གཉིས་པ། དེད་དཔོན་གྱི་ལེའུ།
བམ་པོ་གཉིས་པ། དེའི་ཚེ་བདུད་ཀྱི་བུ་དེད་དཔོན་ཞེས་བྱ་བ། བཅོམ་ལྡན་འདས་ལ་དད་ཅིང་དང་བ་ཆེན་པོ་ཐོབ་པར་གྱུར་པ་དེས་བཅོམ་ལྡན་འདས་ཡོངས་སུ་མྱ་ངན་ལས་འདའ་བའི་སྒྲ་ཐོས་ནས་སྡུག་བསྔལ་ཞིང་ཡིད་མི་བདེ་སྟེ་མི་དགའ་ཞིང་སྡུག་བསྔལ་བ་དང་ཡིད་མི་བདེ་བ་ཆེན་པོ་དང་ལྡན་པར་གྱུར། སྐྱོ་ཞིང་ཡིད་བྱུང་ལ་སྤུ་ཟིང་ཞེས་བྱེད་པར་གྱུར་ནས་མྱུར་བ་མྱུར་བར་རིངས་པའི་ཚུལ་དུ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་བདུད་ཀྱི་བུ་དེད་དཔོན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གསོལ་བ་འཚལ་ན་སྨན་པར་བགྱི་བའི་སླད་དུ་ཡོངས་སུ་མྱ་ངན་ལས་མི་འདའ་བར་གསོལ། བཅོམ་ལྡན་འདས་ལྷ་དང་བཅས་པའི་འཇིག་རྟེན་ལ་ཐུགས་བརྩེ་བ་ཉེ་བར་བཟུང་སྟེ། སྐྱེ་བོ་མང་པོ་ལ་སྨན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་ཐུགས་བརྩེ་བ་དང་ལྷ་དང་མི་རྣམས་ཀྱི་དོན་དང་སྨན་པ་དང་བདེ་བའི་སླད་དུ་བཞུགས་སུ་གསོལ། བཅོམ་ལྡན་འདས་འཇིག་རྟེན་ཧ་ཅང་མྱུར་དུ་ལོང་བ་དང་། མིག་མ་མཆིས་པ་དང་། སྟོན་པ་མ་མཆིས་པ་དང་། འདྲེན་པ་མ་མཆིས་པ་དང་། དཔུང་གཉེན་མ་མཆིས་པ་དང་། སྐྱབས་མ་མཆིས་པ་དང་། རྟེན་མ་མཆིས་པར་མི་འགྱུར་བར་མཛད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བདུད་ཀྱི་བུ་དེད་དཔོན་ལ་འདི་སྐད་ཅེས་བཀའ་སྩལ་ཏོ། །དེད་དཔོན་ཁྱོད་ཀྱི་ཕ་བདུད་སྡིག་ཅན་གྱིས་ང་ལ་བཅོམ་ལྡན་འདས་ཡོངས་སུ་མྱ་ངན་ལས་འདར་གསོལ། བདེ་བར་གཤེགས་པ་ཡོངས་སུ་མྱ་ངན་ལས་འདར་གསོལ། བཅོམ་ལྡན་འདས་ཁྱོད་དེང་ཡོངས་སུ་མྱ་ངན་ལས་འདའ་བའི་དུས་ལ་བབ་བོ་ཞེས་གསོལ་བ་བཏབ་ནས་ཁྱོད་ཀྱི་ཕ་བདུད་སྡིག་ཅན་ལ་ངས་མྱ་ངན་ལས་འདའོ་ཞེས་སྨྲས་ཏེ། དེད་དཔོན་བདུད་སྡིག་ཅན་ལ་ངས་ཡོངས་
སུ་མྱ་ངན་འདའ་བར་བྱ་བའི་སྐབས་ཕྱེའོ། །དེད་དཔོན་སྡིག་ཅན་དེ་ལ་ངས་ཁས་བླངས་པ་དེ་བྱ་བའི་དུས་ལ་ཡང་བབ་བོ། །དེ་སྐད་ཅེས་བཀའ་སྩལ་པ་དང་། བདུད་ཀྱི་བུ་དེད་དཔོན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདུད་སྡིག་ཅན་དེ་ནི་བདག་གི་ཕ་མ་ལགས་ཀྱི། བཅོམ་ལྡན་འདས་དེ་ནི་བདག་གི་དགྲ་ལགས། གཤེད་པོ་སླར་རྒོལ་བ་ལགས་ཤིང་། བཅོམ་ལྡན་འདས་བདག་དང་མི་མཛའ་བ་ལགས་ཏེ། གནོད་པར་འཚལ་བ་མི་སྨན་པར་འཚལ་བ་ལགས་སོ། །བཅོམ་ལྡན་འདས་སྡིག་ཅན་དེ་ནི་བདག་ལ་གྲུབ་པ་དང་བདེ་བ་མ་ལགས་པར་འཚལ་བ་ལགས་སོ། །བཅོམ་ལྡན་འདས་གང་ཤེས་རབ་ཀྱི་སྒྲོན་མ་འདི་ལྟ་བུ་དང་། ཤེས་རབ་ཀྱི་སྣང་བ་ཆེན་པོ་དང་། ཡེ་ཤེས་སྣང་བའི་སྒྲོན་མ་ཆེན་པོ་འདི་ལྟ་བུ་ཡོངས་སུ་མྱ་ངན་ལས་འདའ་བར་འཚལ་བའི་སྡིག་ཅན་དེ་ནི། སྡིག་པའི་བསམ་པ་ཅན། སྡིག་པའི་སྦྱོར་བ་ཅན་ཏེ། ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་སུན་འབྱིན་པའི་དགྲ་ལགས་སོ། །བཅོམ་ལྡན་འདས་ལྷ་དང་བཅས་པའི་འཇིག་རྟེན་ན་སེམས་ཅན་སྡིག་པ་ཆེན་པོ་འཇིག་རྟེན་དུ་བྱུང་ངོ་ཞེས་གང་ཡང་དག་པར་སྨྲ་བས་སྨྲ་བ་དེ་ནི། བཅོམ་ལྡན་འདས་བདུད་ལགས་སོ་ཞེས་ཡང་དག་པར་སྨྲ་བས་སྨྲ་བར་བགྱིའོ། །བཅོམ་ལྡན་འདས་གང་བདག་ལ་མི་ཕན་པར་ཞུགས་པ་དང་། གཞན་ལ་མི་ཕན་པར་ཞུགས་པ་དང་། སྐྱེ་བོ་མང་པོ་ལ་མི་ཕན་པར་ཞུགས་པ་ཞེས་གང་ཡང་དག་པར་སྨྲ་བས་སྨྲ་བ་དེ་ནི། བཅོམ་ལྡན་འདས་བདུད་ལགས་སོ་ཞེས་ཡང་དག་པར་སྨྲ་བས་སྨྲ་བར་བགྱིའོ། །ལྷ་དང་བཅས་བདུད་དང་བཅས་ཚངས་པ་དང་བཅས་པའི་འཇིག་རྟེན་དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་ལ་གནོད་པ་དང་མི་ཕན་པ་དང་སྡུག་བསྔལ་བ་དང་། གྲུབ་པ་དང་བདེ་བ་མ་ལགས་པ་དང་། ལོག་པར་ལྟུང་བའི་ཕྱིར་ཞུགས་པ་ཞེས་བགྱི་བ་ནི་བཅོམ་ལྡན་འདས་བདུད་ལགས་སོ་ཞེས་ཡང་དག་པར་སྨྲ་བས་སྨྲ་བར་བགྱིའོ། །ཆོས་དང་ལྡན་པའི་དམ་བཅས་པ་དང་། ཆོས་དང་མི་ལྡན་པའི་དམ་བཅས་པ་བཅོམ་ལྡན་འདས་ལས་བདག་གིས་མངོན་སུམ་དུ་ཐོས་ཤིང་མངོན་སུམ་དུ་
བཟུང་སྟེ། བཅོམ་ལྡན་འདས་གང་བདུད་སྡིག་ཅན་གྱིས་དམ་བཅས་པ་དེ་ནི་ཆོས་དང་མི་ལྡན་པའི་དམ་བཅས་པ་ལགས་སོ། །བཅོམ་ལྡན་འདས་ཁྱོད་ནི་དམ་བཅས་པ་འདི་ལ་བརྟེན་ཞིང་སྙིང་པོར་འདུ་ཤེས་པ་ལགས་ན། བཅོམ་ལྡན་འདས་སྐྱེ་བོ་མང་པོ་ལ་སྨན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་ཐུགས་བརྩེ་བ་དང་། ལྷ་དང་མི་རྣམས་ལ་ཕན་པ་དང་བདེ་བའི་སླད་དུ་བསྐལ་པར་བཞུགས་སུ་གསོལ། བཅོམ་ལྡན་འདས་ཡུན་རིང་དུ་བཞུགས་ན་དེ་ནི་སྐྱེ་བོ་མང་པོ་ལ་སྨན་པ་དང་། སྐྱེ་བོ་མང་པོ་ལ་བདེ་བ་དང་། ལྷ་དང་མི་རྣམས་ལ་བདེ་བར་འགྱུར་ཏེ། དེའི་སླད་དུ་བཅོམ་ལྡན་འདས་ལྷ་དང་བཅས་པའི་འཇིག་རྟེན་ལ་ཐུགས་བརྩེ་བ་ཉེ་བར་བཟུང་སྟེ་མྱུར་དུ་ཡོངས་སུ་མྱ་ངན་ལས་མི་འདར་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བདུད་ཀྱི་བུ་དེད་དཔོན་ལ་འདི་སྐད་ཅེས་བཀའ་སྩལ་ཏོ། །དེད་དཔོན་ལེགས་སོ་ལེགས་སོ། །དེད་དཔོན་ཁྱོད་སྐྱེ་བོ་མང་པོའི་དོན་འདོད་པ་དང་། སྐྱེ་བོ་མང་པོ་ལ་ཕན་པ་དང་། བདེ་བ་དང་གྲུབ་པ་དང་བདེ་བར་འདོད་པས་དེ་ལྟར་བྱའོ། །དེད་དཔོན་གང་དག་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ལ་བསྙེན་བཀུར་བྱེད་ཅིང་ཕན་པ་དང་བདེ་བས་ཁྱབ་པར་བྱེད་པ་དང་། རྒྱལ་རིགས་སྤྱི་བོ་ནས་དབང་བསྐུར་བའི་ཡུལ་འཁོར་དང་གྲོང་རྡལ་དང་ལྗོངས་རྣམས་དང་། གཞོན་ནུ་རྣམས་དང་། བློན་པོ་རྣམས་ལ་རྟག་ཏུ་རྒྱུན་མི་འཆད་པར་བསྙེན་བཀུར་དང་རིམ་གྲོ་བྱེད་པ་ལ་ཞུགས་པར་གྱུར་པ་དེ་དག་ནི་དེད་དཔོན་རྒྱལ་རིགས་སྤྱི་བོ་ནས་དབང་བསྐུར་བ་ལས་ནོར་མང་པོ་དང་ལོངས་སྤྱོད་ཆེན་པོ་འཐོབ་ཅིང་རྒྱལ་པོ་རྒྱལ་རིགས་དེ་ལན་དུ་ཕན་ཆེན་པོ་འདོགས་ཏེ། བུ་དང་ཆུང་མར་བཅས། གྲོགས་པོ་དང་ཉེ་དུ་དང་སྣག་གི་གཉེན་མཚམས་སུ་བཅས་པ་ལ་ཕན་པས་ཁྱབ་པར་བྱེད་དོ། །དེད་དཔོན་དེ་བཞིན་དུ་གང་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་རྒྱལ་པོ་བླ་ན་མེད་པ་ལ་སེམས་དང་བའི་དགེ་བའི་རྩ་བ་འདི་ལྟ་བུ་འདི་འབུལ་ན། དེད་དཔོན་དེ་བཞིན་གཤེགས་པ་ལ་སེམས་དང་བས་བསྙེན་བཀུར་དང་རིམ་གྲོ་
བྱ་བའི་ཕྱིར་ཁྱོད་ལ་དབུགས་དབྱུང་བ་སྦྱིན་ནོ། །ཁྱོད་ལ་དགེ་བའི་རྩ་བ་རྒྱ་ཆེན་པོའི་ལོངས་སྤྱོད་ཆེན་པོ་སྦྱིན་ནོ། །དེད་དཔོན་ཁྱོད་དེ་བཞིན་གཤེགས་པ་ལ་སེམས་དད་པའི་དགེ་བའི་རྩ་བ་སྐྱེད་ན་དབུགས་དབྱུང་ངོ་། །དེད་དཔོན་ཁྱོད་དགེ་བའི་རྩ་བ་འདི་དང་དད་པ་དང་། དང་བ་འདིས་ང་མྱ་ངན་ལས་འདས་ནས་མ་འོངས་པའི་དུས་ན་རང་སངས་རྒྱས་སྙིང་རྗེ་ཅན་ཞེས་བྱ་བར་འགྱུར་བའི་དུས་དེ་ལྟ་བུ་དང་། ཚེ་དེ་ལྟ་བུ་ཡོད་ཀྱིས་ཤེས་པར་གྱིས་ཤིག། དེད་དཔོན་ང་འདས་ནས་དམ་པའི་ཆོས་ཐམས་ཅད་ཀྱི་ཐམས་ཅད་དུ་ནུབ་པ་ན་བདུད་སྡིག་ཅན་རབ་ཏུ་མགུ་བར་འགྱུར་བ་དང་དགའ་བ་དང་རངས་པར་འགྱུར་བའི་དུས་དེ་ལྟ་བུ་དང་ཚེ་དེ་ལྟ་བུ་ཡོད་པར་འགྱུར་རོ། །དེ་ཤིན་ཏུ་དགའ་ཞིང་མགུ་བ་ལས་བདུད་ཀྱི་གནས་ནས་འཆི་འཕོ་བར་འགྱུར་རོ། །དེ་བདུད་ཀྱི་གནས་ནས་ཤི་འཕོས་མ་ཐག་ཏུ་མནར་མེད་པའི་སེམས་ཅན་དམྱལ་བ་ཆེན་པོར་ལུས་འཐོབ་པར་འགྱུར་ཏེ། དེར་ཡང་དེ་མནར་མེད་པའི་སྡུག་བསྔལ་རྣམ་པ་སྣ་ཚོགས་མྱོང་བར་འགྱུར་རོ། །དེ་ཅིའི་ཕྱིར་ཞེ་ན། དེད་དཔོན་འདི་ལྟར་དེ་ནི་ཤེས་རབ་ཀྱི་སྒྲོན་མ་ཆེན་པོ་ཤེས་རབ་ཀྱི་སྣང་བ་ཆེན་པོ་འདི་ལྟ་བུ་མེད་པར་འགྱུར་བ་ལ་དགའ་བའི་ཕྱིར་རོ། །དེད་དཔོན་གང་བདག་གསོད་པ་དང་། བདག་ལ་གནོད་པ་དང་། བདག་མི་སྒྲུབ་པར་ཞུགས་པ་ཞེས་ཡང་དག་པར་སྨྲ་བས་སྨྲ་བ་དེ་ནི་བདུད་ཡིན་ནོ་ཞེས་ཡང་དག་པར་སྨྲ་བས་སྨྲ་བར་བྱའོ། །དེད་དཔོན་དེ་ཅིའི་ཕྱིར་ཞེ་ན། འདི་ལྟར་ང་ཡོངས་སུ་མྱ་ངན་ལས་འདས་པའི་དམ་པའི་ཆོས་ཇི་སྲིད་དུ་གནས་པ་དེ་སྲིད་དུ་བདུད་སྡིག་ཅན་བདུད་ཀྱི་གནས་ན་འདུག་གོ །དེད་དཔོན་ངའི་དམ་པའི་ཆོས་ནུབ་མ་ཐག་ཏུ་དེ་ནས་བདུད་སྡིག་ཅན་རངས་པ་ཆེན་པོ་སྐྱེ་བར་འགྱུར་ཞིང་། ཚིམ་པ་ཆེན་པོ་དང་དགའ་བ་ཆེན་པོ་དང་། མཆོག་ཏུ་དགའ་བ་ཆེན་པོ་དང་། མགུ་བ་ཆེན་པོ་དང་། ཡིད་བདེ་བ་ཆེན་པོ་སྐྱེ་བར་འགྱུར་ཏེ། དེ་སྐད་ཅིག་དེ་ཉིད་དང་། ཐང་ཅིག་དེ་ཉིད་དང་། ཡུད་ཙམ་དེ་ཉིད་ལ་བདུད་ཀྱི་གནས་ནས་ཤི་འཕོས་ཏེ། སེམས་ཅན་དམྱལ་བ་ཆེན་པོ་མཚམས་མེད་པར་ལྟུང་བར་འགྱུར་རོ། །དེད་དཔོན་འདི་ལྟ་སྟེ་དཔེར་ན། མི་ལ་ལ་ཞིག་ཤིང་སཱ་ལ་ལྗོན་པ་མེ་ཏོག་
དང་འབྲས་བུ་མང་པོ་དང་ལྡན་པ་ཆེན་པོ་ལ་འཛེགས་ནས། དེས་ཤིང་སཱ་ལ་ལྗོན་པ་དེ་ལས་མེ་ཏོག་དང་འབྲས་བུ་ཡིད་དུ་འོང་བ་ཡིད་དུ་འོང་བ་དག་སྤྱད་དེ། ཡལ་ག་གང་ལ་གནས་པའི་ཡལ་ག་དེ་ཉིད་བཅག་ན། དེད་དཔོན་དེ་ཇི་སྙམ་དུ་སེམས། མི་དེ་ཡལ་ག་ཆག་པ་དེ་ལ་གནས་སུ་རུང་ངམ། གང་ཡལ་ག་གང་ལ་འཛེགས་ཏེ་བདེ་བར་འདུག་པའི་ཡལ་ག་དེ་ཉིད་གཅོག་པའི་མི་དེ་ཡང་ཅི་མཁས་པའི་རང་བཞིན་ཅན་ཡིན་ནམ། གསོལ་པ་བཅོམ་ལྡན་འདས་མ་ལགས་སོ། །བདེ་བར་གཤེགས་པ་མ་ལགས་སོ། །བཀའ་སྩལ་པ། དེད་དཔོན་བདུད་སྡིག་ཅན་གང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདའ་བར་འདོད་ཅིང་དེ་བཞིན་གཤེགས་པས་གསུངས་པའི་ཆོས་འདུལ་བ་ནུབ་པར་དགའ་བ་ཡང་དེ་ལྟར་སྣང་བར་ངས་བསམས་སོ། །དེ་ཅིའི་ཕྱིར་ཞེ་ན། འདི་ལྟར་ངའི་དམ་པའི་ཆོས་ཇི་སྲིད་དུ་གནས་པ་དེ་སྲིད་དུ་དེ་བདུད་ཀྱི་གནས་ན་འདུག་གོ །ངའི་ཆོས་ནུབ་པར་གྱུར་ན། བདུད་སྡིག་ཅན་དེ་དགའ་བ་སྐྱེད་དེ་མགུ་རངས་ཤིང་ཡིད་བདེ་བ་སྐྱེད་དེ། དེ་དེ་མ་ཐག་ཏུ་བདུད་ཀྱི་གནས་ནས་ཤི་འཕོས་ནས་སེམས་ཅན་དམྱལ་བ་ཆེན་པོ་མནར་མེད་པར་རབ་ཏུ་ལྟུང་བར་འགྱུར་ཏེ། དེད་དཔོན་འདི་ལྟ་སྟེ་དཔེར་ན། མི་དེ་ཤིང་སཱ་ལ་ལྗོན་པ་དེ་ལ་བདག་ལ་གནོད་པ་དང་གཞན་ལ་གནོད་པར་བྱེད་པ་ལྟར་བདུད་སྡིག་ཅན་ཡང་དེ་ལྟ་བུ་ཡིན་པར་མཐོང་ངོ་། །དེད་དཔོན་བདུད་སྡིག་ཅན་ནི་བདག་ལ་གནོད་པའི་ཕྱིར་ཞུགས་པ་ཡིན་ནོ། །དེད་དཔོན་བདུད་སྡིག་ཅན་ནི་གཞན་ལ་གནོད་པའི་ཕྱིར་ཞུགས་པ་སྟེ། དེད་དཔོན་བདུད་སྡིག་ཅན་དེ་དེའི་ཚེ་དེའི་དུས་ན་སེམས་ཅན་དམྱལ་བ་ཆེན་པོ་མནར་མེད་པར་ལྷུང་ནས། སྡུག་བསྔལ་གྱི་ཚོར་བ་མི་བཟད་པ་ཚ་བ་སྲོག་འཕྲོག་པ་མྱོང་ནས་འཆི་སྟེ་འཆི་ཀར་ཚོར་བ་མྱོང་ནས་ང་རྗེས་སུ་དྲན་པར་འགྱུར་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེན་པ་གསུང་བ། གཞན་དུ་མི་གསུང་བ། ལོག་པར་མི་གསུང་བ་དེས་ལུས་བསྡམས་པ་ལེགས།
ངག་བསྡམས་པ་ལེགས། ཡིད་བསྡམས་པ་ལེགས་ཏེ། ལུས་ཀྱིས་ལེགས་པར་སྤྱད་པ་དང་། ངག་གིས་ལེགས་པར་སྤྱད་པ་དང་། ཡིད་ཀྱིས་ལེགས་པར་སྤྱད་པའི་རྣམ་པར་སྨིན་པ་ནི་སྡུག་པ་དང་འདོད་པ་དང་དགའ་བ་དང་ཡིད་དུ་འོང་བ་མངོན་པར་འགྲུབ་བོ། །ལུས་ཀྱིས་ཉེས་པར་སྤྱད་པ་དང་། ངག་གིས་ཉེས་པར་སྤྱད་པ་དང་། ཡིད་ཀྱིས་ཉེས་པར་སྤྱད་པའི་རྣམ་པར་སྨིན་པ་ནི་མི་སྡུག་པ་དང་མི་འདོད་པ་དང་མི་དགའ་བ་དང་ཡིད་དུ་མི་འོང་བ་མངོན་པར་འགྲུབ་བོ་ཞེས་གསུངས་པ་དེ་ལེགས་པར་གསུངས་པའོ། །བདག་ནི་སྔོན་ལུས་ཀྱིས་ཉེས་པར་སྤྱད་པ་དང་ལྡན་པར་གྱུར། ངག་གིས་ཉེས་པར་སྤྱད་པ་དང་། ཡིད་ཀྱིས་ཉེས་པར་སྤྱད་པ་དང་ལྡན་པར་གྱུར་ཏེ། བདག་ལས་དེའི་རྣམ་པར་སྨིན་པས་ད་ལྟར་སེམས་ཅན་དམྱལ་བ་ཆེན་པོ་འདིར་སྐྱེས་ནས་འདི་ལྟ་བུའི་སྡུག་བསྔལ་མི་བཟད་པ་དྲག་པ་ཚ་བ་ཡིད་ཏུ་མི་འོང་བ་འཆི་བའི་མཐར་འགྱུར་བ་སྲོག་འཕྲོག་པའི་ཚོར་བ་མྱོང་བར་གྱུར་ཏོ་སྙམ་མོ། །དེ་དེའི་ཚེ་ངས་ལེགས་པར་སྨྲས་པ་ཐོས་ནས་སེམས་དང་བར་འགྱུར་ཏེ། དེ་སེམས་དང་བར་གྱུར་ནས་སེམས་ཅན་དམྱལ་བ་ཆེན་པོ་ནས་ཤི་འཕོས་ཏེ་སུམ་ཅུ་རྩ་གསུམ་གྱི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །དེ་ཅིའི་ཕྱིར་ཞེ་ན། དེད་དཔོན་དེ་ནི་འདི་ལྟ་བུ་ཡིན་ཏེ། གང་དག་དེ་བཞིན་གཤེགས་པ་ལ་ཉེས་པའི་བར་དུ་གཅོད་པས་ཀུན་ཏུ་སྤྱོད་པ་དེ་དག་ནི་དེ་བཞིན་གཤེགས་པ་ལ་ཉེས་པའི་བར་དུ་གཅོད་པས་ཀུན་ཏུ་སྤྱད་པས་ལུས་ཞིག་ནས་སེམས་ཅན་དམྱལ་བ་ཆེན་པོར་སྐྱེ་བར་འགྱུར་རོ། །དེད་དཔོན་གང་དག་དེ་བཞིན་གཤེགས་པ་ལ་བྱམས་པས་ཀུན་ཏུ་སྤྱོད་ཀྱི་ཉེས་པར་མ་ཡིན་པ་དེ་དག་ནི་ལུས་ཞིག་ནས། བདེ་འགྲོ་མཐོ་རིས་ཀྱི་འཇིག་རྟེན་ལྷའི་ནང་དུ་སྐྱེ་བར་འགྱུར་ཏེ། དེ་དག་དགེ་བའི་རྩ་བ་དེས་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉམས་སུ་བླངས་ནས་དེ་ཉིད་དུ་དགེ་བའི་རྩ་བ་བསྐྱེད་དེ་རིམ་གྱིས་ཉེ་བར་ལེན་པ་མེད་པར་ཡོངས་སུ་མྱ་ངན་ལས་འདའོ། །དེ་བས་ན་དེད་དཔོན་ཁྱོད་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་སེམས་དང་བར་བྱས་པས་
དེད་དཔོན་ཁྱོད་དགེ་བའི་རྩ་བ་དེ་དང་རྒྱུ་དེ་དང་རྐྱེན་དེས་གང་གི་ཚེ་བྱམས་པ་འཇིག་རྟེན་དུ་འབྱུང་བ་དེའི་ཚེ་དེད་དཔོན་ཁྱོད་དེའི་ཚེ་དེའི་དུས་ན་དེ་བཞིན་གཤེགས་པ་བྱམས་པའི་གསུང་རབ་དེ་ལ་རབ་ཏུ་འབྱུང་ངོ་། །རབ་ཏུ་བྱུང་ནས་ཀྱང་སེམས་ཅན་གཉིད་ཀྱིས་ལོག་པ་དང་། མྱོས་པ་དང་རབ་ཏུ་མྱོས་པ་རྣམས་ལ་ཀྱེ་སེམས་ཅན་ཁྱེད་ལོངས་ལ་སྦྱོར་བར་གྱིས། འབད་པར་གྱིས། རྩོལ་བར་གྱིས་ཤིག །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་འབྱུང་བ་རྙེད་པར་དཀའ་སྟེ། འདི་ལྟ་སྟེ་དཔེར་ན། ཤིང་ཨུ་དུམ་བཱ་རའི་མེ་ཏོག་བརྒྱ་ལ་བརྒྱ་ལམ་ན་འབྱུང་བར་འགྱུར་བ་དེ་བཞིན་དུ་དེ་བཞིན་གཤེགས་པ་རྣམས་ཀྱང་བརྒྱ་ལ་བརྒྱ་ལམ་ན་འཇིག་རྟེན་དུ་འབྱུང་བར་འགྱུར་རོ། །གནས་མེད་པ་ཞི་བར་འགྱུར་བ། ཡོངས་སུ་མྱ་ངན་ལས་འདའ་བར་འགྱུར་བ། ཡང་དག་པར་རྫོགས་པའི་སངས་རྒྱས་ཀྱིས་བསྟན་པའི་ཆོས་སྟོན་པ་ཡང་བརྒྱ་ལ་བརྒྱ་ལམ་ནའོ། །མིའི་ལུས་འཐོབ་ཅིང་འཕགས་པའི་གནས་ན་ཚུལ་བཞིན་དུ་གནས་པ་ཡང་བརྒྱ་ལ་བརྒྱ་ལམ་ན་སྣང་ངོ་། །མི་ཁོམ་པ་བརྒྱད་སྤངས་ནས་དེ་ལྟ་བུའི་དལ་བ་ཕུན་སུམ་ཚོགས་པ་རྙེད་པ་ཡང་བརྒྱ་ལ་བརྒྱ་ལམ་ན་སྟེ། བག་ཡོད་པས་ལེགས་པར་བརྩོན་པར་གྱིས་ཤིག །ཕྱིས་འགྱོད་པར་མ་གྱུར་ཅིག་ཅེས་སྐུལ་བར་འགྱུར་རོ། །དེད་དཔོན་ཁྱོད་དེ་ལྟར་དེ་བཞིན་གཤེགས་པ་བྱམས་པའི་གསུང་རབ་དང་། དེ་བཞིན་གཤེགས་པ་བྱམས་པ་ཆོས་ཀྱི་རྒྱལ་པོའི་སངས་རྒྱས་ཀྱི་ཞིང་དུ་དེའི་གསུང་གི་ཚིག་རྗེས་སུ་འཛིན་ཅིང་རྗེས་སུ་སྐྱོང་བར་འགྱུར་རོ། །བྱམས་པའི་སེམས་ཁོན་མེད་པ་དང་འགྲན་ཟླ་མེད་པ་དང་། ཁ་ན་མ་ཐོ་བ་མེད་པ་དང་ཕན་པ་དང་བདེ་བས་ཁྱབ་པར་བྱེད་པར་འགྱུར་རོ། །དེད་དཔོན་ཁྱོད་དགེ་བའི་རྩ་བ་དེས་བདུད་སྡིག་ཅན་འདས་པའི་འོག་ཏུ་བདུད་ཀྱི་གནས་ན་དབང་ཕྱུག་ཆེན་པོའི་བདག་པོ་བདུད་བྱེད་པར་འགྱུར་རོ། །དེད་དཔོན་སེམས་ཅན་གང་དག་དེ་བཞིན་གཤེགས་པ་ལ་ཐ་ན་སེམས་བསྐྱེད་པ་གཅིག་ཙམ་གྱི་དགེ་བའི་རྩ་བ་སྐྱེད་པར་འགྱུར་བ་དེ་དག་ཐམས་ཅད་ནི་དེད་དཔོན་དགེ་བའི་རྩ་བ་དེས་མི་འཆི་བར་ཉེ་བར་འགྲོ་མི་
འཆི་བ་ལ་གཞོལ་མི་འཆི་བའི་མཐར་འགྱུར་རོ། །དེད་དཔོན་ཁྱོད་ནི་དགེ་བའི་རྩ་བ་དེས་ལྷ་དང་མིའི་ཕུན་སུམ་ཚོགས་པ་རྒྱ་ཆེན་པོ་མྱོང་ནས། བསྐལ་པ་བརྒྱད་ཅུའི་སྲིད་པ་ཐ་མ་ལ་ལུས་ཐ་མ་འཐོབ་པ་ན། རང་སངས་རྒྱས་སྙིང་རྗེ་ཅན་ཞེས་བྱ་བར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེད་དཔོན་ཁྱོད་ཀྱིས་ང་ཡོངས་སུ་མྱ་ངན་ལས་འདས་པའི་སྒྲ་ཐོས་ནས་ང་ལ་སེམས་དང་བ་ཆེན་པོ་བསྐྱེད་དེ། སེམས་ཅན་རྣམས་ལ་ཡང་སྙིང་རྗེའི་སེམས་བསྐྱེད་ནས་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་ང་ལ་བཅོམ་ལྡན་འདས་ཡོངས་སུ་མྱ་ངན་ལས་མི་འདའ་བར་བཞུགས་སུ་གསོལ་ཞེས་གསོལ་བ་འདེབས་པ་དང་། དེ་བཞིན་གཤེགས་པ་བྱམས་པའི་བསྟན་པ་ལ་ཡང་སེམས་ཅན་དེ་དག་ལ་སྙིང་རྗེ་བསྐྱེད་ནས་གཉིད་ཀྱིས་ལོག་པ་དང་མྱོས་པ་དང་རབ་ཏུ་མྱོས་པའི་སྐྱེ་བོ་རྣམས་ལ་སྒོ་ཞིང་སྐུལ་མ་འདེབས། དགེ་བའི་ཆོས་ཚད་མེད་པ་ལ་ཡང་སྐུལ་བར་འགྱུར་ཏེ། དེད་དཔོན་ཁྱོད་རང་སངས་རྒྱས་སུ་འགྱུར་བའི་རྒྱུ་འདི་ཡིན་རྐྱེན་འདི་ཡིན་ནོ། །དེད་དཔོན་དགེ་བའི་རྩ་བའི་ལོངས་སྤྱོད་ཆེན་པོ་འདི་ལྟ་བུ་སྦྱིན་གྱིས་དེད་དཔོན་དགའ་ཞིང་མགུ་བ་དང་རངས་ཤིང་ཡིད་དགའ་བར་གྱིས་ཤིག །དེད་དཔོན་ཁྱོད་དེ་བཞིན་གཤེགས་པ་ལ་གསོལ་བ་འདེབས་པ་དང་། དེ་བཞིན་གཤེགས་པ་ལ་སེམས་དང་བའི་ཕྱིར་དེ་བཞིན་གཤེགས་པས་ཆོས་ཀྱི་དགའ་བ་དང་ཆོས་ཀྱི་ལོངས་སྤྱོད་འདི་བྱིན་པ་ཡིན་ནོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བདུད་ཀྱི་བུ་དེད་དཔོན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་དེ་སྐད་དུ་གསོལ་ཀྱང་དེ་སྟེ་བཞུགས་སུ་མི་གནང་ན། བཅོམ་ལྡན་འདས་བདག་དེང་སླན་ཅད་འདི་ལྟར་ཡི་དམ་འཆའ་ཞིང་སྨོན་ལམ་འདེབས་ཏེ་བཅོམ་ལྡན་འདས་ཡོངས་སུ་མྱ་ངན་ལས་འདས་ནས་དམ་པའི་ཆོས་ཇི་སྲིད་དུ་གནས་པ་དེ་སྲིད་དུ་བཅོམ་ལྡན་འདས་བདག་གཟུགས་དང་སྒྲ་དང་དྲི་དང་རོ་དང་རེག་པ་རྣམས་ལ་སྙེན་པར་མི་བགྱིད་དོ། །འདོད་པའི་ཡོན་ཏན་ལྔ་ལ་ཡང་ཆགས་པ་དང་རྩེ་བ་དང་ཡོངས་སུ་སྤྱོད་པར་མི་བགྱིད་དོ། །གོས་གཞན་ཡང་མི་འཚལ། མེ་ཏོག་དང་སྤོས་དང་ཕྲེང་བ་དང་བྱུག་པ་ཡང་མི་སྙེན་ནོ། །
བཅོམ་ལྡན་འདས་ཀྱི་དམ་པའི་ཆོས་ཇི་སྲིད་དུ་ནུབ་པར་མ་གྱུར་གྱི་བར་དུ་དེ་ལས་གཞན་པའི་ལྷའི་ལོངས་སྤྱོད་དང་ཡོངས་སུ་སྤྱད་པ་དག་ཀྱང་མི་སྤྱོད་དོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་བདག་སང་ནང་པར་འདི་ལྟ་བུའི་སྐྱེས་བུ་རིན་པོ་ཆེ་དང་འབྲལ་བར་འགྱུར་ཞིང་ལྷན་ཅིག་མི་གནས་པ་དང་། དབྱེ་བ་དང་འགྱེས་པ་དང་ཤིན་ཏུ་མི་སྣང་བར་འགྱུར་ན། བཅོམ་ལྡན་འདས་བདག་དགའ་བ་དང་རྩེ་བས་ཅི་ཞིག་བགྱི། བདེ་བས་ཅི་ཞིག་བགྱི། ཡིད་བདེ་བས་ཅི་ཞིག་བགྱི། ཤེས་རབ་ཀྱི་སྒྲོན་མ་ཆེན་པོ་འདི་ལྟ་བུ་དང་ཤེས་རབ་ཀྱི་མར་མེ་ཆེན་པོ་འདི་ལྟ་བུ་དང་། ཡེ་ཤེས་ཀྱི་སྣང་བ་ཆེན་པོ་ཡོངས་སུ་མྱ་ངན་ལས་འདས་ནས་བཅོམ་ལྡན་འདས་བདག་མགུ་བའམ། ཡིད་བདེ་བའམ་དགའ་བའམ་རངས་པའམ་རབ་ཏུ་དགའ་བ་མྱོང་བར་ག་ལ་འགྱུར། ཡེ་ཤེས་ཆེན་པོའི་ཉི་མ་འོད་ཟེར་བརྒྱ་སྟོང་དུ་མས་བསྐོར་བ། མ་རིག་པའི་མུན་པ་སེལ་བ་འདི་ལྟ་བུ་དང་། འོད་སྣང་བར་མཛད་པ་འདི་ལྟ་བུ་ནུབ་པར་གྱུར་ན། བཅོམ་ལྡན་འདས་བདག་དགའ་བའམ་བདེ་བ་ག་ལས་མཆི། བདག་སེམས་ཅན་རིན་པོ་ཆེ་འདི་ལྟ་བུ་དང་བྲལ་ན་དགའ་བ་དང་རྩེ་བ་ག་ལས་མཆི། སེམས་ཅན་སྣང་བ། སེམས་ཅན་རྟོགས་པ། སེམས་ཅན་མ་སྨད་པ། སེམས་ཅན་ཁ་ན་མ་ཐོ་བ་མེད་པ། སེམས་ཅན་མ་རྨོངས་པ། སེམས་ཅན་མཆོག །སེམས་ཅན་བླ་ན་མེད་པ། སེམས་ཅན་གོང་ན་མེད་པ། སེམས་ཅན་མཚུངས་པ་མེད་པ། སེམས་ཅན་མཉམ་པ་མེད་པ། སེམས་ཅན་མི་མཉམ་པ་དང་མཉམ་པ། སེམས་ཅན་ཐམས་ཅད་ཐར་བར་མཛད་པའི་སེམས་ཅན། སེམས་ཅན་རབ། སེམས་ཅན་མཆོད་པ། སེམས་ཅན་ཁ་ལོ་སྒྱུར་བ། སེམས་ཅན་འདུལ་བ། སེམས་ཅན་ཕན་པར་དགྱེས་པ། ཡང་དག་པར་གསུང་བ། དུས་སུ་གསུང་བ། ཚིགས་སུ་གསུང་བ། ཕྱིན་ཅི་མ་ལོག་པ་གསུང་བ། ཇི་སྐད་གསུང་བ་དེ་བཞིན་མཛད་པ། ཐུགས་རྗེ་ཆེན་པོ་དང་ལྡན་པ། བྱམས་པ་ཆེན་པོ་ལ་གནས་པ། སེམས་ཅན་ཐམས་ཅད་ལ་ཁོང་ཁྲོ་བ་མི་མངའ་བ། སེམས་ཅན་ཐམས་ཅད་ལ་སེམས་མཉམ་པ་རབ་ཏུ་མ་སྤྲོས་
པ། ང་རྒྱལ་མི་མངའ་བ། ལེན་པ་མི་མངའ་བ། གཞི་མི་མངའ་བ། གནས་མི་མངའ་བ། མི་སྐྱོ་བ་དྲི་མ་མི་མངའ་བ། སྐྱོབ་པ་འདྲེན་པ་རྣམ་པར་འདྲེན་པ། ཡོངས་སུ་འདྲེན་པ། ཡོངས་སུ་ཐར་བར་མཛད་པ། ཡོངས་སུ་སྐྱོང་བ། དྲན་པར་མཛད་པ། རྟོགས་པར་མཛད་པ། སྐུལ་མ་འདེབས་པ། མྱ་ངན་སྤང་བ། ཟུག་རྔུ་འབྱིན་པ། སྨན་པའི་རྒྱལ་པོ་སེམས་ཀྱི་གསོ་བ་མཛད་པ། སྨན་ཆེན་པོ་སྦྱིན་པ། ཤིན་ཏུ་སྡུག་བསྔལ་བ་ལས་ཡོངས་སུ་ཐར་བར་མཛད་པ། སྟོན་པ་པོ། དེད་དཔོན་ཁྲིད་པ། འབབ་སྟེགས་མཛད་པ། གདོས་པ་འཛིན་པ། སྒྲོན་མ་འཛིན་པ། སྣང་བ་མཛད་པ། འོད་མཛད་པ། གསལ་བར་མཛད་པ། མིག་སྦྱིན་པ། ལམ་སྟོན་པ། ཡུལ་བདེ་བར་ཕྱིན་པར་མཛད་པ། དྲི་མ་དང་ཐ་བ་དང་མདུད་པ་ཐམས་ཅད་སྤངས་པ། སྲེད་པ་མི་མངའ་བ། བག་ལ་ཉལ་མི་མངའ་བ། མདུད་པ་དང་ཀུན་དུ་སྦྱོར་བ། ཐམས་ཅད་རབ་ཏུ་བཤིག་པ། འདོད་ཆགས་དང་བྲལ་བ། ཞེ་སྡང་དང་བྲལ་བ། གཏི་མུག་དང་བྲལ་བ། ཉོན་མོངས་པ་དང་བྲལ་བ། ཀུན་ཏུ་སྦྱོར་བ་དང་བྲལ་བ། ང་རྒྱལ་དང་དྲེགས་པ་དང་རྩོད་པ་དང་བྲལ་བ། དེ་ལྟ་བུའི་སྐྱེས་བུ་ཆེན་པོ། སྐྱེས་བུ་དམ་པ། སྐྱེས་བུ་མཆོག །སྐྱེས་བུ་དཔའ་བོ། སྐྱེས་བུ་རྟུལ་ཕོད་པ། སྐྱེས་བུ་པད་མ། སྐྱེས་བུ་པད་མ་དཀར་པོ། སྐྱེས་བུ་གླང་པོ། སྐྱེས་བུ་སེང་གེ། སྐྱེས་བུ་གཙོ་བོ། སྐྱེས་བུ་བརྟན་པ། སྐྱེས་བུ་མཆོག །སྐྱེས་བུ་ཅང་ཤེས་པ། བླ་ན་མེད་པ། ཡིད་ཡོངས་སུ་མི་སྐྱོ་བ། བསམ་གཏན་ཆེན་པོ་ལ་བསམ་གཏན་པ། བསམ་གཏན་ཐམས་ཅད་ལ་བསམ་གཏན་པ། བསམ་གཏན་དང་སྙོམས་པར་འཇུག་པ་ཐམས་ཅད་སྤྱོད་ཡུལ་བ། ཤེས་རབ་ཆགས་པ་མེད་པ། ཤེས་རབ་སྒྲིབ་པ་མེད་པ། ཤེས་རབ་ཀྱི་སྤྱོད་ཡུལ་མཉམ་པ་མེད་པ། རྒྱལ་མཚན་བསྙལ་བ། འདམ་ལས་རྒལ་བ། ཐང་ལ་གནས་པ། ཕ་རོལ་ཏུ་ཕྱིན་པ། མི་འཇིགས་པའི་གནས་སུ་ཕྱིན་པ། སེམས་ཅན་ཐམས་ཅད་ལ་མི་འཇིགས་པ་སྦྱིན་པ། འཇིག་རྟེན་ཐམས་ཅད་དབུགས་འབྱིན་པ་འདིར་དོ་མོད་ཀྱི་ཐུན་ཐ་མ་ལ་འབྲལ་ཞིང་འབྱེ་བར་འགྱུར་ཏེ། བདག་གིས་
བཅོམ་ལྡན་འདས་སེང་གེའི་སྒྲ་སྒྲོགས་པ་ཕྱིན་ཅད་མི་མཐོང་ཞིང་དེ་བཞིན་གཤེགས་པའི་སེང་གེའི་སྒྲ་ཐོས་པར་མི་འགྱུར་ན། བཅོམ་ལྡན་འདས་བདག་དགའ་བའམ་ཡིད་བདེ་བ་ག་ལས་མཆི། དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་ནི་བཅོམ་ལྡན་འདས་འདི་ལྟ་སྟེ་དཔེར་ན། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་འཆི་བའི་དུས་བགྱིས་པ་ན་སེམས་ཅན་བྱས་པ་གཟོ་ཞིང་བྱས་པ་རིག་པ། བྱས་པ་རྗེས་སུ་སྐྱོང་བ། སྡུག་བསྔལ་གྱིས་གདུངས་པ་ཁ་ཅིག་མཆིས་པ་དེ་དག་དེ་ན་དགུང་གཅིག་གམ། གཉིས་སམ། གསུམ་མམ། བཞིའམ། ལྔའམ། དྲུག་གམ། བདུན་ནམ། ཟླ་བ་ཕྱེད་དམ་ཟླ་བ་གཅིག་ཏུ་མྱ་ངན་བགྱིད་དེ་མཆི་མ་འབྱུང་ཞིང་གནས་པ་དེ་བཞིན་དུ། བདག་ཀྱང་བཅོམ་ལྡན་འདས་ཡོངས་སུ་མྱ་ངན་ལས་འདས་པ་ན་དམ་པའི་ཆོས་འདི་ཇི་སྲིད་དུ་གནས་པ་དེ་སྲིད་དུ་བདག་གཟུགས་དང་སྒྲ་དང་དྲི་དང་རོ་དང་རེག་བྱ་མི་སྙེན་ཏོ། །འདོད་པའི་ཡོན་ཏན་ལྔ་ལ་ཡང་ཆགས་པར་མི་བགྱིད་མི་རྩེ་ཡོངས་སུ་མི་སྤྱོད་དོ། །གོས་གཞན་ཡང་མི་འཚལ་ཞིང་མེ་ཏོག་དང་ཕྲེང་བ་དང་སྤོས་དང་བྱུག་པ་ཡང་མི་སྙེན་ཡོངས་སུ་མི་སྤྱོད་དོ། །བཅོམ་ལྡན་འདས་དམ་པའི་ཆོས་ནུབ་པར་མ་གྱུར་གྱི་བར་དུ་དེ་ལས་གཞན་པའི་ལོངས་སྤྱོད་རྣམས་ཀྱང་མི་སྙེན་ཏོ། །དེད་དཔོན་གྱི་ལེའུ་སྟེ་གཉིས་པ་རྫོགས་སོ།། །།