ལྔ་པ། འོད་སྲུང་གི་ལེའུ།
བམ་པོ་གསུམ་པ། དེའི་ཚེ་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་ཕངས་ན་གཟིམས་ཁྲི་ལ་བསྙེས་ནས་ངུས་ཏེ་མཆི་མ་བྱུང་སྨྲེ་སྔགས་འདོན་ཅིང་འདུག་གོ །དེ་ནས་ཚེ་དང་ལྡན་པ་ཀུན་དགའ་བོ་མཆི་མ་ཟག་པར་ངུ་ཞིང་ཤིང་ལྗོན་པ་ཆེན་པོ་བཅད་དེ་བསྒྱེལ་བ་བཞིན་དུ་ས་ལ་འགྱེལ་ཏེ་བཅོམ་ལྡན་འདས་ཡོངས་སུ་མྱ་ངན་ལས་འདའ་བ་ཧ་ཅང་མྱུར་ཆེས་སོ། །བདེ་བར་གཤེགས་པ་ཡོངས་སུ་མྱ་ངན་ལས་འདའ་བ་ཧ་ཅང་མྱུར་ཆེས་སོ། །ཐུགས་རྗེ་ཅན་མི་བཞུགས་པར་འགྱུར་བ་ཧ་ཅང་མྱུར་ཆེས་སོ། །སེམས་ཅན་རིན་པོ་ཆེ་མི་བཞུགས་པར་འགྱུར་བ་ཧ་ཅང་མྱུར་ཆེས་སོ། །མར་མེ་ཆེན་པོ་འཇིག་རྟེན་ན་མི་སྣང་བར་འགྱུར་བ་ཧ་ཅང་མྱུར་ཆེས་སོ། །སྒྲོན་མ་ཆེན་པོ་འཇིག་རྟེན་ན་མི་སྣང་བར་འགྱུར་བ་ཧ་ཅང་མྱུར་ཆེས་སོ། །འཇིག་རྟེན་གྱི་མཆོག་འཇིག་རྟེན་ན་འགག་པར་འགྱུར་བ་ཧ་ཅང་མྱུར་ཆེས་སོ། །སེམས་ཅན་རིན་པོ་ཆེ་སེམས་ཅན་པད་མ་དཀར་པོ་འཇིག་རྟེན་ན་མི་སྣང་བར་འགྱུར་བ་ཧ་ཅང་མྱུར་ཆེས་སོ། །སེམས་ཅན་ཅང་ཤེས་པ་སེམས་ཅན་དུལ་བ་སེམས་ཅན་མ་དུལ་བ་འདུལ་བ་འཇིག་རྟེན་ན་མེད་པར་འགྱུར་བ་ཧ་ཅང་མྱུར་ཆེས་སོ། །དེད་དཔོན་སྟོན་པ་པོ་བདེ་བའི་ལམ་སྟོན་པ་འཇིག་རྟེན་ན་མི་སྣང་བར་འགྱུར་བ་ཧ་ཅང་མྱུར་ཆེས་སོ། །མིག་ཆེན་པོ་ཤེས་རབ་ཀྱི་སྣང་བ་སྟོན་པ་འཇིག་རྟེན་ན་མི་སྣང་བར་འགྱུར་བ་ཧ་ཅང་མྱུར་ཆེས་སོ། །སེམས་ཅན་རྣམས་ཀྱི་ཕ་མ་འཇིག་རྟེན་ན་མི་སྣང་བར་འགྱུར་བ་ཧ་ཅང་མྱུར་ཆེས་སོ། །འཇིག་རྟེན་ན་ལོང་བར་འགྱུར་བ་ཧ་ཅང་མྱུར་ཆེས་སོ། །བཅོམ་ལྡན་འདས་འཇིག་རྟེན་མགོན་མ་མཆིས་པ་དང་། ཡོངས་སུ་འདྲེན་པ་མ་འཆིས་པར་འགྱུར་བ་ཧ་ཅང་མྱུར་ཆེས་སོ། །སང་ནང་པར་ནས་མིང་མཚན་ཙམ་ཞིག་ལུས་ཏེ་སེམས་ཅན་རིན་པོ་ཆེ་མི་མཐོང་བར་འགྱུར་བ་ལྟ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་
ལ་བཀའ་སྩལ་པ། ཀུན་དགའ་བོ་ཐོང་མྱ་ངན་མ་བྱེད་སྨྲེ་སྔགས་མ་འདོན་ཅིག །ཀུན་དགའ་བོ་སྡུག་པ་དང་ཡིད་དུ་འོང་བ་ཐམས་ཅད་དང་ཐ་དད་པར་འགྱུར་ཞིང་འགྱེས་པར་འགྱུར་བ་དང་། འབྱེ་བར་འགྱུར་བ་དང་འབྲེལ་བར་འགྱུར་བར་ངས་ཐོག་མ་ནས་མ་བཤད་དམ། ཀུན་དགའ་བོ་གང་སྐྱེས་པ་བྱུང་བ། འདུས་བྱས་པ། བསམས་པ། རྟེན་ཅིང་འབྲེལ་བར་འབྱུང་བ། འཇིག་པའི་ཆོས་ཅན་དེ་མི་འཇིག་པར་ག་ལ་འགྱུར་ཏེ་དེ་ནི་གནས་མེད་དོ། །དེ་ལྟ་བུར་གྱུར་པ་དག་གནས་ཤིང་མི་སྣང་བར་མི་འགྱུར་བ་དེའི་གནས་མེད་དོ། །ཀུན་དགའ་བོ་ཇི་ལྟར་རིང་དུ་གནས་ཀྱང་ངེས་པར་ཡོངས་སུ་མྱ་ངན་ལས་འདའ་བའི་ཆོས་ཅན་དུ་འགྱུར་རོ། །དེ་བས་ན་ཀུན་དགའ་བོ་ཁྱོད་མྱ་ངན་མ་བྱེད་སྨྲེ་སྔགས་མ་འདོན་ཅིག །དེ་ནས་ཚེ་དང་ལྡན་པ་ཀུན་དགའ་བོ་མིག་མི་འཛུམས་པར་བཅོམ་ལྡན་འདས་ཀྱི་ཞལ་དུ་བལྟས་ནས་ཤིང་ལྗོན་པ་བཅད་དེ་བསྒྱེལ་བ་བཞིན་དུ་ཡང་ས་ལ་འགྱེལ་ཏོ། །བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་ལན་གཉིས་སུ་བཀའ་སྩལ་པ། ཀུན་དགའ་བོ་ཐོང་མྱ་ངན་མ་བྱེད་སྨྲེ་སྔགས་མ་འདོན་ཅིག །ཀུན་དགའ་བོ་དོན་འདི་མྱ་ངན་བྱས་པ་དང་སྨྲེ་སྔགས་འདོན་པས་རྙེད་པར་སླ་བ་མ་ཡིན་ནོ། །སྡུག་པ་དང་ཡིད་དུ་འོང་བ་ཐམས་ཅད་དང་ཐ་དད་དུ་འགྱུར་ཞིང་འགྱེས་པར་འགྱུར་བར་ངས་ཐོག་མ་ནས་བཤད་དོ། །འདུ་བྱེད་རྣམས་ཇི་སྲིད་རིང་དུ་གནས་ཀྱང་ངེས་པར་རྣམ་པར་འགྱུར་བའི་ཆོས་ཅན་ཡིན་ནོ། །ཀུན་དགའ་བོ་ཁྱོད་ཀྱིས་དེ་བཞིན་གཤེགས་པ་ལ་བྱམས་པའི་ལུས་ཀྱི་ལས་ཕན་པ་དང་། བདེ་བ་དང་། གཉིས་སུ་མེད་པ་དང་། ཚད་མེད་པ་དང་། ཁོན་མེད་པ་དང་། འགྲན་ཟླ་མེད་པ་དང་། བྱམས་པའི་ངག་གི་ལས་དང་། བྱམས་པའི་ཡིད་ཀྱི་ལས་བདེ་བ་ནས་འགྲན་ཟླ་མེད་པའི་བར་གྱིས་བསྙེན་བཀུར་བྱས་སོ། །དེ་ནས་ཚེ་དང་ལྡན་པ་ཀུན་དགའ་བོ་ས་ལས་ལངས་ནས་མཆི་མ་ཕྱིས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་སེམས་ཅན་རིན་པོ་ཆེ་དེ་ལྟ་བུ་དང་ཐ་དད་དུ་འགྱུར། བདག་ཐུགས་རྗེ་ཆེན་པོ་འཇིག་རྟེན་ཐམས་ཅད་ལས་འཕགས་པ། འཇིག་རྟེན་ཐམས་ཅད་ལ་ཕན་པར་བཞེད་པ། འཇིག་རྟེན་ཐམས་ཅད་ལ་ཐུགས་བརྩེ་བ་ཅན། འཇིག་རྟེན་ཐམས་ཅད་ལ་གཅེས་པ། འཇིག་རྟེན་ཐམས་ཅད་
ཀྱི་སྟོན་པ། འཇིག་རྟེན་ཐམས་ཅད་ཀྱི་ཡོངས་སུ་འདྲེན་པ། འཇིག་རྟེན་ཐམས་ཅད་ལ་ཕན་པ་དང་བདེ་བ་སྦྱིན་པ། སེམས་ཅན་ཆེན་པོ་དེ་ལྟ་བུ་དང་སང་ནང་པར་འབྲལ་ཞིང་ཐ་དད་དུ་འགྱུར་ན་ཅིའི་སླད་དུ་བདག་མྱ་ངན་མི་བགྱིད་སྨྲེ་སྔགས་མི་འདོན། དེ་ནས་ཚེ་དང་ལྡན་པ་ཀུན་དགའ་བོ་མཆི་མ་མང་དུ་ཕྱུང་ནས་མཆི་མ་ཕྱིས་ཏེ་ཡང་ཚིག་འདི་སྐད་སྨྲས་སོ། །ཀྱེ་མའོ་གང་དུ་མར་མེ་ཆེན་པོ། སྒྲོན་མ་ཆེན་པོ། སྣང་བ་ཆེན་པོ་འདི་ལྟ་བུ་འཇིག་རྟེན་ན་མི་སྣང་བར་འགྱུར། ཡེ་ཤེས་ཀྱི་ཉི་མ་ཆེན་པོ་འོད་ཟེར་བྱེ་བ་ཁྲག་ཁྲིག་བརྒྱ་སྟོང་དུ་མས་བསྐོར་བ། ཀུན་ཏུ་འོད་ཀུན་ཏུ་སྣང་བ་ཀུན་ཏུ་ལམ་མེ་བ། ཀུན་ཏུ་འོད་ཟེར་ཀུན་ཏུ་རྟོག །ཀུན་ཏུ་གཟིགས་པ་ཀུན་ཏུ་མཁྱེན་པ། ཀུན་ཏུ་ཤེས་རབ་ཀུན་ཏུ་དྲན་པ། ཀུན་ཏུ་སྤྱོད་ཡུལ་ཀུན་ཏུ་འོད་ཀྱི་སེམས་ཅན་ཤེས་རབ་ཀྱི་སྣང་བ་ཆེན་པོ་འདི་ལྟ་བུ་འཇིག་རྟེན་དུ་ནུབ་པར་འགྱུར་བའི་འདུ་བྱེད་རྣམས་ནི་གཡོན་ཅན་ནོ། །བརྙས་ཐབས་ཅན་ནོ། །ཀྱེ་མའོ་འཇིག་རྟེན་ན་འོད་བྱེད་པ་མི་སྣང་བར་འགྱུར་བ་ཧ་ཅང་མྱུར་ཆེས་སོ། །ལྷ་དང་བཅས་པའི་འཇིག་རྟེན་གྱི་མགོན་པོ་མི་སྣང་བར་འགྱུར་བ་ཧ་ཅང་མྱུར་ཆེས་སོ། །ཀྱེ་མའོ་བཅོམ་ལྡན་འདས་ཆོ་འཕྲུལ་དང་བཅས་པ་འཇིག་རྟེན་ན་མི་སྣང་བར་འགྱུར་བ་ཧ་ཅང་ཡང་མྱུར་ཆེས་ན། བཅོམ་ལྡན་འདས་ཅིའི་སླད་དུ་བདག་མྱ་ངན་མི་བགྱིད། བཅོམ་ལྡན་འདས་ཅིའི་སླད་དུ་བདག་སྨྲེ་སྔགས་མི་འདོན། བཅོམ་ལྡན་འདས་བདག་སྙིང་རྣམ་པ་བརྒྱར་མ་གས་པ་ངོ་མཚར་ཆེའོ། །བཅོམ་ལྡན་འདས་ཀྱི་སྤྱན་སྔར་མ་གུམ་པ་ངོ་མཚར་ཆེའོ། །བཅོམ་ལྡན་འདས་བདག་དེ་ལ་འདི་སྙམ་དུ་བཅོམ་ལྡན་འདས་ཀྱི་བྱིན་གྱི་རླབས་ཀྱིས་བདག་མ་གུམ་མོ་སྙམ་བགྱིད་དོ། །དེ་ཅིའི་སླད་དུ། བཅོམ་ལྡན་འདས་ལས་བདག་གིས་གང་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་མངོན་དུ་མནོས། མངོན་དུ་ཀུན་ཏུ་ཆུབ་པར་བགྱིས་མངོན་དུ་ཀུན་བཟུང་བ་དེ་དག་ད་དུང་སྐྱེ་བོ་མང་པོ་ལ་ཕན་པར་མ་གྱུར། ཕྱོགས་མང་པོར་རྒྱས་པར་མ་གྱུར་པས་བཅོམ་ལྡན་འདས་བདག་འདི་སྙམ་དུ་བདག་མ་གུམ་པ་དེ་ནི་བཅོམ་ལྡན་འདས་ཀྱི་མཐུ་ལགས་པ་སྙམ་བགྱིད་དེ། བཅོམ་ལྡན་འདས་བདག་ཅིའི་སླད་དུ་མྱ་ངན་མི་བགྱིད། བཅོམ་ལྡན་འདས་བདག་ཅིའི་སླད་དུ་སྨྲེ་སྔགས་མི་འདོན། བཅོམ་ལྡན་འདས་བདག་གྲོང་ཁྱེར་སེར་སྐྱའི་གནས་སུ་
བཅོམ་ལྡན་འདས་བལྟམས་པའི་སར་མཆིས་ནས་ཤཱཀྱ་རྣམས་ཚོགས་པ་ལ་ཤཱཀྱ་ཐུབ་པ་ཤཱཀྱའི་རྒྱལ་པོ་ཤིན་ཏུ་མི་འབྱུང་བར་བཞུགས་སོ་ཞེས་བགྱིའམ་ཇི་སྐད་བགྱི། རྒྱལ་པོའི་ཁབ་ཀྱི་གྲོང་ཁྱེར་དུ་མཆིས་ནས་ལུས་འཕགས་མོའི་བུ་རྒྱལ་པོ་མ་སྐྱེས་དགྲ་ལ་ཡང་དག་པར་རྫོགས་པའི་སངས་རྒྱས་ཉི་མའི་ཉི་མ་ཆེན་པོ་ནུབ་སྟེ་མཚམས་མེད་པའི་ལས་ཀྱི་ཟུག་རྔུ་འབྱིན་པ་སྨན་པའི་རྒྱལ་པོ་ཆེན་པོ་དེ་གཤེགས་ལགས་སོ་ཞེས་བགྱིའམ་ཇི་སྐད་བགྱི། གྲོང་ཁྱེར་ཆེན་པོ་མཉན་ཡོད་དུ་མཆིས་ནས་ཐུགས་རྗེ་ཆེན་པོ་བརྙེས་པ། ཕན་པ་བཞེད་པ། འཇིག་རྟེན་ལ་ཐུགས་བརྩེ་བ་ཅན་དེ་མི་སྣང་བར་གྱུར་ཏོ་ཞེས་བགྱིའམ་ཇི་སྐད་བགྱི། མགོན་མེད་ཟས་སྦྱིན་ལ་དེ་བཞིན་གཤེགས་པ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བར་ཇི་ག་བཞུགས་པར་འགྱུར་རམ་ཞེས་བགྱིའམ་ཇི་སྐད་བགྱི། ཡངས་པའི་གྲོང་ཁྱེར་ཆེན་པོར་མཆིས་ནས་ལིད་ཙ་བཱིའི་ཚོགས་རྣམས་ཀྱི་མདུན་དུ་དེད་དཔོན་ཕན་པར་བཞེད་པ་དེ་ནུབ་པར་གྱུར་ཏོ་ཞེས་བགྱིའམ་ཇི་སྐད་བགྱི། ཕྱོགས་དང་ཕྱོགས་མཚམས་རྣམས་ནས་རིགས་ཀྱི་བུ་དང་རིགས་ཀྱི་བུ་མོ་གང་དག་ཞུ་བ་ཡོངས་སུ་ཞུ་བའི་སླད་དུ་མཆི་བ་དེ་རྣམས་ལ་མཁྱེན་པ་ཆེན་པོ་དང་ལྡན་པ་འཇིག་རྟེན་ཐམས་ཅད་ཀྱི་ཁམས་མཁྱེན་པ་མཁས་པ་ཐེ་ཚོམ་ཞུས་པ་ཐམས་ཅད་སེལ་བ་དེ་ནུབ་པར་གྱུར་ཏོ་ཞེས་བགྱིའམ་ཇི་སྐད་བགྱི། ཕྱོགས་དང་ཕྱོགས་མཚམས་རྣམས་ནས་དབྱར་གྱི་གནས་སུ་གནས་གནས་པའི་དགེ་སློང་བཅོམ་ལྡན་འདས་ལ་བལྟ་བ་དང་། ཕྱག་འཚལ་བ་དང་། བསྙེན་བཀུར་བགྱི་བ་དང་། ཞུ་བ་དང་བརྟག་པའི་སླད་དུ་མཆི་བ་དེ་རྣམས་ལ་ཆོས་དང་ལྡན་པའི་གཏམ་གསུང་ཞིང་མིའི་ཆོས་བླ་མ་རྟོགས་པ་བཅོམ་ལྡན་འདས་མི་བཞུགས་ན་བདག་གིས་མི་མཐོང་ངོ་མི་ཐོས་སོ། །ཆོ་འཕྲུལ་དང་བཅས་པའི་ཚངས་པར་སྤྱོད་པ་དེ་ལྟ་བུ་འཇིག་རྟེན་ན་མི་སྣང་བར་འགྱུར་ན། བཅོམ་ལྡན་འདས་བདག་ཅིའི་སླད་དུ་མྱ་ངན་མི་བགྱིད། ཅིའི་སླད་དུ་བདག་སྨྲེ་སྔགས་མི་འདོན། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཐོང་མྱ་ངན་མ་བྱེད་སྨྲེ་སྔགས་མ་འདོན་ཅིག་ཀུན་དགའ་བོ་ངའི་ཚངས་པར་
སྤྱོད་པ་སྐྱེ་བོ་མང་པོ་ལ་ཕན་པར་གྱུར་པ་ལྷ་དང་མི་རྣམས་ལ་རྒྱ་ཆེ་ཞིང་ཡངས་པ་དང་ལྷ་དང་བཅས་པའི་འཇིག་རྟེན་གྱིས་མནོས་པ་ཡུན་རིང་དུ་གནས་པར་འགྱུར་རོ། །ཀུན་དགའ་བོ་ང་ཡོངས་སུ་མྱ་ངན་ལས་འདས་ནས་དགེ་སློང་འོད་སྲུང་དང་ཀུན་དགའ་བོ་ཁྱེད་གཉིས་ལོ་བཞི་བཅུ་ལྷག་ཙམ་དུ་ཆོ་འཕྲུལ་དང་བཅས་པའི་ཚངས་པར་སྤྱོད་པ་ལྷ་དང་མིས་སོ་སོར་མནོས་པ་དེ་སྤྱོད་པར་འགྱུར་གྱིས་ཀུན་དགའ་བོ་ཁྱོད་མྱ་ངན་མ་བྱེད་སྨྲེ་སྔགས་མ་འདོན་ཅིག །ངའི་དམ་པའི་ཆོས་སྐྱེ་བོ་མང་པོ་ལ་ཕན་པར་གྱུར་པ་ལྷ་དང་མི་རྣམས་ལ་རྒྱ་ཆེ་ཞིང་ཡངས་པར་གྱུར་པ་ཡུན་རིང་དུ་གནས་པར་འགྱུར་རོ། །ཀུན་དགའ་བོ་ང་འདས་ནས་དགེ་སློང་འོད་སྲུང་དང་ཁྱེད་གཉིས་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་ཡང་དག་པར་བསྒྲུབས་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་དང་། ངའི་དགེ་བའི་ཆོས་དཀོན་མཆོག་འདི་རྣམ་པར་འཕེལ་ཞིང་ཡོངས་སུ་མི་ཉམས་པར་བྱ་བའི་ཕྱིར་ཞུགས་པར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་དགེ་སློང་འོད་སྲུང་ནི་འདོད་པ་ཆུང་བ། ཆོག་ཤེས་པ། རབ་ཏུ་དབེན་པ། བརྩོན་འགྲུས་བརྩམས་པ། དྲན་པ་ཉེ་བར་བཞག་པ། སྤྲོས་པ་མེད་པ་ལ་དགའ་བ། མཉམ་པར་བཞག་པ། ཤེས་རབ་རྣོ་བའོ། །ཀུན་དགའ་བོ་དགེ་སློང་འོད་སྲུང་ནི་སྐྱེ་བོ་མང་པོ་ལ་ཡང་དག་པར་སྟོན་པ། ཡང་དག་པར་འཛིན་དུ་འཇུག་པ། ཡང་དག་པར་གཟེངས་སྟོད་པ། ཡང་དག་པར་རབ་ཏུ་དགའ་བར་བྱེད་པ། ཚངས་པ་མཚུངས་པར་སྤྱོད་པ་ཐམས་ཅད་ལ་ཆོས་འཆད་པས་ངལ་བ་མེད་པའོ། །ཀུན་དགའ་བོ་དགེ་སློང་འོད་སྲུང་ནི་འཁོར་བཞི་པོ་དག་གི་ཕ་མ་ལྟ་བུའོ། །ཀུན་དགའ་བོ་དགེ་སློང་འོད་སྲུང་ནི་འཇིག་རྟེན་ལ་ཡུན་རིང་དུ་ལྟ་ཞིང་སྙིང་བརྩེ་བ་ཅན་ནོ། །ཀུན་དགའ་བོ་དགེ་སློང་འོད་སྲུང་ནི་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་ལྷ་དང་མི་རྣམས་ཀྱི་དོན་དང་ཕན་པ་དང་བདེ་བའི་ཕྱིར་ཞུགས་པ་ཡིན་ནོ། །གསོལ་པ་བཅོམ་ལྡན་འདས་དགེ་སློང་འོད་སྲུང་སྐྱེ་བོ་མང་པོ་ཇི་སྙེད་ཅིག་གི་དོན་ལ་དགའ་བ་དང་། ལྷ་དང་མི་རྣམས་ལ་ཕན་པ་དང་བདེ་བར་དགའ་བ་ལ་ཞུགས་པ་ལགས། བཀའ་སྩལ་པ། ཀུན་དགའ་བོ་དགེ་སློང་འོད་སྲུང་གང་གི་ཚེ་ཡོངས་སུ་མྱ་ངན་ལས་
འདའ་བ་དེའི་ཚེ་འདི་ལྟར་བྱིན་གྱིས་རློབས་པར་འགྱུར་ཏེ། བདག་ཡོངས་སུ་མྱ་ངན་ལས་འདས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པ་འཇིག་རྟེན་དུ་མ་བྱུང་གི་བར་དུ་བདག་གི་ལུས་གཞན་དུ་མ་གྱུར་ཅིག །གོས་དང་སྤུ་དང་སྐྲ་དང་པགས་པ་དང་མདོག་དང་དབང་པོ་རྣམས་གཞན་དུ་མ་གྱུར་ཅིག །བདག་གི་ལུས་སམ་ཡན་ལག་ཐམས་ཅད་ཀྱང་གཞན་དུ་མ་གྱུར་ཅིག །གང་གི་ཚེ་དེ་བཞིན་གཤེགས་པ་བྱམས་པ་འཇིག་རྟེན་དུ་བྱུང་བར་གྱུར་པ་དེའི་ཚེ་དེ་བཞིན་གཤེགས་པ་དེ་འདུས་པ་དང་པོ་དང་། དེ་བཞིན་དུ་འདུས་པ་གཉིས་པ་དང་། དེ་བཞིན་དུ་འདུས་པ་ཆེན་པོ་གསུམ་པ་དང་བཅས་པས་བདག་གི་ལུས་མ་ཞིག་པར་གཟིགས་པར་གྱུར་ཅིག །བདག་གིས་ཆོས་བཤད་པ་ལ་ཉེ་བར་བརྟེན་པ་དང་བདག་གི་བྱིན་གྱིས་བརླབས་དང་། བདག་ལ་དམིགས་པས་སྲོག་ཆགས་བརྒྱ་ཕྲག་མང་པོ་དང་། སྲོག་ཆགས་སྟོང་ཕྲག་མང་པོ་དང་། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོ་རྣམས་དུལ་བར་གྱུར་ཅིག །གང་གི་ཚེ་དེ་བཞིན་གཤེགས་པ་བྱམས་པ་དང་ཉན་ཐོས་འདུས་པ་གསུམ་པོ་དབང་པོ་མ་ཡེངས་པ་གོས་ཇི་ལྟ་བ་བཞིན་དུ་བགོས་པ་དེ་རྣམས་ཀྱིས་བདག་གི་ལུས་མ་ཞིག་པར་གཟིགས་པར་གྱུར་པ་དེའི་ཚེ་བདག་གི་ལུས་ནམ་མཁའ་ལ་མངོན་པར་འཕགས་ནས་ལུས་ཀྱི་མེའི་ཁམས་ཀྱིས་ལུས་ཚིག་པར་གྱུར་ཅིག །ཚིག་པ་དེའི་སོལ་བ་ཡང་མི་སྣང་བར་གྱུར་ཅིག་སྙམ་མོ། །ཀུན་དགའ་བོ་གང་དེ་ལྟར་བྱིན་གྱིས་རློབ་པར་འགྱུར་བའི་དགེ་སློང་འོད་སྲུང་དེ་སེམས་ཅན་ཡོངས་སུ་སྨིན་པར་བྱ་བའི་ཕྱིར་དེ་ལྟར་སྐྱེ་བོ་མང་པོ་ལ་ཕན་པ་དང་། དེ་ལྟར་སྐྱེ་བོ་མང་པོ་ལ་བདེ་བའི་ཕྱིར་ཞུགས་པ་ཡིན་ནོ། །ཀུན་དགའ་བོ་དགེ་སློང་འོད་སྲུང་ཡོངས་སུ་མྱ་ངན་ལས་འདས་ནས་ཀྱང་བྲག་གི་རི་བཞི་ལྷན་ཅིག་ཏུ་ཚོགས་ནས་འོད་སྲུང་གི་ལུས་བསྐོར་ཏེ་གཅིག་ཏུ་འབྱོར་པར་གནས་པར་འགྱུར་རོ། །ཀུན་དགའ་བོ་བྲག་གི་རི་དེ་བཞིའི་ནང་ན་དགེ་སློང་འོད་སྲུང་གི་ལུས་གཅིག་ཏུ་མཁྲེགས་ཤིང་མ་ཞིག་པར་གནས་པར་འགྱུར་རོ། །དེ་བཞིན་གཤེགས་པ་བྱམས་པ་ཇི་སྲིད་དུ་འཇིག་རྟེན་དུ་མ་བྱུང་བ་དེ་སྲིད་དུ་དགེ་སློང་འོད་སྲུང་གི་ལུས་གོས་དང་བཅས་པར་མ་ཞིག་པར་གནས་པར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟ་སྟེ།
ཚུལ་ཁྲིམས་དག་པའི་ཕྱིར་ཚུལ་ཁྲིམས་དང་ལྡན་པ་ཚངས་པར་སྤྱོད་པའི་སེམས་ལ་སྨོན་པ་འགྲུབ་སྟེ་ཚངས་པར་མི་སྤྱོད་པའི་མ་ཡིན་ནོ། །ཤེས་རབ་དང་ལྡན་པའི་འགྲུབ་ཀྱི་ཤེས་རབ་འཆལ་པའི་མ་ཡིན་ནོ། །འདོད་ཆགས་དང་བྲལ་བའི་འགྲུབ་ཀྱི་འདོད་ཆགས་དང་མ་བྲལ་བའི་མ་ཡིན་ནོ། །ཀུན་དགའ་བོ་དེ་བས་ན་དགེ་སློང་འོད་སྲུང་སྔོན་གྱི་བྱིན་གྱི་རླབས་ཀྱིས་ཡོངས་སུ་མྱ་ངན་ལས་འདས་ནས་དེ་བཞིན་གཤེགས་པ་བྱམས་པ་འཇིག་རྟེན་དུ་མ་བྱུང་གི་བར་དུ་ལུས་གཞན་དུ་མི་འགྱུར། སྐྲ་དང་སྤུ་དང་ཤ་དང་ཁྲག་དང་པགས་པ་དང་དེ་ལས་གཞན་པའི་ཡན་ལག་དང་ཉིང་ལག་རྣམས་དང་དབང་པོ་རྣམས་དང་། གོས་རྣམས་གཞན་དུ་མི་འགྱུར་ཞིང་ལུས་ཀྱི་དྲི་ང་བ་མེད་པར་འགྱུར་རོ། །ཀུན་དགའ་བོ་དེ་ནས་དེ་བཞིན་གཤེགས་པ་བྱམས་པ་འཇིག་རྟེན་དུ་བྱུང་ནས་འདུས་པ་དང་པོའི་དགེ་སློང་བྱེ་བ་ཕྲག་དགུ་བཅུ་རྩ་དྲུག་དང་ཐབས་ཅིག་ཏུ་འོད་སྲུང་གི་ལུས་ག་ལ་འདུག་པ་དེར་གཤེགས་པར་འགྱུར་རོ། །ཀུན་དགའ་བོ་དེ་ནས་དེ་བཞིན་གཤེགས་པ་བྱམས་པས་དགེ་སློང་འོད་སྲུང་གི་ལུས་དགེ་སློང་བྱེ་བ་ཕྲག་དགུ་བཅུ་རྩ་དྲུག་པོ་དེ་དག་ལ་བསྟན་ནས་འདི་སྐད་ཀྱང་བཀའ་སྩལ་ཏོ། །དགེ་སློང་དག་འདི་ནི་བཅོམ་ལྡན་འདས་ཤཱཀྱ་ཐུབ་པའི་ཉན་ཐོས་ཆེན་པོ་དགེ་སློང་འོད་སྲུང་ཞེས་བྱ་བ་ཡིན་ཏེ། འདི་ནི་སྦྱངས་པའི་ཡོན་ཏན་ལ་གནས་པ་རྣམས་དང་། འདོད་པ་ཆུང་བ་རྣམས་དང་ཆོག་ཤེས་པ་རྣམས་དང་། རབ་ཏུ་དབེན་པ་རྣམས་དང་། བརྩོན་འགྲུས་བརྩམས་པ་རྣམས་དང་། དྲན་པ་ཉེ་བར་གཞག་པ་རྣམས་དང་། མཉམ་པར་གཞག་པ་རྣམས་དང་། ཤེས་རབ་དང་ལྡན་པ་རྣམས་ཀྱི་མཆོག་ཡིན་ཏེ། སྤྲོས་པ་མེད་པ་ལ་མོས་ཤིང་སྤྲོས་པ་མེད་པ་ལ་དགའ་བ། སྐྱེ་བོ་མང་པོ་ལ་ཡང་དག་པར་སྟོན་པ། ཡང་དག་པར་འཛིན་དུ་འཇུག་པ། ཡང་དག་པར་གཟེངས་སྟོད་པ། ཡང་དག་པར་རབ་ཏུ་དགའ་བར་བྱེད་པ། ཚངས་པ་མཚུངས་པར་སྤྱོད་པ་ལ་ཆོས་འཆད་པས་ངལ་བ་མེད་པའོ། །དགེ་སློང་དག་དགེ་སློང་འོད་སྲུང་ནི་འཁོར་བཞིའི་ཕ་མ་ལྟ་བུར་གྱུར་པའོ། །རིང་དུ་རྗེས་སུ་ལྟ་བ། ཤིན་དུ་རྗེས་སུ་ལྟ་བ། སྐྱེ་བོ་མང་པོ་ལ་རྗེས་སུ་ལྟ་བའོ། །དགེ་སློང་དག་དགེ་སློང་འོད་སྲུང་འདི་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བའི་ཕྱིར་ཞུགས་པ་དང་། ལྷ་
དང་མི་རྣམས་ཀྱི་དོན་དང་། ཕན་པ་དང་བདེ་བའི་ཕྱིར་ཞུགས་པ་ལ་ལྟོས། ལན་གཉིས་སུ་ཡང་དེ་བཞིན་གཤེགས་པ་བྱམས་པ་ཉན་ཐོས་བྱེ་བ་དགུ་བཅུ་རྩ་བཞི་དང་ཐབས་ཅིག་ས་ཕྱོགས་དེར་གཤེགས་པར་འགྱུར་རོ། །ཀུན་དགའ་བོ་ལན་གསུམ་དུ་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པ་ཉན་ཐོས་བྱེ་བ་དགུ་བཅུ་རྩ་གཉིས་དང་ཐབས་ཅིག་ཏུ་དགེ་སློང་འོད་སྲུང་གི་ལུས་ག་ལ་འདུག་པའི་ས་ཕྱོགས་དེར་གཤེགས་ཤིང་། ཀུན་དགའ་བོ་དེ་བཞིན་གཤེགས་པ་བྱམས་པ་དེ་ཡང་དགེ་སློང་བྱེ་བ་དགུ་བཅུ་རྩ་གཉིས་པོ་རྣམས་ལ་དགེ་སློང་འོད་སྲུང་གི་ལུས་སྟོན་པར་འགྱུར་ཏེ། དགེ་སློང་དག་དགེ་སློང་འོད་སྲུང་ཞེས་བྱ་བ་འདི་ནི་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པའི་ཉན་ཐོས་ཆེན་པོ་སྦྱངས་པའི་ཡོན་ཏན་འཛིན་པ་རྣམས་ཀྱི་མཆོག །འདོད་པ་ཆུང་བ་དང་། ཆོག་ཤེས་པ་ནས་སྐྱེ་བོ་མང་པོ་དང་ལྷ་དང་མི་རྣམས་ལ་ཕན་པ་དང་བདེ་བའི་ཕྱིར་ཞུགས་པའི་བར་ལ་ལྟོས། ཀུན་དགའ་བོ་དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པས་དེའི་ཚེ་ཕྱག་གཡས་པ་གསེར་གྱི་ཁ་དོག་ཅན་བརྐྱང་ནས་དགེ་སློང་འོད་སྲུང་ཆེན་པོའི་མགོ་ལ་ཉུག་པར་འགྱུར་རོ། །བྱུགས་ནས་ཀྱང་དགེ་སློང་གི་དགེ་འདུན་ལ་གཟིགས་པར་འགྱུར་རོ། །གཟིགས་ནས་འདི་སྐད་བཀའ་སྩལ་ཏོ། །དགེ་སློང་དག་དགེ་སློང་འོད་སྲུང་དེས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ཡོངས་སུ་མྱ་ངན་ལས་འདས་པ་དེའི་དམ་པའི་ཆོས་ཇི་ལྟར་ཡོངས་སུ་བཟུང་བ་དེ་ལྟ་བུ་ད་ལྟ་ངའི་དགེ་སློང་གི་དགེ་འདུན་མང་པོ་འདིའི་ནང་ན་ང་ཡོངས་སུ་མྱ་ངན་ལས་འདས་ན་གང་དམ་པའི་ཆོས་འཆད་པའི་དགེ་སློང་གཅིག་ཀྱང་མེད་དོ་ཞེས་བཀའ་སྩོལ་བར་འགྱུར་རོ། །ཀུན་དགའ་བོ་དེ་ནས་དགེ་སློང་འོད་སྲུང་འདུས་པ་ཆེན་པོ་གསུམ་པ་དེ་ཉིད་དུ་སྔོན་གྱི་བྱིན་གྱི་རླབས་ཀྱིས་སྟེང་གི་ནམ་མཁའི་བར་སྣང་ལ་མངོན་པར་འཕགས་ནས་ཆོ་འཕྲུལ་རྣམ་པ་སྣ་ཚོགས་བསྟན་ཏེ། རང་གི་མེའི་ཁམས་ཀྱིས་རང་གི་ལུས་སྲེག་པར་འགྱུར་ཏེ། བསྲེགས་པ་དེའི་སོལ་བ་ཡང་མི་སྣང་། ཐལ་བ་ཡང་མི་སྣང་བར་འགྱུར་རོ། །ཀུན་དགའ་བོ་དེ་ནས་དེ་བཞིན་གཤེགས་པ་བྱམས་པ་དེའི་ཚེ་དགེ་སློང་འོད་སྲུང་ལས་
བརྩམས་ནས་ཅི་ནས་ཀྱང་སྲོག་ཆགས་བརྒྱ་ཕྲག་མང་པོ་དང་སྲོག་ཆགས་སྟོང་ཕྲག་མང་པོ་དང་། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོ་དང་། ལྷ་དང་མིར་བཅས་པའི་སྐྱེ་དགུ་དུལ་བར་འགྱུར་བ་དེ་ལྟ་དེ་ལྟར་དགེ་སློང་བྱེ་བ་དགུ་བཅུ་རྩ་དྲུག་པོ་དེ་དག་ལ་ཆོས་སྟོན་པར་འགྱུར་རོ། །ཀུན་དགའ་བོ་དགེ་སློང་འོད་སྲུང་ཇི་ལྟར་སྐྱེ་བོ་མང་པོ་ལ་ཕན་པའི་ཕྱིར་ཞུགས་པ་ལ་ལྟོས། ཀུན་དགའ་བོ་ཁྱོད་ཀྱང་སྐྱེ་བོ་མང་པོ་ལ་ཕན་པ་དང་བདེ་བའི་ཕྱིར་ཞུགས་སོ། །འཇུག་པར་ཡང་འགྱུར་རོ། །ཀུན་དགའ་བོ་དེ་ལྟར་ན་དགེ་སློང་འོད་སྲུང་དང་ཁྱོད་གཉིས་ལོ་བཞི་བཅུ་ལྷག་ཙམ་དུ་ངའི་དམ་པའི་ཆོས་འདི་འཛིན་པར་འགྱུར། ཆོ་འཕྲུལ་དང་བཅས་པའི་ཚངས་པར་སྤྱོད་པ་ལྷ་དང་མི་རྣམས་ལ་རྒྱ་ཆེ་ཞིང་ཡངས་པར་གྱུར་པ་སྤྱོད་པར་འགྱུར་རོ། །འོད་སྲུང་གི་ལེའུ་སྟེ་ལྔ་པ་རྫོགས་སོ།། །།