བཞི་པ། མངལ་གྱི་སྐྱེ་བ་འབྱུང་བ་ཞེས་བྱ་བའི་ལེའུ།
ལུས་ནི་རྫས་དགུའི་རང་བཞིན་ཅན། །འདུས་བྱས་རྡུལ་ཕྲན་
ཚོགས་ཡིན་ཏེ། །ཡོན་ཏན་ཚོགས་ཀྱིས་རྣམ་སྣ་ཚོགས། །འབྱུང་དང་འབྱུང་གནས་ཚོགས་ཡིན་ཏེ། །ཁུ་ཆུ་ཁྲག་ལས་ཀུན་འབྱུང་བ། །སྔོན་མེད་རྣམ་པར་འཕེལ་བ་སྟེ། །སྟེང་གཟུགས་འོག་ཏུ་འགྲོ་བ་ཡིན། །སྡུག་བསྔལ་འཁྲུལ་འཁོར་ཐོག་མ་མེད། །ལས་ཀྱི་རྣམ་པ་བརྒྱས་ཀྱང་གཡོགས། །དུག་གི་ཤིང་གི་ས་བཞིན་དུ། །དཔའ་དང་རྡུལ་གྱིས་དེ་བཞིན་དུ། །མུན་པས་ཀྱང་ནི་གསོས་པ་སྟེ། །ལམ་རྒྱུད་དོག་པར་ཤིན་ཏུ་འཕྱན། །དུས་ཀྱིས་བསྐུལ་ཅིང་རབ་ཏུ་སྐྱེ། །ཡོན་ཏན་ལས་ཀྱིས་འདའ་བ་ནི། །ཕྱུགས་དང་མི་ཡི་མངལ་སྐྱེས་པས། །ཀླུ་དང་ཡི་དགས་ཤ་ཟ་དང་། །འབར་བ་ལྷ་ཡི་ནང་དུ་ཡང་། །སྐྱེ་འམ་ལྷ་མིན་འཇིག་རྟེན་ནམ། །སྔགས་འཆང་རིགས་སུ་དེ་བཞིན་ཏེ། །འོན་ཏམ་རྣལ་འབྱོར་ཅན་དབུས་སུ། །བསམ་གཏན་ཞིག་ཅིང་མངོན་སྐྱེ་བ། །འཁོར་ལོ་འཁོར་རིགས་དམ་པར་ཡང་། །བར་བར་དུ་ནི་སྐྱེ་བར་འགྱུར། །སྐྱེས་ནས་རིག་པ་འཛིན་པ་ནི། །གང་ཚེ་དབང་པོ་འཕེལ་བ་ན། །སུ་ཡི་གང་གི་གང་ཚེ་ལས། །ལྷན་ཅིག་སྐྱེས་པ་རབ་བྱུང་ཞིང་། །ལྷན་ཅིག་སྐྱེས་པའི་ལས་ཚུལ་གྱིས། །ལམ་དང་ལམ་དུ་རབ་ཏུ་འཇུག །བརྟག་མེད་རྟོག་དང་བྲལ་བ་ཡི། །གང་ཚེ་ཆོས་ནི་མངོན་རྟོགས་ན། །ཐར་པ་རྣམས་ཀྱི་ཐར་གསུམ་སྟེ། །ཡི་གེ་ཡི་གེ་མེད་བྱས་པའོ། །འབྱུང་བ་ཐམས་ཅད་རྒྱུ་ཡི་ཚོགས། །དེ་ནི་འོད་སྣང་མཆོག་ཡིན་ཏེ། །ཡང་དག་བླ་ནས་བླར་སྦྱངས་པ། །སྟུག་པོའི་དཀྱིལ་ན་རྣམ་པར་གནས། །བྱེ་བའི་ཞིང་དང་མཉམ་ལུས་ཀྱིས། །སྤྲུལ་པས་ཁྱབ་པར་བྱས་ཤིང་གནས། །དེ་སྟེ་དེ་ཤེས་ཡོད་ན་ནི། །དོག་པའི་ལམ་ནས་འགྲོལ་བར་འགྱུར། །དེ་ལྟའི་སྐྱེས་བུ་སྐྱེས་པ་ནི། །ཁྱད་པར་ཤེས་ཞེས་རྣམ་པར་བརྗོད། །ལྷ་ཡི་ལྷ་ཡིས་ཡང་དག་གསུངས། །རྒྱལ་བའི་སྲས་ཀྱིས་མདུན་བྱས་ཤིང་། །མངལ་གྱི་སྐྱེ་བ་འབྱུང་བ་ནི། །བྱས་པ་ཡིན་ནོ་མི་རྣམས་ཀྱི། །མ་རིག་སྲེད་དང་ལས་སྐྱེས་མིན། །ཉོན་མོངས་ལས་ལས་ཤིན་ཏུ་བྱུང་། །མཚན་མ་མེད་པ་མངོན་གྱུར་ཅིང་། །མཚན་མ་མེད་ལས་རབ་འདས་ཏེ། །ཡི་གེ་མེད་པ་དེ་བྱུང་ནས། །སྤྲོས་པ་ཐམས་ཅད་རབ་བྲལ་ཞིང་། །སྟུག་པོའི་དཀྱིལ་དུ་རབ་ཏུ་འགྲོ། །
དམིགས་ལས་སེམས་ཞིག་འགྱུར་བ་ནི། །རྣལ་འབྱོར་ཅན་གྱི་སྒྲ་རྨོངས་པས། །རྩེད་མོ་ལ་སོགས་ལྷ་རྫས་དང་། །མཐོ་རིས་བུད་མེད་བསྟེན་རྨོངས་ཀྱིས། །གང་ཚེ་ཐུབ་ཆེན་མ་འདུག་པ། །དེ་ཚེ་སེམས་ནི་འབྱུང་བ་སྟེ། །ལམ་ལས་བསྐྱོད་ཅེས་བྱ་བ་ཡི། །ཏིང་འཛིན་འདོད་པའི་ཁམས་སྐྱེས་པ། །གཟུགས་དང་གཟུགས་མེད་འགྲོ་བ་ན། །ཏིང་ངེ་འཛིན་ནི་རབ་ཏུ་སྐྱེ། །སེམས་ཅན་འདུ་ཤེས་མེད་སོང་ན། །ཏིང་ངེ་འཛིན་ལས་བྲལ་བར་འགྱུར། །ནམ་མཁའ་རྣམ་ཤེས་མཐའ་ཡས་ཀྱི། །ཏིང་ངེ་འཛིན་ལ་དབང་མེད་འགྱུར། །རྒྱལ་བ་གང་ཚེ་ཐུབ་དབང་གྱུར། །གཉིས་དང་བྲལ་བས་བྱང་བ་ཡི། །སེམས་ནི་མངོན་པར་མི་འབྱུང་ངོ་། །དེ་བདེན་དེ་ནི་རྣལ་འབྱོར་ཏེ། །བསམ་གཏན་པ་ཡི་བསམ་གཏན་ཡིན། །བསམ་གཏན་རྟག་ཏུ་བསམ་གཏན་བྱ། །དེ་སྟེ་སྟུག་དཀྱིལ་འདོད་ནའོ། །མངལ་གྱི་སྐྱེ་བ་འབྱུང་བ་ཞེས་བྱ་བ་སྟེ་ལེའུ་བཞིའོ།། །།