བཅུ་གཉིས་པ། དམ་པའི་ཆོས་ཡོངས་སུ་གཏད་པ་ཞེས་བྱ་བའི་ལེའུ།
དེ་ནས་ཡང་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ང་བྱང་ཆུབ་ཐོབ་པའི་ཡོན་ཏན་གྱི་ཕན་ཡོན་ལྟ་ཞོག་ལ། ཀུན་དགའ་བོ་ང་བྱང་ཆུབ་སེམས་དཔའི་སྤྱད་པ་སྤྱོད་པ་ན་གང་ཡོན་ཏན་གྱི་ཆོས་རྣམས་བྱུང་བ་དེ་དག་ཀྱང་རང་སངས་རྒྱས་རྣམས་ལ་ཡང་མེད་ན་ཉན་ཐོས་རྣམས་སམ། དེ་ལས་གཞན་པའི་སེམས་ཅན་རྣམས་ལ་
ལྟ་ཅི་སྨོས། ཀུན་དགའ་བོ་ང་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཇི་ཙམ་དུ་དཀའ་བ་སྤྱད་པ་དེ་དག་ཐམས་ཅད་ཁྱེད་ཀྱི་དོན་དུ་སྤྱད་དོ། །ངས་རྒྱལ་སྲིད་དང་སྡུག་པ་དག་ཀྱང་ཡོངས་སུ་བཏང་ཞིང་བུ་ཕོ་དང་། བུ་མོ་དང་། ཆུང་མ་དང་། སླས་དང་། བདག་གི་སྲོག་དང་། ཤ་དང་། ཁྲག་དང་། རུས་པ་དང་། རྐང་དང་། རྣ་བ་དང་། སྣ་དང་། ལག་པ་དང་། རྐང་པ་དང་། མགོ་དག་ཀྱང་ངས་ཡོངས་སུ་བཏང་བ་དང་། སྡུག་བསྔལ་མི་བཟད་པ་རྩུབ་ཅིང་དྲག་པའི་ཚོར་བ་རྣམ་པ་དུ་མ་མྱོང་བ་དེ་དག་ཐམས་ཅད་ཀྱང་ཁྱེད་ཀྱི་ཕྱིར་རོ། །ཀུན་དགའ་བོ་ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བ་ན་གང་བྱ་དཀའ་བ་དང་ཡོངས་སུ་བཏང་བ་བྱས་པ་དང་། སེམས་ཅན་རྣམས་ཀྱི་དོན་དུ་ངས་སྡུག་བསྔལ་གང་དག་མྱོང་བ་དེ་དག་ཐམས་ཅད་ཀུན་དགའ་བོ་གལ་ཏེ་བརྗོད་ན་བདེན་པར་ཡིད་ཆེས་པར་མི་འགྱུར་ན་ཚིག་ཏུ་སྨྲ་བ་ལྟ་ཅི་སྨོས། ཀུན་དགའ་བོ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཁྱེད་ཀྱི་དོན་དུ་སྡུག་བསྔལ་མི་བཟད་པ་རྩུབ་ཅིང་དྲག་པའི་ཚོར་བ་འདི་ལྟ་བུ་དག་མྱོང་ངོ་ཞེས་དེ་སྐད་བཤད་ན་དེ་བཞིན་གཤེགས་པ་དེས་བདག་ཅག་གི་ཕྱིར་རབ་ཏུ་དཀའ་བ་སྤྱད་དོ་ཞེས་གལ་ཏེ་བྱིས་པ་སོ་སོའི་སྐྱེ་བོ་དག་ཚིག་བཞི་པ་གཅིག་གི་སྙིང་རྗེ་སྐྱེད་ན། ཀུན་དགའ་བོ་སེམས་བསྐྱེད་པ་དེའི་འབྲས་བུ་ཡང་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བའི་བར་དུ་འགྱུར་བར་ང་སྨྲ་ན། ཀུན་དགའ་བོ་ང་ལ་དགེ་བའི་རྩ་བ་སྐྱེད་པ་ལྟ་ཅི་སྨོས་ཀུན་དགའ་བོ་འདི་ལ་སྐྱེས་བུ་བླུན་པོ་མ་དད་པ་རྒྱུད་ཉམས་པ། མུན་པ་མཐའ་ཡས་པས་ཁེབས་པ་ཁ་ཅིག་ནི་ངའི་བྱང་ཆུབ་སེམས་དཔའི་སྤྱོད་པ་བཤད་ན་ཚིག་བཞི་པ་གཅིག་གི་སྙིང་རྗེའམ། ཕན་པའི་དངོས་པོའམ། སེམས་དང་བ་ཡང་མི་སྐྱེད་དོ། །གང་དག་བླ་ན་མེད་པའི་མྱ་ངན་ལས་འདའ་བ་བསྒྲུབ་པའི་ཕྱིར་ཁྱད་པར་དུ་འཕགས་པར་འགྱུར་བ་དང་། བྱང་ཆུབ་སེམས་དཔའི་སྤྱད་པ་སྤྱོད་པ་ན་སྙིང་རྗེ་ཆེན་པོ་རྙེད་པས་གང་དག་ཐོབ་པར་གྱུར་པ་ཡོན་ཏན་གྱི་ཆོས་དེ་དག་རང་སངས་རྒྱས་རྣམས་ལ་ཡང་མེད་ན་ཉན་ཐོས་རྣམས་ལ་ལྟ་ག་ལ་ཡོད། སོ་སོའི་སྐྱེ་བོ་རྣམས་ལ་ལྟ་ག་ལ་
ཡོད། ཀུན་དགའ་བོ་ང་བྱང་ཆུབ་སེམས་དཔའི་སྤྱད་པ་སྤྱོད་པ་ན་སྙིང་རྗེ་ཆེན་པོ་རྙེད་པས་གང་དག་ཐོབ་པའི་ཆོས་དེ་དག་ཀུན་དགའ་བོ་གལ་ཏེ་རང་སངས་རྒྱས་རྣམས་ལ་ཡོད་པར་གྱུར་ན་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་ཞིག་ན། གང་གི་ཕྱིར་ཆོས་དེ་དག་བྱམས་པ་ཆེན་པོ་དང་། སྙིང་རྗེ་ཆེན་པོས་ཟིན་པས་དེའི་ཕྱིར་རང་སངས་རྒྱས་རྣམས་ལ་མེད་དོ། །དེའི་ཕྱིར་དེ་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོབས་བཅུ་དང་ལྡན་པ། མི་འཇིགས་པ་བཞི་ཐོབ་པ། བྱམས་པ་ཆེན་པོ་དང་སྙིང་རྗེ་ཆེན་པོ་དང་ལྡན་པར་མི་འགྱུར་རོ། །ཀུན་དགའ་བོ་ངས་མངོན་པར་དྲན་པ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དགེ་བ་ཅི་བྱ་བ་ཚོལ་ཞིང་འཁོར་བས་ཡིད་རྟག་ཏུ་སྐྲག་ལ་སེམས་ཅན་རྣམས་ལ་སྙིང་རྗེ་ཆེན་པོས་ཡོངས་སུ་བསྒོས་པའི་ཡིད་དུ་གྱུར་པ་ན་རྨི་ལམ་འདི་ལྟ་བུ་རྨིས་པ་དྲན་ཏེ། རིའི་རྒྱལ་པོ་རི་རབ་ཀྱི་སྡེང་ཆེ་ཞིང་ཡངས་པ་ཞིག་ན་བདག་འདུག་སྟེ། དེ་ན་སེམས་ཅན་གང་དག་འཇིག་རྟེན་གྱི་བར་ན་བཀོད་པ། སེམས་ཅན་དམྱལ་བ་ཆེན་པོར་སྐྱེས་པ་དེ་དག་སེམས་ཅན་དམྱལ་བའི་སྲུངས་མ་རྣམས་ཀྱིས་ཚར་ཆོད་ཅིང་ལུས་འབར་བ་དང་། ཀུན་ཏུ་འབར་བ་དང་། མེར་གྱུར་པ་དང་། ཤིན་ཏུ་སྡུག་བསྔལ་མི་བཟད་པ་རྩུབ་ཅིང་དྲག་པ་སྲོག་འཕྲོག་པའི་ཚོར་བ་མྱོང་བར་གྱུར་ནས་ང་ག་ལ་བ་དེར་ལྷགས་སོ། །ལྷགས་ནས་ང་ལ་ཐལ་མོ་སྦྱར་ཏེ་ཕྱག་འཚལ་ནས་འདི་སྐད་ཅེས་གྲོགས་པོ་ཁྱེད་ནི་བདེ་བའི་ཚོར་བ་མྱོང་། བདག་ཅག་ནི་སྡུག་བསྔལ་ཞིང་སེམས་ཅན་དམྱལ་བའི་ཚོར་བ་མི་བཟད་པའི་ནང་ན་མཆིས་ཏེ། ཤིན་ཏུ་སྡུག་བསྔལ་མི་བཟད་པ་རྩུབ་ཅིང་དྲག་པ་སྲོག་འཕྲོག་པའི་ཚོར་བ་མྱོང་ཞིང་། མགོན་མ་མཆིས། སྐྱབས་མ་མཆིས། དཔུང་གཉེན་མ་མཆིས་སོ། །སྐྱེས་བུ་དམ་པ་ཁྱོད་བཞེད་ན་ནི་བདག་ཅག་སྡུག་བསྔལ་འདི་ལྟ་བུ་འདི་ལས་ཁྱོད་ཀྱིས་ཡོངས་སུ་ཐར་བར་མཛད་སྤྱོད་དོ་ཞེས་ཟེར་རོ། །ཀུན་དགའ་བོ་ང་རྨི་ལམ་དེ་ཉིད་ན་ངུ་ཞིང་མིག་གཉིས་ནས་འདི་ལྟ་སྟེ་དཔེར་ན། གང་གཱའི་ཀླུང་ཆེན་པོ་ལྟ་བུའི་མཆི་མ་བྱུང་སྟེ། ངས་སེམས་ཅན་དམྱལ་བའི་སེམས་ཅན་དེ་དག་ལ་དེ་ལྟ་བུའི་སྙིང་རྗེ་ཆེན་པོ་སྐྱེས་ནས་
སེམས་ཅན་དམྱལ་བའི་སེམས་ཅན་དེ་དག་ལ་གྲོགས་པོ་དག་དེ་ལྟར་མ་འཇིགས་ཤིག །ངས་ཁྱེད་སྡུག་བསྔལ་ཆེན་པོ་འདི་ལྟ་བུ་འདི་ལས་ཡོངས་སུ་ཐར་བར་བྱའོ་ཞེས་དབུགས་ཕྱུང་ངོ་། །ཀུན་དགའ་བོ་ངས་རྨི་ལམ་ཉིད་ན་སེམས་ཅན་དམྱལ་བ་པའི་སེམས་ཅན་དེ་དག་གཅིག་ཏུ་བསོགས་ནས་ལག་པ་གཡས་པས་མགོ་ལ་བྱུགས་སོ། །ཀུན་དགའ་བོ་སེམས་ཅན་དམྱལ་བ་པའི་སེམས་ཅན་དེ་དག་གི་སྤྱི་བོར་ལག་པ་གཡས་པ་བཞག་མ་ཐག་པ་དང་། སེམས་ཅན་ཁྱེད་ངས་ཐར་བར་བྱས་མ་འཇིགས་ཤིག་ཅེས་ངས་དེ་སྐད་སྨྲས་མ་ཐག་ཏུ་སེམས་ཅན་དམྱལ་བ་པའི་མེ་དེ་ཞི་བར་གྱུར་ཏོ། །སེམས་ཅན་དམྱལ་བ་པའི་སེམས་ཅན་དེ་དག་ཀྱང་སྐད་ཅིག་དེ་ཉིད་དང་། ཡུད་ཙམ་དེ་ཉིད་ལ་བདེ་བའི་ཚོར་བ་མྱོང་བར་གྱུར་ཏོ། །ཀུན་དགའ་བོ་ང་གཉིད་ཀྱིས་ལོག་པ་དེ་ཉིད་ལས་སད་མ་ཐག་ཏུ་མཆི་མ་དེ་གོས་ལས་བཙིར་ནས་བསགས་སོ། །ཀུན་དགའ་བོ་ང་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཡང་སྙིང་རྗེ་ཆེན་པོའི་ཆོས་དེ་ལྟ་བུ་དང་ལྡན་ན། ད་ལྟ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ན་ལྟ་ཅི་སྨོས། ཀུན་དགའ་བོ་རྣམ་གྲངས་འདིས་ཁྱོད་ཀྱིས་འདི་ལྟར་རིག་པར་བྱ་སྟེ། ང་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཆོས་གང་དག་བྱུང་བ་དེ་དག་རང་སངས་རྒྱས་རྣམས་ལ་ཡང་མེད་ན་ཉན་ཐོས་རྣམས་དང་བྱིས་པ་སོ་སོའི་སྐྱེ་བོ་རྣམས་ལ་ལྟ་ག་ལ་ཡོད། ཀུན་དགའ་བོ་དེ་བཞིན་གཤེགས་པ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་སེམས་ཅན་རྣམས་ལ་སྙིང་རྗེ་ཆེན་པོ་ཇི་ཙམ་ཞིག་དང་ལྡན་པ་ཚིག་ཏུ་བརྗོད་པས་ཀྱང་མཐར་ཕྱིན་པར་སླ་བ་མ་ཡིན་པ་དེ་ལྟ་བུའི་སེམས་ཅན་རྣམས་ལ་ཕན་པའི་དངོས་པོའི་སེམས་དང་ལྡན་པར་གྱུར་པ་ལ་ལྟོས། ཀུན་དགའ་བོ་སྔོན་བྱུང་བ་འདས་པའི་དུས་ན་ཚོང་པ་མང་པོ་རིན་པོ་ཆེའི་ཕྱིར་རྒྱ་མཚོ་ཆེན་པོར་ཞུགས་པ་དང་། དེ་དག་གི་གྲུ་ཆེན་པོ་ནོར་གྱིས་གང་བ་རྒྱ་མཚོ་ཆེན་པོ་དེ་ཉིད་དུ་ཞིག་པར་གྱུར་ཏོ། །དེ་ནས་ཚོང་པ་དེ་དག་གྲུ་ཞིག་པས་འཇིགས་སྐྲག་མི་དགའ་བར་གྱུར་ནས་སྲོག་གི་ཕྱིར་ཁ་ཅིག་ནི་སྤང་ལེབ་ལ་རྟེན་ཏེ་རྒལ། ཁ་ཅིག་ནི་ལག་པས་རྐྱལ། ཁ་ཅིག་ནི་འཆི་བའི་དུས་བྱས་སོ། །དེའི་ཚེ་ཡང་ཚོང་པ་
མང་པོ་དེའི་ནང་ན་གང་དེད་དཔོན་དུ་གྱུར་པ་དེ་རྒྱ་མཚོ་ཆེན་པོ་ལ་རྐྱལ་པས་རྐྱལ་ལོ། །དེའི་ཚེ་ཡང་ཚོང་པ་ལྔ་ཞིག་རྒྱ་མཚོ་ཆེན་པོས་ཁྱེར་བ་དེ་དག་དེད་དཔོན་དེ་ལ་ཀྱེ་དེད་དཔོན་མི་འཇིགས་པ་སྩོལ་ཅིག་ཅེས་འབོད་དོ། །ཀུན་དགའ་བོ་དེ་སྐད་ཅེས་སྨྲས་པ་དང་། དེད་དཔོན་དེས་ཚོང་པ་དེ་དག་ལ་འདི་སྐད་ཅེས་སྨྲས་སོ། །ཀྱེ་སྐྱེས་བུ་ཁྱེད་མ་འཇིགས་ཤིག །ངས་ཁྱེད་རྒྱ་མཚོ་ཆེན་པོ་འདི་ལས་བདེ་བར་གདོན་ནོ། །ཀུན་དགའ་བོ་དེའི་ཚེ་དེད་དཔོན་དེའི་ལུས་ལ་མཚོན་རྣོན་པོ་ཞིག་ཀྱང་འཆང་སྟེ། དེ་འདི་སྙམ་དུ་རྒྱ་མཚོ་ཆེན་པོ་འདི་མི་རོ་དང་ལྷན་ཅིག་མི་གནས་པས་ངེས་པར་བདག་གིས་བདག་གི་ལུས་སྲོག་དང་ཕྲལ་ཏེ་ཚོང་པ་འདི་དག་རྒྱ་མཚོ་ཆེན་པོ་འདི་ལས་གདོན་ནོ་སྙམ་དུ་བསམས་ནས། དེས་ཚོང་པ་དེ་དག་བདག་གི་ལུས་ལ་ཤིན་ཏུ་ལེགས་པར་ཁ་ཅིག་ནི་རྒྱབ་ཏུ་ཞོན། །ཁ་ཅིག་ནི་ཕྲག་པ་ལ་ཞོན། ཁ་ཅིག་ནི་བརླ་ལ་བཅར་ཏེ། རྩོལ་བ་ཆེན་པོ་བསྐྱེད་ནས་ལུས་དང་སེམས་ལ་སོ་སོར་བརྟག་པའི་མཐུ་བསྐྱེད་དེ་ཚོང་པ་དེ་དག་ལ་མི་འཇིགས་པ་བྱིན་ནས་སྙིང་རྗེ་ཆེན་པོས་ཡོངས་སུ་བསྒོས་པའི་སེམས་ཀྱིས་མཚོན་རྣོན་པོས་བདག་གི་སྲོག་བཅད་པ་དང་། དེ་མྱུར་བ་ཉིད་དུ་འཆི་བའི་དུས་བྱས་སོ། །དེ་ནས་དེ་མ་ཐག་ཏུ་རོ་དེ་རྒྱ་མཚོ་ཆེན་པོའི་ནང་ནས་སྐམ་ལ་བྱུང་ངོ་། །དེ་ནས་ཚོང་པ་ལྔ་པོ་དེ་དག་བདེ་ཞིང་དོན་གྲུབ་ནས་རྒྱ་མཚོ་ཆེན་པོ་ལས་རྒལ་ཏེ་སླར་འཛམ་བུ་གླིང་དུ་བདེ་བར་ལྷགས་པར་གྱུར་ཏོ། །ཀུན་དགའ་བོ་དེའི་ཚེ་དེའི་དུས་ན་དེད་དཔོན་དེ་གཞན་ཞིག་ཡིན་པ་སྙམ་དུ་ཁྱོད་ཐེ་ཚོམ་འམ་ཡིད་གཉིས་ཟ་ན་ཀུན་དགའ་བོ་ཁྱེད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ཀུན་དགའ་བོ་ང་ཉིད་དེའི་ཚེ་དེའི་དུས་ན་དེད་དཔོན་དུ་གྱུར་ཏོ། །ཀུན་དགའ་བོ་དགེ་སློང་ལྔ་སྡེ་ནི་དེའི་ཚེ་དེའི་དུས་ན་ཚོང་པ་ལྔ་པོར་གྱུར་ཏེ། ཀུན་དགའ་བོ་དེའི་ཚེ་ཡང་དགེ་སློང་ལྔ་པོ་རྒྱ་མཚོ་ཆེན་པོ་ལས་བསྒྲལ་ཏོ། །ད་ཡང་ངས་འཁོར་བའི་རྒྱ་མཚོ་ཆེན་པོ་ལས་བསྒྲལ་ཏེ་མྱ་ངན་ལས་འདས་པ་འཇིགས་པ་མེད་ཅིང་ཞི་བ་ལ་བཀོད་དོ། །ཀུན་དགའ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དཀའ་བ་ཇི་སྙེད་བྱེད་པ་དང་། ཡོན་ཏན་ཚད་མེད་པ་ཇི་སྙེད་དང་ལྡན་པ་ལ་ལྟོས། ཀུན་དགའ་བོ་རྣམ་གྲངས་
འདིས་ཀྱང་ཁྱོད་ཀྱིས་འདི་ལྟར་རིག་པར་བྱ་སྟེ། བྱང་ཆུབ་སེམས་དཔའ་རྣམས་ཅི་འདྲ་བའི་ཡོན་ཏན་འདི་ལྟ་བུ་དག་རང་སངས་རྒྱས་རྣམས་ལ་མེད་དོ། །ཀུན་དགའ་བོ་གལ་ཏེ་རང་སངས་རྒྱས་རྣམས་ལ་ངའི་ཆོས་རྣམས་ཡོད་དུ་ཟིན་ན་དེ་དག་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་བ་ཞིག་ན་གང་གི་ཕྱིར་དེ་དག་ལ་ཆོས་འདི་དག་མེད་པ་དེའི་ཕྱིར་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་མི་རྒྱའོ། །ཀུན་དགའ་བོ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་དཀའ་བ་བྱེད་ཅིང་། སྙིང་རྗེ་ཆེ་ལ་སེམས་ཅན་ཐམས་ཅད་ལ་སྙིང་བརྩེ་བའོ། །དེ་ལ་མི་བླུན་པོ་ཁ་ཅིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་བླ་ན་མེད་པའི་ཡོངས་སུ་མྱ་ངན་ལས་འདའ་བའི་ས་བོན་མངོན་སུམ་དུ་བྱ་བའི་ཕྱིར་སེམས་དང་བ་འགའ་ཡང་ང་ལ་མི་སྐྱེད་དོ། །ཀུན་དགའ་བོ་ཉི་ཚེ་བ་བྱེད་པ་ནི་ཉི་ཚེ་བ་སྒྲུབ་ལ། ཡོངས་སུ་རྫོགས་པ་བྱེད་པ་ནི་ཡོངས་སུ་རྫོགས་པ་སྒྲུབ་བོ། །ཀུན་དགའ་བོ་ངའི་སྤྱོད་པ་གཞན་དག་ཀྱང་བསྟན་ཏེ། ཀུན་དགའ་བོ་ཐ་ན་སེམས་དང་བ་གཅིག་བསྐྱེད་པའི་དགེ་བའི་རྩ་བ་དང་ལྡན་པ་བསྐྱེད་པ་ཡང་དོན་མེད་པར་མི་འགྱུར་ན་གོང་མ་དག་ལྟ་ཅི་སྨོས། ཀུན་དགའ་བོ་གང་དེ་བཞིན་གཤེགས་པ་ལ་བཞག་པའི་དགེ་བའི་རྩ་བ་གང་ཡིན་པ་ཐ་ན་སངས་རྒྱས་ལ་དམིགས་པའི་སེམས་གཅིག་བསྐྱེད་ན་ཀུན་དགའ་བོ་དེ་དག་ཐམས་ཅད་ཀྱང་བདུད་རྩི་དང་མཚུངས་ཤིང་ཐ་མ་བདུད་རྩིར་འགྱུར་བར་ང་སྨྲའོ། །ཀུན་དགའ་བོ་དེ་བཞིན་གཤེགས་པ་ནི་རྣམ་པ་ཐམས་ཅད་ཀྱིས་རྗེས་སུ་དྲན་པར་བྱ་སྟེ། ཀུན་དགའ་བོ་དྲན་པ་ལས་ཀྱང་དེ་བཞིན་གཤེགས་པ་དྲན་པར་བྱའོ། །ཀུན་དགའ་བོ་དགེ་བའི་རྩ་བ་ལས་ཀྱང་དེ་བཞིན་གཤེགས་པ་དྲན་པར་བྱའོ། །ཀུན་དགའ་བོ་རིགས་ལས་ཀྱང་དེ་བཞིན་གཤེགས་པ་དྲན་པར་བྱའོ། །ང་ནི་འདྲ་བའི་ཕྱིར་ཉི་མའི་རིགས་ཏེ་གང་བུ་རམ་ཤིང་པའི་རིགས་སུ་སྐྱེས་པ་ནོར་མང་པོ་ཕུན་སུམ་ཚོགས་པའོ། །ཉི་མའི་རིགས་ཀྱིས་མུན་པ་མུན་ནག་དང་བྲལ་བ་སྣང་བ་བྱེད་པ་འོད་བྱེད་པའོ། །ཀུན་དགའ་བོ་ང་ནི་ཤཱཀྱ་ཡིན་ཏེ། དེ་ནི་རིགས་ཆེ་བའི་ཚིག་བླ་དགས་སོ། །ཀུན་
དགའ་བོ་དེ་བཞིན་གཤེགས་པ་ནི་རུས་དང་། ཆོ་རིགས་དང་། རིགས་དང་། ནོར་དང་། གཟུགས་དང་། ཡུལ་དང་། མཚན་དང་དཔེ་བྱད་བཟང་པོ་དང་། སྟོབས་དང་། མི་འཇིགས་པ་དང་། སངས་རྒྱས་ཀྱི་ཆོས་མ་འདྲེས་པས་མངོན་པར་འཕགས་སོ། །ཀུན་དགའ་བོ་དེ་བཞིན་གཤེགས་པ་ཡོན་ཏན་ཐམས་ཅད་ཀྱིས་མངོན་པར་འཕགས་ཤིང་རིགས་ཕུན་སུམ་ཚོགས་སོ། །ཀུན་དགའ་བོ་རོ་མྱོང་བ་ལས་ཀྱང་དེ་བཞིན་གཤེགས་པ་རྗེས་སུ་དྲན་པར་བྱའོ། །ཀུན་དགའ་བོ་དོན་ཡོད་པ་དང་། སྔོན་གྱི་སྦྱོར་བ་ཕུན་སུམ་ཚོགས་པ་དང་། སྨོན་ལམ་ཕུན་སུམ་ཚོགས་པ་དང་། ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བ་དང་། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་དང་། སྤྱོད་ལམ་དང་། སྤྱོད་པ་དང་། སྒྲུབ་པ་ལས་ཀྱང་དེ་བཞིན་གཤེགས་པ་རྗེས་སུ་དྲན་པར་བྱ་ན་སངས་རྒྱས་ཀྱི་ཡོན་ཏན་ཐམས་ཅད་ཀྱིས་ལྟ་ཅི་སྨོས། ཀུན་དགའ་བོ་རྣམ་པ་གང་དང་གང་དག་གིས་དེ་བཞིན་གཤེགས་པ་རྗེས་སུ་དྲན་པར་འགྱུར་བའི་རྣམ་པ་དེ་དང་དེ་དག་གིས་རྫུ་འཕྲུལ་ཆེ་ཕན་ཡོན་ཆེ་གཟི་ཆེ་རྒྱ་ཆེ། བདུད་རྩི་དང་མཚུངས་ཏེ། བདུད་རྩིས་ཀླས་ཤིང་བདུད་རྩིས་མཐས་གཏུགས་པར་འགྱུར་རོ། །ཀུན་དགའ་བོ་ང་སྔོན་བྱང་ཆུབ་སེམས་དཔར་གྱུར་པའི་རྒྱུད་ལ་ཡོད་པའི་སྦྱིན་པའི་ཕ་རོལ་ཏུ་ཕྱིན་པའི་ས་གང་ཡིན་པ་དེའི་ཡོན་ཏན་རྣམས་ངས་སངས་རྒྱས་ཀྱི་ཡེ་ཤེས་ཀྱིས་ཀྱང་མཐའ་རྟོགས་པར་མི་ནུས་ན་གང་ངའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པར་གྱུར་པ་ལྟ་ཅི་སྨོས། བྱང་ཆུབ་སེམས་དཔའི་ཡོན་ཏན་དེ་ལས་གཞན་པ་དག་ཡོད་པ་ལྟ་ཅི་སྨོས། ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་པ་ན། བྱང་ཆུབ་སེམས་དཔའི་ཡོན་ཏན་ཡོད་པ་དེ་དག་གི་མཐའ་ཡང་ངས་སངས་རྒྱས་ཀྱི་ཡེ་ཤེས་ཀྱིས་རྟོགས་པར་སླ་བ་མ་ཡིན་ན་ལུང་བསྟན་པ་ལྟ་ཅི་སྨོས། སངས་རྒྱས་ཀྱི་ཡོན་ཏན་ཐམས་ཅད་
ལྟ་ཅི་སྨོས་ཏེ། དེ་དག་གི་མཐའ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་ཡང་རྟོགས་པར་སླ་བ་མ་ཡིན་ནོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཡོན་ཏན་དཔག་ཏུ་མེད་པའི་ཕྱིར་རོ། །ཀུན་དགའ་བོ་ངས་དོན་གྱི་དབང་འདི་མཐོང་ནས་གང་དག་ཁ་ཅིག་ངའི་བྱང་ཆུབ་སེམས་དཔའི་སྤྱོད་པའི་ཡོན་ཏན་རྣམས་རྗེས་སུ་དྲན་ཞིང་སེམས་དང་བ་ཡང་སྐྱེད་ན། ཀུན་དགའ་བོ་དགེ་བའི་རྩ་བ་དེ་དག་ཐམས་ཅད་ཀྱི་འབྲས་བུ་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདས་པར་ང་དེ་སྐད་སྨྲའོ། །ཀུན་དགའ་བོ་དེ་བས་ན་མྱ་ངན་མ་བྱེད། སྨྲེ་སྔགས་མ་འདོན་ཅིག །ཀུན་དགའ་བོ་ཁྱོད་དང་ལྷ་དང་བཅས་པའི་འཇིག་རྟེན་གྱི་དོན་ཆེན་པོ་ངས་བྱས་ཟིན་ཏེ་ཕན་ཆེན་པོ་ནི་བཏགས། བླ་ན་མེད་པའི་གྲུབ་པ་དང་བདེ་བ་འདི་ལྟ་སྟེ། མྱ་ངན་ལས་འདའ་བ་ཐོབ་པར་བྱ་བའི་ལམ་ནི་བསྟན། བསྒྲུབ་པ་ནི་བཤད་ཟིན་གྱིས་ད་ཁྱེད་བག་ཡོད་པ་ལ་བརྩོན་པར་གྱིས་ཤིག །དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་དགེ་སློང་གི་དགེ་འདུན་ལ་བཀའ་སྩལ་པ། དགེ་སློང་དག་དོ་མོད་ཀྱི་ནམ་གྱི་གུང་ཐུན་ལ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་དགེ་སློང་དག་ཚུར་ཤོག །དེང་དུ་ངས་ཁྱེད་མཐོང་བའི་ཐ་མ་དང་རྗེས་སུ་བསྟན་པའི་ཐ་མར་འགྱུར། དེང་དུ་ང་དང་ཁྱེད་མཐོང་བ་ཐ་མ་དང་ཕྲད་པ་ཐ་མར་འགྱུར་ཏེ། དགེ་སློང་ཁྱེད་ཀྱིས་ཕྱིས་ང་མི་མཐོང་ངས་ཀྱང་ཁྱེད་མི་མཐོང་ངོ་། །དེ་བས་ན་དགེ་སློང་དག་མྱ་ངན་མ་བྱེད། སྨྲེ་སྔགས་མ་འདོན་ཅིག །དགེ་སློང་དག་སྡུག་པ་དང་ཡིད་དུ་འོང་བ་ཐམས་ཅད་དང་ཐ་དད་དུ་འགྱུར་ཞིང་འགྱེས་ཏེ་འབྱེ་བར་འགྱུར་འབྲལ་བར་འགྱུར་རོ། །དགེ་སློང་དག་གང་སྐྱེས་པ། བྱུང་བ་བརྟགས་པ། འདུས་བྱས་པ། མངོན་པར་བསམས་པ། རྟེན་ཅིང་འབྲེལ་པར་བྱུང་བ། རབ་ཏུ་འཇིག་པའི་ཆོས་ཅན་འདི་དག་འཇིག་པར་མི་འགྱུར་བའི་གནས་ག་ལ་ཡོད་དེ་དེ་ནི་གནས་མེད་དོ། །དགེ་སློང་དག་ཇི་ལྟར་རིང་དུ་གནས་ཀྱང་ཚེ་ཕྱི་མར་ངེས་པར་འགྲོ་དགོས་སོ། །དགེ་སློང་དག་སྐྱེས་པ་ནི་མི་འཆི་བ་མེད་དོ། །འདུ་བྱེད་དུ་གྱུར་པ་རྣམས་ལ་ནི་རྟག་པའམ། བརྟན་པའམ། ཐེར་ཟུག་གམ། མི་འགྱུར་བའི་ཆོས་ཅན་མ་ཡིན་ནོ། །དགེ་སློང་དག་སྐྱེས་པ་
དང་འཆི་བ་ནི་སྡུག་བསྔལ་ལོ། །དགེ་སློང་དག་གང་དག་ཡོངས་སུ་མྱ་ངན་ལས་འདས་པ་དེ་དག་ནི་བདེ་བའོ། །མ་ཐོབ་པ་ཐོབ་པར་བྱ་བ་དང་། མ་རྟོགས་པ་རྟོགས་པར་བྱ་བ་དང་། མངོན་སུམ་དུ་མ་བྱས་པ་མངོན་སུམ་དུ་བྱ་བའི་ཕྱིར་བརྩོན་པ་གྱིས་ཤིག །འབད་པ་གྱིས་ཤིག །བརྩལ་བ་གྱིས་ཤིག །དགེ་སློང་དག་སངས་རྒྱས་བཅོམ་ལྡན་འདས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་། གང་དེ་ལས་གཞན་པའི་དགེ་བའི་བྱང་ཆུབ་ཀྱི་ཕྱོགས་ཀྱི་ཆོས་རྣམས་ནི་བག་ཡོད་པས་ཐོབ་ཀྱིས། བག་ཡོད་པ་ལ་བརྩོན་པར་གྱིས་ཤིག །དགེ་སློང་དག་འདི་ནི་ཁྱེད་ལ་རྗེས་སུ་བསྟན་པའོ། །དེའི་ཚེ་འཁོར་དེ་ན་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་ཇི་སྙེད་འདུས་པར་གྱུར་པ་དེ་དག་ཐམས་ཅད་ཀྱིས་བཅོམ་ལྡན་འདས་ལ་གདམས་པ་དང་རྗེས་སུ་བསྟན་པ་འདི་ལྟ་བུ་འདི་ཐོས་ནས་སྡུག་བསྔལ་ཞིང་ཡིད་མི་བདེ་སྟེ། སྡུག་བསྔལ་དང་ཡིད་མི་བདེ་བ་མཆོག་དང་ལྡན་པར་གྱུར། མྱ་ངན་གྱི་ཟུག་རྔུ་ཆེན་པོས་ཟུག་པར་གྱུར་ནས་ངུ་ཞིང་མཆི་མ་བྱུང་བར་གྱུར་ཏེ། བཅོམ་ལྡན་འདས་ཡོངས་སུ་མྱ་ངན་ལས་འདའ་བ་ཧ་ཅང་མྱུར་ཆེས་སོ། །བདེ་བར་གཤེགས་པ་ཡོངས་སུ་མྱ་ངན་ལས་འདའ་བ་ཧ་ཅང་མྱུར་ཆེས་སོ། །འཇིག་རྟེན་གྱི་མིག་མི་སྣང་བར་འགྱུར་བ་ཧ་ཅང་མྱུར་ཆེས་སོ། །འཇིག་རྟེན་གྱི་མིག་མེད་ཅིང་ལོང་བར་འགྱུར་བ་ཧ་ཅང་མྱུར་ཆེས་སོ། །སེམས་ཅན་རིན་པོ་ཆེ་འདི་ལྟ་བུ་དང་འབྲལ་བ་དང་། འབྱེ་བ་དང་། ཐ་དད་དུ་འགྱུར་བ་ཧ་ཅང་མྱུར་ཆེས་སོ་ཞེས་ཆོ་ངེ་ཆེན་པོ་བཏོན་ནོ། །དེ་ནས་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ལ་མིག་མི་འཛུམས་པར་ལྟ་སྟེ་བལྟས་ཤིང་བརྟགས་ནས་བཅོམ་ལྡན་འདས་ལས་ཚིག་དེ་སྐད་ཐོས་པ་དང་ངུ་ཞིང་སྨྲེ་སྔགས་འདོན་ཏེ། ཇི་ལྟར་ལངས་པ་ཉིད་ལས་ཤིང་བཅད་པ་བསྒྱེལ་བ་བཞིན་དུ་ས་ལ་འགྱེལ་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཐོང་མྱ་ངན་མ་བྱེད། སྨྲེ་སྔགས་མ་འདོན་ཅིག ཀུན་
དགའ་བོ་སྡུག་པ་དང་ཡིད་དུ་འོང་བ་ཐམས་ཅད་དང་ཐ་དད་དུ་འགྱུར་ཞིང་འགྱེས་ཏེ་འབྱེ་བ་དང་འབྲལ་བར་འགྱུར་རོ། །གང་བྱུང་བ། འདུས་བྱས་པ། མངོན་པར་བསམས་པ། རྟེན་ཅིང་འབྲེལ་པར་འབྱུང་བ་དེ་དག་མི་འཇིག་པ་དེ་ག་ལ་ཡོད་དེ་དེ་ནི་གནས་མེད་དོ་ཞེས་ངས་ཐོག་མ་ནས་མ་བསྟན་ཏམ། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །གང་སེམས་ཅན་རིན་པོ་ཆེ་སེམས་ཅན་ཁ་ལོ་སྒྱུར་བ། སེམས་ཅན་ཡོངས་སུ་འདྲེན་པ། སེམས་ཅན་ཐམས་ཅད་ལ་གཅེས་པ། སེམས་ཅན་ཐམས་ཅད་རྟོན་པ། སྟོན་པ་དེ་ལྟ་བུ་དང་བདག་འགྱེས་ཤིང་འབྱེ་འབྲལ་ན། བཅོམ་ལྡན་འདས་ཅིའི་སླད་དུ་མྱ་ངན་མི་བགྱིད། བདེ་བར་གཤེགས་པ་བདག་ཅིའི་སླད་དུ་སྨྲེ་སྔགས་མི་འདོན། བཅོམ་ལྡན་འདས་འདི་ལྟར་འཇིག་རྟེན་གྱི་མགོན་པོ་ཐུགས་རྗེ་ཆེན་པོ་འཇིག་རྟེན་ཐམས་ཅད་ལ་ཕན་ཞིང་ཐུགས་བརྩེ་བ་མིག་རིན་པོ་ཆེ་སྣང་བ་མཛད་པ་དང་བདག་འབྲལ་བར་འགྱུར་ན་ཅིའི་སླད་དུ་བདག་མྱ་ངན་མི་བགྱིད། སྨྲེ་སྔགས་མི་འདོན། བཅོམ་ལྡན་འདས་བདག་གི་སྙིང་ཚལ་པ་བརྒྱར་མ་གས་པ་ངོ་མཚར་ཏོ། །བཅོམ་ལྡན་འདས་བདག་མཆིས་པ་འདི་ཉིད་དུ་འགུམ་པའི་དུས་མ་བགྱིས་པ་ངོ་མཚར་ཏོ། །བཅོམ་ལྡན་འདས་གང་བདག་མཆིས་པ་འདི་ཉིད་དུ་འདི་ལྟ་སྟེ་དཔེར་ན། ཕུབ་མ་སྤར་གང་བཞིན་དུ་རྣམ་པ་དུ་མར་མ་ཞིགས་པ་ངོ་མཚར་ཏོ། །བཅོམ་ལྡན་འདས་བདག་ནི་བཅོམ་ལྡན་འདས་ཀྱི་བྱིན་གྱི་རླབས་ཀྱིས་འགུམ་པའི་དུས་མ་བགྱིས་སོ་སྙམ་བགྱིད་དོ། །བཅོམ་ལྡན་འདས་འདི་ལྟར་སེམས་ཅན་རིན་པོ་ཆེ་འཇིག་རྟེན་ཡོངས་སུ་འདྲེན་པ། འཇིག་རྟེན་ལ་ཕན་ཞིང་ཐུགས་བརྩེ་བ་དེ་ལྟ་བུ་སང་སླན་ཆད་བཞུགས་པ་མི་མཐོང་ན་ཅིའི་སླད་དུ་མྱ་ངན་མི་བགྱིད། སྨྲེ་སྔགས་མི་འདོན། དེ་ནས་སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཁྱོད་ལ་ང་སྡུག་གམ། གསོལ་པ། བཅོམ་ལྡན་འདས་བདག་ལ་སྡུག་གོ །བདེ་བར་གཤེགས་པ་བདག་ལ་སྡུག་གོ །བཀའ་སྩལ་པ། ཀུན་དགའ་བོ་ཁྱོད་ལ་ང་ཇི་ཙམ་དུ་སྡུག །གསོལ་
པ། བཅོམ་ལྡན་འདས་དག་གི་ལས་ཀྱིས་བསྟན་པར་སླ་བ་མ་ལགས་པ་དང་། བཅོམ་ལྡན་འདས་དཔེས་བསྟན་པར་ཡང་སླ་བ་མ་ལགས་པ་དེ་ཙམ་དུ་བཅོམ་ལྡན་འདས་བདག་ལ་སྡུག་གོ །བདེ་བར་གཤེགས་པ་བདག་ལ་སྡུག་གོ །བཅོམ་ལྡན་འདས་བདག་གི་ལུས་དང་སྲོག་བཅོམ་ལྡན་འདས་ཀྱི་དོན་དུ་ཡོངས་སུ་བཏང་ཡང་བདག་མི་དགའ་བར་མི་འགྱུར་བ་དེ་ལྟ་བུར་བཅོམ་ལྡན་འདས་བདག་ལ་སྡུག་གོ །བདེ་བར་གཤེགས་པ་བདག་ལ་སྡུག་གོ །བཅོམ་ལྡན་འདས་བདག་ལ་དེ་ལྟར་སྡུག་པ་དང་བདེ་བར་གཤེགས་པ་བདག་ལ་དེ་ལྟར་སྡུག་པར་བཅོམ་ལྡན་འདས་དེ་བཞིན་གཤེགས་པ་ཉིད་ཀྱིས་མཁྱེན་ནོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་གལ་ཏེ་ཁྱོད་ལ་ང་སྡུག་ན་ལག་པ་གཡས་པ་ང་ལ་བྱིན་དེ་ནས་ཚེ་དང་ལྡན་པ་ཀུན་དགའ་བོས་ལག་པ་གཡས་པ་ཕུལ་ལོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོའི་ལག་པ་ཉིད་ཀྱི་ཕྱག་གཡས་པ་གསེར་གྱི་ཁ་དོག་ཅན་རྒྱ་སྐྱེགས་ཀྱི་ཁུ་བ་རབ་ཏུ་བཟང་པོས་ཁ་བསྒྱུར་བ་ལྟ་བུར་འཇམ་ཞིང་རབ་ཏུ་གཞོན་པས་བཟུང་ནས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་གལ་ཏེ་ཁྱོད་ལ་ང་སྡུག་ན་སྡུག་པའི་བྱ་བ་བྱོས། དེ་ལ་ང་ལ་སྡུག་པར་འཛིན་པའི་བྱ་བ་གང་ཞེ་ན། ཀུན་དགའ་བོ་བསྐལ་པ་གྲངས་མེད་པ་བྱེ་བར་བསྒྲུབས་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་། བླ་ན་མེད་པའི་ཆོས་དཀོན་མཆོག་གི་མཛོད་འདི་ཁྱོད་ལ་བཅོལ་ཅིང་གཏད་ཀྱིས་ཅི་ནས་ཀྱང་ང་དང་འཐུན་པར་གྱིས་ཤིག །འཐུན་པར་བྱས་ནས་ཀྱང་ཡངས་ཤིང་རྒྱས་པར་གྱིས་ཤིག །རྒྱུན་མ་ཆད་པར་གྱིས་ཤིག །སྐྱེས་བུ་ཐ་མ་པར་མ་གྱུར་ཅིག །ཀུན་དགའ་བོ་དེ་བཞིན་གཤེགས་པས་གསུངས་པའི་ཆོས་འདུལ་བ་འདི་རྣམ་པར་འཕེལ་བ་དང་། ཡོངས་སུ་མི་ཉམས་པ་དང་། ཀུན་ཏུ་སྲུང་ཞིང་སྦ་བ་དང་། ཆུད་མི་ཟོས་པར་བྱ་བའི་ཕྱིར་ཁྱོད་ལ་དཔེ་བསྟན་པར་བྱ་སྟེ་འདི་ལ་སྐྱེས་བུ་མཁས་པ་ཁ་ཅིག་དཔེས་སྨྲས་པའི་དོན་ཤེས་པར་འགྱུར་རོ། །ཀུན་དགའ་བོ་འདི་ལྟ་སྟེ་དཔེར་ན། ཚོང་དཔོན་ནམ་ཁྱིམ་བདག་ཕྱུག་པོ་ནོར་ཆེ་བ། ལོངས་
སྤྱོད་ཆེ་བ། བང་མཛོད་མང་བ། བདག་དབང་བ་མང་བ། རྫས་དང་ཡོ་བྱད་མང་བ། རིགས་ཕུན་སུམ་ཚོགས་པ། རུས་ཕུན་སུམ་ཚོགས་པ། རིགས་བཙུན་པའི་རིགས་ལས་བུ་གཅིག་པ་ཞིག་སྐྱེས་ཏེ། དེ་སྐྱེས་མ་ཐག་ཏུ་དབང་པོ་རྣམས་རྒྱས་པར་བྱ་བའི་ཕྱིར་ཡི་གེ་དང་། གྲངས་དང་རྩིས་དང་། ལག་རྩིས་དང་། དེ་ལས་གཞན་པའི་བཟོ་དཀའ་བ་དང་། སྒྱུ་རྩལ་དཀའ་བ་དག་སློབ་བོ། །དེ་ལ་བསླབས་ནས་ཐ་མར་ཚོང་དཔོན་ནམ་ཁྱིམ་བདག་དེ་འདི་སྐད་དུ་བུ་ཁྱོད་ལ་ངས་ཇི་ཙམ་དུ་བྱ་བ་དེ་དག་ངས་བྱས་ཟིན། ཡི་གེ་དང་གྲངས་དང་རྩིས་དང་ལག་རྩིས་དང་བཟོ་དཀའ་བ་དང་། སྒྱུ་རྩལ་དཀའ་བ་དག་ཀྱང་ལོབས་ཟིན་ཏེ་འདི་ནི་ངའི་དུས་ཐ་མ་ཡིན་པས་བདག་དབང་བ་ཐམས་ཅད་ངས་ཁྱོད་ལ་གཏད་ཀྱིས་གནས་གསུམ་ལ་སློབ་ཅིང་ཚོང་དཔོན་གྱི་ཁྱིམ་འདི་ན་གནས་པར་བྱོས་ཤིག །གསུམ་གང་ཞེ་ན། འདུན་པ་དང་། བརྩོན་འགྲུས་དང་། བག་ཡོད་པའོ་ཞེས་སྨྲས་ཏེ། དེ་ལྟར་ཚོང་དཔོན་ནམ་ཁྱིམ་བདག་དེས་བུ་གཅིག་པ་དེ་ལ་ཤིན་ཏུ་ལེགས་པར་གཏམས་ནས་འཆི་བའི་དུས་བྱས་ལ་དེའི་བུ་གཅིག་པ་དེ་བག་མེད་པར་སྤྱོད་པས་ལོངས་སྤྱོད་མ་རྙེད་པ་ནི་མི་རྙེད། ཕ་མེས་ཀྱི་ལོངས་སྤྱོད་རྙེད་པ་དག་ནི་ཡོངས་སུ་ཟད་ཅིང་མེད་པར་གྱུར་ན། ཀུན་དགའ་བོ་དེ་ཇི་སྙམ་དུ་སེམས། ཚོང་དཔོན་གྱི་བུའམ། ཁྱིམ་བདག་གི་བུ་དེས་ཕའི་ལུང་བཞིན་དུ་བྱས་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བདེ་བར་གཤེགས་པ་མ་ལགས་སོ། །བཀའ་སྩལ་པ། ཀུན་དགའ་བོ་ཕ་དེས་བུ་དེ་ལ་བུའི་བྱ་བ་ཅུང་ཟད་བྱས་སམ། གསོལ་པ། བཅོམ་ལྡན་འདས་བགྱིས་སོ། །བདེ་བར་གཤེགས་པ་བགྱིས་སོ། །བཀའ་སྩལ་པ། ཀུན་དགའ་བོ་དེ་བཞིན་དུ་དེ་བཞིན་གཤེགས་པ་ཡང་འཇིག་རྟེན་ཐམས་ཅད་ཀྱི་ཡབ་སྟེ་ཁྱེད་ལ་བུ་གཅིག་པ་བཞིན་དུ་དབུགས་འབྱིན་ཏོ། །ཀུན་དགའ་བོ་འདི་ནི་ངའི་དུས་ཐ་མ་སྟེ། འདི་ནི་ངའི་རྗེས་སུ་བསྟན་པ་ཐ་མ་ཡིན་གྱིས་ཅི་ནས་ཀྱང་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་བསྒྲུབས་པ་ངའི་ཆོས་དཀོན་མཆོག་གི་མཛོད་དང་། ཆོས་དཀོན་མཆོག་གི་སྣོད་དང་། ཆོས་ཀྱི་ནོར་བླ་ན་མེད་པ་འདི་གནས་གསུམ་གྱིས་བཞག་ནས་གནས་པར་གྱིས་
ཤིག །གསུམ་གང་ཞེ་ན། འདུན་པ་དང་། བརྩོན་འགྲུས་དང་། བག་ཡོད་པའོ། །ཁྱེད་གནས་འདི་གསུམ་གྱིས་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་བསྒྲུབས་པ་བླ་ན་མེད་པའི་ཆོས་དཀོན་མཆོག་གི་མཛོད་འདི་ལ་གནས་ན་དགེ་བའི་རྩ་བ་མ་ཐོབ་པ་རྣམས་ཐོབ་པར་འགྱུར་རོ། །དགེ་བའི་ཆོས་ཐོབ་པ་རྣམས་ཡོངས་སུ་མི་ཉམས་པར་འགྱུར་རོ། །གལ་ཏེ་ཁྱེད་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་བསྒྲུབས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ལ་གནས་གསུམ་གྱིས་མི་གནས་ན་དགེ་བའི་ཆོས་མ་ཐོབ་པ་རྣམས་ཁྱེད་ཀྱིས་ཐོབ་པར་མི་འགྱུར་ལ་དགེ་བའི་ཆོས་ཐོབ་པ་རྣམས་ཀྱང་ཡོངས་སུ་ཉམས་པར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་ང་འཇིག་རྟེན་གྱི་ཡབ། འཇིག་རྟེན་གྱི་མགོན་པོ། དོན་བཞེད་པ། ཕན་པར་བཞེད་པ། བདེ་བར་བཞེད་པ། གྲུབ་པ་དང་བདེ་བ་བཞེད་པ། ཕན་པ་བཞེད་པ། ཐུགས་བརྩེ་བ་ཅན། ཐུགས་རྗེ་དང་ལྡན་པས་གང་བྱ་བ་དེ་ནི་ངས་བྱས་ཟིན་གྱིས་ད་ཁྱོད་ཀྱིས་བྱོས་ཤིག །ཀུན་དགའ་བོ་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་བསྒྲུབས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ནི་གནས་གསུམ་གྱིས་མེད་པར་འགྱུར་རོ། །གསུམ་གང་ཞེ་ན། མ་དད་པ་དང་། མི་སྒྲུབ་པ་དང་། མི་སྟོན་པའོ། །ཀུན་དགའ་བོ་དེ་བས་ན་དམ་པའི་ཆོས་དཀོན་མཆོག་གི་མཛོད་འདི་བསྲུང་བའི་ཕྱིར་མངོན་པར་དད་པ་དང་། བསྒྲུབ་པ་དང་། བསྟན་པ་ལ་འདུན་པ་དང་། བརྩོན་འགྲུས་དང་། བག་ཡོད་པ་ལ་བརྩོན་པར་གྱིས་ཤིག །དེ་ལྟར་བྱས་ན་ཆོས་ཀྱི་རྗེ་འཇིག་རྟེན་གྱི་ཡབ་ངའི་བྱ་བ་ཁྱེད་བུ་རྣམས་ཀྱིས་བྱས་པར་འགྱུར་རོ། །ཀུན་དགའ་བོ་དེ་བས་ན་བླ་ན་མེད་པའི་ཆོས་དཀོན་མཆོག་གི་མཛོད་འདི་རྒྱ་ཆེར་ཡོངས་སུ་གཏད་པའི་ཕྱིར་ཁྱོད་ལ་དཔེ་བསྟན་པར་བྱ་སྟེ། འདི་ལ་སྐྱེས་བུ་མཁས་པ་ཁ་ཅིག་དཔེས་སྨྲས་པའི་དོན་ཤེས་པར་འགྱུར་ཏེ། བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བདག་ཅག་གི་དོན་དུ་ཡོངས་སུ་མྱ་ངན་ལས་འདའ་བའི་ཚེ་ཕྱག་གཡས་པས་ཚེ་དང་ལྡན་པ་ཀུན་དགའ་བོའི་ལག་པ་ནས་བཟུང་སྟེ་བསྐལ་པ་གྲངས་མེད་པ་བྱེ་བ་ཁྲག་
ཁྲིག་བརྒྱ་སྟོང་དུ་བསྒྲུབས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཡོངས་སུ་གཏད་དོ་སྙམ་ནས་དེ་དག་རྒྱ་ཆེར་ཡོངས་སུ་དགའ་བ་དང་མགུ་བར་འགྱུར་རོ། །ཀུན་དགའ་བོ་འདི་ལྟ་སྟེ་དཔེར་ན། དེད་དཔོན་བྱེས་སུ་སོང་བས་གང་བདག་གི་བྱ་བ་ཅུང་ཟད་ཅི་ཡོད་པ་དང་། འདྲོན་པ་ཐམས་ཅད་ཀྱི་གང་བྱ་བ་ཅུང་ཟད་ཅི་ཡོད་པ་དེ་དག་བྱས་ཟིན་པར་གྱུར་ན་ཀུན་དགའ་བོ་དེ་ཇི་སྙམ་དུ་སེམས། དེད་དཔོན་དེ་བདག་གི་ཁྱིམ་དུ་འོང་ངམ། འོན་ཏེ་བྱེས་དེ་ཉིད་ན་འདུག་གམ། གསོལ་པ། བཅོམ་ལྡན་འདས་སླར་ཁྱིམ་དུ་མཆིའི་མི་མཆི་བ་མ་མཆིས་སོ། །ཀུན་དགའ་བོ་དེ་བཞིན་དུ་དེ་བཞིན་གཤེགས་པ་འཇིག་རྟེན་གྱི་ཡབ། འཇིག་རྟེན་གྱི་མགོན་པོ། འཇིག་རྟེན་གྱི་ཡོངས་སུ་འདྲེན་པ། དེད་དཔོན་ཆེན་པོས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སངས་རྒྱས་ཀྱི་ཡེ་ཤེས་ཀྱིས་གང་བྱ་བ་དེ་དག་ཐམས་ཅད་བྱས་ཟིན་ཏེ་དེ་ལ་སངས་རྒྱས་ཀྱི་བྱ་བ་གང་ཕྱིས་བྱ་དགོས་པ་ཅུང་ཟད་ཀྱང་མེད་དོ། །ད་ལྟ་སངས་རྒྱས་ཀྱིས་གདུལ་བའི་སེམས་ཅན་གང་མ་དུལ་བའམ་མ་ཞི་བ་འགའ་ཡང་མེད་དོ། །ཀུན་དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་གནས་གསུམ་ཡོངས་སུ་མ་རྫོགས་ཡོངས་སུ་མ་བརྙེས་པར་ཡོངས་སུ་མྱ་ངན་ལས་མི་འདའི། གང་གི་ཚེ་གནས་དེ་གསུམ་མཛད་ཅིང་ཡོངས་སུ་རྫོགས་ལ་ཡོངས་སུ་བརྙེས་པར་གྱུར་པ་དེའི་ཚེ་ན་གདོད་དེ་བཞིན་གཤེགས་པ་ཡོངས་སུ་མྱ་ངན་ལས་འདའོ། །གསུམ་གང་ཞེ་ན། བྱང་ཆུབ་སེམས་དཔའ་གང་དེ་བཞིན་གཤེགས་པའི་བསྟན་པ་ནུབ་པའི་འོག་ཏུ་བསྐལ་པའམ། བསྐལ་པ་བརྒྱའམ། བསྐལ་པ་སྟོང་ངམ། བསྐལ་པ་བརྒྱ་སྟོང་ངམ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ན་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ཕྱིར་མི་ལྡོག་པའི་ཆོས་ལ་གནས་པར་མ་གྱུར་ལ། གལ་ཏེ་སངས་རྒྱས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཕྱིར་མི་ལྡོག་པ་ཉིད་དུ་དབང་པོ་ཡོངས་སུ་མ་སྨིན་པ་གཟིགས་ནས་དེའི་ཚེ་གང་ཟག་དེ་ཡོངས་སུ་སྨིན་པར་བྱ་བའི་ཕྱིར་བྱང་ཆུབ་སེམས་དཔའ་ཕྱིར་མི་ལྡོག་པའི་ཆོས་ཉིད་མ་ཐོབ་ཀྱི་བར་དུ་རྫུ་འཕྲུལ་
གྱི་སྐུ་བྱིན་གྱིས་རློབ་སྟེ། དེའི་ཚེ་ཕྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ནས་གདོད་དེ་བཞིན་གཤེགས་པ་རྣམས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའོ། །དེ་བས་ན་ངས་ད་ནི་བྱང་ཆུབ་སེམས་དཔའ་བྱམས་པ་ལ་སོགས་པ་བྱེ་བ་ཁྲག་ཁྲིག་བརྒྱ་སྟོང་མང་པོ་དག་ཕྱིར་མི་ལྡོག་པའི་ཆོས་ཉིད་ལ་ལུང་བསྟན་ཅིང་བཀོད་དེ་ངའི་བྱ་བ་འདི་དག་སེམས་ཅན་རྣམས་ལ་ཐུགས་བརྩེ་བའི་ཕྱིར་བྱས་ཟིན་ནོ། །ཀུན་དགའ་བོ་གཞན་ཡང་སངས་རྒྱས་ཀྱིས་མངོན་དུ་འདུལ་བ་ཐམས་ཅད་དུལ་བར་མ་གྱུར་གྱི་བར་དུ་དེ་བཞིན་གཤེགས་པ་ཡོངས་སུ་མྱ་ངན་ལས་མི་འདའོ། །གང་གི་ཚེ་སངས་རྒྱས་བཅོམ་ལྡན་འདས་བསྐལ་པ་སྟོང་ཕྲག་མང་པོ་ཞིག་ན་སངས་རྒྱས་བཅོམ་ལྡན་འདས་གཞན་རྣམས་འབྱུང་བ་དང་། འཇིག་རྟེན་གྱི་ཁམས་དེའམ། གཞན་དག་ཏུ་འགྲོ་བ་ལྔའི་ནང་ན་གང་ཡང་རུང་བའི་འགྲོ་བར་སྐྱེས་པའི་གང་ཟག་ཀྱང་སངས་རྒྱས་ཀྱིས་འདུལ་བར་མཁྱེན་ལ། གང་ཟག་དེ་ལོ་གཅིག་གམ་ལོ་བརྒྱའམ་ལོ་སྟོང་ངམ་ལོ་བྱེ་བ་ཁྲག་ཁྲིག་བརྒྱ་སྟོང་ངམ་བསྐལ་པ་ལས་ལྷག་པ་ན་གང་ཟག་དེ་ངས་འདུལ་བར་འགྱུར་གྱི་ཉན་ཐོས་ཀྱིས་མ་ཡིན། རང་སངས་རྒྱས་ཀྱིས་མ་ཡིན་པར་མཁྱེན་པར་འགྱུར་བ་དེའི་ཚེ་སངས་རྒྱས་ཀྱི་ཡེ་ཤེས་ཀྱིས་མཁྱེན་ནས་གང་ཟག་དེ་ལ་ཐུགས་བརྩེ་བའི་ཕྱིར། གང་ཟག་དེ་ཡོངས་སུ་སྨིན་པར་གྱུར་གྱི་བར་དུ་རྫུ་འཕྲུལ་གྱི་སྐུ་བྱིན་གྱིས་བརླབས་ནས་དེའི་འོག་ཏུ་གདོད་འདུལ་ཏེ། ཀུན་དགའ་བོ་འདི་ནི་གང་བྱས་ནས་ཕྱིས་སངས་རྒྱས་བཅོམ་ལྡན་འདས་རྣམས་ཡོངས་སུ་མྱ་ངན་ལས་འདའ་བར་འགྱུར་བ་དེ་བཞིན་གཤེགས་པ་རྣམས་ཀྱི་མཛད་པ་གཉིས་པའོ། །ཀུན་དགའ་བོ་གཞན་ཡང་དེ་བཞིན་གཤེགས་པའི་མདོ་སྡེའམ། འདུལ་བའམ། མ་མོ་སངས་རྒྱས་ཀྱི་བསྟན་པའི་གསུང་རབ་ལས་དགོས་པ་འགའ་ཞིག་མངོན་སུམ་དུ་ཞུ་བའམ་བྱ་བ་ཡོད་ལ། དེ་ཡང་ཉན་ཐོས་སློབ་པའམ་མི་སློབ་པ་དག་གིས་ཀྱང་ཤེས་པའམ། ཡང་དག་པར་བསྡུ་བའམ། བསྟན་པར་མི་ནུས་ལ། གལ་ཏེ་སངས་རྒྱས་རྣམས་ཀྱི་དགེ་སློང་གི་དགེ་འདུན་དེ་ལས་དགེ་སློང་གཅིག་ཙམ་ཡང་དེ་བཞིན་གཤེགས་པ་ལ་
གནོད་པར་འགྱུར་དུ་འོང་ངོ་ཞེས་དེ་བཞིན་གཤེགས་པ་ལ་གུས་པར་ཞུ་ནུས་པ་མེད་པར་གྱུར་པ་དེ་ན་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་སངས་རྒྱས་ཀྱི་ཡེ་ཤེས་ཀྱིས་དགེ་སློང་སྤྲུལ་པ་སྤྲུལ་པར་མཛད་དེ། སྤྲུལ་པ་དེ་དེ་བཞིན་གཤེགས་པ་ལ་བཅོམ་ལྡན་འདས་བགྱི་བ་འདི་ལྟ་བུ་ཞིག་འདི་ལྟར་བྱུང་ན་འདི་ཇི་ལྟར་བགྱི་ཞེས་ཡོངས་སུ་ཞུའོ། །དེ་བཞིན་གཤེགས་པས་སྤྲུལ་པ་དེ་ལ། དགེ་སློང་བྱ་བ་དེ་འདི་ལྟར་བྱོས་ཤིག །འདི་བྱས་ནས་འདི་ལྟར་བྱོས་ཤིག་ཅེས་དེ་སྐད་ཅེས་བཀའ་སྩལ་ཏོ། །གང་ཡོངས་སུ་མ་རྫོགས་པར་དེ་བཞིན་གཤེགས་པ་ཡོངས་སུ་མྱ་ངན་ལས་མི་འདའ་བའི་གནས་གསུམ་པོ་དེ་དག་དེ་བཞིན་གཤེགས་པས་ངེས་པར་མཛད་དགོས་པ་དེ་དག་ཐམས་ཅད་ངས་བྱས་ཤིང་ཡོངས་སུ་རྫོགས་ཏེ། འདི་ལ་ངས་ཉན་ཐོས་རྣམས་ལ་བསླབ་པའི་འདུལ་བ་དང་སོ་སོར་ཐར་པ་ནི་བཅས། ངས་ལམ་ནི་བསྟན། དེ་བྱེད་པ་ཡང་དག་པར་སྡུག་བསྔལ་ཟད་པར་འགྱུར་བ་ངེས་པར་འབྱིན་པའི་ལམ་ནི་བསྙད་ཟིན་ཏེ་ཕྱིས་བྱ་དགོས་པའི་ལྷག་མ་ཅི་ཡང་མེད་དོ། །ཀུན་དགའ་བོ་དེ་ལྟ་བས་ན་ཁྱེད་ཀྱིས་མ་བཅས་པ་ནི་མི་བཅའ། བཅས་པ་ནི་མི་གཞིག་སྟེ། ཀུན་དགའ་བོ་བསླབ་པ་ཇི་ལྟར་བཅས་པ་བཞིན་དུ་སློབས་ཤིག །ཀུན་དགའ་བོ་འདི་ནི་ཁྱེད་ཀྱིས་བྱ་བ་ཡིན་གྱིས་བག་ཡོད་པ་དང་། བག་ཡོད་པ་ལ་དགའ་བར་གྱིས་ཤིག །འདི་ནི་ངའི་རྗེས་སུ་བསྟན་པ་ཡིན་གྱིས་མྱ་ངན་མ་བྱེད། སྨྲེ་སྔགས་མ་འདོན་ཅིག །ཀུན་དགའ་བོ་དོ་མོད་ཀྱི་ཐུན་ཐ་མ་ལ་ང་ཡོངས་སུ་མྱ་ངན་ལས་འདའ་སྟེ། ཀུན་དགའ་བོ་རང་གི་ཡུལ་དང་། རང་གི་སྤྱོད་ཡུལ་དུ་འགྲོའོ། །སླར་འཇིག་རྟེན་འདིར་མི་འོང་ངོ་འཇིག་རྟེན་ཕ་རོལ་ཏུ་ཡང་མི་འགྲོའོ། །ཕྱིན་ཅད་ཁྱེད་ཀྱིས་ང་མི་མཐོང་ངས་ཀྱང་ཁྱེད་མི་མཐོང་ངོ་། །ཀུན་དགའ་བོ་ཕུང་པོའི་ལྷག་མ་མེད་པར་མྱ་ངན་ལས་འདའ་བའི་དབྱིངས་ཞི་བ། བསིལ་བ་རྡུལ་མེད་པ། རྡུལ་དང་བྲལ་བ། སྡུག་བསྔལ་ཐམས་ཅད་རྣམ་པར་ཞི་བ། ཡིད་དུ་འོང་བའི་མྱ་ངན་ལས་འདས་པ། གང་ན་སྐྱེ་བ་ཡང་མེད། རྒ་བ་ཡང་མེད། འཆི་བ་ཡང་མེད། མྱ་ངན་ཡང་མེད། སྨྲེ་སྔགས་
འདོན་པ་ཡང་མེད། སྡུག་བསྔལ་བ་དང་། ཡིད་མི་བདེ་བ་དང་འཁྲུག་པ་ཡང་མེད། གནོད་པ་ཡང་མེད། མི་མཛའ་བ་དང་ཕྲད་པ་ཡང་མེད། མཛའ་བ་དང་འབྲལ་བ་ཡང་མེད་ཅིང་གང་དུ་སངས་རྒྱས་དང་སངས་རྒྱས་ཀྱི་ཉན་ཐོས་ཀྱི་ཚོགས་གང་གཱའི་ཀླུང་གི་བྱེ་མ་སྙེད་བཞུད་ཟིན་པ་དང་བཞུད་པ་དང་བཞུད་པར་འགྱུར་བ་དེ་ལ་ང་དགའོ། །ཀུན་དགའ་བོ་སེམས་ཅན་རྣམས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་ལ་མི་དགའ་བ་དང་། དེ་དག་མྱ་ངན་ལས་འདས་པ་ཐོབ་པའི་ས་བོན་དུ་འགྱུར་བ་ཐར་པའི་རྗེས་སུ་འཐུན་པ་དང་ལྡན་པའི་སེམས་བསྐྱེད་པ་གཅིག་ཀྱང་མི་སྐྱེད་པ་ལ་ལྟོས། ཀུན་དགའ་བོ་བྱིས་པ་སོ་སོའི་སྐྱེ་བོ་ལ་སྟོབས་ག་ལ་ཡོད། ཀུན་དགའ་བོ་བྱིས་པ་སོ་སོའི་སྐྱེ་བོ་ཐམས་ཅད་ནི་སྟོབས་མེད་ཅིང་སྟོབས་ཆུང་བ་སྟེ། ཀུན་དགའ་བོ་བྱིས་པ་སོ་སོའི་སྐྱེ་བོ་འདི་དག་ཐམས་ཅད་ནི་རྩྭ་དང་ཕུབ་མ་དང་སོག་མ་དང་མཚུངས་པར་སྣང་ངོ་། །ཀུན་དགའ་བོ་བྱིས་པ་སོ་སོའི་སྐྱེ་བོ་དག་ནི་མྱ་ངན་ལས་འདས་པའི་ས་བོན་དུ་འགྱུར་བ་ཐར་པའི་རྗེས་སུ་འཐུན་པ་དང་ལྡན་པའི་སེམས་བསྐྱེད་པ་གཅིག་ཀྱང་མི་བསྐྱེད་པ་དག་སྟེ་དེ་དག་ལ་སྟོབས་ག་ལ་ཡོད། དབུགས་དབྱུང་བ་ལྟ་ག་ལ་ཡོད། ཀུན་དགའ་བོ་བྱིས་པ་སོ་སོའི་སྐྱེ་བོ་རྣམས་ལ་ཚུལ་ཁྲིམས་ཀྱི་སྟོབས་མེད། ཏིང་ངེ་འཛིན་གྱི་སྟོབས་མེད། ཤེས་རབ་ཀྱི་སྟོབས་མེད་དོ། །ཀུན་དགའ་བོ་ང་ནི་སངས་རྒྱས་ཀྱི་སྟོབས་དཔག་ཏུ་མེད་པ་དང་། གྲངས་མེད་པ་དང་། བསམ་གྱིས་མི་ཁྱབ་པ་དང་། གཞལ་དུ་མེད་པ་དང་། ཚད་མེད་པ་དང་ལྡན་ཞིང་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བའི་སྟོབས་རྣམས་དང་ལྡན་ལ། ངོ་ཚ་ཤེས་པའི་སྟོབས་དང་། ཁྲེལ་ཡོད་པའི་སྟོབས་དང་། ཡང་དག་པར་འགྲུབ་པའི་སྟོབས་དང་། ཡེ་ཤེས་ཀྱི་སྟོབས་དང་། སྤོང་བའི་སྟོབས་དང་། བསོད་ནམས་ཀྱི་སྟོབས་དང་། ཤེས་རབ་ཀྱི་སྟོབས་དང་། དབང་པོའི་སྟོབས་དང་། བྱིན་གྱི་རླབས་ཀྱི་སྟོབས་དང་། སྟོབས་བཅུ་དང་ལྡན་པ་སྟེ། ཀུན་དགའ་བོ་འོན་ཀྱང་ང་མྱ་ངན་ལས་འདས་པའི་དབྱིངས་དེ་ལ་དགའོ། །དེ་ལ་བྱིས་པ་མུན་ནག་གི་སྒོར་གྱུར་
པ། མི་ཤེས་པའི་ཆོས་དང་ལྡན་པ། འཁོར་བ་ན་རྒྱུ་བ། བཅིང་བས་བཅིངས་པ་ལ་དགའ་བ་དེ་དག་ནི་མྱ་ངན་ལས་འདས་པའི་ས་བོན་དུ་འགྱུར་བ་རྗེས་སུ་འཐུན་པའི་སེམས་གཅིག་ཀྱང་མི་སྐྱེད་དོ། །ཀུན་དགའ་བོ་ཕྱི་མའི་དུས་ཕྱི་མའི་ཚེ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་མདོ་སྡེ་འདི་ལྟ་བུ་བསྟོད་ཅིང་བཞག་སྟེ་བཤད་པ་དེ་དག་དེ་བཞིན་གཤེགས་པ་འདས་པའི་འོག་ཏུ་དེ་དག་དེ་བཞིན་གཤེགས་པས་གསུངས་པའི་མདོ་སྡེ་འདི་ལྟ་བུ་ཉན་ནོ། །ཐོས་ནས་གལ་ཏེ་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་འདི་མ་ཐོབ་ཀྱང་ངའི་ཆོས་རིན་པོ་ཆེའི་སྣོད་འདི་ལ་འཇུག་པར་འགྱུར་བ་དག་ཡོད་དེ། ཀུན་དགའ་བོ་དོན་འདི་ཉིད་རྒྱ་ཆེར་ཤེས་པར་བྱ་བའི་ཕྱིར་ཁྱོད་ལ་དཔེ་བསྟན་པར་བྱའོ། །ཀུན་དགའ་བོ་འདི་ལྟ་སྟེ་དཔེར་ན་འདྲོན་པ་མང་པོ་དག་འབྲོག་དགོན་པ་ཆེན་པོ་ལས་འདས་ཏེ། ཆོམ་རྐུན་གྱི་ལམ་འཇིགས་པ་དང་བཅས་པ་ལས་འདས་ནས་འཇིགས་པ་མེད་པའི་གྲོང་ཁྱེར་དུ་ཕྱིན་པ་དེའི་ནང་ནས་མི་གཅིག་ཅིག་འདྲོན་པ་མང་པོ་དེ་དང་བྲལ་ཞིང་འཁྱམས་པར་གྱུར་ལ་དེ་འདྲོན་པ་མང་པོ་དེའི་རྗེས་བཞིན་དུ་འགྲོ་ཞིང་འདྲོན་པ་མང་པོ་ལམ་གང་ནས་དོང་བའི་རྗེས་བཞིན་དུ་སྡུག་བསྔལ་བ་དང་། ཉོན་མོངས་པ་དང་། ཚེགས་ཆེན་པོས་སོང་ནས་འདྲོན་པ་མང་པོ་དང་ཕྲད་པར་གྱུར་པ་དེ་བཞིན་དུ་ཀུན་དགའ་བོ་གང་དེ་བཞིན་གཤེགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ད་ལྟར་མདོ་སྡེ་འདི་ལྟ་བུ་དག་བཤད་པ་དེ་ལ་མ་འོངས་པའི་དུས་ན་རིགས་ཀྱི་བུའམ་རིགས་ཀྱི་བུ་མོ་དག་མདོ་སྡེ་འདི་ལྟ་བུ་དག་ཐོས་ནས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་འདི་སྒྲས་གོ་བར་འགྱུར་བ་དག་ཡོད་པས་ངས་དམ་པའི་ཆོས་ཀྱི་གྲོང་ཁྱེར་འདི་བཞག་གོ །དེ་དག་ལྷགས་ནས་ངའི་དམ་པའི་ཆོས་ཀྱི་གྲོང་ཁྱེར་འདིར་གནས་པར་བྱེད་ཅིང་ངའི་དམ་པའི་ཆོས་ཀྱི་མཛོད་འདི་སྲུང་བར་བྱེད་ཡང་དག་པར་སྟོན་པར་ཡང་བྱེད་དོ། །ཀུན་དགའ་བོ་གང་ཟག་གཅིག་གི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་གཏད་ན་ཡང་ཁྱོད་ཀྱིས་ལེགས་པར་གཟུང་དགོས་ན་སེམས་ཅན་བརྒྱ་སྟོང་དཔག་ཏུ་མེད་པ་
རྣམས་ཀྱི་ཕྱིར་གཏད་པ་ལྟ་ཅི་སྨོས། ཀུན་དགའ་བོ་དེ་བས་ན་བསྐལ་པ་གྲངས་མེད་པ་བྱེ་བར་བསྒྲུབས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་དང་། དམ་པའི་ཆོས་དཀོན་མཆོག་གི་མཛོད་འདི་ཁྱོད་ལ་གཏད་ཀྱིས་ཅི་ནས་ཀྱང་འཁོར་བཞི་པོ་དད་པ་རྣམས་ལ་རྗེས་སུ་འཐུན་པར་བྱ་བ་དང་། འཇུག་པ་དང་། བཤད་པ་དང་། གདགས་པ་དང་། དགྲོལ་བ་དང་། རྣམ་པར་དབྱེ་བ་དང་། གསལ་བར་བྱོས་ཤིག །སྐྱེས་བུ་ཐ་མ་པར་མ་གྱུར་ཅིག །ཀུན་དགའ་བོ་གང་མདོ་སྡེ་འདི་ལྟ་བུ་དག་མ་ཐོས་པས་ཡོངས་སུ་ཉམས་པར་འགྱུར་བའི་སེམས་ཅན་དག་ཡོད་དོ། །ཀུན་དགའ་བོ་དེ་ལ་སྐྱེས་བུ་མཁས་པ་ཁ་ཅིག་དཔེས་སྨྲས་པའི་དོན་ཤེས་པར་འགྱུར་ཏེ་དེའི་ཕྱིར་ཁྱོད་ལ་དཔེ་བསྟན་པར་བྱའོ། །ཀུན་དགའ་བོ་འདི་ལྟ་སྟེ་དཔེར་ན་ཚོང་དཔོན་ནམ་ཁྱིམ་བདག་ཕྱུག་པ། ནོར་ཆེ་བ། ལོངས་སྤྱོད་ཆེ་བ། བདག་དབང་བ་མང་བ། རྫས་དང་ཡོ་བྱད་མང་བ། ནོར་དང་འབྲུ་མང་བ། བདག་དབང་བའི་སྐྱེ་བོ་མང་བ། མཛོད་དང་བང་བ་མང་བ་ཞིག་ཡོད་པ་དེའི་བུ་གཅིག་པ་ཞིག་བྱེས་སུ་སོང་བར་གྱུར་ལ་ཚོང་དཔོན་ནམ་ཁྱིམ་བདག་དེ་ཡང་ན་ཞིང་མི་བདེ་ལ་ཤིན་ཏུ་སྡུག་བསྔལ་བར་གྱུར་ཏེ་དེ་འཆི་བའི་དུས་ལ་བབ་པའི་ཚེ། ཁྱིམ་བདག་གཞན་ཞིག་ལ་ནོར་བུ་དང་། མུ་ཏིག་དང་། བཻ་དཱུརྱ་དང་། དུང་དང་། མན་ཤེལ་དང་། བྱི་རུ་དང་། གསེར་དང་། དངུལ་མང་པོ་དང་། རིན་པོ་ཆེ་མང་པོ་རྣམས་བཞག་སྟེ། དེས་རིན་པོ་ཆེ་དེ་དག་བཞག་ནས་ཚོང་དཔོན་ནམ་ཁྱིམ་བདག་དེ་ལ་འདི་སྐད་ཅེས་ཁྱེད་ཤེས་པར་གྱིས་ཤིག །ཁོ་བོའི་བུ་གཅིག་པ་དེ་ནི་བྱེས་སུ་སོང་། ཁོ་བོ་ནི་ད་ལྟ་ན་ཞིང་མི་བདེ་སྟེ། རིང་པོར་མི་ཐོགས་པར་ཁོ་བོ་འཆི་བའི་དུས་བྱེད་པར་འགྱུར་གྱིས། རིན་པོ་ཆེ་དང་བང་མཛོད་མང་པོ་འདི་དག་བུ་གཅིག་པ་དེའི་ཕྱིར་ཁྱོད་ཀྱི་ལག་ཏུ་གཞག་གོ །ནམ་བདག་གི་བུ་གཅིག་པ་དེ་བྱེས་དེ་ནས་འོངས་ཏེ། དེ་བག་ཡོད་ལ་བག་ཡོད་པའི་ཆོས་ལ་གནས་པར་གྱུར་པ་དེ་ན་རིན་པོ་ཆེ་འདི་རྣམས་བྱིན་ཅིག །བྱིན་ནས་ཀྱང་འདི་སྐད་དུ་གཞོན་ནུ་ཁྱོད་ཀྱི་ཕ་འཆི་ཀར་རིན་པོ་ཆེ་མང་པོ་འདི་དག་ཁྱོད་ཀྱི་ཕྱིར་ང་ལ་བཞག་སྟེ་ཁྱོད་ཀྱི་ཕའི་ནོར་གྱི་ཚོགས་འདི་བདག་གི་ལོངས་སྤྱོད་ཡིན་གྱིས་ཁྱེར་ལ་བག་ཡོད་པར་
བསྲུངས་ཏེ་ཅི་ནས་ཀྱང་ཆུད་མ་ཟོས་པར་གྱིས་ཞེས་བསྒོ་ཤིག་ཅེས་སྨྲས་ལ། དེ་ནས་ཚོང་དཔོན་ནམ་ཁྱིམ་བདག་དེས་ཚོང་དཔོན་ཅིག་ཤོས་ལས་རིན་པོ་ཆེའི་མཛོད་མང་པོ་བཞག་པ་བླངས་ནས་ཚོང་དཔོན་གྱི་བུ་བྱེས་ནས་འོངས་པ་ལ་རིན་པོ་ཆེའི་མཛོད་བཞག་པ་དེ་མ་བྱིན་ན་ཀུན་དགའ་བོ་དེ་ཇི་སྙམ་དུ་སེམས། དེ་ལ་སུས་ཉེས་པར་འགྱུར། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ཚོང་དཔོན་དེའི་རིན་པོ་ཆེ་མང་པོ་བཞག་པ་བླངས་ནས་ཚོང་དཔོན་གྱི་བུ་དེ་ལ་མ་སྩལ་བས་བཞག་པ་འཆང་བའི་ཁྱིམ་བདག་དེས་ནོངས་པར་འགྱུར་རོ། །བཀའ་སྩལ་པ། ཀུན་དགའ་བོ་དོན་དེ་ཤེས་པར་བྱ་བའི་ཕྱིར་ངས་དཔེ་བསྟན་པ་དེ་ལ་དོན་དུ་ལྟ་བ་གང་ཞེ་ན། ཀུན་དགའ་བོ་ཁྱིམ་བདག་ཅེས་བྱ་བ་དེ་ནི་དེ་བཞིན་གཤེགས་པའི་ཚིག་བླ་དགས་སོ། །ཀུན་དགའ་བོ་འཆི་བའི་དུས་ཀྱི་ཚེ་ཞེས་བྱ་བ་དེ་ནི་དེ་བཞིན་གཤེགས་པའི་ཡོངས་སུ་མྱ་ངན་ལས་འདས་པའི་དབྱིངས་ཀྱི་ཚིག་བླ་དགས་སོ། །ཀུན་དགའ་བོ་བུ་གཅིག་པ་ཞེས་བྱ་བ་དེ་ནི་མ་འོངས་པའི་རིགས་ཀྱི་བུའམ་རིགས་ཀྱི་བུ་མོ་དད་པ་དང་ལྡན་པ་རྣམས་ཀྱི་ཚིག་བླ་དགས་སོ། །ཀུན་དགའ་བོ་བྱེས་སུ་སོང་བ་ཞེས་བྱ་བ་དེ་ནི་འགྲོ་བ་ལྔའི་འཁོར་བར་སྐྱེ་བའི་ཚིག་བླ་དགས་སོ། །ཀུན་དགའ་བོ་རིན་པོ་ཆེའི་མཛོད་ཆེན་པོ་ཞེས་བྱ་བ་དེ་ནི་བསྐལ་པ་གྲངས་མེད་པ་བྱེ་བར་བསྒྲུབས་པ་ཆོས་དཀོན་མཆོག་འདིའི་ཚིག་བླ་དགས་སོ། །ཀུན་དགའ་བོ་བཞག་པ་འཆང་བ་ཞེས་བྱ་བ་དེ་ནི་ཁྱེད་ལྟ་བུ་དམ་པའི་ཆོས་ཀྱི་གྲོང་ཁྱེར་འདི་སྐྱོང་བ་ཉན་ཐོས་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཚིག་བླ་དགས་སོ། །ཀུན་དགའ་བོ་དེ་ལྟར་བསྐལ་པ་གྲངས་མེད་པ་བྱེ་བར་བསྒྲུབས་པའི་ཆོས་དཀོན་མཆོག་གི་མཛོད་ཆེན་པོ་འདི་མ་འོངས་པའི་རིགས་ཀྱི་བུའམ་རིགས་ཀྱི་བུ་མོ་རྣམས་ཀྱི་དོན་དུ་ཁྱོད་དང་། འོད་སྲུང་ཆེན་པོ་དང་། བྱང་ཆུབ་སེམས་དཔའ་བྱམས་པ་ལ་སོགས་པ་ལ་གཏད་ཀྱིས་མ་འོངས་པ་ན་ངའི་བུ་དད་པ་དང་ལྡན་ཞིང་མངོན་པར་དང་བ་རྣམས་ལ་ཅི་ནས་ཀྱང་རྗེས་སུ་འཐུན་པ་དང་རྗེས་སུ་བསྟན་པས་དམ་པའི་ཆོས་དཀོན་མཆོག་གི་མཛོད་འདི་
བྱིན་ཅིག །དེ་ཅིའི་ཕྱིར་ཞེ་ན། ཀུན་དགའ་བོ་ང་སྔོན་བྱང་ཆུབ་སེམས་དཔར་གྱུར་པ་ན་ཡོངས་སུ་སྨིན་པར་བྱས་པའི་སེམས་ཅན་དག་ཡོད་དེ་དེ་དག་ད་ལྟ་ཉེས་པར་བྱས་ཤིང་ཉེས་པར་སྤྱད་པས་སེམས་ཅན་དམྱལ་བའམ། དུད་འགྲོའི་སྐྱེ་གནས་སམ། གཤིན་རྗེའི་འཇིག་རྟེན་དུ་དོང་ངོ་། །དེ་དག་དེ་བཞིན་གཤེགས་པ་འདས་པའི་འོག་ཏུ་དེ་ནས་ཤི་འཕོས་ནས་མིར་སྐྱེ་བར་འགྱུར་རོ། །དེ་དག་དབང་པོ་རྒྱས་ཤིང་ཡོངས་སུ་སྨིན་པའི་རྒྱུས་ངའི་བསྟན་པ་འདི་ལ་ཚེགས་ཆུང་ངུས་དད་པར་འགྱུར་ཏེ། དེ་ལ་ཁ་ཅིག་ནི་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་འགྱུར་རོ། །ཁ་ཅིག་ནི་ཁྱིམ་ན་གནས་པར་འགྱུར་རོ། །དེ་དག་ངའི་མདོ་སྡེ་འདི་ལྟ་བུ་ཐོས་ནས་ཁྱད་པར་དུ་འགྲོ་བར་འགྱུར་ཏེ། དེ་དག་ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་པའམ། ཐེག་པ་ཆེན་པོས་ཡོངས་སུ་མྱ་ངན་ལས་འདའ་བར་འགྱུར་རོ། །ཀུན་དགའ་བོ་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་བསྒྲུབས་པ་དམ་པའི་ཆོས་དཀོན་མཆོག་གི་མཛོད་འདི་འདི་ལྟར་རིགས་ཀྱི་བུ་རྣམས་ཀྱིས་མཉན་པར་བྱ་བའི་ཕྱིར་དེ་དག་གི་དོན་དུ་ཁྱོད་ཀྱི་ལག་ཏུ་གཏད་པས་གཏད་དོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་སེམས་ཅན་དེ་དག་ནི་དགེ་བའི་ལམ་འདི་ལྟ་བུ་དག་མ་ཐོས་པ་ལས་ཡོངས་སུ་ཉམས་པར་འགྱུར་རོ། །ཀུན་དགའ་བོ་དེ་བས་ན་ཅི་ནས་ཀྱང་དེ་དག་འདི་ལྟ་བུ་ཐོས་པ་ལས་ཉམས་པར་མི་འགྱུར་བར་བྱ་བའི་ཕྱིར་མ་འོངས་པ་དེ་དག་ཁྱོད་ལ་གཏད་དོ། །ཀུན་དགའ་བོ་འདི་ལ་སྐྱེས་བུ་མཁས་པ་ཁ་ཅིག་ནི་དཔེས་སྨྲས་པའི་དོན་ཤེས་པར་འགྱུར་ཏེ། དེའི་ཕྱིར་དོན་འདི་རྒྱ་ཆེར་ཤེས་པར་བྱ་བའི་ཕྱིར་ཁྱོད་ལ་དཔེ་བསྟན་པར་བྱའོ། །ཀུན་དགའ་བོ་འདི་ལྟ་སྟེ་དཔེར་ན། འཁོར་ལོས་སྒྱུར་བའི་རྒྱལ་པོས་དཀོར་པ་དང་མངན་རྣམས་ལ་མཛོད་དང་བང་བ་ཐམས་ཅད་གཏད་དེ། ཀྱེ་མི་ཁྱེད་དགེ་སྦྱོང་དང་། བྲམ་ཟེ་དང་། བཀྲེན་པ་དང་། འདྲོན་པ་དང་། སྡུག་ཕོངས་པ་སློང་བ་ཟས་འདོད་པ་རྣམས་ལ་ཟས་དང་། སྐོམ་འདོད་པ་རྣམས་ལ་སྐོམ་དང་། བཞོན་པ་དང་གོས་དང་མེ་ཏོག་དང་སྤོས་དང་ཕྲེང་བ་དང་བྱུག་པ་དང་མལ་ཆ་དང་། གནས་དང་རྒྱབ་རྟེན་དང་། འཚོ་བའི་ཡོ་བྱད་གང་ཡང་རུང་བ་རྣམས་སྦྱིན་པ་བྱིན་ཅིག་ཅེས་དེས་དེ་སྐད་དུ་བསྒོ་
ཞིང་གཏམས་པ་ལས། དེ་ལ་དཀོར་པ་དང་མངན་རྣམས་ལ་མཛོད་དང་བང་བ་དེ་ཕྱེ་ཡང་སྦྱིན་པ་དེ་སྦྱིན་པར་མི་བྱེད་ན། ཀུན་དགའ་བོ་དེ་ཇི་སྙམ་དུ་སེམས་དེ་ལ་སུས་ཉེས་པར་འགྱུར། གསོལ་པ། བཙུན་པ་བཅོམ་ལྡན་འདས་དཀོར་པ་དང་མངན་དེ་དག་གིས་ནོངས་པར་འགྱུར་གྱི། འཁོར་ལོས་སྒྱུར་བའི་རྒྱལ་པོས་ནི་མ་ནོངས་སོ། །བཀའ་སྩལ་པ། ཀུན་དགའ་བོ་དེ་བཞིན་དུ་ཆོས་ཀྱི་རྒྱལ་པོ་ངས་ཆོས་ཀྱི་བང་མཛོད་ཆེན་པོ་འདི་རབ་ཏུ་བསགས་ནས་བསྐལ་པ་གྲངས་མེད་པ་བྱེ་བར་བསྒྲུབས་པའི་ཆོས་དཀོན་མཆོག་གི་མཛོད་འདི་མངོན་པར་རྫོགས་པར་སངས་རྒྱས་ནས་ཡངས་ཤིང་རྒྱ་ཆེ་བར་བྱས་ཏེ་ལྷ་དང་མི་རྣམས་ལ་རྣམ་པར་ཕྱེ་ཞིང་རབ་ཏུ་བསྟན་ནོ། །གང་ངས་བསྟན་པའི་ཆོས་དེ་ཁྱོད་ལ་ཡང་རྣམ་པར་ཕྱེ་སྟེ་སྦྱིན་གྱིས་བྱིས་པ་སོ་སོའི་སྐྱེ་བོ་དང་། དགེ་སྦྱོང་དང་བྲམ་ཟེ་དང་། ཁྱིམ་བདག་དད་པ་དོན་ཡོད་པ། ཆོས་འདོད་པ་རྣམས་ཉན་དུ་ཆུག་ཤིག །ཀུན་དགའ་བོ་གལ་ཏེ་ངའི་ཆོས་དཀོན་མཆོག་གི་མཛོད་འདི་རྣམ་པར་ཕྱེ་ཞིང་ཡང་དག་པར་རབ་ཏུ་བསྟན་ཏེ་ཁྱོད་ཀྱི་ལག་ཏུ་གཏད་པ་དེ་བྲམ་ཟེ་དང་ཁྱིམ་བདག་དད་པ་རྣམས་ལ་མ་བསྟན། བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་དོན་དུ་གཉེར་ཅིང་འདུན་པ་དང་དད་པ་དང་ལྡན་ཞིང་དང་བ་རྣམས་ལ་མི་སྟོན་ན། དེ་ལྟ་ན་ནི་ཀུན་དགའ་བོ་ཁྱོད་ཀྱིས་དེ་བཞིན་གཤེགས་པ་ལ་ཉེས་པ་བྱས་པར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་ང་ནི་རྒྱལ་པོ་སྟེ་བླ་ན་མེད་པའི་ཆོས་ཀྱི་རྒྱལ་པོ། ཆོས་ཀྱི་འཁོར་ལོས་སྒྱུར་བ། ཆོས་དཀོན་མཆོག་གི་མཛོད་རྒྱ་ཆེན་པོ་མང་པོ་དང་ལྡན་པ། ཡོན་ཏན་གྱི་བང་མཛོད་མང་པོ་དང་ལྡན་པ། བྱང་ཆུབ་ཀྱི་ཕྱོགས་མང་པོའི་བདག་པོ། བྱང་ཆུབ་ཀྱི་ཡན་ལག་རིན་པོ་ཆེ་སྣ་བདུན་དང་ལྡན་པ། སྟོབས་བཅུ་དང་མི་འཇིགས་པ་བཞིའི་དབང་ཐོབ་པ་ཆོས་ཐམས་ཅད་ལ་དབང་སྒྱུར་བའོ། །འདི་ལྟ་སྟེ། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གི་ཆོས་ཀྱི་བང་མཛོད་ཇི་སྲིད་འཛིན་གྱི་བར་དུ་བྲམ་ཟེ་དང་ཁྱིམ་བདག་དད་པ་རྣམས་དང་། བྱིས་པ་སོ་སོའི་སྐྱེ་བོ་དད་པས་དོན་དུ་གཉེར་བ་དང་། འདུན་པ་དང་། ཆོས་འདོད་པ་དང་། ཆོས་ཀྱི་སྣོད་དུ་གྱུར་པ་རྣམས་ལ་མ་རྟོག་པར་བྱིན་ཅིག །སྐྱེས་བུ་ཐ་མ་པར་མ་གྱུར་ཅིག །ཀུན་དགའ་
བོ་ཁྱོད་གལ་ཏེ་བསྐལ་པ་གྲངས་མེད་པ་བྱེ་བར་བསྒྲུབས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་དང་། བླ་ན་མེད་པའི་ཆོས་དཀོན་མཆོག་གི་མཛོད་འདི་འཁོར་བཞི་རྣམས་ལ་ཡང་དག་པར་རབ་ཏུ་སྟོན་ན། དེ་ལྟ་ན་ནི་ཀུན་དགའ་བོ་ཁྱོད་དེ་བཞིན་གཤེགས་པ་ལ་ཉེས་པ་བྱེད་པར་མི་འགྱུར་རོ། །ཅི་སྟེ་ཡང་དག་པར་རབ་ཏུ་མི་སྟོན་ན་ཉེས་པ་བྱེད་པར་འགྱུར་རོ། །ཀུན་དགའ་བོ་དགེ་སློང་དགྲ་བཅོམ་པ་ཟག་པ་ཟད་པ་གང་འདུས་མ་བྱས་ཀྱི་ཆོས་རྗེས་སུ་ཐོབ་ནས་གཞན་ལ་མི་འཆད། ཡང་དག་པར་རབ་ཏུ་མི་སྟོན་པ་དེས་སྟོན་པ་ལ་བསྙེན་བཀུར་བྱས་པར་མི་འགྱུར། དེས་ངའི་དམ་པའི་ཆོས་ཡོངས་སུ་གཟུང་བར་མི་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལ་སྐྱེས་བུ་མཁས་པ་ཁ་ཅིག་དཔེས་སྨྲས་པའི་དོན་ཤེས་པར་འགྱུར་བས་ཁྱོད་ལ་དཔེ་བསྟན་པར་བྱའོ། །ཀུན་དགའ་བོ་འདི་ལྟ་སྟེ་དཔེར་ན་ཚོང་དཔོན་ནམ་ཁྱིམ་བདག་ཕྱུག་པོ་ནོར་ཆེ་བ། ལོངས་སྤྱོད་ཆེ་བ། བང་མཛོད་མང་བ། ནོར་དང་འབྲུ་དང་རྫས་དང་ཡོ་བྱད་མང་བ། ནོར་བུ་དང་། མུ་ཏིག་དང་། བཻ་དཱུརྱ་དང་། དུང་དང་། མན་ཤེལ་དང་། བྱི་རུ་དང་། དངུལ་མང་པོ་ཡོད་པ་དེ་ལ་ཕྱིར་རྒོལ་བའམ། དགྲ་བོ་འགའ་ཞིག་བང་མཛོད་དེར་མེ་གཏོང་བ་དང་། གང་དེ་དང་མི་མཛའ་བ་ཕྱིར་རྒོལ་བ་དགྲ་བོར་གྱུར་པ། མི་ཕན་པར་འདོད་པ། མི་བདེ་བར་འདོད་པ། གྲུབ་པ་དང་། བདེ་བ་མི་འདོད་པ་གཞན་དེ་དག་ཀྱང་བང་མཛོད་ཚིག་པའི་མེ་དེ་མཐོང་ནས་མེ་མི་གསོད་ཅིང་གཡེལ་བར་གནས་པ་དང་། གང་དེའི་མཛའ་བོ་ཕན་པར་འདོད་པ། བདེ་བར་འདོད་པ། གྲུབ་པ་དང་བདེ་བར་འདོད་པ་དེ་དག་གིས་ཀྱང་མེའི་ཕུང་པོ་ཆེན་པོ་དེས་ནོར་དང་འབྲུ་མང་པོ་དེ་དག་ཚིག་པ་མཐོང་ནས་གཡེལ་བར་གནས་པ་དང་། ཚོང་དཔོན་ནམ་ཁྱིམ་བདག་དེའི་མཛའ་བཤེས་དང་། ཉེ་དུ་དང་སྣག་གི་གཉེན་མཚམས་དོན་འདོད་པ་གྲུབ་པ་དང་བདེ་བར་འདོད་པ་དེ་དག་མེ་དེ་མཐོང་ནས་མེ་དེ་མི་གསོད་དེ་གཡེལ་བར་གནས་ན་ཡང་དག་པར་ཞུགས་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བདེ་བར་གཤེགས་པ་མ་ལགས་སོ། །བཀའ་སྩལ་པ། ཀུན་དགའ་བོ་གང་དག་ཚོང་དཔོན་ནམ་ཁྱིམ་བདག་དོན་འདོད་
པ། ཕན་པ་འདོད་པ། བདེ་བར་འདོད་པ། གྲུབ་པ་དང་བདེ་བ་འདོད་པ་དེ་དག་ཀྱང་བང་མཛོད་ཚིག་པའི་མེ་དེ་མཐོང་ལ། བང་མཛོད་དེ་དག་གི་མེ་གསད་པ་ལ་གཡེལ་བར་གནས་ན་མེའི་ཕུང་པོ་དེས་རྒྱ་ཆེར་བང་མཛོད་ཐམས་ཅད་ཚིག་པར་འགྱུར་རམ། གསོལ་པ། བཅོམ་ལྡན་འདས་དེ་ལྟ་ལགས་སོ། །བདེ་བར་གཤེགས་པ་དེ་ལྟ་ལགས་སོ། །བཀའ་སྩལ་པ། ཀུན་དགའ་བོ་དེ་བཞིན་དུ་ངས་བསྐལ་པ་གྲངས་མེད་པ་བྱེ་བར་དགེ་བའི་རྩ་བས་བསྒྲུབས་པའི་ཆོས་དཀོན་མཆོག་གི་བང་མཛོད་བླ་ན་མེད་པ་འདི་འཇིག་ཅིང་མི་སྣང་བར་གྱུར་པ་ན་དགེ་སློང་གང་མ་དད་པ་ཚུལ་ཁྲིམས་འཆལ་པ། སྡིག་པའི་ཆོས་ཀུན་ཏུ་སྤྱོད་པ། འཕྱར་བ་སྔོན་དུ་འགྲོ་བ། རབ་ཏུ་དབེན་པ་ལ་བརྩོན་པ་བོར་བ། སྙོམ་ལས་ཅན་ལེ་ལོ་ཅན་ཐོས་པ་ཉུང་བ་དག་འབྱུང་སྟེ། ཉན་པ་ལ་འདུན་པར་ཡང་མི་འགྱུར་ན་ཆོས་དཀོན་མཆོག་འདི་ཡང་དག་པར་གཟུང་བའི་ཕྱིར་གཞན་དག་ཉན་དུ་འཇུག་པར་ལྟ་ག་ལ་འགྱུར་བ་དེ་ལྟ་བུ་དག་འབྱུང་ངོ་། །བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་རྣམས་ནི་ཆོས་དཀོན་མཆོག་གི་བང་མཛོད་འདི་ལྟ་བུ་མེས་ཚིག་པ་མཐོང་ན་མེ་དེ་གསད་པ་ལ་གཡེལ་བར་གནས་ན། ཀུན་དགའ་བོ་དེ་ཇི་སྙམ་དུ་སེམས་ཆོས་དཀོན་མཆོག་འདི་ལྟ་བུ་ལས་ཡོངས་སུ་ཉམས་པར་མི་འགྱུར་རམ། དགེ་སློང་གང་དགྲ་བཅོམ་པ་ཟག་པ་ཟད་པ་དེ་དག་ཀྱང་འདུས་མ་བྱས་མངོན་སུམ་དུ་བྱས་ནས་ཆོས་བཤད་པ་དང་རབ་ཏུ་བསྟན་པ་ཡལ་བར་འདོར་བར་གནས་པ་དག་འབྱུང་སྟེ། དེ་དག་གིས་ཀྱང་སྟོན་པ་ལ་བསྙེན་བཀུར་བྱས་པར་མི་འགྱུར་ལ། ངའི་དམ་པའི་ཆོས་ཀྱང་ཡོངས་སུ་གཟུང་བར་མི་འགྱུར་ཏེ། ཆོས་དཀོན་མཆོག་གི་མཛོད་བླ་ན་མེད་པ་དེ་ལྟར་མ་བཤད་པ་དང་ཀློག་ཏུ་མ་བཅུག་པས་ནུབ་པར་འགྱུར་རོ། །གསོལ་པ། བཅོམ་ལྡན་འདས་དེ་ལྟ་ལགས་སོ། །བདེ་བར་གཤེགས་པ་དེ་ལྟ་ལགས་སོ། །ཀུན་དགའ་བོ་ཅི་ནས་འདིར་སྐྱེས་བུ་མཁས་པ་ཁ་ཅིག་དཔེས་སྨྲས་པའི་དོན་ཤེས་པར་འགྱུར་ཞིང་དོན་འདི་རྒྱ་ཆེར་ཡོངས་སུ་རྫོགས་པར་བྱ་བའི་ཕྱིར་ཁྱོད་ལ་དཔེ་བསྟན་པར་བྱའོ། །ཀུན་དགའ་བོ་འདི་ལྟ་སྟེ་དཔེར་ན་མི་ལ་ལ་མཚན་མོ་མུན་པ་རབ་ཏུ་གནག་པ་ན་རྩྭའི་
སྒྲོན་མ་ཐོགས་ནས་བདག་གི་ཁྱིམ་དུ་སོང་ཞིང་དེ་ན་ཡང་སྐྱེ་བོ་ཕལ་པོ་ཆེ་མུན་གནག་དེ་ལས་ཐར་བར་འདོད་པ་རྣམས་ཚོགས་པར་གྱུར་ལ་མི་དེ་རྩྭའི་སྒྲོན་མ་དེས་མུན་པ་མུན་གནག་ལས་ཐར་ནས་བདག་གི་ཁྱིམ་དུ་ཞུགས་ཏེ་སྒྲོན་མ་དེ་བསད་ནས་སུ་ལ་ཡང་མི་སྟེར་ན། ཀུན་དགའ་བོ་དེ་ཇི་སྙམ་དུ་སེམས་། གང་སྒྲོན་མ་ཡོད་བཞིན་དུ་སྐྱེ་བོ་མང་པོ་མུན་ནག་དེ་ལས་ཐར་བར་འདོད་པ་དག་འཁོད་པ་གང་ལ་ཡང་རྩྭའི་སྒྲོན་མ་མི་སྟེར་ན། ཀུན་དགའ་བོ་སྐྱེས་བུ་དེ་དེ་ལྟར་བྱེད་ན་ལེགས་པར་བྱ་བ་བྱེད་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བདེ་བར་གཤེགས་པ་མ་ལགས་སོ། །བཀའ་སྩལ་པ། ཀུན་དགའ་བོ་དེ་བཞིན་དུ་དགེ་སློང་དགྲ་བཅོམ་པ་ཟག་པ་ཟད་པ་གང་འདུས་མ་བྱས་ཀྱི་ཆོས་མངོན་སུམ་དུ་བྱས་ནས་བསྐལ་པ་གྲངས་མེད་པ་བྱེ་བར་བསྒྲུབས་པ་ཆོས་དཀོན་མཆོག་གི་མཛོད་འདི་མི་འཆད་ཅིང་རབ་ཏུ་མི་སྟོན་གཞན་དག་ལ་རྒྱས་པར་མི་བྱེད་ན་ཀུན་དགའ་བོ་དེས་སྟོན་པ་ལ་བསྙེན་བཀུར་བྱས་པ་མ་ཡིན་ལ། ངའི་དམ་པའི་ཆོས་ཡོངས་སུ་བཟུང་བ་མ་ཡིན་ནོ། །ཀུན་དགའ་བོ་དེ་བས་ན་བསྐལ་པ་གྲངས་མེད་པ་བྱེ་བར་བསྒྲུབས་པ་ཆོས་དཀོན་མཆོག་གི་མཛོད་འདི་ཁྱོད་ལ་གཏད་ཀྱིས་ཅི་ནས་ཀྱང་རྒྱུན་མི་འཆད་པ་དང་། དགེ་བའི་ལམ་འདི་རྒྱུན་དུ་འབྱུང་བར་གཞན་དག་ལ་རྒྱ་ཆེར་རབ་ཏུ་སྟོན་ཅིག །སྐྱེས་བུ་ཐ་མ་པར་མ་གྱུར་ཅིག། །།བམ་པོ་དྲུག་པ་སྟེ་ཐ་མ། ཀུན་དགའ་བོ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་ལ་ལ་ཞིག་ཆོས་འདི་དག་ལ་བདག་ཀྱང་སྒྲུབ་ལ། གཞན་ལ་ཡང་འཆད་ཅིང་རབ་ཏུ་སྟོན་ན། ཀུན་དགའ་བོ་དེ་ལ་ངས་བསྐལ་པ་གྲངས་མེད་པ་བྱེ་བར་བསྒྲུབས་པའི་ཆོས་དཀོན་མཆོག་གི་མཛོད་འདི་ལས་ཆ་ཤས་སྦྱིན་ཞིང་སྐལ་བ་བཞག་གོ །ཀུན་དགའ་བོ་དེ་བས་ན་བསྐལ་པ་གྲངས་མེད་པ་བྱེ་བར་བསྒྲུབས་པའི་བྱང་ཆུབ་འདི་གང་མ་འོངས་པའི་སེམས་ཅན་དེ་རྣམས་ཀྱི་དོན་དུ་ཁྱོད་ལ་ལན་གཉིས་སུ་ཡང་གཏད་ཀྱིས། སེམས་ཅན་དེ་དག་ཆོས་དཀོན་མཆོག་གི་མཛོད་དེ་ལྟ་བུ་མ་ཐོས་པས་ཡོངས་སུ་ཉམས་པར་གྱུར་ཏ་རེ། ཀུན་དགའ་བོ་ཆོས་དཀོན་མཆོག་གི་མཛོད་འདི་ལྟ་བུ་མ་ཐོས་པ་ལས་སེམས་ཅན་མང་པོ་དག་
ཡོངས་སུ་ཉམས་པར་འགྱུར་རོ། །ཀུན་དགའ་བོ་ངས་དོན་འདིའི་དབང་ལ་བརྟེན་ནས་བསྐལ་པ་གྲངས་མེད་པ་བྱེ་བར་བསྒྲུབས་པའི་སངས་རྒྱས་ཀྱི་བྱང་ཆུབ་འདི་ཁྱོད་ལ་གཏད་ཀྱིས་སེམས་ཅན་དེ་དག་ཆོས་དཀོན་མཆོག་གི་མཛོད་འདི་ལྟ་བུ་ལས་ཡོངས་སུ་མ་ཉམས་པར་གྱིས་ཤིག །ཀུན་དགའ་བོ་འདི་ལ་སྐྱེས་བུ་མཁས་པ་ཁ་ཅིག་དཔེས་སྨྲས་པའི་དོན་ཤེས་པར་འགྱུར་ཏེ་དེའི་ཕྱིར་ཁྱོད་ལ་དཔེ་བསྟན་པར་བྱའོ། །ཀུན་དགའ་བོ་འདི་ལྟ་སྟེ་དཔེར་ན་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་བུ་གཅིག་པ་ཞིག་ཡོད་པ་བྱེས་སུ་སོང་སྟེ། དེ་བྱེས་སུ་སོང་བའི་འོག་ཏུ་རྒྱལ་པོ་རྒྱལ་རིགས་དེ་ན་བར་གྱུར་ལ་དེ་ན་བར་གྱུར་པ་དང་། རིན་པོ་ཆེའི་མཛོད་མང་པོ་རིན་པོ་ཆེ་ལ་མཁས་པ་གཏམས་པ་འཆང་བ་རྣམས་ཀྱི་ལག་ཏུ་གཏད་དེ། ཁྱིམ་བདག་རྣམས་ངའི་བུ་བྱེས་སུ་སོང་བ་ནམ་དེ་བྱེས་ནས་སླར་ལོག་པར་གྱུར་ལ་རྒྱལ་པོར་ཡང་བཅུག་པར་གྱུར་པ་དེ་ན་ཁྱེད་ཀྱིས་རིན་པོ་ཆེའི་མཛོད་མང་པོ་འདི་ཁྱོད་ཀྱི་ཕ་འཆི་བའི་དུས་བྱེད་པ་ན་བཞག་པ་ཡིན་ནོ་ཞེས་བྱོས་ལ། རིན་པོ་ཆེའི་མཛོད་མང་པོ་འདི་དེ་ལ་བྱིན་ཅིག་ཅེས་དེ་སྐད་ཀྱང་སྨྲས་ནས་དེ་ལྟར་རྒྱལ་པོ་དེས་ཤིན་ཏུ་ལེགས་པར་གཏམས་ཏེ་འཆི་བའི་དུས་བྱས་ལ་དེ་འཆི་བའི་དུས་བྱས་པའི་འོག་ཏུ་རྒྱལ་པོའི་བུ་དེ་བྱེས་ནས་སླར་ལོག་སྟེ་རྒྱལ་པོར་ཡང་བཅུག་ལ་གསེར་གྱིས་བསྒྱུར་བ་དང་། ཁྱིམ་བདག་དེ་དག་ལ་སོ་སོར་བཞག་པ་རྒྱལ་པོའི་བུ་རྒྱལ་སྲིད་ཀྱི་དབང་ཕྱུག་ཐོབ་པ་རྒྱལ་སྲིད་ལ་གནས་པ་དེ་ལ་རིན་པོ་ཆེའི་མཛོད་མ་བྱིན་ན། ཀུན་དགའ་བོ་དེ་ཇི་སྙམ་དུ་སེམས། གསེར་གྱིས་བསྒྱུར་བའམ། ཁྱིམ་བདག་དེ་དག་རྒྱལ་པོ་དེ་ལ་ཉེས་པར་བྱེད་པ་ཡིན་ནམ། གསོལ་པ། བཅོམ་ལྡན་འདས་དེ་ལྟ་ལགས་སོ། །བདེ་བར་གཤེགས་པ་དེ་ལྟ་ལགས་སོ། །བཀའ་སྩལ་པ། ཀུན་དགའ་བོ་དོན་ཤེས་པར་བྱ་བའི་ཕྱིར་ངས་ཁྱོད་ལ་དཔེ་བསྟན་པ་དེ་ལ་དོན་དུ་ལྟ་བ་གང་ཞེ་ན། ཀུན་དགའ་བོ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ཞེས་བྱ་བ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་རྒྱལ་པོ་ཆེན་པོའི་ཚིག་བླ་དགས་སོ། །ཀུན་དགའ་བོ་བུ་གཅིག་པ་ཞེས་བྱ་བ་དེ་ནི་མ་འོངས་པའི་རིགས་ཀྱི་
བུ་དང་། རིགས་ཀྱི་བུ་མོ་དད་པ་རྣམས་ཀྱི་ཚིག་བླ་དགས་སོ། །ཀུན་དགའ་བོ་བྱེས་སུ་སོང་ཞེས་བྱ་བ་དེ་ནི་འགྲོ་བ་ལྔ་རྣམས་ཀྱི་ཚིག་བླ་དགས་སོ། །ཀུན་དགའ་བོ་ནད་པ་ཞེས་བྱ་བ་དེ་ནི་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བའི་ཚིག་བླ་དགས་སོ། །ཀུན་དགའ་བོ་རིན་པོ་ཆེའི་མཛོད་མང་པོ་ཞེས་བྱ་བ་དེ་ནི་བྱང་ཆུབ་ཀྱི་ཕྱོགས་སུམ་ཅུ་རྩ་བདུན་གྱི་ཆོས་རྣམས་ཀྱི་ཚིག་བླ་དགས་སོ། །ཀུན་དགའ་བོ་ཁྱིམ་བདག་ཅེས་བྱ་བ་དེ་ནི་དགྲ་བཅོམ་པ་རྣམས་ཀྱི་ཚིག་བླ་དགས་སོ། །ཀུན་དགའ་བོ་དཔེར་ན་རྒྱལ་པོ་དེ་འཆི་བའི་དུས་བྱེད་པ་ན་ནོར་འཇོག་པ་དེ་བཞིན་དུ། ཀུན་དགའ་བོ་ངའི་ཆོས་དཀོན་མཆོག་གི་མཛོད་བསྐལ་པ་གྲངས་མེད་པ་བྱེ་བར་བསྒྲུབས་པ་མ་འོངས་པའི་རིགས་ཀྱི་བུ་དང་། རིགས་ཀྱི་བུ་མོ་དེ་དག་གི་དོན་དུ་ཁྱོད་ལ་གཏད་དོ། །དེ་ཅིའི་ཕྱིར་ཞེ་ན། ཀུན་དགའ་བོ་སེམས་ཅན་གང་དག་ངས་ཡོངས་སུ་སྨིན་པར་བྱས་པ་དེ་དག་མི་དགེ་བའི་ལས་ཀྱི་ལམ་འགའ་ཞིག་གིས་སེམས་ཅན་དམྱལ་བ་དང་། དུད་འགྲོ་དང་། གཤིན་རྗེའི་འཇིག་རྟེན་དུ་སྐྱེས་ཏེ། དེ་དག་ང་འདས་པའི་འོག་ཏུ་དེ་ནས་ཤི་འཕོས་ནས་མིར་འགྱུར་བ་ཐོབ་སྟེ། དབང་པོ་རྣམས་རྒྱས་པའི་རྒྱུ་དང་ཡོངས་སུ་སྨིན་པའི་རྒྱུས་ངའི་བསྟན་པ་འདི་ལ་དད་པར་འགྱུར་བ་དག་ཡོད་དེ། དེ་ལ་ཁ་ཅིག་ནི་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་འགྱུར་རོ། །ཁ་ཅིག་ནི་ཁྱིམ་ན་གནས་པར་འགྱུར་རོ། །དེ་ལ་ཁ་ཅིག་ནི་རྒྱུན་དུ་ཞུགས་པའི་འབྲས་བུ་ཐོབ་པར་འགྱུར་རོ། །ཁ་ཅིག་ནི་ལན་ཅིག་ཕྱིར་འོང་བའི་འབྲས་བུ་དང་། ཁ་ཅིག་ནི་ཕྱིར་མི་འོང་བའི་འབྲས་བུ་དང་། ཁ་ཅིག་ནི་དགྲ་བཅོམ་པ་མངོན་སུམ་དུ་བྱེད་པར་འགྱུར་རོ། །ཁ་ཅིག་ནི་སློབ་པའི་ས་ནས་འཆི་བའི་དུས་བྱེད་པར་འགྱུར་རོ། །ཁ་ཅིག་ནི་སངས་རྒྱས་ཀྱི་སར་ལྷག་པའི་བསམ་པས་སེམས་སྐྱེད་པར་འགྱུར་རོ། །ཁ་ཅིག་ནི་ལྷ་དང་མིར་སྐྱེ་བར་བྱ་བའི་ཕྱིར་དགེ་བའི་རྩ་བ་སྐྱེད་པར་འགྱུར་ཏེ། དེ་ལྟར་རྙེད་པ་དེ་དང་དེ་དག་དང་ལྡན་པར་འགྱུར་རོ། །ཁ་ཅིག་ནི་སེམས་དང་བ་གཅིག་ཐོབ་པར་འགྱུར་ཏེ་འཇིག་རྟེན་གྱི་ཡབ་དེས་བདག་ཅག་ལ་ལེགས་པར་གཏད་དོ་སྙམ་ནས་དེ་དག་རྒྱ་ཆེར་རབ་ཏུ་དད་པར་འགྱུར་ཞིང་དང་བ་སྐྱེད་པར་བྱེད་དོ། །ཀུན་དགའ་བོ་འདི་ལྟར་
དེ་དག་གིས་ཆོས་དཀོན་མཆོག་འདི་མཉན་པར་བྱ་བའི་ཕྱིར་ངས་ཆོས་དཀོན་མཆོག་གི་མཛོད་འདི་ཁྱོད་ལ་གཏད་དོ། །ཀུན་དགའ་བོ་ཁྱོད་ཀྱིས་གལ་ཏེ་ངའི་ཆོས་དཀོན་མཆོག་གི་མཛོད་འདི་རིགས་ཀྱི་བུ་དང་། རིགས་ཀྱི་བུ་མོ་དད་པ་དེ་དག་ཉན་དུ་མ་བཙུད་ན། དེ་ལྟ་ན་ནི་ཀུན་དགའ་བོ་ཁྱོད་དེ་བཞིན་གཤེགས་པ་ལ་ཉེས་པ་བྱེད་པ་ཡིན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་རིགས་ཀྱི་བུ་དང་རིགས་ཀྱི་བུ་མོ་དེ་དག་ཆོས་དཀོན་མཆོག་འདི་ལྟ་བུ་ཐོས་ནས་ཁ་ཅིག་གིས་ནི་ཁྱད་པར་ཐོབ་པར་འགྱུར། ཁ་ཅིག་གིས་ནི་རབ་ཏུ་དགའ་ཞིང་མགུ་བར་འགྱུར། ཁ་ཅིག་ནི་ཆོས་ཀྱི་ཤུགས་ཀྱིས་མཆི་མ་འབྱུང་ཞིང་སྤུ་ཟིང་ཞེས་བྱེད་པར་འགྱུར་རོ། །ཀུན་དགའ་བོ་གང་དག་ཆོས་ཀྱི་རྣམ་གྲངས་འདི་ལྟ་བུ་ཐོས་ནས་ངའི་ཡོན་ཏན་རྗེས་སུ་དྲན་ཞིང་ཆོས་ཀྱི་ཤུགས་ཀྱིས་མཆི་མ་འབྱུང་ལ་སྤུ་ཟིང་ཞེས་བྱེད་པར་འགྱུར་ན། ཀུན་དགའ་བོ་དགེ་བའི་རྩ་བ་དེ་དག་ཐམས་ཅད་ཀྱི་འབྲས་བུ་ནི་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདའ་བར་ང་སྨྲའོ། །ཀུན་དགའ་བོ་དགེ་སློང་གང་དག་ཆོས་ཀྱི་རྣམ་གྲངས་འདི་ལྟ་བུ་འཛིན་ལ་རིགས་ཀྱི་བུ་དང་རིགས་ཀྱི་བུ་མོ་དད་པ་ཆོས་འདོད་པ་རྣམས་འོངས་ཤིང་ལྷགས་པ་དག་ལ་ཆོས་མི་འཆད་ཅིང་རབ་ཏུ་མི་སྟོན་ན་དེ་དག་དེ་བཞིན་གཤེགས་པ་ལ་ཉེས་པ་བྱེད་པ་ཡིན་ནོ། །ཀུན་དགའ་བོ་གང་དག་རིགས་ཀྱི་བུ་དང་རིགས་ཀྱི་བུ་མོ་ཆོས་དོན་དུ་གཉེར་ཅིང་ཉན་པར་འདོད་དེ་ཉན་པ་རྣམས་ཆོས་ཉན་པ་ལས་ཉམས་པར་བྱེད་ན། དེ་དག་དེ་ལྟར་སྣོད་དུ་གྱུར་པ་རྣམས་ལ་མི་འཆད་པས་བདག་གི་རྒྱུད་ལ་དགེ་བའི་རྩ་བ་ཉམས་པ་དང་། གཞན་གྱི་རྒྱུད་ལ་དགེ་བའི་རྩ་བ་ཡོངས་སུ་ཉམས་པར་བྱེད་པ་ལ་ཞུགས་པ་ཡིན་ནོ། །དེ་ཅིའི་ཕྱིར་ཞེ་ན། དེ་དག་ནི་གང་ལ་ཆོས་བཤད་པར་བྱ་བ་དང་། གང་ལ་མི་བཤད་པ་མི་ཤེས་སོ། །ཀུན་དགའ་བོ་དེ་བས་ན་དོན་དེ་རྒྱ་ཆེར་ཤེས་པར་བྱ་བའི་ཕྱིར་ཁྱོད་ལ་དཔེ་བསྟན་པར་བྱའོ། །ཀུན་དགའ་བོ་འདི་ལྟ་སྟེ་དཔེར་ན། ཚོང་པ་བྱིས་པའི་རང་བཞིན་ཅན་ལ་ལ་ཞིག་རིན་པོ་ཆེ་མང་པོ་ཁྱེར་ཏེ་འོང་བ་དེ་བྱེས་ནས་འོངས་ཏེ་འབྲོག་དགོན་པ་ཆེན་པོ་ཆོམ་རྐུན་ཡོད་པ་དེར་ཟོང་དེ་དག་བཀྲམ་སྟེ་རྐུན་པོའི་ཚོགས་རྣམས་བོས་ནས། ཀྱེ་མི་དག་ཟོང་འདི་དག་ཇི་ཙམ་དུ་བཟང་ཇི་ཙམ་དུ་མཛེས་པ་
ལྟོས་ཏེ། མི་ཁྱོད་ངའི་ཟོང་འདི་དག་ཉོས་ཤིག་ཅེས་ཟེར་ལ། ཀུན་དགའ་བོ་འབྲོག་དགོན་པ་དེར་ཆོམ་རྐུན་དེ་དག་གིས་ཚོང་པ་བྱིས་པའི་རང་བཞིན་ཅན་དེ་དབྱུག་པས་སྣད་པར་བརྡེགས་ནས་རིན་པོ་ཆེ་ཐམས་ཅད་ཕྲོགས་ན་ཀུན་དགའ་བོ་དེ་ཇི་སྙམ་དུ་སེམས། འབྲོག་དགོན་པ་དེར་ཟོང་བཀྲམ་ནས་ཆོམ་རྐུན་འབོད་པའི་ཚོང་པ་དེ་ཆོས་དང་རྗེས་སུ་འཐུན་པ་ཡིན་ནམ། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཚོང་པ་དེ་ཆོམ་རྐུན་མཆིས་པའི་འབྲོག་དགོན་པར་ཟོང་འགྲེམས་པ་ཡང་ཆོས་དང་འཐུན་པ་མ་ལགས་ན་ཟོང་རྣམས་བཀྲམ་ནས་ཆོམ་རྐུན་འབོད་པ་ལྟ་སྨོས་ཀྱང་ཅི་འཚལ།བཅོམ་ལྡན་འདས་འདི་ལྟར་བགྱིད་ན་ནི་ཆོས་དང་རྗེས་སུ་འཐུན་པ་ལགས་ཏེ། གལ་ཏེ་ཚོང་པ་དེ་ཟོང་དེ་དག་ལེགས་པར་སྦས་ནས་མདའ་གཞུ་ཐོགས་ཤིང་གོ་ཆ་བཟང་པོ་བགོས་ཏེ། འབྲོག་དགོན་པ་དེ་ནས་ལེགས་པར་འབྱུང་ན་དེ་ཆོས་དང་རྗེས་སུ་འཐུན་པ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཅི་སྟེ་ཚོང་པ་བྱིས་པའི་རང་བཞིན་ཅན་དེ་ནོར་གྱི་ཕུང་པོ་མང་པོ་དང་རིན་པོ་ཆེ་མང་པོ་ཁྱེར་ཏེ་བྱེས་ནས་སླར་ལོག་སྟེ། གྲོང་དང་། གྲོང་ཁྱེར་དང་། གྲོང་འདབ་དང་། ཡུལ་འཁོར་དང་། ཕོ་བྲང་འཁོར་དུ་འོངས་ཏེ། ཟོང་དེ་བཀྲམ་ལ་དེར་ཟོང་བཀྲམ་པའི་རིན་པོ་ཆེ་རིན་ཐང་ཆེན་པོ་དེ་དག་ཉོ་བའི་སྐྱེས་བུ་མཁས་པ་ཤེས་རབ་དང་ལྡན་པ་ཟོང་འདོད་པ་རྣམས་ལྷགས་པ་དང་། དེ་ནས་ཚོང་པ་དེ་ཟོང་འདོད་པའི་སྐྱེས་བུ་ལྷགས་པ་དེ་དག་ལ་མདའ་གཞུ་ཐོགས་ཏེ་ཐབ་མོ་རྒོལ་ན། ཀུན་དགའ་བོ་དེ་ཇི་སྙམ་དུ་སེམས། སྐྱེས་བུ་དེ་དེ་ལྟར་བྱེད་ན་ཆོས་དང་རྗེས་སུ་འཐུན་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བདེ་བར་གཤེགས་པ་མ་ལགས་སོ། །བཅོམ་ལྡན་འདས་ཚོང་པ་དེས་འདི་ལྟར་བགྱི་ཞིང་ཟོང་འཚལ་བའི་སྐྱེས་བུ་དེ་དག་ལ་སྐྱེས་བུ་ཁྱེད་ཚུར་ཤོག་ཟོང་གི་བྱེ་བྲག་བཟང་པོ་མང་པོ་འདི་དག་ལ་ཇི་ཙམ་དུ་བཟང་བ་དང་ཇི་ཙམ་དུ་མཛེས་པ་ལྟོས་ལ་ཉོས་ཤིག་དང་། རིན་ཆུང་ངུར་སྦྱིན་ནོ་ཞེས་དེ་སྐད་སྨྲ་ཞིང་བཅོམ་ལྡན་འདས་ཚོང་པ་དེས་དེ་ལྟར་བགྱི་བའི་
རིགས་ཏེ། དེ་ལྟར་བགྱིས་ན་དེ་ཆོས་དང་རྗེས་སུ་འཐུན་གྱི། ཚོང་དུས་སུ་ཟོང་བཀྲམ་ནས་གོ་བགོས་ཏེ་མཆིས་པ་ནི་མི་རིགས་སོ། །བཀའ་སྩལ་པ། ཀུན་དགའ་བོ་དེ་བཞིན་དུ་འདི་ལ་དགེ་སློང་ཁ་ཅིག་ཆོས་དཀོན་མཆོག་གི་མཛོད་མང་པོ་འདི་ལྟ་སྟེ། མདོའི་སྡེ་དང་། དབྱངས་ཀྱིས་བསྙད་པའི་སྡེ་དང་། ལུང་དུ་བསྟན་པའི་སྡེ་དང་། ཚིགས་སུ་བཅད་པའི་སྡེ་དང་། ཆེད་དུ་བརྗོད་པའི་སྡེ་དང་། གླེང་གཞིའི་སྡེ་དང་། རྟོགས་པ་བརྗོད་པའི་སྡེ་དང་།དེ་ལྟ་བུ་བྱུང་བའི་སྡེ་དང་། སྐྱེས་པ་རབས་ཀྱི་སྡེ་དང་། ཤིན་ཏུ་རྒྱས་པའི་སྡེ་དང་། རྨད་དུ་བྱུང་བའི་ཆོས་ཀྱི་སྡེ་དང་། གཏན་ལ་བབ་པར་བསྟན་པའི་སྡེ་རྣམས་ཀུན་ཆུབ་པར་བྱས་ནས་གང་ན་ཆོས་དཀོན་མཆོག་གི་མཛོད་འདིའི་སྣོད་དུ་གྱུར་ཅིང་ལེན་པར་བྱེད་པ་གང་དག་གིས་ཐོས་ནས་ཁྱད་པར་ཐོབ་པར་འགྱུར་ཞིང་དགའ་བ་དང་། མཆོག་ཏུ་དགའ་བ་ཆེན་པོ་རྙེད་པར་འགྱུར་བ་དང་། དེའི་དགེ་བའི་རྩ་བས་མྱ་ངན་ལས་འདའ་བར་འགྱུར་བ་ཡོད་པ་དེར་དེ་དག་མི་འཆད་ཀྱི་དེ་དག་གང་ན་ཆོས་དཀོན་མཆོག་འདིའི་སྣོད་དུ་མ་གྱུར་ཅིང་ཐོས་ནས་དང་བར་མི་འགྱུར། དད་པར་མི་འགྱུར། མོས་པར་མི་འགྱུར་གྱི་སྤོང་བར་འགྱུར་བ་དང་། དེའི་མི་དགེ་བའི་རྩ་བ་ངན་སོང་གསུམ་དུ་འགྱུར་བ་ཡོད་པ་དེར་འཆད་དེ། ཀུན་དགའ་བོ་འདི་ལྟ་སྟེ་དཔེར་ན། ཚོང་པ་བྱིས་པའི་རང་བཞིན་ཅན་དེ་གང་དུ་ཟོང་དེ་བཀྲམ་པའི་རིགས་པ་དེར་མི་འགྲེམས་པར་གང་དུ་དགྲམ་པར་མི་བྱ་བ་དེར་འགྲེམས་ཏེ། གང་དག་ལ་སྦྱིན་པའི་རིགས་པ་དེ་དག་ལ་ནི་མི་སྟེར། གང་དག་ལ་སྦྱིན་པའི་མི་རིགས་པ་དེ་དག་ལ་སྟེར་བ་དེ་བཞིན་དུ་ཀུན་དགའ་བོ་གང་དག་རིགས་ཀྱི་བུ་དང་རིགས་ཀྱི་བུ་མོ་མངོན་པར་དད་པ། ཆོས་དང་ལྡན་པ། ཆོས་འདོད་པ། ཉན་འདོད་པ། སྒྲུབ་འདོད་པ། སྣོད་དུ་གྱུར་པ་ལྷགས་པ་རྣམས་ལ་ཆོས་མི་འཆད་པར་དེ་གང་ལ་བཤད་པའི་མི་རིགས་པ་དེ་དག་ལ་འཆད་ཅིང་། གང་ལ་བཤད་པའི་རིགས་པ་དེ་དག་ལ་མི་འཆད་པ་དག་ཀྱང་ངས་དེ་ལྟ་བུ་ཡིན་པར་མཐོང་ངོ་། །ཀུན་དགའ་བོ་དེ་ལྟ་བས་ན་གང་དག་སྣོད་དུ་གྱུར་པ་དང་བ་ཉན་འདོད་པ་མྱ་ངན་ལས་འདའ་བ་དོན་དུ་གཉེར་བ་དེ་དག་ལ་ཆོས་བཤད་པར་བྱའོ། །གང་དག་སྣོད་དུ་མ་གྱུར་པ། མ་དད་པ། གླགས་ཚོལ་བ། ཚུལ་ཁྲིམས་འཆལ་
པ། སྡིག་པའི་ཆོས་ཅན། འཕྱས་ཚོལ་བའི་བསམ་པ་ཅན། ཆོས་སྤོང་བ་དམ་པའི་ཆོས་དང་འགལ་བར་གནས་པ་གཏམ་དུ་བྱེད་ཀྱི་རྗེས་སུ་འཐུན་པའི་ཆོས་མི་འཆད་པ་དེ་དག་ལ་མི་བཤད་དོ་ཞེས་དེ་ལྟར་བསླབ་པར་བྱའོ། །དེ་ཅིའི་ཕྱིར་ཞེ་ན། མི་བླུན་པོ་དེ་དག་གིས་ཐོས་ནས་རྒྱ་ཆེར་མ་རུང་བར་གྱུར་ཏ་རེ་ཞེས་ཀུན་དགའ་བོ་ཁྱོད་དེ་ལྟར་བསླབ་པར་བྱའོ། །ཀུན་དགའ་བོ་ཁྱོད་སྐྱོ་བར་མ་བྱེད་ཅིག །ཀུན་དགའ་བོ་དགེ་སློང་དོན་དུ་གཉེར་བ་རྣམས་ལ་ཆོས་གུས་པར་འཆད་ཅིང་། དེ་ཡང་གུས་པར་ཉན་ན་ཀུན་དགའ་བོ་དེ་གཉི་ག་ཡང་བསོད་ནམས་རྒྱ་ཆེར་སྐྱེད་ཅིང་། བསོད་ནམས་ཚད་མེད་གྲངས་མེད་པར་སྐྱེད་དོ། །ཀུན་དགའ་བོ་དེ་ཇི་སྙམ་དུ་སེམས། སའི་ཁམས་དང་སེམས་ཅན་གྱི་ཁམས་གང་མང་། གསོལ་པ། བཅོམ་ལྡན་འདས་ཇི་ལྟར་བཅོམ་ལྡན་འདས་ཀྱིས་བཤད་པའི་དོན་བདག་གིས་འཚལ་བ་ལྟར་ན་བཅོམ་ལྡན་འདས་སེམས་ཅན་གྱི་ཁམས་ཆེས་མང་ངོ་། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ཇི་སྐད་སྨྲ་བ་དེ་བཞིན་ཏེ། ཀུན་དགའ་བོ་སེམས་ཅན་གྱི་ཁམས་ཆེས་མང་གི་སའི་ཁམས་ནི་མ་ཡིན་ནོ། །ཀུན་དགའ་བོ་སེམས་ཅན་གྱི་ཁམས་ཆེས་མང་གི་ཆུའི་ཁམས་ནི་མ་ཡིན་ནོ། །མེའི་ཁམས་ནི་མ་ཡིན་ནོ། །ཀུན་དགའ་བོ་ཡོངས་སུ་བརྟགས་པ་བཟུང་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་དུ་མངོན་པས་མངོན་པ་ཀུན་ཏུ་སྣང་བར་གྱུར་པའམ། ཀུན་ཏུ་སྣང་བར་མ་གྱུར་པ་གང་དག་ཡོད་པ་དེ་དག་ཐམས་ཅད་སྐད་ཅིག་གཅིག་དང་། ཐང་ཅིག་གཅིག་དང་། ཡུད་ཙམ་གཅིག་ལ་མིའི་ལུས་ཐོབ་པར་གྱུར་ཏེ། དེ་དག་མིའི་ལུས་ཐོབ་ནས་སྐད་ཅིག་གཅིག་དང་། ཐང་ཅིག་གཅིག་དང་། ཡུད་ཙམ་གཅིག་ལ་རང་བྱང་ཆུབ་ཐོབ་པར་གྱུར་པ་དང་། ཀུན་དགའ་བོ་ཡོངས་སུ་བརྟག་པ་བཟུང་སྟེ། འཇིག་རྟེན་གྱི་ཁམས་མཐའ་ཡས་དཔག་ཏུ་མེད་པ་དག་ན་སའི་ཁམས་ཇི་སྙེད་ཡོད་པ་སའི་ཕུང་པོ་གང་གི་མཐའ་མི་མངོན་པའི་སའི་ཕུང་པོ་དེ་ལ་རྡུལ་ཕྲ་རབ་ཀྱི་རྡུལ་ཇི་སྙེད་ཡོད་པའི་སའི་རྡུལ་དེ་ཐམས་ཅད་སྙེད་ཀྱི་མིར་གྱུར་ལ། ཀུན་དགའ་བོ་མིར་གྱུར་པ་དེ་དག་ཀྱང་སྐད་ཅིག་ཐང་ཅིག་ཡུད་ཙམ་གཅིག་ལ་སྔ་ཕྱི་མེད་པར་རང་བྱང་
ཆུབ་ཐོབ་པར་གྱུར་པ་དང་། ཀུན་དགའ་བོ་ཡོངས་སུ་བརྟག་པ་བཟུང་སྟེ། འཇིག་རྟེན་གྱི་ཁམས་མཐའ་ཡས་དཔག་ཏུ་མེད་པ་ན་གང་རིའི་རྒྱལ་པོ་རི་རབ་རྣམས་དང་། རིའི་རྒྱལ་པོ་ཁོར་ཡུག་དང་། ཁོར་ཡུག་ཆེན་པོ་རྣམས་དང་། གངས་རི་དང་། སྤོས་ཀྱི་ངད་ལྡང་དང་། དེ་ལས་གཞན་པ་རི་ནག་པོ་རྣམས་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་རྩྭ་དང་། ཤིང་དང་ལོ་མ་དང་ཤིང་ལྗོན་པ་དང་ནགས་དང་ཤིང་གེལ་པ་དང་སྨན་དང་ནགས་ཚལ་ཇི་སྙེད་ཡོད་པ་དེ་དག་ལ་རྡུལ་ཕྲ་རབ་ཀྱི་རྡུལ་ཇི་སྙེད་ཡོད་པ། ཡོད་པའི་དངོས་པོའམ། བརྟག་པར་བལྟ་བར་བྱ་བར་སྣང་བ་དེ་དག་ཐམས་ཅད་ཀྱང་མིར་གྱུར་ལ། ཀུན་དགའ་བོ་མིར་གྱུར་པ་དེ་དག་ཀྱང་སྐད་ཅིག་དང་ཐང་ཅིག་དང་ཡུད་ཙམ་གཅིག་ལ་སྔ་ཕྱི་མེད་པར་རང་བྱང་ཆུབ་ཐོབ་པར་གྱུར་ཏེ། ཀུན་དགའ་བོ་རང་སངས་རྒྱས་དེ་དག་ཀྱང་ཇི་སྲིད་དུ་འཁོར་བའི་སྔོན་གྱི་མཐའ་མི་མངོན་པ་དེ་སྲིད་དུ་ཡུན་རིང་དུ་གནས་པར་གྱུར་པ་དེ་དག་ལ་སེམས་ཅན་གྱི་ཁམས་དེར་མ་གཏོགས་པའི་ཁྱིམ་བདག་གཅིག་ཅིག་བྱུང་བ་དེ་ཡང་ཇི་སྲིད་འཁོར་བའི་སྔོན་གྱི་མཐའ་མི་མངོན་པ་དེ་སྲིད་དུ་གནས་པར་གྱུར་ཏེ། དེ་ནས་ཁྱིམ་བདག་དེ་ཚེའི་ཚད་དེ་ལྟ་བུས་རང་སངས་རྒྱས་རྣམས་ལ་ན་བཟའ་དང་། བཤོས་དང་། གཟིམས་ཆ་དང་། ན་བའི་གསོས་སྨན་དང་། བདེ་བར་སྦྱར་བ་ཐམས་ཅད་ཀྱིས་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་པ་དང་། ཡོངས་སུ་མྱ་ངན་ལས་འདས་པ་རྣམས་ཀྱི་མཆོད་རྟེན་ཡང་རིན་པོ་ཆེ་སྣ་བདུན་ལས་བྱས་ནས་ལྷ་དང་མིའི་གདུགས་དང་། རྒྱལ་མཚན་དང་། བ་དན་རྣམས་དང་། མེ་ཏོག་དང་། ཕྲེང་བ་དང་། སྤོས་དང་། བྱུག་པ་དང་། ཕྱེ་མ་དང་། ན་བཟའ་དང་། གླུ་གར་དང་། སིལ་སྙན་རྣམས་ཀྱིས་ལྷ་དང་མི་རྣམས་མཆོད་པ་བྱེད་བསྟི་སྟང་བྱེད། བླ་མར་བྱེད། རིམ་གྲོར་བྱེད། རྗེད་པར་བྱེད། གསོལ་བར་བྱེད་ན། ཀུན་དགའ་བོ་དེ་ཇི་སྙམ་དུ་སེམས། གཞི་དེ་ལས་ཁྱིམ་བདག་དེ་བསོད་ནམས་མང་དུ་སྐྱེད་དམ། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བཤད་པའི་དོན་ཇི་ལྟར་བདག་གིས་འཚལ་བ་ལྟར་ན་ཅང་ཤེས་
གཅིག་ལ་བསྟི་སྟང་བགྱིས་པ་ཡང་བསོད་ནམས་མང་དུ་སྐྱེད་དེ། གྲངས་མ་མཆིས། བསམ་གྱིས་མི་ཁྱབ་མཚུངས་པ་མ་མཆིས་ན། རང་སངས་རྒྱས་ཀྱི་ཚོགས་འདི་ལྟ་བུ་འདི་ལ་བསྟི་སྟང་བགྱིས་པ་ལྟ་སྨོས་ཀྱང་ཅི་འཚལ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཁྱོད་ལ་བསྒོའོ། །ཁྱོད་ཀྱིས་ཁོང་དུ་ཆུད་པར་བྱའོ། །རང་སངས་རྒྱས་ཚུལ་ཁྲིམས་དང་ལྡན། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དང་ལྡན་པ་དེ་དག་ཐམས་ཅད་ཁྱིམ་བདག་དེའི་སྦྱིན་པ་སྦྱོང་བར་བྱེད་པ་བས། ཀུན་དགའ་བོ་གང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཅིག་འཇིག་རྟེན་དུ་བྱུང་སྟེ། བྱུང་ནས་ཀྱང་ཁྱིམ་བདག་དེས་ཕུལ་བའི་ན་བཟའ་དང་བཤོས་དང་། གཟིམས་ཆ་དང་། ན་བའི་གསོས་སྨན་དང་། ཡོ་བྱད་རྣམས་ཡོངས་སུ་སྤྱད་དེ། ཡོངས་སུ་སྤྱད་ནས་ཀྱང་ཁྱིམ་བདག་དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་མཐོང་བ་མ་གཏོགས་པར་ཆོས་ཀྱང་མི་འཆད་ཀྱང་། ཀུན་དགའ་བོ་དེ་བཞིན་གཤེགས་པ་དེ་རང་བཞིན་གྱི་སྤྱོད་ལམ་སྟོན་པ་ཙམ་གྱིས་སྦྱིན་པ་རབ་ཏུ་མང་པོ་དེ་སྦྱོང་བར་མཛད་ཀྱི། ཇི་ལྟར་དེ་བཞིན་གཤེགས་པ་རང་བཞིན་གྱི་སྤྱོད་ལམ་སྟོན་པ་དེས་སྦྱིན་པ་སྦྱོང་བར་མཛད་པ་དེ་ལྟར་རང་སངས་རྒྱས་ཚུལ་ཁྲིམས་ཀྱི་ཕུང་པོ་དང་ལྡན་ཏིང་ངེ་འཛིན་གྱི་ཕུང་པོ་དང་། ཤེས་རབ་ཀྱི་ཕུང་པོ་དང་། རྣམ་པར་གྲོལ་བའི་ཕུང་པོ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དང་ལྡན་པ་ཐམས་ཅད་ཀྱིས་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་ཡང་སྦྱིན་པ་སྦྱོང་བར་མི་བྱེད་དོ། །དེ་ཅིའི་ཕྱིར་ཞེ་ན། ཀུན་དགའ་བོ་དེ་བཞིན་གཤེགས་པའི་སྤྱོད་ལམ་ཡང་ཡོན་ཏན་ཚད་མེད། གྲངས་མེད། བསམ་གྱིས་མི་ཁྱབ་པ་གང་གི་མཐའ་རྟོགས་པར་སླ་བ་མ་ཡིན་པ་དེ་སྙེད་དང་ལྡན་ན་སངས་རྒྱས་ཀྱི་ཡོན་ཏན་གཞན་རྣམས་ལྟ་ཅི་སྨོས། ཀུན་དགའ་བོ་རང་སངས་རྒྱས་རྣམས་ལ་ཡོན་ཕུལ་བ་ཡང་ཡོད། ཡོན་དེ་ཚད་མེད། དཔག་ཏུ་མེད་པར་འགྱུར་བ་ཡང་ཡོད། ཀུན་དགའ་བོ་ཚད་མེད་དཔག་ཏུ་མེད་ཅིང་དཔག་ཡས་པའི་ཁྱད་པར་ཡང་ཡོད། ཐ་དད་དུ་བྱ་བ་ཡང་ཡོད་དོ། །ཀུན་དགའ་བོ་ཡོན་དེ་ཡོད་དེ། དེ་མེད་པ་མ་ཡིན་ནོ། །ཀུན་དགའ་བོ་ང་ལྟ་བུ་ལ་གནས། ང་ལྟ་བུ་ལ་བརྟེན་ཏེ་ཡོན་ཕུལ་
ན་ཡོན་དེའི་དཔེ་བྱ་བར་ཡང་སླ་བ་མ་ཡིན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ་ཡོན་དེ་ཚད་མེད། གྲངས་མེད། བསམ་གྱིས་མི་ཁྱབ་མཚུངས་པ་མེད། དཔག་ཏུ་མེད་ཅིང་ཟད་མི་ཤེས་པའི་ཕྱིར་རོ། །ཀུན་དགའ་བོ་འདི་ལྟ་སྟེ་དཔེར་ན། མི་འགའ་ཞིག་ཁེའི་ཕྱིར་སོང་ལ་དེ་ནས་ཁེ་རྙེད་དེ་སླར་འོངས་པ་དེ་བཞིན་དུ་ཀུན་དགའ་བོ་རང་སངས་རྒྱས་ལ་ཡོན་ཕུལ་བ་ཡང་ངས་དེ་དང་འདྲ་བར་མཐོང་ངོ་། །ང་ལྟ་བུ་ལ་གནས་ཏེ་ང་ལྟ་བུ་ལ་ཡོན་ཕུལ་བ་ལ་བརྩམས་ནས། ཀུན་དགའ་བོ་དོན་དེ་ཉིད་རྒྱ་ཆེར་ཤེས་པར་བྱ་བའི་ཕྱིར་ཁྱོད་ལ་དཔེ་བསྟན་པར་བྱ་སྟེ། འདི་ལྟར་འདི་ལ་སྐྱེས་བུ་མཁས་པ་ཁ་ཅིག་དཔེས་སྨྲས་པའི་དོན་ཤེས་པར་འགྱུར་རོ། །ཀུན་དགའ་བོ་འདི་ལྟ་སྟེ་དཔེར་ན་མི་ལ་ལ་ཞིག་རི་མོ་འདྲི་བ་ལས་དེས་རི་མོ་དེ་མ་ལེགས་པར་བྲིས་ལ་མ་ལེགས་པར་བྲིས་ནས་ཆུང་ཟད་ཆུང་ཟད་ཙམ་ཕྱིས་ཀྱང་། ཀུན་དགའ་བོ་རི་མོ་དེ་ལ་སྡུག་པ་ཡོད་མོད་ཀྱི་དེ་བས་གཞན་ཆེས་སྡུག་པ་དག་ཡོད་དོ། །ཀུན་དགའ་བོ་དེ་བཞིན་དུ་རང་སངས་རྒྱས་ཐམས་ཅད་པས་ང་ལྟ་བུ་དག་ལ་བརྩམས་པའི་ཡོན་རྒྱས་པར་འགྱུར་རོ། །དེ་ཅིའི་ཕྱིར་ཞེ་ན། ཀུན་དགའ་བོ་ཡེ་ཤེས་གང་གིས་རང་སངས་རྒྱས་ཞེས་བྱ་བའི་གྲངས་སུ་འགྲོ་བའི་རང་སངས་རྒྱས་ཀྱི་ཡེ་ཤེས་ནི་འདི་ལས་བྱུང་ངོ་། །དེ་བཞིན་གཤེགས་པ་ནི་ཆོས་ཐམས་ཅད་མཁྱེན་པ་ལ་ཁྱད་པར་དུ་མཁས་པའོ། །ཀུན་དགའ་བོ་དེ་ཇི་སྙམ་དུ་སེམས། གང་དེ་བཞིན་གཤེགས་པ་ལ་ཇི་སྲིད་འཚོའི་བར་དུ་ན་བཟའ་དང་། བཤོས་དང་། གཟིམས་ཆ་དང་། ན་བའི་གསོས་སྨན་དང་། ཡོ་བྱད་ཐམས་ཅད་ཀྱིས་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་ན་བསོད་ནམས་མང་དུ་སྐྱེད་དམ།གསོལ་པ། བཅོམ་ལྡན་འདས་དེ་དེ་ལྟ་ལགས་སོ། །བདེ་བར་གཤེགས་པ་དེ་དེ་ལྟ་ལགས་ཏེ། གང་དེ་བཞིན་གཤེགས་པ་ལ་ཇི་སྲིད་འཚོའི་བར་དུ་བསྟི་སྟང་བགྱིད་པ་དེ་བསོད་ནམས་མང་དུ་སྐྱེད་དོ། །བཅོམ་ལྡན་འདས་དེ་བཞིན་གཤེགས་པ་ལ་སེམས་དང་བས་སེམས་གཅིག་བསྐྱེད་པ་ཡང་གཞི་དེ་ལས་བསོད་ནམས་མང་དུ་སྐྱེད་དེ། དཔག་ཏུ་མ་མཆིས། བསམ་གྱིས་མི་ཁྱབ། གྲངས་མ་མཆིས་ན། གང་དེ་བཞིན་གཤེགས་པ་ལ་ཇི་སྲིད་འཚོའི་བར་དུ་བསྟི་སྟང་བགྱིད། བླ་མར་བགྱིད། རིམ་གྲོར་བགྱིད། མཆོད་པར་བགྱིད་པ་ལྟ་སྨོས་ཀྱང་ཅི་འཚལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་
པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་གང་དེ་བཞིན་གཤེགས་པ་གཅིག་ལ་ཇི་སྲིད་འཚོའི་བར་དུ་བདེ་བའི་ཡོ་བྱད་ཐམས་ཅད་ཀྱིས་བསྟི་སྟང་བྱེད་པ་ལྟ་ཞོག་ལ། གཉིས་སམ། གསུམ་མམ། བཞིའམ། ལྔའམ། བཅུའམ། ཉི་ཤུའམ། སུམ་ཅུའམ། བཞི་བཅུའམ། ལྔ་བཅུའམ། བརྒྱའམ། སྟོང་ངམ། བྱེ་བའམ། བྱེ་བ་བརྒྱའམ། བྱེ་བ་སྟོང་ངམ། བྱེ་བ་བརྒྱ་སྟོང་ངམ། བྱེ་བ་ཁྲག་ཁྲིག་བརྒྱ་སྟོང་ངམ། ཀུན་དགའ་བོ་འཛམ་བུའི་གླིང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཡོངས་སུ་གང་བར་གྱུར་པ་དང་། གླིང་བཞི་པ་ཆེན་པོའི་འཇིག་རྟེན་གྱི་ཁམས་དང་། སྟོང་གཉིས་པའི་འཇིག་རྟེན་གྱི་ཁམས་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་ན་ཟླ་བ་བྱེ་བ་བརྒྱ་རྣམས་དང་། ཉི་མ་བྱེ་བ་བརྒྱ་རྣམས་དང་། རི་རབ་བྱེ་བ་བརྒྱ་རྣམས་དང་། རི་ཁོར་ཡུག་བྱེ་བ་བརྒྱ་རྣམས་དང་། རྒྱ་མཚོ་ཆེན་པོ་བྱེ་བ་བརྒྱ་རྣམས་དང་། འཛམ་བུའི་གླིང་བྱེ་བ་བརྒྱ་རྣམས་དང་། ཤར་གྱི་ལུས་འཕགས་བྱེ་བ་བརྒྱ་རྣམས་དང་། བྱང་གི་སྒྲ་མི་སྙན་བྱེ་བ་བརྒྱ་རྣམས་དང་། ནུབ་ཀྱི་བ་ལང་སྤྱོད་བྱེ་བ་བརྒྱ་རྣམས་ཏེ། གླིང་བརྒྱད་ཁྲིས་བསྐོར་བ་རྣམས་དང་། གླིང་བཞི་པ་ཆེན་པོ་བྱེ་བ་བརྒྱ་རྣམས་དང་།རྒྱལ་ཆེན་བཞི་པ་བྱེ་བ་བརྒྱ་རྣམས་དང་། སུམ་ཅུ་རྩ་གསུམ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་བྱེ་བ་བརྒྱ་རྣམས་དང་། ཚངས་རིས་བྱེ་བ་བརྒྱ་རྣམས་ནས་འོག་མིན་བྱེ་བ་བརྒྱ་རྣམས་ཀྱི་བར་འདི་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཞེས་བྱ་སྟེ། དེ་ཐམས་ཅད་འདི་ལྟ་སྟེ་དཔེར་ན། བུ་རམ་ཤིང་སྟུག་པོའམ། འབྲས་ཀྱི་ཞིང་སྟུག་པོའམ། ཏིལ་གྱི་ཞིང་སྟུག་པོའམ། འདམ་བུ་མདའ་རྒྱུ་སྟུག་པོའམ། འོད་མ་སྟུག་པོའམ། འདམ་བུ་སྟུག་པོའམ། སེང་ལྡེང་སྟུག་པོའམ། རྩྭ་ཀུ་ཤ་སྟུག་པོ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཀུན་ཏུ་གང་བར་གྱུར་ལ་ཐ་ན་ཡོངས་སུ་བརྟག་པ་བཟུང་སྟེ་སངས་རྒྱས་བཅོམ་ལྡན་འདས་དེ་དག་བསྐལ་པ་གང་གཱའི་ཀླུང་གི་བྱེ་མ་སྙེད་དུ་བཞུགས་པར་གྱུར་ལ། དེར་ཁྱིམ་བདག་གཅིག་ཅིག་བྱུང་སྟེ། ཁྱིམ་བདག་དེ་ཡང་དེ་སྲིད་དུ་གནས་པར་གྱུར་པ་དེས་སངས་རྒྱས་བཅོམ་ལྡན་འདས་དེ་དག་ལ་ཇི་སྲིད་འཚོའི་བར་དུ་ན་བཟའ་དང་། བཤོས་དང་།
གཟིམས་ཆ་དང་། ན་བའི་གསོས་སྨན་དང་། ཡོ་བྱད་རྣམས་ཀྱིས་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་པ་དང་། སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་པ་རྣམས་ཀྱི་སྐུ་གདུང་ལ་ཡང་སྐུ་གདུང་གི་མཆོད་པ་རིན་པོ་ཆེ་སྣ་བདུན་གྱི་མཆོད་རྟེན་བྱས་ནས་ལྷའི་གདུགས་དང་། རྒྱལ་མཚན་དང་། བ་དན་ལ་སོགས་པ་དང་། སྤོས་དང་བྱུག་པ་ཐམས་ཅད་དང་། མེ་ཏོག་དང་ཕྲེང་བ་དང་ཨུད་པ་ལ་དང་པད་མ་དང་ཀུ་མུ་ཏ་དང་པད་མ་དཀར་པོ་ཐམས་ཅད་དང་། གླུ་དབྱངས་ཐམས་ཅད་དང་། རོལ་མོའི་སྒྲ་ཐམས་ཅད་དང་། ལྷ་དང་མིའི་མཆོད་པ་བཟང་པོ་མེ་ཏོག་ནས་སིལ་སྙན་དང་ཕེག་རྡོབ་པའི་བར་ཐམས་ཅད་ཀྱིས་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་ན། ཀུན་དགའ་བོ་དེ་ཇི་སྙམ་དུ་སེམས། གཞི་དེ་ལས་ཁྱིམ་བདག་དེ་བསོད་ནམས་མང་དུ་སྐྱེད་དམ།གསོལ་པ། བཅོམ་ལྡན་འདས་དེ་བཞིན་གཤེགས་པ་གཅིག་ལ་ཁྱིམ་བདག་དེས་བཤོས་གསོལ་ན་ཡང་བསོད་ནམས་མང་དུ་སྐྱེད་དེ། དཔག་ཏུ་མ་མཆིས་གྲངས་མ་མཆིས་ན་དེ་བཞིན་གཤེགས་པའི་ཚོགས་དེ་སྙེད་ཅིག་བསྐལ་པ་དེ་སྙེད་དུ་བཞུགས་པ་ལ་བསྟི་སྟང་བགྱིད། བླ་མར་བགྱིད། རིམ་གྲོར་བགྱིད། མཆོད་པར་བགྱིད་པ་དང་། ཡོངས་སུ་མྱ་ངན་ལས་འདས་པ་རྣམས་ཀྱི་མཆོད་རྟེན་ལ་དེ་ལྟ་བུའི་བསྟི་སྟང་བགྱིད་པ་ལྟ་སྨོས་ཀྱང་ཅི་འཚལ། བཅོམ་ལྡན་འདས་དེ་བཞིན་གཤེགས་པའི་ཚོགས་དེ་ལྟ་བུ་ལ་དེ་ལྟ་བུའི་བསྟི་སྟང་བགྱིས་པ་ཁྱིམ་བདག་དེ་གཞི་དེ་ལས་བསོད་ནམས་འདི་སྙེད་ཅིག་སྐྱེད་དོ་ཞེས་བསོད་ནམས་ཀྱི་ཕུང་པོ་དེ་དཔེས་བསྟན་དུ་མི་ནུས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཁྱོད་ལ་བསྒོའོ། །ཀུན་དགའ་བོ་ཁྱོད་ཀྱི་ཁོང་དུ་ཆུད་པར་བྱའོ། །ཁྱིམ་བདག་གང་གིས་དེ་བཞིན་གཤེགས་པ་དེ་སྙེད་ཅིག་བསྐལ་པ་དེ་སྙེད་དུ་བཞུགས་པ་ལ་བསྟི་སྟང་བྱས། བླ་མར་བྱས། རིམ་གྲོར་བྱས། མཆོད་པར་བྱས་པ་དང་། ཡོངས་སུ་མྱ་ངན་ལས་འདས་པ་རྣམས་ཀྱི་མཆོད་རྟེན་ལ་དེ་ལྟ་བུའི་བསྟི་སྟང་བྱས་པའི་བསོད་ནམས་བསྐྱེད་པ་བས། ཀུན་དགའ་བོ་རིགས་ཀྱི་བུའམ། རིགས་ཀྱི་བུ་མོ་དད་པ་རབ་ཏུ་མང་བ། ལྷག་པའི་
བསམ་པས་ཞུགས་པ། སངས་རྒྱས་བཅོམ་ལྡན་འདས་ཀྱི་བྱང་ཆུབ་ལ་མི་རྟོག་པར་མངོན་པར་དད་ཅིང་ཡིད་ཆེས་ལ། མོས་པ་གང་གིས་ཆོས་ཐམས་ཅད་མི་རྟག་པའམ། སྡུག་བསྔལ་བའམ། སྟོང་པའམ། བདག་མེད་པའོ་ཞེས་ལེགས་པར་གསུངས་པའི་ཆོས་ལ་ཡང་དག་པར་ཞུགས་ཤིང་ཚིག་ཏུ་སྨྲ་ན། ཀུན་དགའ་བོ་འདི་ནི་དེ་བས་བསོད་ནམས་ཆེས་མང་དུ་སྐྱེད་དོ། །ཀུན་དགའ་བོ་གང་བླ་ན་མེད་པའི་ཆོས་དཀོན་མཆོག་འདི་ལྟ་བུ་བསྟི་སྟང་དུ་བྱས་ཏེ་གཞན་ལ་འཆད་དམ། རབ་ཏུ་སྟོན་ན་བསོད་ནམས་ཇི་ཙམ་དུ་རྒྱ་ཆེར་སྐྱེད་པ་དང་། ཇི་ཙམ་དུ་ཚད་མེད་པ་དང་། ཇི་ཙམ་དུ་གྲངས་མེད་པ་དང་། ཇི་ཙམ་དུ་བསམ་གྱིས་མི་ཁྱབ་པ་དང་། ཇི་ཙམ་དུ་མཚུངས་པ་མེད་པ་དང་། ཇི་ཙམ་དུ་དཔག་ཏུ་མེད་པའི་བསོད་ནམས་སྐྱེད་པ་ལ་ལྟོས། དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་དེ་ལས་གཞན་པའི་སྦྱིན་པ་རྣམས་ནི་ཟག་པ་དང་བཅས་ཤིང་ཉོན་མོངས་པ་དང་བཅས་པ་སྟེ། འཁོར་བར་རྒྱུ་བ་ཡིན་ལ། ཀུན་དགའ་བོ་བསྐལ་པ་གྲངས་མེད་པ་བྱེ་བར་བསྒྲུབས་པའི་ཆོས་དཀོན་མཆོག་གི་མཛོད་ཟང་ཟིང་མེད་པ་བླ་ན་མེད་པ་འདི་ནི་འཁོར་བའི་རྒྱུན་གཅོད་པར་འགྱུར་བའི་ཕྱིར་རོ། །ཀུན་དགའ་བོ་ཆོས་དཀོན་མཆོག་བླ་ན་མེད་པ་འདི་ཐོས་ན་སེམས་ཅན་སྐྱེ་བའི་ཆོས་ཅན་རྣམས་སྐྱེ་བ་ལས་ཡོངས་སུ་ཐར་བར་འགྱུར། སེམས་ཅན་ན་བའི་ཆོས་ཅན་དང་། འཆི་བའི་ཆོས་ཅན་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པའི་ཆོས་ཅན་རྣམས་འཁྲུག་པའི་བར་ལས་ཡོངས་སུ་ཐར་བར་འགྱུར་རོ། །ཀུན་དགའ་བོ་དོན་གྱི་གཞི་འདི་མཐོང་ནས་གང་ཆོས་གུས་པར་འཆད་པ་དང་། གང་ཆོས་གུས་པར་ཉན་པ་གཉིས་ནི་བསོད་ནམས་མང་དུ་སྐྱེད་དོ་ཞེས་ང་སྨྲའོ། །དེ་སྐད་ཅེས་བཀའ་སྩལ་ནས། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ལྷག་པའི་བསམ་པས་ཞུགས་ཤིང་ཡང་དག་པར་བསྒྲུབ་པར་འདོད་པས་སངས་རྒྱས་བཅོམ་ལྡན་འདས་ཀྱི་བསྟན་པ་ལ་མི་རྟོག་པར་མངོན་པར་དད་ཅིང་མོས་ནས་ཆོས་ལེགས་པར་གསུངས་པ་ཡིན་པ་དང་། དགེ་འདུན་ལེགས་པར་ཞུགས་པ་ཡིན་པ་དང་། འདུ་བྱེད་ཐམས་ཅད་མི་རྟག་པའམ་
སྡུག་བསྔལ་བའམ། ཞི་བའམ། སྟོང་པའམ། བདག་མེད་པ་ཡིན་པར་ཡིད་ཆེས་ན། ཀུན་དགའ་བོ་འདི་ནི་དེ་བས་ཆེས་བསོད་ནམས་མང་དུ་སྐྱེད་དེ་ཚིག་ཙམ་མ་ཡིན་ནོ། །ཀུན་དགའ་བོ་གང་ལ་ལ་ཞིག་གིས་རུ་ཤིང་བཞིན་དུ་བྱས། ཡིད་ལ་བྱས། སེམས་ཐམས་ཅད་ཀྱིས་བསམས་ནས་རྣ་བླགས་ཏེ་ཆོས་ཉན་པ་དང་། མཉན་ནས་ཀྱང་ཐ་ན་སེ་གོལ་གཏོགས་པ་ཙམ་ཡང་མི་རྟག་པའམ། སྡུག་བསྔལ་བའམ། སྟོང་པའམ། བདག་མེད་པར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ན། ཀུན་དགའ་བོ་དེ་འཇིག་རྟེན་གྱི་ཁམས་མཐའ་ཡས་མུ་མེད་པ་དག་ན་སེམས་ཅན་གྱི་ཁམས་ཡོད་པའི་སེམས་ཅན་ཇི་སྙེད་པ་ཐམས་ཅད་ནི་ཆེས་མང་གི། སའི་ཁམས་མ་ཡིན། ཆུའི་ཁམས་མ་ཡིན། མེའི་ཁམས་མ་ཡིན། རླུང་གི་ཁམས་མ་ཡིན་ནོ་ཞེས་དེ་སྐད་བྱ་བ་དེ་དག་ཐམས་ཅད་ཡོངས་སུ་བརྟག་པ་བཟུང་སྟེ། སྐད་ཅིག་དང་། ཐང་ཅིག་དང་། ཡུད་ཙམ་ཅིག་ལ་སྔ་ཕྱི་མེད་པར་མིར་གྱུར་ལ། སྐད་ཅིག་དང་། ཐང་ཅིག་དང་། ཡུད་ཙམ་ཅིག་ལ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཁྱིམ་བདག་གཅིག་ཅིག་ཀྱང་བྱུང་ལ། སངས་རྒྱས་བཅོམ་ལྡན་འདས་དེ་དག་ཇི་ཙམ་དུ་འཁོར་བའི་སྔོན་གྱི་མཐའ་མི་མངོན་པ་དེ་སྲིད་དུ་ཡུན་རིང་དུ་བཞུགས་ཏེ། ཁྱིམ་བདག་དེ་ཡང་བསྐལ་པ་དེ་སྲིད་དུ་གནས་པར་གྱུར་ལ། དེས་སངས་རྒྱས་བཅོམ་ལྡན་འདས་དེ་སྙེད་ལ་ན་བཟའ་དང་། བཤོས་དང་། གཟིམས་ཆ་དང་། ན་བའི་གསོས་སྨན་དང་། ཡོ་བྱད་དང་། བདེ་བར་སྦྱར་བ་ཐམས་ཅད་ཀྱིས་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་པ་དང་། ཡོངས་སུ་མྱ་ངན་ལས་འདས་པ་རྣམས་ཀྱི་མཆོད་རྟེན་རིན་པོ་ཆེ་སྣ་བདུན་ལས་བྱས་ཏེ། ལྷའི་གདུགས་དང་། རྒྱལ་མཚན་དང་། བ་དན་རྣམས་དང་། མེ་ཏོག་དང་། ཕྲེང་བ་དང་། སྤོས་དང་། བྱུག་པ་ཐམས་ཅད་དང་། བདོག་པ་ཐམས་ཅད་ཀྱིས་བསྟི་སྟང་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་ན། ཀུན་དགའ་བོ་དེ་ཇི་སྙམ་དུ་སེམས། ཁྱིམ་བདག་དེ་གཞི་དེ་ལས་བསོད་ནམས་མང་དུ་སྐྱེད་དམ། གསོལ་པ། བཅོམ་ལྡན་འདས་ཁྱིམ་བདག་དེས་དེ་བཞིན་གཤེགས་པ་གཅིག་མཉེས་པར་བགྱིས། བསྟི་སྟང་བགྱིས། བླ་མར་བགྱིས། རིམ་གྲོར་བགྱིས། མཆོད་པར་བགྱིས་ན་ཡང་གཞི་དེ་ལས་བསོད་
ནམས་མང་དུ་སྐྱེད་དེ། བསོད་ནམས་ཚད་མ་མཆིས། གྲངས་མ་མཆིས། བསམ་གྱིས་མི་ཁྱབ། མཚུངས་པ་མ་མཆིས། དཔག་ཏུ་མ་མཆིས་པ་སྐྱེད་པར་འགྱུར་ན། དེ་བཞིན་གཤེགས་པའི་ཚོགས་དེ་ལྟ་བུ་ལ་བསྐལ་པ་དེ་སྙེད་དུ་བསྟི་སྟང་བགྱིས། བླ་མར་བགྱིས། རིམ་གྲོར་བགྱིས། མཆོད་པར་བགྱིས་པ་ལྟ་སྨོས་ཀྱང་ཅི་འཚལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་དེ་དེ་བཞིན་ནོ། །ཁྱོད་ཇི་སྐད་ཟེར་བ་བཞིན་ཏེ། དེ་བསོད་ནམས་ཚད་མེད་པ་སྐྱེད་དོ། །ཀུན་དགའ་བོ་དེ་བས་ན་ཁྱོད་ལ་བསྒོའོ། །ཁྱོད་ཀྱིས་ཁོང་དུ་ཆུད་པར་བྱའོ། །གང་ཁྱིམ་བདག་དེས་དེ་བཞིན་གཤེགས་པ་དེ་སྙེད་ཅིག་ལ་བདེ་བའི་ཡོ་བྱད་ཐམས་ཅད་ཀྱིས་བསྐལ་པ་དེ་སྙེད་དུ་བསྟི་སྟང་བྱས། བླ་མར་བྱས། རིམ་གྲོར་བྱས་པས་བསོད་ནམས་བསྐྱེད་པ་བས། གང་གིས་རུ་ཤིང་བཞིན་དུ་བྱས། ཡིད་ལ་བྱས། སེམས་ཐམས་ཅད་ཀྱིས་བསམས་ཏེ། རྣ་བླགས་སེམས་རྩེ་གཅིག་ཏུ་བྱས་ནས་ཆོས་ཉན་ཅིང་སེ་གོལ་གཏོགས་པ་ཙམ་ཡང་འདུ་བྱེད་ཐམས་ཅད་མི་རྟག་པའམ། སྡུག་བསྔལ་བའམ། ཞི་བའམ། སྟོང་པའམ། བདག་མེད་པའོ་ཞེས་ཡིད་ལ་བྱེད་ན་འདི་དེ་བས་བསོད་ནམས་ཆེས་མང་དུ་སྐྱེད་དེ། ཀུན་དགའ་བོ་གང་ཆོས་གུས་པར་འཆད་པ་དང་། གང་ཆོས་གུས་པར་ཉན་པ་ནི་བསོད་ནམས་ཆེས་མང་དུ་སྐྱེད་དོ། །ཀུན་དགའ་བོ་ངས་འདི་ལ་དགོངས་ནས་འདི་སྐད་དུ། རྣམ་པ་གཉིས་ཀྱི་དོན་གྱི་ཕྱིར། །སངས་རྒྱས་བཤད་པ་མཉན་པར་བྱ། །ཟག་པ་རྣམས་ཀྱང་ཟད་པར་འགྱུར། །བྱང་ཆུབ་ཉེ་བར་གྱུར་པར་འདོད། །གང་ཞིག་ཆོས་རྣམས་འཆད་པ་དང་། །དྲང་སྲོང་རྒྱལ་མཚན་གང་འཛིན་པ། །གཉི་ག་བསོད་ནམས་ལྡན་པར་འགྱུར། །ཆོས་ནི་དྲང་སྲོང་རྒྱལ་མཚན་ཡིན་ཞེས་བཤད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་གང་ཆོས་གུས་པར་འཆད་པ་དང་། གང་ཆོས་གུས་པར་ཉན་པ་འདི་གཉིས་ནི་བདུད་དང་ལྷན་ཅིག་ཏུ་གཡུལ་འདྲེ་བའོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟ་སྟེ་དགེ་བའི་བཤེས་གཉེན་ཉིད་དང་། དགེ་བའི་གྲོགས་སུ་གྱུར་པ་ཉིད་དང་། དགེ་བའི་བཤེས་གཉེན་དང་ལྡན་པ་འདི་ནི་ཚངས་པར་སྤྱོད་པ་ཡོངས་སུ་རྫོགས་པར་བྱེད་པའོ། །དེ་ཅིའི་ཕྱིར་ཞེན། ཀུན་དགའ་བོ་དགེ་བའི་བཤེས་གཉེན་ལ་བརྟེན་ནས་སེམས་ཅན་སྐྱེ་བའི་ཆོས་ཅན་
རྣམས་སྐྱེ་བ་ལས་ཡོངས་སུ་ཐར་བར་འགྱུར་བ་ནས་སེམས་ཅན་འཁྲུག་པའི་ཆོས་ཅན་རྣམས་འཁྲུག་པ་ལས་ཡོངས་སུ་ཐར་བར་འགྱུར་རོ། །ཀུན་དགའ་བོ་ངས་ཉན་ཐོས་རྣམས་ལ་ཡང་དག་པའི་ལྟ་བ་འབྱུང་བའི་རྒྱུ་གཉིས་དང་། རྐྱེན་གཉིས་ནི་འདི་ལྟ་སྟེ། གཞན་གྱི་སྒྲ་དང་། སོ་སོ་རང་གིས་ཚུལ་བཞིན་ཡིད་ལ་བྱེད་པའོ་ཞེས་གསུངས་པ་ཡང་དེ་ཡིན་ཏེ། ཀུན་དགའ་བོ་དེ་དག་ལས་གཞན་གྱི་སྒྲ་ནི་སངས་རྒྱས་བཅོམ་ལྡན་འདས་རྣམས་ལས་བྱུང་བར་རིག་པར་བྱའོ། །གང་སོ་སོ་རང་གི་ཚུལ་བཞིན་ཡིད་ལ་བྱེད་པ་དེ་ཡང་སངས་རྒྱས་བཅོམ་ལྡན་འདས་ཉིད་ལས་བྱུང་བར་རིག་པར་བྱའོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་བྱིས་པ་སོ་སོའི་སྐྱེ་བོ་རྣམས་ལ་སོ་སོ་རང་གི་ཚུལ་བཞིན་ཡིད་ལ་བྱེད་པ་མེད་པའི་ཕྱིར་རོ། །དེ་ཅིའི་ཕྱིར་ཞེ་ན། སངས་རྒྱས་རྣམས་མ་བྱུང་ན། བྱིས་པ་སོ་སོའི་སྐྱེ་བོ་རྣམས་ཅི་ཞིག་ཡིད་ལ་བྱ་བ་མི་ཤེས་ཀྱི་ཆོས་འདི་དག་ཡིད་ལ་བྱའོ་ཞེས་དེ་བཞིན་གཤེགས་པ་ཉིད་ཀྱིས་བསྟན་པའི་ཕྱིར་རོ། །ཀུན་དགའ་བོ་ངས་དོན་གྱི་གཞི་འདི་མཐོང་ནས་སོ་སོ་རང་གི་ཚུལ་བཞིན་ཡིད་ལ་བྱེད་པ་དེ་ཡང་སངས་རྒྱས་བཅོམ་ལྡན་འདས་རྣམས་ལས་བྱུང་བར་རིག་པར་བྱའོ་ཞེས་དེ་སྐད་བཤད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སྐྱེས་བུ་དམ་པ་རྣམས་ནི་མཐོང་ན་ལེགས། །ཐེ་ཚོམ་རྣམས་ནི་གཅོད་ཅིང་སེལ་བར་བྱེད། །བྱིས་པ་རྣམས་ཀྱང་རབ་ཏུ་མཁས་པར་བྱེད། །དེ་བས་མཁས་པ་རྣམས་ནི་མཐོང་ན་ལེགས། །འཕགས་པ་རྣམས་ནི་མཐོང་ན་བདེ། །དམ་པ་རྣམས་དང་འགྲོགས་པའང་བདེ། །བྱིས་པ་རྣམས་ནི་མ་མཐོང་ན། །དམ་པ་རྣམས་ལ་རྟག་ཏུ་བདེ། །ཀུན་དགའ་བོ་འདི་ལྟ་སྟེ། དགེ་བའི་བཤེས་གཉེན་དང་། དགེ་བའི་གྲོགས་སུ་གྱུར་པ་དང་། དགེ་བའི་བཤེས་གཉེན་གྱ་གྱུ་མེད་པ་ཉིད་ནི་ཚངས་པར་སྤྱོད་པ་འདི་རྫོགས་པར་བྱེད་པའོ་ཞེས་བྱ་བ་ཡང་ངས་འདི་ལ་དགོངས་ཏེ་ཚིག་དེ་སྐད་སྨྲས་སོ། །དེ་ཅིའི་ཕྱིར་ཞེ་ན།ཀུན་དགའ་བོ་དགེ་བའི་བཤེས་གཉེན་ལ་བརྟེན་ནས་སེམས་དགེ་བར་འགྱུར་རོ། །སེམས་དགེ་བས་བསམ་པ་དགེ་བར་འགྱུར། སྦྱོར་བ་དགེ་བར་འགྱུར། དགེ་བའི་ཆོས་ལ་སེམས་དང་བར་འགྱུར། དགེ་བའི་ཆོས་ལ་ཉེ་བར་གནས་པར་འགྱུར། སངས་རྒྱས་བཅོམ་ལྡན་འདས་རྣམས་ལ་ཤེས་ནས་དད་པར་འགྱུར། ཆོས་ལ་ཤེས་ནས་དད་པར་འགྱུར། དགེ་འདུན་ལ་ཤེས་
ནས་དད་པར་འགྱུར། འཕགས་པ་དགྱེས་པའི་ཚུལ་ཁྲིམས་རང་དབང་ཅན་མཁས་པས་བསྔགས་པ། མྱ་ངན་ལས་འདའ་བར་འགྱུར་བ་རྣམས་ཐོབ་པར་འགྱུར་རོ། །ཀུན་དགའ་བོ་འདི་ལྟ་སྟེ་དཔེར་ན་ཆར་རབ་ཏུ་བབ་ན་ཤང་ཤོང་རྣམས་ཡོངས་སུ་གང་བར་བྱེད་དོ། །ཤང་ཤོང་རྣམས་ཡོངས་སུ་གང་ནས་ཆུ་བྲན་རྣམས་བྲུག་པར་བྱེད་དོ། །ཆུ་བྲན་རྣམས་བྲུགས་ནས་ཀླུང་ཆེན་པོ་རྣམས་བྲུག་པར་བྱེད་དོ། །ཀླུང་ཆེན་པོ་བྲུགས་པ་རྣམས་ཀྱིས་མཚོ་ཆེན་པོ་རྒྱ་མཚོ་ཡོངས་སུ་གང་བར་འགྱུར་རོ། །ཀུན་དགའ་བོ་དེ་བཞིན་དུ་དགེ་བའི་བཤེས་གཉེན་དང་། དགེ་བའི་གྲོགས་སུ་གྱུར་པ་དང་། དགེ་བ་དང་རབ་ཏུ་ལྡན་པ་དང་། དགེ་བ་གཙོ་བོར་གྱུར་པ་དང་། དགེ་བའི་སེམས་ཉིད་ལ་བརྟེན་ནས་དགེ་བའི་རྩ་བའི་སྟོབས་བསྐྱེད་པ་ཐོབ་པ་རྣམས་ནི་རྗེས་སུ་འཐུན་པའི་ཆོས་ཀྱི་བར་དུ་བསྒྲུབས་པས་རབ་ཏུ་མཐར་ཐུག་པ་དང་། རབ་ཏུ་དྲི་མ་མེད་པ་དང་། རབ་ཏུ་ཚངས་པར་སྤྱོད་པ་དང་། རབ་ཏུ་མཐར་ཕྱིན་པར་འགྱུར་རོ། །ཀུན་དགའ་བོ་ཕྱི་རོལ་གྱི་དངོས་པོར་གྱུར་པ་འདི་དག་ཀྱང་དུས་ལ་བབ་ན་སྐྱེ་བར་འགྱུར་བ་དང་། མེ་ཏོག་དང་། ཡལ་ག་དང་། འབྲས་བུ་འབྱིན་པ་ལ་ལྟོས། ཀུན་དགའ་བོ་འདི་ལྟར་ཕྱི་རོལ་གྱི་དངོས་པོ་འདི་དག་ཀྱང་སླུ་བར་མི་བྱེད་ན་ཁྱེད་ཀྱི་ལེགས་པར་སྤྱད་པ་མི་སླུ་བ་ལྟ་ཅི་སྨོས་ཏེ་དེ་ནི་གནས་མེད་དོ། །ཀུན་དགའ་བོ་ལེགས་པར་སྤྱད་པ་ནི་སུ་ལ་ཡང་མི་སླུའོ། །ལེགས་པར་སྤྱད་པ་སྤྱོད་ཅིག །ཀུན་དགའ་བོ་ང་ཡང་ལེགས་པར་སྤྱད་པས་མ་བསླུས་སོ། །ཀུན་དགའ་བོ་ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། ལེགས་པར་སྤྱད་པ་གང་ཡིན་པ་དེ་དག་སྤྱད་དེ་ལེགས་པར་སྤྱད་པ་དེས་ང་མ་བསླུས་སོ། །ཀུན་དགའ་བོ་དེ་བཞིན་གཤེགས་པ་ལམ་གང་ནས་གཤེགས་པ་དེ་ན་གང་ས་མཐོན་དམན་དང་། ངམ་གྲོག་དང་། གཡང་ས་དང་། སྟོར་ཁུང་དང་། ཤོང་ཁུང་དང་། སྡོང་དུམ་དང་། ཚེར་མ་སྟུག་པོ་དེ་དག་ཐམས་ཅད་འདུད་ཅིང་མེད་པར་འགྱུར་བ་དང་། ས་དམའ་བ་མཐོན་པོར་འགྱུར་བ་དང་། མཐོན་པོ་དམའ་བར་འགྱུར་བ་དང་། ཤིང་རྣམས་རབ་ཏུ་འདུད་པ་དང་། ཤིང་གི་ལྷ་རྣམས་ཕྱག་འཚལ་བ་དང་། ཚོང་དུས་དང་། སྲང་དག་ན་སྐྱེ་བོ་གང་དག་འཁོད་པ་དེ་དག་དེ་བཞིན་གཤེགས་པ་བཞུད་པའི་རྗེས་སུ་འབྲང་སྟེ་དེ་བཞིན་གཤེགས་པ་འདས་ནས་དེ་དག་སླར་རང་རང་གི་གནས་ན་འཁོད་པ་ལ་ལྟོས། ཀུན་དགའ་བོ་སྔོན་སངས་རྒྱས་བཅོམ་ལྡན་འདས་རྣམས་དང་། རང་སངས་རྒྱས་རྣམས་དང་། དགྲ་བཅོམ་པ་རྣམས་དང་། བྱང་ཆུབ་སེམས་
དཔའ་རྣམས་དང་། དགེ་བའི་བཤེས་གཉེན་ཡིད་དུ་འོང་བ་རྣམས་དང་། དགེ་སྦྱོང་དང་། བྲམ་ཟེ་རྒན་པ་རྣམས་ལ་རྟག་ཏུ་གུས་པ་དང་། འདུད་པ་དང་། ཕྱག་འཚལ་བའི་ལེགས་པར་སྤྱད་པའི་རྒྱུ་འཐུན་པ་ལ་ལྟོས། ཀུན་དགའ་བོ་ཕྱི་རོལ་གྱི་དངོས་པོ་སེམས་མེད་པ་ཡང་དེ་བཞིན་གཤེགས་པ་ལ་འདུད་ཅིང་ཕྱག་འཚལ་བ་དང་། མཐོ་བར་འགྱུར་བ་དང་། དངོས་པོ་གང་དག་དམའ་བར་འོས་པའམ། མཐོ་བར་འོས་པ་དེ་དག་དེ་བཞིན་གཤེགས་པ་མཐོང་མ་ཐག་ཏུ་དམའ་བ་དང་མཐོ་བར་འགྱུར་བ་ལེགས་པར་སྤྱད་པའི་ཁྱད་པར་ལ་ལྟོས། འདི་ལ་མི་བླུན་པོ་ཁ་ཅིག་ནི་ང་རྒྱལ་གྱི་ཟིལ་གྱིས་ནོན། ང་རྒྱལ་གྱིས་བསླད། ང་རྒྱལ་གྱིས་སེམས་ཡོངས་སུ་གདུངས་ནས་སུ་ལ་ཡང་མི་འདུད་དོ། །ཀུན་དགའ་བོ་དེ་བཞིན་གཤེགས་པའི་ཕྱག་དྲ་བར་འབྲེལ་བ་དང་། ཞབས་དྲ་བར་འབྲེལ་བ་དེ་དག་ཐམས་ཅད་ཀྱང་ལེགས་པར་སྤྱད་པ་ལས་གྱུར་པ་ལ་ལྟོས། ཀུན་དགའ་བོ་གང་ངས་སྔོན་སྦྱིན་པ་དང་། ཚིག་སྙན་པ་དང་། དོན་སྤྱད་པ་དང་། དོན་འཐུན་པས་སེམས་ཅན་རྣམས་བསྡུས་པ་སྔོན་གྱི་ལེགས་པར་སྤྱད་པ་དེ་དག་ལ་ལྟོས། ཀུན་དགའ་བོ་ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་འདི་ནི་ངའི་མ་ཡིན། འདི་ནི་ངའི་ཕ་ཡིན། འདི་ནི་ཕུ་ནུ་བོ། འདི་ནི་སྲིང་མོ། འདི་ནི་ཉེ་དུ། འདི་ནི་མཛའ་བོ། འདི་ནི་མི་མཛའ་བ་ཡིན་ནོ་སྙམ་པ་དེ་ལྟ་བུར་མ་གྱུར་གྱི། ཀུན་དགའ་བོ་ང་ནི་སེམས་ཅན་ཐམས་ཅད་ལ་སེམས་རོ་གཅིག་པ་དང་། སེམས་མཉམ་ཞིང་སེམས་མི་མཉམ་པ་མེད་པ་དང་། བདག་གི་སེམས་སུ་གྱུར་ཏོ། །ཀུན་དགའ་བོ་ཡུན་རིང་པོ་འདི་ན་གང་ངས་སྦྱིན་པ་དང་། ཚིག་སྙན་པ་དང་། དོན་སྤྱད་པ་དང་། དོན་འཐུན་པས་མ་བཟུང་བའི་སེམས་ཅན་དེ་ནི་རྙེད་པར་སླ་བ་མ་ཡིན་ན་བྱིས་པ་སོ་སོའི་སྐྱེ་བོ་རྣམས་ནི་དེ་ལྟར་བཟུང་བར་མི་ཤེས་སོ། །ཇི་ལྟར་འཁོར་བའི་སྔོན་གྱི་མཐའ་མི་མངོན་པ་བཞིན་དུ་བྱིས་པ་སོ་སོའི་སྐྱེ་བོ་རྣམས་ཀྱིས་བདེ་བ་མྱོང་སྟེ། ཀུན་དགའ་བོ་བྱིས་པ་སོ་སོའི་སྐྱེ་བོ་ཐམས་ཅད་ཀྱིས་རང་གིས་བསོད་ནམས་མངོན་པར་འདུས་བྱས་པས་བདེ་བ་མྱོང་བར་གྱུར་པ་དེ་བས་ནི་གང་ངས་སེམས་ཅན་གཅིག་ལ་བདེ་བར་སྦྱར་ཞིང་བསྒྲུབས་པ་འདི་ཆེས་མང་སྟེ། ངས་སེམས་ཅན་རྣམས་ལ་བདེ་བར་སྦྱར་བ་བསྒྲུབས་པ་ཙམ་ནི་སེམས་ཅན་དེ་དག་གིས་རང་གིས་བསོད་ནམས་མངོན་པར་འདུས་བྱས་པས་བདེ་བ་མ་མྱོང་ངོ་། །ཀུན་དགའ་བོ་འོན་ཀྱང་བདེ་བར་སྦྱོར་བ་དེ་དག་ཐམས་ཅད་ནི་མི་རྟག་པ་
སྟེ་འགྱུར་བའི་ཆོས་ཅན་ནོ། །གང་ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བྱིས་པ་སོ་སོའི་སྐྱེ་བོ་རྣམས་ལ་བདེ་བར་སྦྱོར་བ་ཐམས་ཅད་ཉེ་བར་སྦྱར་བ་དེ་དག་ཐམས་ཅད་ནི་ལམ་འདི་ལ་དགོད་པའི་ཕྱིར་ཡོངས་སུ་སྨིན་པར་འགྱུར་བ་ཤ་སྟག་གོ །ད་ལྟར་བདེ་བ་གང་གིས་ངས་ཁྱེད་བདེ་བར་བྱས་པ་འདུས་མ་བྱས་པའི་བདེ་བ། འཕགས་པ་ཟག་པ་མེད་པའི་བདེ་བ། དེ་དག་ནི་ནམས་ཀྱང་ཕྱིས་ཡོངས་སུ་མི་འགྱུར་ཞིང་ཆུད་ཟ་བར་མི་འགྱུར་རོ། །ཀུན་དགའ་བོ་དེ་བས་ན་འཕགས་པའི་ཡེ་ཤེས་ཀྱིས་བྱ་བ་བྱོས་ཤིག །ཀུན་དགའ་བོ་ཡེ་ཤེས་ཀྱི་བྱ་བས་བྱ་བ་བྱོས་ཤིག །ངས་ནི་བྱས་ཟིན་ཏོ། །ཀུན་དགའ་བོ་སྤྱོད་པ་གཞན་ཡང་ཐ་ན་སེམས་དད་པ་གཅིག་བསྐྱེད་པའི་དགེ་བའི་རྩ་བའི་རྣམ་པར་སྨིན་པ་ངས་བཤད་ཟིན་ཏོ། །ཀུན་དགའ་བོ་སེམས་ཅན་དགེ་བའི་རྩ་བ་བྱས་པ། དགེ་བའི་རྩ་བ་བསྐྱེད་པ། མྱ་ངན་ལས་འདས་པའི་ས་བོན་བསྐྱེད་པ་དག་ཀྱང་ཡོད་དོ། །ཀུན་དགའ་བོ་སེམས་ཅན་གང་དག་གིས་དེ་བཞིན་གཤེགས་པ་ཡང་དག་པར་རྗེས་སུ་དྲན་ནས་ང་འདི་ལྟ་བུར་ཟད་ཅིང་ཡོངས་སུ་ཉམས་པ་ཐོས་ན་དགའ་བ་ཙམ་མམ་དད་པ་ཙམ་གྱིས་མཆི་མ་འབྱུང་བ་དག་ཀྱང་ཡོད་དོ། །ཀུན་དགའ་བོ་དེ་བཞིན་གཤེགས་པ་རྗེས་སུ་དྲན་ནས་ཤུགས་རིང་པོ་འབྱིན་པའི་སེམས་ཅན་དག་ཀྱང་ཡོད། སྤུ་ཟིང་ཞེས་བྱེད་པ་དག་ཀྱང་ཡོད་དེ། སེམས་ཅན་དེ་དག་ནི་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དུ་མི་འགྲོ་ཞིང་ཡང་དག་པར་རྫོགས་པའི་བྱང་ཆུབ་ཏུ་ངེས་པར་གཞོལ་བ་དག་གོ །ཀུན་དགའ་བོ་དེ་བཞིན་དུ་གང་ལ་ལ་ང་རྗེས་སུ་དྲན་ནས་ཆོས་ཀྱི་ཤུགས་ཀྱིས་མཆི་མ་འབྱུང་བའམ། སྤུ་ཟིང་ཞེས་བྱེད་པའམ། ཤུགས་རིང་དུ་འབྱིན་པར་འགྱུར་བའི་སེམས་ཅན་དེ་དག་ཐམས་ཅད་ནི་ཀུན་དགའ་བོ་དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དུ་མི་འགྲོའོ། །ལོག་པར་ལྟུང་བ་ཐམས་ཅད་དུ་མི་འགྲོའོ། །ཀུན་དགའ་བོ་དེ་བས་ན་བག་ཡོད་པ་ལ་བརྩོན་པར་གྱིས་ཤིག །ཀུན་དགའ་བོ་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་ནི་བག་ཡོད་པས་ཐོབ་ཅིང་དེ་ལས་གཞན་པའི་དགེ་བ་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཀྱང་བག་ཡོད་པས་ཐོབ་བོ། །ཀུན་དགའ་བོ་གང་འདོམས་པ་པོས་བྱ་བ་དང་། གང་དོན་འདོད་པ་དང་། ཕན་པ་དང་བདེ་བ་འདོད་པ་དང་། ཕན་པར་དགའ་བ་དང་། སྙིང་རྗེ་ཅན་དང་། སྙིང་བརྩེ་བ་ཅན་གྱིས་སྙིང་
བརྩེ་བའི་ཕྱིར་བྱ་བ་དེ་དག་ངས་བྱས་ཀྱིས། ད་ནི་ཁྱེད་ཀྱིས་ཅི་ནས་ཀྱང་དགེ་བའི་ལམ་རྒྱུན་ཆད་པར་མི་འགྱུར་བ་དང་། དམ་པའི་ཆོས་ཀྱི་ཚུལ་ནུབ་པར་མི་འགྱུར་བར་གྱིས་ཤིག །ཀུན་དགའ་བོ་ཅི་ནས་ཀྱང་དམ་པའི་ཆོས་ཀྱི་ཚུལ་འདི་ཡུན་རིང་དུ་གནས་པར་འགྱུར་བ་དང་། ལྷ་དང་མི་རྣམས་ལ་ཡངས་ཤིང་རྒྱ་ཆེར་འགྱུར་བར་གྱིས་ཤིག །ཀུན་དགའ་བོ་ཆོས་དཀོན་མཆོག་གི་མཛོད་འདི་ཅི་ནས་ཀྱང་རབ་ཏུ་མི་འཇིག་པར་བྱ་བའི་ཕྱིར་ངས་ཁྱོད་ལ་གཏད་དོ། །འདི་ནི་ངས་རྗེས་སུ་བསྟན་པའོ། །འདི་ནི་ངའི་རྗེས་སུ་བསྟན་པའོ། །དམ་པའི་ཆོས་ཡོངས་སུ་གཏད་པ་ཞེས་བྱ་བའི་ལེའུ་སྟེ་བཅུ་གཉིས་པ་རྫོགས་སོ།། །།