འཕགས་པ་སྙིང་རྗེ་པད་ཀར་གྱི་མདོ་ལས། དང་པོ། ཆོས་ཀྱི་འཁོར་ལོ་སྐོར་བ་ཞེས་བྱ་བའི་ལེའུ།
རྒྱ་གར་སྐད་དུ། ཨཱརྱ་ཀ་རུ་ཎཱ་པུཎྜ་རཱི་ཀ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་སྙིང་རྗེ་པད་མ་དཀར་པོ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ། དགེ་སློང་དྲུག་ཁྲི་ཉིས་སྟོང་གི་དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ་བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པ་ཤ་སྟག་དང་ཐབས་ཅིག་ཏུ་བཞུགས་ཏེ་གང་ཟག་གཅིག་མ་གཏོགས་པ་ནི་འདི་ལྟ་སྟེ། ཚེ་དང་ལྡན་པ་ཀུན་དགའ་བོའོ། །བྱམས་པ་ལ་སོགས་པ་གཟུངས་དང་། བཟོད་པ་དང་། ཏིང་ངེ་འཛིན་ཐོབ་པ། སྟོང་པ་ཉིད་ལ་གནས་པ། ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ས་ཡ་ཕྲག་བརྒྱད་དང་ཡང་ཐབས་ཅིག་གོ །མི་མཇེད་ཀྱི་བདག་པོ་ཚངས་པ་དང་། ཚངས་རིས་ཀྱི་ལྷའི་བུ་འབུམ་ཕྲག་མང་པོ་དང་ཡང་ཐབས་ཅིག་གོ །ལྷའི་བུ་གཞན་འཕྲུལ་དང་། གཞན་འཕྲུལ་གྱི་ལྷའི་བུ་ས་ཡ་ཕྲག་བརྒྱད་དང་ཡང་ཐབས་ཅིག་གོ །ལྷའི་བུ་འཕྲུལ་དགའ་དང་། འཕྲུལ་དགའི་ལྷའི་བུ་ས་ཡ་ཕྲག་བདུན་དང་ཡང་ཐབས་ཅིག་གོ །ལྷའི་བུ་ཡོངས་སུ་དགའ་ལྡན་དང་། ཡོངས་སུ་དགའ་ལྡན་ལྷའི་བུ་ས་ཡ་ཕྲག་དྲུག་དང་ཡང་ཐབས་ཅིག་གོ །ལྷའི་བུ་རབ་འཐབ་བྲལ་དང་། རབ་འཐབ་བྲལ་གྱི་ལྷའི་བུ་ས་ཡ་ཕྲག་བདུན་དང་། ཉི་འབུམ་དང་ཡང་ཐབས་ཅིག་གོ །ལྷའི་དབང་པོ་བརྒྱ་བྱིན་དང་། སུམ་ཅུ་རྩ་གསུམ་པའི་ལྷའི་བུ་ས་ཡ་ཕྲག་བརྒྱད་དང་ཡང་ཐབས་ཅིག་གོ །རྒྱལ་པོ་ཆེན་པོ་རྣམ་ཐོས་ཀྱི་བུ་གནོད་སྦྱིན་འབུམ་གྱིས་ཡོངས་སུ་བསྐོར་བ་དང་ཡང་ཐབས་ཅིག་གོ །མིག་མི་བཟང་ཀླུ་འབུམ་གྱིས་ཡོངས་སུ་བསྐོར་བ་དང་ཡང་ཐབས་ཅིག་གོ །འཕགས་སྐྱེས་
པོ་གྲུལ་བུམ་འབུམ་གྱིས་ཡོངས་སུ་བསྐོར་བ་དང་ཡང་ཐབས་ཅིག་གོ །ཡུལ་འཁོར་སྲུང་དྲི་ཟ་འབུམ་གྱིས་ཡོངས་སུ་བསྐོར་བ་དང་ཡང་ཐབས་ཅིག་གོ །ཀླུའི་རྒྱལ་པོ་དགའ་བོ་དང་། ཉེ་དགའ་བོ་ཀླུའི་རྒྱལ་པོ་སྟོང་གིས་ཡོངས་སུ་བསྐོར་བ་དང་། དེ་དག་ལ་སོགས་པ་ཐེག་པ་ཆེན་པོ་ལ་ཡང་དག་པར་ཞུགས་པ། ཕ་རོལ་ཏུ་ཕྱིན་པ་དྲུག་ལ་སྤྱོད་པ། ཕྱིན་ཅི་ལོག་བཞིའི་ཆོས་སྣང་ཞིང་གསལ་བར་རྟོགས་པར་ཁོང་དུ་ཆུད་པ་གང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཏིང་ངེ་འཛིན་སྣ་ཚོགས་རབ་ཏུ་འཐོབ་པར་འགྱུར་བ་དང་། གང་གིས་ཉན་ཐོས་དང་། རང་སངས་རྒྱས་ཀྱི་ས་ལས་ཡང་དག་པར་འདའ་བར་འགྱུར་བ་དང་། ཏིང་ངེ་འཛིན་གང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་བའི་འཕགས་པའི་བདེན་པ་བཞི་ཡང་དག་པར་རབ་ཏུ་རྟོགས་པར་བྱ་བའི་ཕྱིར་ཆོས་སྟོན་པ་ཤ་སྟག་གིས་ཡོངས་སུ་བསྐོར་ཅིང་མདུན་གྱིས་བལྟས་ཏེ་བཞུགས་སོ། །དེའི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་། བྱང་ཆུབ་སེམས་དཔའ་མཐོང་བ་དོན་ཡོད་དང་། བྱང་ཆུབ་སེམས་དཔའ་ཆུ་ལྷ་དང་། བྱང་ཆུབ་སེམས་དཔའ་སེང་གེའི་བློ་གྲོས་དང་། བྱང་ཆུབ་སེམས་དཔའ་རྣམ་པར་སྣང་བྱེད་བློ་གྲོས་དང་། དེ་དག་ལ་སོགས་པ་བྱང་ཆུབ་སེམས་དཔའ་ཁྲི་ལྷན་ཅིག་ཏུ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་ཐལ་མོ་སྦྱར་བ་བཏུད་ནས་ཤར་ལྷོའི་ཕྱོགས་ལོགས་སུ་མངོན་པར་ཕྱོགས་ཏེ་རབ་ཏུ་དགའ་ཞིང་རབ་ཏུ་དང་བའི་ཡིད་ཀྱིས་བལྟས་ནས་ཚིག་འདི་སྐད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མ་དམ་པ་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་པར་ཆོ་འཕྲུལ་ཆེན་པོ་དག་བསྟན་ནས། སེམས་ཅན་རྣམས་ལས་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་དུ་མ་དག་གི་དགེ་བའི་རྩ་བ་ཡོངས་སུ་སྨིན་པར་མཛད་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ལ་བཀོད་པ་ནི་ངོ་མཚར་ཏེ་ཕྱག་འཚལ་ལོ་ཕྱག་འཚལ་ལོ་ཞེས་ཀྱང་སྨྲས་སོ། །དེ་ནས་བྱང་ཆུབ་སེམས་དཔའ་རིན་པོ་ཆེ་རྣམ་པར་སྣང་བྱེད་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་
གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གི་སླད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཐོང་བ་དོན་ཡོད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཆུ་ལྷ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེའི་བློ་གྲོས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་སྣང་བྱེད་བློ་གྲོས་དང་། དེ་དག་ལ་སོགས་པ་བྱང་ཆུབ་སེམས་དཔའ་ཁྲིས་བཅོམ་ལྡན་འདས་ཀྱི་ཆོས་བསྟན་པ་བཅད་ནས་ལྷན་ཅིག་ཏུ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། ཐལ་མོ་སྦྱར་བ་བཏུད་ནས་ཤར་ལྷོའི་ཕྱོགས་ལོགས་སུ་མངོན་པར་ཕྱོགས་ཏེ་རབ་ཏུ་དགའ་ཞིང་རབ་ཏུ་དང་བའི་ཡིད་ཀྱིས་བལྟས་ནས་ཚིག་འདི་སྐད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མ་དམ་པ་མངོན་པར་རྫོགས་པར་སངས་རྒྱས་ནས། རིང་པོ་མ་ལོན་པར་ཆོ་འཕྲུལ་ཆེན་པོ་དག་བསྟན་ནས། སྲོག་ཆགས་བྱེ་བ་ཁྲག་ཁྲིག་འབུམ་ཕྲག་དུ་མ་དགེ་བའི་རྩ་བ་དག་ལ་ཡོངས་སུ་སྨིན་པར་མཛད་པ་ནི་ངོ་མཚར་ཏེ་ཕྱག་འཚལ་ལོ་ཕྱག་འཚལ་ལོ་ཞེས་མཆི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མ་དམ་པ་ཤུལ་ནི་ཇི་སྲིད་ཅིག་ན་བཞུགས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ནི་ཡུན་ཇི་སྲིད་ཅིག་ལགས། གང་ན་དེ་བཞིན་གཤེགས་པ་པད་མ་དམ་པ་ཞེས་བགྱི་བ་བཞུགས་པའི་འཇིག་རྟེན་གྱི་ཁམས་དེའི་མིང་ཅི་ཞེས་བགྱི། འཇིག་རྟེན་གྱི་ཁམས་དེའི་བཀོད་པ་ནི་ཇི་ལྟ་བུ་ཞིག་གིས་བརྒྱན་པ་ལགས། ཅིའི་སླད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མ་དམ་པས་ཆོ་འཕྲུལ་ཆེན་པོ་རྣམ་པ་དེ་ལྟ་བུ་དག་བསྟན་པ་མཛད། རྐྱེན་གང་གིས་ན་བྱང་ཆུབ་སེམས་དཔའ་ཁ་ཅིག་གིས་ནི་ཕྱོགས་བཅུའི་འཇིག་རྟེན་གྱི་ཁམས་བགྲང་བ་ལས་ཡང་དག་པར་འདས་པ་གཞན་དག་ན་བཞུགས་པའི་
སངས་རྒྱས་བཅོམ་ལྡན་འདས་རྣམས་མཐོང་ཞིང་། སངས་རྒྱས་བཅོམ་ལྡན་འདས་དེ་དག་གིས་ཆོ་འཕྲུལ་གང་དག་རྣམ་པར་བསྟན་པ་དེ་དག་ཀྱང་མཐོང་ལ་བདག་ཅག་གིས་མི་མཐོང་བར་འགྱུར་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་རིན་པོ་ཆེ་རྣམ་པར་སྣང་བྱེད་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ལེགས་སོ་ལེགས་སོ། །རིགས་ཀྱི་བུ་ཁྱོད་སེམས་ཅན་བྱེ་བ་ཁྲག་ཁྲིག་འབུམ་ཕྲག་མང་པོ་རྣམས་ཀྱི་དགེ་བའི་རྩ་བ་ཡོངས་སུ་སྨིན་པར་བྱ་བའི་དོན་དུ་དེ་བཞིན་གཤེགས་པ་པད་མ་དམ་པས་བྱང་ཆུབ་ཐོབ་པའི་ཆོ་འཕྲུལ་རྣམ་པར་བསྟན་པར་བྱ་བ་དང་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཡོངས་སུ་དྲི་བའི་ཕྱིར་དེ་བཞིན་གཤེགས་པ་ལ་དོན་དེ་ལྟ་བུ་ཡོངས་སུ་ཞུ་བར་སེམས་པ་ནི་ཁྱོད་ཀྱི་སྤོབས་པ་དགེ་བ་ཡིན་ཏེ་ཁྱོད་ཀྱིས་ཡོངས་སུ་ཞུས་པ་ལེགས་པ་ཡིན་ནོ། །རིགས་ཀྱི་བུ་དེའི་ཕྱིར་ཁྱོད་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་པར་བྱའོ། །བྱང་ཆུབ་སེམས་དཔའ་རིན་པོ་ཆེ་རྣམ་པར་སྣང་བྱེད་ཀྱིས་བཅོམ་ལྡན་འདས་དེ་བཞིན་ནོ་ཞེས་གསོལ་ཏེ་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་རིན་པོ་ཆེ་རྣམ་པར་སྣང་བྱེད་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་འདི་ནས་ཤར་ལྷོའི་ཕྱོགས་ལོགས་སུ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་འབུམ་ཕྲག་གང་གཱའི་ཀླུང་གི་བྱེ་མ་སྙེད་དག་གི་སངས་རྒྱས་ཀྱི་ཞིང་རྣམས་འདས་པ་ན། འཇིག་རྟེན་གྱི་ཁམས་པད་མ་ཞེས་བྱ་བ་ཡོན་ཏན་སྣ་ཚོགས་ཀྱིས་བརྒྱན་པ། མེ་ཏོག་སྣ་ཚོགས་བཀྲམ་པ། སྤོས་སྣ་ཚོགས་ཀྱིས་ཁྱབ་པ། རིན་པོ་ཆེའི་ཤིང་ལྗོན་པ་དག་གིས་བརྒྱན་པ། རིན་པོ་ཆེའི་པད་མ་དག་གིས་ཀུན་ཏུ་གང་བ་ཞིག་ཡོད་དེ། དེ་ན་ས་གཞི་ནི་བཻ་དཱུརྱ་སྔོན་པོ་ལས་གྲུབ་ཅིང་། བྱང་ཆུབ་སེམས་དཔའ་དག་གིས་ཀུན་ཏུ་གང་ལ་ཆོས་ཀྱི་སྒྲས་ཁྱབ་པ་ཡིན་ནོ། །བཻ་དཱུརྱ་ལས་གྲུབ་པའི་ས་གཞི་དེ་ཡང་ཀ་ཙ་ལིན་དི་ཀ་ལྟར་རེག་ན་བདེ་ཞིང་འཇམ་ལ། རྐང་པ་བཞག་ན་ནི་སོར་བཞི་ཙམ་ནེམས་ཞེས་བྱེད། རྐང་པ་བཏེག་ན་ནི་སོར་བཞི་ཙམ་པར་ཅེས་བྱེད་ཅིང་པད་མ་སྣ་ཚོགས་དག་གིས་ཀུན་ཏུ་གང་བ་ཡིན་ནོ། །དེ་ན་རིན་པོ་ཆེ་སྣ་བདུན་གྱི་ཤིང་ལྗོན་པ་འཕང་དུ་དཔག་ཚད་བདུན་གྱི་སྲིད་ཙམ་
པ་དག་ཡོད་དེ། ཤིང་ལྗོན་པ་དེ་དག་ལ་ལྷའི་གོས་ངུར་སྨྲིག་དག་རབ་ཏུ་འཕྱང་ཞིང་། ལྷའི་སིལ་སྙན་ཡིད་དུ་འོང་བའི་སྒྲ་ཡང་དག་པར་འབྱིན་པ་དག་ཀྱང་ཡོད་དོ། །ཤིང་ལྗོན་པ་དེ་དག་ལ་བྱ་སྣ་ཚོགས་དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་གི་སྒྲ་ཡིད་དུ་འོང་བ་རབ་ཏུ་སྒྲོགས་པ་དག་ཀྱང་ཡོད་དོ། །ཤིང་ལྗོན་པ་དེ་དག་གི་ལོ་མ་དག་ཕན་ཚུན་ཕྲད་པ་ན་ལྷའི་ལས་ཤིན་ཏུ་འདས་པའི་སིལ་སྙན་ཡན་ལག་ལྔ་དང་ལྡན་པ་དག་གི་སྒྲ་ཡང་འབྱུང་ངོ་། །ཤིང་ལྗོན་པ་རེ་རེའི་དྲི་རྒྱ་ཆེན་པོ་ལྷའི་ལས་འདས་པས་ཀྱང་དཔག་ཚད་འབུམ་དུ་ཁྱབ་པར་བྱེད་ཅིང་ཤིང་ལྗོན་པ་དེ་དག་ལ་ལྷའི་རྒྱན་དག་ཀྱང་མངོན་པར་རབ་ཏུ་འཕྱང་ངོ་། །ཤིང་ལྗོན་པ་དེ་དག་གི་བར་དག་ན་རིན་པོ་ཆེ་སྣ་བདུན་གྱི་ཁང་པ་བརྩེགས་པ་འཕང་དུ་ནི་དཔག་ཚད་ལྔ་བརྒྱ་རྒྱར་ནི་དཔག་ཚད་བརྒྱ་པ་དག་ཡོད་དེ། ཁང་པ་བརྩེགས་པ་དེ་དག་ཀུན་ལ་ཡང་ཕྱོགས་བཞི་ན་རྟ་བབས་དག་ཡོད་དོ། །རྟ་བབས་དེ་དག་གི་ནང་རོལ་ཁང་པ་བརྩེགས་པ་དེ་དག་གི་ཕྱི་རོལ་ན་རྫིང་བུ་སྲིད་དུ་ནི་དཔག་ཚད་བརྒྱད་ཅུ་རྒྱར་ནི་དཔག་ཚད་ལྔ་བཅུ་པ་དག་ཡོད་དོ། །རྫིང་བུ་དེ་དག་གི་ཕྱོགས་བཞི་ཁོ་ར་ཁོར་ཡུག་ན་རིན་པོ་ཆེ་སྣ་བདུན་ལས་བྱས་པའི་ཐེམ་སྐས་དག་ཀྱང་ཡོད་དོ། །རྫིང་བུ་དེ་དག་ཀྱང་ཁོ་ར་ཁོར་ཡུག་ཏུ་མེ་ཏོག་ཨུད་པ་ལ་དང་། པད་མ་དག་གིས་ཀུན་ནས་ཡོག་སྟེ། མེ་ཏོག་རེ་རེ་ལ་ཡང་རྒྱར་ནི་དཔག་ཚད་ཙམ་ཡོད་དོ། །མེ་ཏོག་དེ་དག་གི་ཟེ་བ་དག་ལས་བྱང་ཆུབ་སེམས་དཔའ་སེམས་དཔའ་ཆེན་པོ་དག་རབ་ཏུ་སྐྱེས་ཏེ། དེ་དག་ཀྱང་ནམ་གྱི་གུང་ཐུན་དང་པོ་ལ་པད་མ་དེ་དག་གི་ཟེ་བ་དག་ལས་སྐྱེ་ཞིང་རྣམ་པར་གྲོལ་བའི་དགའ་བ་དང་། བདེ་བ་མྱོང་བཞིན་དུ་སྐྱིལ་མོ་ཀྲུང་གིས་མཚན་མོ་དེ་འདའ་བར་བྱེད་དེ། དེ་ན་མཚན་མོ་དེའི་ནང་པར་གྱི་དུས་ཀྱི་ཚེ་ཕྱོགས་བཞི་ནས་དྲི་ཞིམ་ཞིང་ཡིད་དུ་འོང་ལ་འཇམ་ཞིང་རེག་ན་བདེ་བར་བྱེད་པའི་རླུང་དག་རབ་ཏུ་ལྡང་སྟེ། དེ་དག་གིས་མེ་ཏོག་ཁ་ཟུམས་པ་རྣམས་མངོན་པར་འབྱེད་པར་བྱེད་ཅིང་། བྱང་ཆུབ་སེམས་དཔའ་དེ་དག་ཀྱང་ཏིང་ངེ་འཛིན་དེ་ལས་ལངས་ཏེ། རྣམ་པར་གྲོལ་བའི་དགའ་བ་དང་བདེ་བ་སྤངས་ནས་པད་མའི་ཟེ་བ་དག་ལས་བབས་ཏེ། ཁང་པ་བརྩེགས་པ་དེ་དག་ཏུ་ཞུགས་ནས་རིན་པོ་ཆེ་སྣ་བདུན་གྱི་སྟན་དག་ལ་སྐྱིལ་མོ་
ཀྲུང་བཅས་ཏེ་འདུག་ཅིང་ཆོས་ཉན་པར་བྱེད་དོ། །ཤིང་ལྗོན་པ་དེ་དག་དང་ཁང་པ་བརྩེགས་པ་དེ་དག་གི་ཕྱོགས་བཞི་ཁོ་ར་ཁོར་ཡུག་དག་ན་རིན་པོ་ཆེ་འཛམ་བུ་ཆུ་བོའི་གསེར་གྱི་རི་འཕང་དུ་ནི་དཔག་ཚད་ཉི་ཤུ་རྒྱར་ནི་དཔག་ཚད་གསུམ་པ་དག་ཡོད་དེ། རི་དེ་དག་གི་བར་བར་དག་ན་ཆུ་ཤེལ་དང་། མེ་ཤེལ་དང་། ཨན་ད་རྙིལ་དང་། ནོར་བུ་སྐར་མདོག་འབུམ་ཕྲག་དུ་མ་དག་སྣང་ངོ་། །དེ་ན་སངས་རྒྱས་པད་མ་དམ་པའི་འོད་ཀྱིས་རི་དང་ནོར་བུ་དག་ལ་ཕོག་པ་ན་སངས་རྒྱས་ཀྱི་འོད་དེ་དང་། ནོར་བུའི་འོད་དེས་འཇིག་རྟེན་གྱི་ཁམས་པད་མ་དེ་རྟག་ཏུ་སྣང་བ་རྒྱ་ཆེན་པོས་ཁྱབ་པར་བྱས་ཏེ། དེ་ན་ཉི་མ་དང་ཟླ་བ་དག་གི་འོད་ཀྱང་མི་མངོན་ཏེ་གཞན་དུ་ན་གང་གི་ཚེ་པད་མ་རྣམས་ཁ་ཟུམས་ཤིང་བྱ་དག་སྒྲ་ཆུང་བར་གྱུར་པ་དེའི་ཚེ་ནི་མཚན་མོ་ཞེས་བྱ་བའི་གྲངས་སུ་འགྱུར་ལ་དེ་ལས་བཟློག་པ་ནི་ཉིན་པར་ཡིན་ནོ། །རི་དེ་དག་གི་སྟེང་ན་བཻ་དཱུརྱ་སྔོན་པོ་ལས་བྱས་པའི་ཁང་པ་བརྩེགས་པ་འཕང་དུ་ནི་དཔག་ཚད་དྲུག་ཅུ་རྒྱར་ནི་དཔག་ཚད་ཉི་ཤུ་པ་དག་ཡོད་དེ། ཁང་པ་བརྩེགས་པ་དེ་དག་གི་ཕྱོགས་བཞི་ན་རིན་པོ་ཆེ་སྣ་བདུན་ལས་བྱས་པའི་རྟ་བབས་དག་ཀྱང་ཡོད་དོ། །ཁང་པ་བརྩེགས་པ་དེ་དག་ན་རིན་པོ་ཆེ་སྣ་བདུན་ལས་བྱས་པའི་ཁྲི་དག་ཡོད་དེ་དེ་ལ་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་དག་འདུག་ཅིང་ཆོས་ཉན་པར་བྱེད་དོ། །རིགས་ཀྱི་བུ་འཇིག་རྟེན་གྱི་ཁམས་པད་མ་དེ་ན་བྱང་ཆུབ་ཀྱི་ཤིང་དབང་པོ་ཞེས་བྱ་བ་འཕང་དུ་ནི་དཔག་ཚད་སུམ་སྟོང་རྒྱར་ནི་དཔག་ཚད་ལྔ་བརྒྱ། ཡལ་ག་དང་། ལོ་མ་དང་། འདབ་མ་དག་ནི་དཔག་ཚད་སྟོང་དུ་ལེགས་པར་གནས་པ་ཡོད་དོ། །བྱང་ཆུབ་ཀྱི་ཤིང་དེའི་དྲུང་ན་དངུལ་ལས་བྱས་པའི་པད་མ་སྡོང་བུའི་འཕང་དུ་ནི་དཔག་ཚད་ལྔ་བརྒྱ་ཡོད་ལ། དེའི་འདབ་མ་ནི་གསེར་ལས་བྱས་པ་བྱེ་བ་ཕྲག་འབུམ་ཡོད་དེ་འཕང་དུ་ནི་དཔག་ཚད་ལྔ་ཡོད་དོ། །ཟེ་བ་ཐམས་ཅད་ན་རིན་པོ་ཆེ་རྡོའི་སྙིང་པོ་ལས་བྱས་པའི་ཟེའུ་འབྲུ་དག་ཡོད་དོ། །ཟེ་བ་རྣམས་ནི་རིན་པོ་ཆེ་སྣ་བདུན་ལས་བྱས་པ་སྟེ། འཕང་དུ་ནི་དཔག་ཚད་བཅུ་རྒྱར་ནི་དཔག་ཚད་བདུན་ཡོད་དོ། །དེར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མ་དམ་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །སངས་
རྒྱས་ཀྱི་གདན་པད་མ་དེའི་ཁོ་ར་ཁོར་ཡུག་ན་ཡང་པད་མ་དག་ཡོད་དེ། དེ་དག་ལ་བྱང་ཆུབ་སེམས་དཔའ་དག་འཁོད་པས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མ་དམ་པའི་ཆོ་འཕྲུལ་དག་མཐོང་བར་གྱུར་ཏོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་རིན་པོ་ཆེ་རྣམ་པར་སྣང་བྱེད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མ་དམ་པས་ཆོ་འཕྲུལ་ཆེན་པོ་ཇི་ལྟ་བུ་དག་བསྟན་པ་མཛད་པ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་རིན་པོ་ཆེ་རྣམ་པར་སྣང་བྱེད་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མ་དམ་པ་ནི་མདང་གི་ནམ་གྱི་ཐུན་ཐ་མ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། ད་ནང་ནང་པར་གྱི་དུས་ཀྱི་ཚེ་འདི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་མཛད་དེ་བདག་ཉིད་ཚངས་པའི་འཇིག་རྟེན་གྱི་བར་དུ་མངོན་པར་སྤྲུལ་ནས་དབུའི་གཙུག་ཏོར་ནས་འོད་ཟེར་བྱེ་བ་ཁྲག་ཁྲིག་འབུམ་རབ་ཏུ་བཀྱེའོ། །འོད་ཟེར་དེ་དག་གིས་སྟེང་གི་ཕྱོགས་ཀྱི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་སྣང་བས་ཁྱབ་པར་མཛད་དོ། །དེའི་ཚེ་སྟེང་གི་ཕྱོགས་ན་བྱང་ཆུབ་སེམས་དཔའ་གང་དག་གནས་པ་དག་གིས་ཐུར་དུ་བལྟས་ན་དེ་དག་ལ་རི་རབ་དང་། ཁོར་ཡུག་དང་། ཁོར་ཡུག་ཆེན་པོ་དང་། རི་ནག་པོ་རྣམས་ཀྱང་སྣང་བར་མ་གྱུར་ཏོ། །འཇིག་རྟེན་གྱི་ཁམས་དེ་དག་ན་བྱང་ཆུབ་སེམས་དཔའ་གང་དག་ལུང་བསྟན་པ་དག་དང་། གང་དག་ཏིང་ངེ་འཛིན་ཐོབ་པ་དག་དང་། གང་དག་གཟུངས་ཐོབ་པ་དག་དང་། གང་དག་བཟོད་པ་ཐོབ་པ་དག་དང་། གང་དག་ས་ལས་ཤིན་ཏུ་འདས་པ་དག་དང་། དེ་ན་གང་དག་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཀྱང་སྣང་བ་དེ་ཁྱབ་པར་གྱུར་ནས་ཐལ་མོ་སྦྱར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མ་དམ་པ་དེའི་
སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་ལེགས་པར་བརྒྱན་པའི་སྐུ་ཡང་མཐོང་། བྱང་ཆུབ་སེམས་དཔའ་འཁོར་དེ་དང་། འཇིག་རྟེན་གྱི་ཁམས་པད་མའི་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཡང་མཐོང་ངོ་། །མཐོང་ནས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་མཆོག་ཏུ་དགའ་བ་དང་། བདེ་བ་སྐྱེས་ཏེ། འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་ནས་བྱང་ཆུབ་སེམས་དཔའ་བགྲང་བ་ལས་ཡང་དག་པར་འདས་པ་དག་རང་རང་གིས་སངས་རྒྱས་ཀྱི་ཞིང་བོར་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མ་དམ་པ་ལ་མཆོད་པ་བྱ་བ་དང་། ཕྱག་བྱ་བ་དང་། བསྙེན་བཀུར་བྱ་བའི་ཕྱིར་རྫུ་འཕྲུལ་གྱི་མཐུས་འཇིག་རྟེན་གྱི་ཁམས་པད་མར་ལྷགས་སོ། །རིགས་ཀྱི་བུ་དེ་བཞིན་གཤེགས་པ་པད་མ་དམ་པ་དེས་ཀྱང་བཞུགས་པ་དང་། བཞེངས་པ་དང་། འཆགས་བཞིན་དུ་ཞལ་གྱི་སྒོ་ནས་ལྗགས་ཀྱི་དབང་པོ་ཕྱུང་སྟེ་ཐམས་ཅད་དང་ལྡན་པའི་གླིང་བཞི་པའི་འཇིག་རྟེན་གྱི་ཁམས་དེ་ལྗགས་ཀྱི་དབང་པོས་ཡོངས་སུ་ཁེབས་པར་མཛད་དོ། །དེ་ནས་བྱང་ཆུབ་སེམས་དཔའ་གང་དག་སྙོམས་པར་ཞུགས་པ་དེ་དག་ཀྱང་ཏིང་ངེ་འཛིན་ལས་ལངས་ནས་དེ་བཞིན་གཤེགས་པ་པད་མ་དམ་པ་དང་། ཐམས་ཅད་དང་ལྡན་པའི་འཁོར་ལ་མཆོད་པ་བྱ་བའི་ལས་ལ་བརྩོན་པར་གྱུར་ཏོ། །རིགས་ཀྱི་བུ་དེ་ནས་དེ་བཞིན་གཤེགས་པ་པད་མ་དམ་པས་ལྗགས་ཀྱི་དབང་པོའི་རྫུ་འཕྲུལ་མངོན་པར་འདུ་མཛད་པའི་ཕྱིར་བསྡུས་ནས། གཞན་ཡང་དེ་བཞིན་གཤེགས་པ་པད་མ་དམ་པས་སྐུ་ཐམས་ཅད་ནས་སྤུའི་ཁུང་བུ་ཐམས་ཅད་ཀྱི་སྤུའི་ཁུང་བུའི་སྒོ་རེ་རེ་ནས་ཀྱང་། འོད་ཟེར་བྱེ་བ་ཁྲག་ཁྲིག་འབུམ་ཕྲག་དྲུག་ཅུ་དྲུག་ཅུ་བྱུང་ཞིང་ཕྱོགས་བཅུའི་ཕྱོགས་རེ་རེར་ཡང་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་སྣང་བ་རྒྱ་ཆེན་པོས་ཁྱབ་པར་མཛད་ནས། འཇིག་རྟེན་གྱི་ཁམས་དེ་དག་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ལུང་བསྟན་པ་དག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཏིང་ངེ་འཛིན་ཐོབ་པ་དེ་དག་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་པད་མ་དམ་པ་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བའི་ཕྱིར་རང་རང་གི་སངས་རྒྱས་ཀྱི་ཞིང་གི་སྣང་བ་དང་། རྫུ་འཕྲུལ་གྱི་སྟོབས་ཀྱིས་འཇིག་རྟེན་གྱི་ཁམས་པད་མར་ལྷགས་སོ། །རིགས་ཀྱི་བུ་དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མ་དམ་པས་རྫུ་འཕྲུལ་མངོན་པར་འདུ་མཛད་པ་དེ་ཕྱིར་བསྡུས་ནས། སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་ཐུགས་བརྩེ་བ་དང་། ལྷ་དང་མི་རྣམས་ལ་ཕན་པ་དང་། བདེ་བ་དང་། ཐེག་པ་ཆེན་པོ་ཡོངས་སུ་རྫོགས་པར་བྱ་བའི་ཕྱིར་ཐམས་ཅད་དང་ལྡན་པའི་བྱང་ཆུབ་བྱང་ཆུབ་སེམས་དཔའི་འཁོར་ལ་ཕྱིར་མི་ལྡོག་པའི་འཁོར་ལོ་ཞེས་བྱ་བ་ཆོས་དང་ལྡན་པའི་ཆོས་ཀྱི་འཁོར་ལོ་བསྐོར་ཏོ། །ཐེག་པ་ཆེན་པོའི་མདོ་སྙིང་རྗེ་པད་མ་དཀར་པོ་ལས་ཆོས་ཀྱི་འཁོར་ལོ་བསྐོར་བ་ཞེས་བྱ་བའི་ལེའུ་སྟེ་དང་པོའོ།། །།