གསུམ་པ། སྦྱིན་པ་གཏོང་བའི་ལེའུ།
དེ་ནས་བཅོམ་ལྡན་འདས་ཀྱིས་རང་གིས་རྫུ་འཕྲུལ་མངོན་པར་མཛད་པ་སླར་བསྡུས་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཞི་བས་འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱུ་གང་དང་རྐྱེན་གང་གིས་སངས་རྒྱས་བཅོམ་ལྡན་འདས་གཞན་དག་གི་སངས་རྒྱས་ཀྱི་ཞིང་ནི་ཡོངས་སུ་དག་ཅིང་རྙོག་པ་མ་མཆིས་ལ། སྙིགས་མ་ལྔ་དང་བྲལ་ཞིང་སངས་རྒྱས་ཀྱི་ཞིང་གི་ཡོན་ཏན་བཀོད་པ་སྣ་ཚོགས་དག་མཆིས་ལ། དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ཀྱང་ཡོན་ཏན་རྣམ་པ་སྣ་ཚོགས་ཡོངས་སུ་རྫོགས་ཤིང་བདེ་བ་སྣ་ཚོགས་དང་ལྡན་ལ། དེ་ན་ཉན་ཐོས་དང་། རང་སངས་རྒྱས་རྣམས་ཀྱི་མིང་ཡང་མ་མཆིས་ན། སྐྱེ་བ་ལྟ་སྨོས་ཀྱང་ཅི་འཚལ་བར་གྱུར་ལགས། བཅོམ་ལྡན་འདས་རྒྱུ་གང་དང་རྐྱེན་གང་གིས་བཅོམ་ལྡན་འདས་ནི་སངས་རྒྱས་ཀྱི་ཞིང་སྨད་པར་འཁྲུགས་ཤིང་། ཚེའི་སྙིགས་མ་དང་། དུས་ཀྱི་སྙིགས་མ་དང་། སེམས་ཅན་གྱི་སྙིགས་མ་དང་། ལྟ་བའི་སྙིགས་མ་དང་། ཉོན་མོངས་པའི་སྙིགས་མ་བྱུང་བར་གྱུར་པ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་འཁོར་བཞི་པོ་དག་ལ་ཐེག་པ་གསུམ་ལས་བརྩམས་ཏེ་ཆོས་བསྟན་པར་
མཛད་ལགས། ཅིའི་སླད་དུ་བཅོམ་ལྡན་འདས་ཀྱིས་སངས་རྒྱས་ཀྱི་ཞིང་སྙིགས་མ་ལྔ་དང་བྲལ་ཞིང་ཡོངས་སུ་དག་པ་ཡོངས་སུ་མ་བཟུང་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་རྣམས་ནི་སྨོན་ལམ་གྱི་དབང་གིས་སངས་རྒྱས་ཀྱི་ཞིང་ཡོངས་སུ་དག་པ་ཡོངས་སུ་འཛིན་པར་བྱེད་ཅིང་སྨོན་ལམ་གྱི་དབང་གིས་སངས་རྒྱས་ཀྱི་ཞིང་ཡོངས་སུ་མ་དག་པ་ཡང་ཡོངས་སུ་འཛིན་པར་བྱེད་དོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སྙིང་རྗེ་ཆེན་པོ་དང་ལྡན་པའི་ཕྱིར་སངས་རྒྱས་ཀྱི་ཞིང་ཡོངས་སུ་མ་དག་པ་ཡང་ཡོངས་སུ་འཛིན་པར་བྱེད་པའོ། །དེ་ཅིའི་ཕྱིར་ཞེ་ན། འདི་ལྟར་ང་ད་ལྟར་སངས་རྒྱས་ཀྱི་ཞིང་སྨད་པ་འདི་ལྟ་བུར་སྐྱེས་པ་ཡང་ངས་དེ་ལྟར་སྨོན་ལམ་བཏབ་པའི་ཕྱིར་ཏེ། དེ་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་། ངས་ཁྱོད་ལ་བཤད་པར་བྱའོ། །བྱང་ཆུབ་སེམས་དཔའ་བློ་གྲོས་ཞི་བས་བཅོམ་ལྡན་འདས་དེ་བཞིན་ནོ་ཞེས་གསོལ་ཏེ། བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་སྔོན་བྱུང་བ་བསྐལ་པ་གྲངས་མེད་པ་གང་གཱའི་ཀླུང་གཅིག་གི་བྱེ་མ་སྙེད་འདས་པ་ན་སངས་རྒྱས་ཀྱི་ཞིང་འདིར་བསྐལ་པ་ཆེན་པོ་འཛིན་པ་ཞེས་བྱ་བ་ཞིག་བྱུང་སྟེ། བསྐལ་པ་ཆེན་པོ་དེ་ལ་གླིང་བཞི་པའི་སངས་རྒྱས་ཀྱི་ཞིང་འདིར་གླིང་བཞི་འཁོར་ལོས་སྒྱུར་བའི་རྒྱལ་པོ་རྩིབས་ཀྱི་མུ་ཁྱུད་ཅེས་བྱ་བ་ཞིག་བྱུང་ངོ་། །རྩིབས་ཀྱི་མུ་ཁྱུད་དེ་ལ་མདུན་ན་འདོན་བྲམ་ཟེ་རྒྱ་མཚོའི་རྡུལ་ཅེས་བྱ་བ་ཞིག་ཡོད་དེ། དེའི་བུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་ཞིང་དཔེ་བྱད་བཟང་པོ་བརྒྱད་ཅུས་ལུས་རྣམ་པར་མཛེས་ལ་བསོད་ནམས་བརྒྱའི་མཚན་དང་ལྡན་ཞིང་འོད་འདོམ་གང་བ་ཡོད་ལ། ཤིང་ནྱ་གྲོ་དྷ་ལྟར་ཆུ་ཞེང་གབ་ཅིང་ལྟ་བས་ཆོག་མི་ཤེས་པ་ཞིག་བཙས་སོ། །དེ་བཙས་མ་ཐག་ཏུ་ལྷ་འབུམ་གྱིས་མཆོད་པ་བྱས་ནས། རྒྱ་མཚོའི་སྙིང་པོ་ཞེས་བྱ་བར་མིང་བཏགས་སོ། །དེ་དུས་གཞན་ཞིག་ན་ངེས་པར་བྱུང་ནས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་
པར་སངས་རྒྱས་ཏེ། དེ་བཞིན་གཤེགས་པ་རིན་པོ་ཆེའི་སྙིང་པོ་ཞེས་བྱ་བར་གྱུར་ནས་བཅོམ་ལྡན་འདས་དེས་ཆོས་ཀྱི་འཁོར་ལོ་བསྐོར་ཏེ་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་མང་པོ་དག་མཐོ་རིས་དང་ཐར་པའི་འབྲས་བུ་ལ་རབ་ཏུ་བཀོད་པར་གྱུར་ཏོ། །དེ་དུས་གཞན་ཞིག་ན་ཉན་ཐོས་བྱེ་བ་ཁྲག་ཁྲིག་འབུམ་ཕྲག་མང་པོ་དག་གིས་ཡོངས་སུ་བསྐོར་ཅིང་མདུན་དུ་བདར་ནས་གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་རྣམས་སུ་རྒྱུ་ཞིང་གཤེགས་ཏེ། རིམ་གྱིས་གང་ན་འཁོར་ལོས་སྒྱུར་བའི་རྒྱལ་པོ་དེ་གནས་པའི་གྲོང་ཁྱེར་གཞན་ཞིག་ཏུ་གཤེགས་སོ། །དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་གྲོང་ཁྱེར་གྱི་ཕྱི་རོལ་ནས་ཧ་ཅང་ཡང་མི་རིང་བ་ན་འཛམ་བུའི་ཚལ་ཞེས་བྱ་བའི་སྐྱེད་མོས་ཚལ་ཞིག་ཡོད་པ་ན་ཉན་ཐོས་བྱེ་བ་ཁྲག་ཁྲིག་འབུམ་ཕྲག་དུ་མ་དང་ཐབས་ཅིག་ཏུ་བཞུགས་སོ། །རྒྱལ་པོ་རྩིབས་ཀྱི་མུ་ཁྱུད་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་བདག་གི་ཡུལ་དུ་གཤེགས་ནས། འཛམ་བུའི་ཚལ་གྱི་སྐྱེད་མོས་ཚལ་ན་ཉན་ཐོས་བྱེ་བ་ཁྲག་ཁྲིག་འབུམ་ཕྲག་དུ་མ་དང་ཐབས་ཅིག་ཏུ་བཞུགས་སོ་ཞེས་ཐོས་ནས་འདི་སྙམ་དུ་སེམས་ཏེ། བདག་སོང་ལ་ཕྱིན་ནས་ཀྱང་དེ་བཞིན་གཤེགས་པ་དེ་ལ་བསྟི་སྟང་དུ་བྱ། བླ་མར་བྱ། རི་མོར་བྱ། མཆོད་པར་བྱ་གོར་མ་ཆག་སྙམ་མོ། །དེ་ནས་རྒྱལ་པོ་རྩིབས་ཀྱི་མུ་ཁྱུད་རྒྱལ་པོའི་འབྱོར་པ་ཆེན་པོ་དང་། རྒྱལ་པོའི་མཐུ་ཆེན་པོས་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་དུ་མས་ཡོངས་སུ་བསྐོར་ཅིང་མདུན་དུ་བདར་ཏེ། གྲོང་ཁྱེར་ནས་བྱུང་ཞིང་འཛམ་བུའི་ཚལ་གྱི་སྐྱེད་མོས་ཚལ་ག་ལ་བ་དེར་སོང་ནས་བཞོན་པས་བགྲོད་པའི་ས་ཇི་སྲིད་པ་དེ་སྲིད་དུ་བཞོན་པས་སོང་སྟེ་ཕྱིན་པ་དང་། རྐང་པས་ཀུན་དགའི་ར་བར་ཞུགས་ནས། དེ་བཞིན་གཤེགས་པ་རིན་པོ་ཆེའི་སྙིང་པོ་ག་ལ་བ་དེར་སོང་སྟེ་ཕྱིན་པ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོའི་ཞབས་ལ་མགོ་བོས་ཕྱག་འཚལ་ཏེ་ལན་གསུམ་དུ་བསྐོར་བ་བྱས་ནས་
ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོས་རྒྱལ་པོ་རྩིབས་ཀྱི་མུ་ཁྱུད་ལ་ཆོས་ཀྱི་གཏམ་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་ཀྱི་གཏམ་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་བར་གྱུར་ཏོ།། །།བམ་པོ་གསུམ་པ། དེ་ནས་རྒྱལ་པོ་རྩིབས་ཀྱི་མུ་ཁྱུད་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་དེ་བཞིན་གཤེགས་པ་རིན་པོ་ཆེའི་སྙིང་པོ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་ཞབས་གཉིས་ལ་གཏུགས་ནས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་དགུང་ཟླ་གསུམ་པོ་འདི་ལ་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལ་ན་བཟའ་དང་། བཤོས་དང་། གཟིམས་ཆ་དང་། གདན་དང་། སྙུན་གྱི་གསོས་སྨན་དང་། ཡོ་བྱད་རྣམས་ཀྱིས་བསྙེན་བཀུར་བགྱི་བར་འཚལ་ན་བཅོམ་ལྡན་འདས་དང་དགེ་སློང་གི་དགེ་འདུན་གྱིས་གནང་བར་མཛད་དུ་གསོལ། རིགས་ཀྱི་བུ་དེ་བཞིན་གཤེགས་པ་རིན་པོ་ཆེའི་སྙིང་པོས་རྒྱལ་པོ་རྩིབས་ཀྱི་མུ་ཁྱུད་ལ་ཅང་མི་གསུང་བས་གནང་བར་མཛད་དོ། །དེ་ནས་རྒྱལ་པོ་རྩིབས་ཀྱི་མུ་ཁྱུད་ཀྱིས་དེ་བཞིན་གཤེགས་པ་རིན་པོ་ཆེའི་སྙིང་པོས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་ཐད་ནས་སོང་ངོ་། །དེ་ནས་རྒྱལ་པོ་རྩིབས་ཀྱི་མུ་ཁྱུད་ཀྱིས་ཁམས་ཀྱི་རྒྱལ་པོ་རྣམས་དང་། བློན་པོ་རྣམས་དང་། སྣ་ཆེན་པོ་ལ་གཏོགས་པ་རྣམས་དང་། བློན་པོ་ཕྲ་མོ་རྣམས་དང་། གྲོང་མི་རྣམས་དང་། ལྗོངས་ཀྱི་མི་རྣམས་དང་། ཞོ་ཤས་འཚོ་བའི་མི་རྣམས་བོས་ཏེ་སྨྲས་པ། གཙོ་བོ་
དག་ཤེས་པར་གྱིས་ཤིག །ངས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་དགེ་སློང་གི་དགེ་འདུན་དང་བཅས་པ་ཟླ་བ་གསུམ་པོ་འདི་ལ་ཡོ་བྱད་ཐམས་ཅད་ཀྱིས་ངེས་པར་སྤྱན་དྲངས་ཏེ། ང་ལ་ཉེ་བར་སྤྱད་པ་དང་། ཡོངས་སུ་སྤྱད་པ་དང་། བསྙེན་བཀུར་བྱ་བ་དང་། དགའ་མགུར་སྤྱད་པ་དང་། བཙུན་མོའི་འཁོར་གང་ཅི་ཡོད་པ་དེ་དག་ཐམས་ཅད་ཀྱང་ངས་བཅོམ་ལྡན་འདས་དང་། དགེ་སློང་གི་དགེ་འདུན་ལ་གུས་པར་བྱས་ཏེ་ཕུལ་གྱིས། ཁྱེད་ཅག་ལ་གང་ཟག་གིས་ཉེ་བར་སྤྱད་པ་དང་། ཡོངས་སུ་སྤྱད་པ་དང་། བསྙེན་བཀུར་བྱ་བ་དང་། དགའ་མགུར་སྤྱད་པ་དང་། ཆུང་མའི་འཁོར་ཇི་ཡོད་པ་དེ་དག་ཐམས་ཅད་ཀྱང་བཅོམ་ལྡན་འདས་དང་དགེ་སློང་གི་དགེ་འདུན་ལ་གུས་པར་ཕུལ་ཅིག་ཅེས་བསྒོ་ནས། དེ་དག་གིས་ཀྱང་དེ་བཞིན་དུ་ཕུལ་ལོ། །ཁྱིམ་བདག་རིན་པོ་ཆེས་ཀྱང་སྐྱེད་མོས་ཚལ་བཟང་པོ་ཐམས་ཅད་འཛམ་བུའི་ཆུ་བོའི་གསེར་ལས་བྱས་ཤིང་སྐྱེད་མོས་ཚལ་དེ་ཉིད་དུ་བཅོམ་ལྡན་འདས་ཀྱི་ཕྱིར་རིན་པོ་ཆེ་སྣ་བདུན་གྱི་ཁང་པ་བརྩེགས་པ་བརྩིགས་ཏེ། དེའི་ཕྱོགས་བཞི་ཁོ་ར་ཁོར་ཡུག་དག་ཏུ་རིན་པོ་ཆེ་སྣ་བདུན་གྱི་སྒོ་དག་ཀྱང་བཏོད་དོ། །སྐྱེད་མོས་ཚལ་ཐམས་ཅད་ཀྱང་རིན་པོ་ཆེ་སྣ་བདུན་གྱི་ཤིང་ལྗོན་པ་དག་གིས་བརྒྱན་ཏོ། །ཤིང་ལྗོན་པ་དེ་དག་ཀྱང་གོས་སྣ་ཚོགས་དང་། རས་བཅོས་བུ་སྣ་ཚོགས་དང་། གདུགས་སྣ་ཚོགས་དང་། མུ་ཏིག་གི་ལྡ་ལྡི་སྣ་ཚོགས་དང་། རྒྱན་སྣ་ཚོགས་དང་། རིན་པོ་ཆེའི་རྒྱན་སྣ་ཚོགས་དང་། སྤོས་སྣ་ཚོགས་དག་གིས་ལེགས་པར་བརྒྱན་ཏོ། །ཤིང་ལྗོན་པ་དེ་དག་རིན་པོ་ཆེའི་མེ་ཏོག་དང་། འབྲས་བུ་ཐམས་ཅད་ཀྱིས་ཀྱང་བརྒྱན་ཏོ། །སྐྱེད་མོས་ཚལ་དེ་དག་ཐམས་ཅད་ནོར་བུ་རྣམ་པ་དུ་མ་དག་གིས་ཀྱང་བརྒྱན་ནས་མེ་ཏོག་སྣ་ཚོགས་བཀྲམ་ཞིང་དར་དང་། རས་བཅོས་བུ་དང་། བེའུ་རས་དང་། བགོ་བ་སྣ་ཚོགས་དག་གི་གདན་དག་ཀྱང་བཤམས་སོ། །འཁོར་ལོ་རིན་པོ་ཆེ་དེ་ཡང་ཁང་པ་བརྩེགས་པའི་ཕྱི་རོལ་གྱི་སྟེང་གི་བར་སྣང་ལ་མིའི་ཚད་ཙམ་དུ་རེད་དེ་བཅོམ་ལྡན་འདས་ཀྱི་སྤྱན་སྔར་བབ་པར་འབར་ཞིང་འདུག་གོ །གླང་པོ་རིན་པོ་ཆེ་ཐལ་ཀར་ཡན་ལག་བདུན་ལེགས་པར་གནས་པ་ཡང་བཅོམ་ལྡན་འདས་ཀྱི་སྣམ་
ལོགས་ན། བཅོམ་ལྡན་འདས་ཀྱི་སྟེང་དུ་རིན་པོ་ཆེའི་ཤིང་ལྗོན་པ་འཛིན་ཅིང་འདུག་སྟེ། ཤིང་ལྗོན་པ་དེ་ཡང་རིན་པོ་ཆེ་སྣ་བདུན་དང་། མུ་ཏིག་གི་ལྡ་ལྡི་སྣ་ཚོགས་དང་། རྒྱན་སྣ་ཚོགས་དང་། མེ་ཏོག་ཕྲེང་སྣ་ཚོགས་དག་གིས་བརྒྱན་ཅིང་། དར་སྣ་ཚོགས་དང་། རས་བཅོས་བུ་སྣ་ཚོགས་དག་གིས་ལེགས་པར་བརྒྱན་ནས་ཤིང་ལྗོན་པ་དེ་ལ་རིན་པོ་ཆེ་སྣ་བདུན་གྱི་གདུགས་དག་ཀྱང་དཔྱངས་པར་གྱུར་ཏོ། །རྒྱལ་པོ་རྩིབས་ཀྱི་མུ་ཁྱུད་ཀྱི་བཙུན་མོ་དམ་པ་གང་ཡིན་པ་དེ་ཡང་བཅོམ་ལྡན་འདས་ཀྱི་སྤྱན་སྔར་འདུག་ནས། བཅོམ་ལྡན་འདས་ལ་ཙན་དན་ས་མཆོག་པ་དང་། ཙན་དན་སྦྲུལ་གྱི་སྙིང་པོའི་ཕྱེ་མ་དག་འཐོར་བར་བྱེད་དོ། །རྒྱལ་པོ་རྩིབས་ཀྱི་མུ་ཁྱུད་ཀྱི་ནོར་བུ་རིན་པོ་ཆེ་འོད་གསལ་བར་གྱུར་པ་གང་ཡིན་པ་དེ་ཡང་རང་གིས་བཅོམ་ལྡན་འདས་ཀྱི་སྤྱན་སྔར་བཞག་གོ །དེ་ནས་ནོར་བུ་རིན་པོ་ཆེ་དེའི་འོད་ཀྱིས་སྐྱེད་མོས་ཚལ་དེ་དག་ཐམས་ཅད་རྟག་པར་རྒྱུན་དུ་སྣང་བ་རྒྱ་ཆེན་པོས་ཁྱབ་པར་གྱུར་ཏོ། །སངས་རྒྱས་ཀྱི་འོད་ཀྱིས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ཐམས་ཅད་རྟག་པར་རྒྱུན་དུ་ཁྱབ་པར་གྱུར་ཏོ། །ཉན་ཐོས་རེ་རེ་ལ་ཡང་ཙན་དན་ས་མཆོག་པའི་རྐང་རྟེན་དག་བཞག་གོ །ཉན་ཐོས་རེ་རེའི་རྒྱབ་ཏུ་ཡང་གླང་པོ་ཆེའི་གཙོ་བོ་ཐལ་ཀར་སྔ་མ་ལྟ་བུ་དག་དང་། ཇི་ལྟར་བཅོམ་ལྡན་འདས་ལ་འཁོར་ལོ་རིན་པོ་ཆེའི་མིའི་ཚད་ཙམ་པ་བཞག་པ་དེ་ལྟ་བུ་དག་ཀྱང་བཞག་གོ །ཉན་ཐོས་རེ་རེའི་མདུན་དུ་ཡང་བུ་མོ་རྒྱན་ཐམས་ཅད་ཀྱིས་བརྒྱན་པ་དག་བཀོད་ནས་ཙན་དན་ས་མཆོག་པའི་ཕྱེ་མ་དག་ཀྱང་འཐོར་བར་བྱེད་དོ། །ཉན་ཐོས་རེ་རེའི་མདུན་དུ་ནོར་བུ་བཻ་དཱུརྱ་དག་ཀྱང་བཞག་གོ །སྐྱེད་མོས་ཚལ་གྱི་ནང་གི་ཁོ་ར་ཁོར་ཡུག་དག་ཏུ་རོལ་མོའི་སྒྲ་སྣ་ཚོགས་དག་ཀྱང་བསྒྲགས་སོ། །སྐྱེད་མོས་ཚལ་གྱི་ཕྱི་རོལ་གྱི་ཁོ་ར་ཁོར་ཡུག་དག་ན་བློན་པོ་རིན་པོ་ཆེ་དཔུང་གི་ཚོགས་ཡན་ལག་བཞི་དང་བཅས་པ་དག་ཀྱང་གནས་སོ། །རིགས་ཀྱི་བུ་དེ་ནས་རྒྱལ་པོ་རྩིབས་ཀྱི་མུ་ཁྱུད་དེ་བཅོམ་ལྡན་འདས་ལ་བལྟ་བ་དང་། བཅོམ་ལྡན་འདས་ལ་བསྙེན་བཀུར་བྱ་བའི་ཕྱིར་ཉིན་གཅིག་བཞིན་དུ་གྲོང་ཁྱེར་ནས་བྱུང་སྟེ། དེ་བཞོན་པས་བགྲོད་པའི་ས་ཇི་སྲིད་པ་དེ་སྲིད་དུ་བཞོན་པས་སོང་
ནས་བཞོན་པ་ལས་བབས་ཏེ། རྐང་པས་སྐྱེད་མོས་ཚལ་དུ་ཞུགས་སོ། །ཞུགས་ནས་ཀྱང་དེ་བཞིན་གཤེགས་པ་རིན་པོ་ཆེའི་སྙིང་པོ་ག་ལ་བ་དེར་སོང་སྟེ་ཕྱིན་པ་དང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོའི་ཞབས་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ནས། རང་གིས་དེ་བཞིན་གཤེགས་པ་རིན་པོ་ཆེའི་སྙིང་པོ་ཕྱག་ཆབ་གསོལ་ཏེ། བདག་ཉིད་ལག་དར་ནས་བཟའ་བ་དང་། བཅའ་བ་དང་། བལྡག་པ་དང་། བསོད་པ་མང་པོ་དག་ལེགས་པར་བསྟབས་ཤིང་ཚིམ་པར་བྱས་སོ། །བདག་ཉིད་ལག་དར་ཏེ་ལེགས་པར་བསྟབས་ཤིང་ཚིམ་པར་བྱས་ནས་ཀྱང་བཅོམ་ལྡན་འདས་ཀྱིས་ཕྱག་ནས་ལྷུང་བཟེད་བཞག་སྟེ་ཕྱག་བཅབས་པར་རིག་ནས། བདག་ཉིད་ཀྱིས་བསིལ་ཡབ་བླངས་ཏེ་བཅོམ་ལྡན་འདས་ལ་གཡབས་སོ། །རྒྱལ་ བུ་སྟོང་དང་། ཁམས་ཀྱི་རྒྱལ་པོ་སྟོང་གིས་ཀྱང་ཉན་ཐོས་རེ་རེ་ལ་དེ་ལྟ་བུའི་བསྙེན་བཀུར་བྱས་ནས་བསིལ་ཡབ་བླངས་ཏེ། ཉན་ཐོས་རྣམས་ལ་གཡབས་སོ། །ཞལ་ཟས་བྲིམ་པ་རྫོགས་ཏེ་གདུགས་ཚོད་གྱུ་མ་ཐག་ཏུ་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་དུ་མ་དག་ཀྱང་ཆོས་མཉན་པའི་ཕྱིར་ཀུན་དགའ་ར་བར་ལྷགས་སོ། །ལྷ་བྱེ་བ་ཁྲག་ཁྲིག་འབུམ་ཕྲག་དུ་མ་དག་གིས་ཀྱང་ནམ་མཁའི་དཀྱིལ་ནས་མེ་ཏོག་གི་ཆར་དག་མངོན་པར་རབ་ཏུ་ཕབ་ནས། ལྷའི་རོལ་མོའི་སྒྲ་དག་ཀྱང་རབ་ཏུ་བསྒྲགས་སོ། །ལྷའི་གདུགས་དང་། གོས་དང་། རྒྱན་དག་ཀྱང་རབ་ཏུ་དཔྱངས་སོ། །གནོད་སྦྱིན་གོས་སྔོན་པོ་ཅན་ས་ཡ་ཕྲག་བཞིས་ཀྱང་བཅོམ་ལྡན་འདས་དང་དགེ་སློང་གི་དགེ་འདུན་བསྲུང་བའི་ཕྱིར་ཙན་དན་གྱི་ཚལ་ནས་ཙན་དན་ས་མཆོག་པའི་སྡོང་པོ་དག་བླངས་ནས་ཐུན་དུ་བླགས་ཏེ་མེལ་ཚེ་བྱེད་དོ། །རྒྱལ་པོ་རྩིབས་ཀྱི་མུ་ཁྱུད་ཉིད་ཀྱིས་ཀྱང་མཚན་མོ་བཅོམ་ལྡན་འདས་དང་དགེ་སློང་གི་དགེ་འདུན་རྣམས་ཀྱི་སྤྱན་སྔར་མར་མེ་ཁ་བྱེ་བ་ཁྲག་ཁྲིག་འབུམ་ཕྲག་དུ་མ་དག་བུས་སོ། །རིགས་ཀྱི་བུ་དེ་ནས་རྒྱལ་པོ་རྩིབས་ཀྱི་མུ་ཁྱུད་བཅོམ་ལྡན་འདས་ཀྱི་སྤྱན་སྔར་འདུག་ནས། མགོའི་སྟེང་དུ་ཡང་མར་མེའི་ཀོང་བུ་གཅིག་བཞག །ཕྲག་པ་གཉིས་དང་། ལག་པ་གཉིས་དང་། རྐང་པ་གཉིས་སུ་ཡང་མར་མེའི་ཀོང་བུ་རེ་རེ་བཞག་
སྟེ། བཅོམ་ལྡན་འདས་ཀྱི་སྤྱན་སྔར་མཚན་ཡལ་ནངས་སུ་མར་མེ་བཏང་ཡང་བཅོམ་ལྡན་འདས་ཀྱི་མཐུས་ལུས་ལ་ངལ་བ་མེད་ཅིང་། འདི་ལྟ་སྟེ་དཔེར་ན་དགེ་སློང་བསམ་གཏན་གསུམ་པ་ལ་སྙོམས་པར་ཞུགས་པ་དེ་ལྟ་བུར་ལུས་ཀྱི་བདེ་བ་ཚོར་བར་གྱུར་ཏེ། དེ་ལྟར་ལུས་ངལ་བ་མེད་པ་དང་། སེམས་ངལ་བ་མེད་པར་ཟླ་བ་གསུམ་དུ་བཅོམ་ལྡན་འདས་ལ་བསྙེན་བཀུར་བྱས་སོ། །དེ་བཞིན་དུ་རྒྱལ་བུ་སྟོང་དང་། ཁམས་ཀྱི་རྒྱལ་པོ་བརྒྱད་ཁྲི་བཞི་སྟོང་དང་། གཞན་ཡང་སྲོག་ཆགས་བྱེ་བ་ཁྲག་ཁྲིག་ཕྲག་འབུམ་གྱིས་ཀྱང་ཉན་ཐོས་རེ་རེ་ལ་ཟླ་བ་གསུམ་དུ་རྒྱལ་པོའི་ཡོ་བྱད་དང་། དེ་ལྟ་བུའི་བསྙེན་བཀུར་གྱིས་བསྙེན་བཀུར་བྱས་སོ། །ཅི་ལྟར་རྒྱལ་པོ་རྩིབས་ཀྱི་མུ་ཁྱུད་ཀྱིས་དེ་བཞིན་གཤེགས་པ་རིན་པོ་ཆེའི་སྙིང་པོ་ལ་བསྙེན་བཀུར་བྱས་པ་དེ་བཞིན་དུ་བཙུན་མོ་དམ་པ་ལྷ་མོ་དཔལ་གྱིས་ཀྱང་ཟླ་བ་གསུམ་དུ་སྤོས་དང་། མེ་ཏོག་དག་གིས་བསྙེན་བཀུར་བྱས་སོ། །དེ་བཞིན་དུ་བུ་མོ་བྱེ་བ་ཁྲག་ཁྲིག་འབུམ་ཕྲག་མང་པོ་དག་གིས་ཀྱང་ཉན་ཐོས་རེ་རེ་ལ་ཟླ་བ་གསུམ་དུ་མེ་ཏོག་དང་། བདུག་པ་དང་། སྤོས་དག་གིས་བསྙེན་བཀུར་བྱས་སོ། །རིགས་ཀྱི་བུ་དེ་ནས་རྒྱལ་པོ་རྩིབས་ཀྱི་མུ་ཁྱུད་ཀྱིས་ཟླ་བ་གསུམ་པོ་འདས་ནས་བཅོམ་ལྡན་འདས་ལ་འཛམ་བུའི་ཆུ་བོའི་གསེར་ལས་བྱས་པའི་རྒྱན་བརྒྱད་ཁྲི་བཞི་སྟོང་ཕུལ་ལོ། །བཅོམ་ལྡན་འདས་ལ་འཁོར་ལོ་རིན་པོ་ཆེ་ལ་སོགས་པ་གསེར་གྱི་འཁོར་ལོ་རིན་པོ་ཆེ་བརྒྱད་ཁྲི་བཞི་སྟོང་ཡང་ཕུལ་ལོ། །བཅོམ་ལྡན་འདས་ལ་གླང་པོ་རིན་པོ་ཆེ་ལ་སོགས་པ་གླང་པོ་ཆེ་ཐལ་ཀར་བརྒྱད་ཁྲི་བཞི་སྟོང་ཡང་ཕུལ་ལོ། །བཅོམ་ལྡན་འདས་ལ་རྟ་རིན་པོ་ཆེ་ལ་སོགས་པ་རྟ་བརྒྱད་ཁྲི་བཞི་སྟོང་ཡང་ཕུལ་ལོ། །བཅོམ་ལྡན་འདས་ལ་ནོར་བུ་རིན་པོ་ཆེ་ལ་སོགས་པ་ནོར་བུ་མེ་ཤེལ་བརྒྱད་ཁྲི་བཞི་སྟོང་ཡང་ཕུལ་ལོ། །བཅོམ་ལྡན་འདས་དེ་ལ་བསྙེན་བཀུར་བྱ་བའི་ཕྱིར་ཁྱིམ་བདག་རིན་པོ་ཆེ་ལ་སོགས་པ་རྒྱལ་བུ་བརྒྱད་ཁྲི་བཞི་སྟོང་ཡང་ཕུལ་ལོ། །བཅོམ་ལྡན་འདས་ལ་བསྙེན་བཀུར་བྱ་བའི་ཕྱིར་བློན་པོ་རིན་པོ་ཆེ་ལ་སོགས་པ་ཁམས་ཀྱི་རྒྱལ་པོ་བརྒྱད་ཁྲི་བཞི་སྟོང་ཡང་ཕུལ་ལོ། །བཅོམ་ལྡན་འདས་དང་དགེ་སློང་གི་དགེ་འདུན་གྱི་འཚོ་བའི་ཕྱིར་བཙུན་མོའི་འཁོར་གྱི་གྲོང་ཁྱེར་ལ་སོགས་པ་གྲོང་ཁྱེར་བརྒྱད་ཁྲི་བཞི་
སྟོང་ཡང་ཕུལ་ལོ། །བཅོམ་ལྡན་འདས་ལ་རིན་པོ་ཆེའི་དཔག་བསམ་གྱི་ཤིང་བརྒྱད་ཁྲི་བཞི་སྟོང་དང་། རིན་པོ་ཆེའི་མེ་ཏོག་གི་ཕུང་པོ་བརྒྱད་ཁྲི་བཞི་སྟོང་དང་། རིན་པོ་ཆེ་སྣ་བདུན་གྱི་གདུགས་བརྒྱད་ཁྲི་བཞི་སྟོང་དང་། རྒྱལ་པོ་ལ་འོས་པའི་གོས་རྒྱན་ཆེན་པོ་བརྒྱད་ཁྲི་བཞི་སྟོང་དང་། རིན་པོ་ཆེའི་ཕྲེང་བ་བརྒྱད་ཁྲི་བཞི་སྟོང་དང་། རྒྱན་དང་། ཁྲིའུ་དང་། མགོ་ལྟ་བུ་དང་། མིག་ལྟ་བུ་དང་། སྙན་ཆ་གདུབ་འཁོར་དང་། གསེར་གྱི་ཙོང་ཙོང་དང་། མུ་ཏིག་གི་དོ་ཤལ་དང་། ཆགས་དང་། གཟིམས་ཆ་དང་། ཞབས་རྟེན་དང་། སྣོད་དང་། རྔ་བོ་ཆེ་དང་། རོལ་མོའི་སྒྲ་དང་། དུང་དང་། དྲིལ་བུ་དང་། རྒྱལ་མཚན་དང་། རིལ་བ་བྷྲིང་ག་ར་དང་། ཀུན་དགའི་ར་བ་དང་། མར་མེའི་ཀོང་བུ་དག་ཀྱང་ཕུལ་ལོ། །བཅོམ་ལྡན་འདས་ལ་རིན་པོ་ཆེའི་བྱ་དང་། རིན་པོ་ཆེའི་རི་དགས་དང་། བསིལ་ཡབ་བརྒྱད་ཁྲི་བཞི་སྟོང་ཡང་ཕུལ་ལོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་ལ་སྨན་བཅུད་ཀྱིས་ལེན་བརྒྱད་ཁྲི་བཞི་སྟོང་ཡང་ཕུལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་བགྱི་བ་མང་ཞིང་བགྱིད་པ་མང་བ་ལགས་ན། བཅོམ་ལྡན་འདས་ཀྱིས་བདག་ལ་བཟོད་པ་མཛད་ཅིང་། བདག་ཅག་གི་སྐྱེད་མོས་ཚལ་དུ་བཞུགས་པ་དང་། བཅོམ་ལྡན་འདས་སྐྱེད་མོས་ཚལ་འདིར་རྟག་ཏུ་དགྱེས་པར་མཛད་དུ་གསོལ། བཅོམ་ལྡན་འདས་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བའི་སླད་དུ་བདག་སླད་ཀྱིས་ཀྱང་མཆིའོ། །རྒྱལ་པོ་རྩིབས་ཀྱི་མུ་ཁྱུད་ཀྱི་བུ་སྟོང་པོ་གང་ཡིན་པ་དེ་དག་གིས་ཀྱང་བཅོམ་ལྡན་འདས་ཀྱི་ཞབས་ལ་གཏུགས་ནས། སོ་སོ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་ཅག་རེ་རེས་ཀྱང་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལ་དགུང་ཟླ་གསུམ་ཞིག་ཡོ་བྱད་ཐམས་ཅད་ཀྱིས་བསྙེན་བཀུར་བགྱི་བར་འཚལ་ན་བཅོམ་ལྡན་འདས་ཀྱིས་བདག་ཅག་ལ་གནང་བར་མཛད་དུ་གསོལ། བཅོམ་ལྡན་འདས་ཀྱིས་ཅང་མི་གསུང་བས་རྒྱལ་བུ་དེ་དག་ལ་གནང་བར་མཛད་དོ། །དེ་ནས་རྒྱལ་པོ་རྩིབས་ཀྱི་མུ་ཁྱུད་ཀྱིས་གནང་བར་རིག་ནས། བཅོམ་ལྡན་འདས་དང་
དགེ་སློང་གི་དགེ་འདུན་གྱི་ཞབས་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔ་ནས་ཕྱིར་སོང་ངོ་། །དེ་ནས་རྒྱལ་བུ་དེ་དག་གི་ཐུ་བོ་མིག་མི་འཛུམས་ཞེས་བྱ་བས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལ་ཟླ་བ་གསུམ་གྱི་བར་དུ་ཇི་ལྟར་རྒྱལ་པོ་རྩིབས་ཀྱི་མུ་ཁྱུད་ཀྱིས་བསྙེན་བཀུར་བྱས་པ་དེ་ལྟ་བུའི་བསྙེན་བཀུར་བྱ་བས་བསྙེན་བཀུར་བྱས་སོ། །རྒྱལ་པོ་རྩིབས་ཀྱི་མུ་ཁྱུད་ཀྱང་བཅོམ་ལྡན་འདས་དང་། དགེ་སློང་གི་དགེ་འདུན་ལ་ལྟ་བ་དང་། ཆོས་མཉན་པའི་ཕྱིར་ཉིན་མོ་སྐབས་སྐབས་སུ་འོང་ངོ་། །རིགས་ཀྱི་བུ་དེ་ནས་དེ་བཞིན་གཤེགས་པ་རིན་པོ་ཆེའི་སྙིང་པོའི་ཡབ་བྲམ་ཟེ་རྒྱ་མཚོའི་རྡུལ་ཅེས་བྱ་བ་དེ་ཡང་འཛམ་བུའི་གླིང་ཐམས་ཅད་ཉུལ་ཞིང་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དག་ལས་ཟས་སློང་བར་བྱེད་དེ། དེ་ལ་ཟས་དེ་སྦྱིན་པ་ན་ཇི་སྲིད་དུ་ཁྱེའུ་དང་། བུ་མོ་དེ་དག་གསུམ་ལ་སྐྱབས་སུ་འགྲོ་བ་ལ་རབ་ཏུ་འགོད་ཅིང་། རབ་ཏུ་བཀོད་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་མི་བྱེད་པ་དེ་སྲིད་དུ་ལེན་པར་མི་བྱེད་དོ། །དེ་ལྟར་ཉུལ་བ་ན་འཛམ་བུའི་གླིང་ན་བྲམ་ཟེ་རྒྱ་མཚོའི་རྡུལ་དེས་གང་ཟས་ཀྱིས་ཡོངས་སུ་མ་བཟུང་བ་དང་། གང་དཀོན་མཆོག་གསུམ་ལ་སྐྱབས་སུ་འགྲོ་བ་ལ་མ་བཀོད་པ་དང་། གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མ་བསྐྱེད་པ་དང་། གང་བླ་ན་མེད་པའི་ཡེ་ཤེས་ལ་རབ་ཏུ་མ་བཀོད་ཅིང་ཡང་དག་པར་འཛིན་དུ་མ་བཅུག་པའི་མིར་གྱུར་པ་འགའ་ཡང་མེད་དོ། །སྲོག་ཆགས་བྱེ་བ་ཁྲག་ཁྲིག་འབུམ་ཕྲག་མང་པོ་དག་གསུམ་ལ་སྐྱབས་སུ་འགྲོ་བའི་གནས་ལ་བཀོད་དོ། །དེ་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་དོ། །རྒྱལ་བུ་གཞོན་ནུ་མིག་མི་འཛུམས་ཀྱིས་ཀྱང་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ཟླ་བ་གསུམ་དུ་སྤྱན་དྲངས་ཤིང་། ཇི་ལྟར་རྒྱལ་པོ་རྩིབས་ཀྱི་མུ་ཁྱུད་ཀྱིས་བསྙེན་བཀུར་བྱས་པ་དེ་ལྟ་བུའི་བསྙེན་བཀུར་གྱིས་བསྙེན་བཀུར་བྱས་ནས་ཟླ་བ་གསུམ་འདས་པ་དང་། དེས་ཀྱང་བཅོམ་ལྡན་འདས་
ལ་འཁོར་ལོ་རིན་པོ་ཆེ་རྩིབས་ཐམས་ཅད་གསེར་ལས་བྱས་པ་བརྒྱད་ཁྲི་བཞི་སྟོང་ཕུལ་ལོ། །གླང་པོ་ཆེ་དང་། རྟ་དང་། ནོར་བུ་དང་། བུད་མེད་དང་། ཁྱིམ་བདག་དང་། བློན་པོ་རིན་པོ་ཆེ་རྣམས་མ་གཏོགས་པ་གླང་པོ་ཆེ་དང་། རྟ་བརྒྱད་ཁྲི་བཞི་སྟོང་དང་། དེ་བཞིན་དུ་ནོར་བུ་མེ་ཤེལ་དང་། ཁྱེའུ་དང་། བུ་མོ་དང་། དཔག་བསམ་གྱི་ཤིང་དང་། མེ་ཏོག་གི་ཕུང་པོ་དང་། གདུགས་དང་། གོས་དང་། མེ་ཏོག་ཕྲེང་དང་། རྒྱན་དང་། རིན་པོ་ཆེའི་ཁྲིའུ་དང་། མགོ་ལྟ་བུ་དང་། མིག་ལྟ་བུ་དང་། སྙན་ཆ་གདུབ་འཁོར་དང་། གསེར་གྱི་ཙོང་ཙོང་དང་། མུ་ཏིག་གི་དོ་ཤལ་དང་། ཆགས་དང་།གཟིམས་ཆ་དང་། གདན་དང་། ཞབས་རྟེན་དང་། སྣོད་དང་། རྔ་བོ་ཆེ་དང་། རོལ་མོའི་སྒྲ་དང་། དུང་དང་། རྔ་པ་ཊ་ཧ་དང་། རྒྱལ་མཚན་དང་། རིལ་བ་བྷྲིང་ག་ར་དང་། ཀུན་དགའི་ར་བ་དང་། མར་མེའི་ཀོང་བུ་དང་། རིན་པོ་ཆེའི་བྱ་སྣ་ཚོགས་དང་། རིན་པོ་ཆེའི་རི་དགས་སྣ་ཚོགས་དང་། སྨན་བཅུད་ཀྱིས་ལེན་ལ་སོགས་པ་སྣ་རེ་རེ་ཞིང་ཡང་བརྒྱད་ཁྲི་བཞི་སྟོང་བཞི་སྟོང་ཡང་ཕུལ་ལོ། །དགེ་སློང་གི་དགེ་འདུན་ལ་ཡང་དེ་སྙེད་ཕུལ་ལོ། །དེ་ནས་རྒྱལ་བུ་གཞོན་ནུ་མིག་མི་འཛུམས་ཀྱིས་བཅོམ་ལྡན་འདས་དང་དགེ་སློང་གི་དགེ་འདུན་ལ་བཟོད་པ་གསོལ་ཏེ། རྒྱལ་བུ་གཞོན་ནུ་མིག་མི་འཛུམས་ཀྱིས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལ་ཇི་ལྟར་རྒྱལ་པོ་རྩིབས་ཀྱི་མུ་ཁྱུད་ཀྱིས་བསྙེན་བཀུར་བྱས་པ་དེ་ལྟ་བུའི་བསྙེན་བཀུར་གྱིས་བསྙེན་བཀུར་བྱས་ཤིང་དེ་ལས་མི་ཉུང་བའི་ཡོན་ཡང་ཕུལ་ལོ། །དེ་བཞིན་དུ་རྒྱལ་བུ་གཞོན་ནུ་དབང་པོའི་ཚོགས་ཀྱིས་ཀྱང་བཅོམ་ལྡན་འདས་དང་། དགེ་སློང་གི་དགེ་འདུན་ལ་ཟླ་བ་གསུམ་གྱི་བར་དུ་འབྱོར་པ་ཡོངས་སུ་བཏང་ཞིང་བསྙེན་བཀུར་བྱས་སོ། །དེ་བཞིན་དུ་སྦྱར་ཏེ་རྒྱལ་བུ་གཞོན་ནུ་ཉོན་མོངས་མེད་དང་། འཇིགས་མེད་དང་། ནམ་མཁའ་དང་། ཡན་ལག་སྐྱེས་དང་། གྲུབ་པ་དང་། འགྲན་མེད་དང་། མཉེན་དེས་དང་། གྲུམ་པོར་འགྲང་བ་དང་། འདྲོན་པ་ཅན་དང་། ཤེད་བུ་དང་། ཤ་བོ་ཆེ་དང་། འདུས་པ་ཅན་དང་། རྩིབས་ཅན་དང་། ཤེས་པ་ཅན་དང་། གདོང་ཅན་དང་། ནོར་མང་དང་། དགྲ་དབང་དང་། མིག་
ཅན་དང་། གླང་པོ་འཐོབ་དང་། ཟླ་བའི་མུ་ཁྱུད་དང་། ཉི་མའི་མུ་ཁྱུད་དང་། དབང་པོའི་མུ་ཁྱུད་དང་། རྡོ་རྗེའི་མུ་ཁྱུད་དང་། བཟོད་པའི་མུ་ཁྱུད་དང་། གནས་ཀྱི་མུ་ཁྱུད་དང་། ཤུགས་ཀྱི་མུ་ཁྱུད་དང་། གཡུལ་གྱི་མུ་ཁྱུད་དང་། སྒྲ་གཅན་དང་། སྒྲ་གཅན་སྟོབས་མེད་དང་། སྒྲ་གཅན་དགྲ་མེད་དང་། ཆུན་པོ་སྣ་ཚོགས་དང་། རྒྱལ་པོར་གནས་དང་། འདོད་ཆགས་མི་གནས་དང་། ནོར་བདག་དང་། སྲུང་བ་པོ་དང་། ལུས་བཟངས་དང་། བསམ་པ་དཔོག་དང་། སྡོམ་བརྩོན་འཁོར་དང་། སྤྲིན་ཆུང་དང་། ཡ་མ་ཐ་དང་། འགྲོ་བའི་རྒྱལ་མཚན་དང་། ངེས་འཚོ་དང་། ཡས་སྱ་ན་དང་། སྐར་མ་འདུད་དང་། ཆགས་མེད་རྣམས་ཀྱིས་ཀྱང་དེ་བཞིན་དུ་བྱས་ཏེ། རྒྱལ་པོ་རྩིབས་ཀྱི་མུ་ཁྱུད་ཀྱི་བུ་སྟོང་གི་བར་དུ་རེ་རེས་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་དགེ་སློང་གི་དགེ་འདུན་དཔག་ཏུ་མེད་པ་དང་བཅས་པ་ལ་ཟླ་བ་གསུམ་གསུམ་དུ་ན་བཟའ་དང་། བཤོས་དང་། གཟིམས་ཆ་དང་། གདན་དང་། སྙུན་གྱི་གསོས་སྨན་དང་། ཡོ་བྱད་ཀྱི་ཚོགས་དེ་ལྟ་བུ་དག་གིས་བསྙེན་བཀུར་བྱ་བས་བསྙེན་བཀུར་བྱས་ནས་རྒྱལ་བུ་ཐུ་བོས་ཇི་ལྟར་བྱས་པ་དེ་བཞིན་དུ་རེ་རེས་ཀྱང་བཅོམ་ལྡན་འདས་དང་། དགེ་སློང་གི་དགེ་འདུན་ལ་གསེར་གྱི་འཁོར་ལོ་བརྒྱད་ཁྲི་བཞི་སྟོང་དང་། སྨན་བཅུད་ཀྱིས་ལེན་བརྒྱད་ཁྲི་བཞི་སྟོང་གི་བར་དུ་རྒྱ་ཆེར་ཕུལ་ལོ། །དེ་ལྟ་བུའི་སྦྱིན་པ་ཆེན་པོ་བྱས་ནས་དེ་དག་ཁ་ཅིག་ནི་བརྒྱ་བྱིན་ཉིད་དུ་སྨོན། ཁ་ཅིག་ནི་ཚངས་པ་ཉིད་དུ་སྨོན། ཁ་ཅིག་ནི་འཁོར་ལོས་སྒྱུར་བའི་རྒྱལ་པོར། ཁ་ཅིག་ནི་ལོངས་སྤྱོད་ཆེན་པོར། ཁ་ཅིག་ནི་ཉན་ཐོས་ཀྱི་ཐེག་པར་སྨོན་ཅིང་། ལོ་ཉིས་བརྒྱ་ལྔ་བཅུར་བཅོམ་ལྡན་འདས་དང་། དགེ་སློང་གི་དགེ་འདུན་ལ་བཟོད་པར་གསོལ་ཏོ། །དེའི་ཚེ་ན་མདུན་ན་འདོན་གྱི་གཙོ་བོ་བྲམ་ཟེ་རྒྱ་མཚོའི་རྡུལ་འོངས་ནས་འདི་ལྟ་སྟེ། ན་བཟའ་དང་། བཤོས་དང་། གཟིམས་ཆ་དང་། གདན་དང་། སྙུན་གྱི་གསོས་སྨན་དང་། ཡོ་བྱད་རྣམས་དང་། འཚོག་ཆས་ཐམས་ཅད་ཀྱིས་ལོ་བདུན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་
སྙིང་པོ་དགེ་སློང་གི་དགེ་འདུན་དང་བཅས་པ་སྤྱན་དྲངས་པ་དང་། བཅོམ་ལྡན་འདས་ཅང་མི་གསུང་བས་ཡབ་མདུན་ན་འདོན་གྱི་གཙོ་བོ་ལ་གནང་བར་མཛད་དོ། །དེ་ནས་བྲམ་ཟེ་རྒྱ་མཚོའི་རྡུལ་གྱིས་དེ་བཞིན་གཤེགས་པ་རིན་པོ་ཆེའི་སྙིང་པོ་དགེ་སློང་གི་དགེ་འདུན་དང་བཅས་པ་ལ། ཇི་ལྟར་རྒྱལ་པོ་རྩིབས་ཀྱི་མུ་ཁྱུད་ཀྱིས་བསྙེན་བཀུར་བྱས་པ་དེ་ལྟ་བུའི་ཡོ་བྱད་ཕུན་སུམ་ཚོགས་པ་ཐམས་ཅད་ཀྱིས་བསྙེན་བཀུར་བྱ་བས་བསྙེན་བཀུར་བྱས་སོ། །རིགས་ཀྱི་བུ་དེ་ནས་དུས་གཞན་ཞིག་ན་བྲམ་ཟེ་རྒྱ་མཚོའི་རྡུལ་གྱི་སེམས་ལ་འདི་ལྟ་བུའི་ཡོངས་སུ་རྟོག་པ་སྐྱེས་ཏེ། བདག་གིས་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་མང་པོ་དེ་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ཀྱང་བདག་གིས་རྒྱལ་པོ་རྩིབས་ཀྱི་མུ་ཁྱུད་འདི་ལྷའི་རྒྱལ་སྲིད་དམ། མིའི་རྒྱལ་སྲིད་འདོད་དམ། ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་པ་འདོད་དམ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་དམ། འདི་ཅི་འདོད་པའི་སྨོན་ལམ་མི་ཤེས་ན། ཇི་སྟེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་ཞིང་སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་དག་ལས་མ་རྒལ་བའི་སེམས་ཅན་རྣམས་སྒྲོལ་བར་བྱེད་པ་དང་། མ་ཐར་བ་རྣམས་ཐར་བར་བྱེད་པ་དང་། ཡོངས་སུ་མྱ་ངན་ལས་མ་འདས་པའི་སེམས་ཅན་རྣམས་ཡོངས་སུ་མྱ་ངན་ལས་འདའ་བར་བྱེད་པར་ལྟ་ན་རྒྱལ་པོ་འདི་ལྷའི་དཔལ་འདོད་དམ། འོན་ཏེ་མིའི་དཔལ་ལམ། འོན་ཏེ་ཉན་ཐོས་ཉིད་དམ། འོན་ཏེ་རང་སངས་རྒྱས་ཀྱི་སའམ། འོན་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་དམ། ཅི་འདོད་པ་ལྷའམ། ཀླུའམ། གནོད་སྦྱིན་ནམ། སངས་རྒྱས་སམ། ཉན་ཐོས་སམ། བྲམ་ཟེ་འགའ་ཞིག་གིས་བདག་གི་རྨི་ལམ་དུ་སྦྲོན་གྲང་སྙམ་མོ། །རིགས་ཀྱི་བུ་དེ་ནས་མདུན་ན་འདོན་གྱི་གཙོ་བོ་བྲམ་ཟེ་རྒྱ་མཚོའི་རྡུལ་གྱི་རྨི་ལམ་ན་སྣང་བ་གང་གིས་ཕྱོགས་བཅུའི་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་དག་གི་སངས་རྒྱས་བཅོམ་ལྡན་འདས་རྣམས་
མཐོང་བ་དེ་ལྟ་བུའི་སྣང་བ་མཐོང་ཞིང་། སངས་རྒྱས་བཅོམ་ལྡན་འདས་དེ་དག་གིས་བྲམ་ཟེ་དེ་ལ་པད་མ་འདབ་མ་རྣམས་ནི་གསེར། སྡོང་བུ་རྣམས་ནི་དངུལ། སྙིང་པོ་རྣམས་ནི་བཻ་དཱུརྱ། ཟེ་བ་རྣམས་ནི་རྡོའི་སྙིང་པོ་ལས་བྱས་པ་དག་བསྐུར་ཏེ། པད་མ་དེ་དག་ཐམས་ཅད་ལ་ཡང་ཉི་མའི་དཀྱིལ་འཁོར་དག་ཀུན་ཏུ་སྣང་ཞིང་། ཉི་མའི་དཀྱིལ་འཁོར་དེ་དག་གི་སྟེང་ན་རིན་པོ་ཆེ་སྣ་བདུན་གྱི་གདུགས་དག་ཀུན་ནས་གནས་པ་དང་། ཉི་མའི་དཀྱིལ་འཁོར་རེ་རེ་ལས་ཀྱང་འོད་ཟེར་བྱེ་བ་ཕྲག་དྲུག་ཅུ་དྲུག་ཅུ་བྱུང་བར་གྱུར་ནས་འོད་ཟེར་དེ་དག་ཐམས་ཅད་བྲམ་ཟེ་དེའི་ཁར་ཞུགས་པ་དང་། བདག་གི་ལུས་དཔག་ཚད་སྟོང་གི་ཚད་ཙམ་དུ་གྱུར་ཅིང་འདི་ལྟ་སྟེ། དཔེར་ན་མེ་ལོང་གི་དཀྱིལ་འཁོར་ཡོངས་སུ་དག་པ་བཞིན་དུ་ཡོངས་སུ་དག་པར་མཐོང་བ་དང་། ལུས་ཀྱི་ཁོང་པ་ན་ཡང་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དྲུག་ཅུ་པད་མ་དག་ལ་སྐྱིལ་མོ་ཀྲུང་བཅས་ཏེ་འདུག་ཅིང་བསམ་གཏན་བསྒོམ་པ་དག་ཀྱང་མཐོང་ངོ་། །ཉི་མའི་དཀྱིལ་འཁོར་གྱི་གཟུགས་དེ་དག་ཀྱང་བདག་གི་མགོ་ལ་ཕྲེང་བ་དངར་བར་མཐོང་ཞིང་གདུགས་རྣམས་ཀྱང་སྟེང་གི་ནམ་མཁའ་ལ་ཚངས་པའི་འཇིག་རྟེན་གྱི་མཐར་ཐུག་པའི་བར་དུ་གནས་པ་མཐོང་ངོ་། །ཁོ་ར་ཁོར་ཡུག་ན་ཡང་པད་མ་སྣ་ཚོགས་དག་ཡོད་པར་མཐོང་ཞིང་པད་མ་དེ་དག་ལས་ལྷའི་སིལ་སྙན་མིའི་ལས་ཤིན་ཏུ་འདས་པ་དག་བྱུང་སྟེ་སྒྲ་ཡང་གྲག་གོ །དེ་ནས་རྒྱལ་པོ་རྩིབས་ཀྱི་མུ་ཁྱུད་ལུས་ཁྲག་གིས་བསྐུས་ཤིང་ཕག་གི་གདོང་དུ་གྱུར་ནས་རྒྱུག་ཅིང་སྲོག་ཆགས་རྣམ་པ་མང་པོ་དག་ལ་ཟ་བ་དང་། ཟོས་ནས་ཀྱང་ཨེ་རན་དའི་ཤིང་དྲུང་ན་སྙེས་ཤིང་འདུག་པ་དང་། སྲོག་ཆགས་སྣ་ཚོགས་དག་འོངས་ཏེ་རྒྱལ་པོ་དེ་ཟོས་པ་ནས་ཀེང་རུས་ཀྱི་བར་ལ་ཐུག་པར་བྱས་ཏེ་བོར་བ་དང་། དེ་བཞིན་དུ་ཡང་དང་ཡང་ཕྱིར་སྐྱེས་པས་ཕག་གི་གདོང་དུ་གྱུར་ཅིང་ལུས་ཁྲག་གིས་བསྐུས་ཏེ་སྲོག་ཆགས་རྣམ་པ་མང་པོ་དག་ཟོས་ནས་ཨེ་རན་དའི་ཤིང་དྲུང་ན་འདུག་པ་དང་། སྲོག་ཆགས་སྣ་ཚོགས་དག་གིས་ཟོས་ཤིང་ཀེང་རུས་ལ་ཐུག་པར་བྱས་ཏེ་བོར་བ་དག་མཐོང་ངོ་། །གཞན་ཡང་རྒྱལ་བུ་དག་ཀྱང་ལ་ལ་ནི་ཕག་གི་གདོང་། ལ་ལ་ནི་གླང་པོ་ཆེའི་གདོང་། ལ་ལ་ནི་མ་ཧེའི་གདོང་། ལ་ལ་ནི་
སེང་གེའི་གདོང་།ལ་ལ་ནི་སྤྱང་ཀིའི་གདོང་། ལ་ལ་ནི་ཝའི་གདོང་། ལ་ལ་ནི་ཁྱིའི་གདོང་། ལ་ལ་ནི་སྤྲེའུའི་གདོང་དུ་གྱུར་པར་མཐོང་ཞིང་ལུས་དག་ལ་ཁྲག་གིས་གཏོར་ཏེ་སྲོག་ཆགས་རྣམ་པ་མང་པོ་དག་ཟོས་ནས་ཨེ་རན་དའི་ཤིང་དྲུང་ན་འདུག་པ་དང་། སྲོག་ཆགས་རྣམ་པ་མང་པོ་དག་གིས་ཟོས་ཤིང་ཀེང་རུས་ལ་ཐུག་པར་བྱས་ཏེ་བོར་བ་མཐོང་ངོ་། །ཡང་ལུས་དེ་ཉིད་ལ་གནས་ཤིང་སྲོག་ཆགས་དག་ལ་ཟ་བར་ཡང་མཐོང་ངོ་། །རྒྱལ་བུ་ཁ་ཅིག་ནི་སྣ་མའི་མེ་ཏོག་གིས་བརྒྱན་ཅིང་མ་ཧེའི་ཤིང་རྟ་དག་ལ་ཞོན་ཏེ་ལམ་གོལ་བར་ཞུགས་ནས་གཡས་ཕྱོགས་སུ་བལྟས་ཤིང་དོང་བར་མཐོང་ངོ་། །བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དག་ཀྱང་འོངས་ནས་བྲམ་ཟེ་ལ་སྨྲས་པ། ཀྱེ་བྲམ་ཟེ་ཁྱོད་ཀྱི་ཁོ་ར་ཁོར་ཡུག་ན་པད་མ་ཡོད་པ་གང་ཡིན་པ་དེ་དག་ལས་ཁྱོད་ཀྱིས་དང་པོར་པད་མ་གཅིག་ནི་རྒྱལ་པོའི་སྐལ་བར་ཕུལ་ཅིག །དེ་ནས་རྒྱལ་བུ་འདི་དག་ལ་ཡང་པད་མ་རེ་རེ་བྱིན་ཅིག །ལྷག་མ་རྣམས་ནི་ཁམས་ཀྱི་རྒྱལ་པོ་རྣམས་ལ་བྱིན་ཅིག །གཞན་དག་ནི་སྐྱེ་བོ་རྣམས་ལ་བྱིན་ཅིག །དེ་ཐོས་ནས་བྲམ་ཟེ་ལྷ་རྣམས་ཀྱིས་བསྒོ་བ་བཞིན་དུ་བྱའོ་ཞེས་སྨྲས་ཏེ། དེ་ནས་བྲམ་ཟེ་དེ་པད་མ་རྣམས་འགོད་བཞིན་པ་ལས་སད་པ་དང་། དེ་མལ་ནས་ལངས་ཏེ་རྨི་ལམ་དྲན་ཞིང་འདུག་པ་ན་དེ་འདི་སྙམ་དུ་སེམས་ཏེ། འཁོར་ལོས་སྒྱུར་བའི་རྒྱལ་པོ་དེ་དང་། རྒྱལ་བུ་ཁ་ཅིག་ནི་སྨོན་ལམ་དམན་ཞིང་འཁོར་བའི་བདེ་བ་ལ་མངོན་པར་དགའ་བ་སྟེ། དེ་དག་ནི་དམན་པ་ལ་མོས་པ་ཡིན་ནོ། །གང་དག་བདག་གིས་རྨི་ལམ་ན་སྣ་མའི་མེ་ཏོག་གིས་བརྒྱན་ཅིང་མ་ཧེའི་ཤིང་རྟ་དག་ལ་ཞོན་ཏེ། ལམ་གོལ་བར་ཞུགས་ནས་གཡས་ཕྱོགས་སུ་བལྟས་ཤིང་དོང་བར་མཐོང་བའི་རྒྱལ་བུ་ཁ་ཅིག་ནི་ཉན་ཐོས་ཀྱི་ཐེག་པ་འདོད་པ་ཡིན་ནོ། །བདག་གིས་སྣང་བ་ཆེན་པོ་མཐོང་ཞིང་སྣང་བ་དེས་ཕྱོགས་བཅུའི་སངས་རྒྱས་བཅོམ་ལྡན་འདས་རྣམས་མཐོང་བ་གང་ཡིན་པ་དེ་ནི་བདག་གིས་འཛམ་བུའི་གླིང་ཐམས་ཅད་ན་གནས་པའི་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་དུ་མ་དག་བསོད་ནམས་བྱ་བའི་དངོས་པོ་གསུམ་པོ་དག་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་པ་དེའི་མཚན་མ་ཡིན་ཏེ། གང་གི་ཕྱིར་བདག་གི་འཛམ་བུའི་
གླིང་མྱུལ་ཅིང་སེམས་ཅན་བགྲང་བ་ལས་ཡང་དག་པར་འདས་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་འཛིན་དུ་བཅུག་ནས་བཏུལ་ཅིང་བཙུད་དེ་རབ་ཏུ་བཀོད་པ་གང་ཡིན་པ་དང་། བདག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགེ་སློང་གི་དགེ་འདུན་དང་བཅས་པ་ཡོ་བྱད་ཐམས་ཅད་ཀྱིས་ལོ་བདུན་དུ་སྤྱན་དྲངས་པ་དེས་ན། བདག་གིས་སྣང་བ་ཆེན་པོ་མཐོང་ཞིང་ཕྱོགས་བཅུའི་སངས་རྒྱས་བཅོམ་ལྡན་འདས་རྣམས་ཀྱང་མཐོང་ལ། ཕྱོགས་བཅུའི་སངས་རྒྱས་ཀྱི་ཞིང་གཞན་དག་ནས་སངས་རྒྱས་བཅོམ་ལྡན་འདས་རྣམས་ཀྱིས་པད་མ་དག་བསྐུར་ཞིང་། བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་པ་གང་ཡིན་པ་དེས་སངས་རྒྱས་བཅོམ་ལྡན་འདས་དེ་དག་གིས་བདག་ལ་གདུགས་དག་བསྐུར་བ་ཡིན་ན། བདག་གིས་པད་མ་དེ་དག་ལ་ཉི་མའི་གཟུགས་དག་མཐོང་བ་གང་ཡིན་པ་དང་། བདག་གིས་འོད་ཟེར་དེ་དག་རང་གི་ཁར་ཞུགས་པར་མཐོང་བ་གང་ཡིན་པ་དང་། ལུས་ཆེན་པོར་གྱུར་པར་མཐོང་བ་གང་ཡིན་པ་དང་། ཉི་མའི་གཟུགས་རྣམས་ཕྲེང་བ་དངར་བར་མཐོང་བ་གང་ཡིན་པ་དང་། ཁོང་པ་ན་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དྲུག་ཅུ་པད་མ་དག་ལ་སྐྱིལ་མོ་ཀྲུང་བཅས་ཏེ་འདུག་ཅིང་བསམ་གཏན་བྱེད་པ་གང་ཡིན་པ་དེ་ལྟ་བུའི་རྨི་ལམ་དག་རྨི་བ་དང་། བདག་གིས་བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དག་མཐོང་ཞིང་པད་མ་འདི་དག་བགོས་ཤིག་ཅེས་བསྒོ་བ་གང་ཡིན་པ་དང་། བདག་གིས་པད་མ་དེ་དག་བགོས་ཏེ་བྱིན་པ་གང་ཡིན་པའི་རྨི་ལམ་དེ་དག་བདག་གིས་བཅོམ་ལྡན་འདས་ལ་གསོལ་ཞིང་རྒྱུ་གང་དང་རྐྱེན་གང་གིས་ན་བདག་ལ་དེ་ལྟ་བུའི་རྨི་ལམ་དག་རྨིས་ཞེས་བདག་གིས་དེ་བཞིན་གཤེགས་པ་ལ་ཞུའོ་སྙམ་མོ། །དེ་ནས་བྲམ་ཟེ་རྒྱ་མཚོའི་རྡུལ་གྱིས་དེ་ཉིད་ཀྱི་མཚན་མོ་འདས་པ་དང་ཞལ་ཟས་སྦྱར་ནས་ནང་པར་སྔར་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་། བདག་ཉིད་ཀྱིས་བཅོམ་ལྡན་འདས་དང་། དགེ་སློང་གི་དགེ་འདུན་ཕྱག་ཆབ་གསོལ་ཏོ། །ཕྱག་ཆབ་གསོལ་ནས་ཀྱང་བདག་ཉིད་ལག་དར་ཏེ་
བཟའ་བ་དང་བཅའ་བ་མང་པོ་དག་ལེགས་པར་བསྟབས་ཤིང་ཚིམ་པར་བྱས་སོ། །ལེགས་པར་བསྟབས་ཤིང་ཚིམ་པར་བྱས་ནས་ཀྱང་དགེ་སློང་གི་དགེ་འདུན་ལ་ཡང་རྣམ་གྲངས་དུ་མས་ལེགས་པར་བསྟབས་ཤིང་ཚིམ་པར་བྱས་སོ། །རྣམ་གྲངས་དུ་མས་ལེགས་པར་བསྟབས་ཤིང་ཚིམ་པར་བྱས། བཅོམ་ལྡན་འདས་དང་དགེ་སློང་གི་དགེ་འདུན་བཤོས་གསོལ་ལགས་ཏེ། ལྷུང་བཟེད་བཞག་ཅིང་ཕྱག་བཅབས་པར་རིག་ནས། སྟན་ཤིན་ཏུ་དམའ་བ་ཞིག་བླངས་ནས་ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ །དེ་ནས་རྒྱལ་པོ་རྩིབས་ཀྱི་མུ་ཁྱུད་ཀྱང་བུ་སྟོང་དང་ལྷན་ཅིག་ཏུ་སྲོག་ཆགས་སྟོང་ཕྲག་དུ་མས་ཡོངས་སུ་བསྐོར་ཅིང་མདུན་དུ་བདར་ཏེ། དེ་ཉིད་དུ་འོངས་ནས་དེ་བཞོན་པས་བགྲོད་པའི་ས་ཇི་སྲིད་པ་དེ་སྲིད་དུ་བཞོན་པས་སོང་སྟེ། བཞོན་པ་ལས་བབས་ནས་རྐང་པས་ཀུན་དགའི་ར་བར་ཞུགས་སོ། །ཞུགས་ནས་ཀྱང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་དང་། དགེ་སློང་གི་དགེ་འདུན་གྱི་ཞབས་ལ་མགོ་བོས་ཕྱག་འཚལ་ཏེ། ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ །དེ་ནས་བཅོམ་ལྡན་འདས་ལ་བྲམ་ཟེ་རྒྱ་མཚོའི་རྡུལ་གྱིས་རྨི་ལམ་ཇི་རྨིས་པ་དག་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། བྲམ་ཟེ་གང་ཁྱོད་ཀྱིས་སྣང་བ་ཆེན་པོ་དང་། སྣང་བ་དེས་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་དག་གི་སངས་རྒྱས་བཅོམ་ལྡན་འདས་རྣམས་མཐོང་ནས་ཁྱོད་ལ་པད་མ་དག་བསྐུར་བ་དང་། པད་མ་དེ་དག་ལ་ཉི་མའི་གཟུགས་འོད་ཟེར་རབ་ཏུ་འབྱུང་བ་དག་མཐོང་བ་དང་། འོད་ཟེར་དེ་དག་ཁྱོད་ཀྱི་ཁར་ཞུགས་པར་མཐོང་བ་ནི་བྲམ་ཟེ་གང་ཁྱོད་ལོ་ཉིས་བརྒྱ་ལྔ་བཅུར་འཛམ་བུའི་གླིང་ཉུལ་བར་བྱེད་པ་ནི་ཁྱོད་ཀྱིས་མྱུལ་བ་དེས་སེམས་ཅན་བགྲང་བ་ལས་ཡང་དག་པར་འདས་པ་དག་བསོད་ནམས་བྱ་བའི་དངོས་པོ་གསུམ་པོ་དག་ལ་བཙུད་ཅིང་རབ་ཏུ་བཀོད་པ་དང་། སེམས་ཅན་བགྲང་བ་ལས་ཡང་དག་པར་འདས་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་སྟེ་བཏུལ་ཅིང་བཙུད་དེ་རབ་ཏུ་བཀོད་པ་དང་། ཐེག་པ་ཆེན་པོ་འདི་ལ་བརྩམ་པ་བྱས་པ་དེས་
ན་གང་དག་གིས་ཁྱོད་ལ་པད་མ་གང་དག་ལ་ཉི་མའི་གཟུགས་དག་སྣང་བའི་པད་མ་འདབ་མ་རྣམས་ནི་གསེར། སྡོང་བུ་རྣམས་ནི་དངུལ། སྙིང་པོ་རྣམས་ནི་བཻ་དཱུརྱ། ཟེ་བ་རྣམས་ནི་རྡོའི་སྙིང་པོ་ལས་བྱས་པ་དག་བསྐུར་བའི་སངས་རྒྱས་བཅོམ་ལྡན་འདས་ཕྱོགས་བཅུའི་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དག་ན་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པ། དེ་དག་གིས་བྲམ་ཟེ་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་གྱུར་ཏེ། རྨི་ལམ་དེ་ནི་དེའི་སྔ་ལྟས་ཡིན་ནོ། །བྲམ་ཟེ་གང་ཁྱོད་ཀྱི་རྨི་ལམ་ན་ཕྱོགས་བཅུའི་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དག་ན་སངས་རྒྱས་བཅོམ་ལྡན་འདས་གང་དག་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པའི་སངས་རྒྱས་བཅོམ་ལྡན་འདས་དེ་དག་གིས་ཁྱོད་ལ་རིན་པོ་ཆེ་སྣ་བདུན་གྱི་གདུགས་དག་བསྐུར་ཞིང་། གདུགས་དེ་དག་ཀྱང་སྟེང་གི་བར་སྣང་ལ་ཚངས་པའི་འཇིག་རྟེན་གྱི་མཐར་ཐུག་པའི་བར་དུ་གནས་པ་དག་མཐོང་བ་ནི། བྲམ་ཟེ་གང་གི་ནུབ་མོ་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེ་ཉིད་ཀྱི་ནུབ་མོ་ཕྱོགས་བཅུའི་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དག་ཏུ་ཁྱོད་ཀྱི་གྲགས་པ་དང་། སྒྲ་དང་། ཚིགས་སུ་བཅད་པ་རྒྱ་ཆེན་པོ་དག་མངོན་པར་འཕགས་པར་འགྱུར་ཞིང་། ཁྱོད་ཀྱི་སྤྱི་གཙུག་ཀྱང་ཚངས་པའི་འཇིག་རྟེན་གྱི་མཐར་ཐུག་པའི་བར་དུ་གྱེན་ཏུ་མངོན་པར་འཕགས་ཤིང་བལྟར་མི་ནུས་པར་གྱུར་ཏེ། བྲམ་ཟེ་རྨི་ལམ་དེ་ནི་དེའི་སྔ་ལྟས་ཡིན་ནོ། །བྲམ་ཟེ་གང་ཁྱོད་ཀྱིས་ཚངས་པའི་འཇིག་རྟེན་གྱི་བར་དུ་ཐུག་པའི་ལུས་ཆེན་པོ་དང་། ཉི་མའི་དཀྱིལ་འཁོར་གྱི་ཕྲེང་བ་དག་མགོ་ལ་བཅིངས་པར་མཐོང་བ་གང་ཡིན་པ་དེ་ནི་བྲམ་ཟེ་ཁྱོད་ཀྱིས་སེམས་ཅན་བགྲང་བ་ལས་ཡང་དག་པར་འདས་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་པ་གང་ཡིན་པ་དེ་དག་ཀྱང་ཁྱོད་བྱང་ཆུབ་མངོན་པར་རྫོགས་པར་སངས་རྒྱས་པ་ན། ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་རྡུལ་སྙེད་དག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
མངོན་པར་རྫོགས་པར་འཚང་རྒྱ་བར་འགྱུར་ཏེ། ཁྱོད་ཀྱིས་བྱང་ཆུབ་ཡང་དག་པར་འཛིན་དུ་བཅུག་པ་གང་ཡིན་པ་དེ་དག་ཐམས་ཅད་ཡང་དང་ཡང་དུ་ཁྱོད་ཀྱི་བསྔགས་པ་རྗོད་པར་གྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེས་བདག་ཅག་དང་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་པས་ན། དེས་ད་ལྟར་བདག་ཅག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེ་ནི་བདག་ཅག་གི་དགེ་བའི་བཤེས་གཉེན་ཡིན་ནོ་ཞེས་བསྔགས་པ་བརྗོད་པར་འགྱུར་ཞིང་སངས་རྒྱས་བཅོམ་ལྡན་འདས་དེ་དག་གིས་ཁྱོད་ལ་མཆོད་པ་བྱ་བའི་ཕྱིར་བྱང་ཆུབ་སེམས་དཔའ་དག་གཏོང་བར་འགྱུར་ཏེ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་བྱང་ཆུབ་སེམས་དཔའི་རྣམ་པར་འཕྲུལ་པ་སྣ་ཚོགས་དག་གིས་ཁྱོད་ལ་མཆོད་པ་བྱས་ཤིང་། དེར་ཁྱོད་ལས་ཆོས་ཐོས་ནས་ཏིང་ངེ་འཛིན་དང་། གཟུངས་དང་། བཟོད་པ་རྣམ་པ་སྣ་ཚོགས་དག་ཐོབ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་རང་རང་གི་སངས་རྒྱས་ཀྱི་ཞིང་དག་ཏུ་དོང་སྟེ། ཁྱོད་ཀྱི་བསྔགས་པ་བརྗོད་པར་འགྱུར་ཞིང་དབྱངས་རྗེས་སུ་སྒྲོགས་པར་འགྱུར་ཏེ། བྲམ་ཟེ་ཁྱོད་ཀྱི་རྨི་ལམ་དེ་ནི་དེའི་སྔ་ལྟས་ཡིན་ནོ། །བྲམ་ཟེ་གང་ཁྱོད་ཀྱི་རྨི་ལམ་ན་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དྲུག་ཅུ་ཁོང་བར་ཞུགས་ནས་དེ་དག་པད་མ་དག་ལ་སྐྱིལ་མོ་ཀྲུང་བཅས་ཏེ་འདུག་ཅིང་བསམ་གཏན་སྒོམ་པ་དག་མཐོང་བ་ནི་བྲམ་ཟེ་ཁྱོད་བྱང་ཆུབ་མངོན་པར་རྫོགས་པར་སངས་རྒྱས་པ་ན། གང་དག་སྲོག་ཆགས་བྱེ་བ་ཁྲག་ཁྲིག་འབུམ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་པར་འགྱུར་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་དག་ལ་འགོད་པར་འགྱུར་བ་དེ་དག་ཀྱང་བྲམ་ཟེ་ཁྱོད་བླ་ན་མེད་པའི་ཡོངས་སུ་མྱ་ངན་ལས་འདའ་བས་ཡོངས་སུ་མྱ་ངན་ལས་འདས་ནས། བསྐལ་པ་སངས་རྒྱས་ཀྱི་ཞིང་རྡུལ་ཕྲ་རབ་ཀྱི་རྡུལ་སྙེད་འདས་པའི་འོག་ཏུ་ཕྱོགས་བཅུའི་སངས་རྒྱས་ཀྱི་ཞིང་གཞན་དག་ཏུ་ཆོས་ཀྱི་རྒྱལ་སྲིད་མཛད་པའི་སངས་རྒྱས་
བཅོམ་ལྡན་འདས་སུ་འགྱུར་བ་ན། འདི་སྐད་དུ་བསྐལ་པ་གྲངས་མེད་པ་འདས་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་འདི་ཞེས་བྱ་བ་ཞིག་བྱུང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེས་བདག་ཅག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་སྟེ་བཏུལ་ཅིང་བཙུད་དེ་རབ་ཏུ་བཀོད་ནས་ཕྱིར་མི་ལྡོག་པ་ལ་བཀོད་པས་ན་དེས་ད་ལྟར་བདག་ཅག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཤིང་ཆོས་ཀྱི་རྒྱལ་སྲིད་ཀྱང་བརྙེས་སོ་ཞེས་ཁྱོད་ཀྱི་བསྔགས་པ་རྗོད་པར་འགྱུར་ཏེ། བྲམ་ཟེ་ཁྱོད་ཀྱི་རྨི་ལམ་དེ་ནི་དེའི་སྔ་ལྟས་ཡིན་ནོ། །བྲམ་ཟེ་གང་ཁྱོད་ཀྱི་རྨི་ལམ་ན་ཕག་གི་གདོང་དང་། ཁྱིའི་གདོང་གི་བར་དུ་གྱུར་ཅིང་ལུས་ཁྲག་གིས་བསྐུས་ཏེ་སྲོག་ཆགས་རྣམ་པ་དུ་མ་དག་ཟོས་ནས་ཨེ་རན་དའི་ཤིང་ངན་པའི་དྲུང་ན་འདུག་པ་དང་། དེ་ཡང་སྲོག་ཆགས་རྣམ་པ་དུ་མ་གཞན་དག་གིས་ཟོས་ཤིང་ཀེང་རུས་ཀྱི་བར་ལ་ཐུག་པར་བྱས་ཏེ་བོར་བ་དང་། ཡང་ལུས་ཕྱིར་སྐྱེས་ནས་ལུས་ཁྲག་གིས་བསྐུས་ཤིང་ཁྱིའི་གདོང་གི་བར་དུ་གྱུར་པས་སྲོག་ཆགས་རྣམ་པ་མང་པོ་དག་ཟོས་ནས་ཡང་ཨེ་རན་དའི་ཤིང་ངན་པའི་དྲུང་ན་འདུག་པ་དང་། སྲོག་ཆགས་རྣམ་པ་དུ་མ་དག་གིས་ཟོས་པར་མཐོང་བ་ནི་ཁྱོད་ཀྱིས་སྐྱེས་བུ་བླུན་པོ་བསོད་ནམས་བྱ་བའི་དངོས་པོ་གསུམ་པོ་སྦྱིན་པ་དང་། དུལ་བ་དང་། ཡང་དག་པར་སྡོམ་པ་ཡང་དག་པར་འཛིན་དུ་བཅུག་ཅིང་རབ་ཏུ་བཀོད་པ་དེ་དག་ལྷ་རྣམས་ཀྱི་ནང་དུ་འཆི་འཕོ་བའི་སྡུག་བསྔལ་འདོད་པ་དང་། མི་རྣམས་ཀྱི་ནང་དུ་རྒ་བ་དང་། ན་བ་དང་། འཆི་བ་དང་། མི་སྡུག་པ་དང་ཕྲད་པ་དང་། སྡུག་པ་དང་བྲལ་བའི་སྡུག་བསྔལ་དང་། ཡི་དགས་རྣམས་ཀྱི་ནང་དུ་བཀྲེས་པ་དང་། སྐོམ་པའི་སྡུག་བསྔལ་དང་། དུད་འགྲོ་རྣམས་ཀྱི་ནང་དུ་གཏི་མུག་གི་མུན་པ་དང་། མགོ་གཅོད་པ་ལ་སོགས་པའི་སྡུག་བསྔལ་དང་། སེམས་ཅན་དམྱལ་བ་རྣམས་ཀྱི་ནང་དུ་གནོད་པ་སྣ་ཚོགས་ལ་སོགས་པའི་སྡུག་བསྔལ་འདོད་པར་འགྱུར་བ་དང་བསོད་ནམས་བྱ་བའི་དངོས་པོ་རྣམ་པ་གསུམ་པོ་དག་ལ་རབ་ཏུ་
བཀོད་པ་རྣམས་ལྷ་རྣམས་ཀྱི་ནང་དུ་ལྷའི་རྒྱལ་སྲིད་འདོད་ལ་མི་རྣམས་ཀྱི་ནང་དུ་ནི་གླིང་གཅིག་གི་དབང་ཕྱུག་འདོད་དེ། དེ་དག་དེར་སེམས་ཅན་ཐམས་ཅད་ལ་ལོངས་སྤྱོད་པར་འགྱུར་ཞིང་། དེ་དག་ཀྱང་སེམས་ཅན་ཐམས་ཅད་ཀྱི་ཁ་ཟས་དང་། ལོངས་སྤྱོད་དུ་འགྱུར་བས་དེ་ལྟར་སྐྱེས་བུ་བླུན་པོ་དེ་དག་ཡུན་རིང་པོར་འཁོར་བར་སྡུག་བསྔལ་ཉམས་སུ་མྱོང་བར་འགྱུར་ཏེ། བྲམ་ཟེ་ཁྱོད་ཀྱི་རྨི་ལམ་དེ་ནི་དེའི་སྔ་ལྟས་ཡིན་ནོ། །བྲམ་ཟེ་གང་ཁྱོད་ཀྱི་རྨི་ལམ་ན་མི་ཁ་ཅིག་སྣ་མའི་མེ་ཏོག་གི་ཕྲེང་བ་དག་གིས་མགོ་བརྒྱན་ཅིང་། མ་ཧེའི་ཤིང་རྟ་དག་ལ་ཞོན་ཏེ་ལམ་གོལ་བར་ཞུགས་ནས་གཡས་ཕྱོགས་སུ་ལྟ་ཞིང་དོང་བར་མཐོང་བ་དེ་ཡང་བྲམ་ཟེ་ཁྱོད་ཀྱིས་བསོད་ནམས་བྱ་བའི་དངོས་པོ་གསུམ་པོ་དག་ལ་རབ་ཏུ་བཀོད་པའི་རིགས་ཀྱི་བུ་དག་གཅིག་བདག་དུལ་བར་བྱ་བ་དང་། བདག་ཞི་བར་བྱ་བ་འབའ་ཞིག་གི་ཕྱིར་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པར་འགྱུར་ཏེ། བྲམ་ཟེ་དེ་ནི་ཉན་ཐོས་ཀྱི་ཐེག་པ་པའི་གང་ཟག་དེ་དག་གི་སྔ་ལྟས་ཡིན་ནོ། །རིགས་ཀྱི་བུ་དེ་ནས་བྲམ་ཟེ་རྒྱ་མཚོའི་རྡུལ་གྱིས་རྒྱལ་པོ་རྩིབས་ཀྱི་མུ་ཁྱུད་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོའི་མིར་སྐྱེ་བ་ནི་རྙེད་པར་དཀའ། དལ་བ་ཕུན་སུམ་ཚོགས་པ་ཡང་རྙེད་པར་དཀའ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འཇིག་རྟེན་དུ་འབྱུང་བར་ཡང་ཨུ་དུམ་བཱ་རའི་མེ་ཏོག་ལྟར་རྙེད་པར་དཀའ། དགེ་བའི་ཆོས་ལ་འདུན་པ་ཡང་རྙེད་པར་དཀའ། ཡང་དག་པའི་སྨོན་ལམ་ཡང་རྙེད་པར་དཀའ་ལགས་སོ། །རྒྱལ་པོ་ཆེན་པོ་ལྷའི་རྒྱལ་སྲིད་ནི་སྡུག་བསྔལ་འབྱུང་བའི་རྒྱུ་ལགས་སོ། །གླིང་གཅིག་གི་མི་རྣམས་ཀྱི་རྒྱལ་སྲིད་ཀྱང་སྡུག་བསྔལ་འབྱུང་བའི་རྒྱུ་ལགས་སོ། །གླིང་གཉིས་དང་། གསུམ་དང་། གླིང་བཞི་པའི་རྒྱལ་སྲིད་ཀྱང་སྡུག་བསྔལ་འབྱུང་བའི་རྒྱུ་ལགས་ཏེ། རྒྱལ་པོ་ཆེན་པོ་ཡུན་རིང་པོར་འཁོར་བའི་སྡུག་བསྔལ་ཉམས་སུ་མྱོང་བར་བགྱིད་པ་ལགས་སོ། །རྒྱལ་པོ་ཆེན་པོ་ལྷ་དང་མིའི་འབྱོར་པ་ནི་རླུང་གི་ཤུགས་བཞིན་དུ་གཡོ་ཞིང་མི་གནས་པ་ལགས་སོ། །བྱིས་པ་རྣམས་ནི་ཆུ་ཟླ་ལྟ་བུའི་འདོད་པའི་ཡོན་ཏན་ལྔས་ངོམས་
མི་མྱོང་ཞིང་ཡུལ་རྣམས་ལ་མྱོས་ནས་ལྷ་དང་མིའི་དཔལ་འཚལ་བར་བགྱིད་དེ། བྱིས་པ་དེ་དག་ནི་ཡང་དང་ཡང་དུ་སེམས་ཅན་དམྱལ་བ་རྣམས་སུ་གནོད་པའི་སྡུག་བསྔལ་དང་། དུད་འགྲོ་རྣམས་ཀྱི་ནང་དུ་ཀུན་ཏུ་གཏི་མུག་པའི་སྡུག་བསྔལ་དང་། ཡི་དགས་རྣམས་ཀྱི་ནང་དུ་བཀྲེས་པ་དང་སྐོམ་པའི་སྡུག་བསྔལ་དང་། མི་རྣམས་ཀྱི་ནང་དུ་སྡུག་པ་དང་བྲལ་བའི་སྡུག་བསྔལ་དང་། ལྷ་རྣམས་ཀྱི་ནང་དུ་འཆི་འཕོའི་སྡུག་བསྔལ་དང་། ཡང་མངལ་དུ་གནས་པའི་སྡུག་བསྔལ་དང་། གཅིག་གིས་གཅིག་མགོ་གཅོད་པའི་སྡུག་བསྔལ་དང་། གཅིག་ལ་གཅིག་འཚལ་བའི་སྡུག་བསྔལ་ཉམས་སུ་མྱོང་བར་འགྱུར་ཏེ། བྱིས་པ་རྣམས་འཁྱམ་པ་ན་དེ་ལྟ་བུའི་སྡུག་བསྔལ་དག་ཉམས་སུ་མྱོང་བར་འགྱུར་རོ། །དེ་ཅིའི་སླད་དུ་ཞེ་ན། དགེ་བའི་བཤེས་གཉེན་དང་བྲལ་བས་མ་ཐོབ་པ་ཐོབ་པར་བགྱི་བ་དང་། མ་རྟོགས་པ་རྟོགས་པར་བགྱི་བ་དང་། མངོན་སུམ་དུ་མ་བགྱིས་པ་མངོན་སུམ་དུ་བགྱི་བའི་སླད་དུ་ཡང་དག་པའི་སྨོན་ལམ་མི་འདེབས་ཤིང་རྩོལ་བར་མི་བགྱིད་པའི་སླད་དུ་སྟེ། དེ་ལྟར་བྱིས་པ་གླེན་པ་དག་ནི་གང་ལ་སྡུག་བསྔལ་ཐམས་ཅད་བས་པར་འགྱུར་བའི་བྱང་ཆུབ་ཀྱི་སེམས་ཀྱིས་སྐྱོ་བར་བགྱིད་ཅིང་གང་ལ་ཡང་དང་ཡང་དུ་སྡུག་བསྔལ་འབྱུང་བར་འགྱུར་བའི་འཁོར་བས་སྐྱོ་བར་མི་བགྱིད་ཅིང་ཡིད་འབྱུང་བར་མི་བགྱིད་དོ། །རྒྱལ་པོ་ཆེན་པོ་དེ་ལྟ་བས་ན་འཁོར་བ་ནི་སྡུག་བསྔལ་ཐམས་ཅད་ཀྱི་སྣོད་དུ་གྱུར་པ་ལགས་པར་ཡོངས་སུ་བརྟག་པ་མཛད་ཅིང་རྒྱལ་པོ་ཆེན་པོ་འདི་ལྟར་ཁྱོད་ཀྱིས་ནི་བཅོམ་ལྡན་འདས་ཀྱི་བསྟན་པ་ལ་ལྷག་པར་མཛད་པ་མཛད་དེ་དགེ་བའི་རྩ་བ་ནི་བསྐྲུན། དཀོན་མཆོག་གསུམ་ལ་དད་པ་ནི་བརྙེས། ལོངས་སྤྱོད་ཆེན་པོའི་ཕྱིར་བཅོམ་ལྡན་འདས་ལ་དབུལ་བ་ནི་ཕུལ། མཐོ་རིས་སུ་སྐྱེ་བ་ཐོབ་པར་བགྱི་བའི་སླད་དུ་ཚུལ་ཁྲིམས་ནི་བསྲུངས། བཅོམ་ལྡན་འདས་ལ་ཆོས་གསན་པས་ཁྱོད་ཤེས་རབ་ཆེན་པོ་བརྙེས་པར་ནི་གྱུར། མཆོད་སྦྱིན་ནི་མཛད་ལགས་ཀྱིས། རྒྱལ་པོ་ཆེན་པོ་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཐུགས་སྐྱེད་ཅིག །སྨྲས་པ། བྲམ་ཟེ་ཁོ་བོ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མི་
འདོད་དེ། བྲམ་ཟེ་ཁོ་བོས་ནི་འཁོར་བ་མངོན་པར་འདོད་པའི་དོན་དུ་སྦྱིན་པ་བྱིན་ཞིང་ཚུལ་ཁྲིམས་བསྲུངས་ལ་ཆོས་ཉན་ཏོ། །བྲམ་ཟེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་ཐོབ་པར་དཀའ་བ་ཡིན་པས་བྲམ་ཟེ་མི་དགོས་སོ། །བྲམ་ཟེ་རྒྱ་མཚོའི་རྡུལ་གྱིས་རྒྱལ་པོ་ལ་ལན་གཉིས་སུ་སྨྲས་པ། རྒྱལ་པོ་ཆེན་པོ་བྱང་ཆུབ་ཀྱི་ལམ་ནི་ཡང་དག་པ་ལགས་པས་བསམ་པས་སྨོན་ལམ་བཏབ་པར་བགྱི་བ་སྟེ། ལམ་དེ་ནི་སྒྲིབ་པ་མ་མཆིས་པས་རྫོགས་ཤིང་ཤིན་ཏུ་དང་བ་ལགས་སོ། །ལམ་དེ་ནི་ལྷག་པའི་བསམ་པས་རྣམ་པར་དག་ཅིང་དྲང་པོ་ལགས་སོ། །ལམ་དེ་ནི་ཉོན་མོངས་པ་བསལ་བས་གཡོ་མེད་ཅིང་དག་པ་ལགས་སོ། །ལམ་དེ་ནི་སྒྲིབ་པ་མ་མཆིས་པས་རྒྱ་ཆེ་བ་ལགས་སོ། །ལམ་དེ་ནི་བསམ་པ་ལས་བྱུང་བས་ཡང་དག་པར་གཞོལ་བ་ལགས་སོ། །ལམ་དེ་ནི་སྡིག་པ་ཐམས་ཅད་མི་བགྱིད་པས་འཇིགས་པ་མ་མཆིས་པ་ལགས་སོ། །ལམ་དེ་ནི་སྦྱིན་པའི་ཕ་རོལ་ཏུ་ཕྱིན་པས་ཡང་དག་པར་འབྱོར་པ་ལགས་སོ། །ལམ་དེ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པས་བསིལ་བ་ལགས་སོ། །ལམ་དེ་ནི་བཟོད་པའི་ཕ་རོལ་ཏུ་ཕྱིན་པས་གཞི་མ་མཆིས་པ་ལགས་སོ། །ལམ་དེ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པས་བྱིན་གྱིས་བརླབས་ཀྱི་རྟེན་ལགས་སོ། །ལམ་དེ་ནི་བསམ་གཏན་གྱི་ཕ་རོལ་ཏུ་ཕྱིན་པས་རྙོག་པ་མ་མཆིས་པ་ལགས་སོ། །ལམ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པས་ཤིན་ཏུ་རྟོགས་པ་ལགས་སོ། །ལམ་དེ་ནི་སྙིང་རྗེ་ཆེན་པོས་ངོ་བོ་ཉིད་ཀྱི་ཤེས་པ་རྗེས་སུ་རྟོགས་པ་ལགས་སོ། །ལམ་དེ་ནི་དགའ་བ་ཆེན་པོས་མཆོག་ཏུ་དགའ་བ་ཐོབ་པ་ལགས་སོ། །ལམ་དེ་ནི་བཏང་སྙོམས་ཆེན་པོས་སྙིང་པོ་དང་འཐུན་པ་ལགས་སོ། །ལམ་དེ་ནི་འདོད་པ་དང་། གནོད་སེམས་དང་། རྣམ་པར་འཚེ་བའི་རྣམ་པར་རྟོག་པ་དག་མ་མཆིས་པས་ཚེར་མ་དང་བྲལ་བ་ལགས་སོ། །ལམ་དེ་ནི་ཁོང་ཁྲོ་བའི་སེམས་མ་མཆིས་པས་བགྲོད་བདེ་བ་ལགས་སོ། །ལམ་དེ་ནི་གཟུགས་དང་། སྒྲ་དང་། དྲི་དང་། རོ་དང་། རེག་བྱ་རྣམ་པར་རིག་པས་གཡོ་དང་བྲལ་བ་ལགས་སོ། །ལམ་དེ་ནི་ཁམས་དང་སྐྱེ་མཆེད་ཤིན་ཏུ་མཐོང་བས་བདུད་དང་
ཕྱིར་རྒོལ་བ་ངེས་པར་བཅོམ་པ་ལགས་སོ། །ལམ་དེ་ནི་ཉོན་མོངས་པ་ཐམས་ཅད་དང་བྲལ་བས་བདུད་དང་བྲལ་བ་ལགས་སོ། །ལམ་དེ་ནི་ཉན་ཐོས་དང་རང་སངས་རྒྱས་ཀྱི་ཡིད་ལ་བགྱིད་པ་དང་བྲལ་བས་སེམས་རྒྱ་ཆེན་པོར་མཆི་བ་ལགས་སོ། །ལམ་དེ་ནི་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པས་སྤྲོ་བ་དང་བཅས་པ་ལགས་སོ། །ལམ་དེ་ནི་ཐམས་ཅད་མཁྱེན་པ་ཉིད་ཀྱི་རིན་པོ་ཆེ་དང་འཐུན་པས་རིན་པོ་ཆེ་ཆེན་པོ་ངེས་པར་སྒྲུབ་པ་ལགས་སོ། །ལམ་དེ་ནི་བཅོམ་ལྡན་འདས་ཀྱི་ཡེ་ཤེས་ཆགས་པ་མི་མངའ་བས་རྟག་ཏུ་བསྟན་པ་ལགས་སོ། །ལམ་དེ་ནི་དགེ་བའི་བཤེས་གཉེན་གྱིས་རྗེས་སུ་ཟིན་པས་དགེ་བའི་རྩ་བ་སྟོན་ཅིང་རྗེས་སུ་སྤྱད་པ་ལགས་སོ། །ལམ་དེ་ནི་རྗེས་སུ་ཆགས་པ་དང་། ཁོང་ཁྲོ་བ་སྤངས་པས་མཐོ་དམན་དང་བྲལ་བ་ལགས་སོ། །ལམ་དེ་ནི་གནོད་སེམས་དང་། ཐ་བ་དང་། ཁྲོ་བ་མ་མཆིས་པས་རྡུལ་ངེས་པར་བཅོམ་པ་ལགས་སོ། །ལམ་དེ་ནི་མི་དགེ་བ་ཐམས་ཅད་དང་བྲལ་བས་བདེ་འགྲོར་མཆི་བ་ལ་སྨན་པ་ལགས་སོ། །རྒྱལ་པོ་ཆེན་པོ་བྱང་ཆུབ་ཀྱི་ལམ་དེ་ནི་མྱ་ངན་ལས་འདས་པའི་མཐར་ཐུག་པས་བདེ་བ་འཐོབ་པ་ལགས་ཀྱིས་རྒྱལ་པོ་ཆེན་པོ་བྱང་ཆུབ་ཏུ་ཐུགས་སྐྱེད་ཅིག །རྒྱལ་པོས་སྨྲས་པ། བྲམ་ཟེ་དེ་བཞིན་གཤེགས་པ་འདི་ནི་སྐྱེ་དགུ་ལོ་བརྒྱད་ཁྲི་པ་རྣམས་ཀྱི་ནང་དུ་འཇིག་རྟེན་དུ་བྱུང་བས་ན་དེ་བཞིན་གཤེགས་པས་ངན་སོང་ཐམས་ཅད་ཞི་བར་མཛད་པ་མ་སྤྱོད་དེ། སེམས་ཅན་གང་དག་གིས་དགེ་བའི་རྩ་བ་བསྐྱེད་པའི་སེམས་ཅན་དེ་དག་ནི་འབྲས་བུ་ལ་གནས་པར་གྱུར། ལ་ལས་ནི་ཏིང་ངེ་འཛིན་དང་། གཟུངས་དང་། བཟོད་པ་བསྒྲུབས། གང་དག་དགེ་བའི་རྩ་བ་མཆོག་ཏུ་གྱུར་པའི་བྱང་ཆུབ་སེམས་དཔའ་དེ་དག་ནི་བྱང་ཆུབ་ལས་ཕྱིར་མི་ལྡོག་པར་གྱུར། དགེ་བའི་རྩ་བ་བསྐྱེད་པ་ཁ་ཅིག་གིས་ནི་ལྷ་དང་མིའི་དཔལ་ཉམས་སུ་མྱོང་བར་གྱུར་ཏེ། སེམས་ཅན་རྣམས་རང་རང་གི་དགེ་བ་དང་། མི་དགེ་བའི་ལས་རྣམས་ཀྱིས་འཕྱན་པར་གྱུར་པས་ན་འདི་ལྟར་སེམས་ཅན་གཅིག་ཙམ་གྱི་སྡུག་བསྔལ་ཡང་རབ་ཏུ་ཞི་བར་མ་མཛད་ན་བཅོམ་ལྡན་འདས་ཀྱིས་བཏུལ་བའི་སེམས་ཅན་གང་ཞིག་ཡིན། བཅོམ་ལྡན་འདས་ཀྱི་སྐུ་ནི་ཞིང་དུ་གྱུར་པ་འབའ་ཞིག་
ཏུ་ཟད་ཀྱི་དགེ་བའི་རྩ་བ་མ་བསྐྱེད་པའི་སེམས་ཅན་རྣམས་སྡུག་བསྔལ་ལས་ཐར་བར་ནི་མི་མཛད་དོ། །ཁོ་བོ་ནི་བྱང་ཆུབ་ཏུ་སེམས་བསྐྱེད་ཅིང་བྱང་ཆུབ་སེམས་དཔའི་སྤྱད་པ་ཡང་སྤྱོད་ལ། ཁོ་བོ་ཡེ་ཤེས་ཆེན་པོ་བསགས་པ་དང་། ཆོས་ཀྱི་སྒོ་རྒྱ་ཆེན་པོ་བསམ་གྱིས་མི་ཁྱབ་པར་འཇུག་པ་དེས་སེམས་ཅན་རྣམས་འདུལ་ཞིང་སངས་རྒྱས་ཀྱི་མཛད་པ་ཡང་བྱེད་མོད་ཀྱི་སངས་རྒྱས་ཀྱི་ཞིང་ཉོན་མོངས་པ་ཅན་འདི་ལྟ་བུར་བྱང་ཆུབ་ཀྱི་ཕྱིར་སེམས་ཡོངས་སུ་བསྔོ་བ་འབའ་ཞིག་ནི་མི་བྱེད་དོ། །གལ་ཏེ་གང་གི་ཚེ་ཁོ་བོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རེག་པར་འགྱུར་བའི་སངས་རྒྱས་ཀྱི་ཞིང་དེར་ཁོ་བོས་སེམས་ཅན་རྣམས་ཀྱི་སྡུག་བསྔལ་ཐམས་ཅད་རབ་ཏུ་ཞི་བར་བྱེད་པར་འགྱུར་བ་དེ་ལྟ་བུའི་སངས་རྒྱས་ཀྱི་ཞིང་ཞིག་འཐོབ་པར་འགྱུར་བ་ལྟ་ན་དེའི་ཚེ་ཁོ་བོ་བྱང་ཆུབ་ཏུ་སེམས་སྐྱེད་ཅིང་ཁོ་བོས་བྱང་ཆུབ་སེམས་དཔའི་སྤྱོད་པ་ཡང་སྤྱད་པར་བྱའོ། །རིགས་ཀྱི་བུ་དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོས་འདི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་མཛད་དེ། དེའི་ཚེ་ཏིང་ངེ་འཛིན་མེ་ལོང་བཀོད་པ་ཞེས་བྱ་བ་ལ་སྙོམས་པར་ཞུགས་སོ། །དེ་ལྟར་བཅོམ་ལྡན་འདས་ཀྱིས་ཏིང་ངེ་འཛིན་མེ་ལོང་བཀོད་པ་ལ་མཉམ་པར་བཞག་པ་དང་། འདི་ལྟ་བུའི་སྣང་བ་བྱུང་བར་གྱུར་ཏེ། སྣང་བ་དེས་ཕྱོགས་བཅུའི་ཕྱོགས་རེ་རེར་ཡང་འཇིག་རྟེན་གྱི་ཁམས་སངས་རྒྱས་ཀྱི་ཞིང་སྟོང་གི་འཇིག་རྟེན་གྱི་རྡུལ་སྙེད་དག་གི་ཡོན་ཏན་བཀོད་པ་ཐམས་ཅད་སྣང་བར་གྱུར་ཏེ། ལ་ལ་དག་ན་སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་པ་དང་། ལ་ལ་དག་ན་ཡོངས་སུ་མྱ་ངན་ལས་འདའ་བའི་ཕྱིར་ཡང་དག་པར་ཞུགས་པ་དང་། གང་དག་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་ཀྱི་ཤིང་དྲུང་ན་འདུག་ནས་བདུད་ཕམ་པར་བྱེད་པ་རྣམས་དང་། གང་དག་ན་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་པར་ཆོས་ཀྱི་འཁོར་ལོ་སྐོར་བ་རྣམས་དང་། གང་དག་ན་ཆོས་ཀྱི་འཁོར་ལོ་བསྐོར་ནས་རིང་པོ་མ་ལོན་པར་ཆོས་སྟོན་པ་རྣམས་དང་། སངས་རྒྱས་ཀྱི་ཞིང་གང་དག་ན་སངས་རྒྱས་དང་བྱང་ཆུབ་སེམས་དཔའ་རྣམས་
ཀྱིས་ཁྱབ་པ་དང་། གང་དག་ན་ཉན་ཐོས་དང་རང་སངས་རྒྱས་རྣམས་འབྱུང་བ་མེད་པ་དང་། གང་དག་ན་ཉན་ཐོས་དང་རང་སངས་རྒྱས་རྣམས་འབྱུང་བ་དང་སངས་རྒྱས་ཀྱི་ཞིང་གང་དག་ན་སངས་རྒྱས་དང་། བྱང་ཆུབ་སེམས་དཔའ་དང་། ཉན་ཐོས་དང་། རང་སངས་རྒྱས་རྣམས་ཀྱིས་སྟོང་པ་དང་། སངས་རྒྱས་ཀྱི་ཞིང་ཁ་ཅིག་སྙིགས་མ་ལྔས་ཉོན་མོངས་པ་ཅན་དུ་གྱུར་པ་དང་། ཁ་ཅིག་སྙིགས་མ་ལྔ་དང་བྲལ་བའི་ཡོངས་སུ་དག་པ་དང་། ཁ་ཅིག་ན་སེམས་ཅན་མཆོག་རྣམས་དང་།ཁ་ཅིག་ན་དམན་པ་རྣམས་དང་། ཁ་ཅིག་ན་ཚེ་རིང་བ་རྣམས་དང་། ཁ་ཅིག་ན་ཚེ་ཐུང་བ་རྣམས་དང་། སངས་རྒྱས་ཀྱི་ཞིང་ཁ་ཅིག་མེས་འཇིག་པ་རྣམས་དང་། ཁ་ཅིག་ཆུ་དང་། ཁ་ཅིག་རླུང་གིས་འཇིག་པ་རྣམས་དང་། ཁ་ཅིག་འཆགས་པ་རྣམས་དང་། ཁ་ཅིག་ཆགས་ཤིང་གནས་པ་དེ་དག་ཐམས་ཅད་སྣང་བ་རྒྱ་ཆེན་པོས་ཁྱབ་པར་ཀུན་ཏུ་སྣང་ངོ་། །ཐམས་ཅད་དང་ལྡན་པའི་འཁོར་དེས་སངས་རྒྱས་ཀྱི་ཞིང་གི་ཡོན་ཏན་བཀོད་པ་དེ་དག་མཐོང་ནས་བྲམ་ཟེ་རྒྱ་མཚོའི་རྡུལ་གྱིས་རྒྱལ་པོ་ལ་སྨྲས་པ། རྒྱལ་པོ་ཆེན་པོ་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་ལ་གཟིགས་ལ། རྒྱལ་པོ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཐུགས་སྐྱེད་ཅིག །རྒྱལ་པོ་ཆེན་པོ་སངས་རྒྱས་ཀྱི་ཞིང་ཇི་ལྟ་བུ་བཞེད་པར་ཡང་གཟུང་བར་མཛོད་ཅིག །དེ་ནས་རྒྱལ་པོ་རྩིབས་ཀྱི་མུ་ཁྱུད་ཀྱིས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལས་གང་གིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་ཡོངས་སུ་དག་པ་ཡོངས་སུ་འཛིན་པ་ནས། གང་གིས་སེམས་ཅན་རྣམས་བསམ་པ་ཡོངས་སུ་དག་པ་དང་། གང་གིས་སེམས་ཅན་རྣམས་ཚེ་རིང་པོར་འགྱུར་བའི་བར་དུ་རྒྱ་ཆེར་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྨོན་ལམ་གྱི་དབང་གིས་སངས་རྒྱས་ཀྱི་ཞིང་སྙིགས་མ་ལྔ་དང་བྲལ་ཞིང་ཡོངས་སུ་དག་པ་དང་། སྨོན་ལམ་གྱི་དབང་གིས་ཡོངས་སུ་མ་དག་པ་ཡང་ཡོངས་སུ་འཛིན་ཏོ། །རྒྱལ་པོས་
གསོལ་པ། བཙུན་པ་བཅོམ་ལྡན་འདས་བདག་གྲོང་ཁྱེར་དུ་ཞུགས་ཏེ། རྩེ་གཅིག་ཏུ་མཆིས་ནས་སྨོན་ལམ་བསམ་པར་བགྱི་ཞིང་བདག་སྙིགས་མ་ལྔ་དང་བྲལ་བའི་སངས་རྒྱས་ཀྱི་ཞིང་ཇི་ལྟ་བུ་ལ་དགའ་བ་དེར་དགེ་བའི་སྤྱོད་པ་འདི་དག་ཡོངས་སུ་བསྔོ་བར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེའི་དུས་ལ་བབ་པར་ཤེས་པར་གྱིས་ཤིག །རིགས་ཀྱི་བུ་དེ་ནས་རྒྱལ་པོ་རྩིབས་ཀྱི་མུ་ཁྱུད་ཀྱིས་བཅོམ་ལྡན་འདས་དང་དགེ་སློང་གི་དགེ་འདུན་གྱི་ཞབས་ལ་མགོ་བོས་ཕྱག་འཚལ་ཏེ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་ཐད་ནས་སོང་སྟེ་གྲོང་ཁྱེར་དུ་ཞུགས་ནས་རང་གི་ཁྱིམ་དུ་ནང་དུ་ཡང་དག་འཇོག་ལ་རྩེ་གཅིག་ཏུ་འདུག་ནས་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་སེམས་པར་བྱེད་དོ།། །།བམ་པོ་བཞི་པ། དེ་ནས་བྲམ་ཟེ་རྒྱ་མཚོའི་རྡུལ་གྱིས་རྒྱལ་བུ་ཐུ་བོ་མིག་མི་འཛུམས་ལ་སྨྲས་པ། མིག་མི་འཛུམས་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་ལ། ཁྱོད་ཀྱིས་བསོད་ནམས་བྱ་བའི་དངོས་པོ་གསུམ་པོ་དག་གིས་དགེ་བ་སྤྱད་ཅིང་བསོད་ནམས་བསྒྲུབས་པ་གང་ཡིན་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྔོས་ཤིག །དེས་སྨྲས་པ། མཁན་པོ་བདག་ཀྱང་རང་གི་ཁྱིམ་དུ་མཆིས་ལ་གཅིག་པུ་དབེན་པར་མཆིས་ནས་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་བསམ་པར་བགྱི་སྟེ། གལ་ཏེ་བྱང་ཆུབ་ཀྱི་སླད་དུ་སེམས་སྐྱེ་བར་འགྱུར་བ་ལྟ་ན་བཅོམ་ལྡན་འདས་ཀྱི་དྲུང་དུ་སླར་མཆིས་ནས་བྱང་ཆུབ་ཏུ་སེམས་ཡོངས་སུ་བསྔོ་བར་བགྱིའོ། །དེ་ནས་རྒྱལ་བུ་དེས་ཀྱང་བཅོམ་ལྡན་འདས་དང་དགེ་སློང་གི་དགེ་འདུན་གྱི་ཞབས་ལ་མགོ་བོས་ཕྱག་འཚལ་ཏེ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་དྲུང་ནས་སོང་སྟེ། རང་གི་གནས་སུ་སོང་ནས་གཅིག་ཏུ་དབེན་པར་སོང་སྟེ་འདུག་ནས་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་སེམས་པར་བྱེད་དོ། །རིགས་ཀྱི་བུ་དེ་ནས་མདུན་ན་འདོན་གྱི་གཙོ་བོ་བྲམ་ཟེ་རྒྱ་མཚོའི་རྡུལ་གྱིས་རྒྱལ་བུ་གཉིས་པ་ལ་བོས་ཏེ་སྨྲས་པ། གཞོན་ནུ་ཁྱོད་བྱང་ཆུབ་ཏུ་སེམས་སྐྱེད་ཅིག་
ཅེས་བྱ་བ་ནས་སྔ་མ་བཞིན་དུ་རྒྱ་ཆེར་སྦྱར་ཏེ། རྒྱལ་བུ་སྟོང་གི་བར་དུ་ཐམས་ཅད་བྱང་ཆུབ་ཡང་དག་པར་འཛིན་དུ་བཅུག་གོ །ཁམས་ཀྱི་རྒྱལ་པོ་བརྒྱད་ཁྲི་བཞི་སྟོང་དང་། གཞན་ཡང་སེམས་ཅན་དུང་ཕྱུར་ཕྲག་དགུ་དང་། བྱེ་བ་ཕྲག་གཉིས་ཀྱང་བྱང་ཆུབ་ཡང་དག་པར་འཛིན་དུ་བཅུག་པ་དང་། དེ་དག་ཐམས་ཅད་ཀྱིས་ཀྱང་འདི་སྐད་ཅེས་སྨྲས་སོ། །བདག་ཅག་ཀྱང་རང་རང་གི་ཁྱིམ་དུ་མཆིས་ལ་གཅིག་པུ་དབེན་པར་མཆིས་ནས་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་བསམ་པར་བགྱིའོ། །དེ་སྐད་ཅེས་སྨྲས་ནས་ཐམས་ཅད་རང་རང་གི་ཁྱིམ་དག་ཏུ་དོང་སྟེ་གཅིག་པུ་དབེན་པར་འདུག་ནས་ལོ་བདུན་གྱི་བར་དུ་སངས་རྒྱས་ཀྱི་ཞིང་གི་ཡོན་ཏན་བཀོད་པའི་སྨོན་ལམ་སེམས་པར་བྱེད་དོ། །རིགས་ཀྱི་བུ་དེ་ནས་དུས་གཞན་ཞིག་ན་བྲམ་ཟེ་རྒྱ་མཚོའི་རྡུལ་གྱི་སེམས་ལ་འདི་ལྟ་བུའི་རྣམ་པར་རྟོག་པ་སྐྱེས་ཏེ། བདག་གིས་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་མང་པོ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ཅིང་། བདག་གིས་སངས་རྒྱས་བཅོམ་ལྡན་འདས་དགེ་སློང་གི་དགེ་འདུན་དཔག་ཏུ་མེད་པ་དང་བཅས་པ་འདི་ཡང་ལོ་བདུན་གྱི་བར་དུ་ཡོ་བྱད་ཐམས་ཅད་ཀྱིས་སྤྱན་དྲངས་པས། གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བདག་གིས་བསམ་པ་ཡོངས་སུ་རྫོགས་པར་འགྱུར་ཞིང་དེ་བཞིན་དུ་སྨོན་ལམ་འདི་ཡང་འགྲུབ་པ་ལྟ་ན་དེའི་ཕྱིར་བདག་གིས་ལྷ་དང་། ལྷ་མ་ཡིན་དང་། དྲི་ཟ་དང་། གནོད་སྦྱིན་དང་། སྲིན་པོ་དང་། གྲུལ་བུམ་རྣམས་མཆོད་སྦྱིན་ཆེན་པོ་འདི་ལ་ཡང་དག་པར་གཟུད་པར་བྱའོ་སྙམ་མོ། །རིགས་ཀྱི་བུ་དེ་ནས་མདུན་ན་འདོན་གྱི་གཙོ་བོ་བྲམ་ཟེ་རྒྱ་མཚོའི་རྡུལ་རྒྱལ་པོ་རྣམ་ཐོས་ཀྱི་བུ་མཐོང་བར་འདོད་པ་དང་། དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུ་གནོད་སྦྱིན་འབུམ་ཕྲག་དུ་མས་ཡོངས་སུ་བསྐོར་ཅིང་མདུན་དུ་བདར་ནས། བྲམ་ཟེ་རྒྱ་མཚོའི་རྡུལ་ག་ལ་བ་དེར་སོང་སྟེ་ཕྱིན་པ་དང་། བྲམ་ཟེ་རྒྱ་མཚོའི་རྡུལ་གྱི་མདུན་དུ་འདུག་ནས་འདི་སྐད་ཅེས་སྨྲས་སོ། །བྲམ་ཟེ་ཁྱོད་ཁོ་བོ་ལས་ཇི་ཞིག་འདོད། །བྲམ་ཟེས་སྨྲས་པ། ཁྱོད་སུ་ཞིག་ཡིན། རྣམ་ཐོས་ཀྱི་བུས་སྨྲས་པ། བྲམ་ཟེ་ཆེན་པོ་ཁྱོད་ཀྱིས་
གནོད་སྦྱིན་གྱི་བདག་པོ་རྣམ་ཐོས་ཀྱི་བུ་ཞེས་བྱ་བ་ཞིག་ཡོད་པར་ཐོས་པ་དེ་ནི་ཁོ་བོ་ཡིན་ན་བྲམ་ཟེ་བསྒོ་བ་ཅི་ཡོད། ཅི་ཞིག་བགྱི། བྲམ་ཟེས་སྨྲས་པ། རྒྱལ་པོ་ཆེན་པོ་ཁྱོད་ཀྱང་མཆོད་སྦྱིན་ཆེན་པོ་འདི་ལ་སྤྲོ་བ་སྐྱེད་ཅིག །དེས་སྨྲས་པ། བྲམ་ཟེ་ཁྱོད་ཇི་ལྟར་འདོད་པ་དེ་ལྟར་བྱའོ། །སྨྲས་པ། རྒྱལ་པོ་ཆེན་པོ་དེའི་ཕྱིར་ཁྱོད་ཀྱིས་ཁོ་བོའི་ཚིག་གིས་གནོད་སྦྱིན་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ལ་འདི་སྐད་ཅེས་ཀྱང་བསྒོ་ཤིག །གལ་ཏེ་གནོད་སྦྱིན་ཁྱེད་ཅག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་པ་ལྟ་ན། ཁྱེད་ཅག་དེང་ལ་རྒྱ་མཚོའི་ཕ་རོལ་ནས་ཙན་དན་ས་མཆོག་པ་དང་། ཙན་དན་སྦྲུལ་གྱི་སྙིང་པོ་དག་ལོང་ཤིག །ཁ་ཅིག་གིས་ནི་སྤོས་སྣ་ཚོགས་དང་། ཁ་ཅིག་གིས་ནི་མེ་ཏོག་སྣ་ཚོགས་དག་ལོང་ཤིག །ཅེས་བསྒོ་ཤིག་དང་། དེས་ཁོ་བོས་ཉིན་གཅིག་བཞིན་དུ་བཅོམ་ལྡན་འདས་ལ་མཆོད་པ་བྱའོ། །རྒྱལ་པོ་ཆེན་པོ་རྣམ་ཐོས་ཀྱི་བུ་བྲམ་ཟེ་དེ་ལྟར་བྱའོ་ཞེས་བྲམ་ཟེ་དེའི་ལྟར་མཉན་ནས་དེ་ཉིད་དུ་མི་སྣང་བར་གྱུར་ཏེ། རྔ་བོ་ཆེ་བརྡུངས་ནས་གནོད་སྦྱིན་དང་། སྲིན་པོ་དག་བསྡུས་ཏེ་འདི་སྐད་ཅེས་སྨྲས་སོ། །གྲོགས་པོ་དག་ཤེས་པར་གྱིས་ཤིག །གང་འཛམ་བུའི་གླིང་འདི་ན་རྒྱལ་པོ་རྩིབས་ཀྱི་མུ་ཁྱུད་ཀྱི་མདུན་ན་འདོན་གྱི་གཙོ་བོ་བྲམ་ཟེ་རྒྱ་མཚོའི་རྡུལ་ཅེས་བྱ་བ་དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་དགེ་སློང་གི་དགེ་འདུན་དང་བཅས་པ་ལ་ལོ་བདུན་དུ་ཡོ་བྱད་ཐམས་ཅད་ཀྱིས་བསྙེན་བཀུར་བྱེད་ཀྱིས། དེའི་ཕྱིར་ཁྱེད་ཅག་གིས་དེའི་དགེ་བའི་རྩ་བ་ལ་རྗེས་སུ་ཡི་རང་བར་བྱ་ཞིང་དགེ་བའི་རྩ་བ་དེས་ཁྱེད་ཅག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་ཅིག །དེའི་ཚེ་ན་གནོད་སྦྱིན་དང་། སྲིན་པོ་བྱེ་བ་ཁྲག་ཁྲིག་འབུམ་ཕྲག་མང་པོ་དག་གིས་ཐལ་མོ་སྦྱར་ཏེ་སྨྲས་པ། བྲམ་ཟེ་རྒྱ་མཚོའི་རྡུལ་གྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་དགེ་སློང་གི་དགེ་འདུན་དཔག་ཏུ་མེད་པ་དང་བཅས་པ་ལ་ལོ་བདུན་དུ་ཡོ་བྱད་ཐམས་ཅད་ཀྱིས་བསྙེན་བཀུར་བྱས་པའི་བསོད་ནམས་ཀྱི་རྒྱུན་དང་། དགེ་བའི་
རྒྱུན་གང་ཡིན་པའི་བསོད་ནམས་ཀྱི་ཕུང་པོ་དེ་དག་ཐམས་ཅད་ལ་བདག་ཅག་རྗེས་སུ་ཡི་རང་ངོ་། །དགེ་བའི་རྩ་བ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ། །རྒྱལ་པོ་ཆེན་པོ་རྣམ་ཐོས་ཀྱི་བུས་སྨྲས་པ། ཁྱེད་ཅག་ཉོན་ཅིག །ཁྱེད་ཅག་ལས་གང་སུ་དགེ་བའི་རྩ་བ་འདོད་པ་དང་། བསོད་ནམས་འདོད་པས་ལོ་བདུན་དུ་གང་གི་ཕྱིར་བྲམ་ཟེ་རྒྱ་མཚོའི་རྡུལ་གྱིས་བཅོམ་ལྡན་འདས་དང་། དགེ་སློང་གི་དགེ་འདུན་གྱི་ཞལ་ཟས་སྦྱོར་བར་འགྱུར་བའི་ཙན་དན་ས་མཆོག་པ་དང་། ཙན་དན་སྦྲུལ་གྱི་སྙིང་པོ་དག་རྒྱ་མཚོའི་ཕ་རོལ་ནས་ལོང་ཤིག །དེ་ནས་གནོད་སྦྱིན་དགུ་ཁྲི་ཉིས་སྟོང་གིས་ཚིག་འཐུན་པར་སྨྲས་པ། གྲོགས་པོ་དག་བདག་ཅག་གིས་ལོ་བདུན་པོ་འདི་ལ་གང་གི་ཕྱིར་བྲམ་ཟེ་རྒྱ་མཚོའི་རྡུལ་གྱིས་བཅོམ་ལྡན་འདས་དང་། དགེ་སློང་གི་དགེ་འདུན་གྱི་ཕྱིར་ཞལ་ཟས་སྦྱོར་བར་འགྱུར་བའི་ཙན་དན་ས་མཆོག་པ་དང་། ཙན་དན་སྦྲུལ་གྱི་སྙིང་པོ་དག་བླང་བར་བྱའོ། །གནོད་སྦྱིན་བཞི་ཁྲི་དྲུག་སྟོང་གིས་སྨྲས་པ། བདག་ཅག་གིས་ནི་སྤོས་བླང་བར་བྱའོ། །གནོད་སྦྱིན་ལྔ་ཁྲི་ཉིས་སྟོང་གིས་སྨྲས་པ། བདག་ཅག་གིས་ནི་མེ་ཏོག་སྣ་ཚོགས་དག་བླང་བར་བྱའོ། །གནོད་སྦྱིན་ཉི་ཁྲིས་སྨྲས་པ། བདག་ཅག་གིས་ནི་བཅོམ་ལྡན་འདས་དང་། དགེ་སློང་གི་དགེ་འདུན་གྱི་ཕྱིར་སྨན་བཅུད་ཀྱིས་ལེན་སྣ་ཚོགས་དག་གི་མཐུ་བླངས་ལ་ཞལ་ཟས་དང་། སྩང་ནན་སྦྱོར་བར་འགྱུར་བ་གང་ཡིན་པ་དེར་མཐུ་གཞུག་པར་བྱའོ། །གནོད་སྦྱིན་བདུན་ཁྲིས་སྨྲས་པ། གྲོགས་པོ་དག་བདག་ཅག་གིས་ནི་བཅོམ་ལྡན་འདས་དང་། དགེ་སློང་གི་དགེ་འདུན་གྱི་ཞལ་ཟས་སྦྱར་བར་བྱའོ། །རིགས་ཀྱི་བུ་དེ་ནས་བྲམ་ཟེ་རྒྱ་མཚོའི་རྡུལ་རྒྱལ་པོ་ཆེན་པོ་འཕགས་སྐྱེས་པོ་མཐོང་བར་འདོད་པ་དང་། དེ་ནས་རྒྱལ་པོ་ཆེན་པོ་འཕགས་སྐྱེས་པོ་བྲམ་ཟེ་རྒྱ་མཚོའི་རྡུལ་ག་ལ་བ་དེར་སོང་སྟེ་ཕྱིན་ཅིང་གྲུལ་བུམ་བྱེ་བ་ཁྲག་ཁྲིག་འབུམ་ཕྲག་དུ་མ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པའི་བར་དང་། དེ་བཞིན་དུ་རྒྱལ་པོ་ཆེན་པོ་མིག་མི་བཟང་དང་། ཡུལ་འཁོར་སྲུང་དང་། ཀླུ་དང་། དྲི་ཟ་བྱེ་བ་ཁྲག་ཁྲིག་འབུམ་ཕྲག་དུ་མ་དག་
གིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པའི་བར་དུ་སྔ་མ་བཞིན་ནོ། །དེ་ནས་སངས་རྒྱས་ཀྱི་མཐུས་གླིང་བཞི་པ་གཉིས་པའི་འཇིག་རྟེན་སྐྱོང་བ་རྣམས་ཀྱང་བྲམ་ཟེ་རྒྱ་མཚོའི་རྡུལ་གྱི་གན་དུ་འོངས་པ་དང་། བྲམ་ཟེ་རྒྱ་མཚོའི་རྡུལ་གྱིས་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ནས། དེ་དག་ཀྱང་དོང་སྟེ་རང་རང་གི་འཁོར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་གོ །སྟོང་གསུམ་གྱི་སྟོང་ཆེན་པོའི་སངས་རྒྱས་ཀྱི་ཞིང་གི་རྣམ་ཐོས་ཀྱི་བུ་ཐེར་འབུམ་འཁོར་དང་བཅས་པ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་གོ །འཕགས་སྐྱེས་པོ་ཐེར་འབུམ་དང་། མིག་མི་བཟང་ཐེར་འབུམ་དང་། ཡུལ་འཁོར་སྲུང་ཐེར་འབུམ་འཁོར་དང་བཅས་པ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་གོ །རིགས་ཀྱི་བུ་དེ་ནས་བྲམ་ཟེ་རྒྱ་མཚོའི་རྡུལ་འདི་སྙམ་དུ་སེམས་ཏེ། གལ་ཏེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཞིང་བདག་གི་རེ་བ་ཡང་ཡང་དག་པར་འགྲུབ་པར་འགྱུར་ལ། གལ་ཏེ་བདག་གི་སྨོན་ལམ་ཡང་ཡང་དག་པར་འགྲུབ་པར་འགྱུར་བ་ལྟ་ན་བདག་འདོད་པ་ན་སྤྱོད་པའི་ལྷ་རྣམས་ལ་མཆོད་སྦྱིན་ཆེན་པོ་འདིའི་བསོད་ནམས་ཡང་དག་པར་བགོ་བཤའ་བྱེད་པར་གྱུར་ཅིག །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་འཇུག་པར་གྱུར་ཅིག །གལ་ཏེ་བདག་བསོད་ནམས་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་ལྟ་ན་དེང་ལྷའི་དབང་པོ་བརྒྱ་བྱིན་བདག་ལ་ལྟ་བའི་ཕྱིར་འདིར་འོང་བར་གྱུར་ཅིག །ལྷའི་བུ་རབ་འཐབ་བྲལ་དང་།
ལྷའི་བུ་ཡོངས་སུ་དགའ་ལྡན་དང་། ལྷའི་བུ་རབ་འཕྲུལ་དང་། ལྷའི་བུ་གཞན་འཕྲུལ་དབང་བྱེད་ཀྱང་བདག་ལ་བལྟ་བའི་ཕྱིར་འདིར་འོང་བར་གྱུར་ཅིག་སྙམ་མོ། །རིགས་ཀྱི་བུ་བྲམ་ཟེ་རྒྱ་མཚོའི་རྡུལ་གྱིས་དེ་སྙམ་དུ་སེམས་བསྐྱེད་མ་ཐག་ཏུ་ལྷའི་དབང་པོ་བརྒྱ་བྱིན་བྲམ་ཟེ་དེ་ལྟ་བའི་ཕྱིར་འོངས་སོ། །ལྷའི་བུ་རབ་འཐབ་བྲལ་དང་། ལྷའི་བུ་ཡོངས་སུ་དགའ་ལྡན་དང་། ལྷའི་བུ་རབ་འཕྲུལ་དང་། ལྷའི་བུ་གཞན་འཕྲུལ་དབང་བྱེད་ཀྱང་བྲམ་ཟེ་དེ་ལྟ་བའི་ཕྱིར་འོངས་ནས། བྲམ་ཟེ་རྒྱ་མཚོའི་རྡུལ་གྱིས་དེ་དག་ལ་ཁྱེད་ཅག་སུ་ཡིན་ཞེས་དྲིས་པ་དང་། ལྷའི་རྒྱལ་པོ་ལྔ་པོ་དག་གིས་རང་རང་གི་མིང་རུས་བསྟན་ནས་འདི་སྐད་ཅེས་སྨྲས་སོ། །ཀྱེ་བྲམ་ཟེ་ཁོ་བོ་ཅག་ལ་བསྒོ་བ་ནི་ཅི་ཞིག་ཡོད། མཆོད་སྦྱིན་ཆེན་པོ་འདི་ལ་ཁོ་བོ་ཅག་གིས་ཡོ་བྱད་དག་སྦྱར་བར་བྱ་བ་ལྟ་ཅི་ཡོད། བྲམ་ཟེས་སྨྲས་པ། བཅོམ་ལྡན་འདས་དང་། དགེ་སློང་གི་དགེ་འདུན་གྱི་ཕྱིར་ཁྱེད་ཅག་ལྷའི་འཇིག་རྟེན་ན་ཐམས་ཅད་ལས་ཁྱད་པར་དུ་འཕགས་པའི་རིན་པོ་ཆེའི་ཁང་པ་བརྩེགས་པ་དག་དང་། རིན་པོ་ཆེའི་ཤིང་ལྗོན་པ་དག་དང་། དཔག་བསམ་གྱི་ཤིང་ལྗོན་པ་དག་དང་། སྤོས་ཀྱི་ཤིང་ལྗོན་པ་དག་དང་། མེ་ཏོག་གི་ཤིང་ལྗོན་པ་དག་དང་། འབྲས་བུའི་ཤིང་ལྗོན་པ་དག་དང་། ལྷའི་ན་བཟའ་དག་དང་། ལྷའི་གདན་དག་དང་། ལྷའི་གདིང་བ་དག་དང་། ལྷའི་རིན་པོ་ཆེའི་སྣོད་དག་དང་། ལྷའི་རྒྱན་དག་དང་། གདུགས་དང་། རྒྱལ་མཚན་དང་། བ་དན་དང་། ལྷབ་ལྷུབ་དག་དང་། ལྷའི་རོལ་མོའི་སྒྲ་གང་དག་ཡོད་པ་དེ་དག་ཐམས་ཅད་ཀྱིས་འཛམ་བུའི་ཚལ་ཐམས་ཅད་བརྒྱན་པར་གྱིས་ཤིག །ལྷའི་རྒྱལ་པོ་ལྔ་པོ་དེ་དག་གིས་གྲོགས་པོ་དེ་ལྟར་བྱའོ་ཞེས་བྲམ་ཟེའི་ལྟར་མཉན་ཏེ། བྲམ་ཟེའི་དྲུང་ནས་ཕྱིར་ལོག་ནས་ལྷའི་འཇིག་རྟེན་དུ་དོང་སྟེ་ཕྱིན་པ་དང་། ལྷའི་བུ་འཁྲི་བྱེད་དང་། ལྷའི་བུ་འཁྱིལ་བྱེད་དང་། ལྷའི་བུ་སྣར་མ་སྐྱེས་དང་། ལྷའི་བུས་རྩོམ་དགའ་རྣམས་བོས་ཏེ་འདི་སྐད་ཅེས་སྨྲས་སོ། །གྲོགས་པོ་དག་ཁྱེད་ཅག་དེང་ལ་འཛམ་བུའི་གླིང་དུ་བབས་ཏེ། བཅོམ་ལྡན་འདས་ཀྱི་ཕྱིར་འཛམ་བུའི་ཚལ་གྱི་སྐྱེད་མོས་ཚལ་རྒྱན་གྱི་ཁྱད་པར་སྣ་ཚོགས་དག་དང་། གདན་དང་། གདིང་བ་སྣ་ཚོགས་དག་གིས་ཇི་ལྟར་ལྷའི་འཇིག་རྟེན་འདི་བརྒྱན་པ་དེ་ལྟ་བུ་དག་གིས་བརྒྱན་པར་གྱིས་ཤིག །གྲོགས་པོ་དག་རིན་པོ་ཆེའི་ཁང་པ་བརྩེགས་པ་འདི་ལྟ་བུ་ཡང་བརྩིག་ཏུ་
ཆུག་ཤིག །འདི་ལྟ་སྟེ། ཁང་པ་བརྩེགས་པ་རིན་པོ་ཆེའི་བ་གམ་ཅན་འདི་ཅི་འདྲ་བ་དེ་ལྟ་བུའི་རིན་པོ་ཆེའི་ཁང་པ་བརྩེགས་པ་བརྩིག་ཏུ་ཆུག་ཤིག །ལྷའི་བུ་དེ་ལྔས་ལྷའི་རྒྱལ་པོ་རྣམས་ཀྱི་ལྟར་མཉན་ནས་འཛམ་བུའི་གླིང་དུ་བབས་ཏེ། བཅོམ་ལྡན་འདས་ཀྱི་ཕྱིར་མཚན་གཅིག་གིས་འཛམ་བུའི་ཚལ་གྱི་སྐྱེད་མོས་ཚལ་ཐམས་ཅད་རིན་པོ་ཆེའི་ཤིང་ལྗོན་པ་དག་དང་། རྒྱལ་མཚན་གྱི་བར་དག་གི་རྒྱན་དེ་ལྟ་བུ་དག་གིས་བརྒྱན་ཏོ། །འདི་ལྟ་སྟེ། དཔེར་ན་ལྷའི་དབང་པོ་བརྒྱ་བྱིན་གྱི་ཁང་པ་བརྩེགས་པ་རིན་པོ་ཆེའི་བ་གམ་ཅན་ཅི་འདྲ་བ་དེ་ལྟ་བུའི་ཁང་པ་བརྩེགས་པ་ཡང་བརྩིགས་ཏེ། འཛམ་བུའི་ཚལ་ཐམས་ཅད་ལྷའི་རྒྱན་གྱིས་རྣམ་པ་ཐམས་ཅད་དུ་ཡོངས་སུ་མཐར་ཐུག་པར་བརྒྱན་ནས་ལྷའི་རྒྱལ་པོ་རྣམས་ཀྱི་གན་དུ་སོང་སྟེ་སྨྲས་པ། གྲོགས་པོ་དག་མཁྱེན་པར་མཛོད་ཅིག །ཇི་ལྟར་ལྷའི་འཇིག་རྟེན་འདི་ལེགས་པར་བརྒྱན་པ་དེ་བཞིན་དུ། བཅོམ་ལྡན་འདས་ཀྱི་ཕྱིར་འཛམ་བུའི་ཚལ་གྱི་སྐྱེད་མོས་ཚལ་ཡང་ལྷའི་རྒྱན་གྱི་ཁྱད་པར་རྣམས་ཀྱིས་རྣམ་པ་ཐམས་ཅད་དུ་ཡོངས་སུ་མཐར་ཐུག་པར་བརྒྱན་ཅིང་འདི་ལྟ་སྟེ། དཔེར་ན་ལྷའི་དབང་པོ་བརྒྱ་བྱིན་གྱི་ཁང་པ་བརྩེགས་པ་རིན་པོ་ཆེའི་བ་གམ་ཅན་ཅི་འདྲ་བ་དེ་ལྟ་བུའི་རིན་པོ་ཆེ་ཐམས་ཅད་ཀྱི་ཁང་པ་བརྩེགས་པ་ཡང་བརྩིགས་ལགས་ཏེ། གྲོགས་པོ་དག་ལྷའི་འཇིག་རྟེན་དང་། འཛམ་བུའི་གླིང་གི་འཛམ་བུའི་ཚལ་གྱི་སྐྱེད་མོས་ཚལ་ནི་ཁྱད་པར་ཅུང་ཟད་ཀྱང་མ་མཆིས་སོ། །དེ་ནས་ལྷའི་རྒྱལ་པོ་ལྔ་པོ་བརྒྱ་བྱིན་དང་རབ་འཐབ་བྲལ་དང་། ཡོངས་སུ་དགའ་ལྡན་དང་། རབ་འཕྲུལ་དང་། གཞན་འཕྲུལ་དབང་བྱེད་དེ་དག་འཛམ་བུའི་གླིང་དུ་བབས་ནས་བྲམ་ཟེ་རྒྱ་མཚོའི་རྡུལ་གྱི་དྲུང་དུ་སོང་སྟེ་འདི་སྐད་ཅེས་སྨྲས་སོ། །བྲམ་ཟེ་བཅོམ་ལྡན་འདས་དང་། དགེ་སློང་གི་དགེ་འདུན་གྱི་ཕྱིར་འཛམ་བུའི་ཚལ་ནི་བརྒྱན་ཟིན་ན་ཡང་ཁོ་བོ་ཅག་གིས་བྱ་བ་ལྟ་ཅི་ཡོད། དེ་སྐད་ཅེས་སྨྲས་པ་དང་། བྲམ་ཟེ་རྒྱ་མཚོའི་རྡུལ་གྱིས་ལྷའི་བུ་ལྔ་པོ་དེ་དག་ལ་འདི་སྐད་ཅེས་སྨྲས་སོ། །ལྷའི་རྒྱལ་པོ་ཁྱེད་ལྔ་ནི་ལྷའི་རིས་སོ་སོ་ན་རྒྱལ་སྲིད་བྱེད་པ་ཡིན་པས་དེ་ན་ཁྱེད་ཅག་གི་དབང་དུ་འགྱུར་གྱིས་ལྷའི་རྒྱལ་པོ་དག་དེང་ལ་རང་རང་གི་ལྷའི་འཁོར་རྣམས་བསྡུས་ཏེ་བཅོམ་ལྡན་འདས་དང་དགེ་སློང་གི་དགེ་འདུན་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བའི་ཕྱིར་འཛམ་བུའི་གླིང་དུ་ཤེག་
ལ་བཅོམ་ལྡན་འདས་ལས་ཆོས་ཀྱང་ཉོན་ཅིག །དེ་ནས་ལྷའི་རྒྱལ་པོ་དེ་ལྔ་རང་རང་གི་གནས་ཀྱི་ཁྱད་པར་རྣམས་སུ་དོང་སྟེ་ཕྱིན་པ་དང་། ལྷའི་དབང་པོ་བརྒྱ་བྱིན་གྱིས་སུམ་ཅུ་རྩ་གསུམ་པའི་ལྷ་རྣམས་བསྡུས་ཏེ་འདི་སྐད་ཅེས་སྨྲས་སོ། །གྲོགས་པོ་དག་ཤེས་པར་གྱིས་ཤིག །འཛམ་བུའི་གླིང་ན་རྒྱལ་པོ་རྩིབས་ཀྱི་མུ་ཁྱུད་ཀྱི་མདུན་ན་འདོན་གྱི་གཙོ་བོ་བྲམ་ཟེ་རྒྱ་མཚོའི་རྡུལ་ཅེས་བྱ་བ་དེས་དེ་བཞིན་གཤེགས་པ་རིན་པོ་ཆེའི་སྙིང་པོ་དགེ་སློང་གི་དགེ་འདུན་དཔག་ཏུ་མེད་པ་དང་བཅས་པ་ལ་ལོ་བདུན་དུ་ཡོ་བྱད་ཐམས་ཅད་ཀྱིས་སྤྱན་དྲངས་ཤིང་རི་མོར་བྱེད་དེ། བྲམ་ཟེ་རྒྱ་མཚོའི་རྡུལ་གྱིས་ཡང་དག་པར་འཛིན་དུ་བཅུག་པས་ཁོ་བོ་ཅག་གིས་ཀྱང་བཅོམ་ལྡན་འདས་དང་དགེ་སློང་གི་དགེ་འདུན་གྱི་ཕྱིར་སྐྱེད་མོས་ཚལ་ཐམས་ཅད་བརྒྱན་ཟིན་གྱིས། དེའི་ཕྱིར་ཁྱོད་ཀྱིས་ཀྱང་དགེ་བའི་རྩ་བ་དེ་ལ་རྗེས་སུ་ཡི་རང་བར་གྱིས་ལ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་ཅིག །དེའི་ཚེ་ན་སུམ་ཅུ་རྩ་གསུམ་པའི་ལྷ་བྱེ་བ་ཁྲག་ཁྲིག་འབུམ་ཕྲག་མང་པོ་དག་གིས་ཐལ་མོ་སྦྱར་ཏེ་ཚིག་ཏུ་སྨྲས་པ། གྲོགས་པོ་བདག་ཅག་གིས་བསོད་ནམས་ཀྱི་ཕུང་པོ་དེ་ལ་རྗེས་སུ་ཡི་རང་བར་བྱ་ཞིང་རྗེས་སུ་ཡི་རང་བ་དེ་ལས་བྱུང་བའི་བསོད་ནམས་གང་ཡིན་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱའོ། །ལྷའི་བུ་རབ་འཐབ་བྲལ་གྱིས་ཀྱང་འཐབ་བྲལ་གྱི་ལྷའི་བུ་རྣམས་བསྡུས་ཏེ། རྒྱ་ཆེར་སྔ་མ་བཞིན་དུ་སྦྱར་བར་བྱའོ། །ལྷའི་བུ་ཡོངས་སུ་དགའ་ལྡན་དང་། ལྷའི་བུ་འཕྲུལ་དགའ་དང་། ལྷའི་བུ་གཞན་འཕྲུལ་དབང་བྱེད་ཀྱིས་ཀྱང་གཞན་འཕྲུལ་དབང་བྱེད་ཀྱི་བར་གྱི་ལྷའི་བུ་དག་བསྡུས་ནས་ལྷའི་བུ་བྱེ་བ་ཁྲག་ཁྲིག་འབུམ་ཕྲག་མང་པོ་དག་གིས་ཐལ་མོ་སྦྱར་ཏེ་ཚིག་ཏུ་སྨྲས་པ། གྲོགས་པོ་དག་བདག་ཅག་གིས་དགེ་བའི་རྩ་བ་རྣམས་ཀྱི་བསོད་ནམས་གང་ཡིན་པ་དེ་ལ་རྗེས་སུ་ཡི་རང་བར་བྱ་ཞིང་། དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱས། གྲོགས་པོ་དག་དེའི་ཕྱིར་འཛམ་བུའི་གླིང་དུ་འབབ་ཅིང་བཅོམ་ལྡན་འདས་དང་། དགེ་སློང་གི་དགེ་འདུན་ལ་བལྟ་བ་དང་། ཕྱག་བྱ་བ་དང་།
བསྙེན་བཀུར་བྱ་བ་དང་། ཆོས་མཉན་པའི་ཕྱིར་འདོང་ངོ་། །ལྷའི་རྒྱལ་པོ་དེ་ལྔ་ནུབ་མོ་ལྷའི་རྒྱལ་པོ་རེ་རེ་ཞིང་ཡང་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་བྱེ་བ་ཁྲག་ཁྲིག་འབུམ་ཕྲག་མང་པོ་དག་དང་ལྷན་ཅིག་ཏུ་འཛམ་བུའི་གླིང་དུ་བབས་ཏེ། བཅོམ་ལྡན་འདས་དང་དགེ་སློང་གི་དགེ་འདུན་གྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ཆོས་ཉན་ཏོ། །ནམ་མཁའི་དཀྱིལ་ན་གནས་པའི་ལྷ་རྣམས་ཀྱང་བཅོམ་ལྡན་འདས་ལ་ལྷའི་མེ་ཏོག་ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་། སྣ་མ་དང་། བར་ཤི་ཀ་དང་། ཨ་ཏི་མུག་ཏ་ཀ་དང་། ཙམ་པ་ཀ་དང་། མན་དཱ་ར་བ་དང་། མན་དཱ་ར་བ་ཆེན་པོའི་མེ་ཏོག་གི་ཆར་དག་འབེབས་ཤིང་ལྷའི་རོལ་མོའི་སྒྲ་དག་ཀྱང་རབ་ཏུ་སྒྲོགས་པར་བྱེད་དོ། །རིགས་ཀྱི་བུ་གཞན་ཡང་བྲམ་ཟེ་རྒྱ་མཚོའི་རྡུལ་གྱི་སེམས་ལ་སེམས་ཀྱི་ཡོངས་སུ་རྟོག་པ་འདི་ལྟ་བུ་སྐྱེས་ཏེ། གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བདག་གི་རེ་བ་ཡོངས་སུ་རྫོགས་པར་འགྱུར་ཞིང་སྨོན་ལམ་འདི་ཡང་འགྲུབ་པ་ལྟ་ན། འདི་ལྟར་ལྷ་མ་ཡིན་དག་ཀྱང་བྱང་ཆུབ་ཡང་དག་པར་འཛིན་དུ་འཇུག་པར་གྱུར་ཅིག་སྙམ་མོ། །རིགས་ཀྱི་བུ་དེས་སེམས་བསྐྱེད་མ་ཐག་ཏུ་གནོད་སྦྱིན་གྱི་དབང་པོ་ལྔ་བྲམ་ཟེ་དེ་ག་ལ་བ་དེར་དོང་སྟེ་ལྷགས་པ་ནས། བྲམ་ཟེའི་ཚིག་གིས་ལྷ་མ་ཡིན་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དང་བཅས་པ་བྱེ་བ་ཁྲག་ཁྲིག་འབུམ་ཕྲག་མང་པོ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ཅིང་། བཅོམ་ལྡན་འདས་ཀྱི་དྲུང་དུ་འོངས་ནས་ཆོས་ཉན་པའི་བར་དུ་སྔ་མ་བཞིན་དུ་རྒྱ་ཆེར་སྦྱར་རོ། །དེ་བཞིན་དུ་བྲམ་ཟེ་དེ་བདུད་འདོད་པ་དང་། དེའི་ཚེ་ན་བདུད་གང་པོ་ཞེས་བྱ་བ་འོངས་པ་ནས་བདུད་ཀྱི་རིས་ཀྱི་ལྷའི་བུ་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དང་བཅས་པ་བྱེ་བ་ཁྲག་ཁྲིག་འབུམ་ཕྲག་དུ་མ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པའི་བར་དང་། ཆོས་མཉན་པའི་ཕྱིར་ལྷགས་པའི་བར་དུ་སྔ་མ་བཞིན་དུ་སྦྱར་རོ། །རིགས་ཀྱི་བུ་དེ་ནས་ཡང་བྲམ་ཟེ་རྒྱ་མཚོའི་རྡུལ་ཚངས་པ་ཆེན་པོ་གནས་པའི་གྲོང་ཁྱེར་ཞེས་བྱ་བ་འོང་
བར་འདོད་པ་ནས་བྲམ་ཟེ་ལས་མཉན་ཅིང་ཚངས་པའི་འཇིག་རྟེན་དུ་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་བཅོམ་ལྡན་འདས་དང་། དགེ་སློང་གི་དགེ་འདུན་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། བཅོམ་ལྡན་འདས་ལས་ཆོས་མཉན་པའི་ཕྱིར་དེ་ནས་བབས་པའི་བར་དུ་སྔ་མ་བཞིན་དུ་སྦྱར་རོ། །རིགས་ཀྱི་བུ་དེ་ནས་ཡང་བྲམ་ཟེ་རྒྱ་མཚོའི་རྡུལ་གླིང་བཞི་པ་གཉིས་པའི་བརྒྱ་བྱིན་མཐོང་བར་འདོད་ཅིང་ལྷའི་བུ་རབ་འཐབ་བྲལ་དང་། ཡོངས་སུ་དགའ་ལྡན་དང་། རབ་འཕྲུལ་དང་། གཞན་འཕྲུལ་དབང་བྱེད་རྣམས་དང་མཐོང་བར་འདོད་པ་དང་། བཅོམ་ལྡན་འདས་ཀྱི་མཐུས་ལྷའི་རྒྱལ་པོ་དེ་ལྔ་ཡང་བྲམ་ཟེའི་དྲུང་དུ་ལྷགས་ནས་བྲམ་ཟེ་དེས་དེ་དག་ཡང་དག་པར་རྗེས་སུ་བསྟན་པ་དང་། དེ་དག་ཀྱང་རང་རང་གི་ལྷའི་གནས་དག་ཏུ་དོང་ནས་བྲམ་ཟེའི་ཚིག་གིས་རང་རང་གི་འཁོར་རྣམས་ཀྱང་ཡང་དག་པར་འཛིན་དུ་བཅུག་གོ །དེ་བཞིན་དུ་སུམ་ཅུ་རྩ་གསུམ་པའི་ལྷའི་བུ་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དང་བཅས་པ་བྱེ་བ་ཁྲག་ཁྲིག་འབུམ་ཕྲག་མང་པོ་དག་གིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་དེ་དག་ཀྱང་བརྒྱ་བྱིན་དང་ལྷན་ཅིག་ཏུ་བཅོམ་ལྡན་འདས་དང་། དགེ་སློང་གི་དགེ་འདུན་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། བཅོམ་ལྡན་འདས་ལས་ཆོས་མཉན་པའི་ཕྱིར་གླིང་བཞི་པ་འདིར་ལྷགས་སོ། །དེ་བཞིན་དུ་ལྷའི་བུ་རབ་འཐབ་བྲལ་དང་། ཡོངས་སུ་དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་རྣམས་ཀྱིས་ཀྱང་གཞན་འཕྲུལ་དབང་བྱེད་ཀྱི་བར་གྱི་ལྷའི་བུ་རྣམས་བྱང་ཆུབ་ཡང་དག་པར་འཛིན་དུ་བཅུག་ནས། གཞན་འཕྲུལ་དབང་བྱེད་ཀྱི་བར་གྱི་ལྷའི་བུ་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དང་བཅས་པ་བྱེ་བ་ཁྲག་ཁྲིག་འབུམ་ཕྲག་མང་པོ་དག་གིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། བཅོམ་ལྡན་འདས་དང་། དགེ་སློང་གི་དགེ་འདུན་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་།
བཅོམ་ལྡན་འདས་ལས་ཆོས་མཉན་པའི་ཕྱིར་གླིང་བཞི་པ་འདིར་ལྷགས་སོ། །གླིང་བཞི་པ་གཉིས་པའི་ལྷ་མ་ཡིན་གྱི་དབང་པོ་དང་། བདུད་དང་། ཚངས་པ་རྣམས་ཀྱང་དེ་བཞིན་ནོ། །དེ་བཞིན་དུ་གླིང་བཞི་པ་གསུམ་པ་དང་། བཞི་པ་དང་། ལྔ་པའི་བར་དག་གི་བརྒྱ་བྱིན་དང་། ལྷའི་བུ་རབ་འཐབ་བྲལ་དང་། ཡོངས་སུ་དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། ལྷ་མ་ཡིན་གྱི་དབང་པོ་དང་། བདུད་དང་། ཚངས་པ་རྣམས་ཀྱང་བཅོམ་ལྡན་འདས་ཀྱི་མཐུས་ཆོས་མཉན་པའི་བར་གྱི་ཕྱིར་དེ་དག་འཁོར་དང་བཅས་ཏེ་གླིང་བཞི་པ་འདིར་ལྷགས་སོ། །དེ་བཞིན་དུ་སྟོང་གསུམ་གྱི་སྟོང་ཆེན་པོའི་སངས་རྒྱས་ཀྱི་ཞིང་གི་བར་དག་ནས་ཀྱང་བརྒྱ་བྱིན་ཐེར་འབུམ་དང་། ལྷའི་བུ་རབ་འཐབ་བྲལ་ཐེར་འབུམ་དང་། ཡོངས་སུ་དགའ་ལྡན་ཐེར་འབུམ་དང་། འཕྲུལ་དགའ་ཐེར་འབུམ་དང་། གཞན་འཕྲུལ་དབང་བྱེད་ཐེར་འབུམ་དང་། ལྷ་མ་ཡིན་གྱི་དབང་པོ་ཐེར་འབུམ་དང་། བདུད་ཐེར་འབུམ་དང་། ཚངས་པ་ཆེན་པོ་ཐེར་འབུམ་དག་ཀྱང་བཅོམ་ལྡན་འདས་ཀྱི་མཐུས་ཚངས་པ་ཆེན་པོའི་བར་དུ་རེ་རེ་ཞིང་ཡང་ཚངས་རིས་ཀྱི་ལྷ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་བྱེ་བ་ཁྲག་ཁྲིག་འབུམ་ཕྲག་དུ་མའི་བར་དག་གིས་ཡོངས་སུ་བསྐོར་ཅིང་མདུན་དུ་བདར་ནས་བཅོམ་ལྡན་འདས་དང་། དགེ་སློང་གི་དགེ་འདུན་ལ་བལྟ་བ་དང་། ཕྲད་པར་བྱ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། བཅོམ་ལྡན་འདས་ལས་ཆོས་མཉན་པའི་ཕྱིར་གླིང་བཞི་པ་འདིར་ལྷགས་སོ། །དེའི་ཚེ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་དག་ཀྱང་ཁྱབ་པར་མ་གྱུར་པའི་ས་ཕྱོགས་དེ་ནི་ཅུང་ཟད་ཀྱང་མེད་དོ། །རིགས་ཀྱི་བུ་དེ་ནས་བྲམ་ཟེ་རྒྱ་མཚོའི་རྡུལ་འདི་སྙམ་དུ་སེམས་ཏེ། གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བདག་གི་རེ་བ་ཡོངས་སུ་རྫོགས་པར་འགྱུར་ཞིང་། ཇི་ལྟར་རྣམ་ཐོས་ཀྱི་བུ་ཐེར་འབུམ་དང་། ཚངས་པ་ཆེན་པོ་ཐེར་འབུམ་གྱི་བར་འདི་དག་བདག་དང་འཐུན་པར་འཇུག་པ་དེ་བཞིན་དུ་བཅོམ་ལྡན་འདས་ཀྱང་བདག་དང་འཐུན་པར་མཛད་པ་ལྟ་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་བར་གྱི་མི་དང་། དུད་འགྲོ་དང་།
གཤིན་རྗེའི་འཇིག་རྟེན་པ་དང་། སེམས་ཅན་དམྱལ་བ་དེ་དག་ཐམས་ཅད་ཀྱི་སྡུག་བསྔལ་གྱི་ཚོར་བ་རབ་ཏུ་ཞི་བར་མཛད་ལ་བདེ་བའི་ཚོར་བ་སྐྱེད་ནས་དེ་དག་རེ་རེའི་མདུན་ན་ཡང་སངས་རྒྱས་ཀྱི་སྤྲུལ་པ་བཞུགས་ཤིང་དེས་སེམས་ཅན་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་པར་འགྱུར་བ་དེ་ལྟ་བུའི་ཆོ་འཕྲུལ་ཆེན་པོ་མཛད་པར་གྱུར་ཅིག་སྙམ་མོ། །རིགས་ཀྱི་བུ་དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོས་བྲམ་ཟེ་རྒྱ་མཚོའི་རྡུལ་གྱི་སེམས་ཀྱི་ཡོངས་སུ་རྟོག་པ་ཐུགས་ཀྱིས་མཁྱེན་ནས་དེའི་ཚེ་ཏིང་ངེ་འཛིན་རབ་ཏུ་གདུང་བ་ཞེས་བྱ་བ་ལ་སྙོམས་པར་ཞུགས་སོ། །འདི་ལྟར་བཅོམ་ལྡན་འདས་ཀྱིས་ཏིང་ངེ་འཛིན་རབ་ཏུ་གདུང་བ་ལ་ཐུགས་མཉམ་པར་བཞག་པས། བཅོམ་ལྡན་འདས་ཀྱི་སྐུ་ལས་སྤུའི་ཁུང་བུ་རེ་རེ་ནས་ཀྱང་འོད་ཟེར་བགྲང་བ་ལས་ཡང་དག་པར་འདས་པ་སྙེད་དག་བྱུང་སྟེ། འོད་ཟེར་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ཁྱབ་པར་གྱུར་ཏོ། །དེ་ལ་འོད་ཟེར་ཁ་ཅིག་ནི་སེམས་ཅན་དམྱལ་བར་དོང་ནས་གྲང་བའི་སེམས་ཅན་དམྱལ་བར་སྐྱེས་པའི་སེམས་ཅན་རྣམས་ལ་རླུང་དྲོན་པོ་དག་ལངས་སོ། །གང་དག་ཚ་བའི་སེམས་ཅན་དམྱལ་བར་སྐྱེས་པའི་སེམས་ཅན་དེ་དག་ལ་ནི་རླུང་བསིལ་བ་དག་ལངས་ཏེ། དེས་སེམས་ཅན་དམྱལ་བའི་སེམས་ཅན་དེ་དག་གི་བཀྲེས་པ་དང་། སྐོམ་པ་དང་། ངལ་བའི་སྡུག་བསྔལ་ཐམས་ཅད་རབ་ཏུ་ཞི་བར་བྱས་ནས་བདེ་བའི་ཚོར་བ་བསྐྱེད་དོ། །སེམས་ཅན་དམྱལ་བ་པ་རེ་རེའི་མདུན་ན་ཡང་སངས་རྒྱས་ཀྱི་སྤྲུལ་པའི་སྐུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་སྐུ་བརྒྱན་ཅིང་དཔེ་བྱད་བཟང་པོ་བརྒྱད་ཅུས་གཟུགས་ལེགས་པར་སྤྲས་པ་བཞུགས་སོ། །དེ་ནས་སེམས་ཅན་དམྱལ་བ་པ་བདེ་བ་དང་ལྡན་པ་དེ་དག་འདི་སྙམ་དུ་སེམས་ཏེ། རྐྱེན་གང་གིས་བདག་ཅག་གི་སྡུག་བསྔལ་རབ་ཏུ་ཞི་ཞིང་བདེ་བ་སྐྱེས་པར་གྱུར་སྙམ་པ་དང་། དེ་དག་གིས་བཅོམ་ལྡན་འདས་ཀྱི་སྐུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ལེགས་པར་བརྒྱན་ཅིང་དཔེ་བྱད་བཟང་པོ་བརྒྱད་ཅུས་རྣམ་པར་
མཛེས་པ་དེ་མཐོང་ངོ་། །དེ་དག་གིས་དེ་མཐོང་ནས་འདི་སྐད་དུ་སྙིང་རྗེ་ཆེན་པོ་དང་ལྡན་པའི་བདག་ཉིད་ཆེན་པོ་འདིའི་མཐུས་བདག་ཅག་འདི་ལྟར་བདེ་བར་གྱུར་ཏོ་ཞེས་ཟེར་ཞིང་དེ་དག་དགའ་བ་དང་། བདེ་བ་སྐྱེས་ནས་རབ་ཏུ་དང་བའི་ཡིད་ཀྱིས་བཅོམ་ལྡན་འདས་ལ་བལྟ་བ་དང་། བཅོམ་ལྡན་འདས་ཀྱིས་དེ་དག་ལ་འདི་སྐད་ཅེས་སེམས་ཅན་དག་ཁྱེད་ཅག་སངས་རྒྱས་ལ་ཕྱག་འཚལ་ལོ་ཞེས་ལེགས་པར་ཚིག་ཏུ་བརྗོད་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་ཅིག་དང་། ཁྱེད་ཅག་ཕྱིས་སྡུག་བསྔལ་གྱི་ཚོར་བ་མྱོང་བར་མི་འགྱུར་ཞིང་རྟག་ཏུ་བདེ་བའི་ཚོར་བ་འདི་ལྟ་བུ་དག་འཐོབ་པར་འགྱུར་རོ་ཞེས་བཀའ་སྩལ་པ་དང་། དེ་དག་གིས་ཀྱང་འདི་སྐད་ཅེས་བདག་ཅག་སངས་རྒྱས་ལ་ཕྱག་འཚལ་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ཀྱིས་དགེ་བའི་རྩ་བ་དེས་བདག་ཅག་གི་ལས་ཀྱི་སྒྲིབ་པ་ཟད་པར་གྱུར་ཅིག་ཅེས་སྨྲས་སོ། །དེ་ནས་ཁ་ཅིག་ཤི་འཕོས་ནས་ཀྱང་མི་རྣམས་དང་སྐལ་བ་མཉམ་པར་སྐྱེས་སོ། །སེམས་ཅན་དམྱལ་བ་པའི་སེམས་ཅན་གང་དག་མེས་སྲེག་པ་དེ་དག་ལ་ཡང་འོད་ཟེར་དེ་དག་གིས་རླུང་བསིལ་བ་དག་རབ་ཏུ་བཏང་སྟེ། དེ་དག་གིས་དེ་དག་ལ་རེག་པ་དང་བཀྲེས་པ་དང་། སྐོམ་པ་རབ་ཏུ་ཞི་ཞིང་སྡུག་བསྔལ་མེད་པར་གྱུར་ནས། ཁ་ཅིག་དེ་ནས་ཤི་འཕོས་ནས་མི་རྣམས་དང་། སྐལ་བ་མཉམ་པར་སྐྱེས་པའི་བར་དུ་གྱུར་ཏོ། །དེ་བཞིན་དུ་དུད་འགྲོའི་སྐྱེ་གནས་རྣམས་ལ་ཡང་བརྗོད་པར་བྱའོ། །དེ་བཞིན་དུ་མི་རྣམས་ཀྱི་བར་ལ་ཡང་བརྗོད་པར་བྱའོ། །འོད་དེ་ཡང་ཕྱིར་ལོག་སྟེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་དབུའི་གཙུག་ཏུ་ནུབ་པ་ལྷ་དང་། མི་དང་། གནོད་སྦྱིན་དང་། སྲིན་པོ་དང་། ཀླུ་དང་། ལྷ་མ་ཡིན་བགྲང་བ་ལས་ཡང་དག་པར་འདས་པ་དག་གིས་མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ལ་གནས་པར་གྱུར་ཏོ། །སེམས་ཅན་བགྲང་བ་ལས་ཡང་དག་པར་འདས་པ་དག་གིས་ཀྱང་ཏིང་ངེ་འཛིན་དང་། བཟོད་པ་དང་། གཟུངས་ཐོབ་པར་གྱུར་ཏོ། །འཛམ་བུའི་གླིང་གི་མི་རྣམས་ཀྱིས་བཅོམ་ལྡན་འདས་དང་། དགེ་སློང་གི་
དགེ་འདུན་གྱི་ཆེད་ཀྱི་ཕྱིར་ལྷ་རྣམས་ཀྱིས་རྒྱལ་པོའི་ཕོ་བྲང་གྲོང་ཁྱེར་ཡིད་འོང་འཛིན་གྱི་འཛམ་བུའི་ཚལ་གྱི་སྐྱེད་མོས་ཚལ་ལྷའི་རྒྱན་དང་། ལྷབ་ལྷུབ་དག་གིས་བརྒྱན་ཏོ་ཞེས་ཐོས་ནས་བདག་ཅག་དོང་སྟེ་བལྟ་ཞིང་དེར་དེ་བཞིན་གཤེགས་པ་རིན་པོ་ཆེའི་སྙིང་པོ་དང་། དགེ་སློང་གི་དགེ་འདུན་ཡང་བལྟའོ། །དེར་སོང་ནས་བཅོམ་ལྡན་འདས་ལས་ཆོས་ཀྱང་མཉན་པར་བྱའོ་ཞེས་སྨྲས་ནས། དེའི་ཚེ་ན་མི་རྣམས་ལས་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་བྱེ་བ་ཁྲག་ཁྲིག་འབུམ་ཕྲག་དུ་མ་དག་བཅོམ་ལྡན་འདས་དང་། དགེ་སློང་གི་དགེ་འདུན་ལ་བལྟ་བ་དང་། ཕྱག་བྱ་བ་དང་། ཕྲད་པར་བྱ་བ་དང་། བསྙེན་བཀུར་བྱ་བ་དང་། སྐྱེད་མོས་ཚལ་དེ་ཡང་མཐོང་བར་འདོད་པའི་ཕྱིར་ཉིན་གཅིག་བཞིན་དུ་གྲོང་ཁྱེར་ཡིད་འོང་འཛིན་དུ་འོང་ངོ་། །སྐྱེད་མོས་ཚལ་དེ་ལ་ཡང་རིན་པོ་ཆེ་སྣ་བདུན་ལས་བྱས་པའི་སྒོ་ཉི་ཁྲི་ཡོད་དེ། སྐྱེད་མོས་ཚལ་གྱི་སྒོ་རེ་རེ་ཞིང་རིན་པོ་ཆེའི་ཁྲིའུ་ལྔ་བརྒྱ་ལྔ་བརྒྱ་བཤམས་ནས་དེ་དག་ལ་བྲམ་ཟེའི་ཁྱེའུ་ལྔ་བརྒྱ་ལྔ་བརྒྱ་འཁོད་ནས་སེམས་ཅན་གང་དག་འོངས་ཤིང་སྐྱེད་མོས་ཚལ་དེར་འཇུག་པ་དེ་དག་བྲམ་ཟེའི་ཁྱེའུ་དེ་དག་གིས་སངས་རྒྱས་ལ་སྐྱབས་སུ་གཏོང་། ཆོས་དང་དགེ་འདུན་ལ་སྐྱབས་སུ་གཏོང་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་འཇུག་སྟེ། འཛུད་ཅིང་སེམས་ཀྱང་སྐྱེད་དུ་འཇུག་གོ །གང་དག་ཉེ་བ་ན་གནས་པ་རྣམས་དང་། གང་དག་རིང་བ་ན་གནས་པ་རྣམས་ཀྱང་བཅོམ་ལྡན་འདས་ལ་བལྟ་བ་དང་། ཕྱག་བྱ་བ་དང་། དགེ་སློང་གི་དགེ་འདུན་ལ་ཡང་བལྟ་བའི་ཕྱིར། ཕྱིས་སྐྱེད་མོས་ཚལ་དེར་འཇུག་གོ །དེ་ལྟར་མདུན་ན་འདོན་གྱི་གཙོ་བོ་བྲམ་ཟེ་རྒྱ་མཚོའི་རྡུལ་གྱིས་ལོ་བདུན་པོ་དེ་དག་ལས་ལྷ་བགྲང་བ་ལས་འདས་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་སྟེ་བཏུལ་ཅིང་བཙུད་དེ་རབ་ཏུ་བཀོད་དོ། །ཀླུ་དང་། ལྷ་མ་ཡིན་དང་། གནོད་སྦྱིན་དང་། སྲིན་པོ་དང་། གྲུལ་བུམ་དང་། དྲི་ཟ་དང་། ཡི་དགས་དང་། ཤ་ཟ་དང་། སེམས་ཅན་དམྱལ་བ་དང་། དུད་འགྲོའི་སྐྱེ་གནས་སུ་སྐྱེས་པ་བགྲང་བ་
ལས་འདས་པའི་བར་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་སྟེ་བཏུལ་ཅིང་བཙུད་དེ་རབ་ཏུ་བཀོད་དོ། །བྲམ་ཟེ་རྒྱ་མཚོའི་རྡུལ་དེ་ལོ་བདུན་པོ་དེ་དག་འདས་ནས་ཀྱང་ལྷའི་འཁོར་ལོ་རིན་པོ་ཆེ་མ་གཏོགས་པར་འཁོར་ལོ་བརྒྱད་ཁྲི་བཞི་སྟོང་དང་། གླང་པོ་རིན་པོ་ཆེ་མ་གཏོགས་པ་རིན་པོ་ཆེ་སྣ་བདུན་གྱི་རྒྱན་གྱིས་བརྒྱན་པའི་གླང་པོ་ཆེ་བརྒྱད་ཁྲི་བཞི་སྟོང་དང་། ཤིང་རྟ་བརྒྱད་ཁྲི་བཞི་སྟོང་གི་བར་དག་ཀྱང་འབུལ་བར་འདོད་དོ། །རྒྱལ་པོ་རྩིབས་ཀྱི་མུ་ཁྱུད་ཀྱང་ལོ་བདུན་པོ་དེ་དག་འདས་འདས་སུ་འདོད་ཆགས་ལ་འདུན་པ་མ་སྐྱེས་སོ། །ཞེ་སྡང་ལ་འདུན་པ་མེད། གཏི་མུག་ལ་འདུན་པ་མེད། རྒྱལ་སྲིད་ལ་འདུན་པ་མེད། ནོར་ལ་འདུན་པ་མེད། བུ་ལ་འདུན་པ་མེད། བུ་མོ་ལ་འདུན་པ་མེད། ཟས་ལ་འདུན་པ་མེད། སྐོམ་ལ་འདུན་པ་མེད། གོས་ལ་འདུན་པ་མེད། སྤོས་ལ་འདུན་པ་མེད། བཞོན་པ་ལ་འདུན་པ་མེད། གཉིད་ལ་འདུན་པ་མེད། བདག་ཏུ་འདུན་པ་མེད། གཞན་དུ་འདུན་པ་མེད་པར་གྱུར་ཏོ། །ལོ་བདུན་དུ་གློས་ཕབ་སྟེ་ཉལ་བར་མ་གྱུར་ཀྱང་། དེ་ལ་མཚན་མོའི་འདུ་ཤེས་མ་སྐྱེས། ཉིན་མོའི་འདུ་ཤེས་མ་སྐྱེས་སོ། །གཟུགས་ཀྱི་འདུ་ཤེས་མ་ཡིན། སྒྲའི་འདུ་ཤེས་མ་ཡིན། དྲིའི་འདུ་ཤེས་མ་ཡིན། རོའི་འདུ་ཤེས་མ་ཡིན་ཏེ། རེག་བྱའི་འདུ་ཤེས་ཀྱང་མ་སྐྱེས་སོ། །ལོ་བདུན་དུ་དེ་དག་གིས་ལུས་ལ་ངལ་བ་མ་སྐྱེས་ཏེ། རྟག་པར་རྒྱུན་དུ་ཕྱོགས་བཅུའི་ཕྱོགས་རེ་རེར་ཡང་འཇིག་རྟེན་གྱི་ཁམས་སངས་རྒྱས་ཀྱི་ཞིང་སྟོང་གི་རྡུལ་ཕྲ་རབ་ཀྱི་རྡུལ་སྙེད་དག་གི་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་མཐོང་ཡང་དེའི་མིག་ལམ་དུ་རི་རབ་སྣང་བར་མ་གྱུར། རི་གཞན་དག་ཀྱང་མ་ཡིན། ཁོར་ཡུག་ཀྱང་མ་ཡིན། ཁོར་ཡུག་ཆེན་པོ་དག་ཀྱང་མ་ཡིན། འཇིག་རྟེན་གྱི་བར་དག་ཀྱང་མ་ཡིན། ཉི་མ་དང་ཟླ་བ་དག་ཀྱང་མ་ཡིན་ཏེ། ལྷའི་གཞལ་མེད་ཁང་དག་ཀྱང་མིག་ལམ་དུ་སྣང་བར་མ་གྱུར་ཅིང་ཇི་ལྟར་སངས་རྒྱས་ཀྱི་ཞིང་ཡོངས་སུ་དག་པ་དེ་དག་མཐོང་བ་དེ་བཞིན་དུ་སངས་རྒྱས་ཀྱི་ཞིང་ཡོངས་སུ་དག་པའི་ཡོན་ཏན་བཀོད་པ་དག་ལ་ལྟ་ཞིང་སྨོན་ལམ་སེམས་པར་བྱེད་དོ། །ཇི་ལྟར་རྒྱལ་པོ་རྩིབས་ཀྱི་མུ་ཁྱུད་དེ་ལྟ་བུའི་
བདེ་བའི་ཡོན་ཏན་གྱི་གནས་པས་ལོ་བདུན་དུ་གནས་པ་དང་། དེ་ལྟ་བུའི་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་མཐོང་ཞིང་སངས་རྒྱས་ཀྱི་ཞིང་ཡོངས་སུ་དག་པའི་ཡོན་ཏན་བཀོད་པའི་སྨོན་ལམ་སེམས་ཤིང་འདུག་པ་དེ་བཞིན་དུ་རྒྱལ་བུ་ཐུ་བོ་མིག་མི་འཛུམས་དང་། མུ་ཁྱུད་དང་། དབང་པོའི་ཚོགས་དང་། དེ་བཞིན་དུ་རྒྱལ་བུ་སྟོང་པོ་དེ་དག་ཐམས་ཅད་དང་། ཁམས་ཀྱི་རྒྱལ་པོ་བརྒྱད་ཁྲི་བཞི་སྟོང་དང་། གཞན་ཡང་སྲོག་ཆགས་དུང་ཕྱུར་ཕྲག་དགུ་དང་། བྱེ་བ་ཕྲག་གཉིས་པོ་ཐམས་ཅད་ཀྱང་དེ་ལྟར་ལོ་བདུན་དུ་གཅིག་པུ་དབེན་པར་སོང་སྟེ་ནང་དུ་ཡང་དག་འཇོག་ལ་ཞུགས་ནས། ཕྱོགས་བཅུའི་ཕྱོགས་རེ་རེར་ཡང་འཇིག་རྟེན་གྱི་ཁམས་སངས་རྒྱས་ཀྱི་ཞིང་སྟོང་གི་རྡུལ་ཕྲ་རབ་ཀྱི་རྡུལ་སྙེད་དག་ཀྱང་མཐོང་ལ། ལོ་བདུན་གྱི་བར་དུ་དེ་དག་འདོད་ཆགས་ལ་འདུན་པ་མ་སྐྱེས་ཤིང་། ཞེ་སྡང་ལ་འདུན་པ་མེད། གཏི་མུག་ལ་འདུན་པ་མེད། དེ་དག་ལ་ངལ་བའི་གནས་སྐྱེས་པར་མ་གྱུར་པའི་བར་དུ་སྟེ། རྟག་པར་རྒྱུན་དུ་ཕྱོགས་བཅུའི་ཕྱོགས་རེ་རེར་ཡང་སངས་རྒྱས་ཀྱི་ཞིང་གི་ཡོན་ཏན་བཀོད་པ་སངས་རྒྱས་ཀྱི་ཞིང་སྟོང་གི་རྡུལ་ཕྲ་རབ་སྙེད་དག་མཐོང་ཡང་དེ་དག་གི་མིག་ལམ་དུ་རི་རབ་ཀྱང་སྣང་བར་མ་གྱུར། རི་གཞན་དག་ཀྱང་མ་ཡིན། ལྷའི་གཞལ་མེད་ཁང་གི་བར་དག་ཀྱང་མིག་ལམ་དུ་སྣང་བར་མ་གྱུར་ཏེ། དེ་དག་གིས་ཇི་ལྟར་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་མཐོང་བ་དེ་བཞིན་དུ་སངས་རྒྱས་ཀྱི་ཞིང་ཡོངས་སུ་དག་པའི་ཡོན་ཏན་བཀོད་པའི་སྨོན་ལམ་སེམས་ཤིང་ཐམས་ཅད་ཀྱང་ཡོན་ཏན་གྱི་གནས་པ་དེ་ལྟ་བུས་ལོ་བདུན་དུ་གནས་ཏེ། ཁ་ཅིག་ནི་སངས་རྒྱས་ཀྱི་ཞིང་ཡོངས་སུ་དག་པའི་ཡོན་ཏན་བཀོད་པ་དག་སེམས་སོ། །ཁ་ཅིག་ནི་སངས་རྒྱས་ཀྱི་ཞིང་ཡོངས་སུ་མ་དག་པའི་ཡོན་ཏན་བཀོད་པ་དག་སེམས་སོ། །དེ་ནས་བྲམ་ཟེ་རྒྱ་མཚོའི་རྡུལ་གྱིས་ལོ་བདུན་པོ་དེ་དག་ཐལ་ཞིང་རྫོགས་པར་རིག་ནས་རིན་པོ་ཆེ་སྣ་བདུན་འབུལ་བར་འདོད་པའི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་
གིས་རྒྱལ་པོ་རྩིབས་ཀྱི་མུ་ཁྱུད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་སྩལ་ནས། དེ་རང་གི་ཁྱིམ་དུ་མཆིས་ཏེ། གཅིག་པུ་དབེན་པར་མཆིས་ནས་ནང་དུ་ཡང་དག་འཇོག་ལ་གནས་ཤིང་དེར་མི་སུ་ཡང་མཆིར་མི་སྟེར་ལགས་སོ། །དེ་བཞིན་དུ་བདག་གིས་རྒྱལ་བུ་སྟོང་པོ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་སྩལ་ཅིང་གཟེངས་བསྟོད་ནས་དེ་བཞིན་དུ་སོ་སོ་རང་རང་གི་ཁྱིམ་དག་ཏུ་མཆིས་ཏེ། གཅིག་པུ་ནང་དུ་ཡང་དག་འཇོག་ལ་གནས་ཤིང་། དེར་ཡང་སུ་ཡང་མཆིར་མི་སྟེར་ལགས་སོ། །དེ་བཞིན་དུ་ཁམས་ཀྱི་རྒྱལ་པོ་བརྒྱད་ཁྲི་བཞི་སྟོང་དང་། དེ་བཞིན་དུ་གཞན་ཡང་སྲོག་ཆགས་དུང་ཕྱུར་ཕྲག་དགུ་དང་། བྱེ་བ་ཕྲག་གཉིས་ཀྱི་བར་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་སྩལ་ཅིང་བཙུད་དེ་རབ་ཏུ་བཀོད་ནས་ཐམས་ཅད་ཀྱང་རང་རང་གི་ཁྱིམ་དག་ཏུ་མཆིས་ཏེ། གཅིག་པུ་དབེན་པར་མཆིས་ནས་ནང་དུ་ཡང་དག་འཇོག་ལ་གནས་ཤིང་དེར་ཡང་སུ་ཡང་མཆིར་མི་སྟེར་ལགས་ན། བཅོམ་ལྡན་འདས་ཀྱིས་ཅི་ནས་ཀྱང་རྒྱལ་པོ་རྩིབས་ཀྱི་མུ་ཁྱུད་ནང་དུ་ཡང་དག་འཇོག་དེ་ལས་ལངས་ཏེ་འདིར་མཆི་བར་འགྱུར་བ་དང་། གང་དག་བདག་གིས་བྱང་ཆུབ་ཡང་དག་པར་འཛིན་དུ་སྩལ་བ་དེ་དག་ཐམས་ཅད་ཀྱང་འདིར་མཆི་བར་འགྱུར་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་བློས་མི་གཡོ་བ་འཛིན་པར་འགྱུར་བ་དང་། བཅོམ་ལྡན་འདས་ལས་ལུང་བསྟན་པ་འཐོབ་པར་འགྱུར་བ་དང་། མིང་དང་། རུས་དང་། སངས་རྒྱས་ཀྱི་ཞིང་ཡང་ཡོངས་སུ་འཛིན་པར་འགྱུར་བ་དེ་དག་ལ་དགོངས་སུ་གསོལ། རིགས་ཀྱི་བུ་དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་ཏིང་ངེ་འཛིན་བློ་གྲོས་སྒྲུབ་པ་ཞེས་བྱ་བ་ལ་སྙོམས་པར་ཞུགས་སོ། །དེ་ལྟར་ཏིང་ངེ་འཛིན་ལ་སྙོམས་པར་ཞུགས་པས་ཞལ་ནས་འོད་ཟེར་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། བཙོད་ཁ་དང་། ཤེལ་དང་། དངུལ་གྱི་ཁ་དོག་ལྟ་བུ་དག་བྱུང་ངོ་། །དེ་དག་བྱུང་ནས་ཀྱང་ནང་དུ་ཡང་དག་འཇོག་ལ་གནས་པ་དེ་དག་གི་མདུན་དུ་
ཚངས་པར་སྤྲུལ་ཏེ་འདུག་ནས་འདི་སྐད་ཅེས་སྨྲས་སོ། །གྲོགས་པོ་དག་ལོངས་ཤིག །བྲམ་ཟེ་རྒྱ་མཚོའི་རྡུལ་གྱིས་ལོ་བདུན་དུ་མཆོད་སྦྱིན་བྱ་བ་ནི་ཟིན་ཏེ། བཅོམ་ལྡན་འདས་ཀྱང་གཞན་དུ་རྒྱུ་ཞིང་གཤེགས་པར་འགྱུར་གྱིས། གྲོགས་པོ་དག་བཅོམ་ལྡན་འདས་དང་། དགེ་སློང་གི་དགེ་འདུན་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བའི་ཕྱིར་དེང་ཤིག །དེ་ནས་དེ་དག་ཐམས་ཅད་ལ་འོད་ཟེར་དེ་དག་གིས་བསྐུལ་བ་དང་། ལངས་ནས་རྒྱལ་པོ་རྩིབས་ཀྱི་མུ་ཁྱུད་ལ་སྐུལ་བར་བྱེད་དོ། །དེ་ཡང་དེ་དག་གིས་བསྐུལ་བ་དང་། ལངས་ཏེ་ཆས་སོ། །རྒྱལ་པོ་དེ་ཆས་པ་དང་ལྷ་རྣམས་ཀྱིས་ནམ་མཁའི་དཀྱིལ་ནས་རྔ་བོ་ཆེ་དང་། རྫ་རྔ་དང་། རྔ་པ་ཊཧ་ལ་སོགས་པ་རོལ་མོའི་སྒྲ་དག་ཀྱང་རབ་ཏུ་བསྒྲགས་སོ། །དེ་ནས་རྒྱལ་པོ་རྩིབས་ཀྱི་མུ་ཁྱུད་བཅོམ་ལྡན་འདས་ལ་བལྟ་བ་དང་། བཅོམ་ལྡན་འདས་ལ་བསྙེན་བཀུར་བྱ་བའི་བར་གྱི་ཕྱིར་ཤིང་རྟ་ལ་ཞོན་ནས་བུ་སྟོང་པོ་དེ་དག་དང་། ཁམས་ཀྱི་རྒྱལ་པོ་བརྒྱད་ཁྲི་བཞི་སྟོང་དང་། སྲོག་ཆགས་དུང་ཕྱུར་ཕྲག་དགུ་དང་། བྱེ་བ་ཕྲག་གཉིས་པོ་རྣམས་ཀྱིས་ཡོངས་སུ་བསྐོར་ཅིང་མདུན་དུ་བདར་ནས་གྲོང་ཁྱེར་ནས་བྱུང་སྟེ་བཅོམ་ལྡན་འདས་ཀྱི་དྲུང་དུ་སོང་ངོ་། །དེ་བཞོན་པས་བགྲོད་པའི་ས་ཇི་སྲིད་པ་དེ་སྲིད་དུ་བཞོན་པས་སོང་ནས་བཞོན་པ་ལས་བབས་སོ། །བཞོན་པ་ལས་བབས་ནས་རྐང་པས་འཛམ་བུའི་ཚལ་དུ་ཞུགས་སོ། །ཞུགས་ནས་ཀྱང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་དང་དགེ་སློང་གི་དགེ་འདུན་གྱི་ཞབས་ལ་མགོ་བོས་ཕྱག་འཚལ་ནས། སྲོག་ཆགས་བྱེ་བ་ཕྲག་དུ་མ་དག་དང་བཅས་ཏེ་ཕྱོགས་གཅིག་ཏུ་འཁོད་དོ། །དེ་ནས་བྲམ་ཟེ་རྒྱ་མཚོའི་རྡུལ་གྱིས་རྒྱལ་པོ་རྩིབས་ཀྱི་མུ་ཁྱུད་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་གང་ཁྱོད་ཀྱིས་བཅོམ་ལྡན་འདས་དང་། དགེ་སློང་གི་དགེ་འདུན་དཔག་ཏུ་མེད་པ་དག་ལ་ཟླ་བ་གསུམ་དུ་ཡོ་བྱད་ཐམས་ཅད་ཀྱིས་བསྙེན་བཀུར་བྱས་ཤིང་། རིན་པོ་ཆེ་རྣམ་པ་སྣ་ཚོགས་པ་དག་དང་། གྲོང་ཁྱེར་བརྒྱད་ཁྲི་བཞི་སྟོང་དག་ཀྱང་ཕུལ་བ་དེ་ལ་རྗེས་སུ་ཡི་རང་བར་གྱིས་ལ། རྗེས་སུ་ཡི་རང་
བ་དང་ལྡན་པའི་བསོད་ནམས་ཀྱི་ཕུང་པོ་དེ་དང་ཡོངས་སུ་གཏོང་བ་དང་ལྡན་པའི་བསོད་ནམས་ཀྱི་ཕུང་པོ་གང་ཡིན་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་ཤིག །དེ་བཞིན་དུ་རྒྱལ་བུ་སྟོང་པོ་དེ་དག་དང་། དེ་བཞིན་དུ་ཁམས་ཀྱི་རྒྱལ་པོ་བརྒྱད་ཁྲི་བཞི་སྟོང་དང་། གཞན་ཡང་སྲོག་ཆགས་དུང་ཕྱུར་ཕྲག་དགུ་དང་། བྱེ་བ་ཕྲག་གཉིས་པོ་རྣམས་ཀྱང་ཡང་དག་པར་འཛིན་དུ་བཅུག་ནས་རྗེས་སུ་ཡི་རང་བ་དང་ལྡན་པའི་བསོད་ནམས་ཀྱི་ཕུང་པོ་དེས་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ཅིང་བཙུད་དེ་རབ་ཏུ་བཀོད་ནས་འདི་སྐད་ཅེས་ཀྱང་སྨྲས་སོ། །ཁྱེད་ཀྱིས་ཡོན་ཏན་འདི་ལ་རྗེས་སུ་ཡི་རང་བར་བྱས་ཏེ་ཕུལ་ལ་འདི་སྐད་ཅེས་ཀྱང་སྨྲོས་ཤིག །སྦྱིན་པ་འདིས་བདག་དབང་པོའི་གནས་མིན་ཚངས་པའི་འཇིག་རྟེན་འབྲས་བུ་མི་འདོད་ན། །རླུང་གི་ཤུགས་ལྟར་མགྱོགས་ཤིང་གཡོ་བ་རྒྱལ་པོའི་སྲིད་ཀྱི་དཔལ་ལྟ་སྨོས་ཅི་དགོས། །བདག་གི་གུས་པ་ཆེན་པོའི་སྦྱིན་པ་འདི་ཡི་འབྲས་བུ་གང་ཡིན་དེ་ཡིས་ནི། །སེམས་ལ་དབང་བྱེད་མཚུངས་མེད་བྱང་ཆུབ་འཐོབ་ཅིང་སེམས་ཅན་རྣམས་ཀྱང་སྒྲོལ་གྱུར་ཅིག །སྙིང་རྗེ་པད་མ་དཀར་པོ་ལས་སྦྱིན་པ་གཏོང་བའི་ལེའུ་ཞེས་བྱ་བ་སྟེ་གསུམ་པའོ།། །།