དམ་པའི་ཆོས་པད་མ་དཀར་པོ་ཞེས་བྱ་བ་ཐེག་པ་ཆེན་པོའི་མདོ་ལས། དང་པོ། གླེང་གཞིའི་ལེའུ།
རྒྱ་གར་སྐད་དུ། སད་དྷརྨ་པུཎ་ཌ་རཱི་ཀ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། དམ་པའི་ཆོས་པད་མ་དཀར་པོ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན། བྱ་རྒོད་ཀྱི་ཕུང་པོའི་རི་ལ་བཞུགས་ཏེ། དགེ་སློང་ཁྲི་ཉིས་སྟོང་གི་དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ། །བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པ། མངོན་པར་ཤེས་པས་མངོན་པར་ཤེས་པའི་
ཉན་ཐོས་ཆེན་པོ་ཤ་སྟག་ལ་འདི་ལྟ་སྟེ། ཚེ་དང་ལྡན་པ་ཀུན་ཤེས་ཀཽཎྜི་ནྱ་དང་། ཚེ་དང་ལྡན་པ་རྟ་ཐུལ་དང་། ཚེ་དང་ལྡན་པ་རླངས་པ་དང་། ཚེ་དང་ལྡན་པ་མིང་ཆེན་དང་། ཚེ་དང་ལྡན་པ་བཟང་པོ་དང་། ཚེ་དང་ལྡན་པ་འོད་སྲུང་ཆེན་པོ་དང་། ཚེ་དང་ལྡན་པ་ལྟང་རྒྱས་འོད་སྲུང་དང་། ཚེ་དང་ལྡན་པ་ཆུ་ཀླུང་འོད་སྲུང་དང་། ཚེ་དང་ལྡན་པ་ག་ཡ་འོད་སྲུང་དང་། ཚེ་དང་ལྡན་པ་ཤཱ་རིའི་བུ་དང་། ཚེ་དང་ལྡན་པ་མཽད་གལ་གྱི་བུ་ཆེན་པོ་དང་། ཚེ་དང་ལྡན་པ་ཀཱ་ཏྱཱའི་བུ་ཆེན་པོ་དང་། ཚེ་དང་ལྡན་པ་མ་འགགས་པ་དང་། ཚེ་དང་ལྡན་པ་ནམ་གྲུ་དང་། ཚེ་དང་ལྡན་པ་ཀ་པི་ན་དང་། ཚེ་དང་ལྡན་པ་བ་ལང་བདག་དང་། ཚེ་དང་ལྡན་པ་པི་ལིན་དའི་བུ་དང་། ཚེ་དང་ལྡན་པ་བཀྐུ་ལ་དང་། ཚེ་དང་ལྡན་པ་གསུས་པོ་ཆེ་དང་། ཚེ་དང་ལྡན་པ་བྷ་ར་དྭ་ཛ་དང་། ཚེ་དང་ལྡན་པ་དགའ་བོ་དང་། ཚེ་དང་ལྡན་པ་ཉེ་དགའ་དང་། ཚེ་དང་ལྡན་པ་མཛེས་དགའ་དང་། ཚེ་དང་ལྡན་པ་བྱམས་མའི་བུ་གང་པོ་དང་། ཚེ་དང་ལྡན་པ་རབ་འབྱོར་དང་། ཚེ་དང་ལྡན་པ་སྒྲ་གཅན་ཟིན་དང་། དེ་དག་དང་ཉན་ཐོས་ཆེན་པོ་གཞན་དག་དང་། སློབ་པ་ཚེ་དང་ལྡན་པ་ཀུན་དགའ་བོ་དང་། གཞན་ཡང་སློབ་པ་དང་མི་སློབ་པའི་དགེ་སློང་ཉིས་སྟོང་དང་། སྐྱེ་དགུའི་བདག་མོ་ཆེན་མོ་ལ་སོགས་པ་དགེ་སློང་མ་དྲུག་སྟོང་དང་། སྒྲ་གཅན་ཟིན་གྱི་མ་དགེ་སློང་མ་གྲགས་འཛིན་འཁོར་དང་བཅས་པ་དང་ཐབས་ཅིག་གོ ། བྱང་ཆུབ་སེམས་དཔའ་བརྒྱད་ཁྲི་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ། གཟུངས་ཐོབ་པ། སྤོབས་པ་ཆེན་པོ་ལ་གནས་པ། ཕྱིར་མི་ལྡོག་པའི་ཆོས་ཀྱི་འཁོར་ལོ་སྐོར་བ། སངས་རྒྱས་བརྒྱ་སྟོང་མང་པོ་ལ་བསྙེན་བཀུར་བྱས་པ། སངས་རྒྱས་བརྒྱ་སྟོང་མང་པོ་ལ་དགེ་བའི་རྩ་བ་བསྐྱེད་
པ། སངས་རྒྱས་བརྒྱ་སྟོང་མང་པོས་ཡང་དག་པར་བསྟོད་པ། ལུས་དང་ངག་དང་སེམས་བྱམས་པས་ཡོངས་སུ་བསྒོས་པ། དེ་བཞིན་གཤེགས་པའི་ཡེ་ཤེས་འཛུད་པ་ལ་མཁས་པ། ཤེས་རབ་ཆེན་པོ། ཤེས་རབ་ཀྱི་ཕ་རོལ་ཏུ་ཕྱིན་པ་རྟོགས་པར་ཁོང་དུ་ཆུད་པ། འཇིག་རྟེན་གྱི་ཁམས་བརྒྱ་སྟོང་མང་པོར་རྣམ་པར་གྲགས་པ། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོ་ཡང་དག་པར་སྒྲོལ་བ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་དང་། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་དང་། བྱང་ཆུབ་སེམས་དཔའ་མཐུ་ཆེན་ཐོབ་དང་། བྱང་ཆུབ་སེམས་དཔའ་དོན་ཐམས་ཅད་ཅེས་བྱ་བ་དང་། བྱང་ཆུབ་སེམས་དཔའ་རྟག་ཏུ་བརྩོན་དང་། བྱང་ཆུབ་སེམས་དཔའ་བརྩོན་པ་མི་གཏོང་བ་དང་། བྱང་ཆུབ་སེམས་དཔའ་ལག་ན་རིན་ཆེན་དང་། བྱང་ཆུབ་སེམས་དཔའ་སྨན་གྱི་རྒྱལ་པོ་དང་། བྱང་ཆུབ་སེམས་དཔའ་སྨན་ཡང་དག་འཕགས་དང་། བྱང་ཆུབ་སེམས་དཔའ་བཀོད་པའི་རྒྱལ་པོ་དང་། བྱང་ཆུབ་སེམས་དཔའ་རབ་ཏུ་སྦྱིན་དཔའ་དང་། བྱང་ཆུབ་སེམས་དཔའ་རིན་ཆེན་ཟླ་བ་དང་། བྱང་ཆུབ་སེམས་དཔའ་རིན་ཆེན་འོད་དང་། བྱང་ཆུབ་སེམས་དཔའ་ཟླ་གང་དང་། བྱང་ཆུབ་སེམས་དཔའ་གནོན་པ་ཆེན་པོ་དང་། བྱང་ཆུབ་སེམས་དཔའ་མཐའ་ཡས་གནོན་དང་། བྱང་ཆུབ་སེམས་དཔའ་འཇིག་རྟེན་གསུམ་གནོན་དང་། བྱང་ཆུབ་སེམས་དཔའ་སྤོབས་པ་ཆེན་པོ་དང་། བྱང་ཆུབ་སེམས་དཔའ་རྟག་པར་རྒྱུན་ཏུ་བརྩོན་དང་། བྱང་ཆུབ་སེམས་དཔའ་ས་འཛིན་དང་། བྱང་ཆུབ་སེམས་དཔའ་བློ་གྲོས་མི་ཟད་པ་དང་། བྱང་ཆུབ་སེམས་དཔའ་པད་མའི་དཔལ་དང་། བྱང་ཆུབ་སེམས་དཔའ་སྐར་མའི་རྒྱལ་པོ་དང་། བྱང་ཆུབ་སེམས་དཔའ་བྱམས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེ་དག་དང་ཡང་ཐབས་ཅིག་གོ ། བཟང་སྐྱོང་ལ་སོགས་པ་སྐྱེས་བུ་དམ་པ་བཅུ་དྲུག་ལ་འདི་ལྟ་སྟེ། བཟང་སྐྱོང་དང་། དཀོན་མཆོག་འབྱུང་གནས་དང་། དེད་དཔོན་བཟང་པོ་དང་། མེས་བྱིན་དང་། ཕུག་སྦས་དང་། ཆུས་བྱིན་དང་། དབང་པོས་བྱིན་དང་། བླ་མའི་བློ་
གྲོས་དང་། ཁྱད་པར་བློ་གྲོས་དང་། འཕེལ་བའི་བློ་གྲོས་དང་། མཐོང་བ་དོན་ཡོད་དང་། ཤིན་ཏུ་ཡང་དག་ཞུགས་དང་། རབ་ཀྱི་རྩལ་གྱིས་རྣམ་པར་གནོན་པ་དང་། དཔེ་མེད་བློ་གྲོས་དང་། ཉི་མའི་སྙིང་པོ་དང་། ས་འཛིན་དག་དང་ཡང་ཐབས་ཅིག་སྟེ། དེ་དག་ལ་སོགས་པ་བྱང་ཆུབ་སེམས་དཔའ་བརྒྱད་ཁྲི་དག་དང་ཡང་ཐབས་ཅིག་གོ ། ལྷ་རྣམས་ཀྱི་དབང་པོ་བརྒྱ་བྱིན་དང་། འཁོར་ལྷའི་བུ་ཉི་ཁྲི་འདི་ལྟ་སྟེ། ལྷའི་བུ་ཟླ་བ་དང་། ལྷའི་བུ་ཉི་མ་དང་། ཀུན་དུ་དྲི་དང་། རིན་ཆེན་འོད་དང་། ལྷའི་བུ་སྣང་འོད་དང་། དེ་དག་ལ་སོགས་པ་ལྷའི་བུ་ཉི་ཁྲི་དང་ཡང་ཐབས་ཅིག་གོ ། རྒྱལ་པོ་ཆེན་པོ་བཞི་དང་། འཁོར་ལྷའི་བུ་སུམ་ཁྲི་འདི་ལྟ་སྟེ། རྒྱལ་པོ་ཆེན་པོ་འཕགས་སྐྱེས་པོ་དང་། རྒྱལ་པོ་ཆེན་པོ་མིག་མི་བཟང་དང་། རྒྱལ་པོ་ཆེན་པོ་ཡུལ་འཁོར་སྲུང་དང་། རྒྱལ་པོ་ཆེན་པོ་རྣམ་ཐོས་ཀྱི་བུ་དང་། ལྷའི་བུ་དབང་ཕྱུག་དང་། ལྷའི་བུ་དབང་ཕྱུག་ཆེན་པོ་དང་། འཁོར་ལྷའི་བུ་སུམ་ཁྲི་དག་དང་ཡང་ཐབས་ཅིག་གོ ། མི་མཇེད་ཀྱི་བདག་པོ་ཚངས་པ་དང་། འཁོར་ཚངས་རིས་ཀྱི་ལྷའི་བུ་ཁྲི་ཉིས་སྟོང་འདི་ལྟ་སྟེ། ཚངས་པ་གཙུག་ཕུད་ཅན་དང་། ཚངས་པ་སྐར་མའི་འོད་དང་། དེ་དག་ལ་སོགས་པ་ཚངས་རིས་ཀྱི་ལྷའི་བུ་ཁྲི་ཉིས་སྟོང་དང་ཡང་ཐབས་ཅིག་གོ ། ཀླུའི་རྒྱལ་པོ་བརྒྱད་འདི་ལྟ་སྟེ། ཀླུའི་རྒྱལ་པོ་དགའ་བོ་དང་། ཉེ་དགའ་དང་། རྒྱ་མཚོ་དང་། ནོར་རྒྱས་ཀྱི་བུ་དང་། འཇོག་པོ་དང་། གཟི་ཅན་དང་། མ་དྲོས་པ་དང་། ཀླུའི་རྒྱལ་པོ་ཨུད་པ་ལ་དང་། འཁོར་ཀླུ་བྱེ་བ་བརྒྱ་སྟོང་མང་པོ་དག་དང་ཡང་ཐབས་ཅིག་གོ ། མིའམ་ཅིའི་རྒྱལ་པོ་བཞི་འདི་ལྟ་སྟེ། མིའམ་ཅིའི་རྒྱལ་པོ་ལྗོན་པ་དང་། མིའམ་ཅིའི་རྒྱལ་པོ་ཆོས་ཆེན་དང་། མིའམ་ཅིའི་རྒྱལ་པོ་ཆོས་བཟང་དང་། མིའམ་ཅིའི་རྒྱལ་པོ་ཆོས་འཛིན་དང་། འཁོར་མིའམ་ཅི་བྱེ་བ་བརྒྱ་སྟོང་མང་པོ་དག་དང་ཡང་ཐབས་ཅིག་གོ ། དྲི་ཟའི་རིས་ཀྱི་ལྷའི་བུ་བཞི་འདི་ལྟ་སྟེ། དྲི་ཟ་ཡིད་དུ་འོང་བ་དང་། ཡིད་འོང་དབྱངས་དང་། འཇམ་སྙན་དང་། དྲི་ཟ་དབྱངས་སྙན་དང་། འཁོར་དྲི་ཟ་བྱེ་བ་བརྒྱ་སྟོང་མང་པོ་དག་དང་ཡང་ཐབས་ཅིག་གོ ། ལྷ་མ་ཡིན་གྱི་དབང་པོ་བཞི་འདི་ལྟ་སྟེ། ལྷ་མ་ཡིན་གྱི་དབང་པོ་སྟོབས་ཅན་དང་། ཕྲག་རྩུབ་དང་། ཐགས་བཟངས་རིས་དང་། ལྷ་མ་
ཡིན་གྱི་དབང་པོ་སྒྲ་གཅན་དང་། འཁོར་ལྷ་མ་ཡིན་བྱེ་བ་བརྒྱ་སྟོང་མང་པོ་དག་དང་ཡང་ཐབས་ཅིག་གོ ། ནམ་མཁའ་ལྡིང་གི་དབང་པོ་བཞི་འདི་ལྟ་སྟེ། ནམ་མཁའ་ལྡིང་གི་དབང་པོ་གཟི་བརྗིད་ཆེན་པོ་དང་། ལུས་ཆེན་དང་། རྫོགས་ཆེན་དང་། ནམ་མཁའ་ལྡིང་གི་དབང་པོ་འཕྲུལ་ཆེན་ཐོབ་དང་། འཁོར་ནམ་མཁའ་ལྡིང་བྱེ་བ་བརྒྱ་སྟོང་མང་པོ་དག་དང་ཡང་ཐབས་ཅིག་གོ ། ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་དང་ཡང་ཐབས་ཅིག་གོ ། དེའི་ཚེ་ན་བཅོམ་ལྡན་འདས་འཁོར་བཞི་པོ་དེ་དག་གིས་ཡོངས་སུ་བསྐོར་ཅིང་མདུན་གྱིས་བལྟས་ཏེ། བསྟི་སྟང་དུ་བྱས། བཙུན་པར་བྱས། རི་མོར་བྱས། མཆོད་པར་བྱས། རྗེད་པར་བྱས། གསོལ་བ་བྱས་ཏེ། ངེས་པར་བསྟན་པ་ཆེན་པོ་ཞེས་བྱ་བའི་ཆོས་ཀྱི་རྣམ་གྲངས་མདོ་སྡེ་ཤིན་ཏུ་རྒྱས་པ་ཆེན་པོ་བྱང་ཆུབ་སེམས་དཔའ་རྣམས་ལ་གདམས་པ། སངས་རྒྱས་ཐམས་ཅད་ཀྱིས་ཡོངས་སུ་བཟུང་བ་བཤད་པར་བཞེད་དེ་ཆོས་ཀྱི་གདན་དེ་ཉིད་ལ་སྐྱིལ་མོ་ཀྲུང་བཅས་ནས། མཐའ་ཡས་ངེས་པར་བསྟན་པའི་གནས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་སྐུ་མི་གཡོ་ཞིང་སེམས་མི་གཡོ་བར་གྱུར་ནས་བཞུགས་སོ། །བཅོམ་ལྡན་འདས་སྙོམས་པར་ཞུགས་མ་ཐག་ཏུ། བཅོམ་ལྡན་འདས་ལ་ལྷའི་མེ་ཏོག་མན་དཱ་ར་དང་། མན་དཱ་ར་ཆེན་པོ་དང་། མཉྫུ་ཥ་ཀ་དང་། མཉྫུ་ཥ་ཀ་ཆེན་པོ་རྣམས་ཀྱི་མེ་ཏོག་གི་ཆར་ཆེན་པོ་མངོན་པར་བབ་སྟེ། བཅོམ་ལྡན་འདས་དང་འཁོར་བཞི་པོ་དེ་དག་ལ་འཐོར་རོ། །ཐམས་ཅད་དང་ལྡན་པའི་སངས་རྒྱས་ཀྱི་ཞིང་ཡང་རྣམ་པ་དྲུག་ཏུ་གཡོས་པར་གྱུར་ཏེ། འགུལ་ཀུན་ཏུ་རབ་ཏུ་འགུལ། ལྡེག་ཀུན་ཏུ་རབ་ཏུ་ལྡེག ། འཁྲུགས་ཀུན་ཏུ་རབ་ཏུ་འཁྲུགས་སོ། །དེའི་ཚེ་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་རྣམས་དང་། རྒྱལ་ཕྲན་དང་། སྟོབས་ཀྱི་འཁོར་ལོས་སྒྱུར་བ་དང་། གླིང་བཞིའི་འཁོར་ལོས་སྒྱུར་བ་གང་དག་འཁོར་དེར་འདུས་ནས་འཁོད་པར་གྱུར་པ་འཁོར་དང་བཅས་པ་དེ་དག་
ཐམས་ཅད་བཅོམ་ལྡན་འདས་ལ་ལྟ་ཞིང་འཁོད་དེ་ངོ་མཚར་དུ་གྱུར། རྨད་དུ་གྱུར། ཤིན་ཏུ་དགའ་བར་གྱུར་ཏོ། །དེ་ནས་དེའི་ཚེ་བཅོམ་ལྡན་འདས་ཀྱི་སྨིན་མཚམས་ཀྱི་མཛོད་སྤུ་ནས་འོད་ཟེར་གཅིག་བྱུང་ནས། དེ་ཤར་ཕྱོགས་སུ་སངས་རྒྱས་ཀྱི་ཞིང་ཁྲི་བརྒྱད་སྟོང་དུ་སོང་སྟེ། སངས་རྒྱས་ཀྱི་ཞིང་དེ་དག་ཐམས་ཅད་མནར་མེད་པའི་སེམས་ཅན་དམྱལ་བ་ཆེན་པོ་ཡན་ཆད་སྲིད་པའི་རྩེ་མོ་མན་ཆད་འོད་ཟེར་དེའི་འོད་ཀྱིས་ཤིན་ཏུ་ཁྱབ་པར་སྣང་ངོ་། །སངས་རྒྱས་ཀྱི་ཞིང་དེ་དག་གི་འགྲོ་བ་དྲུག་པོ་དེ་དག་ན་སེམས་ཅན་གང་ཡོད་པ་དེ་དག་ཐམས་ཅད་མ་ལུས་པར་སྣང་ངོ་། །སངས་རྒྱས་ཀྱི་ཞིང་དེ་དག་ན་སངས་རྒྱས་བཅོམ་ལྡན་འདས་གང་དག་བཞུགས་ཤིང་འཚོ་གཞེས་པ་དེ་དག་ཐམས་ཅད་ཀྱང་སྣང་ངོ་། །སངས་རྒྱས་བཅོམ་ལྡན་འདས་དེ་དག་ཆོས་གང་འཆད་པ་དེ་དག་ཐམས་ཅད་ཀྱང་མ་ལུས་པར་གྲག་གོ ། སངས་རྒྱས་ཀྱི་ཞིང་དེ་དག་ན་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། རྣལ་འབྱོར་ཅན་དང་། རྣལ་འབྱོར་སྤྱོད་པ་གང་དག་འབྲས་བུ་ཐོབ་པ་དང་། འབྲས་བུ་མ་ཐོབ་པ་དེ་དག་ཐམས་ཅད་ཀྱང་སྣང་ངོ་། །སངས་རྒྱས་ཀྱི་ཞིང་དེ་དག་ན། བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཉན་པ་དང་། དམིགས་པ་དང་། མོས་པ་རྣམ་པ་སྣ་ཚོགས་དུ་མའི་རྒྱུའི་ཐབས་ལ་མཁས་པ་དག་གིས་བྱང་ཆུབ་སེམས་དཔའི་སྤྱད་པ་སྤྱོད་པ་དེ་དག་ཐམས་ཅད་ཀྱང་སྣང་ངོ་། །སངས་རྒྱས་ཀྱི་ཞིང་དེ་དག་ན། སངས་རྒྱས་བཅོམ་ལྡན་འདས་གང་དག་ཡོངས་སུ་མྱ་ངན་ལས་འདའ་བ་དེ་དག་ཐམས་ཅད་ཀྱང་སྣང་ངོ་། །སངས་རྒྱས་ཀྱི་ཞིང་དེ་དག་ན། སངས་རྒྱས་བཅོམ་ལྡན་འདས་གང་དག་ཡོངས་སུ་མྱ་ངན་ལས་འདས་པ་རྣམས་ཀྱི་རིང་བསྲེལ་གྱི་མཆོད་རྟེན་རིན་པོ་ཆེ་ལས་བྱས་པ་དེ་དག་ཐམས་ཅད་ཀྱང་སྣང་ངོ་། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འདི་སྙམ་དུ་སེམས་ཏེ། ཀྱེ་མ་དེ་བཞིན་གཤེགས་པས་ལྟས་ཆོ་འཕྲུལ་ཆེན་པོ་བསྟན་པ་འདི་འདིར་ཅིའི་རྒྱུར་འགྱུར་ཞིག་གུ། ཅིའི་ཕྱིར་བཅོམ་ལྡན་འདས་ཀྱིས་ལྟས་ཆོ་འཕྲུལ་ཆེན་པོ་འདི་ལྟ་བུ་འདི་བསྟན་ཏེ། བཅོམ་ལྡན་འདས་ཀྱང་ཏིང་ངེ་འཛིན་དེ་ལ་སྙོམས་པར་ཞུགས་ཤིང་རྫུ་འཕྲུལ་གྱི་ཆོ་འཕྲུལ་ཆེན་པོ་ངོ་མཚར་རྨད་
དུ་བྱུང་བ་ཆེན་པོ་བསམ་གྱིས་མི་ཁྱབ་པ་འདི་ལྟ་བུ་འདི་དག་ཀྱང་སྣང་བར་གྱུར་པ་འདིའི་དོན་བདག་གིས་སུ་ལ་དྲི་འདི་ན་དོན་འདིའི་ལན་ལྡོན་ནུས་པ་ནི་སུ་ཡོད་སྙམ་མོ། །དེ་ཡང་འདི་སྙམ་དུ་འཇམ་དཔལ་གཞོན་ནུར་གྱུར་པ་འདི་སྔོན་གྱི་རྒྱལ་བ་རྣམས་ལ་ལྷག་པར་བྱ་བ་བྱས་པ། དགེ་བའི་རྩ་བ་བསྐྱེད་པ། སངས་རྒྱས་མང་པོ་ལ་བསྙེན་བཀུར་བྱས་པ་སྟེ། འཇམ་དཔལ་གཞོན་ནུར་གྱུར་པ་འདིས་སྔོན་ཆད་ཀྱང་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ལྟས་འདི་ལྟ་བུ་བྱུང་བ་རྣམས་མཐོང་ཞིང་སྔོན་ཆད་ཆོས་ཆེན་པོའི་འབེལ་བའི་གཏམ་དག་ཀྱང་མྱོང་བས་ན། བདག་གིས་འཇམ་དཔལ་གཞོན་ནུར་གྱུར་པ་ལ་དེའི་དོན་དྲིའོ་སྙམ་དུ་སེམས་སོ། །དགེ་སློང་དང་དགེ་སློང་མ་དང་། དགེ་བསྙེན་དང་དགེ་བསྙེན་མའི་འཁོར་བཞི་པོ་དེ་དག་དང་། ལྷ་དང་ཀླུ་དང་གནོད་སྦྱིན་དང་། དྲི་ཟ་དང་ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་མང་པོ་དེ་དག་ཀྱང་། བཅོམ་ལྡན་འདས་ཀྱི་ལྟས་ཀྱི་རྫུ་འཕྲུལ་གྱི་ཆོ་འཕྲུལ་ཆེན་པོའི་སྣང་བ་འདི་ལྟ་བུ་འདི་མཐོང་ནས། ངོ་མཚར་དུ་གྱུར་རྨད་དུ་གྱུར་ལྟད་མོར་གྱུར་ཏེ། འདི་སྙམ་དུ། བཅོམ་ལྡན་འདས་ཀྱིས་རྫུ་འཕྲུལ་གྱི་ཆོ་འཕྲུལ་ཆེན་པོའི་སྣང་བ་འདི་ལྟ་བུ་འདི་བསྟན་པ་བདག་ཅག་གིས་སུ་ལ་དྲི་སྙམ་དུ་སེམས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་སྐད་ཅིག་ཐང་ཅིག་ཡུད་ཙམ་དེ་ཉིད་ལ་འཁོར་བཞི་པོ་རྣམས་ཀྱི་སེམས་ཀྱི་རྣམ་པར་རྟོག་པ་སེམས་ཀྱིས་ཤེས་ནས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་བཅོམ་ལྡན་འདས་ཀྱིས་ལྟས་ངོ་མཚར་རྨད་དུ་བྱུང་བ་རྫུ་འཕྲུལ་གྱི་སྣང་བ་འདི་ལྟ་བུ་འདི་བསྟན་ཏེ། སངས་རྒྱས་ཀྱི་ཞིང་ཁྲི་བརྒྱད་སྟོང་པོ་འདི་དག་རྣམ་པར་བཀྲ་བ། མཆོག་ཏུ་བལྟ་ན་སྡུག་པ། དེ་བཞིན་གཤེགས་པ་སྔོན་དུ་བཞུད་པ། དེ་བཞིན་གཤེགས་པ་ཡོངས་སུ་འདྲེན་པར་སྣང་བ་འདིའི་རྒྱུ་གང་རྐྱེན་གང་། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་འཇམ་དཔལ་གཞོན་ནུར་གྱུར་པ་ལ་ཚིགས་སུ་བཅད་པ་འདི་དག་སྨྲས་སོ། །འཇམ་
དཔལ་ཅི་ཡི་ཕྱིར་ན་འདི་ལྟ་བུ། །མི་ཡི་མགོན་པོས་འོད་ཟེར་གཅིག་པུ་འདི། །ཞལ་གྱི་སྨིན་མཚམས་ཀྱི་ནི་མཛོད་སྤུ་ནས། །ཤིན་ཏུ་སྣང་བའི་འོད་ཟེར་རབ་ཏུ་བཏང་། །ལྷ་རྣམས་དགའ་བས་ཙན་དན་ཕྱེ་མ་དང་། །ལྷ་ཡི་སྤོས་རབ་ཡིད་དུ་འོང་བ་དང་། །མན་དཱ་ར་དང་མཉྫུ་ཥ་ཀ་ཡི། །མེ་ཏོག་དག་གི་ཆར་ཆེན་རབ་ཏུ་ཕབ། །དེས་ནི་ས་འདི་ཀུན་ཏུ་མཛེས་གྱུར་ཅིང་། །འཁོར་བཞི་འདི་དག་དགའ་བ་རབ་ཏུ་ཐོབ། །ཞིང་རྣམས་འདི་དག་ཐམས་ཅད་རྣམ་དྲུག་ཏུ། །ཤིན་ཏུ་འཇིགས་པའི་གཟུགས་སུ་ཀུན་ནས་གཡོས། །འོད་ཟེར་དེ་ཡིས་ཤར་གྱི་ཕྱོགས་ལོགས་ཀྱི། །ཞིང་ནི་སྟོང་ཕྲག་བཅྭ་བརྒྱད་ཚང་བ་རྣམས། །སྐད་ཅིག་གཅིག་གིས་ཐམས་ཅད་རབ་ཏུ་སྣང་། །ཞིང་རྣམས་གསེར་གྱི་ཁ་དོག་བཞིན་དུ་མཛེས། །མནར་མེད་ཡན་ཆད་སྲིད་པའི་རྩེ་མོའི་བར། །ཞིང་དེ་དག་ན་སེམས་ཅན་ཇི་སྙེད་པ། །འགྲོ་བ་དྲུག་པོ་དེ་ན་ཡོད་པ་རྣམས། །གང་དག་དེར་ཡང་ཤི་འཕོ་སྐྱེ་བ་རྣམས། །དེ་དག་ལས་ཀྱི་རྣམ་པ་སྣ་ཚོགས་དང་། །འགྲོ་བ་བདེ་དང་མི་བདེ་རྣམས་ཀྱང་སྣང་། །བཟང་པོ་ངན་པ་དེ་བཞིན་བར་མ་ཡང་། །འདི་ན་འདུག་ཀྱང་དེ་དག་ཐམས་ཅད་མཐོང་། །སངས་རྒྱས་སེང་གེ་མི་ཡི་དབང་པོ་རྣམས། །ཆོས་ཉིད་རབ་སྟོན་རྣམ་པར་དབྱེ་བ་མཐོང་། །སེམས་ཅན་བྱེ་བ་མང་ལ་རབ་སྟོན་པ། །སྙན་པའི་སྒྲ་དང་དབྱངས་སུ་གསུང་བ་དག །ཟབ་ཅིང་རྒྱ་ཆེ་རྨད་དུ་བྱུང་བའི་སྒྲ། །སོ་སོའི་ཞིང་རྣམས་སུ་ཡང་རབ་ཏུ་འབྱིན། །དཔེ་དང་གཏན་ཚིགས་ཁྲག་ཁྲིག་བྱེ་བ་ཡིས། །སངས་རྒྱས་ཆོས་འདིར་རབ་ཏུ་སྟོན་པ་ནི། །སེམས་ཅན་གང་རྣམས་སྡུག་བསྔལ་གཟིར་བ་དག །སྐྱེ་དང་རྒ་བས་ཡིད་སྐྱོ་མི་ཤེས་ལ། །འདི་ནི་དགེ་སློང་སྡུག་བསྔལ་ཐ་མ་ཞེས། །དེ་ལ་རབ་ཞི་མྱ་ངན་འདས་པ་སྟོན། །མི་རྣམས་གང་གིས་རྒྱ་ཆེ་མཐུ་ཐོབ་ཅིང་། །སངས་རྒྱས་མཐོང་བས་དེ་བཞིན་བསོད་ནམས་ལྡན། །དེ་དག་ལ་ནི་ཆོས་ཚུལ་འདི་བརྗོད་ཅིང་། །རང་རྒྱལ་ཐེག་པ་ཡང་ནི་སྟོན་པ་མཛད། །གཞན་ཡང་བདེ་བར་གཤེགས་པའི་སྲས་པོ་གང་། །བླ་ན་མེད་པའི་ཡེ་ཤེས་ཚོལ་བ་དག །བྱ་བ་སྣ་ཚོགས་རྟག་ཏུ་བྱེད་པ་ལ། །དེ་དག་ལ་ནི་བྱང་ཆུབ་ཕྱིར་བསྔགས་གསུང་། །འདི་ན་འདུག་བཞིན་དེ་ན་འདི་འདྲ་དང་། །
ཁྱད་པར་གཞན་ཡང་སྟོང་ཕྲག་བྱེ་བ་དག །ཤིན་ཏུ་མཐོང་ཞིང་ཐོས་ཏེ་འཇམ་པའི་དབྱངས། །དེ་དག་ལས་ནི་ཕྱོགས་ཙམ་སྨོས་པར་བྱ། །བདག་མཐོང་ཞིང་རྣམས་མང་པོ་དེ་དག་ནའང་། །བྱང་ཆུབ་སེམས་དཔའ་གང་གཱའི་བྱེ་མ་སྙེད། གང་རྣམས་བྱེ་བ་སྟོང་ཕྲག་མི་ཉུང་བ། །བརྩོན་འགྲུས་རྣམ་པ་མང་པོས་བྱང་ཆུབ་སྐྱེད། །ལ་ལ་སྦྱིན་པ་སྦྱིན་པའང་དེ་བཞིན་ཏེ། །ནོར་དང་འགྲོན་བུ་གསེར་དང་དངུལ་རྣམས་དང་། །མུ་ཏིག་ནོར་བུ་མན་ཤེལ་བྱི་རུ་དང་། །བྲན་ཕོ་བྲན་མོ་རྟ་དང་ཤིང་རྟ་ལུག །དེ་བཞིན་རིན་ཆེན་དག་གིས་བརྒྱན་པའི་ཁྱོགས། །ཡོངས་སུ་དགའ་བའི་ཡིད་ཀྱིས་སྦྱིན་པ་གཏོང་། །བདག་ཅག་གིས་ཀྱང་ཐེག་མཆོག་ཐོབ་ཤོག་ཅེས། །བྱང་ཆུབ་མཆོག་འདིར་ཡོངས་སུ་སྔོ་བར་བྱེད། །སྦྱིན་པ་འདི་འདྲ་འདི་དག་བྱིན་བྱས་ན། ཁམས་གསུམ་ནང་ན་ཐེག་མཆོག་ཁྱད་པར་ཅན། །སངས་རྒྱས་ཐེག་པ་བདེ་གཤེགས་གང་བསྔགས་པ། །དེ་ནི་བདག་གིས་མྱུར་དུ་ཐོབ་གྱུར་ཅིག །ལ་ལ་རྟ་བཞི་ཅན་གྱི་ཤིང་རྟ་ལ། ཁ་ཁྱེར་བཅས་པ་མེ་ཏོག་རྒྱལ་མཚན་བརྒྱན། །རིན་ཆེན་དག་ལས་བྱས་པའི་བ་དན་ཅན། །ལ་ལས་དེ་ལྟ་བུ་ཡང་སྦྱིན་པ་བྱིན། །དེ་བཞིན་བུ་དང་ཆུང་མ་རྣམས་ཀྱང་བྱིན། །ལ་ལ་ཕངས་པའི་ཤ་ཡང་སྦྱིན་པར་བྱེད། །བྱང་ཆུབ་དམ་པ་འདི་ནི་ཚོལ་བའི་ཕྱིར། །ལག་པ་དང་ནི་རྐང་པ་བསླངས་ན་བྱིན། །ལ་ལ་དག་གིས་མགོ་དང་ལ་ལས་མིག །ལ་ལ་བདག་གི་ལུས་མཆོག་རབ་ཀྱང་གཏོང་། །དང་བའི་སེམས་ཀྱིས་སྦྱིན་པ་རྣམས་བྱིན་ནས། །དེ་བཞིན་གཤེགས་ཀྱི་ཡེ་ཤེས་དོན་དུ་གཉེར། །འཇམ་དཔལ་བདག་གིས་མཐོང་བ་ལ་ལ་ན། །རྒྱལ་སྲིད་སྐྱིད་པ་རྣམ་པར་སྤང་བྱས་ཏེ། །བཙུན་མོའི་འཁོར་དང་དེ་བཞིན་གླིང་ཀུན་དང་། །གཉེན་དང་བློན་པོ་ཐམས་ཅད་རྣམ་སྤངས་ནས། །འཇིག་རྟེན་རྣམ་པར་འདྲེན་གྱི་དྲུང་དོང་སྟེ། །ཞི་བའི་ཕྱིར་ནི་ཆོས་རབ་མཆོག་འདྲི་ཞིང་། །ངུར་སྨྲིག་གོས་རྣམས་རབ་ཏུ་གྱོན་བྱེད་དེ། །སྐྲ་དང་ཁ་སྤུ་དག་ཀྱང་འདྲེག་པར་བྱེད། །བདག་མཐོང་བྱང་ཆུབ་སེམས་དཔའ་ལ་ལ་ནི། །དགེ་སློང་གྱུར་ཅིང་ནགས་ཚལ་གནས་པ་དག །དགོན་པ་སྟོང་པ་རྣམས་སུ་གནས་འཆའ་ཞིང་། །ལ་ལ་ལུང་ནོད་ཁ་ཏོན་བྱེད་ལ་དགའ། །བདག་མཐོང་བྱང་ཆུབ་སེམས་དཔའ་
ལ་ལ་དག །རི་སུལ་དག་ཏུ་ཞུགས་པའི་བརྟན་པ་རྣམས། །སངས་རྒྱས་ཡེ་ཤེས་འདི་ལ་རྣམ་པར་སྒོམ། །ཡོངས་སུ་སེམས་ཤིང་ཉེ་བར་རྟོགས་པར་བྱེད། ཁ་ཅིག་གིས་ནི་འདོད་པ་མ་ལུས་སྤངས། །ཡོངས་བསྒོམས་བདག་ཉིད་སྤྱོད་ཡུལ་རྣམ་པར་དག །མངོན་པར་ཤེས་པ་ལྔ་ཡང་དེར་ཐོབ་ནས། །བདེ་བར་གཤེགས་པའི་སྲས་པོ་དགོན་པར་གནས། །བརྟན་པ་ལ་ལ་རྐང་གཤིབས་དེར་གནས་ཏེ། །འདྲེན་པའི་སྤྱན་སྔར་ཐལ་མོ་སྦྱར་བྱས་ནས། །དགའ་བ་བསྐྱེད་དེ་རྒྱལ་དབང་རྒྱལ་པོ་ལ། །ཚིགས་སུ་བཅད་པ་སྟོང་གིས་མངོན་པར་བསྟོད། །དྲན་དང་ལྡན་ཞིང་དུལ་བ་མི་འཇིགས་པ། །ལ་ལ་སྤྱོད་པ་ཕྲ་བ་ཤེས་པ་དག །རྐང་གཉིས་གཙོ་ལ་ཆོས་ཀྱང་འདྲི་བར་བྱེད། །ཐོས་ནས་དེ་དག་ཆོས་རྣམས་འཛིན་པར་འགྱུར། །ཡོངས་བསྒོམས་བདག་ཉིད་རྒྱལ་དབང་སྲས་པོ་རྣམས། །ལ་ལ་དག་གིས་དེ་དང་དེར་མཐོང་བ། །དཔེ་དང་གཏན་ཚིགས་ཁྲག་ཁྲིག་དུ་མ་ཡིས། །སྲོག་ཆགས་བྱེ་བ་མང་ལ་ཆོས་རྣམས་སྟོན། །མཆོག་ཏུ་དགའ་སྐྱེས་ཆོས་རྣམས་རབ་སྟོན་ཅིང་། །བྱང་ཆུབ་སེམས་དཔའ་མང་པོ་ཡང་དག་འཛུད། །བདུད་རྣམས་སྟོབས་དང་བཞོན་པར་བཅས་བཅོམ་སྟེ། །ཆོས་ཀྱི་རྔ་འདི་ཤིན་ཏུ་རྡུང་བར་བྱེད། །ལ་ལ་བདེ་བར་གཤེགས་པའི་བསྟན་པ་ལ། །བདེ་གཤེགས་སྲས་ལ་ལྷ་མི་གནོད་སྦྱིན་དང་། །སྲིན་པོས་མཆོད་ཀྱང་ངོ་མཚར་མི་འཛིན་ཅིང་། །བསྙེམས་མེད་ཞི་ཞིང་རབ་ཞི་སྤྱོད་པ་མཐོང་། །ཕལ་ཆེར་ནགས་གནས་དེ་བཞིན་གཞན་དག་ཀྱང་། །སྣང་བའི་འོད་ནི་ལུས་ལས་རབ་གཏོང་སྟེ། །སེམས་ཅན་དམྱལ་ནས་སེམས་ཅན་རྣམས་འདོན་ཅིང་། །དེ་དག་བྱང་ཆུབ་ལ་ཡང་ཡང་དག་འཛུད། །རྒྱལ་བའི་སྲས་པོ་ལ་ལ་བརྩོན་འགྲུས་གནས། ཁ་ཅིག་གིས་ཀྱང་མ་ལུས་གཉིད་སྤངས་ནས། །འཆག་པ་བྱེད་ཅིང་ནགས་ཚལ་གནས་པ་དག །དེ་དག་བརྩོན་པས་བྱང་ཆུབ་མཆོག་ལ་ཞུགས། །ལ་ལ་ཚུལ་ཁྲིམས་མ་རལ་སྲུང་བ་ནི། །རྟག་ཏུ་རྣམ་དག་ནོར་བུ་རིན་ཆེན་བཞིན། །ལ་ལ་སྤྱད་པ་ཡོངས་སུ་རྫོགས་པར་འགྱུར། །དེ་དག་ཁྲིམས་ཀྱིས་བྱང་ཆུབ་མཆོག་ལ་ཞུགས། །རྒྱལ་སྲས་ལ་ལ་བཟོད་པའི་སྟོབས་ཅན་ཏེ། །དགེ་སློང་ང་རྒྱལ་ཅན་དག་
ཁྲོ་བ་དང་། །དེ་བཞིན་གཤེ་ཞིང་སྡིག་པའང་བཟོད་པར་བྱེད། །བཟོད་པས་དེ་དག་བྱང་ཆུབ་མཆོག་ལ་ཞུགས། །བདག་མཐོང་བྱང་ཆུབ་སེམས་དཔའ་ལ་ལ་ནི། །རྩེད་མོ་དགའ་བ་ཐམས་ཅད་རྣམ་སྤངས་ཏེ། །བྱིས་པའི་གྲོགས་པོ་རྣམས་ཀྱང་ཡོངས་སྤངས་ནས། །འཕགས་པ་རྣམས་དང་འགྲོགས་དགའ་མཉམ་པར་གཞག །རྣམ་པར་གཡེང་བའི་སེམས་ནི་རྣམ་སྤངས་ནས། །ལོ་སྟོང་བྱེ་བར་ནགས་དང་རི་སུལ་ན། །རྩེ་གཅིག་སེམས་སུ་བསམ་གཏན་བྱེད་པ་རྣམས། །དེ་དག་བསམ་གཏན་བྱང་ཆུབ་མཆོག་ལ་ཞུགས། །དགེ་འདུན་སློབ་བཅས་རྒྱལ་བ་མངོན་སུམ་དུ། །བཟའ་དང་བཅའ་དང་དེ་བཞིན་ཟས་དང་སྐོམ། །ན་བའི་སྨན་ནི་མི་ཉུང་མང་པོ་དག །ཁ་ཅིག་དེ་ལྟར་སྦྱིན་པ་སྦྱིན་པར་བྱེད། །དགེ་འདུན་སློབ་བཅས་རྒྱལ་བ་མངོན་སུམ་དུ། །དེ་དག་གོས་བརྒྱ་བྱེ་བ་སྦྱིན་པར་བྱེད། །ལ་ལ་སྟོང་ཕྲག་བྱེ་བ་བརྒྱ་རི་དང་། །རིན་ཐང་མེད་པའི་གོས་རྣམས་རབ་ཏུ་འབུལ། །རིན་པོ་ཆེ་དང་དེ་བཞིན་ཙན་དན་གྱི། །གཙུག་ལག་ཁང་ནི་བྱེ་བ་བརྒྱ་བྱས་ནས། །སྟན་དང་མལ་ཆ་མང་པོས་བརྒྱན་པ་རྣམས། །བདེ་བར་གཤེགས་པ་རྣམས་ལ་མངོན་སུམ་འབུལ། །ཀུན་དགའ་ར་བ་ཡིད་འོང་གཙང་མ་རྣམས། །མེ་ཏོག་འབྲས་བུ་སྣ་ཚོགས་ལྡན་པ་དག །སྐྱེས་བུ་ཁྱུ་མཆོག་ཉན་ཐོས་བཅས་པ་ལ། །ལ་ལ་ཉིན་པར་ཞུགས་ཕྱིར་རབ་ཏུ་འབུལ། །དགའ་བ་སྐྱེས་ནས་སྣ་ཚོགས་རྣམ་མང་པོ། །དེ་ལྟ་བུ་ཡི་སྦྱིན་པ་སྦྱིན་པར་བྱེད། །བྱིན་ནས་བྱང་ཆུབ་ཕྱིར་ཡང་བརྩོན་འགྲུས་བསྐྱེད། །སྦྱིན་པས་དེ་དག་བྱང་ཆུབ་མཆོག་ལ་ཞུགས། །ལ་ལ་ཞི་བའི་ཆོས་ཀྱང་རབ་འཆད་དེ། །དཔེ་དང་གཏན་ཚིགས་ཁྲག་ཁྲིག་དུ་མ་ཡིས། །དེ་དག་སྲོག་ཆགས་བྱེ་བ་སྟོང་ལ་སྟོན། །དེ་དག་ཡེ་ཤེས་བྱང་ཆུབ་མཆོག་ལ་ཞུགས། །བྱེད་པ་མེད་པའི་ཆོས་རབ་ཤེས་པ་ནི། །གཉིས་མེད་རབ་ཞུགས་ནམ་མཁའ་མཚུངས་འདྲ་བ། །མ་ཆགས་བདེ་བར་གཤེགས་པའི་སྲས་པོ་རྣམས། །དེ་དག་ཤེས་རབ་བྱང་ཆུབ་མཆོག་ལ་ཞུགས། །བདག་གིས་གཞན་ཡང་མཐོང་བ་འཇམ་པའི་དབྱངས། །བདེར་གཤེགས་མྱ་ངན་འདས་པའི་བསྟན་པ་ལ། །བྱང་ཆུབ་
སེམས་དཔའ་བརྟན་པ་མང་བྱུང་ནས། །རྒྱལ་བའི་རིང་བསྲེལ་དག་ལ་རིམ་གྲོ་བྱེད། །མཆོད་རྟེན་བྱེ་བ་སྟོང་ཕྲག་མི་ཉུང་བ། །ཇི་ལྟར་གང་གཱའི་ཀླུང་གི་བྱེ་མ་བཞིན། །གང་གིས་བྱེ་བའི་ཞིང་རྣམས་རྟག་བརྒྱན་པ། །རྒྱལ་སྲས་དེ་དག་བྱེད་དུ་འཇུག་པ་མཐོང་། །རིན་ཆེན་སྣ་བདུན་མཆོག་གི་རྒྱལ་མཚན་གདུགས། །དེ་ན་བྱེ་བ་སྟོང་རྣམས་བསྒྲེང་བ་ནི། །འཕང་དུ་དཔག་ཚད་ལྔ་སྟོང་ཕྱིན་པ་སྟེ། །ཁོར་ཡུག་ཏུ་ནི་དཔག་ཚད་ཉིས་སྟོང་ཡོད། །རྣམ་རྒྱལ་བ་དན་བཅས་པ་ཁོར་མོར་མཛེས། །དྲིལ་དང་དྲིལ་བུ་གཡེར་ཁ་རྟག་ཏུ་འཁྲོལ། །མེ་ཏོག་དྲི་དང་དེ་བཞིན་སིལ་སྙན་གྱིས། །ལྷ་མི་སྲིན་པོ་གནོད་སྦྱིན་རྣམས་ཀྱིས་མཆོད། །ཡོངས་འདུས་ཤིང་གི་མེ་ཏོག་རྒྱས་པ་བཞིན། །དེ་ལྟར་ཕྱོགས་བཅུ་དེ་དག་མཛེས་བྱས་ཏེ། །རྒྱལ་བའི་རིང་བསྲེལ་དག་ལ་འདི་འདྲ་འདིར། །བདེ་གཤེགས་སྲས་ཀྱིས་མཆོད་པ་བྱེད་དུ་བཙུད། །རྒྱལ་བས་འོད་ཟེར་གཅིག་པུ་འདི་བཏང་བས། །ལྷར་བཅས་འཇིག་རྟེན་འདི་དག་རབ་རྒྱས་པ། །བདག་དང་སྲོག་ཆགས་བྱེ་བ་མང་པོ་འདིས། །འདི་ན་འདུག་བཞིན་དེ་དག་ཐམས་ཅད་མཐོང་། །གང་གིས་འོད་ཟེར་གཅིག་པུ་དེང་བཏང་བས། །ཞིང་རྣམས་སྟོང་ཕྲག་མང་པོར་སྟོན་པ་དེ། །ཀྱེ་མ་སྐྱེས་བུ་ཁྱུ་མཆོག་དེ་ཡི་མཐུ། །ཀྱེ་མ་ཡེ་ཤེས་རྒྱ་ཆེ་ཟག་མེད་དོ། །རྨད་དུ་བྱུང་བ་ཚད་མེད་འདི་འདྲ་བའི། །ལྟས་རྣམས་མཐོང་ནས་བདག་ཅག་ངོ་མཚར་གྱུར། །འདི་ཡི་དོན་རྣམས་འཇམ་དབྱངས་རབ་སྟོན་ཏེ། །སངས་རྒྱས་སྲས་རྣམས་ཐེ་ཚོམ་གྱུར་པ་སྩོལ། །འཁོར་བཞི་འདི་དག་རབ་ཏུ་དགའ་སེམས་ཀྱིས། །དཔའ་བོ་ཁྱོད་དང་བདག་ལ་མངོན་པར་ལྟ། །བདེ་བར་གཤེགས་པས་དེ་རིང་ཅི་ཡི་ཕྱིར། །སྣང་བ་འདི་འདྲ་འདི་ནི་རབ་ཏུ་བཏང་། །བདེ་གཤེགས་སྲས་པོ་ཁྱོད་ཀྱིས་ལུང་སྟོན་ལ། །དགའ་བ་སྐྱེད་ཅིང་ཐེ་ཚོམ་རྣམ་པར་སོལ། །འདི་ལྟར་འོད་ཟེར་རྒྱ་ཆེན་རབ་བཏང་བ། །དེ་དག་ཅི་འདྲའི་དོན་དུ་འགྱུར་བ་ཞིག །བདེ་བར་གཤེགས་པ་སྐྱེས་བུ་དམ་པ་ཡིས། །བྱང་ཆུབ་སྙིང་པོར་ཆོས་མཆོག་གང་བརྙེས་པ། །དེ་དག་འཇིག་རྟེན་མགོན་པོ་འདིར་འཆད་དམ། །བྱང་ཆུབ་སེམས་དཔའ་འདི་དག་ལུང་སྟོན་ཏམ། །ཞིང་རྣམས་སྟོང་ཕྲག་དུ་མ་གང་བསྟན་པ། །
སྣ་ཚོགས་རབ་ཏུ་བཀྲ་བ་རིན་ཆེན་བརྒྱན། །མཐའ་ཡས་སྤྱན་ཅན་སངས་རྒྱས་རྣམ་སྣང་བ། །འདི་ནི་མི་ཆུད་རྒྱུར་འགྱུར་གོར་མ་ཆག །རྒྱལ་བའི་སྲས་ལ་བྱམས་པས་ཀུན་དྲིས་ནས། །ལྷ་མི་གནོད་སྦྱིན་སྲིན་པོ་དེ་དག་དགའ། །འཇམ་དབྱངས་འདིར་ནི་ཅི་ཞིག་ལུང་སྟོན་ཅེས། །འཁོར་རྣམས་བཞི་པོ་དེ་དག་ཤིན་ཏུ་སྡོད། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་། ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་དེ་ལ་སྨྲས་པ། རིགས་ཀྱི་བུ་དག་འདི་ནི་དེ་བཞིན་གཤེགས་པ་ཆོས་ཆེན་པོ་བསྒྲགས་པའི་འབེལ་བའི་གཏམ་མཛད་པར་དགོངས་པའོ། །རིགས་ཀྱི་བུ་དག་འདི་ནི་དེ་བཞིན་གཤེགས་པས་ཆོས་ཀྱི་ཆར་ཆེན་པོ་མངོན་པར་དབབ་པ་དང་། ཆོས་ཀྱི་རྔ་ཆེན་པོ་རབ་ཏུ་བརྡུང་བ་དང་། ཆོས་ཀྱི་རྒྱལ་མཚན་ཆེན་པོ་རབ་ཏུ་བསྒྲེང་བ་དང་། ཆོས་ཀྱི་སྒྲོན་མ་ཆེན་པོ་རབ་ཏུ་འབར་བར་མཛད་པ་དང་། ཆོས་ཀྱི་དུང་ཆེན་པོ་རབ་ཏུ་འབུད་པ་དང་། ཆོས་ཀྱི་རྔ་བོ་ཆེ་ཆེན་པོ་རབ་ཏུ་བརྡུང་བ་དང་། ཆོས་བསྟན་པ་ཆེན་པོ་མཛད་པར་དགོངས་པ་སྟེ། རིགས་ཀྱི་བུ་དག་བདག་ཇི་ལྟར་སྤོབས་པ་དང་། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྔ་ལྟས་འདི་ལྟ་བུ་འདི་བདག་གིས་མཐོང་སྟེ། སྔོན་གྱི་དེ་བཞིན་གཤེགས་པ་དེ་དག་གིས་ཀྱང་། འོད་ཟེར་གྱི་སྣང་བ་འདི་བཏང་བས། བདག་ནི་འདི་ལྟར་དེ་བཞིན་གཤེགས་པ་ཡང་ཆོས་ཆེན་པོ་བསྒྲག་པའི་འབེལ་བའི་གཏམ་མཛད་པར་བཞེད་པ་དང་། ཆོས་ཆེན་པོ་བསྒྲགས་པ་ཐོས་པར་མཛད་པ་བཞེད་པས་འདི་ལྟ་བུའི་སྔ་ལྟས་འདི་མཛད་པ་སྙམ་བྱེད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་ཐམས་ཅད་དང་མི་འཐུན་པའི་ཆོས་ཀྱི་རྣམ་གྲངས་བསྒྲག་པར་བཞེད་པས་སྔ་ལྟས་ཆོ་འཕྲུལ་ཆེན་པོ་འོད་ཟེར་རབ་ཏུ་བཏང་བའི་སྣང་བ་འདི་ལྟ་བུ་འདི་སྟོན་ཏོ། །རིགས་ཀྱི་བུ་དག་བདག་གིས་དྲན་པ་འདས་པའི་དུས་ན་བསྐལ་པ་གྲངས་མེད་པའི་ཡང་ཆེས་གྲངས་མེད་པ་ཡངས་པ་དཔག་ཏུ་མེད་པ་བསམ་གྱིས་མི་ཁྱབ་པ་དཔག་གིས་མི་ལང་བ་ཚད་མེད་པ་དེའི་ཕ་རོལ་
གྱི་ཡང་ཆེས་ཕ་རོལ་ཏུ་གྱུར་པ་དེའི་ཚེ་དེའི་དུས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཉི་ཟླ་སྒྲོན་མ་ཞེས་བྱ་བ་འཇིག་རྟེན་དུ་བྱུང་སྟེ། དེས་ཆོས་བསྟན་པ་ཚངས་པར་སྤྱོད་པ་ཐོག་མར་དགེ་བ་བར་དུ་དགེ་བ་ཐ་མར་དགེ་བ་དོན་བཟང་པོ་ཚིག་འབྲུ་བཟང་པོ་མ་འདྲེས་པ་ཡོངས་སུ་རྫོགས་པ་ཡོངས་སུ་དག་པ་ཡོངས་སུ་བྱང་བ་ཡང་དག་པར་སྟོན་ཏེ་འདི་ལྟ་སྟེ། ཉན་ཐོས་རྣམས་ལ་ནི་སྐྱེ་བ་དང་རྒ་བ་དང་། ན་བ་དང་འཆི་བ་དང་། མྱ་ངན་དང་སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་འཁྲུག་པ་ལས་ཤིན་ཏུ་བཟླ་བའི་ཕྱིར། མྱ་ངན་ལས་འདས་པའི་མཐར་ཐུག་པ་འཕགས་པའི་བདེན་པ་བཞི་དང་ལྡན་པ། རྟེན་ཅིང་འབྲེལ་པར་འབྱུང་བ་ལ་འཇུག་པའི་ཆོས་སྟོན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་བརྩམས་ཏེ། ཕ་རོལ་ཏུ་ཕྱིན་པ་དྲུག་དང་ལྡན་པ་ཐམས་ཅད་མཁྱེན་པའི་ཡེ་ཤེས་ཀྱི་མཐར་ཐུག་པའི་ཆོས་སྟོན་ཏོ། །རིགས་ཀྱི་བུ་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་སྒྲོན་མ་དེའི་ཕ་རོལ་གྱི་ཡང་ཆེས་ཕ་རོལ་ན། ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་སྒྲོན་མ་ཞེས་བྱ་བ་ཞིག་འཇིག་རྟེན་དུ་བྱུང་སྟེ་མ་ཕམ་པ་འདི་ལྟར་སྔ་རོལ་དང་སྔ་རོལ་བརྗོད་པའི་ཚུལ་འདིས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་སྒྲོན་མ་ཞེས་བྱ་བར་མཚན་གཅིག་པ་རིགས་དང་གདུང་གཅིག་པ་ཤ་སྟག་སྟེ། འདི་ལྟར་བྷ་ར་དྭ་ཛའི་རིགས་སུ་འཐུན་པ་དེ་བཞིན་གཤེགས་པ་ཉི་ཁྲི་བྱུང་ངོ་། །མ་ཕམ་པ་དེ་ལ་དེ་བཞིན་གཤེགས་པ་ཉི་ཁྲི་པོ་དེ་དག་ཐོག་མའི་དེ་བཞིན་གཤེགས་པ་ནས་ཐ་མའི་དེ་བཞིན་གཤེགས་པའི་བར་དུ་དེ་དག་གིས་ཆོས་བཤད་པ་ཡང་། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་
དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ། ཡང་དག་པར་སྟོན་ཏེ། འདི་ལྟ་སྟེ། ཉན་ཐོས་རྣམས་ལ་ནི་སྐྱེ་བ་དང་རྒ་བ་དང་ན་བ་དང་འཆི་བ་དང་། མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་བ་དང་ཡིད་མི་བདེ་བ་དང་འཁྲུག་པ་ལས་ཤིན་ཏུ་བཟླ་བའི་ཕྱིར། །མྱ་ངན་ལས་འདས་པའི་མཐར་ཐུག་པ་འཕགས་པའི་བདེན་པ་བཞི་དང་ལྡན་པ་རྟེན་ཅིང་འབྲེལ་པར་འབྱུང་བ་ལ་འཇུག་པའི་ཆོས་སྟོན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་བརྩམས་ཏེ། ཕ་རོལ་ཏུ་ཕྱིན་པ་དྲུག་དང་ལྡན་པ་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་མཐར་ཐུག་པའི་ཆོས་སྟོན་ཏོ། །མ་ཕམ་པ་འདི་ལྟར་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་སྒྲོན་མ་དེ་སྔོན་གཞོན་ནུར་གྱུར་ཅིང་ཁབ་ན་བཞུགས་པ་ལས་མངོན་པར་མ་བྱུང་བའི་ཚེ་སྲས་བརྒྱད་ཡོད་པར་གྱུར་ཏེ་འདི་ལྟ་སྟེ། རྒྱལ་བུ་གཞོན་ནུ་བློ་གྲོས་ཞེས་བྱ་བ་དང་། བཟང་པོའི་བློ་གྲོས་དང་། མཐའ་ཡས་བློ་གྲོས་དང་། དཀོན་མཆོག་བློ་གྲོས་དང་། ཁྱད་པར་བློ་གྲོས་དང་། ཐེ་ཚོམ་ཀུན་བཅོམ་དང་། དབྱངས་ཀྱི་བློ་གྲོས་དང་། རྒྱལ་བུ་གཞོན་ནུ་ཆོས་ཀྱི་བློ་གྲོས་ཞེས་བྱ་བ་ཡོད་དོ། །མ་ཕམ་པ་བཅོམ་ལྡན་འདས་ཉི་ཟླ་སྒྲོན་མ་དེའི་སྲས་རྒྱལ་བུ་གཞོན་ནུ་བརྒྱད་པོ་དེ་དག་རྫུ་འཕྲུལ་ཆེན་པོར་གྱུར་ཏེ། དེ་དག་རེ་རེ་ཡང་གླིང་ཆེན་པོ་བཞི་ལ་ཀུན་ཏུ་ལོངས་སྤྱོད་པར་གྱུར་ཅིང་དེ་དག་ན་རྒྱལ་པོ་བྱེད་དོ། །དེ་དག་གིས་བཅོམ་ལྡན་འདས་དེ་ཁབ་ནས་མངོན་པར་བྱུང་བར་ཤེས་ཤིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པར་ཐོས་ནས། རྒྱལ་པོའི་ལོངས་སྤྱོད་ཐམས་ཅད་སྤངས་ཏེ། བཅོམ་ལྡན་འདས་དེའི་རྗེས་སུ་རབ་ཏུ་བྱུང་ནས་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ཏེ་ཆོས་སྨྲ་བར་གྱུར་ཏོ། །རྒྱལ་བུ་གཞོན་ནུ་དེ་དག་རྟག་ཏུ་ཚངས་པར་སྤྱོད་ཅིང་སངས་རྒྱས་བརྒྱ་སྟོང་མང་པོ་ལ་དགེ་བའི་རྩ་བ་བསྐྱེད་པར་གྱུར་ཏོ། །མ་ཕམ་པ་དེའི་ཚེ་ན་ཡང་བཅོམ་ལྡན་འདས་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་སྒྲོན་མ་དེས། ངེས་པར་བསྟན་པ་ཆེན་པོ་ཞེས་བྱ་བའི་ཆོས་ཀྱི་རྣམ་གྲངས་མདོ་སྡེ་ཤིན་ཏུ་རྒྱས་པ་ཆེན་པོ་བྱང་ཆུབ་སེམས་དཔའ་རྣམས་ལ་གདམས་པ་སངས་རྒྱས་ཐམས་ཅད་ཀྱིས་ཡོངས་སུ་བཟུང་བ་བཤད་ནས། དེའི་ཚེ་སྐད་ཅིག་ཐང་ཅིག་ཡུད་ཙམ་དེ་ཉིད་ལ་འཁོར་འདུས་པ་དེ་ཉིད་དུ་ཆོས་ཀྱི་གདན་ཆེན་པོ་དེ་ཉིད་ལ་སྐྱིལ་མོ་ཀྲུང་བཅས་ཏེ། མཐའ་ཡས་ངེས་པར་བསྟན་པའི་གནས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་སྐུ་མི་གཡོ་ཞིང་སེམས་མི་གཡོ་བར་གྱུར་ནས་བཞུགས་སོ། །བཅོམ་ལྡན་འདས་དེ་སྙོམས་པར་ཞུགས་མ་ཐག་ཏུ། བཅོམ་ལྡན་འདས་ལ་མེ་ཏོག་མན་དཱ་ར་བ་དང་། མན་དཱ་ར་བ་ཆེན་པོ་དང་། མཉྫུ་ཥ་ཀ་དང་། མཉྫུ་ཥ་ཀ་ཆེན་པོ་དང་། ལྷའི་མེ་ཏོག་དག་གི་ཆར་ཆེན་པོ་མངོན་པར་བབ་སྟེ། བཅོམ་ལྡན་འདས་འཁོར་དང་བཅས་པ་ལ་མངོན་པར་འཐོར་རོ། །ཐམས་ཅད་དང་ལྡན་པའི་སངས་རྒྱས་ཀྱི་ཞིང་ཡང་རྣམ་པ་དྲུག་ཏུ་རབ་ཏུ་གཡོས་པར་གྱུར་ཏེ། འགུལ་ཀུན་ཏུ་རབ་ཏུ་འགུལ། ལྡེག་ཀུན་ཏུ་རབ་ཏུ་ལྡེག །འཁྲུགས་ཀུན་ཏུ་རབ་ཏུ་འཁྲུགས་སོ། །མ་ཕམ་པ་ཡང་དེའི་ཚེ་འཁོར་དེར་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་རྣམས་དང་། རྒྱལ་ཕྲན་དང་། སྟོབས་ཀྱི་འཁོར་ལོས་སྒྱུར་བ་དང་། གླིང་བཞིའི་འཁོར་ལོས་སྒྱུར་བ་རྣམས་འདུས་ནས་འཁོད་པར་གྱུར་པ་འཁོར་དང་བཅས་པ་དེ་དག་ཐམས་ཅད་བཅོམ་ལྡན་འདས་ལ་ལྟ་ཞིང་ངོ་མཚར་དུ་གྱུར་རྨད་དུ་གྱུར་དགའ་བར་གྱུར་ཏོ། །དེ་ནས་དེའི་ཚེ་བཅོམ་ལྡན་འདས་དེ་བཞིན་གཤེགས་པ་ཉི་ཟླ་སྒྲོན་མ་དེའི་སྨིན་མཚམས་ཀྱི་བར་གྱི་མཛོད་སྤུ་ནས་འོད་ཟེར་གཅིག་བྱུང་ནས་དེ་ཤར་ཕྱོགས་སུ་སངས་རྒྱས་ཀྱི་ཞིང་ཉི་ཁྲི་བྱུང་སྟེ། སངས་རྒྱས་ཀྱི་ཞིང་དེ་དག་ཐམས་ཅད་འོད་ཟེར་དེའི་འོད་ཀྱིས་ཤིན་ཏུ་ཁྱབ་པར་སྣང་བར་གྱུར་ཏེ། མ་ཕམ་པ་འདི་ལྟ་སྟེ་དཔེར་ན། ད་ལྟར་སངས་རྒྱས་ཀྱི་ཞིང་འདི་དག་སྣང་བར་གྱུར་པ་བཞིན་ནོ། །མ་
ཕམ་པ་ཡང་དེའི་ཚེ་བཅོམ་ལྡན་འདས་དེའི་ཞབས་འབྲིང་ན། བྱང་ཆུབ་སེམས་དཔའ་བྱེ་བ་ཕྲག་ཉི་ཤུ་འཁོད་པ་དང་། འཁོར་དེ་ན་ཆོས་ཉན་པ་དེ་དག་འོད་ཟེར་ཆེན་པོའི་སྣང་བ་དེས་འཇིག་རྟེན་སྣང་བར་བྱས་པ་མཐོང་ནས་ངོ་མཚར་དུ་གྱུར་རྨད་དུ་གྱུར་ཏེ་ལྟད་མོ་ཆེར་བྱུང་ངོ་། །མ་ཕམ་པ་དེའི་ཚེ་ན་ཡང་བཅོམ་ལྡན་འདས་དེའི་བསྟན་པ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འོད་མཆོག་ཅེས་བྱ་བ་བྱུང་སྟེ་དེའི་སློབ་མ་བརྒྱད་བརྒྱ་ཡོད་དོ། །བཅོམ་ལྡན་འདས་དེ་ཡང་ཏིང་ངེ་འཛིན་དེ་ལས་བཞེངས་ནས་བྱང་ཆུབ་སེམས་དཔའ་འོད་མཆོག་ལས་བརྩམས་ཏེ། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་ཡང་དག་པར་སྟོན་ཏེ། བར་གྱི་བསྐལ་པ་དྲུག་ཅུ་ཚང་བར་གདན་གཅིག་ལ་བཞུགས་ནས་སྐུ་མི་བསྐྱོད། སེམས་མི་གཡོ་བར་བཤད་དོ། །འཁོར་དེ་དག་ཐམས་ཅད་ཀྱང་སྟན་གཅིག་ལ་འཁོད་དེ། །ལུས་མི་བསྐྱོད་སེམས་མི་གཡོ་བར་བར་གྱི་བསྐལ་པ་དྲུག་ཅུར་བཅོམ་ལྡན་འདས་དེ་ལ་ཆོས་ཉན་ཏེ། འཁོར་དེ་ན་སེམས་ཅན་འགའ་ཡང་ལུས་ངལ་བ་ཡང་མེད། སེམས་སྐྱོ་བ་ཡང་མེད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་སྒྲོན་མས་བར་གྱི་བསྐལ་པ་དྲུག་ཅུ་འདས་ཀྱི་བར་དུ། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་མདོ་སྡེ་ཤིན་ཏུ་རྒྱས་པ་ཆེན་པོ་བྱང་ཆུབ་སེམས་དཔའ་རྣམས་ལ་གདམས་པ། སངས་རྒྱས་ཐམས་ཅད་ཀྱིས་ཡོངས་སུ་བཟུང་བ་བཤད་ནས། སྐད་ཅིག་དེ་ཉིད་ལ་མྱ་ངན་ལས་འདའ་ཞེས་ལྷ་དང་བཅས་བདུད་དང་བཅས་ཚངས་པ་དང་བཅས་པའི་འཇིག་རྟེན་དང་དགེ་སྦྱོང་དང་བྲམ་ཟེར་བཅས་པའི་སྐྱེ་དགུའི་མདུན་དུ། དགེ་སློང་དག་དོ་མོད་ནམ་གྱི་གུང་ཐུན་ལ་དེ་བཞིན་གཤེགས་པ་ཕུང་པོའི་ལྷག་མ་མེད་པའི་མྱ་ངན་ལས་འདའ་བའི་དབྱིངས་སུ་ཡོངས་སུ་མྱ་ངན་ལས་འདའོ་ཞེས་གསུངས་སོ། །མ་ཕམ་པ་དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་སྒྲོན་མ་དེས། བྱང་ཆུབ་སེམས་དཔའ་སེམས་དཔའ་ཆེན་པོ་དཔལ་གྱི་སྙིང་པོ་ཞེས་བྱ་བ་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་ལུང་བསྟན་ནས་འཁོར་དེ་དག་ཐམས་ཅད་ལ་བཀའ་སྩལ་པ། དགེ་སློང་དག་བྱང་ཆུབ་སེམས་དཔའ་དཔལ་གྱི་སྙིང་པོ་འདི། ངའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲི་མ་མེད་པའི་སྤྱན་ཞེས་བྱ་བར་འགྱུར་རོ་ཞེས་གསུངས་སོ། །མ་ཕམ་པ་དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་སྒྲོན་མ་དེའི་ནུབ་མོ་ནམ་གྱི་གུང་ཐུན་ལ། ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་འོད་མཆོག་དེས་བླངས་ཏེ་བར་གྱི་བསྐལ་པ་བརྒྱད་ཅུའི་བར་དུ། བཅོམ་ལྡན་འདས་མྱ་ངན་ལས་འདས་པ་དེའི་བསྟན་པ་ལ་ཡང་དག་པར་བསྟན་ཏོ། །མ་ཕམ་པ་དེ་ལ་བཅོམ་ལྡན་འདས་དེའི་སྲས་བློ་གྲོས་ལ་སོགས་པ་བརྒྱད་པོ་དེ་དག་བྱང་ཆུབ་སེམས་དཔའ་འོད་མཆོག་དེའི་སློབ་མར་གྱུར་ཏེ། དེས་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །དེ་དག་གིས་དེའི་འོག་ཏུ་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་མཐོང་སྟེ། བཀུར་སྟི་བྱས་ནས་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེ་དག་གི་ཐ་མ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཡིན་ནོ། །སློབ་མ་བརྒྱད་བརྒྱ་པོ་དེ་དག་ལས་གཅིག་རྙེད་པ་ལ་རབ་ཏུ་གདུ་བ་བཀུར་སྟི་ལ་གདུ་བ་ཤེས་ཀྱི་ཁེ་ལ་གདུ་བ་གྲགས་པ་འདོད་པས། དེ་ལ་བསྟན་པའི་ཚིག་དང་། ཡི་གེ་མི་ཟིན་མི་ཆགས་ཏེ་དེའི་མིང་ཡང་གྲགས་འདོད་ཅེས་བྱ་བར་གྱུར་ཏོ། །དེས་ཀྱང་དགེ་བའི་རྩ་བ་དེས་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་མཉེས་པར་བྱས་སོ། །མཉེས་པར་བྱས་ནས་བསྟི་སྟང་བྱས། བཙུན་པར་བྱས། རི་མོར་བྱས། མཆོད་པ་དང་། བཀུར་བ་དང་། རིམ་གྲོ་བྱས་སོ། །མ་ཕམ་པ་དེའི་ཚེ་དེའི་
དུས་ན། བྱང་ཆུབ་སེམས་དཔའ་འོད་མཆོག་ཅེས་བྱ་བ་ཆོས་སྨྲ་བར་གྱུར་པ་དེ། གཞན་ཞིག་ཡིན་པ་སྙམ་དུ་ཁྱོད་སོམ་ཉིའམ་ཡིད་གཉིས་སམ་ཐེ་ཚོམ་ཟ་བར་གྱུར་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ཁོ་བོ་དེའི་ཚེ་དེའི་དུས་ན་བྱང་ཆུབ་སེམས་དཔའ་འོད་མཆོག་ཅེས་བྱ་བ་ཆོས་སྨྲ་བར་གྱུར་ཏོ། །གང་ཡང་བྱང་ཆུབ་སེམས་དཔའ་གྲགས་འདོད་ཅེས་བྱ་བ་ལེ་ལོ་ཅན་དུ་གྱུར་པ་དེ་ནི། མ་ཕམ་པ་ཁྱོད་ཉིད་དེའི་ཚེ་དེའི་དུས་ན། བྱང་ཆུབ་སེམས་དཔའ་གྲགས་འདོད་ཅེས་བྱ་བ་ལེ་ལོ་ཅན་དུ་གྱུར་པ་ཡིན་ནོ། །མ་ཕམ་པ་དེ་ལྟར་ཁོ་བོས་རྣམ་གྲངས་འདིས་ན་བཅོམ་ལྡན་འདས་ཀྱི་སྔ་ལྟས་འདི་ལྟ་བུའི་འོད་ཟེར་བཏང་བ་མཐོང་ནས། བཅོམ་ལྡན་འདས་ཀྱང་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་མདོ་སྡེ་ཤིན་ཏུ་རྒྱས་པ་ཆེན་པོ་དེ་བཤད་པར་བཞེད་པ་སྙམ་བྱེད་དོ། །དེ་ནས་འཇམ་དཔལ་གཞོན་ནུར་གྱུར་པས་དོན་དེ་ཉིད་རྒྱས་པར་སྟོན་ཅིང་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འདས་པའི་དུས་རྣམས་རྗེས་སུ་དྲན་པ་ནི། །ཚད་མེད་བསམ་གྱིས་མི་ཁྱབ་བསྐལ་པ་ན། །དེ་ཚེ་རྒྱལ་བ་བྱུང་བ་སྐྱེ་དགུའི་མཆོག །མཚན་ནི་ཉི་ཟླ་སྒྲོན་མ་ཞེས་བྱ་བ། །སྐྱེ་དགུ་འདྲེན་པ་དེ་ནི་ཆོས་སྟོན་ཏེ། །སེམས་ཅན་མཐའ་ཡས་བྱེ་བ་རྣམ་པར་འདུལ། །བྱང་ཆུབ་སེམས་དཔའ་བསམ་ཡས་བྱེ་བ་སྟོང་། །མང་པོ་དེ་དག་ཡེ་ཤེས་ཡང་དག་འཛུད། །རྣམ་པར་འདྲེན་པ་གཞོན་ནུར་གྱུར་པ་ཡི། །དེ་ཚེ་དེའི་སྲས་གྱུར་བརྒྱད་པོ་དག །ཐུབ་ཆེན་རབ་ཏུ་བྱུང་བ་དེ་མཐོང་ནས། །འདོད་སྤངས་ཐམས་ཅད་མྱུར་བར་རབ་ཏུ་བྱུང་། །འཇིག་རྟེན་མགོན་པོ་དེ་ཡི་ཆོས་བཤད་པ། །མཐའ་ཡས་ངེས་པར་བསྟན་པ་མདོ་སྡེ་མཆོག །དེ་མིང་ཤིན་ཏུ་རྒྱས་པའི་མདོ་ཞེས་བྱ། །སྲོག་ཆགས་སྟོང་ཕྲག་བྱེ་བ་དག་ལ་སྟོན། །རྣམ་པར་འདྲེན་པ་དེ་ཡིས་བཤད་མ་ཐག །དེ་ཚེ་སྐད་ཅིག་སྐྱིལ་མོ་ཀྲུང་བཅས་ནས། །མཐའ་ཡས་ངེས་བསྟན་ཏིང་འཛིན་དམ་པ་ལ། །ཐུབ་མཆོག་ཆོས་གདན་བཞུགས་ནས་བསམ་གཏན་མཛད། །ལྷ་ཡི་མེ་ཏོག་མན་དཱ་ར་བ་འབབ། །མ་བརྡུངས་པར་ནི་རྔ་ཡི་སྒྲ་ཡང་འབྱུང་། །ལྷ་དང་གནོད་སྦྱིན་བར་སྣང་གནས་འཁོད་པ། ། རྐང་གཉིས་དམ་པ་ལ་ནི་མཆོད་པ་བྱེད། །ཞིང་རྣམས་
ཐམས་ཅད་དེ་མ་ཐག་ཏུ་གཡོས། །དེ་ན་ངོ་མཚར་རྨད་དུ་བྱུང་བར་གྱུར། །སྨིན་མཚམས་ནས་ནི་ཤིན་ཏུ་མཛེས་པ་ཡི། །འདྲེན་པས་འོད་ཟེར་གཅིག་པོ་རབ་བཏང་བ། །ཤར་གྱི་ཕྱོགས་སུ་འོད་ཟེར་དེ་སོང་བས། །ཞིང་རྣམས་སྟོང་ཕྲག་བཅྭ་བརྒྱད་ཚང་བ་དག །རབ་ཏུ་སྣང་བས་འཇིག་རྟེན་ཐམས་ཅད་མཛེས། །སེམས་ཅན་རྣམས་ཀྱི་ཤི་འཕོ་སྐྱེ་བ་སྟོན། །རྣམ་པར་འདྲེན་པའི་འོད་ཟེར་དེ་ཡི་མཐུས། །དེ་ལྟར་དེ་ན་ལ་ལ་རིན་ཆེན་ཞིང་། །དེ་བཞིན་ཁ་དོག་བཻ་དཱུཪྱ་ཡི་མདོག །བལྟ་ན་སྡུག་པ་སྣ་ཚོགས་སྣང་བར་གྱུར། །ལྷ་དང་མི་དང་དེ་བཞིན་གནོད་སྦྱིན་ཀླུ། །ལྷ་ཡི་བུ་མོ་དྲི་ཟ་མི་འམ་ཅི། །གང་རྣམས་བདེ་བར་གཤེགས་ལ་མཆོད་བརྩོན་པ། །དེ་དག་འཇིག་རྟེན་ཁམས་ན་མཆོད་བྱེད་སྣང་། །སངས་རྒྱས་རང་འབྱུང་དེ་དག་ཉིད་ཀྱང་སྣང་། །གསེར་གྱི་མཆོད་སྡོང་ལྟ་བུར་བལྟ་ན་སྡུག །བཻ་དཱུཪྱ་ཡི་དབུས་ན་གསེར་གཟུགས་བཞིན། །འཁོར་གྱི་དབུས་ན་ཆོས་ནི་རབ་ཏུ་གསུང་། །དེ་ན་ཉན་ཐོས་གྲངས་ཡོད་མ་ཡིན་ཏེ། །བདེ་གཤེགས་ཉན་ཐོས་དེ་སྙེད་ཚད་མེད་པ། །སོ་སོའི་ཞིང་དུ་རྣམ་པར་འདྲེན་པ་ཡི། །འོད་ཟེར་འོད་ཀྱིས་དེ་དག་ཐམས་ཅད་སྟོན། །བརྩོན་འགྲུས་ལྡན་ཞིང་ཚུལ་ཁྲིམས་མ་ཉམས་ཏེ། །ཚུལ་ཁྲིམས་སྐྱོན་མེད་ནོར་བུ་རིན་ཆེན་འདྲ། །མི་མགོན་སྲས་དག་རི་ཡི་སུལ་དག་ན། །གནས་ཤིང་སྤྱོད་པ་དེ་དག་སྣང་བར་གྱུར། །བདོག་པ་ཐམས་ཅད་མ་ལུས་ཡོངས་སུ་གཏོང་། །བརྟན་པ་བཟོད་པའི་སྟོབས་ཅན་བསམ་གཏན་དགའ། །བྱང་ཆུབ་སེམས་དཔའ་གང་གཱའི་བྱེ་སྙེད་མང་། །འོད་ཟེར་དེ་ཡིས་ཐམས་ཅད་རབ་ཏུ་སྣང་། །བསྐྱོད་པ་མེད་ཅིང་གཡོ་བ་མེད་པར་ཡང་། །བཟོད་ནས་བསམ་གཏན་དགའ་ཞིང་མཉམ་པར་བཞག །དེ་དག་བསམ་གཏན་བྱང་ཆུབ་མཆོག་ཞུགས་པ། །བདེ་བར་གཤེགས་པའི་ཐུགས་ཀྱི་སྲས་རྣམས་སྣང་། །ཡང་དག་ཞི་བ་ཟག་པ་མེད་པའི་གནས། །ཤིན་ཏུ་ཤེས་ནས་ཡང་དག་རབ་སྟོན་ཏེ། །འཇིག་རྟེན་ཁམས་མང་དུ་ནི་ཆོས་ཀྱང་འཆད། དེ་འདྲའི་བྱེད་པ་བདེར་གཤེགས་མཐུ་ཡིས་བྱུང་། །ཉི་མ་ཟླ་བ་སྒྲོན་མ་དེ་ཡི་མཐུས། །སྐྱོང་བའི་འཁོར་བཞིས་དེ་དག་མཐོང་ནས་སུ། །དེ་ཚེ་ཐམས་ཅད་དགའ་
བར་གནས་གྱུར་ཏེ། །འདི་ལྟར་ཅི་ཞིག་ཅེས་ནི་ཕན་ཚུན་འདྲི། །གནོད་སྦྱིན་ལྷ་མིས་དེ་མཆོད་མི་རིང་བར། །འཇིག་རྟེན་འདྲེན་པ་ཏིང་ངེ་འཛིན་ལས་བཞེངས། །ཆོས་སྨྲ་བྱང་ཆུབ་སེམས་དཔའ་གང་མཁས་པ། །འོད་མཆོག་སྲས་ལ་དེ་ཚེ་འདི་སྐད་གསུངས། །མཁས་པ་ཁྱོད་ནི་འཇིག་རྟེན་མིག་དང་ལམ། །ང་ཡི་ཆོས་འཛིན་ཤིན་ཏུ་ཡིད་བརྟན་པས། །ཇི་ལྟར་སྲོག་ཆགས་ཕན་ཕྱིར་ངས་བཤད་པ། །ང་ཡི་ཆོས་འཛོད་འདི་ལ་ཁྱོད་མངོན་སུམ། །བྱང་ཆུབ་སེམས་དཔའ་མང་པོ་ཀུན་བཀོད་དེ། །དགའ་བར་བྱས་ཤིང་ཤིན་ཏུ་བསྔགས་བསྟོད་ནས། །བར་གྱི་བསྐལ་པ་དྲུག་ཅུ་ཚང་བར་ནི། །དེ་ཚེ་རྒྱལ་བ་དེ་ཡིས་ཆོས་མཆོག་བཤད། །གདན་གཅིག་སྟེང་བཞུགས་འཇིག་རྟེན་མགོན་པོ་དེས། །ཆོས་མཆོག་དམ་པ་དག་ནི་གང་བཤད་པ། །དེ་དག་ཐམས་ཅད་འོད་མཆོག་རྒྱལ་བའི་སྲས། །ཆོས་སྨྲར་གྱུར་པ་དེ་ཡིས་ཤིན་ཏུ་བཟུང་། །རྒྱལ་བ་དེས་ནི་ཆོས་ཀྱི་མཆོག་བཤད་དེ། །སྐྱེ་བོ་དུ་མ་རབ་ཏུ་དགའ་བྱས་ནས། །དེ་ཡི་ཉིན་པར་ལྷར་བཅས་འཇིག་རྟེན་མདུན། །རྣམ་པར་འདྲེན་པ་དེ་ནི་འདི་སྐད་གསུང་། །ང་ཡིས་ཆོས་ཀྱི་ཚུལ་འདི་རབ་བསྟན་ཏེ། །ཆོས་ཀྱི་རང་བཞིན་ཅི་འདྲ་བཤད་ཟིན་གྱིས། །དགེ་སློང་དོ་ནུབ་ནམ་གྱི་གུང་ཐུན་ལ། །ང་ནི་མྱ་ངན་འདའ་བའི་དུས་ལ་བབ། །ང་ཡི་བསྟན་པ་འདི་ལ་རབ་སྦྱོར་ལ། །བག་མེད་མ་ཡིན་དད་པ་སྙིང་པོར་གྱིས། །བསྐལ་པ་བྱེ་བ་ཁྲག་ཁྲིག་འདས་པར་ཡང་། །རྒྱལ་བ་དྲང་སྲོང་ཆེན་པོ་རྙེད་པར་དཀའ། །རྐང་གཉིས་དམ་པ་ཤིན་ཏུ་མྱུར་བ་རུ། །མྱ་ངན་ལས་ནི་འདའ་བའི་སྒྲ་ཐོས་ནས། སངས་རྒྱས་སྲས་རྣམས་མང་པོ་མྱ་ངན་སྐྱེས། །སྡུག་བསྔལ་རབ་དང་ཤིན་ཏུ་ལྡན་པར་གྱུར། །སྲོག་ཆགས་བསམ་ཡས་བྱེ་མང་དེ་དག་ལ། །མི་ཡི་དབང་པོ་རྒྱལ་པོས་དབུགས་ཕྱུང་བ། །མྱ་ངན་ང་འདས་དགེ་སློང་མ་འཇིགས་ཤིག །ང་ཡི་འོག་ཏུ་སངས་རྒྱས་འབྱུང་བ་ནི། །བྱང་ཆུབ་སེམས་དཔའ་དཔལ་སྙིང་མཁས་པ་འདི། །ཟག་མེད་ཡེ་ཤེས་འདི་ནི་རྟོགས་པར་རིག །ང་ཡི་བྱང་ཆུབ་མཆོག་རབ་འཐོབ་འགྱུར་ཏེ། །སྤྱན་དང་ཡན་ལག་དྲི་མེད་རྒྱལ་བར་འོང་། །དེ་ཚེ་དེ་ཡི་ནམ་གྱི་གུང་ཐུན་ལ། །རྒྱུ་ཟད་མེ་དང་འདྲ་བར་མྱ་ངན་འདས། །དེ་ཡི་སྐུ་གདུང་ཤིན་ཏུ་རྒྱས་
གྱུར་ཏེ། མཆོད་རྟེན་བྱེ་བ་ཁྲག་ཁྲིག་མཐའ་ཡས་སོ། །དེ་ན་དགེ་སློང་དེ་བཞིན་དགེ་སློང་མ། །གང་རྣམས་བྱང་ཆུབ་མཆོག་ལ་རབ་ཞུགས་ཤིང་། །བདེ་གཤེགས་དེ་ཡི་བསྟན་ལ་མངོན་བརྩོན་པ། །དེ་དག་མི་ཉུང་གང་གཱའི་བྱེ་མ་སྙེད། །དེ་ཚེ་ཆོས་སྨྲར་གང་གྱུར་དགེ་སློང་ནི། །གང་གིས་ཆོས་དེ་བཟུང་བ་འོད་མཆོག་སྟེ། །བར་གྱི་བསྐལ་པ་བརྒྱད་ཅུ་ཚང་བར་དེས། །བསྐལ་པ་དེ་ལ་ཆོས་མཆོག་རབ་ཏུ་སྟོན། །དེ་ཡི་སློབ་མར་གྱུར་པ་བརྒྱད་བརྒྱ་དག །དེ་དག་ཐམས་ཅད་ཡོངས་སུ་སྨིན་པར་བྱས། །དེ་དག་སངས་རྒྱས་བྱེ་བ་མང་པོ་མཐོང་། །དྲང་སྲོང་ཆེན་པོ་དེ་དག་བཀུར་སྟི་བྱས། །དེ་ཚེ་སྤྱད་པ་རྗེས་སུ་འཐུན་སྤྱད་ནས། །འཇིག་རྟེན་མང་པོ་ཁམས་སུ་སངས་རྒྱས་གྱུར། །གཅིག་འོག་གཅིག་ཏུ་དེ་དག་རྗེས་བཞིན་དུ། །བྱང་ཆུབ་མཆོག་ཏུ་གཅིག་གིས་གཅིག་ལུང་བསྟན། །སངས་རྒྱས་དེ་དག་རིམ་གྱིས་བྱུང་བ་ཡི། །ཐ་མར་གྱུར་པ་མར་མེ་མཛད་པ་སྟེ། །ལྷ་ཡི་ལྷ་མཆོག་དྲང་སྲོང་མང་པོའི་མཆོག །སྲོག་ཆགས་བྱེ་བ་སྟོང་ཡང་རྣམ་པར་བཏུལ། །གང་སྔོན་བདེ་བར་གཤེགས་པ་དེ་ཡི་སྲས། །དེ་ཡི་ཚེ་ན་འོད་མཆོག་ཆོས་སྨྲ་བའི། །སློབ་མ་སྲེད་དང་ལྡན་ཞིང་ལེ་ལོ་ཅན། །ཤེས་ཀྱི་ཁེ་དང་རྙེད་པ་ཚོལ་བ་དང་། །ཤིན་ཏུ་གྲགས་པ་འདོད་པའི་ཤས་ཆེ་ཞིང་། །གྲོང་ནས་གྲོང་དུ་རྒྱུ་བར་གྱུར་པ་སྟེ། །དེ་ཡི་ཁ་ཏོན་ལུང་ནོས་དེ་བཞིན་ཀུན། །དེ་ཡི་ཚེ་ན་བཤད་པ་རྣམས་མི་ཟིན། །དེ་ཡི་མིང་ཡང་འདི་ཞེས་བྱ་བར་གྱུར། །གྲགས་པ་འདོད་ཅེས་ཕྱོགས་སུ་རྣམ་པར་གྲགས། །དེ་ཡང་དགེ་བ་རྣམས་ཀྱི་ལས་དེ་དག །འདྲེན་མར་གྱུར་པ་མངོན་པར་འདུས་བྱས་པས། །སངས་རྒྱས་སྟོང་ཕྲག་བྱེ་བ་མཉེས་བྱས་ཏེ། །དེ་དག་མཆོད་པ་རྒྱ་ཆེར་བྱས་པར་གྱུར། །རྗེས་སུ་འཐུན་པའི་སྤྱོད་པ་རབ་སྤྱད་ནས། །སངས་རྒྱས་ཤཱཀྱ་སེང་གེ་འདི་ཡང་མཐོང་། །དེ་ནི་འདིར་ཡང་ཐ་མར་བྱུང་བ་སྟེ། །རྗེས་བཞིན་བྱང་ཆུབ་མཆོག་ཀྱང་འཐོབ་འགྱུར་བ། །བྱམས་པའི་རིགས་སུ་བཅོམ་ལྡན་འདས་སུ་འགྱུར། །སྲོག་ཆགས་སྟོང་ཕྲག་བྱེ་བ་རྣམ་པར་འདུལ། །བདེར་གཤེགས་མྱ་ངན་འདས་པའི་བསྟན་པ་ལ། །དེ་ཚེ་ལེ་ལོ་ཅན་དུ་གང་གྱུར་པ། །དེ་ན་དེ་འདྲར་གྱུར་པ་ཁྱོད་ཉིད་དོ། །དེ་ཚེ་ཆོས་
སྨྲར་གྱུར་པ་ཁོ་བོ་སྟེ། །ཁོ་བོས་དེ་དང་དེ་ཡི་རྒྱུ་དང་བཞིས། །ཡེ་ཤེས་གྲགས་པ་དེ་ཡི་ལྟས་བྱུང་བ། །སྔོན་ཚེ་དེ་ན་ཁོ་བོས་མཐོང་གྱུར་པ། །དེ་འདྲའི་ལྟས་འདི་དེང་ཡང་མཐོང་བས་ན། །ངེས་པར་རྒྱལ་བའི་དབང་པོ་ཀུན་ཏུ་སྤྱན། །ཤཱཀྱའི་རྒྱལ་ཆེན་དོན་དམ་གཟིགས་པས་ཀྱང་། །དེ་ཚེ་ཁོ་བོས་རྣམ་གྲངས་མཆོག་ཐོས་གང་། །དེ་དག་ཉིད་ནི་འདིས་ཀྱང་བཤད་པར་དགོངས། །དེ་ཡི་ལྟས་ཉིད་དེ་རིང་ཡོངས་རྫོགས་ཀྱིས། །རྣམ་པར་འདྲེན་པ་རྣམས་ཀྱི་ཐབས་མཁས་པ། །ཤཱཀྱ་སེང་གེ་ཡང་དག་འཇོག་མཛད་དེ། །ཆོས་ཀྱི་དངོས་ཉིད་ཕྱག་རྒྱ་སྟོན་པར་འགྱུར། །ཐལ་མོ་སྦྱར་ཏེ་སེམས་བཟང་བརྩོན་པར་གྱིས། །འཇིག་རྟེན་ཕན་ཞིང་ཐུགས་བརྩེ་སྟོན་གྱུར་ཏེ། །མཐའ་ཡས་པ་ཡི་ཆོས་ཀྱི་ཆར་པ་འབབ། །གང་དག་བྱང་ཆུབ་ཕྱིར་ཞུགས་ངོམས་པར་མཛད། །བྱང་ཆུབ་སེམས་དཔའ་བྱང་ཆུབ་ཕྱིར་ཞུགས་པ། །གང་དག་མཁས་པ་ཉིད་ལས་སྐྱེས་གྱུར་པ། །དེ་དག་རྣམས་ཀྱི་སོམ་ཉི་གང་ཡིན་དང་། །ཡིད་གཉིས་ཐེ་ཚོམ་གང་ཡིན་དེ་སེལ་གྱུར། །དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་ལས། གླེང་གཞིའི་ལེའུ་ཞེས་བྱ་སྟེ་དང་པོའོ།། །།