ལྔ་པ། སྨན་གྱི་ལེའུ།
དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་དང་། གཞན་ཡང་གནས་བརྟན་ཉན་ཐོས་ཆེན་པོ་དེ་དག་ལ་བཀའ་སྩལ་པ། འོད་སྲུང་ལེགས་སོ་ལེགས་སོ། །ཁྱོད་ཀྱིས་དེ་བཞིན་གཤེགས་པའི་ཡང་དག་པའི་ཡོན་ཏན་བསྔགས་པ་བརྗོད་པ་ནི། འོད་སྲུང་ཁྱོད་ལེགས་སོ། །འོད་སྲུང་དེ་དག་ནི་དེ་བཞིན་གཤེགས་པའི་ཡོན་ཏན་ནོ། །དེ་བས་གཞན་ཡང་མང་ཞིང་ཚད་མེད་གྲངས་མེད་དེ། བསྐལ་པ་དཔག་ཏུ་མེད་པར་བཤད་ཀྱང་། དེ་དག་གི་མཐའ་རྟོགས་པར་སླ་བ་མ་ཡིན་ནོ། །འོད་སྲུང་དེ་བཞིན་གཤེགས་པ་ནི་ཆོས་ཀྱི་རྗེ། ཆོས་ཐམས་ཅད་ཀྱི་རྒྱལ་པོ་གཙོ་བོ་མངའ་བ་སྟེ། འོད་སྲུང་དེ་བཞིན་གཤེགས་པས་ཆོས་གང་དུ་བཞག་པ་དང་། ཇི་ལྟར་བཞག་པ་དེ་དག་དེ་བཞིན་དུ་འགྱུར་རོ། །འོད་སྲུང་དེ་བཞིན་གཤེགས་པ་ཆོས་ཐམས་ཅད་རིག་པར་འཇོག་སྟེ། དེ་བཞིན་གཤེགས་པའི་ཡེ་ཤེས་ཀྱིས་འཇོག་གོ ། ཇི་ལྟར་ཆོས་དེ་དག་ཐམས་ཅད་མཁྱེན་པའི་ས་ཉིད་དུ་འབྱུང་བར་དེ་ལྟར་འཇོག་གོ ། ཆོས་ཐམས་ཅད་ཀྱི་དོན་གྱི་རིམ་པ་ལ་དེ་བཞིན་གཤེགས་པ་གཟིགས་
ཏེ། ཆོས་ཐམས་ཅད་ལ་ལྷག་པའི་བསམ་པ་ཐོབ། ཆོས་ཐམས་ཅད་ངེས་པར་གཏན་ལ་དབབ་པ་ལ་ཐབས་མཁས་པའི་ཡེ་ཤེས་དམ་པ་མཆོག་ཐོབ་སྟེ། འོད་སྲུང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་ཐམས་ཅད་མཁྱེན་པའི་ཡེ་ཤེས་སྟོན་པའོ། །ཐམས་ཅད་མཁྱེན་པའི་ཡེ་ཤེས་ལ་འཛུད་པའོ། །ཐམས་ཅད་མཁྱེན་པའི་ཡེ་ཤེས་ལ་འཇོག་པའོ། །འོད་སྲུང་འདི་ལྟ་སྟེ་དཔེར་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན། རྩྭ་དང་ཤིང་གེལ་པ་དང་སྨན་དང་ནགས་ཚལ་ཁ་དོག་སྣ་ཚོགས་རྣམ་པ་དུ་མ་དང་། སྨན་མང་པོ་མིང་ཐ་དད་དུ་བཏགས་པ། ས་དང་རི་དང་རི་སུལ་དག་ནས་ཇི་སྙེད་སྐྱེས་པ། སྤྲིན་ཆུ་ཆེན་པོས་རྒྱས་པ་འདུས་ནས། ཐམས་ཅད་དང་ལྡན་པའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཁེབས་པར་བྱས་སོ། །ཀུན་ཁེབས་པར་བྱས་ནས་དུས་གཅིག་ཏུ་ཆར་མཉམ་པར་ཕབ་སྟེ། འོད་སྲུང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་རྩྭ་དང་ཤིང་གེལ་པ་དང་སྨན་དང་ནགས་ཚལ་དེ་ན། སྡོང་བུ་དང་ཡལ་ག་དང་ལོ་མ་དང་འདབ་མ་གཞོན་ཞིང་འཇམ་པ་ཅི་ཡོད་པ་དང་སྡོང་བུ་དང་ཡལ་ག་དང་ལོ་མ་དང་འདབ་མ་བར་མ་ཅི་ཡོད་པ་དང་སྡོང་བུ་དང་ཡལ་ག་དང་ལོ་མ་དང་འདབ་མ་ཆེན་པོ་དང་རྩྭ་དང་ཤིང་གེལ་པ་དང་སྨན་དང་ནགས་ཚལ་གྱི་སྡོང་པོ་དང་སྡོང་པོ་ཆེན་པོ་ཅི་ཡོད་པ་དེ་དག་ཐམས་ཅད། སྤྲིན་ཆེན་པོ་ལས་ཆར་བབ་པ་ལ་མཐུ་དང་ཡུལ་ཇི་ལྟ་བ་བཞིན་དུ་ཆུའི་ཁམས་སོ་སོར་འཐུངས་ཏེ། དེ་ཡང་སྤྲིན་ཆེན་པོ་གཅིག་ལས་བྱུང་བ། རོ་གཅིག་པའི་ཆུ་མང་པོས་ས་བོན་ཇི་ལྟ་བར་རྗེས་སུ་འཐུན་པར་སྐྱེས་ཏེ། འཕེལ་ཞིང་རྒྱས་པར་འགྱུར་རོ། །དེ་བཞིན་དུ་མེ་ཏོག་དང་འབྲས་བུ་འབྱུང་སྟེ། དེ་དག་ཀྱང་སོ་སོའི་མིང་ཐོབ་པོ། །ས་གཅིག་ལ་གནས་པའི་སྨན་མང་པོ་ས་བོན་མང་པོ་དེ་ཐམས་ཅད་ཆུ་རོ་གཅིག་པས་བངས་པ་དེ་བཞིན་དུ། འོད་སྲུང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་བྱུང་ངོ་། །ཇི་ལྟར་སྤྲིན་ཆེན་པོ་འདུས་པ་དེ་བཞིན་དུ། དེ་བཞིན་གཤེགས་པ་བྱུང་ནས། ལྷ་དང་མི་དང་ལྷ་མ་ཡིན་དུ་བཅས་
པ་ཐམས་ཅད་དང་ལྡན་པའི་འཇིག་རྟེན་ལ་དབྱངས་ཀྱིས་གོ་བར་མཛད་དོ། །དེ་ལ་འདི་ལྟ་སྟེ་དཔེར་ན་སྤྲིན་ཆེན་པོ་དེས་ཐམས་ཅད་དང་ལྡན་པའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཁེབས་པ་དེ་བཞིན་དུ། འོད་སྲུང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས། ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་གྱི་མདུན་དུ། སྒྲ་འདི་སྐད་འབྱིན་ཅིང་དབྱངས་ཀྱིས་ཐོས་པར་བྱེད་དེ། ལྷ་དང་མི་དག་ང་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཏེ། རྒལ་ནས་བསྒྲལ་ལོ་གྲོལ་ནས་དགྲོལ་ལོ། །དབུགས་ཕྱིན་ནས་དབུགས་དབྱུང་ངོ་། །ཡོངས་སུ་མྱ་ངན་ལས་འདས་ནས་ཡོངས་སུ་མྱ་ངན་ལས་བཟླའོ། །ང་ནི་ད་ལྟར་གྱི་འཇིག་རྟེན་དང་འཇིག་རྟེན་གཞན་ཡང་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །ཐམས་ཅད་མཁྱེན་ཅིང་ཐམས་ཅད་གཟིགས་སོ། །ལྷ་དང་མི་དག་ཆོས་ཉན་པའི་ཕྱིར་ངའི་དྲུང་དུ་ཤོག་ཅིག །ང་ནི་ལམ་སྟོན་པའོ། །ལམ་འཆད་པའོ། །ལམ་རིག་པའོ། །ལམ་མཁས་པའོ། །འོད་སྲུང་དེ་ལྟར་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོ། །དེ་བཞིན་གཤེགས་པ་ལ་ཆོས་ཉན་ཞིང་ཉེ་བར་ལྷགས་པའི་སེམས་ཅན་དེ་དག་གི་དབང་པོ་དང་། བརྩོན་འགྲུས་ཀྱི་རིམ་པ་དེ་བཞིན་གཤེགས་པས་མཁྱེན་ནས། དེ་དག་ལ་ཆོས་ཀྱི་རྣམ་གྲངས་ཉེ་བར་སྦྱོར་རོ། །དེ་དག་ལ་ཆོས་ཀྱི་གཏམ་མང་པོ་སྣ་ཚོགས་དགའ་བ་ཚིམ་པ་མགུ་བར་བྱེད་པ་ཕན་པ་དང་བདེ་བར་འགྱུར་བའི་གཏམ་གང་གིས། སེམས་ཅན་ཚེ་འདི་ལ་བདེ་བར་འགྱུར་ཞིང་འཆི་བའི་དུས་བྱས་ནས་ཀྱང་བདེ་འགྲོར་སྐྱེ་ལ། གར་སྐྱེས་པ་དེར་འདོད་པ་མང་པོ་སྤྱོད་ཀྱང་ཆོས་ཉན་ཞིང་། ཆོས་དེ་ཐོས་ནས་སྒྲིབ་པ་མེད་པར་འགྱུར་ཏེ། མཐར་གྱིས་ཐམས་ཅད་མཁྱེན་པའི་ཆོས་ལ་སྟོབས་ཇི་ལྟ་བ་དང་ཡུལ་ཇི་ལྟ་བ་དང་། མཐུ་ཇི་ལྟ་བ་བཞིན་དུ་འཇུག་པ་འགྱུར་བ་གསུང་ངོ་། །འོད་སྲུང་འདི་ལྟ་སྟེ་དཔེར་ན། སྤྲིན་ཆེན་པོ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཁེབས་ནས་ཆར་མཉམ་པར་ཕབ་སྟེ། རྩྭ་དང་ཤིང་གེལ་པ་དང་སྨན་དང་ནགས་ཚལ་ཐམས་ཅད་ཆུས་
ངོམས་ཏེ། སྟོབས་ཇི་ལྟ་བ་དང་ཡུལ་ཇི་ལྟ་བ་དང་མཐུ་ཇི་ལྟ་བ་བཞིན་དུ་རྩྭ་དང་ཤིང་གེལ་པ་དང་སྨན་དང་ནགས་ཚལ་ལ་སོགས་པས་ཆུ་འཐུང་སྟེ། བདག་བདག་གི་སོ་སོའི་རིགས་དང་ཚད་དུ་སྐྱེའོ། །འོད་སྲུང་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཆོས་བཤད་པ། ཆོས་ཐམས་ཅད་རོ་གཅིག་པ་སྟེ། དེ་ནི་རྣམ་པར་གྲོལ་བ་དང་། འདོད་ཆགས་དང་བྲལ་བ་དང་། འགོག་པ་དང་། ཐམས་ཅད་མཁྱེན་པའི་ཡེ་ཤེས་ཀྱི་མཐར་རོ་གཅིག་གོ ། འོད་སྲུང་དེ་བཞིན་དུ་དེ་བཞིན་གཤེགས་པས་ཆོས་བཤད་པ་དེ་ལ། སེམས་ཅན་གང་ཉན་པ་དང་འཛིན་པ་དང་འཇུག་པ་དེ་དག་བདག་གིས་བདག་ཤེས་པའམ་རིག་པའམ་རྟོགས་པ་མེད་དོ། །དེ་ཅིའི་ཕྱིར་ཞེ་ན། འོད་སྲུང་དེ་བཞིན་གཤེགས་པས་འདི་ལྟར་སེམས་ཅན་དེ་དག་དེ་བཞིན་དུ་མཁྱེན་ཏེ། དེ་དག་སུ་ཡིན་པ་དང་དེ་དག་ཅི་ལྟ་བུ་ཡིན་པ་དང་དེ་དག་ཅི་འདྲ་བ་དང་དེ་དག་ཅི་ལ་སེམས་པ་དང་དེ་དག་ཇི་ལྟར་སེམས་པ་དང་དེ་དག་ཅིས་སེམས་པ་དང་དེ་དག་ཅི་ལ་སྒོམ་པ་དང་དེ་དག་ཇི་ལྟར་སྒོམ་པ་དང་དེ་དག་ཅིས་སྒོམ་པ་དང་དེ་དག་ཅི་འཐོབ་པ་དང་དེ་དག་ཇི་ལྟར་འཐོབ་པ་དང་དེ་དག་ཅིས་འཐོབ་པ་དེ་དག་ཐམས་ཅད་ནི་འོད་སྲུང་དེ་བཞིན་གཤེགས་པ་ལ་མངོན་སུམ་སྟེ། མངོན་སུམ་དུ་གཟིགས། ཇི་ལྟ་བ་བཞིན་དུ་གཟིགས་པའི་ཕྱིར་རོ། །འོད་སྲུང་འདི་ལྟ་སྟེ། རྣམ་པར་གྲོལ་བའི་རོ་དང་མྱ་ངན་ལས་འདས་པའི་མཐར་ཐུག་པ་དང་རྟག་པར་ཡོངས་སུ་མྱ་ངན་ལས་འདས་པ་དང་། ས་གཅིག་པ་དང་ནམ་མཁའི་སྤྱོད་ཡུལ་དུ་ངས་ཆོས་རྣམས་རོ་གཅིག་པར་རྟོགས་ཀྱང་། སེམས་ཅན་རྣམས་ཀྱི་དད་པ་བསྲུང་བའི་ཕྱིར། ས་དེ་དང་དེ་དག་ན་གནས་པའི་སེམས་ཅན་རྩྭ་དང་ཤིང་གེལ་པ་དང་སྨན་དང་ནགས་ཚལ་རབ་འབྲིང་ཐ་མ་དེ་དག་ལྟ་བུ་ལ། ཐམས་ཅད་མཁྱེན་པའི་ཡེ་ཤེས་བློ་བུར་དུ་མི་སྟོན་ཏོ། །འོད་སྲུང་དེ་བཞིན་གཤེགས་པས་ལྡེམ་པོར་དགོངས་ཏེ་བཤད་པ་ལ། ཁྱེད་འཇུག་མི་ནུས་པས་ཁྱེད་ངོ་མཚར་དུ་གྱུར་ཏོ། །དེ་ཅིའི་ཕྱིར་ཞེ་ན། འོད་སྲུང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་
དགོངས་ཏེ་བཤད་པ་ནི་ཤེས་པར་དཀའ་བའི་ཕྱིར་རོ། །དེ་ནས་བཅོམ་ལྡན་འདས་ཀྱིས་དེའི་དོན་རྒྱས་པར་སྟོན་ཅིང་། དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཆོས་རྒྱལ་སྲིད་པ་འཇོམས་མཛད་པ། །ང་ནི་འཇིག་རྟེན་བྱུང་ནས་སུ། །མོས་པ་རྣམ་པར་མཁྱེན་གྱུར་ནས། །སེམས་ཅན་རྣམས་ལ་ཆོས་འཆད་དོ། ། དཔའ་བོ་ཆེན་པོ་བློ་བརྟན་པས། །བཤད་པ་རྣམས་ནི་ཡུན་རིང་སྲུང་། །གསང་ཆེན་དག་ཀྱང་འཛིན་མཛད་ཅིང་། །སྲོག་ཆགས་རྣམས་ལ་མི་སྟོན་ཏོ། །ཡེ་ཤེས་དེ་ནི་ཤེས་དགའ་སྟེ། །བྱིས་པ་རྣམས་ཀྱིས་འཕྲ་ལ་ཐོས། །མི་ཤེས་པས་ན་ཐེ་ཚོམ་གྱུར། །དེ་ལས་ཉམས་ཤིང་དེ་དགའ་འཁྱམ། །དེ་ཡི་སྟོབས་ཀྱང་ཅི་འདྲ་དང་། །ཡུལ་ཡང་ཇི་བཞིན་བཤད་པར་བྱ། །ཐ་དད་པ་ཡི་དོན་རྣམས་ཀྱིས། །ལྟ་བ་དག་ནི་དྲང་པོར་བྱ། །འོད་སྲུང་སྤྲིན་ནི་ཇི་ལྟ་བུར། །འདུས་ནས་འཇིག་རྟེན་ཁམས་རྣམས་སུ། །ས་རྣམས་རབ་ཏུ་ཡོག་པར་ནི། །ཐམས་ཅད་དུ་ཡང་ཁེབས་པར་གྱུར། །དེ་ནི་རབ་ཏུ་ཆུས་རྒྱས་ཏེ། །སྤྲིན་ཆེན་གློག་གི་ཕྲེང་བར་བཅས། །སྐད་ཀྱིས་ཤིན་ཏུ་སྒྲ་འབྱིན་ཅིང་། །ལུས་ཅན་རྣམས་ལ་དགའ་བར་བྱེད། །ཉི་མའི་འོད་ནི་བསྒྲིབས་པས་ན། །དཀྱིལ་འཁོར་དག་ཀྱང་བསིལ་བར་བྱས། །ལག་གིས་སླེབས་པར་འདུག་ནས་སུ། །ཐམས་ཅད་དུ་ནི་ཆར་ཡང་འབེབས། །དེ་ནི་སྙོམས་པར་འབེབས་པ་ཡང་། །ཆུ་ཡི་ཕུང་པོ་མི་ཆུང་བར། །ཀུན་ཏུ་བབ་པར་གྱུར་པས་ན། །ས་འདི་རྣམས་ཀྱང་ངོམས་པར་བྱས། །གང་དག་ས་འདི་རྣམས་ལས་ནི། །སྐྱེ་བར་གྱུར་པ་སྨན་རྣམས་དང་། །རྩྭ་དང་གེལ་པ་ནགས་ཚལ་དང་། །སྡོང་པོ་དང་ནི་སྡོང་ཆེན་དང་། །འབྲུ་ཡི་རྣམ་པ་མང་པོ་དང་། །སྔོན་པོར་གྱུར་པ་དག་ཀྱང་རུང་། །རི་དང་རི་སུལ་ནགས་རྣམས་སམ། །སྨན་ལྗོངས་ནས་ནི་གང་འཁྲུངས་པ། །སྤྲིན་གྱིས་ཐམས་ཅད་ངོམས་པར་བྱེད། །རྩྭ་དང་གེལ་པ་ནགས་ཚལ་དང་། །གདུངས་པའི་ས་ཡང་ངོམས་པར་བྱས། །སྨན་རྣམས་ལ་ཡང་ཀུན་ཏུ་ཕབ། །ཆུ་དེ་རྣམས་ཀྱང་རོ་གཅིག་སྟེ། །སྤྲིན་ལས་བབ་པ་འདི་ན་གནས། །ཇི་ལྟར་སྟོབས་དང་ཡུལ་གཞན་དུ། །རྩྭ་དང་གེལ་
པ་དེ་འཐུང་ངོ་། །སྡོང་པོ་དང་ནི་སྡོང་པོ་ཆེན་པོ་རྣམས། །ཆུང་ངུ་བར་མ་ན་ཚོད་ཇི་བཞིན་དུ། །ཇི་ལྟར་སྟོབས་བཞིན་ཐམས་ཅད་ཆུ་འཐུང་སྟེ། ། འཐུངས་ནས་ཇི་ལྟར་འདོད་པ་བཞིན་དུ་སྐྱེ། །སྤྲིན་ལས་ཆར་པ་བབ་པས་རྩི་ཆེན་རྣམས། སྡོང་བུ་སྦུ་གུ་ཤུན་པ་ཅི་ལྟ་བར། །ཡལ་ག་གྱེས་དང་འདབ་མ་ཇི་བཞིན་དུ། །འབྲས་བུ་མེ་ཏོག་རྣམས་ཀྱང་དེ་བཞིན་འཕེལ། །ཆར་པ་རོ་གཅིག་པ་ཡང་བབ་པས་ན། །ཇི་ལྟའི་སྟོབས་དང་ཡུལ་ནི་ཅི་འདྲ་བར། །གང་གིས་ས་བོན་དག་ནི་ཅི་འདྲ་ལས། །དེ་དག་རང་རང་ལས་ནི་སྐྱེ་བ་འབྱིན། །འོད་སྲུང་དེ་བཞིན་སངས་རྒྱས་འཇིག་རྟེན་འདིར། །འཇིག་རྟེན་ཆར་འཛིན་སྤྲིན་དང་འདྲ་བར་འབྱུང་། །འཇིག་རྟེན་མགོན་པོ་བྱུང་ནས་ཆད་པར་འགྱུར། །སྲོག་ཆགས་ལ་ནི་ཡང་དག་སྤྱོད་པར་སྟོན། །ལྷར་བཅས་འཇིག་རྟེན་དག་གིས་མདུན་བདར་ནས། །དེ་ལྟར་དྲང་སྲོང་ཆེན་པོ་རབ་སྒྲོགས་ཏེ། །དེ་ནི་རྐང་གཉིས་མཆོག་རྒྱལ་དེ་བཞིན་གཤེགས། །སྤྲིན་ལྟ་བུར་ནི་འཇིག་རྟེན་འདིར་བྱུང་སྟེ། །རབ་ཏུ་ལུས་སྐམས་སྲིད་པ་གསུམ་ཆགས་པ། །སེམས་ཅན་ཐམས་ཅད་ངས་ནི་ངོམས་པར་བྱས། །སྡུག་བསྔལ་དག་གིས་སྐམས་པ་བདེ་ལ་དགོད། །ངས་ནི་འདོད་དང་མྱ་ངན་འདས་པའང་སྦྱིན། །ལྷ་དང་མི་ཚོགས་རྣམས་ཀྱང་ང་ལ་ཉོན། །ང་ལ་ལྟ་བའི་ཕྱིར་ནི་ཉེ་བར་ཤོག །དེ་བཞིན་གཤེགས་པ་བཅོམ་ལྡན་ཟིལ་མི་ནོན། །བསྒྲལ་བའི་ཕྱིར་ནི་འཇིག་རྟེན་འདིར་སྐྱེས་ཏེ། །རྣམ་དག་ཤིན་ཏུ་མཐོང་བར་བྱ་བའི་ཆོས། །སྲོག་ཆགས་བྱེ་བ་སྟོང་ལ་བཤད་པར་བྱ། །དེ་ཡི་མཉམ་པ་ཉིད་དང་ཡང་དག་གཅིག །དེ་ནི་རྣམ་གྲོལ་མྱ་ངན་འདའ་བ་ཡིན། །རྟག་ཏུ་བྱང་ཆུབ་ཕྱིར་ནི་ཞུགས་པར་ཡང་། །དབྱངས་གཅིག་གིས་ནི་རབ་ཏུ་ཆོས་བཤད་དེ། དེ་ནི་མཉམ་པ་ཉིད་དེ་མི་མཉམ་མེད། །འདོད་ཆགས་མེད་ཅིང་ཞེ་སྡང་དག་ཀྱང་མེད། །ནམ་ཡང་ང་ལ་རྗེས་སུ་ཆགས་པ་མེད། །སུ་ལའང་ང་ནི་མཛའ་ཞིང་སྡང་བ་མེད། །སེམས་ཅན་གཅིག་བཞིན་འགྲོ་བ་གཞན་ལ་སྟེ། །ལུས་ཅན་རྣམས་ལ་ཆོས་ནི་སྙོམས་པར་འཆད། །ལས་གཞན་མི་བྱེད་རབ་ཏུ་ཆོས་འཆད་དེ། །
འགྲོ་བ་དང་ནི་འགྲེང་དང་འདུག་པ་དང་། །མལ་དུ་ཞུགས་ཏེ་ཉལ་བའི་ཚེ་ན་ཡང་། །ནམ་ཡང་ང་ལ་སྐྱོ་བར་གྱུར་པ་མེད། །སྤྲིན་གྱིས་ཆར་པ་མཉམ་པར་ཕབ་པ་བཞིན། །འཇིག་རྟེན་འདི་རྣམས་ཐམས་ཅད་ངོམས་པར་བྱ། །འཕགས་པ་དང་ནི་མ་རབས་མཚུངས་པའི་བློ། །ཚུལ་ཁྲིམས་ལྡན་དང་ཚུལ་ཁྲིམས་འཆལ་པ་དང་། །དེ་བཞིན་མི་གང་སྤྱོད་པ་ཉམས་པ་དང་། །སྤྱོད་དང་ཆོ་ག་རྣམས་སུ་ལྡན་པ་དང་། །ལྟ་ལ་གནས་ཤིང་ལྟ་བ་གང་ཉམས་དང་། །ཡང་དག་གང་ལྟ་ལྟ་བ་རྣམ་དག་དང་། །བློ་གྲོས་ངན་པ་དང་ནི་དམ་པའང་རུང་། །དབང་པོ་བརྟུལ་པོ་རྣམས་ལ་ཆོས་བཤད་དེ། །སྐྱོ་བ་ཐམས་ཅད་རབ་ཏུ་རྣམ་སྤངས་ནས། །ངས་ནི་ཡང་དག་ཆོས་ཀྱི་ཆར་པ་ཕབ། །ཇི་ལྟའི་སྤོབས་བཞིན་ང་ལ་མཉན་ནས་ནི། །ལྷ་མི་ནང་ན་ཡིད་དུ་འོང་བ་དང་། །འཁོར་ལོས་སྒྱུར་དང་བརྒྱ་བྱིན་ཚངས་པ་ཡི། །རྣམ་པ་མང་པོའི་ས་ལ་གནས་པར་འགྱུར། །ཕྲན་ཚེགས་ཕྲན་ཚེགས་སྨན་རྣམས་འདི་དག་དང་། །འཇིག་རྟེན་འདི་ན་གང་ཆུང་འདི་དག་དང་། །བར་མ་ཆེན་པོ་དམན་རྣམས་གཞན་དག་ཀྱང་། །དེ་དག་ཐམས་ཅད་རབ་ཏུ་བཤད་ཀྱིས་ཉོན། །ཟག་པ་མེད་པའི་ཆོས་རྣམས་རབ་ཤེས་ནས། །མི་དག་མྱ་ངན་འདས་ཐོབ་གནས་པ་དང་། །དྲུག་མངོན་ཤེས་ཤིང་གསུམ་རིག་གང་འགྱུར་བ། །དེ་ནི་བར་མའི་སྨན་ཞེས་བྱ་བ་ཡིན། །གང་དག་རི་སུལ་རྣམས་ན་གནས་པ་དང་། །མི་གང་རང་རྒྱལ་བྱང་ཆུབ་འདོད་བྱེད་པ། །དེ་འདྲ་འབྲིང་དུ་རྣམ་པར་དག་པའི་བློ། །དེ་ནི་བར་མའི་སྨན་ཞེས་བྱ་བ་ཡིན། །བརྩོན་འགྲུས་དང་ནི་བསམ་གཏན་རྣམས་བསྟེན་ཅིང་། །ལྷ་དང་མི་མགོན་སངས་རྒྱས་འགྱུར་བྱ་ཞེས། །སྐྱེས་བུ་ཁྱུ་མཆོག་ཏུ་ཡང་གང་སྨོན་པ། །དེ་ནི་སྨན་གྱི་མཆོག་ཅེས་བྱ་བ་ཡིན། །བདེ་བར་གཤེགས་པའི་སྲས་པོ་གང་ཞུགས་པ། །བྱམས་པ་བསྙེན་ཅིང་འདི་ལ་ཞི་བ་སྤྱོད། །སྐྱེས་བུ་ཁྱུ་མཆོག་ཏུ་ཡང་ཐེ་ཚོམ་མེད། །དེ་འདྲ་འདི་ན་སྡོང་པོ་ཡིན་ཞེས་བྱ། །ཕྱིར་མི་ལྡོག་པའི་འཁོར་ལོ་རབ་སྐོར་ཞིང་། །རྫུ་འཕྲུལ་སྟོབས་ལ་གནས་པ་གང་དཔའ་བ། སྲོག་ཆགས་བྱེ་བ་མང་པོ་རབ་ཏུ་འགྲོལ། །དེ་ནི་འདི་ན་སྡོང་པོ་ཆེན་པོ་
ཡིན། །རྒྱལ་བས་ཆོས་དེ་མཉམ་པར་བཤད་པ་ནི། །སྤྲིན་གྱིས་ཆར་པ་མཉམ་པ་ཕབ་པ་བཞིན། །སྣ་ཚོགས་མངོན་ཤེས་འདི་འདྲ་འདི་དག་ཀྱང་། །ས་སྟེང་སྨན་རྣམས་ཇི་ལྟར་གནས་པ་བཞིན། །དེ་ལྟ་བུ་ཡི་དཔེ་དག་བསྟན་པ་ཡིས། །དེ་བཞིན་གཤེགས་པའི་ཐབས་རྣམས་ཤེས་པར་གྱིས། །ཇི་ལྟར་དེ་ཡིས་ཆོས་གཅིག་བཤད་པ་ཡང་། །སྣ་ཚོགས་ཚིག་ནི་ཆར་གྱི་ཐིགས་པ་བཞིན། །ངས་ཀྱང་ཆོས་ཀྱི་ཆར་པ་ཕབ་པས་ན། །འཇིག་རྟེན་འདི་དག་ཐམས་ཅད་ངོམས་པར་གྱུར། །རབ་ཏུ་བཤད་པ་རོ་གཅིག་ཆོས་ལ་ཡང་། །ཅི་འདྲ་སྟོབས་བཞིན་རྗེས་སུ་རྣམ་པར་སེམས། །ཇི་ལྟར་རྩྭ་དང་གེལ་པའི་ཤིང་རྣམས་དང་། །བར་མའི་སྨན་རྣམས་ལ་ཡང་ཇི་ལྟ་བར། །སྡོང་པོ་དང་ནི་སྡོང་པོ་ཆེན་པོ་དེ། །ཆར་བབ་ཕྱོགས་བཅུ་ཀུན་ནའང་མཛེས་པ་བཞིན། །འདི་ནི་རྟག་ཏུ་འཇིག་རྟེན་ཕན་པའི་ཆོས། །འཇིག་རྟེན་འདི་ཀུན་ཆོས་ཀྱིས་ངོམས་པར་བྱེད། །འཇིག་རྟེན་ཐམས་ཅད་ངོམས་པར་བྱས་ནས་ནི། །སྨན་རྣམས་ལས་ནི་མེ་ཏོག་རབ་ཏུ་འབྱུང་། །བར་མའི་སྨན་རྣམས་རྣམ་པར་སྐྱེ་བ་ནི། དགྲ་བཅོམ་གང་དག་ཟག་པ་ཟད་གནས་དང་། །ནགས་ཚལ་ཁྲོད་ནས་རང་སངས་རྒྱས་རྣམས་ལ། །ལེགས་པར་གསུངས་པའི་ཆོས་རྣམས་བསྟན་པར་བྱ། །བྱང་ཆུབ་སེམས་དཔའ་མང་པོ་དྲན་ལྡན་བརྟན། །བྱང་ཆུབ་མཆོག་འདི་ཡོངས་སུ་ཚོལ་བ་ན། །ཁམས་གསུམ་ཐམས་ཅད་རྟོགས་པར་ཁོང་ཆུད་པ། །དེ་དག་རྟག་ཏུ་སྐྱེ་བ་སྡོང་པོ་བཞིན། །རྫུ་འཕྲུལ་གང་ལྡན་བསམ་གཏན་བཞིར་ཞུགས་པ། །གང་དག་སྟོང་པ་ཉིད་ཐོས་དགའ་སྐྱེད་ཅིང་། །འོད་ཟེར་སྟོང་ཕྲག་རབ་ཏུ་གཏོང་བ་རྣམས། །དེ་དག་སྡོང་པོ་ཆེན་པོ་ཞེས་ཀྱང་བྱ། །འོད་སྲུང་འདི་ལྟ་བུ་ཡི་ཆོས་བཤད་པ། །སྤྲིན་གྱིས་ཆར་པ་མཉམ་པར་ཕབ་པ་བཞིན། །མི་ཡི་མེ་ཏོག་མང་པོ་མཐའ་ཡས་པ། །དེས་ནི་མང་པོའི་སྨན་བཞིན་རྣམ་པར་སྐྱེད། ། རང་གིས་རིག་པའི་ཆོས་རྣམས་རབ་ཏུ་བཤད། །སངས་རྒྱས་བྱང་ཆུབ་དག་ནི་དུས་སུ་བསྟན། །དེ་ནི་འཇིག་རྟེན་འདྲེན་པ་ཐམས་ཅད་དང་། །ང་ཡི་ཐབས་ལ་མཁས་པ་
མཆོག་ཡིན་ནོ། །འདི་ལྟར་དོན་དམ་ཡང་དག་ངས་བཤད་པ། །ཉན་ཐོས་དེ་ཀུན་མྱ་ངན་མ་འདས་ཏེ། །དེ་དག་བྱང་ཆུབ་སྤྱོད་པ་རབ་སྤྱད་ནས། །ཉན་ཐོས་འདི་དག་ཐམས་ཅད་སངས་རྒྱས་འགྱུར། །འོད་སྲུང་གཞན་ཡང་དེ་བཞིན་གཤེགས་པ་ནི། སེམས་ཅན་འདུལ་བར་མཚུངས་ཏེ་མི་མཚུངས་པ་མེད་དོ། །འོད་སྲུང་འདི་ལྟ་སྟེ་དཔེར་ན། ཉི་མ་དང་ཟླ་བའི་འོད་ཀྱིས་འཇིག་རྟེན་ཐམས་ཅད་དུ་སྣང་བར་བྱེད་པ་ནི། དགེ་བ་བྱེད་པ་དང་མི་དགེ་བ་བྱེད་པ་དང་སྟེང་ན་གནས་པ་དང་འོག་ན་གནས་པ་དང་དྲི་ཞིམ་པ་དང་དྲི་མི་ཞིམ་པ་ཐམས་ཅད་ལ་མཉམ་པར་འོད་ཀྱིས་ཕོག་སྟེ། མི་མཉམ་པ་མ་ཡིན་ནོ། །འོད་སྲུང་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཐམས་ཅད་མཁྱེན་པའི་ཡེ་ཤེས་ཀྱི་སེམས་ཀྱི་འོད་ཀྱིས་འགྲོ་བ་ལྔར་སྐྱེས་པའི་སེམས་ཅན་ཐམས་ཅད་ཇི་ལྟར་མོས་པ་དེ་བཞིན་དུ་ཐེག་པ་ཆེན་པོ་པ་དང་རང་སངས་རྒྱས་ཀྱི་ཐེག་པ་ཅན་དང་། ཉན་ཐོས་ཀྱི་ཐེག་པ་ཅན་རྣམས་ལ་ཆོས་བཤད་པ་དེ་མཉམ་པར་འཇུག་ལ་དེ་བཞིན་གཤེགས་པའི་ཡེ་ཤེས་ནི་སྐྱེ་བ་ཡང་མེད། འབྲི་བ་ཡང་མེད་དེ། འདི་ལྟར་བསོད་ནམས་དང་ཡེ་ཤེས་ཡང་དག་པར་སྡུད་པར་འགྱུར་རོ།། །།བམ་པོ་ལྔ་པ། འོད་སྲུང་ཐེག་པ་ནི་གསུམ་དུ་མེད་དེ། སེམས་ཅན་སྤྱོད་པ་ཐ་དད་པས། དེའི་ཕྱིར་གྱི་ན་ཐེག་པ་གསུམ་དུ་བཏགས་པར་ཟད་དོ། །དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་ཐེག་པ་གསུམ་དུ་མ་མཆིས་ན། ཅིའི་སླད་དུ་ད་ལྟར་བྱུང་བའི་དུས་ན། ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔར་གདགས་པས་རབ་ཏུ་གདགས། དེ་སྐད་ཅེས་གསོལ་ནས། བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་འདི་ལྟ་སྟེ་དཔེར་ན། རྫ་མཁན་གྱིས་འཇིམ་པ་མཚུངས་པ་ལ་སྣོད་བྱས་ཏེ། དེ་ལས་ཁ་ཅིག་ནི་བུ་རམ་གྱི་སྣོད་དུ་གྱུར། ཁ་ཅིག་ནི་མར་གྱི་སྣོད། ཁ་ཅིག་ནི་ཞོ་དང་འོ་
མའི་སྣོད་ཁ་ཅིག་ནི་ངན་པ་མི་གཙང་བའི་སྣོད་དུ་གྱུར་ཏེ། འཇིམ་པ་ལ་ཐ་དད་པ་མེད་མོད་ཀྱི། རྫས་བཅུག་པ་ཙམ་གྱིས་སྣོད་ཐ་དད་པར་སྣང་ངོ་། །འོད་སྲུང་དེ་བཞིན་དུ་ཐེག་པ་གཅིག་པུ་འདི་ཉིད་དེ། འདི་ལྟ་སྟེ་སངས་རྒྱས་ཀྱི་ཐེག་པ་སྟེ། ཐེག་པ་གཉིས་སམ་གསུམ་དུ་མེད་དོ། །དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་སེམས་ཅན་མོས་པ་ཐ་དད་པ་གང་དག་ཁམས་གསུམ་ནས་བྱུང་བ་དེ་དག་གི་མྱ་ངན་ལས་འདས་པ་གཅིག་གམ། འོན་ཏེ་གཉིས་སམ་གསུམ། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཆོས་ཐམས་ཅད་མཉམ་པ་ཉིད་དུ་ཁོང་དུ་ཆུད་པའི་ཕྱིར། མྱ་ངན་ལས་འདའ་བས་ན། དེ་ནི་གཅིག་སྟེ་གཉིས་སུ་མེད་གསུམ་དུ་ཡང་མེད་དོ། །འོད་སྲུང་སྐྱེས་བུ་མཁས་པ་ཁ་ཅིག་ནི་དཔེས་བཤད་པའི་དོན་རིག་པར་འགྱུར་ཏེ། དེའི་ཕྱིར་ཁྱོད་ལ་དཔེ་བསྟན་པར་བྱའོ། །འོད་སྲུང་འདི་ལྟ་སྟེ་དཔེར་ན། མི་དམུས་ལོང་ཞིག་འདི་སྐད་དུ་ཁ་དོག་བཟང་པོ་དང་ཁ་དོག་ངན་པའི་གཟུགས་ཀྱང་མེད་ཁ་དོག་བཟང་པོ་དང་། ཁ་དོག་ངན་པའི་གཟུགས་མཐོང་བ་ཡང་མེད་ཉི་མ་དང་ཟླ་བ་ཡང་མེད། སྐར་མ་ཡང་མེད། གཟའ་མཐོང་བ་ཡང་མེད་དོ་ཞེས་ཟེར་རོ། །དེ་ནས་མི་གཞན་དག་གིས་དམུས་ལོང་དེའི་མདུན་དུ་འདི་སྐད་ཅེས། ཁ་དོག་བཟང་པོ་དང་ཁ་དོག་ངན་པ་དག་ཀྱང་ཡོད། ཁ་དོག་བཟང་པོ་དང་ཁ་དོག་ངན་པའི་གཟུགས་མཐོང་བ་ཡང་ཡོད། དེ་བཞིན་དུ་ཉི་མ་དང་ཟླ་བ་དང་སྐར་མ་ཡང་ཡོད་གཟའ་ཡང་ཡོད་གཟའ་མཐོང་བ་ཡང་ཡོད་དོ་ཞེས་སྨྲས་ན། མི་དམུས་ལོང་དེ་མི་དེ་དག་ལ་ཡིད་མི་ཆེས་ཤིང་སྨྲས་པ་བཞིན་མི་འཛིན་ཏོ། །དེ་ནས་སྨན་པ་ནད་ཐམས་ཅད་ཤེས་པ་ལ་ལ་ཞིག་གིས་མི་དམུས་ལོང་དེ་མཐོང་ནས་དེ་འདི་སྙམ་དུ་སེམས་ཏེ། མི་དེ་སྔོན་གྱི་སྡིག་པའི་ལས་ཀྱིས་ནད་དུ་གྱུར་ཏེ། གང་ཅུང་ཟད་ནད་དུ་གྱུར་པ་དེ་ཐམས་ཅད་རྣམ་པར་ཞི་སྟེ། རླུང་ལས་གྱུར་པ་དང་། མཁྲིས་པ་ལས་གྱུར་པ་དང་། བད་ཀན་ལས་གྱུར་པ་དང་། འདུས་པ་
ལས་གྱུར་པའོ་སྙམ་མོ། །དེ་ནས་སྨན་པས་དེའི་ནད་ཞི་བར་བྱ་བའི་ཕྱིར་ཡང་དང་ཡང་ཐབས་བསམས་ཏེ། གང་འདི་ན་སྨན་ཡོད་པ་རྣམས་ཀྱིས་ནི་ནད་དེ་ཕྱིན་པར་མི་ནུས་ཀྱི། གངས་ཀྱི་རིའི་རྒྱལ་པོ་ལ་སྨན་སྣ་བཞི་ཡོད་དེ། བཞི་གང་ཞེ་ན་འདི་ལྟ་སྟེ། གཅིག་པ་ཁ་དོག་དང་རོ་ཐམས་ཅད་ཀྱི་གནས་དང་ལྡན་པ་ཞེས་བྱ་བ་དང་གཉིས་པ་ནད་ཐམས་ཅད་ལས་རབ་ཏུ་ཐར་བར་བྱེད་པ་ཞེས་བྱ་བ་དང་གསུམ་པ་དུག་ཐམས་ཅད་ལས་ཐར་བར་བྱེད་པ་ཞེས་བྱ་བ་དང་། བཞི་པ་གནས་གང་ན་འདུག་པར་བདེ་བ་སྦྱིན་པ་ཞེས་བྱ་བ་དང་དེ་བཞི་ཡོད་དོ་སྙམ་མོ། །དེ་ནས་དམུས་ལོང་དེ་ལ་སྨན་པ་དེས་སྙིང་རྗེ་བསྐྱེད་ནས། ཐབས་གང་གིས་གངས་ཀྱི་རིའི་རྒྱལ་པོ་ལ་འགྲོ་ནུས་པ་དེ་ལྟ་བུའི་ཐབས་བསམས་ཏེ། སོང་ནས་ཡར་ཡང་འཛེགས་མར་ཡང་བབས་ངོས་ལ་ཡང་བཙལ་ཏོ། །དེ་ལྟར་བཙལ་ཏེ་སྨན་དེ་སྣ་བཞི་རྙེད་ནས། རྙེད་པ་དང་ཁ་ཅིག་ནི་སོས་བཅས་ཏེ་བྱིན། ཁ་ཅིག་ནི་བཏགས་ཁ་ཅིག་ནི་ཕྲད་གཞན་དང་སྦྱར་ལ་བཙོས་ཏེ་སྦྱིན་ནོ་ཁ་ཅིག་ནི་ཕྲད་རློན་པ་དང་སྦྱར་ཏེ་བྱིན། ཁ་ཅིག་ནི་ལུས་ཀྱི་གནས་ཐུར་མས་ཕུག་སྟེ་བླུགས། ཁ་ཅིག་ནི་མེས་བསྲེགས་ཏེ་བྱིན། ཁ་ཅིག་ནི་ཕྲད་གཞན་དང་སྦྱར་ཏེ། ཟས་དང་སྐོམ་ལ་སོགས་པ་དང་བསྲེས་ཏེ་བྱིན་ནོ་དེ་ནས་དམུས་ལོང་དེ་ཐབས་སྦྱར་བ་དེས་མིག་ཐོབ་བོ། །དེས་མིག་ཐོབ་ནས། ཕྱི་དང་ནང་དང་རིང་པོ་དང་ཉེ་བ་དང་ཟླ་བ་དང་ཉི་མའི་འོད་དང་སྐར་མ་དང་གཟའི་གཟུགས་ཐམས་ཅད་ཀྱང་མཐོང་ནས། འདི་སྐད་ཅེས་ཀྱེ་མ་ཨ་ལ་ལ་བླུན་པོ་ཁོ་བོ་སྔོན་ནི་བསྟན་ཀྱང་ཡིད་མི་ཆེས་ཤིང་སྨྲས་པ་བཞིན་མི་འཛིན་ན། ད་ནི་ཁོ་བོས་ཐམས་ཅད་མཐོང་ནས་དམུས་ལོང་ལས་ཐར་ཏེ་ཁོ་བོས་མིག་ཐོབ་པས། ཁོ་བོ་ལྟ་བུར་ཁྱད་པར་དུ་འཕགས་པ་གང་ཡང་མེད་དོ་ཞེས་སྨྲས་སོ། །དེའི་ཚེ་ན་དྲང་སྲོང་མངོན་པར་ཤེས་པ་ལྔ་དང་ལྡན་པ་ལྷའི་མིག་དང་ལྷའི་རྣ་བ་དང་ཕ་རོལ་གྱི་སེམས་ཤེས་པ་དང་སྔོན་གྱི་གནས་རྗེས་སུ་དྲན་པའི་ཤེས་པ་དང་། རྫུ་འཕྲུལ་མངོན་སུམ་དུ་བྱ་བ་ལ་མཁས་པ་དག་ཅིག་ཡོད་དེ། དེ་དག་གིས་མི་དེ་ལ་འདི་སྐད་ཅེས་སྨྲས་ཏེ། ཀྱེ་མི་ཁྱོད་ནི་མིག་རྙེད་པ་འབའ་ཞིག་ཏུ་ཟད་ཀྱི། ཁྱོད་གཞན་ཅི་ཡང་མི་ཤེས་ན་ཁྱོད་ཀྱི་ང་རྒྱལ་དེ་ཅི་ལས་བྱུང་ཁྱོད་ལ་ནི་ཤེས་རབ་ཀྱང་མེད།
མཁས་པ་ཡང་མ་ཡིན་ནོ། །དེ་དག་གིས་ཡང་དེ་ལ་འདི་སྐད་ཅེས་སྨྲས་ཏེ། ཀྱེ་མི་ཁྱོད་གང་གི་ཚེ་ཁྱིམ་གྱི་ནང་ན་འདུག་པ་ན། ཕྱི་ལོགས་ཀྱི་གཟུགས་གཞན་དག་མི་མཐོང་མི་ཤེས། ཁྱོད་ཀྱིས་སེམས་ཅན་གང་དག་བྱམས་པར་སེམས་པ་དང་། གནོད་པར་སེམས་པ་དེ་དག་ཀྱང་མི་ཤེས། དཔག་ཚད་ལྔའི་བར་ན་འདུག་པའི་སྨྲ་བ་དང་རྔ་དང་དུང་ལ་སོགས་པའི་སྒྲ་ཡང་མི་ཤེས་མི་ཐོས། རྒྱང་གྲགས་གཅིག་གི་བར་དུ་གོམ་པ་མི་འདོར་བར་འགྲོ་ཡང་མི་ནུས། མའི་ལྟོ་ན་སྐྱེ་ཞིང་འཕེལ་བའི་བྱེད་པ་དེ་དག་ཀྱང་མི་དྲན་ན། ཇི་ལྟར་མཁས་པ་ཡིན། ཇི་ལྟར་ན་ཐམས་ཅད་མཐོང་ཞེས་སྨྲ། ཀྱེ་མི་ཁྱོད་ཀྱིས་སྣང་བ་གང་ཡིན་པ་དེ་ནི་མུན་པར་ཤེས་སོ། །མུན་པ་གང་ཡིན་པ་དེ་ནི་སྣང་བར་ཤེས་སོ་ཞེས་སྨྲས་པ་དང་། དེ་ནས་མི་དེས་དྲང་སྲོང་དེ་དག་ལ་འདི་སྐད་ཅེས་སྨྲས་ཏེ། ཐབས་གང་དང་དགེ་བའི་ལས་ཅི་བྱས་ན། འདི་འདྲ་བའི་ཤེས་རབ་འཐོབ། ཁྱོད་ཀྱི་བྱ་དགའ་ལ་ཡོན་ཏན་དེ་དག་ཐོབ་པར་གྱིས་ཤིག །དེ་ནས་དྲང་སྲོང་དེ་དག་གིས་མི་དེ་ལ་འདི་སྐད་ཅེས་སྨྲས་སོ། །གལ་ཏེ་འདོད་ན་འབྲོག་དགོན་པར་གནས་པར་གྱིས། ཡང་ན་བྲག་ཕུག་ཏུ་འདུག་ལ་ཆོས་སེམས་ཤིང་ཁྱོད་ཀྱིས་ཉོན་མོངས་པ་རྣམས་སྤང་བར་བྱ་སྟེ། དེ་བཞིན་དུ་སྦྱངས་པའི་ཡོན་ཏན་དང་ལྡན་ན། མངོན་པར་ཤེས་པ་རབ་ཏུ་འཐོབ་བོ། །དེ་ནས་མི་དེས་དེའི་དོན་བླངས་ཏེ། རབ་ཏུ་བྱུང་ནས་དགོན་པ་ལ་གནས་ཏེ། སེམས་རྩེ་གཅིག་པས་འཇིག་རྟེན་གྱི་སྲེད་པ་སྤངས་ཏེ། མངོན་པར་ཤེས་པ་ལྔ་ཐོབ་བོ། །མངོན་པར་ཤེས་པ་ལྔ་ཐོབ་ནས་བསམས་པ། སྔོན་བདག་གིས་ལས་གཞན་བྱས་པ་དེས་བདག་གིས་ཡོན་ཏན་གང་ཡང་མ་ཐོབ་བོ། །ད་ནི་གར་བསམས་པར་འགྲོའོ། །སྔོན་བདག་ནི་ཤེས་རབ་ཆུང་ཞིང་རྟོགས་པ་ཆུང་སྟེ། བདག་གི་ནི་དམུས་ལོང་དུ་གྱུར་པའོ་སྙམ་མོ། །འོད་སྲུང་དེ་ལྟར་དོན་དེ་རིག་པར་བྱ་བའི་ཕྱིར། དཔེ་འདི་བྱས་ཏེ་དེའི་དོན་ནི་འདི་ལྟར་བལྟའོ། །འོད་སྲུང་དམུས་ལོང་ཞེས་བྱ་བ་དེ་ནི་སེམས་ཅན་འགྲོ་བ་ལྔའི་འཁོར་བ་ན་གནས་པ་རྣམས་ཀྱི་ཚིག་བླ་དགས་ཏེ། གང་དག་དམ་པའི་ཆོས་མི་ཤེས་ཤིང་། ཉོན་མོངས་པའི་མུན་པ་མུན་ནག་སྐྱེད་པ་དེ་དག་མ་རིག་པས་ལྡོངས་སོ། །
མ་རིག་པས་ལྡོངས་པས། འདུ་བྱེད་སོགས་སོ། །འདུ་བྱེད་ཀྱི་རྐྱེན་གྱིས་མིང་དང་གཟུགས་ནས། དེ་བཞིན་དུ་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པ་དེའི་བར་དུ་འབྱུང་བར་འགྱུར་རོ། །དེ་ལྟར་མ་རིག་པས་ལྡོངས་ཏེ། སེམས་ཅན་འཁོར་བ་ན་གནས་པ་རྣམས་ལ་དེ་བཞིན་གཤེགས་པས་ཐུགས་རྗེ་བསྐྱེད་ནས། ཁམས་གསུམ་ལས་འདས་ཀྱང་བུ་གཅིག་པའི་ཕ་བྱམས་པ་བཞིན་དུ། ཐུགས་རྗེ་ཆེན་པོ་བསྐྱེད་ནས་ཁམས་གསུམ་དུ་གཤེགས་ཏེ། སེམས་ཅན་རྣམས་འཁོར་བའི་འཁོར་ལོ་ན་འཁྱམ་ཞིང་ཉོན་མོངས་ཀྱང་དེ་དག་འཁོར་བ་ལས་འབྱུང་བ་ཡང་དག་པ་ཇི་ལྟ་བ་བཞིན་དུ་མི་ཤེས་པར་དེ་དག་བཅོམ་ལྡན་འདས་ཀྱི་ཤེས་རབ་ཀྱི་སྤྱན་གྱིས་གཟིགས་སོ། །གཟིགས་ནས་ཀྱང་སེམས་ཅན་འདི་དག་སྔོན་དགེ་བ་བྱས་པས་ཞེ་སྡང་ཆུང་ལ་འདོད་ཆགས་ཆེ་བ་དང་། འདོད་ཆགས་ཆུང་ལ་ཞེ་སྡང་ཆེ་བ་དང་། ཁ་ཅིག་ཤེས་རབ་ཆུང་བ་དང་། ཁ་ཅིག་མཁས་པ་དང་། ཁ་ཅིག་ཡོངས་སུ་སྨིན་ཅིང་དག་པ་དང་། ཁ་ཅིག་ལོག་པར་ལྟ་བ་མཁྱེན་ནས། སེམས་ཅན་དེ་དག་ལ་དེ་བཞིན་གཤེགས་པ་ཐབས་མཁས་པས་ཐེག་པ་གསུམ་དུ་བཤད་དོ། །དེ་ལ་ཇི་ལྟར་དྲང་སྲོང་ཆེན་པོ་དེ་དག་མངོན་པར་ཤེས་པ་ལྔ་དང་ལྡན་ཞིང་མིག་རྣམ་པར་དག་པ་དེ་བཞིན་དུ་བྱང་ཆུབ་སེམས་དཔས་བྱང་ཆུབ་ཏུ་སེམས་བསྐྱེད་དེ། མི་སྐྱེ་བའི་ཆོས་ལ་བཟོད་པ་ཐོབ་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བལྟའོ། །དེ་ལ་སྨན་པ་ཆེན་པོ་དེ་ཅི་ལྟ་བ་བཞིན་དུ་དེ་བཞིན་གཤེགས་པར་བལྟའོ། །དམུས་ལོང་ཇི་ལྟ་བ་བཞིན་དུ་གཏི་མུག་གིས་ལྡོངས་པའི་སེམས་ཅན་དུ་བལྟའོ། །རླུང་དང་མཁྲིས་པ་དང་བད་ཀན་ཇི་ལྟ་བ་དེ་བཞིན་དུ་འདོད་ཆགས་དང་ཞེ་སྡང་དང་གཏི་མུག་དང་ལྟ་བ་དྲུག་ཅུ་རྩ་གཉིས་སུ་གྱུར་པར་བལྟའོ། །ཇི་ལྟར་སྨན་སྣ་བཞི་པོ་དེ་ལྟར་སྟོང་པ་ཉིད་དང་། མཚན་མ་མེད་
པ་དང་། སྨོན་པ་མེད་པ་དང་མྱ་ངན་ལས་འདས་པའི་སྒོར་བལྟའོ། །ཇི་ལྟ་ཇི་ལྟ་བུར་སྨན་རྣམས་བཏང་བས། དེ་ལྟ་དེ་ལྟ་བུར་ནད་རབ་ཏུ་ཞི་བ་དེ་བཞིན་དུ་རྣམ་པར་ཐར་པའི་སྒོ་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པ་བསྒོམས་པས་མ་རིག་པ་འགག་པར་བྱེད་ཅིང་། མ་རིག་པ་འགགས་པས་འདུ་བྱེད་འགག་པ་ནས། དེ་བཞིན་དུ་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པ་དེའི་བར་དུ་འགག་པར་གྱུར་ཏེ། དེ་བཞིན་དུ་དེའི་སེམས་དགེ་བ་ལ་ཡང་མི་གནས་སྡིག་པ་ལ་ཡང་མི་གནས་ཏེ། ཇི་ལྟར་དམུས་ལོང་གིས་མིག་མཐོང་བ་དེ་བཞིན་དུ་ཉན་ཐོས་དང་རང་སངས་རྒྱས་ཀྱི་ཐེག་པ་ཅན་དུ་བལྟའོ། །འཁོར་བའི་ཉོན་མོངས་པས་བཅིངས་པ་གཅོད་ཅིང་ཉོན་མོངས་པའི་བཅིང་པ་ལས་རྣམ་པར་གྲོལ་ཏེ་ཁམས་གསུམ་གྱི་འགྲོ་བ་དྲུག་ལས་རབ་ཏུ་ཐར་བས་ན། དེའི་ཕྱིར་ཉན་ཐོས་ཀྱི་ཐེག་པ་ཅན་གྱི་འདི་ལྟར་ཤེས་ནས། འདི་སྐད་ཅེས་མངོན་པར་རྫོགས་པར་འཚང་རྒྱ་བར་བྱ་བའི་ཆོས་གཞན་མེད་དེ་བདག་ནི་མྱ་ངན་ལས་འདས་པ་ཐོབ་པོ་ཞེས་ཟེར་རོ། །དེ་ནས་དེ་བཞིན་གཤེགས་པ་དེ་ལ་ཆོས་སྟོན་ཏེ། གང་གིས་ཆོས་ཐམས་ཅད་མ་ཐོབ་པ་དེ་ལ་མྱ་ངན་ལས་འདས་པ་ག་ལ་ཡོད་ཅེས་དེ་བཞིན་གཤེགས་པས་དེ་དག་བྱང་ཆུབ་ཏུ་བཙུད་དེ། དེ་བྱང་ཆུབ་ཀྱི་སེམས་བསྐྱེད་ནས་འཁོར་བ་ལ་ཡང་མི་གནས་མྱ་ངན་ལས་འདའ་བ་ཐོབ་པར་ཡང་མི་འགྱུར་རོ། །དེས་ཁམས་གསུམ་རབ་ཏུ་རྟོགས་ནས་ཕྱོགས་བཅུའི་འཇིག་རྟེན་སྟོང་པ་དང་། སྤྲུལ་པ་ལྟ་བུ་དང་། སྒྱུ་མ་ལྟ་བུ་དང་། རྨི་ལམ་དང་། སྨིག་རྒྱུ་དང་། བྲག་ཅ་ལྟ་བུ་དང་། ཆོས་ཐམས་ཅད་མ་སྐྱེས་པ་དང་། མ་འགགས་པ་དང་། མ་བཅིངས་པ་དང་། མ་གྲོལ་བ་དང་། མུན་པ་ཡང་མ་ཡིན། སྣང་བ་ཡང་མ་ཡིན་པར་མཐོང་ངོ་། །གང་གིས་དེ་ལྟར་ཆོས་ཟབ་མོ་མཐོང་བ་དང་ཐོས་པ་དེས་ཁམས་གསུམ་ཐམས་ཅད་གང་བའི་སེམས་ཅན་གྱི་བསམ་པ་དང་མོས་པ་ཐ་དད་པ་མི་མཐོང་བའི་ཚུལ་གྱིས་མཐོང་ངོ་། །དེ་ནས་བཅོམ་ལྡན་འདས་ཀྱིས་དེའི་དོན་རྒྱས་པར་སྟོན་ཅིང་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཇི་ལྟར་ཉི་མ་ཟླ་བའི་འོད། །ཡོན་ཏན་ལྡན་དང་སྡིག་ཅན་གྱི། །མི་ལ་མཉམ་པར་རབ་འཆར་ཏེ། །དེ་ལ་སྐྱེ་ཞིང་འབྲི་བ་མེད། །དེ་བཞིན་གཤེགས་ཀྱི་ཤེས་རབ་འོད། །སྙོམས་པ་ཉི་མ་ཟླ་བ་བཞིན། །ལྷག་ཅིང་ཆད་པ་མེད་པར་ནི། །
སེམས་ཅན་ཐམས་ཅད་རྣམ་པར་འདུལ། །ཇི་ལྟར་ཁམ་སྣོད་རྫ་མཁན་གྱིས། །འཇིམ་པ་མཚུངས་ལས་བྱས་པ་དག །དེ་ལས་སྣོད་དུ་གྱུར་པ་ནི། །བུ་རམ་འོ་མ་མར་དང་ཆུ། །ཡང་ན་ལ་ལ་མི་གཙང་དང་། །ཁ་ཅིག་ཞོ་ཡི་སྣོད་དུ་གྱུར། །ཁམ་པ་སྣ་གཅིག་དེས་བླངས་ཏེ། །རྫ་མཁན་གྱིས་ནི་སྣོད་དུ་བྱས། །ཇི་ལྟར་དངོས་པོ་བཅུག་པ་བཞིན། །དེས་ནི་སྣོད་ཀྱང་སོ་སོར་རྟོགས། །དེ་བཞིན་སེམས་ཅན་བྱེ་བྲག་མེད། །ཐ་དད་མོས་པས་དེ་བཞིན་གཤེགས། །ཐེག་པ་ཐ་དད་རབ་སྟོན་ཀྱང་། ། ཐེག་པ་སངས་རྒྱས་ཐེག་པར་དེས། །འཁོར་བའི་འཁོར་ལོ་མི་ཤེས་པས། །མྱ་ངན་འདས་པའང་ཤེས་མ་ཡིན། །ཆོས་རྣམས་བདག་ཉིད་རྣམ་སྤངས་ཤིང་། །སྟོང་པར་གང་དག་རྣམ་ཤེས་པ། །དེ་དག་སངས་རྒྱས་བཅོམ་ལྡན་གྱི། །བྱང་ཆུབ་ཡང་དག་ཉིད་དུ་ཤེས། །ཤེས་རབ་བར་མར་གདགས་པ་ནི། །དེ་ནི་རང་རྒྱལ་ཞེས་ཀྱང་བྱ། །སྟོང་པར་ཤེས་ནས་རྣམས་བཏུལ་བ། །དེ་ནི་ཉན་ཐོས་ཉིད་དུ་བཞག །ཆོས་རྣམས་ཐམས་ཅད་རྟོགས་པ་ནི། །ཡང་དག་རྫོགས་པའི་སངས་རྒྱས་ཡིན། །ཇི་ལྟར་དམུས་ལོང་ལ་ལས་ནི། །ཉི་ཟླ་གཟའ་དང་སྐར་མ་རྣམས། །དེས་མ་མཐོང་བས་འདི་སྐད་ཅེས། །གཟུགས་ནི་རྣམས་ཀུན་མེད་ཅེས་སྨྲ། །སྨན་པ་ཆེན་པོས་དམུས་ལོང་ལ། །སྙིང་རྗེ་ཆེན་པོ་བསྐྱེད་ནས་སུ། །གངས་ཀྱི་རི་ལ་དེ་སོང་སྟེ། །གྱེན་འཛེགས་ཐུར་བབས་ཐད་ཀར་སོང་། །ཁ་དོག་རོ་ཀུན་གནས་ལྡན་པ། །དེ་ལ་སོགས་པ་སྣ་བཞི་དག །རི་ལས་སྨན་ཡང་ཀུན་རྙེད་དེ། །དེ་ནས་དེ་དག་རབ་ཏུ་སྦྱར། །ཁ་ཅིག་དག་ནི་སོས་ཀྱང་བཅས། །ཁ་ཅིག་བཏབས་ཏེ་དེ་བཞིན་གཞན། །ཡན་ལག་ཏུ་ཡང་ཁབ་རྩེ་བཅུག །དམུས་ལོང་ལ་ནི་རབ་ཏུ་གཏོང་། །དེ་ཡིས་མིག་ཐོབ་ཉི་ཟླ་དང་། །སྐར་མ་གཟའ་རྣམས་མཐོང་བར་གྱུར། །མི་ཤེས་པས་ན་སྔོན་སྨྲས་ཤེས། །དེ་ནི་དེ་ལྟར་སེམས་པར་གྱུར། །དེ་བཞིན་སེམས་ཅན་མི་ཤེས་ཚེ། །དམུས་ལོང་འདྲ་དག་འདི་ན་འཁོར། །རྟེན་འབྱུང་འཁོར་ལོ་མི་ཤེས་པས། །སྡུག་བསྔལ་ཆུ་བོའི་ལམ་དུ་གྱུར། །དེ་བཞིན་མི་ཤེས་རྨོངས་པ་ཡི། །འཇིག་རྟེན་དུ་ནི་ཀུན་གྱི་མཆོག །
སྨན་པ་ཆེན་པོ་དེ་བཞིན་གཤེགས། །སྙིང་རྗེ་བདག་ཉིད་འདིར་བྱུང་སྟེ། །སྟོན་པ་ཐབས་ལ་མཁས་པས་ན། །དེས་ནི་དམ་པའི་ཆོས་བཤད་དེ། །བླ་མེད་ཡང་དག་རྫོགས་བྱང་ཆུབ། །ཐེག་པ་དམ་པར་ཞུགས་ལ་བཤད། །འདྲེན་པས་ཤེས་རབ་འབྲིང་ལ་ཡང་། །བར་མ་དག་གི་རབ་ཏུ་བཤད། །འཁོར་བས་འཇིགས་ལ་བྱང་ཆུབ་ཀྱང་། །གཞན་དུ་རབ་ཏུ་བཤད་པ་ཡིན། །ཁམས་གསུམ་ལས་ནི་བྱུང་བ་ཡི། །ཉན་ཐོས་རྣམས་ཀྱིས་འདི་ལྟར་ཤེས། །མྱ་ངན་འདས་པའི་དྲི་མེད་ཞི། །བདག་གིས་རབ་ཏུ་ཐོབ་སྙམ་སེམས། །ཆོས་ཀུན་ཁོང་དུ་ཆུད་གྱུར་ན། །མི་འཆི་མྱ་ངན་འདས་པ་ཐོབ། །དྲང་སྲོང་ཆེ་རྣམས་དེ་ལ་ནི། །ཤིན་ཏུ་སྙིང་རྗེ་བསྐྱེད་ནས་སུ། །དེ་ལ་སྨྲས་པ་བླུན་པོ་ཁྱོད། །ཡེ་ཤེས་ཅན་དུ་བདག་མ་སེམས། །གང་ཚེ་ཁྱོད་ནི་ཁང་པ་ཡི། །ནང་ན་འདུག་པར་གྱུར་པ་ན། །ཕྱི་རོལ་དག་ན་གང་ཡོད་པ། །ཤེས་རབ་ཆུང་ཁྱོད་དེ་མི་ཤེས། །གང་ཞིག་ནང་ན་འདུག་པ་དེས། །བྱས་དང་མ་བྱས་ཕྱི་རོལ་གྱི། །ཤེས་བྱ་ད་དུང་མི་ཤེས་ནས། །ཤེས་ཆུང་ཁྱོད་ཀྱིས་ག་ལ་ཤེས། །དཔག་ཚད་ལྔ་ཙམ་བར་དག་གི། །སྒྲ་གང་བྱུང་བ་དེ་རྣམས་ཀྱང་། །དེ་ཡང་ཐོས་པར་མི་ནུས་ན། །དེ་བས་རིང་བ་གཞན་ཅི་སྨོས། །ཁྱོད་ལ་གང་དག་ཉེས་སེམས་དང་། །དེ་བཞིན་གཞན་དག་བྱམས་པ་ཡང་། །ཁྱོད་ཀྱིས་དེ་དག་ཤེས་མི་ནུས། །ཅི་ཕྱིར་ཁྱོད་ཀྱིས་ང་རྒྱལ་བྱ། །རྒྱང་གྲགས་ཙམ་དུ་འགྲོ་ན་ཡང་། །གོམ་པ་མ་བོར་འགྲོ་མི་ནུས། །མ་ཡི་མངལ་དུ་ཅི་བྱུང་བ། །དེ་དག་དེ་མ་ཐག་ཏུ་བརྗེད། །སུ་ལ་མངོན་ཤེས་འདི་ལྔ་ཡོད། །དེ་འདིར་ཐམས་ཅད་ཤེས་ཞེས་བྱ། །ཁྱོད་ནི་གཏི་མུག་ཅང་མི་ཤེས། །བདག་ནི་ཐམས་ཅད་ཤེས་ཞེས་སྨྲ། །ཐམས་ཅད་མཁྱེན་པར་ཁྱེད་འདོད་ན། །འདི་ལྟར་མངོན་པར་ཤེས་པ་སྒྲུབས། །མངོན་པར་ཤེས་པ་དེ་བསྒྲུབས་ན། །དགོན་པར་གནས་ཤིང་རྣམ་དག་ཆོས། །བསམ་པར་བྱ་སྟེ་དེ་ཡིས་ཁྱོད། །མངོན་པར་ཤེས་པ་ཐོབ་པར་འགྱུར། །དོན་གཟུང་དགོན་པར་དེ་སོང་སྟེ། །ཤིན་ཏུ་མཉམ་བཞག་རྣམ་པར་སེམས། །མངོན་པར་ཤེས་པ་ལྔ་ཐོབ་སྟེ། །རིང་པོར་མི་
ཐོགས་ཡོན་ཏན་ལྡན། །དེ་བཞིན་ཉན་ཐོས་ཐམས་ཅད་ཀྱང་། །མྱ་ངན་འདས་ཐོབ་འདུ་ཤེས་ཏེ། །རྒྱལ་བས་བཤད་པ་དེ་དག་ལ། །མྱ་ངན་མ་འདས་དེ་ངལ་བསོ། །གང་ཡང་ཚུལ་འདི་གསུང་བ་ནི། །སངས་རྒྱས་རྣམས་ཀྱི་ཐབས་འདི་སྟེ། །ཐམས་ཅད་མཁྱེན་པ་མ་གཏོགས་པར། །མྱ་ངན་འདའ་མེད་འདི་རྩོམས་ཤིག །དུས་གསུམ་ཡེ་ཤེས་མཐའ་ཡས་དང་། །ཕ་རོལ་ཕྱིན་དྲུག་དགེ་བ་དང་། །སྟོང་པ་ཉིད་དང་མཚན་མ་མེད། །སྨོན་ལམ་རྣམ་པར་སྤངས་པ་དང་། །བྱང་ཆུབ་སེམས་དང་གཞན་ཡང་གང་། །མྱ་ངན་འདའ་བར་འགྲོ་བའི་ཆོས། །ཚངས་པའི་གནས་པ་རྣམ་བཞི་དང་། །བསྡུ་བ་རྣམས་སུ་གང་བརྗོད་པ། །སེམས་ཅན་རྣམས་ནི་འདུལ་བའི་ཕྱིར། །དྲང་སྲོང་མཆོག་གིས་རབ་ཏུ་བརྗོད། །རྨི་ལམ་སྒྱུ་མའི་རང་བཞིན་དང་། །སྙིང་པོ་མེད་པ་ཆུ་ཤིང་ཕུང་། །བྲག་ཅ་དང་ཡང་མཚུངས་པར་ནི། །གང་གིས་ཆོས་རྣམས་རབ་ཤེས་ཤིང་། །ཁམས་གསུམ་ལྷག་མ་མ་ལུས་པར། །དེ་ཡི་རང་བཞིན་ཤེས་པར་ཡང་། །བཅིངས་མེད་རྣམ་གྲོལ་མེད་པ་ཡི། །མྱ་ངན་འདས་པ་མི་ཤེས་སོ། །ཆོས་ཀུན་སྟོང་ཞིང་མཉམ་པ་སྟེ། །ཐ་དད་དབྱེར་མེད་བདག་ཉིད་དོ། །དེ་དག་ལ་ནི་མི་རྟོགས་ཏེ། །ཆོས་ནི་གང་ཡང་མཐོང་མེད་ན། །ཆོས་ཀྱི་སྐུ་ནི་མ་ལུས་པར། །ཤེས་རབ་ཆེན་པོ་དེས་མཐོང་ངོ་། །ཐེག་པ་གསུམ་དུ་ཡོང་མེད་དེ། །འདི་ན་ཐེག་པ་གཅིག་པུ་ཡོད། །ཆོས་ཀུན་མཉམ་སྟེ་ཐམས་ཅད་ཀྱང་། །མཉམ་ཞིང་སྙོམས་ཏེ་རྟག་ཏུ་མཉམ། །དེ་ལྟར་རིག་ནས་ཞི་བ་ཡི། །མི་འཆི་མྱ་ངན་འདའ་བ་ཤེས། །དམ་པའི་ཆོས་པད་མ་དཀར་པོ་ལས་སྨན་གྱི་ལེའུ་ཞེས་བྱ་བ་སྟེ་ལྔ་པའོ།། །།