བཅུ་གཉིས་པ། སྤྲོ་བར་བྱེད་པའི་ལེའུ།
དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོ་དང་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་ཆེན་པོ་གཡོག་བྱང་ཆུབ་སེམས་དཔའ་ཉིས་འབུམ་དང་ལྷན་ཅིག་བཅོམ་ལྡན་འདས་ཀྱི་སྤྱན་སྔར་ཚིག་འདི་སྐད་ཅེས་གསོལ་ཏོ། །བཅོམ་ལྡན་འདས་དོན་འདི་ལ་ཐུགས་ལས་ཆུང་ངུར་མཛད་དུ་གསོལ། བཅོམ་ལྡན་འདས་བདག་ཅག་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། ཆོས་ཀྱི་རྣམ་གྲངས་འདི་སེམས་ཅན་རྣམས་ལ་བསྟན་པར་བགྱིའོ། །ཡང་དག་པར་བསྟན་པར་བགྱིའོ། །བཅོམ་ལྡན་འདས་འདི་ལྟར་ཡང་དེའི་ཚེ། སེམས་ཅན་དམུ་རྒོད་དགེ་བའི་རྩ་བ་ཆུང་བ་ལྷག་པའི་ང་རྒྱལ་ཅན། རྙེད་པ་དང་བཀུར་སྟི་ལ་གནས་པ། མི་དགེ་བའི་རྩ་བ་ལ་ཞུགས་པ། གདུལ་དཀའ་བ་མོས་པ་དང་བྲལ་བ་མ་མོས་པ་མང་བ་དག་འབྱུང་ལགས་མོད་ཀྱི། བཅོམ་ལྡན་འདས་བདག་ཅག་གིས་བཟོད་པའི་སྟོབས་བསྟན་ཏེ། དེའི་དུས་ན་མདོ་འདི་བསྟན་པར་བགྱི་གཟུང་བར་བགྱི་བཤད་པར་བགྱི་ཡི་གེར་བྲི་བར་བགྱི་བསྟི་སྟང་དུ་བགྱི་རིམ་གྲོར་བགྱི། མཆོད་པར་བགྱིའོ། །བཅོམ་ལྡན་འདས་བདག་ཅག་གིས་ལུས་དང་སྲོག་ཀྱང་བོར་ཏེ་མདོ་འདི་བཤད་པར་བགྱི་ཡིས། བཅོམ་ལྡན་འདས་ཐུགས་ལས་ཆུང་ངུར་མཛད་དུ་གསོལ། དེ་ནས་འཁོར་དེའི་དགེ་སློང་སློབ་པ་དང་མི་སློབ་པ་དང་དགེ་སློང་ལྔ་བརྒྱ་ཙམ་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ཀྱང་འཇིག་རྟེན་གྱི་ཁམས་གཞན་དག་ཏུ། ཆོས་ཀྱི་རྣམ་གྲངས་འདི་རབ་ཏུ་བསྟན་པར་སྤྲོ་ལགས་སོ། །དེ་ནས་བཅོམ་ལྡན་འདས་ཀྱི་ཉན་ཐོས་སློབ་པ་དང་མི་སློབ་པ་ཇི་སྙེད་པ་དེ་དག་དང་གང་དག་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ། དགེ་སློང་བརྒྱད་སྟོང་པོ་དེ་དག་ཐམས་ཅད་ཀྱིས་བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཐུགས་ལས་ཆུང་ངུར་མཛད་དུ་གསོལ། དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་སླད་མའི་ཚེ་སླད་མའི་དུས་ན་བདག་ཅག་གིས་ཀྱང་ཆོས་ཀྱི་རྣམ་གྲངས་འདི་
འཇིག་རྟེན་གྱི་ཁམས་གཞན་དག་ཏུ་བཤད་པར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འཇིག་རྟེན་གྱི་ཁམས་མི་མཇེད་འདིའི་སེམས་ཅན་དག་ནི་ལྷག་པའི་ང་རྒྱལ་ཅན་དགེ་བའི་རྩ་བ་ཆུང་བ། རྟག་ཏུ་གནོད་སེམས་ཀྱི་སེམས་དང་ལྡན་པ། གཡོན་ཅན་ཡོན་པོའི་རང་བཞིན་ཅན་ལགས་པའི་སླད་དུའོ། །དེ་ནས་བཅོམ་ལྡན་འདས་ཀྱིས་སྲུ་སྐྱེ་དགུའི་བདག་མོ་ཆེན་མོ་གཽ་ཏ་མཱི་དགེ་སློང་མ་སློབ་པ་དང་མི་སློབ་པ་དགེ་སློང་མ་དྲུག་སྟོང་དང་ལྷན་ཅིག་ཏུ་སྟན་ལས་ལངས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་ལྟ་ཞིང་འཁོད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་བཀའ་སྩལ་པ། གཽ་ཏ་མཱི་ཁྱོད་བདག་ནི་དེ་བཞིན་གཤེགས་པས་ཡོངས་སུ་མ་བརྗོད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་སྙམ་དུ་ཡིད་མི་བདེ་བར། དེ་བཞིན་གཤེགས་པ་ལ་ལྟ་ཞིང་མ་འདུག་ཤིག །གཽ་ཏ་མཱི་འདི་ལྟར་འཁོར་ཐམས་ཅད་ལུང་བསྟན་པས་ཁྱོད་ཀྱང་ལུང་བསྟན་ཟིན་ཏོ། །གཽ་ཏ་མཱི་ཁྱོད་འདི་ནས་བཟུང་སྟེ་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་སུམ་ཅུ་རྩ་བརྒྱད་ཀྱི་ཐད་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་སྨྲ་བར་འགྱུར་རོ། །སློབ་པ་དང་མི་སློབ་པའི་དགེ་སློང་མ་དྲུག་སྟོང་འདི་དག་དང་ཁྱོད་ལྷན་ཅིག་ཏུ་དེ་བཞིན་གཤེགས་པ་དེ་དག་གི་ཐད་ན་བྱང་ཆུབ་སེམས་དཔའ་ཆོས་སྨྲ་བར་འགྱུར་རོ། །དེའི་ཕ་རོལ་གྱི་ཡང་ཆེས་ཕ་རོལ་ནས་བྱང་ཆུབ་སེམས་དཔའི་སྤྱོད་པ་ཡོངས་སུ་རྫོགས་པར་བྱས་ཏེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སེམས་ཅན་ཐམས་ཅད་ཀྱིས་མཐོང་ན་དགའ་བ་ཞེས་བྱ་བར་འཇིག་རྟེན་དུ་འབྱུང་བར་འགྱུར་ཏེ། གཽ་ཏ་མཱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེམས་ཅན་ཐམས་ཅད་ཀྱིས་མཐོང་ན་དགའ་བ་དེས། བྱང་ཆུབ་སེམས་དཔའ་དྲུག་སྟོང་
པོ་དེ་དག་གཅིག་ནས་གཅིག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པས་ལུང་སྟོན་པར་འགྱུར་རོ། །དེ་ནས་སྒྲ་གཅན་ཟིན་གྱི་མ་དགེ་སློང་མ་གྲགས་འཛིན་འདི་སྙམ་དུ། བཅོམ་ལྡན་འདས་ཀྱིས་བདག་གི་མིང་མ་སྨོས་སོ་སྙམ་དུ་སེམས་སོ། །དེ་ནས་བཅོམ་ལྡན་འདས་ཀྱིས་དགེ་སློང་མ་གྲགས་འཛིན་མའི་སེམས་ཀྱི་རྟོགས་པ་ཐུགས་སུ་ཆུད་ནས། དགེ་སློང་མ་གྲགས་འཛིན་ལ་འདི་སྐད་ཅེས་བཀའ་སྩལ་ཏོ། །གྲགས་འཛིན་ཁྱོད་མོས་པར་བྱའོ། །ཁོང་དུ་ཆུད་པར་བྱའོ། །ཁྱོད་ཀྱང་སངས་རྒྱས་བྱེ་བ་སྟོང་ཕྲག་བཅུའི་ཐད་ན་བྱང་ཆུབ་སེམས་དཔའ་ཆོས་སྨྲ་བར་འགྱུར་རོ། །བྱང་ཆུབ་སེམས་དཔའི་སྤྱོད་པ་རིམ་གྱིས་ཡོངས་སུ་རྫོགས་པར་བྱས་ནས། འཇིག་རྟེན་གྱི་ཁམས་བཟང་པོ་ཞེས་བྱ་བར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འོད་ཟེར་བརྒྱ་སྟོང་ཡོངས་སུ་རྫོགས་པའི་རྒྱལ་མཚན་ཞེས་བྱ་བར་འཇིག་རྟེན་དུ་འབྱུང་བར་འགྱུར་རོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་བརྒྱ་སྟོང་ཡོངས་སུ་རྫོགས་པའི་རྒྱལ་མཚན་དེའི་ཚེའི་ཚད་ནི་དཔག་ཏུ་མེད་པར་འགྱུར་རོ། །དེ་ནས་དགེ་སློང་མ་སྐྱེ་དགུའི་བདག་མོ་ཆེན་མོ་གཽ་ཏ་མཱི་དགེ་སློང་མ་གཡོག་འཁོར་དགེ་སློང་མ་དྲུག་སྟོང་དང་། དགེ་སློང་མ་གྲགས་འཛིན་གཡོག་འཁོར་དགེ་སློང་མ་བཞི་སྟོང་དང་། བཅོམ་ལྡན་འདས་ལས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བདག་ཅག་ལུང་བསྟན་པ་ཐོབ་ནས་ངོ་མཚར་དང་རྨད་དུ་གྱུར་ཏེ། དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །བཅོམ་ལྡན་འདྲེན་པ་རྣམ་པར་འདྲེན་པ་སྟེ། །ལྷར་བཅས་འཇིག་རྟེན་དག་གི་སྟོན་པ་ལགས། །དབུགས་འབྱིན་ལྷ་དང་མི་ཡིས་མཆོད་པ་སྟེ། །མགོན་པོ་བདག་ཅག་རྣམས་ཀྱང་དེང་ཚིམ་བགྱིས། །དེ་ནས་དགེ་སློང་མ་རྣམས་ཀྱིས་ཚིགས་སུ་བཅད་པ་འདི་གསོལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ཀྱང་སླད་
མའི་དུས་སླད་མའི་ཚེ་ན། ཆོས་ཀྱི་རྣམ་གྲངས་འདི་འཇིག་རྟེན་གྱི་ཁམས་གཞན་དག་ཏུ་སྟོན་པར་སྤྲོ་ལགས་སོ། ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་གཟུངས་ཐོབ་པ་ཕྱིར་མི་ལྡོག་པའི་ཆོས་ཀྱི་འཁོར་ལོ་བསྐོར་བའི་བྱང་ཆུབ་སེམས་དཔའ་བརྒྱད་ཁྲི་པོ་དེ་དག་ག་ལ་བ་དེ་ལོགས་སུ་གཟིགས་སོ། །དེ་ནས་བཅོམ་ལྡན་འདས་ཀྱིས་གཟིགས་མ་ཐག་ཏུ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་སྟན་ལས་ལངས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་འདི་སྙམ་དུ། ཆོས་ཀྱི་རྣམ་གྲངས་འདི་བཤད་པར་བྱ་བའི་ཕྱིར། བཅོམ་ལྡན་འདས་ཀྱིས་བདག་ཅག་ལ་བསྐུལ་བ་མཛད་དོ་སྙམ་དུ་སེམས་སོ། །དེ་དག་དེ་སྙམ་དུ་བསམས་ནས་ཀུན་གཡོས་ཏེ་ཕན་ཚུན་དུ་སྨྲས་པ། རིགས་ཀྱི་བུ་དག་མ་འོངས་པའི་དུས་ན་ཆོས་ཀྱི་རྣམ་གྲངས་འདི་བཤད་པར་བྱ་བའི་ཕྱིར། བཅོམ་ལྡན་འདས་ཀྱིས་བདག་ཅག་ལ་བསྐུལ་བ་མཛད་ན་བདག་ཅག་གིས་ཇི་ལྟར་བྱ། དེ་ནས་རིགས་ཀྱི་བུ་དེ་དག་བཅོམ་ལྡན་འདས་ལ་གུས་པ་དང་བདག་ཉིད་ཀྱི་སྔོན་གྱི་སྤྱོད་པ་དང་སྨོན་ལམ་གྱིས་བཅོམ་ལྡན་འདས་ཀྱི་སྤྱན་སྔར་སེང་གེའི་སྒྲ་ཕྱུང་བ། བཅོམ་ལྡན་འདས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་བདག་ཅག་ཕྱོགས་བཅུར་མཆིས་ཏེ། བཅོམ་ལྡན་འདས་ཀྱི་མཐུས་ཆོས་ཀྱི་རྣམ་གྲངས་འདི་སེམས་ཅན་རྣམས་ཡི་གེར་འདྲིར་སྩལ་བར་བགྱི་ཀློག་ཏུ་སྩལ་བར་བགྱི་སེམས་སུ་སྩལ་བར་བགྱི་འཆད་དུ་སྩལ་བར་བགྱིའོ། །བཅོམ་ལྡན་འདས་ཀྱང་འཇིག་རྟེན་གྱི་ཁམས་གཞན་ན་བཞུགས་ཏེ། བདག་ཅག་ལ་བསྲུང་བ་དང་སྐྱོབ་པ་དང་སྦེད་པར་མཛད་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་བཅོམ་ལྡན་འདས་ལ་དབྱངས་འཐུན་པར་ཚིགས་སུ་བཅད་པ་འདི་དག་གསོལ་ཏོ། །བཅོམ་ལྡན་འདས་ཁྱོད་ཐུགས་ལས་ཆུང་མཛད་གསོལ། །ཁྱོད་ནི་མྱ་ངན་འདས་ནས་བདག་ཅག་རྣམས། །ཤིན་ཏུ་མ་རུངས་སླད་མའི་དུས་ཀྱི་ཚེ། །མདོ་སྡེ་དམ་པ་འདི་ནི་བཤད་པར་བགྱི། །བྱིས་པ་རྣམས་ཀྱིས་སྤྱོས་པ་དང་། །བརྡེག་པ་དང་ནི་དབྱུག་ཐོགས་ཏེ། །གཟས་པ་རྣམས་ནི་བཟོད་པར་བགྱི། །འདྲེན་པ་བག་ལ་ཞ་བར་བགྱི། །མ་རུངས་སླད་མའི་དུས་ལ་ནི། །ལོག་པའི་བློ་དང་ཡོན་པོ་དང་། །
བྱིས་པ་གཡོ་དང་ང་རྒྱལ་ཅན། །མ་ཐོབ་ཐོབ་པར་འདུ་ཤེས་པ། །དགོན་པ་དག་ལ་རབ་སེམས་ཤིང་། །ཚེམ་བུ་དག་ཀྱང་བགོས་ནས་ནི། །ཡོ་བྱད་བསྙུངས་ཚུལ་སྤྱོད་དོ་ཞེས། །བློ་ངན་དེ་སྐད་སྨྲ་བར་འགྱུར། །རོ་བྲོ་ཆགས་ཤིང་ཞེན་པ་རྣམས། །ཁྱིམ་པ་དག་ལ་ཆོས་ཀྱང་འཆད། །མངོན་ཤེས་དྲུག་ཅན་ཇི་བཞིན་དུ། །བསྟི་སྟང་དག་ཀྱང་བགྱིད་པར་འགྱུར། །གཏུམ་པའི་སེམས་དང་སྡང་སེམས་ལྡན། །ཁྱིམ་དང་ནོར་ལ་རྣམ་པར་སེམས། །དགོན་པ་དབེན་པར་རབ་ཞུགས་ཏེ། །བདག་ཅག་རྣམས་ལ་སྐུར་པ་འདེབས། །བདག་ཅག་ལ་ནི་འདི་སྐད་མཆི། །རྙེད་དང་བཀུར་སྟི་གནས་པ་སྟེ། །དགེ་སློང་འདི་དག་མུ་སྟེགས་ཅན། །བདག་གི་རང་བཟོ་རབ་ཏུ་འཆད། །རྙེད་པ་དང་ནི་བཀུར་སྟིའི་ཕྱིར། །རང་གིས་མདོ་སྡེ་བྱས་ནས་སུ། །འཁོར་གྱི་དབུས་སུ་འཆད་བྱེད་ཅེས། །བདག་ཅག་རྣམས་ལ་ཤིན་ཏུ་འཕྱ། །རྒྱལ་པོ་དང་ནི་རྒྱལ་བུ་དང་། །དེ་བཞིན་རྒྱལ་པོའི་བློན་པོ་དང་། །བྲམ་ཟེ་དང་ནི་ཁྱིམ་བདག་དང་། །དགེ་སློང་གཞན་དག་དྲུང་དུ་ནི། །བདག་ཅག་རྣམས་ལ་མི་བསྔགས་བརྗོད། །མུ་སྟེགས་ཅན་ཞེས་ཚིག་ཀྱང་བརྗོད། །དྲང་སྲོང་ཆེ་ལ་གུས་པས་ན། །ཐམས་ཅད་བདག་ཅག་བཟོད་པར་བགྱི། །དེ་ཚེ་ངན་པའི་བློ་གྲོས་ཅན། །བདག་ཅག་རྣམས་ལ་སྨོད་པར་འགྱུར། །འདི་དག་སངས་རྒྱས་འགྱུར་ཞེས་ཏེ། །རྣམ་པ་ཐམས་ཅད་བཟོད་པར་བགྱི། །འཁྲུག་པའི་བསྐལ་པ་འཇིག་པ་ལ། །མ་རུངས་འཇིགས་པ་ཆེན་པོའི་ཚེ། །གནོད་སྦྱིན་གཟུགས་ཅན་དགེ་སློང་མང་། །བདག་ཅག་ལ་ནི་མི་སྙན་བརྗོད། །འཇིག་རྟེན་དབང་ལ་གུས་པ་ཡིས། །ཤིན་ཏུ་དགའ་བ་སྤྲོ་བར་བགྱི། །བཟོད་པའི་གོ་ཆ་བགོས་ནས་སུ། །མདོ་འདི་རབ་ཏུ་བཤད་པར་བགྱི། །འདྲེན་པ་བདག་ཅག་ལུས་དང་ནི། །སྲོག་ཀྱང་དོན་དུ་གཉེར་མ་ལགས། །བདག་ཅག་བྱང་ཆུབ་དོན་གཉེར་བས། །ཁྱོད་ཀྱིས་བཏམས་གཏད་འཛིན་པ་ལགས། ། ལྡེམ་པོར་དགོངས་བཤད་མ་འཚལ་བ། །དགེ་སློང་སྡིག་ཅན་དེ་འདྲ་དག །སླད་མའི་དུས་ན་འབྱུང་བ་ནི། །བཅོམ་ལྡན་ཉིད་ཀྱིས་རབ་ཏུ་མཁྱེན། །གཙུག་ལག་ཁང་ནས་བསྐྲད་པ་དང་། །
བཅིང་དང་བརྡེག་པ་རྣམ་མང་དང་། །ཕྱིར་ཞིང་བཅས་པ་མ་ལགས་དང། །ཁྲོ་གཉེར་ཐམས་ཅད་བཟོད་པར་བགྱི། །འཇིག་རྟེན་མགོན་གྱིས་བཀའ་སྩལ་པ། །དྲན་པར་བགྱིད་པས་སླད་དུས་ན། །འཁོར་གྱི་དབུས་སུ་མི་འཇིགས་པར། །མདོ་འདི་རབ་ཏུ་བཤད་པར་བགྱི། །འདྲེན་པ་འདི་ནི་འདི་ཚོལ་བ། །གྲོང་ཁྱེར་གྲོང་དུ་གང་བྱུང་བ། །དེ་དག་གན་དུ་མཆིས་ནས་སུ། །ཁྱོད་ཀྱིས་བཏམས་པ་སྩལ་བར་བགྱི། །འཇིག་རྟེན་དབང་པོ་ཐུབ་པ་ཆེ། །ཁྱོད་ཀྱི་མངག་གཞུག་བདག་ཅག་འཚལ། །མྱ་ངན་རབ་འདས་ཞི་བརྙེས་པ། །ཐུགས་ལས་ཆུང་ངུར་མཛད་དུ་གསོལ། །ཕྱོགས་བཅུ་དག་ནས་གང་གཤེགས་པ། །འཇིག་རྟེན་སྒྲོན་མ་ཐམས་ཅད་ཀྱིས། །མོས་པ་རྣམ་པར་མཁྱེན་པས་ན། །བདེན་པའི་ཚིག་ནི་སྨྲ་བར་བགྱིད། །དམ་པའི་ཆོས་པད་མ་དཀར་པོ་ལས་སྤྲོ་བར་བྱ་བའི་ལེའུ་ཞེས་བྱ་བ་སྟེ་བཅུ་གཉིས་པའོ།། །།