ཉི་ཤུ་རྩ་ལྔ་པ། རྒྱལ་པོ་དགེ་བ་བཀོད་པའི་སྔོན་གྱི་སྦྱོར་བའི་ལེའུ།
དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་ལ་བཀའ་སྩལ་པ། རིགས་ཀྱི་བུ་དག་སྔོན་བྱུང་བ་འདས་པའི་དུས་ན། བསྐལ་པ་གྲངས་མེད་པར་གྱུར་པ་དེའི་ཚེ་དེའི་དུས་ན། བསྐལ་པ་མཐོང་ན་དགའ་བ་ལ་འཇིག་རྟེན་གྱི་ཁམས་རྣམ་པར་སྣང་བའི་འོད་ཟེར་གྱིས་བརྒྱན་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་ཞེས་བྱ་བ་འཇིག་རྟེན་དུ་བྱུང་ངོ་། །དེ་བཞིན་གཤེགས་པ་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེའི་གསུང་རབ་ལ། རྒྱལ་པོ་དགེ་བ་བཀོད་པ་ཞེས་བྱ་བ་བྱུང་སྟེ། རིགས་ཀྱི་བུ་དག་རྒྱལ་པོ་དགེ་བ་བཀོད་པ་དེའི་ཆུང་མ་དྲི་མ་མེད་པས་བྱིན་པ་ཞེས་བྱ་བ་ཞིག་ཡོད་དོ། །རིགས་ཀྱི་བུ་དག་རྒྱལ་པོ་དགེ་བ་བཀོད་པ་དེ་ལ་བུ་གཉིས་ཤིག་ཡོད་དེ་གཅིག་གི་མིང་ནི་དྲི་མ་མེད་པའི་སྙིང་པོ། གཅིག་གི་མིང་ནི་དྲི་མ་མེད་པའི་མིག་སྟེ། ཁྱེའུ་དེ་གཉིས་རྫུ་འཕྲུལ་དང་ལྡན་ཤེས་རབ་དང་ལྡན་བསོད་ནམས་དང་ལྡན་ཡེ་ཤེས་དང་ལྡན་ཏེ། བྱང་ཆུབ་སེམས་དཔའི་སྤྱོད་པ་ལ་བརྩོན་པར་གྱུར་ཏོ། །འདི་ལྟ་སྟེ་སྦྱིན་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། ཐབས་མཁས་པའི་ཕ་རོལ་ཏུ་ཕྱིན་པ་དང་། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་དང་། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་པོ་དག་ལ་བརྩོན་པར་གྱུར་ཏེ། ཐམས་ཅད་ཀྱི་ཕ་རོལ་ཏུ་སོན་པར་གྱུར་ཏོ། །དྲི་མ་མེད་པའི་ཏིང་ངེ་འཛིན་གྱི་ཕ་རོལ་ཏུ་
སོང་ངོ་། །རྒྱུ་སྐར་དང་སྐར་མ་དང་ཉི་མའི་ཏིང་ངེ་འཛིན་གྱི་ཕ་རོལ་ཏུ་སོང་ངོ་། །དྲི་མ་མེད་པའི་འོད་ཀྱི་ཏིང་ངེ་འཛིན་གྱི་ཕ་རོལ་ཏུ་སོང་ངོ་། །དྲི་མ་མེད་པའི་འོད་གསལ་བའི་ཏིང་ངེ་འཛིན་གྱི་ཕ་རོལ་ཏུ་སོང་ངོ་། །དཔའ་རྒྱན་གྱི་ཏིང་ངེ་འཛིན་གྱི་ཕ་རོལ་ཏུ་སོང་ངོ་། །གཟི་བརྗིད་ཆེན་པོའི་སྙིང་པོའི་ཏིང་ངེ་འཛིན་གྱི་ཕ་རོལ་ཏུ་སོང་བར་གྱུར་ཏོ། །བཅོམ་ལྡན་འདས་དེ་ཡང་དེའི་ཚེ་དེའི་དུས་ན་སེམས་ཅན་དེ་དག་ལ་ཐུགས་བརྩེ་བ་དང་། རྒྱལ་པོ་དགེ་བ་བཀོད་པ་དེ་ལ་ཐུགས་བརྩེ་བའི་ཕྱིར། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་སྟོན་ཏོ། །རིགས་ཀྱི་བུ་དག་དེ་ནས་ཁྱེའུ་དྲི་མ་མེད་པའི་སྙིང་པོ་དང་ཁྱེའུ་དྲི་མ་མེད་པའི་མིག །བདག་ཅག་སྐྱེད་པའི་མ་ག་ལ་བ་དེར་སོང་སྟེ་ཕྱིན་ནས་སོར་མོ་བཅུ་ཐལ་མོ་སྦྱར་ཏེ། བདག་ཅག་སྐྱེད་པའི་མ་ལ་འདི་སྐད་ཅེས་སྨྲས་སོ། །ཡུམ་ཚུར་སྤྱོན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེ་ལ་བལྟ་བ་དང་ཕྱག་བགྱི་བ་དང་བསྙེན་བཀུར་བགྱི་བའི་སླད་དུ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེའི་དྲུང་དུ་བཞུད་དེ། ཅིའི་སླད་དུ་ཞེ་ན་ཡུམ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེ། ལྷ་དང་བཅས་པའི་འཇིག་རྟེན་གྱི་མདུན་དུ་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་རྒྱས་པར་རབ་ཏུ་འཆད་ཀྱིས་དེ་མཉན་པའི་ཕྱིར་བཞུད་དོ། །རིགས་ཀྱི་བུ་དག་ལ་དེ་སྐད་ཅེས་སྨྲས་ནས། རྒྱལ་པོའི་ཆུང་མ་དྲི་མ་མེད་པས་བྱིན་པས། ཁྱེའུ་དྲི་མ་མེད་པའི་སྙིང་པོ་དང་དྲི་མ་མེད་པའི་མིག་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག་ཁྱེད་ཀྱི་ཕ་རྒྱལ་པོ་དགེ་བ་བཀོད་པ་འདི་བྲམ་ཟེ་ལ་དད་པས། དེ་བཞིན་གཤེགས་པ་དེ་ལ་བལྟ་བའི་ཕྱིར་འགྲོར་མི་སྟེར་རོ། །རིགས་ཀྱི་བུ་དག་དེ་ནས། ཁྱེའུ་དྲི་མ་མེད་པའི་སྙིང་པོ་དང་ཁྱེའུ་དྲི་མ་མེད་པའི་མིག་གིས་
སོར་མོ་བཅུའི་ཐལ་མོ་སྦྱར་ནས། བདག་ཅག་སྐྱེད་པའི་མ་ལ་འདི་སྐད་ཅེས་སྨྲས་སོ། །བདག་ཅག་ལོག་པར་ལྟ་བའི་ཁྱིམ་དུ་སྐྱེས་ཏེ། བདག་ཅག་ཆོས་ཀྱི་རྒྱལ་པོའི་བུ་མ་ལགས་པ་སྟེ། རིགས་ཀྱི་བུ་དག་དེ་ནས་རྒྱལ་པོའི་ཆུང་མ་དྲི་མ་མེད་པས་བྱིན་པས། ཁྱེའུ་དེ་དག་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག་ཁྱེད་ཀྱིས་བདག་ཅག་གི་ཕ་རྒྱལ་པོ་དགེ་བ་བཀོད་པ་ལ་སྙིང་བརྩེ་བའི་ཕྱིར། ཆོ་འཕྲུལ་ཅུང་ཟད་ཅིག་ལེགས་པར་སྟོན་ཅིག་དང་ཁྱེད་ལ་དད་པར་འགྱུར་ཡང་སྲིད་ཀྱིས། སེམས་དད་པར་གྱུར་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེའི་གན་དུ་འདོང་བར་གནང་ངོ་། །རིགས་ཀྱི་བུ་དག་དེ་ནས་ཁྱེའུ་དྲི་མ་མེད་པའི་སྙིང་པོ་དང་ཁྱེའུ་དྲི་མ་མེད་པའི་མིག་གིས། དེའི་ཚེ་ཏ་ལ་བདུན་ཙམ་དུ་ནམ་མཁའ་ལ་འཕགས་ནས། ཕ་རྒྱལ་པོ་དགེ་བ་བཀོད་པ་དེ་ལ་སྙིང་བརྩེ་བའི་ཕྱིར། སངས་རྒྱས་ཀྱིས་གནང་བའི་ཆོ་འཕྲུལ་ཟུང་དུ་བྱེད་དེ། དེ་དག་ནམ་མཁའ་བར་སྣང་དེ་ལ་དོང་ནས་ཉལ་བར་བྱེད་དོ། །བར་སྣང་དེ་ལ་འཆག་གོ ། བར་སྣང་དེ་ལ་རྡུལ་སྤྲུག་གོ ། བར་སྣང་དེ་ཉིད་ལ་ལུས་ཀྱི་སྨད་ནས་ཆུའི་རྒྱུན་གཏོང་ཞིང་། ལུས་ཀྱི་སྟོད་ནས་མེའི་ཕུང་པོ་རབ་ཏུ་འབར་བར་བྱེད་དོ། །ལུས་ཀྱི་སྟོད་ནས་ཆུའི་རྒྱུན་གཏོང་ཞིང་། ལུས་ཀྱི་སྨད་ནས་མེའི་ཕུང་པོ་རབ་ཏུ་འབར་བར་བྱེད་དོ། །དེ་དག་ནམ་མཁའ་དེ་ཉིད་ལ་ཆེན་པོར་གྱུར་ནས་ཆུང་ངུར་གྱུར། ཆུང་ངུར་གྱུར་ནས་ཆེན་པོར་གྱུར་ཏོ། །བར་སྣང་དེ་ཉིད་ལ་མི་སྣང་བར་གྱུར་ཏེ་ས་ལས་བྱུང་ངོ་། །ས་ལས་བྱུང་ནས་ནམ་མཁའ་ལ་འཕགས་སོ། །རིགས་ཀྱི་བུ་དག་ཁྱེའུ་དེ་གཉིས་ཀྱིས་རྫུ་འཕྲུལ་གྱི་ཆོ་འཕྲུལ་དེ་སྙེད་ཀྱིས། རང་གི་ཕ་རྒྱལ་པོ་དགེ་བ་བཀོད་པ་བཏུལ་ལོ། །རིགས་ཀྱི་བུ་དག་དེ་ནས་རྒྱལ་པོ་དགེ་བ་བཀོད་པས། ཁྱེའུ་དེ་གཉིས་ཀྱི་རྫུ་འཕྲུལ་གྱི་ཆོ་འཕྲུལ་དེ་དག་མཐོང་ནས། དེའི་ཚེ་ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ཞིང་བདེ་བ་དང་ཡིད་བདེ་བ་སྐྱེས་ནས། སོར་མོ་བཅུའི་ཐལ་མོ་སྦྱར་ཏེ། ཁྱེའུ་དེ་དག་ལ་འདི་སྐད་ཅེས། རིགས་ཀྱི་
བུ་དག་ཁྱེད་ཀྱི་སྟོན་པ་སུ། ཁྱེད་སུའི་སློབ་མ་ཞེས་སྨྲས་སོ། །རིགས་ཀྱི་བུ་དག་དེ་ནས་ཁྱེའུ་དེ་གཉིས་ཀྱིས་རྒྱལ་པོ་དགེ་བ་བཀོད་པ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེ་བཞུགས་ཏེ་འཚོ་ཞིང་གཞེས་ལ་རིན་པོ་ཆེའི་ཤིང་བྱང་ཆུབ་ཀྱི་ཤིང་དྲུང་ན་ཆོས་ཀྱི་གདན་ལ་བཞུགས་ཏེ། ལྷ་དང་བཅས་བདུད་དང་བཅས་ཚངས་པ་དང་བཅས་པའི་འཇིག་རྟེན་གྱི་མདུན་ན་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་རྒྱས་པར་རབ་ཏུ་འཆད་པའི་བཅོམ་ལྡན་འདས་དེ་ནི་བདག་ཅག་གི་སྟོན་པ་སྟེ། རྒྱལ་པོ་ཆེན་པོ་བདག་ཅག་ནི་དེའི་སློབ་མའོ། །རིགས་ཀྱི་བུ་དག་དེ་ནས་རྒྱལ་པོ་དགེ་བ་བཀོད་པས་ཁྱེའུ་དེ་གཉིས་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག་ཁྱེད་ཀྱི་སྟོན་པ་ལྟ་ཞིང་བཅོམ་ལྡན་འདས་དེའི་དྲུང་དུ་བདག་ཀྱང་འགྲོའོ། །རིགས་ཀྱི་བུ་དག་དེ་ནས་ཁྱེའུ་དེ་གཉིས་བར་སྣང་དེ་ལས་བབས་ནས། བདག་ཅག་སྐྱེད་པའི་མ་ག་ལ་བ་དེར་སོང་སྟེ་ཕྱིན་ནས་སོར་མོ་བཅུའི་ཐལ་མོ་སྦྱར་ཏེ། བདག་ཅག་སྐྱེད་པའི་མ་ལ་འདི་སྐད་ཅེས་སྨྲས་སོ། །ཡུམ་བདག་ཅག་གི་ཡབ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བཏུལ་ལགས་སོ། །བདག་ཅག་གིས་ཡབ་ཀྱི་སྟོན་པའི་བགྱི་བ་བགྱིས་སོ། །བདག་ཅག་བཅོམ་ལྡན་འདས་དེ་ལས་རབ་ཏུ་འབྱུང་ན་ཡུལ་ད་ནི་བདག་ཅག་གཏང་བའི་རིགས་སོ། །རིགས་ཀྱི་བུ་དག་དེ་ནས་ཁྱེའུ་དྲི་མ་མེད་པའི་སྙིང་པོ་དང་ཁྱེའུ་དྲི་མ་མེད་པའི་མིག་གིས། དེའི་ཚེ་བདག་ཅག་སྐྱེད་པའི་མ་ལ་ཚིགས་སུ་བཅད་པ་འདི་དག་སྨྲས་སོ། །ཁྱིམ་མེད་རབ་ཏུ་འབྱུང་བར་ནི། །ཡུམ་གྱིས་བདག་ཅག་གནང་བར་མཛོད། །དེ་བཞིན་གཤེགས་པ་རྙེད་པར་དཀའ། །བདག་ཅག་རབ་ཏུ་འབྱུང་བར་བགྱི། །ཨུ་དུམ་བཱ་རའི་མེ་ཏོག་བཞིན། །རྒྱལ་བ་ཤིན་ཏུ་རྙེད་པར་དཀའ། །དལ་བ་འབྱོར་པའང་རྙེད་དཀའ་བས། །རབ་ཏུ་འབྱུང་གིས་གཏང་དུ་གསོལ། །རྒྱལ་པོའི་ཆུང་མ་དྲི་མ་མེད་པས་བྱིན་
པས་སྨྲས་པ། དེ་རིང་ཁྱེད་གཉིས་གཏང་བར་བྱ། །བྱིས་པ་དག་གོ་ལེགས་པར་དེང་། །དེ་བཞིན་གཤེགས་པ་རྙེད་དཀའ་བས། །བདག་ཀྱང་རབ་ཏུ་བྱུང་བར་བྱ། །རིགས་ཀྱི་བུ་དག་ཁྱེའུ་དེ་དག་གིས་ཚིགས་སུ་བཅད་པ་འདི་དག་སྨྲས་ནས། བདག་གི་ཕ་དང་མ་ལ་འདི་སྐད་ཅེས་སྨྲས་སོ། །ཡབ་ཡུམ་ལེགས་སོ་ཚུར་སྤྱོན། །ཁྱེད་དང་ཐམས་ཅད་ལྷན་ཅིག་བཞུད་དོ། །བཅོམ་ལྡན་འདས་དེ་ལ་བལྟ་བ་དང་ཕྱག་བགྱི་བ་དང་བསྙེན་བཀུར་བགྱི་བའི་སླད་དུ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེའི་དྲུང་དུ་བཞུད་དོ། །དེ་ཅིའི་སླད་དུ་ཞེ་ན། ཡབ་ཡུམ་སངས་རྒྱས་འབྱུང་བ་རྙེད་པར་དཀའ་སྟེ། ཨུ་དུམ་བཱ་རའི་མེ་ཏོག་དང་འདྲ་ཞིང་གཉའ་ཤིང་གི་བུ་གར་རུ་སྦལ་གྱི་མགྲིན་པ་ཆུད་པ་དང་འདྲ་བའི་སླད་དུའོ། །ཡབ་ཡུམ་སངས་རྒྱས་བཅོམ་ལྡན་འདས་དག་འབྱུང་བ་རྙེད་པར་དཀའ་སྟེ། དེ་བས་ན་ཡབ་ཡུམ་བདག་ཅག་བསོད་ནམས་མཆོག་གིས་བརྟན་པས་གསུང་རབ་འདི་ལྟ་བུ་ལ་སྐྱེས་ཏེ། ཡབ་ཡུམ་བདག་ཅག་བཏང་ན་ལེགས་ཏེ་བདག་ཅག་མཆི་ཞིང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པའི་བསྟན་པ་ལ་རབ་ཏུ་བྱུང་ངོ་། །དེ་ཅིའི་སླད་དུ་ཞེ་ན། ཡབ་ཡུམ་དེ་བཞིན་གཤེགས་པ་མཐོང་བ་རྙེད་པར་དཀའ་བ་དང་། ད་ལྟར་གྱི་དུས་ན་འདི་འདྲ་བའི་ཆོས་ཀྱི་རྒྱལ་པོ་རྙེད་པར་དཀའ་བ་དང་། འདི་ལྟ་བུའི་དལ་བ་འབྱོར་པ་ཤིན་ཏུ་རྙེད་པར་དཀའ་བའི་སླད་དུའོ། །རིགས་ཀྱི་བུ་དག་དེའི་ཚེ་ན། རྒྱལ་པོ་དགེ་བ་བཀོད་པ་དེའི་བཙུན་མོའི་འཁོར་ལས་སླས་བརྒྱད་ཁྲི་བཞི་སྟོང་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདིའི་སྣོད་དུ་གྱུར་ཏོ། །ཁྱེའུ་དྲི་མ་མེད་པའི་སྙིང་པོ་དང་དྲི་མ་མེད་པའི་མིག་གིས་ཆོས་ཀྱི་རྣམ་གྲངས་འདི་ལ་སྤྱད་དེ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་ངན་སོང་ཐམས་ཅད་ཇི་ལྟར་བསལ་སྙམ་
ནས། སེམས་ཅན་ཐམས་ཅད་ཀྱི་ངན་སོང་ཐམས་ཅད་སེལ་བའི་ཏིང་ངེ་འཛིན་ལ་སྤྱད་པར་གྱུར་ཏོ། །ཁྱེའུ་དེ་དག་གི་མ་དྲི་མ་མེད་པས་བྱིན་པ་རྒྱལ་པོའི་ཆུང་མ་དེ་ཡང་སངས་རྒྱས་ཐམས་ཅད་ཀྱིས་ཀུན་བསྟན་པ། སངས་རྒྱས་ཐམས་ཅད་ཀྱི་ཆོས་གསང་བའི་གནས་ཤེས་སོ། །རིགས་ཀྱི་བུ་དག་དེ་ནས་ཁྱེའུ་དེ་གཉིས་ཀྱིས་རྒྱལ་པོ་དགེ་བ་བཀོད་པ་དེ་བཞིན་གཤེགས་པའི་བསྟན་པ་ལ་བཏུལ་ཏེ་ཞུགས་པར་བྱས་ནས་ཡོངས་སུ་སྨིན་པར་བྱས་ཏེ། གཉེན་འདབ་དང་རྒྱལ་པོའི་ཆུང་མ་དྲི་མ་མེད་པས་བྱིན་པ་དེ་དང་གཉེན་འདབ་དང་རྒྱལ་པོ་དགེ་བ་བཀོད་པའི་ཁྱེའུ་དེ་གཉིས་ཀྱང་། སྲོག་ཆགས་བཞི་ཁྲི་ཉིས་སྟོང་དང་བཙུན་མོའི་འཁོར་དང་བཅས་བློན་པོ་དང་བཅས་ཏེ་ཐམས་ཅད་འགྲོགས་ནས་ལྷན་ཅིག་ཏུ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེ་ག་ལ་བ་དེར་དོང་སྟེ། ལྷགས་ནས་བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་བདུན་དུ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །རིགས་ཀྱི་བུ་དག་དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེས། རྒྱལ་པོ་དགེ་བ་བཀོད་པ་འཁོར་དང་བཅས་ཏེ་ལྷགས་པར་མཁྱེན་ནས། ཆོས་ཀྱི་གཏམ་གྱིས་ཤིན་ཏུ་ལེགས་པར་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་དོ། །རིགས་ཀྱི་བུ་དག་དེ་ནས་བཅོམ་ལྡན་འདས་དེས་རྒྱལ་པོ་དགེ་བ་བཀོད་པ་ལ། ཆོས་ཀྱི་གཏམ་གྱིས་ཤིན་ཏུ་ལེགས་པར་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་པས། དེའི་ཚེ་ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས། ནུ་བོ་ཅོད་པན་གྱིས་བཅིངས་ཏེ། རྒྱལ་པོར་བཅུག་ནས་
བུ་དང་གཉེན་འདབ་དང་འཁོར་དང་བཅས་པ་དང་། རྒྱལ་པོའི་ཆུང་མ་དྲི་མ་མེད་པས་བྱིན་པ་དེ་ཡང་། བུད་མེད་ཀྱི་ཚོགས་ཐམས་ཅད་དང་འཁོར་དང་ཁྱེའུ་དེ་གཉིས་དང་ལྷན་ཅིག་ཏུ། སྲོག་ཆགས་བརྒྱད་ཁྲི་བཞི་སྟོང་དང་ལྷན་ཅིག་འགྲོགས་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེའི་གསུང་རབ་ལ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། རབ་ཏུ་བྱུང་ནས་རྒྱལ་པོ་དགེ་བ་བཀོད་པ་འཁོར་དང་བཅས་པས། ལོ་བརྒྱད་ཁྲི་བཞི་སྟོང་དུ་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་ལ་བསམ་པ་དང་བསྒོམ་པ་དང་ཀུན་ཆུབ་པར་བྱ་བ་ལ་བརྩོན་པར་འགྱུར་རོ། །རིགས་ཀྱི་བུ་དག་དེ་ནས་རྒྱལ་པོ་དགེ་བ་བཀོད་པ་ལོ་བརྒྱད་ཁྲི་བཞི་སྟོང་འདས་ནས། ཡོན་ཏན་གྱི་རྒྱན་ཐམས་ཅད་བཀོད་པ་ཞེས་བྱ་བའི་ཏིང་ངེ་འཛིན་ཐོབ་སྟེ། ཏིང་ངེ་འཛིན་དེ་ཐོབ་མ་ཐག་ཏུ་དེའི་ཚེ་ནམ་མཁའ་ལ་ཏ་ལ་བདུན་ཙམ་དུ་འཕགས་སོ། །དེ་ནས་རིགས་ཀྱི་བུ་དག་རྒྱལ་པོ་དགེ་བ་བཀོད་པ་ནམ་མཁའི་དཀྱིལ་དུ་འདུག་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གི་བུ་འདི་གཉིས་སྟོན་པ་ལགས་ཏེ། གང་འདི་དག་གིས་རྫུ་འཕྲུལ་གྱིས་ལྟ་བར་གྱུར་པ་ཆེན་པོ་དེ་ལས་བཟློག་སྟེ། དེ་བཞིན་གཤེགས་པའི་བསྟན་པ་ལ་རབ་ཏུ་བཞག་གོ ། ཡོངས་སུ་སྨིན་པར་བགྱིས། །ཞུགས་པར་བགྱིས་སོ། །དེ་བཞིན་གཤེགས་པ་ལ་བལྟ་བ་དང་། ཕྱག་བགྱི་བའི་སླད་དུ་ཡང་བསྐུལ་ལོ། །བཅོམ་ལྡན་འདས་ཁྱེའུ་འདི་གཉིས་བདག་གི་དགེ་བའི་བཤེས་གཉེན་ཏེ། སྔོན་གྱི་དགེ་བའི་རྩ་བ་དྲན་པར་བགྱི་བའི་སླད་དུ། བུའི་གཟུགས་ཀྱིས་བདག་གི་ཁྱིམ་དུ་སྐྱེས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་
མེ་ཏོག་ཀུན་ཏུ་རྒྱས་པས་རྒྱལ་པོ་དགེ་བ་བཀོད་པ་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་དེ་དེ་བཞིན་ཏེ། ཇི་སྐད་སྨྲས་པ་བཞིན་ནོ། །དགེ་བའི་རྩ་བ་སྐྱེད་པའི་རིགས་ཀྱི་བུའམ་རིགས་ཀྱི་བུ་མོ་རྣམས་ནི་སྲིད་པའི་འགྲོ་བ་དང་འཆི་འཕོའི་གནས་ཐམས་ཅད་དུ་སྐྱེས་པ་ན་ཡང་། གང་དག་སྟོན་པའི་བྱེད་པས་ཉེ་བར་གནས་པ་དང་། གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པ་དང་། འཛུད་པ་དང་ཡོངས་སུ་སྨིན་པར་བྱེད་པའི་དགེ་བའི་བཤེས་གཉེན་རྣམས་རྙེད་པར་སླ་བར་འགྱུར་རོ། །རྒྱལ་པོ་ཆེན་པོ་འདི་ལྟ་སྟེ་དགེ་བའི་བཤེས་གཉེན་གྱིས་ཡོངས་སུ་ཟིན་པ། དེ་བཞིན་གཤེགས་པ་ལྟར་འཛུད་པ་གནས་འདི་ནི་རྒྱ་ཆེ་བའོ། །རྒྱལ་པོ་ཆེན་པོ་ཁྱེའུ་འདི་གཉིས་མཐོང་ངམ། གསོལ་པ་བཅོམ་ལྡན་འདས་མཐོང་ལགས་སོ། ། བདེ་བར་གཤེགས་པ་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཁྱེའུ་འདི་གཉིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་དྲུག་ཅུ་རྩ་ལྔའི་བྱེ་མ་སྙེད་ལ་མཆོད་པ་བྱེད་དོ། །སེམས་ཅན་རྣམས་ལ་སྙིང་བརྩེ་བའི་ཕྱིར། ལོག་པར་ལྟ་བའི་སེམས་ཅན་རྣམས་ཡང་དག་པའི་ལྟ་བ་ལ་བརྩོན་འགྲུས་བསྐྱེད་པའི་ཕྱིར་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་འཛིན་པར་འགྱུར་རོ། །རིགས་ཀྱི་བུ་དག་དེ་ནས་རྒྱལ་པོ་དགེ་བ་བཀོད་པ་ནམ་མཁའི་དཀྱིལ་དེ་ནས་བབས་ཏེ། སོར་མོ་བཅུའི་ཐལ་མོ་སྦྱར་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཇི་ལྟ་བུའི་ཡེ་ཤེས་དང་ལྡན་པས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གི་སླད་དུ། དབུའི་གཙུག་ཏོར་རྣམ་པར་མཛེས་སྤྱན་དྲི་མ་མ་མཆིས་པ་ལགས། སྨིན་མཚམས་ཀྱི་མཛོད་སྤུ་མཛེས་ཤིང་། ཟླ་བ་དང་དུང་ལྟར་དཀར་ལ་མཛེས། མཉམ་ཞིང་ཐགས་
བཟངས་པའི་ཚེམས་ཀྱི་ཕྲེང་བ་ཞལ་གྱི་ནང་ནས་མཛེས། བཅོམ་ལྡན་འདས་ཀྱི་ཞལ་གྱི་སྒྲོས་མེ་ཏོག་བིམ་པ་ལྟར་དམར་བ་དང་། བདེ་བར་གཤེགས་པའི་སྤྱན་མཛེས་པ། དེ་བཞིན་གཤེགས་པས་ལེགས་པར་བཤད་དུ་གསོལ། རིགས་ཀྱི་བུ་དག་དེ་ནས་རྒྱལ་པོ་དགེ་བ་བཀོད་པས་ཡོན་ཏན་དེ་སྙེད་ཀྱིས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་དེ་ལ་མངོན་པར་བསྟོད་ནས། ཡོན་ཏན་བྱེ་བ་ཁྲག་ཁྲིག་བརྒྱ་སྟོང་གཞན་དག་གིས་ཀྱང་བཅོམ་ལྡན་འདས་དེ་ལ་བསྟོད་དོ། །དེའི་ཚེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ཙམ་དུ་དེ་བཞིན་གཤེགས་པའི་བསྟན་པ་འདི་དོན་ཆེ་ཞིང་། ཡོན་ཏན་བསམ་གྱིས་མི་ཁྱབ་པ་དང་ལྡན་པའི་ཆོས་འདུལ་བ་གསུངས་ཏེ། ཇི་ཙམ་དུ་དེ་བཞིན་གཤེགས་པས་བསླབ་པ་ལེགས་པར་བཅས་པ་ནི་ངོ་མཚར་ཏོ། །བཅོམ་ལྡན་འདས་དེང་སླན་ཆད་བདག་སླར་སེམས་ཀྱི་དབང་དུ་མཆི་བར་མི་བགྱིའོ། །སླར་ལོག་པར་ལྟ་བའི་དབང་དུ་མཆི་བར་མི་བགྱིའོ། །སླར་ཁྲོ་བའི་དབང་དུ་མཆི་བར་མི་བགྱིའོ། །སླར་སྡིག་པའི་སེམས་བསྐྱེད་པའི་དབང་དུ་མཆི་བར་མི་བགྱིའོ། །བཅོམ་ལྡན་འདས་བདག་མི་དགེ་བའི་ཆོས་འདི་སྙེད་དང་ལྡན་ན། བཅོམ་ལྡན་འདས་ཀྱི་དྲུང་དུ་མཆི་བར་མི་འཚལ་ལོ་ཞེས་སྨྲས་ཏེ། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པའི་ཞབས་ལ་མགོ་བོས་ཕྱག་འཚལ་ནས་བར་སྣང་ལ་སོང་སྟེ་འཆག་གོ ། དེ་ནས་རྒྱལ་པོ་དགེ་བ་བཀོད་པ་དང་། རྒྱལ་པོའི་ཆུང་མ་དྲི་མ་མེད་པས་བྱིན་པ་དེས། བརྒྱ་སྟོང་རི་བའི་མུ་ཏིག་གི་རྒྱན་ཕྲེང་བཅོམ་ལྡན་འདས་ཀྱི་སྟེང་གི་བར་སྣང་ལ་གཏོར་ཏོ། །མུ་ཏིག་གི་རྒྱན་ཕྲེང་དེ་གཏོར་མ་ཐག་ཏུ་བཅོམ་ལྡན་འདས་ཀྱི་
སྟེང་ན། མུ་ཏིག་གི་རྒྱན་ཕྲེང་གི་ཁང་པ་བརྩེགས་པ་གྲུ་བཞི་ལྷམ་པ་ཀ་བ་བཞི་ཟུག་པ་ངོས་མཉམ་པ་ཤིན་ཏུ་རྣམ་པར་ཕྱེ་བ་བལྟ་ན་སྡུག་པ་གནས་པར་གྱུར་ཏེ། ཁང་པ་བརྩེགས་པ་དེར་རས་བཅོས་བུ་བརྒྱ་སྟོང་དུ་མ་བཏིང་བའི་ཁྲི་བྱུང་ངོ་། །ཁྲི་དེ་དག་ལ་དེ་བཞིན་གཤེགས་པའི་སྐུ་སྐྱིལ་མོ་ཀྲུང་བཅས་ཏེ་བཞུགས་པར་སྣང་ངོ་། །དེ་ནས་རྒྱལ་པོ་དགེ་བ་བཀོད་པ་འདི་སྙམ་དུ་སེམས་ཏེ། སངས་རྒྱས་ཀྱི་ཡེ་ཤེས་འདི་ནི་མཐུ་ཆེ་ཞིང་། དེ་བཞིན་གཤེགས་པ་ནི་ཡོན་ཏན་བསམ་གྱིས་མི་ཁྱབ་པ་དང་ལྡན་པས་འདི་ལྟར་དེ་བཞིན་གཤེགས་པའི་སྐུ་ཁང་པ་བརྩེགས་པའི་དབུས་ན་མཛེས་ཤིང་བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པར་གདའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པས་འཁོར་བཞི་པོ་དེ་དག་ལ་བཀའ་སྩལ་པ། དགེ་སློང་དག་རྒྱལ་པོ་དགེ་བ་བཀོད་པ་ནམ་མཁའི་དཀྱིལ་ན་འདུག་ཅིང་སེང་གེའི་སྒྲ་སྒྲོགས་པ་མཐོང་ངམ། གསོལ་པ་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རྒྱལ་པོ་དགེ་བ་བཀོད་པས་ངའི་བསྟན་པ་ལ་དགེ་སློང་གི་ཚུལ་དུ་བྱས་ནས། བསྐལ་པ་མངོན་འཕགས་རྒྱལ་པོ་ཞེས་བྱ་བ་ལ་འཇིག་རྟེན་གྱི་ཁམས་ཡངས་ལྡན་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སཱ་ལའི་དབང་པོའི་རྒྱལ་པོ་ཞེས་བྱ་བ་འཇིག་རྟེན་དུ་འབྱུང་སྟེ། དགེ་སློང་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སཱ་ལའི་དབང་པོའི་རྒྱལ་པོ་དེའི་བྱང་ཆུབ་སེམས་དཔའི་དགེ་འདུན་དཔག་ཏུ་མེད་པ་དང་། ཉན་ཐོས་ཀྱི་དགེ་འདུན་དཔག་ཏུ་མེད་པར་འགྱུར་རོ། །འཇིག་རྟེན་གྱི་ཁམས་ཡངས་ལྡན་ཡང་། ལག་མཐིལ་ལྟར་མཉམ་པར་འགྱུར་རོ། །དེ་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་དེ་ཡོན་ཏན་བསམ་གྱིས་མི་ཁྱབ་པར་འགྱུར་རོ། །རིགས་ཀྱི་བུ་དག་དེའི་ཚེ་དེའི་དུས་ན་རྒྱལ་པོ་དགེ་བ་བཀོད་པ་ཞེས་བྱ་བར་གྱུར་པ་དེ། གཞན་ཞིག་ཡིན་སྙམ་དུ་ཁྱོད་སོམ་ཉི་འམ་ཡིད་གཉིས་སམ་ཐེ་ཚོམ་ཟ་བར་གྱུར་ན། རིགས་ཀྱི་བུ་དག་ཁྱེད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་པད་མའི་དཔལ་འདི་ཉིད་དེའི་ཚེ་དེའི་དུས་ན་རྒྱལ་པོ་དགེ་བ་བཀོད་པ་ཞེས་བྱ་བར་གྱུར་ཏོ། །རིགས་ཀྱི་བུ་དག་དེའི་ཚེ་དེའི་དུས་ན། རྒྱལ་པོའི་ཆུང་མ་དྲི་མ་མེད་པས་བྱིན་པ་ཞེས་བྱ་བར་གྱུར་པ་དེ་གཞན་ཞིག་ཡིན་སྙམ་དུ་ཁྱོད་སོམ་ཉིའམ་ཡིད་གཉིས་སམ་ཐེ་ཚོམ་ཟ་བར་གྱུར་ན། རིགས་ཀྱི་བུ་དག་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་སྣང་བའི་འོད་ཟེར་གྱིས་བརྒྱན་པའི་རྒྱལ་མཚན་ཞེས་བྱ་བ་འདི་ཉིད་དེའི་ཚེ་དེའི་དུས་ན། རྒྱལ་པོའི་ཆུང་མ་དྲི་མ་མེད་པས་བྱིན་པ་ཞེས་བྱ་བར་གྱུར་ཏེ། རྒྱལ་པོ་དགེ་བ་བཀོད་པ་དང་སེམས་ཅན་དེ་དག་ལ་སྙིང་བརྩེ་བའི་ཕྱིར། རྒྱལ་པོ་དགེ་བ་བཀོད་པའི་ཆུང་མར་ཁས་བླངས་པར་གྱུར་ཏོ། །རིགས་ཀྱི་བུ་དག་དེའི་ཚེ་དེའི་དུས་ན་ཁྱེའུ་དེ་གཉིས་སུ་གྱུར་པ་དེ་གཞན་དག་ཞིག་ཡིན་པ་སྙམ་དུ་ཁྱོད་སོམ་ཉིའམ་ཡིད་གཉིས་སམ་ཐེ་ཚོམ་ཟ་བར་གྱུར་ན། རིགས་ཀྱི་བུ་དག་ཁྱེད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། སྨན་གྱི་རྒྱལ་པོ་དང་སྨན་ཡང་དག་འཕགས་པའི་གཉིས་དེའི་ཚེ་དེའི་དུས་ན། རྒྱལ་པོ་དགེ་བ་བཀོད་པའི་བུར་གྱུར་ཏོ། །རིགས་ཀྱི་བུ་དག་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོ་དང་། སྨན་ཡང་དག་འཕགས་གཉིས་ཡོན་ཏན་བསམ་གྱིས་མི་ཁྱབ་པ་དང་ལྡན་ཏེ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་ལ་དགེ་བའི་རྩ་བ་བསྐྱེད་པའོ། །སྐྱེས་བུ་དམ་པ་འདི་གཉི་ག་ཡང་བསམ་གྱིས་མི་ཁྱབ་པའི་ཆོས་ཀྱིས་ཡང་དག་པར་འཕགས་སོ། །གང་དག་སྐྱེས་བུ་དམ་པ་འདི་གཉིས་ཀྱི་མིང་འཛིན་པ་དེ་དག་ཐམས་ཅད་ཀྱིས་ཀྱང་ལྷ་དང་བཅས་པའི་འཇིག་རྟེན་གྱིས་ཕྱག་བྱས་པར་འགྱུར་རོ། །སྔོན་གྱི་སྦྱོར་
བའི་ལེའུ་འདི་བཤད་པ་ན། སྲོག་ཆགས་བརྒྱད་ཁྲི་བཞི་སྟོང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ ། དམ་པའི་ཆོས་པད་མ་དཀར་པོ་ལས། རྒྱལ་པོ་དགེ་བ་བཀོད་པའི་སྔོན་གྱི་སྦྱོར་བའི་ལེའུ་ཞེས་བྱ་བ་སྟེ་ཉི་ཤུ་རྩ་ལྔ་པའོ།། །།