ལྔ་པ། འཁོར་མང་པོས་ཀུན་ནས་དྲིས་པ་ཞེས་བྱ་བའི་ལེའུ།
དེ་ནས་དེའི་ཚེ་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་རྣམ་པ་སྣ་ཚོགས་བཀྱེ་བ་ནི་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེ་བརྒན་དང་། སྨུག་པོ་སྟེ། ཙུན་དའི་ལུས་ཀུན་སྣང་བར་བྱས་སོ། །ཙུན་དའི་ལུས་ལ་འོད་དེས་རེག་པ་དང་། འཁོར་དང་བཅས་ཏེ་ཞལ་ཟས་མང་པོ་ཐོགས་ཏེ་སངས་རྒྱས་གང་ན་བ་དེར་མྱུར་དུ་སོང་སྟེ། དེ་བཞིན་གཤེགས་པ་དང་། དགེ་སློང་གི་དགེ་འདུན་ལ་མཆོད་པ་ཐ་མ་དབུལ་བའི་ཕྱིར་མཆོད་པའི་ཡོ་བྱད་ཕུན་སུམ་ཚོགས་པ་རྣམ་པ་མང་པོ་ཐོགས་ཏེ་སངས་རྒྱས་ལ་ཉེ་བར་བསྙེན་ཏོ། །དེའི་ཚེ་ན་ལྷ་གཟི་བརྗིད་ཆེན་པོ་དང་ལྡན་པ་རྣམས་འཁོར་བར་བསྐོར་ཏེ་མདུན་ཀྱང་ཆོད་པར་གྱུར་ནས་ཙུན་ད་ལ་ཙུན་ད་ཁྱོད་ཀྱི་མཆོད་པ་རེ་ཞིག་སྡོད་ཅིག་ཅེས་བསྒོའོ། །དེའི་ཚེ་ན་ཡང་དེ་བཞིན་གཤེགས་པས་འོད་ཚད་མེད་དཔག་ཏུ་མེད་པ་རྣམ་པ་སྣ་ཚོགས་བཀྱེ་ནས་ལྷ་རྣམས་ཀྱི་ལུས་ལ་སྣང་བར་བྱས་སོ། །ལྷའི་འཁོར་དེ་དག་འོད་དེས་རེག་མ་ཐག་ཏུ་ལྷ་རྣམས་ཀྱང་གོ་ཕྱེ་ནས་མཆོད་པ་འབུལ་དུ་བཅུག་གོ །དེའི་ཚེ་ན་ལྷ་དང་མི་ཐམས་ཅད་ཀྱང་སོ་སོ་ནས་མཆོད་པ་རྣམ་པ་སྣ་ཚོགས་ཐོགས་ནས་སངས་རྒྱས་ཀྱི་སྤྱན་སྔར་བསྙེན་ཏེ་པུས་མོ་བཙུགས་ནས་བཅོམ་ལྡན་འདས་ཀྱིས་དགེ་སློང་གི་དགེ་འདུན་འདི་དག་བདག་ཅག་གི་མཆོད་པ་ལེན་དུ་གནང་བར་མཛད་དུ་གསོལ་ཞེས་དེ་བཞིན་གཤེགས་པ་ལ་གསོལ་ཏོ། །དགེ་སློང་གི་དགེ་འདུན་རྣམས་ཀྱང་དུས་ཤེས་པས་ལྷུང་
བཟེད་ཐོགས་ནས་སེམས་རྩེ་གཅིག་ཏུ་སྤྱོད་ལམ་ལ་གནས་སོ། །དེའི་ཚེ་ཙུན་དས་སངས་རྒྱས་དང་དགེ་འདུན་བཞུགས་པའི་གདན་སེང་གེའི་ཁྲི་རྣམ་པ་མང་པོ་བཙུགས་ནས། བ་དན་དང་། རྒྱལ་མཚན་དང་། གདུགས་བྲེས་ཏེ། སྤོས་དང་། མེ་ཏོག་དང་། ཕྲེང་བས་ཀྱང་ཡོངས་སུ་བརྒྱན་ཏོ། །དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་ཁམས་འདི་རྒྱན་གྱིས་ཡོངས་སུ་བརྒྱན་པ་ནི་ཇི་ལྟར་ནུབ་ཕྱོགས་ཀྱི་བདེ་བ་ཅན་གྱི་འཇིག་རྟེན་གྱི་ཁམས་ལྟ་བུར་གྱུར་ཏོ། །དེ་ནས་ཙུན་ད་སངས་རྒྱས་ཀྱི་སྤྱན་སྔར་མི་དགའ་བའི་མྱ་ངན་ཆེན་པོས་ནོན་ནས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཐུགས་བརྩེ་བའི་སླད་དུ་བསྐལ་པ་གཅིག་གམ་བསྐལ་པ་གཅིག་འགྲིབས་ཀྱི་བར་དུ་བཞུགས་སུ་གསོལ་ལོ། །བཅོམ་ལྡན་འདས་ཀྱིས་ཙུན་ད་ལ་བཀའ་སྩལ་པ། ང་འཇིག་རྟེན་ན་ཡུན་དུ་གནས་པར་འདོད་ན་ཁྱོད་ཀྱིས་མཆོད་པ་ཐ་མར་འབུལ་བའི་ཡོ་བྱད་མྱུར་དུ་ཕུལ་ལ་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་གྱིས་ཤིག །དེའི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་དང་། ལྷ་དང་མི་ལ་སོགས་པ་ཐམས་ཅད་ཀྱིས་སྐད་འཐུན་པར་འདི་སྐད་ཅེས་སྨྲས་སོ། །ངོ་མཚར་ཆེའོ། །ཙུན་ད་ཁྱོད་བསོད་ནམས་ཆེན་པོ་ཡོངས་སུ་རྫོགས་པས་དེ་བཞིན་གཤེགས་པ་ཁྱོད་ཀྱི་མཆོད་པ་ཐ་མ་བཞེས་སོ། །བདག་ཅག་ནི་བསོད་ནམས་མེད་པས་མཆོད་པའི་ཡོ་བྱད་བཤམས་པ་ཡང་ཆུད་ཟོས་པར་གྱུར་ཏོ་ཞེས་སྨྲས་སོ། །དེའི་ཚེ་ན་བཅོམ་ལྡན་འདས་ཀྱིས་དེ་དག་གི་རེ་བ་ཡོངས་སུ་རྫོགས་པར་བྱ་བའི་ཕྱིར་སྐུའི་བ་སྤུའི་ཁུང་རེ་རེ་ནས་སྤྲུལ་པའི་སངས་རྒྱས་ཚད་མེད་པ་སྤྲུལ་ཏེ། སངས་རྒྱས་དེ་དག་རེ་རེ་ལ་ཡང་དགེ་སློང་གི་འཁོར་ཚད་མེད་པ་སྙེད་ཀྱིས་བསྐོར་ནས་བཅོམ་ལྡན་འདས་དང་དགེ་འདུན་གྱི་འཁོར་ཚད་མེད་པ་དེ་དག་གིས་ཀྱང་དེ་དག་གི་མཆོད་པ་བཞེས་པར་བསྟན་ཏོ། །བཅོམ་ལྡན་འདས་ཤཱཀྱ་ཐུབ་པ་ཡང་ཙུན་དའི་མཆོད་པ་བཞེས་སོ། །དེའི་ཚེ་ཙུན་དས་ཕུལ་བའི་བསོད་སྙོམས་འབྲས་ཀྱང་ཡུལ་དབུས་གྱུར་འཆང་གི་བྲེ་ཁལ་ཚད་བརྒྱད་ཕུལ་བ་ཡང་བཅོམ་ལྡན་འདས་ཀྱི་བྱིན་གྱི་རླབས་ཀྱིས་འཁོར་གྱི་དཀྱིལ་
འཁོར་དེ་དག་ཐམས་ཅད་བསོད་སྙོམས་ཀྱིས་ཆོག་པར་གྱུར་ཏོ། །དེའི་ཚེ་ཙུན་ད་དེ་ལྟ་བུར་གྱུར་པ་མཐོང་ནས་རབ་ཏུ་དགའ་བ་སྐྱེས་ཏེ། འཁོར་གྱི་དཀྱིལ་འཁོར་དེ་དག་ཐམས་ཅད་ཀྱང་རབ་ཏུ་དགའ་བར་གྱུར་ཏོ། །དེའི་ཚེ་ན་འཁོར་གྱི་དཀྱིལ་འཁོར་དེ་དག་ཐམས་ཅད་བཅོམ་ལྡན་འདས་ཀྱི་བྱིན་གྱི་རླབས་ཀྱིས་སོ་སོའི་ཡིད་ལ་དེ་བཞིན་གཤེགས་པ་ནི་བདག་ཅག་གི་མཆོད་པ་བཞེས་པས་རིང་པོ་མི་ཐོགས་པར་ཡོངས་སུ་མྱ་ངན་ལས་འདའོ་སྙམ་དུ་སེམས་པར་གྱུར་ཏོ། །དེ་སྙམ་དུ་བསམས་ནས་སོ་སོའི་སེམས་ལ་མྱ་ངན་དང་དགའ་བ་འདྲེས་པར་གྱུར་ཏོ། །དེའི་ཚེ་ན་ཚལ་དེའི་ས་གཞི་ཤིན་ཏུ་ཆུང་ཞིང་དོག་པ་ལས་དེ་བཞིན་གཤེགས་པའི་བྱིན་གྱི་རླབས་ཀྱིས་ཁབ་ཀྱི་རྩེ་མོ་འཛུགས་པའི་ས་ཙམ་ལ་ཡང་ཚད་མེད་པའི་སངས་རྒྱས་བཅོམ་ལྡན་འདས་འཁོར་དང་བཅས་ཏེ་བཞུགས་ཤིང་བསོད་སྙོམས་བཞེས་ཏེ། བསོད་སྙོམས་དེ་དག་ཀྱང་བྱེ་བྲག་མེད་པར་མཐོང་ངོ་། །དེའི་ཚེ་ན་ལྷ་དང་། མི་དང་། ལྷ་མ་ཡིན་ལ་སོགས་པ་ཐམས་ཅད་མཆི་མ་བླགས་ཏེ་ངུས་ནས་འདི་སྐད་ཅེས་སྨྲས་སོ། །དེ་བཞིན་གཤེགས་པས་བདག་ཅག་གི་མཆོད་པ་ཐ་མ་བཞེས་ཏེ་མཆོད་པ་བཞེས་ནས་ཡོངས་སུ་མྱ་ངན་ལས་འདས་པར་གཤེགས་ན་བདག་ཅག་གིས་སླན་ཆད་མཆོད་པ་སུ་ལ་བགྱི། བདག་ཅག་གི་བླ་ན་མེད་པའི་ཁ་ལོ་སྒྱུར་བ་དང་གཏན་བྲལ་བས་ན་མིག་ལྡོངས་པར་གྱུར་ཏོ་ཞེས་སྨྲས་སོ། །དེའི་ཚེ་བཅོམ་ལྡན་འདས་ཀྱིས་འཁོར་གྱི་དཀྱིལ་འཁོར་དེ་དག་སྤྲོ་བ་སྲིང་བའི་ཕྱིར་ཚིགས་སུ་བཅད་དེ་བཀའ་སྩལ་པ། ཁྱེད་རྣམས་མྱ་ངན་མ་བྱེད་ཅིག །སངས་རྒྱས་ཆོས་ཉིད་དེ་བཞིན་ཏེ། །ང་ནི་མྱ་ངན་འདས་ནས་ཀྱང་། །ཚད་མེད་པ་ཡི་བསྐལ་པ་སྙེད། །རྟག་ཏུ་བདེ་བའི་མཆོག་ལ་སྤྱོད། །རྟག་ཏུ་རབ་ཏུ་བདེ་ལ་གནས། །ཁྱེད་རྣམས་ཤིན་ཏུ་བརྟགས་པར་ཉོན། །མྱ་ངན་འདའ་བ་ངས་བཤད་ཀྱིས། །ཟས་ཀྱི་འདུ་ཤེས་མེད་པས་ན། །བཀྲེས་ཤིང་སྐོམ་པའི་སྐྱོན་རྣམས་མེད། །དེང་འདིར་ཁྱེད་ལ་སོགས་པ་ལ། །རྗེས་སུ་གཞོལ་བའི་སྨོན་ལམ་བཏབ། །འཁོར་གྱི་དཀྱིལ་འཁོར་འདི་ཐམས་ཅད། །རབ་ཏུ་བདེ་བ་ཐོབ་པར་བྱ། །ཁྱེད་རྣམས་ཐོས་ནས་ནན་ཏན་བྱོས། །སངས་རྒྱས་ཆོས་རྣམས་རྟག་པ་ལ། །ནམ་ཞིག་ཁྭ་དང་འུག་པ་གཉིས། །ཚང་གཅིག་
ནང་དུ་གནས་བཅས་ཏེ། །དེ་གཉིས་སྤུན་བཞིན་གྱུར་པ་ན། །དེ་ན་མྱ་ངན་འདའ་བར་འགྱུར། །དེ་བཞིན་གཤེགས་པས་ཐམས་ཅད་ལ། །སྒྲ་གཅན་འཛིན་ལྟར་གཟིགས་པས་ན། །འགྲོ་བ་ཀུན་གྱི་གཙོར་གྱུར་པ། །ཅི་ཕྱིར་ཡོངས་སུ་མྱ་ངན་འདའ། །ནམ་ཞིག་སྦྲུལ་དང་སྲེ་མོ་གཉིས། །ཁུང་གཅིག་ནང་དུ་ཚང་བཅས་ཏེ། །དེ་གཉིས་སྤུན་ལྟར་གྱུར་པ་ན། །དེ་ན་ཡོངས་སུ་མྱ་ངན་འདའ། །དེ་བཞིན་གཤེགས་པས་ཐམས་ཅད་ལ། ། སྒྲ་གཅན་འཛིན་ལྟར་ཀུན་གཟིགས་ཏེ། །སེམས་ཅན་ཀུན་གྱི་གཙོར་གྱུར་པ། །ཅི་ཕྱིར་ཡོངས་སུ་མྱ་ངན་འདའ། །ཅི་སྟེ་མེ་ཏོག་འདབ་བདུན་པོ། །ཀ་ཤི་ཀ་ཡི་དྲིར་གྱུར་ཏམ། །ཀ་ལ་ཀ་ཡི་ཤིང་ལས་ནི། །ཙིན་དའི་འབྲས་བུ་འཆགས་སྲིད་ཀྱི། །དེ་བཞིན་གཤེགས་པས་ཐམས་ཅད་ལ། །སྒྲ་གཅན་འཛིན་ལྟར་གཟིགས་པས་ན། །ཅི་ཕྱིར་སྙིང་རྗེ་ཀུན་བཏང་སྟེ། །ཡོངས་སུ་མྱ་ངན་འདའ་བར་གཤེགས། །ཅི་སྟེ་ལོག་སྲེད་ཅན་དེ་དག །སྙིང་པོར་བྱང་ཆུབ་སངས་རྒྱས་ཏེ། །བདེ་བའི་མཆོག་ལ་གནས་གྱུར་ན། །དེ་ན་མྱ་ངན་འདའ་བར་འགྱུར། །དེ་བཞིན་གཤེགས་པས་ཐམས་ཅད་ལ། །སྒྲ་གཅན་འཛིན་ལྟར་གཟིགས་པས་ན། །ཅི་ཕྱིར་སྙིང་རྗེ་ཀུན་བཏང་སྟེ། །ཡོངས་སུ་མྱ་ངན་འདའ་བར་གཤེགས། །གལ་ཏེ་སོ་སོའི་སྐྱེ་བོ་དག །དུས་གཅིག་མཉམ་པར་སངས་རྒྱས་ཏེ། །ཉེས་པའི་སྐྱོན་རྣམས་ཀུན་སྤངས་ན། །དེ་ན་མྱ་ངན་འདའ་བར་འགྱུར། །དེ་བཞིན་གཤེགས་པས་ཐམས་ཅད་ལ། །སྒྲ་གཅན་འཛིན་ལྟར་གཟིགས་པས་ན། །ཅི་ཕྱིར་སྙིང་རྗེ་ཀུན་བཏང་སྟེ། །ཡོངས་སུ་མྱ་ངན་འདའ་བར་གཤེགས། །ཅི་སྟེ་སྦྲང་བུ་ཆུང་ངུའི་གཅིན། །ས་ཆེན་འདི་ཡང་འཇིག་ནུས་ལ། །རི་དང་ལྗོངས་ཀུན་མེད་པར་རམ། །རྒྱ་མཚོ་ཆེན་པོ་འགེངས་འགྱུར་ན། །དེ་ན་ཡོངས་སུ་མྱ་ངན་འདའ། །སྙིང་རྗེའི་སེམས་ཀྱིས་ཐམས་ཅད་ལ། །སྒྲ་གཅན་འཛིན་ལྟར་གཟིགས་པས་ན། །འགྲོ་བ་ཀུན་གྱི་གཙོ་འགྱུར་བ། །ཅི་ཕྱིར་ཡོངས་སུ་མྱ་ངན་འདའ། །དེ་བས་ཁྱེད་ལ་སོགས་པ་དག །དམ་པའི་ཆོས་ལ་མོས་པར་གྱིས། །མྱ་ངན་གྱིས་ཀྱང་མ་གདུངས་པར། །ཡི་བློང་ངུ་བར་མ་བྱེད་ཅིག །ཡང་དག་ལ་ནི་གང་
སྤྱོད་པ། །དེ་བཞིན་གཤེགས་པ་རྟག་པ་སྒོམ། །དེ་ལྟར་དམ་ཆོས་དེ་ཉིད་ཀྱང་། །མི་འགྱུར་རྟག་ཏུ་གནས་པར་རྟོགས། །གཞན་ཡང་དཀོན་མཆོག་གསུམ་དག་ལ། །རྟག་ཏུ་གནས་པར་འདུ་ཤེས་སྐྱེད། །དེ་ལ་ཤིན་ཏུ་སྲུང་བ་ན། །སྔགས་ཀྱི་མཐུ་དབང་ཤིང་སྐམ་ལ། །མེ་ཏོག་དག་ཀྱང་སྐྱེ་བ་བཞིན། །དེ་ནི་དཀོན་མཆོག་གསུམ་པོ་ལ། །འཁོར་རྣམ་བཞི་སྟེ་ལེགས་པར་ཉོན། །ཐོས་ནས་ཤིན་ཏུ་དགའ་བཞིན་དུ། །བྱང་ཆུབ་ཏུ་ནི་སེམས་བསྐྱེད་ཅིང་། །གང་ཞིག་དཀོན་མཆོག་གསུམ་པོ་ལ། །དོན་དམ་བདེན་པར་རྟག་འཛིན་ན། །དེ་ནི་སངས་རྒྱས་མང་པོ་ཡི། །སྨོན་ལམ་ཕུལ་གྱི་མཆོག་ཡིན་ནོ། །དེ་ལ་དགེ་སློང་ངམ། དགེ་སློང་མའམ། དགེ་སྙེན་ནམ། དགེ་བསྙེན་མ་གང་ཞིག་དེ་བཞིན་གཤེགས་པའི་སྨོན་ལམ་མཆོག་གི་སྨོན་ལམ་བཏབ་པ་ནི་གླེན་པའམ་གཏི་མུག་ཅན་མ་ཡིན་ཏེ། མཆོད་པའི་གནས་ཡིན་པར་རིག་པར་བྱའོ། །སྨོན་ལམ་དེའི་མཐུས་ཡོན་ཏན་གྱི་འབྲས་བུ་སྨིན་པ་ནི་དགྲ་བཅོམ་པ་ལྟར་འཇིག་རྟེན་གྱི་ཕུལ་གྱི་མཆོག་ཏུ་འགྱུར་རོ། །གང་ཞིག་དེ་ལྟར་དཀོན་མཆོག་གསུམ་ལ་རྟག་པ་ཉིད་དུ་མི་ཤེས་ན་དེ་ནི་རིགས་ངན་ཡིན་པར་རིག་པར་བྱའོ། །གང་ཞིག་ཆོས་རྣམ་པ་གསུམ་པོ་རྟག་པ་ཉིད་དུ་ཤེས་ན་ཆོས་བདེན་པའི་རྐྱེན་གྱིས་སྡུག་བསྔལ་བ་དང་འབྲལ་ཞིང་རབ་ཏུ་བདེ་བར་འགྱུར། གནོད་པ་མེད་པར་འགྱུར། བར་ཆད་བྱེད་པ་མེད་པར་འགྱུར་རོ། །དེའི་ཚེ་ལྷ་དང་མི་དང་། ལྷ་མ་ཡིན་ལ་སོགས་པ་འཁོར་དེ་དག་གིས་དེ་སྐད་ཅེས་གསུངས་པ་ཐོས་ནས་རབ་ཏུ་དགའ་མགུ་རངས་པའི་སེམས་སྐྱེས་ཏེ། ཤིན་ཏུ་དུལ་ཞིང་དེས་པའི་སེམས་སུ་གྱུར། སྒྲིབ་པ་ཀུན་ཤིན་ཏུ་བསལ་བའི་སེམས་སུ་གྱུར། མཐོན་དམན་མེད་པའི་སེམས་སུ་གྱུར་ཏེ། གཟི་བརྗིད་རྣམ་པར་དང་བ་དང་། འཛུམ་པའི་མདངས་ཅན་དུ་གྱུར་ནས་དེ་བཞིན་གཤེགས་པ་རྟག་པ་ཉིད་དུ་ཤེས་ཏེ། དེ་བས་ན་ལྷ་རྫས་ཀྱི་མཆོད་པ་རྣམ་པ་མང་པོས་མཆོད་དེ། ལྷ་རྫས་ཀྱི་མེ་ཏོག་དང་། སྤོས་དང་། ཕྱེ་མ་དང་། བྱུག་སྤོས་དང་། ལྷ་རྫས་ཀྱི་རོལ་མོས་ཡོངས་སུ་མཆོད་དོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་བཀའ་སྩལ་པ། རིགས་ཀྱི་བུ་ཁྱོད་ཀྱིས་འཁོར་
གྱི་དཀྱིལ་འཁོར་འདི་དག་ངོ་མཚར་རྨད་དུ་གྱུར་པ་མཐོང་ངམ། འོད་སྲུང་གིས་གསོལ་པ། མཐོང་ངོ་། །བཅོམ་ལྡན་འདས་དེ་བཞིན་གཤེགས་པ་ཚད་མེད་པ་དཔག་ཏུ་མེད་པ་དག་འཁོར་མང་པོའི་མཆོད་པ་ཡོངས་སུ་བཞེས་པ་མཐོང་ངོ་། །གཞན་ཡང་སངས་རྒྱས་མང་པོའི་སྐུ་ནི་རབ་ཏུ་ཆེ་ལ། བཞུགས་པའི་གདན་ནི་ཁབ་ཀྱི་རྩེ་མོ་ཙམ་སྟེ། འཁོར་མང་པོས་ཡོངས་སུ་སྐོར་ཀྱང་གཅིག་ལ་གཅིག་འཛེར་བར་མ་གྱུར་པར་མཐོང་ངོ་། །གཞན་ཡང་འཁོར་མང་པོ་འདི་དག་སྨོན་ལམ་ཆེན་པོ་བསྐྱེད་ནས་ཚིགས་སུ་བཅད་པ་བཅུ་གསུམ་པོ་སྨྲས་པ་ཡང་མཐོང་ངོ་། །གཞན་ཡང་འཁོར་གྱི་དཀྱིལ་འཁོར་འདི་དག་སོ་སོ་ནས་འདི་སྙམ་དུ། དེ་བཞིན་གཤེགས་པ་ནི་བདག་འབའ་ཞིག་གི་མཆོད་པ་བཞེས་སོ་སྙམ་དུ་སེམས་པར་ཡང་འཚལ་ཏོ། །གལ་ཏེ་ཙུན་དས་ཕུལ་བའི་མཆོད་པ་རྡུལ་ཕྲ་མོར་བཏགས་ཏེ། སངས་རྒྱས་གཅིག་ལ་རྡུལ་ཕྲ་མོ་ཅིག་ཙམ་ཕུལ་ཀྱང་ཆོག་པའམ་ཁྱབ་པར་མི་འགྱུར་ན་དེ་བཞིན་གཤེགས་པའི་བྱིན་གྱི་རླབས་ཀྱིས་ཐམས་ཅད་ཁྱེད་ཅིང་ཆོག་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་ལ་སོགས་པས་ངོ་མཚར་རྨད་དུ་གྱུར་པ་འདི་དག་ཤེས་སོ། །དེ་ཡང་དེ་བཞིན་གཤེགས་པས་ཐབས་སུ་བསྟན་ཏེ། ཉན་ཐོས་ཀྱི་འཁོར་རྣམས་དང་། ལྷ་མ་ཡིན་ལ་སོགས་པས་དེ་བཞིན་གཤེགས་པ་ནི་རྟག་པའི་ཆོས་ཉིད་དུ་ཤེས་སོ། །དེའི་ཚེ་བཅོམ་ལྡན་འདས་ཀྱིས་ཙུན་ད་ལ་བཀའ་སྩལ་པ། ཁྱོད་ཀྱིས་མཐོང་བ་འདི་དག་ངོ་མཚར་རྨད་དོ་སྙམ་སེམས་སམ། གསོལ་པ་དེ་བཞིན་ནོ། །བཅོམ་ལྡན་འདས་བདག་སྔར་ཚད་མེད་པའི་སངས་རྒྱས་མང་པོ་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་ཡོངས་སུ་བརྒྱན་པར་མཐོང་ན་ད་ནི་ཐམས་ཅད་བྱང་ཆུབ་སེམས་དཔའ་སེམས་དཔའ་ཆེན་པོ་བྱད་གཟུགས་མཆོག་ཏུ་གྱུར་ཏེ། སངས་རྒྱས་ཉག་གཅིག་སྨན་གྱི་སྡོང་པོ་ལྟར་བཞུགས་ཤིང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཡོངས་སུ་བསྐོར་བར་མཐོང་ངོ་། །བཅོམ་ལྡན་འདས་ཀྱིས་ཙུན་ད་ལ་བཀའ་སྩལ་པ། ཁྱོད་ཀྱིས་སྔར་སངས་རྒྱས་ཚད་མེད་པ་མཐོང་བ་ནི་ངས་མངོན་
པར་སྤྲུལ་པ་ཤ་སྟག་སྟེ། སེམས་ཅན་ཐམས་ཅད་ལ་ཕན་པ་དང་བདེ་བའི་དོན་གྱི་ཕྱིར། དགའ་བར་བྱ་བའི་ཕྱིར་མངོན་པར་སྤྲུལ་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཀྱང་སྤྱོད་པ་བསམ་གྱིས་མི་ཁྱབ་སྟེ། ཚད་མེད་པའི་སངས་རྒྱས་ཀྱི་མཛད་པ་ཤ་སྟག་གོ །ཙུན་ད་ཁྱོད་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོའི་སྤྱོད་པ་དང་ལྡན་ཏེ། ས་བཅུ་ལ་རབ་ཏུ་གནས་པས་བྱང་ཆུབ་སེམས་དཔའི་སྤྱོད་པ་རྫོགས་པར་ལྡན་ནོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། དེ་དེ་བཞིན་ནོ། །དེ་དེ་བཞིན་ཏེ། བཅོམ་ལྡན་འདས་ཀྱིས་གསུངས་པ་བཞིན་ནོ། །ཙུན་ད་འདི་ནི་སྤྱོད་པ་ཐམས་ཅད་བྱང་ཆུབ་སེམས་དཔའི་སྤྱོད་པ་དང་ལྡན་ཏེ། བདག་ཅག་རྗེས་སུ་ཡི་རང་ངོ་། །དེ་བཞིན་གཤེགས་པས་ཕྱི་མ་མ་འོངས་པའི་སྐྱེ་བོ་ཚད་མེད་པ་ལ་སྣང་བ་ཆེན་པོ་མཛད་པའི་སླད་དུ་ཐེག་པ་ཆེན་པོའི་མདོ་སྡེ་ཡོངས་སུ་མྱ་ངན་ལས་འདས་པ་ཆེན་པོ་གསུངས་སོ། །བཅོམ་ལྡན་འདས་མདོ་སྡེ་ཐམས་ཅད་ལས། བཅོམ་ལྡན་འདས་ཀྱིས་གསུངས་པ་ལྷག་མ་དང་བཅས་པའི་དོན་ལགས་སམ། ལྷག་མ་མ་མཆིས་པའི་དོན་དུ་གསུངས་པ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ངས་གསུངས་པ་ནི་ལྷག་མ་དང་བཅས་པ་ཡང་ཡོད་ལ། ལྷག་མ་མེད་པའི་དོན་ཡང་ཡིན་ནོ། །དེ་ནས་ཙུན་དས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཀྱིས་གསུངས་པ་ལྟར་ཟང་ཟིང་བདོག་པ་ཐམས་ཅད་སྦྱིན་པ་བྱིན་པ་ནི་བསྔགས་ཤིང་བསྟོད་མོད་ཀྱི། རྣམ་པར་སྨོད་པར་མི་བྱའོ། ། ཞེས་བཅོམ་ལྡན་འདས་ཀྱིས་གསུངས་པའི་དོན་ཇི་ལྟ་བུ། ཚུལ་ཁྲིམས་དང་ལྡན་པ་དང་ཚུལ་ཁྲིམས་ངན་པ་ཅན་ལ་བྱེ་བྲག་གི་ཁྱད་པར་ཅི་མཆིས། བཅོམ་ལྡན་འདས་ཀྱིས་བཀའ་སྩལ་པ། རྣམ་པ་གཅིག་པུ་མ་གཏོགས་པར་སྦྱིན་པ་གཞན་ཐམས་ཅད་ལ་བསྟོད་ཅིང་བསྔགས་སོ། །ཙུན་དས་གསོལ་པ། གཅིག་པུ་མ་གཏོགས་ཞེས་བགྱི་བ་དེ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། དེ་ནི་མདོ་སྡེ་འདི་ལས་གང་ཚུལ་ཁྲིམས་ངན་པ་ཅན་དུ་གསུངས་པའོ། །ཙུན་དས་ཡང་གསོལ་པ། བཅོམ་ལྡན་
འདས་དེའི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ཚུལ་ཁྲིམས་ངན་པ་ཅན་ཞེས་བྱ་བ་ནི་ལོག་སྲེད་ཅན་ལ་བྱའོ། །དེ་མ་ཡིན་པ་སྦྱིན་པ་ཐམས་ཅད་ལ་བསྟོད་ཅིང་བསྔགས་ཏེ། འབྲས་བུ་ཆེན་པོ་ཐོབ་པར་འགྱུར་རོ། །ཙུན་དས་ཡང་གསོལ་པ། ལོག་སྲེད་ཅན་ཞེས་བགྱི་བ་ཇི་ལྟ་བུ་ལགས། བཅོམ་ལྡན་འདས་ཀྱིས་ཙུན་ད་ལ་བཀའ་སྩལ་པ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་ཞིག་ཚིག་ངན་པ་སྨྲ་ཞིང་དམ་པའི་ཆོས་ལ་སྐུར་པ་འདེབས་པ་དང་། ཁ་ན་མ་ཐོ་བའི་ལས་བྱས་ཀྱང་འགྱོད་པའམ། ཁྲེལ་བའམ། འཛེམ་པའི་སེམས་མེད་དེ། གང་ཟག་དེ་ལྟ་བུ་ནི་ལོག་སྲེད་ཅན་གྱི་ལམ་ལ་འབབ་པ་ཞེས་བྱའོ། །གང་ཞིག་རྩ་བ་བཞི་ཉམས་སམ། མཚམས་མེད་པ་ལྔ་བྱས་པར་བདག་ཉིད་ཀྱིས་ཤེས་ལ། དེ་ལྟར་ཁ་ན་མ་ཐོ་བ་ཆེན་པོ་བྱས་ཀྱང་ཐོག་མ་ནས་འཇིགས་པའམ་ཁྲེལ་ཞིང་འཛེམ་པའི་སེམས་མེད་དེ། མི་འགྱོད་མི་འཐོལ་བ་དང་དམ་པའི་ཆོས་ལ་ཕངས་ཤིང་གཅེས་པར་མི་འཛིན་ཏེ། རྣམ་པར་གཞག་པའི་སེམས་མེད་ཀྱི། བརྙས་ཤིང་སྐུར་པ་དང་ཉེས་པ་མང་པོ་ཞེས་སྐྱོན་འདོགས་པའི་གང་ཟག་དེ་ཡང་ལོག་སྲེད་ཅན་གྱི་ལམ་ལ་འབབ་པ་ཞེས་བྱའོ། །གཞན་ཡང་གང་ཞིག་སངས་རྒྱས་དང་། ཆོས་དང་དགེ་འདུན་མེད་དོ་ཞེས་སྨྲ་བ་དེ་ཡང་ལོག་སྲེད་ཅན་གྱི་ལམ་ལ་འབབ་པ་ཞེས་བྱའོ། །དེ་ལྟར་ལོག་སྲེད་ཅན་འདི་འབའ་ཞིག་མ་གཏོགས་པ་བྱིས་པ་གཞན་ཐམས་ཅད་ལ་བསྟོད་ཅིང་བསྔགས་སོ།། །།བམ་པོ་བཅུ་བཞི་པ། དེ་ནས་ཙུན་དས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཚུལ་ཁྲིམས་ངན་པ་ཅན་གྱི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། གང་ཚུལ་ཁྲིམས་རྩ་བ་བཞི་ཉམས་པ་མཚམས་མེད་པ་ལྔ་བྱས་པ་དང་། དམ་པའི་ཆོས་ལ་རྣམ་པར་སྐུར་པ་འདེབས་པ་དེ་ནི་ཚུལ་ཁྲིམས་ངན་པ་ཞེས་བྱའོ། །ཙུན་དས་ཡང་གསོལ་པ། དེ་ལྟར་ཚུལ་ཁྲིམས་ངན་པ་ཅན་དེ་རྣམ་པར་གྲོལ་བའི་སྐལ་བ་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། རྒྱུ་དང་རྐྱེན་དུ་ལྡན་ན་གྲོལ་བའི་སྐལ་བ་ཡོད་དེ།
གལ་ཏེ་ཆོས་གོས་ཀྱང་གྱོན་ལ་ཡོངས་སུ་མ་སྤངས། ཁྲེལ་ཞིང་འཛེམ་པ་དང་འཇིགས་པའི་སེམས་དང་ཡང་ལྡན། ཤིན་ཏུ་ཡང་འགྱོད་ལ་འདི་སྙམ་དུ་ཀྱི་ཧུད་བདག་གིས་ཅིའི་ཕྱིར་ཁ་ན་མ་ཐོ་བའི་ལས་ཆེན་པོ་འདི་བྱས། ཀྱི་ཧུད་བདག་གིས་ཅིའི་ཕྱིར་སྡུག་བསྔལ་དུ་འགྱུར་བའི་ལས་འདི་བྱས་སྙམ་དུ་ཤིན་ཏུ་འགྱོད་པའི་སེམས་སྐྱེས་ལ། ཆོས་བསྲུང་བའི་སེམས་དང་ཆོས་རྣམ་པར་གཞག་པའི་སེམས་ཀྱང་བསྐྱེད་དེ། ཆོས་བཟུང་ཞིང་འཛིན་པ་ལ་མཆོད་པར་བྱེད་པ་དང་། ཐེག་པ་ཆེན་པོའི་མདོ་སྡེ་འདོན་ཅིང་ཀློག་པ་ལ་ཞུ་བ་དང་། གསོལ་བ་འདེབས་པ་དང་། བདག་ཀྱང་འཆང་བ་དང་། འཛིན་པ་དང་། ཀློག་པ་དང་། འདོན་པ་དང་། ཁོང་དུ་ཆུད་པར་བྱེད་ལ། གཞན་ལ་ཡང་རྒྱས་པར་སྟོན་ཅིང་འཆད་པའི་གང་ཟག་དེ་ནི་ཚུལ་ཁྲིམས་ངན་པ་ཅན་ཞེས་མི་བྱའོ། །དེ་ཅིའི་ཕྱིར་ཞེ་ན། རིགས་ཀྱི་བུ་འདི་ལྟ་སྟེ་དཔེར་ན་ཉི་མ་ཤར་ན་ན་བུན་དང་། ཁུག་རྣ་མི་སྣང་བའི་མུན་པ་ཀུན་སེལ་བར་འགྱུར་རོ། །ཡོངས་སུ་མྱ་ངན་ལས་འདས་པའི་མདོ་སྡེ་ཆེན་པོ་འདི་འཇིག་རྟེན་དུ་བྱུང་བ་ཡང་དེ་དང་འདྲ་སྟེ། སེམས་ཅན་གྱིས་བསྐལ་པ་ཚད་མེད་པའི་ཁ་ན་མ་ཐོ་བའི་ལས་ཅི་བྱས་པ་ཐམས་ཅད་སེལ་བར་ནུས་སོ། །དེ་བས་ན་མདོ་སྡེ་འདི་ལས་དམ་པའི་ཆོས་ཀྱི་སྐྱབས་བྱས་པ་དག་འབྲས་བུ་ཆེན་པོ་ཐོབ་པར་འགྱུར་ཏེ། ཚུལ་ཁྲིམས་ངན་པ་ཅན་དག་རྣམ་པར་དགྲོལ་ནུས་སོ་ཞེས་བཤད་པ་ཡིན་ནོ། །དེ་ལ་གང་ཞིག་དམ་པའི་ཆོས་ལ་སྐུར་ཀྱང་ཤིན་ཏུ་འགྱོད་ཅིང་འཐོལ་ལ། ཆོས་ལ་སྐྱབས་སུ་སོང་ནས་མི་དགེ་བའི་ལས་བྱས་པ་ཐམས་ཅད་དྲན་པར་བྱས་ཏེ། དཔེར་ན་མི་ཞིག་གསད་པའི་ལས་བྱས་ན་ཤིན་ཏུ་འཇིགས་པའི་སེམས་སྐྱེ་བ་ལྟར་རམ། རབ་ཏུ་ངོ་ཚ་བ་དང་ཁྲེལ་བའི་སེམས་སྐྱེས་ཏེ། དམ་པའི་ཆོས་འདི་མ་གཏོགས་པར་གཞན་གུད་ན་སྐྱབས་དང་དཔུང་གཉེན་དུ་འགྱུར་བ་མེད་དོ་སྙམ་པའི་སེམས་སྐྱེས་ཏེ། དམ་པའི་ཆོས་ལ་སྐྱབས་སུ་འགྲོ་བ་ཇི་ལྟར་བསྟན་ཅིང་གསུངས་པ་བཞིན་དུ་སྐྱབས་སུ་སོང་བའི་གང་ཟག་དེ་ལ་སྦྱིན་པ་བྱིན་ན་བསོད་ནམས་དཔག་ཏུ་མེད་པ་འཐོབ་ཅིང་འཇིག་རྟེན་གྱི་མཆོད་པའི་གནས་སུ་འགྱུར་རོ། །གང་ཞིག་དེ་ལྟར་གང་དུ་སྨོས་པའི་ཁ་
ན་མ་ཐོ་བའི་ལས་བྱས་ནས་ཟླ་བ་གཅིག་གམ། ཞག་བཅོ་ལྔའི་བར་དུ་སྐྱབས་སུ་འགྲོ་བའམ་འཐོལ་བའམ། འགྱོད་པའི་སེམས་མི་སྐྱེ་བའི་གང་ཟག་དེ་ལ་སྦྱིན་པ་བྱིན་ན་ཡང་འབྲས་བུ་ཆེན་པོར་མི་འགྱུར་ཏེ། མཚམས་མེད་པ་ལྔའི་སྡིག་བྱས་པ་ཡང་དེ་དང་འདྲ་སྟེ། འགྱོད་པའི་སེམས་སྐྱེས་ལ། ཁོང་ནས་ངོ་ཚ་བ་དང་ཁྲེལ་བའི་སེམས་སུ་ལྡན་ཏེ། བདག་གིས་མི་དགེ་བའི་ལས་བྱས་པས་སྡུག་བསྔལ་ཆེན་པོ་མྱོང་བར་འགྱུར་རོ། །སྙམ་སེམས་ཏེ་དམ་པའི་ཆོས་རྣམ་པར་གཞག་པའི་ཕྱིར་མགོན་དང་སྐྱབས་བྱེད་ན་དེ་ཡང་མཚམས་མེད་པ་ལྔའི་སྡིག་བྱས་པ་མ་ཡིན་ནོ། །ཅི་སྟེ་དེ་ལ་སྦྱིན་པ་བྱིན་ན་ཚད་མེད་པའི་བསོད་ནམས་འཐོབ་པར་འགྱུར་རོ། །མཚམས་མེད་པའི་ལས་བྱས་ཀྱང་དམ་པའི་ཆོས་བསྲུང་བའམ། སྐྱབས་སུ་འགྲོ་བའི་སེམས་བསྐྱེད་པ་དེ་ལ་སྦྱིན་པ་བྱིན་ན། བསོད་ནམས་སུ་འགྱུར་བ་ནི་སྨོས་སུ་ཡང་མི་ཆོག་གོ །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་ཁ་ན་མ་ཐོ་བའི་ལས་ཆེན་པོ་བྱས་པ་དག་ཤིན་ཏུ་བརྟགས་པར་ཉོན་ཅིག་དང་། ཁྱོད་ལ་རྒྱས་པར་ཕྱེ་སྟེ་བཤད་པར་བྱའོ། །དེ་དག་འདི་སྙམ་དུ་སེམས་སྐྱེད་ཅིག །དམ་པའི་ཆོས་ཞེས་བྱ་བ་ནི་དེ་བཞིན་གཤེགས་པའི་སྙིང་པོ་སྟེ། དེ་བས་ན་བསྲུང་ཞིང་བསྐྱབ་པ་དང་རྣམ་པར་གཞག་པར་བྱའོ། །དེ་ལ་སྦྱིན་པ་བྱིན་པས་བསོད་ནམས་ཀྱི་འབྲས་བུ་མཆོག་འཐོབ་པར་འགྱུར་རོ། །རིགས་ཀྱི་བུ་དཔེར་ན་བུད་མེད་སྦྲུམ་མ་བུ་འབྱུང་དུ་ཉེ་བ་ཞིག་ཡུལ་དུ་མུ་གེ་བྱུང་སྟེ་འཁྲུགས་ནས་ཡུལ་གཞན་ཞིག་གི་ལྷའི་རྟེན་བཅས་པ་ཞིག་ཏུ་བུ་བཙས་ནས་ཕྱིས་བདག་གི་ཡུལ་ཉིད་ན་འཁྲུག་པ་ཡང་ཞི། ལོ་ཡང་རབ་ཏུ་ལེགས་སོ་ཞེས་གཏམ་ཐོས་ནས་བུ་ཁུར་དུ་ཁྱེར་ཏེ་ཕྱིར་བདག་གི་ཡུལ་དུ་ཆས་སོ། །དེའི་བར་དུ་ཆུ་ཆེན་པོ་བྲུག་ནས་བུ་ཁུར་དུ་ཁྱེར་ཏེ་ཆུ་རྒལ་མ་ནུས་པས་དེ་འདི་སྙམ་དུ་སེམས་ཏེ། བདག་ཅག་མ་སྨད་གཉིས་ལྷན་ཅིག་ཚེ་འཕོས་ཀྱང་བླའི། བུ་བོར་ཏེ་བདག་འབའ་ཞིག་ཆུ་རྒལ་བར་མི་བྱ་སྙམ་བསམ་པ་ལས་ཆུ་རྒལ་བ་ལས་མ་སྨད་གཉིས་ཆུའི་ནང་དུ་ཤིའོ། །ཤི་མ་ཐག་ཏུ་མཐོ་རིས་ཀྱི་ལྷར་སྐྱེས་སོ། །དེ་ཡང་བུ་ལ་བྱམས་ཏེ་ཆུ་ལས་སྒྲོལ་བར་བསམས་པའི་ཕྱིར་རོ། །བུད་མེད་དེ་རང་བཞིན་ངན་ལ་
གཏུམ་ཡང་བུ་ལ་བྱམས་པར་བསམས་པས་མཐོ་རིས་ཀྱི་ལྷར་སྐྱེས་སོ། །རྩ་བ་བཞི་ཉམས་པ་དང་མཚམས་མེད་པ་ལྔ་བྱེད་པ་དག་ཀྱང་དམ་པའི་ཆོས་བསྲུང་ཞིང་བསྐྱབ་པའི་སེམས་བསྐྱེད་པ་ཡང་དེ་དང་འདྲ་སྟེ། སྔར་མི་དགེ་བའི་ལས་བྱས་མོད་ཀྱི། ཆོས་བསྲུངས་པས་ན་འཇིག་རྟེན་ན་བླ་ན་མེད་པའི་བསོད་ནམས་ཀྱི་ཞིང་དུ་འགྱུར་ཏེ། དེ་ལྟར་ན་ཆོས་སྲུང་ཞིང་སྐྱོབ་པ་དེ་ཚད་མེད་པའི་འབྲས་བུ་མཆོག་དང་ལྡན་ནོ། །ཙུན་དས་ཡང་གསོལ་པ། བཅོམ་ལྡན་འདས་ལོག་སྲེད་ཅན་དག་ཤིན་ཏུ་འགྱོད་ཅིང་ངོ་ཚ་བ་དང་ལྡན་ལ། དཀོན་མཆོག་གསུམ་ལ་ཡང་བསྟི་སྟང་བཅས་པས་མཆོད་པ་བགྱིད་བསྟོད་པ་བགྱིད་ན་དེ་ལ་སྦྱིན་པ་བྱིན་ན་འབྲས་བུ་ཆེན་པོ་ཐོབ་པར་འགྱུར་རམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་དེ་སྐད་ཅེས་མ་ཟེར་ཅིག །རིགས་ཀྱི་བུ་འདི་ལྟ་སྟེ་དཔེར་ན་མི་ཞིག་ཤིང་ཏོག་ཨ་མྲ་ཟོས་ནས་འབྲས་བུ་ས་ལ་བོར་རོ། །དེ་འདི་སྙམ་དུ་འབྲས་བུའི་ནང་ན་ཡང་རོ་མངར་བ་ཡོད་དུ་ངེས་སོ་སྙམ་བསམས་ནས་འབྲས་བུ་བཅག་སྟེ་མྱངས་པ་དང་། ཤིན་ཏུ་ཁ་བར་གྱུར་པས་དེ་ལ་འགྱོད་པའི་སེམས་སྐྱེས་ཏེ་ཤིང་ཏོག་དེ་མཐར་མེད་ཀྱིས་དོགས་ནས་འབྲས་བུ་བཅག་པའི་ཕྱིར་ས་ལ་སྨོས་ནས་དེ་སྐྱེ་བར་འདོད་པའི་ཕྱིར་དུས་སུ་མར་དང་འོ་མ་ལ་སོགས་པ་བླུགས་ཏེ་ཤིན་ཏུ་ནན་ཏན་བྱས་ན། དེ་ཁྱོད་ཀྱིས་ཡིད་ལ་ཇི་སྙམ་དེ་སྐྱེ་བར་འགྱུར་རམ། གསོལ་པ་མ་ལགས་སོ། །བཅོམ་ལྡན་འདས་གལ་ཏེ་གནམ་ལས་བླ་ན་མེད་པའི་བདུད་རྩིའི་ཆར་བབ་ཀྱང་སྐྱེ་བར་མི་འགྱུར་རོ། །རིགས་ཀྱི་བུ་ལོག་སྲེད་ཅན་དེ་ཡང་དེ་དང་འདྲ་སྟེ། དགེ་བའི་རྩ་བ་ཀུན་བསྲེགས་ན། ཁ་ན་མ་ཐོ་བའི་ལས་ཅི་ལ་བརྟེན་ཏེ་འབྱང་བར་འགྱུར། རིགས་ཀྱི་བུ་གལ་ཏེ་དགེ་བའི་སེམས་སྐྱེས་ན་དེ་ནི་ལོག་སྲེད་ཅན་ཞེས་མི་བྱའོ། །རིགས་ཀྱི་བུ་སྦྱིན་པ་བྱས་པ་ཐམས་ཅད་ཀྱི་རྣམ་པར་སྨིན་པའི་འབྲས་བུ་ཁྱད་པར་མེད་པ་མ་ཡིན་ནོ། །དེ་ཅིའི་ཕྱིར་ཞེ་ན། ཉན་ཐོས་རྣམས་ལ་སྦྱིན་པ་བྱས་པའི་འབྲས་བུ་རྣམ་པར་སྨིན་པ་དང་། རང་སངས་རྒྱས་ལ་སྦྱིན་པ་བྱིན་པ་ཡང་ཁྱད་པར་ཡོད་དེ། དེ་བཞིན་གཤེགས་པ་འབའ་ཞིག་ལ་སྦྱིན་པ་བྱིན་པ་ནི། བླ་ན་མེད་པའི་འབྲས་བུ་ཐོབ་པར་
འགྱུར་ཏེ། དེ་བས་ན་སྦྱིན་པ་ཐམས་ཅད་ལ་ཁྱད་པར་མེད་པ་ཡང་མ་ཡིན་ནོ། །ཙུན་དས་ཡང་གསོལ་པ། ཅིའི་སླད་དུ་དེ་བཞིན་གཤེགས་པས་ཚིགས་སུ་བཅད་པ་འདི་སྐད་ཅེས་གསུངས། བཅོམ་ལྡན་འདས་ཀྱིས་ཙུན་ད་ལ་བཀའ་སྩལ་པ། ངས་ཚིགས་སུ་བཅད་པ་འདི་གསུངས་པ་ནི་རྒྱུ་དང་རྐྱེན་མེད་པ་མ་ཡིན་ཏེ། སྔོན་རྒྱལ་པོའི་ཁབ་འདི་ན་དགེ་བསྙེན་ཤིན་ཏུ་མ་དད་པ་ཞིག་མུ་སྟེགས་ཅན་གཅེར་བུ་པ་ལ་སྦྱིན་པ་བྱིན་ནས་ང་ལ་སྦྱིན་པའི་དོན་དྲིས་པས་དེའི་རྒྱུ་དེའི་རྐྱེན་གྱིས་ཚིགས་སུ་བཅད་པ་དེ་དག་ངས་སྨྲས་སོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་དགོངས་ཏེ་གསུངས་པའི་སྙིང་པོ་བསྟན་པའི་ཕྱིར་ངས་གསུངས་སོ། །ཚིགས་སུ་བཅད་པ་འདིའི་དོན་ཇི་ལྟ་བུ་ཞེ་ན། ཐམས་ཅད་ཅེས་བྱ་བ་ཡང་ཕྱོགས་གཅིག་གི་ཐམས་ཅད་ལ་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་མིའི་གཙོ་བོར་གྱུར་པ་ཡང་ཚུལ་ཁྲིམས་སྲུང་བ་དག་ནི་ཡོངས་སུ་སྡུད་ཅིང་ཅི་དགོས་པ་སྦྱིན་པར་ཡང་བྱེད་དོ། །ཚུལ་ཁྲིམས་ངན་པ་ཅན་དག་ནི་ཞིང་གཤིན་པའི་ཡུག་པོའམ། ཁྲེ་རྒོད་ལྟར་ཡོངས་སུ་སྤོང་བའོ། །གཞན་ཡང་རིགས་ཀྱི་བུ་ངས་སྔོན་ཚིགས་སུ་བཅད་པ་འདི་དག་གསུངས་སོ། །འབབ་ཆུའི་ཆུ་ཀླུང་ཐམས་ཅད་ནི། །ངེས་པར་གྱ་གྱུ་ཡོད་ཡང་དག །ནགས་ཚལ་གཏོགས་པ་ཐམས་ཅད་ནི། །ངེས་པར་ཤིང་དུ་གདོན་མི་ཟ། །བུད་མེད་སྨོས་པ་ཐམས་ཅད་ནི། །ཀུན་ཀྱང་གཡོ་སྒྱུ་ཡོད་དུ་ངེས། །དབང་དང་ལྡན་པ་ཐམས་ཅད་ནི། །གདོན་མི་ཟ་བར་ལོངས་སྤྱོད་ལྡན། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་འདུག་པ་ལས་ལངས་ནས་བླ་གོས་ཕྲག་པ་གཅིག་ཏུ་བྱས། པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཚིགས་སུ་བཅད་པ་འདི་སྐད་ཅེས་གསོལ་ཏོ། །འབབ་ཆུའི་ཆུ་ཀླུང་ཐམས་ཅད་ནི། །ངེས་པར་གྱ་གྱུ་མཆིས་མ་ལགས། །ནགས་ཚལ་གཏོགས་པ་ཐམས་ཅད་ནི། །ངེས་པར་ཐམས་ཅད་ཤིང་མ་ལགས། །བུད་མེད་སྨོས་པ་ཐམས་ཅད་ནི། །ཐམས་ཅད་གཡོ་སྒྱུ་མཆིས་མ་ལགས། །
དབང་དུ་གྱུར་པ་ཐམས་ཅད་ནི། །ཐམས་ཅད་ལོངས་སྤྱོད་ལྡན་མ་ལགས། །དེ་བས་ན་བཅོམ་ལྡན་འདས་ཀྱིས་གསུངས་པའི་དོན་འདི་ནི་ལྷག་མ་དང་བཅས་པ་ལགས་ན། བདག་ཅག་ལ་ཐུགས་བརྩེ་བའི་སླད་དུ་དེའི་རྒྱུ་དང་རྐྱེན་བསྟན་དུ་གསོལ། དེ་ཅིའི་སླད་དུ་ཞེ་ན། བཅོམ་ལྡན་འདས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན། གླིང་ནུབ་ཀྱི་བ་ལང་སྤྱོད་ཅེས་བྱ་བ་ན་ཆུ་ཀླུང་ས་པ་ཀ་ཞེས་བགྱི་བ་ཞིག་མཆིས་ཏེ། ཐིག་ནག་པོ་ལྟར་ནུབ་ཀྱི་རྒྱ་མཚོར་འབབ་བོ། །ཆུ་ཀླུང་དེའི་མཚན་ཉིད་མདོ་སྡེ་གཞན་དག་ལས་ཀྱང་བཅོམ་ལྡན་འདས་ཀྱིས་མ་གསུངས་ན། དེ་བཞིན་གཤེགས་པས་ཤིན་ཏུ་རྒྱས་པའི་མདོ་སྡེ་འདི་ལས་ལྷག་མ་མཆིས་པར་གསུངས་པ་འདི། བྱང་ཆུབ་སེམས་དཔའ་རྣམས་ཀྱང་དོན་འདི་དག་རྟོགས་པར་མཛད་དུ་གསོལ། བཅོམ་ལྡན་འདས་དཔེར་ན་མི་ལ་ལ་ཞིག་སྔར་གསེར་རྡོ་ངོ་ཤེས་ལ་གསེར་ངོ་མི་ཤེས་པ་དང་མཚུངས་ཏེ། དེ་བཞིན་གཤེགས་པ་ཡང་དེ་དང་འདྲ་བར་ཆོས་ཐམས་ཅད་ཐུགས་སུ་ཆུད་ཀྱང་བསྟན་ཅིང་གསུངས་པ་མ་བས་པའི་ལྷག་མ་དང་བཅས་སོ། །དེ་བཞིན་གཤེགས་པས་དེ་ལྷག་མ་དང་བཅས་པ་གསུངས་མོད་ཀྱི། དེ་ཡང་ཐབས་དང་སྦྱར་ཏེ་དགོངས་ནས་གསུངས་པར་འཚལ་ཏོ། །ནགས་ཚལ་ཐམས་ཅད་ངེས་པར་ཤིང་ངོ་ཞེས་བགྱི་བ་ཡང་ལྷག་མ་དང་བཅས་སོ། །དེ་ཅིའི་སླད་དུ་ཞེ་ན། གསེར་དང་། དངུལ་དང་། བཻ་དཱུརྱ་ལ་སོགས་པ་རིན་པོ་ཆེ་རྣམ་པ་སྣ་ཚོགས་ཀྱི་ནགས་ལ་ཡང་ཚལ་ཞེས་བགྱིའོ། །བུད་མེད་ཐམས་ཅད་ངེས་པར་གཡོ་སྒྱུ་ཅན་ནོ་ཞེས་བགྱི་བ་ཡང་ལྷག་མ་དང་བཅས་སོ། །དེ་ཅིའི་སླད་དུ་ཞེ་ན། བུད་མེད་ཁ་ཅིག་ཚུལ་ཁྲིམས་ཡོངས་སུ་སྲུང་ཞིང་ཡོན་ཏན་དང་ལྡན་པ། བྱམས་པ་དང་སྙིང་རྗེར་ལྡན་པ་ཡང་མཆིས་སོ། །དབང་དང་བཅས་པ་ཐམས་ཅད་ལོངས་སྤྱོད་དང་ལྡན་ནོ་ཞེས་བགྱི་བ་ཡང་ལྷག་མ་དང་བཅས་སོ། །དེ་ཅིའི་སླད་དུ་ཞེ་ན། དབང་དང་བཅས་པ་འཁོར་ལོས་སྒྱུར་བ་དེ་བཞིན་གཤེགས་པ་ཆོས་ཀྱི་རྒྱལ་པོ་ནི་འཆི་བདག་གི་བདུད་ཀྱི་རིས་སུ་མ་གཏོགས་ཏེ། མེད་པར་བྱེད་མི་ནུས་སོ། །ཚངས་པ་དང་བརྒྱ་བྱིན་ལ་སོགས་པ་ནི་དབང་དང་བཅས་མོད་ཀྱི་མི་རྟག་པ་ལགས་སོ། །གང་
རྟག་པ་མི་འགྱུར་མི་འཕོ་བ་ནི་དབང་དང་བཅས་པ་ཞེས་བགྱི་སྟེ། དེ་ཡང་ཐེག་པ་ཆེན་པོ་ཡོངས་སུ་མྱ་ངན་ལས་འདས་པ་འདི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་ནི་ཤིན་ཏུ་སྨྲ་བའི་སྤོབས་པ་དང་ལྡན་ཏེ། འོན་ཀྱང་སྐད་ཅིག་སྡོད་ལ་བརྟན་པོར་ཉོན་ཅིག །འཇམ་དཔལ་དཔེར་ན་ཁྱིམ་བདག་ནད་ཀྱིས་གཟིར་ཏེ་ཤིན་ཏུ་ཉམ་ཆུང་བ་ཞིག་སྨན་པ་མཁས་པ་དང་ཕྲད་ནས་སྨན་པ་དེས་སྨན་ཨ་གས་སྦྱར་ཏེ། ནད་པ་དེ་བརྐམ་པ་ཞིག་སྟེ་མང་དུ་ཟ་འདོད་ན་དེ་ལ་སྨན་པས་འདི་སྐད་ཟེར་རོ། །ནད་པ་ཁྱོད་སྨན་ཞུ་ན་ནི་མང་དུ་ཡང་གཏང་བ་ཞིག་ན། ཁྱོད་ཉམ་ཆུང་ཞིང་རིད་དེ་མི་འཇུ་བས་མང་དུ་གཏང་དུ་མི་རུང་ངོ་། །དེ་བས་ན་སྨན་ཨ་ག་ས་འདི་ནི་བདུད་རྩི་ཞེས་ཀྱང་བྱ་ལ། དུག་ཅེས་ཀྱང་བྱའོ། །གལ་ཏེ་མང་དུ་འཐུངས་ཏེ་མ་ཞུ་ན་དུག་ཅེས་བྱའོ། །རིགས་ཀྱི་བུ་ཁྱོད་སྨན་པ་མཁས་པ་དེས་སྨྲས་པ་དེ་ལ་དོན་འགལ་ཞིང་ནོར་བའམ། སྨན་གྱི་མཐུ་མེད་པར་གྱུར་ཏོ་སྙམ་དུ་མ་སེམས་ཤིག །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། རྒྱལ་པོ་དང་། བཙུན་མོ་དང་། རྒྱལ་བུ་དང་། བློན་པོ་ཆེན་པོ་རྣམས་དང་། རྒྱལ་པོ་རབ་ཏུ་སྡེ་ཕམ་བྱེད་དང་། རྒྱལ་བུ་དང་། བཙུན་མོ་དང་། ཕོ་བྲང་གི་སླས་ང་རྒྱལ་ཅན་དག་གི་དབང་དུ་བྱས་ཏེ། དེ་དག་གདུལ་བའི་ཕྱིར་དེ་དག་འཇིགས་ཤིང་སྐྲག་པར་བྱ་བའི་ཕྱིར་སྨན་པ་མཁས་པ་དེ་དང་འདྲ་བར་ཚིགས་སུ་བཅད་པ་འདི་དག་གསུངས་སོ། །འབབ་པའི་ཆུ་ཀླུང་ཐམས་ཅད་ནི། །ངེས་པར་གྱ་གྱུ་ཡོད་ཡང་དག །ནགས་ཚལ་གཏོགས་པ་ཐམས་ཅད་ནི། །ངེས་པར་ཤིང་དུ་གདོན་མི་ཟ། །བུད་མེད་སྨོས་པ་ཐམས་ཅད་ནི། །ཀུན་ཀྱང་གཅམ་སྒྱུ་ཡོད་དུ་ངེས། །དབང་དང་ལྡན་པ་ཐམས་ཅད་ནི། །གདོན་མི་ཟ་བར་ལོངས་སྤྱོད་ལྡན། །འཇམ་དཔལ་ཁྱོད་ཀྱིས་འདི་ལྟར་རིག་པར་བྱ་སྟེ། དེ་བཞིན་གཤེགས་པས་གསུངས་པ་ལ་ནི་འཁྲུལ་པ་མེད་དོ། །ས་ཆེན་པོ་འདི་འགྱུར་ཞིང་ལྡོག་ཀྱང་སྲིད་ཀྱི། དེ་བཞིན་གཤེགས་པས་གསུངས་པ་ལ་འཁྲུལ་པ་མེད་དོ། །དེ་བས་ན་དེ་བཞིན་གཤེགས་པས་གསུངས་པ་ཐམས་ཅད་ལྷག་
མ་དང་བཅས་སོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ཤིན་ཏུ་ལེགས་སོ། །ཤིན་ཏུ་ལེགས་སོ་ཞེས་བསྟོད་དེ། རིགས་ཀྱི་བུ་ཁྱོད་ནི་ཡུན་རིང་པོ་ནས་དོན་འདི་རབ་ཏུ་རྟོགས་པས་ཐམས་ཅད་ལ་སྙིང་བརྩེ་བ་དང་། སེམས་ཅན་ཐམས་ཅད་ཡེ་ཤེས་སུ་འགྱུར་བར་བྱ་བའི་ཕྱིར་དེ་བཞིན་གཤེགས་པ་ལ་ཚིགས་སུ་བཅད་པའི་དོན་འདི་རྒྱས་པར་དྲིས་པ་ལེགས་སོ། །དེ་ནས་འཇམ་དཔལ་གཞོན་ནུར་གྱུར་པས་ཡང་སངས་རྒྱས་ཀྱི་སྤྱན་སྔར་ཚིགས་སུ་བཅད་དེ་གསོལ་བ། ཕ་རོལ་གཞན་གྱིས་སྨྲས་པ་ལ། །རྗེས་སུ་གཞོལ་གྱི་ཕྱིར་མི་བཟློག །གཞན་གྱིས་བྱས་དང་མ་བྱས་པ། །དེ་ལ་བརྟག་པར་མི་བྱའོ། །བདག་ལ་ཤིན་ཏུ་བརྟག་པ་ནི། །དགེ་དང་མི་དགེ་གང་སྤྱོད་པ། །བཅོམ་ལྡན་འདས་ཀྱིས་དེ་སྐད་གསུངས་པའི་ཆོས་ཀྱི་སྨན་དེ་ནི་ཡང་དག་པར་གསུངས་པ་མ་ལགས་ན། ཕ་རོལ་པོས་གཞན་གྱིས་སྨྲ་བའི་རྗེས་སུ་གཞོལ་ཞིང་འགལ་བར་མི་བགྱིད་པ་དེ་བཞིན་གཤེགས་པས་ཐུགས་བརྩེ་བའི་སླད་དུ་ཡང་དག་པར་བསྟན་དུ་གསོལ། དེ་ཅིའི་སླད་དུ་ཞེ་ན། བཅོམ་ལྡན་འདས་ཀྱིས་རྣམ་པ་དུ་མ་ལས་སློབ་པ་ཕྱི་རོལ་དུ་རྣམ་པ་དགུ་བཅུ་རྩ་ལྔ་པོ་ཐམས་ཅད་ངན་སོང་དུ་འགྲོའོ་ཞེས་གསུངས་ལ། ཉན་ཐོས་ཀྱི་ཉེ་གནས་རྣམས་ནི་ཐམས་ཅད་ཡང་དག་པའི་ལམ་དུ་འགྲོའོ་ཞེས་གསུངས་ཏེ། གང་ཚུལ་ཁྲིམས་ཡོངས་སུ་སྲུང་ཞིང་སྤྱོད་ལམ་ཤིན་ཏུ་སྡོམ་པ་དབང་པོ་རྣམས་སྲུང་བའི་གང་ཟག་དེ་ནི་ཆོས་ཆེན་པོ་ལ་ཤིན་ཏུ་མོས་ཤིང་དགེ་བའི་ལམ་ལ་སྤྱོད་པ་ཡང་ལགས་ན། བཅོམ་ལྡན་འདས་ཀྱིས་ཅིའི་སླད་དུ་མདོ་སྡེ་དགུ་པོ་ལས་ཕ་རོལ་པོ་གཞན་ལ་སྨོད་ན་རྣམ་པར་སྨད་ཅིང་སྤྱོ་བར་བྱའོ་ཞེས་ཚིགས་སུ་བཅད་པའི་དོན་འདི་ཅི་ལས་དགོངས་ཏེ་གསུངས། བཅོམ་ལྡན་འདས་ཀྱིས་འཇམ་དཔལ་ལ་བཀའ་སྩལ་པ། རིགས་ཀྱི་བུ་ངས་ཚིགས་སུ་བཅད་པ་གསུངས་པ་འདི་ཡང་སེམས་ཅན་ཐམས་ཅད་ཀྱི་ཕྱིར་ནི་མ་ཡིན་གྱི། དེའི་ཚེ་ན་རྒྱལ་པོ་མ་སྐྱེས་དགྲ་འབའ་ཞིག་གི་ཕྱིར་གསུངས་ཏེ། སངས་རྒྱས་བཅོམ་ལྡན་འདས་ནི་རྒྱུ་དང་རྐྱེན་མེད་པར་བཟློག་སྟེ་གསུངས་པའི་ཆོས་མེད་དོ། །རྒྱུ་དང་རྐྱེན་ཡོད་པས་ན་དེ་སྐད་ཅེས་གསུངས་པ་ཡིན་ནོ། །རིགས་ཀྱི་བུ་
རྒྱལ་པོ་མ་སྐྱེས་དགྲས་ཕ་བསད་ནས་ང་གང་ན་བ་དེར་འོངས་ནས་གདུལ་བར་འདོད་པའི་ཕྱིར་ང་ལ་འདི་སྐད་ཅེས་དྲིས་སོ། །ཇི་ལྟར་ན་སངས་རྒྱས་བཅོམ་ལྡན་འདས་ཐམས་ཅད་མཁྱེན་པ་ཞེས་བགྱི་བ་དེ་ནི་ཐམས་ཅད་མཁྱེན་པ་མ་ལགས་སོ། །ཅི་སྟེ་ཐམས་ཅད་མཁྱེན་པ་ལགས་ན། ལྷ་སྦྱིན་ལྟ་བུ་སྔོན་སྐྱེ་བ་གྲངས་མེད་པའི་བར་དུ་ངན་སེམས་ཀྱིས་དེ་བཞིན་གཤེགས་པ་ལ་གནོད་པ་བགྱིད་པ་ལགས་ན། ཅིའི་སླད་དུ་དེ་བཞིན་གཤེགས་པས་རབ་ཏུ་བྱུང་བར་གནང་ཞེས་དྲིས་ནས་རིགས་ཀྱི་བུ་དེའི་རྒྱུ་དེའི་རྐྱེན་གྱིས་རྒྱལ་པོ་དེའི་ཕྱིར་ཚིགས་སུ་བཅད་པ་འདི་སྐད་ཅེས་སྨྲས་སོ། །ཕ་རོལ་གཞན་གྱིས་སྨྲས་པ་ལ། །རྗེས་སུ་གཞོལ་གྱི་ཕྱིར་མི་བཟློག །གཞན་གྱིས་བྱས་དང་མ་བྱས་པ། །དེ་ལ་བརྟག་པར་མི་བྱའོ། །བདག་གི་ལུས་ལ་ཤིན་ཏུ་བརྟག །དགེ་དང་མི་དགེ་གང་སྤྱོད་པ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཕ་བསད་པའི་མཚམས་མེད་པའི་ཁ་ན་མ་ཐོ་བའི་ལས་བྱས་ཀྱིས། ཤིན་ཏུ་འགྱོད་ཅིང་མཐོལ་ལ་ཡོངས་སུ་དག་པར་འགྱུར་བར་མི་བྱ་བར་ཅིའི་ཕྱིར་གཞན་གྱི་ཉེས་པའི་སྐྱོན་འཚོལ་བ་ལ་ཞུགས་ཞེས། རིགས་ཀྱི་བུ་ངས་རྒྱལ་པོ་དེའི་ཕྱིར་དེ་བས་ན་ཚིགས་སུ་བཅད་པ་དེ་དག་གསུངས་པ་ཡིན་ནོ། །གཞན་ཡང་རིགས་ཀྱི་བུ་གང་ཚུལ་ཁྲིམས་ཡོངས་སུ་སྲུང་ཞིང་སྤྱོད་ལམ་དང་ལྡན་པ་དག་གཞན་གྱི་སྐྱོན་ཚོལ་བ་ལ་ཞུགས་པ་རྣམས་ཀྱི་ཕྱིར་ཡང་ཚིགས་སུ་བཅད་པ་དེ་སྐད་ཅེས་གསུངས་པ་ཡིན་ནོ། །གང་ཟག་སུ་ཞིག་ཕ་རོལ་པོས་བསྟན་ཅིང་འཆོས་པའི་རྗེས་སུ་མི་དགེ་བ་ཡོངས་སུ་སྤོང་སྟེ། གཞན་དག་ཀྱང་མི་དགེ་བའི་ལས་ཟློག་པར་བྱེད་ན་དེ་ནི་ངའི་ཉེ་གནས་ཡང་དག་པའོ། །དེ་ནས་བཅོམ་ལྡན་འདས་ཀྱིས་འཇམ་དཔལ་ལ་ཚིགས་སུ་བཅད་དེ་བཀའ་སྩལ་པ། མཚོན་ཆས་མི་འཇིགས་གང་ཡང་མེད། །འཚོ་བའི་སྲོག་ལ་ཐམས་ཅད་ཆགས། །བདག་གི་ལུས་ལ་དཔེ་བླངས་ཏེ། །གཞན་ལ་མ་འཚོག་མ་གསོད་ཅིག །དེ་ནས་འཇམ་དཔལ་གཞོན་ནུར་གྱུར་པས་ཡང་བཅོམ་ལྡན་འདས་ཀྱི་སྤྱན་སྔར་ཚིགས་སུ་བཅད་དེ་གསོལ་བ། ཐམས་ཅད་མཚོན་ཆས་འཇིགས་པ་མིན། །
སྲོག་ལ་ཐམས་ཅད་ཆགས་མ་ལགས། །བདག་གི་ལུས་ལ་དཔེ་བླངས་ཏེ། །དགེ་བར་སྤྱོད་ལ་བརྩོན་པར་བྱ། །དེ་བཞིན་གཤེགས་པས་ཆོས་ཀྱི་ཚིག་གི་དོན་གསུངས་པ་འདི་ཡང་བས་པའི་མཐར་ཕྱིན་པ་མ་ལགས་སོ། །དེ་ཅིའི་སླད་དུ་ཞེ་ན། དགྲ་བཅོམ་པ་དང་། འཁོར་ལོས་སྒྱུར་བའི་རྒྱལ་པོའི་བུད་མེད་རིན་པོ་ཆེ་དང་། བལ་གླང་དང་། རྟ་དང་། བློན་པོ་རིན་པོ་ཆེ་ནི་གནམ་གྱི་ལྷའམ། ལྷ་མ་ཡིན་གྱི་མཚོན་རྣོན་པོ་ཐོགས་ཀྱང་གསོད་ནུས་པའི་གནས་མེད་དོ། །སྐྱེས་བུ་དཔའ་བོ་དང་། བུད་མེད་ཆུ་གང་ཅན་དང་། རྟའི་རྒྱལ་པོ་དང་། གཅན་གཟན་གྱི་རྒྱལ་པོ་དང་། དགེ་སློང་ཚུལ་ཁྲིམས་སྲུང་བ་ནི་གཉེན་པོ་མངོན་དུ་སྣང་ཡང་མི་འཇིགས་མི་སྐྲག་པས་དེ་བས་ན་དེ་བཞིན་གཤེགས་པས་ཚིགས་སུ་བཅད་དེ་གསུངས་པ་འདི་ཡང་ལྷག་མ་དང་བཅས་སོ། །བདག་གི་ལུས་ལ་དཔེ་བླང་ངོ་། །ཞེས་བགྱི་བ་ཡང་ལྷག་མ་དང་བཅས་པ་ལགས་སོ། །དེ་ཅིའི་སླད་དུ་ཞེ་ན། ཅི་སྟེ་དགྲ་བཅོམ་པ་དག་བདག་ལ་གཞན་གྱི་དཔེ་ལེན་ན་བདག་ཏུ་འདུ་ཤེས་པ་དང་། སྲོག་ཏུ་འདུ་ཤེས་པ་ཡོད་པར་འགྱུར་རོ། །བདག་ཏུ་འདུ་ཤེས་པ་དང་སྲོག་ཏུ་འདུ་ཤེས་པ་ཡོད་ན་སྲུང་བར་འགྱུར་ཏེ། བྱིས་པ་མ་རབས་དག་གིས་ཀྱང་དགྲ་བཅོམ་པ་མཐོང་བར་འགྱུར་ཏེ། ཐམས་ཅད་རྣལ་འབྱོར་ཅན་དུ་འགྱུར་རོ། །ཅི་སྟེ་དེ་ལྟ་བུ་ལགས་ན་ངན་པར་ལྟ་བ་ལགས་སོ། །གལ་ཏེ་ངན་པར་ལྟ་བ་ལགས་ན་ཚེ་འཕོས་མ་ཐག་ཏུ་སེམས་ཅན་དམྱལ་བར་སྐྱེ་བར་འགྱུར་རོ། །གཞན་ཡང་དགྲ་བཅོམ་པ་དག་ནི་སེམས་ཅན་ཐམས་ཅད་ལ་གསོད་པའི་སེམས་གལ་ཏེ་ཡང་སྐྱེ་བའི་གནས་མ་མཆིས་སོ། །སེམས་ཅན་ཚད་མེད་པ་དག་ཀྱང་དགྲ་བཅོམ་པ་ལ་གསོད་ནུས་པ་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བདག་ཏུ་འདུ་ཤེས་ཞེས་བྱ་བ་ནི་སེམས་ཅན་ལ་སྙིང་རྗེ་ཆེན་པོའི་སེམས་སྐྱེས་ཏེ་གསོད་པའི་འདུ་ཤེས་མེད་པ་ནི་དགྲ་བཅོམ་པ་དག་གི་སེམས་མཉམ་པ་ཉིད་དོ། །བཅོམ་ལྡན་འདས་ལ་རྒྱུ་དང་རྐྱེན་མེད་པར་འགལ་བར་གསུངས་པ་ཡོད་དོ་སྙམ་མ་སེམས་ཤིག །སྔོན་རྒྱལ་པོའི་ཁབ་འདི་ན་རྔོན་པ་ཞིག་རི་དགས་མང་དུ་བསད་ནས་ང་ལ་ཤ་
ཟོ་ཤིག་ཅེས་སྤྱན་དྲངས་སོ། །ངས་དེའི་ཚེ་གསོལ་བ་གནང་མོད་ཀྱི། སེམས་ཅན་ཐམས་ཅད་ལ་སྒྲ་གཅན་འཛིན་ལྟར་ཤིན་ཏུ་བྱམས་པའི་སེམས་ཉེ་བར་བཞག་ནས་ཚིགས་སུ་བཅད་པ་འདི་སྐད་ཅེས་གསུངས་སོ། །ཁྱོད་ནི་ཤིན་ཏུ་ཚེ་རིང་ཞིང་། །འཇིག་རྟེན་འདིར་ཡང་རིང་དུ་འདུག །མི་གསོད་པ་ཡི་ཆོས་འཛིན་ཅིང་། །སངས་རྒྱས་ཚེ་དང་འདྲ་བར་ཤོག །ཚིགས་སུ་བཅད་པ་འདི་ཡང་སྨྲས། །མཚོན་ཆས་མི་འཇིགས་གང་ཡང་མེད། །འཚོ་བའི་སྲོག་ལ་ཐམས་ཅད་ཆགས། །བདག་གི་ལུས་ལ་དཔེ་བླངས་ཏེ། །འཚོག་དང་གསོད་པ་མ་བྱེད་ཅིག །དེ་ནས་ཡང་བཅོམ་ལྡན་འདས་ཀྱིས་འཇམ་དཔལ་གཞོན་ནུ་ལ་ཤིན་ཏུ་ལེགས་སོ་ཤིན་ཏུ་ལེགས་སོ་ཞེས་བྱ་བ་བྱིན་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཕྱིར་དེ་བཞིན་གཤེགས་པ་ལ་དོན་ཤིན་ཏུ་ཟབ་མོ་འདི་ལྟ་བུ་དྲིས་པ་ལེགས་སོ་ཞེས་བྱ་བ་བྱིན་ནོ། །དེ་ནས་འཇམ་དཔལ་གྱིས་ཚིགས་སུ་བཅད་དེ་གསོལ་པ། ཇི་ལྟར་ཤིན་ཏུ་ཕ་མ་ལ། །བསྟི་སྟང་བཅས་པས་རྗེས་སུ་གཞོལ། །ཇི་ལྟར་ཉམས་སུ་བླངས་པ་དག །མཚམས་མེད་སེམས་ཅན་དམྱལ་བར་ལྟུང་། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་འཇམ་དཔལ་ལ་བཀའ་སྩལ་པ། འདོད་ཆགས་པ་ནི་མ་ཞེས་བྱ། །མ་རིག་པ་ནི་ཕ་ཡིན་ནོ། །བསྟི་སྟང་བཅས་པས་རྗེས་འཇུག་ན། །མཚམས་མེད་སེམས་ཅན་དམྱལ་བར་ལྟུང་། །དེ་ནས་བཅོམ་ལྡན་འདས་ཀྱིས་ཡང་བྱང་ཆུབ་སེམས་དཔའ་འཇམ་དཔལ་ལ་ཚིགས་སུ་བཅད་དེ་བཀའ་སྩལ་པ། ཐམས་ཅད་གཞན་གྱིས་དབང་སྒྱུར་ན། །དེ་ནི་སྡུག་བསྔལ་བ་ཞེས་བྱ། །ཐམས་ཅད་བདག་གིས་དབང་སྒྱུར་ན། །དེ་ནི་དབང་དང་བདེ་བར་ལྡན། །ང་རྒྱལ་དྲེགས་པ་ཐམས་ཅད་ནི། །མཐུ་དང་ལྡན་པས་ཁྲོ་གཏུམ་ཆེ། །དགེ་ཞིང་དེས་པ་ཐམས་ཅད་ནི། །ཀུན་ལ་བྱམས་ཏེ་སྙིང་རྗེར་ལྡན། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་བཞིན་གཤེགས་པས་གསུངས་པ་འདི་
ཡང་བས་པའི་མཐར་ཕྱིན་པ་མ་ལགས་སོ། །བཅོམ་ལྡན་འདས་ཐུགས་བརྩེ་བའི་སླད་དུ་དེའི་རྒྱུ་དང་རྐྱེན་བསྟན་དུ་གསོལ། དེ་ཅིའི་སླད་དུ་ཞེ་ན། དཔེར་ན་ཁྱིམ་བདག་གི་བུ་དག་སློབ་དཔོན་ལ་སློབ་པའི་ཚེ་ན་སློབ་དཔོན་གྱི་དབང་དུ་གྱུར་པ་མ་ལགས་སམ། གལ་ཏེ་སློབ་དཔོན་གྱི་དབང་དུ་གྱུར་ན་ཡང་སློབ་པའི་དོན་མི་འགྲུབ་ལ། སློབ་དཔོན་གྱི་དབང་དུ་མ་གྱུར་ན་ཡང་མི་འགྲུབ། བདག་གི་དབང་དུ་གྱུར་ན་ཡང་སློབ་པ་ཡང་མི་འགྲུབ་སྟེ། དེ་བས་ན་དེ་བཞིན་གཤེགས་པས་གསུངས་པ་ནི་ལྷག་མ་དང་བཅས་པ་ལགས་སོ། །བཅོམ་ལྡན་འདས་གཞན་ཡང་འདི་ལྟ་སྟེ་དཔེར་ན་རྒྱལ་བུ་ཅི་ཡང་མི་སློབ་ཅི་ཡང་མི་ཤེས་པ་དག་བདག་གི་དབང་དུ་འགྱུར་བ་ལགས་མོད་ཀྱི། གླེན་ཞིང་མི་ཤེས་པས་རྟག་ཏུ་སྡུག་བསྔལ་ལོ། །དེ་ལྟར་ན་རྒྱལ་བུ་དེ་ནི་བདག་གི་དབང་དུ་འགྱུར་ཞེས་བགྱིར་ཡང་གྲུབ་པའི་དོན་མ་མཆིས་ལ། གཞན་གྱི་དབང་དུ་འགྱུར་ཞེས་བགྱིར་ཡང་གྲུབ་པའི་དོན་མ་མཆིས་པས། དེ་བས་ན་བཅོམ་ལྡན་འདས་ཀྱིས་གསུངས་པའི་དོན་འདི་ནི་ལྷག་མ་དང་བཅས་པ་ལགས་པས། དེ་བས་ན་ཐམས་ཅད་གཞན་གྱི་དབང་དུ་འགྱུར་བ་ལ་ཡང་ངེས་པར་སྡུག་བསྔལ་ཞེས་བགྱིར་མི་རུང་ལ། ཐམས་ཅད་བདག་གི་དབང་དུ་འགྱུར་བ་ལ་ཡང་ངེས་པར་བདེ་བ་ཞེས་བགྱིར་མི་རུང་ངོ་། །ང་རྒྱལ་གྱིས་དྲེགས་པ་ཐམས་ཅད་ཀྱང་ཁྲོ་གཏུམ་ཅན་ནོ་ཞེས་བགྱི་བ་ཡང་ལྷག་མ་དང་བཅས་སོ། །བཅོམ་ལྡན་འདས་དཔེར་ན་བུད་མེད་ཆུ་གང་ཅན་དག་ང་རྒྱལ་གྱི་དབང་གིས་རབ་ཏུ་བྱུང་སྟེ། སློབ་པ་ལ་ཞུགས་ན་ཚུལ་ཁྲིམས་ཡོངས་སུ་སྲུང་ཞིང་སྤྱོད་ལམ་ཤིན་ཏུ་སྡོམ་སྟེ། དབང་པོ་མི་གཡེང་བར་ནན་ཏན་བྱེད་དོ། །དེ་བས་ན་ང་རྒྱལ་གྱི་ཀུན་ནས་ཉོན་མོངས་པ་ཐམས་ཅད་ངེས་པར་ཁྲོ་གཏུམ་པའོ་ཞེས་བགྱིར་མི་རུང་ངོ་། །དེས་ཤིང་དགེ་བ་ཐམས་ཅད་ཀྱང་བྱམས་པ་དང་སྙིང་རྗེར་ལྡན་ནོ་ཞེས་བགྱི་བ་ཡང་ལྷག་མ་དང་བཅས་པ་ལགས་སོ། །དཔེར་ན་མི་ཞིག་ཕས་ཕམ་པ་ཞིག་བྱུང་ཡང་ཆོས་གོས་མ་སྤངས། ཕྱི་རོལ་གྱི་སྤྱོད་ལམ་ཤིན་ཏུ་སྡོམ་ཡང་ཆོས་སྲུང་བ་དག་མཐོང་ན་མི་འདོད་དེ་སྤོང་ངོ་། །དེ་ཚེ་འཕོས་ནས་ཀྱང་སེམས་ཅན་དམྱལ་བར་ལྟུང་ངོ་། །གལ་ཏེ་
དགེ་སློང་ཞིག་ཕས་ཕམ་པ་བྱུང་ན་ཆོས་སྲུང་བ་དེ་དག་གིས་སྐྲོད་པར་བྱེད་དེ་ཁྱིམ་པར་འབེབས་སོ། །དེ་བས་ན་དེས་ཤིང་དགེ་བ་ཐམས་ཅད་ལ་ངེས་པར་བྱམས་པ་དང་ལྡན་ནོ་ཞེས་བགྱིར་མི་རུང་ངོ་། །དེ་ནས་བཅོམ་ལྡན་འདས་ཀྱིས་འཇམ་དཔལ་ལ་བཀའ་སྩལ་པ། རྒྱུ་དང་རྐྱེན་ཡོད་པའི་ཕྱིར་དེ་བཞིན་གཤེགས་པས་འདི་ལྟར་ལྷག་མ་དང་བཅས་པའི་དོན་གསུངས་སོ། །གཞན་ཡང་བཅོམ་ལྡན་འདས་ནི་རྒྱུ་དང་རྐྱེན་ཡོད་པའི་ཕྱིར་འདི་སྐད་ཅེས་གསུངས་པ་ཡིན་ནོ། །རྒྱལ་པོའི་ཁབ་འདིར་བུད་མེད་ཤིན་ཏུ་བཟང་མོ་ཞེས་བྱ་བ་ཞིག་ཕ་མའི་ཁྱིམ་དུ་འགྲོ་བའི་ལམ་ཡོགས་སུ་ང་ག་ན་བར་འོངས་ནས་སངས་རྒྱས་དང་ཆོས་དང་དགེ་འདུན་ལ་སྐྱབས་སུ་གསོལ་ནས་འདི་སྐད་ཅེས་སྨྲས་སོ། །བུད་མེད་ཐམས་ཅད་ནི་མཐུ་མེད་པ་དབང་མེད་པ་ཡིན་ནོ། །སྐྱེས་པ་ཐམས་ཅད་ནི་དབང་ལ་ཐོགས་པ་མེད་པ་ཡིན་ནོ་ཞེས་སྨྲས་པས་དེའི་ཚེ་ན་བུད་མེད་དེའི་བསམ་པ་ཐུགས་སུ་ཆུད་ནས་དེའི་ཕྱིར་ཚིགས་སུ་བཅད་པ་འདི་དག་སྨྲས་པ་ཡིན་ནོ། །འཇམ་དཔལ་ལེགས་སོ་ལེགས་སོ། །ཁྱོད་ཀྱིས་སེམས་ཅན་ཐམས་ཅད་ཀྱི་ཕྱིར་དེ་བཞིན་གཤེགས་པ་ལ་དེ་ལྟ་བུའི་དོན་དྲི་བ་ལེགས་སོ། །དེ་ནས་འཇམ་དཔལ་གྱིས་ཚིགས་སུ་བཅད་དེ་གསོལ་པ། སེམས་ཅན་སྐྱེ་དགུ་ཐམས་ཅད་ནི། །ཀུན་ཀྱང་ཟས་དང་སྐོམ་ལ་རྟེན། །མཐུ་དང་ལྡན་པ་ཐམས་ཅད་ནི། །དེ་ཡི་སེམས་ལ་ཕྲག་དོག་མེད། །ཐམས་ཅད་ཟས་དང་སྐོམ་གྱི་རྐྱེན། །ནད་ཀྱི་སྡུག་བསྔལ་མྱོང་བར་འགྱུར། །སྤྱོད་པ་རྣམ་པར་དག་པ་ནི། །རབ་ཏུ་བདེ་བ་མྱོང་བར་འགྱུར། །དེ་བས་ན་བཅོམ་ལྡན་འདས་ཙུན་དའི་བསོད་སྙོམས་དང་མཆོད་པ་བཞེས་པ་འདི་དེ་བཞིན་གཤེགས་པ་ལ་བསྙེངས་པ་མི་མངའ་འམ། དེ་ལ་བཅོམ་ལྡན་འདས་ཀྱིས་ཚིགས་སུ་བཅད་དེ་འཇམ་དཔལ་ལ་བཀའ་སྩལ་པ། སེམས་ཅན་སྐྱེ་དགུ་ཐམས་ཅད་ནི། །ཟས་དང་སྐོམ་ལ་ལྟོས་མ་ཡིན། །མཐུ་དང་ལྡན་པ་ཐམས་ཅད་ཀྱང་། །ཕྲག་དོག་སེམས་ནི་མེད་མ་ཡིན། །ཐམས་ཅད་ཟས་ཀྱི་རྐྱེན་དབང་གིས། །ནད་ཀྱིས་གཟིར་བར་འགྱུར་མ་ཡིན། །
སྤྱོད་པ་དག་པ་ཐམས་ཅད་ཀྱང་། །ཐམས་ཅད་བདེ་བ་མྱོང་མ་ཡིན། །འཇམ་དཔལ་ཅི་སྟེ་ཁྱོད་ན་བར་གྱུར་ན་དེ་བཞིན་དུ་ང་ཡང་ན་བར་འགྱུར་བའི་རིགས་སོ། །དེ་ཅིའི་ཕྱིར་ཞེ་ན། དགྲ་བཅོམ་པ་རྣམས་དང་། རང་སངས་རྒྱས་རྣམས་དང་། བྱང་ཆུབ་སེམས་དཔའ་དང་། དེ་བཞིན་གཤེགས་པ་ནི་ཡང་དག་པར་ན་ཅི་ཡང་ཟ་བ་མེད་དེ། ཕ་རོལ་གདུལ་བའི་ཕྱིར་སོ་སོའི་སྐྱེ་བོ་ཚད་མེད་པ་དག་གི་སྦྱིན་པ་བླངས་པར་བསྟན་ཏེ། དེ་ཡང་དེ་དག་གི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱ་བ་དང་། སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་གཤིན་རྗེའི་འཇིག་རྟེན་ལས་བསྒྲལ་བའི་ཕྱིར་རོ། །དེ་ལ་གང་ཞིག་འདི་སྙམ་དུ་དེ་བཞིན་གཤེགས་པ་ཡང་ལོ་དྲུག་གི་བར་དུ་ཤིན་ཏུ་སྤྱོད་དཀའ་བ་སྤྱད་དེ། སྐུ་ཡང་ཤིན་ཏུ་ཉམ་ཆུང་བར་གྱུར་ཏོ་སྙམ་དུ་སེམས་ན་དེ་ནི་གནས་མ་ཡིན་ནོ། །སངས་རྒྱས་བཅོམ་ལྡན་འདས་ནི་སྲིད་པ་ལས་རྣམ་པར་གྲོལ་བས་བུས་པ་མ་རབས་དང་མི་འདྲ་བ་ཡིན་ན་ཅིའི་ཕྱིར་སྐུ་ཉམ་ཆུང་ཞིང་རིད་པར་འགྱུར། སངས་རྒྱས་བཅོམ་ལྡན་འདས་ནི་ཤིན་ཏུ་བརྩོན་འགྲུས་སུ་ནན་ཏན་བྱས་པས་རྡོ་རྗེ་ལྟ་བུའི་སྐུ་འཐོབ་པར་འགྱུར་ཏེ། འཇིག་རྟེན་དང་བཅས་པའི་ལུས་སྐྱོན་ཡོད་པ་ལྟ་བུ་དང་འདྲ་བ་མ་ཡིན་ཏེ་ངའི་ཉེ་གནས་རྣམས་ཀྱང་དེ་དང་འདྲ་བར་བསམ་གྱིས་མི་ཁྱབ་པས་ཟས་ལ་རྟེན་པ་མ་ཡིན་ནོ། །མཐུ་བོ་ཆེ་ཐམས་ཅད་ཕྲག་དོག་མེད་དོ་ཞེས་བྱ་བ་ཡང་ལྷག་མ་དང་བཅས་སོ། །དཔེར་ན་འཇིག་རྟེན་ན་མི་ཁ་ཅིག་ཚེ་གཅིག་ཏུ་ཕྲག་དོག་གི་སེམས་ཀྱང་མེད་ལ་མཐུ་མེད་པ་ཡང་ཡོད་དོ། །ནད་ཐམས་ཅད་ཟས་ལ་འགྱུར་ཞེས་བྱ་བ་ཡང་ལྷག་མ་དང་བཅས་སོ། །མི་ཁ་ཅིག་ནི་གློ་བུར་གྱི་ནད་བག་མ་བྱས་པ་ལས་འགྱུར་བ་ཡང་ཡོད་དོ། །འདི་ལྟ་སྟེ་དེ་ནི་ཚེར་མས་ཟུག་པ་དང་། མཚོན་ཆས་ཕོག་པ་ལ་སོགས་པའོ། །སྤྱོད་པ་རྣམ་པར་དག་པ་ཐམས་ཅད་བདེ་བ་མྱོང་ངོ་ཞེས་བྱ་བ་ཡང་ལྷག་མ་དང་བཅས་སོ། །འཇིག་རྟེན་ན་མུ་སྟེགས་ཅན་ཚངས་པར་ཡོངས་སུ་དག་པར་སྤྱོད་མོད་ཀྱི་སྡུག་བསྔལ་མང་དུ་མྱོང་བ་ཡང་ཡོད་དོ། །དེ་བས་ན་དེ་བཞིན་གཤེགས་པས་གསུངས་པ་ཐམས་ཅད་
ཀྱང་ལྷག་མ་དང་བཅས་ཏེ། དེ་ནི་དེ་བཞིན་གཤེགས་པས་རྒྱུ་དང་རྐྱེན་མེད་བཞིན་དུ་ཚིགས་སུ་བཅད་པ་འདི་སྨྲས་པ་མ་ཡིན་གྱི། རྒྱུ་ཡོད་རྐྱེན་ཡོད་པར་གསུངས་སོ། །སྔོན་ཡུལ་ཧུ་ད་ཡ་ན་འདིར་བྲམ་ཟེར་སྐྱེས་ཡོན་ཏན་ཞེས་བྱ་བ་ང་གང་ན་བ་དེར་འོངས་ནས་དུས་བརྒྱད་ཀྱི་ཁྲིམས་བཞི་པོ་བསྲུང་བར་འདོད་པས་ངས་དེའི་ཚེ་དེ་ལ་ཚིགས་སུ་བཅད་པ་དེ་དག་གསུངས་པ་ཡིན་ནོ། །དེ་ནས་བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་དག་ནི་ལྷག་མ་མ་མཆིས་པའི་དོན་ཞེས་བགྱི་བ་ལགས། གང་དག་ནི་དོན་ཐམས་ཅད་ཅེས་བགྱི་བ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཐམས་ཅད་ཅེས་བྱ་བ་ནི་བྱང་ཆུབ་ཀྱི་ཕྱོགས་དང་། དགེ་བའི་ཆོས་ལ་མོས་པ་མ་གཏོགས་པ་ནི་ཐམས་ཅད་ཀྱང་ཡིན་ལ། ལྷག་མ་མེད་པ་ཞེས་ཀྱང་བྱའོ། །ཆོས་གཞན་ཐམས་ཅད་ནི་ལྷག་མ་དང་བཅས་པ་ཞེས་ཀྱང་བྱ་ལ། ལྷག་མ་མེད་པ་ཞེས་ཀྱང་བྱ་སྟེ། ཆོས་ལ་མོས་པའི་རིགས་ཀྱི་བུ་དག་ལྷག་མ་དང་བཅས་པ་དང་། ལྷག་མ་མེད་པའི་དོན་ཤེས་པར་འདོད་པའི་ཕྱིར་རོ། །དེ་ནས་བྱང་ཆུབ་སེམས་དཔའ་འོད་སྲུང་ཤིན་ཏུ་དགའ་ཞིང་མགུ་ལ་རངས་པར་གྱུར་ནས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ངོ་མཚར་ཆེའོ། །བཅོམ་ལྡན་འདས་སེམས་ཅན་ཐམས་ཅད་ལ་སྲས་སྒྲ་གཅན་འཛིན་ལྟར་མཉམ་པར་གཟིགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་ལེགས་སོ་ལེགས་སོ། །ཁྱོད་ཀྱིས་དོན་ཤིན་ཏུ་ཟབ་མོ་རྟོགས་པ་ལེགས་སོ་ལེགས་སོ་ཞེས་བྱ་བ་བྱིན་ནོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཐེག་པ་ཆེན་པོ་ཡོངས་སུ་མྱ་ངན་ལས་འདས་པ་འདིའི་ཡོན་ཏན་དང་བསོད་ནམས་ཇི་སྙེད་ཅིག་ཐོབ་པ་བསྟན་དུ་གསོལ། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་གང་ཞིག་གིས་མདོ་སྡེ་འདིའི་མིང་ཐོས་པ་ཙམ་གྱི་བསོད་ནམས་ཀྱི་ཕུང་པོ་ཐོབ་པ་ནི་སངས་རྒྱས་བཅོམ་ལྡན་འདས་མ་
གཏོགས་པར་ཉན་ཐོས་དང་རང་སངས་རྒྱས་ཀྱིས་ཀྱང་བརྗོད་དུ་ནུས་པ་མ་ཡིན་ནོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་སྤྱོད་ཡུལ་ཡིན་ཏེ། བསམ་གྱིས་མི་ཁྱབ་པའི་ཕྱིར་རོ། །དེ་ལ་གང་ཞིག་འཆང་ངམ། འཛིན་ཏམ། ཀློག་གམ། འདོན་ཏམ། ཁོང་དུ་ཆུད་པར་བྱེད་དམ། གླེགས་བམ་ལ་འདྲིའམ། འདྲིར་བཅུག་པ་ལྟ་སྨོས་ཀྱང་ཅི་དགོས་ཏེ་དེའི་ཚེ་འཇིག་རྟེན་དུ་བཅས་པ་ལྷ་དང་མི་དང་ལྷ་མ་ཡིན་ལ་སོགས་པ་ཐམས་ཅད་ཀྱིས། སངས་རྒྱས་ཀྱི་སྤྱན་སྔར་སྐད་འཐུན་པར་ཚིགས་སུ་བཅད་པ་འདི་སྐད་ཅེས་གསོལ་ཏོ། །སངས་རྒྱས་རྣམས་ནི་བསམ་མི་ཁྱབ། །ཆོས་དང་དགེ་འདུན་དེ་བཞིན་ཏེ། །དེ་བས་བདག་ཅག་གསོལ་བ་འདེབས། །ད་རུང་ཅུང་ཟད་བཞུགས་པར་གསོལ། །བཙུན་པ་འོད་སྲུང་ཆེན་པོ་དང་། །གཞན་ཡང་དགའ་བོ་ལ་སོགས་པ། །འཁོར་གྱི་དཀྱིལ་འཁོར་གཉིས་པོ་ཡང་། །མ་མཆིས་རེ་ཞིག་གཞེས་སུ་གསོལ། །དབུས་གྱུར་འཆང་གི་ཡུལ་བདག་པོ། །རྒྱལ་པོ་ཆེན་པོ་མ་སྐྱེས་དགྲ། །སངས་རྒྱས་ལ་ནི་རབ་མོས་པ། །དེ་ཡང་ད་དུང་འདིར་མ་མཆིས། །དེ་བཞིན་གཤེགས་པ་ཐུགས་བརྩེའི་ཕྱིར། །ད་དུང་ཅུང་ཟད་གཞེས་སུ་གསོལ། །འཁོར་གྱི་དཀྱིལ་འཁོར་མང་པོ་འདིར། །བདག་གི་ཐེ་ཙོམ་གཅད་དུ་གསོལ། །དེ་ནས་དེ་བཞིན་གཤེགས་པས་འཁོར་མང་པོ་དག་ལ་ཚིགས་སུ་བཅད་དེ་བཀའ་སྩལ་པ། ང་ཡི་ཆོས་ཀྱི་སྲས་ཐུ་བོ། །འོད་སྲུང་ཆེན་པོ་ཞེས་བྱ་སྟེ། །དགའ་བོ་བརྩོན་འགྲུས་རྩོམ་པའི་མཆོག །ཀུན་གྱི་ཐེ་ཙོམ་གཅོད་པར་འགྱུར། །ཁྱོད་ཀྱིས་ཤིན་ཏུ་ལེགས་པར་ཉོན། །དགའ་བོ་མང་དུ་ཐོས་པ་ལས། །ཤིན་ཏུ་རྟོགས་པར་འགྱུར་བ་ནི། །རྟག་དང་མི་རྟག་དོན་རྣམས་ཏེ། །དེ་བས་དེ་ཡི་ཕྱིར་ན་ཁྱེད། །མི་དགའ་མྱ་ངན་མ་བྱེད་ཅིག །དེའི་ཚེ་འཁོར་གྱི་དཀྱིལ་འཁོར་མང་པོ་དེ་དག་མཆོད་པའི་ཡོ་བྱད་རྣམ་པ་སྣ་ཚོགས་ཀྱིས་བཅོམ་ལྡན་འདས་ལ་མངོན་པར་མཆོད་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །བྱང་ཆུབ་སེམས་དཔའ་ཚད་མེད་མཐའ་ཡས་པ་ཀླུང་གང་གཱའི་བྱེ་མ་སྙེད་ནི་ས་
དང་པོ་ལ་གནས་པར་གྱུར་ཏོ། །དེའི་ཚེ་བཅོམ་ལྡན་འདས་ཀྱིས་འཇམ་དཔལ་གཞོན་ནུ་དང་། བྱང་ཆུབ་སེམས་དཔའ་འོད་སྲུང་དང་། ཙུན་ད་ལ་ལུང་བསྟན་ནས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་བདག་གི་སེམས་ལ་ཤིན་ཏུ་ནན་ཏན་བྱོས་ལ། བག་ཡོད་པར་གྱིས་ཤིག །ང་ནི་ད་ལྟར་རྒྱབ་ན་བས་ཐམས་ཅད་དུ་ན་བར་གྱུར་གྱིས། ང་ནི་ཇི་ལྟར་བུས་པ་ཆུང་ངུ་ན་བ་ལྟར་ཉལ་ལོ་སྙམ་དགོངས་སོ། །འཇམ་དཔལ་ལ་སོགས་པ་ཁྱེད་རྣམས་ཀྱིས་འཁོར་བཞི་པོ་ལ་ཐེག་པ་ཆེན་པོའི་ཆོས་རྒྱས་པར་སྟོན་ཅིག །ད་ཆོས་འདི་དག་ཀྱང་ཁྱེད་ལ་ཡོངས་སུ་གདམས་སོ། །དེ་བཞིན་དུ་འོད་སྲུང་དང་། དགའ་བོ་ཁྱེད་ལ་ཡང་ཡང་དག་པའི་ཆོས་འདི་དག་གདམས་སོ། །དེའི་ཚེ་དེ་བཞིན་གཤེགས་པས་དེ་སྐད་ཅེས་གསུངས་ནས། སོ་སོའི་སྐྱེ་བོ་དག་གདུལ་བའི་ཕྱིར་ནད་པ་ལྟར་གློ་གཡས་པ་ཕབ་སྟེ་གཟིམས་སོ། །དེ་ནས་བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ནི་ནད་ཀྱིས་སྡུག་བསྔལ་བའི་སྐྱོན་ཐམས་ཅད་དང་བྲལ་བ་ལགས་ཏེ། བསྙེངས་པ་མི་མངའ་ན། བཅོམ་ལྡན་འདས་སེམས་ཅན་ཐམས་ཅད་ནི་གདུག་པའི་ཟུག་རྔུ་རྣམ་པ་བཞིས་ནད་ཀྱི་རྒྱུར་འགྱུར་བ་ནི་འདི་ལྟ་སྟེ། འདོད་ཆགས་དང་། ཞེ་སྡང་དང་། གཏི་མུག་དང་། ང་རྒྱལ་ལོ། །གལ་ཏེ་ནད་ཀྱི་རྒྱུ་མཆིས་ན། ནད་མང་པོ་སྐྱེ་བར་འགྱུར་བ་ནི་འདི་ལྟ་སྟེ། འདོད་པས་ཚ་བ་དང་། གློ་ན་བ་དང་། དབུགས་རྒོད་པ་དང་། སྐྱུག་བྲོ་བ་དང་། ལུས་ཀུན་སྦྲིད་པ་དང་། སྙིང་འཁྲུག་ཅིང་མི་དྲན་པ་དང་། ཚད་པར་འཁྲུག་པ་དང་། ཟ་གུ་དང་། མིག་དང་། རྣ་བ་ཚ་ཞིང་ན་བ་དང་། རྒྱབ་འཛིངས་པ་དང་། ལྟོ་དབོ་བ་དང་། སྨྱོ་བ་དང་། རིད་ཅིང་སྐམ་པ་དང་། ཡི་དགས་ཀྱིས་བརླམས་པ་ལ་སོགས་པ་སྟེ། ལུས་དང་སེམས་ཀྱི་ནད་རྣམ་པ་སྣ་ཚོགས་ནི་བཅོམ་ལྡན་འདས་ལ་མི་མངའ་ན་དེང་ཅིའི་སླད་དུ་དེ་བཞིན་གཤེགས་པ་སྐུ་ཚེ་ལ་གཟིགས་ཏེ། ང་རྒྱབ་ན་བར་འགྱུར་གྱིས་འཇམ་དཔལ་ཁྱོད་འཁོར་མང་པོ་ལ་ཆོས་སྟོན་ཅིག་ཅེས་བཀའ་སྩལ། རྒྱུ་དང་རྐྱེན་
རྣམ་པ་གཉིས་ཀྱི་ནད་ཀྱིས་སྡུག་བསྔལ་བར་མི་འགྱུར་བ་ནི་འདི་ལྟ་སྟེ། སེམས་ཅན་ཐམས་ཅད་ལ་བྱམས་ཤིང་སྙིང་བརྩེ་བ་དང་། ནད་པ་ལ་ན་བའི་རྐྱེན་སྨན་སྦྱིན་ཞིང་དབུལ་བ་སྟེ། དེ་བཞིན་གཤེགས་པ་ནི་སྔོན་བསྐལ་པ་ཚད་མ་མཆིས་པའི་བར་དུ་བྱང་ཆུབ་ཀྱི་ལམ་ལ་ཤིན་ཏུ་ནན་ཏན་མཛད་དེ། རྟག་ཏུ་གསུང་སྙན་པས་སེམས་ཅན་ལ་བདེ་བའི་དོན་མཛད་ཅིང་སྡུག་བསྔལ་བར་མི་འགྱུར་བ་དང་། ནད་པ་ལ་སྨན་རྣམ་པ་སྣ་ཚོགས་ཡོངས་སུ་གཏོང་བ་ལགས་ན་དེ་ཅིའི་རྐྱེན་གྱིས་དེང་འདི་ལྟར་བསྙུང་ངོ་ཞེས་བཀའ་སྩལ། བཅོམ་ལྡན་འདས་འཇིག་རྟེན་ན་ནད་པ་དག་ནི་བར་བར་འདུག་བར་བར་ཉལ། བར་འགའ་ནི་མི་བདེ་བས་བཟའ་བ་དང་འཐུང་བ་ཡང་སློང་། བར་འགའ་ནི་འཁོར་རྣམས་ལ་སོ་ཚིས་དང་ལས་ཀྱང་འདི་ལྟར་བྱའོ་ཞེས་སྟོན་ན་དེ་བཞིན་གཤེགས་པ་ཅིའི་སླད་དུ་ཅང་མི་གསུང་བར་གཟིམས་ཏེ་ཉན་ཐོས་ཀྱི་ཉེ་གནས་རྣམས་ལ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་དང་། རྣམ་པར་གྲོལ་བ་དང་། སྙོམས་པར་འཇུག་པ་དང་། ཡང་དག་པར་སྤོང་བ་ལ་བརྩོན་པ་དག་ཅིའི་སླད་དུ་མི་སྟོན། ཅིའི་རྐྱེན་གྱིས་ཐེག་པ་ཆེན་པོའི་མདོ་སྡེ་ཤིན་ཏུ་ཟབ་མོ་འདི་དག་མི་གསུང་ཞིང་ཅིའི་སླད་དུ་དེ་བཞིན་གཤེགས་པས་ཚད་མེད་པའི་ཐབས་ཀྱིས་འོད་སྲུང་ཆེན་པོ་མིའི་ནང་ན་གླང་པོའི་རྒྱལ་པོ་དང་འདྲ་བ་དང་། སྐྱེས་བུ་ཆེན་པོ་རྣམས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་མི་སྟོན། ཅིའི་སླད་དུ་དགེ་སློང་མ་རུངས་པ་མ་བརྟགས་པའི་དངོས་པོ་ཐམས་ཅད་འཆང་བ་ལ་ཆད་པས་གཅོད་པ་མི་སྟོན། བཅོམ་ལྡན་འདས་ཡང་དག་པར་སྙུན་མི་མངའ་བཞིན་དུ་ཅིའི་སླད་དུ་ཅང་མི་གསུང་བར་གློ་གཡས་པ་ཕབ་ནས་གཟིམས་པར་གྱུར། བྱང་ཆུབ་སེམས་དཔའ་དག་ནད་པ་ལ་ནད་ཀྱི་རྐྱེན་སྨན་བྱིན་པ་ན། དགེ་བའི་རྩ་བ་ཐམས་ཅད་སེམས་ཅན་ལ་བདར་ནས་ཐུན་མོང་དུ་ཐམས་ཅད་མཁྱེན་པའི་ཡེ་ཤེས་སུ་བསྔོས་ཏེ། སེམས་ཅན་ཐམས་ཅད་ཀྱི་ཉོན་མོངས་པའི་སྒྲིབ་པ་དང་། ལས་ཀྱི་སྒྲིབ་པ་དང་། རྣམ་པར་སྨིན་པའི་སྒྲིབ་པ་ཡོངས་སུ་སེལ་ཏོ། །ཉོན་མོངས་པའི་སྒྲིབ་པ་ཞེས་བགྱི་བ་ནི་འདོད་ཆགས་
དང་། ཞེ་སྡང་དང་། གཏི་མུག་དང་། ཁོང་ཁྲོ་བའི་ཀུན་ནས་དཀྲིས་པའི་ཉོན་མོངས་པ་དང་། ཕྲག་དོག་དང་། སེར་སྣ་དང་། གཡོ་དང་། སྒྱུ་དང་། མི་འཛེམ་པ་དང་། ཁྲེལ་མེད་པ་དང་། ང་རྒྱལ་དང་། རབ་ཀྱི་ང་རྒྱལ་དང་། ང་རྒྱལ་ལས་ཀྱང་ང་རྒྱལ་དང་། ངའོ་སྙམ་པའི་ང་རྒྱལ་དང་། ལོག་པའི་ང་རྒྱལ་དང་། མངོན་པའི་ང་རྒྱལ་དང་། ཆུང་བའི་ང་རྒྱལ་དང་། བག་མེད་པ་དང་། དྲེགས་པ་དང་། ཁོན་དུ་འཛིན་པ་དང་། རྩོད་པ་དང་། ལོག་པར་འཚོ་བ་དང་། གཡོ་སྒྱུས་ཚུལ་འཆོས་པ་དང་། རྙེད་པས་རྙེད་པ་ཚོལ་བ་དང་། ཆོས་མ་ཡིན་པས་ཚོལ་བ་དང་། མང་དུ་ཚོལ་བ་དང་། བསྟི་སྟང་མེད་པ་དང་། བསྟན་པ་བཞིན་དུ་མི་བྱེད་པ་དང་། མི་དགེ་བའི་བཤེས་གཉེན་ལ་སྟེན་པ་དང་། རྙེད་པ་ལ་ཆགས་པས་མི་སྐྱོ་བ་དང་། འཆིང་བས་རྣམ་པར་བཅིངས་པས་དགྲོལ་བར་དཀའ་བ་དང་། འདོད་པ་ངན་པ་ལ་འདོད་པ་དང་། ཆགས་པ་ངན་པ་ལ་ཆགས་པ་དང་། འཇིག་ཚོགས་སུ་ལྟ་བ་དང་། ཡོད་པར་ལྟ་བ་དང་། མེད་པར་ལྟ་བ་དང་། སྨྱང་ཞིང་འཕྲེས་པ་དང་། དགའ་བ་དང་། གཉིད་དང་། གླལ་བ་དང་། མི་དགའ་བ་དང་། བཟའ་བ་དང་། བཏུང་བ་ལ་ཆགས་པ་དང་། སེམས་རྨུགས་པ་དང་། སེམས་གཞན་ལ་དམིགས་པ་དང་། མི་དགེ་བ་ཡིད་ལ་བྱེད་པ་དང་། ལུས་དང་ངག་ངན་པར་སྤྱོད་པ་དང་། མང་དུ་སྨྲ་བ་ལ་དགའ་བ་དང་། དབང་པོ་རྣམས་རྟུལ་བ་དང་། སྨྲའོ་ཅོག་ཏུ་བརྫུན་ཟེར་བ་དང་། འདོད་པའི་རྟོག་པ་དང་། ཞེ་སྡང་གི་རྟོག་པ་དང་། གནོད་པའི་རྟོག་པས་ཀུན་ཏུ་ཁེབས་པ་ཉོན་མོངས་པའི་སྒྲིབ་པ་ཞེས་བྱ་བ་དང་། མཚམས་མེད་པ་ལྔའི་ཁ་ན་མ་ཐོ་བའི་ལས་ཀྱི་སྒྲིབ་པ་དང་། སེམས་ཅན་དམྱལ་བ་དང་། བྱོལ་སོང་དང་། ཡི་དགས་སུ་སྐྱེ་བ་དང་། དམ་པའི་ཆོས་ལ་སྐུར་པ་དང་། ལོག་སྲེད་ཅན་དུ་སྐྱེས་པ་ནི་རྣམ་པར་སྨིན་པའི་སྒྲིབ་པ་ཞེས་བགྱི་སྟེ། སྒྲིབ་པ་རྣམ་པ་གསུམ་པོ་འདི་ནི་ནད་ཆེན་པོ་ཞེས་བགྱི་ན་བྱང་ཆུབ་སེམས་དཔའ་རྣམས་ནི་བསྐལ་པ་ཚད་མེད་པའི་བར་དུ་བྱང་ཆུབ་ཀྱི་སྤྱད་པ་སྤྱོད་པ་ན་ན་བ་ཐམས་ཅད་ལ་སྨན་གསོས་ཀྱི་སྦྱིན་པ་བྱིན་ཏེ་འདི་སྐད་དུ་སྨོན་ལམ་བཏབ་བོ། །སེམས་ཅན་ཐམས་ཅད་ནད་དང་
ཡོངས་སུ་བྲལ་ཏེ། དེ་བཞིན་གཤེགས་པའི་རྡོ་རྗེའི་སྐུ་ཐོབ་པར་གྱུར་ཅིག །སེམས་ཅན་ཚད་མེད་པ་ཐམས་ཅད་ལ་སྨན་དམ་པའི་རྒྱལ་པོར་གྱུར་ཏེ་ནད་མ་རུངས་པ་ཐམས་ཅད་སེལ་བར་གྱུར་ཅིག །སེམས་ཅན་ཐམས་ཅད་སྨན་ཨ་ག་ཏ་ཐོབ་ཅིང་། སྨན་དེའི་མཐུས་གདུག་པ་ཐམས་ཅད་སེལ་བར་གྱུར་ཅིག །གཞན་ཡང་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་ཅིང་། མྱུར་དུ་བླ་ན་མེད་པའི་སངས་རྒྱས་ཀྱི་སྨན་རྙེད་དེ་ཉོན་མོངས་པའི་ཟུག་རྔུ་ཐམས་ཅད་བསལ་བར་གྱུར་ཅིག །གཞན་ཡང་སེམས་ཅན་ཐམས་ཅད་ཤིན་ཏུ་བརྩོན་འགྲུས་བརྩམ་པས་དེ་བཞིན་གཤེགས་པའི་རྡོ་རྗེ་ལྟ་བུའི་ཐུགས་དང་ལྡན་ཏེ་སྨན་དམ་པར་གྱུར་ནས་ནད་ཐམས་ཅད་གསོ་ཞིང་རྩོད་པའི་འདུ་ཤེས་མེད་པར་གྱུར་ཅིག །གཞན་ཡང་སེམས་ཅན་དག་སྨན་གྱི་སྡོང་པོ་ཆེན་པོར་གྱུར་ཏེ། ནད་མ་རུངས་པ་ཐམས་ཅད་བསལ་བར་གྱུར་ཅིག །གཞན་ཡང་སེམས་ཅན་ཐམས་ཅད་གདུག་པའི་ཟུག་རྔུ་ཕྱུང་ནས་དེ་བཞིན་གཤེགས་པའི་བླ་ན་མེད་པའི་འོད་ཟེར་ཐོབ་པར་གྱུར་ཅིག །གཞན་ཡང་སེམས་ཅན་ཐམས་ཅད་དེ་བཞིན་གཤེགས་པའི་ཡེ་ཤེས་ཀྱི་སྨན་ཆེན་པོའི་ཆོས་ཀྱི་གཏེར་ཤིན་ཏུ་ཟབ་མོ་ལ་འཇུག་པར་གྱུར་ཅིག་ཅེས་སྨོན་ལམ་འདེབས་སོ། །བཅོམ་ལྡན་འདས་བྱང་ཆུབ་སེམས་དཔའ་ཡང་དེ་ལྟར་བསྐལ་པ་ཚད་མེད་དཔག་ཏུ་མེད། བགྲང་དུ་མེད་པ་བརྒྱ་སྟོང་གི་བར་དུ་དེ་སྐད་ཅེས་སྨོན་ལམ་བཏབ་སྟེ། སེམས་ཅན་ཐམས་ཅད་ནད་མ་མཆིས་པར་བགྱིད་ན་ཅིའི་རྐྱེན་གྱིས་དེ་བཞིན་གཤེགས་པ་ང་ནའོ་ཞེས་བཀའ་སྩལ། བཅོམ་ལྡན་འདས་གཞན་ཡང་འཇིག་རྟེན་ན་ནད་པ་ཁ་ཅིག་ནི་འདུག་པ་དང་། ལྡང་བ་དང་། འགྲོ་བ་དང་། འགོག་ཀྱང་མི་ནུས། ཁ་ཟས་དང་། སྐོམ་ཡང་མི་ཆུད་དེ། བུ་ཚ་ལ་སྟོན་ཅིང་འཆོས་ཀྱང་མི་ནུས། འཚོ་ནམ་གྱི་ལས་བྱ་བའི་འདོམས་ཀྱང་མི་ནུས་ཏེ། དེའི་ཚེ་ན་དེའི་ཕ་མ་དང་། ཆུང་མ་དང་། བུ་དང་། འཁོར་དང་། གཉེན་བཤེས་ལ་སོགས་པ་ཐམས་ཅད་ཀྱིས་དེ་ནི་ངེས་པར་འཆི་བར་འདུ་ཤེས་སོ། །
བཅོམ་ལྡན་འདས་དེ་ལྟར་དེ་བཞིན་གཤེགས་པ་དེ་ཡང་དེ་དང་འདྲ་སྟེ། གློ་གཡས་པ་ཕབ་ནས་གཟིམས་ཏེ། ཅང་མི་གསུང་བར་གྱུར་པས་འཛམ་བུའི་གླིང་འདི་ན་སྐྱེ་བོ་བླུན་པོ་དག་འདི་སྙམ་དུ་སེམས་པར་འགྱུར་རོ། །དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ངེས་པར་མྱ་ངན་ལས་འདས་ཏེ་འགོག་པ་ཟད་པའི་འདུ་ཤེས་སྐྱེད་དོ། །དེ་བཞིན་གཤེགས་པ་ཉིད་ནི་མཐར་ཡོངས་སུ་མྱ་ངན་ལས་འདའ་བ་ཡང་མ་མཆིས་སོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པ་ནི་རྟག་པ་མི་འགྱུར་མི་འཕོ་བའི་ཕྱིར་རོ། །དེའི་རྒྱུ་དེའི་རྐྱེན་གྱིས་ང་འདི་ལྟར་རྒྱབ་ནའོ་ཞེས་གསུངས་པའི་མི་རིགས་སོ། །བཅོམ་ལྡན་འདས་གཞན་ཡང་འཇིག་རྟེན་ན་ནད་པ་ཁ་ཅིག་ནི་ཤིན་ཏུ་སྐེམ་ཞིང་རིད་པས་གན་རྐྱལ་ལམ། གློས་ཉལ་ནས་ལྡང་མི་ནུས་ཏེ། དེའི་ཚེ་འཁོར་རྣམས་ཀྱང་དེ་ལ་མི་འདོད་པའི་སེམས་སྐྱེས་ནས་གདོན་མི་ཟ་བར་འཆི་བར་འདུ་ཤེས་སོ། །དེ་བཞིན་གཤེགས་པ་ཡང་དེ་དང་འདྲ་སྟེ། མུ་སྟེགས་ཅན་རྣམ་པ་དགུ་བཅུ་རྩ་ལྔ་པོ་མི་འདོད་དེ་མྱ་ངན་ལས་འདའ་བར་འདུ་ཤེས་སོ། །མུ་སྟེགས་ཅན་དག་འདི་སྐད་དུ་བདག་ཅག་ལ་སོགས་པ་ནི་བདག་ཅེས་བྱ་བ་དང་། བདག་པོ་དང་། དུས་དང་། རྡུལ་ཕྲ་མོ་ལ་སོགས་པའི་ཆོས་ཀྱིས་རྟག་པར་གྱུར་པས་འགྱུར་ཞིང་འཕོ་བ་མེད་ཀྱི། དགེ་སྦྱོང་གཽ་ཏ་མ་ནི་མི་རྟག་པས་ཕྲོགས་ནས་འགྱུར་ཞིང་འཕོ་བའི་ཆོས་ཅན་དུ་གྱུར་ཏོ་ཞེས་སྨྲའོ། །དེ་བས་ན་བཅོམ་ལྡན་འདས་ཅང་མི་གསུང་བར་གློ་གཡས་པ་ཕབ་སྟེ་གཟིམས་པའི་མི་རིགས་སོ། །བཅོམ་ལྡན་འདས་གཞན་ཡང་འཇིག་རྟེན་ན་ནད་པ་དག་ནི་ཆེན་པོ་བཞི་ཉམས་ནས་ཤས་མི་མཉམ་པ་ལ་ཤིན་ཏུ་རིད་ཅིང་སྐེམ་པར་གྱུར་ཏེ། དེ་བས་ན་ཡིད་བཞིན་དུ་ལྡང་བ་དང་འདུག་པ་མི་ནུས་ཏེ་ཉལ་བ་ལགས་ན་དེ་བཞིན་གཤེགས་པ་ནི་ཆེན་པོ་བཞི་ཡང་མི་མཉམ་པ་མ་མཆིས་ལ། སྐུའི་མཐུ་དང་ཡང་ལྡན། ཉམས་རིད་པ་ཡང་མ་མཆིས་ཏེ། བཅོམ་ལྡན་འདས་ཁྱུ་མཆོག་ཆུང་ངུ་བཅུའི་སྟོབས་ནི་ཁྱུ་མཆོག་ཆེན་པོ་གཅིག་གི་སྟོབས་སུ་མ་མཆིས། ཁྱུ་མཆོག་ཆེན་པོ་བཅུའི་སྟོབས་ཀྱང་ཁྱུ་མཆོག་ཆེན་པོ་སྔོན་པོ་
གཅིག་གི་སྟོབས་སུ་མ་མཆིས། ཁྱུ་མཆོག་སྔོན་པོ་བཅུའི་སྟོབས་ཀྱང་བལ་གླང་གཡུང་གཅིག་གི་སྟོབས་སུ་མ་མཆིས། བལ་གླང་གཡུང་བཅུའི་སྟོབས་ཀྱང་བལ་གླང་རྒོད་གཅིག་གི་སྟོབས་སུ་མ་མཆིས། བལ་གླང་རྒོད་བཅུའི་སྟོབས་ཀྱང་བལ་གླང་མཆེ་བ་གཉིས་པ་གཅིག་གི་སྟོབས་སུ་མ་མཆིས། བལ་གླང་མཆེ་བ་གཉིས་པ་བཅུའི་སྟོབས་ཀྱང་བལ་གླང་མཆེ་བ་བཞི་པ་གཅིག་གི་སྟོབས་སུ་མ་མཆིས། བལ་གླང་མཆེ་བ་བཞི་པ་བཅུའི་སྟོབས་ཀྱང་གངས་ཀྱི་རིའི་བལ་གླང་དཀར་པོ་གཅིག་གི་སྟོབས་སུ་མ་མཆིས། གངས་ཀྱི་རིའི་བལ་གླང་དཀར་པོ་བཅུའི་སྟོབས་ཀྱང་སྤོས་ཀྱི་བལ་གླང་གཅིག་གི་སྟོབས་སུ་མ་མཆིས། སྤོས་ཀྱི་བལ་གླང་བཅུའི་སྟོབས་ཀྱང་བལ་གླང་སྔོན་པོ་གཅིག་གི་སྟོབས་སུ་མ་མཆིས། བལ་གླང་སྔོན་པོ་བཅུའི་སྟོབས་ཀྱང་བལ་གླང་སེར་པོ་གཅིག་གི་སྟོབས་སུ་མ་མཆིས། བལ་གླང་སེར་པོ་བཅུའི་སྟོབས་ཀྱང་བལ་གླང་དམར་པོ་གཅིག་གི་སྟོབས་སུ་མ་མཆིས། བལ་གླང་དམར་པོ་བཅུའི་སྟོབས་ཀྱང་བལ་གླང་དཀར་པོ་གཅིག་གི་སྟོབས་སུ་མ་མཆིས། བལ་གླང་དཀར་པོ་བཅུའི་སྟོབས་ཀྱང་བལ་གླང་རི་ཞེས་བྱ་བ་གཅིག་གི་སྟོབས་སུ་མ་མཆིས། བལ་གླང་རི་ཞེས་བྱ་བ་བཅུའི་སྟོབས་ཀྱང་བལ་གླང་ཨུད་པ་ལ་གཅིག་གི་སྟོབས་སུ་མ་མཆིས། བལ་གླང་ཨུད་པ་ལ་བཅུའི་སྟོབས་ཀྱང་བལ་གླང་ཀུ་མུ་ད་གཅིག་གི་སྟོབས་སུ་མ་མཆིས། བལ་གླང་ཀུ་མུ་ད་བཅུའི་སྟོབས་ཀྱང་བལ་གླང་པུན་ད་རཱི་ཀ་གཅིག་གི་སྟོབས་སུ་མ་མཆིས། བལ་གླང་པུན་ད་རཱི་ཀ་བཅུའི་སྟོབས་ཀྱང་མིའི་ནང་ན་གྱད་གཅིག་གི་སྟོབས་སུ་མ་མཆིས། མིའི་གྱད་བཅུའི་སྟོབས་ཀྱང་པར་གན་དེ་གཅིག་གི་སྟོབས་སུ་མ་མཆིས། པར་གན་དེ་བཅུའི་སྟོབས་ཀྱང་མཐུ་བོ་ཆེ་ལག་པ་བརྒྱད་པ་གཅིག་གི་སྟོབས་སུ་མ་མཆིས། མཐུ་བོ་ཆེ་བཅུའི་སྟོབས་ཀྱང་གནས་བཅུ་པའི་བྱང་ཆུབ་སེམས་དཔའ་ཚིགས་གཅིག་པའི་སྟོབས་སུ་མ་མཆིས་སོ། །སོ་སོའི་སྐྱེ་བོ་ཐམས་ཅད་ཀྱི་རུས་པའི་ཚིགས་ནི་གཅིག་ལ་གཅིག་རེག་ཅིང་འབྲེལ་བ་མ་ལགས་ཀྱི། གྱད་སྟོབས་པོ་ཆེའི་རུས་པའི་ཚིགས་ནི་གཅིག་ལ་གཅིག་རེག་གོ །པར་གན་དེའི་རུས་
པའི་ཚིགས་ནི་གཅིག་ལ་གཅིག་འབྲེལ་ཏོ། །མཐུ་བོ་ཆེའི་རུས་པའི་ཚིགས་ནི་ལུ་གུ་རྒྱུད་བཞིན་གཅིག་ལ་གཅིག་འབྲེལ་ཏོ། །བྱང་ཆུབ་སེམས་དཔའི་རུས་པའི་ཚིགས་ནི་འབྲུག་འཁྱིལ་པ་ལྟར་མདུད་པ་ཅན་དུ་མཆིས་པས་དེ་བས་ན་དེའི་སྟོབས་ནི་མཆོག་ཏུ་ཆེའོ། །འཇིག་རྟེན་ཐོག་མ་མངོན་པར་ཆགས་པ་ན་རྡོ་རྗེའི་མཐའ་ལ་བརྟན་ཏེ། རྡོ་རྗེའི་གདན་སྙིང་པོ་བྱང་ཆུབ་ཀྱི་དཀྱིལ་འཁོར་དུ་མངོན་པར་བྱུང་ནས་བྱང་ཆུབ་སེམས་དཔའ་གདན་དེ་ལ་བཞུགས་ཏེ། དེ་ཉིད་ཀྱི་ཚེ་ན་སྟོབས་བཅུ་རྙེད་པར་གྱུར་ཏོ། །དེ་བཞིན་གཤེགས་པ་ནི་བྱིས་པ་ཆུང་ངུ་ལྟ་བུ་མ་ལགས་ཏེ། བྱིས་པ་ཆུང་ངུ་ནི་གླེན་ཏེ་ཤེས་པ་མ་མཆིས་ལ། སྨྲ་ཡང་མི་ཤེས་པས་ན་ཡིད་བཞིན་དུ་འགྲེ་ཞིང་ཉལ་ཡང་སུ་ཡང་མི་འཕྱ་སྟེ། དེ་བཞིན་གཤེགས་པ་ནི་ཡེ་ཤེས་ཆེན་པོ་དང་ལྡན་པས་ཐམས་ཅད་ལ་འོད་ཀྱིས་གསལ་བར་མཛད་པ་ནི་མིའི་ནང་ན་ཀླུ་ལྟ་བུ་ལགས་པས་གཟི་བརྗིད་ཆེན་པོ་དང་ལྡན་ཏེ། རྫུ་འཕྲུལ་ཆེན་པོ་མངོན་པར་རྫོགས་ནས་བླ་ན་མེད་པའི་དྲང་སྲོང་ཆེན་པོ་ཐེ་ཚོམ་གྱི་དྲ་བ་ཡོངས་སུ་བཅད་པ། འདོད་པའི་ཟུག་རྔུ་ཕྱུང་བ། སྤྱོད་ལམ་ཤིན་ཏུ་མཛེས་པ། སྤྱོད་ལམ་གྱི་དབང་དུ་གྱུར་པ། བསྙེངས་པ་མི་མངའ་བ་ལགས་ན་ཅིའི་སླད་དུ་གློ་གཡས་པ་ཕབ་སྟེ་གཟིམས་པས་འཇིག་རྟེན་དུ་བཅས་པ་ལྷ་དང་མི་ཐམས་ཅད་མི་དགའ་ཞིང་སྡུག་བསྔལ་གྱིས་གདུངས་པར་མཛད། དེ་ནས་བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ཀྱི་སྤྱན་སྔར་ཚིགས་སུ་བཅད་དེ་གསོལ་པ། ཡོན་ཏན་ཆེན་པོ་གཽ་ཏ་མ། །བཞེངས་ཏེ་དམ་ཆོས་བསྟན་དུ་གསོལ། །ཇི་ལྟར་བྱིས་པ་ཆུང་ངུ་འམ། །ནད་པ་ཉལ་བ་ལྟ་བུ་མིན། །ལྷ་མི་སྟོན་པ་ཁ་ལོ་སྒྱུར། །ཤིང་དབང་དྲུང་དུ་གཟིམས་པ་འདི། །བྱིས་པ་མ་རབས་མཐོང་ནས་སུ། །ངེས་པར་མྱ་ངན་འདའ་ཞེས་མཆི། །ཤིན་ཏུ་རྒྱས་པའི་མདོ་སྡེ་ལས། །སངས་རྒྱས་སྤྱོད་ཡུལ་ཟབ་མོ་ཡི། །དགོངས་ཏེ་གསུངས་པ་མི་ཤེས་པ། །དམུས་ལོང་ལམ་མི་མཐོང་བ་བཞིན། །བྱང་ཆུབ་སེམས་དཔའ་ཆེན་པོ་དང་། །འཇམ་དཔལ་གཞོན་ནུ་ལ་སོགས་པ། །ཟབ་
མོའི་དོན་རྣམས་རྟོགས་པ་ནི། །ཇི་ལྟར་འཕོང་ལ་གོམས་པ་བཞིན། །དུས་གསུམ་གཤེགས་པའི་བཅོམ་ལྡན་འདས། །ཐུགས་རྗེ་ཆེན་པོའི་གཙོ་བོར་གྱུར། །དེ་ལྟར་ཐུགས་རྗེ་ཆེ་བ་དེ། །ད་ལྟར་ཇི་ལྟར་ག་ལ་མཆིས། །ཇི་སྟེ་ཐུགས་རྗེ་མི་མངའ་ན། །སངས་རྒྱས་ཞེས་ཀྱང་བགྱིར་མི་རུང་། །ཇི་སྟེ་མྱ་ངན་འདས་གྱུར་ན། །རྟག་པ་ཞེས་ཀྱང་བགྱིར་མི་རུང་། །བླ་ན་མེད་པའི་བཅོམ་ལྡན་འདས། །བདག་ཅག་གསོལ་བ་གནང་བར་མཛོད། །འགྲོ་བ་ཀུན་ལ་བདེ་བའི་ཕྱིར། །མུ་སྟེགས་ཅན་དག་གདུལ་དུ་གསོལ། །དེའི་ཚེ་བཅོམ་ལྡན་འདས་ཐུགས་རྗེ་ཆེན་པོ་ལ་གོམས་པའི་ཐུགས་ཀྱིས་སེམས་ཅན་སོ་སོའི་བསམ་པ་མཁྱེན་ནས་དེ་དག་གི་རྗེས་སུ་མཐར་ཕན་པ་དང་བདེ་བའི་དོན་མཛད་པའི་ཕྱིར་གཟིམས་པ་ལས་བཞེངས་ནས། སྐྱིལ་མོ་ཀྲུང་བཅས་ཏེ་བཞུགས་སོ། །དེའི་ཚེ་སྐུ་མདོག་ལྷང་ངེ་ལྷམ་མེར་འཚེར་བ་ནི་གསེར་བཙོ་མ་ལྟར་གསལ་བར་གྱུར་ཏོ། །ཞལ་མདོག་ཤིན་ཏུ་མཛེས་པ་ནི་ཇི་ལྟར་ཟླ་བ་རྒྱས་པ་ལྟ་བུའོ། །སྐུ་ཤིན་ཏུ་གསལ་ཞིང་དག་པས་དྲི་མའམ། རྙོག་པའི་བག་མེད་དེ་འོད་ཟེར་ཆེན་པོ་བཀྱེ་ནས་ནམ་མཁའི་དབྱིངས་ཡོངས་སུ་གང་བར་གྱུར་ཏོ། །ཉི་མ་བརྒྱ་སྟོང་བས་ཤིན་ཏུ་ལྷག་པའི་འོད་ཀྱིས་ཤར་ཕྱོགས་དང་། ལྷོ་དང་། ནུབ་དང་། བྱང་དང་། ཕྱོགས་མཚམས་བཞི་དང་། སྟེང་དང་། འོག་གི་ཕྱོགས་ཀྱི་སངས་རྒྱས་ཀྱི་འཇིག་རྟེན་གྱི་ཁམས་སུ་སེམས་ཅན་ཐམས་ཅད་ལ་ཡེ་ཤེས་ཆེན་པོའི་སྣང་བ་བྱིན་ནས་མ་རིག་པའི་མུན་པ་ཡོངས་སུ་བསལ་ཏོ། །གཞན་ཡང་སེམས་ཅན་བྱེ་བ་ཁྲག་ཁྲིག་བརྒྱ་སྟོང་སྙེད་བྱང་ཆུབ་ཀྱི་སེམས་ལས་སླར་མི་ལྡོག་པར་བཀོད་དོ། །དེའི་ཚེ་བཅོམ་ལྡན་འདས་སེང་གེའི་རྒྱལ་པོ་ལྟར་བསྙེངས་པ་མེད་བཞིན་དུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་སྐུ་ཡོངས་སུ་བརྒྱན་ཏེ། སྐུའི་བ་སྤུའི་བུ་ག་རེ་རེ་ནས་པད་མོ་རེ་རེ་བྱུང་བར་སྤྲུལ་ཏོ། །པད་མོ་དེ་དག་ཀྱང་འདབ་མ་སྟོང་སྟོང་དང་ལྡན་ཏེ།
པད་མོ་ཉིད་ནི་གསེར། སྡོང་བུ་ནི་བཻ་དཱུརྱ། གེ་སར་ནི་རྡོ་རྗེ། གཞི་ནི་ཤེལ་ལས་བྱས་པ་སྟེ། ཟླུམ་ཁྱད་ནི་ཤིང་རྟའི་འཁོར་ལོ་ཙམ་མོ། །པད་མོ་དེ་དག་སོ་སོ་ལས་ཀྱང་འོད་རྣམ་པ་སྣ་ཚོགས་བྱུང་བ་ནི་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། སྨུག་པོ་དང་། ཤེལ་གྱི་ཁ་དོག་ལྟ་བུ་སྟེ། འོད་དེ་དག་སོ་སོ་ནས་མཚམས་མེད་པའི་སེམས་ཅན་དམྱལ་བ་ཆེན་པོ་དང་། འདུ་ཤེས་ཀྱི་སེམས་ཅན་དམྱལ་བ་དང་། ཐིག་ནག་པོའི་སེམས་ཅན་དམྱལ་བ་དང་། སྣ་ཚོགས་འདུས་པའི་སེམས་ཅན་དམྱལ་བ་དང་། འོ་དོད་འབོད་པའི་སེམས་ཅན་དམྱལ་བ་ཆེན་པོ་དང་། འོ་དོད་འབོད་པ་ཆེན་པོའི་སེམས་ཅན་དམྱལ་བ་དང་། ཤིན་ཏུ་ཚིག་པའི་སེམས་ཅན་དམྱལ་བ་དང་། རབ་ཏུ་ཆེར་ཚིག་པའི་སེམས་ཅན་དམྱལ་བ་དང་། སེམས་ཅན་དམྱལ་བ་བརྒྱད་པོར་སྐྱེས་པའི་སེམས་ཅན་དག་རྟག་ཏུ་སྡུག་བསྔལ་མང་པོས་རྣམ་པར་གཟིར་བ་ནི་འདི་ལྟ་སྟེ། སྲེག་པ་དང་། བཙོ་བ་དང་། མེ་མུར་དང་། གཏུན་བུས་བརྡུང་བ་ལ་སོགས་པ་སྟེ། དེ་དག་ཀྱང་འོད་དེས་ཕོག་མ་ཐག་ཏུ་སྡུག་བསྔལ་དེ་དག་ལྷག་མ་མ་ལུས་པར་ཐམས་ཅད་བྱང་ནས་རབ་ཏུ་བདེ་བ་དང་། ཤིན་ཏུ་བསིལ་བར་ལོངས་སྤྱོད་པར་གྱུར་ཏོ། །འོད་ཟེར་དེ་ལས་འདི་སྐད་དུ། དེ་བཞིན་གཤེགས་པས་དགོངས་ཏེ་གསུངས་པའི་སྙིང་པོ་གྲགས་པར་གྱུར་པ་ནི། ཀྱེ་སེམས་ཅན་ཁྱེད་ཀུན་ལ་ཡང་སངས་རྒྱས་ཀྱི་རང་བཞིན་ཡོད་དོ་ཞེས་གྲགས་པར་གྱུར་ཏོ། །སེམས་ཅན་དེ་དག་གིས་དེ་སྐད་ཅེས་ཐོས་ནས་དེ་མ་ཐག་ཏུ་ཚེ་འཕོས་ཏེ་མཐོ་རིས་ཀྱི་ལྷ་དང་མིར་སྐྱེས་སོ། །ཤིན་ཏུ་གྲང་བའི་སེམས་ཅན་དམྱལ་བ་བརྒྱད་ལ་འདི་ལྟ་སྟེ། ཨ་པ་པའི་སེམས་ཅན་དམྱལ་བ་དང་། ཨ་ཏ་ཏའི་སེམས་ཅན་དམྱལ་བ་དང་། ཨ་ལ་ལའི་སེམས་ཅན་དམྱལ་བ་དང་། ཨ་ཚ་ཚའི་སེམས་ཅན་དམྱལ་བ་དང་། ཨུད་པ་ལའི་སེམས་ཅན་དམྱལ་བ་དང་། པ་ཐུ་མའི་སེམས་ཅན་དམྱལ་བ་དང་། ཀུ་མུ་དའི་སེམས་ཅན་དམྱལ་བ་
དང་། པུན་ད་རཱི་ཀའི་སེམས་ཅན་དམྱལ་བ་སྟེ། དེ་དག་ཏུ་སྐྱེས་པའི་སེམས་ཅན་རྟག་ཏུ་སྡུག་བསྔལ་ཆེན་པོ་མྱོང་བ་ནི་འདི་ལྟ་སྟེ། ལུས་རབ་ཏུ་གས་པ་དང་། ཞིག་པ་དང་། དུམ་བུ་དུམ་བུར་ཆད་པར་གྱུར་ཏེ། དེ་དག་ཀྱང་འོད་ཀྱིས་རེག་མ་ཐག་ཏུ་སྡུག་བསྔལ་ལྷག་མ་མ་ལུས་པར་བྱང་བར་གྱུར་ཏོ། །དྲོ་བ་དང་འཇམ་པར་གྱུར་ནས་འོད་དེ་ལ་འདི་སྐད་དུ། དེ་བཞིན་གཤེགས་པའི་སྙིང་པོ་སྟོན་པའི་སྒྲ་གྲགས་པ་ནི་འདི་ལྟ་སྟེ། ཀྱེ་སེམས་ཅན་ཁྱེད་ལ་ཡང་སངས་རྒྱས་ཀྱི་རང་བཞིན་ཡོད་དོ་ཞེས་གྲགས་ཏེ་དེ་དག་གིས་དེ་སྐད་ཅེས་ཐོས་ནས་དེ་མ་ཐག་ཏུ་ཚེ་འཕོས་ཏེ་མཐོ་རིས་ཀྱི་ལྷ་དང་མིར་སྐྱེས་པར་གྱུར་ཏོ། །དེའི་ཚེ་དེའི་དུས་ན་འཛམ་བུའི་གླིང་འདི་དང་། འཇིག་རྟེན་གྱི་ཁམས་གཞན་དག་གི་སེམས་ཅན་དམྱལ་བ་ཐམས་ཅད་སྟོངས་པར་གྱུར་ཏེ་སྡུག་བསྔལ་མྱོང་བ་མེད་དོ། །ཡི་དགས་ཀྱི་ཁམས་སུ་སྐྱེས་པ་དག་ཟས་དང་སྐོམ་གྱིས་ཡོངས་སུ་གདུངས་པ། སྐྲ་ཤད་འཛིངས་པས་ལུས་དཀྲིས་པ། ལོ་བརྒྱ་སྟོང་གི་བར་དུ་ཆུའི་མིང་ཡང་མི་ཐོས་པ་དག་འོད་དེས་རེག་མ་ཐག་ཏུ་བཀྲེས་པ་དང་། སྐོམ་པས་གདུངས་པ་དང་བྲལ་ཏེ་འོད་དེ་ལས་འདི་སྐད་དུ་དེ་བཞིན་གཤེགས་པའི་སྙིང་པོ་སྟོན་པའི་སྒྲ་གྲགས་པ་ནི་འདི་ལྟ་སྟེ། སེམས་ཅན་ཁྱེད་ལ་ཡང་སངས་རྒྱས་ཀྱི་རང་བཞིན་ཡོད་དོ་ཞེས་པའི་ཚིག་གྲགས་པར་གྱུར་ཏོ། །སེམས་ཅན་དེ་དག་གིས་ཚིག་དེ་སྐད་ཅེས་ཐོས་ནས་དེ་དག་ཚེ་འཕོས་ཏེ་དེ་མ་ཐག་ཏུ་མཐོ་རིས་ཀྱི་ལྷ་དང་མིར་སྐྱེས་ཏེ། ཡི་དགས་ཀྱི་ཁམས་ཀྱང་སྟོངས་པར་གྱུར་ཏེ། དེ་ལ་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ་ལ་སྐུར་པ་ནི་མ་གཏོགས་སོ། །བྱོལ་སོང་གི་སྐྱེ་གནས་སུ་སྐྱེས་པའི་སེམས་ཅན་གཅིག་ལ་གཅིག་འཆའ་ཞིང་ཟ་བ་གནོད་པ་བྱེད་པ་དག་ཀྱང་འོད་དེས་རེག་ནས་སྡིག་པའི་སེམས་ཞི་བར་གྱུར་ཏེ། འོད་དེ་ལས་ཀྱང་འདི་སྐད་དུ་དེ་བཞིན་གཤེགས་པའི་སྙིང་པོ་སྟོན་པ་གྲགས་པ་ནི་འདི་ལྟ་སྟེ། སེམས་ཅན་ཁྱེད་ལ་ཡང་སངས་རྒྱས་ཀྱི་རང་བཞིན་ཡོད་དོ་ཞེས་
གྲགས་པར་གྱུར་ཏོ། །སེམས་ཅན་དེ་དག་གིས་འདི་སྐད་ཅེས་ཐོས་ནས་ཚེ་འཕོས་ཏེ། དེ་མ་ཐག་ཏུ་ལྷ་དང་མིར་སྐྱེས་སོ།། །།འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་བཅོ་ལྔ་པ། དེའི་ཚེ་དེའི་དུས་ན་བྱོལ་སོང་གི་ཁམས་ཀྱང་སྟོངས་པར་གྱུར་ཏེ། དམ་པའི་ཆོས་ལ་སྐུར་པ་ནི་མ་གཏོགས་སོ། །པད་མོ་རེ་རེ་ལ་ཡང་སངས་རྒྱས་རེ་རེ་བཞུགས་པ་ནི་འོད་ཟེར་འཁོར་བར་འདོམ་གང་དང་ལྡན་པ། གསེར་བཙོ་མའི་མདོག་ལྟ་བུ་ལྷམ་མེར་འཚེར་བ། ཤིན་ཏུ་མཛེས་པ་མཆོག་ཏུ་བསྐྲུན་དུ་མེད་པ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་སྐུ་ཤིན་ཏུ་བརྒྱན་པ། སངས་རྒྱས་དེ་དག་ལ་ལ་ནི་བཞུགས། ལ་ལ་ནི་འགྲེང་། ལ་ལ་ནི་མནལ། ལ་ལ་ནི་སྡོད། ལ་ལ་ནི་འབྲུག་གི་སྒྲ་སྒྲོགས། ལ་ལ་ནི་ཆར་འབེབས། ལ་ལ་ནི་གློག་གི་འོད་འགྱེད། ལ་ལ་ནི་རླུང་གཏོང་། ལ་ལ་ནི་སྐུ་མེ་ལྕེའི་ཕུང་པོ་ལྟར་འབར། ལ་ལ་ནི་རིན་པོ་ཆེ་སྣ་བདུན་གྱི་རི་དང་། རྫིང་དང་། མཚེའུ་དང་། ཆུ་མིག་དང་། འབབ་ཆུ་དང་། ནགས་ཚལ་ཡང་མངོན་པར་སྟོན། ལ་ལ་རིན་པོ་ཆེ་སྣ་བདུན་གྱི་ཡུལ་དང་། གྲོང་དང་། གྲོང་རྡལ་དང་། གྲོང་ཁྱེར་དང་། ཁང་ཁྱིམ་ཡང་མངོན་པར་སྟོན། ལ་ལ་ནི་བ་གླང་དང་། རྟ་དང་། སེང་གེ་དང་། སྟག་དང་། སྤྱང་ཀི་དང་། རྨ་བྱ་དང་། ནམ་མཁའ་ལྡིང་ལ་སོགས་པ་ཡང་སྟོན། ལ་ལ་ནི་འཛམ་བུའི་གླིང་ན་གནས་པའི་སེམས་ཅན་གྱིས་སེམས་ཅན་དམྱལ་བ་དང་། བྱོལ་སོང་དང་། ཡི་དགས་འབའ་ཞིག་གིས་གང་བར་སྣང་བ་སྟོན། ལ་ལ་ནི་འདོད་པའི་ཁམས་ཀྱི་གནས་རིམ་པ་དྲུག་སྟོན། བཅོམ་ལྡན་འདས་ལ་ལ་ནི་ཕུང་པོ་དང་། ཁམས་དང་། སྐྱེ་མཆེད་ཀྱི་སྐྱོན་མང་པོ་སྟོན་ཏོ། །ལ་ལ་ནི་བདེན་པ་བཞིའི་ཆོས་སྟོན་ཏོ། །ལ་ལ་ནི་རྟེན་ཅིང་འབྲེལ་ཏེ་འབྱུང་བ་སྟོན་ཏོ། །ལ་ལ་ནི་ལས་དང་ཉོན་མོངས་པ་ཐམས་ཅད་རྒྱུ་དང་རྐྱེན་ལས་སྐྱེ་བར་སྟོན་ཏོ། །
ལ་ལ་ནི་བདག་དང་བདག་མེད་པ་སྟོན་ཏོ། །ལ་ལ་ནི་སྡུག་བསྔལ་བ་དང་བདེ་བའི་ཆོས་གཉིས་པོ་སྟོན་ཏོ། །ལ་ལ་ནི་རྟག་པ་དང་མི་རྟག་པ་སྟོན་ཏོ། །ལ་ལ་ནི་གཙང་བ་དང་མི་གཙང་བ་སྟོན་ཏོ། །བཅོམ་ལྡན་འདས་ལ་ལ་ནི་བྱང་ཆུབ་སེམས་དཔའ་རྣམས་ལ་ཕ་རོལ་ཏུ་ཕྱིན་པ་དྲུག་སྟོན་ཏོ། །ལ་ལ་ནི་བྱང་ཆུབ་སེམས་དཔའི་ཡོན་ཏན་གང་ཡིན་པ་སྟོན་ཏོ། །ལ་ལ་ནི་སངས་རྒྱས་བཅོམ་ལྡན་འདས་ཀྱི་ཡོན་ཏན་གང་ཡིན་པ་སྟོན་ཏོ། །ལ་ལ་ནི་ཉན་ཐོས་ཀྱི་ཡོན་ཏན་གང་ཡིན་པ་སྟོན་ཏོ། །ལ་ལ་ནི་ཐེག་པ་གཅིག་པ་བརྩམས་ཏེ་སྟོན་ཏོ། །ལ་ལ་ནི་ཐེག་པ་གསུམ་གྱི་མངོན་པར་བྱང་ཆུབ་པ་སྟོན་ཏོ། །བཅོམ་ལྡན་འདས་ལ་ལ་ནི་རྩིབ་ལོགས་གཡོན་པ་ནས་ཆུ་འབབ་པ་དང་། རྩིབ་ལོགས་གཡས་པ་ནས་མེ་འབར་བ་སྟོན་ཏོ། །ལ་ལ་ནི་ཐོག་མ་བཙས་པ་དང་། རབ་ཏུ་བྱུང་བ་དང་། སྙིང་པོ་བྱང་ཆུབ་ལ་ཞུགས་པ་དང་། བྱང་ཆུབ་ཀྱི་ཤིང་དྲུང་དུ་ཆོས་ཀྱི་འཁོར་ལོ་སྐོར་བ་དང་། ཡོངས་སུ་མྱ་ངན་ལས་འདའ་བ་ཡང་སྟོན་ཏོ། །བཅོམ་ལྡན་འདས་ལ་ལ་ནི་སེང་གེའི་སྒྲ་སྒྲོགས་ཏེ། འཁོར་གྱི་དཀྱིལ་འཁོར་དག་འབྲས་བུ་དང་པོ་དང་། གཉིས་པ་དང་། གསུམ་པ་དང་། བཞི་པའི་བར་དུ་ཐོབ་པར་སྟོན་ཏོ། །ལ་ལ་ནི་འཁོར་བ་ལས་བྱུང་བའི་རྒྱུ་དང་རྐྱེན་ཚད་མེད་པ་ཡང་སྟོན་ཏོ། །དེའི་ཚེ་ན་འཛམ་བུའི་གླིང་འདིར་གནས་པའི་སེམས་ཅན་འོད་དེས་རེག་པའི་རྣམས་དམུས་ལོང་དག་ནི་མཐོང་བར་གྱུར། འོན་པ་དག་ནི་ཐོས་པར་གྱུར། ལྐུགས་པ་དག་ནི་སྨྲ་ཤེས་པར་གྱུར། ཞ་བོ་དག་ཀྱང་འགྲོ་ནུས་པར་གྱུར། དབུལ་ཕོངས་པ་ནི་ལོངས་སྤྱོད་དང་ལྡན་པར་གྱུར། སེར་སྣ་ཅན་ནི་གཏོང་ཕོད་པར་གྱུར། ཞེ་སྡང་ཅན་ནི་བྱམས་པའི་སེམས་དང་ལྡན་པར་གྱུར། མ་དད་པ་རྣམས་ནི་དད་པར་གྱུར་ཏེ། དེ་ལྟར་འཇིག་རྟེན་གྱི་ཁམས་ན་སེམས་ཅན་གཅིག་ཙམ་ཡང་མི་དགེ་བའི་ཆོས་ལ་སྤྱོད་པ་མེད་དེ། ལོག་སྲེད་ཅན་འབའ་ཞིག་ནི་མ་གཏོགས་སོ། །དེའི་ཚེ་ན་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་
དང་། ལྟོ་འཕྱེ་ཆེན་པོ་དང་། སྲིན་པོ་དང་། གྲུལ་བུམ་དང་། མི་དང་མི་མ་ཡིན་པ་ལ་སོགས་པ་ཐམས་ཅད་སྐད་འཐུན་པར་འདི་སྐད་ཅེས་གསོལ་ཏོ། །ཤིན་ཏུ་ལེགས་སོ། །བླ་ན་མེད་པ་བཅོམ་ལྡན་འདས་ཀྱིས་ཐམས་ཅད་ལ་ཕན་པ་དང་། བདེ་བའི་དོན་མཛད་པ་ཤིན་ཏུ་ལེགས་སོ་ཞེས་དེ་སྐད་ཅེས་གསོལ་ནས་རབ་ཏུ་དགའ་མགུ་རངས་ཏེ་ལ་ལ་ནི་གླུ་ལེན། ལ་ལ་ནི་གར་བྱེད། ལ་ལ་ནི་ཡན་ལག་བསྐུལ་ཏེ། མེ་ཏོག་རྣམ་པ་སྣ་ཚོགས་ཀྱིས། སངས་རྒྱས་དང་། དགེ་འདུན་དུ་བཅས་པ་ལ་མངོན་པར་གཏོར་བ་ནི་འདི་ལྟ་སྟེ། ལྷ་རྫས་ཀྱི་མེ་ཏོག་ཨུད་པ་ལ་དང་། ལྷ་རྫས་ཀྱི་མེ་ཏོག་ཀུ་མུ་ད་དང་། མེ་ཏོག་པད་མོ་དང་། པུན་ད་རཱི་ཀ་དང་། ལྷ་རྫས་ཀྱི་མེ་ཏོག་མན་དཱ་ར་བ་དང་། མན་དཱ་ར་བ་ཆེན་པོ་དང་། མན་ཛུ་ཥ་ཀ་དང་། མན་ཛུ་ཥ་ཀ་ཆེན་པོ་དང་། སན་དན་དང་། སན་དན་ཆེན་པོ་དང་། ལོ་ཙ་ནི་དང་། ལོ་ཙ་ནི་ཆེན་པོ་དང་། བསུང་ཅན་དང་། བསུང་ཅན་ཆེན་པོ་དང་། ཡིད་དུ་འོང་བ་དང་། ཡིད་དུ་འོང་བ་ཆེན་པོ་དང་། བལྟ་ན་དགའ་བ་དང་། བལྟ་ན་དགའ་བ་ཆེན་པོ་དང་། ཤིན་ཏུ་མཛེས་པ་དང་། མཆོག་ཏུ་མཛེས་པ་རྣམས་སོ། །གཞན་ཡང་ལྷ་རྫས་ཀྱི་སྤོས་མང་པོ་མངོན་པར་གཏོར་བ་ནི་འདི་ལྟ་སྟེ། ལྷ་རྫས་ཀྱི་སྤོས་ཆུ་འབྱིང་དང་། ཨ་ག་རུ་དང་། ཙན་དན་དང་། གུར་གུམ་དང་། སྤོས་སྦྱར་མ་དང་། རྒྱ་མཚོའི་ངོགས་ཀྱི་བརྩེགས་པ་ལ་སོགས་པའོ། །གཞན་ཡང་ལྷ་རྫས་ཀྱི་རིན་པོ་ཆེའི་རྒྱལ་མཚན་དང་། བ་དན་དང་། གདུགས་དང་། གཞན་ཡང་ལྷ་རྫས་ཀྱི་རོལ་མོ་གླིང་བུ་དང་། གཅེའུ་ཁ་མངས་དང་། དགུ་པོ་རྒྱུད་མངས་དང་། རྔ་ལ་སོགས་པས་མངོན་པར་མཆོད་ནས་སངས་རྒྱས་ཀྱི་སྤྱན་སྔར་ཚིགས་སུ་བཅད་དེ་གསོལ་པ། བདག་ཅག་ཕྱག་འཚལ་བརྩོན་འགྲུས་རབ་རྩོམ་པ། །བླ་མེད་ཡང་དག་རྫོགས་པ་རྐང་གཉིས་མཆོག །ལྷ་མི་བཅས་པ་འཁོར་གྱིས་མི་ཤེས་པ། །ཁྱུ་མཆོག་གཽ་ཏམ་ཁྱོད་ནི་ཤིན་ཏུ་རྟོགས། །བཅོམ་ལྡན་འདས་པའི་དུས་ན་བདག་ཅག་ཕྱིར། །
བསྐལ་པ་ཚད་མེད་བར་དུ་དཀའ་བ་མཛད། །ཅི་ཡི་སླད་དུ་ཐུགས་དམ་རབ་བཏང་སྟེ། །ཡོངས་སུ་མྱ་ངན་འདའ་བར་གཤེགས་པར་དགོངས། །འགྲོ་བ་ཐམས་ཅད་ཀུན་གྱིས་མི་ཤེས་པ། །དེ་བཞིན་གཤེགས་པ་གསང་བའི་སྙིང་པོའོ། །དེ་ཡི་རྐྱེན་གྱིས་འབྱུང་བར་རབ་དཀའ་སྟེ། །འཁོར་བ་ཀུན་ཏུ་འཁོར་ཞིང་ངན་སོང་ལྟུང་། །བཅོམ་ལྡན་འདས་ཀྱིས་གསུངས་པའི་དགྲ་བཅོམ་པ། །དེ་དག་ཐམས་ཅད་མྱ་ངན་འདའ་བར་འཇུག །དེ་ལྟར་སངས་རྒྱས་སྤྱོད་ཡུལ་ཟབ་མོ་ནི། །བྱིས་པ་མ་རབས་སུ་ཞིག་རྟོགས་པར་འགྱུར། །འགྲོ་བ་ཀུན་གྱི་ཉོན་མོངས་བསལ་བའི་ཕྱིར། །འགྲོ་བ་ཀུན་ལ་ཟིལ་དངར་ཆོས་ཀྱང་སྟོན། །གང་ཞིག་བདུད་རྩི་འདི་དག་མྱོང་བ་ནི། །ཕྱིར་ཡང་སྐྱེ་རྒ་ན་འཆི་ལེན་མི་སྲིད། །བཅོམ་ལྡན་འདས་ཀྱིས་ཤིན་ཏུ་གསོ་བ་ནི། །སེམས་ཅན་མང་པོ་བརྒྱ་སྟོང་ཚད་མེད་སྙེད། །ནད་ཀྱིས་ཤིན་ཏུ་གདུངས་ཏེ་གཟིར་བའི་རྣམས། །ལྷག་མ་ལུས་པ་མེད་པར་ཐམས་ཅད་བསལ། །བཅོམ་ལྡན་འདས་ནི་ཡུན་རིང་ནད་སྤངས་པས། །དེ་ཕྱིར་སངས་རྒྱས་ཐ་མ་བདུན་པོར་གྱུར། །དེང་འདིར་ཆོས་ཀྱི་ཆར་ཀུན་ཕབ་ནས་སུ། །བདག་ཅག་ཡོན་ཏན་ས་བོན་བརླན་པར་མཛོད། །དེ་ལྟར་ལྷ་མིར་བཅས་པ་འཁོར་རྣམས་ཀྱིས། །དེ་སྐད་གསོལ་ནས་ཅང་མི་སྨྲ་བར་འཁོད། །ཚིགས་སུ་བཅད་པ་འདི་དག་གསོལ་པའི་ཚེ། པད་མོ་ལ་བཞུགས་པའི་སངས་རྒྱས་ཐམས་ཅད་འཛམ་བུའི་གླིང་ནས་གཙང་མའི་རིས་ཀྱི་བར་དུ་ཐམས་ཅད་ཀྱིས་ཐོས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་ལེགས་སོ་ལེགས་སོ་ཞེས་བྱ་བ་བྱིན་ནས་རིགས་ཀྱི་བུ་འདི་ལྟར་ཁྱོད་ནི་ཤིན་ཏུ་ཟབ་མོའི་ཡེ་ཤེས་འདི་ལྟ་བུ་དང་ལྡན་པས་ན་བདུད་དང་མུ་སྟེགས་ཅན་ཐམས་ཅད་ཀྱིས་རྣམ་པར་འཇིག་མི་ནུས་སོ། །རིགས་ཀྱི་བུ་ཁྱོད་འདི་ལྟར་ཤིན་ཏུ་བདེ་བར་གནས་པས་ངན་པར་ལྟ་བ་ཐམས་ཅད་ཀྱི་རླུང་གིས་བསྐྱོད་པར་མི་ནུས་སོ། །རིགས་ཀྱི་བུ་ཁྱོད་ཀྱིས་འདི་ལྟར་སོ་སོ་ཡང་དག་པར་ཤེས་པའི་སྤོབས་པ་དང་ལྡན་པ་ནི་འདས་པའི་སངས་རྒྱས་བཅོམ་ལྡན་འདས་ཚད་མེད་པ་གང་གཱ་ཀླུང་གི་བྱེ་མ་སྙེད་ལ་
མཆོད་པ་བྱས་པས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་དོན་འདི་དག་དྲིས་པར་གྱུར་ཏོ། །རིགས་ཀྱི་བུ་ང་ནི་ཡུན་རིང་པོའི་བསྐལ་པ་ཚད་མེད་མཐའ་ཡས་དཔག་ཏུ་མེད་པ་བྱེ་བ་ཁྲག་ཁྲིག་བརྒྱ་སྟོང་གི་བར་དུ་ནད་ཀྱི་དངོས་པོ་དང་བྲལ་བས་བསྙེངས་ཏེ་ཉལ་བ་ཡང་ཡོངས་སུ་སྤོང་ངོ་། །འོད་སྲུང་སྔོན་བསྐལ་པ་ཚད་མེད་གྲངས་མེད་པ་འདས་པ་དེའི་ཚེ་དེའི་དུས་ན་སངས་རྒྱས་བཅོམ་ལྡན་འདས་བླ་མེད་རྒྱལ་བ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པ། མཁྱེན་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་རིག་པ། བླ་ན་མེད་པ། སྐྱེས་བུ་འདུལ་ཞིང་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་མངོན་པར་བྱུང་ནས། ཉན་ཐོས་རྣམས་ལ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་འདི་རྒྱས་པར་ཕྱེ་ཞིང་བསྟན་ཏེ། དོན་རྟོགས་པར་བྱས་སོ། །དེའི་ཚེ་ན་ང་ཡང་སངས་རྒྱས་དེའི་ཉན་ཐོས་སུ་གྱུར་པས། ཡོངས་སུ་མྱ་ངན་ལས་འདས་པ་ཆེན་པོའི་མདོ་འདི་གཟུངས་སུ་བཟུང་ནས། ཀློག་པ་དང་། འདོན་པ་དང་། དོན་ཁོང་དུ་ཆུད་པ་དང་། གླེགས་བམ་དུ་འདྲི་བ་དང་། གཞན་ལ་རྒྱས་པར་འབྱེད་ཅིང་སྟོན་པ་ལ་སོགས་པ་བྱས་ཏེ། དགེ་བའི་རྩ་བ་དེ་ཉིད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་སོ། །རིགས་ཀྱི་བུ་དེ་ཚུན་ཆད་སྡིག་པའི་ཉོན་མོངས་པའི་ལས་ཀྱིས་ངན་སོང་དུ་ལྟུང་མ་མྱོང་ངོ་། །དམ་པའི་ཆོས་ལ་སྐུར་ཏེ་ལོག་སྲེད་ཅན་གྱི་ལུས་སམ། ཉུང་རུམ་དང་། དབང་པོ་མེད་པ་དང་། མཚན་གཉིས་པའི་ལུས་ཀྱང་ལེན་མ་མྱོང་ངོ་། །མཚམས་མེད་པའི་ལས་ཕ་མ་བསད་པ་དང་། དགྲ་བཅོམ་པ་བསད་པ་དང་། མཆོད་རྟེན་བཤིག་པ་དང་། དགེ་འདུན་གྱི་དབྱེན་བྱེད་པ་དང་། སངས་རྒྱས་ཀྱི་སྐུ་ལ་ངན་སེམས་ཀྱིས་ཁྲག་ཕྱུང་བ་དང་། རྩ་བ་བཞི་ཉམས་པའི་ལས་བྱེད་མ་མྱོང་ངོ་། །དེ་ཚུན་ཆད་ལུས་དང་སེམས་རབ་ཏུ་བདེ་བར་གྱུར་གྱི། སྡུག་བསྔལ་གྱིས་གདུངས་པར་མ་གྱུར་ཏོ། །འོད་སྲུང་ང་ལ་ནི་ཡང་དག་པར་ན་ནད་ཐམས་ཅད་མེད་དོ། །དེ་ཅིའི་
ཕྱིར་ཞེ་ན། སངས་རྒྱས་བཅོམ་ལྡན་འདས་ནི་ཡུན་རིང་པོ་ནས་ནད་ཐམས་ཅད་ཡོངས་སུ་སྤངས་པའི་ཕྱིར་རོ། །འོད་སྲུང་སོ་སོའི་སྐྱེ་བོ་དག་ནི་ཐེག་པ་ཆེན་པོ་ཤིན་ཏུ་རྒྱས་པ་ལས་དགོངས་ཏེ་གསུངས་པའི་དོན་མི་ཤེས་པས་ན་དེ་བཞིན་གཤེགས་པ་ནི་ཡང་དག་པར་ནད་ཡོད་དོ་སྙམ་སེམས་སོ། །འོད་སྲུང་དེ་བཞིན་གཤེགས་པ་ནི་མིའི་ནང་ན་སེང་གེའོ་ཞེས་བྱ་བ་དེ་ཡང་དེ་བཞིན་གཤེགས་པ་ནི་ཡང་དག་པར་ན་སེང་གེ་མ་ཡིན་ཏེ། དེ་སྐད་ཅེས་གསུངས་པ་དེ་ནི་དེ་བཞིན་གཤེགས་པས་དགོངས་ཏེ་གསུངས་པ་ཡིན་པར་རིག་པར་བྱའོ། །འོད་སྲུང་དེ་བཞིན་གཤེགས་པ་ནི་མིའི་ནང་ན་ཀླུ་ཆེན་པོ་ཞེས་བྱ་བ་ཡང་ང་ནི་བསྐལ་པ་ཚད་མེད་པའི་བར་དུ་ལས་དེ་དག་ཡོངས་སུ་སྤངས་པ་ཡིན་ནོ། །འོད་སྲུང་དེ་ལ་དེ་བཞིན་གཤེགས་པ་ནི་མི་ཡིན་ནོ། །ལྷ་ཡིན་ནོ་ཞེས་ཟེར་ཏེ། ཡང་དག་པར་ན་ང་ནི་མི་ཡང་མ་ཡིན། ལྷ་ཡང་མ་ཡིན། གནོད་སྦྱིན་མ་ཡིན། དྲི་ཟ་མ་ཡིན། ལྷ་མ་ཡིན་མ་ཡིན། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་མ་ཡིན། བདག་མ་ཡིན། སྲོག་མ་ཡིན། འཚོ་བ་མ་ཡིན། ཤེད་ཅན་མ་ཡིན། ཤེད་བདག་མ་ཡིན། བྱས་པ་མ་ཡིན། མ་བྱས་པ་མ་ཡིན། ཚོར་བ་མ་ཡིན། མི་ཚོར་བ་མ་ཡིན། བཅོམ་ལྡན་འདས་མ་ཡིན། ཉན་ཐོས་མ་ཡིན། སྨྲ་བ་མ་ཡིན། མི་སྨྲ་བ་མ་ཡིན་ཏེ། དེ་སྐད་ཅེས་གསུངས་པ་དེ་དག་ཐམས་ཅད་ནི་དེ་བཞིན་གཤེགས་པས་དགོངས་ཏེ་གསུངས་པ་ཡིན་པར་རིག་པར་བྱའོ། །འོད་སྲུང་དེ་ལ་དེ་བཞིན་གཤེགས་པ་ནི་རྒྱ་མཚོ་དང་འདྲ་བའོ། །རི་རབ་དང་འདྲ་བའོ་ཞེས་ཀྱང་བྱ་སྟེ། ཡང་དག་པར་ན་དེ་བཞིན་གཤེགས་པ་ནི་ལན་ཚྭའི་རོ་བྲོ་བ་མ་ཡིན། བྲག་ཆ་ལྟ་བུ་མ་ཡིན་ཏེ། དེ་སྐད་ཅེས་གསུངས་པ་དེ་ཡང་དེ་བཞིན་གཤེགས་པས་དགོངས་ཏེ་གསུངས་པ་ཡིན་ནོ། །འོད་སྲུང་དེ་བཞིན་གཤེགས་པ་ནི་པུན་ད་རཱི་ཀ་དང་འདྲ་བའོ་ཞེས་ཀྱང་བྱ་སྟེ། ཡང་དག་པར་ན་དེ་བཞིན་གཤེགས་པ་ནི་པུན་ད་རཱི་ཀ་མ་ཡིན་ཏེ། དེ་སྐད་ཅེས་གསུངས་པ་དེ་ཡང་དེ་བཞིན་གཤེགས་པས་དགོངས་ཏེ་གསུངས་པ་ཡིན་ནོ། །འོད་སྲུང་དེ་བཞིན་གཤེགས་པ་ནི་ཕ་མ་ལྟ་བུའོ་ཞེས་ཀྱང་བྱ་སྟེ། དེ་བཞིན་གཤེགས་པ་ནི་ཡང་དག་པར་ན་ཕ་མ་མ་ཡིན་གྱི། དེ་
སྐད་ཅེས་གསུངས་པ་དེ་ཡང་དེ་བཞིན་གཤེགས་པས་དགོངས་ཏེ་གསུངས་པ་ཡིན་ནོ། །འོད་སྲུང་དེ་བཞིན་གཤེགས་པ་ནི་དེད་དཔོན་ཆེན་པོ་ཞེས་ཀྱང་བྱ་སྟེ། དེ་བཞིན་གཤེགས་པ་ནི་ཡང་དག་པར་ན་དེད་དཔོན་ཆེན་པོ་མ་ཡིན་གྱི། དེ་སྐད་ཅེས་གསུངས་པ་དེ་ཡང་དེ་བཞིན་གཤེགས་པས་དགོངས་ཏེ་གསུངས་པ་ཡིན་ནོ། །འོད་སྲུང་དེ་བཞིན་གཤེགས་པ་ནི་ཚོང་དཔོན་དང་འདྲ་བའོ་ཞེས་ཀྱང་བྱ་སྟེ། ཡང་དག་པར་ན་དེ་བཞིན་གཤེགས་པ་ནི་ཚོང་དཔོན་མ་ཡིན་གྱི། དེ་སྐད་ཅེས་གསུངས་པ་དེ་ཡང་དེ་བཞིན་གཤེགས་པས་དགོངས་ཏེ་གསུངས་པ་ཡིན་ནོ། །འོད་སྲུང་དེ་བཞིན་གཤེགས་པ་ནི་བདུད་བཅོམ་པ་ཞེས་ཀྱང་བྱ་སྟེ། ཡང་དག་པར་ན་དེ་བཞིན་གཤེགས་པ་ལ་ངན་སེམས་མེད་ཀྱི། དེ་དག་གདུལ་བའི་ཕྱིར་དེ་སྐད་ཅེས་གསུངས་པ་དེ་ཡང་དེ་བཞིན་གཤེགས་པས་དགོངས་ཏེ་གསུངས་པ་ཡིན་ནོ། །འོད་སྲུང་དེ་བཞིན་གཤེགས་པ་ནི་འབྲུམ་བུ་མ་རུངས་པ་གསོ་བའོ་ཞེས་བྱ་སྟེ། ཡང་དག་པར་ན་དེ་བཞིན་གཤེགས་པ་ནི་འབྲུམ་བུ་གསོ་བའི་མཁན་པོ་མ་ཡིན་གྱི། དེ་སྐད་ཅེས་གསུངས་པ་དེ་ཡང་དེ་བཞིན་གཤེགས་པས་དགོངས་ཏེ་གསུངས་པ་ཡིན་ནོ། །འོད་སྲུང་ངས་སྔར་གསུངས་པ་ལྟར། རིགས་ཀྱི་བུའམ་རིགས་ཀྱི་བུ་མོ་གང་ཞིག་ལུས་དང་། ངག་དང་ཡིད་ཀྱི་ལས་ཡོངས་སུ་དག་པར་སྦྱོང་བ་དེ་ཡང་ཐ་མ་འཆི་བའི་དུས་བྱེད་པ་ན་གཉེན་བཤེས་ཡོད་མོད་ཀྱི། དེའི་རོ་གལ་ཏེ་ན་མེར་སྲེག་གོ །གལ་ཏེ་ན་ཆུའི་ནང་ངམ། དུར་ཁྲོད་དུ་འདོར་ཏེ། ཝ་དང་། ཁྱི་དང་། སྤྱང་ཀི་ལ་སོགས་པས་ཟོས་ཀྱང་། དེའི་རྣམ་པར་ཤེས་པ་ནི་མཐོ་རིས་སུ་སྐྱེའོ། །དེ་ལྟར་དེའི་སེམས་ནི་སོང་བ་དང་། འོང་བ་ཡང་མེད། ཕྱིན་པའི་གནས་ཀྱང་མེད་ཀྱི། སྔ་ཕྱིར་འདྲ་བའི་སྐད་ཅིག་མའི་རྒྱུན་ཡིན་གྱི། ཐ་དད་པ་ནི་མེད་དོ་ཞེས་དེ་སྐད་གསུངས་པ་དེ་ཡང་དེ་བཞིན་གཤེགས་པས་དགོངས་ཏེ་གསུངས་པ་ཡིན་ནོ། །འོད་སྲུང་ད་ལྟར་ང་ནའོ་ཞེས་བྱ་བ་དེ་ཡང་དེ་དང་འདྲ་སྟེ། དེ་བཞིན་གཤེགས་པས་དགོངས་ཏེ་གསུངས་པ་ཡིན་ཏེ། དེ་བས་ན་སྲོག་ལ་ལྟ་བས་ང་རྒྱབ་སྙུང་གིས་འཇམ་དཔལ་ཁྱོད་འཁོར་རྣམ་བཞི་ལ་ཆོས་སྟོན་ཅིག་ཅེས་བྱས་པ་ཡིན་ནོ། །འོད་སྲུང་
ཡང་དག་པར་ན་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་མི་སྙུང་སྟེ། གློ་གཡས་པ་ཕབ་ནས་ཉལ་བ་ཡང་མེད་ལ། མཐར་ཡོངས་སུ་མྱ་ངན་ལས་འདས་པ་ཡང་མེད་དོ། །འོད་སྲུང་ཡོངས་སུ་མྱ་ངན་ལས་འདས་པ་ཆེན་པོ་འདི་ནི་སངས་རྒྱས་རྣམས་ཀྱི་ཏིང་ངེ་འཛིན་ཤིན་ཏུ་ཟབ་མོ་ཡིན་གྱི། ཉན་ཐོས་དང་། རང་སངས་རྒྱས་རྣམས་ཀྱི་སྤྱོད་ཡུལ་མ་ཡིན་ནོ། །འོད་སྲུང་ཁྱོད་སྔར་ང་ལ་འདྲི་བ་ལས། དེ་བཞིན་གཤེགས་པ་ཅིའི་སླད་དུ་གཟིམས་ཏེ་མི་བཞེངས། ཞལ་ཟས་ཀྱང་མི་གསོལ། འཁོར་རྣམས་ལ་གདམས་པ་དང་། འཚོ་ཚིས་ཀྱི་ལས་ལ་སོགས་པ་ཡང་མི་སྟོན་ཅེས་དྲིས་པ་ནི། འོད་སྲུང་འདི་ལྟ་སྟེ། ནམ་མཁའ་ཉིད་ལ་ནི་འདུག་པའམ། ལངས་པ་ཡང་མེད། ཟས་དང་སྐོམ་འདོད་པ་ཡང་མེད། འཁོར་རྣམས་ལ་གདམས་པ་དང་། འཚོ་ཚིས་ཀྱི་ལས་སྟོན་པ་མེད། འོང་བ་དང་། སོང་བ་དང་། སྐྱེ་བ་དང་། འགོག་པ་དང་། རྒ་བ་དང་། ལང་འཚོ་བ་དང་། བྱུང་བ་དང་། ནུབ་པ་དང་། སྨྲས་པ་དང་། འཆག་པ་དང་། གྲོལ་བ་དང་། འཆིང་བ་ཞེས་བྱ་བ་མེད་དེ། བདག་ཅེས་བརྗོད་པ་མེད། གཞན་ཞེས་བརྗོད་པ་མེད། བདག་གྲོལ་བ་ཡང་མེད། གཞན་དགྲོལ་བ་ཡང་མེད། བདེ་བ་ཡང་མ་ཡིན། ན་བ་ཡང་མ་ཡིན་ནོ། །རིགས་ཀྱི་བུ་སངས་རྒྱས་བཅོམ་ལྡན་འདས་ཀྱང་དེ་དང་འདྲ་སྟེ། ནམ་མཁའ་ལྟ་བུ་ཡིན་ན། ནད་ཀྱིས་སྡུག་བསྔལ་བ་ག་ལ་ཞིག་ཡོད། འོད་སྲུང་འཇིག་རྟེན་ན་གང་ཟག་རྣམ་པ་གསུམ་གྱི་ནད་ནི་ཤིན་ཏུ་ཡང་གསོ་དཀའོ། །གང་ཞེ་ན། ཐེག་པ་ཆེན་པོ་ལ་སྐུར་པ་དང་། མཚམས་མེད་པ་ལྔ་བྱས་པ་དང་། ལོག་སྲེད་ཅན་ཏེ། ནད་རྣམ་པ་འདི་གསུམ་ནི་འཇིག་རྟེན་ན་ཤིན་ཏུ་ཡང་གསོ་དཀའ་སྟེ། ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔས་ཀྱང་གསོ་ནུས་པ་མ་ཡིན་ནོ། །རིགས་ཀྱི་བུ་དཔེར་ན་ངེས་པར་འཆི་བའི་ནད་གསོ་དཀའ་བ་ནི། ནད་གཡོག་དང་། ཡིད་བཞིན་གྱི་སྨན་དུ་ལྡན་ནམ། ནད་གཡོག་མེད་དམ། ཡིད་བཞིན་དུ་སྨན་དང་མི་ལྡན་ན་ཡང་ནད་དེ་ནི་ངེས་པར་གསོར་མི་རུང་བས་ན། མི་དེ་གདོན་མི་ཟ་བར་འཆིའོ། །རིགས་ཀྱི་བུ་གང་ཟག་རྣམ་པ་གསུམ་པོ་དེ་ཡང་དེ་དང་འདྲ་སྟེ། གལ་ཏེ་ཉན་
ཐོས་སམ། རང་སངས་རྒྱས་སམ། བྱང་ཆུབ་སེམས་དཔས་ཆོས་བསྟན་ཏམ། ཆོས་མ་བསྟན་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་གྱི། ཆོས་མ་ཐོས་པས་སེམས་བསྐྱེད་པར་འགྱུར་བ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་དུ་གཞུག་མི་ནུས་སོ། །འོད་སྲུང་དཔེར་ན་ནད་གསོར་རུང་བ། ནད་གཡོག་དང་། ཡིད་བཞིན་གྱི་སྨན་དང་ལྡན་ན་འཚོ་བར་འགྱུར་རོ། །རྣམ་པ་གསུམ་པོ་དང་མི་ལྡན་ན་འཚོ་བར་མི་འགྱུར་ཏེ། ཉན་ཐོས་དང་། རང་སངས་རྒྱས་ཀྱང་དེ་དང་འདྲ་སྟེ། སངས་རྒྱས་དང་བྱང་ཆུབ་སེམས་དཔའ་ལས་ཆོས་ཐོས་ན་དེ་མ་ཐག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་གྱི། ཆོས་མ་ཐོས་པས་སེམས་བསྐྱེད་པར་འགྱུར་བ་མ་ཡིན་ནོ། །འོད་སྲུང་དཔེར་ན་ནད་པ་ཞིག་ནད་གཡོག་དང་། ཡིད་བཞིན་གྱི་སྨན་དང་ལྡན་ཡང་རུང་། ནད་གཡོག་དང་། ཡིད་བཞིན་གྱི་སྨན་དུ་མི་ལྡན་ཡང་རུང་སྟེ། འཚོ་བར་འགྱུར་བ་ཡོད་དེ། དེ་བཞིན་དུ་གང་ཟག་རྣམ་པ་གཅིག་ཀྱང་དེ་དང་འདྲ་སྟེ། ཉན་ཐོས་དང་ཕྲད་ཀྱང་རུང་། ཉན་ཐོས་དང་མ་ཕྲད་ཀྱང་རུང་། རང་སངས་རྒྱས་དང་ཕྲད་ཀྱང་རུང་། རང་སངས་རྒྱས་དང་མ་ཕྲད་ཀྱང་རུང་། བྱང་ཆུབ་སེམས་དཔའ་དང་ཕྲད་ཀྱང་རུང་། བྱང་ཆུབ་སེམས་དཔའ་དང་མ་ཕྲད་ཀྱང་རུང་། དེ་བཞིན་གཤེགས་པ་དང་ཕྲད་ཀྱང་རུང་། དེ་བཞིན་གཤེགས་པ་དང་མ་ཕྲད་ཀྱང་རུང་། ཆོས་ཐོས་ཀྱང་རུང་། ཆོས་མ་ཐོས་ཀྱང་རུང་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་འགྱུར་བ་ཡོད་དོ། །འདི་ལྟ་སྟེ། གང་ཟག་སུ་ཞིག་བདག་གི་ཕྱིར་རམ། གཞན་གྱི་ཕྱིར་རམ། གལ་ཏེ་འཇིགས་པའི་ཕྱིར་རམ། རྙེད་པ་དང་གྲགས་པའི་ཕྱིར་རམ། གཡོ་སྒྱུའི་ཕྱིར་རམ། གཞན་བསླུ་བ་ཅན་གྱི་ཕྱིར་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་འདི་བྲིས་སམ། འདྲིར་བཅུག་གམ། འཆང་ངམ། འཛིན་ཏམ། ཀློག་གམ། འདོན་ཏམ། བསྟི་སྟང་དང་བཅས་པས་མཆོད་པ་བྱེད་དམ། གཞན་ལ་སྟོན་ཅིང་འཆད་པའོ། །འོད་སྲུང་གང་ཟག་རྣམ་པ་འདི་ལྔ་ནི་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་འདི་ལ་སྐྱོན་དང་བཅས་པ་བཞིན་དུ་སྤྱོད་ཀྱི། དེ་བཞིན་
གཤེགས་པ་ནི་མ་ཡིན་ནོ། །ལྔ་གང་ཞེ་ན། འདི་ལྟ་སྟེ། ཉོན་མོངས་པ་རྣམ་པ་གསུམ་བཅད་ནས། རྒྱུན་དུ་ཞུགས་པའི་འབྲས་བུ་ཐོབ་པས་སེམས་ཅན་དམྱལ་བ་དང་། བྱོལ་སོང་དང་། ཡི་དགས་ཀྱི་ཁམས་སུ་མི་སྐྱེའི། ལྷ་དང་མིར་ལན་བདུན་ལྡོག་པ། སྡུག་བསྔལ་ཐམས་ཅད་བཅད་ནས་མྱ་ངན་ལས་འདས་པར་ཞུགས་པ་སྟེ། འོད་སྲུང་དེ་ནི་སྐྱོན་དང་བཅས་པས་སྤྱོད་པའི་གང་ཟག་གཅིག་ཅེས་བྱ་སྟེ། མ་འོངས་པའི་དུས་ཀྱི་བསྐལ་པ་བརྒྱད་ཁྲི་འདས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་འགྱུར་རོ། །འོད་སྲུང་ཉོན་མོངས་པ་ཐ་མ་གསུམ་པོ་བཅད་ནས། འདོད་ཆགས་དང་ཞེ་སྡང་དང་། གཏི་མུག་སྲབ་པར་གྱུར་ཏེ། ལན་ཅིག་ཕྱིར་ལྡོག་པའི་འབྲས་བུ་འཐོབ་པས། ལན་ཅིག་ཕྱིར་ལྡོག་སྟེ་སྡུག་བསྔལ་ཡོངས་སུ་བཅད་ནས་མྱ་ངན་ལས་འདས་པར་ཞུགས་པ་ནི། འོད་སྲུང་སྐྱོན་དང་བཅས་པར་སྤྱོད་པ་གཉིས་ཞེས་བྱ་སྟེ། དེ་ཡང་བསྐལ་པ་དྲུག་ཁྲི་འདས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱ་བར་འགྱུར་རོ། །འོད་སྲུང་གང་ཟག་གསུམ་པོ་ནི་ཉོན་མོངས་པ་ཐ་མ་ལྔ་པོ་བཅད་དེ་ཕྱིར་མི་ལྡོག་པའི་འབྲས་བུ་ཐོབ་པས་ཕྱིར་མི་ལྡོག་སྟེ། སྡུག་བསྔལ་ཐམས་ཅད་བཅད་ནས་མྱ་ངན་ལས་འདས་པར་ཞུགས་པ་ནི། སྐྱོན་དང་བཅས་པར་སྤྱོད་པ་གསུམ་ཞེས་བྱ་སྟེ། དེ་ཡང་བསྐལ་པ་བཞི་ཁྲི་འདས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱ་བར་འགྱུར་རོ། །འོད་སྲུང་གང་ཟག་བཞི་པོ་ནི་འདོད་ཆགས་དང་། ཞེ་སྡང་དང་། གཏི་མུག་ཡོངས་སུ་བཅད་ནས། དགྲ་བཅོམ་པའི་འབྲས་བུ་ཐོབ་པས་ཉོན་མོངས་པ་ལྷག་མ་མ་ལུས་པར་མྱ་ངན་ལས་འདས་པར་ཞུགས་པ་ནི་བསེ་རུ་ལྟར་གཅིག་ཏུ་སྤྱོད་པ་ཡང་མ་ཡིན་ཏེ། དེ་ནི་སྐྱོན་དང་བཅས་པར་སྤྱོད་པ་བཞི་ཞེས་བྱ་སྟེ། དེ་ཡང་བསྐལ་པ་ཉི་ཁྲི་འདས་ནས་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་འཚང་རྒྱ་བར་འགྱུར་རོ། །འོད་སྲུང་གང་ཟག་ལྔ་པ་ཡང་འདོད་ཆགས་དང་། ཞེ་སྡང་དང་། གཏི་མུག་ཡོངས་སུ་བཅད་ནས། རང་སངས་རྒྱས་ཀྱི་འབྲས་བུ་ཐོབ་སྟེ། ཉོན་མོངས་པ་ལྷག་མ་མ་ལུས་པར་མྱ་ངན་ལས་འདས་པར་ཞུགས་ཏེ། བསེ་རུ་ལྟར་གཅིག་པུ་སྤྱོད་པ་ནི་སྐྱོན་དང་བཅས་པར་སྤྱོད་པ་ལྔ་ཞེས་བྱ་སྟེ། དེ་ཡང་བསྐལ་པ་ཁྲི་འདས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་འགྱུར་རོ། །འོད་སྲུང་དེ་དག་ནི་སྐྱོན་དང་བཅས་པར་སྤྱོད་པའི་གང་ཟག་ལྔ་ཞེས་བྱ་སྟེ། དེ་བཞིན་གཤེགས་པ་ནི་མ་ཡིན་ནོ། །འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ལས། འཁོར་མང་པོས་ཀུན་ནས་དྲིས་པ་ཞེས་བྱ་བའི་ལེའུ་སྟེ་ལྔའོ།། །།