གསུམ་པ། མཚན་གྱི་ཡོན་ཏན་བརྗོད་པ་ཞེས་བྱ་བའི་ལེའུ།
དེ་ནས་བཅོམ་ལྡན་འདས་ཀྱིས་འོད་སྲུང་ལ་ཡང་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ཀྱིས་མདོ་སྡེ་འདིའི་མིང་དང་ཚིག་དང་། ཡོན་ཏན་རྣམས་ལེགས་པར་ཟུང་ཤིག །རིགས་ཀྱི་བུའམ་རིགས་ཀྱི་བུ་མོ་གང་ཞིག་མདོ་སྡེ་འདིའི་མིང་ཐོས་པ་ཙམ་གྱིས་ཀྱང་ལམ་རྒྱུད་བཞིར་སྐྱེ་བའི་གནས་མེད་དོ། །དེ་ཅིའི་
ཕྱིར་ཞེ་ན། མདོ་སྡེ་འདི་ནི་སངས་རྒྱས་བཅོམ་ལྡན་འདས་ཚད་མེད་དཔག་ཏུ་མེད་པས་བསྒྲུབས་པའི་ཡོན་ཏན་དུ་གྱུར་པ་ངས་བརྗོད་པ་ཡིན་ནོ། །བྱང་ཆུབ་སེམས་དཔའ་འོད་སྲུང་གིས་གསོལ་པ། བཅོམ་ལྡན་འདས་མདོ་སྡེ་འདིའི་མཚན་ཅི་ཞེས་བགྱི། བྱང་ཆུབ་སེམས་དཔའ་སེམས་དཔའ་ཆེན་པོས་ཇི་ལྟར་ཡོངས་སུ་གཟུང་བར་བགྱི། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། མདོ་སྡེ་འདིའི་མིང་ནི་ཡོངས་སུ་མྱ་ངན་ལས་འདས་པ་ཆེན་པོ་ཐོག་མར་ཡང་དགེ ། བར་དུ་ཡང་དགེ ། ཐ་མར་ཡང་དགེ ། དོན་བཟང་བ། ཚིག་བཟང་པོ། མ་འདྲེས་པ། རྣམ་པར་དཀར་བ། ཚངས་པར་སྤྱོད་པ་འབའ་ཞིག་རྡོ་རྗེ་ལྟ་བུའི་རིན་པོ་ཆེའི་མཛོད་མ་ཉམས་པ་ཞེས་བྱ་སྟེ། ཁྱོད་ཤིན་ཏུ་ལེགས་པར་ཉོན་ཅིག་དང་། ངས་ཁྱོད་ལ་བསྟན་པར་བྱའོ། །རིགས་ཀྱི་བུ་དེ་ལ་ཆེན་པོ་ཞེས་བྱ་བ་ནི་རྟག་ཅེས་བྱ་བའི་དོན་ཏེ། དཔེར་ན་ཆུ་ཀླུང་ཆེན་པོ་བརྒྱད་ནི་ཐམས་ཅད་རྒྱ་མཚོར་འབབ་པ་བཞིན་དུ་མདོ་སྡེ་འདི་ཡང་ཀུན་ནས་ཉོན་མོངས་པ་ཐམས་ཅད་དང་། བདུད་ཀྱི་རིས་རྣམས་བཏུལ་ནས་མཐར་ཡོངས་སུ་མྱ་ངན་ལས་འདས་པ་ཆེན་པོ་ལུས་དང་སྲོག་གཏོང་བར་འགྱུར་བས་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །རིགས་ཀྱི་བུ་དཔེར་ན་སྨན་པ་མཁས་པའི་སྨན་དཔྱད་བཟང་པོ་ལ་སྨན་གྱི་དཔྱད་ཐམས་ཅད་འདུས་པ་བཞིན་དུ་རིགས་ཀྱི་བུ་དེ་བཞིན་གཤེགས་པས་གསུངས་པའི་ཆོས་ཤིན་ཏུ་ཟབ་མོ་རྣམ་པ་ཐམས་ཅད་ཡོངས་སུ་མྱ་ངན་ལས་འདས་པ་ཆེན་པོར་འདུས་པས་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །རིགས་ཀྱི་བུ་འདི་ལྟ་སྟེ་དཔེར་ན་ཞིང་པ་དག་ནི་དབྱར་ཞིང་ལ་ས་བོན་བཏབ་ནས་རྟག་ཏུ་རེ་བའི་སེམས་ཡོད་དེ། འབྲས་བུ་ལག་ཏུ་ཐོབ་ནས་རེ་བ་ཐམས་ཅད་ཞིའོ། །རིགས་ཀྱི་བུ་སེམས་ཅན་ཐམས་ཅད་ཀྱང་དེ་དང་འདྲ་སྟེ། མདོ་སྡེ་གཞན་ལ་སྒོམ་པ་ནི་རྟག་ཏུ་ཆོས་ཀྱི་རོ་འདི་ལ་རེའོ། །ཅི་སྟེ་ཡོངས་སུ་མྱ་ངན་ལས་འདས་པ་ཆེན་པོ་འདི་ཐོས་ནས་མདོ་སྡེ་གཞན་གྱི་ཆོས་ཀྱི་རོ་ལ་རེ་བ་ཐམས་ཅད་ཞི་བ་ནི་ཡོངས་སུ་མྱ་ངན་ལས་འདས་པ་ཆེན་པོ་འདིས་སེམས་ཅན་ཐམས་ཅད་སྲིད་པ་ལས་སྒྲོལ་བའི་
ཕྱིར་རོ། །རིགས་ཀྱི་བུ་འདི་ལྟ་སྟེ་དཔེར་ན་རྗེས་ཐམས་ཅད་ཀྱི་ནང་ན་བལ་གླང་གི་རྗེས་མཆོག་གོ །དེ་བཞིན་དུ་མདོ་སྡེ་འདི་ཡང་མདོ་སྡེ་གཞན་ཐམས་ཅད་ཀྱི་ཏིང་ངེ་འཛིན་པས་མཆོག་གོ །རིགས་ཀྱི་བུ་འདི་ལྟ་སྟེ། ཞིང་རྨོས་པའི་ནང་ན་སྟོན་ལོག་བཏབ་པ་ནི་ཞིང་གི་ནང་ན་མཆོག་གོ །དེ་བཞིན་དུ་མདོ་སྡེ་འདི་ཡང་མདོ་སྡེ་ཀུན་གྱི་མཆོག་གོ །རིགས་ཀྱི་བུ་འདི་ལྟ་སྟེ། སྨན་གྱི་ནང་ན་མར་གྱི་སྙིང་པོ་མཆོག་གོ །དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོ་འདི་ཡང་སེམས་ཅན་ཐམས་ཅད་ཀྱི་ཉོན་མོངས་པས་གདུང་བའི་སེམས་ཞི་བར་བྱེད་པས་མཆོག་གོ །རིགས་ཀྱི་བུ་དཔེར་ན་མར་དངར་རུ་ནི་རོ་རྣམ་པ་བརྒྱད་དང་ལྡན་ནོ། །དེ་བཞིན་དུ་མྱ་ངན་ལས་འདས་པ་ཆེན་པོ་འདི་ཡང་རོ་བརྒྱད་དང་ལྡན་ནོ། །བརྒྱད་གང་ཞེ་ན། རྟག་པ་དང་། ཐེར་ཟུག་དང་། བདེ་བ་དང་། བསིལ་བ་དང་། མི་རྒ་བ་དང་། མི་འཆི་བ་དང་། དྲི་མ་མེད་པ་དང་། རབ་ཏུ་སྐྱིད་པ་སྟེ། རོ་བརྒྱད་ཅེས་བྱའོ། །རོ་བརྒྱད་དང་ལྡན་པས་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་འདི་ལ་རབ་ཏུ་གནས་ཤིང་། བར་བར་གནས་དེ་ཉིད་ཀྱིས་མྱ་ངན་ལས་འདའ་བ་སྟོན་པ་དེ་ནི་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །འོད་སྲུང་རིགས་ཀྱི་བུའམ་རིགས་ཀྱི་བུ་མོ་གང་ཞིག་ཡོངས་སུ་མྱ་ངན་ལས་འདས་པ་ཆེན་པོས་མྱ་ངན་ལས་འདའ་བར་འདོད་ན་འདི་བཞིན་དུ་བསླབ་པར་བྱའོ། །དེ་བཞིན་གཤེགས་པ་ནི་རྟག་པ་གནས་པའི་ཆོས་ཅན་ཏེ། ཆོས་དང་དགེ་འདུན་ཡང་དེ་བཞིན་དུ་རིག་པར་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །ངོ་མཚར་ཆེའོ། །བཅོམ་ལྡན་འདས་དེ་བཞིན་གཤེགས་པའི་ཡོན་ཏན་ཡང་བསམ་གྱིས་མི་ཁྱབ། ཆོས་དང་དགེ་འདུན་ཡང་བསམ་གྱིས་མི་ཁྱབ་སྟེ། ཡོངས་སུ་མྱ་ངན་ལས་འདས་པ་ཆེན་པོ་ཡང་བསམ་གྱིས་མི་ཁྱབ་བོ། །གང་སུ་ཞིག་མདོ་སྡེ་འདི་སློབ་པ་ནི་ཡང་དག་པའི་ཆོས་ཀྱི་སྒོ་ཐོབ་ཅིང་། སྨན་པ་མཁས་པ་ཞེས་བགྱི་ལ། གང་མི་སློབ་པ་དེ་དག་ནི་ལྡོངས་པ་ཤེས་རབ་ཀྱི་
མིག་མ་མཆིས་པ་མ་རིག་པས་ཡོངས་སུ་ཁེབས་པ་ལགས་པར་འཚལ་ལོ། །འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ལས་མཚན་གྱི་ཡོན་ཏན་བརྗོད་པ་ཞེས་བྱ་བའི་ལེའུ་སྟེ་གསུམ་མོ།། །།