དྲུག་པ། འཕགས་པའི་སྤྱོད་པ་ཞེས་བྱ་བའི་ལེའུ།
དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་དག། ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་འདི་ལས། སྤྱོད་པ་རྣམ་པ་ལྔ་ཡིད་ལ་བྱའོ། །ལྔ་གང་ཞེ་ན། འཕགས་པའི་སྤྱོད་པ་དང་། ཚངས་པའི་སྤྱོད་པ་དང་། ལྷའི་སྤྱོད་པ་དང་། བྱིས་པའི་སྤྱོད་པ་དང་། སྐྱོན་དང་བཅས་པའི་སྤྱོད་པའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སྤྱོད་པ་ལྔ་པོ་འདི་ལ་ཤིན་ཏུ་ནན་ཏན་བྱའོ། །གཞན་ཡང་སྤྱོད་པ་གཅིག་སྟེ། དེ་བཞིན་གཤེགས་པའི་སྤྱོད་པའོ། །དེ་ཡང་ཐེག་པ་ཆེན་པོ་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་འདིའོ། །འོད་སྲུང་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོས་འཕགས་པའི་སྤྱད་པ་སྤྱོད་པ་ཡིན་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོས་གལ་ཏེ་ཉན་ཐོས་སམ། དེ་བཞིན་གཤེགས་པ་ལས་ཡོངས་སུ་མྱ་ངན་ལས་འདས་པའི་མདོ་སྡེ་འདི་ཐོས་ནས་དད་པ་བསྐྱེད་དོ། །དད་པ་བསྐྱེད་ནས། འདི་སྙམ་དུ་བསམ་པ་ཡིད་ལ་བྱའོ། ། སངས་རྒྱས་བཅོམ་ལྡན་འདས་རྣམས་ལ་བླ་ན་མེད་པའི་ལམ་ཡོད་དེ། ཡང་དག་པའི་ཆོས་ཆེན་པོ་ཡོད་པས། འཁོར་མང་པོ་རྣམས་ཡང་དག་པར་སྤྱོད་དེ། གཞན་ཡང་ཤིན་ཏུ་རྒྱས་པ་ཐེག་པ་ཆེན་པོའི་མདོ་སྡེ་ཡོད་དེ། བདག་ཀྱང་དེ་ལ་དད་པ་དང་། མོས་པར་བྱའོ། །ཐེག་པ་ཆེན་པོའི་མདོ་སྡེ་ཚོལ་བའི་ཕྱིར་ཤིན་ཏུ་ཆགས་པའི་ཆུང་མ་དང་བུ་དང་། འཁོར་རྣམས་དང་། གནས་པའི་ཁང་ཁྱིམ་དང་། གསེར་དང་དངུལ་དང་། རིན་པོ་ཆེ་དང་། རྒྱན་དམ་པ་དང་། མེ་ཏོག་དང་། སྤོས་དང་། རོལ་མོ་དང་། བྲན་ཕོ་དང་། བྲན་མོ་དང་། ལས་བྱེད་པའི་མི་དང་། ཁྱེའུ་དང་། བུ་མོ་དང་། བལ་གླང་དང་། རྟ་དང་། ཤིང་རྟ་དང་། བ་ལང་དང་། ལུག་དང་། བྱ་དང་། ཁྱི་དང་། ཕག་ལ་སོགས་པ་ཡང་ཡོངས་སུ་
གཏང་བར་བྱའོ། །ཡང་འདི་སྙམ་དུ་སེམས་ཏེ། ཁྱིམ་ན་གནས་པ་ཤིན་ཏུ་དོག་པ་དག་ནི་བཙོན་ར་དང་མཚུངས་ཏེ། ཉོན་མོངས་པ་ཐམས་ཅད་ཀྱང་དེའི་དབང་གིས་སྐྱེའོ། །རབ་ཏུ་བྱུང་བ་ཤིན་ཏུ་ཡངས་པ་ནི་ནམ་མཁའ་དང་འདྲ་སྟེ། དགེ་བའི་ཆོས་ཐམས་ཅད་ཀྱང་དེའི་དབང་གིས་སྐྱེ་ཞིང་འཕེལ་ལོ། །ཁྱིམ་ན་གནས་པས་འཚོ་བའི་མཐར་མི་ཕྱིན་གྱི། བདག་ཚངས་པར་སྤྱོད་པའི་ཕྱིར་སྐྲ་དང་ཁ་སྤུ་བྲེགས་ཏེ། ཁྱིམ་ནས་ཁྱིམ་མ་ཡིན་པར་རབ་ཏུ་འབྱུང་ཞིང་བྱང་ཆུབ་ལ་ནན་ཏན་བྱའོ་སྙམ་དུ་བསམས་ནས། བདག་གདོན་མི་ཟ་བར་རབ་ཏུ་བྱུང་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ནན་ཏན་བྱེད་དོ། །བྱང་ཆུབ་སེམས་དཔའ་དེ་ལྟར་རབ་ཏུ་བྱུང་བའི་ཚེ། བདུད་སྡིག་ཏོ་ཅན་ཤིན་ཏུ་སྡུག་བསྔལ་བར་གྱུར་ནས། འདི་སྐད་དུ་བྱང་ཆུབ་སེམས་དཔའ་འདི་ཡང་ང་དང་རྩོད་པར་འགྱུར་རོ་ཞེས་ཟེར་རོ། །རིགས་ཀྱི་བུ་དེ་ལྟར་བྱང་ཆུབ་སེམས་དཔའ་གཞན་དང་ལྟ་ག་ལ་ཞིག་རྩོད་དེ། དེའི་ཚེ་ན་བྱང་ཆུབ་སེམས་དཔའ་དེ་དགེ་འདུན་གྱི་གནས་སུ་སོང་ནས། གལ་ཏེ་དེ་བཞིན་གཤེགས་པའམ། དེ་བཞིན་གཤེགས་པའི་ཉེ་གནས་སྤྱོད་ལམ་དང་ལྡན་པ། དབང་པོ་ཞི་བ། སེམས་མཉེན་ཞིང་དེས་པ། ཡོངས་སུ་དག་པ་རབ་ཏུ་ཞི་བའི་དྲུང་དུ་སོང་ནས། རབ་ཏུ་འབྱུང་བར་གསོལ་ཏེ། སྐྲ་དང་ཁ་སྤུ་བྲེགས་ནས། ཆོས་གོས་ངུར་སྨྲིག་གྱོན་ནོ། །དེ་ལྟར་རབ་ཏུ་བྱུང་ནས། ཚུལ་ཁྲིམས་ཡོངས་སུ་བསྲུངས་ཏེ། སྤྱོད་ལམ་མི་ཉམས་པ་དང་། སྤྱོད་ལམ་མཛེས་པ་དང་། ཉེས་པ་མི་བྱེད་པ་དང་། ཆུང་ངུ་ན་ཉེས་བྱས་ཀྱི་བར་དུ་ཡང་འཇིགས་པའི་སེམས་སྐྱེད་ཅིང་། ཚུལ་ཁྲིམས་སྲུང་བའི་སེམས་རྡོ་རྗེ་ལྟར་བརྟན་པའོ། །རིགས་ཀྱི་བུ་དཔེར་ན་མི་ཞིག་རྐྱལ་པ་ཐོགས་ཏེ་རྒྱ་མཚོར་ཞུགས་པ་ལས། དེའི་ཚེ་རྒྱ་མཚོའི་ནང་ནས་སྲིན་པོ་ཞིག་གིས་མི་དེ་ལ་རྐྱལ་པ་བསླངས་པ་ལས། མི་དེས་དེ་སྐད་ཅེས་ཐོས་ནས། དེ་འདི་སྙམ་དུ་སེམས་ཏེ། བདག་ཅི་སྟེ་རྐྱལ་པ་འདི་བྱིན་ན་གདོན་མི་ཟ་བར་ཆུའི་ནང་དུ་ནུབ་སྟེ་འཆིའོ་སྙམ་བསམས་ནས། སྲིན་པོ་དེ་ལ་འདི་སྐད་ཅེས་སྨྲས་སོ། །ཁྱོད་ཀྱིས་བདག་བསད་ཀྱང་བླའི་རྐྱལ་པ་ནི་སྦྱིན་དུ་མི་རུང་ངོ་། །སྲིན་པོས་ཡང་སྨྲས་པ། རིལ་གྱིས་སྦྱིན་དུ་མི་རུང་ན་
ཡང་ཕྱེད་ཙམ་ཞིག་སྦྱིན་དུ་མི་རུང་ངམ་ཞེས་སྨྲས་ཀྱང་མ་སྟེར་རོ། །སྲིན་པོས་ཡང་སྨྲས་པ། ཕྱེད་སྦྱིན་དུ་མི་རུང་ན་སུམ་ཆ་ཙམ་ཞིག་བྱིན་ཅིག་ཅེས་བྱས་ཀྱང་མ་སྟེར་རོ། །སྲིན་པོས་ཡང་སྨྲས་པ། སུམ་ཆ་ཙམ་སྦྱིན་དུ་མི་རུང་ན་ཡང་ལག་མཐིལ་ཙམ་བྱིན་ཅིག་ཅེས་སྨྲས་ཀྱང་མ་སྟེར་རོ། །སྲིན་པོས་ཡང་སྨྲས་པ། འདི་ལྟར་ཁྱོད་ཀྱིས་ལག་མཐིལ་ཙམ་ཡང་མི་སྦྱིན་ན། བདག་ནི་ཤིན་ཏུ་ལྟོགས་པས་སྡུག་བསྔལ་གྱིས་ཡོངས་སུ་གདུངས་ན་རྡུལ་གྱི་ཆ་ཤས་ཙམ་ཞིག་བདག་ལ་སྩལ་དུ་གསོལ། མི་དེས་སྨྲས་པ། ཁྱོད་སློང་བ་འདི་ཡང་ཆེན་པོ་མ་ཡིན་ཏེ་ཤིན་ཏུ་ཡང་ཆུང་མོད་ཀྱི། འོན་ཀྱང་བདག་རྒྱ་མཚོ་མ་རྒལ་ལ། ཕ་རོལ་གྱི་མཐའ་ཉེ་རིང་ཡང་མ་རྟོགས་པར་ཁྱོད་ལ་བྱིན་པར་གྱུར་ན། དབུགས་ཕྱིར་འབྱུང་སྟེ། རྒྱ་མཚོའི་བགེགས་ལས་ཀྱང་ག་ལ་ཞིག་ཐར་ཏེ། ཆུའི་ནང་དུ་བདག་འཆི་བར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོའི་ཚུལ་ཁྲིམས་ཡོངས་སུ་བསྲུང་བ་ཡང་དེ་དང་འདྲ་སྟེ། ཇི་ལྟར་རྒྱ་མཚོ་རྒལ་བའི་མི་དེ་རྐྱལ་པ་ཕངས་པ་བཞིན་དུ་བྱང་ཆུབ་སེམས་དཔའ་ཡང་ཚུལ་ཁྲིམས་སྲུང་བའི་ཚེ་ན། ཉོན་མོངས་པའི་སྲིན་པོ་མ་རུངས་པ་རྣམས་བྱང་ཆུབ་སེམས་དཔའ་ལ་འདི་སྐད་ཅེས་ཟེར་རོ། །ཁྱོད་བདག་སྨྲ་བ་ལ་ཡིད་ཆེས་པར་གྱིས་ཤིག་དང་ཁྱོད་ལ་སླུ་བ་མ་ཡིན་ཏེ། ཁྱོད་ཀྱིས་ཕས་ཕམ་པ་བཞི་ཉམས་ཀྱང་ཚུལ་ཁྲིམས་གཞན་སྲུང་ན་དེའི་རྒྱུ་དེའི་རྐྱེན་གྱིས་ཁྱོད་རབ་ཏུ་བདེ་བའི་མྱ་ངན་ལས་འདའ་བ་འཐོབ་པར་འགྱུར་རོ་ཞེས་ཟེར་རོ། །དེའི་ཚེ་ན། བྱང་ཆུབ་སེམས་དཔའ་དེ་འདི་སྐད་ཅེས་ཟེར་རོ། །བདག་ཚུལ་ཁྲིམས་དེ་དག་བསྲུངས་པས་མཚམས་མེད་པའི་སེམས་ཅན་དམྱལ་བར་ལྷུང་ཡང་བླའི། ཚུལ་ཁྲིམས་ཉམས་ཏེ་མཐོ་རིས་ཀྱི་ལྷར་སྐྱེ་བ་མི་འདོད་དོ། །ཉོན་མོངས་པའི་སྲིན་པོ་ཡང་འདི་སྐད་ཅེས་ཟེར་ཏེ། ཁྱོད་ཕས་ཕམ་པ་བཞི་ཉམས་པར་མི་འདོད་ན། དགེ་འདུན་གྱི་ལྷག་མ་མ་བསྲུངས་ཀྱང་དེའི་རྒྱུ་དེའི་རྐྱེན་གྱིས་རབ་ཏུ་བདེ་བའི་མྱ་ངན་ལས་འདའ་བ་ཐོབ་པར་འགྱུར་རོ་ཞེས་སྨྲས་ཀྱང་། བྱང་ཆུབ་སེམས་དཔའ་ཚིག་དེའི་རྗེས་སུ་མི་འཇུག་གོ །ཉོན་མོངས་པའི་སྲིན་པོ་ཡང་འདི་སྐད་དུ། ཁྱོད་དགེ་འདུན་གྱི་ལྷག་མ་ཉམས་པར་མི་འདོད་ན། ཉེས་པ་སྦོམ་པོའི་ཆོས་
ཉམས་ཀྱང་དེའི་རྒྱུ་དེའི་རྐྱེན་གྱིས་ཁྱོད་རབ་ཏུ་བདེ་བའི་མྱ་ངན་ལས་འདའ་བ་ཐོབ་པར་འགྱུར་རོ་ཞེས་སྨྲས་ཀྱང་། བྱང་ཆུབ་སེམས་དཔའ་ཚིག་དེའི་རྗེས་སུ་མི་འཇུག་གོ །ཉོན་མོངས་པའི་སྲིན་པོ་ཡང་འདི་སྐད་དུ། ཁྱོད་ཉེས་པ་སྦོམ་པོའི་ཆོས་ཉམས་པར་མི་འདོད་ན། སྤང་བའི་ལྟུང་བའི་ཆོས་ཉམས་ཀྱང་དེའི་རྒྱུ་དེའི་རྐྱེན་གྱིས་རབ་ཏུ་བདེ་བའི་མྱ་ངན་ལས་འདའ་བ་ཐོབ་པར་འགྱུར་རོ་ཞེས་སྨྲས་ཀྱང་། བྱང་ཆུབ་སེམས་དཔའ་ཚིག་དེའི་རྗེས་སུ་མི་འཇུག་གོ །སྲིན་པོས་ཡང་སྨྲས་པ། ཁྱོད་དེ་ལྟར་སྤང་བས་ལྟུང་བའི་ཆོས་ཉམས་པར་མི་འདོད་ན་ལྟུང་བའི་ཆོས་དགུ་བཅུ་ཉམས་ཀྱང་དེའི་རྒྱུ་དེའི་རྐྱེན་གྱིས་རབ་ཏུ་བདེ་བའི་མྱ་ངན་ལས་འདའ་བ་ཐོབ་པར་འགྱུར་རོ་ཞེས་སྨྲས་ཀྱང་། བྱང་ཆུབ་སེམས་དཔའ་ཚིག་དེའི་རྗེས་སུ་མི་འཇུག་གོ །སྲིན་པོས་ཡང་འདི་སྐད་དུ་ལྟུང་བ་དགུ་བཅུ་ཉམས་པར་མི་འདོད་ན། ཉེས་བྱས་ཀྱི་ཆོས་ཉམས་ཀྱང་དེའི་རྒྱུ་དེའི་རྐྱེན་གྱིས་རབ་ཏུ་བདེ་བའི་མྱ་ངན་ལས་འདའ་བ་ཐོབ་པར་འགྱུར་རོ་ཞེས་སྨྲས་ཀྱང་། བྱང་ཆུབ་སེམས་དཔའ་དེའི་ཚེ་འདི་སྙམ་དུ་སེམས་ཏེ། གལ་ཏེ་བདག་ལ་ཉེས་བྱས་ཀྱི་ཁ་ན་མ་ཐོ་བ་བྱུང་སྟེ་མ་བཤགས་མ་མཐོལ་ན་འཁོར་བའི་ཕ་རོལ་ཏུ་ཡང་མི་ཕྱིན། མྱ་ངན་ལས་འདའ་བར་ཡང་མི་འགྱུར་རོ་སྙམ་སེམས་ནས། བྱང་ཆུབ་སེམས་དཔའ་སེམས་དཔའ་ཆེན་པོ་ཆུང་ངུ་ན་ཉེས་བྱས་ལ་ཡང་རྡོ་རྗེ་ལྟ་བུའི་སེམས་ཀྱིས་སྲུང་ཞིང་འཛིན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཕས་ཕམ་པ་བཞི་སྲུང་བ་དང་། ཉེས་བྱས་སྲུང་བ་ལ་ཤིན་ཏུ་བརྟན་ཏེ་ཐ་དད་པ་མེད་དོ། །བྱང་ཆུབ་སེམས་དཔས་གལ་ཏེ་དེ་ལྟར་སྲུང་བ་ནི་ཚུལ་ཁྲིམས་ཀྱི་ཡན་ལག་ལྔ་དང་ལྡན་པ་ཞེས་བྱའོ། །འདི་ལྟ་སྟེ་བྱང་ཆུབ་སེམས་དཔའི་ལས་ཀྱི་ངོ་བོ་ཉིད་ཡོངས་སུ་དག་པའི་ཚུལ་ཁྲིམས་དང་། སྔ་མ་དང་ཕྱི་མའི་འཁོར་ཡོངས་སུ་དག་པའི་ཚུལ་ཁྲིམས་དང་། ངན་པར་རྟོག་པ་མ་ཡིན་པ་རྟོག་པ་རྣམ་པར་དག་པའི་ཚུལ་ཁྲིམས་དང་། ཡང་དག་པའི་དྲན་པ་སྲུང་ཞིང་དྲན་པ་རྣམ་པར་དག་པའི་ཚུལ་ཁྲིམས་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོ་བའི་ཚུལ་ཁྲིམས་སོ། །འོད་སྲུང་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཚུལ་ཁྲིམས་ལ་རྣམ་པ་གཉིས་ཏེ། འཇིག་རྟེན་ན་ཡང་དག་པར་བསྟན་པའི་ཚུལ་ཁྲིམས་བླངས་པ་དང་། ཡང་དག་པའི་ཆོས་ཀྱི་ཚུལ་ཁྲིམས་ཐོབ་པ་སྟེ། བྱང་ཆུབ་སེམས་དཔས་གལ་ཏེ་ཡང་དག་པའི་ཆོས་ཀྱི་ཚུལ་
ཁྲིམས་ཐོབ་ན། ནམ་དུ་ཡང་སྡིག་པ་མི་བྱེད་དོ། །འཇིག་རྟེན་ན་ཡང་དག་པར་བསྟན་པའི་ཚུལ་ཁྲིམས་བླང་བ་ནི་གསོལ་བ་དང་། བཞིའི་ལས་བྱས་པས་ཐོབ་པར་འགྱུར་རོ། །གཞན་ཡང་རིགས་ཀྱི་བུ་ཚུལ་ཁྲིམས་ལ་རྣམ་པ་གཉིས་ཏེ། རང་བཞིན་གྱིས་ལྕི་བའི་ཚུལ་ཁྲིམས་དང་། འཇིག་རྟེན་གྱིས་དཔྱས་པ་མེད་པར་བྱེད་པའི་ཚུལ་ཁྲིམས་སོ། །རང་བཞིན་གྱིས་ལྕི་བའི་ཚུལ་ཁྲིམས་ནི་ཕས་ཕམ་པ་བཞིའོ། །འཇིག་རྟེན་གྱིས་དཔྱས་པ་མེད་པར་བྱ་བའི་ཚུལ་ཁྲིམས་ནི། ཚོང་མི་བྱེད་པ་དང་། བྲེ་ཕུལ་དང་། སྲང་མི་འཆོས་པ་དང་། གཞན་ལ་མི་སླུ་བ་དང་། གཞན་ཡང་རིགས་དང་མཐུ་བསྙེམས་ཏེ་གཞན་གྱི་ནོར་མི་འཕྲོག་པ་དང་། གཞན་ཡང་གནོད་སེམས་ཀྱིས་འཆིང་བ་དང་། ལས་སུ་བྱས་པ་བཤིག་སྟེ་མ་རུང་བར་བྱེད་པ་དང་། མེ་མར་གྱི་འོད་ཡོད་བཞིན་དུ་ཉལ་བ་དང་། ཁང་ཁྱིམ་དང་། རྨོ་བའི་ལས་བྱེད་པ་དང་། འཚོ་ཚིས་ཀྱི་ལས་ལ་སོགས་པ་བྱར་མི་རུང་བ་དང་། གཞན་ཡང་བལ་གླང་དང་། རྟ་དང་། ཤིང་རྟ་དང་། བ་ལང་དང་། ལུག་དང་། རྔ་མོ་དང་། བོང་བུ་དང་། བྱ་དང་། ཁྱི་དང་། སྤྲེའུ་དང་། རྨ་བྱ་དང་། ནེ་ཙོ་དང་། འཚོ་བྱེད་དང་། ཀོ་བྱི་ལ་དང་། ཕར་བ་དང་། སྟག་དང་། གཟིག་དང་། བྱི་ལ་དང་། ཕག་དང་། དེ་མ་ཡིན་པ་གཅན་གཟན་མ་རུངས་པ་རྣམས་དང་། ཁྱེའུ་དང་། བུ་མོ་དང་། སྐྱེས་པ་དང་། བུད་མེད་དང་། བྲན་ཕོ་དང་། བྲན་མོ་དང་། ལས་བྱེད་པའི་མི་མི་འཆང་མི་གསོ་བ་དང་། གཞན་ཡང་གསེར་དང་། དངུལ་དང་། བཻ་དཱུརྱ་དང་། ཤེལ་དང་། མུ་ཏིག་དང་། ཨསྨ་གར་བྷ་དང་། མུ་ས་ལ་གལ་བྷ་དང་། བྱི་རུ་དང་། ཤེལ་གྱི་སྣམ་བུ་དང་། དོ་ཤལ་ལ་སོགས་ཏེ་རིན་པོ་ཆེ་རྣམས་དང་། ཟངས་དང་། ཁར་བ་དང་། ར་གན་གྱི་སྣོད་དང་། གདིང་བ་བར་ཏང་དང་། དྲེའུ་རྔོག་དང་། གདིང་བ་འཇམ་པོ་དང་། དེ་མ་ཡིན་པ་ཁྲེ་དང་། འབྲས་དང་། ནས་དང་གྲོ་དང་། སྲན་མ་དང་། ཟར་མ་དང་། ཟས་གཡོས་བྱས་པ་དང་། མ་བྱས་པ་ལ་སོགས་པ་མི་འཆང་བ་དང་། རྟག་ཏུ་ཟ་གཅིག་བྱེད་ཅིང་ཡང་དང་ཡང་མི་ལེན་པ་དང་། རྟག་ཏུ་བསོད་སྙོམས་སྤྱོད་པ་དང་། དགེ་འདུན་
གྱི་ནང་ན་ཟས་ཀྱི་བྱ་བ་བྱེད་པ་དང་། རྟག་ཏུ་ཆོག་ཤེས་པ་དང་། ཁུད་པར་འགྲོན་དུ་བོས་པར་མི་འགྲོ་བ་དང་། ཤ་མི་ཟ་བ་དང་། སྨྱོ་བའི་ཁུ་བ་ཆང་མི་འཐུང་བ་དང་། དཀུ་བ་རྣམ་པ་ལྔ་ལ་སོགས་ཏེ། དཀུ་ཞིང་མནམ་པའི་བག་མི་ཟ་བ་དང་། དེ་བས་ན་དེའི་ལུས་ནི་མནམ་པའི་བག་མེད་དེ། རྟག་ཏུ་འཇིག་རྟེན་དུ་བཅས་པའི་ལྷ་དང་མི་ཐམས་ཅད་ཀྱིས་བཀུར་སྟི་དང་། རིམ་གྲོ་བྱེད་ཅིང་། མཆོད་པ་དང་། བསྟོད་པར་འགྱུར་བ་དང་། ཟས་ཀྱི་ཚོད་འཛིན་པ་དང་། ལྷག་མ་མི་འཆང་བ་དང་། སྦྱིན་བདག་གི་གོས་བྱིན་པ་ལེན་ན་ཡང་རན་པར་ལེན་པ་དང་། གང་ནས་གང་དུ་འགྲོ་ཡང་ཆོས་གོས་གསུམ་དང་། ལྷུང་བཟེད་དུ་བཅས་ཏེ་བྱའི་འདབ་མ་ལྟར་མི་འབྲལ་བ་དང་། གཞན་ཡང་རྩ་བའི་འབྲས་བུ་དང་། སྡོང་བུའི་འབྲས་བུ་དང་། ཚིགས་ཀྱི་ས་བོན་དང་། མདུད་པའི་ས་བོན་དང་། འབྲས་བུའི་ས་བོན་མི་འཆང་བ་དང་། གཞན་ཡང་རིན་པོ་ཆེའི་གཏེར་དང་། གསེར་དང་། དངུལ་དང་། བཟའ་བ་དང་། བཏུང་བ་དང་། ཚང་མང་དང་། བང་མཛོད་དང་། བགོ་བའི་གོས་དང་། ཁྲི་སྟན་མཐོན་པོ་དང་། བལ་གླང་གི་མཆེ་བའི་ཁྲི་དང་། གསེར་གྱི་ཁྲི་དང་། ཐགས་སུ་བཏགས་པ་རྣམ་པ་མང་པོ་ལ་སོགས་པ་ལ་མི་ཉལ་མི་འཆང་བ་དང་། གཞན་ཡང་རྩྭ་ལས་བྱས་པའི་སྟན་འཇམ་པོ་ཐམས་ཅད་མི་འཆང་བ་དང་། བལ་གླང་གི་ཁྱོགས་དང་། རྟའི་ཁྱོགས་ལ་མི་འདུག་པ་དང་། ཤིན་ཏུ་འཇམ་པའི་གོས་མི་གདིང་བ་དང་། ཁྲི་ལ་སྔས་གཉིས་མི་བཅའ་བ་དང་། གཞན་ཡང་སྔས་བཟང་པོ་དང་། བསྙེས་པའི་སྔས་མི་འཆང་བ་དང་། ནམ་དུ་ཡང་བལ་གླང་འཐབ་པ་དང་། རྟ་འཐབ་པ་དང་། ཤིང་རྟ་འཐབ་པ་དང་། དམག་འཐབ་པ་དང་། སྐྱེས་པ་འཐབ་པ་དང་། བུད་མེད་འཐབ་པ་དང་། ཁྱུ་མཆོག་འཐབ་པ་དང་། ལུག་འཐབ་པ་དང་། ཆུ་གླང་འཐབ་པ་དང་། བྱ་འཐབ་པ་དང་། ནེ་ཙོ་འཐབ་པ་ལ་སོགས་པ་ལ་མི་ལྟ་བ་དང་། ཆེད་དུ་གཡུལ་བཤམས་པ་ལ་མི་ལྟ་བ་དང་། གཞན་ཡང་དུང་འབུད་པ་དང་། རྔ་རྡུང་བ་དང་། གླིང་བུ་དང་། གཅེའུ་ཁ་མངས་དང་། གིམ་དང་། ཤིར་དང་། དགུ་པོ་རྒྱུད་མངས་ལ་སོགས་ཏེ། རོལ་མོ་རྣམས་སངས་རྒྱས་ལ་མཆོད་པ་མ་གཏོགས་པར་མི་ཉན་པ་དང་། ཨུག་ཤུད་དང་། མིག་མངས་དང་། པར་སིག་གི་རྩེད་མོ་སེང་གེ་
དང་། བལ་གླང་གི་རྐྱ་འགྱེད་པ་དང་། ཆོ་ལོ་དང་། རྒྱན་པོ་དང་། ཕོ་ལོང་རྡེབས་པ་དང་། རྡོ་འཕེན་པ་དང་། ཁྲས་དང་། རྩེད་མོའི་བག་ཐམས་ཅད་མི་བྱེད་མི་ལྟ་བ་དང་། ནམ་དུ་ཡང་ལྟས་དང་། མཚན་ལྟ་བ་ལག་པ་དང་། རྐང་པ་དང་། ངོ་དང་། མིག་གི་མཚན་ལྟ་བ་མི་བྱེད་པ་དང་། སེན་མོ་ལ་མེ་ལོང་ལྟ་བུར་ལྟ་བ་དང་། རྩྭ་དང་ལྕུག་མ་དང་། བུམ་པ་དང་། ཐོད་པ་ལ་མོ་འདེབས་ཤིང་ལྟས་སུ་ལྟ་བ་མི་བྱེད་པ་དང་། དེ་མ་ཡིན་པ་གཉིད་བསང་བ་མ་གཏོགས་པར་སྐར་མ་ལ་སོགས་པ་མི་ལྟ་བ་དང་། རྒྱལ་པོའི་ཕོ་ཉ་དང་། ཕྲིན་གྱིས་ཚུ་རོལ་གྱི་ཚིག་ཕ་རོལ་དུ་སྨྲ་ཞིང་། ཕ་རོལ་གྱི་ཚིག་ཚུ་རོལ་དུ་སྨྲ་བ་མི་བྱེད་པ་དང་། གཡོ་དང་། སྒྱུས་ལོག་པར་འཚོ་བ་མ་ཡིན་པ་དང་། གཞན་ཡང་རྒྱལ་པོའི་གཏམ་དང་། བློན་པོ་དང་། རྐུན་པོ་དང་། དགྲ་ཐབས་དང་། བཟའ་བ་དང་། བཏུང་བ་དང་། ཡུལ་དང་། མུ་གེ་དང་། འཇིགས་པ་དང་། བདེ་སྐྱིད་པ་ལ་སོགས་པའི་གཏམ་མི་སྨྲ་བ་སྟེ། རིགས་ཀྱི་བུ་དེ་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་འཇིག་རྟེན་པས་མི་དཔྱས་པའི་ཚུལ་ཁྲིམས་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་དེ་ལྟར་བཅས་པའི་ཚུལ་ཁྲིམས་སྲུང་བ་དང་། རང་བཞིན་གྱིས་ལྕི་བའི་ཚུལ་ཁྲིམས་སྲུང་བ་ལ་ཐ་དད་པའི་བྱེ་བྲག་མེད་དོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་ཚུལ་ཁྲིམས་ཡོངས་སུ་སྲུང་བ་ན་འདི་སྐད་ཅེས་དམ་འཆའོ། །བདག་གི་ལུས་འདི་མེ་མ་མུར་གྱི་དོང་ཟབ་མོར་མཆོངས་ཀྱང་བླའི་འདས་པ་དང་། མ་འོངས་པ་དང་། ད་ལྟར་བཞུགས་པའི་སངས་རྒྱས་རྣམས་ཀྱིས་བཅས་པའི་ཚུལ་ཁྲིམས་ལས་ཉམས་ཏེ། རྒྱལ་རིགས་ཀྱི་བུ་མོའམ། བྲམ་ཟེ་མོའམ། ཁྱིམ་བདག་མོ་ལ་མི་ཚངས་པར་སྤྱོད་པའི་ལས་མི་བྱའོ་ཞེས་དམ་འཆའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འདི་སྐད་ཅེས་དམ་འཆའོ། །གལ་ཏེ་ལྕགས་ཤིན་ཏུ་ཚ་བས་བདག་གི་ལུས་དཀྲིས་གླགས་ཀྱང་བླའི། ཚུལ་ཁྲིམས་ཉམས་པའི་ལུས་ཀྱིས་སྦྱིན་བདག་དད་པས་བྱིན་པའི་གོས་མི་བགོའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འདི་སྐད་དུ་དམ་འཆའ་
སྟེ། བདག་གི་ཁར་ལྕགས་ཀྱི་ཐུ་ལུམ་མིད་ཀྱང་བླའི། ཚུལ་ཁྲིམས་ཉམས་པའི་ཁ་འདིས་ནམ་དུ་ཡང་སྦྱིན་བདག་དད་པས་བྱིན་པའི་ཁ་ཟས་མི་ཟའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འདི་སྐད་དུ་དམ་འཆའ་སྟེ། བདག་གི་ལུས་འདི་ལྕགས་ཤིན་ཏུ་ཚ་བའི་སྟེང་དུ་ཉལ་ཡང་བླའི། ཚུལ་ཁྲིམས་ཉམས་པའི་ལུས་ཀྱིས་ནམ་དུ་ཡང་སྦྱིན་བདག་དད་པས་བྱིན་པའི་ཁྲི་སྟན་ལ་མི་ཉལ་ལོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འདི་སྐད་ཅེས་དམ་འཆའ་སྟེ། བདག་གི་ལུས་ལ་མཚོན་ཤག་ཏི་སུམ་བརྒྱས་བཙུགས་ཀྱང་བླའི་ཚུལ་ཁྲིམས་ཉམས་པའི་ལུས་ཀྱིས་ནམ་དུ་ཡང་སྦྱིན་བདག་དད་པས་བྱིན་པའི་ནད་ཀྱི་རྐྱེན་སྨན་མི་བཏུང་ངོ་། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འདི་སྐད་ཅེས་དམ་འཆའ་སྟེ། བདག་གི་ལུས་འདི་ཤིན་ཏུ་ཁོལ་བའི་ཟངས་པོ་ཆེར་བསྐོལ་ཀྱང་བླའི། ཚུལ་ཁྲིམས་ཉམས་པའི་ལུས་ཀྱིས་སྦྱིན་བདག་དད་པས་བྱས་པའི་གནས་ཁང་དུ་མི་འདུག་གོ །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འདི་སྐད་ཅེས་དམ་འཆའ་སྟེ། གལ་ཏེ་ལྕགས་ཀྱི་ཐོ་བས་མགོ་ནས་རྐང་གི་བར་དུ་བརྡུངས་ཏེ་རྡུལ་དུ་གྱུར་ཀྱང་བླའི། ཚུལ་ཁྲིམས་ཉམས་པའི་ལུས་ཀྱིས་རྒྱལ་རིགས་དང་བྲམ་ཟེ་དང་ཁྱིམ་བདག་གི་རིམ་གྲོ་དང་ཕྱག་བྱ་བ་མི་འདོད་དོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འདི་སྐད་ཅེས་དམ་འཆའ་སྟེ། ལྕགས་ཀྱི་ཐུར་མ་ཤིན་ཏུ་ཚ་བས་མིག་གཉིས་བྲུས་ཀྱང་བླའི། འདོད་ཆགས་ཀྱི་སེམས་ཀྱིས་ཕ་རོལ་གྱི་གཟུགས་བཟང་པོ་ལ་མི་ལྟའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འདི་སྐད་ཅེས་དམ་འཆའ་སྟེ། ཇི་སྟེ་སྨྱུང་མང་པོས་རྣ་བའི་དབང་པོ་གཙགས་ཀྱང་བླའི། འདོད་ཆགས་དང་བཅས་པའི་སེམས་ཀྱིས་སྒྲ་སྙན་པ་མི་མཉན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འདི་སྐད་ཅེས་དམ་འཆའ་སྟེ། གྲི་རྣོན་པོས་སྣ་བཅད་ཀྱང་བླའི། འདོད་ཆགས་ཀྱི་སེམས་ཀྱིས་དྲི་ཞིམ་པོ་ལ་མི་སྣོམ་མོ། །རིགས་ཀྱི་བུ་གཞན་ཡང་བྱང་ཆུབ་སེམས་
དཔའ་སེམས་དཔའ་ཆེན་པོ་ཡང་འདི་སྐད་ཅེས་དམ་འཆའ་སྟེ། གྲི་རྣོན་པོས་ལྕེ་བཅད་ཀྱང་བླའི། འདོད་ཆགས་ཀྱི་སེམས་ཀྱིས་རོ་ཞིམ་པོ་ལ་མི་ཆགས་སོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འདི་སྐད་ཅེས་དམ་འཆའ་སྟེ། གལ་ཏེ་སྟ་རེ་རྣོན་པོས་བདག་གི་ལུས་དུམ་བུ་དུམ་བུར་གཏུབས་ཀྱང་བླའི། འདོད་ཆགས་དང་བཅས་པའི་སེམས་ཀྱིས་རེག་བྱ་མང་པོ་ལ་མི་ཆགས་སོ། །དེ་ཅིའི་ཕྱིར་ཞེ་ན། དེའི་རྒྱུ་དེའི་རྐྱེན་གྱིས་རྣལ་འབྱོར་ཅན་དག་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་དུ་སྐྱེ་བར་འགྱུར་རོ། །འོད་སྲུང་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་ཡོངས་སུ་སྲུང་བ་ཞེས་བྱའོ། ། བྱང་ཆུབ་སེམས་དཔའ་སེམས་དཔའ་ཆེན་པོས་ཚུལ་ཁྲིམས་ཤིན་ཏུ་བསྲུངས་ནས། སེམས་ཅན་ཐམས་ཅད་ལ་སྔོ་བར་བྱེད་དོ། །དེའི་རྒྱུ་དེའི་རྐྱེན་གྱིས་སེམས་ཅན་ཐམས་ཅད་ཚུལ་ཁྲིམས་ཤིན་ཏུ་བསྲུང་བ་དང་། རྣམ་པར་དག་པའི་ཚུལ་ཁྲིམས་དང་། ཤིན་ཏུ་དགེ་བའི་ཚུལ་ཁྲིམས་དང་། མི་ཉམས་པའི་ཚུལ་ཁྲིམས་དང་། མི་ཟློས་པའི་ཚུལ་ཁྲིམས་དང་། ཐེག་པ་ཆེན་པོའི་ཚུལ་ཁྲིམས་དང་། ཕྱིར་མི་ལྡོག་པའི་ཚུལ་ཁྲིམས་དང་། སེམས་དང་སྦྱོར་བའི་ཚུལ་ཁྲིམས་དང་། མཐར་ཕྱིན་པའི་ཚུལ་ཁྲིམས་དང་། ཕ་རོལ་ཏུ་ཕྱིན་པའི་ཚུལ་ཁྲིམས་རྫོགས་པར་གྱུར་ཅིག་ཅེས་སྨོན་ལམ་འདེབས་སོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ཚུལ་ཁྲིམས་ཡོངས་སུ་དག་པར་སྦྱོང་བ་ན། ཐོག་མ་མི་གཡོ་བའི་ས་ལ་གནས་པར་འགྱུར་རོ། །ཅིའི་ཕྱིར་མི་གཡོ་བའི་ས་ཞེས་བྱ་ཞེ་ན། བྱང་ཆུབ་སེམས་དཔའ་མི་གཡོ་བའི་ས་ལ་གནས་པ་ན། མི་གཡོ་མི་ལྟུང་མི་ལྡོག་མི་ཤིགས་པའི་ཕྱིར་རོ། །རིགས་ཀྱི་བུ་དཔེར་ན་རི་རབ་རིའི་རྒྱལ་པོ་ནི་རླུང་ཤིན་ཏུ་དྲག་པོ་རྫི་རླུང་ཡུག་གིས་ཀྱང་གཡོ་བའམ། ལྟུང་བའམ། འཇིག་པར་མི་ནུས་སོ། །བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལ་གནས་པ་ཡང་དེ་དང་འདྲ་སྟེ། གཟུགས་དང་། སྒྲ་དང་། དྲི་
དང་། རོ་དང་། རེག་བྱས་གཡོ་བར་མི་ནུས། སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་དུ་ལྟུང་བར་མི་འགྱུར། ཉན་ཐོས་དང་རང་སངས་རྒྱས་ཀྱི་སར་ཕྱིར་མི་ལྡོག་སྟེ། ལྟ་བ་མང་པོའི་རླུང་གིས་ཀྱང་མི་ཤིགས་ཤིང་ལོག་པར་འཚོ་བར་མི་འགྱུར་རོ། །རིགས་ཀྱི་བུ་གཞན་ཡང་མི་གཡོ་བ་ཞེས་བྱ་བ་ནི་འདོད་ཆགས་དང་། ཞེ་སྡང་དང་། གཏི་མུག་གིས་མི་གཡོས་སོ། །གཞན་ཡང་མི་ལྟུང་ཞེས་བྱ་བ་ནི་ཕས་ཕམ་པ་བཞིར་མི་ལྟུང་ངོ་། །གཞན་ཡང་ཕྱིར་མི་ལྡོག་ཅེས་བྱ་བ་ནི་ཕྱིར་ཚུལ་ཁྲིམས་ལས་ཁྱིམ་དུ་མི་ལྡོག་གོ །གཞན་ཡང་མི་འཇིག་ཅེས་བྱ་བ་ནི་ཐེག་པ་ཆེན་པོའི་མདོ་སྡེ་ལས་མི་འགལ་བས་མི་ཤིགས་སོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཉོན་མོངས་པའི་བདུད་ཀྱིས་མི་གཡོས་སོ། །ཕུང་པོའི་བདུད་ཀྱིས་ལྟུང་བར་མི་འགྱུར་རོ། །སྙིང་པོ་བྱང་ཆུབ་ཀྱི་བར་དུ་ལྷའི་བུའི་བདུད་ཡོད་མོད་ཀྱི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་གོ །འཆི་བདག་གི་བདུད་ཀྱིས་ཀྱང་མི་ཤིགས་སོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པའི་སྤྱོད་པ་ལ་ཤིན་ཏུ་ནན་ཏན་བྱེད་པ་ཞེས་བྱའོ། །རིགས་ཀྱི་བུ་ཅིའི་ཕྱིར་འཕགས་པའི་སྤྱོད་པ་ཞེས་བྱ་ཞེ་ན། འཕགས་པའི་སྤྱོད་པ་ནི་སངས་རྒྱས་དང་བྱང་ཆུབ་སེམས་དཔའ་སྤྱོད་པའི་ཕྱིར་ན། འཕགས་པའི་སྤྱོད་པ་ཞེས་བྱའོ། །ཅིའི་ཕྱིར་སངས་རྒྱས་དང་བྱང་ཆུབ་སེམས་དཔའ་ལ་འཕགས་པ་ཞེས་བྱ་ཞེ་ན། དེ་དག་ལ་སོགས་པ་འཕགས་པའི་ཆོས་དང་ལྡན་པའི་ཕྱིར། ཆོས་ཐམས་ཅད་ལ་ངོ་བོ་ཉིད་ཀྱིས་སྟོང་པ་ཉིད་དུ་རྟོགས་པའི་ཕྱིར། དེ་བས་ན་འཕགས་པ་ཞེས་བྱའོ། །གཞན་ཡང་འཕགས་པའི་ཚུལ་ཁྲིམས་དང་ལྡན་པས་འཕགས་པ་ཞེས་བྱའོ། །འཕགས་པའི་ཏིང་ངེ་འཛིན་དང་ཤེས་རབ་ཏུ་ལྡན་པས་འཕགས་པ་ཞེས་བྱའོ། །གཞན་ཡང་འཕགས་པའི་ནོར་བདུན་དད་པ་དང་། ཚུལ་ཁྲིམས་དང་། འཛེམ་པ་དང་། ཁྲེལ་བ་དང་། མང་དུ་ཐོས་པ་དང་། ཤེས་རབ་དང་། བཏང་སྙོམས་
ཀྱི་ནོར་དང་ལྡན་པས་འཕགས་པ་ཞེས་བྱའོ། །གཞན་ཡང་འཕགས་པའི་ལམ་ཡན་ལག་རྣམ་པ་བདུན་དང་ལྡན་པས་འཕགས་པ་ཞེས་བྱ་སྟེ། དེ་བས་ན་འཕགས་པའི་སྤྱོད་པ་ཞེས་བྱའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པའི་སྤྱད་པ་སྤྱོད་པ་ནི། ལུས་འདི་ལ་སྤྱི་བོ་ནས་རྐང་པའི་བར་དུ་བརྟགས་ན། སྐྲ་དང་། སེན་མོ་དང་། སོ་དང་། མི་གཙང་བ་བཙོག་པ། པགས་པ་དང་། ཤ་དང་། རྒྱུས་པ་དང་། རུས་པ་དང་། མཆེར་པ་དང་། མཁལ་མ་དང་། སྙིང་དང་། གློ་བ་དང་། མཆིན་པ་དང་། མཁྲིས་པ་དང་། རྒྱུ་མ་དང་། ཕོ་བ་དང་། ཞུ་བ་དང་། མ་ཞུ་བའི་སྣོད་གཉིས་དང་། བཤང་གཅི་ཆེ་ཆུང་དང་། མཆིལ་མ་དང་། སྣབས་དང་། མཆི་མ་དང་། ཀླད་པ་དང་། ཐོད་པ་དང་། རྐང་དང་། རྣག་དང་། ཁྲག་དང་། རྩ་ལ་སོགས་པ་མི་གཙང་བ་འབའ་ཞིག་གིས་གང་བར་མཐོང་ངོ་། །བྱང་ཆུབ་སེམས་དཔའ་དེ་ལྟར་རྩེ་གཅིག་ཏུ་ཤིན་ཏུ་རྟོག་པ་ན། བདག་ཅེས་བྱ་བ་སུ་དབང་། གང་ན་གནས། བདག་ཅེས་བྱ་བ་སུ་དབང་ཞེས་ཤིན་ཏུ་རྟོག་སྟེ། ཡང་འདི་སྙམ་དུ་སེམས་སོ། །རུས་པ་དེ་བདག་ཡིན་ནམ། རུས་པ་ལས་གཞན་པ་ཞིག་ཡོད་དམ་སྙམ། བྱང་ཆུབ་སེམས་དཔའ་དེའི་ཚེ་པགས་པ་དང་། ཤ་བཏང་སྟེ། ཀེང་རུས་འབའ་ཞིག་ལ་རྟོག་གོ །ཡང་འདི་སྙམ་དུ་སེམས་ཏེ། རུས་པའི་ཁ་དོག་ཀྱང་རྣམ་པ་ཐ་དད་དེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ཕུག་རོན་གྱི་གཤོག་པ་ལྟ་བུ་སྟེ། དེ་ལྟར་ན་རུས་པའི་མཚན་ཉིད་ཀྱང་བདག་མ་ཡིན་ནོ། །དེ་ཅིའི་ཕྱིར་ཞེ་ན། བདག་ཅེས་བྱ་བ་ནི་སྔོན་པོའམ། སེར་པོའམ། དམར་པོའམ། དཀར་པོའམ། ཕུག་རོན་གྱི་གཤོག་པ་ལྟ་བུ་མ་ཡིན་པའི་ཕྱིར་རོ། །བྱང་ཆུབ་སེམས་དཔས་དེ་ལྟར་རྩེ་གཅིག་པའི་སེམས་ཀྱིས་ཤིན་ཏུ་རྟོག་པ་ན། གཟུགས་ལ་འདོད་ཆགས་པ་ཐམས་ཅད་ཞི་བར་འགྱུར་རོ། །ཡང་འདི་སྙམ་དུ་སེམས་ཏེ། རུས་པ་དེ་ཡང་རྟེན་ཅིང་འབྲེལ་ཏེ་འབྱུང་བ་ཡིན་ཏེ། རྐང་པའི་རྟིང་པའི་རུས་པས་ནི་ལོང་བུའི་རུས་པ་བརྟེན། ལོང་བུས་ནི་རྗེ་ངར་གྱི་རུས་པ་བརྟེན། རྗེ་ངར་གྱི་རུས་པས་ནི་པུས་མོ་བརྟེན།
པུས་མོའི་རུས་པས་ནི་བརླའི་རུས་པ་བརྟེན། བརླའི་རུས་པས་ནི་དཔྱིའི་རུས་པ་བརྟེན། དཔྱིའི་རུས་པས་ནི་རྐེད་པའི་རུས་པ་བརྟེན། རྐེད་པའི་རུས་པས་ནི་སྒལ་ཚིགས་ཀྱི་རུས་པ་བརྟེན། རྒལ་ཚིགས་ཀྱི་རུས་པས་ནི་རྩིབ་མའི་རུས་པ་བརྟེན། ཡང་རྒལ་ཚིགས་ཀྱི་རུས་པས་ནི་གཉའ་བའི་རུས་པ་བརྟེན། གཉའ་བའི་རུས་པས་ནི་འགྲམ་པའི་རུས་པ་བརྟེན། འགྲམ་པའི་རུས་པས་ནི་འགྲམ་སོ་དང་ཐོད་པའི་རུས་པ་བརྟེན་ཏོ། །ཡང་ལྟག་རུས་ནི་ཕྲག་པའི་རུས་པ་ལ་རྟེན། ཕྲག་པའི་རུས་པ་ནི་ལག་ངར་གྱི་རུས་པ་ལ་རྟེན། ལག་ངར་གྱི་རུས་པ་ནི་མཁྲིག་མའི་རུས་པ་ལ་རྟེན། མཁྲིག་མའི་རུས་པ་ནི་ལག་མཐིལ་གྱི་རུས་པ་ལ་རྟེན། ལག་མཐིལ་གྱི་རུས་པ་ནི་སོར་མོའི་རུས་པ་ལ་རྟེན་ཏེ། དེ་ལྟར་རུས་པ་ཐམས་ཅད་གཅིག་ལ་གཅིག་རྟེན་ཅིང་འབྲེལ་བར་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་རྟོག་པ་ན་ལུས་ཀྱི་རུས་པ་ཐམས་ཅད་སོ་སོ་ནས་འདུག་པར་རྟོགས་སོ། །དེ་ལྟར་ཤིན་ཏུ་རྟོགས་པ་ན་གཟུགས་ལ་ཆགས་པ་དང་། མངའ་བྱད་ལ་ཆགས་པ་དང་། རེག་ན་འཇམ་པའི་ཆགས་པ་རྣམ་པ་གསུམ་པོ་ཡོངས་སུ་སྤོང་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་རུས་པ་སྔོན་པོ་ལ་རྟོག་པ་ན་ས་ཆེན་པོ་འདི་ལྷོ་བྱང་ཤར་ནུབ་དང་། ཕྱོགས་མཚམས་བཞི་དང་། སྟེང་དང་། འོག་ཀུན་སྔོན་པོར་མཐོང་ངོ་། །སྔོན་པོ་ལ་རྟོག་པ་བཞིན་དུ་སེར་པོ་དང་། དཀར་པོ་དང་། ཕུག་རོན་གྱི་གཤོག་པ་ལྟ་བུ་ཡང་དེ་བཞིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་རྟོག་པ་ན་སྨིན་མཚམས་ནས་འོད་ཟེར་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ཕུག་རོན་གྱི་གཤོག་པ་ལྟ་བུ་བྱུང་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དེས་འོད་དེ་རེ་རེ་ལས་ཀྱང་སངས་རྒྱས་བཞུགས་པར་མཐོང་ནས། དེ་ལ་ལུས་འདི་མི་གཙང་བའི་རྒྱུ་དང་རྐྱེན་རྟེན་ཅིང་འབྲེལ་ཏེ་འབྱུང་བ་འདྲི་ཞིང་ཞུ་བ་ནི་འདི་ལྟ་སྟེ། ལུས་འདི་འདུག་པ་དང་། ལྡང་བ་དང་། འགྲོ་བ་དང་། སྡོད་པ་དང་། དགུ་བ་དང་། དགྱེ་བ་དང་། ལྟ་བ་དང་། མིག་འཛུམས་པ་དང་། དབུགས་རྒྱུ་བ་དང་། ངུ་བ་དང་། རྒོད་པ་དང་། དགའ་བར་འགྱུར་བ་དེ་ལ་ནི་བདག་པོ་མེད་ན་སུ་ཞིག་དེ་ལྟར་བསྒྱུར་ཞེས་ཞུ་ཞིང་འདྲིའོ། །དེ་སྐད་ཅེས་དྲིས་ནས་འོད་ཀྱི་ནང་ན་བཞུགས་པའི་སངས་རྒྱས་ཀྱང་མོད་ལ་མི་སྣང་བར་གྱུར་ཏོ།། །།
འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་བཅུ་དྲུག་པ། ཡང་འདི་སྙམ་དུ་སེམས་ཏེ། འོན་ཏེ་རྣམ་པར་ཤེས་པ་དེ་བདག་ཡིན་ནམ། ཅི་ན་སངས་རྒྱས་རྣམས་ཀྱིས་བདག་ལ་བསྟན་པར་མ་གྱུར་སྙམ་ནས། ཡང་རྣམ་པར་ཤེས་པ་ལ་བརྟགས་ན་རྣམ་པར་ཤེས་པ་ལ་ནི་སྐད་ཅིག་སྐད་ཅིག་ཏུ་ཆུ་བོའི་རྒྱུན་བཞིན་སྐྱེ་ཞིང་འགོག་པས་དེ་ཡང་བདག་མ་ཡིན་ནོ་ཡང་འདི་སྙམ་དུ་སེམས་ཏེ། ཕྱི་ནང་དུ་རྒྱུ་བའི་དབུགས་འདི་ནི་རླུང་ཡིན་ཏེ། རླུང་གི་མཚན་ཉིད་ནི་ཆེན་པོ་བཞི་ཡིན་པས། ཆེན་པོ་བཞི་ལ་བདག་ཅེས་བྱ་བ་གང་ཡིན། སའི་མཚན་ཉིད་ཀྱང་བདག་མ་ཡིན་ལ། དེ་བཞིན་དུ་ཆུ་དང་། མེ་དང་། རླུང་གི་མཚན་ཉིད་ཀྱང་བདག་ཅེས་བྱ་བ་མ་ཡིན་ནོ་སྙམ་སེམས་སོ། །ཡང་འདི་སྙམ་དུ་སེམས་ཏེ། ལུས་འདི་ལ་ནི་ཐམས་ཅད་ཀྱང་བདག་ཅེས་བྱ་བ་མེད་དེ། སེམས་དང་རླུང་འདུས་ཤིང་ཚོགས་པའི་རྒྱུ་དང་རྐྱེན་ལས་བྱ་བ་རྣམ་པ་སྣ་ཚོགས་མངོན་དུ་སྣང་བར་གྱུར་པ་ནི་དཔེར་ན་སྔགས་ཀྱི་ཕྱིར་རམ། སྒྱུ་མ་མཁན་གྱིས་བྱས་པ་བཞིན་ནོ། །གཞན་ཡང་དགུ་པོ་རྒྱུད་མངས་དང་འདྲ་སྟེ། ཡིད་བཞིན་དུ་སྒྲ་འབྱུང་བས་དེས་ན་ལུས་འདི་མི་གཙང་བ་སྟེ། རྒྱུ་དང་རྐྱེན་ཚོགས་པ་ལ་རག་ལུས་པས་གྲུབ་པ་ཡིན་ན་ཆགས་སུ་ཡང་ཅི་ཞིག་ཡོད། གལ་ཏེ་ཕ་རོལ་པོས་གཤེའམ་སྤྱོས་ན་ཡང་ཞེ་སྡང་བསྐྱེད་དུ་ཡང་ཅི་ཞིག་ཡོད་དེ། བདག་གི་ལུས་འདི་ནི་མི་གཙང་བ་རྣམ་པ་སུམ་ཅུ་རྩ་དྲུག་གིས་ཡོངས་སུ་གང་ན་གཤེ་ཞིང་སྤྱོ་བ་དེ་ཡང་ཅི་ལ་གནས། གཤེ་བ་ཐོས་ན་ཡང་འདི་སྙམ་དུ་སེམས་ཏེ། སྒྲ་སྐད་གང་གིས་སྤྱོ་བར་འགྱུར་སྙམ། སྒྲ་སྐད་ཀུན་ལ་སོ་སོར་བརྟགས་ན་གཤེ་བ་ཡོད་པར་མི་མཐོང་སྟེ། གཅིག་ལ་མེད་པ་བཞིན་མང་པོ་ཡང་དེ་དང་འདྲ་སྟེ། དེ་བས་ན་ཞེ་སྡང་མི་སྐྱེའོ། །གལ་ཏེ་ཕ་རོལ་པོས་བརྡེགས་ན་ཡང་འདི་སྙམ་དུ་སེམས་ཏེ། འདི་ལྟར་བརྡེགས་པ་འདི་ཅི་ལས་བྱུང་སྙམ་བརྟགས་ན་ལག་པ་དང་། སྟོབས་དང་། དབྱིག་པ་དང་། བདག་གི་ལུས་ཚོགས་པ་ལས་རྡེག་པ་ཞེས་བྱ་བ་བྱུང་ན། ཅིའི་ཕྱིར་ཕ་རོལ་ལ་ཁྲོས། འདི་ནི་བདག་གི་ལུས་ཡོད་པས་ན་འདི་འདྲ་བ་མྱོང་བར་གྱུར་ཏེ། བདག་གི་ཕུང་པོ་ལྔའི་ལུས་འདི་ཡོད་པ་ལས་འདི་འདྲ་བར་གྱུར་ཏོ། །དཔེར་ན་འབེན་
ཡོད་པའི་རྐྱེན་གྱིས་མདའ་འོང་བ་དང་འདྲ་བར་བདག་གི་ལུས་ཀྱང་དེ་དང་འདྲ་སྟེ། ལུས་ཡོད་པས་ན་རྡེག་པ་ཡོད་དེ། གལ་ཏེ་བདག་གིས་ལུས་བཟོད་པ་མ་བྱས་ན་སེམས་འཁྲུག་པར་འགྱུར་རོ། །གལ་ཏེ་སེམས་འཁྲུགས་ན་ཡང་དག་པའི་དྲན་པ་ཉམས་པར་འགྱུར། གལ་ཏེ་ཡང་དག་པའི་དྲན་པ་ཉམས་ན། དགེ་བ་དང་མི་དགེ་བའི་དོན་མི་རྟོགས་སོ། །དགེ་བ་དང་མི་དགེ་བའི་དོན་མ་རྟོགས་ན་ཁ་ན་མ་ཐོ་བའི་ཆོས་སྤྱོད་པར་འགྱུར་རོ། ། ཁ་ན་མ་ཐོ་བའི་ཆོས་བྱས་ན་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། ཡི་དགས་ཀྱི་ཁམས་སུ་ལྟུང་བར་འགྱུར་རོ། །བྱང་ཆུབ་སེམས་དཔའ་དེའི་ཚེ་དེ་ལྟར་རྟོགས་པས་དྲན་པ་ཉེ་བར་གཞག་པ་བཞི་ཐོབ་པར་འགྱུར་རོ། །དྲན་པ་ཉེ་བར་གཞག་པ་བཞི་ཐོབ་པས་ཤིན་ཏུ་བཟོད་པའི་ས་ལ་གནས་པར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ས་དེ་ལ་གནས་ན། འདོད་ཆགས་དང་། ཞེ་སྡང་དང་། གཏི་མུག་ལ་བཟོད་དོ། །གཞན་ཡང་གྲང་བ་དང་། ཚ་བ་དང་། བྲུ་བ་དང་། སྐོམ་པ་དང་། སྦྲང་མ་དང་། མཆུ་སྨྱུང་དང་། རླུང་དང་། རེག་བྱ་ཡིད་དུ་མི་འོང་བ་དང་། ནད་རྣམ་པ་སྣ་ཚོགས་དང་། ཚིག་ངན་པས་གཤེ་བ་དང་། སྤྱོ་བ་དང་། རྡེག་པ་དང་། འཚོག་པ་དང་། གཞུ་བ་དང་། མདོར་ན་ལུས་དང་སེམས་སྡུག་བསྔལ་བར་འགྱུར་བ་ཐམས་ཅད་ལ་བཟོད་དེ། དེ་བས་ན་ཤིན་ཏུ་བཟོད་པའི་ས་ལ་གནས་པ་ཞེས་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་མི་གཡོ་བའི་ས་ལ་གནས་པར་མ་གྱུར་གྱི་བར་དུ་ཚུལ་ཁྲིམས་ཡོངས་སུ་དག་པར་བསྲུང་བ་ན་རྒྱུ་དང་རྐྱེན་གང་གིས་ཚུལ་ཁྲིམས་ཉམས་པར་འགྱུར་བ་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཡོད་དོ། །བྱང་ཆུབ་སེམས་དཔའ་མི་གཡོ་བའི་ས་ལ་གནས་པར་མ་གྱུར་གྱི་བར་དུ་རྒྱུ་དང་རྐྱེན་གྱིས་ཚུལ་ཁྲིམས་ཉམས་པར་གྱུར་པ་ཡོད་དོ། །འོད་སྲུང་ངོ་མཚར་དུ་གྱུར་ནས་དེ་གང་ལགས་ཞེས་གསོལ་པ་དང་། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། བྱང་ཆུབ་སེམས་དཔའ་
བདག་གི་ཚུལ་ཁྲིམས་ཉམས་པར་གྱུར་པ་དེའི་རྒྱུ་དེའི་རྐྱེན་གྱིས། ཕ་རོལ་པོ་གཞན་དག་ཐེག་པ་ཆེན་པོའི་མདོ་སྡེ་ལ་མོས་ཤིང་དང་བས་འཆང་ཞིང་འཛིན་པར་འགྱུར་རམ། ཕ་རོལ་པོ་གཞན་དག་ཀློག་པ་དང་། འདོན་པ་དང་། ཁོང་དུ་ཆུད་པར་བྱེད་པ་དང་། གླེགས་བམ་དུ་འདྲི་བར་འགྱུར་བ་དང་། གཞན་དག་ལ་ཡང་རྒྱས་པར་སྟོན་ཅིང་འཆད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་ཙམ་གྱི་ཚོད་ན། དེའི་ཕྱིར་ཚུལ་ཁྲིམས་ཉམས་པར་བྱེད་དེ་བྱང་ཆུབ་སེམས་དཔའ་དེའི་ཚེ་འདི་སྙམ་དུ་སེམས་སོ། །བདག་བསྐལ་པ་གཅིག་གམ་བསྐལ་པ་གཅིག་འགྲིབས་ཀྱི་བར་དུ་མཚམས་མེད་པའི་སེམས་ཅན་དམྱལ་བ་ཆེན་པོར་ལྷུང་ཡང་བླའི། ཕ་རོལ་པོ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་དགོད་པར་བྱེད་དོ། །འོད་སྲུང་དེའི་རྒྱུ་དེའི་རྐྱེན་གྱིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་དག་ཉམས་པར་འགྱུར་རོ། །དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་བྱང་ཆུབ་སེམས་དཔའ་ཕ་རོལ་པོ་བྱང་ཆུབ་ཀྱི་སེམས་ལས་ཕྱིར་མི་ལྡོག་པར་བསྐྱབ་ཅིང་བསྡུ་བའི་སླད་དུ་ཚུལ་ཁྲིམས་ཉམས་ཀྱང་མཚམས་མེད་པའི་སེམས་ཅན་དམྱལ་བར་ལྟུང་བའི་གནས་མ་མཆིས་སོ། །དེ་ནས་བཅོམ་ལྡན་འདས་ཀྱིས་འཇམ་དཔལ་ལ་བཀའ་སྩལ་པ། ལེགས་སོ་ཤིན་ཏུ་ལེགས་སོ། །ཁྱོད་ཀྱིས་སྨྲས་པ་བཞིན་ནོ། །ང་ཡང་སྔོན་འཛམ་བུའི་གླིང་འདིར་རྒྱལ་པོ་ཆེན་པོ་དྲང་སྲོང་ཞེས་བྱ་བར་གྱུར་པས་ན་ཐེག་པ་ཆེན་པོའི་མདོ་སྡེ་ལ་བསྟི་སྟང་དང་བཅས་པས་ཤིན་ཏུ་དད་ཅིང་མོས་ཏེ། སེམས་དགེ་བ་འབའ་ཞིག་ལ་བརྩོན་པས་ཁ་ན་མ་ཐོ་བའི་ལས་ཕྲག་དོག་དང་སེར་སྣའི་བག་མེད་དེ། ངག་གི་ལས་ཀྱིས་ནི་རྟག་ཏུ་ངག་སྙན་པ་དང་། དགེ་བའི་ཆོས་སྨྲ་ཞིང་སྟོན་ཏོ། །ལུས་ཀྱིས་ཀྱང་དབུལ་ཕོངས་པ་མགོན་དང་སྐྱབས་མེད་པའི་དཔུང་གཉེན་བྱས་ཏེ། སྦྱིན་པ་ལ་བར་ཆད་མེད་པར་བརྩོན་པར་གྱུར་ཏོ། །དེའི་ཚེ་དེའི་དུས་ན་འཇིག་རྟེན་ན་
སངས་རྒྱས་ཀྱང་མི་བཞུགས། ཉན་ཐོས་དང་རང་སངས་རྒྱས་ཀྱང་མེད་དེ། དེའི་ཚེ་ན་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ་ལ་དད་ཅིང་མོས་པའི་ཕྱིར་ངས་ལོ་བཅུ་གཉིས་ཀྱི་བར་དུ་བྲམ་ཟེའི་གཡོག་བྱས་ཏེ། ཡོ་བྱད་ཅི་འདོད་པ་སྦྱར་ཏོ། །ལོ་བཅུ་གཉིས་ཀྱི་བར་དུ་བདེ་བ་བྱིན་ནས་སྟོན་པ་དེ་རྣམས་ལ་འདི་སྐད་ཅེས་སྨྲས་སོ། །ཀྱེ་སྟོན་པ་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་ཅིག་ཅེས་སྨྲས་སོ། ། བྲམ་ཟེས་སྨྲས་པ། རྒྱལ་པོ་ཆེན་པོ་བྱང་ཆུབ་ཀྱི་མཚན་ཉིད་ནི་ཅི་ཡང་མེད་པ་སྟེ། ཐེག་པ་ཆེན་པོའི་མདོ་སྡེ་ཡང་དེ་དང་འདྲ་བ་ཡིན་ན། རྒྱལ་པོ་ཆེན་པོ་ཅིའི་ཕྱིར་མི་ཞེས་བྱ་བ་བཀུར་བཀུར་ཏེ། ནམ་མཁའ་དང་མཉམ་ཞེས་སྨྲས་སོ། །རིགས་ཀྱི་བུ་ང་དེའི་ཚེ་ཐེག་པ་ཆེན་པོ་ལ་ཤིན་ཏུ་མོས་པས་བྲམ་ཟེས་ཤིན་ཏུ་རྒྱས་པ་ལ་སྐུར་པའི་ཚིག་དེ་ཐོས་ནས། དེའི་ཚེ་ན་ངས་བྲམ་ཟེ་དེའི་སྲོག་བཅད་དོ། །རིགས་ཀྱི་བུ་དེའི་རྒྱུ་དེའི་རྐྱེན་གྱིས་དེ་ཚུན་ཅད་སེམས་ཅན་དམྱལ་བར་མ་སྐྱེས་སོ། །རིགས་ཀྱི་བུ་ཐེག་པ་ཆེན་པོའི་མདོ་སྡེ་ལ་བསྲུང་ཞིང་བསྐྱབ་པའི་མཐུ་སྟོབས་ནི་དེ་ལྟར་ཚད་མེད་དོ། །འོད་སྲུང་གཞན་ཡང་འཕགས་པའི་སྤྱོད་པ་ནི་འདི་ལྟ་སྟེ། འཕགས་པའི་བདེན་པ་བཞིའོ། །དེ་ཡང་གང་ཞེ་ན། སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་ནི་འཕགས་པའི་བདེན་པ་བཞི་ཞེས་བྱའོ། །འོད་སྲུང་སྡུག་བསྔལ་ཞེས་བྱ་བ་ནི་ཤ་ཐང་ཞིང་གདུང་བའི་མཚན་ཉིད་དོ། །ཀུན་འབྱུང་བ་ནི་སྐྱེ་ཞིང་འཕེལ་བའི་མཚན་ཉིད་དོ། །འགོག་པ་ནི་ཞི་བ་འགོག་པའི་མཚན་ཉིད་དོ། །ལམ་ནི་ཐེག་པ་ཆེན་པོའི་མཚན་ཉིད་དོ། །རིགས་ཀྱི་བུ་གཞན་ཡང་སྡུག་བསྔལ་ནི་མངོན་དུ་སྣང་བའི་མཚན་ཉིད་དོ། །ཀུན་འབྱུང་བ་ནི་འགྱུར་བའི་མཚན་ཉིད་དོ། །འགོག་པ་ནི་བསལ་བའི་མཚན་ཉིད་དོ། །ལམ་ནི་བསལ་བས་འགྱུར་བའི་མཚན་ཉིད་དོ། །རིགས་ཀྱི་བུ་གཞན་ཡང་སྡུག་བསྔལ་ལ་རྣམ་པ་གསུམ་སྟེ། སྡུག་བསྔལ་བའི་སྡུག་བསྔལ་དང་འདུ་བྱེད་ཀྱི་སྡུག་བསྔལ་དང་། འགྱུར་བའི་སྡུག་བསྔལ་ལོ། །ཀུན་འབྱུང་བ་ནི་སྲིད་པ་ཉི་ཤུ་རྩ་ལྔའོ། །འགོག་པ་ནི་ཉི་ཤུ་རྩ་ལྔ་འགོག་པའོ། །ལམ་ནི་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་བསྒོམ་
པའོ། །རིགས་ཀྱི་བུ་གཞན་ཡང་ཟག་པ་དང་བཅས་པའི་ཆོས་ལ་ཡང་རྒྱུ་དང་བཅས། འབྲས་བུ་དང་བཅས་པ་རྣམ་པ་གཉིས་ཡོད་དོ། །ཟག་པ་མེད་པའི་ཆོས་ལ་ཡང་རྒྱུ་དང་བཅས་འབྲས་བུ་དང་བཅས་པ་རྣམ་པ་གཉིས་ཡོད་དོ། །ཟག་པ་དང་བཅས་པ་འབྲས་བུ་དང་བཅས་པ་ནི་སྡུག་བསྔལ་ཞེས་བྱའོ། །ཟག་པ་དང་བཅས་པའི་རྒྱུ་དང་བཅས་པ་ནི་ཀུན་འབྱུང་ཞེས་བྱའོ། །ཟག་པ་མེད་པའི་འབྲས་བུ་དང་བཅས་པ་ནི་འགོག་པ་ཞེས་བྱའོ། །ཟག་པ་མེད་པའི་རྒྱུ་དང་བཅས་པ་ནི་ལམ་ཞེས་བྱའོ། །རིགས་ཀྱི་བུ་གཞན་ཡང་མཚན་ཉིད་རྣམ་པ་འདི་བརྒྱད་ནི་སྡུག་བསྔལ་ཞེས་བྱའོ། །འདི་ལྟ་སྟེ། སྐྱེ་བའི་སྡུག་བསྔལ་དང་། རྒ་བའི་སྡུག་བསྔལ་དང་། ན་བའི་སྡུག་བསྔལ་དང་། ཤི་བའི་སྡུག་བསྔལ་དང་། འདོད་པ་དང་བྲལ་བའི་སྡུག་བསྔལ་དང་། དགྲ་སྡང་བ་དང་ཕྲད་པའི་སྡུག་བསྔལ་དང་། འདོད་པ་མི་རྙེད་པའི་སྡུག་བསྔལ་དང་། ཕུང་པོ་ལྔ་ནི་སྡུག་བསྔལ་ཏེ། གང་སྡུག་བསྔལ་བརྒྱད་པོ་འདི་དག་སྐྱེ་བར་བྱེད་པ་ནི་ཀུན་འབྱུང་ཞེས་བྱའོ། །ཆོས་འདི་དག་གི་གནས་ཀྱང་མེད་པ་ནི་འགོག་པ་ཞེས་བྱའོ། །སྟོབས་བཅུ་དང་། མི་འཇིགས་པ་བཞི་དང་། དྲན་པ་ཉེ་བར་གཞག་པ་གསུམ་དང་། སྙིང་རྗེ་ཆེན་པོ་ནི་ལམ་ཞེས་བྱའོ། །རིགས་ཀྱི་བུ་སྐྱེ་བ་ཞེས་བྱ་བ་ནི་འབྱུང་བའི་མཚན་ཉིད་དེ། དེ་ཡང་རྣམ་པ་ལྔའོ། །འདི་ལྟ་སྟེ། ཐོག་མ་བྱུང་བ་དང་། ཐ་མར་ཟད་པ་དང་། འཕེལ་ཞིང་སྐྱེ་བ་དང་། མངལ་ནས་བྱུང་བ་དང་། རིགས་ལས་སྐྱེས་པའོ། །རྒས་ཞེས་བྱ་བ་ནི་རྒས་པ་ལ་རྣམ་པ་གཉིས་ཏེ། སྐད་ཅིག་སྐད་ཅིག་ཏུ་རྒས་པ་དང་། མཐར་རྒས་པའོ། །ཡང་རྣམ་པ་གཉིས་ཏེ། སྐྱེ་ཞིང་འཕེལ་བས་རྒས་པ་དང་། འགོག་ཅིང་ཞིགས་པས་རྒས་པ་ནི་རྒས་པ་ཞེས་བྱའོ། །ན་བ་ཞེས་བྱ་བ་གང་ཞེ་ན། ན་བ་ནི་ཆེན་པོ་བཞིའི་སྦྲུལ་གདུག་པ་ཤས་མི་མཉམ་པ་ལས་ནད་དུ་གྱུར་ཏེ། དེ་ཡང་རྣམ་པ་གཉིས་སོ། །ལུས་ན་བ་དང་། སེམས་ན་བ་སྟེ། ལུས་ན་བ་ལ་ཡང་རྣམ་པ་ལྔའོ། །བད་ཀན་ལས་གྱུར་པ་དང་། རླུང་ལས་གྱུར་པ་དང་། མཁྲིས་པ་ལས་གྱུར་པ་དང་། འདུས་པ་ལས་ནད་དུ་གྱུར་པ་
དང་། བག་མ་བྱས་པ་ལས་ནད་དུ་གྱུར་པའོ། །བག་མ་བྱས་པའི་ནད་ལ་ཡང་རྣམ་པ་བཞི་སྟེ། ཉམས་ཀྱིས་མི་ལྕོགས་བཞིན་དུ་བྱེད་པ་དང་། གཡང་དུ་ལྟུང་བ་དང་། རྡོ་དབྱུག་དང་མཚོན་གྱིས་ཕོག་པ་དང་། མི་མ་ཡིན་པས་བརླམས་པའོ། །སེམས་ན་བ་ལ་ཡང་རྣམ་པ་བཞི་སྟེ། ཤིན་ཏུ་དགའ་བ་ལས་གྱུར་པ་དང་། འཇིགས་སྐྲག་པ་ལས་གྱུར་པ་དང་། མྱ་ངན་བྱེད་པ་ལས་གྱུར་པ་དང་། གཏི་མུག་ལས་གྱུར་པའོ། །རིགས་ཀྱི་བུ་གཞན་ཡང་ལུས་ན་བ་དང་། སེམས་ན་བ་ལ་རྣམ་པ་གསུམ་སྟེ། ལས་ཀྱི་རྣམ་པར་སྨིན་པ་དང་། སྡིག་པའི་གཉེན་པོ་མ་སྤངས་པ་དང་། དུས་ལས་གྱུར་པ་སྟེ། དེ་དག་ལ་སོགས་པ་ལས་རྒྱུ་དང་། རྐྱེན་དང་། མིང་དུ་འདོགས་པ་དང་། རྣམ་པ་ཐ་དད་པའི་ནད་སྐྱེས་པར་གྱུར་ཏོ། །རྒྱུ་རྐྱེན་ལས་གྱུར་པ་ནི་རླུང་ལ་སོགས་པའི་ནད་རྣམས་སོ། །མིང་དུ་འདོགས་པ་ནི་སེམས་མྱོས་པ་དང་། གློ་ན་བ་དང་། དབུགས་མི་བདེ་བ་དང་། སྐྱུག་བྲོ་བ་དང་། སྙིང་སྟོར་ལྡང་བ་དང་། ཚད་པར་འཁྲུ་བའོ། །རྣམ་པ་ཐ་དད་པ་ནི་ཀླད་པ་ན་བ་དང་། མིག་ན་བ་དང་། རྐང་ལག་ལ་སོགས་པ་ན་བ་སྟེ། དེ་དག་ནི་ན་བ་ཞེས་བྱའོ། །ཤི་བ་ཞེས་བྱ་བ་གང་ཞེ་ན། བདག་གི་ལུས་བླངས་པ་དེ་དང་བྲལ་བའོ། །ལུས་བླངས་པ་དང་བྲལ་བ་ལ་ཡང་རྣམ་པ་གཉིས་ཏེ། ཚེ་ཟད་ནས་ཤི་བ་དང་། ཕྱི་རོལ་གྱི་རྐྱེན་གྱིས་ཤི་བའོ། །ཚེ་ཟད་དེ་ཤི་བ་ལ་ཡང་རྣམ་པ་གསུམ་སྟེ། ཚེ་ཟད་ལ་བསོད་ནམས་མ་ཟད་པ་དང་། བསོད་ནམས་ནི་ཟད་ལ་ཚེ་མ་ཟད་པ་དང་། བསོད་ནམས་དང་ཚེ་གཉིས་ཀ་ཟད་པའོ། །ཕྱི་རོལ་གྱི་རྐྱེན་གྱིས་ཤི་བ་ལ་ཡང་རྣམ་པ་གསུམ་སྟེ། མི་རིགས་པར་བདག་ལྕེབས་ཏེ་ཤི་བ་དང་། ཕ་རོལ་པོ་གཞན་གྱིས་བསད་པ་དང་། གཉིས་ཀ་དང་བཅས་ཏེ་ཤི་བའོ། །གཞན་ཡང་ཤི་བ་ལ་རྣམ་པ་གསུམ་ཡོད་དོ། །བག་མེད་པས་ཤི་བ་དང་། ཚུལ་ཁྲིམས་ཉམས་པས་ཤི་བ་དང་། ཚེའི་དབང་པོ་ཞིག་སྟེ་ཤི་བའོ། །དེ་ལ་བག་མེད་པས་ཤི་བ་གང་ཞེ་ན། ཐེག་པ་ཆེན་པོ་ཤིན་ཏུ་རྒྱས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྐུར་པ་ནི་བག་མེད་པས་ཤི་བ་ཞེས་བྱའོ། །
ཚུལ་ཁྲིམས་ཉམས་ཏེ་ཤི་བ་གང་ཞེ་ན། འདས་པ་དང་། མ་འོངས་པ་དང་། ད་ལྟར་བཞུགས་པའི་སངས་རྒྱས་རྣམས་ཀྱིས་བཅས་པའི་ཚུལ་ཁྲིམས་བཤིག་པ་ནི་ཚུལ་ཁྲིམས་ཉམས་ཏེ་ཤི་བ་ཞེས་བྱའོ། །ཚེའི་དབང་པོ་ཞིག་སྟེ་ཤི་བ་གང་ཞེ་ན། ཕུང་པོ་ལྔའི་ལུས་དང་བྲལ་བ་ནི་ཚེའི་དབང་པོ་ཞིག་ནས་ཤི་བ་ཞེས་བྱ་སྟེ། དེ་དག་ནི་ཤི་བའི་སྡུག་བསྔལ་ཆེན་པོ་ཞེས་བྱའོ། །འདོད་པ་དང་། བྱེ་བྲལ་བའི་སྡུག་བསྔལ་གང་ཞེ་ན། གང་ཡིད་དུ་འོང་ཞིང་འདོད་པའི་དབང་པོ་ཞིག་གམ་བྲལ་ལམ་གྱེས་པར་གྱུར་པའོ། །ཡིད་དུ་འོང་ཞིང་འདོད་པའི་དངོས་པོ་དང་བྱེ་བྲལ་བ་ལ་ཡང་རྣམ་པ་གཉིས་ཏེ། མིའི་ནང་ན་ཕུང་པོ་ལྔ་ཞིག་པ་དང་། ལྷའི་ནང་ན་ཕུང་པོ་ལྔ་དང་བྲལ་བའོ། །དེ་ལྟར་ལྷ་དང་མི་ལ་འདོད་པའི་ཕུང་པོ་ལྔ་ནི་རྣམ་པར་ཕྱེ་ན་ཚད་མེད་དེ། མདོར་ན་དེ་དག་ནི་འདོད་པ་དང་བྱེ་བྲལ་བའི་སྡུག་བསྔལ་བ་ཞེས་བྱའོ། །དགྲ་སྡང་བ་དང་ཕྲད་པའི་སྡུག་བསྔལ་གང་ཞེ་ན། གང་ཡིད་དུ་མི་འོང་ཞིང་མི་འདོད་པ་དང་འདུས་ཤིང་ཕྲད་པའོ། །ཡིད་དུ་མི་འོང་ཞིང་མི་འདོད་པ་དང་ཕྲད་པ་ལ་ཡང་རྣམ་པ་གསུམ་སྟེ། སེམས་ཅན་དམྱལ་བ་དང་། ཡི་དགས་དང་། བྱོལ་སོང་གི་སྐྱེ་གནས་སོ། །དེ་ལྟར་ངན་སོང་གསུམ་པོ་ཡང་རྣམ་པར་དབྱེ་ན་ཚད་མེད་མོད་ཀྱི། མདོར་ན་དེ་དག་ནི་དགྲ་སྡང་བ་དང་ཕྲད་པའི་སྡུག་བསྔལ་བ་ཞེས་བྱའོ། །འདོད་པ་མི་རྙེད་པའི་སྡུག་བསྔལ་གང་ཞེ་ན། འདོད་པ་མི་རྙེད་པའི་སྡུག་བསྔལ་ལ་ཡང་རྣམ་པ་གཉིས་ཏེ། རེ་བའི་གནས་ནས་འདོད་པ་མི་རྙེད་པ་དང་། ལས་མང་དུ་བྱས་ནས་འབྲས་བུ་དོན་དུ་མ་གྲུབ་པ་ནི་འདོད་པ་མི་རྙེད་པའི་སྡུག་བསྔལ་ཞེས་བྱའོ། །ཕུང་པོ་ལྔའི་སྡུག་བསྔལ་གང་ཞེ་ན། ཕུང་པོ་ལྔའི་སྡུག་བསྔལ་ནི། སྐྱེ་བའི་སྡུག་བསྔལ་དང་། རྒ་བའི་སྡུག་བསྔལ་དང་། ན་བའི་སྡུག་བསྔལ་དང་། ཤི་བའི་སྡུག་བསྔལ་དང་། འདོད་པ་དང་བྱེ་བྲལ་བའི་སྡུག་བསྔལ་དང་། དགྲ་སྡང་བ་དང་ཕྲད་པའི་སྡུག་བསྔལ་ནི་ཕུང་པོ་ལྔའི་སྡུག་བསྔལ་ཞེས་བྱའོ། །འོད་སྲུང་སྐྱེ་བའི་དངོས་པོ་ལ་དེ་ལྟར་རྒ་བའི་སྡུག་བསྔལ་ནས་ཕུང་པོ་ལྔའི་སྡུག་བསྔལ་གྱི་བར་དུ་སྡུག་བསྔལ་རྣམ་པ་བདུན་ཡོད་དོ། །འོད་སྲུང་རྒུད་པ་
དང་། ན་བ་ནི་ཐམས་ཅད་ལ་ཡོད་པ་མ་ཡིན་ཏེ། སངས་རྒྱས་དང་ལྷ་རྣམས་ལ་ནི་ངེས་པར་མེད་དོ། །མི་ལ་གཅིག་ཏུ་མ་ཆད་དེ་ལ་ལ་ལ་ཡོད། ལ་ལ་ལ་མེད་དོ། །འོད་སྲུང་ཁམས་གསུམ་གྱི་ལུས་སུ་གྱུར་པ་ནི་མི་སྐྱེ་བ་མེད་དེ། རྒ་བ་ནི་གཅིག་པུ་མ་ཆད་དོ། །དེ་བས་ན་ཐམས་ཅད་ཀྱང་སྐྱེ་བ་ནི་རྩ་བར་འགྱུར་རོ། །འོད་སྲུང་འཇིག་རྟེན་གྱི་སེམས་ཅན་དག་ནི་ཕྱིན་ཅི་ལོག་གིས་བསྒྲིབས་པས་ན། སྐྱེ་བ་ལ་ནི་འདོད་ཅིང་ཆགས་ཀྱི། རྒ་བ་དང་འཆི་བ་མི་འདོད་དོ། །འོད་སྲུང་བྱང་ཆུབ་སེམས་དཔའ་ནི་དེ་ལྟ་མ་ཡིན་ཏེ། ཐོག་མ་སྐྱེ་བ་ནས་སྐྱོན་དུ་རྟོགས་སོ། །འོད་སྲུང་དཔེར་ན་མི་ཞིག་གི་ཁྱིམ་དུ་བུད་མེད་བཟང་མོ་བལྟ་ན་སྡུག་པ་ཤིན་ཏུ་མཛེས་པ་ཚུལ་དུ་ཤིས་པ་རྒྱན་བཟང་པོས་ཡོངས་སུ་བརྒྱན་པ་ཞིག་འོངས་ནས། ཁྱིམ་བདག་གིས་དེ་ལ་འདི་སྐད་ཅེས་འདྲིའོ། །བུད་མེད་ཁྱོད་མིང་ཅི་སུ་དབང་ཞེས་དྲིས་ན། བུད་མེད་དེས་ཁོ་མོ་ནི་ལྷ་ཆེན་པོ་བཀྲ་ཤིས་མ་ཡིན་ནོ་ཞེས་སྨྲའོ། །ཁྱིམ་བདག་གིས་ཡང་དྲིས་པ་ཁྱོད་མིའི་ཁྱིམ་དུ་འོངས་ན་ཅི་དང་ཅི་ནུས། བུད་མེད་དེས་སྨྲས་པ། ཁོ་མོ་ནི་གར་འོངས་པར་ཁྱིམ་བདག་དེ་ལ་གསེར་དང་། དངུལ་དང་། བཻ་དཱུརྱ་དང་། ཤེལ་དང་། མུ་ཏིག་དང་། བྱི་རུ་དང་། སྦུར་ལོང་དང་། ཨས་མ་གར་བྷ་དང་། མུ་ས་གལ་བྷ་ལ་སོགས་པའི་རིན་པོ་ཆེ་རྣམ་པ་མང་པོ་དང་། བལ་གླང་དང་། རྟ་དང་། ཤིང་རྟ་དང་། བྲན་ཕོ་དང་། བྲན་མོ་ལས་བྱེད་པའི་མི་བདོག་པར་འོང་ངོ་། །ཁྱིམ་བདག་གིས་དེ་སྐད་ཀྱི་ཚིག་ཐོས་ནས་ཤིན་ཏུ་དགའ་མགུ་རངས་ཏེ། བདག་ཅག་གི་བསོད་ནམས་སྨིན་པས་ལྷ་མོ་ཁྱོད་བདག་གི་ཁྱིམ་དུ་འོངས་ཞེས་སྨྲས་ནས། སྤོས་དང་། མེ་ཏོག་གིས་མཆོད་དེ། བསྟི་སྟང་དང་བཅས་པས་ཕྱག་བྱེད་དོ། །དེའི་སྒོ་ན་ཡང་བུད་མེད་ཤིན་ཏུ་མི་སྡུག་པ་གོས་ཧྲུལ་པོ་དྲི་མ་ཅན་གྱོན་པ། པགས་པ་རྩུབ་པ་མདོག་ངན་པ་གཅིག་ཀྱང་འོངས་ནས་ཁྱིམ་བདག་གིས་བུད་མེད་དེ་ལ་ཁྱོད་ཀྱི་མིང་ཅི་སུ་དབང་ཞེས་དྲིས་སོ། །བུད་མེད་དེས་སྨྲས་པ། ཁོ་མོའི་མིང་ནི་རྣ་ནག་མོ་ཞེས་བྱའོ། །དེས་སྨྲས་པ་ཁྱོད་ཀྱི་མིང་ཅིའི་ཕྱིར་རྣ་ནག་མོ་ཞེས་བྱ། བུད་མེད་དེས་སྨྲས་པ། ཁོ་མོ་གང་དུ་འོངས་
པ་དེའི་ཁྱིམ་ན་ནོར་རིན་པོ་ཆེ་དང་། ལོངས་སྤྱོད་ཐམས་ཅད་མེད་པར་འགྱུར་བས་ན་རྣ་ནག་མོ་ཞེས་བྱའོ། །ཁྱིམ་བདག་གིས་དེ་སྐད་ཐོས་ནས་མཚོན་རྣོན་པོ་ཐོགས་ཏེ་བུད་མེད་དེ་ལ་འདི་སྐད་ཅེས་སྨྲས་སོ། །ཁྱོད་མྱུར་དུ་སོང་ཤིག །མི་འགྲོ་ན་ཁྱོད་བསད་དོ་ཞེས་བྱས་སོ། །བུད་མེད་དེས་སྨྲས་པ། ཁྱོད་ནི་ཤིན་ཏུ་གླེན་པ་ཤེས་པ་མེད་པ་ཡིན་ནོ། །ཁྱིམ་བདག་གིས་སྨྲས་པ། བདག་ཅིའི་ཕྱིར་གླེན་པ་ཤེས་པ་མེད་པ་ཡིན། བུད་མེད་དེས་སྨྲས་པ། ད་ལྟར་ཁྱོད་ཀྱི་ཁྱིམ་ན་འདུག་པ་དེ་ཁོ་མོའི་ནུ་མོ་ཡིན་ཏེ། གར་འགྲོ་ཡང་འགྲོགས་དགོས་ན། གལ་ཏེ་ཁོ་མོ་སྐྲོད་ན་ནང་ན་འདུག་པ་ཡང་སྐྲོད་ཅིག །མི་དེ་ཕྱིར་ཁྱིམ་དུ་སོང་ནས་ལྷ་བཀྲ་ཤིས་མ་ལ་འདི་སྐད་དུ་སྒོ་ན་བུད་མེད་ཅིག་ལྷའི་ནུ་མོ་ཞེས་ཟེར་ན་ཡིན་ནམ། བཀྲ་ཤིས་མས་སྨྲས་པ། དེ་ནི་ཁོ་མོའི་ནུ་མོ་ཡིན་ཏེ། གར་སོང་ཡང་ལྷན་ཅིག་འགྲོགས་ཏེ་འབྲལ་མ་མྱོང་ངོ་། །གར་སོང་ཡང་བདག་ནི་ལེགས་པར་དགའ་སྟེ་ལེགས་པར་བྱེད། ཕན་པར་བྱེད་ཀྱི། ནུ་མོ་ནི་རྟག་ཏུ་ཉེས་པར་དགའ་ཞིང་ཉེས་པར་བྱེད། གནོད་པར་བྱེད་དོ། །ཅི་སྟེ་བདག་འདོད་ན། དེ་ཡང་འདོད་པར་བྱ་དགོས་སོ། །བདག་ལ་བསྟི་སྟང་བྱེད་ན། དེ་ལ་ཡང་བསྟི་སྟང་བྱ་དགོས་སོ། །ཁྱིམ་བདག་དེས་དེ་སྐད་སྨྲས་པ་ཐོས་ནས། འདི་སྐད་ཅེས་སྨྲས་སོ། །དེ་ལྟར་ལེགས་པ་དང་ཉེས་པ་གཉིས་ཡོད་ན། གཉིས་ཀ་ཁོ་བོ་ལ་མི་དགོས་ཀྱིས་གར་དགའ་བར་དེང་ཤིག་ཅེས་བསྒོའོ། །དེ་ནས་བུད་མེད་དེ་གཉིས་ཀྱང་ཕྱིར་གནས་སུ་སོང་ནས། དེའི་ཚེ་ཁྱིམ་བདག་དེ་རབ་ཏུ་དགའ་མགུ་རངས་པར་གྱུར་ཏོ། །དེ་ནས་བུད་མེད་དེ་གཉིས་ཡང་འགྲོགས་ཏེ། དབུལ་པོ་ཞིག་གི་ཁྱིམ་དུ་སོང་ནས་དབུལ་པོ་དེ་རབ་ཏུ་དགའ་སྟེ། དེ་གཉིས་ཀ་ལ་འདི་སྐད་ཅེས་སྨྲས་སོ། །ད་ཕྱིན་ཆད་ཁྱོད་གཉིས་རྟག་ཏུ་བདག་གི་ཁྱིམ་ན་འདུག་ཤིག །བཀྲ་ཤིས་མས་སྨྲས་པ། བདག་ཅག་གཉིས་སྔར་ཡང་གཞན་གྱིས་བསྐྲད་པ་ཡིན་ན། ད་ཅིའི་ཕྱིར་ཁྱོད་ཀྱིས་བདག་ཅག་གཉིས་ཀ་འདུག་ཅེས་སྨྲས། དབུལ་པོས་སྨྲས་པ། ཁྱོད་ཀྱིས་བདག་ལ་དགོངས་ཤིག་དང་། བདག་ནི་ཁྱོད་ཀྱི་ཕྱིར་འདི་ལ་ཡང་རིམ་གྲོ་བྱེད་ན། དེ་བས་ན་གཉིས་ཀ་འདུག་པར་གསོལ་བ་
བྱེད་པ་ཡིན་ནོ། །འོད་སྲུང་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ་ལྷར་སྐྱེ་བར་མི་འདོད་དོ། །སྐྱེས་པས་ན་རྒ་བ་དང་། ན་བ་དང་། འཆི་བ་ཡོད་དེ། དེ་བས་ན་གཉི་ག་སྤོང་སྟེ་མི་འདོད་དོ། །བྱིས་པ་མ་རབས་ནི་རྒ་བ་དང་། ན་བ་དང་། འཆི་བ་ལ་སོགས་པའི་སྐྱོན་མང་པོ་མི་ཤེས་པས། སྐྱེ་བ་དང་འཆི་བའི་སྐྱོན་གཉིས་ལ་ཆགས་སོ། ། རིགས་ཀྱི་བུ་གཞན་ཡང་འདི་ལྟ་སྟེ། བྲམ་ཟེའི་བུ་ཆུང་ངུ་ཤེད་མ་བྱེ་བ་བཀྲེས་པས་ཉེན་ན་ངན་སྐྱུགས་ཀྱི་ནང་ན་ཨ་མྲའི་འབྲས་བུ་ཡོད་པ་ལེན་ཏོ། །དེ་ལ་མཁས་ཤིང་ཤེས་པ་དག་གིས་མཐོང་ནས་འདི་སྐད་དུ་གཤེ་སྟེ། ཁྱོད་ནི་བྲམ་ཟེའི་རིགས་ཤིན་ཏུ་གཙང་བ་ཡིན་ན། ཅིའི་ཕྱིར་ན་ངན་སྐྱུགས་ཀྱི་ནང་ན་ཨ་མྲའི་འབྲས་བུ་ལེན་ཅེས་སྨྲས་སོ། །བྲམ་ཟེའི་ཁྱེའུ་དེ་ནི་ངོ་ཚ་ནས་དེ་ལ་འདི་སྐད་ཅེས་སྨྲས་སོ། །བདག་གིས་ཡང་དག་པར་ན་ཟ་བར་ནི་མ་བྱས་ཀྱི། བཀྲུས་ཏེ་དོར་སྙམ་མོ། །མཁས་པ་དེས་སྨྲས་པ། ཁྱོད་ནི་ཤིན་ཏུ་ཡང་གླེན་ཏེ་ཕྱིར་དོར་བར་བསམས་ན་བླང་བའི་མི་རིགས་སོ་ཞེས་སྨྲས་སོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། སྐྱེ་བའི་ཕྱོགས་མི་ལེན་མི་སྤོང་སྟེ། ཅི་ལྟར་མཁས་པ་ཁྱེའུ་དེ་ལ་སྤྱོས་པ་བཞིན་ནོ། །བུས་པ་མ་རབས་ནི་སྐྱེ་བ་ནི་འདོད་ཀྱི། འཆི་བ་མི་འདོད་དེ་ཁྱེའུ་དེས་ཤིང་ཏོག་བླངས་ནས་དོར་བ་དང་འདྲའོ། །འོད་སྲུང་གཞན་ཡང་འདི་ལྟ་སྟེ་དཔེར་ན་ལམ་གྱི་བཞི་མདོར་མི་ཞིག་སྣོད་བཟང་པོའི་ནང་དུ་ཁ་ཟས་བྲོ་དང་། བསུང་དང་། ཁ་དོག་དང་ལྡན་པ་འཚོང་བ་ལ། ལམ་རིང་པོ་ནས་འོངས་པའི་མི་བཀྲེས་པ་ཉམ་ཆུང་ལ་ངལ་བ་ཞིག །ཁ་ཟས་དེ་བྲོ་བསུང་དང་། ཁ་དོག་ཏུ་ལྡན་པ་དེ་མཐོང་ནས་དྲུང་དུ་བསྙེན་ཏེ་འདི་ཅི་ཡིན་ཞེས་འདྲིའོ། །ཟས་ཀྱི་བདག་པོ་དེས་སྨྲས་པ། འདི་ནི་ཁ་ཟས་ཀྱི་མཆོག་བྲོ་བསུང་དང་ཁ་དོག་ཏུ་ལྡན་པ་ཡིན་ཏེ། གང་གིས་འདི་ཟོས་ན་མདོག་དང་སྟོབས་ཀྱང་སྐྱེ་ཞིང་བཀྲེས་པ་དང་སྐོམ་པ་ཡང་སེལ་ལ། ལྷ་རྣམས་ཀྱང་མཐོང་བར་འགྱུར་ཏེ། སྐྱོན་སྣ་གཅིག་ཅིག་ཡོད་དེ། དེ་ནི་འཆི་བར་འགྱུར་བའོ། །མི་དེས་དེ་སྐད་ཅེས་ཐོས་ནས་འདི་སྙམ་དུ་བདག་མདོག་དང་སྟོབས་ཀྱང་དགོས། ལྷ་མཐོང་བ་དང་ཤི་བ་
ཡང་མི་འདོད་དོ། །སྙམ་ནས་འདི་སྐད་ཅེས་སྨྲས་སོ། །ཟས་འདི་ཟོས་པས་འཆི་བར་འགྱུར་ན་འདི་བཙོངས་ཏེ་ཅི་ཞིག་བྱ། ཟས་བདག་གིས་སྨྲས་པ། མཁས་པ་ཤེས་རབ་ཅན་སུ་ཡང་མི་ཉོའི། གླེན་པ་ཤེས་པ་མེད་པ་དག་ནི་ང་ལ་རིན་ཡང་མང་དུ་བྱིན་ནས་ཉོས་ཏེ་ཟའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། ལྷར་སྐྱེ་བ་ཡང་མི་འདོད་ལ་མདོག་དང་། སྟོབས་དང་ལྷ་མཐོང་བར་ཡང་མི་འདོད་དོ། །དེ་ཅིའི་ཕྱིར་ཞེ་ན། སྡུག་བསྔལ་མང་པོ་ལས་མི་ཐར་བའི་ཕྱིར་རོ། །བུས་པ་མ་རབས་ནི་རྒ་བ་དང་། ན་བ་དང་། འཆི་བའི་སྐྱོན་མ་མཐོང་ནས། སྐྱེ་བའི་གནས་ཀུན་ལ་ཆགས་སོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་དུག་གི་སྡོང་པོ་ནི་རྩ་བས་ཀྱང་འཆི་བར་བྱེད། སྡོང་པོས་ཀྱང་འཆི་བར་བྱེད། ཤུན་པ་དང་ལོ་མ་དང་མེ་ཏོག་དང་། འབྲས་བུས་ཀྱང་འཆི་བར་བྱེད་དོ། །རིགས་ཀྱི་བུ་སྲིད་པ་ཉི་ཤུ་རྩ་ལྔ་པོར་སྐྱེ་བའི་གནས་སུ་ཕུང་པོ་ལྔ་བླངས་པ་ཡང་དེ་དང་འདྲ་སྟེ། ཐམས་ཅད་འཆི་བར་བྱེད་དོ། །འོད་སྲུང་གཞན་ཡང་འདི་ལྟ་སྟེ། དཔེར་ན་ངན་སྐྱུགས་ནི་མང་ཉུང་འདྲ་སྟེ་མནམ་མོ། །རིགས་ཀྱི་བུ་སྐྱེ་བ་ཡང་དེ་དང་འདྲ་སྟེ། གལ་ཏེ་ཚེ་ལོ་བརྒྱད་ཁྲི་ཐུབ་བམ། ལོ་བཅུ་ཐུབ་པ་འདྲ་སྟེ། ཐམས་ཅད་སྡུག་བསྔལ་དུ་འདྲའོ། །རིགས་ཀྱི་བུ་གཞན་ཡང་འདི་ལྟ་སྟེ། དཔེར་ན་གཡང་ས་ཤིན་ཏུ་ཉམ་ང་བ་རྩྭས་ཡོག་པའི་དྲུང་ན་བདུད་རྩི་མང་དུ་ཡོད་དེ། གལ་ཏེ་ཟོས་ན་ལྷའི་ལོ་སྟོང་ཐུབ་ལ། ནད་རྣམས་ཀྱང་རབ་ཏུ་བྱང་ཞིང་བདེ་བར་འགྱུར་རོ། །བྱིས་པ་མ་རབས་ནི་རོ་ལ་ཆགས་པའི་ཕྱིར་རྐང་པའི་འོག་ན་གཡང་ས་ཉམ་ང་བ་ཆེན་པོ་ཡོད་པར་མི་ཤེས་ཏེ། བླངས་པར་ཆས་པ་ལས་རྐང་པ་འགྲེད་དེ། གཡང་སར་ལྷུང་ནས་ཤིའོ། །མཁས་པ་ཤེས་རབ་ཅན་ནི་ཤེས་པས་ན་དེར་མི་འགྲོའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། ལྷ་རྫས་ཀྱི་ཟས་བཟང་པོ་ཡང་མི་འདོད་ན་མི་དག་གི་ཟས་ལྟ་སྨོས་ཀྱང་ཅི་དགོས། བྱིས་པ་མ་རབས་ནི་སེམས་ཅན་དམྱལ་བར་ལྕགས་ཀྱི་ཐུ་ལུམ་ཟ་བར་ཡང་བཟོད་པར་བྱེད་ན། ལྷ་དང་མིའི་ཟས་བཟང་པོ་
ལྟ་སྨོས་ཀྱང་ཅི་དགོས། འོད་སྲུང་དཔེར་བསྟན་པ་འདི་དག་དང་། གཞན་ཡང་དཔེ་ཚད་མེད་གྲངས་མེད་པའི་སྒོ་ནས་སྐྱེ་བ་འདི་ནི་སྡུག་བསྔལ་ཆེན་པོ་ཡིན་པར་རིག་པར་བྱའོ། །འོད་སྲུང་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཐེག་པ་ཆེན་པོ་ཡོངས་སུ་མྱ་ངན་འདས་པའི་མདོ་ལས་སྐྱེ་བའི་སྡུག་བསྔལ་རྟོགས་པ་ཞེས་བྱའོ། །འོད་སྲུང་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་ལས་རྒ་བའི་སྡུག་བསྔལ་རྟོགས་པ་ཞེ་ན། རྒས་ཞེས་བྱ་བ་ནི་སྐྱུག་བྲོ་བ་ལུ་བ། དཔའ་བ་དང་ཉམ་རྩལ་འཕྲོག་པ། དྲན་པ་དང་། བརྩོན་པ་དང་། འཛིན་པ་དང་། གཞོན་དར་བ་དང་། རབ་ཏུ་བདེ་བ་དང་། ང་རྒྱལ་དང་། རྒྱགས་འཆོས་པ། བདེ་བ་ལ་ཡིད་བཞིན་དུ་སྤྱོད་པ་ཀུན་མ་རུང་བར་བྱེད་དེ། དེ་ལས་བཟློག་ནས་ལེ་ལོ་དང་། སྙོམ་ལས་ཆེ་བ་དང་། གཞན་གྱིས་བརྙས་པར་འགྱུར་བར་བྱེད་དོ། །འོད་སྲུང་འདི་ལྟ་སྟེ་དཔེར་ན་རྫིང་བུའི་ནང་ན་པད་མོས་ཡོངས་སུ་གང་སྟེ་འདབ་མ་རྒྱས་ན། ཁ་དོག་འཚེར་བས་ཐམས་ཅད་ཀྱི་ཡིད་དུ་འོང་སྟེ་འདོད་དོ། །གལ་ཏེ་སེར་བ་བབ་ན་ཐམས་ཅད་བཅོམ་སྟེ་མ་རུང་བར་བྱེད་དོ། །རིགས་ཀྱི་བུ་རྒ་བ་ཡང་དེ་དང་འདྲ་སྟེ། གཞོན་དར་བའི་མདོག་བཟང་པོ་མ་རུང་བར་བྱེད་དོ། །འོད་སྲུང་གཞན་ཡང་འདི་ལྟ་སྟེ་དཔེར་ན། རྒྱལ་པོ་ཞིག་ལ་བློན་པོ་མཛངས་པ་བློ་དང་ལྡན་པ་དགྲ་ཆོས་ལ་མཁས་པ་ཞིག་ཡོད་དེ། རྒྱལ་ཕྲན་གཞན་ཞིག་དེ་ལ་སྡོ་སྟེ་མི་ཉན་ན། རྒྱལ་པོ་དེས་བློན་པོ་དེ་ལ་ཕ་རོལ་གྱི་རྒྱལ་ཕྲན་དེ་ཟུང་ཤིག་ཅེས་བསྒོ་ན་དེས་ཁྲིད་དེ་འོང་ངོ་། །རྒས་པ་ཡང་དེ་དང་འདྲ་སྟེ། གཞོན་དར་བ་བཟུང་ནས་འཆི་བདག་གི་རྒྱལ་པོ་ལ་འབུལ་ལོ། །འོད་སྲུང་གཞན་ཡང་འདི་ལྟ་སྟེ་དཔེར་ན། ཤིང་རྟའི་སྲོག་ཤིང་ཆག་ན་སྤྱད་དུ་མི་རུང་ངོ་། །རྒས་པ་ཡང་དེ་དང་འདྲ་སྟེ་ཅིར་ཡང་མི་རུང་ངོ་། །འོད་སྲུང་གཞན་ཡང་འདི་ལྟ་སྟེ་དཔེར་ན། ཁྱིམ་བདག་ཕྱུག་པོ་ཞིག་ལ་གསེར་དང་། དངུལ་དང་། བཻ་དཱུརྱ་དང་། བྱི་རུ་དང་། ཨ་སྨ་གར་བྷ་དང་། མུ་ས་ལ་གལ་བྷ་མང་དུ་ཡོད་པའི་ཁྱིམ་དུ་རྐུན་པོའམ། མི་རྒོད་མང་པོ་འོངས་ན་ཐམས་
ཅད་ཕྲོགས་ཏེ་ཁྱིམ་སྟོངས་པར་བྱེད་དོ། །རིགས་ཀྱི་བུ་གཞོན་དར་བའི་མདོག་བཟང་པོ་ཡང་དེ་དང་འདྲ་སྟེ། རྟག་ཏུ་རྒ་བའི་དགྲས་རྐུ་ཞིང་འཕྲོག་གོ །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན། མི་དབུལ་པོ་ཞིག་ཟས་བཟང་པོ་དང་གོས་འཇམ་པོ་ལ་ཆགས་ཏེ། རྟག་ཏུ་རེ་ཡང་རྙེད་པར་མི་འགྱུར་རོ། །རིགས་ཀྱི་བུ་རྒས་པ་ཡང་དེ་དང་འདྲ་སྟེ། འདོད་པ་ལྔའི་བདེ་སྐྱིད་ལ་ཡིད་བཞིན་དུ་ལོངས་སྤྱོད་པར་འདོད་མོད་ཀྱི་མི་ནུས་སོ། །འོད་སྲུང་གཞན་ཡང་འདི་ལྟ་སྟེ་དཔེར་ན། སྐམས་ལ་འདུག་པའི་རུས་སྦལ་ནི། སེམས་ལ་རྟག་ཏུ་ཆུ་དྲན་ནོ། །རིགས་ཀྱི་བུ་མི་ཡང་དེ་དང་འདྲ་སྟེ། རྒས་འཁོགས་པས་ཡོངས་སུ་བསྐམས་ནས། སེམས་ལ་རྟག་ཏུ་གཞོན་དར་བའི་འདོད་པ་ལྔའི་བདེ་བ་དྲན་ནོ། །རིགས་ཀྱི་བུ་གཞན་ཡང་འདི་ལྟ་སྟེ། དཔེར་ན། སྟོན་གྱི་དུས་སུ་མེ་ཏོག་པད་མོ་ཁ་བྱེ་བ་ལ་ནི། ཐམས་ཅད་འདོད་དེ་ཡིད་དུ་འོང་ངོ་། །རྙིངས་ཏེ་སེར་པོར་སོང་ནས་ཐམས་ཅད་ཀྱིས་མི་འདོད་དོ། །རིགས་ཀྱི་བུ་གཞོན་དར་བའི་མདོག་བཟང་པོ་ཡང་དེ་དང་འདྲ་སྟེ། ཐམས་ཅད་ཀྱིས་འདོད་ཅིང་དགའ་བ་ལས་རྒས་པར་གྱུར་ན། ཐམས་ཅད་ཀྱི་ཡིད་དུ་མི་འོང་སྟེ་མི་འདོད་དོ། །འོད་སྲུང་གཞན་ཡང་འདི་ལྟ་སྟེ། དཔེར་ན། བུ་རམ་ཤིང་བཙིར་ཟིན་པའི་ཚིགས་མ་ནི་རོ་མེད་པ་ཡིན་ནོ། །རིགས་ཀྱི་བུ་གཞོན་དར་བའི་མདོག་ཀྱང་དེ་དང་འདྲ་སྟེ། རྒས་རྒུད་པས་ཁེབས་པས་ན། རབ་ཏུ་འབྱུང་བའི་རོ་དང་། ཀློག་ཅིང་འདོན་པའི་རོ་དང་། བསམ་གཏན་གྱི་རོ་དང་། རོ་གསུམ་པོ་མེད་པར་འགྱུར་རོ། །འོད་སྲུང་གཞན་ཡང་འདི་ལྟ་སྟེ་དཔེར་ན། ཟླ་བ་རྒྱས་པ་ནི་མཚན་མོ་ཤིན་ཏུ་སྣང་ཞིང་གསལ་གྱི་ཉིན་པར་ནི་མ་ཡིན་ནོ། །རིགས་ཀྱི་བུ་མི་ཡང་དེ་དང་འདྲ་སྟེ། གཞོན་པའི་ཚེ་ནི་བཟང་ཞིང་མཛེས་སོ། །རྒས་ནས་ནི་སྐམས་ཤིང་རིད་དོ། །འོད་སྲུང་གཞན་ཡང་འདི་ལྟ་སྟེ། དཔེར་ན་རྒྱལ་པོ་ཡང་དག་པའི་ཆོས་ཀྱིས་སྲིད་འཚོ་ཞིང་གཡོ་སྒྱུ་མེད་ལ་སྙིང་རྗེ་དང་ལྡན་པ་ཡོངས་སུ་གཏོང་བ་དང་ལྡན་པ་ཞིག་ཡུལ་གཞན་གྱི་དམག་གིས་བཏབ་ནས་འཁྱམས་ཏེ། ཡུལ་གཞན་དུ་
ཕྱིན་པར་གྱུར་ན་ཐམས་ཅད་ཀྱིས་དེ་ལ་སྙིང་བརྩེ་སྟེ། འདི་སྐད་ཅེས་ཟེར་རོ། །རྒྱལ་པོ་ཆེན་པོ་སྔོན་ཡང་དག་པའི་ཆོས་ཀྱི་སྲིད་འཚོ་སྟེ་མི་དགའ་བ་གཅིག་ཀྱང་མེད་ན། ད་ཅིའི་ཕྱིར་འཁྱམས་པར་གྱུར་ཅེས་ཟེར་རོ། །རིགས་ཀྱི་བུ་མི་ཡང་དེ་དང་འདྲ་སྟེ། རྒས་འཁོགས་པས་ཉམས་པར་གྱུར་ནས་གཞོན་དར་བའི་ལས་ཅི་བྱས་པ་ལ་སྨོན་ཏོ། །འོད་སྲུང་གཞན་ཡང་འདི་ལྟ་སྟེ་དཔེར་ན། མེ་མར་གྱི་སྙིང་པོ་ནི་མར་ལ་རག་ལུས་ཏེ། མར་ཟད་ན་རིང་པོ་མི་ཐོགས་སོ། །རིགས་ཀྱི་བུ་མི་ཡང་དེ་དང་འདྲ་སྟེ། གཞོན་དར་བ་ལ་རག་ལུས་སོ། །གཞོན་དར་བ་ཟད་ན་རྒས་ཤིང་འཁོགས་པའི་སྙིང་པོ་ནི་རིང་པོ་མི་ཐོགས་སོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན། ཆུ་སྐམས་པའི་གྲམ་པ་ནི་མི་དང་མི་མ་ཡིན་པ་དང་། བྱ་དང་། གཅན་གཟན་ལ་སོགས་པ་ལ་ཕན་མི་ཐོགས་སོ། །རིགས་ཀྱི་བུ་མི་ཡང་དེ་དང་འདྲ་སྟེ། རྒས་པས་སྐམས་པར་གྱུར་ན། ལས་སུ་བྱ་བ་ཐམས་ཅད་ལ་ཕན་པར་མི་འགྱུར་རོ། །འོད་སྲུང་གཞན་ཡང་འདི་ལྟ་སྟེ་དཔེར་ན། ཆུས་བཟས་པའི་གད་ཀ་ན་ཤིང་སྐྱེས་པ་ནི། རླུང་དྲག་པོ་ལངས་མ་ཐག་ཏུ་གདོན་མི་ཟ་བར་འགྱེལ་ཏོ། །རིགས་ཀྱི་བུ་མི་ཡང་དེ་དང་འདྲ་སྟེ། རྒས་པའི་གད་ཀ་གཡང་ས་དང་ཉེ་བས་འཆི་བའི་རླུང་ལངས་ནས་རིང་པོར་མི་གནས་སོ། །འོད་སྲུང་གཞན་ཡང་འདི་ལྟ་སྟེ་དཔེར་ན། ཤིང་རྟའི་སྲོག་ཤིང་ཆག་ན་ཁལ་ལྕི་བ་བཀུར་མི་བཟོད་དོ། །རིགས་ཀྱི་བུ་རྒས་པ་ཡང་དེ་དང་འདྲ་སྟེ། དགེ་བའི་ཆོས་ཐམས་ཅད་འཛིན་མི་ནུས་སོ། །འོད་སྲུང་གཞན་ཡང་འདི་ལྟ་སྟེ་དཔེར་ན། བུས་པ་ཆུང་ངུ་ཤེད་མ་བྱེ་བ་ལ་ནི་ཐམས་ཅད་ཀྱིས་བརྙས་སོ། །རིགས་ཀྱི་བུ་རྒས་པ་ཡང་དེ་དང་འདྲ་སྟེ། ཐམས་ཅད་ཀྱིས་བརྙས་སོ། །འོད་སྲུང་དཔེ་འདི་དག་དང་། གཞན་ཡང་དཔེ་ཚད་མེད་དཔག་ཏུ་མེད་པའི་སྒོ་ནས་རྒས་པ་ནི་སྡུག་བསྔལ་ཆེན་པོ་ཡིན་པར་རིག་པར་བྱའོ། །འོད་སྲུང་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོས་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་སྤྱོད་པ་ན། རྒ་བའི་སྡུག་བསྔལ་རྟོགས་པ་ཞེས་བྱའོ། །
འོད་སྲུང་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་སྤྱོད་པ་ན་ན་བའི་སྡུག་བསྔལ་རྟོགས་པ་ཞེ་ན། ན་བ་ཞེས་བྱ་བ་ནི་བདེ་བའི་དངོས་པོ་ཐམས་ཅད་མེད་པར་བྱེད་པ་སྟེ། དཔེར་ན་སེར་བ་བབ་ན་ལོ་ཐོག་ཐམས་ཅད་བཅོམ་སྟེ་མ་རུང་བར་བྱེད་དོ། །འོད་སྲུང་གཞན་ཡང་འདི་ལྟ་སྟེ་དཔེར་ན། མི་ཞིག་ལ་ཤ་འཁོན་གྱི་དགྲ་ཡོད་ན་རྟག་ཏུ་མྱ་ངན་བྱེད་དེ་འཇིགས་སོ། །རིགས་ཀྱི་བུ་སེམས་ཅན་ཐམས་ཅད་ཀྱང་དེ་དང་འདྲ་སྟེ། རྟག་ཏུ་ན་བའི་སྡུག་བསྔལ་གྱིས་འཇིགས་ནས་མྱ་ངན་བྱེད་དོ། །འོད་སྲུང་གཞན་ཡང་འདི་ལྟ་སྟེ་དཔེར་ན། སྐྱེས་བུ་བྱད་བཞིན་བཟང་པོ་ཞིག་ཡོད་ན། རྒྱལ་པོའི་བཙུན་མོས་འདོད་པས་བཀུག་ནས་ལྷན་ཅིག་ཏུ་ཉལ་ལོ། །དེ་ནས་རྒྱལ་པོས་འཕྲིགས་ནས། དེ་བཟུང་སྟེ་མིག་ཡ་གཅིག་ཕྱུང་། རྣ་བ་ཡ་གཅིག་ཀྱང་བཅད། ལག་པ་ཡ་གཅིག་ཀྱང་བཅད་ན་དེའི་ཚེ་བྱད་བཞིན་སྔོན་ལས་ཉམས་ཏེ་སུས་ཀྱང་མི་འདོད་དོ། །རིགས་ཀྱི་བུ་མི་ཡང་དེ་དང་འདྲ་སྟེ། ལུས་ཀྱི་ཡན་ལག་དང་མིག་དང་། རྣ་བར་ལྡན་མོད་ཀྱི། ན་བའི་སྡུག་བསྔལ་གྱིས་གཟིར་བར་གྱུར་ན། ཐམས་ཅད་ཀྱིས་མི་འདོད་དོ། །འོད་སྲུང་གཞན་ཡང་འདི་ལྟ་སྟེ་དཔེར་ན། ཆུ་ཤིང་དང་། སྨྱིག་མ་དང་། འདམ་བུ་དང་། དྲེའུ་ནི་འབྲས་བུའམ། བུ་ཡོད་པར་གྱུར་ན་འཆིའོ། །རིགས་ཀྱི་བུ་མི་ཡང་དེ་དང་འདྲ་སྟེ་ནད་ཡོད་ན་འཆིའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན། འཁོར་ལོས་སྒྱུར་བའི་རྒྱལ་པོ་ནི་དམག་ལ་དབང་བའི་བློན་པོ་སྔར་སོང་བའི་ཕྱི་བཞིན་དུ་རྒྱལ་པོ་འགྲོའོ། །ཉའི་རྒྱལ་པོ་དང་། བུང་བའི་རྒྱལ་པོ་དང་། དུང་གི་རྒྱལ་པོ་དང་། ཁྱུ་མཆོག་གི་རྒྱལ་པོ་དང་། ཚོང་དཔོན་སྔར་སོང་ན་དེའི་ཕྱི་བཞིན་གཞན་དག་འགྲོ་སྟེ་མི་འབྲལ་ལོ། །རིགས་ཀྱི་བུ་འཆི་བའི་འཁོར་ལོས་སྒྱུར་བའི་རྒྱལ་པོ་ཡང་དེ་དང་འདྲ་སྟེ། རྟག་ཏུ་ན་བའི་བློན་པོའི་རྗེས་སུ་འགྲོ་སྟེ་མི་འབྲལ་ལོ། །ཉ་དང་བུང་བ་དང་། དུང་དང་། ཁྱུ་མཆོག་དང་། ཚོང་དཔོན་ལྟ་བུར་ན་བའི་རྒྱལ་པོའི་རྗེས་སུ་ཡང་འཆི་བའི་འཁོར་
རྟག་ཏུ་ཕྱི་བཞིན་དུ་འབྲང་སྟེ་རྟག་ཏུ་མི་འབྲལ་ལོ། །འོད་སྲུང་ན་བའི་རྒྱུ་དང་རྐྱེན་ནི་འདི་ལྟ་སྟེ། སྡུག་བསྔལ་བ་དང་། འཁྲུག་པ་དང་། སློས་པའི་མྱ་ངན་དང་། སྨྲེ་སྔགས་འདོན་པ་དང་། ལུས་དང་སེམས་མི་བདེ་བར་བྱེད་པ་སྟེ། དགྲ་མ་རུངས་པས་ཉེན་པ་ཞེས་ཀྱང་བྱ། རྐྱལ་པ་འདྲལ་བ་ཞེས་ཀྱང་བྱ། ཟམ་པ་འཇིག་པ་ཞེས་ཀྱང་བྱ། ཡང་དག་པའི་དྲན་པ་འཕྲོག་པ་ཞེས་ཀྱང་བྱ། གཞན་ཡང་གཞོན་དར་བའི་མདོག་བཟང་པོ་དང་། མཐུ་སྟོབས་དང་། བདེ་བ་མ་རུང་བར་བྱེད་པ་ཞེས་ཀྱང་བྱའོ། །ཁྲེལ་དང་ངོ་ཚ་མེད་པ་ལུས་དང་སེམས་འབར་ཞིང་ཚིག་པར་བྱེད་པ་སྟེ། དཔེ་འདི་དག་དང་དེ་མ་ཡིན་པ་གཞན་ཡང་དཔེ་ཚད་མེད་དཔག་ཏུ་མེད་པ་བསྟན་པའི་སྒོ་ནས་ན་བའི་སྡུག་བསྔལ་ནི་སྡུག་བསྔལ་ཆེན་པོ་ཡིན་པར་རིག་པར་བྱའོ། །འོད་སྲུང་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོས་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་སྤྱོད་པ་ན་ན་བའི་སྡུག་བསྔལ་རྟོགས་པ་ཞེས་བྱའོ། །འོད་སྲུང་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་སྤྱོད་པ་ན་འཆི་བའི་སྡུག་བསྔལ་རྟོགས་པ་ཡིན་ཞེ་ན། འདི་ལྟ་སྟེ། འཆི་བ་ཞེས་བྱ་བ་ནི་ཚིག་ཅིང་མེད་པར་བྱེད་པའོ། །འོད་སྲུང་འདི་ལྟ་སྟེ། མེའི་བསྐལ་པ་བྱུང་བ་ན་བསམ་གཏན་གཉིས་པ་མ་གཏོགས་པར་གཞན་ཐམས་ཅད་ཚིག་པར་བྱེད་པའོ། །རིགས་ཀྱི་བུ་འཆི་བའི་སེམས་ཀྱང་ཐམས་ཅད་མེད་པར་བྱེད་དེ། བྱང་ཆུབ་སེམས་དཔའ་སེམས་དཔའ་ཆེན་པོས་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་གནས་པའི་མཐུ་སྟོབས་དང་ལྡན་པ་ནི་མ་གཏོགས་སོ། །འོད་སྲུང་འདི་ལྟ་སྟེ། ཆུའི་བསྐལ་པས་བཀྲུ་བ་ན་ཐམས་ཅད་བཀྲུས་ཏེ་མེད་པར་བྱེད་ན་བསམ་གཏན་གསུམ་པ་ནི་མ་གཏོགས་སོ། །རིགས་ཀྱི་བུ་འཆི་བའི་ཆུ་ཡང་དེ་དང་འདྲ་སྟེ། ཐམས་ཅད་བཀྲུ་སྟེ་མེད་པར་བྱེད་ན་བྱང་ཆུབ་སེམས་དཔའ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་འདི་ལ་གནས་པ་ནི་མ་གཏོགས་སོ། །འོད་
སྲུང་འདི་ལྟ་སྟེ། རླུང་གི་བསྐལ་པ་བྱུང་བ་ན་ཐམས་ཅད་གཏོར་ཏེ་མེད་པར་བྱེད་ན་བསམ་གཏན་བཞི་པ་ནི་མ་གཏོགས་སོ། །རིགས་ཀྱི་བུ་འཆི་བའི་རླུང་ཡང་དེ་དང་འདྲ་སྟེ། ཐམས་ཅད་མེད་པར་བྱེད་མོད་ཀྱི་བྱང་ཆུབ་སེམས་དཔའ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་གནས་པ་ནི་མ་གཏོགས་སོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཅིའི་སླད་དུ་བསམ་གཏན་བཞི་པ་དེ་རླུང་གིས་ཀྱང་མི་ཤིགས། ཆུས་ཀྱང་མི་འཁྲུས། མེས་ཀྱང་མི་ཚིག་བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་བསམ་གཏན་བཞི་པ་ནི་ཕྱི་ནང་གི་སྐྱོན་ཐམས་ཅད་མེད་པའི་ཕྱིར་རོ། །རིགས་ཀྱི་བུ་བསམ་གཏན་དང་པོ་པ་ལ་ནང་ན་རྟོག་པའི་སྐྱོན་ཡོད་པས་ཕྱི་རོལ་གྱི་མེས་འཚིག་གོ །བསམ་གཏན་གཉིས་པ་ནི་ནང་ན་དགའ་བའི་སྐྱོན་ཡོད་པས་ཕྱི་རོལ་གྱི་ཆུས་བཀྲུས་སོ། །བསམ་གཏན་གསུམ་པ་ནི་ནང་ན་དབུགས་རྒྱུ་བས་རླུང་གི་བསྐལ་པས་འཇིག་པར་འགྱུར་རོ། །རིགས་ཀྱི་བུ་བསམ་གཏན་བཞི་པ་ནི་ཕྱི་ནང་གཉིས་ཀའི་སྐྱོན་ཐམས་ཅད་བྲལ་བས་བསྐལ་པས་མི་ཚུགས་པ་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་བདེ་བར་གནས་ན་ཕྱི་ནང་གི་སྐྱོན་ཐམས་ཅད་དང་བྲལ་བས་འཆི་བའི་རྒྱལ་པོས་ཀྱང་མི་ཚུགས་པ་ཡིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ། ནམ་མཁའ་ལྡིང་གི་རྒྱལ་པོ་ནི་ཀླུ་དང་། ཉ་དང་། གསེར་དངུལ་དང་། རིན་པོ་ཆེ་ལ་སོགས་པ་ཟོས་ཀྱང་ཞུ་བར་ནུས་ན། རྡོ་རྗེ་འབའ་ཞིག་ནི་ཞུ་བར་མི་ནུས་སོ། །རིགས་ཀྱི་བུ་འཆི་བའི་ནམ་མཁའ་ལྡིང་གི་རྒྱལ་པོ་ཡང་དེ་དང་འདྲ་སྟེ། སེམས་ཅན་ཐམས་ཅད་ཟོས་ཀྱང་ཞུ་བར་ནུས་ན། ཐེག་པ་ཆེན་པོ་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཞུ་བར་མི་ནུས་སོ། །འོད་སྲུང་གཞན་ཡང་འདི་ལྟ་སྟེ། ཆུ་འགྲམ་ན་ཤིང་དང་རྩྭ་སྐྱེས་པ་
ཐམས་ཅད་ཆུ་བྲུག་ན་ཐམས་ཅད་ཆུས་ཁྱེར་ཏེ། རྒྱ་མཚོར་ཕྱིན་གྱི་བར་དུ་འགྲོ་ཡང་ལྕང་མ་ནི་མ་གཏོགས་ཏེ་རྩ་བ་མཉེན་པའི་ཕྱིར་རོ། །རིགས་ཀྱི་བུ་སེམས་ཅན་ཐམས་ཅད་ཀྱང་དེ་དང་འདྲ་སྟེ། ཐམས་ཅད་འཁོར་བའི་རྒྱ་མཚོར་འབབ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་གནས་པ་ནི་མ་གཏོགས་སོ། །འོད་སྲུང་འདི་ལྟ་སྟེ། མཐུ་བོ་ཆེ་ནི་གྱད་ལ་སོགས་པ་ཐམས་ཅད་གདུལ་ནུས་ན། རླུང་ཆེན་པོ་འབའ་ཞིག་ནི་མ་ཡིན་ནོ། །དེ་ཅིའི་ཕྱིར་ཞེ་ན། གཉེན་པོ་མེད་པའི་ཕྱིར་རོ། །རིགས་ཀྱི་བུ་ཤི་བའི་མཐུ་བོ་ཆེ་ཡང་དེ་དང་འདྲ་སྟེ། སེམས་ཅན་ཐམས་ཅད་གདུལ་ནུས་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་གནས་པ་ནི་མ་གཏོགས་སོ། །དེ་ཅིའི་ཕྱིར་ཞེ་ན། གཉེན་པོ་མེད་པའི་ཕྱིར་རོ། །འོད་སྲུང་གཞན་ཡང་འདི་ལྟ་སྟེ། དགྲ་སྡང་བ་དག་འཁོན་ཡོད་ཀྱང་དེ་ལས་སྒྱུས་བསྙེན་ཏེ་ཉེ་བའམ་མཛའ་བ་ལྟར་འཆོས་ཤིང་ལུས་ཀྱི་གྲིབ་མ་ལྟར་འགྲོགས་ཤིང་གསད་པའི་གླགས་ཚོལ་ཡང་ཕ་རོལ་པོས་སྔ་ནས་བག་བྱས་ན་གསོད་མི་ནུས་སོ། །རིགས་ཀྱི་བུ་འཆི་བའི་དགྲ་ཡང་དེ་དང་འདྲ་སྟེ། རྟག་ཏུ་སེམས་ཅན་ཐམས་ཅད་གསོད་པའི་གླགས་ཚོལ་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་ལ་གནས་པ་ལ་གསོད་ནུས་པ་མ་ཡིན་ནོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་བག་བྱེད་པའི་ཕྱིར་རོ། །འོད་སྲུང་གཞན་ཡང་འདི་ལྟ་སྟེ། རྡོ་རྗེའི་ཆར་པ་བབ་ན་ཐམས་ཅད་འཇིག་པར་ནུས་ཏེ། ཤིང་དང་ནགས་ཚལ་དང་། ས་དང་བྱེ་མ་དང་གསེག་མ་དང་། གྱོ་མོ་དང་རྡོ་དང་། གསེར་དང་དངུལ་དང་བཻ་དཱུརྱ་ལ་སོགས་པ་ཐམས་ཅད་འཇིག་པར་འགྱུར་གྱི། རིན་པོ་ཆེ་ཡང་དག་པའི་རྡོ་རྗེ་ལ་ནི་མ་ཡིན་ནོ། །རིགས་ཀྱི་བུ་འཆི་བའི་རྡོ་རྗེའི་ཆར་པ་ཡང་དེ་དང་འདྲ་སྟེ། སེམས་ཅན་ཐམས་ཅད་མེད་པར་བྱེད་ནུས་ན། བྱང་ཆུབ་སེམས་དཔའ་རྡོ་རྗེ་ལྟ་བུ་ཐེག་པ་ཆེན་པོ་ཡོངས་སུ་མྱ་ངན་ལས་
འདས་པ་ལ་གནས་པ་ནི་མ་གཏོགས་སོ། །འོད་སྲུང་གཞན་ཡང་འདི་ལྟ་སྟེ། བྱ་ནམ་མཁའ་ལྡིང་ནི་ཀླུ་ཐམས་ཅད་ཟ་ཡང་སྐྱབས་སུ་འགྲོ་བ་གསུམ་ལ་སྐྱབས་སུ་སོང་བ་ལ་ནི་མ་ཡིན་ནོ། །རིགས་ཀྱི་བུ་འཆི་བའི་ནམ་མཁའ་ལྡིང་ཡང་དེ་དང་འདྲ་སྟེ། སེམས་ཅན་ཚད་མེད་པ་ཐམས་ཅད་ཟོས་ན་སྟོང་པ་ཉིད་དང་། མཚན་མ་མེད་པ་དང་སྨོན་པ་མེད་པ་སྟེ། སྟོང་པ་ཉིད་གསུམ་ལ་གནས་པ་ནི་མ་གཏོགས་སོ། །འོད་སྲུང་གཞན་ཡང་འདི་ལྟ་སྟེ། སྦྲུལ་གདུག་པ་མ་ལ་ན་ཞེས་བྱ་བས་ཟིན་ན་སྔགས་མཁས་པ་དང་སྨན་པ་མཁས་པ་ཡོད་མོད་ཀྱི་ཅི་བྱར་མེད་དོ། །ཨ་ཀ་ཏ་སྱའི་སྔགས་ཤེས་པ་འབའ་ཞིག་གིས་འཚོ་བར་འགྱུར་བ་ནི་མ་གཏོགས་སོ། །རིགས་ཀྱི་བུ་འཆི་བའི་སྦྲུལ་གདུག་པས་ཟིན་པ་ཡང་དེ་དང་འདྲ་སྟེ། སྨན་དཔྱད་ཐམས་ཅད་ཀྱིས་ཅི་བྱར་ཡང་མེད་དེ། བྱང་ཆུབ་སེམས་དཔའ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་སྔགས་ལ་གནས་པ་ནི་མ་གཏོགས་སོ། །འོད་སྲུང་གཞན་ཡང་འདི་ལྟ་སྟེ། མི་ཞིག་རྒྱལ་པོ་སྡང་བར་གྱུར་ན་མི་དེས་ཚིག་སྙན་པ་འཇམ་པོ་སྨྲས་ཏེ། ནོར་དབྱིག་རིན་པོ་ཆེ་རྒྱལ་པོ་ལ་ཕུལ་ན། མི་སྡང་བར་འགྱུར་རོ། །རིགས་ཀྱི་བུ་འཆི་བའི་རྒྱལ་པོ་དེ་ནི་དེ་དང་མི་འདྲ་སྟེ། ཚིག་སྙན་པ་འཇམ་པོ་སྨྲས་སམ། ནོར་དབྱིག་རིན་པོ་ཆེ་ཕུལ་ཡང་དེ་ལས་མི་ཐར་རོ། །རིགས་ཀྱི་བུ་བུས་པ་མ་རབས་ནི་གཡང་ས་ཆེན་པོར་འགྲོ་བའི་གྲོགས་མེད་པ་སྟེ། ཤིན་ཏུ་ལམ་རིང་པོར་འགྲོ་བའི་གྲོགས་མེད་པ། ཉིན་མཚན་དུ་སོང་ཡང་ཕྱིན་པའི་མཐའ་མི་ཤེས་པ། ཤིན་ཏུ་གནག་པའི་མུན་པར་འཐོམས་པ། སྣང་བའི་སྒྲོན་མ་མེད་པ། འཇུག་པའི་སྒོ་མེད་ལ་གནས་ཡོད་པ། ན་བའི་དམིགས་མེད་ལ་གསོར་མི་རུང་བ། འགྲོ་བ་ལ་བར་དུ་གཅོད་པ་མེད་ཅིང་ཐར་པ་མེད་པའི་གནས་སུ་ཕྱིན་པ། གཞིག་ཏུ་མེད་པ། མཐོང་བ་ཙམ་གྱིས་མྱ་ངན་གྱིས་གདུངས་པར་འགྱུར་བ། གཟུགས་གདུག་པ་མ་ཡིན་ཡང་ཀུན་གྱིས་འཇིགས་སྐྲག་པ། ལུས་ལ་ཁྱབ་པར་ཡོད་ཀྱང་མི་ཚོར་མི་ཤེས་པའོ། །འོད་སྲུང་དཔེ་འདི་དག་
དང་གཞན་ཡང་དཔེ་ཚད་མེད་པ་བསྟན་པའི་སྒོ་ནས་ཤི་བ་ནི་སྡུག་བསྔལ་ཆེན་པོ་ཡིན་པར་རིག་པར་བྱའོ། །འོད་སྲུང་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ། ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་སྤྱོད་པ་ན་འཆི་བའི་སྡུག་བསྔལ་རྟོགས་པ་ཞེས་བྱའོ། །འོད་སྲུང་ཇི་ལྟར་ན་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་གནས་པ་ན་འདོད་པ་དང་བྱེ་བྲལ་བའི་སྡུག་བསྔལ་རྟོགས་པ་ཞེ་ན། འདོད་པ་དང་བྱེ་བྲལ་བའི་སྡུག་བསྔལ་ནི་སེམས་ཅན་ཐམས་ཅད་ཀྱི་སྡུག་བསྔལ་བའི་རྩ་བ་སྟེ་ཚིགས་སུ་བཅད་པ་ལས་ཀྱང་འདི་དག་འབྱུང་ངོ་། །འདོད་པའི་རྐྱེན་གྱིས་མྱ་ངན་སྐྱེ། །འདོད་པའི་རྐྱེན་གྱིས་འཇིགས་པ་སྐྱེ། །འདོད་པ་ཐམས་ཅད་ཡོངས་སྤངས་ན། །མྱ་ངན་འཇིགས་པ་ག་ལས་འོང་། །འདོད་པའི་རྐྱེན་གྱིས་མྱ་ངན་གྱི་སྡུག་བསྔལ་སྐྱེ་སྟེ། མྱ་ངན་གྱི་སྡུག་བསྔལ་ཡིན་པས་ན་སེམས་ཅན་དག་རྒས་ཤིང་རྒུད་པར་འགྱུར་ཏེ། འདོད་པ་དང་བྱེ་བྲལ་བའི་སྡུག་བསྔལ་ནི་འདི་ལྟ་སྟེ་ཚེ་ཟད་པའོ། །རིགས་ཀྱི་བུ་བྱེ་བྲལ་བར་གྱུར་པས་ན་སྡུག་བསྔལ་ཕྲ་མོ་རྣམ་པ་སྣ་ཚོགས་ཀྱང་སྐྱེ་བར་འགྱུར་ཏེ། ཁྱོད་ལ་རྒྱས་པར་ཕྱེ་ཞིང་བསྟན་པར་བྱའོ། །རིགས་ཀྱི་བུ་སྔོན་འདས་པའི་དུས་ན་མིའི་ཚེ་ཡང་ཚད་མེད་དེ། དེའི་ཚེ་དེའི་དུས་ན་རྒྱལ་པོ་དགེ་བ་ལ་གནས་པ་ཞེས་བྱ་བ་བྱུང་ངོ་། །དེའི་ཚེ་ན་རྒྱལ་པོ་དེ་གཞོན་ནུའི་ལུས་ཀྱིས་རྒྱལ་ཚབ་ཀྱི་ལས་ཀྱང་ལོ་བརྒྱད་ཁྲི་བཞི་སྟོང་གི་བར་དུ་བྱས་ནས་རྒྱལ་སར་དབང་བསྐུར་ཏེ། རྒྱལ་པོ་ཡང་ལོ་བརྒྱད་ཁྲི་བཞི་སྟོང་གི་བར་དུ་བྱས་སོ། །དེའི་ཚེ་རྒྱལ་པོ་དེའི་སྤྱི་བོ་ལ་ཤ་ལྷག་པ་ཤིན་ཏུ་འཇམ་པ་ཤིང་བལ་ལམ། རས་འཇམ་པོ་ལྟར་འཇམ་པ་སྐྱེས་ཏེ། བགས་ཀྱིས་ཇེ་ཆེ་ཇེ་ཆེར་སྐྱེས་ཀྱང་གནོད་པར་མ་གྱུར་ཏེ། ཟླ་བ་བཅུ་ལོན་པ་དང་རྡོལ་ནས་ནང་ནས་ཁྱེའུ་གཞོན་ནུ་བྱད་བཞིན་བཟང་བ་དཔེ་མེད་པ། མཚན་དང་མདོག་ཏུ་ལྡན་པ། མིའི་ནང་ན་ཕུལ་དུ་གྱུར་པ་གཅིག་བྱུང་ངོ་། །རྒྱལ་པོ་ཆེན་པོ་དེ་དགའ་ནས་མིང་ཡང་སྤྱི་བོ་སྐྱེས་ཞེས་བཏགས་ཏེ། དེའི་ཚེ་རྒྱལ་པོ་དགེ་བ་ལ་གནས་པ་དེ་རྒྱལ་པོའི་
སྲིད་ཀུན་སྤྱི་བོ་སྐྱེས་ལ་གཏད་ནས་ཕོ་བྲང་དང་། བཙུན་མོ་དང་། བུ་དང་འཁོར་ཀུན་ཡོངས་སུ་སྤངས་ཏེ། ལོ་རིལ་པོ་བརྒྱད་ཁྲི་བཞི་སྟོང་གི་བར་དུ་བྱང་ཆུབ་ལ་ནན་ཏན་བྱས་སོ། ། དེའི་ཚེ་རྒྱལ་པོ་སྤྱི་བོ་སྐྱེས་དེ་ཚེས་བཅྭ་ལྔའི་ཉིན་པར་ཁྲུས་བྱས་ཏེ། རྒྱལ་ཐབས་བླངས་ནས་ཡང་ཐོག་མཐོན་པོར་འདུག་པ་ལས་ཤར་ཕྱོགས་ནས་གསེར་གྱི་འཁོར་ལོ་རྩིབས་མ་སྟོང་དང་ལྡན་པ་བཟོ་བྱས་པ་ནི་མ་ཡིན་གྱི་ལྷུན་གྱིས་གྲུབ་པ་ཅིག་བྱུང་བར་གྱུར་ཏོ། །དེའི་ཚེ་རྒྱལ་པོ་སྤྱི་བོ་སྐྱེས་དེ་འདི་སྙམ་དུ་སེམས་པར་གྱུར་ཏོ། །བདག་གིས་སྔོན་དྲང་སྲོང་མངོན་པར་ཤེས་པ་ལྔ་དང་ལྡན་པ་ལས་ཐོས་ན་རྒྱལ་རིགས་རྒྱལ་པོར་འགྱུར་བ་ཚེས་བཅྭ་ལྔའི་ཉིན་པར་ཁྲུས་བྱས་ཏེ་རྒྱལ་པོའི་དབང་བླངས་ནས་ཡང་ཐོག་མཐོན་པོར་འདུག་པ་ལས་གསེར་གྱི་འཁོར་ལོ་རྩིབས་མ་སྟོང་དང་ལྡན་པ་བཟོ་མ་བྱས་པ་ལྷུན་གྱིས་གྲུབ་པ་རང་བྱུང་ན་རྒྱལ་པོ་དེ་གདོན་མི་ཟ་བར་འཁོར་ལོས་སྒྱུར་བའི་རྒྱལ་པོར་འགྱུར་རོ་ཞེས་ཐོས་པ་བསམས་ནས། དེ་བརྟག་པའི་ཕྱིར་ལག་པ་གཡོན་པས་ནི་འཁོར་ལོ་བླངས། ལག་པ་གཡས་པས་ནི་པོག་ཕོར་ཐོགས་ནས་པུས་མོ་གཡས་པ་ས་ལ་བཙུགས་ཏེ་འདི་སྐད་ཅེས་སྨྲས་སོ། །གསེར་གྱི་འཁོར་ལོ་འདི་ཡང་དག་པ་ཞིག་ཡིན་ན་སྔོན་འདས་པའི་འཁོར་ལོས་སྒྱུར་བའི་རྒྱལ་པོའི་ཆོས་སུ་གར་འགྲོ་བར་སོང་ཤིག་ཅེས་སྨྲས་པ་དང་། དེ་སྐད་སྨྲས་མ་ཐག་ཏུ་གསེར་གྱི་འཁོར་ལོ་དེ་སྟེང་གི་ནམ་མཁའ་ལ་འཕགས་ནས་ཕྱོགས་བཅུར་བསྐོར་ཏེ་ཕྱིར་རྒྱལ་པོའི་ལག་པ་གཡོན་པར་འོངས་སོ། །དེའི་ཚེ་རྒྱལ་པོ་སྤྱི་བོ་སྐྱེས་ཤིན་ཏུ་དགའ་མགུ་རངས་ནས་བདག་ནི་ངེས་པར་འཁོར་ལོས་སྒྱུར་བའི་རྒྱལ་པོ་ཡིན་ནོ་ཞེས་སྨྲས་སོ། །ཕྱིས་རིང་པོ་མ་ལོན་པར་བལ་གླང་རིན་པོ་ཆེ་ཤིན་ཏུ་བཟང་བ་པད་མོ་དཀར་པོ་ལྟར་དཀར་ལ་ཡན་ལག་བདུན་ས་ལ་རེག་པ་བྱུང་སྟེ། རྒྱལ་པོ་སྤྱི་བོ་སྐྱེས་དེས་མཐོང་ནས་ཡང་འདི་སྙམ་དུ་བསམས་སོ། །བདག་གིས་སྔོན་དྲང་སྲོང་མངོན་པར་ཤེས་པ་ལྔ་དང་ལྡན་པ་ལས་ཐོས་ན། གལ་ཏེ་འཁོར་ལོས་སྒྱུར་བའི་རྒྱལ་པོ་ཚེས་བཅྭ་ལྔའི་ཉིན་པར་
ཁྲུས་བྱས་ནས་ཡང་ཐོག་མཐོན་པོར་འཛེགས་ཏེ་འདུག་པ་ལས། བལ་གྱི་གླང་པོ་ཆེ་ཤིན་ཏུ་བཟང་པོ་པད་མོ་དཀར་པོ་ལྟར་དཀར་ལ་ཡན་ལག་བདུན་ས་ལ་རེག་པ་བྱུང་ན་དེ་ནི་གདོན་མི་ཟ་བར་འཁོར་ལོས་སྒྱུར་བའི་རྒྱལ་པོར་འགྱུར་ཞེས་ཐོས་པ་བསམས་ནས་དེ་བརྟག་པའི་ཕྱིར་པོག་ཕོར་ཐོགས་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས་འདི་སྐད་ཅེས་སྨྲས་སོ། །བལ་གླང་རིན་པོ་ཆེ་འདི་གལ་ཏེ་ཡང་དག་པ་ཞིག་ཡིན་ན་སྔོན་འདས་པའི་འཁོར་ལོས་སྒྱུར་བའི་རྒྱལ་པོའི་ཆོས་ལྟར་གར་འགྲོ་བར་སོང་ཤིག །ཅེས་སྨྲས་ནས་བལ་གླང་རིན་པོ་ཆེ་དེ་ནང་པར་ནས་དགོངས་སུ་ཕྱོགས་མཚམས་བརྒྱད་རྒྱ་མཚོའི་མཐའ་ལ་ཐུག་གི་བར་དུ་བསྐོར་ནས་ཕྱིར་གནས་སུ་འོངས་སོ། །དེའི་ཚེ་རྒྱལ་པོ་སྤྱི་བོ་སྐྱེས་རབ་ཏུ་དགའ་མགུ་རངས་ནས་བདག་ནི་གདོན་མི་ཟ་བར་འཁོར་ལོས་སྒྱུར་བའི་རྒྱལ་པོ་ཡིན་ནོ་ཞེས་སྨྲས་སོ། །དེ་ནས་ཕྱིས་རིང་པོ་མ་ལོན་པར་རྟ་རིན་པོ་ཆེ་སྤུ་མདོག་མཐོན་མཐིང་དུ་འདུག་ལ། རྔ་རྔོག་གསེར་གྱི་ཁ་དོག་འདྲ་བ་ཞིག་རང་བྱུང་སྟེ། རྒྱལ་པོ་སྤྱི་བོ་སྐྱེས་དེས་མཐོང་ནས་ཡང་འདི་སྙམ་དུ་བསམས་སོ། །བདག་གིས་སྔོན་དྲང་སྲོང་མངོན་པར་ཤེས་པ་ལྔ་དང་ལྡན་པ་ལས་ཐོས་ན། གལ་ཏེ་འཁོར་ལོས་སྒྱུར་བའི་རྒྱལ་པོ་ཚེས་བཅྭ་ལྔའི་ཉིན་པར་ཁྲུས་བྱས་ནས་ཡང་ཐོག་མཐོན་པོར་འཛེགས་ཏེ་འདུག་པ་ལས་རྟ་རིན་པོ་ཆེ་སྤུ་མདོག་མཐོན་མཐིང་ལ་རྔ་རྔོག་གསེར་གྱི་ཁ་དོག་འདྲ་བ་བྱུང་ན་རྒྱལ་པོ་དེ་ནི་གདོན་མི་ཟ་བར་འཁོར་ལོས་སྒྱུར་བའི་རྒྱལ་པོ་ཡིན་ནོ། །ཞེས་ཐོས་པ་བསམས་ནས་དེ་བརྟག་པའི་ཕྱིར་པོག་ཕོར་ཐོགས་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་འདི་སྐད་ཅེས་སྨྲས་སོ། །རྟ་རིན་པོ་ཆེ་མཐོན་མཐིང་འདི་ཡང་དག་པ་ཞིག་ཡིན་ན་སྔོན་གྱི་འཁོར་ལོས་སྒྱུར་བའི་རྒྱལ་པོའི་ཆོས་ལྟར་གར་འགྲོ་བར་སོང་ཤིག་ཅེས་སྨྲས་ནས་རྟ་རིན་པོ་ཆེ་ནང་པར་ནས་དགོངས་སུ་ཕྱོགས་མཚམས་བརྒྱད་དུ་རྒྱ་མཚོའི་མཐའ་ལ་ཐུག་པར་བསྐོར་ནས་ཕྱིར་གནས་སུ་འོངས་སོ། །དེའི་ཚེ་རྒྱལ་པོ་སྤྱི་བོ་སྐྱེས་རབ་ཏུ་དགའ་མགུ་རངས་ནས་བདག་ནི་གདོན་མི་ཟ་བར་འཁོར་ལོས་སྒྱུར་བའི་
རྒྱལ་པོ་ཡིན་ནོ་ཞེས་སྨྲས་སོ། །དེ་ནས་རིང་པོ་མ་ལོན་པར་བུད་མེད་རིན་པོ་ཆེ་གཟུགས་བྱད་མཛེས་པ་ཤིན་ཏུ་སྡུག་པ་ཕུལ་དུ་གྱུར་པ། མི་རིང་མི་ཐུང་། ཧ་ཅང་ཡང་མི་དཀར། ཧ་ཅང་ཡང་མི་གནག །ལུས་ཀྱི་བ་སྤུའི་ཁུང་ནས་སྤོས་ཙན་དན་གྱི་དྲི་བྲོ་བ། ཁ་ནས་པད་མ་སྔོན་པོའི་བསུང་བྲོ་བ། མིག་རྒྱང་རིང་པོ་དཔག་ཚད་གཅིག་ཚུན་ཆད་མཐོང་བ། རྣ་བས་ཀྱང་ཐོས་པ། སྣས་ཀྱང་བསུང་ཚོར་བ། ལྕེ་ཤིན་ཏུ་མཉེན་ཞིང་རིང་ལ་ངོ་ཡོག་པ། མདོག་འཇམ་ཞིང་འཚེར་བ་ནི་ཟངས་གླེབས་པ་དང་འདྲ་བ་ཤེས་རབ་རྣོ་ལ་བློ་ཆེ་བ། སེམས་ཅན་ཐམས་ཅད་ལ་རྟག་ཏུ་ངག་འཇམ་པོས་སྨྲ་བ། བུད་མེད་དེའི་ལག་པས་རྒྱལ་པོའི་གོས་ལ་རེག་པ་ཙམ་གྱིས་ཀྱང་རྒྱལ་པོ་དེའི་ན་བ་དང་བདེ་བ་ཡང་ཤེས་ལ་ཅི་ལ་དམིགས་ཅི་ལ་སེམས་པ་ཡང་ཤེས་སོ། །དེའི་ཚེ་རྒྱལ་པོ་སྤྱི་བོ་སྐྱེས་དེ་འདི་སྙམ་དུ་བུད་མེད་གང་རྒྱལ་པོའི་སེམས་ཤེས་པ་ནི་བུད་མེད་རིན་པོ་ཆེ་ཡིན་ནོ་སྙམ་བསམས་སོ། །དེ་ནས་རིང་པོ་མ་ལོན་པར་རྒྱལ་པོའི་ཕོ་བྲང་གི་ནང་ནས་ནོར་བུ་རིན་པོ་ཆེ་བཻ་དཱུརྱ་སྔོན་པོ་ལྟ་བུ་ཆེ་ཁྱད་མིའི་བརླ་ཙམ་ཞིག་བྱུང་སྟེ། ནོར་བུ་རིན་པོ་ཆེ་དེས་མུན་པ་དཔག་ཚད་གཅིག་ཁོ་ར་ཁོར་ཡུག་ཏུ་སྣང་བར་ཡང་བྱེད་ལ། གལ་ཏེ་ཆར་པའི་ཐིགས་པ་ཤིང་རྟའི་སྲོག་ཤིང་ཙམ་བབ་ཀྱང་། ནོར་བུ་རིན་པོ་ཆེ་དེའི་མཐུས་དཔག་ཚད་གཅིག་ཁོ་ར་ཁོར་ཡུག་ཏུ་གདུགས་སུ་གྱུར་ཏེ་ཆར་པ་མི་ཟག་གོ །དེའི་ཚེ་རྒྱལ་པོ་སྤྱི་བོ་སྐྱེས་འདི་སྙམ་དུ་འཁོར་ལོས་སྒྱུར་བའི་རྒྱལ་པོས་ནོར་བུ་རིན་པོ་ཆེ་འདི་ཐོབ་ན་གདོན་མི་ཟ་བར་འཁོར་ལོས་སྒྱུར་བའི་རྒྱལ་པོ་ཡིན་ནོ་སྙམ་སེམས་སོ། །དེ་ནས་རིང་པོ་མ་ལོན་པར་རིན་པོ་ཆེའི་གཏེར་ལ་དབང་བའི་བློན་པོ་རང་བྱུང་སྟེ། ནོར་བུ་རིན་པོ་ཆེ་རབ་ཏུ་མང་བ། ཤིན་ཏུ་ཕྱུག་པ། བང་མཛོད་ཚད་མེད་པ་ཤིན་ཏུ་གང་བ། ཅིས་ཀྱང་མི་ཕོངས་མི་བྲེལ་བ་བསོད་ནམས་ལས་གྱུར་པའི་མིག་གི་དབང་པོས་སའི་འོག་ན་གཏེར་ཅི་ཡོད་པ་ཐམས་ཅད་མཐོང་བས་རྒྱལ་པོས་བསམས་པ་བཞིན་དུ་སྦྱོར་རོ། །དེའི་ཚེ་རྒྱལ་པོ་སྤྱི་བོ་
སྐྱེས་དེ་བརྟག་པའི་ཕྱིར་གྲུར་ཞུགས་ནས་རྒྱ་མཚོ་ཆེན་པོར་ཞུགས་ཏེ། རྒྱལ་པོས་དེ་ལ་འདི་སྐད་ཅེས་བསྒོའོ། །ཁོ་བོ་ནོར་བུ་རིན་པོ་ཆེ་རྣམ་པ་ཐ་དད་པ་དག་ཅིག་འདོད་དོ། །བློན་པོ་དེས་དེ་སྐད་ཅེས་ཐོས་མ་ཐག་ཏུ་ལག་པ་གཉིས་ཀྱིས་རྒྱ་མཚོའི་ནང་ནས་བཅུས་པ་དང་སོར་མོ་བཅུ་ལ་ནོར་བུ་རིན་པོ་ཆེའི་གཏེར་བཅུ་ཡོད་པར་གྱུར་ཏེ། རྒྱལ་པོ་ལ་ཕུལ་ནས་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ་ཇི་ཙམ་འདོད་པ་བཞེས་ཏེ་ལྷག་མ་སླར་རྒྱ་མཚོར་དོར་དུ་གསོལ། དེའི་ཚེ་རྒྱལ་པོ་སྤྱི་བོ་སྐྱེས་རབ་ཏུ་དགའ་མགུ་རངས་ནས་བདག་ནི་ངེས་པར་འཁོར་ལོས་སྒྱུར་བའི་རྒྱལ་པོ་ཡིན་ནོ། །ཞེས་སྨྲས་སོ། །དེ་ནས་རིང་པོ་མ་ལོན་པར་དམག་ལ་དབང་བའི་བློན་པོ་བྱུང་སྟེ། ཤིན་ཏུའང་རྩལ་ཆེ་ཞིང་དཔའ་བ། དགྲ་ཐབས་ལ་ཕུལ་དུ་མཁས་པ་དམག་གི་ཚོགས་རྣམ་བཞི་ལ་ཤིན་ཏུ་མཁས་པ། རྒྱལ་པོ་གཞན་ལ་རྒོལ་དུ་ཆ་ན་དམག་མངོན་པར་སྟོན་པ། རྒོལ་བ་མེད་པ་ན་ཅང་མི་སྣང་བ། མ་བཏུལ་བ། ཐུལ་བ། ཐུལ་བའི་རྣམས་མཐུས་ཤིན་ཏུ་སྐྱོབ་པ་ལ་མཁས་པ་བྱུང་ངོ་། །དེའི་ཚེ་རྒྱལ་པོ་སྤྱི་བོ་སྐྱེས་ཡང་འདི་སྙམ་དུ་སེམས་ཏེ། འཁོར་ལོས་སྒྱུར་བའི་རྒྱལ་པོ་ལ་དམག་དཔོན་རིན་པོ་ཆེ་འདི་ཡོད་དེ། བདག་ནི་གདོན་མི་ཟ་བར་འཁོར་ལོས་སྒྱུར་བའི་རྒྱལ་པོ་ཡིན་ནོ། །སྙམ་སེམས་སོ། །དེའི་ཚེ་འཁོར་ལོས་སྒྱུར་བའི་རྒྱལ་པོ་སྤྱི་བོ་སྐྱེས་ཀྱིས་བློན་པོ་རྣམས་ལ་བཀའ་སྩལ་པ། ཁྱེད་འདི་ལྟར་རིག་པར་གྱིས་ཤིག །འཛམ་བུའི་གླིང་འདིར་ནི་རབ་ཏུ་བདེ་ཞིང་སྐྱིད་པར་གྱུར་ལ། ང་ནི་རིན་པོ་ཆེ་སྣ་བདུན་དང་བུ་སྟོང་དུ་ཡང་ལྡན་ན་ད་གཞན་ཅི་ཞིག་བྱར་ཡོད། བློན་པོ་རྣམས་ཀྱིས་གསོལ་པ། དེ་བཞིན་ནོ། །རྒྱལ་པོ་ཆེན་པོ་ཤར་གྱི་ལུས་འཕགས་གླིང་ཞེས་བགྱི་བ་ད་དུང་མ་བཏུལ་ཏེ། རྒྱལ་པོའི་བཀའ་མི་ཉན་ན་དེ་ཡང་དབབ་པའི་རིགས་སོ་ཞེས་གསོལ་ཏོ། །དེའི་ཚེ་འཁོར་ལོས་སྒྱུར་བའི་རྒྱལ་པོ་རིན་པོ་ཆེ་སྣ་བདུན་དང་བཅས་ཏེ། ཐམས་ཅད་ནམ་མཁའ་ལ་འཕགས་ནས་ཤར་གྱི་ལུས་འཕགས་གླིང་དུ་ཆས་ཏེ། གླིང་དེའི་མི་རྣམས་ཐམས་ཅད་
དགའ་ནས་བཀའ་ཉན་པར་གྱུར་ཏོ།། །།འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་བཅུ་བདུན་པ། དེ་ནས་ཡང་བློན་པོ་རྣམས་ལ་བཀའ་སྩལ་པ། ལྷོའི་འཛམ་བུའི་གླིང་དང་། ཤར་གྱི་ལུས་འཕགས་ཀྱི་གླིང་ནི་རབ་ཏུ་བདེ་བར་གྱུར་ཏེ། ཐམས་ཅད་བཀའ་ཉན་པར་ཡང་གྱུར། རིན་པོ་ཆེ་སྣ་བདུན་དང་བུ་སྟོང་དུ་ཡང་ལྡན་ན་ད་ཡང་གཞན་ཅི་ཞིག་བྱར་ཡོད། བློན་པོ་རྣམས་ཀྱིས་གསོལ་པ། དེ་བཞིན་ནོ། །རྒྱལ་པོ་ཆེན་པོ་ནུབ་ཀྱི་བ་ལང་སྤྱོད་ཅེས་བགྱི་བ་ད་དུང་མ་བཏུལ་ལོ། །དེ་ནས་རྒྱལ་པོ་རིན་པོ་ཆེ་སྣ་བདུན་དང་བཅས་ཏེ། ཐམས་ཅད་ནམ་མཁའ་ལ་འཕགས་ནས་ནུབ་ཀྱི་བ་ལང་སྤྱོད་དུ་ཆས་སོ། །རྒྱལ་པོ་དེར་ཕྱིན་མ་ཐག་ཏུ་དེ་ན་གནས་པའི་མི་ཐམས་ཅད་ཀྱང་བཀའ་ཉན་པར་གྱུར་ཏོ། །ཡང་བློན་པོ་རྣམས་ལ་བཀའ་སྩལ་པ། ལྷོའི་འཛམ་བུའི་གླིང་དང་། ཤར་གྱི་ལུས་འཕགས་གླིང་དང་། ནུབ་ཀྱི་བ་ལང་སྤྱོད་ན་གནས་པའི་མི་དག་ནི་རབ་ཏུ་བདེ་ཞིང་སྐྱིད་ལ་བཀའ་ཡང་ཉན་པར་གྱུར་ཏེ། རིན་པོ་ཆེ་སྣ་བདུན་དང་། བུ་སྟོང་དུ་ཡང་ལྡན་ན་ད་གཞན་ཡང་ཅི་ཞིག་བྱར་ཡོད། བློན་པོ་རྣམས་ཀྱིས་གསོལ་པ། དེ་བཞིན་ནོ། །རྒྱལ་པོ་ཆེན་པོ་བྱང་གི་སྒྲ་མི་སྙན་ཞེས་བགྱི་བ་ད་དུང་མ་བཏུལ་ལོ། །དེ་ནས་རྒྱལ་པོ་ཡང་རིན་པོ་ཆེ་སྣ་བདུན་དང་བཅས་ཏེ། ཐམས་ཅད་སྟེང་གི་ནམ་མཁའ་ལ་འཕགས་ནས་བྱང་གི་སྒྲ་མི་སྙན་དུ་ཆས་སོ། །དེར་ཕྱིན་མ་ཐག་ཏུ་དེ་ན་གནས་པའི་མི་ཐམས་ཅད་རབ་ཏུ་དགའ་ནས་བཀའ་ཉན་ཏོ། །དེ་ནས་ཡང་བློན་པོ་རྣམས་ལ་བཀའ་སྩལ་པ། གླིང་བཞི་ན་གནས་པའི་མི་དག་ནི་རབ་ཏུ་ཡང་སྐྱིད་ཅིང་བདེ་ལ་བཀའ་ཉན་པར་གྱུར་ཏེ། རིན་པོ་ཆེ་སྣ་བདུན་དང་བུ་སྟོང་དུ་ལྡན་ན་ད་གཞན་ཡང་ཅི་ཞིག་བྱར་ཡོད། བློན་པོ་རྣམས་ཀྱིས་གསོལ་པ། དེ་བཞིན་ནོ། །རྒྱལ་པོ་ཆེན་པོ་སུམ་ཅུ་རྩ་གསུམ་གྱི་ལྷ་ནི་ཚེ་ཡང་རབ་ཏུ་རིང་ལ་ཤིན་ཏུ་བདེ་སྐྱིད་དོ། །ལྷའི་ལུས་ནི་ཤིན་ཏུ་ཡང་བཟང་སྟེ། དཔེ་ཟླ་མེད་ལ་གནས་པའི་ཕོ་བྲང་
དང་། འདུག་པའི་ཁྲི་དང་། ཉལ་བའི་མལ་ཡང་རིན་པོ་ཆེ་སྣ་བདུན་འབའ་ཞིག་སྟེ། ལྷའི་བསོད་ནམས་བསྙེམས་པས་དེ་དག་ཀྱང་རྒྱལ་པོའི་བཀའ་མི་ཉན་ན་བཏུལ་ཞིང་དབབ་པའི་རིགས་སོ། །དེ་ནས་འཁོར་ལོས་སྒྱུར་བའི་རྒྱལ་པོ་རིན་པོ་ཆེ་སྣ་བདུན་དང་བཅས་ཏེ། ཐམས་ཅད་ནམ་མཁའ་ལ་འཕགས་ནས་སུམ་ཅུ་རྩ་གསུམ་གནམ་དུ་ཆས་སོ། །དེར་ཕྱིན་པ་དང་ཤིང་ཁ་དོག་སྔོན་པོར་འདུག་པ་ཅིག་མཐོང་ནས་སྔོན་པོར་འདུག་པ་འདི་ཅི་ཞིག་ཡིན་ཞེས་བློན་པོ་རྣམས་ལ་དྲིས་སོ། །བློན་པོ་རྣམས་ཀྱིས་གསོལ་པ། འདི་ནི་ཤིང་པཱ་རི་ཛཱ་ཏ་ཞེས་བྱ་སྟེ། སུམ་ཅུ་རྩ་གསུམ་གནམ་གྱི་ལྷ་རྣམས་དབྱར་གྱི་ཟླ་བ་གསུམ་ལ་ཤིང་དེའི་འོག་ན་ལོངས་སྤྱོད་ཅིང་རྩེའོ། །གཞན་ཡང་ཁ་དོག་དཀར་པོ་སྤྲིན་དཀར་པོ་དང་འདྲ་བ་ཞིག་མཐོང་ནས་འདི་ཅི་ཡིན་ཞེས་དྲིས་སོ། །བློན་པོ་རྣམས་ཀྱིས་གསོལ་པ། འདི་ནི་སུམ་ཅུ་རྩ་གསུམ་གནམ་གྱི་ཆོས་བཟང་གི་ལྷའི་འདུན་ས་ཞེས་བྱ་སྟེ། སུམ་ཅུ་རྩ་གསུམ་གནམ་གྱི་ལྷ་རྣམས་ནི་དེར་འདུ་ཞིང་ལྷ་དང་མིའི་གཏམ་ཟེར་རོ། །དེའི་ཚེ་བརྒྱ་བྱིན་ལྷའི་དབང་པོས་ཀྱང་རྒྱལ་པོ་སྤྱི་བོ་སྐྱེས་འོངས་པར་ཤེས་ནས་ཕྱི་རོལ་དུ་བསུ་སྟེ། ལག་པས་བཟུང་ནས་འགྲོགས་ཏེ་ཆོས་བཟང་གི་འདུན་སར་བཞུགས་ནས་གདན་ཕྱེད་བདར་ཏེ་ལྷན་ཅིག་ཏུ་འདུག་གོ ། དེའི་ཚེ་རྒྱལ་པོ་གཉིས་ལྷན་ཅིག་ཏུ་འདུག་པ་ན་གཟུགས་བྱད་དང་མཚན་ལ་སོགས་པ་ཐ་དད་པ་མེད་དེ། ལྟ་བ་དང་མིག་འཛུམས་པ་ཙམ་ཞིག་མི་འདྲའོ། །དེའི་ཚེ་ན་འཁོར་ལོས་སྒྱུར་བའི་རྒྱལ་པོ་དེས་འདི་སྙམ་དུ་བསམས་པར་གྱུར་ཏེ། བདག་གིས་ལྷའི་རྒྱལ་པོ་འདིའི་ཐབས་ཕྲོགས་ཏེ་བདག་གིས་བྱར་རུང་ངམ་སྙམ་བསམས་སོ། །རིགས་ཀྱི་བུ་དེའི་ཚེ་དེའི་དུས་ན་བརྒྱ་བྱིན་ལྷའི་དབང་པོ་ཐེག་པ་ཆེན་པོའི་མདོ་སྡེ་འཆང་བ་དང་། འཛིན་པ་དང་། ཀློག་པ་དང་། འདོན་པ་དང་། གཞན་ལ་ཡང་འབྱེད་ཅིང་སྟོན་པའི་ལས་བྱེད་དེ། ཤིན་ཏུ་ཟབ་མོའི་དོན་ཟད་པར་རྟོགས་པ་ནི་མ་ཡིན་ནོ། །དེ་ལྟར་ཐེག་པ་ཆེན་པོའི་མདོ་སྡེ་འཆང་བ་དང་། འཛིན་པ་དང་། ཀློག་པ་དང་། འདོན་པ་
དང་། གཞན་ལ་རྒྱས་པར་འབྱེད་ཅིང་སྟོན་པ་དེའི་རྒྱུ་དེའི་རྐྱེན་གྱིས་གཟི་བརྗིད་ཆེན་པོ་དང་ལྡན་པར་གྱུར་ཏོ། །རིགས་ཀྱི་བུ་དེའི་ཚེ་ན་རྒྱལ་པོ་སྤྱི་བོ་སྐྱེས་དེ་དེ་ལྟར་བརྒྱ་བྱིན་ལ་ངན་སེམས་བསྐྱེད་པས་དེ་མ་ཐག་ཏུ་ཕྱིར་འཛམ་བུ་གླིང་དུ་ལྷུང་ནས་འདོད་པའི་ལྷ་དང་། མི་དང་བྱེ་བྲལ་བར་གྱུར་ཏེ། སྡུག་བསྔལ་ཆེན་པོ་སྐྱེས་སོ། །དེ་ནས་ཀྱང་ནད་ཀྱིས་བཏབ་སྟེ་ཚེ་འཕོས་པར་གྱུར་ཏོ། །དེའི་ཚེ་དེའི་དུས་ན་བརྒྱ་བྱིན་དུ་གྱུར་པ་དེ་ནི་སངས་རྒྱས་འོད་སྲུང་ཞེས་བྱ་བ་ཡིན་ནོ། །འཁོར་ལོས་སྒྱུར་བའི་རྒྱལ་པོ་དེ་ནི་ད་ལྟར་ང་ཡིན་ནོ། །རིགས་ཀྱི་བུ་དེ་བས་ན་འདོད་པ་དང་བྱེ་བྲལ་ན་སྡུག་བསྔལ་ཆེན་པོ་ཡིན་པར་རིག་པར་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་ལྟར་འདས་པའི་དུས་ཀྱི་བྱེ་བྲལ་བའི་སྡུག་བསྔལ་དྲན་པ་ཡིན་ན། བྱང་ཆུབ་སེམས་དཔའ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་གནས་པ། ད་ལྟར་གྱི་དུས་ཀྱི་འདོད་པ་དང་བྱེ་བྲལ་བའི་སྡུག་བསྔལ་ལ་རྟོགས་པ་ལྟ་ཅི་སྨོས། རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་སྤྱོད་པ་ན་དགྲ་སྡང་བ་དང་ཕྲད་པའི་སྡུག་བསྔལ་ཞེ་ན། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་ནི་འདི་ལྟར་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་དང་། མི་དང་ལྷ་ལ་ཡང་དགྲ་སྡང་བ་དང་ཕྲད་པའི་སྡུག་བསྔལ་ཞེས་བྱ་བ་ཡོད་དོ། །འདི་ལྟ་སྟེ། དཔེར་ན་མིས་ནི་བཙོན་རར་བཅུག་པ་དང་། བཟུང་བ་དང་། བཅིངས་པ་དང་། ལྕགས་དང་། ཁོང་སྒྲིལ་དང་། ཤིང་སྒྲོག་ཏུ་བཅུག་པ་ལ་སྡུག་བསྔལ་ཆེན་པོར་མཐོང་ངོ་། །བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། ལམ་རྒྱུད་ལྔའི་སེམས་ཅན་ཐམས་ཅད་ཀྱང་དགྲ་སྡང་བ་དང་ཕྲད་པའི་སྡུག་བསྔལ་ཆེན་པོ་ཡིན་པར་རྟོགས་སོ། །རིགས་ཀྱི་བུ་གཞན་ཡང་འདི་ལྟ་སྟེ། དཔེར་ན་མི་ཞིག་ཁོན་ཡོད་
པས་འཇིགས་སམ། ལྟོང་ངམ། ལྕགས་སམ། ཁོང་སྒྲིལ་གྱིས་འཇིགས་པས་ཕ་མ་དང་ཆུང་མ་དང་། བུ་དང་འཁོར་རྣམས་དང་། རིན་པོ་ཆེ་དེར་སོ་ནམ་ཀུན་སྤངས་ཏེ། ལམ་རིང་པོར་བྱོལ་ཞིང་བྲོས་སོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། འཁོར་བས་འཇིགས་པ་དང་ཕ་རོལ་ཏུ་ཕྱིན་པ་དྲུག་རྫོགས་པར་སྤྱད་དེ་མྱ་ངན་ལས་འདས་པར་འཇུག་གོ །འོད་སྲུང་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་སྤྱོད་པ་ན་དགྲ་སྡང་བ་དང་ཕྲད་པའི་སྡུག་བསྔལ་རྟོགས་པ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྤྱོད་པར་འདོད་པ་མི་རྙེད་པའི་སྡུག་བསྔལ་རྟོགས་པ་ཞེ་ན། འདོད་པ་ནི་ཐམས་ཅད་འདོད་པའོ། །ཐམས་ཅད་འདོད་པ་ཡང་རྣམ་པ་གཉིས་ཏེ། དགེ་བའི་ཆོས་འདོད་པ་དང་། མི་དགེ་བའི་ཆོས་འདོད་པའོ། །དེ་ཡང་དགེ་བའི་ཆོས་མ་རྙེད་ན་སྡུག་བསྔལ་བའོ། །མི་དགེ་བའི་ཆོས་དང་མ་བྲལ་ན་སྡུག་བསྔལ་བ་སྟེ། འདི་དག་ནི་ཕུང་པོ་ལྔ་སྡུག་བསྔལ་བ་མདོར་བཤད་པའོ། །འོད་སྲུང་དེ་དག་ནི་སྡུག་བསྔལ་གྱི་བདེན་པ་ཞེས་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཕུང་པོ་ལྔ་སྡུག་བསྔལ་བར་གསུངས་པའི་དོན་དེ་ལྟ་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཀྱིས་སྔོན་ཤཱཀྱ་མིང་ཆེན་ལ་འདི་སྐད་ཅེས་བཀའ་སྩལ་ཏོ། །གལ་ཏེ་གཟུགས་སྡུག་བསྔལ་བ་ཡིན་ན། སེམས་ཅན་ཐམས་ཅད་གཟུགས་འདོད་པའི་མི་རིགས་ཏེ། ཐམས་ཅད་འདོད་པས་ན་སྡུག་བསྔལ་ཞེས་བྱར་མི་རུང་ངོ་ཞེས་ཀྱང་གསུངས། ཡང་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། ཚོར་བ་ལ་ཡང་རྣམ་པ་གསུམ་སྟེ། བདེ་བར་ཚོར་བ་དང་། སྡུག་བསྔལ་བར་ཚོར་བ་དང་།
བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པར་ཚོར་བ་སྟེ། སྔོན་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། གང་ཞིག་གིས་དགེ་བའི་ཆོས་ལ་ནན་ཏན་བྱས་ན་བདེ་བ་མྱོང་བར་འགྱུར་རོ་ཞེས་ཀྱང་གསུངས། ཡང་བཅོམ་ལྡན་འདས་ཀྱིས་གསུངས་པ། དགེ་བའི་རྒྱུད་དུ་རེག་བྱ་དྲུག་གིས་ཀྱང་བདེ་བ་མྱོང་བར་འགྱུར་ཏེ། མིག་གིས་གཟུགས་བཟང་པོ་མཐོང་ན་དེ་ཡང་བདེ་བ་ལགས་ན་རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་བར་དུ་བཟང་པོ་ལ་རེག་པ་ཡང་བདེའོ་ཞེས་གསུངས་ཏེ། བཅོམ་ལྡན་འདས་ཀྱིས་ཚིགས་སུ་བཅད་དེ་གསུངས་པ། ཚུལ་ཁྲིམས་ལྡན་པ་བདེ་བ་སྟེ། །ལུས་ཀྱི་སྡུག་བསྔལ་མི་མྱོང་བ། །གཉིད་ཀྱིས་ལོག་ནའང་བདེ་བར་འགྱུར། །སད་ན་སེམས་ཀྱང་དགའ་བར་འགྱུར། །གོས་དང་བསོད་སྙོམས་ལེན་པ་དང་། །ཀློག་དང་སྒོམ་ཞིང་འཆད་པ་དང་། །བས་མཐའ་དགོན་པ་རི་དང་ཚལ། །གནས་པར་གྱུར་ན་མཆོག་ཏུ་བདེ། །གང་ཞིག་སེམས་ཅན་མང་པོ་ལ། །ཉིན་མཚན་རྟག་ཏུ་སྙིང་རྗེ་ཞིང་། །གཞན་ལ་གནོད་པ་མི་བྱེད་ན། །དེ་ཡི་རྐྱེན་གྱིས་རྟག་ཏུ་བདེ། །འདོད་པ་ཉུང་ཞིང་ཆོག་ཤེས་བདེ། །དེ་བཞིན་མང་དུ་ཐོས་པ་བདེ། །ཆགས་མེད་དགྲ་བཅོམ་པ་དག་ཀྱང་། །རབ་ཏུ་བདེ་བ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེ། །ཕ་རོལ་ཕྱིན་པའི་མཐའ་ཕྱིན་ཅིང་། །བྱ་བ་ཐམས་ཅད་བྱས་པ་ནི། །མཆོག་ཏུ་བདེ་བ་ཞེས་བྱའོ། །བཅོམ་ལྡན་འདས་ཀྱིས་མདོ་སྡེ་གཞན་དག་ལས་བདེ་བའི་མཚན་ཉིད་དུ་གསུངས་པའི་དོན་འདི་ལགས་ན། དེ་ཡང་བཅོམ་ལྡན་འདས་ཀྱིས་འདི་སྐད་དུ་གསུངས་ན་དོན་དེ་དག་འཐུན་པར་རུང་ངམ། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ལེགས་སོ། །ཤིན་ཏུ་ལེགས་སོ། །རིགས་ཀྱི་བུ་དེ་བཞིན་གཤེགས་པ་ལ་དོན་འདི་དག་དྲིས་པ་ལེགས་སོ། །རིགས་ཀྱི་བུ་སེམས་ཅན་ཐམས་ཅད་ནི་སྡུག་བསྔལ་བ་ཐ་མ་ལ་ནན་གྱིས་བདེ་བར་འདུ་ཤེས་ཏེ། དེ་བས་ན་སྡུག་བསྔལ་གྱི་མཚན་
ཉིད་འདི་བཤད་པ་ཡང་སྔ་མ་དང་ཐ་མི་དད་དོ། །དེ་ནས་བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ཀྱིས་སྔར་གསུངས་པ་ལྟར། སྡུག་བསྔལ་ཐ་མ་ལ་ཡང་བདེ་བར་འདུ་ཤེས་པ་བསྐྱེད་ན། སྐྱེ་བ་ཐ་མ་དང་། རྒ་བ་ཐ་མ་དང་། ན་བ་ཐ་མ་དང་། འཆི་བ་ཐ་མ་དང་། འདོད་པ་དང་བྱེ་བྲལ་བ་ཐ་མ་དང་། འདོད་པ་མི་རྙེད་པ་ཐ་མ་དང་། དགྲ་སྡང་བ་དང་ཕྲད་པ་ཐ་མ་དང་། ཕུང་པོ་ལྔ་ཐ་མ་ལ་སོགས་པ་སྡུག་བསྔལ་བ་ལ་ཡང་བདེ་བ་མཆིས་པའི་རིགས་སོ། །བཅོམ་ལྡན་འདས་སྐྱེ་བ་ཐ་མ་ཞེས་བགྱི་བ་ནི་ངན་སོང་གསུམ་མོ། །སྐྱེ་བ་འབྲིང་ཞེས་བགྱི་བ་ནི་མིའི་ནང་དུ་སྐྱེས་པའོ། །སྐྱེ་བ་རབ་ཅེས་བྱ་བ་ནི་མཐོ་རིས་ཀྱི་ལྷར་སྐྱེ་བ་ལགས་ན། གལ་ཏེ་ལ་ལ་ཞིག་གིས་འདི་སྐད་དུ་བདེ་བ་ཐ་མ་ལ་སྡུག་བསྔལ་བར་འདུ་ཤེས། བདེ་བ་འབྲིང་ལ་ནི་སྡུག་བསྔལ་མེད་པར་བདེ་བར་འདུ་ཤེས། བདེ་བ་རབ་ལ་ནི་བདེ་བར་འདུ་ཤེས་སོ་ཞེས་དེ་སྐད་ཅེས་དྲི་བ་མཆིས་ན། དེ་ལ་ཇི་སྐད་ཅེས་ལན་གདབ་པར་བགྱི། བཅོམ་ལྡན་འདས་སྡུག་བསྔལ་ཐ་མ་ལ་བདེ་བར་འདུ་ཤེས་པ་ནི། དཔེར་ན་མི་ཞིག་ལྕག་སྟོང་གིས་གཞུ་བ་ལས། ཐོག་མ་གཅིག་ཕོག་པ་ན་བདེ་བར་འདུ་ཤེས་པའི་རིགས་ན་དེ་བདེ་བར་འདུ་ཤེས་པ་མ་ལགས་པས་ན་ཅིའི་སླད་དུ་སྡུག་བསྔལ་ཐ་མ་ལ་བདེ་བར་འདུ་ཤེས་པར་བགྱི། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། དེ་དེ་བཞིན་ནོ། །དེ་དེ་བཞིན་ནོ། །ཁྱོད་ཀྱིས་སྨྲས་པ་བཞིན་ཏེ། དོན་དེ་ལྟ་བས་ན་བདེ་བར་འདུ་ཤེས་པ་མེད་དོ། །དེ་ཅིའི་ཕྱིར་ཞེ་ན། དཔེར་ན་མི་དེ་ལྕག་སྟོང་གིས་གཞུ་བ་ལས། ལྕག་གཅིག་ཕོག་སྟེ་བཏང་ན་དེའི་ཚེ་མི་དེ་བདེ་བའི་འདུ་ཤེས་སྐྱེ་སྟེ། དེ་བས་ན་བདེ་བ་མེད་པ་ལ་ནན་ཏན་གྱིས་བདེ་བར་འདུ་ཤེས་སྐྱེད་དོ། །འོད་སྲུང་གིས་གསོལ་པ། མི་དེ་ལྕག་གཅིག་ཕོག་པ་ལ་བདེ་བར་འདུ་ཤེས་པ་མ་ལགས་ཀྱི། དེ་ལས་ཐར་བས་བདེ་བར་འདུ་ཤེས་པ་ལགས་སོ། །བཀའ་
སྩལ་པ། འོད་སྲུང་དེ་བས་ངས་སྔོན་ཤཱཀྱ་མིང་ཆེན་ལ་ཕུང་པོ་ལྔ་ལ་བདེ་བ་གསུངས་པ་ཡང་དག་པ་སྟེ། བརྫུན་པ་མ་ཡིན་ནོ། །འོད་སྲུང་ཚོར་བ་རྣམ་པ་གསུམ་དང་། སྡུག་བསྔལ་རྣམ་པ་གསུམ་ཡོད་དོ། །ཚོར་བ་རྣམ་པ་གསུམ་ནི་འདི་ལྟ་སྟེ། བདེ་བར་ཚོར་བ་དང་། སྡུག་བསྔལ་བར་ཚོར་བ་དང་། སྡུག་བསྔལ་བ་ཡང་མ་ཡིན་བདེ་བ་ཡང་མ་ཡིན་པར་ཚོར་བའོ། །སྡུག་བསྔལ་གསུམ་ནི་སྡུག་བསྔལ་བའི་ཡང་སྡུག་བསྔལ་དང་། འདུ་བྱེད་ཀྱི་སྡུག་བསྔལ་དང་། འགྱུར་བའི་སྡུག་བསྔལ་ལོ། །རིགས་ཀྱི་བུ་སྡུག་བསྔལ་གྱི་ཚོར་བ་ནི་སྡུག་བསྔལ་བའི་སྡུག་བསྔལ་དང་། འདུ་བྱེད་ཀྱི་སྡུག་བསྔལ་དང་། འགྱུར་བའི་སྡུག་བསྔལ་དང་། སྡུག་བསྔལ་གསུམ་དུ་སྦྱར་རོ། །ལྷག་མ་གཉིས་ནི་འདུ་བྱེད་ཀྱི་སྡུག་བསྔལ་དང་། འགྱུར་བའི་སྡུག་བསྔལ་དང་སྦྱར་རོ། །རིགས་ཀྱི་བུ་དེའི་རྒྱུ་དེའི་རྐྱེན་གྱིས་ན་སྐྱེ་བ་དང་། འཆི་བའི་ནང་ན་ཡང་དག་པར་བདེ་བར་ཚོར་བ་ཡོད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྡུག་བསྔལ་དང་བདེ་བ་ཉིད་ཐ་དད་པ་མ་ཡིན་པར་རྟོགས་པས་ཐམས་ཅད་སྡུག་བསྔལ་བའོ་ཞེས་གསུངས་སོ། །རིགས་ཀྱི་བུ་སྐྱེ་བ་དང་འཆི་བའི་ནང་ན་ཡང་དག་པར་ན་བདེ་བ་མེད་དེ། སངས་རྒྱས་དང་བྱང་ཆུབ་སེམས་དཔའ་རྣམས་ནི་འཇིག་རྟེན་པའི་རྗེས་སུ་བདེ་བ་ཡོད་དོ་ཞེས་གསུངས་པ་ཡིན་ནོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་གསོལ་པ། སངས་རྒྱས་དང་བྱང་ཆུབ་སེམས་དཔའ་རྣམས་འཇིག་རྟེན་གྱི་དབང་དུ་མཛད་དེ་རྗེས་སུ་གསུངས་པ་འདི་བརྫུན་དུ་མི་འགྱུར་རམ། བཅོམ་ལྡན་འདས་ཀྱིས་གསུངས་པ་ལྟར་ན་གང་དགེ་བ་བགྱིད་པ་ནི་དེའི་འབྲས་བུ་མྱོང་བར་འགྱུར། ཚུལ་ཁྲིམས་བསྲུངས་པས་ནི་ལུས་བདེ་བ་དང་། སྡུག་བསྔལ་མི་མྱོང་བ་ནས་བྱ་བ་ཐམས་ཅད་རྫོགས་པའི་བར་དུ་འགྱུར་བ་ནི་མཆོག་ཏུ་བདེ་བར་འགྱུར་བ་ལགས་ན། མདོ་སྡེ་དེ་དག་ལ་སོགས་པ་ལས་བདེ་བ་མྱོང་བར་གསུངས་པ་དེ་དག་ཀྱང་བརྫུན་དུ་
མི་འགྱུར་རམ། གལ་ཏེ་བརྫུན་དུ་འགྱུར་ན་ལྟ། སངས་རྒྱས་བཅོམ་ལྡན་འདས་བསྐལ་པ་ཚད་མེད་གྲངས་མེད་པ་བརྒྱ་སྟོང་གི་བར་དུ་བྱང་ཆུབ་བསྒྲུབས་པ་ན་བརྫུན་དུ་སྨྲ་བ་ཡོངས་སུ་སྤངས་ཏེ་དེ་ཡང་འདི་སྐད་དུ་གསུངས་ན་དེའི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གོང་དུ་ཚིགས་སུ་བཅད་པ་ལས་བདེ་བ་མྱོང་བར་བཤད་པ་ནི་བྱང་ཆུབ་ཀྱི་ལམ་གྱི་རྩ་བ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་སྐྱེ་བར་འགྱུར་བས་ན་དེའི་ཕྱིར་སྔར་མདོ་སྡེ་དག་ལས་བདེ་བའི་མཚན་ཉིད་དེ་སྐད་ཅེས་གསུངས་པ་ཡིན་ནོ། །རིགས་ཀྱི་བུ་དཔེར་ན་འཇིག་རྟེན་གྱི་དགོས་པའི་ལོངས་སྤྱོད་ནི་བདེ་བའི་རྒྱུར་འགྱུར་ཏེ། བདེ་བ་ཞེས་བྱའོ། །འདི་ལྟ་སྟེ་ན་ཆུང་བཟང་མོ་དང་། ཆང་ཞིམ་པོ་དང་། ཁ་ཟས་རོ་མཆོག་དང་། སྐོམ་པས་གདུངས་པ་ན་ཆུ་དང་ཕྲད་པ་དང་། གྲང་བའི་ཚེ་མེ་དང་ཕྲད་པ་དང་། གོས་དང་། ལུས་ཀྱི་རྒྱན་དང་། བལ་གླང་དང་། རྟ་དང་ཤིང་རྟ་དང་། བྲན་ཕོ་དང་བྲན་མོ་དང་། ལས་བྱེད་པའི་མི་དང་། གསེར་དང་། དངུལ་དང་། བཻ་དཱུརྱ་དང་། བྱི་རུ་དང་། མུ་ཏིག་དང་། བང་མཛོད་དང་། ནས་འབྲས་ལ་སོགས་པ་ནི་འཇིག་རྟེན་གྱི་དགོས་པ་སྟེ། བདེ་བའི་རྒྱུར་འགྱུར་བས་ན་བདེ་བ་ཞེས་བྱའོ། །རིགས་ཀྱི་བུ་དངོས་པོ་དེ་དག་ལ་སོགས་པས་སྡུག་བསྔལ་ཡང་སྐྱེ་བར་བྱེད་དོ། །འདི་ལྟ་སྟེ་བུད་མེད་ཀྱི་ཕྱིར་སྐྱེས་པ་དག་སྡུག་བསྔལ་བ་དང་། མི་དགའ་བ་དང་། མྱ་ངན་བྱེད་པ་དང་། ཆོ་ངེ་རྡུང་བ་དང་། སྲོག་གི་བར་དུ་ཡང་བར་ཆད་དུ་འགྱུར་བ་ཡོད་དོ། །ཆང་དང་ཟས་ཞིམ་པོ་ནས་བང་མཛོད་ཀྱི་བར་དུ་ཡང་སྡུག་བསྔལ་ཆེན་པོ་སྐྱེ་བར་འགྱུར་ཏེ། དེ་བས་ན་ཐམས་ཅད་སྡུག་བསྔལ་ཡིན་གྱི་བདེ་བའི་མཚན་ཉིད་མེད་དོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་ནི་སྡུག་བསྔལ་བརྒྱད་ལ་སྡུག་བསྔལ་བར་ཤེས་ཏེ་བདེ་བ་མེད་དོ། །རིགས་ཀྱི་བུ་ཉན་ཐོས་དང་། རང་སངས་རྒྱས་ལ་སོགས་པ་ནི་བདེ་བའི་རྒྱུ་མི་ཤེས་པས་ན་དེ་དག་གི་ཕྱིར་སྡུག་བསྔལ་ཐ་མ་ལ་བདེ་
བའི་མཚན་ཉིད་ཡོད་པར་སྨྲའོ། །བྱང་ཆུབ་སེམས་དཔའ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་ལ་གནས་པ་འབའ་ཞིག་ནི་སྡུག་བསྔལ་གྱི་རྒྱུ་དང་། བདེ་བའི་རྒྱུ་རྟོགས་ཤིང་ཤེས་སོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་གནས་པ་ན། ཀུན་འབྱུང་གི་བདེན་པ་རྟོགས་པ་ཞེ་ན། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཀུན་འབྱུང་གི་བདེན་པ་འདི་ཕུང་པོའི་རྒྱུ་དང་རྐྱེན་ཡིན་པར་རྟོགས་སོ། །ཀུན་འབྱུང་ཞེས་བྱ་བ་ནི་ཕྱིར་ཡང་སྲིད་པ་ལ་འདོད་པ་སྟེ། འདོད་པ་ལ་རྣམ་པ་གཉིས་སོ། །བདག་གི་ལུས་འདོད་པ་དང་། དགོས་པ་འདོད་པའོ། །ཡང་རྣམ་པ་གཉིས་ཏེ། འདོད་པ་ལྔ་མ་ཐོབ་པ་ལ་སེམས་རྩེ་གཅིག་ཏུ་ཚོལ་བ་དང་། རྙེད་ནས་ཤིན་ཏུ་ཆགས་པ་ལ་བཟོད་པར་བྱེད་པའོ། །གཞན་ཡང་རྣམ་པ་གསུམ་སྟེ། འདོད་པའི་འདོད་པ་དང་། གཟུགས་ཀྱི་འདོད་པ་དང་། གཟུགས་མེད་པའི་འདོད་པའོ། །གཞན་ཡང་རྣམ་པ་གསུམ་སྟེ། ལས་ཀྱི་རྒྱུ་དང་རྐྱེན་ལ་འདོད་པ་དང་། ཉོན་མོངས་པའི་རྒྱུ་དང་རྐྱེན་ལ་འདོད་པ་དང་། སྡུག་བསྔལ་གྱི་རྒྱུ་དང་རྐྱེན་ལ་འདོད་པའོ། །རབ་ཏུ་བྱུང་བ་ལ་འདོད་པ་རྣམ་པ་བཞི འོ། །ཆོས་གོས་དང་། བསོད་སྙོམས་དང་། མལ་ཆ་དང་། ནད་ཀྱི་རྐྱེན་སྨན་ནོ། །གཞན་ཡང་རྣམ་པ་ལྔ་སྟེ། ཕུང་པོ་ལྔ་ལ་ཆགས་ནས་དགོས་པའི་རྗེས་སུ་ཐམས་ཅད་འདོད་དོ། །རྣམ་པར་རྟོག་པ་ཚད་མེད་མཐའ་ཡས་པའོ། །རིགས་ཀྱི་བུ་འདོད་པ་ལ་ཡང་རྣམ་པ་གཉིས་ཏེ། དགེ་བ་ལ་འདོད་པ་དང་། མི་དགེ་བ་ལ་འདོད་པའོ། །མི་དགེ་བ་ལ་འདོད་པ་ནི་གླེན་པ་འབའ་ཞིག་འདོད་དོ། །དགེ་བ་ལ་འདོད་པ་ནི་བྱང་ཆུབ་སེམས་དཔའ་རྣམས་འདོད་དོ། །དགེ་བའི་ཆོས་འདོད་པ་ལ་ཡང་རྣམ་པ་གཉིས་ཏེ། མི་དགེ་བ་དང་། དགེ་བའོ། །ཐེག་པ་གཉིས་པོ་ཚོལ་བ་ནི་མི་དགེ་བའོ། །ཐེག་པ་ཆེན་པོ་ཚོལ་བ་ནི་དགེ་བའོ། །རིགས་ཀྱི་བུ་བྱིས་པ་མ་རབས་ཀྱི་འདོད་པ་ནི་
ཀུན་འབྱུང་ཞེས་བྱ་སྟེ་བདེན་པ་མ་ཡིན་ནོ། །བྱང་ཆུབ་སེམས་དཔའི་འདོད་པ་ནི་བདེན་པ་ཞེས་བྱ་སྟེ། ཀུན་འབྱུང་མ་ཡིན་ནོ། །དེ་ཅིའི་ཕྱིར་ཞེ་ན། སེམས་ཅན་བསྒྲལ་བའི་དོན་གྱི་ཕྱིར་སྐྱེ་བ་ལེན་གྱི། འདོད་པའི་ཕྱིར་སྐྱེ་བ་ལེན་པ་ནི་མ་ཡིན་ནོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་གསོལ་པ། སངས་རྒྱས་བཅོམ་ལྡན་འདས་ཀྱི་མདོ་སྡེ་གཞན་དག་ལས་སེམས་ཅན་དག་གི་ཕྱིར་ལས་ནི་རྒྱུ་དང་རྐྱེན་དུ་འགྱུར་རོ་ཞེས་གསུངས། བར་བར་ནི་ང་རྒྱལ་རྒྱུར་འགྱུར་རོ་ཞེས་གསུངས། བར་བར་ནི་རེག་བྱ་དྲུག་རྒྱུར་འགྱུར་རོ་ཞེས་གསུངས། བར་བར་ནི་མ་རིག་པ་ཕུང་པོ་ལྔར་འགྱུར་ཏེ། རྒྱུ་དང་རྐྱེན་དུ་འགྱུར་རོ་ཞེས་གསུངས་ན། དེ་ཅིའི་སླད་དུ་འཕགས་པའི་བདེན་པ་བཞི་ལས་འདོད་པའི་མཚན་ཉིད་འབའ་ཞིག་ཕུང་པོ་ལྔའི་རྒྱུར་འགྱུར་ཞེས་གསུངས། བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་བཀའ་སྩལ་པ། ལེགས་སོ་ལེགས་སོ། །རིགས་ཀྱི་བུ་ཁྱོད་ཀྱིས་སྨྲས་པ་བཞིན་ཏེ། རྒྱུ་དང་རྐྱེན་གཞན་དག་ཀྱང་རྒྱུར་མི་འགྱུར་བ་ནི་མ་ཡིན་མོད་ཀྱི། ཕུང་པོ་ལྔའི་རྒྱུ་ནི་མདོར་ན་འདོད་པ་ལས་གྱུར་ཏོ། །རིགས་ཀྱི་བུ་དཔེར་ན། རྒྱལ་པོ་ཆེན་པོ་གཤེགས་ན་བློན་པོ་ཆེན་པོ་འཁོར་དང་བཅས་ཏེ་རྗེས་སུ་འགྲོའོ། །འདོད་པ་ཡང་དེ་དང་འདྲ་སྟེ། འདོད་པ་གང་དུ་སྤྱོད་པའི་རྗེས་སུ་ཀུན་ནས་ཉོན་མོངས་པ་རྣམས་ཀྱང་རྗེས་སུ་འགྲོའོ། །དཔེར་ན་གོས་གང་དུ་སྣུམ་པ་དེར་རྡུལ་ཆགས་པ་བཞིན་དུ་འདོད་པ་ཡང་དེ་དང་འདྲ་སྟེ། གང་དུ་འདོད་པར་ལས་ཀྱི་ཉོན་མོངས་པ་ཡང་དེ་ལ་གནས་སོ། །རིགས་ཀྱི་བུ་གཞན་ཡང་འདི་ལྟ་སྟེ། དཔེར་ན་གང་དུ་བརླན་པའི་ས་ལ་ནི་མྱུ་གུ་སྐྱེའོ། །འདོད་པ་ཡང་དེ་དང་འདྲ་སྟེ། ལས་ཀྱི་ཉོན་མོངས་པའི་མྱུ་གུ་ཐམས་ཅད་སྐྱེ་བར་བྱེད་དོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པ་ལ་གནས་པ་དག་ནི་འདོད་པ་ལ་རྣམ་པ་དགུར་ཤིན་ཏུ་རྟོགས་སོ། །འདི་ལྟ་སྟེ་བུ་ལོན་མ་འཁོར་བ་ལྟ་བུ་དང་། ཆུང་མ་སྲིན་མོ་ལྟ་བུ་དང་།
མེ་ཏོག་བཟང་པོའི་སྡོང་བུ་ལ་སྦྲུལ་གདུག་པས་དཀྲིས་པ་ལྟ་བུ་དང་། ཟས་ཡིད་དུ་མི་འོང་ཞིང་མི་འདོད་པ་ནན་གྱིས་ཟ་བ་ལྟ་བུ་དང་། སྦྲུལ་འཚོང་མ་ལྟ་བུ་དང་། འབའ་ལུ་ཀའི་འབྲས་བུ་ལྟ་བུ་དང་། རྨའི་ཤ་རྨན་ལྟ་བུ་དང་། རླུང་དྲག་པོ་ལྟ་བུ་དང་། སྐར་མ་ཕོད་ལྟ་བུའོ། །དེ་ལ་ཇི་ལྟར་ན་བུ་ལོན་མ་འཁོར་བ་ལྟ་བུ་ཞེ་ན། རིགས་ཀྱི་བུ་དཔེར་ན་མི་དབུལ་པོ་ཞིག་བུ་ལོན་ཆགས་པས་རྫོགས་སུ་ཉེ་སྟེ། མཇུག་ལུས་ན་བཟུང་བ་ལས་མི་ཐར་ཏོ། །ཉན་ཐོས་དང་རང་སངས་རྒྱས་ཀྱང་དེ་དང་འདྲ་སྟེ། འདོད་པའི་བག་ཆགས་ཀྱི་ལྷག་མ་ལུས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་མི་རྒྱའོ། །རིགས་ཀྱི་བུ་དེ་ལྟར་ན་བུ་ལོན་མ་འཁོར་བ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་ཆུང་མ་སྲིན་མོ་ལྟ་བུ་ཞེ་ན། རིགས་ཀྱི་བུ་དཔེར་ན་མི་ཞིག་ཆུང་མར་སྲིན་མོ་བླངས་ན་བུ་བཙས་མ་ཐག་ཏུ་བུ་ཟའོ། །བུ་ཟད་ནས་ཁྱོ་ཡང་ཟའོ། །རིགས་ཀྱི་བུ་འདོད་པའི་སྲིན་མོ་ཡང་དེ་དང་འདྲ་སྟེ། སེམས་ཅན་དག་དགེ་བའི་རྩ་བ་ཇི་ཙམ་བསྐྱེད་པ་སྐྱེས་མ་ཐག་ཏུ་མེད་པར་བྱེད་དོ། །དགེ་བའི་རྩ་བ་ཟད་པར་བྱས་ནས་སེམས་ཅན་དག་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་དུ་སྐྱེ་བར་བྱེད་དེ། བྱང་ཆུབ་སེམས་དཔའ་ནི་མ་གཏོགས་སོ། །དེ་ལྟར་ན་ཆུང་མ་སྲིན་མོ་ལྟ་བུ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་མེ་ཏོག་བཟང་པོའི་སྡོང་བུ་ལ་སྦྲུལ་གདུག་པས་དཀྲིས་པ་ལྟ་བུ་ཞེ་ན། དཔེར་ན་མེ་ཏོག་བཟང་པོ་ལ་དགའ་བ་ཞིག་མེ་ཏོག་གི་སྡོང་བུ་ལ་སྦྲུལ་གདུག་པའི་ཉེན་ཡོད་པར་མི་ཤེས་པས་དྲུང་དུ་བསྙེན་ནས་མེ་ཏོག་བཟུང་ངོ་། །བཟུང་མ་ཐག་ཏུ་སྦྲུལ་གྱིས་ཟིན་ནས་ཚེའི་དུས་བྱས་སོ། །བུས་པ་མ་རབས་ཐམས་ཅད་ཀྱང་དེ་དང་འདྲ་སྟེ། འདོད་པ་ལྔའི་མེ་ཏོག་ལ་ཆགས་པས་འདོད་པའི་སྦྲུལ་གདུག་པའི་སྐྱོན་ཡོད་པར་མི་ཤེས་པས་ལེན་ཏོ། །བླངས་ནས་འདོད་པའི་གདུག་པས་ཟིན་ཏེ་ཚེའི་དུས་བྱས་ནས་ངན་སོང་གསུམ་དུ་ལྷུང་སྟེ། བྱང་ཆུབ་སེམས་དཔའ་ནི་མ་
གཏོགས་སོ། །དེ་ལྟར་ན་མེ་ཏོག་བཟང་པོའི་སྡོང་བུ་ལ་སྦྲུལ་གདུག་པས་དཀྲིས་པ་ལྟ་བུ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་ཡིད་དུ་མི་འོང་བའི་ཟས་ངན་པ་ནན་གྱིས་ཟ་བ་ལྟ་བུ་ཞེ་ན། འདི་ལྟ་སྟེ་ལ་ལ་ཞིག་ཟས་ངན་པ་ཡིད་དུ་མི་འོང་བ་ནན་གྱིས་ཟོས་ན། ཟོས་མ་ཐག་ཏུ་ལྟོ་བ་ན་སྟེ་ཚད་པར་འཁྲུས་ཏེ་འཆིའོ། །འདོད་པའི་ཟས་ཀྱང་དེ་དང་འདྲ་སྟེ། ལམ་རྒྱུད་ལྔའི་སེམས་ཅན་དག་འདོད་པ་ལ་ནན་གྱིས་ཆགས་པས་དེའི་རྒྱུ་དེའི་རྐྱེན་གྱིས་ངན་སོང་གསུམ་དུ་ལྟུང་སྟེ། བྱང་ཆུབ་སེམས་དཔའ་ནི་མ་གཏོགས་སོ། །དེ་ལྟར་ན་ཟས་ཡིད་དུ་མི་འོང་བ་ནན་གྱིས་ཟ་བ་ལྟ་བུ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་བུད་མེད་སྦྲུལ་འཚོང་མ་ལྟ་བུ་ཞེ་ན། དཔེར་ན་མི་གླེན་པ་དག་ནི་བུད་མེད་སྦྲུལ་འཚོང་མ་དང་འདྲུལ་ཏེ། བུད་མེད་དེས་གཅམ་དང་སྒྱུ་རྣམ་པ་སྣ་ཚོགས་ཀྱིས་མིའི་ནོར་ཀུན་ཕྲོག་གོ །དེའི་ནོར་ཟད་ནས་ནི་སྐྲོད་དོ། །འདོད་པའི་སྦྲུལ་འཚོང་མ་ཡང་དེ་དང་འདྲ་སྟེ། གླེན་པ་ཤེས་རབ་མེད་པ་དག་དེ་ལ་བསྟེན་ཏེ་འདོད་པ་དེས་དགེ་བའི་ཆོས་ཐམས་ཅད་འཕྲོག་གོ །དགེ་བའི་ཆོས་ཀུན་ཟད་པར་བྱས་ནས་ངན་སོང་གསུམ་དུ་ལྷུང་བར་སྐྲོད་དེ། བྱང་ཆུབ་སེམས་དཔའ་འབའ་ཞིག་ནི་མ་གཏོགས་སོ། ། དེ་ལྟར་ན་བུད་མེད་སྦྲུལ་འཚོང་མ་ལྟ་བུ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་འབའ་ལུ་ཀའི་འབྲས་བུ་ལྟ་བུ་ཞེ་ན། དཔེར་ན་འབའ་ལུ་ཀའི་འབྲས་བུ་བྱས་ཟོས་ན། ཟོས་མ་ཐག་ཏུ་ཕྱིར་བྱུང་ནས་ས་ལ་གཏུགས་པ་རླུང་གིས་བདས་ཏེ། ཤིང་དྲུང་དུ་ཕྱིན་ན་དེ་མ་ཐག་ཏུ་སྐྱེས་ཏེ། ཤིང་དེ་ཉིད་ལ་དཀྲིས་གླགས་ནས་ཤིང་ནྱ་གྲོ་དྷ་ཡང་ཚད་དུ་ཕྱིན་པར་མི་སྐྱེ་བར་བྱེད་ཅིང་སྐམས་པར་ཡང་འགྱུར་རོ། །འདོད་པའི་འབའ་ལུ་ཀའི་འབྲས་བུ་ཡང་དེ་དང་འདྲ་སྟེ། བུས་པ་མ་རབས་ཀྱི་དགེ་བའི་རྩ་བ་ཅི་ཡོད་པ་དཀྲིས་གླགས་ནས་མི་འཕེལ་མི་སྐྱེ་བ་དང་མེད་པར་འགྱུར་ཞིང་སྐམས་པའི་བར་དུའང་བྱེད་དོ། །སྐམས་ཤིང་མེད་པར་བྱས་ནས་ཚེ་འཕོས་པའི་འོག་ཏུ་ངན་སོང་གསུམ་དུ་ལྟུང་བར་བྱེད་དེ། བྱང་ཆུབ་སེམས་དཔའ་ནི་མ་གཏོགས་སོ། །དེ་ལྟར་ན་འབའ་ལུ་ཀའི་འབྲས་
བུ་ལྟ་བུ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་རྨའི་ཤ་རྨེན་ལྟ་བུ་ཞེ་ན། དཔེར་ན་མི་ཞིག་རྨ་བྱུང་སྟེ་ཤ་རྨེན་ཡོད་ན་གསོ་དགོས་ཏེ་གཏང་དུ་མི་རུང་ངོ་། །བཞག་སྟེ་མ་གསོས་ན་རྨ་ཡང་རེད་ལ་འབུ་ཡང་འཇུག་སྟེ། དེའི་རྐྱེན་གྱིས་ཚེའི་དུས་ཀྱང་བྱེད་པར་འགྱུར་རོ། །བྱིས་པ་གླེན་པའི་འདོད་པ་ལྔའི་འབྲས་བུ་ཡང་དེ་དང་འདྲ་སྟེ། འདོད་པ་ནི་རྨའི་ནང་ན་ཤ་རྨེན་ལྟ་བུ་ཡིན་པས་བརྩོན་འགྲུས་སུ་གསོ་དགོས་སོ། །འདོད་པའི་ཤ་རྨེན་མ་གསོས་ན། ཚེ་འཕོས་མ་ཐག་ཏུ་ངན་སོང་གསུམ་དུ་ལྟུང་སྟེ། བྱང་ཆུབ་སེམས་དཔའ་ནི་མ་གཏོགས་སོ། །རིགས་ཀྱི་བུ་དེ་ལ་ཇི་ལྟར་ན་རླུང་དྲག་པོ་ལྟ་བུ་ཞེ་ན། དཔེར་ན་རླུང་དྲག་པོ་ལངས་ན་རི་ཡང་རྙིལ། གད་པ་ཡང་རྡིག་ཤིང་ཡང་རྩ་བ་ནས་འདོན་ཏོ། །འདོད་པའི་རླུང་དྲག་པོ་ཡང་དེ་དང་འདྲ་སྟེ། ཕ་མ་ལ་ཡང་ངན་སེམས་སྐྱེད་ལ། ཤེས་རབ་ཆེན་པོའི་མཆོག་རི་བོ་ལ་སོགས་པའི་བླ་ན་མེད་པའི་བྱང་ཆུབ་ཀྱི་རྩ་བ་ཤིན་ཏུ་བརྟན་པ་ཡང་རྩ་ནས་འབྱིན་ཏེ། བྱང་ཆུབ་སེམས་དཔའ་ནི་མ་གཏོགས་སོ། །དེ་ལྟར་ན་རླུང་དྲག་པོ་ལྟ་བུ་ཞེས་བྱའོ། །དེ་ལ་ཇི་ལྟར་སྐར་མ་ཕོད་ལྟ་བུ་ཞེ་ན། དཔེར་ན་སྐར་མ་ཕོད་བྱུང་ན། གང་དུ་བྱུང་བའི་ཡུལ་དེར་མུ་གེ་དང་ནད་དང་འཁྲུག་པ་འབྱུང་ངོ་། །འདོད་པའི་སྐར་མ་ཕོད་ཀྱང་དེ་དང་འདྲ་སྟེ། དགེ་བའི་རྩ་བ་ཐམས་ཅད་ཀྱི་ས་བོན་གཅོད་ཅིང་བྱིས་པ་མ་རབས་དག་དབུལ་ཕོངས་པ་དང་། མུ་གེ་འབྱུང་བ་དང་། ཉོན་མོངས་པའི་ནད་སྐྱེ་བ་དང་། འཁོར་བར་འཁོར་ཞིང་སྡུག་བསྔལ་རྣམ་པ་སྣ་ཚོགས་མྱོང་བར་བྱེད་དེ། བྱང་ཆུབ་སེམས་དཔའ་ནི་མ་གཏོགས་སོ། །དེ་ལྟར་ན་སྐར་མ་ཕོད་ལྟ་བུ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་གནས་པ་ན་འདོད་པའི་ཀུན་ནས་ཉོན་མོངས་པ་ལ་རྣམ་པ་འདི་དགུ་ལྟ་བུར་རྟོགས་སོ། །རིགས་ཀྱི་བུ་དེ་བས་ན་བྱིས་པ་མ་རབས་ནི་སྡུག་བསྔལ་ཡོད་ཀྱི་བདེན་པ་མེད་དོ། །ཉན་ཐོས་དང་རང་སངས་རྒྱས་ནི་
སྡུག་བསྔལ་ཡང་ཡོད། སྡུག་བསྔལ་གྱི་བདེན་པ་ཡང་ཡོད་ཀྱི། ཡང་དག་པའི་བདེན་པ་ནི་མེད་དོ། །བྱང་ཆུབ་སེམས་དཔའ་རྣམས་ནི་སྡུག་བསྔལ་ཤེས་ཤིང་སྡུག་བསྔལ་མེད་དེ་དེ་བས་ན་སྡུག་བསྔལ་བ་ནི་མེད་ཀྱི་ཡང་དག་པའི་བདེན་པ་ནི་ཡོད་དོ། །བྱིས་པ་མ་རབས་ནི་ཀུན་འབྱུང་ནི་ཡོད་ཀྱི། བདེན་པ་ནི་མེད་དོ། །ཉན་ཐོས་དང་རང་སངས་རྒྱས་ནི་ཀུན་འབྱུང་ཡང་ཡོད་ཀུན་འབྱུང་གི་བདེན་པ་ཡང་ཡོད་དོ། །བྱང་ཆུབ་སེམས་དཔའ་ནི་ཀུན་འབྱུང་ཤེས་ཤིང་ཀུན་འབྱུང་མེད་དེ་དེ་བས་ན་ཀུན་འབྱུང་ནི་མེད་ཀྱི། ཡང་དག་པའི་བདེན་པ་ནི་ཡོད་དོ། །ཉན་ཐོས་དང་རང་སངས་རྒྱས་ནི་འགོག་པ་ཡོད་ཀྱང་ཡང་དག་པ་མ་ཡིན། བྱང་ཆུབ་སེམས་དཔའ་སེམས་དཔའ་ཆེན་པོ་ནི་འགོག་པ་ཡང་ཡོད། ཡང་དག་པའི་བདེན་པ་ཡང་ཡོད་དོ། །ཉན་ཐོས་དང་རང་སངས་རྒྱས་ནི་ལམ་ཡོད་ཀྱང་བདེན་པ་ནི་མ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་ལམ་ཡང་ཡོད་ལ་ཡང་དག་པའི་བདེན་པ་ཡང་ཡོད་དོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་གནས་པ་ན་འགོག་པ་མཐོང་ཞིང་འགོག་པའི་བདེན་པ་མཐོང་བ་ཡིན་ཞེ་ན། འདི་ལྟ་སྟེ་ཉོན་མོངས་པ་ཐམས་ཅད་ཡོངས་སུ་བཅད་པའོ། །གལ་ཏེ་ཉོན་མོངས་པ་བཅད་ན་རྟག་པ་ཞེས་བྱའོ། །ཉོན་མོངས་པའི་མེ་བསད་པས་ན་རབ་ཏུ་ཞི་བ་ཞེས་བྱའོ། །ཉོན་མོངས་པ་བགགས་པས་ན་བདེ་བ་མྱོང་བར་གྱུར་ཏོ། །སངས་རྒྱས་དང་བྱང་ཆུབ་སེམས་དཔའ་རྣམས་ནི་རྟེན་ཅིང་འབྲེལ་པར་འབྱུང་བ་འདོད་པས་ཡོངས་སུ་དག་པ་ཞེས་བྱའོ། །སྲིད་པ་ཉི་ཤུ་ལྔ་པོ་ཕྱིར་མི་ལེན་པས་ན་འཇིག་རྟེན་ལས་འདས་པ་ཞེས་བྱའོ། །འཇིག་རྟེན་ལས་འདས་པས་ན་བདག་ཅེས་བྱའོ། །གཟུགས་དང་། སྒྲ་དང་། དྲི་དང་། རོ་དང་། རེག་བྱ་དང་། སྐྱེས་པ་དང་། བུད་མེད་དང་། སྐྱེ་བ་དང་། གནས་པ་དང་། འགོག་པ་དང་། སྡུག་བསྔལ་དང་། བདེ་བ་དང་། སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པ་ལ་མཚན་
མར་མི་ལེན་པས་ན་མཐར་ཕྱིན་པ་རབ་ཏུ་ཞི་བ་ཡང་དག་པའི་བདེན་པ་ཞེས་བྱའོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའི་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་གནས་པ་ན་འགོག་པའི་འཕགས་པའི་བདེན་པ་ལ་ཡོངས་སུ་རྟོག་པ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པ་ལ་གནས་པ་ན་ལམ་གྱི་འཕགས་པའི་བདེན་པ་རྟོག་པ་ཡིན་ཞེ་ན། རིགས་ཀྱི་བུ་དཔེར་ན་མུན་ཁུང་གི་ནང་དུ་མེ་མར་བྱུང་ན་དེའི་ནང་ན་དངོས་པོ་ཆེན་པོ་དང་ཆུང་ངུ་ཀུན་མཐོང་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་ལ་གནས་པ་དག་འཕགས་པའི་ལམ་བརྒྱད་ཀྱི་རྐྱེན་གྱིས་ཆོས་ཐམས་ཅད་མཐོང་བར་འགྱུར་རོ། །འདི་ལྟ་སྟེ་རྟག་པ་དང་། མི་རྟག་པ་དང་། འདུས་བྱས་དང་། འདུས་མ་བྱས་དང་། སེམས་ཅན་དང་སེམས་ཅན་མ་ཡིན་པ་དང་། དངོས་པོ་དང་དངོས་པོ་མ་ཡིན་པ་དང་། བདེ་བ་དང་སྡུག་བསྔལ་དང་། བདག་དང་བདག་མེད་པ་དང་། གཙང་བ་དང་མི་གཙང་བ་དང་། ཉོན་མོངས་པ་དང་ཉོན་མོངས་པ་མ་ཡིན་པ་དང་། ལས་དང་ལས་མ་ཡིན་པ་དང་། བདེན་པ་དང་བདེན་པ་མ་ཡིན་པ་དང་། ཐེག་པ་དང་ཐེག་པ་མ་ཡིན་པ་དང་། ཤེས་པ་དང་ཤེས་པ་མ་ཡིན་པ་དང་། ཡོན་ཏན་དང་ཡོན་ཏན་མ་ཡིན་པ་དང་། བདག་པོ་དང་བདག་པོ་མ་ཡིན་པ་དང་། མཐོང་བ་དང་མཐོང་བ་མ་ཡིན་པ་དང་། གཟུགས་དང་གཟུགས་མ་ཡིན་པ་དང་། ལམ་དང་ལམ་མ་ཡིན་པ་དང་། ཤེས་རབ་དང་ཤེས་རབ་མ་ཡིན་པ་རྣམས་སོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་ལ་གནས་པ་ན་འཕགས་པའི་ལམ་གྱི་བདེན་པ་ལ་ཡོངས་སུ་རྟོག་པ་ཞེས་བྱའོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་
གསོལ་ཏོ། །བཅོམ་ལྡན་འདས་གལ་ཏེ་འཕགས་པའི་ལམ་བརྒྱད་ཀྱི་འཕགས་པའི་བདེན་པ་ལགས་ན། དེའི་དོན་འཐུན་པ་མ་ལགས་སོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པས་སྐབས་ཁ་ཅིག་ཏུ་ཟག་པ་དང་བཅས་པ་སྒྲོལ་བའི་སླད་དུ་དད་པའི་སེམས་ནི་ལམ་ལགས་སོ་ཞེས་གསུངས། སྐབས་ཁ་ཅིག་ཏུ་ནི་བག་བྱེད་པ་ལམ་ལགས་སོ་ཞེས་གསུངས་ཏེ། སངས་རྒྱས་བཅོམ་ལྡན་འདས་རྣམས་བག་བྱས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བས་བྱང་ཆུབ་སེམས་དཔའི་ལམ་གྱི་ཡན་ལག་གོ་ཞེས་ཀྱང་གསུངས། སྐབས་ཁ་ཅིག་ཏུ་ནི་བརྩོན་འགྲུས་ནི་ལམ་ལགས་སོ་ཞེས་གསུངས་ཏེ་དེ་ཡང་དགའ་བོ་ལ་བཀའ་སྩལ་པ། དགའ་བོ་གང་ཞིག་བརྩོན་འགྲུས་ཤིན་ཏུ་བརྩམས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱའོ་ཞེས་ཀྱང་གསུངས། སྐབས་ཁ་ཅིག་ཏུ་ནི་ལུས་ལ་ལུས་ཀྱི་རྗེས་སུ་དྲན་པ་ཉེ་བར་གཞག་པ་ནི་སེམས་རྩེ་གཅིག་ཏུ་དམིགས་ཏེ། བརྩོན་འགྲུས་སུ་ལུས་ལ་ལུས་ཀྱི་རྗེས་སུ་དྲན་པ་ཉེ་བར་གཞག་པ་ལ་ནན་ཏན་བྱས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ་ཞེས་ཀྱང་གསུངས། སྐབས་ཁ་ཅིག་ཏུ་ནི་ཡང་དག་པའི་ཏིང་ངེ་འཛིན་ལམ་ལགས་སོ་ཞེས་ཀྱང་གསུངས་ཏེ། དེ་ཡང་འོད་སྲུང་ཆེན་པོ་ལ་བཀའ་སྩལ་པ་ལྟར་ན་ཡང་དག་པའི་ཏིང་ངེ་འཛིན་ནི་ལམ་ལགས་ཏེ། ཡང་དག་པའི་ཏིང་ངེ་འཛིན་མ་ལགས་པ་ནི་ལམ་ལགས་སོ་ཞེས་མ་གསུངས། ཏིང་ངེ་འཛིན་དུ་ཞུགས་ན་ཕུང་པོ་ལྔ་སྐྱེ་ཞིང་འགོག་པ་ཡིད་ལ་བྱེད་ནུས་པར་འགྱུར་གྱི། ཏིང་ངེ་འཛིན་དུ་མ་ཞུགས་པར་ཡིད་ལ་བྱེད་ནུས་པ་མ་ཡིན་ནོ་ཞེས་ཀྱང་གསུངས། སྐབས་ཁ་ཅིག་ཏུ་ནི་ཆོས་གཅིག་ལ་གང་བསྒོམ་ཞིང་ནན་ཏན་བྱེད་པ་དེས་སེམས་ཅན་ཐམས་ཅད་ཀྱི་མྱ་ངན་དང་། སྡུག་བསྔལ་བ་དང་། འཁྲུག་པ་རྣམས་ཡོངས་སུ་སྦྱང་ཞིང་ཡང་དག་པའི་ཆོས་ཐོབ་པར་འགྱུར་རོ་ཞེས་གསུངས་པ་ནི་འདི་ལྟ་སྟེ། སངས་རྒྱས་རྗེས་སུ་དྲན་པའི་ཏིང་ངེ་འཛིན་
ལགས་སོ་ཞེས་ཀྱང་གསུངས། སྐབས་ཁ་ཅིག་ཏུ་ནི་མི་རྟག་པ་ལ་བསྒོམ་པ་ལམ་ལགས་སོ་ཞེས་ཀྱང་གསུངས་ཏེ། དེ་ཡང་དགེ་སློང་རྣམས་ལ་བཀའ་སྩལ་པ། གང་ཞིག་མི་རྟག་པ་ལ་མང་དུ་བསྒོམས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ་ཞེས་ཀྱང་གསུངས། སྐབས་ཁ་ཅིག་ཏུ་ནི་ཤིན་ཏུ་དབེན་པའི་བས་མཐར་གཅིག་པུ་གནས་ཏེ་ཡིད་ལ་བྱས་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ་ཞེས་ཀྱང་གསུངས། སྐབས་ཁ་ཅིག་ཏུ་ནི་ཕ་རོལ་པོ་གཞན་ལ་ཆོས་བསྟན་པ་ནི་ལམ་ལགས་ཏེ་ཆོས་ཐོས་པས་ཐེ་ཙོམ་གྱི་དྲ་བ་ཆོད་པར་འགྱུར། ཐེ་ཙོམ་གྱི་དྲ་བ་ཆོད་པས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ་ཞེས་ཀྱང་གསུངས། སྐབས་ཁ་ཅིག་ཏུ་ནི་ཚུལ་ཁྲིམས་བསྲུངས་པ་ནི་ལམ་ལགས་སོ་ཞེས་གསུངས་ཏེ། དེ་ཡང་དགའ་བོ་ལ་བཀའ་སྩལ་པ། དགའ་བོ་གང་ཞིག་ཚུལ་ཁྲིམས་སྲུང་བ་ལ་ཤིན་ཏུ་ནན་ཏན་བྱས་ན་གང་ཟག་དེ་ནི་འཁོར་བའི་རྒྱ་མཚོ་ལས་རྒལ་བར་འགྱུར་རོ་ཞེས་ཀྱང་གསུངས། སྐབས་ཁ་ཅིག་ཏུ་ནི་དགེ་བའི་བཤེས་གཉེན་ལ་བསྟེན་པ་ནི་ལམ་ལགས་སོ་ཞེས་གསུངས་ཏེ། དེ་ཡང་དགའ་བོ་ལ་བཀའ་སྩལ་པ། གང་ཞིག་དགེ་བའི་བཤེས་གཉེན་ལ་བསྟེན་ན་ཚུལ་ཁྲིམས་ཡོངས་སུ་དག་པར་འགྱུར་ཏེ། སེམས་ཅན་གང་ཞིག་ང་ལ་བསྙེན་བཀུར་བྱས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་རོ་ཞེས་ཀྱང་གསུངས། སྐབས་ཁ་ཅིག་ཏུ་ནི་བྱམས་པ་བསྒོམ་པ་ནི་ལམ་ལགས་ཏེ། བྱམས་པ་བསྒོམས་ན་ཉོན་མོངས་པ་ཐམས་ཅད་ཆོད་ཅིང་མི་གཡོ་བའི་གནས་ཐོབ་པར་འགྱུར་རོ་ཞེས་ཀྱང་གསུངས། སྐབས་ཁ་ཅིག་ཏུ་ནི་ཤེས་རབ་ནི་ལམ་ལགས་སོ་ཞེས་གསུངས་ཏེ། དེ་ཡང་སྔོན་བཅོམ་ལྡན་འདས་ཀྱིས་དགེ་སློང་མ་སྐྱེ་དགུའི་བདག་མོའི་སླད་དུ་ཕུ་ནུ་མོ་གསུངས་པ་དང་། ཉན་ཐོས་རྣམས་ཀྱང་ཤེས་རབ་ཀྱི་མཚོན་གྱིས་སྲིད་པའི་ཟག་པ་དང་བཅས་པའི་ཉོན་
མོངས་པ་གཅད་དོ་ཞེས་ཀྱང་གསུངས། སྐབས་ཁ་ཅིག་ཏུ་ནི་དེ་བཞིན་གཤེགས་པས་སྦྱིན་པ་ནི་ལམ་ལགས་སོ་ཞེས་གསུངས་ཏེ། དེ་ཡང་སྔོན་སངས་རྒྱས་བཅོམ་ལྡན་འདས་ཀྱིས་རྒྱལ་པོ་སྡེ་རབ་ཏུ་ཕམ་བྱེད་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་ངས་སྔོན་སྦྱིན་པ་མང་དུ་བྱས་པས། དེའི་རྒྱུ་དེའི་རྐྱེན་གྱིས་ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སངས་རྒྱས་པར་རིག་པར་གྱིས་ཤིག་ཅེས་ཀྱང་གསུངས་པ་ལགས་ན། བཅོམ་ལྡན་འདས་ད་གལ་ཏེ་འཕགས་པའི་ལམ་བརྒྱད་ལམ་གྱི་བདེན་པ་ལགས་སོ་ཞེས་གསུངས་ན་མདོ་སྡེ་གཞན་དག་ལས་དེ་སྐད་ཅེས་གསུངས་པ་དག་བརྫུན་དུ་མ་གྱུར་ཏམ། གལ་ཏེ་མདོ་སྡེ་དེ་དག་ལས་འབྱུང་བ་བརྫུན་དུ་མ་གྱུར་ན་ཅིའི་སླད་དུ་དེ་དག་ལས་ཀྱང་འཕགས་པའི་ལམ་བརྒྱད་ནི་ལམ་གྱི་བདེན་པ་ཡིན་ནོ་ཞེས་མ་གསུངས། དེ་ལྟར་མ་གསུངས་པས་ན་སྔོན་དེ་བཞིན་གཤེགས་པས་གསུངས་པ་ཡང་འཁྲུལ་པ་འདྲ་སྟེ། བདག་ནི་ངེས་པས་སངས་རྒྱས་བཅོམ་ལྡན་འདས་ནི་ཡུན་རིང་པོ་ནས་འཁྲུལ་པ་དང་བྲལ་བར་འཚལ་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་བཀའ་སྩལ་པ། ལེགས་སོ་ལེགས་སོ། །རིགས་ཀྱི་བུ་ཁྱོད་ནི་བྱང་ཆུབ་སེམས་དཔའི་ཐེག་པ་ཆེན་པོའི་མདོ་སྡེ་ལས་དོན་ཤིན་ཏུ་ཟབ་མོ་ཤེས་པར་འདོད་པས་དེ་སྐད་ཅེས་ཞུས་པ་ཤིན་ཏུ་ལེགས་སོ། །རིགས་ཀྱི་བུ་མདོ་སྡེ་དེ་དག་ཀྱང་ཐམས་ཅད་ལམ་གྱི་བདེན་པར་འཇུག་གོ །རིགས་ཀྱི་བུ་དད་པ་ནི་ལམ་མོ། །ཞེས་བྱ་བ་དད་པ་ནི་ལམ་ཡིན་ཏེ། དད་པ་ནི་རྩ་བ་ཡིན་པས་ན་བྱང་ཆུབ་ཀྱི་ལམ་གྱི་གྲོགས་སུ་འགྱུར་ཏེ། དེ་བས་ན་ངས་གསུངས་པ་དེ་ལ་འཁྲུལ་པ་མེད་དོ། །རིགས་ཀྱི་བུ་དེ་བཞིན་གཤེགས་པ་ནི་ཚད་མེད་པའི་ཐབས་ལ་ཤིན་ཏུ་མཁས་པས་སེམས་ཅན་གདུལ་བའི་ཕྱིར་དེ་ལྟར་རྣམ་པ་སྣ་ཚོགས་སུ་གསུངས་པ་ཡིན་ནོ། །རིགས་ཀྱི་བུ་འདི་ལྟ་སྟེ་དཔེར་ན་སྨན་པ་མཁས་པ་ནི་སེམས་ཅན་གྱི་ནད་རྣམ་པ་སྣ་ཚོགས་ལ་ཤིན་ཏུ་མཁས་པས་ཇི་ལྟར་ན་བ་བཞིན་དུ་སྨན་སྦྱོར་ཏེ། སྨན་གྱི་མི་རུང་བའི་གཉེན་པོ་ཡང་སྟོན་ན་ཆུ་
འབའ་ཞིག་ནི་མ་གཏོགས་སོ། །དེ་ཡང་འདི་ལྟ་སྟེ་སྒེའུ་གཤེར་གྱི་ཁུ་བ་དང་། ཤིང་མངར་གྱི་ཁུ་བ་དང་། ཤ་ཁ་ར་ནག་པོའི་ཁུ་བ་དང་། ཨ་མ་ལའི་ཁུ་བ་དང་། ནི་པ་ལའི་ཁུ་བ་དང་། པ་ར་ཧ་ལའི་ཁུ་བ་དང་། ཆུ་གྲང་མོ་དང་། ཆུ་ཚ་བ་དང་། དགུན་ཆུ་དང་། བལ་པོ་སེའུ་ཡི་ཆུ་ལ་སོགས་པའོ། །རིགས་ཀྱི་བུ་སྨན་པ་མཁས་པ་ནད་ཀྱི་རྣམ་པ་ལ་མཁས་པ་དག་ཀྱང་སྨན་ལ་མི་རུང་བའི་གཉེན་པོ་མང་མོད་ཀྱི་ཆུ་ནི་དེར་མ་གཏོགས་སོ། །དེ་བཞིན་གཤེགས་པ་ཡང་དེ་དང་འདྲ་སྟེ། ཐབས་ལ་ཤིན་ཏུ་མཁས་པས་ཆོས་ཀྱི་མཚན་ཉིད་གཅིག་གིས་སེམས་ཅན་ཇི་ལྟ་ཇི་ལྟ་བའི་རྗེས་སུ་མིང་དང་མཚན་ཉིད་དེ་དང་དེ་ལྟ་བུས་རྒྱས་པར་འབྱེད་ཅིང་སྟོན་ཏེ། སེམས་ཅན་རྣམས་ཀྱང་ཇི་ལྟར་བསྟན་པ་བཞིན་དུ་ཉམས་སུ་ལེན་ཏོ། །ཉམས་སུ་བླངས་ནས་ནན་ཏན་བྱས་པས་ཉོན་མོངས་པ་ཐམས་ཅད་བྱང་བར་འགྱུར་བ་ནི་ཇི་ལྟར་ནད་པས་སྨན་པའི་ལུང་བཞིན་དུ་བྱས་པས་ནད་འབྱང་བ་བཞིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་མི་ཞིག་སྐད་རྣམ་པ་ཀུན་ལ་མཁས་ཏེ། མི་ཕལ་མོ་ཆེའི་ནང་དུ་འདུག་པ་ལས་མི་ཐམས་ཅད་སྐོམ་གྱིས་ཡོངས་སུ་གདུངས་ཏེ། འདི་སྐད་དུ་བདག་སྐོམ་སྟེ་ཆུ་འདོད་དོ་ཞེས་སྨྲ་ན། མི་དེས་རྣམ་པ་ཇི་བཞིན་དུ་ཆུ་གྲང་མོ་གཙང་མ་སོ་སོར་བྱིན་ན་རྣམ་པ་དེ་དག་ལ་ལ་ནི་ཆུ་འདོད་དོ་ཞེས་ཟེར། ལ་ལ་ནི་པ་ཎི་ཞེས་ཟེར། ལ་ལ་ནི་ཨུ་དི་ཞེས་ཟེར། ལ་ལ་ནི་ས་ལེ་མ་ཞེས་ཟེར། ལ་ལ་ནི་ས་ལི་ཞེས་ཟེར། ལ་ལ་ནི་པ་ན་ཞེས་ཟེར། ལ་ལ་ནི་བདུད་རྩི་ཞེས་ཟེར། ལ་ལ་ནི་འོ་མ་ཞེས་ཟེར་ཏེ། དེ་ལྟར་ཆུའི་མིང་སྨྲ་བ་ཚད་མེད་པ་འཁོར་རྣམས་ལ་སྨྲའོ། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། འཕགས་པའི་ལམ་གཅིག་གིས་ཉན་ཐོས་རྣམས་ལ་དད་པའི་དབང་པོ་ནས་འཕགས་པའི་ལམ་བརྒྱད་ཀྱི་བར་དུ་རྒྱས་པར་སྟོན་ཅིང་འཆད་དོ། །རིགས་ཀྱི་བུ་གཞན་ཡང་འདི་ལྟ་སྟེ། དཔེར་ན་གསེར་མགར་མཁས་པ་ནི་གསེར་གཅིག་པུ་ལ་ལུས་ཀྱི་རྒྱན་རྣམ་པ་སྣ་ཚོགས་ཡིད་
བཞིན་དུ་བྱེད་དོ། །འདི་ལྟ་སྟེ་གདུ་བུ་དང་། སོར་གདུབ་དང་། རྣ་ཆ་དང་། ཅོད་པན་དང་། དཔུང་རྒྱན་ལ་སོགས་པ་རྣམ་པ་སྣ་ཚོགས་མི་འཐུན་མོད་ཀྱི་གསེར་ལས་གཞན་མ་ཡིན་ནོ། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། སངས་རྒྱས་ནི་ལམ་གཅིག་ལས་སེམས་ཅན་གྱི་རྗེས་སུ་རྣམ་པ་སྣ་ཚོགས་སུ་འབྱེད་ཅིང་སྟོན་ཏེ། བར་བར་ནི་རྣམ་པ་གཅིག་ཅེས་སྟོན་ཏོ། །འདི་ལྟ་སྟེ་སངས་རྒྱས་རྣམས་ཀྱི་བྱང་ཆུབ་ནི་གཅིག་སྟེ། གཉིས་སུ་མེད་དོ་ཞེས་གསུངས་པ། ཡང་རྣམ་པ་གཉིས་ཏེ། ཏིང་ངེ་འཛིན་དང་། ཤེས་རབ་བོ་ཞེས་ཀྱང་གསུངས། གཞན་ཡང་རྣམ་པ་གསུམ་དུ་གསུངས་ཏེ། ལྟ་བ་དང་། ཡེ་ཤེས་དང་། ཤེས་རབ་བོ། །གཞན་ཡང་རྣམ་པ་བཞི་སྟེ། མཐོང་བའི་ལམ་དང་། སྒོམ་པའི་ལམ་དང་། མི་སློབ་པའི་ལམ་དང་། སངས་རྒྱས་ཀྱི་ལམ་མོ། །གཞན་ཡང་རྣམ་པ་ལྔ་སྟེ། དད་པ་སྤྱོད་པའི་ལམ་དང་། ཆོས་སྤྱོད་པའི་ལམ་དང་། དད་པས་རྣམ་པར་གྲོལ་བའི་ལམ་དང་། མཐོང་བས་ཕྱིན་པའི་ལམ་དང་། ལུས་ཀྱིས་རིག་པའི་ལམ་མོ། །གཞན་ཡང་རྣམ་པ་དྲུག་སྟེ་རྒྱུན་དུ་ཞུགས་པའི་ལམ་དང་། ལན་ཅིག་ཕྱིར་ལྡོག་པའི་ལམ་དང་། ལན་ཅིག་ཕྱིར་མི་ལྡོག་པའི་ལམ་དང་། དགྲ་བཅོམ་པའི་ལམ་དང་། རང་སངས་རྒྱས་ཀྱི་ལམ་དང་། སངས་རྒྱས་ཀྱི་ལམ་མོ། །གཞན་ཡང་རྣམ་པ་བདུན་ཏེ། དྲན་པ་བྱང་ཆུབ་ཀྱི་ཡན་ལག་དང་། ཆོས་རྣམ་པར་འབྱེད་པ་བྱང་ཆུབ་ཀྱི་ཡན་ལག་དང་། བརྩོན་འགྲུས་བྱང་ཆུབ་ཀྱི་ཡན་ལག་དང་། དགའ་བ་བྱང་ཆུབ་ཀྱི་ཡན་ལག་དང་། ཤིན་ཏུ་སྦྱངས་པ་བྱང་ཆུབ་ཀྱི་ཡན་ལག་དང་། ཏིང་ངེ་འཛིན་བྱང་ཆུབ་ཀྱི་ཡན་ལག་དང་། བཏང་སྙོམས་བྱང་ཆུབ་ཀྱི་ཡན་ལག་གོ །གཞན་ཡང་རྣམ་པ་བརྒྱད་དེ། ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་པའི་ངག་དང་། ཡང་དག་པའི་ལས་ཀྱི་མཐའ་དང་། ཡང་དག་པའི་འཚོ་བ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ་དང་།
ཡང་དག་པའི་ཏིང་ངེ་འཛིན་ཏོ། །གཞན་ཡང་རྣམ་པ་དགུ་སྟེ། འཕགས་པའི་ལམ་ཡན་ལག་བརྒྱད་དང་དད་པའོ། །གཞན་ཡང་རྣམ་པ་བཅུ་སྟེ། སྟོབས་བཅུའོ། །གཞན་ཡང་རྣམ་པ་བཅུ་གཅིག་སྟེ། སྟོབས་བཅུ་དང་བྱམས་པ་ཆེན་པོའོ། །གཞན་ཡང་རྣམ་པ་བཅུ་གཉིས་ཏེ། སྟོབས་བཅུ་དང་། བྱམས་པ་ཆེན་པོ་དང་། སྙིང་རྗེ་ཆེན་པོའོ། །གཞན་ཡང་རྣམ་པ་བཅུ་གསུམ་སྟེ། སྟོབས་བཅུ་དང་། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། སངས་རྒྱས་རྗེས་སུ་དྲན་པའི་ཏིང་ངེ་འཛིན་ནོ། །གཞན་ཡང་རྣམ་པ་བཅུ་དྲུག་སྟེ། སྟོབས་བཅུ་དང་། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། སངས་རྒྱས་རྗེས་སུ་དྲན་པའི་ཏིང་ངེ་འཛིན་དང་། སངས་རྒྱས་ཀྱིས་བརྙེས་པའི་ཡང་དག་པའི་དྲན་པ་ཉེ་བར་གཞག་པ་གསུམ་མོ། །གཞན་ཡང་རྣམ་པ་ཉི་ཤུ་སྟེ། སྟོབས་བཅུ་དང་། མི་འཇིགས་པ་བཞི་དང་། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། སངས་རྒྱས་རྗེས་སུ་དྲན་པའི་ཏིང་ངེ་འཛིན་དང་། ཡང་དག་པའི་དྲན་པ་ཉེ་བར་གཞག་པ་གསུམ་མོ། །རིགས་ཀྱི་བུ་ལམ་དེ་དག་ནི་དངོས་པོ་གཅིག་སྟེ། དེ་བཞིན་གཤེགས་པས་སྔོན་སེམས་ཅན་གྱི་ཕྱིར་རྣམ་པ་སྣ་ཚོགས་སུ་གསུངས་པ་ཡིན་ནོ། །རིགས་ཀྱི་བུ་འདི་ལྟ་སྟེ་དཔེར་ན་མེ་ལྟ་བུ་དངོས་པོ་གཅིག་ཏུ་ཟད་ན་ཚིག་པ་ལས་མེ་མང་པོར་གྱུར་ཏོ། །འདི་ལྟ་སྟེ། ཤིང་གི་མེ་དང་། རྩྭའི་མེ་དང་། ཕུབ་མའི་མེ་དང་། རྟ་རྟུག་དང་། བ་ལང་གི་ལྕི་བའི་མེ་ཞེས་རྣམ་པ་མང་པོར་བཏགས་སོ། །རིགས་ཀྱི་བུ་སངས་རྒྱས་ཀྱི་ལམ་ཡང་དེ་དང་འདྲ་བར་གཅིག་སྟེ་གཉིས་སུ་མེད་མོད་ཀྱི། སེམས་ཅན་གྱི་ཕྱིར་རྣམ་པ་སྣ་ཚོགས་སུ་སོ་སོར་ཕྱེ་བ་ཡིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན། རྣམ་པར་ཤེས་པ་གཅིག་ལས་རྣམ་པ་དྲུག་ཏུ་ཕྱེ་སྟེ། བསྟན་པ་ནི་མིག་གི་སྐབས་སུ་ནི་མིག་གི་རྣམ་པར་ཤེས་པ་ཞེས་བཏགས་པ་ནས་ཡིད་ཀྱི་རྣམ་པར་ཤེས་པའི་བར་དུ་དེ་བཞིན་དུ་རྒྱས་པར་རིག་པར་བྱའོ། །རིགས་ཀྱི་བུ་
ལམ་ཡང་དེ་དང་འདྲ་བར་གཅིག་སྟེ། གཉིས་སུ་མེད་མོད་ཀྱི། དེ་བཞིན་གཤེགས་པས་སེམས་ཅན་དག་གདུལ་བའི་ཕྱིར་རྣམ་པ་སྣ་ཚོགས་སུ་ཕྱེ་ཞིང་བསྟན་པ་ཡིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན། གཟུགས་ལྟ་བུ་གཅིག་ལ་མིག་གིས་མཐོང་བའི་སྐབས་སུ་ནི་གཟུགས་ཞེས་བྱ། རྣ་བས་ཐོས་པའི་སྐབས་སུ་ནི་སྒྲ་ཞེས་བཏགས། སྣས་སྣོམ་པའི་ཚེ་ནི་དྲི་ཞེས་བྱ། ལྕེས་མྱོང་བའི་དུས་སུ་ནི་རོ་ཞེས་བྱ། ལུས་ཀྱིས་ཚོར་བའི་སྐབས་སུ་ནི་རེག་བྱ་ཞེས་བཏགས་སོ། །རིགས་ཀྱི་བུ་ལམ་ཡང་དེ་དང་འདྲ་བར་གཅིག་སྟེ་གཉིས་སུ་མེད་མོད་ཀྱི། སེམས་ཅན་དག་གདུལ་བའི་ཕྱིར་རྣམ་པ་སྣ་ཚོགས་སུ་ཕྱེ་ཞིང་བསྟན་ཏོ། །རིགས་ཀྱི་བུ་དོན་དེ་ལྟ་བས་ན་འཕགས་པའི་ལམ་གྱི་ཡན་ལག་བརྒྱད་ཀྱང་འཕགས་པའི་ལམ་གྱི་བདེན་པ་ཞེས་བྱའོ། །རིགས་ཀྱི་བུ་སངས་རྒྱས་བཅོམ་ལྡན་འདས་ཀྱིས་འཕགས་པའི་བདེན་པ་བཞི་རིམ་གྱིས་བསྟན་ཏེ། དེའི་རྒྱུ་དེའི་རྐྱེན་གྱིས་སེམས་ཅན་ཚད་མེད་པ་སྙེད་འཁོར་བ་ལས་སྒྲོལ་བར་གྱུར་ཏོ། །བྱང་ཆུབ་སེམས་དཔའ་འོད་སྲུང་གིས་སངས་རྒྱས་ལ་གསོལ་པ། བཅོམ་ལྡན་འདས་སྔོན་དུས་གཅིག་ཅིག་ན། ཀླུང་གང་གཱའི་འགྲམ་ཤི་ཤུ་ཞེས་བགྱི་བའི་ཚལ་ན་བཞུགས་ཏེ། དེའི་ཚེ་དེ་བཞིན་གཤེགས་པས་ཤིང་གི་འདབ་མ་གཅིག་ཕྱག་གིས་བླངས་ནས་དགེ་སློང་རྣམས་ལ་བཀའ་སྩལ་པ། ད་ལྟར་ངའི་ལག་ན་ཡོད་པའི་འདབ་མ་མང་ངམ། ས་ལ་བརྟེན་ཏེ་རྩི་ཤིང་ལ་སོགས་པ་སྐྱེས་པ་ཐམས་ཅད་ཀྱི་ལོ་མ་མང་ཞེས་བཀའ་སྩལ་པ་དང་། དགེ་སློང་རྣམས་ཀྱིས་གསོལ་པ། ས་ལ་བརྟེན་ཏེ་སྐྱེས་པའི་རྩི་ཤིང་གི་ལོ་མ་ནི་རབ་ཏུ་མང་སྟེ། དཔག་ཏུ་མ་མཆིས་སོ། །དེ་བཞིན་གཤེགས་པའི་ཕྱག་ན་བསྣམས་པའི་ལོ་མ་ནི་ཤིན་ཏུ་ཡང་ཉུང་སྟེ་སྨོས་སུ་མི་འཚལ་ལོ། །བཀའ་སྩལ་པ། དགེ་སློང་དག་ངས་རྟོགས་པའི་ཆོས་ཐམས་ཅད་ནི་ས་ཆེན་པོ་ལ་བརྟེན་ཏེ་སྐྱེས་པའི་རྩི་ཤིང་ལ་སོགས་པའི་ལོ་མ་དང་འདྲའོ། །སེམས་ཅན་རྣམས་ལ་བསྟན་པ་ནི་ལག་ན་ཁྱེར་
བའི་ལོ་མ་དང་འདྲ་ཞེས་གསུངས་ན། བཅོམ་ལྡན་འདས་དེའི་ཚེ་དེ་སྐད་ཅེས་གསུངས་པ་དེ་དེ་བཞིན་གཤེགས་པས་ཆོས་ཚད་མེད་པ་ཐུགས་སུ་ཆུད་པ། གལ་ཏེ་བདེན་པ་བཞིའི་ནང་དུ་གཏོགས་ན་ནི་དེ་བཞིན་གཤེགས་པས་སྔར་གསུངས་ཀྱང་ལགས། གལ་ཏེ་མ་གཏོགས་ན་ནི་བདེན་པ་ལྔ་མཆིས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་བཀའ་སྩལ་པ། ལེགས་སོ་ལེགས་སོ། །རིགས་ཀྱི་བུ་ཁྱོད་ཀྱིས་དེ་སྐད་ཅེས་ཞུས་པ་ནི་སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་གྱི་ཕྱིར་ཞུས་པ་ལེགས་སོ། །རིགས་ཀྱི་བུ་འདི་ལྟར་ཆོས་ཐམས་ཅད་ནི་འཕགས་པའི་བདེན་པ་བཞིའི་ནང་དུ་གཏོགས་སོ། །འོད་སྲུང་གིས་ཡང་གསོལ་པ། དེ་ལྟར་ཆོས་ཐམས་ཅད་འཕགས་པའི་བདེན་པ་བཞིའི་ནང་དུ་གཏོགས་ན་ཅིའི་སླད་དུ་དེ་བཞིན་གཤེགས་པས་སྨོས་པ་ཙམ་སྟེ་རྒྱས་པར་མ་གསུངས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེར་གཏོགས་པ་ནི་ཡིན་མོད་ཀྱི་བསྟན་ཅིང་བཤད་པ་ཞེས་མི་བྱའོ། །དེ་ཅིའི་ཕྱིར་ཞེ་ན། རིགས་ཀྱི་བུ་འཕགས་པའི་བདེན་པ་རྟོགས་པ་ལ་ཤེས་རབ་རྣམ་པ་གཉིས་ཏེ། འབྲིང་དང་རབ་བོ། །འབྲིང་ནི་ཉན་ཐོས་དང་རང་སངས་རྒྱས་ཀྱི་ཤེས་རབ་བོ། །རབ་ནི་སངས་རྒྱས་དང་བྱང་ཆུབ་སེམས་དཔའི་ཡེ་ཤེས་སོ། །རིགས་ཀྱི་བུ་ཕུང་པོ་རྣམས་ལ་སྡུག་བསྔལ་བར་རྟོགས་པ་ནི་ཤེས་རབ་འབྲིང་ཞེས་བྱའོ། །ཕུང་པོ་རྣམས་ལ་མཚན་ཉིད་གྲངས་མེད་པར་ཕྱེ་སྟེ། ཐམས་ཅད་སྡུག་བསྔལ་བར་ཤེས་པ་ཉན་ཐོས་དང་རང་སངས་རྒྱས་རྣམས་ཀྱིས་ཤེས་པའི་སྤྱོད་ཡུལ་མ་ཡིན་པ་ནི་ཡེ་ཤེས་རབ་ཅེས་བྱའོ། །རིགས་ཀྱི་བུ་དོན་འདི་དག་ནི་མདོ་སྡེ་དག་ལས་ཀྱང་ངས་མ་གསུངས་སོ། །རིགས་ཀྱི་བུ་འཇུག་པ་ཤེས་པ་ནི་སྒོ་ཞེས་ཀྱང་བྱ། སྡུག་བསྔལ་ཞེས་ཀྱང་བྱ་སྟེ། དེ་ནི་ཤེས་རབ་འབྲིང་ཞེས་བྱའོ། །མཚན་ཉིད་རྣམ་པ་སྣ་ཚོགས་སུ་ཕྱེ་སྟེ། ཐམས་ཅད་སྡུག་བསྔལ་བ། ཉན་ཐོས་དང་རང་སངས་རྒྱས་རྣམས་ཀྱིས་ཤེས་པའི་སྤྱོད་ཡུལ་མ་ཡིན་པ་ནི་ཡེ་ཤེས་རབ་
ཅེས་བྱའོ། །དོན་འདི་དག་ཀྱང་མདོ་སྡེ་དེ་དག་ལས་ངས་མ་གསུངས་སོ། །རིགས་ཀྱི་བུ་གང་ཁམས་ཤེས་པ་ནི་ཡན་ལག་ཅེས་བྱ། མཚན་ཉིད་ཅེས་ཀྱང་བྱ། སྡུག་བསྔལ་བ་ཞེས་ཀྱང་བྱ་སྟེ། དེ་ནི་ཤེས་རབ་འབྲིང་ཞེས་བྱའོ། །ཁམས་རྣམས་ལ་མཚན་ཉིད་ཚད་མེད་པར་ཕྱེ་སྟེ། ཐམས་ཅད་སྡུག་བསྔལ་བ། ཉན་ཐོས་དང་རང་སངས་རྒྱས་རྣམས་ཀྱིས་ཤེས་པའི་སྤྱོད་ཡུལ་མ་ཡིན་པ་ནི་ཡེ་ཤེས་རབ་ཅེས་བྱའོ། །རིགས་ཀྱི་བུ་དོན་འདི་དག་ཀྱང་མདོ་སྡེ་དེ་དག་ལས་ངས་མ་གསུངས་སོ། །རིགས་ཀྱི་བུ་གཟུགས་འཇིག་པའི་མཚན་ཉིད་དུ་ཤེས་པ་ནི་ཤེས་རབ་འབྲིང་ཞེས་བྱའོ། །གཟུགས་ལ་མཚན་ཉིད་རྣམ་པ་སྣ་ཚོགས་སུ་ཕྱེ་སྟེ། ཐམས་ཅད་སྡུག་བསྔལ་བ། ཉན་ཐོས་དང་རང་སངས་རྒྱས་ཀྱིས་ཤེས་པའི་སྤྱོད་ཡུལ་མ་ཡིན་པ་ནི་ཡེ་ཤེས་རབ་ཅེས་བྱ་སྟེ། དོན་འདི་ཡང་མདོ་སྡེ་དེ་དག་ལས་ངས་མ་གསུངས་སོ། །རིགས་ཀྱི་བུ་ཚོར་བ་ལ་ཚོར་བའི་མཚན་ཉིད་དུ་ཤེས་པ་ནི་ཤེས་རབ་འབྲིང་ཞེས་བྱའོ། །ཚོར་བ་ལ་མཚན་ཉིད་རྣམ་པ་སྣ་ཚོགས་སུ་ཕྱེ་སྟེ། ཉན་ཐོས་དང་རང་སངས་རྒྱས་ཀྱིས་ཤེས་པའི་སྤྱོད་ཡུལ་མ་ཡིན་པ་ནི་ཡེ་ཤེས་རབ་ཅེས་བྱ་སྟེ། རིགས་ཀྱི་བུ་དོན་འདི་ཡང་མདོ་སྡེ་དེ་དག་ལས་ངས་མ་གསུངས་སོ། །རིགས་ཀྱི་བུ་འདུ་ཤེས་ལ་ལེན་པའི་མཚན་ཉིད་དུ་ཤེས་པ་ནི་ཤེས་རབ་འབྲིང་ཞེས་བྱའོ། །འདུ་ཤེས་ལ་ལེན་པའི་མཚན་ཉིད་རྣམ་པ་སྣ་ཚོགས་སུ་ཕྱེ་སྟེ། ཉན་ཐོས་དང་རང་སངས་རྒྱས་ཀྱིས་ཤེས་པའི་སྤྱོད་ཡུལ་མ་ཡིན་པ་ནི་ཡེ་ཤེས་རབ་ཅེས་བྱ་སྟེ། དོན་འདི་ནི་མདོ་སྡེ་དེ་དག་ལས་ཀྱང་ངས་མ་གསུངས་སོ། །རིགས་ཀྱི་བུ་འདུ་བྱེད་ལ་བྱེད་པའི་མཚན་ཉིད་དུ་ཤེས་པ་ནི་ཤེས་རབ་འབྲིང་ཞེས་བྱའོ། །འདུ་བྱེད་ལ་བྱེད་པའི་མཚན་ཉིད་རྣམ་པ་སྣ་ཚོགས་སུ་ཕྱེ་སྟེ། ཉན་ཐོས་དང་རང་སངས་རྒྱས་ཀྱིས་ཤེས་པར་འགྱུར་བའི་མཚན་ཉིད་མ་ཡིན་པ་ནི་ཡེ་ཤེས་རབ་ཅེས་བྱའོ། །རིགས་ཀྱི་བུ་དོན་འདི་ནི་མདོ་སྡེ་དག་ལས་ཀྱང་ངས་མ་གསུངས་སོ། །རིགས་ཀྱི་བུ་རྣམ་པར་ཤེས་པ་ལ་བྱེ་བྲག་འབྱེད་པའི་མཚན་ཉིད་དུ་ཤེས་
པ་ནི་ཤེས་རབ་འབྲིང་ཞེས་བྱའོ། །རྣམ་པར་ཤེས་པ་ལ་ཤེས་པའི་མཚན་ཉིད་རྣམ་པ་སྣ་ཚོགས་སུ་ཕྱེ་སྟེ། ཉན་ཐོས་དང་རང་སངས་རྒྱས་ཀྱིས་ཤེས་པའི་མཚན་ཉིད་མ་ཡིན་པ་ནི་ཡེ་ཤེས་རབ་ཅེས་བྱའོ། །རིགས་ཀྱི་བུ་དོན་འདི་ནི་མདོ་སྡེ་དེ་དག་ལས་ཀྱང་ངས་མ་གསུངས་སོ།། །།འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་བཅྭ་བརྒྱད་པ། རིགས་ཀྱི་བུ་འདོད་པའི་རྐྱེན་གྱིས་ཕུང་པོ་ལྔ་སྐྱེས་པར་ཤེས་པ་ནི་ཤེས་རབ་འབྲིང་ཞེས་བྱའོ། །གང་ཟག་གཅིག་གི་འདོད་པ་སྐྱེས་པ་ཡང་ཉན་ཐོས་དང་རང་སངས་རྒྱས་ཚད་མེད་མཐའ་ཡས་པ་རྣམས་ཀྱིས་མི་ཤེས་པ། སེམས་ཅན་ཐམས་ཅད་ཀྱི་འདོད་པ་གང་དང་གང་སྐྱེས་པ་དེ་དང་དེ་དག་ཐམས་ཅད་ཤེས་པ་ནི་ཡེ་ཤེས་རབ་ཅེས་བྱ་སྟེ། དོན་འདི་ཡང་མདོ་སྡེ་དེ་དག་ལས་ངས་མ་གསུངས་སོ། །རིགས་ཀྱི་བུ་ཉོན་མོངས་པ་འགོག་པར་ཤེས་པ་ནི་ཤེས་རབ་འབྲིང་ཞེས་བྱའོ། །ཉོན་མོངས་པ་ཡང་དཔག་ཏུ་མེད་པ་ལ། འགོག་པ་ཡང་དེ་བཞིན་དཔག་ཏུ་མེད་པར་རྣམ་པར་ཕྱེ་སྟེ། ཉན་ཐོས་དང་རང་སངས་རྒྱས་རྣམས་ཀྱིས་ཤེས་པའི་སྤྱོད་ཡུལ་མ་ཡིན་པ་ནི་ཡེ་ཤེས་རབ་ཅེས་བྱ་སྟེ། དོན་འདི་ཡང་མདོ་སྡེ་དེ་དག་ལས་ངས་མ་གསུངས་སོ། །རིགས་ཀྱི་བུ་ལམ་གྱི་མཚན་ཉིད་ཀྱིས་ཉོན་མོངས་པ་སྤོང་བར་ཤེས་པ་ནི་ཤེས་རབ་འབྲིང་ཞེས་བྱའོ། །རིགས་ཀྱི་བུ་ལམ་གྱི་མཚན་ཉིད་ཀྱང་ཚད་མེད་མཐའ་ཡས་པ་ལ། སྤོང་བར་འགྱུར་བའི་ཉོན་མོངས་པ་ཡང་ཚད་མེད་མཐའ་ཡས་པར་རྣམ་པར་ཕྱེ་སྟེ། ཉན་ཐོས་དང་རང་སངས་རྒྱས་རྣམས་ཀྱིས་ཤེས་པའི་སྤྱོད་ཡུལ་མ་ཡིན་པ་ནི་ཡེ་ཤེས་རབ་ཅེས་བྱ་སྟེ། དོན་འདི་ཡང་མདོ་སྡེ་དེ་དག་ལས་ངས་མ་གསུངས་སོ། །རིགས་ཀྱི་བུ་ཀུན་རྫོབ་ཀྱི་བདེན་པ་ཤེས་པ་ནི་ཤེས་རབ་འབྲིང་ཞེས་བྱའོ། །ཀུན་རྫོབ་ཀྱི་བདེན་པ་ཚད་མེད་མཐའ་ཡས་དཔག་ཏུ་མེད་པར་རྣམ་པར་ཕྱེ་སྟེ། ཉན་ཐོས་དང་རང་སངས་རྒྱས་རྣམས་ཀྱིས་ཤེས་པའི་སྤྱོད་ཡུལ་མ་ཡིན་པ་ནི་ཡེ་ཤེས་རབ་ཅེས་བྱ་སྟེ། དོན་འདི་ཡང་མདོ་སྡེ་དེ་
དག་ལས་ངས་མ་གསུངས་སོ། །རིགས་ཀྱི་བུ་འདུ་བྱེད་ཐམས་ཅད་མི་རྟག་པ་དང་། ཆོས་ཐམས་ཅད་བདག་མེད་པ་དང་མྱ་ངན་ལས་འདས་པ་ནི་ཞི་བ་དོན་དམ་པར་ཤེས་པ་ནི་ཤེས་རབ་འབྲིང་ཞེས་བྱའོ། །དོན་དམ་པ་ཚད་མེད་མཐའ་ཡས་དཔག་ཏུ་མེད་པར་ཤེས་ཤིང་། ཉན་ཐོས་དང་རང་སངས་རྒྱས་རྣམས་ཀྱིས་ཤེས་པའི་སྤྱོད་ཡུལ་མ་ཡིན་པ་ནི་ཡེ་ཤེས་རབ་ཅེས་བྱ་སྟེ། དོན་འདི་ཡང་མདོ་སྡེ་དེ་དག་ལས་ངས་མ་གསུངས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀུན་རྫོབ་ཀྱི་བདེན་པ་དང་། དོན་དམ་པའི་བདེན་པ་ཞེས་བགྱི་བའི་དོན་ཇི་ལྟ་བུ་ལགས། བཅོམ་ལྡན་འདས་དོན་དམ་པའི་བདེན་པ་ལ་ཀུན་རྫོབ་ཀྱི་བདེན་པ་མཆིས་སམ། ཀུན་རྫོབ་ཀྱི་བདེན་པ་ལ་དོན་དམ་པའི་བདེན་པ་མཆིས་སམ། ཅི་སྟེ་མཆིས་ན་བདེན་པ་གཅིག་ཏུ་བས་སོ། །ཅི་སྟེ་མ་མཆིས་ན་དེ་བཞིན་གཤེགས་པས་གསུངས་པ་བརྫུན་དུ་མི་འགྱུར་རམ། བཀའ་སྩལ་པ། རིགས་ཀྱི་བུ་ཀུན་རྫོབ་ཀྱི་བདེན་པ་ཉིད་དོན་དམ་པའི་བདེན་པའོ། །གསོལ་པ། བཅོམ་ལྡན་འདས་དེ་ལྟ་ན་ནི་བདེན་པ་གཉིས་སུ་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཤིན་ཏུ་ཐབས་མཁས་པས་སེམས་ཅན་གྱི་རྗེས་སུ་བདེན་པ་གཉིས་སུ་གསུངས་སོ། །རིགས་ཀྱི་བུ་ཚིག་ཏུ་སྨྲ་བ་ལྟར་ན་རྣམ་པ་གཉིས་ཏེ། འཇིག་རྟེན་གྱི་ཆོས་དང་། འཇིག་རྟེན་ལས་འདས་པའི་ཆོས་སོ། །རིགས་ཀྱི་བུ་འཇིག་རྟེན་ལས་འདས་པའི་གང་ཟག་གིས་ཤེས་པ་དེ་ནི་དོན་དམ་པའི་བདེན་པ་ཞེས་བྱའོ། །འཇིག་རྟེན་པའི་གང་ཟག་གིས་ཤེས་པ་ནི་ཀུན་རྫོབ་ཀྱི་བདེན་པ་ཞེས་བྱའོ། །རིགས་ཀྱི་བུ་ཕུང་པོ་ལྔ་འདུས་པ་ལས་བདག་ཅེས་བཏགས་ཏེ། སེམས་ཅན་མ་རབས་ནི་བཏགས་པའི་རྗེས་སུ་འཇུག་པས་ཀུན་རྫོབ་ཀྱི་བདེན་པ་ཞེས་བྱའོ། །ཕུང་པོ་ལ་ཡང་བདག་ཅེས་བྱ་བ་མེད་པར་ཤེས་ལ། ཕུང་པོའི་ཕ་རོལ་ན་ཡང་བདག་མེད་པར་ཤེས་པ་ནི་འཇིག་རྟེན་ལས་འདས་
པ་ཞེས་བྱ་སྟེ། མཚན་ཉིད་ཇི་ལྟ་བ་བཞིན་དུ་ཤེས་པ་ནི་དོན་དམ་པའི་བདེན་པ་ཞེས་བྱའོ། །གཞན་ཡང་རིགས་ཀྱི་བུ་ཆོས་ལ་ལ་ནི་མིང་ཡང་ཡོད་ལ་འབྲས་བུ་ཡང་ཡོད་དོ། །ཆོས་ལ་ལ་ནི་མིང་ཡོད་ལ་འབྲས་བུ་མེད་དོ། །རིགས་ཀྱི་བུ་མིང་ཡོད་ལ་འབྲས་བུ་མེད་པ་ནི་ཀུན་རྫོབ་ཀྱི་བདེན་པའོ། །མིང་ཡང་ཡོད་ལ་འབྲས་བུ་ཡང་ཡོད་པ་ནི་དོན་དམ་པའི་བདེན་པའོ། །རིགས་ཀྱི་བུ་བདག་ཇི་ལྟ་བ་བཞིན་དུ་སེམས་ཅན་དང་། སྲོག་དང་། ཤེས་པ་དང་། མཐོང་བ་དང་། འཚོ་བ་དང་། ཤེད་ཅན་དང་། ཤེད་བདག་དང་། ཚོར་བ་དང་། བྱས་པ་དང་། ཚ་བའི་དུས་ཀྱི་སྨིག་རྒྱུ་དང་། དྲི་ཟའི་གྲོང་ཁྱེར་དང་། རུས་སྦལ་གྱི་སྤུ་དང་། རི་བོང་གི་རྭ་དང་། མེ་མགལ་བསྐོར་བའི་འཁོར་ལོ་དང་། ཕུང་པོ་དང་། ཁམས་དང་། སྐྱེ་མཆེད་རྣམས་ནི་ཀུན་རྫོབ་ཀྱི་བདེན་པ་ཞེས་བྱའོ། །སྡུག་བསྔལ་བ་དང་། ཀུན་འབྱུང་དང་། འགོག་པ་དང་། ལམ་ནི་དོན་དམ་པའི་བདེན་པ་ཞེས་བྱའོ། །རིགས་ཀྱི་བུ་འཇིག་རྟེན་གྱི་ཆོས་ལ་རྣམ་པ་ལྔ་སྟེ། མིང་གི་འཇིག་རྟེན་དང་། ཚིག་གི་འཇིག་རྟེན་དང་། འཆིང་བའི་འཇིག་རྟེན་དང་། ཆོས་ཀྱི་འཇིག་རྟེན་དང་། ཆགས་པའི་འཇིག་རྟེན་དང་ལྔའོ། །རིགས་ཀྱི་བུ་མིང་གི་འཇིག་རྟེན་གང་ཞེ་ན། སྐྱེས་པ་དང་། བུད་མེད་དང་། བུམ་པ་དང་། གོས་དང་། ཤིང་རྟ་དང་། ཁང་ཁྱིམ་ལ་སོགས་པའི་དངོས་པོ་ནི་མིང་གི་འཇིག་རྟེན་ཞེས་བྱའོ། །ཚིག་གི་འཇིག་རྟེན་གང་ཞེ་ན། རྩ་བ་བཞི་པའི་ཚིགས་སུ་བཅད་པ་གཅིག་སྟེ། ཚིགས་སུ་བཅད་པ་དེ་དག་ནི་ཚིག་གི་འཇིག་རྟེན་ཞེས་བྱའོ། །འཆིང་བའི་འཇིག་རྟེན་གང་ཞེ་ན། དྲིལ་བ་དང་། སྦྱར་བ་དང་། མདུད་པ་བོར་བ་དང་། སྦམས་པ་དང་། བཅིངས་པ་དང་། ཐལ་མོ་སྦྱར་བ་ནི་འཆིང་བའི་འཇིག་རྟེན་ཞེས་བྱའོ། །ཆོས་ཀྱི་འཇིག་རྟེན་གང་ཞེ་ན། གཎ་ཌཱི་བརྡུངས་ན་དགེ་འདུན་འདུ་བ་དང་། རྔ་བརྡུངས་ན་དམག་ཆ་བ་དང་། དུང་བུས་ན་དུས་ཤེས་པ་སྟེ། དེ་ནི་ཆོས་ཀྱི་འཇིག་རྟེན་ཞེས་བྱའོ། །ཆགས་པའི་འཇིག་རྟེན་གང་ཞེ་ན། དཔེར་ན་རྒྱང་རིང་པོ་ནས་ཁ་
དོག་བསྒྱུར་བའི་གོས་གྱོན་པའི་མི་མཐོང་ན། དེ་ནི་དགེ་སྦྱོང་ཡིན་གྱི། བྲམ་ཟེ་མ་ཡིན་ནོ་ཞེས་ཆགས་པ་དང་། ཐག་པ་མདུད་པ་བོར་བ་སེ་རལ་ཁ་རུ་ཐོགས་པ་མཐོང་ན། དེ་འདི་སྙམ་དུ་དེ་ནི་བྲམ་ཟེ་ཡིན་གྱི། དགེ་སྦྱོང་མ་ཡིན་ནོ་སྙམ་བསམས་པ་དེ་ནི་ཆགས་པའི་འཇིག་རྟེན་ཞེས་བྱའོ། །རིགས་ཀྱི་བུ་དེ་དག་ནི་འཇིག་རྟེན་གྱི་ཆོས་རྣམ་པ་ལྔ་ཞེས་བྱའོ། །རིགས་ཀྱི་བུ་སོ་སོའི་སྐྱེ་བོ་གང་ཞིག་དེ་ལྟར་འཇིག་རྟེན་གྱི་ཆོས་རྣམ་པ་ལྔ་པོ་ལ་སེམས་ཕྱིན་ཅི་མ་ལོག་སྟེ། ཡང་དག་པ་ཇི་ལྟ་བ་བཞིན་དུ་ཤེས་ན་དོན་དམ་པའི་བདེན་པ་ཞེས་བྱའོ། །གཞན་ཡང་རིགས་ཀྱི་བུ་ཚིག་པ་དང་། ཆོད་པ་དང་། ཤིགས་པ་དང་། འཇིག་པ་ནི་ཀུན་རྫོབ་ཀྱི་བདེན་པ་ཞེས་བྱའོ། །མི་ཚིག །མི་ཆོད། མི་ཤིགས། མི་འཇིག་པ་ནི་དོན་དམ་པའི་བདེན་པ་ཞེས་བྱའོ། །གཞན་ཡང་རིགས་ཀྱི་བུ་སྡུག་བསྔལ་གྱི་མཚན་ཉིད་བརྒྱད་དང་བཅས་པ་ནི་ཀུན་རྫོབ་ཀྱི་བདེན་པ་ཞེས་བྱའོ། །སྐྱེ་བ་མེད། རྒ་བ་མེད། ན་བ་མེད། འཆི་བ་མེད། འདོད་པ་དང་བྱེ་བྲལ་བ་མེད། དགྲ་སྡང་བ་དང་ཕྲད་པ་མེད། འདོད་པ་མི་རྙེད་པ་མེད། ཕུང་པོ་ལྔ་མེད་པ་ནི་དོན་དམ་པའི་བདེན་པ་ཞེས་བྱའོ། །གཞན་ཡང་རིགས་ཀྱི་བུ་དཔེར་ན་ཤེས་པའི་རྩལ་མང་པོ་དང་ལྡན་པའི་མི་ཞིག་རྒྱུག་པའི་ཚེ་ནི་རྒྱུག་པ་ཞེས་བྱ། ཞིང་བརྔ་བའི་ཚེ་ནི་ཞིང་པ་ཞེས་བྱ། ཟས་ཀྱི་གཡོས་བྱེད་ན་གཡོས་མཁན་ཞེས་བྱ། ཤིང་བཞོག་པའི་ཚེ་ནི་ཤིང་མཁན་ཞེས་བྱ། གསེར་དངུལ་གྱི་རྡུངས་བྱེད་པའི་ཚེ་ནི་གསེར་མགར་ཞེས་བྱ་སྟེ། དེ་ལྟར་མི་གཅིག་ལ་མིང་དུ་བཏགས་པ་མང་དུ་ཡོད་དོ། །ཆོས་ཀྱང་དེ་དང་འདྲ་སྟེ། ཡང་དག་པར་གཅིག་མོད་ཀྱི་མིང་དུ་བཏགས་པ་མང་ངོ་། །ཕ་མ་ཕྲད་ཅིང་འདུས་པ་ལས་སྐྱེས་པ་ནི་ཀུན་རྫོབ་ཀྱི་བདེན་པ་ཞེས་བྱའོ། །རྟེན་ཅིང་འབྲེལ་ཏེ་འབྱུང་བ་བཅུ་གཉིས་འདུས་པ་ལས་སྐྱེས་པ་ནི་དོན་དམ་པའི་བདེན་པ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་
ལྡན་འདས་ཡང་དག་པའི་བདེན་པ་ཞེས་བགྱི་བའི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཡང་དག་པའི་བདེན་པ་ཞེས་བྱ་བ་ནི་ཡང་དག་པའི་ཆོས་སོ། །རིགས་ཀྱི་བུ་གང་ཆོས་ཡང་དག་པ་མ་ཡིན་པ་དེ་ནི་ཡང་དག་པའི་བདེན་པ་མ་ཡིན་ནོ། །རིགས་ཀྱི་བུ་ཡང་དག་པའི་བདེན་པ་ཞེས་བྱ་བ་ནི་ཕྱིན་ཅི་མ་ལོག་པ་སྟེ། ཕྱིན་ཅི་མ་ལོག་པ་ནི་ཡང་དག་པའི་བདེན་པ་ཞེས་བྱའོ། །རིགས་ཀྱི་བུ་ཡང་དག་པའི་བདེན་པ་ནི་མི་བདེན་པ་མེད་པ་སྟེ། མི་བདེན་པ་དང་བཅས་པ་ནི་ཡང་དག་པའི་བདེན་པ་ཞེས་མི་བྱའོ། །རིགས་ཀྱི་བུ་ཡང་དག་པའི་བདེན་པ་ནི་ཐེག་པ་ཆེན་པོ་སྟེ། ཐེག་པ་ཆེན་པོ་མ་ཡིན་པ་ནི་ཡང་དག་པའི་བདེན་པ་ཞེས་མི་བྱའོ། །རིགས་ཀྱི་བུ་ཡང་དག་པའི་བདེན་པ་ནི་སངས་རྒྱས་ཀྱིས་གསུངས་པ་སྟེ། བདུད་ཀྱིས་སྨྲས་པ་མ་ཡིན་ནོ། །བདུད་ཀྱིས་སྨྲས་པ་དང་། སངས་རྒྱས་ཀྱིས་གསུངས་པ་མ་ཡིན་པ་ནི་ཡང་དག་པའི་བདེན་པ་ཞེས་མི་བྱའོ། །རིགས་ཀྱི་བུ་ཡང་དག་པའི་བདེན་པ་ཞེས་བྱ་བ་ནི་རྣམ་པར་དག་པའི་ལམ་གཅིག་སྟེ། གཉིས་སུ་མེད་པའོ། །རིགས་ཀྱི་བུ་རྟག་པ་དང་བཅས། བདེ་བ་དང་བཅས། བདག་དང་བཅས་ཡོངས་སུ་དག་པ་དང་བཅས་པ་ནི་ཡང་དག་པའི་བདེན་པའི་དོན་ཞེས་བྱའོ། །འཇམ་དཔལ་གཞོན་ནུས་ཡང་གསོལ་པ། བཅོམ་ལྡན་འདས་གལ་ཏེ་ཡང་དག་པ་དེ་ཡང་དག་པའི་བདེན་པ་ལགས་ན་ཡང་དག་པའི་ཆོས་ནི་དེ་བཞིན་གཤེགས་པའི་སྟོང་པ་ཉིད་དང་། རང་སངས་རྒྱས་ཀྱི་རང་བཞིན་ལགས་ཏེ། ཅི་སྟེ་དེ་ལྟ་བུ་ལགས་ན། དེ་བཞིན་གཤེགས་པ་དང་། ནམ་མཁའ་ཉིད་དང་། སངས་རྒྱས་ཀྱི་རང་བཞིན་བྱེ་བྲག་མ་མཆིས་པར་འགྱུར་རོ། །བཅོམ་ལྡན་འདས་ཀྱིས་འཇམ་དཔལ་ལ་བཀའ་སྩལ་པ། སྡུག་བསྔལ་ཡོད་ན་བདེན་པ་དང་བཅས། ཡང་དག་པ་དང་བཅས། ཀུན་འབྱུང་ཡོད་ན་བདེན་པ་དང་བཅས། ཡང་དག་པ་དང་བཅས། འགོག་པ་ཡོད་ན་བདེན་པ་དང་བཅས། ཡང་དག་པ་དང་བཅས། ལམ་ཡོད་ན་
བདེན་པ་དང་བཅས། ཡང་དག་པ་དང་བཅས་སོ། །རིགས་ཀྱི་བུ་དེ་བཞིན་གཤེགས་པ་ནི་སྡུག་བསྔལ་མ་ཡིན། བདེན་པ་མ་ཡིན་ཏེ། ཡང་དག་པ་ཡིན་ནོ། །སྟོང་པ་ཉིད་ཀྱང་སྡུག་བསྔལ་མ་ཡིན། བདེན་པ་མ་ཡིན་ཏེ། ཡང་དག་པ་ཡིན་ནོ། །སངས་རྒྱས་ཀྱི་རང་བཞིན་ཡང་སྡུག་བསྔལ་མ་ཡིན། བདེན་པ་མ་ཡིན་ཏེ། ཡང་དག་པ་ཡིན་ནོ། །འཇམ་དཔལ་སྡུག་བསྔལ་ཞེས་བྱ་བ་ནི་མི་རྟག་པའི་མཚན་ཉིད། གཅད་དུ་རུང་བའི་མཚན་ཉིད་དེ། དེ་བས་ན་ཡང་དག་པའི་བདེན་པ་ཞེས་མི་བྱའོ། །དེ་བཞིན་གཤེགས་པ་ཉིད་ནི་སྡུག་བསྔལ་མ་ཡིན། མི་རྟག་པ་མ་ཡིན། གཅད་དུ་རུང་བ་མ་ཡིན་ཏེ། དེ་བས་ན་ཡང་དག་པ་ཞེས་བྱ་སྟེ། ནམ་མཁའ་དང་སངས་རྒྱས་ཀྱི་རང་བཞིན་ཡང་དེ་བཞིན་དུ་རིག་པར་བྱའོ། །རིགས་ཀྱི་བུ་གཞན་ཡང་ཀུན་འབྱུང་ཞེས་བྱ་བ་ནི་ཕུང་པོ་ལྔ་འདུས་ཤིང་སྐྱེ་བར་བྱེད་པས་སྡུག་བསྔལ་ཞེས་ཀྱང་བྱ། མི་རྟག་པ་ཞེས་ཀྱང་བྱ། གཅད་དུ་རུང་བ་སྟེ། ཡང་དག་པའི་བདེན་པ་ཞེས་མི་བྱའོ། །རིགས་ཀྱི་བུ་དེ་བཞིན་གཤེགས་པ་ནི་ཀུན་འབྱུང་གི་མཚན་ཉིད་མ་ཡིན། ཕུང་པོའི་རྒྱུ་མ་ཡིན། གཅད་དུ་རུང་བའི་མཚན་ཉིད་མ་ཡིན་ཏེ། དེ་བས་ན་ཡང་དག་པ་ཞེས་བྱ་སྟེ། ནམ་མཁའ་དང་། སངས་རྒྱས་ཀྱི་རང་བཞིན་ཡང་དེ་བཞིན་དུ་རིག་པར་བྱའོ། །རིགས་ཀྱི་བུ་འགོག་པ་ཞེས་བྱ་བ་ནི་ཉོན་མོངས་པ་འགོག་པ་སྟེ། རྟག་པ་ཡང་ཡིན། མི་རྟག་པ་ཡང་ཡིན་ནོ། །ཐེག་པ་གཉིས་ཀྱིས་འཐོབ་པ་ནི་མི་རྟག་པ་ཞེས་བྱའོ། །སངས་རྒྱས་རྣམས་ཀྱིས་འཐོབ་པ་ནི་རྟག་པ་ཞེས་ཀྱང་བྱ། རང་གིས་རིག་པའི་ཆོས་ཞེས་ཀྱང་བྱ་སྟེ། ཡང་དག་པའི་བདེན་པ་ཞེས་བྱའོ། །རིགས་ཀྱི་བུ་དེ་བཞིན་གཤེགས་པ་ཉིད་ནི་འགོག་པ་ཞེའམ། ཉོན་མོངས་པ་འགོག་པ་ཞེས་ཀྱང་མི་བྱ། རྟག་པ་དང་། མི་རྟག་པ་ཡང་མ་ཡིན། རང་གིས་རིག་པ་ཡང་མ་ཡིན། རྟག་པ་གནས་པ་མི་འགྱུར་བ་སྟེ། དེ་བས་ན་ཡང་དག་པ་ཞེས་བྱའོ། །ནམ་མཁའ་དང་། སངས་རྒྱས་ཀྱི་རང་བཞིན་ཡང་དེ་བཞིན་དུ་རིག་པར་བྱའོ། །
རིགས་ཀྱི་བུ་ལམ་ཞེས་བྱ་བ་ནི་ཉོན་མོངས་པ་གཅོད་པ་སྟེ། རྟག་པ་ཡང་མ་ཡིན་ལ་མི་རྟག་པ་ཡང་མ་ཡིན་ཏེ། བསྒོམ་པའི་ཆོས་ཡིན་པས་ན་ཡང་དག་པའི་བདེན་པ་ཞེས་བྱའོ། །དེ་བཞིན་གཤེགས་པ་ནི་ལམ་གྱིས་ཉོན་མོངས་པ་གཅོད་པ་ཡང་མ་ཡིན། རྟག་པ་དང་མི་རྟག་པ་ཡང་མ་ཡིན། བསྒོམ་པའི་ཆོས་ཀྱང་མ་ཡིན་ཏེ། རྟག་པ་གནས་པ་མི་འགྱུར་མི་འཕོ་བས་དེའི་ཕྱིར་བདེ་བ་ཞེས་བྱ་སྟེ། ནམ་མཁའ་དང་སངས་རྒྱས་ཀྱི་རང་བཞིན་ཡང་དེ་བཞིན་དུ་རིག་པར་བྱའོ། །རིགས་ཀྱི་བུ་གཞན་ཡང་ཡང་དག་པ་ཞེས་བྱ་བ་ནི་དེ་བཞིན་གཤེགས་པ་སྟེ། དེ་བཞིན་གཤེགས་པ་ཡང་ཡང་དག་པའོ། །ཡང་དག་པ་ནི་ནམ་མཁའ་སྟེ། ནམ་མཁའ་ཡང་ཡང་དག་པའོ། །ཡང་དག་པ་ནི་སངས་རྒྱས་ཀྱི་རང་བཞིན་ཏེ། སངས་རྒྱས་ཀྱི་རང་བཞིན་ཡང་ཡང་དག་པའོ། །འཇམ་དཔལ་སྡུག་བསྔལ་ཡོད་ན་སྡུག་བསྔལ་གྱི་རྒྱུ་དང་བཅས། སྡུག་བསྔལ་ཟད་པ་དང་བཅས། སྡུག་བསྔལ་གྱི་གཉེན་པོ་དང་བཅས་ཏེ། དེ་བཞིན་གཤེགས་པ་ནི་སྡུག་བསྔལ་མ་ཡིན་པ་ནས་གཉེན་པོའི་བར་དུ་མ་ཡིན་པས་དེ་བས་ན་ཡང་དག་པ་ཞེས་བྱ་སྟེ། བདེན་པ་མ་ཡིན་ནོ། །ནམ་མཁའ་དང་སངས་རྒྱས་ཀྱི་རང་བཞིན་ཡང་རིག་པར་བྱའོ། །སྡུག་བསྔལ་ནི་འདུས་བྱས་དང་བཅས། ཟག་པ་དང་བཅས། མི་བདེ་བ་དང་བཅས་སོ། །དེ་བཞིན་གཤེགས་པ་ནི་འདུས་བྱས་དང་བཅས་པ་མ་ཡིན། ཟག་པ་དང་བཅས་པ་མ་ཡིན་ཏེ། རབ་ཏུ་བདེ་བས་ན་ཡང་དག་པ་ཡིན་གྱི། བདེན་པ་མ་ཡིན་ནོ། །འཇམ་དཔལ་གཞོན་ནུས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གསུངས་པ་ལྟར་ཕྱིན་ཅི་མ་ལོག་པ་ནི་ཡང་དག་པའི་བདེན་པ་ཞེས་གསུངས་ཏེ། གལ་ཏེ་དེ་ལྟ་བུ་ལགས་ན་བདེན་པ་བཞི་ལ་ཕྱིན་ཅི་ལོག་བཞི་མཆིས་སམ། གལ་ཏེ་མཆིས་ན་ཅིའི་སླད་དུ་ཕྱིན་ཅི་མ་ལོག་པ་ནི་ཡང་དག་པའི་བདེན་པ་ཞེས་གསུངས། ཕྱིན་ཅི་ལོག་ཐམས་ཅད་ནི་ཡང་དག་པ་མ་ལགས་སོ། །བཅོམ་ལྡན་འདས་ཀྱིས་འཇམ་དཔལ་ལ་བཀའ་སྩལ་པ། ཕྱིན་ཅི་ལོག་ཐམས་ཅད་ནི་སྡུག་
བསྔལ་གྱི་བདེན་པའི་ནང་དུ་གཏོགས་ཏེ། དཔེར་ན་སེམས་ཅན་ལྟ་བུ་ཕྱིན་ཅི་ལོག་གི་སེམས་དང་བཅས་པས་ཕྱིན་ཅི་ལོག་ཅེས་བྱའོ། །རིགས་ཀྱི་བུ་དཔེར་ན་མི་ཞིག་ཕ་མ་དང་། སློབ་དཔོན་དང་། བླ་མའི་ངག་མི་ཉན་ལ། བསྟན་པ་བཞིན་དུ་མི་བྱེད་པ་དེ་ནི་ཕྱིན་ཅི་ལོག་པ་ཞེས་བྱ་སྟེ། ཕྱིན་ཅི་ལོག་དེ་ཡང་སྡུག་བསྔལ་མ་ཡིན་པ་མ་ཡིན་གྱི། སྡུག་བསྔལ་ཡིན་ནོ། །འཇམ་དཔལ་གྱིས་ཡང་གསོལ་པ། བཅོམ་ལྡན་འདས་ཀྱིས་གསུངས་པ་ལྟར་མི་བདེན་པ་མ་ལགས་པ་དེ་ཡང་དག་པའི་བདེན་པ་ལགས་ན། མི་བདེན་པ་དེ་ནི་ཡང་དག་པའི་བདེན་པ་མ་ལགས་པར་འཚལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་མི་བདེན་པ་བརྫུན་ཐམས་ཅད་ནི་སྡུག་བསྔལ་གྱི་ནང་དུ་གཏོགས་ཏེ། དཔེར་ན་སེམས་ཅན་ཞིག་ཕ་རོལ་པོ་གཞན་ལ་དབང་བཟས་ཏེ། གཡོ་སྒྱུ་ཞིག་བྱས་ན། དེའི་རྒྱུ་དེའི་རྐྱེན་གྱིས་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། ཡི་དགས་ཀྱི་ཁམས་སུ་ལྟུང་སྟེ་དེ་དག་ནི་མི་བདེན་པ་ཞེས་བྱའོ། །མི་བདེན་པ་དེ་ནི་སྡུག་བསྔལ་བ་མ་ཡིན་པ་མ་ཡིན་གྱི་སྡུག་བསྔལ་བ་ཡིན་ནོ། །ཉན་ཐོས་དང་། རང་སངས་རྒྱས་དང་། སངས་རྒྱས་བཅོམ་ལྡན་འདས་རྣམས་ནི་ཡོངས་སུ་སྤངས་ཏེ་མི་སྤྱོད་པས་ན་མི་བདེན་པ་ཞེས་མི་བྱའོ། །མི་བདེན་པ་ནི་སངས་རྒྱས་རྣམས་དང་ཐེག་པ་གཉིས་ཀྱིས་ཡོངས་སུ་བསལ་བའི་ཕྱིར་ཡང་དག་པའི་བདེན་པ་ཞེས་བྱའོ། །འཇམ་དཔལ་གྱིས་ཡང་གསོལ་པ། བཅོམ་ལྡན་འདས་ཀྱིས་གསུངས་པ་ལྟར་ཐེག་པ་ཆེན་པོ་ལ་ཡང་དག་པའི་བདེན་པ་ཞེས་བགྱི་ན། ཉན་ཐོས་དང་རང་སངས་རྒྱས་ཀྱི་ཐེག་པ་ནི་ཡང་དག་པ་མ་ལགས་པར་འགྱུར་རོ། །བཅོམ་ལྡན་འདས་ཀྱིས་འཇམ་དཔལ་ལ་བཀའ་སྩལ་པ། ཐེག་པ་གཉིས་པོ་ནི་ཡང་དག་པ་ཡང་ཡིན་ལ། ཡང་དག་པ་ཡང་མ་ཡིན་ནོ། །ཉན་ཐོས་དང་རང་སངས་རྒྱས་ཀྱིས་ཉོན་མོངས་པ་རྣམས་བཅད་པས་ན་ཡང་དག་པ་ཞེས་བྱའོ། །མི་རྟག་ཅིང་མི་གནས་ལ་འགྱུར་ཞིང་འཕོ་བའི་ཆོས་ཅན་ཡིན་པས་ན་ཡང་དག་པ་མ་ཡིན་ནོ། །འཇམ་དཔལ་
གྱིས་ཡང་གསོལ་པ། བཅོམ་ལྡན་འདས་ཀྱིས་གསུངས་པ་ལྟར་ཡང་དག་པ་ཞེས་བགྱི་ན། གང་བདུད་ཀྱིས་སྨྲས་པ་དེ་ཡང་དག་པ་མ་ལགས་པར་འཚལ་ཏེ། བཅོམ་ལྡན་འདས་བདུད་ཀྱིས་སྨྲས་པ་དེ་འཕགས་པའི་བདེན་པར་རྟོགས་པ་ལགས་སམ། བཅོམ་ལྡན་འདས་ཀྱིས་འཇམ་དཔལ་ལ་བཀའ་སྩལ་པ། བདུད་ཀྱིས་སྨྲས་པ་ནི་སྡུག་བསྔལ་དང་། ཀུན་འབྱུང་ཞེས་བྱ་བའི་བདེན་པ་གཉིས་ཀྱི་ནང་དུ་གཏོགས་སོ། །ཇི་ཙམ་དུ་ཆོས་མ་ཡིན་པ་དང་། འདུལ་བ་མ་ཡིན་པ་ཕ་རོལ་ལ་ཕན་པ་དང་། བདེ་བའི་དོན་དུ་མི་འགྱུར་བ་ཐམས་ཅད་ནི་དུས་ཐམས་ཅད་དུ་མི་དལ་བར་སྨྲས་ཀྱང་། ཕ་རོལ་པོས་སྡུག་བསྔལ་མཐོང་བར་རམ། ཀུན་འབྱུང་ཆོད་པར་རམ། འགོག་པ་རིག་པར་རམ། ལམ་བསྒོམ་པར་འགྱུར་བ་མེད་དེ། དེ་བས་ན་མི་བདེན་པ་ཡིན་ཏེ། མི་བདེན་པ་དེ་ནི་བདུད་ཀྱིས་སྨྲས་པ་ཞེས་བྱའོ། །འཇམ་དཔལ་གྱིས་ཡང་གསོལ་པ། བཅོམ་ལྡན་འདས་ཀྱིས་གསུངས་པ་ལྟར་རྣམ་པར་དག་པའི་ལམ་གཅིག་སྟེ། གཉིས་སུ་མ་མཆིས་སོ་ཞེས་བགྱི་བ། མུ་སྟེགས་ཅན་རྣམས་ཀྱང་འདི་སྐད་དུ་རྣམ་པར་དག་པའི་ལམ་གཅིག་སྟེ་གཉིས་སུ་མ་མཆིས་སོ་ཞེས་མཆི་ན། ཅི་སྟེ་ལམ་གཅིག་པུ་དེ་ཡང་དག་པའི་བདེན་པ་ལགས་ན། མུ་སྟེགས་ཅན་དང་ཁྱད་པར་ཅི་མཆིས། ཅི་སྟེ་ཁྱད་པར་མ་མཆིས་ན་རྣམ་པར་དག་པའི་ལམ་གཅིག་གོ་ཞེས་གསུངས་པའི་ཡང་མི་རིགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་མུ་སྟེགས་ཅན་རྣམས་ལ་སྡུག་བསྔལ་དང་། ཀུན་འབྱུང་གི་བདེན་པ་ནི་ཡོད་ཀྱི། འགོག་པ་དང་། ལམ་གྱི་བདེན་པ་ནི་མེད་པས་འགོག་པ་མ་ཡིན་པ་ལ་འགོག་པར་འདུ་ཤེས། ལམ་མ་ཡིན་པ་ལ་ལམ་དུ་འདུ་ཤེས། འབྲས་བུ་མ་ཡིན་པ་ལ་འབྲས་བུར་འདུ་ཤེས། རྒྱུ་མ་ཡིན་པ་ལ་རྒྱུར་འདུ་ཤེས། དེ་བས་དེ་ལ་ནི་རྣམ་པར་དག་པའི་ལམ་གཅིག་སྟེ། གཉིས་སུ་མེད་དོ་ཞེས་བྱ་བ་མེད་དོ། །འཇམ་དཔལ་གྱིས་ཡང་གསོལ་པ། བཅོམ་ལྡན་འདས་ཀྱིས་གསུངས་པ་ལྟར་རྟག་པ་དང་
བཅས། བདག་དང་བཅས། བདེ་བ་དང་བཅས། དག་པ་དང་བཅས་པ་ལ་ཡང་དག་པའི་དོན་ཅེས་བགྱི་ན་ལྟ། མུ་སྟེགས་ཅན་རྣམས་ལ་ཡང་དག་པའི་བདེན་པ་མཆིས་ཀྱི་སངས་རྒྱས་ཀྱི་ཆོས་ལ་ནི་མ་མཆིས་པར་འགྱུར་རོ། །དེ་ཅིའི་སླད་དུ་ཞེ་ན། མུ་སྟེགས་ཅན་རྣམས་ཀྱང་འདི་སྐད་ཅེས་སྨྲ་སྟེ། འདུ་བྱེད་ཐམས་ཅད་ནི་རྟག་པའོ། །ཇི་ལྟར་རྟག་ཅེ་ན། ཡིད་དུ་འོང་བ་དང་། ཡིད་དུ་མི་འོང་བའི་ལས་ཀྱི་རྣམ་པར་སྨིན་པ་ལ་སོགས་པ་མེད་པར་མི་འགྱུར་བའི་ཕྱིར་རོ། །ཡིད་དུ་འོང་བ་ནི་དགེ་བ་བཅུའི་འབྲས་བུ་མྱོང་བའོ། །ཡིད་དུ་མི་འོང་བ་ནི་མི་དགེ་བ་བཅུའི་རྣམ་པར་སྨིན་པ་སྟེ། གལ་ཏེ་འདུ་བྱེད་ཐམས་ཅད་མི་རྟག་ན་ལས་བྱས་པའི་རྣམས་འདི་ནས་ཤི་འཕོས་ནས་ཕ་རོལ་ཏུ་རྣམ་པར་སྨིན་པའི་འབྲས་བུ་སུས་མྱོང་བར་འགྱུར། དེ་བས་ན་འདུ་བྱེད་ཐམས་ཅད་ནི་རྟག་པ་ལགས་ཏེ་སྲོག་བཅད་པའི་རྐྱེན་གྱིས་རྟག་པ་ཞེས་བྱའོ། །བཅོམ་ལྡན་འདས་ཅི་སྟེ་འདུ་བྱེད་ཐམས་ཅད་མི་རྟག་ན་གསོད་པ་དང་། བསད་པ་གཉི་ག་མི་རྟག་པར་འགྱུར་རོ། །གལ་ཏེ་མི་རྟག་ན་སེམས་ཅན་དམྱལ་བར་ཁ་ན་མ་ཐོ་བའི་ལས་མྱོང་བར་འགྱུར། གལ་ཏེ་ངེས་པར་སེམས་ཅན་དམྱལ་བའི་རྣམ་པར་སྨིན་པ་མྱོང་ན་འདུ་བྱེད་རྣམས་ཀྱང་ཡང་དག་པར་མི་རྟག་པ་མ་ལགས་པར་འགྱུར་རོ། །བཅོམ་ལྡན་འདས་སེམས་རྩེ་གཅིག་ཏུ་སེམས་ཤིང་དྲན་པ་ཡང་རྟག་པ་ཞེས་བགྱིའོ། །འདི་ལྟ་སྟེ། ལོ་བཅུ་ལོན་ཏེ་དྲན་པ་ནི་ལོ་བརྒྱའི་བར་དུ་དྲན་ཏེ་མི་བརྗེད་པ་ཡང་རྟག་པ་ཞེས་བགྱི་སྟེ། ཅི་སྟེ་མི་རྟག་ན་སྔོན་མཐོང་བའི་དངོས་པོ་དག་སུས་དྲན་པར་འགྱུར། དེ་བས་ན་འདུ་བྱེད་ཐམས་ཅད་མི་རྟག་པ་མ་ལགས་སོ། །བཅོམ་ལྡན་འདས་དྲན་པ་ཐམས་ཅད་ཀྱང་རྟག་པ་ཞེས་བགྱིའོ། །དཔེར་ན་མི་ཞིག་སྔོན་མི་གཞན་ཞིག་གི་ལག་པའམ། རྐང་པའམ། མགོའམ། གཉའ་བ་ལ་སོགས་པ་ཅི་འདྲ་བ་མཐོང་ན་ཕྱིས་མཐོང་མ་ཐག་ཏུ་ངོ་ཤེས་སོ། །ཅི་སྟེ་མི་རྟག་པ་ཞིག་ལགས་ན་མཚན་མ་སྔ་མ་མེད་པར་སོང་བའི་རིགས་སོ། །བཅོམ་ལྡན་འདས་ལས་བྱེད་པ་ཐམས་ཅད་ནི་ཡུན་རིང་དུ་གོམས་པ་ལས་འགྱུར་ཏེ།
ཐོག་མ་སློབ་པ་ནས་ལོ་གསུམ་མམ། ལོ་ལྔ་ནས་མཁས་པར་འགྱུར་བས་རྟག་པ་ཞེས་བགྱིའོ། །བཅོམ་ལྡན་འདས་རྩིས་སློབ་པ་ཡང་གཅིག་ལས་གཉིས། གཉིས་ལས་གསུམ་སྟེ། བརྒྱ་སྟོང་གི་བར་དུའོ། །ཅི་སྟེ་མི་རྟག་ན་ཐོག་མའི་གཅིག་ཀྱང་མ་མཆིས་པར་འགྱུར་རོ། །གལ་ཏེ་ཐོག་མ་གཅིག་མ་མཆིས་ན་གཉིས་སུ་ག་ལ་འགྱུར་ཏེ། དེ་ལྟར་ན་གཅིག་ནི་རྟག་པ་སྟེ་གཉིས་མ་ལགས་སོ། །གཅིག་མ་མཆིས་པར་མ་སོང་བས་གཉིས་ནས་བརྒྱ་སྟོང་གི་བར་དུ་འགྱུར་ཏེ། དེ་བས་ན་རྟག་གོ །བཅོམ་ལྡན་འདས་དཔེར་ན་ཆོས་ཀློག་པའམ། འདོན་པ་ལྟ་བུ་ཨ་ག་མ་གཅིག་དང་། ཨ་ག་མ་གཉིས་དང་། ཨ་ག་མ་གསུམ་དང་། བཞིའི་བར་དུ་འདོན་པར་འགྱུར་རོ། །གལ་ཏེ་མི་རྟག་ན་ཀློག་པ་དང་། འདོན་པ་བཞི་ལ་ཐུག་གི་བར་དུ་མི་འགྱུར་ཏེ། ཀློག་པ་དང་འདོན་པ་འཕེལ་ཞིང་སྐྱེ་བས་ན་རྟག་པ་ཞེས་བགྱིའོ། །བཅོམ་ལྡན་འདས་བུམ་པ་དང་། གོས་དང་། ཤིང་རྟ་དང་། བུ་ལོན་ཆགས་པ་དང་། ས་ཆེན་པོའི་མཚན་ཉིད་རི་དང་། ཆུ་དང་། ནགས་ཚལ་དང་། རྩི་ཤིང་གི་ལོ་མ་དང་། སེམས་ཅན་གྱི་ནད་གསོ་བ་ལ་སོགས་པ་ཐམས་ཅད་རྟག་སྟེ་དེ་དང་འདྲའོ། །བཅོམ་ལྡན་འདས་མུ་སྟེགས་ཅན་ཐམས་ཅད་ནི་དེ་སྐད་ཅེས་མཆི་སྟེ། འདུ་བྱེད་ཐམས་ཅད་རྟག་ཅེས་མཆིའོ། །འདུ་བྱེད་ཐམས་ཅད་རྟག་ན་ཡང་དག་པའི་བདེན་པ་ལགས་པར་འགྱུར་རོ། །བཅོམ་ལྡན་འདས་མུ་སྟེགས་ཅན་ཁ་ཅིག་ཀྱང་འདི་སྐད་དུ་བདེ་བ་ཡང་ཡོད་ཅེས་མཆིའོ། །ཇི་ལྟར་ཤེས་ཞེ་ན། ཡིད་དུ་འོང་བའི་འབྲས་བུ་མྱོང་བར་འགྱུར་བའི་སླད་དུའོ། །བཅོམ་ལྡན་འདས་བདེ་བ་མྱོང་བ་ནི་ངེས་པར་མཆིས་སོ། །འདི་ལྟ་སྟེ། ཚངས་པའི་རྒྱལ་པོ་ཆེན་པོ་དང་། དབང་བསྒྱུར་ཆེན་པོ་དང་། བརྒྱ་བྱིན་ལྷའི་དབང་ཕྱུག་དང་། འཇུག་སེལ་དང་། ལྷ་དང་། མི་ལ་སོགས་པ་སྟེ། དེ་བས་ན་ངེས་པར་བདེ་བ་མཆིས་སོ། །བཅོམ་ལྡན་འདས་མུ་སྟེགས་ཅན་ཁ་ཅིག་ཀྱང་འདི་སྐད་དུ་བདེ་བ་མཆིས་ཞེས་སྨྲ་སྟེ། དེ་ཡང་སེམས་ཅན་དག་རེ་ཞིང་
ཚོལ་བའི་སེམས་སྐྱེ་བའོ། །འདི་ལྟ་སྟེ་བཀྲེས་པ་ཟས་ཚོལ་བ་དང་། སྐོམ་པ་ཆུ་ཚོལ་བ་དང་། གྲང་བ་དྲོ་བ་ཚོལ་བ་དང་། ཚ་བ་བསིལ་བ་འདོད་པ་དང་། ངལ་བ་བསྟི་འདོད་པ་དང་། ནད་པ་འཚོ་འདོད་པ་དང་། འདོད་པ་གཟུགས་ཚོལ་བ་སྟེ། ཅི་སྟེ་བདེ་བ་མ་མཆིས་ན་དེ་དག་ཅིའི་སླད་དུ་ཚོལ། ཚོལ་བ་མཆིས་པས་ན་བདེ་བ་མཆིས་པར་མངོན་ནོ། །བཅོམ་ལྡན་འདས་མུ་སྟེགས་ཅན་ཁ་ཅིག་ཀྱང་འདི་སྐད་ཅེས་མཆིའོ། །སྦྱིན་པ་བྱིན་པས་བདེ་བར་འགྱུར་ཏེ། འཇིག་རྟེན་པ་དག་དགེ་སློང་ངམ། བྲམ་ཟེའམ། དབུལ་ཕོངས་པ་ལ་གོས་དང་། ཟས་དང་། སྐོམ་དང་། མལ་ཆ་དང་། ནད་ཀྱི་རྐྱེན་སྨན་དང་། བལ་གླང་དང་། རྟ་དང་། ཐེག་པ་དང་། སྤོས་ཕྱེ་མ་དང་། མེ་ཏོག་དང་། ཁང་ཁྱིམ་དང་། གནས་དང་། མེ་མར་ལ་སོགས་པ་སྦྱིན་པ་བྱིན་ན། ཚེ་ཕྱི་མ་ལ་ཡིད་དུ་འོང་བའི་འབྲས་བུ་མྱོང་བར་འགྱུར་ཏེ། དེ་བས་ན་ངེས་པར་བདེ་བ་མཆིས་སོ། །བཅོམ་ལྡན་འདས་མུ་སྟེགས་ཅན་ཁ་ཅིག་ཀྱང་འདི་སྐད་ཅེས་མཆིའོ། །རྒྱུ་དང་རྐྱེན་གྱི་ཕྱིར་བདེ་བ་མཆིས་པར་འཚལ་ལོ། །འདི་ལྟ་སྟེ་བདེ་བ་མྱོང་བ་ཡང་རྒྱུ་དང་རྐྱེན་མཆིས་པས་ན་བདེ་བ་ལ་རེག་པ་ཞེས་བྱ་སྟེ། བདེ་བ་མ་མཆིས་ན་རྒྱུ་དང་རྐྱེན་ཡང་ག་ལ་མཆིས། དཔེར་ན་རི་བོང་གི་རྭ་མ་མཆིས་ན། རྒྱུ་དང་རྐྱེན་ཡང་མ་མཆིས་སོ། །བདེ་བའི་རྒྱུ་དང་རྐྱེན་མཆིས་པས་བདེ་བ་མཆིས་པར་འཚལ་ལོ། །བཅོམ་ལྡན་འདས་མུ་སྟེགས་ཅན་ཁ་ཅིག་ཀྱང་འདི་སྐད་ཅེས་མཆི་སྟེ། རབ་དང་འབྲིང་དང་། ཐ་མའི་ཕྱིར་བདེ་བ་མཆིས་པར་འཚལ་ཏོ། །བདེ་བ་མྱོང་བ་ཐ་མ་ནི་བརྒྱ་བྱིན་ལྷའི་དབང་ཕྱུག་གོ །བདེ་བ་མྱོང་བ་འབྲིང་ནི་ཚངས་པ་ཆེན་པོ་ལྷའི་རྒྱལ་པོའོ། །བདེ་བ་མྱོང་བ་རབ་ནི་དབང་སྒྱུར་ཆེན་པོ་སྟེ། དེ་ལྟར་རབ་དང་འབྲིང་དང་། ཐ་མ་མཆིས་པས་བདེ་བ་མཆིས་པར་འཚལ་ཏོ། །བཅོམ་ལྡན་འདས་མུ་སྟེགས་ཅན་ཁ་ཅིག་ནི་འདི་སྐད་ཅེས་དག་པ་མཆིས་སོ། །ཞེས་མཆིའོ། །དེ་ཅིའི་སླད་དུ་ཞེ་ན། ཅི་སྟེ་དག་པ་ཞིག་མ་མཆིས་ན་འདོད་པ་སྐྱེ་བ་ཡང་མི་རིགས་ན། འདོད་པ་སྐྱེ་བ་ལས་ན་དག་པ་མཆིས་པར་འཚལ་ཏོ། །ཁ་
ཅིག་ཀྱང་འདི་སྐད་ཅེས་མཆི་སྟེ། གསེར་དང་། དངུལ་དང་། བཻ་དཱུརྱ་དང་། ཤེལ་དང་། ཨ་ས་མ་གར་བྷ་དང་། མུ་ས་ལ་གལ་བ་དང་། སྤུག་དང་། མུ་ཏིག་དང་། ཤེལ་གྱི་སྣམ་བུ་དང་། དོ་ཤལ་དང་། འབབ་ཆུ་དང་། ཆུ་མིག་དང་། ཁྲུས་ཀྱི་རྫིང་བུ་དང་། བཟའ་བ་དང་། བཏུང་བ་དང་། གོས་དང་། མེ་ཏོག་དང་། སྤོས་དང་། སྤོས་ཕྱེ་མ་དང་། བྱུག་སྤོས་དང་། སྣང་བའི་སྒྲོན་མ་ལ་སོགས་པ་ཐམས་ཅད་ཀྱང་ཡོངས་སུ་དག་པའི་ཆོས་ཅན་ནོ། །ཞེས་མཆིའོ། །གཞན་ཡང་འདི་སྐད་དུ་ཕུང་པོ་ལྔ་ནི་སྣོད་གཙང་མ་སྟེ་བཅུད་ཀྱང་གཙང་མས་ཡོངས་སུ་གང་ངོ་། །འདི་ལྟ་སྟེ་ལྷ་དང་། མི་དང་། དྲང་སྲོང་དང་། དགྲ་བཅོམ་པ་དང་། རང་སངས་རྒྱས་དང་། བྱང་ཆུབ་སེམས་དཔའ་དང་། སངས་རྒྱས་རྣམས་ཏེ་དོན་དེ་ལྟ་བས་ན་གཙང་ངོ་ཞེས་མཆིའོ། །བཅོམ་ལྡན་འདས་མུ་སྟེགས་ཅན་ཁ་ཅིག་ནི་བདག་ཅེས་བགྱི་བ་མཆིས་སོ་ཞེས་མཆི་སྟེ། ཇི་ཙམ་དུ་མཐོང་བ་དང་། བྱ་བ་བྱེད་པ་ནི་བདག་གོ་ཞེས་མཆི་སྟེ། དཔེར་ན་མི་ཞིག་རྫ་མཁན་གྱི་ཁྱིམ་དུ་ཕྱིན་ན་རྫ་མཁན་ཉིད་དང་མ་ཕྲད་ཀྱང་། འཇི་བ་དང་འཁོར་ལོ་མཐོང་བས་གདོན་མི་ཟ་བར་རྫ་མཁན་གྱི་ཁྱིམ་ཡིན་པར་ཤེས་ཏེ། བདག་ཅེས་བྱ་བ་ཡང་དེ་དང་འདྲ་སྟེ། མིག་གིས་གཟུགས་མཐོང་མ་ཐག་ཏུ་ངེས་པར་བདག་ཅེས་བགྱི་བ་མཆིས་པར་འཚལ་ཏོ། །ཅི་སྟེ་བདག་ཅེས་བགྱི་བ་མ་མཆིས་ན། སུ་ཞིག་གིས་གཟུགས་མཐོང་སུ་ཞིག་གིས་སྒྲ་ཐོས་པ་ནས་རེག་བྱ་དང་། ཆོས་ཀྱི་བར་དུ་རྒྱས་པར་རོ། །གཞན་ཡང་བདག་ཅེས་བགྱི་བ་མཆིས་ཏེ། ཇི་ལྟར་ཤེས་ཞེ་ན། མཚན་མ་ལས་རིག་པར་འགྱུར་ཏེ། མཚན་མ་ཞེས་བགྱི་བ་ཇི་ལྟ་བུ་ཞེ་ན། དབུགས་རྒྱུ་བ་དང་། མིག་གིས་བལྟ་ཞིང་འཛུམ་པ་དང་། ཚེའི་ཚད་དང་། སྡུག་བསྔལ་དང་། བདེ་བ་མྱོང་བ་དང་། ཆགས་པས་ཁྲོ་བ་དང་། ཆོས་དེ་དག་ལ་སོགས་པ་ནི་ཐམས་ཅད་བདག་ཅེས་བགྱི་བའི་མཚན་མ་ལགས་ཏེ། དེ་བས་ན་ངེས་པར་བདག་ཅེས་བགྱི་བ་མཆིས་པར་འཚལ་ཏོ། །གཞན་ཡང་བདག་ཅེས་བགྱི་བ་མཆིས་པ་ནི་རོ་བྲོ་བའི་བྱེ་བྲག་ཕྱེད་པ་སྟེ། དཔེར་ན་མི་ཞིག་ཤིང་ཐོག་ཟོས་ན་མཐོང་མ་ཐག་ཏུ་རོ་ཅི་བྲོ་བ་འཚལ་ཏེ། དེ་བས་ན་བདག་ཅེས་བགྱི་བ་མཆིས་སོ། །གཞན་
ཡང་བདག་ཅེས་བགྱི་བ་མཆིས་པར་ལས་བགྱིད་པའི་སྒོ་ནས་རིག་སྟེ། སྐམ་པ་ཐོགས་ན་འཛིན་པའི་ལས་བྱེད། སྟ་རེ་ཐོགས་ན་གཅོད་པའི་ལས་བྱེད། བུམ་པ་ཐོགས་ན་ཆུ་ལྡུགས་པའི་ལས་བྱེད། ཤིང་རྟ་དང་འགྲོགས་ན་འཁོར་ལོས་སྒྱུར་བའི་ལས་བགྱིད་དེ། ལས་དེ་དག་ལ་སོགས་པ་ཡང་བདག་ཅེས་བགྱི་བ་དེས་བཟུང་བས་ན་བྱེད་པར་འགྱུར་ཏེ། དེ་བས་ན་ངེས་པར་བདག་ཅེས་བགྱི་བ་མཆིས་སོ། །གཞན་ཡང་བདག་ཅེས་བགྱི་བར་མཆིས་པར་ཅི་མངོན་ཞེ་ན། དཔེར་ན་བུ་བྱུང་མ་ཐག་ཏུ་ནུ་ཞོ་འཐུང་འཚལ་བ་ནི་སྔོན་གྱི་བག་ཆགས་ལས་གྱུར་ཏེ། དེ་བས་ན་ངེས་པར་བདག་ཅེས་བགྱི་བ་མཆིས་སོ། །གཞན་ཡང་བདག་ཅེས་བགྱི་བ་མཆིས་ཏེ། ཅི་མངོན་ཞེ་ན། འདུས་ཤིང་ཚོགས་པ་ལས་སེམས་ཅན་ཕ་རོལ་ལ་ཕན་པར་འགྱུར་བའི་ཕྱིར་ཏེ། དཔེར་ན་བུམ་པ་དང་། གོས་དང་། ཤིང་རྟ་དང་། ཞིང་དང་། ཁྱིམ་དང་། རི་དང་། ནགས་ཚལ་དང་། ཤིང་དང་། བལ་གླང་དང་། རྟ་དང་། བ་ལང་དང་། ལུག་ལ་སོགས་ཏེ། དངོས་པོ་དེ་དག་འདུས་པ་ལས་ཕན་པའི་དོན་དུ་འགྱུར་ཏེ། ནང་གི་ཕུང་པོ་ལྔ་ཡང་དེ་དང་འདྲ་བར་མིག་གི་དབང་པོ་ལ་སོགས་པ་འདུས་ཤིང་ཚོགས་ན་བདག་ཅེས་བྱ་བ་ལ་ཕན་པར་འགྱུར་ཏེ། དེ་བས་ན་བདག་ཅེས་བགྱི་བ་ངེས་པར་མཆིས་སོ། །གཞན་ཡང་བདག་ཅེས་བགྱི་བ་མཆིས་པར་ཅི་མངོན་ཞེ་ན། བར་དུ་གཅོད་ཅིང་སྒྲིབ་ནུས་པའི་ཕྱིར་རོ། །དཔེར་ན་དངོས་པོ་མཆིས་ན་བར་དུ་བཅད་ཅིང་། བསྒྲིབ་ཏུ་རུང་གི ། དངོས་པོ་མ་མཆིས་ན་བསྒྲིབ་ཏུ་མ་མཆིས་ཏེ། བསྒྲིབ་ཅིང་བར་དུ་གཅད་དུ་མཆིས་པས་ན་བདག་ཅེས་བགྱི་བ་མཆིས་པར་འཚལ་ཏོ། །དེ་བས་ན་བདག་ཅེས་བགྱི་བ་ངེས་པར་མཆིས་སོ། །གཞན་ཡང་བདག་ཅེས་བགྱི་བ་མཆིས་པར་ཅི་མངོན་ཞེ་ན། གྲོགས་དང་གྲོགས་མ་ཡིན་པའི་ཕྱིར་ཏེ། གཉེན་དང་གཉེན་མ་ཡིན་པ་ཡང་གྲོགས་སུ་འགྱུར་བ་མ་ལགས། ཡང་དག་པའི་ཆོས་དང་ལོག་པའི་ཆོས་ཀྱང་གྲོགས་སུ་འགྱུར་བ་མ་
ལགས། ཡེ་ཤེས་དང་ཡེ་ཤེས་མ་ཡིན་པ་ཡང་གྲོགས་སུ་འགྱུར་བ་མ་ལགས། དགེ་སྦྱོང་དང་དགེ་སྦྱོང་མ་ཡིན་པ་ཡང་གྲོགས་སུ་འགྱུར་བ་མ་ལགས། བྲམ་ཟེ་དང་བྲམ་ཟེ་མ་ཡིན་པ་དང་། བུ་དང་བུ་མ་ཡིན་པ་དང་། ཉིན་དང་ཉིན་མ་ཡིན་པ་དང་། མཚན་དང་མཚན་མ་ཡིན་པ་དང་། བདག་དང་བདག་མ་ཡིན་པ་ལ་སོགས་པ་ཆོས་དེ་དག་ནི་གྲོགས་དང་གྲོགས་མ་ཡིན་པས་ན། བདག་ཅེས་བགྱི་བ་ངེས་པར་མཆིས་སོ། །བཅོམ་ལྡན་འདས་མུ་སྟེགས་ཅན་དག་ཀྱང་དེ་ལྟར་རྣམ་པ་སྣ་ཚོགས་ཀྱི་སྒོ་ནས་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་མཆིས་པར་སྨྲ་སྟེ། རྟག་པ་དང་། བདེ་བ་དང་། བདག་དང་ཡོངས་སུ་དག་པ་ཞེས་བགྱི་བ་ངེས་པར་མཆིས་པར་འཛིན་ཏོ། །བཅོམ་ལྡན་འདས་དོན་དེ་ལྟ་བས་ན་མུ་སྟེགས་ཅན་དག་ཀྱང་ཡང་དག་པའི་བདེན་པ་མཆིས་ཞེས་སྨྲའོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དགེ་སྦྱོང་ངམ་བྲམ་ཟེ་གང་ཞིག་རྟག་པ་ཡོད་ཅེའམ། བདེ་བ་ཡོད་ཅེའམ། ཡོངས་སུ་དག་པ་ཡོད་ཅེའམ། བདག་ཡོད་ཅེས་སྨྲ་ན། དེ་ནི་དགེ་སྦྱོང་མ་ཡིན། བྲམ་ཟེ་མ་ཡིན་ནོ། །དེ་ཅིའི་ཕྱིར་ཞེ་ན། འཁོར་བ་ལས་འཁྲུལ་ཏེ། ཐམས་ཅད་མཁྱེན་པའི་ཡེ་ཤེས་དང་ལྡན་པའི་སྟོན་པ་ཆེན་པོ་སྤོང་བའི་ཕྱིར་རོ། །དགེ་སྦྱོང་དང་བྲམ་ཟེ་དེ་དག་ནི་འདོད་པའི་ནང་དུ་ཤིན་ཏུ་བྱིང་བས་དགེ་བའི་ཆོས་ཉམ་ཆུང་བའི་ཕྱིར་རོ། །མུ་སྟེགས་ཅན་དེ་དག་ནི་འདོད་ཆགས་དང་། ཞེ་སྡང་དང་། གཏི་མུག་གིས་རྣམ་པར་བཅིངས་ཀྱང་། འདོད་པའི་བདེ་བ་ལ་བཟོད་པར་བྱེད་པའི་ཕྱིར་རོ། །མུ་སྟེགས་ཅན་དེ་དག་ནི་ལས་ཀྱི་འབྲས་བུ་བདག་གིས་བྱས་པ། བདག་གིས་མྱོང་བར་ཤེས་མོད་ཀྱི། མི་དགེ་བའི་ཆོས་སྤོང་བར་མི་ནུས་སོ། །མུ་སྟེགས་ཅན་དེ་དག་ནི་ཡང་དག་པའི་ཆོས་ཅན་མ་ཡིན། ཡང་དག་པའི་འཚོ་བས་འཚོ་བ་མ་ཡིན་ནོ། །དེ་ཅིའི་ཕྱིར་ཞེ་ན། ཤེས་རབ་ཀྱི་མེ་མེད་དེ་སྦྱོང་མི་ནུས་པའི་ཕྱིར་རོ། །མུ་སྟེགས་ཅན་དེ་དག་ནི་འདོད་པ་ལྔའི་མཆོག་
དམ་པ་ལ་ཆགས་མོད་ཀྱི། བརྩོན་འགྲུས་སུ་ནན་ཏན་མི་བྱེད་པས་དགེ་བའི་ཆོས་ཀྱིས་དབུལ་བའི་ཕྱིར་རོ། །མུ་སྟེགས་ཅན་དེ་དག་ནི་ཡང་དག་པའི་རྣམ་པར་ཐར་པ་འདོད་མོད་ཀྱི་ཚུལ་ཁྲིམས་བསྲུང་བའི་རྐང་པ་དང་མི་ལྡན་པའི་ཕྱིར་རོ། །མུ་སྟེགས་ཅན་དེ་དག་ནི་བདེ་བ་འདོད་མོད་ཀྱི་བདེ་བར་འགྱུར་བའི་རྒྱུ་དང་རྐྱེན་ཚོལ་མི་ནུས་སོ། །མུ་སྟེགས་ཅན་དེ་དག་ནི་སྡུག་བསྔལ་བར་འགྱུར་བ་ཐམས་ཅད་མི་འདོད་མོད་ཀྱི། སྤྱོད་པ་ཐམས་ཅད་སྡུག་བསྔལ་གྱི་རྒྱུར་འགྱུར་བ་མི་སྤོང་ངོ་། །མུ་སྟེགས་ཅན་དེ་དག་ནི་ཆེན་པོ་བཞིའི་སྦྲུལ་གདུག་པས་དཀྲིས་ཤིང་གླགས་ཀྱང་བག་མེད་པར་སྤྱོད་དོ། །མུ་སྟེགས་ཅན་དེ་དག་ནི་མ་རིག་པས་ཡོངས་སུ་ཁེབས་པས་དགེ་བའི་བཤེས་གཉེན་སྤོང་སྟེ། ཁམས་གསུམ་དུ་གནས་པར་མོས་པས་མི་རྟག་པའི་མེ་ཆེན་པོ་ཤིན་ཏུ་འབར་བ་ལས་ཐར་བར་མི་ནུས་སོ། །མུ་སྟེགས་ཅན་དེ་དག་ནི་ཉོན་མོངས་པའི་ནད་ལྕི་བ་འཚོ་དཀའ་བས་བཏབ་ཀྱང་མཁས་པ་དང་ལྡན་པའི་སྨན་པ་མི་ཚོལ་ལོ། །མུ་སྟེགས་ཅན་དེ་དག་ནི་མ་འོངས་པའི་དུས་མཐའ་མེད་པའི་ལམ་རིང་པོ་ཤིན་ཏུ་ཡ་ང་བ་བགྲོད་དགོས་ཀྱང་བདེ་བའི་ཆོས་ཀྱི་ཚོགས་བསག་ཅིང་བདག་གི་རྒྱན་དུ་འགྱུར་བ་མི་ཤེས་སོ། །མུ་སྟེགས་ཅན་དེ་དག་ནི་འདོད་ཆགས་ཀྱི་གདུག་པས་གསོད་པར་འགྱུར་ཡང་འདོད་པ་ལྔའི་བ་མོ་གདུག་པ་ལ་ཆགས་སོ། །མུ་སྟེགས་ཅན་དེ་དག་ནི་ཞེ་སྡང་གི་མེ་ཤིན་ཏུ་འབར་ཞིང་མཆེད་ཀྱང་མི་དགེ་བའི་བཤེས་གཉེན་ལ་སྟེན་པར་བྱེད་དོ། །མུ་སྟེགས་ཅན་དེ་དག་ནི་མ་རིག་པས་ཁེབས་ཏེ་ཟིལ་གྱིས་ནོན་ཀྱང་ངན་པར་ལྟ་བའི་ཆོས་ལོག་པ་ཚོལ་ལོ། །མུ་སྟེགས་ཅན་དེ་དག་ནི། ངན་པར་ལྟ་བས་རྟག་ཏུ་བསླུས་ཀྱང་དེ་དག་ལ་དགེ་བའི་བཤེས་གཉེན་དུ་འདུ་ཤེས་སྐྱེད་དོ། །མུ་སྟེགས་ཅན་དེ་དག་ནི་འབྲས་བུ་ཞིམ་པོ་ལ་རེ་ཡང་འབྲས་བུ་ཁ་བའི་ས་བོན་འདེབས་སོ། །མུ་སྟེགས་ཅན་དེ་དག་ནི་ཉོན་མོངས་པའི་མུན་ཁང་དུ་ཞུགས་ཀྱང་ཡེ་ཤེས་ཆེན་པོའི་སྒྲོན་མ་སྤོང་བར་བྱེད་དོ། །མུ་སྟེགས་ཅན་དེ་དག་ནི་ཉོན་མོངས་པས་ཤིན་ཏུ་གདུངས་ཏེ་ཤིན་ཏུ་སྐོམ་ཡང་
འདོད་པའི་ཚྭ་ཆུ་འཐུང་ངོ་། །མུ་སྟེགས་ཅན་དེ་དག་ནི་འཁོར་བའི་རྒྱ་མཚོ་མཐའ་ཡས་པས་གཡེངས་ཀྱང་བླ་ན་མེད་པའི་གྲུ་སྤོང་བར་བྱེད་དོ། །མུ་སྟེགས་ཅན་དེ་དག་ནི་ཕྱིན་ཅི་ལོག་གིས་ཤིན་ཏུ་བསླད་ཀྱང་འདུ་བྱེད་ཐམས་ཅད་རྟག་ཅེས་སྨྲ་སྟེ། འདུ་བྱེད་ཐམས་ཅད་ནི་རྟག་ཅེས་བྱ་བའི་གནས་མེད་དོ། །རིགས་ཀྱི་བུ་ངས་བལྟས་ན་འདུ་བྱེད་ཐམས་ཅད་ནི་མི་རྟག་པའོ། །དེ་ཡང་ཇི་ལྟར་ཤེས་ཞེ་ན། རྒྱུ་དང་རྐྱེན་གྱི་སྒོ་ནས་ཤེས་སོ། །ཇི་ཙམ་དུ་རྐྱེན་ལས་སྐྱེས་པའི་ཆོས་ཐམས་ཅད་ནི་མི་རྟག་པར་རིག་པར་བྱའོ། །དེ་བས་ན་མུ་སྟེགས་ཅན་གྱི་ཆོས་ཐམས་ཅད་ནི་གཅིག་ཙམ་ཡང་རྐྱེན་ལས་མ་སྐྱེས་པ་མེད་དོ། །རིགས་ཀྱི་བུ་སངས་རྒྱས་ཀྱི་རང་བཞིན་ནི་མ་སྐྱེས་པ། མི་འགོག་པ། འོང་བ་ཡང་མེད། སོང་བ་ཡང་མེད། འདས་པ་མ་ཡིན། མ་འོངས་པ་མ་ཡིན། ད་ལྟར་བྱུང་བ་མ་ཡིན། རྒྱུ་ལས་བྱས་པ་མ་ཡིན། རྒྱུ་མེད་པ་ལས་བྱས་པ་མ་ཡིན། མ་བྱས་པ་མ་ཡིན། བྱས་པ་མ་ཡིན། མཚན་མ་མ་ཡིན། མཚན་མ་མེད་པ་མ་ཡིན། མིང་ཡོད་པ་མ་ཡིན། མིང་མེད་པ་མ་ཡིན། མིང་མ་ཡིན། གཟུགས་མ་ཡིན། རིང་པོ་མ་ཡིན། ཐུང་ངུ་མ་ཡིན། ཕུང་པོ་དང་། ཁམས་མ་ཡིན། སྐྱེ་མཆེད་དུ་གཏོགས་པ་མ་ཡིན་པས་ན་རྟག་པ་ཞེས་བྱའོ། །རིགས་ཀྱི་བུ་རང་སངས་རྒྱས་ཀྱི་རང་བཞིན་ནི་དེ་བཞིན་གཤེགས་པའོ། །དེ་བཞིན་གཤེགས་པ་ནི་ཆོས་སོ། །ཆོས་ནི་རྟག་པའོ། །རིགས་ཀྱི་བུ་རྟག་ཅེས་བྱ་བ་ནི་དེ་བཞིན་གཤེགས་པའོ། །དེ་བཞིན་གཤེགས་པ་ནི་དགེ་འདུན་ནོ། །དགེ་འདུན་ནི་རྟག་པའོ། །དོན་དེ་ལྟ་བས་ན་རྐྱེན་ལས་སྐྱེས་པའི་ཆོས་ཐམས་ཅད་ནི་རྟག་པ་ཞེས་མི་བྱ་སྟེ། མུ་སྟེགས་ཅན་དེ་དག་གི་ཆོས་ནི་གཅིག་ཙམ་ཡང་རྐྱེན་ལས་མ་སྐྱེས་པ་མེད་དོ། །རིགས་ཀྱི་བུ་མུ་སྟེགས་ཅན་དག་ནི་སངས་རྒྱས་ཀྱི་རང་བཞིན་དང་། དེ་བཞིན་གཤེགས་པ་དང་། ཆོས་མི་མཐོང་བས་དེ་བས་ན་མུ་སྟེགས་ཅན་དག་སྨྲ་བ་ཐམས་ཅད་ནི་བརྫུན་ཏེ་ཡང་དག་པའི་བདེན་པ་མེད་དོ། །བུས་པ་མ་རབས་དག་ནི་སྔོན་བུམ་པ་དང་། གོས་དང་། ཐེག་པ་དང་། ཁང་ཁྱིམ་དང་། གྲོང་ཁྱེར་དང་། ཆུ་ཀླུང་དང་། རི་དང་། ནགས་
ཚལ་དང་། སྐྱེས་པ་དང་། བུད་མེད་དང་། བལ་གླང་དང་། རྟ་དང་། བ་ལང་དང་། ལུག་ལ་སོགས་པ་མཐོང་བ་ལས་ཕྱིས་དེ་འདྲ་བ་ཞིག་མཐོང་ན་རྟག་པ་ཡིན་ནོ་ཞེས་སྨྲ་སྟེ། ཡང་དག་པར་ན་དེ་ནི་རྟག་པ་མ་ཡིན་ནོ། །རིགས་ཀྱི་བུ་འདུས་བྱས་ཐམས་ཅད་ནི་མི་རྟག་པའོ། །ནམ་མཁའ་དང་འདུས་མ་བྱས་ནི་རྟག་པ་ཞེས་བྱའོ། །སངས་རྒྱས་ཀྱི་རང་བཞིན་ནི་འདུས་མ་བྱས་པས་ན་རྟག་པ་ཞེས་བྱའོ། །ནམ་མཁའ་ཞེས་བྱ་བ་ནི་སངས་རྒྱས་ཀྱི་རང་བཞིན་ནོ། །སངས་རྒྱས་ཀྱི་རང་བཞིན་ནི་དེ་བཞིན་གཤེགས་པའོ། །དེ་བཞིན་གཤེགས་པ་ནི་འདུས་མ་བྱས་པའོ། །འདུས་མ་བྱས་པ་ནི་རྟག་པའོ། །རྟག་པ་ནི་ཆོས་སོ། །ཆོས་ནི་དགེ་འདུན་ནོ། །དགེ་འདུན་ནི་འདུས་མ་བྱས་སོ། །འདུས་མ་བྱས་ནི་རྟག་པའོ། །རིགས་ཀྱི་བུ་འདུས་བྱས་ཀྱི་ཆོས་ལ་མདོར་ན་རྣམ་པ་གཉིས་ཏེ། གཟུགས་ཀྱི་ཆོས་དང་། གཟུགས་མ་ཡིན་པའི་ཆོས་སོ། །གཟུགས་མ་ཡིན་པའི་ཆོས་ཞེས་བྱ་བ་ནི་སེམས་དང་སེམས་ལས་བྱུང་བའི་ཆོས་སོ། །གཟུགས་ཀྱི་ཆོས་ཞེས་བྱ་བ་ནི་ས་དང་ཆུ་དང་མེ་དང་རླུང་ངོ་། །རིགས་ཀྱི་བུ་སེམས་ནི་མི་རྟག་པ་ཞེས་བྱའོ། །དེ་ཅིའི་ཕྱིར་ཞེ་ན། རང་བཞིན་གྱིས་དམིགས་ཤིང་རྣམ་པར་རྟོག་པ་དང་ལྡན་པའི་ཕྱིར་རོ། །རིགས་ཀྱི་བུ་མིག་གི་རྣམ་པར་ཤེས་པའི་རང་བཞིན་སོ་སོ་བ་ནས་ཡིད་ཀྱི་རྣམ་པར་ཤེས་པའི་རང་བཞིན་གྱི་བར་དུ་ཡང་སོ་སོ་སྟེ། དེ་བས་ན་མི་རྟག་གོ །རིགས་ཀྱི་བུ་གཟུགས་ཀྱི་སྤྱོད་ཡུལ་སོ་སོ་བ་ནས་ཆོས་ཀྱི་སྤྱོད་ཡུལ་གྱི་བར་དུ་ཡང་སོ་སོ་སྟེ། དེ་བས་ན་མི་རྟག་གོ །རིགས་ཀྱི་བུ་མིག་གི་རྣམ་པར་ཤེས་པ་དང་ལྡན་པ་ནས་ཡིད་ཀྱི་རྣམ་པར་ཤེས་པ་དང་ལྡན་པའི་བར་དུ་སོ་སོ་སྟེ། དེ་བས་ན་མི་རྟག་གོ །རིགས་ཀྱི་བུ་ཅི་སྟེ་སེམས་རྟག་པ་ཞིག་ཡིན་ན་ནི་མིག་གི་རྣམ་པར་ཤེས་པ་འབའ་ཞིག་གིས་ཆོས་ཐམས་ཅད་ལ་དམིགས་པར་འགྱུར་བའི་རིགས་སོ། །རིགས་ཀྱི་བུ་མིག་གི་རྣམ་པར་ཤེས་པ་སོ་སོ་བ་ནས་ཡིད་ཀྱི་རྣམ་པར་ཤེས་པའི་བར་དུ་སོ་སོ་བས་ན་མི་རྟག་པར་ཤེས་སོ། །འདྲ་བའི་ཆོས་སྐད་ཅིག་སྐད་ཅིག་ཏུ་སྐྱེ་ཞིང་འགོག་པས་བྱིས་པ་མ་རབས་ཀྱིས་དེ་ལྟར་མཐོང་ནས་རྟག་པར་འཛིན་ཏོ། །
རིགས་ཀྱི་བུ་རྒྱུ་དང་རྐྱེན་གྱི་མཚན་ཉིད་གཞིག་ཏུ་རུང་བས་ན་མི་རྟག་པ་ཞེས་བྱའོ། །འདི་ལྟ་སྟེ་མིག་གི་དབང་པོ་དང་། གཟུགས་དང་། སྣང་བ་དང་། བསམས་པའི་རྐྱེན་ལས་མིག་གི་རྣམ་པར་ཤེས་པ་སྐྱེ་སྟེ། རྣ་བའི་རྣམ་པར་ཤེས་པ་སྐྱེ་བ་ན་ཡང་རྐྱེན་སོ་སོ་བས། མིག་གི་རྣམ་པར་ཤེས་པའི་རྐྱེན་གྱིས་མ་ཡིན་པ་ནས་ཡིད་ཀྱི་རྣམ་པར་ཤེས་པའི་བར་དུ་སོ་སོ་བ་ཡང་དེ་བཞིན་དུ་རིག་པར་བྱའོ། །གཞན་ཡང་རིགས་ཀྱི་བུ་འདུ་བྱེད་རྣམས་ཀྱི་རྒྱུ་དང་རྐྱེན་འཇིག་པས་ན་སེམས་ནི་མི་རྟག་གོ །འདི་ལྟ་སྟེ་མི་རྟག་པ་སྒོམ་པའི་སེམས་ཀྱང་གཞན་ལ། སྡུག་བསྔལ་བ་དང་། སྟོང་པ་ཉིད་དང་། བདག་མེད་པ་བསྒོམ་པའི་སེམས་ཀྱང་གཞན་ནོ། །ཅི་སྟེ་སེམས་རྟག་པ་ཞིག་ཡིན་ན་མི་རྟག་པ་རྟག་ཏུ་བསྒོམ་པས་ན་སྡུག་བསྔལ་བ་དང་། སྟོང་པ་ཉིད་དང་། བདག་མེད་པ་རྟོགས་པར་ཡང་མི་འགྱུར་ན། རྟག་པ་དང་། བདེ་བ་དང་། བདག་དང་། ཡོངས་སུ་དག་པ་རྟོགས་པ་ལྟ་ཅི་སྨོས་ཏེ། དོན་དེ་ལྟ་བས་ན་མུ་སྟེགས་ཅན་གྱི་ཆོས་ཀྱི་ནང་དུ་རྟག་པ་དང་། བདེ་བ་དང་། བདག་དང་ཡོངས་སུ་དག་པ་བསྡུ་མི་ནུས་སོ། །རིགས་ཀྱི་བུ་དེ་བས་ན་སེམས་ཀྱི་ཆོས་ནི་ངེས་པར་མི་རྟག་གོ །ཡང་ན་རིགས་ཀྱི་བུ་སེམས་ཀྱི་རང་བཞིན་ཐ་དད་པའི་ཕྱིར་ན་མི་རྟག་གོ །འདི་ལྟ་སྟེ་ཉན་ཐོས་ཀྱི་སེམས་ཀྱི་རང་བཞིན་སོ་སོ། རང་སངས་རྒྱས་ཀྱི་སེམས་ཀྱི་རང་བཞིན་སོ་སོ། སངས་རྒྱས་རྣམས་ཀྱི་སེམས་ཀྱི་རང་བཞིན་ཡང་སོ་སོ་སྟེ། མུ་སྟེགས་ཅན་ཐམས་ཅད་ཀྱི་སེམས་ནི་རྣམ་པ་གསུམ་སྟེ། རབ་ཏུ་བྱུང་བའི་སེམས་དང་ཁྱིམ་ན་གནས་པའི་སེམས་དང་། ཁྱིམ་ན་གནས་པས་དབེན་པའི་སེམས་སོ། །དབེན་པ་དང་ལྡན་པའི་སེམས་ཀྱང་གཞན་ལ། སྡུག་བསྔལ་དང་ལྡན་པའི་སེམས་ཀྱང་གཞན། བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པ་དང་ལྡན་པའི་སེམས་ཀྱང་གཞན། འདོད་ཆགས་དང་ལྡན་པའི་སེམས་ཀྱང་གཞན། ཞེ་སྡང་དང་ལྡན་པའི་སེམས་ཀྱང་གཞན། གཏི་མུག་དང་ལྡན་པའི་སེམས་ཀྱང་གཞན་ཏེ། མུ་སྟེགས་ཅན་ཐམས་ཅད་ཀྱི་སེམས་ཀྱི་མཚན་ཉིད་ཀྱང་གཞན་ནོ། །འདི་ལྟ་སྟེ་གཏི་མུག་དང་ལྡན་པའི་སེམས་ཀྱང་གཞན་ལ།
ཐེ་ཙོམ་དང་ལྡན་པའི་སེམས་ཀྱང་གཞན། ངན་པར་ལྟ་བ་དང་ལྡན་པའི་སེམས་ཀྱང་གཞན། འགྲོ་བ་དང་སྡོད་པའི་སྤྱོད་ལམ་གྱི་སེམས་ཀྱང་གཞན་ནོ། །རིགས་ཀྱི་བུ་ཅི་སྟེ་སེམས་རྟག་པ་ཞིག་ཡིན་ན། ཁ་དོག་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། སྨུག་པོར་བྱེ་བྲག་མི་ཕྱེད་པའི་རིགས་སོ། །རིགས་ཀྱི་བུ་གལ་ཏེ་སེམས་རྟག་པ་ཞིག་ཡིན་ན། དྲན་པར་བྱ་བའི་ཆོས་ཐམས་ཅད་བརྗེད་པར་འགྱུར་བའི་མི་རིགས་སོ། །རིགས་ཀྱི་བུ་ཅི་སྟེ་སེམས་རྟག་པ་ཞིག་ཡིན་ན་ཀློག་པ་དང་། འདོན་པའི་ལས་བྱེད་པ་འཕེལ་ཞིང་སྐྱེ་བའི་མི་རིགས་སོ། །རིགས་ཀྱི་བུ་ཅི་སྟེ་སེམས་རྟག་པ་ཞིག་ཡིན་ན་བྱས་པ་དང་། བྱེད་པ་དང་། བྱ་བ་བཤད་པའི་མི་རིགས་ཏེ། བྱས་པ་དང་། བྱེད་པ་དང་། བྱ་བ་ཡོད་པས་ན་སེམས་དེ་ནི་ངེས་པར་མི་རྟག་པར་ཤེས་པར་བྱའོ། །རིགས་ཀྱི་བུ་ཅི་སྟེ་སེམས་རྟག་པ་ཞིག་ཡིན་ན། སྡང་བ་དང་། བྱམས་པ་མེད་དོ། །སྡང་བ་ཡང་མ་ཡིན། བྱམས་པ་ཡང་མ་ཡིན་པར་འགྱུར་རོ། །ཅི་སྟེ་སེམས་རྟག་པ་ཞིག་ཡིན་ན་བདག་གི་རྫས་དང་། གཞན་གྱི་རྫས་ཞེའམ། འཆིའོ་སྐྱེའོ་ཞེས་བརྗོད་པའི་མི་རིགས་སོ། །ཅི་སྟེ་སེམས་རྟག་པ་ཞིག་ཡིན་ན་བྱ་བ་བྱས་ཀྱང་སྐྱེ་ཞིང་འཕེལ་བའི་མི་རིགས་སོ། །རིགས་ཀྱི་བུ་དོན་དེ་ལྟ་བས་ན་སེམས་ཀྱི་རང་བཞིན་ནི་སོ་སོ་ཐ་དད་དེ་ཐ་དད་པས་ན་མི་རྟག་པར་རིག་པར་བྱའོ། །རིགས་ཀྱི་བུ་ངས་འདིར་གཟུགས་མ་ཡིན་པའི་ཆོས་ལ་མི་རྟག་པའི་དོན་བཤད་པ་ནི་འདི་དག་ཡིན་ནོ། །དེ་ལ་གཞན་ཡང་ཁྱོད་ལ་གཟུགས་མི་རྟག་པ་བཤད་དེ། གཟུགས་ནི་མི་རྟག་པ་སྟེ་ཐོག་མ་ནས་མ་སྐྱེས་པའོ། །སྐྱེས་ནས་འགོག་པའི་ཕྱིར་མངལ་དུ་འཇུག་པ་ནུར་ནུར་པོའི་ཚེ་ཐོག་མ་ནས་མ་སྐྱེས་ལ། སྐྱེས་ནས་འགྱུར་བའི་ཕྱིར་རོ། །ཕྱི་རོལ་གྱི་མྱུ་གུ་དང་། སྡོང་བུ་ཡང་ཐོག་མ་ནས་མ་སྐྱེས་ལ། སྐྱེས་ནས་འགྱུར་བའི་ཕྱིར་རོ། །དེ་བས་ན་གཟུགས་ཀྱི་ཆོས་ཐམས་ཅད་ནི་མི་རྟག་པར་ཤེས་པར་བྱའོ། །རིགས་ཀྱི་བུ་ནང་གི་གཟུགས་ནི་དུས་བཞིན་དུ་འགྱུར་ཏེ། ནུར་ནུར་པོའི་ཚེ་ཡང་གཞན་ལ་མེར་མེར་པོའི་ཚེ་ཡང་གཞན། མཁྲེགས་པའི་ཚེ་ཡང་གཞན། མངལ་གྱི་ཚེ་ཡང་གཞན། སྐྱེ་བའི་ཚེ་ཡང་གཞན། བུས་པའི་ཚེ་ཡང་གཞན། གཞོན་
ནུའི་ཚེ་ཡང་གཞན་པ་ནས་རྒས་པའི་བར་དུ་འགྱུར་ཏེ་སོ་སོར་འགྱུར་བས་ན་གཞན་ནོ། །ཕྱི་རོལ་གྱི་གཟུགས་ཐམས་ཅད་ཀྱང་དེ་དང་འདྲ་སྟེ། མྱུ་གུའི་ཚེ་ཡང་གཞན། སྡོང་བུའི་ཚེ་ཡང་གཞན། ཡལ་གའི་ཚེ་ཡང་གཞན། ལོ་མའི་ཚེ་ཡང་གཞན། མེ་ཏོག་གི་ཚེ་ཡང་གཞན། འབྲས་བུའི་ཚེ་ཡང་གཞན་ནོ། །རིགས་ཀྱི་བུ་གཞན་ཡང་ནང་གི་རོ་བྲོ་བ་ཡང་ནུར་ནུར་པོའི་ཚེ་ཡང་གཞན་པ་ནས་རྒས་པའི་བར་དུ་ཡང་ཐ་དད་དེ་གཞན་ནོ། །ཕྱི་རོལ་གྱི་རོ་བྲོ་བ་དེ་དང་འདྲ་སྟེ། མྱུ་གུ་དང་། སྡོང་བུ་དང་། ཡལ་ག་དང་། ལོ་མ་དང་། མེ་ཏོག་དང་། འབྲས་བུའི་བར་དུ་ཐ་དད་དེ་གཞན་ནོ། །ནུར་ནུར་པོའི་མཐུ་སྟོབས་ཀྱི་ཚེ་གཞན་པ་ནས་རྒས་ཀྱི་བར་དུ་མཐུ་སྟོབས་ཀྱང་ཐ་དད་དེ་གཞན་ནོ། །ནུར་ནུར་པོའི་ཚེ་གཟུགས་བྱད་ཀྱང་གཞན་པ་ནས་རྒས་པའི་བར་དུ་གཟུགས་བྱད་ཀྱང་ཐ་དད་དེ་གཞན་ནོ། །ནུར་ནུར་པོའི་ཚེ་ན་རྣམ་པར་སྨིན་པའི་འབྲས་བུ་ཡང་གཞན་པ་ནས་རྒས་པའི་བར་དུ་རྣམ་པར་སྨིན་པའི་འབྲས་བུ་ཡང་ཐ་དད་དེ་གཞན་ནོ། །ནུར་ནུར་པོའི་ཚེ་མིང་བཏགས་པ་ཡང་གཞན་པ་ནས་རྒས་པའི་བར་དུ་མིང་འདོགས་པ་ཡང་ཐ་དད་དེ་གཞན་ནོ། །འདི་ལྟ་སྟེ་ནང་གི་གཟུགས་ཀྱང་ཞིག་མ་ཐག་ཏུ་ཕྱིར་འདུ་བས་ན་མི་རྟག་སྟེ། ཕྱི་རོལ་གྱི་རྩི་ཤིང་ཡང་ཞིག་མ་ཐག་ཏུ་ཕྱིར་འདུ་བས་ན་མི་རྟག་གོ །བགས་ཀྱིས་སྐྱེ་བའི་ཕྱིར་ཡང་མི་རྟག་གོ ། ནུར་ནུར་པོ་ནས་རྒས་པའི་བར་དུ་ཡང་བགས་ཀྱིས་སྐྱེ་ཞིང་འགྱུར་ལ་མྱུ་གུ་ནས་འབྲས་བུའི་བར་དུ་ཡང་བགས་ཀྱིས་སྐྱེ་ཞིང་འགྱུར་བས་ན་མི་རྟག་གོ །གཟུགས་ཐམས་ཅད་འགོག་པར་འགྱུར་བས་ན་མི་རྟག་སྟེ། ནུར་ནུར་པོ་འགོག་པའི་ཚེ་གཞན་པ་ནས་རྒས་པའི་བར་དུ་འགོག་པ་ཡང་གཞན་ནོ། །མྱུ་གུ་འགོག་པ་གཞན་པ་ནས་འབྲས་བུ་འགོག་པའི་བར་དུ་ཡང་གཞན་པས་ན་མི་རྟག་གོ །བྱིས་པ་མ་རབས་ཤེས་པ་མེད་པ་དག་ནི་སྐྱེ་བ་དྲན་པར་མཐོང་བས་རྟག་པར་འཛིན་ཏེ། དོན་དེ་ལྟ་བས་ན་མི་རྟག་པ་ཞེས་བྱའོ། །གལ་ཏེ་མི་རྟག་ན་དེ་ནི་སྡུག་བསྔལ་བ་ཡིན་ནོ། །སྡུག་བསྔལ་བ་ཡིན་པས་ན་མི་གཙང་བའོ། །རིགས་ཀྱི་བུ་དོན་འདི་དག་ནི་འོད་སྲུང་གིས་ཀྱང་སྔར་དྲིས་ཏེ་ངས་རྒྱས་པར་བཤད་དོ། །གཞན་
ཡང་རིགས་ཀྱི་བུ་འདུ་བྱེད་ཐམས་ཅད་ལ་ཡང་བདག་ཅེས་བྱ་བ་མེད་དོ། །རིགས་ཀྱི་བུ་ཆོས་ཐམས་ཅད་ཅེས་བྱ་བ་ནི་མདོར་ན་གཟུགས་དང་གཟུགས་མ་ཡིན་པ་སྟེ། གཟུགས་ལ་ནི་བདག་ཅེས་བྱ་བ་མེད་དོ། །དེ་ཅིའི་ཕྱིར་ཞེ་ན། གཞིག་ཏུ་རུང་། གཅད་དུ་རུང་། བཙོག་ཏུ་རུང་ལ། སྐྱེ་ཞིང་འཕེལ་བའི་ཕྱིར་རོ། །བདག་ཅེས་བྱ་བ་ནི་གཞིག་ཏུ་མི་རུང་། གཅད་དུ་མི་རུང་། སྐྱེ་ཞིང་འཕེལ་བ་མེད་དེ། དེ་བས་ན་གཟུགས་ནི་བདག་མ་ཡིན་ནོ། །གཟུགས་མ་ཡིན་པའི་ཆོས་ཀྱང་བདག་མ་ཡིན་ནོ། །དེ་ཅིའི་ཕྱིར་ཞེ་ན། རྒྱུ་དང་རྐྱེན་ལས་སྐྱེས་པའི་ཕྱིར་རོ། །རིགས་ཀྱི་བུ་ཅི་སྟེ་མུ་སྟེགས་ཅན་དག་རྩེ་གཅིག་ཏུ་དྲན་པས་བདག་ཡོད་པར་ཤེས་པ་ཡིན་ན། རྩེ་གཅིག་ཏུ་དྲན་པ་ཉིད་ནི་བདག་ཅེས་བྱ་བ་མ་ཡིན་ནོ། །ཅི་སྟེ་རྩེ་གཅིག་ཏུ་དྲན་པ་བདག་ཡིན་ནོ་ཞེས་བྱར་ནི་འདས་པའི་དངོས་པོ་དག་བརྗེད་པ་ཡང་ཡོད་དོ། །བརྗེད་པ་ཡོད་པས་ན་ངེས་པར་བདག་ཅེས་བྱ་བ་མེད་དོ། །རིགས་ཀྱི་བུ་ཅི་སྟེ་མུ་སྟེགས་ཅན་དག་དྲན་པའི་ཕྱིར་བདག་ཡོད་ཅེས་བྱར་ནི་དྲན་པ་མེད་པས་ན་བདག་ཅེས་བྱ་བ་མེད་དོ། །རིགས་ཀྱི་བུ་དཔེར་ན་མི་ཞིག་ལག་པ་ལ་སོར་མོ་དྲུག་ཡོད་པ་མཐོང་ན། དེ་ལ་འདི་སྐད་དུ་སྔོན་ཆེ་གེ་མོ་ཞིག་ཏུ་མ་ཕྲད་དམ་ཞེས་འདྲིའོ། །ཅི་སྟེ་བདག་ཅེས་བྱ་བ་ཡོད་ན་འདྲི་བའི་ཡང་མི་རིགས་ཏེ། འདི་འདྲི་བ་ལས་ན་བདག་ཅེས་བྱ་བ་ངེས་པར་མེད་དོ། །རིགས་ཀྱི་བུ་ཅི་སྟེ་མུ་སྟེགས་ཅན་དག་བར་དུ་གཅད་ཅིང་སྒྲིབ་ཏུ་རུང་བའི་ཕྱིར་བདག་ཡོད་ཅེས་བྱར་ནི་རིགས་ཀྱི་བུ་སྒྲིབ་ཏུ་ཡོད་པས་ན་ངེས་པར་བདག་ཅེས་བྱ་བ་མེད་པར་ཤེས་སོ། །དཔེར་ན་ལྷ་སྦྱིན་ཞེས་བརྗོད་པའི་ཚེ་ལྷ་སྦྱིན་མ་ཡིན་ནོ་ཞེས་མི་བརྗོད་དོ། །བདག་ཀྱང་དེ་དང་འདྲ་སྟེ། ངེས་པར་བདག་ཡིན་ན་ལྟ། བདག་ཅེས་བྱ་བ་ལ་སྒྲིབ་པར་མི་འགྱུར་ཏེ། སྒྲིབ་པར་འགྱུར་བས་ན་ངེས་པར་བདག་ཅེས་བྱ་བ་མེད་དོ། །ཅི་སྟེ་སྒྲིབ་པར་འགྱུར་བས་བདག་ཡོད་པར་ཤེས་ན་དེ་ལྟར་ཁྱོད་མ་བསྒྲིབས་ན་ངེས་པར་བདག་ཅེས་བྱ་བ་མེད་དོ། །རིགས་ཀྱི་བུ་ཅི་སྟེ་མུ་སྟེགས་ཅན་དག་གྲོགས་དང་གྲོགས་མ་ཡིན་པ་ལས་བདག་ཡོད་པར་ཤེས་སོ་ཞེས་བྱར་ནི་གྲོགས་མེད་པས་ན་བདག་ཅེས་བྱ་བ་མེད་པའི་རིགས་སོ། །གྲོགས་
མེད་པའི་ཆོས་ཡོད་དེ། འདི་ལྟ་སྟེ་དེ་བཞིན་གཤེགས་པ་དང་། ནམ་མཁའ་དང་། སངས་རྒྱས་ཀྱི་རང་བཞིན་ནོ། །བདག་ཅེས་བྱ་བ་ཡང་དེ་དང་འདྲ་བར་ཡང་དག་པར་གྲོགས་མེད་དེ། དེ་བས་ངེས་པར་བདག་ཅེས་བྱ་བ་མེད་དོ། །རིགས་ཀྱི་བུ་གཞན་ཡང་མུ་སྟེགས་ཅན་དག་ཅི་སྟེ་མིང་བཏགས་པ་ལས་བདག་ཡོད་པར་ཤེས་སོ་ཞེས་བྱར་ནི་བདག་མེད་པའི་ཆོས་ལ་ཡང་བདག་མེད་ཅེས་འདོགས་པའི་མིང་ཡོད་དེ། དཔེར་ན་ཤིན་ཏུ་དབུལ་པོ་ཞིག་གི་མིང་ཕྱུག་པོ་ཞེས་འདོགས་པ་དང་། དཔེར་ན་བདག་ཤིའོ་ཞེས་བྱ་བ་སྟེ། གལ་ཏེ་བདག་ཅེས་བྱ་བ་ཤི་ན་བདག་གིས་བདག་གསོད་པར་འགྱུར་རོ། །བདག་ཅེས་བྱ་བ་ནི་ཡང་དག་པར་ན་གསད་དུ་མི་རུང་སྟེ་ཐ་སྙད་དུ་བདག་གསོད་པ་ཞེས་བཏགས་སོ། །དཔེར་ན་མི་ཐུང་ངུ་ཞིག་རིང་པོ་ཞེས་བཏགས་པ་དང་འདྲ་སྟེ་དེ་བས་ན་ངེས་པར་བདག་ཅེས་བྱ་བ་མེད་པར་ཤེས་སོ། །གཞན་ཡང་རིགས་ཀྱི་བུ་ཅི་སྟེ་མུ་སྟེགས་ཅན་དག་བུ་བྱུང་མ་ཐག་ཏུ་ནུ་ཞོ་ཚོལ་བ་ལས་བདག་ཡོད་པར་ཤེས་སོ་ཞེས་བྱ་བ་ནི། རིགས་ཀྱི་བུ་ཅི་སྟེ་བདག་ཅེས་བྱ་བ་ཡོད་ན་བུས་པ་ཆུང་ངུ་ཐམས་ཅད་མི་གཙང་བ་ངན་སྐྱུགས་དང་། མེ་དང་། སྦྲུལ་དང་། དུག་པ་ལ་འཛིན་པའི་མི་རིགས་སོ། །དེ་བས་ན་ངེས་པར་བདག་ཅེས་བྱ་བ་མེད་དོ། །རིགས་ཀྱི་བུ་སེམས་ཅན་ཐམས་ཅད་ནི་རྣམ་པ་འདི་གསུམ་གྱི་ཡེ་ཤེས་མཉམ་པར་ཡོད་དོ། །འདི་ལྟ་སྟེ། འདོད་ཆགས་དང་། ཟ་བ་དང་། འཇིགས་པ་སྟེ་དེ་བས་ན་བདག་ཅེས་བྱ་བ་མེད་དོ། །གཞན་ཡང་རིགས་ཀྱི་བུ་ཅི་སྟེ་མུ་སྟེགས་ཅན་དག་མཚན་མ་དང་། གཟུགས་ཙམ་ལས་བདག་ཡོད་པར་ཤེས་སོ་ཞེས་བྱར་ནི། རིགས་ཀྱི་བུ་མཚན་མ་ཡོད་པས་ཀྱང་བདག་མེད་ལ། མཚན་མ་མེད་པས་ཀྱང་བདག་མེད་དོ། །དཔེར་ན་མི་གཉིད་ལོག་པའི་ཚེ། སོང་བ་དང་། འོང་བ་དང་། རྒུ་བ་དང་། དགྱེ་བ་དང་། བལྟ་བ་ཡང་མེད་ལ། བདེ་བ་དང་སྡུག་བསྔལ་བ་ཡང་མི་ཚོར་བས་ན་བདག་ཡོད་པའི་མི་རིགས་སོ། །ཅི་སྟེ་སོང་བ་དང་། འོང་བ་དང་། རྒུ་བ་དང་། དགྱེ་བ་དང་། བལྟ་བ་ཡོད་པས་བདག་ཡོད་པར་ཤེས་ན། ཤིང་གི་འཁྲུལ་འཁོར་བྱས་པའི་མི་ལ་
ཡང་བདག་ཡོད་པའི་རིགས་སོ། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། མི་འགྲོ། མི་སྡོད་། མི་དགྱེ། མི་རྒུ། མི་བལྟ། མི་འཛུམ། སྡུག་བསྔལ་བ་མ་ཡིན། བདེ་བ་མ་ཡིན། འདོད་ཆགས་མ་ཡིན། ཞེ་སྡང་མ་ཡིན། གཏི་མུག་མ་ཡིན། སྤྱོད་པ་མ་ཡིན་ཏེ། དེ་ལྟར་ན་དེ་བཞིན་གཤེགས་པ་ནི་ཡང་དག་པའི་བདག་ཅེས་བྱ་བ་ཡོད་དོ། །གཞན་ཡང་རིགས་ཀྱི་བུ་ཅི་སྟེ་མུ་སྟེགས་ཅན་དག་ཕ་རོལ་པོས་ཤིང་ཐོག་སྐྱུར་མོ་ཟོས་ན། ཚུ་རོལ་གྱི་འགྲམ་ཆུ་ལངས་པ་ལས་བདག་ཡོད་པར་ཤེས་སོ་ཞེས་བྱར་ནི། རིགས་ཀྱི་བུ་དྲན་པ་ལས་མཐོང་ནས་འགྲམ་ཆུ་ལངས་ཏེ་འགྲམ་ཆུ་ནི་བདག་མ་ཡིན། བདག་ཀྱང་འགྲམ་ཆུ་མ་ཡིན་ནོ། །དགའ་བ་མ་ཡིན། མྱ་ངན་མ་ཡིན། གླལ་བ་མ་ཡིན། རྒོད་པ་མ་ཡིན། ལྷུང་བ་མ་ཡིན། སྐྱེ་བ་མ་ཡིན། སྐོམ་པ་མ་ཡིན། འགྲངས་པ་མ་ཡིན་ཏེ། དེ་བས་ན་ངེས་པར་བདག་མེད་པར་ཤེས་སོ། །རིགས་ཀྱི་བུ་མུ་སྟེགས་ཅན་དེ་དག་ནི་བུས་པ་ཆུང་ངུ་ཤེད་མ་བྱེ་བ་དང་འདྲ་སྟེ། ཤེས་པ་མེད་པ། ཐབས་མེད་པ། རྟོགས་པ་མེད་པ། རྟག་པ་དང་། མི་རྟག་པ་དང་། སྡུག་བསྔལ་བ་དང་། བདེ་བ་དང་། ཡོངས་སུ་དག་པ་དང་། ཡོངས་སུ་མ་དག་པ་དང་། བདག་དང་བདག་མེད་པ་དང་། ཚོར་བ་དང་ཚོར་བ་མ་ཡིན་པ་དང་། སེམས་ཅན་དང་སེམས་ཅན་མ་ཡིན་པ་དང་། བདེ་བ་དང་བདེ་བ་མ་ཡིན་པ་དང་། ཡོད་པ་དང་ཡོད་པ་མ་ཡིན་པ་མི་ཤེས་ཏེ། སངས་རྒྱས་ཀྱི་ཆོས་ལས་བག་དང་། ཆ་ཙམ་ཞིག་བླངས་ནས་རྟག་པ་དང་། བདེ་བ་དང་། བདག་དང་། ཡོངས་སུ་དག་པར་འཛིན་ཏེ། ཡང་དག་པར་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་མི་ཤེས་སོ། །དཔེར་ན་དམུས་ལོང་འོ་མའི་ཁ་དོག་མི་ཤེས་པས། གཞན་ལ་འོ་མའི་ཁ་དོག་ཅི་འདྲ་ཞེས་དྲིས་པ་ལས། ཕ་རོལ་པོས་དུང་གི་ཁ་དོག་འདྲའོ་ཞེས་བསྟན་ན། དམུས་ལོང་དེ་འོ་མའི་ཁ་དོག་ལ་དུང་གི་སྒྲ་འདྲ་བ་ཞིག་ཡིན་པར་འཛིན་ཏོ། །ཡང་དུང་གི་ཁ་དོག་ཅི་འདྲ་ཞེས་དྲིས་པ་ལས། འབྲས་ཕྱེ་འདྲའོ་ཞེས་སྨྲས་ན། དམུས་ལོང་དེ་དུང་གི་ཁ་དོག་ལ་ཤིན་ཏུ་འཇམ་པར་འཛིན་ཏོ། །ཡང་འདི་སྐད་
དུ་འབྲས་ཕྱེའི་ཁ་དོག་ཅི་འདྲ་ཞེས་དྲིས་པ་ལས། ཕ་རོལ་པོས་ཁ་བ་འདྲའོ་ཞེས་སྨྲས་ན། དམུས་ལོང་དེས་འབྲས་ཕྱེ་མའི་ཁ་དོག་ལ་གྲང་བར་འཛིན་ཏོ། །ཁ་བའི་ཁ་དོག་ཀྱང་ཅི་འདྲ་ཞེས་དྲིས་པ་ལས་ཕ་རོལ་པོས་ངང་པའི་གཤོག་པ་འདྲའོ་ཞེས་སྨྲས་ཀྱང་དམུས་ལོང་དེས་དེ་ལྟར་དཔེ་བསྟན་པ་བཞིའི་སྒོ་ནས་ཀྱང་དམུས་ལོང་དེས་འོ་མའི་ཁ་དོག་ཡང་དག་པ་ཅི་འདྲ་བ་མི་ཤེས་སོ། །མུ་སྟེགས་ཅན་དེ་དག་ཀྱང་དེ་དང་འདྲ་སྟེ། རྟག་པ་དང་། བདེ་བ་དང་། བདག་དང་། ཡོངས་སུ་དག་པ་མི་ཤེས་སོ། །རིགས་ཀྱི་བུ་དེ་བས་ན་སངས་རྒྱས་ཀྱི་ཆོས་ལ་ནི་ཡང་དག་པའི་བདེན་པ་ཡོད་ཀྱི། མུ་སྟེགས་ཅན་རྣམས་ལ་མ་ཡིན་ནོ།། །།འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་བཅུ་དགུ་པ། འཇམ་དཔལ་གཞོན་ནུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ངོ་མཚར་ཆེའོ། །དེ་བཞིན་གཤེགས་པ་ནི་ཡོངས་སུ་མྱ་ངན་ལས་འདའ་ཀར་བླ་ན་མེད་པའི་ཆོས་ཀྱི་འཁོར་ལོ་བསྐོར་ཏེ་ཡང་དག་པའི་བདེན་པ་རྣམ་པར་ཕྱེ་སྟེ་བསྟན་ཏོ། །བཅོམ་ལྡན་འདས་ཀྱིས་འཇམ་དཔལ་ལ་བཀའ་སྩལ་པ། ཅི་ཁྱོད་དེ་བཞིན་གཤེགས་པ་ལ་མྱ་ངན་ལས་འདའ་བར་འདུ་ཤེས་སམ། རིགས་ཀྱི་བུ་དེ་བཞིན་གཤེགས་པ་ནི་ཡང་དག་པར་ན་རྟག་པ། གནས་པ། མི་འགྱུར་བ། ཡོངས་སུ་མྱ་ངན་ལས་མ་འདས་པའོ། །རིགས་ཀྱི་བུ་དེ་ལ་གང་ཞིག་བདག་ཏུ་འཛིན་ན་དེ་ནི་སངས་རྒྱས་ཀྱི་བདག་ཅེས་བྱ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །བདག་ཅེས་བྱ་བ་ནི་ཆོས་ཏེ་ཆོས་ནི་བདག་གི་བའོ། །བདག་ནི་ལམ་སྟེ་ལམ་ནི་བདག་གི་བའོ། །བདག་ནི་བཅོམ་ལྡན་འདས་ཏེ་བཅོམ་ལྡན་འདས་ནི་བདག་གི་བའོ། །བདག་ནི་ཉན་ཐོས་ཏེ་ཉན་ཐོས་ནི་བདག་གི་བའོ། །བདག་གི་བ་ནི་ཆོས་སྟོན་པར་འགྱུར་ཏེ་གཞན་དག་ཉན་པར་བྱེད་དོ། །བདག་ནི་ཆོས་ཀྱི་འཁོར་ལོ་བསྐོར་ཏེ་གཞན་གྱིས་ནུས་པ་མ་ཡིན་ནོ། །དེ་བཞིན་གཤེགས་པ་ནི་དེ་ལྟ་བུར་མི་འཛིན་ཏེ། དེ་བས་ན་དེ་བཞིན་གཤེགས་པ་ནི་ཆོས་ནི་འཁོར་ལོ་མི་སྐོར་རོ། །རིགས་ཀྱི་
བུ་གང་ཞིག་དེ་ལྟ་བུར་འཛིན་ན་བདག་ནི་མིག་གོ །མིག་ནི་བདག་གི་བའོ། །རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་བར་དུ་ཡང་དེ་བཞིན་ཏེ། བདག་ནི་གཟུགས་སོ་གཟུགས་ནི་བདག་གི་བའོ། །དེ་བཞིན་དུ་ཆོས་ཀྱི་བར་དུ་ཡང་རྒྱས་པར་རིག་པར་བྱའོ། །བདག་ནི་སའོ། །ས་ནི་བདག་གི་བ་སྟེ། ཆུ་དང་། མེ་དང་། རླུང་ཡང་དེ་བཞིན་དུ་རིག་པར་བྱའོ། །རིགས་ཀྱི་བུ་དེ་ལ་གང་ཞིག་འདི་སྐད་དུ་བདག་ཅེས་བྱ་བ་ནི་དད་པའོ། །དད་པ་ནི་བདག་གི་བའོ། །བདག་ཅེས་བྱ་བ་ནི་མང་དུ་ཐོས་པའོ། །མང་དུ་ཐོས་པ་ནི་བདག་གི་བའོ། །བདག་ཅེས་བྱ་བ་ནི་སྦྱིན་པའི་ཕ་རོལ་ཏུ་ཕྱིན་པ། སྦྱིན་པའི་ཕ་རོལ་ཏུ་ཕྱིན་པ་ནི་བདག་གི་བའོ། །བདག་ཅེས་བྱ་བ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ནི་བདག་གི་བའོ། །བདག་ནི་བཟོད་པའི་ཕ་རོལ་ཏུ་ཕྱིན་པ། བཟོད་པའི་ཕ་རོལ་ཏུ་ཕྱིན་པ་ནི་བདག་གི་བའོ། །བདག་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ། བརྩོན་འགྲུས་ཀྱི་ཕ་རོལ་ཏུ་ཕྱིན་པ་ནི་བདག་གི་བའོ། །བདག་ནི་བསམ་གཏན་གྱི་ཕ་རོལ་ཏུ་ཕྱིན་པ། བསམ་གཏན་གྱི་ཕ་རོལ་ཏུ་ཕྱིན་པ་ནི་བདག་གི་བའོ། །བདག་ནི་ཤེས་རབ་ཀྱི་ཕ་རོལ་ཏུ་ཕྱིན་པ། ཤེས་རབ་ཀྱི་ཕ་རོལ་ཏུ་ཕྱིན་པ་ནི་བདག་གི་བའོ། །བདག་ནི་དྲན་པ་ཉེ་བར་གཞག་པ་བཞི་པའོ། །དྲན་པ་ཉེ་བར་གཞག་པ་བཞི་ནི་བདག་གི་བའོ། །དེ་བཞིན་དུ་ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་བརྒྱད་ཀྱང་རྒྱས་པར་རིག་པར་བྱའོ། །རིགས་ཀྱི་བུ་དེ་བཞིན་གཤེགས་པ་ནི་དེ་ལྟར་མི་འཛིན་པས་ན་དེ་བཞིན་གཤེགས་པ་ནི་ཆོས་ཀྱི་འཁོར་ལོ་མི་བསྐོར་རོ། །རིགས་ཀྱི་བུ་ཅི་སྟེ་དེ་བཞིན་གཤེགས་པ་རྟག་པ་གནས་པ་མི་འགྱུར་མི་འཕོ་བ་ཡིན་ན་ཅིའི་ཕྱིར་དེ་བཞིན་གཤེགས་པ་ཆོས་ཀྱི་འཁོར་ལོ་བསྐོར་ཏོ་ཞེས་སྨྲས། དེ་བས་ན་ཁྱོད་ཀྱིས་དེ་བཞིན་གཤེགས་པས་ཆོས་ཀྱི་འཁོར་ལོ་བསྐོར་ཏོ་ཞེས་བྱ་བའི་མི་རིགས་སོ། །རིགས་ཀྱི་བུ་དཔེར་ན་མིག་དང་སྣང་བ་དང་། བསམ་པ་འདུས་པ་ལས་མིག་
གི་རྣམ་པར་ཤེས་པ་སྐྱེ་བར་འགྱུར་རོ། །རིགས་ཀྱི་བུ་མིག་ཀྱང་། འདི་ལྟར་བདག་གིས་ནི་མིག་གི་རྣམ་པར་ཤེས་པ་བསྐྱེད་དོ་སྙམ་མི་སེམས་པ་ནས་བསམ་པའི་བར་དུ་ཡང་མིག་གི་རྣམ་པར་ཤེས་པ་བསྐྱེད་དོ་སྙམ་མི་སེམས་ལ། མིག་གི་རྣམ་པར་ཤེས་པ་ཉིད་ཀྱང་བདག་ནི་བདག་བསྐྱེད་དོ་སྙམ་མི་སེམས་ཏེ། རིགས་ཀྱི་བུ་འོན་ཀྱང་དེ་རྣམས་འདུས་ཤིང་ཚོགས་པ་ལས་མཐོང་བར་གྱུར་ཏོ། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། ཕ་རོལ་ཏུ་ཕྱིན་པ་དྲུག་དང་། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང་། ཆོས་རྣམས་རྟོག་པ་དང་། གཞན་ཡང་ལྐོག་མ་དང་། རྐན་དང་། ལྕེ་དང་། སོ་དང་མཆུ་དང་། ཁ་ལས་ཚིག་ཏུ་སྨྲ་བའི་སྒྲ་ལས། ཐོག་མ་ཚེ་དང་ལྡན་པ་ཀཽཎྜི་ནྱ་ལ་ཆོས་བསྟན་པ་ནི་ཆོས་ཀྱི་འཁོར་ལོ་བསྐོར་བ་ཞེས་བྱ་སྟེ། དོན་དེ་ལྟ་བས་ན་དེ་བཞིན་གཤེགས་པ་ནི་ཆོས་ཀྱི་འཁོར་ལོ་བསྐོར་ཞེས་མི་བྱའོ། །རིགས་ཀྱི་བུ་གང་མ་བསྐོར་བ་དེ་ནི་ཆོས་ཞེས་བྱ་སྟེ་ཆོས་ནི་དེ་བཞིན་གཤེགས་པའོ། །རིགས་ཀྱི་བུ་དཔེར་ན་གཙུབ་ཤིང་དང་། གཙུབ་སྟན་དང་། ལག་པ་དང་། བཙའ་འདུས་པ་ལས་མེ་བྱུང་སྟེ། གཙུབ་ཤིང་ཡང་བདག་གིས་ནི་མེ་ཕྱུང་ངོ་སྙམ་མི་སེམས། གཙུབ་སྟན་དང་། ལག་པ་དང་། བཙའ་ཡང་བདག་གིས་མེ་ཕྱུང་ངོ་སྙམ་མི་སེམས་སོ། །མེ་ཡང་དེ་ལྟར་བདག་གིས་བདག་ཕྱུང་ངོ་སྙམ་མི་སེམས་སོ། །དེ་བཞིན་གཤེགས་པ་ཡང་དེ་དང་འདྲ་སྟེ་ཕ་རོལ་ཏུ་ཕྱིན་པ་དྲུག་ནས་ཚེ་དང་ལྡན་པ་ཀཽཎྜི་ནྱའི་བར་དུ་ཆོས་ཀྱི་འཁོར་ལོ་བསྐོར་བ་ཞེས་བྱ་སྟེ། དེ་བཞིན་གཤེགས་པ་ནི་ངས་ཆོས་ཀྱི་འཁོར་ལོ་བསྐོར་རོ་སྙམ་མི་དགོངས་སོ། །རིགས་ཀྱི་བུ་དེ་ལྟར་མི་དགོངས་པ་དེ་ནི་ཆོས་ཀྱི་འཁོར་ལོ་ཡང་དག་པར་བསྐོར་བ་ཞེས་བྱ་སྟེ། དེ་ལྟར་ཆོས་ཀྱི་འཁོར་ལོ་བསྐོར་བ་དེ་ནི་དེ་བཞིན་གཤེགས་པ་ཞེས་བྱའོ། །རིགས་ཀྱི་བུ་དཔེར་ན་མར་ཡང་ཞོ་དང་། ཆུ་དང་། རྫ་མ་དང་། སྲུབ་ཤིང་། ཐག་གུ་དང་། ལག་པ་ལས་མར་འབྱུང་སྟེ། ཞོ་ཡང་འདི་ལྟར་བདག་གིས་མར་ཕྱུང་ངོ་སྙམ་མི་སེམས་པ་ནས་ལག་པའི་བར་དུ་བདག་གིས་འདི་ལྟར་
མར་ཕྱུང་ངོ་སྙམ་མི་སེམས། མར་ཡང་འདི་ལྟར་བདག་གིས་མར་ཕྱུང་ངོ་སྙམ་མི་སེམས་ཏེ། རྐྱེན་མང་པོ་འདུས་པ་ལས་མར་བྱུང་བར་གྱུར་ཏོ། །དེ་བཞིན་གཤེགས་པ་ཡང་དེ་དང་འདྲ་སྟེ། འདི་ལྟར་ངས་ནི་ཆོས་ཀྱི་འཁོར་ལོ་བསྐོར་ཏོ་སྙམ་མི་དགོངས་སོ། །ཇི་ལྟར་མི་དགོངས་པ་དེ་ནི་ཆོས་ཀྱི་འཁོར་ལོ་ཡང་དག་པར་བསྐོར་བ་ཞེས་བྱ་སྟེ། ཆོས་ཀྱི་འཁོར་ལོ་བསྐོར་བ་དེ་ནི་དེ་བཞིན་གཤེགས་པ་ཞེས་བྱའོ། །རིགས་ཀྱི་བུ་དཔེར་ན་ས་བོན་དང་། ས་དང་། ཆུ་དང་། མེ་དང་། རླུང་དང་། རྨེད་དང་། དུས་དང་། ལས་སུ་བྱ་བ་ལས་མྱུ་གུ་སྐྱེ་བར་འགྱུར་རོ། །རིགས་ཀྱི་བུ་ས་བོན་ཡང་འདི་ལྟར་བདག་གིས་མྱུ་གུ་བསྐྱེད་དོ་སྙམ་མི་སེམས་པ་ནས་ལས་སུ་བྱས་པའི་བར་དུ་ཡང་འདི་ལྟར་བདག་གིས་མྱུ་གུ་བསྐྱེད་དོ། །སྙམ་དུ་མི་སེམས། མྱུ་གུ་ཡང་འདི་ལྟར་བདག་གིས་མྱུ་གུ་བསྐྱེད་དོ་སྙམ་མི་སེམས་སོ། །དེ་བཞིན་གཤེགས་པ་ཡང་དེ་དང་འདྲ་བར་ངས་ནི་ཆོས་ཀྱི་འཁོར་ལོ་བསྐོར་ཏོ་སྙམ་དུ་མི་དགོངས་ཏེ། རིགས་ཀྱི་བུ་གང་མི་དགོངས་པ་དེ་ནི་ཡང་དག་པར་ཆོས་ཀྱི་འཁོར་ལོ་བསྐོར་བ་ཞེས་བྱ་སྟེ་ཆོས་ཀྱི་འཁོར་ལོ་བསྐོར་བ་དེ་ནི་དེ་བཞིན་གཤེགས་པའོ། །རིགས་ཀྱི་བུ་དཔེར་ན་རྔ་ཡང་རྔ་ཤིང་དང་། ཀོ་བ་དང་། མིའི་ལག་པ་དང་། རྡུང་བ་འདུས་པ་ལས་སྒྲ་འབྱུང་སྟེ། རྔ་ཡང་འདི་ལྟར་བདག་གིས་སྒྲ་དབྱུང་ངོ་སྙམ་མི་སེམས་པ་ནས་རྡུང་བ་དང་། སྒྲའི་བར་དུ་ཡང་བདག་གིས་སྒྲ་ཕྱུང་ངོ་སྙམ་མི་སེམས་སོ། །དེ་བཞིན་གཤེགས་པ་ཡང་དེ་དང་འདྲ་བར་ངས་ནི་ཆོས་ཀྱི་འཁོར་ལོ་བསྐོར་ཏོ་སྙམ་མི་དགོངས་སོ། །རིགས་ཀྱི་བུ་གང་དེ་ལྟར་མི་དགོངས་པ་དེ་ནི་ཡང་དག་པར་ཆོས་ཀྱི་འཁོར་ལོ་བསྐོར་བ་ཞེས་བྱ་སྟེ། རིགས་ཀྱི་བུ་ཆོས་ཀྱི་འཁོར་ལོ་བསྐོར་བ་ནི་འདུས་མ་བྱས་པའོ། །འདུས་མ་བྱས་པ་ནི་ཆོས་ཀྱི་འཁོར་ལོ་བསྐོར་བའོ། །ཆོས་ཀྱི་འཁོར་ལོ་བསྐོར་བ་ནི་དེ་བཞིན་གཤེགས་པའོ། །རིགས་ཀྱི་བུ་ཆོས་ཀྱི་འཁོར་ལོ་བསྐོར་བ་ནི་སངས་རྒྱས་བཅོམ་ལྡན་འདས་ཀྱི་སྤྱོད་ཡུལ་ཡིན་གྱི། ཉན་ཐོས་དང་རང་སངས་རྒྱས་ཀྱིས་ཤེས་པ་མ་ཡིན་ནོ། །རིགས་ཀྱི་བུ་ནམ་མཁའ་ནི་སྐྱེ་བ་མ་ཡིན། སྐྱེས་པ་མ་ཡིན། བྱེད་
པ་མ་ཡིན། བྱས་པ་མ་ཡིན། འདུས་བྱས་ཀྱི་ཆོས་མ་ཡིན་ནོ། །དེ་བཞིན་གཤེགས་པ་ཡང་དེ་དང་འདྲ་སྟེ། སྐྱེ་བ་མ་ཡིན། སྐྱེས་པ་མ་ཡིན། བྱེད་པ་མ་ཡིན། བྱས་པ་མ་ཡིན། འདུས་བྱས་ཀྱི་ཆོས་མ་ཡིན་ནོ། །དེ་བཞིན་གཤེགས་པ་ཇི་ལྟ་བ་བཞིན་དུ་སངས་རྒྱས་ཀྱི་རང་བཞིན་ཡང་དེ་དང་འདྲ་སྟེ། སྐྱེ་བ་མ་ཡིན། སྐྱེས་པ་མ་ཡིན། བྱེད་པ་མ་ཡིན། བྱས་པ་མ་ཡིན། འདུས་བྱས་ཀྱི་ཆོས་མ་ཡིན་ནོ། །རིགས་ཀྱི་བུ་སངས་རྒྱས་བཅོམ་ལྡན་འདས་ཀྱི་གསུང་ནི་རྣམ་པ་གཉིས་ཏེ། འཇིག་རྟེན་གྱི་གསུང་དང་། འཇིག་རྟེན་ལས་འདས་པའི་གསུང་ངོ་། །རིགས་ཀྱི་བུ་དེ་བཞིན་གཤེགས་པས་ཉན་ཐོས་དང་རང་སངས་རྒྱས་ལ་ནི་འཇིག་རྟེན་གྱི་གསུང་གིས་གསུང་ངོ་། །བྱང་ཆུབ་སེམས་དཔའ་རྣམས་ལ་ནི་འཇིག་རྟེན་ལས་འདས་པའི་གསུང་གིས་གསུང་ངོ་། །རིགས་ཀྱི་བུ་འཁོར་གྱི་དཀྱིལ་འཁོར་ལ་ཡང་རྣམ་པ་གཉིས་ཏེ། ཐེག་པ་ཆུང་ངུ་ཚོལ་བ་དང་། ཐེག་པ་ཆེན་པོ་ཚོལ་བའོ། །ང་སྔོན་བཱ་རཱ་ཎ་སཱིར་ཉན་ཐོས་རྣམས་ལ་ཆོས་ཀྱི་འཁོར་ལོ་བསྐོར་ཏེ་ད་ཡང་རྩྭ་མཆོག་གི་གྲོང་ཁྱེར་འདིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཆོས་ཀྱི་འཁོར་ལོ་བསྐོར་ཏོ། །རིགས་ཀྱི་བུ་གཞན་ཡང་གང་ཟག་ལ་རྣམ་པ་གཉིས་ཏེ། དབང་པོ་འབྲིང་དང་། དབང་པོ་རབ་བོ། །དབང་པོ་འབྲིང་པོ་ལ་ནི་བཱ་རཱ་ཎ་སཱིར་ཆོས་ཀྱི་འཁོར་ལོ་བསྐོར་ཏོ། །དབང་པོ་རབ་ནི་མིའི་ནང་ན་ཁྱུ་མཆོག་གི་རྒྱལ་པོ་ལྟ་བུ་བྱང་ཆུབ་སེམས་དཔའ་འོད་སྲུང་ལ་སོགས་པ་ལ་རྩྭ་མཆོག་གི་གྲོང་ཁྱེར་འདིར་ཆོས་ཆེན་པོའི་འཁོར་ལོ་བསྐོར་ཏོ། །རིགས་ཀྱི་བུ་དབང་པོ་ཐ་མ་ལ་ནི་དེ་བཞིན་གཤེགས་པ་ཆོས་ཀྱི་འཁོར་ལོ་མི་བསྐོར་ཏེ། དབང་པོ་ཐ་མ་ཞེས་བྱ་བ་ནི་ལོག་སྲེད་ཅན་དག་གོ །རིགས་ཀྱི་བུ་གཞན་ཡང་སངས་རྒྱས་ཀྱི་བྱང་ཆུབ་ཚོལ་བ་ལ་ཡང་རྣམ་པ་གཉིས་ཏེ། བརྩོན་འགྲུས་འབྲིང་པོ་དང་། བརྩོན་འགྲུས་རབ་བོ། །བཱ་རཱ་ཎ་སཱིར་ནི་བརྩོན་འགྲུས་འབྲིང་པོ་རྣམས་ལ་ཆོས་ཀྱི་འཁོར་ལོ་བསྐོར་ཏོ། །རྩྭ་མཆོག་གི་གྲོང་ཁྱེར་འདིར་ནི་བརྩོན་འགྲུས་རབ་རྣམས་ལ་ཆོས་ཆེན་པོའི་འཁོར་ལོ་བསྐོར་ཏོ། །
རིགས་ཀྱི་བུ་གཞན་ཡང་ངས་སྔོན་བཱ་རཱ་ཎ་སཱིར་ཐོག་མ་ཆོས་ཀྱི་འཁོར་ལོ་བསྐོར་བ་ན་ལྷ་དང་མི་བརྒྱད་ཁྲི་སྙེད་རྒྱུན་དུ་ཞུགས་པའི་འབྲས་བུ་ཐོབ་པར་གྱུར་ཏོ། །ད་རྩྭ་མཆོག་གི་གྲོང་ཁྱེར་འདིར་ནི་ལྷ་དང་མི་ཁྲི་ཕྲག་བརྒྱད་ཅུ་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །རིགས་ཀྱི་བུ་སྔོན་བཱ་རཱ་ཎ་སཱིར་ནི་ཚངས་པ་ཆེན་པོའི་རྒྱལ་པོ་ང་ལ་ཕྱག་འཚལ་ཏེ། ཆོས་ཀྱི་འཁོར་ལོ་བསྐོར་བར་གསོལ་ཏོ། །རྩྭ་མཆོག་གི་གྲོང་ཁྱེར་འདིར་ནི་བྱང་ཆུབ་སེམས་དཔའ་འོད་སྲུང་གིས་ང་ལ་ཕྱག་འཚལ་ཏེ། ཆོས་ཀྱི་འཁོར་ལོ་བསྐོར་བར་གསོལ་ཏོ། །རིགས་ཀྱི་བུ་གཞན་ཡང་སྔོན་བཱ་རཱ་ཎ་སཱིར་ཆོས་ཀྱི་འཁོར་ལོ་བསྐོར་བ་ན་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་སྟོན་ཏོ། །ད་རྩྭ་མཆོག་གི་གྲོང་ཁྱེར་འདིར་ཆོས་ཀྱི་འཁོར་ལོ་བསྐོར་བ་ན་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་བསྟན་ཏོ། །གཞན་ཡང་རིགས་ཀྱི་བུ་ངས་སྔོན་བཱ་རཱ་ཎ་སཱིར་ཆོས་ཀྱི་འཁོར་ལོ་བསྐོར་བ་ན་གསུང་དབྱངས་ཚངས་པའི་འཇིག་རྟེན་ལ་ཐུག་གི་བར་དུ་གྲགས་སོ། །ད་རྩྭ་མཆོག་གི་གྲོང་ཁྱེར་འདིར་ཆོས་ཀྱི་འཁོར་ལོ་བསྐོར་བ་ན་གསུང་དབྱངས་ཀྱིས་ཤར་ཕྱོགས་ཀྱི་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་ཉི་ཤུ་སྙེད་དུ་གྲགས་ཏེ། ལྷོ་དང་ནུབ་དང་། བྱང་དང་། ཕྱོགས་མཚམས་བཞི་དང་། སྟེང་དང་། འོག་ཏུ་ཡང་དེ་བཞིན་དུ་གྲགས་པར་གྱུར་ཏོ། །གཞན་ཡང་རིགས་ཀྱི་བུ་སངས་རྒྱས་བཅོམ་ལྡན་འདས་ཇི་ཙམ་དུ་གསུང་བ་ཐམས་ཅད་ནི་ཆོས་ཀྱི་འཁོར་ལོ་བསྐོར་བ་ཞེས་བྱའོ། །རིགས་ཀྱི་བུ་དཔེར་ན་འཁོར་ལོས་སྒྱུར་བའི་རྒྱལ་པོའི་འཁོར་ལོ་ནི་མ་བཏུལ་བའི་རྣམས་ཐུལ་བ་དང་། ཐུལ་བའི་རྣམས་བདེ་བར་བྱེད་དོ། །རིགས་ཀྱི་བུ་སངས་རྒྱས་བཅོམ་ལྡན་འདས་རྣམས་ཀྱིས་ཆོས་གསུངས་པ་ཡང་། དེ་དང་འདྲ་སྟེ། ཚད་མེད་པའི་ཀུན་ནས་ཉོན་མོངས་པ་མ་བཏུལ་བ་ཡང་ཐུལ་བར་བྱེད་ལ། ཐུལ་བ་ཡང་དགེ་བའི་རྩ་བ་སྐྱེ་བར་བྱེད་དོ། །རིགས་ཀྱི་བུ་དཔེར་ན་འཁོར་ལོས་སྒྱུར་བའི་རྒྱལ་པོ་ནི་འཁོར་ལོ་རིན་པོ་ཆེས་ཕས་རྒོལ་བའི་དགྲ་ཐམས་ཅད་ཞི་བར་བྱེད་དོ། །དེ་བཞིན་གཤེགས་
པས་ཆོས་བསྟན་པ་ཡང་དེ་དང་འདྲ་སྟེ། ཀུན་ནས་ཉོན་མོངས་པའི་དགྲ་ཐམས་ཅད་ཞི་བར་བྱེད་དོ། །གཞན་ཡང་རིགས་ཀྱི་བུ་དཔེར་ན་འཁོར་ལོས་སྒྱུར་བའི་རྒྱལ་པོའི་འཁོར་ལོ་རིན་པོ་ཆེས་ནི་འོག་ནས་སྟེང་དུ་ཡིད་བཞིན་དུ་འགྱུར་རོ། །དེ་བཞིན་གཤེགས་པས་ཆོས་བསྟན་པ་ཡང་དེ་དང་འདྲ་སྟེ། ངན་སོང་གི་སེམས་ཅན་ཐམས་ཅད་མཐོ་རིས་ཀྱི་ལྷར་སྐྱེ་བ་ནས་སངས་རྒྱས་ཀྱི་བྱང་ཆུབ་ལ་ཐུག་གི་བར་དུ་ཕྱིན་པར་བྱེད་དོ། །རིགས་ཀྱི་བུ་དེ་བས་ན་ཁྱོད་ཀྱི་དེ་བཞིན་གཤེགས་པ་ལ་ཆོས་ཀྱི་འཁོར་ལོ་གདོད་བསྐོར་རོ་ཞེས་མ་ཟེར་ཅིག །དེ་ནས་འཇམ་དཔལ་གཞོན་ནུར་གྱུར་པས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དོན་འདི་དག་བདག་གིས་མ་འཚལ་བའི་སླད་དུ་ཞུ་བ་ནི་མ་ལགས་ཀྱི་སེམས་ཅན་ཐམས་ཅད་ལ་ཕན་པ་དང་། བདེ་བའི་སླད་དུ་ཞུས་པ་ལགས་སོ། །བཅོམ་ལྡན་འདས་བདག་ནི་ཡུན་རིང་པོ་ནས་ཆོས་ཀྱི་འཁོར་ལོ་བསྐོར་བ་ནི་སངས་རྒྱས་བཅོམ་ལྡན་འདས་ཀྱི་སྤྱོད་ཡུལ་ལགས་ཀྱི། ཉན་ཐོས་དང་རང་སངས་རྒྱས་ཀྱི་སྤྱོད་ཡུལ་མ་ལགས་པར་འཚལ་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་བཀའ་སྩལ་པ། རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་ལ་གནས་པ་ནི། འཕགས་པའི་སྤྱད་པ་སྤྱོད་པ་ཞེས་བྱའོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གཞན་ཡང་ཅིའི་སླད་དུ་འཕགས་པའི་སྤྱོད་པ་ཞེས་བགྱི། བཀའ་སྩལ་པ། རིགས་ཀྱི་བུ་འཕགས་པ་ཞེས་བྱ་བ་ནི་སངས་རྒྱས་བཅོམ་ལྡན་འདས་ཏེ། དེ་བས་ན་འཕགས་པའི་སྤྱོད་པ་ཞེས་བྱའོ། །གསོལ་པ། བཅོམ་ལྡན་འདས་གལ་ཏེ་སངས་རྒྱས་བཅོམ་ལྡན་འདས་ཀྱི་སྤྱོད་པ་ལགས་ན་ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའི་སྤྱོད་པ་མ་ལགས་སོ། །བཀའ་སྩལ་པ། རིགས་ཀྱི་བུ་སངས་རྒྱས་བཅོམ་ལྡན་འདས་ཀྱང་ཡོངས་སུ་མྱ་ངན་ལས་འདས་པ་ཆེན་པོ་འདི་ལ་བརྟེན་ཏེ། འདི་ལྟར་རྣམ་པར་ཕྱེ་ཞིང་བསྟན་པས་འཕགས་པའི་སྤྱོད་པ་ཞེས་བྱའོ། །ཉན་ཐོས་དང་
རང་སངས་རྒྱས་དང་། བྱང་ཆུབ་སེམས་དཔའ་རྣམས་ཀྱང་དེ་ལྟར་ཐོས་ནས་རྗེས་སུ་སྤྱོད་ན་འཕགས་པའི་སྤྱོད་པ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་དག་སྤྱོད་པ་འདི་ལ་གནས་ན་འཇིགས་པ་མེད་པའི་ས་ལ་གནས་པར་གྱུར་ཏོ། །རིགས་ཀྱི་བུ་བྱང་ཆུབ་སེམས་དཔའ་གང་མི་འཇིགས་པའི་ས་ལ་གནས་ན་འདོད་ཆགས་དང་། ཞེ་སྡང་དང་། གཏི་མུག་དང་། སྐྱེ་བ་དང་། རྒ་བ་དང་། ན་བ་དང་། འཆི་བས་ནམ་དུ་ཡང་མི་འཇིགས་ཏེ། སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། ཡི་དགས་སུ་ལྟུང་བའི་འཇིགས་པ་མེད་པར་འགྱུར་རོ། །རིགས་ཀྱི་བུ་མི་དགེ་བ་ལ་རྣམ་པ་གཉིས་ཏེ། ལྷ་མ་ཡིན་དང་། མིའི་ནང་དུ་སྐྱེས་པའོ། །མིའི་ནང་དུ་སྐྱེས་པ་ལ་ཡང་མི་དགེ་བ་རྣམ་པ་གསུམ་སྟེ། ལོག་སྲེད་ཅན་དང་། ཤིན་ཏུ་རྒྱས་པའི་མདོ་སྡེ་ལ་སྐུར་བ་དང་། ཕས་ཕམ་པ་བཞི་ཉམས་པའོ། །རིགས་ཀྱི་བུ་ས་དེ་ལ་གནས་པའི་བྱང་ཆུབ་སེམས་དཔའ་རྣམས་ནི་ནམ་དུ་ཡང་དེ་ལྟ་བུའི་མི་དགེ་བའི་གནས་སུ་ལྟུང་བས་མི་འཇིགས་སོ། །གཞན་ཡང་དགེ་སྦྱོང་དང་། བྲམ་ཟེ་དང་། མུ་སྟེགས་ཅན་ངན་པར་ལྟ་བ་དང་། ལྷའི་བུ་བདུད་སྡིག་ཏོ་ཅན་ལ་སོགས་པས་ཀྱང་མི་འཇིགས་སོ། །གཞན་ཡང་སྲིད་པ་ཉི་ཤུ་ལྔ་བོས་མི་འཇིགས་ཏེ། དེ་བས་ན་ས་འདི་ནི་འཇིགས་པ་མེད་པ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་འཇིགས་པ་མེད་པའི་ས་ལ་གནས་པ་ནི་ཏིང་ངེ་འཛིན་རྣམ་པ་ཉི་ཤུ་ལྔ་ཐོབ་པས་སྲིད་པ་ཉི་ཤུ་ལྔ་གཞོམ་པར་བྱེད་དོ། །རིགས་ཀྱི་བུ་དྲི་མ་མེད་པའི་ཏིང་ངེ་འཛིན་ཐོབ་པས་ནི་སེམས་ཅན་དམྱལ་བའི་སྲིད་པ་བཅོམ། ཕྱིར་མི་ལྡོག་པའི་ཏིང་ངེ་འཛིན་ཐོབ་པས་ནི་བྱོལ་སོང་གི་སྲིད་པ་བཅོམ། སེམས་བདེ་བའི་ཏིང་ངེ་འཛིན་ཐོབ་པས་ནི་ཡི་དགས་ཀྱི་སྲིད་པ་བཅོམ། རབ་ཏུ་དགའ་བའི་ཏིང་ངེ་འཛིན་ཐོབ་པས་ནི་ལྷ་མ་ཡིན་གྱི་སྲིད་པ་བཅོམ། ཉི་མའི་འོད་ཟེར་གྱི་ཏིང་ངེ་འཛིན་ཐོབ་པས་ནི་ཤར་གྱི་ལུས་འཕགས་གླིང་དུ་སྐྱེ་བའི་སྲིད་པ་བཅོམ། ཟླ་བའི་འོད་ཟེར་གྱི་ཏིང་ངེ་འཛིན་ཐོབ་པས་ནི་ནུབ་ཀྱི་བ་ལང་སྤྱོད་དུ་སྐྱེ་བའི་སྲིད་པ་བཅོམ། མེའི་དབལ་གྱི་ཏིང་ངེ་འཛིན་ཐོབ་
པས་ནི་བྱང་གི་སྒྲ་མི་སྙན་དུ་སྐྱེ་བའི་སྲིད་པ་བཅོམ། སྒྱུ་མ་ལྟ་བུའི་ཏིང་ངེ་འཛིན་ཐོབ་པས་ནི་ལྷོའི་འཛམ་བུའི་གླིང་དུ་སྐྱེ་བའི་སྲིད་པ་བཅོམ། ཆོས་ཐམས་ཅད་མི་གཡོ་བའི་ཏིང་ངེ་འཛིན་ཐོབ་པས་ནི་རྒྱལ་ཆེན་བཞིའི་གནས་སུ་སྐྱེ་བའི་སྲིད་པ་བཅོམ། ཤིན་ཏུ་གདུལ་དཀའི་ཏིང་ངེ་འཛིན་ཐོབ་པས་ནི་སུམ་ཅུ་རྩ་གསུམ་གནམ་དུ་སྐྱེ་བའི་སྲིད་པ་བཅོམ། ཡིད་དུ་འོང་བའི་ཏིང་ངེ་འཛིན་ཐོབ་པས་ནི་ཐུན་སྦྱོང་འཐབ་བྲལ་གནམ་དུ་སྐྱེ་བའི་སྲིད་པ་བཅོམ། ཐམས་ཅད་སྔོན་པོའི་ཏིང་ངེ་འཛིན་ཐོབ་པས་ནི་དགའ་ལྡན་གནམ་དུ་སྐྱེ་བའི་སྲིད་པ་བཅོམ། ཐམས་ཅད་སེར་པོའི་ཏིང་ངེ་འཛིན་ཐོབ་པས་ནི་འཕྲུལ་དགའི་གནམ་དུ་སྐྱེ་བའི་སྲིད་པ་བཅོམ། ཐམས་ཅད་དམར་པོའི་ཏིང་ངེ་འཛིན་ཐོབ་པས་ནི་གཞན་འཕྲུལ་དབང་བྱེད་གནམ་དུ་སྐྱེ་བའི་སྲིད་པ་བཅོམ། ཐམས་ཅད་དཀར་པོའི་ཏིང་ངེ་འཛིན་ཐོབ་པས་ནི་བསམ་གཏན་དང་པོའི་སྲིད་པ་བཅོམ། རྣམ་པ་སྣ་ཚོགས་ཀྱི་ཏིང་ངེ་འཛིན་ཐོབ་པས་ནི་ཚངས་པ་ཆེན་པོའི་སྲིད་པ་བཅོམ། ཟུང་དུ་འབྲེལ་བའི་ཏིང་ངེ་འཛིན་ཐོབ་པས་ནི་བསམ་གཏན་གཉིས་པའི་སྲིད་པ་བཅོམ། འབྲུག་སྒྲའི་ཏིང་ངེ་འཛིན་ཐོབ་པས་ནི་བསམ་གཏན་གསུམ་པའི་སྲིད་པ་བཅོམ། ཆར་པ་བབ་པའི་ཏིང་ངེ་འཛིན་ཐོབ་པས་ནི་བསམ་གཏན་བཞི་པའི་སྲིད་པ་བཅོམ། ནམ་མཁའ་ལྟ་བུའི་ཏིང་ངེ་འཛིན་ཐོབ་པས་ནི་འདུ་ཤེས་མེད་པའི་སྲིད་པ་བཅོམ། མེ་ལོང་ལྟ་བུའི་ཏིང་ངེ་འཛིན་ཐོབ་པས་ནི་གཙང་མའི་རིས་ལན་ཅིག་ཕྱིར་ལྡོག་པའི་སྲིད་པ་བཅོམ། ཆགས་པ་མེད་པའི་ཏིང་ངེ་འཛིན་ཐོབ་པས་ནི་ནམ་མཁའ་མཐའ་ཡས་སྐྱེ་མཆེད་སྟེངས་ཀྱི་སྲིད་པ་བཅོམ། རྟག་པའི་ཏིང་ངེ་འཛིན་ཐོབ་པས་ནི་རྣམ་ཤེས་མཐའ་ཡས་སྐྱེ་མཆེད་སྟེངས་ཀྱི་སྲིད་པ་བཅོམ། དགའ་བའི་ཏིང་ངེ་འཛིན་ཐོབ་པས་ནི་ཅུང་ཟད་མེད་པའི་སྐྱེ་མཆེད་སྟེངས་ཀྱི་སྲིད་པ་བཅོམ། བདག་གི་ཏིང་ངེ་འཛིན་ཐོབ་པས་ནི་འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ཀྱི་སྲིད་པ་བཅོམ་མོ། །རིགས་ཀྱི་བུ་འདི་དག་ནི་བྱང་ཆུབ་སེམས་དཔའི་ཏིང་ངེ་འཛིན་ཉི་ཤུ་རྩ་ལྔ་ཐོབ་པས་སྲིད་པ་ཉི་ཤུ་རྩ་ལྔ་བཅོམ་པ་ཞེས་བྱའོ། །རིགས་ཀྱི་བུ་ཏིང་ངེ་འཛིན་ཉི་ཤུ་རྩ་ལྔ་པོ་
འདི་དག་ནི་ཏིང་ངེ་འཛིན་གྱི་རྒྱལ་པོ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་གྱི་རྒྱལ་པོ་འདི་དག་ལ་ཞུགས་ན། གལ་ཏེ་རི་རབ་རིའི་རྒྱལ་པོ་འདི་འཇིག་པར་འདོད་ན་ཡང་བསམས་པ་བཞིན་དུ་འཇིག་གོ །གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ཀྱི་བསམ་པ་ཤེས་པར་འདོད་ན་ཡང་ཡིད་བཞིན་དུ་ཤེས་པར་འགྱུར་རོ། །གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་གནས་པའི་སེམས་ཅན་ཐམས་ཅད་ལུས་ཀྱི་བ་སྤུའི་ཁུང་གཅིག་ཏུ་ཞུགས་པར་འདོད་ན་ཡང་ཡིད་བཞིན་དུ་འགྱུར་ཏེ། དོག་པའམ་གཟེར་བའི་སེམས་མེད་དོ། །གལ་ཏེ་སེམས་ཅན་གྲངས་མེད་པར་སྤྲུལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཡོངས་སུ་གང་བར་འདོད་ན་ཡང་ཡིད་བཞིན་དུ་འགྱུར་རོ། །ཅི་སྟེ་ལུས་གཅིག་ལས་ལུས་མང་པོར་འདོད་དམ། ལུས་མང་པོ་ལས་ལུས་གཅིག་ཏུ་འདོད་ན་ཡང་ཡིད་བཞིན་དུ་འགྱུར་ཏེ། དེ་ལྟ་བུར་འགྱུར་མོད་ཀྱི། པད་མོ་ལྟར་སེམས་ཅི་ལ་ཡང་མི་ཆགས་སོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་ཏིང་ངེ་འཛིན་གྱི་རྒྱལ་པོ་དེ་ལ་ཞུགས་ནས་དབང་དུ་འགྱུར་བའི་ས་ལ་ཡང་གནས་པར་འགྱུར་རོ། །བྱང་ཆུབ་སེམས་དཔའ་དབང་དུ་འགྱུར་བའི་ས་ལ་གནས་པ་ནི་དབང་དུ་འགྱུར་བའི་མཐུ་དང་ལྡན་པས་གང་ནས་གང་དུ་སྐྱེ་བར་འདོད་པ་དེ་དང་དེ་དག་ཏུ་ཡིད་བཞིན་དུ་སྐྱེ་བར་འགྱུར་རོ། །རིགས་ཀྱི་བུ་དཔེར་ན་འཁོར་ལོས་སྒྱུར་བའི་རྒྱལ་པོ་གླིང་བཞིར་འགྲོ་འདོད་ན་ཡིད་བཞིན་དུ་ཕྱིན་ཏེ་བར་དུ་གཅོད་པ་མེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། གང་ནས་གང་དུ་སྐྱེ་བར་འདོད་པ་དེ་དང་དེ་དག་ཏུ་ཡིད་བཞིན་དུ་སྐྱེ་བར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་གལ་ཏེ་སེམས་ཅན་དམྱལ་བ་ན་གནས་པའི་སེམས་ཅན་དག་དགེ་བའི་རྩ་བ་ལ་འཇོག་པར་འགྱུར་ན་བྱང་ཆུབ་སེམས་དཔའ་དེར་སྐྱེ་སྟེ། བྱང་ཆུབ་སེམས་དཔའ་དེར་སྐྱེ་མོད་ཀྱི། སྔོན་གྱི་ལས་ཀྱི་འབྲས་བུ་ནི་མ་ཡིན་གྱི། བྱང་ཆུབ་སེམས་དཔའ་སེམས་དཔའ་ཆེན་པོ་དབང་དུ་
གྱུར་པའི་ས་ལ་གནས་པ་དེའི་རྒྱུ་དེའི་རྐྱེན་གྱིས་དེར་སྐྱེ་བར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་དམྱལ་བ་ན་གནས་མོད་ཀྱི། དམྱལ་བ་གཏུབ་པའི་སྡུག་བསྔལ་ལ་སོགས་པ་ནི་མི་མྱོང་ངོ་། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོའི་ལྷུན་གྱིས་གྲུབ་པའི་ཡོན་ཏན་ཡང་ཚད་མེད་དཔག་ཏུ་མེད་དེ། བསྐལ་པ་ཁྲི་ཕྲག་བརྒྱ་སྟོང་གི་བར་དུ་ཡང་བཤད་ཀྱིས་མི་རྫོགས་ན། སངས་རྒྱས་བཅོམ་ལྡན་འདས་རྣམས་ཀྱི་ཡོན་ཏན་བརྗོད་པ་ལྟ་སྨོས་ཀྱང་ཅི་དགོས། དེའི་ཚེ་ན་འཁོར་གྱི་དཀྱིལ་འཁོར་དེ་ན། བྱང་ཆུབ་སེམས་དཔའ་དྲི་མ་མེད་པའི་སྙིང་པོའི་རྒྱལ་པོ་ཞེས་བྱ་བ་གཟི་བརྗིད་ཆེན་པོ་དང་མངོན་པར་ཤེས་པ་དང་ལྡན་པ། གཟུངས་ཆེན་པོ་ཐོབ་པ། ཏིང་ངེ་འཛིན་ཕུན་སུམ་ཚོགས་པ། འཇིགས་པ་མེད་པ་ཐོབ་པ་ཞིག་འདུག་པ་ལས་ལངས་ནས་བླ་གོས་ཕྲག་པ་གཅིག་ཏུ་བྱས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ཀྱིས་གསུངས་པ་ལྟར་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཡོན་ཏན་དང་ཡེ་ཤེས་ནི་ཚད་མ་མཆིས་དཔག་ཏུ་མ་མཆིས་ཏེ། བསྐལ་པ་ཁྲི་ཕྲག་བརྒྱ་སྟོང་གི་བར་དུ་ཡང་བཤད་ཀྱིས་མི་རྫོགས་ཞེས་བགྱི་བ་བདག་གིས་ཡིད་ལ་བསམས་པ་ལྟར་ཐེག་པ་ཆེན་པོའི་མདོ་སྡེ་དང་སྦྱར་ན་དེ་ལྟ་མ་ལགས་སོ། །དེ་ཅིའི་སླད་དུ་ཞེ་ན། ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེའི་མཐུས་སངས་རྒྱས་བཅོམ་ལྡན་འདས་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དེ་ལས་འབྱུང་ཞིང་སྐྱེའོ། །དེ་ནས་བཅོམ་ལྡན་འདས་ཀྱིས་ལེགས་སོ་ལེགས་སོ་ཞེས་བྱ་བ་བྱིན་ནས་རིགས་ཀྱི་བུ་དེ་དེ་བཞིན་ནོ། །དེ་དེ་བཞིན་ཏེ། ཁྱོད་ཀྱིས་སྨྲས་པ་བཞིན་ཏེ། དེ་ལྟར་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ་ཡང་དེ་ལྟར་ཡོན་ཏན་ཚད་མེད་མཐའ་ཡས་པ་དང་ལྡན་མོད་ཀྱི། མདོ་སྡེ་དེ་དག་མདོ་སྡེ་འདིའི་དཔེར་ཡང་མི་བཟོད་དེ། བརྒྱའི་ཆར་ཡང་མི་བཟོད། སྟོང་གི་ཆར་ཡང་མི་བཟོད། བརྒྱ་སྟོང་གི་ཆར་ཡང་མི་བཟོད་པ་ནས་རྩིས་སམ། གྲངས་
སམ། དཔེའི་བར་དུ་ཡང་མི་བཟོད་དོ། །རིགས་ཀྱི་བུ་འདི་ལྟ་སྟེ་དཔེར་ན་བ་ལས་འོ་མ་འབྱུང་སྟེ། འོ་མ་ལས་ནི་ཞོ་འབྱུང་། ཞོ་ལས་ནི་མར་འབྱུང་། མར་ལས་ནི་ཞུན་མར་འབྱུང་། ཞུན་མར་ལས་ནི་མར་གྱི་སྙིང་པོ་འབྱུང་། མར་གྱི་སྙིང་པོ་ཞེས་བྱ་བ་ནི་མཆོག་དང་ཕུལ་དུ་གྱུར་པ་སྟེ། གང་ཞིག་གིས་འཐུངས་ན་ནད་རྣམ་པ་སྣ་ཚོགས་འབྱང་བར་འགྱུར་ཏེ། སྨན་ཐམས་ཅད་ཀྱི་ནང་དུ་ཡང་འགྲོའོ། །རིགས་ཀྱི་བུ་སངས་རྒྱས་བཅོམ་ལྡན་འདས་ཀྱང་དེ་དང་འདྲ་སྟེ། སངས་རྒྱས་ལས་ནི་མདོ་སྡེ་བཅུ་གཉིས་འབྱུང་ངོ་། །མདོ་སྡེ་བཅུ་གཉིས་ལས་ནི་མདོའི་སྡེ་འབྱུང་ངོ་། །མདོའི་སྡེ་ལས་ནི་ཤིན་ཏུ་རྒྱས་པའི་མདོ་སྡེ་འབྱུང་ངོ་། །ཤིན་ཏུ་རྒྱས་པའི་མདོ་སྡེ་ལས་ནི་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་ངོ་། །ཤེས་རབ་ཀྱི་ཕ་རོལ་ཏུ་ཕྱིན་པ་ལས་ནི་ཡོངས་སུ་མྱ་ངན་ལས་འདས་པ་ཆེན་པོ་མར་གྱི་སྙིང་པོ་ལྟ་བུ་འབྱུང་ངོ་། །མར་གྱི་སྙིང་པོ་ཞེས་བྱ་བ་ནི་སངས་རྒྱས་ཀྱི་རང་བཞིན་གྱི་དཔེའོ། །སངས་རྒྱས་ཀྱི་རང་བཞིན་ཞེས་བྱ་བ་ནི་དེ་བཞིན་གཤེགས་པའོ། །རིགས་ཀྱི་བུ་དེ་བས་ན་དེ་བཞིན་གཤེགས་པའི་ཡོན་ཏན་ནི་ཚད་མེད་མཐའ་ཡས་དཔག་ཏུ་མེད་པ་ཡིན་ནོ། །དེ་ནས་བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས་གསུངས་པ་ལྟར་ཡོངས་སུ་མྱ་ངན་ལས་འདས་པའི་མདོ་ནི་མར་གྱི་སྙིང་པོ་ལྟ་བུར་མཆོག་ཏུ་གྱུར། ཕུལ་དུ་གྱུར་ཏེ། གང་ཞིག་གིས་འཐུངས་ན་ནད་ཀྱི་རྣམ་པ་ཡང་འབྱང་བར་འགྱུར་ལ། སྨན་ཐམས་ཅད་ཀྱི་ནང་དུའང་འགྲོའོ་ཞེས་གསུངས་པ་ཐོས་ནས་བདག་འདི་སྙམ་དུ་གྱུར་ཏོ། །གང་མདོ་སྡེ་འདི་མི་ཉན་ཅིང་མི་འདོན་པ་དེ་ནི་ཤིན་ཏུ་ཡང་གཏི་མུག་ཆེ་བ་སྟེ་དགེ་བའི་སེམས་མ་མཆིས་པར་འཚལ་ཏོ། །བཅོམ་ལྡན་འདས་བདག་ནི་པགས་པ་བཤུས་ཏེ་ཡི་གེ་འདྲི་བའི་གཞིར་བྱས་ལ། ཁྲག་ཕྱུང་སྟེ་སྣག་ཚར་བྱ་བ་དང་། རྐང་ཕྱུང་སྟེ་ཆུར་བྱ་བ་དང་། རུས་པ་གཞོགས་ཏེ་སྨྱུག་གུར་བྱས་ལ། ཡོངས་སུ་མྱ་ངན་ལས་འདས་པའི་མདོ་སྡེ་འདི་འདྲི་བར་བཟོད་དོ། །བྲིས་ནས་ཀྱང་ཀློག་པ་དང་། འདོན་
པ་དང་། ཁོང་དུ་ཆུད་པར་བྱ་བ་དང་། གཞན་ལ་ཡང་རྒྱ་ཆེར་སྟོན་ཅིང་འཆད་ཀྱང་བཟོད་དོ། །བཅོམ་ལྡན་འདས་གལ་ཏེ་སེམས་ཅན་གང་ཞིག་ལོངས་སྤྱོད་ལ་ཆགས་པར་འགྱུར་ན་བདག་གིས་དེ་ལ་སྔར་ལོངས་སྤྱོད་བྱིན་ཏེ། དེའི་འོག་ཏུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་འདི་ཀློག་པར་བསྐུལ་ལོ། །གལ་ཏེ་ལོངས་སྤྱོད་ཆེན་པོ་དང་ལྡན་པ་ཞིག་ན། སྔར་ཡིད་ལ་འདོད་པའི་གཏམ་སྙན་པ་བྱས་ཏེ། དེའི་འོག་ཏུ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་འདི་ཀློག་པར་བསྐུལ་ལོ། །གལ་ཏེ་མ་རབས་ཤིག་ཡིན་ན་ཡང་མཐུས་ནན་གྱིས་ཀློག་ཏུ་གཞུག་གོ །གལ་ཏེ་ང་རྒྱལ་ཅན་ཞིག་ཡིན་ན་ཡང་བདག་གིས་སྔར་ཡིད་བཞིན་དུ་གཡོག་བྱས་ཏེ་ཤིན་ཏུ་དགའ་ཞིང་མགུ་བར་བྱས་ལ་དེའི་འོག་ཏུ་ཡོངས་སུ་མྱ་ངན་ལས་འདས་པའི་མདོ་སྡེ་འདི་བསྟན་ཏོ། །གལ་ཏེ་ཤིན་ཏུ་རྒྱས་པའི་མདོ་སྡེ་ལ་སྐུར་པ་ཞིག་མཆིས་ན་མཐུ་སྟོབས་ཀྱིས་བཏུལ་བར་འཚལ་ལོ། །བཏུལ་ནས་དེའི་འོག་ཏུ་ཡོངས་སུ་མྱ་ངན་ལས་འདས་པའི་མདོ་སྡེ་ཀློག་ཏུ་གཞུག་གོ །གལ་ཏེ་ཐེག་པ་ཆེན་པོའི་མདོ་སྡེ་ལ་དད་ཅིང་མོས་པ་ཞིག་ན། བདག་དེའི་དྲུང་དུ་མཆིས་ཏེ། ཤིན་ཏུ་བསྟི་སྟང་དང་བཅས་པས་རིམ་གྲོ་དང་། བཀུར་སྟི་དང་། མཆོད་པ་དང་། བསྟོད་པ་བགྱིའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་བཀའ་སྩལ་པ། ལེགས་སོ་ལེགས་སོ། །ཁྱོད་ཐེག་པ་ཆེན་པོའི་མདོ་སྡེ་ལ་ཤིན་ཏུ་མོས་པ་དང་། ཐེག་པ་ཆེན་པོའི་མདོ་སྡེ་ལ་ཤིན་ཏུ་དགའ་བ་དང་། ཐེག་པ་ཆེན་པོའི་མདོ་སྡེ་འདོད་པ་དང་། ཐེག་པ་ཆེན་པོའི་མདོ་སྡེའི་རོ་ལ་དགའ་བ་དང་། ཐེག་པ་ཆེན་པོ་ལ་ཤིན་ཏུ་དད་པ་དང་། བསྟི་སྟང་དང་། བཀུར་སྟི་དང་། མཆོད་པ་བྱེད་པ་ལེགས་སོ། །རིགས་ཀྱི་བུ་ཁྱོད་ཀྱིས་འདི་ལྟར་ཤིན་ཏུ་དགེ་བའི་སེམས་འདིའི་རྒྱུ་དང་འདིའི་རྐྱེན་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཚད་མེད་མཐའ་ཡས་པ་གང་གཱ་ཀླུང་གི་བྱེ་མ་སྙེད་ལས་ཤིན་ཏུ་འཕགས་ཏེ། དེ་དག་པས་སྔར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །ཁྱོད་
ནི་རིང་པོ་མི་ཐོགས་པར་འཁོར་གྱི་དཀྱིལ་འཁོར་མང་པོ་ལ་ཡོངས་སུ་མྱ་ངན་ལས་འདས་པའི་མདོ་སྡེ་དེ་བཞིན་གཤེགས་པའི་སངས་རྒྱས་ཀྱི་རང་བཞིན་དགོངས་ཏེ་གསུངས་པའི་སྙིང་པོ་སྟོན་ཅིང་འཆད་པར་འགྱུར་རོ། །རིགས་ཀྱི་བུ་སྔོན་འདས་པའི་དུས་སངས་རྒྱས་ཀྱི་ཉི་མ་མ་ཤར་བ་དེའི་ཚེ་དེའི་དུས་ན་ང་བྲམ་ཟེར་གྱུར་ཏེ། བྱང་ཆུབ་སེམས་དཔའི་སྤྱད་པ་སྤྱོད་པ་ན་མུ་སྟེགས་ཅན་ཐམས་ཅད་ཀྱིས་མུ་སྟེགས་ཅན་གྱི་གཙུག་ལག་ཐམས་ཅད་ཀྱང་ཁོང་དུ་ཆུད་དེ་རབ་ཏུ་ཞི་བར་སྤྱོད་ཅིང་། སྤྱོད་ལམ་དང་ལྡན་པ་སེམས་ཡོངས་སུ་དག་པས་ཕྱི་རོལ་གྱི་རྐྱེན་གྱིས་འདོད་པའི་འདུ་ཤེས་མི་སྐྱེ་སྟེ། ཞེ་སྡང་གི་མེ་བསད་ནས། རྟག་པ་དང་། བདེ་བ་དང་། བདག་དང་། ཡོངས་སུ་དག་པའི་ཆོས་ཡིད་ལ་བཟུང་སྟེ། ཕྱོགས་ཐམས་ཅད་དུ་ཐེག་པ་ཆེན་པོའི་མདོ་སྡེ་བཙལ་ཀྱང་ཤིན་ཏུ་རྒྱས་པའི་མིང་ཙམ་ཡང་མ་ཐོས་སོ། །ང་དེའི་ཚེ་ན་གངས་ཀྱི་རི་ཞིག་ལ་གནས་ཏེ། རི་དེ་ཤིན་ཏུ་དབེན་ལ། ཆུ་མིག་དང་། འབབ་ཆུ་དང་། ཁྲུས་ཀྱི་རྫིང་བུ་དང་། སྐྱེད་ཤིང་དང་། ནགས་ཚལ་དང་། རྩི་ཤིང་གིས་ཡོངས་སུ་གང་སྟེ། གནས་དེའི་བར་བར་ན། བྲག་ལས་ཆུ་མིག་གཙང་མ་འབབ་སྟེ། མེ་ཏོག་བསུང་ཅན་གྱིས་ཡོངས་སུ་བརྒྱན་ལ། བྱ་དང་རི་དགས་ཀྱང་དཔག་ཏུ་མེད་དོ། །དེ་ན་ཤིན་ཏུ་རོ་དང་ལྡན་པའི་འབྲས་བུའི་ཤིང་རྣམ་པ་ཐ་དད་པ་ཡང་དཔག་ཏུ་མེད་ལ། གཞན་ཡང་པད་མོའི་རྩ་བ་དངར་པོ་དང་། ཤིང་སྔོན་པོའི་རྩ་བ་བསུང་ཅན་གྱིས་ཡོངས་སུ་གང་ངོ་། །ང་དེའི་ཚེ་དེའི་དུས་ན་གཅིག་པུ་དེ་ན་གནས་ཏེ། ཤིང་གི་འབྲས་བུ་འབའ་ཞིག་ཟའོ། །ཟོས་ནས་སེམས་རྩེ་གཅིག་ཏུ་ཏིང་ངེ་འཛིན་ཡིད་ལ་བྱེད་དེ། ལོ་ཚད་མེད་པའི་བར་དུ་དེ་བཞིན་གཤེགས་པ་འཇིག་རྟེན་དུ་འབྱུང་ངོ་ཞེས་ཀྱང་མ་ཐོས་ལ། ཐེག་པ་ཆེན་པོའི་མདོ་སྡེའི་མིང་ཡང་མ་ཐོས་སོ། །རིགས་ཀྱི་བུ་ངས་དེ་ལྟར་དཀའ་ཐུབ་སྤྱོད་པ་ན་བརྒྱ་བྱིན་ལྷའི་དབང་པོ་དང་། ལྷའི་བུ་རྣམས་ཤིན་ཏུ་ངོ་མཚར་དུ་གྱུར་ཏེ། འདུས་ནས་སོ་སོ་ནས་འདི་སྙམ་དུ་འགྱུར་ཏེ། ཚིགས་སུ་བཅད་པ་འདི་སྨྲས་སོ། །གཅིག་ལ་གཅིག་ནི་འདི་སྐད་ཅེས། །རྣམ་དག་གངས་ཀྱི་རི་འདི་ལ། །རབ་ཞི་འདོད་ཆགས་སྤངས་པའི་བདག །ཡོན་ཏན་བརྒྱད་པའི་རྒྱལ་
པོའོ། །འདོད་ཆགས་ཞེ་སྡང་ང་རྒྱལ་སྤངས། །གཏི་མུག་གཡོ་སྒྱུ་ཡོངས་སུ་བཅད། །ངག་གི་སྒོ་ནས་མི་སྨྲ་བ། །རྩུབ་ཅིང་བརླང་བའི་ཚིག་རྣམས་སོ། །དེའི་ཚེ་འཁོར་དེའི་ནང་ན་ལྷའི་སྲས་པོ་རབ་ཏུ་དགའ་བ་ཞེས་བྱ་བ་ཞིག་གིས་ཡང་ཚིགས་སུ་བཅད་དེ་སྨྲས་པ། དེ་ལྟར་འདོད་ཆགས་སྤངས་ནས་སུ། །ཡོངས་དག་བརྩོན་འགྲུས་རབ་བརྩོན་པ། །བརྒྱ་བྱིན་ལྷ་ཡི་ཐབས་འདོད་དམ། །ལྷ་ཡི་གནས་སུ་སྐྱེ་བར་འདོད། །ཇི་སྟེ་མུ་སྟེགས་ཅན་ཡིན་ན། །ཤིན་ཏུ་དཀའ་ཐུབ་སྤྱད་པ་འདི། །བརྒྱ་བྱིན་ལྷ་ཡི་དབང་པོ་ཡི། །དབང་དང་ཐབས་དག་ཚོལ་ཕྱིར་རོ། །དེའི་ཚེ་གཞན་ཡང་ལྷའི་སྲས་པོ་དྲང་སྲོང་གཅིག་ཅེས་བྱ་བས། བརྒྱ་བྱིན་ལ་ཚིགས་སུ་བཅད་དེ་གསོལ་པ། ལྷ་ཡི་དབང་པོ་ཀཽ་ཤི་ཀ ། དེ་ལྟར་ཐེ་ཙོམ་བསྐྱེད་མི་རིགས། །མུ་སྟེགས་དཀའ་ཐུབ་སྤྱོད་པ་ཡང་། །བརྒྱ་བྱིན་དབང་པོའི་ཐབས་མི་ཚོལ། །ཚིགས་སུ་བཅད་པ་དེ་སྐད་ཅེས་སྨྲས་ནས་ཡང་འདི་སྐད་ཅེས་གསོལ་ཏོ། །ཀཽ་ཤི་ཀ་འཇིག་རྟེན་ན་སྐྱེས་བུ་ཆེན་པོ་དག་ནི་སེམས་ཅན་ལ་ཕན་པའི་ཕྱིར་གྱི། བདག་གི་ལུས་ལ་ཆགས་པའི་ཕྱིར་མ་ཡིན། སེམས་ཅན་ལ་ཕན་པ་དང་བདེ་བའི་དོན་གྱི་ཕྱིར་དཀའ་ཐུབ་ཚད་མེད་པ་རྣམ་པ་སྣ་ཚོགས་སྤྱོད་དོ། །སྐྱེས་བུ་དེ་ནི་འཁོར་བའི་སྐྱོན་མང་པོ་མཐོང་བས་ཅི་སྟེ་ས་ཆེན་པོ་འདི་དང་རི་དང་རྒྱ་མཚོ་ཆེན་པོར་རིན་པོ་ཆེས་ཡོངས་སུ་གང་བར་མཐོང་ཡང་། མཆིལ་མའམ། ངར་སྣབས་ལྟར་ཆགས་པ་མི་སྐྱེད་དོ། །དེ་ལྟར་སྐྱེས་བུ་ཆེན་པོ་དེ་རིན་པོ་ཆེ་དང་། ལོངས་སྤྱོད་དང་། ཆུང་མ་དང་། བུ་དང་། མགོ་དང་། མིག་དང་། ཀླད་པ་དང་། ལག་པ་དང་། རྐང་པ་དང་། ཡན་ལག་དང་། ཉིང་ལག་དང་། གནས་པའི་ཁང་ཁྱིམ་དང་། བལ་གླང་དང་། རྟ་དང་། ཐེག་པ་དང་། བྲན་ཕོ་དང་། བྲན་མོ་དང་། ལས་བྱེད་པའི་མི་ཡང་ཡོངས་སུ་སྤངས་ཏེ་མཐོ་རིས་ཀྱི་ལྷར་སྐྱེ་བར་མི་སྨོན་གྱི། སེམས་ཅན་ཐམས་ཅད་ལ་ཕན་པ་དང་། བདེ་བའི་དོན་འབའ་ཞིག་སྦྱོར་རོ། །བདག་གིས་འཚལ་བ་ལྟར་ན་སྐྱེས་བུ་ཆེན་པོ་དེ་ནི་ཡོངས་སུ་དག་ཅིང་ཀུན་ནས་ཉོན་མོངས་པ་ཐམས་ཅད་ཡོངས་སུ་བཅད་ནས་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་འབའ་ཞིག་ཚོལ་ལོ། །བརྒྱ་བྱིན་ལྷའི་དབང་པོས་ཡང་འདི་སྐད་ཅེས་སྨྲས་སོ། །ཁྱོད་ཀྱིས་སྨྲས་པ་ལྟར་དྲང་སྲོང་ཆེན་པོ་དེ་འཇིག་རྟེན་དང་བཅས་པ་ཐམས་ཅད་ཀྱི་སྐྱབས་སུ་འགྱུར་བ་ཡིན་ལ། ཇི་སྟེ་འཇིག་རྟེན་འདི་ན་སངས་རྒྱས་ཀྱི་ཤིང་ཆེན་པོ་བྱུང་ན། འཇིག་རྟེན་དུ་བཅས་པ་ལྷ་དང་། མི་དང་། ལྷ་མ་ཡིན་ལ་སོགས་པ་ཐམས་ཅད་ཀྱི་ཉོན་མོངས་པའི་སྦྲུལ་གདུག་པ་སེལ་བར་འགྱུར་ཏེ། སེམས་ཅན་དེ་དག་སངས་རྒྱས་ཀྱི་སྐྱེད་ཤིང་གི་གྲིབ་མ་ལ་འདུག་པས་ཉོན་མོངས་པའི་སྦྲུལ་གདུག་པ་ཐམས་ཅད་རྣམ་པར་སེལ་བར་འགྱུར་རོ། །དྲང་སྲོང་ཆེན་པོ་དེ་མ་འོངས་པའི་དུས་སུ་བདེ་བར་གཤེགས་པར་འགྱུར་ན་ལྟ། བདག་ཅག་ལ་སོགས་པ་ཐམས་ཅད་ཀྱང་ཤིན་ཏུ་འབར་བའི་ཉོན་མོངས་པ་དཔག་ཏུ་མེད་པ་ཞི་བར་འགྱུར་ཏེ། དེ་ནི་ཤིན་ཏུ་ཡང་ཡིད་ཆེས་པར་དཀའོ། །དེ་ཅིའི་ཕྱིར་ཞེ་ན། སེམས་ཅན་ཚད་མེད་པ་བརྒྱ་སྟོང་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་ལ། རྐྱེན་ཅུང་ཟད་ཙམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་པར་འགྱུར་ཏེ། དཔེར་ན་ཆུའི་ཟླ་བ་ལྟར་ཆུ་འགུལ་ན་ཟླ་བ་ཡང་འགུལ་བ་དང་འདྲའོ། །ཡང་དཔེར་ན་རི་མོ་བྲིས་པའི་སྐུ་གཟུགས་དང་འདྲ་སྟེ། བྱ་བ་ནི་དཀའ་ལ་གཞིག་ནི་སླ་བ་ལྟར་བྱང་ཆུབ་ཀྱི་སེམས་ཀྱང་དེ་དང་འདྲ་སྟེ་བསྐྱེད་ནི་དཀའ་ལ་ལྡོག་ནི་སླའོ། །དྲང་སྲོང་ཆེན་པོ་དཔེར་ན་མི་ཞིག་གོ་མཚོན་དང་ཤིན་ཏུ་ཆས་ཏེ། གཡུལ་ངོར་ཕྱིན་ནས་དགྲ་དང་ཕྲད་མ་ཐག་ཏུ་འཇིགས་ནས་ཕྱིར་ལྡོག་པ་དང་འདྲ་བར་སེམས་ཅན་ཐམས་ཅད་ཀྱང་དེ་དང་འདྲ་བར་བྱང་ཆུབ་ཏུ་སེམས་བསྐྱེད་པའི་གོ་མཚོན་གྱིས་ཡོངས་སུ་བརྒྱན་ནས་འཁོར་བའི་སྐྱོན་མཐོང་མ་ཐག་ཏུ་འཇིགས་པ་བསྐྱེད་ནས་ཕྱིར་ལྡོག་པར་འགྱུར་རོ། །དེ་བས་ན་ངས་སྐྱེས་བུ་དེ་ཉོན་མོངས་པ་དང་གདུང་བ་མེད་པར་དཀའ་བ་སྤྱོད་དེ། སྤྱོད་པ་ཡོངས་སུ་དག་པར་མཐོང་མོད་ཀྱི། འོན་ཀྱང་ཡིད་མི་ཆེས་ཀྱིས་དེའི་གན་དུ་ཉེ་བར་སོང་ལ། སྐྱེས་བུ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཕྲག་པ་ལ་བསྐུར་ནུས་སམ་མི་ནུས་པ་བརྟག་དགོས་སོ། །
དཔེར་ན་ཤིང་རྟ་ལ་འཕང་ལོ་གཉིས་ཡོད་ན་སྤྱད་དུ་རུང་བ་དང་། བྱ་ལ་འདབ་མ་གཉིས་ཡོད་ན་འཕུར་ནུས་པ་དང་འདྲ་བར་དཀའ་ཐུབ་སྤྱོད་པ་ཡང་དེ་དང་འདྲ་སྟེ། ཤིན་ཏུ་ཚུལ་ཁྲིམས་སྡོམ་པར་ནི་ངས་ཀྱང་མཐོང་ན། ཤིན་ཏུ་ཟབ་མོའི་ཡེ་ཤེས་ཡོད་དམ་མེད་པ་བརྟག་དགོས་སོ། །ཅི་སྟེ་ཤིན་ཏུ་ཟབ་མོའི་ཡེ་ཤེས་ཡོད་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཁུར་ལྕི་བ་ཕྲག་པ་ལ་ཁྱེར་ནུས་སོ། །དྲང་སྲོང་དཔེར་ན་ཉ་མོ་ལྟ་བུ་མངལ་ན་ཕྲུ་གུ་ནི་རབ་ཏུ་མང་མོད་ཀྱི། ཕྲུ་གུར་འགྱུར་བ་ནི་ཉུང་ངོ་། །དཔེར་ན་ཤིང་ཨ་མྲ་ཡང་མེ་ཏོག་ནི་ཤིན་ཏུ་མང་ཡང་འབྲས་བུར་འགྱུར་བ་ནི་ཉུང་ངོ་། །སེམས་ཅན་བྱང་ཆུབ་ཏུ་སེམས་བསྐྱེད་པ་ཡང་ཚད་མེད་མོད་ཀྱི། ཐ་མར་འབྲས་བུར་འགྱུར་བ་ནི་ཤིན་ཏུ་ཉུང་ངོ་། །དྲང་སྲོང་ཆེན་པོ་བདག་ཅག་འགྲོགས་ཏེ་སྐྱེས་བུ་དེ་གང་ན་བར་རྟོག་ཏུ་འདོང་ངོ་། །དྲང་སྲོང་དཔེར་ན་གསེར་ཡང་དག་པར་ཡང་རྣམ་པ་གསུམ་གྱི་སྒོ་ནས་བརྟགས་ན་ཡང་དག་པ་ཡིན་ནམ་མ་ཡིན་པ་རྟོགས་སོ། །འདི་ལྟ་སྟེ། བསྲེག་པ་དང་། བརྡུང་བ་དང་། བདར་བའི་སྒོ་ནས་བརྟག་པའོ། །དཀའ་ཐུབ་སྤྱོད་པ་ཡང་དེ་དང་འདྲའོ་ཞེས་སྨྲས་ནས། དེའི་ཚེ་བརྒྱ་བྱིན་ལྷའི་དབང་པོ་བདག་གི་ལུས་སྲིན་པོའི་ལུས་ཤིན་ཏུ་འཇིགས་སུ་རུང་བ་ཞིག་ཏུ་སྤྲུལ་ནས་གངས་ཀྱི་རི་ལ་བབས་ཏེ། ཧ་ཅང་ཡང་མི་རིང་བ་ན་འདུག་ནས། དེའི་ཚེ་སྲིན་པོ་དེ་ཡང་མི་འཇིགས་པའི་སེམས་དང་། ཤིན་ཏུ་སྤོབས་པའི་སྐད་གསང་བས་འདས་པའི་སངས་རྒྱས་རྣམས་ཀྱིས་གསུངས་པ་ཚིགས་སུ་བཅད་པ་ཕྱེད་པོ་འདི་སྨྲས་སོ། །ཀྱེ་མའོ་འདུ་བྱེད་རྟག་པ་མེད། །སྐྱེ་ཞིང་འགོག་པའི་ཆོས་ཅན་ཡིན། །ཚིགས་སུ་བཅད་པ་ཕྱེད་པ་འདི་སྨྲས་ནས། དེའི་དྲུང་དུ་འདུག་སྟེ། ཤིན་ཏུ་འཇིགས་སུ་རུང་བའི་གཟུགས་མངོན་པར་བསྟན་ནས། མིག་བགྲད་དེ་ཕྱོགས་བཞི་ཀུན་ཏུ་བལྟས་སོ། །དེའི་ཚེ་དཀའ་ཐུབ་སྤྱོད་པ་དེས་ཚིགས་སུ་བཅད་པ་ཕྱེད་པོ་འདི་ཐོས་ནས་རབ་ཏུ་དགའ་བའི་སེམས་སྐྱེས་པ་ནི་དཔེར་ན་ཚོང་པ་ཤིན་ཏུ་ཉམ་ང་བའི་གཡང་སར་མཚན་མོ་སོང་སོང་བ་ལས་གྲོགས་སྟོར་ནས་
ཤིན་དུ་འཇིགས་ཏེ་གྲོགས་ཚོལ་བ་ལས་གྲོགས་དང་ཕྲད་པ་ཙམ་དུ་ཤིན་ཏུ་དགའ་མགུ་རངས་པ་ཚད་མེད་པ་སྐྱེས་སོ། །གཞན་ཡང་དཔེར་ན་ནད་ཡུན་རིང་པོས་བཏབ་པ་ཞིག་སྨན་པ་མཁས་པ་དང་ཕྲད་དེ་སྨན་བཟང་པོས་གསོས་པ་ཙམ་མམ། དཔེར་ན་རྒྱ་མཚོར་ལྟུང་བ་ལས་གཟིངས་དང་ཕྲད་པ་ཙམ་མམ། ཤིན་ཏུ་སྐོམ་གྱིས་གདུངས་པ་ཞིག་ཆུ་གྲང་མོ་དང་ཕྲད་པའམ། དགྲས་བདས་པ་ལས་ཤོར་བ་ཙམ་མམ། ཡུན་རིང་པོར་བཙོན་དུ་བཟུང་བ་ལས་ཐར་བ་ཙམ་མམ། ཞིང་པ་ཐན་ཆེན་བྱུང་བ་ལས་ཆར་པ་བབ་པ་ཙམ་མམ། འདྲོན་པོ་ལམ་རིང་པོར་འདྲོན་དུ་སོང་བ་ཕྱིར་འཁོར་བ་ཙམ་དུ་ཐོས་ནས་ཤིན་ཏུ་དགའ་བ་ཆེན་པོ་སྐྱེས་སོ། །རིགས་ཀྱི་བུ་དེའི་ཚིགས་སུ་བཅད་པ་ཕྱེད་པོ་དེ་ཐོས་ནས་ཤིན་ཏུ་དགའ་བ་ཡང་དེ་དང་འདྲ་སྟེ། འདུག་པ་ལས་ལངས་ནས་ལག་པས་སྐྲ་བཏེག་སྟེ། ཕྱོགས་བཞིར་བལྟས་ནས་འདི་སྐད་ཅེས་སྨྲས་སོ། །དེ་ཅི་ཚིགས་སུ་བཅད་པ་སྨྲས་པ་འདི་སུ་ཡིན་ཞེས་བལྟས་ན། གཞན་ནི་མི་སྣང་གི་སྲིན་པོ་འབའ་ཞིག་མཐོང་ནས་ཡང་འདི་སྐད་ཅེས་སྨྲས་སོ། །འདི་ལྟར་རྣམ་པར་གྲོལ་བའི་སྒོ་འབྱེད་པ་འདི་སུ་ཡིན། སངས་རྒྱས་རྣམས་ཀྱི་གསུང་དབྱངས་ཀྱི་འབྲུག་སྒྲ་སྒྲོགས་པ་འདི་སུ་ཡིན། འཁོར་བའི་གཉིད་ཀྱིས་ཤིན་ཏུ་ལོག་པ་འདི་ལས་སད་པར་བྱེད་པ་འདི་སུ་ཡིན་ཞེས་སྨྲས་སོ། །ཡང་འདི་སྐད་དུ་འཁོར་བ་ན་ཤིན་ཏུ་མུ་གེས་གདུངས་པའི་སེམས་ཅན་རྣམས་ལ་བླ་ན་མེད་པའི་བྱང་ཆུབ་ཀྱི་རོ་སྟོན་པ་འདི་སུ་ཡིན། སེམས་ཅན་ཚད་མེད་པ་འཁོར་བའི་རྒྱ་མཚོར་བྱིང་བ་ལས་གྲུ་ཆེན་པོས་འདྲེན་པ་འདི་སུ་ཡིན། སེམས་ཅན་མང་པོ་ཉོན་མོངས་པའི་ནད་ཀྱིས་ཤིན་ཏུ་གཟིར་བ་ལས་ནད་གསོ་བའི་སྨན་པར་གྱུར་ཏེ་སྨན་པ་མཁས་པར་འགྱུར་བ་འདི་སུ་ཡིན། ཚིགས་སུ་བཅད་པ་ཕྱེད་པོ་འདི་སྨྲས་པས་བདག་གི་སེམས་བསྐུལ་ཏེ། ཇི་ལྟར་ཟླ་བ་ཕྱེད་པོས་པད་མོ་བགས་ཀྱིས་ཕྱེ་བ་ལྟར་གྱུར་ཏོ་ཞེས་སྨྲས་སོ། །རིགས་ཀྱི་བུ་ང་དེའི་ཚེ་དེའི་དུས་ན་གཞན་ཅི་ཡང་མ་མཐོང་གི ། སྲིན་པོ་འབའ་ཞིག་མཐོང་བས་ཡང་འདི་སྙམ་དུ་ཚིགས་སུ་བཅད་པ་ཕྱེད་པོ་འདི་སྲིན་པོས་མ་
སྨྲས་སྙམ་སེམས་པར་གྱུར་ཏོ། །ཡང་འདི་སྙམ་དུ་སེམས་ཏེ། འདིས་སྨྲས་པ་ནི་མ་ཡིན་པ་སྙམ། དེ་ཅིའི་ཕྱིར་ཞེ་ན། འདི་ལྟར་བྱད་གཟུགས་ཤིན་ཏུ་མི་སྡུག་ལ་འཇིགས་སུ་རུང་བ་ནི་འདི་ལྟ་བུར་མི་འགྱུར་བའི་ཕྱིར་རོ། །གང་གིས་ཚིགས་སུ་བཅད་པ་འདི་ཐོས་ནས་འཇིགས་སུ་རུང་བའི་མི་སྡུག་པ་ཐམས་ཅད་དང་བྲལ་བའི་རིགས་ཏེ། ཅིའི་ཕྱིར་ན་འདི་ལྟ་བུ་བྱད་གཟུགས་ཅན་གྱིས་འདི་སྐད་དུ་ཚིགས་སུ་བཅད་པ་སྨྲས་པར་གྱུར། དེ་ནི་མེའི་ནང་ནས་པད་མོ་སྐྱེ་མི་སྲིད་ལ། ཉི་མས་གདུངས་པའི་འོད་ལས་ཆུ་གྲང་མོ་འབྱུང་མི་སྲིད་སྙམ་སེམས་པར་གྱུར་ཏེ། རིགས་ཀྱི་བུ་ང་ཡང་དེའི་ཚེ་ན་འདི་སྙམ་དུ་བདག་ནི་ཤིན་ཏུ་ཤེས་པ་མེད་པ་སྟེ་གལ་ཏེ་ན་སྲིན་པོ་འདི་སྔོན་འདས་པའི་སངས་རྒྱས་དང་ཕྲད་དེ། སངས་རྒྱས་ལས་ཚིགས་སུ་བཅད་པ་ཕྱེད་པོ་འདི་ཐོས་སམ་སུས་ཤེས། ཚིགས་སུ་བཅད་པ་ཕྱེད་པོའི་དོན་འདི་དྲི་བར་བྱའོ་སྙམ་དུ་བསམས་ནས་སྲིན་པོ་དེ་ལ་བསྙེན་ཏེ་འདི་སྐད་ཅེས་སྨྲས་སོ། །ལེགས་སོ། །སྐྱེས་བུ་ཆེན་པོ་ཁྱོད་སྔོན་འདས་པའི་འཇིགས་པ་དང་བྲལ་བས་གསུངས་པའི་ཚིགས་སུ་བཅད་པ་ཕྱེད་པོ་འདི་སུ་ལས་ཐོས། སྐྱེས་བུ་ཆེན་པོ་ཡིད་བཞིན་གྱི་ནོར་བུ་རིན་པོ་ཆེ་ཕྱེད་པོ་འདི་ག་ལས་རྙེད། སྐྱེས་བུ་ཆེན་པོ་ཚིགས་སུ་བཅད་པ་ཕྱེད་པོ་འདིའི་དོན་འདི་ནི་འདས་པ་དང་། མ་འོངས་པ་དང་། ད་ལྟར་བཞུགས་པའི་སངས་རྒྱས་བཅོམ་ལྡན་འདས་ཐམས་ཅད་ཀྱི་ཡང་དག་པའི་ལམ་ཡིན་ཏེ། འཇིག་རྟེན་ན་གནས་པའི་སེམས་ཅན་ཚད་མེད་པ་ནི་རྟག་ཏུ་ལྟ་བའི་དྲ་བས་ཀུན་ཏུ་གླགས་པས་ན་ནམ་དུ་ཡང་མུ་སྟེགས་ཅན་གྱི་ཆོས་ལས་འཇིག་རྟེན་ལས་འདས་པ་སྟོབས་བཅུ་དང་ལྡན་པ་ཤིན་ཏུ་དཔའ་བས་གསུངས་པའི་སྟོང་པ་ཉིད་ཀྱི་དོན་འདི་མི་ཐོས་སོ། །རིགས་ཀྱི་བུ་ངས་དེ་ལ་དེ་སྐད་ཅེས་དྲིས་པ་དང་། ཕྱིར་ང་ལ་འདི་སྐད་ཅེས་སྨྲས་སོ། །བྲམ་ཟེ་ཆེན་པོ་ཁྱོད་ང་ལ་འདི་སྐད་ཅེས་མ་འདྲི་ཤིག །དེ་ཅིའི་ཕྱིར་ཞེ་ན། ཁོ་བོ་ཟས་མ་རྙེད་ནས་ཞག་མང་དུ་ལོན་ཏེ་གནས་ཀུན་ཏུ་བཙལ་ཀྱང་མ་རྙེད་པས། བཀྲེས་པ་དང་སྐོམ་པས་ཡོངས་སུ་གདུངས་ཏེ་སྔར་སྨྲས་པ་ཡང་མྱོས་བཞིན་དུ་སྨྲས་པར་ཟད་ཀྱི། དྲན་བཞིན་ནམ་ཤེས་བཞིན་
དུ་སྨྲས་པ་མ་ཡིན་ཏེ། གལ་ཏེ་བདག་གི་མཐུ་སྟོབས་ཀྱིས་ནམ་མཁའ་ལ་འཕུར་ཏེ་བྱང་གི་སྒྲ་མི་སྙན་དུ་ཕྱིན་ནས་ལྷའི་གནས་ཀྱི་བར་དུ་ཕྱིན་ཀྱང་བདག་གི་ཟས་མ་རྙེད་པས་དེ་སྐད་ཅེས་སྨྲས་པ་ཡིན་ནོ། །རིགས་ཀྱི་བུ་ངས་དུས་དེའི་ཚེ་ན་སྲིན་པོ་ལ་འདི་སྐད་ཅེས་སྨྲས་སོ། །སྐྱེས་བུ་ཆེན་པོ་གལ་ཏེ་ཁྱོད་ཀྱིས་ང་ལ་ཚིགས་སུ་བཅད་པ་འདི་རྫོགས་པར་སྨྲས་ན། བདག་ཚེ་གཅིག་ཏུ་ཁྱོད་ཀྱི་སློབ་མར་དམ་འཆའོ། །སྐྱེས་བུ་ཆེན་པོ་ཁྱོད་ཀྱིས་སྨྲས་པ་འདི་ནི་ཚིག་ཀྱང་མ་རྫོགས། དོན་ཡང་མ་རྫོགས་ན་ཁྱོད་ཅིའི་ཕྱིར་རྫོགས་པར་མི་སྨྲ། ཟང་ཟིང་གི་སྦྱིན་པ་ནི་རྫོགས་པའི་མཐའ་ཡོད་ཀྱི། ཆོས་ཀྱི་སྦྱིན་པ་ནི་རྫོགས་པའི་མཐའ་མེད་དོ། །རྫོགས་པའི་མཐའ་མེད་མོད་ཀྱི། ཕན་པ་དང་བདེ་བའི་དོན་དུ་ཆེའོ། ། བདག་གིས་ཚིགས་སུ་བཅད་པ་ཕྱེད་པོ་འདི་ཐོས་ནས་ངོ་མཚར་དུ་ཐེ་ཙོམ་དུ་གྱུར་གྱིས་ཚིགས་སུ་བཅད་པ་འདི་རྫོགས་པར་སྨྲས་ཏེ། བདག་གི་ཐེ་ཙོམ་བཅད་ན་ཚེ་གཅིག་ཏུ་ཁྱོད་ཀྱི་སློབ་མ་བྱའོ་ཞེས་སྨྲས་སོ། །སྲིན་པོས་སྨྲས་པ། ཁྱོད་ཀྱི་ཤེས་པ་ནི་ལྷག་ཆེས་པས་ཁྱོད་བདག་གི་དོན་ནི་ཆེར་འཛིན་གྱི། ཁོ་བོའི་བསམ་པ་ནི་མི་སེམས་པ་ལྟ། ཁོ་བོ་ནི་ཤིན་ཏུ་བཀྲེས་པས་གདུངས་ནས་སྨྲ་མི་ཕོད་དོ། །ངས་ཡང་དེ་ལ་འདི་སྐད་ཅེས་སྨྲས་སོ། །ཁྱོད་ཟས་སུ་ཅི་ཞིག་ཟ་ཞེས་དྲིས་ན། སྲིན་པོ་དེས་སྨྲས་པ། ཁྱོད་ང་ལ་མ་འདྲི་ཤིག །ཅི་སྟེ་ངས་སྨྲས་ན་མི་མང་པོ་དག་ཤིན་ཏུ་སྐྲག་པར་འགྱུར་རོ། །ངས་ཡང་དེ་ལ་འདི་སྐད་ཅེས་དྲིས་སོ། །ཡུལ་སྟོང་པ་འདིར་མི་སུ་ཡང་མེད་ལ་ང་ནི་ཁྱོད་ལ་མི་འཇིགས་ན། ཅིའི་ཕྱིར་མི་སྨྲ། སྲིན་པོ་དེས་ཡང་སྨྲས་པ། ཁོ་བོ་ཟས་སུ་ནི་མིའི་ཤ་རྗེན་པ་དང་། ཁྲག་དྲོན་པོ་འཐུང་སྟེ། ཁོ་བོ་ནི་བསོད་ནམས་ཆུངས་པས་ཟས་སུ་འདི་ལྟ་བུ་ཟ་ཡང་གནས་ཐམས་ཅད་དུ་མ་རྙེད་དོ། །འཇིག་རྟེན་ན་མི་དག་ཤིན་ཏུ་མང་མོད་ཀྱི། ཐམས་ཅད་བསོད་ནམས་དང་ལྡན་པ་ཤ་སྟག་ལ། ལྷས་ཀྱང་བསྲུངས་པས་ན་བདག་ནི་དེ་དག་གསོད་ཅིང་ཟ་བའི་མཐུ་མེད་དོ་ཞེས་སྨྲས་སོ། །རིགས་ཀྱི་བུ་ངས་དེ་ལ་འདི་སྐད་ཅེས་སྨྲས་སོ། །ཁྱོད་ཚིགས་སུ་བཅད་པ་འདི་དོན་དང་བཅས་སུ་རྫོགས་
པར་སྨྲོས་ཤིག་དང་ངའི་ལུས་འདི་ཁྱོད་ལ་ཡོངས་སུ་གཏང་བར་བྱའོ། །སྐྱེས་བུ་ཆེན་པོ་ཅི་སྟེ་ཁོ་བོའི་ལུས་འདི་ཤིན་ཏུ་ཡང་ཅིར་ཡང་དགོས་པ་བྱེད་ཀྱི། སྟག་དང་། སྤྱང་ཀི་དང་། འཕར་བ་དང་། བྱ་རྒོད་དང་། བྱན་ལག་དང་། ཁྭ་ལ་སོགས་པས་ཟ་བར་འགྱུར་ཏེ། སྤུ་ཉག་མ་གཅིག་ཙམ་གྱི་བསོད་ནམས་ཀྱང་སྐྱེ་བར་མི་འགྱུར་གྱི། བདག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཚོལ་བའི་ཕྱིར་སྙིང་པོ་མེད་པའི་ལུས་འདིས་སྙིང་པོ་དང་བཅས་པའི་ལུས་སུ་གྱུར་ཅིག་ཅེས་སྨྲས་སོ། །སྲིན་པོ་དེས་ཡང་འདི་སྐད་ཅེས་སྨྲས་སོ། །ཁྱོད་འདི་སྐད་དུ་སྨྲ་བ་འདི་ཡི་གེ་འབྲུ་བརྒྱད་པོའི་ཕྱིར་ལུས་ཡོངས་སུ་གཏང་ངོ་། །ཞེས་སྨྲ་བ་འདི་སུ་དག་གིས་ཡིད་ཆེས་པར་འགྱུར། རིགས་ཀྱི་བུ་ངས་དེའི་ཚེ་ན་དེ་ལ་ཡང་འདི་སྐད་ཅེས་སྨྲས་སོ། །ཁྱོད་ནི་ཡང་དག་པར་ཤེས་པ་མེད་པ་སྟེ། དཔེར་ན་མི་ཞིག་ཁམ་ཕོར་ཐོགས་ཏེ། རིན་པོ་ཆེ་སྣ་བདུན་གྱི་སྣོད་དང་བརྗེས་པ་དང་འདྲ་བར་བདག་ཀྱང་སྙིང་པོ་མེད་པའི་ལུས་འདིས་རྡོ་རྗེ་ལྟ་བུའི་ལུས་ཐོབ་པར་འགྱུར་ན། འདི་སྐད་ཅེས་སྨྲས་པ་འདི་ལ་སུས་ཡིད་ཆེས་པར་འགྱུར་ཞེས་བྱ་བ་ནི་ཁོ་བོའི་དཔང་དུ་ཚངས་པ་ཆེན་པོའི་རྒྱལ་པོ་དང་། བརྒྱ་བྱིན་ལྷའི་དབང་ཕྱུག་དང་། རྒྱལ་ཆེན་བཞིའི་རྒྱལ་པོ་ལ་སོགས་པ་དཔང་དུ་ཡོད་དོ། །དེ་མ་ཡིན་པ་གཞན་ཡང་བྱང་ཆུབ་སེམས་དཔའ་འཕྲུལ་གྱི་མིག་ཅན་སེམས་ཅན་ཚད་མེད་ལ་ཕན་པ་དང་། བདེ་བའི་དོན་གྱི་ཕྱིར་ཐེག་པ་ཆེན་པོ་ལ་ནན་ཏན་བྱེད་ཅིང་ཕ་རོལ་ཏུ་ཕྱིན་པ་དྲུག་དང་ལྡན་པ་ཡང་དཔང་དུ་འགྱུར་རོ། །དེ་མ་ཡིན་པ་གཞན་ཡང་ཕྱོགས་བཅུའི་འཇིག་རྟེན་གྱི་ཁམས་ན་ད་ལྟར་བཞུགས་པའི་སངས་རྒྱས་བཅོམ་ལྡན་འདས་ད་ལྟར་སེམས་ཅན་གྱི་དོན་དུ་འཚོ་ཞིང་སྐྱོང་བ་རྣམས་ཀྱང་བདག་གི་དཔང་དུ་འགྱུར་ཏེ། བདག་ནི་ཡི་གེ་འབྲུ་བརྒྱད་པོའི་ཕྱིར་ལུས་འདི་ཡོངས་སུ་གཏོང་ངོ་། །སྲིན་པོས་ཡང་སྨྲས་པ། ཅི་སྟེ་ཁྱོད་དེ་ལྟར་ལུས་ཡང་དག་པར་གཏོང་ཕོད་ན་ཤིན་ཏུ་ལེགས་པར་ཉོན་ཅིག །ཚིགས་སུ་བཅད་པ་འདི་ཡང་བསྟན་པར་བྱའོ། །རིགས་ཀྱི་བུ་ངས་དེའི་ཚེ་དེ་སྐད་ཅེས་ཐོས་ནས་སེམས་རབ་ཏུ་དགའ་བ་སྐྱེས་
ཏེ། ལུས་ལ་གྱོན་པའི་ཤ་ལྤགས་ཀྱི་གོས་ཕུད་ནས་སྲིན་པོའི་སྟན་དུ་བཏིང་སྟེ། སློབ་དཔོན་གདན་ལ་བཞུགས་སུ་གསོལ་ཞེས་སྨྲས་ནས། ཐལ་མོ་སྦྱར་ཏེ་པུས་མོ་ས་ལ་བཙུགས་ནས་འདི་སྐད་ཅེས་སྨྲས་སོ། །སློབ་དཔོན་བདག་ལ་ཚིགས་སུ་བཅད་པ་ཕྱེད་པོ་འདི་བསྟན་དུ་གསོལ་ཞེས་སྨྲས་ནས། དེ་ནས་སྲིན་པོས་ཚིགས་སུ་བཅད་པ་ཕྱེད་སྨྲས་སོ། །སྐྱེས་ནས་འགོག་པར་འགྱུར་བས་ན། །དེ་དག་ཉེ་བར་ཞི་བ་བདེ། །དེའི་ཚེ་སྲིན་པོ་དེས་ཚིགས་སུ་བཅད་པ་དེ་སྨྲས་ནས་ཡང་འདི་སྐད་ཅེས་ཟེར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཁྱོད་ཚིགས་སུ་བཅད་པའི་དོན་རྫོགས་པ་ཐོས་ན། ད་ཁྱོད་ཀྱི་སྨོན་ལམ་ཡོངས་སུ་རྫོགས་མོད་ཀྱི། ཅི་སྟེ་ཁྱོད་ངེས་པར་སེམས་ཅན་ལ་ཕན་པ་དང་བདེ་བའི་དོན་སྤྱོད་པ་ལ་ཡང་དག་པ་ཡིན་ཞེ་ན། ད་ང་ལ་ལུས་སྦྱིན་པའི་དུས་ལ་བབ་བོ་ཞེས་སྨྲས་སོ། །རིགས་ཀྱི་བུ་ང་དེའི་ཚེ་དེའི་དུས་ན་དོན་འདི་ཤིན་ཏུ་ཡིད་ལ་བྱས་ནས། དེའི་འོག་ཏུ་བྲག་དང་། རྩིག་ངོས་དང་། ཤིང་དང་། ལམ་ཀ་ཀུན་ཏུ་ཚིགས་སུ་བཅད་པ་འདི་བྲིས་ནས། ལུས་ཀྱི་ཤ་མི་སྣང་བར་བྱ་བའི་ཕྱིར་ལུས་ལ་གྱོན་པའི་གོས་བསྡམས་ནས་ཤིང་ཁར་འཛེགས་སོ། །དེའི་ཚེ་ཤིང་དེའི་ལྷས་ང་ལ་འདི་སྐད་ཅེས་དྲིས་སོ། །ལེགས་སོ། །ལེགས་སོ། །སྐྱེས་བུ་ཆེན་པོ་ཁྱོད་ད་ལྟར་ཅི་ཞིག་བྱེད་སྙམ་དུ་སེམས། རིགས་ཀྱི་བུ་ངས་དེའི་ཚེ་ན་དེ་ལ་འདི་སྐད་ཅེས་སྨྲས་སོ། །ཁོ་བོ་ནི་ལུས་འདི་ཡོངས་སུ་བཏང་སྟེ་ཚིགས་སུ་བཅད་པ་ཐོས་པའི་དྲིན་བསབ་སྙམ་སེམས་སོ། །ཤིང་གི་ལྷ་དེས་སྨྲས་པ། ཚིགས་སུ་བཅད་པ་དེ་ཐོས་ན་ཕན་པའི་དོན་ཅི་ཞིག་ཡོད་ཅེས་སྨྲས་སོ། །བྱང་ཆུབ་སེམས་དཔའ་དེས་སྨྲས་པ། ཚིགས་སུ་བཅད་པ་འདི་ནི་འདས་པ་དང་། མ་འོངས་པ་དང་། ད་ལྟར་བཞུགས་པའི་སངས་རྒྱས་བཅོམ་ལྡན་འདས་རྣམས་ཀྱི་སྟོང་པ་ཉིད་འབྱེད་པའི་ཆོས་ཡིན་ཏེ། ང་ནི་ཆོས་འདིའི་ཕྱིར་ལུས་ཡོངས་སུ་གཏོང་ངོ་། །རྙེད་པ་དང་། གྲགས་པ་དང་། ལོངས་སྤྱོད་དང་། རིན་པོ་ཆེ་དང་། འཁོར་ལོས་སྒྱུར་བའི་རྒྱལ་པོ་དང་། རྒྱལ་ཆེན་རིས་བཞིའི་རྒྱལ་པོ་དང་། བརྒྱ་བྱིན་ལྷའི་དབང་ཕྱུག་དང་། ཚངས་པ་ཆེན་པོའི་རྒྱལ་པོ་དང་། ལྷ་དང་མིའི་བདེ་བ་འདོད་པའི་ཕྱིར་མ་ཡིན་གྱི།
སེམས་ཅན་ཐམས་ཅད་ལ་ཕན་པ་དང་། བདེ་བའི་དོན་གྱི་ཕྱིར་ལུས་འདི་ཡོངས་སུ་གཏོང་ངོ་། །རིགས་ཀྱི་བུ་ངའི་ལུས་འདི་ཡོངས་སུ་གཏོང་བའི་ཚེ་ཡང་འདི་སྐད་ཅེས་སྨྲས་སོ། །ཇི་ཙམ་དུ་སེར་སྣ་ལ་གནས་པའི་སེམས་ཅན་དག་བདག་གིས་ལུས་ཡོངས་སུ་བཏང་བ་འདི་མཐོང་ན་སྦྱིན་པ་ལ་གནས་པར་འགྱུར་བ་དང་། གང་སྦྱིན་པ་ལ་ཞེན་པ་ང་རྒྱལ་གྱིས་མངོན་པར་ཟིན་པ་དག་ཀྱང་བདག་གིས་འདི་ལྟར་ལུས་ཡོངས་སུ་བཏང་བ་འདི་མཐོང་བར་ཤོག་ཤིག་ཅེས་སྨོན་ལམ་བཏབ་ནས། ལུས་འདི་མཆིལ་མའམ། ས་རྡོ་ལྟར་ཡོངས་སུ་གཏོང་ངོ་། །བྱང་ཆུབ་སེམས་དཔས་དེའི་ཚེ་ན་དེ་སྐད་ཅེས་སྨྲས་མ་ཐག་ཏུ་ཤིང་ཁ་ནས་མཆོངས་སོ། །དེའི་ཚེ་དེའི་དུས་ན་སྟེང་གི་བར་སྣང་ལས་སྒྲ་སྐད་རྣམ་པ་སྣ་ཚོགས་བྱུང་ནས་སྲིད་པའི་རྩེ་མོ་ལ་ཐུག་གི་བར་དུ་གྲགས་པར་གྱུར་ཏོ། །དེའི་ཚེ་དེའི་དུས་ན་སྲིན་པོ་དེའི་ཕྱིར་བརྒྱ་བྱིན་གྱི་ལུས་སུ་བསྒྱུར་ནས་བྱང་ཆུབ་སེམས་དཔའ་ས་ལ་མ་ལྟུང་བར་བླངས་ཏེ་བདེ་བར་བཞག་གོ །དེའི་ཚེ་བརྒྱ་བྱིན་ལྷའི་དབང་ཕྱུག་དང་། ལྷའི་སྲས་པོ་དང་། ཚངས་པ་ཆེན་པོའི་རྒྱལ་པོར་བཅས་ཏེ། བྱང་ཆུབ་སེམས་དཔའི་རྐང་པ་ལ་སྤྱི་བོས་ཕྱག་འཚལ་ནས་འདི་སྐད་ཅེས་སྨྲས་སོ། །ལེགས་སོ་ལེགས་སོ། །བྱང་ཆུབ་སེམས་དཔའ་ཡང་དག་པ་སྟེ། སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་དུ་འགྱུར་བ། མ་རིག་པའི་མུན་པ་ཆེན་པོར་ཆོས་ཆེན་པོའི་སྒྲོན་མ་སྣང་བར་བྱེད་པ། བདག་ནི་དེ་བཞིན་གཤེགས་པའི་ཆོས་ཆེན་པོ་བསྲུང་ཞིང་བསྐྱབ་པའི་ཕྱིར་ཁྱོད་ཀྱི་སེམས་འཁྲུགས་ཤིང་གནོད་པ་བྱས་པ་དག་འགྱོད་ཅིང་མཐོལ་ལོ། །ཁྱོད་ནི་མ་འོངས་པའི་དུས་སུ་ངེས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བ་ན། བདག་ཅག་ཀྱང་བསྒྲལ་བར་སྨོན་ཏོ། །དེའི་ཚེ་བརྒྱ་བྱིན་ལྷའི་དབང་ཕྱུག་དང་། ལྷའི་སྲས་པོ་རྣམས་བྱང་ཆུབ་སེམས་དཔའ་ལ་ཕྱག་འཚལ་ནས་མི་སྣང་བར་གྱུར་ཏོ། །རིགས་ཀྱི་བུ་ང་སྔོན་ཚིགས་སུ་བཅད་པ་ཕྱེད་ཀྱི་ཕྱིར་ཡང་ལུས་ཡོངས་སུ་བཏང་སྟེ། དེའི་རྒྱུ་དེའི་རྐྱེན་གྱིས་བསྐལ་པ་བཅུ་གཉིས་ཀྱིས་བྱམས་པ་བས་སྔོན་དུ་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་སོ། །རིགས་ཀྱི་བུ་ངས་དེ་ལྟར་ཚད་མེད་པའི་ཡོན་ཏན་ཐོབ་པ་ཡང་དེ་བཞིན་གཤེགས་པའི་ཡང་དག་པའི་ཆོས་ལ་མཆོད་པའི་དབང་གིས་སོ། །རིགས་ཀྱི་བུ་ཁྱོད་ཀྱང་དེ་དང་འདྲ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པས་བྱང་ཆུབ་སེམས་དཔའ་ཚད་མེད་མཐའ་ཡས་པ་ཀླུང་གང་གཱའི་བྱེ་མ་སྙེད་པས་ཤིན་ཏུ་འཕགས་ཏེ་ཕུལ་དུ་གྱུར་ཏོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པ་ལ་གནས་པ་ན་འཕགས་པའི་སྤྱད་པ་སྤྱོད་པ་ཞེས་བྱའོ། །འཕགས་པ་ཡོངས་སུ་མྱ་ངན་ལས་འདས་པ་ཐེག་པ་ཆེན་པོའི་མདོ་ལས། འཕགས་པའི་སྤྱོད་པ་ཞེས་བྱ་བའི་ལེའུ་སྟེ་དྲུག་གོ།། །།