བཅོ་ལྔ་པ། སྐུ་མྱ་ངན་ལས་འདས་ཤིང་ཞུགས་ལ་བཞེན་པའི་ལེའུ།
བཅོམ་ལྡན་འདས་ཀྱིས་ཡང་འཁོར་མང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །ང་ནི་ད་དུས་ལ་བབ་སྟེ། སྐུ་ཀུན་དུ་གཙེ་ཞིང་ནའོ་ཞེས་བཀའ་སྩལ་ནས་བསམ་གཏན་དང་པོ་ལ་འཇུག་ཅིང་མྱ་ངན་ལས་འདའ་བའི་འོད་ཀྱིས་འཇིག་རྟེན་གྱི་ཁམས་ཀུན་བརྟགས་ཏེ་ཞི་ཞིང་འགོག་པའི་ཏིང་ངེ་འཛིན་ལ་འཇུག་གོ །དེའི་ཚེ་བཅོམ་ལྡན་འདས་དེ་སྐད་གསུངས་མ་ཐག་ཏུ་བསམ་གཏན་དང་པོ་ལ་ཞུགས་སོ། །བསམ་གཏན་དང་པོ་ལས་བྱུང་ནས་བསམ་གཏན་གཉིས་པ་ལ་ཞུགས་སོ། །བསམ་གཏན་གཉིས་པ་ལས་བྱུང་ནས་བསམ་གཏན་གསུམ་པ་ལ་ཞུགས་སོ། །བསམ་གཏན་གསུམ་པ་ལས་བྱུང་ནས་བསམ་གཏན་བཞི་པ་ལ་ཞུགས་སོ། །བསམ་གཏན་བཞི་པ་ལས་བྱུང་ནས་ནམ་མཁའ་མཐའ་ཡས་སྐྱེ་མཆེད་སྟེངས་ལ་ཞུགས་སོ། །ནམ་མཁའ་མཐའ་ཡས་སྐྱེ་མཆེད་སྟེངས་ལས་བྱུང་ནས་རྣམ་ཤེས་མཐའ་ཡས་སྐྱེ་མཆེད་སྟེངས་ལ་ཞུགས་སོ། །རྣམ་ཤེས་མཐའ་ཡས་སྐྱེ་མཆེད་སྟེངས་ལས་བྱུང་ནས་ཅུང་ཟད་མེད་མིན་སྐྱེ་མཆེད་སྟེངས་ལ་ཞུགས་སོ། །ཅུང་ཟད་མེད་མིན་སྐྱེ་མཆེད་སྟེངས་ལས་བྱུང་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ལ་ཞུགས་སོ། །འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ལས་བྱུང་ནས་འགོག་
པ་ཟད་པའི་ཏིང་ངེ་འཛིན་ལ་ཞུགས་སོ། །འགོག་པ་ཟད་པའི་ཏིང་ངེ་འཛིན་ལས་བྱུང་ནས་ཕྱིར་ཡང་འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ལ་ཞུགས་སོ། །འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ལས་བྱུང་ནས་ཕྱིར་ཡང་ཅུང་ཟད་མེད་མིན་སྐྱེ་མཆེད་སྟེངས་ལ་ཞུགས་སོ། །ཅུང་ཟད་མེད་མིན་སྐྱེ་མཆེད་སྟེངས་ལས་བྱུང་ནས་རྣམ་ཤེས་མཐའ་ཡས་སྐྱེ་མཆེད་སྟེངས་ལ་ཞུགས་པའོ། །རྣམ་ཤེས་མཐའ་ཡས་སྐྱེ་མཆེད་སྟེངས་ལས་བྱུང་ནས་ནམ་མཁའ་མཐའ་ཡས་སྐྱེ་མཆེད་སྟེངས་ལ་ཞུགས་པའོ། །ནམ་མཁའ་མཐའ་ཡས་སྐྱེ་མཆེད་སྟེངས་ལས་བྱུང་ནས་བསམ་གཏན་བཞི་པ་ལ་ཞུགས་སོ། །བསམ་གཏན་བཞི་ལས་བྱུང་ནས་བསམ་གཏན་གསུམ་པ་ལ་ཞུགས་སོ། །བསམ་གཏན་གསུམ་པ་ལས་བྱུང་ནས་བསམ་གཏན་གཉིས་པ་ལ་ཞུགས་སོ། །བསམ་གཏན་གཉིས་པ་ལས་བྱུང་ནས་བསམ་གཏན་དང་པོ་ལ་ཞུགས་སོ། །དེའི་ཚེ་བཅོམ་ལྡན་འདས་དེ་ལྟར་ཡན་མན་དུ་བསམ་གཏན་དུ་ཞུགས་ནས་འཁོར་མང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །ངས་ཤིན་ཏུ་ཟབ་པའི་ཤེས་རབ་ཀྱིས་ཁམས་གསུམ་གྱི་རྒྱུད་དྲུག་གི་སེམས་ཅན་ཐམས་ཅད་དང་། རི་དང་། རྒྱ་མཚོ་དང་། ས་ཆེན་པོ་ལ་གནས་པའི་སྲོག་ཆགས་ཐམས་ཅད་ལ་བརྟགས་ན་ཁམས་གསུམ་འདི་དག་ནི་རང་བཞིན་དང་བྲལ་བ། རབ་ཏུ་ཞི་བ། ནམ་མཁའི་མཚན་ཉིད་དང་འདྲ་བས་གདགས་སུ་མེད་པ། རྣམ་པར་ཤེས་པ་མེད་པ། སྲིད་པ་ཐམས་ཅད་ཡོངས་སུ་བཅད་པ། ཐོག་མ་ནས་མཉམ་པ། མཐོ་དམན་གྱི་འདུ་ཤེས་མེད་པ། མཐོང་བ་མེད་པ། ཐོས་པ་མེད་པ། ཚོར་བ་མེད་པ། ཤེས་པ་མེད་པ། བཅིངས་པ་མེད་པ། རྣམ་པར་གྲོལ་བ་མེད་པ། སེམས་ཅན་མེད་པ། སྲོག་མེད་པ། མ་སྐྱེས་པ། མ་བྱུང་བ། མི་ཟད་པ། མི་འགོག་པ། འཇིག་རྟེན་མ་ཡིན། འཇིག་རྟེན་མ་ཡིན་པ་ཡང་མ་ཡིན་པ། མྱ་ངན་ལས་འདའ་བ་དང་འཁོར་བ་དམིགས་སུ་མེད་པ། གཉིས་ཀའི་མཐའ་མཉམ་པ་ནི་ཆོས་ཐམས་ཅད་མཉམ་པའི་ཕྱིར་རོ། །བས་མཐར་གནས་པ། ཅི་ཡང་མི་བྱེད་པ། མཐར་རྣམ་པར་གཞག་པ།
ངེས་པར་དམིགས་སུ་མེད་པ། མི་གནས་པའི་ཆོས་ལས་ཆོས་ཀྱི་མཚན་ཉིད་ཀྱི་བྱ་བ་བྱེད་པ། མཚན་མ་ཐམས་ཅད་ཡོངས་སུ་བཅད་ནས་ཅི་ཡང་མེད་པ་སྟེ། ཆོས་ཀྱི་མཚན་ཉིད་ནི་དེ་དག་ཡིན་ནོ། །གང་གིས་དེ་ལྟར་ཤེས་ན་འཇིག་རྟེན་ལས་འདའ་བ་ཞེས་བྱའོ། །གང་གིས་དེ་ལྟར་མི་ཤེས་པ་དེ་ནི་འཁོར་བའི་ཐོག་མའི་མཐའ་ཞེས་བྱའོ། །དེ་བས་ན་ཁྱེད་ལ་སོགས་པ་མ་རིག་པ་ཡོངས་སུ་བཅད་དེ། འཁོར་བའི་ཐོག་མའི་མཐའ་དགག་གོ །དེའི་ཚེ་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཡང་འཕར་བའི་བསམ་གཏན་ལ་ཞུགས་སོ། །བསམ་གཏན་དང་པོ་ལས་བྱུང་ནས་བསམ་གཏན་གསུམ་པ་ལ་ཞུགས་སོ། །བསམ་གཏན་གསུམ་པ་ལས་བྱུང་ནས་ནམ་མཁའ་མཐའ་ཡས་སྐྱེ་མཆེད་སྟེངས་ལ་ཞུགས་སོ། །ནམ་མཁའ་མཐའ་ཡས་སྐྱེ་མཆེད་སྟེངས་ལས་བྱུང་ནས་ཅུང་ཟད་མེད་མིན་སྐྱེ་མཆེད་སྟེངས་ལ་ཞུགས་སོ། །ཅུང་ཟད་མེད་མིན་སྐྱེ་མཆེད་སྟེངས་ལས་བྱུང་ནས་འགོག་པ་ཟད་པའི་འདུ་ཤེས་ཀྱི་ཏིང་ངེ་འཛིན་ལ་ཞུགས་སོ། །འགོག་པ་ཟད་པའི་ཏིང་ངེ་འཛིན་ལས་བྱུང་ནས་ཕྱིར་ཡང་འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ལ་ཞུགས་སོ། །འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ལས་བྱུང་ནས་རྣམ་ཤེས་མཐའ་ཡས་སྐྱེ་མཆེད་སྟེངས་ལ་ཞུགས་སོ། །རྣམ་ཤེས་མཐའ་ཡས་སྐྱེ་མཆེད་སྟེངས་ལས་བྱུང་ནས་བསམ་གཏན་བཞི་པ་ལ་ཞུགས་སོ། །བསམ་གཏན་བཞི་པ་ལས་བྱུང་ནས་བསམ་གཏན་གསུམ་པ་ལ་ཞུགས་སོ། །བསམ་གཏན་གསུམ་པ་ལས་བྱུང་ནས་བསམ་གཏན་གཉིས་པ་ལ་ཞུགས་སོ། །བསམ་གཏན་གཉིས་པ་ལས་བྱུང་ནས་བསམ་གཏན་དང་པོ་ལ་ཞུགས་སོ། །དེ་ལྟར་ན་ཡན་མན་དུ་འཕར་བའི་བསམ་གཏན་ལ་ཞུགས་ནས་ཡང་འཁོར་མང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །ངས་ཤེས་རབ་ཆེན་པོས་ཁམས་གསུམ་ན་གནས་པ་ཇི་ཙམ་སྲོག་ཡོད་པ་དང་། སྲོག་མེད་པ་དང་། གང་ཟག་དང་ཆོས་ཐམས་ཅད་ལ་བརྟགས་ན་ཐམས་ཅད་མཐར་ཕྱིན་པ་སྟེ། རྣམ་པར་བཅིངས་པ་མེད་པ། རྣམ་པར་གྲོལ་བ་མེད་པ། བདག་པོ་མེད་པ། གནས་མེད་པ། གཟུང་
དུ་མེད་པ། ཁམས་གསུམ་ལས་འདས་པ་ཡང་མ་ཡིན། སྲིད་པ་ཀུན་དུ་འཇུག་པ་ཡང་མ་ཡིན་ཏེ། ཐོག་མ་ནས་རྣམ་པར་དག་པ། དྲི་མ་མེད་པ། ཉོན་མོངས་པ་མེད་པ། ནམ་མཁའ་དང་མཉམ་པ། མཉམ་པ་མེད་པ། མི་མཉམ་པ་ཡང་མ་ཡིན་པ། རྟོག་པ་དང་རྣམ་པར་རྟོག་པ་ཟད་པ། རྟོག་པ་ཐམས་ཅད་ཞི་བ་སྟེ། དེ་ལྟར་ཆོས་ཀྱི་མཚན་ཉིད་དེ་ནི་མྱ་ངན་ལས་འདས་པ་ཆེན་པོ་ཞེས་བྱ་སྟེ། ཆོས་འདི་ལ་ཡང་དག་པ་ཇི་ལྟ་བ་བཞིན་དུ་མཐོང་ན་རྣམ་པར་གྲོལ་བ་ཞེས་བྱ་སྟེ། བུས་པ་མ་རབས་ཀྱིས་མི་མཐོང་བས་ན་མ་རིག་པ་ཞེས་བྱའོ། །དེ་སྐད་ཅེས་བཀའ་སྩལ་ནས་ཕྱིར་ཡང་འཕར་བའི་བསམ་གཏན་ལ་ཞུགས་ཏེ། བསམ་གཏན་དང་པོ་ལས་བྱུང་ནས་འགོག་པ་ཟད་པའི་ཏིང་ངེ་འཛིན་གྱི་བར་དང་། འགོག་པ་ཟད་པའི་ཏིང་ངེ་འཛིན་ལས་བྱུང་བ་ནས་བསམ་གཏན་དང་པོ་ལ་འཇུག་པའི་བར་དུ་དེ་བཞིན་དུ་ཡན་མན་འཕར་བའི་བསམ་གཏན་ལ་ཞུགས་ནས། ཡང་འཁོར་མང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །ངས་སངས་རྒྱས་ཀྱི་སྤྱན་གྱིས་ཁམས་གསུམ་གྱི་ཆོས་ཐམས་ཅད་ལ་བརྟགས་ན། མ་རིག་པའི་ཐོག་མའི་མཐའ་ནི་རང་བཞིན་གྱིས་རྣམ་པར་གྲོལ་བ་སྟེ། ཕྱོགས་བཅུར་བཙལ་ཀྱང་དམིགས་སུ་མེད་པ་ནི་རང་བཞིན་མེད་པའི་ཕྱིར་རོ། །དེའི་རྒྱུར་འགྱུར་བ་ཡལ་ག་དང་ལོ་མ་ཡང་རྣམ་པར་གྲོལ་བ་སྟེ། མ་རིག་པ་རྣམ་པར་གྲོལ་བས་རྒ་ཤིའི་བར་དུ་ཡང་རྣམ་པར་གྲོལ་ལོ། །དེ་བས་ན་ང་ནི་རྟག་ཏུ་རབ་ཏུ་ཞི་བའི་སྣང་བ་ལ་གནས་པས་མྱ་ངན་ལས་འདས་པ་ཆེན་པོ་ཞེས་བྱའོ། །དེའི་ཚེ་དགའ་བོ་མྱ་ངན་གྱིས་ཤིན་ཏུ་ཡིད་གདུངས་ཏེ་མྱོས་འཁྲུགས་ནས་མི་དྲན་པ་ནི་ཇི་ལྟར་ཆང་གིས་མྱོས་པ་དང་འདྲ་སྟེ། འཁོར་རྣམ་བཞི་ཡང་མི་མཐོང་མི་ཤེས་ལ། དེ་བཞིན་གཤེགས་པ་མྱ་ངན་ལས་འདས་སམ་མྱ་ངན་ལས་མ་འདས་པ་མི་ཤེས་མི་རྟོགས་སོ། །དེའི་ཚེ་བཅོམ་ལྡན་འདས་དེ་ལྟར་ལན་གསུམ་གྱི་བར་དུ་འཕར་བའི་བསམ་གཏན་ལ་ཞུགས་ཏེ་ཆོས་ཀྱི་དབྱིངས་ལ་ཐུག་གི་བར་དུ་བརྟགས་ནས་འཁོར་མང་པོ་རྣམས་ལ་ལན་གསུམ་དུ་ཆོས་བསྟན་ཏོ། །དེ་བཞིན་གཤེགས་པས་དེ་བཞིན་
དུ་ཡང་དང་ཡང་ལན་ཉི་ཤུ་རྩ་བདུན་གྱི་བར་དུ་བསམ་གཏན་དུ་ཞུགས་སོ། །དགའ་བོས་མི་ཤེས་པས་སངས་རྒྱས་ལན་གཅིག་བསམ་གཏན་དུ་འཇུག་པ་ན་ལན་གཅིག་དྲིས་ཏེ། དེ་བཞིན་དུ་ལན་ཉི་ཤུ་རྩ་བདུན་གྱི་བར་དུ་སངས་རྒྱས་མྱ་ངན་ལས་འདས་སམ། མྱ་ངན་ལས་མ་འདས་ཞེས། མ་འགགས་པ་ལ་དྲིས་སོ། །དེ་བཞིན་དུ་མ་འགགས་པས་ཀྱང་དེ་བཞིན་གཤེགས་པ་བསམ་གཏན་དུ་ཞུགས་ཏེ། མྱ་ངན་ལས་མ་འདས་སོ་ཞེས་ལན་ཉི་ཤུ་རྩ་བདུན་གྱི་བར་དུ་སྨྲས་སོ། །དེའི་ཚེ་འཁོར་དེ་དག་ཐམས་ཅད་འཁྲུག་ཅིང་མྱོས་པས། དེ་བཞིན་གཤེགས་པ་མྱ་ངན་ལས་འདས་སམ་མྱ་ངན་ལས་མ་འདས་མི་ཤེས་མི་རྟོགས་སོ། །དེའི་ཚེ་བཅོམ་ལྡན་འདས་ལན་གསུམ་གྱི་བར་དུ་བསམ་གཏན་དུ་ཞུགས་ནས་ལན་གསུམ་གྱི་བར་དུ་འཁོར་རྣམས་ལ་ཆོས་བསྟན་ཏེ། རིན་པོ་ཆེ་སྣ་བདུན་གྱི་ཁྲི་ལ་གློ་གཡས་པ་ཕབ་ནས་གཟིམས་ཏེ། དབུ་ནི་བྱང་ཕྱོགས་སུ་བསྟན། ཞབས་ནི་ལྷོ་ཕྱོགས་སུ་བསྟན། ཞལ་ནི་ནུབ་ཕྱོགས་སུ་གཟིགས་ཏེ། རྒྱབ་ནི་ཤར་ཕྱོགས་སུ་བསྟན་ནས་གཟིམས་སོ། །རིན་པོ་ཆེ་སྣ་བདུན་གྱི་ཁྲི་ཡང་ཕྲེང་བ་རྣམ་པ་སྣ་ཚོགས་ཀྱིས་ཡོངས་སུ་བརྒྱན་ཏོ། །སཱ་ལའི་ཤིང་ཟུང་བཞི་ཡ་བརྒྱད་ཡོད་དེ། ནུབ་ཕྱོགས་ཀྱི་ཟུང་གཅིག་ནི་དེ་བཞིན་གཤེགས་པའི་མདུན། ཤར་ཕྱོགས་ཀྱི་ཟུང་གཅིག་ནི་དེ་བཞིན་གཤེགས་པའི་རྒྱབ། བྱང་ཕྱོགས་ཀྱི་ཟུང་གཅིག་ནི་དེ་བཞིན་གཤེགས་པའི་དབུ་རོལ། ལྷོ་ཕྱོགས་ཀྱི་ཟུང་གཅིག་ནི་དེ་བཞིན་གཤེགས་པའི་ཞབས་རོལ་ལོ། །དེའི་ཚེ་བཅོམ་ལྡན་འདས་ཤིང་སཱ་ལའི་དྲུང་ན་རིན་པོ་ཆེའི་ཁྲི་ལ་གཟིམས་ནས་བསམ་གཏན་བཞི་པ་ལ་ཞུགས་ཏེ། ཅང་མི་གསུང་ཞིང་ནམ་གྱི་གུང་ལ་ཡོངས་སུ་མྱ་ངན་ལས་འདས་སོ། །སངས་རྒྱས་བཅོམ་ལྡན་འདས་མྱ་ངན་ལས་འདས་ནས་སཱ་ལའི་ཤིང་ཤར་དང་ནུབ་ཀྱི་ཟུང་གཉིས་ཀྱང་ཤིང་གཅིག་ཏུ་གྱུར། ལྷོ་དང་བྱང་གི་ཟུང་གཉིས་ཀྱང་ཤིང་གཅིག་ཏུ་གྱུར་ཏེ། རིན་པོ་ཆེའི་ཁྲི་ལ་གདུགས་ལྟ་བུར་གྱུར་ནས། དེའི་ཚེ་ཤིང་དེ་ཉིད་ཀྱང་ངང་པའི་གཤོག་པ་ལྟར་སྐྱ་བོར་གྱུར་ཏེ། ཡལ་ག་དང་། ལོ་མ་དང་།
མེ་ཏོག་དང་། འབྲས་བུ་ཡང་ལྷགས། ཤུན་པ་ཡང་གོགས། ཤིང་ཉིད་ཀྱང་གས་ནས་མཐར་གྱིས་སྐམས་ཏེ་ལྷག་མ་མ་ལུས་པར་ཆག་གོ །དེའི་ཚེ་ཕྱོགས་བཅུའི་འཇིག་རྟེན་གྱི་ཁམས་གྲངས་མེད་པ་བྱེ་བ་ཁྲག་ཁྲིག་ཀླུང་གང་གཱའི་བྱེ་མ་སྙེད་ཀྱི་ས་ཆེན་པོ་ཤིན་ཏུ་གཡོས་ནས་སྐད་ཆེན་པོ་རྣམ་པ་སྣ་ཚོགས་བྱུང་བ་ལས། ཀྱི་ཧུད་ཀྱི་ཧུད་འཇིག་རྟེན་སྟོངས་སོ་ཞེས་མི་རྟག་པ་དང་། སྡུག་བསྔལ་བ་དང་། སྨྲེ་སྔགས་འདོན་པའི་སྒྲ་བྱུང་ངོ་། །དེའི་ཚེ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རི་བཏང་བཟུང་དང་། རི་བཏང་བཟུང་ཆེན་པོ་དང་། རི་ཁོ་ར་ཁོར་ཡུག་དང་། རི་ཁོ་ར་ཁོར་ཡུག་ཆེན་པོ་དང་། རི་རབ་ལྷུན་པོ་དང་། རི་བསུང་ཅན་དང་། རིན་པོ་ཆེའི་རི་དང་། རྡོ་རྗེའི་རི་དང་། རི་ནག་པོ་དང་། ས་ཆེན་པོ་ལ་གནས་པའི་རི་ཐམས་ཅད་དུས་གཅིག་ཏུ་སྒྲ་བྱུང་ནས་ཐམས་ཅད་རྡིབ་སྟེ། སྐད་ཆེན་པོ་འཇིག་རྟེན་གྱི་ཁམས་སུ་གྲགས་པ་ལས་ཀྱི་ཧུད་ཀྱི་ཧུད་ནང་གཅིག་ཏུ་འཇིག་རྟེན་ལ་མགོན་མེད་པར་གྱུར་ཏེ། ཤེས་རབ་ཀྱི་ཉི་མ་ནུབ་ནས་མྱ་ངན་ལས་འདས་པ་ཆེན་པོའི་རི་འགྱེལ་ཏོ། །སེམས་ཅན་ཐམས་ཅད་ཀྱི་བྱམས་པའི་ཡབ་ཡང་དག་པར་འདས་ཏེ། མཆོད་པ་བྱ་བའི་ལྷ་ཡང་མི་མཐོང་བར་གྱུར་ཏོ་ཞེས་གྲགས་སོ། །དེའི་ཚེ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྒྱ་མཚོ་ཆེན་པོ་ཡང་འཁྲུག་ཅིང་ཁོལ་ཏེ་རྙོག་པར་གྱུར་ནས་དབའ་རླབས་དྲག་པོ་ལས་སྐད་རྣམ་པ་སྣ་ཚོགས་གྲགས་པ་ནི་ཀྱི་ཧུད་ཀྱི་ཧུད་ཡང་དག་པར་རྫོགས་པའི་སངས་རྒྱས་འདས་ནས་སེམས་ཅན་གྱི་ཁ་ན་མ་ཐོ་བའི་སྡིག་པ་དང་སྡུག་བསྔལ་ནི་སྲིད་པའི་གང་ཆེན་མཚོར་འཁོར་ཞིང་འབབ་པར་གྱུར་ཏེ། ཡང་དག་པའི་ལམ་སྟོར་ན། ནམ་ཞིག་རྣམ་པར་གྲོལ་བར་འགྱུར་ཞེས་གྲགས་པར་གྱུར་ཏོ། །དེའི་ཚེ་གཙང་པོ་དང་། ཆུ་བོ་དང་། འབབ་ཆུ་དང་། ལུང་པ་དང་། ལུང་ཕྲན་གྱི་ཆུ་དང་། ཆུ་མིག་དང་། རྫིང་བུ་དང་། ལྟེང་ཀ་དང་། ཁྲོན་པ་ཐམས་ཅད་ཀྱང་འབོ་ཞིང་ཆུ་སྐམས་པར་གྱུར་ཏོ། །དེའི་ཚེ་ཕྱོགས་བཅུའི་འཇིག་རྟེན་གྱི་ཁམས་ཀྱི་ས་ཆེན་པོ་དང་། ནམ་མཁའི་ཁམས་ཀྱང་མུན་པ་ཆེན་པོར་གྱུར་ཏེ། ཉི་ཟླའི་འོད་ཀྱང་མི་སྣང་ཞིང་འཇིག་རྟེན་གྱི་ཁམས་ཐམས་ཅད་མུན་པར་གྱུར་ཏོ། །དེ་མ་ཐག་ཏུ་རླུང་ནག་པོ་གཡོས་ནས་སྐད་ཆེན་པོ་ཕྱུང་སྟེ། རྡུལ་དང་བྱེ་མས་འཚུབས་
པར་གྱུར་ཏོ། །དེའི་ཚེ་ས་ཆེན་པོ་ལས་སྐྱེས་པའི་ཤིང་གེལ་པ་དང་། ནགས་ཚལ་དང་། རྩི་ཤིང་ལ་སོགས་པའི་མེ་ཏོག་དང་། འབྲས་བུ་དང་། ལོ་མ་དང་། ཡལ་ག་ཐམས་ཅད་ཀྱང་ཆག་ནས་ས་ལ་ལྷགས་ཏེ་ལྷག་མ་ཙམ་ཡང་མ་ལུས་པར་གྱུར་ཏོ། །དེ་ནས་དེ་མ་ཐག་ཏུ་ཕྱོགས་བཅུའི་འཇིག་རྟེན་གྱི་ཁམས་ཀྱི་ལྷ་ཐམས་ཅད་ཀྱང་སྟེང་གི་ནམ་མཁའ་ལ་ཤིན་ཏུ་མི་དགའ་བས་ངུས་ཏེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱང་རབ་ཏུ་གཡོས་ནས་རྣམ་པ་སྣ་ཚོགས་ཀྱི་ལྷའི་མེ་ཏོག་དང་། ལྷའི་སྤོས་བརྒྱ་སྟོང་གྲངས་མེད་པ་ཆར་བཞིན་དུ་ཕབ་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རི་རབ་ལྷུན་པོ་ཙམ་དུ་སྤུངས་ཏེ། དེ་བཞིན་གཤེགས་པ་ལ་མཆོད་པ་བྱས་སོ། །སྟེང་གི་ནམ་མཁའ་ལ་གཞན་ཡང་གྲངས་མེད་པའི་ལྷའི་རྒྱལ་མཚན་དང་། ལྷའི་བ་དན་དང་། ལྷའི་ཕྲེང་བ་དང་། ལྷའི་གདུགས་དང་། ལྷའི་ནོར་བུ་རིན་པོ་ཆེ་ཆར་བཞིན་དུ་ཕབ་པ་ནི་ནམ་མཁའི་ཁམས་ཡོངས་སུ་གང་སྟེ། རིན་པོ་ཆེའི་ཁང་བུ་བརྩེགས་མར་གྱུར་ནས་ངོས་བཞི་རིན་པོ་ཆེ་སྣ་བདུན་གྱི་ཕྲེང་བས་ཤིན་ཏུ་བརྒྱན་པ། མེ་ཏོག་གི་འོད་དང་ལྡན་པས་དེ་བཞིན་གཤེགས་པ་ལ་མཆོད་པ་བྱས་སོ། །སྟེང་གི་ནམ་མཁའ་ལ་གཞན་ཡང་ལྷའི་རོལ་མོ་རྔ་དང་། གར་དང་། གླུ་རྣམ་པ་མང་པོ་ལས་ཀྱི་ཧུད་ཀྱི་ཧུད་སངས་རྒྱས་མྱ་ངན་ལས་འདས་པས་འཇིག་རྟེན་སྟོངས་སོ། །སེམས་ཅན་གྱི་མིག་མདོངས་པས་ཉོན་མོངས་པའི་སྲིན་མོ་དར་ཏེ་སྡུག་བསྔལ་གྱི་འདུ་བྱེད་རྒྱུན་མི་འཆད་པས་ན་འཁོར་བའི་འཁོར་ལོ་རྒྱུན་དུ་འཁོར་རོ་ཞེས་གྲགས་སོ། །དེའི་ཚེ་དགའ་བོ་སེམས་འཁྲུགས་ཏེ་མྱོས་བརྒྱལ་ནས་དེ་བཞིན་གཤེགས་པ་མྱ་ངན་ལས་འདས་སམ། མྱ་ངན་ལས་མ་འདས་པ་མི་རྟོགས་མི་ཤེས་ཀྱི། འཇིག་རྟེན་གྱི་ཁམས་སྔོན་ལས་གྱུར་པ་འབའ་ཞིག་མཐོང་ནས་སངས་རྒྱས་མྱ་ངན་ལས་འདས་སམ་ཞེས་མ་འགགས་པ་ལ་དྲིས་སོ། །མ་འགགས་པས་སྨྲས་པ། སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་སོ། །དེའི་ཚེ་དགའ་བོས་དེ་སྐད་ཅེས་སྨྲས་པ་ཐོས་ནས་ས་ལ་བརྒྱལ་ཏེ་རོ་བཞིན་དུ་གྱུར་ནས་དབུགས་ཀྱང་མི་རྒྱུ་སྟེ། ཅི་ཡང་མི་ཚོར་རོ། །དེ་ནས་མ་འགགས་པས་དགའ་བོའི་གདོང་ལ་ཆུ་གྲང་མོས་
བཏབ་ནས་བསླང་ངོ་། །དེ་ནས་ཐབས་མཁས་པའི་ཚིག་གིས་སྤྲོ་བ་བསྐྱེད་པའི་ཕྱིར་དགའ་བོ་ལ་འདི་སྐད་ཅེས་སྨྲས་སོ། །ཀྱི་ཧུད་ཀྱི་ཧུད་སྡུག་གོ །མྱ་ངན་ཆེན་པོ་མ་བྱེད་ཅིག །དེ་བཞིན་གཤེགས་པ་ནི་འདུལ་བའི་མཛད་པ་ཀུན་མཛད་ནས། ལྷ་དང་། མི་ལ་སོགས་པ་ཐམས་ཅད་ཀྱིས་བཞུགས་སུ་གསོལ་ཀྱང་མ་གནང་གིས། མྱ་ངན་ཆེན་པོས་སེམས་འཁྲུགས་པར་མ་བྱེད་ཅིག །ཀྱི་ཧུད་ཀྱི་ཧུད་ཇི་ལྟར་བྱ། ད་ཇི་ལྟར་བྱ། ནང་གཅིག་ཏུ་ལྷ་དང་མིའི་སྟོན་པ་མཛད་པའི་མཐར་ཕྱིན་ནས་བཞུགས་སུ་མ་གནང་ངོ་། །ད་བདག་ཅག་རེ་ཞིག་མྱ་ངན་བསང་ངོ་ཞེས་སྤྲོ་བ་བསྐྱེད་ནས། དགའ་བོ་ལ་འདི་སྐད་ཅེས་སྨྲས་སོ། །སངས་རྒྱས་མྱ་ངན་ལས་འདས་མོད་ཀྱི། འོན་ཀྱང་རིང་བསྲེལ་དང་། བླ་ན་མེད་པའི་ཆོས་ཀྱི་དཀོན་མཆོག་འཇིག་རྟེན་ན་རྟག་ཏུ་བཞུགས་ཏེ། སེམས་ཅན་གྱི་གནས་དང་། རྟེན་དུ་འགྱུར་བ་ཡོད་དེ། དེ་བས་ན་བདག་ཅག་གིས་བརྩོན་འགྲུས་སུ་སངས་རྒྱས་ཀྱི་ཆོས་དཀོན་མཆོག་སེམས་ཅན་ལ་བྱིན་ཏེ། སྡུག་བསྔལ་ལས་རྣམ་པར་བསྒྲལ་བས་སངས་རྒྱས་ཀྱི་དྲིན་ལ་ལན་གླན་པར་བྱའོ་ཞེས་སྨྲས་སོ། །དེའི་ཚེ་དགའ་བོ་སྤྲོ་བ་བསྐྱེད་པ་ཐོས་ནས་བགས་ཀྱིས་སངས་ཏེ། སྐད་བརྣངས་པ་ཙམ་དུ་མཆི་མ་བླགས་ནས་མྱ་ངན་གྱིས་ནོན་ཏོ། །དེའི་ཚེ་རྩྭ་མཆོག་གི་གྲོང་ཁྱེར་ཤིང་སཱ་ལའི་ཚལ་ཁོ་ར་ཁོར་ཡུག་དཔག་ཚད་བཅུ་གཉིས་ཀྱི་ནང་ལྷ་དང་མིས་ཡོངས་སུ་གང་བ་ནི་ཁབ་ཀྱི་རྩེ་མོ་ཙམ་ལ་ཡང་སེམས་ཅན་ཚད་མེད་པ་སྙེད་ཡོད་དེ། བར་ན་ས་སྟོང་པ་མེད་ཀྱང་གཅིག་ལ་གཅིག་མི་བདེ་ཞིང་ཕན་ཚུན་གནོན་པར་འགྱུར་བ་མེད་དོ། །དེའི་ཚེ་བྱང་ཆུབ་སེམས་དཔའ་ཁྲག་ཁྲིག་གྲངས་མེད་པ་དང་། འཁོར་མང་པོ་ཐམས་ཅད་མི་དྲན་ཏེ་བརྒྱལ་ནས་དེ་བཞིན་གཤེགས་པ་མྱ་ངན་ལས་འདས་སམ། མྱ་ངན་ལས་མ་འདས་པ་མི་རྟོགས་མི་ཤེས་ཀྱི། སྔོན་དང་མི་འདྲ་བར་ལྡེག་ཅིང་གཡོ་བ་འབའ་ཞིག་མཐོང་ནས་ཐམས་ཅད་ཀྱིས་མ་འགགས་པ་ལ་སངས་རྒྱས་མྱ་ངན་ལས་འདས་སམ་ཞེས་དྲིས་སོ། །དེ་ནས་མ་འགགས་པས་འཁོར་མང་པོ་རྣམས་དང་། འཇིག་རྟེན་དུ་བཅས་པ་ལྷ་དང་མི་ཐམས་ཅད་ལ་སངས་རྒྱས་བཅོམ་ལྡན་འདས་ནི་ཡོངས་སུ་མྱ་ངན་ལས་འདས་སོ་ཞེས་སྨྲས་
སོ། །དེ་ནས་འཁོར་གྲངས་མེད་པ་ཐམས་ཅད་ཀྱིས་དེ་སྐད་ཅེས་སྨྲས་པ་ཐོས་ནས་ཐམས་ཅད་བརྒྱལ་ཏེ་ས་ལ་འགྱེལ་ནས། སྡུག་བསྔལ་གྱིས་ཤིན་ཏུ་གདུངས་པས་སྐད་ཀྱང་མི་ཕྱིན་ཏེ། ལ་ལ་ནི་སངས་རྒྱས་ཀྱི་ཞབས་འབྲིང་དུ་ཐལ་བྱུང་ཤིའོ། །ལ་ལ་ནི་སེམས་སྟོར་བར་གྱུར་ཏོ། །ལ་ལ་ནི་ལུས་དང་སེམས་ཤིན་ཏུ་འབར་བར་གྱུར་ཏོ། །ལ་ལ་ནི་གཅིག་གི་ལག་པ་ལ་གཅིག་འཇུས་ཏེ་སྐད་བརྣངས་པ་ཙམ་དུ་མཆི་མ་བླགས་ནས་ངུས་སོ། །ལ་ལ་ནི་བྲང་ལ་ཁུ་ཚུར་གྱིས་བརྡེག་ཅིང་སྐད་ཆེན་པོས་འབོད་དོ། །ལ་ལ་ནི་མགོ་ལ་ཐལ་མོས་རྡེབས་ཤིང་རང་གི་སྐྲ་འབལ་ལོ། །ལ་ལ་ནི་འདི་སྐད་དུ་ཀྱི་ཧུད་ཀྱི་ཧུད་སྡུག་བསྔལ་གྱིས་གདུངས་སོ་ཞེས་སྨྲའོ། །ལ་ལ་ནི་དེ་བཞིན་གཤེགས་པ་མྱ་ངན་ལས་འདས་པ་ཧ་ཅང་ཡང་སྔ་ཆེས་སོ་ཞེས་སྨྲའོ། །ལ་ལ་ནི་བདག་ཅག་གི་ལྷ་སྟོར་ཏོ་ཞེས་སྨྲའོ། །ལ་ལ་ནི་འཇིག་རྟེན་སྟོངས་ཏེ་སེམས་ཅན་གྱི་མིག་མདོངས་སོ་ཞེས་སྨྲའོ། །ལ་ལ་ནི་ཉོན་མོངས་པའི་སྲིན་མོ་མངོན་དུ་བྱུང་ངོ་ཞེས་སྨྲའོ། །ལ་ལ་ནི་སེམས་ཅན་གྱི་དགེ་བའི་མྱུ་གུ་དང་ས་བོན་འགགས་སོ་ཞེས་སྨྲའོ། །ལ་ལ་ནི་བདུད་ཀྱི་སྡེ་རྣམས་དགའ་སྟེ་གོ་ཆ་ཡང་ཕུད་དོ་ཞེས་སྨྲའོ། །ལ་ལ་ནི་བདག་གི་ལུས་འདི་མི་རྟག་གོ་ཞེས་སྨོད་དོ། །ལ་ལ་ནི་ཡང་དག་པར་སྤྱོད་པས་རྣམ་པར་གྲོལ་བར་གྱུར་ཏོ། །ལ་ལ་ནི་མགོན་དང་སྐྱབས་མེད་པར་གྱུར་ཏོ་ཞེས་སྨྲའོ། །ལ་ལ་ནི་ལུས་ལས་ཁྲག་མངོན་དུ་ཟག་ཅིང་ས་ལ་འབབ་པར་གྱུར་ཏོ། །དེའི་ཚེ་རྣམ་པ་ཐ་དད་པའི་སྒྲ་སྐད་ཆེན་པོས་འཇིག་རྟེན་གྱི་ཁམས་ཀུན་གཡོས་པར་གྱུར་ཏེ། དེའི་ཚེ་མི་མཇེད་ཀྱི་འཇིག་རྟེན་གྱི་ཁམས་ཀྱི་བདག་པོ་ཚངས་པའི་རྒྱལ་པོ་ཆེན་པོ་ཡང་། སངས་རྒྱས་ཡོངས་སུ་མྱ་ངན་ལས་འདས་པར་ཤེས་ནས་ལྷའི་འཁོར་དང་བཅས་ཏེ་བསམ་གཏན་དང་པོ་ནས་བབས་ནས་སྐད་ཆེན་པོས་ངུས་ཏེ། དེ་བཞིན་གཤེགས་པའི་སྤྱན་སྔར་བརྒྱལ་ནས་ས་ལ་འགྱེལ་ཏོ། །རིང་ཞིག་ལོན་ནས་ཕྱིར་སངས་ཏེ། སངས་རྒྱས་ཀྱི་སྤྱན་སྔར་ཚིགས་སུ་བཅད་པས་འདི་སྐད་ཅེས་ངུས་སོ། །བཅོམ་ལྡན་འདས་ནི་སྔོན་གྱི་སྨོན་ལམ་གྱིས། །བདག་ཅག་ཕྱིར་དུ་མི་མཇེད་འཇིག་རྟེན་གཤེགས། །ཚད་མེད་དབང་དུ་འགྱུར་བའི་མཐུ་བཅས་ནས། །ཕོངས་པ་ཆོས་འདོད་འགྲོ་བ་རྣམས་ཀྱང་བཏུལ། །མཁས་པའི་ཐབས་
ཀྱིས་ཅི་རིགས་ཆོས་བསྟན་ནས། །སེམས་ཅན་མི་བདེར་འགྱུར་བ་གང་ཡང་མེད། །སྲིད་པ་གསུམ་གྱི་སྡུག་བསྔལ་ལས་བཏོན་ཏེ། །མཐར་ཕྱིན་མྱ་ངན་འདའ་བའི་ལམ་ལ་བཀོད། །བཅོམ་ལྡན་སེམས་ཅན་རྣམས་ལ་བྱམས་པའི་ཡུམ། །སེམས་ཅན་ཀུན་ལ་སྙིང་བརྩེ་ཞོ་བླུད་པ། །ཇི་སྟེ་ཐམས་ཅད་ནང་གཅིག་རབ་སྤངས་ནས། །ལྷ་མི་ཕོངས་པའི་མགོན་མ་མཆིས་པར་མཛད། །ཀྱི་ཧུད་འགྲོ་བའི་དགེ་བའི་མྱུ་གུ་ཡང་། །སྐྱེ་བའི་ཆར་ནི་འབབ་པའི་དུས་མ་མཆིས། །དགེ་བའི་མྱུ་གུ་ཁད་ཀྱིས་འགགས་ནས་སུ། །སྡུག་པའི་ལས་ཀྱིས་བསྡུས་ནས་ངན་སོང་འགྲོ། །འཇིག་རྟེན་སྟོངས་སོ་ད་ནི་ཇི་ལྟར་བགྱི། །སེམས་ཅན་ཡང་དག་ཤེས་རབ་མིག་མདོངས་སོ། །མ་རིག་མུན་པར་འཐོམ་ཞིང་འགྲོ་བས་ན། །སྲིད་པ་གསུམ་དུ་ལྟུང་ཞིང་འཁོར་བར་གྱུར། །སེམས་ཅན་སྡིག་པ་མགོན་མེད་ཇི་ལྟར་བགྱི། །རིང་བསྲེལ་དག་ལ་བརྟེན་ནས་གྲོལ་བར་ཤོག །དེ་བཞིན་གཤེགས་ལ་གསོལ་བའི་སྙིང་རྗེའི་མཐུས། །སྡུག་བསྔལ་ལས་ནི་གྲོལ་བའི་སྐྱབས་སུ་ཤོག །ཀྱི་ཧུད་ཇི་ལྟར་འཇིག་རྟེན་ངན་པ་འདིར། །བཅོམ་ལྡན་བདག་ཅག་སྤངས་ནས་མྱ་ངན་འདའ། །དེའི་ཚེ་བརྒྱ་བྱིན་ལྷའི་དབང་ཕྱུག་འཁོར་དང་བཅས་ཏེ་སྟེང་གི་ནམ་མཁའ་ལས་བབས་ནས་ཀྱི་ཧུད་ཀྱི་ཧུད་ཅེས་སྐད་ཆེན་པོ་ཕྱུང་སྟེ་ངུས་ནས་མཆི་མ་བླགས་ཏེ། དེ་བཞིན་གཤེགས་པའི་སྤྱན་སྔར་བརྒྱལ་ནས་ས་ལ་འགྱེལ་ཏོ། །དེ་ནས་རིང་ཞིག་ལོན་པ་དང་གདོད་ཕྱིར་སངས་ཏེ་མྱ་ངན་གྱིས་ཡིད་གདུངས་ནས་སངས་རྒྱས་ཀྱི་སྤྱན་སྔར་ཚིགས་སུ་བཅད་པ་འདིས་ངུས་སོ། །བཅོམ་ལྡན་བསྐལ་པར་དཀའ་བ་མཛད་པ་ནི། །བདག་དང་འགྲོ་བ་རྣམས་ཀྱི་སླད་དུ་སྟེ། །བླ་ན་མེད་པའི་བྱང་ཆུབ་རབ་བརྙེས་ནས། །འགྲོ་བ་ཀུན་ལ་བུ་གཅིག་བཞིན་དུ་གསོ། །ཆོས་སྦྱིན་སྨན་ནི་སྨན་གྱི་ནང་ན་མཆོག །ནད་གསོ་སྨན་པའི་ནང་ན་སྨན་པ་གཙོ། །ཐུགས་རྗེ་ཆེན་པོའི་སྤྲིན་གྱིས་ཀུན་བསྐྱབས་ནས། །བདུད་རྩི་ཤེས་རབ་ཆར་ནི་ཀུན་ལ་ཕབ། །ཤེས་རབ་ཉི་མའི་འོད་ཀྱིས་མ་རིག་མུན་པ་བསལ། །མ་རིག་སེམས་ཅན་འཕགས་པའི་ལམ་ཡང་མཐོང་། །འཕགས་པའི་བྱམས་པའི་འོད་ཀྱིས་རྒྱུད་དྲུག་སྣང་མཛད་ནས། །སྲིད་པ་རྣམ་གསུམ་འོད་ཀྱིས་རེག་ནས་རྣམ་
པར་གྲོལ། །ཅི་ཡི་སླད་དུ་བྱམས་པ་ཆེན་པོའི་ཐུགས་བཏང་ནས། །མྱ་ངན་འདས་སོ་མི་མཐོང་ཇི་ལྟར་བགྱི། །སྔོན་གྱི་ཐུགས་རྗེ་ཆེན་པོ་ཡི་དམ་ག་རེ་ན། །མཆིལ་མ་བཞིན་དུ་སེམས་ཅན་ཡོངས་སུ་སྤངས། །བདག་ལ་སོགས་ཏེ་སེམས་ཅན་ཐམས་ཅད་ནི། །ཇི་ལྟར་བེའུ་དག་མས་བོར་ངེས་པར་འཆི་བ་བཞིན། །འཁོར་བཞི་གཅིག་གི་ལག་ལ་གཅིག་འཇུས་ནས། །བྲང་རྡུང་ངུ་བའི་སྐད་ཀྱིས་འཇིག་རྟེན་གསུམ་ཡང་གཡོས། །ཀྱི་ཧུད་ཀྱི་ཧུད་སྲིད་པར་འཁོར་བ་འདི་ཐམས་ཅད། །ཐམས་ཅད་ནང་གཅིག་ཏུ་ནི་སྐྱབས་མ་མཆིས་པར་གྱུར། །རེ་སྡུག་བདག་ཅག་བསོད་ནམས་ཟད་པའི་རྣམས། ། དགེ་བའི་མྱུ་གུ་ཚིག་པ་རླན་པའི་དུས་མ་མཆིས། །དམ་ཆོས་དཀོན་མཆོག་རིང་བསྲེལ་འོད་ཟེར་གྱིས། །སྣང་བར་མཛད་ཅིང་སྲིད་པ་གསུམ་ལས་གྲོལ་བར་ཤོག །ཀྱི་ཧུད་ཤིན་ཏུ་སྡུག་གོ་བདག་ཅག་རྣམས། །ནམ་ཞིག་སླར་ཡང་དེ་བཞིན་གཤེགས་པ་མཐོང་བར་འགྱུར། །དེའི་ཚེ་མ་འགགས་པ་ཡང་མྱ་ངན་གྱིས་ཡིད་གདུངས་ཏེ་ངུས་ནས་ལུས་ཀྱང་འདར་བར་གྱུར་ཏེ། སངས་རྒྱས་ཀྱི་སྤྱན་སྔར་པུས་མོ་བཙུགས་ནས་ཚིགས་སུ་བཅད་པ་འདི་སྐད་ཅེས་བསྟོད་དོ། །སངས་རྒྱས་ཆོས་ཀྱི་རྒྱལ་པོས་བདག་ཅག་རབ་ཏུ་གསོས། །བདག་ཅག་ཆོས་ཀྱི་སྐོམ་བླུད་ཆོས་ཀྱི་སྐུ་ཡང་བསྐྱེད། །སེམས་ཅན་ཆོས་ཀྱི་སྐུ་ཡང་མངོན་པར་མ་གྲུབ་ཅིང་། །ཤེས་རབ་འཚོ་བའི་ཚོགས་ཀྱང་ཡོང་མ་བསགས། །རྣམ་པ་བརྒྱད་དང་ལྡན་པའི་དབྱངས་ཀྱིས་རབ་བསྟན་ཅིང་། །འཁོར་རྣམས་ཐོས་ནས་བྱང་ཆུབ་རྟོགས་པར་མཛད་པའི་རིགས། །རྟག་ཏུ་བྱམས་ཆེན་ཁ་དོག་ལྔ་ཡི་འོད་བཀྱེ་ཞིང་། །འཁོར་རྣམས་འོད་ཀྱིས་རེག་ནས་རྣམ་པར་གྲོལ་བར་མཛོད། །ཅི་ཡི་སླད་དུ་ཡོངས་སུ་མྱ་ངན་འདས་གཤེགས་ནས། །སྡུག་བསྔལ་སྤྱོད་པའི་སེམས་ཅན་ཅི་ལ་འཇུག་པར་བགྱི། །ཀྱི་ཧུད་བཅོམ་ལྡན་འདས་ནི་བྱམས་པ་ཆེན་པོ་སྤངས། །བདག་ཅག་མགོན་མ་མཆིས་པས་ངེས་པར་འཆི། །བཅོམ་ལྡན་འདས་ཀྱིས་ཐབས་སུ་བསྟན་པར་འཚལ་མོད་ཀྱི། །བདག་ཅག་མྱ་ངན་མི་བགྱིད་པ་ཡི་གཏོལ་མ་མཆིས། །འཁོར་བཞི་མྱོས་ཤིང་འཁྲུགས་ཏེ་བརྒྱལ་ནས་སེམས་ཀྱང་སྟོར། །ངུ་བའི་སྐད་ཀྱིས་གནམ་ས་འཇིག་རྟེན་གསུམ་ཡང་འགུལ། །བཅོམ་
ལྡན་ཉག་གཅིག་བདེ་བ་ཆེན་པོ་ལ་བཞུགས་ན། །འགྲོ་བ་མང་པོའི་སྡུག་བསྔལ་ཆེན་པོ་ཇི་ལྟར་བགྱི། །བཅོམ་ལྡན་འདས་པའི་དུས་ན་བདག་ཅག་རྣམས་ཀྱི་ཕྱིར། །བསྐལ་པ་མང་པོར་དབུ་དང་ཕྱག་དང་ཞབས་ཀྱང་བཏང་། །བླ་ན་མེད་པའི་བྱང་ཆུབ་མངོན་པར་སངས་རྒྱས་ནས། །རིང་པོར་མི་བཞུགས་མྱ་ངན་ལས་ནི་འདའ་བར་གཤེགས། །བདག་ཅག་འཁོར་བཞི་མ་རིག་ཐིབས་པོར་གནས་པས་ན། །བདུད་ཀྱི་རྒྱལ་པོ་དགའ་ཤིང་སྤྲོ་བས་གོ་ཆའང་བོར། །ཀྱི་ཧུད་བཅོམ་ལྡན་འདས་ནི་ཐུགས་རྗེ་ཆེན་པོ་ཡིས། །རིང་བསྲེལ་བྱམས་པའི་འོད་ཀྱིས་བདག་ཅག་བསྐྱབས་པར་ཤོག །འཁོར་བཞི་པོ་ལ་བཅོམ་ལྡན་ཐུགས་བརྩེའི་ཕྱིར། །ཆོས་ཀྱི་དཀོན་མཆོག་ཕན་པ་ཟད་མི་ཤེས་པར་ཤོག །བདག་ཅག་རྣམས་ནི་འཕྲལ་དུ་འཆི་བར་མ་གྱུར་ཏེ། །འཚོ་བའི་ལྷག་མ་འདི་ཙམ་གྱིས་ནི་ཅི་ཞིག་ནུས། །ཀྱི་ཧུད་ཤིན་ཏུ་སྡུག་བསྔལ་བཟོད་པར་དཀའ། །ད་ནི་སླན་ཅད་བཅོམ་ལྡན་མཐོང་བའི་དུས་མ་མཆིས། །དེའི་ཚེ་དགའ་བོ་བགས་ཀྱིས་སངས་ནས། ཐལ་མོ་མགོ་ལ་རྡེབས་ཤིང་བྲང་ལ་ཁུ་ཚུར་གྱིས་བརྡེགས་ནས་སྐད་བརྣངས་ཤིང་སྡུག་བསྔལ་ལུས་ཀྱིས་མི་བཟོད་པ་ཙམ་དུ་ངུས་ནས་སངས་རྒྱས་ཀྱི་སྤྱན་སྔར་པུས་མོ་བཙུགས་ཏེ་ངུ་བའི་ཚིགས་སུ་བཅད་པ་འདི་སྐད་ཅེས་གསོལ་ཏོ། །བདག་སྔོན་བཅོམ་ལྡན་འདས་དང་སྨོན་ལམ་མཐུ་གཅིག་པས། །འཐུན་པར་གཅིག་ཏུ་ཤཱཀྱའི་རིགས་སུ་སྐྱེས་པར་གྱུར། །དེ་བཞིན་གཤེགས་པ་མངོན་པར་བྱང་ཆུབ་སངས་རྒྱས་ནས། །བདག་གིས་ལོ་ནི་ཉི་ཤུ་ལྷག་ཅིག་གཡོག་ཀྱང་བགྱིས། །དད་པའི་སེམས་ཀྱིས་བསྙེན་པར་བགྱི་བ་མ་ངོམས་བཞིན། །ནང་གཅིག་བོར་ནས་ཡོངས་སུ་མྱ་ངན་འདའ་བར་གཤེགས། །ཀྱི་ཧུད་ཀྱི་ཧུད་སྡུག་བསྔལ་ཆེན་པོས་གདུངས་པར་གྱུར། །ཡུན་དུ་སྡུག་བསྔལ་གྱིས་ནི་སེམས་ཀྱང་རབ་ཏུ་གཟིར། །བདག་གི་ལུས་ཀྱང་སྲིད་པའི་དྲ་བ་ལས་མ་གྲོལ། །མ་རིག་པ་ཡི་སྒོ་ང་ལས་ཀྱང་ཕྱིར་མ་བྱུང་། །བཅོམ་ལྡན་འདས་ཀྱིས་མ་རིག་སྒོ་ང་མ་བཅག་པར། །ཅི་ཡི་སླད་དུ་ཡོངས་སུ་མྱ་ངན་འདའ་བར་གཤེགས། །བདག་ནི་གསར་དུ་བཙས་པའི་བུ་དང་མཚུངས་པ་ལ། །མ་ཡིས་བོར་ན་གདོན་མི་འཚལ་བར་
འཆི་བར་འགྱུར། །ཅི་ཡི་སླད་དུ་བཅོམ་ལྡན་འདས་ཀྱིས་ཡོངས་སྤངས་ནས། །ཉག་གཅིག་ཁམས་གསུམ་ལས་ནི་འདས་ནས་བདེ་བར་བཞུགས། །བཅོམ་ལྡན་འདས་ལ་བདག་གིས་འགྱོད་ཅིང་མཐོལ་བ་ནི། །དགུང་ལོ་ཉི་ཤུའི་བར་དུ་ཞབས་འབྲིང་འཚལ་བ་ན། །སྤྱོད་ལམ་བཞི་པོ་ལེ་ལོའི་དབང་དུ་གྱུར་པས་ན། །འཕགས་པའི་ཐུགས་དང་འགལ་ཞིང་མཉེས་པར་མ་བགྱིས་པ། །ཡང་དག་རྫོགས་པའི་སངས་རྒྱས་ཐུགས་རྗེ་ཆེན་པོ་ཡིས། །བདག་ལ་བདུད་རྩི་སྩལ་ཅིང་བདེ་བ་མཛད་པར་ཤོག །བདག་གིས་ཕྱི་མའི་བསྐལ་པ་མཐའ་ཡི་བར་དུ་ཡང་། །རྟག་ཏུ་བཅོམ་ལྡན་འདས་ཀྱི་ཞམ་རིང་བྱེད་པར་ཤོག །བཅོམ་ལྡན་འདས་ནི་ཐུགས་རྗེ་ཆེན་པོའི་འོད་ཟེར་གྱིས། །ཐམས་ཅད་འཇིག་རྟེན་ཁམས་སུ་བདག་ནི་སྐྱོབ་པར་ཤོག །ཀྱི་ཧུད་ཀྱི་ཧུད་ཚིག་གིས་བརྗོད་མི་ནུས། །འཕགས་པའི་དྲིན་སྨྲར་སྐད་ཀྱང་མི་ཕྱིན་ཏོ། །དེའི་ཚེ་ཀླུང་གང་གཱ་གྲངས་མེད་པ་བྱེ་མ་སྙེད་ཀྱི་བྱང་ཆུབ་སེམས་དཔའ་དང་། འཇིག་རྟེན་དུ་བཅས་པ་ལྷ་དང་མི་ཐམས་ཅད་གཅིག་གི་ལག་པ་ལ་གཅིག་གིས་འཇུས་ནས་ཤིན་ཏུ་ངུ་ཞིང་ཆོ་ངེས་འདོན་པ་ལས་སོ་སོ་ནས་སྤྲོ་བ་བསྐྱེད་དེ། ཅི་ནུས་ཀྱིས་གྲངས་མེད་པའི་ལྷའི་སྤོས་དང་། ལྷའི་མེ་ཏོག་མན་དཱ་ར་བ་དང་། མན་དཱ་ར་བ་ཆེན་པོ་དང་། མན་ཛུ་ཥ་ཀ་དང་། མན་ཛུ་ཥ་ཀ་ཆེན་པོ་དང་། གྲངས་མེད་པའི་ལྷ་དང་མིའི་འཇིག་རྟེན་གྱི་རྒྱ་མཚོ་ངོགས་ཀྱི་ཙན་དན་དང་། ཨ་ག་རུ་དང་། རྣམ་པ་བརྒྱ་སྟོང་སྙེད་ཀྱི་སྤོས་སྦྱར་མ་དང་། གྲངས་མེད་པའི་བྱུག་སྤོས་དང་། སྤོས་ཆུ་དང་། རིན་པོ་ཆེའི་གདུགས་དང་། རིན་པོ་ཆེའི་རྒྱལ་མཚན་དང་། རིན་པོ་ཆེའི་བ་དན་དང་། མུ་ཏིག་དང་། དོ་ཤལ་ནམ་མཁའི་ཁམས་ཡོངས་སུ་གང་བ་བཅོམ་ལྡན་འདས་ཀྱི་སྤྱན་སྔར་ཕབ་ནས་མཆོད་པ་བྱས་སོ། །དེའི་ཚེ་རྩྭ་མཆོག་གི་གྲོང་ཁྱེར་གྱི་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་ཐམས་ཅད་ཀྱིས་ཀྱང་ཤིན་ཏུ་ངུས་ནས་སོ་སོ་ནས་གྲངས་མེད་པའི་མེ་ཏོག་དང་། སྤོས་དང་། རྒྱལ་མཚན་དང་། གདུགས་ལ་སོགས་པ་སྔ་མ་བས་ཤིན་ཏུ་ལྷག་པར་སྦྱར་ཏེ་དེ་བཞིན་གཤེགས་པའི་སྤྱན་སྔར་ཕབ་ནས་མཆོད་པ་བྱས་སོ། །དེའི་ཚེ་ཕྱོགས་བཞིའི་མགོན་པོ་བཞི་ལྷའི་འཁོར་དང་བཅས་ཏེ་ཤིན་
ཏུ་ངུས་ནས་སོ་སོ་ནས་གྲངས་མེད་པའི་མེ་ཏོག་དང་སྤོས་ལ་སོགས་པ་མཆོད་པའི་ཡོ་བྱད་སྔ་མ་བས་སུམ་འགྱུར་གྱིས་ལྷག་པ་བཤམས་ནས་ངུས་བཞིན་དུ་དེ་བཞིན་གཤེགས་པའི་སྤྱན་སྔར་ལྷགས་ཏེ་མཆོད་པ་བྱས་སོ། །གནམ་རིམ་པ་ལྔའི་ལྷས་ཀྱང་དེ་བཞིན་དུ་སྔ་མ་བས་ཤིན་ཏུ་ལྷག་པ་བཤམས། གཟུགས་ཀྱི་ཁམས་དང་། གཟུགས་མེད་པའི་ཁམས་ཀྱི་ལྷ་རྣམས་ཀྱང་མཆོད་པའི་ཡོ་བྱད་སྔ་མ་བས་ཤིན་ཏུ་ལྷག་པ་བཤམས་ནས་མཆོད་པ་བྱས་སོ། །དེའི་ཚེ་རྩྭ་མཆོག་གི་གྲོང་ཁྱེར་ན་གནས་པའི་སྐྱེས་པ་དང་། བུད་མེད་མཆི་མ་བླགས་ཏེ་ངུས་ནས། མདང་ཇི་ལྟར་བཏང་བ་མི་ཤེས་ནས་དགའ་བོ་ལ་འདི་སྐད་ཅེས་སྨྲས་སོ། །དེ་བཞིན་གཤེགས་པ་ཡོངས་སུ་མྱ་ངན་ལས་འདས་ན་ཇི་ལྟ་བུའི་ཚུལ་དུ་མདང་གཏང་བར་བགྱི། དེ་ནས་བརྒྱ་བྱིན་ལྷའི་དབང་ཕྱུག་གིས་གོང་དུ་བཅོམ་ལྡན་འདས་ཀྱིས་གསུངས་པ་བཞིན་དུ། འཁོར་ལོས་སྒྱུར་བའི་རྒྱལ་པོའི་མདང་གཏང་བ་བཞིན་བྱའོ་ཞེས་སྨྲས་སོ། །དེའི་ཚེ་རྩྭ་མཆོག་གི་གྲོང་ཁྱེར་གྱི་མི་ཐམས་ཅད་ངུས་ཏེ་གྲོང་ཁྱེར་དུ་ཞུགས་ནས་ལྕགས་ཀྱི་སྒྲོམ་བྱས་ཏེ། རིན་པོ་ཆེ་སྣ་བདུན་གྱིས་བརྒྱན་ནས། །རིན་ཐང་མེད་པའི་རས་དཀར་པོ་བཟང་པོ་ཡུག་སྟོང་དང་གྲངས་མེད་པའི་ཤིང་བལ་ཤིན་ཏུ་འཇམ་པ་ཡང་བཤམས་སོ། །གཞན་ཡང་གྲངས་མེད་པའི་ཤིང་ཙན་དན་དང་། ཨ་ག་རུ་དང་། གཞན་ཡང་ཁྲི་ཕྲག་བརྒྱ་སྟོང་སྙེད་ཀྱི་སྤོས་སྦྱར་མ་དང་། སྤོས་ཀྱི་འདག་གུ་དང་། སྤོས་ཆུ་དང་། གདུགས་དང་། བ་དན་དང་། མེ་ཏོག་ལ་སོགས་པ་སྤྲིན་ལྟར་ནམ་མཁའ་ལ་ཡོངས་སུ་གང་བ་མཐོ་ཁྱད་རི་རབ་ལྷུན་པོ་ཙམ་བཤམས་སོ། །དེ་ལྟ་བུ་དག་བཤམས་ནས་མཆི་མ་བླགས་ཏེ་དེ་བཞིན་གཤེགས་པའི་སྤྱན་སྔར་ཕབ་ནས། མྱ་ངན་གྱིས་ཡིད་གདུངས་བཞིན་དུ་མཆོད་པ་བྱས་སོ། །དེའི་ཚེ་རྩྭ་མཆོག་གི་གྲོང་ཁྱེར་གྱི་མི་ཐམས་ཅད་དང་། འཁོར་མང་པོ་ཐམས་ཅད་ཀྱང་མཆི་མ་བླགས་ཏེ་ངུས་ནས། གཞན་ཡང་ཚད་མེད་པ་སྙེད་ཀྱི་སྤོས་དང་། མེ་ཏོག་དང་། རྒྱལ་མཚན་དང་། གདུགས་ལ་སོགས་ཏེ་མཆོད་པའི་ཡོ་བྱད་སྤྲིན་ལྟ་བུར་ནམ་མཁའ་ཡོངས་སུ་གང་བར་བཤམས་ནས་གཅིག་གི་ལག་པ་ལ་གཅིག་འཇུས་ཏེ། བྲང་ལ་ཁུ་ཚུར་གྱིས་རྡེག་ཅིང་ཆོ་ངེའི་
སྒྲས་སྟོང་ཆེན་པོ་ཡང་གཡོས་ཏེ། དེ་བཞིན་གཤེགས་པའི་སྤྱན་སྔར་ཕབ་ནས་མཆོད་པའི་ཡོ་བྱད་ཀྱིས་མཆོད་པ་བྱས་སོ། །དེའི་ཚེ་འཁོར་མང་པོ་རྣམས་སྐད་བརྣངས་པ་ཙམ་གྱིས་ངུས་ནས། བཀུར་སྟིར་བྱ་བའི་ཕྱིར་སོ་སོ་ནས་རས་དཀར་པོའི་སླེབ་མོས་དེ་བཞིན་གཤེགས་པའི་སྐུ་བཏེག་སྟེ། ལྕགས་ཀྱི་སྒྲོམ་གྱི་ནང་དུ་བཅུག་ནས་མར་བསུང་ཅན་གང་བར་བླུགས་ཏེ་སྒྲོམ་གྱི་ཁ་བཅད་དོ། །དེའི་ཚེ་རྩྭ་མཆོག་གི་གྲོང་ཁྱེར་གྱི་ཕོ་མོས་ཐམས་ཅད་ཀྱང་བསོད་ནམས་འདོད་པའི་ཕྱིར། དེ་བཞིན་གཤེགས་པའི་ཡོན་ཏན་འདོད་པའི་ཕྱིར་ལྷ་དང་། མི་དང་། འཁོར་མང་པོས་དེ་བཞིན་གཤེགས་པའི་པུར་སྒྲོམ་འདེགས་སུ་མ་བཅུག་གི །ཀུན་གྱིས་བགྲོས་ནས་ཟླ་མེད་པའི་གྱད་སྟོབས་པོ་ཆེ་བཞིས་འདེགས་པར་བྱས་སོ། །གྱད་བཞི་པོས་གོས་དང་རྒྱན་བཀྲོལ་ཏེ་དེ་བཞིན་གཤེགས་པའི་པུར་སྒྲོམ་འདེག་པའི་ཕྱིར་གྲོང་ཁྱེར་གྱི་ནང་དུ་འོངས་ཏེ། མཆོད་པ་བྱས་ནས་མཐུ་ཅི་ཡོད་པས་བཏེག་ཀྱང་མ་ཐེག་གོ །དེ་ནས་གྲོང་ཁྱེར་དེའི་གྱད་སྟོབས་པོ་ཆེ་བརྒྱད་ཀྱིས་པུར་སྒྲོམ་བཏེག་པར་བྱས་ཏེ། སོ་སོའི་གོས་དང་རྒྱན་བཀྲོལ་ནས་མཆོད་པ་བྱས་ཏེ་མཐུ་ཅི་ཡོད་པས་རྩལ་ཀྱང་མ་ཐེག་གོ །དེ་ནས་གྲོང་ཁྱེར་དེའི་སྟོབས་པོ་ཆེ་བཅུ་དྲུག་གིས་འདེག་པར་བྱས་ཏེ་གོས་དང་རྒྱན་བཀྲོལ་ནས། སངས་རྒྱས་ཀྱི་སྒྲོམ་བཏེག་པར་རྩལ་ཀྱང་ཐེག་པར་མ་གྱུར་ཏོ། །དེའི་ཚེ་མ་འགགས་པས་སྟོབས་པོ་ཆེ་རྣམས་ལ་འདི་སྐད་ཅེས་སྨྲས་སོ། །ཇི་སྟེ་གྲོང་ཁྱེར་འདིའི་ནང་གི་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་ཐམས་ཅད་ཀྱིས་དེ་བཞིན་གཤེགས་པའི་པུར་སྒྲོམ་གྲོང་ཁྱེར་གྱི་ནང་དུ་བཀུར་བར་རྩོལ་ཡང་མི་ཐེག་ན། ཁྱེད་འབའ་ཞིག་གིས་མི་ཐེག་པ་ལྟ་ཅི་སྨོས་ཏེ། ཁྱེད་རྣམས་ཀྱིས་འཁོར་མང་པོ་དང་ལྷ་རྣམས་ཀྱི་སྟོབས་ཀྱིས་བསྟང་བར་གསོལ་ཏེ་སྒྲོམ་བཏེག་ན། གྲོང་ཁྱེར་དུ་བཀུར་ནུས་པར་འགྱུར་རོ་ཞེས་མ་འགགས་པས་སྨྲས་མ་ཐག་ཏུ། དེའི་ཚེ་བརྒྱ་བྱིན་ལྷའི་དབང་ཕྱུག་རིན་པོ་ཆེ་སྣ་བདུན་གྱི་གདུགས་དམ་པ་དང་། གྲངས་མེད་པའི་མེ་ཏོག་དང་། སྤོས་དང་། རྒྱལ་མཚན་དང་། བ་དན་དང་། ལྷའི་རོལ་མོ་བཤམས་ནས། ལྷའི་འཁོར་དང་བཅས་ཏེ་ཤིན་ཏུ་ངུས་ནས་ནམ་མཁའ་ལས་
འཕགས་ཏེ། འཕགས་པའི་པུར་སྒྲོམ་ལ་མཆོད་པ་བྱེད་དོ། །གནམ་རིམ་པ་དྲུག་གི་ལྷ་དང་། གཟུགས་ཀྱི་ཁམས་ཀྱི་ལྷ་རྣམས་ཀྱང་བརྒྱ་བྱིན་ལྷའི་དབང་ཕྱུག་དང་འདྲ་བར་པུར་སྒྲོམ་ལ་མཆོད་པ་བྱེད་དོ། །དེའི་ཚེ་བཅོམ་ལྡན་འདས་ཀུན་ལ་ཐུགས་རྗེས་ཁྱབ་པར་མཛད་ཅིང་། འཇིག་རྟེན་དུ་བཅས་པ་ཐམས་ཅད་ཀྱི་མཉམ་པར་བསོད་ནམས་ཁྱད་པར་མེད་པར་མཛད་པའི་ཕྱིར་ཤིང་སཱ་ལའི་ཚལ་ནས། པུར་སྒྲོམ་ཤིང་ཏ་ལ་གཅིག་གི་སྲིད་དུ་སྟེང་གི་ནམ་མཁའ་ལ་འཕགས་ནས་གཤེགས་པར་གྱུར་གྱི། རྩྭ་མཆོག་གི་གྲོང་ཁྱེར་གྱི་མི་ཐམས་ཅད་དང་། འཇིག་རྟེན་དུ་བཅས་པ་ལྷ་དང་། མི་དང་། འཁོར་ཐམས་ཅད་ཀྱིས་ཀྱང་སངས་རྒྱས་ཀྱི་སྒྲོམ་བཏེག་པར་མ་གྱུར་ཏོ། །དེའི་ཚེ་བརྒྱ་བྱིན་ལྷའི་དབང་ཕྱུག་འཁོར་རྣམས་དང་བཅས་ཏེ། རིན་པོ་ཆེ་སྣ་བདུན་གྱི་གདུགས་ཆེན་པོ། རིན་པོ་ཆེའི་ཀ་བ་བཞི་དང་ལྡན་པ་རིན་པོ་ཆེ་སྣ་བདུན་གྱི་དོ་ཤལ་གྱིས་ངོས་བཞི་བརྒྱན་པ། སྟེང་གི་ནམ་མཁའ་ལས་དེ་བཞིན་གཤེགས་པའི་སྒྲོམ་ཁེབས་པར་བྱས་ནས་གྲངས་མེད་པའི་སྤོས་དང་། མེ་ཏོག་དང་། རྒྱལ་མཚན་དང་། བ་དན་དང་། དོ་ཤལ་དང་། ལྷའི་རོལ་མོ་དང་། དར་གྱི་ལྡ་ལྡི་སྣ་ཚོགས་ཀྱིས་ནམ་མཁའ་ལ་མཆོད་པ་བྱས་སོ། །གནམ་རིམ་པ་དྲུག་གི་བར་གྱི་ལྷ་དང་། གཟུགས་ཀྱི་ཁམས་ཀྱི་ལྷ་རྣམས་ཀྱང་མཆོད་པའི་ཡོ་བྱད་བརྒྱ་བྱིན་པས་ལྷག་པར་བཤམས་ནས་དེ་བཞིན་གཤེགས་པའི་པུར་སྒྲོམ་ལ་མཆོད་པ་བྱས་སོ། །དེའི་ཚེ་རྩྭ་མཆོག་གི་གྲོང་ཁྱེར་གྱི་མི་ཐམས་ཅད་ཀྱིས་དེ་བཞིན་གཤེགས་པའི་པུར་སྒྲོམ་སྟེང་གི་ནམ་མཁའ་ལ་འཕགས་པ་མཐོང་ནས་བྲང་བརྡུངས་ཏེ་སྐད་ཆེན་པོ་ཕྱུང་ནས་ངུས་སོ། །དེའི་ཚེ་ལྷ་དང་མི་ཐམས་ཅད་ཀྱིས་དེ་བཞིན་གཤེགས་པའི་པུར་སྒྲོམ་ལ་མཆོད་པ་བྱ་བའི་ཕྱིར་རིན་པོ་ཆེ་སྣ་བདུན་དང་། མུ་ཏིག་དང་། མེ་ཏོག་དང་། སྤོས་དང་། དོ་ཤལ་དང་། དར་གྱི་ལྡ་ལྡི་རྣམ་པ་མང་པོ་སྤྲིན་བཞིན་དུ་ནམ་མཁའི་ཁམས་ཡོངས་སུ་གང་བར་བྱས་ཏེ་ཤིན་ཏུ་ངུས་ནས། དེ་བཞིན་གཤེགས་པའི་རིན་པོ་ཆེ་སྣ་བདུན་གྱི་པུར་སྒྲོམ་ལ་མཆོད་དེ། ཐམས་ཅད་སྐད་འཐུན་པར་ཀྱི་ཧུད་ཀྱི་ཧུད་བདག་ཅག་ལ་བསོད་ནམས་མ་མཆིས་པས་
དེ་བཞིན་གཤེགས་པའི་པུར་སྒྲོམ་མ་ཐེག་སྟེ། བདག་ཅག་ལ་མགོན་སྐྱབས་མ་མཆིས། དགེ་བའི་རྩ་བའི་སྐལ་བ་མ་མཆིས་སོ་ཞེས་སྨྲས་སོ། །དེའི་ཚེ་བཅོམ་ལྡན་འདས་ཀྱི་གསེར་གྱི་པུར་སྒྲོམ་ཤིང་སཱ་ལའི་ཚལ་གྱི་ནམ་མཁའ་ལ་དལ་གྱིས་གཤེགས་ཏེ། རྩྭ་མཆོག་གི་གྲོང་ཁྱེར་གྱི་ནུབ་སྒོར་ཞུགས་སོ། །དེའི་ཚེ་རྩྭ་མཆོག་གི་གྲོང་ཁྱེར་ན་གནས་པའི་དགེ་བསྙེན་མ་ཐམས་ཅད་དང་། བྱང་ཆུབ་སེམས་དཔའ་དང་། ཉན་ཐོས་གྲངས་མེད་པ། ལྷ་དང་། མི་དང་། འཁོར་མང་པོས་སྟེང་གི་ནམ་མཁའ་དང་། ས་ལ་ཡོངས་སུ་གང་བར་དེ་བཞིན་གཤེགས་པའི་པུར་སྒྲོམ་གྱི་ཕྱི་བཞིན་དོང་ནས། གཅིག་གི་ལག་པ་ལ་གཅིག་གིས་འཇུ་ཞིང་སྐད་ཆེན་པོ་ཕྱུང་སྟེ་ངུས་ནས་བྲང་ལ་ཁུ་ཚུར་གྱིས་རྡེགས་ཏེ། སོ་སོ་ནས་གྲངས་མེད་པའི་མེ་ཏོག་དང་། སྤོས་དང་། རིན་པོ་ཆེའི་རྒྱལ་མཚན་དང་། བ་དན་དང་། གདུགས་ཀྱིས་སའི་སྟེང་དང་། ནམ་མཁའ་ཡང་ཡོངས་སུ་གང་བར་བཤམས་ཏེ། དེ་བཞིན་གཤེགས་པའི་པུར་སྒྲོམ་ལ་མཆོད་པར་བྱེད་དོ། །རྩྭ་མཆོག་གི་གྲོང་ཁྱེར་ནི་ངོས་གཅིག་ཀྱང་དཔག་ཚད་བཞི་བཅུ་རྩ་བརྒྱད་ཡོད་དོ། །དེའི་ཚེ་དེ་བཞིན་གཤེགས་པའི་རིན་པོ་ཆེ་སྣ་བདུན་གྱི་པུར་སྒྲོམ་སྟེང་གི་ནམ་མཁའ་ལ་དལ་གྱིས་གཤེགས་ཏེ། རྩྭ་མཆོག་གི་གྲོང་ཁྱེར་གྱི་ཤར་སྒོ་ནས་བྱུང་ནས། གཡས་ཕྱོགས་ནས་འཁོར་ཏེ་གྲོང་ཁྱེར་གྱི་ལྷོ་སྒོར་ཞུགས་སོ། །དེ་ནས་བགས་ཀྱིས་ནམ་མཁའ་ལ་གཤེགས་ཏེ། བྱང་སྒོ་ནས་གཡས་ཕྱོགས་སུ་འཁོར་ཏེ་ནུབ་སྒོར་ཞུགས་སོ། །དེ་བཞིན་དུ་ལན་གསུམ་གྱི་བར་དུ་བསྐོར་ནས་སྟེང་གི་ནམ་མཁའ་ལ་དལ་གྱིས་གཤེགས་ཏེ། ཕྱིར་ཡང་ནུབ་སྒོར་ཞུགས་ནས་ཤར་སྒོར་བྱུང་སྟེ། གཡས་ནས་བསྐོར་ནས་བྱང་སྒོར་ཞུགས་སོ། །དེ་ནས་ཡང་ནམ་མཁའ་ལ་དལ་གྱིས་གཤེགས་ཏེ། ལྷོ་སྒོར་བྱུང་ནས་གཡས་ནས་བསྐོར་ཏེ་བྱང་སྒོར་ཞུགས་ནས་ལན་བཞི་བསྐོར་ཏོ། །དེ་བཞིན་དུ་གཡས་ཕྱོགས་ནས་གྲོང་ཁྱེར་རྩྭ་མཆོག་ལན་བདུན་གྱི་བར་དུ་བསྐོར་ཏོ། །དེའི་ཚེ་རིན་པོ་ཆེ་སྣ་བདུན་གྱི་པུར་སྒྲོམ་གྲོང་ཁྱེར་གྱི་ནང་དུ་ཞུགས་པ་ན་འཁོར་མང་པོ་ཐམས་ཅད་མཆི་མ་བླགས་ཏེ་ངུས་ནས་སོ་སོ་ནས་གྲངས་མེད་པའི་སྤོས་ཀྱི་ཤིང་ཙན་དན་
དང་། རིན་པོ་ཆེའི་སྤོས་ཀྱི་ཤིང་རི་མོ་དང་བསུང་དུ་ལྡན་པ་འཇིག་རྟེན་གྱི་ཁམས་ཀུན་བྲོ་བར་བྱེད་པ་ཐོགས་ཤིང་གཞན་ཡང་རིན་པོ་ཆེའི་རྒྱལ་མཚན་དང་། བ་དན་དང་། གདུགས་དང་། སྤོས་དང་། མེ་ཏོག་དང་། དོ་ཤལ་གྲངས་མེད་པ་བཤམས་ཏེ། དེ་བཞིན་གཤེགས་པའི་མདད་མཛད་པའི་གནས་སུ་མཆོད་པ་བྱས་སོ། ། དེའི་ཚེ་ཕྱོགས་བཞིའི་མགོན་པོ་ཆེན་པོ་དང་། ལྷའི་འཁོར་དང་བཅས་ཏེ་ངུས་ནས་ལྷ་རྫས་ཀྱི་ཙན་དན་དང་། ཨ་ག་རུ་ཕྱི་ནང་ཀུན་བསུང་དང་ལྡན་པ། བསུང་གིས་མདད་པ། སྦོམས་ཤིང་རྟའི་འཁོར་ལོ་ཙམ་ལྔ་བརྒྱ་དང་། དེ་མ་ཡིན་པའི་རིན་པོ་ཆེའི་སྤོས་དང་། རིན་པོ་ཆེའི་རྒྱལ་མཚན་དང་། རིན་པོ་ཆེའི་གདུགས་དམ་པ་དང་། མེ་ཏོག་གི་ཕྲེང་བ་ལ་སོགས་པ་བཤམས་ཏེ། མཆོད་པ་བྱ་བའི་ཕྱིར་མདད་མཛད་པའི་གནས་སུ་ལྷགས་སོ། །གནམ་རིམ་པ་གཉིས་ཀྱི་ལྷས་ནི་ཤིང་སྟོང་བཤམས་སོ། །གནམ་རིམ་པ་གསུམ་པའི་ལྷས་ནི་ཤིང་ཉིས་སྟོང་བཤམས་སོ། །རིམ་པ་བཞི་པའི་ལྷས་ནི་ཤིང་སུམ་སྟོང་བཤམས་སོ། །རིམ་པ་ལྔ་པའི་ལྷས་ནི་ཤིང་བཞི་སྟོང་བཤམས་སོ། །རིམ་པ་དྲུག་པའི་ལྷས་ནི་ཤིང་ལྔ་སྟོང་སྙེད་བཤམས་ཏེ། སོ་སོ་ནས་བ་དན་དང་། མེ་ཏོག་ལ་སོགས་པ་ཐོགས་ཏེ་ངུས་ནས་མཆོད་པ་བྱ་བའི་ཕྱིར་མདད་མཛད་པའི་གནས་སུ་ལྷགས་སོ། །དེའི་ཚེ་གཟུགས་ཡོད་པའི་ཁམས་དང་གཟུགས་མེད་པའི་ཁམས་ཀྱི་ལྷ་རྣམས་ནི་སྤོས་དང་། མེ་ཏོག་འབའ་ཞིག་ཐོགས་ཏེ། མདད་མཛད་པའི་གནས་སུ་ལྷགས་ནས་མཆོད་པ་བྱེད་དོ། །དེ་ནས་འཇིག་རྟེན་དུ་བཅས་པ་འཁོར་མང་པོ་རྣམས་ཀྱང་། སོ་སོ་ནས་སྤོས་ཙན་དན་གྱི་ཤིང་དང་། ཨ་ག་རུ་དང་། མེ་ཏོག་དང་། སྤོས་དང་། བ་དན་དང་། གདུགས་ལ་སོགས་པ་ཐོགས་ཏེ། ངུས་ནས་མཆོད་པ་བྱ་བའི་ཕྱིར་མདད་ཀྱི་གནས་སུ་ལྷགས་སོ། །དེའི་ཚེ་མ་འགགས་པ་མིག་མཆི་མས་གང་སྟེ་དྲག་ཏུ་ངུས་ནས། ལྷ་དང་མི་རྣམས་ལས་ཤིང་ཙན་དན་དང་། ཨ་ག་རུ་དྲུག་སྟོང་སྙེད་རི་མོ་དང་བསུང་དུ་ལྡན་པ། ཀུན་དུ་ཤིན་ཏུ་མདད་པ་བསླངས་ནས་མདད་ཀྱི་གནས་སུ་བཞག་གོ །མཚོ་མ་དྲོས་པ་ངོས་བཞི་ཆུ་ཞེང་གབ་པ་དཔག་ཚད་ཉིས་བརྒྱ་ཡོད་དེ། གཙང་པོ་ཆེན་པོ་བཞི་འབབ་བོ། །བཅོམ་
ལྡན་འདས་ཐོག་མ་མངོན་པར་སངས་རྒྱས་པ་ན་གཙང་པོ་གང་གཱའི་བྱང་ཕྱོགས་ཀྱི་འགྲམ་ན་ཙན་དན་གྱི་ཤིང་དྲུང་ཅིག་སྐྱེས་ཏེ། སྦོམས་ཁྱད་ཤིང་རྟའི་འཁོར་ལོ་ཙམ་ལ་གནམ་འཕང་དུ་ཤིང་ཏ་ལ་བདུན་སྲིད་དེ། བསུང་ཤིན་ཏུ་མདད་པས་དེ་བཞིན་གཤེགས་པ་ལ་མཆོད་པ་བྱེད་དོ། །ཤིང་དེའི་ལྷ་ཡང་ཤིང་དེ་དང་ཅིག་ཅར་སྐྱེས་ཏེ། རྟག་ཏུ་སྤོས་དེས་སངས་རྒྱས་ཀུན་ལ་མཆོད་པར་བྱེད་དོ། །སངས་རྒྱས་མྱ་ངན་ལས་འདས་པ་ན་ཙན་དན་གྱི་ཤིང་དེ་ཡང་ལོ་མ་དང་ཤུན་པ་ལྷགས་ནས་སྐམས་ཏེ་ཤིང་གི་ལྷ་ཡང་དེར་ཤིའོ། །དེ་ནས་ལྷ་གཞན་རྣམས་ཀྱིས་ཤིང་དེ་བླངས་ནས་མདད་ཀྱི་གནས་སུ་བསྐྱལ་ཏེ་མཆོད་པ་བྱས་སོ། །ས་གཞི་དེ་ནི་དུས་གསུམ་གྱི་སངས་རྒྱས་ཐམས་ཅད་ཀྱི་མདད་ཀྱི་གནས་ཏེ། སངས་རྒྱས་བཅོམ་ལྡན་འདས་སྔོན་གྱི་སྨོན་ལམ་གྱི་མཐུས་གནས་དེ་ཉིད་དུ་མདད་མཛད་དོ། །གནས་དེ་ན་སྔོན་གྱི་སངས་རྒྱས་རྣམས་ཀྱི་རིན་པོ་ཆེའི་མཆོད་རྟེན་ཡང་གྲངས་མེད་པ་ཞིག་ཡོད་དོ། །གནས་དེ་ནི་རྡོ་རྗེ་ལྟར་མི་འཇིག་ཅིང་ཤིན་ཏུ་བརྟན་པའོ། །དེའི་ཚེ་དེ་བཞིན་གཤེགས་པའི་པུར་སྒྲོམ་ནམ་མཁའ་ལ་དལ་གྱིས་གཤེགས་ཏེ་མདད་ཀྱི་གནས་སུ་ཕྱིན་པ་དང་། བགས་ཀྱིས་ཇེ་དམའ་ཇེ་དམའ་ནས་རིན་པོ་ཆེ་སྣ་བདུན་གྱི་ཁྲི་དར་གྱི་ལྡ་ལྡི་དང་། དོ་ཤལ་ཡོངས་སུ་བརྒྱན་པ་ལ་གཤེགས་ཏེ། དེ་ནས་དེའི་བར་དུ་ཞག་བདུན་འདས་སོ། །དེའི་ཚེ་རྩྭ་མཆོག་གི་གྲོང་ཁྱེར་གྱི་སྐྱེས་པ་དང་། བུད་མེད་ཐམས་ཅད་དང་། གྲངས་མེད་པའི་བྱང་ཆུབ་སེམས་དཔའ་དང་། ཉན་ཐོས་དང་། སུམ་ཅུ་རྩ་གསུམ་གནམ་གྱི་ལྷ་ཐམས་ཅད་མྱ་ངན་གྱིས་ཡིད་གདུངས་ཏེ་རབ་ཏུ་ངུས་ནས། བ་དན་དང་། གདུགས་དང་། རིན་པོ་ཆེའི་རྒྱལ་མཚན་དང་། སྤོས་དང་། མེ་ཏོག་ལ་སོགས་པ་ཐོགས་ཏེ། སངས་རྒྱས་ཀྱི་པུར་སྒྲོམ་གྱི་ཕྱི་བཞིན་ཞག་བདུན་གྱི་བར་དུ་འབྲང་ཡང་སངས་རྒྱས་ཀྱི་བྱིན་གྱི་རླབས་ཀྱིས་ལྷ་དང་མི་ཐམས་ཅད་ལ་སྐོམ་པ་དང་བཀྲེས་པའི་འདུ་ཤེས་མེད་དེ། ཟས་མི་སེམས་ཀྱི་དེ་བཞིན་གཤེགས་པ་དྲན་པའི་ཕྱིར་ངུ་བ་འབའ་ཞིག་བྱེད་དོ། །དེ་བཞིན་གཤེགས་པའི་པུར་དེ་ལྟར་ཞག་བདུན་ལོན་ནས་སྒྲོམ་གྱི་ནང་ནས་ཕྱིར་དབྱུང་བ་ན་རྩྭ་མཆོག་གི་གྲོང་ཁྱེར་གྱི་སྐྱེས་པ་དང་། བུད་མེད་དང་། འཁོར་གྲངས་མེད་པ་ཐམས་ཅད་ཀྱིས་ངུས་པའི་སྒྲས་འཇིག་རྟེན་གྱི་ཁམས་ཀྱང་
གཡོས་ནས། གཞན་ཡང་མེ་ཏོག་དང་། སྤོས་དང་། ལྷའི་རྒྱལ་མཚན་དང་། གདུགས་དང་། གྲངས་མེད་པའི་ལྷའི་རོལ་མོ་མང་པོས་སངས་རྒྱས་ཀྱི་པུར་ལ་ངུས་ཏེ་མཆོད་པ་བྱས་སོ། །དེའི་ཚེ་འཁོར་མང་པོ་རྣམས་མཆི་མ་བླགས་ནས་རས་དཀར་པོ་འཇམ་པོས་ལག་པ་དཀྲིས་ཏེ་བསྟི་སྟང་དང་བཅས་པའི་སེམས་ཀྱིས་རིན་པོ་ཆེའི་སྒྲོམ་ནས་དེ་བཞིན་གཤེགས་པའི་སྐུ་གསེར་བཙོ་མའི་ཁ་དོག་དང་ལྡན་པ། མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུར་ལྡན་པ། རྡོ་རྗེ་ལྟར་མི་འཇིག་པའི་ཆོས་ཅན་དལ་གྱིས་ཕྱུང་སྟེ། རིན་པོ་ཆེ་སྣ་བདུན་གྱི་ཁྲི་ལ་བཞག་གོ །དེའི་ཚེ་ན་འཁོར་མང་པོ་རྣམས་ཤིན་ཏུ་ངུས་པས་ཕྱོགས་བཅུའི་འཇིག་རྟེན་གྱི་ཁམས་ཀུན་གཡོས་པར་གྱུར་ཏོ། །གཞན་ཡང་སྤོས་དང་། མེ་ཏོག་དང་། གདུགས་དང་། རོལ་མོ་ལ་སོགས་པས་མཆོད་པ་བྱས་ནས་ངུས་སོ། །དེས་འཁོར་མང་པོ་རྣམས་ངུ་ཞིང་མཆི་མ་བླགས་ནས་སོ་སོ་ནས་སྤོས་ཆུ་དང་། བྱུག་སྤོས་གྲངས་མེད་པ་སྙེད་ཀྱིས་དེ་བཞིན་གཤེགས་པའི་སྐུ་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་དང་ལྡན་པ། བསོད་ནམས་དང་ཡེ་ཤེས་ཀྱི་ཚོགས་ཚད་མེད་པ་དང་ལྡན་པ། རྡོ་རྗེ་ལྟ་བུར་མི་འཇིག་པ། གསེར་བཙོ་མའི་ཁ་དོག་ལྟ་བུ། དབུ་དང་ཞབས་ཀྱི་བར་དུ་བཀྲུས་སོ། །དེ་ནས་རིན་པོ་ཆེའི་སྒྲོམ་ཡང་ཡོངས་སུ་དག་པར་བཀྲུས་སོ། །དེའི་ཚེ་འཁོར་མང་པོ་རྣམས་ཤིན་ཏུ་ངུས་ཏེ་མཆི་མ་བླགས་ནས་ལྷའི་སྤོས་དང་། རིན་པོ་ཆེ་སྣ་བདུན་གྱི་མེ་ཏོག་གིས་གཏོར་ནས་གྲངས་མེད་པའི་རིན་པོ་ཆེའི་རྒྱལ་མཚན་དང་། གདུགས་དང་། བ་དན་ནམ་མཁའི་ཁམས་ཡོངས་སུ་གང་བས་མཆོད་པ་བྱས་ནས་ངུས་སོ། །དེ་ནས་འཁོར་མང་པོ་རྣམས་ངུས་བཞིན་དུ་གྲངས་མེད་པའི་ཤིང་བལ་ཐོགས་ནས་དེ་བཞིན་གཤེགས་པའི་སྐུ་གསེར་བཙོ་མ་ལྟ་བུ་དཀྲིས་སོ། །དེ་ལྟར་ཤིང་བལ་གྱིས་དཀྲིས་པའི་སྟེང་དུ་རིན་ཐང་མེད་པའི་རས་དཀར་པོ་ཡུག་སྟོང་གིས་དེ་བཞིན་གཤེགས་པའི་སྐུ་དཀྲིས་སོ། །དེ་ལྟར་དཀྲིས་ནས་འཁོར་མང་པོ་རྣམས་བརྒྱལ་བ་ཙམ་དུ་ཤིན་ཏུ་ངུས་ནས། གཞན་ཡང་རིན་པོ་ཆེའི་མེ་ཏོག་དང་། སྤོས་དང་། རིན་པོ་ཆེའི་རྒྱལ་མཚན་དང་། རིན་པོ་ཆེའི་གདུགས་དང་། ལྷའི་རོལ་མོ་ལ་སོགས་པས་མཆོད་པ་བྱས་ཏེ་ངུས་སོ། །དེ་ནས་འཁོར་མང་པོ་རྣམས་ངུས་བཞིན་དུ་སོ་སོ་
ནས་རས་དཀར་པོ་སླེབ་མོས་དེ་བཞིན་གཤེགས་པའི་སྐུ་བཏེག་ནས་རིན་པོ་ཆེའི་སྒྲོམ་གྱི་ནང་དུ་བཅུག་སྟེ། མར་བསུང་ཅན་གྱིས་བཀང་ནས་སྒྲོམ་གྱི་ཁ་བཅད་དོ། །དེ་ནས་འཁོར་མང་པོ་རྣམས་ཤིན་ཏུ་ངུ་བའི་སྒྲ་འཇིག་རྟེན་གྱི་ཁམས་ཀུན་དུ་གྲགས་པར་གྱུར་ཏེ། གཞན་ཡང་མེ་ཏོག་དང་། སྤོས་དང་། བ་དན་དང་། གདུགས་དང་། རོལ་མོ་ལ་སོགས་པས་རིན་པོ་ཆེའི་སྒྲོམ་ལ་མཆོད་ནས་ངུས་སོ། །དེ་ནས་འཁོར་མང་པོ་ཐམས་ཅད་ཀྱིས་བསགས་པའི་སྤོས་ཀྱི་ཤིང་དྲི་བསུང་ཤིན་ཏུ་མདད་པ་རི་རབ་ལྷུན་པོ་ཙམ་བརྩིགས་ཏེ་བཅེར་བ་སྤོས་ཀྱི་ཁང་པ་བརྩེགས་མ་ལྟ་བུར་གྱུར་ནས་ངོས་བཞི་རིན་པོ་ཆེ་སྣ་བདུན་གྱིས་བརྒྱན་ཅིང་གདུགས་དང་། རྒྱལ་མཚན་དང་། བ་དན་དང་། སྤོས་དང་། མེ་ཏོག་དང་། དོ་ཤལ་དང་། དར་གྱི་ལྡ་ལྡི་སྤྲིན་ལྟ་བུར་ནམ་མཁའི་ཁམས་ཡོངས་སུ་གང་བ་ཙམ་གྱིས་བརྒྱན་ནས་ལྷའི་རོལ་མོའི་མཆོད་པ་བྱས་སོ།། །།འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་ལྔ་བཅུ་དྲུག་པ་སྟེ་ཐ་མ། དེ་ནས་ལྷ་དང་། མི་དང་། འཁོར་རྣམས་ཀྱིས་པུར་སྒྲོམ་བཏེག་སྟེ། སྤོས་ཀྱི་ཁང་པ་བརྩེགས་མའི་སྟེང་དུ་བཞག་པ་ན་ཤིན་ཏུ་སྐད་ཆེན་པོ་ཕྱུང་སྟེ་བྲང་བརྡུངས་ནས་ངུས་པའི་སྒྲ་ཆེན་པོས་སྟོང་ཆེན་པོའི་འཇིག་རྟེན་གྱི་ཁམས་སུ་གྲགས་ཤིང་གཡོས་པར་གྱུར་ཏེ། གཞན་ཡང་རིན་པོ་ཆེའི་རྒྱལ་མཚན་དང་། གདུགས་དང་། སྤོས་དང་། མེ་ཏོག་དང་། ལྷའི་རོལ་མོས་མཆོད་ནས་ངུས་སོ། །དེ་ནས་བསྟི་སྟང་བྱ་བའི་ཕྱིར་སོ་སོ་ནས་རས་དཀར་པོའི་སླེབ་མོས་དེ་བཞིན་གཤེགས་པའི་པུར་སྒྲོམ་བཏེག་སྟེ། ཤིན་ཏུ་བརྒྱན་པའི་སྤོས་ཀྱི་ཤིང་གི་སྟེང་དུ་བཞག་ནས་ཆོ་ངེས་འདོན་ཞིང་བརྒྱལ་ཏོ། །དེ་ནས་ཕྱིར་སངས་ནས་འདི་སྐད་དུ་ཀྱི་ཧུད་ཀྱི་ཧུད་འཇིག་རྟེན་ན་མགོན་དང་སྐྱབས་མེད་པར་གྱུར་ཏོ་ཞེས་སྨྲས་ནས་མཆི་མ་བླགས་ཏེ། མེ་ཏོག་དང་། སྤོས་དང་། རིན་པོ་ཆེའི་རྒྱལ་མཚན་དང་། བ་དན་དང་། གདུགས་དང་། ལྷའི་རོལ་མོས་མཆོད་པ་བྱས་སོ། །དེ་ནས་དེ་བཞིན་གཤེགས་པའི་པུར་སྒྲོམ་སྤོས་ཀྱི་ཤིང་གི་སྟེང་དུ་བཞག་སྟེ། མེ་གཏོང་བ་ན་འཁོར་མང་པོ་ཐམས་ཅད་ཤིན་ཏུ་ངུས་ཏེ། སྟོང་ཆེན་པོའི་འཇིག་རྟེན་གྱི་ཁམས་སུ་གྲགས་པར་གྱུར་ཏེ། ངུས་ནས་དེ་བཞིན་གཤེགས་པའི་པུར་སྒྲོམ་དེ་ལ་མཆོད་པ་བྱས་སོ། །དེ་ནས་འཁོར་མང་པོ་རྣམས་ངུས་ནས་རིན་པོ་
ཆེ་སྣ་བདུན་གྱི་སྤོས་ཀྱི་སྒྲོན་མ་ཤིང་རྟའི་འཁོར་ལོ་ཙམ་འཇིག་རྟེན་གྱི་ཁམས་སྣང་བར་བྱས་ནས་ཐམས་ཅད་དུས་གཅིག་ཏུ་སྐད་ཆེན་པོ་ཕྱུང་སྟེ་ངུས་པས་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་གཡོས་ནས་མེ་ཏོག་དང་སྤོས་ཀྱིས་ཡོངས་སུ་མཆོད་པ་བྱས་སོ། །དེའི་ཚེ་རིན་པོ་ཆེའི་སྒྲོན་མ་སྤོས་ཀྱི་ཤིང་བརྩིགས་པའི་དྲུང་དུ་ཕྱིན་མ་ཐག་ཏུ་རང་ཤིའོ། །དེ་ནས་ལྷ་ཐམས་ཅད་ཀྱིས་ཀྱང་བླ་ན་མེད་པའི་རིན་པོ་ཆེ་སྣ་བདུན་གྱི་མེ་ཆེན་པོ་ཐོགས་ཏེ། མེའི་འོད་ཀྱིས་ཀུན་དུ་སྣང་བར་བྱས་ནས་ངུས་བཞིན་དུ་སྤོས་ཀྱི་ཤིང་བརྩིགས་པའི་དྲུང་དུ་ཕྱིན་མ་ཐག་ཏུ་མེ་དེ་ཡང་རང་ཤིའོ། །དེ་ནས་རྒྱ་མཚོའི་ལྷ་ཐམས་ཅད་ཀྱང་རྒྱ་མཚོའི་ནང་གི་མེ་རིན་པོ་ཆེ་སྣ་བདུན་གྱི་སྒྲོན་མའི་འོད་ཟེར་གྲངས་མེད་པ་དང་ལྡན་པ་ཐོགས་ཏེ། སྤོས་ཀྱི་ཤིང་བརྩིགས་པ་ལ་བསྲེགས་ན་མེ་དེ་ཡང་རང་ཤིའོ། །དེའི་ཚེ་འཁོར་མང་པོ་རྣམས་ཤིན་ཏུ་ངུས་ནས་མཆོད་པ་ཐམས་ཅད་ཀྱིས་མཆོད་དེ། དེ་བཞིན་གཤེགས་པ་མཛད་པ་ཅིའི་མཐར་མ་ཕྱིན་ན། སྤོས་ཀྱི་ཤིང་ལ་མེ་མཆེད་དུ་མ་བཏུབ་པ་མ་རྟོགས་སོ། །དེའི་ཚེ་བཅོམ་ལྡན་འདས་ཀྱིས་ཐུགས་རྗེ་ཆེན་པོ་ཀུན་ལ་ཁྱབ་པ་འོད་སྲུང་གི་འཁོར་ལ་གཞེས་ཏེ་གདོད་ཞུགས་ཀྱིས་བཞེན་ཏོ། །དེའི་ཚེ་ན་འོད་སྲུང་ཆེན་པོ་འཁོར་ལྔ་བརྒྱ་དང་བྱ་རྒོད་འཕུངས་པའི་རི་ལ་འཁོད་དོ། །རི་དེ་རྩྭ་མཆོག་གྲོང་ཁྱེར་ནས་དཔག་ཚད་ལྔ་བཅུ་ཡོད་དེ། དེ་ན་ལུས་དང་སེམས་རབ་ཏུ་ཞི་བའི་ཏིང་ངེ་འཛིན་ལ་ཞུགས་པ་ལས་དངངས་ནས་ལུས་ཀྱང་འདར་ཞིང་གཡོས་སོ། །དེ་ནས་ཏིང་ངེ་འཛིན་ལས་བྱུང་སྟེ་བལྟས་ན་ས་དང་རི་ཀུན་རབ་ཏུ་གཡོས་པ་མཐོང་ནས། དེ་བཞིན་གཤེགས་པ་མྱ་ངན་ལས་འདས་པར་ཤེས་ཏེ། འཁོར་རྣམས་ལ་འདི་སྐད་ཅེས་སྨྲས་སོ། །ངའི་སྟོན་པ་ཆེན་པོ་ཡོངས་སུ་མྱ་ངན་ལས་འདས་ནས་ཞག་བདུན་ལོན་ཏེ། སྒྲོམ་གྱི་ནང་དུ་ཡང་བཅུག་གོ །ཀྱི་ཧུད་ཀྱི་ཧུད་མྱུར་དུ་དེ་བཞིན་གཤེགས་པ་གང་ན་བར་དོང་ངོ་། །གལ་ཏེ་ཞུགས་ལ་བཞེན་པར་གྱུར་ན་དེ་བཞིན་གཤེགས་པའི་སྐུ་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུར་ལྡན་པ་ཡོངས་སུ་
དག་པ་མཐོང་བར་མི་འགྱུར་རོ་ཞེས་སྨྲས་ནས། འོད་སྲུང་གིས་བཅོམ་ལྡན་འདས་ལ་བསྟི་སྟང་བྱ་བའི་ཕྱིར། རྫུ་འཕྲུལ་གྱིས་ནམ་མཁའ་ལ་མ་སོང་གི །འཁོར་དང་བཅས་ཏེ་ལམ་དུ་ཞུགས་ནས། དེ་བཞིན་གཤེགས་པ་གང་ན་བར་མྱུར་དུ་ངུས་བཞིན་དུ་སོང་ནས་ཞག་བདུན་གྱིས་རྩྭ་མཆོག་གི་གྲོང་ཁྱེར་དུ་ཕྱིན་ཏོ། །གྲོང་ཁྱེར་གྱི་ཤར་སྒོར་བྲམ་ཟེ་ཞིག་ལྷའི་མེ་ཏོག་གཅིག་ཐོགས་ཏེ་འོངས་པ་དང་ཕྲད་ནས། འོད་སྲུང་གིས་དེ་ལ་ཀྱེ་ག་ལས་འོངས་ཞེས་དྲིས་སོ། །དེས་སྨྲས་པ། བདག་སངས་རྒྱས་མྱ་ངན་ལས་འདས་པ་ཞུགས་ལ་བཞེན་པའི་གནས་ནས་འོངས་སོ་ཞེས་སྨྲས་སོ། །འོད་སྲུང་གིས་མེ་ཏོག་འདི་དག་ག་ལས་རྙེད་ཅེས་དྲིས་ན་ཞུགས་ལ་བཞེན་པའི་གནས་སུ་ལྷའི་མེ་ཏོག་འདི་རྙེད་དོ་ཞེས་སྨྲས་སོ། །འོད་སྲུང་གིས་མེ་ཏོག་འདི་ཁོ་བོ་བསླང་ངོ་ཞེས་སྨྲས་ན་མི་རུང་ངོ་། །བདག་འདི་གཉེན་པ་རྣམས་བསྟེན་ཅིང་ཁྱིམ་དུ་མཆོད་པ་བྱར་འགྲོའོ་ཞེས་སྨྲས་སོ། །འོད་སྲུང་གིས་ཅུང་བལྟའོ་ཞེས་སྨྲས་ནས་ལག་གིས་བླངས་ཏེ། སྤྱི་བོ་ལ་བཞག་མ་ཐག་དེར་བརྒྱལ་ཏེ་ས་ལ་འགྱེལ་ཏོ། །རིང་ཞིག་ལོན་པ་དང་ཕྱིར་སངས་ནས་ངུས་ཏེ། དེ་བཞིན་གཤེགས་པའི་སྐུ་དཔེ་བྱད་བཟང་པོ་བརྒྱད་ཅུ་དང་ལྡན་པ། གསེར་བཙོ་མའི་ཁ་དོག་ལྟ་བུ་ད་ཕྱིན་ཆད་མི་མཐོང་ངོ་ཞེས་སྨྲས་ནས་འཁོར་དང་བཅས་ཏེ་གྲོང་ཁྱེར་རྩྭ་མཆོག་གི་བྱང་སྒོར་ཞུགས་ཏེ། གྲོང་ཁྱེར་གྱི་ནང་དུ་ཕྱིན་ནས་དགེ་སློང་གི་གནས་ཞིག་ཏུ་ཞུགས་ནས་དགེ་སློང་དག་ཅིག་འདུས་ཤིང་འཁོད་པ་དག་མཐོང་ངོ་། །དགེ་སློང་དེ་དག་གིས་འོད་སྲུང་ལ་ཁྱོད་ལམ་རིང་པོ་ནས་འོངས་ན་ཉོན་མོངས་ཤིང་མི་བདེ་བར་མ་གྱུར་ཏམ། བདེ་བར་འདུག་ལ་བསོད་སྙོམས་སྡོད་ཅིག་ཅེས་སྨྲས་སོ། །འོད་སྲུང་གིས་སྨྲས་པ། ཁོ་བོའི་སྟོན་པ་ཆེན་པོ་མྱ་ངན་ལས་འདས་ན། བདག་བྲོད་པ་ཅི་ཞིག་ཡོད་དེ། འདིར་བདེ་བར་འདུག་ཅིང་བསོད་སྙོམས་བསྡད་དུ་རུང་ངམ། དགེ་སློང་རྣམས་ཀྱིས་སྨྲས་པ། ཁྱོད་ཀྱི་སྟོན་པ་སུ་ཡིན། འོད་སྲུང་གིས་སྨྲས་པ། ཅི་ཁྱེད་མི་ཤེས་སམ། ཀྱི་ཧུད་བདག་གི་སྟོན་པ་ནི་སངས་རྒྱས་བཅོམ་
ལྡན་འདས་ཡིན་ཏེ། ད་ཡོངས་སུ་མྱ་ངན་ལས་འདས་སོ། །དགེ་སློང་རྣམས་ཀྱིས་དེ་སྐད་ཅེས་ཐོས་ནས་སོ་སོ་ནས་འདི་སྐད་ཅེས་སྨྲས་སོ། །ལེགས་སོ་ལེགས་སོ། །དེ་བཞིན་གཤེགས་པ་འཇིག་རྟེན་ན་བཞུགས་ན་ཚུལ་ཁྲིམས་དམ་པས་བདག་ཅག་མི་བཟོད་དེ། བདག་ཅག་དེ་བཞིན་དུ་སྤྱོད་མི་ནུས་པ་ལས། ད་མྱ་ངན་ལས་འདས་ནས་ཚུལ་ཁྲིམས་བསྡམས་པ་ཡང་ལྷོད་པར་གྱུར་གྱིས་རེ་ཞིག་མ་རིངས་པར་བསོད་སྙོམས་སྡོད་ཅིག་ཅེས་སྨྲས་སོ། །སངས་རྒྱས་ཀྱི་བྱིན་གྱི་རླབས་ཀྱིས་ལྷ་རྣམས་དང་། འོད་སྲུང་གི་འཁོར་རྣམས་རྣ་བ་འགགས་པར་བྱས་པས་དགེ་སློང་སྡིག་ཅན་རྣམས་ཀྱིས་སྨྲས་པའི་ཚིག་ཐོས་པར་མ་གྱུར་གྱི། འོད་སྲུང་འབའ་ཞིག་གིས་ཐོས་སོ། །དེ་ནས་འོད་སྲུང་འཁོར་རྣམས་དང་བཅས་ཏེ་ཤིན་ཏུ་ངུས་ནས་སངས་རྒྱས་ག་ན་བར་མྱུར་བར་སོང་ངོ་། །དེའི་ཚེ་འོད་སྲུང་འཁོར་དང་བཅས་ཏེ་འདི་སྙམ་དུ་བསམས་སོ། །བདག་ཅག་གིས་ཇི་ལྟ་བུར་མཆོད་པའི་ཡོ་བྱད་རྙེད་ཅིང་སངས་རྒྱས་ལ་མཆོད་པར་འགྱུར་སྙམ་བསམས་ནས་འོད་སྲུང་གིས་འདི་སྐད་ཅེས་སྨྲས་སོ། །བདག་ཀྱང་གྲོང་ཁྱེར་འདིར་སྐྱེས་ཏེ། མཆོད་པའི་ཡོ་བྱད་བསླངས་ན་རྙེད་པར་འགྱུར་ཡང་དག་སྙམ་ནས་འཁོར་རྣམས་དང་བཅས་ཏེ་གྲོང་ཁྱེར་དེར་མཐར་གྱིས་བསླངས་སོ། །མཐར་གྱིས་བསླངས་ནས་རས་དཀར་པོ་བཟང་པོ་ཡུག་སྟོང་ཡང་རྙེད། དེ་མ་ཡིན་པ་གཞན་ཡང་ཤིང་བལ་གྲངས་མེད་པ་དང་། ཚད་མེད་པའི་མེ་ཏོག་རིན་པོ་ཆེ་དང་། བྱུག་སྤོས་དང་། སྤོས་ཆུ་དང་། སྤོས་ཀྱི་མར་དང་། རིན་པོ་ཆེའི་རྒྱལ་མཚན་དང་། རིན་པོ་ཆེའི་གདུགས་དང་། བ་དན་དང་། རོལ་མོ་དང་། དོ་ཤལ་རྣམ་པ་སྣ་ཚོགས་དང་། དར་གྱི་ལྡ་ལྡི་ལ་སོགས་པ་རྙེད་དོ། །དེ་ནས་འོད་སྲུང་འཁོར་དང་བཅས་ཏེ་མཆོད་པའི་ཡོ་བྱད་ཅི་རྙེད་པ་ཐོགས་ནས་མྱུར་བར་གྲོང་ཁྱེར་གྱི་ནུབ་སྒོར་བྱུང་ནས། འོད་སྲུང་གིས་ཞུགས་ལ་བཞེན་པའི་གནས་ན། འཁོར་མང་པོ་ཐམས་ཅད་ཤིན་ཏུ་ངུ་ཞིང་ཆོ་ངེས་འདེབས་པའི་སྒྲ་ཡང་ཐོས། ཀུན་གྱིས་བརྒྱ་བྱིན་དབང་
ཕྱུག་ལ་ད་མཆོད་པ་ནི་བྱས་ན་བཞེན་པའི་མེ་ག་ལས་རྙེད་ཅེས་འདྲི་བ་དང་། བརྒྱ་བྱིན་གྱིས་འཁོར་མང་པོ་རྣམས་ལ་རེ་ཞིག་འོད་སྲུང་ལ་བསྡད་དགོས་སོ་ཞེས་བྱ་བ་ཡང་ཐོས་ཏེ། བརྒྱ་བྱིན་གྱིས་འཁོར་མང་པོ་རྣམས་ལ་དེ་སྐད་ཅེས་སྨྲས་པ་ཐོས་མ་ཐག་ཏུ་འོད་སྲུང་ཆེན་པོ་འཁོར་དང་བཅས་ཏེ་ངུ་བཞིན་དུ་དེར་ལྷགས་སོ། །འཁོར་གྱི་དཀྱིལ་འཁོར་རྣམས་ཀྱིས་གོ་ཕྱེ་ནས། འོད་སྲུང་གིས་རྒྱང་ནས་སངས་རྒྱས་ཀྱི་པུར་སྒྲོམ་མཐོང་བ་དང་། འཁོར་དང་བཅས་ཏེ་ཕྱག་འཚལ་ནས་ཤིན་ཏུ་ངུས་ཏེ་ཆོ་ངེས་བཏབ་ནས་བརྒྱལ་ལོ། །དེ་ནས་རིང་ཞིག་ལོན་ནས་ཕྱིར་སངས་ཏེ་བགས་ཀྱིས་དྲུང་དུ་བསྙེན་ནས། འཁོར་མང་པོ་རྣམས་ལ་འདི་སྐད་ཅེས་སྨྲས་སོ། །བདག་གིས་ཇི་ལྟ་བུར་འཕགས་པའི་པུར་སྒྲོམ་དབྱེ་བར་བགྱི། འཁོར་རྣམས་ཀྱིས་སྨྲས་པ། བཅོམ་ལྡན་འདས་ཡོངས་སུ་མྱ་ངན་ལས་འདས་ནས་དེ་རིང་དུ་ཞག་བདུན་གསུམ་ལོན་ཏེ། དེ་ཙམ་ཞིག་པ་སྙམ་ན་ཇི་ལྟར་སྒྲོམ་དབྱེ་བར་བྱ། འོད་སྲུང་གིས་སྨྲས་པ། དེ་བཞིན་གཤེགས་པའི་སྐུ་ནི་རྡོ་རྗེ་ལྟ་བུར་སྲ་བ། བརྟན་པ། རྟག་པ། བདེ་བ། ཡོངས་སུ་དག་པ། མི་འཇིག་པ་སྟེ། ཡོན་ཏན་གྱི་བསུང་ཤིན་ཏུ་མདད་པ། ཙན་དན་གྱི་རི་ལྟ་བུ་ཡིན་ནོ་ཞེས་སྨྲས་ནས་ཤིན་ཏུ་ངུས་ཏེ། དེ་བཞིན་གཤེགས་པའི་པུར་སྒྲོམ་གྱི་དྲུང་དུ་བསྙེན་ཏོ། །དེའི་ཚེ་དེ་བཞིན་གཤེགས་པའི་ཐུགས་རྗེ་ཆེན་པོ་ཀུན་ལ་སྙོམས་པས་འོད་སྲུང་གི་ཕྱིར་པུར་སྒྲོམ་གྱི་ཁ་རང་བྱེ་ནས་རས་དཀར་པོ་སྟོང་གིས་དཀྲིས་པ་དང་ཤིང་བལ་གྱིས་དཀྲིས་པ་ཡང་རང་གྲོལ་ཏེ། མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་བརྒྱན་པ། གསེར་བཙོ་མའི་ཁ་དོག་ལྟ་བུ། སྲ་ཞིང་བརྟན་པའི་སྐུ་འོད་སྲུང་ལ་མངོན་པར་བསྟན་ཏོ། །འོད་སྲུང་འཁོར་དང་བཅས་པས་དེ་ལྟ་བུ་དག་མཐོང་ནས་ཤིན་ཏུ་ངུས་ཏེ་བརྒྱལ་ནས་འགྱེལ་ཏོ། །དེ་ནས་རིང་ཞིག་ལོན་པ་དང་ཕྱིར་སངས་ནས་མིག་མཆི་མས་གང་བཞིན་དུ་འཁོར་རྣམས་དང་བཅས་ཏེ། སྤོས་ཀྱི་ཤིང་བརྩིགས་པ་ལ་འཛེགས་ནས། པུར་སྒྲོམ་ལ་ཤིན་ཏུ་བསྙེན་ཏེ་ཆོ་
ངེས་བཏབ་ནས་མེ་ཏོག་དང་། སྤོས་དང་། རྒྱལ་མཚན་དང་། གདུགས་དང་། བ་དན་དང་། དོ་ཤལ་དང་། རོལ་མོ་ལ་སོགས་པས་མཆོད་དེ། བྱུག་སྤོས་དང་། སྤོས་ཆུས་དེ་བཞིན་གཤེགས་པའི་སྐུ་གསེར་བཙོ་མའི་ཁ་དོག་ལྟ་བུ་བཀྲུས་ནས་སྤོས་ཀྱིས་བདུགས་ཤིང་། མེ་ཏོག་གིས་གཏོར་ཏེ་ངུས་ནས་མཆོད་པ་བྱས་སོ། །དེ་ལྟར་བཀྲུས་ནས་འོད་སྲུང་འཁོར་དང་བཅས་ཏེ་ཅི་རྙེད་པའི་ཤིང་བལ་གྱིས་དེ་བཞིན་གཤེགས་པའི་སྐུ་དཀྲིས་སོ། །དེའི་སྟེང་དུ་ཤིང་བལ་རྙིང་གིས་ཀྱང་དཀྲིས་སོ། །དེའི་སྟེང་དུ་བསླངས་པའི་རས་དཀར་པོ་ཡུག་སྟོང་གིས་དཀྲིས་སོ། །དེའི་སྟེང་དུ་རས་རྙིང་པ་སྟོང་གིས་ཀྱང་དཀྲིས་སོ། །དེ་ལྟར་རིམ་པ་དུ་མར་དེ་བཞིན་གཤེགས་པའི་སྐུ་དཀྲིས་ནས་པུར་སྒྲོམ་གྱི་ཁ་ཡང་བཅད་དེ། རིན་པོ་ཆེ་སྣ་བདུན་གྱིས་ཤིན་ཏུ་བརྒྱན་ཏེ། དེའི་ཚེ་འོད་སྲུང་ཤིན་ཏུ་ངུས་ནས་འཁོར་དང་བཅས་ཏེ་གཡས་ཕྱོགས་ནས་ལན་བདུན་བསྐོར་ཏེ། མིག་མཆི་མས་གང་བཞིན་དུ་ཐལ་མོ་སྦྱར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་ཚིགས་སུ་བཅད་པ་འདི་སྐད་ཅེས་སྨྲས་སོ། །ཀྱི་ཧུད་ཀྱི་ཧུད་འཕགས་པ་བཅོམ་ལྡན་འདས། །བདག་ནི་སྡུག་བསྔལ་ཤིན་ཏུ་གདུངས་པར་གྱུར། །ཐུགས་རྗེ་ཆེན་པོས་བདག་ལ་མི་གཞེས་པར། །ཅི་ཡི་སླད་དུ་མྱུར་བར་མྱ་ངན་འདས། །བྱ་རྒོད་སྤུངས་པའི་རི་ལ་སྙོམས་པར་ཞུགས་པ་ན། །ཀུན་དུ་བལྟས་ཀྱང་དེ་བཞིན་གཤེགས་མ་མཐོང་། །བལྟས་ན་བཅོམ་ལྡན་མྱ་ངན་འདས་མཐོང་ནས། །ཤིན་ཏུ་འདར་ཏེ་སེམས་ཀྱང་དངངས་པར་གྱུར། །འཇིག་རྟེན་ཁམས་ཀྱང་མུན་པར་གྱུར་ནས་སུ། །རི་དང་ས་ཆེན་དག་ཀྱང་རབ་ཏུ་གཡོས། །བཅོམ་ལྡན་མྱ་ངན་འདས་པར་དེར་རྟོགས་ཏེ། །མྱུར་དུ་མཆིས་ཀྱང་བཅོམ་ལྡན་འདས་མ་མཐོང་། །བཅོམ་ལྡན་ཐུགས་རྗེས་བདག་ལ་མ་ཁྱབ་པས། །བདག་གིས་སངས་རྒྱས་མྱ་ངན་འདས་མ་མཐོང་། །བདག་ལ་བསྟན་པ་གསུང་གཅིག་མ་བཞག་པས། །བདག་ལ་མགོན་མ་
མཆིས་ན་ཅི་ལ་གནས། །བཅོམ་ལྡན་བདག་ནི་སྡུག་བསྔལ་ཤིན་ཏུ་གདུངས། །སེམས་ཀྱང་མྱོས་ནས་ཤིན་ཏུ་བསླད་པར་གྱུར། །བདག་གིས་བཅོམ་ལྡན་དབུ་ལ་ཕྱག་འཚལ་ལམ། །འོན་ཏེ་བཅོམ་ལྡན་དཔལ་བེའུ་ལ་ཕྱག་འཚལ། །འོན་ཏེ་འཕགས་པའི་ཕྱག་ལ་ཕྱག་འཚལ་ལམ། །འོན་ཏེ་བཅོམ་ལྡན་རྐེད་པ་ལ་ཕྱག་འཚལ། །དེ་བཞིན་གཤེགས་པའི་ཞབས་ལ་ཕྱག་འཚལ་ལམ། །འོན་ཏེ་བཅོམ་ལྡན་ལྟེ་བ་ལ་ཕྱག་འཚལ། །ཀྱི་ཧུད་བཅོམ་ལྡན་མྱ་ངན་འདས་མ་མཐོང་། །བདག་ལ་ཕྱག་འཚལ་གནས་ནི་བསྟན་དུ་གསོལ། །བཅོམ་ལྡན་བཞུགས་ན་འཁོར་རྣམས་ཀུན་ལ་བདེ། །མྱ་ངན་འདས་ན་ཐམས་ཅད་སྡུག་བསྔལ་ནོན། །ཀྱི་ཧུད་ཀྱི་ཧུད་སྡུག་བསྔལ་ཤིན་ཏུ་གདུངས། །ཐུགས་རྗེ་ཆེན་པོ་ཕྱག་གནས་བསྟན་དུ་གསོལ། །དེའི་ཚེ་འོད་སྲུང་ངུས་ནས་ཚིགས་སུ་བཅད་པ་དེ་སྐད་ཅེས་སྨྲས་མ་ཐག་ཏུ། བཅོམ་ལྡན་འདས་ཐུགས་རྗེ་ཆེན་པོས་ཞབས་གཉིས་འཁོར་ལོ་རྩིབས་སྟོང་དང་ལྡན་པའི་མཚན་སྒྲོམ་གྱི་ཕྱི་རོལ་ཏུ་མངོན་པར་བསྟན་ཏེ། འཁོར་ལོ་རྩིབས་སྟོང་དང་ལྡན་པ་ལས་འོད་ཟེར་སྟོང་སྙེད་བཀྱེ་ནས་ཕྱོགས་བཅུའི་འཇིག་རྟེན་གྱི་ཁམས་ཀུན་སྣང་བར་བྱས་སོ། །དེའི་ཚེ་འོད་སྲུང་འཁོར་རྣམས་དང་བཅས་ཏེ། བཅོམ་ལྡན་འདས་ཀྱི་ཞབས་མཐོང་ནས་ཐམས་ཅད་ཀྱིས་ཕྱག་འཚལ་ཏེ་ངུས་ནས་བརྒྱལ་ལོ། །དེ་ནས་རིང་མོ་ཞིག་ལོན་ནས་ཕྱིར་སངས་ཏེ་འཁོར་དང་བཅས་པས་ཤིན་ཏུ་ངུས་ཏེ། གཡས་ནས་ལན་བདུན་བསྐོར་ནས་སངས་རྒྱས་ལ་ཕྱག་འཚལ་ཏེ། ངུ་བའི་སྒྲས་འཇིག་རྟེན་གྱི་ཁམས་ཀྱང་གཡོས་ནས། སངས་རྒྱས་ཀྱི་ཞབས་ལ་ཚིགས་སུ་བཅད་པས་འདི་སྐད་ཅེས་སྨྲས་སོ། །བདེར་གཤེགས་མཐར་ཕྱིན་ཐུགས་རྗེ་ཆེན་པོ་ནི། །སྙོམས་པར་བྱམས་པའི་འོད་ནི་གཉིས་སུ་མེད། །སེམས་ཅན་རྣམ་པར་སྨིན་ན་གར་ཡང་སྟོན། །ཞབས་གཉིས་འཁོར་ལོ་རྩིབས་སྟོང་ལྡན་པ་མཐོང་། །བདག་གིས་དང་བའི་སེམས་ཀྱིས་གུས་ཕྱག་འཚལ། །འཁོར་ལོའི་མཚན་དང་ལྡན་པའི་ཞབས་གཉིས་ལའོ། །འཁོར་ལོའི་མཚན་ལས་འོད་
སྟོང་རབ་བཀྱེ་ནས། །ཕྱོགས་བཅུའི་སངས་རྒྱས་ཞིང་ཀུན་སྣང་བར་མཛད། །བདག་གི་སྤྱི་བོས་གུས་པར་ཕྱག་ཀྱང་འཚལ། །འཁོར་ལོའི་མཚན་དང་ལྡན་པའི་འོད་ཟེར་ལའོ། །སྐྱེ་བོ་འོད་ཀྱིས་ཕོག་ནས་རྣམ་པར་གྲོལ། །ངན་སོང་གསུམ་དང་བགེགས་བརྒྱར་སྡུག་བསྔལ་སྤངས། །བདག་གི་སྤྱི་བོས་གུས་པར་ཕྱག་འཚལ་བ། །འཁོར་ལོའི་འོད་ཀྱིས་ངན་སོང་སྒྲོལ་བ་ལའོ། །བཅོམ་ལྡན་སྔོན་ནི་བསྐལ་པ་གྲངས་མེད་པར། །བདག་ཅག་སླད་དུ་ཤིན་ཏུ་དཀའ་བ་མཛད། །དེ་དབང་རྡོ་རྗེ་ལྟ་བུའི་སྐུ་རྙེད་ནས། །ཞབས་ཀྱི་འོག་ནས་འོད་ཟེར་སྟོང་ཡང་བཀྱེ། །སྐྱབས་གསོལ་སྤྱི་བོས་གུས་པར་ཕྱག་འཚལ་བ། །སེམས་ཅན་བདེ་བར་མཛད་པའི་འཁོར་ལོ་ལའོ། །ཐམས་ཅད་ཕྱིར་དུ་བསོད་ནམས་ཀུན་བསགས་ནས། །བྱང་ཆུབ་ཤིང་དྲུང་རྣམ་བཞི་བདུད་ཀྱང་བཏུལ། །བདུད་བཞི་བཏུལ་ནས་མུ་སྟེགས་ཅན་ཡང་ཕབ། །དེ་བས་སེམས་ཅན་ཡང་དག་ལྟ་བར་གྱུར། །བདག་གི་སྤྱི་བོས་གུས་པར་ཕྱག་འཚལ་བ། །སེམས་ཅན་ཡང་དག་ལྟ་བའི་འོད་ཟེར་ཞབས། །སངས་རྒྱས་ཀུན་གྱི་བྱམས་པའི་ཕ་དང་མཚུངས། །ཞབས་ཀྱི་འོད་ཀྱང་མཉམ་པར་སེམས་ཅན་སྒྲོལ། །བདག་གིས་སྐྱབས་གསོལ་གུས་པར་ཕྱག་འཚལ་བ། །སྡུག་བསྔལ་སྤོང་བའི་ཞབས་ཀྱི་འཁོར་ལོ་ལའོ། །བདག་གིས་ཞབས་ཀྱི་འཁོར་ལོའི་འོད་མཐོང་ནས། །དགའ་དང་མི་དགའ་སེམས་ཀྱང་ཤིན་ཏུ་གདུངས། །བདག་གིས་སྨྲེ་སྔགས་འདོན་ཅིང་ཕྱག་འཚལ་བ། །རྩིབས་སྟོང་ལྡན་པའི་འཁོར་ལོའི་མཚན་ལའོ། །སྐྱབས་གསོལ་ཕྱག་འཚལ་ཞབས་ཀྱི་འཁོར་ལོའི་འོད། །མཐར་ཕྱིན་ཐེག་པས་འཇིག་རྟེན་གསུམ་ལས་འདའ། །གུས་པར་ཕྱག་འཚལ་ལྷ་མི་སྐྱབས་མཆི་བས། །འཁོར་ལོའི་འོད་ཀྱིས་སྲིད་གསུམ་སྡུག་བསྔལ་སྣང་། །སྐྱེ་བོ་སྡུག་བསྔལ་སྒོ་ལས་མ་གྲོལ་རྣམས། །ཞབས་ཀྱི་འཁོར་ལོའི་འོད་ལ་སྐྱབས་ཀྱང་གསོལ། །བདག་ཅག་འཁོར་བ་ལས་ནི་ཡོངས་སུ་མ་གྲོལ་བ། །ཞབས་ཀྱི་འཁོར་ལོས་ཡོངས་སུ་གྲོལ་བར་མཛོད། །ཀྱི་ཧུད་
རེ་སྡུག་སོ་སོའི་སྐྱེ་བོ་རྣམས། །ཡུན་རིངས་ཞབས་ཀྱི་འཁོར་ལོའི་འོད་མི་མཐོང་། །མཐོལ་ལོ་བཅོམ་ལྡན་ཐུགས་རྗེ་ཆེན་པོ་ཡི། །རྩིབས་སྟོང་ལྡན་པའི་འཁོར་ལོའི་ཞབས་ཀྱི་འོད། །ཀྱི་ཧུད་དེང་འདིར་འཁོར་ལོའི་མཚན་མཐོང་བ། །དེ་ནི་སླན་ཆད་མཐོང་བའི་དུས་མ་མཆིས། །དེའི་ཚེ་འོད་སྲུང་འཁོར་དང་བཅས་ཏེ་ཚིགས་སུ་བཅད་པ་དེ་སྐད་ཅེས་སྨྲས་ནས་ཡང་བརྒྱལ་ཏེ་ས་ལ་འགྱེལ་ཏོ། །དེ་ནས་རིང་ཞིག་ལོན་ནས་ཕྱིར་སངས་ཏེ་མྱ་ངན་བསངས་སོ། །བཅོམ་ལྡན་འདས་ཀྱི་རྩིབས་སྟོང་ལྡན་པའི་འཁོར་ལོའི་མཚན་གྱི་ཞབས་གཉིས་ཀྱང་ཕྱིར་སྒྲོམ་གྱི་ནང་དུ་ནུབ་ནས་མི་སྣང་བར་གྱུར་ཏོ། །དེའི་ཚེ་ན་གྲོང་ཁྱེར་དེའི་སྐྱེས་པ་དང་། བུད་མེད་དང་། ལྷ་དང་། མི་མང་པོ་ཐམས་ཅད་ཀྱིས་འོད་སྲུང་ཆེན་པོ་དེ་ལྟར་གྱུར་པ་མཐོང་ནས། ཡང་བྲང་བརྡུངས་ཏེ་ངུད་མོ་ཆེན་པོ་དེ་སྐད་ཕྱུང་སྟེ་ངུས་ནས་ངུད་མོའི་སྒྲས་སྟོང་ཆེན་པོའི་འཇིག་རྟེན་གྱི་ཁམས་ཚད་མེད་པར་གྲགས་ཏེ། སོ་སོ་ནས་མཆོད་པའི་ཡོ་བྱད་ཀྱིས་ཡང་མཆོད་དོ། །དེའི་ཚེ་ན་རྩྭ་མཆོག་གི་གྲོང་ཁྱེར་ན་གནས་པའི་གྱད་སྟོབས་པོ་ཆེ་བཞི་ཞིག་ལུས་ཡོངས་སུ་བརྒྱན་ཏེ། རིན་པོ་ཆེ་སྣ་བདུན་གྱི་མེ་ཤིང་རྟའི་འཁོར་ལོ་ཙམ་ཐོགས་ནས། སྤོས་ཀྱི་ཤིང་བཅེར་བ་བསྲེགས་ན་མེ་རང་ཤིའོ། །དེ་ལ་འོད་སྲུང་གིས་འདི་སྐད་ཅེས་སྨྲས་སོ། །འཕགས་པ་ཆེན་པོའི་རིན་པོ་ཆེའི་པུར་སྒྲོམ་ནི་ཁམས་གསུམ་གྱི་མེས་ཚིག་པར་མི་ནུས་ན་གྱད་ཁྱེད་ཀྱི་མེས་ཚིག་པ་ལྟ་ཅི་སྨོས། གྲོང་ཁྱེར་དེ་ན་གཞན་ཡང་གྱད་སྟོབས་པོ་ཆེ་བརྒྱད་ཀྱིས་རིན་པོ་ཆེ་སྣ་བདུན་གྱི་མེ་ཆེན་པོ་ཐོགས་ཏེ། པུར་སྒྲོམ་གྱི་དྲུང་དུ་བཞག་ན་མེ་དེ་ཡང་རང་ཤིའོ། །གཞན་ཡང་གྱད་སྟོབས་པོ་ཆེ་བཅུ་དྲུག་གིས་རིན་པོ་ཆེ་སྣ་བདུན་གྱི་མེ་ཆེན་པོ་ཐོགས་ཏེ། སྤོས་ཀྱི་ཤིང་བསྲེགས་ན་མེ་དེ་ཡང་རང་ཤིའོ། །གཞན་ཡང་གྱད་སུམ་ཅུ་རྩ་དྲུག་སྙེད་ཀྱིས་རིན་པོ་ཆེ་སྣ་བདུན་གྱི་མེ་ཆེན་པོ་ཐོགས་ཏེ་བསྲེགས་ན་མེ་དེ་ཡང་རང་ཤིའོ། །དེའི་ཚེ་འོད་སྲུང་ཆེན་པོས་གྱད་རྣམས་དང་འཁོར་མང་པོ་རྣམས་ལ་འདི་སྐད་ཅེས་སྨྲས་སོ། །ཁྱེད་འདི་ལྟར་རིག་པར་གྱིས་ཤིག །གལ་ཏེ་ལྷ་དང་མི་ལ་སོགས་པའི་མེ་ཐམས་ཅད་
ཀྱིས། དེ་བཞིན་གཤེགས་པའི་པུར་སྒྲོམ་ཚིག་པར་མི་འགྱུར་གྱིས། མི་ནུས་བཞིན་དུ་ལས་སྟོ་བར་འགྱུར་བ་མ་བྱེད་ཅིག །དེའི་ཚེ་གྲོང་ཁྱེར་དེའི་སྐྱེས་པ་དང་། བུད་མེད་དང་། ལྷ་དང་མི་ལ་སོགས་པ་འཁོར་མང་པོ་ཐམས་ཅད་ཀྱིས་ཤིན་ཏུ་ངུས་ནས་མཆོད་པའི་ཡོ་བྱད་ཐམས་ཅད་ཀྱིས་ཡང་མཆོད་དེ། དུས་གཅིག་ཏུ་ཕྱག་འཚལ་ནས་ལན་བདུན་བསྐོར་ཏེ། ངུས་པའི་ངུད་མོའི་སྒྲས་སྟོང་གསུམ་གྱི་འཇིག་རྟེན་གྱི་ཁམས་སུ་གྲགས་པར་གྱུར་ཏོ། །དེའི་ཚེ་དེ་བཞིན་གཤེགས་པས་ཐུགས་རྗེ་ཆེན་པོའི་ཤུགས་ཀྱིས་ཐུགས་ཀ་ནས་མེ་མཆེད་དེ། སྒྲོམ་གྱི་ཕྱི་རོལ་དུ་འབར་ནས་བགས་ཀྱིས་སྤོས་ཤིང་བརྩིགས་པ་ལ་མཆེད་དེ། ཞག་བདུན་ལོན་ནས་མེ་ཤི་བར་གྱུར་ཏོ། །དེའི་ཚེ་ན་གྲོང་ཁྱེར་དེའི་སྐྱེས་པ་དང་། བུད་མེད་དང་། ལྷ་དང་མི་ལ་སོགས་པའི་འཁོར་མང་པོ་རྣམས་ཞག་བདུན་གྱི་བར་དུ་རྒྱུན་མི་འཆད་པར་ངུ་ཞིང་མཆོད་པ་ཡང་རྒྱུན་དུ་བྱེད་དོ། །དེའི་ཚེ་ན་ཕྱོགས་བཞིའི་མགོན་པོ་བཞིའི་ཡིད་ལ་འདི་སྙམ་བསམས་སོ། །བདག་ཅག་གིས་སྤོས་ཀྱི་ཆུས་མེ་བསད་དེ། སྐུ་གདུང་མྱུར་དུ་བསླངས་ལ་ལྷའི་འཇིག་རྟེན་དུ་མཆོད་པ་བྱའོ་སྙམ་བསམས་ནས་སོ་སོ་ནས་རིན་པོ་ཆེ་སྣ་བདུན་གྱིས་སྤྲས་པའི་གསེར་གྱི་བུམ་པ་སྤོས་ཆུས་ཡོངས་སུ་བཀང་བ་ཐོགས་ཏེ། གཞན་ཡང་རི་རབ་ལྷུན་པོའི་ངོས་བཞི་ན་བདུད་རྩིའི་འོ་མ་ཟག་པའི་ཤིང་སྦོམས་ཁྱད་འདོམ་སྟོང་གིས་འཁོར་བ། མཐོ་ཁྱད་དཔག་ཚད་བརྒྱར་ཕྱིན་པ་ཡང་དུས་གཅིག་ཏུ་མགོན་པོ་བཞི་དང་བཅས་ཏེ་ཞུགས་ལ་བཞེན་པའི་གནས་སུ་ཕྱིན་ནས་ཤིང་གི་འོ་མ་དང་སྤོས་ཆུ་ཅིག་ཅར་དུ་མེའི་སྟེང་དུ་བླུགས་ན་མེ་སྔར་བས་ཆེར་མཆེད་དེ་མ་ཤིའོ། །དེའི་ཚེ་ན་རྒྱ་མཚོའི་ལྷ་ཀླུའི་རྒྱལ་པོ་རྒྱ་མཚོ་མཆིང་རྣམ་དང་། གཙང་པོའི་ལྷ་དང་། ཆུ་ཀླུང་གི་ལྷ་རྣམས་ཀྱིས་དེ་ལྟར་མེ་མ་ཤི་བ་མཐོང་ནས། དེ་དག་ཀྱང་སོ་སོ་ནས་འདི་སྙམ་དུ་བསམས་སོ། །བདག་ཅག་གིས་སྤོས་ཆུ་ཐོགས་ལ་མེ་བསད་དེ། སྐུ་གདུང་མྱུར་དུ་བསྡུས་ཏེ་བདག་ཅག་གི་གནས་སུ་མཆོད་པ་བྱའོ་སྙམ་བསམས་ནས་སོ་སོ་ནས་རིན་པོ་ཆེའི་བུམ་པ་སྤོས་ཆུ་ཚད་མེད་པས་བཀང་བ་ཐོགས་ནས་དུས་གཅིག་ཏུ་ཞུགས་
ལ་བཞེན་པའི་གནས་སུ་ལྷགས་ཏེ་ཆུས་བླུགས་ཀྱང་མེ་ཤི་བར་མ་གྱུར་གྱི་ཕྱིར་མཆེད་དོ། །དེའི་ཚེ་མ་འགགས་པས་རྒྱལ་པོ་ཆེན་པོ་བཞི་དང་། རྒྱ་མཚོའི་ལྷ་ལ་སོགས་པ་ལ་འདི་སྐད་ཅེས་སྨྲས་སོ། །ཁྱེད་སྤོས་ཆུ་ཐོགས་ཏེ་མེ་གསོད་པ་འདི་སྐུ་གདུང་འདོད་པའི་ཕྱིར་མ་ཡིན་ནམ། དེ་དག་གིས་དེ་བཞིན་ནོ་ཞེས་སྨྲས་སོ། །མ་འགགས་པས་རྒྱལ་པོ་ཆེན་པོ་བཞི་ལ་སྨྲས་པ། ཁྱེད་ནི་ཤིན་ཏུ་ཡང་འདོད་པ་ཆེའོ། །ཁྱེད་གནམ་གྱི་སྟེང་དུ་ལྷའི་ཁམས་སུ་གནས་ཏེ། སྐུ་གདུང་ཀུན་ཁྱོད་འདོད་པ་ལྟར་ལྷའི་ཁམས་སུ་བསྐུར་ན་ས་ལ་གནས་པའི་མི་རྣམས་ཀྱིས་དེར་མཆོད་པ་བྱེད་དུ་འགྲོར་རུང་ངམ། རྒྱ་མཚོའི་ལྷ་རྣམས་ལ་ཡང་འདི་སྐད་ཅེས་སྨྲས་སོ། །ཁྱེད་ནི་རྒྱ་མཚོའི་ནང་དང་གཙང་པོའི་ནང་ན་གནས་ཏེ། དེ་བཞིན་གཤེགས་པའི་སྐུ་གདུང་རིལ་གྱིས་ཁྱེད་ལ་བསྐུར་ན་ས་ལ་གནས་པའི་མི་རྣམས་ཀྱིས་ཇི་ལྟར་དེ་དག་ཏུ་མཆོད་པ་བྱ་བར་འགྱུར་ཞེས་སྨྲས་སོ། །དེའི་ཚེ་ཕྱོགས་བཞིའི་མགོན་པོ་བཞི་ཉེས་པ་བཤགས་ནས་ཕྱིར་ལྷའི་གནས་སུ་དོང་ངོ་། །དེའི་ཚེ་རྒྱ་མཚོའི་ལྷ་དང་། གཙང་པོའི་ལྷ་རྣམས་ཀྱང་ཉེས་པ་བཤགས་ནས་འཕགས་པ་ཁྱོད་གསུང་བ་བཞིན་ནོ་ཞེས་སྨྲས་ནས་ཕྱིར་གནས་སུ་དོང་ངོ་། །དེའི་ཚེ་བརྒྱ་བྱིན་ལྷའི་དབང་ཕྱུག་རིན་པོ་ཆེ་སྣ་བདུན་གྱི་བུམ་པ་དང་། མཆོད་པའི་ཡོ་བྱད་ཐོགས་ཏེ། ཞུགས་ལ་བཞེན་པའི་གནས་སུ་ལྷགས་མ་ཐག་ཏུ་མེ་ཡང་རང་ཤི་བར་གྱུར་ཏོ། །དེ་ནས་བརྒྱ་བྱིན་གྱིས་རིན་པོ་ཆེའི་པུར་སྒྲོམ་དབྱེ་ཞིང་དེ་བཞིན་གཤེགས་པའི་ཚེམས་མཆེ་བ་བསླང་བར་སྩལ་པ་ལས་མ་འགགས་པས་བརྒྱ་བྱིན་ལ་ཁྱོད་ཅི་བྱེད་ཅེས་སྨྲས་སོ། །བརྒྱ་བྱིན་གྱིས་སྨྲས་པ། བདག་དེ་བཞིན་གཤེགས་པའི་ཚེམས་མཆེ་བ་ལྷའི་འཇིག་རྟེན་དུ་མཆོད་པ་བྱའོ་ཞེས་སྨྲས་སོ། །མ་འགགས་པས་སྨྲས་པ། དེ་ལྟར་ཁྱོད་གཅིག་པུས་སྔར་བསླང་དུ་མི་རུང་གིས་འཁོར་རྣམས་ཚོགས་ཏེ་གདོད་བགོ་བར་བྱའོ་ཞེས་སྨྲས་སོ། །བརྒྱ་བྱིན་གྱིས་སྨྲས་པ། བཅོམ་ལྡན་འདས་ཀྱིས་སྔར་རིང་བསྲེལ་ཚེམས་མཆེ་བ་གཅིག་གནང་བས་ན་བདག་མཆིས་མ་ཐག་ཏུ་མེ་ཡང་རང་ཤི་བར་གྱུར་ཏོ་ཞེས་སྨྲས་ནས། རིན་པོ་ཆེའི་པུར་སྒྲོམ་ཕྱེ་སྟེ། སངས་རྒྱས་ཀྱི་འགྲམ་
པ་གཡས་པའི་ཚེམས་མཆེ་བ་གོང་མ་གཅིག་ལྷའི་འཇིག་རྟེན་དུ་སྤྱན་དྲངས་ནས་མཆོད་རྟེན་བྱས་ཏེ་མཆོད་དོ། །དེའི་ཚེ་ན་སྲིན་པོ་ཤིན་ཏུ་མྱུར་བ་དང་ལྡན་པ་གཉིས་ཤིག་ལུས་མི་སྣང་བར་སྦས་ནས་བརྒྱ་བྱིན་གྱི་ཕྱི་བཞིན་དུ་སངས་རྒྱས་ཀྱི་ཚེམས་མཆེ་བ་གཉིས་བརྐུས་ན། འཁོར་མང་པོ་ཀུན་གྱིས་མ་ཚོར་རོ། །དེའི་ཚེ་ན་གྲོང་ཁྱེར་དེའི་སྐྱེས་པ་དང་། བུད་མེད་དང་། འཁོར་མང་པོ་ཐམས་ཅད་ཀྱིས་རིང་བསྲེལ་རྟོད་དུ་ཆ་བ་ལས་མ་འགགས་པས་འདི་སྐད་ཅེས་སྨྲས་སོ། །ཁྱེད་རྣམས་རེ་ཞིག་སྡོད་ཅིག །དེ་བཞིན་གཤེགས་པས་གསུངས་པའི་ལུང་བཞིན་དུ་ལེགས་པར་བགོས་ཏེ་མཆོད་པ་བྱའོ། །དེའི་ཚེ་ན་གྲོང་ཁྱེར་དེའི་སྐྱེས་པ་དང་། བུད་མེད་དང་། འཁོར་མང་པོས་མ་འགགས་པས་སྨྲས་པ་མ་ཐོས་པ་རྣམས་སོ་སོ་ནས་མཚོན་ཤག་ཏི་དང་། མདའ་གཞུ་དང་། རལ་གྲི་དང་། ཞགས་པ་ལ་སོགས་ཏེ་མཚོན་མང་པོ་ཐོགས་ནས་རིང་བསྲེལ་རྟོད་དུ་ཆས་སོ། །དེ་ནས་གྲོང་ཁྱེར་དེའི་མི་རྣམས་ཀྱིས་དེ་བཞིན་གཤེགས་པའི་པུར་སྒྲོམ་ཕྱེ་ན་ཤིང་བལ་དང་། རས་དཀར་པོ་ཡང་ཅང་མ་ཚིག་པར་འཁོར་རྣམས་ཀྱིས་མཐོང་ནས་ལྷག་པར་མྱ་ངན་གྱིས་ཡིད་གདུངས་ཏེ་མཆི་མ་བླགས་ནས་ངུས་སོ། །དེ་ནས་ངུས་བཞིན་དུ་མཆོད་དེ་ཕྱག་འཚལ་ནས། པུས་མོའི་ལྷ་ང་ས་ལ་བཙུགས་ཏེ་ཚིགས་སུ་བཅད་པ་འདི་སྐད་ཅེས་སྨྲས་སོ། །དེ་བཞིན་གཤེགས་པའི་དབང་སྒྱུར་ཆེན་པོའི་ཤུགས། །འཇིག་རྟེན་ཐམས་ཅད་ཀུན་ལ་དབང་སྒྱུར་མཛད། །ཐུགས་རྗེ་ཆེན་པོ་སྔོན་གྱི་སྨོན་ལམ་གྱིས། །སྲིད་པའི་རྒྱ་མཚོར་སེམས་ཅན་ཡོངས་སུ་སྒྲོལ། །ཚད་མེད་ཡེ་ཤེས་མངོན་པར་ཤེས་པའི་མཐུ། །ཐོགས་པ་མེད་པ་སྲིད་པའི་འཁོར་བར་འཇུག །སྐུ་གཅིག་ལས་ནི་སྐུ་མང་རྣམ་པར་སྟོན། །སྐུ་མང་སྐུ་གཅིག་དེ་བཞིན་ཚད་ཀྱང་མེད། །འདུལ་བར་འགྱུར་བ་བྱིན་གྱི་བརླབས་ཀྱིས་མཐོང་། །རྒྱུ་མེད་པ་ལ་མྱ་ངན་འདའ་བ་སྟོན། །བདག་ཅག་བསོད་ནམས་ཟད་དེ་རྒྱུ་མེད་པས། །དེ་བཞིན་གཤེགས་པས་ཡོངས་སུ་བཏང་བར་གྱུར། །དེ་བཞིན་གཤེགས་པའི་རིན་ཆེན་པུར་སྒྲོམ་ནི། །གྱད་ཀུན་བཟློག་སྟེ་བཏེག་ཀྱང་བསྐྱོད་མ་ནུས། །ཐུགས་རྗེ་ཆེན་པོའི་ཤུགས་ཀྱིས་འཕགས་པ་ནི། །སྟེང་གི་ནམ་མཁའ་ཏ་ལ་གཅིག་གི་སྲིད། །མཁའ་ལས་རྩྭ་
མཆོག་གྲོང་ཁྱེར་བསྐོར་ཅིང་གཤེགས། །ཞག་བདུན་གྱིས་ནི་གྲོང་ཁྱེར་ལན་བདུན་བསྐོར། །དེ་ལྟར་བསྐོར་ནས་ཞུགས་བཞེན་གནས་སུ་གཤེགས། །མ་འདྲེས་པ་ཡི་རྫུ་འཕྲུལ་མཛད་པ་ནི། །ལྷ་མིར་བཅས་པ་ཐམས་ཅད་དཔོག་མི་ནུས། །བཅོམ་ལྡན་ཡོངས་སུ་མྱ་ངན་འདས་པ་ནི། །རྡོ་རྗེ་ལྟ་བུར་མི་འཇིག་དབང་སྒྱུར་མཐུ། །ཐམས་ཅད་མེས་ནི་བཞེན་པར་མ་གྱུར་ཏོ། །ཐུགས་ཀ་ནས་ནི་བྱམས་པའི་མེ་ཕྱུང་ནས། །ཞག་བདུན་བར་དུ་བཞེན་པར་གྱུར་པ་བསྟན། །ལྷ་མིར་བཅས་པས་སོད་པར་མ་གྱུར་གྱི། །བཅོམ་ལྡན་ཐུགས་རྗེ་ཆེན་པོའི་ཤུགས་བསྟན་པས། །བརྒྱ་བྱིན་ལྷགས་མ་ཐག་ཏུ་མེ་ཡང་ཤི། །ཤིང་བལ་བཟང་པོས་སངས་རྒྱས་སྐུ་དཀྲིས་པ། །མེ་ཆེན་མང་བསྲེགས་ཚིག་པར་མ་གྱུར་ཏོ། །རས་དཀར་རིན་ཆེན་པུར་སྒྲོམ་བཅུག་པ་ཡང་། །མེ་ཡི་ནང་ན་ཚིག་པར་མ་གྱུར་པས། །དེ་བཞིན་གཤེགས་པའི་དབང་སྒྱུར་མཐུས་རྟོགས་སོ། །ཆོས་ཀྱི་དབང་སྒྱུར་ཆོས་ཀྱི་རྒྱལ་པོ་ལས། །ཕྱག་འཚལ་ཐུགས་རྗེ་འཇིག་རྟེན་མགོན་པོ་ལའོ། །འཕགས་པའི་ནང་ན་བསྙེངས་མེད་ཕྱག་ཀྱང་འཚལ། །ཕྱག་འཚལ་ཀུན་དུ་ཐུགས་རྗེ་ཆེན་པོའི་སྟོབས། །ཕྱག་འཚལ་བྱིན་གྱིས་བརླབས་པ་དབང་སྒྱུར་བ། །བདག་ཅག་སླན་ཅད་བཅོམ་ལྡན་འདས་དང་བྲལ། །སྡུག་བསྔལ་ནང་དུ་ནུབ་ཀྱང་མགོན་སྐྱབས་མེད། །ཀྱི་ཧུད་ཀྱི་ཧུད་འཕགས་པ་བཅོམ་ལྡན་འདས། །ཡུན་དུ་བྲལ་ནས་མཐོང་བའི་དུས་མ་མཆིས། །དེའི་ཚེ་ན་འཁོར་མང་པོ་རྣམས་ཚིགས་སུ་བཅད་པ་དེ་དག་སྨྲས་ནས། ཤིན་ཏུ་ངུས་ཏེ་སོ་སོ་ནས་མཆོད་པའི་ཡོ་བྱད་ཐོགས་ཏེ་མཆོད་པ་བྱས་སོ། །དེའི་ཚེ་ན་མ་འགགས་པས་འཇིག་རྟེན་དུ་བཅས་པ་ལྷ་དང་། མི་དང་། འཁོར་མང་པོ་དང་། གྲོང་ཁྱེར་དེའི་མི་ཐམས་ཅད་ཀྱི་ཕྱིར་པུར་སྒྲོམ་གྱི་དྲུང་དུ་བསྙེན་ཏེ། རས་དང་ཤིང་བལ་གྱིས་དཀྲིས་པ་ལ་བལྟས་ན། འོད་སྲུང་གིས་དཀྲིས་པའི་རས་དཀར་པོ་ཡུག་སྟོང་དང་། གྲོང་ཁྱེར་གྱི་མི་རྣམས་ཀྱིས་ཕུལ་བའི་རས་དཀར་པོ་ཡུག་སྟོང་ལ་ཐ་མ་གཉིས་དང་ཤིང་བལ་ནི་མ་ཚིག་གི །གཞན་ཐམས་ཅད་ནི་མེས་ཚིག་གོ །དེ་ནས་མ་འགགས་པས་རས་དཀར་པོ་རྣམས་དང་། ཤིང་བལ་གྱི་རྣམས་དུམ་བུར་གཤེགས་ཏེ། འཁོར་མང་པོ་རྣམས་ལ་བགོས་ནས་རིན་པོ་ཆེའི་མཆོད་རྟེན་བྱས་ཏེ་མཆོད་དོ། །མ་འགགས་པས་རས་ཚིག་པའི་གཞོབ་ཀྱང་སོ་སོར་བགོས་
ནས་རིན་པོ་ཆེའི་མཆོད་རྟེན་བྱས་ཏེ་མཆོད་དོ། །ཐལ་བ་གཞན་ནི་བགོར་ཡང་མི་ཁོམ་པར་སོ་སོར་བསླངས་ནས་མཆོད་རྟེན་བྱས་ཏེ་མཆོད་དོ། །གྲོང་ཁྱེར་དེའི་མི་རྣམས་ཀྱིས་སྔ་ནས་མགར་བ་ལ་གསེར་གྱི་སྒྲོམ་སེང་གེའི་ཁྲིས་བཏེག་པ་རིན་པོ་ཆེ་སྣ་བདུན་གྱིས་ཡོངས་སུ་བརྒྱན་པ་བརྒྱད་བྱས་སོ། །རིན་པོ་ཆེའི་སྒྲོམ་བརྒྱད་པོ་དེ་དག་རེ་རེ་ཡང་ཁལ་ཕྱེད་ཕྱེད་ཤོང་བ་སྟེ། རིན་པོ་ཆེ་སྣ་བདུན་གྱི་སེང་གེའི་ཁྲིའི་སྟེང་དུ་བཞག་གོ །རིན་པོ་ཆེ་སྣ་བདུན་གྱི་སེང་གེའི་ཁྲི་བརྒྱད་པོ་དེ་རེ་རེ་ཞིང་ཡང་གྱད་སུམ་ཅུ་རྩ་གཉིས་སྙེད་རིན་པོ་ཆེ་སྣ་བདུན་གྱི་རྒྱན་གྱིས་ཡོངས་སུ་བརྒྱན་པ། ལུས་ལ་དར་སྣ་ཚོགས་ཀྱིས་དཀྲིས་པ་དག་གིས་རིན་པོ་ཆེ་སྣ་བདུན་གྱི་སེང་གེའི་ཁྲི་བཏེག་གོ །སེང་གེའི་ཁྲི་དེ་རེ་རེའི་སྟེང་ཡང་རིན་པོ་ཆེའི་རྒྱན་གྱིས་ཡོངས་སུ་བརྒྱན་པའི་བུ་མོ་བརྒྱད་བརྒྱད་ཀྱིས་རིན་པོ་ཆེ་སྣ་བདུན་གྱི་སྒྲོམ་འཛིན་ཏོ། །ཁྲི་དེ་རེ་རེའི་སྟེང་ཡང་རིན་པོ་ཆེ་སྣ་བདུན་གྱིས་ཡོངས་སུ་བརྒྱན་པའི་བུ་མོ་བརྒྱད་བརྒྱད་ཀྱིས་རིན་པོ་ཆེ་སྣ་བདུན་གྱི་གདུགས་ཐོགས་ཏེ། གསེར་སྒྲོམ་ཡང་ཡོངས་སུ་བཀབ་བོ། །ཁྲི་དེ་རེ་རེའི་སྟེང་ན་གཞན་ཡང་ལུས་ཡོངས་སུ་བརྒྱན་པའི་བུ་མོ་བརྒྱད་བརྒྱད་ཀྱིས་སོ་སོ་ནས་རིན་པོ་ཆེ་སྣ་བདུན་གྱི་རལ་གྲི་ཐོགས་ཏེ། རིན་པོ་ཆེ་སྣ་བདུན་གྱི་སྒྲོམ་སྲུང་ངོ་། །ཁྲི་དེ་རེ་རེའི་སྟེང་ན་གཞན་ཡང་ལུས་ཡོངས་སུ་བརྒྱན་པའི་བུ་མོ་བརྒྱད་བརྒྱད་ཀྱིས། སོ་སོ་ནས་བྱ་བུམ་ཐོགས་ཏེ་སྒྲོམ་གྱི་ངོས་བཞིན་འགྲེང་ངོ་། །ཁྲི་དེ་རེ་རེ་ལ་ཡང་མི་ཚད་མེད་པ་སྙེད་ཀྱིས་སོ་སོ་ནས་ལྷའི་རོལ་མོ་དང་། རྒྱལ་མཚན་དང་། བ་དན་དང་། རིན་པོ་ཆེའི་གདུགས་དང་། སྤོས་དང་། མེ་ཏོག་དང་། དོ་ཤལ་ཐོགས་ཏེ་འཁོར་བར་བསྐོར་ནས་མཆོད་པ་བྱེད་དོ། །ཁྲི་དེ་རེ་རེ་ལ་གཞན་ཡང་མི་ཚད་མེད་པ་སྙེད་སོ་སོ་ནས་མདའ་གཞུ་དང་། མཚོན་ཤག་ཏི་དང་། ཞགས་པ་དང་། ལྕགས་ཀྱུ་དང་། དགྲ་ཆ་ཡང་ཚང་བར་ཐོགས་ཏེ་ཡོངས་སུ་བསྐོར་ནས་རྩྭ་མཆོག་གི་གྲོང་ཁྱེར་ནས་བྱུང་སྟེ། ཞུགས་ལ་བཞེན་པའི་གནས་གང་ན་བར་དོང་ངོ་། །རིན་པོ་ཆེ་སྣ་བདུན་གྱི་སེང་གེའི་ཁྲི་བརྒྱད་པོ་སོང་བའི་རྗེས་བཞིན་དུ་གྲོང་ཁྱེར་དེའི་མི་དག་གིས་སོ་སོ་ནས་གྲངས་མེད་པའི་སྤོས་ཀྱི་འདག་གུ་དང་། སྤོས་ཆུ་ཐོགས་ཏེ་གྱད་རྣམས་སོང་བའི་རྗེས་བཞིན་དུ་སྤོས་ཀྱི་འདག་གུས་བྱུགས་ཏེ། གྲོང་ཁྱེར་ནས་ཞུགས་ལ་བཞེན་པའི་བར་དུ་
སྤོས་ཀྱིས་ལམ་ཡོངས་སུ་དག་ཅིང་ཤིན་ཏུ་ཡངས་པ་བྱས་སོ། །ལམ་དེའི་གཡས་གཡོན་ན་གྲངས་མེད་པའི་རིན་པོ་ཆེའི་རྒྱལ་མཚན་དང་། བ་དན་དང་། གདུགས་དང་། སྤོས་དང་། མེ་ཏོག་དང་། མུ་ཏིག་དང་། དོ་ཤལ་དང་། དར་གྱི་ལྡ་ལྡི་དང་། རོལ་མོ་དང་། གླུ་གར་ལ་སོགས་པ་ཐམས་ཅད་ཀྱིས་ལམ་གཡས་གཡོན་བརྒྱན་ཏེ། བཅོམ་ལྡན་འདས་ཀྱི་རིང་བསྲེལ་སླར་གཤེགས་པ་སྡོད་དོ། །དེ་ནས་གྱད་རྣམས་ཀྱིས་རིན་པོ་ཆེ་སྣ་བདུན་གྱི་སེང་གེའི་ཁྲི་བརྒྱད་པོ་བཏེག་སྟེ་ཞུགས་ལ་བཞེན་པའི་གནས་སུ་ཕྱིན་ནས་ཐམས་ཅད་ཀྱིས་སྐད་ཀྱིས་བརྣངས་པ་ཙམ་དུ་ཤིན་ཏུ་ངུས་ནས་ངུད་མོའི་སྒྲ་སྟོང་ཆེན་པོའི་འཇིག་རྟེན་གྱི་ཁམས་སུ་གྲགས་པར་གྱུར་ཏེ། སོ་སོ་ནས་དད་པའི་སེམས་ཀྱིས་མཆོད་པ་བྱས་སོ། །དེའི་ཚེ་བཅོམ་ལྡན་འདས་ཐུགས་རྗེ་ཆེན་པོའི་ཤུགས་ཀྱིས་རྡོ་རྗེ་ལྟ་བུའི་སྐུ་རིང་བསྲེལ་ཕྲ་མོར་བསིལ་ཏེ། ཚེམས་མཆེ་བ་བཞི་ནི་སོ་བཞིན་དུ་བཞག་གོ །དེ་ནས་འཁོར་མང་པོ་རྣམས་ཀྱིས་དེ་ལྟར་སྐུ་གདུང་ཕྲ་མོར་གྱུར་པ་མཐོང་ནས། ལྷག་པར་མྱ་ངན་གྱིས་ཡིད་གདུངས་ཏེ་ངུས་ནས་མཆོད་པར་བྱས་སོ། །དེ་ནས་མ་འགགས་པ་དང་གྲོང་ཁྱེར་གྱི་མི་རྣམས་ཀྱིས་མིག་མཆི་མས་གང་བཞིན་དུ་རིང་བསྲེལ་རྣམས་བསྡུས་ནས་སེང་གེའི་ཁྲིའི་སྟེང་དུ་རིན་པོ་ཆེ་སྣ་བདུན་གྱི་སྒྲོམ་དུ་བླུགས་ཏེ། སྒྲོམ་བརྒྱད་པོ་གང་ནས་སྐུ་གདུང་ཡང་ཟད་པར་གྱུར་ཏོ། །དེའི་ཚེ་འཇིག་རྟེན་དུ་བཅས་པ་ལྷ་དང་མི་ཐམས་ཅད་ཀྱིས། བཅོམ་ལྡན་འདས་ཀྱི་སྐུ་གདུང་གསེར་གྱི་སྒྲོམ་གྱི་ནང་དུ་གཤེགས་པ་མཐོང་ནས། ལྷག་པར་མྱ་ངན་གྱིས་ཡིད་གདུངས་ཏེ་ངུས་ནས་མཆོད་པ་བྱས་སོ། །དེའི་ཚེ་གྲོང་ཁྱེར་དེ་ན་གནས་པའི་སྟོབས་པོ་ཆེ་རྣམས་དང་། སྐྱེས་པ་དང་། བུད་མེད་རྣམས་བཅོམ་ལྡན་འདས་ཀྱི་རིང་བསྲེལ་གྱི་སྒྲོམ་རྩྭ་མཆོག་གི་གྲོང་ཁྱེར་དུ་གཤེགས་པ་ན། འཁོར་མང་པོ་རྣམས་ལྷག་པར་ཤིན་ཏུ་ངུས་ནས་མཆི་མ་བླགས་ཏེ་མཆོད་པ་བྱས་སོ། །དེ་ནས་སྟོབས་པོ་ཆེ་རྣམས་འཁོར་དང་བཅས་པ་ཤིན་ཏུ་ངུས་ནས་རིན་པོ་ཆེ་སྣ་བདུན་གྱི་སེང་གེའི་ཁྲི་བརྒྱད་པོ་བཏེག་སྟེ་སྤོས་ཀྱི་འདག་གུས་བསྐུས་པའི་ལམ་ཐོག་ཐག་ཏུ་རྩྭ་མཆོག་གི་གྲོང་ཁྱེར་དུ་གཤེགས་སོ། །དེ་ནས་ལྷ་དང་མི་དང་འཁོར་མང་པོ་རྣམས་ཤིན་ཏུ་ངུས་ཏེ། ངུད་མོའི་སྒྲ་འཇིག་རྟེན་གྱི་ཁམས་ཀུན་ཏུ་གྲགས་པར་གྱུར་ཏེ། སོ་སོ་ནས་ཅི་ཐོགས་པའི་མཆོད་པའི་ཡོ་བྱད་ཀྱིས་དེ་བཞིན་གཤེགས་པའི་སྐུ་གདུང་མཆོད་ནས་གྲོང་ཁྱེར་གྱི་ནང་དུ་ལམ་གྱི་བཞི་མདོར་བཞག་གོ །
དེའི་ཚེ་གྲོང་ཁྱེར་རྩྭ་མཆོག་ན་གནས་པའི་མི་རྣམས་ཀྱིས་དམག་གྲངས་མེད་པ་བཞི་བཤམས་ནས། གོ་ཆ་དང་མཚོན་ཆ་སྣ་ཚང་བར་ཐོགས་ཏེ། གྲོང་ཁྱེར་རྩྭ་མཆོག་གི་ངོས་བཞི་འཁོར་བར་རིམ་པ་གྲངས་མེད་པར་བསྐོར་ནས་སྡོད་པ་ཡང་རིང་བསྲེལ་གཞན་གྱིས་ཕྲོགས་ཀྱིས་དོགས་ནས་བསྲུང་བ་ཙམ་གྱིས་ཕྱིར་དམག་བཤམས་ཀྱི། འཐབ་པའི་སེམས་ནི་མེད་དོ། །གཞན་ཡང་སྔགས་མཁན་ཆེན་པོ་ལྔ་བརྒྱ་སྙེད་ཀྱིས་བགེགས་མི་འབྱུང་བར་བྱ་བའི་ཕྱིར་གྲོང་ཁྱེར་གྱི་སྒོ་བཞི་བསྲུངས་སོ། །གཞན་ཡང་རིན་པོ་ཆེའི་རྒྱལ་མཚན་དང་། བ་དན་དང་། གདུགས་དང་། རྒྱན་རྣམ་པ་སྣ་ཚོགས་དང་། བྱ་བུམ་ལ་སོགས་པ་གྲོང་ཁྱེར་གྱི་གྲྭ་བཞིར་མཆོད་པའི་རྒྱལ་མཚན་དུ་བཙུགས་སོ། །དེ་ནས་གྲོང་ཁྱེར་དེའི་སྐྱེས་པ་དང་། བུད་མེད་དང་། ལྷ་དང་། མི་ལ་སོགས་པ་འཁོར་མང་པོ་ཐམས་ཅད་སྐད་ཆེན་པོར་རྒྱུན་མི་ཆད་པར་ངུས་ཏེ། མཆོད་པའི་ཡོ་བྱད་ཅི་འབྱོར་པས་དད་པའི་སེམས་ཀྱིས་མཆོད་པ་བྱས་སོ། །རིན་པོ་ཆེ་སྣ་བདུན་གྱི་སེང་གེའི་ཁྲི་བརྒྱད་པོ་དེ་རེ་རེ་ལ་ཡང་སྔགས་མཁན་ལྔ་བརྒྱས་ལྷ་དང་། ཀླུ་དང་། གནོད་སྦྱིན་དང་། ཡི་དགས་དང་། སྲིན་པོ་ལ་སོགས་པས་ཕྲོགས་ཀྱིས་དོགས་ནས་བསྲུངས་སོ། །དེ་ལྟར་ཞག་གཅིག་ལོན་ནས་དེ་བཞིན་གཤེགས་པ་སྔོན་བལྟམས་པའི་ཡུལ་སེར་སྐྱའི་རྒྱལ་པོ་འཁོར་ཤཱཀ་གི་རིགས་ལ་སོགས་པ་བཅོམ་ལྡན་འདས་ཀྱི་བྱིན་གྱི་རླབས་ཀྱིས་སངས་རྒྱས་ཡོངས་སུ་མྱ་ངན་ལས་འདས་པ་མ་ཚོར་ཏེ། སངས་རྒྱས་མྱ་ངན་ལས་འདས་ནས་ཞག་བདུན་གསུམ་ལོན་པ་དང་། གདོད་ཚོར་ནས། ཡུལ་སེར་སྐྱའི་རྒྱལ་པོ་ཤཱཀ་གི་རིགས་དང་བཅས་ཏེ་རབ་ཏུ་ངུས་ནས་མྱུར་བར་གྲོང་ཁྱེར་རྩྭ་མཆོག་གང་ན་བར་ལྷགས་ཏེ། དམག་གྲངས་མེད་པ་རྣམས་ཀྱིས་བསྐོར་བ་དང་། གྲོང་ཁྱེར་གྱི་གྲྭ་བཞིར་རིན་པོ་ཆེའི་རྒྱལ་མཚན་དང་། བ་དན་བཙུགས་པ་ཡང་མཐོང་། གྲོང་ཁྱེར་གྱི་སྒོ་བཞིར་སྔགས་མཁན་མང་པོ་འདུག་པ་ཡང་མཐོང་ནས། རྒྱལ་པོ་དང་ཤཱཀ་གི་རིགས་རྣམས་ཀྱིས་སངས་རྒྱས་མྱ་ངན་ལས་འདས་སོ་ཞེས་སྨྲས་སོ། །སྔགས་མཁན་གྱིས་སྨྲས་པ། སངས་རྒྱས་མྱ་ངན་ལས་འདས་ནས་ཞག་བདུན་བཞི་ལོན་ཏེ། ཞུགས་ལ་བཞེན་ནས་ད་ལྟར་རིང་བསྲེལ་འགོད་དོ། །རྒྱལ་པོས་སྨྲས་པ། བདག་ཅག་ནི་བཅོམ་ལྡན་འདས་ཀྱི་གཉེན་ལགས་ཏེ། བཅོམ་ལྡན་འདས་ཀྱི་བྱིན་གྱི་རླབས་
ཀྱིས་བདག་ཅག་གིས་དེ་བཞིན་གཤེགས་པ་མྱ་ངན་ལས་འདས་པ་ནི་མ་ཚོར་ན། ད་བདག་ཅག་གིས་དེ་བཞིན་གཤེགས་པའི་སྐུ་གདུང་བལྟར་འགྲོ་ན། ཁྱེད་ཀྱིས་མ་འགགས་པར་ལམ་དང་སྒོ་ཕྱེ་ཤིག །སྔགས་མཁན་དང་དམག་རྣམས་ཀྱིས་དེ་སྐད་ཅེས་སྨྲས་པ་ཐོས་ནས། རྒྱལ་པོ་དང་ཤཱཀ་གི་རིགས་རྣམས་ནང་དུ་བཏང་ངོ་། །དེ་དག་གིས་བཅོམ་ལྡན་འདས་ཀྱི་སྐུ་གདུང་མཐོང་ནས་སྐད་བརྣངས་པ་ཙམ་དུ་ངུད་མོས་བཏབ་སྟེ། གཡས་ཕྱོགས་ནས་ལན་བདུན་བསྐོར་ནས། མཆི་མ་ཕྱིས་ཏེ་འདི་སྐད་ཅེས་སྨྲས་སོ། །དེ་བཞིན་གཤེགས་པའི་རིང་བསྲེལ་ཆ་གཅིག་ཙམ་བདག་ཅག་གི་མཆོད་པའི་གནས་སུ་བྱིན་ཅིག་ཅེས་སྨྲས་སོ། །འཁོར་མང་པོ་རྣམས་ཀྱིས་སྨྲས་པ། ཁྱེད་ཤཱཀ་གི་རིགས་ཀྱང་ཡིན་ལ་གཉེན་དུ་ཡང་ཤེས་ན་སངས་རྒྱས་བཅོམ་ལྡན་འདས་ཀྱིས་ནི་ཁྱེད་ལ་མ་བྱིན་ཏེ། རིང་བསྲེལ་འདི་དག་ཀྱང་སོ་སོ་ནས་བདག་པོ་ཡོད་པས་ཁྱེད་ཀྱིས་མི་ཐོབ་ཀྱིས་ཕྱིར་དེང་ཤིག་ཅེས་སྨྲས་སོ། །དེའི་ཚེ་ན་རྒྱལ་པོ་དང་ཤཱཀ་གི་རིགས་རྣམས་ཀྱིས་རིང་བསྲེལ་གྱི་སྐལ་བ་མ་ཐོབ་པས་མྱ་ངན་གྱིས་ཡིད་གདུངས་ཏེ། ངུས་ནས་ས་ལ་བརྒྱལ་ལོ། །དེ་ནས་རིང་ཞིག་ལོན་པ་དང་ཕྱིར་སངས་ནས་མི་དགའ་བཞིན་དུ་འཁོར་མང་པོ་རྣམས་ལ་འདི་སྐད་ཅེས་སྨྲས་སོ། །སངས་རྒྱས་བཅོམ་ལྡན་འདས་ནི་བདག་ཅག་གི་ཤཱཀ་གི་རིགས་ཡིན་ཏེ། ཁྱེད་ལ་ཐུགས་བརྩེ་བའི་ཕྱིར་འདིར་མྱ་ངན་ལས་འདས་ན། ཅིའི་ཕྱིར་བདག་ཅག་ལ་རིང་བསྲེལ་གྱི་ཤས་ཙམ་ཡང་མི་སྦྱིན་ཞེས་སྨྲས་ནས། རིང་བསྲེལ་ལ་ཕྱག་འཚལ་ཏེ་ལན་བདུན་བསྐོར་ནས་ངུས་བཞིན་དུ་ཁྲོས་ཏེ་ཕྱིར་དོང་ངོ་། །དེའི་ཚེ་ཡུལ་དབུས་འགྱུར་འཆང་གི་རྒྱལ་པོ་མ་སྐྱེས་དགྲ་ཕ་བསད་ནས་ཤིན་ཏུ་འགྱོད་དེ། ལུས་ལ་འབྲུམ་བུ་མ་རུངས་པ་བྱུང་སྟེ། བཅོམ་ལྡན་འདས་ཀྱི་འོད་ཟེར་ཟླ་བ་ཞེས་བྱ་བ་ལུས་ལ་རེག་ནས་འབྲུམ་བུ་ཡང་བགས་ཀྱིས་སོས་ཏེ། བཅོམ་ལྡན་འདས་གང་ན་བར་ལྷགས་ཏེ་མཐོལ་ཚངས་བྱས་སོ། །བཅོམ་ལྡན་འདས་ཀྱི་ཐུགས་རྗེ་ཆེན་པོས་བདུད་རྩིའི་ཆོས་ཀྱི་སྨན་གྱིས་ལུས་བཀྲུས་ཏེ། ཁ་ན་མ་ཐོ་བའི་སྡིག་བྱང་ནས་ཕྱིར་ཕོ་བྲང་དུ་དོང་ནས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་ཡང་མ་ཚོར་རོ། །བཅོམ་ལྡན་འདས་མྱ་ངན་ལས་འདས་པའི་ནུབ་མོ་རྨི་ལམ་འདི་དག་རྨིས་སོ། །ཟླ་བ་ས་ལ་ལྟུང་ནས་ས་ལ་ཉི་
མ་ཤར་ཏེ་སྐར་མ་སྤྲིན་ལ་ཆར་བཞིན་དུ་འབབ་པ་དང་། དུད་པ་ས་ལས་བྱུང་ནས་སྐར་མའི་གཟའ་བདུན་པོ་གནམ་ལ་མངོན་དུ་སྣང་བ་དང་གནམ་ལ་མེའི་ཕུང་པོ་ཆེན་པོ་འབར་ཏེ་མཁའ་ལ་མངོན་དུ་འབར་ནས་དུས་གཅིག་ཏུ་ས་ལ་ལྟུང་བ་སྙམ་རྨིས་ནས། དེ་མ་ཐག་ཏུ་སད་དེ་ཤིན་ཏུ་དངངས་ནས་བློན་པོ་རྣམས་བསྡུས་ཏེ། འདི་ལྟ་བུ་ཞིག་རྨིས་ན་ཅི་ལ་ལྟ་ཞེས་བཀའ་སྩལ་ཏོ། །བློན་པོ་རྣམས་ཀྱིས་གསོལ་པ། འདི་ནི་སངས་རྒྱས་ཡོངས་སུ་མྱ་ངན་ལས་འདས་པའི་ལྟས་ལགས་ཏེ། སངས་རྒྱས་མྱ་ངན་ལས་འདས་ནས་ཁམས་གསུམ་ན་ལམ་རྒྱུད་དྲུག་གི་སེམས་ཅན་ལ་ཉོན་མོངས་པ་ཀུན་ནས་ལྡང་བས་མེ་ཆེན་པོ་གནམ་ལས་ལྟུང་བ་ལགས་སོ། །སངས་རྒྱས་ཡོངས་སུ་མྱ་ངན་ལས་འདས་ནས། ཟླ་བ་ལྟ་བུའི་ཐུགས་རྗེའི་འོད་དང་ཀུན་ལ་སྙོམས་པར་ཁྱབ་པའི་ཤེས་རབ་ནུབ་པར་འགྱུར་བས་ཟླ་བ་ས་ལ་ལྟུང་བ་ལགས་སོ། །སྐར་མ་ས་ལ་ལྟུང་བ་ནི་སངས་རྒྱས་མྱ་ངན་ལས་འདས་ནས། སྤྱོད་ལམ་བརྒྱད་ཁྲི་དང་། ཚུལ་ཁྲིམས་ཐམས་ཅད་ལས་སྐྱེ་བོ་ཐམས་ཅད་འགལ་བར་བྱེད་དོ། །སངས་རྒྱས་ཀྱི་བཀའ་བཞིན་དུ་མི་བྱེད་ཀྱི། ལོག་པའི་ཆོས་སྤྱོད་པས་སེམས་ཅན་དམྱལ་བར་ལྟུང་ངོ་། །ཉི་མ་ས་ལ་ལྟུང་བ་ནི་སངས་རྒྱས་མྱ་ངན་ལས་འདས་ནས། ངན་སོང་གསུམ་གྱི་སྡུག་བསྔལ་གྱི་ཕུང་པོ་ཉི་མ་ལྟ་བུར་འཇིག་རྟེན་དུ་ཤར་བས་རྨི་ལམ་འདི་དག་རྨིས་པ་ལགས་སོ། །རྒྱལ་པོས་དེ་སྐད་ཅེས་ཐོས་ནས་ནམ་གྱི་གུང་ཚིགས་ན་བློན་པོའི་འཁོར་དང་བཅས་ཏེ། གྲོང་ཁྱེར་རྩྭ་མཆོག་དང་ཉེ་བ་ཞིག་ཏུ་ལྷགས་ནས། དམག་གི་ཚོགས་གྲངས་མེད་པ་རྣམ་བཞིས་རྩྭ་མཆོག་གི་གྲོང་ཁྱེར་རིམ་པ་གྲངས་མེད་པར་བསྐོར་བ་དང་། སྒོ་བཞི་ན་བགེགས་སྲུང་བའི་སྔགས་མཁན་ལ་སོགས་པ་ཡང་མཐོང་ནས་སྔགས་མཁན་ལ་འདི་སྐད་ཅེས་སྨྲས་སོ། །ཅི་སངས་རྒྱས་ཡོངས་སུ་མྱ་ངན་ལས་འདས་སམ། སྔགས་མཁན་གྱིས་སྨྲས་པ། སངས་རྒྱས་ཡོངས་སུ་མྱ་ངན་འདས་ནས་དེང་དུ་ཞག་བདུན་བཞི་ལོན་ཏེ། འཁོར་མང་པོ་རྣམས་ད་ལྟར་སྐུ་གདུང་འགོད་དོ། །རྒྱལ་པོས་སྨྲས་པ། བདག་གིས་སངས་རྒྱས་མྱ་ངན་ལས་འདས་པ་མ་ཐོས་ཏེ། རྨི་ལམ་དུ་ལྟས་ངན་པ་མཐོང་ནས་བློན་པོ་རྣམས་ཀྱིས་དེ་བཞིན་གཤེགས་པ་མྱ་ངན་ལས་འདས་པའི་
ལྟས་ཡིན་ནོ་ཞེས་སྨྲས་ནས་བདག་ཅག་འདིར་ལྷགས་ན། བདག་ཅག་དེ་བཞིན་གཤེགས་པའི་རྡོ་རྗེ་ལྟ་བུའི་སྐུ་གདུང་ལ་ཕྱག་འཚལ་དུ་འགྲོ་བའི་ལམ་ཕྱེ་ཤིག་ཅེས་སྨྲས་སོ། །སྔགས་མཁན་རྣམས་ཀྱིས་རྒྱལ་པོ་གྲོང་ཁྱེར་གྱི་ནང་དུ་བཏང་ངོ་། །ལམ་གྱི་བཞི་མདོར་སེང་གེའི་ཁྲིའི་སྟེང་ན་གསེར་གྱི་སྒྲོམ་དུ་རིང་བསྲེལ་བཞག་ནས། འཁོར་མང་པོ་ཐམས་ཅད་ཀྱིས་ངུ་བཞིན་དུ་མཆོད་པ་བྱེད་པ་མཐོང་ནས། རྒྱལ་པོ་འཁོར་དང་བཅས་ཏེ་ཕྱག་བྱས་ནས་ངུས་ཏེ། གཡས་ཕྱོགས་ནས་ལན་བདུན་བསྐོར་ནས་མཆོད་པ་བྱས་སོ། །དེ་ནས་རྒྱལ་པོས་འཁོར་མང་པོ་ལ་དེ་བཞིན་གཤེགས་པའི་རིང་བསྲེལ་ཤས་ཀྱིས་ཅི་གནང་ཞེས་གསོལ་ནས། འཁོར་རྣམས་ཀྱིས་སྨྲས་པ། རྒྱལ་པོ་ཆེན་པོ་འཕྱིས་སོ། །དེ་བཞིན་གཤེགས་པའི་སྐུ་གདུང་བགོ་བ་ཡང་སུ་ལ་གནང་བ་སྔར་བཀའ་སྩལ་པས། རྒྱལ་པོའི་སྐལ་པ་མེད་ཀྱིས་སླར་དེང་ཤིག །རྒྱལ་པོ་མ་སྐྱེས་དགྲས་དེ་སྐད་ཅེས་སྨྲས་པ་ཐོས་ནས་གསོལ་པ་བཞིན་དུ་མ་རངས་པས་མི་དགའ་བཞིན་དུ་རིང་བསྲེལ་ལ་ཕྱག་འཚལ་ཏེ་ཕྱིར་དོང་ངོ་། །དེའི་ཚེ་ཡུལ་ཡངས་པ་ཅན་གྱི་རྒྱལ་པོ་ཡང་སངས་རྒྱས་མྱ་ངན་ལས་འདས་ནས་ཞག་བདུན་གསུམ་ལོན་ནས་གདོད་རྟོགས་ཏེ། འཁོར་དང་བཅས་སུ་རྩྭ་མཆོག་གི་གྲོང་ཁྱེར་གྱི་དྲུང་དུ་ལྷགས་སོ། །རྩྭ་མཆོག་གི་གྲོང་ཁྱེར་ལ་དམག་གི་ཚོགས་གྲངས་མེད་པས་རིམ་པ་གྲངས་མེད་པར་བསྐོར་བ་མཐོང་ངོ་། །དེའི་ཚེ་ཡུལ་ཨ་ཀ་ལེག་གི་རྒྱལ་པོས་སངས་རྒྱས་མྱ་ངན་ལས་འདས་ནས་ཞག་བདུན་གསུམ་ལོན་ནས་གདོད་ཚོར་ཏེ། མྱུར་བར་རྩྭ་མཆོག་གི་གྲོང་ཁྱེར་དུ་ལྷགས་ནས་གྲོང་ཁྱེར་རྩྭ་མཆོག་ན་དམག་གི་ཚོགས་གྲངས་མེད་པས་རིམ་པ་གྲངས་མེད་པར་བསྐོར་བ་མཐོང་ངོ་། །དེའི་ཚེ་ཡུལ་བྱི་ནུ་ཏིའི་རྒྱལ་པོ་མི་འཇིགས་པ་ཞེས་བྱ་བ་ཡང་སངས་རྒྱས་ཡོངས་སུ་མྱ་ངན་ལས་འདས་ནས་ཞག་བདུན་གསུམ་ལོན་ནས་གདོད་ཚོར་རོ། །དེའི་ཚེ་ཡུལ་ཙ་ལ་ཀའི་རྒྱལ་པོ་ཡང་སངས་རྒྱས་མྱ་ངན་ལས་འདས་ནས་ཞག་
བདུན་གསུམ་ལོན་ནས་གདོད་ཚོར་རོ། །དེའི་ཚེ་རྒྱལ་པོ་ཤི་ཀ་ན་ཞེས་བྱ་བ་ཡང་སངས་རྒྱས་མྱ་ངན་ལས་འདས་ནས་ཞག་བདུན་གསུམ་ལོན་ནས་གདོད་ཚོར་རོ། །དེའི་ཚེ་པ་ཤ་ལ་མུ་སྟེགས་ཅན་གྱི་རྒྱལ་པོ་ཡང་སངས་རྒྱས་མྱ་ངན་ལས་འདས་ནས་ཞག་བདུན་གསུམ་ལོན་ནས་གདོད་ཚོར་ཏེ། བློན་པོའི་འཁོར་དང་བཅས་ནས་གྲོང་ཁྱེར་རྩྭ་མཆོག་ཏུ་ལྷགས་ཏེ། གྲོང་ཁྱེར་རྩྭ་མཆོག་ལ་དམག་གི་ཚོགས་གྲངས་མེད་པས་བསྐོར་ཏེ་སྲུང་བ་དང་། སྒོ་བཞིར་ཡང་སྔགས་མཁན་གྱིས་སྒོ་སྲུང་བ་མཐོང་ནས་སྔགས་མཁན་ལ་འདི་སྐད་ཅེས་སྨྲས་སོ། །ཅི་སངས་རྒྱས་ཡོངས་སུ་མྱ་ངན་ལས་འདས་སམ། སྔགས་མཁན་གྱིས་སྨྲས་པ། སངས་རྒྱས་མྱ་ངན་ལས་འདས་ནས་ཞག་བདུན་གསུམ་ལོན་ཏེ། ད་ལྟར་འཁོར་མང་པོ་སྐུ་གདུང་བགོ་བའི་ལས་བྱེད་དོ། །བདག་ཅག་གིས་སངས་རྒྱས་ཡོངས་སུ་མྱ་ངན་ལས་འདས་པ་ཡང་མ་ཚོར་ཏེ། དེ་བཞིན་གཤེགས་པའི་རིང་བསྲེལ་ལ་ཕྱག་འཚལ་དུ་འགྲོ་ན། ཁྱེད་ལམ་ཕྱེ་ཤིག་ཅེས་སྨྲས་སོ། །སྔགས་མཁན་གྱིས་རྒྱལ་པོ་གྲོང་ཁྱེར་གྱི་ནང་དུ་བཏང་ནས། ལམ་གྱི་བཞི་མདོར་སེང་གེའི་ཁྲིའི་སྟེང་ན་རིན་པོ་ཆེ་སྣ་བདུན་གྱིས་བརྒྱན་པའི་གསེར་གྱི་སྒྲོམ་དུ་རིང་བསྲེལ་བཞུགས་པ་མཐོང་ནས་ཐམས་ཅད་ཀྱིས་དུས་གཅིག་ཏུ་ཕྱག་འཚལ་ཏེ། ངུས་ནས་གཡས་ཕྱོགས་སུ་ལན་བདུན་བསྐོར་ཏེ། མཆོད་པ་ཅི་འབྱོར་པས་མཆོད་པ་བྱས་སོ། །རྒྱལ་པོས་སྨྲས་པ། སངས་རྒྱས་མྱ་ངན་ལས་འདས་པ་སྔར་མ་ཚོར་ན། དེ་བཞིན་གཤེགས་པའི་སྐུ་གདུང་ལ་ཤས་ཀྱིས་མཆོད་པའི་རྟེན་དུ་ཅི་གནང་ཞེས་གསོལ་ཏོ། །འཁོར་རྣམས་ཀྱིས་སྨྲས་པ། སྐུ་གདུང་བགོ་བའི་ཆོ་ག་སྔར་བཀའ་སྩལ་ཏེ། རྒྱལ་པོ་སྐལ་བ་མེད་ཀྱིས་སླར་དེང་ཤིག །རྒྱལ་པོ་འཁོར་དང་བཅས་ཏེ་སྐུ་གདུང་མ་ཐོབ་པས་མྱ་ངན་གྱིས་ཡིད་གདུངས་ཏེ། སྐུ་གདུང་ལ་ཕྱག་འཚལ་ནས་ངུས་བཞིན་དུ་ཕྱིར་དོང་ངོ་།། །།འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་རྫོགས་སོ།། །།མདོ་མྱ་ངན་ལས་འདས་པ་ཆེན་པོ་རྒྱ་ནག་ནས་བསྒྱུར་བ་འདི། རྒྱ་ནག་གི་མཁན་པོ་ཝང་ཕབ་ཞུན་དང་། དྷརྨའི་གཞི་འཛིན་དགེ་བའི་བློ་གྲོས་དང་། ལོཙྪ་བ་རྒྱ་མཚོའི་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །