བཅུ་གཅིག་པ། མདོ་སྡེ་འཛིན་པའི་ལེའུ།
དེ་ནས་བཅོམ་ལྡན་འདས་ཟླ་འོད་གཞོན་ནུར་གྱུར་པའི་ཁྱིམ་གྱི་སྲང་དུ་བྱུང་སྟེ། ཟླ་འོད་གཞོན་ནུར་གྱུར་པའི་ཁྱིམ་དུ་གཤེགས་སོ། །གཤེགས་ནས་གདན་བཤམས་པ་ལ་བཞུགས་སོ། །བྱང་ཆུབ་སེམས་དཔའི་དགེ་འདུན་དང་དགེ་སློང་གི་དགེ་འདུན་ཀྱང་སོ་སོར་གར་འོས་པའི་སྟན་ལ་འཁོད་དོ། །དེ་ནས་ཟླ་འོད་གཞོན་ནུར་གྱུར་པས་བཅོམ་ལྡན་འདས་བྱང་ཆུབ་སེམས་
དཔའི་དགེ་འདུན་དང་། དགེ་སློང་གི་དགེ་འདུན་བཞུགས་པར་རིག་ནས་མཆོད་ཡོན་ཆེན་པོ་རིམ་གྱིས་གསོལ་ཏེ། ཞལ་ཟས་རོ་བརྒྱ་དང་ལྡན་པ་བཟང་ཞིང་མང་བའི་བཟའ་བ་དང་། བཅའ་བ་དང་བལྡག་པ་དང་གཞིབ་པ་དང་བཏུང་བ་རྣམས་བདག་ཉིད་ཀྱིས་གསོལ་ཅིང་བདར་ཏེ། བཅོམ་ལྡན་འདས་བཤོས་གསོལ་ནས་ལྷུང་བཟེད་བཞག་སྟེ་ཕྱག་བཅབས་པར་རིག་ནས་རས་བཅོས་བུ་ཕྲུགས་བྱེ་བ་སྟོང་ཕྲག་བརྒྱ་རི་བ་བཅོམ་ལྡན་འདས་ཀྱི་སྐུ་ལ་གསོལ་ཏོ། །བྱང་ཆུབ་སེམས་དཔའ་དེ་དག་དང་དགེ་སློང་གི་དགེ་འདུན་ལ་ཡང་སོ་སོར་ཆོས་གོས་སུམ་ཕྲུགས་སུ་ཕུལ་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་ལ་ལྷའི་མེ་ཏོག་མན་དཱ་རས་གཏོར་ཏེ། མཆོད་ཅིང་མངོན་པར་བསྟོད་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་ཚུལ་དང་འདྲ་བའི་ཚིགས་སུ་བཅད་པས་མངོན་པར་བསྟོད་དོ། །སྐྱེས་པ་མེད་ཅིང་འགགས་མེད་པ། །སྐུ་ལུས་མི་མངའ་བསམ་མི་ཁྱབ། །གཟུགས་དང་མཚན་ནི་ཕུན་སུམ་ཚོགས། །ཡོན་ཏན་རྒྱ་མཚོ་ཕྱག་འཚལ་ལོ། །དཔའ་བོ་ཤེས་རབ་མཆོག་གིས་བསྐྱེད། །ཐབས་དང་སྟོབས་ཀྱི་རྩལ་ཀྱང་མངའ། །སངས་རྒྱས་ནམ་མཁའ་འདྲ་བ་སྟེ། །བཟོད་མཐར་ཕྱིན་ལ་ཕྱག་འཚལ་ལོ། །དྲན་པ་ཉེ་བར་གཞག་པ་བཞུགས་པའི་སྤྱོད་ཡུལ་ཏེ། །དེ་བཞིན་གཤེགས་པའི་གཟིམས་མལ་རབ་ཏུ་དགའ་དང་བདེ། །བཏུང་བར་ཏིང་ངེ་འཛིན་ཏེ་བཤོས་སུ་བསམ་གཏན་མཆོག །སྟོང་ཉིད་དགོན་པར་གནས་པ་ཁྱོད་ལ་ཕྱག་འཚལ་ལོ། །རྒྱལ་བས་ཐུགས་རྗེ་བསྙེན་པས་ན། །གཟུགས་ཀྱི་སྐུ་ཡང་སྟོན་པར་མཛད། །སེམས་ཅན་དག་ལ་ཐུགས་བརྩེའི་ཕྱིར། །བཏུང་དང་བཤོས་ཀྱང་གསོལ་བར་གདའ། །ཨེ་མ་སངས་རྒྱས་བསམ་མི་ཁྱབ། །འཇིག་རྟེན་ཀུན་གྱི་འདྲེན་པ་སྟེ། །འཇིག་རྟེན་འདི་ནི་ཁྱོད་མཆོད་ནས། །མྱ་ངན་འདས་པ་མཆོག་ཏུ་མཆི། །མི་མཉམ་མཉམ་པའི་མགོན་གཅིག་པོ་ལ་དེ་སྐད་བསྟོད། །གཞོན་ནུ་ཡིད་ཀྱང་རབ་ཏུ་དགར་གྱུར་ཚིག་སྨྲས་པ། །སངས་རྒྱས་མཚུངས་མེད་བསམ་ཡས་སྐུ་མངའ་བཤོས་གསོལ་བས། །ལྷ་ཡི་ལྷ་ཁྱོད་བཞིན་དུ་བདག་ཀྱང་སངས་རྒྱས་གྱུར། །དེ་ལྟར་ཟླ་འོད་གཞོན་
ནུར་གྱུར་པས་བཅོམ་ལྡན་འདས་ལ་ལྷའི་ཞལ་ཟས་རོ་བརྒྱ་པ་ནི་བཞེས་པར་གསོལ། ལྷའི་ན་བཟའ་རིན་ཐང་མེད་པ་ཕྲུགས་ཀྱིས་ནི་སྐུ་ལ་གསོལ། ལྷའི་མེ་ཏོག་མན་དཱ་རས་ནི་བཅོམ་ལྡན་འདས་ལ་མཆོད། ཚུལ་དང་འདྲ་བའི་ཚིགས་སུ་བཅད་པས་ནི་མངོན་པར་བསྟོད་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཏེ་བཅོམ་ལྡན་འདས་ལ་ཡིད་ཀྱིས་ཚིགས་སུ་བཅད་པས་ཞུ་བ་ཞུས་པ། བྱང་ཆུབ་སེམས་དཔའ་མཁས་པས་ཅི་སྤྱད་ན། །རྟག་ཏུ་ཆོས་རྣམས་རང་བཞིན་རབ་ཏུ་འཚལ། །མཁས་པ་བགྱི་བ་དག་ལ་ཇི་ལྟར་འཇུག །བགྱི་བར་འཇུག་པ་འདྲེན་པས་བསྟན་དུ་གསོལ། །འདྲེན་པ་སྐྱེ་བ་དྲན་པར་ཇི་ལྟར་འགྱུར། །ཇི་ལྟར་མངལ་དག་ཏུ་ཡང་ཡོང་མི་སྐྱེ། །ཇི་ལྟ་བུར་ན་འཁོར་རྣམས་མི་ཕྱེད་འགྱུར། །འདི་ལ་ཇི་ལྟར་སྤོབས་པ་མཐའ་ཡས་འགྱུར། །སེམས་ཅན་ཀུན་གྱི་སྤྱོད་པ་རབ་ཏུ་མཁྱེན། །ཆོས་རྣམས་ཀུན་ལ་མངོན་པར་མཁྱེན་པ་འཇུག །རྐང་གཉིས་གཙོ་བོ་ཟིལ་གྱིས་མི་ནོན་པ། །ཞུ་བ་ཞུ་ཡིས་བདག་ལ་ལུང་སྟོན་ཅིག །ཆོས་ཀྱི་རང་བཞིན་དངོས་མེད་རབ་མཁྱེན་ལ། །བརྗོད་དུ་མེད་པ་ཚིག་ཏུ་བརྗོད་པར་མཛད། །སེང་གེས་ཝ་རྣམས་ཇི་ལྟར་ཕམ་བགྱིས་པ། །མུ་སྟེགས་གཞན་ལའང་སངས་རྒྱས་དེ་བཞིན་ཏེ། །སེམས་ཅན་ཀུན་གྱི་སྤྱོད་པ་རབ་མཁྱེན་ཅིང་། །ཆོས་རྣམས་ཀུན་ལའང་ཡེ་ཤེས་རྗེས་སུ་འཇུག །ཡེ་ཤེས་ཆགས་མེད་སྤྱོད་ཡུལ་ཡོངས་སུ་དག། ཆོས་ཀྱི་མངའ་བདག་བདག་ལ་དེ་ལུང་སྟོན། །འདས་པ་མཁྱེན་ཅིང་མ་འོངས་དེ་བཞིན་ཏེ། །ད་ལྟར་འདི་ན་ཅི་མཆིས་པ་ཡང་མཁྱེན། །དུས་གསུམ་ལ་ནི་ཡེ་ཤེས་ཐོགས་མེད་འཇུག །དེ་ཕྱིར་བདག་ཞུ་ཤཱཀྱ་སེང་གེ་ལ། །དུས་གསུམ་ལྡན་པའི་རྒྱལ་བའི་ཆོས་ཉིད་ནི། །ཆོས་ཀྱི་རྒྱལ་པོས་ཆོས་ཉིད་རབ་ཏུ་མཁྱེན། །རང་བྱུང་ཆོས་ཀྱི་ངོ་བོ་ཉིད་ལ་མཁས། །དེ་ཕྱིར་བདག་ཞུ་ཡེ་ཤེས་རྒྱ་མཚོ་ལ། །ཁྱོད་ལ་འཁྲུལ་པའི་ཆོས་ནི་ཅི་ཡང་མེད། །དེ་བས་ཁྱོད་ཀྱི་སེམས་པ་མ་ལུས་སྤངས། །མདུད་སྤངས་ཐ་བ་གཏི་མུག་རབ་ཏུ་བཅད། །མི་དབང་བདག་ལ་བྱང་ཆུབ་སྤྱོད་པ་སྟོན། །ཆོས་ཀྱི་མཚན་ཉིད་ཅི་འདྲར་རྒྱལ་བས་མཁྱེན། །ཆོས་ཀྱི་མཚན་ཉིད་དེ་འདྲ་བདག་ལ་སྟོན། །བདག་གིས་
མཚན་ཉིད་དེ་འདྲའི་ཆོས་རྟོགས་ནས། །མཚན་ཉིད་དེ་འདྲའི་བྱང་ཆུབ་སྤྱོད་པ་སྤྱད། །སེམས་ཅན་སྤྱོད་པ་མི་འཐུན་མཐའ་ཡས་པ། །ཇི་ལྟར་སྤྱོད་པ་སྤྱད་པར་འཇུག་པ་ལགས། །གང་ཐོས་སེམས་ཅན་སྤྱོད་པ་འཚལ་འགྱུར་བ། །སྤྱོད་ལ་འཇུག་པ་བདག་ལ་བཤད་དུ་གསོལ། །མཚན་ཉིད་མི་འཐུན་ཆོས་ཀྱི་རང་བཞིན་མཚན། །ངོ་བོ་ཉིད་སྟོང་རང་བཞིན་རྣམ་དག་པ། །བྱང་ཆུབ་སེམས་དཔས་ཇི་ལྟར་མངོན་སུམ་འགྱུར། །ཆོས་ཀྱི་ཚུལ་རྣམས་བདག་ལ་བསྟན་དུ་གསོལ། །འདི་ལ་ཆོས་རྣམས་ཀུན་གྱི་ཕ་རོལ་ཕྱིན། །བསྟན་པའི་ཚིག་ཀུན་ལ་ཡང་ཤིན་ཏུ་མཁས། །ཐེ་ཚོམ་མི་མངའ་ནེམ་ནུར་ཐེ་ཚོམ་ཆོད། །བདག་ལ་སངས་རྒྱས་བྱང་ཆུབ་བསྟན་དུ་གསོལ། །དེ་ནས་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པའི་སེམས་ཀྱི་རྟོགས་པ་སེམས་ཀྱིས་མཁྱེན་ནས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་གཅིག་དང་ལྡན་ན་ཡོན་ཏན་འདི་དག་རབ་ཏུ་འཐོབ་སྟེ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མངོན་པར་རྫོགས་པར་འཚང་རྒྱའོ། །ཆོས་གཅིག་པོ་གང་ཞེ་ན། གཞོན་ནུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་ཀྱི་ངོ་བོ་ཉིད་ཤེས་པ་ཡིན་ནོ། །གཞོན་ནུ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་ཀྱི་ངོ་བོ་ཉིད་ཤེས་ཞེ་ན། གཞོན་ནུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་ཀྱི་མིང་མེད་ཅིང་མིང་དང་བྲལ་བར་རབ་ཏུ་ཤེས་སོ། །ཆོས་ཐམས་ཅད་སྒྲ་མེད་པ། ཚིག་གི་ལམ་དང་བྲལ་བ། ཡི་གེ་དང་བྲལ་བ། སྐྱེ་བ་དང་བྲལ་བ། འགོག་པ་དང་བྲལ་བ། རྒྱུ་དང་མཚན་ཉིད་མི་འཐུན་པ། རྐྱེན་དང་མཚན་ཉིད་མི་འཐུན་པ། དབེན་པའི་མཚན་ཉིད་འདི་ལྟ་སྟེ། མཚན་ཉིད་མེད་པར་མཚན་ཉིད་གཅིག་པ། མཚན་ཉིད་དང་བྲལ་བ། བསམ་གྱིས་མི་ཁྱབ་པ། བསམ་པ་དང་བྲལ་བ། ཡིད་དང་བྲལ་བར་རབ་ཏུ་ཤེས་སོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །ཆོས་རྣམས་བསྟན་པ་གཅིག་པོ་ནི། །ཆོས་རྣམས་ཐམས་ཅད་མཚན་ཉིད་མེད། །ཡང་དག་ཇི་བཞིན་རབ་མཁྱེན་པས། །ཤེས་རབ་མཆོག་གིས་བཤད་པ་ཡིན། །
དེ་ལྟ་བུར་ནི་ཆོས་བསྟན་རྣམས། །བྱང་ཆུབ་སེམས་དཔའ་སུས་ཤེས་པ། །མདོ་སྡེ་བྱེ་བ་རབ་སྟོན་ཀྱང་། །དེ་ལ་བྱང་ཆུབ་རྒྱུན་འཆད་མེད། །འདྲེན་པས་བྱིན་གྱིས་བརླབས་པས་ན། །ཡང་དག་ཉིད་ཀྱི་མཐའ་ཡང་ཤེས། །ཡང་དག་མཐའ་དེ་རབ་ཤེས་ན། །དེ་ལ་ཅི་ཡང་བཤད་པ་མེད། །གཅིག་གིས་ཀྱང་ནི་ཐམས་ཅད་ཤེས། །གཅིག་གིས་ཀྱང་ནི་ཐམས་ཅད་མཐོང་། །ཇི་སྙེད་མང་པོར་བཤད་ན་ཡང་། །དེ་ལ་དྲེགས་པ་སྐྱེ་བ་མེད། །ཆོས་རྣམས་ཐམས་ཅད་བདག་མེད་པར། །དེ་ལྟར་སེམས་ཀྱིས་ངེས་བརྟགས་ཤིང་། །མིང་དུ་བསྟན་པ་བསླབས་པས་ན། །ཡང་དག་ཉིད་དུ་ཚིག་ཀྱང་སྨྲ། །སྒྲ་དབྱངས་གང་དག་ཅི་ཐོས་པ། །དེ་ཡི་སྔོན་གྱི་མཐའ་ཤེས་ཏེ། །སྒྲ་ཡི་སྔོན་གྱི་མཐའ་ཤེས་ནས། །སྒྲ་དག་གིས་ནི་དེ་མི་འཕྲོགས། །སྒྲ་ཡི་སྔོན་མཐའ་ཇི་འདྲ་བར། །ཆོས་རྣམས་མཚན་ཉིད་དེ་བཞིན་ཏེ། །ཆོས་རྣམས་དེ་ལྟར་རབ་ཤེས་ན། །མངལ་དུ་སྐྱེ་བར་མི་འགྱུར་རོ། །ཆོས་རྣམས་ཐམས་ཅད་མི་སྐྱེ་ཞིང་། །འབྱུང་བ་མེད་པར་རབ་ཏུ་ཤེས། །བསྟན་པ་འདི་ནི་རབ་ཤེས་ན། །རྟག་ཏུ་སྐྱེ་བ་དྲན་པར་འགྱུར། །ནམ་ཞིག་སྐྱེ་བ་དྲན་གྱུར་ན། །དེ་ཚེ་བྱ་བ་དག་ལ་འཇུག །བྱ་བ་དག་ལ་ཞུགས་པ་ཡི། །འཁོར་རྣམས་ཤིན་ཏུ་མི་ཕྱེད་འགྱུར། །དེ་ལྟར་ཆོས་རྣམས་སྟོང་པར་ནི། །བྱང་ཆུབ་སེམས་དཔའ་སུས་ཤེས་པ། །དེས་ནི་གང་ཡང་མི་ཤེས་མེད། །འདི་ནི་ཅི་ཡང་མེད་པའི་མཐའ། །ཅི་ཡང་མེད་པའི་མཐའ་ལ་ཡང་། །བྱིས་པ་དག་གིས་ཅི་དག་བརྟགས། །བསྐལ་པ་བྱེ་བར་དེ་དག་དེས། །ཡང་དང་ཡང་དུ་འཁོར་བར་གྱུར། །ཇི་ལྟར་འདྲེན་པས་མཁྱེན་པ་བཞིན། །གལ་ཏེ་དེ་དག་རྟོག་རིག་ན། །དེ་ལས་སྡུག་བསྔལ་མི་སྐྱེ་སྟེ། །ངན་འགྲོ་རྣམས་སུའང་དེ་མི་འགྲོ། །སོ་སོའི་སྐྱེ་བོ་ཐམས་ཅད་ཀྱིས། །དེ་ལྟར་ཚུལ་འདི་མ་ཤེས་པས། །གང་དུ་ཆོས་རྣམས་འགག་པ་ཡི། །འདི་འདྲའི་ཆོས་རྣམས་སྤོང་བར་བྱེད། །ཆོས་ཀུན་རྙེད་པ་མེད་པར་ནི། །ཆོས་ཀྱི་འདུ་ཤེས་གང་བྱུང་བ། །དེ་ལྟ་བུ་ཡི་འདུ་ཤེས་ཏེ། །འདུ་ཤེས་དེ་ལྟར་རིག་པར་གྱིས། །རྣམ་པར་ཤེས་དང་འདུ་ཤེས་སུ། །བྱིས་པ་དག་གིས་འདི་བརྟགས་ཏེ། །བརྟགས་པ་ཡི་ནི་ཆོས་རྣམས་ལ། །མཁས་
པ་འདིར་ནི་རྨོངས་མི་འགྱུར། །སྟོང་པ་རྙོག་པ་མེད་པའི་ཆོས། །འདི་ནི་མཁས་པའི་ས་ཡིན་ཏེ། །འདི་ལ་བྱིས་པའི་སྤྱོད་ཡུལ་མེད། །སངས་རྒྱས་སྲས་ཀྱི་སྤྱོད་ཡུལ་ལོ། །ཞི་བ་སྟོང་པ་རབ་བསྟན་པ། །འདི་ནི་བྱང་ཆུབ་སེམས་དཔའི་ས། །འདི་ནི་སངས་རྒྱས་སྲས་སྤྱོད་པ། །སངས་རྒྱས་ཆོས་ཀྱི་རྒྱན་ཡིན་ནོ། །འདི་ལྟར་བྱང་ཆུབ་སེམས་དཔའ་དག །བག་ཆགས་རབ་ཏུ་སྤངས་གྱུར་པ། །དེ་དག་གཟུགས་ཀྱིས་མི་འཕྲོགས་ཏེ། །སངས་རྒྱས་རིགས་ལ་དེ་དག་གནས། །ཆོས་རྣམས་ཐམས་ཅད་གནས་མེད་དེ། །དེ་དག་ལ་ནི་གནས་ཡོད་མིན། །གང་གིས་དེ་ལྟར་གནས་ཤེས་པ། །དེ་ལ་བྱང་ཆུབ་རྙེད་མི་དཀའ། །སྦྱིན་དང་ཚུལ་ཁྲིམས་ཐོས་དང་བཟོད། །བཤེས་གཉེན་བཟང་པོ་བསྟེན་བྱས་ནས། །བྱ་བ་འདི་དག་རྣམ་རིག་ན། །བྱང་ཆུབ་མྱུར་དུ་དེ་འཚང་རྒྱ། །དེ་ལ་ལྷ་ཀླུས་རྟག་ཏུ་བཀུར་སྟི་བྱེད། །གནོད་སྦྱིན་ལྷ་མིན་ལྟོ་འཕྱེ་དྲི་ཟ་དང་། །ནམ་མཁའ་ལྡིང་གི་རྒྱལ་པོ་ཐམས་ཅད་དང་། །མི་འམ་ཅི་དང་སྲིན་པོས་མཆོད་པ་བྱེད། །སངས་རྒྱས་བྱེ་བ་དེ་ཡི་སྙན་པ་བརྗོད། །བསྐལ་པ་བྱེ་བ་མང་པོར་མི་འཆད་པར། །ཆོས་བཤད་པ་ཡི་བསྔགས་པ་བརྗོད་ན་ཡང་། །དེ་ཡི་མུ་མཐའ་ཟད་པར་ནུས་མི་འགྱུར། །བྱང་ཆུབ་སེམས་དཔའ་གང་གིས་སྟོང་ཤེས་པ། །དེ་ནི་སྲོག་ཆགས་བྱེ་བའི་དོན་མང་བྱེད། །ཤིན་ཏུ་དེས་པས་འཁོར་ལ་ཆོས་སྟོན་ཏེ། །ཐོས་ནས་དགའ་ཞིང་རི་མོར་བྱེད་པ་སྐྱེད། །དེ་དག་གིས་ནི་ཡེ་ཤེས་ཡངས་པ་འབྱུང་། །དེ་ཕྱིར་རྒྱལ་བ་མི་མཆོག་མཐོང་བར་འགྱུར། །ཞིང་རྣམས་ན་ཡང་བཀོད་པ་བཟང་པོ་མཐོང་། །འཇིག་རྟེན་མགོན་པོ་དེ་ལ་ཆོས་རྣམས་སྟོན། །ཆོས་ཀུན་སྒྱུ་མ་ལྟ་བུར་ཤེས་པར་གྱིས། །ཇི་ལྟར་བར་སྣང་རང་བཞིན་སྟོང་པ་ལྟར། །དེ་དག་གི་ཡང་རང་བཞིན་དེ་འདྲར་ཤེས། །དེ་ལྟར་སྤྱོད་པ་ཅི་ལའང་ཆགས་མི་འགྱུར། །ཡེ་ཤེས་ཆགས་པ་མེད་ཅིང་དོན་བྱེད་ཅིང་། །འཇིག་རྟེན་ན་ཡང་བྱང་ཆུབ་སྤྱད་མཆོག་སྤྱོད། །ཤེས་པས་ཆོས་ཀུན་ལ་ཡང་རབ་བརྟགས་ཏེ། །དེ་དག་ཞིང་རྣམས་གཞན་དུའང་སྤྲུལ་པ་འགྱེད། །སྤྲུལ་པ་དེ་དག་སངས་རྒྱས་དོན་བྱས་ནས། །ཇི་ལྟར་ཆོས་ཉིད་བཞིན་དུ་རང་བཞིན་འགྱུར། །བྱང་ཆུབ་སེམས་ལ་མི་གང་གནས་པ་རྣམས། །བསམ་པ་
ཇི་བཞིན་དོན་རྣམས་རྙེད་པར་འགྱུར། །སངས་རྒྱས་རིགས་ནི་གནས་པར་གང་བརྩོན་པ། །དེ་ནི་རྟག་ཏུ་སངས་རྒྱས་བྱས་པ་གཟོ། །རྣམ་པར་འབར་བའི་ལུས་དང་རབ་ལྡན་ཞིང་། །མཚན་བཟང་སུམ་ཅུ་རྩ་གཉིས་དེ་ལ་འབྱུང་། །ཕན་ཡོན་གཞན་ཡང་མང་པོ་མཐའ་ཡས་པ། །ཏིང་འཛིན་མཆོག་ལ་སྤྱོད་པས་ཐོབ་པར་འགྱུར། །རྟག་ཏུ་མི་སྒུལ་སྟོབས་ཀྱང་ཆེ་བར་འགྱུར། །དེ་ཡི་གཟི་བརྗིད་རྒྱལ་པོས་མི་བཟོད་དེ། །མཁས་པ་སུ་དག་སངས་རྒྱས་ཆོས་སྤྱོད་པ། ། བྱད་བཞིན་བཟང་ཞིང་ཤིན་ཏུ་མཛེས་པར་འགྱུར། །བསོད་ནམས་གཟི་བརྗིད་དཔལ་གྱིས་མངོན་འཕགས་ཏེ། །ལྷས་ཀྱང་དེ་ཡི་གཟི་བརྗིད་བཟོད་མི་འགྱུར། །སུ་དག་བྱང་ཆུབ་སེམས་ལ་བརྟན་གནས་པ། །དེ་ནི་རྟག་ཏུ་སྲོག་ཆགས་ཀུན་གྱི་བཤེས། །སངས་རྒྱས་བྱང་ཆུབ་འདི་ནི་རབ་སྟོན་པ། །དེ་ལ་ནམ་ཡང་མུན་པ་མེད་པར་འགྱུར། །སྒྲ་དང་ཚིག་གི་ལམ་བྲལ་བརྗོད་དུ་མེད། །ནམ་མཁའ་ཇི་བཞིན་ཆོས་ཀྱི་རང་བཞིན་ཏེ། །འདི་ལྟ་བུ་ཡི་ཚུལ་མཆོག་རྣམ་རིག་ན། །དེ་ཡི་སྤོབས་པ་དག་ཀྱང་མི་ཟད་འགྱུར། །མདོ་སྡེ་དག་ནི་བརྒྱ་སྟོང་རབ་བཤད་ཀྱང་། །སྔོན་གྱི་མཐའ་མ་ཕྲ་ཞིབ་རབ་ཏུ་ཤེས། །ཆོས་ཀྱི་རང་བཞིན་ཤིན་ཏུ་ཕྲ་ཤེས་པས། །མཁས་པའི་ཚིག་ནི་རྟག་ཏུ་ཐོགས་པ་མེད། །རྟག་པར་ཚུལ་བརྒྱ་དག་ལ་མཁས་གྱུར་ཅིང་། །སྒྲ་དང་ངེས་ཚིག་རྣམ་པ་མང་ལ་མཁས། །ལས་དང་འབྲས་བུ་རྣམ་སྨིན་ངེས་པ་སྟེ། །ཁྱད་པར་འཕགས་པའི་བྱེ་བྲག་དེ་འདྲར་འགྱུར། །མཁས་པ་བདག་ཉིད་ཆེན་པོ་སྟོབས་བཅུའི་སྲས། །མ་ཚང་མེད་པའི་སྟོབས་ཀྱིས་ཤུགས་འཆང་ཞིང་། །ཤིན་ཏུ་ཕྲ་བའི་རང་བཞིན་ཆོས་ཤེས་པས། །དེ་ཡི་དྲན་པ་རྟག་པར་ཡོངས་སུ་དག །ཤིན་ཏུ་ཕྲ་བའི་རང་བཞིན་ཆོས་ཤེས་པས། །ཡིད་དུ་མི་འོང་སྒྲ་ནི་ཐོས་མི་འགྱུར། །རྟག་ཏུ་སྙན་ཅིང་ཡིད་འོང་སྒྲ་ཡང་ཐོས། །དེ་ཡི་ཚིག་ནི་རྟག་ཏུ་ཡིད་འོང་འགྱུར། །ཤིན་ཏུ་ཕྲ་བའི་རང་བཞིན་ཆོས་ཤེས་པས། །དྲན་དང་བློ་གྲོས་ཤེས་རབ་རྟོགས་དང་ལྡན། །དེ་བཞིན་སེམས་ཀྱང་རྙོག་མེད་དང་བར་འགྱུར། །མདོ་སྡེ་བརྒྱ་ཕྲག་དུ་མ་རབ་ཏུ་འཆད། །ཡོན་ཏན་འདི་འདྲའི་རང་བཞིན་ཆོས་ཤེས་པས། །ཡི་གེ་དང་ནི་ཚིག་རྣམས་འབྱེད་ལ་མཁས། །ཐ་དད་པ་ཡི་
སྒྲ་མང་དུ་མ་ཤེས། །དོན་དང་ཚིག་འབྲུ་ལ་ཡང་མཁས་པར་འགྱུར། །ཤིན་ཏུ་ཕྲ་བའི་རང་བཞིན་ཆོས་ཤེས་པས། །ལྷ་དང་མི་དང་ཀླུ་འབྲུག་སྲིན་པོ་དང་། །ལྷ་མིན་ལྟོ་འཕྱེ་མི་འམ་ཅི་ལ་ཡང་། །རྟག་ཏུ་སྡུག་ཅིང་ཡིད་དུ་འོང་བར་འགྱུར། །ཤིན་ཏུ་ཕྲ་བའི་རང་བཞིན་ཆོས་ཤེས་པས། །འབྱུང་པོ་ཡི་དགས་སྲིན་པོའི་ཚོགས་རྣམས་ནི། །ཤ་ལ་ཟ་བ་ཤིན་ཏུ་མི་བཟད་པ། །དེ་དག་ནམ་ཡང་དེ་ལ་འཇིགས་མི་བྱེད། །མཁས་པ་དེ་དག་ཡངས་པའི་གཏམ་ཐོས་ནས། །ཤིན་ཏུ་དགའ་ཞིང་བ་སྤུ་ཟིང་ཞེས་བྱེད། །སངས་རྒྱས་ལ་ཡང་དགའ་བ་རྒྱ་ཆེར་སྐྱེད། །དེ་དག་བསམ་གྱིས་མི་ཁྱབ་དོན་ཆེན་འཐོབ། །བདེ་བར་གཤེགས་པའི་ཆོས་མཛོད་འདི་བཟུང་བའི། །བསྐལ་པ་སྟོང་མང་དེ་ཡི་བསོད་ནམས་སྟོབས། །རབ་ཏུ་བརྗོད་ཀྱང་རྫོགས་པར་མི་ནུས་ཏེ། །དཔག་ཏུ་མེད་ཅིང་མཐའ་ཡས་ཚད་མེད་དོ། །ཏིང་འཛིན་ཞི་བའི་མཆོག་འདི་བཟུང་བ་ཡིས། །འདས་པའི་རྒྱལ་བ་དཔག་མེད་ཐམས་ཅད་དང་། །སངས་རྒྱས་མ་བྱོན་པ་དང་ཕྱོགས་བཅུ་ན། །སངས་རྒྱས་གང་བཞུགས་དེ་དག་དེ་ཡིས་མཆོད། །སྐྱེས་བུ་ལ་ལ་བསོད་ནམས་འདོད་པས་འདིར། །སྟོབས་བཅུ་ལྡན་པའི་ཐུགས་རྗེ་ཅན་དག་ལ། །དགའ་བ་དཔག་ཏུ་མེད་པ་བསྐྱེད་ནས་ནི། །བསྐལ་པ་མཐའ་ཡས་དཔག་མེད་རིམ་གྲོ་བྱས། །སྐྱེས་བུ་གཉིས་པ་བསོད་ནམས་འདོད་པ་ཡིས། །དོན་དམ་ཚུལ་འདི་ལས་ནི་ཚིགས་བཅད་གཅིག །ཕྱི་མའི་དུས་སུ་གྱུར་ཚེ་འཛིན་པ་ནི། །དེ་ལ་སྔ་མའི་བསོད་ནམས་ཆར་མི་ཕོད། །འདི་ནི་སངས་རྒྱས་མཆོད་པ་རབ་མཆོག་སྟེ། །ཕྱི་མ་མི་བཟད་དུས་སུ་གྱུར་པའི་ཚེ། །འདི་ལས་ཚིག་བཞིའི་ཚིགས་བཅད་གཅིག་ཐོས་ནས། །འཛིན་པ་དེས་ནི་སངས་རྒྱས་ཐམས་ཅད་མཆོད། །དེ་དག་རྟག་ཏུ་རྙེད་མཆོག་ལེགས་པར་རྙེད། །དེ་དག་གྲོང་གི་ཟས་མཆོག་ལེགས་པར་ཟོས། །སྟོབས་བཅུའི་སྲས་ཀྱི་ཐུ་བོ་དམ་པ་སྟེ། །དེ་ཡིས་རྒྱལ་བ་མང་པོ་ཡུན་རིང་མཆོད། །བྱ་རྒོད་ཕུང་པོའི་རི་འདིར་ང་ཡང་མཐོང་། །དེ་དག་སངས་རྒྱས་མཁྱེན་ལ་ངས་ལུང་བསྟན། །མྱ་ངན་ང་འདས་ནས་ནི་བྱམས་པ་ཡང་། །དེ་ཚེ་དེ་ལ་ལུང་ཡང་སྟོན་པར་འགྱུར། །དེ་བཞིན་སངས་རྒྱས་ཚེ་དཔག་མེད་པ་ཡང་། །ང་ཡི་བདེ་བ་ཅན་དུ་ཀུན་འདོད་
ཞེས། །ཕན་ཡོན་རྣམ་པ་དུ་མ་དེ་ལ་འཆད། །མངོན་དགའ་དེར་སོང་སངས་རྒྱས་མི་འཁྲུགས་མཐོང་། །བསྐལ་པ་བརྒྱ་སྟོང་དཔག་ཏུ་མེད་པར་ཡང་། །ལོགས་པར་ལྟུང་བའི་འཇིགས་པ་ཡོང་མི་འབྱུང་། །བྱང་ཆུབ་སྤྱད་པ་མཆོག་འདི་སྤྱོད་པ་ནི། །རྟག་ཏུ་ཡིད་རབ་བདེ་བ་མྱོང་བར་འགྱུར། །དེ་ཕྱིར་བྱེ་བྲག་འདི་འཕགས་དེ་འདྲ་སྟེ། །འདི་ནི་རབ་ཏུ་བཤད་པ་ཕན་ཡོན་མཆོག །སོ་སོའི་ཚིག་ལ་ང་ཡི་རྗེས་སློབས་ལ། །ཕྱི་མའི་དུས་ལ་མདོ་སྡེ་འདི་ཟུང་ཤིག །མདོ་སྡེ་འཛིན་པའི་ལེའུ་སྟེ་བཅུ་གཅིག་པའོ།། །།