བཅུ་བཞི་པ། འཛུམ་པ་བསྟན་པའི་ལེའུ།
འཕགས་པ་ཏིང་ངེ་འཛིན་གྱི་རྒྱལ་པོའི་མདོ། བམ་པོ་ལྔ་པ། དེ་ནས་ཟླ་འོད་གཞོན་ནུར་གྱུར་པ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་
ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཆོས་ཐམས་ཅད་ཀྱི་རང་བཞིན་མཉམ་པ་ཉིད་བྱང་ཆུབ་སེམས་དཔའ་ཐམས་ཅད་ཀྱི་བསླབ་པའི་ཏིང་ངེ་འཛིན་བསྟན་པ་ལེགས་པར་བཤད་པ་ནི་ངོ་མཚར་ཏོ། །འདི་ལྟར་བཅོམ་ལྡན་འདས་ཀྱིས་ཡུན་རིང་པོར་བསླབ་པ་འདི་ལ་བསླབས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་བསྒྲུབས་པ་ནི་བཅོམ་ལྡན་འདས་བདག་སྤོབས་སོ། །བདེ་བར་གཤེགས་པ་བདག་སྤོབས་སོ། །བཅོམ་ལྡན་འདས་ཀྱིས་བཀའ་སྩལ་པ། གཞོན་ནུ་དེའི་དུས་ལ་དབབ་པར་ཤེས་ན་ཁྱོད་སྤོབས་པར་གྱིས་ཤིག །དེ་ནས་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་སྐབས་ཕྱེ་ནས་བཅོམ་ལྡན་འདས་ལ་མངོན་སུམ་དུ་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་བསྟོད་དོ། །འདོད་དང་ཁྲོ་བས་རྟག་ཏུ་ཟིལ་ནོན་ཅིང་། །སྡུག་བསྔལ་གཙེས་པའི་སེམས་ཅན་གཟིགས་ནས་ནི། །སྐྱེ་དགུ་ཐར་བྱེད་སངས་རྒྱས་གྱུར་ཅིག་ཅེས། །བྱང་ཆུབ་ཕྱིར་ནི་ཁྱོད་ཀྱིས་སེམས་ཀྱང་བསྐྱེད། །དཔའ་བོས་བསྐལ་པ་བྱེ་བ་མང་སྤྱད་དེ། །སྦྱིན་དང་དུལ་དང་ལེགས་སྡོམ་རྟག་ཏུ་གནས། །བཟོད་དང་ཚུལ་ཁྲིམས་དེ་བཞིན་བརྩོན་འགྲུས་དེས། །སྦྱིན་པ་དག་ཀྱང་མཐའ་ཡས་རྒྱ་ཆེར་བྱིན། །རྐང་ལག་དང་ནི་སྲོག་ཀྱང་རབ་གཏོང་ཞིང་། །ཁྱོད་ཀྱི་ཡིད་ལ་ནམ་ཡང་སྐྱོ་མེད་དེ། །གསེར་དངུལ་དེ་བཞིན་བུ་དང་ཆུང་མ་དང་། །ཆགས་མེད་གྱུར་ནས་རྒྱལ་པོའི་སྲིད་ཀྱང་གཏོང་། །ཁྱོད་ཀྱི་ཚུལ་ཁྲིམས་དྲི་མེད་རྣམ་དག་སྟེ། །བདག་ཉིད་གཏོང་ཞིང་ཚུལ་ཁྲིམས་ཡོང་མི་འདྲལ། །ལུས་དང་ངག་དང་ཡིད་ཀྱང་རབ་ཏུ་བསྡམས། །བདེ་གཤེགས་སེམས་དུལ་ཁྱོད་ལ་ཕྱག་འཚལ་ལོ། །བཟོད་ལ་དགྱེས་ཤིང་བཟོད་པའི་ལམ་ལ་གནས། །ལུས་ནི་དུམ་བུར་བྱས་ཀྱང་འཁྲུགས་མེད་དེ། །བྱམས་པ་བསྒོམས་པས་དེ་ལས་འོ་མ་ཟགས། །བདེ་གཤེགས་ངོ་མཚར་ཁྱོད་ལ་ཕྱག་འཚལ་ལོ། །སྟོབས་བཅུ་དག་གི་སྟོབས་དང་ལྡན་གྱུར་ཅིང་། །ཆགས་མེད་ཡེ་ཤེས་གནས་པས་ཆོས་ཀུན་
རྟོགས། །ཐུགས་རྗེས་འཇིག་རྟེན་ཕན་མཛད་ཆོས་ཀྱི་རྗེ། །སྐྱེ་དགུ་འདི་ཡི་དོན་བཞེད་ཐུགས་བརྩེ་བ། །སྟོང་པར་མཁྱེན་ཅིང་འདི་ན་སེམས་ཅན་མེད། །དེ་བཞིན་འཇིག་རྟེན་ལམ་སྟོར་གཟིགས་ནས་ནི། །དེ་དག་རང་བཞིན་བདག་མེད་ཆོས་རྟོགས་བགྱིས། །རྣམ་གྲོལ་སྐྱེས་ཀྱང་གང་ནའང་རྣམ་གྲོལ་མེད། །སོ་སོར་བརྟགས་ཏེ་བག་མེད་ཐམས་ཅད་སྤངས། །བདུད་སྡེ་མཐའ་ཡས་སྟོབས་དང་ལྡན་པ་བཅོམ། །ཡེ་ཤེས་མཐའ་ཡས་བྱང་ཆུབ་རྒྱ་ཆེར་མཁྱེན། །མཆོག་ཏུ་རྣམ་དག་ཞི་བའི་ཆོས་ཀྱང་སྟོན། །ཟླ་བ་སྐར་མར་བཅས་པ་གནམ་ལྷུང་ཞིང་། །རི་དང་གྲོང་དུ་བཅས་པའི་ས་ཞིག་ལ། །ནམ་མཁའི་ཁམས་ནི་རྣམ་པ་གཞན་གྱུར་ཀྱང་། །ཁྱོད་ནི་མི་བདེན་པ་ཡི་ཚིག་མི་གསུང་། །སྐྱེ་དགུ་དམིགས་པ་དག་ལ་དགའ་བ་དང་། །སེམས་ཅན་སྡུག་བསྔལ་ཁྱོད་ཀྱིས་གཟིགས་ནས་ནི། །སྟོང་པ་ཉིད་དང་ཟབ་ཅིང་ཞི་བ་ཡིན། །དམིགས་པ་མེད་པ་དག་ནི་སྟོན་པར་མཛད། །བསྐལ་པ་བྱེ་བ་བསམ་ཡས་སུ། །མི་དམིགས་པ་ཡི་བསླབ་པ་ལ། །དཔའ་བོ་ཆེན་པོས་བསླབས་པས་ན། །ཁྱོད་ལ་འཁྲུལ་པ་ཡོང་མི་མངའ། །ཇི་ལྟ་བུ་ཡི་ཆོས་བསླབས་པ། །དེ་ལྟ་བུ་ཡི་ཆོས་སྟོན་ཏེ། །མུ་སྟེགས་གཞན་དག་ཇི་སྙེད་དང་། །བྱིས་པ་དག་གིས་ས་འདི་མིན། །བདག་ཏུ་འདུ་ཤེས་གང་གནས་པ། །མི་མཁས་དེ་དག་འཁྲུལ་པར་འགྱུར། །ཆོས་རྣམས་བདག་མེད་རིག་པས་ན། །ཁྱོད་ལ་འཁྲུལ་པ་ཡོང་མི་མངའ། །དཔའ་བོ་ཆེན་པོ་ཡང་དག་གསུང་། །ཡང་དག་ཆོས་ལ་རབ་ཏུ་གནས། །མགོན་པོ་ཡང་དག་བདེན་གནས་ཏེ། །ཡང་དག་ཚིག་ནི་རབ་ཏུ་གསུང་། །ཁྱོད་ཀྱི་སྨོན་ལམ་བཏབ་པ་བཞིན། །ཁྱོད་ཀྱི་ཡང་དག་སྤྱོད་པ་བྱུང་། །ཡང་དག་དེ་ཡི་རྒྱུ་འདྲ་བས། །ཡང་དག་ཚིག་ནི་རབ་ཏུ་གསུང་། །ཡང་དག་སྤྱོད་པ་ཕུན་སུམ་ཚོགས། །ཡང་དག་མཐའ་ལ་ཤིན་ཏུ་བསླབས། །ཡང་དག་བསམ་པ་ཡང་དག་སྤྱོད། །ཡང་དག་མཁྱེན་ལ་ཕྱག་འཚལ་ལོ། །ཁྱོད་ཀྱི་ཤེས་རབ་མཉམ་པ་མེད། །ཡེ་ཤེས་གསུང་བ་འོད་མཛད་པ། །ཡེ་ཤེས་ཁྱད་པར་རབ་བརྙེས་ཤིང་། །ཡེ་ཤེས་གསུང་ལ་ཕྱག་འཚལ་ལོ། །ཁྱོད་ཀྱིས་བྱམས་པ་རབ་བསྒོམས་ཏེ། །སེམས་ཅན་ཀུན་གྱི་བཤེས་
གཉེན་ཁྱོད། །རི་རབ་བཞིན་དུ་མི་སྒུལ་ཏེ། །མི་གཡོ་རབ་ཏུ་གནས་པ་པོ། །སྟོན་པའི་འཁོར་ཚོགས་རྒྱ་ཆེ་ཡང་། །ཚོགས་མང་དག་ཀྱང་སྡུད་པར་མཛད། །ཤེས་རབ་ཟབ་མོ་བདེ་བར་གཤེགས། །འཁོར་གྱི་ནང་གཤེགས་སྒྲ་ཡང་སྒྲོག །སངས་རྒྱས་སེང་གེའི་སྒྲ་སྒྲོགས་ཤིང་། །སེང་གེའི་སྟབས་སུ་རྣམ་པར་གཤེགས། །ཁྱོད་ཀྱིས་མུ་སྟེགས་ཀུན་བཏུལ་བ། །སེང་གེ་ཡིས་ནི་ཝ་རྣམས་བཞིན། །དཔའ་བོ་མ་དུལ་དུལ་མཛད་པ། །མ་དུལ་བ་དག་ཁྱོད་ཀྱིས་བཏུལ། །དེ་དག་མཛའ་སྡུག་བརྟན་གྱུར་ཏེ། །དབྱེར་མི་ཕྱེད་ཅིང་ལེགས་པར་གནས། །ལྟ་བ་སྣ་ཚོགས་གནས་པ་ཡི། །སེམས་ཅན་སྡུག་བསྔལ་གཟིགས་ནས་ནི། །སྡུག་དང་མི་སྡུག་མེད་པ་ཡི། །བདག་མེད་ཆོས་ནི་ཁྱོད་སྟོན་ཏེ། །མ་བསླབས་པ་ཡི་བྱིས་པ་དག །ལོག་པའི་ལམ་ལ་སྤྱོད་པ་རྣམས། །འདྲེན་པ་གང་ནས་གཤེགས་པ་ཡི། །ལམ་ཡང་རབ་ཏུ་ཁྱོད་ཀྱིས་བསྟན། །བདག་ཏུ་འཛིན་ལ་སུ་གནས་པ། །དེ་དག་སྡུག་བསྔལ་ཉིད་ལ་གནས། །གང་ལ་སྡུག་བསྔལ་མེད་པ་ཡི། །བདག་མེད་དེ་དག་མི་ཤེས་སོ། །འཁྲུལ་པ་མེད་པའི་ཆོས་ཚིག་ཁྱོད་སྟོན་ཏེ། །ཁྱོད་ལ་འཁྲུལ་བ་མི་རྙེད་འཇིག་རྟེན་མགོན། །ཁྱོད་ནི་མ་ལོག་པ་ཡི་ཚིག་གསུང་སྟེ། །སྡུག་བསྔལ་མང་ཐར་མཛད་ལ་ཕྱག་འཚལ་ལོ། །ལྷ་ཀླུ་གནོད་སྦྱིན་བྱེ་བ་ཁྲག་ཁྲིག་ཕྲག། བརྒྱ་སྟོང་མང་པོ་མཁའ་ལ་འཁོད་པ་རྣམས། །བཅོམ་ལྡན་འདས་ཀྱི་དོན་ལྡན་གསུང་ཐོས་ནས། །ཐམས་ཅད་འདྲེན་ལ་རབ་ཏུ་དགའ་བ་སྐྱེད། །ཚིག་ནི་རབ་ཏུ་སྙན་ཅིང་བཟང་ལ་འཐད། །མཉེན་ཞིང་འཇམ་ལ་ཡིད་འོང་དུས་དང་འབྱོར། །གསུང་གི་ཡན་ལག་དཔག་ཏུ་མེད་དང་ལྡན། །ཕན་བྱེད་སྐྱེ་བོ་མང་པོ་ཐར་བྱེད་པ། །སིལ་སྙན་བརྒྱ་སྟོང་དཔག་ཏུ་མེད་པ་དང་། །ལྷ་ཡི་དབྱངས་སྒྲ་དགའ་བར་འགྱུར་བའི་མཆོག །ཤིན་ཏུ་སྙན་པ་དུས་གཅིག་འབྱོར་གྱུར་ཀྱང་། །བདེ་གཤེགས་གསུང་གཅིག་གིས་ནི་ཟིལ་གྱིས་ནོན། །ཁུ་བྱུག་བྱ་མང་འཇམ་པའི་སྒྲ་འབྱིན་དང་། །ཀུན་ལ་ཤིན་ཏུ་ཡིད་འཐད་དབྱངས་སྙན་དག །བྱ་ཚོགས་མང་པོ་ཐམས་ཅད་སྒྲ་འབྱིན་པ། །སངས་རྒྱས་གསུང་གི་ཆར་
ཡང་དེས་མི་ཕོད། །ལྷ་ཡི་བུ་མོ་སྒྲ་དབྱངས་སྙན་པ་དང་། །སིལ་སྙན་རོལ་མོ་གླུ་དབྱངས་འཇམ་པ་དང་། །པི་བང་རྫ་རྔ་རྔ་ཆེན་དུང་གི་སྒྲ། །དེ་དག་སངས་རྒྱས་གསུང་གི་ཆར་མི་ཕོད། །ཁུ་བྱུག་ནེ་ཙོ་རི་སྐེགས་སྒྲ་རྣམས་དང་། །ཁྲུང་ཁྲུང་རྨ་བྱ་མི་འམ་ཅི་ཡི་སྒྲ། །སྒྲ་དབྱངས་ཡིད་འོང་སྙན་པ་ཅི་ཡོད་པ། །དེ་དག་སངས་རྒྱས་གསུང་གི་ཆར་མི་ཕོད། །སྙན་ཅིང་མཉེན་ལ་ཡིད་འོང་དགའ་བ་དང་། །ཤིན་ཏུ་མཉེན་ལ་རབ་བསྔགས་ཞི་བའི་ཚིག །དབྱངས་རྣམས་ཐམས་ཅད་དུས་གཅིག་བསྒྲགས་པ་བས། །དེ་བཞིན་གཤེགས་པའི་གསུང་མཆོག་དགར་འགྱུར་ཡིན། །ལྷ་མི་མི་དབང་ལྷ་མ་ཡིན་རྣམས་དང་། །སྲིད་གསུམ་སེམས་ཅན་མཐའ་དག་ཅི་ཡོད་པ། །འོད་བྱེད་རྣམས་ཀྱི་འོད་སྣང་དེ་དག་ནི། །བདེ་གཤེགས་འོད་ཟེར་གཅིག་གི་ཟིལ་གྱིས་ནོན། །བདེ་གཤེགས་སྐུ་ནི་མེ་ཏོག་རྒྱས་པ་བཞིན། །མཚན་རྣམས་ཀུན་གྱིས་སྣ་ཚོགས་སྤྲས་ཤིང་བརྒྱན། །བསོད་ནམས་བརྒྱས་གྲུབ་དག་ཅིང་རྣམ་པར་དང་། །རྒྱལ་བའི་སྐུ་ནི་འཇིག་རྟེན་ཀུན་ཏུ་ལྷན། །དུང་གི་སྒྲ་དང་འཁར་རྔ་སྒྲ་སྙན་དང་། །རྔའི་སྒྲ་དེ་བཞིན་ཀིམ་པ་ལ་ཡི་སྒྲ། །རབ་ཏུ་འཇམ་ཞིང་འཐད་པའི་སྒྲ་དེ་ཀུན། །སངས་རྒྱས་དབྱངས་ཀྱི་བརྒྱ་ཡི་ཆར་མི་ཕོད། །སིལ་སྙན་བྱེ་བ་ཁྲག་ཁྲིག་སྟོང་གི་སྒྲ། །སྒྲ་སྐད་གསལ་ཞིང་མཉེན་པ་ལྷ་ཡི་འདྲ། །ལྷ་དང་ལྷ་མོའི་སྒྲ་དབྱངས་དགར་འགྱུར་བ། །སངས་རྒྱས་དབྱངས་ཀྱི་བརྒྱ་ཡི་ཆར་མི་ཕོད། །ཁྲུང་ཁྲུང་རྨ་བྱ་ངུར་པ་ཁུ་བྱུག་དང་། །ངང་པ་ཀུ་ནལ་རྣམ་མང་བྱ་ཡི་ཚོགས། །དེ་དག་སྒྲ་སྙན་དུས་གཅིག་ཚོགས་པས་ཀྱང་། །སངས་རྒྱས་དབྱངས་ཀྱི་བརྒྱ་ཡི་ཆར་མི་ཕོད། །ཀླུ་དང་གནོད་སྦྱིན་ལྷ་མིན་ལྟོ་འཕྱེ་དང་། །ལྷ་དབང་ཚངས་པ་ལྷ་ཡི་བདག་པོའི་སྒྲ། །སྲིད་གསུམ་ཡིད་འོང་འཐད་པ་ཅི་ཡོད་པ། །དེ་དག་སངས་རྒྱས་དབྱངས་ཀྱི་ཆར་མི་ཕོད། །ཚངས་པའི་འོད་དང་ལྷ་ཡི་དབང་པོ་དང་། །ཉི་མ་དང་ནི་ནོར་བུ་རིན་ཆེན་འོད། །ཀུན་གྱི་འོད་ནི་རྣམ་པ་དུ་མ་དག །འོད་ཀུན་རྒྱལ་བའི་འོད་ཀྱིས་ཟིལ་གྱིས་ནོན། །ལུས་དང་ངག་དང་ཡིད་ཀྱང་ཤིན་ཏུ་རྣམ་པར་དག །ཡེ་ཤེས་དག་པ་སྲིད་པ་གསུམ་ན་གོས་པ་མེད། །མི་དབང་ཡོན་ཏན་དབྱིག་
ཚོགས་ཡོན་ཏན་རིན་ཆེན་མངའ། །རང་འབྱུང་ཡོན་ཏན་ཐམས་ཅད་ཀྱིས་ནི་མཉམ་མེད་མཉམ། །དེ་ལྟར་སྟོབས་བཅུ་བདེན་པ་གསུང་ལ་བསྟོད་ནས་ནི། །གཞོན་ནུ་ཡིད་ཀྱང་རབ་ཏུ་དགའ་བས་ཚིག་སྨྲས་པ། །སངས་རྒྱས་གཞལ་མེད་དཔག་ཡས་ལ་ནི་མཆོད་པ་ཡིས། །ཤཱཀྱ་ཐུབ་བཞིན་བདག་ཀྱང་སངས་རྒྱས་གྱུར་ཅིག་སྨྲ། །བདེ་བར་གཤེགས་པས་དེ་ཡི་སྤྱོད་པ་མཆོག་མཁྱེན་ནས། །མི་དབང་ཆགས་མེད་ཡེ་ཤེས་མངའ་བ་འཛུམ་པ་མཛད། །སྟོབས་བཅུ་སྲས་ཀྱི་ཐུ་བོ་བྱམས་པས་དེ་ཞུས་ཏེ། །འདྲེན་པས་གང་གི་སླད་དུ་འདི་ལྟར་འཛུམ་པ་མཛད། །ས་འདི་དག་ཀྱང་རྣམ་པ་དྲུག་ཏུ་ཡོངས་སུ་གཡོས། །ལྷ་དང་ཀླུ་རྣམས་མཁའ་ལ་འདུག་ཅིང་རབ་དགའ་སྟེ། །ཤིན་ཏུ་སེམས་རངས་མགུ་བས་སངས་རྒྱས་ལྟ་ཞིང་མཆིས། །བདེ་གཤེགས་ཟིལ་གྱིས་མ་ནོན་དེ་དག་ལུང་བསྟན་གསོལ། །སྐྱེས་བུ་མཆོག་གི་ཡེ་ཤེས་གང་ལ་ཞུགས་པ་ནི། །བཅོམ་ལྡན་འདས་ཀྱི་ཉན་ཐོས་དག་གི་ས་མ་ལགས། །རྒྱལ་བ་ཁྱོད་ཀྱིས་གང་གི་སླད་དུ་འཛུམ་མཛད་པ། །ཡེ་ཤེས་རྣམ་དག་དཔེ་མེད་ཡེ་ཤེས་མ་ལུས་གསུངས། །ཤཱཀྱའི་སེང་གེ་སྟོབས་བཅུ་མངའ་ཞིང་རྣམ་འདྲེན་པ། །རྐང་གཉིས་གཙོ་བོ་ཡེ་ཤེས་ཀྱི་ཡང་ཕ་རོལ་ཕྱིན། །འདོད་ཆགས་དང་ནི་ཞེ་སྡང་ཐ་བ་གཏི་མུག་སེལ། །རབ་ཏུ་འོད་སྣང་མཛད་པ་ཁྱོད་ལ་ཞུ་བ་ལགས། །བྱང་ཆུབ་དམ་པ་མཆོག་འདི་རབ་ཏུ་ཚོལ་བའི་ཕྱིར། ། འདྲེན་པ་ཁྱོད་ཀྱིས་བསྐལ་པ་གང་གཱའི་བྱེ་སྙེད་དང་། །དེ་ལས་ལྷག་པར་ཡང་ནི་སྤྱོད་པ་རབ་ཏུ་སྤྱད། །གང་གི་དོན་དུ་འཛུམ་པ་འདི་མཛད་བསྟན་དུ་གསོལ། །ཡེ་ཤེས་དམ་པ་མཆོག་འདི་རབ་ཏུ་ཚོལ་བའི་ཕྱིར། །སྟོན་པས་ཕྱག་དང་ཞབས་ཀྱང་ཡོངས་སུ་བཏང་བ་མཛད། །སྲས་དང་བཙུན་མོ་གཉེན་བཤེས་རྩ་ལག་ཕངས་པ་བཏང་། །ཐུབ་པ་འཛུམ་པ་བསྟན་པ་འདི་ཡི་རྒྱུ་གང་ལགས། །རྟ་དང་བ་གླང་དང་ནི་ཤིང་རྟ་རྐང་ཐང་དང་། །བྲན་དང་ནོར་བུ་དངུལ་དང་མུ་ཏིག་ཁྱོད་ཀྱིས་བཏང་། །སྤྱོད་པ་མཆོག་སྤྱོད་ཚེ་ནི་ཁྱོད་ཀྱིས་མ་བཏང་བ། །རིན་པོ་ཆེ་དང་ནོར་རྫས་དག་ནི་གང་ཡང་མེད། །སྲིད་པ་གསུམ་ན་ཡེ་ཤེས་དག་ནི་མཆོག་ཏུ་གྱུར། །སེམས་ཅན་ཐམས་ཅད་ཀྱི་ནི་སྤྱོད་པ་རབ་ཏུ་
མཁྱེན། །སེམས་དང་ཁམས་དང་མོས་པ་དག་ལའང་མཁས་ཤིང་རིག །གང་གི་དོན་དུ་འཛུམ་པ་འདི་དག་བསྟན་པ་མཛད། །མི་ཡི་གཙོ་བོ་ལ་ནི་གང་གིས་མཆོད། །གང་གི་དོན་ནི་རྒྱ་ཆེ་ཡངས་པར་འགྱུར། །སྤྱོད་པ་འདི་ཡང་སུ་དག་རབ་ཏུ་འཛིན། །ཐུབ་པ་གང་གི་དོན་དུ་འཛུམ་འདི་བསྟན། །ས་ཡང་རྣམ་པ་དྲུག་ཏུ་རབ་ཏུ་གཡོས། །པད་མ་བྱེ་བ་འདབ་མ་བྱེ་བར་ལྡན། །གསེར་གྱི་པད་མ་ཤིན་ཏུ་འོད་གསལ་བ། །མཛེས་ཤིང་ཡིད་དུ་འཐད་པ་ས་ལས་བྱུང་། །བྱང་ཆུབ་སེམས་དཔའ་རྫུ་འཕྲུལ་རབ་ཆེ་བ། །རྒྱལ་བའི་ཐུགས་ཀྱི་སྲས་པོ་དེ་ལ་མཆིས། །ཆོས་སྨྲ་བ་ཡང་མང་པོ་འདིར་མཆིས་ཏེ། །འདྲེན་པ་ལ་ནི་དེ་ཡི་སླད་དུ་ཞུ། །རྔ་དང་དུང་དང་འཁར་རྔ་སྒྲ་ཆེན་དང་། །སིལ་སྙན་བྱེ་བ་ཁྲག་ཁྲིག་བརྡུངས་པ་ཡི། །དེ་དག་སྒྲ་ནི་ནམ་མཁའ་འདི་ལས་གདའ། །བདེ་བར་གཤེགས་པའི་དབྱངས་ནི་བསམ་མི་ཁྱབ། །ཁྲུང་ཁྲུང་ངང་པ་ཀ་ལ་པིང་ཀ་དང་། །ཁུ་བྱུག་བྱ་ཚོགས་མང་པོ་འདུས་པ་ཡི། །སྒྲ་དབྱངས་རབ་ཏུ་སྙན་པ་ཕྱུང་བ་ཡང་། །དེ་དག་སངས་རྒྱས་དབྱངས་ཀྱི་ཆར་མི་ཕོད། །གང་གིས་སྦྱིན་དང་དུལ་དང་ལེགས་སྡོམ་རྣམས། །སྔོན་གྱི་བསྐལ་པ་མང་པོར་བསྙེན་པར་བགྱིས། །གང་གིས་མི་ཡི་གཙོ་བོ་རབ་མཆོད་ན། །སུ་ཡི་སླད་དུ་འཛུམ་པ་འདི་དག་བསྟན། །རི་མོ་གུས་པ་མཆོག་ཀྱང་བསྐྱེད་ནས་ནི། །སངས་རྒྱས་བྱང་ཆུབ་ཇི་ལྟར་ཐོབ་འགྱུར་ཞེས། །གང་གིས་རྐང་གཉིས་གཙོ་ལ་སྔོན་ཆད་ཞུས། །སུ་ཡི་སླད་དུ་འཛུམ་པ་འདི་དག་བསྟན། །སྟོབས་བཅུ་ལྡན་པ་ཇི་སྙེད་འདས་པ་དང་། །ད་ལྟར་བྱུང་དང་མ་བྱོན་བདེ་གཤེགས་དང་། །མི་ཡི་གཙོ་བོ་ཐམས་ཅད་རབ་ཏུ་མཁྱེན། །དེ་ཕྱིར་སྐྱེ་དགུའི་དོན་དུ་ཞུ་བ་ལགས། །སྲོག་ཆགས་ཀུན་གྱི་སྤྱོད་ཡུལ་མཐའ་ཡས་དང་། །མི་རྣམས་གང་གི་བསམ་པ་ཇི་འདྲ་དང་། །སྐྱེ་དགུའི་སེམས་ཀྱི་རྒྱུད་ཀྱང་རབ་ཏུ་མཁྱེན། །དེ་ཕྱིར་མི་ཡི་གཙོ་ལ་ཞུ་བ་ལགས། །རྒྱུ་དང་རིགས་པ་འདུལ་ལ་མཁས་པ་དག །སངས་རྒྱས་ཡེ་ཤེས་ཇི་ལྟར་ཐོབ་སྙམ་པ། །སྤྱོད་པ་མཆོག་ལ་སུ་དག་སྤྱོད་པ་རྣམས། །དེ་ཕྱིར་བདག་ནི་རྐང་གཉིས་གཙོ་ལ་ཞུ། །གང་གིས་ཕྲ་ཞིང་ཤིན་ཏུ་བལྟ་དཀའི་
ཆོས། །སྟོང་པ་ཞི་བ་མཚུངས་མེད་བསམ་མི་ཁྱབ། །སྟོབས་བཅུ་ལྡན་པའི་སྤྱོད་ཡུལ་བསྒོམས་པ་རྣམས། །དེ་དག་སླད་དུ་འདྲེན་པ་བདག་ཞུའོ། །སྲོག་ཆགས་འགྲོ་བ་བསམ་ཡས་ཀུན་གྱི་ཕྱིར། །གང་གིས་བྱམས་པ་སྙིང་རྗེ་རབ་བསྒོམས་ཤིང་། །གང་ལ་སེམས་ཅན་འདུ་ཤེས་མེད་པ་དག །དེ་ཕྱིར་རྐང་གཉིས་གཙོ་ལ་བདག་ཞུའོ། །གང་དག་ཡེ་ཤེས་མཚུངས་མེད་བསམ་མི་ཁྱབ། །དེ་དག་ལ་ནི་གཟུང་བ་ཡོང་མེད་དེ། །སེམས་དང་སྤྱོད་ཡུལ་དག་གི་ཕ་རོལ་ཕྱིན། །དེ་ཕྱིར་མགོན་པོ་ལ་ནི་བདག་ཞུའོ། །ཚུལ་ཁྲིམས་ཡེ་ཤེས་ཡོན་ཏན་ཕ་རོལ་ཕྱིན། །དུས་གསུམ་ལ་ནི་ཡེ་ཤེས་མཚུངས་མེད་འཇུག །ཁྱོད་ལ་འཁྲུལ་པ་དག་ནི་མི་མངའ་ན། །སུ་ཡི་སླད་དུ་འཛུམ་པ་འདི་དག་བསྟན། །ཤཱ་རིའི་བུ་དང་མ་འགགས་མཽད་གལ་བུ། །བདེ་གཤེགས་ཉན་ཐོས་གཞན་གང་སུ་མཆིས་པ། །འདི་ལ་དེ་དག་ཡེ་ཤེས་མི་འཇུག་སྟེ། །འདི་ནི་སངས་རྒྱས་སྤྱོད་ཡུལ་བླ་ན་མེད། །ཆོས་རྣམས་ཀུན་ལ་དབང་བའི་ཕ་རོལ་ཕྱིན། །བསླབས་པའི་སྤྱོད་པ་ཀུན་གྱིས་མངོན་པར་འཕགས། །འདྲེན་པ་ཐུགས་རྗེ་དག་ཀྱང་རབ་བསྐྱེད་ལ། །དོན་དམ་མཁྱེན་པ་གསུང་སྒྲ་དབྱུང་བར་གསོལ། །སྔོན་གང་བསྐལ་པ་བྱེ་བ་མང་པོར་ཡང་། །སྐྱབས་དང་དཔུང་གཉེན་མཆོག་ཏུ་གྱུར་སྙམ་སྟེ། །དེ་འདྲའི་སེམས་ཀྱིས་རྐང་གཉིས་གཙོ་དྲིས་པ། །འདྲེན་པས་དེ་ཡི་འབྲས་བུ་དེང་གསུང་ཤིག །གང་ཟག་ཆེན་པོས་ལུང་བསྟན་མཉན་པའི་ཕྱིར། །གནོད་སྦྱིན་སྲིན་པོ་གྲུལ་བུམ་གསང་བ་པོ། །རྐང་གཉིས་གཙོ་བོ་ལ་ནི་རབ་རྟོག་ཅིང་། །ཐམས་ཅད་ཐལ་མོ་སྦྱར་ཏེ་གུས་པར་འཁོད། །སངས་རྒྱས་ཞིང་ནི་བྱེ་བ་མང་པོ་ནས། །བྱང་ཆུབ་སེམས་དཔའ་འཕྲུལ་ལྡན་མང་པོ་མཆིས། །བདེ་གཤེགས་སྲས་ཀྱི་གཙོ་བོ་ཐུགས་ལས་སྐྱེས། །ཐམས་ཅད་ཐལ་མོ་སྦྱར་ཅིང་གུས་པས་འཁོད། །ཤཱཀྱ་སེང་གེ་མི་མཆོག་དྲི་བའི་ཕྱིར། །མི་འཁྲུགས་ཞིང་ཕྱོགས་འཇིག་རྟེན་རྣམ་གྲགས་པ། །ཤར་ཕྱོགས་ནས་ནི་སྤོས་ཀྱི་གླང་པོ་ཡང་། །བྱང་ཆུབ་སེམས་དཔའ་ཁྲག་ཁྲིག་མདུན་བདར་མཆིས། །ཤཱཀྱ་སེང་གེ་མི་མཆོག་དྲི་བའི་ཕྱིར། །
བདེ་བ་ཅན་གྱི་འཇིག་རྟེན་ཁམས་མཆོག་ནས། །མཐུ་ཆེན་ཐོབ་དང་སྤྱན་རས་གཟིགས་དབང་ཡང་། །བྱང་ཆུབ་སེམས་དཔའ་ཁྲག་ཁྲིག་ལྷན་ཅིག་མཆིས། །གང་དག་སྔན་ཆད་བསྐལ་པ་བྱེ་མང་སྙེད། །ཡེ་ཤེས་དམ་པ་མཆོག་འདི་ཚོལ་བའི་ཕྱིར། །རྒྱ་མཚོ་ཀུན་གྱི་བྱེ་མ་མཉམ་པ་ཡི། །བདེ་གཤེགས་དཔག་ཏུ་མེད་པ་བསྙེན་བཀུར་བགྱིས། །སངས་རྒྱས་ཀུན་གྱིས་བསྟོད་ཅིང་རབ་བསྔགས་པ། །ཆོས་རྣམས་ཀུན་གྱི་ཡོན་ཏན་ཕ་རོལ་ཕྱིན། །འཇིག་རྟེན་ཕྱོགས་རྣམས་ཀུན་ཏུ་རབ་གྲགས་པ། །འཇམ་དབྱངས་ལེགས་པར་ཐལ་མོ་སྦྱར་ཏེ་མཆིས། །སངས་རྒྱས་ཞིང་དུ་ཁྲག་ཁྲིག་སྤྱད་བགྱིས་ཀྱང་། །འདི་འདྲ་རྣམས་ནི་མཐོང་བ་རྙེད་དཀའ་སྟེ། །ལེགས་བསླབས་སངས་རྒྱས་སྲས་པོ་ཡོན་ཏན་ཅན། །ཐམས་ཅད་ཐལ་མོ་རབ་སྦྱར་གུས་པར་འཁོད། །སྟོན་པ་ཀུན་གྱི་ཆོས་ཀྱི་མཛོད་འཛིན་པ། །མཁས་པ་འདིར་མཆིས་ཅི་འདྲ་དེ་ལྟ་བུ། །སྣོད་དུ་གྱུར་པ་འདི་ན་གཞན་མ་མཆིས། །འདྲེན་པ་འཇམ་པའི་དབྱངས་སུ་བརྗོད་པ་གསུངས། །རྒྱལ་བ་རྣམ་འདྲེན་གླེང་གཞི་མ་མཆིས་པར། །གང་ཟག་དམ་པ་འཛུམ་པ་མི་སྟོན་ན། །གང་གི་སླད་དུ་འཛུམ་པ་འདི་བསྟན་པ། །རྔ་མཆོག་སྒྲ་ལྡན་གསུང་དབྱངས་དབྱུང་དུ་གསོལ། །ངང་པ་ཁུ་བྱུག་རྨ་བྱ་ས་ར་ས། །འབྲུག་གི་སྒྲ་སྐད་ཁྱུ་མཆོག་སྒྲ་འབྱིན་བཞིན། །ལྷ་ཡི་རོལ་མོ་སྙན་པའི་སྒྲ་འབྱིན་པ། །སེམས་ཅན་གྲོལ་མཛད་གསུང་གིས་ལུང་སྟོན་ཅིག །བྱམས་པ་སྐྱེད་ཅིང་དགའ་བ་འཕེལ་བར་བགྱིད། ། ཡེ་ཤེས་སྟོན་ཅིང་མ་རིག་སེལ་བ་སྟེ། །དོན་ལ་རྟོག་ཅིང་ཤེས་རབ་འཕེལ་བགྱིད་ཅིང་། །བསྐལ་པ་ཁྲག་ཁྲིག་བྱེ་བར་རྣམ་སྦྱོང་བ། །རྟོགས་པས་ངེས་བགྱིས་དངོས་པོ་རྣམ་པར་བཤིག །སྡུག་བསྔལ་འགོག་པའི་ཚིག་དོན་ངེས་པར་སྟོན། །མུ་སྟེགས་ཀུན་གྱི་སྨྲ་བ་རྣམ་པར་འཇོམས། །སྟོང་པ་སྲོག་མེད་སེམས་ཅན་མེད་པ་སྒོམ། །བསོད་ནམས་སྟོང་ཕྲག་བརྒྱ་ཡིས་ལེགས་པར་བརྒྱན། །སངས་རྒྱས་སྟོང་ཕྲག་བརྒྱ་ཡིས་འདིར་སྤྱད་དེ། །ལྷ་རྣམས་སྟོང་ཕྲག་བརྒྱ་ཡིས་རབ་ཏུ་བསྟོད། །ཚངས་པ་སྟོང་ཕྲག་བརྒྱ་ཡིས་ཕྱག་ཀྱང་བགྱིས། །གནོད་སྦྱིན་སྲིན་པོ་གྲུལ་བུམ་དད་བགྱིད་དེ། །ཀླུ་དང་ལྟོ་
འཕྱེ་འདབ་བཟངས་གྲོལ་བར་བགྱིད། །རྟག་ཏུ་མ་ཆགས་ཤིན་ཏུ་ལྡན་པ་སྟེ། །ལས་དགེའི་འབྲས་བུས་འཕགས་པ་གསུང་ཕྱུང་ཤིག །རྒྱལ་བ་ཇི་སྙེད་མྱ་ངན་འདས་པ་དང་། །གང་དག་མ་བྱོན་པ་དང་བཞུགས་པ་རྣམས། །ཐམས་ཅད་ཁྱོད་ཀྱིས་མཁྱེན་ཅིང་ཐོགས་མི་མངའ། །འདྲེན་པ་ཡོན་ཏན་ཀུན་གྱིས་ཤིན་ཏུ་འཕགས། །འབྱུང་པོ་འཛིན་པ་རི་དང་རྒྱ་མཚོར་བཅས། །ས་འདི་ཐམས་ཅད་རྣམ་པ་དྲུག་ཏུ་གཡོས། །ལྷ་ཡི་ཚོགས་རྣམས་མཁའ་ལས་མེ་ཏོག་འཐོར། །ལྷ་ཡི་སྤོས་ངད་ཡིད་དུ་འོང་བ་ལྡང་། །འདོད་ཆགས་ཞེ་སྡང་རབ་རིབ་མ་ལུས་བསལ། །ཚུལ་ཁྲིམས་ཡོངས་དག་ཡིད་ཀྱང་ཡོངས་སུ་དག །མཚན་མེད་རབ་ཏུ་ཞི་བའི་སྟོང་ལ་དགྱེས། །སེང་གེའི་སྒྲ་སྐད་སྒྲོགས་ཤིག་ཐུགས་རྗེ་ཅན། །སྤོབས་དང་ལྡན་ཞིང་ཤིན་ཏུ་སྙན་པ་ཡངས། །རྒྱལ་བའི་ཤེས་རབ་རྫོགས་ཤིང་ཡེ་ཤེས་རྫོགས། །ཐུགས་རྗེ་ལྡན་པ་ཁྱོད་འདྲ་འཇིག་རྟེན་མེད། །གང་གི་དོན་དུ་འཛུམ་པ་འདི་བསྟན་གསུངས། །རྨ་བྱ་ཁུ་བྱུག་ཀ་ལ་པིང་ཀའི་སྒྲ། །ཤང་ཤང་ཏེའུའི་སྒྲ་ཡང་ཡིད་འོང་བ། །དགའ་འགྱུར་སྐད་ཀུན་དུས་གཅིག་ཚོགས་པས་ཀྱང་། །བདེ་གཤེགས་གསུང་གི་ཆར་ནི་དེས་མི་ཕོད། །རྔ་དང་རྫ་རྔ་འཁར་རྔ་དེ་བཞིན་ཏེ། །དུང་དང་གླིང་བུ་དེ་བཞིན་པི་བང་དང་། །སིལ་སྙན་སྟོང་གི་སྒྲ་རྣམས་གཅིག་ཏུ་འདུས། །དེ་དག་བདེ་གཤེགས་སྒྲ་ཡི་ཆར་མི་ཕོད། ། ལྷ་ཡི་སིལ་སྙན་དམ་པ་སྟོང་གི་སྒྲ། །ལྷ་ཡི་བུ་མོ་གླུ་དབྱངས་སྙན་པ་དང་། །རོལ་མོའི་སྒྲ་རྣམས་དགའ་བ་སྐྱེད་བགྱིད་པ། །དེ་དག་བདེ་གཤེགས་གསུང་གི་ཆར་མི་ཕོད། །འཇིག་རྟེན་ཕན་པ་ཁྱོད་ཀྱི་གསུང་གཅིག་ལས། །མོས་པ་ཐ་དད་བཞིན་དུ་སྒྲ་འབྱུང་སྟེ། །རྒྱལ་བ་བདག་ལ་སྟོན་སྙམ་སོ་སོ་སེམས། །གང་གི་སླད་དུ་ཁྱོད་ཀྱིས་འཛུམ་མཛད་བསྟན། །ལྷ་ཡི་སྒྲ་དང་དེ་བཞིན་ཀླུ་ཡི་སྐད། །མི་འམ་ཅི་ཡི་སྒྲ་སྙན་ཅི་མཆིས་པ། །དེ་དག་ནམ་ཡང་ཉོན་མོངས་ཞི་མི་བགྱིད། །སངས་རྒྱས་གསུང་ནི་རྟག་ཏུ་ཉོན་མོངས་སེལ། །དགའ་བ་སྐྱེད་ཅིང་འདོད་ཆགས་དགའ་མ་ལགས། །བྱམས་པ་སྐྱེད་ཅིང་ཞེ་སྡང་བློ་མ་ལགས། །ཤེས་རབ་སྐྱེད་ཅིང་གཏི་མུག་བློ་མ་ལགས། །སངས་
རྒྱས་གསུང་གིས་དྲི་མ་ཐམས་ཅད་སེལ། །འཁོར་ལས་སླད་རོལ་ཏུ་ནི་སྒྲ་མི་འབྱུང་། །ཐམས་ཅད་ཀྱི་ཡང་ནེམ་ནུར་བརྒྱ་མང་གཅོད། །མཐོ་བ་མ་ལགས་དམའ་བ་མ་ལགས་པ། །ཐུབ་པའི་གསུང་ནི་སྙོམས་ཤིང་བདེ་བ་སྟོན། །རི་དང་ནགས་བཅས་ས་འདི་གས་གྱུར་ཅིང་། །རྒྱ་མཚོའི་ཆུ་དག་དེ་བཞིན་གས་གྱུར་ལ། །ཟླ་བ་ཉི་མ་ས་ལ་ལྷུང་གྱུར་ཀྱང་། །རྒྱལ་བས་བཤད་པ་རྣམ་པ་གཞན་མི་འགྱུར། །ཚིག་གི་ཡན་ལག་ཐམས་ཅད་དག་པའི་གསུང་། །སེང་གེའི་སྒྲ་སྐད་འཇམ་ཞིང་མཉེན་པའི་དབྱངས། །ཚངས་པའི་དབྱངས་མངའ་བདེ་གཤེགས་ཐུགས་རྗེ་ཅན། །གང་གི་སླད་དུ་འཛུམ་མཛད་བསྟན་དུ་གསོལ། །འདས་དང་མ་འོངས་པ་དང་ད་ལྟར་གྱི། །འཇིག་རྟེན་སེམས་ཅན་ཇི་སྙེད་ཀུན་གྱི་ཡང་། །སེམས་དང་སྤྱོད་པ་ཀུན་ལ་རབ་ཏུ་མཁས། །གང་གི་སླད་དུ་འཛུམ་བསྟན་བཤད་དུ་གསོལ། །རྒྱལ་བ་ཇི་སྙེད་སུ་དག་ཐུགས་རྗེ་ཅན། །དབང་དང་ཡེ་ཤེས་ཀུན་གྱི་ཕ་རོལ་ཕྱིན། །དྲི་མེད་ཟླ་ཞལ་རྒྱལ་བ་དེ་དག་ནི། །རྟག་ཏུ་རྒྱུ་མེད་འཛུམ་པ་མི་མཛད་དོ། །བསྐལ་པ་བྱེ་བར་བརྗོད་ཀྱང་མཚུངས་མེད་པ། །གང་གཱའི་བྱེ་སྙེད་ཡོན་ཏན་བརྗོད་བགྱིས་ཀྱང་། །ཡོན་ཏན་དག་གི་ཚད་བརྗོད་མི་ནུས་པ། །གང་གི་སླད་དུ་འཛུམ་བསྟན་བཤད་དུ་གསོལ། །འཛུམ་པ་བསྟན་པའི་ལེའུ་སྟེ་བཅུ་བཞི་པའོ།། །།