བཅུ་དྲུག་པ། སྔོན་བྱུང་བའི་ལེའུ།
དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་ཐམས་ཅད་སྲིད་པའི་སྡུག་བསྔལ་ཐམས་ཅད་ལས་ཐར་བར་བྱ་བར་འདོད་པ་དང་། ཏིང་ངེ་འཛིན་གྱི་དགའ་ཞིང་བདེ་བ་བླ་ན་མེད་པ་འཕགས་པ་འདི་ལ་སེམས་ཅན་རྣམས་རབ་ཏུ་དགོད་པར་འདོད་པས་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པ་ཏིང་ངེ་འཛིན་གྱི་རྒྱལ་པོ་འདི་མཉན་པར་བྱ། གཟུང་བར་བྱ། ཀུན་ཆུབ་པར་བྱ། བཅང་བར་བྱ། བཀླག་པར་བྱ། རབ་ཏུ་གདོན་པར་བྱ། ལུང་མནོད་པར་བྱ། ཁ་ཏོན་དུ་བྱ། ཉོན་མོངས་པ་མེད་པའི་བསྒོམ་པས་བསྒོམ་པར་བྱ། མང་དུ་བྱ། གཞན་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་པར་བྱའོ། །དེ་ཅིའི་ཕྱིར་ཞེ་ན། གཞོན་ནུ་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པ་ཏིང་ངེ་འཛིན་གྱི་རྒྱལ་པོ་འདི་ནི་ངན་སོང་ཐམས་ཅད་ལས་འདའ་བར་བྱེད་པ། ནད་ཐམས་ཅད་ལས་རབ་ཏུ་ཐར་བར་བྱེད་པ་ཡིན་ཏེ། གཞོན་ནུ་ནམ་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པ་ཏིང་ངེ་འཛིན་གྱི་རྒྱལ་པོ་འདི་ཐོས་ཤིང་བཟུང་སྟེ་བསྒོམས་པར་གྱུར་པ་དེའི་ཚེ། གཞོན་ནུ་
བྱང་ཆུབ་སེམས་དཔའ་སེམས་དཔའ་ཆེན་པོ་དེ་སེམས་ཅན་ཐམས་ཅད་སྲིད་པའི་སྡུག་བསྔལ་ཐམས་ཅད་ལས་ཐར་བར་བྱས་ཤིང་ཏིང་ངེ་འཛིན་གྱི་དགའ་བའི་བདེ་བ་བླ་ན་མེད་པ་འཕགས་པ་ལ་སེམས་ཅན་རྣམས་རབ་ཏུ་འགོད་དེ་ཏིང་ངེ་འཛིན་འདི་ཡང་མྱུར་དུ་འཐོབ་བོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མྱུར་དུ་མངོན་པར་རྫོགས་པར་འཚང་རྒྱའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་དོན་འདི་ཉིད་བསྟན་པའི་ཕྱིར་ཚིགས་སུ་བཅད་པའི་དབྱངས་ཀྱིས་སྔོན་བྱུང་བའི་གཏམ་བསྟན་པ་འདི་ཡང་དག་པར་རབ་ཏུ་བཤད་དོ། །སྔོན་ཆད་སྤྱོད་པ་སྤྱད་པ་དྲན་པ་ནི། །བདེ་གཤེགས་སེང་གེ་རྒྱལ་མཚན་བསྟན་པ་ལ། །དགེ་སློང་མཁས་པ་ཆོས་སྨྲ་བྱུང་བ་ཡང་། །དེ་ཡི་མིང་ནི་ཚངས་པས་བྱིན་ཞེས་བྱ། །ང་ནི་བློ་གྲོས་ཞེས་བྱ་རྒྱལ་པོའི་བུ། །ན་བར་གྱུར་ཏེ་མི་བཟད་སྡུག་བསྔལ་ཚོར། །དེ་ཚེ་ཚངས་པས་བྱིན་པ་ཆོས་སྨྲ་བ། །ང་ཡི་སློབ་དཔོན་དུ་ནི་གྱུར་པ་ཡིན། །ང་ནི་སྨན་པ་ལྔ་བརྒྱ་མི་ཉུང་བ། །བརྩོན་པའི་ཡིད་ཀྱིས་ནད་དཔྱད་གསོ་བར་བྱེད། །ང་ཡི་ནད་ནི་གསོ་བར་མ་ནུས་ནས། །ང་ཡི་གཉེན་བཤེས་ཀུན་ཀྱང་སྡུག་བསྔལ་གྱུར། །ང་ཡང་ན་བར་དགེ་སློང་དེས་ཐོས་ནས། །ནད་དྲི་བར་ནི་ང་ཡི་དྲུང་དུ་འོངས། །ཚངས་བྱིན་ང་ལ་བརྩེ་བ་རབ་བསྐྱེད་ནས། །ཏིང་འཛིན་མཆོག་འདི་དེ་ཚེ་བཤད་པར་གྱུར། །ང་ནི་ཏིང་འཛིན་དམ་པ་འདི་ཐོས་ནས། །འཕགས་པའི་དགའ་བ་ཟང་ཟིང་མེད་པ་སྐྱེས། །ཆོས་ཀྱི་ངོ་བོ་ཉིད་ཀྱང་རབ་ཤེས་པས། །ང་ཡང་དེ་ཡི་དུས་ན་ནད་ལས་སོས། །མར་མེ་མཛད་ནི་སྤྱད་པ་སྤྱོད་པ་ན། །དགེ་སློང་ཆོས་སྨྲ་མཁས་པར་གྱུར་པ་ཡིན། །ང་ནི་བློ་གྲོས་རྒྱལ་པོའི་བུར་གྱུར་ཏེ། །ཏིང་འཛིན་ཡེ་ཤེས་ཀྱིས་ནི་ནད་ལས་ཐར། །དེ་བས་གཞོན་ནུ་ཁྱོད་ཀྱིས་ཕྱི་དུས་ན། །ཡོངས་སུ་ཉམས་པ་འདི་དག་རྗེས་དྲན་ཞིང་། །བྱིས་པས་ཉེས་པར་བརྗོད་པའི་ཚིག་བཟོད་གྱིས། །ཏིང་འཛིན་འདི་ཡང་ཟུང་ལ་ལེགས་པར་ལྷོགས། །ཕྱི་མའི་དུས་ལ་དགེ་སློང་མང་པོ་དག །བརྐམ་ཞིང་གཏུམ་ལ་མ་བསྡམས་འབྱུང་བར་འགྱུར། །སྡིག་ལ་དགའ་ཞིང་ལྷུང་བཟེད་ཆོས་གོས་ཆགས། །ཏིང་འཛིན་འདི་ནི་རབ་ཏུ་སྤོང་བར་
འགྱུར། །རྒོད་ཅིང་དབང་པོ་གཡེངས་པ་ཕྲག་དོག་ཅན། །གྲོང་ལ་ཆགས་ཤིང་རྙེད་པ་འདོད་པ་དག །སྦྱོར་བ་བྱེད་པའི་སྐབས་ལ་རྟག་ཏུ་གནས། །ཏིང་འཛིན་འདི་ནི་རབ་ཏུ་སྤོང་བར་འགྱུར། །ལག་པ་དང་ནི་རྐང་པ་རྣམ་པར་རྡོབ། །རྩེ་འཇོ་རྒོད་ལ་རྟག་པར་རབ་ཏུ་ཞུགས། །གཅིག་ལ་གཅིག་ནི་མགུལ་འཁྱུད་ལག་ཀྱང་སྦྲེལ། །གྲོང་དུ་སྤྱོད་ལམ་གཞན་དུ་སྒྱུར་བར་བྱེད། །མི་རིགས་སྦྱོར་བའི་མཚན་ཉིད་འདི་དག་སྟེ། །གཞན་གྱི་བུ་མོ་ལ་ཡང་རྟག་ཏུ་ཆགས། །གཟུགས་ཀྱིས་རྒྱུགས་ཤིང་འདུན་པ་བོར་བ་ཡིན། །གྲོང་དང་གྲོང་ཁྱེར་ཡུལ་འཁོར་ཀུན་ཏུ་རྒྱུ། །དེ་དག་བཟའ་དང་བཏུང་ལ་རབ་ཏུ་ཞུགས། །གླུ་དང་བྲོ་གར་དེ་བཞིན་རོལ་མོ་དང་། །ཉོ་འཚོང་ལྷག་པར་བྱེད་ཅིང་རྟག་ཏུ་བརྩོན། །བཏུང་བ་དག་ལ་ཆགས་ཤིང་ངོ་ཚ་བོར། །མི་རིགས་བརྩོན་པ་སྤྲིང་ཡིག་སྐུར་བར་བྱེད། །ཚུལ་ཁྲིམས་དེ་བཞིན་ལམ་དག་བཏང་ནས་ནི། །ཁྱིམ་པ་དག་དང་བསྟེན་ཅིང་ཁྲིམས་དྲལ་ནས། །དེ་དག་ཚུལ་ཞིག་ལོག་པར་ཤིན་ཏུ་གནས། །ལས་གང་སངས་རྒྱས་ཀྱིས་ནི་རྟག་སྨད་པ། །སྲང་དང་ཚད་ལ་གཡོ་སྒྱུ་བྱེད་པར་ཞུགས། །དེ་འདྲའི་སྡིག་པ་ཉོན་མོངས་ལས་བྱས་པས། །ལས་ངན་བྱེད་པ་དེ་དག་ངན་སོང་འགྲོ། །དུང་དང་གསེར་དང་ནོར་བུ་ནོར་མང་དང་། །ཁྱིམ་དང་གཉེན་བཤེས་རྣམ་སྤངས་རབ་བྱུང་སྟེ། །སངས་རྒྱས་བསྟན་པ་འདི་ལ་རབ་བྱུང་ནས། ། སྡིག་པའི་ལས་རྣམས་ཤིན་ཏུ་སྤྱོད་པར་བྱེད། །ནོར་དང་འབྲུ་ལ་སྙིང་པོར་འདུ་ཤེས་ཤིང་། །བཞོན་དང་བ་ལང་ཤིང་རྟ་རྣམས་ལ་ཆགས། །གང་ལ་བསླབ་པའི་ནན་ཏན་མེད་པ་རྣམས། །དེ་དག་གིས་ཀྱང་ཅི་ཕྱིར་མགོ་བོ་བྲེགས། །ངས་ནི་སྔོན་ཚེ་སྤྱོད་པ་སྤྱད་པ་ན། །བསྐལ་པ་སྟོང་དུ་ཤིན་ཏུ་དཀའ་སྤྱད་དེ། །ང་ཡིས་ཏིང་འཛིན་ཞི་བ་འདི་བཙལ་ན། །དེ་དག་དེ་ཚེ་འདི་ཐོས་གད་མོས་འདེབས། །དེ་དག་ཡུན་རིང་བརྫུན་སྨྲ་ཚངས་མི་སྤྱོད། །རྟག་ཏུ་རྙེད་ལ་དགའ་ཞིང་ངན་སོང་གཞོལ། །ཚངས་པར་སྤྱོད་པའི་རྒྱལ་མཚན་ཐོགས་ནས་ནི། །ཚུལ་ཁྲིམས་འཆལ་པ་དེ་ནི་ཆོས་མིན་སྨྲ། །དེ་དག་ཕན་ཚུན་དབྱེ་བའི་ཕྱིར་འཇུག་སྟེ། །རིགས་པ་མ་ཡིན་པས་ནི་རྙེད་པ་ཚོལ། །གཅིག་ལ་གཅིག་ནི་མི་སྙན་རབ་བརྗོད་དེ། །ཤི་འཕོས་ནས་ནི་ངན་སོང་
སར་ཡང་འགྲོ། །དེ་དག་བརྒྱ་དང་སྟོང་གི་ནང་ན་ཡང་། །དེ་ཚེ་བཟོད་པའི་སྟོབས་ལྡན་ཤིན་ཏུ་དཀོན། །དེ་ཕྱིར་འཐབ་ལ་བརྩོན་པ་མང་པོ་འབྱུང་། །བཟོད་པ་སྤངས་ནས་རབ་ཏུ་སྤྲོས་པ་བྱེད། །བྱང་ཆུབ་སེམས་དཔའ་ངེད་ཡིན་ཚིག་ཏུ་སྨྲ། །དེ་ཡི་སྒྲ་ཡང་ཕྱོགས་དང་ཕྱོགས་སུ་འགྲོ། །མི་བདེན་སྒྲ་ཡི་དྲེགས་པས་དེ་རྒྱགས་ཏེ། །ཚུལ་ཁྲིམས་ཉམས་ལ་བྱང་ཆུབ་ག་ལ་ཡོད། །གང་ལ་བསམ་པ་རྣམ་པར་དག་མེད་ཅིང་། །ཆོས་འདི་ལ་ཡང་བཟོད་པ་མེད་པ་དང་། །ཆོས་རྣམས་སྤོང་བྱེད་བྱང་ཆུབ་འདི་ཐོབ་པ། །ངས་ནི་མ་ཐོས་ནམ་ཡང་ཡོང་མ་མཐོང་། །དེ་དག་འཇིགས་ཤིང་སྐྲག་ནས་ཁྱིམ་སྤངས་ཏེ། །རབ་ཏུ་བྱུང་ནས་ཤིན་ཏུ་དམ་དུ་འཛིན། །སྐྱེས་བུ་དམ་པའི་ཐེག་པ་སྤང་བྱས་ནས། །བྱེ་བྲག་ལྷག་པར་འདོད་པ་བརླག་པར་འགྱུར། །ཤེས་རབ་དམན་ཞིང་ཡོན་ཏན་རྣམ་སྤངས་པ། །ཐེག་པ་མཆོག་གི་ཉེས་པ་རྟག་ཏུ་བརྗོད། །གང་གི་སྐྱབས་སུ་དེ་དག་རབ་ཞུགས་པ། །དེ་ཉིད་ལ་ཡང་ཉེས་པ་བརྒྱ་དག་བརྗོད། །འཚོ་བ་མེད་པ་མང་པོ་རབ་བྱུང་སྟེ། །སངས་རྒྱས་བྱང་ཆུབ་རྣམ་པ་ཀུན་མི་འདོད། །བྱིས་པ་དེ་དག་བདག་ཏུ་ལྟ་ལ་གནས། །སྟོང་པ་ཉིད་ནི་ཐོས་ནས་སྐྲག་པར་འགྱུར། །ཕན་ཚུན་དུ་ཡང་རྩོད་པ་བྱས་ནས་ནི། །གནོད་སེམས་ཁོང་ཁྲོ་ཐ་བ་རབ་ཏུ་སྐྱེད། །ཕན་ཚུན་དུ་ཡང་སྐུར་པ་མངོན་འདེབས་ཤིང་། །སྡིག་པ་བྱས་ནས་ཤིན་ཏུ་དགའ་བ་རྙེད། །གང་དག་ཚུལ་ཁྲིམས་གནས་ཤིང་ཡོན་ཏན་ལྡན། །བྱམས་ལ་གནས་ཤིང་རྟག་ཏུ་བཟོད་རྟོགས་པ། །མཉེན་ཞིང་དེས་ལ་ཤིན་ཏུ་བསྡམས་པ་རྣམས། །དེ་དག་དེ་ཚེ་ཡོངས་སུ་བརྙས་པར་འགྱུར། །གང་ལ་ཤིན་ཏུ་གཏུམ་སེམས་ལྡན་འབྱུང་དང་། །མི་བཟང་མ་རུངས་ངན་པའི་ལས་བྱེད་པ། །ཆོས་མ་ཡིན་པ་སྤྱོད་ཅིང་འཐབ་ལ་དགའ། །དེ་དག་དེ་ཡི་དུས་ན་མཆོད་པར་འགྱུར། །བསྒོ་བར་བྱ་ཞིང་རབ་ཏུ་གོ་བར་བྱ། །གཞོན་ནུ་ང་ལ་དད་པའི་ཕྱིར་འབྲང་ན། །བདེ་བར་གཤེགས་པས་བསྟན་པ་འདི་དྲན་ནས། །དེ་དག་ལ་ནི་ནམ་ཡང་ཡིད་མི་རྟོན། །དེ་དག་འདོད་ཆགས་ཆེ་ཞིང་ཞེ་སྡང་ཆེ། །གཏི་མུག་ཆེ་ཞིང་ང་རྒྱལ་དྲེགས་པས་རྒྱགས། །ལུས་ཀྱང་མ་དུལ་ངག་ཀྱང་མ་དུལ་ཞིང་། །སེམས་ཀྱང་མ་དུལ་ངན་
སོང་གཞོལ་བ་ཡིན། །ང་ནི་ཡོན་ཏན་དག་གི་བསྔགས་བརྗོད་ན། །དགེ་སློང་ཡོན་ཏན་དག་ལ་མི་སྤྱོད་དེ། །ཚིག་ཙམ་གྱིས་ནི་བྱང་ཆུབ་ཐོབ་མི་འགྱུར། །ནན་ཏན་ལྷུར་བྱེད་བྱང་ཆུབ་རྙེད་མི་དཀའ། །སྔོན་བྱུང་བའི་ལེའུ་སྟེ་བཅུ་དྲུག་པའོ།། །།