བཅོ་བརྒྱད་པ། ཏིང་ངེ་འཛིན་རྗེས་སུ་གཏད་པའི་ལེའུ།
དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཏིང་ངེ་འཛིན་འདི་འཛིན་པ་དང་ཀུན་ཆུབ་པར་བྱེད་པ་དང་འཆང་བ་དང་ཀློག་པ་དང་རབ་ཏུ་འདོན་པ་དང་ལུང་ནོད་པ་དང་ཁ་ཏོན་བྱེད་པ་དང་གཞན་ལ་ཡང་རྒྱ་ཆེར་རབ་ཏུ་སྟོན་པ་དེ་ལ་ཡོན་ཏན་གྱི་ཕན་ཡོན་བཞིར་རིག་པར་བྱ་སྟེ། བཞི་གང་ཞེ་ན། འདི་ལྟ་སྟེ། བསོད་ནམས་ཟིལ་གྱིས་མི་ནོན་པར་འགྱུར། ཕས་ཀྱི་རྒོལ་བ་རྣམས་ཀྱིས་མི་རྫི་བར་འགྱུར། ཡེ་ཤེས་དཔག་ཏུ་མེད་པར་འགྱུར། སྤོབས་པ་མཐའ་ཡས་པར་འགྱུར་ཏེ། གཞོན་ནུ་བྱང་ཆུབ་སེམས་དཔའ་སེམས་དཔའ་
ཆེན་པོ་གང་ལ་ལ་ཏིང་ངེ་འཛིན་འདི་འཛིན་པ་དང་། ཀུན་ཆུབ་པར་བྱེད་པ་དང་འཆང་བ་དང་ཀློག་པ་དང་རབ་ཏུ་འདོན་པ་དང་ལུང་ནོད་པ་དང་ཁ་ཏོན་བྱེད་པ་དང་གཞན་ལ་ཡང་རྒྱ་ཆེར་རབ་ཏུ་སྟོན་པ་དེ་ལ་ཡོན་ཏན་གྱི་ཕན་ཡོན་འདི་བཞི་ཡོད་པར་རིག་པར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སངས་རྒྱས་ཀུན་གྱི་སྤྱོད་ཡུལ་བ། །ཏིང་འཛིན་ཞི་བ་འདི་བཟུང་ན། །རྟག་པའི་དུས་སུ་བསོད་ནམས་ཀྱང་། །ཤིན་ཏུ་ཟིལ་གྱིས་མ་ནོན་འགྱུར། །བྱང་ཆུབ་སྤྱོད་པ་བྱེ་བྲག་འཕགས། །མཆོག་ཏུ་དག་པ་སྤྱོད་པ་ན། །དཔའ་བོ་རྟག་པའི་དུས་སུ་ཡང་། །བསོད་ནམས་དག་གིས་བསྲུང་བར་འགྱུར། །དེ་ལ་ཕས་ཀྱི་རྒོལ་བ་དག །སུ་ཡང་འཚེ་བར་ཡོང་མི་བྱེད། །རྟག་པའི་དུས་སུ་སངས་རྒྱས་ཀྱིས། །ཡོངས་སུ་གཟུང་བར་འགྱུར་བ་ཡིན། །རྟག་པའི་དུས་སུ་ཡེ་ཤེས་ཀྱང་། །དཔག་ཏུ་མེད་པར་འགྱུར་བ་ཡིན། །ཞི་བའི་རྟེན་འདི་འཛིན་པ་ནི། །སྤོབས་པ་དག་ཀྱང་མཐའ་ཡས་འགྱུར། །ཏིང་འཛིན་ཞི་བ་མཆོག་འདི་རབ་བཟུང་ན། །རྟག་ཏུ་བསོད་ནམས་ཕུང་པོ་ཟིལ་མི་ནོན། །བྱང་ཆུབ་སྤྱད་པ་དམ་པ་སྤྱོད་པ་ན། །ཕས་ཀྱི་རྒོལ་བ་མེད་ཅིང་མི་ཚུགས་འགྱུར། །དེ་ཡི་ཡེ་ཤེས་ཡངས་ཤིང་རྣོ་བར་འགྱུར། །དེ་བཞིན་སྤོབས་པ་དག་ཀྱང་མཐའ་ཡས་འགྱུར། །མིག་ཀྱང་དག་འགྱུར་རྟག་ཏུ་མཁས་པ་དེ། །དྲན་པའི་སྟོབས་དང་གཟུངས་ཀྱི་སྟོབས་ཀྱང་འབྱུང་། །དོན་གྱི་ཚིག་རྣམས་རབ་ཏུ་སྟོན་བྱེད་ན། །མཁས་པ་དག་གི་ཤིན་ཏུ་ཡིད་འོང་འགྱུར། །ཏིང་འཛིན་ཞི་མཆོག་འདི་ནི་རབ་བཤད་ན། །ཤེས་རབ་ལྡན་པ་སྐྱེ་བོ་མང་པོས་རིག ། ཏིང་འཛིན་ཞི་བ་མཆོག་འདི་རབ་བཟུང་ན། །ཆོས་གོས་དམ་པ་མཆོག་དང་མལ་ཆ་དང་། །མགྲོན་དུ་གཉེར་དང་བཟའ་ཞིང་བཅའ་བའང་རྙེད། །ཤིན་ཏུ་གཞོན་ཞིང་བལྟ་ན་སྡུག་པར་འགྱུར། །ཏིང་འཛིན་ཞི་བ་མཆོག་འདི་ཚོལ་བ་ན། །སངས་རྒྱས་འཇིག་རྟེན་མགོན་པོ་མང་པོ་མཐོང་། །འདྲེན་པ་དག་ལ་མཚུངས་མེད་མཆོད་པ་བྱེད། །དེ་ལ་བར་ཆད་དག་ཀྱང་འབྱུང་མི་འགྱུར། །ཏིང་འཛིན་ཞི་བ་མཆོག་འདི་རབ་བཟུང་ན། །སེམས་དགའ་ཚིགས་བཅད་སྙན་པ་བརྒྱ་དག་གིས། །འཇིག་
རྟེན་མགོན་པོའི་སྤྱན་སྔར་བསྟོད་འགྱུར་ཏེ། །དེ་ནི་ཉམས་པར་ནམ་ཡང་ཡོང་མི་འགྱུར། །ཏིང་འཛིན་ཞི་བ་མཆོག་འདི་རབ་བཟུང་ན། །དེ་ཡི་མདུན་དུ་འཇིག་རྟེན་མགོན་པོ་ནི། །མཚན་དང་དཔེ་བྱད་མཛེས་པའི་སྐུ་བཞུགས་ཏེ། །དེ་ཡི་ཡེ་ཤེས་ཉམས་པར་ཡོང་མི་འགྱུར། །ཏིང་འཛིན་ཞི་བ་མཆོག་འདི་རབ་བཟུང་ན། །ནམ་ཡང་ཞུམ་པའི་སེམས་སུ་མི་འགྱུར་ཏེ། །རྟག་ཏུ་ཕྱུག་ཅིང་དབུལ་པོ་མ་ཡིན་འགྱུར། །སེམས་ཀྱང་འཛིན་ཅིང་ཆགས་པར་ཡོང་མི་འགྱུར། །ཏིང་འཛིན་ཞི་བ་མཆོག་འདི་རབ་བཟུང་ན། །མི་ཁོམ་པར་ཡང་གནས་པར་མི་འགྱུར་ཏེ། །ས་བདག་འཁོར་ལོས་སྒྱུར་བའི་རྒྱལ་པོར་འགྱུར། །དེ་ཡི་རྒྱལ་སྲིད་རྟག་ཏུ་བདེ་བར་འོང་། །བསྐལ་པ་བརྒྱར་ནི་བཤད་ཀྱང་མི་ཟད་དེ། །ཡེ་ཤེས་ཡངས་པ་དེ་ལ་ཐེ་ཚོམ་མེད། །ཏིང་འཛིན་ཞི་བའི་ས་འདི་ཐོས་ནས་ནི། །བརྟན་པ་ཇི་ལྟར་བསྟན་པ་དེ་བཞིན་གནས། །བསྐལ་པ་བྱེ་བ་མཐའ་ཡས་དཔག་མེད་དུ། །སྟོབས་བཅུས་དེ་ཡི་ཕན་ཡོན་བརྗོད་ན་ཡང་། །ཆ་ཙམ་དུ་ནི་ཡོངས་སུ་བརྗོད་མི་འགྱུར། །རྒྱ་མཚོ་ལས་ནི་ཆུ་ཐིགས་བླངས་པ་བཞིན། །དེ་ཚེ་གཞོན་ནུ་དེ་ཡང་རབ་དགའ་བས། །ལངས་ནས་རབ་ཏུ་ཐལ་སྦྱར་ཕྱག་འཚལ་ཏེ། །མགུ་རངས་སྟོབས་བཅུ་ཡི་ནི་མངོན་སུམ་འདུག །ཚིག་རབ་མཆོག་གིས་ཆེད་དུ་རྗོད་པ་བརྗོད། །འཇིག་རྟེན་མགོན་པོ་འོད་མཛད་པ། །མི་གཙོས་འདི་དག་ཇི་ཙམ་དུ། །ཕན་ཡོན་ལེགས་པར་རབ་བཤད་པ། །དཔའ་བོ་ཆེན་པོ་བསམ་མི་ཁྱབ། །ཕྱི་མའི་དུས་ན་སུ་དག་ནི། །མདོ་སྡེ་འདི་ལ་ཉན་པར་འགྱུར། །ཕན་པར་དགོངས་ཤིང་ཐུགས་བརྩེ་བ། །དཔའ་བོ་ཆེན་པོ་བདག་ལ་གསུངས། །ཀ་ལ་པིང་ཀའི་སྒྲ་དབྱངས་ཀྱིས། །སྟོན་པས་དེ་ལ་བཤད་མཛད་དེ། །བཅོམ་ལྡན་ཆགས་མེད་ཡེ་ཤེས་ཅན། །ཚིག་ཀྱང་འདི་སྐད་རབ་ཏུ་གསུང་། །སུ་དག་ཆོས་ཀྱི་རྗེས་སློབ་ཅིང་། །མདོ་སྡེ་འདི་ནི་ཉན་འགྱུར་བ། །ནན་ཏན་བླ་ན་མེད་པ་ཡང་། །གཞོན་ནུ་བཤད་ཀྱིས་མཉན་པར་གྱིས། །སངས་རྒྱས་ཡེ་ཤེས་རབ་ཚོལ་བས། །མི་དབང་དག་ལ་མཆོད་བྱེད་ཅིང་། །བྱམས་པའི་སེམས་ལ་སྙེན་བྱེད་པ། །མདོ་སྡེ་འདི་ནི་ཉན་པར་འགྱུར། །
སྦྱངས་པའི་ཡོན་ཏན་ཡོ་བྱད་བསྙུངས། །ཡོན་ཏན་མཆོག་ལ་བསྙེན་བྱས་ཤིང་། །ནན་ཏན་ལ་ཡང་གནས་ནས་སུ། །མདོ་སྡེ་འདི་ནི་ཉན་པར་འགྱུར། །འཇིག་རྟེན་མགོན་པོའི་བསྟན་པ་ལ། །གང་གིས་ཚུལ་ཁྲིམས་བཤིག་པ་དང་། །སྡིག་པ་བྱེད་པའི་ལག་ནས་ནི། །མདོ་སྡེ་འདི་ཡང་ཐོས་མི་འགྱུར། །དཔའ་བོ་ཚངས་པར་སྤྱོད་པ་དང་། །གང་གི་སེམས་ཀྱང་མི་བརྐམ་ཞིང་། །སངས་རྒྱས་དག་གིས་བྱིན་བརླབས་པ། །དེ་དག་ལག་ནས་ཐོས་པར་འགྱུར། །གང་གིས་སྔོན་གྱི་སངས་རྒྱས་དག །འཇིག་རྟེན་མགོན་པོ་རི་མོར་བྱས། །དེ་དག་ལ་གནས་མདོ་སྡེ་འདི། །ཕྱི་མའི་དུས་ན་ཐོས་པར་འགྱུར། །གང་དག་ཚེ་རབས་སྔ་མ་ལ། །མུ་སྟེགས་ཅན་དུ་གྱུར་པ་ནི། །དེ་དག་མདོ་སྡེ་འདི་ཐོས་ན། །ཡིད་ནི་དགའ་ཞིང་བདེར་མི་འགྱུར། །ང་ཡི་བསྟན་པ་འདི་ལ་ནི། །འཚོ་བ་འདོད་ཕྱིར་རབ་བྱུང་ནས། །རྙེད་དང་བཀུར་སྟིས་ཟིལ་གྱིས་ནོན། །གཅིག་ལ་གཅིག་ཀྱང་སྨོད་པར་བྱེད། །དགེ་སློང་དབང་པོ་མ་བསྡམས་པ། །གཞན་གྱི་བུད་མེད་རབ་སྙེགས་ཤིང་། །ཚུལ་ཁྲིམས་འཆལ་པ་རྙེད་པ་འདོད། །མདོ་སྡེ་འདི་ལ་དད་མི་བྱེད། །སངས་རྒྱས་བརྙེས་པའི་བསོད་ནམས་དང་། །བསམ་གཏན་ཐོབ་པར་མི་འདོད་ཅིང་། །བདག་ཏུ་འདུ་ཤེས་གནས་པ་དག །མདོ་སྡེ་འདི་ལ་དད་མི་བྱེད། །ཕྱི་མའི་དུས་ན་འབྱུང་བ་ནི། །འཇིག་རྟེན་བསམ་གཏན་འབྲས་བུར་འཛིན། །དགྲ་བཅོམ་བསོད་སྙོམས་ཟོས་ནས་ཀྱང་། །སངས་རྒྱས་བྱང་ཆུབ་སྨོད་པར་བྱེད། །འཛམ་བུ་ཡི་ནི་གླིང་འདི་ནི། །མཆོད་རྟེན་ཅི་ཡོད་ཀུན་བཤིག་པས། །གང་གིས་མདོ་སྡེ་འདི་སྤངས་ན། །སྡིག་པ་འདི་ནི་ཁྱད་པར་ཆེ། །གང་གིས་གང་གཱའི་བྱེ་སྙེད་ཀྱི། །དགྲ་བཅོམ་དག་ནི་བསད་པ་བས། །གང་གིས་མདོ་སྡེ་འདི་སྤངས་ན། །སྡིག་པ་འདི་ནི་ཁྱད་པར་ཆེ། །མི་བཟད་པ་ཡི་ཕྱི་དུས་ལ། །དམ་པའི་ཆོས་ནི་འཇིག་པའི་ཚེ། །མདོ་སྡེ་འདི་ནི་རབ་བཤད་པར། །ཁྱེད་ལ་སུ་དག་སྤྲོ་བ་ཡོད། །དེ་ཚེ་གཞོན་ནུ་ལངས་ནས་ནི། །ངུ་ཞིང་རྒྱལ་ལ་འདི་སྐད་གསོལ། །སངས་རྒྱས་ཐུགས་ཀྱི་སྲས་པོ་ཡིས། །འདི་སྐད་སེང་གེའི་སྒྲ་ཡང་
བསྒྲགས། །རྫོགས་པའི་སངས་རྒྱས་མྱ་ངན་འདས། །མི་བཟད་པ་ཡི་ཕྱི་དུས་ལ། །ལུས་དང་སྲོག་ཀྱང་རབ་བཏང་སྟེ། །བདག་གིས་མདོ་སྡེ་རྒྱས་པར་བགྱི། །བྱིས་པ་རྣམས་ཀྱི་མི་བདེན་པ། །བརྒྱད་ཅིང་སྤྱོས་པ་བཟོད་པར་བགྱི། །གཤེ་བ་དང་ནི་བསྡིགས་པ་ཡང་། །འདྲེན་པ་དང་དུ་བླང་བར་བགྱི། །བྱང་ཆུབ་སེམས་དཔའ་གཞན་དག་ལ། །ངན་སེམས་དག་ནི་བསྐྱེད་པ་འམ། །གང་སྔོན་བདག་གིས་སྡིག་པ་ཡི། །ལས་རྣམས་བགྱིས་པ་བྱང་བར་བགྱི། །སྤྱི་བོ་ལ་ནི་ཕྱག་བཞག་སྟེ། །སངས་རྒྱས་གསེར་གྱི་མདོག་འདྲ་བ། །དེ་བཞིན་གཤེགས་པ་འཇམ་པའི་དབྱངས། །ཟླ་འོད་ལ་ནི་སྟོན་པ་གསུང་། །གཞོན་ནུ་ཕྱི་མའི་དུས་དག་ལ། །ཁྱོད་ཀྱིས་ཚངས་པར་སྤྱོད་པ་དང་། །སྲོག་གི་བར་ཆད་མི་འབྱུང་བར། །ཁྱོད་ལ་བྱིན་གྱིས་བརླབ་པར་བྱ། །ཆོས་སྨྲ་བ་ནི་གཞན་དག་ཀྱང་། །བརྒྱད་བརྒྱ་པོ་དག་ལངས་ནས་ནི། །ཕྱི་མའི་དུས་ལ་བདག་ཅག་ཀྱང་། །མདོ་སྡེ་འདི་ནི་འཛིན་པ་ལགས། །ལྷ་དང་ཀླུ་དང་གནོད་སྦྱིན་ཡང་། །བྱེ་བ་བརྒྱད་ཅུ་ཉེར་ལྷགས་ཏེ། །གཞན་ཡང་ཁྲག་ཁྲིག་དྲུག་ཅུ་རྣམས། །འཇིག་རྟེན་མགོན་ལ་འདི་སྐད་སྨྲ། །དགེ་སློང་དག་ནི་འདི་རྣམས་ལས། །དེ་རིང་སུ་དག་ལངས་པ་རྣམས། །ཕྱི་དུས་དེ་ཚེ་བདག་ཅག་གིས། །འདྲེན་པ་རབ་ཏུ་བསྲུང་བར་བགྱི། །མདོ་སྡེ་འདི་ནི་བཤད་པའི་ཚེ། །སྟོན་པ་ཡི་ནི་བྱིན་རླབས་ཀྱིས། །གང་གཱའི་བྱེ་མ་མཉམ་པ་ཡི། །སངས་རྒྱས་ཞིང་རྣམས་རབ་ཏུ་གཡོས། །ཞིང་རྣམས་ཇི་སྙེད་རབ་གཡོས་པས། །ཀུན་ཏུ་སངས་རྒྱས་སྤྲུལ་པ་དག །འཇིག་རྟེན་མགོན་པོས་རབ་བཀྱེ་སྟེ། །དེ་དག་གིས་ཀྱང་ཆོས་རབ་བསྟན། །ཞིང་དེ་སོ་སོ་རེ་རེར་ཡང་། ། སེམས་ཅན་བྱེ་བ་བསམ་མི་ཁྱབ། །དེ་ཚེ་དེ་འདྲའི་ཆོས་ཐོས་ནས། །སངས་རྒྱས་ཀྱི་ནི་ཡེ་ཤེས་བཀོད། །སངས་རྒྱས་ཀྱི་ཡང་ཞིང་འདི་ནས། །སེམས་ཅན་བྱེ་བ་དགུ་བཅུ་རྣམས། །བྱང་ཆུབ་ཀྱི་ནི་སེམས་བསྐྱེད་དེ། །སངས་རྒྱས་ལ་ཡང་མེ་ཏོག་འཐོར། །བསྐལ་པ་བྱེ་བ་བརྒྱད་ཅུ་ན། །བསྐལ་པ་གཅིག་ལ་ཐམས་ཅད་ཀྱང་། །རྣམ་པར་འདྲེན་པ་ཉིད་འགྱུར་ཞེས། །དེ་དག་མི་གཙོས་ལུང་བསྟན་ཏོ། །དགེ་སློང་དང་ནི་དགེ་སློང་མ། །དགེ་བསྙེན་
ཕ་དང་དགེ་བསྙེན་མ། །སྲོག་ཆགས་བྱེ་བ་བདུན་ཅུ་དྲུག །གང་དག་མདོ་སྡེ་འདི་ཐོས་པ། །དེ་དག་མི་གཙོས་ལུང་བསྟན་ཏེ། །བྱང་ཆུབ་སྤྱོད་པ་རབ་སྤྱོད་ཅིང་། །གང་གཱའི་བྱེ་མ་མཉམ་པ་ཡི། །འཇིག་རྟེན་འདྲེན་པ་མཐོང་བར་འགྱུར། །སངས་རྒྱས་ཡེ་ཤེས་རབ་ཚོལ་བས། །ཐམས་ཅད་ལ་ཡང་མཆོད་པ་བྱེད། །མདོ་སྡེ་བླ་ན་མེད་པ་འདི། །དེ་དང་དེར་ཡང་ཐོས་པར་འགྱུར། །བྱམས་པ་ཡི་ནི་སངས་རྒྱས་ལ། །བླ་ན་མེད་པའི་མཆོད་བྱས་ཏེ། །དམ་པའི་ཆོས་མཆོག་བཟུང་ནས་ནི། །བདེ་བ་ཅན་དུ་འགྲོ་བར་འགྱུར། །གང་ན་སངས་རྒྱས་རྡུལ་བྲལ་བ། །ཚེ་དཔག་མེད་པ་དེ་བཞིན་གཤེགས། །དེ་ལ་བྱང་ཆུབ་མཆོག་གི་ཕྱིར། །མཆོད་པ་དག་ཀྱང་བྱེད་པར་འགྱུར། །མདོ་སྡེ་དམ་པ་འདི་ཐོས་ན། །མ་འོངས་པ་ཡི་བསྐལ་པར་ནི། །གྲངས་མེད་བདུན་ཅུ་རྩ་གསུམ་དུ། །ངན་འགྲོ་རྣམས་སུ་ཡང་མི་འགྲོ། །ཕྱི་མའི་དུས་ལ་སུ་དག་ནི། །མདོ་སྡེ་དམ་པ་ཉན་འགྱུར་ཞིང་། །འཆང་ངམ་ཀློག་པར་བྱེད་པ་ཡང་། །དེ་དག་ཀུན་གྱིས་ང་ལ་མཆོད། །ཇི་སྙེད་མདུན་ན་འདུག་པ་རྣམས། །ཐམས་ཅད་ལ་ཡང་བསྒོ་བྱ་སྟེ། །ངས་ནི་དཀའ་བས་ཐོས་པ་ཡི། །བྱང་ཆུབ་འདི་ཡང་ཡོངས་སུ་གཏད། །ཏིང་ངེ་འཛིན་རྗེས་སུ་གཏད་པའི་ལེའུ་སྟེ་བཅྭ་བརྒྱད་པའོ།། །།