ཉི་ཤུ་རྩ་བརྒྱད་པ། ཚུལ་ཁྲིམས་ངེས་པར་བསྟན་པའི་ལེའུ།
གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་ཡོངས་སུ་དག་པའི་ཕན་ཡོན་འདི་བཅུ་སྟེ། བཅུ་གང་ཞེ་ན། འདི་ལྟ་སྟེ། ཡེ་ཤེས་ཀྱིས་རྗེས་སུ་བསྐོར་ཅིང་ཡོངས་སུ་རྫོགས་པར་བྱེད་པ་དང་། སངས་རྒྱས་རྣམས་ཀྱི་རྗེས་སུ་སློབ་པ་དང་། མཁས་པ་རྣམས་ཀྱིས་མ་སྨད་པ་དང་། དམ་བཅས་པ་ལས་མི་གཡོ་བ་དང་། ནན་ཏན་ལ་གནས་པ་དང་འཁོར་བ་ལས་འབྱོར་པ་དང་མྱ་ངན་ལས་འདས་པ་ཐོབ་པར་བྱེད་པ་དང་ཀུན་ནས་ལྡང་
བ་མེད་པར་གནས་པ་དང་ཏིང་ངེ་འཛིན་རབ་ཏུ་འཐོབ་པ་དང་། མི་དབུལ་བར་འགྱུར་ཏེ། གཞོན་ནུ་བཅུ་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་ཡོངས་སུ་དག་པའི་ཕན་ཡོན་ནོ། །དེ་ལ་འདི་སྐད་ཅེས་བྱ་སྟེ། ཡེ་ཤེས་ཡོངས་སུ་རྫོགས་བྱེད་ཅིང་། །སངས་རྒྱས་དག་གི་རྗེས་སུ་སློབ། །མཁས་པ་དག་གིས་མ་སྨད་པ། །རྟག་ཏུ་འཇིགས་པ་མེད་པར་འགྱུར། །དམ་བཅས་པ་ལས་མི་གཡོ་ཞིང་། །ནན་ཏན་ལ་ཡང་རབ་ཏུ་གནས། །མྱ་ངན་འདས་པ་ཐོབ་བྱེད་ཅིང་། །འཁོར་བ་ལས་ཀྱང་ཤིན་ཏུ་འབྱོར། །ཀུན་ནས་ལྡང་བ་མེད་གནས་ཤིང་། །ཏིང་ངེ་འཛིན་རྣམས་མྱུར་དུ་འཐོབ། །དབུལ་པོར་ཡང་ནི་མི་འགྱུར་ཏེ། །ཚུལ་ཁྲིམས་ཕུང་པོར་རབ་ཏུ་གནས། །དེ་ཡི་ཡེ་ཤེས་ཡོངས་སུ་རྫོགས་པར་འགྱུར། །དེ་བཞིན་གཤེགས་པ་རྣམས་ཀྱིས་རྗེས་སུ་སློབ། །དེ་ལྟར་དེ་ཡི་ཚུལ་ཁྲིམས་ཡོངས་དག་ཅིང་། །དེ་ལ་མཁས་པ་དག་ནི་སྨོད་མི་བྱེད། །དམ་བཅས་པ་ལས་མཁས་པ་མི་གཡོ་ཞིང་། །དེ་ལྟར་དཔའ་བོ་ནན་ཏན་གནས་པར་བྱེད། །འཁོར་བའི་ཉེས་པ་མང་པོ་མཐོང་ནས་ནི། །འབྱོལ་ཞིང་མྱ་ངན་འདའ་བར་དེ་ཡིས་འགྲོ། །དེ་ལྟར་ཚུལ་ཁྲིམས་སྟོབས་ལ་གནས་པས་ན། །དེ་ཡི་སེམས་ནི་ཀུན་ནས་ལྡང་མི་འགྱུར། །ཉོན་མོངས་མེད་པའི་ཏིང་འཛིན་མྱུར་དུ་འཐོབ། །ཚུལ་ཁྲིམས་དག་པའི་ཕན་ཡོན་འདི་དག་ཡིན། །ཚུལ་ཁྲིམས་ངེས་པར་བསྟན་པའི་ལེའུ་སྟེ་ཉི་ཤུ་བརྒྱད་པའོ།། །།