སུམ་ཅུ་པ། གཟི་བརྗིད་ཀྱི་ཚོགས་ཀྱི་རྒྱལ་པོའི་ལེའུ།
དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་ལྷའི་འཁོར་ལོས་སྒྱུར་བའི་རྒྱལ་སྲིད་ཀྱི་བདེ་བ་ཡང་སྤངས་ཏེ་རབ་ཏུ་བྱུང་ངོ་ཞེས་གཞོན་ནུ་ཁྱོད་ཀྱིས་དེ་ལྟར་བསླབ་པར་བྱའོ། །གཞོན་ནུ་རབ་ཏུ་བྱུང་ནས་ཀྱང་སྦྱངས་པའི་ཡོན་ཏན་ཡོ་བྱད་བསྙུངས་པ་ལ་གནས་ཤིང་དབེན་པར་གནས་པ་དང་། བཟོད་པ་དང་དེས་པ་ཕུན་སུམ་ཚོགས་པར་བྱའོ། །གཞོན་ནུ་མགོ་དང་གོས་ལ་མེ་འབར་བ་བཞིན་དུ་བརྩོན་འགྲུས་བརྩམས་ཏེ་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་འདི་མཉན་པར་བྱ། གཟུང་བར་བྱ། ཀུན་ཆུབ་པར་བྱ། བཅང་བར་བྱ། བཀླག་པར་བྱ། རབ་ཏུ་གདོན་པར་བྱ། ལུང་མནོད་ཅིང་ཁ་ཏོན་དུ་བྱ། ཉོན་མོངས་པ་མེད་པའི་བསྒོམ་པས་བསྒོམ་པར་བྱ། མང་དུ་བྱ། གཞན་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་པར་བྱའོ། །གཞོན་ནུ་བསེ་རུ་ལྟ་བུར་གྱུར་པས་
གཉིས་སུ་མེད་པར་དགོན་པ་དང་ནགས་འདབ་ཏུ་རྟག་ཏུ་གནས་པར་བྱའོ། །གཞོན་ནུ་བདག་ཉིད་ཡོངས་སུ་གཏོང་བས་ཀྱང་སེམས་ཅན་དེ་དག་གི་དོན་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་དོན་དེ་ཉིད་བརྗོད་པའི་ཕྱིར། ཟླ་འོད་གཞོན་ནུར་གྱུར་པ་ལ་སྔོན་བྱུང་བའི་ལེའུ་འདི་ཚིགས་སུ་བཅད་པའི་དབྱངས་ཀྱིས་ཡང་དག་པར་རབ་ཏུ་བསྟན་ཏོ། །འདས་པའི་བསྐལ་པ་བརྒྱ་མང་རབ་དྲན་ཏེ། །གྲགས་པ་མཐའ་ཡས་འདྲེན་པ་གང་བྱུང་བ། །ལྷ་མི་ཀླུ་ཡི་ཚོགས་ཀྱིས་མཆོད་པ་སྟེ། །མཚན་ནི་གཟི་བརྗིད་ཚོགས་རྒྱལ་རྒྱལ་བ་ཡིན། །དགེ་སློང་བྱེ་བ་ཕྲག་བཅུ་དྲུག་མངོན་ཤེས། །ཡང་དག་རིག་དང་དབང་གི་ཕ་རོལ་ཕྱིན། །སྦྱངས་ཚུལ་ཡོ་བྱད་བསྙུངས་པ་ཞི་བའི་ཡིད། །དེ་ཡི་དུས་ན་དེ་ཡི་ཚོགས་རྣམས་བྱུང་། །གྲོང་ཁྱེར་བྱེ་བ་བརྒྱ་ཕྲག་བདུན་ཅུ་དྲུག །དཔག་ཚད་ལྔ་ཡི་ཚད་དང་མཉམ་པ་སྟེ། །རིན་ཆེན་སྣ་བདུན་བྱེ་བྲག་འཕགས་པའི་མཆོག །དེ་ཚེ་འཛམ་བུའི་གླིང་འདིར་བྱུང་བར་གྱུར། །དེ་ཚེ་གྲོང་མཆོག་དམ་པ་དེ་ཀུན་ཀྱང་། །སྐྱེད་མོས་ཚལ་བརྒྱ་མང་པོས་རབ་ཏུ་བརྒྱན། །སྐྱེད་མོས་ཚལ་ཀུན་སྟུག་པའི་སྤྲིན་བཞིན་དུ། །མེ་ཏོག་འབྲས་བུས་བརྒྱན་ཅིང་ཤིང་རྣམས་རྒྱས། །བཟའ་ཤིང་རིགས་ཀྱང་སྣ་ཚོགས་མཛེས་པ་དག །ལ་ཀུ་ཨ་མྲ་ཛམ་བུ་པ་ནས་དཀྲིགས། །ཀར་ནི་ཙམ་པ་པུར་ན་བརྒྱ་ཡིས་ཀྱང་། །སྐྱེད་མོས་ཚལ་མཆོག་དེ་དག་རབ་ཏུ་བརྒྱན། །ནྱ་གྲོ་དྷ་ལས་བྱ་མང་སྒྲ་འབྱིན་ཏེ། །ཁུ་བྱུག་ཀ་ལ་པིང་ཀ་རྨ་བྱ་བརྒྱ། །ཤང་ཤང་ཏེའུ་དང་ཀུ་ནལ་སྒྲ་འབྱིན་པ། །བྱ་ཚོགས་མང་པོ་དེ་ཚེ་སྙན་པར་སྒྲོག །ངང་པའི་རྒྱལ་པོ་ངང་སྐྱ་འདྲ་བ་དང་། །བུང་བ་ཀུ་ནལ་སྒྲ་དབྱངས་མཆོག་སྒྲོག་སྟེ། །ཡན་ལག་བཀྲ་ཞིང་ཚོན་ཆེ་ཁ་དོག་འབར། །ཤིན་ཏུ་ཡིད་འོང་སྒྲ་འཇམ་དགའ་བ་འབྱིན། །དེའི་དུས་བྱ་མང་དེ་དག་འདུས་གྱུར་ཏེ། །ཀ་ལ་པིང་ཀ་རྨ་བྱ་ནེ་ཙོ་དང་། །ཁུ་བྱུག་རི་སྐེགས་བྱ་རྣམས་སྣ་ཚོགས་པ། །བྱ་མང་དེ་དག་སྣ་ཚོགས་སྒྲ་ཡང་འབྱིན། །སྐྱེད་མོས་ཚལ་བརྒྱ་དག་ན་དེ་དག་གནས། །བཏང་བཟུང་མྱ་ངན་འཚང་དང་བར་ཤ་ཀ ། ཨ་ཏི་མུག་ཏ་མེ་ཏོག་འདབ་མ་དང་། །པད་མ་ཨུད་པལ་ཀུ་མུད་པད་མ་དཀར། །པད་མ་འདབ་སྟོང་བརྒྱ་ཡིས་རབ་ཏུ་བརྒྱན། །མེ་ཏོག་དེ་དག་རྫིང་བུ་མཛེས་པར་བྱེད། །དྲི་ཞིམ་
སྤོས་མཆོག་དམ་པས་སོ་སོར་བརྒྱན། །རྫིང་བུ་སྡུག་ཅིང་ཤིན་ཏུ་མཛེས་པར་གྱུར། །དེ་ཚེ་འཛམ་བུའི་གླིང་འདིར་རྒྱལ་པོ་ནི། །མི་དབང་བརྟན་པས་བྱིན་ཞེས་བྱ་བ་བྱུང་། །དེ་ཡི་བུ་ཡང་བརྒྱ་ཕྲག་ལྔ་ཡོད་དེ། །བྱད་བཞིན་བཟང་ཞིང་ཤིན་ཏུ་བལྟ་ན་སྡུག །དེ་ཚེ་རྒྱལ་སྲིད་ཞི་ཞིང་བདེ་བར་གྱུར། །གཙེ་བ་མེད་ཅིང་དབྱངས་དགའ་རྣལ་དུ་བབ། །འཛམ་བུའི་གླིང་ཡང་མེ་ཏོག་མང་པོས་བརྒྱན། །ལྷ་ཡི་གནས་དང་མཚུངས་ཤིང་བྱེ་བྲག་མེད། །དེ་ཚེ་སྡིག་མེད་སྟོབས་བཅུ་ལྡན་པ་ཡི། །རྒྱལ་བ་དེ་ནི་ཏིང་འཛིན་མཆོག་འདི་འཆད། །སྲིད་པའི་འགྲོ་བ་རྨི་ལམ་ལྟ་བུ་སྟེ། །འདི་ལ་སུ་ཡང་མི་སྐྱེ་འཆི་བ་མེད། །སེམས་ཅན་མིང་དང་སྲོག་ཀྱང་མི་རྙེད་དེ། །ཆོས་འདི་རྣམས་ནི་རྨི་ལམ་ཆུ་ཤིང་འདྲ། །སྒྱུ་མ་ལྟ་བུ་ནམ་མཁའི་གློག་འདྲ་སྟེ། །ཆུ་ཡི་ཟླ་བ་འདྲ་ཞིང་སྨིག་རྒྱུ་བཞིན། །མི་གང་འཇིག་རྟེན་འདིར་ཡང་ཤི་ནས་ནི། །འཇིག་རྟེན་གཞན་དུ་འཕོ་ཞིང་འགྲོ་མེད་ཀྱང་། །ལས་བྱས་རྣམས་ནི་ནམ་ཡང་མེད་མི་འགྱུར། །འཁོར་བ་ན་ཡང་དཀར་གནག་འབྲས་བུ་སྨིན། །རྟག་པ་མ་ཡིན་ཆད་པར་མི་འགྱུར་ཏེ། །ལས་བསགས་མེད་ཅིང་གནས་པ་དག་ཀྱང་མེད། །དེ་ཡང་བྱས་ནས་རེག་པར་མི་འགྱུར་མིན། །གཞན་གྱིས་བྱས་པ་ཚོར་བར་འགྱུར་བའང་མེད། །འཕོ་བ་མེད་ཅིང་ཕྱིར་ཡང་འོང་བ་མེད། །ཐམས་ཅད་ཡོད་པའང་མ་ཡིན་མེད་པའང་མིན། །འདི་ན་ལྟ་གནས་འཇུག་པ་དག་པ་མིན། །སེམས་ཅན་སྤྱོད་པ་རབ་ཞི་འཇུག་པ་མེད། །བདེ་གཤེགས་སྤྱོད་ཡུལ་རྒྱལ་བའི་ཡོན་ཏན་ནི། །སྐྱེ་མེད་ཞི་བ་མཚན་མ་མེད་པའི་གནས། །སྟོབས་དང་གཟུངས་རྣམས་དང་ནི་སྟོབས་བཅུའི་སྟོབས། །འདི་ནི་སངས་རྒྱས་ཁྱུ་མཆོག་གྱུར་པའི་མཆོག །དཀར་པོའི་ཆོས་མཆོག་ཡོན་ཏན་བསགས་པ་སྟེ། ། ཡོན་ཏན་ཡེ་ཤེས་གཟུངས་དང་སྟོབས་རྣམས་དང་། །རྫུ་འཕྲུལ་རྣམ་པར་འཕྲུལ་པ་བྱ་བའི་མཆོག །མངོན་ཤེས་མཆོག་ལྔ་འཐོབ་པ་དམ་པའི་ཚུལ། །འདིར་ནི་རང་བཞིན་གང་ནའང་ཤེས་པ་མེད། །འགྲོ་དང་འཇུག་མེད་མཁས་པའི་ཆོས་ཀྱི་འགྲོས། །ཆོས་ཀྱི་དབྱིངས་ནི་གར་ཡང་མི་འགྲོ་སྟེ། །དེ་འདྲའི་འགྲོ་བ་འགྲོ་མེད་ཆོས་ཀྱི་འགྲོས། །དབྱངས་ཀྱི་ཚོགས་མེད་ངོ་བོ་ཉིད་ཀྱི་འགྲོས། །འགྲོ་བའི་རང་བཞིན་གང་དུའང་
མི་གནས་ཏེ། །མི་གནས་མི་རྟེན་རང་བཞིན་འཇུག་པ་ནི། །རྒྱལ་བའི་སྤྱོད་ཡུལ་རྡུལ་བྲལ་ཞི་བའི་གནས། །ཞི་བ་རབ་ཞི་ཉེ་བར་ཞི་བའི་འགྲོས། །འགྲོ་བ་དེ་ནི་གར་ཡང་མི་གནས་ཏེ། །རྟག་ཏུ་དངོས་པོའི་རང་བཞིན་རྗེས་སུ་སོང་། །མཁས་ཤིང་མི་གཡོ་མཐོང་དཀའ་ཤིན་ཏུ་གནས། །དེ་ནི་མི་གཡོ་བདག་ཉིད་གནས་པ་སྟེ། །མི་གནས་མ་འོངས་རང་བཞིན་གནས་པ་ཡིན། །རང་བཞིན་གནས་པ་བཤད་པར་མི་ནུས་ཏེ། །དེ་ནི་སྟོང་པ་མི་གཡོ་ཆོས་ཀྱི་གནས། །དབྱངས་ཀྱིས་བཤད་ཀྱང་དབྱངས་ཀྱི་འཇུག་པ་མེད། །དབྱངས་ཀྱི་རང་བཞིན་འཇུག་པ་ཆོས་ཀྱི་འགྲོས། །དབྱངས་ཀྱི་ཚོགས་གནས་གང་ནའང་ཡོད་མ་ཡིན། །དེ་ལྟར་རང་བཞིན་འཇུག་པ་ཆོས་ཀྱི་འགྲོས། །འགྲོས་ཀྱི་སྒྲར་གསུངས་སེམས་ཅན་འགྲོ་བ་མེད། །ཆོས་ཀྱི་རང་བཞིན་མཁས་དོན་འགྲོ་བ་སྟེ། །དབྱངས་ཀྱང་བརྗོད་དེ་སེམས་ཅན་འགྲོ་བ་མེད། །དབྱངས་རྣམས་མི་རྙེད་སེམས་ཅན་འགྲོ་བ་མེད། །མཐའ་དང་མཐའ་མེད་མ་ཡིན་དབུས་འགྲོ་མེད། །ཡོད་མེད་མ་ཡིན་ཕྱོགས་སུ་འགྲོ་བ་མེད། །རང་བཞིན་འགྲོ་བ་ཅི་འདྲ་ཤེས་པ་ནི། །རྒྱལ་བ་མཆོག་གི་བསྟན་པ་འདི་དག་མཉམ། །རྡུལ་བྲལ་རྣམ་པར་དག་པ་དོན་དམ་གནས། །ཞི་ཞིང་རབ་ཞི་རྡུལ་མེད་རྡུལ་བྲལ་བ། །རྟོག་དང་རློམ་སེམས་མེད་པ་རབ་ཞི་གནས། །རྒྱལ་བ་ཐུགས་རྗེའི་མཆོག་ལྡན་སྟོན་པར་མཛད། །འདི་ལ་ཡི་གེ་སྤྱོད་པ་ཡོད་མ་ཡིན། །འགྲོ་བ་ཡངས་ཤིང་ཡངས་དོན་འགྲོ་བ་སྟེ། །སངས་རྒྱས་དག་གིས་བསྙེན་ཅིང་རྒྱལ་བས་བསྟོད། །སྣང་བའི་ཆོས་ཀྱི་ཚུལ་ནི་འཇུག་པ་ཕྲ། །དེ་ལ་གནས་ནས་བདེ་གཤེགས་མཚུངས་མེད་པ། །ཆོས་ཀྱི་གཏེར་ནི་རྡུལ་བྲལ་ཡངས་པ་དང་། །རིན་ཆེན་ཆོས་རྣམས་རྡུལ་བྲལ་དོན་དམ་སྟོང་། །ཞི་བའི་དོན་ལ་འཇུག་པ་སྟོན་པར་མཛད། །རྐང་གཉིས་གཙོ་བོས་ཏིང་འཛིན་འདི་བཤད་པ། །རྒྱལ་པོ་བརྟེན་བྱིན་གྱིས་ནི་དེ་ཚེ་ཐོས། །དེ་ནི་བྱེ་བ་ཁྲག་ཁྲིག་བརྒྱད་ཅུ་དང་། །རྒྱལ་བ་སྙིང་རྗེ་ཅན་དྲུང་རྟག་ཏུ་འོངས། །རྒྱལ་བ་སྟོབས་ལྡན་གུས་པ་རབ་བསྐྱེད་དེ། །ཞབས་ལ་མི་ཡི་བདག་པོ་ཕྱག་འཚལ་ནས། །དེ་ཚེ་སྟོབས་བཅུ་ལྡན་པའི་སྤྱན་སྔར་འདུག །རབ་ཏུ་དགའ་ཞིང་སོར་བཅུ་ཐལ་མོ་སྦྱར། །དེ་ཡི་སྤྱོད་
པ་ཡོངས་སུ་དག་རིག་ནས། །དབང་པོ་དག་ལ་དབང་གི་ཕ་རོལ་ཕྱིན། །མི་མཆོག་རྒྱལ་བ་མོས་པ་མཁྱེན་པ་ཡིས། །དེ་ལ་ཏིང་འཛིན་དམ་པ་འདི་བཤད་དོ། །རྒྱལ་པོ་དེ་ནི་དོན་དམ་འདི་ཐོས་ཚེ། །འཕགས་པའི་དགའ་བ་མཚུངས་མེད་སྐྱེས་ནས་སུ། །གླིང་བཞི་དག་ཀྱང་ཐམས་ཅད་རྣམས་སྤངས་ཏེ། །འདོད་པ་བོར་ནས་ཁྱིམ་ནས་མངོན་པར་བྱུང་། །རྒྱལ་བར་འགྱུར་ཞེས་བྱང་ཆུབ་དོན་དུ་ཡང་། །ནམ་ཚེ་རྒྱལ་པོས་ས་བོར་རབ་བྱུང་ཚེ། །འཛམ་བུའི་རྒྱལ་མཚན་འདི་ཡི་མི་ཀུན་ཀྱང་། །འདོད་པའི་ཡོན་ཏན་རྣམ་སྤངས་རབ་ཏུ་བྱུང་། །དེ་ཚེ་སྟོབས་བཅུའི་ཡོན་ཏན་རྒྱ་ཆེ་སྟེ། །བརྩོན་ཡིད་དགེ་སློང་མ་དང་དགེ་སློང་མང་། །དེ་ཚེ་མ་རྨོས་མ་བཏབ་རྩི་འཁྲུངས་ཏེ། །ལྷ་རྣམས་ཀྱང་ནི་གཡོག་དང་བསྙེན་བཀུར་བྱེད། །ངུར་སྨྲིག་ཆོས་གོས་གསུམ་དག་བྱུང་བར་གྱུར། །དྲ་བ་མཉམ་ཞིང་དྲུབ་ལེགས་དཔེ་མེད་ལ། །དྲི་མ་མེད་ཅིང་རྡུལ་བྲལ་གསེར་བརྒྱན་པ། །སངས་རྒྱས་ཡོན་ཏན་བསོད་ནམས་སྟོབས་ལས་བྱུང་། །གཞོན་ནུ་ལྟོས་ཤིག་རྒྱལ་མཆོག་དེ་ཡང་ནི། །ས་རྣམས་ཐམས་ཅད་རྣམ་སྤངས་རབ་བྱུང་ན། །ཟད་པའི་དུས་ན་སེམས་ཅན་མང་པོ་དག །ཤིན་ཏུ་ལོངས་སྤྱོད་ཆུང་ཡང་ཁྱིམ་མི་གཏོང་། །ཤིང་སྒྲོག་དང་ནི་བཅིང་བ་ཆད་པ་མང་། །གཤེ་ཞིང་སྤྱོ་བ་སྡུག་བསྔལ་མི་དགའ་དང་། །བླ་མ་ཡི་ཆད་པ་མང་པོ་བཟོད་པར་བྱེད། །ལོངས་སྤྱོད་ཆུང་རབ་ཁྱིམ་ན་བཟའ་བ་མེད། །ཤིན་ཏུ་ཚེ་ཡང་ཐུང་ལ་ནོར་ཡང་མེད། །རབ་ཏུ་བག་ཆུང་བསོད་ནམས་སྟོབས་ཀྱང་མེད། །མི་མཁས་བཟོ་ཡི་གནས་ཀྱང་མི་ཤེས་ཏེ། །དབུལ་པོར་གྱུར་ཅིང་ཁྱིམ་ན་ནོར་ཡང་མེད། །དྲི་མ་མ་དག་གཞན་གྱི་བུད་མེད་ཆགས། །ཕྲག་དོག་བྱེད་ཅིང་ཤིན་ཏུ་བཙམ་པ་མེད། །ཉོན་མོངས་ཆོས་ལྡན་ཚུལ་ལ་མི་གནས་ཀྱང་། །ངེད་ནི་སངས་རྒྱས་ཉིད་དུ་འགྱུར་ཞེས་སྨྲ། །གསུག་གིས་སླུ་ཞིང་བབ་ཆོལ་བྱེད་པ་དག །ང་ནི་ཕྱུག་པོ་འཇིག་རྟེན་ཆོས་ནོར་སྦྱིན། །གནོད་པ་བྱེད་ཅིང་ཚུལ་འཆོས་སྒྱུ་མ་དག །ངེད་ནི་སངས་རྒྱས་ཉིད་དུ་འགྱུར་ཞེས་སྨྲ། །གཞན་དག་བསད་ཅིང་བཅིང་དང་གཙེ་ལ་དགའ། །ཚུལ་ཁྲིམས་འཆལ་པ་མ་རུངས་ཞེ་སྡང་ཡིད། །བྱས་པ་མི་གཟོ་དབྱེན་
བྱེད་འཚེ་བར་གནས། །བཙུན་པ་བྱང་ཆུབ་སྤྱོད་པ་སྟོན་ཅེས་སྨྲས། །གང་ལས་དེས་ནི་བྱང་ཆུབ་སྤྱོད་ཐོས་པ། །དེ་ཉིད་ལ་ནི་ཁོང་ཁྲོ་རབ་བསྐྱེད་ནས། །མཁས་པས་འཁྲུལ་པའི་ཚིག་འགའ་ཐོས་ན་ཡང་། །དེ་ལ་མི་སྙན་བརྒྱ་དག་སྒྲོག་པར་བྱེད། །གཞོན་ནུ་ང་ཡི་ཚིག་འདི་ཐོས་ནས་ནི། །དེ་དག་དང་ནི་སྟེན་པར་མ་བྱེད་ཅིག །བྱང་ཆུབ་དམ་པ་རེག་པར་འདོད་ན་ནི། །རྨི་ལམ་དུ་ཡང་དེ་ལ་ཡིད་མ་རྟོན། །སྦྱངས་ཚུལ་བསྙུངས་པ་ཡོན་ཏན་དུ་མ་རྗོད། །ཡོན་ཏན་བསྐལ་པ་མང་པོ་བརྒྱར་བཤད་ཀྱང་། །དེ་ཡི་ཡོན་ཏན་དག་ལ་མི་གནས་ན། །བྱང་ཆུབ་ཞི་བ་མཆོག་ནི་རྟོགས་མི་འགྱུར། །ཁོར་མོར་ཡང་ནི་དགེ་ཞིང་འཇམ་པར་གྱིས། །ཚུལ་ཁྲིམས་དག་ཅིང་རྟག་ཏུ་དང་བའི་ཡིད། །ཁོར་མོར་ཚུལ་ཁྲིམས་ཡོངས་སུ་དག་པར་གྱིས། །རིང་པོར་མི་ཐོགས་ཏིང་འཛིན་མཆོག་ཐོབ་འགྱུར། །ང་རྒྱལ་མ་བྱེད་ཐ་བ་མ་སྐྱེད་པར། །རྟག་ཏུ་ཡིད་ནི་ཡོངས་སུ་དག་པར་གྱིས། །ང་རྒྱལ་རྒྱགས་དང་འཆབ་པ་ཀུན་སྤོངས་ལ། །ཏིང་འཛིན་མཆོག་འདི་རབ་ཏུ་ཐོབ་པར་གྱིས། །རྟག་ཏུ་ཡོན་ཏན་ལས་ནི་རྒྱལ་བ་དྲན། །གསེར་མཆོག་མདོག་འདྲ་ཤིན་ཏུ་འོད་མཛད་པ། །མཚན་མོ་གནམ་ལ་སྐར་མས་གང་བ་ལྟར། །ཐུབ་པའི་སྐུ་ནི་མཚན་གྱིས་ཡོངས་སུ་རྒྱས། །འཆག་ཅིང་འདུག་དང་འགྲེང་ཞིང་ཉལ་བ་ན། །མི་གང་ཐུབ་པའི་ཟླ་བ་དྲན་བྱེད་པ། །དེ་ཡི་མདུན་ན་རྟག་ཏུ་སྟོན་པ་བཞུགས། །དེ་ནི་རྒྱ་ཆེར་མྱ་ངན་འདས་པར་འགྱུར། །གདུགས་དང་རྒྱལ་མཚན་བླ་རེ་བ་དན་མཆོག །ཕྱེ་མ་བྱུག་པ་མང་པོ་ཀུན་ཐོགས་ལ། །རྟག་ཏུ་བདེ་བར་གཤེགས་ལ་མཆོད་པ་གྱིས། །རིང་པོར་མི་ཐོགས་ཏིང་འཛིན་མཆོག་འདི་འཐོབ། །སྤོས་མཆོག་ཕྲེང་བ་མེ་ཏོག་བདུག་པ་དང་། །རོལ་མོ་སིལ་སྙན་མང་པོ་རབ་ཐོགས་ལ། །རྒྱལ་བའི་མཆོད་རྟེན་དག་ལ་མཆོད་པ་གྱིས། །རིང་པོར་མི་ཐོགས་ཏིང་འཛིན་མཆོག་འདི་ཐོབ། །གླུ་གར་བཟང་པོ་སྣ་ཚོགས་མང་པོ་དང་། །ཡིད་གཙང་བཞད་གད་རོལ་མོ་བཟང་པོ་དང་། །རྟག་པར་མར་མེའི་ཕྲེང་སྡུག་བཟང་པོ་ཡིས། །མཚུངས་པ་མེད་ལ་མཆོད་བཟང་རབ་ཏུ་གྱིས། །འཁར་རྔ་དང་ནི་སྒྲ་སྙན་རྫ་རྔ་བརྒྱ། །རྔ་དང་གླིང་བུའི་སྒྲ་མཆོག་སྣ་ཚོགས་དང་། །
སྒྲ་སྙན་རོལ་མོའི་ཡོན་ཏན་སྣ་ཚོགས་ཀྱིས། །དང་བའི་ཡིད་ལྡན་འདྲེན་པ་མཆོད་པར་གྱིས། །སངས་རྒྱས་སྐུ་གཟུགས་ཤིན་ཏུ་མཛེས་པ་དག །རིན་ཆེན་བྱི་དོར་ལེགས་པར་བྱས་པ་ཡང་། །བལྟ་ན་སྡུག་ཅིང་ཤིན་ཏུ་བཟང་པོ་གྱིས། །རིང་པོར་མི་ཐོགས་ཏིང་འཛིན་མཆོག་འདི་འཐོབ། །དེ་བཞིན་གསེར་དག་དང་ནི་དངུལ་དག་དང་། །ཙན་དན་གྱི་ནི་སྐུ་གཟུགས་བཟང་པོ་དག །མཛེས་ཤིང་ཤིན་ཏུ་བལྟ་ན་སྡུག་པ་གྱིས། །རིང་པོར་མི་ཐོགས་ཏིང་འཛིན་མཆོག་འདི་འཐོབ། །འཇི་བ་དང་ནི་དེ་བཞིན་རྡོ་བ་དང་། །ཤིང་དང་རི་མོར་བྲིས་པའི་སྐུ་གཟུགས་དག །མཛེས་ཤིང་ཤིན་ཏུ་བལྟ་ན་སྡུག་པ་གྱིས། །རིང་པོར་མི་ཐོགས་ཏིང་འཛིན་མཆོག་འདི་འཐོབ། །རྟག་ཏུ་ནགས་ཁྲོད་དབེན་པར་བསྙེན་པར་གྱིས། །གྲོང་དང་གྲོང་ཁྱེར་དགའ་བ་རྣམ་སྤོངས་ལ། །བསེ་རུ་ལྟ་བུར་གཉིས་སུ་མེད་པར་གྱིས། །རིང་པོར་མི་ཐོགས་ཏིང་འཛིན་མཆོག་འདི་འཐོབ། །ང་ནི་ཆོས་རྗེ་ཁྱོད་ནི་ང་ཡི་བུ། །ང་ཡི་ཏིང་འཛིན་སྤྱོད་པ་རྗེས་སུ་སློབས། །ང་ནི་དེ་ཚེ་ཕྱོགས་སུ་གྲགས་པ་ཡི། །མི་དབང་བརྟན་པས་བྱིན་ཞེས་བྱ་བར་གྱུར། །ཏིང་འཛིན་ཞི་བ་མཆོག་འདི་ཚོལ་བའི་ཕྱིར། །ངས་སྔོན་སངས་རྒྱས་མཐའ་ཡས་མཆོད་བྱས་པ། །རྟག་པར་ངས་ནི་ཚུལ་ཁྲིམས་རྣམ་དག་བསྲུངས། །ང་ཡིས་སྟོབས་བཅུ་དག་ལ་རི་མོར་བྱས། །ཏིང་འཛིན་ཞི་བ་མཆོག་འདི་ཚོལ་བའི་ཕྱིར། །ངས་སྔོན་བུ་དང་ཆུང་མ་ཡོངས་བཏང་སྟེ། །མགོ་དང་རྐང་ལག་མིག་མཆོག་བཟང་པོ་བྱིན། །ཞུམ་པའི་སེམས་སུ་ནམ་ཡང་ཡོངས་མ་བྱས། །ཏིང་འཛིན་ཞི་བ་མཆོག་འདི་ཚོལ་བའི་ཕྱིར། །ནོར་འབྲུ་བྲན་ཕོ་བྲན་མོ་བརྒྱ་མང་དང་། །རིན་ཆེན་མང་པོ་ངས་ནི་ཡོངས་བཏང་སྟེ། །སློང་བ་མང་པོ་ཤིན་ཏུ་ཚིམ་པར་བྱས། །ཏིང་འཛིན་ཞི་བ་མཆོག་འདི་ཚོལ་བའི་ཕྱིར། །ངས་སྔོན་གསེར་དང་མུ་ཏིག་ཤེལ་མང་དང་། །དུང་དང་མན་ཤེལ་དང་ནི་བཻ་དཱུཪྱ། །ནོར་བུ་གཟུགས་གཙང་བྱི་རུ་འབྲུ་རྣམས་བཏང་། །ཏིང་འཛིན་ཞི་བ་མཆོག་འདི་ཚོལ་བའི་ཕྱིར། །ངས་ནི་རྣམ་པ་སྣ་ཚོགས་རྒྱན་རྣམས་དང་། །མུ་ཏིག་ཕྲེང་མཆོག་དེ་བཞིན་སེང་གེ་ཅན། །རིན་ཆེན་དྲ་བ་བཟང་ཞིང་མང་བ་བཏང་། །ཏིང་འཛིན་ཞི་བ་མཆོག་འདི་ཚོལ་
བའི་ཕྱིར། །ངས་སྔོན་གོས་མཆོག་ཕྲ་མོ་བྱེ་བ་དག །ཡོངས་སུ་གཙང་བ་ཀ་ཤི་དུ་ཀུལ་མཆོག །གསེར་གྱིས་སྤྲས་པ་མང་པོ་ཡོངས་སུ་བཏང་། །ཏིང་འཛིན་ཞི་བ་མཆོག་འདི་ཚོལ་བའི་ཕྱིར། །རྟ་དང་བལ་གླང་ཤིང་རྟ་སྣ་ཚོགས་དང་། །བུ་དང་ཆུང་མ་རབ་སྡུག་ངས་བཏང་སྟེ། །ཡིད་མི་བདེ་བ་ནམ་ཡང་མ་བྱུང་ངོ་། །ཏིང་འཛིན་ཞི་བ་མཆོག་འདི་ཚོལ་བའི་ཕྱིར། །ཚོལ་བས་སྡུག་བསྔལ་ཉོན་མོངས་གྱུར་པ་ཡི། །ཤིན་ཏུ་དབུལ་བའི་མི་དག་ངས་མཐོང་ནས། །དེ་དག་ངས་ནི་དབུལ་བ་མེད་པར་བྱས། །ཏིང་འཛིན་ཞི་བ་མཆོག་འདི་ཚོལ་བའི་ཕྱིར། །རྟ་དང་བལ་གླང་ཤིང་རྟ་ཁྲག་ཁྲིག་དག །ནོར་བུ་རིན་ཆེན་བརྒྱན་པའི་དྲ་བས་གཡོགས། །ངས་སྔོན་སློང་བ་དག་ལ་སྦྱིན་པར་བྱས། །ཏིང་འཛིན་ཞི་བ་མཆོག་འདི་ཚོལ་བའི་ཕྱིར། །ངས་སྔོན་སྐྱེད་མོས་ཚལ་ནི་མང་པོ་དག །བྱེ་བ་ཁྲག་ཁྲིག་ལེགས་པར་བརྒྱན་བྱས་ཏེ། །ཡིད་ཀྱང་དགའ་ཞིང་སྙིང་རྗེ་བསྐྱེད་ནས་བྱིན། །ཏིང་འཛིན་ཞི་བ་མཆོག་འདི་ཚོལ་བའི་ཕྱིར། །གྲོང་དང་གྲོང་ཁྱེར་ཡུལ་འཁོར་གྲོང་འདབ་ཀྱང་། །ངས་སྔོན་ལེགས་པར་བརྒྱན་ནས་ཡོངས་སུ་བཏང་། །བྱིན་ནས་རྟག་ཏུ་དགའ་བ་མྱང་བར་བྱས། །ཏིང་འཛིན་ཞི་བ་མཆོག་འདི་ཚོལ་བའི་ཕྱིར། །རིན་ཆེན་ཕུང་པོ་རི་རབ་མཉམ་པ་དང་། །དེ་བཞིན་གོས་དང་རྒྱན་རྣམས་མང་པོ་ཡང་། །ངས་སྔོན་སློང་བ་དག་ལ་སྦྱིན་པ་བྱས། །ཏིང་འཛིན་ཞི་བ་མཆོག་འདི་ཚོལ་བའི་ཕྱིར། །ཤིན་ཏུ་དབུལ་བ་ངས་ནི་ཕྱུག་པོར་བྱས། །རབ་ཏུ་ཉོན་མོངས་གྱུར་པ་ངས་བསྐྱབས་ཏེ། །སྡུག་བསྔལ་གཙེས་པ་མང་པོ་བདེ་བར་བྱས། །ང་ནི་ས་སྟེང་དབང་ཕྱུག་གྱུར་པའི་ཚེ། །སྐྱེ་བོའི་ཚོགས་རྣམས་སྡུག་བསྔལ་མཐོང་ནས་ནི། །སྙིང་རྗེ་བསྐྱེད་ནས་བདེ་བར་གྱུར་ཅིག་ཅེས། །དེ་དག་ལ་ནི་ང་ཡིས་རྒྱལ་སྲིད་བཏང་། །གཞོན་ནུ་ངས་ནི་ངོ་མཚར་བྱས་པ་དང་། །བསྐལ་པ་བརྒྱ་མང་དཀའ་བ་ཅི་སྤྱད་པ། །ངས་ནི་བསྐལ་པ་བྱེ་བ་ཁྲག་ཁྲིག་ཏུ། །དེ་དག་བཤད་ཀྱང་ཟད་པར་མི་ནུས་སོ། །ཏིང་འཛིན་ཞི་བ་མཆོག་འདི་ཚོལ་བའི་ཕྱིར། །ངས་ནི་ངོ་མཚར་དཀའ་བ་སྤྱད་པ་ནི། །བདེ་བར་གཤེགས་པའི་སྤྱོད་ལ་མ་དད་པ། །མི་རྣམས་སེམས་ནི་མྱོས་ཤིང་བསླད་པར་འགྱུར། །གཞོན་ནུ་ཁྱོད་
ལ་ཤིན་ཏུ་བསྒོ་བར་བྱ། །དད་པར་གྱིས་ཤིག་ང་ལ་མི་བདེན་མེད། །བདེ་གཤེགས་བརྫུན་གྱི་ཚིག་ནི་མི་གསུང་སྟེ། །ཐུགས་རྗེ་རྒྱལ་བ་རྟག་ཏུ་བདེན་པར་གསུང་། །ཇི་ལྟར་ཏིང་འཛིན་མཆོག་ཀྱང་འཐོབ་འགྱུར་ཞིང་། །སེམས་ཅན་ཁྲག་ཁྲིག་སྡུག་བསྔལ་ཐར་བྱ་ཞེས། །བསྐལ་པ་མང་པོར་སྤྱོད་པ་འདི་དག་དང་། །གཞན་ཡང་ངས་ནི་རྣམ་པ་མང་པོ་སྦྱངས། །སྐད་ཅིག་གང་ལ་ཏིང་འཛིན་འདི་ཡང་ནི། །ང་ཡིས་རབ་ཏུ་ཐོབ་པར་གྱུར་པའི་ཚེ། །ཏིང་འཛིན་དམ་པ་ཡེ་ཤེས་ཆེན་པོའི་ལམ། །ངས་ཐོབ་སངས་རྒྱས་ཁྲག་ཁྲིག་མང་པོ་མཐོང་། །རྫུ་འཕྲུལ་དག་ཀྱང་མཐའ་ཡས་ངས་ཐོབ་སྟེ། །ཞིང་བརྒྱ་དག་ཏུ་རྣམ་པར་སྤྲུལ་པས་འགྲོ། །སོང་ནས་ངས་ནི་སྙིང་རྗེ་ལྡན་པ་ལ། །དྲི་བ་བྱེ་བ་ཁྲག་ཁྲིག་མང་པོ་དྲིས། །བདེ་གཤེགས་དག་གིས་ང་ལ་ཅི་བསྟན་པ། །དེ་ཚེ་དྲི་བ་བྱེ་བ་ཁྲག་ཁྲིག་བཟུང་། །ང་ཡིས་མ་ལུས་ཐམས་ཅད་བཟུང་བྱས་ཏེ། །ཚིག་གཅིག་ཙམ་ཡང་ང་ལ་ཉམས་པ་མེད། །དྲི་བ་བྱེ་བ་ཁྲག་ཁྲིག་མང་པོ་ཡི། །ཡང་དག་པ་ཡི་ཚུལ་དེ་ངས་ཐོས་ནས། །རྡུལ་བྲལ་ཞི་བའི་གནས་དེ་ངས་བཤད་དེ། །སེམས་ཅན་མང་པོ་ཡེ་ཤེས་ལམ་ལ་བཀོད། །ངས་ནི་ཏིང་འཛིན་འདི་ལ་གནས་ནས་སུ། །བསྐལ་པ་བརྒྱར་ཡང་ཡང་དག་ཚུལ་བསླབས་ཏེ། །ངས་སྔོན་སེམས་ཅན་བྱེ་བ་ཁྲག་ཁྲིག་རྣམས། །རྡུལ་དང་བྲལ་བའི་ལམ་མཆོག་དམ་པར་བཀོད། །གང་གིས་སྔོན་གྱི་བདེ་བར་གཤེགས་པ་དག །རྡུལ་དང་བྲལ་བའི་ཚུལ་འདི་སྟོན་པ་རྣམས། །མ་མཐོང་བས་ནི་དོན་དམ་སྟོང་པ་ཡི། །ཏིང་འཛིན་མཆོག་ལ་དད་པར་མི་ནུས་སོ། །མི་གང་དད་ཅིང་མཁས་ལ་ཆོ་ག་ཤེས། །ཡང་དག་ཚུལ་ཟབ་ཚུལ་རྣམས་ཐོས་པ་ནི། །དེ་དག་མི་སྐྲག་དངང་བར་མི་འགྱུར་ཏེ། །ཐོས་ནས་རྟག་ཏུ་ཡིད་ཀྱང་རངས་པར་འགྱུར། །དེ་དང་དེ་དག་བྱང་ཆུབ་འདི་འཛིན་ཏེ། །དེ་དག་རྗེས་སུ་སྐྱེས་པའི་ང་ཡི་བུ། །དེ་དག་ཨུ་དུམ་བཱ་རའི་མེ་ཏོག་འདྲ། །དེ་ཕྱིར་བསྐལ་པ་བརྒྱར་ཡང་ངས་སྤྱད་དོ། །ཏིང་འཛིན་མཆོག་འདི་མི་གང་འཛིན་པ་ནི། །དེ་དག་ལོག་པར་ལྟུང་བའི་འཇིགས་པ་མེད། །རྟག་ཏུ་མི་ཁོམ་བརྒྱད་དང་དེ་བྲལ་ཏེ། །སངས་རྒྱས་ཁྲག་ཁྲིག་ཤིན་ཏུ་མང་པོ་མཐོང་། །གང་གི་ལག་ན་
ཏིང་འཛིན་མཆོག་ཡོད་པ། །རྒྱལ་བ་བྱམས་པ་གྲགས་པ་མཐའ་ཡས་བཞིན། །སེམས་ཅན་རྣམས་ཀྱི་དོན་མང་བྱེད་འགྱུར་ཞེས། །བློ་གྲོས་མཐའ་ཡས་དེ་ནི་ངས་ལུང་བསྟན། །ཏིང་འཛིན་མཆོག་འདི་མི་གང་འཛིན་པ་ནི། །དེ་དག་དྲན་དང་ལྡན་ཞིང་བློ་གྲོས་ལྡན། །རྟོགས་ལྡན་ཡེ་ཤེས་འཕགས་པ་ཐོས་པ་འཛིན། །དེ་ཡི་སྤོབས་པ་དག་ཀྱང་རྒྱ་ཆེར་འགྱུར། །མི་གང་ཏིང་འཛིན་མཆོག་འདི་འཛིན་པ་ནི། །ལྷ་རྣམས་ཀྱིས་ཀྱང་མཆོད་པར་བྱ་བ་ཡིན། །མིས་ཀྱང་རྟག་ཏུ་ཕྱག་བྱར་འོས་པ་སྟེ། །ཁོར་མོར་འབྱུང་བའི་ཚོགས་ཀྱིས་མངོན་པར་སྲུང་། །མི་གང་ཏིང་འཛིན་མཆོག་འདི་འཛིན་པ་ནི། །དེ་དག་མེ་དང་ཆུར་ཡང་མི་འཆི་ཞིང་། །དེ་ལ་དུག་དང་མཚོན་གྱིས་མི་ཚུགས་ཏེ། །དགྲ་དག་གིས་ཀྱང་བརྒལ་བར་མི་ནུས་འགྱུར། །མི་གང་ཏིང་འཛིན་མཆོག་འདི་འཛིན་པ་ནི། །དེ་དག་ནགས་ཁྲོད་གཤོང་གནས་རྟག་པར་ཡང་། །ལྷ་དག་ཁོར་མོར་བསྙེན་བཀུར་བྱེད་པར་འགྱུར། །གནོད་སྦྱིན་མང་པོ་དེ་ཡི་གཡོག་ཀྱང་བྱེད། །མི་གང་ཏིང་འཛིན་མཆོག་འདི་འཛིན་པ་ནི། །ཡེ་ཤེས་དག་ཀྱང་རྒྱ་མཚོ་འདྲ་བར་འགྱུར། ། ཐུབ་པའི་ཡོན་ཏན་བརྗོད་ལ་ཐོགས་པ་མེད། །སངས་རྒྱས་ཡོན་ཏན་ཡང་དག་རྗོད་པར་བྱེད། །མི་གང་ཏིང་འཛིན་མཆོག་འདི་འཛིན་པ་ནི། །དེ་ཡི་ཐོས་པ་མཐའ་ཡས་མུ་མེད་དེ། །ཚད་རྙེད་མི་འགྱུར་ཇི་ལྟར་ནམ་མཁའ་བཞིན། །ཡེ་ཤེས་སྒྲོན་མ་འཛིན་ཅིང་རབ་རིབ་སེལ། །མི་གང་ཏིང་འཛིན་མཆོག་འདི་འཛིན་པ་ནི། །རྟག་པར་འཇམ་ཞིང་རིགས་པའི་ཚིག་སྨྲ་སྟེ། །འཁོར་གྱི་ནང་དུ་དགའ་བར་འགྱུར་བ་སྟོན། །སེང་གེ་བཞིན་དུ་དེ་ནི་སྒྲ་རྣམས་སྒྲོག །མི་གང་ཏིང་འཛིན་མཆོག་འདི་འཛིན་པ་ནི། །དེ་ནི་སྨན་པ་དཔྱད་མཁན་འདྲ་བར་ཡང་། །མང་པོའི་རྟེན་དང་དཔུང་གཉེན་སྐྱབས་སུ་འགྱུར། །འཇིག་རྟེན་དག་ན་སྣང་བར་གྱུར་ཅིང་སྤྱོད། །མི་གང་ཏིང་འཛིན་མཆོག་འདི་འཛིན་པ་ནི། །འཁྲིག་པ་དག་ལ་ཡིད་ཀྱང་དགའ་མི་བྱེད། །ཞི་གནས་དགའ་ཞིང་བསམ་གཏན་བདེ་བ་རེག །རབ་ཏུ་ཞི་བའི་དབྱིངས་སུ་ཞི་བར་སྨྲ། །མི་གང་ཏིང་འཛིན་མཆོག་འདི་འཛིན་པ་ནི། །དེ་ཡིད་མཚན་མ་དག་ལ་མི་དགའ་སྟེ། །མཚན་མ་མང་པོ་ཐམས་ཅད་རྣམ་པར་བཤིག །མཁས་པ་རྟག་ཏུ་མཉམ་པར་
བཞག་ཅིང་སྤྱོད། །མི་གང་ཏིང་འཛིན་མཆོག་འདི་འཛིན་པ་ནི། །དེ་ཡི་མིག་ཀྱང་ཐ་མལ་མ་ཡིན་འཐོབ། །དེས་ནི་རྒྱལ་བ་མཐའ་ཡས་མཐོང་བར་འགྱུར། །མཐའ་ཡས་མིག་ལྡན་དེ་ནི་ཁྱུ་མཆོག་འགྱུར། །མི་གང་ཏིང་འཛིན་མཆོག་འདི་འཛིན་པ་ནི། །ཁྲུང་ཁྲུང་སྒྲ་དབྱངས་འཇམ་ཞིང་མཉེན་དང་ལྡན། །ཀ་ལ་པིང་ཀ་རྔ་ཡི་དབྱངས་སུ་འགྱུར། །གླུ་དབྱངས་ལྡན་ཞིང་སྒྲ་སྐད་འཇམ་པར་འགྱུར། །མི་གང་ཏིང་འཛིན་མཆོག་འདི་འཛིན་པ་ནི། །སྤྲིན་གྱི་འབྲུག་སྒྲ་བསྒྲགས་པའི་སྐད་རྣམས་དང་། །ངང་པའི་སྒྲ་དབྱངས་བཞིན་དུ་འཇམ་པར་སྒྲོག །དབྱངས་ཀྱི་ཡན་ལག་ལྔ་བརྒྱར་ལྡན་པའི་སྒྲ། །མི་གང་ཏིང་འཛིན་མཆོག་འདི་འཛིན་པ་ནི། །བསྐལ་པ་བྱེ་བ་མང་པོ་ཁྲག་ཁྲིག་ཏུ། །དབྱངས་ཀྱི་ཡན་ལག་སྣ་ཚོགས་ལྡན་པ་ཡི། །སྒྲ་དབྱངས་སྙན་པ་བསམ་གྱིས་མི་ཁྱབ་འབྱུང་། །མི་གང་ཏིང་འཛིན་མཆོག་འདི་འཛིན་པ་ནི། །ཟས་ལ་ཡིད་ཀྱང་ཆགས་པར་མི་འགྱུར་ཏེ། །ལྷུང་བཟེད་ཆོས་གོས་དག་ལ་དགའ་མ་ཡིན། །འདོད་པ་ཉུང་ཞིང་ཆོག་ཤེས་ཡོ་བྱད་བསྙུངས། །མི་གང་ཏིང་འཛིན་མཆོག་འདི་འཛིན་པ་ནི། །བདག་ཉིད་ལ་ཡང་སྟོད་པར་མི་འགྱུར་ཞིང་། །གར་ཡང་གཞན་ལ་མི་སྙན་མི་རྗོད་དེ། །རྟག་ཏུ་བསམ་གཏན་དགའ་ཞིང་ཕྲ་བའི་སེམས། །མི་གང་ཏིང་འཛིན་མཆོག་འདི་འཛིན་པ་ནི། །རྟག་ཏུ་བདག་ཉིད་ལ་ཡང་རྟོག་འགྱུར་ཏེ། །གཞན་གྱི་འཁྲུལ་པ་དག་ནི་དེ་མི་ཚོལ། །འཇིག་རྟེན་ཀུན་དང་དེ་ནི་མི་འཕྲོད་མེད། །མི་གང་ཏིང་འཛིན་མཆོག་འདི་འཛིན་པ་ནི། །སྤྱོད་པ་ཡོངས་དག་སེམས་ལ་ཉོན་མོངས་མེད། །རྟག་ཏུ་གཡོ་ཡང་མེད་ཅིང་འདྲིད་པ་མེད། །ཁོར་མོར་འཇམ་ཞིང་རྣམ་པར་ཐར་ལ་དགའ། །མི་གང་ཏིང་འཛིན་མཆོག་འདི་འཛིན་པ་ནི། །རྟག་ཏུ་གཏོང་ལ་ཤིན་ཏུ་མོས་པར་འགྱུར། །དེ་ནི་སེར་སྣའི་སེམས་ལ་དགའ་མི་བྱེད། །ཁོར་མོར་ཚུལ་ཁྲིམས་དང་ཡང་ལྡན་པར་འགྱུར། །མི་གང་ཏིང་འཛིན་མཆོག་འདི་འཛིན་པ་ནི། །བྱད་བཞིན་བཟང་ཞིང་བལྟ་སྡུག་མཛེས་པ་སྟེ། །མདོག་ཀྱང་གསེར་མཆོག་འདྲ་བར་སྣང་བར་བྱེད། །སུམ་ཅུ་རྩ་གཉིས་མཚན་རྣམས་འཆང་བར་འགྱུར། །མི་གང་ཏིང་འཛིན་མཆོག་འདི་འཛིན་པ་ནི། །དེ་དག་རྟག་པར་རབ་ཏུ་མཛེས་པར་འགྱུར། །ཁོར་
མོར་རྟོག་ཅིང་སྐྱེ་བོ་མང་པོ་ལ། །ཕངས་ཤིང་སྡུག་སྟེ་ལྟ་བས་མི་ངོམས་འགྱུར། །མི་གང་ཏིང་འཛིན་མཆོག་འདི་འཛིན་པ་ནི། །ལྷ་དང་ཀླུ་དང་དེ་བཞིན་གནོད་སྦྱིན་རྣམས། །རྟག་ཏུ་ཡི་རང་དགའ་ཞིང་མགུ་ནས་ནི། །གྲོང་དུ་ཞུགས་ནས་དེ་ཡི་བསྔགས་པ་སྨྲ། །མི་གང་ཏིང་འཛིན་མཆོག་འདི་འཛིན་པ་ནི། །ཚངས་པ་བརྒྱ་བྱིན་དབང་སྒྱུར་མང་པོ་དག །རྟག་པར་དེ་ལ་རིམ་གྲོ་རབ་ཏུ་བྱེད། །དེ་ཡི་ཡིད་ཀྱང་ཁེངས་པར་ཡོང་མི་འགྱུར། །མི་གང་ཏིང་འཛིན་མཆོག་འདི་འཛིན་པ་ནི། །དེ་ལ་ངན་འགྲོའི་འཇིགས་པ་མི་འབྱུང་སྟེ། །མི་ཁོམ་མེད་ཅིང་ལོག་ལྟུང་འཇིགས་པ་མེད། །ལོག་ལྟུང་འཇིགས་པ་ཀུན་ལས་ཡོངས་སུ་གྲོལ། །མི་གང་ཏིང་འཛིན་མཆོག་འདི་འཛིན་པ་ནི། །སངས་རྒྱས་ཆོས་མཆོག་ཞིབ་མོ་ཐོས་ནས་ཀྱང་། །དེ་ལ་ནེམ་ནུར་ཡིད་གཉིས་མི་འབྱུང་སྟེ། །ཡེ་ཤེས་ཟབ་མོའི་རྗེས་སུ་སོང་བ་ཡིན། །མི་གང་ཏིང་འཛིན་མཆོག་འདི་འཛིན་པ་ནི། །ཕྲ་བའི་ཆོས་རྣམས་གང་དག་ཅི་ཐོས་ཀྱང་། །ཐམས་ཅད་ལ་ནི་དབང་གི་ཕ་རོལ་སོང་། །གཏན་ཚིགས་ཞིབ་ཅིང་སྟོབས་དང་ལྡན་པར་འགྱུར། །མི་གང་ཏིང་འཛིན་མཆོག་འདི་འཛིན་པ་ནི། །རྒྱལ་བས་གསུང་ནི་དེ་སྐད་རབ་བཤད་དེ། །རྟག་པར་བདག་ནི་དེ་ལྟར་བྱ་སྙམ་ན། །གཟུངས་ནི་བྱེ་བྲག་འཕགས་པ་མཆོག་ཐོབ་འགྱུར། །མི་གང་ཏིང་འཛིན་མཆོག་འདི་འཛིན་པ་ནི། །ནམ་ཚེ་དེ་ཡང་འཆི་བའི་དུས་བྱེད་པ། །འོད་དཔག་མེད་པ་ཐུགས་རྗེར་ལྡན་པ་ནི། །དགེ་སློང་ཚོགས་བཅས་དེ་ཡི་མདུན་ན་བཞུགས། །མི་གང་ཏིང་འཛིན་མཆོག་འདི་འཛིན་པ་ནི། །དེ་དག་གཟུངས་རྣམས་རབ་ཏུ་ཐོབ་པར་འགྱུར། །ཆོས་ཀྱི་གཏེར་ལ་དབང་བའི་ཕ་རོལ་ཕྱིན། །སྤོབས་དང་ལྡན་ཞིང་ཚིག་ཀྱང་རྒྱུན་མི་འཆད། །མི་གང་ཏིང་འཛིན་མཆོག་འདི་འཛིན་པ་ནི། །ཆོས་འཛིན་དེ་དག་གང་དུ་སོང་བར་ཡང་། །འགྲོ་བ་དག་ལ་ཀུན་ཏུ་སྣང་བར་འགྱུར། །ཤིན་ཏུ་སྤྱོད་པ་ཞི་ཞིང་ཡིད་རབ་ཞི། །རབ་ཏུ་དགའ་དང་དྲི་མེད་འོད་བྱེད་དང་། །འོད་འཕྲོ་ཤིན་ཏུ་སྦྱང་དཀའ་མངོན་གྱུར་དང་། །རིང་དུ་སོང་དང་མི་གཡོ་ལེགས་པའི་བློ། །ཆོས་སྤྲིན་ས་བཅུ་པོ་ཡང་འཐོབ་པར་འགྱུར། །ཚེ་དང་ལས་དང་ཡོ་བྱད་མོས་པ་དང་། །སྨོན་ལམ་རྫུ་འཕྲུལ་སྐྱེ་བའི་སྟོབས་རྣམས་དང་། །ཆོས་
དང་སེམས་དང་དེ་བཞིན་ཡེ་ཤེས་ཆེ། །དབང་བཅུ་འདི་དག་དཔའ་བོས་ཐོབ་པར་འགྱུར། །མི་གང་ཏིང་འཛིན་མཆོག་འདི་འཛིན་པ་ནི། །མཁས་པ་ཆོས་ཀྱི་མཛོད་མཆོག་རྣམ་འབྱེད་ཅིང་། །ཆོས་ཀྱི་སྐུ་ལ་དབང་བའི་ཕ་རོལ་ཕྱིན། །དེ་ནི་འགྲོ་བ་ཀུན་གྱི་ཐེ་ཚོམ་གཅོད། །སེམས་ཅན་ཐམས་ཅད་བཅོམ་ལྡན་སྙིང་རྗེ་ཅན། །སྲིད་པའི་མཐར་ཕྱིན་བདེ་གཤེགས་གྱུར་པ་ལ། །བསྐལ་པ་མང་པོ་བརྒྱ་འམ་གང་གཱ་ཡི། །བྱེ་མ་སྙེད་དམ་ལྷག་པར་མཆོད་བྱས་པས། །ཟད་པའི་དུས་ན་མི་གང་ལ་ལ་ཡིས། །འདིར་ཡང་ཏིང་ངེ་འཛིན་འདི་ཐོས་ནས་སུ། །ཡི་རང་ཞེས་ནི་ཚིག་གཅིག་སྨྲས་ན་ཡང་། །སྔ་མའི་བསོད་ནམས་ཕུང་པོས་ཆར་མི་ཕོད། །གཞོན་ནུ་སུ་དག་ཞི་བའི་སྤྱོད་པ་འདི། ། དོན་དམ་སྟོང་པ་ཏིང་ངེ་འཛིན་གྱི་མཆོག །རབ་ཏུ་འདོན་དང་དེ་བཞིན་གླེགས་བམ་བྱས། །ཆོས་སྨྲ་བློ་གྲོས་དམ་པ་གནས་པ་ཡིན། །གཟི་བརྗིད་ཚོགས་ཀྱི་རྒྱལ་པོའི་ལེའུ་སྟེ་སུམ་ཅུ་པའོ།། །།