སུམ་ཅུ་རྩ་གཅིག་པ། ཕན་ཡོན་གྱི་ལེའུ།
དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཅི་ནས་བདག་སེམས་ཅན་ཐམས་ཅད་ཀྱི་སྒྲ་དང་སྐད་ཤེས་པ་རྟོགས་ཤིང་། དབང་པོ་མཆོག་དང་མཆོག་མ་ཡིན་པ་རྣམ་པར་རིག་ནས་ཆོས་བསྟན་ཏོ་སྙམ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེས་གཞོན་ནུ་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་འདི་མཉན་པར་བྱ། གཟུང་བར་བྱ། ཀུན་ཆུབ་པར་བྱ། བཅང་བར་བྱ། བཀླག་པར་བྱ། རབ་ཏུ་གདོན་པར་བྱ། ལུང་མནོད་ཅིང་ཁ་ཏོན་དུ་བྱ། ཉོན་མོངས་པ་མེད་པའི་བསྒོམ་པས་བསྒོམ་པར་བྱ། མང་དུ་བྱ། གཞན་ལ་ཡང་རྒྱ་ཆེར་རབ་ཏུ་བསྟན་པར་བྱའོ། །དེ་ནས་ཡང་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ཐར་པ་འདོད་པ་ཏིང་འཛིན་རྡུལ་བྲལ་འདི་འཛིན་ན། །དེས་ནི་འདས་པའི་འདྲེན་པ་ཚད་མེད་རྣམས་ཀྱང་མཐོང་། །སྔོན་གྱི་སྲིད་པར་བརྩོན་བྱས་འཇིག་རྟེན་མགོན་པོས་དྲིས། །བྱང་ཆུབ་སེམས་དཔའ་དགེ་བའི་རྩ་བ་མཆོག་ལ་གནས། །ཐར་པ་འདོད་པ་ཏིང་འཛིན་རྡུལ་བྲལ་འདི་འཛིན་ན། །ལྷ་དང་མི་ཡི་བདེ་བ་
གྱ་ནོམ་རྙེད་པར་འགྱུར། །ལྷ་དང་མི་ཡི་མཆོད་པ་དམ་པ་དེས་འཐོབ་སྟེ། །བསམ་གཏན་བདེ་དང་འཕགས་པའི་བདེ་བ་མཆོག་ཀྱང་འཐོབ། །ཐར་པ་འདོད་པ་ཏིང་འཛིན་རྡུལ་བྲལ་འདི་འཛིན་ན། །བསྔགས་པ་རྒྱ་ཆེར་ཐོས་ཀྱང་དེ་ནི་དགའ་མི་འགྱུར། །མི་སྙན་པ་དག་ཐོས་ཀྱང་ཞུམ་པར་མི་འགྱུར་ཏེ། །འཇིག་རྟེན་ཆོས་བརྒྱད་དག་གིས་མི་རྒུལ་རི་བོ་བཞིན། །ཐར་པ་འདོད་པ་ཏིང་འཛིན་རྡུལ་བྲལ་འདི་འཛིན་ན། །དགེ་ཞིང་མཉེན་པར་སྨྲ་ལ་འཇམ་པའི་ཚིག་དང་ལྡན། །ཁྲོ་གཉེར་མེད་ཅིང་རྟག་ཏུ་གསོང་པོར་སྨྲ་བར་འགྱུར། ། བཞིན་ཡང་འཛུམ་ཞིང་འདྲེན་པ་དག་གི་རྗེས་སུ་སློབ། །ཐར་པ་འདོད་པ་ཏིང་འཛིན་རྡུལ་བྲལ་འདི་འཛིན་ན། །དེས་ཤིང་འགྲོགས་ན་བདེ་ལ་འཇམ་པའི་སེམས་སུ་འགྱུར། །རྟག་པར་རབ་ཏུ་དུལ་ཞིང་དུལ་བའི་ས་ལ་གནས། །འཇམ་ཞིང་དགའ་བའི་ཚིག་སྨྲ་ཤིན་ཏུ་བདེ་བར་ཟེར། །ཐར་པ་འདོད་པ་ཏིང་འཛིན་རྡུལ་བྲལ་འདི་འཛིན་ན། །དེ་ནི་གཏམ་བྱེད་འགྱུར་ཡང་རྩོད་ཅིང་འཐབ་པ་མེད། །ཞེ་སྡང་ཐ་བ་དེ་དག་མ་ལུས་རྣམ་སྤངས་ཏེ། །རྟག་པར་རབ་ཏུ་དགའ་ཞིང་དེས་ལ་མཉེན་པ་ཡིན། །ཐར་པ་འདོད་པ་ཏིང་འཛིན་རྡུལ་བྲལ་འདི་འཛིན་ན། །མཁས་པ་རྟག་ཏུ་གཏོང་ལ་མོས་པར་རབ་འགྱུར་ཏེ། །ཤིན་ཏུ་སྡུག་བསྔལ་སྐྱེ་བོ་མཐོང་ནས་ཁ་ཟས་སྦྱིན། །གཏོང་ལ་ཤིན་ཏུ་དགའ་ཞིང་བདག་ཉིད་སྤྱོད་མི་དགའ། །ཐར་པ་འདོད་པ་ཏིང་འཛིན་རྡུལ་བྲལ་འདི་འཛིན་ན། །ལྷ་ཡང་བརྒྱ་སྟོང་དེ་ལ་སྨོན་པ་ཤིན་ཏུ་སྐྱེད། །ཀླུ་དང་ལྷ་མིན་གནོད་སྦྱིན་རྟག་ཏུ་གཡོག་བྱེད་དེ། །ནགས་དང་ནགས་འདབས་གནས་པ་དེ་ལ་སྲུང་བར་བྱེད། །ཚིག་ནི་ཐོགས་པ་མེད་ཅིང་ཚངས་པའི་སྒྲ་དབྱངས་ཏེ། །ངང་པའི་སྒྲ་སྐད་མི་འམ་ཅི་ཡི་གླུ་ཡི་དབྱངས། །དབྱངས་ཀྱི་ཡན་ལག་ལྔ་བརྒྱ་དགའ་བའི་སྒྲ་སྐད་དེ། །སྒྲ་སྒྲགས་ཤིན་ཏུ་གྲགས་པའི་སྒྲ་ཡི་མཆོག་ཏུ་འགྱུར། །ཇི་སྙེད་ཞིང་རྣམས་དེ་དག་སྐྱེས་བུ་ལ་ལ་ཡིས། །ཕྲ་བའི་རྡུལ་དུ་བྱས་པ་ཤེས་པར་ནུས་ཀྱང་ནི། །ཏིང་འཛིན་རྡུལ་བྲལ་མཆོག་འདི་མི་གང་འཛིན་པ་དག །དེ་ཡི་དབྱངས་སྒྲ་དེ་བས་ཤིན་ཏུ་མང་བར་འགྱུར། །ཏིང་འཛིན་རྡུལ་བྲལ་འདི་ཡང་མི་གང་འཛིན་པ་ནི། །དབང་བཅུ་འཐོབ་ཅིང་ས་ཡང་བརྒྱད་དང་གཉིས་འཐོབ་སྟེ། །མཁས་པས་སངས་རྒྱས་ཆོས་རྣམས་
བསམ་ཡས་འཐོབ་པར་འགྱུར། །བདུད་རྣམས་ཐམས་ཅད་བཏུལ་ནས་བྱང་ཆུབ་དམ་པ་རིག །ཕན་ཡོན་གྱི་ལེའུ་སྟེ་སུམ་ཅུ་རྩ་གཅིག་པའོ།། །།