སུམ་ཅུ་རྩ་གསུམ་པ། མདོ་སྡེ་འཛིན་པའི་ཕན་ཡོན་གྱི་ལེའུ།
འཕགས་པ་ཏིང་ངེ་འཛིན་གྱི་རྒྱལ་པོའི་མདོ། བམ་པོ་བཅུ་པ། དེ་ནས་ཡང་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་ལ་མངོན་པར་ཤེས་པ་ཆེན་པོའི་བྱི་དོར་བྱ་བ་ཡོངས་སུ་སྦྱང་བར་འདོད་པས་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་འདི་མཉན་པར་བྱ། གཟུང་བར་བྱ། ཀུན་ཆུབ་པར་བྱ། བཅང་བར་བྱ། བཀླག་པར་བྱ། རབ་ཏུ་གདོན་པར་བྱ། ལུང་མནོད་ཅིང་ཁ་ཏོན་དུ་བྱ། ཉོན་མོངས་པ་མེད་པས་བསྒོམ་པར་བྱ། མང་དུ་བྱ། གཞན་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་པར་བྱའོ། །གཞོན་ནུ་ཆོས་ཐམས་ཅད་ལ་མངོན་པར་ཤེས་པ་ཆེན་པོའི་བྱི་དོར་བྱ་བ་གང་ཞེ་ན། འདི་ལྟ་སྟེ། ཆོས་ཐམས་ཅད་ལ་ཡོངས་སུ་འཛིན་པ་མེད་ཅིང་ཚུལ་ཁྲིམས་ཀྱི་ཕུང་པོ་མཆོག་ཏུ་མི་འཛིན་པ། ཏིང་ངེ་འཛིན་གྱི་ཕུང་པོ་རློམ་སེམས་མེད་པ། ཤེས་རབ་ཀྱི་ཕུང་པོ་རྒྱུ་བ་མེད་པ། རྣམ་པར་གྲོལ་བའི་ཕུང་པོ་དབེན་པར་མཐོང་བ། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་ཡང་དག་པ་ཇི་ལྟ་བ་བཞིན་དུ་མཐོང་བ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་མངོན་པར་ཤེས་པ་དེ་དག་དང་ལྡན་པས་ཏིང་ངེ་འཛིན་གྱི་རྣམ་པར་འཕྲུལ་པ་ཐམས་ཅད་ཀྱིས་རྣམ་པར་འཕྲུལ་ཞིང་སེམས་ཅན་རྣམས་ལ་ཆོས་སྟོན་པ་འདི་ནི་གཞོན་ནུ་ཆོས་ཐམས་ཅད་ལ་མངོན་པར་ཤེས་པ་ཆེན་པོའི་བྱི་དོར་བྱ་བ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཆོས་ཐམས་ཅད་ལ་མངོན་པར་ཤེས་པ་ཆེན་པོའི་བྱི་དོར་བྱ་བ་བསྟན་པའི་ཆོས་ཀྱི་རྣམ་གྲངས་འདི་ཟླ་འོད་གཞོན་ནུར་གྱུར་པ་ལ་ཚིགས་སུ་བཅད་པའི་དབྱངས་ཀྱིས་རྒྱ་ཆེར་ཡང་དག་པར་རབ་ཏུ་བསྟན་ཏོ། །མངོན་ཤེས་ཆེན་པོ་ཡོངས་སྦྱངས་པ། །རྩོད་པ་མེད་པར་བསྟན་པ་སྟེ། །རྩོད་པ་དག་ལ་གང་སྤྱོད་ཅིང་། །འཛིན་པར་བྱེད་པ་དེ་མི་ཐར། །མངོན་ཤེས་དེ་ཡི་ཤེས་རབ་སྟེ། །སངས་རྒྱས་ཡེ་ཤེས་བསམ་མི་ཁྱབ། །འཛིན་པ་ལ་ནི་གང་གནས་པ། །དེ་ལ་ཡེ་ཤེས་ཡོང་མི་འགྱུར། །གང་དག་སྒྲ་ཡིས་བསྟན་པ་ཡི། །ཆོས་རྣམས་མང་པོ་བསམ་མི་ཁྱབ། །སྒྲ་དེ་ལ་ཡང་གང་ཆགས་པ། །དགོངས་པའི་བཤད་པ་མི་ཤེས་སོ། །
ཅི་ལ་དགོངས་ཏེ་བཤད་པ་ཡི། །དགོངས་པ་དག་ནི་མི་ཤེས་པ། །ཆོས་ཉིད་ལ་ནི་མ་བསླབས་པས། །ཆོས་མ་ཡིན་པ་ཆོས་སུ་འཆད། །འཇིག་རྟེན་ཁམས་ནི་སྟོང་དག་ཏུ། །ངས་ནི་མདོ་སྡེ་གང་བཤད་པ། །ཚིག་འབྲུ་ཐ་དད་དོན་གཅིག་སྟེ། །ཐམས་ཅད་བརྗོད་པར་ནུས་མ་ཡིན། །ཚིག་གཅིག་རྣམ་པར་བསྒོམས་ན་ནི། །དེ་དག་ཐམས་ཅད་བསྒོམས་པར་འགྱུར། །སངས་རྒྱས་ཇི་སྙེད་ཐམས་ཅད་ཀྱིས། །ཆོས་རྣམས་མང་པོ་རབ་བཤད་པ། །ཆོས་རྣམས་ཐམས་ཅད་སྟོང་པ་ཉིད། །མི་གང་དོན་ལ་མཁས་པ་དག །ཚིག་འདི་བསླབས་པར་གྱུར་པ་ལ། །སངས་རྒྱས་ཆོས་རྣམས་དཀོན་མ་ཡིན། །ཆོས་ཀུན་སངས་རྒྱས་ཆོས་ཡིན་ཏེ། །ཆོས་ཉིད་ལ་ཡང་གང་བསླབས་པ། །ཆོས་ཉིད་རབ་ཏུ་ཤེས་པ་ནི། །ཆོས་ཉིད་དང་ཡང་འགལ་མི་བྱེད། །ཚིག་ཀུན་ཀྱང་ནི་སངས་རྒྱས་ཚིག །སྒྲ་ཀུན་དངོས་པོ་མེད་པ་སྟེ། །ཕྱོགས་བཅུ་དག་ཏུ་བཙལ་ན་ཡང་། །སངས་རྒྱས་ཚིག་ནི་མི་རྙེད་དོ། །ཚིག་འདི་སངས་རྒྱས་ཚིག་ཡིན་ཏེ། །ཕྱོགས་བཅུ་དག་ཏུ་རབ་བཙལ་ཀྱང་། །བླ་མེད་འདི་ནི་མི་རྙེད་དོ། །མ་རྙེད་རྙེད་པར་མི་འགྱུར་རོ། །སངས་རྒྱས་ཚིག་ནི་བླ་ན་མེད། །ལྟག་ན་མེད་པ་སངས་རྒྱས་ཚིག །དེ་ལ་རྡུལ་ཙམ་མི་རྙེད་པས། །དེ་ཚེ་བླ་ན་མེད་ཅེས་བརྗོད། །ཆོས་ནི་རྡུལ་ཙམ་མི་སྐྱེ་སྟེ། །རྡུལ་ཙམ་སྒྲར་ནི་བཤད་པ་ཡིན། །རྡུལ་ཙམ་རྙེད་པར་མ་གྱུར་ཀྱང་། །འཇིག་རྟེན་དུ་ནི་སྒྲ་ཡིས་བཤད། །ཆོས་རྣམས་རྙེད་མེད་རྙེད་པ་སྟེ། །རྙེད་པ་ལ་ཡང་རྙེད་པ་མེད། །དེ་ལྟར་ཆོས་རྣམས་གང་ཤེས་པ། །བྱང་ཆུབ་དམ་པ་རྟོགས་པར་འགྱུར། །བྱང་ཆུབ་བླ་མེད་ངེས་རྟོགས་ནས། །ཆོས་ཀྱི་འཁོར་ལོ་རབ་ཏུ་བསྐོར། །ཆོས་ཀྱི་འཁོར་ལོ་རབ་བསྐོར་ནས། །སངས་རྒྱས་ཆོས་རྣམས་སྟོན་པར་བྱེད། །སངས་རྒྱས་ཡེ་ཤེས་བླ་མེད་ནི། །བྱང་ཆུབ་སེམས་དཔའ་རྟོགས་པར་བྱེད། །སངས་རྒྱས་ཡེ་ཤེས་རྟོགས་བྱེད་པས། །སངས་རྒྱས་ཞེས་ཀྱང་དེ་ཕྱིར་བརྗོད། །དངོས་མེད་སྨོན་པ་མེད་པ་དང་། །མཚན་མ་མེད་དང་སྟོང་པ་ཉིད། །རྣམ་ཐར་སྒོ་ནི་འདི་དག་གིས། །སྒོ་དག་སངས་རྒྱས་རབ་ཏུ་སྟོན། །མིག་དང་རྣ་བ་སྣ་དག་དང་། །ལྕེ་དང་ལུས་དང་དེ་བཞིན་ཡིད། །དེ་དག་རང་བཞིན་སྟོང་པར་ནི། །སངས་རྒྱས་དག་གིས་རབ་ཏུ་བཤད། །དེ་ལྟ་བུ་ཡི་ཆོས་རྣམས་
ཀྱི། ། རང་བཞིན་དག་ནི་སུས་ཤེས་པ། །ཆོས་ཀྱི་མཚན་ཉིད་ཤེས་པས་ན། །དེ་ནི་རྩོད་པར་མི་བྱེད་དོ། །འདི་ནི་བྱང་ཆུབ་སེམས་དཔའ་དག །དཔའ་བོ་སྐྱོབ་པའི་སྤྱོད་ཡུལ་ཏེ། །ཆོས་རྣམས་སྟོང་པར་ཤེས་པ་ནི། །དེ་དག་ནམ་ཡང་ནེམ་ནུར་མེད། །ཆོས་ཀྱི་རང་བཞིན་ཤེས་པས་ན། །དེ་ཕྱིར་སངས་རྒྱས་ཞེས་བྱ་སྟེ། །སེམས་ཅན་བསམ་གྱིས་མི་ཁྱབ་ཅིང་། །དཔག་ཏུ་མེད་པ་བྱང་ཆུབ་འདུལ། །སངས་རྒྱས་སྒྲས་ནི་གང་བྱས་པ། །ཚུལ་ཁྲིམས་སྒྲས་ཀྱང་དེ་བྱས་ཏེ། །སངས་རྒྱས་སྒྲ་དང་ཚུལ་ཁྲིམས་སྒྲ། །དེ་དག་གཉི་ག་མཚན་ཉིད་གཅིག །འཇིག་རྟེན་སྒྲ་དག་བརྗོད་པ་ནི། །རབ་དང་འབྲིང་དང་ཐ་མ་རྣམས། །མཉམ་པར་གཞག་པའི་སྒྲ་གཅིག་ལ། །སངས་རྒྱས་སྒྲས་ནི་བསྟན་པ་ཡིན། །སངས་རྒྱས་སྒྲ་ནི་ཡུལ་མི་གནས། །ཕྱོགས་ལའང་གནས་པ་མ་ཡིན་རྗོད། །སྐྱེས་དང་འགགས་པ་མ་ཡིན་ཏེ། །དེ་བཞིན་གཅིག་དང་ཐ་དད་མིན། །དེ་དག་གསར་རམ་རྙིང་མ་ཡིན། །དེ་དག་ལ་ནི་རློམ་སེམས་མེད། །སེར་པོ་མ་ཡིན་སྔོན་པོ་མིན། །དཀར་པོ་མ་ཡིན་དམར་པོ་མིན། །བརྗོད་དུ་མེད་ཅིང་གཟུང་མེད་པར། །དེ་ལྟར་དབྱངས་ཀྱིས་བསྟན་མོད་ཀྱི། །དེ་ནི་དབྱངས་ཀྱི་ས་མ་ཡིན། །ཐུབ་པ་དག་གི་ཆོ་འཕྲུལ་འདི། །སངས་རྒྱས་མྱ་ངན་འདས་པ་ཡི། །སངས་རྒྱས་སྐུ་གཟུགས་སྣང་གྱུར་ཏེ། །དེ་གནས་ཡིད་ལ་བྱས་པ་ན། །ཆོ་འཕྲུལ་རྣམས་ཀྱང་དེ་ཡིས་མཐོང་། །གང་གིས་མྱ་ངན་འདས་རེག་པ། །སེམས་ཅན་དེ་ནི་མི་རྙེད་དེ། །དེ་བཞིན་ཆོས་རྣམས་རབ་བསྟན་ཅིང་། །སེམས་ཅན་མང་པོ་གྲོལ་བར་བྱས། །ཇི་ལྟར་ཉི་མ་ཟླ་བ་དག །ཁར་བའི་སྣོད་དུ་སྣང་བ་ཡང་། །རང་གི་གཟུགས་ནི་མི་འཕོ་ལྟར། །ཆོས་ཀྱི་མཚན་ཉིད་དེ་འདྲའོ། །ཆོས་རྣམས་མིག་ཡོར་ལྟ་བུར་ཡང་། །གང་གིས་ངོ་བོ་ཉིད་ཤེས་པ། །དེ་དག་གཟུགས་ཀྱི་ལུས་སུ་ནི། །སངས་རྒྱས་སྐུ་ལ་མི་བལྟའོ། །ཆོས་འདི་ལུས་གཟུགས་མེད་པ་སྟེ། །འདི་ལ་ལུས་གཟུགས་གང་ཡང་མེད། །ཆོས་གང་ལུས་གཟུགས་མེད་པ་ནི། །དེ་ནི་སངས་རྒྱས་སྐུ་ལུས་སོ། །སུ་དག་ཆོས་ཀྱི་སྐུར་ལྟ་བ། །དེ་དག་གིས་ནི་འདྲེན་པ་མཐོང་། །རྫོགས་པའི་སངས་རྒྱས་
ཆོས་ཀྱི་སྐུ། །དེ་ནི་རྫོགས་པའི་སངས་རྒྱས་མཐོང་། །རྟེན་ཅིང་སོ་སོར་བསྟན་པ་སྟེ། །སོ་སོ་མ་ཡིན་སོ་སོར་བཤད། །དགེ་སྦྱོང་ཉིད་ནི་སུ་འདོད་པ། །འཇུག་པ་འདི་ནི་རིག་པར་གྱིས། །གང་དག་བདག་གིས་ཐོབ་སྙམ་པ། །དེ་ཕྱིར་མ་ཐོབ་པ་ཞེས་བྱ། །གང་གིས་དགེ་སྦྱོང་ཉིད་མ་ཐོབ། །དེ་ཕྱིར་དགེ་སྦྱོང་ཞེས་ཀྱང་བྱ། །སུ་དག་བསླབས་པར་མ་གྱུར་པ། །ཟབ་མོའི་ཆོས་འདི་ག་ལ་སྨྲ། །དེ་དག་ཟབ་མོའི་མིང་དུ་ཡང་། །ཡོངས་སུ་བརྗོད་པར་མི་ནུས་སོ། །ཕུང་པོ་ལྔ་ནི་དངོས་མེད་དེ། །མེད་པ་ལས་ནི་འདི་དག་བྱུང་། །སུ་ཡི་ཕུང་པོ་བྱུང་བ་ཡང་། །དེ་ལ་སློང་བར་བྱེད་པ་མེད། །ཕུང་པོའི་མཚན་ཉིད་གང་ཡིན་པ། །ཆོས་ཀུན་དེ་ཡི་མཚན་ཉིད་ཡིན། །དེ་ཡི་མཚན་ཉིད་ཡོད་བཤད་དེ། །མཚན་ཉིད་ཀྱང་ནི་ཡོད་མ་ཡིན། །ཇི་ལྟར་བར་སྣང་ནམ་མཁའ་བཞིན། །ཆོས་ཀྱི་མཚན་ཉིད་དེ་འདྲ་བར། །སྔོན་གྱི་མཐའ་དང་ཕྱི་མའི་མཐའ། །ད་ལྟར་བྱུང་བའང་མཐོང་བར་འགྱུར། །ནམ་མཁའ་གཟུང་བ་མེད་པར་བཤད། །དེ་ལ་གཟུང་བ་མི་རྙེད་དེ། །ཆོས་ཀྱི་རང་བཞིན་འདི་ཉིད་ཡིན། །གཟུང་བ་མེད་པ་ནམ་མཁའ་འདྲ། །དེ་ལྟ་བུར་ནི་ཆོས་བསྟན་ཏེ། །དེ་ལ་གང་ཡང་མཐོང་བ་མེད། །སུ་དག་ཆོས་འདི་མི་མཐོང་བ། །དེ་ཡི་ཆོས་རྣམས་བསམ་མི་ཁྱབ། །ཆོས་འདི་རྣམས་ནི་རང་བཞིན་མེད། །འདི་དག་རང་བཞིན་མི་རྙེད་དེ། །སངས་རྒྱས་བྱང་ཆུབ་སུ་བརྩོན་པ། །རྣལ་འབྱོར་པ་ཡི་སྤྱོད་ཡུལ་འདི། །དེ་ལྟ་བུར་ནི་སུས་ཤེས་པ། །དེ་ནི་ཆོས་ལ་མི་ཆགས་ཏེ། །ཆོས་རྣམས་ལ་ཡང་མི་ཆགས་པས། །ཆོས་ཀྱི་འདུ་ཤེས་རབ་ཏུ་རྟོགས། །བྱང་ཆུབ་སེམས་དཔའ་སྐྱོབ་པ་ཡིས། །ཆོས་རྣམས་ཐམས་ཅད་རྣམ་པར་བཤིག །ཆོས་ཀྱི་འདུ་ཤེས་རྣམ་བཤིག་ནས། །སངས་རྒྱས་ཆོས་ལ་རློམ་སེམས་མེད། །མཐའ་དེ་རློམ་སེམས་མ་བྱས་པ། །བརྟགས་ནས་མཐར་ནི་བཤད་པ་སྟེ། །དེ་ལྟར་མཐའ་ནི་སུས་ཤེས་པ། །བསྐལ་པ་བྱེ་བར་རློམ་སེམས་མེད། །བྱིས་པས་སྔོན་གྱི་མཐའ་བརྟགས་པས། །འཁོར་བ་རྣམས་སུ་འཁོར་འགྱུར་ཏེ། །ཕྱོགས་བཅུ་དག་ཏུ་བཙལ་ན་ཡང་། །དེ་ཡི་གནས་ནི་མི་རྙེད་དོ། །འཁོར་བ་སྟོང་པར་རིག་ནས་ནི། །རྒྱལ་བའི་ཐུགས་
སྲས་ཆགས་མི་འགྱུར། །བྱང་ཆུབ་དོན་ཕྱིར་སྤྱོད་མོད་ཀྱི། །དེ་དག་སྤྱོད་པ་མི་རྙེད་དོ། །ནམ་མཁའ་ལ་ནི་བྱ་རྗེས་བཞིན། །དེ་དག་རྙེད་པར་མི་འགྱུར་ཏེ། །དེ་འདྲའི་རང་བཞིན་བྱང་ཆུབ་དེ། །བྱང་ཆུབ་སེམས་དཔས་རྟོགས་པར་འགྱུར། །སྒྱུ་མ་བྱེད་པ་རབ་བསླབས་པ། །སྒྱུ་མ་དག་ནི་སྟོན་པ་ལྟར། །རྣམ་པ་སྣ་ཚོགས་གཟུགས་རྣམས་ཀྱང་། །གཟུགས་ནི་དམིགས་པར་མི་འགྱུར་རོ། །རྙེད་དང་མི་རྙེད་རློམ་སེམས་མེད། །རྙེད་པ་ལ་ཡང་རྙེད་མེད་དེ། །ཡེ་ཤེས་དེ་ནི་སྒྱུ་མ་འདྲ། །སྒྱུ་མ་དེ་ལ་གནས་པ་མིན། །དེ་བཞིན་ཆོས་རྣམས་སྟོང་པ་ལ། །བྱིས་པའི་བློ་ཡིས་རྣམ་བརྟགས་ནས། །རྣམ་པར་རྟོག་ལ་སྤྱོད་པ་དག །འགྲོ་བ་དྲུག་ཏུ་གཞོལ་བར་འགྱུར། །ཕུང་པོ་སྐྱེ་རྒ་ཉེར་འགྲོ་སྟེ། །དེ་དག་སྐྱེ་བ་ཟད་མི་འགྱུར། །སྐྱེ་ཞིང་འཆི་བའི་ཕུང་པོ་རྣམས། །དེ་དག་སྡུག་བསྔལ་མཐའ་ཡས་སོ། །སྐྱེ་ཞིང་འཁོར་བ་སྡུག་བསྔལ་ཏེ། །བྱིས་པའི་བློ་ཡིས་བརྟགས་པས་ན། །དེ་དག་རྟོག་པ་མི་ཟད་དེ། །དེ་དག་བསྐལ་པ་བྱེ་བར་འཁོར། །མི་སྦྱོར་བ་དང་རབ་སྦྱོར་དང་། །ལས་ཀྱི་སྦྱོར་ལ་གང་གནས་དང་། །ལས་རྣམས་ལེན་པ་གང་དགའ་བ། །དེ་དག་ལས་ལས་མི་འཐར་རོ། །ལས་ཀྱི་ཆུ་བོས་ཁྱེར་བ་དེ། །ལས་ནི་རྟག་ཏུ་ཟད་མི་འགྱུར། །བདུད་ཀྱི་ཕྱོགས་ལ་གང་གནས་པ། །ཡང་དང་ཡང་ནི་འཆི་བར་འགྱུར། །བདུད་ཀྱིས་ཟིལ་ནོན་ཤེས་རབ་འཆལ། །ཉོན་མོངས་པ་ཡི་ལས་རྣམས་ཀྱིས། །སྐྱེ་བ་དེ་དང་དེ་དག་ཏུ། །སྐྱེ་ཞིང་འཆི་བ་མྱོང་བར་འགྱུར། །སོ་སོའི་སྐྱེ་བོ་ལོང་བ་ཡི། །བྱིས་པ་དེ་དག་འཆི་བར་འགྱུར། །དེ་དག་བཏག་ཅིང་རྣམ་པར་གཞོམ། །དེ་དག་འགྲོ་བ་མི་བཟད་འགྱུར། །བྱིས་པའི་བློ་ཅན་མཚོན་ཆ་ཡིས། །གཅིག་ལ་གཅིག་ནི་གསོད་པ་བྱེད། །དེ་ལྟ་བུར་ནི་སྦྱོར་བ་དག །དེ་དག་སྦྱོར་བ་རབ་ཏུ་འཕེལ། །ངའི་བུ་ང་ཡི་ནོར་སྙམ་དུ། །བྱིས་པའི་བློ་ཡིས་རབ་བརྟགས་ཏེ། །མེད་པའི་ཆོས་རྣམས་བརྟགས་པས་ན། །འཁོར་བ་དག་ནི་ཕྱིར་ཞིང་འཕེལ། །འཁོར་བ་དག་ནི་འཕེལ་བྱེད་ཅིང་། །སོ་སོའི་སྐྱེ་བོ་དེ་དག་འཁོར། །སོ་སོ་ཐ་དད་འགྲོ་བས་ན། །སོ་སོའི་སྐྱེ་བོར་བརྗོད་པ་ཡིན། །སངས་རྒྱས་བསྟན་པ་
བོར་ནས་ནི། །ཆོས་རྣམས་མང་པོ་རབ་ཏུ་འཆད། །བདུད་ཀྱི་དབང་དུ་སོང་བས་ན། །དེ་དག་ཐར་པ་རྙེད་མི་འགྱུར། །འདོད་པའི་ཕྱིར་ནི་བྱིས་པ་རྣམས། ། བུད་མེད་རུལ་ལ་སྟེན་བྱེད་དེ། །འགྲོ་བ་རུལ་བར་འགྲོ་འགྱུར་ཞིང་། །དེས་ནི་ངན་འགྲོར་ལྟུང་བར་འགྱུར། །འཇིགས་པ་ཆེན་པོའི་ཞགས་པ་ནི། །བུད་མེད་ཞགས་པ་མི་བཟད་པས། །སངས་རྒྱས་རྣམས་ཀྱིས་འདོད་པ་དང་། །བུད་མེད་བསྟེན་པའང་མ་བསྔགས་སོ། །ལམ་འདི་བྱང་ཆུབ་མི་འགྱུར་བས། །བུད་མེད་རྣམས་ལ་མ་རྟོན་པར། །སྦྲུལ་གདུག་ཤིན་ཏུ་ཁྲོ་བོ་ལྟར། །མཁས་པས་དེ་ནི་རྣམ་པར་སྤོང་། །སངས་རྒྱས་ཀུན་གྱིས་བསྟན་པ་ཡི། །བྱང་ཆུབ་ལམ་ལ་སྒོམ་པར་བྱེད། །ལམ་དེ་གོམས་པར་བསྒོམས་བྱས་ན། །བླ་མེད་སངས་རྒྱས་འགྲུབ་པར་འགྱུར། །དེ་དག་བླ་ན་མེད་འགྱུར་ཏེ། །འཇིག་རྟེན་གྱི་ནི་མཆོད་རྟེན་འགྱུར། །བླ་ན་མེད་པའི་ཡེ་ཤེས་ཀྱིས། །སངས་རྒྱས་བླ་ན་མེད་པར་འགྱུར། །གསོ་སྦྱོང་དག་ལ་སྙེན་བྱེད་ཅིང་། །ཚུལ་ཁྲིམས་ཕུང་པོར་ཡང་དག་འཛུད། །སེམས་ཅན་བྱེ་བ་བསམ་མི་ཁྱབ། །བྱང་ཆུབ་ཏུ་ཡང་ཡང་དག་འཛུད། །དེ་དག་སེམས་ཅན་རྣམས་ཀྱི་ནི། །བསམ་ཡས་དཔག་མེད་དོན་བྱེད་དེ། །དཔའ་བོ་ཤེས་རབ་ཆེན་པོ་དེ། །བདུད་རྩི་ཡི་ནི་རྔ་ཡང་རྡུང་། །བདུད་ཀྱི་གནས་རྣམས་གཡོ་བྱེད་ཅིང་། །བདུད་ཀྱི་རིས་ཀྱང་གཡོ་བར་བྱས། །བདུད་རྣམས་བྱེ་བ་བསམ་མི་ཁྱབ། །བྱང་ཆུབ་ལ་ནི་ཡང་དག་འཛུད། །ཕ་རོལ་རྒོལ་བ་ཚར་གཅོད་ཅིང་། །མུ་སྟེགས་ཅན་ནི་ཕམ་པར་བྱེད། །རི་དང་རྒྱ་མཚོར་བཅས་པ་ཡི། །ས་ཡང་རབ་ཏུ་གཡོ་བར་བྱེད། །ཁྱུ་མཆོག་གྱུར་པ་དུ་མ་ཡིས། །ལུས་ཀྱི་རྣམ་པར་འཕྲུལ་བྱེད་ཅིང་། །ཤེས་རབ་ཆེན་པོ་དེ་དག་ནི། །ཆོ་འཕྲུལ་བསམ་གྱིས་མི་ཁྱབ་སྟོན། །ཞིང་རྣམས་བྱེ་བ་གཡོ་བྱེད་དེ། །གང་གཱ་ཡི་ནི་བྱེ་མ་སྙེད། །དེ་དག་བདུད་རྣམས་ཕམ་བྱས་ནས། །སངས་རྒྱས་གྲགས་པ་ཆེན་པོར་འགྱུར། །དེ་དག་ཞིང་རྣམས་སྤྲུལ་བྱེད་དེ། །རིན་པོ་ཆེ་ཡིས་རྣམ་པར་བརྒྱན། །མེ་ཏོག་འབྲས་བུ་ཕུན་སུམ་ཚོགས། །དྲི་དང་ལྡན་ཞིང་ཡིད་དུ་འོང་། །ཁང་པ་དང་ནི་གཞལ་མེད་ཁང་། །ཁང་པ་བརྩེགས་
པ་པུ་ཤུར་བཅས། །དཔའ་བོ་དེ་དག་སྤྲུལ་པ་བྱེད། །རྫིང་བུ་ཡིད་དུ་འོང་བ་དག །ཡན་ལག་བརྒྱད་ལྡན་ཆུ་ཡིས་གང་། །དང་ཞིང་བསིལ་ལ་རྙོག་པ་མེད། །དེ་ལས་ཆུ་ནི་སུས་འཐུངས་པ། །སྲིད་པ་གསུམ་ཡང་སྤོང་བར་འགྱུར། །བླ་ན་མེད་པའི་ཆུ་འཐུངས་ནས། །དེ་དག་ཕྱིར་ཡང་མི་ལྡོག་འགྱུར། །བླ་ན་མེད་པའི་ཡེ་ཤེས་ཀྱིས། །སངས་རྒྱས་བླ་ན་མེད་པར་འགྱུར། །བླ་མེད་ཞི་བའི་འཇུག་པར་ནི། །འགྲོ་བར་ཤིན་ཏུ་རིག་པར་གྱིས། །འཇུག་པ་འདི་ནི་མི་ཤེས་པས། །དམིགས་པ་ཅན་དག་ཤིན་ཏུ་བརླག། །སུ་དག་དེ་ལ་རྟེན་གྱུར་ཅིང་། །དེ་དག་སྐལ་མཉམ་སེམས་ཅན་དེ། །མནར་མེད་པར་ནི་དེ་འགྲོ་སྟེ། །མི་བཟད་པ་ནི་ཆེན་པོར་ལྟུང་། །དེ་ཡི་སྡུག་བསྔལ་དྲག་པོ་ནི། །བརྗོད་པར་ནུས་པ་མ་ཡིན་ཏེ། །བྱང་ཆུབ་སེམས་དཔའ་སྐྱོབ་པ་དང་། །ངས་ནི་དེ་དག་རབ་ཏུ་ཤེས། །འདི་འདྲའི་ཟབ་མོ་མཐོང་དཀའ་ཡི། །ཆོས་ལ་སུ་དག་ནེམ་ནུར་བྱེད། །སུ་དག་དམིགས་ལ་གནས་པ་ཡི། །བྱིས་པ་དག་གི་ས་མ་ཡིན། །བླ་མེད་སངས་རྒྱས་ཞིང་དུ་ནི། །གང་གིས་དེ་དག་འགྲོ་འགྱུར་བ། །གཟུགས་སྟོན་པ་ནི་དུ་མ་ཡི། །བཀོད་པ་དག་ནི་སྤྲུལ་པར་བྱེད། །སངས་རྒྱས་ཞིང་ནི་ཇི་སྙེད་ཀྱི། །གཟུགས་འགྲུབ་ཕུན་སུམ་ཚོགས་ཡོད་པ། །དེ་དག་ཐམས་ཅད་འདིར་ཡང་ནི། །བྱང་ཆུབ་སེམས་དཔའ་འཕྲུལ་ཆེ་སྟོན། །ཆོས་ཆེན་གྱི་ནི་གོ་བགོས་ཏེ། །དཔའ་ཆེན་སྟོབས་ཀྱང་ཆེ་བ་དག །སྟོང་པའི་དོན་ཆེན་རྡོ་རྗེ་ཡིས། །གདབ་པ་དག་ཀྱང་དེ་དག་འདེབས། །འོད་ཟེར་བྱེ་བ་ཕྲག་སྟོང་དག །གང་གཱ་ཡི་ནི་བྱེ་མ་སྙེད། །དེ་ཡི་ལུས་ལས་འབྱུང་བར་འགྱུར། །དེས་ནི་འཇིག་རྟེན་རབ་ཏུ་སྣང་། །དེ་དག་བུད་མེད་མི་ཆགས་ཏེ། །དེ་དག་ཡིད་འབྱུང་མི་བྱེད་ལ། །བུད་མེད་འདུ་ཤེས་རང་བཞིན་གྱིས། །འདུ་ཤེས་དེ་དག་རྣམ་པར་བཤིག །དཔའ་བོ་དེ་དག་གར་གནས་པ། །སངས་རྒྱས་ཞིང་དེ་མི་སྟོང་སྟེ། །དེ་དག་ལ་ནི་སྡིག་ཅན་བདུད། །བར་ཆད་བྱེད་པར་ག་ལ་འགྱུར། །ལྟ་བ་དག་ལ་དེ་གནས་པས། །སངས་རྒྱས་མང་པོ་མཉེས་མ་བྱས། །གནོད་སེམས་ཀྱིས་ནི་ཉེར་བརྟན་ཅིང་། །འདོད་དང་ཆགས་ལ་རབ་ཏུ་གནས། །ལྟ་ལ་གནས་པ་དེ་དག་ཀུན། །
བདུད་ཡིན་པར་ནི་རིག་པར་བྱ། །དེ་ལ་སྡིག་ཅན་བདུད་རྣམས་ཀྱང་། །བར་ཆད་བྱེད་པར་མི་འཇུག་གོ །སངས་རྒྱས་ཡེ་ཤེས་བསམ་མི་ཁྱབ། །ཡེ་ཤེས་དེ་ལྟར་སུས་ཤེས་པ། །འདུ་ཤེས་ཐམས་ཅད་རྣམ་བཤིག་ནས། །འདུ་ཤེས་དག་པ་མི་ལྡོག་གནས། །སྔོན་གྱི་མཐའ་དང་ཕྱི་མའི་མཐའ། །ད་ལྟར་མཐའ་ཡང་མཐོང་བར་འགྱུར། །དེ་ལྟར་ཆོས་རྣམས་བསྟན་མོད་ཀྱི། །དེ་ལ་ཆུང་ཟད་བསྟན་པ་མེད། །ཡེ་ཤེས་ཀྱིས་ཀྱང་ཤེས་པ་མེད། །མི་ཤེས་པས་ཀྱང་ཞུམ་མི་འགྱུར། །ཡེ་ཤེས་མི་ཤེས་རྣམ་བརྟགས་ནས། །སངས་རྒྱས་ཡེ་ཤེས་བརྗོད་པ་ཡིན། །རྣམ་རིག་ཚིག་དང་བརྡ་རྣམས་ནི། །བྱང་ཆུབ་སེམས་དཔས་རབ་ཏུ་ཤེས། །དེ་ནི་སེམས་ཅན་དོན་རྣམས་ཀྱང་། །དཔག་མེད་བསམ་ཡས་བྱེད་པར་འགྱུར། །འདུ་ཤེས་ཀུན་ཏུ་ཤེས་པའི་ཕྱིར། །འཛིན་པར་ཡང་ནི་དེ་བསྟན་ཏེ། །འདུ་ཤེས་དེ་ནི་མི་འཛིན་པ། །དབེན་པའི་དོན་དུ་རབ་ཏུ་བསྟན། །དབེན་པ་གང་ཡིན་འདུ་ཤེས་ཏེ། །འདུ་ཤེས་གང་ཡིན་བསྟན་པ་དེ། །འདུ་ཤེས་རང་བཞིན་ཡེ་ཤེས་ཏེ། །དེ་ལྟར་འདུ་ཤེས་མེད་པར་འགྱུར། །འདུ་ཤེས་འདི་ནི་སྤང་སྙམ་དུ། །གང་གི་འདུ་ཤེས་འབྱུང་བ་ནི། །འདུ་ཤེས་སྤྲོས་ལ་སྤྱོད་པ་སྟེ། །འདུ་ཤེས་ལས་ནི་དེ་མི་འཐར། །སུ་ཡི་འདུ་ཤེས་འདི་དག་བྱུང་། །སུ་ཡིས་འདུ་ཤེས་འདི་བསྐྱེད་བྱས། །སུས་ནི་འདུ་ཤེས་རེག་པར་བྱས། །སུས་ནི་འདུ་ཤེས་བཀག་པར་གྱུར། །གང་གི་འདུ་ཤེས་འབྱུང་བ་ནི། །སངས་རྒྱས་ཀྱིས་ཀྱང་ཆོས་མ་བརྙེས། །འདིར་ནི་དོན་དེ་བསམ་པར་གྱིས། །དེ་ནས་འདུ་ཤེས་མེད་པར་འགྱུར། །ནམ་ཚེ་འདུ་ཤེས་སྐྱེས་པ་ན། །སུ་ཡི་འདུ་ཤེས་ཡིན་ཞེས་བརྗོད། །སེམས་ཀྱི་རྒྱུད་ཀྱི་རྣམ་ཐར་ཡང་། །དེ་ལ་ཇི་ལྟར་རུང་བར་འགྱུར། །གང་ཚེ་རྣམ་ཐར་རེག་པ་ན། །བསམ་པ་ཐམས་ཅད་བསམ་པ་མེད། །གང་ཚེ་བསམ་པ་བསམ་མེད་པ། །དེ་ཚེ་བསམ་དུ་མེད་པར་འགྱུར། །བསམ་པའི་ས་ལ་གནས་ནས་ནི། །མཐར་གྱིས་རྣམ་པར་བསམ་བྱས་ཏེ། །བསམ་པ་ཐམས་ཅད་རྣམ་སྤངས་ནས། །དེ་ནས་བསམ་དུ་མེད་པར་འགྱུར། །འདི་ནི་དཀར་ཆོས་རྣམ་སྨིན་ཏེ། །འདུ་བྱེད་མེད་
པས་མཐོང་བར་འགྱུར། །སེམས་ཅན་ཀུན་གྱིས་རྣམ་བསམ་པ། །སྐད་ཅིག་གཅིག་ལ་རབ་ཏུ་ཤེས། །སེམས་ཅན་ཅི་འདྲ་དེ་བཞིན་བསམ། །བསམ་བཞིན་རྒྱལ་བ་དེ་འདྲ་སྟེ། །སངས་རྒྱས་བསམ་དུ་མེད་པ་ཡིས། །བསམ་པ་འདི་ནི་རབ་ཏུ་བསྟན། །གཅིག་པུ་དབེན་སོང་གང་སེམས་པ། །ནམ་ཞིག་སེམས་པ་མེད་པར་འགྱུར། །བསམ་པ་དག་ནི་མི་སེམས་ན། །བསམ་པ་ཐམས་ཅད་མེད་པར་འགྱུར། །ཤི་འཕོས་དུས་བྱས་ཤི་བའི་ཚེ། །གང་གི་བསམ་པ་རབ་འཇུག་པ། །བསམ་པའི་རྗེས་སུ་རྣམ་ཤེས་འབྲང་། །བསམ་ལས་དེ་ནི་མི་ཐར་ཏོ། །སུ་དག་བུད་མེད་འདུ་ཤེས་གནས། །དེ་དག་འདོད་ཆགས་རབ་ཏུ་འཕེལ། །འདུ་ཤེས་དག་ནི་རྣམ་བཤིག་ན། །འདོད་ཆགས་ཀྱིས་ནི་གོས་མི་འགྱུར། །བསམ་པ་འདི་ནི་བསམ་པ་ཆེ། །ཆོས་ཀྱི་བསམ་པ་བླ་ན་མེད། །ཆོས་ཀྱི་བསམ་པ་འདི་ཡིས་ནི། །ཡང་དག་བསམ་པ་རབ་ཏུ་འབྱུང་། །ཚུལ་མ་ཡིན་པ་རྣམ་བསམས་པས། །བསམ་པ་བསམ་ཡས་མང་པོ་དག །ཡུན་རིང་དུས་སུ་རྣམ་བསམས་ཀྱང་། །བསམ་པ་དག་ནི་ཟད་མ་གྱུར། །གང་དག་མིང་ལ་སེམས་པ་ཡང་། །ཟད་པ་ལ་ནི་ཡེ་ཤེས་མེད། །སྒྲ་ཤེས་པ་ལ་ཟད་པ་མེད། །ཟད་པའི་ཆོས་ཉིད་དེ་ཡིན་ནོ། །སྒྲ་དང་རྣམ་རིག་ཚིག་གི་ལམ། །ཟད་པའི་སྒྲར་ནི་བསྟན་པ་སྟེ། །ཆོས་དེ་རྣམས་ནི་བྱེ་བྲག་མེད། །ཤེས་བཞིན་ཟད་པ་དེ་བཞིན་ཏེ། །མ་སྐྱེས་ཤིང་ནི་མ་འགགས་པ། །མཚན་མ་མེད་ཅིང་མཚན་ཉིད་མེད། །བསྐལ་པ་བྱེ་བར་བཤད་ཀྱང་ནི། །མཚན་མ་མེད་པར་བསྟན་པ་ཡིན། །དངོས་པོ་ཐམས་ཅད་རྣམ་བཤིག་ནས། །དངོས་པོ་མེད་ལ་རབ་གནས་པ། །དངོས་པོ་གཞན་དུ་མ་བསྟན་ཏེ། །དངོས་མེད་པ་ཡང་གཞན་མི་བསྟན། །དངོས་མེད་སྒྲར་ནི་རིག་བྱས་ཏེ། །དངོས་པོ་མེད་པ་རབ་ཏུ་བསྟན། །སངས་རྒྱས་དག་ནི་ཀུན་གྱིས་ཀྱང་། །དངོས་པོ་མེད་པ་བལྟར་མི་ནུས། །དངོས་པོ་ཀུན་གྱི་དངོས་པོ་ནི། །དངོས་པོ་མེད་པར་དེ་བསྟན་ཏེ། །དེ་ལྟར་དངོས་པོ་རྣམ་རིག་ནི། །དངོས་པོ་མེད་པར་འགྱུར་ཞེས་བསྟན། །དངོས་པོ་མེད་པ་དེ་ཡང་ནི། །སུས་ཀྱང་ནམ་དུ་རེག་མི་ནུས། །དངོས་པོ་མེད་པ་རེག་པ་ཡིས། །ཀུན་རྫོབ་ཏུ་ནི་དེ་བསྟན་ཏོ། །
འཇིག་རྟེན་སངས་རྒྱས་བདག་འགྱུར་སྙམ། །དེ་ལྟར་གང་གི་བློ་འགྱུར་བ། །སྲིད་པའི་སྲེད་པས་ཡོང་མི་གཟིར། །མཁས་པ་བྱང་ཆུབ་རྟོགས་པར་འགྱུར། །བྱང་ཆུབ་སེམས་དཔའ་མཉམ་བཞག་པ། །ཆོས་ནི་གང་ལའང་སྨོན་མི་བྱེད། །ཅི་ཡང་མེད་ཅིང་དམིགས་པ་མེད། །དེ་ནི་བྱང་ཆུབ་བརྗོད་པ་ཡིན། །བྱང་ཆུབ་ཏུ་ནི་ངེས་ཞུགས་ཤེས། ། མང་དུ་དེ་སྐད་སྨྲ་མོད་ཀྱི། །འཇུག་པ་འདི་ནི་མི་ཤེས་པས། །དེ་དག་སངས་རྒྱས་བྱང་ཆུབ་རིང་། །འདུ་བྱེད་ཐམས་ཅད་སྟོང་པར་ནི། །སྒྲ་ཡིས་ཆོས་རྣམས་རབ་ཏུ་བཤད། །སྒྲ་ཡི་རང་བཞིན་གང་ཡིན་པ། །ཟབ་ཅིང་ཕྲ་སྟེ་མཐོང་བར་དཀའ། །མངོན་ཤེས་ཆེ་ལ་མདོ་སྡེ་འདི། །ངེས་པར་བསྟན་ཞེས་བྱ་བ་ཡིན། །བྱང་ཆུབ་སེམས་དཔའི་དོན་ཕྱིར་ནི། །སངས་རྒྱས་རྣམས་ཀྱིས་བསྟན་མཛད་དོ། །ཀུན་ནས་ཉོན་མོངས་ཇི་སྙེད་པ། །གཉེན་པོ་ཐམས་ཅད་དེ་ཡིས་བཅོམ། །མངོན་པར་ཤེས་ལ་རབ་གནས་ཤིང་། །དེ་དག་རྫུ་འཕྲུལ་ཤིན་ཏུ་བསྒོམས། །བསམས་ནས་ཤེས་ལ་དེ་གནས་ཏེ། །ཤེས་པ་དེ་ཡང་རྣམ་པར་བཤིག །བསམ་གྱིས་མི་ཁྱབ་དཔག་མེད་ཀྱི། །ཡེ་ཤེས་ཐོབ་པས་ངོམས་པ་མེད། །ཏིང་ངེ་འཛིན་དང་རྫུ་འཕྲུལ་ཕྱིར། །དེ་དག་མངོན་པར་འདུ་བྱེད་མེད། །དཔའ་བོའི་རྣམ་སྨིན་དེ་ཡིན་ཏེ། །དུས་ཀུན་དུ་ཡང་མཉམ་པར་བཞག །རྣམ་སྨིན་སྐྱེས་པའི་རྫུ་འཕྲུལ་གྱིས། །ཞིང་ནི་བྱེ་བར་དེ་འགྲོ་སྟེ། །འཇིག་རྟེན་སྒྲོན་མ་མཐོང་བ་ནི། །གང་གཱ་དག་གི་བྱེ་མ་སྙེད། །དེ་དག་འཆི་འཕོ་སྐྱེ་བ་ཡང་། །སེམས་གཞན་དུ་ནི་སྒྱུར་བར་བྱེད། །སེམས་ལ་དབང་ཡང་ཐོབ་པས་ན། །དེ་དག་ལུས་ནི་འོད་གསལ་ལོ། །སངས་རྒྱས་དག་གི་ཉན་ཐོས་གང་། །བསྒོམས་པའི་རྫུ་འཕྲུལ་གནས་པ་ནི། །འདུ་བྱེད་མེད་པའི་རྫུ་འཕྲུལ་ལ། །དེ་དག་བཅུ་དྲུག་ཆར་མི་ཕོད། །ལྷ་རྣམས་ཀྱིས་ཀྱང་དེ་དག་གི། །བསམ་པ་ཤེས་པར་མི་ནུས་ཏེ། །འཇིག་རྟེན་གྱི་ནི་མགོན་པོ་དང་། །དེ་དག་མཚུངས་གནས་མ་གཏོགས་སོ། །དེ་དག་སྤྱི་ཅེར་མི་འགྱུར་ཏེ། །མགོ་ལ་སྐྲ་དཀར་མི་འབྱུང་ཞིང་། །རགས་པའི་རྒ་བ་མི་འབྱུང་སྟེ། །དེ་བཞིན་སྡུག་བསྔལ་འཆི་བ་མེད། །ཐེ་ཚོམ་ཡིད་གཉིས་མི་འབྱུང་སྟེ། །དེ་དག་ལ་ནི་ནེམ་ནུར་མེད། །
མདོ་སྡེ་བྱེ་བ་བརྒྱ་རྣམས་ནི། །ཉིན་མཚན་དུ་ཡང་དེ་དག་ཚོལ། །ཇི་སྙེད་ཀུན་ནས་ཉོན་མོངས་ཀྱི། །བག་ལ་ཉལ་ནི་རབ་ཏུ་སྤངས། །དེ་དག་སེམས་ཅན་ཐམས་ཅད་ལ། །རྟག་ཏུ་མཉམ་པའི་སེམས་སུ་འགྱུར། །ཏིང་འཛིན་བྱེ་བ་ཁྲག་ཁྲིག་རྣམས། །ཕྱོགས་བཅུ་དག་ཏུ་ངེས་པར་སྟོན། །དྲིས་པ་བྱེ་བ་སྟོང་རྣམས་ཀྱང་། ། མི་གནས་པར་ནི་ལུང་སྟོན་ཏོ། །ཕོ་དང་མོར་ནི་འདུ་ཤེས་དང་། །འདུ་ཤེས་ཐམས་ཅད་རྣམ་པར་བཤིག །དངོས་མེད་འདུ་ཤེས་གནས་ནས་ནི། །ཡང་དག་ངེས་པར་སྟོན་པར་བྱེད། །ཡོངས་སུ་དག་པའི་ཡེ་ཤེས་ཀྱིས། །ཇི་བཞིན་དུ་ནི་ཆོས་སྟོན་ཏོ། །ཆོས་རྣམས་ཡང་དག་བསྟན་ལ་བརྩོན། །ཏིང་འཛིན་ཡེ་ཤེས་སྤྱོད་ཡུལ་ལྡན། །དེ་ཡི་ཏིང་འཛིན་སྤྱོད་པ་ཡང་། །དངོས་པོ་དག་ལ་མི་གནས་ཏེ། །དེ་ཡི་ཚིག་ཀྱང་དོན་མེད་མིན། །ཆོས་བསྟན་པ་ཡང་འབྲས་བུ་ཡོད། །མདོ་སྡེ་འདི་ལ་སུ་དགའ་བ། །དེས་ནི་མིར་འགྱུར་ལེགས་པར་འཐོབ། །མི་ཁོམ་ཐམས་ཅད་རབ་ཏུ་སྤངས། །སངས་རྒྱས་ཀུན་ལ་བྱས་པ་གཟོ། །གང་གིས་རིན་ཆེན་མདོ་འདི་ལས། །ཚིག་བཞིའི་ཚིགས་བཅད་བཟུང་བ་ཡང་། །དེས་ནི་འཁོར་བ་གང་བོར་བ། །བསྐལ་པ་བསམ་གྱིས་མི་ཁྱབ་བོ། །མདོ་སྡེ་འདི་ལ་སུ་དགའ་བ། །དེ་དག་སངས་རྒྱས་ཀུན་གྱིས་གཟིགས། །དེ་ནི་སངས་རྒྱས་རི་མོར་བྱས། །མྱུར་དུ་བྱང་ཆུབ་ཐོབ་པར་འགྱུར། །མདོ་སྡེ་འདི་ལ་སུ་དགའ་བ། །དེ་དག་ཆོས་རྣམས་ཐམས་ཅད་ལ། །ཐེ་ཚོམ་དང་ནི་ནེམ་ནུར་མེད། །དེ་དག་མྱ་ངན་འདས་དང་ཉེ། །བྱ་རྒོད་ཕུང་པོར་དེ་བཞིན་གཤེགས། །དཔའ་བོ་ཆེན་པོ་དེ་ཡིས་མཐོང་། །ཐམས་ཅད་སངས་རྒྱས་ལུང་བསྟན་ཏེ། །རྒྱལ་བ་བྱམས་པ་མཐོང་བར་འགྱུར། །སངས་རྒྱས་བྱམས་པ་མཐོང་ནས་ནི། །བཟོད་པ་བཟང་པོ་ཐོབ་པར་འགྱུར། །གང་སུ་ཟད་པའི་དུས་ལ་ཡང་། །མདོ་སྡེ་འདི་ལ་རབ་གནས་པ། །དེ་དག་ཡང་དག་མཐའ་ལ་གནས། །ཡང་དག་མཐའ་ནི་བསམ་མི་ཁྱབ། །བསམ་གྱིས་མི་ཁྱབ་མཐའ་ལ་ནི། །དེ་དག་ནེམ་ནུར་ཡོད་མ་ཡིན། །རྡུལ་ཕྲན་ཙམ་ཡང་རྣམ་པ་ཀུན། །དེ་དག་ལ་ཡང་ཐེ་ཚོམ་མེད། །རྡུལ་ཙམ་རབ་ཏུ་སྤངས་པ་ནི། །དེ་དག་བྱང་ཆུབ་རྙེད་མི་དཀའ། །ཟད་དུས་ཤིན་
ཏུ་འཇིགས་པ་ལ། །དཀའ་བ་དག་ནི་སྤྱད་བྱས་ཏེ། །མདོ་སྡེ་རིན་ཆེན་འདི་བསླབས་ན། །སྤོབས་པ་དག་ཀྱང་མི་ཟད་འགྱུར། །མདོ་སྡེ་འདི་ནི་རབ་བཏོན་ན། །སངས་རྒྱས་རྣམས་ཀྱི་མཛོད་བསྲུངས་ཏེ། །འདི་ནི་སངས་རྒྱས་ཀུན་མཆོད་པ། །ཆོས་ཀྱི་མཆོད་པ་བསམ་མི་ཁྱབ། ། མ་རུངས་ཟད་པའི་དུས་ལ་ནི། །མདོ་སྡེ་འདི་དག་གང་འཛིན་པ། །དེ་དག་ཡེ་ཤེས་རྙེད་མི་དཀའ། །སངས་རྒྱས་ཡེ་ཤེས་བསམ་མི་ཁྱབ། །གང་གིས་སྔོན་གྱི་སངས་རྒྱས་ལས། །མདོ་སྡེ་འདི་དག་བཟུང་བ་ནི། །དེ་དག་ལུས་ལ་འཆང་གྱུར་ཏེ། །ཟད་པའི་དུས་ལ་རབ་ཏུ་འདོན། །སངས་རྒྱས་ཞིང་ནི་བྱེ་བར་ཡང་། །འཇིག་རྟེན་མགོན་པོའི་སྤྱན་སྔར་ཡང་། །ཤཱཀྱ་སེང་གེའི་སྤྱོད་པ་རྣམས། །དེ་དག་སྒྲར་ཡང་སྒྲོག་པར་འགྱུར། །དེ་དག་སངས་རྒྱས་སྤྱན་སྔར་ནི། །རྟག་ཏུ་སེང་གེའི་སྒྲ་སྒྲོག་སྟེ། །མཐའ་ཡས་པ་ཡི་སྤོབས་པ་ཡིས། །སངས་རྒྱས་བྱང་ཆུབ་འདི་ཡང་སྨྲ། །ཟད་དུས་འཇིགས་པ་ཆེན་པོའི་ཚེ། །བྱང་ཆུབ་འདི་ནི་གང་སྲུང་བ། །བུ་རམ་ཤིང་གི་རིགས་སྐྱེས་རྣམས། །སངས་རྒྱས་རྣམས་ཀྱིས་ལུང་བསྟན་ཡིན། །དེ་དག་གཟུགས་ནི་ཕུན་སུམ་ཚོགས། །མཚན་རྣམས་ཀྱིས་ཀྱང་རྣམ་པར་བརྒྱན། །སངས་རྒྱས་བྱེ་བར་ཕྱག་འཚལ་དུ། །རྣམ་པར་འཕྲུལ་པས་འགྲོ་བར་འགྱུར། །སྒྱུ་མ་ཡི་ནི་མེ་ཏོག་དག །གསེར་གྱི་མདོག་འདྲར་སྣང་བ་དང་། །བཻ་དཱུཪྱ་དང་ཤེལ་དག་དང་། །དངུལ་གྱི་ཡང་ནི་མེ་ཏོག་རྣམས། །རིན་ཆེན་རིགས་རྣམས་ཐམས་ཅད་ཀྱང་། །དེ་ཡི་ལག་ནས་འབྱུང་བར་འགྱུར། །བྱང་ཆུབ་ལམ་རྣམས་ཚོལ་བའི་ཕྱིར། །དེ་དག་སངས་རྒྱས་རྣམས་ལ་འཐོར། །མཆོད་པ་རྣམ་པ་སྣ་ཚོགས་དང་། །རོལ་མོ་སྒྲུབ་པ་ཕུན་སུམ་ཚོགས། །གང་གཱ་ཡི་ནི་བྱེ་མ་སྙེད། །བ་སྤུའི་ཁུང་ནས་འབྱུང་བར་འགྱུར། །སེམས་ཅན་བྱེ་བ་བསམ་མི་ཁྱབ། །གང་དག་སྒྲ་འདི་ཐོས་པ་ནི། །སངས་རྒྱས་ཡེ་ཤེས་བླ་མེད་ལས། །དེ་དག་ཕྱིར་ཡང་མི་ལྡོག་འགྱུར། །སངས་རྒྱས་བྱེ་བ་དེ་དག་གི། །བསྔགས་པ་བསམ་གྱིས་མི་ཁྱབ་བརྗོད། །བསམ་གྱིས་མི་ཁྱབ་ཞིང་རྣམས་སུ། །དེ་དག་སྒྲ་ཡང་ཐོས་པར་འགྱུར། །གང་གིས་སྒྲ་དེ་ཐོས་པ་ནི། །དེ་དག་འདུ་ཤེས་འགགས་
པར་འགྱུར། །འདུ་ཤེས་དག་ནི་འགགས་ནས་སུ། །སངས་རྒྱས་མཐའ་ཡས་མཐོང་བར་འགྱུར། །དེ་འདྲ་བ་ཡི་ཡེ་ཤེས་ཀྱིས། །བྱང་ཆུབ་སྤྱོད་པ་སྤྱད་ནས་ནི། །སེམས་ཅན་ཀུན་གྱི་དོན་བྱས་ནས། །དོན་བྱེད་པ་ཡི་རྒྱལ་བར་འགྱུར། །གང་གིས་ཏིང་འཛིན་བཟུང་བ་ཡི། །མཁས་པས་འདིར་ནི་གང་འཐོབ་པ། །ཡོན་ཏན་ཕན་ཡོན་འདི་དག་སྟེ། །གཞན་ཡང་དཔག་ཏུ་མེད་པར་འགྱུར། །བུད་མེད་ཀྱིས་ཀྱང་མདོ་སྡེ་འདི། །ཐོས་ནས་ཚིགས་བཅད་གཅིག་བཟུང་ན། །བུད་མེད་དངོས་པོ་རྣམ་བསྒྱུར་ནས། །ཆོས་སྨྲ་བ་ཡང་དེ་འགྱུར་རོ། །དེ་ནི་ཕྱིས་ཀྱང་བུད་མེད་ཀྱི། །དངོས་པོ་འཛིན་པར་མི་འགྱུར་ཏེ། །མཚན་རྣམས་ཀྱིས་ནི་ལེགས་བརྒྱན་ཅིང་། །རྟག་ཏུ་བྱད་བཞིན་བཟང་པོར་འགྱུར། །མདོ་སྡེ་མཆོག་རབ་འདི་ཡི་ནི། །ཡོན་ཏན་དག་ཀྱང་མཆོག་བཤད་པ། །དེ་ལ་དེ་དག་ཐམས་ཅད་འབྱུང་། །བྱང་ཆུབ་ཉིད་ཀྱང་མྱུར་དུ་འཐོབ། །སངས་རྒྱས་ཀུན་གྱི་སྤྱོད་ཡུལ་ཏེ། །མདོ་སྡེ་འདི་ནི་བཟུང་ནས་སུ། །དེ་དག་སྐྱེ་བ་ཐམས་ཅད་དུ། །རྟག་ཏུ་འཇིགས་པ་མེད་པར་འགྱུར། །ཏིང་འཛིན་ཞི་བ་བཤད་པ་ནི། །བྱང་ཆུབ་སེམས་དཔའ་སྐྱེད་པ་སྟེ། །བྱང་ཆུབ་རྟོགས་པར་སུ་འདོད་པ། །མདོ་སྡེ་འདི་ནི་བརྗོད་པར་གྱིས། །དེ་དག་ཐུབ་དབང་བསྙེན་པ་སྟེ། །སངས་རྒྱས་བྱང་ཆུབ་ཉེ་བར་འགྱུར། །དེ་དག་རིང་པོར་མི་ཐོགས་པར། །མཉམ་གཞག་ཞི་བའི་ས་འདི་ཐོབ། །བྱང་ཆུབ་སེམས་དཔའ་དཔའ་བོ་དག །བྱང་ཆུབ་དེ་ལ་རྟག་གནས་ནས། །སངས་རྒྱས་དག་ནི་བྱེ་བ་རྣམས། །གང་གཱའི་བྱེ་སྙེད་མཐོང་བར་འགྱུར། །ཏིང་འཛིན་རྡུལ་བྲལ་ཞི་བ་འདི་ནི་དེས་ཐོབ་ནས། །ས་བདག་འཁོར་ལོས་སྒྱུར་བའི་རྒྱལ་པོར་དེ་འགྱུར་ཏེ། །སངས་རྒྱས་རྡུལ་བྲལ་ཤིན་ཏུ་སེམས་ཞི་རྣམས་མཐོང་ནས། །འཇིག་རྟེན་མགོན་པོ་དེ་དག་ཚིགས་བཅད་བརྒྱས་སྟོད་འགྱུར། །ཤིན་ཏུ་གྲགས་པ་ཆེན་པོ་ལྷ་དང་མི་ཡི་མཆོག །འདྲེན་པ་དག་ལ་མཆོད་པ་མཚུངས་མེད་དེས་བྱས་ཏེ། །དེས་ནི་རྒྱལ་སྲིད་མཆིལ་མ་བཞིན་དུ་ཡོངས་སྤངས་ནས། །གཙང་ཞིང་རྣམ་པར་དག་པས་ཚངས་པའི་སྤྱད་པ་སྤྱོད། །དེ་ནི་ཐུབ་པ་མཆོག་གི་བསྟན་ལ་རབ་བྱུང་ནས། །ཏིང་
འཛིན་རྡུལ་བྲལ་ཞི་བ་འདི་ཡང་རབ་ཐོབ་སྟེ། །དེ་ཡང་ཚིག་དགེ་དག་ཀྱང་ཤིན་ཏུ་འཇམ་གྱུར་ནས། །བློ་ལྡན་བྱིན་གྱིས་བརླབས་ཀྱིས་མདོ་སྡེ་བྱེ་བ་འཆད། །སྟོང་པ་མཚན་མེད་མཆོག་ཏུ་གྱ་ནོམ་ཞི་བའི་མཆོག །རབ་ཏུ་ཞི་ཆོས་སྤྱད་པ་ཞིབ་ཅིང་ཐོགས་པ་མེད། ། ཤིན་ཏུ་ཞི་བ་རྟག་ཏུ་རྡུལ་བྲལ་རང་བཞིན་སྟོང་། །ཏིང་འཛིན་འདི་ཐོབ་སྐྱེ་བོ་མང་ལ་རབ་ཏུ་སྟོན། །བློ་ནི་རྟག་ཏུ་ཟབ་ཅིང་བློ་ཡང་མཐའ་ཡས་ཏེ། །བློ་ཡང་རྒྱ་ཆེ་དཔག་ཏུ་མེད་པའི་དོན་ལྡན་བློ། །ཟབ་ཅིང་ཞི་བའི་ཏིང་ངེ་འཛིན་འདི་ཐོབ་ནས་ནི། །འཇིག་རྟེན་ཐམས་ཅད་དུ་ཡང་སྣང་བ་ཐོབ་པར་འགྱུར། །རྡུལ་དང་བྲལ་བའི་ཏིང་འཛིན་ཞི་བ་འདི་རྙེད་ན། །དེ་ནི་ཚངས་པར་སྤྱོད་པ་རྟག་ཏུ་གཙང་བར་འགྱུར། །དྲི་ང་མེད་ཅིང་རྟག་ཏུ་ཀུན་ནས་ཉོན་མོངས་མེད། །སེམས་ཅན་བྱེ་བ་གཞན་ཡང་དེ་ལ་འགོད་པར་འགྱུར། །རྡུལ་དང་བྲལ་བའི་ཏིང་འཛིན་ཞི་བ་འདི་བཟུང་ན། །ཤེས་རབ་ཤིན་ཏུ་རྣོ་ཞིང་ཤེས་རབ་མཆོག་ཏུ་འགྱུར། །དེ་ཐོས་རྒྱ་མཚོར་འགྱུར་ཞིང་རྟག་ཏུ་བློ་མཐའ་ཡས། །ངག་དགེ་བློ་གྲོས་མཁས་ཤིང་ཆོ་ག་ཤེས་པར་འགྱུར། །རྡུལ་དང་བྲལ་བའི་ཏིང་འཛིན་ཞི་བ་འདི་བཟུང་ན། །ལས་ཀྱི་གནས་དང་དེ་བཞིན་བཟོ་ཡི་གནས་རྣམས་དང་། །སྨན་གྱི་གནས་རྣམས་དང་ནི་དེ་བཞིན་རྩི་ཡི་གནས། །བརྟན་པ་དེ་ནི་ཐམས་ཅད་ཀྱི་ཡང་ཕ་རོལ་ཕྱིན། །རྡུལ་དང་བྲལ་བའི་ཏིང་འཛིན་ཞི་བ་འདི་བཟུང་ན། །སྙན་དངགས་བསྟན་བཅོས་བཞད་གད་རོལ་མོ་དང་། །གླུ་དང་གར་ལ་ཤིན་ཏུ་མཁས་ཤིང་ཕ་རོལ་ཕྱིན། །འཇིག་རྟེན་ན་ཡང་རྟག་ཏུ་སློབ་དཔོན་འགྱུར་བ་ཡིན། །རྡུལ་དང་བྲལ་བའི་ཏིང་འཛིན་ཞི་བ་འདི་བཟུང་ན། །བྱང་ཆུབ་སྤྱོད་པ་ཞི་བ་དམ་པ་མཆོག་སྤྱོད་ཅིང་། །དེ་ནི་རྟག་པར་གཡོག་དང་རབ་ཏུ་ལྡན་པར་འགྱུར། །ཕྱོགས་ཀྱང་རྟག་ཏུ་མི་ཕྱེད་འཐུན་ཞིང་འཚམ་པར་འགྱུར། །རྡུལ་དང་བྲལ་བའི་ཏིང་འཛིན་ཞི་བ་འདི་བཟུང་ན། །མཁས་པས་དེ་ལ་མྱ་ངན་དག་གི་ཟུག་རྔུ་དང་། །མཁས་པའི་སེམས་ལ་ནམ་ཡང་གནོད་པ་མི་འབྱུང་སྟེ། །ཐམས་ཅད་དུས་སུ་རྟག་པར་ནད་ཀྱང་མེད་པར་འགྱུར། །རྡུལ་དང་བྲལ་བའི་ཏིང་འཛིན་ཞི་བ་འདི་བཟུང་ན། །ལུས་ཀྱི་ནད་དང་དེ་བཞིན་སེམས་ཀྱི་ནད་རྣམས་དང་། །སོ་ཡི་ནད་དང་
དེ་བཞིན་མགོ་ཡི་ནད་རྣམས་ཀྱང་། །འཚོ་བའི་འཇིག་རྟེན་དག་ན་དེ་ལ་ནད་མི་འབྱུང་། །རྡུལ་དང་བྲལ་བའི་ཏིང་འཛིན་ཞི་བ་འདི་བཟུང་ན། །མི་ཡི་འཇིག་རྟེན་ནད་རྣམས་མང་པོ་ཅི་ཡོད་པ། ། ལུས་ཀྱི་ནད་དང་དེ་བཞིན་སེམས་ཀྱི་ནད་རྣམས་དང་། །དེ་ལ་ནད་ཀྱང་དེ་དག་རྟག་ཏུ་ཡོང་མི་འབྱུང་། །རྡུལ་དང་བྲལ་བའི་ཏིང་འཛིན་ཞི་བ་འདི་བཟུང་ན། །སེམས་ལ་ཀུན་ནས་ཉོན་མོངས་པ་ནི་གང་ཡོད་དང་། །ལུས་ལ་ཡང་ནི་ནད་ཀྱི་རྣམ་པ་གང་ཡོད་པ། །ཀུན་ནས་ཉོན་མོངས་མང་པོ་དེ་དག་དེ་ལ་མེད། །རྡུལ་དང་བྲལ་བའི་ཏིང་འཛིན་ཞི་བ་འདི་བཟུང་ན། །བར་སྣང་ནམ་མཁའ་དག་ལ་གོས་པ་མེད་པ་ལྟར། །རྣམ་པར་དག་ཅིང་རྒྱ་ཆེ་རབ་ཏུ་འོད་གསལ་ཏེ། །དེ་བཞིན་དེ་ཡི་སེམས་ཀྱང་རྣམ་པར་དག་པར་འགྱུར། །རྡུལ་དང་བྲལ་བའི་ཏིང་འཛིན་ཞི་བ་འདི་བཟུང་ན། །ཟླ་བའི་འོད་དང་དེ་བཞིན་ཉི་མའི་འོད་རྣམས་ནི། །དག་ཅིང་གཟུང་དུ་མེད་ལ་རབ་ཏུ་འོད་གསལ་བ། །དེ་བཞིན་དེ་ཡི་སེམས་ཀྱང་ཤིན་ཏུ་འོད་གསལ་འགྱུར། །ཇི་ལྟར་ཚོན་རྩི་ཐོགས་ནས་བར་སྣང་ནམ་མཁའ་ལ། །རྣམ་པ་མང་པོ་དུ་མའི་གཟུགས་རྣམས་བྲི་བར་དཀའ། །དེ་བཞིན་རྡུལ་བྲལ་ཞི་བའི་ཏིང་འཛིན་འདི་བསྒོམས་ན། །དེ་ཡི་སེམས་ལ་རི་མོར་བྲི་བ་སླ་མ་ཡིན། །རླུང་ནི་ཇི་ལྟར་ཕྱོགས་བཞི་དག་ནས་ལངས་པ་དང་། །ཐོགས་པ་མེད་པར་ཕྱོགས་རྣམས་ཀུན་ཏུ་འགྲོ་བར་འགྱུར། །དེ་ཡི་སེམས་ཀྱི་རྒྱུད་ཀྱང་རླུང་དང་འདྲར་འགྱུར་ཏེ། །དེ་ནི་འཇིག་རྟེན་དག་ན་ཐོགས་མེད་མ་ཆགས་འགྲོ། །རླུང་ལངས་པ་ནི་རྒྱ་མོས་གཟུང་དུ་རུང་ཡང་སྲིད། །རླུང་ནི་ཞགས་པ་དག་གིས་བཅིང་བར་ནུས་གྱུར་ཀྱང་། །རྡུལ་དང་བྲལ་བ་ཞི་བའི་ཏིང་འཛིན་འདི་བསྒོམས་ན། །དེ་ཡི་སེམས་ནི་རབ་ཏུ་ཤེས་པར་སླ་མ་ཡིན། །གཟུགས་བརྙན་དག་ནི་ཆུ་ཡི་ནང་དུ་གཟུང་བར་རུང་། །འབྲུ་མར་གང་བའི་སྣོད་དང་ཆུ་ཡི་ནང་དུ་འབྱུང་། །དེ་བཞིན་རྡུལ་བྲལ་ཞི་བའི་ཏིང་འཛིན་འདི་བསྒོམས་ན། །དེ་ཡི་སེམས་ནི་རབ་ཏུ་ཤེས་པར་སླ་མ་ཡིན། །སྤྲིན་ལས་འབྲུག་ཟེར་གློག་གི་འཁྲི་ཤིང་བྱུང་བ་དག །མི་དག་གི་ནི་ལག་པས་གཟུང་བར་ནུས་གྱུར་ཀྱང་། །རྡུལ་དང་བྲལ་བ་ཞི་བའི་ཏིང་འཛིན་འདི་ཐོབ་ན། །དེ་ཡི་
སེམས་ཀྱི་ཚད་ནི་ཤེས་པར་སླ་མ་ཡིན། །ཕྱོགས་བཅུའི་སངས་རྒྱས་ཞིང་ན་སེམས་ཅན་ཅི་ཡོད་པ། །སེམས་ཅན་དེ་དག་གི་ནི་སྒྲ་སྐད་གཟུང་ནུས་ཀྱང་། །བྱང་ཆུབ་སེམས་དཔའ་ནམ་ཞིག་ཏིང་འཛིན་འདི་ཐོབ་ན། །དེ་ཡི་སེམས་ཀྱི་མཐའ་ནི་ཤེས་པར་སླ་མ་ཡིན། །དེས་ནི་རྡུལ་བྲལ་ཞི་བའི་ཏིང་འཛིན་འདི་ཐོབ་ནས། །ཀུན་ནས་ཉོན་མོངས་མེད་ཅིང་གོས་པ་མེད་པར་འགྱུར། །ནམ་ཞིག་དེས་ནི་ཏིང་འཛིན་ཞི་བ་ཐོབ་པའི་ཚེ། །ཕྱིར་ཡང་སྲེད་པ་གསུམ་ལ་ནམ་ཡང་ཆགས་མི་བྱེད། །ནམ་ཞིག་རྡུལ་དང་བྲལ་བའི་ཏིང་འཛིན་འདི་ཐོབ་ན། །འདོད་པ་དག་ལ་མི་སྲེད་གཟུགས་ལ་མི་སྲེད་དེ། །བུད་མེད་དག་ལ་མི་སྲེད་སེམས་ཀྱང་འཁྲུལ་པ་མེད། །ཞི་ཞིང་རབ་ཏུ་ཞི་བ་གོས་པ་མེད་པར་འགྱུར། །ནམ་ཞིག་རྡུལ་དང་བྲལ་བའི་ཏིང་འཛིན་འདི་ཐོབ་ན། །བུ་ལ་མི་སྲེད་བུ་མོ་དག་ལའང་སྲེད་མི་འགྱུར། །ཆུང་མ་དག་ལའང་མི་སྲེད་གཡོག་ལའང་སྲེད་པ་མེད། །རབ་ཏུ་ཞི་བར་སྤྱོད་ཅིང་གོས་པ་མེད་པར་འགྱུར། །གསེར་ལ་མི་སྲེད་ནོར་རྣམས་ལ་ཡང་སྲེད་མེད་དེ། །མཐོ་རིས་མི་སྲེད་རིན་ཆེན་རྫས་ལ་ཆགས་མི་འགྱུར། །སེམས་ཀྱང་ཤིན་ཏུ་རྣམ་པར་དག་ཅིང་མི་རྟོག་པ། །འདི་ནི་ཏིང་ངེ་འཛིན་རྣམས་ཐོབ་པའི་བྱེ་བྲག་ཡིན། །རྒྱལ་སྲིད་འདོད་ཕྱིར་ཚངས་པར་སྤྱོད་པ་དེ་མི་སྤྱོད། །མཁས་པ་མཐོ་རིས་སྲེད་པས་རྟག་ཏུ་སྦྱིན་མི་བྱེད། །བྱང་ཆུབ་སེམས་དཔའ་བྱང་ཆུབ་འདོད་པས་སྦྱིན་བྱེད་དེ། །འདི་ནི་ཏིང་ངེ་འཛིན་དག་ཐོབ་པའི་བྱེ་བྲག་གོ །རྒྱལ་པོའི་སྲིད་ཕྱིར་དཀའ་ཐུབ་བརྟུལ་ཞུགས་མི་སྤྱོད་དོ། །སྲིད་པ་གསུམ་དུ་དབང་ཕྱུག་འདོད་པའི་ཕྱིར་མ་ཡིན། །སྐྱེ་བོ་མང་ལ་ཕན་ཕྱིར་བྱང་ཆུབ་སྲེད་པ་ཡིས། །དེ་ནི་རྡུལ་དང་བྲལ་བའི་ཏིང་འཛིན་འདི་སྒྲུབ་བོ། །གླུ་ལ་མི་སྲེད་གར་ལའང་སྲེད་པ་མ་ཡིན་ཏེ། །སྤོས་ལ་མི་སྲེད་བཏུང་བ་དག་ལའང་སྲེད་མ་ཡིན། །ཟས་ལའང་མི་སྲེད་གོས་ལ་ཡང་ནི་སྲེད་མི་འགྱུར། །འདི་ནི་ཏིང་ངེ་འཛིན་དག་ཐོབ་པའི་བྱེ་བྲག་ཡིན། །མིག་ལ་མི་སྲེད་རྣ་བ་ལ་ཡང་སྲེད་མ་ཡིན། །སྣ་ལ་མི་སྲེད་ལྕེ་ལ་སྲེད་པ་མ་ཡིན་ཞིང་། །ལུས་ལ་མི་སྲེད་སེམས་ལ་ཡང་ནི་སྲེད་མི་འགྱུར། །འདི་ནི་ཏིང་ངེ་འཛིན་དག་ཐོབ་པའི་བྱེ་བྲག་ཡིན། །ཁྱིམ་ལ་མི་སྲེད་དགོན་པར་སྲེད་པ་མ་ཡིན་
ཏེ། །གཙུག་ལག་ཁང་ལ་མི་སྲེད་གྲོང་ལའང་སྲེད་མི་འགྱུར། །ཡུལ་འཁོར་མི་སྲེད་གྲོང་ཁྱེར་ལ་ཡང་མི་སྲེད་དེ། །འདི་ནི་ཏིང་ངེ་འཛིན་དག་ཐོབ་པའི་བྱེ་བྲག་ཡིན། །སྦྱིན་ལ་མི་སྲེད་ཚུལ་ཁྲིམས་དག་ལ་སྲེད་མི་འགྱུར། །བཟོད་ལ་མི་སྲེད་བརྩོན་འགྲུས་ལ་ཡང་སྲེད་མ་ཡིན། །བསམ་གཏན་མི་སྲེད་ཤེས་རབ་ལ་ཡང་མི་སྲེད་དེ། །འདི་ནི་ཏིང་ངེ་འཛིན་དག་ཐོབ་པའི་བྱེ་བྲག་ཡིན། །སེམས་ཅན་ལ་ཡང་མི་སྲེད་སྲོག་ལ་མི་སྲེད་ཅིང་། །སངས་རྒྱས་དག་ལ་མི་སྲེད་ཆོས་ལ་སྲེད་མི་བྱེད། །དགེ་འདུན་མི་སྲེད་བྱང་ཆུབ་ལ་ཡང་སྲེད་མི་འགྱུར། །འདི་ནི་ཏིང་ངེ་འཛིན་དག་ཐོབ་པའི་བྱེ་བྲག་ཡིན། །ཡོད་ལ་མི་སྲེད་མེད་པ་ལ་ཡང་སྲེད་མ་ཡིན། །དབུས་ལ་མི་སྲེད་མཐའ་ལའང་སྲེད་པར་མི་འགྱུར་ཞིང་། །ཀུན་ལ་མི་སྲེད་སྲེད་པ་མེད་པའང་མ་ཡིན་ཏེ། །འདི་ནི་ཏིང་ངེ་འཛིན་དག་ཐོབ་པའི་བྱེ་བྲག་ཡིན། །རྡུལ་དང་བྲལ་བའི་ཏིང་འཛིན་ཞི་བ་འདི་ཐོབ་ན། །དེ་ལ་འདོད་ཆགས་ནམ་ཡང་གནོད་པ་མི་སྐྱེད་དེ། །སུ་དག་བུད་མེད་སྲེད་པ་དེ་ནི་སེམས་འཁྲུལ་འགྱུར། །འདི་ལྟར་དེས་ནི་འདོད་ཆགས་རང་བཞིན་ཡོངས་སུ་ཤེས། །རྡུལ་དང་བྲལ་བ་ཞི་བའི་ཏིང་འཛིན་འདི་ཐོབ་ན། །དེ་ལ་ནམ་ཡང་ཞེ་སྡང་གནོད་པ་མི་སྐྱེད་དེ། །མཁས་པས་འདི་ལྟར་གནོད་སེམས་རབ་ཏུ་བཤིག་པའི་ཕྱིར། །བྱམས་པར་བྱེད་ཅིང་ཞེ་སྡང་ཐམས་ཅད་ཤིན་ཏུ་བཅོམ། །དེ་ལ་ནམ་ཡང་གཏི་མུག་གནོད་པ་མི་སྐྱེད་དེ། །ཤེས་རབ་ཀྱིས་ནི་གཏི་མུག་མ་རིག་ངེས་པར་བསལ། །ཡེ་ཤེས་རབ་རིབ་མེད་པ་དཔག་ཏུ་མེད་པ་ཐོབ། །ཏིང་འཛིན་ཐོབ་པའི་ཡོན་ཏན་འདི་དག་དཔག་ཏུ་མེད། །མི་གཙང་བས་ནི་འདོད་ཆགས་རྟག་ཏུ་ཚར་བཅད་དེ། །བྱམས་པ་ཡིས་ཀྱང་ཞེ་སྡང་ཁོར་མོར་མ་ལུས་བཅོམ། །ཤེས་རབ་ཀྱིས་ནི་གཏི་མུག་ཉོན་མོངས་དྲ་བ་བསལ། །ཏིང་འཛིན་ཐོབ་པ་འཇིག་རྟེན་ཀུན་ན་རབ་ཏུ་མཛེས། །དེ་ལ་ནམ་ཡང་གཉིད་ནི་གནོད་པ་མི་བསྐྱེད་དེ། །དེས་ནི་ཉེ་བའི་ཉོན་མོངས་རྣམ་མང་རྣམ་པར་བཤིག །དེ་ནི་གོས་པ་མེད་ཅིང་ཤིན་ཏུ་བྲལ་བར་འགྱུར། །ཏིང་འཛིན་ཐོབ་པའི་ཡོན་ཏན་འདི་དག་དཔག་ཏུ་མེད། །བྱང་ཆུབ་སེམས་དཔའ་གང་དག་ཏིང་འཛིན་འདི་འཛིན་པ། །དེ་ལ་ནམ་ཡང་
ཆགས་པ་གནོད་པར་མི་འགྱུར་ཏེ། །འདི་ལྟར་དེ་ནི་དུས་ཀུན་ཏུ་ཡང་གཏོང་ལ་དགའ། །བདོག་པ་ཐམས་ཅད་གཏོང་ཞིང་བདེ་བ་སྦྱིན་པར་འགྱུར། །བྱང་ཆུབ་སེམས་དཔའ་གང་དག་ཏིང་འཛིན་འདི་འཛིན་པ། །དེ་ནི་དཔེ་མེད་པ་ཡི་མཐུ་དང་ལྡན་པར་འགྱུར། །དེ་ནི་རྟག་པར་སྟོབས་དང་རྗེས་སུ་ལྡན་འགྱུར་ཏེ། །འཇིག་རྟེན་ན་ནི་དེ་དང་མཉམ་པ་སུ་ཡང་མེད། །ནམ་ཚེ་འཇིག་རྟེན་དུ་ཡང་འཁོར་ལོས་སྒྱུར་བ་ཡིན། །མི་ཡི་རྒྱལ་པོར་དེ་འགྱུར་འཛམ་བུའི་གླིང་དུ་འོངས། །དེ་ཚེ་སྐྱེ་བོ་མང་པོས་ཤིན་ཏུ་མཆོད་པར་འགྱུར། །ཁྱད་པར་ཐོབ་པས་རབ་རིབ་མེད་ཅིང་ཤེས་རབ་མཆོག །སུ་དག་གཙོ་བོར་གྱུར་ཅིང་རིགས་ཆེ་རིན་ཆེན་མཆོག །ལོངས་སྤྱོད་ཆེ་ཞིང་གཡོག་བྲན་མང་ལ་དབང་ཡང་ཆེ། །གང་ལ་རྟ་དང་བལ་གླང་ཤིང་རྟ་བཞོན་མཆོག་ཡོད། །གསེར་དང་ནོར་བུ་རིན་ཆེན་འགྲོན་བུ་རབ་ཏུ་མང་། །སངས་རྒྱས་ཡེ་ཤེས་དམ་པ་འདི་ལ་སུ་དད་པ། །དེ་དག་འཛམ་གླིང་རིན་ཆེན་རིགས་ཞེས་བྱ་བ་ཡིན། །དེ་ནི་རིན་ཆེན་རིགས་མཆོག་དེ་རུ་སྐྱེས་ནས་ཀྱང་། །གཉེན་བཤེས་ཤིན་ཏུ་མང་པོའི་ཚོགས་ཀྱི་དོན་ཀྱང་བྱེད། །འཛམ་བུའི་གླིང་འདི་དག་ན་མ་དད་གང་ཡོད་པ། །དེ་དག་བག་ཡོད་པས་ནི་དད་པ་སྐྱེད་པར་བྱེད། །སེམས་ཅན་ཚོགས་རྣམས་བྱང་ཆུབ་སེམས་ལ་གང་བཀོད་པ། །དེ་དག་སངས་རྒྱས་རང་བྱུང་རྒྱལ་བ་མཆོག་ཏུ་འགྱུར། །དེ་དག་མཚུངས་པ་མེད་པའི་བྱང་ཆུབ་མཆོག་ཐོབ་ནས། །སངས་རྒྱས་ཞིང་དུ་མཚུངས་མེད་འཁོར་ལོ་རབ་ཏུ་བསྐོར། །དེ་ཚེ་ཆོས་ཀྱི་འཁོར་ལོ་འདི་ནི་སུས་ཤེས་པ། །དེ་དག་མ་ལུས་མི་སྐྱེའི་ཆོས་ལ་གནས་པར་འགྱུར། །བྱང་ཆུབ་སེམས་དཔའ་དེ་དག་ཤིན་ཏུ་མང་བྱེད་དེ། །དེ་དག་རྟག་ཏུ་སེམས་ཅན་རྣམས་ཀྱིས་མཆོད་པར་འགྱུར། །དེ་དག་དུས་ཀུན་དུ་ཡང་མཚུངས་མེད་དོན་བྱེད་དེ། །དེ་དག་སེམས་ཅན་མིག་ནི་རབ་རིབ་མེད་པར་བྱེད། །བྱང་ཆུབ་སེམས་དཔའ་གང་དག་རབ་དགའ་བྱམས་པའི་སེམས། །གོས་པ་མེད་པ་དེ་དག་དེ་ཚེ་སངས་རྒྱས་འགྱུར། །དེ་ཚེ་བྱང་ཆུབ་སེམས་དཔའ་དེ་དག་གར་གནས་པ། །སེམས་ཅན་དག་གི་དོན་ཀྱང་ཚད་མེད་བྱེད་པར་འགྱུར། །ཚངས་སྤྱོད་མཚུངས་མེད་ཚུལ་ཁྲིམས་རྣམ་དག་རབ་ཏུ་བསྲུང་། །བསྐལ་པ་མཐའ་
ཡས་མང་པོར་ཏིང་འཛིན་སྒོམ་པར་བྱེད། །རྟག་ཏུ་བསམ་གཏན་རྣམ་པར་ཐར་ལ་ཤིན་ཏུ་ངེས། །དེ་ཚེ་བྱང་ཆུབ་སེམས་དཔའ་དེ་དག་སངས་རྒྱས་སྲས། །དེ་དག་རྫུ་འཕྲུལ་རྐང་པ་རྟག་ཏུ་སྙེན་བྱེད་ཅིང་། །ཞིང་རྣམས་མཐའ་ཡས་རྣམ་པ་མང་པོར་དེ་སོང་ནས། །བདེ་བར་གཤེགས་པས་རབ་ཏུ་བཤད་པའི་ཆོས་ཉན་ཏེ། །གཟུངས་ལ་རབ་ཏུ་གནས་པས་ཐམས་ཅད་འཛིན་པར་བྱེད། །བྱང་ཆུབ་སེམས་དཔའ་གང་དག་གཟུངས་ལ་གནས་པ་ནི། །མདོ་སྡེ་དཔག་ཏུ་མེད་པ་མཐའ་ཡས་རབ་ཏུ་སྟོན། །བྱང་ཆུབ་སེམས་དཔའ་གང་དག་གཟུངས་ལ་གནས་པ་ནི། །སེམས་ཅན་དག་གི་དོན་ཀྱང་དཔག་ཏུ་མེད་པ་བྱེད། །སེམས་ཅན་འཆི་འཕོ་སྐྱེ་བ་དང་། །འགྲོ་བ་དང་ནི་འོང་བ་ཤེས། །དེས་ནི་ཅི་འདྲའི་ལས་བྱས་པ། །རྣམ་པར་སྨིན་པ་དེ་འདྲར་འགྱུར། །ལས་རྣམས་འཕོ་བར་འགྱུར་བ་ཡང་། །རྡུལ་ཙམ་ཡང་ནི་མི་རྙེད་དོ། །བྱང་ཆུབ་སེམས་དཔའ་གྲགས་ཆེན་ནི། །དེ་དག་གི་ཡང་དེ་ཤེས་སོ། །སྟོང་པ་བདག་ཉིད་ཆེན་པོ་ཡི། །གནས་པ་དག་གི་དམ་པ་ཡིན། །སེམས་ཅན་བྱེ་བ་བསམ་ཡས་ཀྱང་། །ཐེག་པ་ཆེ་ལ་རབ་ཏུ་འགོད། །དེ་ལ་སྟོན་པར་བྱེད་པ་ན། །སེམས་ཅན་འདུ་ཤེས་མི་འཇུག་སྟེ། །ཆོས་རྣམས་འཇུག་པ་མེད་པར་ནི། །བྱང་ཆུབ་སེམས་དཔའ་རབ་ཏུ་སྟོན། །ཆོས་རྣམས་རབ་ཏུ་སྟོན་པ་ན། །དམིགས་པ་དག་ནི་མི་འབྱུང་སྟེ། །ཡེ་ཤེས་བརྟན་ལ་རབ་གནས་ཤིང་། །སྟོང་པ་ཉིད་ལ་གནས་པར་འགྱུར། །སྟོན་པ་ཀུན་གྱི་གནས་པ་ཡི། །ཏིང་འཛིན་འདི་ནི་བསྟན་བྱས་ནས། །བུད་མེད་འདུ་ཤེས་རང་བཞིན་གྱིས། །དེ་ལ་འདུ་ཤེས་མི་འབྱུང་ངོ་། །བུད་མེད་འདུ་ཤེས་རྣམ་བཤིག་ནས། །བྱང་ཆུབ་སྙིང་པོར་འདུག་པར་འགྱུར། །བྱང་ཆུབ་སྙིང་པོར་འདུག་ནས་ནི། །བདུད་ཀྱི་འདུ་ཤེས་རྣམ་པར་ལྡོག །མཁས་པ་དེས་ནི་བདུད་རྣམས་དང་། །བདུད་ཀྱི་སྡེ་ཡང་མི་མཐོང་སྟེ། །བདུད་ཀྱི་བུ་མོ་གསུམ་པོ་ཡང་། །དེས་ནི་མཐོང་བར་མི་འགྱུར་རོ། །བྱང་ཆུབ་སྙིང་པོར་འདུག་ནས་ནི། །འདུ་ཤེས་ཐམས་ཅད་རབ་ཏུ་སྤོང་། །འདུ་ཤེས་ཐམས་ཅད་རབ་སྤངས་ནས། །ས་འདི་ཐམས་ཅད་གཡོས་པར་གྱུར། །
རི་རབ་རྒྱ་མཚོར་བཅས་པ་དག །ཕྱོགས་བཅུ་ན་ཡང་ཅི་ཡོད་གཡོས། །ཕྱོགས་བཅུ་དག་ན་སེམས་ཅན་རྣམས། །ཀུན་གྱིས་དེ་ནི་མི་ཤེས་སོ། །ས་དག་རབ་ཏུ་གཡོས་པ་འདི། །བྱང་ཆུབ་སེམས་དཔའི་རྫུ་འཕྲུལ་ཡིན། །བྱང་ཆུབ་དམ་པ་འཚང་རྒྱ་བ། །དེ་ཚེ་ས་ཡང་ལན་དྲུག་གཡོས། །འདུས་བྱས་ཆོས་ནི་ཇི་སྙེད་དང་། །ཆོས་གང་འདུས་མ་བྱས་པ་ཡང་། །ཆོས་དེ་ཐམས་ཅད་རབ་རྟོགས་ཏེ། །ཆོས་ཀྱི་སྒྲར་ནི་བསྟན་པ་ཡིན། །འདི་ལ་རྟོགས་བྱེད་གང་ཡང་མེད། །སེང་གེའི་སྒྲ་ནི་འབྱུང་མོད་ཀྱི། །འབྱུང་བ་དག་ཀྱང་རྣམ་རིག་ནས། །འོད་བྱེད་སངས་རྒྱས་ཉིད་དུ་འགྱུར། །རྟེན་ཅིང་ཆོས་རྣམས་འབྱུང་བར་འགྱུར། །རྟེན་ཅིང་ཆོས་རྣམས་རབ་ཏུ་སྐྱེ། །ཆོས་རྣམས་ཀྱི་ནི་རྟེན་པ་ཡང་། །མཁས་པ་དེ་དག་ཐམས་ཅད་ཤེས། །ཆོས་ཀུན་གྱི་ནི་ཆོ་ག་ཤེས། །སྟོང་ཉིད་རྟོགས་པར་ཁོང་དུ་ཆུད། །དེ་དག་འགྲོ་བ་རབ་ཤེས་ཏེ། །ཆོས་ཀུན་རྟོགས་པར་ཁོང་དུ་ཆུད། །དེ་ཡི་འགྲོ་བ་བཙལ་ན་ཡང་། །བྱང་ཆུབ་སེམས་དཔས་མི་རྙེད་དེ། །འདི་ལྟར་སངས་རྒྱས་ཐམས་ཅད་ཀྱི། །འགྲོ་བ་བསམ་ཡས་དེ་ཡིས་རིག །འགྲོ་བ་ཐམས་ཅད་ཤེས་པ་གང་། །དེ་ནི་འགྲོ་བ་དེར་འགྲོ་སྟེ། །དམ་ཆོས་མཚན་ཉིད་རིག་པས་ན། །ངན་སོང་ཐམས་ཅད་ཆད་པ་ཡིན། །དམ་ཆོས་མཚན་ཉིད་རིག་ནས་ནི། །ཞིང་རྣམས་ཐམས་ཅད་རྣམ་པར་ལྟ། །ཞིང་ཀུན་ལ་ཡང་རྣམ་བལྟས་ནས། །བྱང་ཆུབ་སྙིང་པོར་འདུག་པར་འགྱུར། །བྱང་ཆུབ་སྙིང་པོར་འདུག་ནས་སུ། །སེང་གེ་ཡི་ནི་སྒྲ་སྒྲོག་སྟེ། །དེ་བཞིན་ཞིང་རྣམས་བྱེ་བ་སྙེད། །བསམ་ཡས་དཔག་མེད་གྲགས་པར་བྱེད། །ཞིང་དེ་རྣམས་ཀྱང་གཡོ་བྱེད་ཅིང་། །སངས་རྒྱས་དཔའ་བོ་གྲགས་ཆེན་དག །སེམས་ཅན་ཇི་ལྟར་འདུལ་བ་བཞིན། །སེམས་ཅན་ཁ་ལོ་སྒྱུར་ཞིང་འདུལ། །བྱང་ཆུབ་དམ་པ་རེག་ནས་ནི། །བྱང་ཆུབ་སྙིང་པོ་དེ་ལས་ལངས། །དཔག་མེད་བསམ་གྱིས་མི་ཁྱབ་པ། །སེམས་ཅན་འདུལ་བའང་རྣམ་པར་འདུལ། །དེ་ནས་རྫོགས་པའི་སངས་རྒྱས་ནི། །སངས་རྒྱས་སྤྲུལ་པ་མཐའ་ཡས་སྤྲུལ། །ཞིང་རྣམས་བྱེ་བ་སྟོང་དུ་ཡང་། །སངས་རྒྱས་སྤྲུལ་པ་འགྲོ་བར་འགྱུར། །སེམས་ཅན་བྱེ་བ་བསམ་ཡས་རྣམས། །བྱང་ཆུབ་
མཆོག་ལ་རབ་ཏུ་འགོད། །སྲོག་ཆགས་ཀུན་ལ་ཕན་པའི་ཕྱིར། །ཆོས་ཀྱི་མཆོག་ཀྱང་སྟོན་པར་བྱེད། །ཡེ་ཤེས་ཆེན་པོ་དེ་འདྲ་སྟེ། །སངས་རྒྱས་ཡེ་ཤེས་བསམ་མི་ཁྱབ། །དེ་ཕྱིར་འདུན་པ་རབ་སྐྱེད་ཅིག །བྱང་ཆུབ་འདུན་པ་བླ་ན་མེད། །སངས་རྒྱས་དང་ནི་ཆོས་རྣམས་དང་། །འདུས་པའི་དམ་པ་དགེ་འདུན་ལ། །བྱང་ཆུབ་སེམས་དཔའ་དཔའ་བོ་རྣམས། །བྱང་ཆུབ་མཆོག་ཚོལ་གུས་པ་སྐྱེད། །ཞུམ་པ་མེད་པའི་སེམས་ཀྱིས་ཀྱང་། །གཡེལ་བ་མེད་པར་རི་མོ་གྱིས། །དེ་ནས་འོད་བྱེད་སངས་རྒྱས་སུ། །རིང་པོར་མི་ཐོགས་འགྲོ་བར་འགྱུར། །བྱང་ཆུབ་སེམས་དཔའ་གང་དག་ཀྱང་། །ཞིང་རྣམས་སྟོང་ནས་ལྷགས་པ་རྣམས། །འཇིག་རྟེན་སྒྲོན་མ་རབ་མཐོང་སྟེ། །ཆོས་ཀྱིས་མཆོག་ཀྱང་འཆད་པར་མཛད། །དཔའ་བོ་ཆེན་པོ་འདྲེན་པ་ལ། །རིན་ཆེན་ཆེན་པོས་འཐོར་བར་བྱེད། །མན་དཱ་ར་བའི་མེ་ཏོག་དག །བྱང་ཆུབ་ཕྱིར་ནི་འཐོར་བར་བྱེད། །བླ་ན་མེད་པའི་སངས་རྒྱས་ཞིང་། །ཞིང་འདི་རབ་ཏུ་བརྒྱན་པར་བྱེད། །ཕྱོགས་དང་ཕྱོགས་ནི་ཀུན་ཏུ་ཡང་། །རིན་པོ་ཆེ་ཡི་དྲ་བས་གཡོགས། །བ་དན་དག་ཀྱང་གདགས་བྱས་ཤིང་། །རྒྱལ་མཚན་བྱེ་བ་མངོན་པར་བསྒྲེང་། །དུ་མ་ཡི་ནི་རྒྱན་རྣམས་ཀྱིས། །ཞིང་འདི་ཤིན་ཏུ་ལེགས་པར་བརྒྱན། །ཁང་པ་བརྩེགས་པ་བྱེད་པར་འགྱུར། །རིན་ཆེན་ཀུན་གྱིས་རྣམ་པར་སྤྲས། །ཁང་པ་པུ་ཤུ་སྟེགས་བུ་དག །ཡིད་དུ་འོང་བ་གྲངས་མེད་རྣམས། །གཞལ་མེད་ཁང་དང་ཟླ་གམ་དང་། །སྐར་ཁུང་དེ་བཞིན་བྱ་རྒྱ་བྲེས། །རིན་ཆེན་སྣ་ཚོགས་བརྒྱན་པ་ཡི། །བདུག་པའི་སྣོད་དུ་བདུག་པ་བདུགས། །བདུག་པ་དག་ནི་བདུགས་པ་ཡིས། །སངས་རྒྱས་ཞིང་འདི་རབ་ཏུ་གང་། །དེ་ཡི་དྲི་ནི་ཡིད་འོང་བ། །ཞིང་ཡང་བྱེ་བ་སྟོང་དུ་ལྡང་། །དེ་དག་ཀུན་ཏུ་ཁྱབ་བྱས་ནས། །སྤོས་ཀྱི་ཆར་ཡང་རབ་ཏུ་འབེབས། །གང་གིས་དྲི་དེ་བསྣམས་པ་ཡང་། །དེ་དག་སངས་རྒྱས་འདྲེན་པར་འགྱུར། །དེ་དག་འདོད་ཆགས་ཟུག་རྔུ་སྤངས། །ཞེ་སྡང་སྲེད་པ་ཡོང་མེད་དེ། །རྒྱ་མོ་ཆེན་པོ་རྣམ་པར་དྲལ། །མུན་པ་ཀུན་ཀྱང་མེད་པར་འགྱུར། །དེར་ནི་རྫུ་འཕྲུལ་ཐོབ་གྱུར་ཏེ། །དབང་སྟོབས་བྱང་ཆུབ་ཡན་
ལག་དང་། །བསམ་གཏན་ཐར་པ་རྣམ་པར་རེག །དེ་དག་སྦྱིན་པར་འོས་པར་འགྱུར། །སྟན་ཡང་ཡིད་དུ་འོང་བ་རྣམས། །བྱེ་བ་ཕྲག་ལྔ་རབ་བཤམས་ཏེ། །རིན་ཆེན་དྲ་བས་བརྒྱན་པ་ཡི། །གོས་རྣམས་བྱེ་བ་རབ་ཏུ་བཏིང་། །དེ་ལ་དཔའ་བོ་གྲགས་པ་ཆེ། །བྱང་ཆུབ་སེམས་དཔའ་དེ་དག་འདུག །མཚན་དང་དེ་བཞིན་དཔེ་བྱད་ཀྱིས། །དེ་དག་ཤིན་ཏུ་རྣམ་པར་འབར། །སངས་རྒྱས་ཞིང་འདི་ཐམས་ཅད་ཀྱང་། །རིན་ཆེན་ཤིང་གིས་ལེགས་བརྒྱན་ཏེ། །ཡན་ལག་བརྒྱད་ལྡན་ཆུས་གང་བ། །རྫིང་བུ་དག་ནི་རྣམ་པར་སྤྲུལ། །རྫིང་བུའི་འགྲམ་ན་གནས་པ་རྣམས། །དེ་དག་དེ་ལས་ཆུ་འཐུངས་ནས། །ཐམས་ཅད་སྲེད་པ་བསལ་ནས་ནི། །འཇིག་རྟེན་གྱི་ཡང་མཆོད་རྟེན་འགྱུར། །ཐ་དད་པ་ཡི་ཞིང་ནས་ཀྱང་། །བྱང་ཆུབ་སེམས་དཔའ་ལྷགས་པ་རྣམས། །ཤཱཀྱ་སེང་གེ་སྐྱོབ་པ་ཡི། །སངས་རྒྱས་བསྔགས་པ་རྗོད་པར་བྱེད། །སྒྲ་དེ་སུ་དག་ཐོས་པ་ནི། །དེ་དག་འཇིག་རྟེན་འདྲེན་པར་འགྱུར། །ཕན་ཡོན་བསམ་གྱིས་མི་ཁྱབ་པ། །མདོ་སྡེ་འདི་ནི་ངས་རབ་བཤད། །པད་མ་བྱེ་བ་བསམ་མི་ཁྱབ། །འདབ་མ་དག་ནི་གསེར་ལས་བྱས། །སྙིང་པོ་སྦྲུལ་གྱི་སྙིང་པོ་སྟེ། །དེར་ནི་དེ་དག་རབ་ཏུ་སྤྲུལ། །ཡལ་ག་དག་ཀྱང་བཻ་དཱུཪྱ། །ཁོག་པ་དག་ནི་ཤེལ་ཡིན་ཏེ། །ཟེ་བ་དཔལ་གྱི་སྙིང་པོ་ཅན། །དེར་ནི་མཛེས་པ་རྣམས་ཀྱང་སྤྲུལ། །དེ་དག་དྲི་ཡང་བསམ་མི་ཁྱབ། །རྒྱུན་མི་འཆད་པར་འབྱུང་བ་ཡིས། །ཞིང་རྣམས་བྱེ་བ་ཀུན་ཏུ་གང་། །པད་མོའི་དྲི་ནི་བསམ་མི་ཁྱབ། །ཡིད་དུ་འོང་བར་འབྱུང་བ་ཡི། །དྲི་དེ་སུ་ཡིས་བསྣམས་པ་ཡང་། །དེ་དག་རབ་ཏུ་སེམས་དགའ་ཞིང་། །ནད་རྣམས་ཐམས་ཅད་ཞི་བར་འགྱུར། །འདོད་ཆགས་ཞེ་སྡང་གཏི་མུག་རྣམས། །མ་ལུས་པར་ནི་ཟད་འགྱུར་ཏེ། །དེ་དག་ཉེས་པ་གསུམ་ཟད་ནས། །སངས་རྒྱས་བདེ་བ་སྦྱིན་པར་འགྱུར། །དེ་དག་ལས་ནི་སྒྲ་འབྱུང་སྟེ། །སངས་རྒྱས་སྒྲ་ནི་བསམ་མི་ཁྱབ། །དམ་པའི་ཆོས་དང་དགེ་འདུན་སྒྲ། །རྣམ་པ་ཀུན་ནི་འབྱུང་བར་འགྱུར། །སྟོང་པ་ཉིད་དང་མཚན་མེད་དང་། །སྨོན་པ་མེད་པའི་སྒྲ་འབྱུང་སྟེ། །དེ་ཐོས་སེམས་ཅན་བྱེ་བ་མང་། །ཕྱིར་མི་ལྡོག་པར་རབ་ཏུ་
འགྱུར། །སྒྲ་དེ་དག་ནི་བྱུང་བ་ཡང་། །ཞིང་རྣམས་བྱེ་བར་འགྲོ་བར་འགྱུར། །སེམས་ཅན་བྱེ་བ་བསམ་ཡས་རྣམས། །སངས་རྒྱས་ཡེ་ཤེས་འགོད་པར་བྱེད། །རྨ་བྱ་ཀ་ལ་པིང་ཀ་དང་། །ཤང་ཤང་ཏེའུ་དང་བྱ་རྣམས་ཀྱང་། །དེ་དག་རབ་ཏུ་སྒྲ་འབྱིན་པ། །སངས་རྒྱས་སྒྲ་ནི་བླ་ན་མེད། །ཀུ་ནལ་རི་སྐེགས་ཁྲུང་ཁྲུང་དང་། །ཁུ་བྱུག་དང་ནི་བྱ་རྣམས་ཏེ། །དེ་དག་སྒྲ་ནི་འབྱིན་པ་ཡང་། །བསམ་གྱིས་མི་ཁྱབ་ཆོས་སྒྲ་འབྱིན། །ནེ་ཙོ་ངང་པ་ཀ་རན་ད། །ངུར་པ་དང་ནི་ས་ར་ས། །དེ་དག་སྒྲ་རྣམས་འབྱིན་པ་ནི། །བླ་མེད་དགེ་འདུན་སྒྲ་ཡང་འབྱིན། །ལྷ་དག་གི་དང་མི་ཡི་ནི། །བྱ་རྣམས་ཇི་སྙེད་གང་ཡོད་པ། །དཀོན་མཆོག་གསུམ་གྱི་བསྔགས་པ་རྣམས། །དེ་དག་ཀུན་ཏུ་སྒྲ་ཡང་འབྱིན། །རིན་པོ་ཆེ་ཡི་ཤིང་རྣམས་ནི། །བྱེ་བྲག་འཕགས་ཤིང་བལྟ་ན་སྡུག །ཡིད་འོང་ནོར་བུའི་ཤིང་རྣམས་ཀྱང་། །ཞིང་འདི་ཉིད་དུ་རྣམ་པར་སྤྲུལ། །ཤིང་འདི་ཀུན་ལ་རྒྱན་རྣམས་ཀྱི། །ཆུན་པོ་ཐམས་ཅད་རབ་ཏུ་འཕྱང་། །སངས་རྒྱས་དག་གི་མཐུ་ཡིས་ནི། །ཞིང་འདི་ཉིད་དུ་མངོན་པར་སྤྲུལ། །ཞིང་འདི་ན་ནི་མི་སྣང་བ། །དེ་ལྟ་བུ་ཡི་བཀོད་པ་ནི། །ཞིང་ཀུན་ན་ཡང་ཡོང་མེད་དེ། །དེ་ཚེ་ཤིན་ཏུ་བྱེ་བྲག་འཕགས། །གོང་མ་བཞིན་དུ་འདི་དག་རྣམས། །ཤཱཀྱ་སེང་གེ་སྐྱོབ་པས་བཤད། །བྱང་ཆུབ་སེམས་དཔའ་གྲགས་ཆེན་རྣམས། །ཡེ་ཤེས་དེ་ལ་ནེམ་ནུར་མེད། །གང་གི་མཐའ་འདི་རྟོགས་པ་ནི། །དེ་དག་འཇུག་པ་བསམ་ཡས་ཏེ། །ཡེ་ཤེས་ཀྱིས་ནི་རྣམ་པར་འཕེལ། །འབབ་ཆུ་དག་གིས་རྒྱ་མཚོ་བཞིན། །དེ་དག་ལ་ཡང་མཐའ་མི་རྙེད། །རྒྱ་མཚོ་དག་ནི་འཐུང་བ་བཞིན། །བྱང་ཆུབ་སེམས་དཔའ་རྣམས་ཀྱི་ཚུལ། །བསམ་གྱིས་མི་ཁྱབ་འདི་དག་བཤད། །དཔའ་བོ་མཐའ་འདིར་གནས་པ་ཡི། །བྱང་ཆུབ་སེམས་དཔའ་གྲགས་ལྡན་རྣམས། །དབྱངས་ཀྱི་ཡན་ལག་རྣམ་འབྱིན་པ། །གང་གཱ་ཡི་ནི་བྱེ་མ་སྙེད། །དེ་བས་དབྱངས་ཀྱང་བསམ་ཡས་ཏེ། །བྱང་ཆུབ་སེམས་དཔའ་རློམ་སེམས་མེད། །རློམ་སེམས་རབ་ཏུ་སྤངས་པ་ན། །བྱང་ཆུབ་ཏུ་ཡང་ཉེ་བར་འགྱུར། །དེ་དག་སྲོག་གི་ཕྱིར་ཡང་ནི། །ཚུལ་ཁྲིམས་འདྲལ་བར་མི་བྱེད་དེ། །བྱང་ཆུབ་སེམས་དཔའ་དཀའ་ཐུབ་
བརྟན། །དེ་ནི་མི་འདྲལ་སྤྱོད་པར་བྱེད། །འདོད་པ་ཡི་ནི་འདུ་ཤེས་ཀྱིས། །དེ་ཀུན་ཕྱིར་ཡང་མི་འདྲལ་ཏེ། །འདུ་ཤེས་ཐམས་ཅད་སྤངས་པ་ལ། །ཏིང་འཛིན་དག་ནི་དཔག་ཏུ་མེད། །མཉམ་པར་བཞག་པས་དེ་སྤྱོད་དེ། །ཏིང་འཛིན་ལ་ཡང་ཆགས་པ་མེད། །ཆགས་པ་མེད་ཅིང་བག་ཡོད་པས། །དེ་ནི་འཇིག་རྟེན་ཆགས་མི་བྱེད། །འཇིག་རྟེན་ཁམས་ནི་འདས་ནས་ཀྱང་། །བདེ་བ་ཅན་དུ་དེ་འགྲོ་སྟེ། །དེར་སོང་ནས་ནི་དེ་ཡིས་ཀྱང་། །སངས་རྒྱས་འོད་དཔག་མེད་པ་མཐོང་། །བྱང་ཆུབ་སེམས་དཔའ་དཔའ་བོ་གང་། །མཚན་རྣམས་ཀྱིས་ནི་ལེགས་པར་བརྒྱན། །མངོན་ཤེས་ལྔ་ལྡན་ཤེས་རབ་ཆེ། །གཟུངས་རྣམས་སྤྱོད་ཡུལ་གྱུར་པ་དག །ཞིང་རྣམས་བྱེ་བར་རབ་འགྲོ་ཞིང་། །སངས་རྒྱས་ཞབས་ལ་ཕྱག་ཀྱང་འཚལ། །སངས་རྒྱས་ཞིང་ནི་བསམ་ཡས་སུ། །སྣང་བར་བྱེད་ཅིང་འགྲོ་བར་འགྱུར། །སྐྱོན་རྣམས་ཐམས་ཅད་རབ་སྤངས་ཤིང་། །ཉོན་མོངས་ཐམས་ཅད་རྣམ་པར་སྦྱངས། །ཉོན་མོངས་ཐམས་ཅད་རྒྱུན་བཅད་དེ། །རྒྱལ་བར་སྐྱེ་བ་གཅིག་གིས་གནས། །ཞིང་དེ་ནས་ནི་མི་རྣམས་ཀྱང་། །ངན་སོང་དུ་ཡང་མི་འགྲོ་སྟེ། །ཞིང་དེར་ངན་སོང་ཐམས་ཅད་ཀྱང་། །མ་ལུས་པར་ནི་ཆད་པར་འགྱུར། །སྐྱོབ་པ་འོད་ནི་དཔག་མེད་པ། །འཇིག་རྟེན་མགོན་པོས་བཤད་པ་སྟེ། །དེ་ལ་ནེམ་ནུར་མ་བྱེད་ཅིག །བདེ་བ་ཅན་དུ་འགྲོ་བར་འགྱུར། །མདོ་སྡེ་རིན་ཆེན་འདི་ཡི་བསྔགས་པ་རྣམས། །བུད་མེད་གང་ཐོས་སེམས་ཀྱང་དད་འགྱུར་བ། །སྐྱེས་བུ་མཁས་པ་མཆོག་ཏུ་མྱུར་འགྱུར་ཏེ། །རྫུ་འཕྲུལ་གྱིས་ནི་ཞིང་སྟོང་བྱེ་བར་འགྲོ། །མཆོད་པ་ཚད་མེད་རྣམ་མང་ཇི་སྙེད་པ། །ཞིང་ནི་བྱེ་བ་ཁྲག་ཁྲིག་གཏམས་སྙེད་དུ། །སྐྱེས་བུ་མཆོག་ལ་མཆོད་པ་དེ་བྱས་པས། །བྱམས་པའི་སེམས་ལ་གྲངས་དང་ཆར་མི་ཕོད། །ཚུལ་ཁྲིམས་ཏིང་འཛིན་རྟག་ཏུ་བསྙེན་བྱས་ཏེ། །བསམ་གཏན་རྣམ་ཐར་དེ་བཞིན་ཚད་མེད་དང་། །སྟོང་པ་མཚན་མེད་རྟག་ཏུ་བསྙེན་བྱས་ན། །རིང་པོར་མི་ཐོགས་འཇིག་རྟེན་བདེ་གཤེགས་འགྱུར། །བྱང་ཆུབ་སེམས་དཔའ་ཚུལ་ཁྲིམས་ཚོགས་གནས་པ། །དེས་ནི་ང་ལ་མཆོད་པ་རབ་མཆོག་བྱས། །ཟད་དུས་ཐ་མར་བྱང་ཆུབ་སེམས་གནས་པ། །དེས་ནི་སངས་རྒྱས་
ཐམས་ཅད་རྟག་ཏུ་མཆོད། །ཟད་དུས་མི་བཟད་པ་ལ་བྱང་ཆུབ་སེམས་དཔའ་གང་། །བདེ་བར་གཤེགས་པས་བསྟན་པའི་ཆོས་མཆོག་འདི་སྲུང་བ། །དེ་དག་ང་ཡི་སྲས་ཏེ་ཕྱི་དུས་ཆོས་སྐྱོང་བ། །དེ་དག་སངས་རྒྱས་བྱེ་བ་སྟོང་གིས་ཡོངས་སུ་གཏད། །མདོ་སྡེ་འཛིན་པའི་ཕན་ཡོན་གྱི་ལེའུ་སྟེ་སུམ་ཅུ་རྩ་གསུམ་པའོ།། །།