སུམ་ཅུ་རྩ་བདུན་པ། ཚུལ་ཁྲིམས་ཀྱི་ཕུང་པོ་ངེས་པར་བསྟན་པའི་ལེའུ།
དེ་ནས་བཅོམ་ལྡན་འདས་ཀྱིས་ཟླ་འོད་གཞོན་ནུར་གྱུར་པ་ལ་བཀའ་སྩལ་པ། གཞོན་ནུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཅི་ནས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བདེ་བར་མངོན་པར་རྫོགས་པར་འཚང་རྒྱ་བར་འདོད་ན། གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་དེས་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོས་པའི་ཏིང་ངེ་འཛིན་འདི་མཉན་པར་བྱ། གཟུང་བར་བྱ། ཀུན་ཆུབ་པར་བྱ། བཅང་བར་བྱ། བཀླག་པར་བྱ། རབ་ཏུ་གདོན་པར་བྱ། ལུང་མནོད་ཅིང་ཁ་ཏོན་དུ་བྱ། ཉོན་མོངས་པ་མེད་པའི་བསྒོམ་པས་མང་དུ་བསྒོམ་པར་བྱ། གཞན་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་པར་བྱའོ། །ཚུལ་ཁྲིམས་ཀྱི་ཕུང་པོ་ལ་ཡང་རབ་ཏུ་གནས་པར་བྱའོ། །དེ་ནས་ཡང་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །བྱང་ཆུབ་སེམས་དཔའ་ཚུལ་ཁྲིམས་ཚོགས་གནས་ཤིང་། །བདག་ལ་ཕན་སེམས་སྤྱད་པ་གང་སྤྱོད་པ། །མངོན་དགའི་སངས་རྒྱས་ཞིང་དུ་མྱུར་སོང་ནས། །བཟོད་པ་དེས་ཐོབ་ཆོས་ཀྱི་རྒྱལ་པོར་འགྱུར། །དེ་ཕྱིར་གནོད་སེམས་མེད་ཅིང་ཀུན་འཐུན་གྱིས། །ཐམས་ཅད་རྟག་ཏུ་ཡིད་དུ་འོང་བར་བགྱིས། །དཔལ་སྟུག་སངས་རྒྱས་དཔག་མེད་མཐོང་ནས་ནི། །བྱང་ཆུབ་རེག་ནས་ཆོས་ཀྱི་བདག་པོར་འགྱུར། །དེ་ཕྱིར་ཕན་ཡོན་མཆོག་འདི་ཐོས་ནས་ནི། །དགེ་སློང་ཚུལ་ཁྲིམས་མཆོག་དང་ལྡན་མཐོང་ན། །མཁས་པས་གཡོ་མེད་རྟག་ཏུ་བསྟེན་པར་བྱ། །རིང་པོར་མི་ཐོགས་ཏིང་འཛིན་འདི་འཐོབ་འགྱུར། །གལ་ཏེ་གཏེར་རྣམས་དཔག་མེད་ཚད་ཀྱང་མེད། །རིན་ཆེན་སྣ་བདུན་ནོར་བུས་
གང་གྱུར་པ། །དེ་བཞིན་ཞིང་རྣམས་གང་གཱའི་བྱེ་མ་སྙེད། །ནོར་བུ་རིན་པོ་ཆེ་ཡིས་གང་བ་རྣམས། །བྱང་ཆུབ་སེམས་དཔའ་སྦྱིན་ལ་མོས་པ་ཡིས། །ཉིན་མཚན་རེ་རེར་སྦྱིན་པ་འདི་དག་བྱིན། །དེ་བཞིན་བསྐལ་པ་གང་གཱའི་བྱེ་མ་སྙེད། །རྒྱུན་མི་འཆད་པར་སྦྱིན་པ་བྱིན་པ་བས། །བྱང་ཆུབ་སེམས་དཔའ་གང་གིས་ཏིང་འཛིན་འདི། །ཐོས་ནས་བདེ་གཤེགས་མཛོད་མཆོག་འཛིན་བྱེད་པ། །བསོད་ནམས་ཕུང་པོ་དེས་ནི་གང་བཟུང་བ། །སྦྱིན་པ་དེ་ཀུན་དེ་ཡི་ཆར་མི་ཕོད། །མི་གང་རྗེས་སུ་འཐུན་ལ་དད་པ་དག །ཏིང་འཛིན་རྡུལ་བྲལ་མཆོག་འདི་འཛིན་པ་ནི། །བསོད་ནམས་ཕུང་པོ་དཔེ་མེད་མཆོག་འདི་ཡིན། །ཡེ་ཤེས་མཛོད་དེ་དཔག་མེད་འབྱུང་གནས་སོ། །ཏིང་འཛིན་རྡུལ་བྲལ་ཞི་བ་འདི་བཟུང་ན། །བྱང་ཆུབ་སེམས་དཔའ་དེ་ནི་ནོར་ཆེན་འགྱུར། །རྒྱ་མཚོ་ཆེན་པོ་བཞིན་དུ་ཐོས་པའི་གཏེར། །དེ་ལ་བསོད་ནམས་ཚད་ཡོད་ཡོང་མི་འགྱུར། །ཆོས་ཀྱི་མཆོག་རྣམས་བསམ་གྱིས་མི་ཁྱབ་པས། །ཤིན་ཏུ་རྒྱས་བྱས་བྱང་ཆུབ་སེམས་དཔར་བརྗོད། །ཏིང་འཛིན་འདི་ནི་སུ་དག་སྟོན་བྱེད་པ། །དེ་ནི་ནམ་ཡང་བྱང་ཆུབ་ཐེ་ཚོམ་མེད། །བསོད་ནམས་ཕུང་པོ་མཆོག་དང་གང་ལྡན་ཞིང་། །གང་ལ་ཚད་མེད་བསམ་གྱིས་མི་ཁྱབ་པ། །འཇིག་རྟེན་སློབ་དཔོན་སངས་རྒྱས་རྣམ་པར་འདྲེན། །རང་བྱུང་ཐུགས་རྗེ་ཆེན་པོ་མ་གཏོགས་པར། །དེ་ཡི་འོག་ཏུ་སེམས་ཅན་སུ་དག་ཀྱང་། །སྟོང་ཆེན་འདི་ནི་བསོད་ནམས་ཕུང་པོ་དང་། །མཚུངས་མེད་བསམ་གྱིས་མི་ཁྱབ་ཡེ་ཤེས་ཀྱིས། །མཉམ་པར་གྱུར་པ་ནམ་ཡང་ཡོང་མེད་དོ། །ཏིང་འཛིན་འདི་ནི་ཐོས་ནས་འཛིན་པ་དང་། །ཀློག་ཅིང་ཡོངས་སུ་ཆུབ་པར་བྱེད་པ་དང་། །མཚུངས་མེད་སངས་རྒྱས་བྱང་ཆུབ་ཚོལ་མ་གཏོགས། །དེ་ཡི་ཡེ་ཤེས་མཚུངས་པ་མེད་པར་འགྱུར། །ཏིང་འཛིན་འདི་ནི་བཟུང་ཞིང་བཀླགས་པ་ཡིས། །བསོད་ནམས་ཕུང་པོ་ཇི་སྙེད་བསགས་པ་ཡང་། །གཞོན་ནུ་ཇི་སྟེ་ཆོས་དེ་གཟུགས་ཡོད་ན། །འཇིག་རྟེན་ཁམས་མང་འདིར་ཡང་ཤོང་མི་འགྱུར། །གཞོན་ནུ་དེ་ཕྱིར་བྱང་ཆུབ་སེམས་དཔའ་གང་། །འདས་དང་འབྱུང་བའི་དེ་བཞིན་གཤེགས་པ་དང་། །སངས་རྒྱས་ཐམས་ཅད་མཆོད་པར་འདོད་པ་ཡིས། །ཏིང་འཛིན་
འདི་ནི་གཟུང་ཞིང་བཀླག་པར་གྱིས། །དེ་བཞིན་གཤེགས་པའི་བྱང་ཆུབ་འདི་ཡིན་ཏེ། །གཞོན་ནུ་ང་ཡི་ཚིག་ལ་དད་པར་གྱིས། །དེ་བཞིན་གཤེགས་པ་བརྫུན་གྱི་ཚིག་མི་གསུང་། །འདི་འདྲའི་སེམས་ཅན་བརྫུན་དུ་སྨྲ་བ་མེད། །སྔོན་གྱི་བསྐལ་པ་བརྒྱ་ཕྲག་བསམ་ཡས་སུ། །བྱང་ཆུབ་སྤྱད་པ་མཆོག་འདི་རབ་སྤྱོད་ཅིང་། །ཏིང་འཛིན་འདི་ནི་ཡོངས་སུ་ཚོལ་བའི་ཕྱིར། །ངས་ནི་བདག་ཏུ་ལྟ་བ་འདིར་སྦྱངས་སོ། །དེ་ཕྱིར་ཆོས་ཀྱི་མཛོད་འདི་མཉན་པར་གྱིས། །འདི་ལས་མདོ་སྡེ་བྱེ་བ་ཁྲག་ཁྲིག་འབྱུང་། །འདི་ནི་བསོད་ནམས་ཕུང་པོ་བསམ་ཡས་ཡངས། །འདིས་ནི་སངས་རྒྱས་ཡེ་ཤེས་མྱུར་དུ་འཐོབ། །མཁས་པ་འཇིགས་མེད་དེ་དག་གང་སྟོན་པ། །འདི་ནི་མདོ་སྡེ་ཀུན་གྱི་དམ་པའི་མདོ། །དགེ་བ་བསམ་གྱིས་མི་ཁྱབ་འབྱུང་གནས་ཏེ། །ཆོས་དེ་རྣམས་ལ་མཐའ་ཐུག་རྙེད་མི་འགྱུར། །སྟོང་ཆེན་དག་ནི་བཅད་ཅིང་བཤིག་ནས་སུ། །རྡུལ་གྱི་ཚོགས་རྣམས་བགྲང་བར་ནུས་ན་ཡང་། །མདོ་སྡེ་བརྒྱ་ཕྲག་བསམ་ཡས་ཚད་མེད་པ། །རྒྱུན་མི་ཆད་པར་དེ་སྟོང་བགྲང་མི་ནུས། །སངས་རྒྱས་ཞིང་གི་སེམས་ཅན་ཐམས་ཅད་ཀྱི། །ཕྱི་ནང་རྒྱུ་བའི་དབུགས་ནི་བགྲང་ནུས་ཀྱང་། །ཏིང་འཛིན་འདི་ལ་གནས་ནས་གང་སྟོན་པ། །མདོ་སྡེ་དེ་དག་མཐར་ཐུག་ནུས་མི་འགྱུར། །སངས་རྒྱས་ཞིང་ནི་གང་གཱའི་བྱེ་མ་སྙེད། །འགྲོ་བ་དེར་ཡང་སེམས་ཅན་གང་སྐྱེས་པ། །དེ་དག་སེམས་ནི་བགྲང་བར་ནུས་ཀྱང་སྲིད། །རྟག་སྟོན་མདོ་སྡེ་དེ་དག་བགྲང་མི་ནུས། །རྒྱ་མཚོ་ཆེན་པོའི་བྱེ་མ་ཅི་ཡོད་དང་། །ཀླུང་དང་མཚེའུ་དང་གཤོང་གི་བྱེ་མ་དག །བསྐལ་པ་བྱེ་བ་དག་གིས་བགྲང་ནུས་ཀྱང་། །དེ་དག་འཆད་པའི་མདོ་སྡེ་མཐའ་ཡས་སོ། །སངས་རྒྱས་ཞིང་ནི་བྱེ་བ་མང་པོ་ན། །ཆུ་ཡི་ཕུང་པོ་རྟག་འདུག་ཅི་ཡོད་པ། །བརྒྱ་ཚལ་སྐྲ་ཡི་རྩེ་མོས་བགྲང་ནུས་ཀྱང་། །དེ་ཡི་དབྱངས་ཀྱི་ཡན་ལག་ཀུན་མི་འགྲངས། ། གང་སྔོན་འདིར་ནི་སེམས་ཅན་ཅི་འབྱུང་བ། །རང་གི་ལུས་ལ་སྙིང་པོར་འདོགས་པ་རྣམས། །བསྐལ་པ་བྱེ་བ་མང་པོས་བགྲང་ནུས་ཀྱང་། །དེ་དག་མདོ་སྡེ་སྒྲུབ་པ་ཤེས་མི་ནུས། །ཕྱོགས་བཅུ་དག་ན་སེམས་ཅན་ཅི་ཡོད་པ། །སྲོག་ཆགས་ཀུན་གྱི་སྒྲ་སྐད་བགྲང་ནུས་ཀྱང་། །དེ་དག་རྟག་ཏུ་མི་
འཆད་སྟོན་པ་ཡི། །མདོ་སྡེ་དེ་དག་བགྲང་བར་ཡོང་མི་ནུས། །ཆོས་རྣམས་ཐམས་ཅད་བསྟན་པར་རབ་ཤེས་ཤིང་། །ངེས་པའི་ཚིག་དང་བསྟན་པ་ཚིག་དོན་མཁས། །གཏན་ལ་བབ་པའི་ཡང་དག་ཚུལ་ལ་བསླབས། །བློ་གྲོས་ཡངས་ཤིང་རྟག་དགའ་ཤེས་རབ་ཅན། །ཡངས་པའི་དོན་སེམས་རབ་ཏུ་ཕྱེ་བའི་བློ། །བསམ་དང་མི་བསམ་པ་ཡང་རྟག་ཏུ་ཤེས། །དབྱངས་ཀྱི་རང་བཞིན་རྒྱ་ཆེན་ཐམས་ཅད་རིག །སྒྲ་དབྱངས་དེ་དག་སྟོན་ཀྱང་ཆགས་མི་འགྱུར། །ཐོགས་མེད་དེ་ནི་ཆོས་སྨྲར་བརྗོད་པ་སྟེ། །འགྲོ་བ་ཀུན་ལ་སྟོན་ཀྱང་ཆགས་མི་འགྱུར། །དྲི་བ་ངེས་པར་བསྟན་པ་བརྒྱ་ལ་མཁས། །དེ་ལྟར་དེ་ཡིས་དོན་དམ་རབ་ཏུ་རྟོགས། །མདོ་སྡེ་གཅིག་གིས་ཕྱོགས་ཀྱང་བྱེ་བ་སྙེད། །བསམ་གྱིས་མི་ཁྱབ་དེས་སྟོན་ཆགས་པ་མེད། །ཆགས་མེད་སྟོན་པ་ཚིག་གི་དོན་ལ་མཁས། །འཁོར་གྱི་ནང་དུ་དེ་འཆད་ཆགས་མི་འགྱུར། །ཏིང་འཛིན་འདི་ལ་ལེགས་པར་གང་གནས་པ། །བྱང་ཆུབ་སེམས་དཔའ་དེ་ནི་གཡོ་བ་མེད། །ཆོས་ལ་སྟོབས་བསྐྱེད་བྱེ་བྲག་ཐོབ་པས་ནི། །སྲོག་ཆགས་བྱེ་བ་མང་པོའི་དོན་དེ་བྱེད། །ཇི་ལྟར་རི་རབ་མི་གཡོ་མི་འགུལ་ཏེ། །རླུང་རྣམས་ཀུན་གྱིས་འགུལ་བར་མི་ནུས་པ། །དེ་བཞིན་དགེ་སློང་ཆོས་སྨྲ་མཁས་པ་ཡང་། །ཕ་རོལ་རྒོལ་བ་ཀུན་གྱིས་བསྐྱོད་མི་ནུས། །སྟོང་ཆེན་གྱི་ནི་འཇིག་རྟེན་ཁམས་འདི་ན། །རི་གང་མི་གཡོ་བར་ནི་བརྗོད་པ་རྣམས། །དེ་དག་རླུང་གིས་རབ་ཏུ་བསྐྱོད་ནུས་ཀྱང་། །སྟོང་པའི་ཆོས་གནས་དགེ་སློང་བསྐྱོད་མི་ནུས། །སུ་དག་སྟོང་པ་ཉིད་ལ་རྟག་བརྩོན་པ། །སངས་རྒྱས་གནས་སུ་ངེས་པ་དེ་ཡིན་ཏེ། །གཏན་ལ་བབ་པ་སྟོང་པའི་ཆོས་རབ་ཤེས། །དེ་ནི་རྒོལ་བ་ཀུན་གྱིས་དཀྲུག་མི་ནུས། །ཕས་ཀྱི་རྒོལ་བ་དག་གིས་མི་བསྐྱོད་ཅིང་། །སྨྲ་བ་ཐམས་ཅད་ཀྱིས་ཀྱང་ཟིལ་མི་ནོན། །ཏིང་འཛིན་ཞི་བ་འདི་ནི་བསྟན་བྱས་ན། །ཟིལ་གྱིས་མི་ནོན་སྨད་པ་མེད་པར་འགྱུར། །ཏིང་འཛིན་ཞི་བ་འདི་ནི་བཤད་བྱས་ན། །དེ་ཡིས་སྟོང་ཉིད་རྟོགས་པར་ཁོང་དུ་ཆུད། །དེ་ནི་ཆོས་རྣམས་ཀུན་ལ་ནེམ་ནུར་མེད། །ཡེ་ཤེས་མཐའ་ཡས་དག་ལ་ཁོར་མོར་གནས། །ཏིང་འཛིན་འདི་ནི་བཟུང་ཞིང་བཀླགས་པ་ན། །སྟོབས་དང་བྱང་ཆུབ་ཡན་ལག་རྙེད་མི་དཀའ། །ཡང་དག་རིག་དང་རྫུ་འཕྲུལ་བསམ་མི་ཁྱབ། །དེ་ལ་མངོན་པར་ཤེས་པ་རྙེད་མི་དཀའ། །མཐའ་ཡས་ཡེ་ཤེས་རྒྱལ་བ་མཐོང་བ་ཡང་། །སྲིད་པར་གྲུབ་པ་དག་ནི་རྙེད་མི་དཀའ། །སངས་རྒྱས་བྱེ་བ་ཁྲག་ཁྲིག་བསམ་མི་ཁྱབ། །
ཏིང་འཛིན་འདི་འཆང་དེ་ཡིས་མཐོང་བར་འགྱུར། །དེ་ནི་རྒྱལ་བ་དེ་དག་ཐམས་ཅད་ལས། །ཏིང་འཛིན་ཞི་བ་འདི་ཡང་ཐོས་འགྱུར་ཏེ། །ཡང་དག་རིག་དང་དབང་གི་ཕ་རོལ་ཕྱིན། །སངས་རྒྱས་ཡེ་ཤེས་མཆོག་དང་ལྡན་པར་འགྱུར། །སྟོང་ཆེན་གྱི་ནི་འཇིག་རྟེན་ཁམས་འདི་དག །ལྷ་རྫས་ནོར་བུ་རིན་ཆེན་བཟང་མཆོག་གིས། །འོག་ནས་བཟུང་སྟེ་སྲིད་པའི་རྩེ་མོའི་བར། །ནོར་བུ་རིན་ཆེན་དག་གིས་གང་གྱུར་དང་། །ཞིང་ཡང་མཐའ་ཡས་རྣམ་མང་ཇི་སྙེད་པ། །འཛམ་བུའི་ཆུ་བོའི་གསེར་བཀྲམ་གང་བ་ཀུན། །ས་ཡི་འོག་ནས་སྲིད་པའི་རྩེ་མོའི་བར། །ཐམས་ཅད་རྒྱལ་བའི་མཆོག་ལ་སྦྱིན་པ་བྱིན། །སེམས་ཅན་རྣམ་པ་མང་པོ་ཇི་སྙེད་པ། །བསྐལ་པ་མཐའ་ཡས་མང་པོར་སྦྱིན་པ་བྱིན། །སངས་རྒྱས་རྣམས་ལ་ཁོར་མོར་མི་ཆད་བྱིན། །བྱང་ཆུབ་འདོད་ཕྱིར་བྱིན་པའི་སྦྱིན་ཚོགས་ལ། །དགེ་སློང་གང་དག་སྟོང་ཉིད་མངོན་དགའ་ཞིང་། །སྟོབས་བཅུ་ལ་ནི་ཐལ་སྦྱར་ཕྱག་འཚལ་ན། །བྱང་ཆུབ་སེམས་དཔའ་སྟོང་ཉིད་མངོན་དགའ་ལ། །སྦྱིན་པའི་ཕུང་པོ་སྔ་མས་ཆར་མི་འཕོད། །བསོད་ནམས་ལྡན་པའི་མི་དེས་དེ་རྙེད་ནས། །སངས་རྒྱས་བྱང་ཆུབ་མཚུངས་མེད་ཚོལ་བའི་ཕྱིར། །དད་པ་རྒྱ་ཆེར་བསྐྱེད་ནས་སྦྱིན་པ་བྱིན། །དེ་ཡི་དཔེ་འདི་སྐྱེས་བུ་དམ་པས་བསྟན། །སུ་དག་ཏིང་འཛིན་དམ་པའི་མཆོག་འདི་ལས། །ཚིག་བཞིའི་ཚིགས་བཅད་སེམས་དགའ་འཛིན་པ་ཡང་། །དེ་ཡི་བསོད་ནམས་ཕུང་པོ་བསགས་པ་ལ། །སྦྱིན་པ་དེ་ཀུན་བརྒྱ་ཡི་ཆར་མི་ཕོད། །ཏིང་འཛིན་རྡུལ་བྲལ་ཞི་བ་མ་ཐོས་པར། །ཕན་བྱེད་བྱང་ཆུབ་སེམས་དཔས་སྦྱིན་བྱིན་ཀྱང་། ། ཐོས་པས་སངས་རྒྱས་ཡེ་ཤེས་མྱུར་ཐོབ་ལྟར། །དེ་ཙམ་སངས་རྒྱས་ཡེ་ཤེས་མྱུར་མི་འཐོབ། །གང་གིས་ཞིང་མཆོག་ས་འདི་ཐོབ་ནས་སུ། །རྡུལ་བྲལ་ཏིང་འཛིན་སྟོང་པའི་རིགས་འདི་ནི། །བྱང་ཆུབ་སེམས་དཔའ་དགའ་བས་རྟོགས་བྱེད་པ། །དེས་ནི་སངས་རྒྱས་ཡེ་ཤེས་མྱུར་དུ་འཐོབ། །གང་གིས་འདི་ལྟ་བུ་ཡི་གཏེར་རྙེད་པ། །ཞིང་རྣམས་མཐའ་ཡས་གང་གཱའི་བྱེ་མ་སྙེད། །དེ་དག་ལྷ་དང་དེ་བཞིན་མི་རྣམས་ཀྱི། །ནོར་བུ་
རིན་པོ་ཆེ་ཡིས་གང་བར་གྱུར། །བྱང་ཆུབ་སེམས་དཔས་ཏིང་འཛིན་འདི་ཐོབ་སྟེ། །རྟག་ཏུ་ཆུབ་པར་བྱེད་ཅིང་མི་ངོམས་པ། །ཐུལ་བར་དཀའ་ཞིང་མཛོད་རྣམས་ཤིན་ཏུ་མང་། །ནོར་ཡང་མང་ཞིང་རིན་ཆེན་ནོར་དང་ལྡན། །ཇི་ལྟར་ཏིང་འཛིན་རྡུལ་བྲལ་འདི་ཐོབ་ནས། །བྱང་ཆུབ་སེམས་དཔའ་དགའ་ཞིང་རངས་པ་ལྟར། །རྒྱལ་སྲིད་ཤིན་ཏུ་འབྱོར་ཅིང་རྒྱས་ཐོབ་ཀྱང་། །མཁས་པ་དེ་དག་ནམ་ཡང་དགར་མི་འགྱུར། །དེ་དང་དེ་དག་སངས་རྒྱས་ཀུན་མཁྱེན་གྱི། །ཆོས་རྣམས་རྟག་ཏུ་འཛིན་པར་བྱེད་པ་ཡིན། །ཟད་པའི་མཐར་ཐུག་དུས་སུ་གྱུར་པའི་ཚེ། །ཆོས་ཀྱི་ཚུལ་མཆོག་རྒྱ་ཆེར་འཛིན་པར་འགྱུར། །ཆོས་ཀྱི་མཛོད་འཆང་བློ་གྲོས་ཆེན་པོ་འཆང་། །ཐམས་ཅད་མཁྱེན་པའི་མཛོད་ཀྱང་འཆང་བ་ཡིན། །དེ་དང་དེ་དག་སེམས་ཅན་བྱེ་སྟོང་དང་། །ཁྲག་ཁྲིག་ཆོས་ཀྱི་དབྱངས་ཀྱིས་མགུ་བར་བྱེད། །དེ་དག་ཚུལ་ཁྲིམས་ནོར་ལྡན་བློ་གྲོས་ཅན། །སྐྱེས་བུ་དེ་དག་བསླབས་པའི་ནོར་གྱིས་ཕྱུག །དེ་དང་དེ་དག་ཚུལ་ཁྲིམས་བརྟུལ་ཞུགས་གནས། །མངོན་དགའ་ཆོས་ཀྱི་སྡོང་པོའི་མྱུ་གུ་ཡིན། །དེ་དག་ཆོས་གོས་ངུར་སྨྲིག་རིན་ཆེན་འཆང་། །ཁྱིམ་ནས་འབྱུང་ལ་རྟག་ཏུ་དགའ་བར་བྱེད། །དེ་དག་སེམས་ཅན་ཕན་ཕྱིར་མཉམ་པ་མེད། །ཐམས་ཅད་མཁྱེན་པ་ཉིད་ལ་རབ་ཏུ་ཞུགས། །དེ་དག་དུལ་བ་སེམས་ཅན་མ་དུལ་འདུལ། །རྟག་པར་དུལ་བའི་གནས་དང་རྗེས་སུ་ལྡན། །དེ་དག་དུལ་ཞིང་རབ་དུལ་རྗེས་སུ་སོང་། །ཞི་བའི་དབང་པོ་རབ་ཏུ་ཞི་བ་ཡིན། །དེ་དག་སེམས་ཅན་ཉལ་བ་གཉིད་ལོག་པ། །རྟག་ཏུ་ཆོས་ཀྱི་སྐད་ཀྱིས་སད་པར་བྱེད། །སེམས་ཅན་དག་ནི་སད་པར་བྱས་ནས་སུ། །རིན་ཆེན་ཆོས་བཟང་མཆོག་ལ་འགོད་པར་བྱེད། །དེ་དང་དེ་དག་སྦྱིན་པའི་བདག་པོ་ཡིན། །ཁོར་མོར་རྟག་ཏུ་གཏོང་ལ་བརྐྱང་བ་སྟེ། །མཁས་པ་དེ་དག་འཇུངས་དང་འགྲོགས་མི་བྱེད། །གཏོང་བ་ཆེན་པོ་དག་ལ་རྟག་ཏུ་དགའ། །དེ་དག་སེམས་ཅན་དབུལ་ཞིང་སྡུག་བསྔལ་རྣམས། །མཐོང་ནས་ལོངས་སྤྱོད་ཀྱིས་ཀྱང་ཚིམ་པར་བྱེད། །དེ་དག་སེམས་ཅན་བདེ་ཞིང་ཕན་པའི་ཕྱིར། །ཐམས་ཅད་མཁྱེན་པ་ཉིད་ལ་རྟག་པར་ཞུགས། །དེ་དག་ཡེ་ཤེས་རྟག་ཏུ་བསླབས་པ་སྟེ། །ཆོས་ཀྱི་རྔ་ཡང་རྒྱ་ཆེར་ཤིན་ཏུ་རྡུང་། །སྐྱེ་བོ་ཀུན་གྱི་ཐེ་ཚོམ་འཁྲི་ཤིང་གཅོད། །རྟག་པར་ཡེ་ཤེས་ལ་ཡང་རབ་ཏུ་ཞུགས། །དེ་དག་ལེགས་ཐོས་ཆོས་འཛིན་རྡུལ་བྲལ་བ། །འཁོར་གྱི་
ནང་དུ་སྟན་ལ་འདུག་ནས་སུ། །མཁས་པ་བློ་གྲོས་འཆང་བ་དེ་དག་ནི། །མདོ་སྡེ་བྱེ་བ་བརྒྱ་དག་རབ་ཏུ་སྟོན། །དེ་དང་དེ་དག་མང་དུ་ཐོས་པ་ཡིན། །ཐོས་པ་འཛིན་པ་སངས་རྒྱས་ཆོས་རྣམས་འཛིན། །ཆོས་ཀྱི་མཛོད་རྣམས་ཤིན་ཏུ་འཛིན་བྱེད་དེ། །ཐུབ་པའི་ཆོས་ཀྱི་གཏེར་ལ་དགའ་བ་ཡིན། །དེ་དང་དེ་དག་ཤེས་རབ་ཡངས་པ་ཡིན། །དགའ་བ་དག་ཀྱང་རྒྱ་ཆེར་རྟག་ཏུ་སྐྱེད། །ཞིབ་ཅིང་འབྱུང་བར་འགྱུར་བ་བལྟ་དཀའ་བ། །ཞི་བའི་ཆོས་མཆོག་རྣམས་ཀྱང་རབ་ཏུ་སྟོན། །དེ་དག་ཆོས་དང་ཆོས་མིན་ཤེས་པ་སྟེ། །དེས་ཤིང་བློ་གྲོས་ལྡན་པ་ཆོས་ལ་གནས། །ཆོས་ཀྱི་རྒྱལ་སྲིད་རབ་ཏུ་སྟོན་བྱེད་ཅིང་། །མཚུངས་མེད་ཆོས་ཀྱི་མཆོག་ལ་རྟག་ཏུ་སྤྱོད། །དེ་དག་ཆོས་ཀྱི་མཆོག་ལ་ལྷུར་བྱེད་དེ། །བླ་མ་ལ་ཡང་རི་མོ་བྱེད་པར་གནས། །ཆོས་ཀྱི་གྲོང་ཁྱེར་མཆོག་ལ་གནས་པ་སྟེ། །བློ་གྲོས་ལྡན་པ་ཆོས་ཀྱི་རྒྱལ་མཚན་སྒྲེང་། །དེ་དག་དྲེགས་ཤིང་རྒྱགས་པའི་སེམས་ཅན་རྣམས། །རྟག་ཏུ་བག་མེད་པ་ལ་གནས་པ་མཐོང་། །རབ་ཏུ་མ་རུངས་ལོག་པའི་ལམ་སོང་ཞིང་། །འཁོར་བའི་ལམ་ལ་གནས་པ་མཐོང་ནས་ནི། །དེ་ལ་བྱམས་དང་སྙིང་རྗེ་རྒྱ་ཆེར་བསྐྱེད། །དགའ་དང་བཏང་སྙོམས་དག་ལའང་རབ་གནས་ཏེ། །དེ་དག་ལ་ནི་ཡན་ལག་བརྒྱད་ལྡན་པ། །ལམ་མཆོག་ཞི་བ་བལྟ་དཀའ་རབ་ཏུ་སྟོན། །དེ་དང་དེ་དག་ལེགས་བྱས་ཆོས་ཀྱི་གྲུ། ། བཤམས་ནས་འཁོར་བའི་རྒྱུན་ཏུ་སོང་བ་དག །རྒྱ་མཚོ་ཆེན་པོར་ལྷུང་ཞིང་ཁྱེར་བ་ཡི། །སེམས་ཅན་མང་པོ་དག་ནི་སྒྲོལ་བར་བྱེད། །བྱང་ཆུབ་ཡན་ལག་སྟོབས་དང་དབང་པོ་ཡིས། །གོ་བགོས་དམ་པའི་ཆོས་ཀྱི་གྲུར་ཞུགས་ནས། །ཕ་རོལ་འགྲམ་བདེ་རྟག་ཏུ་འཇིགས་མེད་པར། །ཁོར་མོར་སེམས་ཅན་རྣམས་ཀྱང་འགོད་པར་བྱེད། །དེ་དག་སྨན་པའི་གཙོ་བོ་དཀའ་ཐུབ་ལ། །ཤིན་ཏུ་སྤྱད་པ་རིག་བྱེད་སྨན་པའི་མཆོག །རིག་པ་ཡེ་ཤེས་རྣམ་གྲོལ་ཕ་རོལ་ཕྱིན། །དམ་པའི་ཆོས་ཀྱི་རྩི་ཡང་སྦྱིན་པར་བྱེད། །ནད་ནི་རྣམ་པ་མང་པོས་བཏབ་པ་ཡི། །སེམས་ཅན་ན་བ་དག་ཀྱང་མཐོང་ནས་སུ། །དེ་དག་ལ་ནི་ཆོས་ཀྱི་བཀྲུ་སྨན་གཏོང་། །ཆོས་རྣམས་ཀྱིས་ནི་དེ་དག་གསོ་བ་བྱེད། །དེ་དག་སྨྲ་བ་ཕ་རོལ་རྒོལ་བ་འཇོམས། །འཇིག་རྟེན་དབང་པོ་ཚིག་གི་དབང་ཕྱུག་ལྡན། །ཤེས་བྱ་ཀུན་ལ་འོད་བྱེད་བློ་གྲོས་འཆང་། །ཡེ་ཤེས་དམ་པའི་ས་ལ་རབ་ཏུ་གནས། །དཔའ་བོ་ཡེ་ཤེས་སྟོབས་ལྡན་སྟོབས་འཇོམས་པ། །ཡེ་ཤེས་
ལྡན་པ་དག་གིས་ཡང་དག་བསྔགས། །སེམས་ཅན་བྱེ་བ་ཁྲག་ཁྲིག་མང་པོ་དག །ཆོས་ལ་གནས་ནས་ཤེས་པས་མགུ་བར་བྱེད། །དེ་དང་དེ་དག་བདག་པོ་དེད་དཔོན་ཏེ། །གསལ་བ་སེམས་ཅན་རྣམས་ཀྱི་སྐྱབས་འདོད་པ། །སེམས་ཅན་རིན་ཆེན་ལམ་ལ་རྨོངས་གྱུར་ཅིང་། །རྟག་ཏུ་བདུད་ཀྱི་སྙིང་ཞུགས་མཐོང་ནས་ནི། །དེ་དག་ལ་ཡང་ལམ་མཆོག་ཞི་ཞིང་བདེ། །རྟག་པར་མྱ་ངན་འདས་པ་རབ་ཏུ་སྟོན། །མཁས་པ་དག་ནི་ཡེ་ཤེས་ལམ་དེ་ཡིས། །སེམས་ཅན་མང་པོ་བྱེ་བརྒྱ་འདྲེན་པར་བྱེད། །དེ་དང་དེ་དག་གནས་དང་རྟེན་དུ་འགྱུར། །སྐྱབས་དང་མིག་དང་སྒྲོན་མ་བྱེད་པ་ཡིན། །འཇིགས་པ་རྣམས་ལ་མི་འཇིགས་རབ་ཏུ་སྦྱིན། །སྐྲག་པ་རྣམས་ཀྱང་རྟག་ཏུ་དབུགས་འབྱིན་བྱེད། །དེ་དག་སེམས་ཅན་ཤིན་ཏུ་སྡུག་བསྔལ་དང་། །དམུས་ལོང་གྱུར་པ་འདི་དག་རིག་ནས་ནི། །ཡང་དག་ཚུལ་བསླབས་རིན་ཆེན་ཆོས་རྣམས་ཀྱིས། །ཆོས་ཀྱི་སྣང་བ་དག་ཀྱང་བྱེད་པར་འགྱུར། །འཇིག་རྟེན་ན་ནི་བཟོ་མཆོག་ཅི་ཡོད་པ། །བཟོ་བོ་བྱེད་པས་སེམས་ཅན་ཕན་འགྱུར་ཞིང་། །གང་གིས་སེམས་ཅན་རྟག་ཏུ་བདེར་འགྱུར་བ། །བཟོ་ཡི་རྣམ་པ་དེ་དག་ཤིན་ཏུ་བསླབས། ། སུ་དག་བྱང་ཆུབ་ཏུ་ནི་མངོན་ཞུགས་ཏེ། །བློ་གྲོས་ལྡན་ཞིང་འཇིག་རྟེན་མིག་སྦྱིན་པ། །བསླབས་པ་རྣམས་ལ་མཆོག་གི་ཕ་རོལ་ཕྱིན། །མཁས་རབ་འཇིག་རྟེན་ན་ཡང་ངོ་མཚར་ཐོབ། །སངས་རྒྱས་དག་གི་ཆོས་མཆོག་ཐོས་པ་ཡིས། །མཚུངས་པ་མེད་པ་ངོམས་པར་ཡོང་མི་འགྱུར། །ཚུལ་ཁྲིམས་བཟོད་དང་ཏིང་འཛིན་ཕ་རོལ་ཕྱིན། །ཟབ་མོ་ཡི་ནི་ཆོས་རྣམས་ཤིན་ཏུ་ཐོས། །དེ་དག་ཞི་བ་རིན་ཆེན་ཆོས་རྣམས་ནི། །གཞན་ལ་སྟོན་པས་ངོམས་པར་མི་འགྱུར་ཏེ། །ཐར་བའི་ཐབས་ཀྱི་ཆར་ཡང་རབ་འབེབས་ཤིང་། །ཆོས་ཀྱིས་སྐྱེས་བུ་དག་ནི་ཚིམ་པར་བྱེད། །དེ་ཡི་དྲུང་དུ་སེམས་ཅན་མང་པོ་ནི། །ཆོས་འདོད་མཁས་པ་ཇི་སྙེད་ལྷགས་ནས་སུ། །ཆོས་མཆོག་བཟང་པོ་དམ་པ་རིན་པོ་ཆེ། །དྲང་ཞིང་གསལ་བའི་ལམ་རྣམས་མཉན་སྙམ་པ། །དེ་དག་བློ་གྲོས་འཆང་བས་ཐེ་ཚོམ་བཅད། །ཆོས་ཀྱིས་དེ་དག་ཤིན་ཏུ་མགུ་བར་བྱེད། །ཚུལ་ཁྲིམས་བཟོད་དང་ཏིང་འཛིན་ཕ་རོལ་ཕྱིན། །སེམས་ཅན་རྣམས་ཀྱི་བསམ་པ་རབ་ཏུ་ཤེས། །ཡེ་ཤེས་ལྡན་ཞིང་ཡེ་ཤེས་མཆོག་རབ་ཀྱི། །ཕ་རོལ་ཕྱིན་པ་སེམས་ཅན་བསམ་ལ་མཁས། །སེམས་ཅན་ཕ་རོལ་སེམས་དང་སྤྱོད་པ་དང་། །གང་
དག་གཏམ་ནི་ཅི་འདྲའི་ཆོས་བརྗོད་པ། །ཡེ་ཤེས་གཏམ་ནི་བརྗོད་ལ་གང་དག་གིས། །སེམས་ཅན་ཁྲག་ཁྲིག་ཆོས་མཆོག་མིག་ཐོབ་འགྱུར། །དེ་དག་ཡེ་ཤེས་བྱེ་བྲག་ཕ་རོལ་ཕྱིན། །ལམ་རྣམས་ཀྱང་ནི་ཉེ་བར་སྟོན་པར་བྱེད། །མཁས་པ་དེ་དག་གི་ནི་སེམས་རྣམས་ཀྱང་། །བདུད་རྣམས་བྱེ་བ་སྟོང་གིས་ཡོང་མི་ཤེས། །ཇི་ལྟར་ནམ་མཁའ་ལ་ནི་བྱ་སོང་བ། །དེ་ཡི་རྗེས་ནི་གང་དུའང་ཤེས་མི་ནུས། །ཡེ་ཤེས་སྟོབས་ལྡན་དུལ་ཞིང་རབ་ཏུ་ཞི། །ཞི་བ་འཕགས་པའི་ཡེ་ཤེས་དག་ལ་གནས། །དཔའ་བོ་ཁྱུ་མཆོག་བདུད་རྣམས་ཐམས་ཅད་བཅོམ། །བྱང་ཆུབ་ཞི་བ་མངོན་པར་འཚང་ཡང་རྒྱ། །རྟག་ཏུ་རྫུ་འཕྲུལ་དག་གི་ཕ་རོལ་ཕྱིན། །ཞིང་ཡང་བརྒྱ་ཕྲག་མང་པོར་འགྲོ་བར་བྱེད། །སངས་རྒྱས་མང་པོ་བྱེ་བ་ཁྲག་ཁྲིག་མཐོང་། །ཇི་བཞིན་གང་གཱ་ཡི་ནི་བྱེ་མ་སྙེད། །དེ་ཡི་མིག་ཀྱང་ཐོགས་པར་མི་འགྱུར་ཏེ། །ཕྱོགས་བཅུ་དག་གི་གཟུགས་མང་མཐོང་བར་འགྱུར། །ཇི་སྙེད་ཕྱོགས་བཅུ་ཡི་ནི་སྲིད་པ་ན། །སེམས་ཅན་ཡོད་དགུ་དེ་དག་འདྲེན་པར་གྱུར། །བསྐལ་པ་བྱེ་བ་བརྒྱ་ཕྲག་མང་པོར་ནི། །དེ་དག་དེ་ཡི་ཕན་ཡོན་ཀུན་བརྗོད་ཅིང་། །སྤོབས་པ་ཡི་ནི་རབ་ཏུ་བཤད་མཛད་ཀྱང་། །སྔོན་གྱི་སྤྱོད་པའི་བསྔགས་པ་ཟད་མི་ནུས། །ཏིང་འཛིན་མཚུངས་མེད་རྡུལ་དང་བྲལ་བ་འདི། །སྐྱེས་བུ་སུ་གང་འཛིན་པར་བྱེད་པ་ནི། །སངས་རྒྱས་དག་གི་ནོར་རྣམས་མི་ཟད་དེ། །ཤིན་ཏུ་རྒྱ་ཆེ་ཡེ་ཤེས་རྒྱ་མཚོ་བཞིན། །ཚུལ་ཁྲིམས་ཀྱི་ཕུང་པོ་ངེས་པར་བསྟན་པའི་ལེའུ་སྟེ་སུམ་ཅུ་རྩ་བདུན་པའོ།། །།