འཕགས་པ་བུད་མེད་འགྱུར་བ་ལུང་བསྟན་པ་ཞེས་བྱ་བ་ཐེག་པ་ཆེན་པོའི་མདོ།
རྒྱ་གར་སྐད་དུ། ཨཱཪྱ་སྟྲཱི་བི་བ་བྱཱ་ཀ་ར་ཎ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་བུད་མེད་འགྱུར་བ་ལུང་བསྟན་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཕུང་པོའི་རི་ལ་དགེ་སློང་ལྔ་སྟོང་གི་དགེ་སློང་
གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་བརྒྱད་སྟོང་མངོན་པར་གྲགས་པ། མངོན་པར་ཤེས་པ་ཐོབ་པ། སྤོབས་པ་ཐོགས་པ་མེད་པ། མི་འཇིགས་པ་ཐོབ་པ། མི་སྐྱེ་བའི་ཆོས་ལ་བཟོད་པ་དང་ལྡན་པ། སངས་རྒྱས་དཔག་ཏུ་མེད་པ་ལ་དགེ་བའི་རྩ་བ་བསྐྱེད་པ། ཐེག་པ་ཆེན་པོའི་རྗེས་སུ་སོང་བ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་མུ་ཁྱུད་འཛིན་དང་། ས་འཛིན་དང་། བང་རིམ་འཛིན་དང་། མཆོད་སྦྱིན་རུས་འཛིན་དང་། སྣང་བའི་བློ་གྲོས་དང་། རྣམ་པར་དག་པའི་བློ་གྲོས་དང་། སྦྱངས་པའི་བློ་གྲོས་དང་། ཁྱད་པར་བློ་གྲོས་དང་། མཐའ་ཡས་བློ་གྲོས་དང་། འཕེལ་བའི་བློ་གྲོས་དང་། མཐོང་དགའ་དང་། ལེགས་མཐོང་དང་། ཆེར་སྣང་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དོན་ཀུན་མཐོང་ལ་སོགས་པ་དང་ཐབས་ཅིག་ཏུ་བཞུགས་སོ། །བྱམས་པ་ལ་སོགས་པ་བསྐལ་པ་བཟང་པོའི་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ཀྱང་འཁོར་དེ་ཉིད་དུ་འདུས་པར་གྱུར་ཏེ་འཁོད་དོ། །དེ་ནས་བཅོམ་ལྡན་འདས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན་རྟེན་ཅིང་བཞུགས་ཏེ། རྒྱལ་པོ་དང་། རྒྱལ་པོའི་བུ་རྣམས་དང་། ཚོང་དཔོན་རྣམས་དང་། ཁྱིམ་བདག་རྣམས་དང་། བློན་པོ་རྣམས་དང་། འཁོར་རྣམས་དང་། གྲོང་རྡལ་པ་དང་། ཡུལ་གྱི་མི་རྣམས་ཀྱིས་བཀུར་སྟི་བྱས། བླ་མར་བྱས། རི་མོ་བྱས། མཆོད་པ་བྱས་སོ། །དེ་ནས་ཚེ་དང་ལྡན་པ་རབ་འབྱོར་སྔ་དྲོའི་དུས་ཀྱི་ཚེ་སྨད་གཡོགས་དང་། ཆོས་གོས་བགོས། ལྷུང་བཟེད་ཐོགས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་མདང་སུམ་བདག་གི་རྨི་ལམ་ན་དེ་བཞིན་གཤེགས་པ་བྱང་ཆུབ་ཀྱི་སྙིང་པོ་ལ་བཞུགས་པ་ཞིག་མཐོང་སྟེ། དེས་ཕྱག་གཡས་པ་གསེར་གྱི་མདོག་ཅན་བརྐྱང་ནས་བདག་གི་སྤྱི་བོར་བཞག་སྟེ། རབ་འབྱོར་སང་ཁྱོད་ཀྱི་སྔོན་མ་ཐོས་པའི་ཆོས་སྟོན་པ་ཐོས་པར་འགྱུར་རོ་ཞེས་དེ་སྐད་ཅེས་བཀའ་སྩལ་ན། བཅོམ་ལྡན་འདས་དེ་
གང་གི་སྔ་ལྟས་ལགས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་དེ་ནི་རིགས་ཀྱི་བུའམ། རིགས་ཀྱི་བུ་མོ་ཆོས་འདོད་པ་རྣམས་ཀྱི་སྔོན་མ་ཐོས་པའི་ཆོས་ཐོས་པར་འགྱུར་བའི་སྔ་ལྟས་ཡིན་ནོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་བསོད་སྙོམས་ལ་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་དེའི་དུས་ལ་དབབ་པར་ཤེས་ན་སོང་ཤིག །དེ་ནས་ཚེ་དང་ལྡན་པ་རབ་འབྱོར་བཅོམ་ལྡན་འདས་ཀྱིས་གནང་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་བསོད་སྙོམས་ལ་ཞུགས་སོ། །དེ་ནས་ཚེ་དང་ལྡན་པ་རབ་འབྱོར་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་མཐར་ཆགས་སུ་བསོད་སྙོམས་ལ་རྒྱུ་ཞིང་སོང་བ་ལས། ཁྱིམ་བདག་ཅིག་གི་གནས་ག་ལ་བ་དེར་སོང་སྟེ་ཕྱིན་ནས་སྒོ་ཁང་གི་ནང་ལོགས་སུ་ཅང་མི་སྨྲ་བར་སྡོད་དོ། །དེ་ནས་ཁྱིམ་དེའི་ནང་ནས་བུད་མེད་མཆོག་གི་གཟུགས་དང་ལྡན་པ། བལྟ་ན་སྡུག་པ། རྒྱན་གྱིས་ལེགས་པར་བཀླུབས་ཏེ། ནོར་བུ་དང་། མུ་ཏིག་དང་། བྱི་རུ་དང་། གསེར་གྱི་རྒྱན་གྱིས་བརྒྱན་པ། དཔལ་ཤིན་ཏུ་འབར་བ། ཁ་དོག་རྒྱས་ཤིང་མཛེས་པ་དང་ལྡན་པ་ཞིག་བྱུང་ངོ་། །དེ་ནས་བུད་མེད་དེས་ཚེ་དང་ལྡན་པ་རབ་འབྱོར་གྱི་རྐང་པ་ལ་མགོ་བོས་ཕྱག་འཚལ་ནས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །བཙུན་པ་རབ་འབྱོར་ཁྱོད་ཅི་ཞིག་བཞེད་པའི་སླད་དུ་སྒོ་ཁང་འདི་ན་གཞེས། རབ་འབྱོར་གྱིས་སྨྲས་པ། ཆེ་ཞེ་བདག་ནི་བསོད་སྙོམས་འདོད་པའི་ཕྱིར་སྒོ་གང་འདི་ན་སྡོད་དོ། །བུད་མེད་དེས་སྨྲས་པ། བཙུན་པ་རབ་འབྱོར་ཁྱོད་ལ་ད་དུང་ཡང་བསོད་སྙོམས་ཀྱི་འདུ་ཤེས་འབྱུང་ལགས་སམ། བཙུན་པ་རབ་འབྱོར་ཁྱོད་ལ་ད་དུང་ཡང་བསོད་སྙོམས་ཀྱི་འདུ་ཤེས་ཐུགས་སུ་མ་ཆུད་དམ། རབ་འབྱོར་གྱིས་སྨྲས་པ། ཆེ་ཞེ་བདག་གིས་བསོད་སྙོམས་ཀྱི་འདུ་ཤེས་ནི་ཁོང་དུ་ཆུད་མོད་ཀྱི། འོན་ཀྱང་ཕ་མ་ལས་སྐྱེས་པའི་ལུས་འབྲས་ཆན་དང་ཟན་དྲོན་གྱིས་བསྐྱེད་པ་འདི་ཟས་མེད་ཀྱི་བར་དུ་འཚོ་བར་མི་ནུས་སོ། །བུད་མེད་དེས་སྨྲས་པ། བཙུན་པ་རབ་འབྱོར་གྱིས་
མ་རིག་པ་འགགས་པས་འདུ་བྱེད་འགག །འདུ་བྱེད་འགགས་པས་རྣམ་པར་ཤེས་པ་འགག །རྣམ་པར་ཤེས་པ་འགགས་པས་མིང་དང་གཟུགས་འགག །མིང་དང་གཟུགས་འགགས་པས་སྐྱེ་མཆེད་དྲུག་འགག །སྐྱེ་མཆེད་དྲུག་འགགས་པས་རེག་པ་འགག །རེག་པ་འགགས་པས་ཚོར་བ་འགག །ཚོར་བ་འགགས་པས་སྲེད་པ་འགག །སྲེད་པ་འགགས་པས་ལེན་པ་འགག །ལེན་པ་འགགས་པས་སྲིད་པ་འགག །སྲིད་པ་འགགས་པས་སྐྱེ་བ་འགག །སྐྱེ་བ་འགགས་པས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་འགག་པ་མངོན་སུམ་དུ་མ་མཛད་དམ། རབ་འབྱོར་གྱིས་སྨྲས་པ། ཆེ་ཞེ་བདག་གིས་འགོག་པ་མངོན་སུམ་དུ་བྱས་སོ། །སྨྲས་པ་བཙུན་པ་རབ་འབྱོར་ཅི་ཞིག་ནི་འགོག་པར་འགྱུར། ཆོས་གང་ནི་རབ་ཏུ་བསྒོམ་པར་བགྱི། སྨྲས་པ་ཆེ་ཞེ་འགོག་པ་ནི་ཆོས་གང་གི་རབ་ཏུ་བསྒོམ་པར་བྱ་བ་ཡང་མ་ཡིན་ནོ། །སྨྲས་པ། བཙུན་པ་རབ་འབྱོར་གལ་ཏེ་འགོག་པ་ཆོས་གང་གི་རབ་ཏུ་བསྒོམ་པ་ཡང་མ་ལགས་ན་བཙུན་པ་རབ་འབྱོར་གྱི་ལུས་བསོད་སྙོམས་ཀྱིས་ཇི་ལྟར་འཚོ་བར་འགྱུར། སྨྲས་པ། ཆེ་ཞེ་འགོག་པ་ལ་སྙོམས་པར་ཞུགས་ཏེ་ཚོར་བ་ཐམས་ཅད་བཀག་པ་ལས་ལངས་པའི་ལུས་འཚོ་བར་བྱེད་དོ། །སྨྲས་པ། བཙུན་པ་རབ་འབྱོར་གལ་ཏེ་གཏན་དུ་མྱ་ངན་ལས་འདས་ན་ཁྱོད་ཀྱི་ལུས་ཇི་ལྟར་འཚོ་བ་ལ་འཇུག་པར་འགྱུར། སྨྲས་པ། ཆེ་ཞེ་བཅོམ་ལྡན་འདས་ཀྱི་ཉན་ཐོས་རྣམས་ནི་ལུས་འཚོ་བར་བྱ་བའི་ཕྱིར་བསོད་སྙོམས་ལ་རྒྱུའོ། །སྨྲས་པ། དེས་ན་བཅོམ་ལྡན་འདས་ཀྱིས་བཙུན་པ་རབ་འབྱོར་ཉོན་མོངས་པ་མེད་པར་གནས་པ་རྣམས་ཀྱི་མཆོག་ཏུ་མ་བསྟན་ཏམ། སྨྲས་པ། ཆེ་ཞེ་དེ་ཡིན་ནོ། །སྨྲས་པ། ཅི་ཉོན་མོངས་པ་མེད་པ་དེ་རྒྱུ་བའམ་རབ་ཏུ་རྒྱུ་བ་ལགས་སམ། སྨྲས་པ། ཆེ་ཞེ་མ་ཡིན་ནོ། །སྨྲས་པ། འོ་ན་ཅིའི་སླད་དུ་བཙུན་པ་རབ་འབྱོར་བསོད་སྙོམས་ལ་རྒྱུ་བ་མཛད། སྨྲས་པ། ཆེ་ཞེ་བདག་ནི་ལུས་ཆ་བའི་ཕྱིར་བསོད་སྙོམས་ལ་རྒྱུ་བ་མ་ཡིན་གྱི། སྲོག་གི་ཕྱིར་ཚོར་བ་དགག་པའི་དོན་དུ་བསོད་སྙོམས་ལ་རྒྱུའོ། །སྨྲས་པ། བཙུན་པ་རབ་འབྱོར་ད་དུང་ཡང་ཚོར་
བས་འཕྲོགས་སམ། སྨྲས་པ། ཆེ་ཞེ་བདག་ནི་ཚོར་བས་མི་འཕྲོགས་མོད་ཀྱི། ཚོར་བ་དགག་པའི་ཕྱིར་བསོད་སྙོམས་ལ་རྒྱུའོ། །སྨྲས་པ། བཙུན་པ་རབ་འབྱོར་ཉོན་མོངས་པ་མེད་པ་ནི་མཚུངས་པ་མེད་པ་སྟེ། དེ་ཅིའི་སླད་དུ་ཞེ་ན། ཉོན་མོངས་པ་མེད་པར་གནས་པ་ནི་ལུས་དང་སེམས་ཀྱི་ཚོར་བ་མྱོང་བ་མ་མཆིས་སོ། །ཉོན་མོངས་པ་མེད་པ་ནི་ལུས་དང་སེམས་དང་མཚུངས་པར་ལྡན་པ་མ་ལགས་སོ། །ཉོན་མོངས་པ་མེད་པ་ནི་དགའ་བའམ། ཡིད་མི་དགའ་བ་སྐྱེད་པ་མི་བགྱིད་དོ། །ཉོན་མོངས་པ་མེད་པ་ནི་སུ་ལ་ཡང་ཉོན་མོངས་པས་ཉེ་བར་གནས་པ་མ་མཆིས་སོ། །གཞན་ཡང་གང་གི་སླད་དུ་བཅོམ་ལྡན་འདས་ཀྱིས་བཙུན་པ་རབ་འབྱོར་ཉོན་མོངས་པ་མེད་པར་གནས་པ་རྣམས་ཀྱི་མཆོག་ཏུ་བསྟན་ན། ཅིའི་སླད་དུ་ནི་ཉོན་མོངས་པ་མེད་པ་ཉོན་མོངས་པ་མེད་པ་ཞེས་བགྱི། རབ་འབྱོར་གྱིས་སྨྲས་པ། ཆེ་ཞེ་དམིགས་པ་མེད་པའི་ཉོན་མོངས་པ་མེད་པ་ནི་འདོད་ཆགས་ཀྱི་རྡུལ་དང་བྲལ་བ་ཡིན་ནོ། །སྨྲས་པ། བཙུན་པ་རབ་འབྱོར་ཅི་ཉོན་མོངས་པ་མེད་པའི་ཕྱིར་འདོད་ཆགས་དང་བྲལ་བར་འགྱུར་རམ། སྨྲས་པ། ཆེ་ཞེ་མ་ཡིན་ནོ། །སྨྲས་པ། བཙུན་པ་རབ་འབྱོར་འོ་ན་ཉོན་མོངས་པ་མེད་པ་དེ་ཇི་ལྟར་འདོད་ཆགས་ཀྱི་རྡུལ་དང་བྲལ་བར་གྱུར། སྨྲས་པ། ཆེ་ཞེ་ཉོན་མོངས་པ་མེད་པར་བསྟན་པ་འདི་ནི་བཤད་པ་ཙམ་དུ་ཟད་དོ། །སྨྲས་པ། བཙུན་པ་རབ་འབྱོར་ཅི་ཉོན་མོངས་པ་མེད་པ་ལ་བཤད་པ་མཆིས་སམ། སྨྲས་པ། ཆེ་ཞེ་མེད་དོ། །སྨྲས་པ། བཙུན་པ་རབ་འབྱོར་གལ་ཏེ་ཉོན་མོངས་པ་མེད་པ་ལ་བཤད་པ་མ་མཆིས་ན་ཅི་ཞིག་འཆད་ཅིང་བཞུགས། སྨྲས་པ། ཆེ་ཞེ་བཅོམ་ལྡན་འདས་ཀྱི་ཉན་ཐོས་རྣམས་ནི་ཐ་སྙད་ཙམ་གྱིས་ཐ་སྙད་དུ་འདོགས་པར་ཟད་དོ། །སྨྲས་པ། བཙུན་པ་རབ་འབྱོར་ཇི་ཙམ་དུ་བརྗོད་པ་མཆིས་པ་དེ་ཙམ་དུ་ཐ་སྙད་འདོགས་སོ། །ཇི་ཙམ་དུ་ཐ་སྙད་འདོགས་པ་དེ་ཙམ་དུ་ཕྱིན་ཅི་ལོག་གོ །ཇི་ཙམ་དུ་ཕྱིན་ཅི་ལོག་པ་དེ་ཙམ་དུ་རྩོད་པར་འགྱུར་རོ། །ཇི་ཙམ་དུ་རྩོད་པ་དེ་ཙམ་དུ་དགེ་སྦྱོང་གི་ཆོས་མ་ལགས་སོ། །སྨྲས་པ། ཆེ་ཞེ་འོ་ན་དགེ་སྦྱོང་གི་ཆོས་གང་ཡིན། སྨྲས་པ། བཙུན་པ་རབ་འབྱོར་དགེ་སྦྱོང་གི་ཆོས་ནི་ཐ་སྙད་མ་མཆིས་
པ། ཕྱིན་ཅི་མ་ལོག་པ་རྩོད་པ་མ་མཆིས་པའོ། །དགེ་སྦྱོང་གི་ཆོས་ནི་ཆོས་དང་ཆོས་མ་ལགས་པ་དང་བྲལ་བའོ། །དགེ་སྦྱོང་གི་ཆོས་ནི་ཆགས་པ་དང་མ་ཆགས་པ་དང་བྲལ་བའོ། །དགེ་སྦྱོང་གི་ཆོས་ནི་ཡུལ་མ་མཆིས་པ་དང་། ཡུལ་མ་ལགས་པའོ། །དགེ་སྦྱོང་གི་ཆོས་ནི་ཆགས་པ་མ་མཆིས་པ་དང་། མ་བཅིངས་མ་གྲོལ་བའོ། །དགེ་སྦྱོང་གི་ཆོས་ནི་སེམས་མ་མཆིས་པ་སྟེ། སེམས་དང་། ཡིད་དང་། རྣམ་པར་ཤེས་པ་དང་བྲལ་བའོ། །དགེ་སྦྱོང་གི་ཆོས་ནི་ཆོག་ཤེས་པའོ། །དགེ་སྦྱོང་གི་ཆོས་ནི་ཕྲག་དོག་དང་ཆགས་པ་སྤངས་པའོ། །དགེ་སྦྱོང་གི་ཆོས་ནི་འདོད་པ་ཆུང་ཞིང་ཆོག་ཤེས་པའོ། །དགེ་སྦྱོང་གི་ཆོས་ནི་འདོད་པ་ཐམས་ཅད་དང་བྲལ་བའོ། །དགེ་སྦྱོང་གི་ཆོས་ནི་ཡུལ་ཐམས་ཅད་ལས་ཡང་དག་པར་འདས་པ་དང་ཞེན་པ་མ་མཆིས་པའོ། །དགེ་སྦྱོང་གི་ཆོས་ནི་ཕུང་པོའི་བདུད་ལས་ངེས་པར་གྲོལ་བའོ། །དགེ་སྦྱོང་གི་ཆོས་ནི་ཉོན་མོངས་པ་མ་མཆིས་པ་སྟེ། ཉོན་མོངས་པའི་བདུད་ལས་ཡང་དག་པར་འདས་པའོ། །དགེ་སྦྱོང་གི་ཆོས་ནི་མ་སྐྱེས་པའོ། །དགེ་སྦྱོང་གི་ཆོས་ནི་འཆི་བདག་གི་བདུད་དང་བྲལ་བའོ། །དགེ་སྦྱོང་གི་ཆོས་ནི་གཡོ་བ་མ་མཆིས་པ་དང་། རློམ་སེམས་མ་མཆིས་པ་དང་། རྟོག་པ་མ་མཆིས་པ་དང་། རྣམ་པར་མ་བསྒྲིབས་པ་དང་། སྤྱད་པ་མ་ལགས་པའོ། །དགེ་སྦྱོང་གི་ཆོས་ནི་བདུད་ཀྱི་ཡུལ་ལས་ཡང་དག་པར་འདས་པའོ། །དགེ་སྦྱོང་གི་ཆོས་ནི་བླང་བ་མ་མཆིས་པ་དང་། དོར་བ་མ་མཆིས་པའོ། །དགེ་སྦྱོང་གི་ཆོས་ནི་སྐྱེ་བ་དང་། འཇིག་པ་དང་བྲལ་བའོ། །དགེ་སྦྱོང་གི་ཆོས་ནི་ལྷའི་བུའི་བདུད་དང་མ་འབགས་པའོ། །དགེ་སྦྱོང་གི་ཆོས་ནི་ཡིད་ལ་བྱེད་པ་མ་མཆིས་པ་དང་། ཐམས་ཅད་དུ་གོས་པ་མ་མཆིས་པའོ། །དགེ་སྦྱོང་གི་ཆོས་ནི་མངོན་པར་ཞེན་པ་མ་མཆིས་པ་དང་། མཚན་མ་མ་མཆིས་པ་དང་། མཚན་མ་ཐམས་ཅད་དང་བྲལ་བའོ། །དགེ་སྦྱོང་གི་ཆོས་ནི་ཁམས་དང་ཁམས་མ་ལགས་པའི་ཚུལ་ཐམས་ཅད་ཀྱིས་བཅོས་པ་མ་ལགས་པ་དང་། བགྲང་བ་དང་། བྲལ་བ་དང་། གནས་མ་མཆིས་པ་དང་། ནམ་མཁའ་དང་མཉམ་པའོ། །དགེ་སྦྱོང་གི་ཆོས་བསྟན་པ་འདི་བཤད་པ་ན་སྒོ་གང་དེར་ལྷའི་བུ་གང་དག་ཆོས་མཉན་པའི་ཕྱིར་
འདུས་པ་དེ་དག་ལས་ལྷའི་བུ་བཞི་སྟོང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ །རྒྱ་ཆེན་པོ་ལ་མོས་པའི་ལྷའི་བུ་ལྔ་བརྒྱ་ནི་བུད་མེད་དེའི་སྤོབས་པ་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །དེ་ནས་ཚེ་དང་ལྡན་པ་རབ་འབྱོར་འདི་སྙམ་དུ་སེམས་ཏེ། ཆེ་ཞེ་འདི་འདི་ལྟར་སྤོབས་པ་ཕུན་སུམ་ཚོགས་པ་དང་ལྡན་པ་དེ་ནི་ངོ་མཚར་ཏེ། ཆེ་ཞེ་འདིའི་སྤོབས་པ་འདི་འདྲ་བ་ལས་ན་འདི་ནི་དེ་བཞིན་གཤེགས་པའི་སྤྲུལ་པ་ཡིན་པར་ཐེ་ཙོམ་མེད་དོ་སྙམ་མོ། །དེ་ནས་བུད་མེད་དེའི་སེམས་ཀྱིས་ཚེ་དང་ལྡན་པ་རབ་འབྱོར་གྱི་སེམས་ཤེས་ནས་གནས་བརྟན་རབ་འབྱོར་ལ་འདི་སྐད་ཅེས་སྨྲས་སོ། །བཙུན་པ་རབ་འབྱོར་འདི་ལྟར་འདི་ནི་དེ་བཞིན་གཤེགས་པའི་སྤྲུལ་པ་ཡིན་པར་ཐེ་ཙོམ་མེད་དོ་སྙམ་དུ་དགོངས་པ་དེ་ནི་ཇི་ལྟར་དགོངས་པ་དེ་བཞིན་ཏེ། དེ་ཅིའི་སླད་དུ་ཞེ་ན། ཇི་ལྟར་དེ་བཞིན་གཤེགས་པས་དེ་བཞིན་ཉིད་ཐུགས་སུ་ཆུད་པ་དེ་བཞིན་དུ་བདག་གིས་ཀྱང་དེ་བཞིན་ཉིད་ཁོང་དུ་ཆུད་དེ། དེས་ན་བདག་ནི་དེ་བཞིན་གཤེགས་པའི་སྤྲུལ་པའོ། །དེ་བཞིན་གཤེགས་པའི་གཟུགས་ཀྱི་དེ་བཞིན་ཉིད་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་དེ་བཞིན་ཉིད་གང་ལགས་པ་དེ་བདག་གི་དེ་བཞིན་ཉིད་ཀྱང་དེ་ཉིད་དེ། དེས་ན་བདག་ནི་དེ་བཞིན་གཤེགས་པའི་སྤྲུལ་པའོ། །དེ་བཞིན་གཤེགས་པའི་དེ་བཞིན་ཉིད་གང་ལགས་པ་དེ་ནི་ནམས་ཀྱང་། དེ་བཞིན་ཉིད་མ་ལགས་པར་མི་འགྱུར་རོ། །བདག་གི་དེ་བཞིན་ཉིད་གང་ལགས་པ་དང་། སེམས་ཅན་ཐམས་ཅད་ཀྱི་དེ་བཞིན་ཉིད་གང་ལགས་པ་དེ་ནི་ནམས་ཀྱང་དེ་བཞིན་ཉིད་མ་ལགས་པར་མི་འགྱུར་ཏེ། དེས་ན་བདག་ནི་དེ་བཞིན་གཤེགས་པའི་སྤྲུལ་པའོ། །དེ་བཞིན་གཤེགས་པའི་དེ་བཞིན་ཉིད་གང་ལགས་པ་དེ་ནི་རེས་འགའ་དེ་བཞིན་ཉིད་དུ་འགྱུར་བ་མ་ལགས་ལ། བདག་གི་དེ་བཞིན་ཉིད་གང་ལགས་པ་དེ་ཡང་རེས་འགའ་དེ་བཞིན་ཉིད་དུ་འགྱུར་བ་མ་ལགས་ཀྱི། རྟག་ཏུ་དེ་བཞིན་ཉིད་དེ་ཁོ་ན་ལགས་སོ། །དེས་ན་བདག་ནི་དེ་བཞིན་གཤེགས་པའི་སྤྲུལ་པའོ། །བདག་གི་དེ་བཞིན་ཉིད་གང་ལགས་པ་དང་། སེམས་ཅན་ཐམས་ཅད་ཀྱི་དེ་བཞིན་ཉིད་གང་ལགས་པ་དང་། ཆོས་ཐམས་
ཅད་ཀྱི་དེ་བཞིན་ཉིད་གང་ལགས་པ་དེ་ནི་ཡང་དག་པ་ཇི་ལྟ་བ་དང་། གཞན་མ་ཡིན་པ་དེ་ནི་དེ་བཞིན་ཉིད་དེ། དེས་ན་བདག་ནི་དེ་བཞིན་གཤེགས་པའི་སྤྲུལ་པའོ། །དེ་ནས་ཚེ་དང་ལྡན་པ་རབ་འབྱོར་གྱིས་བུད་མེད་དེ་ལ་འདི་སྐད་ཅེས་སྨྲས་སོ། །ཆེ་ཞེ་ཅི་ཁྱོད་ཀྱིས་དེ་བཞིན་གཤེགས་པའི་མཐུས་བདག་གི་སེམས་ཤེས་སམ། འོན་ཏེ་རང་གི་ཤེས་པས་ཤེས་སྨྲས་པ། བཙུན་པ་རབ་འབྱོར་ཉན་ཐོས་རྣམས་སམ། རང་སངས་རྒྱས་རྣམས་སམ། བྱང་ཆུབ་སེམས་དཔའ་རྣམས་སམ། དྲང་སྲོང་མངོན་པར་ཤེས་པ་ལྔ་དང་ལྡན་པ་གང་ཡང་རུང་སྟེ། སེམས་ཅན་གཞན་གྱི་སེམས་ཤེས་པ་དེ་དག་ཐམས་ཅད་ནི་སངས་རྒྱས་ཀྱི་མཐུས་གཞན་གྱི་སེམས་ཤེས་པ་ལགས་སོ། །དེ་ལྟར་གནས་བརྟན་རབ་འབྱོར་གཞན་གྱི་སེམས་མཁྱེན་པ་གང་ལགས་པ་དེ་ཡང་སངས་རྒྱས་ཀྱི་མཐུས་མཁྱེན་པ་ལགས་སོ། །བཙུན་པ་རབ་འབྱོར་དཔེར་ན་ཟླ་བ་དང་། ཉི་མ་དང་། མེ་དང་། ནོར་བུ་དང་། མར་མེ་དང་། སྐར་མ་ལ་བརྟེན་ནས་སྐྱེས་བུ་མིག་དང་ལྡན་པ་རྣམས་ཀྱིས་གཟུགས་རྣམས་མཐོང་བ་དེ་བཞིན་དུ་བཙུན་པ་རབ་འབྱོར་མ་རིག་པའི་མུན་པ་ནི་འཇིག་རྟེན་གནས་པ་ལས་གང་སུ་དག་ཕ་རོལ་གྱི་སེམས་ཤེས་པ་དེ་དག་ཐམས་ཅད་ནི་དེ་བཞིན་གཤེགས་པ་ལ་བརྟེན་ནས་ཤེས་པ་ལགས་སོ། །དེ་ནས་ཚེ་དང་ལྡན་པ་རབ་འབྱོར་གྱིས་བུད་མེད་དེ་ལ་འདི་སྐད་ཅེས་སྨྲས་སོ། །ཆེ་ཞེ་ཁྱོད་འདི་ལྟ་བུའི་སྤོབས་པ་དང་ལྡན་པ་ཁྱོད་སུ་ཡིན་པ་དང་། ག་ལས་འོངས་པ་བདག་ལ་སྟོན་ཅིག །བུད་མེད་དེས་སྨྲས་པ། བཙུན་པ་རབ་འབྱོར་གང་ཞིག་དེ་བཞིན་གཤེགས་པའི་སྤྲུལ་པ་ལ་འདྲི་སྟེ། རིགས་ཀྱི་བུ་ཁྱོད་སུ་ཡིན་པ་དང་། ག་ལས་འོངས་པ་བདག་ལ་སྟོན་ཅིག་ཅེས་དེ་སྐད་སྨྲས་ན། ཇི་སྐད་དུ་ལན་འདེབས་པར་འགྱུར། སྨྲས་པ། ཆེ་ཞེ་ཅུང་ཟད་ཀྱང་ལན་གདབ་ཏུ་མེད་དོ། །སྨྲས་པ། བཙུན་པ་རབ་འབྱོར་དེ་བཞིན་དུ་ཆོས་ཐམས་ཅད་སྤྲུལ་པའི་ངོ་བོ་ཉིད་ཀྱི་མཚན་ཉིད་དུ་ཤེས་ན་བདག་གིས་ཅི་ཞིག་ཞེས་སུ་མཆིས། གཞན་ཡང་གང་ཞིག་བཙུན་པ་རབ་འབྱོར་ལ་འདྲི་སྟེ། ཅི་ཁྱོད་སོ་སོའི་སྐྱེ་བོ་ཡིན་ནམ། འོན་ཏེ་སློབ་པའམ། དགྲ་བཅོམ་པ་ཡིན་ཞེས་དེ་སྐད་སྨྲས་ན། ལན་ཇི་སྐད་གདབ། དེ་ནས་ཚེ་དང་ལྡན་པ་རབ་འབྱོར་སེམས་པ་ལ་ཞུགས་ཏེ། ཆེ་ཞེ་འདིའི་
ལན་ཇི་སྐད་གདབ་པར་བྱ་སྙམ་མོ། །དེ་ནས་བར་སྣང་ལས་བཙུན་པ་རབ་འབྱོར་ཁྱོད་ཀྱིས་ཅུང་ཟད་ཅིག་ཐོབ་པའམ། རྟོགས་པའམ། མངོན་སུམ་དུ་བྱས་པའམ། མངོན་པར་རྟོགས་པ་གང་གིས་དགྲ་བཅོམ་པ་ཡིན་པར་ཤེས་པ་དེ་ཆེ་ཞེ་འདི་ལ་སྟོན་ཅིག་ཅེས་སྒྲ་བྱུང་ངོ་། །དེ་ནས་ཚེ་དང་ལྡན་པ་རབ་འབྱོར་གྱིས་བར་སྣང་དེ་ལས་སྒྲ་བྱུང་བ་དེ་ཐོས་ནས་བུད་མེད་དེ་ལ་འདི་སྐད་ཅེས་སྨྲས་སོ། །ཆེ་ཞེ་བདག་ནི་སོ་སོའི་སྐྱེ་བོ་ཡང་མ་ཡིན། སློབ་པ་ཡང་མ་ཡིན། དགྲ་བཅོམ་པ་ཡང་མ་ཡིན་ནོ། །སྨྲས་པ། བཙུན་པ་རབ་འབྱོར་དེ་བདག་གིས་ཇི་ལྟར་གཟུང་བར་བགྱི། སྨྲས་པ། ཆེ་ཞེ་དེ་བཞིན་གཤེགས་པའི་སྤྲུལ་པའི་གདགས་པ་ཇི་ལྟ་བ་དེ་བཞིན་དུ་བདག་ལ་ཟུང་ཤིག །སྨྲས་པ། བཙུན་པ་རབ་འབྱོར་ནི་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པར་གནས་པ་རྣམས་ཀྱི་མཆོག་དང་ཡོན་གནས་ཞེས་བགྱི་བ་ལགས་སོ། །སྨྲས་པ། ཆེ་ཞེ་བདག་ནི་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པར་གནས་པ་རྣམས་ཀྱི་མཆོག་དང་ཡོན་གནས་མ་ཡིན་ནོ། །སྨྲས་པ། བཙུན་པ་རབ་འབྱོར་དེ་ལྟར་ན་ཤེས་བཞིན་གྱིས་བརྫུན་གསུང་བར་མི་འགྱུར་རམ། སྨྲས་པ། ཆེ་ཞེ་གལ་ཏེ་བདག་ཟག་པ་ཟད་པ། ཉོན་མོངས་པ་མེད་པར་གནས་པ་རྣམས་ཀྱི་མཆོག་དང་། ཡོན་གནས་ཡིན་པར་འཛིན་པར་གྱུར་ན་ནི་དེ་ལྟར་ན་བདག་བརྫུན་དུ་སྨྲ་བར་འགྱུར་ན། གང་གི་ཕྱིར་བདག་དེ་ལྟར་མི་འཛིན་པ་དེའི་ཕྱིར་བདག་ནི་ཡང་དག་པར་སྨྲ་བ་ཡིན་གྱི་བརྫུན་དུ་སྨྲ་བ་ཞེས་མི་བྱའོ། །སྨྲས་པ། བཙུན་པ་རབ་འབྱོར་སྒོ་གང་འདིར་ལྷ་བདེན་པ་མཐོང་བ་ཆོས་མཉན་པའི་ཕྱིར་འདུས་པ་རྣམས་ལ་སླུ་བར་མི་འགྱུར་རམ། སྨྲས་པ། ཆེ་ཞེ་བདེན་པ་མཐོང་བ་གང་དག་ཡིན་པ་དེ་དག་ནི་སླུ་བར་མི་ནུས་སོ། །སྨྲས་པ། བཙུན་པ་རབ་འབྱོར་གྱིས་བདེན་པ་རྣམས་གཟིགས་སམ། སྨྲས་པ། མཐོང་ངོ་། །སྨྲས་པ། གལ་ཏེ་བདེན་པ་རྣམས་མཐོང་དུ་རུང་ན་ནི་དེ་དག་བདེན་པ་མ་ལགས་པར་འགྱུར་རོ། །དེ་ཅིའི་སླད་དུ་ཞེ་ན། བདེན་པ་རྣམས་ནི་སུས་ཀྱང་མཐོང་བར་མི་ནུས་པའི་སླད་དུའོ། །རབ་འབྱོར་གྱིས་སྨྲས་པ། ཆེ་ཞེ་བདེན་པ་མཐོང་བ་ཞེས་བྱ་བ་དེ་གང་གི་ཚིག་
བླ་དགས་ཡིན། སྨྲས་པ། བཙུན་པ་རབ་འབྱོར་བདེན་པ་མཐོང་བ་ཞེས་བགྱི་བ་དེ་ནི་ཆོས་ཐམས་ཅད་མཉམ་པ་ཉིད་དུ་ཡང་དག་པར་མཐོང་བའི་ཚིག་བླ་དགས་སོ། །བདེན་པ་མཐོང་ཞེས་བགྱི་བ་དེ་ནི་ཕྱིན་ཅི་ལོག་ཡང་དག་པར་མཐོང་བའི་ཚིག་བླ་དགས་སོ། །སྨྲས་པ། ཆེ་ཞེ་ཁྱོད་ཀྱིས་གང་ལས་བསམས་ཏེ་དེ་སྐད་སྨྲས། སྨྲས་པ། བཙུན་པ་རབ་འབྱོར་ཕྱིན་ཅི་ལོག་གིས་ཉོན་མོངས་པ་ཀུན་ནས་བསླང་བ་གང་ལགས་པ་དེ་ནི་བདེན་པ་མཐོང་བས་སྐྱེ་བར་འགྱུར་ཏེ། དེས་ན་ཕྱིན་ཅི་ལོག་ཡང་དག་པར་མཐོང་བས་བདེན་པ་མཐོང་ཞེས་བགྱིའོ། །དེ་ནས་སྒོ་གང་དེར་ཆོས་མཉན་པའི་ཕྱིར་ལྷ་འདུས་པ་དེ་དག་གིས་གནས་བརྟན་རབ་འབྱོར་ལ་རགས་པའི་ལུས་བསྟན་ནས་འདི་སྐད་ཅེས་སྨྲས་སོ། །བཙུན་པ་རབ་འབྱོར་ཁྱོད་ཀྱིས་ཆེ་ཞེ་འདིའི་སྤོབས་པ་ཐོས་པ་དེ་ནི་ཁྱོད་ཀྱིས་རྙེད་པ་ལེགས་པ་རྙེད་དོ། །སེམས་ཅན་གང་དག་གིས་བསྟན་པ་འདི་ཐོས་ནས་མོས་པ་དེ་དག་ཀྱང་རྙེད་པ་ལེགས་པར་རྙེད་པ་ཡིན་ནོ། །གང་དག་མོས་པ་དེ་དག་ནི་གང་ལས་ཀྱང་རྣམ་པར་གྲོལ་བ་མེད་དོ། །དེ་ཅིའི་ཕྱིར་ཞེ་ན། མོས་པ་མང་བ་རྣམས་ནི་གང་ལས་ཀྱང་རྣམ་པར་གྲོལ་བ་མེད་དོ། །མོས་པ་མང་བ་ལ་ནི་འཆིང་བ་མེད་པས་ན་དེ་ནི་གང་ལས་ཀྱང་རྣམ་པར་གྲོལ་བ་མེད་དོ། །དེ་ནས་བུད་མེད་དེས་ཡང་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །བཙུན་པ་རབ་འབྱོར་བསོད་སྙོམས་ལ་རྒྱུར་མི་བཞུད་དམ། བཤོས་བཅད་དེ་ཅི་བགྱི། སྨྲས་པ། ཆེ་ཞེ་བདག་གི་ཟས་ནི་འདི་ཉིད་ཡིན་ཏེ། ཆོས་མཉན་པ་འདི་ལྟ་བུས་ཆོག་གོ །ཆེ་ཞེ་གང་ཆོས་གོས་དང་བསོད་སྙོམས་ཀྱི་ཕྱིར་ཡིད་མི་བདེ་བ་སྐྱེ་བ་དེ་ནི་ཆོས་འདོད་པ་མ་ཡིན་ནོ། །གང་རྙེད་པ་དང་། བཀུར་སྟི་དང་། ཚིགས་སུ་བཅད་པ་འདོད་པ་དེ་ནི་ཆོས་འདོད་པ་མ་ཡིན་ནོ། །གང་ལུས་དང་། སྲོག་དང་། བསོད་སྙོམས་འདོད་པ་དེ་ནི་ཆོས་འདོད་པ་མ་ཡིན་ནོ། །གང་ཐ་ན་ལེགས་སོ་ཞེས་བྱ་བ་འདོད་པ་དེ་ཡང་ཆོས་འདོད་པ་མ་ཡིན་ནོ། །སྨྲས་པ། ཆེ་ཞེ་རིགས་ཀྱི་བུའམ་རིགས་ཀྱི་བུ་མོ་དག་ཆོས་འདོད་པ་ཇི་ལྟ་བུ་ཡིན། སྨྲས་པ། བཙུན་པ་རབ་འབྱོར་གང་འདོད་པ་ལ་མི་སྲེད་པ་དེ་ནི་ཆོས་འདོད་པའོ། །གང་མིག་དང་གཟུགས་མི་འདོད་པ་དང་། རྣ་བ་དང་།
སྒྲ་དང་། སྣ་དང་། དྲི་དང་། ལྕེ་དང་། རོ་དང་། ལུས་དང་། རེག་བྱ་དང་། ཡིད་དང་། ཆོས་མི་འདོད་པ་དེ་ནི་ཆོས་འདོད་པའོ། །གང་ཆོས་ཅི་ལ་ཡང་མི་རྟེན་པ་དེ་ནི་ཆོས་འདོད་པའོ། །བཙུན་པ་རབ་འབྱོར་གཞན་ཡང་གང་དག་ཕུང་པོ་དང་། ཁམས་དང་། སྐྱེ་མཆེད་མི་འདོད་པ་དེ་ནི་ཆོས་འདོད་པའོ། །གང་འདོད་པ་དང་། གཟུགས་དང་། གཟུགས་མེད་པ་མི་འདོད་པ་དེ་ནི་ཆོས་འདོད་པའོ། །གང་དམིགས་པའི་མཚན་མ་ལ་དམིགས་པ་མི་འདོད་པ་དེ་ནི་ཆོས་འདོད་པའོ། །དེ་ནས་ཚེ་དང་ལྡན་པ་རབ་འབྱོར་གྱིས་བུད་མེད་དེ་ལ་འདི་སྐད་ཅེས་སྨྲས་སོ། །ཆེ་ཞེ་བཟོད་པར་གྱིས་ཤིག །བདག་སྒོ་གང་འདི་ནས་འགྲོའོ། །བུད་མེད་དེས་སྨྲས་པ། བཙུན་པ་རབ་འབྱོར་དཔེར་ན་སའི་ཁམས་ལ་བཟོད་པ་གསོལ་མི་འཚལ་བ་དེ་བཞིན་དུ་བཙུན་པ་རབ་འབྱོར་གང་གི་སེམས་ས་དང་འདྲ་བ་དེ་ལ་ནི་བཟོད་པ་གསོལ་མི་འཚལ་ལོ། །བཙུན་པ་རབ་འབྱོར་ཆུ་ལ་བཟོད་པ་གསོལ་མི་འཚལ་བ་དེ་བཞིན་དུ་གང་གི་སེམས་ཆུ་དང་འདྲ་བ་དེ་ལ་ནི་བཟོད་པ་གསོལ་མི་འཚལ་ལོ། །བཙུན་པ་རབ་འབྱོར་མེ་དང་། རླུང་དང་། ནམ་མཁའ་ལ་བཟོད་པ་གསོལ་མི་འཚལ་བ་དེ་བཞིན་དུ་གང་གི་སེམས་མེ་དང་། རླུང་དང་། ནམ་མཁའ་དང་འདྲ་བ་དེ་ལ་ནི་བཟོད་པ་གསོལ་མི་འཚལ་ལོ། །བཙུན་པ་རབ་འབྱོར་གྲུ་དང་། སྟེགས་དང་། ཟམ་པ་དང་། ལམ་པོ་ཆེ་ལ་བཟོད་པ་གསོལ་མི་འཚལ་བ་དེ་བཞིན་དུ་བཙུན་པ་རབ་འབྱོར་གང་གི་སེམས་གྲུ་དང་། སྟེགས་དང་། ཟམ་པ་དང་། ལམ་པོ་ཆེ་དང་འདྲ་བ་དེ་ལ་ནི་བཟོད་པ་གསོལ་མི་འཚལ་ལོ། །བཙུན་པ་རབ་འབྱོར་བྱིས་པ་རྣམས་ལ་ནི་བཟོད་པ་གསོལ་འཚལ་གྱི་འཕགས་པ་རྣམས་ལ་ནི་བཟོད་པ་གསོལ་མི་འཚལ་ལོ། །བཙུན་པ་རབ་འབྱོར་གང་དག་ལ་གནོད་སེམས་དང་། ཁྲོ་བ་དང་། བག་ལ་ཉལ་སྐྱེ་བ་དེ་དག་ལ་ནི་བཟོད་པ་གསོལ་འཚལ་གྱི། གང་དག་ལ་མི་སྐྱེ་བ་དེ་དག་ལ་ནི་བཟོད་པ་གསོལ་མི་འཚལ་ལོ། །བཙུན་པ་རབ་འབྱོར་དཔེར་ན་མེ་འབར་བ་ནི་ཞི་བར་བགྱི་འཚལ་གྱི། མེ་མི་འབར་བ་ནི་ཞི་བར་བགྱི་མི་འཚལ་བ་དེ་བཞིན་དུ་བཙུན་པ་རབ་འབྱོར་གང་དག་གི་ཉོན་མོངས་པ་འབར་བ་དེ་དག་ལ་ནི་བཟོད་པ་གསོལ་འཚལ་གྱི། གང་དག་ཉོན་མོངས་པ་མེད་པ་དེ་དག་ལ་ནི་བཟོད་པ་
གསོལ་མི་འཚལ་ལོ། །དེ་ནས་ཚེ་དང་ལྡན་པ་རབ་འབྱོར་གྱིས་བུད་མེད་དེ་ལ་འདི་སྐད་ཅེས་སྨྲས་སོ། །ཆེ་ཞེ་ཁྱོད་ཅི་ཞིག་འདོད་ན་འདི་ལྟར་སེང་གེའི་སྒྲ་སྒྲོགས། སྨྲས་པ། བཙུན་པ་རབ་འབྱོར་གང་འདོད་པ་མཆིས་པ་དེས་ནི་སེང་གེའི་སྒྲ་སྒྲོགས་པར་མི་ནུས་སོ། །གང་དག་ཅི་ཡང་མི་འདོད་པ་དེ་དག་ནི་སེང་གེའི་སྒྲ་སྒྲོགས་པར་བགྱིད་དོ། །དེ་ཅིའི་སླད་དུ་ཞེ་ན། དམིགས་པ་མཆིས་པ་ལ་ནི་འདོད་པ་མཆིས་ལ། གང་ལ་དམིགས་པ་མ་མཆིས་པ་དེ་ལ་ནི་སེང་གེའི་སྒྲ་ཅི་ཡང་མ་མཆིས་སོ། །འཇིག་ཚོགས་ལ་ལྟ་བ་མཆིས་པ་ལ་ནི་འདོད་པ་མཆིས་ལ། གང་ལ་ལྟ་བའི་རྣམ་པ་མ་མཆིས་པ་དེ་ལ་ནི་སེང་གེའི་སྒྲ་ཅི་ཡང་མ་མཆིས་སོ། །བཙུན་པ་རབ་འབྱོར་གཞན་ཡང་ཅི་ཞིག་བཞེད་པ་ལས་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་བར་འགྱུར། སྨྲས་པ། ཆེ་ཞེ་འདོད་པ་ཡོད་པ་ལ་ནི་རྣམ་པར་གྲོལ་བ་ཅི་ཡང་མེད་དོ། །སྨྲས་པ། བཙུན་པ་རབ་འབྱོར་གང་བཞེད་པས་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་བ་དེ་བཞིན་དུ་བདག་ཀྱང་དེ་ལྟ་བུའི་འཇུག་པས་ཞུགས་སོ། །བདག་ཀྱང་དེ་ལྟ་བུའི་རྣམ་པར་གྲོལ་བའི་འཇུག་པས་ཞུགས་སོ། །བདག་ཀྱང་དེ་ལྟ་བུའི་ཆོས་ཀྱི་དབྱིངས་ཀྱི་འཇུག་པས་ཞུགས་སོ། །དེ་ནས་ཚེ་དང་ལྡན་པ་རབ་འབྱོར་གྱིས་བུད་མེད་དེ་ལ་འདི་སྐད་ཅེས་སྨྲས་སོ། །ཆེ་ཞེ་ཐེག་པའི་རྣམ་པ་གང་ཡིན་པ་རྣམས་དང་། རྟགས་གང་ཡིན་པ་རྣམས་དང་། མཚན་མ་གང་དག་ཡིན་པ་འདི་ལྟ་བུ་དག་བདག་ལ་སྟོན་པ་ལས་ན། ཁྱོད་ནི་ཐེག་པ་ཆེན་པོ་ལ་ཡང་དག་པར་ཞུགས་པ་ཡིན་པར་ཐེ་ཙོམ་མེད་དོ། །བུད་མེད་དེས་སྨྲས་པ། བཙུན་པ་རབ་འབྱོར་ཐེག་པ་ཆེན་པོའི་རྣམ་པ་རྣམས་དང་། རྟགས་རྣམས་དང་། མཚན་མ་རྣམས་མཁྱེན་ཏམ། སྨྲས་པ། ཆེ་ཞེ་ཉན་ཐོས་ཀྱིས་ནི་མ་ཐོས་པར་ཐེག་པ་ཆེན་པོའི་རྣམ་པ་རྣམས་དང་། རྟགས་རྣམས་དང་། མཚན་མ་རྣམས་ཤེས་པར་མི་ནུས་ཀྱི། ཆེ་ཞེ་ཐེག་པ་ཆེན་པོའི་རྣམ་པ་རྣམས་དང་། རྟགས་རྣམས་དང་། མཚན་མ་རྣམས་ཤོད་ཅིག །སྨྲས་པ། བཙུན་པ་རབ་འབྱོར་ཐེག་པ་ཆེན་པོ་ཞེས་བགྱི་བ་དེ་ནི་ཆགས་པ་མ་མཆིས་པའི་ཐེག་པ་དང་། སྒྲིབ་པ་མ་མཆིས་པའི་ཡེ་ཤེས་དང་། ཐ་དད་པ་མ་མཆིས་
པའི་ཡེ་ཤེས་ཀྱི་ཚིག་བླ་དགས་སོ། །བཙུན་པ་རབ་འབྱོར་དཔེར་ན་ལས་སུ་འགྲོ་བའི་ལྷའི་བུ་རྣམས་དང་། ཟླ་བ་དང་། ཉི་མའི་གཞལ་མེད་ཁང་རྣམས་ནི་སེམས་ཅན་རྣམས་ལ་སྣང་བར་བགྱི་བའི་སླད་དུ་ཆགས་པ་མ་མཆིས་པ་དང་། སྒྲིབ་པ་མ་མཆིས་པ་དང་། རྒྱུན་མི་འཆད་པར་ནམ་མཁའ་ལ་ཤུགས་ཀྱིས་མཆི་བ་དེ་བཞིན་དུ། བཙུན་པ་རབ་འབྱོར་ཐེག་པ་ཆེན་པོ་ལ་ཡང་དག་པར་ཞུགས་པའི་སྐྱེས་བུ་དམ་པ་རྣམས་ནི་སེམས་ཅན་ཐམས་ཅད་ལ་ཆོས་ཀྱི་སྣང་བ་བགྱི་བའི་སླད་དུ་ཆགས་པ་མ་མཆིས་པ་དང་། སྒྲིབ་པ་མ་མཆིས་པ་དང་། རྒྱུན་མི་འཆད་པར་ཕ་རོལ་ཏུ་ཕྱིན་པ་དྲུག་པོ་དག་གི་ཤུགས་ཀྱིས་མཆིའོ། །བཙུན་པ་རབ་འབྱོར་དཔེར་ན་གླིང་བཞི་ནི་འཁོར་ལོས་སྒྱུར་པའི་རྒྱལ་པོའི་ལགས་ཏེ། དེ་གང་དང་གང་དུ་མཆི་བ་དེ་དང་དེར་གླིང་བཞི་པའི་མི་རྣམས་ཀྱིས་བསྟེན་པའི་འོས་སུ་འགྱུར་བ་ལགས་ལ། འཁོར་ལོས་སྒྱུར་བའི་རྒྱལ་པོ་ཡང་སེམས་ཅན་དེ་དག་ལ་བསམ་པ་མི་མཉམ་པའི་རྣམ་པ་མ་མཆིས་ཏེ་བྱམས་པར་བགྱིད་པ་དེ་བཞིན་དུ། བཙུན་པ་རབ་འབྱོར་ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའ་རྣམས་ནི་གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་ཐམས་ཅད་དུ་གང་དང་གང་དུ་མཆི་བ་དེ་དང་དེར་སེམས་ཅན་ཐམས་ཅད་ཀྱིས་བསྟེན་པའི་འོས་སུ་གྱུར་པ་ལགས་ལ། སེམས་ཅན་ཐམས་ཅད་ལ་སེམས་སྙོམས་ཤིང་ཐ་དད་དུ་སྤྱོད་པ་མ་མཆིས་སོ། །བྱང་ཆུབ་སེམས་དཔའ་རྣམས་ནི་བསྡུ་བ་རྣམས་བཞིས་སྡུད་པ་ན་སེམས་ཅན་རྣམས་ལ་བྱམས་པ་ཐ་དད་པ་མ་མཆིས་ཏེ་དེས་ན་ཐེག་པ་ཆེན་པོ་ཞེས་བགྱིའོ། །བཙུན་པ་རབ་འབྱོར་ཐེག་པ་ཆེན་པོ་ཞེས་བགྱི་བ་ནི་ཐེག་པ་དེ་ཆེ་བ་ལགས་ལ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་རྣམས་དང་། མི་དང་མི་མ་ཡིན་པ་རྣམས་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་རྣམས་དང་། མཁས་པ་རྣམས་དང་། སྐྱེས་བུ་དམ་པ་རྣམས་དང་། ཤེས་པ་རྣམས་དང་། ཡང་དག་པར་སོང་བ་རྣམས་དང་། ཡང་དག་པར་ཞུགས་པ་རྣམས་
ཀྱིས་མཆོད་པ་ལགས་ཏེ། དེས་ན་ཐེག་པ་ཆེན་པོ་ཞེས་བགྱིའོ། །ཐེག་པ་དེ་ནི་མ་སྐྱེས་པའི་ཕྱིར་མི་ཟད་པའོ། །ཐེག་པ་དེ་ནི་སངས་རྒྱས་ཀྱི་རིགས་མི་འཆད་པའོ། །ཐེག་པ་དེ་ནི་ཆོས་ཀྱི་རིགས་སྡུད་པའོ། །ཐེག་པ་དེ་ནི་དགེ་འདུན་གྱི་རིགས་ཡོངས་སུ་འཛིན་པའོ། །ཐེག་པ་དེ་ནི་སེམས་ཅན་ཐམས་ཅད་ལ་གོ་སྐབས་འབྱེད་ཅིང་སྒྲིབ་པ་མེད་པའི་ཕྱིར་ཡངས་པའོ། །ཐེག་པ་དེ་ནི་ཕན་མ་མཆིས་པའི་ཕྱིར་འདུས་མ་བྱས་པའོ། །ཐེག་པ་དེ་ནི་ཕ་རོལ་ཏུ་ཕྱིན་པ་དྲུག་གིས་ཤིན་ཏུ་སྦྱང་བ་བྱས་པའོ། །ཐེག་པ་དེ་ནི་བསྡུ་བ་རྣམ་བཞིས་ལེགས་པར་བསྡུས་པའོ། །ཐེག་པ་དེ་ནི་འཕགས་པའི་ལམ་ཡན་ལག་བརྒྱད་པའི་རྗེས་སུ་འབྲང་བའི་ཕྱིར་ཤིན་ཏུ་ཡང་དག་པར་སོང་བའོ། །ཐེག་པ་དེ་ནི་ཞི་གནས་དང་། ལྷག་མཐོང་བསྒོམས་པས་བཞོན་པ་བཟང་པོ་ལྡན་པའོ། །ཐེག་པ་དེ་ནི་དྲན་པ་ཉེ་བར་གཞག་པ་དང་། བྱང་ཆུབ་ཀྱི་སེམས་མི་བརྗེད་པའི་ཕྱིར་ཁ་ལོ་སྒྱུར་བ་བཟང་པོའི་གནས་སོ། །ཐེག་པ་དེ་ནི་སྙིང་རྗེ་ཆེན་པོས་ཤིན་ཏུ་བརྟན་པའོ། །ཐེག་པ་དེ་ནི་ཐམས་ཅད་མཁྱེན་པ་ཉིད་ཀྱིས་ལེགས་པར་གནས་པའོ། །ཐེག་པ་དེ་ནི་བདུད་ཐམས་ཅད་ཕམ་པར་བྱས་པས་འཇིགས་པ་དང་བྲལ་བའོ། །ཐེག་པ་དེ་ནི་ཤེས་རབ་ཀྱི་སྣང་བ་ཡང་དག་པར་སྟོན་པའི་ཕྱིར་མུན་པ་དང་བྲལ་བའོ། །ཐེག་པ་དེ་ནི་དགེ་བའི་རྩ་བ་ཐམས་ཅད་སྡུད་ཅིང་སོགས་པས་ཤིན་ཏུ་འབྱོར་བའོ། །ཐེག་པ་དེ་ནི་ལྷ་དང་བཅས་པའི་འཇིག་རྟེན་གྱིས་ཕྱག་བགྱིས་པའོ། ཐེག་པ་དེ་ནི་ཕས་ཀྱི་རྒོལ་བ་ཐམས་ཅད་ཀྱིས་མི་རྫི་བའོ། །ཐེག་པ་དེ་ནི་ཉན་ཐོས་དང་རང་སངས་རྒྱས་ཐམས་ཅད་ཀྱིས་རྟོགས་པར་དཀའ་བའོ། །ཐེག་པ་དེ་ནི་མ་དད་པ་རྣམས་དགའ་བར་བགྱིད་པའོ། །ཐེག་པ་དེ་ནི་སྡང་བ་རྣམས་བྱམས་པར་བགྱིད་པའོ། །ཐེག་པ་དེ་ནི་སེར་སྣ་ཅན་རྣམས་ཀྱི་གཏོང་བ་བགྱིད་པའོ། །ཐེག་པ་དེ་ནི་ཚུལ་ཁྲིམས་འཆལ་པ་རྣམས་ཀྱི་ཚུལ་ཁྲིམས་བགྱིད་པའོ། །ཐེག་པ་དེ་ནི་གནོད་སེམས་ཀྱི་སེམས་དང་ལྡན་པ་རྣམས་ཀྱི་བཟོད་པ་བགྱིད་པའོ། །ཐེག་པ་དེ་ནི་ལེ་ལོ་ཅན་རྣམས་ཀྱི་བརྩོན་འགྲུས་བགྱིད་པའོ། །ཐེག་པ་དེ་ནི་བརྗེད་ངས་པ་རྣམས་དྲན་པར་བགྱིད་པའོ། །ཐེག་པ་དེ་ནི་སེམས་རྣམ་པར་གཡེངས་
པ་རྣམས་ཉེ་བར་ཞི་བར་བགྱིད་པའོ། །ཐེག་པ་དེ་ནི་ཤེས་རབ་འཆལ་པ་རྣམས་ཀྱི་ཤེས་རབ་བགྱིད་པའོ། །ཐེག་པ་དེ་ནི་དབུལ་པོ་རྣམས་ཀྱི་ནོར་བགྱིད་པའོ། །ཐེག་པ་དེ་ནི་སྡུག་བསྔལ་བ་རྣམས་བདེ་བར་བགྱིད་པའོ། །ཐེག་པ་དེ་ནི་མཁས་པ་རྣམས་མཆོག་ཏུ་དགའ་བར་བགྱིད་པའོ། །ཐེག་པ་དེ་ནི་ཤེས་པ་རྣམས་དང་བར་བགྱིད་པ་སྟེ། དེས་ན་ཐེག་པ་ཆེན་པོ་ཞེས་བགྱིའོ། །དེ་ནས་ཚེ་དང་ལྡན་པ་རབ་འབྱོར་གྱིས་བུད་མེད་དེ་ལ་འདི་སྐད་ཅེས་སྨྲས་སོ། །ཆེ་ཞེ་ཁྱོད་ཀྱིས་ཐེག་པ་ཆེན་པོའི་རྣམ་པ་རྣམས་དང་། རྟགས་རྣམས་དང་། མཚན་མ་རྣམས་ལེགས་པར་སྨྲས་སོ། །བུད་མེད་དེས་སྨྲས་པ། བཙུན་པ་རབ་འབྱོར་ཐེག་པ་ཆེན་པོའི་རྣམ་པ་རྣམས་དང་། རྟགས་རྣམས་དང་། མཚན་མ་རྣམས་ནི་བསྐལ་པའམ། དེ་བས་ཆེས་ལྷག་པར་བདག་གིས་བཤད་དུ་ལགས་ཀྱང་མཐར་ཕྱིན་པར་མི་འགྱུར་རོ། །བཙུན་པ་རབ་འབྱོར་ཐེག་པ་ཆེན་པོ་ཇི་ལྟར་ཚད་མ་མཆིས་པ་དེ་བཞིན་དུ་རྣམ་པ་རྣམས་དང་། རྟགས་རྣམས་དང་། མཚན་མ་རྣམས་ཀྱང་ཚད་མ་མཆིས་སོ། །ཚེ་དང་ལྡན་པ་རབ་འབྱོར་གྱིས་བུད་མེད་དེ་ལ་གཞན་ཡང་འདི་སྐད་ཅེས་སྨྲས་སོ། །ཆེ་ཞེ་ཁྱོད་ཀྱིས་བདག་ལ་ཁྱོད་ཅི་ཞིག་འདོད་དེ་བསོད་སྙོམས་ལ་རྒྱུ་བར་བྱེད་ཅེས་གླགས་བཙལ་བ་དེ་ནི་དེ་བཞིན་གཤེགས་པ་ཆོས་ཀྱི་མངའ་བདག་ཉིད་ཀྱང་བསོད་སྙོམས་ལ་རྒྱུ་བ་མཛད་ན་ཁྱོད་ཀྱིས་དེ་བཞིན་གཤེགས་པ་ལ་ཡང་དེའི་གླགས་བཙལ་ལམ། བུད་མེད་དེས་སྨྲས་པ། བཙུན་པ་རབ་འབྱོར་གལ་ཏེ་དེ་བཞིན་གཤེགས་པ་ཐབས་གང་གིས་བསོད་སྙོམས་ལ་རྒྱུ་བ་མཛད་པ་མཁྱེན་པ་ལྟ་ན་དེ་སྤོབས་པར་མཛོད་ཅིག །རབ་འབྱོར་གྱིས་སྨྲས་པ། ཆེ་ཞེ་དེ་བཞིན་གཤེགས་པ་ཐབས་ཇི་ལྟ་བུ་ཞིག་གིས་བསོད་སྙོམས་ལ་རྒྱུ་བ་མཛད། བུད་མེད་དེས་སྨྲས་པ། བཙུན་པ་རབ་འབྱོར་དེ་བཞིན་གཤེགས་པ་ནི་དོན་གྱི་དབང་ཉི་ཤུ་རྩ་གཅིག་གཟིགས་ནས་བསོད་སྙོམས་ལ་རྒྱུ་བ་མཛད་དེ། ཉི་ཤུ་རྩ་གཅིག་པོ་གང་ཞེ་ན། གཟུགས་ཀྱི་སྐུ་བཟང་པོ་བསྟན་པའི་ཕྱིར་དེ་བཞིན་གཤེགས་པ་བསོད་སྙོམས་ལ་རྒྱུ་བ་མཛད་དེ། དེར་སེམས་ཅན་གང་དག་གིས་དེ་བཞིན་གཤེགས་པའི་སྐུ་སྐྱེས་བུ་ཆེན་པོའི་མཚན་
སུམ་ཅུ་རྩ་གཉིས་ཀྱིས་བརྒྱན་པ་རྣམ་པ་ཐམས་ཅད་ཀྱི་མཆོག་དང་ལྡན་པ་མཐོང་བ་དེ་དག །དེ་བཞིན་གཤེགས་པའི་གཟུགས་ཀྱི་སྐུའི་མཚན་འཐོབ་པར་བགྱི་བའི་ཕྱིར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བགྱིད་དེ། བཙུན་པ་རབ་འབྱོར་དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར་གཞན་ཡང་དེ་བཞིན་གཤེགས་པ་གྲོང་དང་། གྲོང་ཁྱེར་དུ་བསོད་སྙོམས་ལ་གཤེགས་ན་སེམས་ཅན་ལོང་བ་རྣམས་ཀྱིས་ནི་གཟུགས་རྣམས་མཐོང་བར་འགྱུར། སེམས་ཅན་འོན་པ་རྣམས་ཀྱིས་ནི་སྒྲ་ཐོས་པར་འགྱུར། སེམས་ཅན་སྨྱོན་པ་རྣམས་ཀྱིས་ནི་དྲན་པ་རྙེད་པར་འགྱུར། སེམས་ཅན་གཅེར་བུ་རྣམས་ཀྱིས་ནི་གོས་རྙེད་པར་འགྱུར། སེམས་ཅན་བཀྲེས་པ་རྣམས་ཀྱིས་ནི་ཟས་རྙེད་པར་འགྱུར། སེམས་ཅན་སྐོམ་པ་རྣམས་ཀྱིས་ནི་བཏུང་བ་རྙེད་པར་འགྱུར་ལ། སེམས་ཅན་སུ་ལ་ཡང་འདོད་ཆགས་སམ། ཞེ་སྡང་ངམ། གཏི་མུག་དང་། ཕྲག་དོག་དང་། སེར་སྣ་དང་། ཁྲོ་བ་དང་། རྒྱགས་པ་དང་། འཆབ་པ་དང་། ཡོངས་སུ་གདུང་བའི་གནོད་པ་མ་མཆིས་སོ། །སེམས་ཅན་ཐམས་ཅད་བྱམས་པའི་སེམས་དང་ལྡན་ཏེ་གཅིག་ལ་གཅིག་ཕ་མའི་འདུ་ཤེས་སྐྱེད་པར་འགྱུར་ཏེ། དེར་སེམས་ཅན་མང་པོས་དེ་བཞིན་གཤེགས་པ་གྲོང་དང་། གྲོང་ཁྱེར་དུ་གཤེགས་པའི་ཡོན་ཏན་ཕུན་སུམ་ཚོགས་པ་དེ་མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བགྱིད་དེ། བཙུན་པ་རབ་འབྱོར་དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར་གཞན་ཡང་དེ་བཞིན་གཤེགས་པ་ནི་གྲོང་དང་། གྲོང་ཁྱེར་དང་། གྲོང་རྡལ་དུ་གཤེགས་ན། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་རྣམས་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་རྣམས་མཆོད་པའི་ལས་བགྱི་བའི་སླད་དུ་ཕྱི་བཞིན་དུ་འབྲང་སྟེ། དེར་སངས་རྒྱས་ཀྱི་མཐུས་མི་རྣམས་ཀྱིས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་།
ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་རྣམས་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་རྣམས་བཅོམ་ལྡན་འདས་ལ་མཆོད་པ་བགྱིད་པ་མཐོང་ནས་དེ་དག་དེ་བཞིན་གཤེགས་པ་ལ་འདོད་པ་སྐྱེ་སྟེ། དེ་བཞིན་གཤེགས་པ་ནི་ངོ་མཚར་ཆེ་བ་ནས་རྨད་དུ་བྱུང་བའི་བར་གྱི་ཆོས་དང་ལྡན་ནོ་སྙམ་སྟེ། དེ་དག་གིས་དེ་བཞིན་གཤེགས་པ་ལ་འདོད་པ་བསྐྱེད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བགྱིད་དེ། བཙུན་པ་རབ་འབྱོར་དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར་གཞན་ཡང་དེ་བཞིན་གཤེགས་པ་བསོད་སྙོམས་ལ་རྒྱུ་བ་མཐོང་ན་སེམས་ཅན་དཔག་ཏུ་མེད་པ་ལོངས་སྤྱོད་དང་དབང་ཕྱུག་གིས་རྒྱགས་ཤིང་མྱོས་པ་དང་། གཟུགས་དང་། རིགས་དང་། འཚོ་བ་དང་། ནད་མེད་པས་རྒྱགས་ཤིང་མྱོས་པ་འདི་རྣམས་འདི་སྙམ་དུ་སེམས་ཏེ། འདི་འཁོར་ལོས་སྒྱུར་བའི་རྒྱལ་སྲིད་བོར་ནས་རབ་ཏུ་བྱུང་ཞིང་བསོད་སྙོམས་ལ་རྒྱུ་ཞེས་གྲགས་ཏེ། དེས་ཀྱང་འདི་ལྟར་ང་རྒྱལ་བཅོམ་ན། ཀྱེ་མ་བདག་ཅག་གིས་ཀྱང་ང་རྒྱལ་གཞོམ་པར་བྱའོ་སྙམ་སྟེ། དེ་དག་གིས་དེ་ལྟ་བུ་མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བགྱིད་དེ། བཙུན་པ་རབ་འབྱོར་དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར་གཞན་ཡང་དེ་བཞིན་གཤེགས་པ་གྲོང་དང་། གྲོང་ཁྱེར་དུ་བསོད་སྙོམས་ལ་རྒྱུ་བ་ན། ལྷ་གཟི་བྱིན་ཆེ་བ་གཟི་བྱིན་ཆེ་བ་རྣམས་ཀྱིས་དགོངས་པ་ལ་བལྟས་ནས་འདི་སྐད་དུ་འདི་ལ་ནི་བཀྲེས་པ་དང་། སྐོམ་པའི་གནོད་པ་ཡང་མེད་ལ། ལུས་ཉམ་ཆུང་བ་ཡང་མེད་ཀྱི། སེམས་ཅན་རྣམས་ལ་སྙིང་བརྩེ་བ་ཆེད་ཆེར་བྱས་ནས་བསོད་སྙོམས་ལ་རྒྱུ་བ་མཛད་ཀྱིས། བདག་ཅག་ཀྱང་དེ་བཞིན་དུ་སེམས་ཅན་རྣམས་ལ་སྙིང་བརྩེ་བ་ཆེད་ཆེར་བྱ་བའི་སེམས་ཀྱིས་བསོད་སྙོམས་ལ་རྒྱུ་བར་བྱའོ་ཞེས་སྨྲ་ཞིང་དེ་དག་གིས་དེ་ལྟ་བུ་མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བགྱིད་དེ། བཙུན་པ་རབ་འབྱོར་དེ་བཞིན་གཤེགས་པས་དོན་གྱི་དབང་དེ་གཟིགས་
ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར་གཞན་ཡང་སེམས་ཅན་ལེ་ལོ་ཅན་སྙོམ་ལས་ཅན་དེ་བཞིན་གཤེགས་པ་ལ་བལྟ་བ་དང་། ཕྱག་འཚལ་བ་དང་། བསྙེན་བཀུར་བགྱི་བའི་སླད་དུ་མི་མཆི་བ་དེ་དག་དེ་བཞིན་གཤེགས་པ་གྲོང་དང་། གྲོང་ཁྱེར་དུ་གཤེགས་ན་འབད་མི་འཚལ་བར་མཐོང་བར་འགྱུར་ལ། མཐོང་ནས་ཀྱང་དགའ་བ་དང་། མཆོག་ཏུ་དགའ་བ་ཆེན་པོ་འཐོབ་པར་འགྱུར་ཏེ། དགའ་བ་དང་མཆོག་ཏུ་དགའ་བ་ཐོབ་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བགྱིད་དེ། བཙུན་པ་རབ་འབྱོར་དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར་གཞན་ཡང་སངས་རྒྱས་བཅོམ་ལྡན་འདས་རྣམས་ནི་མཐོང་ན་དོན་ཡོད་པ་སྟེ། ཐ་ན་སེམས་ཅན་གང་དག་གིས་སེམས་ཀྱི་སྐད་ཅིག་གཅིག་ཙམ་ལ་ཞི་བའི་མིག་གིས་དེ་བཞིན་གཤེགས་པ་མཐོང་ན་ཡང་དེ་འབའ་ཞིག་གིས་ཀྱང་དེ་དག་ཐམས་ཅད་ཀྱི་ཡོངས་སུ་མྱ་ངན་ལས་འདའ་བར་འགྱུར་བའི་བར་གྱི་རྒྱུར་འགྱུར་ཏེ། བཙུན་པ་རབ་འབྱོར་དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར་གཞན་ཡང་དེ་བཞིན་གཤེགས་པ་གྲོང་དང་། གྲོང་ཁྱེར་དུ་གཤེགས་ན་སེམས་ཅན་བཅིང་པས་བཅིངས་པ་རྣམས་བཅིང་བ་ལས་གྲོལ་བར་འགྱུར་ལ། དེ་དག་གིས་དེ་བཞིན་གཤེགས་པའི་མཐུས་བདག་ཅག་བཅིང་བ་འདི་དག་ལས་གྲོལ་བར་གྱུར་ཏོ། །ཞེས་ཤེས་ཏེ་དེ་བཞིན་གཤེགས་པ་ལ་བྱས་པ་གཟོ་བ་དང་། བྱས་པ་ཚོར་བར་གྱུར་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བགྱིད་དེ། བཙུན་པ་རབ་འབྱོར་དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར་གཞན་ཡང་རིགས་ཀྱི་བུའམ། རིགས་ཀྱི་བུ་མོ་དེ་བཞིན་གཤེགས་པའི་ཡོན་ཏན་བསྔགས་པ་ཐོས་ན། ཀྱེ་མ་མ་ལ་བདག་ཅག་གིས་དེ་བཞིན་གཤེགས་པ་ལ་བསོད་སྙོམས་དབུལ་བར་བྱའོ། །ཆོས་གོས་དབུལ་བ་དང་། མཆོད་པ་དང་། བཀུར་སྟིར་བྱ་བ་ཅི་ཡང་རུང་བས་མཆོད་པ་བྱའོ་སྙམ་དུ་སེམས་པ་དེ་ལྟ་བུ་དག་མཆིས་
ལ་དེ་དག་ལས་ཀྱང་མས་བསྲུངས་པའམ། ཕས་བསྲུངས་པའམ། མིང་པོས་བསྲུངས་པའམ། ཕུ་ནུ་མོས་བསྲུངས་པའམ། ཁྱིམ་ཐབ་ཀྱིས་བསྲུངས་པའམ། མཛའ་བོས་བསྲུངས་པ་རྣམས་དེ་དང་དེའི་རྐྱེན་གྱིས་དེ་བཞིན་གཤེགས་པའི་ཐད་དུ་མཆི་མི་ནུས་ཏེ། དེ་དག་གིས་དེ་བཞིན་གཤེགས་པ་གྲོང་དང་། གྲོང་ཁྱེར་དུ་གཤེགས་པ་མཐོང་ན་ཚིམ་ཞིང་མགུ་ལ་རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་དེ་བཞིན་གཤེགས་པ་ལ་བསོད་སྙོམས་དབུལ་བར་བགྱིད་དོ། །ཕུལ་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བགྱིད་དེ། བཙུན་པ་རབ་འབྱོར་དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར་གཞན་ཡང་དེ་བཞིན་གཤེགས་པ་ལ་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱིས་ལྷུང་བཟེད་ཕུལ་ནས་དེ་བཞིན་གཤེགས་པས་བཞེས་པ་མཆིས་ཏེ། དེར་སེམས་ཅན་ལོངས་སྤྱོད་ཆུང་བ་དང་། ཆུང་ངུ་སྦྱིན་པར་འཚལ་བ་གང་དག་ལགས་པ་དེ་དག་གིས་ནི་དེ་བཞིན་གཤེགས་པའི་ལྷུང་བཟེད་གང་བར་མཐོང་ངོ་། །སེམས་ཅན་ལོངས་སྤྱོད་ཆེ་ཞིང་མང་དུ་སྦྱིན་པར་འཚལ་བ་གང་དག་ལགས་པ་དེ་དག་གིས་ནི་དེ་བཞིན་གཤེགས་པའི་ལྷུང་བཟེད་མ་གང་བར་མཐོང་ནས་དེ་དག་གིས་ཇི་ཙམ་དགོས་པ་ཕུལ་ཏེ། ལྷུང་བཟེད་གང་བར་བགྱིས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བགྱིད་དེ། བཙུན་པ་རབ་འབྱོར་དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར་གཞན་ཡང་དེ་བཞིན་གཤེགས་པའི་ལྷུང་བཟེད་ཀྱི་ནང་དུ་བཅའ་བ་དང་། བཟའ་བ་དང་། མྱང་བར་བྱ་བ་རོ་བརྒྱ་དང་ལྡན་པ་བླུགས་ན། བཅའ་བ་དང་། བཟའ་བ་དང་། མྱང་བར་བྱ་བ་དེ་དག་འདྲེ་བར་མི་འགྱུར་ཏེ། ཇི་ལྟར་སྣོད་ཐ་དད་པའི་ནང་ན་མཆིས་པ་དེ་ཁོ་ན་བཞིན་དུ་མཆིས་ཏེ། དེར་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་མང་པོ་དག་གིས་དེ་བཞིན་གཤེགས་པའི་ལྷུང་བཟེད་ཀྱི་ཆོ་འཕྲུལ་དེ་ལྟ་བུ་མཐོང་ནས་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བགྱིད་དེ། བཙུན་པ་རབ་འབྱོར་དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར་གཞན་ཡང་དེ་བཞིན་གཤེགས་པའི་ལྷུང་བཟེད་ཀྱི་ནང་དུ་དགེ་སློང་ཐམས་ཅད་ཀྱི་ཟས་བླུགས་ཀྱང་དེས་ལྷུང་བཟེད་དེ་མ་གང་བའམ། གང་བར་ཡང་མི་འགྱུར་ཏེ། དེར་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་མང་པོ་དག་གིས་དེ་བཞིན་གཤེགས་པའི་ལྷུང་བཟེད་ཀྱི་ཆོ་འཕྲུལ་དེ་ལྟ་བུ་མཐོང་སྟེ་ངོ་མཚར་དུ་གྱུར་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བགྱིད་དེ། དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར་གཞན་ཡང་དེ་བཞིན་གཤེགས་པའི་སྐུ་ནི་གཅིག་ཏུ་མཁྲེགས་ཤིང་ཁོང་སྟོང་མ་ལགས་ལ་རྡོ་རྗེ་ལྟར་མཁྲེགས་པ་སྟེ། དེ་བཞིན་གཤེགས་པའི་སྐུ་ལ་ཕོ་བའམ། ལོང་ཀ་ཡང་མི་མངའ། ཕྱིས་ཡང་མི་མངའ། གཅིན་ཡང་མི་མངའ་མོད་ཀྱི། འོན་ཀྱང་བསོད་སྙོམས་ལ་རྒྱུ་བ་དང་། བཤོས་གསོལ་བ་དེ་ལྟར་ཡང་གདའ་ལ་ཁོང་དུ་མིད་པ་ཡང་མི་མངའ་སྟེ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་མང་པོ་དག་གིས་དེ་མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བགྱིད་དེ། བཙུན་པ་རབ་འབྱོར་དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དེ། བཙུན་པ་རབ་འབྱོར་གཞན་ཡང་དེ་བཞིན་གཤེགས་པ་གྲོང་དང་། གྲོང་ཁྱེར་དུ་གཤེགས་ན་སེམས་ཅན་མང་པོ་དག་གིས་བསོད་སྙོམས་མང་པོའམ། ཉུང་ངུའམ། བཟང་པོའམ། ངན་པ་ཡང་རུང་སྟེ། དབུལ་བར་བགྱིད་ལ། སེམས་ཅན་དེ་དག་གིས་ཀྱང་དེ་བཞིན་གཤེགས་པ་ལ་བསྐྱེད་པའི་ཡོན་ཏན་རྣམས་མཐར་ཐུག་པར་བགྱིད་མི་ནུས་ཏེ། ལྷ་དང་མི་རྣམས་ཀྱི་ཕུན་སུམ་ཚོགས་པ་མང་པོ་དག་ཀྱང་ཉམས་སུ་མྱོང་བར་འགྱུར་
ལ་ཡོན་ཏན་དེ་ཡང་ཡོངས་སུ་མྱ་ངན་ལས་འདའ་བར་འགྱུར་བའི་བར་དུ་བས་པར་མི་འགྱུར་ཏེ། བཙུན་པ་རབ་འབྱོར་དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར་གཞན་ཡང་དེ་བཞིན་གཤེགས་པ་ནི་རྟག་ཏུ་མཉམ་པར་བཞག་པ་སྟེ་ཏིང་ངེ་འཛིན་ལས་ཉམས་པ་མི་མངའ་ལ། དེར་ཚངས་པའམ། དེ་མ་ཡིན་པའི་གཟུགས་ན་སྤྱོད་པའི་ལྷ་གཟི་བྱིན་ཆེ་བ་གཟི་བྱིན་ཆེ་བ་རྣམས་ཀྱིས་དེ་བཞིན་གཤེགས་པ་བསོད་སྙོམས་ལ་རྒྱུ་ཞིང་ཏིང་ངེ་འཛིན་ལས་ཀྱང་མི་གཡོ་བ་མཐོང་ན་དེ་དག་འདི་སྙམ་དུ་སེམས་ཏེ། འདི་ནི་སེམས་ཅན་གྱི་དོན་ལ་བརྩོན་པ་ཡིན་གྱི། ཟས་འདོད་པ་མ་ཡིན་པར་ཐེ་ཙོམ་མེད་དོ་སྙམ་ནས་དེ་དག་དགའ་བ་ཐོབ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་བགྱིད་དེ། བཙུན་པ་རབ་འབྱོར་དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར་གལ་ཏེ་དེ་བཞིན་གཤེགས་པ་བསོད་སྙོམས་ལ་རྒྱུ་བ་མི་མཛད་དེ། ཞལ་ཟས་ཀྱང་མི་གསོལ་བར་གྱུར་ན་ནི་དེ་ལྟ་ན་རིགས་ཀྱི་བུ་དང་། རིགས་ཀྱི་བུ་མོ་ལེགས་པར་གསུངས་པའི་ཆོས་འདུལ་བ་ལ་ཁྱིམ་ནས་ཁྱིམ་མེད་པར་རབ་ཏུ་བྱུང་བ་དེ་དག་ཀྱང་ཟས་མི་ཟ་བ་ལ་ཞུགས་ཏེ། བདག་ཅག་ཀྱང་བསོད་སྙོམས་ལ་རྒྱུ་བར་མི་བྱ། ཟས་ཀྱང་བཟའ་བར་མི་བྱའོ་སྙམ་ནས་དེ་དག་ཀྱང་བཀྲེས་ཤིང་ཉམ་ཆུང་བར་གྱུར་པས་ཁྱད་པར་ཐོབ་པར་རྟོགས་པར་མི་ནུས་ཏེ། དེ་དག་གིས་མ་འོངས་པ་ན་ཁྱད་པར་འཐོབ་པའི་བསམ་པ་རྫོགས་པར་མཛད་པའི་ཕྱིར་ཡང་དེ་བཞིན་གཤེགས་པ་བསོད་སྙོམས་ལ་རྒྱུ་ཞིང་གསོལ་བར་མཛད་དོ། །བཙུན་པ་རབ་འབྱོར་དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར་གཞན་ཡང་དེ་བཞིན་གཤེགས་པ་ནི་འཕགས་པའི་རིགས་རྣམས་ཡང་དག་པར་ཡོངས་སུ་གཟུང་བའི་ཕྱིར་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར་གཞན་ཡང་དེ་བཞིན་གཤེགས་པ་ནི་སྐྱེ་བོ་ཕྱི་མ་རྣམས་ལ་ཐུགས་བརྩེ་བའི་ཕྱིར་བསོད་སྙོམས་ལ་རྒྱུ་སྟེ། ཕྱི་མའི་དུས་ན་བྲམ་ཟེ་དང་། ཁྱིམ་བདག་མ་དད་པ་རྣམས་འདི་སྐད་དུ་གལ་ཏེ་འདི་དག་
གི་སྟོན་པ་ཉིད་ཀྱིས་ཀྱང་བསོད་སྙོམས་ལ་རྒྱུ་བ་མ་བྱས་ན་འདི་དག་ཅིའི་ཕྱིར་བསོད་སྙོམས་ལ་རྒྱུ་བར་བྱེད་ཅེས་དེ་དག་དགེ་སློང་དང་། དགེ་སློང་མ་རྣམས་ལ་ཤས་ཆེར་མི་དགའ་བར་མི་འགྱུར་བར་བྱ་བའི་ཕྱིར་རོ། །དེ་བས་ན་དེ་དག་ཀྱང་འདི་སྙམ་དུ་སེམས་ཏེ། འདི་དག་གི་སྟོན་པས་ཀྱང་བསོད་སྙོམས་ལ་རྒྱུ་བར་བྱས་ན་འདི་དག་ཅིའི་ཕྱིར་བསོད་སྙོམས་ལ་རྒྱུ་བར་མི་བྱེད་སྙམ་སྟེ། དེ་དག་གིས་བསྔགས་པ་ཡང་རྗོད་པར་བགྱིད་ལ། བསོད་སྙོམས་ཡང་སྟེར་བར་འགྱུར་ཏེ། འདི་སྐད་དུ་བསོད་སྙོམས་ལ་རྒྱུ་བ་འདི་ནི་གཙུག་ལག་ལས་འབྱུང་བའི་བསོད་སྙོམས་ཡིན་ནོ། །སྤྱོད་པ་འདི་ནི་དེ་བཞིན་གཤེགས་པས་བསྔགས་པ་ཡིན་ནོ་ཞེས་ཀྱང་སྨྲ་བར་འགྱུར་ཏེ། བཙུན་པ་རབ་འབྱོར་དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར་གཞན་ཡང་རྒྱལ་པོ་དང་། བློན་པོ་དང་། བྲམ་ཟེ་དང་། ཁྱིམ་བདག་དང་། བློན་པོའི་བུ་རྣམས་ལས་ལེགས་པར་གསུངས་པའི་ཆོས་འདུལ་བ་ལ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་དེ་དག །བདག་ཅག་ནི་འདི་ལྟར་རིགས་ཆེན་པོར་སྐྱེས་པ་ཡིན་ན། ཟས་ཀྱི་ཕྱིར་ཁྱིམ་ནས་ཁྱིམ་དུ་བསོད་སྙོམས་ལ་ཅིའི་ཕྱིར་རྒྱུ་བར་བྱ་སྙམ་སྟེ། ངོ་ཚ་ནས་བསོད་སྙོམས་ལ་རྒྱུ་བར་མི་བགྱིད་པ་དེ་དག་དེ་བཞིན་གཤེགས་པའི་བསོད་སྙོམས་དང་། གཟི་བྱིན་དང་ལྡན་པའི་སྐུའི་རྗེས་སུ་སློབ་ཅིང་བསོད་སྙོམས་ལ་རྒྱུ་བར་འགྱུར་ཏེ། བཙུན་པ་རབ་འབྱོར་དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར་གཞན་ཡང་དེ་བཞིན་གཤེགས་པ་རྣམས་ཀྱིས་ནི་འཇིག་རྟེན་དང་འཐུན་པར་མཛད་འཚལ་ཏེ། ཇི་ལྟ་ཇི་ལྟར་སེམས་ཅན་རྣམས་ཡོངས་སུ་སྨིན་པར་འགྱུར་བ་དེ་ལྟ་དེ་ལྟར་འཐུན་པར་མཛད་དེ། བཙུན་པ་རབ་འབྱོར་དེ་བཞིན་གཤེགས་པས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་དོ། །བཙུན་པ་རབ་འབྱོར་གཞན་ཡང་དེ་བཞིན་གཤེགས་པ་ལ་ནི་སྒྲིབ་པའམ། སྐྱེམས་པ་ཡང་མི་མངའ། ཉམ་ཆུང་བ་ཡང་མི་མངའ། ཆགས་པ་ཡང་མི་མངའ། ཆགས་པར་འགྱུར་བ་ཡང་མི་མངའ། སྡིག་པ་བཞེད་པ་ཡང་མ་ལགས། སོགས་པ་ཡང་
མི་མངའ་མོད་ཀྱི། འོན་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་འཇིག་རྟེན་དང་འཐུན་པར་མཛད་པ་དང་། སེམས་ཅན་ཡོངས་སུ་སྨིན་པར་མཛད་པའི་སླད་དུ་བསོད་སྙོམས་ལ་རྒྱུ་བ་མཛད་དེ། བཙུན་པ་རབ་འབྱོར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་དོན་གྱི་དབང་དེ་གཟིགས་ནས་བསོད་སྙོམས་ལ་རྒྱུ་བ་མཛད་ན། བཙུན་པ་རབ་འབྱོར་དེ་ལྟ་བུའི་ཐབས་དང་དེ་ལྟ་བུའི་སྙིང་རྗེ་ཆེན་པོ་དང་། དེ་ལྟ་བུའི་དོན་ཡོངས་སུ་དག་པ་སུ་བསོད་སྙོམས་ལ་རྒྱུ་བར་སྤྱོད་དམ། སྨྲས་པ། ཆེ་ཞེ་བདག་གིས་ནི་འདི་མི་ནུས་ཏེ། ཆེ་ཞེ་དཔེར་ན་ཁྱི་དང་བྱི་ལ་ཐམས་ཅད་ཀྱིས་རིའི་རྒྱལ་པོ་རི་རབ་གཞིག་པར་མི་ནུས་པ་དང་། ཝ་ཐམས་ཅད་ཀྱིས་རི་དགས་ཀྱི་རྒྱལ་པོ་སེང་གེ་ལ་བསྐལ་པའི་བར་དུ་ཡང་མཐུ་རྩལ་ལམ་སྒྲ་བསྒྲགས་པ་བསྟན་པར་མི་ནུས་པ་དེ་བཞིན་དུ། ཆེ་ཞེ་ཉན་ཐོས་དང་། རང་སངས་རྒྱས་ཐམས་ཅད་ཀྱིས་དེ་བཞིན་གཤེགས་པ་ལ་སྤྱོད་པའམ། ཐབས་སམ། སྙིང་རྗེ་ཆེན་པོ་བསྟན་པར་མི་ནུས་སོ། །དེ་བཞིན་གཤེགས་པའི་ཐབས་ལ་མཁས་པ་དང་། བསོད་སྙོམས་ལ་རྒྱུ་བའི་གཏམ་བསྟན་པ་འདི་བཤད་པ་ན་ཁྱིམ་བདག་དེའི་ནང་མི་དེ་དག་དང་། ཁྱིམ་གཞན་དག་ནས་ཆོས་མཉན་དུ་འོངས་པ་རྣམས་ཀྱི་ནང་ནས་མི་ཉིས་སྟོང་བརྒྱད་བརྒྱས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་ཚེ་དང་ལྡན་པ་རབ་འབྱོར་གྱིས་བུད་མེད་དེ་ལ་འདི་སྐད་ཅེས་སྨྲས་སོ། །ཆེ་ཞེ་ཁྱོད་ཀྱི་ཁྱིམ་ཐབ་ད་ལྟ་ག་ལ་འདུག །བུད་མེད་དེས་སྨྲས་པ། བཙུན་པ་རབ་འབྱོར་བདག་གི་ཁྱིམ་ཐབ་ནི་གཅིག་པུར་མ་བས་སོ། །དེ་ཅིའི་སླད་དུ་ཞེ་ན། བཙུན་པ་རབ་འབྱོར་སེམས་ཅན་ཇི་སྙེད་དགའ་བ་བཀོད་པའི་ཐབས་ལ་མཁས་པས་འདུལ་བར་འགྱུར་བ་དེ་དག་ཐམས་ཅད་ནི་བདག་གི་ཁྱིམ་ཐབ་ལགས་སོ། །སྨྲས་པ། ཆེ་ཞེ་དེ་བཞིན་གཤེགས་པས་ནི་སུ་ལ་ཡང་འདོད་པའི་དགའ་བ་གནང་བ་མེད་དོ། །སྨྲས་པ། བཙུན་པ་རབ་འབྱོར་དེ་བཞིན་གཤེགས་པས་ནི་དགེ་སློང་གང་རྐྱེན་དུ་འཚལ་བའི་ཆོས་གོས་དང་། བསོད་སྙོམས་དང་། མལ་ཆ་དང་། སྟན་དང་། ན་བའི་གསོས་སྨན་དང་།
སྨན་ཟོང་དང་། མཛའ་བཤེས་ཀྱི་ཁྱིམ་དང་། བསོད་སྙོམས་སྟེར་བའི་ཁྱིམ་བསྟེན་ཅིང་བསྙེན་པ་དང་། གྲོགས་པོ་དགའ་བར་བྱ་བ་དང་། མཁན་པོ་དང་སློབ་དཔོན་བསྟེན་པ་དང་། བསྙེན་པ་དང་། བསྙེན་བཀུར་བྱ་བ་ཀུན་ཏུ་བསྟེན་པར་བྱེད་པ་དེ་ལ་ཡང་དགེ་བའི་ཆོས་འཕེལ་བར་འགྱུར་བ་དང་། མི་དགེ་བའི་ཆོས་འགྲིབ་པར་འགྱུར་བ་གསུངས་སོ། །སྨྲས་པ། ཆེ་ཞེ་དེ་ནི་ཁྱོད་ཇི་སྐད་ཟེར་བ་བཞིན་ནོ། །སྨྲས་པ། བཙུན་པ་རབ་འབྱོར་དེ་བས་ན་དེ་བཞིན་གཤེགས་པས་ནི་ཐབས་དེ་ལྟ་བུས་སེམས་ཅན་རྣམས་ལ་འདོད་པའི་དགའ་བ་ཐམས་ཅད་གནང་ངོ་། །སྨྲས་པ། ཆེ་ཞེ་ཁྱོད་ཀྱིས་དགའ་བ་བཀོད་པའི་ཐབས་ལ་མཁས་པས་སེམས་ཅན་ཇི་སྙེད་བཏུལ་སྨྲས་པ། བཙུན་པ་རབ་འབྱོར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སྐར་མའི་གཟུགས་རྣམས་ནི་བགྲང་བའི་ཚུལ་གྱིས་མཐའ་རྟོགས་པར་ནུས་ཀྱི། བདག་གིས་དགའ་བ་བཀོད་པའི་ཐབས་ལ་མཁས་པས་སེམས་ཅན་བཏུལ་ཏེ། བཏུལ་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཀོད་པ་གང་དག་ལགས་པ་དེ་དག་ལ་ནི་དེ་ལྟར་མི་ནུས་སོ། །སྨྲས་པ། ཆེ་ཞེ་ཁྱོད་སེམས་ཅན་དེ་དག་ལ་དགའ་བ་ཇི་ལྟ་བུ་དག་སྟོབས་པར་བྱེད། བུད་མེད་དེས་སྨྲས་པ། བཙུན་པ་རབ་འབྱོར་སེམས་ཅན་ཚངས་པའི་དགའ་བ་ལ་མོས་པ་དག་ཀྱང་མཆིས་ཏེ། བཙུན་པ་རབ་འབྱོར་དེ་དག་ལ་ནི་བདག་ཚངས་པར་འགྱུར་བ་ཐོབ་པར་བགྱི་བའི་སླད་དུ་ཚད་མེད་པའི་བསམ་གཏན་གྱི་དགའ་བ་སྟོབས་པར་བགྱིད་དེ། བསྟབས་ནས་ཀྱང་དེའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འཛུད་པར་བགྱིད་དོ། །བཙུན་པ་རབ་འབྱོར་སེམས་ཅན་བརྒྱ་བྱིན་གྱི་དགའ་བ་ལ་མོས་པ་དག་ཀྱང་མཆིས་ཏེ། དེ་དག་ལ་ནི་བདག་བརྒྱ་བྱིན་གྱི་དགའ་བ་སྟོབས་པར་བགྱིད་དེ། བསྟབས་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འཛུད་པར་བགྱིད་དོ། །བཙུན་པ་རབ་འབྱོར་སེམས་ཅན་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོའི་དགའ་བ་ལ་མོས་པ་དག་ཀྱང་མཆིས་ཏེ། དེ་དག་ལ་ནི་བདག་ལྟོ་འཕྱེ་ཆེན་པོའི་བར་གྱི་དགའ་བ་སྟོབས་པར་བགྱིད་དེ་བསྟབས་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འཛུད་པར་བགྱིད་དོ། །
བཙུན་པ་རབ་འབྱོར་སེམས་ཅན་འཁོར་ལོས་སྒྱུར་བའི་རྒྱལ་སྲིད་ཀྱི་དགའ་བ་ལ་མོས་པ་དག་ཀྱང་མཆིས་སོ། །བློན་པོ་དང་། གྲོང་རྡལ་གྱི་མི་དང་། ཡུལ་གྱི་མི་དང་། བྲམ་ཟེ་དང་། རྒྱལ་རིགས་དང་། རྗེའུ་རིགས་དང་། དམངས་རིགས་ཀྱི་དགའ་བ་ལ་མོས་པ་དག་ཀྱང་མཆིས་སོ། །སེམས་ཅན་གཟུགས་དང་། སྒྲ་དང་། དྲི་དང་། རོ་དང་། རེག་པའི་དགའ་བ་ལ་མོས་པ་དག་ཀྱང་མཆིས་སོ། །སེམས་ཅན་མེ་ཏོག་དང་། བདུག་པ་དང་། སྤོས་དང་། མེ་ཏོག་ཕྲེང་བ་དང་། བྱུག་པ་དང་། ཕྱེ་མ་དང་། གདུགས་དང་། རྒྱལ་མཚན་དང་། བ་དན་དང་། རྔ་ཡབ་ཀྱི་དགའ་བ་ལ་མོས་པ་དག་ཀྱང་མཆིས་སོ། །སེམས་ཅན་གསེར་དང་། དངུལ་དང་། ནོར་བུ་དང་། མུ་ཏིག་དང་། བཻ་དཱུཪྱ་དང་། དུང་དང་། མན་ཤེལ་དང་། ཤེལ་དང་། མུ་ཏིག་དམར་པོ་དང་། བྱི་རུ་དང་། རྡོའི་སྙིང་པོ་དང་། སྤུག་དང་རིན་པོ་ཆེ་རྣམ་པ་སྣ་ཚོགས་ཀྱི་དགའ་བ་ལ་མོས་པ་དག་ཀྱང་མཆིས་སོ། །སེམས་ཅན་རྔ་བོ་ཆེ་དང་། རྫ་རྔ་དང་། དུང་དང་། ཁར་རྔ་དང་། པི་བང་དང་། གླིང་བུ་དང་། རོལ་མོའི་སྒྲ་རྣམ་པ་སྣ་ཚོགས་ཀྱི་དགའ་བ་ལ་མོས་པ་དག་ཀྱང་མཆིས་ཏེ། བཙུན་པ་རབ་འབྱོར་སེམས་ཅན་དེ་དག་ལ་ཡང་བདག་གིས་བསམ་པ་ཐམས་ཅད་དང་། དགའ་བ་དང་། རྩེད་མོ་ཐམས་ཅད་སྟོབས་པར་བགྱིད་དེ། བསྟབས་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འཛུད་པར་བགྱིད་དོ། །རབ་འབྱོར་གྱིས་སྨྲས་པ། ཆེ་ཞེ་འདོད་པའི་ཡོན་ཏན་ལྔ་ནི་འཕགས་པའི་ལམ་གྱི་བར་དུ་གཅོད་པ་ཡིན་ན། ཇི་ལྟར་དེ་དག་བསྟབས་པས་འདུལ་བར་འགྱུར་ཏེ། གནས་འདི་ཕན་ཚུན་མི་འཐུན་པ་ཡིན་ནོ། །ཆེ་ཞེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འཕགས་པའི་ལམ་ལ་བར་དུ་གཅོད་པར་བྱེད་པའི་ཆོས་གང་ཁོ་ན་ཡིན་པ་དེ་དག་ཉིད་ཀྱིས་སེམས་ཅན་རྣམས་འདུལ་བར་བྱེད་པ་ནི་དཀའ་བར་བྱེད་པ་སྟེ་ངོ་མཚར་ཏོ།། །།བམ་པོ་གཉིས་པ་སྟེ་ཐ་མ། དེ་ནས་བུད་མེད་དེས་དགའ་བ་བཀོད་པའི་ཐབས་ལ་མཁས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་པའི་ཚོང་དཔོན་གྱི་བུ་གཉིས་ཆོས་མཉན་པའི་ཕྱིར་སྒོ་གང་དེར་འདུས་པར་གྱུར་ཏེ། དེ་གཉིས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་
ཅེས་སྨྲས་སོ། །བཙུན་པ་རབ་འབྱོར་རང་གི་ཤེས་རབ་ཀྱིས་བྱང་ཆུབ་སེམས་དཔའི་ཤེས་རབ་སད་པར་མ་མཛད་ཅིག །དེ་ཅིའི་སླད་དུ་ཞེ་ན། བཙུན་པ་རབ་འབྱོར་འདི་ཇི་སྙམ་དུ་དགོངས། འབྲུ་མར་གྱི་མར་མེ་ཆུང་ངུ་གང་ལགས་པ་དེ་ཁའི་དབུགས་སམ། ལག་པས་གཡབས་པའམ། གོས་ཀྱིས་གཡབས་པའི་རླུང་གིས་ཞི་བར་མཛད་སྤྱོད་དམ། སྨྲས་པ། རིགས་ཀྱི་བུ་དག་འབྲུ་མར་གྱི་མར་མེ་ཆུང་ངུ་གང་ཡིན་པ་དེ་ནི་ཁའི་དབུགས་སམ། ལག་པས་གཡབས་པའམ། གོས་ཀྱིས་གཡབས་པའི་རླུང་གིས་ཞི་བར་བྱེད་ནུས་སོ། །དེ་གཉིས་ཀྱིས་སྨྲས་པ། བཙུན་པ་རབ་འབྱོར་དེ་བཞིན་དུ་ཉན་ཐོས་ཀྱི་ཐེག་པ་པའི་རིགས་ཀྱི་བུའམ། རིགས་ཀྱི་བུ་མོའི་ཤེས་རབ་ཀྱི་སྣང་བ་དང་། བསོད་ནམས་ཀྱི་སྣང་བ་ཆུང་ངུ་དེ་ནི་འདོད་པའི་རྟོག་པ་གཅིག་གིས་ཀྱང་མ་མཆིས་པར་བགྱིད་དོ། །བཙུན་པ་རབ་འབྱོར་འདི་ཇི་སྙམ་དུ་དགོངས། སྲེག་པའི་བསྐལ་པའི་མེའི་ཕུང་པོ་གང་ལགས་པ་དེ་གང་གཱའི་ཀླུང་ཆུས་གང་བས་ཞི་བར་མཛད་སྤྱོད་དམ། སྨྲས་པ། རིགས་ཀྱི་བུ་དག་དེ་ནི་རྒྱ་མཚོ་འབུམ་གྱིས་ཀྱང་ཞི་བར་མི་ནུས་ན་གང་གཱའི་ཀླུང་ཆུས་ཡོངས་སུ་གང་བས་ལྟ་ཅི་སྨོས། དེ་གཉིས་ཀྱིས་སྨྲས་པ། བཙུན་པ་རབ་འབྱོར་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོའི་ཤེས་རབ་ཀྱི་སྣང་བ་དང་། བསོད་ནམས་ཀྱི་སྣང་བ་ཡང་དེ་དང་འདྲ་བར་བལྟ་བར་བགྱིའོ། །བཙུན་པ་རབ་འབྱོར་གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་བསྐལ་པ་གང་གཱའི་ཀླུང་གི་བྱེ་མ་སྙེད་དུ་འདོད་པའི་ཡོན་ཏན་ལྔས་རྩེ་ཞིང་དགའ་ལ་དགའ་དགུར་སྤྱོད་ཀྱང་། དེ་དག་གིས་བྱང་ཆུབ་སེམས་དཔའི་ཤེས་རབ་ཀྱི་སྣང་བ་དང་། བསོད་ནམས་ཀྱི་སྣང་བ་ཟད་པར་མི་ནུས་སོ། །བཙུན་པ་རབ་འབྱོར་དཔེར་ན་མི་དབུལ་པོ་ནད་པ་གསོ་ཞིང་ནད་ཞི་བར་བགྱི་བའི་སླད་དུ་སྨན་པས་སྨན་མངར་བ་དང་། སྐྱུར་བ་དང་། ལན་ཚྭའི་རོ་དང་། ཚ་བ་དང་། ཁ་བ་དང་། བསྐ་བ་ལས་མོད་པ་དང་། རིན་ཆུང་བ་གང་ལགས་པ་དེ་དག་སྩོལ་བར་བགྱིད་དོ། །དེས་ཀྱང་བདག་བདེ་བ་ཉམས་སུ་མྱོང་བར་བགྱི་བའི་སླད་དུ་དེ་དག་བསྟེན་པར་བགྱིད་དོ། །དེ་དག་བསྟེན་པས་ནད་ཆུང་བའི་སླད་དུ་ནད་དེ་ལས་ཐར་བར་འགྱུར་བ་དེ་བཞིན་དུ། བཙུན་པ་རབ་འབྱོར་ཉན་ཐོས་ཀྱི་
ཐེག་པ་པ་སྦྱངས་པའི་ཡོན་ཏན་དང་། ཡོ་བྱད་བསྙུངས་པ་དང་། འདོད་པ་ཉུང་བ་དང་། དགོན་པ་ན་གནས་པ་དང་། ཆོག་ཤེས་པ་དང་། ལོངས་སྤྱོད་ཆུང་བ་དང་། བྱ་བ་ཉུང་བས་སྡུག་བསྔལ་ཐམས་ཅད་ཉམས་སུ་མྱོང་ནས། དེའི་འོག་ཏུ་ལེན་པ་མེད་པར་ཡོངས་སུ་མྱ་ངན་ལས་འདའ་བར་འགྱུར་ཏེ། བཙུན་པ་རབ་འབྱོར་རྣམ་གྲངས་དེས་ཀྱང་ཁྱོད་ཀྱིས་འདི་ལྟར་རིག་པར་བགྱི་སྟེ། ཇི་ལྟར་མི་དབུལ་པོ་གསོ་བ་དེ་བཞིན་དུ་ཉན་ཐོས་ཀྱི་ཐེག་པ་པའི་རྣམ་པར་གྲོལ་བ་ཡང་དེ་དང་འདྲ་བར་བལྟ་བར་བགྱིའོ། །བཙུན་པ་རབ་འབྱོར་དཔེར་ན་རྒྱལ་རིགས་ཀྱི་རྒྱལ་པོ་སྤྱི་བོ་ནས་དབང་བསྐུར་བ་ནད་པ་གསོ་བའི་ཕྱིར་སྨན་པས་རྒྱལ་པོ་ལ་འོས་པའི་སྨན་ཁ་དོག་ཕུན་སུམ་ཚོགས་པ་དང་། དྲི་ཕུན་སུམ་ཚོགས་པ་དང་། རོ་ཕུན་སུམ་ཚོགས་པ་དང་ཁར་བཅུག་ན་ཡང་ཞིམ་ལ་ལྟོར་སོང་ན་ཡང་བདེ་བ་དེ་ལྟ་བུ་ལེགས་པར་སྦྱར་ནས་སྦྱིན་པར་བགྱིད་དེ་རྒྱལ་པོ་ལ་འོས་པའི་ཁུ་བཅུད་དོ་ཅོག་ཀྱང་དེ་ལ་སྦྱིན་པར་བགྱིད་དོ། །རྒྱལ་པོ་དེ་ཡིད་མི་བདེ་བར་མི་འགྱུར་བར་བགྱི་བའི་སླད་དུ་ཡང་མེ་ཏོག་དང་། བདུག་པ་དང་། སྤོས་དང་། མེ་ཏོག་ཕྲེང་དང་། བྱུག་པ་རྣམས་དེ་ལ་འབུལ་བར་བགྱིད་དོ། །སིལ་སྙན་དང་། ཕེག་རྡོབ་པ་རྣམས་ཀྱང་དེ་དང་འཐུན་པར་སྦྱོར་ཞིང་གླུ་ལེན་པར་བགྱིད་དོ། །དེ་ཇི་ཙམ་དུ་དགའ་བ་རྣམ་པ་སྣ་ཚོགས་དེ་དག་གིས་དགའ་བར་གྱུར་པ་དེ་ཙམ་དུ་ནད་དེ་ལས་ཐར་བར་འགྱུར་བ་དེ་བཞིན་དུ། བཙུན་པ་རབ་འབྱོར་བྱང་ཆུབ་སེམས་དཔའ་ཁ་ཅིག་དགའ་བ་བཀོད་པའི་ཐབས་ལ་མཁས་པས་དགའ་བ་ཐམས་ཅད་ཀྱང་མྱོང་ལ། བདེ་བ་ཐམས་ཅད་དང་ལྡན་པའི་ཐེག་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེ་ལྟ་བུ་དག་ཀྱང་མཆིས་ཏེ། བཙུན་པ་རབ་འབྱོར་རྣམ་གྲངས་དེས་ཀྱང་ཁྱོད་ཀྱིས་འདི་ལྟར་རིག་པར་བགྱི་སྟེ། ཇི་ལྟར་རྒྱལ་པོ་གསོ་བ་དེ་བཞིན་དུ་བྱང་ཆུབ་སེམས་དཔའི་ཡེ་ཤེས་མངོན་པར་རྟོགས་པ་ཡང་དེ་དང་འདྲ་བར་བལྟ་བར་བགྱིའོ། །བཙུན་པ་རབ་འབྱོར་གཞན་ཡང་འདོད་པའི་ཡོན་ཏན་ལྔ་ཡང་རྩ་བ་མ་མཆིས་པ་དང་། གནས་མ་མཆིས་པ་ལགས་ལ། ཐམས་ཅད་མཁྱེན་པ་ཉིད་ཀྱང་རྩ་བ་མ་མཆིས་པ་དང་། གནས་མ་མཆིས་པ་ལགས་ཏེ། དེ་ལྟ་བུར་བཟོད་པ་གང་
ལགས་པ་དེས་ནི་བདག་གིས་བྱ་བ་ནི་གང་ཡིན། མི་བྱ་བ་ནི་གང་ཡིན་སྙམ་དུ་རང་གིས་འཚལ་ཏོ། །འདོད་པའི་ཡོན་ཏན་ལྔ་མི་དམིགས་པ་ལགས་ཏེ་གང་གིས་དེ་ལྟ་བུར་བཟོད་པ་དེས་ནི་ལམ་ནི་གང་ཡིན་ལམ་ངན་པ་ནི་གང་ཡིན་སྙམ་དུ་རང་གིས་འཚལ་ཏོ། །འདོད་པའི་ཡོན་ཏན་ལྔ་ཡང་སྟོང་ལ་ཐམས་ཅད་མཁྱེན་པ་ཉིད་ཀྱང་སྟོང་སྟེ། གང་གིས་དེ་ལྟ་བུར་བཟོད་པ་དེས་ནི་འདོད་པ་རྣམས་ལས་བཟློག་མི་འཚལ་ཏེ་དེ་ནི་རང་ཉིད་ཀྱིས་འདོད་པ་རྣམས་ལ་སྨོད་པར་བགྱིད་དེ་སྟོན་པར་མི་བགྱིད་དོ། །དེ་ནས་ཚེ་དང་ལྡན་པ་རབ་འབྱོར་གྱིས་ཚོང་དཔོན་གྱི་བུ་དེ་གཉིས་ལ་འདི་སྐད་ཅེས་སྨྲས་སོ། །ཆེ་ཞེ་འདི་རིགས་ཀྱི་བུ་ཁྱེད་གཉིས་ཀྱི་ཅིར་འོང་། དེ་ནས་ཚོང་དཔོན་གྱི་བུ་དེ་གཉིས་ཀྱིས་དེའི་ཚེ་ཚེ་དང་ལྡན་པ་རབ་འབྱོར་ལ་ཐལ་མོ་སྦྱར་ནས་ཚིགས་སུ་བཅད་པ་འདི་དག་སྨྲས་སོ། །འདི་ནི་ཕ་ལགས་མ་ཡང་ལགས། །འདི་ནི་མཛའ་བོ་གྲོགས་མཆོག་འདི། །འདི་ནི་ཁྱོ་ལགས་འཁྲ་ས་ལགས། །འདི་ནི་སྟོན་པ་བླ་ན་མེད། །འདི་ནི་ཉིད་ཀྱི་མཐུ་སྟོབས་ཀྱི། །འདི་ནི་ཡོངས་སུ་གྲོལ་བར་བགྱིས། །འདི་ནི་དེ་བཞིན་ཉིད་ལྡན་པས། །སྡུག་བསྔལ་འཆིང་ལས་བདག་ཅག་བཀྲོལ། །འདི་ནི་ཆོས་ཀུན་སྟོན་པ་སྟེ། །རིགས་པ་ཀུན་གྱིས་རྣམ་པར་རྟོགས། །བདག་ཅག་གཉིས་ནི་དགའ་བྱིན་ནས། །འཆི་བ་མེད་ལ་ལེགས་པར་བཙུད། །ཇི་ལྟར་ཉ་ནི་ཤས་གཡོགས་པའི། །མཆིལ་པ་ཡིས་ནི་བཟུང་བ་ལྟར། །འདིས་ནི་ཐབས་ཀྱིས་བདག་ཅག་གཉིས། །བསོད་ནམས་བརྒྱས་ནི་བཅུས་པར་གྱུར། །གདུག་པའི་སྦྲུལ་གྱིས་ཟིན་པ་ཡི། །དུག་ནི་དུག་གིས་ཞི་བགྱིད་ལྟར། །དེ་བཞིན་འདིས་ནི་བདག་ཅག་གི། །འདོད་ཆགས་དུག་ནི་དུག་གིས་བཅོམ། །ཇི་ལྟར་མི་ནི་མེས་ཚིག་པ། །མེ་ཡིས་བསྲོས་ན་ཞི་བ་ལྟར། །དེ་བཞིན་རང་གི་ཉོན་མོངས་གདུང་། །ཉོན་མོངས་རྣམས་ཀྱིས་ཡོངས་སུ་བཀྲོལ། །བདག་ཅག་གཉིས་ཀྱིས་དམ་ཆོས་རྟོགས། །འདོད་པ་བདག་ཅག་གཉིས་མི་འཚལ། །བྱིས་པ་གང་དག་འདོད་པ་འཚལ། །དེ་དག་བྱང་ཆུབ་འདོད་མ་ལགས། །འཇིག་རྟེན་འདོད་པར་གསུངས་པ་རྣམས། །དེ་དག་འཇིགས་ཆེན་གཤེད་མ་སྟེ། །དེ་དག་ཉིད་ནི་ཡོངས་རྟོགས་
པ། །མཁས་པ་རྣམས་ཀྱི་རྣམ་གྲོལ་ལགས། །དེ་ནས་ཚེ་དང་ལྡན་པ་རབ་འབྱོར་གྱིས་བུད་མེད་དེ་ལ་འདི་སྐད་ཅེས་སྨྲས་སོ། །ཆེ་ཞེ་ཅི་ཁྱོད་ཀྱིས་རིགས་ཀྱི་བུ་རྣམས་ཁོ་ན་དགའ་བ་བཀོད་པའི་ཐབས་ལ་མཁས་པ་འདིས་འདུལ་བར་བྱེད་དམ། འོན་ཏེ་རིགས་ཀྱི་བུ་མོ་དག་ཀྱང་འདུལ་བར་བྱེད། སྨྲས་པ། བཙུན་པ་རབ་འབྱོར་བདག་གིས་ནི་དགའ་བ་བཀོད་པའི་ཐབས་ལ་མཁས་པས་སེམས་ཅན་ཐམས་ཅད་གང་ཡང་འདུལ་བར་མི་བགྱིད་པ་མ་མཆིས་ཏེ། བཙུན་པ་རབ་འབྱོར་བུད་མེད་ཀྱི་སེམས་ནི་ལྷག་པར་ཡང་དགའ་བ་ལ་སྲེད་པས་ན་བདག་གིས་ནི་བུད་མེད་ཆོས་མང་དུ་དགའ་བ་བཀོད་པའི་ཐབས་ལ་མཁས་པས་བཏུལ་གྱི་སྐྱེས་པ་དག་ནི་དེ་ལྟ་མ་ལགས་སོ། །སྨྲས་པ། ཆེ་ཞེ་ཁྱོད་ཀྱིས་ཇི་ལྟར་བུད་མེད་ཀྱི་གཟུགས་ཀྱིས་བུད་མེད་འདུལ་བར་བྱེད། དེ་ནས་བུད་མེད་དེས་དེའི་ཚེ་སྐྱེས་པ་ལོ་ཉི་ཤུ་རྩ་གཉིས་ལོན་པ། གོས་གཙང་མ་སྲབ་མོ་བགོས་པ། སྐྱེས་པའི་རྒྱན་གྱིས་བརྒྱན་པ། མཛེས་ཤིང་བལྟ་ན་སྡུག་ལ་ཁ་དོག་རྒྱས་པ་མཆོག་དང་ལྡན་པ་ཅི་འདྲ་བ་དེ་ལྟ་བུར་སྣང་བར་བྱས་ནས་དེས་སྨྲས་པ། བཙུན་པ་རབ་འབྱོར་བུད་མེད་ནི་གཟུགས་ཀྱི་ལུས་འདི་ལྟ་བུས་འདུལ་བར་འགྱུར་རོ། །དེ་ནས་ཚེ་དང་ལྡན་པ་རབ་འབྱོར་གྱིས་རིགས་ཀྱི་བུ་དེ་ལ་འདི་སྐད་ཅེས་སྨྲས་སོ། །ཅི་ཁྱོད་བུད་མེད་ཡིན་ནམ། འོན་ཏེ་སྐྱེས་པ་ཡིན། དེས་སྨྲས་པ། བཙུན་པ་རབ་འབྱོར་ཅི་ཁྱོད་སོ་སོའི་སྐྱེ་བོའམ། འོན་ཏེ་སློབ་པ་ལགས། སྨྲས་པ། རིགས་ཀྱི་བུ་བདག་ནི་སོ་སོའི་སྐྱེ་བོ་ཡང་མ་ཡིན། སློབ་པ་ཡང་མ་ཡིན་ནོ། །སྨྲས་པ། བཙུན་པ་རབ་འབྱོར་བདག་ཀྱང་དེ་བཞིན་ཏེ། བུད་མེད་ཀྱང་མ་ལགས། སྐྱེས་པ་ཡང་མ་ལགས་སོ། །རབ་འབྱོར་གྱིས་སྨྲས་པ། གལ་ཏེ་ཁྱོད་སྐྱེས་པ་ཡང་མ་ཡིན། བུད་མེད་ཀྱང་མ་ཡིན་ན་བདག་གིས་ཁྱོད་ཇི་ལྟར་གཟུང་བར་བྱ། སྨྲས་པ། གལ་ཏེ་བཙུན་པ་སོ་སོའི་སྐྱེ་བོ་ཡང་མ་ལགས། སློབ་པ་ཡང་མ་ལགས་ན་བདག་གིས་ཁྱོད་ཇི་ལྟར་གཟུང་བར་བགྱི། དེ་ནས་ཚེ་དང་ལྡན་པ་རབ་འབྱོར་འདི་སྙམ་དུ་སེམས་ཏེ། ཀྱེ་མ་བྱང་ཆུབ་སེམས་དཔའ་འདི་ནི་ཤེས་རབ་ཟབ་མོ་དང་ལྡན་ཏེ་གལ་ཏེ་བདག་གིས་བརྩམས་ན་ནི་ཡང་བདག་ལ་འདྲི་བར་འོང་ངོ་སྙམ་
མོ། །དེ་ནས་རིགས་ཀྱི་བུ་དེས་ཚེ་དང་ལྡན་པ་རབ་འབྱོར་གྱི་སེམས་སེམས་ཀྱིས་བརྟགས་ནས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །བཙུན་པ་རབ་འབྱོར་ཁྱོད་ནི་བརྟན་པོ་མ་ལགས་ཏེ་འདྲི་བས་སྐྲག་གིས། བཙུན་པ་རབ་འབྱོར་འདྲི་བས་སྐྲག་པར་མ་མཛད་ཅིག །སྨྲས་པ། བདག་ནི་དགྲ་བཅོམ་པ་ཟག་པ་ཟད་པའོ། །སྨྲས་པ། བཙུན་པ་རབ་འབྱོར་ཟག་པ་ཟད་པ་དེ་དག་གང་ལགས། ཅི་འདས་པ་རྣམས་ལགས་སམ། མ་འོངས་པ་རྣམས་ལགས་སམ། ད་ལྟར་བྱུང་བ་རྣམས་ལགས་སམ། འདས་པ་གང་ལགས་པ་དེ་དག་ཟད་ཅེས་བགྱིར་ནི་འདས་པ་ལ་ཟད་པ་མ་མཆིས་སོ། །མ་འོངས་པ་གང་ལགས་པ་དེ་དག་ཀྱང་ད་དུང་མ་ཕྱིན་པ་སྟེ། དེ་དག་ཀྱང་ཟད་པར་བགྱིར་མི་ནུས་སོ། །ད་ལྟར་བྱུང་བ་གང་ལགས་པ་དེ་དག་ནི་མི་གནས་པ་སྟེ། དེ་དག་ཀྱང་ཟད་པར་བགྱིར་མི་ནུས་སོ། །རབ་འབྱོར་གྱིས་སྨྲས་པ། རིགས་ཀྱི་བུ་བདག་གིས་ནི་འདྲི་བ་ཐམས་ཅད་ཀྱི་ལན་གདབ་པར་མི་ནུས་པའི་སྟེང་དུ་བསོད་སྙོམས་ཀྱི་དུས་ལ་བབ་སྟེ་བདག་གི་དུས་ཡོལ་དུ་འོང་གིས་བསོད་སྙོམས་ལ་འགྲོའོ། །དེ་ནས་དེའི་ཚེ་རིགས་ཀྱི་བུ་དེ་བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱི་ཞིང་ཐམས་ཅད་ཀུན་ཏུ་སྟོན་པ་ཞེས་བྱ་བ་ལ་སྙོམས་པར་ཞུགས་སོ། །རིགས་ཀྱི་བུ་དེ་སྙོམས་པར་ཞུགས་མ་ཐག་ཏུ་ཚེ་དང་ལྡན་པ་རབ་འབྱོར་གྱིས་སངས་རྒྱས་ཀྱི་ཞིང་དཔག་ཏུ་མེད་གྲངས་མེད་པ་དག་མཐོང་སྟེ། ལ་ལར་ནི་ཉི་མ་འཆར་ཀ་ཙམ། ལ་ལར་ནི་ཉི་མ་བག་དྲོས་ཙམ། ལ་ལར་ནི་དྲོས་བུ་ཆུང་ཙམ། ལ་ལར་ནི་སྔ་དྲོ་ཕྱེད་ཙམ། ལ་ལར་ནི་དྲོ་ལ་བབ་ཏུ་ཉེ་བའི་དུས་ཙམ། ལ་ལར་ནི་གཎྜཱི་རྡུང་བའི་དུས་ཙམ། ལ་ལར་ནི་སྔ་མ་བཀད་པ་ཙམ། ལ་ལར་ནི་བཀད་ཟིན་པ་ཙམ། ལ་ལར་ནི་ཟན་ཟ་ཞིང་འདུག་པ་ཙམ། ལ་ལར་ནི་ལྡང་བ་ཙམ། ལ་ལར་ནི་ལྷུང་བཟེད་འཁྲུ་བ་ཙམ། ལ་ལར་ནི་ཕྱེད་ཡོལ་གྱི་དུས་ཙམ། ལ་ལར་ནི་ཕྱེམ་རེད་ཀྱི་དུས་ཙམ། ལ་ལར་ནི་སྲོད་ཙམ། ལ་ལར་ནི་ནམ་ཕྱེད་ཙམ། ལ་ལར་ནི་ནམ་ཆུང་འཁོར་ཙམ། ལ་ལར་ནི་ཟླ་བ་དང་ཉི་མ་མེད་དེ་རང་གི་འོད་དང་ལྡན་པར་མཐོང་ངོ་། །དེ་ནས་རིགས་ཀྱི་བུ་དེས་གནས་བརྟན་རབ་འབྱོར་ལ་འདི་སྐད་ཅེས་སྨྲས་སོ། །བཙུན་པ་རབ་
འབྱོར་ཁྱོད་དུས་ཚོད་གང་གི་ཚེ་བཤོས་གསོལ། དུས་ཚོད་ནི་ཇི་ཙམ་དུ་གདའ། རབ་འབྱོར་གྱིས་སྨྲས་པ། རིགས་ཀྱི་བུ་བདག་ནི་འདི་ཉིད་ཀྱི་དུས་ཚོད་ལ་ཟན་ཟའི་སངས་རྒྱས་ཀྱི་ཞིང་གཞན་གྱི་དུས་ཚོད་ལ་མ་ཡིན་ནོ། །དེ་ནས་རིགས་ཀྱི་བུ་དེས་དེའི་ཚེ་ཉི་མའི་དཀྱིལ་འཁོར་ནུབ་ཕྱོགས་སུ་སོང་བ་དེ་སྔ་དྲོའི་ཕྱེད་ཙམ་དུ་བཞག་སྟེ། ཅི་ནས་སྔ་དྲོའི་ཕྱེད་ཙམ་དུ་འཛིན་པར་འགྱུར་བ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུས་བྱས་སོ། །དེ་ནས་རིགས་ཀྱི་བུ་དེས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །བཙུན་པ་རབ་འབྱོར་དུས་ཚོད་ཇི་ཙམ་ལ་བབ་པ་གཟིགས་ཤིག །དེ་ནས་ཚེ་དང་ལྡན་པ་རབ་འབྱོར་གྱིས་མཐོང་ནས་ཡིད་ཆེས་ཏེ་མི་རིང་བར་གྱུར་ཏོ། །དེ་ནས་ཚེ་དང་ལྡན་པ་རབ་འབྱོར་གྱིས་རིགས་ཀྱི་བུ་དེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱི་མིང་ཅི་ཡིན་བདག་ལ་སྟོན་ཅིག །རིགས་ཀྱི་བུ་དེས་སྨྲས་པ། བཙུན་པ་རབ་འབྱོར་ཁྱོད་ལ་བདག་གི་མིང་གིས་ཅི་ཞིག་བགྱི། །ཡང་ན་དེ་བཞིན་གཤེགས་པ་ཉིད་ལ་ཞུས་ཤིག་དང་དེ་ཁྱོད་ལ་ལན་འདེབས་སོ། །བཙུན་པ་རབ་འབྱོར་གཞན་ཡང་མིང་ཐམས་ཅད་ནི་མིང་མ་མཆིས་པའོ། །དེ་ཅིའི་སླད་དུ་ཞེ་ན། མིང་ཐམས་ཅད་ནི་ཀུན་བརྟགས་པ་དང་། ཡང་དག་པ་མ་ལགས་པ་སྟེ། གང་ཀུན་བརྟགས་པ་དང་། ཡང་དག་པ་མ་ལགས་པ་དེ་ལ་མིང་འདི་ཞེས་ཇི་སྐད་བགྱི། བཙུན་པ་རབ་འབྱོར་གྱིས་སྨྲས་པ། ཅི་ཐམས་ཅད་མཁྱེན་པ་ཉིད་ཀྱི་མིང་གང་ཡིན་པ་དེ་ཡང་ཀུན་བརྟགས་པ་དང་། ཡང་དག་པ་མ་ཡིན་པ་ཡིན་ནམ། སྨྲས་པ། བཙུན་པ་རབ་འབྱོར་དེ་ནི་དེ་བཞིན་ཏེ། དེ་ཅིའི་སླད་དུ་ཞེ་ན། འདི་ལྟར་ཐམས་ཅད་མཁྱེན་པ་ཉིད་ཀྱང་སངས་རྒྱས་ཀྱི་ཞིང་གཞན་དང་གཞན་དག་ན་མིང་ཕན་ཚུན་ཐ་དད་པ་མ་མཆིས་པའི་སླད་དུའོ། །སྨྲས་པ། རིགས་ཀྱི་བུ་ཐམས་ཅད་མཁྱེན་པ་ཉིད་ཀྱི་མིང་ཐ་དད་པ་ཇི་ལྟ་བུ་ཡིན། སྨྲས་པ། བཙུན་པ་རབ་འབྱོར་ཐམས་ཅད་མཁྱེན་པ་ཉིད་ལ་སངས་རྒྱས་ཀྱི་ཞིང་ལ་ལར་ནི་མཐུ་ཞེས་བགྱིའོ། །ལ་ལར་ནི་སྡུད་པ་ཞེས་བགྱིའོ། །ལ་ལར་ནི་ཐམས་ཅད་དུ་སྣང་བ་ཞེས་བགྱིའོ། །ལ་ལར་ནི་དྲི་མ་མེད་པ་ཞེས་བགྱིའོ། །ལ་ལར་ནི་དོན་ཐམས་ཅད་སྟོན་པ་ཞེས་བགྱིའོ། །
ལ་ལར་ནི་ཉམས་པ་མེད་པ་ཞེས་བགྱིའོ། །ལ་ལར་ནི་མཆོད་པ་པོ་ཞེས་བགྱིའོ། །ལ་ལར་ནི་མངོན་སུམ་པ་ཞེས་བགྱིའོ། །ལ་ལར་ནི་བྱི་རུ་འཛིན་ཅེས་བགྱིའོ། །ལ་ལར་ནི་རྣམ་པར་རྒྱལ་བ་ཆེན་པོ་ཞེས་བགྱིའོ། །ལ་ལར་ནི་སྒྲ་ཆེན་པོ་ཞེས་བགྱིའོ། །ལ་ལར་ནི་དཔག་ཏུ་མ་མཆིས་པ་ཞེས་བགྱི་སྟེ། བཙུན་པ་རབ་འབྱོར་དེ་ལྟར་ན་ཐམས་ཅད་མཁྱེན་པ་ཉིད་ཀྱང་སངས་རྒྱས་ཀྱི་ཞིང་གཞན་དང་གཞན་དག་ན་མིང་ཐ་དད་པ་དཔག་ཏུ་མ་མཆིས་སོ། །དེ་བཞིན་དུ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་མིང་ཐ་དད་པ་ཡང་དཔག་ཏུ་མ་མཆིས་སོ། །དེ་བཞིན་དུ་ཕུང་པོ་རྣམས་དང་། ཁམས་རྣམས་དང་། སྐྱེ་མཆེད་རྣམས་དང་། དྲན་པ་ཉེ་བར་གཞག་པ་རྣམས་དང་། ཡང་དག་པར་སྤོང་བ་རྣམས་དང་། རྫུ་འཕྲུལ་གྱི་རྐང་པ་རྣམས་དང་། དབང་པོ་རྣམས་དང་། སྟོབས་རྣམས་དང་། བྱང་ཆུབ་ཀྱི་ཡན་ལག་རྣམས་དང་། འཕགས་པའི་ལམ་ཡན་ལག་བརྒྱད་པ་རྣམས་ཀྱང་སངས་རྒྱས་ཀྱི་ཞིང་གཞན་དང་གཞན་དག་ན་མིང་ཐ་དད་པ་དཔག་ཏུ་མ་མཆིས་ཏེ། དེ་བས་ན་བཙུན་པ་རབ་འབྱོར་རྣམ་གྲངས་དེས་ཀྱང་མིང་ཐམས་ཅད་ནི་མིང་མ་མཆིས་པ་དང་། ཀུན་བརྟགས་པ་དང་། ཡང་དག་པ་མ་ལགས་པ་དེ་ལྟར་རིག་པར་བགྱིའོ། །དེ་ནས་ཚེ་དང་ལྡན་པ་རབ་འབྱོར་གྱིས་རིགས་ཀྱི་བུ་དེ་ལ་འདི་སྐད་ཅེས་སྨྲས་སོ། །རྒྱལ་པོའི་ཁབ་ཀྱི་བྲམ་ཟེ་དང་ཁྱིམ་བདག་རྣམས་ནི་དེ་ན་ཡོན་གནས་འདི་ལྟ་བུ་དག་འཁོད་པ་ལས་ན་རྙེད་པ་ལེགས་པར་རྙེད་པ་ཡིན་ནོ། །རིགས་ཀྱི་བུ་དེས་སྨྲས་པ། བཙུན་པ་རབ་འབྱོར་འཇིག་རྟེན་ན་ཡོན་གནས་གང་ལགས་པ་མཁྱེན་ཏམ། སྨྲས་པ། རིགས་ཀྱི་བུ་ཇི་ལྟར་བདག་གིས་སྤོབས་པ་དེ་བཞིན་དུ་བསྟན་པར་བྱ་སྟེ། ཚུལ་ཁྲིམས་དང་ལྡན་པ། དགེ་བའི་ཆོས་ལ་ཞུགས་པ། སེམས་འཁྲུལ་པ་མེད་པ་གང་ཡིན་པ་དེ་དག་ནི་འཇིག་རྟེན་ན་ཡོན་གནས་ཡིན་ནོ། །སྨྲས་པ། བཙུན་པ་རབ་འབྱོར་ཁྱོད་ཀྱིས་ཇི་སྐད་བསྟན་པ་དེ་དག་ནི་ཡོན་གནས་ཡོངས་སུ་རྫོགས་པ་མ་ལགས་སོ། །སྨྲས་པ། རིགས་ཀྱི་བུ་ཡོན་གནས་ཡོངས་སུ་རྫོགས་པ་ཇི་ལྟ་བུ་ཡིན། སྨྲས་པ། བཙུན་པ་རབ་འབྱོར་སེམས་ཅན་
ཐམས་ཅད་ལ་བྱམས་པ་ཆེན་པོ་དང་། སྙིང་རྗེ་ཆེན་པོ་ཡང་སྐྱེ་ལ་སེམས་ཅན་གང་ཡང་མི་དམིགས་པ་གང་དག་ལགས་པ་དེ་དག་ནི་འཇིག་རྟེན་ན་ཡོན་གནས་ལགས་སོ། །སངས་རྒྱས་དང་། ཆོས་དང་། དགེ་འདུན་གྱི་ཚུལ་མི་གཅོད་པ་གང་དག་ལགས་པ་དེ་དག་ནི་འཇིག་རྟེན་ན་ཡོན་གནས་ལགས་སོ། །སེམས་ཅན་ཐམས་ཅད་ཀྱི་ཉོན་མོངས་པ་སྤོང་བ་ལ་བརྩོན་པ་གང་དག་ལགས་པ་དེ་དག་ནི་འཇིག་རྟེན་ན་ཡོན་གནས་ལགས་སོ། །ཡེ་ཤེས་མི་ཟད་པ་དང་། ཤེས་རབ་མི་ཟད་པ་དང་། བསོད་ནམས་མི་ཟད་པ་དང་། སྤོབས་པ་མི་ཟད་པ་གང་དག་ལགས་པ་དེ་དག་ནི་འཇིག་རྟེན་ན་ཡོན་གནས་ལགས་སོ། །སོ་སོའི་སྐྱེ་བོའི་གྲོགས་མི་བགྱིད་ལ་འཕགས་པའི་གྲོགས་བགྱིད་པ་གང་དག་ལགས་པ་དེ་དག་ནི་འཇིག་རྟེན་ན་ཡོན་གནས་ལགས་སོ། །གང་དག་མཐོང་བ་ཙམ་གྱིས་སེམས་ཅན་རྣམས་ཀྱི་ཡེ་ཤེས་མཐོང་བ་རྣམ་པར་དག་པར་འགྱུར་བ་གང་དག་ལགས་པ་དེ་དག་ནི་འཇིག་རྟེན་ན་ཡོན་གནས་ལགས་སོ། །དེ་ནས་གནས་བརྟན་རབ་འབྱོར་གྱི་ཕྱི་བཞིན་དུ་རྟག་ཏུ་འབྲང་བའི་ལྷ་ངེས་པ་ལ་མ་ཞུགས་པ་གང་ཡིན་པ་དེས་ཡོན་གནས་ཀྱིས་བསྟན་པ་འདི་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། ཚེ་དང་ལྡན་པ་རབ་འབྱོར་གྱི་རྐང་པ་ལ་ཕྱག་འཚལ་ནས་ཚེ་དང་ལྡན་པ་རབ་འབྱོར་ལ་བཟོད་པ་གསོལ་ཏེ། བཙུན་པ་རབ་འབྱོར་བདག་ཁྱོད་ཀྱི་སླད་བཞིན་དུ་འབྲང་བར་མི་བགྱིད་དོ་ཞེས་བྱས་སོ། །དེ་ནས་རིགས་ཀྱི་བུ་དེས་ལྷ་དེ་ལ་འདི་སྐད་ཅེས་སྨྲས་སོ། །ལྷ་ཁྱོད་ཅིའི་ཕྱིར་བཙུན་པ་རབ་འབྱོར་ལ་བཟོད་པ་གསོལ། སྨྲས་པ། རིགས་ཀྱི་བུ་བདག་ལོ་བཅུ་གཉིས་ཀྱི་བར་དུ་བཙུན་པ་རབ་འབྱོར་གྱི་ཕྱི་བཞིན་འབྲངས་ཀྱང་། བདག་གིས་ཡོན་གནས་ཀྱི་ས་བསྟན་པ་འདི་ལྟ་བུ་སྔོན་ཆད་མ་ཐོས་ཏེ། དེ་བས་ན་ད་ལྟར་ཡོན་གནས་ཀྱི་ས་བསྟན་པ་འདི་ཐོས་ནས་བདག་གི་ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་བདག་འདི་སྙམ་དུ་སེམས་ཏེ། གང་དང་གང་ན་ཡོན་གནས་ཀྱི་ས་ཡོངས་སུ་དག་པར་བྱེད་པའི་བྱང་ཆུབ་སེམས་དཔའ་སྡུད་པར་བྱེད་པའི་ཆོས་
འདི་ལྟ་བུ་དག་ཐོས་པར་འགྱུར་བ་དེ་དང་དེར་འགྲོའོ་སྙམ་མོ། །དེ་ནས་ཚེ་དང་ལྡན་པ་རབ་འབྱོར་ལྷ་དེའི་སེམས་བསྐྱེད་པ་དེ་ལ་རྗེས་སུ་ཡི་རངས་ནས་ལྷ་དེ་ལ་འདི་སྐད་ཅེས་སྨྲས་སོ། །ལྷ་ཁྱོད་ཀྱི་སེམས་སངས་རྒྱས་ཀྱི་ཆོས་རྒྱ་ཆེན་པོ་དག་ལ་བཏུད་པ་དེ་ནི་རྙེད་པ་ལེགས་པར་རྙེད་དོ། །ལྷ་བདག་ནི་ཐམས་ཅད་མཁྱེན་པ་ཉིད་ལ་སེམས་སྣད་པར་གྱུར་ཏེ། སངས་རྒྱས་ཀྱི་ཆོས་རྣམས་ཀྱི་སྣོད་དུ་མ་གྱུར་པས་ཅི་བྱར་ཡང་མེད་དོ། །ལྷ་གལ་ཏེ་བདག་སེམས་རྣམ་པར་གྲོལ་བར་མ་གྱུར་ན་ནི་བདག་གིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ཞིག་མོད། ལྷ་གཞན་ཡང་ཁྱོད་ཀྱིས་ནི་སྔོན་མ་ཐོས་པའི་ཆོས་རྣམས་ཐོས་པར་བྱེད་པ་དང་། ཐོས་པ་རྣམས་ཀྱང་ཆུད་མི་ཟ་བར་བྱེད་པའི་སྐྱེས་བུ་དམ་པ་འདི་ཅི་འདྲ་བ་དེ་ལྟ་བུའི་དགེ་བའི་བཤེས་གཉེན་ལ་རྟག་ཏུ་རྒྱུན་མི་འཆད་པར་བསྟེན་པར་བྱའོ། །དེ་ནས་རིགས་ཀྱི་བུ་དེས་ལྷ་དེ་ལ་འདི་སྐད་ཅེས་སྨྲས་སོ། །ལྷ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་འགྲུབ་པར་དཀའ་སྟེ། དེ་ནི་གོ་ཆ་ངན་ངོན་ཙམ་གྱིས་མངོན་པར་རྫོགས་པར་འཚང་རྒྱ་བར་མི་ནུས་སོ། །ལྷས་སྨྲས་པ། སྐྱེས་བུ་དམ་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འགྲུབ་པར་དཀའ་བ་ཡིན་མོད་ཀྱི། འོན་ཀྱང་ཅི་ནས་བདག་གིས་བཙལ་བ་དོན་ཡོད་པར་འགྱུར་བར་བདག་གིས་བསྒྲུབ་པར་བྱའོ། །སྨྲས་པ། ལྷ་ཁྱོད་ཀྱིས་ཇི་ལྟར་བསྒྲུབ་པར་བྱ། སྨྲས་པ། སེམས་ཅན་ཐམས་ཅད་ལ་སེམས་སྙོམས་པར་བྱ་བ་དང་། སེམས་ཅན་ཐམས་ཅད་ཉོན་མོངས་པ་ལས་རབ་ཏུ་གྲོལ་བར་བྱ་བ་དང་། སེམས་ཅན་ཐམས་ཅད་ཀྱི་ཕུང་པོའི་ཁུར་ཁྱེར་བ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། སྡུག་བསྔལ་ཐམས་ཅད་རྟོགས་པར་བྱ་བའི་ཕྱིར་དེ་ལྟར་བསྒྲུབ་པར་བྱའོ། །རིགས་ཀྱི་བུ་དེས་སྨྲས་པ། ལྷ་སེམས་ཅན་དུ་འདུ་ཤེས་པ་ལ་ནི་སེམས་ཅན་ཐམས་ཅད་ལ་སེམས་སྙོམས་པ་མེད་དོ། །ཉོན་མོངས་པར་འདུ་ཤེས་པ་ལ་ནི་སེམས་ཅན་ཐམས་ཅད་རབ་ཏུ་གྲོལ་བར་བྱེད་པ་མེད་དོ། །ཕུང་པོར་འདུ་ཤེས་པ་ལ་ནི་སེམས་ཅན་ཐམས་ཅད་ཀྱི་ཕུང་པོའི་ཁུར་ཁྱེར་བ་མེད་དོ། །ཀུན་བརྟགས་པའི་དགེ་བའི་རྩ་བ་ཅན་ལ་ནི་སེམས་ཅན་ཡོངས་སུ་སྨིན་པར་བྱེད་པ་
མེད་དོ། །བདག་དང་གཞན་དུ་འདུ་ཤེས་པ་ལ་ནི་སྡུག་བསྔལ་ཐམས་ཅད་རྟོགས་པར་བྱེད་པ་མེད་དོ། །དེ་ནས་ལྷ་དེ་གདམས་ངག་འདི་བསྟན་པས་འཐུན་པའི་ཆོས་རྣམས་ལ་བཟོད་པ་ཐོབ་བོ། །དེ་ནས་ལྷ་དེས་རིགས་ཀྱི་བུ་དེ་ལ་མཆོད་པའི་ལས་བྱ་བའི་ཕྱིར་སྒོ་གང་དེར་ལྷའི་མེ་ཏོག་སིལ་མས་གཏོར་ཏོ། །དེ་ནས་ཚེ་དང་ལྡན་པ་རབ་འབྱོར་གྱིས་ལྷ་དེ་ལ་འདི་སྐད་ཅེས་སྨྲས་སོ། །ལྷ་བདག་གིས་ཁྱོད་ཀྱི་བསམ་པ་མ་ཤེས་ནས་ཉན་ཐོས་ཀྱི་ཆོས་རྣམས་ཀྱི་གཏམ་བྱས་ཏེ་དགའ་བ་སྐྱེད་པ་དེ་ཁྱོད་ཀྱིས་ཀྱང་བཟོད་པ་གྱིས་ཤིག །དེ་ནས་ལྷ་དེས་འདི་སྐད་ཅེས་སྨྲས་སོ། །བཙུན་པ་རབ་འབྱོར་ཁྱོད་ལ་བདག་ཕྱག་འཚལ་གྱིས་སེམས་ཅན་སུའི་ཚོད་ཀྱང་མ་འཛིན་ཅིག །སེམས་ཅན་སུ་ལ་ཡང་རུང་སྟེ་བསམ་པ་མ་བརྟགས་པར་ཆོས་མ་འཆད་ཅིག །དེ་ཅིའི་ཕྱིར་ཞེ་ན། བཙུན་པ་རབ་འབྱོར་མ་ཐོས་པ་ནི་སླའི་བྱང་ཆུབ་འདོད་པས་ཉན་ཐོས་ཀྱི་ཐེག་པ་ཐོས་པ་ནི་དེ་ལྟ་མ་ཡིན་ནོ། །བཙུན་པ་རབ་འབྱོར་ཡུན་རིང་དུ་བཀྲེས་པ་ནི་སླའི་ཁ་ཟས་དུག་དང་འདྲེས་པ་ཟོས་པ་ནི་དེ་ལྟ་མ་ཡིན་ནོ། །བཙུན་པ་རབ་འབྱོར་དེ་བཞིན་དུ་མ་ཐོས་པ་ནི་སླའི་བྱང་ཆུབ་སེམས་དཔའི་ཐེག་པ་པས་ཉན་ཐོས་ཀྱི་ཐེག་པ་ཐོས་པ་ནི་དེ་ལྟ་མ་ཡིན་ནོ། །དེ་ནས་རིགས་ཀྱི་བུ་དེས་ཡང་བུད་མེད་ཀྱི་གཟུགས་དང་། ཁ་དོག་སྔ་མ་ཇི་ལྟ་བ་དེ་བཞིན་དུ་བསྟན་ནས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །བཙུན་པ་རབ་འབྱོར་བདག་གིས་བསོད་སྙོམས་མ་ཕུལ་གྱི་བར་དུ་རེ་ཞིག་གཞེས་ཤིག །དེ་ནས་བུད་མེད་དེ་རང་གི་ཁྱིམ་དུ་སོང་སྟེ། རོ་བརྒྱ་དང་ལྡན་པའི་ཟས་བླངས་ནས་ཕྱིར་བྱུང་སྟེ། འོངས་ནས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །བཙུན་པ་རབ་འབྱོར་བསོད་སྙོམས་འདི་བཞེས་ལ་འདོད་ཆགས་དང་བཅས་པར་ཡང་མ་མཛད་ཅིག །འདོད་ཆགས་དང་བྲལ་བར་ཡང་མ་མཛད་ཅིག །ཞེ་སྡང་དང་བཅས་པར་ཡང་མ་མཛད་ཅིག །ཞེ་སྡང་དང་བྲལ་བར་ཡང་མ་མཛད་ཅིག །གཏི་མུག་དང་བཅས་པར་ཡང་མ་མཛད་ཅིག །གཏི་མུག་དང་བྲལ་བར་ཡང་མ་མཛད་ཅིག །ཉོན་མོངས་པ་དང་བཅས་པར་ཡང་མ་མཛད་ཅིག །ཉོན་མོངས་པ་དང་བྲལ་བར་
ཡང་མ་མཛད་ཅིག །གལ་ཏེ་བཙུན་པ་རབ་འབྱོར་གྱིས་སྡུག་བསྔལ་ཡོངས་སུ་མ་མཁྱེན། ཀུན་འབྱུང་བ་མ་སྤངས། འགོག་པ་མངོན་སུམ་དུ་མ་བགྱིས། ལམ་མ་བསྒོམས་ན་དེ་ལྟ་ན་བསོད་སྙོམས་འདི་བཞེས་ཤིག །གལ་ཏེ་བཙུན་པ་རབ་འབྱོར་གྱིས་དྲན་པ་ཉེ་བར་གཞག་པ་བཞི་མ་བསྒོམས། ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་བརྒྱད་པ་མ་བསྒོམས་ན། དེ་ལྟ་ན་བསོད་སྙོམས་འདི་བཞེས་ཤིག །གལ་ཏེ་བཙུན་པ་རབ་འབྱོར་གྱིས་འཇིག་ཚོགས་ཀྱང་མ་དཀྲུགས་ལ་བགྲོད་པ་གཅིག་པའི་ལམ་ཡང་ཐོབ་ན་དེ་ལྟ་ན་བསོད་སྙོམས་འདི་བཞེས་ཤིག །གལ་ཏེ་བཙུན་པ་རབ་འབྱོར་གྱིས་མ་རིག་པ་མ་བཤིག་པར་རིག་པས་རྣམ་པར་གྲོལ་བ་མངོན་སུམ་དུ་མཛད་པ་དང་། འདུ་བྱེད་ཟད་པར་མ་མཛད་པར་འདུས་མ་བྱས་མངོན་སུམ་དུ་མཛད་པ་དང་། རྣམ་པར་ཤེས་པའི་རྒྱུ་བ་ལ་མ་བརྟེན་པར་རྣམ་པར་གྲོལ་བར་གྱུར་པ་དང་། མིང་དང་གཟུགས་སུ་སྒྲོ་མ་བཏགས་པར་ཁམས་གསུམ་པ་ལས་ཡང་དག་པར་འདས་པ་དང་། སྐྱེ་མཆེད་དྲུག་ལ་མ་བརྟེན་པར་རྣམ་པར་ཐར་པའི་སྒོ་སྟོང་པ་ཉིད་བསྒོམས་པ་དང་། མིག་གི་འདུས་ཏེ་རེག་པ་ལ་མ་བརྟེན་པར་རྣམ་པར་ཐར་པའི་སྒོ་མཚན་མ་མེད་པ་བསྒོམས་པ་དང་། ཚོར་བ་མ་དམིགས་པར་རྣམ་པར་ཐར་པའི་སྒོ་སྨོན་པ་མེད་པ་མངོན་སུམ་དུ་མཛད་པ་དང་། སྲེད་པ་མི་དམིགས་པར་དེ་བཞིན་ཉིད་ཡོངས་སུ་མཁྱེན་པ་དང་། ལེན་པ་རློམ་སེམས་སུ་མ་མཛད་པར་ལེན་པ་མེད་པ་ཀུན་མཁྱེན་པ་དང་། སྲིད་པ་མི་འབྱུང་བའི་ཚུལ་དུ་ཡོངས་སུ་མཁྱེན་པ་དང་། སྐྱེ་བ་མི་སྐྱེ་བར་ཡོངས་སུ་མཁྱེན་པ་དང་། རྒ་ཤི་བརྗོད་དུ་མེད་པའི་ཚུལ་དུ་ཡོངས་སུ་མཁྱེན་པ་དེ་ལྟ་བུར་སྲིད་པའི་ཡན་ལག་རྣམས་ཀུན་མཁྱེན་ན་དེ་ལྟ་ན་བསོད་སྙོམས་འདི་བཞེས་ཤིག །གལ་ཏེ་བཙུན་པ་རབ་འབྱོར་གྱིས་སངས་རྒྱས་ཀྱང་མ་གཟིགས། ཆོས་ཀྱང་མ་གསན། དགེ་འདུན་ལ་ཡང་མི་རྟོན་ན་དེ་ལྟ་ན་བསོད་སྙོམས་འདི་བཞེས་ཤིག །གལ་ཏེ་བཙུན་
པ་རབ་འབྱོར་གྱིས་འཕགས་པའི་མཉམ་པ་ཉིད་ཀྱིས་སོ་སོའི་སྐྱེ་བོ་མཉམ་པ་ཉིད་དུ་ཡོངས་སུ་མཁྱེན་ན་དེ་ལྟ་ན་བསོད་སྙོམས་འདི་བཞེས་ཤིག །གལ་ཏེ་བཙུན་པ་རབ་འབྱོར་ཉིད་འདི་ནས་ཀྱང་མེད་པར་གྱུར་ལ་ཕ་རོལ་ཏུ་ཡང་མི་སྐྱེ་ན་དེ་ལྟ་ན་བསོད་སྙོམས་འདི་བཞེས་ཤིག །གལ་ཏེ་བཙུན་པ་རབ་འབྱོར་གྱིས་འདོད་ཆགས་དང་། ཞེ་སྡང་དང་། གཏི་མུག་མཉམ་པ་ཉིད་ཀྱིས་ཉོན་མོངས་པ་མེད་པ་མཉམ་པ་ཉིད་དུ་ཡོངས་སུ་མཁྱེན་ལ། ཉོན་མོངས་པ་མེད་པ་མཉམ་པ་ཉིད་ཀྱིས་ཀྱང་འདོད་ཆགས་དང་། ཞེ་སྡང་དང་། གཏི་མུག་མཉམ་པ་ཉིད་དུ་ཡོངས་སུ་མཁྱེན་ན་དེ་ལྟ་ན་བསོད་སྙོམས་འདི་བཞེས་ཤིག །གལ་ཏེ་བཙུན་པ་རབ་འབྱོར་སོ་སོའི་སྐྱེ་བོའི་ས་ལས་ཀྱང་མ་འདས་ལ་འཕགས་པའི་ས་ལ་ཡང་མ་ཞུགས་ན་དེ་ལྟ་ན་བསོད་སྙོམས་འདི་བཞེས་ཤིག །གལ་ཏེ་བཙུན་པ་རབ་འབྱོར་སྣང་བ་ཡང་མ་ལགས། སྣང་བར་འགྲོ་བ་ཡང་མ་ལགས། འཁོར་བ་ལ་ཡང་མ་ཞུགས། མྱ་ངན་ལས་འདས་པ་ཡང་མི་འཐོབ། བརྫུན་དུ་སྨྲ་བ་ཡང་མ་ལགས། བདེན་པར་སྨྲ་བ་ཡང་མ་ལགས་ན་དེ་ལྟ་ན་བསོད་སྙོམས་འདི་བཞེས་ཤིག །གལ་ཏེ་བཙུན་པ་རབ་འབྱོར་གྱིས་ཟག་པ་ཡང་ཟད་པར་མི་མཛད་ལ་མི་ཟད་པ་ཡང་འཁྲུག་པར་མི་མཛད། ཕུང་པོ་དང་། ཁམས་དང་། སྐྱེ་མཆེད་རྣམས་ལས་ཀྱང་མི་གཡོ་ལ་རྟེན་པ་མ་མཆིས་པར་ཡང་ཉོན་མོངས་པ་མ་མཆིས་པ་བསམ་གཏན་དུ་མཛད། ཐམས་ཅད་ལ་ཡང་རྟག་ཏུ་སྨོན་པ་མི་མངའ་ལ་ཆོས་རྣམས་ཀྱང་སེམས་ཀྱིས་ཤིན་ཏུ་ཐུགས་སུ་ཆུད་ན་དེ་ལྟ་ན་བསོད་སྙོམས་འདི་བཞེས་ཤིག །བཙུན་པ་རབ་འབྱོར་གལ་ཏེ་ཁྱོད་ཀྱིས་གང་གི་ཕྱིར་རབ་ཏུ་བྱུང་བའི་ཆོས་དེ་མ་རྟོགས་ན་དེ་ལྟ་ན་བསོད་སྙོམས་འདི་བཞེས་ཤིག །བཙུན་པ་རབ་འབྱོར་གྱི་ཉོན་མོངས་པ་མེད་པ་གང་ལགས་པ་དང་། སེམས་ཅན་དམྱལ་བ་པ་རྣམས་ཀྱི་ཉོན་མོངས་པ་མེད་པ་གང་ལགས་པ། བཙུན་པ་རབ་འབྱོར་གལ་ཏེ་ཉོན་མོངས་པ་མེད་པ་འདི་གཉིས་ལ་ཡོན་གནས་ཆེས་ལྷག་པ་མ་མཆིས་ན་དེ་ལྟ་ན་བསོད་སྙོམས་འདི་བཞེས་ཤིག །འཕགས་པ་རབ་འབྱོར་ལ་ཡོན་གནས་
ཡིན་པར་འདུ་ཤེས་སྐྱེད་པ་གང་ལགས་པ་དེ་དག་ནི་བཙུན་པ་རབ་འབྱོར་ལ་མེད་པ་དང་། ཡང་དག་པ་མ་ཡིན་པས་སྐུར་པ་འདེབས་པ་སྟེ། གལ་ཏེ་བཙུན་པ་རབ་འབྱོར་ཁྱོད་ཆོས་དེ་ལྟ་བུ་དང་ལྡན་ན་དེ་ལྟ་ན་བསོད་སྙོམས་འདི་བཞེས་ཤིག །དེ་ནས་ཚེ་དང་ལྡན་པ་རབ་འབྱོར་གྱིས་སྒོ་གང་དེ་གཡོས་པར་བྱས་ནས་ལག་པ་གཡས་པ་བརྐྱང་སྟེ་འདི་སྐད་ཅེས་སྨྲས་སོ། །ཆེ་ཞེ་གང་དག་ཡང་དག་པར་སྨྲ་བ་ན་འདི་ལྟ་བུའི་ཆོས་ལྡན་པར་སྨྲ་བ་དེ་དག་ནི་བདག་ལ་ཡང་དག་པར་སྨྲ་བས་སྨྲ་བ་ཡིན་ནོ། །དེ་སྐད་ཅེས་སྨྲས་ནས་བསོད་སྙོམས་དེ་བླངས་སོ། །དེ་ནས་བུད་མེད་དེས་ཚེ་དང་ལྡན་པ་རབ་འབྱོར་ལ་ལེགས་སོ་ཞེས་བྱ་བ་བྱིན་ཏེ་འདི་སྐད་ཅེས་སྨྲས་སོ། །གང་དག་མཉམ་པ་ཉིད་ཀྱིས་བསོད་སྙོམས་ལེན་པའི་ཡོན་གནས་དེ་དག་ནི་དཀོན་ནོ། །སྨྲས་པ། མངོན་པའི་ང་རྒྱལ་ཅན་རྣམས་ནི་མཉམ་པ་ཉིད་འདི་སུན་ཕྱུང་སྟེ་སྨད་ནས་ཕལ་ཆེར་སེམས་ཅན་དམྱལ་བར་འགྲོ་བར་འགྱུར་རོ། །དེ་ནས་ལྷ་དེས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །བཙུན་པ་རབ་འབྱོར་ཁྱོད་ཀྱིས་ཅི་ལས་བསམས་ཏེ་གང་དག་ཆོས་འདི་སུན་ཕྱུང་སྟེ་སྨད་ནས་ཕལ་ཆེར་སེམས་ཅན་དམྱལ་བར་འགྲོ་བར་འགྱུར་རོ་ཞེས་དེ་སྐད་སྨྲ། སྨྲས་པ། ལྷ་འདི་ཇི་སྙམ་དུ་སེམས། སྒྱུ་མའི་ཆོས་འགའ་ཞིག་ལ་འདི་ནི་རྒྱུ་དང་བཅས་པའོ། །འདི་ནི་རྒྱུ་མེད་པའོ་ཞེས་སུན་འབྱིན་པའམ། སྨོད་པར་བྱེད་དམ། སྨྲས་པ། བཙུན་པ་རབ་འབྱོར་དེ་ནི་མ་ཡིན་ནོ། །སྨྲས་པ། ལྷ་དེ་བཞིན་དུ་ཆོས་ཐམས་ཅད་སྒྱུ་མ་ལྟ་བུར་རྟོགས་ན་བདག་གིས་སུན་དབྱུང་བའམ་སྨད་དུ་ཅི་ཞིག་ཡོད། ལྷ་གཞན་ཡང་བདག་ནི་སེམས་ཅན་ཐམས་ཅད་ཀྱིས་ཡང་དག་པའམ། ཡང་དག་པ་མ་ཡིན་པ་བརྗོད་པའི་སྒྲ་དེ་དག་ཐམས་ཅད་དང་མཉམ་མོ། །དེ་ཅིའི་ཕྱིར་ཞེ་ན། བརྗོད་པ་ཐམས་ཅད་ནི་སྒྱུ་མའི་ངོ་བོ་ཉིད་ཀྱིས་བརྗོད་དུ་མེད་དོ། །བསོད་སྙོམས་ལེན་པ་བསྟན་པ་འདི་བཤད་པ་ན་ལྷའི་བུ་བརྒྱ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ །དེ་ནས་བུད་མེད་དེས་འཕགས་པ་རབ་འབྱོར་ལ་བཟོད་པ་གསོལ་ནས་འདི་སྐད་ཅེས་སྨྲས་སོ། །བཙུན་པ་རབ་འབྱོར་བཤོས་གསོལ་ནས་བཅོམ་ལྡན་འདས་
ག་ལ་བ་དེར་བཞུད་ཅིག་དང་། བདག་ཀྱང་ཆོས་མཉན་པའི་སླད་དུ་དེར་མཆིའོ། །དེ་ནས་ཚེ་དང་ལྡན་པ་རབ་འབྱོར་གྱིས་བསོད་སྙོམས་དེ་བླངས་ནས་རྒྱལ་པོའི་ཁབ་ཀྱི་གྲོང་ཁྱེར་ནས་བྱུང་ནས་དེ་ཆོས་ཐོས་པའི་དགའ་བ་དང་། མཆོག་ཏུ་དགའ་བས་ཟས་ལ་སེམས་མི་འཇུག་པར་གྱུར་ནས་དེ་འདི་སྙམ་དུ་སེམས་ཏེ་བདག་གིས་བསོད་སྙོམས་བླངས་ན་གང་ལ་ལོག་པར་ལྟུང་བར་མི་འགྱུར་བ་སུ་ཞིག་ལ་སྦྱིན་པར་བྱ་སྙམ་མོ། །དེ་ནས་བྱང་ཆུབ་སེམས་དཔའ་ཆོས་ཐམས་ཅད་མི་ལེན་པས་ཚེ་དང་ལྡན་པ་རབ་འབྱོར་གྱི་སེམས་སེམས་ཀྱིས་ཤེས་ནས། ཚེ་དང་ལྡན་པ་རབ་འབྱོར་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་རབ་འབྱོར་གྱི་རྐང་པ་ལ་མགོ་བོས་ཕྱག་འཚལ་ནས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །བཙུན་པ་རབ་འབྱོར་བསོད་སྙོམས་འདི་བདག་ལ་བྱིན་ཅིག་དང་། བདག་ལ་བྱིན་ན་ལོག་པར་ལྟུང་བར་མི་འགྱུར་རོ། །སྨྲས་པ། རིགས་ཀྱི་བུ་ཅི་ཁྱོད་ཚུལ་ཁྲིམས་བླངས་པའམ། ཚུལ་ཁྲིམས་ལ་གནས་པ་ཡིན་ནམ། སྨྲས་པ། བཙུན་པ་རབ་འབྱོར་ཆོས་ཐམས་ཅད་ནི་བླང་དུ་མེད་པ་སྟེ། དེ་ལ་ནི་ཚུལ་ཁྲིམས་ཀྱང་མེད། འཆལ་པའི་ཚུལ་ཁྲིམས་ཀྱང་མེད་དོ། །བཙུན་པ་རབ་འབྱོར་གཞན་ཡང་བདག་ནི་སྲོག་གཅོད་པར་བྱེད་པ་དང་། མ་བྱིན་པར་ལེན་པ་བྱེད་པ་དང་། འདོད་པ་ལ་ལོག་པར་གཡེམ་པ་བྱེད་པ་དང་། བརྫུན་དུ་སྨྲ་བ་བྱེད་པ་དང་། ཕྲ་མ་བྱེད་པ་དང་། ཚིག་རྩུབ་པོ་སྨྲ་བ་དང་། ཚིག་ཀྱལ་པ་སྨྲ་བ་དང་། བརྣབ་སེམས་ཅན་དང་། གནོད་སེམས་ཀྱི་སེམས་དང་ལྡན་པ་དང་། ལོག་པར་ལྟ་བ་ཅན་ཡིན་ནོ། །དེ་ནས་ཚེ་དང་ལྡན་པ་རབ་འབྱོར་འདི་སྙམ་དུ་སེམས་ཏེ། རིགས་ཀྱི་བུ་འདིའི་བསྟན་པ་འདི་འདྲ་བ་ལས་ན་འདི་ནི་བྱང་ཆུབ་སེམས་དཔའ་ཕྱིར་མི་ལྡོག་པ་ཡིན་པར་ཐེ་ཙོམ་མེད་ཀྱིས་ལྡེམ་པོ་ངག་འདི་བདག་གིས་དྲི་བར་བྱའོ་སྙམ་མོ། །དེ་ནས་ཚེ་དང་ལྡན་པ་རབ་འབྱོར་གྱིས་རིགས་ཀྱི་བུ་དེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་ཅི་ལས་བསམས་ཏེ། འདི་སྐད་དུ་བདག་ནི་སྲོག་གཅོད་པ་བྱེད་པ་དང་། མ་བྱིན་པར་ལེན་པ་བྱེད་པ་དང་། འདོད་པས་ལོག་པར་གཡེམ་པ་བྱེད་པ་དང་། བརྫུན་དུ་
སྨྲ་བ་བྱེད་པ་དང་། ཕྲ་མ་བྱེད་པ་དང་། ཚིག་རྩུབ་པོ་སྨྲ་བ་དང་། ཚིག་ཀྱལ་པ་སྨྲ་བ་དང་། བརྣབ་སེམས་ཅན་དང་། གནོད་སེམས་ཀྱི་སེམས་དང་ལྡན་པ་དང་། ལོག་པར་ལྟ་བ་ཅན་ཡིན་ནོ་ཞེས་སྨྲ། དེ་ནས་བྱང་ཆུབ་སེམས་དཔའ་ཆོས་ཐམས་ཅད་མི་ལེན་པས་ཚེ་དང་ལྡན་པ་རབ་འབྱོར་ལ་ཚིགས་སུ་བཅད་དེ་སྨྲས་པ། བྱང་ཆུབ་ལམ་ནི་བླ་མེད་པའི། །ལམ་ནི་བདག་གིས་རྣམ་པར་སྦྱངས། །སྲོག་ཆགས་བྱེ་བ་ཕྲག་སྟོང་ཡང་། །ལམ་དེ་ལ་ནི་ཡོངས་སུ་བཀོད། །སྲོག་ནི་བདག་གི་ཤིན་ཏུ་གཏུགས། །དེ་ཕྱིར་བདག་ནི་དེ་སྐད་སྨྲ། །གང་དག་ལམ་ནི་རྣམ་པར་སྦྱངས། །དེ་དག་སྲོག་གཅོད་པ་ཞེས་བྱ། །ལྷས་ནི་བྱང་ཆུབ་བྱིན་མ་ཡིན། །བརྒྱ་བྱིན་ཚངས་པས་མ་བྱིན་ཏེ། །མ་བྱིན་པར་ནི་བདག་གིས་བླངས། །དེ་ཕྱིར་བདག་ནི་མ་བྱིན་ལེན། །སྲོག་ཆགས་ཀུན་ལ་ཕན་པའི་ཕྱིར། །འཐུན་པའི་ཐེག་པ་བླངས་པས་ན། །དེ་ཕྱིར་ཐེག་པ་ཆེན་པོ་འདི། །མ་བྱིན་བླངས་ཞེས་བྱ་བ་ཡིན། །འདོད་པས་ལོག་པར་ཡོངས་ཤེས་པ། །ཆོས་འདོད་ཡིན་ཞེས་དེ་དག་ཤེས། །འདོད་པ་འདི་དག་འདོད་མ་ཡིན། །དེ་ཕྱིར་ལོག་ཅེས་སྤྱོད་པར་བྱེད། །སྒྲར་ནི་ཇི་སྙེད་གདགས་པ་རྣམས། །དེ་དག་བརྫུན་ཞེས་ཡང་དག་གསུངས། །མེད་པའི་ཕྱིར་ན་དེ་བརྫུན་ཏེ། །བརྫུན་དུ་སྨྲ་བ་ཞེས་ཀྱང་བྱ། །ཐེག་པ་དམན་པ་འདོད་པ་ཡི། །སེམས་ཅན་གང་དག་སུ་ཡང་རུང་། །སེམས་ཅན་དེ་དག་དབྱེ་བའི་ཕྱིར། །ཐེག་པ་ཆེ་ལ་དགོད་པར་བྱེད། །ཕྲ་མའི་ཚིག་ནི་སྨྲ་བྱེད་ཅིང་། །མུ་སྟེགས་ཅན་གཞན་འབྱེད་པར་བྱེད། །སེམས་ཅན་ལམ་ངན་ལྷུང་བ་རྣམས། །ཡང་དག་ལམ་ལ་འཛུད་པར་བྱེད། །རྒོལ་བ་དེ་དག་ཚར་བཅད་དེ། །དེ་དག་ཤིན་ཏུ་དགའ་བ་མེད། །རྩུབ་པའི་ཚིག་ནི་སྨྲས་ནས་ཀྱང་། །བདུད་རྣམས་ཐམས་ཅད་ཕམ་པར་བྱས། །རྩུབ་པའི་ཚིག་ནི་སྨྲ་མོད་ཀྱི། །འོན་ཀྱང་སེམས་ལ་ཁྲོ་བ་མེད། །སེམས་ཅན་སྨིན་པར་བྱ་བ་ལ། །དཔའ་བོ་རྣམས་ཀྱིས་ཐབས་ལ་ལྟོས། །གང་ལས་དགོངས་ཏེ་གསུངས་པ་ཡི། །དགོངས་པའི་ཚིག་ནི་རབ་ཏུ་ཤེས། །དེས་ན་བསམས་ཏེ་རབ་སྨྲ་ཞིང་། །སེམས་ཅན་བྱེ་བ་འདུལ་བར་བྱེད། །ཁ་ཅིག་ལ་ནི་བསམས་ཏེ་སྨྲས། །ཁ་ཅིག་དེ་དག་བརྫུན་པར་ཤེས། །
དེ་ཕྱིར་བསམས་ཏེ་སྨྲ་བ་ཡིན། །ཆོས་ཀྱི་མངོན་སུམ་རྟོགས་པར་བྱེད། །སེམས་ཅན་ཇི་སྙེད་ཡོད་པ་རྣམས། །རེ་རེ་ལ་ཡང་དེ་དག་ནི། །མི་མིན་ལྷ་ཡི་བདེ་བ་དག །འཇིག་རྟེན་ན་ནི་བརྣབ་སེམས་བྱེད། །བདེ་བ་གང་དག་ལྡན་གྱུར་ན། །འཇིག་རྟེན་མགོན་པོ་ཕན་བྱེད་འགྱུར། །བདེ་བ་དེ་ནི་སེམས་ཅན་ཀུན། །ལྡན་པར་མཁས་རྣམས་བརྣབ་སེམས་བྱེད། །སེམས་ཅན་ཐམས་ཅད་རྒྱལ་གྱུར་ཅེས། །རྟག་ཏུ་དེ་དག་བརྣབ་སེམས་བྱེད། །བརྣབ་སེམས་དེ་འདྲ་ཡིན་པས་ན། །དེ་ཕྱིར་བརྣབ་སེམས་ཅན་ཞེས་སྨྲས། །དམ་པའི་ཆོས་ནི་འཇིག་པའི་ཚེ། །སྟོབས་ཆེན་རྣམས་ཀྱིས་ཚར་བཅད་དེ། །དེ་དག་རང་གི་བདེ་བ་སྤོང་། །ཆོས་དང་སྲོག་ཆགས་སྤོང་མི་བྱེད། །འཇིག་རྟེན་ཀུན་གྱི་རྒོལ་བ་དང་། སེམས་ཅན་ཀུན་དང་མི་འཐུན་ཏེ། །ཐམས་ཅད་འཐུན་པར་བྱ་བའི་ཕྱིར། །དེ་དག་གནོད་སེམས་སྟོན་པར་བྱེད། །དེ་དག་བསྐལ་པར་རྩོད་བྱེད་དམ། །བསྐལ་པ་བྱེ་བར་རྩོད་ཀྱང་རུང་། །དམ་པའི་ཆོས་ནི་སྤོང་མི་བྱེད། །སླར་ཡང་ལྡོག་པར་ཡོངས་མི་བྱེད། །ལོག་པར་ལྟ་ལ་དཔའ་བ་རྣམས། །དེ་དག་འདུས་བྱས་ཀུན་ལ་སྙོམས། །ལོག་པར་ལྟ་བ་རབ་ཏུ་ཤེས། །ཡང་དག་ལྟ་བའི་རྣམ་པར་རྟོག །གང་དག་དེ་འདྲའི་ཆོས་དང་ལྡན། །དེ་དང་དེ་དག་ཁྲིམས་ལ་གནས། །གནས་མེད་ལ་ནི་གནས་བཅས་ནས། །མཁས་རྣམས་བྱང་ཆུབ་རྟོགས་པར་འགྱུར། །དེ་ནས་ཚེ་དང་ལྡན་པ་རབ་འབྱོར་གྱིས་རིགས་ཀྱི་བུ་དེ་ལ་བསོད་སྙོམས་དེ་བྱིན་ནས་འདི་སྐད་དུ་སྐྱེས་བུ་དམ་པ་འདི་ལྟ་བུ་དག་གིས་ནི་དད་པས་བྱིན་པའི་བསོད་སྙོམས་ལོག་པར་ལྟུང་བར་མི་བྱེད་དོ་ཞེས་སྨྲས་སོ། །དེ་ནས་ཚེ་དང་ལྡན་པ་རབ་འབྱོར་ཟན་མ་ཟོས་ཏེ་ཕྱེམ་རེད་ཀྱི་དུས་ན་ནང་དུ་ཡང་དག་འཇོག་ལས་ལངས་ནས། བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཇི་ལྟར་གྱུར་པ་དེ་དག་ཐམས་ཅད་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་བྱང་ཆུབ་སེམས་དཔའ་དེ་སུ་ཡིན་པ་ཤེས་སམ། གསོལ་པ། བཅོམ་ལྡན་འདས་མ་འཚལ་ལགས་སོ། །བཅོམ་ལྡན་འདས་ཀྱིས་
བཀའ་སྩལ་པ། རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི་བུད་མེད་འགྱུར་བ་ཞེས་བྱ་སྟེ་དགའ་བ་བཀོད་པའི་ཐབས་ལ་མཁས་པས་སེམས་ཅན་རྣམས་འདུལ་བར་བྱེད་དོ། །རབ་འབྱོར་དཔེར་ན་ཡུངས་འབྲུས་ཤིང་རྟ་བཀང་བ་ལ་ཡུལ་མ་ག་དྷཱའི་ཁལ་བཅུ་ཚད་ཉི་ཤུ་ཡོད་པ་ལས་ལོ་བརྒྱ་ཞིང་ཡུངས་འབྲུ་རེ་རེ་བོར་བ་ནི་བགྲང་བ་དེ་ལྟ་བུའི་ཚུལ་གྱིས་ཤིང་རྟ་དེའི་ཡུངས་འབྲུའི་མཐའ་ཆེས་མྱུར་དུ་རྟོགས་པར་ནུས་ཀྱི། བྱང་ཆུབ་སེམས་དཔའ་བུད་མེད་འགྱུར་བས་དགའ་བ་བཀོད་པའི་ཐབས་ལ་མཁས་པས་མི་མཇེད་ཀྱི་འཇིག་རྟེན་གྱི་ཁམས་འདིར་སེམས་ཅན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱེད་པ་དང་། སེམས་ཅན་མང་པོ་ལྷ་དང་མིར་སྐྱེ་བ་ལ་བཀོད་པ་རྣམས་ནི་དེ་ལྟ་མ་ཡིན་ནོ། །དེ་ནས་བུད་མེད་དེ་བུད་མེད་ལྔ་བརྒྱས་བསྐོར་ཅིང་མདུན་དུ་བདར་ཏེ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་ནས་བྱ་རྒོད་ཀྱི་ཕུང་པོའི་རི་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱིས་བུད་མེད་དེ་འོང་བ་ཐག་རིང་པོ་ནས་གཟིགས་ཏེ། གཟིགས་ནས་ཚེ་དང་ལྡན་པ་རབ་འབྱོར་ལ་བཀའ་སྩལ་པ། རབ་འབྱོར་བུད་མེད་ལྔ་བརྒྱ་ཙམ་འོང་བ་འདི་དག་མཐོང་ངམ། གསོལ་པ། བཅོམ་ལྡན་འདས་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འདི་དག་ཐམས་ཅད་ནི་བྱང་ཆུབ་སེམས་དཔའ་བུད་མེད་འགྱུར་བས་དགའ་བ་བཀོད་པའི་ཐབས་ལ་མཁས་པས་ཡོངས་སུ་སྨིན་པར་བྱས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཀོད་པ་ཤ་སྟག་གོ །དེ་ནས་བུད་མེད་དེ་བུད་མེད་ལྔ་བརྒྱས་བསྐོར་ཅིང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ །དེ་ནས་ཚེ་དང་ལྡན་པ་རབ་འབྱོར་གྱིས་བུད་མེད་དེ་བསུ་ནས་ཐལ་མོ་སྦྱར་ཏེ་ཕྱག་བྱས་སོ། །དེ་ནས་ཚེ་དང་ལྡན་པ་ཤཱ་རིའི་བུས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར་འཕགས་པའི་ཆོས་མ་ཐོབ་པ་དང་། འཕགས་པའི་ལུས་སུ་མི་གནས་པའི་བུད་མེད་ལ་ཅིའི་ཕྱིར་ཕྱག་འཚལ། བུད་མེད་དེས་སྨྲས་པ། གནས་བརྟན་ཤཱ་རིའི་བུ་གལ་ཏེ་འཇིག་རྟེན་ན་འཕགས་པ་ནི་གང་
དག་ལགས། འཕགས་པ་མ་ལགས་པ་ནི་གང་དག་ལགས་པ་མཁྱེན་ན་ཁྱོད་ཀྱིས་སྤོབས་པ་མཛོད་ཅིག །གནས་བརྟན་ཤཱ་རིའི་བུས་སྨྲས་པ། ཆེ་ཞེ་ཁྱོད་ཀྱིས་འཇིག་རྟེན་ན་འཕགས་པ་གང་དག་ཡིན་པ་དང་། འཕགས་པ་མ་ཡིན་པ་གང་དག་ཡིན་པ་ཤེས་སམ། སྨྲས་པ། བཙུན་པ་ཤཱ་རིའི་བུ་བདག་གིས་འཚལ་ཏོ། །སྨྲས་པ་དེ་དག་གང་ཡིན། སྨྲས་པ། བཙུན་པ་ཤཱ་རིའི་བུ་འཕགས་པའི་རིགས་མི་གཅོད་པ་གང་དག་ལགས་པ་དེ་དག་ནི་འཕགས་པའོ། །སངས་རྒྱས་དང་། ཆོས་དང་། དགེ་འདུན་གྱི་རིགས་མི་གཅོད་པ་གང་དག་ལགས་པ་དེ་དག་ནི་འཕགས་པའོ། །འཕགས་པ་རྣམས་ལ་བྱམས་པའི་སེམས་དང་ལྡན་པ་དང་། འཕགས་པ་མ་ཡིན་པ་རྣམས་ལ་ཐར་བ་འདོད་པ་གང་དག་ལགས་པ་དེ་དག་ནི་འཕགས་པའོ། །བཙུན་པ་ཤཱ་རིའི་བུ་གཞན་ཡང་བུད་མེད་རྒྱན་གྱིས་ལེགས་པར་བརྒྱན་པ། གོས་གཙང་མ་སྲབ་མོ་གྱོན་པ། ཕྱེ་མ་དང་། སྤོས་དང་། མེ་ཏོག་ཕྲེང་དང་། བྱུག་པ་རྣམས་ལ་སྟེན་པ། འདོད་པའི་ཡོན་ཏན་ལྔ་དང་ལྡན་པ། ཐམས་ཅད་མཁྱེན་པ་ཉིད་ཀྱི་སེམས་དང་མ་བྲལ་བ་ནི་ཆེས་སླའི་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་དབེན་པ་ན་གནས་པ་ནི་དེ་ལྟ་མ་ལགས་སོ། །བཙུན་པ་ཤཱ་རིའི་བུ་གཞན་ཡང་དོན་འདི་ཉིད་བརྡ་སྤྲད་པའི་ཕྱིར་ཁྱོད་ལ་དཔེ་བསྟན་པར་བགྱི་ན་བཙུན་པ་ཤཱ་རིའི་བུ་འདི་ཇི་སྙམ་དུ་དགོངས། མཆིང་བུའི་ནོར་བུ་བཻ་དཱུཪྱའི་སྣོད་དུ་བཅུག་པ་འདམ་མམ། འོན་ཏེ་ནོར་བུ་རིན་པོ་ཆེ་རིན་ཐང་མེད་པ་འདམ་རྫབ་ཏུ་བཅུག་པ་འདམ། གནས་བརྟན་ཤཱ་རིའི་བུས་སྨྲས་པ། ཆེ་ཞེ་ནོར་བུ་རིན་པོ་ཆེ་རིན་ཐང་མེད་པ་འདམ་རྫབ་ཏུ་བཅུག་པ་འདམ་གྱི་མཆིང་བུའི་ནོར་བུ་བཻ་དཱུཪྱའི་སྣོད་དུ་བཅུག་པ་ནི་དེ་ལྟ་མ་ཡིན་ནོ། །སྨྲས་པ། བཙུན་པ་ཤཱ་རིའི་བུ་དེ་བཞིན་དུ་བུད་མེད་འདོད་པའི་ཡོན་ཏན་ལྔ་དང་ལྡན་པ་ཐམས་ཅད་མཁྱེན་པ་ཉིད་ཀྱི་སེམས་དང་མ་བྲལ་བ་ནི་ཆེས་འཕགས་ཀྱི། དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་དབེན་པ་ན་གནས་པ་དེ་ནི་དེ་ལྟ་མ་ལགས་སོ། །དེ་ནས་ཚེ་དང་ལྡན་པ་ཤཱ་རིའི་བུས་སྨྲས་པ། ཆེ་ཞེ་ཁྱོད་ཐེག་པ་ཆེན་པོ་ལ་ཡང་དག་པར་ཞུགས་པ་ཡིན་ནམ། སྨྲས་པ། བཙུན་པ་ཤཱ་རིའི་བུ་ཐེག་པ་ཆེན་པོ་ནི་
གང་ལ་ཡང་མི་གནས་ལ་ལྡོག་པ་ཡང་མ་མཆིས་སོ། །སྨྲས་པ། ཆེ་ཞེ་གལ་ཏེ་ཁྱོད་ཐེག་པ་ཆེན་པོ་གང་ལ་ཡང་མི་གནས་ལ་ལྡོག་པ་ཡང་མེད་ན་ཐེག་པ་ཆེན་པོ་ལ་ཡང་དག་པར་ཞུགས་པ་གང་དག་ཡིན་པ་དེ་དག་ཅི་ལ་ཞུགས། སྨྲས་པ། བཙུན་པ་ཤཱ་རིའི་བུ་ཐེག་པ་ཆེན་པོ་པ་རྣམས་ནི་ཅི་ལ་ཡང་མི་གནས་ཏེ། མ་རིག་པ་ཟད་པར་བགྱི་བའི་སླད་དུ་དེ་དག་མི་གནས་པ་ནས་རྒ་ཤིའི་བར་དུ་ཟད་པར་བགྱི་བའི་སླད་དུ་དེ་དག་མི་གནས་སོ། །དེ་ཅིའི་སླད་དུ་ཞེ་ན། བཙུན་པ་ཤཱ་རིའི་བུ་མ་རིག་པ་ནས་རྒ་ཤིའི་བར་དུ་མི་ཟད་པའི་སླད་དུའོ། །དེས་ན་དེ་དག་ནི་སྐྱེ་བའི་ཆོས་ཅན་ཡང་མ་ལགས། འགག་པའི་ཆོས་ཅན་མ་ལགས་སོ། །གལ་ཏེ་སྐྱེ་བར་གྱུར་ན་ནི་དེ་ལས་ཟད་པར་འགྱུར་ན་གང་གི་ཕྱིར་མི་སྐྱེ་བ་དེའི་ཕྱིར་མི་ཟད་དོ། །དེ་བས་ན་ཟད་པ་ཡང་མ་མཆིས། སྐྱེ་བ་ཡང་མ་མཆིས་སོ། །དགེ་སྦྱོང་གི་ཆོས་ནི་མི་སྐྱེ་བའི་ཆོས་ཅན་ནོ། །བཙུན་པ་ཤཱ་རིའི་བུ་དེ་ལྟར་ན་རྟེན་ཅིང་འབྲེལ་པར་འབྱུང་བ་མ་སྐྱེས་པ་དང་མ་འགགས་པ་ལགས་སོ། །དེ་ནས་ཚེ་དང་ལྡན་པ་ཤཱ་རིའི་བུས་བུད་མེད་དེ་ལ་འདི་སྐད་ཅེས་སྨྲས་སོ། །ཆེ་ཞེ་ཁྱོད་ནི་ལྷར་བཅས་པའི་འཇིག་རྟེན་དང་། ཉན་ཐོས་དང་། རང་སངས་རྒྱས་དང་བཅས་པས་ཕྱག་བྱ་བའི་འོས་ཡིན་ན་ཚེ་དང་ལྡན་པ་རབ་འབྱོར་གྱིས་ལྟ་ཅི་སྨོས། དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ཟག་གིས་གང་ཟག་ལ་ཚོད་འཛིན་པ་སུ་ཞིག་མཆིས་ཏེ། ཆེ་ཞེ་འདི་ནི་འདི་ལྟར་རྒྱན་གྱིས་ལེགས་པར་བརྒྱན་ལ་འདི་ལྟར་སྤོབས་པ་ཕུན་སུམ་ཚོགས་པ་དང་ལྡན་པ་ལགས་སོ། །བུད་མེད་དེས་སྨྲས་པ། བཙུན་པ་ཤཱ་རིའི་བུ་འདི་ནི་རྒྱན་གྱི་སྤོབས་པ་མ་ལགས་སོ། །སྨྲས་པ། འོ་ན་གང་གི་སྤོབས་པ་ཡིན། སྨྲས་པ། བཙུན་པ་ཤཱ་རིའི་བུ་བརྒྱད་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རྒྱན་ལགས་ཏེ། བརྒྱད་གང་ཞེ་ན། འདི་ལྟ་སྟེ། བྱང་ཆུབ་ཀྱི་སེམས་མི་བརྗེད་པའི་རྒྱན་དང་། སྙིང་རྗེ་ཆེན་པོའི་ལྷག་པའི་བསམ་པ་ལ་གནས་པའི་རྒྱན་དང་། སེམས་ཅན་ཐམས་ཅད་ལ་ཞེ་འགྲས་པ་མེད་པའི་སེམས་ཀྱི་རྒྱན་དང་། ཐོས་པའི་ཆོས་ཡོངས་སུ་འཚོལ་བ་ལ་ཆོག་མི་ཤེས་པའི་རྒྱན་དང་། ཇི་ལྟར་ཐོས་པའི་ཆོས་རྣམས་དང་།
ཇི་ལྟར་ཀུན་ཆུབ་པར་བྱས་པ་རྣམས་ལ་ཚུལ་བཞིན་དུ་སོ་སོར་རྟོག་ཅིང་དཔྱོད་པའི་རྒྱན་དང་། སེམས་ཅན་ཡོངས་སུ་སྨིན་པར་བྱེད་ཀྱང་ཆོས་ཐམས་ཅད་མི་དམིགས་པའི་རྒྱན་དང་། ཆོས་ཟབ་མོ་རྣམ་པར་ངེས་པ་དང་། རྟེན་ཅིང་འབྲེལ་པར་འབྱུང་བ་དང་། སེམས་ཅན་གྱི་དབང་པོ་མཆོག་དང་། མཆོག་མ་ཡིན་པ་ཤེས་པའི་ཡེ་ཤེས་ཀྱི་རྒྱན་དང་། རྒྱན་དེ་ཡང་སངས་རྒྱས་ཀྱི་བྱིན་གྱི་རླབས་དང་། ཐབས་ལ་མཁས་པའི་རྒྱན་ཏེ། བཙུན་པ་ཤཱ་རིའི་བུ་བརྒྱད་པོ་དེ་དག་ནི་རྒྱན་དག་ལགས་ཏེ། རྒྱན་དེ་དག་གིས་བརྒྱན་པའི་བྱང་ཆུབ་སེམས་དཔའ་ནི་ཐོགས་པ་མེད་པའི་སྤོབས་པ་དང་ལྡན་ནོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆེ་ཞེ་འདི་གང་ནས་ཤི་འཕོས་ཏེ་འདིར་སྐྱེས་ལགས། དེ་ནས་བུད་མེད་དེས་བདག་ཉིད་ཀྱི་ལུས་ཅི་འདྲ་བ་དེ་ཁོ་ན་འདྲ་བའི་བུད་མེད་དག་གཅིག་ཚེ་དང་ལྡན་པ་ཤཱ་རིའི་བུའི་མདུན་དུ་སྤྲུལ་ཏོ། །སྤྲུལ་ནས་ཀྱང་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤཱ་རིའི་བུ་ཁྱོད་ཀྱིས་བུད་མེད་འདི་ལ་ག་ལས་ཤི་འཕོས་ཏེ་འདིར་སྐྱེས་ཞེས་དྲིས་ཤིག །གནས་བརྟན་ཤཱ་རིའི་བུས་སྨྲས་པ། བུད་མེད་འདི་ནི་སྤྲུལ་པ་ཡིན་ཏེ། སྤྲུལ་པ་ལ་ནི་འཆི་འཕོ་དང་སྐྱེ་བ་མེད་དོ། །སྨྲས་པ། བཙུན་པ་ཤཱ་རིའི་བུ་དེ་བཞིན་དུ་དེ་བཞིན་གཤེགས་པ་ནི་ཆོས་ཐམས་ཅད་སྤྲུལ་པའི་ངོ་བོ་ཉིད་ཀྱི་མཚན་ཉིད་དུ་མངོན་པར་རྫོགས་པར་སངས་རྒྱས་སོ། །ཆོས་ཐམས་ཅད་སྤྲུལ་པའི་ངོ་བོ་ཉིད་ཀྱི་མཚན་ཉིད་དུ་ཤེས་པ་གང་ཡིན་པ་དེ་དག་ལ་ནི་འཆི་འཕོའམ་སྐྱེ་བ་འདྲི་བར་མི་བྱའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་བུད་མེད་འགྱུར་བ་ཞེས་བྱ་བ་ཡིན་ཏེ། དེ་བཞིན་གཤེགས་པ་མི་འཁྲུགས་པའི་སངས་རྒྱས་ཀྱི་ཞིང་མངོན་པར་དགའ་བ་ནས་ཤི་འཕོས་ནས་སེམས་ཅན་ཡོངས་སུ་སྨིན་པར་བྱ་བའི་ཕྱིར་འདིར་འོངས་སོ། །ཤཱ་རིའི་བུ་བྱང་ཆུབ་སེམས་དཔའ་བུད་མེད་འགྱུར་བ་འདིས་མི་མཇེད་ཀྱི་འཇིག་རྟེན་གྱི་ཁམས་འདིར་སེམས་ཅན་དཔག་ཏུ་མེད་གྲངས་མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །དེ་ནས་བྱང་ཆུབ་སེམས་དཔའ་བུད་མེད་འགྱུར་བས་
བུད་མེད་ཀྱི་གཟུགས་ཉིད་ཀྱིས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་འདི་སྐད་ཅེས་གསོལ་ཏོ། །བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་པའི་བར་དང་། བདག་གི་བུད་མེད་ཀྱི་ལུས་མ་མཆིས་པར་གྱུར་ཏེ། སྐྱེས་པའི་ལུས་སུ་མ་གྱུར་གྱི་བར་དུ་བཅོམ་ལྡན་འདས་ཀྱི་ཞབས་ལས་མི་ལྡང་ལགས་སོ། །བུད་མེད་ལྔ་བརྒྱ་པོ་དེ་དག་ཀྱང་བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ཀྱང་བུད་མེད་ཀྱི་རང་བཞིན་ལས་གྱུར་ཏེ། སྐྱེས་པའི་རང་བཞིན་དུ་མ་གྱུར་གྱི་བར་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་གྱི་བར་དུ་བདག་ཅག་མི་ལྡང་ལགས་སོ། །དེ་ནས་དེའི་ཚེ་བཅོམ་ལྡན་འདས་ཀྱིས་འཛུམ་པ་མཛད་དོ། །འདི་ནི་སངས་རྒྱས་བཅོམ་ལྡན་འདས་རྣམས་གང་གི་ཚེ་འཛུམ་པ་མཛད་པའི་ཆོས་ཉིད་དེ། དེ་ནས་དེའི་མོད་ལ་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་དུ་མ་སྣ་ཚོགས་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། བཙོད་ཀ་དང་། ཤེལ་དང་། དངུལ་གྱི་ཁ་དོག་ལྟ་བུ་དག་བྱུང་སྟེ། འོད་ཟེར་དེ་དག་གིས་འཇིག་རྟེན་གྱི་ཁམས་མཐའ་ཡས་མུ་མེད་པ་འོད་ཀྱིས་ཁྱབ་པར་བྱས་ནས་ཚངས་པའི་འཇིག་རྟེན་གྱི་བར་དུ་ཐུག་སྟེ། ཕྱིར་ལོག་ནས་བཅོམ་ལྡན་འདས་ཀྱི་སྤྱི་བོའི་གཙུག་ཏུ་མི་སྣང་བར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་རྣམས་ནི་རྒྱུ་མ་མཆིས་རྐྱེན་མ་མཆིས་པར་འཛུམ་པ་མི་མཛད་ན། བཅོམ་ལྡན་འདས་འཛུམ་པ་མཛད་པའི་རྒྱུ་ནི་གང་ལགས། རྐྱེན་ནི་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ཀྱིས་བྱང་ཆུབ་སེམས་དཔའ་
བུད་མེད་འགྱུར་བ་བུད་མེད་ལྔ་བརྒྱས་བསྐོར་བ་དེ་བཞིན་གཤེགས་པའི་ཞབས་ལ་གཏུགས་པ་མཐོང་ངམ། གསོལ་པ། བཅོམ་ལྡན་འདས་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་བྱང་ཆུབ་སེམས་དཔའ་བུད་མེད་འགྱུར་བ་འདི་བསྐལ་པ་བགྲང་བ་ལས་འདས་པ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། འཇིག་རྟེན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་གྱི་རྒྱལ་པོའི་སྤོབས་པ་ཅན་ཞེས་བྱ་བར་འགྱུར་ཏེ། དེས་བྱང་ཆུབ་ཐོབ་པ་ན་བུད་མེད་ལྔ་བརྒྱ་པོ་འདི་དག་གཟུངས་ཐོབ་པ་དང་། ཐོགས་པ་མེད་པའི་སྤོབས་པ་དང་ལྡན་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བུད་མེད་འགྱུར་བ་འདིས་ཡོན་ཏན་གྱི་རྒྱན་བསྟན་པ་གང་དག་ཡིན་པའི་རྒྱན་བརྒྱད་པོ་དེ་དག་གིས་བརྒྱན་པའི་བྱང་ཆུབ་སེམས་དཔའ་ལྔ་བརྒྱར་འགྱུར་ཏེ། བྱང་ཆུབ་སེམས་དཔའ་དེ་དག་དེ་བཞིན་གཤེགས་པ་ཡོན་ཏན་གྱི་རྒྱལ་པོ་སྤོབས་པ་ཅན་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་འགྱུར་རོ། །ཀུན་དགའ་བོ་དེ་བཞིན་གཤེགས་པ་ཡོན་ཏན་གྱི་རྒྱལ་པོ་སྤོབས་པ་ཅན་དེའི་སངས་རྒྱས་ཀྱི་ཞིང་ཡང་འབྱོར་ཅིང་རྒྱས་ལ། བདེ་བ་དང་། ལོ་ལེགས་པ་དང་། མི་དང་། སྐྱེ་བོ་མང་པོས་གང་བར་འགྱུར་ཏེ། དགའ་ལྡན་གྱི་ལྷའི་ལོངས་སྤྱོད་དང་མཉམ་པར་འགྱུར་རོ། །སངས་རྒྱས་ཀྱི་ཞིང་དེ་ན་བུད་མེད་ནི་མིང་ཙམ་ཡང་མེད་པར་འགྱུར་ཏེ། སེམས་ཅན་དེ་དག་ཐམས་ཅད་པད་མའི་སྙིང་པོ་ལས་རྫུས་ཏེ་སྐྱེས་ནས་སྐྱིལ་མོ་ཀྲུང་བཅས་ཏེ་འདུག་ལ་གཙང་ཞིང་ཚངས་པར་སྤྱོད་པ་དང་། རྒྱན་བརྒྱད་པོ་དེ་དག་གིས་བརྒྱན་པར་འགྱུར་རོ། །དེ་ནས་བྱང་ཆུབ་སེམས་དཔའ་བུད་མེད་འགྱུར་བ་དེ་དང་། བུད་མེད་ལྔ་བརྒྱ་པོ་དེ་དག་བཅོམ་ལྡན་འདས་ཀྱིས་མངོན་སུམ་དུ་ལུང་བསྟན་པ་ཐོས་ནས་དགའ་བ་དང་། མཆོག་ཏུ་དགའ་བ་དེ་ཁོ་ནས་ཏ་ལ་བདུན་སྲིད་ཙམ་གྱི་ནམ་མཁའ་ལ་འཕགས་ནས། དེའི་མོད་ཁོ་ན་ལ་ཁྱེའུ་ལོ་བཅུ་དྲུག་ལོན་པ་ཙམ་དུ་སྣང་བར་གྱུར་ཏོ། །དེ་དག་བར་སྣང་དེ་ལས་བབས་ཏེ་བཅོམ་ལྡན་འདས་ལ་ཕྱག་འཚལ་ནས། དེ་བཞིན་གཤེགས་པས་དེ་དག་ཐམས་ཅད་ཀྱི་སྤྱི་བོར་ཕྱག་གིས་བྱུགས་སོ། །དེ་ནས་དེ་དག་ཐམས་ཅད་ཀྱིས་དེའི་ཚེ་གཟུངས་དང་ཀུན་ཏུ་སྣང་བ་ཞེས་བྱ་བའི་ཏིང་ངེ་འཛིན་ཐོབ་བོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་
པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཆོས་ཀྱི་རྣམ་གྲངས་འདི་ཟུང་ལ་གཞན་དག་ལ་ཡང་རྒྱས་པར་ཡང་དག་པར་སྟོན་ཅིག །གསོལ་པ། བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ཕྱིར་ཆོས་ཀྱི་རྣམ་གྲངས་འདི་ཁྱོད་ཀྱིས་སྤོབས་པ་བཀོད་པའི་རྒྱན་ཅེས་བྱ་བར་ཟུང་ཤིག །བུད་མེད་འགྱུར་བ་ལུང་བསྟན་པ་ཞེས་བྱ་བར་ཡང་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་བུད་མེད་འགྱུར་བ་འཁོར་དང་བཅས་པ་དང་། ཚེ་དང་ལྡན་པ་ཀུན་དགའ་བོ་དང་། ཉན་ཐོས་ཆེན་པོ་དེ་དག་དང་། བྱང་ཆུབ་སེམས་དཔའ་དེ་དག་དང་། ལྷ་དང་། ཀླུ་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་བུད་མེད་འགྱུར་བ་ལུང་བསྟན་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །། རྒྱ་གར་གྱི་མཁན་པོ་པྲཛྙཱ་བརྨ་དང་། ཤཱི་ལེནྡྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེ་ལ་སྩོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ། ཤླཽ་ཀ་དྲུག་བརྒྱ། བམ་པོ་གཉིས་པའོ། །