གསུམ་པ། གནས་ཤིང་སྤྱད་པར་མི་བྱ་བའི་ལེའུ།
བམ་པོ་གསུམ་པ། དེ་ནས་འཁོར་གྱི་དཀྱིལ་འཁོར་དེའི་ནང་ན་ཚངས་པ་ཆེན་པོ་ལྷའི་སྙིང་པོ་ཞེས་བྱ་བ་དགེ་བའི་རྩ་བ་ཤིན་ཏུ་བསྐྱེད་པ། ས་བཅུ་ནོན་པ་བྱང་ཆུབ་སེམས་དཔའ་སེམས་དཔའ་ཆེན་པོའི་ཡོན་ཏན་དང་ལྡན་པ་ཞིག་སྟན་ལས་ལངས་ནས་ཐལ་མོ་སྦྱར་ཏེ་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་ཚིགས་སུ་བཅད་པ་འདི་དག་སྨྲས་སོ། །ཤེས་རབ་རྒྱ་མཚོ་ཡོན་ཏན་མཛོད་ཅན་ལ། །བདག་གིས་ཐེ་ཙོམ་ཞུ་ཞིང་གསོལ་བར་བགྱི། །ཤེས་རབ་རྒྱ་མཚོ་ཐུགས་རྗེས་སྐབས་ཕྱེ་སྟེ། །བདག་གི་རྟོག་པའི་ཐེ་ཙོམ་བསལ་བར་གསོལ། །བདག་ཅག་སྐོམ་གྱིས་ཤིན་ཏུ་གདུངས་པ་ལྟར། །ཡོན་ཏན་སྙིང་པོ་མཆོག་གི་ཆོས་རོ་དང་། །ཕུལ་དུ་གྱུར་པའི་དོན་དམ་ཆོས་ཀྱི་རོ། །འཁོར་དུ་གྱུར་པ་ཐམས་ཅད་ཐོས་པར་སྨོན། །བཅོམ་ལྡན་འདས་ཀྱིས་ཚངས་པ་ཆེན་པོ་ལྷའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །ཁྱོད་ཀྱིས་དེ་བཞིན་གཤེགས་པ་ལ་ཅི་དང་ཅི་འདོད་པ་དྲིས་ཤིག་དང་། ངས་དྲིས་པ་དེ་དང་དེའི་ལུང་བསྟན་པས་ཁྱོད་ཀྱི་སེམས་རངས་པར་བྱའོ། །ཚངས་པ་ཆེན་པོས་གསོལ་པ། བཅོམ་ལྡན་འདས་དེ་ལྟར་བགྱིའོ་ཞེས་གསོལ་ནས་ཚིགས་སུ་བཅད་དེ་
ཞུས་པ། ཤེས་རབ་ལྡན་ཞིང་ཏིང་འཛིན་རབ་བསྒོམས་ཏེ། །བདག་མེད་པ་ལ་བདེ་བར་གནས་པའི་རྣམས། །འོན་ཏེ་དམ་པའི་དོན་ལ་གནས་བགྱི་འམ། །འོན་ཏེ་འཁོར་བའི་འཁོར་བར་གནས་པར་བགྱི། །ཉིན་མཚན་ཆོས་མཆོག་དམ་པ་དེ་དག་ལ། །འདོན་ཅིང་གོམས་པར་བགྱིད་དེ་རྩོལ་བ་དག །འོན་ཏེ་ཉོན་མོངས་མཚོ་ལས་རྒལ་བགྱི་འམ། །འོན་ཏམ་ངན་སོང་དག་ཏུ་ལྟུང་བར་བགྱི། །བསོད་ནམས་བྱེད་ལ་ཤིན་ཏུ་འབད་རྩོལ་བ། །ངེས་པར་མྱ་ངན་འདའ་ལ་གཞོལ་འགྱུར་རམ། །འོན་ཏེ་འཁོར་བའི་འཁོར་བར་གནས་འགྱུར་རམ། །འོན་ཏེ་ངན་སོང་དག་ཏུ་ལྟུང་བར་འགྱུར། །ཤེས་རབ་ལྡན་པའི་རྒྱལ་ཐབས་དབང་བསྐུར་ཏེ། །འཁོར་ལོ་རྣམ་པ་བཅུ་དང་ལྡན་པ་དག །འོན་ཏེ་འཁོར་བའི་ནང་དུ་འབྱིང་འགྱུར་རམ། །འོན་ཏེ་སངས་རྒྱས་འབྲས་བུ་ཐོབ་པར་འགྱུར། །ཀུན་ནས་ཉོན་མོངས་པས་ནི་གླགས་པའི་སེམས། །ཉོན་མོངས་མང་པོས་འཁྲུལ་པར་གྱུར་པ་དག །ཇི་ལྟར་སེམས་ནི་ཡོངས་སུ་དག་པར་སྦྱང་། །སྒོམ་དང་འདོན་པའི་ལས་དག་ཇི་ལྟར་བགྱི། །དེ་ནས་བཅོམ་ལྡན་འདས་ཀྱིས་ཚངས་པ་ཆེན་པོ་ལྷའི་སྙིང་པོ་དེ་ལ་འདི་སྐད་ཅེས་བཀའ་སྩལ་ཏོ། །ལེགས་སོ། །དོན་འདི་དག་ལེགས་པར་ཞུ་བར་སྤོབས་པ་ལེགས་ཏེ། ཁྱོད་ནི་ཆོས་འདི་དག་ལ་ཤིན་ཏུ་ནན་ཏན་བྱེད་པའོ། །ཁྱོད་ནི་སྤྱོད་པ་ཐམས་ཅད་ཡོངས་སུ་རྫོགས་པའོ། །ཁྱོད་ནི་སྔོན་འདས་པའི་སངས་རྒྱས་བཅོམ་ལྡན་འདས་ཀླུང་གང་གཱའི་བྱེ་མ་སྙེད་ལ་སྒོ་གསུམ་ཡོངས་སུ་སྦྱངས་པའོ། །དམ་པའི་ཆོས་སྤེལ་བའོ། །དཀོན་མཆོག་གསུམ་གྱི་གདུང་འཚོབ་པ་སྟེ། ད་ཡང་སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་གྱི་ཕྱིར་དེ་བཞིན་གཤེགས་པ་ལ་དོན་ཟབ་མོ་འདི་དག་དྲིས་པ་ལེགས་སོ། །རིགས་ཀྱི་བུ་འདི་ལྟ་སྟེ། ཤེས་པ་བརྡ་སྤྲོད་པ་ཆེན་པོ་གནས་པ་དང་། སྤྱད་པར་མི་བྱ་བའི་ཆོས་ཡོད་དེ། སྔོན་འདས་པའི་སངས་རྒྱས་བཅོམ་ལྡན་འདས་ཐམས་ཅད་ཀྱིས་ཀྱང་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། འཁོར་བ་ལས་སྐྱོ་བར་བྱ་བ་དང་། ལས་དང་ཉོན་མོངས་པ་ཡོངས་སུ་བཅད་པ་དང་། ཐེག་པ་གསུམ་མྱུར་དུ་ཡོངས་སུ་རྫོགས་པར་བྱ་
བའི་ཕྱིར་ཤེས་པ་བརྡ་སྤྲོད་པ་ཆེན་པོ་གནས་པ་དང་། སྤྱད་པར་མི་བྱ་བའི་ཆོས་འདི་གསུངས་སོ། །ད་ལྟར་ཕྱོགས་བཅུ་ན་བཞུགས་པའི་སངས་རྒྱས་བཅོམ་ལྡན་འདས་ཐམས་ཅད་ཀྱིས་ཀྱང་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། འཁོར་བ་ལས་སྐྱོ་བར་བྱ་བ་དང་། ལས་དང་ཉོན་མོངས་པ་ཡོངས་སུ་བཅད་པ་དང་། ཐེག་པ་གསུམ་མྱུར་དུ་ཡོངས་སུ་རྫོགས་པར་བྱ་བའི་ཕྱིར་ཤེས་པ་བརྡ་སྤྲོད་པ་ཆེན་པོ་གནས་པ་དང་། སྤྱད་པར་མི་བྱ་བའི་ཆོས་འདི་ལ་གནས་པ་གསུང་ངོ་། །མ་འོངས་པའི་སངས་རྒྱས་བཅོམ་ལྡན་འདས་ཐམས་ཅད་ཀྱང་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། འཁོར་བ་ལས་སྐྱོ་བར་བྱ་བ་དང་། ལས་དང་ཉོན་མོངས་པ་ཡོངས་སུ་གཅད་པར་བྱ་བ་དང་། ཐེག་པ་གསུམ་མྱུར་དུ་ཡོངས་སུ་རྫོགས་པར་བྱ་བའི་ཕྱིར་ཤེས་པ་བརྡ་སྤྲོད་པ་ཆེན་པོ་གནས་པ་དང་། སྤྱད་པར་མི་བྱ་བའི་ཆོས་འདི་ལ་གནས་པར་བྱ་བ་འདི་དག་གསུང་བར་འགྱུར་རོ། །ཁྱོད་ཀྱིས་སྔོན་འདས་པའི་དེ་བཞིན་གཤེགས་པ་རྣམས་ལས་ཤེས་པ་བརྡ་སྤྲོད་པ་ཆེན་པོ་གནས་པ་དང་། སྤྱད་པར་མི་བྱ་བའི་ཆོས་འདི་ལ་གནས་པར་བྱ་བ་འདི་རྫོགས་པར་ཐོས་པ་དེ་ངས་ཀྱང་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། འཁོར་བ་ལས་སྐྱོ་བར་བྱ་བ་དང་། ལས་དང་ཉོན་མོངས་པ་ཡོངས་སུ་གཅད་པ་དང་། ཐེག་པ་གསུམ་མྱུར་དུ་ཡོངས་སུ་རྫོགས་པར་བྱ་བའི་ཕྱིར་ཤེས་པ་བརྡ་སྤྲོད་པ་ཆེན་པོ་གནས་པ་དང་། སྤྱད་པར་མི་བྱ་བའི་ཆོས་འདི་ལ་གནས་པར་བྱ་བ་འདི་ལ་བསྟན་པར་བྱས། དེ་བས་ན་སྐྱེས་བུ་དམ་པ་ཁྱོད་ཀྱིས་ལེགས་པར་ཉོན་ལ་ཡིད་ལ་ཟུང་ཤིག་དང་བསྟན་པར་བྱའོ། །བཅོམ་ལྡན་འདས་དེ་ལྟར་བགྱིའོ་ཞེས་གསོལ་ནས། ཚངས་པ་ཆེན་པོ་ལྷའི་སྙིང་པོ་བཅོམ་ལྡན་འདས་ལ་ཕྱིར་ཉན་ཏོ། །བཅོམ་ལྡན་འདས་ཀྱིས་ཚངས་པ་ཆེན་པོ་ལྷའི་སྙིང་པོ་ལ་བཀའ་སྩལ་པ། གནས་པ་དང་སྤྱད་པར་མི་བྱ་བའི་ཆོས་རྣམ་པ་བཅུ་ཡོད་དེ། གལ་ཏེ་རྣལ་འབྱོར་ཅན་དག་སྤྱོད་པ་ངན་པ་འདི་ལས་འགའ་ཙམ་གྱི་རྗེས་སུ་ཞུགས་ན་ཡང་འདོད་པའི་ཁམས་ཀྱི་དགེ་བའི་རྩ་བ་ཙམ་ཡང་ཡོངས་སུ་མི་འགྲུབ་པོ། །ཇི་སྟེ་སྔར་གྲུབ་ན་ཡང་དེ་མ་ཐག་ཏུ་
ཕྱིར་སྟོར་ཅིང་ཉམས་པར་གྱུར་ན་གཟུགས་དང་། གཟུགས་མེད་པའི་ཏིང་ངེ་འཛིན་ནས་ཐེག་པ་གསུམ་དང་ཐེག་པ་གཅིག་གི་བར་དུ་ཐོབ་པར་འགྱུར་བ་ལྟ་ཅི་སྨོས། བཅུ་གང་ཞེ་ན། འདི་ལྟ་སྟེ། འཇིག་རྟེན་ན་ཁ་ཅིག་ཏིང་ངེ་འཛིན་སྒོམ་འདོད་ཀྱང་འཚོ་བའི་ཡོ་བྱད་ཀྱིས་བྲེལ་བས་ཚོལ་བའི་རྐྱེན་གྱིས་ཉོན་མོངས་པ་དང་། ཁ་ཅིག་ནི་ཏིང་ངེ་འཛིན་སྒོམ་འདོད་ཀྱང་ཚུལ་ཁྲིམས་ཉམས་ཤིང་ཁ་ན་མ་ཐོ་བ་མང་པོ་བྱེད་པ་དང་། ཁ་ཅིག་ནི་ཏིང་ངེ་འཛིན་སྒོམ་འདོད་ཀྱང་ཕྱིན་ཅི་ལོག་ཏུ་ལྟ་ཞིང་འཇིག་རྟེན་གྱི་ལྟས་བཟང་ངན་ལ་ཆགས་ཏེ་ལུས་དང་སེམས་མ་དུལ་བ་དང་། ཁ་ཅིག་ནི་ཏིང་ངེ་འཛིན་སྒོམ་འདོད་ཀྱང་སེམས་གཡོ་ཞིང་རྒོད་པས་འཕགས་པ་ལ་མ་གཞོལ་ཏེ་དབང་པོ་རྒོད་པ་དང་། ཁ་ཅིག་ནི་ཏིང་ངེ་འཛིན་སྒོམ་འདོད་ཀྱང་ཕྲ་མ་བྱེད་པ་ལ་དགའ་བས་དབྱེན་བྱེད་པ་དང་། ཁ་ཅིག་ནི་ཏིང་ངེ་འཛིན་སྒོམ་འདོད་ཀྱང་ངག་རྩུབ་པོས་འཕགས་པ་ལ་སྨོད་ཅིང་དབང་ཟ་བ་དང་། ཁ་ཅིག་ནི་ཏིང་ངེ་འཛིན་སྒོམ་འདོད་ཀྱང་ཚིག་ཀྱལ་པ་དང་། བརྫུན་དུ་སྨྲ་བ་དང་། ཁ་ཅིག་ནི་ཏིང་ངེ་འཛིན་སྒོམ་འདོད་ཀྱང་འདོད་ཆགས་དང་། ཕྲག་དོག་གིས་གཞན་གྱི་ཁེ་དང་། བསྟི་སྟང་དང་། རྙེད་པ་ལ་མི་དགའ་བ་དང་། ཁ་ཅིག་ནི་ཏིང་ངེ་འཛིན་སྒོམ་འདོད་ཀྱང་ཞེ་སྡང་དང་བཅས་པས་སེམས་ཅན་ལ་གནོད་སེམས་སྐྱེས་པ་དང་། ཁ་ཅིག་ནི་ཏིང་ངེ་འཛིན་སྒོམ་འདོད་ཀྱང་ལོག་པར་ལྟ་བ་དང་བཅས་པས་རྒྱུ་དང་འབྲས་བུ་མེད་པར་ལྟ་བའོ། །ཚངས་པ་ཆེན་པོ་དེ་ལྟར་ཤེས་པར་བྱ་སྟེ། འདི་དག་ནི་གནས་པ་དང་སྤྱད་པར་མི་བྱ་བའི་ཆོས་རྣམ་པ་བཅུ་ཞེས་བྱའོ། །གལ་ཏེ་ཏིང་ངེ་འཛིན་སྒོམ་པ་དག་སྤྱོད་པ་ངན་པ་འདི་དག་ལས་འགའ་ཙམ་གྱི་རྗེས་སུ་ཞུགས་ན་འདོད་པའི་ཁམས་ཀྱི་དགེ་བ་ཡང་ཡོངས་སུ་མི་འགྲུབ་བོ། །ཇི་སྟེ་སྔར་གྲུབ་ན་ཡང་དེ་མ་ཐག་ཏུ་སྟོར་ཅིང་ཉམས་པར་འགྱུར་ན་གཟུགས་དང་། གཟུགས་མེད་པའི་ཏིང་ངེ་འཛིན་དང་། ཐེག་པ་གསུམ་དང་། གཅིག་ཐོབ་པར་འགྱུར་བ་ལྟ་ཅི་སྨོས། ཚངས་པ་ཆེན་པོ་གཞན་ཡང་གནས་པ་དང་སྤྱད་པར་མི་བྱ་བའི་ཆོས་རྣམ་པ་བཅུ་ཡོད་དེ། ཏིང་ངེ་འཛིན་སྒོམ་པ་དག་སྤྱོད་པ་ངན་པ་འདི་དག་ལས་འགའ་ཞིག་དང་ལྡན་
ན་ཏིང་ངེ་འཛིན་ཡོངས་སུ་མི་འགྲུབ་པོ། །ཇི་སྟེ་སྔར་གྲུབ་ན་ཡང་དེ་མ་ཐག་ཏུ་སྟོར་ཅིང་ཉམས་པར་འགྱུར་རོ། །བཅུ་གང་ཞེ་ན། འདི་ལྟ་སྟེ། ལས་སུ་བྱ་བའི་དངོས་པོ་ལ་དགའ་ཞིང་ཆགས་པ་དང་བྲེ་མོའི་གཏམ་ལ་དགའ་ཞིང་ཆགས་པ་དང་། གཉིད་ཀྱིས་ལོག་པ་ལ་དགའ་ཞིང་ཆགས་པ་དང་། ཟང་ཟིང་ཚོལ་བ་ལ་དགའ་ཞིང་ཆགས་པ་དང་། གཟུགས་བཟང་པོ་ལ་དགའ་ཞིང་ཆགས་པ་དང་། སྒྲ་སྙན་པ་ལ་དགའ་ཞིང་ཆགས་པ་དང་། དྲི་ཞིམ་པོ་ལ་དགའ་ཞིང་ཆགས་པ་དང་། རོ་ཞིམ་པོ་ལ་དགའ་ཞིང་ཆགས་པ་དང་། རེག་བྱ་འཇམ་པོ་ལ་དགའ་ཞིང་ཆགས་པ་དང་། རྟོག་པ་དང་དཔྱོད་པ་ལ་དགའ་ཞིང་ཆགས་པའོ། །ཚངས་པ་ཆེན་པོ་དེ་ལྟར་ཤེས་པར་བྱ་སྟེ། གནས་པ་དང་སྤྱད་པར་མི་བྱ་བའི་ཆོས་རྣམ་པ་བཅུ་པོ་དེ་ཏིང་ངེ་འཛིན་སྒོམ་པ་དག་སྤྱོད་པ་ངན་པ་འདི་ལས་འགའ་ཞིག་དང་ལྡན་ན་ཡང་ཏིང་ངེ་འཛིན་དག་ཡོངས་སུ་མི་འགྲུབ་པོ། །ཇི་སྟེ་སྔར་གྲུབ་ན་ཡང་དེ་མ་ཐག་ཏུ་སྟོར་ཅིང་ཉམས་པར་འགྱུར་རོ། །གལ་ཏེ་ཏིང་ངེ་འཛིན་མ་བསྒྲུབས་ན་དགེ་བའི་ཚོགས་གཞན་ཅི་བསགས་ཀྱང་དེ་ནི་དོན་དུ་མི་འགྱུར་ཏེ། གང་བདག་གི་ལོངས་སྤྱོད་དང་། དང་བས་སྦྱིན་པ་བསྒྲུབ་པའི་ཕྱིར་སེམས་དང་སེམས་ལས་བྱུང་བའི་ཆོས་ངན་པ་སྐྱེ་བར་འགྱུར་རོ། །དེའི་རྐྱེན་གྱིས་རྒྱལ་པོ་དང་། བློན་པོ་ཆེན་པོའི་ཁྲིམས་དང་ཡང་འགལ་བར་བྱེད་དེ། ཁ་ཅིག་ལ་ནི་གཤེ་ཤིང་སྤྱོ་བ་ཡང་བྱེད་དོ། །ཁ་ཅིག་ལ་ནི་ལྕག་གིས་གཞུ་བ་དང་། ཁ་ཅིག་ལ་ནི་ལུས་ཀྱི་ཡན་ལག་དང་ཉིང་ལག་གཅོད་ཅིང་གཅོད་པར་ཡང་བྱེད་དོ། །དེའི་རྒྱུ་དེའི་རྐྱེན་གྱིས་ནད་དྲག་པོས་འདེབས་ཤིང་ཡུན་རིང་པོར་སྡུག་བསྔལ་མྱོང་བ་དང་། ཚེ་ཐུང་བ་དང་། འཆི་འཕོས་ནས་ཀྱང་ངན་སོང་གསུམ་གང་ཡང་རུང་བ་ཅིག་གི་ནང་དུ་སྐྱེ་བ་ནས་མཚམས་མེད་པའི་སེམས་ཅན་དམྱལ་བའི་བར་དུ་ལྟུང་བར་འགྱུར་ཏེ། ཀུ་དྲཱ་ཀ་དང་། ཨ་ར་ད་ཀ་དང་། དེ་ཤུ་ཀུ་པ་ལ་ཀི་དང་། ལྷས་སྦྱིན་ལ་སོགས་པ་དང་འདྲ་བར་བསམ་གཏན་ལས་ཉམས་པ་དང་། མཚམས་མེད་པའི་སེམས་ཅན་དམྱལ་བའི་བར་དུ་ལྟུང་ཞིང་རྣམ་པ་ཚད་མེད་པ་སྙེད་ཀྱི་སྡུག་བསྔལ་ཆེན་པོ་མི་
བཟོད་པ་ཀུན་མྱོང་བར་འགྱུར་རོ། །དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཅང་ཤེས་ཀཽ་དི་ནྱ་ལ་འདི་སྐད་ཅེས་བཀའ་སྩལ་ཏོ། །ཁྱོད་དང་བས་མཐར་གནས་ཤིང་ཏིང་ངེ་འཛིན་སྒོམ་པའི་དགེ་སློང་དག་གནས་ཁང་མཆོག་དག་ན་གནས་ཤིང་མལ་ཆ་མཆོག་དང་། ཁ་ཟས་མཆོག་ལ་སྤྱོད་ཅིང་དགེ་འདུན་གྱི་ལས་ཐམས་ཅད་མི་བྱེད་པར་གནང་ངོ་། །དེ་ཅིའི་ཕྱིར་ཞེ་ན། ཏིང་ངེ་འཛིན་སྒོམ་པ་དག་གལ་ཏེ་འཚོ་བའི་ཡོ་བྱད་ཀྱིས་བྲེལ་བར་གྱུར་ན་སེམས་དང་སེམས་ལས་བྱུང་བའི་ཆོས་ངན་པ་སྐྱེ་ཞིང་ཏིང་ངེ་འཛིན་ཐམས་ཅད་མི་འགྲུབ་པ་ནས་མཚམས་མེད་པའི་སེམས་ཅན་དམྱལ་བའི་བར་དུ་ལྟུང་ཞིང་མི་བཟད་པའི་སྡུག་བསྔལ་ཆེན་པོ་རྣམ་པ་ཚད་མེད་པ་སྙེད་མྱོང་བར་འགྱུར་རོ། །ཏིང་ངེ་འཛིན་སྒོམ་པ་དག་གལ་ཏེ་འཚོ་བའི་ཡོ་བྱད་དང་ལྡན་ན་ཏིང་ངེ་འཛིན་མང་པོ་མ་གྲུབ་པ་ཡང་གྲུབ་པ་དང་། སྔར་གྲུབ་པ་དག་ཀྱང་མི་ཉམས་སོ། །དེའི་དབང་གིས་མི་དགེ་བའི་ཆོས་ཐམས་ཅད་མི་སྐྱེ་བ་ནས་གཞུང་དེ་བཞིན་དུ་རྒྱས་པར་མི་དགེ་བའི་རྟོག་པ་དང་དཔྱོད་པའི་བར་དུ་མི་སྐྱེ་བ་ལ་མཐོ་རིས་ཀྱི་ལྷར་སྐྱེ་བ་ནས་མྱ་ངན་འདའ་བའི་བར་དུ་འཐོབ་པར་འགྱུར་རོ། །ཏིང་ངེ་འཛིན་སྒོམ་པ་དག་གལ་ཏེ་ཏིང་ངེ་འཛིན་མང་པོ་མ་གྲུབ་ན་ནམ་གྱི་སྟོད་དང་། ནམ་གྱི་སྨད་ལ་མི་ཉལ་བར་བྱས་ཏེ། བརྩོན་འགྲུས་སུ་བསླབ་ཅིང་བསྒོམ་པ་དང་། འདུ་འཛི་ཡོངས་སུ་སྤངས་ཏེ་འདོད་པ་ཉུང་ཞིང་ཆོག་ཤེས་པར་བྱ་བ་དང་། ཅི་ལ་ཡང་མི་ཆགས་པ་དང་། འདོད་ཆགས་དང་། ཞེ་སྡང་དང་། ཁོང་ཁྲོ་བ་དང་། འཆབ་པ་དང་། འཁྲུག་པ་དང་། འཚེ་བ་དང་། ང་རྒྱལ་དང་། རྒྱགས་པ་དང་། ཕྲག་དོག་དང་། འཇུངས་པ་དང་། ཕྲ་མ་དང་། ངག་རྩུབ་པོ་དང་། བརྫུན་དང་། འཇིག་རྟེན་གྱི་རྩོད་པ་དང་། བག་མེད་པ་ཐམས་ཅད་ཡོངས་སུ་སྤོང་ངོ་། །གང་དེ་ལྟར་ནན་ཏན་བྱེད་པ་དེ་ནི་བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་བཞི་དང་། འཁོར་ལོས་སྒྱུར་བའི་རྒྱལ་པོ་ལ་སོགས་པས་བསྟོད་པ་དང་། བསྔགས་པ་དང་། ཕྱག་དང་། བསྟི་སྟང་དང་། རིམ་གྲོ་དང་། བསྙེན་བཀུར་ལ་སོགས་པ་དང་། སྦྱིན་པ་བྱེ་བ་ཁྲག་ཁྲིག་བརྒྱ་སྟོང་སྙེད་ཀྱང་བླང་བར་བྱ་ན། རྒྱལ་རིགས་
དང་། བྲམ་ཟེ་དང་། རྗེའུ་རིགས་ལ་སོགས་པའི་མཆོད་པ་ལེན་པ་ལྟ་ཅི་སྨོས། ཏིང་ངེ་འཛིན་མ་ཐོབ་པ་དག་ཀྱང་དེ་དག་གི་བསྟོད་པ་དང་། བསྔགས་པ་དང་། ཕྱག་དང་། བཀུར་སྟི་དང་། རིམ་གྲོ་དང་། བསྙེན་བཀུར་དང་། སྦྱིན་པ་དང་། མཆོད་པ་བདག་གིར་བྱེད་དུ་དབང་ན་ཏིང་ངེ་འཛིན་ཐོབ་པ་ལྟ་སྨོས་ཀྱང་ཅི་དགོས། དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། ཏིང་འཛིན་བསྒོམས་པས་ཐེ་ཙོམ་གཅོད་འགྱུར་ཏེ། །དེ་མ་གཏོགས་པར་གཞན་གྱིས་ནུས་མ་ཡིན། །དེ་བས་ཏིང་འཛིན་བསྒོམ་པ་མཆོག་ཡིན་གྱིས། །མཁས་པ་དག་གིས་དེ་ལ་མཆོད་པར་བྱ། །དེ་ནས་ཚངས་པ་ཆེན་པོ་ལྷའི་སྙིང་པོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་སངས་རྒྱས་ཀྱི་བསྟན་པ་ལ་རབ་ཏུ་བྱུང་བ་དག་གལ་ཏེ་རྒྱལ་རིགས་སམ། བློན་པོ་ཆེན་པོའམ། དབང་པོས་ལྕག་དང་དབྱུག་པ་ལ་སོགས་པས་གཞུས་སམ། བརྡེགས་སམ། གལ་ཏེ་བཙོན་རར་བཅུག་གམ། སྤྱོས་སམ། བརྒྱད་དམ། ཡན་ལག་གཏུབས་སམ། སྲོག་དང་ཕྲལ་ཏེ་བཀུམ་ན་དེ་ཅི་རིགས་པ་ལགས་སམ། འོན་ཏེ་རིགས་པར་མ་ལགས། བཅོམ་ལྡན་འདས་ཀྱིས་ཚངས་པ་ཆེན་པོ་ལྷའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་སེམས་ཅན་གང་ཞིག་ངའི་བསྟན་པ་ལ་རབ་ཏུ་བྱུང་ནས་སྐྲ་དང་ཁ་སྤུ་བྲེགས་ཏེ། ངུར་སྨྲིག་གི་ཚལ་བུ་གྱོན་ན་ཚུལ་ཁྲིམས་སྲུང་ངམ། ཚུལ་ཁྲིམས་ཉམས་སམ། ཚུལ་ཁྲིམས་མེད་ཀྱང་རུང་སྟེ། དེ་ལ་ལྷ་དང་། མི་དང་། ལྷ་མ་ཡིན་ལ་སོགས་པ་ཐམས་ཅད་ཀྱིས་ཀྱང་ཁྱིམ་པའི་ཆོས་ཉིད་དང་སྦྱར་དུ་ཡང་མི་གནང་ན། དེ་ལ་ལྕག་དང་དབྱིག་པ་ལ་སོགས་པས་ལུས་ལ་གཞུ་ཞིང་འཚོག་པ་དང་། བཙོན་རར་གཞུག་པ་དང་། གཤེ་བ་དང་། སྤྱོ་བ་དང་། ལུས་ཀྱི་ཡན་ལག་གཏུབ་པ་དང་། འཚོ་བའི་དབང་པོ་དང་ཕྲལ་བ་ཆོས་མ་ཡིན་པ་དང་སྦྱོར་བ་ལྟ་ཅི་སྨོས། དེ་ཅིའི་ཕྱིར་ཞེ་ན། ཚུལ་ཁྲིམས་སྲུང་ཞིང་མང་དུ་ཐོས་པ་དང་ལྡན་པ་ལྟ་ཞོག་ལ། ངའི་བསྟན་པ་ལ་རབ་ཏུ་བྱུང་ནས་ཚུལ་ཁྲིམས་ཉམས་ཏེ་མི་དགེ་བའི་ཆོས་སྤྱོད་པས་ནང་རུལ་ཅིང་མི་གཙང་བས་གང་བའི་སྲིན་ཀྭ་ལྭ་དང་འདྲ་བ། དགེ་
སྦྱོང་མ་ཡིན་པར་དགེ་སྦྱོང་དུ་ཁས་འཆེ་བ། ཚངས་པར་སྤྱོད་པ་མ་ཡིན་པར་ཚངས་པར་སྤྱོད་པར་ཁས་འཆེ་བ། ཉོན་མོངས་པ་རྣམ་པ་སྣ་ཚོགས་ལས་ཕམ་པ། ཞིག་པ། ཁས་བུབ་པ་དེ་ལྟ་བུའི་ཚུལ་ཁྲིམས་ཉམས་པའི་དགེ་སློང་ངན་པ་ཡང་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་ལ་སོགས་པ་ཐམས་ཅད་ཀྱི་སྟོན་པ་དང་འདྲེན་པར་འགྱུར་ཏེ། ཡོན་ཏན་རིན་པོ་ཆེ་དཔག་ཏུ་མེད་པའི་གཏེར་དུ་འགྱུར་རོ། །གཞན་ཡང་རིགས་ཀྱི་བུ་ངའི་བསྟན་པ་ལ་རབ་ཏུ་བྱུང་བ་དག་ཚུལ་ཁྲིམས་ཉམས་ཀྱང་སེམས་ཅན་དག་གཟུགས་མཐོང་བ་ཙམ་གྱིས་ལྷག་པའི་བསམ་པ་རྣམ་པ་བཅུ་སྐྱེ་བས་ན་ཡོན་ཏན་རིན་པོ་ཆེའི་ཕུང་པོ་དཔག་ཏུ་མེད་པ་བཅུ་འཐོབ་པར་འགྱུར་རོ། །བཅུ་གང་ཞེ་ན། འདི་ལྟ་སྟེ། ངའི་བསྟན་པ་ལ་རབ་ཏུ་བྱུང་བ་དག་ཚུལ་ཁྲིམས་ཉམས་མོད་ཀྱི། སེམས་ཅན་དག་གིས་མཐོང་བར་གྱུར་ན་སངས་རྒྱས་རྗེས་སུ་དྲན་པས་བཀུར་སྟི་དང་བཅས་པས་དད་ཅིང་གུས་པའི་ལྷག་པའི་བསམ་པ་སྐྱེའོ། །དེའི་རྒྱུ་དེའི་རྐྱེན་གྱིས་མུ་སྟེགས་ཅན་གྱི་སྟོན་པ་དང་། དེའི་གཙུག་ལག་དང་། དེའི་འཁོར་ལ་ནམ་དུའང་མི་ཕྱོགས་པ་ནས་འཇིགས་པ་དང་བྲལ་བ་ཡོངས་སུ་མྱ་ངན་ལས་འདས་པའི་གྲོང་ཁྱེར་ཆེན་པོ་ལ་འཇུག་པའི་བར་དུ་འགྱུར་རོ། །ལ་ལས་མཐོང་ནས་འཕགས་པའི་ཚུལ་ཁྲིམས་རྗེས་སུ་དྲན་པ་ལ་ལྷག་པའི་བསམ་པ་སྐྱེའོ། །དེའི་རྒྱུ་དེའི་རྐྱེན་གྱིས་སྲོག་གཅོད་པ་ཡོངས་སུ་སྤོང་བ་དང་། མ་བྱིན་པར་ལེན་པ་ཡོངས་སུ་སྤོང་བ་དང་། འདོད་པས་ལོག་པར་གཡེམ་པ་ཡོངས་སུ་སྤོང་བ་དང་། བརྫུན་དུ་སྨྲ་བ་ཡོངས་སུ་སྤོང་བ་དང་། བག་མེད་པའི་གནས་སྨྱོ་བའི་ཁུ་བ་ཆང་ལ་སོགས་པ་འཐུང་བ་ཡོངས་སུ་སྤོང་བ་ནས་འཇིགས་པ་དང་བྲལ་བ་ཡོངས་སུ་མྱ་ངན་ལས་འདའ་བའི་གྲོང་ཁྱེར་ཆེན་པོ་ལ་འཇུག་པའི་བར་དུ་འགྱུར་རོ། །ལ་ལས་མཐོང་ནས་སྦྱིན་པ་རྗེས་སུ་དྲན་པ་ལ་ལྷག་པའི་བསམ་པ་སྐྱེའོ། །དེའི་རྒྱུ་དེའི་རྐྱེན་གྱིས་ལོངས་སྤྱོད་ཆེན་པོ་དང་ལྡན་ཞིང་ཡང་དག་པ་དང་ཡང་དག་པའི་སྤྱོད་པ་ཅན་ལ་མཆོད་
པ་དང་། བསྙེན་བཀུར་བྱེད་པ་ནས་འཇིགས་པ་དང་བྲལ་བ་ཡོངས་སུ་མྱ་ངན་ལས་འདའ་བའི་གྲོང་ཁྱེར་ཆེན་པོ་ལ་འཇུག་པའི་བར་དུ་འགྱུར་རོ། །ལ་ལས་མཐོང་ནས་ངང་དེས་པའི་བཟོད་པ་རྗེས་སུ་དྲན་པ་ལ་ལྷག་པའི་བསམ་པ་སྐྱེའོ། །དེའི་རྒྱུ་དེའི་རྐྱེན་གྱིས་ཕྲ་མ་ཡོངས་སུ་སྤོང་བ་དང་། ངག་རྩུབ་པོ་དང་། ཚིག་ཀྱལ་པ་དང་། ཞེ་སྡང་ཡོངས་སུ་སྤོང་བ་ནས་འཇིགས་པ་དང་བྲལ་བ་ཡོངས་སུ་མྱ་ངན་ལས་འདས་པའི་གྲོང་ཁྱེར་ཆེན་པོ་ལ་འཇུག་པའི་བར་དུ་འགྱུར་རོ། །ལ་ལས་མཐོང་ནས་རབ་ཏུ་འབྱུང་ཞིང་བརྩོན་འགྲུས་ལ་ནན་ཏན་བྱ་བར་རྗེས་སུ་དྲན་པ་ལ་ལྷག་པའི་བསམ་པ་སྐྱེའོ། །དེའི་རྒྱུ་དེའི་རྐྱེན་གྱིས་ཁྱིམ་རབ་ཏུ་སྤོང་ཞིང་ཁྱིམ་མ་ཡིན་པའི་ཆོས་ལེན་ཏེ་ཤིན་ཏུ་འབད་པའི་བརྩོན་འགྲུས་ཀྱིས་སྤྱོད་པའི་མཆོག་ནན་ཏན་བྱེད་པ་ནས་འཇིགས་པ་མེད་པའི་ཡོངས་སུ་མྱ་ངན་ལས་འདའ་བའི་གྲོང་ཁྱེར་ཆེན་པོ་ལ་འཇུག་པའི་བར་དུ་འགྱུར་རོ། །ལ་ལས་མཐོང་ནས་འཁྲུག་པའི་སེམས་ཡོངས་སུ་སྤོང་ཞིང་བསམ་གཏན་ལ་མཉམ་པར་གཞོག་པ་རྗེས་སུ་དྲན་པ་ལ་ལྷག་པའི་བསམ་པ་སྐྱེའོ། །དེའི་རྒྱུ་དེའི་རྐྱེན་གྱིས་རི་དང་། ཚལ་དང་། བས་མཐའ་དགོན་པ་ལ་མོས་ཤིང་ཉིན་མཚན་དུ་ཏིང་ངེ་འཛིན་སྒོམ་པ་ལ་བརྩོན་འགྲུས་རྩོམ་པ་ནས་འཇིགས་པ་མེད་པའི་ཡོངས་སུ་མྱ་ངན་ལས་འདའ་བའི་གྲོང་ཁྱེར་ཆེན་པོ་ལ་འཇུག་པའི་བར་དུ་འགྱུར་རོ། །ལ་ལས་མཐོང་ནས་ཤེས་རབ་རྗེས་སུ་དྲན་པ་ལ་ལྷག་པའི་བསམ་པ་སྐྱེའོ། །དེའི་རྒྱུ་དེའི་རྐྱེན་གྱིས་དམ་པའི་ཆོས་ཉན་པ་དང་། ཀློག་པ་དང་། འདོན་པ་ལ་དགའ་ཞིང་སྤྲོ་བ་ནས་ཡོངས་སུ་མྱ་ངན་ལས་འདས་པའི་གྲོང་ཁྱེར་ཆེན་པོ་ལ་འཇུག་པའི་བར་དུ་འགྱུར་རོ། །ལ་ལས་མཐོང་ནས་ཡང་དག་པར་འབྱུང་བ་དགེ་བའི་རྩ་བ་སྔོན་བསྐྱེད་པར་རྗེས་སུ་དྲན་པ་ལ་ལྷག་པའི་བསམ་པ་སྐྱེ་བ་ནས་འཛུམ་བཞིན་དུ་སྨྲ་བ་དང་། སྤྲོ་བཞིན་དུ་གཏམ་ཟེར་བ་དང་། རྐང་པ་ལ་ཕྱག་འཚལ་བའི་བར་དུ་བྱེད་པར་འགྱུར་རོ། །དེའི་རྒྱུ་དེའི་རྐྱེན་གྱིས་རིགས་ཆེ་ཞིང་མཐོ་བ་དང་། བཙུན་པའི་རིགས་སུ་སྐྱེ་ཞིང་སེམས་ཅན་ཚད་མེད་པ་ཀུན་གྱིས་མཐོང་ན་དགའ་བ་ནས་འཇིགས་པ་དང་བྲལ་བ་ཡོངས་སུ་མྱ་ངན་ལས་འདས་པའི་གྲོང་ཁྱེར་ཆེན་པོ་ལ་
འཇུག་པའི་བར་དུ་འགྱུར་རོ། །རིགས་ཀྱི་བུ་ངའི་བསྟན་པ་ལ་རབ་ཏུ་བྱུང་བ་དག་ཚུལ་ཁྲིམས་ཉམས་ཀྱང་སེམས་ཅན་དག་གཟུགས་དང་ཆ་ལུགས་མཐོང་བ་ཙམ་གྱིས་ལྷག་པའི་བསམ་པ་རྣམ་པ་འདི་བཅུ་སྐྱེ་སྟེ། ཡོན་ཏན་རིན་པོ་ཆེའི་ཕུང་པོ་ཚད་མེད་པ་ཐོབ་པར་འགྱུར་རོ། །དེ་བས་ན་རྒྱལ་པོ་དང་། བློན་པོ་ཆེན་པོ་དང་། དབང་པོ་ལ་སོགས་པས་དེ་ལ་ལྕག་དང་། དབྱིག་པ་ལ་སོགས་པས་གཞུ་ཞིང་འཚོག་པ་དང་། བཙོན་རར་གཞུག་པ་དང་། གཤེ་ཞིང་སྤྱོ་བ་དང་། ལུས་ཀྱི་ཡན་ལག་གཏུབ་པ་དང་། འཚོ་བའི་དབང་པོ་དང་ཕྲལ་བ་ལ་སོགས་པ་བྱ་བར་མི་རིགས་སོ། །གཞན་ཡང་ཚངས་པ་ཆེན་པོ་ང་ལ་སྐྱབས་སུ་སོང་སྟེ། རབ་ཏུ་བྱུང་བ་དག་ཚུལ་ཁྲིམས་ཉམས་ཏེ་མི་དགེ་བའི་ཆོས་སྤྱོད་པ་ནང་རུལ་ཅིང་མི་གཙང་བས་གང་བའི་སྲིན་ཀྭ་ལྭ་དང་འདྲ་བ། དགེ་སྦྱོང་མ་ཡིན་པར་དགེ་སྦྱོང་དུ་ཁས་འཆེ་བ། ཚངས་པར་སྤྱོད་པ་མ་ཡིན་པར་ཚངས་པར་སྤྱོད་པར་ཁས་འཆེ་བ། ཉོན་མོངས་པ་རྣམ་པ་མང་པོ་ལས་ཕམ་པ། རུལ་བ། ཁས་བུབ་པ་ལྟ་བུའི་དགེ་སློང་ཚུལ་ཁྲིམས་ཉམས་ཏེ་མི་དགེ་བ་སྤྱོད་མོད་ཀྱི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་ལ་སོགས་པ་ཐམས་ཅད་ཀྱི་སྟོན་པ་དང་། འདྲེན་པའི་དགེ་བའི་བཤེས་གཉེན་བྱེད་ཅིང་ཡོན་ཏན་དཔག་ཏུ་མེད་པའི་གཏེར་དུ་འགྱུར་རོ། །དེ་ལྟར་དགེ་སློང་དེ་ཆོས་ཀྱི་སྣོད་མ་ཡིན་མོད་ཀྱི། སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་གྱོན་ནས་ཆ་ལུགས་དང་སྤྱོད་ལམ་འཕགས་པ་རྣམས་དང་འཐུན་ཏེ། དེ་མཐོང་བ་ཙམ་གྱིས་སེམས་ཅན་ཚད་མེད་པ་རྣམས་དགེ་བའི་རྩ་བ་རྣམ་པ་སྣ་ཚོགས་འཕེལ་ཞིང་སྐྱེ་བར་འགྱུར་རོ། །གཞན་ཡང་སེམས་ཅན་ཚད་མེད་པ་རྣམས་མཐོ་རིས་ཀྱི་ལྷར་སྐྱེ་བ་དང་། མྱ་ངན་ལས་འདའ་བའི་ཡང་དག་པའི་ལམ་ལ་འཛུད་པར་འགྱུར་ཏེ། དེ་བས་ན་ང་ལ་སྐྱབས་སུ་སོང་སྟེ་རབ་ཏུ་བྱུང་བ་དག་ཚུལ་ཁྲིམས་སྲུང་ངམ། ཚུལ་ཁྲིམས་ཉམས་སམ། ཚུལ་ཁྲིམས་མེད་ཀྱང་རུང་སྟེ། འཁོར་ལོས་སྒྱུར་བའི་རྒྱལ་པོའམ། རྒྱལ་པོ་གཞན་ནམ། བློན་པོ་ལ་
སོགས་པས་ཁྱིམ་པའི་ཆོས་ཉིད་དང་སྦྱོར་དུ་ཡང་མ་གནང་ན། ལྕག་དང་དབྱིག་པ་ལ་སོགས་པས་གཞུ་བ་དང་། འཚོག་པ་དང་། བཙོན་རར་གཞུག་པ་དང་། གཤེ་ཞིང་སྤྱོ་བ་དང་། ལུས་ཀྱི་ཡན་ལག་དང་ཉིང་ལག་གཅོད་ཅིང་གཏུབ་པ་དང་། འཚོ་བའི་དབང་པོ་དང་ཕྲལ་བ་ལ་སོགས་པ་ཆོས་མ་ཡིན་པ་གཞན་ལྟ་ཅི་སྨོས། ཚངས་པ་ཆེན་པོ་དེ་ལྟར་ཚུལ་ཁྲིམས་ཉམས་ཤིང་སྡིག་པ་སྤྱོད་པའི་དགེ་སློང་དེ་ངས་བསྟན་པའི་འདུལ་བ་ལས་མི་རོ་ལྟ་བུའོ་ཞེས་གསུངས་མོད་ཀྱི་རབ་ཏུ་བྱུང་བ་དང་། ཚུལ་ཁྲིམས་དང་། ཡོན་ཏན་ལྷག་མའི་མཐུ་ཡོད་དོ། །དཔེར་ན་ཁྱུ་མཆོག་གམ། གླ་བ་ལྟ་བུ་ཤི་སྟེ་རྣམ་པར་ཤེས་པ་དང་བྲལ་ནས་བྱོལ་སོང་གི་ནང་ན་རོ་ཡིན་མོད་ཀྱི། ཁྱུ་མཆོག་ལ་གིའུ་ཝང་ཡོད་པ་དང་། གླ་བ་ལ་གླ་རྩི་ཡོད་པས་སེམས་ཅན་ཚད་མེད་དཔག་ཏུ་མེད་པའི་ཕན་པ་དང་བདེ་བའི་དོན་ཆེན་པོར་འགྱུར་བ་བཞིན་དུ་ཚུལ་ཁྲིམས་ཉམས་པའི་དགེ་སློང་དེ་ཡང་ངས་བསྟན་པའི་འདུལ་བ་ལས་མི་རོ་ལྟ་བུའོ་ཞེས་བྱ་མོད་ཀྱི། རབ་ཏུ་བྱུང་བ་དང་། ཚུལ་ཁྲིམས་དང་། ཡོན་ཏན་ལྷག་མའི་མཐུས་ཀྱང་སེམས་ཅན་ཚད་མེད་དཔག་ཏུ་མེད་པ་ལ་ཕན་པ་དང་བདེ་བའི་དོན་ཆེན་པོར་འགྱུར་རོ། །ཚངས་པ་ཆེན་པོ་འདི་ལྟ་སྟེ། ཚོང་པ་དག་ཀྱང་རྒྱ་མཚོ་ཆེན་པོར་ཞུགས་ནས་རིགས་གཅིག་པའི་སེམས་ཅན་ཚད་མེད་པ་དག་བསད་དེ་མིག་ཕྱུང་ནས་མིག་གི་འབྲས་བུ་དེ་དང་། བརྟན་ཞེས་བྱ་བའི་འབྲས་བུ་དང་ལྷན་ཅིག་སྦྱར་ན་མིག་སྨན་རིན་པོ་ཆེར་འགྱུར་རོ། །སེམས་ཅན་གང་ལོང་བ་མིག་མེད་པ་མངལ་ནས་ཕྱུང་ནས་དམུས་ལོང་དུ་གྱུར་པ་དག་གི་མིག་ཏུ་རིན་པོ་ཆེའི་མིག་སྨན་དེས་བྱུགས་ན་མིག་ནད་ཐམས་ཅད་དང་བྲལ་ཏེ། མིག་རྣོ་ཞིང་གསལ་བར་འགྱུར་རོ། །དེ་བཞིན་དུ་ཚུལ་ཁྲིམས་ཉམས་པའི་དགེ་སློང་ཡང་ངས་བསྟན་པའི་འདུལ་བ་ལས་མི་རོ་ལྟ་བུའོ་ཞེས་བྱ་མོད་ཀྱི་རབ་ཏུ་བྱུང་བའི་སྤྱོད་ལམ་དང་། ཆ་ལུགས་ཡོད་པས་སེམས་ཅན་ཚད་མེད་པ་དག་གིས་སྐད་ཅིག་མཐོང་བ་ཙམ་གྱིས་ཀྱང་རྣམ་པར་དག་པའི་ཤེས་རབ་ཀྱི་མིག་ཐོབ་པར་འགྱུར་ན་ཕ་རོལ་པོ་གཞན་ལ་དམ་པའི་ཆོས་སྟོན་ནུས་པ་ལྟ་ཅི་སྨོས། ཚངས་པ་ཆེན་པོ་འདི་ལྟ་སྟེ། བདུག་སྤོས་བསྲེགས་
ན་སྤོས་ཉིད་ཚིག་སྟེ་མེད་པར་སོང་ཡང་དྲི་བསུང་གིས་གཞན་ལ་བྲོ་བར་བྱེད་དོ། །དེ་བཞིན་དུ་ཚུལ་ཁྲིམས་ཉམས་པའི་དགེ་སློང་དེ་ཡང་ཚུལ་ཁྲིམས་ཉམས་པས་བསོད་ནམས་ཀྱི་ཞིང་གཤིན་པ་མ་ཡིན་ཏེ། ཉིན་མཚན་དུ་དད་པས་བྱིན་པས་བསྲེགས་ཏེ་ཚེ་འཕོས་ནས་ངན་སོང་གསུམ་དུ་ལྷུང་མོད་ཀྱི་སེམས་ཅན་ཚད་མེད་དཔག་ཏུ་མེད་པའི་ཕན་པ་དང་བདེ་བའི་དོན་དུ་འགྱུར་ཏེ། མཐོ་རིས་ཀྱི་ལྷར་སྐྱེ་བ་དང་མྱ་ངན་ལས་འདའ་བའི་བསུང་ཚོར་བར་བྱེད་དོ། །དེ་བས་ན་ཚངས་པ་ཆེན་པོ་དེ་ལྟར་ཚུལ་ཁྲིམས་ཉམས་ཤིང་སྡིག་པ་སྤྱོད་པའི་དགེ་སློང་ལ་ཁྱིམ་པ་ཐམས་ཅད་ཀྱིས་བསྟི་སྟང་དང་བཅས་པས་མཆོད་པ་དང་། རིམ་གྲོ་བྱའི་རབ་ཏུ་བྱུང་བ་དེ་ལ་ལྕག་དང་དབྱུག་པས་གཞུ་ཞིང་འཚོག་པ་དང་། བཙོན་རར་གཞུག་པ་དང་། གཤེ་ཞིང་སྤྱོ་བ་དང་། ལུས་ཀྱི་ཡན་ལག་གཏུབ་པ་དང་། འཚོ་བའི་དབང་པོ་དང་དབྲལ་དུ་ངས་མ་གནང་ངོ་། །དེ་དག་ཡོངས་སུ་དག་པའི་དགེ་འདུན་གྱི་ནང་དུ་གསོ་སྦྱིན་བྱ་བ་དང་། ཚུལ་དུ་འཇུག་པ་དང་། ཚུལ་ནས་བྱུང་བའི་ཚེ་བསྐྲད་པ་དང་། ཕྱོགས་བཞིའི་དགེ་འདུན་གྱི་རྙེད་པ་དང་། ལོངས་སྤྱོད་དང་། བཟའ་བ་དང་། བཏུང་བ་དང་། འཚོ་བའི་ཡོ་བྱད་ལ་སོགས་པ་ཐམས་ཅད་ལ་སྤྱོད་དུ་མི་དབང་སྟེ་དགེ་སྦྱོང་གིས་འདུལ་བའི་ལས་བྱེད་པ་ཐམས་ཅད་ཀྱི་ནང་དུ་འོང་དུ་མི་གནང་བར་ཟད་ཀྱི་དེ་ལ་གཞུ་བ་དང་། འཚོག་པ་དང་། འཆིང་བ་དང་། སྲོག་གི་དབང་པོ་ལ་སོགས་པ་དང་དབྲལ་བར་ངས་མ་གནང་ངོ་། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། ཙམ་པ་ཀ་ཡི་མེ་ཏོག་རྙིས་གྱུར་ཀྱང་། །མེ་ཏོག་རྣམ་པ་གཞན་པས་ཤིན་ཏུ་ལྷག །དགེ་སློང་ཚུལ་ཁྲིམས་ཉམས་ཤིང་སྡིག་སྤྱོད་ཀྱང་། །མུ་སྟེགས་ཅན་དག་ཐམས་ཅད་ཀུན་པས་མཆོག །གཞན་ཡང་ཚངས་པ་ཆེན་པོ་མཚམས་མེད་པའི་ཁ་ན་མ་ཐོ་བ་ཆེན་པོའི་ལས་རྣམ་པ་ལྔ་ཡོད་དོ། །ལྔ་གང་ཞེ་ན། ཆེད་དུ་བསམས་ཏེ་ཕ་བསད་པ་དང་། ཆེད་དུ་བསམས་ཏེ་མ་བསད་པ་དང་། ཆེད་དུ་བསམས་ཏེ་དགྲ་བཅོམ་པ་བསད་པ་དང་། ལོག་པར་ལྟ་བས་ཉན་ཐོས་ཀྱི་དགེ་འདུན་གྱི་དབྱེན་བྱས་པ་དང་། ངན་སེམས་ཀྱིས་སངས་རྒྱས་ཀྱི་སྐུ་ལ་ཁྲག་
ཕྱུང་བའོ། །རྣམ་པ་འདི་ལྔ་ནི་མཚམས་མེད་པའི་ཁ་ན་མ་ཐོ་བ་ཆེན་པོའི་ལས་ཞེས་བྱ་སྟེ། གང་ཟག་གང་ཞིག་རྣམ་པ་འདི་ལྔ་ལས་གཅིག་ཙམ་བྱས་ན་རབ་ཏུ་འབྱུང་ཞིང་བསྙེན་པར་རྫོགས་སུ་མི་རུང་ངོ་། །གལ་ཏེ་རབ་ཏུ་ཕྱུང་ངམ་བསྙེན་པར་རྫོགས་པར་བྱིན་ན་དེའི་སློབ་དཔོན་དེ་ཉེས་པ་དང་བཅས་པ་ཡིན་པས་དགེ་འདུན་གྱི་ནང་ནས་བསྐྲད་པར་བྱའོ། །དེ་ལྟར་གང་ཟག་དེ་རབ་ཏུ་བྱུང་ནས་སྤྱོད་ལམ་དང་ཆ་ལུགས་ཡོད་པའི་ཕྱིར་དེ་ལ་ཡང་ལྕག་དང་དབྱིག་པས་གཞུ་ཞིང་འཚོག་པ་དང་། བཙོན་རར་གཞུག་པ་དང་། གཤེ་ཞིང་སྤྱོ་བ་དང་། ལུས་ཀྱི་ཡན་ལག་གཏུབ་པ་དང་། སྲོག་གི་དབང་པོ་དང་དབྲལ་དུ་མི་གནང་ངོ་། །གཞན་ཡང་མཚམས་མེད་པའི་ཁ་ན་མ་ཐོ་བ་ཆེན་པོའི་ལས་དང་ཉེ་བ་རྣམ་པ་བཞི་ཡོད་དེ། བཞི་གང་ཞེ་ན། མི་དགེ་བའི་སེམས་ཀྱིས་རང་སངས་རྒྱས་བསད་པ་སྟེ། དེ་ཡང་སྲོག་གཅོད་པའི་ནང་ན་ཁ་ན་མ་ཐོ་བ་ཆེན་པོའི་ལས་ཡིན་ཏེ་ཉེས་པའི་རྩ་བ་ཡིན་ནོ། །དགྲ་བཅོམ་པའི་དགེ་སློང་མ་ལ་མི་ཚངས་པར་སྤྱོད་པ་སྟེ། འདོད་པས་ལོག་པར་གཡེམ་པའི་ནང་ན་ཁ་ན་མ་ཐོ་བ་ཆེན་པོའི་ལས་ཡིན་པས་ཉེས་པའི་རྩ་བ་ཡིན་ནོ། །དད་པས་བྱིན་པའི་དཀོན་མཆོག་གསུམ་གྱི་དཀོར་ནོར་ལ་སྤྱོད་པ་སྟེ། མ་བྱིན་པར་ལེན་པའི་ནང་ན་ཁ་ན་མ་ཐོ་བ་ཆེན་པོའི་ལས་ཡིན་པས་ཉེས་པའི་རྩ་བ་ཡིན་ནོ། །ངན་པར་ལྟ་བས་འདུམ་པའི་དགེ་འདུན་གྱི་དབྱེན་བྱེད་པ་སྟེ། བརྫུན་དུ་སྨྲ་བའི་ནང་ན་ཁ་ན་མ་ཐོ་བ་ཆེན་པོའི་ལས་ཡིན་པས་ཉེས་པའི་རྩ་བ་ཡིན་ནོ། །གང་ཟག་གང་ཞིག་མཚམས་མེད་པའི་ཁ་ན་མ་ཐོ་བ་ཆེན་པོའི་ལས་དང་ཉེ་བ་རྣམ་པ་བཞི་པོ་འདི་ལས་གཅིག་ཙམ་བྱས་ན་རབ་ཏུ་བྱུང་ཞིང་བསྙེན་པར་རྫོགས་སུ་མི་གནང་སྟེ། གལ་ཏེ་རབ་ཏུ་ཕྱུང་ངམ་བསྙེན་པར་རྫོགས་པ་བྱིན་ན་དེའི་སློབ་དཔོན་ཉེས་པ་དང་བཅས་པ་ཡིན་ཏེ་ངའི་བསྟན་པ་ལས་བསྐྲད་པར་བྱའོ། །དེ་ལྟར་གང་ཟག་དེ་རབ་ཏུ་བྱུང་ངམ་བསྙེན་པར་རྫོགས་ན་སྤྱོད་ལམ་དང་ཆ་ལུགས་དང་ལྡན་པས་དེ་ལ་ཡང་ལྕག་དང་། དབྱིག་པས་གཞུ་ཞིང་འཚོག་པ་དང་། གཤེ་བ་དང་། སྤྱོ་བ་དང་། བཙོན་རར་གཞུག་པ་དང་། ལུས་ཀྱི་ཡན་ལག་གཏུབ་པ་དང་། འཚོ་བའི་དབང་པོ་དང་ཕྲལ་བའི་བར་དུ་བྱེད་དུ་མི་གནང་ངོ་། །དེ་ལྟར་ལ་ལ་
ནི་རྩ་བའི་སྡིག་ཀྱང་ཡིན་ལ་མཚམས་མེད་པ་མ་ཡིན་པ་ཡང་ཡོད་དོ། །ལ་ལ་ནི་མཚམས་མེད་པ་ཡིན་ལ་རྩ་བའི་སྡིག་པ་མ་ཡིན་པ་ཡང་ཡོད་དོ། །ལ་ལ་ནི་རྩ་བའི་སྡིག་ཀྱང་ཡིན་ལ་མཚམས་མེད་པའི་སྡིག་ཀྱང་ཡིན་པ་ཡོད་དོ། །ལ་ལ་ནི་རྩ་བའི་སྡིག་ཀྱང་མ་ཡིན་ལ་མཚམས་མེད་པ་ཡང་མ་ཡིན་པ་ཡོད་དོ། །དེ་ལ་ཇི་ལྟར་ན་རྩ་བའི་སྡིག་ཀྱང་ཡིན་ལ་མཚམས་མེད་པ་ཡང་ཡིན་པ་གང་ཞེ་ན། འདི་ལྟ་སྟེ། ངའི་བསྟན་པ་ལ་རབ་ཏུ་བྱུང་ནས་བསྙེན་པར་རྫོགས་པ་ལ་ཆེད་དུ་བསམས་ཏེ་བདེན་པ་མཐོང་བའི་ཕ་རོལ་ཏུ་ཕྱིན་པའི་གང་ཟག་བསད་པ་སྟེ། འདི་ནི་རྩ་བའི་སྡིག་ཀྱང་ཡིན་ལ་མཚམས་མེད་པ་ཡང་ཡིན་པས་ངས་བསྟན་པའི་འདུལ་བའི་ཆོས་ལས་མྱུར་དུ་བསྐྲད་དགོས་སོ། །དེ་ལ་ཇི་ལྟར་ན་རྩ་བའི་སྡིག་ནི་ཡིན་ལ་མཚམས་མེད་པ་མ་ཡིན་པ་ཞེ་ན། འདི་ལྟ་སྟེ་ངའི་བསྟན་པ་ལ་རབ་ཏུ་བྱུང་ནས་བསྙེན་པར་རྫོགས་པ་ལ་ཆེད་དུ་བསམས་ཏེ། གང་ཟག་ཕ་རོལ་པོ་གཞན་གྱི་སྲོག་བཅད་པ་དང་། ཆུང་ངུ་ན་དུག་བྱིན་པས་མངལ་ན་འདུག་པ་བསད་པ་སྟེ། དེ་དག་ནི་རྩ་བའི་སྡིག་ཡིན་ལ་མཚམས་མེད་པ་ནི་མ་ཡིན་ནོ། །གང་ཟག་དེ་དགེ་འདུན་དང་ཞག་ཏུ་ལྷན་ཅིག་ཏུ་གནས་ཤིང་ལོངས་སྤྱོད་དང་། ཕྱོགས་བཞིའི་དགེ་འདུན་གྱི་ནོར་ལ་སྤྱོད་དུ་མི་གནང་ངོ་། །དེ་ལ་ཇི་ལྟར་ན་མཚམས་མེད་པ་ནི་ཡིན་ལ་རྩ་བའི་སྡིག་མ་ཡིན་པ་གང་ཞེ་ན། འདི་ལྟ་སྟེ། གང་ཟག་གང་ཞིག་དཀོན་མཆོག་གསུམ་ལ་སྐྱབས་སུ་སོང་ངམ། ཁྲིམས་ལྔ་འཛིན་ཏམ། ཁྲིམས་བཅུ་འཛིན་པ་དག་མཚམས་མེད་པ་ལྔ་ལས་གཅིག་ཙམ་བྱས་པ་དག་ནི་མཚམས་མེད་པའི་སྡིག་ཡིན་ལ་རྩ་བའི་སྡིག་མ་ཡིན་པ་ཞེས་བྱའོ། །གང་ཟག་དེ་ནི་རབ་ཏུ་དབྱུང་ཞིང་བསྙེན་པར་རྫོགས་སུ་མི་རུང་སྟེ། གལ་ཏེ་རབ་ཏུ་ཕྱུང་ངམ་བསྙེན་པར་རྫོགས་པ་བྱིན་ན། དེའི་སློབ་དཔོན་སྡིག་པ་དང་བཅས་པ་ཡིན་ཏེ། ངའི་བསྟན་པ་ལས་བསྐྲད་པར་བྱའོ། །དེ་ལ་ཇི་ལྟར་ན་རྩ་བའི་སྡིག་ཀྱང་མ་ཡིན་ལ་མཚམས་མེད་པ་ཡང་མ་ཡིན་པ་ཞེ་ན། འདི་ལྟ་སྟེ། གང་ཟག་གང་ཞིག་དཀོན་མཆོག་གསུམ་ལ་སྐྱབས་སུ་སོང་ངམ། ཁྲིམས་ལྔ་བཟུང་བ་ལས་སངས་རྒྱས་དང་། ཆོས་དང་། དགེ་འདུན་ལ་ཐེ་ཙོམ་ཟ་བའི་སེམས་སྐྱེ་སྟེ། མུ་སྟེགས་ཅན་ལ་སྐྱབས་སུ་སོང་ནས་སྟོན་པའི་སློབ་
དཔོན་དུ་འཛིན་ཏམ། ལྟས་སུ་བལྟ་བ་སྣ་ཚོགས་ལ་ལྟས་སུ་འཛིན་ཅིང་འཇིག་རྟེན་གྱི་ལྷ་རྗེད་པའོ། །གང་ཟག་གང་ཞིག་དེ་བཞིན་གཤེགས་པས་གསུངས་པའི་དམ་པའི་ཆོས་ཉན་ཐོས་ཀྱི་ཐེག་པ་དང་ལྡན་པའི་དམ་པའི་ཆོས་དང་། རང་སངས་རྒྱས་ཀྱི་ཐེག་པ་དང་ལྡན་པའི་དམ་པའི་ཆོས་དང་། ཐེག་པ་ཆེན་པོ་དང་ལྡན་པའི་དམ་པའི་ཆོས་ལ་སྐུར་ཅིང་སྒྲོ་འདོགས་པ་དང་། བགེགས་དང་བར་ཆད་བྱེད་པ་དང་། བདག་ཡིད་མི་ཆེས་ཤིང་མི་དད་པས་ཕ་རོལ་པོ་གཞན་དག་ཀྱང་དེ་ལས་ཟློག་ཅིང་བར་ཆད་བྱེད་པ་དང་། གཞན་དག་ཀློག་པ་དང་། འདོན་པ་དང་། གླེགས་བམ་དུ་འདྲི་བའི་ཚིགས་བཅད་གཅིག་ཙམ་གྱི་ཡང་བར་དུ་གཅོད་ཅིང་བགེགས་བྱས་ན། དེ་ནི་རྩ་བའི་སྡིག་ཀྱང་མ་ཡིན་ལ་མཚམས་མེད་པ་ཡང་མ་ཡིན་ཏེ། ཁ་ན་མ་ཐོ་བ་ཆེན་པོའི་ལས་མཚམས་མེད་པ་དང་ཉེ་བ་ཞེས་བྱའོ། །གང་ཟག་དེ་ཁ་ན་མ་ཐོ་བའི་སྡིག་པའི་ལས་ཆེན་པོ་དག་མཐོལ་བ་དང་། བཤགས་པ་མ་བྱས་ཀྱི་བར་དུ་རབ་ཏུ་འབྱུང་བ་དང་བསྙེན་པར་རྫོགས་སུ་མི་རུང་སྟེ། ལ་ལ་ཞིག་གིས་རབ་ཏུ་ཕྱུང་ངམ། བསྙེན་པར་རྫོགས་པ་བྱིན་ན། དེའི་སློབ་དཔོན་དེ་སྡིག་པ་དང་བཅས་པ་ཡིན་པས་ངའི་བསྟན་པ་ལས་བསྐྲད་པར་བྱའོ། །གང་ཟག་དེ་རབ་ཏུ་བྱུང་ངམ། བསྙེན་པར་རྫོགས་ནས་ཁ་ན་མ་ཐོ་བའི་སྡིག་པ་དེ་མཐོལ་བ་དང་། བཤགས་པའི་ལས་མ་བྱས་ན་དེ་ནི་ངས་བསྟན་པའི་འདུལ་བ་ལས་མྱུར་དུ་བསྐྲད་དགོས་སོ། །དེ་ཅིའི་ཕྱིར་ཞེ་ན། གང་ཟག་རྣམ་པ་དེ་གཉིས་ནི་དམ་པའི་ཆོས་ཀྱི་མིག་མེད་པར་བྱེད་པ། དམ་པའི་ཆོས་ཀྱི་སྒྲོན་མ་ནུབ་པར་བྱེད་པ། དཀོན་མཆོག་གསུམ་གྱི་གདུང་ཡོངས་སུ་གཅོད་པ་སྟེ། ལྷ་དང་མི་ལ་སོགས་པ་ཡང་དོན་མེད་པ་ཕན་པ་མེད་པའི་སྡུག་བསྔལ་སྤྱོད་དུ་འཇུག་ཅིང་ངན་སོང་དུ་ལྟུང་བར་བྱེད་པ་ཡིན་ནོ། །གང་ཟག་རྣམ་པ་གཉིས་པོ་དེ་ནི་བདག་ཉིད་ཀྱིས་དམ་པའི་ཆོས་ལ་སྐུར་ཅིང་འཕགས་པ་རྣམས་ལ་སྨོད་པ་ཡིན་ལ། ཕ་རོལ་པོ་གཞན་དག་ཀྱང་དམ་པའི་ཆོས་ལ་སྐུར་ཅིང་འཕགས་པ་རྣམས་ལ་སྨོད་དུ་འཛུད་པ་སྟེ། ཚེ་འཕོས་མ་ཐག་ཏུ་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་ཞིང་བསྐལ་པའི་བར་དུ་སྡུག་བསྔལ་མྱོང་བར་འགྱུར་ཏེ་ཕྱིར་གསོར་མི་རུང་ངོ་། །ཚངས་པ་ཆེན་པོ་གཞན་ཡང་བཅས་པའི་སྡིག་ལ་མི་གནས་པ་དང་མི་བྱ་
བ་ཡང་ཡོད་ལ། རང་བཞིན་གྱི་སྡིག་ལ་མི་གནས་པ་དང་མི་བྱ་བ་ཡང་ཡོད། རང་བཞིན་གྱི་སྡིག་ལ་རྩ་བའི་སྡིག་ཏུ་འགྱུར་བ་མི་གནས་པ་དང་མི་བྱ་བ་ཡང་ཡོད་དོ། །དེ་ལ་ཇི་ལྟར་ན་རྩ་བའི་སྡིག་ལ་མི་གནས་པ་དང་མི་བྱ་བའི་ཆོས་གང་ཞེ་ན། འདི་ལྟ་སྟེ། དགེ་སློང་གང་ཞིག་མི་ཚངས་པར་སྤྱོད་པས་རྩ་བའི་སྡིག་བྱས་པ་དང་ཆེད་དུ་བསམས་ཏེ། སྐྱེ་བོ་མིའི་སྲོག་བཅད་ནས་རྩ་བའི་སྡིག་བྱས་པ་དང་། དཀོན་མཆོག་གསུམ་གྱི་དཀོར་མ་ཡིན་པར་བརྐུས་ནས་རྩ་བའི་སྡིག་བྱས་པ་དང་། བརྫུན་ཆེན་པོ་སྨྲས་ནས་རྩ་བའི་སྡིག་བྱས་པ་སྟེ། དགེ་སློང་གང་ཞིག་རྩ་བའི་སྡིག་རྣམ་པ་འདི་བཞི་ལས་འགའ་ཞིག་བྱས་ན་དགེ་སློང་གིས་ལས་བྱ་བའི་ནང་དུ་མི་ཆུད་དེ། ལོངས་སྤྱོད་ཐམས་ཅད་དང་། ཕྱོགས་བཞིའི་དགེ་འདུན་གྱི་ནོར་ལ་སྤྱོད་དུ་མི་དབང་མོད་ཀྱི་དེ་ལ་ཡང་དབྱིག་པ་དང་། ལྕག་གིས་བརྡེག་ཅིང་གཞུ་བ་དང་། བཙོན་རར་གཞུག་པ་དང་། སྤྱོ་ཞིང་གཤེ་བ་དང་། ལུས་ཀྱི་ཡན་ལག་གཏུབ་པ་དང་། འཚོ་བའི་དབང་པོ་དང་ཕྲལ་བ་ལ་སོགས་པ་ཐམས་ཅད་བྱེད་དུ་མི་གནང་ངོ་། །དེ་དག་ནི་རང་བཞིན་གྱི་སྡིག་གི་ནང་ན་རྩ་བའི་སྡིག་ལྕི་བ་སྟེ། མི་གནས་པ་དང་མི་བྱ་བ་ཞེས་བྱའོ། །ཅིའི་ཕྱིར་དེ་ལ་རྩ་བའི་སྡིག་ཅེས་བྱ་ཞེ་ན། གང་ཟག་གང་གིས་ཆོས་རྣམ་པ་དེ་བཞི་བྱས་ན། ཚེ་འཕོས་མ་ཐག་ཏུ་ངན་སོང་དུ་ལྟུང་བར་འགྱུར་ཏེ། ངན་སོང་དུ་འགྲོ་བའི་རྩ་བ་ཡིན་པས་ན་རྩ་བའི་སྡིག་ཅེས་བྱའོ། །དེ་ལ་ཅིའི་ཕྱིར་མཚམས་མེད་པ་དང་། མཚམས་མེད་པ་ལ་ཉེ་བ་དང་། རྩ་བའི་སྡིག་ལ་མི་གནས་པ་དང་མི་བྱ་བའི་ཁ་ན་མ་ཐོ་བ་ཆེན་པོའི་ལས་ངན་པ་ཞེས་གསུངས་ཞེ་ན། རིགས་ཀྱི་བུ་འདི་ལྟ་སྟེ། ལྕགས་ཀྱི་ཐུ་ལུམ་མམ། རོ་ཉེའི་གོང་བུ་ནི་སྟེང་གི་ནམ་མཁའ་ལ་བོར་ན་ཅུང་ཟད་ཀྱང་མི་སྡོད་པར་དེ་མ་ཐག་ཏུ་ཕྱིར་ཡང་ས་ལ་ལྟུང་ངོ་། །མཚམས་མེད་པ་ལྔ་དང་། མཚམས་མེད་པ་ལ་ཉེ་བ་དང་། རྩ་བའི་སྡིག་བཞི་དང་། དམ་པའི་ཆོས་ལ་སྐུར་པ་དང་། དཀོན་མཆོག་གསུམ་ལ་ཐེ་ཙོམ་ཟ་བ་དང་། གང་ཟག་སྡིག་པ་ཅན་རྣམ་གཉིས་པོ་ཡང་དེ་དང་འདྲ་སྟེ། གང་ཟག་གང་གིས་སྡིག་པ་རྣམ་པ་བཅུ་གཅིག་པོ་དེ་ལས་འགའ་ཞིག་བྱས་ན་ཚེ་འཕོས་མ་ཐག་ཏུ་ཐོགས་པ་མེད་པར་མཚམས་མེད་པའི་སེམས་ཅན་དམྱལ་བ་ཆེན་པོར་གདོན་མི་ཟ་བར་སྐྱེ་ཞིང་སྡུག་བསྔལ་ཆེན་པོ་མྱོང་བར་འགྱུར་ཏེ། དེ་བས་ན་མི་གནས་པ་དང་། མི་བྱ་བའི་ཁ་ན་མ་ཐོ་བ་ཆེན་པོའི་ལས་ངན་པ་
ཞེས་བྱའོ། །མི་གནས་པ་དང་། མི་བྱ་བའི་ཁ་ན་མ་ཐོ་བ་ཆེན་པོའི་ལས་ངན་པ་འདི་དག་བྱས་པའི་གང་ཟག་ནི་ལུས་འདི་ཉིད་ལ་ཉོན་མོངས་པ་ཟད་པར་བྱེད་མི་ནུས་སུ་ངེས་ཏེ་ཏིང་ངེ་འཛིན་ཡང་མི་འགྲུབ་ན་ཡང་དག་པ་མི་འགྱུར་བ་ལ་ཞུགས་པ། ཐོབ་པ་ལྟ་ཅི་སྨོས་ཏེ། ཚེ་འཕོས་མ་ཐག་ཏུ་གདོན་མི་ཟ་བར་སེམས་ཅན་དམྱལ་བར་སྐྱེ་ཞིང་སྡུག་བསྔལ་ཆེན་པོ་མྱོང་བར་འགྱུར་རོ། །ཚངས་པ་ཆེན་པོ་གཞན་ཡང་རིགས་ཀྱི་བུའམ། རིགས་ཀྱི་བུ་མོ་གང་གིས་བསམ་པ་དག་པས་ངའི་བསྟན་པ་ལ་དད་ནས་ཉན་ཐོས་ཀྱི་ཐེག་པ་ལ་ཞུགས་སམ། རང་སངས་རྒྱས་ཀྱི་ཐེག་པ་ལ་ཞུགས་སམ། ཐེག་པ་ཆེན་པོ་ལ་ཞུགས་ཏེ་ངས་བསྟན་པ་ལ་དད་པས་ཁྱིམ་ནས་ཁྱིམ་མ་ཡིན་པར་རབ་ཏུ་ཕྱུང་སྟེ་བསྙེན་པར་རྫོགས་པར་བསླབ་པའི་གནས་མང་པོ་ལ་ཤིན་ཏུ་བཀུར་སྟི་དང་། རིམ་གྲོར་བྱ་བ་དང་། རྩ་བའི་སྡིག་པ་བཞི་བསྲུང་བ་ལ་ཤིན་ཏུ་འབད་པའི་བརྩོན་འགྲུས་ཆེན་པོ་བརྩམ་པར་བྱའོ། །གང་ཟག་དེ་ལ་ནི་རྟག་ཏུ་ལྷ་དང་། མི་དང་མི་མ་ཡིན་པ་ལ་སོགས་པ་རྗེས་སུ་འབྲང་ཞིང་སྲུང་སྟེ་དེ་ནི་ལྷ་དང་། མི་ལ་སོགས་པའི་མཆོད་པ་ཡང་ཆུད་མི་ཟའོ། །ཐེག་པ་གསུམ་གང་ལ་སྤྲོ་ཞིང་དགའ་བ་བཞིན་དེ་མ་ཐག་ཏུ་མཐའི་གནས་བྱེད་པར་འགྱུར་རོ། །དེ་བས་ན་ཡང་དག་པ་མྱ་ངན་ལས་འདའ་བར་འདོད་པ་དག་ལུས་དང་སྲོག་སྟོར་ཀྱང་སླའི་ཆོས་རྣམ་པ་དེ་བཞི་ཉམས་པར་མི་བྱའོ། །དེ་ཅིའི་ཕྱིར་ཞེ་ན། སོ་སོའི་སྐྱེ་བོ་དག་ནི་རྒྱུ་རྣམ་པ་འདི་གསུམ་གྱིས་མྱ་ངན་ལས་འདའ་བའི་བདེ་བ་ཐོབ་པར་འགྱུར་བའི་ཕྱིར་རོ། །གསུམ་གང་ཞེ་ན། དེ་བཞིན་གཤེགས་པ་ལ་བརྟེན་པའི་རྒྱུ་དང་། འཕགས་པས་བསྟན་པ་ལ་བརྟེན་པའི་རྒྱུ་དང་། ངའི་ཉེ་གནས་ལ་བརྟེན་པའི་རྒྱུ་སྟེ་གསུམ་མོ། །སོ་སོའི་སྐྱེ་བོ་དག་རྒྱུ་རྣམ་པ་འདི་གསུམ་ལ་བརྟེན་ཏེ་བརྩོན་འགྲུས་སུ་ནན་ཏན་བྱས་ན་མྱ་ངན་ལས་འདའ་བའི་བདེ་བ་ཐོབ་པར་འགྱུར་རོ། །གང་ཟག་གང་གིས་ཆོས་རྣམ་པ་དེ་བཞི་ཉམས་ན་ང་ཡང་དེའི་སྟོན་པ་མ་ཡིན་ལ། དེ་ཡང་ངའི་ཉན་ཐོས་མ་ཡིན་ནོ། །གང་ཟག་གང་གིས་ཆོས་རྣམ་པ་དེ་བཞི་ཉམས་ན་དེ་ནི་ངས་བསྟན་པའི་ཤིན་ཏུ་ཟབ་པ། རྒྱ་ཆེ་བའི་མི་རྟག་པ་དང་། སྡུག་བསྔལ་བ་དང་། སྟོང་པ་ཉིད་དང་། བདག་མེད་པ་དང་ལྡན་པ་སེམས་ཅན་ཐམས་ཅད་ལ་ཕན་པ་དང་བདེ་
བའི་དོན་དུ་འགྱུར་བར་བསྟན་པ་སོ་སོར་ཐར་པ་ལས་འགལ་བའོ། །གལ་ཏེ་ངས་བསྟན་པའི་སོ་སོར་ཐར་པ་ལས་འགལ་ན་དེ་ནི་བསམ་གཏན་དང་། ཏིང་ངེ་འཛིན་ཐམས་ཅད་ལ་ལྡོངས་ཤིང་འཐོམ་པར་འགྱུར་ཏེ། གཞོལ་ཞིང་འཇུག་མི་ནུས་པ་དང་། ཉོན་མོངས་པ་མང་པོས་དཀྲིས་ཤིང་གླགས་ཏེ་ཐེག་པ་གསུམ་གྱི་ཆོས་ཀྱི་སྣོད་ཀྱང་མ་ཡིན་པས་ངན་སོང་དུ་ལྟུང་ཞིང་སྡུག་བསྔལ་ཆེན་པོ་མྱོང་བར་འགྱུར་རོ། །རིགས་ཀྱི་བུའམ། རིགས་ཀྱི་བུ་མོ་གང་གིས་ངས་བསྟན་པའི་སོ་སོར་ཐར་པ་ལས་རྩ་བ་བཞི་མ་ཉམས་ཏེ། ཡོངས་སུ་དག་ན་ང་ཡང་དེའི་སྟོན་པ་ཡིན་ལ། དེ་ཡང་ངའི་ཉན་ཐོས་ཡིན་པས་ངའི་གསུང་གི་རྗེས་སུ་འབྲང་བ། ངའི་ཆོས་ལ་བདེ་བར་གནས་པ། བྱ་བ་ཐམས་ཅད་ཀྱི་མཐར་ཕྱིན་པ་ཡིན་པས་གང་ཟག་དེ་ནི་ཚུལ་ཁྲིམས་ཀྱི་ཕུང་པོ་ལ་ཤིན་ཏུ་གནས་པས་ན་དགེ་བའི་ཆོས་ཐམས་ཅད་ལ་ལེགས་པར་གནས་པ་ཡིན་ནོ། །ཉན་ཐོས་ཀྱི་ཐེག་པ་ཕུན་སུམ་ཚོགས་པ་ལ་གནས་པ་ཡིན་ནོ། །རང་སངས་རྒྱས་ཀྱི་ཐེག་པ་ཕུན་སུམ་ཚོགས་པ་ལ་གནས་པ་ཡིན་ནོ། །ཐེག་པ་ཆེན་པོ་ཕུན་སུམ་ཚོགས་པ་ལ་གནས་པ་ཡིན་ནོ། །དེ་ཅིའི་ཕྱིར་ཞེ་ན། གལ་ཏེ་རང་བཞིན་གྱི་སྡིག་པའི་རྩ་བ་རྣམ་པ་བཞི་པོ་དེ་བསྲུངས་ན། དེ་ནི་ཟག་པ་དང་བཅས་པ་དང་། ཟག་པ་མེད་པའི་དགེ་བའི་ཆོས་ཐམས་ཅད་ཀྱི་རྒྱུ་མཆོག་དམ་པ་རྣམ་པར་གཞག་པ་ཡིན་ནོ། །དེ་བས་ན་ཆོས་རྣམ་པ་འདི་བཞི་སྲུང་བ་ནི་དགེ་བའི་ཆོས་ཐམས་ཅད་ཀྱི་རྩ་བ་ཞེས་བྱའོ། །འདི་ལྟ་སྟེ་ས་ཆེན་པོ་ལ་བརྟེན་ནས་རྩི་ཤིང་དང་། ལོ་ཏོག་དང་། ཤིང་གེལ་པ་དང་། ནགས་ཚལ་ལ་སོགས་པ་ཐམས་ཅད་སྐྱེའོ། །དེ་བཞིན་དུ་ཚུལ་ཁྲིམས་ཀྱི་རྩ་བ་བཞི་པོ་འདི་སྲུང་བ་ལ་བརྟེན་ནས། དགེ་བའི་ཆོས་ཐམས་ཅད་འཕེལ་ཞིང་སྐྱེ་བར་འགྱུར་རོ། །འདི་ལྟ་སྟེ། ས་ཆེན་པོ་ལ་བརྟེན་ནས་རི་ཐམས་ཅད་དང་། རི་ཁོར་ཡུག་དང་། རི་ཁོར་ཡུག་ཆེན་པོ་དང་། རི་རབ་རིའི་རྒྱལ་པོ་ལ་སོགས་པ་ཐམས་ཅད་བདེ་བར་གནས་སོ། །དེ་བཞིན་དུ་ཚུལ་ཁྲིམས་ཀྱི་རྩ་བ་བཞི་པོ་སྲུང་བ་ལ་བརྟེན་ནས་ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པ་དང་། བླ་ན་མེད་པའི་ཐེག་པ་ཆེན་པོ་བདེ་བར་གནས་པར་འགྱུར་རོ། །འདི་ལྟ་སྟེ།
ས་ཆེན་པོ་ལ་བརྟེན་ནས་འཇིག་རྟེན་གྱི་རོ་བྲོ་བའི་མཆོག་ཐམས་ཅད་བཙལ་གྱིས་རྙེད་དོ། །དེ་བཞིན་དུ་ཚུལ་ཁྲིམས་ཀྱི་རྩ་བ་བཞི་པོ་སྲུང་བ་ལ་བརྟེན་ནས་དྲན་པ་དང་། ཏིང་ངེ་འཛིན་དང་། གཟུངས་དང་། ངང་དེས་པའི་བཟོད་པ་དང་། འཕགས་པའི་ལམ་ཐམས་ཅད་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དུ་ཐོབ་པར་འགྱུར་རོ། །འདི་ལྟ་སྟེ་ས་ཆེན་པོ་ནི་གཙང་བ་དང་། མི་གཙང་བ་ཐམས་ཅད་སྙོམས་པར་འཛིན་ཏོ། །ཚུལ་ཁྲིམས་ཀྱི་རྩ་བ་བཞི་ཤིན་ཏུ་སྲུང་བའི་རིགས་ཀྱི་བུ་དང་། རིགས་ཀྱི་བུ་མོ་དག་ཀྱང་དེ་བཞིན་དུ་ཆོས་ཀྱི་སྣོད་དུ་གྱུར་པ་དང་། ཆོས་ཀྱི་སྣོད་དུ་མ་གྱུར་པ་ལ་སེམས་མཉམ་པར་བཞག་སྟེ། དེ་ལ་མི་བརྙས་མི་སྨད་བདག་མི་བསྟོད་མི་སྙེམས་ཅོ་མི་འདྲི་ན་དགེ་བའི་ཆོས་ཐམས་ཅད་སྐྱེ་བའི་གནས་སུ་འགྱུར་རོ། །འདི་ལྟ་སྟེ། ས་ཆེན་པོ་འདི་ལ་ནི་སེམས་ཅན་ཐམས་ཅད་དེ་ལ་ལོངས་སྤྱོད་ཅིང་བདེ་བར་འཚོའོ། །དེ་བཞིན་དུ་ཚུལ་ཁྲིམས་ཀྱི་རྩ་བ་བཞི་ཤིན་ཏུ་སྲུང་བའི་རིགས་ཀྱི་བུ་དང་། རིགས་ཀྱི་བུ་མོ་དག་ཀྱང་དེ་བཞིན་གཤེགས་པས་བསྟན་པ་ཡང་དག་པའི་ཆོས་ལ་ཤིན་ཏུ་སྤྲོ་བ་དང་། མཆོག་དམ་པའི་བསམ་པ་དག་པས་སེམས་ཅན་ཐམས་ཅད་ལ་བྱེ་བྲག་གི་འདུ་ཤེས་མེད་པར་བསྡུ་བ་རྣམ་པ་བཞིའི་ཆོས་ཀྱིས་མཉམ་པར་བསྡུས་ཏེ། སེམས་ཅན་ཐམས་ཅད་ཆོས་ཀྱི་དགའ་བ་ལ་ལོངས་སྤྱོད་ཅིང་བདེ་བར་འཚོ་བར་བྱེད་དོ། །དེ་ནས་ཚེ་དང་ལྡན་པ་ཨུ་པ་ལིས་བཅོམ་ལྡན་འདས་ཀྱིས་གསུངས་པ་འདི་དག་ཐོས་ནས་འདུག་པ་ལས་ལངས་ཏེ། གོས་ཚགས་བཅོས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་གཏུགས་ཏེ་བླ་གོས་གཅིག་ཏུ་བྱས། པུས་མོ་གཡས་པའི་ལྷ་ང་ས་ལ་བཙུགས་ནས་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གསུངས་པ་ལྟར་ཚུལ་ཁྲིམས་ཀྱི་རྩ་བ་བཞི་ཤིན་ཏུ་སྲུང་བའི་རིགས་ཀྱི་བུ་དང་། རིགས་ཀྱི་བུ་མོ་དག་ཆོས་ཀྱི་སྣོད་དུ་གྱུར་པའི་ཆོས་ཀྱི་སྣོད་དུ་མ་གྱུར་པ་ཀུན་ལ་སེམས་མཉམ་པར་བཞག་སྟེ། མི་བརྙས་མི་སྨད་བདག་མི་བསྟོད་མི་སྙེམས་གློ་བུར་དུ་ཉེས་པ་མ་གླེང་ངོ་ཞེས་གསུངས་ན། དེ་ལྟ་ན་ནི་མ་མཆིས་པའི་དུས་ན་དགེ་སློང་ཚུལ་ཁྲིམས་ཉམས་ཞིང་མི་དགེ་བ་སྤྱོད་པ། དགེ་སྦྱོང་མ་ལགས་པར་དགེ་སྦྱོང་དུ་ཁས་འཆེ་བ། ཚངས་པར་སྤྱོད་པ་མ་ལགས་པར་
ཚངས་པར་སྤྱོད་པར་ཁས་འཆེ་བ་དག་ལ་དགེ་སློང་གི་དགེ་འདུན་གྱིས་ཇི་ལྟ་བུའི་ཐབས་ཀྱིས་གླེང་ཞིང་དགར་བར་བགྱི། བཅོམ་ལྡན་འདས་ཀྱིས་ཚེ་དང་ལྡན་པ་ཨུ་པ་ལི་ལ་བཀའ་སྩལ་པ། ངས་མུ་སྟེགས་ཅན་དང་། ཁྱིམ་པ་རྣམས་ཀྱིས་དགེ་སློང་གི་ཉེས་པ་གླེང་དུ་ནི་གནང་བའི་སྐབས་མེད་དོ། །དགེ་སློང་གི་དགེ་འདུན་གྱིས་ཀྱང་ཆོས་བཞིན་མ་ཡིན་པ་དང་། མ་རྟོགས་པར་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེང་དུ་མ་གནང་ན་དགར་བའམ་བསྐྲད་པ་ལྟ་ཅི་སྨོས། ཆོས་བཞིན་མ་ཡིན་པ་དང་། མ་རྟོགས་པར་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེངས་སམ་གལ་ཏེ་བསྐྲད་ན་ཁ་ན་མ་ཐོ་བ་ཆེན་པོའི་སྡིག་པ་འཐོབ་བོ། །ཨུ་པ་ལི་འདི་ལྟར་ཤེས་པར་བྱ་སྟེ། ཆོས་བཞིན་མ་ཡིན་པ་དང་། མ་རྟོགས་པ་རྣམ་པ་འདི་བཅུས་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེངས་ན་ཁ་ན་མ་ཐོ་བའི་སྡིག་པ་ཆེན་པོ་ཐོབ་པར་འགྱུར་གྱིས། མཁས་པ་དག་གིས་ནི་དེ་ལྟར་མི་བྱའོ། །བཅུ་གང་ཞེ་ན། དགེ་འདུན་མ་དད་པར་རྒྱལ་པོའི་སྤྱན་སྔར་མ་རྟོགས་བཞིན་དུ་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེང་བ་དང་། དགེ་འདུན་མ་དད་པར་ཀུན་དུ་རྒྱུ་བའི་མདུན་དུ་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེང་བ་དང་། དགེ་འདུན་མ་དད་པར་བློན་པོའི་མདུན་དུ་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེང་བ་དང་། དགེ་འདུན་མ་དད་པར་ཚོང་དཔོན་དང་། ཁྱིམ་བདག་གི་མདུན་དུ་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེང་བ་དང་། བུད་མེད་མང་པོའི་མདུན་དུ་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེང་བ་དང་། སྐྱེས་པ་མང་པོའི་མདུན་དུ་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེང་བ་དང་། མ་རུང་བར་བྱེད་པ་མང་པོའི་མདུན་དུ་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེང་བ་དང་། དགེ་སློང་དང་དགེ་སློང་མ་མང་པོའི་མདུན་དུ་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེང་བ་དང་། ཁོན་ཡོད་པའི་མདུན་དུ་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེང་བ་དང་། དགྲ་བོ་ཞེ་འགྲས་པའི་མདུན་དུ་མ་རྟོགས་བཞིན་དུ་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེང་བའོ། །འདི་དག་ནི་ཆོས་མ་ཡིན་པ་དང་། མ་རྟོགས་པར་ཚུལ་ཁྲིམས་ཉམས་པའི་དགེ་སློང་གི་ཉེས་
པ་གླེངས་ན་ཁ་ན་མ་ཐོ་བའི་སྡིག་པ་ཆེན་པོ་འཐོབ་པར་འགྱུར་བ་བཅུ་ཞེས་བྱའོ། །གལ་ཏེ་བདེན་པ་ཡང་དག་པ་ལ་བརྟེན་ཏེ་གླེངས་ན་ཡང་ཉེས་པར་འགྱུར་ན་བདེན་པ་མ་ཡིན་པ་ལ་བརྟེན་ཏེ་གླེང་བ་ལྟ་ཅི་སྨོས་ཏེ། ཁ་ན་མ་ཐོ་བའི་སྡིག་པ་ཆེན་པོ་ཐོབ་པར་འགྱུར་རོ། །གཞན་ཡང་ཆོས་མ་ཡིན་པ་རྣམ་པ་འདི་བཅུས་ཚུལ་ཁྲིམས་ཉམས་པའི་དགེ་སློང་གི་ཉེས་པ་གླེངས་ན་ཁ་ན་མ་ཐོ་བ་ཆེན་པོའི་སྡིག་འཐོབ་པར་འགྱུར་གྱིས་མཁས་པ་དག་གིས་དེ་ལྟར་མི་བྱའོ། །བཅུ་གང་ཞེ་ན། མུ་སྟེགས་ཅན་དག་གིས་དགེ་སློང་གི་ཉེས་པ་གླེང་བ་དང་། ཚུལ་ཁྲིམས་མེད་པའི་ཁྱིམ་པ་དག་གིས་དགེ་སློང་གི་ཉེས་པ་གླེང་བ་དང་། མཚམས་མེད་པ་བྱས་པ་དག་གིས་དགེ་སློང་གི་ཉེས་པ་གླེང་བ་དང་། དམ་པའི་ཆོས་ལ་སྐུར་པ་དག་གིས་དགེ་སློང་གི་ཉེས་པ་གླེང་བ་དང་། འཕགས་པ་རྣམས་ལ་སྨོད་པ་དག་གིས་དགེ་སློང་གི་ཉེས་པ་གླེང་བ་དང་། གླེན་པ་སེམས་འཁྲུག་པ་དག་གིས་དགེ་སློང་གི་ཉེས་པ་གླེང་བ་དང་། ནད་ཀྱིས་ཡོངས་སུ་གཟིར་བ་དག་གིས་དགེ་སློང་གི་ཉེས་པ་གླེང་བ་དང་། ཕྱོགས་བཞིའི་དགེ་འདུན་གྱི་རུང་བར་བྱེད་པ་བས་དགེ་སློང་གི་ཉེས་པ་གླེང་བ་དང་། བཟའ་ཤིང་གི་ར་བ་སྲུང་བ་དག་གིས་དགེ་སློང་གི་ཉེས་པ་གླེང་བ་དང་། དགེ་སློང་ཆད་པ་པ་དག་གིས་དགེ་སློང་གི་ཉེས་པ་གླེང་བ་སྟེ། ཆོས་མ་ཡིན་པ་རྣམ་པ་འདི་བཅུས་དགེ་སློང་ཚུལ་ཁྲིམས་ཉམས་པའི་ཉེས་པ་གླེངས་ན་ཁ་ན་མ་ཐོ་བའི་སྡིག་པ་ཆེན་པོ་འཐོབ་པར་འགྱུར་རོ། །ཇི་སྟེ་བདེན་པ་ཡང་དག་པ་ལ་བརྟེན་ཏེ་གླེངས་ན་ཡང་ཉེས་པར་འགྱུར་ན་བདེན་པ་མ་ཡིན་པར་གླེང་བ་ལྟ་ཅི་སྨོས་ཏེ། ཁ་ན་མ་ཐོ་བའི་སྡིག་པ་ཆེན་པོ་ཐོབ་པར་འགྱུར་རོ། །གཞན་ཡང་ཨུ་པ་ལི་གལ་ཏེ་དགེ་སློང་ཚུལ་ཁྲིམས་ཉམས་པ་དག་དགེ་སློང་གི་དགེ་འདུན་གྱི་ནང་ན་དགེ་འདུན་དང་ལྷན་ཅིག་ཏུ་གནས་ན། དགེ་སློང་དེའི་ནང་ན་ཚུལ་བཞིན་དུ་བྱེད་པ། སྤྱོད་ལམ་དང་ལྡན་པ། ཡོན་ཏན་ལྔ་ཕྲུགས་དང་ལྡན་པ་གཅིག་འདུག་པ་ལས་ལངས་ཏེ། གོས་ཚགས་བཅོས་ལ་བསྟི་སྟང་དང་བཅས་པས་དགེ་སློང་གི་དགེ་འདུན་གྱི་རྐང་པ་ལ་ཕྱག་འཚལ་ལ། དེ་ནས་ཚུལ་ཁྲིམས་ཉམས་པའི་དགེ་སློང་གི་མདུན་དུ་སོང་ལ་ཉེས་པ་གླེང་ངོ་ཞེས་འདི་སྐད་
གསོལ་བ་ཐོབ་ཤིག །ཚེ་དང་ལྡན་པ་དགོངས་ཤིག་བདག་དེང་ཚེ་དང་ལྡན་པ་ཁྱོད་ཀྱི་ཉེས་པ་གླེང་ངོ་། །བདེན་པ། བརྫུན་པ་མ་ཡིན་པ་དུས་ལ་བབ་པ། དུས་ལས་མི་འདའ་བ། འཛུམ་བཞིན་དུ་སྨྲ་བ། མི་བརླང་བའི་ཚིག་དང་། བྱམས་པའི་སེམས་དང་། ཞེ་སྡང་མེད་པ་དང་། ཕན་པ་དང་། བདེ་བའི་གནོད་པ་མ་ཡིན་པ་དང་། དེ་བཞིན་གཤེགས་པའི་ཆོས་ཀྱི་མིག་དང་། ཆོས་ཀྱི་སྒྲོན་མ་ཡུན་དུ་གནས་པར་བྱ་བའི་ཕྱིར་གླེང་ངོ་། །ཚེ་དང་ལྡན་པ་ཁྱོད་ཀྱི་ཉེས་པ་བདག་གིས་ཆོས་བཞིན་དུ་གླེང་ངོ་ཞེས་གསོལ་བ་ཐོབ་ཤིག །གང་ཟག་དེས་གླེང་དུ་གནང་ན་ནི་ཆོས་བཞིན་དུ་གླེང་བར་བྱའོ། །གལ་ཏེ་གླེང་དུ་མ་གནང་ན་ཕྱིར་ཡང་གནས་བརྟན་དང་། དགེ་འདུན་གྱི་རྐང་པ་ལ་ཕྱག་འཚལ་ཏེ་བསྟི་སྟང་དང་བཅས་པས་འདི་སྐད་ཅེས་གསོལ་ཅིག །དགེ་སློང་མིང་འདི་ཞེས་བགྱི་བ་ཉེས་པ་འདི་ལྟ་བུ་ཞིག་བགྱིས་ཏེ། བདག་གིས་ཆོས་ལྔ་ལ་བརྟེན་ཏེ་གླེང་བར་འཚལ་ལོ་ཞེས་གསོལ་ཅིག །དེ་ནས་དགེ་འདུན་གྱི་ནང་ན་དགེ་སློང་གནས་བརྟན་གྱིས་ཤིན་ཏུ་རྟོགས་ལ་གླེང་བ་བས་ཅི་གླེང་བ་དང་། ཉེས་པ་ཅི་བྱས་པ་དང་། བདེན་ནམ་བརྫུན་ནམ་ལྕིའམ་ཡང་བ་རྟོགས་ལ་འདུལ་བ་དང་། མདོ་སྡེ་ལ་བརྟེན་ཏེ་བསྡིགས་པ་དང་། བཞོ་བའི་ཐབས་སྣ་ཚོགས་ཀྱིས་དྲི་ཞིང་གླེང་བར་བྱའོ། །བདུན་ཤིན་ཏུ་ཞི་བར་བྱ་བའི་ཆོས་ཀྱིས་གང་དང་གང་དུ་འཐུན་པ་དེ་དང་དེའི་ཆོས་ཀྱིས་ཞི་བར་བྱའོ། །གལ་ཏེ་ཉེས་པ་ཆེན་པོ་བྱས་ན་ཡང་ཆད་པ་ཆེན་པོས་གཅད་དོ། །ཉེས་པ་འབྲིང་བྱས་ན་ཡང་ཆད་པ་འབྲིང་གིས་གཅད་དོ། །ཉེས་པ་ཆུང་ངུ་བྱས་ན་ཡང་ཆད་པ་ཆུང་ངུས་གཅད་དེ་ཁྲེལ་བ་དང་། ངོ་ཚ་བས་ཉེས་པ་མཐོལ་དུ་གཞུག་གོ །དེ་ནས་ཨུ་པ་ལིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཉེས་པ་ཡང་དག་པར་བྱུང་བའི་སྡིག་པ་བགྱིས་པའི་དགེ་སློང་དག་གལ་ཏེ་ཁྱིམ་པའི་མཐུ་ལ་སྙེམས་སམ། ནོར་གྱི་མཐུ་སྙེམས་སམ། མང་དུ་ཐོས་པའི་མཐུ་དང་། སྨྲ་བཤགས་ཀྱི་མཐུ་དང་། སློབ་མའི་མཐུ་ལ་སྙེམས་ཏེ། མཐུ་རྣམ་པ་དེ་ལྟ་བུས་མཇིང་བསྡོམས་ཏེ། དེ་དགེ་འདུན་གྱི་ངག་མི་ཉན་ལ་དགེ་སློང་གནས་བརྟན་མདོ་སྡེ་དང་། འདུལ་བ་དང་། མ་མོ་འཛིན་
པས་ཆོས་བཞིན་དུ་བསྟན་ཅིང་བཅོས་ཀྱང་ཉན་དུ་མི་བཏུབ་པའི་དགེ་སློང་དེ་ལ་ཇི་ལྟར་ཆད་པས་གཅད་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གནས་བརྟན་སྡེ་སྣོད་གསུམ་འཛིན་པས་དགེ་འདུན་ལ་དད་པ་དྲིས་ཏེ། རྒྱལ་པོ་དང་། བློན་པོ་ཆེན་པོ་ལ་མཐུ་བཙལ་བའི་ཕོ་ཉ་ཐོང་ལ་གདོད་ཆོས་བཞིན་དུ་ཆད་པས་ཆོད་ཅིག །ཨུ་པ་ལིས་ཡང་གསོལ་པ། བཅོམ་ལྡན་འདས་གལ་ཏེ་སྡིག་པ་བགྱིད་པའི་དགེ་སློང་དེ་ནོར་དབྱིག་གི་མཐུ་དང་། མང་དུ་ཐོས་པའི་མཐུ་དང་། སྨྲ་བཤགས་ཀྱི་མཐུ་དང་། ཐབས་རྣམ་པ་སྣ་ཚོགས་ཀྱིས་རྒྱལ་པོ་དང་། བློན་པོ་ཡང་དགའ་བར་བགྱིས་ཏེ། ཐམས་ཅད་ཆོས་མ་ལགས་པ་བགྱིད་པ། ཚུལ་ཁྲིམས་ཉམས་པའི་དགེ་སློང་གི་གྲོགས་བགྱིད་དེ། ཚུལ་ཁྲིམས་ངན་པ་ཙམ་གྱི་དགེ་སློང་དེ་དག་སྡིག་པ་ཉམ་རངས་སུ་བགྱིད་དུ་སྩལ་ནས། ཆོས་བཞིན་དུ་ཆད་པས་གཅད་དུ་ཡང་མི་སྟེར་ན། དེའི་ཚེ་དེ་ལ་དགེ་འདུན་གྱིས་ཇི་ལྟར་བགྱི། བཅོམ་ལྡན་འདས་ཀྱིས་ཨུ་པ་ལི་ལ་བཀའ་སྩལ་པ། གལ་ཏེ་དགེ་སློང་དེ་མི་གནས་པ་དང་མི་བྱ་བ་ལ་བརྟེན་ཏེ། དགེ་འདུན་གྱི་ནང་དུ་གནས་ནས་སྡིག་པ་ཆེན་པོ་མངོན་སུམ་དུ་མི་སྣང་ན། དེའི་ཚེ་དགེ་འདུན་གྱིས་སྐད་ཅིག་གཞག་གོ །གལ་ཏེ་དགེ་སློང་དེ་མི་གནས་པ་དང་མི་བྱ་བའི་སྡིག་པ་ཆེན་པོ་མངོན་སུམ་དུ་སྣང་བཞིན་དུ་དགེ་འདུན་གྱི་ནང་ན་གནས་ན། དེའི་ཚེ་དགེ་འདུན་དག་དད་པ་དྲིས་ཏེ། ཆོས་བཞིན་དུ་བསྐྲད་དེ་སངས་རྒྱས་ཀྱི་ཆོས་ལས་ཕྱིར་དབྱུང་ངོ་། །ཨུ་པ་ལི་འདི་ལྟ་སྟེ། ནས་ཀྱི་ཞིང་གི་ནང་ན་ནས་ལ་གནོད་པ་སྐྱེས་པ་ཡང་མྱུ་གུ་དང་། སྡོང་བུ་དང་། ཚིགས་ནས་དང་འདྲ་ཡང་། ནས་བཟང་པོ་སྨེ་བར་བྱེད་དེ། ནས་ལ་གནོད་པ་དེ་སྙེ་མ་མ་བྱུང་བ་ན་ནས་ཀྱི་བདག་པོས་སྐད་ཅིག་འཇོག་གོ །སྙེ་མ་བྱུང་མ་ཐག་པ་ན་ནས་ཀྱི་བདག་པོས་ནས་བཟང་པོ་སྨེ་བར་བྱེད་དོ་སྙམ་བསམས་ནས་རྩ་ཐོན་དུ་ཕྱུང་སྟེ་ཞིང་དེའི་ཕྱི་རོལ་དུ་འདོར་རོ། །དེ་བཞིན་དུ་མི་གནས་པ་དང་། མི་བྱ་བའི་དགེ་སློང་ཚུལ་ཁྲིམས་ཉམས་པ་དེ་ཁྱིམ་པ་དང་མཐུ་རྣམ་པ་མང་པོ་སྙེམས་ཏེ། དགེ་འདུན་གྱི་ནང་ན་གནས་པ་སྤྱོད་
ལམ་དང་ཆ་ལུགས་དགེ་འདུན་དང་འདྲ་ཡང་། དགེ་འདུན་རྣམ་པར་དག་པ་སྨེ་བར་བྱེད་དེ། སྲུང་མའི་ལྷས་མ་གླེངས་ཀྱི་བར་དུ་དགེ་འདུན་གྱི་ནང་ན་གནས་ཏེ། སྡིག་པ་ཆེན་པོ་མངོན་སུམ་དུ་མི་སྣང་ན་དེའི་ཚེ་དགེ་འདུན་གྱིས་སྐད་ཅིག་ཞོག་ཤིག །གལ་ཏེ་ལྷ་སྲུང་མས་ཀྱང་བསྐུལ་ལ་དགེ་འདུན་གྱི་ནང་ན་ཉེས་པ་ཆེན་པོ་ཡང་མངོན་སུམ་དུ་སྣང་བར་གྱུར་ན། དེའི་ཚེ་དགེ་འདུན་དད་པ་དྲིས་ཏེ། སངས་རྒྱས་ཀྱི་ཆོས་ལས་ཕྱིར་སྐྲོད་ཅིག །ཨུ་པ་ལི་འདི་ལྟ་སྟེ། རྒྱ་མཚོ་ཆེན་པོར་ནི་རོ་ཞག་ལོན་པར་མི་འཇོག་གོ །དེ་བཞིན་དུ་ངའི་ཉན་ཐོས་ཀྱི་དགེ་འདུན་གྱི་སློབ་མ་ཡང་ཚུལ་ཁྲིམས་ཉམས་པ། སྡིག་པ་སྤྱོད་པའི་དགེ་སློང་རོ་དང་འདྲ་བ་དང་ལྷན་ཅིག་མི་འགྲོགས་སོ། །ཨུ་པ་ལིས་ཡང་གསོལ་པ། བཅོམ་ལྡན་འདས་གལ་ཏེ་ཚུལ་ཁྲིམས་ཉམས་པ་སྡིག་པ་བྱེད་པའི་དགེ་སློང་དེ་དགེ་འདུན་དད་པ་དྲིས་ཏེ་བསྐྲད་ཀྱང་ནོར་རིན་པོ་ཆེའི་མཐུ་དང་། མང་དུ་ཐོས་པའི་མཐུ་དང་། སྨྲ་བཤགས་ཀྱི་མཐུ་དང་། ཐབས་རྣམ་པ་སྣ་ཚོགས་ཀྱིས་རྒྱལ་པོ་དང་། བློན་པོ་ཆེན་པོ་དགའ་བར་བགྱིས་ཏེ། ཐམས་ཅད་ཚུལ་ཁྲིམས་ངན་པ་ཅན་གྱི་གྲོགས་སུ་གྱུར་ན། མཐུ་ཆེན་པོས་ནན་གྱིས་ལྷན་ཅིག་ཏུ་བཞག་ནས། ཚུལ་ཁྲིམས་ཉམས་པའི་དགེ་སློང་དང་དགེ་འདུན་ལྷན་ཅིག་ཏུ་གནས་ན། དེའི་ཚེ་དགེ་འདུན་གྱིས་དེ་ཇི་ལྟར་བགྱི། བཅོམ་ལྡན་འདས་ཀྱིས་བཀའ་སྩལ་པ། དེའི་ཚེ་དགེ་འདུན་གྱི་ནང་ན་འཛེམ་པ་དང་། ངོ་ཚ་བར་ལྡན་པ་དང་། ཚུལ་ཁྲིམས་དང་ལྡན་པའི་དགེ་སློང་དག་ཚུལ་ཁྲིམས་བསྲུང་བའི་ཕྱིར། ཚུལ་ཁྲིམས་ཉམས་པའི་དགེ་སློང་དེ་ལ་ཞེ་སྡང་མི་བསྐྱེད་པ་དང་། རྒྱལ་པོ་དང་། བློན་པོ་ཆེན་པོ་ལ་གནོད་པར་མ་གྱུར་པར་གསོལ་བ་ཐོབ་སྟེ། གནས་དེ་སྤོངས་ལ་གནས་གཞན་དུ་སོང་ཤིག །བམ་པོ་བཞི་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་གང་སངས་རྒྱས་ཀྱི་ཞིང་རྙོག་པ་ལྔ་ཅན་དེ་བཞིན་གཤེགས་པ་མི་བཞུགས་པ་ན། དེའི་ཚེ་དེ་ན་གནས་པའི་སེམས་ཅན་
དག་ཉོན་མོངས་པས་གཟིར་ཏེ། མི་དགེ་བ་སྤྱོད་ཅིང་གླེན་པའི་རང་བཞིན་ཅན་དུ་གྱུར་ནས། ཤིན་ཏུ་གདུལ་དཀའ་བ་རྒྱལ་རིགས་གདོལ་པ་ཅན་དང་། བློན་པོ་གདོལ་པ་ཅན་དང་། ཁྱིམ་བདག་གདོལ་པ་ཅན་དང་། ཚོང་དཔོན་གདོལ་པ་ཅན་དང་། བྲམ་ཟེ་གདོལ་པ་ཅན་དེ་དག་ལ་སོགས་པ་དགེ་བའི་རྩ་བ་ཆུང་བ། དད་པའི་སེམས་མ་མཆིས་པ། གཡོ་དང་སྒྱུས་འཚོ་བ། གླེན་པ་དག་ཤེས་པ་བསྙེམས་ཤིང་། འཇིག་རྟེན་ཕྱི་མའི་སྡུག་བསྔལ་གྱི་འབྲས་བུས་མི་འཇིགས་པ་དང་། དགེ་བའི་བཤེས་གཉེན་སྤོང་བ། མཚམས་མེད་པའི་སེམས་ཅན་དམྱལ་བ་ལ་འཇུག་ཅིང་འབབ་པ་དེ་དག་ཁེ་དང་རྙེད་པའི་ཕྱིར། ཚུལ་ཁྲིམས་ཉམས་པ་སྡིག་པ་བགྱིད་པའི་དགེ་སློང་དང་སྟེན་ཅིང་། ཆོས་མ་ཡིན་པ་ལ་སྤྱོད་པའི་གྲོགས་སུ་གྱུར་ནས། ཐམས་ཅད་གདོན་མི་ཟ་བར་མཚམས་མེད་པའི་སེམས་ཅན་དམྱལ་བ་ལ་འཇུག་ཅིང་འབབ་པའི་གནས་དེ་དག་ཏུ་བདག་མཆིས་ཏེ། སངས་རྒྱས་བཅོམ་ལྡན་འདས་ཀྱི་ཆོས་ཀྱིས་སེམས་ཅན་དེ་དག་ལ་ཕན་པ་དང་། བདེ་བ་དང་། དབུགས་དབྱུང་བའི་སླད་དུ་བླ་ན་མེད་པའི་བདུད་རྩི་ལྟ་བུའི་དམ་པའི་ཆོས་ཐབས་ཀྱིས་བསྟན་ཅིང་དྲངས་ཏེ། དེ་ལ་སྤྱོད་དུ་གཞུག་པ་དང་། རྒྱལ་རིགས་གདོལ་པ་ཅན་ནས་བྲམ་ཟེ་གདོལ་པ་ཅན་གྱི་བར་དུ་མཚམས་མེད་པའི་སེམས་ཅན་དམྱལ་བར་ལྟུང་བ་ལས་རྣམ་པར་བཟློག་པར་བགྱིའོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ཕྱི་མ་མ་འོངས་པའི་དུས་ན། སངས་རྒྱས་ཀྱི་ཞིང་འདིར་སེམས་ཅན་དག་ཉོན་མོངས་པས་ཡོངས་སུ་གདུངས་ནས་སྡིག་པ་སྤྱོད་ཅིང་། བྱིས་པ་གཏི་མུག་ཅན་གདུལ་དཀའ་བར་གྱུར་པ་གང་རྒྱལ་རིགས་གདོལ་པ་ཅན་དང་། བློན་པོ་གདོལ་པ་ཅན་དང་། ཁྱིམ་བདག་གདོལ་པ་ཅན་དང་། ཚོང་དཔོན་གདོལ་པ་ཅན་དང་། དགེ་སྦྱོང་གདོལ་པ་ཅན་དང་། བྲམ་ཟེ་གདོལ་པ་ཅན་ལ་སོགས་པ་དགེ་བའི་རྩ་བ་ཆུང་བ། དད་པའི་སེམས་མེད་པ། གཡོ་དང་
སྒྱུས་འཚོ་བ། གཏི་མུག་ཅན། ཤེས་པ་སྙེམས་པ་ཅན། དགེ་བའི་བཤེས་གཉེན་སྤོང་བ། སྨྲས་པའི་ཚིག་བདེན་པ་མེད་པ། དགེ་བའི་བཤེས་གཉེན་གྱིས་བསྟན་པ་ལ་མི་འཇུག་པ་དང་བརྙས་ཤིང་དབང་ཟ་བ། ཚིག་ངན་པས་རྣམ་པར་འཐིང་བ། དམ་པའི་ཆོས་ལ་ཐེ་ཙོམ་ཟ་ཞིང་ལོག་པར་ལྟ་བ། འཇིག་རྟེན་ཕྱི་མའི་སྡུག་བསྔལ་གྱི་འབྲས་བུ་ལ་མི་འཇིགས་པ། རྟག་ཏུ་ངང་ཚུལ་ངན་པ་ཅན་དག་ལ་སྟེན་པར་དགའ་བ། སྲོག་གཅོད་པ་ནས་ལོག་པར་ལྟ་བའི་བར་དུ་སྤྱོད་པ་ལ་དགའ་ཞིང་། གཡོ་དང་སྒྱུས་འཇིག་རྟེན་སླུ་བ་དང་། བདག་དང་གཞན་ལ་གནོད་པ་བྱེད་པའི་རྒྱལ་རིགས་གདོལ་པ་ཅན་ནས། བྲམ་ཟེ་གདོལ་པ་ཅན་གྱི་བར་དུ་ངའི་ཆོས་འཇིག་པར་བྱེད་པ། ངའི་བསྟན་པ་ལ་རབ་ཏུ་བྱུང་ན་ཡང་ཚུལ་ཁྲིམས་ཉམས་ཤིང་། འཇིག་རྟེན་གྱི་འདུ་འཛིའི་ལས་བྱེད་པར་སྤྲོ་བ་ལ་རྒྱལ་རིགས་དང་། བྲམ་ཟེ་ལ་སོགས་པས་བསྟི་སྟང་དང་བཅས་པས་མཆོད་པ་དང་། ཁེ་ལ་བརྐམ་པས་ནོར་ཚོལ་བའི་ཕྱིར་ཚིག་ཙམ་དུ་སྨྲ་ཞིང་སྤྱོད་པ་དང་མི་ལྡན་པ་ཕན་ཚུན་དུ་ཕྲིན་ཅིང་ཡི་གེ་སྐྱེལ་བ་ལ་དགའ་བ་དང་། ཚོང་དང་ཁེ་སྤོགས་བྱེད་ཅིང་འཇིག་རྟེན་རྒྱང་ཕན་པའི་གཙུག་ལག་སློབ་པ་དང་། ཞིང་རྨོ་བའི་ལས་ལ་དགའ་བ་དང་། ནོར་རིན་པོ་ཆེ་སོགས་ཤིང་སྦེད་པ་དང་། ཁང་ཁྱིམ་དང་། ཆུང་མ་དང་། བུ་སྨད་སྲུང་བ་དང་། འཇིག་རྟེན་གྱི་སྔགས་དང་། ཕྱག་རྒྱས་འབྱུང་པོ་འཁོལ་བ་དང་། ལྟས་བཟང་ངན་བལྟ་བ་དང་། སྨན་སྦྱར་ཅིང་ནད་གསོས་པའི་ནོར་གྱིས་འཚོ་བ་དང་། བཟའ་བ་དང་། བཏུང་བ་དང་། བགོ་བ་དང་། རིན་པོ་ཆེའི་རྒྱན་ལ་ཆགས་ཤིང་ཁྱིམ་པའི་ལས་བྱེད་པ་ལ་དགའ་བ་དང་། ཚུལ་ཁྲིམས་འདྲལ་ཞིང་སྡིག་པ་སྤྱོད་པ་དང་། དུང་གི་སྒྲ་ལ་ཁྱིའི་སྤྱོད་པ་དང་ལྡན་པ། དགེ་སྦྱོང་མ་ཡིན་པར་དགེ་སྦྱོང་དུ་ཁས་འཆེ་བ་དང་། ཚངས་པར་སྤྱོད་པ་མ་ཡིན་པར་ཚངས་པར་སྤྱོད་པར་ཁས་འཆེ་བ་ཡོད་དེ། རྒྱལ་རིགས་གདོལ་པ་ཅན་ནས་བྲམ་ཟེ་གདོལ་པ་ཅན་གྱི་བར་དུ་དེ་དག་ལ་བསྙེན་བཀུར་བྱེད་ཅིང་བསྟི་སྟང་དང་བཅས་པས་མཆོད་པ་བྱེད་དེ། དེ་དག་གི་ངག་ཀྱང་ཉན་ཏོ། །ཚུལ་ཁྲིམས་
ཉམས་པ་དེ་དག་ཀྱང་རྒྱལ་རིགས་གདོལ་པ་ཅན་ནས་བྲམ་ཟེ་གདོལ་པ་ཅན་གྱི་བར་དུ་དེ་དག་ལ་སྟེན་པར་དགའ་ཞིང་བཀུར་སྟི་དང་རིམ་གྲོ་བྱེད་དེ་དེའི་ངག་ཉན་ཏོ། །གལ་ཏེ་གང་ཟག་འགའ་ཞིག་ངའི་བསྟན་པ་ལ་རབ་ཏུ་བྱུང་ནས་ཚུལ་ཁྲིམས་དང་ཡོན་ཏན་དུ་ལྡན་པ། སློབ་པ་དང་མི་སློབ་པ་ལ་ནན་ཏན་བྱེད་པ་ནས་འབྲས་བུའི་མཐར་ཕྱིན་གྱི་བར་དུ་གྱུར་པ་ལ། རྒྱལ་རིགས་གདོལ་པ་ཅན་ནས་བྲམ་ཟེ་གདོལ་པ་ཅན་གྱི་བར་དུ་དེ་དག་གིས་དེ་ལ་ཕྲག་དོག་བྱེད་དེ། བསྙེན་བཀུར་དང་། བསྟི་སྟང་དང་། རིམ་གྲོ་དང་། མཆོད་པ་མི་བྱེད་ཅིང་སླར་ངག་ཉན་པར་ཡང་མི་བྱེད་དོ། །རིགས་ཀྱི་བུ་འདི་ལྟ་སྟེ། མི་ལ་ལ་ཞིག་རིན་པོ་ཆེའི་གླིང་དུ་ཕྱིན་པ་ལས་རིན་པོ་ཆེ་ཨིན་དྲ་ནཱི་ལ་དང་། མ་ཧཱ་ནཱི་ལ་དང་། གསེར་དང་། དངུལ་དང་། མུ་ཏིག་དང་། པད་མ་རཱ་ག་དང་། བཻ་དཱུཪྱ་དང་། རིན་ཐང་མེད་པའི་རིན་པོ་ཆེ་རྣམ་པ་སྣ་ཚོགས་བོར་ནས་ནོར་བུ་མཆིང་བུ་ལེན་པ་ལྟར་དེ་བཞིན་དུ་མ་འོངས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་རིགས་གདོལ་པ་ཅན་ནས་བྲམ་ཟེ་གདོལ་པ་ཅན་གྱི་བར་དུ་ཡང་དེ་དང་འདྲ་སྟེ། ངས་བསྟན་པའི་དམ་པའི་ཆོས་ཀྱི་རིན་པོ་ཆེའི་གླིང་དུ་ཕྱིན་ནས་ཚུལ་ཁྲིམས་དང་ཡོན་ཏན་དུ་ལྡན་པ། དོན་དམ་པ་ལ་དགའ་བ། འཛེམ་པ་དང་ངོ་ཚ་བར་ལྡན་པ། སློབ་པ་དང་མི་སློབ་པའི་གང་ཟག་དང་། ཕ་རོལ་ཏུ་ཕྱིན་པ་དྲུག་ལ་ནན་ཏན་བྱེད་པ་ལ་བརྩོན་པའི་སོ་སོའི་སྐྱེ་བོ་དགེ་བའི་ཡོན་ཏན་དང་ལྡན་པ། འཕགས་པའི་འཁོར་སྤངས་ནས་ཚུལ་ཁྲིམས་ཉམས་པ། སྡིག་པ་མང་པོ་སྤྱོད་པ། ངོ་ཚ་བ་མེད་པ་དང་འཛེམ་པ་མེད་པ། ཚིག་བརླང་ཞིང་རྩུབ་པ། ལུས་དང་སེམས་ང་རྒྱལ་གྱིས་དྲེགས་པ། རྣམ་པར་དཀར་བའི་ཆོས་དང་བྲལ་བ། བྱམས་པའི་སེམས་མེད་པ། སྙིང་རྗེ་མེད་པ། སྡིག་པའི་དགེ་སློང་དག་ལ་བསོད་ནམས་ཀྱི་ཞིང་དུ་འཛིན་ཅིང་བཀུར་སྟི་དང་རིམ་གྲོ་དང་། མཆོད་པ་བྱེད་དེ་དེའི་ངག་ཉན་ཏོ། །དེ་ལྟར་སྡིག་པ་ཅན་དེ་དག་ནི་སློབ་དཔོན་དང་སློབ་མར་བཅས་ཏེ་གདོན་མི་ཟ་བར་མཚམས་མེད་པའི་སེམས་ཅན་དམྱལ་བར་ལྟུང་བར་འགྱུར་རོ། །རིགས་ཀྱི་བུ་སྡིག་པའི་འཁོར་ལོ་རྣམ་པ་བཅུ་ཡོད་དེ། མ་འོངས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་རིགས་
གདོལ་པ་ཅན་དང་། རྗེའུ་རིགས་གདོལ་པ་ཅན་དང་། ཁྱིམ་བདག་གདོལ་པ་ཅན་དང་། ཚོང་དཔོན་གདོལ་པ་ཅན་དང་། དགེ་སྦྱོང་གདོལ་པ་ཅན་དང་། བྲམ་ཟེ་གདོལ་པ་ཅན་དག་སྡིག་པའི་འཁོར་ལོ་རྣམ་པ་བཅུ་པོ་ལས་འགའ་ཞིག་དང་ལྡན་ནམ། གལ་ཏེ་ཀུན་དང་ལྡན་ན་སྔོན་བསགས་པའི་དགེ་བའི་རྩ་བ་ཐམས་ཅད་ཀྱང་ཚིག་སྟེ་ཐལ་བ་བཞིན་དུ་འགྱུར་ལ་རིང་པོ་མི་ཐོགས་པར་ལུས་ཀྱི་ཡན་ལག་ཀྱང་དུམ་བུར་བཅད་པ་དང་། ཉིན་མཚན་དུ་མར་ལྕེ་ལྡིབ་ཅིང་སྨྲ་མི་ནུས་པ་དང་། མི་ཟད་པའི་སྡུག་བསྔལ་ཆེན་པོ་མྱོང་བ་དང་། ཚེ་འཕོས་ནས་ཀྱང་གདོན་མི་ཟ་བར་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་བར་འགྱུར་རོ། །བཅུ་གང་ཞེ་ན། འདི་ལྟ་སྟེ། དེ་ལྟར་ཚུལ་ཁྲིམས་ཉམས་པ་སྡིག་པ་སྤྱོད་པའི་དགེ་སློང་དག་གི་ངན་པར་ལྟ་བ་ནི་རྒྱལ་རིགས་དང་། བློན་པོ་ལ་སོགས་པས་བཟོད་ལ། སླར་དེ་བས་མཐར་གནས་པའི་དགེ་སློང་ཡོངས་སུ་དག་པ་མཐོང་ན་དེ་ལ་འདི་སྐད་ཟེར་རོ། །ཀྱེ་སྐྱེས་བུ་དག་འདི་ལྟར་དགེ་སློང་འདི་དག་ནི་གླེན་པ་གཏི་མུག་ཅན། ཚུལ་འཆོས་ཤིང་འཇིག་རྟེན་སླུ་བ་ཡིན་ཏེ། ཁ་ཟས་དང་། བཏུང་བ་དང་། བགོ་བ་དང་། ཁེ་དང་། རྙེད་པ་དང་། གྲགས་པ་འདོད་པའི་ཕྱིར་བདག་ནི་སྟོད། གཞན་ལ་ནི་སྨོད་ཅིང་ཕྲག་དོག་གིས་དཀྲུགས་མ་བྱེད་དོ། །ཁེ་དང་གྲགས་པ་ལ་སྐྱོ་ཞིང་ཆོག་མི་ཤེས་པ་ཡིན་པས་བསྐྲད་པར་འོས་པ་དེ་དག་གི་ཚིག་ཀྱང་མཉན་པར་མི་བྱའོ། །དགེ་སློང་དེ་དག་ནི་བརྫུན་འབའ་ཞིག་སྨྲ་ཞིང་བདེན་པའི་ཆོས་དང་བྲལ་བས་འབྲས་བུ་ཐོབ་པ་ཡང་མེད། འདོད་པ་དང་བྲལ་ཞིང་ཟག་པ་ཡོངས་སུ་ཟད་པ་ཡང་མ་ཡིན་ལ། ཁེ་དང་གྲགས་པ་དང་། མཆོད་པ་ཙམ་འདོད་པའི་ཕྱིར་བས་མཐར་གནས་ཤིང་ཡོན་ཏན་ཅན་དུ་སྟོན་པ་དག་ལ་མཆོད་པ་དང་། བསྙེན་བཀུར་དང་བསྟི་སྟང་མ་བྱེད་ཅིག །དེ་ནི་གཡོ་དང་སྒྱུས་འཚོ་བ་ཡིན་གྱི། བསོད་ནམས་ཀྱི་ཞིང་ཡང་དག་པའམ། ལམ་ལ་ནན་ཏན་བྱེད་པ་ནི་མ་ཡིན་ནོ་ཞེས་སྐུར་ཏོ། །དེ་ནས་རྒྱལ་རིགས་གདོལ་པ་ཅན་ནས་བྲམ་ཟེ་གདོལ་པ་ཅན་གྱི་བར་དུ་ཐམས་ཅད་ཀྱི་བས་མཐར་གནས་པའི་དགེ་སློང་ཡོངས་སུ་དག་པ་ལ་དད་པའི་སེམས་མི་སྐྱེ། དཀོན་པའི་འདུ་ཤེས་མི་འབྱུང་སྟེ། བསྟི་
སྟང་བྱ་བའི་སེམས་མེད་དོ། །དེ་ལ་མཆོད་པ་དང་། བསྙེན་བཀུར་བྱེད་པ་ལ་མི་མོས་ཤིང་། ཇི་སྐད་དུ་བསྟན་ཀྱང་དེའི་ཚིག་མི་ཉན་ཏེ་དེ་ལ་བརྙས་ཤིང་སྨོད་དོ། །དེ་ལྟར་བས་མཐར་གནས་པའི་དགེ་སློང་ཡོངས་སུ་དག་པ་ལ་བརྙས་སྨོད་པ་ཉིད་ཆོས་ཀྱི་མིག་དང་དཀོན་མཆོག་གསུམ་གྱི་གདུང་ལ་བརྙས་ཤིང་སྨོད་པ་ཡིན་པས་དེའི་ཚེ་ཡུལ་དེ་ན་གནས་པའི་ལྷ་དང་། ཀླུ་དང་། གནོད་སྦྱིན་དང་། ལྷ་ལ་སོགས་པ་དཀོན་མཆོག་གསུམ་ལ་བསམ་པ་དག་པ་དད་པ་མི་ཕྱེད་པ་དག་རྒྱལ་རིགས་གདོལ་པ་ཅན་ནས་བྲམ་ཟེ་གདོལ་པ་ཅན་གྱི་བར་དུ་གདོལ་པ་ཅན་དེ་དག་ཐམས་ཅད་ཁྲོས་ཏེ་ཞེ་སྡང་གི་སེམས་སྐྱེས་ནས་གཅིག་ལ་གཅིག་འདི་སྐད་ཟེར་རོ། །ཀྱེ་སྐྱེས་བུ་དག་ལྟོས་རྒྱལ་རིགས་གདོལ་པ་ཅན་དང་། རྗེའུ་རིགས་དང་། ཁྱིམ་བདག་དང་། ཚོང་དཔོན་དང་། དགེ་སྦྱོང་དང་། བྲམ་ཟེ་གདོལ་པ་ཅན་འདི་དག་ཆོས་ཀྱི་མིག་དཀོན་མཆོག་གསུམ་གྱི་གདུང་འཚོབ་པ་ཐམས་ཅད་ལ་ནི་བརྙས་ཤིང་དབང་བཟས་པས་དགེ་བའི་རྩ་བ་ཡང་མེད་པར་བྱས་ཏེ་མི་དགེ་བའི་བཤེས་གཉེན་གྱི་དབང་དུ་གྱུར་པས་སྡིག་པའི་ལས་ཀྱིས་ངན་སོང་དུ་ལྟུང་བར་འགྱུར་གྱིས་བདག་ཅག་དེང་ཕྱིན་ཆད་དེ་དག་གི་སྐྱབས་མི་བྱའོ། །རྒྱལ་རིགས་གདོལ་པ་ཅན་ལ་སོགས་པ་དེ་དག་གི་གནས་དང་། ཡུལ་དང་། གྲོང་ཁྱེར་དང་། སྲིད་ཀྱང་མི་བསྲུང་ངོ་ཞེས་ཟེར་ཏེ། ལྷ་དང་། ཀླུ་དང་། གནོད་སྦྱིན་དང་། ལྷ་ལ་སོགས་པ་ཐམས་ཅད་དེ་དག་ལ་མི་སྐྱོབ་མི་འགོ་སྟེ་ཡལ་བར་གཏོང་ངོ་། །དེ་བས་ན་རྒྱལ་རིགས་གདོལ་པ་ཅན་ལ་སོགས་པའི་ཡུལ་དང་། གྲོང་ཁྱེར་ན་གནས་པའི་ཡང་དག་པའི་ཆོས་ཀྱི་སྣོད་དུ་འགྱུར་བ་དང་། ཡང་དག་པར་བསོད་ནམས་ཀྱི་ཞིང་དུ་འགྱུར་བ་ཐམས་ཅད་ཡུལ་དེ་ནས་བྱུང་སྟེ་འགྲོའོ། །ཇི་སྟེ་འདུག་པ་ཞིག་ཡོད་ན་ཡང་མི་འདོད་ཅིང་གཏོང་བའི་བསམ་པ་སྐྱེས་པས་བསྐྱབ་ཅིང་བསྲུང་བའི་སེམས་མེད་དོ། །དེ་ལྟར་ལྷ་དང་། ཀླུ་དང་། གནོད་སྦྱིན་དང་། ལྷ་ལ་སོགས་པ་དང་། ཡང་དག་པའི་ཆོས་ཀྱི་སྣོད་དུ་གྱུར་པ་དང་། བསོད་ནམས་ཀྱི་ཞིང་དུ་འགྱུར་བ་ཐམས་ཅད་ཀྱིས་རྒྱལ་རིགས་གདོལ་པ་ཅན་དང་། དེའི་སྲིད་དང་། ཡུལ་དང་། གྲོང་ཁྱེར་ལ་བསྲུང་ཞིང་བསྐྱབ་པའི་སེམས་མེད་དེ། བསྲུང་ཞིང་བསྐྱབ་པའི་སེམས་མེད་པས་དེའི་ཚེ་ན་ཡུལ་
དེའི་སྲིད་ལ་ནང་གི་དགྲ་དང་། ཕྱིའི་དགྲ་གཉི་ག་ལྡང་སྟེ། སྲིད་འཕྲོག་པའི་ཕྱིར་གཅིག་ལ་གཅིག་འཚེ་ཞིང་གསོད་པ་དང་། ནད་དང་མུ་གེ་ལ་སོགས་པ་ཡང་དེའི་དབང་གིས་འབྱུང་ངོ་། །དེ་ནས་རྒྱལ་རིགས་གདོལ་པ་ཅན་ནས་དགེ་སྦྱོང་དང་། བྲམ་ཟེ་གདོལ་པ་ཅན་གྱི་བར་དུ་གདོལ་པ་ཅན་དེ་དག་ཐམས་ཅད་དང་། ཡུལ་དེ་ན་གནས་པ་ཐམས་ཅད་ཀྱང་དགའ་ཞིང་སྤྲོ་བའི་སེམས་མེད་དེ། སྔོན་གྱི་ཡིད་དུ་འོང་བ་དང་། སྡུག་པ་ཐམས་ཅད་དང་ཡང་བྲལ་ནས་གཉེན་བཤེས་དང་། མཛའ་བོ་དང་། གྲོགས་ཀྱང་གཅིག་གིས་གཅིག་ཡིད་བྱུང་ཞིང་ཕྲད་མི་འདོད་པ་དང་། བྱམས་པ་དང་། སྙིང་རྗེ་མེད་དེ། ཕྲག་དོག་དང་སེར་སྣ་བྱེད་ཅིང་སྡིག་པ་མང་པོ་ཡང་བྱེད་པར་འགྱུར་རོ། །འདི་ལྟ་སྟེ། སྲོག་གཅོད་པ་ནས་ངན་པར་ལྟ་བའི་བར་དུ་ཀུན་སྤྱོད་ཅིང་ངོ་ཚ་བ་དང་། འཛེམ་པ་མེད་པར་མཆོད་རྟེན་གྱི་ནོར་དང་། དགེ་འདུན་གྱི་ནོར་ལ་སྤྱོད་ཅིང་ཟ་བ་ལ་འགྱོད་པའི་སེམས་མེད་དོ། །རྒྱལ་རིགས་གདོལ་པ་ཅན་དེ་མཛངས་ཤིང་དྲང་པོ་ལ་ནི་སྡང་ལ། གཅམ་སྒྱུ་ཅན་ལ་ནི་དགའ་བས་བློན་པོ་དང་། དམངས་གཅིག་ལ་གཅིག་གནོད་པ་བྱེད་ཅིང་འཁོན་དང་ཤར་གཉེར་ནས་འཐབ་ཅིང་རྩོད་པ་དང་ཕ་རོལ་པོའི་དགྲ་དང་གཡུལ་སྤྲོད་པ་ནའང་འོག་མ་སེམས་མི་འཐུན་པའི་ཕྱིར་གཡུལ་ཡང་ཉེས་པར་འགྱུར་རོ། །རྒྱལ་རིགས་གདོལ་པ་ཅན་དང་། བློན་པོ་དང་། ཁྱིམ་བདག་དང་། ཚོང་དཔོན་དང་། དགེ་སྦྱོང་དང་། བྲམ་ཟེ་ལ་སོགས་པ་གདོལ་པ་ཅན་དེ་དག་ཐམས་ཅད་རིང་པོ་མི་ཐོགས་པར་ལུས་ཀྱི་ཡན་ལག་ཉམས་ཤིང་ཉིན་མཚན་དུ་མར་ལྕེ་ལྐུགས་པར་འགྱུར་བ་དང་། ཤིན་ཏུ་མི་བཟད་པའི་ན་བ་དང་ཚ་བའི་སྡུག་བསྔལ་ཆེན་པོ་མྱོང་བ་དང་། འཆི་འཕོས་ནས་ཀྱང་གདོན་མི་ཟ་བར་མཚམས་མེད་པའི་སེམས་ཅན་དམྱལ་བར་ལྟུང་ངོ་། །རིགས་ཀྱི་བུ་གཞན་ཡང་རྒྱལ་རིགས་གདོལ་པ་ཅན་དང་། བློན་པོ་དང་། ཁྱིམ་བདག་དང་། ཚོང་དཔོན་དང་། དགེ་སྦྱོང་དང་། བྲམ་ཟེ་ལ་སོགས་པའི་གདོལ་པ་ཅན་སྡིག་པའི་བཤེས་གཉེན་གྱི་རྗེས་སུ་སྤྱོད་པ་དག་དགེ་བའི་རྩ་བ་ཆུང་བ། གཡོ་དང་སྒྱུས་འཚོ་བ། གླེན་པ་གཏི་མུག་ཅན་ཤེས་པ་བསྙེམས་པ། དཀོན་མཆོག་གསུམ་ལ་བསམ་པ་དག་པའི་སེམས་མེད་པ། འཇིག་རྟེན་ཕྱི་མའི་སྡུག་བསྔལ་
གྱི་འབྲས་བུ་ལ་འཇིགས་པར་མི་ལྟ་བ་དག་དེ་ལ་ཁ་ཅིག་ནི་ཉན་ཐོས་ཀྱི་ཐེག་པ་ལ་ཅུང་ཟད་དད་ཀྱང་ཡང་དག་པར་གླེན་པའི་རང་བཞིན་ཅན་དུ་གྱུར་པས་འདི་སྙམ་དུ་བདག་ལས་ཤེས་ཤིང་མཁས་པ་མེད་དོ་སྙམ་ནས། ངས་བསྟན་པའི་རང་སངས་རྒྱས་ཀྱི་ཐེག་པའི་ཆོས་དང་། ཐེག་པ་ཆེན་པོའི་ཆོས་ལ་བརྙས་སྨོད་དེ་འཕྱ་ཞིང་སྐུར་ནས་སེམས་ཅན་གཞན་དག་ཀྱང་ཚིགས་སུ་བཅད་པ་གཅིག་ཙམ་གྱི་བར་དུ་འཆང་ཞིང་འཛིན་པ་དང་། ཀློག་ཅིང་འདོན་དུ་ཡང་མི་སྟེར་ཏོ། །དེ་ལ་ཁ་ཅིག་ནི་རང་སངས་རྒྱས་ཀྱི་ཐེག་པ་ལ་དད་པ་ཅུང་ཟད་ཐོབ་ཀྱང་། ཡང་དག་པར་གླེན་པའི་རང་བཞིན་ཅན་དུ་གྱུར་པས་འདི་སྙམ་དུ་བདག་ལས་མཁས་ཤིང་ཤེས་པ་མེད་དོ་སྙམ་ནས། ངས་བསྟན་པའི་ཉན་ཐོས་ཀྱི་ཐེག་པའི་ཆོས་དང་། ཐེག་པ་ཆེན་པོའི་ཆོས་ལ་བརྙས་ཤིང་སྨོད་དེ་འཕྱ་ཞིང་སྐུར་ནས། སེམས་ཅན་གཞན་དག་ཚིགས་སུ་བཅད་པ་གཅིག་ཙམ་གྱི་བར་དུ་འཆང་ངམ། འཛིན་ཏམ་ཀློག་གམ། འདོན་དུ་ཡང་མི་སྟེར་ཏོ། །དེ་ལ་ཁ་ཅིག་ནི་ཐེག་པ་ཆེན་པོའི་ཆོས་ལ་དད་པ་ཅུང་ཟད་ཙམ་ཐོབ་ཀྱང་ཡང་དག་པར་གླེན་པའི་རང་བཞིན་ཅན་དུ་གྱུར་པས་འདི་སྙམ་དུ་བདག་ལས་ཤེས་ཤིང་མཁས་པ་མེད་དོ་སྙམ་ནས་ངས་བསྟན་པའི་ཉན་ཐོས་ཀྱི་ཐེག་པའི་ཆོས་དང་། རང་སངས་རྒྱས་ཀྱི་ཐེག་པའི་ཆོས་ལ་བརྙས་སྨོད་དེ་འཕྱ་ཞིང་སྐུར་ནས། སེམས་ཅན་གཞན་དག་ཚིགས་སུ་བཅད་པ་གཅིག་ཙམ་གྱི་བར་དུ་ཡང་འཆང་ཞིང་འཛིན་ཏམ། ཀློག་ཅིང་འདོན་དུ་ཡང་མི་སྟེར་ཏོ། །གང་ཟག་དེ་དག་ནི་སངས་རྒྱས་ཀྱི་དམ་པའི་ཆོས་ལ་བརྙས་སྐུར་བ་དང་། དུས་གསུམ་གྱི་སངས་རྒྱས་བཅོམ་ལྡན་འདས་ལ་དབང་ཟ་བ་དང་། །དུས་གསུམ་གྱི་སངས་རྒྱས་ཀྱི་ཆོས་ཀྱི་སྡེ་སྣོད་ཐམས་ཅད་བཤིག་ནས་བསྲེགས་ཏེ་ཐལ་བ་བཞིན་དུ་འཇིག་པར་བྱེད་པ། འཕགས་པའི་ལམ་གྱི་ཡན་ལག་བརྒྱད་པ་ཐམས་ཅད་གཅོད་པ། ཚད་མེད་པའི་སེམས་ཅན་གྱི་མིག་འཛར་བ་ཞེས་བྱའོ། །རྒྱལ་རིགས་གདོལ་པ་ཅན་ནས་དགེ་སྦྱོང་དང་། བྲམ་ཟེ་གདོལ་པ་ཅན་གྱི་བར་དུ་དེ་དག་གིས་སངས་རྒྱས་ཀྱིས་བསྟན་པའི་ཉན་ཐོས་ཀྱི་ཐེག་པའི་ཆོས་དང་། རང་སངས་རྒྱས་ཀྱི་ཐེག་པའི་ཆོས་དང་། ཐེག་པ་ཆེན་པོའི་ཆོས་བཅབས་ཏེ་བར་ཆད་བྱས་ནས་ཚིགས་སུ་བཅད་པ་གཅིག་ཙམ་གྱི་བར་དུ་
མེད་པར་བྱས་ན། གང་ཟག་དེ་ནི་ཆོས་ཀྱི་མིག་དང་དཀོན་མཆོག་གསུམ་གྱི་གདུང་འཚོབ་པ་ཐམས་ཅད་ལ་མ་གུས་པ་སྟེ། དེའི་རྒྱུ་དང་དེའི་རྐྱེན་གྱིས་ཡུལ་དེ་སྲུང་བའི་ལྷ་དང་། ཀླུ་དང་། གནོད་སྦྱིན་དང་། ལྷ་ལ་སོགས་པ་དཀོན་མཆོག་གསུམ་ལ་བསམ་པ་དག་ཅིང་དད་པ་མི་ཕྱེད་པ་དག་རྒྱལ་རིགས་གདོལ་པ་ཅན་ནས་བྲམ་ཟེ་གདོལ་པ་ཅན་གྱི་བར་དུ་གདོལ་པ་ཅན་དེ་དག་ཐམས་ཅད་ལ་ཁྲོ་ཞིང་ཞེ་སྡང་བའི་སེམས་སྐྱེ་བ་ནས་གཞུང་དེ་བཞིན་དུ་རྒྱས་པར་རྒྱལ་རིགས་གདོལ་པ་ཅན་དང་། བློན་པོ་དང་། ཁྱིམ་བདག་དང་། ཚོང་དཔོན་དང་། དགེ་སྦྱོང་དང་། བྲམ་ཟེ་ལ་སོགས་པ་གདོལ་པ་ཅན་ཐམས་ཅད་རིང་པོ་མི་ཐོགས་པར་ལུས་ཀྱི་ཡན་ལག་ཉམས་ཤིང་ཉིན་མཚན་དུ་མར་ལྕེ་ལྐུགས་པར་འགྱུར་བ་དང་། ཤིན་ཏུ་མི་བཟད་པའི་ན་བ་དང་། ཚ་བའི་སྡུག་བསྔལ་ཆེན་པོ་མྱོང་བ་དང་། འཆི་འཕོས་ནས་ཀྱང་གདོན་མི་ཟ་བར་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་ངོ་། །རིགས་ཀྱི་བུ་གཞན་ཡང་རྒྱལ་རིགས་གདོལ་པ་ཅན་དང་། བློན་པོ་དང་། ཁྱིམ་བདག་དང་། ཚོང་དཔོན་དང་། དགེ་སྦྱོང་དང་། བྲམ་ཟེ་ལ་སོགས་པའི་གདོལ་པ་ཅན་རྣམས་ཚུལ་ཁྲིམས་ཉམས་པ་སྡིག་པ་སྤྱོད་པའི་དགེ་སློང་གི་རྗེས་སུ་ཞུགས་པ་ནས། གཞུང་དེ་དེ་བཞིན་དུ་རྒྱས་པར་ཡུལ་དེ་ན་ཆོས་ཀྱི་སྣོད་དུ་གྱུར་པ་ཡང་དག་པའི་བསོད་ནམས་ཀྱི་ཞིང་དུ་གྱུར་པ་ཐམས་ཅད་རྒྱལ་རིགས་གདོལ་པ་ཅན་ལ་སོགས་པ་ལ་སྤོང་བའི་སེམས་སྐྱེད་དེ་བསྐྱབ་པའམ་སྲུང་བ་མི་བྱེད་དོ། །བརྒྱ་ལ་ཡུལ་དེ་ན་གནས་སུ་ཟིན་ཀྱང་ཆོས་ལ་རྟེན་གྱི་ཁྱིམ་པ་ལ་དགའ་ཞིང་གནས་པར་མི་བྱེད་པ་དང་། སྦྱིན་བདག་གི་ཁྱིམ་དུ་ཡང་དང་ཡང་དུ་འགྲོ་བར་མི་བྱེད་པ་དང་། གལ་ཏེ་སྐད་ཅིག་ཙམ་ཕྱིན་ན་ཡང་ཚིག་སྲུང་ཞིང་མི་སྨྲ་བ་དང་། ཇི་སྟེ་སྨྲ་ན་ཡང་བརྫུན་གྱི་བག་མེད་དེ། ཁྱིམ་པའི་མདུན་དུ་ཚུལ་ཁྲིམས་ཉམས་པ་དག་ལ་འཕྱ་བ་འམ་བརྙས་པར་མི་བྱེད་པ་དང་། ཚུལ་ཁྲིམས་ཉམས་པ་སྡིག་པ་སྤྱོད་པའི་དགེ་སློང་དེ་དག་གི་ཉེས་པ་མི་རྗོད་ཅིང་མི་གླེང་བ་དང་། རྟག་ཏུ་བསོད་ནམས་ཀྱི་ཞིང་ལ་སྟེན་གྱི་ཚུལ་ཁྲིམས་ཉམས་པ་ཡོངས་སུ་སྤོང་ངོ་། །ཚུལ་ཁྲིམས་ཉམས་པ་སྡིག་པ་སྤྱོད་པའི་དགེ་སློང་དེ་དག་ནི་ཕྱིར་ཚུལ་ཁྲིམས་སྲུང་བ་དགེ་བའི་ཡོན་ཏན་དང་ལྡན་པ་དག་ལ་ཁྲོ་བ་དང་།
ཞེ་སྡང་གི་སེམས་བསྐྱེད་དེ་བརྙས་སྨོད་པ་དང་། རྒྱལ་རིགས་གདོལ་པ་ཅན་དང་། དགེ་སྦྱོང་དང་། བྲམ་ཟེ་གདོལ་པ་ཅན་དག་གི་བར་དུ་ཁྱིམ་པའི་བུས་པ་དང་། བུད་མེད་ཀྱི་མདུན་དུ་གཅམ་པ་དང་། སྒྱུ་སྣ་ཚོགས་ཀྱིས་བརྫུན་ཟེར་ཞིང་ཚུལ་ཁྲིམས་སྲུང་བ་དེ་དག་ལ་འཕྱ་ཞིང་སྐུར་པ་དང་། ཚིག་ངན་པ་རྣམ་པ་སྣ་ཚོགས་འདོགས་ཏེ། རྒྱལ་རིགས་གདོལ་པ་ཅན་ནས་བྲམ་ཟེ་གདོལ་པ་ཅན་གྱི་བར་དུ་དེ་དག་ཐམས་ཅད་ངའི་སློབ་མ་འདོད་པ་ཉུང་ཞིང་ཆོག་ཤེས་པ། ཚུལ་ཁྲིམས་སྲུང་བ། མང་དུ་ཐོས་པ། སྤོབས་པ་དང་ལྡན་པའི་དགེ་སྦྱོང་ལ་ཞེ་སྡང་བ་དང་། ཁྲོ་བའི་སེམས་སྐྱེད་ཅིང་ཚིག་རྩུབ་པོ་རྣམ་པ་སྣ་ཚོགས་ཀྱིས་འཕྱ་ཞིང་སྐུར་དུ་བཅུག་ནས་ལུས་དང་སེམས་མི་བདེ་བར་བྱེད་དོ། །གཞན་ཡང་ཆོས་གོས་དང་། ལྷུང་བཟེད་དང་། འཚོ་བའི་ཡོ་བྱད་ཀྱང་འཕྲོག་ཏུ་བཅུག་ནས་འཚོ་བས་བྲེལ་བར་བྱེད་དོ། །གཞན་ཡང་ཕྱོགས་བཞིའི་དགེ་འདུན་གྱི་ནོར་འཕྲོག་ཏུ་བཅུག་ནས་སྤྱོད་དུ་མི་སྟེར་བ་དང་། ལ་ལ་ནི་བཙོན་རར་བཅུག་ནས་ལྕགས་དང་། ཁོང་སྒྲིལ་དང་། ཤིང་གི་གདོས་ལ་སོགས་པའི་ནན་ལ་བོར་རོ། །ལ་ལ་ནི་ལུས་ཀྱི་ཡན་ལག་གཏུབས། ལ་ལ་ནི་མགོ་གཅོད་དུ་བཅུག་གོ །རིགས་ཀྱི་བུ་ཁྱོད་ལྟོས་ཤིག །དེ་ལྟར་རྒྱལ་རིགས་གདོལ་པ་ཅན་ནས་དགེ་སྦྱོང་དང་། བྲམ་ཟེ་གདོལ་པའི་བར་དུ་གདོལ་པ་ཅན་དེ་དག་ཚུལ་ཁྲིམས་ཉམས་པ་སྡིག་པ་སྤྱོད་པའི་དགེ་སློང་ལ་བརྟེན་ནས་དེ་ལྟ་བུའི་ཁ་ན་མ་ཐོ་བ་ཆེན་པོའི་སྡིག་པ་རྣམ་པ་སྣ་ཚོགས་བྱེད་དོ། །མཚམས་མེད་པའི་སེམས་ཅན་དམྱལ་བའི་བར་དུ་ལྟུང་བར་འགྱུར་རོ། །སེམས་ཅན་གང་གིས་མཚམས་མེད་པ་ལྔ་བྱས་སམ། ཚུལ་ཁྲིམས་ཀྱི་རྩ་བ་དག་བཤིག་གམ། མཚམས་མེད་པ་ལ་ཉེ་བའི་སྡིག་བྱས་སམ། རང་བཞིན་གྱི་སྡིག་གམ། བཅས་པའི་སྡིག་གང་བྱས་པ་བས་ནི་རྒྱལ་རིགས་གདོལ་པ་ཅན་ནས་དགེ་སྦྱོང་དང་། བྲམ་ཟེ་གདོལ་པ་ཅན་གྱི་བར་དུ་ཚུལ་ཁྲིམས་ཉམས་པ་ཆོས་ལས་འགལ་བར་བྱེད་པ་ལ་བསྟེན་པ་བས་སྡིག་པ་ཡང་ངོ་། །རིགས་ཀྱི་བུ་དེ་ལྟར་ཚུལ་ཁྲིམས་ཉམས་པ་སྡིག་པ་སྤྱོད་པའི་དགེ་སློང་དག་དེ་ལྟར་ཆོས་ལས་འགལ་བའི་སྡིག་པ་ཆེན་པོ་བྱས་མོད་ཀྱི། འོན་ཀྱང་ངའི་བསྟན་པ་ལ་གནས་ཤིང་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས། སྤྱོད་
ལམ་དང་ཆ་ལུགས་འཕགས་པ་རྣམས་དང་འཐུན་ཏེ། དེ་ལ་ནི་རྒྱལ་པོ་དང་། བློན་པོ་ཆེན་པོ་དང་། ཁྱིམ་པ་རྣམས་ཀྱིས་ཁྱིམ་པའི་ཆོས་ཉིད་དང་ཡང་སྦྱར་དུ་མི་གནང་ན། གཞུ་བ་དང་། འཚོག་པ་དང་། ནན་ལ་བོར་བ་དང་། བཙོན་རར་གཞུག་པ་དང་། གཤེ་ཞིང་སྤྱོ་བ་དང་། ལུས་ཀྱི་ཡན་ལག་གཏུབ་པ་དང་། འཚོ་བའི་དབང་པོ་དང་ཕྲལ་བ་ཆོས་མ་ཡིན་པ་བྱེད་པ་ལྟ་ཅི་སྨོས། རྒྱལ་པོའམ། བློན་པོ་འམ། ཁྱིམ་པ་རྣམས་ཀྱིས་གལ་ཏེ་དེ་ལྟར་བྱས་ན་ཁ་ན་མ་ཐོ་བའི་སྡིག་པ་ཆེན་པོ་འཐོབ་པར་འགྱུར་ཏེ། གདོན་མི་ཟ་བར་མཚམས་མེད་པའི་སེམས་ཅན་དམྱལ་བར་སྐྱེའོ། །འདི་ལྟར་ཚུལ་ཁྲིམས་ཉམས་པ་སྡིག་པ་སྤྱོད་པའི་དགེ་སློང་ལ་ཡང་ཆད་པས་གཅོད་དུ་མི་གནང་ན་ཚུལ་ཁྲིམས་དང་ལྡན་པ་དགེ་བ་སྤྱོད་པ་ལ་ལྟ་ཅི་སྨོས། རིགས་ཀྱི་བུ་དགེ་སློང་གང་གིས་ཚུལ་ཁྲིམས་ཀྱི་རྩ་བའི་སྡིག་ལས་གཅིག་ཉམས་པ་ཡང་ཚུལ་ཁྲིམས་ཉམས་ཤིང་སྡིག་པ་སྤྱོད་པའི་དགེ་སློང་ཞེས་བྱ་མོད་ཀྱི། བསྟན་པ་བཞིན་དུ་དད་པའི་དགེ་འདུན་གྱིས་ལས་བྱས་པའི་སྡོམ་པ་རྒྱུན་མི་འཆད་པར་ཡོད་དེ། བསླབ་པ་དང་། ཚུལ་ཁྲིམས་ཀྱི་བར་དུ་བཏང་ཡང་རྣམ་པར་དཀར་བའི་ཆོས་ཀྱི་གསུང་ཙམ་ཡོད་ཀྱིས། དེ་ལ་ཡང་རྒྱལ་པོ་དང་། བློན་པོ་དང་། ཁྱིམ་པ་དང་། སྡོམ་པ་མེད་པ་རྣམས་ཀྱིས་བརྙས་སྨོད་དམ། ཆད་པས་གཅད་དུ་མི་གནང་ངོ་། །དེ་ལྟར་དགེ་སློང་དེ་ཆོས་ཀྱི་སྣོད་མ་ཡིན་ཏེ། འཕགས་པའི་ཆོས་ཉམས་པས་ཡོངས་སུ་དག་པའི་དགེ་འདུན་སྨེ་བར་བྱེད་ཅིང་དགེ་སྦྱོང་གི་ལས་སུ་བྱ་བའི་ལས་ཐམས་ཅད་མི་རུང་བར་བྱེད་པ་ཡིན་ཏེ། ཕྱོགས་བཞིའི་དགེ་འདུན་གྱི་ལོངས་སྤྱད་ལ་སྤྱོད་དུ་ནི་མི་དབང་མོད་ཀྱི། འོན་ཀྱང་ཡིད་འཐུན་པའི་དགེ་འདུན་ལས་བསྙེན་པར་རྫོགས་ཏེ་སྡོམ་པ་ཐོབ་པ་མ་བཏང་བས་ཁྱིམ་པ་སྐྱེ་བོ་ཐམས་ཅད་པས་མཆོག་གོ །རྩ་བའི་སྡིག་ཉམས་ཀྱང་དེ་ལྟ་བུ་ཡིན་ན། དེ་མ་ཡིན་པ་བཅས་པའི་སྡིག་ཕྲ་མོ་གཞན་ཉམས་པ་ལྟ་ཅི་སྨོས་ཏེ། དེ་བས་ན་རྒྱལ་པོ་དང་། བློན་པོ་དང་། ཁྱིམ་པ་རྣམས་ཀྱིས་བརྙས་པ་འམ། སྨོད་པ་བྱེད་དམ། ཆད་པས་གཅོད་དུ་མི་དབང་ངོ་། །དེ་ཅིའི་ཕྱིར་ཞེ་ན། རིགས་ཀྱི་བུ་
སྔོན་འདས་པའི་དུས་ན་ཡུལ་ཀ་ཤི་ཞེས་བྱ་བ་ན་རྒྱལ་པོ་ཚངས་པས་བྱིན་ཞེས་བྱ་བ་ཞིག་ཡོད་དེ། དེས་གདོལ་པ་ལྔ་ལ་འདི་སྐད་ཅེས་བཀའ་སྩལ་ཏོ། །ཁྱེད་དེང་ལ་རི་ཁ་བ་ཅན་གྱི་དྲུང་ན་གླང་པོ་ཆེ་མཆེ་བ་དྲུག་དང་ལྡན་པ་ཨུ་པ་ལིའི་མིག་ཅེས་བྱ་བ་ཞིག་ཡོད་ཀྱིས། ཁྱེད་ཀྱིས་དེའི་མཆེ་བ་ཕྱུང་ལ་འོན་ཅིག་གལ་ཏེ་ཁྱོད་ཀྱིས་མ་ཐོབ་ན་གསོན་དུ་མ་རེ་ཤིག་ཅེས་བསྒོའོ། །དེའི་ཚེ་གདོལ་པ་ཅན་དེ་དག་ལུས་དང་སྲོག་གི་ཕྱིར་མདའ་གཞུ་ཞིག་ཐོགས་ནས་གོས་ཚོན་ཅན་གྱོན་ཏེ། དགེ་སྦྱོང་གི་ཚུལ་ལྟར་བཅོས་ནས་རི་ཁ་བ་ཅན་གྱི་དྲུང་དུ་གླང་པོ་ཆེའི་རྒྱལ་པོ་གང་ན་བར་སོང་ངོ་། །དེར་ཕྱིན་པ་དང་དེ་ན་གླང་པོ་ཆེ་མོ་ཞིག་གིས་སྔར་མཐོང་བ་དང་། མདའ་གཞུ་ཐོགས་པ་དེས་དངངས་ནས་གླང་པོ་ཆེའི་རྒྱལ་པོའི་གན་དུ་བརྒྱུགས་ཏེ་ཕྱིན་ནས་འདི་སྐད་ཅེས་སྨྲས་སོ། །ལྷ་ཆེན་པོ་མ་གཟིགས་སམ། མི་ཁ་ཅིག་མདའ་གཞུ་ཐོགས་ཏེ་དལ་གྱིས་འཇབ་ཅིང་མཆི་ན་ཅི་བདག་ཅག་གི་ཚེའི་བར་ཆད་དུ་མི་འབྱུང་གྲང་། གླང་པོ་ཆེའི་རྒྱལ་པོས་མགོ་བཏེག་སྟེ་བལྟས་ན། སྐྲ་དང་ཁ་སྤུ་བྲེགས་ནས་གོས་ཚོན་ཅན་གྱོན་པ་དག་ཅིག་འོང་བ་མཐོང་ནས། གླང་པོ་ཆེ་མོ་ལ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་གང་གཱའི་ཀླུང་གི་བྱེ་སྙེད་ཀྱི། །རྒྱལ་མཚན་ཆོས་གོས་གྱོན་པ་འདི་དག་ནི། །སྡིག་པ་ཐམས་ཅད་ཡོངས་སུ་སྤངས་པས་ན། །ངེས་པར་སེམས་ཅན་དག་ལ་གནོད་མི་བྱེད། །དེ་ནས་གླང་པོ་ཆེ་མོས་ཀྱང་ཚིགས་སུ་བཅད་ནས་ལན་བཏབ་པ། ཆོས་གོས་གྱོན་པ་ལྟར་ནི་བྱེད་མོད་ཀྱི། །ཐམས་ཅད་ལག་ན་མདའ་གཞུ་ཐོགས་པས་ན། །འདི་ནི་སྙིང་རྗེ་མེད་ཅིང་མ་རུངས་པ། །སྡིག་པ་བྱེད་ལ་མོས་པའི་གདོལ་པ་ཡིན། །དེ་ནས་གླང་པོ་ཆེའི་རྒྱལ་པོས་ཀྱང་ཚིགས་སུ་བཅད་དེ་སྨྲས་པ། ཆོས་གོས་ཚལ་བུ་གྱོན་པར་སྣང་བས་ན། །བྱམས་དང་སྙིང་རྗེའི་རྩ་བ་དེ་ཉིད་ཡིན། །སེམས་ཅན་ཀུན་ལ་བྱམས་ཤིང་བརྩེ་བའི་ཕྱིར། །སངས་རྒྱས་ལ་ནི་འདི་དག་སྐྱབས་སོང་ངེས། །ཁྱེད་ཅག་འདི་ལ་ཐེ་ཙོམ་མ་ཟ་བར། །མྱུར་དུ་སེམས་དེ་རྗེས་སུ་བཟུང་ན་མཛེས། །ཆོས་གོས་ཚོན་ཅན་གྱོན་པ་འདི་དག་ནི། །འཁོར་བའི་རྒྱ་མཚོ་ལས་ནི་སྒྲོལ་མཛད་པའོ། །དེ་ནས་དེའི་ཚེ་གདོལ་པ་དེ་དག་གིས་མདའ་
དུག་ཅན་གྱིས་གླང་པོ་ཆེའི་རྒྱལ་པོ་ལ་འཕངས་ནས་གཟས་པ་བཞིན་དུ་སྙིང་ལ་ཕོག་གོ །དེ་ནས་གླང་པོ་ཆེ་མོས་སྐད་ཆེན་པོ་ཕྱུང་སྟེ་ངུས་ནས། སྐད་ཀྱིས་བརྣངས་བཞིན་དུ་ཚིགས་སུ་བཅད་པ་འདི་སྐད་ཅེས་སྨྲས་སོ། །ཆོས་གོས་གྱོན་པ་དེ་དག་ནི། །སངས་རྒྱས་ལ་ནི་སྐྱབས་སོང་སྙམ། །ཆ་ལུགས་ཤིན་དུ་ཞིར་སྣང་ཡང་། །གདུག་པའི་སེམས་ནི་ཁོང་ན་སྲེལ། །ལྷ་ཡི་སྐུ་ལ་མདའ་འཕེན་པའི། །དགྲ་དེ་ཤིན་དུ་བརླག་པའི་ཕྱིར། །མྱུར་དུ་ལུས་ཀུན་བརྫིས་ནས་སུ། །འཚོ་བའི་དབང་དང་དབྲལ་བར་བྱ། །དེ་ནས་གླང་པོ་ཆེའི་རྒྱལ་པོས་ཚིགས་སུ་བཅད་དེ་སྨྲས་པ། འཚོ་བའི་སྲོག་དང་བྲལ་ཀྱང་སླའི། །སྡིག་པའི་སེམས་ནི་བསྐྱེད་མི་རིགས། །འདི་དག་སླུ་བའི་སེམས་ཡོད་ཀྱང་། །ཆ་ལུགས་སངས་རྒྱས་སློབ་མ་འདྲ། །མཁས་པའི་སེམས་ནི་རྣམ་དག་པ། །སྲོག་གི་ཕྱིར་ནི་མ་ཡིན་ཏེ། །སྐྱེ་བོ་མང་པོ་བསྒྲལ་བའི་ཕྱིར། །རྟག་ཏུ་བྱང་ཆུབ་སྤྱད་པ་སྤྱོད། །དེའི་ཚེ་གླང་པོ་ཆེའི་རྒྱལ་པོས་སྙིང་བརྩེ་བའི་སེམས་སྐྱེས་ནས་མི་དེ་དག་ལ་འདི་སྐད་ཅེས་སྨྲས་སོ། །ཁྱེད་ང་ལ་ཅི་འདོད། དེ་དག་གིས་སྨྲས་པ། ཁྱོད་ཀྱི་མཆེ་བ་འདོད་དོ། །གླང་པོ་ཆེའི་རྒྱལ་པོ་སྙིང་ཤིན་དུ་དགའ་ནས་མཆེ་བ་ཕྱུང་སྟེ་དེ་དག་ལ་བྱིན་ནས་ཚིགས་སུ་བཅད་དེ་སྨྲས་པ། ཁྲོ་ཞིང་ཕངས་པའི་བསམ་པ་མེད་བཞིན་དུ། །ཁྱེད་ལ་ང་ཡི་མཆེ་བ་དཀར་པོ་འདི། །བྱིན་པའི་བསོད་ནམས་མངོན་པར་སངས་རྒྱས་ནས། །སྐྱེ་བོའི་ཉོན་མོངས་ནད་རྣམས་ཞི་བྱེད་ཤོག །རིགས་ཀྱི་བུ་སྔོན་འདས་པའི་དུས་ན་དེ་ལྟར་གླང་པོ་ཆེའི་རྒྱལ་པོ་བྱོལ་སོང་གི་སྐྱེ་གནས་སུ་གྱུར་པ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་པའི་ཕྱིར་ལུས་དང་སྲོག་ལ་མ་ཆགས་པར་བཏང་ནས་ཆོས་གོས་གྱོན་པ་དེ་ལ་རིམ་གྲོ་དང་། བསྟི་སྟང་བྱ་བའི་ཕྱིར་དེས་དགྲར་བྱས་ཀྱང་ལན་མི་ལྡོན་པ་ལ་ལྟོས། མ་འོངས་པའི་དུས་ན་རྒྱལ་རིགས་གདོལ་པ་ཅན་དང་། བློན་པོ་དང་། ཁྱིམ་བདག་དང་། ཚོང་དཔོན་དང་། དགེ་སྦྱོང་དང་། བྲམ་ཟེ་གདོལ་པ་ཅན་དག་ཡང་དག་པར་གླེན་པའི་རང་བཞིན་ཅན་ཡིན་ཡང་ཅུང་ཟད་ཙམ་གྱི་ཤེས་པ་སྙེམས་ཏེ། གཡོ་དང་སྒྱུས་འཚོ་ཞིང་འཇིག་རྟེན་དག་བསླུས་ནས་འཇིག་རྟེན་ཕྱི་མའི་སྡུག་བསྔལ་གྱི་འབྲས་བུ་ལ་འཇིགས་པར་མི་ལྟ་བས་ངའི་བསྟན་པ་ལ་སྐྱབས་སུ་སོང་ཞིང་རབ་ཏུ་བྱུང་བ་
ཆོས་ཀྱི་སྣོད་དུ་གྱུར་པ་དང་། ཆོས་ཀྱི་སྣོད་དུ་མ་གྱུར་པ་ཀུན་ལ་འཚེ་ཞིང་གནོད་པ་བྱེད་དེ་གཤེ་ཞིང་སྤྱོ་བ་དང་། འཚོག་པ་དང་། གཞུ་བ་དང་། བཙོན་རར་གཞུག་པ་དང་། འཚོ་བའི་དབང་པོ་དང་ཕྲལ་བའི་བར་དུ་བྱེད་དོ། །དེ་ནི་འདས་པ་དང་། མ་འོངས་པ་དང་། ད་ལྟར་བཞུགས་པའི་སངས་རྒྱས་བཅོམ་ལྡན་འདས་ཀྱི་དམ་ཚིག་ལས་འགལ་བའི་ཁ་ན་མ་ཐོ་བ་ཆེན་པོ་བྱེད་པ་སྟེ། གདོན་མི་ཟ་བར་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་ངོ་། །དགེ་བའི་རྩ་བ་ཡོངས་སུ་བསྲེགས་ཏེ་རྒྱུན་བཅད་པས་མཁས་པ་ཐམས་ཅད་ཀྱིས་ཡོངས་སུ་སྤང་བར་བྱའོ། །དེ་དག་གིས་དེ་ལྟར་ཁ་ན་མ་ཐོ་བ་སྡིག་པ་ཆེན་པོ་བྱས་ཀྱང་གཡོ་དང་སྒྱུས་འཚོ་སྟེ། ང་རྒྱལ་གྱི་དབང་དུ་གྱུར་ནས་འཇིག་རྟེན་དག་བསླུ་བའི་ཕྱིར་དེ་དག་ཀྱང་སོ་སོ་ནས་བདག་ཅག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་པ་ཡིན་ཏེ། བདག་ཅག་ནི་ཐེག་པ་ཆེན་པོས་མངོན་པར་འཚང་རྒྱའོ་ཞེས་ཟེར་རོ། །འདི་ལྟ་སྟེ་དཔེར་ན་མི་ཞིག་བདག་གི་མིག་ཕྱུང་ནས་ལོང་བར་གྱུར་པ་ཕ་རོལ་གཞན་གྱི་ལམ་མཚོན་པའི་ཕྱིར་རི་ཆེན་པོ་ལ་འཛེག་པ་ནི་གནས་མེད་དོ། །དེ་བཞིན་དུ་ཕྱི་མ་མ་འོངས་པའི་དུས་ན་རྒྱལ་རིགས་གདོལ་པ་ཅན་དང་། བློན་པོ་དང་། ཁྱིམ་བདག་དང་། ཚོང་དཔོན་དང་། དགེ་སྦྱོང་དང་། བྲམ་ཟེ་གདོལ་པ་ཅན་དག་ཀྱང་དེ་དང་འདྲ་སྟེ། ངའི་བསྟན་པ་ལ་སྐྱབས་སུ་སོང་ཞིང་རབ་ཏུ་བྱུང་བ་ཆོས་ཀྱི་སྣོད་དུ་གྱུར་པའམ། ཆོས་ཀྱི་སྣོད་མ་ཡིན་པའང་རུང་བའི་སློབ་མ་རྣམས་ལ་འཚེ་ཞིང་གནོད་པར་བྱེད་དེ། གཤེ་ཞིང་སྤྱོ་བ་དང་། བརྡེག་པ་དང་། བཙོན་རར་གཞུག་པ་དང་། འཚོ་བའི་དབང་པོ་དང་ཕྲལ་བའི་བར་དུ་བྱེད་དེ། དེ་ནི་འདས་པ་དང་། མ་འོངས་པ་དང་། ད་ལྟར་གྱི་སངས་རྒྱས་ཐམས་ཅད་ཀྱི་དམ་ཚིག་ལས་འགལ་བའི་ཁ་ན་མ་ཐོ་བ་ཆེན་པོ་བྱས་པས་དགེ་བའི་རྩ་བ་ཐམས་ཅད་བསྲེགས་ཤིང་རྒྱུན་བཅད་པས་གདོན་མི་ཟ་བར་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་ངོ་། །དེ་བས་ན་མཁས་པ་རྣམས་ཀྱིས་སྤང་བར་བྱའོ། །དེས་དེ་ལྟར་ཁ་ན་མ་ཐོ་བ་ཆེན་པོ་བྱས་ཀྱང་གཡོ་དང་སྒྱུས་འཚོ་ཞིང་ང་རྒྱལ་གྱི་དབང་དུ་གྱུར་པ་འཇིག་རྟེན་བསླུ་བའི་ཕྱིར་བདག་ཅག་ནི་བླ་ན་མེད་པའི་བྱང་ཆུབ་ཚོལ་བ་ཡིན་ཏེ། བདག་ཅག་ཀྱང་ཐེག་པ་ཆེན་པོས་མངོན་པར་འཚང་རྒྱའོ་ཞེས་ཟེར་རོ། །དེ་དག་
གིས་དེ་ལྟར་རབ་ཏུ་བྱུང་བ་ལ་འཚེ་ཞིང་གནོད་པ་བྱས་པས་མ་རབས་ཐ་མའི་ལུས་ཀྱང་མི་ཐོབ་ན་ཐེག་པ་རྣམ་གཉིས་ཀྱི་བྱང་ཆུབ་པའམ། བླ་ན་མེད་པའི་ཐེག་པ་ཐོབ་པ་ལྟ་ཅི་སྨོས་ཏེ་སྐལ་བ་ཆད་པ་ཡིན་ནོ། །རིགས་ཀྱི་བུ་གཞན་ཡང་སྔོན་འདས་པའི་དུས་ན། ཡུལ་པན་ཙ་ལ་ཞེས་བྱ་བ་ན་རྒྱལ་པོ་དགྲ་ལས་རྒྱལ་ཞེས་བྱ་བ་ཡོད་དེ། ཡུལ་དེའི་སྲིད་འཛིན་ཅིང་དབང་བྱེད་དོ། །དེ་ན་དུར་ས་ཆེན་པོ་ཁ་ལམ་པ་ཞེས་བྱ་བ་ཤིན་ཏུ་འཇིགས་པའི་གནས་ཤིག་ཡོད་དེ། གནོད་སྦྱིན་དང་། སྲིན་པོ་ཡང་དེ་ན་མང་དུ་གནས་སོ། །དེ་དག་ཏུ་ཕྱིན་ན་འཇིགས་ཤིང་བ་སྤུ་ལྡང་ངོ་། །དེ་ཡུལ་དེ་ན་ཉེས་པ་བྱས་པ་གསད་པ་ཞིག་ཡོད་ན་རྒྱལ་པོའི་ཁྲིམས་ཀྱིས་གསད་པ་དེ། བཅིང་བ་ལྔས་བཅིངས་ནས་ཁ་ལམ་པ་ཞེས་བྱ་བའི་དུར་ས་ཆེན་པོ་དེར་སྐྱེལ་ཏེ། སྲིན་པོ་དང་། འབྱུང་པོ་རྣམས་ཟར་འཇུག་གོ །གསད་པ་གཅིག་གིས་སྲོག་གི་ཕྱིར་སྐྲ་དང་ཁ་སྤུ་བྲེགས་ཏེ་ཆོས་གོས་ཀྱི་ཚལ་བུ་ཞིག་རྙེད་པ་མགུལ་དུ་བཏགས་སོ། །བཙོན་རྫིས་ཁྲིད་དེ་རྒྱལ་པོའི་ཁྲིམས་བཞིན་དུ་བཅིང་བ་ལྔས་བཅིངས་ནས་དུར་ས་ཆེན་པོ་དེར་བསྐྱལ་ཏོ། །སྐྱེལ་མ་ཕྱིར་ལོག་ནས་དེའི་ནུབ་མོ་སྲིན་མོ་ཆེན་མོ་མཚོན་ཆའི་མིག་ཅེས་བྱ་བ་འཁོར་ལྔ་སྟོང་དང་བཅས་ཏེ་དུར་ཁྲོད་དེར་ལྷགས་སོ། །མི་དེས་རྒྱང་ནས་མཐོང་ནས་རབ་ཏུ་འཇིགས་ཤིང་སྐྲག་གོ །དེའི་ཚེ་སྲིན་མོ་དེས་མི་དེ་བཅིང་བ་ལྔས་བཅིངས་པ་སྐྲ་དང་ཁ་སྤུ་བྲེགས་པ་ཆོས་གོས་ཀྱི་ཚལ་བུ་མགུལ་དུ་བཏགས་པ་མཐོང་ནས་གཡས་ནས་བསྐོར་ཏེ་བསྟི་སྟང་དང་བཅས་པས་ཕྱག་བྱས་ཏེ་ཐལ་མོ་སྦྱར་ནས་ཚིགས་སུ་བཅད་པས་འདི་སྐད་སྨྲས་སོ། །སྐྱེས་བུ་ཁྱོད་ནི་མ་བསྙེངས་བདེ་བར་བཞུགས། །ཁྱོད་ལ་བདག་ཅག་གནོད་པ་མི་བགྱིད་དོ། །སྐྲ་བྲེགས་ཆོས་གོས་གྱོན་པ་ཁྱོད་མཐོང་ནས། །བདག་ཅག་སངས་རྒྱས་རྗེས་སུ་དྲན་པར་གྱུར། །དེའི་ཚེ་སྲིན་མོའི་བུ་རྣམས་ཀྱིས་མ་ལ་འདི་སྐད་ཅེས་སྨྲས་སོ། །བདག་ཅག་ཤིན་ཏུ་བཀྲེས་སྐོམ་པས། །ལུས་དང་སེམས་ནི་རྣམ་པར་གཟིར། །ལུས་དང་སེམས་ནི་བདེ་བའི་ཕྱིར། །ཡུམ་གྱིས་མི་དེ་འཚལ་དུ་གནོང་། །དེ་ནས་སྲིན་མོས་བུ་རྣམས་ལ་འདི་སྐད་ཅེས་སྨྲས་སོ། །སངས་རྒྱས་གང་གཱའི་ཀླུང་གི་བྱེ་སྙེད་ཀྱི། །རྣམ་པར་གྲོལ་བའི་རྒྱལ་མཚན་གོས་གྱོན་པ། །འདི་ལ་མི་དགེ་
སྡིག་པའི་སེམས་བསྐྱེད་ན། །ངེས་པར་མཚམས་མེད་སེམས་ཅན་དམྱལ་བར་ལྟུང་། །དེ་ནས་སྲིན་མོའི་བུ་དང་འཁོར་དུ་བཅས་པས་བསྐོར་ཏེ། བསྟི་སྟང་དང་བཅས་པས་ཕྱག་བྱས་ཏེ་ཐལ་མོ་སྦྱར་ནས་ཚིགས་སུ་བཅད་པས་འདི་སྐད་ཅེས་སྨྲས་སོ། །ཚོན་ཅན་གྱོན་པ་ཁྱོད་ལ་སོ་སོར་འཆགས། །བདག་ཅག་ཇི་སྟེ་ཕ་དང་མ་དག་ལ། །ལུས་དང་ངག་ཡིད་མི་དགེ་བྱས་སླ་ཡི། །ཁྱོད་ལ་ནམ་དུའང་གནོད་པར་མི་བགྱིད་དོ། །དེ་ནས་ཡང་སྲིན་མོ་ཆེན་མོ་བོང་བུ་སོ་ཞེས་བྱ་བ་འཁོར་ལྔ་སྟོང་དང་བཅས་ཏེ་དུར་ཁྲོད་དེར་ལྷགས་སོ། །སྲིན་མོ་དེས་ཀྱང་བཅིང་བ་ལྔས་བཅིངས་པ་སྐྲ་དང་ཁ་སྤུ་བྲེགས་པ་ཆོས་གོས་ཀྱི་ཚལ་བུ་མགུལ་དུ་བཏགས་པའི་མི་དེ་མཐོང་ནས་བསྐོར་ཏེ། བསྟི་སྟང་དང་བཅས་པས་ཕྱག་བྱས་ནས་ཐལ་མོ་སྦྱར་ཏེ་ཚིགས་སུ་བཅད་པས་འདི་སྐད་ཅེས་སྨྲས་སོ། །སྐྱེས་བུ་བདག་གིས་མ་བསྙེངས་བདེ་བར་བཞུགས། །ཁྱོད་ཀྱི་མགུལ་དུ་བཏགས་པའི་ཚལ་བུ་འདི། །དྲང་སྲོང་ཆེན་པོའི་རྒྱལ་མཚན་ན་བཟའ་ལགས། །དེ་ལ་བདག་ཅག་མཆོད་ཅིང་ཕྱག་འཚལ་ལོ། །དེ་ནས་སྲིན་མོ་དེའི་བུ་རྣམས་ཀྱིས་མ་ལ་འདི་སྐད་ཅེས་སྨྲས་སོ། །མི་ཡི་ཤ་དང་ཁྲག་ལས་ཞིམ་པ་མེད། །ལུས་དང་སེམས་སྟོབས་སྐྱེ་ཞིང་འཕེལ་བར་འགྱུར། །ཤིན་ཏུ་དཔའ་ལ་རྟུལ་ཕོད་འཇིགས་མེད་པ། །ཡུམ་གྱིས་དེ་ལ་བདག་ཅག་འཚལ་དུ་གནོང་། །དེ་ནས་སྲིན་མོས་བུ་རྣམས་ལ་འདི་སྐད་ཅེས་སྨྲས་སོ། །ལྷ་མིའི་ལོངས་སྤྱོད་ལྡན་པ་ཐམས་ཅད་ཀྱང་། །རབ་ཏུ་བྱུང་བ་དག་ལས་ཐོབ་པའི་ཕྱིར། །ཆོས་གོས་གྱོན་པ་འདི་ལ་མཆོད་པས་ན། །བདེ་བ་ཚད་མེད་པ་ཡང་འཐོབ་པར་འགྱུར། །དེ་ནས་སྲིན་མོའི་བུ་རྣམས་འཁོར་དང་བཅས་པས་བསྐོར་ནས་བསྟི་སྟང་དང་བཅས་པས་ཕྱག་བྱས་ཏེ། ཐལ་མོ་སྦྱར་ནས་ཚིགས་སུ་བཅད་དེ་སྨྲས་པ། སྐྲ་བྲེགས་ཆོས་གོས་གྱོན་པའི་སྐྱེས་བུ་ལ། །བདག་ཅག་ཤིན་ཏུ་གུས་པར་ཕྱག་འཚལ་བས། །རྟག་ཏུ་མ་འོངས་པ་ཡི་དུས་ཀུན་དུ། །སངས་རྒྱས་མཐོང་ཞིང་དད་པ་སྐྱེ་བར་ཤོག །དེའི་ཚེ་ཡང་སྲིན་མོ་ཆེན་མོ་ཁྲོ་གཉེར་འཕྲལ་སྐྲ་ཅན་ཞེས་བྱ་བ་འཁོར་ལྔ་སྟོང་དང་བཅས་ཏེ་དུར་ཁྲོད་དེར་ལྷགས་སོ། །སྲིན་མོ་དེས་ཀྱང་བཅིང་བ་ལྔས་བཅིངས་པ་སྐྲ་དང་ཁ་སྤུ་བྲེགས་པ་ཆོས་གོས་ཀྱི་ཚལ་བུ་མགུལ་དུ་བཏགས་
པའི་མི་དེ་མཐོང་ནས་གཡས་ནས་བསྐོར་ཏེ། བསྟི་སྟང་དང་བཅས་པས་ཕྱག་བྱས་ནས་ཐལ་མོ་སྦྱར་ཏེ་ཚིགས་སུ་བཅད་པས་འདི་སྐད་ཅེས་སྨྲས་སོ། །དྲང་སྲོང་ཆེན་པོའི་རྒྱལ་མཚན་ན་བཟའ་འདི། །མཁས་པ་ཐམས་ཅད་ཤིན་ཏུ་བསྟོད་ཅིང་བསྔགས། །གང་ཞིག་འདི་ལ་མཆོད་པ་བྱེད་པ་ནི། །སྲིད་པའི་བཅིངས་པ་ཀུན་ལས་ངེས་པར་འགྲོལ། །དེའི་ཚེ་སྲིན་མོ་དེའི་བུ་རྣམས་ཀྱིས་མ་ལ་འདི་སྐད་ཅེས་སྨྲས་སོ། །མི་འདིའི་ལུས་ཀྱི་ཤ་དང་ཁྲག་ཀུན་ནི། །རྒྱལ་པོ་ཆེན་པོས་བདག་ཅག་རྣམས་ལ་བསྔོས། །བདག་ཅག་འདི་ལ་ཟ་ཞིང་འཐུང་དུ་གནོང་། །མཐུ་དང་ལྡན་ནས་མ་ཡི་གཡོག་ཀྱང་བགྱི། །དེ་ནས་སྲིན་མོས་བུ་རྣམས་ལ་འདི་སྐད་ཅེས་སྨྲས་སོ། །ཆོས་གོས་བཏགས་པ་གྱོན་པ་འདི་དག་ནི། །ཁྱོད་ཀྱིས་བཟའ་བའི་རིགས་པ་མ་ཡིན་གྱིས། །འདི་ལ་མི་དགེ་སྡིག་པའི་སེམས་བསྐྱེད་ན། །སྡུག་བསྔལ་ཆེན་པོའི་སྣོད་དུ་གྱུར་ཏ་རེ། །དེ་ནས་སྲིན་མོའི་བུ་རྣམས་འཁོར་དང་བཅས་པས་བསྐོར་ནས་བསྟི་སྟང་དང་བཅས་པས་ཕྱག་འཚལ་ཏེ་ཐལ་མོ་སྦྱར་ནས་ཚིགས་སུ་བཅད་དེ་སྨྲས་པ། ཁྱོད་ནི་དྲང་སྲོང་ཆེན་པོའི་གོས་གྱོན་ཏེ། །ཤིན་ཏུ་བསོད་ནམས་ཞིང་དུ་གྱུར་པ་ཡིན། །དེ་བས་བདག་ཅག་ཁྱོད་ལ་མཆོད་པས་ན། །སྲིད་པའི་བཅིངས་པ་ལས་ནི་ཐར་བར་ཤོག །དེའི་ཚེ་ན་ཡང་སྲིན་མོ་ཆེན་མོ་མཚོན་ཆའི་གདོང་ཞེས་བྱ་བ་ཡང་འཁོར་ལྔ་སྟོང་དང་བཅས་ཏེ་དུར་ཁྲོད་དེར་ལྷགས་སོ། །སྲིན་མོ་དེས་ཀྱང་མི་དེ་བཅིང་བ་ལྔས་བཅིངས་པ་སྐྲ་དང་ཁ་སྤུ་བྲེགས་པ་ཆོས་གོས་ཀྱི་ཚལ་བུ་མགུལ་དུ་བཏགས་པ་མཐོང་ནས་བསྐོར་ཏེ་བསྟི་སྟང་དང་བཅས་པས་ཕྱག་འཚལ་ནས་ཐལ་མོ་སྦྱར་ཏེ་ཚིགས་སུ་བཅད་པས་འདི་སྐད་ཅེས་སྨྲས་སོ། །ཁྱོད་ནི་བཏགས་པའི་ཆོས་གོས་གྱོན་པས་ན། །མྱ་ངན་འདའ་བའི་བདེ་བ་ཐོབ་ཏུ་ངེས། །དེ་བས་ཁྱོད་ལ་བདག་ཅག་གནོད་བྱེད་ན། །སངས་རྒྱས་ཀུན་གྱིས་རྣམ་པར་སྨོད་ཀྱིས་དོགས། །དེ་ནས་སྲིན་མོ་དེའི་བུ་རྣམས་ཀྱིས་མ་ལ་འདི་སྐད་ཅེས་སྨྲས་སོ། །བདག་ཅག་རྟག་ཏུ་མི་ཡི་མདངས་འཕྲོག་ཅིང་། །དེ་བཞིན་ཤ་དང་ཁྲག་ཀྱང་ཟ་འཐུང་བས། །གཟུགས་དང་མཐུ་ནི་ཡོངས་སུ་འཕེལ་བའི་ཕྱིར། །བདག་ཅག་འདི་ལ་ཅི་བདེར་འཚལ་དུ་གནོང་། །
དེ་ནས་སྲིན་མོ་དེས་བུ་རྣམས་ལ་འདི་སྐད་ཅེས་སྨྲས་སོ། །ཇི་སྟེ་སྐྲ་དང་ཁ་སྤུ་བྲེགས་པ་ཡི། །ཆོས་གོས་གྱོན་པ་འདི་ལ་གནོད་བྱས་ན། །ངེས་པར་མཚམས་མེད་སེམས་ཅན་དམྱལ་བར་ལྟུང་། །ཡུན་རིང་སྡུག་བསྔལ་ཆེན་པོའི་སྣོད་དུ་འགྱུར། །དེ་ནས་སྲིན་མོ་བུ་རྣམས་དང་འཁོར་དུ་བཅས་པས་བསྐོར་ནས་བསྟི་སྟང་དང་བཅས་པས་ཕྱག་འཚལ་ཏེ། ཐལ་མོ་སྦྱར་ནས་ཚིགས་སུ་བཅད་པ་འདི་དག་སྨྲས་སོ། །བདག་ཅག་སེམས་ཅན་དམྱལ་བས་རབ་འཇིགས་ཏེ། །དེ་བས་ཁྱོད་ཀྱི་སྲོག་ལ་གནོད་མི་བགྱིད། །བཅིངས་པ་འདི་ཡང་བཀྲོལ་ཏེ་ཁྱོད་གཏང་གིས། །དམྱལ་བའི་སྡུག་བསྔལ་ཀུན་ལས་ཐར་བར་ཤོག །དེའི་ཚེ་སྲིན་མོ་བུ་སྨད་འཁོར་དང་བཅས་པ་སྙིང་རྗེའི་སེམས་བསྐྱེད་ནས་མི་དེའི་བཅིངས་པ་བཀྲོལ་ཏེ་བཤགས་པ་དང་། སྤྲོ་བ་བསྐྱེད་པ་བྱས་ནས་ཕྱིར་བཏང་ངོ་། །མི་དེ་ཕྱིས་ཉིན་སྔ་རབ་ཏུ་རྒྱལ་པོའི་དྲུང་དུ་འོངས་ནས་དངོས་པོ་དེ་དག་རྒྱུས་ཀྱིས་ཞིབ་ཏུ་གསོལ་ཏོ། །དེའི་ཚེ་རྒྱལ་པོ་དགྲ་ལས་རྒྱལ་བ་འཁོར་དང་བཅས་པས་དེ་སྐད་ཐོས་ནས་དངངས་ཏེ་ངོ་མཚར་རྨད་དུ་གྱུར་ནས་ཁྲིམས་སུ་བཅས་ཏེ་ཡུལ་གྱི་མི་རྣམས་ལ་བཀས་བཏགས་པ། དེང་ཕྱིན་ཆད་ངའི་ཡུལ་ན་གནས་པ་སངས་རྒྱས་ཀྱི་སློབ་མ་ཚུལ་ཁྲིམས་སྲུང་ངམ། ཚུལ་ཁྲིམས་ཉམས་སམ། ཆུང་ངུ་ན་ཚུལ་ཁྲིམས་མེད་པར་སྐྲ་དང་ཁ་སྤུ་བྲེགས་ཏེ་ངུར་སྨྲིག་གྱོན་པ་ལ་སུ་ཞིག་ཀྱལ་ཀའམ་གནོད་པ་བྱས་ན་ཐམས་ཅད་གསད་དོ་ཞེས་ཁྲིམས་སུ་བྱས་སོ། །དེའི་རྒྱུ་དེའི་རྐྱེན་གྱིས་མི་མང་པོ་ཡང་བསོད་ནམས་ལ་དགའ་བས་ཐམས་ཅད་བགས་ཀྱིས་བསྟན་པ་ལ་ཕྱོགས་ནས་འཛམ་བུའི་གླིང་ན་རྒྱལ་པོ་དེ་དབང་བའི་མི་ཐམས་ཅད་བསམ་པ་དེས་པས་དཀོན་མཆོག་གསུམ་ལ་སྐྱབས་སུ་གསོལ་ཏོ། །རིགས་ཀྱི་བུ་དེ་ལྟར་འདས་པའི་དུས་ན་སྲིན་མོ་ཡི་དགས་ཀྱི་རྒྱུད་དུ་སྐྱེས་པ། མདངས་འཕྲོག་པ་ཤ་དང་ཁྲག་ཟ་བ། སྡིག་པ་ལ་བརྐམ་པ། སྙིང་རྗེ་མེད་པ་ཡང་དེ་ལྟ་བུའི་ཚུལ་ཁྲིམས་མེད་པ་སྐྲ་དང་ཁ་སྤུ་བྲེགས་པ་ཆོས་གོས་ཀྱི་ཚལ་བུ་མགུལ་དུ་བཏགས་པ་དེ་ལ་བསྐོར་བ་དང་། བསྟི་སྟང་དང་། རིམ་གྲོ་དང་། ཕྱག་བྱ་བ་དང་། མཆོད་པ་དང་། ཚིགས་སུ་བཅད་པས་བསྟོད་དེ། གནོད་པ་བྱེད་པའི་སེམས་མེད་ན། ཕྱི་མ་
མ་འོངས་པའི་དུས་སུ་རྒྱལ་རིགས་གདོལ་པ་ཅན་དང་། བློན་པོ་དང་། ཁྱིམ་བདག་དང་། ཚོང་དཔོན་དང་། དགེ་སྦྱོང་དང་། བྲམ་ཟེ་གདོལ་པ་ཅན་ལ་སོགས་པ་གདུག་པའི་སེམས་འཆང་ཞིང་སྙིང་རྗེ་མེད་པ། གནོད་སྦྱིན་དང་། སྲིན་པོ་བས་ཐུ་བར་སྡིག་པ་བྱེད་དོ། །གླེན་ཞིང་གཏི་མུག་ཅན་དགེ་བའི་རྩ་བ་ཡོངས་སུ་གཅོད་པ་དེ་ངའི་བསྟན་པ་ལ་རབ་ཏུ་བྱུང་བའི་ཆོས་ཀྱི་སྣོད་དུ་གྱུར་པ་དང་། ཆོས་ཀྱི་སྣོད་དུ་མ་གྱུར་པ་ཡང་རུང་། སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་གྱོན་པའི་སློབ་མ་ལ་དད་པ་དང་བཀུར་སྟི་མི་བྱེད་དེ། དེ་ལ་གནོད་པ་དང་། གཤེ་ཞིང་རྡེག་པ་དང་། ནན་ལ་འདར་ཞིང་བཙོན་རར་གཞུག་པ་དང་། འཚོ་བའི་དབང་པོ་དང་ཕྲལ་བའི་བར་དུ་བྱེད་པ་དེ་ནི་འདས་པ་དང་། མ་འོངས་པ་དང་། ད་ལྟར་གྱི་སངས་རྒྱས་བཅོམ་ལྡན་འདས་ཐམས་ཅད་ཀྱིས་བསྟན་པའི་ཁ་ན་མ་ཐོ་བ་ཆེན་པོ་དང་འགལ་བར་བྱེད་པ་སྟེ། དགེ་བའི་རྩ་བ་ཡོངས་སུ་བསྲེགས་ནས་རྒྱུན་བཅད་པས་གདོན་མི་ཟ་བར་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་བར་འགྱུར་བས་མཁས་པ་རྣམས་ཀྱིས་ཡོངས་སུ་སྤང་བར་བྱའོ། །ཡང་རིགས་ཀྱི་བུ་སྔོན་རྒྱལ་པོ་བསོད་ནམས་ཆེན་པོ་ཞེས་བྱ་བ་ཞིག་ཡོད་དེ། རྒྱལ་པོ་དེ་སྙིང་རྗེ་ཆེ་བས་ཉེས་པ་བྱས་པས་གསད་པ་ལ་ཐུག་པ་དག་ཀྱང་གསོད་དུ་མི་དགའོ། །དེའི་ཚེ་བློན་པོ་བློ་དང་ལྡན་པ་གཅིག་གིས་རྒྱལ་པོ་ལ་འདི་སྐད་ཅེས་གསོལ་ཏོ། །རྒྱལ་པོ་ཐུགས་ངན་མ་མཛད་ཅིག །རྒྱལ་པོས་ཀྱང་སྲོག་གཅོད་པའི་སྡིག་པ་མི་འཐོབ་ལ། གཤེད་མས་ཀྱང་འགུམ་མི་འཚལ་བར་མི་དེ་འགུམ་པའི་ཐབས་མཆིས་སོ་ཞེས་གསོལ་ནས་བློན་པོ་ཆེན་པོ་དེས་གསད་པ་ལ་ཐུག་པའི་མི་དེ་བལ་གླང་རྨིས་པ་མ་རུངས་པའི་མདུན་དུ་བཞག་གོ །དེ་ནས་བལ་གླང་རྨིས་པ་དེས་མི་དེ་སྣས་བཟུང་སྟེ་ཡར་བཏེག་ནས་ས་ལ་བརྡབས་པ་ལས། མི་དེ་གོས་དམར་པོ་གྱོན་པ་མཐོང་ནས་ཆོས་གོས་ཡིན་ནོ་སྙམ་སྟེ། བསམ་པ་དག་པའི་དད་པ་སྐྱེས་ནས་དལ་གྱིས་ས་ལ་བཞག་ཅིང་དེ་ལ་འགྱོད་ནས་ས་ལ་བཏུད་དེ། མི་དེའི་རྐང་པ་ལ་སྣས་འཕྱི་ཞིང་བསྟི་སྟང་དང་བཅས་པས་མིག་མི་འཛུམས་པར་མི་དེ་ལ་ལྟའོ། །བློན་པོ་ཆེན་པོ་དེས་དེ་ལྟ་བུར་གྱུར་པ་མཐོང་ནས་བརྒྱུགས་
ཏེ། རྒྱལ་པོ་དེ་ལ་དེ་བཞིན་དུ་གསོལ་ཏོ། །རྒྱལ་པོས་དེ་སྐད་ཅེས་ཐོས་ནས་དངངས་ཏེ་ངོ་མཚར་རྨད་དུ་གྱུར་ནས། མི་ཡོངས་ལ་དེང་ཕྱིན་ཆད་དཀོན་མཆོག་གསུམ་ལ་བསྟི་སྟང་གྱིས་ཤིག་པར་བཀས་བཏགས་སོ། །དེའི་རྒྱུ་དེའི་རྐྱེན་གྱིས་སྲོག་གཅོད་པ་ཡང་སྤངས་ཏེ་འཛམ་བུའི་གླིང་ལ་དབང་བྱེད་པར་གྱུར་ཏོ། །ལྟོས་རིགས་ཀྱི་བུ་དེ་ལྟར་འདས་པའི་དུས་ན་བལ་གླང་རྨིས་པ་བྱོལ་སོང་གི་སྐྱེ་གནས་སུ་གྱུར་པ་ཡང་ཆོས་གོས་ལ་གུས་པས་སྡིག་མི་བྱེད་ན། མ་འོངས་པའི་དུས་ན་རྒྱལ་རིགས་གདོལ་པ་ཅན་དང་། བློན་པོ་དང་། ཁྱིམ་བདག་དང་། ཚོང་དཔོན་དང་། དགེ་སྦྱོང་དང་། བྲམ་ཟེ་གདོལ་པ་ཅན་ལ་སོགས་པ་སེམས་གདུག་པ་ཅན་སྙིང་རྗེའི་སེམས་མེད་པ། བལ་གླང་རྨིས་པ་བས་ཐུ་བའི་སྡིག་པའི་ལས་བྱེད་དོ། །བུས་པ་གླེན་པ་ཅན་དེ་དག་ངའི་བསྟན་པ་ལ་རབ་ཏུ་བྱུང་བ་ཆོས་ཀྱི་སྣོད་དུ་གྱུར་པའམ། ཆོས་ཀྱི་སྣོད་མ་ཡིན་པའང་རུང་། སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་གྱོན་པ་ལ་དད་པ་དང་གུས་པ་མི་བྱེད་དེ། དེ་ལ་གནོད་པ་དང་། གཤེ་ཞིང་སྤྱོ་བ་དང་། གཞུ་ཞིང་འཚོག་པ་དང་། བཙོན་རར་གཞུག་པ་དང་། འཚོ་བའི་དབང་པོ་དང་ཕྲལ་བའི་བར་དུ་བྱེད་པས་འདས་པ་དང་། མ་འོངས་པ་དང་། ད་ལྟར་བཞུགས་པའི་སངས་རྒྱས་བཅོམ་ལྡན་འདས་ཐམས་ཅད་ཀྱིས་བསྟན་པའི་ཁ་ན་མ་ཐོ་བ་ཆེན་པོ་དང་འགལ་བར་བྱེད་པས་དགེ་བའི་རྩ་བ་བསྲེགས་ནས་རྒྱུན་གཅད་པས་གདོན་མི་ཟ་བར་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་བར་འགྱུར་བས་མཁས་པ་རྣམས་ཀྱིས་སྤང་བར་བྱའོ། །གལ་ཏེ་རྒྱལ་རིགས་གདོལ་པ་ཅན་ནས་དགེ་སྦྱོང་དང་། བྲམ་ཟེ་གདོལ་པ་ཅན་གྱི་བར་དུ་སྡིག་པའི་འཁོར་ལོ་གསུམ་པོ་འདི་དང་ལྡན་པས། དེའི་རྒྱུ་དེའི་རྐྱེན་གྱིས་ཡུལ་སྲུང་བའི་ལྷ་དང་། ཀླུ་དང་། གནོད་སྦྱིན་ལ་སོགས་པ་དཀོན་མཆོག་གསུམ་ལ་བསམ་པ་དག་ཅིང་དད་པ་མི་ཕྱེད་པ་ཐམས་ཅད་རྒྱལ་རིགས་གདོལ་པ་ཅན་ནས་དགེ་སྦྱོང་དང་། བྲམ་ཟེ་གདོལ་པ་ཅན་གྱི་བར་དུ་གདོལ་པ་དེ་དག་ལ་ཁྲོ་ཞིང་ཞེ་སྡང་བའི་སེམས་སྐྱེ་བ་ནས་གཞུང་དེ་བཞིན་དུ་རྒྱས་པར་རྒྱལ་རིགས་གདོལ་པ་ཅན་དང་། བློན་པོ་དང་། ཁྱིམ་བདག་དང་། ཚོང་དཔོན་དང་། དགེ་སྦྱོང་དང་། བྲམ་ཟེ་ལ་སོགས་
པ་གདོལ་པ་ཅན་དེ་ཐམས་ཅད་རིང་པོར་མི་ཐོགས་པར་ལུས་ཀྱི་ཡན་ལག་དུམ་བུར་ཆད་ཅིང་ཞག་མང་དུ་ལྕེ་ལྡིབས་པ་དང་། ཤིན་ཏུ་མི་བཟད་པའི་ན་བ་དང་ཚ་བའི་སྡུག་བསྔལ་ཆེན་པོ་མྱོང་བར་འགྱུར་བ་དང་། འཆི་འཕོས་ནས་ཀྱང་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་བར་འགྱུར་རོ། །རིགས་ཀྱི་བུ་གཞན་ཡང་ཕྱི་མ་མ་འོངས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་རིགས་གདོལ་པ་ཅན་དང་། བློན་པོ་དང་། ཁྱིམ་བདག་དང་། ཚོང་དཔོན་དང་། དགེ་སྦྱོང་དང་། བྲམ་ཟེ་གདོལ་པ་ཅན་ལ་སོགས་པ་སྡིག་པའི་བཤེས་གཉེན་ལ་སྟེན་པ་དགེ་བའི་རྩ་བ་ཆུང་ཞིང་ཞེན་པ་ནས་དེ་བཞིན་དུ་རྒྱས་པར་འཇིག་རྟེན་ཕྱི་མའི་སྡུག་བསྔལ་མ་མཐོང་བ་དག་ཕྱོགས་བཞིའི་དགེ་འདུན་གྱི་ནོར་དང་། གཙུག་ལག་ཁང་གི་ནོར་དང་། གཙུག་ལག་ཁང་དུ་བསྔོས་པའི་ནོར་དང་། སྐྱེད་ཤིང་གི་ར་བ་དང་། སྐྱེད་ཤིང་གི་ར་བར་བསྔོས་པའི་ནོར་དང་། ཞིང་འབྲོག་དང་། ཞིང་འབྲོག་ཏུ་བསྔོས་པའི་ནོར་དང་། གཙུག་ལག་ཁང་སོ་སོའི་རུང་བར་བྱེད་པར་གཏོགས་པའི་སྐྱེས་པ་དང་། བུད་མེད་ཕྲོགས་པ་དང་། ནོར་ཕྱུགས་ཕྲོགས་པ་དང་། གོས་དང་། བསོད་སྙོམས་ཕྲོགས་པ་དང་། གདིང་བ་དང་། ཁྲི་སྟན་ཕྲོགས་པ་དང་། ནད་ཀྱི་རྐྱེན་སྨན་ཕྲོགས་པ་དང་། དེ་མ་ཡིན་པའི་འཚོ་བའི་ཡོ་བྱད་རྣམ་པ་སྣ་ཚོགས་ལ་འཕྲོག་པ་སྟེ། དེ་ལྟར་ཕྱོགས་བཞིའི་དགེ་འདུན་ལ་ཕུལ་བའི་ནོར་དེ་ནི་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། བརྩོན་འགྲུས་རྩོམ་པ། སློབ་པ་དང་མི་སློབ་པ་ལ་ནན་ཏན་དུ་བྱེད་པ་ནས་མཐའི་གནས་བྱས་པའི་འབྲས་བུ་ཐོབ་པའི་བར་གྱི་དགེ་སློང་ཡོངས་སུ་དག་པ་སྤྱོད་དུ་གནང་བར་ཟད་ན། རྒྱལ་རིགས་གདོལ་པ་ཅན་ནས་དགེ་སྦྱོང་དང་། བྲམ་ཟེ་གདོལ་པ་ཅན་གྱི་བར་དུ་གདོལ་པ་ཅན་དེ་དག་གིས་མཐུ་དང་དཔུང་བསྙེམས་ཏེ་ནན་གྱིས་ཕྲོགས་ནས། དགེ་སློང་ཚུལ་ཁྲིམས་དང་ལྡན་པ་ཡོངས་སུ་དག་པ་དག་ནི་སྤྱོད་དུ་མི་སྟེར་གྱི། ཚུལ་ཁྲིམས་ཉམས་པ་སྡིག་པ་སྤྱོད་པའི་དགེ་སློང་ཁྱིམ་ན་གནས་ཤིང་ཁྱིམ་པའི་ལས་བྱེད་པ་དག་ལ་བྱིན་ནས་ཁ་ཅིག་ནི་ཐུན་མོང་དུ་སྤྱོད། ཁ་ཅིག་ནི་ཁུད་པར་ཡང་སྤྱོད་དོ། །ཚུལ་ཁྲིམས་ཉམས་པའི་དགེ་སློང་དག་གིས་དེ་དག་ཐོས་ནས་ཀྱང་ཁ་ཅིག་ནི་ཐུན་
མོང་དུ་སྤྱོད། ཁ་ཅིག་ནི་ཁུད་པར་ཡང་སྤྱོད་དོ། །ཁ་ཅིག་ནི་ཁྱིམ་པ་ལ་བྱིན་ནས་དེ་དང་ཡང་ཐུན་མོང་དུ་སྤྱོད་དོ། །དེའི་རྒྱུ་དེའི་རྐྱེན་གྱིས་ཡུལ་སྲུང་བའི་ལྷ་དང་། ཀླུ་དང་། གནོད་སྦྱིན་ལ་སོགས་པ་དཀོན་མཆོག་གསུམ་ལ་བསམ་པ་དག་ཅིང་དད་པ་མི་ཕྱེད་པ་དག་རྒྱལ་རིགས་གདོལ་པ་ཅན་ནས་དགེ་སྦྱོང་དང་། བྲམ་ཟེ་གདོལ་པ་ཅན་གྱི་བར་དུ་གདོལ་པ་ཅན་དེ་དག་ལ་ཁྲོས་ཏེ་ཞེ་སྡང་གི་སེམས་སྐྱེ་བ་ནས་དེ་བཞིན་དུ་རྒྱས་པར་རྒྱལ་རིགས་གདོལ་པ་ཅན་དང་། བློན་པོ་དང་། ཁྱིམ་བདག་དང་། ཚོང་དཔོན་དང་། དགེ་སྦྱོང་དང་། བྲམ་ཟེ་ལ་སོགས་པ་གདོལ་པ་ཅན་དེ་དག་རིང་པོར་མི་ཐོགས་པར་ལུས་ཀྱི་ཡན་ལག་དུམ་བུར་ཆད་པ་དང་། ཞག་མང་དུ་ལྕེ་ལྡིབས་པ་དང་། ཤིན་ཏུ་མི་བཟད་པའི་ན་བ་དང་ཚ་བའི་སྡུག་བསྔལ་ཆེན་པོ་མྱོང་ཞིང་འཆི་འཕོས་ནས་ཀྱང་གདོན་མི་ཟ་བར་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་བར་འགྱུར་རོ། །རིགས་ཀྱི་བུ་གཞན་ཡང་མ་འོངས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་རིགས་གདོལ་པ་ཅན་དང་། བློན་པོ་དང་། ཁྱིམ་བདག་དང་། ཚོང་དཔོན་དང་། དགེ་སྦྱོང་དང་། བྲམ་ཟེ་གདོལ་པ་ཅན་ལ་སོགས་པ་སྡིག་པའི་བཤེས་གཉེན་ལ་སྟེན་པ་དགེ་བའི་རྩ་བ་ཆུང་ཞིང་ཞན་པ་ནས་དེ་བཞིན་དུ་རྒྱས་པར་འཇིག་རྟེན་ཕྱི་མའི་སྡུག་བསྔལ་གྱི་འབྲས་བུ་མ་མཐོང་བ་དག་གིས་ངའི་བསྟན་པ་ལ་རབ་ཏུ་བྱུང་བ། ཤེས་རབ་རྣོ་བ། མང་དུ་ཐོས་པ། ཚིག་དང་དོན་རྫོགས་པར་སྨྲ་བ་དང་ལྡན་པ། ཉན་ཐོས་ཀྱི་ཐེག་པའི་ཆོས་སྟོན་ནུས་པའམ། རང་སངས་རྒྱས་ཀྱི་ཐེག་པའི་ཆོས་ཆུད་ཅིང་སྟོན་ནུས་པའམ། བླ་ན་མེད་པའི་ཐེག་པའི་ཆོས་སྟོན་ནུས་ཤིང་རྒྱས་པར་སེམས་ཅན་ལ་ཕན་པ་དང་། བདེ་བའི་དོན་དུ་སྟོན་ནུས་པའི་ཆོས་སྨྲ་བ་ལ་སྤྱོ་ཞིང་གཤེ་བ་དང་། སྨད་པ་དང་། འཕྱ་ཞིང་སྐུར་པ་དང་། དབང་ཟ་བ་དང་། གནོད་པ་བྱེད་ཅིང་ཆོས་སྟོན་པའི་བར་ཆད་བྱེད་དོ། །དེའི་རྒྱུ་དེའི་རྐྱེན་གྱིས་ཡུལ་སྲུང་བའི་ལྷ་དང་། ཀླུ་དང་། གནོད་སྦྱིན་ལ་སོགས་པ་དཀོན་མཆོག་གསུམ་ལ་བསམ་པ་དག་ཅིང་དད་པ་མི་ཕྱེད་པ་དག་རྒྱལ་རིགས་གདོལ་པ་ཅན་ནས་དགེ་སྦྱོང་དང་། བྲམ་ཟེ་གདོལ་པ་ཅན་གྱི་བར་དུ་གདོལ་པ་ཅན་དེ་དག་ལ་ཁྲོས་ཏེ། ཞེ་སྡང་གི་སེམས་སྐྱེ་བ་ནས་གཞུང་དེ་བཞིན་དུ་རྒྱས་པར་རྒྱལ་རིགས་གདོལ་པ་ཅན་
ནས་བློན་པོ་དང་། ཁྱིམ་བདག་དང་། དགེ་སྦྱོང་དང་། བྲམ་ཟེ་ལ་སོགས་པ་གདོལ་པ་ཅན་དེ་དག་ཐམས་ཅད་རིང་པོ་མི་ཐོགས་པར་བདག་གི་ལུས་དུམ་བུར་ཆད་པ་དང་། ཞག་མང་དུ་ལྕེ་ལྡིབས་པ་དང་། ཤིན་ཏུ་མི་བཟད་པའི་ན་བ་དང་ཚ་བའི་སྡུག་བསྔལ་ཆེན་པོ་མྱོང་བ་དང་། འཆི་འཕོས་ནས་ཀྱང་གདོན་མི་ཟ་བར་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་བར་འགྱུར་རོ། །རིགས་ཀྱི་བུ་གཞན་ཡང་ཕྱི་མ་མ་འོངས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་རིགས་གདོལ་པ་ཅན་དང་། བློན་པོ་དང་། ཁྱིམ་བདག་དང་། ཚོང་དཔོན་དང་། དགེ་སྦྱོང་དང་། བྲམ་ཟེ་ལ་སོགས་པ་གདོལ་པ་ཅན་སྡིག་པའི་བཤེས་གཉེན་ལ་སྟེན་པ་དགེ་བའི་རྩ་བ་ཞན་ཅིང་ཆུང་བ་ནས་དེ་བཞིན་དུ་རྒྱས་པར་འཇིག་རྟེན་ཕྱི་མའི་སྡུག་བསྔལ་གྱི་འབྲས་བུ་ལ་འཇིགས་པར་མི་ལྟ་བ་དག་ཕྱོགས་བཞིའི་དགེ་འདུན་ལ་ཕུལ་བའི་ནོར་དང་། གཙུག་ལག་ཁང་གི་ཞིང་འབྲོག་དང་། ནོར་ཕྱུགས་དང་། རིན་པོ་ཆེ་དང་། མེ་ཏོག་གི་ཤིང་དང་། འབྲས་བུའི་ཤིང་དང་། ཁ་དོག་གི་ཤིང་དང་། བསིལ་གྲིབ་དང་། བསུང་དང་། སྨན་གྱི་ཤིང་ལ་སོགས་པ་དང་། དེ་མ་ཡིན་པ་འཚོ་བའི་ཡོ་བྱད་རྣམ་པ་སྣ་ཚོགས་ལ་འཕྲོག་ཅིང་ངའི་སློབ་མ་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། བརྩོན་འགྲུས་རྩོམ་པ། སློབ་པ་དང་མི་སློབ་པ་ལ་ནན་ཏན་བྱེད་པ་ནས་མཐའི་གནས་བྱས་པའི་འབྲས་བུའི་བར་དུ་ཐོབ་ཏུ་ཉེ་བའི་དགེ་སློང་ཡོངས་སུ་དག་པ་འབའ་ཞིག་གིས་སྤྱོད་དུ་དབང་བར་ཟད་ན། རྒྱལ་རིགས་གདོལ་པ་ཅན་དང་། དགེ་སྦྱོང་དང་། བྲམ་ཟེ་གདོལ་པ་ཅན་ལ་སོགས་པ་མཐུ་དང་དཔུང་བསྙེམས་ཏེ་ནན་གྱིས་ཕྲོགས་སམ། གཞན་འཕྲོག་ཏུ་བཅུག་གམ། བདག་སྤྱོད་དམ། གཞན་སྤྱོད་དུ་བཅུག་ཀྱང་རུང་། དེའི་རྒྱུ་དེའི་རྐྱེན་གྱིས་ཡུལ་སྲུང་བའི་ལྷ་དང་། ཀླུ་དང་། གནོད་སྦྱིན་ལ་སོགས་པ་དཀོན་མཆོག་གསུམ་ལ་བསམ་པ་དག་ཅིང་དད་པ་མི་ཕྱེད་པ་དག་རྒྱལ་རིགས་གདོལ་པ་ཅན་དང་། དགེ་སྦྱོང་དང་། བྲམ་ཟེ་གདོལ་པ་ཅན་ལ་སོགས་པ་ལ་ཁྲོས་ཏེ། ཞེ་སྡང་གི་སེམས་སྐྱེ་བ་ནས་དེ་བཞིན་དུ་རྒྱས་པར་རྒྱལ་རིགས་གདོལ་པ་ཅན་དང་། བློན་པོ་དང་། ཁྱིམ་བདག་དང་། ཚོང་དཔོན་དང་། དགེ་སྦྱོང་དང་། བྲམ་ཟེ་གདོལ་པ་ཅན་ལ་སོགས་
པ་དེ་དག་ཐམས་ཅད་རིང་པོ་མི་ཐོགས་པར་ལུས་ཀྱི་ཡན་ལག་དུམ་བུར་ཆད་པ་དང་། ཞག་མང་དུ་ལྕེ་ལྡིབས་པ་དང་། ཤིན་ཏུ་མི་བཟད་པའི་ན་བ་དང་ཚ་བའི་སྡུག་བསྔལ་ཆེན་པོ་མྱོང་བ་དང་། འཆི་འཕོས་ནས་ཀྱང་གདོན་མི་ཟ་བར་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་བར་འགྱུར་རོ། །རིགས་ཀྱི་བུ་གཞན་ཡང་མ་འོངས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་རིགས་གདོལ་པ་ཅན་དང་། བློན་པོ་དང་། ཁྱིམ་བདག་དང་། ཚོང་དཔོན་དང་། དགེ་སྦྱོང་དང་། བྲམ་ཟེ་གདོལ་པ་ཅན་ལ་སོགས་པ་སྡིག་པའི་བཤེས་གཉེན་ལ་སྟེན་པ་དགེ་བའི་རྩ་བ་ཆུང་ཞིང་ཞན་པ་བསམ་པ་མ་དག་པ་གཡོ་དང་སྒྱུས་འཚོ་བ། གླེན་པ་གཏི་མུག་ཅན་ཅུང་ཟད་ཀྱི་ཤེས་པ་ཙམ་བསྙེམས་པ། ཚིག་ལ་བདེན་པ་མེད་པ། དགེ་བའི་བཤེས་གཉེན་སྤོང་བ། སྡིག་པའི་གྲོགས་པོ་ལ་སྟེན་ཅིང་མི་དགེ་བ་སྤྱོད་པ། འཕགས་པའི་ཆོས་ལ་ཐེ་ཙོམ་ཟ་བ། འཇིག་རྟེན་ཕྱི་མའི་སྡུག་བསྔལ་གྱི་འབྲས་བུ་ལ་འཇིགས་པར་མི་ལྟ་བ་དག་སྡིག་པའི་སྡོམ་པ་སྲུང་བར་དགའ་བ། སྲོག་གཅོད་པ་ནས་ངན་པར་ལྟ་བའི་བར་དུ་མོས་པ། ང་རྒྱལ་གྱིས་མངོན་པར་ཟིན་པ། འཇིག་རྟེན་པ་དག་སླུ་བ། བདག་ནི་ཚུལ་ཁྲིམས་ཀྱི་སྡོམ་པ་ལ་གནས་པའོ་ཞེས་ཁས་འཆེ་བའི་རྒྱལ་རིགས་གདོལ་པ་ཅན་དང་། དགེ་སྦྱོང་དང་། བྲམ་ཟེ་གདོལ་པ་ཅན་ལ་སོགས་པ་དག །ཐབས་རྣམ་པ་སྣ་ཚོགས་ཀྱིས་ངའི་བསྟན་པ་འཇིག་པར་བྱེད་ཅིང་ངའི་བསྟན་པ་ལ་རབ་ཏུ་བྱུང་བ་དག་ལ་ཡང་དང་ཡང་དུ་ཁྲོ་ཞིང་གཤེ་བ་དང་། སྤྱོ་ཞིང་སྨོད་པ་དང་། ནན་ལ་བོར་བ་དང་། བཙོན་རར་གཞུག་པ་དང་། ལུས་ཀྱི་ཡན་ལག་གཏུབ་པ་དང་། འཚོ་བའི་དབང་པོ་དང་ཕྲལ་བའི་བར་དུ་བྱེད་དེ། ངས་བསྟན་པའི་ཆོས་ལ་ཡིད་མི་ཆེས་པ། མཆོད་རྟེན་འཇིག་པ། གཙུག་ལག་ཁང་འཇིག་པ། དགེ་སློང་དག་ཁྱིམ་པར་འབེབས་པ། སྐྲ་དང་ཁ་སྤུ་འབྲེག་ཅིང་གོས་ངུར་སྨྲིག་གྱོན་པའི་བར་ཆད་བྱེད་པ་ལས་རྣམ་པ་སྣ་ཚོགས་བྱེད་དུ་འཇུག་ཅིང་འཁོལ་བ་སྟེ། དེའི་རྒྱུ་དེའི་རྐྱེན་གྱིས་ཡུལ་སྲུང་བའི་ལྷ་དང་། ཀླུ་དང་། གནོད་སྦྱིན་ལ་སོགས་པ་དཀོན་མཆོག་གསུམ་ལ་བསམ་པ་དག་ཅིང་དད་པ་མི་ཕྱེད་པ་དག་རྒྱལ་རིགས་གདོལ་པ་ཅན་དང་། དགེ་སྦྱོང་དང་། བྲམ་ཟེ་གདོལ་པ་ཅན་ལ་ཁྲོས་ཏེ་ཞེ་
སྡང་གི་སེམས་བསྐྱེད་པ་ནས་དེ་བཞིན་དུ་རྒྱས་པར་རྒྱལ་རིགས་གདོལ་པ་ཅན་དང་། བློན་པོ་དང་། ཁྱིམ་བདག་དང་། ཚོང་དཔོན་དང་། དགེ་སྦྱོང་དང་། བྲམ་ཟེ་ལ་སོགས་པ་གདོལ་པ་ཅན་དེ་དག་རིང་པོ་མི་ཐོགས་པར་ལུས་ཀྱི་ཡན་ལག་ཀུན་དུམ་བུར་ཆད་པ་དང་། ཞག་མང་དུ་ལྕེ་ལྡིབས་པ་དང་། ཤིན་ཏུ་མི་བཟད་པའི་ན་བ་དང་ཚ་བའི་སྡུག་བསྔལ་ཆེན་པོ་མྱོང་བ་དང་། འཆི་འཕོས་ནས་ཀྱང་གདོན་མི་ཟ་བར་མཚམས་མེད་པའི་སེམས་ཅན་དམྱལ་བར་ལྟུང་བར་འགྱུར་རོ། །རིགས་ཀྱི་བུ་རྒྱལ་རིགས་གདོལ་པ་ཅན་དང་། བློན་པོ་དང་། ཁྱིམ་བདག་དང་། ཚོང་དཔོན་དང་། དགེ་སྦྱོང་དང་། བྲམ་ཟེ་ལ་སོགས་པ་འདི་དག་སྡིག་པའི་འཁོར་ལོ་རྣམ་པ་བཅུ་པོ་གསུངས་པ་འདི་ལས་འགའ་ཞིག་དང་ལྡན་ན་ཡང་དགེ་བའི་རྩ་བ་སྔར་བསགས་པ་ཐམས་ཅད་ཐལ་བ་བཞིན་དུ་ཚིག་སྟེ་མེད་པར་འགྱུར་ལ། རིང་པོར་མི་ཐོགས་པར་ལུས་ཀྱི་ཡན་ལག་དུམ་བུར་ཆད་པ་དང་། ཞག་མང་དུ་ལྕེ་ལྡིབས་པ་དང་། ཤིན་ཏུ་མི་བཟད་པའི་ན་བ་དང་ཚ་བའི་སྡུག་བསྔལ་ཆེན་པོ་མྱོང་བ་དང་། ཤི་ནས་ཀྱང་མཚམས་མེད་པའི་སེམས་ཅན་དམྱལ་བ་ཆེན་པོར་ལྟུང་བར་འགྱུར་རོ། །རྒྱལ་རིགས་གདོལ་པ་ཅན་དང་། བློན་པོ་དང་། ཁྱིམ་བདག་དང་། ཚོང་དཔོན་དང་། དགེ་སྦྱོང་དང་། བྲམ་ཟེ་ལ་སོགས་པ་གདོལ་པ་ཅན་འདི་དག་མ་འོངས་པའི་དུས་ན་མི་མ་རབས་ཐ་མའི་ལུས་ཀྱང་འཐོབ་པར་དཀའ་ན་ཐེག་པ་རྣམ་པ་གཉིས་ཀྱི་བྱང་ཆུབ་བམ་བླ་ན་མེད་པའི་བྱང་ཆུབ་ཐོབ་པ་ལྟ་ཅི་སྨོས་ཏེ་སྐལ་བ་མེད་པ་མེད་དོ། །སྡིག་པ་ཅན་དེ་ཐེག་པ་ཆེན་པོའི་མིང་ཡང་ཐོས་པར་དཀའ་ན་བླ་ན་མེད་པར་མངོན་པར་འཚང་རྒྱ་བའི་འབྲས་བུ་ཐོབ་པ་ལྟ་ཅི་སྨོས་ཏེ། གང་ཟག་དེ་ནི་ཡུན་དུ་བདག་མ་རུང་ལ་གཞན་ཡང་མ་རུང་བར་བྱས་པས་སངས་རྒྱས་ཐམས་ཅད་ཀྱིས་ཀྱང་བསྐྱབ་མི་སྤྱོད་དོ། །རིགས་ཀྱི་བུ་འདི་ལྟ་སྟེ། འབྲུའི་མར་འཚིར་བའི་ལས་བྱེད་པ་ནི་འབྲུ་རེ་རེ་ལས་སྲིན་བུ་རེ་རེར་གྱུར་ཏེ་བཙིར་ནས་མར་འབྱུང་ངོ་། །ཁྱོད་ལྟོས་ཤིག་མར་འཚིར་བའི་ལས་བྱེད་པ་དེ་ཉིན་གཅིག་ལ་སེམས་ཅན་ཇི་སྙེད་ཅིག་གསོད་པར་འགྱུར། གལ་ཏེ་འབྲུ་མར་འཚིར་བ་དེ་མར་འཚིར་བའི་གནས་རྣམ་པ་བཅུ་བཅས་ནས་ཉིན་ཞག་གཅིག་ལ་གནས་དེ་རེ་རེར་ཡང་འབྲུ་ཁལ་སྟོང་སྟོང་རྒྱུན་མི་
འཆད་པར་ལོ་སྟོང་ཚང་བར་འཚིར་ན་གང་ཟག་དེས་སྲོག་གཅོད་པའི་ཁ་ན་མ་ཐོ་བའི་ལས་རབ་ཏུ་མང་བ་ཡིན་ནམ། བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོས་གསོལ་པ། རབ་ཏུ་མང་ངོ་། །བཅོམ་ལྡན་འདས་རབ་ཏུ་མང་ངོ་། །བདེ་བར་གཤེགས་པ་གང་ཟག་དེས་སྲོག་གཅོད་པ་ཡང་ཚད་མ་མཆིས། དཔག་ཏུ་མ་མཆིས་ལ་ཁ་ན་མ་ཐོ་བའི་ལས་ཀྱང་གཞལ་བར་རམ། རྩི་བར་རམ། བགྲང་བར་རམ། དཔེར་ཡང་མི་བཟོད་དེ། དེ་བཞིན་གཤེགས་པ་ཉག་གཅིག་གིས་མཁྱེན་གྱི་གཞན་གྱིས་འཚལ་བ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འདི་ལྟ་སྟེ། གལ་ཏེ་མི་ལ་ལ་ཞིག་གིས་ནོར་དང་ཁེའི་ཕྱིར་སྨད་འཚོང་མའི་གནས་རྣམ་པ་བཅུ་བཅས་ཏེ། གནས་དེ་གཅིག་ཏུ་ཡང་བུད་མེད་སྨད་འཚོང་མ་སྟོང་སྟོང་བཞག་ནས་བུད་མེད་དེ་དག་སོ་སོ་ནས་རྒྱན་རྣམ་པ་སྣ་ཚོགས་ཀྱིས་བརྒྱན་ཏེ། སྐྱེ་བོ་བསླུས་ནས་འདོད་ཆགས་ཀྱི་ལས་རྒྱུན་མི་འཆད་པར་ལོ་སྟོང་གི་བར་དུ་བྱེད་དུ་བཅུག་ན། གང་ཟག་དེའི་ཁ་ན་མ་ཐོ་བའི་སྡིག་པ་ཡང་གཞལ་དུ་མེད་དེ། བརྩི་བས་སམ། བགྲང་བས་སམ། དཔེར་ཡང་མི་བཟོད་དོ། །འབྲུ་མར་འཚིར་བའི་གནས་བཅུ་པོའི་སྡིག་པ་དེ་ནི་སྨད་འཚོང་མའི་གནས་གཅིག་བཅས་པའི་སྡིག་དང་མཉམ་མོ། །རིགས་ཀྱི་བུ་གཞན་ཡང་འདི་ལྟ་སྟེ། གང་ཟག་གང་ལ་ལ་ཞིག་ནོར་དང་ཁེའི་ཕྱིར་ཆང་འཚོང་བའི་གནས་བཅུ་བཅས་ཏེ། གནས་དེ་སོ་སོར་རྣམ་པ་སྣ་ཚོགས་ཀྱི་རྒྱན་གྱིས་ཤིན་ཏུ་བརྒྱན་ནས་གནས་དེ་རེ་རེར་ཡང་ཐབས་རྣམ་པ་སྣ་ཚོགས་ཀྱིས་ཆང་དད་ཆེ་བའི་མི་སྟོང་སྟོང་བྲིད་དེ་ཆང་བླུད་ནས་ཉིན་མཚན་དུ་རྒྱུན་མི་འཆད་པར་ལོ་སྟོང་གི་བར་དུ་རྩེ་ན། གང་ཟག་དེའི་སྡིག་པ་ཡང་དཔག་ཏུ་མེད་དེ། བརྩི་བས་སམ། བགྲང་བས་སམ། དཔེར་ཡང་མི་བཟོད་དོ། །གོང་དུ་བཤད་པའི་སྨད་འཚོང་མའི་གནས་བཅུ་པོའི་སྡིག་པ་དེ་ཆང་འཚོང་བའི་གནས་བཅས་པའི་སྡིག་གཅིག་དང་མཉམ་མོ། །རིགས་ཀྱི་བུ་གཞན་ཡང་འདི་ལྟ་སྟེ། གང་ཟག་ལ་ལ་ཞིག་ནོར་དང་ཁེའི་ཕྱིར་ཤན་པའི་གནས་རྣམ་པ་བཅུ་བཅས་ཏེ། གནས་དེ་རེ་རེར་ཡང་ཉིན་ཞག་གཅིག་ལ་བལ་གླང་དང་། ལུག་དང་། རྔ་མོ་དང་། ཤ་བ་དང་། བྱ་དང་། ཕག་སྟོང་
སྟོང་རྒྱུན་མི་འཆད་པར་ལོ་སྟོང་གི་བར་དུ་བསད་ན་གང་ཟག་དེའི་ཁ་ན་མ་ཐོ་བའི་སྡིག་ཀྱང་གཞལ་དུ་མེད་དེ། བརྩི་བས་སམ། བགྲང་བས་སམ། དཔེར་ཡང་མི་བཟོད་དོ། །དེ་ལྟར་སྔར་བཤད་པའི་ཆང་འཚོང་བའི་གནས་བཅུ་པོའི་སྡིག་པ་དེ་ཤན་པའི་གནས་གཅིག་བཅས་པའི་སྡིག་དང་མཉམ་མོ། །འདི་ལྟར་ཤན་པའི་གནས་བཅུ་པོའི་སྡིག་དེ་རྒྱལ་རིགས་གདོལ་པ་ཅན་ནས། དགེ་སྦྱོང་དང་། བྲམ་ཟེ་ལ་སོགས་པའི་གདོལ་པ་ཅན་དེ་དག་སྡིག་པའི་འཁོར་ལོ་བཅུ་པོ་ལས་འགའ་ཞིག་དང་ལྡན་ན་ཉིན་ཞག་གཅིག་གི་ཁ་ན་མ་ཐོ་བའི་སྡིག་ཀྱང་སྔ་མ་དང་མཉམ་མོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། མར་འཚིར་གནས་སྡིག་བཅུ་པོ་དག །སྨད་འཚོང་གནས་སྡིག་གཅིག་དང་མཉམ། །སྨད་འཚོང་གནས་སྡིག་བཅུ་པོ་དག །ཆང་འཚོང་གནས་སྡིག་གཅིག་དང་མཉམ། །ཆང་འཚོང་གནས་ནི་བཅུ་པོ་དག །ཤན་པའི་གནས་སྡིག་གཅིག་དང་མཉམ། །ཤན་པའི་གནས་ནི་བཅུ་བཅས་པས། །རྒྱལ་པོ་གདོལ་ཅན་སྡིག་གཅིག་མཉམ།། །།བམ་པོ་ལྔ་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་གལ་ཏེ་རྒྱལ་རིགས་དགེ་བའམ། བློན་པོ་དགེ་བ་དང་། ཁྱིམ་བདག་དགེ་བ་དང་། ཚོང་དཔོན་དགེ་བ་དང་། དགེ་སྦྱོང་དགེ་བ་དང་། བྲམ་ཟེ་དགེ་བ་དག་བདག་ཤིན་ཏུ་སྐྱོང་ཞིང་གཞན་དག་ཀྱང་ཤིན་ཏུ་སྐྱོང་ལ། འཇིག་རྟེན་ཕྱི་མས་ཀྱང་འཛེམ་པ། སངས་རྒྱས་ཀྱི་བསྟན་པ་ལ་གནས་པ། རབ་ཏུ་བྱུང་བ་ཆོས་ཀྱི་སྣོད་དུ་གྱུར་པ་འམ། ཆོས་ཀྱི་སྣོད་དུ་མ་གྱུར་པའམ། ཆུང་ངུ་ན་ཚུལ་ཁྲིམས་མ་མཆིས་པའང་རུང་སྟེ་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་འཚལ་བ་ལ་ཤིན་ཏུ་བསྟི་སྟང་དང་བཅས་ཏེ་རིམ་གྲོ་དང་མཆོད་པ་བགྱིད་དོ། །གཞན་ཡང་ཉན་ཐོས་ཀྱི་ཐེག་པའི་ཆོས་དང་། རང་སངས་རྒྱས་ཀྱི་ཐེག་པའི་ཆོས་དང་། ཐེག་པ་ཆེན་པོའི་ཆོས་ལ་བསྟི་སྟང་དང་བཅས་པས་མཆོད་པ་ཉན་པ་དང་བ་གཟུངས་སུ་འཛིན་པ་མཆོད་པ་བྱེད་པ་ཐེག་པ་ཆེན་པོ་ལ་གནས་ཤིང་ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ། བརྩོན་འགྲུས་
རྩོམ་ཞིང་ནན་ཏན་དུ་བགྱིད་པ་ནས་འབྲས་བུ་ལ་གནས་པའི་བར་གྱི་གང་ཟག་རྗེས་སུ་སྲུང་ཞིང་མཐུ་སྟོབས་བསྟང་བ་དང་། ཞུ་ཞིང་འདྲི་བ་དང་། ཉན་ཅིང་འཛིན་པ་དང་། དགའ་བཞིན་དུ་གཏམ་ཟེར་ཞིང་གླེང་བ་དང་། ཚུལ་ཁྲིམས་ཉམས་པ་སྡིག་པ་སྤྱོད་པའི་དགེ་སློང་རིང་དུ་སྤོང་བ་དང་། ཕྱོགས་བཞིའི་དགེ་འདུན་གྱི་ནོར་ལ་ཕ་རོལ་པོ་གཞན་ཆུད་གཟོན་དུ་མི་གཞུག་ཅིང་ཤིན་ཏུ་སྲུང་བ་དང་། ཕྱོགས་བཞིའི་དགེ་འདུན་གྱི་ནོར་དང་། མཆོད་རྟེན་གྱི་ནོར་ལ་བདག་ཀྱང་མི་རྐུ། གཞན་ཡང་རྐུར་མི་འཛུད་པ་དང་། བདག་མི་སྤྱོད། གཞན་ཡང་སྤྱོད་དུ་མི་འཛུད་པ་དང་། ཐེག་པ་རྣམ་གསུམ་གྱི་ཆོས་སྨྲ་བ་ལ་བསྟི་སྟང་དང་བཅས་པས་མཆོད་ཅིང་མཐུས་བསྟང་བ་དང་། ཕ་རོལ་པོ་གཞན་དག་འཕྱ་ཞིང་སྐུར་པ་དང་སྨོད་དུ་མི་འཛུད་པ་དང་། དེ་ལ་རིམ་གྲོ་བགྱིད་ཅིང་སྤྲོ་བ་སྐྱེད་པ་དང་། གང་རབ་ཏུ་བྱུང་བ་དག་དང་། སངས་རྒྱས་ཀྱི་བསྟན་པའི་ཆོས་ལ་དད་པས་སྲུང་ཞིང་རྗེས་སུ་འཛིན་པ་དང་། མཆོད་རྟེན་མི་འཇིག་པ་དང་། དགེ་འདུན་གྱི་གནས་དང་། གཙུག་ལག་ཁང་ཡང་ཤིན་ཏུ་སྲུང་བ་དང་། སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་གྱོན་པའི་རབ་ཏུ་བྱུང་བའི་གང་ཟག་ལ་མི་བརྙས་མི་སྨོད་པ་དང་། སྡིག་པའི་འཁོར་ལོ་རྣམ་པ་བཅུ་ལ་བདག་མི་སྤྱོད། ཕ་རོལ་པོ་གཞན་སྡིག་པའི་འཁོར་ལོ་བཅུ་ལས་རིང་དུ་གྱུར་ཅིང་རྒྱལ་པོ་སྔ་མའི་ཆོས་དང་ལུགས་ཀྱིས་རྒྱལ་པོའི་སྲིད་འཚོ་བ་དང་། དཀོན་མཆོག་གསུམ་གྱི་གདུང་འཚོབ་ཅིང་དད་ཅིང་རྒྱས་པར་བྱེད་པ་དང་། རྟག་ཏུ་དགེ་བའི་བཤེས་གཉེན་ལ་སྟེན་ཅིང་བྱམས་པའི་སེམས་ཀྱིས་མི་ཡོངས་ལ་སྐྱོང་བ་དང་། ཐམས་ཅད་ལ་ཅི་དང་ཅིས་འདུལ་བ་བཞིན་དུ་དེ་དང་དེའི་ཆོས་ཀྱིས་འདུལ་ཞིང་སྟོན་ཏོ། །ངན་པར་ལྟ་བ་སྤངས་ནས་ཡང་དག་པའི་ཆོས་ལ་ནན་ཏན་བྱེད་དུ་འཛུད་པའི་རྒྱལ་རིགས་དགེ་བ་ནས་བྲམ་ཟེ་དགེ་བའི་བར་དུ་དགེ་བ་དེ་དག་བསོད་ནམས་ཇི་སྙེད་ཅིག་ཐོབ་ཅིང་། སྡིག་པ་ཇི་སྙེད་ཅིག་འབྱང་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གལ་ཏེ་གང་ཟག་མཐུ་ཆེན་པོ་དང་ལྡན་པ་གཅིག་འཇིག་རྟེན་དུ་མངོན་པར་བྱུང་སྟེ། སྔ་དྲོའི་དུས་སུ་ཡང་རིན་པོ་ཆེ་སྣ་བདུན་གྱིས་འཛམ་བུ་གླིང་ཡོངས་སུ་བཀང་ནས་སངས་རྒྱས་དང་དགེ་འདུན་ལ་
འབུལ་བ་དང་། ཉི་མའི་གུང་ལ་ཡང་རིན་པོ་ཆེ་སྣ་བདུན་གྱིས་འཛམ་བུའི་གླིང་ཡོངས་སུ་བཀང་སྟེ་སངས་རྒྱས་དང་དགེ་འདུན་ལ་འབུལ་བ་དང་། ཕྱི་དྲོའི་དུས་སུ་ཡང་རིན་པོ་ཆེ་སྣ་བདུན་གྱིས་འཛམ་བུའི་གླིང་ཡོངས་སུ་བཀང་སྟེ་སངས་རྒྱས་དང་དགེ་འདུན་ལ་འབུལ་བ་དང་། དེ་བཞིན་དུ་ཉིན་རེ་རེར་ཡང་རྒྱུན་མི་འཆད་པར་ལོ་བརྒྱ་སྟོང་གི་བར་དུ་སྦྱིན་པ་བྱིན་ན་གང་ཟག་དེའི་བསོད་ནམས་ཀྱི་ཚོགས་དེ་མང་བ་ཡིན་ནམ། བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོས་གསོལ་པ། ཤིན་ཏུ་མང་ངོ་། །བཅོམ་ལྡན་འདས་ཤིན་ཏུ་མང་ངོ་། །བདེ་བར་གཤེགས་པ་གང་ཟག་དེའི་བསོད་ནམས་ཀྱི་ཚོགས་ནི་ཚད་མ་མཆིས། དཔག་ཏུ་མ་མཆིས་ཏེ། བརྗོད་པའམ། བརྩི་བའམ། བགྲང་བའམ། དཔེར་ཡང་མི་བཟོད་དེ། སངས་རྒྱས་ཉག་གཅིག་གིས་མཁྱེན་གྱི་གཞན་གྱིས་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ནོ། །དེ་དེ་བཞིན་ཏེ། ཁྱོད་ཀྱིས་སྨྲས་པ་དེ་བཞིན་ནོ། །གལ་ཏེ་རྒྱལ་རིགས་དགེ་བ་ནས་བྲམ་ཟེ་དགེ་བའི་བར་དུ་གང་ཞིག་སྡིག་པའི་འཁོར་ལོ་རྣམ་པ་བཅུ་པོ་བདག་ཀྱང་མི་སྤྱོད་ལ་ཕ་རོལ་པོ་གཞན་སྤྱོད་པ་དག་སྡིག་པའི་འཁོར་ལོ་བཅུ་སྤོང་བར་ཡང་གཞན་ལ་སྟོན་པའི་བསོད་ནམས་ཀྱི་ཕུང་པོ་ནི་བསོད་ནམས་ཀྱི་ཕུང་པོ་སྔ་མ་བས་ཚད་མེད། དཔག་ཏུ་མེད། བརྗོད་པར་རམ། བརྩི་བས་སམ། བགྲང་བས་སམ། དཔེར་ཡང་མི་བཟོད་པར་ཆེའོ། །རིགས་ཀྱི་བུ་གཞན་ཡང་འདི་ལྟ་སྟེ། གང་ཟག་མཐུ་ཆེན་པོ་དང་ལྡན་པ་གཅིག་འཇིག་རྟེན་དུ་མངོན་པར་བྱུང་སྟེ་ཕྱོགས་བཞིའི་དགེ་འདུན་གྱི་ཕྱིར་གཙུག་ལག་ཁང་དང་། གནས་ཁང་ཤིན་ཏུ་བཟང་ཞིང་ཡངས་པ་གླིང་བཞི་དང་མཉམ་པ་བརྩིགས་ནས་གནས་དེ་དག་ཀུན་ཏུ་ཁྲི་སྟན་དང་། ན་བཟའ་དང་། བསོད་སྙོམས་དང་། སྙུན་གྱི་རྐྱེན་སྨན་དང་། འཚོ་བའི་ཡོ་བྱད་ཐམས་ཅད་དང་ལྡན་པར་བཤམས་ཏེ་དེ་བཞིན་གཤེགས་པ་དང་། ཉན་ཐོས་དང་། བྱང་ཆུབ་སེམས་དཔའི་ཉེ་གནས་ཆེན་པོའི་འཁོར་ཐམས་ཅད་དེ་ན་བཞུགས་པ་ལ། བརྩོན་འགྲུས་སུ་དགེ་བའི་ཕྱོགས་རྣམ་པ་སྣ་ཚོགས་ལ་ནན་ཏན་བྱེད་ཅིང་ཉིན་མཚན་ལེ་ལོ་མེད་པར་
ལོ་བྱེ་བ་ཁྲག་ཁྲིག་བརྒྱ་སྟོང་གི་བར་དུ་མཆོད་པ་དང་བསྙེན་བཀུར་རྒྱུན་མི་འཆད་པར་བྱེད་ན། གང་ཟག་དེའི་བསོད་ནམས་ཀྱི་ཕུང་པོ་ཤིན་ཏུ་མང་བ་ཡིན་ནམ། བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོས་གསོལ་པ། ཤིན་ཏུ་མང་ངོ་། །བཅོམ་ལྡན་འདས་ཤིན་ཏུ་མང་ངོ་། །བདེ་བར་གཤེགས་པ་གང་ཟག་དེའི་བསོད་ནམས་ཀྱི་ཕུང་པོ་ནི་ཚད་མ་མཆིས། དཔག་ཏུ་མ་མཆིས་ཏེ། བརྗོད་པར་རམ། བརྩི་བས་སམ། བགྲང་བས་སམ། དཔེར་ཡང་མི་བཟོད་དེ། སངས་རྒྱས་ཉག་གཅིག་གིས་ནི་མཁྱེན་གྱི་གཞན་གྱིས་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་དེ་བཞིན་ནོ། །དེ་དེ་བཞིན་ཏེ། ཁྱོད་ཀྱིས་སྨྲས་པ་བཞིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ་གང་ཟག་མཐུ་ཆེན་པོ་དང་ལྡན་པ་གཅིག་འཇིག་རྟེན་དུ་མངོན་པར་བྱུང་སྟེ་ཕྱོགས་བཞིའི་དགེ་འདུན་གྱི་ཕྱིར་གཙུག་ལག་ཁང་དང་གནས་ཁང་ཤིན་ཏུ་བཟང་ལ་ཡངས་པ། གླིང་བཞི་པ་བཅུ་དང་མཉམ་པ་བརྩིགས་ཏེ། གནས་དེ་དག་ཀུན་ཏུ་ཁྲི་སྟན་དང་། ན་བཟའ་དང་། བསོད་སྙོམས་དང་། གསོས་སྨན་དང་། འཚོ་བའི་ཡོ་བྱད་ཐམས་ཅད་དང་ལྡན་པར་བཤམས་ཏེ་དེ་བཞིན་གཤེགས་པ་དང་། ཉན་ཐོས་དང་། བྱང་ཆུབ་སེམས་དཔའི་དགེ་འདུན་ཆེན་པོའི་ཉེ་གནས་ཐམས་ཅད་དེ་ན་བཞུགས་པ་ལ་བརྩོན་འགྲུས་སུ་དགེ་བའི་ཕྱོགས་རྣམ་པ་སྣ་ཚོགས་ལ་ནན་ཏན་བྱེད་ཅིང་ཉིན་མཚན་ལེ་ལོ་མེད་པར་ལོ་བརྒྱ་སྟོང་བྱེ་བ་ཁྲག་ཁྲིག་གི་བར་དུ་མཆོད་པ་དང་། བསྙེན་བཀུར་རྒྱུན་མི་འཆད་པར་བྱེད་ན། གང་ཟག་དེའི་བསོད་ནམས་ཀྱི་ཕུང་པོ་ཤིན་ཏུ་མང་བ་ཡིན་ནམ། བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོས་གསོལ་པ། ཤིན་ཏུ་མང་ངོ་། །བཅོམ་ལྡན་འདས་ཤིན་ཏུ་མང་ངོ་། །བདེ་བར་གཤེགས་པ་གང་ཟག་དེའི་བསོད་ནམས་ཀྱི་ཕུང་པོ་ནི་ཚད་མ་མཆིས། དཔག་ཏུ་མ་མཆིས་ཏེ། བརྗོད་པར་རམ། བརྩི་བས་སམ། བགྲང་བས་སམ། དཔེར་ཡང་མི་བཟོད་དེ། སངས་རྒྱས་ཉག་གཅིག་གིས་མཁྱེན་གྱི་གཞན་གྱིས་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ནོ། །དེ་དེ་བཞིན་ཏེ། ཇི་ལྟར་ཁྱོད་ཀྱིས་སྨྲས་པ་
བཞིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ། གང་ཟག་མཐུ་ཆེན་པོ་དང་ལྡན་པ་གཅིག་འཇིག་རྟེན་དུ་མངོན་པར་བྱུང་སྟེ། སངས་རྒྱས་ཀྱི་རིང་བསྲེལ་གྱི་ཕྱིར་མཆོད་རྟེན་ཤིན་ཏུ་མཛེས་པ། མཐོ་ཞིང་ཡངས་པ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དང་མཉམ་པ་བརྩིགས་ལ་སྔར་བཤད་པ་བཞིན་ཕྱོགས་བཞིའི་དགེ་འདུན་གྱི་ཕྱིར་གཙུག་ལག་ཁང་དང་། གནས་ཁང་བརྩིགས་པའི་བསོད་ནམས་ཀྱི་ཕུང་པོ་བས་སངས་རྒྱས་ཀྱི་རིང་བསྲེལ་གྱི་ཕྱིར་མཆོད་རྟེན་བརྩིགས་པའི་བསོད་ནམས་ཀྱི་ཕུང་པོ་ཆེ་སྟེ། བརྒྱའི་ཆར་ཡང་ཉེ་བར་མི་འགྲོ་བ་ནས་སྟོང་གི་ཆར་ཡང་ཉེ་བར་མི་འགྲོའོ། །བརྒྱ་སྟོང་གི་ཆར་ཡང་ཉེ་བར་མི་འགྲོའོ། །བྱེ་བའི་ཆར་ཡང་ཉེ་བར་མི་འགྲོའོ། །ཁྲག་ཁྲིག་གི་ཆར་ཡང་ཉེ་བར་མི་འགྲོའོ། །གྲངས་ཀྱི་ཆར་རམ། རྩིས་ཀྱི་ཆར་རམ། དཔག་པའི་ཆར་རམ། དཔེའི་ཆར་རམ། རྒྱུའི་ཆར་ཡང་ཉེ་བར་མི་འགྲོའོ། །རིགས་ཀྱི་བུ་གཞན་ཡང་འདི་ལྟ་སྟེ། གལ་ཏེ་ཕ་རོལ་ཏུ་ཕྱིན་པ་ཐོབ་པ། རྣམ་པར་གྲོལ་བ་བརྒྱད་དང་ལྡན་པ་བསམ་གཏན་ལ་སྙོམས་པར་ཞུགས་པའི་དགྲ་བཅོམ་པ་ཆེན་པོ་ཤ་སྟག་གིས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་ཡོངས་སུ་གང་བ་ནི་འདི་ལྟ་སྟེ། འབྲས་ཀྱི་ལྗང་བུའམ། ཏིལ་ལམ། འོད་མའམ། འདམ་བུའམ། བུ་རམ་ཤིང་གི་ཚལ་ལྟ་བུར་གྱུར་ལ། དེ་དག་ཐམས་ཅད་བཅིང་བ་ལྔས་བཅིངས་ནས་ལོ་བྱེ་བ་བརྒྱ་སྟོང་སྙེད་ལོན་པ་ལས་མཐུ་ཆེན་པོ་དང་ལྡན་པའི་གང་ཟག་གཅིག་འཇིག་རྟེན་དུ་མངོན་པར་བྱུང་སྟེ། བསོད་ནམས་འདོད་པའི་ཕྱིར་དེ་དག་གི་བཅིངས་པ་ཐམས་ཅད་བཀྲོལ་ནས་དགྲ་བཅོམ་པ་དེ་དག་ཐམས་ཅད་སྤོས་ཆུས་བཀྲུས་ཏེ། ཆོས་གོས་དང་། ལྷུང་བཟེད་ལོ་བརྒྱ་སྟོང་གི་བར་དུ་ཕུལ་ནས། གནས་ཁང་དང་། ཁྲི་སྟན་དང་། གོས་དང་། བསོད་སྙོམས་དང་། ནད་ཀྱི་གསོས་སྨན་དང་། འཚོ་བའི་ཡོ་བྱད་རྣམ་པ་སྣ་ཚོགས་ཀྱང་ཡིད་བཞིན་དུ་བྱིན་ལ། དགྲ་བཅོམ་པ་དེ་དག་མྱ་ངན་ལས་འདས་ནས་ཀྱང་མཆོད་པ་བྱས་ཏེ། བསྲེགས་ནས་དེ་དག་གི་རིང་བསྲེལ་བསྡུས་ནས་རིན་པོ་ཆེ་སྣ་བདུན་གྱི་མཆོད་རྟེན་གྱི་ནང་དུ་བཅུག་གོ །གཞན་ཡང་རིན་པོ་ཆེའི་རྒྱལ་མཚན་དང་། བ་དན་དང་། གདུགས་དང་།
སྤོས་དང་། མེ་ཏོག་དང་། རོལ་མོ་རྣམ་པ་སྣ་ཚོགས་ཀྱིས་མཆོད་པའི་བསོད་ནམས་ཀྱི་ཕུང་པོ་བས་སངས་རྒྱས་ཀྱི་རིང་བསྲེལ་གྱི་ཕྱིར་མཆོད་རྟེན་བརྩིགས་པའི་བསོད་ནམས་ཀྱི་ཕུང་པོ་མང་སྟེ། དགྲ་བཅོམ་པའི་བཅིང་བ་བཀྲོལ་ཏེ་མཆོད་པ་བྱས་པའི་བསོད་ནམས་ཀྱིས། བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆར་ཡང་ཉེ་བར་མི་འགྲོའོ། །བརྒྱ་སྟོང་གི་ཆར་ཡང་ཉེ་བར་མི་འགྲོའོ། །བྱེ་བའི་ཆར་ཡང་ཉེ་བར་མི་འགྲོའོ། །ཁྲག་ཁྲིག་གི་ཆར་ཡང་ཉེ་བར་མི་འགྲོ་བ་ནས། རྩིས་ཀྱི་ཆར་རམ། གྲངས་ཀྱི་ཆར་རམ། དཔག་པའི་ཆར་རམ། དཔེའི་ཆར་རམ། རྒྱུའི་ཆར་ཡང་ཉེ་བར་མི་འགྲོའོ། །རིགས་ཀྱི་བུ་གལ་ཏེ་རྒྱལ་རིགས་དགེ་བ་ནས་བྲམ་ཟེ་དགེ་བའི་བར་དུ་གང་གིས་སྡིག་པའི་འཁོར་ལོ་བཅུ་པོ་བདག་ཀྱང་མི་བྱེད་ལ། གཞན་དག་ཀྱང་སྡིག་པའི་འཁོར་ལོ་བཅུ་པོ་མ་སྤྱོད་ཅིག་པར་གྲོས་འདེབས་ན་དེའི་བསོད་ནམས་ཀྱི་ཕུང་པོ་ནི། བསོད་ནམས་ཀྱི་ཕུང་པོ་སྔ་མ་གང་བས་ཀྱང་ཚད་མེད། དཔག་ཏུ་མེད། བརྗོད་དུ་མེད་པར་ཆེ་སྟེ། ཇི་སྙེད་ཀྱི་བསོད་ནམས་སྐྱེས་པ་དེ་སྙེད་ཀྱི་སྡིག་ཀྱང་ཡོངས་སུ་འབྱང་བར་འགྱུར་རོ། །རིགས་ཀྱི་བུ་གལ་ཏེ་རྒྱལ་རིགས་དགེ་བའམ། བློན་པོ་དགེ་བའམ། ཁྱིམ་བདག་གམ། ཚོང་དཔོན་ནམ། དགེ་སྦྱོང་ངམ། བྲམ་ཟེ་དགེ་བ་གང་ཞིག་མ་འོངས་པའི་དུས་ལྔ་བརྒྱའི་ཐ་མ་ལ་དམ་པའི་ཆོས་རྣམ་པར་འཇིག་ཏུ་ཉེ་བ་ན་ངས་བསྟན་པའི་ཆོས་ཀྱི་མིག་ཤིན་ཏུ་སྲུང་ཞིང་བདག་ཀྱང་ཤིན་ཏུ་སྡོམ་ལ། ཕ་རོལ་པོ་གཞན་ཡང་སྲུང་བ། འཇིག་རྟེན་ཕྱི་མའི་བག་བྱེད་པ་ངའི་བསྟན་པ་ལ་རབ་ཏུ་བྱུང་བའི་སློབ་མ་ཆོས་ཀྱི་སྣོད་དུ་གྱུར་པའམ་ཆོས་ཀྱི་སྣོད་དུ་མ་གྱུར་པ་ཡང་རུང་། མཐར་ནི་ཚུལ་ཁྲིམས་མེད་པ་ཡང་རུང་སྟེ། སྐྲ་དང་ཁ་སྤུ་བྲེགས་ནས་གོས་ངུར་སྨྲིག་གྱོན་པ་ལ་ཤིན་ཏུ་བག་བྱེད་ཅིང་བསྟི་སྟང་དང་བཅས་པས་མཆོད་དེ་གནོད་པ་མི་བྱེད་དམ། གཞན་ཡང་ཐེག་པ་གསུམ་གྱི་དམ་པའི་ཆོས་ཤིན་ཏུ་སྲུང་ཞིང་ཉན་ཏེ་འཛིན་པ་དང་། ཉན་ཐོས་ཀྱི་ཆོས་ལ་བསྟི་སྟང་བྱེད་པ་ན་རང་སངས་རྒྱས་ཀྱི་ཐེག་པའི་ཆོས་དང་ཐེག་པ་ཆེན་པོའི་ཆོས་ལ་མི་འཕྱ་མི་སྐུར་པ་དང་། རང་སངས་རྒྱས་ཀྱི་ཐེག་པ་པ་དང་། ཐེག་པ་ཆེན་པོ་ལ་ཕྲག་དོག་མི་སྐྱེད་པ་དང་། རང་སངས་རྒྱས་ཀྱི་ཐེག་པའི་
ཆོས་ལ་རིམ་གྲོ་བྱེད་དེ་ཉན་ཅིང་འཛིན་པ་ན། ཉན་ཐོས་ཀྱི་ཐེག་པ་དང་། ཐེག་པ་ཆེན་པོའི་ཆོས་ལ་མི་འཕྱ་མི་སྐུར། ཉན་ཐོས་ཀྱི་ཐེག་པ་དང་། ཐེག་པ་ཆེན་པོ་ལ་ཕྲག་དོག་མི་སྐྱེད་པ་དང་། ཐེག་པ་ཆེན་པོའི་ཆོས་ལ་རིམ་གྲོ་བྱེད་དེ་ཉན་ཅིང་འཛིན་པ་ན་ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པའི་ཆོས་ལ་མི་བརྙས། མི་སྐུར་ཅིང་། ཉན་ཐོས་ཀྱི་ཐེག་པ་པ་དང་། རང་སངས་རྒྱས་ཀྱི་ཐེག་པ་ལ་ཕྲག་དོག་མི་སྐྱེད་ལ། ཉན་ཐོས་ཀྱི་ཐེག་པ་དང་རང་སངས་རྒྱས་ཀྱི་ཐེག་པའི་ཆོས་མངོན་དུ་མི་བྱེད་དོ། །ཐེག་པ་ཆེན་པོའི་ཆོས་ཡང་དག་པ་ཉིད་མངོན་དུ་བྱེད་པ་དང་། ཐེག་པ་ཆེན་པོ་ལ་གནས་པས་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། བརྩོན་འགྲུས་རྩོམ་པ་ནས་འབྲས་བུ་ལ་གནས་པའི་བར་དུ་ནན་ཏན་བྱེད་པའི་གང་ཟག་ལ་རྟག་ཏུ་བསྙེན་བཀུར་བྱེད་ཅིང་གཡོག་དང་། མཆོད་པ་དང་། དད་པའི་སེམས་ཀྱིས་བཀུར་སྟི་བྱེད་དེ་འདྲི་བ་དང་། ཉན་པ་དང་། འཛིན་པར་བྱེད་པ་དང་། ཚུལ་ཁྲིམས་ཉམས་པ་སྡིག་པ་སྤྱོད་པའི་དགེ་སློང་དག་རིང་དུ་སྤོང་བ་དང་། དད་པས་ཕུལ་བའི་ཕྱོགས་བཞིའི་དགེ་འདུན་གྱི་ནོར་ལ་ཆོས་མ་ཡིན་པས་ཆུད་གཟོན་དུ་མི་གཞུག་པ་དང་། ཕྱོགས་བཞིའི་དགེ་འདུན་གྱི་ནོར་དང་། མཆོད་རྟེན་དང་། དགེ་འདུན་གྱི་ཁུད་པའི་ནོར་ལ་བདག་ཀྱང་ཐུག་ཐུབ་མི་བྱེད་ཅིང་། ཕ་རོལ་པོ་གཞན་ཡང་ཐུག་ཐུབ་ཏུ་སྤྱོད་དུ་མི་འཛུད་པ་དང་། ཐེག་པ་གསུམ་གྱི་ཆོས་སྨྲ་བའི་གང་ཟག་ལ་ཤིན་ཏུ་བསྟི་སྟང་དང་བཅས་པས་མཆོད་ཅིང་མཐུ་བསྟང་བ་དང་། ཕ་རོལ་པོ་གཞན་དག་འཕྱ་ཞིང་སྐུར་པ་དང་། སྨོད་དུ་མི་གཞུག་པ་དང་། རབ་ཏུ་བྱུང་བའི་གང་ཟག་ལ་ཤིན་ཏུ་དད་པས་སྤྲོ་བ་སྐྱེད་པ་དང་། དེ་བཞིན་གཤེགས་པས་གསུངས་པའི་འཕགས་པའི་བཀའ་ལ་དད་ཅིང་འཛིན་པ་དང་། མཆོད་རྟེན་མི་འཇིག་པ་དང་། ཕྱོགས་བཅུའི་དགེ་འདུན་གྱི་གནས་གཙུག་ལག་ཁང་སྐྱོང་བ་དང་། ངའི་བསྟན་པ་ལ་རབ་ཏུ་བྱུང་བའི་སློབ་མ་དག་ལ་དབང་མི་ཟ་ཞིང་ཕྱིར་ཡང་ཁྱིམ་པར་མི་འབེབས་པ་དང་། སྡིག་པའི་འཁོར་ལོ་རྣམ་པ་བཅུ་པོ་དག་ལ་བདག་ཀྱང་མི་སྤྱོད་ཅིང་ཕ་རོལ་པོ་གཞན་ཡང་སྡིག་པའི་འཁོར་ལོ་རྣམ་པ་བཅུ་པོ་ཡོངས་སུ་
སྤོངས་ཤིག་པར་གྲོས་འདེབས་པ་དང་། རྒྱལ་པོ་སྔ་མའི་ཆོས་ལུགས་དང་སྲིད་ཀྱིས་འཚོ་ཞིང་དགེ་བ་བཅུའི་ལས་ཀྱི་ལམ་གྱིས་འཇིག་རྟེན་མང་པོ་ཡོངས་སུ་སྡུད་ཅིང་སྟོན་པ་དང་། རྟག་ཏུ་དགེ་བའི་བཤེས་གཉེན་ལ་སྟེན་པ་དང་། དཀོན་མཆོག་གསུམ་གྱི་གདུང་འཚོབ་ཅིང་ཤིན་ཏུ་རྒྱས་པར་བྱེད་པ་དང་། ཆོས་ཀྱི་མིག་ནམ་དུ་ཡང་མི་ནུབ་པར་སྲུང་བའི་རྒྱལ་རིགས་དགེ་བ་ནས་བྲམ་ཟེ་དགེ་བའི་བར་དུ་དེ་དག་དེ་ལྟ་བུའི་ཡོན་ཏན་དང་ལྡན་པས་ན་དེ་དག་འཚོ་བས་སྤྱོད་པ་ཆུད་ཟ་བར་མི་འགྱུར་བ་དང་། ལྷ་དང་། མི་དང་། གནོད་སྦྱིན་དང་། ཡི་དགས་དང་། ལུས་སྲུལ་པོ་ལ་སོགས་པ་ཐམས་ཅད་ཀྱང་དགའ་སྟེ་བྱམས་པའི་སེམས་ཀྱིས་སྲུང་ཞིང་སྐྱོབ་བོ། །ཆོས་ཀྱི་སྣོད་དུ་གྱུར་པ་བསོད་ནམས་ཀྱི་ཞིང་ཡང་དག་པ་ཐམས་ཅད་ཀྱང་དགའ་ཞིང་སྙིང་རྗེའི་སེམས་ཀྱིས་སྐྱོབ་ཅིང་རྗེས་སུ་འཛིན་པར་འགྱུར་རོ། །དེའི་རྒྱུ་དེའི་རྐྱེན་གྱིས་གནས་པའི་ཡུལ་དང་། སྐྱེ་བོ་ཐམས་ཅད་ཀྱང་ཕྱིར་ཞིང་བདེ་ལ་ཤིན་ཏུ་སྐྱིད་པ་དང་། ཕྱིའི་དགྲས་ཀྱང་གནོད་པ་བྱེད་མ་ནུས་ཤིང་ཐམས་ཅད་བཀའ་ཉན་ཏེ་མ་ཕམ་པར་ངང་འདུ་བ་དང་། དེའི་དབང་གིས་དགེ་བའི་ཕྱོགས་ལ་ཕྱིར་ཞིང་བརྩོན་ཏེ་མི་དགེ་བའི་རྒྱུད་ཡོངས་སུ་སྐེམས་པ་དང་། ལྷ་དང་མི་ལ་སོགས་པ་ཡོངས་སུ་རྒྱས་ཤིང་ཀུན་ཏུ་སྲུང་བའི་ཕྱིར་ཚེ་ཤིན་ཏུ་རིང་བར་འགྱུར་བ་དང་། བདག་གི་ཉོན་མོངས་པ་ཡོངས་སུ་འཇོམས་ཤིང་ཕ་རོལ་པོའི་ཉོན་མོངས་པ་ཡང་འཇིལ་བར་བྱེད་པ། བྱང་ཆུབ་སེམས་དཔའི་ལམ་ཕ་རོལ་དུ་ཕྱིན་པ་དྲུག་ཡོངས་སུ་བཟུང་བས་ལོག་པར་ལྟ་བའི་ལམ་ངན་པ་ཐམས་ཅད་ཡོངས་སུ་བཅོམ་པས་འཁོར་བའི་རྒྱ་མཚོར་ཡུན་རིང་པོར་འཁོར་བ་ལས་ལྡོག་པ། སྡིག་པའི་བཤེས་གཉེན་སྤོང་ཞིང་དགེ་བའི་བཤེས་གཉེན་ལ་རྟག་ཏུ་སྟེན་པ་དང་། གང་ནས་གང་དུ་སྐྱེ་བའི་གནས་ཐམས་ཅད་དུ་སངས་རྒྱས་དང་། བྱང་ཆུབ་སེམས་དཔའ་དང་ཕྲད་ཅིང་བསྙེན་བཀུར་བ་དང་། མཆོད་པ་རྒྱུན་མི་འཆད་པར་བྱེད་པར་འགྱུར་བ་དང་། རིང་པོ་མི་ཐོགས་པར་བསམས་བཞིན་དུ་གང་ནས་གང་དུ་དགའ་བའི་སངས་རྒྱས་ཀྱི་ཞིང་དེ་དང་དེ་དག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ནས་དེའི་ཚེ་འཁོར་དེའི་ནང་ནས་ལྷའི་དབང་པོ་འཁོར་དང་བཅས་པ་ཐམས་ཅད་ནས་ཤ་ཟའི་དབང་པོ་འཁོར་དང་བཅས་པ་ཐམས་
ཅད་ཀྱི་བར་དུ་འདུག་པ་ལས་ལངས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་གཏུགས་ཏེ་ཐལ་མོ་སྦྱར་ནས་བསྟི་སྟང་དང་བཅས་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་མ་མཆིས་པའི་དུས་ལྔ་བརྒྱའི་ཐ་མ་ལ་སངས་རྒྱས་ཀྱི་ཞིང་འདིར་དམ་པའི་ཆོས་རབ་ཏུ་རྣམ་པར་འཇིག་ཏུ་ཉེ་བ་ན། གལ་ཏེ་རྒྱལ་རིགས་དགེ་བ་ནས་བྲམ་ཟེ་དགེ་བའི་བར་དུ་གང་སྡིག་པའི་འཁོར་ལོ་བཅུ་པོ་བདག་ཀྱང་ཡོངས་སུ་སྤངས་ལ་གཞན་ཡང་ཡོངས་སུ་སྤོངས་ཤིག་པར་གྲོས་འདེབས་པ་དང་། བདག་དང་གཞན་སྲུང་བ་ལ་མཁས་པ། འཇིག་རྟེན་སླད་མའི་བག་བགྱིད་པ་ལ་མཁས་པ། དམ་པའི་ཆོས་སྲུང་བ། དཀོན་མཆོག་གསུམ་གྱི་གདུང་འཚོབ་ཅིང་རྒྱུན་མི་འཆད་པར་རྒྱས་པར་བགྱིད་པ་ནས། མདོར་ན་བཅོམ་ལྡན་འདས་ཀྱིས་གསུངས་པ་ལྟར་གང་ཟག་དེ་དག་ལ་སོགས་པ་ཐེག་པ་གསུམ་གྱི་ཆོས་ལ་བསྟི་སྟང་དང་བཅས་པས་ཉན་ཅིང་འཛིན་ཏེ། ནམ་དུ་ཡང་མི་འཆབ་པ་དང་། ཐེག་པ་གསུམ་ལ་གནས་པའི་གང་ཟག་ལ་ཤིན་ཏུ་སྲུང་ཞིང་མཆོད་པ་བགྱིད་དེ་གནོད་པ་མི་བགྱིད་པ་དང་། དཀོན་མཆོག་གསུམ་གྱི་ནོར་རྫས་ལ་ཤིན་ཏུ་སྲུང་ཞིང་གོད་པར་མི་བགྱིད་པའི་རྒྱལ་རིགས་དགེ་བ་ནས་བྲམ་ཟེ་དགེ་བའི་བར་དུ་དེ་དག་ལ་བདག་ཅག་འཁོར་དང་བཅས་པས་བསྲུང་བ་དང་། བསྐྱབ་པ་དང་། ཆོས་རྣམ་པ་འདི་བཅུ་ཡང་སྐྱེ་ཞིང་འཕེལ་བར་བགྱིའོ། །བཅུ་གང་ཞེ་ན་ཚེ་རིང་བར་འགྱུར་བ་དང་། བགེགས་མེད་པ་སྐྱེ་ཞིང་འཕེལ་བ་དང་། ནད་མེད་པ་སྐྱེ་ཞིང་འཕེལ་བ་དང་། འཁོར་སྐྱེ་ཞིང་འཕེལ་བ་དང་། ནོར་དང་རིན་པོ་ཆེ་སྐྱེ་ཞིང་འཕེལ་བ་དང་། འཚོ་བའི་ཡོ་བྱད་སྐྱེ་ཞིང་འཕེལ་བ་དང་། གོ་འཕང་སྐྱེ་ཞིང་འཕེལ་བ་དང་། གྲགས་པ་སྐྱེ་ཞིང་འཕེལ་བ་དང་། དགེ་བའི་གྲོགས་པོ་སྐྱེ་ཞིང་འཕེལ་བ་དང་། ཤེས་རབ་སྐྱེ་ཞིང་འཕེལ་བ་སྟེ། བཙུན་པ་བཅོམ་ལྡན་འདས་གལ་ཏེ་རྒྱལ་རིགས་དགེ་བ་དང་བྲམ་ཟེ་དགེ་བའི་བར་དུ་སྡིག་པའི་འཁོར་ལོ་རྣམ་པ་བཅུ་པོ་ཡོངས་སུ་སྤོང་ཞིང་ཕ་རོལ་པོ་གཞན་ཡང་སྤོང་བར་གྲོས་འདེབས་ལ། ཡོན་ཏན་སྔར་སྨོས་པ་དང་ལྡན་ན་བདག་ཀྱང་སྲུང་ཞིང་སྐྱོབ་པ་དང་ཆོས་
རྣམ་པ་བཅུ་པོ་ཡང་སྐྱེ་ཞིང་འཕེལ་བར་འགྱུར་རོ། །བཅོམ་ལྡན་འདས་གཞན་ཡང་རྒྱལ་རིགས་དགེ་བ་དང་། བྲམ་ཟེ་དགེ་བའི་བར་དུ་གང་སྔར་སྨོས་པའི་ཡོན་ཏན་དེ་དག་དང་ལྡན་ན་བདག་ཅག་འཁོར་དང་བཅས་པས་དེ་ལ་བསྲུང་ཞིང་བསྐྱབ་པ་དང་། ཆོས་རྣམ་པ་བཅུ་པོ་འདི་དང་ཡོངས་སུ་བྲལ་བར་བགྱིའོ། །བཅུ་གང་ཞེ་ན། འདི་ལྟ་སྟེ་དགྲ་ཞེ་འགྲས་པ་ཐམས་ཅད་དང་ཡོངས་སུ་བྲལ་བ་དང་། ཡིད་དུ་མི་འོང་བའི་གཟུགས་དང་། སྒྲ་དང་། དྲི་དང་། རོ་དང་། རེག་བྱའི་ཡུལ་དང་ཡོངས་སུ་བྲལ་བ་དང་། རིམས་དང་ནད་ཐམས་ཅད་དང་ཡོངས་སུ་བྲལ་བ་དང་། ལོག་པར་འཛིན་ཅིང་ངན་པར་ལྟ་བ་ཐམས་ཅད་དང་ཡོངས་སུ་བྲལ་བ་དང་། ལོག་པ་ལ་སྐྱབས་སུ་འགྲོ་བ་དང་ཡོངས་སུ་བྲལ་བ་དང་། ལོག་པའི་ལྟས་ངན་པ་ཐམས་ཅད་དང་ཡོངས་སུ་བྲལ་བ་དང་། ལོག་པའི་ལས་ངན་པའི་དངོས་པོ་ཐམས་ཅད་དང་ཡོངས་སུ་བྲལ་བ་དང་། ལོག་པའི་བཤེས་གཉེན་ངན་པ་ཐམས་ཅད་དང་ཡོངས་སུ་བྲལ་བ་དང་། ཁྱིམ་ན་གནས་པའི་འདམ་རྫབ་ཐམས་ཅད་དང་ཡོངས་སུ་བྲལ་བ་དང་། དུས་མ་ཡིན་པར་བློ་བུར་དུ་འཆི་བ་ཐམས་ཅད་དང་ཡོངས་སུ་བྲལ་བ་སྟེ། བཙུན་པ་བཅོམ་ལྡན་འདས་གལ་ཏེ་ཤིན་ཏུ་དགེ་བའི་རྒྱལ་རིགས་ནས་བྲམ་ཟེ་དགེ་བའི་བར་དུ་གང་ཞིག་ཡོན་ཏན་སྔར་གསུངས་པ་རྣམས་དང་ལྡན་ན་བདག་ཅག་འཁོར་དང་བཅས་ཏེ་དེ་ལ་སྲུང་ཞིང་སྐྱོབ་པ་དང་། ཡོངས་སུ་བྲལ་བའི་ཆོས་རྣམ་པ་བཅུ་པོ་འདི་ཡང་ཐོབ་པར་བགྱིད་དོ། །བཅོམ་ལྡན་འདས་གཞན་ཡང་རྒྱལ་རིགས་དགེ་བ་ནས་བྲམ་ཟེ་དགེ་བའི་བར་དུ་གང་གིས་སྔར་གསུངས་པའི་ཡོན་ཏན་ཡོངས་སུ་རྫོགས་པར་ནན་ཏན་བྱེད་ན་བདག་ཅག་འཁོར་དང་བཅས་ཏེ་བསྲུང་ཞིང་བསྐྱབ་པར་འཚལ་ལོ། །རྒྱལ་པོ་འཁོར་དང་བཅས་པ་དང་ཡུལ་དེ་ན་གནས་པའི་མི་ཐམས་ཅད་ཀྱང་ཆོས་རྣམ་པ་འདི་བཅུ་དང་ཡོངས་སུ་བྲལ་བར་བགྱིའོ། །བཅུ་གང་ཞེ་ན། ཡུལ་ཕ་རོལ་གྱི་དགྲ་ཐམས་ཅད་དང་། ཡོངས་སུ་བྲལ་བ་དང་། བདག་གི་ཡུལ་གྱི་དགྲ་ཐམས་ཅད་དང་བྲལ་བ་དང་། བཀྲ་མི་ཤིས་པའི་ཡི་དགས་ཐམས་ཅད་དང་ཡོངས་སུ་བྲལ་བ་དང་། ཐན་པ་དང་ཡོངས་སུ་བྲལ་བ་དང་། གནོད་པར་འགྱུར་བའི་ཆར་ཆུ་
དང་ཡོངས་སུ་བྲལ་བ་དང་། དུས་མ་ལགས་པའི་ཚ་བ་དང་། གྲང་བ་དང་། རླུང་དང་། ཆར་དྲག་པོ་དང་། སད་དང་། སེར་བ་གནོད་པར་འགྱུར་བ་ཐམས་ཅད་དང་ཡོངས་སུ་བྲལ་བ་དང་། གཟའ་དང་ལྟས་ངན་དུ་གྱུར་པ་ཐམས་ཅད་དང་ཡོངས་སུ་བྲལ་བ་དང་། མུ་གེའི་གནོད་པ་ཐམས་ཅད་དང་ཡོངས་སུ་བྲལ་བ་དང་། དུས་མ་ཡིན་པར་ནད་ཀྱིས་འཆི་བར་འགྱུར་བ་དང་ཡོངས་སུ་བྲལ་བ་དང་། ལོག་པར་འཛིན་ཅིང་ངན་པར་ལྟ་བ་ཐམས་ཅད་དང་ཡོངས་སུ་བྲལ་བ་སྟེ། བཙུན་པ་བཅོམ་ལྡན་འདས་གལ་ཏེ་རྒྱལ་རིགས་དགེ་བའི་རྒྱལ་པོས་ཡོན་ཏན་སྔར་གསུངས་པ་དེ་དག་ཀུན་ལ་ནན་ཏན་བགྱིད་ཅིང་ཡོངས་སུ་རྫོགས་པར་བྱེད་ན་བདག་ཅག་འཁོར་དང་བཅས་པས་བསྲུང་ཞིང་བསྐྱབ་པར་འཚལ་ལོ། །རྒྱལ་པོ་འཁོར་དང་བཅས་པ་དང་། ཡུལ་དེ་ན་གནས་པའི་མི་ཐམས་ཅད་ཀྱང་ཡོངས་སུ་བྲལ་བའི་ཆོས་བཅུ་པོ་འདི་དག་ཐོབ་པར་བགྱིད་དོ། །དེ་ནས་བཅོམ་ལྡན་འདས་ཀྱིས་ལྷའི་དབང་པོ་འཁོར་དང་བཅས་པ་ནས་ཤ་ཟའི་དབང་པོའི་བར་དུ་འཁོར་དང་བཅས་པ་ལ་ལེགས་སོ་ལེགས་སོ་ཞེས་བསྟོད་ནས་ཁྱེད་རྣམས་འདི་སྐད་དུ་ཡི་དམ་བཅས་པའི་དངོས་པོ་འདི་དག་ཁྱེད་ཀྱིས་བྱ་བའི་རིགས་པ་སྟེ། དེའི་རྒྱུ་དེའི་རྐྱེན་གྱིས་ཁྱེད་ལའང་ཡུན་རིང་པོར་ཕན་པ་དང་བདེ་བའི་དོན་དུ་འགྱུར་རོ། །དེ་ནས་ཚངས་པ་ཆེན་པོ་ལྷའི་སྙིང་པོས་བཅོམ་ལྡན་འདས་ལ་ཡང་འདི་སྐད་ཅེས་གསོལ་ཏོ། །མ་མཆིས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་རིགས་དགེ་བ་ཐམས་ཅད་ཀྱི་སླད་དུ་ཡུལ་སྲུང་བ་ལ་སེམས་ཕྱིར་མི་ལྡོག་པའི་གཟུངས་འདི་དག་འཕུལ་ལོ། །ཡུལ་ཡོངས་སུ་བསྲུང་བའི་ཕྱིར་ཕྱིར་མི་ལྡོག་པའི་འཁོར་ལོ་ཞེས་བྱ་བའི་གཟུངས་སྔགས་ཆེན་པོའི་ཚིག་འདིའི་གཟི་བརྗིད་དང་མཐུས་མ་མཆིས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་རིགས་དགེ་བའི་རྒྱལ་པོ་ཐམས་ཅད་ལ་ཕས་རྒོལ་བའི་དགྲ་ཐམས་ཅད་ཀྱིས་མི་ཚུགས་པ་དང་། ཕས་རྒོལ་བའི་དགྲ་ཐམས་ཅད་ཞི་ཞིང་རང་ལྡོག་པར་འགྱུར་བ་དང་། ལུས་དང་། ངག་དང་། ཡིད་ཀྱི་ལས་ཤིན་ཏུ་སྡོམ་པ་དང་། མཁས་པ་རྣམས་ཀྱིས་བསྔགས་ཤིང་བསྟོད་པ་དང་། སྡིག་པའི་ཆོས་ཡོངས་སུ་སྤོང་ཞིང་དགེ་བའི་ཆོས་ལ་རྟག་ཏུ་ནན་ཏན་བགྱིད་པ་དང་། ངན་པར་
ལྟ་བ་དང་། ངན་པར་ཕྱོགས་པ་རྟག་ཏུ་སྤོང་ཞིང་ཐེག་པ་ཆེན་པོ་ལ་ཤིན་ཏུ་འབད་པའི་བརྩོན་འགྲུས་བརྟན་པས་ནན་ཏན་བགྱིད་པ་དང་། སྣོད་དུ་གྱུར་པའི་སེམས་ཅན་ཚད་མེད་གྲངས་མེད་པ་ཡོངས་སུ་སྨིན་པར་བགྱིད་པ་དང་། ཤེས་པ་གཞན་གྱི་དྲིང་ལ་མི་འབྲང་བར་མཁས་པའི་རང་བཞིན་ཅན་དུ་གྱུར་པ་ཕ་རོལ་དུ་ཕྱིན་པ་དྲུག་གི་རིན་པོ་ཆེའི་གཏེར་རྫོགས་པར་ནན་ཏན་བགྱིད་པས་ཁོང་ཁྲོ་བ་དང་། སེར་སྣ་དང་། ཕྲག་དོག་ལ་སོགས་པ་ཀུན་ནས་ཉོན་མོངས་པའི་དྲི་མ་ཐམས་ཅད་ཡོངས་སུ་སྤོང་བ་དང་། མི་དང་མི་མ་ཡིན་པ་ལ་སོགས་པ་ཐམས་ཅད་ཀྱིས་བསྟི་སྟང་དང་བཅས་པས་སྐྱོབ་པར་འགྱུར་བ་དང་བྱ་བ་རྣམས་ལ་བརྗེད་མི་ངས་པ་དང་། བསྡུ་བ་རྣམ་པ་བཞིའི་དངོས་པོ་ལ་དགའ་བས་སེམས་ཅན་མི་གཏོང་བ་དང་། རྟག་ཏུ་ཆོས་ཀྱི་སྣོད་བསོད་ནམས་ཀྱི་ཞིང་དུ་གྱུར་པ་དང་མི་འབྲལ་བར་འགྱུར་རོ། །ཡང་བཅོམ་ལྡན་འདས་ཀྱིས་ལྷའི་སྙིང་པོ་ལ་བཀའ་སྩལ་པ། ཁྱོད་ཀྱིས་མ་འོངས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་པོ་རྒྱལ་རིགས་དགེ་བའི་ཡུལ་བསྲུང་བའི་ཕྱིར་ཕྱིར་མི་ལྡོག་པའི་འཁོར་ལོའི་སྙིང་པོ་ཞེས་བྱ་བའི་གཟུངས་ཆེན་པོའི་ཚིག་སྨྲོས་ཤིག །ཡུལ་ཡོངས་སུ་བསྲུང་བ་ལ་ཕྱིར་མི་ལྡོག་པའི་འཁོར་ལོའི་སྙིང་པོ་ཞེས་བྱ་བའི་གཟུངས་ཆེན་པོའི་ཚིག་འདིའི་མཐུ་དང་གཟི་བརྗིད་ཀྱིས་མ་འོངས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་པོ་རྒྱལ་རིགས་དགེ་བ་ཐམས་ཅད་ལ་ཕས་རྒོལ་པའི་དགྲ་ཐམས་ཅད་ཀྱིས་མི་ཚུགས་པ་ནས་དེ་བཞིན་དུ་རྒྱས་པར་སངས་རྒྱས་དང་སངས་རྒྱས་ཀྱི་འཁོར་གྱི་བར་དུ་ཐམས་ཅད་དང་མི་འབྲལ་བར་བསྲུང་བར་འགྱུར་བ་སྨྲོས་ཤིག །དེ་ནས་ཚངས་པ་ཆེན་པོ་ལྷའི་སྙིང་པོས་ཡུལ་ཡོངས་སུ་སྲུང་བ་ལ་ཕྱིར་མི་ལྡོག་པའི་འཁོར་ལོའི་སྙིང་པོ་ཞེས་བྱ་བའི་གཟུངས་ཆེན་པོའི་ཚིག་འདི་དག་སྨྲས་སོ། །ཏད་ཡ་ཐཱ། མུ་ནི་མོ་རི། མུ་ན་གར་བྷེ། མུ་ནི་ཁི་ལི་དྷ་ཡེ། མུ་ནི་རོ་ག་བི་ཙ་ལེ། མུ་ནི་ཧ་ལི་ཏེ། མུ་ནི་ག་མེ། ཤུ་ཀླ་པཀྵེ། པཱ་ལ་ལ་པཀྵེ། མྲི་ལ་པཀྵེ། སོའུ་རི་ས་ཀྲི་ཏི། ཏོ་ར་ཎ་ཀྲི་ཙ་ལེ། པ་ཏ་ག་ཤ་ཀྲི་ཏེ། ཀུ་ཀུ་ལ་མྲི་ལེ། ཨ་པཀྵ་ས་ར། ཨོ་ད་ཧ་ཀི་ལི་བ་མུ་ནི་པཱ་ཐ་བ་སྭཱ་ཧཱ། ཚངས་པ་ཆེན་པོ་ལྷའི་སྙིང་པོས་གཟུངས་འདི་དག་སྨྲས་ནས་བཅོམ་
ལྡན་འདས་ལ་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་འཁོར་མང་པོ་དང་བཅས་ཏེ་བདག་གིས་བཤད་པའི་གཟུངས་ཆེན་པོ་འདི་ལ་རྗེས་སུ་ཡི་རང་བར་མཛད་དུ་གསོལ། བཅོམ་ལྡན་འདས་ཀྱིས་ལེགས་སོ་ལེགས་སོ་ཞེས་བཀའ་སྩལ་ཏོ། །འཁོར་མང་པོ་ཐམས་ཅད་ཀྱིས་ཀྱང་ལེགས་སོ་ལེགས་སོ་ཞེས་སྨྲས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ན་ཚེ་དང་ལྡན་པ་མཽང་གལ་ཡ་ན་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ཀྱིས་ཚངས་པ་ཆེན་པོ་ལྷའི་སྙིང་པོས་ཕུལ་བ་ཡུལ་ཡོངས་སུ་བསྲུང་བ་ལ་ཕྱིར་མི་ལྡོག་པའི་འཁོར་ལོའི་སྙིང་པོ་ཞེས་བྱ་བའི་གཟུངས་ཆེན་པོའི་ཚིག་འདི་དག་གཟུངས་སུ་ཟུང་ཤིག །མ་འོངས་པའི་དུས་ན་སངས་རྒྱས་ཀྱི་ཞིང་འདིར་རྒྱལ་རིགས་དགེ་བའི་རྒྱལ་པོ་ཐམས་ཅད་ལ་ཡང་རྒྱས་པར་སྟོན་ཅིག །དེའི་རྒྱུ་དེའི་རྐྱེན་གྱིས་ན་རྒྱལ་རིགས་དགེ་བའི་རྒྱལ་པོ་འཁོར་དང་བཅས་པ་ཐམས་ཅད་དང་། ཡུལ་དེ་ན་གནས་པའི་མི་ཐམས་ཅད་ལ་ཕན་པ་དང་། བདེ་བའི་དོན་དུ་འགྱུར་ཏེ། རྟག་ཏུ་ཆོས་ཀྱི་འཁོར་ལོ་སྐོར་བ་དང་། ཤིན་ཏུ་གྲགས་པ་ཆེ་བ་དང་། གཟི་བརྗིད་ཆེ་བར་འགྱུར་བ་དང་། ངན་པར་ལྟ་བ་འཇོམས་ཤིང་ཡང་དག་པའི་ལྟ་བ་འཛུགས་པ་དང་། ཆོས་ཀྱི་མིག་སྲུང་ཞིང་དཀོན་མཆོག་གསུམ་གྱི་གདུང་རྒྱུན་མི་འཆད་པར་འཚོབ་པ་དང་། སེམས་ཅན་ཚད་མེད་དཔག་ཏུ་མེད་པ་ཡོངས་སུ་སྨིན་པར་བྱེད་པ་དང་། ཐེག་པ་ཆེན་པོ་ལ་དད་པ་ཤིན་ཏུ་བརྟན་པ་དང་། ཡུན་རིང་པོ་ནས་ཕ་རོལ་དུ་ཕྱིན་པ་དྲུག་བསྒོམ་པ་ལ་གནས་ཤིང་སྒྲིབ་པ་ཐམས་ཅད་བཅད་ནས་མྱུར་དུ་མཐའི་གནས་བྱེད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་འདི་དག་གསལ་བར་བཟླས་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །དེ་ཚེ་ཚངས་ཆེན་ལྷ་ཡི་སྙིང་པོས། །རྐང་གཉིས་མཆོག་ལ་འདི་སྐད་ཞུས་སོ། །དབང་པོ་རྣོ་བའི་སྐྱེ་བོ་དག་ནི། །ཏིང་འཛིན་སྒོམ་ཞིང་བསོད་ནམས་བྱེད་མོས། །རྒྱལ་པོ་མཁས་པས་ཆོས་ལུགས་བྱས་པ། །ཤིན་ཏུ་འཁྱམ་པ་འདེག་ཅིང་བསྒྲལ་ཕྱིར། །སྤྱོད་པའི་དངོས་པོ་གསུམ་པོ་འདི་ལ། །གང་དག་ཐེ་ཙོམ་སེལ་ཅིང་མི་
ལྡོག །བཅོམ་ལྡན་འདས་ཀྱིས་འདི་སྐད་བཀའ་སྩལ། །གལ་ཏེ་མི་གནས་མི་བྱ་མི་བྱས། །བློ་གྲོས་ཆེ་ཞིང་ཤེས་རབ་རྣོ་ཡང་། །མཚམས་མེད་སེམས་ཅན་དམྱལ་བར་ལྟུང་འགྱུར། །མཁས་པ་མ་ཡིན་ཡང་དག་པ་དག །སྡིག་པ་བཅུ་ཡི་འཁོར་ལོ་སྤྱོད་མོས། །དགེ་བའི་རྩ་བ་ཡོངས་སུ་བཅད་པས། །མྱུར་དུ་སེམས་ཅན་དམྱལ་བར་ལྟུང་འགྱུར། །ཏིང་ངེ་འཛིན་ནི་ཉོན་མོངས་ཀུན་གཅོད། །ཉན་པའི་བསོད་ནམས་ཀྱིས་ནི་མ་ཡིན། །དེ་བས་མྱ་ངན་འདའ་བར་འདོད་པ། །རྟག་ཏུ་བསམ་གཏན་ལ་ནི་མཉམ་བཞག །མཁས་པས་ཤིན་ཏུ་བརྩོན་འགྲུས་རྩོམ་པ། །ང་ཡི་ཡང་དག་ཆོས་ནི་སྲུང་འཛིན། །ངུར་སྨྲིག་གྱོན་ལ་དད་ཅིང་གུས་པས། །ཉོན་མོངས་རྒྱ་མཚོ་ལས་ནི་གྲོལ་འགྱུར། །ཤིན་ཏུ་དབེན་པའི་བས་མཐར་གནས་ཏེ། །མཚམས་མེད་བྱེད་པ་རྣམ་པར་རིང་སྤངས། །ཚུལ་ཁྲིམས་འཛིན་ཅིང་ཏིང་འཛིན་སྒོམ་ལ། །དད་པས་སྲིད་པའི་རྒྱ་མཚོར་སྒྲོལ་འགྱུར། །ཐེག་པ་རྣམ་གསུམ་ཀུན་ལ་དད་པ། །ང་ཡི་ཡང་དག་ཆོས་ནི་རྒྱས་བྱེད། །ངུར་སྨྲིག་གྱོན་ལ་མཆོད་པ་བྱས་ན། །ཡོན་ཏན་རྣམ་པའི་རྒྱ་མཚོར་ངེས་འགྱུར། །གདུལ་དཀའི་སེམས་ནི་ཤིན་ཏུ་བཏུལ་ཏེ། །དགེ་སློང་རྣམས་ཀྱི་ཉེས་པ་མི་གླེང་། །ཆོག་ཤེས་འཕགས་པའི་རིགས་འཚོ་བ་ནི། །རྐང་གཉིས་དམ་པའི་མཆོག་ཏུ་ངེས་འགྱུར། །དགེ་སློང་སྡིག་ཅན་དག་ནི་སྤངས་ཏེ། །འཕགས་པའི་སྤྱོད་པའི་གནས་ལ་བསྟེན་བྱ། །དགེ་འདུན་ནོར་ལ་མི་སྤྱོད་མི་ཟ། །མྱུར་དུ་བྱང་ཆུབ་ཆེན་པོ་འཐོབ་འགྱུར། །ཁམས་གསུམ་ཀུན་ན་བདེ་ཞིང་སྐྱིད་པ། །དེ་ཡང་དཀོན་མཆོག་གསུམ་ལས་བྱུང་བས། །དེ་བས་བདེ་ཞིང་སྐྱིད་པ་འདོད་པ། །རྟག་ཏུ་དཀོན་མཆོག་གསུམ་ལ་མཆོད་བྱོས། །གདོལ་པའི་རྒྱལ་པོ་དག་ལ་སོགས་པ། །དགེ་སློང་སྡིག་པ་སྤྱོད་པའི་གྲོགས་དག །དཀོན་མཆོག་གསུམ་ལ་ཉེས་པ་བསྐྱེད་པས། །མཚམས་མེད་སེམས་ཅན་དམྱལ་བར་ལྟུང་འགྱུར། །འབྲུ་མར་འཚིར་བ་བཅུ་ཡི་སྡིག་པ། །སྨད་འཚོང་གཅིག་གི་སྡིག་དང་དེ་མཉམ། །སྨད་འཚོང་མ་ནི་བཅུ་ཡི་སྡིག་དང་། །ཆང་འཚོང་གཅིག་གི་སྡིག་དང་དེ་མཉམ། །ཆང་འཚོང་གནས་ནི་བཅུ་ཡི་སྡིག་དང་། །
ཤན་པ་གཅིག་གི་སྡིག་དང་དེ་མཉམ། །ཤན་པའི་གནས་ནི་བཅུ་ཡི་སྡིག་དང་། །རྒྱལ་པོ་གཅིག་གི་སྡིག་དང་དེ་མཉམ། །ཡང་དག་དགེ་བའི་རྒྱལ་པོ་དག་ནི། །ང་ཡི་ཡང་དག་ཆོས་ཀུན་རྒྱས་བྱེད། །ཐེག་པ་རྣམ་གསུམ་ཀུན་ལ་མཆོད་པས། །ཡོན་ཏན་རྣམ་པའི་རྒྱ་མཚོར་དེས་འགྱུར། །རིན་ཆེན་སྣ་བདུན་འཛམ་གླིང་བཀང་སྟེ། །སངས་རྒྱས་དགེ་འདུན་རྣམས་ལ་ཕུལ་བའི། །བསོད་ནམས་ཕུང་པོ་ཐོབ་པ་དེས་ནི། །སངས་རྒྱས་ཆོས་སྲུང་ཙམ་དུ་མི་ཕོད། །སངས་རྒྱས་དགེ་འདུན་བཞུགས་པའི་གནས་དག །གླིང་བཞི་བཅུ་དང་མཉམ་པར་བྱས་པའི། །བསོད་ནམས་ཕུང་པོ་ཐོབ་པ་དེས་ཀྱང་། །སངས་རྒྱས་ཆོས་སྲུང་ཙམ་ནི་མི་ཕོད། །སངས་རྒྱས་དག་གི་མཆོད་རྟེན་བརྩིགས་པ། །སྟོང་གསུམ་ཁམས་དང་མཉམ་པ་བྱས་པའི། །བསོད་ནམས་ཕུང་པོ་ཐོབ་པ་དེས་ཀྱང་། །སངས་རྒྱས་ཆོས་སྲུང་ཙམ་ནི་མི་ཕོད། །དགྲ་བཅོམ་པ་ཡི་བཅིངས་པ་བཀྲོལ་ནས། །མཆོད་པ་རྣམ་པ་སྣ་ཚོགས་ཀུན་པས། །ཆོས་ཀྱི་བར་ཆད་མ་བྱས་པ་ཡི། །བསོད་ནམས་དེ་ནི་དེ་བས་མཆོག་འགྱུར། །བསྐལ་པ་བྱེ་བ་སྟོང་གི་བར་དུ། །མཁས་པས་ཏིང་འཛིན་བསྒོམས་པ་ཡི་ནི། །ཁྱད་པར་ཅན་གྱི་བློ་སྐྱེས་གང་བས། །ཆོས་སྲུང་བ་ཡི་བསོད་ནམས་དེ་ཆེ། །ཤིན་ཏུ་དགེ་བའི་རྒྱལ་པོ་གང་དག །སྡིག་པ་བཅུ་ཡི་འཁོར་ལོ་སྤངས་ཏེ། །ང་ཡི་ཡང་དག་ཆོས་འདི་བསྐྱབས་སམ། །ངུར་སྨྲིག་གྱོན་པ་དག་ཀྱང་བསྲུངས་ན། །ངས་གསུངས་པ་ཡི་ཐེག་པ་གསུམ་དང་། །གང་ཟག་དག་ལ་འཕྱ་སྐུར་མི་བྱེད། །ཀུན་ཀྱང་ཉན་ཅིང་མཆོད་པ་བྱེད་ལ། །ཆོས་སྨྲ་བ་ཡི་སྐྱབས་དང་མགོན་བྱེད། །དཀོན་མཆོག་གསུམ་ནོར་ཆུད་མི་གཟོན་ཅིང་། །ཆོས་གོས་གྱོན་པའི་བར་ཆད་མི་བྱེད། །སྣོད་དང་སྣོད་མ་ཡིན་པ་ཀུན་ལ། །གུས་ན་དེ་ཡི་བསོད་ནམས་དཔེ་མེད། །ཇི་ལྟར་ཉི་མ་ལྔ་པོ་ཤར་ན། །རྒྱ་མཚོ་ཆེན་པོ་ཀུན་ནི་སྐེམས་ཏེ། །དེ་བཞིན་ང་ཡི་ཆོས་སྲུང་བ་དེ། །ཉོན་མོངས་པ་ཡི་རྒྱ་མཚོ་སྐེམས་འགྱུར། །ཇི་ལྟར་རླུང་གིས་འཇིག་པ་བྱུང་སྟེ། །རི་རྣམས་ཐམས་ཅད་འཇིག་པ་བཞིན་དུ། །ང་ཡི་ཆོས་ལ་སྲུང་བ་དེ་ཡང་། །ཀུན་ནས་ཉོན་མོངས་ཐམས་ཅད་འཇོམས་འགྱུར། །ཇི་ལྟར་ཆུ་ཡིས་
འཇིག་པ་བྱུང་ཚེ། །ས་ཆེན་ཆུ་ཡིས་གཡེངས་ཏེ་འཇིག་འགྱུར། །དེ་བཞིན་ང་ཡི་ཆོས་སྲུང་བ་ཡང་། །ཡིད་དུ་མི་འོང་འབྲས་བུ་འཇོམས་འགྱུར། །ཇི་ལྟར་རིན་ཆེན་ཡིད་བཞིན་ནོར་བུས། །འདོད་པ་ཐམས་ཅད་ཡོངས་སུ་རྫོགས་བྱེད། །དེ་བཞིན་ཐེག་པ་གསུམ་གྱི་ཆོས་ཀྱང་། །སེམས་ཅན་ཀུན་གྱི་སྨོན་པ་རྫོགས་བྱེད། །གང་གིས་བུམ་པ་བཟང་པོ་རྙེད་ན། །དབུལ་དང་བྲལ་ཏེ་བདེ་སྐྱིད་ཐོབ་འགྱུར། །དེ་བཞིན་སངས་རྒྱས་ཆོས་དང་ཕྲད་པ། །ཐེ་ཙོམ་གཅོད་ཅིང་བྱང་ཆུབ་ཐོས་འགྱུར། །ཇི་ལྟར་བཅོ་ལྔའི་ཟླ་བ་ཉ་ན། །འོད་ཀྱིས་ནམ་མཁའ་ཐམས་ཅད་ཀུན་སྣང་། །དེ་བཞིན་ཆོས་སྲུང་བ་ཡི་གང་ཟག །ཤེས་རབ་ཀྱིས་ནི་ཆོས་དབྱིངས་ཀུན་ཁྱབ། །ཇི་ལྟར་ནམ་མཁའ་ཀུན་ཏུ་མཉམ་ལ། །རྫས་ཀྱང་མེད་ཅིང་མཚན་མ་མེད་པ། །དེ་བཞིན་ཆོས་སྲུང་བ་ཡི་གང་ཟག །ཐམས་ཅད་ཆོས་ནི་རོ་གཅིག་པར་ཤེས། །ཇི་ལྟར་ཉི་མའི་འོད་ནི་བཀྱེ་བ། །འཇིག་རྟེན་མུན་པ་ཐམས་ཅད་ཀུན་སེལ། །དེ་བཞིན་ཆོས་སྲུང་བ་ཡི་གང་ཟག །རྟག་ཏུ་འཇིག་རྟེན་ཀུན་ཏུ་བདེ་བྱེད། །ཤིན་ཏུ་རྒྱས་པ་ཆེན་པོའི་མདོ་སའི་སྙིང་པོ་འཁོར་ལོ་བཅུ་པ་ཞེས་བྱ་བ་ལས་གནས་ཤིང་སྤྱད་པར་མི་བྱ་བའི་ལེའུ་སྟེ་གསུམ་མོ།། །།