དྲུག་པ། འདུས་པ་ཆེན་པོ་ཉི་མའི་སྙིང་པོའི་ལེའུ་བཅུ་གཅིག་པ་ལས་ལེའུ་དྲུག་པ།
ཡང་དེའི་ཚེ་རྒྱལ་པོ་གཟུགས་ཅན་སྙིང་པོ་དགའ་བ་དང་
མཆོག་ཏུ་དགའ་བ་དམ་པ་སྐྱེས་ཏེ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གཏན་ལ་མངོན་པར་བརྩོན་པ་རྣམས་ཀྱིས་སངས་རྒྱས་ཀྱི་ཞིང་མི་མཇེད་གཏམས་ཞིང་སྔོན་མ་མཐོང་མ་ཐོས་པའི་སྣང་བ་ཆེན་པོས་ཁྱབ་པ་དེ་ལྟ་བུ་ནི་ངོ་མཚར་ལགས་སོ། །བཙུན་པ་བདེ་བར་གཤེགས་པ་མཆོག་ཏུ་ངོ་མཚར་ལགས་ཏེ། སངས་རྒྱས་ཀྱི་ཞིང་འདི་དང་མཚམས་གཞན་གྱི་ཁོར་ཡུག་ཆེན་པོའི་རི་མ་གཏོགས་པར་གཡར་སྔར་གཞན་ཅི་ཡང་གདའ་བར་མི་འགྱུར་ལགས་སོ། །བཙུན་པ་བཅོམ་ལྡན་འདས་གང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྣང་བས་སངས་རྒྱས་ཀྱི་ཞིང་མི་མཇེད་འདི་ཐམས་ཅད་མཐོང་ལགས་ན་དེ་བཞིན་གཤེགས་པ་སྙོམས་པར་ཞུགས་པའི་སྣང་བ་ཇི་ལྟ་བུར་འགྱུར་བ་ལགས། ཅི་དེ་བཞིན་གཤེགས་པའི་སྣང་བས་བདག་ཅག་གིས་སངས་རྒྱས་ཀྱི་ཞིང་གཞན་གྱི་ཡོན་ཏན་བཀོད་པ་མཐོང་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་དེ་བཞིན་ཏེ། དེ་བཞིན་གཤེགས་པ་རང་གི་སྤྱོད་ཡུལ་ན་བཞུགས་སོ། །དེ་བཞིན་གཤེགས་པ་བསོད་ནམས་ཆེན་པོའི་རྒྱན་གྱིས་མངོན་པར་བརྒྱན་པ། སྔོན་གྱི་ཚོགས་བསགས་པའི་དགེ་བའི་རྩ་བ་དང་སྔོན་གྱི་བྱང་ཆུབ་སེམས་དཔའི་སྤྱོད་པའི་རྒྱུ་འཐུན་པའི་བྱང་ཆུབ་སེམས་དཔར་གྱུར་པའི་རྒྱུ་འཐུན་པའི་རང་གི་གནས་སངས་རྒྱས་ཀྱི་རྣམ་པར་སྨིན་པས་མངོན་པར་གྲུབ་པ་མཐའ་ཡས་པར་བསྟན་པ། དེ་བཞིན་གཤེགས་པའི་རྣམ་པར་འཕྲུལ་པ་མ་ཆགས་པའི་སྤྱོད་ཡུལ་གྱིས་བྱིན་གྱིས་བརླབས་པ། ཡེ་ཤེས་གསལ་བ་བསྐྱེད་པར་འཇུག་པའི་བློ་གྲོས་དང་ཡང་དག་པར་ལྡན་པ། ཡེ་ཤེས་ཀྱི་ཕ་རོལ་ཏུ་གཤེགས་པ་ལས་རབ་ཏུ་སྐྱེས་པ། ཕྱི་མའི་མཐའི་བསྐལ་པར་ཡང་དག་པར་བསྒྲུབས་པ། སངས་རྒྱས་ཀྱི་སྤྱོད་ཡུལ་ཚད་མེད་པ་ལ་གནས་པ། ཆོས་ཀྱི་འཁོར་ལོ་ཤིན་ཏུ་བསྐོར་བ། ཆོས་ཐམས་ཅད་ལ་དབང་སྒྱུར་བ་བརྙེས་པའི་རྒྱུ་འཐུན་པ། སེམས་ཅན་ཐམས་ཅད་ཀྱི་
དབང་པོ་མཆོག་དང་མཆོག་མ་ཡིན་པ་མཁྱེན་པ་དང་། ཡོངས་སུ་སྨིན་པར་མཛད་པ་ལ་མཁས་པ། བག་ཆགས་ཡང་དག་པར་བཅོམ་པས་སངས་རྒྱས་ཀྱི་མཛད་པ་ལྷུན་གྱིས་གྲུབ་པ་ཡང་དག་པར་བསྟན་པ་ན་བཞུགས་སོ། །རྒྱལ་པོ་ཆེན་པོ་དེས་ན་ཕྱོགས་བཅུ་ཀུན་ཏུ་འཇིག་རྟེན་གྱི་ཁམས་གྲངས་མེད་པ་དཔག་ཏུ་མེད་པ་ཁྱོད་ཀྱིས་མཐོང་བར་འགྱུར་རོ། །དེ་བཞིན་དུ་དེ་བཞིན་གཤེགས་པ་གྲངས་མེད་པ་དཔག་ཏུ་མེད་པ་བཞུགས་ཤིང་གཞེས་པ་བྱང་ཆུབ་སེམས་དཔའ་རྣམས་དང་། ཉན་ཐོས་ཀྱི་ཚོགས་ཀྱིས་ཡོངས་སུ་བསྐོར་བ་དང་བཅས་པ་ཁྱོད་ཀྱིས་མཐོང་བར་འགྱུར་རོ། །དེ་ནས་རྒྱལ་པོ་གཟུགས་ཅན་སྙིང་པོ་དང་སྲོག་ཆགས་བྱེ་བ་མང་པོ་གཞན་དག་གིས་ཀྱང་ཚིག་འཐུན་པར་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བདག་ཅག་ལ་སངས་རྒྱས་ཀྱི་ཡུལ་ཉིད་ཀྱི་སྤྱོད་ཡུལ་བསོད་ནམས་ཆེན་པོའི་རྒྱན་གྱི་རྒྱུ་འཐུན་པ་བསྟན་དུ་གསོལ། བདག་ཅག་ལ་སངས་རྒྱས་ཀྱི་མཛད་པ་ལྷུན་གྱིས་གྲུབ་པའི་བར་ཡང་དག་པར་བསྟན་དུ་གསོལ། བཅོམ་ལྡན་འདས་ཀྱིས་དེ་བཞིན་གཤེགས་པའི་སྤྱོད་ཡུལ་ཡང་དག་པར་བསྟན་པ་གནང་བར་མཛད་དུ་གསོལ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་ཤེས་ཀཽ་ཌི་ནྱ་ལ་བཀའ་སྩལ་པ། ཀཽ་ཌི་ནྱ་ཉན་ཐོས་ཆེན་པོ་རྣམས་དང་། ཁྱིམ་ན་གནས་པ་དང་། རབ་ཏུ་བྱུང་བ་གང་དག་ཡིན་པ་ཐམས་ཅད་རང་གི་དགེ་བའི་ཕྱོགས་ཀྱི་ནང་དུ་ཡང་དག་འཇོག་ལ་གནས་པར་བྱོས་ཤིག །ང་ཡང་རང་གི་སངས་རྒྱས་ཀྱི་སྤྱོད་ཡུལ་གྱི་ནང་དུ་ཡང་དག་འཇོག་ལ་གནས་པར་མཛད་དོ། །ཡང་དེའི་ཚེ་ལྷ་དང་། ཀླུ་དང་། གནོད་སྦྱིན་ནས་མི་དང་། མི་མ་ཡིན་པའི་བར་གང་དག་ཡིན་པ་དང་། བདེན་པ་མཐོང་བ་གང་དག་ཡིན་པ་དང་། རྗེས་སུ་འཐུན་པའི་བཟོད་པ་ཐོབ་པ་གང་དག་ཡིན་པ་དང་། ཐེག་པ་གསུམ་ལས་ཕྱིར་མི་ལྡོག་པ་གང་དག་ཡིན་པ་དང་། དཀོན་མཆོག་གསུམ་ལ་མངོན་པར་དད་པ་གང་དག་ཡིན་པ་དེ་དག་ཐམས་ཅད་སྐྱིལ་མོ་ཀྲུང་དུ་འཁོད་ནས་སྙོམས་པར་ཞུགས་སོ། །དེ་ནས་བཅོམ་ལྡན་འདས་སངས་རྒྱས་
ཐམས་ཅད་ཀྱི་ཡུལ་གྱི་སྤྱོད་ཡུལ་ལ་ཤེས་རབ་ཀྱིས་ནམ་མཁའ་ཁྱབ་པར་བྱེད་པ། མཁས་པ་མང་པོ་ཐམས་ཅད་ཡང་དག་པར་ཚིམ་པར་བྱེད་པ་ཉི་མ་དང་ཟླ་བ་ལྟ་བུ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་ནི་ཉན་ཐོས་དང་རང་རྒྱལ་བ་ཐམས་ཅད་ཀྱི་སྤྱོད་ཡུལ་མ་ཡིན་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ཀྱི་སྤྱོད་ཡུལ་མ་ཡིན་པ་དང་། སེམས་ཅན་ཐམས་ཅད་ཀྱིས་ཤེས་པའི་སྤྱོད་ཡུལ་མ་ཡིན་ཏེ། དེ་སངས་རྒྱས་བཅོམ་ལྡན་འདས་ཐམས་ཅད་ཀྱི་སྤྱོད་ཡུལ་གྱི་ཡུལ་མཁྱེན་པ་ནི་མ་གཏོགས་སོ། །དེའི་ཚེ་བཅོམ་ལྡན་འདས་ཏིང་ངེ་འཛིན་ལ་སྙོམས་པར་ཞུགས་ནས་སངས་རྒྱས་ཀྱི་ཞིང་མི་མཇེད་འདི་ཐམས་ཅད་དང་། གླིང་བཞི་པ་བྱེ་བ་ཕྲག་བརྒྱ་དང་། རིའི་རྒྱལ་པོ་རི་རབ་བྱེ་བ་ཕྲག་བརྒྱ་དང་། ཉི་མ་དང་ཟླ་བ་བྱེ་བ་ཕྲག་བརྒྱ་སྙེད་དང་། སྲིད་པའི་རྩེ་མོའི་ལྷའི་གནས་བྱེ་བ་ཕྲག་བརྒྱ་སྙེད་ཡོད་པ་དེ་དག་ཐམས་ཅད་དེ་བཞིན་གཤེགས་པའི་སྐུ་ལ་ཆུད་པར་ཡང་དག་པར་སྣང་ངོ་། །ཐམས་ཅད་དང་ལྡན་པའི་སངས་རྒྱས་ཀྱི་ཞིང་མི་མཇེད་ཐམས་ཅད་དེ་བཞིན་གཤེགས་པའི་སྐུ་ལ་གནས་པར་ཡང་དག་པར་སྣང་ངོ་། །སངས་རྒྱས་ཀྱི་ཞིང་མི་མཇེད་འདིར་གཏོགས་པའི་སེམས་ཅན་སེམས་ཅན་དམྱལ་བའམ། དུད་འགྲོའི་སྐྱེ་གནས་པའམ། གཤིན་རྗེའི་འཇིག་རྟེན་པའམ། ལྷའམ། མི་གང་དག་ཡིན་པ་དེ་དག་ཐམས་ཅད་ཀྱི་ལུས་དང་སེམས་ཀྱི་སྡུག་བསྔལ་གྱི་ཉོན་མོངས་པ་ཡང་ཐམས་ཅད་ཀྱི་ཐམས་ཅད་དུ་རྒྱུན་ཆད་དོ། །དེ་དག་ཐམས་ཅད་ཀྱིས་ལུས་དང་སེམས་ཀྱི་བདེ་བ་འདི་ལྟ་བུ་ཐོབ་པར་གྱུར་ཏེ། དཔེར་ན་བསམ་གཏན་གཉིས་པའི་ཞི་གནས་ཐོབ་པའི་དགེ་སློང་སྙོམས་པར་ཞུགས་པ་བཞིན་ནོ། །བྱང་ཆུབ་སེམས་དཔའ་ཐམས་ཅད་ཀྱིས་ཏིང་ངེ་འཛིན་ལས་ལངས་ཏེ་ལངས་པ་དེ་དག་ཐམས་ཅད་ཀྱི་རང་གི་ལུས་ལ་སྣང་བ་ནུབ་པར་གྱུར་ཏོ། །ཉན་ཐོས་ཐམས་ཅད་དང་སེམས་ཅན་གང་སུ་དག་སྙོམས་པར་ཞུགས་པ་དེ་དག་ཐམས་ཅད་ཏིང་ངེ་འཛིན་ལས་ལངས་ཏེ། དེ་དག་ཐམས་ཅད་ལུས་དང་སེམས་
ཀྱི་བདེ་བ་དེ་ལྟ་བུ་དང་ཡང་དག་པར་ལྡན་པར་གྱུར་ཏོ། །དེ་དག་ཐམས་ཅད་ངོ་མཚར་ཐོབ་ཅིང་རྨད་དུ་བྱུང་བ་ཐོབ་སྟེ། དབང་པོ་ཚིམ་ནས་དེ་དག་དེ་བཞིན་གཤེགས་པའི་སྐུའི་ནང་དུ་གནས་ཤིང་འཁོད་ནས་བཅོམ་ལྡན་འདས་ཀྱི་སྐུའི་བ་སྤུའི་ཁུང་བུ་ལ་བལྟས་ཏེ། དེ་དག་ཐམས་ཅད་ཀྱིས་འདི་ལྟར་བཅོམ་ལྡན་འདས་ཀྱི་སྐུའི་བ་སྤུའི་ཁུང་བུ་གཅིག་ནས་འོད་ཟེར་འདི་ལྟ་བུ་བྱུང་བ་དེ་ལྟ་བུ་མཐོང་བར་གྱུར་ཏེ། དཔེར་ན་ཉི་མ་དང་ཟླ་བ་གང་གཱའི་ཀླུང་གི་བྱེ་མ་སྙེད་དང་། ནོར་བུ་རིན་པོ་ཆེ་ཆེན་པོ་གང་གཱའི་ཀླུང་གི་བྱེ་མ་སྙེད་ཀྱི་སྣང་བ་དང་། བྱང་ཆུབ་སེམས་དཔའ་ས་བཅུ་པ་གང་གཱའི་ཀླུང་གི་བྱེ་མ་སྙེད་ཀྱི་འོད་ཟེར་གྱི་སྣང་བ་བཞིན་ནོ། །བཅོམ་ལྡན་འདས་ཀྱི་བ་སྤུའི་ཁུང་བུ་རེ་རེ་ནས་ཀྱང་འོད་དེ་ལྟ་བུ་བྱུང་སྟེ། བཅོམ་ལྡན་འདས་ཀྱི་སྐུ་ལས་འོད་ཟེར་རབ་ཏུ་བྱུང་བ་དེ་དག་གིས་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་སྣང་བ་ཆེན་པོས་རྒྱས་པར་གང་བར་གྱུར་ཏོ། །སངས་རྒྱས་ཀྱི་ཞིང་སྟོང་པ་མ་ཡིན་པ་གང་དག་ན་སངས་རྒྱས་བཅོམ་ལྡན་འདས་བཞུགས་ཤིང་གཞེས་པའི་སངས་རྒྱས་བཅོམ་ལྡན་འདས་དེ་དང་དེ་དག་གིས་ཐམས་ཅད་དང་ལྡན་པའི་སངས་རྒྱས་ཀྱི་ཞིང་མི་མཇེད་ཐམས་ཅད་འདི་ལྟ་བུའི་དབྱངས་བརྗོད་པས་ཀུན་ཏུ་གང་བར་མཛད་དོ། །ཤཱཀྱ་སེང་གེ་མི་ཡི་མཆོག །བྱམས་དང་ཐུགས་རྗེའི་རྒྱུ་འཐུན་པ། །སེམས་ཅན་ཀུན་ལ་ཕན་མཛད་པ། ། བསོད་ནམས་ལས་གྲུབ་པ་ལ་ལྟོས། །སེམས་ཅན་ཀུན་ལ་ཐུགས་བརྩེའི་ཕྱིར། །སངས་རྒྱས་སྤྱོད་ཡུལ་སྟོན་པར་མཛད། །ཐུགས་རྗེས་འོད་ཟེར་བཀྱེ་བས་ནི། །ཞིང་རྣམས་ཐམས་ཅད་གསལ་བར་གྱུར། །རེ་རེས་ཞིང་ནི་རྒྱས་གྱུར་པ། །གནས་ཀུན་གསལ་བ་མཐོང་ནས་སུ། །བྱང་ཆུབ་མཆོག་ནི་ཡོངས་ཚོལ་ཞིང་། །སེམས་ཀྱི་མཆོག་ཀྱང་སྐྱེད་པར་བྱེད། །གང་དག་ལུས་ཅན་རྫུ་འཕྲུལ་འཐོབ། །དེ་དག་ཐམས་ཅད་མྱུར་དུ་ལྷགས། །ཤཱཀྱ་སེང་གེ་མི་མཆོག་ལ། །ཁྱེད་ཀྱིས་བསྐོར་བ་བྱས་ནས་ཀྱང་། །གང་དག་རྫུ་འཕྲུལ་མ་ཐོབ་ཀུན། །རྒྱང་མ་ནས་ནི་ཕྱག་འཚོལ་
ལ། །བྱང་ཆུབ་ཏུ་ནི་སེམས་བསྐྱེད་དང་། །མི་ཡི་སྐྱེས་མཆོག་རྣམས་སུ་འགྱུར། །སངས་རྒྱས་བཅོམ་ལྡན་འདས་དེ་དག་གི་རང་རང་གི་སངས་རྒྱས་ཀྱི་ཞིང་ནས་དབྱངས་ཀྱིས་གོ་བར་མཛད་ནས། ཐུགས་རྗེའི་དབང་གིས་སེམས་ཅན་རྣམས་ཡོངས་སུ་སྨིན་པར་མཛད་པའི་ཕྱིར་དེ་བཞིན་གཤེགས་པ་ཤཱཀྱ་ཐུབ་པའི་དགོངས་པ་དང་སྨོན་ལམ་ཡོངས་སུ་བསྐང་བའི་ཕྱིར་དང་། དེའི་ཡོན་ཏན་བརྗོད་པའི་ཕྱིར་དེ་བཞིན་གཤེགས་པ་རེ་རེ་ཡང་བྱང་ཆུབ་སེམས་དཔའ་དང་། དེ་བཞིན་དུ་ཉན་ཐོས་ཆེན་པོ་གང་གཱའི་ཀླུང་གི་བྱེ་མ་སྙེད་ཕྲག་དུ་མ་དང་། ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། དྲི་ཟ་དང་། མིའམ་ཅི་དང་། ལྟོ་འཕྱེ་ཆེན་པོ་གང་གཱའི་ཀླུང་གི་བྱེ་མ་སྙེད་ཕྲག་དུ་མས་མདུན་དུ་བདར་ཅིང་ཡོངས་སུ་བསྐོར་ཏེ། དེ་དག་རང་རང་གི་སངས་རྒྱས་ཀྱི་ཞིང་རྣམས་ནས་རྫུ་འཕྲུལ་གྱིས་ཡང་དག་པར་ཞུགས་ནས་སངས་རྒྱས་ཀྱི་ཞིང་མི་མཇེད་འདིར་གཤེགས་ཏེ། བཅོམ་ལྡན་འདས་ཀྱི་སྐུ་ལ་ལན་གསུམ་བསྐོར་བ་མཛད་ནས་སངས་རྒྱས་བཅོམ་ལྡན་འདས་དེ་དག་གི་འཁོར་གྱི་སེམས་ཅན་གང་དག་ཡིན་པ་དེ་དག་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ལ་སྐོར་བ་བྱེད་ཅིང་དེ་ལྟ་བུའི་མཆོད་པ་བྱེད་པར་གྱུར་ཏོ། །ཡང་རང་རང་གི་སངས་རྒྱས་ཀྱི་ཞིང་དག་ཏུ་ཡང་དོང་ངོ་། །དེའི་དུས་ན་སེམས་ཅན་གང་དག་སངས་རྒྱས་ཀྱི་ཞིང་མི་མཇེད་དུ་བཅོམ་ལྡན་འདས་ཀྱི་སྐུ་ལ་ཆུད་པ་དེ་དག་ཐམས་ཅད་ཀྱིས་ཕྱོགས་བཅུ་ཀུན་གྱི་སངས་རྒྱས་ཀྱི་ཞིང་ཐམས་ཅད་ཀྱི་ཡོན་ཏན་བཀོད་པའི་དེ་བཞིན་གཤེགས་པ་འཁོར་དང་བཅས་པ་རྣམས་མཐོང་ངོ་། །དེ་དག་ཐམས་ཅད་ཀྱིས་དེ་ནས་ཡང་དག་པར་ཞུགས་པ་འཁོར་དང་བཅས་པ་རྣམས་དང་། བཅོམ་ལྡན་འདས་ཤཱཀྱ་ཐུབ་པ་ལ་བསྐོར་བ་མཛད་ཅིང་གཤེགས་པ་དང་། རང་རང་གི་སངས་རྒྱས་ཀྱི་ཞིང་དུ་འཇུག་ཅིང་རྡོ་རྗེའི་གདན་ལ་བཞུགས་ཏེ་ཆོས་སྟོན་པ་མཐོང་ངོ་། །ཇི་ལྟར་སངས་རྒྱས་བཅོམ་ལྡན་འདས་དེ་དག་རང་རང་གི་སངས་རྒྱས་ཀྱི་ཞིང་དག་ཏུ་རང་རང་གི་
གདན་ལ་བཞུགས་ནས་རང་རང་གི་འཁོར་ལས་བརྩམས་ཏེ། དེ་བཞིན་གཤེགས་པ་ཤཱཀྱ་ཐུབ་པའི་བསྔགས་པ་དང་། ཡོན་ཏན་དང་། གྲགས་པ་དང་། ཤེས་རབ་དང་། བསོད་ནམས་དང་། བརྩོན་འགྲུས་དང་། ཐུགས་རྗེ་དང་། སེམས་ཅན་ཡོངས་སུ་སྨིན་པར་མཛད་པ་བསྟན་པ་བཞིན་དེར་སངས་རྒྱས་ཀྱི་ཞིང་རེ་རེར་ཡང་སེམས་ཅན་གྲངས་མེད་དཔག་ཏུ་མེད་པ་གང་གཱའི་ཀླུང་གི་བྱེ་མ་སྙེད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །རང་རང་གི་ལུང་བསྟན་པ་ཐོབ་པར་གྱུར་ཏོ། །རང་སངས་རྒྱས་ཀྱི་ཐེག་པ་ལ་ཡང་དེ་བཞིན་ནོ། །ཉན་ཐོས་ཀྱི་ཐེག་པ་ལ་ཡང་དེ་བཞིན་ནོ། །འདིར་བཅོམ་ལྡན་འདས་ཀྱི་སྐུ་ལ་ཆུད་པ་གང་དག་ཡིན་པ་ཐམས་ཅད་ཀྱིས་ཀྱང་མཐོང་ངོ་། །ལུང་བསྟན་པ་ཡང་ཐམས་ཅད་ཀྱིས་ཐོས་སོ། །སྙིགས་མ་ལྔའི་སངས་རྒྱས་ཀྱི་ཞིང་སྟོང་པ་དག་ན་སེམས་ཅན་གང་དག་ཡོད་པའི་བདེ་བ་དང་སྡུག་བསྔལ་གྱི་ཚོར་བ་ཅི་འདྲ་བ་མྱོང་བ་དག་ཀྱང་འདིར་བཅོམ་ལྡན་འདས་ཀྱི་སྐུ་ལ་ཆུད་ཅིང་འཁོད་པ་རྣམས་ཀྱིས་མཐོང་ངོ་། །དེའི་ཚེ་སྙིགས་མ་ལྔའི་འཇིག་རྟེན་གྱི་ཁམས་སྟོང་པ་དག་ན་སེམས་ཅན་གང་དག་ཡོད་པ་དེ་དག་ཐམས་ཅད་ཀྱིས་ཀྱང་སྣང་བ་དེ་མཐོང་ནས་དེ་བཞིན་གཤེགས་པ་ཤཱཀྱ་ཐུབ་པ་ཡང་མཐོང་སྟེ། སངས་རྒྱས་བཅོམ་ལྡན་འདས་བགྲང་བ་ལས་འདས་པ་དང་། དེ་བཞིན་གཤེགས་པ་རེ་རེ་ཡང་སེམས་ཅན་བགྲང་བ་ལས་འདས་པ་དག་དང་ཐབས་ཅིག་ཏུ་འདིར་དེ་བཞིན་གཤེགས་པ་ཤཱཀྱ་ཐུབ་པ་ལ་བསྐོར་བ་མཛད་པ་མཐོང་ངོ་། །དེའི་ཚེ་སེམས་ཅན་དེ་དག་ཐམས་ཅད་མཆོག་ཏུ་དགའ་བའི་དམ་པ་སྐྱེས་ཏེ། ཐམས་ཅད་སྡུག་བསྔལ་གྱི་ཚོར་བ་རྒྱུན་ཆད་དོ། །སྙིགས་མ་ལྔའི་སངས་རྒྱས་ཀྱི་ཞིང་སྟོང་པ་དེ་དག་ན་བྱང་ཆུབ་སེམས་དཔའ་སེམས་དཔའ་ཆེན་པོ་ས་བཅུ་པ་གང་དག་སེམས་ཅན་ཡོངས་སུ་སྨིན་པར་བྱ་བའི་ཕྱིར་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་སངས་རྒྱས་ཀྱི་ཞིང་གང་ན་སངས་རྒྱས་ཀྱིས་འདུལ་བའི་སེམས་ཅན་དག་ཡོད་པ་དེར་སངས་རྒྱས་ཀྱི་སྐུ་བྱད་
ཀྱིས་སངས་རྒྱས་ཀྱི་ཞིང་མི་མཇེད་ཐམས་ཅད་དབྱངས་དང་། ངག་དང་། སྒྲ་བརྗོད་པ་གཅིག་གིས་གོ་བར་མཛད་དོ། །དགེ་བའི་དོན་དུ་ཞིང་གཅིག་ཏུ། །ངེད་ཅག་ཐམས་ཅད་གཤེགས་པ་ཡིན། །སངས་རྒྱས་རྣམས་ནི་མི་བཞུགས་ན། །སུས་ཀྱང་དཔལ་ཆེན་མི་འཐོབ་བོ། །ཁྱེད་ཅག་གིས་ནི་བྱང་ཆུབ་ཏུ། །གཅིག་ཏུ་སེམས་ནི་གཞོལ་བྱས་ན། །ཁྱེད་ཅག་ཕྱིན་ཅད་འཁོར་བར་ནི། །སྡུག་བསྔལ་སྐྱེ་བར་མི་འགྱུར་རོ། །ཤཱཀྱ་ཁྱུ་མཆོག་མཆོད་པ་དང་། །དེ་ལ་བསྐོར་བ་བྱ་བའི་ཕྱིར། །འདི་ལྟར་ཁྱེད་ཅག་ཐམས་ཅད་ནི། །ང་དང་ཐབས་ཅིག་མྱུར་དུ་འདེང་།། །།འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་དགུ་པ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཀྱང་སངས་རྒྱས་ཀྱི་སྐུ་བྱད་ཀྱིས་རེ་རེ་ཞིང་སེམས་ཅན་རྫུ་འཕྲུལ་དང་ལྡན་པ་གང་གཱའི་ཀླུང་གཅིག་གི་བྱེ་མ་སྙེད་དང་ལྷན་ཅིག་ཏུ་དེ་ནས་ཆས་ཏེ། དེ་བཞིན་གཤེགས་པ་ཤཱཀྱ་ཐུབ་པ་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཤཱཀྱ་ཐུབ་པ་ལ་སེམས་ཅན་དེ་དག་གིས་རིན་པོ་ཆེ་སྣ་ཚོགས་ནས་རོལ་མོའི་སྒྲ་དང་། གར་དང་གླུ་སྣ་ཚོགས་པའི་བར་གྱིས་མཆོད་པ་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་བོ། །ཁ་ཅིག་གིས་ནི་རྐྱེན་གྱི་ཐེག་པར་སྨོན་ལམ་བཏབ། ཁ་ཅིག་གིས་ནི་ཉན་ཐོས་ཀྱི་ཐེག་པར་སྨོན་ལམ་བཏབ་སྟེ། ཐམས་ཅད་ཀྱང་བསམས་པ་ཇི་ལྟ་བ་བཞིན་དུ་ཕྱིར་མི་ལྡོག་པར་གྱུར་ཏོ། །དེའི་ཚེ་དེ་དག་ཆོ་ག་བཞིན་དུ་ཏིང་ངེ་འཛིན་དང་། བཟོད་པ་དང་། གཟུངས་ཐོབ་སྟེ། དགེ་བའི་རྩ་བ་རྣམ་པ་སྣ་ཚོགས་བསྒྲུབས་ནས་རང་གི་ཞིང་དུ་དོང་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཁ་ཅིག་ནི་རང་རྒྱལ་བའི་ལུས་བྱད་ཀྱིས་ཞེས་བྱ་བ་ནས་ཁ་ཅིག་ནི་ཉན་ཐོས་ཀྱི་ལུས་བྱད་ཀྱིས་ཞེས་བྱ་བའི་བར་དང་། ཁ་ཅིག་ནི་ཚངས་པའི་ལུས་བྱད་དང་། ཁ་ཅིག་ནི་བརྒྱ་བྱིན་གྱི་ལུས་བྱད་ཀྱིས་ཞེས་བྱ་བ་ནས་ཁ་ཅིག་ནི་རྒྱལ་པོ་ཆེན་པོ་བཞིའི་
ལུས་བྱད་ཀྱིས་ཞེས་བྱ་བའི་བར་དང་། ཁ་ཅིག་ནི་སྲེད་མེད་ཀྱི་བུའི་ལུས་བྱད་དང་། ཁ་ཅིག་ནི་དབང་ཕྱུག་ཆེན་པོའི་ལུས་བྱད་ཀྱིས་ཞེས་བྱ་བའི་བར་དང་། ཁ་ཅིག་ནི་ཀླུའི་ལུས་བྱད་ཀྱིས་ཞེས་བྱ་བའི་བར་དང་། ཁ་ཅིག་ནི་གནོད་སྦྱིན་གྱི་ལུས་བྱད་ཀྱིས་ཞེས་བྱ་བའི་བར་དང་། ཁ་ཅིག་ནི་ལྷ་མ་ཡིན་གྱི་ལུས་བྱད་ཀྱིས་ཞེས་བྱ་བའི་བར་དང་། ཁ་ཅིག་ནི་འཁོར་ལོས་སྒྱུར་བའི་ལུས་བྱད་ཀྱིས་ཞེས་བྱ་བའི་བར་གྱིས་སངས་རྒྱས་ཀྱི་ཞིང་གང་དག་ན་སེམས་ཅན་ཉན་ཐོས་ཀྱིས་འདུལ་བའི་བར་དུ་ཡོད་པའི་སངས་རྒྱས་ཀྱི་ཞིང་དེ་དག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་ས་བཅུ་པ་རྣམས་སེམས་ཅན་ཡོངས་སུ་སྨིན་པར་བྱ་བའི་ཕྱིར་ཞུགས་ཏེ། དེར་ཉན་ཐོས་ཀྱི་ལུས་བྱད་ཀྱི་བར་གྱིས་སེམས་ཅན་རྣམས་ལ་ཆོས་སྟོན་ཏོ། །སངས་རྒྱས་ཀྱི་ཞིང་དེར་ཡང་སེམས་ཅན་ཐམས་ཅད་ཀྱིས་སྣང་བ་དེ་མཐོང་སྟེ། དེ་བཞིན་གཤེགས་པ་ཤཱཀྱ་ཐུབ་པ་ཡང་མཐོང་ནས་སེམས་ཅན་དེ་དག་ཤིན་ཏུ་དགའ་བ་དང་མཆོག་ཏུ་དགའ་བ་སྐྱེས་ཤིང་དབང་པོ་རྣམས་ཚིམ་སྟེ། ཐམས་ཅད་སྡུག་བསྔལ་གྱི་ཚོར་བ་རྒྱུན་ཆད་དོ། །དེ་དག་ལ་བདེ་བའི་ཚོར་བ་ཡང་བྱུང་ངོ་། །སངས་རྒྱས་ཀྱི་ཞིང་དེར་གང་ཉན་ཐོས་ཀྱི་ལུས་བྱད་ཀྱིས་ཆོས་སྟོན་པ་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་ཏེ། དེས་བསོད་ནམས་ཆེན་པོ་བསགས་པའི་དགེ་བའི་རྩ་བས་འདི་ལྟ་བུའི་དབྱངས་དང་སྒྲ་བརྗོད་པས་སངས་རྒྱས་ཀྱི་ཞིང་དེ་ཐམས་ཅད་གོ་བར་བྱེད་པ་འདི་སྐད་ཅེས་སྨྲས་སོ། །སྡིག་པའི་སེམས་ནི་གཞོམ་པར་བྱོས། །སྡིག་པའི་ལྟ་བ་སྤོང་བར་བྱོས། །གང་དུ་འཇིག་རྟེན་མི་འཇུག་པའི། །འཁོར་བའི་ཕ་རོལ་འདོང་བར་བྱོས། །ཁྱེད་ཅག་སྡིག་པའི་སེམས་ཀྱིས་སུ། །ངེས་པར་འབྱུང་བར་མི་ལྟ་བས། །རྒ་བ་དང་ནི་འཆི་བའི་ལུས། །འཁོར་བར་རིང་པོར་ཞུགས་པ་ཡིན། །སྟོན་པ་མཐོང་བ་རྙེད་པར་དཀའ། །དལ་བ་འདི་འདྲ་རྙེད་པར་དཀའ། །ཆོས་ཐོས་པ་ཡང་རྙེད་པར་དཀའ། །དགེ་བྱེད་རབ་ཏུ་རྙེད་པར་དཀའ། །དེ་ལྟར་ཁྱེད་ཀྱིས་གུས་བྱས་ཏེ། །བྱང་ཆུབ་ཏུ་
ནི་འདུན་པ་སྐྱེད། །སྡུག་བསྔལ་ཀུན་ལས་ཐར་གྱིས་ལ། །འཇིག་རྟེན་འདྲེན་པར་འགྱུར་བར་བྱོས། །རྟག་པ་དང་ནི་ཆད་པའི་བློས། །ཆོས་གཉིས་མྱུར་དུ་སྤངས་ནས་ནི། །འདུ་བྱེད་ཐམས་ཅད་བདག་མེད་ལ། །ཚུལ་བཞིན་དུ་ནི་རྟག་པར་བྱོས། །ཀུན་འབྱུང་སྲེད་དང་སྡུག་བསྔལ་ཡང་། །ཡེ་ཤེས་ཆུ་ཡིས་བཀྲུ་བར་བྱོས། །ཤཱཀྱ་སེང་གེ་མཆོད་པའི་ཕྱིར། །ཐམས་ཅད་ལྷན་ཅིག་མྱུར་དུ་འདོང་། །དེ་ནས་བྱང་ཆུབ་སེམས་དཔའ་དེ་དག་ཉན་ཐོས་ཀྱི་ལུས་བྱད་ཀྱི་བར་གྱིས་བྱང་ཆུབ་སེམས་དཔའ་རེ་རེ་ཞིང་བྱང་ཆུབ་སེམས་དཔའ་དང་། སེམས་ཅན་རྫུ་འཕྲུལ་དང་ལྡན་པ་གང་གཱའི་ཀླུང་གི་བྱེ་མ་སྙེད་ཚད་མེད་པ་དང་ལྷན་ཅིག་ཏུ་རང་རང་གི་སངས་རྒྱས་ཀྱི་ཞིང་ནས་ཆས་ཏེ། འདིར་དེ་བཞིན་གཤེགས་པ་ཤཱཀྱ་ཐུབ་པ་འཁོར་དང་བཅས་པ་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཤཱཀྱ་ཐུབ་པ་ལ་དེ་དག་གིས་རིན་པོ་ཆེ་སྣ་ཚོགས་དང་། རས་བཅོས་བུ་སྣ་ཚོགས་དང་། ཆོས་གོས་སྣ་ཚོགས་དང་། རྒྱན་དང་རྒྱན་གྱི་ལྷབ་ལྷུབ་སྣ་ཚོགས་དང་། གདུགས་དང་། རྒྱལ་མཚན་དང་། བ་དན་སྣ་ཚོགས་དང་། མེ་ཏོག་སྣ་ཚོགས་དང་། སྤོས་སྣ་ཚོགས་དང་། རོལ་མོའི་སྒྲ་སྣ་ཚོགས་དང་། བསྟོད་པ་སྣ་ཚོགས་དང་། གླུ་སྣ་ཚོགས་དང་། གར་སྣ་ཚོགས་ཀྱིས་མཆོད་པ་བྱས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་རང་རང་གི་སངས་རྒྱས་ཀྱི་ཞིང་དུ་ཕྱིན་ནས་རང་རང་གི་སྟན་དག་ལ་འཁོད་དོ། །དེ་བཞིན་དུ་རང་རང་གི་འཁོར་རྣམས་ལ་དེ་བཞིན་གཤེགས་པ་ཤཱཀྱ་ཐུབ་པའི་བསྔགས་པ་དང་གྲགས་པ་ནས་སེམས་ཅན་ཐམས་ཅད་ཡོངས་སུ་སྨིན་པར་མཛད་པའི་ཡོན་ཏན་གྱི་ཕན་ཡོན་གྱི་བར་བརྗོད་པར་གྱུར་ཏེ། དེ་ནས་སངས་རྒྱས་ཀྱི་ཞིང་དེ་དག་ན་འཁོར་དེའི་སེམས་ཅན་གྲངས་མེད་པ་དཔག་ཏུ་མེད་པ་ཡོད་པ་དེ་དག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་བཞིན་དུ་ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པར་ཡང་སེམས་བསྐྱེད་དེ། ཐམས་ཅད་ཀྱང་ཕྱིར་
མི་ལྡོག་པར་གྱུར་ཏོ། །དེའི་ཚེ་དེ་དག་གིས་ཏིང་ངེ་འཛིན་དང་། གཟུངས་དང་། བཟོད་པ་སྣ་ཚོགས་ཐོབ་ནས་དགེ་བའི་རྩ་བ་རྣམས་བསྐྱེད་དོ། །སེམས་ཅན་ཐམས་ཅད་ཀྱིས་སངས་རྒྱས་ཀྱི་ཞིང་མི་མཇེད་འདིར་གང་བཅོམ་ལྡན་འདས་ཀྱི་སྐུ་ལ་ཆུད་པར་གྱུར་པའི་བཀོད་པ་དེ་ལྟ་བུ་ཡང་མཐོང་ངོ་། །དེ་དག་ཐམས་ཅད་དེ་བཞིན་གཤེགས་པའི་ཡོན་ཏན་རྣམས་ལ་ངོ་མཚར་ཐོབ་ཅིང་རྨད་དུ་བྱུང་བ་ཐོབ་བོ། །དེའི་ཚེ་གང་དག་སྔོན་ཆད་སེམས་མ་བསྐྱེད་པའི་སེམས་ཅན་གང་གཱའི་ཀླུང་གི་བྱེ་མ་སྙེད་གྲངས་མེད་པ་དཔག་ཏུ་མེད་པ་དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དེ་བཞིན་དུ་རང་སངས་རྒྱས་ཀྱི་ཐེག་པ་དང་། དེ་བཞིན་དུ་ཉན་ཐོས་ཀྱི་ཐེག་པར་ཡང་སེམས་དག་བསྐྱེད་དེ། དེ་དག་ཐམས་ཅད་ཕྱིར་མི་ལྡོག་པའི་ས་ཐོབ་པར་གྱུར་ཏོ། །དེ་བཞིན་དུ་འཁོར་ལོས་སྒྱུར་བའི་ལུས་བྱད་ཀྱིས་ཞེས་བྱ་བའི་བར་དང་། ཕྱིར་མི་ལྡོག་པའི་ས་ཐོབ་པར་གྱུར་ཏོ་ཞེས་བྱ་བའི་བར་དུ་ཡིན་ཏེ། སེམས་ཅན་ཡོངས་སུ་སྨིན་པར་མཛད་པའི་ཕྱིར་ཇི་ལྟར་བཅོམ་ལྡན་འདས་ཆོ་འཕྲུལ་ཆེན་པོ་སངས་རྒྱས་ཐམས་ཅད་ཀྱི་ཡུལ་གྱི་རྒྱུ་འཐུན་པར་ཏིང་ངེ་འཛིན་དེ་ལྟ་བུ་ལ་སྙོམས་པར་ཞུགས་པ་བཞིན་ནོ། །འདུས་པ་ཆེན་པོ་ཉི་མའི་སྙིང་པོའི་ལེའུ་བཅུ་གཅིག་པ་ལས་ལེའུ་དྲུག་པའོ།། །།