བརྒྱད་པ། འཕགས་པ་འདུས་པ་ཆེན་པོའི་སྡེ་ཐེག་པ་ཆེན་པོའི་མདོ་ལས་ཉི་མའི་སྙིང་པོའི་ལེའུ་བཅུ་གཅིག་པ་ལས་བརྒྱད་པ།
འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་བཅུ་གཅིག་པ། རྒྱ་མཚོས་སྨྲས་པ། ནམ་མཁའ་ལ་ནི་རྒྱུ་སྐར་ཚོགས། །ཇི་ལྟར་བཞག་པ་བཞིན་དུ་ནི། །ཁྱོད་ཀྱིས་སྔོན་གྱི་ཚེ་རབས་དྲན། །མཁས་ཁྱོད་སྲིད་གསུམ་ཀུན་གྱི་གཙོ། །ཁྱོད་ཀྱི་སྙིང་རྗེ་བྱམས་པ་དཔེར། །ཤེས་གསལ་འགྲོ་ལ་སྙིང་བརྩེ་བཞིན། །ཀུན་དཔལ་འདི་ནས་ཁྱོད་ཀྱིས་ནི། །ལག་འགྲོ་ཐམས་ཅད་ཐར་བར་གྱིས། །སྲིད་གསུམ་ཚུལ་བརྟུལ་མཚུངས་མེད་ཁྱོད། །ལག་འགྲོ་དེ་ཀུན་ཚིམ་བྱེད་ཁྱོད། །ཁྱོད་ནི་དྲང་སྲོང་ཀུན་གྱི་བླ། །
མི་རྣམས་ཀྱིས་ནི་མཆོད་པར་འོས། །འགྲོ་བ་ཀུན་དཔལ་ཁྱོད་ལ་ནི། །ལྷ་དང་ལག་འགྲོ་གནོད་སྦྱིན་ཚོགས། །རྟེན་གྱི་ཡུལ་རྣམས་ཐམས་ཅད་པ། །ལག་འགྲོ་མྱུར་དུ་ཐར་བར་གྱིས། །དེ་ནས་དྲང་སྲོང་སྐར་མ་ལ་དགའ་བ་དཀོན་མཆོག་གསུམ་ལ་མཆོག་ཏུ་ཡིད་དང་བ་བསྐྱེད་པར་འདོད་ནས་དེ་ལྟ་བུའི་ཀླུའི་ཚོགས་ཐམས་ཅད་ལ་ཤིན་ཏུ་རིགས་པའི་ཚིག་སྙན་པ་དག་གིས་འདི་སྐད་ཅེས་སྨྲས་སོ། །ཡོན་ཏན་དེ་འདྲ་བདག་ལ་མེད། །དྲང་སྲོང་རྔ་བོང་བདག་མ་ཡིན། །ཁྱེད་ཅག་འདི་ནས་ཐར་བྱེད་པར། །བདག་གིས་ནུས་པ་མ་ཡིན་ནོ། །གང་གིས་བསྐལ་པ་དུ་མར་ནི། །དཀའ་ཐུབ་དཀའ་བ་བཟོད་པ་སྤྱད། །ཁྱོད་ཅག་ཐར་བར་བྱེད་པ་ཡི། །དྲང་སྲོང་གཞན་དེ་བལྟ་བར་གྱིས། །རྟག་ཏུ་བརྩོན་ཞིང་སྦྱིན་པ་བྱིན། །མཁས་ཤིང་གླང་ཆེན་རྟ་དང་ནི། །ཤིང་རྟ་བུ་དང་ཆུང་མ་དང་། །ནོར་གྱིས་སེམས་ཅན་ཕན་པ་བྱས། །རྐང་ལག་མགོ་དང་རྣ་བ་དང་། ། མིག་དང་པགས་པ་ཁྲག་དང་ནི། །བུ་བྲན་བྲན་མོ་བཟའ་བཏུང་མང་། །མལ་ཆ་ཁ་ཟས་སྔོན་ཆད་བཏང་། །སྙིང་རྗེ་དང་ནི་བྱམས་པ་ཡིས། །ཁྱེད་ཅག་ཐར་བྱེད་སྲིད་གསུམ་ན། །མཚུངས་མེད་བསམ་གཏན་དགའ་འབྱུང་བ། །དེ་ནི་དྲང་སྲོང་རྔ་བོང་སྟེ། །ཀུན་ཏུ་བརྩེ་ཞིང་བྱང་ཆུབ་སེམས། །སྔོན་ཆད་རིག་བྱེད་ཕ་རོལ་ཕྱིན། །སེམས་ཅན་མང་པོ་སྡུག་བསྔལ་གྱིས། །ཉམ་ཐག་པ་ནི་ཐར་བར་བྱས། །སེམས་ཅན་གཅིག་གི་ཆེད་དུ་ཡང་། །སྔོན་གྱི་ཚེ་རབས་དེ་བསྐལ་པར། །དམྱལ་བར་འགྲོ་བཟོད་དེ་ཡི་དགས། །དེ་ནི་འཇིག་རྟེན་སངས་རྒྱས་བྱུང་། །སེམས་ཅན་སྡུག་བསྔལ་ཉམ་ཐག་ཀུན། །སྡུག་བསྔལ་མཐར་མཛད་རྔ་བོང་ཡིན། །སེམས་ཅན་སྨན་ཕྱིར་བརྩོན་འགྲུས་དང་། །སྙིང་རྗེ་བརྟན་པོས་དེ་སྲིད་འཁོར། །རྔ་བོང་དེ་ནི་སྐྱེས་པ་ན། །རྒྱལ་སྲས་བུ་རམ་ཤིང་བ་ཡི། །རིགས་སུ་ཟས་གཙང་གི་ནི་སྲས། །དེས་ནི་བཙས་མ་ཐག་ཏུ་ཁྱབ། །སྲིད་གསུམ་བདེ་འབྱུང་འཇིག་རྟེན་དཔལ། །ཡིད་བདེ་རྣམ་པ་སྣ་ཚོགས་དང་། །ལྷ་དང་ཀླུ་ཡི་བུ་རྣམས་དང་། །
འབྱུང་པོ་གནོད་སྦྱིན་རྒྱལ་པོས་ཁྱབ། །དེར་ནི་མཆོད་ཕྱིར་ཐམས་ཅད་ལྷགས། །དེ་ཡིས་གོམ་པ་བདུན་བོར་ཏེ། །རི་དང་རྒྱ་མཚོར་བཅས་པ་ཡི། །ས་ནི་ཐམས་ཅད་འཁྲུགས་པར་གྱུར། །འགྲོ་བ་རྒ་ནད་སྡུག་བསྔལ་དང་། །འཆི་བས་གཟིར་ལས་ངས་བསྒྲལ་ཞིང་། །ཞི་བ་བདེ་བ་མྱ་ངན་མེད། །སྐམ་ལ་དགོད་ཅེས་ཤཱཀ་སྲས་གསུངས། །མེ་ཏོག་དྲི་དང་རིན་ཆེན་དག །ལྷ་ཀླུ་རྣམས་ཀྱིས་གཏོར་གྱུར་ཅིང་། །འབྱུང་པོའི་ཚོགས་རྣམས་སྣ་ཚོགས་ཀྱིས། །སྲས་པོ་ལ་ནི་བསྟོད་གྱུར་པ། །བསྐལ་པ་མང་པོ་དུ་མར་ཡང་། །སྔོན་ཆད་ཁྱོད་ཀྱིས་དུལ་བ་དང་། །སྦྱིན་དང་བསམ་གཏན་དགྱེས་ལ་བརྟེན། །སེམས་ཅན་ཀུན་ཆེད་སྡུག་བསྔལ་བཟོད། །འདི་ལ་སྐྱེ་བ་འདི་ཡང་ནི། །ཐམས་ཅད་ཀྱི་ནི་ཐ་མ་ལགས། །སྡུག་བསྔལ་ཐམས་ཅད་ཞི་མཛད་པར། །རིང་པོར་མི་ཐོགས་ཁྱོད་འཚང་རྒྱ། །དེས་ཀྱང་དཔའ་བོ་བརྟན་པར་གྱུར། །མཚུངས་པ་མེད་དེ་བུད་མེད་ཚོགས། ། དྲུག་ཁྲི་ཐམ་པ་སྤངས་ནས་སུ། །སྤྱོད་པ་རབ་བསྟན་ལོ་དྲུག་སྤྱད། །གཡོ་སྒྱུ་ཅན་ནི་སྡེར་བཅས་པའི། །བདུད་ནི་གཅིག་པུས་བཅོམ་ནས་ཀྱང་། །བྱང་ཆུབ་ཞི་མཆོག་གཞལ་མེད་བརྙེས། །མྱ་ངན་མེད་ལམ་དོན་དམ་གཟིགས། །བྱམས་དང་ཡེ་ཤེས་ཐུགས་རྗེ་ཡིས། །སེམས་ཅན་ཀུན་དང་མི་མཉམ་ཞིང་། །འབྱུང་པོ་དག་ནི་ཐམས་ཅད་ལ། །དེ་ནི་བྱམས་པའི་ཐུགས་མཉམ་པ། །སེམས་ཅན་གང་ལའང་མཐོ་མི་འཚམ། །སེམས་ཅན་ཐམས་ཅད་སྡུག་བསྔལ་ལས། །ཐར་བར་མཛད་ཅིང་དེ་ཡང་ནི། །རྣམ་བཅིངས་བཙོན་ར་ཐར་མཛད་པ། །མ་ག་དྷཱ་ན་དེ་གནས་ཤིང་། །འགྲོ་བའི་ནང་ན་ཆོས་ཀྱང་སྟོན། །དེ་ལ་ཁྱོད་ཀྱིས་གསོལ་བ་ཐོབ། །བྱམས་པའི་ཡིད་ཀྱིས་རྣམ་པར་ལྟོས། །དྲང་སྲོང་མཆོག་གི་ཐད་དུ་དེང་། །འགྲོ་བའི་སྡུག་བསྔལ་ཐམས་ཅད་ལས། །ཁྱེད་ཅག་ཡོངས་སུ་ཐར་བར་བྱེད། །རང་ཉིད་ཀྱང་ནི་འདོང་བར་གྱིས། །དགའ་མཆོག་བདེ་བ་འདོད་རྣམས་ཀྱིས། །ཕྱིན་ཅད་མཁའ་ལྡིང་ཐམས་ཅད་ལས། །འཇིགས་པ་ཁྱེད་ལ་མི་འབྱུང་ངོ་། །རྟག་བདེ་སྡུག་
བསྔལ་བྲལ་དགར་གྱིས། །བཙོན་ར་འདི་ནི་གཡོ་སྒྱུ་ཅན། །བདུད་ནི་ཁྱེད་ལ་རྣམ་པར་འཚེ། །ཇི་ལྟར་ང་ཡིས་བཤད་པ་བཞིན། །ཐམས་ཅད་ཀྱང་ནི་གཟུང་བར་གྱིས། །ཡང་དེའི་ཚེ་དྲང་སྲོང་ཐུབ་པའི་གནས་རྟེན་དུ་ཀླུ་དང་། ཀླུ་ཆེན་པོ་ཕོ་དང་། མོ་དང་། ཁྱེའུ་དང་། བུ་མོ་གང་དག་ཐམས་ཅད་འདུས་པ་དེ་དག་ཐམས་ཅད་ཀྱིས་ཐལ་མོ་རབ་ཏུ་སྦྱར་ཏེ་འདི་སྐད་ཅེས་སྨྲས་སོ། །འཇིག་རྟེན་ཐམས་ཅད་ལས་ཁྱད་པར་དུ་འཕགས་པ། ཆོས་ཐམས་ཅད་ཀྱི་དབང་གི་ཕ་རོལ་ཏུ་ཕྱིན་པ། སེམས་ཅན་ཐམས་ཅད་ཀྱི་སྡུག་བསྔལ་སེལ་བར་མཛད་པ། བདེ་བ་ཐམས་ཅད་སྦྱིན་པར་མཛད་པ། དགའ་བ་ཐམས་ཅད་སྐྱེད་པར་མཛད་པ། ཤེས་རབ་ཐམས་ཅད་ཀྱི་ཕ་རོལ་ཏུ་ཕྱིན་པ། རྟག་ཏུ་བྱམས་པའི་ཐུགས་དང་ལྡན་པ། ཐུགས་རྗེ་ཐམས་ཅད་ཀྱིས་ཁྱབ་པ། ཕྲིན་ལས་ཐམས་ཅད་སྒྲུབ་པར་མཛད་པ། ལམ་ཐམས་ཅད་སྟོན་པ། ཡང་དག་པའི་མིག་གསུང་བ། ལྷ་དང་ཀླུ་རྣམས་ཀྱིས་མཆོད་པ་ལ་ཕྱག་འཚལ་ལོ། །སྲིད་པ་གསུམ་གྱི་དགྲ་བཅོམ་པ། མཆོད་པ་ཐམས་ཅད་འོས་པ། བདག་ཅག་ཐམས་ཅད་སྡུག་བསྔལ་གྱི་བཙོན་ར་འདིར་འཕངས་ལགས་ན་འདི་ནས་བདག་ཅག་ཐར་བར་མཛད་པར་གསོལ། ཀླུ་དེ་དག་དང་ལྷན་ཅིག་བདག་ཅག་གནས་པར་བགྱིའོ། །བཅོམ་ལྡན་འདས་ཀྱིས་ཀླུ་དེ་དག་ཐམས་ཅད་སྔོན་གྱི་ལུས་ཀྱི་གཟུགས་ཇི་ལྟ་བ་བཞིན་དུ་བཀོད་དེ། གནས་དེ་ནས་འགྲོ་བར་མ་ནུས་སོ། །དེ་དག་ཐམས་ཅད་ཀྱིས་དྲང་སྲོང་སྐར་མ་ལ་དགའ་བ་ལ་སྨྲས་པ། དེ་བཞིན་གཤེགས་པ་དེ་ནི་བདེན་ཏེ། སེམས་ཅན་ཐམས་ཅད་ལ་བདེ་བར་བཞེད་པ་རྣམ་པར་མི་འཚེ་བའི་ཆོས་ཉིད་ཡིན་ནོ། །དེ་ལ་བདག་ཅག་སྐྱབས་སུ་ཉེ་བར་གནས་སོ། །འདི་ནས་མྱུར་དུ་བཞུད་ཅིག །བདུད་ཀྱི་འཆིང་བ་འདི་ལས་བདག་ཅག་ཐར་བར་མཛོད་ཅིག །སྐར་མ་ལ་དགའ་བས་འདི་སྐད་ཅེས་སྨྲས་སོ། །དེ་བཞིན་གཤེགས་པ་དྲང་སྲོང་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་སྙིང་རྗེ་ཆེན་པོའི་རྒྱུ་འཐུན་པ་ཐམས་ཅད་མཁྱེན་པ་ཐུབ་པ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་
ལ་འཁོར་བའི་འཁོར་ལོ་རྣམ་པར་ལྡོག་པར་བྱ་བའི་ཕྱིར་དང་། བྱང་ཆུབ་ཀྱི་ལམ་རྣམ་པར་དག་པར་བྱ་བའི་ཕྱིར་དང་། རྒྱུ་དང་འབྲས་བུའི་སེམས་ཅན་ཡང་དག་པར་བསྟན་པའི་ཕྱིར་ཞེས་བྱ་བ་ནས་སངས་རྒྱས་ཀྱི་སྤྱན་གྱི་བར་དུ་ཐོབ་པར་བྱ་བའི་ཕྱིར་མང་པོར་མ་བྱུང་བ་ལ་དམིགས་པ་དང་། ཉན་ཐོས་དང་ཐུན་མོང་བ་སེམས་ཅན་ལ་དམིགས་པའི་གནས་པ་མཆོག་བསྟན་ཏོ། །ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སློབ་དཔོན་ལ་རག་ལས་པ་རྣམས་ལ་རྒྱུ་ལས་ཡང་དག་པར་བྱུང་བ་དང་། སོ་སོར་བརྟགས་པ་ལ་དམིགས་པ་ཚངས་པའི་གནས་པ་བསྟན་ཏོ། །ད་ལྟར་དེ་བཞིན་གཤེགས་པ་དེ་ནི་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་གྲངས་མེད་པ་དཔག་ཏུ་མེད་པ་རྡུལ་ཕྲ་རབ་ཀྱི་རྡུལ་སྙེད་ན་ཐེག་པ་བླ་ན་མེད་པའི་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་། སེམས་ཅན་ཐམས་ཅད་འཁོར་བའི་རྒྱ་མཚོ་ལས་བསྒྲལ་བའི་ཕྱིར་དང་། བདུད་བཞི་གདུལ་བའི་ཕྱིར་དང་། དཀོན་མཆོག་གསུམ་གྱི་གདུང་རྒྱུན་མི་གཅད་པའི་ཕྱིར་ཆོས་ཀྱི་ཆུས་ཁྲུས་མཛད་དོ། །ད་ལྟར་ཤིན་ཏུ་ཀུན་ཏུ་རྟོག་པའི་ཉོན་མོངས་པའི་ཚོགས་ཀྱི་སེམས་ཅན་གྱི་ཁམས་ལ་དམིགས་པ་མེད་པ། ཀུན་ནས་ལྡང་བ་མེད་པ། རྒྱུ་བ་མེད་པ། གཞི་མེད་པ། མཚན་ཉིད་མེད་པ། མཚན་མ་མེད་པ། ཆགས་པ་མེད་པ། རྣམ་པར་གཞག་པ་མེད་པ། རྡུལ་མེད་པ། མུན་པ་མེད་པ། སྣང་བ་མེད་པ། གཟུང་བ་མེད་པ། གསལ་བྱེད་མེད་པ། སྤྱོད་པ་མེད་པ། ཐ་མི་དད་པ་ཉིད་ཅེས་བྱ་བ་ནས་ཕུང་པོ་དང་། ཁམས་དང་། སྐྱེ་མཆེད་དང་། འབྱུང་བ་ཆེན་པོ་ཐམས་ཅད་དང་། མིག་གི་རང་བཞིན་ཚོར་བ་པོ་མེད་པའི་སྲེད་པ་ཞེས་བྱ་བའི་བར་ནས། ཡིད་ཀྱི་རང་བཞིན་ཚོར་བ་པོ་མེད་པའི་སྲེད་པའི་བར་ལ་སྨོན་པ་མེད་པ་དང་། མངོན་པར་འདུ་བྱེད་པ་མེད་པ་དང་། འཇུག་པ་མེད་པའི་ཆོས་ཀྱི་དབྱིངས་དང་། ཡང་དག་པའི་མཐའ་དང་། འགག་པ་མེད་པ་དང་། དེ་བཞིན་ཉིད་འདྲེས་པ་མེད་པ་དང་། གང་འཇུག་པ་མེད་པའི་ཆོས་ཀྱི་
དབྱིངས་དོན་དམ་པ་སྟོང་པ་ཉིད་དང་། ཕྱིར་མི་ལྡོག་པའི་ཆོས་ཐམས་ཅད་མཉམ་པ་ཉིད་ཀྱིས་སྒྲོལ་བ། ཕྱད་པའི་ཡེ་ཤེས་ཀྱི་སྤྱོད་པ་དང་ལྡན་པ། ཡང་དག་པར་དམིགས་པའི་དེ་བཞིན་གཤེགས་པ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཕ་རོལ་ཏུ་ཕྱིན་པ་དྲུག་གི་སྤྱོད་པ་དག་ལ་ཡོངས་སུ་སྦྱང་བ་བྱས་པ། སེམས་ནམ་མཁའ་དང་མཉམ་ཞིང་མཚུངས་པ། མ་ཆགས་པའི་ཡེ་ཤེས་མཉམ་པ་ཉིད་ཐོབ་པ། ལྟ་བ་ཐམས་ཅད་ཀྱི་བག་ཆགས་ཀྱི་ཉོན་མོངས་པ་ཡང་དག་པར་བཅོམ་པ་རྣམས་ལ་ཚངས་པའི་གནས་པ་དམིགས་པ་མེད་པ་སྟོན་ཏོ། །ཀྱེ་དྲང་སྲོང་སྐར་མ་ལ་དགའ་བས་བསྟན་པ་འདི་བཤད་པ་ན་ཡང་ཀླུའི་རྒྱལ་པོ་རྒྱ་མཚོ་དང་། ཀླུའི་རྒྱལ་པོ་ལུས་འབིགས་པའི་ཁབ་ཅེས་བྱ་བ་དང་། ཀླུའི་རྒྱལ་པོ་ཟླ་བ་ལ་རྩུབ་པ་ཞེས་བྱ་བ་དང་། ཀླུའི་རྒྱལ་པོ་རིན་ཆེན་སྐྱོང་ཞེས་བྱ་བ་དེ་དག་བྱང་ཆུབ་ཀྱི་སྤྱོད་པའི་དགེ་བའི་རྩ་བ་སྔོན་བསགས་པའི་སྨོན་ལམ་ཡང་དག་པར་རྗེས་སུ་དྲན་པས་དེ་དག་སྣང་བ་དང་། རྣམ་པར་བསྒྱིངས་པ་དང་ལྡན་པའི་གཟུངས་ཐོབ་པར་གྱུར་ཏོ། །དེའི་ཚེ་ཀླུ་གཞན་བརྒྱད་ཅུ་རྩ་བཞི་ནི་བྱང་ཆུབ་ཀྱི་སྤྱོད་པའི་དགེ་བའི་རྩ་བ་སྔོན་བསགས་པའི་སྨོན་ལམ་ཡང་དག་པར་རྗེས་སུ་དྲན་པས་བྱང་ཆུབ་ཀྱི་སེམས་མི་བརྗེད་པའི་ཏིང་ངེ་འཛིན་ཐོབ་པར་གྱུར་ཏོ། །བྱང་ཆུབ་སེམས་དཔའ་སྐར་མ་ལ་དགའ་བ་ལ་དེ་དག་གིས་འདི་སྐད་ཅེས་སྨྲས་སོ། །ཁྱོད་བཞུད་ལ་སྙིང་རྗེ་ཆེན་པོ་ཐོབ་པ་གང་གིས་འདིར་བདག་ཅག་བདུད་ཀྱི་འཆིང་བ་འདི་ལས་ཡོངས་སུ་ཐར་བར་བགྱིད་པའི་དེ་བཞིན་གཤེགས་པའི་སྙིང་རྗེ་ཆེན་པོ་ཐོབ་པ་དེ་ལ་བདག་ཅག་གི་ཚིག་གིས་གསོལ་བ་ཐོབ་ཤིག །དེ་བཞིན་དུ་བྱའོ་ཞེས་སྨྲས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྐར་མ་ལ་དགའ་བ་དྲང་སྲོང་གི་ཆ་བྱད་ཀྱིས་འཁོར་དྲང་སྲོང་སྟོང་ཕྲག་མང་པོ་དང་དེ་ནས་རྫུ་འཕྲུལ་གྱིས་སོང་ངོ། །འཕགས་པ་འདུས་པ་ཆེན་པོའི་སྡེ་ཐེག་པ་ཆེན་པོའི་མདོ་ལས་ཉི་མའི་སྙིང་པོའི་ལེའུ་བཅུ་གཅིག་པ་ལས་བརྒྱད་པའོ།། །།