བཅུ་གཅིག་པ། ཀླུ་སྐྱབས་སུ་འགྲོ་བའི་ལེའུ།
འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་བཅུ་གཉིས་པ། དེ་ནས་བཅོམ་ལྡན་འདས་མེ་ཏོག་དང་། རིན་པོ་ཆེ་དང་། ཆོས་གོས་དག་གི་ཆར་རབ་ཏུ་འབེབས་ཤིང་། སིལ་སྙན་དང་། ཕེག་རྡོབ་པ་དང་། གླུ་དབྱངས་དག་གི་རོལ་མོའི་སྒྲ་འབྱིན་པའི་ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་ཐམས་ཅད་སྡོད་པས་རི་རབ་ཀྱི་རྩེ་མོ་ནས་གཤེགས་ཏེ། བཅོམ་ལྡན་འདས་ཉན་ཐོས་ཀྱི་དགེ་འདུན་གྱིས་མདུན་དུ་བདར་ཅིང་བྱང་ཆུབ་སེམས་དཔའི་དགེ་འདུན་གྱིས་ཡོངས་སུ་བསྐོར་ནས་དྲང་སྲོང་ཐུབ་པའི་གནས་རྟེན་གྱི་དབུས་སུ་གདན་བཏིང་བ་ཉིད་ལ་བཞུགས་སོ། །བཅོམ་ལྡན་འདས་ལ་མཆོད་པའི་ལས་བྱ་བའི་ཕྱིར་སྟེང་གི་ནམ་མཁའ་ལ་ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། མིའམ་ཅི་ཐམས་ཅད་ཀྱིས་རྒྱན་དང་། ཕྱེ་མ་སྣ་ཚོགས་དང་། མེ་ཏོག་སྣ་ཚོགས་དང་། རིན་པོ་ཆེ་སྣ་ཚོགས་ཀྱི་ཆར་རབ་ཏུ་ཕབ་བོ། །བཅོམ་ལྡན་འདས་ལ་ཀླུ་དེ་དག་གིས་ཀྱང་མེ་ཏོག་སྣ་ཚོགས་དང་། དྲི་སྣ་ཚོགས་དང་། རིན་པོ་ཆེ་སྣ་ཚོགས་དང་། རས་གོས་དང་། རས་བཅོས་བུ་དང་། ཆོས་གོས་དང་། རྒྱན་སྣ་ཚོགས་ཀྱིས་མཆོད་པ་བྱས་ནས་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་སྤྱན་སྔར་ཆོས་མཉན་པའི་ཕྱིར་འཁོད་དོ། །དེ་ནས་བཅོམ་ལྡན་འདས་ལ་ཀླུའི་རྒྱལ་པོ་རྒྱ་མཚོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་སུག་ལས་གང་དག་གིས་སེམས་ཅན་རྣམས་ཀླུའི་སྐྱེ་གནས་སུ་སྐྱེ་ལགས། བཅོམ་ལྡན་འདས་ཀྱིས་བཀའ་སྩལ་པ། ཀླུའི་བདག་པོ་ལས་ཀྱི་སྒྲིབ་པ་བཅུས་སེམས་
ཅན་འབྱུང་པོ་རྣམས་མྱུར་དུ་ཀླུའི་སྐྱེ་གནས་སུ་སྐྱེའོ། །བཅུ་གང་ཞེ་ན། སེམས་ཅན་གང་དག་ཕ་རོལ་ཏུ་ཕྱིན་པ་དྲུག་ལ་མངོན་པར་བརྩོན་ཞིང་བླ་ན་མེད་པའི་ཐེག་པ་ཡོངས་སུ་ཚོལ་བའི་སེམས་དང་ལྡན་པ་དག་ཡིན་ལ་མྱུར་དུ་འདོད་པ་རྣམས་ལ་ཉེས་དམིགས་སུ་ལྟ་བ་མ་ཡིན་ཞིང་ཤིན་ཏུ་སྦྱིན་པ་ལ་མངོན་པར་བརྩོན་ལ་ལག་པ་བརྐྱང་བ་དག་ཡོད་དེ། དེ་དག་སྨོན་ལམ་གྱི་དབང་གིས་ཀླུ་རྣམས་ཀྱི་ནང་དུ་སྐྱེའོ། །ཡང་སེམས་ཅན་གང་དག་བླ་ན་མེད་པའི་ཐེག་པ་ཡོངས་སུ་ཚོལ་བའི་སེམས་དང་ལྡན་ཞིང་སྦྱིན་པའི་ཕ་རོལ་ཏུ་ཕྱིན་པ་ལ་མངོན་པར་བརྩོན་པ་དག་ཡོད་དེ། དེ་དག་གིས་ཚུལ་ཁྲིམས་ཐམས་ཅད་རྫོགས་པར་སྐྱོན་མེད་པར་བསྲུང་བར་ནི་མ་ནུས་སོ། །དེ་དག་སེམས་ཅན་དམྱལ་བ་དང་། ཡི་དགས་ཀྱི་འཇིགས་པས་སྐྲག་ནས་རང་གི་སྨོན་ལམ་གྱིས་ཀླུ་རྣམས་ཀྱི་ནང་དུ་སྐྱེའོ། །ཡང་སེམས་ཅན་གང་དག་བླ་ན་མེད་པའི་ཐེག་པ་ཡོངས་སུ་ཚོལ་བར་བྱེད་ཅིང་ཤིན་ཏུ་ང་རྒྱལ་གྱིས་ཁེངས་པ་དག་ཡོད་དེ། དེ་དག་ང་རྒྱལ་གྱི་མཐུས་རང་གི་སྨོན་ལམ་གྱིས་ཀླུ་རྣམས་ཀྱི་ནང་དུ་སྐྱེའོ། །ཡང་སེམས་ཅན་གང་དག་བླ་ན་མེད་པའི་ཐེག་པའི་སྤྱོད་པ་ལ་མངོན་པར་བརྩོན་པ་དག་ཡོད་དེ། དེ་དག་ཤིན་ཏུ་ཁྲོ་བ་མང་ཞིང་སེམས་ཅན་གཞན་རྣམས་ལ་རབ་ཏུ་སྡང་སྟེ། དེ་དག་ཤ་ཁོན་ལ་རྟེན་པས་འཆི་བའི་དུས་ཐ་མར་ཀླུ་རྣམས་ཀྱི་ནང་དུ་སྨོན་ལམ་འདེབས་ཏེ། དེ་དག་སྨོན་ལམ་གྱིས་དེར་སྐྱེའོ། །ཡང་སེམས་ཅན་གང་དག་ཉན་ཐོས་ཀྱི་ཐེག་པ་དང་ཡང་དག་པར་ལྡན་ཞིང་སྣོད་དུ་གྱུར་པའི་སྦྱིན་གནས་ཡོངས་སུ་བཙལ་བ་དང་མཆོད་པའི་སེམས་དང་ལྡན་པ་དག་ཡོད་དེ། དེ་དག་རང་གི་སྨོན་ལམ་གྱིས་ཀླུ་རྣམས་ཀྱི་ནང་དུ་སྐྱེའོ། །ཡང་སེམས་ཅན་གང་དག་སེར་སྣ་ཅན་དང་ང་རྒྱལ་གྱི་སྐྱོན་དང་ལྡན་པ་དག་ཡོད་དེ། དེ་དག་ལས་དེས་ཀླུ་རྣམས་ཀྱི་ནང་དུ་སྐྱེའོ། །ཡང་སེམས་ཅན་གང་དག་ང་རྒྱལ་ལ་མངོན་པར་དགའ་ཞིང་མུ་ཅོར་སྨྲ་ལ་བརྫུན་དུ་སྨྲ་བ་དག་ཡོད་དེ། དེ་དག་ལས་དེས་ཀླུ་རྣམས་ཀྱི་ནང་དུ་སྐྱེའོ། །ཡང་སེམས་ཅན་གང་དག་སངས་རྒྱས་ལ་གཅེས་པར་བྱེད་པ་མ་ཡིན་པ་མང་བ་དག་ཡིན་ཞིང་། ཆོས་དང་།
དགེ་འདུན་དང་། བསླབ་པ་དང་། མཁན་པོ་དང་། སློབ་དཔོན་དང་། བླ་མའི་གནས་ལྟ་བུ་དང་། ཕ་མ་རྣམས་ལ་གཅེས་པར་བྱེད་པ་མ་ཡིན་པ་མང་བ་དག་ཡིན་པ་ཡོད་དོ། །དེའི་ཚེ་དེ་དག་ང་རྒྱལ་གྱི་རྒྱུ་དང་། ལུས་དང་། ངག་དང་། ཡིད་ཆུང་ངུས་འཁྲུལ་པས་ཀླུ་རྣམས་ཀྱི་ནང་དུ་སྐྱེའོ། །ཡང་སེམས་ཅན་གང་དག་ང་རྒྱལ་དང་། གཏི་མུག་གིས་ཟིལ་གྱིས་ནོན་ཅིང་མ་དུལ་ལ་སྐྱོན་མེད་པ་མ་ཡིན་པར་སྤྱོད་པ་དག་ཡོད་དེ། དེ་དག་ཀླུ་རྣམས་ཀྱི་ནང་དུ་སྐྱེའོ། །ཡང་སེམས་ཅན་གང་དག་ང་རྒྱལ་དང་། ཕྲ་མ་སྨྲ་བ་དང་། ཚིག་རྩུབ་པོ་སྨྲ་བ་ལ་གོམས་པ་དག་ཡོད་དེ། དེ་དག་འཆི་བའི་དུས་བྱས་ནས་ཀླུ་རྣམས་ཀྱི་ནང་དུ་སྐྱེ་སྟེ་བཅུ་པོ་དེ་དག་ཡིན་ནོ། །ཆོས་གཞན་གསུམ་དང་ལྡན་ན་ཀླུ་རྣམས་ཀྱི་ནང་དུ་སྐྱེའོ། །གསུམ་གང་ཞེ་ན། སེམས་ཅན་གང་དག་ལུས་དང་། ངག་དང་། ཡིད་ཀྱི་ཉེས་པར་སྤྱོད་པ་ཤིན་ཏུ་དམ་པོ་དག་གིས་སེམས་ཅན་དམྱལ་བ་རྣམས་ཀྱི་ནང་དུ་སྐྱེས་པ་དག་ཡོད་དེ། དེ་དག་དེ་ནས་ཤི་འཕོས་ནས་ཉེས་པར་སྤྱོད་པའི་ལྷག་མ་ཆུང་ངུས་ཀླུ་རྣམས་ཀྱི་ནང་དུ་སྐྱེའོ། ། དེ་བཞིན་དུ་དུད་འགྲོ་རྣམས་དང་། དེ་བཞིན་དུ་ཡི་དགས་རྣམས་ནས་ཞེས་བྱ་བའི་བར་དུ་སྟེ། ཆོས་གསུམ་པོ་དེ་དག་གིས་སེམས་ཅན་རྣམས་ཀླུ་རྣམས་ཀྱི་ནང་དུ་སྐྱེའོ། །རྒྱ་མཚོས་ཀྱང་གསོལ་པ། བཙུན་པ་བཅོམ་ལྡན་འདས་དེ་དེ་བཞིན་ནོ། །བཙུན་པ་བདེ་བར་གཤེགས་པ་དེ་དེ་བཞིན་ཏེ། བཙུན་པ་བཅོམ་ལྡན་འདས་འདི་ན་ཀླུ་གང་དག་ལོངས་སྤྱོད་པ་དང་། ཉེ་བར་སྤྱོད་པའི་དཔལ་དང་ལྡན་པ་ལྷ་དང་འདྲ་བ་དག་མཆིས་པ་ནས་མི་སྨད་རིམས་དང་འདྲ་བ་དག་མཆིས་པའི་བར་དང་། ཡི་དགས་དང་འདྲ་བ་དག་མཆིས་པའི་བར་དང་། གང་དག་དུད་འགྲོའི་སྐྱེ་གནས་པ་དང་འདྲ་བ་དག་མཆིས་པའི་བར་ནས་ཀླུ་གང་དག་སེམས་ཅན་དམྱལ་བ་དང་འདྲ་བ་དག་གི་བར་མཆིས་ལགས་ཏེ། དེ་དག་སྡུག་བསྔལ་གྱི་ཚོར་བ་མྱོང་བར་འགྱུར་ལགས་སོ། །དེ་ནས་ཀླུའི་རྒྱལ་པོའི་བུ་པད་མའི་གདོང་ཞེས་བྱ་བས་འདི་སྐད་ཅེས་གསོལ་ཏོ། །བདག་སུ་ག་ལས་གང་གིས་ཀླུའི་རིགས་སུ་སྐྱེས་ནས་གཟུགས་
མཆོག་ཏུ་ལྷམ་མེ་ཞིང་ལུས་ཀྱིས་རེག་པ་གང་ཆུང་ཟད་ཅི་རེག་ཀྱང་ཀུན་ཏུ་ཚིག་ཅིང་འབར་བ་ལགས། བདག་དུས་ཐམས་ཅད་དུ་མཆིལ་ལྷམ་བོར་ནས་གཅེར་བུར་རྒྱུ་བར་བགྱིད་ལགས། བདག་གི་ཕ་མ་དེ་ནི་དཔལ་ཕུན་སུམ་ཚོགས་པའི་ཆེས་ཁྱད་པར་དུ་འཕགས་པ་མྱོང་སྟེ། དཔེར་ན་གླིང་བཞི་པའི་འཁོར་ལོས་སྒྱུར་བའི་རྒྱལ་པོ་བཞིན་ལགས། བཅོམ་ལྡན་འདས་ཀྱིས་བཀའ་སྩལ་པ། ཀྱེ་ལག་འགྲོ་སྔོན་བྱུང་བ་འདས་པའི་དུས་བསྐལ་པ་སུམ་ཅུ་རྩ་གཅིག་འདས་པ་དེའི་ཚེ་དེའི་དུས་ན། དེ་བཞིན་གཤེགས་པ་ཞེས་བྱ་བ་ནས་སངས་རྒྱས་བཅོམ་ལྡན་འདས་ཞེས་བྱ་བའི་བར་གཙུག་ཏོར་ཅན་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཚེ་རྒྱལ་པོ་མེ་ཏོག་བྲལ་ཞེས་བྱ་བ་ཞིག་བྱུང་སྟེ། རྒྱལ་པོ་མེ་ཏོག་བྲལ་དེས་ཀྱང་དེ་བཞིན་གཤེགས་པ་གཙུག་ཏོར་ཅན་ཉན་ཐོས་དང་། བྱང་ཆུབ་སེམས་དཔའི་དགེ་འདུན་བརྒྱ་སྟོང་ཕྲག་མང་པོའི་འཁོར་དང་ལྡན་པ་དེ་ལ་ཟླ་བ་གསུམ་དུ་ཡོ་བྱད་ཐམས་ཅད་ཕུལ་ནས་རྟག་ཏུ་ཆོས་མཉན་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་བོ། །བཅོམ་ལྡན་འདས་དེའི་གཙུག་ལག་ཁང་ཡོ་བྱད་ཐམས་ཅད་དང་ལྡན་པ་ཞིག་ཀྱང་བརྩིགས་སོ། །རྒྱལ་པོ་མེ་ཏོག་བྲལ་དེའི་བུ་སྲིད་སྒྲུབ་བཅས་ཞེས་བྱ་བ་ཞིག་ཡོད་དེ། དེ་ཤིན་ཏུ་འཁོར་བས་སྐྲག་ནས་བཅོམ་ལྡན་འདས་ཀྱི་ཐད་དུ་རབ་ཏུ་བྱུང་སྟེ་ཕའི་དགེ་འདུན་གྱི་ཀུན་དགའི་ར་བ་དེ་རྗེས་སུ་སྐྱོང་ཞིང་འདུག་གོ །དེ་ནས་བཅོམ་ལྡན་འདས་ཀྱི་ཉན་ཐོས་ཀྱི་དགེ་སློང་གང་དག་གནས་པ་དང་། དེ་ན་གང་དག་བཟའ་བ་དང་། བཏུང་བ་དང་། མལ་ཆ་ལ་ལོངས་སྤྱོད་པར་བྱེད་པ་ཐམས་ཅད་ལ་མེ་ཏོག་བྲལ་གྱི་བུ་དགེ་སློང་སྲིད་སྒྲུབ་བཅས་དེ་ཕྲག་དོག་བྱེད་དོ། །བཅོམ་ལྡན་འདས་ཀྱི་ཉན་ཐོས་ཀྱི་དགེ་སློང་དེ་དག་ཀྱང་གནས་དེ་ནས་དོང་ངོ་། །དེ་ཡང་ཡིད་མཆོག་ཏུ་དགའ་ནས་བདག་ཉིད་ཀྱིས་ཀྱང་ལོངས་སྤྱོད་པར་མི་བྱེད། གཞན་དག་ལ་ཡང་མི་སྟེར་རོ་ཞེས་བྱ་བ་ནས་དགེ་སློང་དེ་ཡང་འཆི་བའི་དུས་བྱས་ནས་སེམས་ཅན་དམྱལ་བ་ཆེན་པོ་རྣམས་ཀྱི་ནང་དུ་སྐྱེས་སོ་ཞེས་བྱ་བའི་བར་དུའོ། །དེ་ལོ་ཁྲག་ཁྲིག་བརྒྱ་
སྟོང་ཕྲག་མང་པོར་སེམས་ཅན་དམྱལ་བ་ཆེན་པོའི་ནང་དུ་སྐྱེས་ནས་བཙོས་སོ། །དེ་དེ་ནས་ཤི་འཕོས་ནས་ཡི་དགས་རྣམས་ཀྱི་ནང་དུ་སྐྱེས་ཏེ། ལོ་བརྒྱ་སྟོང་ཕྲག་མང་པོར་དེར་སྡུག་བསྔལ་མྱོང་ངོ་། །ཕྱིས་ཡང་སེམས་ཅན་དམྱལ་བ་དང་ཡི་དགས་རྣམས་ཀྱི་ནང་དུ་སྡུག་བསྔལ་མྱོང་ངོ་། །ལག་འགྲོ་འཁོར་བས་སྐྲག་པའི་སེམས་དང་ལྡན་པའི་སྲིད་སྒྲུབ་བཅས་ཞེས་བྱ་བ་རབ་ཏུ་བྱུང་སྟེ། དེ་ནས་ཤི་འཕོས་ནས་དེ་ལྟར་ཡུན་རིང་པོར་ངན་སོང་གསུམ་དུ་སྡུག་བསྔལ་མྱོང་བ་དེ་གཞན་ཞིག་ཡིན་པར་ཁྱོད་སེམས་ན། གཞན་ཡིན་པར་བལྟ་བར་མི་བྱ་སྟེ། དེ་ལྟར་ལས་ཀྱི་སྒྲིབ་པ་དམ་པོས་ཟིན་པ་ཡང་ཁྱོད་ཡིན་ནོ། །འདི་ཕན་ཆད་བསྐལ་པ་སུམ་ཅུ་རྩ་གཅིག་ཏུ་ཁྱོད་རྟག་པར་ངན་སོང་གསུམ་གྱི་ནང་དུ་སྐྱེས་སོ། །དེའི་ལས་ཀྱི་སྒྲིབ་པ་ལྷག་མ་ལུས་པ་དེས་འདིར་ཀླུ་རྣམས་ཀྱི་ནང་དུ་སྐྱེས་པ་ནི་གཞན་མ་ཡིན་གྱི་ཁྱོད་ཡིན་ཏེ། སྡུག་བསྔལ་གྱི་ཚོར་བ་དེ་ལྟ་བུ་མྱོང་ངོ་། །གང་ཁྱོད་འདི་ནས་ཤི་འཕོས་ནས་ཕྱིས་ཀྱང་སེམས་ཅན་དམྱལ་བ་དང་། དུད་འགྲོ་དང་། ཡི་དགས་རྣམས་ཀྱི་ནང་དུ་རྟག་ཏུ་སྡུག་བསྔལ་གྱིས་གཟིར་བར་འགྱུར་བ་འདི་ནི་གནས་ཡོད་དོ། །ཀླུའི་བུ་དེ་མཆོག་ཏུ་ཡིད་མི་དགའ་ནས་རབ་ཏུ་ངུ་ཞིང་བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བྱིས་པ་ཇི་ལྟ་བ་དང་། རྨོངས་པ་ཇི་ལྟ་བ་དང་། མི་གསལ་བ་དང་། མི་མཁས་པ་ཇི་ལྟ་བ་བཞིན་དུ་ནོངས་པ་སོ་སོར་འཆགས་ལགས་སོ་ནོངས་པ་སོ་སོར་འཆགས་ལགས་སོ། །བཙུན་པ་བཅོམ་ལྡན་འདས་བདག་གི་བསམ་པས་སྡོམ་པ་གཟུང་བར་བགྱིའོ། །བདག་དེ་བཞིན་གཤེགས་པའི་དགེ་བསྙེན་ལགས་ཏེ། ཇི་སྲིད་འཚོའི་བར་དུ་སྲོག་གཅོད་པ་སྤངས་པ་ལགས་སོ། །བདག་བཅོམ་ལྡན་འདས་ལ་སྐྱབས་སུ་མཆིས་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །ཁྱོད་ལྷག་པའི་བསམ་པས་ང་ལ་སྐྱབས་སུ་སོང་བས་ཁྱོད་ཀྱི་ངན་སོང་ཐམས་ཅད་ཡོངས་སུ་ཟད་དོ། །འདི་ནས་ཤི་འཕོས་ནས་ཁྱོད་ཀྱིས་བྱམས་པའི་ཚེ་ན་མིའི་རྙེད་པ་ཐོབ་པར་འགྱུར་ཏེ། བྱམས་
པའི་ཐད་དུ་རབ་ཏུ་འབྱུང་བར་འགྱུར་ཞིང་དགྲ་བཅོམ་པ་ཉིད་ཀྱི་བར་དུ་མངོན་སུམ་དུ་བྱེད་པར་འགྱུར་རོ། །དེའི་ཚེ་དེའི་དུས་ན་གང་གིས་གཙུག་ཏོར་ཅན་འཁོར་དང་བཅས་པ་ལ་ཟླ་བ་གསུམ་དུ་ཡོ་བྱད་ཐམས་ཅད་ཀྱིས་རིམ་གྲོ་བྱས་པ་དང་། དེའི་ཕྱིར་དགེ་འདུན་གྱི་ཀུན་དགའ་ར་བ་ཡོ་བྱད་ཐམས་ཅད་ཕུན་སུམ་ཚོགས་པར་བྱས་པའི་རྒྱལ་པོ་མེ་ཏོག་བྲལ་ཞེས་བྱ་བ་གཞན་ཞིག་ཡིན་པར་ཁྱོད་སེམས་ན་དེ་གཞན་ཡིན་པར་ཡང་མི་བལྟ་སྟེ། དེ་ནི་ཀླུའི་རྒྱལ་པོ་རྒྱ་མཚོ་འདི་ཡིན་ནོ། །འདི་ནི་བསྐལ་པ་སུམ་ཅུ་རྩ་གཅིག་ཏུ་ནམ་ཡང་ངན་འགྲོར་མ་སྐྱེས་སོ། །ལྷའི་དཔལ་དང་སྐལ་བ་བཟང་པོ་ཕུན་སུམ་ཚོགས་པ་ཤིན་ཏུ་རྒྱ་ཆེན་པོ་མྱོང་ངོ་། །འདི་ནི་བླ་ན་མེད་པའི་ཐེག་པའི་ཕྱིར་སྨོན་ལམ་གྱི་དབང་གིས་འདིར་ཀླུ་རྣམས་ཀྱི་ནང་དུ་སྐྱེས་ཏེ། འདིར་དཔལ་དང་སྐལ་བ་བཟང་པོ་དེ་ལྟ་བུ་མྱོང་ངོ་། །དེ་སྐད་ཅེས་ཐོས་ནས་ཀླུ་ཐམས་ཅད་སྐྱོ་ཞིང་མཆོག་ཏུ་ཡིད་མི་བདེ་ནས་བཅོམ་ལྡན་འདས་ལ་མཆོག་ཏུ་གུས་པ་སྐྱེས་ཤིང་ཉེ་བར་རྟོག་པས་གཅེས་པར་བྱེད་པར་གྱུར་ཏོ། །དེའི་ནང་ན་ཀླུ་གཞན་མིག་མེད་པ་ལོང་བ་འབྲས་བུ་ཉམ་ཆུང་བ་ཞེས་བྱ་བ་ཞིག་ཡོད་དེ། དེས་གསང་བསྟོད་ནས་འོ་དོད་བོས་ཏེ་གསོལ་པ། སེམས་ཅན་རྣམས་ལ་ཐུགས་བརྩེ་བདག་ཅག་ཡོངས་སུ་བསྐྱབ་པར་གསོལ། །ཡུན་རིང་བདག་གི་ལུས་ལ་སྡུག་བསྔལ་ཚོར་བ་རབ་མི་བཟད། །སྲིན་བུ་སྦལ་པ་སྐྱེ་བོ་སྲོག་ཆགས་སྣ་ཚོགས་འཚལ་བར་བགྱིད། །བཟའ་བ་བཏུང་བ་མ་མཆིས་ཆབ་ཚན་ནང་ན་བདག་གནས་ལགས། བཅོམ་ལྡན་འདས་ཀྱིས་བཀའ་སྩལ་པ། འཁོར་བ་འཇིག་རྒྱལ་བསྟན་པ་ལ། །སྔོན་ནི་དགེ་སྦྱོང་ཁྱོད་གྱུར་ཏོ། །མཁས་ཤིང་གཙང་སྦྲ་སྤྱོད་ལམ་ལྡན། །དབེན་པ་དག་ཏུའང་སྡིག་པ་བྱེད། །ལྷན་ཅིག་གནས་པ་དག་ཀྱང་མང་། །ཁྱོད་བདག་སྟོན་པ་འདྲ་བར་གྱུར། །དགྲ་བཅོམ་རྫུ་འཕྲུལ་ཆེན་པོ་ཡང་། །ཁྱོད་ལ་སློབ་མ་རྣམས་ཀྱིས་བརྗོད། །རྙེད་དང་བཀུར་སྟི་བྱུང་བ་ནི། །ཁྱོད་གཅིག་བུ་ཡིས་ལོངས་སྤྱད་ཅིང་། །ཁྱོད་ཀྱིས་དགེ་སློང་ངེས་པ་མཐོང་། །དེ་དག་ལ་ནི་མི་སྙན་བརྗོད། །
ལྷན་ཅིག་གནས་དེ་མི་དགར་གནས། །ཁྱོད་ནི་ཚེ་རབས་སྟོང་དག་ཏུ། །ངེད་ཀྱི་ཟས་སུ་གྱུར་ཅིག་ཅེས། །དེ་ལྟ་བུ་ཡི་སེམས་བསྐྱེད་དོ། །ལས་ཀྱི་རྣམ་པར་སྨིན་པ་དེས། །འདིར་ཡང་ཁྱོད་ནི་ལག་འགྲོར་སྐྱེས། །ཁྱོད་རང་གི་ཡང་ལྷན་ཅིག་གནས། །ཕྱི་ཕྱིར་ཟ་བར་བྱེད་པ་ཡིན། །ཆུ་ཚན་ནང་ན་གནས་པ་དང་། །ལོང་བར་དེ་ཡིས་གྱུར་པ་ཡིན། །ཀུན་ཏུ་འབར་བའི་ལྕགས་དང་ཟངས། །ཕྱིས་ཀྱང་དམྱལ་བར་ཟ་བར་འགྱུར། །སྟོབས་མེད་ཡིད་ནི་མི་དགའ་བས། །ཀླུ་དབང་ཀུན་གྱི་ནང་ན་ངུ་། །ཉེས་པ་སོ་སོར་བཤགས་བྱས་ན། །སྡུག་བསྔལ་རྣམས་ལས་ཡོངས་སུ་གྲོལ། །དེ་ནས་བཅོམ་ལྡན་གསེར་འདྲ་བའི། །ཕྱག་གི་མཐིལ་གྱི་དཀྱིལ་འཁོར་རེག །སྤྱོད་པར་དཀའ་བ་དགོངས་མཛད་ནས། །སྟོན་པས་འདི་སྐད་བཀའ་སྩལ་ཏོ། །རྒྱལ་པོ་མིག་བཟངས་ང་བྱུང་སྟེ། །སྔོན་ཚེ་བདེན་པ་གང་གིས་ངས། །བྲམ་ཟེ་ལོང་བའི་དོན་དུ་ནི། །མིག་དག་གཉིས་ཀ་ཕྱུང་བར་གྱུར། །བདེན་པའི་ཚིག་དེ་ཁོ་ན་ཡིས། །ཁྱོད་ཀྱིས་དྲི་མེད་མིག་ཐོབ་ཤོག །ང་ཡི་ལེགས་པར་སྤྱོད་པས་ཁྱོད། །སྔོན་གྱི་ལས་དེ་བྱང་བར་ཤོག །ཏདྱ་ཐཱ། ཙཀྵུ་ཁ་བ། ར་ས་ན་ཁ་བ། ཀརྨ་ཁ་བ། ཨ་ནན་ཛ་ན། བི་ར་ཛ། བ་ར་ཨན་ཏ། ཛྙཱ་མ། ནི་ས་ར་ཎ་ཏྲོ་ཡ། ཨ་ཧེ་ཙན་དྲ་ཌ་ནེ་ཀྲི་མི་ཤུད་དྷེ། ཕ་ལ་ཤུད་དྷེ། ཨ་ཛེ་ཏ་ཛེ། ཏ་ལེ་ཏན་ཏ་ལེ། བ་སེ་དྷ་ས་ཀ། བ་ས་ཏེ། རཱུ་ར་ཏི། མ་ཧཱ་རཱུ་ར་བི། ཏྲི་རད་ན་བྲ་ཏེ་སྭཱ་ཧཱ། བཅོམ་ལྡན་འདས་ཀྱིས་བདེན་པའི་ཚིག་དེ་བཤད་པ་ན་ཀླུ་འབྲས་བུ་ཉམ་ཆུང་བའི་མིག་ཡོངས་སུ་དག་པར་གྱུར་ཏོ། །ཀླུ་གཞན་སྟོང་ཕྲག་ལྔ་བཅུ་རྩ་གསུམ་གྱི་མིག་ཀྱང་ཡོངས་སུ་དག་པར་གྱུར་ཏོ། །གཞན་གནོད་སྦྱིན་དང་། གྲུལ་བུམ་དང་། ཡི་དགས་དང་། ཤ་ཟ་དང་། མི་ཁྲག་ཁྲིག་ཕྲག་བརྒྱད་ཅུ་རྩ་བཞི་ནི་སྔོན་གྱི་ལས་ཀྱི་སྒྲིབ་པ་ཟད་ཅིང་མིག་ཡོངས་སུ་དག་པར་གྱུར་ཏོ། །དེ་ནས་ལྷའི་བུ་མཚམས་བཟངས་ཐལ་མོ་རབ་ཏུ་སྦྱར་བ་བྱས་ནས་སྨྲས་པ། འཇིག་རྟེན་འདྲེན་པ་རྣམས་ཀྱི་སྟོབས་ལ་ལྟོས། །རབ་ཏུ་ལམ་མེད་
རྣམས་ལ་མིག་ཀྱང་བྱིན། །གལ་ཏེ་སྟོན་པ་འཇིག་རྟེན་མི་འབྱུང་ན། །སུ་ཡང་འགྲོ་བར་ཤའི་མིག་ཕྱིས་མི་འཐོབ། །དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་ཤེས་ཀཽ་ཌི་ནྱ་ལ་བཀའ་སྩལ་པ། ཀཽ་ཌི་ནྱ་ཁྱོད་ཀྱིས་གསང་སྔགས་ཆེན་པོའི་གཞིའི་གཟུངས་སྔགས་མིག་སྒྲུབ་པ་འདི་ཟུང་ཤིག །ད་ལྟར་དང་མ་འོངས་པའི་དུས་ན་སུ་ལ་ལ་སེམས་ཅན་རྣམས་ཀྱི་སྔོན་གྱི་ལས་ཀྱི་ལྷག་མ་དང་། ཁམས་ཀུན་ཏུ་འཁྲུགས་པ་དང་། གསང་སྔགས་དང་། སྨན་དང་། དུག་གི་སྦྱོར་བས་ལོང་བར་འགྱུར་བ་དང་། ཆུང་ཟད་མཐོང་བར་ཡང་འགྱུར་བ་དེས་མིག་སྒྲུབ་པའི་གཟུངས་སྔགས་འདི་རང་གིས་བཀླག་པར་བྱའོ། །རང་གི་ལས་སོ་སོར་བཤགས་པར་བྱའོ། །དེས་སེམས་ཅན་ཐམས་ཅད་ལ་བྱམས་པའི་སེམས་ཀྱིས་སངས་རྒྱས་རྗེས་སུ་དྲན་པ་བསྒོམ་ཞིང་ལས་གཞན་མི་བྱེད་པར་ཞག་བདུན་ཕྲག་བདུན་དུ་རང་གི་མིག་ལ་བྱབས་ན་མིག་ཡོངས་སུ་དག་པར་འགྱུར་རོ། །ཡང་སེམས་ཅན་གང་དག་མཚམས་མེད་པའི་ལས་ལྷག་མ་ལུས་པས་ལོང་བར་གྱུར་ཅིང་དམ་པའི་ཆོས་སྤོང་བའི་ལྷག་མ་ལུས་པ་དང་། འཕགས་པ་ལ་སྐུར་པ་འདེབས་པའི་ལྷག་མ་ལུས་པ་དང་། ཆོས་ཀྱི་སྦྱིན་པའི་སྒྲིབ་པའི་ལྷག་མ་ལུས་པ་དང་། གླེགས་བམ་དུ་བྲིས་པ་རྣམ་པར་འཇིག་པའི་ལྷག་མ་ལུས་པ་དང་། གཞན་གྱི་མིག་རྣམ་པར་འཇིག་པའི་ལས་ཀྱི་ལྷག་མས་ལོང་བར་གྱུར་པ་དེ་དག་གིས་གཟུངས་སྔགས་འདི་ཡི་གེར་འདྲིར་བཅུག་སྟེ། ཡང་དང་ཡང་དུ་ཀློག་ཏུ་གཞུག་གོ །ལས་ཀྱི་སྒྲིབ་པ་བཤགས་པར་བྱའོ། །གཞན་ཡང་རྒྱ་མཚོའི་ལྦུ་བ་དང་། ཤིང་མངར་དང་། སྨན་ཀ་ཙ་དང་། འབྲས་བུ་གསུམ་དང་། རུས་སྦལ་གྱི་སྙིང་རྙིང་པ་སྦྲང་རྩི་དང་ལྷན་ཅིག་བཏག་ཅིང་བཙོས་ལ་གསང་སྔགས་འདི་དག་ལན་སྟོང་རྩ་བརྒྱད་མངོན་པར་བརྗོད་ཅིང་མིག་གི་ཕྱི་རོལ་དུ་བསྐུ་བར་བྱའོ། །ཞག་བདུན་ཕྲག་བདུན་དུ་ལས་གཞན་མི་བྱེད་པར་སངས་རྒྱས་རྗེས་སུ་དྲན་པ་བསྒོམ་ཞིང་སངས་རྒྱས་ཀྱི་སྐུ་གཟུགས་ཀྱང་བྱས་ན་དེའི་ལས་ཀྱི་སྒྲིབ་པ་མ་ལུས་པར་བྱང་བར་འགྱུར་ཞིང་དེའི་མིག་ཡོངས་
སུ་དག་པར་འགྱུར་རོ། །གཞན་ཡང་དགེ་སློང་རྣམས་ཀྱི་གནས་དགེ་འདུན་གྱི་ཀུན་དགའ་ར་བ་བྱས་ན་ཡང་དེའི་ལས་ཀྱི་སྒྲིབ་པར་བྱང་བར་འགྱུར་རོ། །ཕྱིས་ཀྱང་འཁོར་བར་མིག་མ་ཚང་བར་མི་འགྱུར་རོ། །དེ་ནས་ཐམས་ཅད་དང་ལྡན་པའི་ཀླུའི་འཁོར་དེས་འདི་སྐད་ཅེས་གསོལ་ཏོ། །ཐུགས་རྗེ་ཆེན་པོ་དང་ལྡན་པ་དུས་གསུམ་གྱི་སེམས་ཅན་ཐམས་ཅད་ལ་ཕན་པར་མཛད་པ་ནད་ལས་རབ་ཏུ་ཐར་བར་མཛད་པ་ལ་ཕྱག་འཚལ་ལོ། །དེ་ནས་དེའི་ཚེ་ཀླུ་ཚོན་རྩི་སྔོན་པོས་གསང་བསྟོད་དེ་འདི་སྐད་ཅེས་གསོལ་ཏོ། །སྡིག་པ་ཐམས་ཅད་སྦྱོང་བ་ཁྱོད། །ཁྱོད་ནི་དཀའ་མཛད་དཔལ་ཀུན་ལྡན། །ཁྱོད་ཀྱིས་ལས་ཀྱང་རབ་ཏུ་མཁྱེན། །སྲོག་ཆགས་ཀུན་གྱི་རྒྱལ་པོ་ཁྱོད། །བདག་ནི་ཆུ་དང་རྣམ་བྲལ་ཞིང་། །ཚ་བའི་ཀླུང་གིས་ཀུན་གདུངས་པའི། །འབྲོག་དགོན་པ་ན་གནས་པ་ལགས། །དྲི་མི་ཞིམ་པའི་གནས་ན་གནས། །ལོ་ནི་བྱེ་བ་ཕྲག་སྟོང་དུ། །ཞག་གཅིག་བདག་ལ་བདེ་མ་མཆིས། །རྟག་པར་འཁོར་དང་ལྷན་ཅིག་ཏུ། །བདག་ནི་གཞན་གྱིས་བཟའ་བ་ལགས། །བཅོམ་ལྡན་འདས་ཀྱིས་བཀའ་སྩལ་པ། །སེམས་ཅན་གང་དག་སྡིག་བྱས་ནས། །ཕྱིས་ཀྱང་བདག་ཉིད་བསོད་ནམས་སྒྲུབ། །ལུས་ཀྱིས་ག གཎྜཱི་བརྡུངས་ནས་སུ། །དགེ་སློང་དགེ་འདུན་ཚིམ་བྱེད་ནའང་། །ལས་ཀྱི་ལྷག་མ་དེ་ཡིས་སུ། །གང་དང་གང་དུ་སྐྱེས་པར་ནི། །སྡུག་བསྔལ་ཅི་འདྲ་འབྱུང་འགྱུར་ཞིང་། །བཟའ་བཏུང་དག་དང་ཡང་དག་ལྡན། །ཡང་ན་ཀླུ་ཡི་སྐྱེ་གནས་སུ། །ལུས་ཀྱིས་སྐྱེ་བར་འགྱུར་བ་ཡིན། །དེ་ཡི་མགོ་ཡི་ཀླད་པ་དེར། །ནོར་བུའི་རྒྱལ་པོ་འབྱུང་བར་འགྱུར། །ཀུན་ཏུ་ཆུ་འབྱུང་ཞེས་བྱ་བ། །ཆུ་སྦྱིན་བྱེད་པའི་ཀླུར་འགྱུར་རོ། །གང་ན་ཀླུ་ནི་གནས་བྱེད་པ། །དེ་ནས་ཆུ་ནི་འབབ་པར་འགྱུར། །ས་འམ་ནམ་མཁའ་ལ་ཡང་རུང་། །གང་དང་གང་དུ་འགྲོ་བ་དེར། །སེམས་ནི་བསྐྱེད་མ་ཐག་ཏུ་ཡང་། །ཆུ་ནི་འབྱུང་བར་འགྱུར་བ་ཡིན། །ཡང་ན་སེམས་ཅན་གང་དག་གིས། །མི་ཡི་དངོས་པོ་ཐོབ་ནས་སུ། །སྡིག་པ་རྣམ་པ་སྣ་ཚོགས་བྱས། །དགེ་འདུན་རིམ་གྲོ་མི་བྱེད་ན། །
དེ་དག་སྡུག་བསྔལ་སྣ་ཚོགས་ནི། །ངན་སོང་གསུམ་དུ་མྱོང་ནས་ཀྱང་། །དེ་ཉིད་ཀླུ་ཡི་སྐྱེ་གནས་སུ། །སྐྱེ་བ་ཐོབ་པར་འགྱུར་བ་ཡིན། །དེ་ལས་ཀུན་ཏུ་ཆུ་མི་འབྱུང་། །མགོ་ལ་ནོར་བུ་རིན་ཆེན་མེད། །སྟོང་པ་སྐོམ་པའི་གནས་དག་ཏུ། །ཆུ་མེད་པར་ནི་གནས་པར་འགྱུར། །སྔོན་འདས་དུས་ན་ཁྱོད་ཀྱིས་ནི། །རྒྱལ་བ་སྐར་རྒྱལ་བསྟན་པ་ལ། །དགེ་སློང་དགོན་པ་པར་གྱུར་ཏེ། །ཕྲག་དོག་སེར་སྣས་གང་བ་ཡིན། །དགེ་སློང་བློ་བུར་འོངས་མཐོང་ནས། །ཁྲོ་གཉེར་ཅན་གྱི་བཞིན་བྱས་ནས། །དེ་དག་ལ་ནི་སྦྱིན་གཏོང་བྱེད། །དེ་ལ་ཡང་ནི་མངོན་སུམ་གཤེ། །དེར་ནི་གང་དག་ཆུར་ཡང་ནི། །མྱུར་དུ་མི་གཙང་བ་ཡིས་བཀང་། ། འཆག་ས་གནས་ཁང་དག་གི་གནས། །དྲི་ང་བ་ཡིས་བཀང་བར་གྱུར། །དགེ་སློང་དེས་པ་འགྲོ་བ་ན། །བརྒྱད་བཀག་གིས་ནི་གཤེ་བར་གྱུར། །དགེ་སློང་དེས་པ་གཞན་དག་ཀྱང་། །རྒྱང་རིང་བར་ནི་ཡོངས་སུ་སྤངས། །དེ་ཕྱིར་ཕྲག་དོག་སེར་སྣའི་རྒྱུས། །མ་ཆོད་པར་ནི་ཁྱོད་གྱུར་ནས། །དགེ་སྦྱོང་སུ་ཞིག་ལ་ལ་མཐོང་། །མྱུར་དུ་ཁྲོས་ནས་གཤེ་བར་འགྱུར། །སྦྱིན་པ་པོ་ལ་ཁྲོ་བས་གཤེ། །ངོ་ཚ་ཁྲེལ་ཡོད་རྣམ་པར་སྤངས། །ལས་ཀྱི་རྣམ་པར་སྨིན་པ་དེས། །སེམས་ཅན་དམྱལ་བར་སོ་སོར་སྐྱེས། །ལུས་ནི་བྱེ་བས་སེམས་དམྱལ་དུ། །སྡུག་བསྔལ་མང་པོ་ཉམས་སུ་མྱོང་། །ཡི་དགས་རྣམས་སུ་དུས་རིང་པོར། །སྡུག་བསྔལ་རབ་ཏུ་མི་བཟད་མྱོང་། །ཁྱོད་ནི་ཀླུ་ཡི་སྐྱེ་གནས་སུ། །སྐྱེས་ནས་ཤིན་ཏུ་སྡུག་བསྔལ་གྱུར། །སྟོང་པ་འབྲོག་དགོན་རྫོང་རྣམས་སུ། །ཆུ་དང་བྲལ་བར་གནས་པ་ཡིན། །སེམས་ཅན་དམྱལ་བ་རྣམས་སུ་ཁྱོད། །སྡུག་བསྔལ་ཚོར་བ་ཕྱི་ཕྱིར་མྱོང་། །ཤིན་ཏུ་ཡུན་རིང་ཡི་དགས་དང་། །དུད་འགྲོར་སྡུག་བསྔལ་ཚོར་བ་མྱོང་། །སུ་ཞིག་ཐ་མའི་དུས་ཚེ་གནོད་སེམས་བྱུང་། །རྟག་ཏུ་ཕྲག་དོག་སེར་སྣ་ཁྲོས་པ་ལ། །བསམ་གཏན་མི་སྐྱོབ་སངས་རྒྱས་མཆོད་པ་མིན། །ཚུལ་ཁྲིམས་མི་སྐྱོབ་དགོན་པར་གནས་པ་མིན། །
ཡང་དེའི་ཚེ་ཀླུའི་འཁོར་དེའི་ནང་ན་ཀླུ་ཡི་དགས་ལྟ་བུ་བྱེ་བ་ཕྲག་ཉི་ཤུ་རྩ་དྲུག་སྔོན་གྱི་ཚེ་རབས་རྗེས་སུ་དྲན་པར་གྱུར་ཏེ། སྐད་པོ་ཆེར་རབ་ཏུ་ངུ་ཞིང་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ཡོངས་སུ་བསྐྱབ་ཏུ་གསོལ། བདེ་བར་གཤེགས་པ་བདག་ཅག་ཡོངས་སུ་བསྐྱབ་ཏུ་གསོལ། སྔོན་གྱི་རྒྱལ་བའི་བསྟན་པ་ལ་བདག་ཅག་གིས་འདྲ་མཚུངས་པར་ལས་ཀྱི་སྒྲིབ་པ་དེ་ལྟ་བུ་འཕངས་ལགས་སོ། །དེ་ལྟར་ཡུན་རིང་པོར་ངན་སོང་གསུམ་དུ་སྡུག་བསྔལ་མྱོང་ལགས་སོ། །ད་ལྟར་ཡང་ཀླུ་ཡི་དགས་ལྟ་བུ་རྣམས་ཀྱི་ནང་དུ་རྟག་ཏུ་སྡུག་བསྔལ་དེ་ལྟ་བུས་གཟིར་ལགས་ཏེ། དཔེར་ན་ཀླུ་ཡི་དགས་ལྟ་བུ་ཚོན་རྩི་སྔོན་པོ་བཞིན་ནོ། །བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཀྱིས་ཆུ་ལོང་ལ་དེ་བཞིན་གཤེགས་པའི་ཞབས་ཀྱི་དྲུང་དུ་ཆག་ཆག་ཐོབ་ཤིག་དང་། དེས་ནི་ཁྱེད་ཀྱི་སྡུག་བསྔལ་ཐམས་ཅད་ཡོངས་སུ་ཟད་པར་འགྱུར་རོ། །དེ་ནས་ཀླུ་ཡི་དགས་ལྟ་བུ་དེ་དག་ཐམས་ཅད་ཀྱིས་ལག་པ་གཉིས་ཀྱིས་ཆུ་བླངས་པ་དང་། ལག་ན་ཆུ་འདུག་པ་དེ་རབ་ཏུ་འབར་རོ། །དེ་ནས་མེའི་ཕུང་པོ་ཤིང་ཏ་ལ་དྲུག་སྲིད་དུ་འཕགས་ཏེ། ལན་བདུན་གྱི་བར་དུ་དེ་བཞིན་ནོ། །ཀླུའི་ཚོགས་དེ་མཆོག་ཏུ་ཡིད་མི་དགའ་ནས་མཆི་མ་དག་ཕྱུང་ངོ་། །ཐམས་ཅད་དང་ལྡན་པའི་འཁོར་དེ་ཡང་ཡིད་ཀུན་ཏུ་མི་དགའ་ནས་དེ་བཞིན་ནོ། །བཅོམ་ལྡན་འདས་ཀྱིས་བཀའ་སྩལ་པ། །ཅི་འདྲ་བ་ཡི་ལས་བྱས་པ། །དེ་འདྲ་བ་ཡི་འབྲས་བུ་འཐོབ། །དགེ་བ་ཡིན་ན་བཟང་པོ་སྟེ། །སྡིག་པ་བྱེད་པའང་སྡིག་ཏོའོ། །དེ་ནས་ཡི་དགས་ལྟ་བུའི་ཀླུ། །ཁྱེད་ཀུན་འདི་སྐད་ཚིག་སྨྲོས་ཤིག །བདེན་པ་གང་གིས་སྟོན་པ་ནི། །སེམས་ཅན་ཀུན་ལ་ཐུགས་སྙོམས་པ། །བདེན་པའི་ཚིག་དེ་ཁོ་ན་ཡིས། །ངེད་ཀྱི་ཆུ་ནི་མ་འབར་ཅིག །ཀླུ་ཐམས་ཅད་ཀྱིས་འདི་སྐད་ཅེས་སྨྲས་སོ། །ལན་བརྒྱད་པ་ལ་ལག་པ་གཉིས་ཀྱིས་ཆུ་བླངས་ཏེ་བཅོམ་ལྡན་འདས་ཀྱི་ཞབས་གཉིས་ལ་གཏོར་ནས་ཉེས་པ་ལ་ཉེས་པར་སོ་སོར་བཤགས་སོ། །བཅོམ་ལྡན་འདས་ཀྱིས་བཀའ་སྩལ་པ། སྡིག་པའི་
ལས་ཀྱི་སྒྲིབ་པ་ཡི། །ལྷག་མ་ལུས་པ་ཡོངས་སུ་ཟད། །བྱམས་པའི་ཚེ་ན་ཁྱེད་ཅག་ནི། །མི་ཡི་སྲིད་པ་ཐོབ་པར་འགྱུར། །བྱམས་པ་ཡི་ནི་བསྟན་པ་ལ། །མྱུར་དུ་རབ་ཏུ་འབྱུང་བ་ཐོབ། །རྣལ་འབྱོར་ལ་ནི་མངོན་བརྩོན་དང་། །མྱུར་དུ་དགྲ་བཅོམ་ཐོབ་པར་འགྱུར། །ཡང་དེའི་ཚེ་བཅོམ་ལྡན་འདས་ཀྱི་མཐུས་ཀླུའི་ཚོགས་དེ་ཇི་ལྟར་ལྷགས་པ་བཞིན་དེ་དག་ཐམས་ཅད་ཀྱིས་སྔོན་གྱི་ཚེ་རབས་དང་། བདག་གི་ལས་དང་། འགྲོ་བ་དང་། སྐྱེ་བ་རྗེས་སུ་དྲན་ཏེ། འཁོར་དེའི་ནང་ནས་ཀླུ་བརྒྱ་སྟོང་ཕྲག་མང་པོ་རང་གིས་ཉེས་པར་བྱས་པའི་སྡིག་པའི་ལས་ཀྱིས་རབ་ཏུ་དུས་ནས་ཁ་ཅིག་གིས་འདི་སྐད་ཅེས་གསོལ་ཏོ། །སྔོན་གྱི་དེ་བཞིན་གཤེགས་པ་རྣམས་ཀྱི་བསྟན་པ་ལ་བདག་ཅག་ཁྱིམ་ན་གནས་པར་གྱུར་ཏེ། ཉེ་དུ་དང་འགྲོགས་པའི་རྐྱེན་དང་། ཆོས་མཉན་པའི་རྐྱེན་གྱིས་དགེ་སློང་རྣམས་དང་ལྷན་ཅིག་ཏུ་དགེ་འདུན་གྱི་མངོན་དུ་གྱུར་པ་བསྔོས་པའི་མེ་ཏོག་དང་། འབྲས་བུ་དང་། ཁུ་བ་དང་། བཟའ་བ་དང་། བཏུང་བ་ལོངས་སྤྱད་ལགས་སོ་ཞེས་བྱ་བ་ནས་ཁ་ཅིག་གིས་གསོལ་པ། བདག་ཅག་གིས་ཕྱོགས་བཞི་པ་ལ་བསྔོས་པ་ལོངས་སྤྱད་ལགས་སོ་ཞེས་བྱ་བའི་བར་དུའོ། །ཁ་ཅིག་གིས་འདི་སྐད་ཅེས་གསོལ་ཏོ། །བདག་ཅག་གིས་རང་གིས་བསྔོས་པ་ལོངས་སྤྱོད་ལགས་སོ་ཞེས་བྱ་བའི་བར་དུའོ། །ཁ་ཅིག་གིས་གསོལ་པ། བདག་ཅག་དེ་བཞིན་གཤེགས་པ་རྣམ་པར་གཟིགས་ཀྱི་ཞེས་བྱ་བའི་བར་དང་། བདག་ཅག་གཙུག་ཏོར་ཅན་གྱི་ཞེས་བྱ་བའི་བར་དང་། བདག་ཅག་འཁོར་བ་འཇིག་གི་ཞེས་བྱ་བའི་བར་དང་། བདག་ཅག་གསེར་ཐུབ་ཀྱི་ཞེས་བྱ་བའི་བར་དུའོ། །ཀླུ་ཁ་ཅིག་གིས་འདི་སྐད་ཅེས་གསོལ་ཏོ། །དེ་བཞིན་གཤེགས་པ་འོད་སྲུང་གི་བསྟན་པ་ལ་བདག་ཅག་ཁྱིམ་ན་གནས་པར་གྱུར་ཏེ། ཉེ་དུ་དང་འགྲོགས་པའི་རྐྱེན་དང་། ཆོས་མཉན་པའི་རྐྱེན་གྱིས་དེ་བཞིན་དུ་བསྔོས་པའི་དགེ་འདུན་གྱི་མེ་ཏོག་དང་། འབྲས་བུ་དང་། ཁུ་བ་དང་། བཟའ་བ་དང་། བཏུང་བ་དགེ་སློང་རྣམས་
ལ་སྩལ་པ་དེ་བདག་ཅག་གིས་ལོངས་སྤྱད་ལགས་སོ། །སྡིག་པའི་ལས་དེས་ཀྱང་སེམས་ཅན་དམྱལ་བ་རྣམས་ཀྱི་ནང་དུ་སྡུག་བསྔལ་མི་བཟད་པ་ཆེན་པོ་རྣམ་པ་སྣ་ཚོགས་རབ་ཏུ་མི་བཟད་པ་མང་པོ་ཡང་དང་ཡང་ཉམས་སུ་མྱོང་ལགས་སོ། །དུད་འགྲོ་དང་ཡི་དགས་རྣམས་ཀྱི་ནང་དུ་དུས་ཡུན་རིང་པོར་རྟག་ཏུ་སྡུག་བསྔལ་གྱིས་གཟིར་ལགས་སོ། །ལས་ཀྱི་ལྷག་མ་དེས་བདག་ཅག་ཀླུའི་སྐྱེ་གནས་དམན་པ་འདིར་སྐྱེས་ནས་ཆབ་བསྐོལ་བ་ཀུན་ཏུ་ཚ་བའི་ནང་དུ་བཙོས་ལགས་སོ། །བྱེ་མ་ཀུན་ཏུ་ཚ་བའི་ནང་དུ་བསྲེགས་ལགས་སོ། །བདག་ཅག་གི་ཁའི་སྒོར་ཁ་ཟས་སྩལ་བ་ཡང་ལྕགས་ཀྱི་ཐུ་ལུམ་དུ་གྱུར་ལགས་སོ། །དེ་བཞིན་དུ ་ཁར་བཏུང་བ་སྩལ་བ་ཡང་ལྕགས་དང་ཟངས་སུ་གྱུར་ལགས་སོ། །གང་དང་གང་དུ་མཆིས་པ་ཐམས་ཅད་དུ་སྡུག་བསྔལ་གྱི་ཚོར་བ་དེ་ལྟ་བུ་མྱོང་ལགས་ན་བདག་ཅག་ཡོངས་སུ་བསྐྱབ་ཏུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཀྱེ་ལག་འགྲོ་དག་ཁྱེད་ཀྱིས་དགེ་འདུན་གྱི་ལོངས་སྤྱོད་པ་དེ་ནི་འོས་པ་མ་ཡིན་ཏེ། མཚམས་མེད་པ་དང་ཉེ་བ་ཡིན་ནོ། །རྣམ་པར་མ་སྨིན་པར་གང་གིས་ཀྱང་མྱུར་དུ་བཤགས་པར་མི་ནུས་སོ། །ཀྱེ་ལག་འགྲོ་དག་དེ་ལྟ་ཡིན་ཡང་ཇི་སྲིད་འཚོའི་བར་དུ་སྐྱབས་གསུམ་དུ་འགྲོ་བ་ལ་འཁོད་ཅིག་དང་། དེ་ལྟ་ན་ཁྱེད་ལ་ཕན་པ་དང་བདེ་བར་འགྱུར་རོ། །རྒྱུ་དེས་དེ་བཞིན་གཤེགས་པས་ཁྱེད་འདོད་པ་བཞིན་འཁོར་བར་གཞོག་པར་མཛད་དོ། །དེ་དག་ཐམས་ཅད་གསུམ་ལ་སྐྱབས་སུ་འགྲོ་བ་ལ་ཡང་བཀོད་པར་གྱུར་ཏོ། །ཡང་འཁོར་དེའི་ནང་ན་ཀླུ་མོ་ལོང་མ་ཞིག་ཡོད་དེ། དེའི་ཁ་སྲིན་བུས་གང་ཞིང་གཅིན་རུལ་པ་ལྟ་བུའི་རྣག་དྲི་ང་བ་ཟག་གོ །སྨད་ཀྱི་མཚན་མ་ལ་ཡང་དེ་བཞིན་ནོ། །དེའི་ལུས་ཐམས་ཅད་རུལ་ཅིང་རྣག་འཛག་པ་ཕོལ་མིག་དང་སྲིན་བུས་གང་བ་ལ་ཤ་སྦྲང་དང་། སྦྲང་བུ་མཆུ་རིངས་དང་། སྦྲང་བུ་གདུག་པ་རྣམས་ཀྱིས་ཟ་བར་བྱེད་དོ། །དེའི་ཚེ་བཅོམ་ལྡན་འདས་ཀྱིས་ཐུགས་རྗེ་ཆེན་པོས་གཟིགས་ཏེ། བཀའ་སྩལ་པ། སྲིང་མོ་ཁྱོད་ཀྱིས་ལུས་
ལ་སྡིག་པའི་ལས་ནི་ཅི་བྱས། ཇི་ལྟ་བུ་ཞིག །དེས་གསོལ་པ། བཙུན་པ་བཅོམ་ལྡན་འདས་བདག་གི་ཚོར་བ་སྡུག་བསྔལ་ལགས་སོ། །བཙུན་པ་བཅོམ་ལྡན་འདས་བདག་གི་ཚོར་བ་ཚ་བ་ལགས་ཏེ། གང་ནས་ཀླུའི་སྐྱེ་གནས་དམན་པ་འདིར་སྐྱེས་པའི་དགུང་ལོ་སྟོང་ཕྲག་སུམ་ཅུ་རྩ་དྲུག་བདག་གིས་མངོན་པར་འཚལ་ལགས་སོ། །བདག་གི་སྡུག་བསྔལ་གྱི་ཚོར་བ་དེ་ལྟ་བུ་ནི་གདུགས་ཞག་གཅིག་ཀྱང་རྒྱུན་མ་ཆད་ལགས་སོ། །བཀའ་སྩལ་པ། སྔོན་གྱི་ལས་ཅི་ཞིག་བྱས། དེས་གསོལ་པ། འདི་ནས་བསྐལ་པ་དགུ་བཅུ་རྩ་གཅིག་པ་ལ་རྒྱལ་བ་རྣམ་པར་གཟིགས་ཀྱི་བསྟན་པ་ལ་མིའི་རྒྱུད་ཀྱི་བུད་མེད་དུ་གྱུར་ལགས་ཏེ། བདག་དེར་འདོད་པའི་དྲེགས་པས་མྱོས་ནས་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་བ་དང་ལྷན་ཅིག་ཏུ་དགེ་འདུན་གྱི་གཙུག་ལག་ཁང་ན་དགེ་འདུན་གྱི་མལ་ཆའི་སྟེང་དུ་ཡང་དང་ཡང་འཁྲིག་པ་དང་ལྡན་པའི་ཆོས་འདོད་པ་དག་སོ་སོ་ཡང་དག་པར་མྱོང་ལགས་ཏེ། ནོར་གྱི་སླད་དུ་མ་སྐྲག་ལགས་སོ། །བཅོམ་ལྡན་འདས་དེ་ཚུན་ཆད་བདག་རྟག་ཏུ་ལྷ་དང་མིའི་རྙེད་པ་དང་བྲལ་ལགས་སོ། །རྟག་ཏུ་ངན་སོང་གསུམ་གྱི་ཚོར་བ་མི་བཟད་པས་རབ་ཏུ་གཟིར་ལགས་སོ། །བཀའ་སྩལ་པ། སྲིང་མོ་གང་གི་ཚེ་འདིར་བསྐལ་པ་ཆེན་པོ་འཇིག་པར་གྱུར་པ་དེའི་ཚེ་ཁྱོད་གང་དུ་སོང་། དེས་གསོལ་པ། སྔོན་གྱི་ལས་ལ་རྟེན་པའི་རླུང་ཆེན་པོ་དེ་དག་གིས་འཕངས་ནས། འཇིག་རྟེན་གྱི་ཁམས་སྙིགས་མ་ལྔ་དང་ལྡན་པ་གཞན་དག་ཏུ་འཕངས་ལགས་སོ། །ཡང་གང་གི་ཚེ་དེར་འཇིག་པར་གྱུར་ནས་དེ་ནས་ཡང་འདིར་འཕངས་ལགས་ན། བཅོམ་ལྡན་འདས་ཐུགས་རྗེ་ཆེན་པོས་བདག་ཡོངས་སུ་བསྐྱབ་ཏུ་གསོལ། བདེ་བར་གཤེགས་པ་བདག་ཡོངས་སུ་བསྐྱབ་ཏུ་གསོལ། དེ་ནས་བཅོམ་ལྡན་འདས་ཀྱི་ཕྱག་གཉི་གས་རྨ་རྩི་སྤོས་དང་སྦྱར་བའི་ཆུ་བཞེས་ཏེ་བདེན་པ་བརྗོད་པར་མཛད་དོ། །བདེན་པ་གང་གིས་སྔོན་ཐི་བའི་ཕྱིར་ངའི་ལུས་ཆགས་པ་མེད་པར་ཡོངས་སུ་བཏང་བའི་བདེན་པ་དེས་ཁྱོད་ཀྱི་ནད་དེ་དག་ཞི་བར་གྱུར་ཅིག །ཀླུ་མོ་དེའི་ཁར་བླུགས་ཤིང་ལུས་ལ་གཏོར་བས་
ནད་ཐམས་ཅད་རབ་ཏུ་ཞི་བར་གྱུར་ཏེ། གསུམ་ལ་སྐྱབས་སུ་ཉེ་བར་གནས་པར་གྱུར་ཏོ། །ཡང་དེ་ཉིད་ན་ཀླུ་གཞན་ཞིག་ལུས་དྲི་ང་ཞིང་སྲིན་བུས་གང་ལ་སྲིན་བུ་སེར་སྐྱས་གང་ནས་དེ་ལས་རྣག་ཁྲག་ཚ་ཞིང་གོར་གོར་པོ་ཟག་པ། སྨྲ་མི་ནུས་པ། མཆོག་ཏུ་སྐྱོན་དུ་བགྲང་བ་ཞིག་ཡོད་དོ། །བཅོམ་ལྡན་འདས་ཀྱིས་ཀླུ་དེ་གཟིགས་ནས་བཀའ་སྩལ་པ། ལག་འགྲོ་ཁྱོད་ཀྱིས་སྔོན་མི་དགེ་བའི་ལས་ཅི་ཞིག་བྱས། ཀླུ་དེས་ཁའི་སྒོ་ཕྱེ་ནས་སྲིན་བུའི་རིགས་དང་། རྣག་ཁྲག་དང་། མེས་གང་བའི་ཁའི་སྒོ་སྦྱང་བྲིམས་ཏེ་སྨྲ་མ་ནུས་སོ། །དེ་ནས་བཅོམ་ལྡན་འདས་ཀྱིས་སྐྱོར་ཆུ་ཞིག་བཞེས་ཏེ་བཀའ་སྩལ་པ། རི་བོང་གྱུར་ཏེ་དྲང་སྲོང་ཕྱིར། །རང་གིས་མེ་ཡི་ནང་བོར་བ། །བདེན་པའི་ཚིག་དེ་ཁོ་ན་ཡིས། །ཀླུ་ནི་སྨྲ་བར་ནུས་པར་ཤོག །སྐྱོར་ཆུ་དེ་ཀླུའི་ཁར་བླུགས་ནས་དེའི་ཁའི་ནང་དུ་མེ་རབ་ཏུ་ཞི་ཞིང་སྲིན་བུ་དང་རྣག་ཁྲག་ཁའི་ཕྱི་རོལ་དུ་བྱུང་ངོ་། །ཀླུ་དེ་ཁ་ཡོངས་སུ་དག་པར་གྱུར་ནས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་རྒྱལ་བ་འོད་སྲུང་གི་བསྟན་པ་ལ་བདག་ཞིང་པར་གྱུར་ལགས་སོ། །བདག་གིས་བཅོམ་ལྡན་འདས་ཀྱི་ཉན་ཐོས་གཞན་ཞིག་ལ་སྐྱེད་དུ་སྩོལ་ཅིག་དང་། སྟོན་གྱི་དུས་སུ་ཁྱོད་ལ་དབུལ་ལོ་ཞེས་གསེར་ལྔ་བཅུ་ཞིག་གསོལ་བ་བཏབ་ལགས་སོ། །དེས་བདག་ལ་འགྲོན་བུ་བརྒྱད་ཅུའི་རིན་བཅུ་ཞིག་སྩལ་ཏེ། ལྔ་བཅུར་མ་སྩལ་ལགས་སོ། །བདག་གིས་དགེ་སློང་དེ་ལ་ཁྲོ་བས་ཟིལ་གྱིས་ནོན་ནས་འགྲོན་བུ་བརྒྱད་ཅུའི་རིན་བཅུ་བླངས་ཏེ། དེ་ལ་སླར་ཡང་མ་སྩལ་ལགས་སོ། །གཞན་ཡང་དུས་གཞན་ཞིག་ན་དགེ་སློང་རྣམས་ཀྱི་ཀུན་དགའ་ར་བ་དེར་བདག་མཆིས་ནས་དེར་དགེ་འདུན་གྱི་མངོན་དུ་གྱུར་པ་བསྔོས་པ་ཨ་མྲའི་འབྲས་བུ་བཅུ་གསུམ་པ་ལོངས་སྤྱད་ལགས་སོ། །སུག་ལས་ཀྱི་སྒྲིབ་པའི་ལྷག་མ་དེ་ཁོ་ནས་དེ་ནས་ཤི་འཕོས་ནས་འབྲོག་དགོན་པ་སྐམ་པོ་འདིར་ཉི་ཚེ་བའི་སེམས་ཅན་དམྱལ་བ་རྣམས་ཀྱི་ནང་དུ་སྐྱེས་ཏེ། རྟག་ཏུ་བདག་གི་ལུས་སྲིན་བུ་དག་དང་རྣག་ཁྲག་བརྡུས་པས་གང་ལགས་སོ། །བཀྲེས་པ་དང་སྐོམ་པས་
ཀུན་ཏུ་གཟིར་ནས་སྡུག་བསྔལ་གྱི་ཚོར་བ་མྱོང་ལགས་སོ། །ཡང་མི་དགེ་བའི་ལས་ཀྱི་རྒྱུ་དེས་བདག་འདི་ནས་ཤི་འཕོས་ནས་ཡང་སེམས་ཅན་དམྱལ་བ་ཆེན་པོ་རྣམས་ཀྱི་ནང་དུ་སྐྱེས་ལགས་སོ། །དགེ་སློང་དེ་ཡང་ཁྲོ་བ་དང་སེར་སྣའི་རྒྱུ་དེས་འཆི་བའི་དུས་བགྱིས་ནས་འདིར་ཀླུ་རྣམས་ཀྱི་ནང་དུ་བདག་གི་མཆན་ཁུང་དུ་སྐྱེས་ཏེ། དུས་རྟག་ཏུ་བདག་ལ་གཡོ་བར་བགྱིད་དོ། །དེ་རྟག་ཏུ་ཁྲོ་བས་ཟིལ་གྱིས་ནོན་ནས་དབུགས་ཚ་བས་བདག་གི་ལུས་ལ་ཡོངས་སུ་གང་བར་བགྱིད་དོ། །རྒྱུ་དེས་རྟག་པར་རྒྱུན་ཏུ་བདག་གི་ལུས་སྲིན་བུ་དག་དང་རྣག་ཁྲག་གིས་གང་ལགས་ན་དེ་བཞིན་གཤེགས་པས་བདག་ཡོངས་སུ་བསྐྱབ་ཏུ་གསོལ། སྦྲུལ་དགྲ་དང་འདྲ་བ་དེ་ལས་བདག་ཡོངས་སུ་ཐར་བར་མཛད་པར་གསོལ། དེ་ནས་ཡང་བཅོམ་ལྡན་འདས་ཀྱིས་ཕྱག་ཏུ་ཆབ་བཞེས་ཏེ་འདི་སྐད་ཅེས་བཀའ་སྩལ་ཏོ། །མུ་གེ་དག་ནི་བྱུང་བའི་ཚེ། །ང་ནི་འདིར་ཡང་ཉར་གྱུར་ཏེ། །ཤ་དང་ཁྲག་གིས་ཚིམ་བྱས་པས། །ཁྱེད་ཅག་གཉི་ག་བདེ་བར་ཤོག །ཆུ་དེས་ཀླུ་ལ་གཏོར་ནས་དེའི་མཆན་ཁུང་ནས་ཀླུའི་བུ་བྱུང་ངོ་། །གཉི་གས་འདི་སྐད་ཅེས་གསོལ་ཏོ། །ཡུན་ཇི་ཙམ་གྱིས་ངན་སོང་དག་ལས་བདག་ཅག་ཐར་བར་འགྱུར། །བཅོམ་ལྡན་འདས་ཀྱིས་བཀའ་སྩལ་པ། ཀྱེ་ལག་འགྲོ་དག་གང་ཕྱོགས་བཞིའི་དགེ་འདུན་ནས་དགེ་འདུན་གྱི་མངོན་དུ་གྱུར་པ་བསྔོས་པའི་མེ་ཏོག་དང་། འབྲས་བུ་དང་། འདབ་མ་དང་། བཟའ་བ་དང་། བཏུང་བ་དང་། མལ་ཆ་དང་། རྩི་དང་། ཡོ་བྱད་ཀྱང་རུང་། དགེ་འདུན་ལས་གལ་ཏེ་བདག་གིར་ལོངས་སྤྱད་དམ། གཞན་ལ་བྱིན་ན་སྡིག་པའི་ལས་དེ་རྣམ་པར་སྨིན་ཅིང་སོ་སོ་ཡང་དག་པར་མ་མྱོང་བར་སུས་ཀྱང་མྱུར་དུ་ཟད་པར་བྱ་བར་མི་ནུས་ཏེ་འདི་ནི་མཚམས་མེད་པ་དང་ཉེ་བ་ཤིན་ཏུ་ལྕི་བ་ཡིན་ནོ། །ལག་འགྲོ་དག་ཁྱེད་ཚུར་ཤེག །དཀོན་མཆོག་གསུམ་ལ་སྐྱབས་སུ་དེང་ཤིག་དང་། དེས་ན་ཁྱེད་ཅག་ཆུ་ལ་གནས་པ་དག་ཏུ་འགྱུར་རོ་ཞེས་བྱ་བ་ནས་དཀོན་མཆོག་གསུམ་ལ་སྐྱབས་སུ་རྣམ་པར་བཀོད་དེ་ཆུ་ལ་གནས་པར་
གྱུར་ཏོ་ཞེས་བྱ་བའི་བར་དུའོ། །བཅོམ་ལྡན་འདས་ཀྱིས་བཀའ་སྩལ་པ། སྤུ་གྲི་རྣོན་པོ་དག་གིས་སུ། །རང་གི་ཡན་ལག་གཏུབས་པ་སླའི། །བསྔོས་ཟིན་པ་ཡི་དངོས་པོ་ནི། །ཁྱིམ་པ་རྣམས་ལ་སྦྱིན་མི་བྱ། །མེ་ལྕེ་འབར་བ་ལྟ་བུ་ཡི། །ལྕགས་ཀྱི་ཐུ་ལུམ་ཟོས་སླ་ཡི། །དགེ་འདུན་དག་ལས་གལ་ཏེ་ནི། །དགེ་འདུན་གྱི་ལ་ལོངས་མི་སྤྱད། །ལྷུན་པོ་དང་ནི་འདྲ་བའི་མེ། །བླང་བ་བྱས་ཏེ་ཟོས་པ་སླའི། །ཁྱིམ་པར་གྱུར་པས་དགེ་འདུན་གྱི། །ལོངས་སྤྱད་པར་ནི་མི་བྱའོ། །ཐམས་ཅད་དབྱུང་བ་བྱས་པ་དང་། །གསལ་ཤིང་སྟེང་དུ་བཏེག་པ་སླའི། །ཁྱིམ་པར་གྱུར་པས་དགེ་འདུན་གྱི། །ལོངས་སྤྱད་པར་ནི་མི་བྱའོ། །མེ་མདག་གིས་ནི་གང་བ་ཡི། །གནས་ཁང་དེར་ནི་ཞུགས་པ་སླའི། །ཁྱིམ་པས་དགེ་འདུན་གནས་ཁང་དུ། །མཚན་མོ་གནས་པར་མི་བྱའོ། །མེ་ལྕེ་འབར་བ་ལྟ་བུ་ཡི། །ལྕགས་ཀྱི་ཐུ་ལུམ་བླངས་པ་སླའི། །རབ་ཏུ་བྱུང་དང་ཁྱིམ་པ་ཡིས། །དབྱིག་ནི་བླང་བར་མི་བྱའོ། །འཁོར་ལོ་རྣོན་པོས་བདག་གི་ལུས། །ཀུན་ཏུ་གཏུབ་པར་བྱས་པ་སླའི། །ལེགས་པར་གསུངས་པའི་ཆོས་རྣམས་ལ། །རྒྱགས་དང་གཤེ་བ་བསྐྱེད་མི་བྱ། །ལེགས་པར་གསུངས་པའི་ཆོས་ཅན་གྱི། །མིག་ནི་རང་གི་ཕྱུང་བ་སླའི། །སེམས་ཅན་དུ་ནི་བགྲང་བ་ལ། །ཁྲོས་པས་སྐྱེ་དགུ་མི་མངག་གོ །ལེགས་པར་གསུངས་པའི་ཆོས་ཅན་གྱི། །མེ་ཡི་གོས་ནི་གྱོན་པ་སླའི། །ཚུལ་འཆོས་པ་དང་མཐུ་ཡིས་སུ། །ཁྱིམ་པ་ལས་ནི་གོས་མི་བསླང་། །མེ་འདྲ་བར་ནི་བསྐོལ་བ་ཡི། །རྩུབ་འགྱུར་ཆུ་ནི་འཐུངས་པ་སླའི། །རབ་ཏུ་བྱུང་བས་གཡོ་སྒྱུ་ཡིས། །བཟའ་བཏུང་བསླང་བར་མི་བྱའོ། །དེའི་ཚེ་བཅོམ་ལྡན་འདས་ཀྱིས་ཀླུ་ཁྲི་བཞི་སྟོང་སྙེད་སྔོན་གྱི་ཉེས་པར་བྱས་པའི་སྡུག་བསྔལ་གྱི་ཚོར་བ་དེ་ལྟ་བུ་དག་ལས་ཡོངས་སུ་ཐར་བར་མཛད་དེ་སྐྱབས་གསུམ་ལ་ཡང་རྣམ་པར་བཀོད་དོ། །དེའི་ཚེ་ཀླུ་གཞན་བྱེ་བ་ཕྲག་བརྒྱད་ཅུ་ནི་སྐྱབས་གསུམ་དུ་འགྲོ་བ་དང་། ཐེག་པ་གསུམ་ལ་ངེས་པར་རྣམ་པར་བཀོད་དོ། །དེའི་ཚེ་བཅོམ་
ལྡན་འདས་ཀྱིས་ཚེ་དང་ལྡན་པ་ཀཽ་ཌི་ནྱ་ལ་བཀའ་སྩལ་པ། ཀཽ་ཌི་ནྱ་སེམས་ཅན་རྣམས་རང་ལ་སླུ་བ་ལ་ལྟོས། སེམས་ཅན་གང་དག་དབུལ་པོ་ཉིད་ཀྱི་འཇིགས་པས་སྐྲག་ནས་རང་གིས་དགེ་སློང་ཆོས་ཀྱིས་གནས་པ་རྣམས་ལ་ཕན་གདགས་པའི་ཕྱིར་ཡོ་བྱད་ཀྱི་དངོས་པོ་རྣམ་པ་སྣ་ཚོགས་བསྔོས་ལ། ཁ་ཅིག་གིས་ནི་རང་གིས་ལོངས་སྤྱད་དོ། །ཁ་ཅིག་གིས་ནི་གཞན་དག་ལོངས་སྤྱད་པར་བྱ་བའི་ཕྱིར་བྱིན། ཁ་ཅིག་གིས་ནི་མཐུས་ཕྲོགས་ནས་ལོངས་སྤྱད་པས་དེ་ལྟར་ཡུན་རིང་པོར་ངན་སོང་གསུམ་དུ་སྡུག་བསྔལ་བརྟེན་ཏོ། །ཡང་སེམས་ཅན་གང་དག་དབུལ་པོ་ཉིད་ཀྱིས་འཇིགས་པས་སྐྲག་ནས་འཁོར་བའི་སྲིད་པའི་བཙོན་ར་ཐམས་ཅད་ལས་ཡོངས་སུ་ཐར་བར་བྱ་བའི་ཕྱིར་སྔོན་གྱི་སངས་རྒྱས་བཅོམ་ལྡན་འདས་རྣམས་ཀྱི་བསྟན་པ་ལ་རབ་ཏུ་བྱུང་ངོ་། །དེ་དག་རབ་ཏུ་བྱུང་ནས་ཆོས་དང་ལྡན་པའི་རྣལ་འབྱོར་ཡིད་ལ་བྱེད་པ་དང་། ཚིག་འདོན་པ་བཏང་ནས་ཉམས་པར་གྱུར་པ་དེ་དག་ཁ་ཅིག་ནི་དགེ་སློང་ཆོས་ཀྱིས་གནས་པ་རྣམས་ལ་དངོས་པོ་རྣམ་པ་སྣ་ཚོགས་དེ་བཞིན་དུ་བསྔོས་པ་རང་གིས་ཕྲོགས་ཏེ་ལོངས་སྤྱོད་པར་བྱེད་དོ། །ཁ་ཅིག་གིས་ནི་ཁྱིམ་པ་རྣམས་ལ་སྦྱིན་པར་བྱེད་དེ། དེ་དག་གཉི་ག་དེ་ལྟར་ཡུན་རིང་པོར་ངན་སོང་གསུམ་དུ་སྡུག་བསྔལ་གྱིས་གཟིར་ཏོ། །ངས་ཉེས་དམིགས་དེ་ཡང་དག་པར་གཟིགས་ནས་ངའི་ཉན་ཐོས་རྣམས་ལ་དྲན་པར་བྱ་བ་བཅའ་བ་མཛད་དེ། ངའི་ཉན་ཐོས་སུས་ཀྱང་དགེ་སློང་ལ་བསྔོས་པ་དང་། དགེ་སློང་གི་དགེ་འདུན་ལ་བསྔོས་པའི་མེ་ཏོག་དང་། འབྲས་བུ་དང་། ལོ་མ་དང་། བཅུད་ཁྱིམ་པ་རྣམས་ལ་སྦྱིན་པར་མི་བྱའོ། །གང་ཟག་གི་འདུ་ཤེས་ཀྱིས་ལོངས་སྤྱད་པར་མི་བྱའོ། །དགེ་འདུན་ལས་ཕྱི་རོལ་དུ་ཡང་ཉོ་ཚོང་མི་བྱའོ། །བསྐོར་བ་དང་། བསྒྱུར་བ་དང་། དབྱིག་གི་གཏམ་མི་བྱའོ། །སེམས་ཅན་རྣམས་ཟང་ཟིང་གིས་ཡོངས་སུ་བསྡུ་བའི་རྐྱེན་གྱིས་ངན་སོང་གི་སྡུག་བསྔལ་དག་ལ་དགོད་པར་མི་བྱའོ། །སེམས་ཅན་རྣམས་ཆོས་ཀྱིས་བསྡུ་བས་བསྡུ་བར་བྱའོ། །མི་ཕྱེད་པའི་དད་པ་བཞི་དང་། ཐེག་པ་
གསུམ་དང་། རྣམ་པར་ཐར་པའི་སྒོ་གསུམ་ལ་དགོད་པར་བྱའོ། །འཕགས་པ་འདུས་པ་ཆེན་པོའི་སྡེ་ཉི་མའི་སྙིང་པོའི་མདོ་ལེའུ་བཅུ་གཅིག་པ་ལས་ཀླུ་སྐྱབས་སུ་འགྲོ་བའི་ལེའུ་སྟེ་བཅུ་གཅིག་པའོ།། །།