འཕགས་པ་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་ཞེས་བྱ་བ་ཐེག་པ་ཆེན་པོའི་མདོ་ལས། ལེའུ་བཅུ་གཅིག་པ།
བམ་པོ་བཅུ་པ། དེ་ནས་ཀུན་ཏུ་རྒྱུ་ཤིན་ཏུ་རྣམ་པར་ཕྱེ་བའི་འོད་ཟེར་འཆང་བ་ཞེས་བྱ་བ་དེ་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་ཏེ་ཕྱག་འཚལ་ནས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གསོལ་ཏོ། །ཤིན་ཏུ་རྐང་གཉིས་མཆོག་གིས་བདེ་བྱིན་པ། །ལྟ་བ་ལོག་ཞུགས་འགྲོ་ལ་སྒྲོན་མ་འཛིན། །ཆོས་ཀྱི་འཁོར་ལོ་དག་གི་སྒྲ་འཇུག་པ། །ཇི་ལྟར་ལྟ་བའི་དྲ་བ་མངོན་འཆད་འགྱུར། །དྲི་མ་གསུམ་སྤངས་མིག་གསུམ་གཏོང་ཕོད་པ། །ཆོས་ཀྱིས་འགྲོ་བ་ཐམས་ཅད་ཚིམ་མཛད་པ། །ཁམས་གསུམ་འགྲོ་བ་ལ་ནི་སྒྲོན་འཛིན་པ། །ཇི་ལྟར་ལྟ་བའི་དྲ་བ་སྲབ་པར་འགྱུར། །འགྲོ་བ་དག་ལ་གསེར་དང་ཟླ་བ་བཞིན། །སྤྱན་ནི་རབ་མཛེས་ཤིན་ཏུ་གསལ་བའི་ཞལ། །བཟོད་པ་ཇི་ལྟར་ཐོབ་པའི་སྤྱོད་པ་གསུངས། །ཇི་ལྟར་ལྟ་བའི་རྒྱུ་རྣམས་འཇིག་པར་འགྱུར། །སེམས་ཅན་འགྲོ་བ་སྡིག་པ་ལས་ཟློག་མཛད། སྡིག་པའི་བསམ་བྲལ་ལྟ་བ་དགེ་བ་ལ། །ཚེ་ཡི་ཆུ་བོ་སྡིག་པ་སེལ་འགྱུར་བ། །སྡིག་པའི་ལྟ་གསུམ་ཇི་ལྟར་ཐར་བར་བྱེད། །དྲང་སྲོང་ཆེན་པོ་དབང་པོ་ཐམས་ཅད་བསྡམས། །དད་པས་མོས་པ་ལྟར་ན་གཞན་ལ་གནས། །རྣམ་པར་སྤྱོད་བཅས་རྩ་བ་ཤིན་སྤང་ཕྱིར། །ལྟ་བའི་མདུད་ཡོང་ཇི་ལྟར་ཟད་པར་འགྱུར། །ཐམས་ཅད་འགྲོ་ལ་ཁྱོད་ནི་བློ་གྲོས་ཅན། །མཆོག་གི་བཟོད་པ་དག་གི་ལམ་སྟོན་པ། །བསམ་པ་ཐམས་ཅད་ཀྱིས་ནི་འགྲོ་འདི་མགུ། །སྡིག་པར་ལྟ་བ་ཇི་ལྟར་འཇིག་པར་འགྱུར། །འཕགས་པའི་རྒྱལ་པོ་ཉོན་མོངས་དགྲ་སྲེག་པ། །ལམ་གྱི་ཡན་ལག་
བརྒྱད་ནི་ཉེ་བར་སྟོན། །འགྲོ་ལ་ལྷ་དང་ཟླ་བ་ཀུན་སྤངས་པ། །ལྟ་བའི་མུན་པ་དག་པར་ཇི་ལྟར་འགྱུར། །མི་འདུལ་ཁ་ལོ་སྒྱུར་ཞིང་ཐུགས་རབ་དགྱེས། །མི་མཆོག་རྒྱལ་པོ་འགྲོ་ལ་བཀྲ་ཤིས་མཛད། །ལྟ་བ་དགེ་ལ་འགྲོ་བ་འཇུག་པ་མེད། །སྡིག་པ་ལྟ་ལ་གང་དག་རྒྱུན་གཅོད་མེད། །བདེ་གཤེགས་འདུལ་དང་བཟོད་དང་སྡོམ་ལ་དགྱེས། །འགྲོ་བའི་ཐེ་ཙོམ་སྣ་ཚོགས་དེ་གཟིགས་ཏེ། །ཟླ་བར་གྱུར་པའི་ཆོས་ཀྱི་ཟླ་བ་བྱིན། །སྡིག་པའི་ལྟ་ཀུན་ཇི་བཞིན་འགྱུར་བ་མེད། །གཅིག་ཏུ་སྤྱད་པ་རྟག་ཏུ་བསམ་གཏན་དགྱེས། །དེ་བཞིན་འདིར་གནས་དཔག་མེད་འཁོར་དག་ལ། །སྡིག་པའི་ལྟ་བ་ཇི་ལྟར་ཡང་རེག་མེད། །ཆགས་མེད་རྒྱལ་མཚན་དོན་འདི་བཤད་དུ་གསོལ། །འཁོར་བའི་སྡུག་བསྔལ་རབ་ཏུ་ཞི་བར་མཛད། །་བཱ་རཱ་ཎ་སཱིར་དགེ་བའི་འཁོར་ལོ་བསྐོར། །སྲོག་ཆགས་བྱེ་མང་ལྟ་ལས་ཐར་མཛད་པ། །ལྟ་བར་སོང་བ་ཐར་མཛད་ཆོས་གསུངས་གསོལ། །ལྟ་བ་སྤྱོད་ཅིང་སྡིག་པའི་བློ་གྲོས་ཅན། །སྲོག་ཆགས་བྱེ་སྟོང་ཕྲག་བཅུ་འདི་དག་གནས། །སྡིག་བའི་ལྟ་ཀུན་ཇི་བཞིན་འགྱུར་མེད་པ། །བདེ་གཤེགས་ཡོངས་སུ་བསྔོ་བ་ཇི་ལྟར་འགྱུར། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ནམ་མཁའི་རང་བཞིན་ཅན་ལ་བཀའ་སྩལ་པ། རིགས་ཀྱི་བུ་གང་གི་ཚེ་བསྐལ་པ་ཚད་མེད་པ་ལས་ཤིན་ཏུ་འདས་པར་སྟོན་པ་དེའི་ཚེ་དེའི་དུས་ན་ལྷོ་ཕྱོགས་ན་སངས་རྒྱས་ཀྱི་ཞིང་སྟོང་ཕྲག་ཉི་ཤུ་ལས་ཤིན་ཏུ་འདས་པ་དེ་ན་སངས་རྒྱས་ཀྱི་ཞིང་བློ་གྲོས་དབྱངས་ཞེས་བྱ་བ་རྙོག་པ་ལྔས་ཤིན་ཏུ་གང་ཞིང་ལྟ་བ་ཐ་དད་པར་སོང་བ་དོག་པ་རྙེད་པར་གྱུར་ཅིང་། སེམས་ཅན་ཀུན་ཏུ་གཟིར་བར་གྱུར་པ་དེ་ལ་དེའི་ཚེ་དེའི་དུས་ན། བཅོམ་ལྡན་འདས་དེ་བཞིན་གཤེགས་པ་ཚངས་པའི་དབང་པོ་ཞེས་བྱ་བ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་གྱུར་པ་དེའི་སྟོང་གསུམ་གྱི་ཉན་ཐོས་ཀྱི་ཚོགས་འདུས་པ་ཆེན་པོར་གྱུར་པ་དྲན་ནམ། ཇི་ལྟར་ད་ལྟར་རྒྱལ་པོ་འབི་འབི་ས་ར་ངའི་ཡོན་བདག་ཆེན་པོ་ཡིན་པས་དེ་ན་ང་འོད་འཛིན་པའི་རྒྱལ་པོ་ཆེན་པོར་གྱུར་ཅིང་དེ་བཞིན་གཤེགས་པ་ཚངས་པའི་དབང་པོར་ཡང་གྱུར་ཏོ། །དེ་བཞིན་གཤེགས་པ་ཚངས་པའི་དབང་པོ་འཁོར་དང་
བཅས་པ་ལ་དེ་ལྟར་བདག་ཉི་མ་རེ་རེ་ཞིང་ཡང་མེ་ཏོག་སྣ་ཚོགས་དང་། དྲི་སྣ་ཚོགས་དང་། རིན་པོ་ཆེའི་གདུགས་སྣ་ཚོགས་དང་། རོལ་མོ་སྣ་ཚོགས་ཀྱིས་མཆོད་པ་བྱས་སོ། །ཡང་བཅོམ་ལྡན་འདས་དེ་ལ་དེ་བཞིན་དུ་ཉན་ཐོས་ཀྱི་དགེ་འདུན་དང་བཅས་པས་ཟླ་བ་གསུམ་དུ་ཡོ་བྱད་ཀྱིས་སྤྱན་དྲངས་ཏེ། ལམ་སྲང་གང་ན་མི་ཡོད་པ་དག་ཁ་ན་མ་ཐོ་བ་མེད་པའི་སྟོན་པ་བྱའོ་ཞེས་ལམ་སྲང་དུ་སྒྲ་འབྱིན་དུ་ཡང་བཅུག་གོ །ལམ་སྲང་དེ་ན་བྲམ་ཟེ་གང་གཱ་ཞེས་བྱ་བ་ཉི་མ་ལ་དད་པ་ཅན་དུ་གྱུར་པ་རྐང་པ་གཅིག་གིས་ཉི་མ་ལ་དགའ་ཞིང་ཉིན་མཚན་སྟོན་པ་ན་མངོན་པར་ཤེས་པ་དེ་བཅོམ་ལྡན་འདས་ལ་སྐྱབས་སུ་འགྲོ་བར་མི་འདོད་ནས། དེ་ངས་སྦྲན་པར་བྱས་སོ། །བྲམ་ཟེ་འདིས་ངའི་བྱ་བ་ལ་ནན་ཏན་དུ་མ་བྱས་པས་ཉི་མ་བདུན་དུ་མཆོག་ཏུ་གནོད་པས་གཙེའོ་ཞེས་བྱས་ནས་རྒྱལ་པོའི་ཞམ་རིང་བས་བཟུང་སྟེ་བཙོན་རར་བཅུག་པ་དང་། བྲམ་ཟེ་དེས་རྟག་ཏུ་ཉིན་མཚན་བདུན་དུ་འདི་ལྟ་བུའི་སྨོན་ལམ་བཏབ་བོ། །གལ་ཏེ་དེ་བཞིན་དུ་ཚངས་པའི་དབང་པོ་མགོ་རེག་སྣམ་བུ་དམར་པོ་ཅན་ཐམས་ཅད་ཤེས་པར་འགྱུར་བ་དེ་སྦེད་པའི་གནས་འདིར་བདག་གི་གན་དུ་ཤོག་ཤིག །དེའི་འོག་ཏུ་ཉི་མ་ཐམས་ཅད་ཤེས་པར་གྱུར་པ་གང་བདག་བཙོན་ར་ནས་ཐར་བར་བྱེད་པ་དེ་བཙོན་ར་འདིར་ཞུགས་ཤིང་གང་གི་མཐུས་བདག་འཚོ་བ་རྙེད་པ་དེ་ལ་བདག་སྐྱབས་སུ་འགྲོའོ། །དེ་ནས་ཉིན་མཚན་བདུན་པའི་ཐ་མ་འདས་པ་ན་སྔ་དྲོའི་དུས་ཀྱི་ཚེ་བཅོམ་ལྡན་འདས་དེ་བཞིན་གཤེགས་པ་ཚངས་པའི་དབང་པོའི་གཡས་ཕྱོགས་ན་ནི་ཉི་མའི་ལྷའི་བུ་ཕྱག་འཚལ་ཞིང་འདུག །གཡོན་ཕྱོགས་ན་ནི་ཟླ་བའི་ལྷའི་བུ་ཕྱག་འཚལ་ཞིང་འདུག །མདུན་ན་ནི་བརྒྱ་བྱིན་དང་། ཚངས་པ་ཕྱག་འཚལ་ཞིང་འདུག་པ་བཙོན་རར་བཞུད་ནས་དེ་བཞིན་གཤེགས་པ་དེས་བྲམ་ཟེ་ཉི་མ་ལ་དད་པ་ཅན་ལ་བཀའ་སྩལ་པ། བྲམ་ཟེ་ང་ནི་མིར་གྱུར་པ་ཐམས་ཅད་ཀྱིས་ཤེས་པའོ། །ཐམས་ཅད་ལ་སྟོན་པའོ། །ལྷ་ཐམས་ཅད་ཀྱིས་ཡིད་ལ་བྱེད་པའོ། །སེམས་ཅན་ཐམས་ཅད་ལ་བྱམས་ཤིང་སྙིང་རྗེ་བའོ། །འཁོར་བའི་བཙོན་ར་དང་རྒ་ཤི་ཐམས་ཅད་ལས་ཡོངས་སུ་ཐར་བར་བྱེད་པའོ། །བྲམ་ཟེ་ལྟ་བ་ལོག་པའི་རྒྱུན་ཆོད་ཅིག །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་
ལམ་ཐོབ་ཤིག་ཆོས་ཀྱི་རོས་སེམས་ཅན་ཐམས་ཅད་བོས་ཤིག །ལྷ་དང་། མི་དང་། སྐྱེ་དགུའི་ནང་ན་སེམས་ཅན་ལྟ་བ་དོག་པ་རྙེད་པ་རྣམས་ཡོངས་སུ་ཐར་བར་བྱོས་ཤིག །དེ་ནས་བྲམ་ཟེ་དེ་དགའ་མགུ་ཡིད་བདེ་བ་སྐྱེས་ནས་དེ་བཞིན་གཤེགས་པ་ཚངས་པའི་དབང་པོའི་ཞབས་གཉིས་ཀྱི་དྲུང་དུ་འོངས་ནས་གསོལ་པ། བཙུན་པ་བཅོམ་ལྡན་འདས་སྡིག་པའི་ལྟ་བར་སོང་བའི་ནོངས་པ་སྤངས་ཏེ། བཅོམ་ལྡན་འདས་དང་། ཆོས་དང་། དགེ་འདུན་ལ་བདག་ནི་འདི་ལྟར་སྐྱབས་སུ་མཆིའོ། །དེ་བཞིན་གཤེགས་པས་བཀའ་སྩལ་པ། བྲམ་ཟེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཁྱོད་ཀྱིས་བསམ་པ་ཐམས་ཅད་ཡོངས་སུ་རྫོགས་པ་ལེགས་སོ་ལེགས་སོ། །གང་གི་ཕྱིར་འདི་ལ་བྲམ་ཟེའི་ཡོན་ཏན་ཐམས་ཅད་ཡོངས་སུ་རྫོགས་པར་འདོད་པ་དང་། སེམས་ཅན་ཐམས་ཅད་ལ་བདེ་བ་སྐྱེད་པར་འདོད་པ་དང་། ཁམས་གསུམ་ཐམས་ཅད་ཟིལ་གྱིས་གནོན་པར་འདོད་པ་དང་། སངས་རྒྱས་ཐམས་ཅད་ལ་མཆོད་པར་འདོད་པ་དང་། སྐྱེ་དགུ་ཐམས་ཅད་ཟིལ་གྱིས་གནོན་པར་འདོད་པ་དང་། རྒ་ཤི་ལས་ཐར་བར་བྱ་བར་འདོད་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱ་བ་དེ་ལྟར་ཁྱོད་གྲགས་པ་བརྗོད་པའི་ཡོན་ཏན་དང་ལྡན་པར་འགྱུར་རོ། །དེས་གསོལ་པ། བཙུན་པ་བཅོམ་ལྡན་འདས་བདག་བཅོམ་ལྡན་འདས་གཤེགས་པའི་བར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱའོ་ཞེས་ངས་ཐོས་ནས་ངས་བྲམ་ཟེ་དེ་ཡོ་བྱད་ཐམས་ཅད་ཀྱིས་བོས་པ་དང་། བྲམ་ཟེ་དེ་ཡང་ཞག་བདུན་དུ་དབེན་པར་ཞུགས་ནས་སྨོན་ལམ་གདབ་པར་བསམས་པ་དང་། ཞག་བདུན་པ་དེ་ལས་ཤིན་ཏུ་འདས་ནས་བཅོམ་ལྡན་འདས་དེ་བཞིན་གཤེགས་པ་ཚངས་པའི་དབང་པོ་གང་ན་བ་དེར་ཉེ་བར་ཕྱིན་ཏེ་བཅོམ་ལྡན་འདས་དེའི་སྤྱན་སྔར་སྨོན་ལམ་བཏབ་བོ། །བཅོམ་ལྡན་འདས་ཀྱིས་བཀའ་སྩལ་པ། ནམ་མཁའི་རང་བཞིན་ཅན་གང་བྲམ་ཟེ་ཉི་མ་ལ་དད་པ་ཅན་དུ་གྱུར་པ་ངས་བཙོན་རར་བཅུག་པ་དེ་ནི་གང་། བྱང་ཆུབ་སེམས་དཔའ་ནམ་མཁའི་རང་བཞིན་ཅན་གྱིས་གསོལ་པ། བཅོམ་ལྡན་འདས་བདག་ནི་བྲམ་ཟེ་ཉི་མ་ལ་དད་པ་
ཅན་དུ་གྱུར་ཏེ། བདག་ཀྱང་བཅོམ་ལྡན་འདས་དེ་བཞིན་གཤེགས་པ་ཚངས་པའི་དབང་པོ་དེའི་སྤྱན་སྔར་སྨོན་ལམ་བཏབ་བོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གང་སྔོན་བཅོམ་ལྡན་འདས་དེ་བཞིན་གཤེགས་པ་ཚངས་པའི་དབང་པོའི་སྤྱན་སྔར་སྨོན་ལམ་བཏབ་པར་གྱུར་པ་དེ་རྗོད་ཅིག །གསོལ་པ། བཙུན་པ་བཅོམ་ལྡན་འདས་གང་གི་ཚེ་བདག་སངས་རྒྱས་མཆོད་པ་དང་། ཆོས་མཉན་པ་དང་། དགེ་འདུན་ལ་བསྙེན་བཀུར་བྱ་བའི་ཕྱིར་སྟན་ལས་ལྡང་བར་འདོད་པ་བདག་གི་སྨོན་ལམ་དེ་བཞིན་དུ་གྱུར་ཏོ། །གང་གི་ཚེ་བདག་སྟན་ལས་ལངས་ནས་བདག་གི་ལུས་ལ་སའི་ཁམས་ཀྱི་རྡུལ་ཕྲ་མོ་ཤིན་ཏུ་ཕྲ་བའི་ཚད་ཇི་ཙམ་དུ་འགྱུར་བ་དེ་ཙམ་གྱི་སེམས་ཅན་ཐམས་ཅད་ལས་སེམས་ཅན་རེ་རེའི་རྟག་པར་ལྟ་བ་དང་། ཆད་པར་ལྟ་བ་དང་། ཕྱིན་ཅི་ལོག་བཞི་ཀུན་ནས་ལྡང་བའི་ལྟ་བ་དང་། སྲིད་པའི་ལྟ་བ་དང་། སྲིད་པ་དང་བྲལ་བའི་ལྟ་བ་དང། འཇིག་ཚོགས་ཀྱི་ལྟ་བ་དང་། མཐར་འཛིན་པའི་ལྟ་བ་དང་དེ་ལ་སོགས་པ་དང་། གང་ལ་ལ་འཇིག་རྟེན་པའི་ཟག་པ་དང་བཅས་པའི་ཉེ་བར་ལེན་པའི་ལྟ་བ་རྣམས་དང་། དེ་ཙམ་གྱི་སེམས་ཅན་གཅིག་གི་སྔོན་གྱི་མཐའི་མུ་ལ་ལྟ་བ་ཐམས་ཅད་མ་ལུས་པར་མངོན་པར་འདུས་བྱས་སུ་འགྱུར་བ་དང་། དེ་ཙམ་གྱི་སེམས་ཅན་རེ་རེའི་འཁོར་བ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་སྐམས་པར་གྱུར་ཅིག་ཅེས་བདག་གི་སྨོན་ལམ་དེ་བཞིན་དུ་བཏབ་བོ། །སེམས་ཅན་གཅིག་གི་སེམས་དང་བསམ་པ་ལ་ཡང་དེ་ལ་སོགས་པའི་ལྟ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པའི་བར་དུ་སྐྱེ་བར་མ་གྱུར་ཅིག །ཡང་བདག་གི་དེ་ཙམ་གྱི་མཐའི་མུ་བརྩམས་པ་ནས་བླ་ན་མེད་པར་མྱ་ངན་ལས་འདའ་བའི་བར་གྱི་ཕྱིར་དེ་ལ་སོགས་པའི་ལྟ་བ་ཀུན་འཕགས་པར་གྱུར་པ་དེ་ལ་སོགས་པའི་ལྟ་བ་དེ་དག་ཀྱང་མ་ལུས་པར་སེམས་དང་བསམ་པ་ལ་མ་འཇུག་ཅིག །བཅོམ་ལྡན་འདས་གང་གི་ཚེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བ་དེའི་ཚེ། སེམས་ཅན་ཐམས་ཅད་ལས་སེམས་ཅན་རེ་རེའི་དེ་ཙམ་གྱི་ལྟ་བ་མ་ལུས་པར་སེལ་
བ་འདི་ནི་བཅོམ་ལྡན་འདས་བདག་གི་སྨོན་ལམ་དུ་གྱུར་ཏོ། །གང་གི་ཚེ་སངས་རྒྱས་ལ་ལྟ་བ་ནས་དགེ་འདུན་ལ་བསྙེན་བཀུར་བའི་བར་གྱི་ཕྱིར་བདག་སྟན་ལས་ལངས་པ་དེའི་ཚེ་སེམས་འདི་ལྟར་བསྐྱེད་དེ། བདག་གི་ལུས་ཀྱི་སྐྲའི་རྩེ་མོའི་ཆ་ཤས་ཙམ་གྱིས་ཆུའི་ཁམས་གཏོར་བར་འགྱུར་བ་ཇི་ཙམ་པ་དེ་ཙམ་གྱི་སེམས་ཅན་ཐམས་ཅད་ལས་སེམས་ཅན་རེ་རེའི་ལས་ཀྱི་སྒྲིབ་པ་མ་ལུས་པར་ཡོངས་སུ་ཟད་པར་འགྲོའོ། །སྔོན་གྱི་མཐའི་མུ་ཇི་ཙམ་པ་ལ་ཕ་རོལ་གྱི་ཕ་རོལ་ཏུ་ཕྱིན་པ་དྲུག་སྒྲིབ་པ་བྱས་པར་འགྱུར་བ་དང་། ལས་ཀྱི་སྒྲིབ་པ་དང་། སེམས་ཅན་གྱི་སྒྲིབ་པ་དང་། དགེ་བའི་སྒྲིབ་པ་དག་འཕགས་ཤིང་འདོར་བར་མ་གྱུར་ཏོ། །ཕྱི་མའི་མཐའི་མུ་ནས་བླ་ན་མེད་པར་ཡོངས་སུ་མྱ་ངན་ལས་འདའ་བའི་བར་དུ་ཕ་རོལ་གྱི་སྒྲིབ་པར་བྱེད་པ་མ་ལུས་པར་འཕང་བར་འགྱུར་རོ། །གང་ཡང་བདག་གི་སྔོན་གྱི་མཐའི་མུ་ལ་སྤྱད་པས་ཕ་རོལ་གྱི་ཕ་རོལ་ཏུ་ཕྱིན་པ་དྲུག་ལ་སྒྲིབ་པར་བྱས་པར་འགྱུར་ཞིང་། ཆོས་ཀྱི་སྒྲིབ་པ་དང་། སེམས་ཀྱི་སྒྲིབ་པ་དང་། དགེ་བའི་སྒྲིབ་པར་འགྱུར་བ་དག་ཕྱིས་སེམས་ཅན་རྣམས་ཡོངས་སུ་སྨིན་པའི་རྒྱུས་སྤང་བ་ནས་ཡོངས་སུ་མྱ་ངན་ལས་འདའ་བའི་བར་དུ་དེ་དག་ཐམས་ཅད་མ་ལུས་པར་ཡོངས་སུ་ཟད་པར་འགྲོའོ། །གང་གི་ཚེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བ་དེའི་ཚེ། སེམས་ཅན་ཐམས་ཅད་ལས་སེམས་ཅན་རེ་རེའི་དེ་སྙེད་ཀྱི་རྣམ་པ་དེ་ལྟ་བུའི་སྒྲིབ་པའི་ཆོས་མ་ལུས་པར་འཕང་བར་བྱ་ཞིང་སེམས་ཅན་རེ་རེ་ལ་ཡང་མྱུར་དུ་དེ་དེ་ཙམ་གྱི་ཏིང་ངེ་འཛིན་གྱི་གཟུངས་བཀོད་པར་བྱའོ། །སེམས་ཅན་ཐམས་ཅད་མངལ་གྱི་གནས་ལས་ཡོངས་སུ་གྲོལ་བར་བྱའོ། །སེམས་ཅན་ཐམས་ཅད་རྒ་ཤི་འབྱུང་བའི་རྒྱ་མཚོ་ལས་བསྒྲལ་བར་བྱའོ་ཞེས་གང་གི་ཚེ་བདག་དགེ་འདུན་ལ་བསྙེན་བཀུར་བའི་བར་གྱི་ཕྱིར་སྟན་ལས་ལྡང་བར་བྱ་བ་འདི་ནི་བཙུན་པ་བཅོམ་ལྡན་འདས་བདག་གི་སྨོན་ལམ་དུ་གྱུར་ཏོ། །གང་གི་ཚེ་བདག་སྟན་གྱི་ལོངས་སྤྱོད་དང་བདེ་བའི་ཡོ་བྱད་སྤངས་ཏེ། བདག་གི་ལུས་ཀྱི་སྐྲའི་རྩེ་མོའི་ཆ་ཤས་ཙམ་དུ་མེའི་ཁམས་གྱུར་པ་ཇི་ཙམ་པ་དེ་ཙམ་གྱི་སེམས་ཅན་ཐམས་ཅད་ལས་སེམས་ཅན་རེ་རེའི་སྔོན་གྱི་མཐའི་མུ་ནས་ད་ལྟར་གྱི་སྐྱེ་བའི་བར་དུ་གཞན་ལ་ལས་
ཀྱིས་མ་ལུས་པར་མངོན་པར་འདུས་བྱས་པར་འགྱུར་རོ། །གང་གི་ཚེ་ཕྱི་མའི་མཐའི་མུ་ནས་བླ་ན་མེད་པ་མྱ་ངན་ལས་འདའ་བའི་བར་དུ་འཕངས་ཤིང་སེམས་ཅན་རེ་རེའི་དེ་ཙམ་གྱི་ངན་སོང་གི་ལས་མ་ལུས་པར་སྒྲུབ་པར་འགྱུར་བ་ནས་བླ་ན་མེད་པར་མྱ་ངན་ལས་འདའ་བའི་བར་དུ་བྲལ་བ་མེད་པར་འགྱུར་རོ། །འཕགས་པའི་གདན་འདི་ནས་བྱང་ཆུབ་ཀྱི་སྙིང་པོའི་གདན་གྱི་བར་དུ་བྲལ་བ་མེད་པར་འགྱུར་རོ། །གང་ཡང་བདག་གིས་སྔོན་གྱི་མཐའི་མུ་ལ་རྣམ་པ་དེ་ལྟ་བུའི་ལས་བསྒྲུབས་པ་མངོན་པར་འདུས་བྱས་པར་འགྱུར་རོ། །གང་ཡང་མངོན་པར་འདུ་བྱེད་པ་ནས་བླ་ན་མེད་པར་མྱ་ངན་ལས་འདའ་བའི་བར་དུ་ཐམས་ཅད་ཀྱི་སྐྱེ་བ་མ་ལུས་པར་ཡོངས་སུ་ཟད་པར་འགྱུར་རོ། །གང་གི་ཚེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པ་དེའི་ཚེ་སེམས་ཅན་སྤྱོད་ཡུལ་ངན་པ་དང་། དམའ་བའི་ངན་འགྲོར་གནས་པ་དག་ཡོངས་སུ་ཐར་བར་བྱ་བ་ནས་ཕ་རོལ་ཏུ་ཕྱིན་པ་དྲུག་ལ་དགོད་པར་བྱ་བའི་བར་དུ་འདི་ནི་བཙུན་པ་བཅོམ་ལྡན་འདས་བདག་གི་སྨོན་ལམ་དུ་གྱུར་ཏོ། །གང་གི་ཚེ་བདག་སངས་རྒྱས་ལ་ལྟ་བ་ནས་དགེ་འདུན་ལ་བསྙེན་བཀུར་བའི་ཕྱིར་སྟན་ལས་ལངས་ཏེ་སྨོན་ལམ་འདི་ལྟ་བུ་བྱས་ཏེ། རླུང་གི་ཁམས་བདག་གི་ལུས་ཀྱི་སྐྲའི་རྩེ་མོའི་ཆ་ཤས་ཙམ་དུ་འགྱུར་བ་ཇི་ཙམ་པ་དེ་ཙམ་གྱི་སེམས་ཅན་ཐམས་ཅད་ལས་སེམས་ཅན་རེ་རེའི་དེ་ཙམ་གྱི་སྔོན་གྱི་མཐའི་མུའི་བར་དུ་གཞན་ལ་ཁམས་མཚུངས་པ་མེད་པའི་འཁྲུག་པར་བྱེད་པའི་ལས་དེ་དག་ཐམས་ཅད་མ་ལུས་པར་འདུས་བྱས་པར་འགྱུར་རོ། །ཡང་འཁོར་བ་ན་འཁོར་བ་ནས་བླ་ན་མེད་པར་ཡོངས་སུ་མྱ་ངན་ལས་འདའ་བའི་བར་དུ་ཁམས་འཁྲུག་པའི་ནད་དུ་མ་གྱུར་ཅིག །གང་ཡང་བདག་གིས་སྔོན་གྱི་མཐའི་མུ་ནས་བརྩམས་ཏེ་གཞན་ལ་ཁམས་འཁྲུག་པར་བྱེད་པའི་ལས་མ་ལུས་པར་མངོན་པར་འདུ་བྱ་བར་འགྱུར་བ་ནས་བླ་ན་མེད་པ་ཡོངས་སུ་མྱ་ངན་ལས་འདའ་བའི་བར་དུ་འཕང་བར་བྱའོ། །གང་གི་ཚེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བ་དེའི་ཚེ་སེམས་ཅན་ཐམས་ཅད་ལས་སེམས་ཅན་རེ་རེ་ལ་ཡང་ཇི་ཙམ་གྱི་ཏིང་ངེ་འཛིན་སྒྲུབ་པའི་ཚུལ་གྱིས་ཁམས་
འཁྲུག་པ་མ་ལུས་པར་སེལ་བར་བྱའོ། །སེམས་ཅན་ཐམས་ཅད་ལས་སེམས་ཅན་རེ་རེ་ལ་ཡང་དེ་ཙམ་གྱི་བརྩོན་འགྲུས་ལ་དམིགས་པ་ཐབས་ལ་མཁས་པའི་ཡེ་ཤེས་བསླབ་པར་བྱ་ཞིང་དེ་ཙམ་གྱི་ཆོས་ཀྱི་སྒོ་སྟོང་ཡང་རབ་ཏུ་བསྟན་པར་བྱའོ། །དེ་ཙམ་གྱི་སྦྱིན་པའི་ཕ་རོལ་ཏུ་ཕྱིན་པ་ལ་སྦྱོར་བར་བྱ་བ་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་སྦྱོར་བར་བྱའོ། །ཕྱིར་མི་ལྡོག་པའི་ས་ལ་དགོད་པར་བྱའོ། །དེ་ཙམ་གྱི་སངས་རྒྱས་བཅོམ་ལྡན་འདས་རྣམས་ཀྱི་སེམས་ཅན་རེ་རེ་ལ་ཡང་བཅོལ་ཞིང་གདམས་པར་བྱ་བ་འདི་ནི་བཙུན་པ་བཅོམ་ལྡན་འདས་བདག་གི་སྨོན་ལམ་དུ་གྱུར་ཏོ། །གང་གི་ཚེ་བདག་སངས་རྒྱས་ལ་བལྟ་བ་ནས་དེ་བཞིན་དུ་སྨོན་ལམ་བྱས་པའི་བར་དུ་རྐང་ལག་གཉིས་ས་ལ་གཞག་པར་བྱའོ། །གང་གི་ཚེ་བདག་ནམ་མཁའི་ཁམས་མཐའ་ཡས་མུ་མེད་པ་ཉོན་མོངས་པས་བཅིངས་པའི་བག་ལ་ཉལ་བ་ཐམས་ཅད་ཀྱིས་ཉོན་མོངས་པ་མེད་པ་ཇི་ཙམ་པ་ལ་ནམ་མཁའ་ལ་ཆགས་པ་མེད་པར་འགྲོ་བ་ན་སེམས་ཅན་ཐམས་ཅད་ལ་སེམས་ཅན་རེ་རེ་ལ་ཡང་དེ་ཙམ་གྱི་ཉོན་མོངས་པས་བཅིངས་པའི་བག་ལ་ཉལ་བ་གྲངས་མེད་པ་བརྗོད་དུ་མེད་པ་མ་ལུས་པར་གྱུར་ཅིག །དེ་ཙམ་གྱི་ཆོས་ཐམས་ཅད་ཀྱི་ཚུལ་ནམ་མཁའི་རང་བཞིན་ལྟ་བུ་ལ་ཞུགས་པ་ནས་བླ་ན་མེད་པར་ཡོངས་སུ་མྱ་ངན་ལས་འདའ་བའི་བར་དུ་ཉོན་མོངས་པ་ཐམས་ཅད་དང་འདྲེས་པ་མེད་པར་གྱུར་ཅིག །ཆོས་ཐམས་ཅད་མ་དྲན་པ་མེད་པར་འགྱུར་བ་ནས་ནམ་མཁའི་ཁམས་མཐའ་ཡས་མུ་མེད་པའི་ཉོན་མོངས་པས་བཅིངས་པའི་བག་ལ་ཉལ་བས་ཉོན་མོངས་པ་མེད་པའི་བར་དུ་དེ་ཙམ་གྱི་ཉོན་མོངས་པས་བཅིངས་པའི་བག་ལ་ཉལ་བ་ཐམས་ཅད་མ་ལུས་པར་དག་པར་གྱུར་ཅིག །དེ་ཙམ་གྱི་ཆོས་ཐམས་ཅད་ཀྱི་ཚུལ་ནམ་མཁའི་རང་བཞིན་ལྟ་བུ་ནས་བླ་ན་མེད་པར་ཡོངས་སུ་མྱ་ངན་ལས་འདའ་བའི་བར་དུ་འཇུག་པར་བྱའོ། །བདག་ནི་ནམ་མཁའ་ལ་ཀུན་ཏུ་རྟོག་པས་འཁོར་བ་ན་བདག་བླ་ན་མེད་པའི་ཡེ་ཤེས་ཐོབ་པར་བྱ་བའི་ཕྱིར་བྱང་ཆུབ་ཀྱི་སྤྱོད་པ་སྤྱད་པར་བྱའོ། །སེམས་ཅན་ཐམས་ཅད་ཀྱི་ཉོན་མོངས་པའི་རྙོག་པ་སྦྱང་བར་བྱ་བ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་བྱ་བའི་བར་དུ།
སེམས་ཅན་ཐམས་ཅད་ལས་སེམས་ཅན་རེ་རེ་ལ་ཡང་དེ་ཙམ་གྱི་དགེ་བའི་ཆོས་མཐའ་ཡས་མུ་མེད་པ་བསྟན་པར་བྱའོ། །ནམ་མཁའི་རང་བཞིན་ལྟ་བུའི་ཕ་རོལ་ཏུ་ཕྱིན་པ་དྲུག་ལ་བསླབ་པར་བྱ་ཞིང་དགོད་པར་བྱ་བ་ནས་བླ་ན་མེད་པར་ཡོངས་སུ་མྱ་ངན་ལས་འདས་པའི་བར་དུ་སེམས་ཅན་དེ་དག་ཆོས་ཀྱི་སྒོ་ནམ་མཁའི་རང་བཞིན་ཅན་ཕ་རོལ་ཏུ་ཕྱིན་པ་དང་ལྡན་པ་བྱེ་བ་ཁྲག་ཁྲིག་བརྒྱ་སྟོང་དེ་དག་ཏུ་དྲན་པ་ཉམས་པར་མ་གྱུར་པ་འདི་ནི། བཙུན་པ་བཅོམ་ལྡན་འདས་བདག་གི་སྨོན་ལམ་དུ་གྱུར་ཏོ། །གང་གི་ཚེ་བདག་སངས་རྒྱས་བལྟ་བ་དང་། ཆོས་མཉན་པ་དང་། དགེ་འདུན་ལ་བསྙེན་བཀུར་བའི་ཕྱིར་ཉེ་བར་འགྲོ་བ་ཡང་དེ་བཞིན་དུ་སྨོན་ལམ་བཏབ་སྟེ་སྤྱད་པ་ན་བདག་གི་རྐང་པ་གཉིས་ཀྱི་མཐིལ་ས་ལ་རེག་པ་ཇི་ཙམ་པ་དང་། གླིང་བཞི་པའི་ས་ནས་བཟུང་སྟེ། བླ་ན་མེད་པའི་རྡུལ་ཤིན་ཏུ་ཕྲ་བར་འགྱུར་བ་ཇི་ཙམ་པ་དེ་ཙམ་གྱི་སེམས་ཅན་ཐམས་ཅད་ལས་སེམས་ཅན་རེ་རེ་ལ་ཡང་ཕྱི་མའི་མཐའི་མུ་ནས་བཟུང་སྟེ། ཕ་རོལ་གྱི་གན་ན་ཡན་ལག་མ་ཚང་བ་འདོད་པ་མེད་པར་འགྱུར་བ་ཡོད་ཅིང་ལས་ཀྱི་སྒྲིབ་པས་འཕངས་པར་འགྱུར་བ་སེམས་ཅན་རེ་རེ་ལ་ཡང་དེ་ཙམ་གྱི་ལས་དེ་དག་མ་ལུས་པར་འགྱུར་ཞིང་། འཁོར་བ་ན་འཁོར་བ་ནས་བླ་ན་མེད་པར་ཡོངས་སུ་མྱ་ངན་ལས་འདའ་བའི་བར་དུ་ཡན་ལག་མ་ཚང་བ་མེད་པར་གྱུར་ཅིག །གང་ཡང་བདག་གིས་སྔོན་གྱི་མཐའི་མུ་ནས་བཟུང་སྟེ། ཕ་རོལ་གྱི་གན་དུ་ཡན་ལག་མ་ཚང་བའི་ལས་ཀྱི་སྒྲིབ་པ་ཇི་ཙམ་པ་དེ་ཙམ་འཕངས་པར་འགྱུར་བ་དེ་དག་ཐམས་ཅད་མ་ལུས་པར་ཡོངས་སུ་ཟད་པར་གྱུར་ཅིག །བདག་བླ་ན་མེད་པའི་ཡེ་ཤེས་ཆེན་པོ་ཐོབ་པའི་རྒྱུར་བྱས་ཏེ་སྟོབས་ལྔའི་ཡན་ལག་དང་བྲལ་བ་མེད་པར་འགྱུར་རོ། །གང་གི་ཚེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བ་དེའི་ཚེ། སེམས་ཅན་ཐམས་ཅད་ལས་སེམས་ཅན་རེ་རེ་ལ་ཡང་དེ་ཙམ་གྱི་དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་ཡོངས་སུ་བཀང་བར་བྱ་བའི་ཕྱིར་ཏིང་ངེ་འཛིན་གྱི་སྒོ་བསྟན་པར་བྱའོ། །སེམས་ཅན་ཐམས་ཅད་ཐེག་པ་གསུམ་ལ་ལུང་སྟོན་ཅིང་ཕྱིར་མི་ལྡོག་པའི་ས་ལ་ཡང་དགོད་པར་བྱ་
བ་འདི་ནི་བཙུན་པ་བཅོམ་ལྡན་འདས་བདག་གི་སྨོན་ལམ་དུ་གྱུར་ཏོ། །གང་གི་ཚེ་བདག་སངས་རྒྱས་མཐོང་ཞིང་ཆོས་སྨྲ་བ་དང་དགེ་སློང་གི་དགེ་འདུན་མཐོང་ནས་ཀྱང་དེ་བཞིན་དུ་སྨོན་ལམ་བཏབ་བོ། །དེ་འགྲོ་བ་ལྔ་དང་། གནས་གསུམ་དང་། སྐྱེ་གནས་བཞི་ལ་རྣམ་པར་ཤེས་པའི་ཁམས་སུ་འགྱུར་བ་ཇི་ཙམ་པ་དེ་ཙམ་གྱི་སེམས་ཅན་ཐམས་ཅད་ལས་སེམས་ཅན་རེ་རེ་ལ་ཡང་སྔོན་གྱི་མཐའི་མུ་ནས་བཟུང་སྟེ། གཞན་ལ་དབང་པོ་དྲུག་མ་ཚང་བའི་ལས་ཐམས་ཅད་མ་ལུས་པར་འཕངས་པར་གྱུར་ཅིག །ཕྱི་མའི་མཐའི་མུ་འཕང་བ་ནས་མཆོག་ཏུ་རྒྱ་ཆེ་བ་དགའ་བར་བྱེད་པའི་དབང་པོ་དྲུག་ཡོངས་སུ་རྫོགས་པ་ཐོབ་པར་གྱུར་པ་བླ་ན་མེད་པར་ཡོངས་སུ་མྱ་ངན་ལས་འདའ་བའི་བར་དུ་དབང་པོ་དྲུག་མཚང་བ་མེད་པར་གྱུར་ཅིག །གང་ཡང་བདག་གིས་སྔོན་གྱི་མཐའི་མུ་ནས་བཟུང་སྟེ། གཞན་ལ་དབང་པོ་ཉམས་པའི་ལས་མངོན་པར་འདུས་བྱས་པ་འཕངས་པར་འགྱུར་བ་མ་ལུས་པར་འདོར་བ་མེད་པར་གྱུར་ཅིག །སེམས་ཅན་རྣམས་བླ་ན་མེད་པའི་ཡེ་ཤེས་ཆེན་པོ་ཐོབ་པའི་བར་གྱི་ཕྱིར་མཆོག་ཏུ་རྒྱ་ཆེ་བ་བལྟ་ན་སྡུག་པ་དགའ་བར་བྱེད་པའི་དབང་པོ་དྲུག་ཡོངས་སུ་ཚང་བས་བྲལ་བ་མེད་པར་གྱུར་ཅིག །གང་གི་ཚེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བ་དེའི་ཚེ། བདག་གིས་སེམས་ཅན་ཐམས་ཅད་ལས་སེམས་ཅན་རེ་རེ་ལ་ཡང་ལས་ཀྱི་སྒྲིབ་པ་མ་ལུས་པར་ཐལ་བར་བྱས་པ་འདི་ནི་བཅོམ་ལྡན་འདས་བདག་གི་སྨོན་ལམ་དུ་གྱུར་ཏོ། །གང་གི་ཚེ་བདག་སངས་རྒྱས་དང་། ཆོས་སྨྲ་བ་དང་། དགེ་འདུན་གྱི་སྤྱན་སྔར་པུས་མོ་གཡས་པའི་ལྷ་ང་ས་ལ་བཙུགས་ནས་འདི་ལྟར་སེམས་བསྐྱེད་པར་བྱའོ། །བདག་གིས་སྔོན་གྱི་མཐའི་མུ་ནས་བཟུང་སྟེ། སྐད་ཅིག་ཐང་ཅིག་ཡུད་ཙམ་གྱིས་སོང་བར་གྱུར་པ་ཇི་ཙམ་པ་སེམས་ཅན་ཐམས་ཅད་ལས་སེམས་ཅན་རེ་རེ་ལ་ཡང་དེ་ཙམ་གྱི་སྔོན་གྱི་མཐའི་མུ་ནས་བཟུང་བ་ནས། བདག་མི་དགེ་བ་བཅུའི་ལས་ཀྱི་ལམ་ཡང་དག་པར་བཟུང་སྟེ། རྣམ་པར་མ་སྨིན་པར་འཇུག་ཅིང་འདོར་བ་མེད་པར་བྱས་པའི་བར་དུ་མ་ལུས་པར་རྣམ་པར་མ་སྨིན་པར་གྱུར་ཅིག །ཡང་སེམས་ཅན་རེ་རེ་ལ་ཡང་ཕ་རོལ་ཏུ་ཕྱིན་པ་དྲུག་རྫོགས་པར་བྱ་བའི་ཕྱིར། དེ་ཙམ་གྱི་ལུས་དང་
ངག་དང་ཡིད་ཀྱི་འདུ་བྱེད་རྣམས་དགེ་བ་ལ་མངོན་པར་འདུས་བྱས་སུ་གྱུར་ཅིག །གང་ཡང་བདག་གིས་སྔོན་གྱི་མཐའི་མུ་ནས་བཟུང་སྟེ། དགེ་བ་བཅུའི་ལས་ཀྱི་ལམ་ལ་རྣམ་པར་སྨིན་པར་འཇུག་ཅིང་འདོར་བ་མེད་པར་འགྱུར་བ་མ་ལུས་པར་རྣམ་པར་སྨིན་པར་གྱུར་ཅིག །བདག་ནི་རྟག་ཏུ་དགེ་བ་བཅུའི་ལས་ཀྱི་ལམ་གྱིས་འབྲལ་བ་མེད་པར་འགྱུར་བ་ནས། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བའི་བར་དུ་སེམས་ཅན་ཐམས་ཅད་ལས་སེམས་ཅན་རེ་རེ་ལ་ཡང་དེ་ཙམ་གྱི་དགེ་བ་དང་མི་དགེ་བའི་འདུས་བྱས་ཀྱི་ཆོས་རབ་ཏུ་བསྟན་ཅིང་། ཐེག་པ་གསུམ་གྱིས་ལུང་བསྟན་པར་བྱ་བ་འདི་ནི་བཅོམ་ལྡན་འདས་བདག་གི་སྨོན་ལམ་དུ་གྱུར་ཏོ། །གང་གི་ཚེ་བདག་སངས་རྒྱས་ཀྱི་སྤྱན་སྔར་པུས་མོ་གཡས་པའི་ལྷ་ང་ས་ལ་བཙུགས་ཤིང་ཆོས་སྨྲ་བའི་མདུན་དུ་པུས་མོ་གཡས་པའི་ལྷ་ང་ས་ལ་བཙུགས་ཏེ་དེ་ལྟ་བུའི་སྨོན་ལམ་བཏབ་པས་བདག་སྔོན་གྱི་མཐའི་མུ་ནས་བཟུང་སྟེ། ཉིན་མཚན་མེད་པ་ཇི་ཙམ་པ་སེམས་ཅན་རྣམས་ལས་སེམས་ཅན་རེ་རེ་ལ་ཡང་དེ་ཙམ་གྱི་ངན་འགྲོ་གསུམ་སྒྲུབ་པའི་ལས་ཀྱི་སྒྲིབ་པ་མ་ལུས་པར་ཟད་པར་གྱུར་ཅིག །གང་ཕ་རོལ་ལ་སྐྱེད་པར་འགྱུར་བ་བདེ་འགྲོ་གསུམ་ལ་ཉོན་མོངས་པ་མེད་པར་འགྱུར་བ་ནས་བླ་ན་མེད་པར་ཡོངས་སུ་མྱ་ངན་ལས་འདའ་བའི་བར་དུ་ངན་འགྲོར་སྐྱེ་བར་མ་གྱུར་ཅིག །གང་ཡང་བདག་གིས་སྔོན་གྱི་མཐའི་མུ་ནས་བཟུང་སྟེ། ངན་འགྲོ་གསུམ་སྒྲུབ་པའི་ལས་མངོན་པར་འདུས་བྱས་པ་འདོར་བ་མེད་པ་མ་ལུས་པར་ཟད་པར་གྱུར་ཅིག །སྨོན་ལམ་གཞན་གྱི་དབང་གིས་སེམས་ཅན་ཡོངས་སུ་སྨིན་པར་བྱ་བའི་ཕྱིར་བླ་ན་མེད་པར་ཡོངས་སུ་མྱ་ངན་ལས་འདའ་བའི་བར་དུ་ངན་འགྲོ་གསུམ་གྱི་ངན་འགྲོར་སྐྱེ་བར་མི་བྱའོ། །གང་གི་ཚེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བ་དེའི་ཚེ། སེམས་ཅན་རྣམས་ངན་འགྲོ་གསུམ་ལས་ཡོངས་སུ་ཐར་བར་བྱ་བའི་ཕྱིར་སྐྱབས་གསུམ་ལས་རྣམ་པར་དགོད་པར་བྱ་བ་འདི་ནི་བཙུན་པ་བཅོམ་ལྡན་འདས་བདག་གི་སྨོན་ལམ་དུ་གྱུར་ཏོ། །གང་གི་ཚེ་བདག་སངས་རྒྱས་དང་། ཆོས་དང་། དགེ་འདུན་ལ་
ཡན་ལག་ལྔས་ཕྱག་འཚལ་བར་བྱེད་པ་དེ་བཞིན་དུ་ཡང་བདག་གིས་སྨོན་ལམ་བཏབ་བོ། །ཕྱོགས་བཅུའི་སའི་ཁམས་མཐའ་ཡས་མུ་མེད་པ་འདི་རེ་རེ་ལ་ཡང་རྡུལ་ཤིན་ཏུ་ཕྲ་བ་ཇི་ཙམ་པ་ལྟར་ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། རྣམ་པར་ཤེས་པའི་ཁམས་ཀྱང་དེ་བཞིན་ཏེ། སེམས་ཅན་ཐམས་ཅད་ལས་སེམས་ཅན་རེ་རེ་ལ་ཡང་སྔོན་གྱི་མཐའི་མུ་ནས་བཟུང་སྟེ། མ་རིག་པའི་རྒྱུ་ནས་རྒ་ཤིའི་རྒྱུའི་བར་དུ་ལས་ཀྱི་མངོན་པར་འདུ་བྱེད་པ་མངོན་པར་འདུས་བྱས་ཤིང་འདོར་བ་མེད་པར་འགྱུར་བ་མ་ལུས་པར་ཟད་པར་གྱུར་ཅིག །སེམས་ཅན་རེ་རེ་ལ་ཡང་དེ་ཙམ་གྱི་རྟེན་ཅིང་འབྲེལ་པར་འབྱུང་བའི་ཆོས་ཀྱི་སྒོའི་ཚུལ་ཤེས་པ་དེ་ཆོས་ལ་སུ་ཡང་བླ་ན་མེད་པར་ཡོངས་སུ་མྱ་ངན་ལས་འདའ་བའི་བར་དུ་མ་བརྗེད་ཅིག །གང་ཡང་བདག་གིས་སྔོན་གྱི་མཐའི་མུ་ནས་བཟུང་སྟེ། མ་རིག་པའི་རྒྱུ་ནས་རྒ་ཤིའི་རྒྱུའི་བར་དུ་དེ་ཙམ་གྱི་ལས་ཀྱི་མངོན་པར་འདུ་བྱེད་པ་མངོན་པར་འདུས་བྱས་པར་གྱུར་པ་མ་ལུས་པར་ཡོངས་སུ་ཟད་པར་གྱུར་ཅིག །ཡང་བླ་ན་མེད་པའི་ཡེ་ཤེས་ཆེན་པོ་ཐོབ་པར་བྱ་བའི་བར་གྱི་ཕྱིར་རྟེན་ཅིང་འབྲེལ་པར་འབྱུང་བའི་ཆོས་ཀྱི་ཤེས་པར་བྱ་བ་དྲན་པར་བྱའོ། །གང་གི་ཚེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བ་དེའི་ཚེ། སེམས་ཅན་ཐམས་ཅད་ལས་སེམས་ཅན་རེ་རེ་ལ་ཡང་དེ་ཙམ་གྱི་རྟེན་ཅིང་འབྲེལ་པར་འབྱུང་བའི་ཆོས་ལ་འཇུག་པར་བྱ་བ་འདི་ནི་བཅོམ་ལྡན་འདས་བདག་གི་སྨོན་ལམ་དུ་གྱུར་ཏོ། །གང་གི་ཚེ་བདག་སངས་རྒྱས་དང་ཆོས་སྨྲ་བའི་སྤྱན་སྔར་པུས་མོ་གཡས་པའི་ལྷ་ང་ས་ལ་བཙུགས་ཏེ། ལག་པ་གཉིས་ཐལ་མོ་སྦྱར་ནས་མཆོག་ཏུ་དགའ་བའི་མིག་དང་། བཞིན་དང་། དབང་པོ་ཐམས་ཅད་གཅིག་ཏུ་འདུས་པས་སྦྱིན་པའི་གནས་དེ་ལ་རྟག་ཏུ་མཆོད་པར་བྱ་བའི་ཕྱིར་ཉེ་བར་ཕྱིན་ཏེ་བདག་ཉིད་ཀྱི་ལུས་ཀྱི་བ་སྤུའི་ཁུང་བུ་ཇི་ཙམ་པ་དང་། སེམས་ཅན་ཐམས་ཅད་ཀྱི་བ་སྤུའི་ཁུང་བུར་གྱུར་པ་ཇི་ཙམ་པ་དེ་ཙམ་གྱི་སེམས་ཅན་ཐམས་ཅད་ལས་སེམས་ཅན་རེ་རེ་ཞིང་ཡང་དེ་ཙམ་གྱི་ལས་ཀྱི་འབྲས་བུ་ཐམས་ཅད་ཟད་པར་གྱུར་ཅིག །ཉོན་མོངས་པའི་དྲི་མ་ཐམས་ཅད་སྤངས་པར་གྱུར་ཅིག །གཏི་མུག་གི་དྲི་མ་ཐམས་ཅད་སྤངས་པར་
གྱུར་ཅིག །ཡེ་ཤེས་ཀྱི་དྲི་མ་ཐམས་ཅད་སེལ་བར་གྱུར་ཅིག །སེམས་ཅན་རེ་རེ་ལ་ཡང་དེ་ཙམ་གྱི་བསོད་ནམས་ཀྱིས་ཡང་དག་པར་བརྒྱན་པར་གྱུར་ཅིག །སེམས་ཅན་རེ་རེ་ལ་ཡང་དེ་ཙམ་གྱི་འཁོར་བ་བརྒྱ་སྟོང་གྲངས་མེད་པ་ཕྱིར་ཕྱོགས་པར་གྱུར་ཅིག །སེམས་ཅན་རེ་རེ་ལ་ཡང་དེ་ཙམ་གྱི་རྫུ་འཕྲུལ་གྱི་ཡུལ་ལ་ཏིང་ངེ་འཛིན་གྱི་སྒོ་སྒྲུབ་པ་རྣམ་པར་རྩེ་བར་གྱུར་ཅིག །སེམས་ཅན་རེ་རེ་ལ་ཡང་དེ་ཙམ་གྱི་སངས་རྒྱས་བཅོམ་ལྡན་འདས་ལ་བསྙེན་བཀུར་བར་གྱུར་ཅིག །སངས་རྒྱས་རེ་རེ་ལ་ཡང་ཆོས་ཀྱི་སྒོ་བརྒྱ་སྟོང་འཇུག་པར་གྱུར་ཅིག །སངས་རྒྱས་རེ་རེའི་སྤྱན་སྔར་ཡང་དེ་ཙམ་གྱི་སངས་རྒྱས་ཀྱི་ཞིང་གི་ཡོན་ཏན་ཚོགས་ཀྱི་སྨོན་ལམ་དག་འཛིན་པར་གྱུར་ཅིག །སེམས་ཅན་རེ་རེ་ལ་ཡང་སེམས་ཅན་རེ་རེས་དེ་ཙམ་གྱི་དགེ་བའི་རྩ་བ་ལ་སྦྱོར་བར་གྱུར་ཅིག་སེམས་ཅན་རེ་རེ་ཞིང་ཡང་གཅིག་ལ་གཅིག་དེ་ཙམ་གྱི་དགའ་བ་དང་། ཡིད་བདེ་བ་ཐོབ་པར་གྱུར་ཅིག །སེམས་ཅན་རྣམས་རེ་རེ་ལ་ཡང་དེ་ཙམ་གྱི་སངས་རྒྱས་ཀྱི་ཞིང་གི་ཡོན་ཏན་གྱི་ཚོགས་ལས་སངས་རྒྱས་ཀྱི་ཞིང་ཕུན་སུམ་ཚོགས་པར་གྱུར་ཅིག །སེམས་ཅན་རེ་རེ་ལ་ཡང་སྲིད་པར་སྐྱེ་བ་མ་ལུས་པར་སྤངས་པར་གྱུར་ཅིག །སེམས་ཅན་ཐམས་ཅད་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་གྱུར་ཅིག །དེ་ཙམ་གྱི་བདག་གི་ལས་ཀྱི་སྟོབས་ཟད་པར་གྱུར་ཅིག །དེ་ཙམ་གྱི་ཉོན་མོངས་པའི་དྲི་མ་བྱང་བར་གྱུར་ཅིག །བདག་གིས་དེ་ཙམ་གྱི་ཆུ་བོའི་སྟོབས་ཉམས་པར་གྱུར་ཅིག །བདག་གིས་དེ་ཙམ་གྱི་ཡེ་ཤེས་ཀྱི་སྟོབས་ཉམས་པ་མེད་པར་གྱུར་ཅིག །བདག་གིས་དེ་ཙམ་གྱི་བསོད་ནམས་དང་བསོད་ནམས་ཀྱི་མཛོད་དུ་གྱུར་ཅིག །བདག་གིས་དེ་ཙམ་གྱི་འཁོར་བ་བརྒྱ་སྟོང་གྲངས་མེད་པའི་ཕྱི་ཕྱོགས་སུ་གྱུར་ཅིག །དེ་ཙམ་གྱི་རྫུ་འཕྲུལ་གྱི་ཡུལ་ལ་ཏིང་ངེ་འཛིན་གྱི་སྒོ་སྒྲུབ་པ་རྣམ་པར་ཕྱེ་བར་གྱུར་ཅིག །ཡུད་ཙམ་གྱིས་ན་དེ་ཙམ་གྱི་ཕྱོགས་བཅུའི་སངས་རྒྱས་བཅོམ་ལྡན་འདས་བཞུགས་ཤིང་འཚོ་སྐྱོང་བ་ལ་བསྙེན་བཀུར་བར་བྱའོ། །སངས་རྒྱས་རེ་རེ་ལས་ཀྱང་དེ་ཙམ་གྱི་ཆོས་ཀྱི་སྒོ་སྟོང་ལ་འཇུག་པར་བྱའོ། །སེམས་ཅན་
རེ་རེ་ལའང་སེམས་ཅན་ཐམས་ཅད་ཀྱིས་དེ་ཙམ་གྱི་དགེ་བའི་རྩ་བས་བརྒྱན་པར་བྱའོ། །སེམས་ཅན་རྣམས་ཡོངས་སུ་སྨིན་པར་བྱ་བའི་ཕྱིར་བདག་ཀྱང་ལུས་དང་ངག་དང་ཡིད་དེ་ཙམ་གྱི་སྙན་པ་དང་། དགའ་བར་བྱ་བའི་དགེ་བའི་རྩ་བས་བརྒྱན་པར་གྱུར་ཅིག །སེམས་ཅན་དེ་དང་བདག་ལྷན་ཅིག་ཏུ་བྱང་ཆུབ་ཀྱི་སྤྱད་པ་སྤྱོད་པ་ན། བདག་གིས་བརྗོད་པ་ཙམ་གྱིས་ཀྱང་སེམས་ཅན་དེ་དག་གི་དེ་ཙམ་གྱི་སྲིད་པ་སྐྱེ་བ་མ་ལུས་པར་ཟད་པར་བྱའོ། །དེ་ཙམ་གྱི་ལྟ་བ་ལོག་པའི་རྙོག་པ་འདི་རབ་ཏུ་ཞི་བར་བྱའོ། །དེ་ཙམ་གྱི་ཉོན་མོངས་པའི་ནད་འདི་རབ་ཏུ་ཞི་བར་བྱའོ། །དེ་ཙམ་གྱི་སེམས་ཅན་ལུས་དང་། བསམ་གཏན་དང་། དབང་པོ་མ་ཚང་བ་ཚིག་གིས་སྙིང་རིང་བ་རབ་ཏུ་ཞི་བར་བྱ་བ་གཅིག་བརྗོད་པ་ཙམ་གྱིས་ན། སེམས་ཅན་ཐམས་ཅད་ལས་སེམས་ཅན་རེ་རེ་ཞིང་། དེ་ཙམ་གྱི་སྦྱིན་པ་དགེ་བའི་རྩ་བ་ལ་དགོད་པར་བྱ་བ་ནས་ཤེས་རབ་ཀྱི་བར་དུ་དགེ་བའི་རྩ་བ་ལ་དགོད་པར་བྱའོ། །བདག་དང་སེམས་ཅན་ཐམས་ཅད་ཀྱི་བ་སྤུའི་ཁུང་བུ་ཇི་ཙམ་དུ་གྱུར་པ་བདག་གིས་གཅིག་བརྗོད་པས་དེ་ཙམ་གྱི་སེམས་ཅན་ཐམས་ཅད་ལས་སེམས་ཅན་རེ་རེ་ཞིང་སྦྱིན་པའི་དགེ་བའི་རྩ་བ་ལ་དགོད་པར་བྱ་བ་འདི་ནི་བཙུན་པ་བཅོམ་ལྡན་འདས་བདག་གི་སྨོན་ལམ་དུ་གྱུར་ཏོ། །གང་གི་ཚེ་བདག་ཟས་དང་། སྐོམ་གྱིས་སངས་རྒྱས་སམ། ཆོས་སྨྲ་བའམ། དགེ་སློང་གི་དགེ་འདུན་ནམ། དགེ་སློང་གཅིག་གམ། དགེ་སློང་མ་གཅིག་གམ། དགེ་བསྙེན་ཕའམ། དགེ་བསྙེན་མའམ། ཕའམ། མའམ། ཕྱི་རོལ་གྱི་དྲང་སྲོང་ངམ། ལ་ལ་རིགས་ཀུན་ནས་བསྙེན་བཀུར་བའི་མིར་གྱུར་པ་ལ་སྟོབས་ཤིང་། ཆུང་ངུ་ན་བྱོལ་སོང་གི་སྐྱེ་གནས་སུ་སོང་བ་ལ་ཡང་ཟས་དང་སྐོམ་བྲིམ་པར་བྱ་བ་དེ་བཞིན་དུ་ཡང་སྨོན་ལམ་བཏབ་པ་ནས་སེམས་ཅན་འདུལ་བ་ཡོངས་སུ་སྨིན་པར་བྱ་བའི་བར་གྱི་ཕྱིར་བདག་ཡུན་རིང་པོར་འཁོར་བ་ན་འཁོར་བར་བྱའོ། །གང་ཆུང་ངུ་ན་སྐྲའི་ཉག་མ་གཅིག་ཙམ་གྱི་ཟས་དང་སྐོམ་ཡང་ཡོངས་སུ་ལེན་ཏོ། །སེམས་ཅན་བརྒྱ་སྟོང་ནས་ཆུ་བོ་གང་གཱའི་བྱེ་མ་ཙམ་པོ་ཟས་དང་སྐོམ་འདོད་པ་ཡང་དག་པར་ལྷགས་པ་བདག་གི་གན་དུ་ཉེ་བར་འོངས་པ་ཇི་ཙམ་པ་དང་། ཁ་དོག་གིས་འདོད་པ་ཇི་ཙམ་པ་དེ་ཙམ་པ་དང་། རོ་ཇི་
ཙམ་གྱིས་དོན་ཇི་ལྟར་འདོད་པ་དེ་ཙམ་གྱི་ཕུན་སུམ་ཚོགས་པར་འདོད་དོ། །གལ་ཏེ་ཁ་དོག་དམར་པོ་གཅིག་དང་། སྐྱ་བོ་གཉིས་འདོད་པ་ནས་ཁ་དོག་སྟོང་ཕྲག་བརྒྱད་ཅུ་གཅིག་ལ་གཅིག་འདོད་པ་དེ་ཙམ་གྱི་ཕུན་སུམ་ཚོགས་པར་འགྱུར་ཞིང་། གཅིག་ལ་གཅིག་ཉམས་པ་མེད་པར་འགྱུར་རོ། །བདག་ནི་སེམས་ཅན་དེ་དག་ཇི་ཙམ་པ་དེ་ཙམ་གྱི་ཟས་དང་སྐོམ་ཟད་པ་མེད་པ་ཇི་ཙམ་འདོད་པ་བྲིམ་པར་བྱའོ། །གང་བདག་གི་ལག་ནས་ཟས་དང་སྐོམ་བླངས་པ་དེ་དག་ཐམས་ཅད་ཀྱི་ལུས་ཀྱི་ནད་རབ་ཏུ་ཞི་བར་འགྱུར་རོ། །གང་ཡང་ཟས་དང་སྐོམ་དེ་ཡོངས་སུ་ཟོས་པ་དེ་ཐམས་ཅད་ཀྱི་ཡིད་ཀྱི་ནད་རབ་ཏུ་ཞི་བར་འགྱུར་རོ། །སྡིག་པའི་ལྟ་བ་ཐམས་ཅད་རབ་ཏུ་ཞི་བར་འགྱུར་རོ། །འགྲོ་བ་ཐམས་ཅད་ལ་སེམས་ཅན་གྱི་མངལ་གྱི་གནས་རྒྱུན་གཅོད་པར་བྱ་བ་ནས། གང་བདག་གི་ཟས་དང་སྐོམ་ཟོས་ཤིང་། དེ་བཞིན་དུ་གོས་དང་། མལ་སྟན་དང་། མེ་ཏོག་དང་། ཕྲེང་བ་དང་། བྱུག་པ་དང་། སྨན་དང་། གནས་དང་། ནད་གཡོག་དང་། ཆུང་ངུ་ན་སྐྲའི་རྩེ་མོའི་ཆ་ཙམ་གྱི་བར་དུ་བདག་གིས་གཞན་ལ་བྱིན་པ་གང་གིས་བླངས་པ་དེའི་མངལ་གྱི་གནས་ཇི་ཙམ་པ་ཐམས་ཅད་ལས་བླ་ན་མེད་པར་ཡོངས་སུ་མྱ་ངན་ལས་འདའ་བའི་བར་དུ་ཡོངས་སུ་ཐར་བར་འགྱུར་ཞིང་བདག་གིས་འདུལ་བ་ཐམས་ཅད་ཡོངས་སུ་མྱ་ངན་ལས་འདའ་བར་གྱུར་ཅིག་པ་འདི་ནི་བཙུན་པ་བཅོམ་ལྡན་འདས་བདག་གི་སྨོན་ལམ་དུ་གྱུར་ཏོ། །གང་གི་ཚེ་ཡང་ཉོན་མོངས་པ་དང་རྙོག་པ་ལྔའི་སངས་རྒྱས་ཀྱི་ཞིང་དུ་བདག་འཁོར་བ་ན་བྱང་ཆུབ་ཀྱི་སྤྱད་པ་སྤྱོད་པར་བྱ་ཞིང་སེམས་ཅན་རྣམས་དམའ་བར་སྤྱོད་པ་ལས་ཡོངས་སུ་ཐར་བར་བྱ་བ་དེའི་ཚེ་ཉོན་མོངས་པ་དང་། རྙོག་པ་ལྔའི་སངས་རྒྱས་ཀྱི་ཞིང་སོ་སོར་བདག་སྤྱོད་པ་དང་། དཀའ་ཐུབ་དང་། བརྟུལ་ཞུགས་ཡང་དག་པར་སྤྱོད་པ་བསླབ་པར་བྱའོ། །གང་གི་ཚེ་དགའ་ལྡན་གྱི་ཁང་པ་ན་བདག་སྐྱེ་བ་གཅིག་གིས་ཐོགས་ནས་མི་བཟད་པའི་སྤྱོད་ལམ་དང་། མི་བཟད་པའི་བརྟུལ་ཞུགས་དང་། མི་བཟད་པའི་དཀའ་བ་ཡང་དག་པར་སྤྱོད་པས་བརྩོན་འགྲུས་བརྟན་པ་ལ་ཡི་དམ་དུ་སྤྱད་པར་བྱའོ། །ཇི་ལྟར་སངས་རྒྱས་ཀྱི་ཞིང་དེ་ནས་སའི་རོ་ཐིགས་པའི་བག་ཆགས་
ཞེས་བྱ་བ་ས་ལ་བུ་ག་ཙམ་ཡང་བྲལ་བ་མེད་པར་འབྱུང་བས་སངས་རྒྱས་ཀྱི་ཞིང་དེ་ན་གང་སེམས་ཅན་ཤ་ཟ་བ་དེ་རྨའི་མཚན་མས་ས་རྐོའོ། །ཤ་ཡོངས་སུ་སྤངས་པས་སའི་རོ་ཐིགས་པའི་བག་ཆགས་དེ་ཟོས་ནས་ཤིན་ཏུ་ཞིམ་ཞིང་དྲི་ཤིན་ཏུ་ཞིམ་པ་སྟོང་དུ་འགྱུར་བ། གང་གི་ཕྱིར་འདོད་པ་དང་། གང་ལ་འདོད་པ་དང་། ཇི་ཙམ་གྱི་ཕྱིར་འདོད་པ་དེ་ལྟར་ཐོབ་པར་འགྱུར་རོ། །གང་ཡང་སའི་རོ་ཐིགས་པའི་བག་ཆགས་དེ་ཡོངས་སུ་ཟོས་ཤིང་གང་ཆུང་ངུ་ན་བྱ་དང་རི་དགས་ཀྱིས་ཀྱང་ཟོས་པས་དེ་དག་ཐམས་ཅད་ཀྱི་ལུས་ཀྱི་གནས་ངན་ལེན་དང་། ངག་གི་གནས་ངན་ལེན་དང་། ཡིད་ཀྱི་གནས་ངན་ལེན་དང་། ཉོན་མོངས་པའི་བག་ཆགས་ཀྱི་རྗེས་ཀྱི་མཚམས་ཀྱང་ཐམས་ཅད་ཀྱིས་ཐམས་ཅད་ཀྱི་རྒྱུན་བཅད་པར་འགྱུར་རོ། །སངས་རྒྱས་ཀྱི་ཞིང་ཐམས་ཅད་ན་ལ་ལ་ཤ་ཡོངས་སུ་མི་ཟ་ཞིང་ཆུང་ངུ་ན་བྱ་དང་རི་དགས་ཀྱིས་ཀྱང་ཁྲག་མི་འཐུང་བར་འགྱུར་བ་དེ་དག་གི་ཤིང་རོ་ཧི་ནི་རྣམ་པར་རྒྱལ་བ་ཞེས་བྱ་བ་བྱུང་བར་གྱུར་ཏོ། །གང་དེའི་ལོ་མ་དང་། ལྕུག་མ་དང་། ཡལ་ག་བཅད་པ་དེ་ལས་ཁྲག་ཁ་དོག་དང་ལྡན་པ། དྲི་དང་ལྡན་པ། རོ་དང་ལྡན་པ་འབྱུང་བར་འགྱུར་བ་ལ་ཆུང་ངུ་ན་བྱ་དང་རི་དགས་ཀྱིས་ཀྱང་ཁྲག་འཐུངས་པས་དེ་དག་གི་ལུས་ཀྱི་གནས་ངན་ལེན་དང་། ངག་གི་གནས་ངན་ལེན་དང་། ཡིད་ཀྱི་གནས་ངན་ལེན་དང་། ཉོན་མོངས་པའི་བག་ཆགས་ཀྱི་མཚམས་ཐམས་ཅད་ཐམས་ཅད་ཀྱིས་ཐམས་ཅད་ཀྱི་རྒྱུན་བཅད་པར་འགྱུར་གྱི། ཇི་ལྟར་སངས་རྒྱས་ཀྱི་ཞིང་དེ་ཐམས་ཅད་ན་ལ་ལ་ཁྲག་མི་འཐུང་ན་ནི་ཆུང་ངུ་ན་བྱ་དང་རི་དགས་ཀྱིས་ཀྱང་འཐུང་བར་མི་འགྱུར་རོ། །གང་ཡང་སངས་རྒྱས་ཀྱི་ཞིང་འདིར་འོ་མ་འཐུང་བར་འདོད་པ་དེ་དག་གི་ཕྱིར་སངས་རྒྱས་ཀྱི་ཞིང་དེ་ན་ཤིང་རྡུལ་དང་བྲལ་བ་དེ་སྐྱེ་བར་འགྱུར་རོ། །སངས་རྒྱས་ཀྱི་ཞིང་གང་ན་འོ་མ་འཐུང་བར་འདོད་པ་དེ་ཤིང་དེའི་ལོ་མའམ། ལྕུག་མའམ། ཡལ་ག་བཅད་པ་དེ་ལས་འོ་མ་མཆོག་ཏུ་གསལ་བ། ཁ་དོག་དང་ལྡན་པ། དྲི་དང་ལྡན་པ། རོ་དང་ལྡན་པར་འབྱུང་བར་འགྱུར་བ་དེ་ལ་གང་བྱ་དང་རི་དགས་ཀྱི་བར་དུ་ཡོངས་སུ་འཐུངས་པས་དེའི་ལུས་ཀྱི་གནས་ངན་ལེན་དང་། ངག་གི་གནས་ངན་ལེན་དང་། ཡིད་ཀྱི་གནས་ངན་ལེན་དང་། ཉོན་མོངས་པའི་བག་ཆགས་
ཀྱི་མཚམས་ཐམས་ཅད་ཐམས་ཅད་ཀྱིས་ཐམས་ཅད་ཀྱི་རྒྱུན་བཅད་པར་འགྱུར་གྱི། ཇི་ལྟར་སངས་རྒྱས་ཀྱི་ཞིང་དེ་ཐམས་ཅད་ལ་ལ་ཤིང་གི་འོ་མ་དེ་མ་གཏོགས་པར་འོ་མ་གཞན་ནི་ཡོངས་སུ་མི་མཐོང་ངོ་། །སངས་རྒྱས་ཀྱི་ཞིང་དེ་ན་ཆུའི་རྫིང་དུ་སེམས་ཅན་སྐྱེའི་མངལ་གྱི་གནས་ནི་མ་ཡིན་ནོ། །སངས་རྒྱས་ཀྱི་ཞིང་དེར་སེམས་ཅན་དམྱལ་བ་ཐམས་ཅད་དང་། གཤིན་རྗེའི་འཇིག་རྟེན་རྒྱུན་ཆད་པར་གྱུར་པ་དེ་ཙམ་ན་དགའ་ལྡན་ན་མི་བཟད་པའི་བརྟུལ་ཞུགས་དང་། ཡང་དག་པར་སྤྱོད་པའི་ཡི་དམ་གྱིས་ཡང་དག་པར་སྤྱད་པར་བྱའོ། །སངས་རྒྱས་ཀྱི་ཞིང་དེ་ན་ཇི་ལྟར་བུད་མེད་ཡོངས་སུ་དག་པའི་སེམས་ཀྱི་མཐའ་དང་ལྡན་པ་ཐོབ་པར་བྱ་བའི་ཕྱིར་བུད་མེད་ཀྱི་ཕྲག་དོག་དང་། འཇུངས་པའི་གནས་སུ་གྱུར་པ་དང་། སླུ་བའི་ལས་ཀྱི་གནས་ཡོངས་སུ་ཟད་པར་འགྱུར་རོ། །སངས་རྒྱས་ཀྱི་ཞིང་དེ་ན་བུད་མེད་ཀྱི་ལུས་ཐོབ་པར་འགྱུར་བ་དེ་ལ་སེམས་ཅན་འཁྲིག་པའི་ཆོས་བྲལ་བར་གྱུར་ཅིང་། ཐབ་མོ་དང་། འཁྲུག་པ་དང་། བརྫུན་དུ་སྨྲ་བ་དང་། བརྫུན་དང་། ཕྲ་མ་དང་། ཞེ་གཅོད་པ་དང་། ཚིག་ཀྱལ་པ་དང་། གནོད་སེམས་དང་། ཆགས་སེམས་དང་། ལོག་པར་ལྟ་བ་དང་། མུ་གེ་དང་། ཆར་མི་འབབ་པ་དང་། རྐུན་པོ་དང་། ལྕགས་སྒྲོག་དང་། ཤིང་སྒྲོག་དང་། རྐང་སྒྲིལ་དང་། མ་རུངས་པར་ཚོལ་བ་དང་། རྟག་ཏུ་གཞན་ལ་གནོད་པར་བྱེད་པ་དང་བྲལ་བ་སངས་རྒྱས་ཀྱི་ཞིང་དེར་རབ་ཏུ་ཞི་བར་འགྱུར་རོ། །གང་གི་ཚེ་བདག་དགའ་ལྡན་གྱི་ཁང་པར་འཇུག་པར་བྱ་ཞིང་དེ་ན་ཟླ་བ་བཅུ་མའི་མངལ་ན་གནས་པའི་ཚེ། སངས་རྒྱས་ཀྱི་ཞིང་ཐམས་ཅད་དུ་མངོན་པར་ཤེས་པ་རྣམ་པར་རྩེ་བར་འགྱུར་ཞིང་ཐམས་ཅད་ཀྱང་སྔོན་བྱས་པའི་དགེ་བའི་རྩ་བ་རྗེས་སུ་དྲན་པར་འགྱུར་རོ། །ནམ་བདག་ཟླ་བ་བཅུ་འདས་ནས་མའི་མངལ་ནས་བྱུང་བ་དེ་ན་བྱང་ཆུབ་ལ་ཞག་བདུན་པ་བདུན་གྱི་བར་དུ་སྤྱོད་པར་བྱའི་སངས་རྒྱས་ཀྱི་ཞིང་དེ་ན་དེ་ལྟར་སེམས་ཅན་ཐམས་ཅད་ཡོངས་སུ་སྨིན་པར་བྱའོ། །ཇི་ལྟར་བྱ་དང་རི་དགས་ཀྱི་བར་དུ་ཡང་རྒ་ཤི་ཐམས་ཅད་ལ་སྐྱོ་བས་མི་བཟད་པའི་བརྟུལ་ཞུགས་དང་། ཡོན་ཏན་ཡང་དག་པར་སྤྱོད་ཅིང་དཀའ་ཐུབ་ཀྱི་ནགས་ཚལ་དུ་མངོན་པར་ཆགས་པའི་སེམས་སུ་འགྱུར་རོ། །གང་གི་ཚེ་བདག་ཞག་བདུན་པ་བདུན་
ལས་འདས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་བྱ་བ་ཞག་དེ་ཉིད་ལ་ཆོས་ཀྱི་འཁོར་ལོ་བསྐོར་བར་བྱའོ། །ཆོས་ཀྱི་འཁོར་ལོ་བསྐོར་བ་དེ་ལ་སེམས་ཅན་བྱེ་བ་ཁྲག་ཁྲིག་བརྒྱ་སྟོང་གྲངས་མེད་མཐའ་ཡས་མུ་མེད་པ་ཐེག་པ་གསུམ་གྱིས་ཡོངས་སུ་སྨིན་པར་བྱའོ། །སངས་རྒྱས་ཀྱི་ཞིང་ཐམས་ཅད་ན་ལྷ་ཐམས་ཅད་ལ་ཆོས་ཀྱི་འཁོར་ལོ་བསྐོར་བ་བསྟན་པར་བྱའོ། །གླིང་ཐམས་ཅད་ན་སེམས་ཅན་རྣམས་བཟོད་པ་དང་། ཏིང་ངེ་འཛིན་དང་། གཟུངས་ཀྱིས་བརྒྱན་པར་བྱ་བ་ནས་གླིང་ཐམས་ཅད་དུ་ཞག་བདུན་པ་བདུན་གྱི་བར་དུ་སེམས་ཅན་རྣམས་ལ་ཆོས་བསྟན་པར་བྱའོ། །གང་གི་ཚེ་སངས་རྒྱས་ཀྱི་ཞིང་དེ་ན་སེམས་ཅན་བྱོལ་སོང་གི་སྐྱེ་གནས་ཅན་ཐམས་ཅད་བྱོལ་སོང་གི་སྐྱེ་གནས་ལས་ཡོངས་སུ་ཐར་བར་འགྱུར་ཞིང་མིའི་འཇིག་རྟེན་ཐོབ་པར་འགྱུར་རོ། །སངས་རྒྱས་ཀྱི་ཞིང་དེ་ན་དེ་དག་ལ་བདག་ཉི་མ་བདུན་པ་བདུན་དུ་ཏིང་ངེ་འཛིན་དང་གཟུངས་དང་། བཟོད་པ་བསྟེན་པར་བྱ་བས་ཐམས་ཅད་བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་པར་མི་འགྱུར་ཞིང་ཐམས་ཅད་དེ་ལས་ཤི་འཕོས་ནས་སངས་རྒྱས་ཀྱི་ཞིང་དེར་སྐྱེ་བར་འགྱུར་རོ། །ཆུང་ངུ་ན་སེམས་ཅན་གཅིག་ཀྱང་དེ་ན་ངན་སོང་གསུམ་ལས་ཤི་འཕོས་ནས་སངས་རྒྱས་ཀྱི་ཞིང་དེར་སྐྱེ་བར་འགྱུར་རོ། །ཆུང་ངུ་ན་སེམས་ཅན་གཅིག་ཀྱང་གང་ཡོན་ཏན་འདི་དག་གིས་ཡང་དག་པར་བརྒྱན་པར་བྱས་པ་མེད་པར་སངས་རྒྱས་ཀྱི་ཞིང་དེར་གཏོང་བར་མི་བྱ་སྟེ། །ཞག་བདུན་པ་བདུན་པ་དེ་ལས་འདས་པས་མྱ་ངན་ལས་འདས་པའི་ཁམས་སུ་ཕུང་པོའི་ལྷག་མ་མ་ལུས་པར་མྱ་ངན་ལས་འདའ་བར་བྱ་བར་ཚངས་པའི་དབང་པོ་དེའི་སྤྱན་སྔར་བདག་གིས་སྨོན་ལམ་དེ་བཞིན་དུ་བཏབ་པར་གྱུར་ཏོ། །བཙུན་པ་བཅོམ་ལྡན་འདས་གལ་ཏེ་བདག་ནི་རྣམ་པ་དེ་ལྟ་བུའི་སྨོན་ལམ་གྲུབ་པས་མ་འོངས་པའི་དུས་ན་རྣམ་པ་དེ་ལྟ་བུའི་རྩལ་ཆེན་པོ་བྱ་བར་ཡང་ནུས་པར་འགྱུར་རོ། །བཙུན་པ་བཅོམ་ལྡན་འདས་བདག་སྔོན་ལྟ་བ་ཅན་དེ་དག་གི་རྒྱུན་བཅད་དེ། །དེ་ལྟར་འཁོར་ཐམས་ཅད་དང་ལྡན་པ་ཇི་ལྟར་མངོན་དུ་གྱུར་པར་འགྱུར་བ་ལ། དེ་ལྟར་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་བགྱིའོ། །དེ་བཞིན་གཤེགས་པ་ཚངས་པའི་དབང་པོ་
དེས་ཡང་བདག་ལ་བཀའ་སྩལ་པ། ཤིན་ཏུ་ཟབ་མོ། ཤིན་ཏུ་ངོ་མཚར་བ། ཤིན་ཏུ་རྒྱ་ཆེ་བའི་སྨོན་ལམ་བཏབ་པ་ནི་ནམ་མཁའ་ལ་འབྲུག་ཟེར་བས་ཆུས་སེམས་ཅན་རྣམས་ཚིམ་པར་བྱེད། ཆུའི་རྫིང་དང་། ལྟེང་ཀའི་སྒོར་ཡོངས་སུ་རྫོགས་པར་བྱེད། ཤིན་ཏུ་དྲོ་བས་གདུངས་པའི་སེམས་ཅན་རྣམས་དང་། སྨན་དང་། ལོ་མ་དང་། ནགས་ཚལ་དང་། ཤིང་གེལ་པ་རྣམས་ཚིམ་པར་བྱེད་དོ། །རིགས་ཀྱི་བུ་ནམ་མཁའ་ལ་འབྲུག་བསྒྲགས་པ་དེ་བཞིན་དུ་ཤིན་ཏུ་ཟབ་མོའི་སྨོན་ལམ་འདིས་འཁོར་ཐམས་ཅད་དང་ལྡན་པ་འདི་དག་ལ་གཞོག་པར་བྱེད་དོ། །རིགས་ཀྱི་བུ་མི་བཟད་པར་བརྩོན་པའི་སྨོན་ལམ་གྱིས་རྣམ་པ་དེ་ལྟ་བུའི་སྨོན་ལམ་འགྲུབ་པར་འགྱུར་རོ། །མ་འོངས་པའི་དུས་ན་ཁྱོད་སངས་རྒྱས་ཀྱི་ཞིང་ཀུན་ནས་གཟི་བརྗིད་དུ་བསྐལ་པའི་འོད་ཆེན་པོར་འགྱུར་རོ། །དེ་ན་ཡང་རིགས་ཀྱི་བུ་ཁྱོད་འཇིག་རྟེན་དུ་སངས་རྒྱས་སུ་སྐྱེ་ཞིང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་པ་དང་ཞབས་སུ་ལྡན་པ། བླ་ན་མེད་པ་སྐྱེས་བུ་འདུལ་ཞིང་ཁ་ལོ་སྒྱུར་བ། ལྷ་དང་མིའི་སྟོན་པ་སངས་རྒྱས་བཅོམ་ལྡན་འདས་དེ་བཞིན་གཤེགས་པ་དབྱངས་མ་ལུས་པའི་གནས་དབང་ཕྱུག་གི་རྒྱལ་པོ་ཞེས་བྱ་བར་འགྱུར་རོ། །དེ་བཞིན་གཤེགས་པ་ཚངས་པའི་དབང་པོ་དེ་ལ་ཡན་ལག་ལྔས་ཞབས་གཉིས་ལ་སྤྱི་བོས་ཕྱག་འཚལ་མ་ཐག་ཏུ་བདག་གི་སྤྱི་བོ་ས་ལ་རེག་པ་ཙམ་གྱིས་ན། དེ་ན་དེ་ཉིད་ཀྱི་ཚེ་ན་སངས་རྒྱས་ཀྱི་ཞིང་སྟོང་ཕྲག་བཅུའི་ས་ཆུ་ཟླ་བཞིན་དུ་རབ་ཏུ་གཡོས་སོ། །ལྷ་དང་། དྲི་ཟ་དང་། ལྷ་མ་ཡིན་དང་། མིའི་འཁོར་ཐམས་ཅད་དང་ལྡན་པ་འདིས་ལེགས་སོ་ཞེས་བྱ་བ་བྱིན་ཏེ། འདི་སྐད་ཅེས་སྨྲས་སོ། །སྐྱེས་བུ་དམ་པ་ཆོས་ཆེན་པོ། སྙིང་རྗེ་ཆེན་པོ་ཅན། བརྩོན་འགྲུས་བརྟན་པ་དང་། བརྩོན་པ་དང་མཐུ་ཆེན་པོ་ཤིན་ཏུ་དཀའ་བའི་སྨོན་ལམ་བཏབ་པ་ལེགས་སོ་ལེགས་སོ། །བཙུན་པ་བཅོམ་ལྡན་འདས་ཁྱོད་དེ་ན་ཡོ་བྱད་ཐམས་ཅད་ཀྱིས་དེ་བཞིན་གཤེགས་པ་ཚངས་པའི་དབང་པོ་ཉན་ཐོས་ཀྱི་འཁོར་དང་བཅས་པ་ལ་ཟླ་བ་གསུམ་དུ་བསྙེན་བཀུར་བྱས་པ་དེ་ལྟར་བདག་ཉི་མ་རེ་རེ་ཞིང་ཡང་བཅོམ་ལྡན་འདས་དེ་ལ་མེ་ཏོག་དང་། དྲི་དང་། ཕྲེང་བ་དང་།
སྤོས་སྣ་ཚོགས་ཀྱིས་མཆོད་པས་མཆོད་པའི་གནས་སུ་བྱས་པར་གྱུར་ཏོ། །བཙུན་པ་བཅོམ་ལྡན་འདས་ཇི་ལྟར་ཁྱོད་ཟླ་བ་གསུམ་པ་དེ་དག་ལས་ཤིན་ཏུ་འདས་ནས་རྒྱལ་པོའི་ལོངས་སྤྱོད་དང་། ཀུན་ཏུ་སྤྱོད་པ་ཐམས་ཅད་སྤངས་ཏེ། དེ་བཞིན་གཤེགས་པ་ཚངས་པའི་དབང་པོ་དེའི་སྤྱན་སྔར་སྲོག་ཆགས་སྟོང་ཕྲག་བཅུ་དང་ཐབས་ཅིག་ཏུ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་གྱོན་ནས། ཡང་དག་པར་དད་པས་རབ་ཏུ་བྱུང་བ་དེ་བཞིན་དུ་བདག་ཀྱང་རབ་ཏུ་བྱུང་བ་ནས་བཅོམ་ལྡན་འདས་དེ་བཞིན་གཤེགས་པ་ཡུལ་གཞན་དུ་རྒྱུ་ཞིང་གཤེགས་པའི་བར་དུ་དེ་ནས་བདག་ཀྱང་གྲོང་རྡལ་གཞན་དུ་བསོད་སྙོམས་ཀྱི་ཕྱིར་ཕྱིན་ཏེ། གྲོང་རྡལ་དེར་མཆོད་སྦྱིན་ཆེན་པོ་སོ་སོར་གནས་པར་གྱུར་ཏོ། །དེ་ལ་ཡང་སྲོག་ཆགས་མང་པོ་གསད་པར་བྱ་བར་འདོད་པ་དེ་ལ་གལ་ཏེ་བདག་སེམས་ཅན་འདི་དག་གསོད་པ་ལས་ཡོངས་སུ་མ་ཐར་ན། བདག་ཉིད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་མི་བྱ་ཞིང་རྒ་ཤིའི་ཆུ་བོ་ལས་སེམས་ཅན་ཡོངས་སུ་སྨིན་པར་མི་ནུས་སོ་ཞེས་སྙིང་རྗེ་ཆེན་པོ་སྐྱེས་ཏེ། དེར་ཉེ་བར་ཕྱིན་ནས་དྲིས་པ། ཀྱེ་གང་གི་ཕྱིར་མཆོད་སྦྱིན་འདི་བྱ། དེ་དག་གིས་སྨྲས་པ། ཡུལ་འདིར་ཆར་མི་འབབ་པར་འགྱུར་ཞིང་། མུ་གེ་ཡང་འབྱུང་བ་དང་། འདིར་སེམས་ཅན་མང་པོ་ནད་ཀྱིས་གོས་པ་དང་། ལོང་བ་དང་། ཞར་བར་འགྱུར་བ་དང་། ནང་འཁྲུག་འབྱུང་བ་དང་། རྒྱལ་པོའི་ཞམ་རིང་བ་དང་། བློན་པོ་དང་། གྲོང་དང་། ལྗོངས་དང་། མིའི་མཆོག་གཅིག་ལ་གཅིག་འཁྲུག་པ་རྣམ་པ་དེ་ལྟ་བུའི་ལྟས་ངན་པ་དེ་དག་མེད་པར་བྱ་བ་དང་། ནད་རབ་ཏུ་ཞི་བར་བྱ་བ་དང་། ཀུན་འདུས་པར་བྱ་བའི་ཕྱིར་མཆོད་སྦྱིན་འདི་བྱའོ། །དེ་ནས་དེ་དག་ལ་བདག་གིས་འདི་སྐད་ཅེས་སྨྲས་སོ། །བཞིན་བཟངས་སེམས་ཅན་འདི་དག་གསོད་པ་ལས་ཡོངས་སུ་ཐར་བར་ནུས་ཀྱིས་མཆོད་སྦྱིན་གྱི་ར་བ་འདིར་མ་གསོད་ཅིག །བདག་གིས་ཁྱོད་ལ་མུ་གེ་དང་། ཆར་མི་འབབ་པ་དང་། ནད་དང་། ནང་གི་འཁྲུག་པ་ཐམས་ཅད་ཡོངས་སུ་ཞི་བར་བྱའོ། །དེ་དག་གིས་སྨྲས་པ། དགེ་སྦྱོང་མགོ་རེག་ནུས་སམ་ཞེས་པ་དང་། བདག་གིས་སེམས་ཅན་དེ་དག་ལ་མཆོད་སྦྱིན་གྱི་ར་བ་མི་སྣང་བར་བྱས་
སོ། །དེ་ལ་ཡང་བདག་གིས་སྨོན་ལམ་འདི་ལྟ་བུ་བཏབ་སྟེ། བཅོམ་ལྡན་འདས་མད་པར་གསུངས་པས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་ལུང་བསྟན་པ་དེ་ལྟ་བུའི་སྨོན་ལམ་ཡོངས་སུ་རྫོགས་པར་གྱུར་ཅིག །གལ་ཏེ་མཆོད་སྦྱིན་འདིའི་ཕྱིར་སྨོན་ལམ་ཡོངས་སུ་དག་པས་བདག་བསད་དེ། བདག་གིས་ལུས་ཐམས་ཅད་ཀྱི་བ་སྤུའི་ཁུང་བུ་ཇི་ཙམ་པ་དེ་ཙམ་གྱི་ལྷ་དང་། ཀླུ་དང་། གནོད་སྦྱིན་ཡུལ་ཡོངས་སུ་སྐྱོང་བ་ལ་ལུས་འདི་དབུལ་བར་བྱ་ཞིང་བདག་གི་ཁྲག་ཤིན་ཏུ་རྒྱ་ཆེ་བ་མདངས་ཅན་བྱུང་བར་གྱུར་ནས་ཡུལ་ཡོངས་སུ་སྐྱོང་བ་དེ་དག་ཀྱང་ཁྲག་འདི་ལ་ཡོངས་སུ་འཐུང་བར་གྱུར་ཅིག །ཡོངས་སུ་འཐུངས་པས་ཡུལ་སྐྱོང་བ་རེ་རེ་ལ་ཡང་ཡུལ་འདིར་དེ་ཙམ་གྱི་ལྟས་ངན་རབ་ཏུ་ཞི་བར་གྱུར་ཅིག །དེ་ཙམ་གྱིས་བདེ་བ་དང་། ལོ་ལེགས་པ་དང་། ནད་མེད་པས་ཐབ་མོ་དང་། བཅིང་བ་དང་། གནོད་པ་དང་། རྩོད་པ་ལ་འཇུག་པའི་གཉེན་པོར་ཕུན་སུམ་ཚོགས་པར་གྱུར་ཅིག །སེམས་ཅན་རེ་རེ་ཞིང་ཡང་འདིར་དེ་ཙམ་གྱི་བདེ་བ་དང་། ཡིད་བདེ་བ་སྐྱེས་པར་གྱུར་ཅིག །སེམས་ཅན་རྣམས་ཀྱི་ཡུལ་འདིར་དེ་ཙམ་གྱི་ལུས་ཀྱི་གནས་ངན་ལེན་དང་། ངག་གི་གནས་ངན་ལེན་དང་། ཡིད་ཀྱི་གནས་ངན་ལེན་མེད་པར་གྱུར་ཅིག །ཡུལ་ཇི་ཙམ་པ་འདིར་སེམས་ཅན་ཐམས་ཅད་དེ་ཙམ་གྱི་མཆོག་ཏུ་བདེ་བས་ཚིམ་པར་གྱུར་ཅིག །གང་གི་ཚེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བ་དེའི་ཚེ་སེམས་ཅན་འདི་ཐམས་ཅད་རྒ་ཤི་ལས་ཡོངས་སུ་ཐར་པར་བྱའོ། །སེམས་ཅན་ཐམས་ཅད་ཀྱི་སྤུའི་ཁུང་བུ་ཇི་ཙམ་པར་གྱུར་པ་དེ་ཙམ་གྱི་བསྐལ་པ་ཆེན་པོའི་གླིང་བཞི་པ་རེ་རེ་ལ་མཆོད་སྦྱིན་གྱི་ར་བར་མཆོད་སྦྱིན་གྱི་ཕྱིར་བདག་བསད་ལ། གང་མི་དག་མཆོད་སྦྱིན་གྱི་ར་བའི་ཕྱིར་གསད་པར་འགྱུར་བ་དང་། གང་བྱོལ་སོང་གི་སྐྱེ་གནས་ཅན་ཐམས་ཅད་ཀྱི་ཕྱིར་བདག་མཆོད་སྦྱིན་གྱི་ར་བ་དེ་དག་ཏུ་གསད་པར་བྱོས་ཤིག །དེ་ནས་ཡུལ་འདིར་བདག་གི་ལུས་མི་སྣང་བར་གྱུར་ཅིག །ཡུལ་དེ་ན་གསོད་པ་དང་། ནད་དང་། མུ་གེ་དང་། ཆར་མི་འབབ་པ་དང་། འཁྲུག་པ་གཉིས་དང་།
ཤིན་ཏུ་གྲང་བ་དང་། ཤིན་ཏུ་དྲོ་བ་དང་། དུག་དང་། བྱད་སྟེམས་དང་། དུས་མ་ཡིན་པའི་རླུང་དང་། དུས་མ་ཡིན་པའི་ཆར་དང་། དུས་མ་ཡིན་པའི་སྦྲང་མ་དང་། ཤ་སྦྲང་དང་། སྦྲུལ་གདུག་པ་དང་། ཕྱེ་མ་ལེབ་གསོད་པ་དང་། སྡོམ་པ་མེད་པའི་ལོངས་སྤྱོད་ཡོངས་སུ་ཚོལ་བ་དང་། ཆོས་མ་ཡིན་པ་ལ་ཆགས་པ་དང་། སླུ་བ་དང་། ཕྲ་མ་དང་། ཞེ་གཅོད་པ་དང་། ཚིག་ཀྱལ་པ་དང་། ཆགས་སེམས་དང་། གནོད་སེམས་དང་། ལོག་པར་ལྟ་བ་ཞེས་བྱ་བ་འདི་དག་གི་དངོས་པོ་རབ་ཏུ་ཞི་བར་གྱུར་ཅིག །དེ་ན་སེམས་ཅན་རྣམས་གཅིག་ལ་གཅིག་དགའ་བའི་སེམས་དང་། འཇམ་པའི་སེམས་དང་། ལས་སུ་རུང་བའི་སེམས་དང་། གཟུང་དུ་མེད་པའི་སེམས་དང་། ས་དང་མཚུངས་པ་བྲལ་བ་མེད་པའི་སེམས་དང་། སྦྱིན་པའི་སེམས་སུ་གྱུར་ཅིག །དེ་ན་སེམས་ཅན་རྣམས་འབྱུང་བའི་སེམས་དང་། ཚུལ་ཁྲིམས་ཀྱི་སེམས་དང་། ཞི་གནས་ཀྱི་སེམས་དང་། བརྩོན་འགྲུས་ཀྱི་སེམས་དང་། བཟོད་པའི་སེམས་དང་། བསམ་གཏན་གྱི་སེམས་དང་། ཤེས་རབ་ཀྱི་བསྒོམ་པ་ཡོངས་སུ་ཚོལ་བའི་སེམས་སུ་གྱུར་ཅིག །གང་ལ་བདག་མཆོད་སྦྱིན་གྱི་ཕྱིར་གསད་པར་བྱ་བ་ནས་ཕྱོགས་བཅུའི་སངས་རྒྱས་ཀྱི་ཞིང་སྟོང་པ་དང་རྙོག་པ་ལྔའི་སངས་རྒྱས་ཀྱི་ཞིང་ཆུ་བོ་གང་གཱའི་བྱེ་མ་སྙེད་དུ་རྩལ་ཆེན་པོ་བྱ་བའི་བར་དུ་བདག་གི་སྔོན་གྱི་ལྟས་དེ་དག་བྱུང་བར་གྱུར་ཅིག །ནམ་མཁའ་ལས་ཆར་འབབ་པར་གྱུར་ཅིག་ཅེས་བདག་གིས་ཚིག་དེ་བརྗོད་མ་ཐག་ཏུ་དེ་ནས་དེ་ཉིད་ཀྱི་ཚེ་ན་བདག་གི་ལུས་ཐམས་ཅད་ཀྱི་བ་སྤུའི་ཁུང་བུ་ལས་འོ་མ་ཟག་ཅིང་ནམ་མཁའ་ལས་ཆར་ཀྱང་རབ་ཏུ་འབབ་བོ། །དེ་ན་ཡང་མཆོད་སྦྱིན་ཅན་དེས་མི་གསད་པར་བཅོམ་ལྡན་འདས་ལ་འདིར་དཔང་དུ་གསོལ་ཏེ། ཡུལ་དེ་ན་ཐམས་ཅད་ཀྱང་དཔལ་ཕུན་སུམ་ཚོགས་པ་བདེ་བའི་ཡོ་བྱད་དང་འཐུན་པར་གྱུར་ཏོ། །ནད་དང་། ཐབ་མོ་དང་། མུ་གེ་དང་། ཆར་མི་འབབ་པ་མི་སྣང་བར་བྱས་ཏེ། གང་བདག་མིར་གྱུར་པས་ཆུ་བོ་གང་གཱའི་བྱེ་མ་སྙེད་ཀྱི་མཆོད་སྦྱིན་གྱི་ར་བ་ལ་མཆོད་སྦྱིན་བྱས་པ་བཅོམ་ལྡན་འདས་དཔང་དུ་གསོལ་ལོ། །བལ་གླང་གི་གཟུགས་ཀྱིས་ཆུ་བོ་གང་གཱའི་བྱེ་མ་སྙེད་ཀྱི་མཆོད་སྦྱིན་བྱས་པ་ནས་རྟའི་གཟུགས་དང་། གཡག་གི་
གཟུགས་དང་། གླང་གི་གཟུགས་དང་། ཕག་གི་གཟུགས་དང་། སྤྱང་ཀིའི་གཟུགས་དང་། ཕྱུགས་ཀྱི་གཟུགས་དང་། བསེའི་གཟུགས་དང་། མ་ཧེའི་གཟུགས་དང་། ཝའི་གཟུགས་བསྡུས་པས་བདག་བྱོལ་སོང་གི་སྐྱེ་གནས་སྟོང་ཕྲག་བརྒྱད་ཅུ་རྩ་བཞི་ལ་སྐྱེ་གནས་རེ་རེ་ཐོབ་པས་ཆུ་བོ་གང་གཱའི་བྱེ་མ་སྙེད་ཀྱི་འཁོར་ལ་མཆོད་སྦྱིན་བྱས་སོ། །ཕྱོགས་བཅུ་ཀུན་ནས་ཉོན་མོངས་པ་དང་། རྙོག་པ་ལྔའི་སངས་རྒྱས་ཀྱི་ཞིང་ཆུ་བོ་གང་གཱའི་བྱེ་མ་སྙེད་དུ་རྣམ་པ་དེ་ལྟ་བུའི་བདེ་བའི་ཡོ་བྱད་ཐམས་ཅད་ཀྱིས་སེམས་ཅན་རྣམས་བདེ་བས་ཚིམ་པར་བྱས་པ་རྣམ་པ་དེ་ལྟ་བུའི་རྩལ་ཆེན་པོ་བྱས་སོ།། །།བམ་པོ་བཅུ་གཅིག་པ་སྟེ་ཐ་མ། ཡང་བཙུན་པ་བཅོམ་ལྡན་འདས་ངན་པའི་དུས་ཀྱི་ཚེ་ནད་པ་ལ་ལ་ཞིག་གི་དོན་དུ་རའི་གཙང་ཤ་འཚལ་བར་གྱུར་ལ། ཡུལ་དེ་ན་ར་མ་མཆིས་ན་དེ་ལ་བདག་གིས་སྨོན་ལམ་འདི་ལྟ་བུ་བཏབ་སྟེ། གལ་ཏེ་བདག་བླ་ན་མེད་པའི་ཤེས་རབ་ཆེན་པོ་མ་ཐོབ་ཀྱི་བར་དུ་བདག་གི་སྨོན་ལམ་འདི་གྲུབ་པར་གྱུར་ཅིག །བདག་ཤིང་ཆེན་པོ་འདི་ལ་འཛེགས་ཏེ། བདག་མཆོངས་ནས་རྫུས་ཏེ་རར་སྐྱེས་ལ། ལྷས་མི་རྣམས་ལ་བསྒོ་བ་འདི་ནི་ནད་པ་རྣམས་ཀྱི་སྨན་དུ་གྱུར་པ་ཡིན་གྱིས་སེམས་ཅན་དེ་དག་གིས་ཤ་ཟོ་ཤིག་དང། དེ་དག་གི་ནད་དེ་ཞི་བར་འགྱུར་རོ། །སངས་རྒྱས་ཀྱི་ཞིང་གང་དུ་བདག་འཇིག་རྟེན་དུ་སངས་རྒྱས་སུ་གྱུར་པ་དེར་སེམས་ཅན་རྣམས་ཤ་ཟ་བར་མ་གྱུར་ཅིག །དེ་ན་ནད་ཀྱིས་རེག་པ་རྣམས་ལ་སྨན་དུ་མ་གྱུར་པའི་དངོས་པོ་མེད་པར་གྱུར་ཅིག །ཡིད་དུ་མི་འོང་བའི་སྒྲ་མི་གྲག་པར་གྱུར་ཅིག །སངས་རྒྱས་ཀྱི་ཞིང་དེ་ན་སེམས་ཅན་རྣམས་ལོངས་སྤྱོད་དང་ཀུན་ཏུ་སྤྱོད་པས་ཕོངས་པར་འགྱུར་བའི་སྒྲ་མི་གྲག་པར་གྱུར་ཅིག །བདག་ད་ལྟར་རའི་གཟུགས་ཀྱིས་ནད་པ་རྣམས་བསྙེན་བཀུར་བྱེད་པ་དེ་བཞིན་དུ་ཇི་སྲིད་དུ་ཡུན་རིང་པོར་འཁོར་བ་ན་སེམས་ཅན་རྣམས་ནད་ཀྱིས་རེག་པར་གྱུར་པ་ལ་ཤ་དང་། ཁྲག་དང་། འོ་མ་དང་། མར་གྱིས་སེམས་ཅན་རྣམས་ཀྱི་ནད་ཞི་བར་འགྱུར་བ་དེ་སྲིད་ཀྱི་ཡུན་རིང་པོར་སེམས་ཅན་རྣམས་ཀྱི་ནད་ཞི་བར་བགྱི་བའི་སླད་དུ་བྱོལ་སོང་གི་སྐྱེ་གནས་སུ་གྱུར་ཅིག །བདག་ཤིང་དེ་ལས་
འཛེགས་ནས་བདག་མཆོངས་ཏེ། དེ་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་རྣམ་པ་དྲུག་ཏུ་གཡོས་ལ། བརྒྱ་བྱིན་དང་། ཚངས་པ་དང་། ལྷ་བྱེ་བ་ཁྲག་ཁྲིག་བརྒྱ་སྟོང་གིས་ལྷ་རྫས་ཀྱི་མེ་ཏོག་དང་། སྤོས་དང་། ཕྲེང་བ་དང་། ཨ་ག་རུ་དང་། ཏ་ཀ་ར་དང་། དུས་དང་འཐུན་པའི་ཙན་དན་གྱི་ཕྱེ་མའི་ཆར་རབ་ཏུ་ཕབ་ནས་བདག་གི་མདུན་དུ་ཐལ་མོ་སྦྱར་ཏེ་འདུག་ལ་འདི་སྐད་ཅེས་སྨྲས་ཏེ། སྐྱེས་བུ་དམ་པ་སེམས་ཅན་ནོ་ཅོག་གིས་བདག་མ་གསད་ཅིག་དང་། བདག་ཅག་གིས་སངས་རྒྱས་ཀྱི་ཞིང་ཐམས་ཅད་ན་སེམས་ཅན་ནད་པ་རྣམས་ནད་ཐམས་ཅད་ལས་ཡོངས་སུ་ཐར་བར་བྱའོ། །ཆར་མི་འབབ་ཅིང་མུ་གེ་འབྱུང་བ་ཐམས་ཅད་དང་། ན་བ་དང་། འཆི་བ་དང་། ཐབ་མོ་དང་། རྩོད་པ་ནས་མི་དགེ་བ་བཅུའི་ལས་ཀྱི་ལམ་གྱི་བར་ལས་ཀྱང་ཐར་བར་བྱ་སྟེ། དགེ་བ་བཅུའི་ལས་ཀྱི་ལམ་ལ་སེམས་ཅན་རྣམས་སྦྱར་བར་བྱའོ། །བདག་ཤིང་དེ་ལས་མཆོངས་པ་ལྷ་རྣམས་ཀྱིས་བདག་ནམ་མཁའ་བར་སྣང་ལས་བཟུང་སྟེ། དེ་ན་བདག་གིས་སེམས་ཅན་རྣམས་ལ་བསླབས་ནས་སེམས་ཅན་རྣམས་ཆོས་ལ་སྦྱོར་བར་བྱས་སོ། །དེ་ན་བདག་གིས་སེམས་ཅན་ཁྲག་ཁྲིག་བརྒྱ་སྟོང་ཕྲག་མང་པོ་ལྔ་མངོན་པར་ཤེས་པ་དང་ལྡན་པར་བྱས་སོ། །བདག་གི་ཚིག་གིས་ལྷ་རྣམས་ཀྱིས་སངས་རྒྱས་ཀྱི་ཞིང་དེ་དག་ཐམས་ཅད་དུ་སེམས་ཅན་རྣམས་དགེ་བ་བཅུའི་ལས་ཀྱི་ལམ་གྱི་བར་ལ་བཙུད་ཅིང་སོ་སོར་བཀོད་དོ། །བཙུན་པ་བཅོམ་ལྡན་འདས་བདག་གི་སྨོན་ལམ་ནི་དེ་ལྟ་བུ་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ནམ་མཁའི་དབྱངས་ལ་ལེགས་སོ་ཞེས་བྱ་བ་བྱིན་ནས་རིགས་ཀྱི་བུ་ཁྱོད་ཀྱི་སྨོན་ལམ་དེ་ལྟ་བུར་གྱུར་ཏེ། སྤྱད་པར་དཀའ་བ་སྤྱོད་པའི་སེང་གེའི་སྒྲ་དེ་ལྟ་བུ་བསྒྲགས་པ་ནི་ལེགས་སོ་ལེགས་སོ། །རིགས་ཀྱི་བུ་ཁྱོད་ཇི་ལྟར་སྔོན་གང་གཱ་ཞེས་བྱ་བ་ཉི་མ་ལ་དགའ་བར་གྱུར་པ་དེ་ངས་བསྐུལ་ནས་ཐོག་མར་བྱང་ཆུབ་ཏུ་སེམས་བསྐྱེད་པར་མ་གྱུར་ཏམ། གསོལ་པ། བཙུན་པ་བཅོམ་ལྡན་འདས་བདག་སྔོན་ལན་འགའ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་པ་མ་མཆིས་སོ། །བཙུན་པ་བཅོམ་ལྡན་འདས་བདག་ཐོག་མ་བྱང་
ཆུབ་སེམས་དཔར་གྱུར་པ་ནི་འདི་ལགས་ཏེ། བཙུན་པ་བཅོམ་ལྡན་འདས་བདག་དེ་བཞིན་གཤེགས་པ་ཚངས་པའི་དབང་པོའི་ཐད་དུ་མཆིས་ཏེ། དེའི་ཚེ་ད་ལྟར་ཇི་སྐད་དུ་བརྗོད་པའི་སྨོན་ལམ་དེ་ལྟ་བུ་བཏབ་བོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་གལ་ཏེ་སྔོན་བྱང་ཆུབ་ཏུ་སེམས་བསྐྱེད་པར་མ་གྱུར་ན་སྨོན་ལམ་དེ་ལྟ་བུ་སུས་བསླབས། གསོལ་པ། དེ་ན་བདག་དབེན་པ་ཞིག་ཏུ་མཆིས་ཏེ། དོག་ས་ལ་མཆིས་ནས་སྨོན་ལམ་ཞིག་གདབ་པར་སེམས་པ་དེ་ན་བདག་གི་རྨི་ལམ་དུ་དེ་བཞིན་གཤེགས་པ་ཚངས་པའི་དབང་པོས་སྨོན་ལམ་དེ་དག་བསྒོ་བ་དང་། དེས་དེ་བཞིན་གཤེགས་པ་དེའི་སྤྱན་སྔར་སྨོན་ལམ་བཏབ་བོ། །དེ་ན་བདག་སེམས་ཅན་རྣམས་ལ་སྙིང་རྗེ་སྐྱེས་ཏེ་འཁོར་བའི་སྐྱོན་རྟོགས་སོ། །དེ་ཕྱིས་རྗེས་སུ་དཔག་པ་དེས་མཆོད་སྦྱིན་སྨྲ་བ་བདག་ཡོངས་སུ་བཏང་བ་བགྱིས་ཏེ། སྨོན་ལམ་དེ་ལྟ་བུ་བཏབ་བོ། །བཅོམ་ལྡན་འདས་ཀྱིས་བཀའ་སྩལ་པ། ཅི་ཁྱོད་ལྟ་བར་སོང་བ་དེ་དག་ཏུ་ཞུགས་སམ། གསོལ་པ། མ་ལགས་སོ། སུ་ཞིག་གི་མཐུས། གསོལ་པ། བཙུན་པ་བཅོམ་ལྡན་འདས་སྨོན་ལམ་གྱི་ཁྱད་པར་གྱིས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ཏེ། སྨོན་ལམ་གྱི་ཁྱད་པར་གྱིས་སེམས་ཅན་རྣམས་ལྟ་བར་སོང་བ་ཐམས་ཅད་ལས་ཡོངས་སུ་དགྲོལ་གྱི། གཞན་གང་གི་མཐུས་ཀྱང་སེམས་ཅན་རྣམས་ལྟ་བར་སོང་བ་ཐམས་ཅད་ལས་ཡོངས་སུ་གྲོལ་བར་མི་འགྱུར་རོ། །རིགས་ཀྱི་བུ་བྱང་ཆུབ་ཀྱི་ཕྱིར་ལུང་བསྟན་པ་འདི་སུ་ཞིག་གི་དུས་གསུམ་གྱི་གཟུགས་ཀྱི་ཕུང་པོ་ནས་རྣམ་པར་ཤེས་པའི་ཕུང་པོའི་བར་དུ་ཡིན་ནམ། འོན་ཏེ་དུས་གསུམ་གྱི་བདེ་བ་དང་། སྡུག་བསྔལ་དང་། བདེ་བ་ཡང་མེད་སྡུག་བསྔལ་ཡང་མེད་པ་ཚོར་བའི་སྐྱེ་མཆེད་དྲུག་པོ་འདི་དག་གི་ཡིན་ནམ། འོན་ཏེ་ཚོར་བ་མེད་པ་ཡིན་ནམ། བྱང་ཆུབ་ཀྱི་ཕྱིར་ལུང་བསྟན་པ་ཞེས་བྱ་བ་འདི་སུ་ཞིག་གི་ཡིན། གསོལ་པ། བཙུན་པ་བཅོམ་ལྡན་འདས་འདི་ལྟ་སྟེ། བདག་ལུང་བསྟན་པར་གསོལ་བའམ་བདག་ལུང་སྟོན་པའམ། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་དེ་མ་མཆིས་སོ། །དེ་ཅིའི་
སླད་དུ་ཞེ་ན། ཇི་ལྟར་ནམ་མཁའ་འདི་རྫས་མ་མཆིས། དངོས་པོ་མ་མཆིས། རང་བཞིན་མ་མཆིས། ཅུང་ཟད་ཀྱང་མ་མཆིས། ཡི་གེ་མ་མཆིས། ཐོབ་པ་མ་མཆིས། བརྗོད་དུ་མ་མཆིས་པ་དེ་བཞིན་དུ་ཆོས་འདི་དག་ཀྱང་རྫས་མ་མཆིས་ཤིང་དངོས་པོ་མ་མཆིས་པ་ནས། བརྗོད་དུ་མ་མཆིས་ཤིང་མ་སྐྱེས་པའི་བར་དུའོ། །བཙུན་པ་བཅོམ་ལྡན་འདས་དུས་གསུམ་གྱི་གཟུགས་འབྱུང་བ་མ་མཆིས་ཏེ་ལྟ་བའི་མཚན་ཉིད་དང་ཉེ་བར་བྲལ་བ་ནས་རྣམ་པར་ཤེས་པའི་བར་དུ་ཡང་མ་སྐྱེས་པའོ། །བཙུན་པ་བཅོམ་ལྡན་འདས་དུས་གསུམ་གྱི་མིག་འབྱུང་བ་མ་མཆིས་ཤིང་ལྟ་བའི་མཚན་ཉིད་དང་ཉེ་བར་བྲལ་བ་ནས་དུས་གསུམ་གྱི་ནང་གི་ཡིད་ཀྱི་བར་དང་། བདེ་བ་དང་། སྡུག་བསྔལ་བ་དང་། བདེ་བ་ཡང་མ་མཆིས་སྡུག་བསྔལ་བ་ཡང་མ་མཆིས་པའི་ཚོར་བ་ཡང་མ་སྐྱེས་པ་ནས་ལྟ་བའི་མཚན་ཉིད་དང་བྲལ་བའི་བར་དུའོ། །བཙུན་པ་བཅོམ་ལྡན་འདས་བདག་གིས་ནི་དུས་གསུམ་གྱི་གཟུགས་ཀྱི་ཡང་དག་པའི་མཐའ་དང་། ཆོས་ཉིད་ལ་སྐྱེ་བའམ། གནས་པའམ། འཇིག་པ་མི་དམིགས་སོ། །ཆོས་ཀྱི་དབྱིངས་ལ་ཡང་གནས་པར་མི་དམིགས་ཏེ། མིང་དང་གཟུགས་ཀྱང་ཡང་དག་པར་རྗེས་སུ་མི་མཐོང་ངོ་། །བརྡར་བཏགས་པ་ཙམ་དུ་ཡང་གཟུགས་ཀྱི་མཚན་ཉིད་ཡང་དག་པར་རྗེས་སུ་མི་མཐོང་སྟེ། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། བཙུན་པ་བཅོམ་ལྡན་འདས་བདག་གིས་ནི་དུས་གསུམ་གྱི་རྣམ་པར་ཤེས་པའི་ཡང་དག་པའི་མཐའི་བར་ལ་ཡང་བརྡར་བཏགས་པ་ཙམ་དུ་ཡང་རྣམ་པར་ཤེས་པའི་མཚན་ཉིད་ཡང་དག་པར་རྗེས་སུ་མི་མཐོང་སྟེ། བཅོམ་ལྡན་འདས་བདག་གིས་ནི་དུས་གསུམ་གྱི་མིག་གི་ཡང་དག་པའི་མཐའ་ནས་བརྡ་ཙམ་དུ་བཏགས་པའི་མིག་གི་མཚན་ཉིད་ནས་དུས་གསུམ་གྱི་ནང་གི་ཡིད་ཀྱི་འདུས་ཏེ་རེག་པ་བདེ་བ་དང་། སྡུག་བསྔལ་དང་། བདེ་བ་ཡང་མ་མཆིས། སྡུག་བསྔལ་ཡང་མ་མཆིས་པའི་བར་དུ་ཡང་ཡང་དག་པར་རྗེས་སུ་མི་མཐོང་ངོ་། །བཙུན་པ་བཅོམ་ལྡན་འདས་བདག་གིས་ནི་ཡང་དག་པའི་མཐའ་དང་། ཆོས་ཉིད་དང་། ཆོས་སྐྱོན་མེད་པ་ཉིད་ཀྱི་སྐྱེ་བ་དང་། གནས་པ་དང་། འགོག་པ་མི་དམིགས་སོ། །ཡིད་དང་ཆོས་ཀྱི་ཁམས་ཀྱང་མི་
དམིགས་སོ། །བདག་གིས་ནི་ཡིད་རྣམ་པར་གནས་པའི་མཚན་ཉིད་ཀྱང་ཡང་དག་པར་རྗེས་སུ་མི་མཐོང་ངོ་། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་བྲག་ཅ་ལྟ་བུ་སྟེ། ནམ་མཁའ་ལ་བརྟག་པའི་མཚན་ཉིད་ལྟ་བུ་འོང་བ་མེད་ཅིང་འགྲོ་བ་མེད་པ་གང་ལ་གང་གིས་ཀྱང་མ་བཟུང་བའོ། །ཆོས་ཐམས་ཅད་ནི་མིག་ཡོར་ལྟ་བུ། སྨིག་རྒྱུ་ལྟ་བུ། རྨི་ལམ་ལྟ་བུ། ཆུ་ཟླ་ལྟ་བུ་སྟེ། ནམ་མཁའ་ལ་བརྟག་པའི་མཚན་ཉིད་ལྟ་བུ་འོང་བ་མེད་ཅིང་འགྲོ་བ་མེད་པ་གང་ལ་གང་གིས་ཀྱང་མ་བཟུང་བའོ། །བཙུན་པ་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོའི་ཏིང་ངེ་འཛིན་སྤངས་པའི་མཚན་ཉིད་བཟུང་བ་མ་མཆིས་པ་ཞེས་བགྱི་བ་ཞིག་མཆིས་ཏེ། ཉན་ཐོས་དང་། རང་སངས་རྒྱས་ཐམས་ཅད་དང་ཐུན་མོང་བ་མ་ལགས་སོ། །དེ་ལ་གཟུགས་ཀྱི་མཚན་ཉིད་དང་བྲལ་ཞིང་ཡོངས་སུ་གཟུང་དུ་མ་མཆིས་པའི་ཏིང་ངེ་འཛིན་གང་ཞེ་ན། འདི་ལྟ་སྟེ། ནང་སྟོང་པ་ཉིད་དང་། ཕྱི་སྟོང་པ་ཉིད་དང་། ཕྱི་ནང་སྟོང་པ་ཉིད་དང་། སྟོང་པ་ཉིད་སྟོང་པ་ཉིད་དང་། ཆེན་པོ་སྟོང་པ་ཉིད་དང་། དོན་དམ་པ་སྟོང་པ་ཉིད་དང་། འདུས་བྱས་སྟོང་པ་ཉིད་དང་། འདུས་མ་བྱས་སྟོང་པ་ཉིད་དང་། རབ་ཏུ་སྟོང་པ་ཉིད་དང་། ཐོག་མ་དང་ཐ་མ་མེད་པ་སྟོང་པ་ཉིད་དང་། མི་འགྱུར་བ་སྟོང་པ་ཉིད་དང་། རང་བཞིན་སྟོང་པ་ཉིད་དང་། རང་གི་མཚན་ཉིད་སྟོང་པ་ཉིད་དང་། ཆོས་ཐམས་ཅད་སྟོང་པ་ཉིད་དང་། མི་དམིགས་པ་སྟོང་པ་ཉིད་དང་། དངོས་པོ་མེད་པ་སྟོང་པ་ཉིད་དང་། ངོ་བོ་ཉིད་སྟོང་པ་ཉིད་དང་། དངོས་པོ་མེད་པའི་ངོ་བོ་ཉིད་སྟོང་པ་ཉིད་དག་བཟུང་བ་དེ་ནི་མཚན་ཉིད་དང་བྲལ་བ་ཡོངས་སུ་བཟུང་བ་མ་མཆིས་པ་ཞེས་བགྱི་བའི་ཏིང་ངེ་འཛིན་ཏེ། ཉན་ཐོས་དང་། རང་སངས་རྒྱས་ཐམས་ཅད་དང་ཐུན་མོང་བ་མ་ལགས་སོ། །བཙུན་པ་བཅོམ་ལྡན་འདས་དེ་ནི་རྣམ་གྲངས་འདིས་ཀྱང་དེ་སྐད་བརྗོད་པར་བགྱི་སྟེ། འདི་ལྟ་སྟེ། དེ་ནི་མ་མཆིས་པའི་ཚིག་བླ་དགས་སོ། །འདི་ལྟ་སྟེ། བདག་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །ལུང་སྟོན་པར་འགྱུར་རོ། །ལུང་བསྟན་ཏོ་སྙམ་དུ་མི་སེམས་སོ། །དེ་ཅིའི་ཕྱིར་ཞེ་ན། བདག་ནི་ལུང་བསྟན་པ་ཡང་
དག་པར་རྗེས་སུ་མི་མཐོང་། བརྗོད་པ་དང་ལུང་བསྟན་པ་དང་འཁོར་བ་ཡང་ཡང་དག་པར་རྗེས་སུ་མི་མཐོང་། མྱ་ངན་ལས་འདའ་བ་དང་། རྣལ་འབྱོར་དང་། རྣལ་འབྱོར་མ་ལགས་པ་དང་། ལམ་དང་། ལམ་མ་ལགས་པ་ཡང་ཡང་དག་པར་རྗེས་སུ་མི་མཐོང་ངོ་། །འདི་ལྟ་སྟེ། དཔེར་ན་དེ་བཞིན་ཉིད་ཀྱི་ལམ་མ་མཆིས་ཤིང་ཕྱིན་ཅི་མ་ལོག་པ་དེ་བཞིན་ཉིད་དང་། ཆོས་ཀྱི་དབྱིངས་དང་། ཆོས་ཉིད་དང་། ཆོས་སྐྱོན་མེད་པ་ཉིད་ཀྱི་ལམ་ཡང་དག་པར་རྗེས་སུ་མི་མཐོང་བ་དེ་བཞིན་དུ་གཟུགས་སུ་ཡང་དག་པར་རྗེས་སུ་མི་མཐོང་བ་ནས། རྣམ་པར་ཤེས་པའི་བར་དུ་ཡང་དག་པར་རྗེས་སུ་མི་མཐོང་ངོ་། །མིག་ཡང་དག་པར་རྗེས་སུ་མི་མཐོང་བ་ནས། ཡིད་ཀྱི་རྣམ་པར་ཤེས་པའི་བར་གྱི་ལམ་ཡང་ཡང་དག་པར་རྗེས་སུ་མི་མཐོང་ངོ་། །ལུང་བསྟན་པ་བརྗོད་པ་འདིའི་སྐབས་དང་གོ་སྐབས་ཀྱང་ཡང་དག་པར་རྗེས་སུ་མི་མཐོང་ངོ་། །གང་གཟུགས་ཀྱི་ལུང་བསྟན་པ་ནས། རྣམ་པར་ཤེས་པའི་བར་དང་། མིག་ནས་ཡིད་ཀྱི་བར་གྱི་ལུང་བསྟན་པ་དང་། གང་བྱང་ཆུབ་ཏུ་ལུང་བསྟན་པ་ཡང་དག་པར་རྗེས་སུ་མི་མཐོང་ངོ་། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཤིན་ཏུ་བསྟན་པ་འདི་བཤད་པ་ན། ཀུན་ཏུ་རྒྱུ་ཤིན་ཏུ་རྣམ་པར་ཕྱེ་བའི་སས་ཀྱང་དེ་ཡང་ཡང་དག་པར་རྗེས་སུ་མ་མཐོང་ནས། ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་རབ་ཏུ་ཐོབ་པར་གྱུར་ཏོ། །སེམས་ཅན་གཞན་མུ་སྟེགས་ཅན་ང་རྒྱལ་བཅོམ་པ་སྟོང་ཕྲག་བཅུ་གསུམ་པོ་དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་ཕྱིར་མི་ལྡོག་པའི་ས་རབ་ཏུ་ཐོབ་པར་གྱུར་ཏོ། །ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་ཞེས་བྱ་བ་ཐེག་པ་ཆེན་པོའི་མདོ། །ལེའུ་བཅུ་གཅིག་པའོ།། །།