འཕགས་པ་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་ཞེས་བྱ་བ་ཐེག་པ་ཆེན་པོའི་མདོ་ལས། ལེའུ་གསུམ་པ།
རྒྱ་གར་སྐད་དུ། ཨཱཪྱ་སཾ་མྱཀ་ཙཱཪྱ་བྲཱིཏྟ་ག་ག་ན་ཝརྞ་བི་ན་ཡ་ཀྵཱ་ནྟི་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་བྱེད་པ་ཅན་ན་རྙོག་པ་སེལ་བ་ཞེས་བྱ་བའི་བྱེད་པ་ཅན་གྱི་གྲོང་རྡལ་དུ་སྣང་བ་འཕེལ་བ་ཞེས་བྱ་བའི་རི་ལ་དྲང་སྲོང་རྟ་རླུང་ཞེས་བྱ་བ་དཀའ་ཐུབ་ལ་གནས་པ་ན། དགེ་སློང་གི་དགེ་འདུན་བརྒྱ་ཕྲག་ཕྱེད་དང་བཅུ་གསུམ་གྱི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་སྤྱོད་ཡུལ་ལ་ཆགས་པ་མེད་པའི་ཡེ་ཤེས་ཀྱིས་རྣམ་པར་སྤྲུལ་པ། ཚད་མེད་པའི་བྱམས་པ་ཆེན་པོའི་བྱིན་གྱི་རླབས་ཀྱི་སྟོབས་རྗེས་སུ་ཐོབ་པ། ཚད་མེད་པའི་སྙིང་རྗེ་ཆེན་པོས་སེམས་ཅན་གྱི་ཆུ་བོ་ཀུན་ཏུ་འཆང་བར་རྣམ་པར་སྤྲུལ་པ། ཚད་མེད་པའི་དགའ་བའི་བྱིན་གྱིས་བརླབས་ཀྱི་སྟོབས་ཀྱིས་སེམས་ཅན་ཐམས་ཅད་ལ་བདེ་བའི་དྲན་པའི་ཆར་རབ་ཏུ་འབབ་པས་ཀུན་ཏུ་ངོམས་པ། ཚད་མེད་པའི་བཏང་སྙོམས་ཀྱི་ཡེ་ཤེས་ཀྱིས་ཆོས་ཐམས་ཅད་ནམ་མཁའ་དང་མཉམ་པར་འཇུག་པ་ལ་མཁས་པ།ཆོས་ཀྱི་སྤྲིན་དང་། ལྷག་མཐོང་དང་། རིག་པ་དང་། ཡེ་ཤེས་ཀྱི་སྟོབས་ཀྱིས་མ་རིག་པའི་མུན་པ་ཆེན་པོ་རྣམ་པར་འཇིག་པ་ལ་མཁས་པ། བསྡུ་བ་རྣམ་པ་བཞིས་སེམས་ཅན་རྣམས་ཆུ་བོ་བཞི་ལས་བསྒྲལ་བར་བྱ་བའི་ཡེ་ཤེས་དང་། སེམས་ཅན་ཐམས་ཅད་ལ་མཚུངས་པར་སེམས་པའི་ཕྱིར་བྱམས་པ་དང་། ཁོང་ཁྲོ་བ་མེད་པས་བྱང་ཆུབ་ཀྱི་ཕྱོགས་ཀྱི་ལམ་ཡོངས་སུ་དག་པ། ཆོས་ཀྱིས་ཡང་དག་པར་འཇུག་པ། ཡེ་ཤེས་ཆེན་པོ་ལ་མཁས་པ། འཇིག་རྟེན་ལ་མཆོག་གི་ལམ་ཡང་དག་པར་སྟོན་པ། །སེམས་ཅན་རྣམ་པར་རྒྱས་ཤིང་དགེ་བའི་རྩ་བས་ཡོངས་སུ་སྲེད་པའི་ཆུ་བརྐམ་ཞིང་ཡེ་ཤེས་ཀྱི་ལས་ཀྱི་མཐའ་ལ་རབ་ཏུ་འཇུག་པ། མངོན་པར་ཤེས་པ་ཆེན་པོའི་ཡེ་ཤེས་རྣམ་པར་རྩེ་བ་མངོན་པར་ཤེས་པ་ཟླ་བ་ལྟ་བུ། སེམས་ཅན་ཐམས་ཅད་ཀྱི་སེམས་མཚུངས་པར་
ཤེས་པའི་བསམ་པ་མངོན་པར་ཡང་དག་པར་མགུ་བའི་ཕྱིར་ཐབས་ལ་མཁས་པ་འཕེལ་བ་ཡང་དག་པར་སྟོན་པ། ནམ་མཁའ་དང་མཚུངས་པའི་གཟུངས་ཀྱིས་ཚད་མེད་པའི་སྣོད་ཆོས་རིན་པོ་ཆེས་ཡོངས་སུ་བཀང་ཞིང་བྱང་ཆུབ་སེམས་དཔའི་སྤྱོད་པའི་ཕྱིར་སྐྱེ་བོ་ཐམས་ཅད་ཀྱི་ཉེ་བར་འཚོ་བ། འཕགས་པའི་བདེན་པ་བཞིས་རྐང་པའི་ཤུགས་ཆེན་པོས་ཆོས་ཀྱི་ཚུལ་གྱི་ལམ་ཟབ་མོའི་རྗེས་སུ་ཞུགས་པ། མཚུངས་པའི་ཆོས་ཀྱིས་གཞན་གྱི་རྒོལ་བ་ཐམས་ཅད་ཚར་གཅོད་པ། བསྐལ་པ་བརྒྱ་སྟོང་གྲངས་མེད་པའི་མཐར་བྱང་ཆུབ་སེམས་དཔའི་སྤྱོད་པ་ཐུག་པ་མེད་ཅིང་རྒྱུན་མ་བཅད་པའི་ཡོན་ཏན་ཐམས་ཅད་འབྱུང་བ། རླུང་དང་མཚུངས་པའི་སེམས་འཇིག་རྟེན་པ་དང་འཇིག་རྟེན་ལས་འདས་པའི་ཆོས་ཐམས་ཅད་ཀྱིས་གོས་པ་མེད་པ། བག་ཆགས་ཐམས་ཅད་རྗེས་སུ་འབྲེལ་པའི་ཉོན་མོངས་པ་རབ་ཏུ་སྤངས་པ། ཚད་མེད་གྲངས་མེད་པའི་ཏིང་ངེ་འཛིན་དང་། གཟུངས་དང་། བཟོད་པས་རྣམ་པར་རྩེ་བ་ལ་མཁས་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་རྟ་དང་གླང་པོ་ཆེ་མི་དཀར་བ་ཞེས་བྱ་བ་དང་། བྱང་ཆུབ་སེམས་དཔའ་རི་རབ་ཀུན་ཏུ་སྣང་བ་ཞེས་བྱ་བ་དང་། བྱང་ཆུབ་སེམས་དཔའ་རི་རབ་ཟླ་བ་ཞེས་བྱ་བ་དང་། བྱང་ཆུབ་སེམས་དཔའ་རྣམ་པར་བསྒྱིངས་པ་མི་ཟད་པ་ཞེས་བྱ་བ་དང་། བྱང་ཆུབ་སེམས་དཔའ་ཡེ་ཤེས་དཔལ་ཞེས་བྱ་བ་དང་། བྱང་ཆུབ་སེམས་དཔའ་མིག་སྔོན་པོ་ཞེས་བྱ་བ་དང་། བྱང་ཆུབ་སེམས་དཔའ་ངུར་སྨྲིག་སེང་གེ་སྒྲ་འབྱིན་ཅེས་བྱ་བ་དང་། བྱང་ཆུབ་སེམས་དཔའ་ནོར་གྱི་འོད་ཀྱི་ཚོགས་ཞེས་བྱ་བ་དང་། བྱང་ཆུབ་སེམས་དཔའ་རི་རབ་མཚམས་ཞེས་བྱ་བ་དང་། བྱང་ཆུབ་སེམས་དཔའ་རྒྱལ་མཚན་རྣམ་པར་སྤྲུལ་པའི་དབྱངས་ཞེས་བྱ་བ་དང་། བྱང་ཆུབ་སེམས་དཔའ་གློག་གི་ཕུང་པོ་ཞེས་བྱ་བ་དང་། བྱང་ཆུབ་སེམས་དཔའ་ཡོན་ཏན་གྱི་གཟི་བརྗིད་དྲི་མ་མེད་པའི་རྒྱལ་པོ་ཞེས་བྱ་བ་དང་། བྱང་ཆུབ་སེམས་དཔའ་རི་རབ་སྟོབས་ཀུན་ཏུ་རྒྱས་པ་ཞེས་བྱ་བ་དང་། བྱང་ཆུབ་སེམས་དཔའ་གཏོགས་འདོད་མཐུ་བོ་ཆེ་ཞེས་བྱ་བ་དང་། བྱང་ཆུབ་སེམས་དཔའ་བྱམས་པ་དང་། དེ་ལ་སོགས་པ་བྱང་ཆུབ་སེམས་དཔའ་སྟོང་ཕྲག་བཅུ་དང་། སྔོན་དུ་འགྲོ་བ་དྲང་སྲོང་རྟ་རླུང་དང་། དྲང་སྲོང་སྟོང་ཕྲག་སུམ་
ཅུ་དང་། ལྷ་བྲན་བརྒྱ་སྟོང་ཕྲག་བཅོ་བརྒྱད་ཀྱིས་སངས་རྒྱས་བཅོམ་ལྡན་འདས་ལ་ཡོངས་སུ་བསྐོར་ནས་ལྷན་ཅིག་ཏུ་འཁོད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ལེགས་པར་འོངས་པ་ལ་བཀའ་སྩལ་པ། ལེགས་པར་འོངས་པ་དེ་བཞིན་གཤེགས་པའི་སེང་གེའི་ཁྲི་བཤམས་པ་དེ་ལ་བདག་འདུག་སྟེ། ཉན་ཐོས་རྣམས་ལ་ཉན་ཐོས་ཀྱི་གཏམ་སྨྲ་བར་འགྱུར་རོ། །བཅོམ་ལྡན་འདས་དེ་བཞིན་ནོ་ཞེས་གསོལ་པ་དང་། ཚེ་དང་ལྡན་པ་ལེགས་པར་འོངས་པ་ཕྱིར་མཉན་ཏེ། བཅོམ་ལྡན་འདས་ཀྱི་ཕྱིར་ཕོ་བྲང་ཟླུམ་པོ་བྱས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་འཁོར་ཐམས་ཅད་དང་ལྡན་པ་ལ་རྣམ་པར་ཀུན་ཏུ་བལྟས་ཏེ། ཕོ་བྲང་ཟླུམ་པོར་བཤམས་པ་ཉིད་དུ་བཞུགས་སོ། །དེ་ནས་དགེ་སློང་གཞན་དག་ཀྱང་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་བྱས་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་ཏེ། ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་ཞེས་བགྱི་བ་བཙུན་པ་བཅོམ་ལྡན་འདས་འཇིག་རྟེན་ཞེས་བགྱི་བ་ནི་གང་ལགས། དེ་བཞིན་གཤེགས་པས་འཇིག་རྟེན་དུ་བཏགས་པས་བཏགས་པ་ནི་ཇི་ལྟ་བུ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་དགེ་སློང་དེ་ལ་འདི་སྐད་ཅེས་བཀའ་སྩལ་ཏོ། །དགེ་སློང་དག་འཇིག་རྟེན་འཇིག་རྟེན་ཞེས་བྱ་བ་དང་། དེ་དེ་བཞིན་གཤེགས་པས་འཇིག་རྟེན་དུ་བཏགས་པས་བཏགས་པ་ནི་ཇི་ཙམ་ཞེས་དགེ་སློང་ཁྱོད་དེ་སྐད་འདྲིའམ། བཅོམ་ལྡན་འདས་དེ་བཞིན་ནོ། །དེའི་ཕྱིར་དགེ་སློང་ཁྱོད་ལེགས་པར་ཉོན་ལ་ཤིན་ཏུ་ཡིད་ལ་ཟུང་ཤིག་དང་ངས་བཤད་དོ། །བཙུན་པ་དེ་བཞིན་ནོ་ཞེས་གསོལ་ཏེ། དགེ་སློང་དེ་བཅོམ་ལྡན་འདས་ལ་ཕྱིར་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །དགེ་སློང་འཇིག་རྟེན་ཞེས་བྱ་བ་ནི་འཇིག་རྟེན་རྣམ་པ་གཉིས་ཏེ། སྣོད་ཀྱི་འཇིག་རྟེན་དང་། འདུ་བྱེད་ཀྱི་འཇིག་རྟེན་ནོ། །དགེ་སློང་དེ་ལ་སྣོད་ཀྱི་འཇིག་རྟེན་ནི་གང་། འདུ་བྱེད་ཀྱི་འཇིག་རྟེན་ནི་གང་ཞེ་ན། སའི་ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་ཇི་ཙམ་པ་ནི་སྣོད་ཅེས་
བྱའོ། །དགེ་སློང་དེ་ལ་ནང་གི་སའི་ཁམས་ཡོད་དེ། དགེ་སློང་དེ་ལ་ནང་གི་སའི་ཁམས་གང་ཞེ་ན། གང་ནང་གི་སྲ་བའི་སྲ་བ་ཉིད་ཟིན་པ་ནི་འདི་ལྟ་སྟེ། རུས་པ་དང་། སེན་མོ་དང་། སོའི་བར་དུ་སྟེ། འདི་དག་ནི་ནང་གི་སའི་ཁམས་ཞེས་བྱའོ། །དེ་ལ་ཕྱི་རོལ་གྱི་སའི་ཁམས་གང་ཞེ་ན། གང་ལུས་ཀྱི་ཕྱི་རོལ་གྱི་སའི་ཁམས་ནི་འདི་ལྟ་སྟེ། འགྲོན་བུ་དང་། གསེར་དང་། ནོར་བུ་དང་། མུ་ཏིག་དང་། བཻ་དཱུཪྱ་དང་། དུང་དང་། རྡོ་དང་། བྱི་རུ་དང་། དངུལ་དང་། ས་ལེ་སྦྲམ་དང་། གྲམ་བུ་དང་། གསེག་མ་དང་། གྱོ་མོ་དང་། ཤིང་དང་། རྩྭ་དང་། སྨན་དང་། ཕྱག་དར་དང་། འདི་དག་ནི་ཕྱི་རོལ་གྱི་སའི་ཁམས་ཞེས་བྱའོ། །ཆུའི་ཁམས་གང་ཞེ་ན། ཕྱི་རོལ་གྱི་ཆུའི་ཁམས་ཡོད། ནང་གི་ཆུའི་ཁམས་ཀྱང་ཡོད་དེ། དེ་ལ་ནང་གི་ཆུའི་ཁམས་གང་ཞེ་ན། ལུས་འདི་ལ་ཆུ་དང་། ཆུའི་ཁམས་ཀྱི་མཁྲིས་པ་དང་། བད་ཀན་དང་། རྣག་དང་། ཁྲག་དང་། གླད་པ་དང་། གླད་རྒྱས་དང་། མཆིལ་མ་དང་། རྡུལ་དང་། ངར་སྣབས་དང་། སྣབས་དང་། རྒྱུངས་པ་དང་། རྐང་དང་། གཅིན་ཡོད་པ་ཀུན་ཏུ་ལེན་པ་འདི་ནི་ནང་གི་ཆུའི་ཁམས་ཞེས་བྱའོ། །དེ་ལ་ཕྱི་རོལ་གྱི་ཆུའི་ཁམས་གང་ཞེ་ན། གང་ལུས་ཀྱི་ཕྱི་རོལ་གྱི་ཆུའི་ཁམས་ནི་འདི་ལྟ་སྟེ། ཆུ་དང་། ཆུའི་ཁམས་ཀྱི་སྣུམ་པ་དང་། འོ་མ་དང་། ཞོ་དང་། དར་བ་དང་། བུ་རམ་དང་། ཤིང་གི་རོ་དང་། ཆང་དང་། རྩབ་མོ་དང་། བུ་རམ་ཆང་དང་། མེ་ཏོག་ཆང་དང་། ལུས་ཀྱི་ཕྱི་རོལ་གྱི་ཆུའི་ཁམས་ཇི་ཙམ་པ་ཀུན་དུ་ལེན་པ་འདི་ནི་ཕྱི་རོལ་གྱི་ཆུའི་ཁམས་སོ། །དེ་ལ་ནང་གི་མེའི་ཁམས་གང་ཞེ་ན། ལུས་འདི་ལ་གང་སྐྱེ་བོའི་མདོག་གི་དྲོ་བ་ཀུན་ཏུ་ལེན་པ་དེས་ལུས་འདི་དྲོ་བ་ཉིད་དུ་བ་དང་། གདུངས་པ་དང་། རིམས་དང་། ཡོངས་སུ་ཚིག་པ་དང་། དེས་ཟོས་པ་དང་། འཐུངས་པ་དང་། འཆོས་པ་དང་། མྱངས་པ་དེའི་ཡང་དག་པར་ཡོངས་སུ་སྨིན་པར་འགྱུར་བ་འདི་ནི་ནང་གི་མེའི་ཁམས་ཞེས་བྱའོ། །དེ་ལ་ཕྱི་རོལ་གྱི་མེའི་ཁམས་གང་ཞེ་ན། གང་མེའི་གདུང་བ་དང་། ཉི་མའི་གདུང་བ་དང་། ནོར་བུའི་གདུང་བ་དང་། འབྲུ་དང་། སྨན་དང་། ཤིང་དང་། རྩྭའི་དྲོ་བ་དང་། ལྕི་བའི་དྲོ་བ་དང་། ཕྱག་དར་གྱི་དྲོ་བ་དང་། འདི་དག་ནི་ཕྱི་རོལ་གྱི་མེའི་ཁམས་ཞེས་བྱའོ། །དེ་ལ་ནང་གི་རླུང་
གི་ཁམས་གང་ཞེ་ན། གང་ལུས་འདི་ལ་གྱེན་དུ་རྒྱུ་བའི་རླུང་དང་། ཐུར་དུ་རྒྱུ་བའི་རླུང་དང་། མ་ཞུ་བའི་རླུང་དང་། ཡན་ལག་དང་། ཉིང་ལག་ཏུ་རྒྱུ་བའི་རླུང་དང་། འདི་ནི་ནང་གི་རླུང་རྣམས་ཞེས་བྱའོ། །དེ་ལ་ཕྱི་རོལ་གྱི་རླུང་གང་ཞེ་ན། གང་ཕྱི་རོལ་ཏུ་ཡང་དག་པར་རྒྱུ་བའི་རླུང་དང་། རྣམ་པར་རྒྱུ་བའི་རླུང་དང་། གྱེན་དུ་རྒྱུ་བ་དང་། གྲང་བ་དང་། དྲོ་བའི་དམུ་རླུང་ཕྱེད་པ་མང་པོ་དང་། ས་འཛིན་པའི་རླུང་དང་། ཕྱི་རོལ་གྱི་རླུང་གི་ཁམས་གང་ཡང་རུང་བ་འདི་ནི་ཕྱི་རོལ་གྱི་རླུང་གི་ཁམས་ཞེས་བྱ་སྟེ། དེ་ལྟར་ཕྱི་དང་ནང་གི་འབྱུང་བ་ཆེན་པོ་བཞི་པོ་འདི་ནི་སྣོད་ཀྱི་འཇིག་རྟེན་ཞེས་བྱའོ། །འདི་གང་གི་སྣོད་ཅེ་ན། ཉེ་བར་ལེན་པའི་ཕུང་པོ་ལྔའི་སྣོད་དོ། །དགེ་སློང་དག་ཕྱི་དང་ནང་གི་འབྱུང་བ་ཆེན་པོ་བཞི་པོ་འདི་དག་ལ་གང་མོས་པའམ། དགའ་བའམ། བྱམས་པའམ། ཆགས་པའམ། རྒྱ་ཆེ་བའམ། ང་ཡིར་བྱ་བའམ། བདག་གིར་བྱ་བ་དེ་ཐམས་ཅད་སྤང་བར་བྱའོ་ཞེས་སོ་སོར་བསླབ་པར་བྱའོ། །གང་ལ་ལ་འདས་པ་དང་། མ་འོངས་པ་དང་། ད་ལྟར་བྱུང་བའི་ཕྱི་དང་ནང་གིའམ། ཆེ་བའམ། ཕྲ་བའམ། ངན་པའམ། བཟང་བའམ། གང་རིང་བའམ། གང་ཉེ་བའམ། འབྱུང་བ་ཆེན་པོ་བཞི་པོ་དེ་ཐམས་ཅད་དེ་བཞིན་དུ་སོ་སོར་བསླབ་པར་བྱའོ། །གང་ལ་ལ་འབྱུང་བ་ཆེན་པོ་བཞི་པོ་དེ་དག་ནི་བདག་གི་མ་ཡིན། བདག་ཀྱང་དེའི་མ་ཡིན། དེ་ཡང་བདག་མ་ཡིན་ནོ་ཞེས་དེ་ལྟར་དེ་བཞིན་དུ་ཡང་དག་པའི་ཤེས་རབ་ཀྱིས་ཇི་ལྟ་བ་བཞིན་དུ་བལྟ་བར་བྱའོ། །དགེ་སློང་དག་དགེ་སློང་གང་ལ་ལ་འབྱུང་བ་ཆེན་པོ་བཞི་པོ་འདི་དག་ལ་དེ་བཞིན་དུ་ཡང་དག་པའི་ཤེས་རབ་ཀྱིས་ཤིན་ཏུ་བརྟན་པར་བྱེད་དོ། །ཤིན་ཏུ་ཡིད་ལ་བྱས་པའི་དགེ་སློང་དེ་སྲེད་པ་དང་། རྒུད་པ་དང་། ལུས་ཀྱི་སྦྱོར་བའི་རྒྱུན་གཅོད་ཅིང་སྡུག་བསྔལ་གྱི་མཐར་བྱེད་པ་སྟེ། དགེ་སློང་དག་འདི་ནི་སྣོད་ཀྱི་འཇིག་རྟེན་ནོ། །དགེ་སློང་དག་དེ་ལ་འདུ་བྱེད་ཀྱི་འཇིག་རྟེན་གང་ཞེ་ན། ཉེ་བར་ལེན་པའི་ཕུང་པོ་ལྔ་ནི་འདུ་བྱེད་ཅེས་བྱའོ། །ལྔ་གང་ཞེ་ན། འདི་ལྟ་སྟེ། གཟུགས་ཉེ་བར་ལེན་པའི་ཕུང་པོ་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཉེ་བར་ལེན་པའི་ཕུང་པོ་སྟེ། དགེ་སློང་དག་འདི་ནི་འདུ་བྱེད་ཀྱི་འཇིག་རྟེན་ནོ། །དགེ་སློང་དག་སེམས་
ཅན་ཇི་ཙམ་པ་གང་སེམས་ཅན་གྱི་བསྡུ་བས་ཡང་དག་པར་བསྡུས་པ་དེ་ཐམས་ཅད་ཕུང་པོ་འདི་དག་གིས་བསྡུས་པ་དང་། ལྡན་པ་འདི་ནི་འདུ་བྱེད་ཀྱི་འཇིག་རྟེན་ཞེས་བྱའོ། །དགེ་སློང་དག་ཉེ་བར་ལེན་པའི་ཕུང་པོ་ལྔ་པོ་དེ་ལ་གང་མོས་པའམ། །དགའ་བའམ། བྱམས་པའམ། ཆགས་པའམ། རྒྱ་ཆེ་བའམ། ང་ཡིར་བྱ་བའམ། བདག་གིར་བྱ་བ་དེ་ཐམས་ཅད་སྤང་བར་བྱའོ་ཞེས་སོ་སོར་བསླབ་པར་བྱའོ། །གང་ཅུང་ཟད་འདས་པ་དང་། མ་འོངས་པ་དང་། ད་ལྟར་བྱུང་བའམ། ཕྱིའི་འམ། ནང་གིའམ། ཆེ་བ་འམ། ཕྲ་བའམ། ངན་པའམ། བཟང་བའམ། གང་རིང་བའམ། གང་ཉེ་བའི་གཟུགས་དེ་ཐམས་ཅད་བདག་གི་མ་ཡིན། བདག་ཀྱང་དེའི་མ་ཡིན། དེ་ཡང་བདག་མ་ཡིན་ནོ་ཞེས་དེ་ལྟར་དེ་བཞིན་དུ་ཡང་དག་པའི་ཤེས་རབ་ཀྱིས་ཇི་ལྟ་བ་བཞིན་དུ་བལྟ་བར་བྱའོ། །གང་ལ་ལ་འདས་པ་དང་། མ་འོངས་པ་དང་། ད་ལྟར་བྱུང་བའམ། ཕྱིའིའམ། ནང་གིའམ། ཆེ་བའམ། ཕྲ་བའམ། ངན་པའམ། བཟང་བའམ། གང་རིང་བའམ། གང་ཉེ་བ་ཚོར་བ་དང་། གང་ལ་ལ་འདུ་ཤེས་དང་། གང་ལ་ལ་འདུ་བྱེད་དང་། གང་ཅུང་ཟད་རྣམ་པར་ཤེས་པ་དེ་ཐམས་ཅད་ནི་བདག་གི་མ་ཡིན། བདག་ཀྱང་དེའི་མ་ཡིན། དེ་བདག་མ་ཡིན་ནོ་ཞེས་དེ་ལྟར་དེ་བཞིན་དུ་ཡང་དག་པའི་ཤེས་རབ་ཀྱིས་ཇི་ལྟ་བ་བཞིན་དུ་བལྟ་བར་བྱ་བ་འདི་ནི་དགེ་སློང་དག་སྣོད་ཀྱི་འཇིག་རྟེན་དང་འདུ་བྱེད་ཀྱི་འཇིག་རྟེན་ཞེས་བྱའོ། །དེ་ནས་བྱང་ཆུབ་སེམས་དཔའ་ཀུན་ཏུ་སྣང་བ་འཁོར་དེར་འདུས་པར་གྱུར་ཏེ་འདུག་པ་དེས་བྱང་ཆུབ་སེམས་དཔའ་ཕུང་པོ་རྣམ་པར་འཇིག་པ་ལ་སྨྲས་པ། ཚེ་དང་ལྡན་པ་ཕུང་པོ་རྣམ་པར་འཇིག་པ་བཅོམ་ལྡན་འདས་ཀྱིས་ཕུང་པོ་ལྔ་པོ་འདི་འཇིག་རྟེན་དུ་བསྟན་པ་ནི་འདི་ལྟ་སྟེ། གཟུགས་ཀྱི་ཕུང་པོ་དང་། ཚོར་བའི་ཕུང་པོ་དང་། འདུ་ཤེས་དང་། འདུ་བྱེད་དང་།རྣམ་པར་ཤེས་པའི་ཕུང་པོའོ། །ཚེ་དང་ལྡན་པ་ཕུང་པོ་ལྔ་པོ་དེ་དག་ནི་ཇི་ལྟ་བུ། གཟུགས་ཀྱི་ཕུང་པོ་ནི་གང་། འདོད་པའི་ཁམས་མིག་དང་གཟུགས་ཀྱི་འདོད་ཆགས་དང་བྲལ་བ་ཡང་དག་པར་གཞོལ་བ་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱང་མིག་དང་། གཟུགས་ཀྱི་འགོག་པ་ཡང་དག་པར་གཞོལ་བ་ཞིག་
གམ། གཟུགས་དང་། གཟུགས་མེད་པའི་ཁམས་ཀྱི་མིག་དང་། གཟུགས་ཀྱི་འདོད་ཆགས་དང་བྲལ་བ་ཡང་དག་པར་གཞོལ་བ་དང་། དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་དང་ཡིད་ཀྱི་མིག་དང་། གཟུགས་ཀྱི་འདོད་ཆགས་དང་བྲལ་བས་ཡང་དག་པར་གཞོལ་བ་ནི་གང་། ཅི་གཟུགས་ཀྱི་ཕུང་པོ་འདོད་པའི་ཁམས་མིག་དང་། གཟུགས་ཀྱི་འདོད་ཆགས་དང་བྲལ་བ་ཡང་དག་པར་གཞོལ་བ་དང་། །རྣ་བ་དང་། སྣ་དང་། ལྕེ་དང་། ལུས་དང་ཡིད་ཀྱང་མིག་དང་གཟུགས་ཀྱི་འདོད་ཆགས་དང་བྲལ་བ་ཡང་དག་པར་གཞོལ་བ་དང་། གཟུགས་དང་། གཟུགས་མེད་པའི་ཁམས་མིག་དང་། གཟུགས་ཀྱི་འདོད་ཆགས་དང་བྲལ་བ་ཡང་དག་པར་གཞོལ་བའམ། འོན་ཏེ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་འདོད་པའི་ཁམས་མིག་དང་། གཟུགས་ཀྱི་འདོད་ཆགས་དང་བྲལ་བ་ཡང་དག་པར་གཞོལ་བ་དང་། གཟུགས་དང་གཟུགས་མེད་པའི་ཁམས་མིག་དང་། གཟུགས་ཀྱི་འདོད་ཆགས་དང་བྲལ་བ་ཡང་དག་པར་གཞོལ་བའམ། ཅི་འདས་པ་གཟུགས་ཀྱི་ཕུང་པོའམ། མིག་དང་། གཟུགས་ཀྱི་འདོད་ཆགས་དང་བྲལ་བ་ཡང་དག་པར་གཞོལ་བ་དང་། རྣ་བ་དང་། སྣ་དང་ལྕེ་དང་། ལུས་དང་། ཡིད་ནས་མིག་གི་བར་དུའམ། གཟུགས་དང་། གཟུགས་མེད་པའི་ཁམས་མིག་དང་། གཟུགས་ཀྱི་འདོད་ཆགས་དང་བྲལ་བ་ཡང་དག་པར་གཞོལ་བ་ཞིག་གམ། འོན་ཏེ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་དག་པར་གཞོལ་བ་ཞིག་གམ། འོན་ཏེ་ད་ལྟར་བྱུང་བ་གཟུགས་ཀྱི་ཕུང་པོ་འམ། མིག་དང་གཟུགས་ཀྱི་འདོད་ཆགས་དང་བྲལ་བ་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱང་གཟུགས་དང་གཟུགས་མེད་པའི་མིག་ནས་ཡིད་ཀྱི་བར་དུ་ཡང་དག་པར་གཞོལ་བ་ཞིག་གམ། འོན་ཏེ་ཚོར་བ་ནས་ཡིད་ཀྱི་བར་དུའམ། འོན་ཏེ་མ་འོངས་པ་གཟུགས་ཀྱི་ཕུང་པོའམ། མིག་དང་གཟུགས་ཀྱི་འདོད་ཆགས་དང་བྲལ་བ་དང་། དེ་རྣ་བ་ནས་ཡིད་ཀྱི་བར་དུ་ཡང་དག་པར་གཞོལ་བ་ཞིག་གམ། འོན་ཏེ་ཚོར་བ་ནས་ཡིད་ཀྱི་བར་དུའམ། དེ་ནས་བྱང་ཆུབ་སེམས་དཔའ་ཕུང་པོ་རྣམ་པར་འཇིག་པས་བྱང་
ཆུབ་སེམས་དཔའ་ཀུན་ཏུ་སྣང་བ་ལ་འདི་སྐད་ཅེས་སྨྲས་སོ། །རིགས་ཀྱི་བུ་འགོད་པའི་ཆོས་ལྟོས། མིག་གི་བུ་གར་གཟུགས་ཀྱི་ཕུང་པོ་དང་། །འདོད་ཆགས་དང་བྲལ་བ་འཕོས་པའང་མ་ཡིན། །མིག་གི་བུ་གར་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་ཕུང་པོ་དང་། འདོད་ཆགས་དང་བྲལ་བ་འཕོས་པ་ཡང་མ་ཡིན། སྐྱེ་མཆེད་ནི་མི་རྟོག་རྣམ་པར་མི་རྟོག་ཅིང་ལྡང་བའང་མ་ཡིན། ཕུང་པོ་ནི་ངག་གི་ལམ་དང་། དབྱངས་དང་། སྒྲ་དང་བརྗོད་པ་ལས་ཡང་དག་པར་ཤིན་ཏུ་འདས་པའོ། །དེ་ཅིའི་ཕྱིར་ཞེ་ན། རིགས་ཀྱི་བུ་ཆོས་ཐམས་ཅད་ནི་སྐད་ཅིག་མ་སྟེ། དངོས་པོ་དང་བྲལ་བའོ། །ཆོས་ཐམས་ཅད་ནི་དབྱངས་མེད་པའོ། །དབྱངས་དང་བྲལ་བའོ། །ཆོས་ཐམས་ཅད་ནི་ནམ་མཁའི་ལམ་སྟེ་མཚན་མ་མེད་པའོ། །ཆོས་ཐམས་ཅད་ནི་ཡི་གེ་མེད་པའོ། །སྨོན་པ་མེད་པའོ། །ཆོས་ཐམས་ཅད་ནི་སྐྱེ་བ་མེད་པའོ། །སྟོང་པའོ། །ཆོས་ཐམས་ཅད་ནི་ཐོབ་པ་མེད་པའོ། །ཚིག་མེད་པའོ། །ཆོས་ཐམས་ཅད་ནི་རྟོག་པ་དང་བྲལ་བའོ། །མི་ཁོམ་པའོ། །ཆོས་ཐམས་ཅད་ནི་ཆགས་པ་དང་བྲལ་བའོ། །རྐྱེན་མེད་པའོ། །ཆོས་ཐམས་ཅད་ནི་སྦྱོར་བ་དང་བྲལ་བའོ། །དམིགས་པ་མེད་པའོ། །ཆོས་ཐམས་ཅད་ནི་ལྟ་བ་དང་བྲལ་བའོ། །མཚན་ཉིད་དབེན་པའོ། །ཆོས་ཐམས་ཅད་ནི་དམིགས་པ་དང་བྲལ་བའོ། །བདག་མེད་པའོ། །ཆོས་ཐམས་ཅད་ནི་བདག་དང་བྲལ་བའོ། །བརྗོད་དུ་མེད་པའོ། །ཆོས་ཐམས་ཅད་ནི་ཡི་གེ་དང་བྲལ་བའོ། །རབ་ཏུ་ཞི་བའོ། །ཆོས་ཐམས་ཅད་ནི་ཆོས་ཉིད་མི་ཐོབ་པའོ། །མི་སྣང་བ་ཐོབ་པའོ། །ཆོས་ཐམས་ཅད་ནི་སྣང་བ་དང་བྲལ་བའོ། །ཤིན་ཏུ་ཡུལ་མེད་པའོ། །ཆོས་ཐམས་ཅད་ནི་ཡུལ་དང་བྲལ་བའོ། །ཤིན་ཏུ་རྩ་བ་མེད་པའོ། །ཆོས་ཐམས་ཅད་ནི་དབང་པོ་མེད་པའོ། །ཤིན་ཏུ་རང་བཞིན་མེད་པའོ། །ཆོས་ཐམས་ཅད་ནི་སྤྱོད་པ་རྣམ་པར་དག་པའོ། །གཉེན་པོ་མེད་པའོ། །ཆོས་ཐམས་ཅད་ནི་སེམས་མེད་པའོ། །ཆགས་པ་དང་བྲལ་བའོ། །ཆོས་ཐམས་ཅད་ནི་ཤིན་ཏུ་འཕྲོས་པའོ། །ཕུན་སུམ་ཚོགས་པ་དང་བྲལ་བའོ། །ཆོས་ཐམས་ཅད་ནི་འཇུངས་པ་མེད་པའོ། །སྤྲོས་པ་དང་བྲལ་བའོ། །ཆོས་
ཐམས་ཅད་ནི་ཤིན་ཏུ་བསམ་གཏན་དང་ལྡན་པའོ། །གཡོ་བ་དང་བྲལ་བའོ། །ཆོས་ཐམས་ཅད་ནི་ཤིན་ཏུ་སྒྲིབ་པ་མེད་པའོ། །རྡུལ་དང་བྲལ་བའོ། །ཤིན་ཏུ་བྲལ་བའོ། །ཆོས་ཐམས་ཅད་ནི་ཉོན་མོངས་པ་དང་བྲལ་བའོ། །སྟོབས་ཆུང་བའོ། །ཆོས་ཐམས་ཅད་ནི་རྩོམ་པ་དང་བྲལ་བའོ། །དངོས་པོ་མེད་པའོ། །ཆོས་ཐམས་ཅད་ནི་དངོས་པོ་དང་བྲལ་བའོ། །བྱེད་པ་མེད་པའོ། །ཆོས་ཐམས་ཅད་ནི་ལས་མི་སྟོན་པའོ། །ཚོར་བ་མེད་པའོ། །ཆོས་ཐམས་ཅད་ནི་ནམ་མཁའ་དང་ལྡན་པའོ། །ཐོས་པ་མེད་པའོ། །ཆོས་ཐམས་ཅད་ནི་དབྱངས་དང་བྲལ་བའོ། །གཟུང་དུ་མེད་པའོ། །ཆོས་ཐམས་ཅད་ནི་རང་བཞིན་གྱིས་སྡུག་པའོ། །ཤེས་པ་མེད་པའོ། ཆོས་ཐམས་ཅད་ནི་ཚོར་བ་ཆགས་པ་མེད་པའོ། །སྨིག་རྒྱུ་ལྟ་བུའོ། །ཆོས་ཐམས་ཅད་ནི་འདུ་ཤེས་དང་བྲལ་བའོ། །བྲག་ཅ་ལྟ་བུའོ། །ཆོས་ཐམས་ཅད་ནི་ངོ་བོ་ཉིད་མེད་པའོ། །གཟུགས་བརྙན་ལྟ་བུའོ། །ཆོས་ཐམས་ཅད་ནི་རབ་ཏུ་སྣང་བའི་འོད་རྣམ་པར་དག་པ་ཆུ་ཟླ་ལྟ་བུའོ། །ཆོས་ཐམས་ཅད་ནི་གཟུགས་བརྙན་དང་བྲལ་བའོ། །གཟུགས་བརྙན་ལ་བརྟེན་པའོ། །ཆོས་ཐམས་ཅད་ནི་སྤྲིན་མི་དམིགས་པའོ། །ནམ་མཁའ་དང་མཉམ་པའོ། །ཆོས་ཐམས་ཅད་ནི་གཟུགས་བརྙན་ནོ། །བསྟན་དུ་མེད་པའོ། །དངོས་པོ་མེད་པའོ། །དངོས་པོ་དང་བྲལ་བའོ། །མཚན་ཉིད་མེད་པ་ནས། མཚན་ཉིད་མེད་པ་དང་། མཚན་ཉིད་དང་བྲལ་བ་དང་། མཉམ་པའི་མཚན་ཉིད་དང་། མཚན་ཉིད་གཅིག་པ་དང་། མཚན་ཉིད་མེད་པའི་བར་དུའོ། །ཆོས་ཐམས་ཅད་ནི་བདག་མེད་པའོ། །ཆོས་ཐམས་ཅད་ནི་བདག་ཏུ་མི་དམིགས་པའོ། །ངར་སེམས་པ་མེད་པའོ། །རྟེན་མེད་པའོ། །བརྗོད་དུ་མེད་པའོ། །ཆོས་ཐམས་ཅད་ནི་ཡི་གེ་མེད་པའོ། །རིགས་ཀྱི་བུ་འདུ་བྱེད་ཐམས་ཅད་ནི་སྐད་ཅིག་མ་ཟད་པ་དང་བྲལ་བའོ་ཞེས་ཉོན་མོངས་པ་དང་འཁྲུག་པ་མེད་པར་བྱ་བའི་ཕྱིར་བདག་དང་གཞན་ལ་གནོད་པ་མེད་པ་སྤྲོས་པ་མེད་པའི་བཟོད་པ་བསྒོམ་པར་བྱའོ། །འདི་ལ་རིགས་ཀྱི་བུ་བྱང་ཆུབ་སེམས་དཔའ་དེའི་དབང་གི་བཟོད་པ་བསྒོམ་པ་ན་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་
བཟོད་པ་ཞེས་བྱ་བ་ཐོབ་བོ། །བཟོད་པ་འདི་ཐོབ་པའི་བྱང་ཆུབ་སེམས་དཔའ་སྐད་ཅིག་མ་གཅིག་དང་ཡང་དག་པར་ལྡན་པ་ཙམ་གྱིས་སངས་རྒྱས་ཀྱི་ཞིང་རྡུལ་ཤིན་ཏུ་ཕྲ་བ་སྙེད་ལས་ལྷག་པར་ལུས་ཡོངས་སུ་སྤྲུལ་ཏོ། །སངས་རྒྱས་ཀྱི་ཞིང་རྡུལ་ཤིན་ཏུ་ཕྲ་བ་སྙེད་ཀྱི་ཕྱོགས་བཅུ་སྟོང་པ་དང་། རྙོག་པ་ལྔའི་སངས་རྒྱས་ཀྱི་ཞིང་དུ་སོང་སྟེ། སངས་རྒྱས་ཀྱི་ཞིང་རེ་རེར་ཡང་རྡུལ་ཤིན་ཏུ་ཕྲ་བ་སྙེད་ཀྱི་རྣམ་པ་སྣ་ཚོགས་ཀྱི་ཆར་གཏོང་བ་ནི་འདི་ལྟ་སྟེ། ཟས་ཀྱི་ཆར་རམ། སྐོམ་གྱི་ཆར་རམ། གོས་སམ། ལྷབ་ལྷུབ་བམ། དྲིའམ། མེ་ཏོག་གམ། རིན་པོ་ཆེ་སྣ་ཚོགས་ཀྱི་ཆར་ཡང་རབ་ཏུ་འོང་ངོ་། །གང་སེམས་ཅན་ཟས་དང་། སྐོམ་དེ་ཡོངས་སུ་ཟོས་པས་ཟང་ཟིང་མེད་པའི་དགའ་བ་དང་། བདེ་བ་འཐོབ་པའི་སེམས་ཅན་དེ་འདུ་བྱེད་ཐམས་ཅད་ནི་མི་རྟག་པ། སྡུག་བསྔལ་བ། བདག་མེད་པ། སྟོང་པ་ཉིད་ཀྱི་དྲན་པ་དང་། ཚུལ་ཁྲིམས་ཐོབ་བོ། །ཁྱིམ་གྱི་བཅིངས་པ་ཐམས་ཅད་དང་། འདོད་པའི་ཡོན་ཏན་ལྔ་སྤངས་ཏེ་བྱུང་ནས་རིའི་སུལ་དང་། ཁྱིམ་མེད་པ་སྟོང་པའི་ནགས་ཚལ་སྟུག་པོར་གནས་པར་འགྱུར་རོ། །དྲང་སྲོང་གི་ཆ་བྱད་ཀྱི་རྩྭ་དང་། རྩ་བ་དང་འབྲས་བུའི་ཟས་ལ་གནས་པར་འགྱུར་རོ། །ཉེ་བར་ལེན་པའི་ཕུང་པོ་ལྔ་པོ་དེ་དག་ལ་མི་བཟད་པར་མོས་ཤིང་། བརྩོན་འགྲུས་རྩོམ་པ་ལ་སྤྲོ་བར་བྱེད་དོ། །ཉེ་བར་ལེན་པའི་ཕུང་པོ་ལྔ་པོ་འདི་དག་ལ་ནད་དང་། ཤུ་བ་དང་། ཟུག་རྔུ་དང་། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་ཡིད་ལ་བྱེད་དོ། །མངོན་པར་ཤེས་པ་ལྔ་ཐོབ་བོ། །ཚངས་པ་དང་། འཇིག་རྟེན་ལ་གཞོལ་བར་འགྱུར་རོ། །དེ་བཞིན་དུ་གོས་ནས་རིན་པོ་ཆེ་ཡོངས་སུ་སྦྱང་བའི་བར་དུ་ཡོངས་སུ་སྤྱོད་པར་བྱེད་དོ། །དེ་ཤེས་པས་ཟང་ཟིང་མེད་པའི་དགའ་བ་དང་། བདེ་བ་ཐོབ་པ་ནས་ཚངས་པ་དང་། འཇིག་རྟེན་གྱི་བར་དུ་གཞོལ་བར་འགྱུར་རོ། །བྱང་ཆུབ་སེམས་དཔའ་དེ་ལྟར་དེ་བཞིན་དུ་གང་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་འདི་དག་ཐོབ་པ་དེ་སྙིམ་པས་མེ་ཏོག་ནམ་མཁའ་ལ་གཏོར་བའི་མེ་ཏོག་དེ་ཕྱོགས་བཅུའི་སངས་རྒྱས་ཀྱི་ཞིང་རྡུལ་ཤིན་ཏུ་ཕྲ་བ་སྙེད་ཀྱི་སྟོང་པ་དང་།
རྙོག་པ་ལྔའི་སངས་རྒྱས་ཀྱི་ཞིང་དུ་སྐད་ཅིག་མ་གཅིག་གིས་སོང་བའི་མེ་ཏོག་རེ་རེ་ལ་ཡང་སངས་རྒྱས་ཀྱི་ཞིང་རྡུལ་ཤིན་ཏུ་ཕྲ་བ་སྙེད་ཀྱི་ཆོས་ཀྱི་སྒོ་བརྗོད་པའི་དབྱངས་འབྱུང་བ་ནི་འདི་ལྟ་སྟེ། ཆོས་ཐམས་ཅད་དབྱངས་མེད་པའོ། །བདུད་བཞིའི་ཡུལ་ལས་འདའ་བའོ། །ཆོས་ཐམས་ཅད་ནི་ནམ་མཁའི་ལམ་མོ། །གནས་ཡང་དག་པར་སྤོང་བའོ། །ཡི་གེ་མེད་པའོ། །ཆོས་ཐམས་ཅད་ནི་ཆགས་པ་ཡང་དག་པར་གཞོལ་བའོ། །མི་སྐྱེ་བའོ། །ཆོས་ཐམས་ཅད་ནི་ཉོན་མོངས་པ་ཡང་དག་པར་གཞོལ་བའོ། །མ་འགགས་པའོ། །ཆོས་ཐམས་ཅད་ནི་སྔོན་གྱི་དམ་ཚིག་མི་གཏོང་བའོ། །མཚན་ཉིད་མེད་པའོ། །ཆོས་ཐམས་ཅད་ནི་ཆགས་པ་ཡང་དག་པར་གཏོང་བའོ། །རྐྱེན་མེད་པའོ། །ཆོས་ཐམས་ཅད་ནི་ཀུན་ཏུ་སྦྱོར་བ་ཡང་དག་པར་གཏོང་བའོ། །གནས་མེད་པའོ། །ཆོས་ཐམས་ཅད་ནི་རྩོམ་པ་མེད་པའོ། །ཆོས་ཐམས་ཅད་ནི་བདག་གིར་བྱ་བ་དང་། ང་ཡིར་བྱ་བ་ཡང་དག་པར་གཏོང་བའོ། །ཆོས་ཐམས་ཅད་ནི་དབེན་པའོ། །འདུ་འཛི་ཡང་དག་པར་གཏོང་བའོ། །བདག་མེད་པའོ། །ཆོས་ཐམས་ཅད་ནི་བདག་དང་བྲལ་བ་ནས་བརྗོད་དུ་མེད་པའི་བར་དུའོ། །རབ་ཏུ་ཞི་བའོ། །མི་སྣང་བ་ཐོབ་པའོ། །མི་གནས་པའོ། །ཤིན་ཏུ་ཡུལ་མེད་པའོ། །ཤིན་ཏུ་རྩ་བ་མེད་པའོ། །ཤིན་ཏུ་རང་བཞིན་མེད་པའོ། །གཉེན་པོ་མེད་པའོ། ཁ་ཟས་མེད་པའོ། །ཤིན་ཏུ་འཐོར་བ་མེད་པའོ། །འཇུངས་པ་མེད་པའོ། །ཤིན་ཏུ་བསམ་གཏན་བྱེད་པའོ། །ཤིན་ཏུ་བསྒྲིབས་པ་མེད་པའོ། །ཤིན་ཏུ་འོང་བ་མེད་པའོ། །ཉམ་ཆུང་བའོ། །དངོས་པོ་མེད་པའོ། །བྱེད་པ་མེད་པའོ། །ཚོར་བ་མེད་པའོ། །ཟག་པ་མེད་པའོ། །འཛིན་པ་མེད་པའོ། །རྣམ་པར་ཤེས་པ་མེད་པའོ། །སྨིག་རྒྱུ་ལྟ་བུའོ། །བྲག་ཅ་ལྟ་བུའོ། །མིག་ཡོར་ལྟ་བུའོ། །ཆུ་ཟླ་ལྟ་བུའོ། །གཟུགས་བརྙན་ལྟ་བུའོ། །ནམ་མཁའ་དང་མཉམ་པའོ། །དངོས་པོ་མེད་པའོ། །མཚན་ཉིད་མེད་པ་ནས་མཚན་ཉིད་མེད་པ་དང་། མཚན་ཉིད་དང་བྲལ་བ་དང་། མཉམ་པའི་མཚན་ཉིད་དང་། མཚན་ཉིད་གཅིག་པ་དང་། མཚན་ཉིད་མེད་པའི་བར་དུའོ། །ཆོས་ཐམས་ཅད་ནི་བདག་མེད་པའོ། །ངར་སེམས་པ་མེད་པའོ། །
གཟུང་དུ་མེད་པའོ། །བརྗོད་དུ་མེད་པའོ། །ཆོས་ཐམས་ཅད་ནི་སྐད་ཅིག་མའོ། །འདུ་བྱེད་ཟད་པ་དང་བྲལ་བའོ་ཞེས་བཟོད་པའི་སེམས་བསྒོམ་པར་བྱའོ། །ཆོས་ཐམས་ཅད་ནི་སྐད་ཅིག་མ་ཞེས་ཞི་བའི་སེམས་བསྒོམ་པར་བྱའོ། །མཉམ་པའི་སེམས་དང་། རྣམ་པར་ཞི་བའི་སེམས་དང་། འཛིན་པ་མེད་པའི་སེམས་དང་། འབྱུང་བ་མེད་པའི་སེམས་དང་། སྒྲིབ་པ་མེད་པའི་སེམས་དང་། ཆོད་པ་མེད་པའི་སེམས་དང་། ཕྱིན་ཅི་མ་ལོག་པའི་སེམས་དང་། རྟེན་མེད་པའི་སེམས་དང་། མཉམ་པར་བཞག་པའི་སེམས་དང་། སྡུག་བསྔལ་གྱི་སེམས་བསྒོམ་པར་བྱའོ། །དེ་བཞིན་དུ་ཉེ་བར་ཞི་བ་སྟོང་པ་ཕྱི་དང་ནང་གི་འཇིག་པ་བརྗོད་པའི་ཆོས་ཀྱི་སྒོ་དང་། ཚད་མེད་གྲངས་མེད་པའི་ཆོས་ཀྱི་སྒོ་མེ་ཏོག་དེ་དག་ལ་འབྱུང་བར་འགྱུར་རོ། །སེམས་ཅན་དེ་ཡང་ཆོས་ཀྱི་སྒོ་དེ་ཐོས་ནས་ཟང་ཟིང་མེད་པའི་དགའ་བ་དང་། བདེ་བ་ཐོབ་པ་དེ་འདུ་བྱེད་ཐམས་ཅད་ནི་མི་རྟག་པ། སྡུག་བསྔལ་བ། བདག་མེད་པ། སྟོང་པ་ཉིད་ཀྱི་དྲན་པ་དང་། ཚུལ་ཁྲིམས་ཐོབ་པོ། །ཁྱིམ་གྱི་བཅིངས་པ་ཐམས་ཅད་དང་། འདོད་པའི་ཡོན་ཏན་ལྔ་ཡང་དག་པར་སྤངས་ཏེ་བྱུང་ནས་རིའི་སུལ་དང་། ཁྱིམ་མེད་པ་སྟོང་པའི་ནགས་ཚལ་སྟུག་པོར་གནས་པར་འགྱུར་རོ། །དྲང་སྲོང་གི་ཆ་བྱད་ཀྱིས་འབྲས་བུ་དང་། རྩ་བ་དང་། རྩྭའི་ཟས་ལ་གནས་པར་འགྱུར་རོ། །ཉེ་བར་ལེན་པའི་ཕུང་པོ་ལྔ་པོ་དེ་དག་ལ་མི་བཟད་པར་མོས་ཤིང་བརྩོན་འགྲུས་རྩོམ་པ་ལ་སྤྲོ་བར་བྱེད་དོ། །ཉེ་བར་ལེན་པའི་ཕུང་པོ་ལྔ་པོ་འདི་དག་ལ་ནད་དང་། ཤུ་བ་དང་། ཟུག་རྔུ་དང་། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་ཡིད་ལ་བྱེད་དོ། །མངོན་པར་ཤེས་པ་ལྔ་ཐོབ་བོ། །ཚངས་པའི་འཇིག་རྟེན་ལ་གཞོལ་བར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའ་འདི་འདྲ་བའི་བཟོད་པ་སྒོམ་པ་དེ་ནི་མིང་མི་དམིགས་སེམས་ཅན་མི་དམིགས། སྲོག་མི་དམིགས། གསོ་བ་མི་དམིགས། གང་ཟག་མི་དམིགས། གཟུགས་མི་དམིགས། ཚོར་བ་མ་ཡིན། འདུ་ཤེས་མ་ཡིན། འདུ་བྱེད་མ་ཡིན། རྣམ་པར་ཤེས་པའང་མི་དམིགས། མིག་མི་དམིགས། རྣ་བའང་མ་ཡིན། སྣའང་མ་ཡིན། ལྕེའང་མ་ཡིན། ལུས་ཀྱང་མི་དམིགས། ཡིད་ཀྱང་
མི་དམིགས་སོ། །གཟུགས་མི་དམིགས། སྒྲ་མི་དམིགས། དྲི་མི་དམིགས། རོ་མི་དམིགས། རེག་མི་དམིགས། ཆོས་མི་དམིགས། ཡིད་མི་དམིགས། ལུས་མི་དམིགས། ཚིག་མི་དམིགས། སེམས་མི་དམིགས་སོ། །སྟོང་པ་ཉིད་མི་སོགས་པ། མཚན་མ་མེད་པ། ཐུབ་པ། ཁམས་གསུམ་གཏོང་བ་མེད་པ། མངོན་པར་འདུ་མི་བྱེད་པ། མ་སྐྱེས་པ། མ་བསྒོམས་པ། མ་བྱང་བའི་བཟོད་པ་འདི་སྨྲས་སོ། །མ་བྱས་པ། བྱ་བ་མེད་པ་དེ་སྔོན་གྱི་མཐའ་ལ་བྱ་བ་མེད་པ། ཕྱི་མའི་མཐའ་ལ་འདས་པ་མེད་པ། དབུས་ཀྱི་མཐའ་ལ་ཡང་དག་པར་མེད་པ། མི་གནས་པ། མི་དམིགས་པ། ཡིད་ལ་མི་བྱེད་པའི་བཟོད་པ་འདི་བསྒོམ་པ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བ་ཞེས་བྱ་བའི་བཟོད་པ་ཐོབ་པོ། །བྱང་ཆུབ་སེམས་དཔའ་བཟོད་པ་འདི་ཐོབ་པས་ཇི་ལྟ་བུར་གོང་དུ་བཤད་པའི་རྩལ་འདི་འདྲ་བ་བྱ་བར་འགྱུར་རོ། །བྱང་ཆུབ་སེམས་དཔའ་ཕུང་པོ་རྣམ་པར་འཇིག་པ་འདི་བསྟན་པ་སྟོན་ཅིང་བརྗོད་པ་ན་བྱང་ཆུབ་སེམས་དཔའ་རྣམ་པར་མི་རྟོག་པ་ཞེས་བྱ་བས་ལེགས་སོ་ཞེས་བྱ་བ་བྱས་ཏེ། བྱང་ཆུབ་སེམས་དཔའ་མང་པོ་དག་ཅང་མི་སྨྲ་བར་གྱུར་ནས། བཅོམ་ལྡན་འདས་ཅང་མི་གསུང་བས་ཞལ་གྱིས་བཞེས་པར་གྱུར་པ་དང་། དེ་ནས་དགེ་སློང་དྲུག་ཅུ་ཙམ་འདི་སྙམ་དུ་སེམས་ཏེ། རིགས་ཀྱི་བུ་ཕུང་པོ་རྣམ་པར་འཇིག་པ་ཅི་ལ་བསམས་ཏེ་རྣམ་པ་འདི་ལྟ་བུའི་སྒྱུ་མ་འདྲ་བའི་འདུ་བྱེད་ཐམས་ཅད་སྟོན། གལ་ཏེ་གཟུགས་བདག་མེད་པ། མི་སྣང་བ། ཀུན་ནས་ལྡང་བ་མེད་པ། ཡིད་ལ་མི་བྱེད་པ། མི་རྟོག་པ། རྣམ་པར་མི་རྟོག་པ། དམིགས་པ་མེད་པ། རྒྱུ་བ་མེད་པའམ། འོན་ཏེ་འདི་ལྟ་ཅི། སེམས་ཅན་ནམ། སྲོག་གམ། སྐྱེ་བའམ། གསོ་བའམ། གང་ཟག་གམ། ཤེད་ལས་སྐྱེས་པའམ། ཤེད་ཅན་ནམ། བྱེད་པ་པོའམ། ཚོར་བ་པོའམ། ཚོར་བ་གཞན་ནམ། སྐྱེ་བའམ། ཡང་དག་པར་སྐྱེ་བའམ། གང་མི་དགའ་བ་དང་། མི་འབྱུང་བ་མེད་པར་མི་འགྱུར་བའམ། དེ་བཞིན་གཤེགས་པ་ནི་གང་དུ་བྱུང་། སྙིང་རྗེ་ཆེན་པོ་ནི་གང་
ན། ཆོས་འཆད་པ་ནི་སུ་ཞིག །ཆོས་ཀུན་ཤེས་པ་ནི་གང་ཞིག །བསླབ་པ་སྡོམ་པ་ནི་གང་ན་གནས། གལ་ཏེ་ཕུང་པོར་མི་འགྱུར་ན་དེ་ལྟར་ཁམས་དང་སྐྱེ་མཆེད་རྣམས་ཀྱང་དགེ་བ་རྣམས་ཀྱི་ཆོས་ཀྱི་འབྲས་བུ་རྣམ་པར་སྨིན་པར་མི་འགྱུར་ན། ལེགས་པར་བྱས་པ་དང་། ཉེས་པར་བྱས་པའི་ལས་ཀྱི་འབྲས་བུ་ནི་གང་དུ་སྨིན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་གང་དུ་འབྱུང་། ཉན་ཐོས་དང་། རང་རྒྱལ་བ་རྣམས་དང་། ལྷ་དང་མི་རྣམས་དང་། གང་གཞན་ཡང་སེམས་ཅན་གྱི་ལུས་སྐྱེ་མཆེད་དྲུག་གིས་བཟུང་བ་ནི་གང་དུ་བྱུང་། བདག་ནི་སྟན་ལས་ལངས་ཏེ་འགྲོ་བར་བྱ་སྙམ་མོ། །དེ་ནས་དགེ་སློང་དྲུག་ཅུ་ཙམ་སྟན་ལས་ལངས་ཏེ་དོང་ནས་དགེ་སློང་གཞན་དག་ཀྱང་ཅང་མི་སྨྲ་བར་གྱུར་པ་དང་། དེ་ནས་བྱང་ཆུབ་སེམས་དཔའ་ཕུང་པོ་རྣམ་པར་འཇིག་པ་བཅོམ་ལྡན་འདས་ལ་ངོ་ཚ་ཞིང་མི་སྤོབས་པ་དང་གནོང་བར་གྱུར་ཏོ། །དེ་ནས་བྱང་ཆུབ་སེམས་དཔའ་ལག་ན་མར་མེ་འཁོར་དེ་ཉིད་དུ་འདུས་པར་གྱུར་པ་དེས། བྱང་ཆུབ་སེམས་དཔའ་ཕུང་པོ་རྣམ་པར་འཇིག་པ་ལ་འདི་སྐད་ཅེས་སྨྲས་སོ། །དོན་གྱི་དབང་གང་མཐོང་ན་འཁོར་སྨྲ་བ་དང་བཅས་པ་ལ་ཆོས་ཀྱི་ཚུལ་རྣམ་པ་འདི་ལྟ་བུ་ཟབ་མོ་ཡང་དག་པར་སྟོན། རིགས་ཀྱི་བུ་བཅོམ་ལྡན་འདས་ཀྱིས་མདོ་སྡེ་གཞན་དག་ལས་གང་ཟག་ལྔ་རྣམས་ལ་ཆོས་ཀྱི་གཏམ་དང་། གཏམ་ངན་པ་དང་། དད་པ་མེད་པ་ལ་དད་པའི་གཏམ་དང་། གཏམ་ངན་པ་དང་། འཇུངས་པ་ལ་གཏོང་བའི་གཏམ་དང་། གཏམ་ངན་པ་དང་། ཚུལ་ཁྲིམས་ངན་པ་ལ་ཚུལ་ཁྲིམས་ཀྱི་གཏམ་དང་། གཏམ་ངན་པ་དང་། ལེ་ལོ་ལ་བརྩོན་འགྲུས་ཀྱི་གཏམ་དང་། གཏམ་ངན་པ་དང་། འཆལ་པའི་ཤེས་རབ་ལ་ཤེས་རབ་ཀྱི་གཏམ་དང་། གཏམ་ངན་པའོ་ཞེས་འདི་ལྟར་གསུངས་སོ། །ཡང་བཅོམ་ལྡན་འདས་ཀྱིས་མདོ་སྡེ་གཞན་ལས་བསྟན་པ། མཚམས་མེད་པར་བྱེད་པ་རྣམས་ལ་སྟོང་པའི་གཏམ་མི་སྨྲ་བར་བྱའོ། །ལོག་པར་ལྟ་བའི་ལུས་ཅན་རྣམས་ལ་ལུས་དྲན་པ་ཉེ་བར་གཞག་པ་མི་སྨྲ་བར་བྱའོ། །བརྐམ་པ་རྣམས་ལ་ཚོར་བ་དྲན་པ་ཉེ་བར་གཞག་པ་མི་སྨྲ་བར་བྱའོ། །ང་རྒྱལ་དང་། དྲེགས་པ་དང་། ཁ་ཟས་ལ་
ཆགས་པ་རྣམས་ལ་སེམས་དྲན་པ་ཉེ་བར་གཞག་པ་མི་སྨྲ་བར་བྱའོ། །ངོ་ཚ་བའི་ཆོས་ཀྱི་རྩ་བ་སྤོང་བ་རྣམས་ལ་ཆོས་དྲན་པ་ཉེ་བར་གཞག་པ་མི་སྨྲ་བར་བྱའོ། །མི་ཐོབ་པར་འདོད་པ་རྣམས་ལ་ལྷར་སྐྱེ་བའི་ཡོན་ཏན་མི་སྨྲ་བར་བྱའོ། །འདོད་པ་ལ་སྤྱོད་པའི་ལྷར་སྐྱེ་བ་ཡང་དག་པར་ཞུགས་པ་རྣམས་ལ་མདངས་འཕྲོག་པའི་གནོད་སྦྱིན་སྐྱེ་བའི་ཡོན་ཏན་མི་སྨྲ་བར་བྱའོ། །གཟུགས་ལ་སྤྱོད་པའི་ལྷར་སྐྱེ་བ་བཟུང་བ་རྣམས་ལ་འདོད་པ་སྤྱོད་པའི་ལྷ་དང་དཔལ་མི་སྨྲ་བར་བྱའོ། །གཟུགས་མེད་པའི་ཁམས་སུ་སྐྱེ་བ་ཡང་དག་པར་ཞུགས་པ་རྣམས་ལ་གཟུགས་ལ་སྤྱོད་པའི་ཡོན་ཏན་མི་སྨྲ་བར་བྱའོ། །གཟུགས་ལ་སྤྱོད་པའི་ལྷར་སྐྱེ་བ་བཟུང་བ་རྣམས་ལ་འདོད་པ་སྤྱོད་པའི་ལྷའི་བདེ་བ་མི་སྨྲ་བར་བྱའོ། །ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་རྣམས་ལ་རང་སངས་རྒྱས་ཀྱི་ཡོན་ཏན་མི་སྨྲ་བར་བྱའོ། །རང་སངས་རྒྱས་ཀྱི་ཐེག་པ་ལ་ཡང་དག་པར་ཞུགས་པ་རྣམས་ལ་ཉན་ཐོས་ཀྱི་ཡོན་ཏན་དག་མི་སྨྲ་བར་བྱའོ། །ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་ལ་རང་སངས་རྒྱས་ཀྱི་ཡོན་ཏན་མི་སྨྲ་བར་བྱའོ། །བྱང་ཆུབ་སེམས་དཔའ་ཕ་རོལ་ཏུ་ཕྱིན་པ་ལ་མངོན་པར་བརྩོན་པ་རྣམས་ལ་བསྡུ་བའི་དངོས་པོ་རྣམ་པ་བཞི་མི་སྨྲ་བར་བྱའོ། །བྱང་ཆུབ་སེམས་དཔའ་ཚངས་པའི་རྣམ་པར་སྤྱོད་པ་ལ་མངོན་པར་བརྩོན་པ་རྣམས་ལ་ཐ་དད་པ་ཡང་དག་པར་ཤེས་པ་བཞི་མི་སྨྲ་བར་བྱའོ། །བྱང་ཆུབ་སེམས་དཔའ་འཁོར་སྨྲ་བ་མེད་པ་ལ་རྣམ་པ་འདི་ལྟ་བུ་ཟབ་མོ་ཞི་བ་སྟོང་པ་ཉིད་ཀྱི་གཏམ་མི་སྨྲ་བར་བྱའོ། །ཉན་ཐོས་དང་། རང་སངས་རྒྱས་ཀྱི་ཐེག་པ་པའི་འཁོར་རྣམ་པ་འདི་ལྟ་བུ་སྨྲ་བ་དང་བཅས་པའི་མདུན་དུ་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་ཟབ་མོ་འདི་མི་སྨྲ་བར་བྱའོ། །དེ་ནས་བྱང་ཆུབ་སེམས་དཔའ་འཁོར་མང་པོ་དེ་ཐམས་ཅད་དང་ལྡན་པས་མགྲིན་གཅིག་ཏུ་ལེགས་སོ་ཞེས་བྱ་བ་བྱས་སོ། །བཅོམ་ལྡན་འདས་ཀྱིས་ཀྱང་བྱང་ཆུབ་སེམས་དཔའ་ལག་ན་མར་མེ་ལ་ལེགས་སོ་ཞེས་བྱ་བའི་ཚིག་གིས་སྤྲོ་བ་ཡང་དག་པར་བསྐྱེད་དོ། །ལེགས་སོ་ལེགས་སོ་ཤེས་རབ་ཆེ། །རྣམ་པར་ཤེས་
པས་མཆོག་གཅོད་པ། །མཚན་ཉིད་ཐབས་དང་ཆོས་རྣམས་ཀྱི། །དུས་ནི་ཁྱོད་ཀྱིས་རབ་ཏུ་ཤེས། །འཁོར་རྣམས་ཤེས་པ་ཅི་འདྲ་བ། །དེ་འདྲའི་ཚུལ་དུ་སྟོན་པར་བྱེད། །ཉན་ཐོས་རང་རྒྱལ་ཐེག་པ་ལ། །ཆོས་འདི་བརྗོད་པར་མི་བྱེད་དོ། །ནམ་མཁའ་མཚུངས་ཤིང་མཉམ་པ་ཡི། །བྱང་ཆུབ་སེམས་དཔའི་མདུན་དག་ཏུ། །ཆོས་འདི་རབ་ཏུ་བསྟན་པས་ན། །ཚུལ་འདི་ཀུན་དུ་ཤེས་པར་འགྱུར། །ནམ་མཁའ་ཇི་ལྟར་མཐོ་མེད་ལ། །དམའ་བ་མེད་ཅིང་གཟུགས་མེད་པ། །ཤེས་རབ་ཕ་རོལ་ཕྱིན་སྤྱོད་པའི། །བྱང་ཆུབ་སེམས་དཔའི་མཚན་ཉིད་མེད། །བསྐལ་པ་གྲངས་མེད་པ་དག་གི །འདས་པའི་རྒྱལ་བའི་སྤྱན་སྔར་ནི། །སྨྲ་བ་མེད་པའི་འཁོར་རྣམས་ལ། །ཁྱོད་ཀྱི་ཆོས་འདི་ཐོས་པ་དང་། །ཇི་ལྟར་རྒྱལ་བ་དེས་བསྟན་པའི། །གྲགས་པ་ཆེན་པོའི་བཟོད་པ་འདི། །བརྩོན་འགྲུས་བརྟན་པའི་སེམས་ཅན་ལ། །འཇིགས་མེད་པ་འདི་རབ་ཏུ་བསྟན། །བྱང་ཆུབ་སེམས་དཔའ་རབ་དག་ཅིང་། །ཡོན་ཏན་རྒྱ་མཚོ་མཐའ་མེད་པ། །སྐལ་བ་ལྡན་པའི་མདུན་དུ་ནི། །ཆོས་འདི་ཡང་ནི་རབ་ཏུ་བསྟན། །ཉན་ཐོས་ཐེག་པ་མངོན་བརྩོན་དང་། །རང་རྒྱལ་དག་གི་མངོན་དགའ་ལ། ཆོས་འདི་རབ་ཏུ་བསྟན་པས་ན། །དེ་ཉིད་འཚང་རྒྱར་མི་འགྱུར་རོ། །མི་ཤེས་པས་ནི་སྤོང་བ་དང་། །མོས་པ་མེད་པར་སྐྱེས་པས་ན། །བསོད་ནམས་མང་པོ་འབྱུང་མེད་ཅིང་། །ངན་འགྲོར་ཡང་ནི་མྱུར་དུ་འགྲོ། །ཏིང་འཛིན་བཟོད་པའི་གཟུངས་ཀྱིས་ནི། །གལ་ཏེ་དེ་ལུས་སྦྱང་བྱས་ཏེ། །བྱང་ཆུབ་ལམ་ལ་བརྩོན་བྱའི་ཕྱིར། །ལ་ལ་ཐབས་དང་དེ་བྲལ་བ། །འཁོར་དང་གང་ཟག་རྣམས་ཀྱིས་ཀྱང་། །སེམས་ཀྱིས་རྟོག་པར་མི་བྱེད་དོ། །འཆལ་པའི་ཤེས་རབ་སྣོད་མིན་ལ། །སྟོང་པ་ཞི་བ་སྨྲ་བར་བྱེད། །དེ་ཡང་མྱུར་དུ་སྤངས་པས་ན། །མུན་པའི་ཕུང་པོས་བསྒྲིབས་པ་དག །གཞན་དག་གི་ནི་གནས་བཅུ་ལ། །མྱུར་དུ་ཡང་ནི་འགྲོ་བར་འགྱུར། །དམྱལ་བ་ཡི་དགས་བྱོལ་སོང་དུ། །ལྷ་མ་ཡིན་དང་ལུས་སྲུལ་པོ། །གནོད་སྦྱིན་སྲིན་པོ་གཏུམ་པོ་ཡང་། །ཡང་དང་ཡང་ནི་འདིར་སྐྱེའོ། །མིར་གྱུར་དཀའ་བྱེད་ཐོབ་པ་དག །གལ་ཏེ་ཇི་ལྟར་ཐོབ་ན་ཡང་། །སྨད་པའི་གདོལ་པ་རྣམས་དང་ནི། །འོན་
པ་ལོང་བ་ཞར་བ་དང་། །རྟག་ཏུ་ནད་དང་ཉམ་ཆུང་བ། །སྐུར་པ་འདེབས་ཤིང་མཆོད་པ་མེད། །ཟས་དང་སྐོམ་དང་བྲལ་བ་སྟེ། །མཁས་པ་རྣམས་ཀྱིས་སྨད་པར་འགྱུར། །ཕ་དང་མ་ལ་བཀུར་སྟི་མེད། །ཉེས་པར་བྱས་པ་རྟག་ཏུ་སྤྱོད། །སེམས་ཅན་རྣམས་ལ་སྙིང་རྗེ་མེད། །ངན་འགྲོར་ཡང་ནི་འགྲོ་བར་འགྱུར། །འདིར་ནི་རབ་ཏུ་སོང་བ་ཡི། །དགེ་སློང་དྲུག་ཅུ་ཙམ་འདི་དག །ཡིད་ཀྱིས་རྟོག་པ་ཞེ་སྡང་བ། །ངན་འགྲོར་ཡང་ནི་མྱུར་དུ་འགྲོ། །ལུས་དབང་བྱས་པའི་སེམས་ཅན་འདི། །གང་གིས་བཟོད་པ་འདི་བསྟན་ཅིང་། །ཐབས་ལ་མངོན་སུམ་མ་ཡིན་པ། །དེས་ནི་དགེ་སློང་དེ་སོང་ངོ་། །ཡེ་ཤེས་ཐབས་དང་ལྡན་པ་དག །ཕ་རོལ་སེམས་ལ་ལྟ་བ་ཡི། །འཇིག་རྟེན་ལ་ནི་སྒྲོན་འཛིན་པ། །སེམས་ཅན་ཀུན་ལ་སྨན་པར་སྨྲ། །ཐམས་ཅད་དོན་གྱི་རྗེས་ཤེས་པ། །ཐོག་མར་ཡང་ནི་འཁོར་ལྟོས་ལ། །ཅི་འདྲར་འགྱུར་བའི་འཁོར་རྣམས་ལ། །དེ་འདྲ་བར་ནི་ཆོས་ཀྱང་ཤོད། །དེ་ནས་ཡང་བྱང་ཆུབ་སེམས་དཔའ་ལག་ན་རིན་པོ་ཆེས་འདི་སྐད་ཅེས་སྨྲས་སོ། །རིགས་ཀྱི་བུ་ཇི་ལྟ་བུར་ཉན་ཐོས་ཀྱིས་བཅོམ་ལྡན་འདས་ཀྱི་སེང་གེའི་ཁྲི་བཤམས་ཏེ། ཉན་ཐོས་འདུལ་བའི་ཕྱིར་སྨྲ་བར་འགྱུར་རོ་ཞེས་བདག་གིས་ཡོངས་སུ་ཤེས་སོ། །རིགས་ཀྱི་བུ་ཡང་འདིས་སྔོན་མ་ཐོས་པ་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་བསྟན་པ་ན། ཡང་བཅོམ་ལྡན་འདས་ཀྱིས་ཇི་ལྟ་བུར་བདག་ལ་ཐུགས་བརྩེ་བའི་སླད་དུ་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་ཡོན་ཏན་གྱིས་དམིགས་པ་སྦྱོར་བ་རྒྱ་ཆེན་པོས་བཤད་པར་བདག་ཀྱང་བཅོམ་ལྡན་འདས་ལ་གསོལ་བ་གདབ་ཅིང་། །བདག་དང་སེམས་ཅན་གཞན་ལ་ཡང་ཐུགས་བརྩེ་བའི་སླད་དུ་རྗེས་སུ་གཟུང་བར་འགྱུར་སྙམ་མོ། །དེ་ནས་བྱང་ཆུབ་སེམས་དཔའ་ལག་ན་མར་མེས་བྱང་ཆུབ་སེམས་དཔའ་ལག་ན་རིན་པོ་ཆེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་གང་གི་དུས་ལ་བབ་པར་ཤེས། །དེ་ནས་བྱང་ཆུབ་སེམས་དཔའ་ལག་ན་མར་མེ་སྟན་ལས་ལངས་ཏེ། །བླ་གོས་ཕྲག་པ་གཅིག་ཏུ་བྱས་ཏེ། །བཅོམ་ལྡན་འདས་གང་ན་བ་དེ་ལོགས་སུ་ཐལ་
མོ་སྦྱར་ཏེ་ཕྱག་བྱས་ནས། བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་པ། ཐུབ་པ་ཚངས་པ་རབ་ཏུ་དགའ་མཛད་པ། །ཡེ་ཤེས་ཉམས་པའི་འགྲོ་ལ་སྒྲོན་མ་འཛིན། །གྲོལ་དང་རིག་ལ་ཁྱོད་ནི་དང་བར་མཛད། །རྡུལ་དང་བྲལ་བའི་ཆོས་ཀྱི་སྒོ་འདི་སྟོན། །རྒྱལ་བ་ཉི་མ་གྲོལ་ལ་མར་མེ་མཛད། །སེམས་ཅན་དུ་མ་ལ་ནི་སྣང་མཛད་པ། །ལམ་རྣམས་རབ་བསྟན་ལམ་ནི་ཁྱོད་སྟོན་པ། །མཆོག་གི་ཆོས་ཀྱི་སྒོ་འདི་བསྟན་པར་མཛོད། །ནམ་མཁའི་རང་བཞིན་ཡོངས་སུ་དག་པའི་ཐུགས། །ཐུགས་དམ་མི་གཡོ་ཇི་ལྟར་རི་བརྟན་བཞིན། །ཐུབ་པ་འཇིག་རྟེན་ཟླ་བའི་འོད་འདྲ་བ། །ཚུལ་མདོག་བཟོད་པའི་དགེ་བ་འདི་ཡང་སྟོན། །སྙིང་རྗེ་གནས་ཤིང་འགྲོ་ལ་བཟོད་མཛོད་པ། །ཁྱོད་ཀྱི་ཆོག་ཤེས་པ་ནི་མཆོག་ཏུ་ཆེ། །རྒ་འཆི་ནད་གསུམ་རབ་ཏུ་ཞི་མཛད་པ། །བཟོད་པ་མཆོག་གི་ཡོན་ཏན་འདི་ཡང་སྟོན། །ཐུབ་པ་སེང་གེ་མུ་སྟེགས་འཇིགས་པར་མཛད། །འགྲོ་བ་དགའ་མཛད་ཀ་ལ་པིང་ཀའི་སྐད། །མུ་སྟེགས་ཅན་གྱི་འཁོར་མངས་རྣམ་འཇིག་པ། །མར་མེའི་བཟོད་པ་འདི་ཡང་བསྟན་པར་མཛོད། །ས་དང་མཉམ་པ་བཟོད་པ་མཆོག་གི་ཐུགས། །བདེ་དང་སྡུག་བསྔལ་རེག་ལ་ཁྲོ་མི་མཛད། །མཐོན་པོ་མ་ཡིན་ད་ལྟར་མཐོ་མིན་པ། །ཡོངས་མིན་གཟིགས་ཏེ་བཟོད་པ་འདི་ཡང་གསུངས། །ཡེ་ཤེས་མཆོག་གིས་ང་ཡི་ང་རྒྱལ་གྱི། །རླུང་ལངས་ལྟ་བུའི་ཉོན་མོངས་དགྲ་ཡང་གཏོར། །དེས་ནི་བཟོད་པའི་དམ་པ་འདི་ཐོབ་པ། །ལམ་གྱི་མེ་ཡིས་སྲེད་པའི་ཆུ་ཡང་བསྐམས། །ཁྱོད་ཀྱིས་ལྟ་བ་ལྕུག་མ་སྲེད་ཆུ་ཚིག །ཀླུ་ལྟ་བུར་ནི་ཆོས་ཀྱི་ཆར་གཏོང་བ། །དེས་ནི་འཁོར་འདི་དགའ་བར་གྱུར་པ་སྟེ། །ཡོངས་སུ་སྨིན་ལ་གཟིགས་ཤིང་བཟོད་འདི་གསུང་། །སེམས་ཅན་རྣམས་ལ་རྣམ་གྲོལ་ཡོན་ཏན་སྐྱེད། །བཟོད་པ་མཆོག་གི་ཡོན་ཏན་འདི་སྟོན་ཅིང་། །གང་གི་བསམ་པ་དྲི་མ་མེད་བཟོད་འགྱུར། །དེ་ཐོབ་པ་ཡི་ཡོན་ཏན་འདི་མཐའ་ཡས། །སྤྱོད་ཡུལ་ནམ་མཁའི་མདོག་གིས་འདུལ་བ་ཡི། །ཐུབ་པས་འདས་པའི་བཟོད་པ་འདི་གསུངས་དང་། །ད་ལྟར་གྱི་ཡང་བཟོད་པ་འདི་གསུངས་པ། །ཐུགས་རྗེར་དགོངས་ཁྱོད་བཟོད་པ་
འདི་ཡང་གསུངས། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་རིན་ཆེན་ལག་ལ་ཅང་མི་གསུང་བས་ཞལ་གྱིས་བཞེས་སོ། །དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གང་ན་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་བསྟན་པར་ང་ཡང་དགོངས་སོ་སྙམ་མོ། །ལྷ་བྲན་གྱིས་གསོལ་པ། སྤོས་ཀྱི་ངད་ལྡང་བའི་རི་ལ་སྔོན་ཡང་དག་པར་རྫོགས་པའི་སངས་རྒྱས་ཀྱིས་བཟོད་པ་འདི་བསྟན་ནས་ཇི་ལྟ་བུའི་སྤོས་ཀྱི་ངད་ལྡང་བའི་རི་ལ་སྔོན་གྱི་ཡང་དག་པར་རྫོགས་པའི་སངས་རྒྱས་ཀྱིས་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་འདི་བཤད་པར་འགྱུར་རོ་ཞེས་བཅོམ་ལྡན་འདས་བདག་ཉིད་ཡེ་ཤེས་བསྟན་པ་ལ་འཇུག་གོ །དེ་ནས་ཡང་བཅོམ་ལྡན་འདས་སྐར་མདའི་བདག་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཏིང་ངེ་འཛིན་དེས་བཅོམ་ལྡན་འདས་དྲང་སྲོང་གི་བརྟུལ་ཞུགས་དང་། སྤྱོད་ལམ་དང་། མཚན་མ་དང་། དབྱིབས་ཀུན་ཏུ་སྣང་སྟེ། དྲང་སྲོང་དེ་ཡང་རྒན་པོ་དང་། རྒས་པ་དང་། འཁོགས་པ་དང་། སྐྲ་རིང་པོའི་རལ་པ་འཆང་བ་དང་། ཨག་ཙོམ་རིང་པོ་དང་། དབྱུག་པ་དང་། རིལ་བ་དང་། གཙང་མ་འཛིན་མེའི་སྦྱིན་སྲེག་ཆེན་པོ་འབར་བར་བྱེད་དོ། །དེ་ལས་ཀྱང་འོད་ཀྱི་ཕུང་བོ་ཁ་དོག་སྣ་ཚོགས་དང་། ཁ་དོག་མཐའ་ཡས་པ་དང་། ཁ་དོག་བརྒྱ་སྟོང་དུ་མ་དང་། ཁ་དོག་རྒྱ་ཆེན་པོ་ཤིན་ཏུ་ཡོངས་སུ་དག་པ་དྲི་མ་མེད་པའི་འོད་འབྱུང་ངོ་། །དེའི་འོད་སྣང་བས་ཕྱོགས་བཅུའི་ཞིང་སྟོང་པ་དང་། རྙོག་པ་ལྔའི་སངས་རྒྱས་ཀྱི་ཞིང་མཐའ་ཡས་མུ་མེད་པའི་སྐར་མ་དང་། རིན་པོ་ཆེ་དང་། གློག་དང་། འོད་དང་། ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་གྱི་འོད་ཀྱང་མི་མངོན་མི་སྣང་ངོ་། སེམས་ཅན་དམྱལ་བ་དང་། བྱོལ་སོང་དང་། ཡི་དགས་ཀྱི་ལྟ་བ་ཡང་མི་མངོན་མི་སྣང་ངོ་། །དེའི་ཚེ་དྲང་སྲོང་ཐུབ་པ་མ་གཏོགས་པར་སེམས་ཅན་རྣམས་ཀྱི་སྒྲ་དང་། བརྗོད་པ་དང་། དབྱངས་དང་། ཚིག་དང་། ཡི་གེ་དང་། ཆུང་ངུ་ན་ས་དང་། ཆུ་དང་། མེ་དང་། རླུང་གི་སྒྲ་ཡང་མི་གྲག་
གོ །དེའི་ཚེ་ན་ཕྱོགས་བཅུའི་སངས་རྒྱས་ཀྱི་ཞིང་མཐའ་ཡས་མུ་མེད་པ་ན་སེམས་ཅན་གང་ལ་ལ་ཐེག་པ་ཆེན་པོ་ལ་ཡང་དག་པར་ཞུགས་པ་དེ་ཐམས་ཅད་དྲང་སྲོང་གི་བརྟུལ་ཞུགས་དང་། ལུས་དང་མཚན་མ་དང་། དབྱིབས་ཀུན་ཏུ་སྣང་ངོ་། །ཡང་ཐེག་པ་ཆེན་པོ་ལ་ཡང་དག་པར་ཞུགས་པའི་དྲང་སྲོང་མ་གཏོགས་པར་ཉན་ཐོས་སམ། །རང་རྒྱལ་བའི་ཐེག་པ་པའི་དྲང་སྲོང་ནི་ཀུན་ཏུ་མི་སྣང་ངོ་། །ཡང་ཐེག་པ་ཆེན་པོ་ལ་ཡང་དག་པར་ཞུགས་པའི་དྲང་སྲོང་དེས་ཉན་ཐོས་དང་། རང་སངས་རྒྱས་མི་མཐོང་ཞིང་ཉན་ཐོས་དང་། རང་སངས་རྒྱས་ཀྱི་ཐེག་པ་པ་ཡང་མི་མཐོང་ངོ་། །དེའི་ཚེ་ན་གང་ཡང་ཉན་ཐོས་འཁོར་དེར་འདུག་པ་དེ་དེ་བཞིན་གཤེགས་པ་མི་མཐོང་ཞིང་། དེ་བྱང་ཆུབ་སེམས་དཔའ་ཡང་ཡང་དག་པར་རྗེས་སུ་མི་མཐོང་ངོ་། །གང་ཡང་འདིར་འདུག་འདུག་པ་འདུས་པར་གྱུར་པ་གཞན་དུ་ན་ཅུང་ཟད་གཟུགས་སྣང་བ་ཡང་ཡང་དག་པར་རྗེས་སུ་མི་མཐོང་ངོ་། །སྣང་བ་རྒྱ་ཆེན་པོས་ནི་འཇིག་རྟེན་ཐམས་ཅད་ཁྱབ་པར་ཡང་དག་པར་རྗེས་སུ་མི་མཐོང་ངོ་། དེ་ནས་ཉན་ཐོས་ཆེན་པོ་དེས་ཀུན་ཤེས་ཀཽ་དི་ནྱ་ལ་སྨྲས་པ། གནས་བརྟན་ཀཽ་དི་ནྱ་བཅོམ་ལྡན་འདས་གང་ན་ཀཽ་དི་ནྱས་སྨྲས་པ། བཅོམ་ལྡན་འདས་ད་ལྟར་གང་ན་ཞེས་བྱ་བ་ནི་མི་ཤེས་སོ། །མི་མཐོང་ངོ་། །དེ་ནས་ཉན་ཐོས་ཆེན་པོ་དེས་འོད་སྲུང་ཆེན་པོ་ལ་སྨྲས་པ། སྦྱངས་པ་སྨྲ་བའི་ནང་ན་བཅོམ་ལྡན་འདས་ཀྱིས་ཁྱོད་མཆོག་ཏུ་བསྟན་ན། བཅོམ་ལྡན་འདས་ད་ལྟར་གང་ན་བ་སོམས་ཤིག །འོད་སྲུང་ཆེན་པོས་སྨྲས་པ། བཅོམ་ལྡན་འདས་ད་ལྟར་གང་ན་ཞེས་བྱ་བ་མི་ཤེས་སོ། །མི་མཐོང་ངོ་། །དེ་ནས་ཉན་ཐོས་ཆེན་པོ་དེས་ཚེ་དང་ལྡན་པ་ཤ་ར་དྭ་ཏིའི་བུ་ལ་སྨྲས་པ། གནས་བརྟན་ཤཱ་རིའི་བུ་ཤེས་རབ་དང་ལྡན་པའི་ནང་ན་བཅོམ་ལྡན་འདས་ཀྱིས་ཁྱོད་མཆོག་ཏུ་བསྟན་ན། བཅོམ་ལྡན་འདས་གང་ན་བ་སོམས་ཤིག །ཤཱ་རིའི་བུས་སྨྲས་པ། ཚེ་དང་ལྡན་པ་སངས་རྒྱས་ཀྱི་ཞིང་མཐའ་མེད་པས་བཅོམ་ལྡན་འདས་ད་ལྟར་གང་ན་ཞེས་བྱ་བ་མི་ཤེས་སོ། །མི་མཐོང་ངོ་། །དེ་ནས་ཉན་ཐོས་ཆེན་པོ་དེས་མཽང་གལ་ཡ་ན་ལ་སྨྲས་པ། ཚེ་དང་ལྡན་པ་མཽང་གལ་ཡ་ན་རྫུ་འཕྲུལ་དང་ལྡན་པའི་ནང་ན་བཅོམ་ལྡན་འདས་
ཀྱིས་ཁྱོད་ཀྱང་མཆོག་ཏུ་བསྟན་ན། བཅོམ་ལྡན་འདས་ད་ལྟར་གང་ན་བ་སོམས་ཤིག །མཽང་གལ་ཡ་ནས་སྨྲས་པ། གང་གི་ཚེ་ཚེ་དང་ལྡན་པ་འོད་སྲུང་ཆེན་པོས་སྨྲས་པ་དེ་ཉིད་ན་བདག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ནི་རྫུ་འཕྲུལ་གྱི་སྟོབས་ཀྱིས་རྗེས་སུ་ཤེས་ཀྱི། བཅོམ་ལྡན་འདས་ད་ལྟར་གང་ན་བཞུགས་པ་གང་དུ་བཞུད་ཅེས་བྱ་བ་ནི་མི་མཐོང་ངོ་། །མི་ཤེས་སོ། །དེ་ནས་ཉན་ཐོས་ཆེན་པོ་དེས་ཚེ་དང་ལྡན་པ་མ་འགགས་པ་ལ་སྨྲས་པ། ལྷའི་མིག་གི་ནང་ན་བཅོམ་ལྡན་འདས་ཀྱིས་ཁྱོད་ཀྱང་མཆོག་ཏུ་བསྟན་ན། བཅོམ་ལྡན་འདས་ད་ལྟར་གང་དུ་བཞུད། གང་ན་གནས། སྤྱོད་པ་ནི་ཅི་འདྲ་ཅི་འདྲར་སྤྱོད། ཁྱོད་ཀྱི་ལྷའི་མིག་གིས་ལྟོས། མ་འགགས་པས་སྨྲས་པ། ཁོ་བོས་འཕགས་པའི་ཤེས་རབ་ཀྱི་མིག་གིས་མཐའ་ཡས་མུ་མེད་པའི་སངས་རྒྱས་ཀྱི་ཞིང་རྣམ་པར་བལྟས་ན། བཅོམ་ལྡན་འདས་ད་ལྟར་གང་ན་བཞུགས། གང་དུ་བཞུད་ཅེས་བྱ་བ་དག་ཀྱང་མི་ཤེས་སོ། །མི་མཐོང་ངོ་། །དེས་སྨྲས་པ། ཡང་ཐ་དད་པར་ཡང་དག་པར་ཤེས་པ་ཐོབ་པའི་ཉན་ཐོས་ཀྱི་ཡེ་ཤེས་གང་ལ་འང་མི་འཇུག་གི །བཟོད་པ་ཐོབ་པའི་བྱང་ཆུབ་སེམས་དཔའི་ཡེ་ཤེས་ནི་དེ་ལ་འཇུག་གོ །བདག་གིས་བཅོམ་ལྡན་འདས་ད་ལྟར་གང་དུ་བཞུད། གང་ན་བཞུགས་ཞེས་བྱང་ཆུབ་སེམས་དཔའ་ལ་དྲི་སྙམ་པ་དང་། དེ་ནས་ཉན་ཐོས་ཆེན་པོ་དེས་བྱང་ཆུབ་སེམས་དཔའ་གཅིག་ཀྱང་ཡང་དག་པར་རྗེས་སུ་མ་མཐོང་ངོ་། །ཚེ་དང་ལྡན་པ་ཤཱ་རིའི་བུས་སྨྲས་པ། ཚེ་དང་ལྡན་པ་འདི་ལ་རིགས་ཀྱི་བུ་གཞན་ཞིག་གིས་ཕུང་པོ་བཤད་པར་བྱས་པ་དེ་ན་དགེ་སློང་དྲུག་ཅུ་ཙམ་པོ་སྟན་ལས་ལངས་ཏེ་དོང་བས། ཚེ་དང་ལྡན་པ་བཅོམ་ལྡན་འདས་ཐུགས་མི་དགྱེས་ནས་བཏང་སྙོམས་ཤིང་འཕགས་པ་སངས་རྒྱས་ཀྱི་སྤྱོད་པས་རིགས་ཀྱི་བུ་དང་ཐབས་ཅིག་ཏུ་སྤྱོད་དོ། །བདག་ཅག་ནི་རང་རང་གི་སྤྱིལ་པོར་ཞུགས་ཤིང་བསམ་གཏན་བྱ་སྙམ་སྟེ། དེ་ནས་ཉན་ཐོས་ཆེན་པོ་དེ་དག་རང་རང་གི་སྤྱིལ་པོར་ཞུགས་ནས་བསམ་གཏན་བྱེད་དོ།། །།བམ་པོ་གཉིས་པ། དེ་ནས་དེའི་ཚེ་དེའི་དུས་ན་ཕྱོགས་བཅུའི་
སངས་རྒྱས་ཀྱི་ཞིང་ཚད་མེད་གྲངས་མེད་པ་ན་ཐེག་པ་ཆེན་པོ་ལ་ཡང་དག་པར་ཞུགས་པའི་སེམས་ཅན་དེ། བདག་དྲང་སྲོང་གི་ཆ་བྱད་དུ་མཐོང་ནས་དེ་འདི་སྙམ་དུ་སེམས་ཏེ། གལ་ཏེ་བདག་ཅག་དྲང་སྲོང་དུ་གྱུར་པ་ན། གང་དྲང་སྲོང་ལས་ཤིན་ཏུ་ཁྱད་པར་དུ་འཕགས་པ་དེ་བདག་ཅག་གི་མཁན་པོར་བཟུང་ངོ་ཞེས། །བདག་ཅག་རྣམ་པར་བལྟ་བར་བྱའོ་སྙམ་པ་དེ་ཐམས་ཅད་རྙོག་པ་སེལ་བ་ཞེས་བྱ་བ་བྱེད་པ་ཅན་གྱི་གྲོང་རྡལ་ན་དྲང་སྲོང་ཆེན་པོ་ཤཱཀྱ་ཐུབ་པ་རྒས་པ། འཁོགས་པ། གཏུགས་པ་རྣམས་མེ་ཏོག་དང་། འབྲས་བུ་དང་། སྨན་དང་། ཟས་དང་། སྐོམ་རྣམ་པ་སྣ་ཚོགས་ཀྱིས་མེ་ལ་གཏོར་བ་ཐག་མི་རིང་བར་མཐོང་ནས། དེ་འདི་སྙམ་དུ་སེམས་ཏེ། དྲང་སྲོང་ཆེན་པོ་འདི་ནུས་པ་ཆེན་པོ་མཐུ་ཆེན་པོ་འདིའི་མཐུས་སྣང་བ་ཆེན་པོ་འབྱུང་ངོ་། །དྲང་སྲོང་འདི་གང་ན་བ་དེ་ལོགས་སུ་ཉེ་བར་འགྲོ་ཞིང་དྲང་སྲོང་གི་བརྟུལ་ཞུགས་དང་སྤྱོད་པའི་རྗེས་སུ་བསླབ་པར་བྱའོ་སྙམ་མོ། །དེ་ནས་དེའི་ཚེ་དེའི་དུས་ན་བྱང་ཆུབ་སེམས་དཔའ་དྲང་སྲོང་བྱེ་བ་ཁྲག་ཁྲིག་བརྒྱ་སྟོང་བཅོམ་ལྡན་འདས་ཀྱི་ཐད་དུ་ཉེ་བར་དོང་ངོ་། །དེ་ནས་བྱང་ཆུབ་སེམས་དཔའ་དྲང་སྲོང་ཏིང་ངེ་འཛིན་དང་། བཟོད་པ་དང་། གཟུངས་དབང་དུ་བྱས་པ་དེ་སེམས་རྩེ་གཅིག་པའི་སྟོབས་ཀྱིས་བཅོམ་ལྡན་འདས་ལ་མཆོད་པའི་ལས་ཀྱི་ཕྱིར་བརྩོན་པ་དེ་ཉིད་ཀྱི་ཚེ། མི་མཇེད་ཀྱི་འཇིག་རྟེན་གྱི་ཁམས་འདིར་གང་ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་ལ་ལ་ཐེག་པ་ཆེན་པོ་ལ་ཡང་དག་པར་ཞུགས་པ་དེ་ཐམས་ཅད་དྲང་སྲོང་གི་ཆ་བྱད་ཀྱིས་དྲང་སྲོང་ཤཱཀྱ་ཐུབ་པའི་ཐད་དུ་དེར་ཉེ་བར་དོང་ངོ་། །འཁོར་ཐམས་ཅད་དང་ལྡན་པ་དེ་བཅོམ་ལྡན་འདས་ཇི་ལྟ་བུར་སྤོས་ཀྱི་ངད་ལྡང་བའི་རི་ལ་བཞུད་ནས་དེ་ན་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་་བའི་བཟོད་པ་འདི་བསྟན་པའི་ཕྱིར། ཆོས་ཀྱི་འཁོར་ལོ་གཉིས་པ་ལ་ཡང་། འཇུག་པར་བཞེད་པའི་བཅོམ་ལྡན་འདས་ཀྱི་ཐུགས་སེམས་ཀྱིས་ཤེས་སོ། །བདག་ཅག་ནི་བཅོམ་ལྡན་འདས་ཀྱི་དོན་གྱི་ཕྱིར་ལམ་བརྒྱན་པ་སྦྱང་བར་བྱ་ཞིང་
ལམ་དེས་དྲང་སྲོང་གི་མཆོག་སྤོས་ཀྱི་ངད་ལྡང་བའི་རི་ལ་ཉེ་བར་འགྲོ་བར་བྱའོ་སྙམ་སྟེ། དེ་ནས་ཀླུའི་རྒྱལ་པོ་དགའ་བོ་དང་། བསྙེན་དགའ་བོ་དང་། རྒྱ་མཚོ་དང་། ནོར་མདོག་དང་། འཇོག་པོ་དང་། ཡིད་ཡོད་ལ་སོགས་པ་ཀླུའི་རྒྱལ་པོ་བྱེ་བ་ཕྲག་དྲུག་ཅུ་ཙམ་ལྷན་ཅིག་ཏུ་དྲང་སྲོང་གི་ཆ་བྱད་ཀྱིས་ལྷ་རྫས་ཀྱི་རིན་པོ་ཆེ་གསེར་དང་། དངུལ་དང་། བཻ་དཱུཪྱ་དང་། ཤེལ་དང་། བྱི་རུ་དང་། ཨསྨ་གར་བ་དང་། མུ་ས་ར་གལ་བ་ལ་སོགས་པ་རིན་པོ་ཆེ་སྣ་བདུན་གྱི་ཤིང་ཏ་ལའི་ཕྲེང་བ་གསེར་གྱི་ཤིང་ལ་དངུལ་གྱི་ལོ་མ་དང་། མེ་ཏོག་དང་འབྲས་བུ་དང་། དངུལ་གྱི་ཤིང་ལ་གསེར་གྱི་ལོ་མ་དང་། མེ་ཏོག་དང་། འབྲས་བུ་ནས་མུ་ས་ར་གལ་བའི་ཤིང་གི་བར་དུ་རིན་པོ་ཆེ་སྣ་བདུན་གྱི་ལོ་མ་དང་། མེ་ཏོག་དང་། འབྲས་བུའི་ཕྲེང་བའི་རྒྱན་གྱིས་ལམ་དེ་བརྒྱན་པར་སྤྲུལ་ཏོ། །ཤིང་ཏ་ལའི་ཕྲེང་བ་དེ་ལ་ལྷ་རྫས་ཀྱི་གོས་སྟོང་ཕྲག་བྱེ་བ་རྣམ་པ་དུ་མ་རྣམ་པ་སྣ་ཚོགས་མངོན་པར་རབ་ཏུ་འཕྱང་ངོ་། །ལྷ་དེ་དག་ཀྱང་དྲང་སྲོང་གི་ཆ་བྱད་ཀྱིས་དཀའ་ཐུབ་ཀྱི་གནས་ནས་སྤོས་ཀྱི་ངད་ལྡང་བའི་རིའི་བར་དུ་ལམ་གྱི་ཞིང་དཔག་ཚད་བཅུ་པ་སྦྱོངས་སོ། །ལམ་གྱི་མུ་གཉིས་སུ་ལྷ་རྫས་ཀྱི་གསེར་ནས། མུ་ས་ར་གལ་བའི་བར་དུ་རིན་པོ་ཆེ་སྣ་བདུན་གྱི་སྟེགས་བུར་སྤྲུལ་ཏོ། །གསེར་གྱི་ཤིང་རྟ་ལ་དངུལ་གྱི་སྙིང་པོ་འཕྱང་བ་ནས། མུ་ས་ར་གལ་བའི་བར་དུ་སྨྲ་བར་བྱའོ། །འོག་ལོགས་སུ་བཻ་དཱུཪྱ་བཟང་པོ་ནས། གོང་ལོགས་ཀྱི་གནས་སུ་ཤེལ་གྱི་བར་དུ་རྒྱ་ཆེན་པོས་སྨྲ་བར་བྱའོ། །སྤྲིན་གྱི་ལྷའི་བུ་དྲང་སྲོང་གི་ཆ་བྱད་ཀྱིས་ལམ་གྱི་མུ་གཉིས་སུ་རྫིང་རྙོག་པ་མེད་པ་རིན་པོ་ཆེ་སྣ་བདུན་གྱི་ཐེམ་སྐས་ཅན་གྱི་རྫིང་དེ་དག་ལ་གསེར་གྱི་ཕྱེ་མ་བདལ་བ། རྫིང་དེ་དག་ལ་ཡང་ལྷ་རྫས་ཀྱི་མེ་ཏོག་ཨུད་པ་ལ་དང་། པད་མ་དང་། ཀུ་མུ་ད་དང་། པུན་ད་རཱི་ཀ་དང་། ཨ་ཏི་མུག་ཏ་ཀ་དང་། ཙམ་པ་ཀ་དང་། ཨ་ཤོ་ཀ་དང་། མུ་ཙུ་ཀུན་ད་དང་། མན་འཛུ་ཤ་ཀ་དང་། བ་ཏ་ལི་དང་། པ་རི་ཤ་ཀ་དང་། གྷན་དྷ་ད་ནུ་པ་སྐ་རི་དང་། སུ་མར་དང་། ཨ་མྲ་དང་། འཛམ་བུ་དང་། མྲི་ན་ལ་དང་། མཆོག་ཏུ་དྲི་ཞིམ་པ་རྣམ་པ་སྣ་ཚོགས་སུ་མངོན་པར་སྤྲུལ་ཏོ། །ས་བླ་ན་གནམ་གྱི་གནོད་སྦྱིན་དྲང་སྲོང་གི་ཆ་བྱད་ཀྱིས་ལམ་
སྦྱོང་བར་བྱེད་དོ། །གཞན་འཕྲུལ་དབང་བྱེད་ཀྱི་ལྷའི་བུ་ཡང་དྲང་སྲོང་གི་ཆ་བྱད་ཀྱིས་ལམ་གྱི་མུ་གཉིས་ལ་ལྷ་རྫས་ཀྱི་རིན་པོ་ཆེ་སྣ་བདུན་གྱི་རྒྱལ་མཚན་མཆོག་འཛིན་ཏོ། །རྒྱལ་མཚན་གྱི་མཆོག་དེ་དག་ལ་ལྷ་རྫས་ཀྱི་གོས་དང་། དོ་ཤལ་དང་། རྒྱན་རབ་ཏུ་འཕྱང་ངོ་། །འཕྲུལ་དགའི་ལྷའི་བུ་ཡང་དྲང་སྲོང་གི་ཆ་བྱད་ཀྱིས་ལྷ་རྫས་ཀྱི་རིན་པོ་ཆེ་སྣ་བདུན་གྱི་ཁང་བུ་བརྩེག་མ་མངོན་པར་སྤྲུལ་ཏོ། །ཁང་བུ་བརྩེག་མ་དེ་དག་གི་ཕྱོགས་བཞི་ཀུན་ཏུ་རིན་པོ་ཆེ་སྣ་བདུན་གྱིས་བྱས་སོ། །ཁང་བུ་བརྩེག་མ་དེ་ལ་ཡང་ལྷ་རྫས་ཀྱི་དོ་ཤལ་སྣ་ཚོགས་དང་། གོས་སྣ་ཚོགས་དང་། རྒྱན་སྣ་ཚོགས་མངོན་པར་རབ་ཏུ་འཕྱང་ངོ་། །མེ་ཏོག་སྣ་ཚོགས་ཀྱིས་ཀུན་ཏུ་གཏོར་ཏོ། །ཁང་བུ་བརྩེག་མ་དེ་ལ་ལྷ་རྫས་ཀྱི་རོལ་མོ་རྒྱ་ཆེན་པོ་ཡིད་དུ་འོང་བ་སྣ་ཚོགས་བྱུང་ངོ་། །སངས་རྒྱས་ཀྱི་བྱིན་གྱི་རླབས་ཀྱིས་རོལ་མོ་དཀྲོལ་བ་དང་། གླུའི་སྒྲ་བསྒྲགས་པ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་སྒྲས་ཁྱབ་པར་གྱུར་ཏོ། །ཀླུའི་བུ་མོ་བརྒྱ་སྟོང་ཕྲག་དྲུག་ཅུ་རྩ་བརྒྱད་ལམ་མཛེས་པས་བཅོམ་ལྡན་འདས་ལ་མཆོད་པའི་ལས་ཀྱི་ཕྱིར་དྲང་སྲོང་གི་རྒྱན་ཐམས་ཅད་ཀྱིས་བརྒྱན་ནས་རིན་པོ་ཆེ་སྣ་ཚོགས་ཀྱི་ཆར་ཕབ་བོ། །དགའ་ལྡན་གྱི་ལྷའི་བུ་བརྒྱ་སྟོང་དུ་མ་ཡང་དྲང་སྲོང་གི་ཆ་བྱད་ཀྱིས་འདི་ལྟ་སྟེ། ལྷ་རྫས་ཀྱི་མེ་ཏོག་མན་དཱ་ར་བ་དང་། མན་དཱ་ར་བ་ཆེན་པོ་དང་། ཙམ་པ་ཀ་དང་། བ་རི་ཡ་ཏྲ་དང་། འཛོ་ཤ་དང་། འཛོ་ཤ་ཀ་ཆེན་པོ་དང་། རོ་ཙ་དང་། རོ་ཙ་ཀ་ཆེན་པོ་དང་། བལ་ལ་དང་། བལ་ལ་ཆེན་པོ་དང་། ཙཀྲ་དང་།ཙཀྲ་ཆེན་པོའི་འོད་དྲི་མ་མེད་པ། འདབ་མ་བརྒྱ་པ། འདབ་མ་སྟོང་པ། འདབ་མ་བརྒྱ་སྟོང་པ། ཀུན་ནས་འོད། ཀུན་ནས་དྲི། ཀུན་ནས་རྣམ་པར་རྒྱུ་བའི་དྲི། །རྟག་ཏུ་མེ་ཏོག་འོད་སྣང་བ། །ཁ་དོག་མཐའ་མེད་པ། བལྟར་འོས་པ་མིག་གིས་མངོན་པར་དགའ་བ། རྣམ་པ་སྣ་ཚོགས་ཀྱིས་བཅོམ་ལྡན་འདས་ཀྱི་དོན་དང་། བཅོམ་ལྡན་འདས་ཀྱི་མཆོད་པའི་ལས་ཀྱི་ཕྱིར་ལམ་དེ་མཛེས་པར་བྱས་སོ། །ཆར་པའི་སྤྲིན་གྱི་ལྷའི་བུ་བརྒྱ་སྟོང་དུ་མ་དག་ཀྱང་དྲང་སྲོང་གི་ཆ་བྱད་ཀྱིས་ཆུ་ལས་སྐྱེས་པ་དང་། ཐང་ལས་སྐྱེས་པའི་མེ་ཏོག་གི་ཆར་རབ་ཏུ་ཕབ་བོ། །
ཀླུའི་གླང་པོ་བརྒྱ་སྟོང་དུ་མ་ཡང་དྲང་སྲོང་གི་ཆ་བྱད་ཀྱིས་ཡང་དག་པར་གནས་ཤིང་འདི་ལྟ་སྟེ། མུ་ཏིག་སྔོན་པོའི་ཆར་དང་། གོ་ཤིར་ཤའི་སྙིང་པོའི་ཆར་ལ་སོགས་ཏེ། ཆར་སྣ་ཚོགས་རབ་ཏུ་ཕབ་བོ། །གང་ལ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་སྔོན་བྱང་ཆུབ་ཏུ་སེམས་བསྐྱེད་པའི་ལྷའམ། ལྷའི་དབང་པོའམ། ཀླུ་འམ། ཀླུའི་དབང་པོའམ། གནོད་སྦྱིན་དང་། སྲིན་པོ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། ཡི་དགས་དང་། ཤ་ཟ་དང་། གྲུལ་བུམ་དང་། གྲུལ་བུམ་གྱི་དབང་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བའི་བར་དུ་དེ་ཐམས་ཅད་དྲང་སྲོང་གི་ཆ་བྱད་ཀྱིས་མེ་ཏོག་སྣ་ཚོགས་དང་། ཕྲེང་བ་སྣ་ཚོགས་དང་། དྲི་སྣ་ཚོགས་དང་། བྱུག་པ་སྣ་ཚོགས་དང་། རོལ་མོ་དཀྲོལ་བ་སྣ་ཚོགས་དང་བརྡུང་བ་དང་། གླུ་སྣ་ཚོགས་ཡོངས་སུ་བཟུང་ནས་བཅོམ་ལྡན་འདས་སྤྱན་མི་འཛུམས་པའི་ཞལ་ལ་རྣམ་པར་ལྟ་བའི་ཕྱིར་འཁོད་དོ། །གང་ལ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་ལྷའི་བུ་མོའམ། གནོད་སྦྱིན་གྱི་བུ་མོའམ། ནམ་མཁའ་ལྡིང་གི་བུ་མོ་འམ། ལྷ་མ་ཡིན་གྱི་བུ་མོའམ། མི་འམ་ཅིའི་བུ་མོའམ་ལྟོ་འཕྱེ་ཆེན་པོའི་བུ་མོ་དེ་ཐམས་ཅད་དྲང་སྲོང་གི་ཆ་བྱད་ཀྱིས་བཅོམ་ལྡན་འདས་ལ་མཆོད་པའི་ལས་ཀྱི་ཕྱིར་རོལ་མོ་བརྡུང་བ་དང་། དཀྲོལ་བ་དང་། གླུ་ཡོངས་སུ་བཟུང་སྟེ།དམར་པོ་དང་། དཀར་པོ་དང་། ལེ་བརྒན་དང་། ཤེལ་གྱི་ཁ་དོག་གི་གོས་ཀྱི་ཆར་ཁད་ཀྱིས་ཁད་ཀྱིས་རབ་ཏུ་ཕབ་བོ། །མི་འམ་ཅིའི་བུ་མོ་བརྒྱ་སྟོང་དུ་མ་ཡང་དྲང་སྲོང་གི་ཆ་བྱད་ཀྱིས་བཅོམ་ལྡན་འདས་ལ་མཆོད་པ་སྣ་ཚོགས་ཀྱི་ལས་ཀྱི་ཕྱིར་བརྩོན་ནོ། །ཚངས་པའི་དབང་པོ་སྔོན་བྱང་ཆུབ་ཏུ་སེམས་བསྐྱེད་པ་བྱེ་བ་ཁྲག་ཁྲིག་བརྒྱ་སྟོང་དུ་མ་ཡང་དྲང་སྲོང་གི་ཆ་བྱད་ཀྱིས་བཅོམ་ལྡན་འདས་ལ་སྟོད་ཅིང་སྤྱན་སྔར་འཁོད་དོ། །བརྒྱ་བྱིན་གྱི་དབང་པོ་བརྒྱ་སྟོང་དུ་མ་ཡང་དྲང་སྲོང་གི་ཆ་བྱད་ཀྱིས་ཕྱག་འཚལ་བར་བྱེད་ཅིང་། མི་འམ་ཅིའི་དབང་པོ་བརྒྱ་སྟོང་དུ་མ་ཡང་དྲང་སྲོང་གི་ཆ་བྱད་ཀྱིས་སྟོད་ཅིང་ཕྱག་འཚལ་ལོ། །
དྲི་ཟའི་དབང་པོ་བརྒྱ་སྟོང་དུ་མ་ཡང་དྲང་སྲོང་གི་ཆ་བྱད་ཀྱིས་རབ་ཏུ་གསལ་བའི་སེམས་ཀྱིས་ཞལ་ལ་རྣམ་པར་ལྟའོ། །ཀླུའི་དབང་པོ་བརྒྱ་སྟོང་དུ་མ་ཡང་དྲང་སྲོང་གི་ཆ་བྱད་ཀྱིས་དུས་དང་འཐུན་པའི་ཙན་དན་གྱི་ཕྱེ་མའི་ཆར་ཆེན་པོ་རབ་ཏུ་འབེབས་སོ། །ལྷ་མ་ཡིན་གྱི་དབང་པོ་བརྒྱ་སྟོང་དུ་མ་ཡང་དྲང་སྲོང་གི་ཆ་བྱད་ཀྱིས་ཕྱོགས་བཞིར་རླུང་མཆོག་ཏུ་འཇམ་པས་ཀུན་ཏུ་རེག་པ། མཆོག་ཏུ་དྲི་ཞིམ་པ། མཆོག་ཏུ་འཇམ་པ་གཏོང་ངོ་། །གནོད་སྦྱིན་གྱི་དབང་པོ་བརྒྱ་སྟོང་དུ་མ་ཡང་དྲང་སྲོང་གི་ཆ་བྱད་ཀྱིས་མེ་ཏོག་གི་གདུགས་འཛིན་ཏོ། །གནོད་སྦྱིན་གྱི་དབང་པོ་བརྒྱ་སྟོང་དུ་མ་ཡང་དྲང་སྲོང་རྒན་པོར་གྱུར་ནས་གསེར་གྱི་དབྱུག་པའི་གདུགས་འཛིན་ཅིང་བཅོམ་ལྡན་འདས་ཀྱི་གཡས་ལོགས་སུ་འཁོད་དེ། བཅོམ་ལྡན་འདས་ལ་དེ་བཞིན་དུ་ལྟའོ། །གྲུལ་བུམ་བརྒྱ་སྟོང་དུ་མའང་དྲང་སྲོང་རྒན་པོའི་ཆ་བྱད་ཀྱིས་གསེར་གྱི་དབྱུག་པའི་གདུགས་འཆང་ཞིང་བཅོམ་ལྡན་འདས་ཀྱི་གཡོན་ལོགས་སུ་འཁོད་དེ། བཅོམ་ལྡན་འདས་ལ་དེ་བཞིན་དུ་ལྟའོ། །ནམ་མཁའ་ལྡིང་གི་དབང་པོ་བརྒྱ་སྟོང་དུ་མ་ཡང་དྲང་སྲོང་གི་ཆ་བྱད་ཀྱིས་ནམ་མཁའི་དཀྱིལ་དུ་གསེར་གྱི་འཕྲེང་བ་འཕྱང་བར་གྱུར་ཏོ། །ལྷའི་བུ་མོ་བརྒྱ་སྟོང་དུ་མ་ཡང་དྲང་སྲོང་གི་ཆ་བྱད་ཀྱིས་མེ་ཏོག་གི་ཆུན་པོའི་ཆར་ཆེན་པོ་མངོན་པར་རབ་ཏུ་འབེབས་སོ། །ཀླུའི་བུ་མོ་བརྒྱ་སྟོང་དུ་མ་ཡང་དྲང་སྲོང་གི་ཆ་བྱད་ཀྱིས་མུ་ཏིག་དམར་པོའི་ཆར་མངོན་པར་རབ་ཏུ་འབེབས་སོ། །དྲི་ཟའི་བུ་མོ་བརྒྱ་སྟོང་དུ་མ་ཡང་དྲང་སྲོང་གི་ཆ་བྱད་ཀྱིས་མུ་ཏིག་དམར་པོའི་ཆར་མངོན་པར་རབ་ཏུ་འབེབས་སོ། །གནོད་སྦྱིན་གྱི་བུ་མོ་བརྒྱ་སྟོང་དུ་མ་ཡང་དྲང་སྲོང་གི་ཆ་བྱད་ཀྱིས་ཙན་དན་གྱི་ཕྱེ་མའི་ཆར་མངོན་པར་རབ་ཏུ་འབེབས་སོ། །ལྷ་མ་ཡིན་གྱི་བུ་མོ་བརྒྱ་སྟོང་དུ་མ་ཡང་དྲང་སྲོག་གི་ཆ་བྱད་ཀྱིས་རྒྱན་གྱི་ཆར་མངོན་པར་རབ་ཏུ་འབེབས་སོ། །ནམ་མཁའ་ལྡིང་གི་བུ་མོ་བརྒྱ་སྟོང་དུ་མ་ཡང་དྲང་སྲོང་གི་ཆ་བྱད་ཀྱིས་འཛམ་བུ་ཆུ་ཀླུང་གི་གསེར་གྱི་ཆར་མངོན་པར་རབ་ཏུ་འབེབས་སོ། །ལྟོ་འཕྱེ་ཆེན་པོའི་བུ་མོ་བརྒྱ་སྟོང་དུ་མ་ཡང་དྲང་སྲོང་གི་ཆ་བྱད་ཀྱིས་
ནམ་མཁའི་དཀྱིལ་བརྒྱན་པར་བྱེད་དོ། །སའི་གནོད་སྦྱིན་བརྒྱ་སྟོང་དུ་མ་ཡང་དྲང་སྲོང་གི་ཆ་བྱད་ཀྱིས་དབྱངས་གཏོང་བར་བྱེད་དོ། །བར་སྣང་གི་གནོད་སྦྱིན་བརྒྱ་སྟོང་དུ་མ་ཡང་དྲང་སྲོང་གི་ཆ་བྱད་ཀྱིས་ནམ་མཁའ་ལ་འཕྱེན་ཏོ། །བདུད་བརྒྱ་སྟོང་དུ་མ་ཡང་དྲང་སྲོང་གི་ཆ་བྱད་ཀྱིས་ལྷུང་ལྷུང་ལྡེགས་ཀྱི་སྒྲ་འབྱིན་པ་ལ་འཇུག་གོ །དྲང་སྲོང་ལྷ་བརྒྱ་སྟོང་ཕྲག་བརྒྱད་ཅུ་རྩ་བཞི་རང་བཞིན་གྱིས་བརྟན་པའི་བརྟུལ་ཞུགས་ཡང་དག་པར་སྤྱོད་པ་དང་། དྲང་སྲོང་སྟོང་ཕྲག་བརྒྱད་ཅུ་རྩ་བཞི་རང་བཞིན་གྱིས་བརྟན་པའི་བརྟུལ་ཞུགས་ཡང་དག་པར་སྤྱོད་པ་དག་ལྷ་རྫས་ཀྱི་མེ་ཏོག་མན་དཱ་ར་བ་ཆེན་པོ་བླངས་ཏེ། བཅོམ་ལྡན་འདས་ཀྱི་དོན་གྱི་ཕྱིར་རྙོག་པ་སེལ་བ་ནས་སྤོས་ཀྱི་ངད་ལྡང་བའི་རིའི་བར་དུ་མཚམས་སྦྱོར་བའི་ཆར་རབ་ཏུ་འབྱིན་ཏོ། །དེ་ནས་བཅོམ་ལྡན་འདས་བཞུད་པའི་ཞབས་ཀྱིས་མེ་ཏོག་གི་སྙིང་པོ་ཀུན་ཏུ་གནོན་པར་གྱུར་ཏོ། །ལྷའི་བུ་ཉི་མ་དང་ཟླ་བ་བརྒྱ་སྟོང་དུ་མ་ཡང་དྲང་སྲོང་གི་ཆ་བྱད་ཀྱིས་མེ་ཏོག་གི་ཆུན་པོའི་ཆར་མངོན་པར་རབ་ཏུ་འབེབས་སོ། །དྲི་ཟ་བྱེ་བ་ཁྲག་ཁྲིག་བརྒྱ་སྟོང་དུ་མ་ཡང་དྲང་སྲོང་གི་ཆ་བྱད་ཀྱིས་རོལ་མོ་དཀྲོལ་བས་དྲང་སྲོང་ཐུབ་པའི་སྐུ་ལ་འོད་ཟེར་བྱེ་བ་བརྒྱ་སྟོང་འབྱུང་ངོ་། །དེ་ནས་ལྷ་ཡོན་ཏན་ཅན་ཞེས་བྱ་བ་སྤོས་ཀྱི་ངད་ལྡང་བའི་རི་ལ་གནས་པ་ལྷ་བྲན་བརྒྱ་སྟོང་ཕྲག་བརྒྱད་ཅུ་རྩ་བཞི་དང་ལྷན་ཅིག་ཏུ་དྲང་སྲོང་གི་ཆ་བྱད་ཀྱིས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་ཏེ་ཕྱག་འཚལ་ནས། བཅོམ་ལྡན་འདས་ལ་མགྲིན་གཅིག་ཏུ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །སེམས་ཅན་མི་སྲུན་གྲོལ་བྱེད་རྐང་གཉིས་མཆོག །མཉེས་དཀའ་རྒྱལ་བ་གཟུངས་ངན་འདྲེན་མཛད་ཅིང་། །སྡུག་བསྔལ་གཟིར་ལ་བདེ་བའི་མཆོག་སྦྱིན་པ། །རྒྱལ་བ་རྐང་གཉིས་དམ་པ་འདིར་གཤེགས་གསོལ། །སྲེད་པ་རབ་སྤངས་རྣམ་ཐར་གསུམ་སྟོན་ཅིང་། །འགྲོ་ལ་དུས་གསུམ་ནང་ན་ཡེ་ཤེས་ཀྱིས། །བསླབ་པ་གསུམ་སྟོན་དྲི་མ་གསུམ་སྤངས་པ། །ཁམས་གསུམ་ལས་འདས་ཐུབ་པ་འདིར་གཤེགས་གསོལ། །འགྲོ་ལ་ཕྱིན་ཅི་ལོག་བཞི་རྣམ་པར་གྲོལ། །འཁོར་བཞི་དག་གིས་ཞབས་ལ་བསྙེན་བཀུར་ཞིང་། །འགྲོ་ལ་འཕགས་པའི་བདེན་བཞི་རབ་སྟོན་པ། །ཟླ་བ་བས་ཀྱང་ལྷག་པ་འདིར་གཤེགས་གསོལ། །ཐུབ་པ་ཕུང་པོ་ལྔ་འདི་རབ་སྟོན་པ། །འདོད་པ་ལྔ་ལས་སྐྱེ་བོ་རྣམ་གྲོལ་ཞིང་། །འཕགས་པའི་ཤེས་རབ་ཡན་ལག་ལྔ་སྟོན་པ། །
འགྲོ་བ་ལྔ་ཡི་བཙོན་ར་རྣམ་པར་བཀྲོལ། །དབང་པོ་དྲུག་འདུལ་གནས་པ་སྐྱོན་མེད་ཅིང་། །སྲེད་ལུས་དྲུག་ལ་ཤིན་ཏུ་རྣམ་གྲོལ་ཤེས། །སུམ་ཅུ་རྩ་དྲུག་དྲན་སྟོན་སེམས་ཅན་མཆོག །སྤོས་ཀྱི་ངད་ལྡན་རི་འདིར་གཤེགས་སུ་གསོལ། །རྒྱལ་བ་མཉམ་བཞག་རབ་ཏུ་དུལ་བའི་ཐུགས། །ཤིན་ཏུ་བསྒོམས་པ་བྱང་ཆུབ་དམ་པ་མཆོག །ཡེ་ཤེས་སེམས་ཅན་བྱེ་བ་རབ་དུལ་མཛད། ཁ་ལོ་རབ་སྒྱུར་སྤོས་ངད་རི་འདིར་སྤྱོན། །རྒྱལ་བ་ཡེ་ཤེས་སེམས་ཅན་རབ་སྟོན་པ། །ཡེ་ཤེས་ཀྱིས་ནི་འཇིག་རྟེན་སྣང་མཛད་ནས། །ཁྱོད་ནི་མུན་པས་བསྒྲིབས་ལ་ཡེ་ཤེས་སྟོན། །ཐུབ་པ་དགོན་པའི་གནས་འདིར་གཤེགས་སུ་གསོལ། །འཛམ་བུའི་གླིང་འདིར་སངས་རྒྱས་འབྱུང་བ་དག །འདི་ལ་སྔོན་གྱུར་ལ་ལ་ཐར་འདོད་ཅིང་། །མི་ཡི་དབང་པོ་བྱང་ཆུབ་འདིར་ཐོབ་པ། །མི་ཡི་འདྲེན་མཁན་ཁྱོད་ནི་འདིར་གཤེགས་གསོལ། །སྦྱིན་དང་འདུལ་བ་གཏོང་ཞིང་དུལ་བའི་ཐུགས། །སེམས་ཅན་ནང་ན་གཙོ་བོ་སྟོབས་བཅུའི་མཆོག །སེམས་ཅན་དབུལ་ལ་གཉེན་པ་འཕགས་པ་ཁྱོད། སྤོས་ཀྱི་ངད་ལྡང་རི་འདིར་གཤེགས་སུ་གསོལ། །བར་འགའ་ཁྱོད་ཀྱིས་ལོ་དྲུག་དཀའ་མཛད་ཅིང་། །བར་འགར་རྒྱལ་བ་བདུད་ཕྱིར་ཤིང་ལ་བཞུགས། །དཔའ་བོ་ཚུལ་གཅིག་ཏུ་ནི་ལམ་སྟོན་པ། །ཐུབ་པ་འདིར་གཤེགས་བཟོད་པ་རབ་ཏུ་སྟོན། །་བཱ་རཱ་ཎ་སཱིར་འཁོར་ལོ་དམ་པ་བསྐོར། །ཤེས་རབ་དམ་པ་དག་གི་མཛོད་ཅིག་གསུངས། །འཇིག་རྟེན་ཐམས་ཅད་འདི་ལ་ཁུར་བོར་བ། །སྤོས་ཀྱི་ངད་ལྡང་རི་འདིར་བཟོད་པ་གསུངས། །དེ་ནས་བཅོམ་ལྡན་འདས་ལ་ལྷ་དུ་མས་མདུན་དུ་བདར་ཅིང་བྱང་ཆུབ་སེམས་དཔའ་དུ་མས་བསྐོར་ནས་གདན་ལས་བཞེངས་པ་དང་། དེ་ཉིད་ཀྱི་ཚེ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལན་དྲུག་ཏུ་རབ་ཏུ་གཡོས་སོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་གང་སེམས་ཅན་ཉན་ཐོས་སམ། ཉན་ཐོས་ཀྱི་ཐེག་པ་པའམ། རང་སངས་རྒྱས་སམ། རང་སངས་རྒྱས་ཀྱི་ཐེག་པ་པའམ། གང་ཡང་སེམས་ཅན་གཞན་ཐམས་ཅད་གང་ནམ་མཁའ་ལ་རྒྱུ་བའམ། གང་ས་ལ་རྒྱུ་བ་འམ། གང་ཆུ་ལ་རྒྱུ་བ་དེ་
ཐམས་ཅད་དྲན་པ་རྒྱ་ཆེན་པོ་སོ་སོར་ཐོབ་བོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ལག་མཐིལ་དུ་སྐྱེས་པ་སྣང་བ་རྒྱ་ཆེན་པོས་ཁྱབ་པར་མཐོང་ངོ་། །མིག་གི་གཟུགས་ལ་ནི་ཅུང་ཟད་ཀྱང་སྣང་བར་མི་འགྱུར་རོ། །གང་ཡང་སེམས་ཅན་དཀའ་ཐུབ་ངན་པའི་རྣལ་འབྱོར་དང་ལྡན་པ་དེ་ཡང་ངོ་མཚར་ཆེན་པོ་ཐོབ་བོ། །འདི་ལྟ་སྟེ། མེའི་བརྟུལ་ཞུགས་ཅན་དང་། ཟླ་བའི་བརྟུལ་ཞུགས་ཅན་དང་། ཉི་མའི་བརྟུལ་ཞུགས་ཅན་དང་། འཇིག་རྟེན་གསུམ་གྱི་བརྟུལ་ཞུགས་ཅན་དང་། དེ་ལ་སོགས་པའི་སེམས་ཅན་གང་ལ་ལ་ལྟ་བ་ཉམ་ང་བ་རྣམ་པ་སྣ་ཚོགས་ཐོབ་པ། ལོག་པ་ལ་ལྟ་བ་ཅན་དེ་ཐམས་ཅད་དཀའ་ཐུབ་ངན་པ་སྤངས་ནས་ཕྱོགས་དང་ཕྱོགས་མཚམས་སུ་བལྟས་སོ། །ཅིའི་རྒྱུ་ཅིའི་རྐྱེན་གྱིས་ན་རྣམ་པ་དེ་ལྟ་བུའི་ས་གཡོ་བ་འདི་དང་། སྣང་བ་ཆེན་པོ་འདི་འཇིག་རྟེན་དུ་འབྱུང་བར་འགྱུར། དེ་ནས་བཅོམ་ལྡན་འདས་དྲང་སྲོང་ཆེན་པོའི་སྤྱན་སྔར་གང་མེའི་ཕུང་པོ་ཆེན་པོ་འདུག་པ་དེ་ཡུངས་ཀར་གྱི་འབྲུ་ཙམ་དུ་མངོན་པར་སྤྲུལ་ཏེ། ཕྱོགས་བཅུའི་སངས་རྒྱས་ཀྱི་ཞིང་རྣམ་པར་དག་པ་དང་། མ་དག་པ་ཚད་མེད་གྲངས་མེད་པ་རྣམས་སུ་གཏོར་ཏོ། །སངས་རྒྱས་ཀྱི་ཞིང་འདིར་གང་སངས་རྒྱས་བཅོམ་ལྡན་འདས་དག་བཞུགས་ཏེ་འཚོ་སྐྱོང་བའི་སངས་རྒྱས་དེ་དག་གི་སྤྱན་སྔར་མེར་སྣང་བ་དེ་མེ་ཏོག་མན་དཱ་ར་བ་ཆེན་པོར་ཀུན་ཏུ་གནས་པར་འདུག་པར་གྱུར་ཏོ། །འཁོར་ཇི་ཙམ་པ་འདུས་པ་དང་། གང་སྔོན་བྱང་ཆུབ་ཏུ་སེམས་བསྐྱེད་པ་དེ་ཐམས་ཅད་དྲང་སྲོང་གི་ཆ་བྱད་ཀྱིས་སངས་རྒྱས་བཅོམ་ལྡན་འདས་དེ་དག་གི་སྤྱན་སྔར་འཁོད་དོ། །ཤར་ཕྱོགས་ཀྱི་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་ཆུ་བོ་གང་གཱ་གཉིས་ཀྱི་བྱེ་མ་སྙེད་ལས་ཤིན་ཏུ་འདས་ཏེ། །དེ་ན་རྒྱལ་མཚན་དང་ལྡན་པ་ཞེས་བྱ་བའི་འཇིག་རྟེན་གྱི་ཁམས་དེར་དེ་བཞིན་གཤེགས་པ་དབང་གི་རྒྱལ་མཚན་གྱི་དཔལ་ཞེས་བྱ་བ་བཞུགས་ཏེ་འཚོ་སྐྱོང་བ་ཆོས་ཀྱང་སྟོན་ཏོ། །དེ་ན་དེ་བཞིན་གཤེགས་པ་དབང་གི་རྒྱལ་མཚན་གྱི་འཁོར་དེ་ལས་བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་དཔལ་ཞེས་བྱ་བ་དང་། བྱང་ཆུབ་སེམས་དཔའ་
སེམས་དཔའ་ཆེན་པོ་བཟའ་ཤིང་གི་ར་བའི་དཔལ་ཞེས་བྱ་བ་དེ་དྲང་སྲོང་གི་གཟུགས་དང་། ལུས་དང་། དབྱིབས་ཀྱིས་བདག་མཐོང་ངོ་། །གཞན་ཡང་ཐེག་པ་ཆེན་པོ་ལ་ཡང་དག་པར་ཞུགས་པའི་རིགས་ཀྱི་བུ་ཐམས་ཅད་དྲང་སྲོང་གི་གཟུགས་དང་ལུས་དང་དབྱིབས་ཀྱིས་མཐོང་ངོ་། །མཐོང་ནས་དེ་བཞིན་གཤེགས་པ་དབང་གི་རྒྱལ་མཚན་གྱི་དཔལ་ལ་ཡོངས་སུ་ཞུས་པ། བཅོམ་ལྡན་འདས་ཅིའི་རྒྱུ། ཅིའི་རྐྱེན་གྱིས་ན་གང་མེ་ཏོག་མེར་སྣང་བ་བཻ་དཱུཪྱའི་དབྱིག་པ་འདི་བཅོམ་ལྡན་འདས་ཀྱི་སྤྱན་སྔར་འདུག་པར་གྱུར། ཐེག་པ་ཆེན་པོ་འདི་དག་ལ་ཡང་དག་པར་ཞུགས་པའི་རིགས་ཀྱི་བུ་དེ་ཐམས་ཅད་དྲང་སྲོང་གི་ཆ་བྱད་འཛིན་པར་གྲུབ། དེ་ནས་བཅོམ་ལྡན་འདས་དེ་བཞིན་གཤེགས་པ་དབང་གི་རྒྱལ་མཚན་གྱི་དཔལ་གྱིས་རིགས་ཀྱི་བུ་དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་ནུབ་ཕྱོགས་ཀྱི་མི་མཇེད་ཀྱི་འཇིག་རྟེན་གྱི་ཁམས་ན་འདུག་ཅིང་རྙོག་པ་ལྔའི་འཇིག་རྟེན་དུ་འཇུག་པ་ན་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་འཁོར་བཞི་དག་ལ་ཐེག་པ་གསུམ་གྱི་ཆོས་སྟོན་པར་བྱེད་དོ། །དེ་བཞིན་གཤེགས་པ་དེ་ད་ལྟར་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་བསྟན་པར་འདོད་པས་དེ་བཞིན་གཤེགས་པ་སྒྲོན་མ་དང་ལྡན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དེའི་རྫུ་འཕྲུལ་རྣམ་པར་སྤྲུལ་ཏོ། །གསོལ་པ། བཅོམ་ལྡན་འདས་བཟོད་པ་འདིའི་ཐོག་མ་དང་ཐ་མ་ཇི་ལྟ་བུ་ཞིག་བཀའ་སྩལ་པ། བཟོད་པ་འདི་ནི་མུ་སྟེགས་ཅན་ཐམས་ཅད་ལ་འཇུག་པའོ། །དེ་ལྟར་མི་མཇེད་ཀྱི་སངས་རྒྱས་ཀྱི་ཞིང་དེར་སེམས་ཅན་ཆུ་བོ་བཞིས་ཁྱེར་བ་རྣམས་ལས་སྒྲོལ་བར་བྱེད་པའོ། །ཆུ་བོ་བཞི་གང་ཞེ་ན། འདོད་པའི་ཆུ་བོ་དང་། ལྟ་བའི་ཆུ་བོ་དང་། སྲིད་པའི་ཆུ་བོ་དང་། མ་རིག་པའི་ཆུ་བོ་འདི་དག་ལས་སེམས་ཅན་སྒྲོལ་བར་བྱེད་པའོ། །དད་པ་མི་ཕྱེད་པ་བཞི་ཡང་དག་པར་ལེན་དུ་འཇུག་པ། འཇུག་པར་བྱེད་པ། སོ་སོར་དགོད་པར་བྱེད་པའོ། །བཞི་གང་ཞེ་ན། སངས་རྒྱས་ལ་
དད་པ་མི་ཕྱེད་པ། སེམས་ཅན་རྣམས་ཡང་དག་པར་ལེན་དུ་འཇུག་པ། འཇུག་པར་བྱེད་པ། སོ་སོར་དགོད་པར་བྱེད་པའོ། །བསྡུ་བའི་དངོས་པོ་རྣམ་པ་བཞི་ལ་སེམས་ཅན་རྣམས་སྦྱོར་བར་བྱེད་པའོ། །ཚུལ་ཁྲིམས་ཀྱི་ཕུང་པོས་སེམས་ཅན་རྣམས་འདོད་པའི་ཆུ་བོ་ལས་སྒྲོལ་བར་བྱེད་པའོ། །ཏིང་ངེ་འཛིན་གྱི་ཕུང་པོས་སེམས་ཅན་རྣམས་ལྟ་བའི་ཆུ་བོ་ལས་སྒྲོལ་བར་བྱེད་པའོ། །ཤེས་རབ་ཀྱི་ཕུང་པོས་སེམས་ཅན་རྣམས་མ་རིག་པའི་ཆུ་བོ་ལས་སྒྲོལ་བར་བྱེད་པའོ། །རྣམ་པར་གྲོལ་བའི་ཕུང་པོས་སེམས་ཅན་རྣམས་སྲིད་པའི་ཆུ་བོ་ལས་སྒྲོལ་བར་བྱེད་པའོ། །སངས་རྒྱས་ལ་དད་པ་མི་ཕྱེད་པས་སེམས་ཅན་རྣམས་ཐེག་པ་ཆེན་པོས་སྒྲོལ་བར་བྱེད་པའོ། །ཆོས་ལ་དད་པ་མི་ཕྱེད་པས་སེམས་ཅན་རྣམས་རང་སངས་རྒྱས་ཀྱི་ཐེག་པས་སྒྲོལ་བར་བྱེད་པའོ། །དགེ་འདུན་ལ་དད་པ་མི་ཕྱེད་པས་སེམས་ཅན་རྣམས་ཉན་ཐོས་ཀྱི་ཐེག་པས་སྒྲོལ་བར་བྱེད་པའོ། །འཕགས་པ་ཡིད་དུ་འོང་བའི་ཚུལ་ཁྲིམས་ཀྱིས་ལྟ་བར་སོང་བ་ཐམས་ཅད་སྤོང་བ་ལ་སྟོན་པར་བྱེད་པའོ། །སྦྱིན་པས་སེམས་ཅན་རྣམས་ཚེའི་རྒྱ་མཚོ་ལས་སྒྲོལ་བར་བྱེད་པའོ། །ངག་སྙན་པས་ལྟ་བའི་རྒྱ་མཚོ་ལས་སྒྲོལ་བར་བྱེད་པའོ། །དོན་བྱ་བས་སེམས་ཅན་རྣམས་ཉོན་མོངས་པའི་རྒྱ་མཚོ་ལས་སྒྲོལ་བར་བྱེད་པའོ། །དོན་འཐུན་པས་སེམས་ཅན་རྣམས་ཤེས་རབ་ཀྱི་ཕ་རོལ་དུ་སྒྲོལ་བར་བྱེད་པའོ། །བྱང་ཆུབ་སེམས་དཔའ་དེ་དག་གིས་གསོལ་པ། བཙུན་པ་བཅོམ་ལྡན་འདས་བདག་ཅག་ལ་བཀའ་སྩལ་དུ་གསོལ། །དེ་བཞིན་གཤེགས་པ་ཤཱཀྱ་ཐུབ་པ་དེ་ལ་བལྟ་བ་དང་། ཕྱག་འཚལ་བ་དང་། བསྙེན་བཀུར་བའི་ཕྱིར་བདག་ཅག་ཉེ་བར་མཆིའོ། །དེ་བཞིན་གཤེགས་པ་དབང་གི་རྒྱལ་མཚན་གྱི་དཔལ་དེས་ཡང་རིགས་ཀྱི་བུ་གང་གི་དུས་ལ་དབབ་པར་ཤེས་ན་ཞེས་བཀའ་སྩལ་པ་དང་། དེ་ནས་རིགས་ཀྱི་བུ་ཡེ་ཤེས་དཔལ་དང་། བཟའ་ཤིང་གི་ར་བའི་དཔལ་དེ་གཉིས་དང་། བྱང་ཆུབ་སེམས་དཔའ་བྱེ་བ་ཕྲག་དྲུག་ཅུ་ལྷན་ཅིག་ཏུ་བཅོམ་ལྡན་འདས་དེ་བཞིན་གཤེགས་པ་དབང་གི་རྒྱལ་མཚན་གྱི་དཔལ་དེ་ལ་དྲང་སྲོང་གི་ཆ་བྱད་ཀྱིས་རྐང་པ་གཉིས་ལ་སྤྱི་བོས་ཕྱག་འཚལ་ནས་གཡས་ཕྱོགས་ནས་བསྐོར་
བ་བྱས་ཏེ་འཁོད་དོ། །སྐད་ཅིག་མ་གཅིག་ཙམ་གྱིས་མི་མཇེད་ཀྱི་སངས་རྒྱས་ཀྱི་ཞིང་དུ་ལྷགས་ནས། བཅོམ་ལྡན་འདས་དྲང་སྲོང་ཤཱཀྱ་ཐུབ་པའི་སྤྱན་སྔར་འདུག་སྟེ། ཐལ་མོ་སྦྱར་ནས་ཕྱག་འཚལ་ཏེ་འཁོད་པར་གྱུར་ཏོ། །དེ་ལ་སོགས་པ་བྱང་ཆུབ་སེམས་དཔའ་ཚད་མེད་གྲངས་མེད་པ་རྣམས་དྲང་སྲོང་གི་ཆ་བྱད་ཀྱིས་ཤར་ཕྱོགས་ཀྱི་སངས་རྒྱས་ཀྱི་ཞིང་རྣམ་པར་དག་པ་དང་། རྣམ་པར་མ་དག་པ་ཚད་མེད་གྲངས་མེད་པ་འདིར་སྐད་ཅིག་མ་གཅིག་གིས་ལྷགས་སོ། །དེ་བཞིན་དུ་ལྷོ་ཕྱོགས་ཀྱི་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་ཆུ་བོ་གང་གཱའི་བྱེ་མ་སྙེད་ལས་ཤིན་ཏུ་འདས་ཏེ། དེ་ན་རི་རབ་ཀྱི་རྒྱལ་མཚན་ཞེས་བྱ་བའི་འཇིག་རྟེན་གྱི་ཁམས་དེར་དེ་བཞིན་གཤེགས་པ་རི་རབ་ཆེན་པོ་ཞེས་བྱ་བ་བཞུགས་ཏེ། འཚོ་སྐྱོང་བ་ཆོས་ཀྱང་སྟོན་ཏོ། །སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་མངོན་པར་ཤེས་པ་ཞེས་བྱ་བ་དང་། བྱང་ཆུབ་སེམས་དཔའ་གློག་གི་མཆོག་ཅེས་བྱ་བ་དང་། བྱང་ཆུབ་སེམས་དཔའ་དེ་གཉིས་དྲང་སྲོང་གི་ཆ་བྱད་དང་། ལུས་དང་། གཟུགས་དང་། དབྱིབས་ཀྱིས་བདག་མཐོང་ངོ་། །སྔོན་མ་བྱུང་བའི་ཐུབ་པ་ཆེན་པོ་གཞན་ཡང་དྲང་སྲོང་གི་ཆ་བྱད་ཀྱིས་མཐོང་ནས་དེ་བཞིན་གཤེགས་པ་རི་རབ་ཆེན་པོ་དེ་ལ་ཡོངས་སུ་ཞུས་པ་དེ་བཞིན་དུ་ཇི་ལྟ་བུར་གོང་དུ་བཤད་པ་ནས་དེ་བཞིན་དུ་ནུབ་ཕྱོགས་ཀྱི་སངས་རྒྱས་ཀྱི་ཞིང་འདི་ལས་ཤིན་ཏུ་འདས་པའི་བར་དུ་སྟེ། དེ་ན་འདུས་པ་ཞེས་བྱ་བའི་འཇིག་རྟེན་གྱི་ཁམས་དེར་དེ་བཞིན་གཤེགས་པ་དཔལ་སྣང་བ་ཞེས་བྱ་བ་བཞུགས་ཏེ་འཚོ་སྐྱོང་བ་ཆོས་ཀྱང་སྟོན་ཏོ། །དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་དོན་ཡོད་པར་མཐོང་བ་དང་། ཀུ་མུ་དའི་གླང་པོ་ཞེས་བྱ་བ་གཉིས་ཀྱང་ཇི་ལྟར་གོང་དུ་བཤད་པ་ནས། བྱང་ཕྱོགས་ཀྱི་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་ཆུ་བོ་གང་གཱ་གསུམ་གྱི་བྱེ་མ་སྙེད་ལས་ཤིན་ཏུ་འདས་པའི་བར་དུ་སྟེ། དེ་ན་རྒྱན་གཅིག་ཅེས་བྱ་བའི་འཇིག་རྟེན་གྱི་ཁམས་དེར་དེ་བཞིན་གཤེགས་པ་རྒྱན་པོ་ཆེ་ཞེས་བྱ་བ་བཞུགས་ཏེ་འཚོ་སྐྱོང་བ་ཆོས་ཀྱང་སྟོན་ཏོ། །དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྡུལ་དང་བྲལ་བའི་འོད་དང་། ཚངས་པའི་འོད་ཅེས་བྱ་བ་
གཉིས་ཀྱང་ཇི་ལྟར་གོང་དུ་བཤད་པ་ནས། འོག་གི་ཕྱོགས་ཀྱི་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་ཆུ་བོ་གང་གཱ་གཅིག་གི་བྱེ་མ་ལས་ཤིན་ཏུ་འདས་པའི་བར་དུ་སྟེ། དེ་ན་མེ་ཏོག་ཆེན་པོ་ཞེས་བྱ་བའི་འཇིག་རྟེན་གྱི་ཁམས་དེར་དེ་བཞིན་གཤེགས་པ་ཡེ་ཤེས་ཀྱི་རྒྱལ་མཚན་ཆེན་པོ་ཞེས་བྱ་བ་བཞུགས་ཏེ་འཚོ་སྐྱོང་བ་ཆོས་ཀྱང་སྟོན་ཏོ། །དེ་ན་བྱང་ཆུབ་སེམས་དཔའ་ཡེ་ཤེས་དཔལ་ཞེས་བྱ་བ་དང་། བྱང་ཆུབ་སེམས་དཔའ་དཔལ་ཆེན་པོ་ཞེས་བྱ་བ་གཉིས་ཀྱང་ཇི་ལྟར་གོང་དུ་བཤད་པ་ནས། ཡང་སྟེང་གི་ཕྱོགས་ཀྱི་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་ཆུ་བོ་གང་གཱ་བདུན་གྱི་བྱེ་མ་སྙེད་ནས་ཤིན་ཏུ་འདས་པའི་བར་དུ་སྟེ། དེ་ན་འོད་སྣང་བ་ཞེས་བྱ་བའི་འཇིག་རྟེན་གྱི་ཁམས་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་མའི་སྙིང་པོ་ཞེས་བྱ་བ་བཞུགས་ཏེ་འཚོ་སྐྱོང་བ་ཆོས་ཀྱང་སྟོན་ཏོ། །དེ་ན་བྱང་ཆུབ་སེམས་དཔའ་ཆོས་ཀྱི་དབྱངས་དང་། བདུད་རྩི་དབྱངས་ཞེས་བྱ་བའི་བྱང་ཆུབ་སེམས་དཔའ་གཉིས་ཀྱང་ཇི་སྙེད་གོང་དུ་བཤད་པ་བཞིན་ནོ། །དེའི་ཚེ་བྱང་ཆུབ་སེམས་དཔའ་དྲང་སྲོང་གི་ཆ་བྱད་འཛིན་པས་མི་མཇེད་ཀྱི་སངས་རྒྱས་ཀྱི་ཞིང་ཐམས་ཅད་དང་ལྡན་པ་འདི་ཀུན་ཏུ་རྒྱས་ནས། དེ་བཞིན་གཤེགས་པ་དྲང་སྲོང་ཆེན་པོ་ཤཱཀྱ་ཐུབ་པ་གང་ན་བ་དེ་ལོགས་སུ་ཐལ་མོ་སྦྱར་ཏེ་ཕྱག་འཚལ་ནས་འཁོད་དོ། །མི་མཇེད་ཀྱི་སངས་རྒྱས་ཀྱི་ཞིང་འདིར་སེམས་ཅན་གང་ལ་ལ་ཐེག་པ་ཆེན་པོ་ལ་ཡང་དག་པར་མ་ཞུགས་པ་ནི་དྲང་སྲོང་གི་ཆ་བྱད་ཀྱིས་མ་གྱུར་པའོ། །རྒྱན་དེ་དག་ལ་ཉན་ཐོས་སམ། ཉན་ཐོས་ཀྱི་ཐེག་པ་པའམ། རང་སངས་རྒྱས་སམ། རང་སངས་རྒྱས་ཀྱི་ཐེག་པ་པས་ཀྱང་མི་མཐོང་ན། སེམས་ཅན་གཞན་གྱིས་མཐོང་བར་མི་འགྱུར་བ་ལྟ་ཅི་སྨོས། དེ་ནས་བཅོམ་ལྡན་འདས་དྲང་སྲོང་ཆེན་པོ་གདན་དེ་ལས་བཞེངས་ཏེ། ཐུབ་པ་དབང་པོའི་འགྲོས་དང་། ཚངས་པ་དབང་པོའི་འགྲོས་དང་། ཚངས་པ་དྲང་སྲོང་གི་འགྲོས་དང་། གཉའ་ཤིང་དུ་ལྟ་བའི་འགྲོས་དང་། ཉེ་བར་ཞི་བའི་འགྲོས་དང་། རབ་ཏུ་ཞི་བའི་འགྲོས་དང་། དགེ་སློང་རྣམས་མོས་པ་ཆེན་པོའི་འགྲོས་དང་། ལྷ་
དགའ་བའི་འགྲོས་དང་། གནོད་སྦྱིན་དུལ་བའི་འགྲོས་དང་། ལྷ་མ་ཡིན་དགའ་བར་བྱེད་པའི་འགྲོས་དང་། ཀླུ་དུལ་བའི་འགྲོས་དང་། རྒྱལ་བ་ཉོན་མོངས་པ་མེད་པའི་འགྲོས་དང་། རྣམ་པར་གྲོལ་བའི་འགྲོས་ཅི་འདྲ་བ་དེ་འདྲ་བའི་འགྲོས་སུ་བཞུད་ཅིང་སངས་རྒྱས་ཆེན་པོར་རྣམ་པར་འཕྲུལ་པའི་འགྲོས་དང་། རྒྱན་ཆེན་པོའི་འགྲོས་དང་། སངས་རྒྱས་ཀྱི་བྱིན་གྱི་རླབས་ཆེན་པོའི་འགྲོས་སུ་བཅོམ་ལྡན་འདས་སྤོས་ཀྱི་ངད་ལྡང་བའི་རི་ལ་མེ་ཏོག་གི་ཟེ་བ་ལ་ཞབས་འདེགས་པ་དང་འདོར་བས་བཞུད་ནས་སྤོས་ཀྱི་ངད་ལྡང་བའི་རི་ལ་བྱོན་ཏོ། །དཀའ་ཐུབ་ཀྱི་གནས་གཙང་མ་དྲི་ཐ་དད་པ་མེད་ཅིང་དྲི་མ་མེད་པའི་ཕྱོགས་སུ་འགྲོ་སེལ་གྱི་ལྷ་མོ་ཆེན་མོ་འོད་འདྲེས་པ་ཞེས་བྱ་བ་གང་ན་བ་དེ་ན་བཅོམ་ལྡན་འདས་བཞུགས་ཏེ། གླང་པོའི་རྣམ་པར་ལྟ་བའི་ཚུལ་གྱིས་རྣམ་པར་བལྟས་པར་གྱུར་པ་དེའི་དུས་ན་ཡང་འདི་བརྗོད་དོ། །ལ་ལ་གང་འདིར་བསྟན་དང་ལྡན་པ་ལ། །བྱང་ཆུབ་དམ་པ་མཆོག་ཏུ་སེམས་བསྐྱེད་པ། །བདག་གིས་ཡང་དག་སྤྱད་པ་བསྟན་པའི་ཕྱིར། །དེ་དག་ཐམས་ཅད་བདག་གི་མདུན་དུ་འོངས། །བྱང་ཆུབ་སེམས་དཔའ་ཉོན་མོངས་སྤངས་མེད་གང་། །ད་དུང་དུ་ཡང་འཁོར་བའི་བདེ་འདོད་ཅིང་། །ཆོས་ལ་བདག་མེད་རབ་ཏུ་མི་ཤེས་པ། །བདག་ནི་དེ་དག་ཐམས་ཅད་འོང་ན་སྟོན། །ཀུན་ཏུ་སྦྱོར་བ་སྤངས་མེད་གང་དག་དང་། སྒྱུ་མའི་ཕུང་ལྟར་ཤིན་ཏུ་སྔོན་མཐོང་ཞིང་། །ཐབས་ལ་མཁས་པར་ཡང་ནི་མི་ཤེས་པ། །དེ་དག་ཐམས་ཅད་འོང་ན་བདག་སྟོན་ཏོ། །བརྩོན་འགྲུས་ལྡན་པ་བསོད་ནམས་མཛོད་མང་པོ། །ཐབས་ལ་མཁས་པས་སེམས་ཅན་རྣམས་འདུལ་ཞིང་། །ཤེས་རབ་ཕ་རོལ་ཕྱིན་མཆོག་རྟག་སྤྱོད་པ། །བཟོད་ཉན་ཐོས་ཕྱིར་དེ་དག་ཐམས་ཅད་འོང་། །གང་གིས་སངས་རྒྱས་དུ་མ་སྔོན་བསྙེན་བཀུར། །འདུས་བྱས་ཐམས་ཅད་འདི་ལ་རྟེན་པ་མེད། །ཆུ་ཟླ་ལྟ་བུར་རབ་ཏུ་སུ་སྟོན་པ། །རང་བཞིན་རྣམ་པར་འཇུག་པ་འདིར་ཡང་འོང་། །གང་རྣམས་ཐབས་དང་ཡང་དག་སྦྱོར་ཕྱིར་ཞུགས། །ཐམས་ཅད་དངོས་ལ་སེམས་པ་རྟེན་མེད་ཅིང་། །མཚན་མ་སྤངས་ལ་རྟོག་པར་འགྱུར་མེད་པ། །དྲན་པར་བྱེད་པ་དག་ནི་འདིར་ཡང་འོང་། །བདག་གིས་བཟོད་པ་མཆོག་འདི་རབ་བསྟན་ནས། །ཇི་
ལྟར་སྡུག་བསྔལ་ཀུན་ལ་མི་གནས་པ། །ཆོས་ཀྱི་འཁོར་ལོ་ལ་ཡང་ཁྱོད་མྱུར་འཇུག །སྲིད་མཚོ་ལས་ཀྱང་སེམས་ཅན་རབ་ཐར་བྱེད། །ཕྱོགས་བཅུར་ཐུབ་པའི་དབང་པོ་གང་དག་ཀྱང་། །འགྲོ་བ་རྣམས་ལ་ཕན་ཕྱིར་འཁོར་ལོ་སྐོར། །ད་དུང་ཐེག་པའི་དམ་ཚིག་གང་འདོད་པ། །བདག་གི་གན་དུ་བྱང་ཆུབ་སེམས་དཔའ་མཐོང་། །ལན་གཉིས་སུ་ཡང་འཁོར་ལོ་བདག་སྐོར་ཏེ། །ཕྱིར་མི་ལྡོག་ལ་སེམས་ཅན་བྱེ་བཀོད་པ། །རྣམ་པར་གྲོལ་བའི་བློ་མཚན་རབ་ཐོགས་ཤིང་། །བདག་བདག་ཞིང་རྣམས་སུ་ཡང་འགྲོ་བར་འགྱུར། །སངས་རྒྱས་ཞིང་འདིར་འོངས་པ་གང་དག་ཀྱང་། །བྱང་ཆུབ་མཆོག་གི་སྤྱོད་ཕྱིར་བཟོད་པ་བསྟན། །ཉན་ཐོས་རང་རྒྱལ་ཐེག་པ་ཅན་མཐོང་སྟེ། །དེ་བས་མུ་སྟེགས་གཞན་ཀུན་འདིར་འདུལ་ལོ། །སངས་རྒྱས་བཅོམ་ལྡན་འདས་ཀྱི་དབྱངས་ཀྱི་དཀྱིལ་འཁོར་དེ་ཡང་དེ་ལྟར་བཅོམ་ལྡན་འདས་ཀྱི་ཡི་གེ་དང་། དོན་དང་། ཚིག་བརྗོད་པའི་དབྱངས་ཀྱི་དཀྱིལ་འཁོར་ཕྱོགས་བཅུའི་སངས་རྒྱས་ཀྱི་ཞིང་མཐའ་ཡས་མུ་མེད་པར་སོང་ངོ་། །དེ་ན་སེམས་ཅན་གང་ལ་ལ་ཐེག་པ་ཆེན་པོ་ལ་ཡང་དག་པར་ཞུགས་པ་དེ་ཐམས་ཅད་ཉན་ཅིང་དེ་ཕྱོགས་བཅུར་ཡང་ལྟ་བར་འགྱུར་རོ། །བདག་ཅག་གིས་བལྟ་བའི་སེམས་ཅན་དེ་སེམས་ཅན་གང་གི་དབྱངས་ཀྱི་དཀྱིལ་འཁོར་དེ་ལྟར་ཡིད་དུ་འོང་བ་དེ་ལྟར་དགའ་བ། དེ་ལྟར་མངོན་པར་དགའ་བ། དེ་ལྟར་ཟབ་ཅིང་སེམས་ཅན་གྱི་དབུགས་འབྱིན་པ། དེ་ལྟར་ཚིམ་པ། དེ་ལྟར་འཁོར་བའི་ཕ་རོལ་ཏུ་འགྲོ་བ། དོན་དང་ཚིག་དང་། ཡི་གེ་བརྗོད་པའི་དབྱངས་ཀྱི་དཀྱིལ་འཁོར་དེ་བཞིན་དུ་སྨྲ་བར་བྱ་བ་ཇི་ལྟ་བ་དེར་དེ་ཕྱོགས་བཞི་ཀུན་ཏུ་བལྟས་ཏེ། སངས་རྒྱས་ཀྱི་མཐུས་སྤོས་ཀྱི་ངད་ལྡང་བའི་རི་ལ་དྲང་སྲོང་ཐུབ་པ་དབང་པོ་ཞི་ཞིང་ཐུགས་ཞི་བ། དུལ་བ་དང་། ཞི་བའི་མཆོག་ཐོབ་པ། གསེར་གྱི་ཕུང་པོ་ཇི་ལྟར་འབར་བ་ལ་དྲང་སྲོང་བྱེ་བ་ཁྲག་ཁྲིག་བརྒྱ་སྟོང་མང་པོས་མངོན་སུམ་དུ་ཕྱག་འཚལ་ཏེ། ཧ་ཅང་ཡང་མི་རིང་བར་མཐོང་ངོ་། །མཐོང་ནས་ཀྱང་དེ་དག་འདི་སྙམ་དུ་སེམས་ཏེ། དྲང་སྲོང་འདི་ནི་མཐུ་ཆེན་པོ་དྲང་སྲོང་གི་འཁོར་ཆེན་པོ་འདི་ནི་སྙིང་རྗེ་ཆེན་པོ་དང་ལྡན་པར་འགྱུར་བ་ཞིག་སྙམ་སྟེ། གལ་ཏེ་སྙིང་རྗེ་དང་
ལྡན་པར་འགྱུར་བ་དེའི་རྗེས་སུ་འགྲོའོ། །དྲང་སྲོང་གི་ཆ་བྱད་དང་། ལུས་དང་། དབྱིབས་ཀྱིས་བདག་གི་ལུས་སུ་གྱུར་པ་དེ་དག་མཐོང་ནས། དེ་དག་འདི་སྙམ་དུ་སེམས་ཏེ། བདག་ཅག་ཀྱང་དྲང་སྲོང་དུ་གྱུར་ན། དྲང་སྲོང་ཆེན་པོ་དེ་ལ་བསྙེན་བཀུར་བ་དང་། ཕྱག་འཚལ་བའི་ཕྱིར་ཉེ་བར་འགྲོའོ། །དེ་དག་ཀྱང་སེམས་བསྐྱེད་མ་ཐག་པས་ཕྱོགས་བཅུའི་སངས་རྒྱས་ཀྱི་ཞིང་ཚད་མེད་གྲངས་མེད་པ་ལས་དྲང་སྲོང་གི་ཆ་བྱད་ཚད་མེད་གྲངས་མེད་བསམ་གྱིས་མི་ཁྱབ། མཚུངས་པ་མེད་ཅིང་དཔག་ཏུ་མེད་པ། ཆུ་བོ་གང་གཱའི་བྱེ་མ་སྙེད་ཀྱི་བྱང་ཆུབ་སེམས་དཔའ་སངས་རྒྱས་ཀྱི་ཞིང་འདིར་མངོན་པར་ལྷགས་སོ། །བྱང་ཆུབ་སེམས་དཔའི་རྣམ་པར་འཕྲུལ་པའི་ཚོགས་སྣ་ཚོགས་ཀྱི་དྲང་སྲོང་ཐུབ་པ་ལ་མཆོད་པ་བྱས་ནས། དྲང་སྲོང་ཐུབ་པ་གང་ན་བ་དེ་ལོགས་སུ་ཐལ་མོ་སྦྱར་ཏེ། ཕྱག་འཚལ་ནས་བསྟོད་དེ་འཁོད་དོ། །ལ་ལ་སྨོན་ལམ་གྱི་དབང་དང་། ལ་ལ་ངན་དུ་སྤྱོད་པའི་རྐྱེན་གྱིས་གང་ཡང་ངན་སོང་དུ་སྐྱེས་པ་དེ་དག་སངས་རྒྱས་ཀྱི་མཐུས་དྲན་པ་སོ་སོར་ཐོབ་ནས་དྲང་སྲོང་གི་ཆ་བྱད་ཀྱིས་ཀུན་ཏུ་འཁོད་དོ། །དྲང་སྲོང་ཆེན་པོ་ཐུབ་པའི་དབང་པོ་གང་ན་བ་དེ་ལོགས་སུ་ཡང་ཐལ་མོ་སྦྱར་ཏེ་འཁོད་དོ། །དེ་ནས་བྱང་ཆུབ་སེམས་དཔའ་བློ་གྲོས་ཀྱི་ཚོགས་མཐའ་ཡས་པའི་རྒྱལ་པོ་སངས་རྒྱས་ཀྱི་མཐུས་འདི་སྙམ་དུ་སེམས་ཏེ། ཤཱཀྱ་ཐུབ་པ་བཞུགས་ཤིང་ཇི་ལྟ་བུར་འཁོར་ཡང་དག་པར་འོངས་པ་ལ་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་འདི་གང་ན་སྟོན་པར་འགྱུར། དེ་ནས་དེ་ཉིད་ཀྱི་ཚེ་ན་ཤར་ཕྱོགས་ཀྱི་ནམ་མཁའི་ལམ་ལས་ཁང་པ་བརྩེགས་པ་བལྟ་ན་སྡུག་པ། རིན་པོ་ཆེ་སྣ་བདུན་གྱིས་གང་བ་སྣ་ཚོགས་འདི་ལྟ་སྟེ། དཔེར་ན་བརྒྱ་བྱིན་ལྷའི་དབང་པོ་ཞེས་བྱ་བའི་ཁང་པ་བརྩེགས་པ་ལྟ་བུ་བྱེ་བ་ཁྲག་ཁྲིག་བརྒྱ་སྟོང་ཕྲག་དྲུག་ཅུ་ལྷགས་སོ། །དེ་ནས་བྱང་ཆུབ་སེམས་དཔའ་བློ་གྲོས་ཀྱི་ཚོགས་མཐའ་ཡས་པའི་རྒྱལ་པོ་ཁང་པ་བརྩེགས་པ་དེ་མཐོང་ནས་དེ་འདི་སྙམ་དུ་སེམས་ཏེ། བདག་གིས་ཁང་པ་བརྩེགས་པ་འདི་ལྟ་སྟེ། དཔེར་ན་ཚངས་པ་མི་མཇེད་ཀྱི་བདག་པོའི་ཁང་པ་བརྩེགས་པ་དབྱངས་ཞི་བ་འདི་འདྲ་བར་སྤྲུལ་ཏེ། དྲང་སྲོང་ཐུབ་པ་གང་ན་བཞུགས་པ་དེར་བདག་བཟོད་པ་འདི་བསྟན་
སྙམ་པ་དང་། དེ་ཉིད་ཀྱི་ཚེ་ན་ལྷོ་ཕྱོགས་ནས་ནམ་མཁའི་ལམ་ལས་ཁང་པ་བརྩེགས་པ་བལྟ་ན་སྡུག་པ། རིན་པོ་ཆེ་སྣ་བདུན་གྱིས་གང་བ་སྣ་ཚོགས་འདི་ལྟ་སྟེ། དཔེར་ན་ཚངས་པ་མི་མཇེད་ཀྱི་བདག་པོའི་ཁང་པ་བརྩེགས་པ་དབྱངས་ཞི་བ་ལྟ་བུ་བྱེ་བ་ཁྲག་ཁྲིག་བརྒྱ་སྟོང་ཕྲག་དྲུག་ཅུ་ལྷགས་པ་མཐོང་ནས། བྱང་ཆུབ་སེམས་དཔའ་བློ་གྲོས་ཀྱི་ཚོགས་མཐའ་ཡས་པའི་རྒྱལ་པོ་དེ་འདི་སྙམ་དུ་སེམས་ཏེ། བདག་གིས་འདི་ལྟ་སྟེ་དཔེར་ན་ཚངས་པ་ཆེན་པོ་གློག་གི་འོད་ཅེས་བྱ་བའི་ཁང་པ་བརྩེགས་པ་དེ་འདྲ་བར་མངོན་པར་སྤྲུལ་ཏེ། བཅོམ་ལྡན་འདས་དེ་ན་བཞུགས་ཤིང་ཆོས་སྟོན་ཏོ་སྙམ་པ་དང་། དེ་ནས་དེ་ཉིད་ཀྱི་ཚེ་ན་ནུབ་ཕྱོགས་ནས་ནམ་མཁའི་ལམ་ལས་འདི་ལྟ་སྟེ། དཔེར་ན་ཚངས་པ་གློག་གི་འོད་ཅེས་བྱ་བའི་ཁང་པ་བརྩེགས་པ་བལྟ་ན་སྡུག་པ་རིན་པོ་ཆེ་སྣ་བདུན་གྱིས་གང་བ་སྣ་ཚོགས་ཁྲག་ཁྲིག་བརྒྱ་སྟོང་ཕྲག་དྲུག་ཅུ་ལྷགས་སོ། །དེ་ནས་བྱང་ཆུབ་སེམས་དཔའ་བློ་གྲོས་ཀྱི་ཚོགས་མཐའ་ཡས་པའི་རྒྱལ་པོ་འདི་སྙམ་དུ་སེམས་ཏེ་བདག་གིས་ཁང་པ་བརྩེགས་པ་འདི་ལྟ་སྟེ། དཔེར་ན་ཚངས་པ་རི་རབ་ཀྱི་འོད་ཅེས་བྱ་བའི་ཁང་པ་བརྩེགས་པ་དེ་འདྲ་བ་མངོན་པར་སྤྲུལ་ཏེ། བཅོམ་ལྡན་འདས་དེ་ན་བཞུགས་ཤིང་ཆོས་སྟོན་ཏོ་སྙམ་པ་དང་། དེ་ནས་དེ་ཉིད་ཀྱི་ཚེ་ན་བྱང་ཕྱོགས་ནས་ནམ་མཁའི་ལམ་ལས་ཁང་པ་བརྩེགས་པ་བལྟ་ན་སྡུག་པ། རིན་པོ་ཆེ་སྣ་བདུན་གྱིས་གང་བ་སྣ་ཚོགས་འདི་ལྟ་སྟེ། དཔེར་ན་ཚངས་པ་ཆེན་པོ་རི་རབ་ཀྱི་འོད་ཅེས་བྱ་བའི་ཁང་པ་བརྩེགས་པ་དོར་བ་མེད་པ་དང་ལྡན་པ་ཁྲག་ཁྲིག་བརྒྱ་སྟོང་ཕྲག་དྲུག་ཅུ་ལྷགས་སོ། །དེ་ནས་ཡང་དེའི་ཚེ་ན་ཁང་པ་བརྩེགས་པ་ཁྲག་ཁྲིག་བརྒྱ་སྟོང་དུ་མ་ནམ་མཁའ་ལ་འཁོད་དོ། །དེ་ནས་བྱང་ཆུབ་སེམས་དཔའ་བྱམས་པ་འདི་སྙམ་དུ་སེམས་ཏེ། ཁང་པ་བརྩེགས་པ་དེ་དག་ཏུ་བཅོམ་ལྡན་འདས་ཀྱི་དོན་གྱི་ཕྱིར་སེང་གེའི་ཁྲི་ལ་རྣམ་པར་བལྟས་ཏེ། བཅོམ་ལྡན་འདས་ཀྱི་དོན་གྱི་ཕྱིར་སེང་གེའི་ཁྲི་བཤམས་པའི་ཁང་པ་བརྩེགས་པ་གང་ཞིག་སྙམ་སྟེ། དེ་ནས་བྱང་ཆུབ་སེམས་དཔའ་བྱམས་པས་བྱང་ཆུབ་སེམས་དཔའ་གཟི་བརྗིད་དྲི་མ་མེད་པ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁང་པ་
བརྩེགས་པ་འདི་དག་གང་དུ་ལྷགས། སུ་ཡི་བྱིན་གྱིས་བརླབས། བྱང་ཆུབ་སེམས་དཔའ་གཟི་བརྗིད་དྲི་མ་མེད་པས་བྱང་ཆུབ་སེམས་དཔའ་བྱམས་པ་ལ་སྨྲས་པ། རིགས་ཀྱི་བུ་དེ་བས་ན་ཆོས་ཀྱི་སྒོས་ཆགས་པ་ཐམས་ཅད་རྒྱུན་བཅད་པའི་ཕྱིར་ད་དུང་མི་སྒྲུབ་ཀྱི། འདི་གཉིས་ཀྱིས་འཁོར་བ་འཁྱིལ་པའི་སྒྲུབ་པའོ། །རིགས་ཀྱི་བུ་འདི་གཉིས་ནི་འགྲོ་བ་དང་འོང་བའོ། །འདི་གཉིས་ནི་འབྱུང་བ་དང་འཇིག་པ་ཞེས་བྱ་སྟེ། གང་མི་སྐྱེ་མི་འབྱུང་བ་དེ་འགྲོ་བ་དང་འོང་བའི་འདུ་ཤེས་ཀྱང་མེད་དོ། །དེ་འཇིག་པ་ཐམས་ཅད་སྤངས་ནས་མི་སྐྱེ་བའི་ཆོས་ལ་བཟོད་པ་ཐོབ་བོ། །འཁོར་བའི་རྒྱུན་གཅོད་པ་འདི་ནི་གཉིས་སུ་མེད་པའི་ཆོས་ཀྱི་སྒོའོ། །གང་འགྲོ་བ་དང་འོང་བ་ཞེས་བྱ་བ་འདི་གཉིས་ནི་འགྲོ་བ་དང་འོང་བའོ། །རིགས་ཀྱི་བུ་གང་བདག་ཏུ་སྒྲོ་འདོགས་པ་མེད་པ་དང་། སྲོག་དང་། གསོ་བ་དང་། གང་ཟག་དང་། ཤེད་ལས་སྐྱེས་པ་དང་། ཤེད་ཅན་དང་། འགྲོ་བ་དང་། འོང་བའི་འདུ་ཤེས་སུ་འཇུག་པ་མེད་པ། འདི་ནི་གཉིས་སུ་མེད་པའི་ཆོས་ཀྱི་སྒོ་ལ་འཇུག་པའོ། །རིགས་ཀྱི་བུ་གང་སྐྱེས་པའམ། མ་སྐྱེས་པར་རྟོག་པ་འདི་ནི་གཉིས་པའོ། །གང་འབྱུང་བ་དང་། འགོག་པར་རྣམ་པར་མི་རྟོག་ཅིང་འགྲོ་བ་དང་འོང་བར་དམིགས་པ་མེད་པ་དང་། ཐ་དད་པར་བྱ་བ་མེད་པ་དང་། འགྱུར་བ་མེད་པ་དང་། རྣམ་པར་བྱང་བ་འདི་ནི་རིགས་ཀྱི་བུ་གཉིས་སུ་མེད་པའི་ཆོས་ཀྱི་སྒོ་ལ་འཇུག་པའོ། །ཉོན་མོངས་པ་དང་། རྣམ་པར་བྱང་བ་དང་ཕུང་པོ་སྐྱེ་བ་དང་། འཇིག་པའི་མཚན་ཉིད་འདི་ནི་གཉིས་པའོ། །གང་ཕུང་པོ་ཡོངས་སུ་ཤེས་ཤིང་སྐྱེ་བ་དང་། འཇིག་པའི་མཚན་ཉིད་སྤངས་པ་རློམ་སེམས་ཐམས་ཅད་བཅོམ་པ། གཟུགས་ཀྱི་འགོག་པར་འགྲོ་བའི་ལམ་འདི་ནི་གཉིས་སུ་མེད་པའི་ཆོས་ཀྱི་སྒོ་ལ་འཇུག་པའོ། །འགུལ་བ་དང་། རློམ་ཞིང་སེམས་པར་རིག་པ་འདི་ནི་གཉིས་པའོ། །གང་ཚོར་བའི་འགུལ་བ་མེད་ཅིང་རློམ་སེམས་མེད་པ། གཡོ་བ་མེད་ཅིང་ཡིད་ལ་མི་བྱེད་པ་འདི་ནི་གཉིས་སུ་མེད་པའི་ཆོས་ཀྱི་སྒོ་ལ་འཇུག་པའོ། །རིགས་ཀྱི་བུ་གང་ཚོར་བར་ཤེས་པ་དང་། ཚོར་བ་ཀུན་འབྱུང་བར་ཤེས་པ་དང་། ཚོར་བའི་འགོག་པར་ཤེས་པ་དང་། ཚོར་བ་འགོག་པར་འགྲོ་བའི་
ལམ་དུ་ཤེས་པ་འདི་ནི་གཉིས་པའོ། །རིགས་ཀྱི་བུ་གང་ཡང་ཚོར་བ་ཀུན་འབྱུང་བར་འགོག་པར་འགྲོ་བར་མི་ཤེས་པ་དང་། གཟུགས་ཀྱི་ཕུང་པོ་དང་། ཚོར་བའི་ཕུང་པོའི་མཚན་ཉིད་ཐ་དད་པར་མི་ཤེས་པ་དང་། མཉམ་པའི་མཚན་ཉིད་དང་། མཚན་ཉིད་མེད་པ་དང་། མཚན་ཉིད་ཐ་དད་པ་དང་། མཚན་ཉིད་གཅིག་པ་དང་། མཚན་ཉིད་མང་པོར་མི་ཤེས་པ་འདི་ཡང་རིགས་ཀྱི་བུ་གཉིས་སུ་མེད་པའི་ཆོས་ཀྱི་སྒོ་ལ་འཇུག་པའོ། །ཡང་རིགས་ཀྱི་བུ་གང་ཕུང་པོ་དང་། ཁམས་དང་། སྐྱེ་མཆེད་ལ་ཉན་ཐོས་དང་། རང་བྱང་ཆུབ་འདོད་པ་དང་། བླ་ན་མེད་པ་ཐམས་ཅད་མཁྱེན་པའི་ཡེ་ཤེས་འདོད་པ་འདི་ནི་གཉིས་པའོ། །རིགས་ཀྱི་བུ་གང་ཡང་ཉན་ཐོས་དང་། རང་སངས་རྒྱས་ཀྱི་ཐེག་པ་དང་། ཐམས་ཅད་མཁྱེན་པའི་ཡེ་ཤེས་དང་། ཕུང་པོ་དང་། ཁམས་དང་། སྐྱེ་མཆེད་ལ་བརྟེན་པར་མི་ཤེས་པ་དང་། ཡི་གེའི་ཚིག་གི་ལམ་ཐམས་ཅད་ནི་གནས་མེད་པ། ཡི་གེ་མེད་པ། སྤྲོས་པ་མེད་པར་རབ་ཏུ་ཤེས་པ་འདི་ཡང་རིགས་ཀྱི་བུ་གཉིས་སུ་མེད་པའི་ཆོས་ཀྱི་སྒོ་ལ་འཇུག་པའོ། །རིགས་ཀྱི་བུ་གང་དགེ་བ་དང་། མི་དགེ་བར་འདུ་ཤེས་ཀུན་ཏུ་ཤེས་པ་དང་། ཕ་རོལ་དང་ཚུ་རོལ་ཏུ་འདུ་ཤེས་པ་འདི་ནི་གཉིས་པའོ། རིགས་ཀྱི་བུ་གང་དགེ་བ་མི་དགེ་བ་འདི་ཡང་མཚན་མ་མེད་པ་ཀུན་ནས་ལྡང་བ་དང་། མི་ཟད་པ་ཀུན་ཏུ་རྟོག་པ་འདི་ཡང་རིགས་ཀྱི་བུ་གཉིས་སུ་མེད་པའི་ཆོས་ཀྱི་སྒོ་ལ་འཇུག་པའོ། །རིགས་ཀྱི་བུ་གཞན་ཡང་ཚུ་རོལ་ནི་ཟག་པའོ། །ཕ་རོལ་ནི་ཕྱིན་ཅི་ལོག་སྟེ་གང་ཚུ་རོལ་དང་ཕ་རོལ་ལ་རྟོག་པ་དང་། འཛིན་པ་དང་བཀྲོལ་བ་འདི་ནི་གཉིས་པའོ། །གང་ཡང་ཚུ་རོལ་དང་ཕ་རོལ་ལ་འཛིན་པ་མེད་པ་དང་། བཀྲོལ་བ་མེད་པ་དང་། ཅི་ལ་ཡང་བཏགས་པ་མེད་པ་དང་། བཏང་བ་མེད་པ་འདི་ནི་གཉིས་སུ་མེད་པའི་ཆོས་ཀྱི་སྒོ་ལ་འཇུག་པའོ། །རིགས་ཀྱི་བུ་གཞན་ཡང་གང་ཕུང་པོ་དང་། ཁམས་དང་། སྐྱེ་མཆེད་ལ་ཟག་པ་དང་བཅས་པའམ། ཟག་པ་མེད་པའམ་ཞེས་རྟོག་པ་འདི་ནི་གཉིས་པའོ། །གང་ཡང་ཁམས་དང་། སྐྱེ་མཆེད་ལ་ཟག་པ་དང་བཅས་པ་ཞེས་རྟོག་པ་མེད་པ་དང་། ཟག་པ་མེད་པའི་འདུ་ཤེས་སུ་བྱ་
བའང་མེད་པ་དང་། འདུ་ཤེས་དང་འདུ་ཤེས་མེད་མིན་ཐོབ་པའང་མེད་པ་འདི་ཡང་གཉིས་སུ་མེད་པའི་ཆོས་ཀྱི་སྒོ་ལ་འཇུག་པའོ། །རིགས་ཀྱི་བུ་གང་ཕུང་པོ་དང་། ཁམས་དང་། སྐྱེ་མཆེད་ལ་འདུས་བྱས་དང་། འདུས་མ་བྱས་སུ་རྟོག་པ་འདི་ནི་གཉིས་པའོ། །གང་ཡང་འདུ་བྱེད་སྐྱེ་མཆེད་ཐམས་ཅད་ལ་མི་རྟོག་ཅིང་རྣམ་པར་མི་རྟོག་པ་དང་། ཆོས་ཐམས་ཅད་ནམ་མཁའ་དང་མཉམ་པར་ཡང་དག་པར་རྗེས་སུ་མཐོང་བ་འདི་ཡང་རིགས་ཀྱི་བུ་གཉིས་སུ་མེད་པའི་ཆོས་ཀྱི་སྒོ་ལ་འཇུག་པའོ། །རིགས་ཀྱི་བུ་གང་ཡང་འཇིག་རྟེན་པ་དང་། འཇིག་རྟེན་ལས་འདས་པའི་ཆོས་ལ་སྙེམས་པ་འདི་ནི་གཉིས་པའོ། །གང་ལ་ལ་འཇིག་རྟེན་པ་དང་། འཇིག་རྟེན་ལས་འདས་པའི་ཆོས་ལ་མི་འཇུག་མི་འགྲོ། རྣམ་པར་མི་འགྲོ། མི་རྒལ་ཞིང་འགྲོ་བ་ཡང་མེད། རྣམ་པར་འགྲོ་བ་མེད་པ་འདིའང་གཉིས་སུ་མེད་པའི་ཆོས་ལ་འཇུག་པའོ། །རིགས་ཀྱི་བུ་གཞན་ཡང་གང་ལ་ལ་མིང་དང་གཟུགས་ལས་ཕུང་པོ་དང་། ཁམས་དང་། སྐྱེ་མཆེད་འབྱུང་བར་རབ་ཏུ་ཤེས་པ་འདི་ནི་གཉིས་པའོ། །ཕུང་པོ་དང་། ཁམས་དང་། སྐྱེ་མཆེད་དང་། མིང་དང་གཟུགས་བྲལ་བ་ལ་སྒྱུ་མའི་རང་བཞིན་གྱི་ལྟ་བ་ཀུན་ཏུ་འགྲོ་ཞིང་ཀུན་ཏུ་མི་འགྲོ། ཡོངས་སུ་མྱ་ངན་ལས་མ་འདས་པ་འདི་ཡང་བྱང་ཆུབ་སེམས་དཔའི་གཉིས་སུ་མེད་པའི་ཆོས་ཀྱི་སྒོ་ལ་འཇུག་པའོ། །རིགས་ཀྱི་བུ་གཞན་ཡང་གང་རྣམ་པར་ཤེས་པ་འབྱུང་བར་རབ་ཏུ་ཤེས་པ་འདི་ནི་གཉིས་པའོ། །གང་ཡང་འབྱུང་བ་མེད་པ་སྐད་ཅིག་མ་དང་སྐད་ཅིག་མ་མ་ཡིན་པ་ལ་འདུས་བྱས་ཐམས་ཅད་དུ་མྱུར་དུ་རབ་ཏུ་ཤེས་པ་འདི་ཡང་གཉིས་སུ་མེད་པའི་ཆོས་ཀྱི་སྒོ་ལ་འཇུག་པའོ། །རིགས་ཀྱི་བུ་གཞན་ཡང་བདག་གིར་བྱ་བ་དང་། རྣམ་པར་ཤེས་པར་ཡོངས་སུ་ཤེས་པ་དང་། ང་ཡིར་བྱ་བ་དང་། སྐྱེ་མཆེད་ལ་ཆགས་པ་འདི་ནི་གཉིས་པའོ། །གང་ལ་ལ་བདག་དང་བྲལ་བའི་རྣམ་པར་ཤེས་པ་ཐོབ་པ་བདག་གི་རང་བཞིན་ལྟ་བ་གཉིས་དང་བྲལ་བ། སྐྱེ་མཆེད་ཉམས་པ་མེད་པ། བདག་གིར་བྱ་བ་དང་། ང་ཡིར་བྱ་བ་དང་བྲལ་བ་འདི་ཡང་གཉིས་སུ་མེད་པའི་ཆོས་ཀྱི་སྒོ་ལ་འཇུག་པའོ། །གང་ལ་ལ་རིག་པ་དང་། རྣམ་པར་གྲོལ་བར་རྟོག་པ་འདི་ནི་གཉིས་པའོ། །
རིགས་ཀྱི་བུ་མ་རིག་པ་ནི་རྒྱུ་བ་མེད་ཅིང་བདག་མེད་པའོ། །རིག་པ་ནི་གློག་གི་རང་བཞིན་ཅན་ནོ། །རྣམ་པར་གྲོལ་བ་ཡང་ནམ་མཁའོ། །ནམ་མཁའ་ཡང་མི་རྟོག་པ། རྟོག་པར་བྱེད་པ་མེད་པ། སྤྲོས་པ་མེད་པ་འདི་ཡང་གཉིས་སུ་མེད་པའི་ཆོས་ཀྱི་སྒོ་ལ་འཇུག་པའོ། །གང་རྣམ་པར་ཤེས་པ་དང་། གཟུགས་ཀུན་ཏུ་སྤྱོད་པ་འདི་ནི་གཉིས་པའོ། །གཟུགས་ཉིད་ཀྱང་ནམ་མཁའ་བཞིན་དུ་སྟོང་སྟེ། ནམ་མཁའ་ཡང་འཇིག་པ་མེད་དོ། །གཟུགས་འཇིག་པ་སྟོང་པ་ཉིད་གཟུགས་ཀྱི་མཚན་ཉིད་རབ་ཏུ་རྒྱུ་བ་སྟོང་པ་ཉིད་ཀྱི་རང་བཞིན་ཡང་སྟོང་པ་ཉིད་དོ། །ཚོར་བ་དང་། འདུ་ཤེས་དང་། འདུ་བྱེད་ཀྱང་དེ་བཞིན་ནོ། །རྣམ་པར་ཤེས་པ་རབ་ཏུ་རྒྱུ་བ་མེད་པ་ནི་ནམ་མཁའ་ཇི་ལྟ་བུར་མུན་པ་མེད་ཅིང་སྣང་བ་མེད་པ་རྣམ་པར་ཤེས་པའང་དེ་བཞིན་ནོ། །རྣམ་པར་ཤེས་པའི་འཇིག་པ་སྟོང་པ་མ་ཡིན་ཏེ། རྣམ་པར་ཤེས་པའི་རང་བཞིན་ཉིད་ཀྱང་སྟོང་པའོ། །དེ་བཞིན་དུ་ཉེ་བར་ལེན་པའི་ཕུང་པོ་ལྔ་ཡང་ནམ་མཁའི་རང་བཞིན་ལྟར་སྟོང་ངོ་། །ནམ་མཁའ་ཇི་ལྟ་བུར་འདོད་ཆགས་མེད། ཞེ་སྡང་མེད། གཏི་མུག་མེད། མི་མཐོ་མི་དམའ། མི་རྟོག་རྣམ་པར་མི་རྟོག །མི་འགྲོ་རྣམ་པར་མི་འགྲོ། དེ་ལྟར་སེམས་པའི་བྱང་ཆུབ་སེམས་དཔའ་ནི་ཆོས་ཐམས་ཅད་ཇི་ལྟ་བ་བཞིན་དུ་རབ་ཏུ་ཤེས་སོ། །ཕུང་པོ་དང་། ཁམས་དང་། སྐྱེ་མཆེད་ལ་ཡང་འདོད་ཆགས་མེད། ཞེ་སྡང་མེད། གཏི་མུག་མེད། མི་མཐོ་མི་དམའ། མི་རྟོག་རྣམ་པར་མི་རྟོག །མི་འགྲོ་རྣམ་པར་མི་འགྲོ་ཞིང་ཉན་ཐོས་དང་། རང་སངས་རྒྱས་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མི་རྟོག་རྣམ་པར་མི་རྟོག །མི་འགྲོ་རྣམ་པར་མི་འགྲོ་བ་འདི་ནི་རིགས་ཀྱི་བུ་བྱང་ཆུབ་སེམས་དཔའི་གཉིས་སུ་མེད་པའི་ཆོས་ཀྱི་སྒོ་ལ་འཇུག་པའོ། །བྱང་ཆུབ་སེམས་དཔའ་གཟི་བརྗིད་དྲི་མ་མེད་པས་འདི་བསྟན་པ་སྟོན་པ་ན། བྱང་ཆུབ་སེམས་དཔའ་ཁྲག་ཁྲིག་ཕྲག་དགུ་བཅུ་རྩ་གཉིས་ཀྱིས་མི་སྐྱེ་བའི་ཆོས་ཀྱི་བཟོད་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་ཁྲག་ཁྲིག་ཕྲག་བཞི་བཅུ་རྩ་དྲུག་གཉིས་སུ་མེད་པའི་ཆོས་ཀྱི་སྒོ་ལ་འཇུག་པ་ཐོབ་པར་གྱུར་ཏོ། །བཅོམ་ལྡན་འདས་ཀྱང་སྒྲོན་མ་དང་ལྡན་པ་ཞེས་བྱ་བའི་ཏིང་ངེ་འཛིན་
ལས་བཞེངས་ནས། བཅོམ་ལྡན་འདས་ཀྱི་དྲང་སྲོང་གི་ཆ་བྱད་ཇི་ཙམ་པ་མི་སྣང་བར་གྱུར་ཏེ། སངས་རྒྱས་ཀྱི་སྐུ་མཚན་རབ་སུམ་ཅུ་རྩ་གཉིས་ཀྱིས་སྐུ་ཡང་དག་པར་བརྒྱན་ཏེ་བཞུགས་སོ། །དེ་ལྟར་དེ་བཞིན་དུ་གང་གཞན་ལ་ལ་དག་ཀྱང་དྲང་སྲོང་གི་ཆ་བྱད་མི་སྣང་བར་གྱུར་ཏེ། སྔོན་གྱི་ལུས་ཇི་ལྟ་བ་བཞིན་དུ་འཁོད་ནས་བཅོམ་ལྡན་འདས་ཀྱིས་ཡང་བྱང་ཆུབ་སེམས་དཔའ་གཟི་བརྗིད་དྲི་མ་མེད་པ་ལ་ལེགས་སོ་ཞེས་བྱ་བ་བྱིན་ཏེ། རིགས་ཀྱི་བུ་ཁྱོད་ཀྱིས་ཇི་ལྟ་བུར་བསྟན་པ་དེ་བཞིན་དུ་གཉིས་སུ་མེད་པའི་སྒོ་འདི་བསྟན་པར་བྱ་བ་ལེགས་སོ་ལེགས་སོ། །རིགས་ཀྱི་བུ་ཁྱོད་ནི་ཆོས་ཀྱི་སྒོ་འདི་ལ་ལུས་དཔང་དུ་བཙུགས་ཏེ། དེ་ལྟར་ཁྱོད་ཀྱིས་ཚད་མེད་པའི་སེམས་ཅན་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བཀོད་དོ། །གཞན་ཡང་ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། མི་དང་མི་མ་ཡིན་པ་རྣམས་བཅོམ་ལྡན་འདས་ལ་མཆོད་པ་སྣ་ཚོགས་བྱས་སོ།། །།བམ་པོ་གསུམ་པ། དེ་ནས་དེའི་ཚེ་ན་འཇམ་དཔལ་གཞོན་ནུར་གྱུར་པ་བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་ཏེ། ཕྱག་འཚལ་ནས་བཅོམ་ལྡན་འདས་ལ་ཆོས་བསྟན་དུ་གསོལ་བའི་ཕྱིར་ཚིགས་སུ་བཅད་པའི་ཡོན་ཏན་འདི་དག་གིས་བསྟོད་དོ། །རྒྱལ་བ་མི་མཉམ་ཞིང་མངས་དག་ཁྱབ་པ། །ཉོན་མོངས་དགྲ་ཞི་འདི་ལ་མངོན་པར་གནས། །ཐུབ་པ་ཤིན་ཏུ་རྣམ་གྲོལ་འདིར་ཞུགས་ཤིང་། །ཁྱོད་ཀྱིས་འགྲོ་ལ་བཟོད་པའི་མཆོག་འདི་སྟོན། །རབ་ཏུ་ཞི་ཐུགས་བརྟུལ་ཞུགས་ཡོངས་སུ་དག །ཐུབ་པ་མཆོད་སྦྱིན་བགྱིས་པ་བཟོད་དགེ་གསུངས། །འགྲོ་ལ་བདེ་སྦྱིན་དྲང་སྲོང་ཤེས་རབ་འཆང་། །གཏི་མུག་འཇིག་མཛད་འདི་ལ་བདུད་རྩི་ཆར། །འདི་ལ་ལྷ་ཀླུ་སེམས་ཅན་མི་མང་པོ། །ཤིན་ཏུ་གསལ་ཡིད་མྱུར་དུ་ཞིང་གང་བ། །འགྲོ་བ་ཐམས་ཅད་ཁྱོད་ཞལ་ལྟ་ཞིང་འདུག །ཉོན་མོངས་ཡོངས་སུ་སྤངས་ཏེ་དམ་ཆོས་གསུངས། །སྔོན་ཆད་རྒྱལ་བ་ཁྱོད་ཀྱང་ཀུན་སྤྱོད་བསྟན། །མིག་གཉིས་རྐང་པ་ལག་པ་ལྕེ་བྱིན་ཞིང་། །པགས་
པ་མགོ་ཁྲག་ཡན་ལག་དམ་འབྲུ་ནོར། །གླང་རྟ་བུ་གྲོང་ཤིང་རྟ་རིན་ཆེན་རྣམ་མང་བྱིན། །ཟས་སྐོམ་མལ་དང་བྲན་ཕོ་བྲན་མོ་བྱིན། །གཉེན་དང་འགྲོ་ལ་སྡུག་བསྔལ་རྟག་ཐར་བྱེད། །བསམ་པ་རྫོགས་ཤིང་སེམས་ཅན་དགའ་མཛད་པ། །ཁྱོད་ཀྱིས་མཆོད་སྦྱིན་བརྒྱ་བྱས་སེམས་ཅན་ཕྱིར། །སངས་རྒྱས་མང་ལ་སྔོན་ཆད་དགེ་མཆོད་བྱས། །བྱམས་སེམས་རྟག་པས་ཐེར་ཟུག་སྦྱིན་ལ་དགའ། །བརྟུལ་ཞུགས་བརྟན་པས་རི་རབ་ཇི་བཞིན་འབར། །འགྲོ་ལ་བརྟན་ཕྱིར་བཟོད་པ་འདི་བསྟན་གསོལ། །ངན་སོང་གསུམ་སྤངས་སེམས་ཅན་མཐོ་རིས་ཁྲིད། །ཁྱོད་ཀྱིས་བསྟན་པའི་སྨོན་ལམ་སྔོན་རྟག་བྱས། །འགྲོ་བ་བྱང་ཆུབ་སྡུག་བསྔལ་ཞི་མཆོག་རིག །རྒྱལ་བ་སྔོན་ཆད་ཅི་བཞིན་བྱང་ཆུབ་དེ་ཐོབ་བོ། །སྙིང་རྗེ་དཔལ་ཆུས་ས་རྣམས་མ་ལུས་གང་། །ཉོན་མོངས་དྲི་གསུམ་ཐེ་ཙོམ་ཐམས་ཅད་ཞི། །ལམ་གང་ཞི་བས་བྱང་ཆུབ་ཐོབ་སྟོན་པ། །ཇི་ལྟར་ཆོས་རྟོགས་འདི་ལ་ཁྱོད་ཀྱིས་དུས། །ཤིན་ཏུ་སྐོམ་ཡིད་འགྲོ་ལ་ཆོས་ཆར་ཕོབ། །བདུད་རྩིའི་རོས་ངོམས་ཡང་དག་ཡོན་ཏན་གསུངས། །ལམ་གང་ཞི་དེས་འགྲོ་བ་བྱང་ཆུབ་རེག །ཞིང་མངས་འདི་ལ་སེམས་ཅན་གང་དག་འོངས། །རྒ་ཤི་དག་ལས་རྣམ་ཐར་གང་ཡོད་པ། །ཐུབ་པ་ཆེན་པོ་ཆོས་འདི་གསུང་དུ་གསོལ། །ནམ་མཁའི་མདོག་གིས་འདུལ་བའི་བཟོད་པ་སྟོན། །དེ་ནི་སྒྱུ་མ་སྨིག་རྒྱུ་སྤྲོས་པར་འགྲོ། །འཇམ་དཔལ་གཞོན་ནུར་གྱུར་པ་ལ་བཅོམ་ལྡན་འདས་ཅང་མི་གསུང་བས་ཞལ་གྱིས་བཞེས་ནས། དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། བདག་རྣམ་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ནས་ཏིང་ངེ་འཛིན་ལ་སྙོམས་པར་ཞུགས་པ་གང་གིས་ཁང་པ་བརྩེགས་པ་ཇི་སྙེད་པ་དེ་སྙེད་དུ་ལུས་མངོན་པར་སྤྲུལ་ནས་ཁང་པ་བརྩེགས་པ་ཐམས་ཅད་ན་འདུག་སྟེ། འཁོར་འདི་དག་ཀྱང་ཡང་དག་པར་དགའ་ཞིང་སྐྱོ་བར་བྱའོ་སྙམ་པ་དང་། དེ་ནས་བཅོམ་ལྡན་འདས་འོད་ཤིན་ཏུ་རྣམ་པར་བཀོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། མཉམ་པར་བཞག་པའི་ཐུགས་ཀྱིས་ཁང་པ་བརྩེགས་པ་ཇི་སྙེད་པ་དེ་སྙེད་དུ་སངས་རྒྱས་བཅོམ་ལྡན་འདས་རང་རང་ཞུགས་ཏེ་བཞུགས་སོ། །
དེ་ནས་བྱང་ཆུབ་སེམས་དཔའ་ངོ་མཚར་དང་ལྡན་པས་བྱང་ཆུབ་སེམས་དཔའ་དགྲ་རྣམ་པར་འགྲེལ་པ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁང་པ་བརྩེགས་པ་ཚད་མེད་པ་འདི་དག་ནི་གང་ན་རིགས་ཀྱི་བུ་དེ་བཞིན་གཤེགས་པ་བདག་ཁང་པ་བརྩེགས་པ་ན་བཞུགས་པ་ནི་གང་། སངས་རྒྱས་ཀྱི་བྱིན་གྱི་རླབས་ཀྱིས་ཁང་པ་བརྩེགས་པར་སངས་རྒྱས་ཀྱི་སྐུ་བཞུགས་པར་ཡང་དག་པར་མཐོང་བ་ནི་གང་། དེ་ནས་བྱང་ཆུབ་སེམས་དཔའ་དགྲ་རྣམ་པར་འགྲེལ་པས་བྱང་ཆུབ་སེམས་དཔའ་ངོ་མཚར་དང་ལྡན་པ་ལ་འདི་སྐད་ཅེས་སྨྲས་སོ། །རིགས་ཀྱི་བུ་དེ་བཞིན་གཤེགས་པ་ཞེས་བྱ་བའི་ཚིག་འདི་ནི་སྨྲ་བ་མེད་པའོ། །མ་རིག་པ་ཡང་སངས་རྒྱས་ཀྱི་ཆོས་ལ་སྤྲོས་པ་མེད་དོ། །རིགས་ཀྱི་བུ་ཅི་འདས་པའི་སེམས་ཀྱིས་བྱང་ཆུབ་ཐོབ་བམ། སྨྲས་པ། རིགས་ཀྱི་བུ་མ་ཡིན་ནོ། །སྨྲས་པ། ཅི་མ་འོངས་པའི་སེམས་ཀྱིས་བྱང་ཆུབ་ཐོབ་བམ། སྨྲས་པ། རིགས་ཀྱི་བུ་མ་ཡིན་ནོ། །སྨྲས་པ། ཅི་ད་ལྟར་བྱུང་བའི་སེམས་དང་། བསམ་པའི་གནས་པ་ཡོད་དམ། སྨྲས་པ། རིགས་ཀྱི་བུ་མེད་དོ། །སྨྲས་པ། གལ་ཏེ་རེ་ཞིག་སེམས་དང་། བསམ་པའི་གནས་པ་མེད་ན་རྣམ་པར་མི་གནས་པའི་དངོས་པོ་ལ་ཇི་ལྟར་བྱང་ཆུབ་ཐོབ། སྨྲས་པ། རིགས་ཀྱི་བུ་ཅི་དུས་གསུམ་གྱི་ཆོས་ཐམས་ཅད་སྤངས་པས། དེའི་ཚེ་ཅིས་ཀྱང་ཆོས་ཁོང་དུ་ཆུད་པ་མེད་དམ། སྨྲས་པ། རྟག་པ་དང་ཆད་པ་ཡོངས་སུ་སྤངས་པ། མི་འགྲོ་བ། མི་སྐྱེ་བ། མི་འགོག་པ། མི་རེག་པ། འདུས་བྱས་དང་། འདུས་མ་བྱས་ལ་གནས་པ་མེད་པའོ། །དངོས་པོ་ཐམས་ཅད་ནམ་མཁའ་དང་མཉམ་པ་ལ་བྱང་ཆུབ་འགྲོ་བ་མེད་དོ། །ཇི་ལྟར་ནམ་མཁའ་ལ་འདས་པ་དང་། མ་འོངས་པ་དང་། ད་ལྟར་བྱུང་བ་མེད་ཅིང་སྙེམས་པ་མེད་པ་དེ་བཞིན་དུ་བྱང་ཆུབ་ཀྱང་འདས་པ་དང་། མ་འོངས་པ་དང་།ད་ལྟར་བྱུང་བ་མེད་དོ། །ཇི་ལྟར་ནམ་མཁའ་ལ་རྟོག་པ་མེད་ཅིང་རྣམ་པར་རྟོག་པ་མེད་པ་དེ་བཞིན་དུ་སངས་རྒྱས་ཀྱི་བྱང་ཆུབ་ཀྱང་རྟོག་པ་མེད་ཅིང་རྣམ་པར་རྟོག་པའང་མེད་དོ། །ཇི་ལྟར་ནམ་མཁའ་ལ་མུན་པ་མེད་ཅིང་སྣང་བ་མེད་པ་དེ་བཞིན་དུ་སངས་རྒྱས་ཀྱི་ཆོས་རྣམས་ཀྱང་མུན་པ་མེད་ཅིང་སྣང་བའང་མེད་དོ། །ཇི་ལྟར་ནམ་མཁའ་
ལ་གཟུགས་མེད་ཅིང་བསྟན་དུ་མེད་པ་དེ་བཞིན་དུ་སངས་རྒྱས་ཀྱི་ཆོས་རྣམས་ཀྱང་གཟུགས་མེད་ཅིང་བསྟན་དུ་ཡང་མེད་དོ། །ཇི་ལྟར་ནམ་མཁའ་མ་སྐྱེས་མ་འགགས་པ་དེ་བཞིན་དུ་སངས་རྒྱས་ཀྱི་ཆོས་རྣམས་ཀྱང་མ་སྐྱེས་མ་འགགས་སོ། །ཇི་ལྟར་ནམ་མཁའ་ལ་འགྲོ་བ་མེད་པ་དེ་བཞིན་དུ་སངས་རྒྱས་ཀྱི་ཆོས་རྣམས་ཀྱང་འགྲོ་བར་དམིགས་པ་མེད་དོ། །ཇི་ལྟར་ནམ་མཁའ་ལ་གནས་པ་མེད་པ་དེ་བཞིན་དུ་སངས་རྒྱས་ཀྱི་ཆོས་རྣམས་ཀྱང་གནས་པ་མེད་དོ། །ཇི་ལྟར་ནམ་མཁའ་ལ་རེག་པ་མེད་པ་དེ་བཞིན་དུ་སངས་རྒྱས་ཀྱི་ཆོས་རྣམས་ཀྱང་རེག་པ་མེད་དོ། །ཇི་ལྟར་ནམ་མཁའ་ལ་ལམ་དུ་དམིགས་པ་མེད་པ་དེ་བཞིན་དུ་སངས་རྒྱས་ཀྱི་ཆོས་རྣམས་ཀྱང་ཅི་ལའང་ལམ་དུ་དམིགས་པ་མེད་དོ། །ཇི་ལྟར་ནམ་མཁའ་ལ་དངོས་པོ་མེད་ཅིང་མཚན་ཉིད་མེད་པ་དེ་བཞིན་དུ་སངས་རྒྱས་ཀྱི་ཆོས་རྣམས་ཀྱང་དངོས་པོ་མེད་ཅིང་མཚན་ཉིད་མེད་དོ། །ཇི་ལྟར་ནམ་མཁའ་ལ་བརྗོད་དུ་མེད་ཅིང་ཡི་གེ་མེད་པ་དེ་བཞིན་དུ་སངས་རྒྱས་ཀྱི་བྱང་ཆུབ་ཀྱང་བརྗོད་དུ་མེད་ཅིང་ཡི་གེ་མེད་དོ། །ཇི་ལྟར་ནམ་མཁའ་ལ་རྟག་པ་མེད་ཅིང་ཆད་པ་མེད་པ་དེ་བཞིན་དུ་སངས་རྒྱས་ཀྱི་ཆོས་རྣམས་ཀྱང་རྟག་པ་མེད་ཅིང་ཆད་པ་མེད་དོ། །ཇི་ལྟར་ནམ་མཁའ་ལ་ལུས་མེད་ཅིང་འབྱུང་བ་མེད་པ་དེ་བཞིན་དུ་སངས་རྒྱས་ཀྱི་ཆོས་རྣམས་ཀྱང་ལུས་མེད་ཅིང་འབྱུང་བ་མེད་དོ། །ཇི་ལྟར་ནམ་མཁའ་ལ་གཟུང་བ་མེད་ཅིང་གནས་པ་མེད་པ་དེ་བཞིན་དུ་སངས་རྒྱས་ཀྱི་ཆོས་རྣམས་ཀྱང་གཟུང་བ་མེད་ཅིང་གནས་པ་མེད་དོ། །ཇི་ལྟར་ནམ་མཁའ་ལ་རྟེན་པ་མེད་པ། གནས་པ་མེད་པ། དམིགས་པ་མེད་པ། རྣམ་པར་རྟོག་པ་མེད་པ། འདེག་པ་མེད་པ། རྣམ་པར་རིག་པ་མེད་པ། འགྲོ་བ་མེད་པ། འོང་བ་མེད་པ། རྩ་བ་མེད་པ། མཐའ་མེད་པ། འཁྲུག་པ་མེད་པ། ཡོངས་སུ་གདུངས་པ་མེད་པ། བརྟགས་པ་མེད་པ། བཀྲོལ་བ་མེད་པ། མཐོང་བ་མེད་པ། རྟོག་པ་མེད་པ། མུན་པ་མེད་པ། དངོས་པོ་མེད་པ། མཚན་མ་མེད་པ། སྤྲུལ་པ་མེད་པ་དེ་བཞིན་དུ་རིགས་ཀྱི་བུ་སངས་རྒྱས་ཀྱི་ཆོས་རྣམས་ཀྱང་རྟེན་པ་མེད་པ་ནས་མཚན་མ་མེད་པའི་བར་དུའོ། །རིགས་ཀྱི་བུ་སངས་རྒྱས་ཀྱི་ཆོས་རྣམས་ནི་མི་
སྐྱེ་བར་བསྒྲགས་པའོ། །སངས་རྒྱས་ཀྱི་ཆོས་རྣམས་ནི་གཉིས་སུ་མེད་པའི་ཆ་ཤས་སོ། །ཆོས་ཀྱི་དབྱིངས་ལ་གནས་པའོ། །སངས་རྒྱས་ཀྱི་ཆོས་རྣམས་ནི་སེམས་ཅན་གྱི་ཁམས་སུ་ཡང་དག་པར་འདུས་པའོ། །སངས་རྒྱས་ཀྱི་ཆོས་རྣམས་ནི་ནམ་མཁའི་ཁམས་སུ་ཡང་དག་པར་འདུས་པའོ། །རིགས་ཀྱི་བུ་སངས་རྒྱས་ཀྱི་ཆོས་རྣམས་ནི་རྟོགས་པ་དང་ཀུན་ཏུ་རྟོག་པ་ལ་ཡང་དག་པར་འདུས་པའོ། །སངས་རྒྱས་ཀྱི་ཆོས་རྣམས་ནི་གནས་དང་། རྣམ་པའི་གནས་དང་། རབ་ཀྱི་གནས་སུ་ཡང་དག་པར་འདུས་པའོ། །སངས་རྒྱས་ཀྱི་ཆོས་རྣམས་ནི་ཤེས་པ་དང་མི་ཤེས་པ་དང་། རབ་ཏུ་ཤེས་པ་དང་། རྣམ་པར་ཤེས་པ་དང་། ཉེ་བར་ཤེས་པ་ལ་ཡང་དག་པར་འདུས་པའོ། །སངས་རྒྱས་ཀྱི་ཆོས་རྣམས་ནི་མཚན་མ་མེད་པ་ཡང་དག་པའི་མཚན་ཉིད་དང་། རྣམ་པའི་མཚན་ཉིད་དང་། ཉེ་བའི་མཚན་ཉིད་དང་། རྗེས་སུ་མཚན་ཉིད་ལ་ཡང་དག་པར་འདུས་པའོ། །སངས་རྒྱས་ཀྱི་ཆོས་རྣམས་ནི་འདས་པ་མེད་པ་དང་། རྣམ་པར་འདས་པ་དང་། འདས་པ་དང་། རྗེས་སུ་འདས་པ་ལ་ཡང་དག་པར་འདུས་པའོ། །སངས་རྒྱས་ཀྱི་ཆོས་རྣམས་ནི་བླངས་པ་དང་། དོར་བ་དང་། ཀུན་ཏུ་བླང་བ་དང་། ཉེ་བར་བླང་བ་ལ་ཡང་དག་པར་འདུས་པའོ། །སངས་རྒྱས་ཀྱི་ཆོས་རྣམས་ནི་སྣང་བ་དང་། ཀུན་ཏུ་སྣང་བ་དང་། རྗེས་སུ་སྣང་བ་དང་། ཡང་དག་པར་སྣང་བ་མེད་པ་དང་། རབ་ཏུ་སྣང་བ་མེད་པ་ལ་ཡང་དག་པར་འདུས་པའོ། །སངས་རྒྱས་ཀྱི་ཆོས་རྣམས་ནི་ཡང་དག་པ་དང་། ཤིན་ཏུ་ཡང་དག་པ་དང་། རྗེས་སུ་ཡང་དག་པ་དང་། ཀུན་ཏུ་ཡང་དག་པ་མ་ཡིན་པ་དང་། རབ་ཏུ་ཡང་དག་པ་མ་ཡིན་པ་ལ་ཡང་དག་པར་འདུས་པའོ། །སངས་རྒྱས་ཀྱི་ཆོས་རྣམས་ནི་ཀུན་ཏུ་སྨྲ་བ་དང་། རྣམ་པར་སྨྲ་བ་དང་། ཤིན་ཏུ་སྨྲ་བ་དང་། རྗེས་སུ་སྨྲ་བ་དང་། རབ་ཏུ་སྨྲ་བ་དང་། ཉེ་བར་སྨྲ་བ་ལ་ཡང་དག་པར་འདུས་པའོ། །སངས་རྒྱས་ཀྱི་ཆོས་རྣམས་ནི་ཀུན་ཏུ་རིག་པ་དང་། རྣམ་པར་རིག་པ་དང་མཚུངས་པར་རིག་པ་དང་རྗེས་སུ་རིག་པ་ལ་ཡང་དག་པར་འདུས་པའོ། །སངས་རྒྱས་ཀྱི་ཆོས་རྣམས་ནི་ཀུན་ཏུ་གཟུགས་དང་། རྣམ་པར་གཟུགས་དང་། མཚུངས་པར་གཟུགས་དང་། ཡང་དག་
པར་གཟུགས་དང་། ཉེ་བའི་གཟུགས་ལ་ཡང་དག་པར་འདུས་པའོ། །རིགས་ཀྱི་བུ་སངས་རྒྱས་ཀྱི་བྱང་ཆུབ་ནི་ཀུན་ཏུ་སྤྱོད་པ་དང་། རྣམ་པར་སྤྱོད་པ་དང་། མཚུངས་པར་སྤྱོད་པ་དང་། རྗེས་སུ་སྤྱོད་པ་དང་། ཉེ་བར་སྤྱོད་པ་ལ་ཡང་དག་པར་འདུས་པའོ། །རིགས་ཀྱི་བུ་བྱང་ཆུབ་ནི་ཀུན་ཏུ་བརྗོད་པ་དང་། རྣམ་པར་བརྗོད་པ་དང་། རྗེས་སུ་བརྗོད་པ་དང་། མཚུངས་པར་བརྗོད་པ་དང་། ཉེ་བར་བརྗོད་པ་ལ་ཡང་དག་པར་འདུས་པའོ། །རིགས་ཀྱི་བུ་བྱང་ཆུབ་ནི་བགྲང་བ་དང་། རྣམ་པར་བགྲང་བ་དང་། མཚུངས་པར་བགྲང་བ་དང་། རྗེས་སུ་བགྲང་བ་དང་། ཉེ་བར་བགྲང་བ་ལ་ཡང་དག་པར་འདུས་པའོ། །བྱང་ཆུབ་ནི་ཀུན་ཏུ་ཡོད་པ་དང་། རྣམ་པར་ཡོད་པ་དང་། རྗེས་སུ་ཡོད་པ་དང་། ཉེ་བར་ཡོད་པ་ལ་ཡང་དག་པར་འདུས་པའོ། །རིགས་ཀྱི་བུ་བྱང་ཆུབ་ནི་སྤྲོས་པ་དང་། རྣམ་པར་སྤྲོས་པ་དང་། སྤྲོས་པ་དང་བྲལ་བ་དང་། རྗེས་སུ་སྤྲོས་པ་དང་། ཉེ་བར་སྤྲོས་པ་ལ་ཡང་དག་པར་འདུས་པའོ། །རིགས་ཀྱི་བུ་ཇི་ལྟར་ནམ་མཁའི་ཁམས་ལ་གཟུང་དུ་མེད་པ་དེ་ལྟར་སངས་རྒྱས་ཀྱི་བྱང་ཆུབ་བལྟ་བར་བྱའོ། །རིགས་ཀྱི་བུ་ལ་ལ་ནམ་མཁའ་སྤྲོས་པར་བྱ་བ་དང་། ཚད་དུ་བྱ་བ་དང་། རྣམ་པར་འགྲན་པར་བྱ་བ་དང་། བརྒྱན་པར་བྱ་བ་དང་། རི་མོར་བྱ་བར་ནུས་སམ།རིགས་ཀྱི་བུ་མི་ནུས་སོ། །སྨྲས་པ། རིགས་ཀྱི་བུ་ནམ་མཁའ་ཇི་ལྟ་བ་དེ་ལྟར་སངས་རྒྱས་ཀྱི་ཆོས་ཀྱང་དེ་བཞིན་ཏེ། ནམ་མཁའ་ཅིས་ཀྱང་སྤྲོས་པར་མི་ནུས་པ་ཇི་ལྟ་བ་དེ་ལྟར་སངས་རྒྱས་ཀྱི་ཆོས་ཀྱང་དེ་བཞིན་དུ་ཅིས་ཀྱང་སྤྲོས་པར་མི་ནུས་སོ། །རིགས་ཀྱི་བུ་ཁང་པ་བརྩེགས་པར་བཅོམ་ལྡན་འདས་བདག་བཞུགས་པ་ནི་གང་། སངས་རྒྱས་ཀྱི་སྐུ་བཞུགས་པ་ནི་གང་། ཞེས་བྱ་བ་ཁྱོད་ཅིའི་ཕྱིར་དེ་སྐད་སྨྲ། དེ་ལྟར་སྤྲོས་པར་བྱེད་ཅེས་བྱང་ཆུབ་སེམས་དཔའ་དགྲ་རྣམ་པར་འགྲེལ་པས་གཉིས་སུ་མེད་པའི་ཆོས་ཀྱི་སྒོ་འདི་བསྟན་པ་ན། བྱང་ཆུབ་སེམས་དཔའ་ཁྲག་ཁྲིག་ཕྲག་ལྔ་བཅུ་རྩ་བདུན་མི་སྐྱེ་བའི་ཆོས་ཀྱི་བཟོད་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་ཁྲག་ཁྲིག་ཕྲག་བཞི་བཅུ་རྩ་གཉིས་དེ་བཞིན་གཤེགས་པའི་གསང་བའི་རྗེས་སུ་འཇུག་པ་གཉིས་སུ་མེད་པའི་ཆོས་ཀྱི་སྒོ་སོ་སོར་ཐོབ་ཅིང་སངས་རྒྱས་ཀྱི་ཞིང་ཐམས་
ཅད་ཀྱང་རྒྱས་པར་གྱུར་ཏོ། །ས་དང་ནམ་མཁའ་ལ་གནས་པའི་སེམས་ཅན་གྱིས་ལེགས་སོ་ཞེས་བྱ་བ་བྱིན་ཏེ། སྐྱེས་བུ་དམ་པ་དེ་བཞིན་གཤེགས་པའི་གསང་བའི་རྗེས་སུ་འཇུག་པ་གཉིས་སུ་མེད་པའི་ཆོས་ཀྱི་སྒོ་འདི་སྟོན་པ་བསྟན་པ་ལེགས་པར་བཤད་པ་ལེགས་སོ་ལེགས་སོ། །དེ་ནས་དེ་ཉིད་ཀྱི་ཚེ་ན་བཅོམ་ལྡན་འདས་འོད་ཟེར་འབྱུང་བའི་བདག་པོ་ཞེས་བྱ་བའི་ཏིང་ངེ་འཛིན་ལས་བཞེངས་ཏེ། ཁང་པ་བརྩེགས་པ་གཅིག་ན་བཅོམ་ལྡན་འདས་བཞུགས་པར་ཡང་དག་པར་མཐོང་བ་མ་གཏོགས་པར་སངས་རྒྱས་ཀྱི་སྐུ་དེ་དག་དང་། ཁང་པ་བརྩེགས་པ་དེ་དག་ཀྱང་མི་སྣང་བར་གྱུར་ནས། འཁོར་ཐམས་ཅད་དང་ལྡན་པ་དེ་ངོ་མཚར་ཐོབ་པར་གྱུར་ཏོ། །དེ་ནས་བྱང་ཆུབ་སེམས་དཔའ་རྒྱལ་པོ་མང་པོའི་མཆོག་གིས་བྱང་ཆུབ་སེམས་དཔའ་དྲང་སྲོང་རྣམ་པར་འགྲེལ་པ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁང་པ་བརྩེགས་པ་འདི་དག་ནི་གང་ནས་འོངས། ཡང་གང་དུ་འགྲོ། དེ་ནས་བྱང་ཆུབ་སེམས་དཔའ་དྲང་སྲོང་རྣམ་པར་འགྲེལ་པས་བྱང་ཆུབ་སེམས་དཔའ་རྒྱལ་པོ་མང་པོའི་མཆོག་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ད་དུང་འགྲོ་བ་དང་། འོང་བའི་འདུ་ཤེས་སུ་འཇུག་གོ །བྱང་ཆུབ་སེམས་དཔའ་རྒྱལ་པོ་མང་པོའི་མཆོག་གིས་སྨྲས་པ། རིགས་ཀྱི་བུ་འདི་ལྟར་འོངས་སོ་ཞེས་བྱ་བ་འདི་ནི་གློ་བུར་གྱི་ཚིག་གོ །རིགས་ཀྱི་བུ་འགྲོའོ་ཞེས་བྱ་བ་འདི་ནི་བདག་མེད་པའི་ཚིག་གོ །བྱང་ཆུབ་སེམས་དཔའ་དགྲ་རྣམ་པར་འགྲེལ་པས་སྨྲས་པ། རིགས་ཀྱི་བུ་གློ་བུར་གྱི་ཚིག་དང་། རིགས་ཀྱི་བུ་བདག་མེད་པའི་ཚིག་གིས་ཀྱང་རིགས་ཀྱི་བུ་ང་ཡིར་བྱ་བ་དང་། བདག་གིར་བྱ་བའི་ཚིག་གོ །སྐྱེས་བུ་གང་ཟག་ང་ཡིར་བྱ་བ་དང་། བདག་གིར་བྱ་བ་ལ་ཆགས་པས་ཕྱིན་ཅི་ལོག་བཞི་སྟེ། མི་རྟག་པ་ལ་རྟག་པར་འདུ་ཤེས་པ་དང་། སྡུག་བསྔལ་བ་ལ་བདེ་བར་འདུ་ཤེས་པ་རྣལ་འབྱོར་གྱི་རྗེས་སུ་ལྡན་པ་དང་། མི་གཙང་བ་ལ་གཙང་བར་འདུ་ཤེས་པ་དང་། བདག་མེད་པ་ལ་བདག་ཏུ་འདུ་ཤེས་པར་རྣལ་འབྱོར་གྱི་རྗེས་སུ་ལྡན་པ་ལ་ཞུགས་པའོ། །སྐྱེས་བུ་གང་ཟག་སེམས་ཕྱིན་ཅི་ལོག་ལ་ཞུགས་པས་སྒྲིབ་པ་ལྔར་འགྱུར་རོ། །ལྔ་གང་ཞེ་ན། འདི་ལྟ་སྟེ། འདོད་པ་ལ་སྲེད་པའི་སྒྲིབ་པ་དང་། གནོད་སེམས་དང་། རྨུགས་པ་དང་། གཉིད་
དང་། ལེ་ལོ་དང་། རྒོད་པ་དང་། འགྱོད་པ་དང་། ཐེ་ཙོམ་གྱི་སྒྲིབ་པ་སྤངས་པ་མེད་པར་འགྱུར་རོ། །རིགས་ཀྱི་བུ་གང་ལ་ལ་སྒྲིབ་པ་ལྔ་པོ་འདི་དག་ཏུ་འགྱུར་བ་དེ་མཚམས་མེད་པ་ལྔ་ཡང་དག་པར་སྤྱོད་དོ། །མཚམས་མེད་པ་ལྔ་མ་སྤངས་པའི་སྐྱེ་བུ་གང་ཟག་ལྷ་དང་མིའི་ནང་དུ་འགྲོ་བར་ཡང་དག་པར་རྗེས་སུ་མི་མཐོང་ན་ཉན་ཐོས་ཀྱི་བྱང་ཆུབ་ལྟ་ཅི་སྨོས། གང་ལ་ཉན་ཐོས་ཀྱི་བྱང་ཆུབ་མེད་པ་དེ་ལ་རང་སངས་རྒྱས་ཀྱི་བྱང་ཆུབ་དང་། སངས་རྒྱས་ཀྱི་བྱང་ཆུབ་ལྟ་ཡང་ཅི་སྨོས། གང་ལ་ང་ཡིར་བྱ་བ་དང་། བདག་གིར་བྱ་བ་མ་སྤངས་པ་དེ་ལ་རྟག་པ་དང་། ཆད་པ་ཡང་སྤངས་པ་མེད་དོ། །གང་གང་ཟག་ཆད་པར་ལྟ་བ་ཅན་དུ་འགྱུར་བ་དེ་དགེ་བའི་ལས་དང་། དགེ་བ་ལ་སྤྱོད་པའི་མཚུངས་པར་སྤྱོད་པར་ལྟ་ག་ལ་འགྱུར། གང་ཡང་རྟག་པར་ལྟ་བ་ཅན་དུ་འགྱུར་བ་དེ་ཐར་བ་ལ་བསྔོས་པ་མཚུངས་པར་སྤྱོད་པ་དང་། དགེ་བ་ལ་སྤྱོད་པར་ལྟ་ག་ལ་འགྱུར། རྟག་པར་ལྟ་བ་དང་། ཆད་པར་ལྟ་བའི་སྐྱེས་བུ་གང་ཟག་ནི་ལྷ་དང་། མིའི་ནང་དུ་སྐྱེ་བར་ཡང་དག་པར་རྗེས་སུ་མི་མཐོང་ན། ཉན་ཐོས་དང་། རང་བྱང་ཆུབ་ལྟ་ཅི་སྨོས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་ག་ལ་མཐོང་། ང་ཡིར་བྱ་བ་དང་། བདག་གིར་བྱ་བ་ལྟ་བར་སོང་བ་གནས་པ་མེད་པས་ཉན་ཐོས་དང་། རང་སངས་རྒྱས་ཀྱི་ཐེག་པས་མ་འདྲེས་པའི་འཁོར་ཇི་ལྟ་བུར་ཡང་དག་པར་འོངས་པ་སྨྲ་བ་མེད་པ་དེ་དང་རིགས་ཀྱི་བུ་ཁྱོད་ཀྱང་སྨྲ་བ་མེད་པར་མཐོང་ངོ་། །བྱང་ཆུབ་སེམས་དཔའ་ལག་བཟངས་ཀྱིས་སྨྲས་པ། རིགས་ཀྱི་བུ་ཅི་འགྲོ་བ་དང་འོང་བར་འདུ་ཤེས་པ་ཡིད་ལ་མི་བྱ་བའམ། གལ་ཏེ་ཡིད་ལ་མི་བྱ་ན་བྱང་ཆུབ་སེམས་དཔའི་སྦྱིན་པའི་གནས་རྣམས་ལ་བྱིན་ལེན་དང་ཡོ་བྱད་ཀྱིས་ཇི་ལྟར་བསྙེན་བཀུར་བྱ། ཕ་དང་མ་རྣམས་རིམ་གྲོའི་གནས་དང་། ནད་པ་རྣམས་ལ་ཇི་ལྟར་བསྙེན་བཀུར་བྱ། སྨྲས་པ། རིགས་ཀྱི་བུ་སྤྲོས་པ་མེད་པ་ནི་འདི་ལྟ་སྟེ། གནས་དང་། ཉེ་བའི་གནས་དང་། རབ་ཀྱི་གནས་དང་། གནས་གཞན་དང་། རིམ་གྲོའི་གནས་དང་། ཀུན་ཏུ་འགྲོ་བ་དང་། ལྷག་པར་འགྲོ་བ་དང་། ཉེ་བར་འགྲོ་བ་དང་། རྗེས་སུ་འགྲོ་བ་དང་། གཞན་དུ་འགྲོ་བ་འདིའི་ཚིག་དེ་དག་ཐམས་ཅད་ནི་སྤྲོས་པ་མེད་པའོ། །དེ་ཅིའི་ཕྱིར་ཞེ་ན། རིགས་ཀྱི་བུ་རྟོག་པ་
དང་། རྣམ་པར་རྟོག་པ་དང་། རྗེས་སུ་རྟོག་པ་དང་། ཉེ་བར་རྟོག་པ་དང་། རབ་ཏུ་རྟོག་པ་འདི་དག་གིས་འཁོར་བ་འདྲེན་ནོ། །གཞོག་གོ་སྒྲུབ་བོ། །མེ་ཏོག་ནི་ལྷ་དང་། མིར་སྐྱེ་བའོ། །འབྲས་བུ་ནི་ངན་སོང་གསུམ་དུ་འགྲོ་བ་ལ་ཡང་དང་ཡང་དུ་འཆི་འཕོ་སྐྱེ་བ་དང་། སྐད་ཅིག་མའི་ཆོས་བརྒྱད་ལ་ཡང་དག་པར་གཞོལ་བ་དང་འདི་དག་ནི་ཉེས་པའོ། །གང་སྤྱོད་པ་དང་། རྣམ་པར་སྤྱོད་པ་དང་། ཉེ་བར་སྤྱོད་པ་དང་། རྗེས་སུ་སྤྱོད་པ་འདི་དག་གི་དངོས་པོ་ཐམས་ཅད་ནི་འཕགས་པའི་བཟོད་པ་སྤོང་བའི་ཕྱིར་སྒྲུབ་བོ། །སྨྲས་པ། རིགས་ཀྱི་བུ་གང་སངས་རྒྱས་ཀྱི་ཡོན་ཏན་བསྒྲུབ་པའི་ཕྱིར་དགེ་བ་ལ་སྤྱོད་པ་དེ་ཅི་འཕགས་པའི་བཟོད་པ་འཁྲུག་པར་འགྱུར་རམ། སྨྲས་པ། རིགས་ཀྱི་བུ་གང་དགེ་བའི་ཆོས་ལ་ཉུང་ངུ་འདོད་ཅིང་སྡིག་པ་ལ་མང་དུ་འདོད་པ་ནི་འཕགས་པའི་བཟོད་པ་ལ་འཁྲུག་པའོ། །རྣམ་པར་འཇིག་པའོ། །འཐོར་བའོ། །གཏི་མུག་པའོ། །གང་དེ་དགེ་བའི་ཆོས་ཡོངས་སུ་སྤངས་པ་དེ་འདོད་པའི་རྟོག་པ་ཞེས་སྨྲས་སོ། །གང་འདོད་པའི་རྟོག་པ་དེ་ཀུན་ཏུ་སྤྱོད་པའི་བཟོད་པ་ལ་འཁྲུག་པ་དང་འཇིག་པའོ། །དེ་བཟོད་པའི་ཚོགས་མེད་པ་འདི་ནི་ཡོངས་སུ་སྤོང་བའོ། །རིགས་ཀྱི་བུ་ངག་དང་། ཡིད་དང་། དྲུག་གི་སྐྱེ་མཆེད་ཀྱི་སྡོམ་པ་དང་། མངོན་པར་འདུ་མི་བྱེད་པ་དང་། བརྗོད་དུ་མེད་པ་དང་། རྩོལ་བ་མེད་པ་དང་། རྟོག་པ་མེད་པ་དང་། རྣམ་པར་རྟོག་པ་མེད་པ་དང་། དམིགས་པ་མེད་པ་དང་། སེམས་དང་ཡིད་ཀྱིས་དམིགས་པ་མེད་པ་སྟེ། དེ་ནི་འཕགས་པའི་བཟོད་པའི་ཚོགས་སོ། །གང་ཡང་སེམས་ཀྱི་རྣམ་པར་ལས་དང་། ལུས་ཀྱི་རྣམ་པར་ལས་དང་། ངག་གི་རྣམ་པར་ལས་དེ་ཐམས་ཅད་འཕགས་པའི་བཟོད་པ་ལ་གཏི་མུག་དང་། ཡོངས་སུ་སྤོང་བའི་ཕྱིར་སྒྲུབ་བོ། །གཞན་ཡང་ཆོས་ཀྱི་བྱ་བའམ། མི་འགུལ་བའམ། མཚན་ཉིད་དམ། རྟོག་པ་དེ་འཕགས་པའི་བཟོད་པ་ལ་གཏི་མུག་དང་ཡོངས་སུ་སྤོང་བའི་ཕྱིར་སྒྲུབ་བོ། །གང་ཡང་ལུས་དང་། ངག་དང་། ཡིད་ཀྱི་བྱ་བ་མེད་པ་དང་། འགྱུར་བ་མེད་པ་དང་། མཚན་ཉིད་མེད་པ་དང་། རྟོག་པ་མེད་པ་དེ་འཕགས་པའི་བཟོད་པའི་ཚོགས་སྒོམ་པའོ། །གཉིས་སུ་མེད་པའི་ཆོས་ཀྱི་མཐའི་རྗེས་སུ་ཞུགས་ཤིང་ཡང་དག་པའི་མཐའ་དང་ལྡན་ནོ། །ཅུང་ཟད་དུ་ཉོན་མོངས་པ་
ཐམས་ཅད་ཀྱི་མཐའ་དང་། ཆོས་ཐམས་ཅད་ཀྱི་ཡང་མཐའོ། །གང་དེ་ལྟར་རབ་ཏུ་ཤེས་པ་དེ་བཟོད་པ་སྒོམ་པའོ། །གང་ཡི་གེ་ལ་འཁྲུག་པ་མེད་པ་དང་། ཉོན་མོངས་པ་ཐམས་ཅད་ཐུལ་བ་དང་། བརྗོད་དུ་མེད་པ་ལ་གཡོ་བ་མེད་པ་དང་། སྨྲ་བ་ཐམས་ཅད་ལ་ཆགས་པ་མེད་པ་དང་། གང་མི་སྐྱེ་བ་མི་འབྱུང་བར་བསྒྲགས་པའི་ཆོས་རབ་ཏུ་ཤེས་པ་དེ་བཟོད་པ་སྒོམ་པའོ། །གང་ཆོས་ཀྱི་ཁམས་ལ་གནས་པ་དང་། སེམས་ཅན་གྱི་ཁམས་ལ་ཡང་དག་པར་གཞོལ་བ་དང་། ཆོས་ཀྱི་ཁམས་དང་སེམས་ཅན་གྱི་ཁམས་ཀྱང་མཚུངས་པའི་ཁམས་སུ་བཟུང་སྟེ་ཐ་དད་པར་མི་བྱེད་པ་དང་། མཚན་ཉིད་ཀྱི་ཁམས་ཀྱང་འཁྲུག་པར་མི་བྱེད་པ་དེ་བཟོད་པ་སྒོམ་པའོ། །གང་ཆོས་ཐམས་ཅད་དམིགས་པ་མེད་ཅིང་བདག་དང་གཞན་མེད་པ་མི་སྐྱེ་བའི་ཕྱིར་སྣང་བ་མེད་པ། གཟུང་དུ་མེད་པ་ཀུན་ནས་ལྡང་བ་མེད་པ། ལུས་མེད་པ། བསྒོམ་པ་མེད་པ། སྐྱེ་བ་མི་འབྱུང་བ། འཆི་འཕོ་མེད་པ། བརྟེན་པ་མེད་པ། གཡོ་བ་མེད་པ། འགྱུར་བ་མེད་པ། ཡོད་པར་རྟོག་པ་དང་། མེད་པར་རྟོག་པ་དང་བྲལ་བ། སྣོད་མ་ཡིན་པ། ཡོངས་སུ་རྟོག་པ་མེད་པ། འདོད་ཆགས་དང་བྲལ་བ། རྡུལ་དང་བྲལ་བ། རིགས་སྤངས་པ། རང་བཞིན་ཡོངས་སུ་དག་པ། དྲི་མ་མེད་པ། ཉོན་མོངས་པ་མེད་པ། སྒྲོ་བཏགས་པ་མེད་པ། ཀུན་ནས་ལངས་པ་མེད་པ། འཁྲུག་པ་མེད་པའི་ཆོས་ཐམས་ཅད་མེད་པར་ཇི་ལྟ་བ་བཞིན་དུ་རབ་ཏུ་ཤེས་པ་དེ་བཟོད་པ་སྒོམ་མོ། །གང་རྐྱེན་དང་བྲལ་བ་དང་། རབ་ཏུ་རྒྱུ་བ་ཉེ་བར་ཞི་བ་དང་། ལམ་མ་རུངས་པ་ལས་ཡང་དག་པར་ཤིན་ཏུ་འདས་པ་དང་། འབྱུང་བ་མེད་པ་དང་། འཇུག་པ་མེད་པ་དང་། རིངས་པ་མེད་པ་དང་། ཡུལ་ཐམས་ཅད་ལ་རྣམ་པར་དམིགས་པ་མེད་པ་དང་། རྣམ་པར་ཤེས་པའི་ལམ་ལས་ཤིན་ཏུ་ཡང་དག་པར་འདས་པ་དང་། བཏགས་པ་མེད་པ་དང་། བཀྲོལ་བ་མེད་པ་དང་། འོང་བ་མེད་པ་དང་། གནས་མེད་པ་དང་། གནས་པ་མེད་པ་དང་། ས་བོན་མེད་པ་དང་། རྩ་བ་མེད་པ་དང་། ཡིད་བརྟན་པ་ཉེ་བར་ཞི་ཞིང་རབ་ཏུ་ཞི་བ་དང་། ཡོངས་སུ་གདུངས་པ་མེད་པ་དང་། ཤིན་ཏུ་མཐར་ཐུག་པ་དང་། ཡང་སྲིད་པ་ཀུན་ནས་ལྡང་བ་མེད་པ་དང་། མྱ་
ངན་ལས་འདའ་བ་ལ་མངོན་པར་དགའ་བ་དང་འདི་འདྲ་བར་ཡིད་ལ་བྱས་པས་བཟོད་པ་ཡོངས་སུ་རྫོགས་པར་འགྱུར་རོ། །རྟོག་པ་དང་། རྣམ་པར་རྟོག་པ་དང་། ཀུན་ཏུ་རྟོག་པ་དང་། ཡང་དག་པར་རྟོག་པ་དང་། ཉེ་བར་རྟོག་པ་དང་། འགྲོ་བ་དང་། ཀུན་ཏུ་འགྲོ་བ་དང་། མངོན་པར་འགྲོ་བ་དང་། ཉེ་བར་འགྲོ་བར་ཡིད་ལ་བྱེད་པས་བཟོད་པ་སྒོམ་པར་མི་འགྱུར་རོ། །རིགས་ཀྱི་བུ་འོང་བ་ཞེས་བྱ་བ་འདི་ནི་ཡང་དག་པར་འདྲེན་པའི་ཚིག་གོ །རིགས་ཀྱི་བུ་གང་ལ་འདྲེན་པ་མེད་ཅིང་ཡང་དག་པར་འདྲེན་པ་མེད་པ་དེ་ལ་འགྲོ་བ་མེད་ཅིང་འོང་བ་ཡང་མེད་དོ། །འགྲོ་བ་མེད་པ་དང་། འོང་བ་མེད་པའི་ཀུན་གཞི་ཀུན་ཏུ་གཞོམ་པའི་ཕྱིར་གཉིས་སུ་མེད་པའི་ཆོས་ཀྱི་སྒོའི་བཟོད་པ་བསྒོམ་མོ། །རིགས་ཀྱི་བུ་འོང་ངོ་ཞེས་བྱ་བ་ལས་ཀྱི་མཚན་ཉིད་ལ་དམིགས་པ་འདི་ནི་བཟོད་པ་སྒོམ་པ་ཡོངས་སུ་སྤང་བའི་ཕྱིར་ཡང་དག་པར་སྒྲུབ་བའོ། །རིགས་ཀྱི་བུ་འགྲོའོ་ཞེས་བྱ་བའི་ལས་ཀྱི་མཚན་ཉིད་ཀྱི་རྒྱུ་འདི་ནི་མཚན་ཉིད་མེད་པ། མཚན་ཉིད་དང་བྲལ་བའི་བཟོད་པ་སྒོམ་པ་ཞེས་བྱ་བའོ། །འོང་ངོ་ཞེས་བྱ་བའི་སྨོན་ལམ་མཚན་ཉིད་ཀྱི་རྒྱུ་འདི་ནི་བཟོད་པ་འགོག་པའི་ཕྱིར་ཡང་དག་པར་སྒྲུབ་ཀྱི་འདི་ནི་བཟོད་པ་སྒོམ་པ་མ་ཡིན་ནོ། །རིགས་ཀྱི་བུ་འགྲོའོ་ཞེས་བྱ་བ་འདི་ནི་སྨོན་ལམ་ཟད་པ་དང་། མེད་པ་དང་། ཞི་བའི་བཟོད་པ་སྒོམ་པ་ཞེས་བྱའོ། །རིགས་ཀྱི་བུ་འོང་ངོ་ཞེས་བྱ་བ་འབྱུང་བའི་མཚན་ཉིད་འདི་ནི་བཟོད་པ་ལས་གཏི་མུག་པ་ཡིན་གྱི་བཟོད་པ་སྒོམ་པ་མ་ཡིན་ནོ། །རིགས་ཀྱི་བུ་འགྲོའོ་ཞེས་བྱ་བ་དམིགས་པ་མེད་པ་དང་། འགལ་བའི་མཚན་ཉིད་འདི་ནི་བཟོད་པ་སྒོམ་པ་ཞེས་སྨྲས་སོ། །རིགས་ཀྱི་བུ་འོང་ངོ་ཞེས་བྱ་བ་རྣམ་པར་དམིགས་པའི་སྒོའི་མཚན་ཉིད་འདི་ནི་བཟོད་པ་ལ་སྒོམ་པ་མ་ཡིན་གྱི་བཟོད་པ་ལ་འཁྲུག་པ་ཡིན་ནོ། །འགྲོའོ་ཞེས་བྱ་བ་རྣམ་པར་དམིགས་པ་ཟད་པའི་མཚན་ཉིད་དང་། ཉེ་བར་ཞི་བ་འདི་ནི་བཟོད་པ་སྒོམ་པ་ཞེས་སྨྲས་སོ། །རིགས་ཀྱི་བུ་འོང་ངོ་ཞེས་བྱ་བའི་ཀུན་གཞིའི་མཚན་ཉིད་འདི་ནི་བཟོད་པ་ལ་འཇུག་པ་ཡིན་གྱི་བཟོད་པ་སྒོམ་པ་ནི་མ་ཡིན་ནོ། །རིགས་ཀྱི་བུ་འགྲོའོ་ཞེས་བྱ་བའི་ཀུན་གཞི་ནུབ་པ་དང་ཞི་བ་འདི་ནི་བཟོད་པ་སྒོམ་པ་ཞེས་སྨྲས་སོ། །རིགས་ཀྱི་བུ་འོང་ངོ་ཞེས་བྱ་བ་འབྱུང་བའི་མཚན་
ཉིད་འདི་ནི་བཟོད་པ་ཡོངས་སུ་སྤངས་པ་ཡིན་གྱི་བཟོད་པ་སྒོམ་པ་ནི་མ་ཡིན་ནོ། །འགྲོའོ་ཞེས་བྱ་བ་རྒྱུ་ཟད་པའི་མཚན་ཉིད་འདི་དང་། རྣམ་པར་ཞི་བ་འདི་ནི་བཟོད་པ་སྒོམ་པའོ་ཞེས་སྨྲས་སོ། །རིགས་ཀྱི་བུ་འོང་ངོ་ཞེས་བྱ་བ་བརྡ་དང་ཐ་སྙད་ཀྱི་ཚིག་གི་མཚན་ཉིད་འདི་ནི་བཟོད་པ་སྒོམ་པ་མ་ཡིན་ནོ། །འགྲོའོ་ཞེས་བྱ་བ་ཐ་སྙད་རྣམ་པར་ཞི་བའི་གནས་འདི་ནི་བཟོད་པ་སྒོམ་པའོ་ཞེས་སྨྲས་སོ། །རིགས་ཀྱི་བུ་འོང་ངོ་ཞེས་བྱ་བ་སྔོན་གྱི་མཐའ་དང་། ཕྱི་མའི་མཐའ་མི་ཤེས་པའི་ཆུ་བོར་བྱིང་བ་འདི་ནི་བཟོད་པ་ལ་གཏི་མུག་པ་ཡིན་གྱི་བཟོད་པ་སྒོམ་པ་ནི་མ་ཡིན་ནོ། །འགྲོའོ་ཞེས་བྱ་བ་སྔོན་གྱི་མཐའ་དང་། ཕྱི་མའི་མཐའ་ཤེས་པ་དང་། མི་ཤེས་པ་རབ་ཏུ་སྤངས་ཏེ། རྒྱ་ཆེན་པོ་ཉེ་བར་ཞི་བ་འདི་ནི་བཟོད་པ་བསྒོམ་པའོ་ཞེས་སྨྲས་སོ། །རིགས་ཀྱི་བུ་འོང་ངོ་ཞེས་བྱ་བ་ལུས་དང་། ངག་དང་། ཡིད་ཀུན་སྤྱོད་པའི་མཚན་ཉིད་འདི་ནི་བཟོད་པ་བསྒོམ་པ་མ་ཡིན་ནོ། །འགྲོའོ་ཞེས་བྱ་བ་སྲེད་པའི་འདུ་བྱེད་ཉེ་བར་ཞི་བ་འདི་ནི་བཟོད་པ་སྒོམ་པའོ་ཞེས་སྨྲས་སོ། །རིགས་ཀྱི་བུ་འོང་ངོ་ཞེས་བྱ་བ་རྣམ་པར་ཤེས་པ་ཉེ་བར་ཞི་བ་དང་། རྣམ་པར་སྤྱོད་པ་ཆགས་པ་མེད་པའི་ཚིག་གི་མཚན་ཉིད་འདི་ནི་བཟོད་པ་སྒོམ་པ་མ་ཡིན་ནོ། །འགྲོའོ་ཞེས་བྱ་བ་རྣམ་པར་ཤེས་པ་རྣམ་པར་དམིགས་པ་དང་། རྣམ་པར་སྤྱོད་པ་ནུབ་པ་འདི་ནི་བཟོད་པ་སྒོམ་པའོ་ཞེས་སྨྲས་སོ། །འོང་ངོ་ཞེས་བྱ་བ་མིང་དང་གཟུགས་ཀུན་ནས་ལྡང་བའི་ཚིག་གི་མཚན་ཉིད་འདི་ནི་བཟོད་པ་སྒོམ་པ་མ་ཡིན་ནོ། །འགྲོའོ་ཞེས་བྱ་བ་མིང་དང་གཟུགས་ཉེ་བར་ཞི་བ་འདི་ནི་བཟོད་པ་སྒོམ་པའོ་ཞེས་སྨྲས་སོ། །འོང་ངོ་ཞེས་བྱ་བ་འདུལ་བ་དང་། ཀུན་ནས་ལྡང་ཞིང་འདོད་པའི་ཡོན་ཏན་གྱི་གནས་ཀྱི་མཚན་ཉིད་འདི་ནི་བཟོད་པ་སྒོམ་པ་མ་ཡིན་ནོ། །འགྲོའོ་ཞེས་བྱ་བ་དབང་པོ་དྲུག་ཉེ་བར་ཞི་ཞིང་ནུབ་པ་འདི་ནི་བཟོད་པ་སྒོམ་པའོ་ཞེས་སྨྲས་སོ། །འོང་ངོ་ཞེས་བྱ་བ་རེག་པའི་ཆུ་བོ་སྒོམ་པ་གཞན་གྱི་ཚིག་གི་མཚན་ཉིད་འདི་ནི་བཟོད་པ་སྒོམ་པ་མ་ཡིན་ནོ། འགྲོའོ་ཞེས་བྱ་བ་རེག་པའི་ཆུ་བོར་ཉེ་བར་འགྲོ་བ་འདི་ནི་བཟོད་པ་སྒོམ་པའོ་ཞེས་སྨྲས་སོ། །འགྲོའོ་ཞེས་བྱ་བ་ཚོར་བ་གསུམ་གྱི་རྒྱུན་གཅོད་པ་འདི་ནི་བཟོད་པ་སྒོམ་པའོ་ཞེས་སྨྲས་སོ། །འོང་ངོ་ཞེས་བྱ་བ་སྲེད་པའི་ཀུན་གཞི་ལ་འཇུག་པ་འདི་ནི་བཟོད་པ་སྒོམ་པ་མ་ཡིན་ནོ། །འགྲོའོ་
ཞེས་བྱ་བ་སྲེད་པ་གཏོང་བ་དང་། ནུབ་པ་འདི་ནི་བཟོད་པ་སྒོམ་པའོ་ཞེས་སྨྲས་སོ། །རིགས་ཀྱི་བུ་འོང་ངོ་ཞེས་བྱ་བ་ཉེ་བར་ལེན་པ་ལ་འཇུག་པའི་ཚིག་གི་མཚན་ཉིད་འདི་ནི་བཟོད་པ་སྒོམ་པ་མ་ཡིན་ནོ། །འགྲོའོ་ཞེས་བྱ་བ་ཉེ་བར་ལེན་པ་སེལ་བ་འདི་ནི་བཟོད་པ་སྒོམ་པའོ་ཞེས་སྨྲས་སོ། །འོང་ངོ་ཞེས་བྱ་བ་སྒོམ་པ་མངོན་པར་འཇུག་པའི་ཚིག་གི་མཚན་ཉིད་འདི་ནི་བཟོད་པ་སྒོམ་པ་མ་ཡིན་ནོ། །འགྲོའོ་ཞེས་བྱ་བ་ཁོང་དུ་ཆུད་པ་ཆགས་པའི་ལམ་འདི་ནི་བཟོད་པ་སྒོམ་པའོ་ཞེས་སྨྲས་སོ། །རིགས་ཀྱི་བུ་འོང་ངོ་ཞེས་བྱ་བ་ཡང་དང་ཡང་སྙིང་པོར་འཇུག་པའི་ཚིག་གི་མཚན་ཉིད་འདི་ནི་བཟོད་པ་སྒོམ་པ་མ་ཡིན་ནོ། །འགྲོའོ་ཞེས་བྱ་བ་སྐྱེ་བ་ཟད་པ་འདི་ནི་བཟོད་པ་སྒོམ་པའོ་ཞེས་སྨྲས་སོ། །འོང་ངོ་ཞེས་བྱ་བ་ཡང་དང་ཡང་དགའ་བར་འཇུག་པའི་ཚིག་གི་མཚན་ཉིད་འདི་ནི་བཟོད་པ་སྒོམ་པ་མ་ཡིན་ནོ། །འགྲོའོ་ཞེས་བྱ་བ་རྒ་བ་ཟད་པ་སྤང་བའི་ཕྱིར་བཟོད་པ་སྒོམ་པའོ་ཞེས་སྨྲས་སོ། །རིགས་ཀྱི་བུ་འོང་ངོ་ཞེས་བྱ་བ་ཡང་དང་ཡང་ཤི་བའི་ཆུའི་ཆུ་བོར་ལྟུང་བའི་གནས་ཀྱི་མཚན་ཉིད་འདི་ནི་བཟོད་པ་སྒོམ་པ་མ་ཡིན་ནོ། །འགྲོའོ་ཞེས་བྱ་བ་ཤི་བའི་ཆུ་བོ་ལས་རྒལ་བ་འདི་ནི་བཟོད་པ་སྒོམ་པའོ་ཞེས་སྨྲས་སོ། །རིགས་ཀྱི་བུ་འོང་ངོ་ཞེས་བྱ་བ་མྱ་ངན་དང་། སྨྲེ་སྔགས་འདོན་པ་དང་། ཡིད་མི་བདེ་བ་དང་། འཁྲུག་པར་འཇུག་པའི་གནས་ཀྱི་མཚན་ཉིད་འདི་ནི་བཟོད་པ་སྒོམ་པ་མ་ཡིན་ནོ། །འགྲོའོ་ཞེས་བྱ་བ་སྡུག་བསྔལ་བ་དང་། འཁྲུག་པ་ཐམས་ཅད་ཉེ་བར་ཞི་བ་འདི་ནི་བཟོད་པ་སྒོམ་པའོ་ཞེས་སྨྲས་སོ། །རིགས་ཀྱི་བུ་འོང་ངོ་ཞེས་བྱ་བ་འདུ་བྱེད་ཀྱི་སྡུག་བསྔལ་ཐམས་ཅད་སྐྱེ་བ་དང་། རྒ་ཤི་དང་འཆི་འཕོ་སྐྱེ་བ་དང་། ཕྲད་པ་དང་། འབྲལ་བའི་སྡུག་བསྔལ་སྐྱེ་བའི་གནས་ཀྱི་མཚན་ཉིད་འདི་ནི་བཟོད་པ་སྒོམ་པ་མ་ཡིན་ནོ། །འགྲོའོ་ཞེས་བྱ་བ་འདུ་བྱེད་ཀྱི་སྡུག་བསྔལ་ཐམས་ཅད་ཉེ་བར་ཞི་བ་འདི་ནི་བཟོད་པ་སྒོམ་པའོ། །རིགས་ཀྱི་བུ་འོང་ངོ་ཞེས་བྱ་བ་ནི་སྡུག་བསྔལ་ཐམས་ཅད་སྐྱེ་ཞིང་ཕྱིན་ཅི་ལོག་བཞི་ཀུན་ནས་ལྡང་བའི་རང་བཞིན་ཏེ། དགེ་བ་ཐམས་ཅད་སྒོམ་པ་ལ་གེགས་བྱེད་པའོ། །རིགས་ཀྱི་བུ་འགྲོའོ་ཞེས་བྱ་བ་ནི་ཐམས་ཅད་ཉེ་བར་ཞི་བའོ། །སྡུག་བསྔལ་གྱི་ཕྱིན་ཅི་ལོག་གི་གཉེན་པོའོ། །རིགས་ཀྱི་བུ་དེ་བས་ན་འོང་ངོ་ཞེས་བྱ་བའི་ཚིག་ནི་ཉོན་མོངས་པ་ཐམས་ཅད་ཀུན་ཏུ་འདྲེན་པའོ་ཞེས་སྨྲས་
པ་ཡིན་ནོ། །འགྲོའོ་ཞེས་བྱ་བ་ནི་ཉོན་མོངས་པའི་བག་ཆགས་ཀྱི་རྗེས་སུ་འབྲེལ་པ་ཐམས་ཅད་འདྲེན་པ་མེད་པའོ་ཞེས་སྨྲས་པ་ཡིན་ནོ། །རིགས་ཀྱི་བུ་དེ་བས་ན་བརྗོད་དུ་མེད་པ་ལ་གཡོ་བ་མེད་དོ། །བརྗོད་པ་ཐམས་ཅད་ལ་ཡང་ཆགས་པ་མེད་དོ། །ཡི་གེའི་ཆོས་ཀྱི་དབྱིངས་ལ་འཁྲུག་པ་མེད་དོ། །བཟུང་བ་མེད་པ་དང་། ཀུན་ནས་ལྡང་བ་མེད་པ་དང་། ལུས་མེད་པ་དང་། འབྱུང་བ་མེད་པ་དང་། འདུ་བྱེད་ཐམས་ཅད་ལ་དམིགས་པའི་རྒྱུན་ཆད་པ་དང་། ཡོད་པར་རྟོག་པ་དང་། མེད་པར་རྟོག་པ་དང་བྲལ་བའི་བྱང་ཆུབ་སེམས་དཔའ་བཟོད་པ་ཡོངས་སུ་རྫོགས་པར་བྱེད་དོ། །བྱང་ཆུབ་སེམས་དཔའ་དགྲ་རྣམ་པར་འགྲེལ་བས་འདི་སྟོན་པ་བསྟན་པ་ན་སྔོན་དུ་འགྲོ་བ་ལག་བཟངས་ལ་སོགས་པ་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་དགུ་མི་སྐྱེ་བའི་ཆོས་ཀྱི་བཟོད་པ་ཐོབ་བོ། །སངས་རྒྱས་ཀྱི་ཞིང་ཐམས་ཅད་དང་ལྡན་པ་ས་དང་ནམ་མཁའ་ཁྱབ་པ་འདི་ལ་གནས་པས་མགྲིན་གཅིག་ཏུ་ལེགས་སོ་ཞེས་བྱ་བ་བྱིན་ཏེ། རིགས་ཀྱི་བུ་ཇི་ལྟ་བུར་ཁྱོད་ཀྱང་ཆོས་ཟབ་མོའི་ཚུལ་གྱི་རྗེས་སུ་ཞུགས་ཤིང་བྱང་ཆུབ་སེམས་དཔའི་ཀུན་ནས་ཡོན་ཏན་རྣམ་པར་རོལ་པ་མངོན་པར་ཤེས་པ་ཆགས་པ་མེད་པའི་སྤོབས་པ་དང་ལྡན་པ་གང་གི་ཕྱིར་ཁྱོད་ཀྱིས་བདག་ཅག་ལ་འདི་འདྲ་བའི་ཆོས་ཀྱི་ཆར་རབ་ཏུ་ཕབ་པ་ལེགས་སོ་ལེགས་སོ། །དེ་ཉིད་ཀྱི་ཚེ་ན་ཕྱོགས་བཅུ་ནས་འདུས་པའི་ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་མང་པོ་ལྷ་རྣམས་ཀྱི་མེ་ཏོག་དང་། ཕྲེང་བ་དང་། དྲི་དང་། བྱུག་པས་བྱང་ཆུབ་སེམས་དཔའ་དགྲ་རྣམ་པར་འགྲེལ་པ་ལ་མཆོད་པའི་ལས་ཀྱི་ཕྱིར་འདུན་ཅིང་བརྩོན་ནོ། །དེའི་ལུས་ལ་མེ་ཏོག་དང་། ཕྲེང་བ་དང་། དྲི་དང་། བྱུག་པས་གཏོར་བས་རིགས་ཀྱི་བུ་ཡང་དེ་ལྟར་ཏིང་ངེ་འཛིན་གྱི་སྟོབས་ཀྱིས་རིན་པོ་ཆེ་སྣ་ཚོགས་སུ་བྱིན་གྱིས་བརླབས་ཏེ་ཕུང་པོ་ཕྱོགས་གཅིག་ཏུ་བཞག་ནས། བཅོམ་ལྡན་འདས་ཀྱི་སླད་དུ་རིན་པོ་ཆེ་སྣ་བདུན་གྱི་སེང་གེའི་ཁྲི་འཕང་དུ་དཔག་ཚད་སྟོང་ཞེང་དུ་དཔག་ཚད་བཅུ་པ་ལྷ་རྫས་ཀྱི་གོས་ཀྱིས་བཏིང་བ། བལྟ་ན་སྡུག་པ་རྣམ་པ་སྣ་ཚོགས་བྱུང་ངོ་། །སངས་རྒྱས་ཀྱི་ཞིང་འདིར་མུ་སྟེགས་ཅན་གཞན་དཀའ་ཐུབ་དང་།
བརྟུལ་ཞུགས་དང་། སྤྱོད་པ་དང་། སྤྱོད་ལམ་ལ་བརྩོན་པར་བྱིན་གྱིས་བརླབས་པ་ཇི་སྙེད་པ་དང་། གང་ཡང་ཕྱོགས་བཅུའི་ཞིང་སྟོང་པ་དང་། རྙོག་པ་ལྔའི་སངས་རྒྱས་ཀྱི་ཞིང་མཐའ་ཡས་མུ་མེད་པ་ན་མུ་སྟེགས་གཞན་དཀའ་ཐུབ་དང་། བརྟུལ་ཞུགས་དང་། སྤྱོད་པ་དང་། སྤྱོད་ལམ་ལ་བརྩོན་པ་བྱིན་གྱིས་བརླབས་པ། དཀའ་ཐུབ་ངན་པ་དེ་དག་ཐམས་ཅད་ཀྱིས་རིན་པོ་ཆེ་སྣ་བདུན་གྱི་སེང་གེའི་ཁྲི་ཡང་དག་པར་མཐོང་ངོ་། །ལ་ལ་དཀའ་ཐུབ་ལྔ་པ་དག་ཉི་མ་དང་ཟླ་བ་ལ་ཕྱག་འཚལ་བར་ཡང་དག་པར་མཐོང་ངོ་། །ལ་ལ་ཆུ་འཛིན་པ་དང་། ལ་ལ་འདམ་འཛིན་པ་དང་། ཆུ་དང་འདམ་འཛིན་པ་དང་། ལ་ལ་སྐྲ་འཛིན་པ་དང་། ཨག་ཚོམ་འཛིན་པ་དང་། སྐྲ་དང་ཨག་ཚོམ་འཛིན་པ་དང་། ལ་ལ་རྐང་པ་འདེགས་པ་དང་། ལག་པ་འདེགས་པ་དང་། ལ་ལ་ནགས་ཚལ་གྱི་རྩ་བ་དང་འདབ་མ་ཟ་བ་དང་། ཚེར་མའི་སྟེང་དུ་ཉལ་བ་དང་། ལ་ལ་རུས་པའི་ཕྱེ་མས་ལུས་བསྐུས་པ་དང་། མིའི་མགོ་བོའི་ཕྲེང་བ་དང་། མགོ་ལག་མཐིལ་ན་འཆང་བ་ཡང་དག་པར་མཐོང་ངོ་། །ལ་ལ་ཕྱུགས་ཀྱི་བརྟུལ་ཞུགས་ཅན་དང་། ཁྱིའི་བརྟུལ་ཞུགས་ཅན་དང་། ཕག་གི་བརྟུལ་ཞུགས་ཅན་དང་། རི་དགས་གྱི་བརྟུལ་ཞུགས་ཅན་དང་། བྱའི་བརྟུལ་ཞུགས་ཅན་དང་། མེའི་བརྟུལ་ཞུགས་ཅན་དང་། ཟླ་བའི་བརྟུལ་ཞུགས་ཅན་དང་། ཉི་མའི་བརྟུལ་ཞུགས་ཅན་དང་། ཆུའི་བརྟུལ་ཞུགས་ཅན་དང་། འཛེག་པའི་བརྟུལ་ཞུགས་ཅན་དང་། དཀའ་ཐུབ་རྣམ་པ་སྣ་ཚོགས་ཀྱི་ནད་གསོས། དེ་ལ་སོགས་པ་མུ་སྟེགས་ཅན་གཞན་ལ་ལ་དཀའ་ཐུབ་དང་། བརྟུལ་ཞུགས་དང་། སྤྱོད་པ་དང་། སྤྱོད་ལམ་ལ་བརྩོན་པར་བྱིན་གྱིས་བརླབས་པ། དཀའ་ཐུབ་ངན་པ་སྣ་ཚོགས་དེ་དག་ཐམས་ཅད་དེའི་ཚེ་ན། དེར་སེང་གེའི་ཁྲི་ཡང་དག་པར་མཐོང་ངོ་། །སེང་གེའི་ཁྲི་དེའི་སྟེང་གི་བར་སྣང་ན་རིན་པོ་ཆེ་སྣ་བདུན་གྱི་གདུགས་ཞེང་དུ་དཔག་ཚད་སྟོང་ཕྲག་བཅུ་པར་བྱིན་གྱིས་བརླབས་སོ། །གདུགས་དེ་ལ་ལྷ་རྫས་ཀྱི་རིན་པོ་ཆེའི་རྒྱན་སྣ་ཚོགས་སུ་ཡང་དག་པར་མཐོང་ངོ་། །རྒྱན་དེ་དག་ལས་ལོག་པའི་ཚིག་གི་ཐ་སྙད་སྣ་ཚོགས་བྱུང་བ་ནི་འདི་ལྟ་སྟེ། ཆད་པར་ལྟ་བ་དང་། རྟག་པར་ལྟ་བ་དང་། འཇིག་ཚོགས་ཀྱི་ལྟ་བ་དང་། མཐར་འཛིན་པའི་ལྟ་བ་དང་། ཚུལ་ཁྲིམས་དང་བརྟུལ་
ཞུགས་སྙེམས་པའི་ལྟ་བ་དང་། འདོད་པ་ལ་བདེ་བ་སྐྱེ་བའི་ལྟ་བ་བྱུང་ངོ་། །འཐབ་ཅིང་གཅིག་ལ་གཅིག་འཚོག་པ་དང་། མགོ་གཅོད་པ་དང་། མིག་འབྱིན་པའི་ལྟ་བ་དང་། དགེ་བ་བཅུའི་ལས་ཀྱི་ལམ་དུ་ལྟ་བ་སྤྲོས་པས་ལྟ་བར་སོང་བ་དྲུག་ཅུ་རྩ་གཉིས་ཀྱི་ལྟ་བའི་ཚིག་གི་ཐ་སྙད་ཀྱི་དབྱངས་བྱུང་ངོ་། །གང་ཡང་ཕྱོགས་བཅུའི་སངས་རྒྱས་ཀྱི་ཞིང་ཡོངས་སུ་དག་པ་ཚད་མེད་གྲངས་མེད་པ་དག་ནས་སངས་རྒྱས་ཀྱི་ཞིང་འདིར་ལྷགས་པའི་བྱང་ཆུབ་སེམས་དཔའ་དེ་དག་སྒྲ་དེ་ཉན་ཏོ། །སེང་གེའི་ཁྲི་ལ་སེམས་ཅན་ཚུལ་ཁྲིམས་དང་། བརྟུལ་ཞུགས་ངན་པ་སྣ་ཚོགས་སྦྱོར་བའི་རྗེས་སུ་ལྡན་པ་དེ་དག་ཀྱང་ལྟའོ། །ཀྱེ་མ་ཀྱི་ཧུད་ལྟ་བ་ཉོན་མོངས་པ་ཐོབ་པ་འདི་དག་རྙོག་པ་ལྔའི་མི་མཇེད་ཀྱི་སངས་རྒྱས་ཀྱི་ཞིང་དུ་ཡང་དག་པར་མཐོང་བ་གང་ཞིག་ཅེས་དེ་མཆོག་ཏུ་སྐྱོ་བའི་ཡིད་ཀྱིས་འདི་སྙམ་དུ་སེམས་པར་གྱུར་ཏོ། །བདག་ཅག་རང་རང་གི་སངས་རྒྱས་ཀྱི་ཞིང་དུ་འགྲོའོ་སྙམ་སྟེ། དེ་དག་སངས་རྒྱས་ཀྱི་ཞིང་འདི་ལས་འགྲོ་བར་འདོད་ཀྱང་དེ་དག་རང་རང་གི་ཕྱོགས་གང་དུ་འགྲོ་བར་མི་ཤེས་ནས། དེ་དག་གིས་བྱང་ཆུབ་སེམས་དཔའ་དགྲ་རྣམ་པར་འགྲེལ་པ་གང་ན་བ་དེ་ལོགས་སུ་ཐལ་མོ་སྦྱར་ཏེ་ཕྱག་འཚལ་ནས་འདི་སྐད་ཅེས་སྨྲས་སོ། །རིགས་ཀྱི་བུ་བདག་ཅག་ནི་སངས་རྒྱས་ཀྱི་ཞིང་འདི་ནས་རང་རང་གི་སངས་རྒྱས་ཀྱི་ཞིང་དུ་འགྲོ་བར་འདོད་པ་ནི་རིགས་ཀྱི་བུ་སངས་རྒྱས་ཀྱི་ཞིང་འདི་ཤིན་ཏུ་ལྟ་བ་སྟུག་པོས་བསྒྲིབས་ཤིང་དོག་པ་ཐོབ་པས། བདག་ཅག་ཀྱང་ཅུང་ཟད་ལུས་དང་ངག་དང་། ཡིད་ཀྱིས་འཕྲུལ་པར་འགྱུར་བ་དེའི་ཕྱིར་བདག་ཅག་མྱུར་དུ་འགྲོ་བར་འདོད་དོ། །བདག་ཅག་ཀྱང་ཕྱོགས་ཐམས་ཅད་མགོ་འཁོར་བར་གྱུར་ནས། ཡང་བདག་ཅག་རང་རང་གི་ཕྱོགས་གང་དུ་འགྲོ་བ་མི་ཤེས་ན། དེའི་ཕྱིར་རིགས་ཀྱི་བུ་ཁྱོད་བདག་ཅག །རང་རང་གི་སངས་རྒྱས་ཀྱི་ཞིང་དུ་འགྲོ་བར་ནུས་པ་ཉམས་སུ་ལོངས་ཤིག །དེ་ནས་བྱང་ཆུབ་སེམས་དཔའ་དགྲ་རྣམ་པར་འགྲེལ་བས་ཕྱོགས་བཅུའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་ཡང་དག་པར་ལྷགས་པ་དེ་དག་ལ་སྨྲས་པ། རིགས་ཀྱི་བུ་ཅི་ཁྱེད་ཅག་ཐེག་པ་ཆེན་པོ་ལ་ཡང་དག་པར་མ་ཞུགས་སམ། སྨྲས་པ། རིགས་ཀྱི་བུ་བདག་ཅག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་
ཡང་དག་པར་ཞུགས་ནས་ཡུན་རིང་ངོ་། །རིགས་ཀྱི་བུ་བྱང་ཆུབ་འདོད་པ་རྣམས་འདུལ་བའི་སེམས་ཅན་ཡོངས་སུ་སྨིན་པར་བྱ་བའི་ཕྱིར་སྨོན་ལམ་གྱི་དབང་གིས་སེམས་ཅན་དམྱལ་བར་སྐྱེ་བ་ལ་བརྩོན་པ་ནི་གོར་མ་ཆག །དེ་བཞིན་དུ་བྱོལ་སོང་དང་། ཡི་དགས་དང་། རྙོག་པ་ལྔའི་སངས་རྒྱས་ཀྱི་ཞིང་དང་། གནོད་སྦྱིན་དབུལ་པོ་དང་། མི་དབུལ་པོ་དང་། གཤེད་པོ་དབུལ་པོ་དང་།དེ་བཞིན་དུ་ལྟ་བ་ཐ་དད་པར་སོང་ཞིང་དོགས་པ་རྙེད་པའི་མུ་སྟེགས་ཅན་གཞན་ལ་སེམས་ཅན་ཡོངས་སུ་སྨིན་པར་བྱ་བའི་ཕྱིར་སྨོན་ལམ་གྱི་དབང་གིས་དེར་སྐྱེ་བ་བླངས་པ་འདི་ནི་བྱང་ཆུབ་སེམས་དཔའ་རྣམས་ཀྱི་རྩལ་པོ་ཆེ་ཞེས་སྨྲས་སོ། །ཇི་ལྟ་བུར་གནས་དེ་དང་དེ་དག་ཏུ་བརྩོན་འགྲུས་བརྟན་པ་ཕ་རོལ་གནོན་པས་ཉེ་བར་ཕྱིན་ཏོ། །སེམས་ཅན་རྣམས་ནི་མི་ཤེས་པའི་རྩ་བ་དང་། ལྷན་ཅིག་ཏུ་འགྲོགས་པ། ཚེའི་དགོན་པར་ཡང་དག་པར་རྫོགས་པའི་ཞི་བའི་ལམ་རབ་ཏུ་ཉམས་པའོ། །སེམས་ཅན་རྣམས་ནི་སྲོག་ཆགས་སུ་གྱུར་པ་ལ་མི་དགེ་བ་བཅུའི་ལས་ལ་བརྩོན་པའོ། །ལྟ་བ་ངན་པ་རྫོགས་པ་དང་། འཇིག་རྟེན་ཕ་རོལ་གྱིས་འཇིགས་པ་མེད་པར་ལྟ་བ་དང་། རྟག་པ་དང་ཆད་པར་ལྟ་བ་ཡང་དག་པར་རྫོགས་པའི་སེམས་ཅན་ལ་སྙིང་བརྩེ་བའི་ཕྱིར་བདག་གི་ལུས་དང་སེམས་ཀྱི་སྡུག་བསྔལ་ལ་མོས་སོ། །སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་སེམས་ཅན་གཅིག་ཀྱང་ཕ་རོལ་ཏུ་ཕྱིན་པ་དྲུག་ལ་རབ་ཏུ་མོས་པར་ནུས་པ་དང་། དགེ་བ་བཅུའི་ལས་ཀྱི་ལམ་ལ་ལས་ཀྱི་ལམ་གཅིག་གིས་ཀྱང་ས་བོན་བསྐྱེད་ཅིང་འདུག་པ་དང་། ལེགས་པར་སྨྲ་བ་གཅིག་གིས་ཀྱང་རྣ་བར་གོ་བར་ནུས་པས་སེམས་ཅན་རེ་རེའི་ཕྱིར་ཡང་སྡུག་བསྔལ་རྣམ་པ་མང་པོ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོ་རྣམ་པ་དུ་མ་སྣ་ཚོགས་སུ་མངོན་པར་བརྩོན་ནོ། །རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་གོ་ཆ་གཉིས་ཏེ། བྱང་ཆུབ་སེམས་དཔའི་གོ་ཆ་གང་གིས་བགོས་པ་ནི་བདུད་བཞི་འཛིན་ཅིང་བྱང་ཆུབ་སེམས་དཔའ་ཞེས་ཀྱང་བྱའོ། །གཉིས་གང་ཞེ་ན། སེམས་ཅན་གྱི་གོ་ཆ་དང་། སངས་རྒྱས་ཀྱི་ཞིང་གི་ཡོན་ཏན་གྱི་གོ་ཆའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་སེམས་
ཅན་གྱི་གོ་ཆ་གང་ཞེ་ན། རིགས་ཀྱི་བུ་གང་བྱང་ཆུབ་སེམས་དཔའ་རྣམས་ཤིན་ཏུ་བརྟན་པའི་བརྩོན་འགྲུས་ཀྱིས་མོས་ཤིང་ཕ་རོལ་གནོན་པར་འགྱུར་བ་དང་། ཕ་རོལ་ཏུ་ཕྱིན་པ་དྲུག་ལ་བརྩོན་ཞིང་བྱམས་པ་བསྒོམས་པས་ཕོངས་པ་ཐམས་ཅད་དང་། མི་དགེ་བའི་རྩ་བ་དང་འགྲོགས་པ་དང་། མཚམས་མེད་པ་བྱེད་པ་དང་། དམ་པའི་ཆོས་སྤོང་བ་དང་། འཕགས་པ་ལ་སྐུར་པ་འདེབས་པ་དང་། ཡོངས་སུ་དག་པའི་སངས་རྒྱས་ཀྱི་ཞིང་ཐམས་ཅད་ལས་དཀར་བའི་སེམས་ཅན་ཡོངས་སུ་སྨིན་པར་བྱེད་དོ། །སྙིང་རྗེ་ཆེན་པོས་ལྟ་བར་སོང་བ་དྲུག་ཅུ་རྩ་གཉིས་ལས་ཡོངས་སུ་གྲོལ་བར་བྱེད་པ་བདག་གིས་ཀྱང་ཡང་དེ་བཞིན་དུ་སེམས་ཅན་ཉོན་མོངས་པའི་སྐྱབས་སུ་བསླབ་པར་བྱའོ། །བསྡུ་བའི་དངོས་པོ་རྣམ་པ་བཞི་སྟེ། སྦྱིན་པ་དང་། ངག་སྙན་པ་དང་། དོན་བྱ་བ་དང་། དོན་འཐུན་པས་སེམས་ཅན་མགུ་བར་བྱའོ། །སྦྱིན་པའི་བསྡུ་བའི་དངོས་པོས་སེམས་ཅན་མགུ་བར་བྱེད་པ་ནི་འདི་ལྟ་སྟེ། ཟས་དང་། སྐོམ་ནས་མགོའི་བར་དུ་སྦྱིན་པས་གང་སྦྱིན་པ་བྱིན་པའི་བྱང་ཆུབ་སེམས་དཔའ་དེ་ནི་ཐབས་ལ་མཁས་པས་ཡོངས་སུ་བསྔོས་ཏེ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱེད་དོ། །གང་སྦྱིན་པ་བྱིན་པའི་བྱང་ཆུབ་སེམས་དཔའ་དེ་ནི་མཚན་མ་ཡོངས་སུ་བྱིན་པ་འདི་ནི་སྦྱིན་པའི་ཕ་རོལ་ཏུ་ཕྱིན་པའོ། །གང་དེ་ནི་དངོས་པོ་ལ་དམིགས་པ་རབ་ཏུ་ཞི་བ་འདི་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །གང་ཡུལ་ལ་མི་བཟོད་པ་མེད་པ་འདི་ནི་བྱང་ཆུབ་སེམས་དཔའི་བཟོད་པའི་ཕ་རོལ་ཏུ་ཕྱིན་པའོ། །གང་དངོས་པོ་ཡོངས་སུ་བཏང་སྟེ། དབེན་པར་སྤྱོད་པའི་ཕྱིར་འབྱུང་བ་འདི་ནི་བྱང་ཆུབ་སེམས་དཔའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །གང་དངོས་པོ་ཡོངས་སུ་བཏང་སྟེ་ལས་ཐམས་ཅད་ལ་ཀུན་ཏུ་མི་སྤྱོད་པ་འདི་ཡང་བྱང་ཆུབ་སེམས་དཔའི་བསམ་གཏན་གྱི་ཕ་རོལ་ཏུ་ཕྱིན་པའོ། །གང་དངོས་པོ་ཡོངས་སུ་སྦྱིན་པའི་ཕྱིར་བདག་གི་ཡིད་ལ་མི་སེམས་ཤིང་དངོས་པོ་དེ་ལ་དབེན་པར་སེམས་པ་ལ་རྣམ་པར་སྨིན་པར་མི་འདོད་པས་ལེན་པ་དང་། སྦྱིན་པ་གཉིས་མ་བྱུང་བ་རྣམ་པར་མི་རྟོག །ཀུན་ནས་མི་ལྡང་། དངོས་པོ་མེད། རྣམ་པར་བསལ་བ་མེད་པ་འདི་ཡང་བྱང་ཆུབ་སེམས་དཔའི་རང་བཞིན་མི་སྐྱེ་བའི་ཆོས་ཀྱི་བཟོད་པའི་ཤེས་རབ་ཀྱི་ཕ་རོལ་ཏུ་ཕྱིན་པའོ། །ཡང་
བྱང་ཆུབ་སེམས་དཔའ་ཐབས་ལ་མཁས་པས་དོང་ཚེ་གཅིག་བྱིན་པས་ཀྱང་ཕ་རོལ་ཏུ་ཕྱིན་པ་དྲུག་ཇི་ལྟར་ཡོངས་སུ་རྫོགས་པར་བྱེད། །རིགས་ཀྱི་བུ་འདི་ལ་བྱང་ཆུབ་སེམས་དཔའ་མཚན་མ་དང་ལྷན་ཅིག་པས་འདི་ལྟར་སློབ་སྟེ། ལུས་མེད་པའི་ཕྱིར་ལོངས་སྤྱོད་ཆེན་པོའི་སྦྱིན་པ་རྣམ་པར་མི་སྒྲུབ། ལོངས་སྤྱོད་ཆེན་པོའི་རྒྱུར་སྦྱིན་པ་རྣམ་པར་མི་སྤོང་། ལོངས་སྤྱོད་ཆེན་པོའི་སྦྱིན་པ་ཡང་དག་པར་མི་ཤེས་ཏེ། རང་བཞིན་གྱིས་སྟོབས་འཛིན་པ་འདི་ཡང་སྦྱིན་པའི་ཕ་རོལ་ཏུ་ཕྱིན་པའོ། །གང་འདོད་པའི་ཁམས་ཀྱི་རྣམ་པར་སྨིན་པ་མི་འདོད་པས། སྦྱིན་པ་བྱིན་པའི་རྒྱུན་བཅད་པ་དང་། དེ་བཞིན་དུ་གཟུགས་དང་གཟུགས་མེད་པའི་རྣམ་པར་སྨིན་པ་མི་འདོད་པས་སྦྱིན་པའི་རྒྱུན་བཅད་པ་དང་། བརྩོན་འགྲུས་ཀྱིས་མཚན་ཉིད་ལ་མི་འཇུག་པ་དང་། དྲན་པའི་སྟོབས་མི་སྐྱེ་མི་འགོག་པ་ལ་དམིགས་པས་སྦྱིན་པ་བྱིན་པ་འདི་ཡང་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །གང་སྦྱིན་པ་ནི་གཡེང་བའི་མཚན་ཉིད་དང་། དྲན་པའི་ཡུལ་ལ་ཡང་དག་པར་རྒྱས་པ་དང་། ལེན་པ་དང་དོར་བ་མེད་པའི་རང་བཞིན་ཅན་གྱི་ཡུལ་ལ་མི་ཁོམ་པར་དམིགས་ཤིང་སྙེམས་པ་མེད་པ་འདི་ནི་བཟོད་པའི་ཕ་རོལ་ཏུ་ཕྱིན་པའོ། །གང་ཡང་སྦྱིན་པ་དེ་དམིགས་པ་ཐམས་ཅད་ཀུན་ལྡང་བ་དྲན་པ་ཉེ་བར་གཞག་པའི་ཡེ་ཤེས་དང་། རྣམ་པར་སྤྱོད་པས་ལམ་མི་འཐུན་པ་ཡོངས་སུ་སྤངས་པའི་ཡེ་ཤེས་དང་། ཉན་ཐོས་དང་། རང་སངས་རྒྱས་ཀྱི་ལམ་ལ་རེག་པ་མེད་པའི་ཡེ་ཤེས་དང་། དམའ་ཞིང་རབ་ཏུ་ཉམས་པའི་ལམ་དང་། ཚིག་པས་གདུངས་པ་རྣམས་སྙིང་རྗེ་ཐམས་ཅད་ཀྱིས་ཡོངས་སུ་བསྐྱབས་ཏེ་ཞི་བའི་ལམ་དུ་བཞག་པ་དང་། དབེན་པར་སྤྱོད་པ་ལ་བདག་བདེ་བ་སྐྱེད་ཅིང་ཐེག་པ་ཆེན་པོ་ཡོངས་སུ་བཟུང་བའི་ཕྱིར་སྦྱིན་པ་བྱིན་པ་འདི་ནི་བྱང་ཆུབ་སེམས་དཔའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །གང་སྦྱིན་པ་དེ་ལས་ཐམས་ཅད་ལ་མཚན་ཉིད་མཚུངས་ཤིང་ཡུལ་ཐམས་ཅད་ལ་ཏིང་ངེ་འཛིན་བསྒྲུབས་པས་སྟོང་པའི་གྲོང་བཞིན་དུ་རྟོག་པ་དང་། མཚན་མ་ཐམས་ཅད་བློ་མེད་ཅིང་དངོས་པོ་མེད་པར་རྟོག་པ་དང་། འདོད་ཆགས་ཐམས་ཅད་རྐྱེན་ལ་རག་ལས་ཤིང་བླ་ན་མེད་པ་དང་། རྟོག་པ་ཐམས་ཅད་ལུས་མེད་ཅིང་མཚན་ཉིད་
སྐད་ཅིག་དུ་འཇིག་པ་དང་། གནས་ཐམས་ཅད་ཡོད་པ་མ་ཡིན་ཞིང་མི་འགྲོ་རྣམ་པར་མི་འགྲོ། ཀུན་ནས་མི་ལྡང་བའི་མཚན་ཉིད་དུ་རྟོག་པ་འདི་ནི་བྱང་ཆུབ་སེམས་དཔའི་བསམ་གཏན་གྱི་ཕ་རོལ་ཏུ་ཕྱིན་པའོ། །གང་སྦྱིན་པ་དེ་བདག་ལ་སེམས་པ་དང་། དབེན་པར་སེམས་པ་དང་། རྣམ་པར་སྨིན་པ་འདོད་པར་སེམས་པ་དང་། ལེན་པ་རྣམ་པར་རྟོག་པར་སེམས་པ་དེ་ལས་འདོད་པའི་ཁམས་ཀྱི་ཕུང་པོ་ལ་མི་གནས་པའི་ཕྱིར་སྦྱིན་པ་དང་། སའི་ཁམས་ལ་ལེན་པ་དང་དོར་བ་མེད་པའི་སྦྱིན་པ་དང་། ཆུ་དང་། མེ་དང་། རླུང་དང་། ནམ་མཁའ་དང་། རྣམ་པར་ཤེས་པའི་ཁམས་ལ་བླང་བ་དང་དོར་བ་མེད་པའི་སྦྱིན་པ་དང་། ཉན་ཐོས་དང་། རང་སངས་རྒྱས་འདུལ་བའི་ཕྱིར་མི་རྟོག་ཅིང་རྣམ་པར་མི་རྟོག་པའི་སྦྱིན་པ་དང་། ཕུང་པོ་དང་། ཁམས་ལ་ནམ་མཁའ་ཀུན་ནས་ལྡང་བ་དང་། གཟུགས་ཀྱི་རང་བཞིན་ལ་རྣམ་པར་མི་དམིགས་པ་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་དང་། རྣམ་པར་ཤེས་པ་དང་། ཆོས་ལ་རང་བཞིན་རྣམ་པར་མི་དམིགས་པའི་སྦྱིན་པ་དང་། དྲན་པའི་སྟོབས་ཀྱིས་སྦྱིན་པ་དང་། བརྩོན་འགྲུས་ཀྱི་སྟོབས་ཀྱིས་རྣམ་པར་མི་རྟོག་པའི་ཕྱིར་མཚན་མ་རྒྱུན་མི་གཅད་པར་སྦྱིན་པ་བྱིན་པ་དང་། སྦྱིན་པ་དེ་སྒྲོལ་བའི་རྣམ་པར་མི་དམིགས། མ་སྐྱེས་མ་བྱུང་བའི་ཕྱིར་འདྲེས་པ་མེད་ཅིང་འཆི་འཕོ་བ་དང་། སྐྱེ་བའི་སྦྱིན་པ་བྱིན་པ་འདི་ནི་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་སྨྲས་སོ། །གཞན་ཡང་སྦྱིན་པ་དེ་བདག་མི་ཤེས་ཤིང་ལོངས་སྤྱོད་ཐམས་ཅད་གདོན་མི་ཟ་བར་འགྲུབ་པ་བདེ་བ་ཐམས་ཅད་སྐྱེ་བ་ལ་བཟོད་པ་འདྲེན་པ་དང་། བརྩོན་འགྲུས་ཀྱིས་སེམས་ཅན་ལ་མཐའ་ཐུག་པ་མེད་ཅིང་རྣམ་པར་མི་རྟོག་པ་དང་། མཚན་མ་ཐམས་ཅད་ལ་བླང་བ་དང་། དོར་བ་མེད་པ་དང་། བསམ་གཏན་ལ་འདུག་པ་མེད་པ་དང་། ཁམས་གསུམ་ལ་ཤེས་རབ་དང་། དམིགས་པ་ཐམས་ཅད་དང་བྲལ་བ་དེ་དག་གི་ཐབས་ཀྱིས་བྱང་ཆུབ་སེམས་དཔའ་དོང་ཚེ་གཅིག་སྦྱིན་པ་བྱིན་ཏེ། རྣམ་པ་དེ་ལྟ་བུའི་སེམས་སྐྱེད་པས་ཡོངས་སུ་བསྔོས་པས་ཕ་རོལ་ཏུ་ཕྱིན་པ་དྲུག་པོ་འདི་དག་ཐམས་ཅད་ལ་གནས་པར་འགྱུར་རོ། །ཉན་ཐོས་དང་། རང་
སངས་རྒྱས་འདུལ་བའི་ཕྱིར་ཤིན་ཏུ་བརྟན་པར་མོས་པར་འགྱུར་རོ། །ཉན་ཐོས་དང་། རང་སངས་རྒྱས་ཀྱི་ཐེག་པ་ལ་རེ་བ་སྐྱེད་པར་མི་བྱེད་དོ། །མུ་སྟེགས་ཅན་འདུལ་བའི་ཕྱིར་འགྲོ་བ་ཐམས་ཅད་ལ་འཇུག་གི །ལྟ་བ་ལོག་པར་ནི་མི་འགྱུར་རོ། །སེམས་ཅན་ཐམས་ཅད་ཉེ་བར་འཚོ་བར་བྱ་བའི་ཕྱིར་སྦྱིན་པའི་ལས་ཐམས་ཅད་དང་། ཐམས་ཅད་མཁྱེན་པ་བསྒྲུབ་པའི་དགེ་བ་བཅུའི་རྩ་བ་ཡོངས་སུ་སྔོ་བར་བྱེད་དོ། །བདག་གིར་བྱ་བའི་ལྟ་བ་ཐོབ་པ་དེ་ཚུལ་ཁྲིམས་ལ་ནན་ཏན་དུ་བྱེད་ཅིང་དཀའ་ཐུབ་དང་བརྟུལ་ཞུགས་ཡང་དག་པར་སྤྱོད་པར་འགྱུར་རོ། །སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་གཤིན་རྗེའི་འཇིག་རྟེན་པའི་སེམས་ཅན་ཡོངས་སུ་སྨིན་པར་བྱ་བ་དང་། སྡུག་བསྔལ་ཡོངས་སུ་ཐར་བར་བྱ་བའི་ཕྱིར་དགེ་བའི་རྩ་བ་ཡོངས་སུ་སྔོ་བར་བྱེད་དོ། །བདག་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་པའི་སྡུག་བསྔལ་གྱིས་འཇིགས་པས་སྐྲག་པར་མི་འགྱུར་རོ། །བདག་ཀྱང་དེ་བཞིན་དུ་སྙིང་རྗེ་ཆེན་པོའི་བརྩོན་འགྲུས་བརྟན་པ་ཕ་རོལ་གནོན་པའི་སྨོན་ལམ་གྱི་དབང་གིས་དེར་བསམས་བཞིན་དུ་སྐྱེ་བ་མཚུངས་པར་འཛིན་ཏོ། །སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་བཟོད་པ་ཐམས་ཅད་དང་ལྡན་པར་འགྱུར་རོ། །སྐད་ཅིག་མའི་འདུ་བྱེད་ཐམས་ཅད་བརྟག་པར་བྱའོ། །ཡུལ་གཅེས་པ་ཐམས་ཅད་ཡང་དག་པར་མཐོང་ངོ་། །སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་དགེ་བའི་རྩ་བ་ཐམས་ཅད་ལ་བརྟན་པའི་བརྩོན་འགྲུས་ཕ་རོལ་གནོན་པར་འགྱུར་རོ། །སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་སློབ་དཔོན་དང་སློབ་དཔོན་མ་ཡིན་པ་ཐམས་ཅད་ལ་འཇུག་ཅིང་བསམ་གཏན་དང་། ཏིང་ངེ་འཛིན་ལ་སྙོམས་པར་འཇུག་པའི་རྣལ་འབྱོར་ལ་མངོན་པར་བརྩོན་པར་འགྱུར་རོ། །མངོན་པར་འདུ་མི་བྱེད་པར་བརྟགས་ནས་ཡུལ་ཐམས་ཅད་ཀྱི་བདུད་ཀྱི་ལམ་སྤྱོད་པས་བདག་ཏུ་ལྟ་བར་བྱེད་དོ། །སེམས་ཅན་འདུལ་བའི་ཕྱིར་ཤེས་རབ་འབྱུང་བར་འགྱུར་རོ། །བྱིས་པའི་ཡུལ་ལ་སྤྱོད་པ་ཐམས་ཅད་ལའང་བདག་ཏུ་ལྟ་བར་བྱེད་དོ། །སེམས་ཅན་ཡོངས་སུ་སྨིན་པར་བྱ་བའི་ཕྱིར་འཇིག་རྟེན་ཐམས་ཅད་ཀྱི་ཡུལ་ལས་ཤིན་ཏུ་འདས་ཤིང་བསམ་གཏན་བྱེད་དོ། །འཇིག་རྟེན་ཐམས་ཅད་ཀྱི་
ཡུལ་གྱི་ལམ་སྤྱོད་པ་ལ་ཡང་དག་པར་མཐོང་ངོ་། །སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་དངོས་པོ་ཐམས་ཅད་ཡོངས་སུ་གཏོང་བར་འགྱུར་རོ། །སེམས་ཅན་ཐམས་ཅད་ཡོངས་སུ་མགུ་བར་བྱ་བའི་ཕྱིར་རིགས་ཀྱི་བུ་རྣམ་པ་དེ་ལྟ་བུའི་སེམས་ཅན་གྱི་གོ་ཆ་དང་། སེམས་ཅན་ཡོངས་སུ་སྨིན་པའི་རྒྱན་དང་། བྱང་ཆུབ་སེམས་དཔའི་བསྡུ་བའི་དངོས་པོས་སེམས་ཅན་དབུལ་པོ་དབུལ་བ་ལས་ཡོངས་སུ་ཐར་བར་བྱའོ། །རིགས་ཀྱི་བུ་གཞན་ཡང་འདི་ནི་སེམས་ཅན་ཡོངས་སུ་སྨིན་པར་བྱེད་ཅིང་བྱང་ཆུབ་སེམས་དཔའ་རྣམས་ལ་སྦྱིན་པ་བྱིན་པ་འདི་ནི་སྦྱིན་པའི་ཕ་རོལ་ཏུ་ཕྱིན་པའོ། །ཇི་ལྟ་བུར་བསམ་པས་སེམས་ཅན་ཡོངས་སུ་མགུ་བར་བྱེད་པ་དང་། ཡང་ན་ནི་ཟང་ཟིང་གི་བསམ་པའི་སེམས་ཅན་རྣམས་ཟང་ཟིང་གིས་ཡོངས་སུ་སྨིན་པར་བྱེད་པ་དང་། ཆོས་འདོད་པའི་སེམས་ཅན་རྣམས་ཇི་ལྟ་བུར་སེམས་ཅན་རྣམས་ལ་གཟུགས་དང་འཐུན་པར་ཆོས་བསྟན་པས། ཡོངས་སུ་མགུ་བར་བྱེད་ཅིང་། ཡོངས་སུ་སྨིན་པར་བྱེད་པ་འདི་ཡང་བྱང་ཆུབ་སེམས་དཔའི་སྦྱིན་པའི་ཕ་རོལ་ཏུ་ཕྱིན་པའོ། །རིགས་ཀྱི་བུ་གཞན་ཡང་སེམས་ཅན་ཡོངས་སུ་སྨིན་པས་ཟང་ཟིང་གི་སྦྱིན་པ་ཡང་སྦྱིན་པའི་ལེན་པ་དེ་དག་ལ་བྱམས་པ་དང་འཐུན་པར་སེམས་བསྐྱེད་པར་བྱ་བ་དེ་ཉིད་ཀྱིས་དེ་དག་ཡོངས་སུ་སྨིན་པར་བྱེད་དོ། །རབ་ཏུ་དགའ་བ་སྐྱེ་བའི་བློ་དང་ལྡན་པའི་སེམས་སྐྱེ་བར་འགྱུར་བ་དེ་ཉིད་ཀྱིས་དེ་དག་ཡོངས་སུ་སྨིན་པར་བྱེད་དོ། །སྙིང་རྗེ་ཅི་བྱའོ་ཅོག་བྱེད་པ་ལ་བརྩོན་པ་དགེ་བའི་སེམས་སྐྱེ་བ་དང་ལྡན་པར་ཡང་འགྱུར་རོ། །བཏང་སྙོམས་ཤིང་སྡིག་པ་མི་བྱེད་པ་དགེ་བའི་སེམས་སྐྱེ་བར་འགྱུར་བ་དེ་ཉིད་ཀྱིས་དེ་དག་ཡོངས་སུ་སྨིན་པར་བྱེད་དོ། །ཏིང་ངེ་འཛིན་དང་འཐུན་པ་དང་ལྡན་པ་སེམས་སྐྱེ་བར་འགྱུར་བ་དེ་ཉིད་ཀྱིས་དེ་དག་ཡོངས་སུ་སྨིན་པར་བྱེད་དོ། །དོན་ལ་རྟོན་པ་བདག་མེད་པ་དང་ལྡན་པའི་སེམས་སྐྱེ་བར་འགྱུར་བ་དེ་ཉིད་ཀྱིས་དེ་དག་ཡོངས་སུ་སྨིན་པར་བྱེད་དོ། །དེ་ཡང་སྦྱིན་པ་བྱིན་པའི་ལེན་པ་རྣམས་ཀྱི་སེམས་དང་བསམ་པ་ལ་དང་པོར་བྱང་ཆུབ་ཏུ་སེམས་བསྐྱེད་པ་དེ་ཉིད་ཀྱིས་དེ་དག་ཡོངས་སུ་སྨིན་པར་བྱེད་དོ། །ལ་ལ་ལེན་པ་རྣམས་ལ་བྱང་ཆུབ་སྤྱད་པ་སྤྱོད་པ་དེ་དག་སྐྱོ་བ་སྐྱེད་པར་བྱེད་པ་དེ་ཉིད་ཀྱིས་དེ་དག་
ཡོངས་སུ་སྨིན་པར་བྱེད་དོ། །ལ་ལ་ཡང་ཡུན་རིང་པོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ལ་ཇི་ལྟར་བྱང་ཆུབ་སེམས་དཔའ་དེ་དག་གིས་ཉན་ཐོས་དང་། རང་སངས་རྒྱས་ཀྱི་ཐེག་པ་ལ་སྤྱོད་པའི་རྒྱུན་བཅད་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་དེ་ལྟ་བུའི་ཆོས་སྟོན་ཅིང་རབ་ཏུ་སྟོན་པ་དེ་ཉིད་ཀྱིས་དེ་དག་ཡོངས་སུ་སྨིན་པར་བྱེད་དོ། །ལ་ལ་ཡང་ཕྱིར་མི་ལྡོག་པ་རྣམས་ལ་ཇི་ལྟ་བུར་སྐྱེས་བུ་དམ་པའི་ཏིང་ངེ་འཛིན་དང་། བཟོད་པའི་གཟུངས་ཐོབ་པས་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་དང་ལྡན་པ་རྣམ་པ་དེ་ལྟ་བུའི་ཆོས་སྟོན་ཅིང་རབ་ཏུ་སྟོན་པ་དེ་ཉིད་ཀྱིས་དེ་དག་ཡོངས་སུ་སྨིན་པར་བྱེད་དོ། །ལ་ལ་ཡང་བྱང་ཆུབ་སེམས་དཔའ་རྣམས་ལ་ཇི་ལྟར་བྱང་ཆུབ་སེམས་དཔའ་དེ་དག་གིས་སངས་རྒྱས་ཀྱི་ཞིང་ཡོངས་སུ་དག་པ་རྣམས་རྒྱུན་བཅད་ཅིང་ཉོན་མོངས་པ་དང་། རྙོག་པ་ལྔའི་སངས་རྒྱས་ཀྱི་ཞིང་དུ་སྙིང་རྗེ་ཆེན་པོ་སྐྱེད་པ་དེ་ལྟ་བུའི་ཆོས་སྟོན་ཅིང་རབ་ཏུ་སྟོན་པ་དེ་ན་སྨོན་ལམ་བྱེད་དོ། །དེ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་ཞིང་། ལྟ་བ་ངན་པ་དོགས་པ་རྙོག་པའི་སེམས་ཅན་རྣམས་ཐེག་པ་གསུམ་ལ་སྦྱོར་བར་བྱེད་དོ། །ཡོངས་སུ་མྱ་ངན་ལས་འདའ་བར་བྱེད་དོ། །ཐབས་དེས་སེམས་ཅན་བྱེ་བ་ཁྲག་ཁྲིག་བརྒྱ་སྟོང་མང་པོ་སྨིན་པར་བྱེད་དོ། །རིགས་ཀྱི་བུ་བྱང་ཆུབ་སེམས་དཔའི་བ་སྤུའི་ཁུང་བུ་ཇི་སྙེད་པ་དེ་སྙེད་ཀྱི་སྦྱིན་པའི་དངོས་པོ་རྣམས་ཡང་ན་ནི་ཟང་ཟིང་གི་སྦྱིན་པའམ། ཡང་ན་ནི་ཆོས་ཀྱི་སྦྱིན་པའི་ཐབས་ཀྱིས་སེམས་ཅན་ཡོངས་སུ་སྨིན་པར་བྱེད་དོ།། །།བམ་པོ་བཞི་པ། རིགས་ཀྱི་བུ་གཞན་ཡང་བྱང་ཆུབ་སེམས་དཔའ་ངག་སྙན་པའི་བསྡུ་བའི་དངོས་པོས་ཀྱང་སེམས་ཅན་ཡོངས་སུ་སྨིན་པར་བྱེད་དོ། །རིགས་ཀྱི་བུ་དེ་ན་གང་བྱང་ཆུབ་སེམས་དཔའ་དགའ་བའི་མིག་གིས་ལྟ་བ་དང་། ཚིག་སྙན་པས་དགའ་བར་བྱ་བ་དང་། ངག་འཇམ་པས་སློང་བ་པོ་དང་། ཆོས་ཉན་པ་རྣམས་སྙན་པ་ལ་སྦྱོར་བར་བྱེད་དོ། །སེམས་ཅན་ཡོངས་སུ་སྤྱད་པས་སྡིག་པ་ལས་ཕྱིར་ལྡོག་པར་བྱེད། ལྟ་བར་སོང་བ་ཐམས་ཅད་ལས་ཕྱིར་ལྡོག་པར་བྱེད་དོ། །བྲལ་བ་བཞིའི་སེམས་ཅན་རྣམས་བཞི་ལ་དགོད་པར་བྱེད་དོ། །བཞི་
གང་ཞེ་ན། ཚུལ་ཁྲིམས་དང་བྲལ་བའི་སེམས་ཅན་རྣམས་ངག་སྙན་པ་དང་འཇམ་པས་ཚུལ་ཁྲིམས་ལ་འགོད་པར་བྱེད་པ་དང་། སེམས་ཅན་ལྟ་བ་དང་བྲལ་བ་རྣམས་ཡང་དག་པའི་ལྟ་བ་ལ་འགོད་པར་བྱེད་པ་དང་། སེམས་ཅན་བསམ་པ་དང་བྲལ་བ་རྣམས་བསམ་པ་ཡོངས་སུ་སྦྱོང་བར་བྱེད་པ་དང་། སེམས་ཅན་ཆོ་ག་དང་བྲལ་བ་རྣམས་ཡང་དག་པའི་ཆོ་ག་ལ་འགོད་པར་བྱེད་པའོ། །རིགས་ཀྱི་བུ་དེ་ན་སེམས་ཅན་ཚུལ་ཁྲིམས་དང་བྲལ་བ་རྣམས་བྱང་ཆུབ་སེམས་དཔའི་ངག་སྙན་པའི་བསྡུ་བའི་དངོས་པོས་འཕགས་པའི་ཚུལ་ཁྲིམས་ལ་ཇི་ལྟར་འགོད་པར་བྱེད། ཡང་བྱང་ཆུབ་སེམས་དཔའ་བདེན་པ་ཚིག་མི་རྩུབ་པ་དེའི་དྲུང་དུ་སློང་བ་པོ་ཉེ་བར་ཕྱིན་པའི་སེམས་ཅན་དེ་དག་ཀྱང་བསམ་པ་ཤིན་ཏུ་ཡོངས་སུ་མགུ་བར་བྱེད་དོ། །དེ་དག་ལ་མཚུངས་པར་ངག་སྙན་པས་གཏམ་སྨྲ་བར་བྱེད་དོ། །དེ་དག་ཀྱང་འདུལ་བར་བྱེད་དོ། །སེམས་ཅན་གང་དགེ་བ་བཅུའི་ལས་ཀྱི་ལམ་དང་ལྡན་པར་འགྱུར་བ་དེ་དག་ཐམས་ཅད་ངག་སྙན་པས་དགེ་བ་བཅུའི་ལས་ཀྱི་ལམ་ལ་ཡང་དག་པར་གཞོག་པར་བྱེད། འགོད་པར་བྱེད་དོ། །ཚུལ་ཁྲིམས་ངན་པའི་སེམས་ཅན་རྣམས་ཚུལ་ཁྲིམས་ལ་ཡང་དག་པར་གཞོག་པར་བྱེད་འགོད་པར་བྱེད་འཛུད་པར་བྱེད་དོ། །སེམས་ཅན་ལེ་ལོ་ཅན་རྣམས་ཉན་ཐོས་ཀྱི་ཐེག་པ་ལ་ཡང་དག་པར་གཞོག་པར་བྱེད། འགོད་པར་བྱེད་འཛུད་པར་བྱེད་དོ། །སེམས་ཅན་བདག་བདེ་བར་འདོད་པ་རྣམས་རང་སངས་རྒྱས་ཀྱི་ཐེག་པ་ལ་ཡང་དག་པར་གཞོག་པར་བྱེད། འགོད་པར་བྱེད། འཛུད་པར་བྱེད་དོ། །གཞན་ཡང་སེམས་ཅན་ལེ་ལོ་ཅན་རྣམས་བརྩོན་འགྲུས་རྩོམ་པ་ལ་འགོད་པར་བྱེད་དོ། །མ་དད་པ་རྣམས་དད་པའི་བརྩོན་འགྲུས་ལ་འགོད་པར་བྱེད་དོ། །ཐོས་པ་ཉུང་བ་རྣམས་མང་དུ་ཐོས་པ་དང་། འཆལ་པའི་ཤེས་རབ་ཅན་རྣམས་ཤེས་རབ་ཕུན་སུམ་ཚོགས་པ་དང་། མི་འགྲོགས་པའི་སེམས་ཅན་རྣམས་འགྲོགས་པ་ལ་སྦྱོར་བར་བྱེད་དོ། །གཞན་ཡང་སེམས་ཅན་ཕར་མི་ཤེས་ཤིང་མར་མི་ཤེས་ཏེ་མ་གུས་པ་རྣམས་ཕ་མ་ལ་གུས་ཤིང་ནད་པ་ལ་བསྙེན་བཀུར་བ་དང་། དྲང་སྲོང་ལ་སྦྱོར་བར་བྱེད། འགོད་པར་བྱེད། སེམས་རྩུབ་པ་རྣམས་བྱམས་པ་ལ་སྦྱོར་བར་བྱེད། སྙིང་རྗེ་མེད་པའི་སེམས་
ཅན་རྣམས་སྙིང་རྗེ་ལ་སྦྱོར་བར་བྱེད། སེམས་དམའ་བ་ཅན་རྣམས་དགའ་བ་ལ་སྦྱོར་བར་བྱེད། སེམས་ཀྱིས་ཆགས་པ་རྣམས་བཏང་སྙོམས་ལ་སྦྱོར་བར་བྱེད། སེམས་ཅན་ངན་སོང་གསུམ་དུ་འགྲོ་བ་རྣམས་ཚུལ་ཁྲིམས་ལ་བཀོད་པས་ལྷའི་བདེ་བ་སྐྱེ་བ་ལ་སྦྱོར་བར་བྱེད་དོ། །འདོད་པ་ལ་སྤྱོད་པའི་སེམས་ཅན་གྱི་ནང་ན་ལྷར་འགྲོ་བའི་སེམས་ཅན་རྣམས་བསམ་གཏན་ལ་བཀོད་པས་གཟུགས་ལ་སྤྱོད་པའི་ལྷའི་བསམ་གཏན་བདེ་བ་ལ་སྦྱོར་བར་བྱེད་དོ། །སེམས་ཅན་བསམ་གཏན་ལ་ཆགས་པ་རྣམས་གཟུགས་ལ་འཇུག་པ་སྙོམས་པར་སྦྱོར་བར་བྱེད། གཟུགས་མེད་པའི་ཁམས་སུ་སྙོམས་པར་འཇུག་པ་ལ་མངོན་པར་ཆགས་པའི་སེམས་ཅན་རྣམས་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་ལ་སྦྱོར་བར་བྱེད་དོ། །སེམས་ཅན་བདག་ཏུ་འདུ་ཤེས་པ་ལ་མངོན་པར་ཆགས་པ་རྣམས་ཉེ་བར་ལེན་པའི་ཕུང་པོ་ལྔ་ལ་མི་འཇིགས་ཤིང་དབུ་བ་དང་། སྨིག་རྒྱུ་ལྟ་བུ་དང་། མདའ་དང་། རལ་གྲིས་འཕངས་ཏེ་གསོད་པའི་སྐྱེས་བུ་ལྟ་བུའི་སེམས་ཅན་རྣམས་ལ་སྟོན་པར་བྱེད་དོ། །རྒྱུན་དུ་ཞུགས་པའི་འབྲས་བུ་ལ་འགོད་པར་བྱེད་པ་ནས། དགྲ་བཅོམ་པའི་བར་དུ་འགོད་པར་བྱེད་དོ། །གཞན་ཡང་སེམས་ཅན་བསྟན་པ་ངན་པ་ལ་རབ་ཏུ་མོས་ཤིང་སངས་རྒྱས་དང་། ཆོས་དང་དགེ་འདུན་ལ་མངོན་པར་མོས་པ་མེད་པའི་སེམས་ཅན་དེ་དག་སངས་རྒྱས་ཀྱི་ཡོན་ཏན་སྟོན་པར་བྱེད། སངས་རྒྱས་ལ་མི་ཕྱེད་པར་རབ་ཏུ་མོས་པ་ལ་རབ་ཏུ་གཞོག་པར་བྱེད། རབ་ཏུ་འགོད་པར་བྱེད་པ་ནས་ཆོས་དང་དགེ་འདུན་གྱི་བར་དུའོ། །གང་ལོག་པ་ལ་ལྟ་བའི་སེམས་ཅན་ལོག་པར་སྟོན་ཅིང་ཕྱི་རོལ་གྱི་མུ་སྟེགས་ཅན་གྱི་ཚུལ་ཁྲིམས་ལ་ཡང་དག་པར་ཞུགས་པའི་སེམས་ཅན་དེ་དག་སྐྱབས་གསུམ་དུ་འགྲོ་བ་ལ་སྦྱོར་བར་བྱེད། དགེ་བསྙེན་པའི་སྡོམ་པ་དང་། རབ་ཏུ་བྱུང་བའི་སྡོམ་པ་དང་། འཕགས་པའི་འཇིག་རྟེན་པ་དང་། འཇིག་རྟེན་ལས་འདས་པའི་ཚུལ་ཁྲིམས་ལ་སྦྱོར་བར་བྱེད། འགོད་པར་བྱེད་དོ། །དགེ་བ་བཅུའི་ལས་ཀྱི་ལམ་ནི་འཇིག་རྟེན་པའི་ཚུལ་ཁྲིམས་འཕགས་པའི་སློབ་པ་ལ་སྡོམ་པ་ནི་འཇིག་རྟེན་ལས་འདས་པའི་ཚུལ་ཁྲིམས་ཏེ། མུ་སྟེགས་ཅན་གཞན་གྱི་ཚུལ་ཁྲིམས་ཀྱིས་
ངན་སོང་གསུམ་དུ་འགྲོ་བའི་སེམས་ཅན་དག་གང་གིས་ལྷ་དང་མིར་སྐྱེ་བ་ཐོབ་པའི་འཇིག་རྟེན་པའི་སེམས་ཅན་ལ་མངོན་པར་འགོད་པར་བྱེད་དོ། །འདོད་པའི་ཁམས་ཀྱི་ལྷ་རྣམས་ལ་ཡང་དེ་ཉིད་ཀྱིས་དེ་དག་ཡོངས་སུ་སྨིན་པར་བྱེད་དོ། །སེམས་ཅན་འཇིག་རྟེན་པའི་ཚུལ་ཁྲིམས་ལ་ཞུགས་པ་རྣམས་འཕགས་པའི་སློབ་པའི་སྡོམ་པའི་ཚུལ་ཁྲིམས་ལ་འགོད་པར་བྱེད་དོ། །གང་གིས་ཟག་པ་མེད་པའི་ལམ་གྱི་འབྲས་བུ་ཐོབ་པ་དེ་ཉིད་ཀྱིས་དེ་དག་ཡོངས་སུ་སྨིན་པར་བྱེད་དོ། །སེམས་ཅན་ཉན་ཐོས་ཀྱི་ཐེག་པ་པ་རྣམས་གང་སངས་རྒྱས་ཀྱི་ཐེག་པ་ལ་སྦྱོར་བར་བྱེད་པ་དེ་ཉིད་ཀྱིས་དེ་དག་ཡོངས་སུ་སྨིན་པར་བྱེད་དོ། །རང་སངས་རྒྱས་ཀྱི་ཐེག་པ་པ་རྣམས་ཀྱང་བྱང་ཆུབ་སེམས་དཔའི་ཡོན་ཏན་གྱི་ཡུལ་ཕ་རོལ་ཏུ་ཕྱིན་པ་དྲུག་གི་ཚུལ་ཁྲིམས་ལ་སྦྱོར་བར་བྱེད། འགོད་པར་བྱེད་པ་དེ་ཉིད་ཀྱིས་དེ་དག་ཡོངས་སུ་སྨིན་པར་བྱེད་དོ། །བྱང་ཆུབ་སེམས་དཔའ་ཐབས་ལ་མཁས་པས་སེམས་ཅན་ཉན་ཐོས་དང་། རང་སངས་རྒྱས་ཀྱི་ཐེག་པ་པ་རྣམས་འཕགས་པ་བྱང་ཆུབ་སེམས་དཔའི་ཚུལ་ཁྲིམས་ལ་སྦྱོར་བར་བྱེད་དོ། །རིགས་ཀྱི་བུ་དེ་ལ་འཕགས་པ་བྱང་ཆུབ་སེམས་དཔའི་ཚུལ་ཁྲིམས་གང་ཞེ་ན། སེམས་ཅན་ཕ་རོལ་ལ་གནོད་པ་ཅན་གྱི་ནང་ན་བྱང་ཆུབ་སེམས་དཔའ་ཐམས་ཅད་ལ་གནོད་པ་མེད་པར་གནས་པ་དང་། སེམས་ཅན་མ་བྱིན་པར་ལེན་པ་ཅན་རྣམས་ཀྱི་ནང་ན་བྱང་ཆུབ་སེམས་དཔའ་གཞན་གྱི་ནོར་ལ་མི་རྐུ་བའི་སེམས་ཀྱིས་གནས་པ་ནས་ཕ་རོལ་གྱི་ཆུང་མ་ལ་མི་གཡེམ་པ་དང་། བརྫུན་དུ་སྨྲ་བ་ལ་མི་སླུ་བའི་བར་དུའོ། །སེམས་ཅན་ཐམས་ཅད་ལ་ཕྲ་མ་མི་ཟེར་བ་ནས་ངག་མི་རྩུབ་པའི་བར་དུ་སྟེ། ཚིག་ཀྱལ་པ་ཟེར་བ་སྤངས་པ་དང་། གནོད་སེམས་འདོད་པ་སྤངས་པ་དང་། ཆགས་སེམས་སྤངས་པ་དང་། སེམས་ཀྱི་རྙོག་པ་སྤང་བའི་ཕྱིར་གཞན་གྱི་བསྟན་པ་སྤངས་པ་དང་། སངས་རྒྱས་དང་། ཆོས་དང་། དགེ་འདུན་གྱི་ཡོན་ཏན་ལ་གུས་པར་བྱ་བ་ལ་མི་ཟད་པར་མོས་ཤིང་ཉན་པར་འདོད་པ་དང་། བསླབ་པ་ལ་མི་ཟད་པར་གུས་པ་སྐྱེས་པ་དང་། ཁ་ན་མ་ཐོ་བ་ཅུང་ཟད་ཙམ་ལ་འཇིགས་པར་ལྟ་བ་དང་། ཐེག་པ་གཞན་མི་འདོད་པས་ཚུལ་ཁྲིམས་མ་ཞིག་པ་དང་། མ་རུང་བ་སྐྱེ་བ་ལ་ཡང་དག་པར་གནས་པ་རྣམས་སྐྱོ་བས་ཚུལ་ཁྲིམས་
མ་རལ་བ་དང་། ཉོན་མོངས་པའི་བག་ཆགས་སྤངས་པས་ཚུལ་ཁྲིམས་འདྲེས་མ་མེད་པ་དང་། ཆོས་དཀར་པོ་འཕེལ་བས་མཁས་པས་མི་དམོད་པ་དང་། དྲན་པས་སྨྲ་བ་དང་། ཏིང་ངེ་འཛིན་ཁ་ན་མ་ཐོ་བ་མེད་པ་དང་། དབང་པོ་དྲུག་སྲུང་བ་དང་། འདོད་པ་དང་ཆགས་སེམས་ཀྱི་འདོད་པ་རབ་ཏུ་སྤངས་པས་བསམ་པ་བསྔགས་པའོ། །ལྷ་དང་མི་མངོན་པར་མོས་པར་བྱ་བའི་ཕྱིར་རྩོད་པ་དང་ཐབ་མོའི་འདུ་འཛི་ཅན་ཡོངས་སུ་སྤངས་པ་དེ་ཉིད་ཀྱིས་དེ་དག་ཡོངས་སུ་སྨིན་པར་བྱེད་དོ། །སེམས་ཅན་ཡོངས་སུ་བསྐྱབ་པའི་ཕྱིར་སེམས་ཅན་སྙིང་རྗེ་མེད་པའི་ནང་ན་འདུག་པ་ལ་བྱམས་པ་སྤྱོད་པར་འགྱུར་རོ། །སྡུག་བསྔལ་ཐམས་ཅད་བཟོད་པའི་སེམས་དང་། ངན་འགྲོར་འགྲོ་བ་ལ་ཞུམ་པ་མེད་པའི་སེམས་དང་། བདག་འཁྲུལ་པ་ཕྱིར་འབྱིན་པ་དང་། གཞན་འཁྲུལ་པ་ལ་ནི་རྩོད་ཅིང་འདོར་བ་དེ་ཉིད་ཀྱིས་དེ་དག་ཡོངས་སུ་སྨིན་པར་བྱེད་དོ། །ཉོན་མོངས་པ་དང་། རྙོག་པ་ལྔའི་སངས་རྒྱས་ཀྱི་ཞིང་འདིར་སེམས་ཅན་མཐའ་མེད་པར་བྱེད་པ་དང་། དམ་པའི་ཆོས་སྤོང་བ་དང་། འཕགས་པ་ལ་སྐུར་པ་འདེབས་པ་དང་། ལེ་ལོ་ཅན་དང་། མི་དགེ་བའི་རྩ་བ་དང་ལྷན་ཅིག་ཏུ་འགྲོགས་པའི་ནང་ན་བྱང་ཆུབ་སེམས་དཔའ་དགེ་བའི་བརྩོན་འགྲུས་བརྩམས་པར་འགྱུར་རོ། །ལུས་དང་། ངག་དང་། ཡིད་ཡོངས་སུ་སྦྱོང་བའི་ཕྱིར་ཚུལ་ཁྲིམས་དང་། ཐོས་པ་དང་། གཏོང་བ་དང་། བསམ་གཏན་དང་། ཚད་མེད་པའི་ལས་དང་། གཟུགས་མེད་པའི་ཁམས་ཀྱི་དགེ་བའི་རྩ་བ་ལ་བརྩོན་འགྲུས་བརྩམས་པར་འགྱུར་རོ། །འདོད་པའི་ཁམས་དང་། གཟུགས་དང་། གཟུགས་མེད་པའི་ཕུང་པོ་ཉོན་མོངས་པའི་བག་ཆགས་ཀྱི་ལྟ་བ་ཀུན་ཏུ་སྦྱོར་བ་དང་། ཚུལ་འཆོས་པ་དང་། ཁ་གསག་གི་མཚན་མ་དང་། འཇིག་ཚོགས་ཀྱི་མཚན་མ་དང་། མཐར་འཛིན་པའི་ལྟ་བ་ཡོངས་སུ་སྦྱང་བ་དང་། རབ་ཏུ་སྤང་བའི་ཕྱིར་རྩོལ་བ་དེ་དང་དེ་དག་གི་དགེ་བའི་རྩ་བ་ལ་ཡང་སེམས་ཅན་སྦྱོར་བར་བྱེད། འགོད་པར་བྱེད་པ་དེ་ཉིད་ཀྱིས་སེམས་ཅན་ཡོངས་སུ་སྨིན་པར་བྱེད་པ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་སེམས་ཅན་ཡོངས་སུ་སྨིན་པར་བྱ་བའི་ཕྱིར་བརྩོན་འགྲུས་དང་ཚུལ་ཁྲིམས་ཀྱི་སེམས་ཀྱི་གོ་ཆ་ལ་བརྩོན་པ་
འདི་ཡང་འཇིག་རྟེན་པའི་ངག་སྙན་པའི་བསྡུ་བའི་དངོས་པོའོ། །གང་གིས་གོ་ཆའི་ཐབས་ལ་མཁས་པས་ཉོན་མོངས་པ་དང་། རྙོག་པ་ལྔའི་སངས་རྒྱས་ཀྱི་ཞིང་འདིར་བྱང་ཆུབ་སེམས་དཔའ་སྐྱེས་བུ་ཆེན་པོའི་རྩལ་གྱིས་སེམས་ཅན་མཚམས་མེད་པ་བྱེད་པ་དང་། དམ་པའི་ཆོས་སྤོང་བ་དང་། འཕགས་པ་ལ་སྐུར་པ་འདེབས་པ་དང་། མི་དགེ་བའི་རྩ་བ་དང་ལྷན་ཅིག་འགྲོགས་པ་དག་ཡོངས་སུ་སྨིན་པར་འགྱུར་རོ། །ཇི་ལྟར་ཡང་སངས་རྒྱས་ཀྱི་ཞིང་ཡོངས་སུ་མ་དག་པར་བྱང་ཆུབ་སེམས་དཔའ་རྣམས་རྣམ་པ་དེ་ལྟ་བུའི་སྐྱེས་བུའི་རྩལ་ཡོད་དོ། །རིགས་ཀྱི་བུ་དེའི་ཚེ། གཞུང་འདིས་གང་ཉོན་མོངས་པ་དང་། རྙོག་པ་ལྔའི་སངས་རྒྱས་ཀྱི་ཞིང་དུ་བྱང་ཆུབ་སེམས་དཔའ་ཕ་རོལ་ཏུ་ཕྱིན་པ་དྲུག་སྤྱད་པ་སྤྱོད་ཅིང་སྙིང་རྗེ་ཆེན་པོ་དང་ལྡན་པ་དེ་དག་བྱང་ཆུབ་སེམས་དཔའ་ཞེས་བྱ་བར་དེ་ལྟར་རིག་པར་བྱའོ། །བྱང་ཆུབ་སེམས་དཔའི་བ་སྤུའི་ཁུང་བུ་ཇི་སྙེད་པ་དེ་སྙེད་ཀྱི་ངག་སྙན་པའི་བ་སྤུའི་དངོས་པོས་སེམས་ཅན་ཡོངས་སུ་སྨིན་པར་བྱེད་དོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་འཇིག་རྟེན་ལས་འདས་པའི་ཚུལ་ཁྲིམས་དང་། སེམས་ཅན་ཡོངས་སུ་སྨིན་པ་དང་། དོན་བྱ་བའི་བསྡུ་བའི་དངོས་པོ་གང་ཞེ་ན།རིགས་ཀྱི་བུ་ཉོན་མོངས་པ་དང་། རྙོག་པ་ལྔའི་སངས་རྒྱས་ཀྱི་ཞིང་འདིར་བྱང་ཆུབ་སེམས་དཔའ་བརྟན་པའི་སྙིང་རྗེ་ཆེན་པོས་བཅིངས་པ་དང་། བདག་གི་སྨོན་ལམ་གྱི་ཁྱད་པར་གྱིས་བཅིངས་པ་ནི་འདི་ལྟ་སྟེ། དཔེར་ན་ཕྱུགས་ཤིང་ལ་བཏགས་པ་ལྟར་སྡུག་བསྔལ་མྱོང་བས་ན་སེམས་དང་བསམ་པ་ལ་འཇིགས་པའམ། སྐྲག་པའམ། ཡོངས་སུ་བསྡིགས་པ་སྐྱེ་བར་མི་འགྱུར་རོ། །དེ་ཆུང་ངུ་ན་སེམས་ཀྱི་སྐད་ཅིག་མ་གཅིག་གིས་ཀྱང་སེམས་ཅན་ཡོངས་སུ་སྨིན་པར་བྱ་བའི་ཕྱིར་སྙིང་རྗེ་ཆེན་པོ་འདི་སྒོམ་པ་ན་དེ་ལྟར་བསླབ་བོ། །དེ་འདི་སྙམ་དུ་སེམས་ཏེ། སེམས་ཅན་འདི་གང་སེམས་ཅན་འདི་མིང་ཙམ་ཞིག་གམ། སེམས་ཅན་འདི་ཕྱིན་ཅི་ལོག་ཙམ་ཞིག་གམ། །གཏི་མུག་པ་ཙམ་མམ། ཐ་སྙད་ཙམ་མམ། ཐོག་མར་དག་པ་འདི་སེམས་ཅན་ཞེས་བྱ་བའམ། ཡང་དག་པ་མ་ཡིན་པར་གཏི་མུག་པ་མ་གཏོགས་པར་ཤིན་ཏུ་མངོན་པར་མི་སྒྲུབ་པ་དང་། འདུ་བྱེད་སྣ་
ཚོགས་ཀྱི་ཕྱིན་ཅི་ལོག་ཀུན་ནས་ལྡང་བ་རྣམས་མངོན་པར་འདུ་བྱ་བ་ན་སྡུག་བསྔལ་བ་དང་། ཡིད་མི་བདེ་བ་མྱོང་བ་དང་། འདུས་བྱས་ཐམས་ཅད་ཀྱི་དངོས་པོ་གར་མཁན་གྱི་ཚོན་འདྲ་བ་དང་། རྨི་ལམ་ལྟ་བུ་དང་། རང་བཞིན་གྱིས་སྨིག་རྒྱུ་ལྟ་བུ་དང་། འཁོར་བ་ལ་ཆགས་པ་རྣམས་བདེ་བར་འདོད་ཅིང་མངོན་པར་འདུ་བྱ་བ་དེས་སྡུག་བསྔལ་རྣམ་པ་སྣ་ཚོགས་མྱོང་བ་དང་། ཆོས་ཐམས་ཅད་ནམ་མཁའི་རང་བཞིན་དུ་མི་ཤེས་པ་ན་ཀུན་ཏུ་སྦྱོར་བས་འཁྲུལ་པ་དང་། མྱོས་པའི་སྡུག་བསྔལ་སྣ་ཚོགས་ཀྱི་ནད་འབྱུང་བར་འགྱུར་བ་དང་། གང་གི་འགྲོ་བ་ལྔའི་འཁོར་བ་ལ་འཁོར་ལོ་སྟུག་པོ་ལྟ་བུའི་སྡུག་བསྔལ་གྱིས་ཡོངས་སུ་འཁོར་བ་དེ་དག་ཀྱང་བདག་ཅག་གིས་ཕྱིན་ཅི་ལོག་བཞི་སྤངས་ཏེ། ཇི་ལྟ་བ་བཞིན་དུ་ཞི་བའི་ལམ་ལ་དགོད་པར་བྱ་ཞིང་ཡང་དག་པའི་སྡུག་བསྔལ་ཐམས་ཅད་ཀྱིས་ཡོངས་སུ་སྨིན་པར་བྱ་བ་ཞིག་སྙམ་པ་དང་། དེ་སེམས་ཅན་རྣམས་ལ་ཚུལ་བཞིན་དུ་རྟོག་སྟེ། སེམས་ཅན་རྣམས་ལ་དམིགས་པའང་མེད་དོ། །སྲོག་དང་།གསོ་བ་དང་། གང་ཟག་དང་། ཤེད་ལས་སྐྱེས་པ་དང་། ཤེད་ཅན་དུ་དམིགས་པའང་མེད་དོ། །སེམས་ཅན་ཡོངས་སུ་སྨིན་པར་བྱ་བའི་ཕྱིར་སྙིང་རྗེ་ཆེན་པོ་ཡང་རྣམ་པར་མི་སྤོང་ངོ་། །བསྟན་པ་ལ་མོས་པས་སེམས་ཅན་རྣམས་འཇིག་རྟེན་ལས་འདས་པའི་ཚུལ་ཁྲིམས་ལ་སྦྱོར་བར་བྱེད། ཐབས་ལ་མཁས་པས་འགོད་པར་བྱེད། དགོན་པ་དང་། ནགས་འདབ་ཏུ་འདུག་པའི་ཕྱིར་སྤྱོད་པར་འགྱུར་རོ། །འདུ་འཛི་ཡོངས་སུ་སྤང་བའི་ཕྱིར་བརྩོན་འགྲུས་བརྩམས་པས་ཉེ་བར་ལེན་པའི་ཕུང་པོ་ལྔ་ལ་ལྷ་དང་མི་མངོན་པར་མོས་པར་བྱ་བའི་ཕྱིར་ཡིད་ལ་བྱེད་པའི་རྣལ་འབྱོར་དང་ལྡན་པར་འགྱུར་རོ། །གང་ཡང་ཕྱག་འཚལ་བ་དང་། བསྙེན་བཀུར་བ་དང་། འདུ་འཛི་སྤང་བའི་ཕྱིར་སེམས་ཅན་དེ་དག་གི་དྲུང་དུ་ཉེ་བར་ཕྱིན་ནས་ཆོས་སྟོན་ཏེ། བག་ལ་ཉལ་བ་སྤང་བའི་ཕྱིར་འགྲོ་བ་ལྔ་ལ་མངོན་པར་ཆགས་པ་རྗེས་སུ་སྨོན་པ་རྣམ་པར་བྱང་བའི་ཕྱོགས་ལ་སྦྱོར་བར་བྱེད་དོ། །ཉེས་པ་མང་པོའི་ལྟ་བ་དང་། ང་ཡིར་བྱ་བ་དང་། བདག་གིར་བྱ་བ་དང་། རྟག་པ་དང་ཆད་པ་ཡོངས་སུ་སྤང་བའི་ཕྱིར་དགོན་པའི་གནས་དང་། སྦྱངས་པའི་ཡོན་ཏན་བཅུ་གཉིས་ལ་རབ་ཏུ་གནས་པར་བྱེད་པ་དེ་དག་གི་གན་དུ་གུས་
པ་སྐྱེ་བར་འགྱུར་རོ། །དེ་དག་ལའང་འཇིག་རྟེན་ལས་འདས་པའི་ཚུལ་ཁྲིམས་སྟོན་པར་བྱེད་པ་དེ་ནི་སངས་རྒྱས་ཀྱིས་གནང་བ། འཇིག་རྟེན་ལས་འདས་པའི་ཚུལ་ཁྲིམས་འདིའོ། །གང་དང་ལྡན་པའི་སེམས་ཅན་ཐམས་ཅད་འདོད་པའི་འདོད་ཆགས་འཇིག་པར་བྱེད་དོ། །གཟུགས་དང་གཟུགས་མེད་པའི་འདོད་ཆགས་ཐམས་ཅད་འཇིག་པར་བྱེད་དོ། །བག་ལ་ཉལ་བ་དང་། ང་ཡིར་བྱ་བ་དང་། བདག་གིར་བྱ་བ་ཐམས་ཅད་འཇིག་པར་བྱེད་དོ། །མྱུར་དུ་ཆོས་ཟབ་མོ་གཏིང་དཔག་དཀའ་བའི་བཟོད་པ་འཐོབ་བོ། །མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །སེམས་ཅན་འཇིག་རྟེན་པའི་ཚུལ་ཁྲིམས་ཅན་ཡང་དང་ཡང་དུ་སྡུག་བསྔལ་གྱི་ཟིལ་གྱིས་ནོན་ཅིང་འགྲོ་བ་ལྔའི་འཁོར་ལོ་ལ་ཡང་དག་པར་གནས་པ་ང་ཡིར་བྱ་བ་དང་། བདག་གིར་བྱ་བ་ལ་རྟེན་པ་དག་བྱང་ཆུབ་ཀྱི་ལམ་རབ་ཏུ་མི་ཤེས་སོ། །དེ་བཞིན་དུ་རྫུ་འཕྲུལ་ཆེན་པོ་འཇིག་རྟེན་ལས་འདས་པའི་ཚུལ་ཁྲིམས་ཀྱིས་སེམས་ཅན་རྣམས་དགོས་པ་མེད་པ་ནི་གང་ན་བདག་གི་གནས་མེད་ཅིང་སེམས་ཅན་དང་། སྲོག་དང་། གསོ་བ་དང་། གང་ཟག་དང་། ཤེད་ལས་སྐྱེས་པ་དང་། ཤེད་ཅན་གྱི་གནས་མེད་པ་དང་། གཟུགས་ཀྱི་གནས་མེད་པ་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་གནས་མེད་པ་དང་། སའི་ཁམས་ཀྱི་གནས་མེད་པ་དང་། ཆུ་དང་མེ་དང་། རླུང་དང་མིག་དང་། གཟུགས་ཀྱི་མཚན་མ་ལ་མི་གནས་ཤིང་རྣ་བ་དང་། སྒྲའི་མཚན་མ་ལ་མི་གནས། སྣ་དང་དྲིའི་མཚན་མ་ལ་མི་གནས། ལྕེ་དང་། རོའི་མཚན་མ་ལ་མི་གནས། ལུས་དང་། རེག་བྱའི་མཚན་མ་ལ་མི་གནས། ཡིད་དང་ཆོས་ཀྱི་མཚན་མ་ལ་མི་གནས། ལུས་དང་ངག་དང་ཡིད་ཀྱི་མཚན་མ་ལ་མི་གནས། ང་ཡིར་བྱ་བའི་རང་བཞིན་གྱི་མཚན་མ་ལ་མི་གནས། རྟག་པ་དང་། ཆད་པའི་མཚན་མ་ལ་མི་གནས། འཇིག་ཚོགས་ཀྱི་ལྟ་བ་དང་། མཐར་འཛིན་པའི་ལྟ་བ་ལ་མི་གནས། རྟོག་པ་དང་རྣམ་པར་རྟོག་པ་དང་། ཀུན་ཏུ་རྟོག་པ་དང་། རབ་ཏུ་རྟོག་པ་དང་། ཉེ་བར་རྟོག་པ་ལ་མི་གནས། མྱ་ངན་དང་ཉེ་བའི་མྱ་ངན་དང་རྗེས་སུ་མྱ་ངན་དང་ཟད་པའི་མྱ་ངན་དང་གཉིས་པའི་མྱ་ངན་ལ་
མི་གནས། སྟོང་པ་ཉིད་དང་། སྨོན་པ་མེད་པ་དང་། མཚན་མ་མེད་པ་དང་། ཁམས་གསུམ་གྱི་རྒྱུད་ལ་མི་གནས། མངོན་པར་འདུ་མི་བྱེད། མ་སྐྱེས། མ་བྱུང་། མ་བྱས། མངོན་པར་མ་བྱས་པ་ལ་མི་གནས། དུས་གསུམ་ལ་མི་གནས། སེམས་དང་ཡིད་ཀྱི་མཚན་ཉིད་ལ་མི་གནས། ཉོན་མོངས་པ་དང་། རྣམ་པར་བྱང་བ་དང་། ཚིག་པ་དང་རྗེས་སུ་ཚིག་པ་དང་། སྐད་ཅིག་དུ། འཇིག་པའི་མཐའི་རྡུལ་ལ་མི་གནས། མངོན་པར་མི་ཤེས་པ་དང་། འཐུན་པ་ལ་མི་གནས། ཉན་ཐོས་ཀྱི་ཐེག་པ་སྡོམ་པ་ལ་མི་གནས། རང་སངས་རྒྱས་ཀྱི་ཐེག་པ་ལ་མི་གནས།མཚན་མ་ལ་མི་གནས་ཤིང་ཕ་རོལ་ཏུ་ཕྱིན་པ་དྲུག་ལ་སྙེམས་པར་མི་གནས་ཀྱི་སེམས་དང་། ཡིད་ཀྱི་རྣམ་པར་ཤེས་པའི་རྣམ་པར་སྤྱོད་པ་ནམ་མཁའ་བཞིན་དུ་གནས་ཤིང་ཡང་དག་པ་དང་ཡང་དག་པ་མ་ཡིན་པའི་རྣམ་པར་དཔྱོད་པ་ལ་མཚུངས་པར་གནས་སོ། །ཞེན་པ་གཉིས་སུ་མེད་པ་རྣམ་པར་དཔྱོད་པ་དང་། ཆགས་པ་གཉིས་སུ་མེད་པ་རྣམ་པར་དཔྱོད་པ་དང་། ཡེ་ཤེས་གཉིས་སུ་མེད་པ་རྣམ་པར་དཔྱོད་པ་དང་། རྣལ་འབྱོར་གཉིས་སུ་མེད་པ་རྣམ་པར་དཔྱོད་པ་དང་། ཕ་རོལ་ཏུ་ཕྱིན་པ་གཉིས་སུ་མེད་པ་རྣམ་པར་དཔྱོད་པ་དང་། རྟོག་པ་གཉིས་སུ་མེད་པ་རྣམ་པར་དཔྱོད་པ་དང་། ཟག་པ་དང་བཅས་པ་གཉིས་སུ་མེད་པ་རྣམ་པར་དཔྱོད་པ་དང་། ལམ་གཉིས་སུ་མེད་པ་རྣམ་པར་དཔྱོད་པ་དང་། ཉོན་མོངས་པ་མེད་པའི་འདྲེན་པ་གཉིས་སུ་མེད་པ་རྣམ་པར་དཔྱོད་པ་སྟེ། རིགས་ཀྱི་བུ་རྣམ་པ་དེ་ལྟ་བུའི་ཚུལ་ཁྲིམས་དང་ལྡན་པས་རིགས་ཀྱི་བུ་ཆོས་ཟབ་མོའི་བཟོད་པ་ཐོབ་བོ། །ཐོག་མ་མེད་པའི་སྟོང་པ་ཉིད་རབ་ཏུ་འབྱེད་པའི་ཡེ་ཤེས་ལ་མཁས་པར་འགྱུར་རོ། །ཤེས་རབ་སྣང་བས་བྱང་ཆུབ་ཀྱི་ལམ་རྣམ་པར་སྦྱོང་བར་བྱེད་དོ། །འཇིག་རྟེན་གྱི་ཆོས་ཀྱིས་གོས་པའང་མེད་དོ། །བདུད་ཀྱི་ལས་ཀྱིས་གོས་པའང་མེད་དོ། །བག་ཆགས་ཀྱི་རྗེས་སུ་འབྲེལ་བའི་ཉོན་མོངས་པས་གོས་པའང་མེད་དོ། །ཕྱོགས་བཅུར་ཤེས་རབ་ཀྱི་སྣང་བས་ལྡན་པར་འགྱུར་རོ། །ཤེས་རབ་ཀྱི་སྟོབས་སྐྱེས་པས་ཡུལ་ཐམས་ཅད་ཡོངས་སུ་ཤེས་པར་འགྱུར་རོ། །སངས་རྒྱས་ཀྱི་ཆོས་ཐམས་ཅད་ལ་སྣང་བ་ཐོབ་པར་འགྱུར་རོ། །འདོད་ཆགས་ཀྱི་འཁོར་བས་ལྡན་པ་དང་། མྱ་ངན་ལས་འདས་པ་དང་
དངོས་པོ་དང་དངོས་པོ་མེད་པ་ཐམས་ཅད་ཀྱི་ཉོན་མོངས་པ་དང་། རྣམ་པར་བྱང་བ་ཡོངས་སུ་ཤེས་པ་དང་། ཆགས་པ་ཐམས་ཅད་ལས་ཡང་དག་པར་ཤིན་ཏུ་འདས་པ་དང་། མྱ་ངན་ལས་འདའ་བར་འགྲོ་བའི་སྤྱོད་ཡུལ་དུ་འགྱུར་ཞིང་འཁོར་བའི་ཡུལ་དུ་འང་ཡང་དག་པར་མཐོང་ངོ་། །དབེན་པའི་སྤྱོད་ཡུལ་དུའང་འགྱུར་ཞིང་འདུ་འཛི་ཐམས་ཅད་ལ་མངོན་པར་ཆགས་པར་ཡང་ཡང་དག་པར་མཐོང་ངོ་། །བསམ་གཏན་གྱི་སྤྱོད་ཡུལ་དུའང་འགྱུར་ཞིང་བཙུན་མོའི་འཁོར་དུའང་ཡང་དག་པར་མཐོང་ངོ་། །མངོན་པར་འདུ་མི་བྱེད་པའི་སྤྱོད་ཡུལ་དུའང་འགྱུར་ཞིང་འདུ་བྱེད་ཐམས་ཅད་ཀྱི་ཡུལ་དུའང་ཡང་དག་པར་མཐོང་ངོ་། །མ་སྐྱེས་པའི་སྤྱོད་ཡུལ་དུའང་འགྱུར་ཞིང་བདུད་བཞིའི་ཡུལ་གྱི་སྤྱོད་ཡུལ་དུའང་ཡང་དག་པར་མཐོང་ངོ་། །འཕགས་པའི་སྐྱེ་བོའི་སྤྱོད་ཡུལ་དུའང་འགྱུར་ཞིང་། འཕགས་པའི་སྐྱེ་བོའི་སྤྱོད་ཡུལ་མ་ཡིན་པར་ཡང་ཡང་དག་པར་མཐོང་ངོ་། །འཇིག་རྟེན་གྱི་ཡུལ་ལས་ཡང་དག་པར་ཤིན་ཏུ་འདས་པར་ཡང་འགྱུར་ཞིང་འཇིག་རྟེན་ཐམས་ཅད་ཀྱི་ཡུལ་གྱི་སྤྱོད་ཡུལ་དུའང་ཡང་དག་པར་མཐོང་ངོ་། །ཡེ་ཤེས་ཀྱི་སྤྱོད་ཡུལ་དུའང་འགྱུར་ཞིང་བྱིས་པའི་ཡུལ་གྱི་སྤྱོད་ཡུལ་དུའང་ཡང་དག་པར་མཐོང་ངོ་། །ཡང་དག་པའི་མཐའི་ཡུལ་མངོན་དུའང་འགྱུར་ཞིང་ཉན་ཐོས་དང་། རང་སངས་རྒྱས་ཀྱི་ཡུལ་གྱི་སྤྱོད་པ་ལ་ཡང་དག་པར་དགའ་བས་ཀྱང་བྱང་ཆུབ་སེམས་དཔའི་ཡུལ་ལ་སྤྱད་པ་སྤྱོད་དོ། །ཡུལ་ཐམས་ཅད་མཚན་ཉིད་མེད་པའི་སྤྱོད་ཡུལ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པར་བྱེད། སྤྱོད་པར་བྱེད། མཚན་དང་། དཔེ་བྱད་དང་། སངས་རྒྱས་ཀྱི་ཡུལ་ལ་ཡང་དག་པར་གཞོལ་བའི་རྣམ་པར་ཤེས་པ་ལ་བརྩོན་པས་བདུད་བཞིའི་ཡུལ་ལ་དབྱེ་བར་འཇུག་པ་ཤེས་པར་འགྱུར་རོ། །དེ་བཞིན་གཤེགས་པ་ལ་མཆོད་ཅིང་རིམ་གྲོ་བྱ་བའི་ཕྱིར་སངས་རྒྱས་ཀྱི་ཞིང་ཐམས་ཅད་དུ་ཉེ་བར་འགྲོ་བ་ལ་བརྩོན་པར་འགྱུར་ཞིང་དེ་བཞིན་གཤེགས་པ་ཐམས་ཅད་ཀྱི་བསྟན་པའང་བྱེད་དོ། །སངས་རྒྱས་ཀྱི་ཡུལ་ཐམས་ཅད་ཡོངས་སུ་རྫོགས་པར་བྱེད་ཅིང་། ཐམས་ཅད་མཁྱེན་པའི་ཡེ་ཤེས་ཀྱི་ཡུལ་ལ་ཡང་འཇུག་པར་བྱེད་དོ། །དམིགས་པ་ཐམས་ཅད་ཀྱི་དགེ་བ་སྤྱོད་པ་ལ་སེམས་ཅན་ཡོངས་སུ་སྨིན་པར་བྱེད་དོ། །ཉོན་མོངས་པའི་རི་རྣམ་པར་ཕྱེ་
མར་བྱེད་དོ། །སྤྲོས་པ་ཐམས་ཅད་རབ་ཏུ་དེད་པར་བྱེད་དོ། །ལྟ་བ་ཐམས་ཅད་རྣམ་པར་འཇིག་པར་བྱེད་དོ། །སངས་རྒྱས་ཀྱི་ཆོས་ཐམས་ཅད་ལ་ཡང་འགོད་པར་བྱེད་དོ། །རིགས་ཀྱི་བུ་ཉོན་མོངས་པ་དང་། རྙོག་པ་ལྔའི་སངས་རྒྱས་ཀྱི་ཞིང་ན་སེམས་ཅན་མི་དགེ་བའི་རྩ་བ་དང་ལྷན་ཅིག་ཏུ་འགྲོགས་པ་རྣམས་ཀྱི་ནང་ན་བྱང་ཆུབ་སེམས་དཔའ་རྣམ་པ་དེ་ལྟ་བུས་ཕ་རོལ་ཏུ་ཕྱིན་པ་དྲུག་སྤྱད་པ་སྤྱོད་པའི་ཚེ། རྣམ་པ་དེ་ལྟ་བུའི་དོན་བྱ་བ་བསྡུ་བའི་དངོས་པོས་སེམས་ཅན་རྣམས་འཇིག་རྟེན་ལས་འདས་པའི་ཚུལ་ཁྲིམས་ལ་སྦྱོར་བར་བྱེད་དོ། །དགོད་པར་བྱེད་དོ། །ཡོན་ཏན་གྱིས་སངས་རྒྱས་ཀྱི་ཡོན་ཏན་དོན་བྱ་བ་ལ་སེམས་ཅན་རྣམས་འགོད་པར་བྱེད་པ་འདི་དག་ཀྱང་བྱང་ཆུབ་སེམས་དཔའི་སྐྱེས་བུ་ཆེན་པོའི་ཁུར་ཏོ། །སེམས་ཅན་གྱི་བསྡུ་བའོ། སེམས་ཅན་གྱི་ཚོགས་སོ། །སེམས་ཅན་ཡོངས་སུ་སྨིན་པར་བྱེད་པའོ། །གང་སེམས་ཅན་ཤིན་ཏུ་དབུལ་པོ་ལས་ཡོངས་སུ་ཐར་བར་བྱེད་པའོ། །རྣམ་པར་ཐར་པའི་སྒོ་གསུམ་ལ་འགོད་པར་བྱེད་པའོ། །ཇི་ལྟ་བུར་སངས་རྒྱས་ཀྱི་ཞིང་རྣམ་པར་མ་དག་པར་བྱང་ཆུབ་སེམས་དཔའ་ལ་ལ་རྣམ་པ་དེ་ལྟ་བུའི་རྩལ་བྱེད་ཅིང་། བྱང་ཆུབ་སེམས་དཔའི་བ་སྤུའི་ཁུང་བུ་ཇི་སྙེད་པ་དེ་སྙེད་ཀྱི་དོན་བྱ་བས་སེམས་ཅན་ཡོངས་སུ་སྨིན་པར་འགྱུར་རོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའི་དོན་འཐུན་པ་སེམས་ཅན་ཡོངས་སུ་སྨིན་པའི་རྩ་ལ་ཆེན་པོ་གང་ཞེ་ན། རིགས་ཀྱི་བུ་ཉོན་མོངས་པ་དང་རྙོག་པ་ལྔའི་སངས་རྒྱས་ཀྱི་ཞིང་འདིར་བྱང་ཆུབ་སེམས་དཔའ་ཕ་རོལ་ཏུ་ཕྱིན་པ་དྲུག་སྤྱད་པ་སྤྱོད་པ་ན། གང་གི་ཚེ་བདག་བརྩོན་པར་འགྱུར་བ་ཡང་ན་ནི་སྦྱིན་པའི་ཕ་རོལ་ཏུ་ཕྱིན་པ་དང་། ཡང་ན་ནི་ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྩོན་པར་འགྱུར་བ་དེ་དང་དེར་སེམས་ཅན་རྣམས་སྦྱོར་བར་བྱེད་དོ། །གལ་ཏེ་ཡང་བྱང་ཆུབ་སེམས་དཔའ་སྦྱིན་པ་བྱིན་པས་ཟས་སམ་སྐོམ་ནས། ཡན་ལག་གི་དམ་པ་མགོའི་བར་དུ་གཏོང་བར་འགྱུར་བ་དེ་དེ་ལྟར་སེམས་ཅན་རྣམས་ལ་སྦྱིན་པའི་ཕ་རོལ་ཏུ་ཕྱིན་པའི་ཡོན་ཏན་སྟོན་པ་དེ་ལ་སྦྱོར་བར་བྱེད་དོ། །གང་གི་ཚེ་བྱང་ཆུབ་སེམས་དཔའ་སྲོག་གཅོད་པ་སྤངས་ཤིང་སེམས་
ཅན་རྣམས་ལ་སྙིང་རྗེ་བ་དེ་དེ་ལྟར་སྲོག་གཅོད་པ་ཟློག་པར་བྱེད། སེམས་ཅན་ཐམས་ཅད་ལ་སྙིང་རྗེ་བར་སྦྱོར་བར་བྱེད་དོ། །འཇིག་རྟེན་ལས་འདས་པའི་ཚུལ་ཁྲིམས་ལ་འགོད་པར་བྱེད་པ་ནས། ཡང་དག་པར་ལྟ་བའི་བར་དུ་སྨྲ་བར་བྱའོ། །ཇི་ལྟར་ཡང་བྱང་ཆུབ་སེམས་དཔའ་བདག་བཟོད་པའི་ཡོན་ཏན་ལྔ་དང་ལྡན་པར་འགྱུར་བ་དང་། བག་ལ་ཉལ་བ་སྤངས་པའི་ཕྱིར་བཟོད་པ་སྒོམ་པར་བྱེད་པ་ནས། མི་སྐྱེ་བའི་ཆོས་ཀྱི་བཟོད་པ་ཐོབ་པའི་བར་དུ་དེ་ལ་སེམས་ཅན་རྣམས་སྦྱོར་བར་བྱེད་ཅིང་མི་སྐྱེ་བའི་ཆོས་ཀྱི་བཟོད་པའི་བར་དུ་འགོད་པར་བྱེད་དོ། །ཇི་ལྟར་བྱང་ཆུབ་སེམས་དཔའ་བདག་བརྩོན་འགྲུས་བརྩམས་ནས་སེམས་ཅན་ཡོངས་སུ་སྨིན་པར་བྱ་བའི་ཕྱིར་དགེ་བའི་ལུས་ཀྱི་ལས་བྱིན་གྱིས་བརླབས་པ་དང་། དགེ་བའི་ངག་གི་ལས་དང་། ཡིད་ཀྱི་ལས་བྱིན་གྱིས་བརླབས་པ་ནས་དགེ་བའི་རྒྱུར་འདུ་ཤེས་པ་དང་། ཞི་བ་དང་། སྙིང་རྗེ་ཆེན་པོའི་རྒྱུར་འདུས་བྱས་རྣམས་རྣམ་པར་མི་སྤོང་བ་དེ་ལ་སེམས་ཅན་རྣམས་སྦྱོར་བར་བྱེད། འགོད་པར་བྱེད་དོ། །ཇི་ལྟ་བུར་བྱང་ཆུབ་སེམས་དཔའ་ཉན་ཐོས་དང་། རང་རྒྱལ་བ་འདུལ་བའི་ཕྱིར་ཉན་ཐོས་དང་། རང་སངས་རྒྱས་ཀྱི་ཐེག་པ་ལ་གནས་ཏེ། བསམ་གཏན་ལ་བསམ་གཏན་དུ་བྱེད་དོ། །དེ་བཞིན་གཤེགས་པའི་ཏིང་ངེ་འཛིན་ཡོངས་སུ་རྫོགས་པར་བྱ་བའི་ཕྱིར་ཉན་ཐོས་དང་། རང་རྒྱལ་བ་དང་བྲལ་བའི་བསམ་གཏན་ལ་བསམ་གཏན་དུ་བྱེད་དོ། །བྱང་ཆུབ་སེམས་དཔའ་བདག་མེད་པའི་བསམ་གཏན་ལ་བསམ་གཏན་དུ་བྱེད་པ་ནས་འཁྱིལ་བ་དང་། ལྡོག་པའི་བསམ་གཏན་ཐོབ་པའི་བར་དུ་དེ་ལ་སེམས་ཅན་རྣམས་དེ་དང་དེ་དག་གི་ཡོན་ཏན་ལ་སྦྱོར་བར་བྱེད། འགོད་པར་བྱེད་དོ། །ཇི་ལྟ་བུར་བྱང་ཆུབ་སེམས་དཔའ་བདག་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མངོན་པར་བརྩོན་པ་ན་ཐབས་སྣ་ཚོགས་ཀྱིས་ཤེས་རབ་ཀུན་འབྱུང་བར་བྱེད་དོ། །ཇི་ལྟར་བདག་མངོན་སུམ་དུ་འགྱུར་བ་དེ་ལྟར་སེམས་ཅན་རྣམས་སྦྱོར་བར་བྱེད་དོ། །ཇི་ལྟ་བུར་ཆོས་ཐམས་ཅད་ལ་ཡེ་ཤེས་ཐོབ་ཅིང་ཕ་རོལ་མ་ཡིན་པའི་རྐྱེན་མངོན་པར་ཤེས་པ་དེ་ལྟར་སེམས་ཅན་གྱི་རྒྱུའི་ཕྱིར་ཆོས་འདི་དག་འབྱུང་བ་འདི་ནི་སེམས་ཅན་ཡོངས་སུ་སྨིན་པར་སྦྱོར་བའི་ཐབས་ལ་མཁས་པའི་ཡེ་ཤེས་ཏེ།
གང་གི་ལས་ཀྱིས་སེམས་ཅན་རྣམས་དགེ་བའི་རྩ་བ་སྐྱེད་པར་ནུས་པ་དེའི་བར་དུ་སྦྱོར་བའི་བྱིན་གྱིས་བརླབས་པའི་ཕྱིར་ཆགས་པ་ཡང་མེད་དོ། །སེམས་ཅན་ཉན་ཐོས་ཀྱི་ཐེག་པ་པ་རྣམས་ཉན་ཐོས་ཀྱི་ཐེག་པ་ལ་སྦྱོར་བར་བྱེད་དོ། །སེམས་ཅན་རང་སངས་རྒྱས་ཀྱི་ཐེག་པ་པ་རྣམས་རང་སངས་རྒྱས་ཀྱི་ཐེག་པ་ལ་སྦྱོར་བར་བྱེད་དོ། །སེམས་ཅན་རྣམས་ཇི་ལྟ་བུར་ཕྲ་བའི་ཆོས་ལ་ཡེ་ཤེས་མངོན་སུམ་དུ་འབྱུང་བར་འགྱུར་བ་དེ་ལྟར་བྱང་ཆུབ་ཀྱི་སྤྱོད་པ་ཟབ་མོ་ལ་སྦྱོར་བར་བྱེད་དོ། །ལས་ཀྱི་རྣམ་པར་སྨིན་པ་ལ་མཁས་པའི་ཡེ་ཤེས་དང་ལྡན་པའི་དྲན་པ་རྣམ་པར་མི་སྤོང་བ་འདི་ཡང་བྱང་ཆུབ་སེམས་དཔའི་ཐབས་ལ་མཁས་པས་རབ་ཏུ་འབྱེད་པའི་ཡེ་ཤེས་མངོན་པར་བསྒྲུབས་པའོ། །གང་བྱང་ཆུབ་སེམས་དཔའ་ཆོས་དང་སེམས་ལ་དབང་བྱེད་པར་རབ་ཏུ་ཤེས་ཤིང་སྐད་ཅིག་མར་འཇིག་པའི་མཚན་ཉིད་ལ་ཡང་རྟོག་པ་དང་། སེམས་ཅན་ལ་སྙིང་རྗེ་ཆེན་པོ་རྣམ་པར་མི་སྤོང་བ་འདི་ཡང་བྱང་ཆུབ་སེམས་དཔའི་ཐབས་ལ་མཁས་པས་སེམས་ཅན་ཡོངས་སུ་སྨིན་པ་མངོན་པར་བསྒྲུབས་པའོ། །གང་བྱང་ཆུབ་སེམས་དཔའ་སེམས་ཅན་སྟོང་པ་ཉིད་དང་། དོན་དམ་པ་སྟོང་པ་ཉིད་ལ་སྤྱོད་པ་ཐམས་ཅད་ཀྱི་མཚན་ཉིད་དུ་དམིགས་པ་ཡང་མེད་ཅིང་སེམས་ཅན་རྣམས་ཐེག་པ་གསུམ་ལ་སྦྱོར་བར་བྱེད་པ་དང་། སེམས་ཅན་ཡོངས་སུ་སྨིན་པར་སྦྱོར་བའི་རྒྱུན་མ་བཅད་པ་འདི་ཡང་བྱང་ཆུབ་སེམས་དཔའི་ཐབས་ལ་མཁས་པས་སེམས་ཅན་ཡོངས་སུ་སྨིན་པར་མངོན་པར་བསྒྲུབས་པའོ། །གང་བྱང་ཆུབ་སེམས་དཔའ་ལུས་དང་ངག་དང་ཡིད་ཀྱི་འདུ་བྱེད་བདག་མེད་པ་དང་ལྡན་པས་ཆོས་སྟོན་པ་ལ་དམིགས་པ་མེད་པ་དང་།ཉན་པ་དང་། སྒྲ་དང་དབྱངས་ལ་དམིགས་པ་མེད་པ་དང་། ལས་ཀྱི་འབྲས་བུ་རྣམ་པར་སྨིན་པ་ལ་དམིགས་པ་མེད་པ་དང་། སེམས་ཅན་རྣམས་ལ་སྙིང་རྗེ་བའི་ཕྱིར་ཡང་སེམས་ཅན་ཕྱིན་ཅི་ལོག་ལ་ཡང་དག་པར་འདུ་བ་མེད་པ་རྣམས་ལ་སེམས་ཅན་གྱི་མཚན་ཉིད་ཀྱི་རྗེས་སུ་འབྲེལ་པ་སྟོན་པ་འདི་ཡང་བྱང་ཆུབ་སེམས་དཔའི་ཐབས་ལ་མཁས་པས་སེམས་ཅན་ཡོངས་སུ་སྦྱང་བ་མངོན་པར་བསྒྲུབས་པའོ། །བྱང་ཆུབ་སེམས་དཔའ་རང་བཞིན་གྱིས་འདུ་བྱེད་པར་མི་དམིགས་ཤིང་གཏོང་བར་ཡང་མི་དམིགས་པ་དང་། ལེན་
པ་དང་རྣམ་པར་སྨིན་པའི་འབྲས་བུ་ཡང་མ་ཡིན་ལ། སེམས་ཅན་ལ་སྙིང་རྗེ་བའི་ཕྱིར་ཡང་སྦྱིན་པ་བྱིན་པར་འགྱུར་ལ་སེམས་ཅན་རྣམས་ལ་སྦྱིན་པའི་འབྲས་བུ་རྣམ་པར་སྨིན་པར་ཡང་སྟོན་པར་བྱེད་པ་དང་། སྦྱིན་པ་པོ་བསོད་ནམས་བྱ་བའི་དངོས་པོ་ལ་སྦྱོར་བར་བྱེད་པ་འདི་ཡང་བྱང་ཆུབ་སེམས་དཔའི་ཐབས་ལ་མཁས་པས་སེམས་ཅན་ཡོངས་སུ་སྨིན་པ་མངོན་པར་བསྒྲུབས་པའོ། །ཡང་བྱང་ཆུབ་སེམས་དཔའ་ཇི་ལྟར་སེམས་ཅན་གྱི་ལུས་སྤྱོད་པ་མེད་པ་དང་། འགྱུར་བ་མེད་པ་དང་། མི་གཙང་བའི་གཟུགས་བརྙན་ལྟ་བུར་རབ་ཏུ་ཤེས་པ་དང་། སེམས་བྲག་ཅ་ལྟ་བུར་བརྟག་པ་དང་། འདུ་བྱེད་སྒྱུ་མའི་རང་བཞིན་ལྟ་བུར་རབ་ཏུ་ཤེས་པ་དང་། སེམས་ཅན་རྣམས་ལ་སྙིང་རྗེ་ཆེན་པོ་རབ་ཏུ་སྦྱོར་བ་རྣམ་པར་མི་སྤོང་བ་དང་། སེམས་ཅན་རྣམས་ལུས་དང་ངག་དང་། ཡིད་ཀྱི་འདུ་བྱེད་ལ་སྦྱོར་བར་བྱེད་པ་དང་། རྒྱུ་དང་འབྲས་བུ་ཡང་དག་པར་སྟོན་པར་བྱེད་པ་འདི་ཡང་བྱང་ཆུབ་སེམས་དཔའི་ཐབས་ལ་མཁས་པས་སེམས་ཅན་ཡོངས་སུ་སྨིན་པ་མངོན་པར་བསྒྲུབས་པའོ། །ཡང་བྱང་ཆུབ་སེམས་དཔའ་ཇི་ལྟ་བུར་བདག་མེད་ཅིང་མངོན་པར་འདུ་མི་བྱེད་པའི་ཚུལ་ཁྲིམས་ལ་རྟོག་པར་བྱེད་པ་དང་། སྤྱོད་པའི་མཚན་ཉིད་ཀྱང་རབ་ཏུ་ཤེས་པ་དང་། འདི་ལ་སེམས་ཅན་གྱི་བཏང་སྙོམས་སུ་རབ་ཏུ་སྦྱོར་བར་མི་འགྱུར་བ་དང་། སེམས་ཅན་རྣམས་དང་ཕུང་པོ་གསུམ་ལ་སྦྱོར་བར་བྱེད་པ་འདི་ནི་ལྷག་པའི་ཚུལ་ཁྲིམས་སུ་སློབ་པ་དང་ལྷག་པའི་སེམས་དང་། ལྷག་པའི་ཤེས་རབ་ལ་སྦྱོར་བར་བྱེད་པ་འདི་ཡང་བྱང་ཆུབ་སེམས་དཔའི་ཐབས་ལ་མཁས་པས་སེམས་ཅན་ཡོངས་སུ་སྨིན་པ་བསྒྲུབས་པའོ། །ཡང་བྱང་ཆུབ་སེམས་དཔའ་འདི་ལྟར་ལུས་དང་ངག་དང་ཡིད་ཀྱི་འདུ་བྱེད་སྐད་ཅིག་ཏུ་འཇིག་པའི་མཚན་ཉིད་དུ་ཤེས་ཏེ། འདུས་མ་བྱས་ཀྱི་གནས་དང་བྲལ་བར་ཡང་དག་པར་རྗེས་སུ་མཐོང་ཞིང་སེམས་ཅན་རྣམས་ལ་ཏིང་ངེ་འཛིན་དང་། བཟོད་པའི་རྒྱུ་དང་། འབྲས་བུ་མཚུངས་པར་སྟོན་པ་དེ་ལ་སེམས་ཅན་རྣམས་སྦྱོར་བར་བྱེད་པ་འདི་ཡང་བྱང་ཆུབ་སེམས་དཔའི་ཐབས་ལ་མཁས་པས་སེམས་ཅན་ཡོངས་སུ་སྨིན་པ་མངོན་པར་བསྒྲུབས་པའོ། །བྱང་ཆུབ་སེམས་དཔའ་ཇི་ལྟར་ཡང་བླང་བ་མེད་པ་དང་
དོར་བ་མེད་པའི་འདུ་བྱེད་ཐམས་ཅད་ཤེས་ཤིང་རྒྱུ་དང་འབྲས་བུར་ཡང་རྟོག་པ་དང་། ཆོས་ཐམས་ཅད་སྐྱེ་བ་དང་འགོག་པར་དམིགས་པ་མེད་པ་དང་། རྒྱུ་དང་རྐྱེན་གྱི་འབྲས་བུ་རྣམ་པར་སྨིན་པ་དང་བྲལ་བར་རབ་ཏུ་མི་ཤེས་པ་དང་། སེམས་ཅན་རྣམས་ཡོངས་སུ་སྨིན་པར་བྱེད་པ་དང་། སྙིང་རྗེ་ཆེན་པོའི་རྒྱུན་མི་གཅོད་པ་དང་། ཡང་སེམས་ཅན་རྣམས་ཀྱི་ཉོན་མོངས་པ་རབ་ཏུ་སྤངས་པ་དང་། ཕུང་པོ་ཡོངས་སུ་ཤེས་པ་དང་། ཡེ་ཤེས་མངོན་སུམ་དུ་བྱ་བའི་ཕྱིར་བརྩོན་འགྲུས་བརྩམ་པ་དང་། རྒྱུའི་འབྲས་བུ་སྟོན་པར་བྱེད་པ་དང་། སེམས་ཅན་ལེ་ལོ་ཅན་རྣམས་བརྩོན་འགྲུས་ལ་དམིགས་པའི་སྡུག་བསྔལ་འཛིན་པ་ལ་སྦྱོར་བ་འདི་ཡང་བྱང་ཆུབ་སེམས་དཔའི་ཐབས་ལ་མཁས་པས་སེམས་ཅན་ཡོངས་སུ་སྨིན་པ་མངོན་པར་བསྒྲུབས་པའོ། །བྱང་ཆུབ་སེམས་དཔའ་ཇི་ལྟར་ཡང་བསམ་གཏན་ལ་བསམ་གཏན་དུ་བྱེད་ཅིང་འདུ་བྱེད་ཐམས་ཅད་མི་རྟག་པར་ཡང་དག་པར་རྗེས་སུ་མཐོང་བ་དང་། སྡུག་བསྔལ་བ་དང་། བདག་མེད་པ་དང་། མྱོང་བ་མེད་པ་དང་། བྱས་པ་མེད་པ་དང་། བྱ་བ་མེད་པ་དང་། ཀུན་ནས་ལྡང་བ་མེད་པ་དང་། སྐད་ཅིག་ཏུ་ཟད་པ་མེད་པའི་ཡེ་ཤེས་ལ་མཁས་པའི་འདུ་བྱེད་རྣམས་ཡང་དག་པར་རྗེས་སུ་མཐོང་བ་དང་། སེམས་ཅན་རྣམས་ལ་ཡང་ཕུང་པོ་ལ་རྟེན་པའི་བསམ་གཏན་ཚངས་པར་སྤྱོད་པ་མངོན་པར་ཤེས་པ་ཐོབ་པའི་རྒྱུ་དང་འབྲས་བུ་སྟོན་པ་དང་། བསམ་གཏན་གྱིས་ཉོན་མོངས་པ་སྤང་བར་བྱོས་ཤིག་ཅེས་དེ་ལྟར་ལས་གཞན་མ་ཡིན་པས་སེམས་ཅན་རྣམས་བསམ་གཏན་ལ་སྦྱོར་བར་བྱེད་པ་དང་། ཐོབ་པ་ཆེན་པོ་ཐོབ་པར་བྱོས་ཤིག་ཅེས་བསམ་གཏན་ལ་སེམས་སྦྱོར་བར་བྱེད་པ་འདི་ཡང་བྱང་ཆུབ་སེམས་དཔའི་ཐབས་ལ་མཁས་པས་སེམས་ཅན་ཡོངས་སུ་སྨིན་པའི་མངོན་པར་བསྒྲུབས་པའོ། །ཡང་བྱང་ཆུབ་སེམས་དཔའ་ཇི་ལྟར་བླང་བ་མེད་ཅིང་དོར་བ་མེད་པ་དང་། ཆགས་པ་དང་། ཁོང་ཁྲོ་བ་གཉི་ག་དང་བྲལ་བས་ཐམས་ཅད་བཏང་སྙོམས་ཐོབ་པ་དང་། ནན་ཏན་དང་། བདག་ཏུ་ཤེས་པ་དང་། མི་སྐྱེ་བའི་ཆོས་ཀྱི་བཟོད་པ་དང་། བསམ་གཏན་གྱི་དབང་པོ་ལ་ཡིད་ཀྱི་འདུ་བྱེད་རྣམས་རྟོག་པར་མི་བྱེད། རྣམ་པར་རྟོག་པར་མི་བྱེད་པ་དང་། སེམས་ཅན་རྣམས་
ལ་སྙིང་རྗེ་ཆེན་པོ་རབ་ཏུ་སྦྱོར་བ་ཡོངས་སུ་འགྲུབ་པ་རབ་ཏུ་མི་སྤོང་བ་དང་། ཤེས་རབ་སྒོམ་པ་ལ་བརྩོན་པས་སེམས་ཅན་རྣམས་འཁོར་བའི་བཙོན་ར་ལས་རབ་ཏུ་ཐར་བར་སྟོན་པ་དང་། སེམས་ཅན་རྣམས་ཐོས་པ་དང་བསམ་གཏན་ལ་བརྩོན་ཞིང་ཚོལ་བ་བསྒོམ་པ་ལ་སྦྱོར་བར་བྱེད་པ་དང་། ཡང་བྱང་ཆུབ་སེམས་དཔའ་ཇི་ལྟ་ཇི་ལྟ་བུར་དགེ་བའི་ཆོས་ཀྱི་ཁྱད་པར་ཁོང་དུ་ཆུད་པས་འཁོར་བའི་འདམ་ལས་རྒལ་བར་འགྱུར་བ་དེ་ལྟ་དེ་ལྟ་བུར་སེམས་ཅན་རྣམས་ཆོས་དེ་དང་དེ་དག་ལ་ཡང་དག་པར་གཞོག་པར་བྱེད་སྦྱོར་བར་བྱེད། འགོད་པར་བྱེད་པ་འདི་ཡང་བྱང་ཆུབ་སེམས་དཔའི་ཡེ་ཤེས་ཀྱི་ཐབས་ལ་མཁས་པས་སེམས་ཅན་རྣམས་ཡོངས་སུ་སྨིན་པར་བྱ་བའི་ཕྱིར་དོན་འཐུན་པའི་བསྡུ་བའི་དངོས་པོ་མངོན་པར་བསྒྲུབས་པའོ། །རིགས་ཀྱི་བུ་བྱང་ཆུབ་སེམས་དཔའི་བ་སྤུའི་ཁུང་བུ་ཇི་སྙེད་པ་དེ་སྙེད་ཀྱི་སེམས་ཅན་ཡོངས་སུ་སྨིན་པ་དོན་འཐུན་པའི་བསྡུ་བའི་དངོས་པོའོ། །གཞན་ཡང་ཉོན་མོངས་པ་རྙོག་པ་ལྔའི་སངས་རྒྱས་ཀྱི་ཞིང་དུ་ངན་སོང་གསུམ་དང་། ངན་སོང་དུ་སྤྱོད་པའི་ཉེས་པ་དང་། སེམས་ཅན་ཉོན་མོངས་པ་དང་། ཚེ་དང་ལྟ་བ་དང་། བསྐལ་པའི་རྙོག་པས་བྱང་ཆུབ་སེམས་དཔའ་རྙོག་པ་ལྔའི་སངས་རྒྱས་ཀྱི་ཞིང་འདི་ལས་སྨོན་ལམ་གྱི་རྒྱུན་མི་གཅོད་ཅིང་སངས་རྒྱས་ཀྱི་ཞིང་གི་ཡོན་ཏན་གྱི་ཚོགས་ལ་མངོན་པར་མི་འདོད་པ་དང་། སངས་རྒྱས་ཀྱི་ཞིང་ཡོངས་སུ་དག་པར་སྨོན་ལམ་མི་བྱེད་དོ། །ཡང་ཉོན་མོངས་པ་དང་། རྙོག་པ་ལྔའི་སངས་རྒྱས་ཀྱི་ཞིང་དུ་ཕ་རོལ་ཏུ་ཕྱིན་པ་དྲུག་གིས་བྱང་ཆུབ་ཀྱི་སྤྱད་པ་སྤྱོད་པ་ན། སེམས་ཅན་མཚམས་མེད་པ་བྱེད་པ་དང་། དམ་པའི་ཆོས་སྤོང་བ་དང་། འཕགས་པ་ལ་སྐུར་པ་འདེབས་པ་དང་། མི་དགེ་བའི་རྩ་བ་དང་ལྷན་ཅིག་ཏུ་འགྲོགས་པ་རྣམས་བསྡུ་བའི་དངོས་པོ་རྣམ་པ་བཞི་པོ་འདི་དག་གིས་སེམས་ཅན་རྣམས་ཡོངས་སུ་སྨིན་པ་སྐྱེད་པར་བྱེད་དོ། །ཐེག་པ་གསུམ་ལ་སྦྱོར་བར་བྱེད་དོ། །ཕ་རོལ་ཏུ་ཕྱིན་པ་དྲུག་ལ་འགོད་པར་བྱེད་དོ། །དེ་ཡང་འདིར་དེ་ཙམ་གྱིས་བྱང་ཆུབ་ཀྱི་སྤྱད་པ་སྤྱོད་ཅིང་སེམས་ཅན་ཡོངས་སུ་སྨིན་པར་བྱེད་དོ། །འདིར་ཡང་འདུལ་བ་འཛིན་པ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་
མངོན་པར་འཚང་རྒྱ་བའི་བར་དུའོ། །བྱང་ཆུབ་ཐོབ་པ་ན་ཡང་སེམས་ཅན་མཚམས་མེད་པ་བྱེད་པ་ནས་མི་དགེ་བའི་རྩ་བ་དང་ལྷན་ཅིག་ཏུ་འགྲོགས་པའི་བར་དུ་ཡོངས་སུ་སྨིན་པར་འགྲོ་ཞིང་སེམས་ཅན་རྣམས་ཐེག་པ་གསུམ་ལ་ཡོངས་སུ་སྨིན་པར་བྱེད་པ་ཉོན་མོངས་པའི་ལྟ་བ་ཐམས་ཅད་ལས་ཡོངས་སུ་ཐར་བར་བྱེད་པ་འདིའང་རིགས་ཀྱི་བུ་ཉོན་མོངས་པ་དང་། རྙོག་པ་ལྔའི་སངས་རྒྱས་ཀྱི་ཞིང་འདིར་བྱང་ཆུབ་སེམས་དཔའ་རྩལ་ཆེན་པོས་ཡོངས་སུ་སྨིན་པའི་གོ་ཆའོ། །གང་བྱང་ཆུབ་སེམས་དཔའ་ལ་ལས་སངས་རྒྱས་ཀྱི་ཞིང་ཡོངས་སུ་དག་པར་སེམས་ཅན་གྱི་གོ་ཆ་རྣམ་པ་དེ་ལྟ་བུས་སེམས་ཅན་ཡོངས་སུ་སྨིན་པར་བྱ་བར་མི་ནུས་པ་འདི་ཡང་རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་དེ་ལྟ་བུ་དང་ལྡན་པས་སེམས་ཅན་ཡོངས་སུ་སྨིན་པའོ། །ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་ཞེས་བྱ་བ་ཐེག་པ་ཆེན་པོའི་མདོ། །ལེའུ་གསུམ་པའོ།། །།