འཕགས་པ་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་ཞེས་བྱ་བ་ཐེག་པ་ཆེན་པོའི་མདོ་ལས། ལེའུ་ལྔ་པ།
དེ་ནས་བྱང་ཆུབ་སེམས་དཔའ་བློ་གྲོས་མཐའ་ཡས་པའི་ཚོགས་ཀྱི་རྒྱལ་པོས་བཅོམ་ལྡན་འདས་ཇི་ཙམ་དུ་ཁང་པ་བརྩེགས་པ་ན་མི་བཞུགས་པ་དེ་ཙམ་གྱིས་བཅོམ་ལྡན་འདས་ཀྱི་དོན་གྱི་སླད་དུ་ལྷ་རྫས་ཀྱི་གསེར་དང་། ལྷ་རྫས་ཀྱི་བཻ་དཱུཪྱ་སྔོན་པོའི་སྐས་མངོན་པར་སྤྲུལ་ཏེ། སྐས་དེ་
དག་གི་ངོས་གཉིས་ལ་བྲམ་ཟེའི་བྱིས་པ་ཚེ་ལོ་སུམ་ཅུ་པ་ལྟ་བུ་ཚངས་དབྱངས་དང་ལྡན་པ་གསེར་གྱི་དབྱིག་པ་དང་གདུགས་འཛིན་པ། ཚངས་པའི་སྤྱོད་ལམ་དང་ལྡན་པ་སྟོང་ཕྲག་བརྒྱད་ཅུ་རྩ་བཞི་མངོན་པར་སྤྲུལ་ཏོ། །དེ་ནས་བྲམ་ཟེའི་བྱིས་པ་དེ་དག་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཏེ་ཕྱག་འཚལ་ནས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཁྱོད་ནི་རབ་ཉོན་མོངས་ལ་སྔོན་ཐུགས་བསྐྱེད། །ཉོན་མོངས་ཐེག་ལ་བྱང་ཆུབ་ཕན་པའི་རྒྱུ། །ཉོན་མོངས་ཞི་ཕྱིར་རྒྱལ་བ་བསྙེན་ཀྱང་བཀུར། །ཉོན་མོངས་ཐབས་མཛད་རྒྱལ་བ་འདིར་གཤེགས་གསོལ། །ཉོན་མོངས་སྤྱོད་པ་ཐམས་ཅད་ཁྱོད་ཀྱིས་སྤངས། །སེམས་ཅན་ཉོན་མོངས་ལ་ནི་རྟག་ཏུ་གཉེན། ཁྱོད་ནི་ཉོན་མོངས་ལས་ལས་འགྲོ་བ་བཟློག །ཉོན་མོངས་རྒལ་བའི་རྒྱུས་ནི་རྟག་ཏུ་མྱོས། །ཉོན་མོངས་མ་རུངས་ཁྱོད་ཀྱིས་རབ་ཏུ་ཞི། །བདག་གི་བློས་ནི་ཉོན་མོངས་དྲ་བ་བཅད། །འགྲོ་བ་རྟག་ཏུ་ཉོན་མོངས་ཆུ་ལས་སྒྲོལ། །ཉོན་མོངས་སུན་འབྱིན་རྒྱལ་བ་འདིར་གཤེགས་གསོལ། །ཉོན་མོངས་ཞིང་དུ་བྱང་ཆུབ་དམ་པར་རེག །ཡེ་ཤེས་སྒྲོན་འཆང་འགྲོ་བ་ཤེས་ཉམས་པའི། །སེམས་ཅན་ཐམས་ཅད་ལ་ནི་ཐར་སྟོན་པ། །ཉོན་མོངས་སྙོན་སྨོངས་ཞི་ཕྱིར་འདིར་གཤེགས་གསོལ། །ཡེ་ཤེས་འོད་ཟེར་གྱིས་ནི་རྣམ་ཐར་སྟོན། ཁྱོད་ཐུགས་བརྩེ་བས་འགྲོ་བ་ཤེས་ཉམས་ཁྱབ། །ཡེ་ཤེས་ཀྱིས་ནི་འགྲོ་ལ་མིག་ལྡན་པས། །རྒྱལ་བ་ཡེ་ཤེས་ཉི་མ་འདིར་གཤེགས་གསོལ། །མཁྱེན་པས་ལྷ་དང་མི་མང་ཐར་བར་མཛད། །ཁྱོད་ཀྱི་ཡེ་ཤེས་སྲོག་དང་གང་ཟག་མེད། །ཐུབ་པ་ཡེ་ཤེས་དཔའ་བ་འདི་ལ་འཇུག །ཉོན་མོངས་པ་ལ་སྦྱིན་མཛོད་དྲན་པ་གསུངས། །ཉི་མ་ཟླ་བ་མཆོག་ཏུ་མཛེས་པའི་སྤྱན། །རྒྱལ་བ་སེམས་ཅན་ཐལ་མོ་སྦྱར་ལ་གསུངས། །ཐུབ་པ་བྱང་ཆུབ་མཆོག་ཕྱིར་བསྟན་དུ་གསོལ། །འཕགས་པ་ཐུབ་པ་འདི་ལ་འཇུག་པ་གསུངས། །རྒྱལ་བ་བྱང་ཆུབ་རྒྱུ་ཅན་མཛེས་གཟིགས་པ། །ཕྱོགས་བཞི་འདིར་ནི་ཡང་དག་ལྷགས་མང་ལ། །སྟོང་པ་ཉིད་དང་བཟོད་སྤྱོད་ཤེས་གྱུར་གསུངས། །རྒྱལ་བ་དཔའ་གཏོད་འདི་ལ་ཤིན་ཏུ་འདུག །
བྲམ་ཟེའི་བྱིས་པ་དེ་དག་གིས་བཅོམ་ལྡན་འདས་ཀྱི་ཡོན་ཏན་འདི་སྨྲས་མ་ཐག་ཏུ་བཅོམ་ལྡན་འདས་ཀྱིས་ལེགས་སོ་ཞེས་བྱ་བ་བྱིན་ཏེ། དེ་ནས་དྲང་སྲོང་ཐུབ་པ་གདན་དེ་ལས་བཞེངས་པ་དང་། དེ་ཉིད་ཀྱི་ཚེ་ན་ཐམས་ཅད་དང་ལྡན་པའི་སངས་རྒྱས་ཀྱི་ཞིང་ཆེན་པོ་འདི་ལན་དྲུག་ཏུ་གཡོས་སོ། །ལྷ་དང་ཀླུ་དང་། གནོད་སྦྱིན་དང་། ལྷ་མ་ཡིན་དང་། མི་འམ་ཅི་དང་། ལྟོ་འཕྱེ་ཆེན་པོ་དུ་མས་ཀྱང་མི་མཇེད་ཀྱི་སངས་རྒྱས་ཀྱི་ཞིང་མ་ལུས་པར་ལྷ་རྫས་ཀྱི་མེ་ཏོག་གི་ཆར་མངོན་པར་ཕབ་བོ། །ལྷ་རྫས་ཀྱི་ཨ་ག་རུ་དང་། ཏ་ག་ར་དང་། དུས་དང་འཐུན་པའི་ཙན་དན་གྱི་ཆར་མངོན་པར་ཕབ་བོ། །ལྷ་རྫས་ཀྱི་གོས་དང་། རྒྱན་དང་ཡིད་བཞིན་གྱི་གོས་དང་། ནོར་བུ་དང་། མུ་ཏིག་གི་སེ་མོ་དོ་དང་རིན་པོ་ཆེའི་ཆར་མངོན་པར་ཕབ་བོ། །ལྷ་རྫས་ཀྱི་རོལ་མོ་རྡུང་བ་མངོན་པར་དཀྲོལ་ཏོ། །དབྱངས་ཀྱིས་ལྷུང་ལྷུང་ལྡེགས་ཀྱི་སྒྲ་ཕྱུང་ནས་འདི་སྐད་ཅེས་གསོལ་ཏོ། །བདག་ཅག་སྔོན་མ་བསྟན་པའི་ཆོས་མཉན་པར་བགྱིའོ། །བདུད་ཀྱི་ཡུལ་ལས་ཡང་དག་པར་ཤིན་དུ་འདའ་བར་བགྱིའོ། །ཉོན་མོངས་པའི་ཡུལ་གཞོམ་པར་བགྱིའོ། །ཡེ་ཤེས་ཀྱི་ཡུལ་ཁོང་དུ་ཆུད་པར་བགྱིའོ། །ཟབ་མོ་སྟོང་པ་ཉིད་ཀྱི་ལམ་ཁོང་དུ་ཆུད་པར་བགྱིའོ་ཞེས་གསོལ་པ་དང་། དེ་ནས་བཅོམ་ལྡན་འདས་ཁང་པ་བརྩེགས་པ་དེ་དག་ལ་འཛེགས་ཏེ། སེང་གེའི་ཁྲི་བཤམས་པ་དེ་ཉིད་ལ་བཞུགས་ནས་མི་མཇེད་ཀྱི་སངས་རྒྱས་ཀྱི་ཞིང་ཐམས་ཅད་དང་ལྡན་པ་ས་དང་ནམ་མཁའ་ཁྱབ་པའི་འཁོར་ཀུན་ཅང་མི་སྨྲ་བར་གྱུར་ནས་ཐལ་མོ་སྦྱར་ཏེ་སེམས་རྩེ་གཅིག་ཏུ་དྲང་སྲོང་ཐུབ་པ་ལ་ལྟ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་སངས་རྒྱས་ཀྱི་ཞིང་ཐམས་ཅད་དང་ལྡན་པ་མ་ལུས་པར་ས་དང་ནམ་མཁའ་ཁྱབ་པའི་འཁོར་ལ་རྣམ་པར་གཟིགས་ནས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སེམས་ཅན་ཇི་སྙེད་འདིར་ནི་ཀུན་ལྷགས་པ། །བྱང་ཆུབ་འདོད་རྣམས་ཡོངས་སུ་ཆོས་ཚོལ་ན། །བྱང་ཆུབ་མཆོག་གི་སྤྱོད་པ་རབ་བསྟན་གྱིས། །དེ་དག་ཐམས་ཅད་རྩེ་གཅིག་སེམས་སུ་ཉོན། །སེམས་ཅན་ལ་ལ་གཏི་མུག་སྲེད་པས་བསྒྲིབས། །ཕུང་པོ་དག་ལའང་ལྟ་བ་རྣམ་མི་སྤོང་། །གང་དག་ད་དུང་བྱང་ཆུབ་མཆོག་སྤྱོད་བརྩོན། །ཡང་
ཡང་འདི་ལ་ཡོན་ཏན་ཅུང་ཟད་སྤྱོད། །དབང་པོ་དྲུག་ལ་སྟོང་པ་མི་ལྟ་སྟེ། །མཚན་མ་མེད་པའི་འཛིན་པ་བདག་ལ་ཟུང་། །བྱང་ཆུབ་ཕྱིར་ནི་ཅུང་ཟད་བརྩོན་སྤྱོད་ཀྱི། །ཤེས་རབ་ཡོན་ཏན་ཐམས་ཅད་སྤྱོད་པ་མེད། །ཇི་ལྟར་མེ་འདོད་ཁྱིམ་གྱི་ནང་དུ་ནི། །བཙལ་བས་ཀྱང་ནི་མེ་དག་རྙེད་མ་གྱུར། །དེ་ལྟར་སེམས་ཅན་ལ་ལ་བྱང་ཆུབ་འདོད། །སྟོང་མ་བསྒོམས་པར་ཤེས་རབ་ཐོབ་པ་མེད། །དེ་བས་གང་དག་བྱང་ཆུབ་སྡུག་འདོད་པ། །ཕུང་པོ་ཁམས་དང་སྐྱེ་མཆེད་མཚན་མ་དག །རྨི་ལམ་སྨིག་རྒྱུ་ལྟ་བུར་ཐམས་ཅད་ལྟོས། །འདི་ནི་བྱང་ཆུབ་དམ་པ་མཆོག་གི་ལམ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་བཟང་སྐྱོང་ལ་བཀའ་སྩལ་པ། རིགས་ཀྱི་བུ་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་འདི་ལ་གནས་པའི་བྱང་ཆུབ་སེམས་དཔའ་བདུད་ཀྱི་ཡུལ་ཐམས་ཅད་ལས་ཡང་དག་པར་ཤིན་ཏུ་འདས་ཏེ་ང་ཡིར་བྱ་བ་དང་། བདག་གིར་བྱ་བ་ཐམས་ཅད་ཀྱི་སྲིད་པའི་བག་ལ་ཉལ་བ་དང་། མཚན་མ་མེད་པ་དང་། མ་རིག་པར་ལྟ་བ་ཐམས་ཅད་སྤངས་པར་འགྱུར་རོ། །འཇིག་རྟེན་གྱི་ཁམས་ཐམས་ཅད་འདྲེས་པ་མེད་པ་དང་། སེམས་ཅན་གྱི་གོ་ཆ་དང་། སེམས་སྒྱུ་མ་ལྟ་བུ་དང་། ཚོར་བ་དུ་བ་དང་། རྡུལ་དང་། ནམ་མཁའ་དང་། སྤྲིན་ལྟ་བུར་རབ་ཏུ་ཤེས་སོ། །མཚན་མ་དང་མཚན་ཉིད་ཐམས་ཅད་ནམ་མཁའ་སྤྲོས་པ་ལྟ་བུར་རབ་ཏུ་ཤེས་སོ། །དགེ་བའི་རྩ་བ་ཐམས་ཅད་ལས་འདས་པར་འགྱུར་རོ། །ལས་ཡོངས་སུ་ཟད་ཅིང་སེམས་ཅན་ཉེ་བར་འཚོ་བར་ཡང་འགྱུར་རོ། །དགེ་བའི་རྩ་བ་བསྐྱེད་པ་དང་མ་བསྐྱེད་པའི་གཉེན་ལྟ་བུར་འགྱུར་རོ། །སངས་རྒྱས་ཀྱི་ཆོས་ཐམས་ཅད་ལ་སྒྲིབ་པ་མེད་པ་སྟོན་པར་འགྱུར་རོ། །ཕ་རོལ་གྱི་རྒོལ་བ་ཐམས་ཅད་ནམ་མཁའ་དང་མཚུངས་པར་ཐལ་བ་མེད་པར་འགྱུར་རོ། །སངས་རྒྱས་ཀྱི་ཆོས་ཐམས་ཅད་ཡོངས་སུ་རྒྱས་པ་སེང་གེ་ལྟ་བུ་དང་། རྒྱ་མཚོ་ཆེན་པོ་ལྟ་བུ་ཆོས་ཆེན་པོའི་ཆར་གྱི་ཆུ་བོ་རབ་ཏུ་གཏོང་བ་དང་། འཁྲུལ་བ་མེད་པའི་མངོན་པར་ཤེས་པ་དང་། ཆགས་པ་མེད་པའི་སྤོབས་པ་དང་ལྡན་པ་དང་། བསྟོད་པ་དང་རབ་ཏུ་བསྔགས་པར་འགྱུར་རོ། །རིགས་ཀྱི་བུ་བཟོད་པ་འདི་བསྒོམས་པ་ནས་ལུས་དཔང་དུ་བཙུགས་པའི་བར་
དུ་འདི་ལས་སངས་རྒྱས་ཀྱི་ཡོན་ཏན་བསམ་གྱིས་མི་ཁྱབ་པར་འགྱུར་རོ། །རིགས་ཀྱི་བུ་དེ་ལ་བཟོད་པ་འདི་རྣམ་པ་གཉིས་ཏེ། ཡང་དག་པར་སྤྱོད་པའི་ཚུལ་གྱི་བཟོད་པ་དང་། ནམ་མཁའི་མདོག་གིས་འདུལ་བའི་བཟོད་པར་འགྱུར་རོ། །རིགས་ཀྱི་བུ་དེ་ལ་ཡང་དག་པར་སྤྱོད་པའི་ཚུལ་གྱི་བཟོད་པ་གང་ཞེ་ན། རྣམ་པ་ལྔ་སྟེ། རིགས་ཀྱི་བུ་ཡང་དག་པར་སྤྱོད་པའི་ཚུལ་གྱི་བཟོད་པ་རྣམ་པ་ལྔ་གང་ཞེ་ན། འདི་ལྟ་སྟེ། གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཞེས་བྱའོ། །རིགས་ཀྱི་བུ་དེ་ལ་གཟུགས་ཀྱི་ཕུང་པོ་གང་ཞེ་ན། རིགས་ཀྱི་བུ་རྣམ་པ་བརྒྱད་དེ། བྱང་ཆུབ་སེམས་དཔས་ཚུལ་བཞིན་ཡིད་ལ་བྱེད་པ་བརྟགས་པའི་བཟོད་པ་བསྒོམ་པར་བྱའོ། །རིགས་ཀྱི་བུ་བརྒྱད་གང་ཞེ་ན། གཟུགས་ཞེས་བྱ་བ་ནི་འབྱུང་བ་ཆེན་པོ་བཞིའོ། །གཟུགས་ཞེས་བྱ་བ་ནི་ནད་དོ། །འདོད་ཆགས་ཞེས་བྱ་བ་ནི་རྣམ་པར་འཇིག་པའི་ཆོས་ཀྱི་མཚན་ཉིད་དོ། །གང་རྣམ་པར་འཇིག་པའི་རང་བཞིན་དེ་ནི་མི་རྟག་པའོ། །དེའི་རང་བཞིན་ནི་དངོས་པོ་མེད་པའི་སྟོང་པ་ཉིད་ཡོངས་སུ་ཆད་པའོ། །ཕྱི་དང་ནང་གི་རབ་འབྲིང་ཐ་མའི་ཉོན་མོངས་པའི་རྒྱུན་བཅད་པའོ། །ནམ་མཁའ་ཇི་ལྟར་ཐམས་ཅད་དང་ལྡན་པ་དེ་བཞིན་དུ་མི་རྟག་པ་དང་། སྡུག་བསྔལ་བ་དང་། བདག་མེད་པ་དང་། སྟོང་པའི་མཚན་ཉིད་དང་ལྡན་པའི་བཟོད་པ་སྒོམ་པར་བྱེད་དོ། །འདི་ནི་བྱང་ཆུབ་སེམས་དཔའི་སེམས་ཅན་ཡོངས་སུ་སྨིན་པ་ཉེ་བར་འཚོ་བའི་བཟོད་པར་བལྟ་བར་བྱའོ། །རིགས་ཀྱི་བུ་གཞན་ཡང་གཟུགས་དེ་ཡང་འབྱུང་བ་ཆེན་པོ་བཞི་སྟེ། རིགས་ཀྱི་བུ་འབྱུང་བ་ཆེན་པོ་བཞི་པོ་འདི་དག་ནང་གི་འམ། ཕྱི་རོལ་གྱིའམ། ཆེ་བའམ། ཕྲ་བའམ། དམའ་བའམ། བདེ་བའམ། གལ་ཏེ་རིང་བའམ། གལ་ཏེ་ཉེ་བ་དེ་དག་ཐམས་ཅད་མི་འགྲོ། རྣམ་པར་མི་འགྲོ། མི་སྐྱེ། མི་འབྱུང་བདག་མེད་བདག་གི་མེད་པར་བརྟག་པར་བྱའོ། །ཟད་པའི་ཚུལ་དང་། ཞི་གནས་ཀྱི་མཚན་ཉིད་ཀྱི་ཚུལ་དང་། རྟོག་པ་མེད་པ་དང་། སྨོན་པ་མེད་པའི་ཚུལ་དང་། འབྱུང་བ་མེད་ཅིང་མཚན་མ་མེད་པའི་ཚུལ་གྱིས་བརྟག་པར་བྱའོ། །ཇི་ལྟར་རྡུལ་ཤིན་ཏུ་ཕྲ་བ་ཀུན་འབྱུང་བ་དང་། ལུས་ཀུན་འབྱུང་
བའི་ཕྱིར་ནང་གི་སའི་ཁམས་སྲ་བར་བརྟག་པར་བྱའོ། །ཤིན་ཏུ་ཕྲ་བའི་རྡུལ་གཅིག་པོ་དེ་ལ་ཇི་ལྟར་ལྷག་མཐོང་ཕྲ་མོས་བརྟག །རྡུལ་ཕྲ་མོ་གཅིག་པོ་དེ་ལ་ཇི་ལྟར་མཚན་ཉིད་མེད་པའི་ཉོན་མོངས་པ་ཐམས་ཅད་ཀྱི་སྤྱོད་ལམ་དུ་གྱུར་པར་རབ་ཏུ་ཤེས། བདག་མེད་པ་དང་། རྣམ་པ་དང་བྲལ་བར་རབ་ཏུ་ཤེས། དངོས་པོ་མེད་པ་དང་། ཚིག་གི་ལམ་དང་བྲལ་བ་དང་། དམིགས་པ་མེད་པ་དང་། སྒྲ་དབྱངས་ཐམས་ཅད་དང་བྲལ་བར་རབ་ཏུ་ཤེས། བདག་མེད་པ་དང་བྲལ་བ་དང་། བདུད་ཀྱི་མཚན་ཉིད་རབ་ཏུ་ཤེས།ཡི་གེ་མེད་པ་དང་། རྒྱུ་དང་རྐྱེན་དང་བྲལ་བར་རབ་ཏུ་ཤེས། དངོས་པོ་མེད་པ་དང་། རྒྱུ་དང་རྐྱེན་དང་བྲལ་བར་རབ་ཏུ་ཤེས། མཚན་མ་མེད་པ་ལས་རྡུལ་ཤིན་ཏུ་ཕྲ་བར་རབ་ཏུ་ཤེས། ཇི་ལྟར་འདུ་བྱེད་ཐམས་ཅད་རབ་ཏུ་ཞི་བ་ལ་རྣམ་པ་བརྒྱད་པོ་དེ་དག་གིས་རྡུལ་ཤིན་ཏུ་ཕྲ་མོ་གཅིག་ཏུ་བརྟག་གོ །དེ་བཞིན་དུ་གཉིས་པ་དང་། དེ་བཞིན་དུ་གསུམ་པ་ནས་ནང་གི་ལུས་ཐམས་ཅད་ཀྱི་བར་དུ་གཅིག་ལ་ཡང་སོ་སོར་རྣམ་པ་བརྒྱད་པོ་འདི་དག་གིས་རྡུལ་ཤིན་ཏུ་ཕྲ་མོ་གཅིག་ཏུ་བརྟག་གོ །ནང་གི་ལུས་ཇི་ལྟ་བ་དེ་བཞིན་དུ་ཕྱི་རོལ་གྱི་ལུས་ཀྱི་སའི་ཁམས་ཀྱང་རྣམ་པ་བརྒྱད་པོ་འདི་དག་གིས་སོ་སོར་རྡུལ་ཤིན་ཏུ་ཕྲ་བར་བརྟག་གོ །མཚན་ཉིད་མེད་པ་ནས་མཚན་མ་མེད་པའི་བར་དུ་སའི་ཁམས་ཐམས་ཅད་ནང་གིའམ། ཕྱི་རོལ་གྱི་འམ། ཆེ་བའམ་ཕྲ་བའམ། དམའ་བའམ། བདེ་བའམ། གང་རིང་བའམ། གང་ཉེ་བ་དེ་དག་ཐམས་ཅད་ཟད་པའི་ཆོས་སུ་ཡང་དག་པར་རྗེས་སུ་མཐོང་ངོ་། །གང་ཟད་པ་འདི་ནི་མི་རྟག་པའོ། །གང་མི་རྟག་པ་འདི་ཡང་སྡུག་བསྔལ་བའོ། །གང་མི་འབྱུང་བ་དེ་བདག་མེད་པའོ། །གང་འདུ་བྱེད་ཐམས་ཅད་ཀྱི་ཚིག་གི་ལམ་དང་ཕྲལ་བ་དེ་ཡང་སྟོང་པ་སྟེ། ཇི་ལྟར་ཕྱི་དང་ནང་གི་སའི་ཁམས་ཇི་ལྟ་བ་བཞིན་དུ་སྟོང་པར་རབ་ཏུ་ཤེས་པ་དེ་ལྟར་རབ་འབྲིང་དང་ཐ་མའི་ཉོན་མོངས་པ་ཉེ་བར་ཞི་བར་འགྱུར་རོ། །ནམ་མཁའ་ཇི་ལྟར་འདུ་ཤེས་མེད་ཅིང་ཚོར་བ་མེད་པ་དེ་བཞིན་དུ་སའི་ཁམས་ཀྱང་འདུ་ཤེས་མེད་ཅིང་ཚོར་བ་མེད་པ་དང་། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པའི་མཚན་ཉིད་དང་ལྡན་པའི་བཟོད་
པ་སྒོམ་པར་བྱེད་པ་འདི་ཡང་བྱང་ཆུབ་སེམས་དཔའི་སེམས་ཅན་ཐམས་ཅད་ཡོངས་སུ་སྨིན་པ་ཉེ་བར་འཚོ་བའི་བཟོད་པར་བལྟ་བར་བྱའོ། །རིགས་ཀྱི་བུ་གཞན་ཡང་ལུས་འདི་ལ་གཤེར་བའི་མཚན་ཉིད་ནི་ཆུ་སྟེ། ཆུའི་མཚན་ཉིད་ཕྲན་ཚེགས་སུ་ན་སྐྲའི་རྩེ་མོའི་ཆ་ཤས་ཙམ་དུ་ནང་གི་ལུས་ཆུའི་ཁམས་ཐམས་ཅད་སོ་སོར་ཐིགས་པ་ཙམ་དུ་ལྷག་མཐོང་གི་ཚུལ་གྱིས་བརྟག་གོ །ཆེ་བའམ།ཕྲ་བའམ། དམའ་བའམ། བདེ་བའི་མཚན་ཉིད་མེད་པ་ཉོན་མོངས་པ་ཐམས་ཅད་དང་བྲལ་བ་ཇི་ལྟ་བ་བཞིན་དུ་རབ་ཏུ་ཤེས་པ་ནས་མཚན་མ་མེད་པའི་བར་དུ་དེ་དག་ཐིགས་པ་ཙམ་དུ་འདུ་བྱེད་ཐམས་ཅད་ཉེ་བར་ཞི་བར་རབ་ཏུ་ཤེས་པ་ཇི་ལྟ་བུར་ཐིགས་པ་གཅིག་ལ་རྣམ་པ་བརྒྱད་པོ་དེ་དག་གིས་ཇི་ལྟ་བ་བཞིན་དུ་བརྟག་གོ །དེ་བཞིན་དུ་གཉིས་པ་དང་། དེ་བཞིན་དུ་གསུམ་པ་ནས་ནང་གི་ལུས་ཀྱི་ཆུའི་ཁམས་ཐམས་ཅད་རྣམ་པ་བརྒྱད་པོ་དེ་དག་གིས་སོ་སོ་རེ་རེ་ལ་ཐིགས་པ་ཕྲ་བ་ཇི་ལྟ་བ་བཞིན་དུ་བརྟག་གོ །མཚན་ཉིད་མེད་པ་ནས་མཚན་མ་མེད་པའི་བར་དུ་ནང་གི་ཆུའི་ཁམས་ཇི་ལྟ་བ་དེ་བཞིན་དུ་ཕྱི་རོལ་གྱི་ཆུའི་ཁམས་ཆེ་བའམ། ཕྲ་བའམ། དམའ་བའམ། བདེ་བའམ། གང་རིང་བའམ། གང་ཉེ་བ་དེ་དག་ཐམས་ཅད་ཟད་པའི་ཆོས་སུ་ཡང་དག་པར་རྗེས་སུ་མཐོང་ངོ་། །གང་ཟད་པའི་ཆོས་དེའང་མི་རྟག་པའོ། །དེའང་རྟོག་པ་མེད་པའོ། །གང་རྟོག་པ་མེད་པ་དེའང་སྡུག་བསྔལ་བའོ། །གང་འབྱུང་བ་མེད་པ་དེའང་བདག་མེད་པའོ། །གང་འདུ་བྱེད་ཐམས་ཅད་ཀྱི་ཚིག་གི་ལམ་དང་བྲལ་བ་དེའང་སྟོང་པ་སྟེ། ཇི་ལྟར་ནང་དང་ཕྱི་རོལ་གྱི་ཆུའི་ཁམས་ཇི་ལྟ་བ་བཞིན་དུ་སྟོང་པར་ཤེས་པ་དེ་ལྟར་རབ་འབྲིང་དང་ཐ་མའི་ཉོན་མོངས་པ་ཞི་བར་འགྱུར་རོ། །ནམ་མཁའ་ཇི་ལྟར་གནས་མེད་ཅིང་སྤྲོས་པ་མེད་པ་དེ་བཞིན་དུ་ཕྱི་དང་ནང་གི་ཆུའི་ཁམས་ཀྱང་སྤྲོས་པ་མེད་ཅིང་གནས་མེད་པ་དང་། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པའི་མཚན་ཉིད་དང་ལྡན་པའི་བཟོད་པ་སྒོམ་པར་བྱེད་པ་འདི་ཡང་བྱང་ཆུབ་སེམས་དཔའི་སེམས་ཅན་ཡོངས་སུ་སྨིན་པ་ཉེ་བར་འཚོ་བ་སྟེ། སའི་ཁམས་དང་། ཆུའི་ཁམས་ཇི་ལྟ་བ་དེ་བཞིན་དུ་མེའི་ཁམས་དང་། རླུང་གི་ཁམས་རྒྱ་ཆེན་པོས་བྱའོ། །
རིགས་ཀྱི་བུ་གཞན་ཡང་འབྱུང་བ་ཆེན་པོ་བཞི་ལས་གཟུགས་ནི་ཐེ་ཙོམ་ཅན་གྱི་རྒྱུ་ལྟ་བུ་སྟེ། །ནང་གིའམ། ཕྱི་རོལ་གྱིའམ། ཆེ་བའམ། ཕྲ་བའམ། དམའ་བའམ། བདེ་བའམ། གང་རིང་བའམ། གང་ཉེ་བ་དེ་དག་ཐམས་ཅད་དངོས་པོ་མེད་ཅིང་གཟུགས་བརྙན་ལྟ་བུ་དང་། དྲུག་གི་སྐྱེ་མཆེད་དབང་དུ་གྱུར་པ། སའི་ཁམས་ནས་རྣམ་པར་ཤེས་པའི་རྒྱུའི་བར་དུའོ། །གང་སྐད་ཅིག་སྐད་ཅིག་ཏུ་འབྱུང་བ་ཟད་པའི་ཆོས་ཉིད་དབང་པོ་དེ་ལ་ཟད་པ་དང་། འགོག་པ་དེ་ནི་འབྱུང་བ་ཟད་པ་ཉིད་དུ་བརྟག་གོ །དངོས་པོ་མེད་པ་དང་། བདག་མེད་པར་དམིགས་པ། ཚིག་གི་ལམ་མེད་པ་དང་། རྣམ་པར་མི་འགྲོ་བ་དང་། མ་སྐྱེས་པ་དང་། མ་བྱུང་བ་དང་། བདག་མེད་པ། བདག་གི་མེད་པ་དང་། ཞི་གནས་ཀྱི་མཚན་ཉིད་ཀྱི་ཚུལ་དང་། རྟོག་པ་མེད་ཅིང་སྨོན་པ་མེད་པའི་ཚུལ་དང་། མཚན་མ་མེད་པའི་ཚུལ་དང་། ལྷག་མཐོང་གི་ཚུལ་གྱིས་བརྟག་པར་བྱའོ། །མཚན་ཉིད་མེད་པ་དང་། ཉོན་མོངས་པ་ཐམས་ཅད་དང་བྲལ་བ་དང་། རྣམ་པ་དང་བྲལ་བ་དང་། བདག་མེད་པ་དང་། ཡིད་ཀྱི་འདུ་བྱེད་དང་བྲལ་བ་དང་། ཡི་གེ་མེད་པ་དང་། རྒྱུ་དང་རྐྱེན་དང་བྲལ་བར་རབ་ཏུ་ཤེས་སོ། །དངོས་པོ་མེད་པ་ཤིན་ཏུ་སྐད་ཅིག་མ་དང་བྲལ་བར་རབ་ཏུ་ཤེས་སོ། །འདུ་བྱེད་ཐམས་ཅད་མཚན་མ་མེད་པ་དང་། ཡུན་རྒྱུན་ཆད་པ་མེད་པར་རབ་ཏུ་ཤེས་སོ། །འདུ་བྱེད་ཐམས་ཅད་གནས་མེད་ཅིང་ཉེ་བར་ཞི་བར་རབ་ཏུ་ཤེས་སོ། །རྣམ་པ་འདི་དག་གིས་གཟུགས་དངོས་པོ་མེད་པ་ལྦུ་བའི་ཕུང་པོ་ལྟར་བརྟག་གོ །མཚན་ཉིད་མེད་པ་ནས་མཚན་མ་མེད་པའི་བར་དུ་དེ་དག་ཐམས་ཅད་ཟད་པའི་ཆོས་སུ་ཡང་དག་པར་རྗེས་སུ་མཐོང་ངོ་། །གང་ཟད་པའི་ཆོས་དེ་མི་རྟག་པའོ། །གང་མི་རྟག་པ་དེ་ནི་རྟོག་པ་མེད་པའོ། །གང་རྟོག་པ་མེད་པ་དེ་ཡང་སྡུག་བསྔལ་བའོ། །གང་འབྱུང་བ་མེད་པ་དེའང་བདག་མེད་པའོ། །གང་འདུ་བྱེད་ཐམས་ཅད་ཀྱི་ལམ་དང་བྲལ་བ་དེ་ཡང་སྟོང་པའོ། །གང་ནང་དང་ཕྱི་རོལ་གྱི་གཟུགས་དེ་དག་ལྦུ་བའི་ཕུང་པོ་ལྟ་བུ་དངོས་པོ་མེད་ཅིང་གཟུགས་བརྙན་ལྟ་བུར་སྟོང་པ་ཇི་ལྟ་བ་བཞིན་དུ་རབ་ཏུ་ཤེས་པ་དེ་ལྟར་རབ་འབྲིང་དང་ཐ་མའི་ཉོན་མོངས་པ་ཉེ་བར་ཞི་བར་འགྱུར་རོ། །ནམ་མཁའ་
ཇི་ལྟར་དམིགས་པ་མེད་ཅིང་འདུས་བྱས་པ་མེད་པ་དེ་བཞིན་དུ་གཟུགས་ཀྱང་ལྦུ་བ་ལྟ་བུར་འདུ་ཤེས་པ་མེད་ཅིང་འགྱུར་བ་མེད་པ་དང་། ཚོར་བ་མེད་པ་དང་། མི་རྟག་པ་དང་། སྡུག་བསྔལ་བ་དང་། བདག་མེད་པ་དང་། སྟོང་པའི་མཚན་ཉིད་དང་བྲལ་བའི་བཟོད་པ་སྒོམ་པར་བྱེད་པ་འདི་དང་། བྱང་ཆུབ་སེམས་དཔའི་སེམས་ཅན་ཡོངས་སུ་སྨིན་པ་ཉེ་བར་འཚོ་བའི་བཟོད་པ་བལྟ་བར་བྱའོ། །རིགས་ཀྱི་བུ་གཞན་ཡང་གཟུགས་ནི་ཕྱི་རོལ་དང་ནང་གི་ནས་གང་ཉེ་བའི་བར་དུ་རང་བཞིན་གྱིས་གཟུགས་བརྙན་ལྟ་བུའི་རྒྱུ་འདྲ་བ་མངོན་པར་མི་འགྱུར་བ་དང་། སྒྱུ་མ་ལྟ་བུ་དང་། ལུས་མངོན་པའི་མཚན་ཉིད་དུ་བརྟག་གོ །གཟུགས་ནི་ཅི་ལའང་ཆགས་པ་མེད། སྙེམས་པའང་མེད། བླང་བ་དང་དོར་བ་མེད་པར་ཤེས་ཏེ། གཟུགས་ནི་གཉིས་སུ་མེད་དོ། །ཆོས་ཐམས་ཅད་ཆོས་ཀྱི་དབྱིངས་ལ་ཡང་དག་པར་གཞོལ་བར་ཤེས་པས་འབྱུང་བ་ཆེན་པོ་བཞིའི་གཟུགས་ཐམས་ཅད་ཅུང་ཟད་ཀྱང་དབྱེར་མེད་དོ། །ཚིག་གི་ལམ་ཐམས་ཅད་གནས་མེད་པར་ཡང་དག་པར་ཤེས་སོ། །གཟུགས་ནི་གཞན་དུ་སོང་བའང་མེད་ཅིང་ཡུལ་མེད་པ་དང་། གློ་བུར་གྱི་སྡུག་བསྔལ་བ་དང་། རྒྱུན་བཅད་པ་དང་རྒྱུན་མ་བཅད་པའི་མདུད་པ་གཉིས་དང་བྲལ་བ་དང་། གཟུགས་བརྙན་ལྟ་བུ་དང་། གནས་མེད་པར་བརྟག་གོ །གཟུགས་ཐམས་ཅད་ཀྱི་མཚན་ཉིད་ནི་ལྦུ་བའི་ཕུང་པོ་ལྟ་བུར་དམིགས་པ་མེད་པ་དང་། ཀུན་འབྱུང་བ་མེད་པ་དང་། ཤིན་ཏུ་རང་བཞིན་མེད་པར་བརྟག་གོ །འབྱུང་བ་ཆེན་པོ་བཞི་རྣམས་ནི་རྣམ་པར་དག་པ། རྣམ་པར་མི་རྟོག་པ། མི་འབྱུང་བ། མངོན་པར་མི་སྒྲུབ་པ། ཆོས་ཐམས་ཅད་སྤྲོས་པའི་རྒྱུན་བཅད་པ་ཐམས་ཅད་དུ་ཞུགས་པ་མེད་པར་བརྟག་གོ །འབྱུང་བ་ཆེན་པོ་བཞིའི་གཟུགས་ཀྱི་ཕུང་པོའི་མཚན་ཉིད་ནི་སྙེམས་པ་མེད་པ་དང་། གཏོང་བ་མེད་པ་དང་། མུན་པ་མེད་པ་དང་། སྣང་བ་མེད་པ་དང་། ཡིད་ལ་མི་བྱེད་པ་དང་། གཉིས་སུ་མེད་པ་དང་། སོགས་པ་མེད་པ་དང་། སྤྲོས་པ་མེད་པ་དང་། གཟུགས་བརྙན་ལྟ་བུ་དབྱེར་མེད་པ་དང་། དངོས་པོ་མེད་པར་བརྟག་གོ །གཟུགས་འབྱུང་བ་ཆེན་པོ་བཞི་ནི་ཤིན་ཏུ་རྣམ་པར་མི་རྟོག་པ་དང་། ཟད་པ་དང་ལྦུ་བ་ལྟ་བུར་བལྟའོ། །
རྣམ་པ་འདི་དག་གིས་གཟུགས་ལ་དངོས་པོ་མེད་པར་གཟུགས་བརྙན་ལྟ་བུར་རྟོག་གོ །མཚན་ཉིད་མེད་པ་ནས་མཚན་མ་མེད་པའི་བར་དུ་འདུ་བྱེད་ཐམས་ཅད་ཟད་པའི་ཆོས་སུ་ཡང་དག་པར་རྗེས་སུ་མཐོང་ངོ་། །གང་ཟད་པའི་ཆོས་དེ་མི་རྟག་པའོ། །གང་མི་རྟག་པ་དེ་རྟོག་པ་མེད་པའོ། །གང་རྟོག་པ་མེད་པ་དེ་སྡུག་བསྔལ་བའོ། །གང་འབྱུང་བ་མེད་པ་དེའང་བདག་མེད་པའོ། །གང་འདུ་བྱེད་ཐམས་ཅད་ཀྱི་ཚིག་གི་ལམ་དང་བྲལ་བ་དེ་ཡང་སྟོང་པ་སྟེ། ཇི་ལྟར་ཕྱི་དང་ནང་གི་གཟུགས་ལྦུ་བ་འདྲ་བ་སྟོང་པ་ཇི་ལྟ་བ་བཞིན་དུ་རབ་ཏུ་ཤེས་པ་དེ་ལྟར་རབ་འབྲིང་དང་ཐ་མའི་ཉོན་མོངས་པའང་ཉེ་བར་ཞི་བར་འགྱུར་རོ། །ནམ་མཁའ་ཇི་ལྟར་ཟད་པ་མེད་ཅིང་གཟུགས་མེད་པ་དང་བསྟན་དུ་མེད་པ་དེ་བཞིན་དུ་ཟད་པ་མེད་ཅིང་མཚན་ཉིད་མེད་པ་དང་། གཟུགས་མེད་པ་དང་། བསྟན་དུ་མེད་པ་དང་། ལྦུ་བ་ལྟ་བུར་མི་རྟག་པ་དང་། སྡུག་བསྔལ་བ་དང་། བདག་མེད་པ་དང་། སྟོང་པའི་མཚན་ཉིད་ལ་དམིགས་པའི་མཚན་ཉིད་དང་བྲལ་བའི་བཟོད་པ་སྒོམ་པར་བྱེད་པ་འདི་ཡང་བྱང་ཆུབ་སེམས་དཔའི་སེམས་ཅན་ཡོངས་སུ་སྨིན་པ་ཉེ་བར་འཚོ་བར་བལྟའོ། །རིགས་ཀྱི་བུ་གཞན་ཡང་གཟུགས་འབྱུང་བ་ཆེན་པོ་བཞིའི་མཚན་ཉིད་ནང་གི་ནས་ཉེ་བའི་བར་དུ་གང་སྨྲས་པ་དེའི་གཟུགས་ཀྱི་མཚན་ཉིད་ནི་མིག་ཡོར་ལྟ་བུ་དང་། གྲིབ་མ་ལྟ་བུ་དང་། ལྦུ་བ་ལྟ་བུ་གནས་མེད་པ་དང་། ནམ་མཁའ་ལྟ་བུ་ཆགས་པ་མེད་པ་དང་། བརྗོད་དུ་མེད་པ་དང་། སོགས་པ་མེད་པ་ནས་ཁམས་གསུམ་གྱི་འཁོར་བ་བདག་མེད་པ་ལྟ་བུ་དང་། དུས་གསུམ་གྱི་མཚན་ཉིད་ཐོབ་པ་དང་། དམིགས་པ་མེད་པ་དང་། ཡི་གེ་མེད་པ་དང་། གཉིས་སུ་མེད་པའི་མཐའ་དང་། རྟག་པའི་མཐའ་དང་། ཀུན་དུ་བཟུང་བའི་མཐའ་དང་། ཟད་པ་མེད་པར་སྤྱོད་པའི་མཐའ་དང་། ཉོན་མོངས་པ་མེད་པའི་མཐའ་དང་། །ཡུལ་མེད་པའི་མཐའ་དང་།རབ་ཏུ་རྒྱུ་བ་མེད་པའི་མཐའ་དང་། །སྨྲ་བ་མེད་པའི་མཐའ་དང་། གཟུགས་བརྙན་ལྟ་བུར་གཟུགས་དེའི་མཚན་ཉིད་དུ་རབ་ཏུ་ཤེས་སོ། །འདོད་པའི་ཁམས་དང་གཟུགས་ཀྱི་ཁམས་དེ་གཉིས་ཀྱི་གཟུགས་ཀྱི་སྣང་བ་ནམ་མཁའ་ལྟ་བུར་བརྟག་གོ །མིག་ཡོར་གྱི་མཚན་ཉིད་ནམ་མཁའ་ལྟ་བུར་དངོས་པོར་དམིགས་པ་མེད་པ་སྟེ། ནམ་
མཁའ་ཇི་ལྟ་བུར་གཟུང་དུ་མེད་ཅིང་ཀུན་ནས་ལྡང་བ་མེད་པ་དང་། དངོས་པོ་མེད་པ་དེ་ལྟར་དེ་བཞིན་དུ་གཟུགས་ཀྱི་མཚན་ཉིད་ཀྱང་མིག་ཡོར་ལྟ་བུ་དང་། ཚུ་རོལ་དང་ཕ་རོལ་བྲལ་བའི་གནས་མེད་པའོ། །གཟུགས་ཀྱི་མཚན་ཉིད་ནི་མཉམ་པའི་མཚན་ཉིད་དང་། །སྒྲ་བརྙན་ལྟ་བུ་དང་། ལྦུ་བའི་ཕུང་པོ་ལྟ་བུ་དང་། ཆོས་ཀྱི་དབྱིངས་དང་། ནམ་མཁའི་ཁམས་ཀྱི་གཟུགས་ཀྱི་སྒྲ་བརྙན་ནི་ཁམས་མེད་པ་དང་། ཐ་དད་པ་མེད་པ་དང་། མཚུངས་པ་མེད་པ་དང་། འཁྲུག་པ་མེད་པའོ། །དེ་ལྟར་དེ་བཞིན་དུ་ཆོས་འདི་དག་ཀྱང་ནམ་མཁའ་ལྟ་བུའོ། །གཟུགས་ཀྱི་སྣང་བ་དེ་ཡང་གཟུང་དུ་མེད་པ་དང་། བསགས་པ་མེད་པ་དང་། སྐྱེ་བ་མེད་པ་དང་། འབྱུང་བ་མེད་པ་དང་། གཡོ་བ་མེད་པ་དང་། འགྱུར་བ་མེད་པ་དང་། འཆི་འཕོ་བ་མེད་པ་དང་། མི་གནས་པ་དང་། བདག་དང་གཞན་གྱི་ལ་མི་ལེན་པ་དང་། ཡོངས་སུ་མི་རྟོག་པ་དང་། ཆགས་པ་མེད་པ་དང་། བྱས་པ་མེད་པ་ཐམས་ཅད་གཟུགས་ཀྱི་སྣང་བའོ། །དེ་ལྟར་དེ་བཞིན་དུ་འདུ་བྱེད་ཐམས་ཅད་ཀྱི་ལམ་ལས་ཤིན་ཏུ་འདས་ཤིང་མིག་གི་རྣམ་པར་ཤེས་པའི་ལམ་ཀུན་ནས་ལྡང་བ། ལྦུ་བའི་ཕུང་པོ་ལྟ་བུའི་གཟུགས་ཀྱི་སྣང་བ་མིག་གི་རྣམ་པར་ཤེས་པས་སྟོང་པ་དེ་ཡང་མིག་འབྱུང་བ་ཆེན་པོ་བཞིའི་རྒྱུའོ། །བདག་མེད་པའི་ཕྱིར་འབྱུང་བ་ཆེན་པོ་བཞི་པོ་དེ་དག་ཀྱང་སྟོང་པ་སྟེ། ཇི་ལྟར་གོང་དུ་བཤད་པ་བཞིན་དུ་བདག་ཏུ་དམིགས་པའང་མེད་དོ། །མིག་གཉིས་ནི་རྒུན་འབྲུམ་ཙམ་སྟེ། མིག་རེ་རེ་ལའང་ཚད་མེད་པའི་རྡུལ་ཤིན་ཏུ་ཕྲ་བའོ། །རྡུལ་ཤིན་ཏུ་ཕྲ་བ་ལའང་འབྱུང་བ་ཆེན་པོ་བཞི་པོ་སོགས་སོ། །འབྱུང་བ་ཆེན་པོ་བཞི་པོ་རེ་རེ་ལའང་བདག་ཏུ་མི་དམིགས་ཤིང་སེམས་ཅན་དུ་མི་དམིགས་ན། དེ་ལ་རྣམ་པར་ཤེས་པའི་གནས་སམ། ཀུན་ནས་ལྡང་བའང་ལམ་དུ་ཤེས་པར་ལྟ་ཅི་སྨོས། རྡུལ་ཤིན་དུ་ཕྲ་བ་དེ་དང་དེ་དག་ལ་ཇི་ལྟ་བ་བཞིན་དུ་མིག་འབྱུང་བ་ཆེན་པོ་བསགས་པ་དང་། རྒུན་འབྲུམ་ཙམ་དུ་ཡོངས་སུ་བརྟག་གོ །ཡོངས་སུ་བརྟགས་པ་དེས་དེ་ལ་མིག་གི་རྣམ་པར་ཤེས་པའི་གནས་པ་དང་ལམ་ཡང་མེད་དོ། །དེས་ཡང་དག་པར་ཡོངས་སུ་བརྟགས་པས་སེམས་ཅན་མིག་ཡོངས་སུ་བརྟགས་པར་
འགྱུར་རོ། །གང་མིག་གི་རྣམ་པར་ཤེས་པ་སྟོང་པ་ཇི་ལྟ་བ་བཞིན་དུ་ཤེས་པ་དེ་དག་འདོད་ཆགས་དང་བྲལ་བར་འགྲོའོ། །ཇི་ལྟར་ཡང་མིག་གི་རྣམ་པར་ཤེས་པ་སྟོང་པར་ཇི་ལྟ་བ་བཞིན་དུ་རབ་ཏུ་ཤེས་པ་དེ་བཞིན་དུ་ཁམས་གསུམ་གྱི་མིག་མིག་གི་རྣམ་པར་ཤེས་པས་སྟོང་པ་ཇི་ལྟ་བ་བཞིན་དུ་ཤེས་པར་བྱའོ། །ཇི་ལྟར་ཡང་མིག་གིས་གཟུགས་ཀྱི་སྣང་བ་ལྦུ་བའི་ཕུང་པོ་ལྟ་བུ་ནི། ཕྱི་དང་ནང་གི་གཟུགས་ཀྱི་མཚན་ཉིད་སྣང་བ་ནས་ཉེ་བའི་བར་དུ་དེ་དག་ཐམས་ཅད་ལྦུ་བའི་ཕུང་པོ་གཟུགས་ཀྱི་སྣང་བ་འབྱུང་བ་ཆེན་པོ་ནམ་མཁའ་ལ་མི་རྟེན་པར་འགྱུར་རོ། །ནམ་མཁའ་ཇི་ལྟར་དངོས་པོ་མེད་ཅིང་མཚན་ཉིད་མེད་པ་དང་། མཚན་ཉིད་ཀྱིས་སྟོང་པ་ལྟར་གཟུགས་ཀྱི་མཚན་ཉིད་སྣང་བ་ལྦུ་བའི་ཕུང་པོ་ལྟ་བུ་དེ་དག་ཐམས་ཅད་ཀྱང་སྣང་བའོ། །ཇི་ལྟར་གཟུགས་གཞན་གྱིས་ནམ་མཁའ་སྟོང་པ་ལྟར་ནང་དང་ཕྱིའི་ལུས་ཀྱི་མཚན་ཉིད་ལྦུ་བ་ལྟ་བུར་སྣང་བ་ནས་ཉེ་བའི་བར་དུ་དེ་དག་ཐམས་ཅད་གཟུགས་ཀྱི་མཚན་ཉིད་སྣང་བའང་སྟོང་པའོ། །ཇི་ལྟར་མིག་མིག་གི་རྣམ་པར་ཤེས་པས་སྟོང་པ་དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་ཀྱང་ལུས་ཀྱི་རྣམ་པར་ཤེས་པས་སྟོང་ངོ་། །འདོད་པའི་ཁམས་དང་གཟུགས་ཀྱི་ཁམས་ཐམས་ཅད་ཀྱི་མིག་ཀྱང་མིག་དང་མིག་གི་རྣམ་པར་ཤེས་པས་སྟོང་པས་སྟོང་པ་ཇི་ལྟ་བ་བཞིན་དུ་རབ་ཏུ་ཤེས་སོ། །དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་ཀྱང་ལུས་ཀྱི་རྣམ་པར་ཤེས་པ་སྟོང་པ་ཉིད་ཀྱིས་སྟོང་པ་ཇི་ལྟ་བ་བཞིན་དུ་རབ་ཏུ་ཤེས་སོ། །འབྱུང་བ་ཆེན་པོ་ལྟ་བུ་མི་རྟོག་རྣམ་པར་མི་རྟོག་ཅིང་དམིགས་པར་ཡང་དག་པར་རྗེས་སུ་མི་མཐོང་ངོ་། །སེམས་ཅན་དང་། སྲོག་དང་། གསོ་བ་དང་། གང་ཟག་དང་། ཤེད་ལས་སྐྱེས་པ་དང་། ཤེད་ཅན་དང་། བྱེད་པ་པོ་དང་། བྱེད་དུ་འཇུག་པ་དང་། ཚོར་བ་པོ་དང་། ཚོར་བར་འཇུག་པ་དང་། སྐྱེ་བ་དང་། ཀུན་ཏུ་སྐྱེ་བ་དང་། ཀུན་ནས་ལྡང་བར་ཡང་དག་པར་རྗེས་སུ་མི་མཐོང་ངོ་། །གཟུགས་ཀྱི་མཚན་ཉིད་སྣང་བའི་མཚན་མས་མཚན་མ་ལས་དམིགས་པའང་མེད་དོ། །སེམས་ཀྱི་གཟུང་བ་དང་། བཏང་བ་དང་། མངོན་སུམ་དུ་བྱ་བ་དང་། ཁོང་དུ་ཆུད་པ་དང་། གནས་དང་། ཀུན་ནས་ལྡང་བའི་གནས་དང་། ཡིད་
ལ་བྱེད་པའི་གཟུགས་ཀྱི་མཚན་ཉིད་སྣང་བ་དམིགས་པ་མེད་པ་སྟོང་པ་ཉིད་ཀྱིས་སྟོང་པ་ཇི་ལྟ་བ་བཞིན་དུ་རབ་ཏུ་ཤེས་སོ། །གཟུགས་ཀྱི་ཕུང་པོ་དང་། ནམ་མཁའ་དང་། སེམས་ཀྱི་རྣམ་པར་ཤེས་པ་ཐ་དད་པར་རབ་ཏུ་མི་ཤེས་སོ། ཁམས་གསུམ་ཐམས་ཅད་སྟོང་པ་ཉིད་ཀྱིས་སྟོང་པར་རབ་ཏུ་ཤེས་སོ། །གང་ཕྱི་རོལ་དང་ནང་གི་ནས་ཉེ་བའི་བར་དུ་གཟུགས་ཀྱི་མཚན་ཉིད་སྣང་བ་ཐམས་ཅད་ལྦུ་བའི་ཕུང་པོ་ལྟ་བུར་སྟོང་པ་ཉིད་དང་། ཟད་པའི་ཚུལ་དང་། ཞི་གནས་ལ་འཚེ་བ་མེད་པའི་ཚུལ་དང་། རྟོག་པ་མེད་པའི་ཚུལ་དང་། མི་སྐྱེ་བ་དང་། མི་འགོག་པ་དང་། འབྱུང་བ་མེད་པ་དང་། མཚན་མ་མེད་པའི་ཚུལ་གྱིས་རྟོག་གོ །ནམ་མཁའ་དང་བྲལ་ཞིང་གནས་མེད་པ་དང་། ཚིག་གི་ལམ་ལ་བྲལ་བར་རབ་ཏུ་ཤེས་སོ། །ནང་དང་ཕྱི་རོལ་གྱི་འདུ་བྱེད་ནས་ཉེ་བའི་བར་དུ་གཟུགས་ཀྱི་མཚན་ཉིད་ཐམས་ཅད་འཇིག་པའི་ཆོས་དང་། ཟད་པའི་ཆོས་དང་། དངོས་པོའི་རྒྱུན་ཆད་པ་སྟོང་པ་དང་། འཁྲུག་པ་རྒྱུན་ཆད་པ་ཇི་ལྟ་བ་བཞིན་དུ་རབ་ཏུ་ཤེས་སོ། །གང་གཟུགས་ཀྱི་མཚན་ཉིད་ཐམས་ཅད་ཟད་པའི་ཆོས་དེའང་མི་རྟག་པའོ། །གང་རྟག་པ་མེད་པ་དེའང་སྡུག་བསྔལ་བའོ། །གང་འབྱུང་བ་མེད་པ་དེའང་བདག་མེད་པའོ། །གང་འདུ་བྱེད་ཐམས་ཅད་ཀྱི་ཚིག་གི་མཚན་ཉིད་ཀྱི་ལམ་དང་བྲལ་བ་དེའང་སྟོང་པ་སྟེ།གང་ཕྱི་དང་ནང་གི་ནས་ཉེ་བའི་བར་དུ་གཟུགས་ཀྱི་མཚན་ཉིད་སྟོང་པ་ཐམས་ཅད་ཇི་ལྟ་བ་བཞིན་དུ་རབ་ཏུ་ཤེས་པ་དེ་ལྟར་རབ་འབྲིང་དང་ཐ་མའི་ཉོན་མོངས་པ་ཞི་བར་འགྱུར་རོ། །འདི་ནི་མངོན་པར་འདུ་བྱེད་པའི་མཚན་ཉིད་རྒྱུན་གཅོད་པ་མེད་པའི་བཟོད་པའོ། །ནམ་མཁའ་ཇི་ལྟར་རླུང་མེད་པ་དེ་བཞིན་དུ་བག་ལ་ཉལ་བ་དང་བྲལ་བའི་བཟོད་པའོ། །ནམ་མཁའ་ཇི་ལྟར་འགྱུར་བ་མེད་པ་དེ་བཞིན་དུ་གཟུགས་ཀྱི་མཚན་ཉིད་སྣང་བ་མེད་པའི་བཟོད་པའོ། །ནམ་མཁའ་ཇི་ལྟར་གཙེས་པ་མེད་ཅིང་གནོད་པ་མེད་པ་དེ་བཞིན་དུ་སེམས་དང་རྣམ་པར་རྟོག་པ་དང་རྣམ་པར་དཔྱོད་པས་གཙེས་པ་མེད་ཅིང་གནོད་པ་མེད་པའི་བཟོད་པའོ། །ནམ་མཁའ་ཇི་ལྟར་བག་ལ་ཉལ་བ་ཐམས་ཅད་དང་བྲལ་བ་དེ་བཞིན་དུ་ཚིག་གི་ལམ་ཐམས་ཅད་བག་ལ་ཉལ་བ་དང་བྲལ་བའི་བཟོད་པའོ། །ནམ་མཁའ་ཇི་ལྟར་མ་སྐྱེས་མ་བྱུང་བ་
དེ་བཞིན་དུ་མཚན་ཉིད་ཐམས་ཅད་སྔར་མ་སྐྱེས་མ་བྱུང་བའི་བཟོད་པ་བསྒྲུབས་པའོ། །ནམ་མཁའ་ཇི་ལྟར་སྤྲོས་པ་མེད་པ་དེ་བཞིན་དུ་ཁམས་གསུམ་གྱི་བག་ལ་ཉལ་བ་ཐམས་ཅད་སྤྲོས་པ་མེད་པའི་བཟོད་པའོ། །ནམ་མཁའ་ཇི་ལྟར་ཁམས་གསུམ་པར་གཏོགས་པ་དེ་བཞིན་དུ་གཟུགས་ཀྱི་མཚན་ཉིད་སྣང་བ་ཁམས་གསུམ་པར་གཏོགས་པ་ཡང་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་མཚན་ཉིད་དམིགས་པ་མེད་པའི་མཚན་ཉིད་དང་བྲལ་བའི་བཟོད་པ་སྒོམ་པར་བྱེད་པ་འདི་ཡང་བྱང་ཆུབ་སེམས་དཔའི་སེམས་ཅན་ཉེ་བར་འཚོ་བའི་བཟོད་པར་བལྟ་བར་བྱའོ། །ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་ཞེས་བྱ་བ་ཐེག་པ་ཆེན་པོའི་མདོའི་ལེའུ་སྟེ་ལྔ་པའོ།། །།