འཕགས་པ་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་ཞེས་བྱ་བ་ཐེག་པ་ཆེན་པོའི་མདོ་ལས། ལེའུ་དྲུག་པ།
རིགས་ཀྱི་བུ་གཞན་ཡང་བྱང་ཆུབ་སེམས་དཔས་ཚོར་བའི་ཕུང་པོ་ཡང་ཚུལ་བཞིན་དུ་བརྟག་པར་བྱའོ། །དེ་ལ་ཚོར་བའི་ཕུང་པོ་གང་ཞེ་ན། འདི་ལྟ་སྟེ། ཚོར་བའི་ཚོགས་རྣམ་པ་དྲུག་སྟེ། མིག་གི་འདུས་ཏེ་རེག་པ་ལས་སྐྱེས་པའི་ཚོར་བ་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་འདུས་ཏེ་རེག་པ་ལས་སྐྱེས་པའི་ཚོར་བ་སྟེ། འདི་དག་ནི་ཚོར་བའི་ཕུང་པོ་ཞེས་བྱའོ། །ཚོར་བའི་ཕུང་པོ་དེ་ལ་ཚོར་བ་རྣམ་པ་གསུམ་དུ་ཤེས་པར་འགྱུར་ཏེ། གསུམ་གང་ཞེ་ན། བདེ་བར་ཚོར་བ་དང་། སྡུག་བསྔལ་བར་ཚོར་བ་དང་། བདེ་བ་དང་། སྡུག་བསྔལ་དུའང་མི་ཤེས་པར་ཚོར་བ་སྟེ། འདི་དག་རྣམ་གསུམ་ནི་ཚོར་བའི་ཕུང་པོ་ཞེས་བྱའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམ་པ་བརྒྱད་པོ་འདི་དག་གིས་ཚོར་བའི་ཕུང་པོ་ཚུལ་བཞིན་དུ་བརྟག་པར་བྱའོ། །དེ་ལ་བརྒྱད་གང་ཞེ་ན། རིགས་ཀྱི་བུ་ཉོན་མོངས་པའི་རྩ་བ་གསུམ་སྟེ། འདོད་ཆགས་དང་། ཞེ་སྡང་དང་། གཏི་མུག་ཅེས་བྱའོ། །ཉོན་མོངས་པའི་རྩ་བ་གསུམ་པོ་འདི་དག་གིས་སེམས་ཅན་ཉོན་མོངས་པ་རྣམས་འདོད་ཆགས་དང་བྲལ་བ་ཟག་པ་ཟད་པ་དང་བཅས་པར་མི་འགྱུར་རོ། །ཉོན་མོངས་པའི་རྩ་བ་གསུམ་པོ་འདི་དག་ཚོར་བ་རྣམ་པ་གསུམ་ལ་ཞུགས་པ་དེ་ལ་ཉོན་མོངས་པ་རྣམ་པ་ཐ་དད་པར་འགྱུར་རོ། །དེ་ལ་ཚོར་བའི་ཚོགས་དྲུག་གིས་
ཚོར་བ་རྣམ་གསུམ་ཚུལ་བཞིན་དུ་བརྟག་པར་བྱའོ། །ཚོར་བ་རྣམ་གསུམ་གྱིས་ཉོན་མོངས་པའི་རྩ་བ་འབྱུང་བ་དང་། ལས་ཀྱི་རྩ་བ་དང་། ཟད་པའི་རྩ་བ་ནུབ་པ་ཚུལ་བཞིན་དུ་བརྟག་པར་བྱའོ། །དེ་མིག་གིས་གཟུགས་ཀྱི་མཚན་ཉིད་སྣང་བ་དམའ་བའམ། བདེ་བའམ། ཆེ་བའམ། ཕྲ་བའམ། གང་ཉེ་བའམ། གང་རིང་བར་མཐོང་བ་དེ་ལ་ཚོར་བ་འབྱུང་ངོ་། །གང་གཟུགས་བདེ་བའམ། ཆེ་བའམ། ཕྲ་བའམ། གང་རིང་བའམ། ཉེ་བར་མཐོང་བ་དེ་ལ་ཚོར་བ་སྲེད་པའི་གནས་ཆུའི་ཆུ་བུར་ལྟ་བུ་དང་། མངོན་པར་དགའ་བ་འབྱུང་བར་འགྱུར་བ་དེ་ལ་ཡང་ཚུལ་བཞིན་དུ་བརྟག་པར་བྱའོ། །ཇི་ལྟར་ཡང་མིག་མིག་གིས་སྟོང་པ་ནས་ཇི་ལྟར་གོང་དུ་བཤད་པའི་བར་དུ་དེ་གློ་བུར་དང་། ལུས་མ་ཡིན་པ་དང་། གནས་མེད་པ་དང་། གཟུགས་མེད་པ་དང་། བསྟན་དུ་མེད་པ་དང་། དངོས་པོ་མེད་པ་དང་། ཡི་གེ་མེད་པ་ཚོར་བ་ཆུའི་ཆུ་བུར་ལྟ་བུར་འབྱུང་ངོ་། །འདོད་ཆགས་ཀྱིས་ཀུན་ཏུ་བསྒྲིབས་པ་འབྱུང་ངོ་། །སློང་བ་པོའམ། དགོད་པ་པོའམ། ཀུན་ཏུ་རྒྱུ་བ་པོའམ། སོགས་པར་ཡང་མི་ཤེས་སོ། །འབྱུང་བའི་མཚན་ཉིད་བདག་པོ་མེད་པ་དང་། འགོག་པ་ལ་ཡང་བདག་པོ་མེད་པ་དང་། མཚན་ཉིད་ཚོར་བ་ལ་ཡང་བདག་པོ་མེད་པ་སྟེ། མཚན་ཉིད་མེད་པའི་ཆོས་འདི་དག་ཐམས་ཅད་ལ་ཡང་སྲོག་མེད་པ་དང་། སྲོག་དང་བྲལ་བ་དང་། སེམས་ཅན་མེད་པ་དང་། སེམས་ཅན་དང་བྲལ་བ་དང་། གསོ་བ་མེད་པ་དང་། གསོ་བ་དང་བྲལ་བ་དང་། གང་ཟག་མེད་པ་དང་། གང་ཟག་དང་བྲལ་བ་དང་། འདོད་པ་མེད་པ་དང་། དངོས་པོ་མེད་པ་དང་། མཚན་ཉིད་མེད་པ་དང་། བདག་པོ་མེད་པ་དང་། མཚན་ཉིད་འཇིག་པ་དང་། ཟད་པའི་འདུ་བྱེད་ཀྱི་སྡུག་བསྔལ་དངོས་པོ་མེད་པ་དང་། དུས་གསུམ་གྱི་འདོད་ཆགས་དང་བྲལ་བའི་མཐའ་ལ་དེས་དེ་དག་སྟོང་ངོ་། །བརྗོད་དུ་མེད་པ་འདོད་ཆགས་ཀྱི་མཐའ་ལ་དེས་དེ་དག་སྟོང་ངོ་། །གཉིས་སུ་མེད་པའི་འདོད་ཆགས་ཀྱི་མཐའ་ལ་དེས་དེ་དག་སྟོང་ངོ་། །རྒྱུན་ཆད་པ་མེད་པ་འདོད་ཆགས་ཀྱི་མཐའ་ལ་དེས་དེ་དག་སྟོང་ངོ་། །རྟག་པ་མེད་པ་འདོད་ཆགས་ཀྱི་མཐའ་ལ་དེས་དེ་དག་སྟོང་ངོ་། །མཚན་མ་མེད་པ་འདོད་ཆགས་ཀྱི་མཐའ་ལ་དེས་དེ་དག་སྟོང་ངོ་། །སྨོན་པ་མེད་པ་འདོད་ཆགས་ཀྱི་མཐའ་
ལ་དེས་དེ་དག་སྟོང་ངོ་། །ཚོར་བ་མེད་པ་འདོད་ཆགས་ཀྱི་མཐའ་ལ་དེས་དེ་དག་སྟོང་ངོ་། །བྱེད་པ་པོའི་རྣམ་པ་མེད་པ་འདོད་ཆགས་ཀྱི་མཐའ་ལ་དེས་དེ་དག་སྟོང་ངོ་། །ཤེས་པ་མེད་པ་འདོད་ཆགས་ཀྱི་མཐའ་ལ་དེས་དེ་དག་སྟོང་ངོ་། །ལེན་པ་མེད་པ་འདོད་ཆགས་ཀྱི་མཐའ་ལ་དེས་དེ་དག་སྟོང་ངོ་། །གྲོལ་བ་མེད་པ་འདོད་ཆགས་ཀྱི་མཐའ་ལ་དེས་དེ་དག་སྟོང་ངོ་། །དངོས་པོ་མེད་པ་འདོད་ཆགས་ཀྱི་མཐའ་ལ་དེས་དེ་དག་སྟོང་ངོ་། །མུན་པ་མེད་པ་འདོད་ཆགས་ཀྱི་མཐའ་ལ་དེས་དེ་དག་སྟོང་ངོ་། །སྣང་བ་མེད་པ་འདོད་ཆགས་ཀྱི་མཐའ་ལ་དེས་དེ་དག་སྟོང་ངོ་། །དུས་གསུམ་གྱི་འདོད་ཆགས་དམིགས་པ་རྣམ་པར་སོགས་སོ། །གནས་སམ།བྱེད་དུ་འཇུག་པའམ། སོགས་པར་བྱ་བ་ཡང་དག་པར་རྗེས་སུ་མི་མཐོང་ངོ་། །སེམས་སྒྱུ་མ་ལྟ་བུ་དང་། དུས་གསུམ་གྱི་འདོད་ཆགས་དངོས་པོ་དང་དངོས་པོ་མེད་པ་ཡོངས་སུ་ཆད་པར་ཡང་རྣམ་པར་མི་རྟོག་གོ །ཇི་ལྟ་བ་བཞིན་དུ་ཤེས་པ་ཅི་ལ་ཡང་ཆགས་པ་མེད་དོ། །ཐམས་ཅད་ལ་མི་རྟེན་པ་དང་། མི་གནས་པ་དང་། ལེན་པ་མེད་པ་དང་། འཕོས་པ་མེད་པ་ལ་གཉིས་སུ་མི་བྱེད་དོ། །ཆོས་ཐམས་ཅད་ཆོས་ཀྱི་དབྱིངས་སུ་ཡང་དག་པར་གཞོལ་བར་ཤེས་པས་ཅུང་ཟད་ཀྱང་དབྱེ་བར་མི་བྱེད་དོ། །དེ་ཆགས་པའི་གཟུགས་ལ་སེམས་རྟོགས་པ་དང་། གཟུགས་དང་། ཚོར་བ་གཉིས་དང་བྲལ་བའོ། །གང་ཆགས་པའི་གཟུགས་ལ་ཚོར་བ་གང་ཆུའི་ཆུ་བུར་ལྟ་བུ་དང་། གང་འབྱུང་བ་ཟད་པ་འཇིག་པར་བརྟག་པ་འདི་དག་ནི་འདུ་བྱེད་བརྟག་པ་མེད་པའོ། །ཁམས་གསུམ་ལས་འབྱུང་བ་འདི་ཡང་སྨོན་པ་མེད་པ་རྣམ་པར་ཐར་བའི་སྒོའོ། །གང་འདོད་ཆགས་དེ་ལ་བརྗོད་དུ་མེད་པའི་ཚོར་བ་དང་། དུས་གསུམ་གྱི་བསྒོམ་པ་ཐོབ་པ་འདི་ཡང་འདུ་བྱེད་སྡུག་བསྔལ་རབ་ཏུ་བྱེད་པའི་སྒོའོ། །ཁམས་གསུམ་གྱི་འདོད་ཆགས་ཀྱི་ཀུན་གཞི་ཚོར་བ་པོ་མེད་པ་དང་། ཉོན་མོངས་པ་མེད་པ་འདི་ཡང་མཚན་མ་མེད་པ་རྣམ་པར་ཐར་བའི་སྒོའོ། །གང་འདོད་ཆགས་ཀྱི་ཀུན་གཞི་ཚོར་བ་བླང་བ་མེད་ཅིང་དོར་བ་མེད་པ་དང་། ཚིག་གི་ལམ་བདག་མེད་པ་དང་། ཡི་གེར་དམིགས་པ་མེད་པ་དང་། ཁམས་གསུམ་གྱི་ཚོར་བ་ཡུལ་མེད་ཅིང་མིག་ཡོར་མེད་པ་འདི་ཡང་འདུ་བྱེད་རྣམ་པར་ཞི་བའི་ཕྱིར་རོ། །
བདག་མེད་པ་སྟོང་པ་ཉིད་རྣམ་པར་ཐར་པའི་སྒོའོ། །གང་ཁམས་གསུམ་ཐམས་ཅད་ལ་ཚོར་བ་དངོས་པོ་མེད་པ་དང་། སྣང་བ་མེད་པ་དང་། ཡི་གེ་མེད་པ་དང་། བརྗོད་དུ་མེད་པ་དང་། ཟད་པ་མེད་པ་དང་། ཅི་ལའང་ཆགས་པ་མེད་པ་དེ། དེ་ལྟར་རབ་འབྲིང་དང་ཐ་མའི་ཉོན་མོངས་པ་རྒྱུན་ཆད་པར་འགྱུར་རོ། །ནམ་མཁའ་ཇི་ལྟར་སྦྱོར་བ་མེད་པ་དེ་བཞིན་དུ་འདོད་ཆགས་ཀུན་ནས་ལྡང་བ་དང་། ཚོར་བ་སྦྱོར་བ་མེད་ཅིང་བརྗོད་དུ་མེད་པ་དང་། གཉིས་སུ་མེད་པ་དང་། སེམས་དང་ཡིད་ཀྱི་རྣམ་པར་ཤེས་པ་ལ་ཁམས་གསུམ་གྱི་ཚོར་བ་ཅི་ལའང་ཆགས་པ་མེད་པ་དང་། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་དང་། འདོད་ཆགས་ཀྱི་ཀུན་གཞི་ཚོར་བ་མཚན་ཉིད་དམིགས་པ་མེད་པ་དང་། མཚན་ཉིད་དང་བྲལ་བའི་བཟོད་པ་སྒོམ་པར་བྱེད་པ་འདི་ཡང་བྱང་ཆུབ་སེམས་དཔའི་སེམས་ཅན་ཉེ་བར་འཚོ་བའི་བཟོད་པར་བལྟ་བར་བྱའོ། །དེ་བཞིན་དུ་རྣ་བ་ལ་སྒྲ། སྣ་ལ་དྲི། ལྕེ་ལ་རོ། ལུས་ལ་རེག །ཡིད་ལ་ཆོས་ཏེ། གང་ཡིད་ཀྱིས་འདས་པ་དང་། མ་འོངས་པ་དང་། ད་ལྟར་བྱུང་བའི་འདོད་ཆགས་ཀྱི་ཀུན་གཞི་ཀུན་ནས་ལྡང་བ་ཡིད་དུ་འོང་བའི་ཆོས་རྣམ་པར་ཤེས་ཤིང་གཟུགས་དང་། སྒྲ་དང་། དྲི་དང་། རོ་དང་། རེག་པ་མངོན་པར་དགའ་བ་རྗེས་སུ་དྲན་པ་དེ་ལ་ཡང་ཡིད་ཀྱི་རྣམ་པར་ཤེས་པ་འབྱུང་ངོ་། །ཚོར་བ་འདོད་ཆགས་ཀྱི་ཀུན་གཞིས་བསྐྱེད་དོ། །དེ་ལའང་བྱང་ཆུབ་སེམས་དཔའ་དེ་བཞིན་དུ་ཡིད་ཀྱི་རྣམ་པར་ཤེས་པ་དང་། ཚོར་བ་འདོད་ཆགས་ཀྱི་ཀུན་གཞི་ཚུལ་བཞིན་དུ་རྟོག་གོ །གཟུགས་ཀྱི་དངོས་པོ་རང་བཞིན་གྱིས་སྒྱུ་མ་ལྟ་བུའི་སེམས་དང་། ཡིད་ཀྱི་རྣམ་པར་ཤེས་པ་ཞེས་བྱ་བ་འདི་སེམས་དང་། ཡིད་ཀྱི་སྒྲས་བརྗོད་དོ། །གང་འདས་པའི་སེམས་དེ་འགགས་པ་དང་། མ་འོངས་པའི་མ་བྱུང་བ་དང་། ད་ལྟར་བྱུང་བའི་སེམས་དང་། ཡིད་ཀྱི་རྣམ་པར་ཤེས་པ་གནས་པའང་མེད་དོ། །སྐད་ཅིག་ཏུ་འཇིག་པ་དང་། མི་རྟག་པ་དང་། ལུས་མེད་པ་དང་། ངོ་བོ་ཉིད་མེད་པ་དང་། ཡི་གེ་མེད་པ་དང་། མཚན་ཉིད་མེད་པ་དང་། བྱ་བ་མེད་པ་དང་། འགྱུར་བ་མེད་པ་དང་། གཟུང་དུ་མེད་པ་དང་། གཏོང་བ་མེད་པ་དང་། མུན་པ་མེད་པ་དང་། སྣང་
བ་མེད་པ་དང་། གཅིག་པུ་མ་ཡིན་པ་དང་། ཐ་མི་དད་པ་དང་། གཉིས་སུ་མེད་པ་དང་། གཉིས་ལྟ་བུ་མེད་པ་དང་། དངོས་པོ་མེད་པ་དང་། སྙེམས་པ་མེད་པ་དང་། སྤྲོས་པ་མེད་པ་དང་། ཕུལ་བ་མེད་པ་དང་།སེལ་བ་མེད་པ་དང་། ཀུན་གཞི་ཐམས་ཅད་དང་བྲལ་བ་དང་། ཆུ་ཟླ་ལྟ་བུ་དང་། འདས་པ་དང་། མ་འོངས་པ་དང་། ད་ལྟར་བྱུང་བའི་ཆའི་གནས་མངོན་པར་དགའ་བའི་ཕྱི་རོལ་གྱི་དངོས་པོ་སེམས་དང་ཡིད་ཀྱི་རྣམ་པར་ཤེས་པ་རྐྱེན་ཇི་ལྟ་བ་བཞིན་དུ་སྣང་བར་འགྱུར་རོ། ནམ་མཁའ་ཇི་ལྟར་ཉི་མ་དང་། ཟླ་བ་ལ་སྣང་བ་མེད་པའི་ནམ་མཁའ་དང་སྣང་བ་གཉིས་ཀྱི་མཚན་ཉིད་མེད་པ་དེ་མིང་ཙམ་གྱིས་བརྗོད་པ་དེ་བཞིན་དུ་སེམས་དང་ཡིད་ཀྱི་རྣམ་པར་ཤེས་པ་ལ་འདོད་ཆགས་ཀྱི་གནས་སྣང་བ་དང་། བརྗོད་དུ་མེད་པ་གཉིས་ཀྱི་མཚན་ཉིད་ཀྱང་མིང་ཙམ་གྱིས་བརྗོད་པ་ཡང་གཉིས་སུ་མེད་པ་དང་། གནས་པ་མེད་པ་དང་། གཟུགས་མེད་པ་དང་། བསྟན་དུ་མེད་པ་དང་། ངོ་བོ་ཉིད་མེད་པ་དང་། ཡི་གེ་མེད་པ་དང་། སློང་བ་པོ་མེད་པ་ནས། སྟོན་པའི་བར་དུ་འདོད་ཆགས་ཀྱི་མཐའ་ལ་དེས་དེ་དག་སྟོང་ངོ་། །དུས་གསུམ་གྱི་འདོད་ཆགས་ལ་ཀུན་གཞི་རྣམ་པར་སོགས་སོ། །འདི་ལ་གནས་མེད་པས་ཅིའང་ཆགས་པ་མེད་པའི་བར་དུ་དེ་ལྟར་རབ་འབྲིང་དང་ཐ་མའི་ཉོན་མོངས་པ་ཉེ་བར་ཞི་བར་འགྱུར་རོ། །ནམ་མཁའ་ཇི་ལྟར་མུན་པ་མེད་ཅིང་སྣང་བ་མེད་པ་དང་། མཚན་ཉིད་མེད་པ་དེ་བཞིན་དུ་ཡིད་ཀྱི་རྣམ་པར་ཤེས་པ་འདོད་ཆགས་ཀྱི་ཀུན་གཞི་ཡང་མུན་པ་མེད་ཅིང་སྣང་བ་མེད་པ་དང་། མཚན་ཉིད་མེད་པ་ངོ་བོ་ཉིད་མེད་པ་དང་། སེམས་དང་ཡིད་ཀྱི་རྣམ་པར་ཤེས་པ་ཅི་ལའང་མ་ཆགས་པ་དང་། ཡིད་ཀྱི་རྣམ་པར་ཤེས་པ་ཅི་ལའང་མ་ཆགས་པ་དང་། ཁམས་གསུམ་གྱི་འདོད་ཆགས་ཀྱི་ཀུན་གཞི་ཚོར་བ་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པའི་མཚན་ཉིད་དང་བྲལ་བའི་བཟོད་པ་བསྒོམ་པར་བྱ་བ་འདི་ཡང་བྱང་ཆུབ་སེམས་དཔའི་སེམས་ཅན་ཡོངས་སུ་སྨིན་པ་ཉེ་བར་འཚོ་བའི་བཟོད་པར་ཡོངས་སུ་བལྟ་བར་བྱའོ། །དེ་བཞིན་དུ་འདོད་ཆགས་ཀྱི་རྒྱུན་གཅོད་པར་ཡང་འགྱུར་རོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔས་ཞེ་སྡང་སྐྱེ་བ་ཉོན་མོངས་པའི་རྩ་བ་ལས་ཟད་པར་ནུས་པའི་ཚུལ་བཞིན་དུ་བརྟག་པར་བྱའོ། །གང་མིག་གིས་གཟུགས་ཀྱི་མཚན་
ཉིད་སྣང་བ་ཡིད་དུ་འོང་བ་དམའ་བ་ནས་ཉེ་བའི་བར་དུ་དེ་ལ་ཚོར་བ་ཆུའི་ཆུ་བུར་ལྟ་བུར་མི་སྡུག་པ་མངོན་པར་དགའ་བ་མེད་པར་འབྱུང་བའི་ཚོར་བ་སྟེ། དེ་ལ་ཡང་བྱང་ཆུབ་སེམས་དཔའ་ཚུལ་བཞིན་དུ་རྟོག་གོ །ཇི་ལྟར་མིག་མིག་གིས་སྟོང་པ་དང་། མིག་གཟུགས་རྣམ་པར་ཤེས་པས་སྟོང་པ་ནས་ཇི་ལྟར་གོང་དུ་བཤད་པའི་བར་དུའོ། །སྐད་ཅིག་འཇིག་པ་ཟད་པའི་འདུ་བྱེད་དུས་གསུམ་གྱི་ཞེ་སྡང་གི་མཐའ་ལ་དེས་དེ་སྟོང་པ་ནས་སྣང་བ་མེད་པའི་བར་དུ་ཞེ་སྡང་གི་མཐའ་ལ་དེས་དེ་སྟོང་སྟེ་དུས་གསུམ་གྱི་ཞེ་སྡང་དམིགས་པ་རྣམ་པར་སོགས་སོ། །ཞེ་སྡང་གནས་པ་མེད་པ་ནས་ཞེ་སྡང་ཅན་གྱི་གཟུགས་སྣང་བ་ལ་སེམས་གཞོག་པ་དང་། ཞེ་སྡང་གི་ཚོར་བ་དང་གཉིས་བྲལ་བར་འགྱུར་བའི་བར་དུའོ། །གང་ཞེ་སྡང་ཅན་གྱི་གཟུགས་ལ་ཞེ་སྡང་གི་ཀུན་གཞི་འབྱུང་བ་དང་། ཚོར་བ་ཆུའི་ཆུ་བུར་ལྟ་བུར་འབྱུང་བ་ཟད་པ་འཇིག་པར་བརྟག་པ་འདི་དག་ཀྱང་འདུ་བྱེད་མི་རྟག་པ་ཞེས་བྱ་བའི་བར་དུ་བཟོད་པ་བལྟ་བར་བྱའོ། །དེ་བཞིན་དུ་རྣ་བས་སྒྲ་ནས་ཡིད་ཀྱིས་ཆོས་ཀྱི་བར་དུ་ཡིད་ཀྱིས་གང་མི་སྡུག་པ་དང་། མི་མཛེས་པའི་ཆོས་རྣམ་པར་ཤེས་པ་དེ་ལ་ཡང་ཞེ་སྡང་གི་ཀུན་གཞི་ཀུན་ནས་ལྡང་བའི་ཚོར་བ་ཀུན་ནས་འབྱུང་བར་འགྱུར་རོ། །དེ་ལ་ཡང་བྱང་ཆུབ་སེམས་དཔའ་ཞེ་སྡང་གི་ཀུན་གཞི་ཡིད་བཞིན་གྱི་ཚུལ་ཀུན་ཏུ་རྟོག་པར་བྱ་སྟེ། འདི་དག་ནི་གཟུགས་མེད་པ་ལས་ཇི་ལྟ་བུར་གང་མ་བཤད་པའི་བར་དུའོ། །ནམ་མཁའ་ཇི་ལྟར་ཁྲོ་བ་མེད་ཅིང་གཤེ་བ་མེད་པ་ལྟར་ཞེ་སྡང་གི་ཀུན་གཞིའང་དེ་བཞིན་ནོ། །ཡིད་ཀྱི་རྣམ་པར་ཤེས་པ་ཞི་བ་དེ་ལ་ཞེ་སྡང་མེད་ཅིང་གཤེ་བ་མེད་པ་དང་། ཅི་ལ་ཡང་ཆགས་པ་མེད་པ་དང་། ཁམས་གསུམ་ཐམས་ཅད་ཀྱི་ཞེ་སྡང་གི་ཀུན་གཞི་ཚོར་བ་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་དང་། མཚན་ཉིད་དང་བྲལ་བའི་བཟོད་པ་སྒོམ་པར་བྱེད་པ་འདི་ཡང་བྱང་ཆུབ་སེམས་དཔའི་སེམས་ཅན་ཐམས་ཅད་ཡོངས་སུ་སྨིན་པ་ཉེ་བར་འཚོ་བའི་བཟོད་པ་ཡོངས་སུ་སྨིན་པར་བྱའོ།། །།བམ་པོ་དྲུག་པ། རིགས་ཀྱི་བུ་གཞན་ཡང་བྱང་ཆུབ་སེམས་དཔའ་མིག་གིས་ནང་གིའམ་ཕྱིའི་གཟུགས་གང་ཇི་སྙེད་ཡོད་པ་དག་མཐོང་ནས། གང་ཡང་འདི་ལ་འདས་པ་དང་། མ་འོངས་པ་དང་། ད་ལྟར་བྱུང་
བའི་གཟུགས་ཡང་དག་པ་མ་ཡིན་པར་ཀུན་ཏུ་རྟོག་པ་མུན་པར་གྱུར་པ། འདོད་ཆགས་ཀྱི་གནས། ཞེ་སྡང་གི་གནས་ལ་རྟག་པ་དང་། བདེ་བ་དང་། ཐེར་ཟུག་པ་དང་། བདག་དང་། མི་གཡོ་བའི་འདུ་བྱེད་དུ་དམིགས་ལ་ཁམས་གསུམ་ལ་དམིགས་པའི་ཉོན་མོངས་པའི་རྐུན་པོ་སྐྱེ་ཞིང་འཕེལ་བ་དང་། ཁམས་གསུམ་པོ་ཐམས་ཅད་བསྡུས་ནས་རྣམ་པ་གཉིས་སུ་ཉེ་བར་འགྲོ། །ཉེ་བར་ལེན། བྱིན་གྱིས་རློབ། མངོན་པར་ཆགས་ཤིང་རྒྱུ་དང་རྐྱེན་གྲངས་མེད་དཔག་ཏུ་མེད་པ་ལ་དམིགས་ཤིང་ཉེ་བར་འཛིན་ཏེ། དེ་ལ་རང་བཞིན་གྱིས་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་མི་སྟོན། སྐྱེ་བ་དང་། འགོག་པ་དང་། འཇིག་པར་ཡང་ཉེ་བར་མི་རྟོག་གོ །བདག་དང་། སྲོག་དང་། གསོ་བ་དང་། གང་ཟག་ཏུ་དམིགས་ཤིང་རྟག་པ་དང་ཆད་པར་སྙེམས་ཏེ། ནང་དང་། ཕྱིའི་རྐྱེན་ལ་ཕུང་པོ་དང་། ཁམས་དང་། སྐྱེ་མཆེད་རྣམས་ཀྱང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས། རྒྱུ་དང་། འབྲས་བུ་དང་། ལས་དང་། རྣམ་པར་སྨིན་པའི་ཀུན་ནས་ལྡང་བ་ལ་དམིགས་པ་དང་། རྣམ་པར་དཔྱོད་པ་དང་། རྣམ་པར་དཔྱོད་པ་མེད་པ་དང་། འཁྲུགས་པ་དང་། མ་འཁྲུགས་པ་དང་། ཉེ་བར་ཞི་བ་དང་། ཡང་དག་པར་རྟོག་པ་དང་། ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཤིང་བདེ་བ་དང་། སྡུག་བསྔལ་གྱི་ཚོར་བ་དང་བྲལ་བ་ཤེས་རབ་ཀྱི་དབང་པོ་མ་སྐྱེས་པས་ཆོས་ལ་རྣམ་པར་རྟོག་པ་འདི་ཡང་སྡུག་བསྔལ་བ་ཡང་མེད། བདེ་བ་ཡང་མེད་པའི་ཚོར་བའོ། །དེ་ལ་བྱང་ཆུབ་སེམས་དཔས་ནང་དང་ཕྱིའི་མཚན་ཉིད་དུ་སྣང་བ་དང་། གཟུགས་ཀྱི་མཚན་ཉིད་དུ་སྣང་བ་གང་ཇི་སྙེད་ཡོད་པ་དག་ལ་ཡང་དག་པ་ཉིད་དང་། དེ་ཁོ་ན་ཉིད་དུ་བརྟག་པར་བྱའོ། །གང་ཇི་ལྟར་སྔར་བསྟན་པའི་འདོད་ཆགས་ཀྱི་གནས་དང་། ཞེ་སྡང་གི་གནས་ལ་འདི་ལྟར་རྟག་པའམ། སྐད་ཅིག་གིས་འཇིག་པའི་ཚུལ་དང་རྟག་པའམ། མི་རྟག་པའི་ཚུལ་དང་། བདེ་བའམ། སྡུག་བསྔལ་གྱི་ཚུལ་དང་། བདག་གམ་བདག་མེད་པའི་ཚུལ་དང་། ཁམས་གསུམ་པོ་ཐམས་ཅད་ཀྱི་འདུ་བྱེད་དང་། ཉོན་མོངས་པའི་རྒྱུན་མ་ཞི་བ་དང་། རྒྱུ་མེད་པ་དང་། བདག་པོ་མེད་པའི་རྒྱུན་མ་ཞི་བ་དང་། གཉིས་དང་བྲལ་བ་
མི་སྐྱེ་བ་ལ་མངོན་པར་མི་ཆགས་པའི་ཚུལ་གྱིས་ཡོངས་སུ་རྟོག་པ་དང་། ཁམས་གསུམ་པོ་ཐམས་ཅད་དང་། དུས་གསུམ་གྱི་སྡུག་བསྔལ་ཡང་མེད། བདེ་བ་ཡང་མེད་པའི་ཚོར་བ་མི་སྐྱེ་བ་ནི་ཚོར་བ་གཉིས་མི་སྐྱེ་བའི་མཐར་ཁོང་དུ་ཆུད་པར་བྱའོ། །དེ་དག་ནི་རྟག་པ་མེད་པའི་མཐའ་དང་། ཆད་པ་མེད་པའི་མཐའ་དང་། བརྗོད་དུ་མེད་པའི་རྗེས་ཀྱི་རྒྱུན་གྱི་མཐའ་དང་། ལུས་མེད་པའི་མཐའ་དང་། གནས་མེད་པའི་མཐར་ཁོང་དུ་ཆུད་པར་བྱའོ། །ཚིག་གི་ལམ་དང་བྲལ་བའི་བག་ལ་ཉལ་གྱི་སེམས་དང་། ཡིད་དང་རྣམ་པར་ཤེས་པ་ལ་སྡུག་བསྔལ་ཡང་མེད་བདེ་བ་ཡང་མེད་པའི་ཚོར་བ་མི་དམིགས་པར་སོ་སོར་བརྟག་པར་བྱའོ། །ཡང་དེ་ལྟར་ཞི་གནས་ཀྱི་ཚུལ་གྱིས་རྒྱུ་དང་། རྐྱེན་དང་རྒྱུ་མེད་པ་དང་། རྐྱེན་མེད་པའི་ལྷག་མཐོང་རྣམ་པ་བཅུ་གཉིས་ནི་ཡང་དག་པའི་ཤེས་རབ་ཀྱིས་གཏི་མུག་གི་མུན་པར་བལྟའོ། །འདི་ལ་མ་རིག་པའི་གནས་ཚུལ་བཞིན་མ་ཡིན་པ་ཡིད་ལ་བྱེད་པ་ནི་གང་། ཚུལ་བཞིན་མ་ཡིན་པ་ཡིད་ལ་བྱེད་པ་ནི་གང་ལ་དམིགས། ལུས་དང་། ངག་དང་། ཡིད་ཀྱི་འདུ་བྱེད་ལ་དམིགས་ན་ནི་ལུས་དེ་ཡང་འབྱུང་བ་ཆེན་པོ་བཞི་ལ་གནས་པ། འབྱུང་བ་ཆེན་པོ་བཞི་པོ་དེ་དག་ཀྱང་གཡོ་བ་འགྱུར་བ་མེད་པ། བདག་མེད་པ། བདག་གི་མེད་པ་སྟེ། ཇི་ལྟར་སྔར་བསྟན་པ་བཞིན་ནོ། །ཚིག་གི་ལམ་ཡང་དམིགས་སུ་མེད་པ། ཡི་གེ་མེད་པ་སྟེ། བདག་མི་དམིགས་པའི་ཕྱིར་གནས་མེད་པའོ། །ཡིད་ཀྱི་རྣམ་པར་ཤེས་པ་ཡང་གནས་མེད་པ། མི་གནས་པ་ཚིག་གི་ལམ་ཙམ་དུ་བརྗོད་པ་སྟེ། འདི་ལ་བདག་དང་། ཡན་ལག་ཅན་དང་། གང་ཟག་མེད་དོ། །ལུས་དང་། ངག་དང་། ཡིད་ཀྱི་དམིགས་པ་གཉི་ག་ཡང་སྟོང་པ་སྟེ། དེས་ན་མ་རིག་པ་ཡང་སྟོང་པའོ། །ལུང་དུ་མ་བསྟན་པའི་སེམས་ཀྱི་རྒྱུད་ཀྱང་འགྲོ་བ་མེད་པའོ། །མཚན་ཉིད་དུ་སྣང་བ་ཡང་བརྗོད་དུ་མེད་པའོ། །མ་རིག་པ་དང་། སྲིད་པའི་སྲེད་པ་དང་། སེམས་དང་། ཡིད་ཀྱི་རྣམ་པར་ཤེས་པ་དང་། ཁམས་གསུམ་དང་། དུས་གསུམ་ལ་དམིགས་པ་ཡང་ཡང་དག་པའི་མཐས་མི་དམིགས་ལ། དགེ་བ་དང་མི་དགེ་བ་ཡང་དགེ་བའི་མཚན་ཉིད་ཀྱིས་མེད་དེ། དེས་ན་མ་རིག་པ་ནི་སྟོང་པའོ། །ཡང་མ་རིག་པ་ནི་ཤིན་ཏུ་བྱང་ནས་འདུ་བྱེད་ལ་རྟོག་སྟེ། སྐད་ཅིག་མ་གང་ལ་མ་རིག་པ་སྐྱེ་བ་སྐད་ཅིག་མ་དེ་ཉིད་ལ་མི་གནས་ཤིང་འགག་
སྟེ། སྐད་ཅིག་མ་གཉིས་ལ་མི་གནས་སོ། །སྐད་ཅིག་མ་གཅིག་ལ་གཉི་ག་སྐྱེ་བའམ་འགག་པ་མེད་ཀྱི་མ་རིག་པ་འགགས་ནས་སྐད་ཅིག་མ་གཉིས་པ་ལ་འདུ་བྱེད་སྐྱེ་སྟེ། དེས་ན་མ་རིག་པ་སྟོང་པ་སྟེ་བདག་མེད་པའི་ངོ་བོའོ། །ཡང་སྐད་ཅིག་མ་གང་ལ་འདུ་བྱེད་སྐྱེ་བ་དེ་ལ་ལུས་ཀྱི་འདུ་བྱེད་དང་། ངག་གི་འདུ་བྱེད་དང་། ཡིད་ཀྱི་འདུ་བྱེད་དང་། འདུ་བྱེད་གསུམ་འགག་གོ །ཡང་ལུས་ཀྱི་འདུ་བྱེད་སྐྱེས་ནས། འདོད་ཆགས་དང་བྲལ་བའི་མཐའི་གནས་ན་ངག་གི་འདུ་བྱེད་སྐྱེའོ། །ཡང་རྣམ་པར་གྲོལ་བའི་མཐའ་ཡང་ཡིད་ཀྱི་འདུ་བྱེད་ཀྱི་རྗེས་ཀྱི་རྒྱུན་གྱིས་ངག་གི་འདུ་བྱེད་ལ་འཇུག་གོ །ལུས་ཀྱི་འདུ་བྱེད་དེ་མ་སྐྱེས་ན་ངག་དང་ཡིད་ཀྱི་འདུ་བྱེད་ཀྱི་འཇུག་པ་མི་སོགས་སོ། །འདུ་བྱེད་ཉེ་བར་ལེན་པ་ཡང་དག་པར་རྟོག་པ་དང་། ལུས་ཀྱི་འདུ་བྱེད་ཉེ་བར་འཚོ་བ་ལ་རྣམ་པར་དཔྱོད་ཅིང་ཆགས་པར་ཡང་མི་འགྱུར་རོ། །ཡིད་ཀྱི་འདུ་བྱེད་མ་སྐྱེས་ན་ལུས་དང་ངག་གི་འདུ་བྱེད་རྣམས་ཀྱི་དུས་གསུམ་གྱི་འཇུག་པ་བསགས་པ་བསལ་དུའང་མེད་དོ། །ངག་གི་འདུ་བྱེད་མ་སྐྱེས་ན་ལུས་དང་། ཡིད་ཀྱི་འདུ་བྱེད་རྣམས་ཀྱི་དུས་གསུམ་གྱི་འཇུག་པ་བསགས་པ་བསལ་དུའང་མེད་དོ། །ཡང་འདུ་བྱེད་གསུམ་གྱི་མཚན་ཉིད་ཀྱི་གནས་དེ་འདྲ་བས་ཁམས་གསུམ་ན་སྤྱོད་པའི་རྣམ་པར་ཤེས་པའི་གནས་དང་སྣང་བ་ཐོབ་བར་བྱེད་པ་ཡང་མེད། སེལ་བར་བྱེད་པ་ཡང་མེད་དེ། དེས་ན་དེ་དག་སྟོང་པའོ། །འདུ་བྱེད་ཀྱི་མཐའ་ལས་སྐྱེས་པ་ཡང་རང་བཞིན་གྱིས་བསལ་བས་རྣམ་པར་དག་པ་གཉིས་སུ་མེད་པའི་རྗེས་སུ་སོང་བ། སྨོན་པ་མེད་པ། འདུ་བྱེད་རྣམ་པར་གཞག་པ། ནམ་མཁའ་ལྟར་སྟོང་པའོ། །ལུས་ཀྱི་འདུ་བྱེད་ཀྱང་ཡང་དག་པའི་མཐའི་རང་བཞིན་བདག་མེད་པ་སྟེ། སྔོན་གྱི་མཐའ་དང་། ཕྱི་མའི་མཐའ་དང་། བར་དུ་ཡང་མ་བྱུང་བ་དང་། གནས་མེད་པའི་ཕྱིར་སྟོང་པའོ། །ངག་གི་འདུ་བྱེད་ཀྱང་ཚིག་གི་ལམ་དང་བྲལ་བའི་རྗེས་སུ་འགྲོ་བ། །ནམ་མཁའ་ལྟར་སྒྲོ་བཏགས་པ་སྟེ། ཁམས་གསུམ་དང་གཉིས་དང་བྲལ་བས་སྟོང་པའོ། །ཡིད་ཀྱི་འདུ་བྱེད་ཀྱང་ཐོབ་པ་མེད་པ། མངོན་སུམ་དུ་བྱ་བ་མེད་པ། དུས་གསུམ་ཐམས་ཅད་ཀྱི་མཚན་ཉིད་དང་བྲལ་བ་སེམས་ཅན་མེད་པ་ནས། གང་ཟག་གི་བར་དུ་བྱེད་པ་མེད་པ་ལ་རྣམ་པར་རྟོག་པ་གཏི་མུག་
གིས་རྣམ་པར་བསྒྲུབས་པ། མུན་པ་མེད་པ། སྣང་བ་མེད་པ། བླང་བ་མེད་པ། སྤྲོས་པ་མེད་པ། ཡི་གེ་མེད་པ། སྟོང་པ། ནམ་མཁའ་དང་མཚུངས་པའོ། །འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ལ་ཡོངས་སུ་རྟོག་པར་བྱེད་དེ། འདུ་བྱེད་རྣམས་ནི་སྐྱེས་ནས་འགག་པ་ཡིན་གྱི། རྣམ་པར་ཤེས་པའི་རྒྱུན་ནི་བཀྲི་བར་བྱ་བ་མེད་པ་སྟེ། རྣམ་པར་ཤེས་པའི་ཚོགས་དྲུག་པོ་འདི་དག་ཀྱང་འདྲ་བ་དང་། མི་འདྲ་བ་དང་། བདག་པོ་མེད་པ་དང་། སྐད་ཅིག་མ་དང་། འགོད་པའི་མཚན་ཉིད་ལ་མི་གནས་སོ། །ཡང་རྣམ་པར་ཤེས་པ་ནི་རྣམ་པར་དཔྱོད་པའི་མཚན་ཉིད་མི་དམིགས་པ་དང་། ནང་དང་ཕྱི་མི་དམིགས་པ་དང་། དགེ་བ་དང་། མི་དགེ་བ་མི་དམིགས་པ་དང་། ཟག་པ་དང་བཅས་པ་དང་། ཟག་པ་མེད་པ་མི་དམིགས་པ་དང་། འདུས་བྱས་དང་། འདུས་མ་བྱས་མི་དམིགས་པ་དང་། རྒྱུ་དང་རྐྱེན་མི་དམིགས་པ་དང་། ཁམས་གསུམ་གྱི་དང་། དུས་གསུམ་གྱི་ཚོར་བ་མི་དམིགས་པ་དང་། འདོད་པ་ལྔའི་ཡོན་ཏན་ཉམས་པ་མི་དམིགས་པ་དང་། འབྱུང་བ་ཆེན་པོ་བཞི་མི་དམིགས་པ་དང་། ཁམས་དྲུག་མི་དམིགས་པ་དང་། བསྒོམ་པ་དང་། ཚུལ་བཞིན་ཡིད་ལ་བྱེད་པ་དང་། བར་ཆད་མེད་པའི་ལམ་ནས་ཕུང་པོའི་ལྷག་མ་དང་བཅས་པ་དང་། ཕུང་པོའི་ལྷག་མ་མ་ལུས་པའི་བར་གྱི་རྣམ་པར་ཤེས་པ་མི་དམིགས་པས་གཟུགས་ལ་ཉེ་བར་བཀྲི་བ་མེད་པ་ནས། །ཡིད་ཀྱི་བར་ལ་ཉེ་བར་བཀྲི་བ་མེད་པ་སྒྱུ་མ་སྣང་བ་ལྟ་བུར་རང་བཞིན་མེད་པ། ལུས་མེད་པ་གནས་མེད་པའོ། །རྣམ་པར་ཤེས་པ་ནི་སྔོན་གྱི་མཐའ་དང་། ཕྱི་མའི་མཐའ་དང་། བར་གྱི་མཐའི་ཡང་དག་པའི་མཐའ་འབྱུང་བ་མེད་པས། གཟུགས་ཀྱི་མཚན་ཉིད་གང་དུ་ཡང་རྣམ་པར་བརྟག་པའི་གནས་སུ་སྣང་བ་དང་། སྤྱོད་པ་ཤེས་པར་མི་ནུས་ཏེ། དེས་ན་རྣམ་པར་ཤེས་པ་ནི་སྟོང་པའོ། །ཡང་རྣམ་པར་ཤེས་པའི་རྐྱེན་གྱིས་མིང་དང་གཟུགས་ལ་རྟོག་པར་བྱེད་དེ། སྐད་ཅིག་མ་གཅིག་ལ་རྣམ་པར་ཤེས་པ་སྐྱེས་ཤིང་འགགས་ནས་མིང་དང་གཟུགས་སྐྱེའོ། །མིང་ཡང་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་དང་། གཟུགས་མེད་པའི་ཕུང་པོ་འདི་དག་གོ །ཕུང་པོ་ཡང་རྫས་མེད་པའི་དོན་ཏེ། གཟུགས་ཀྱི་མཚན་ཉིད་དང་། དབྱིབས་ཀྱི་སྣང་བ་ལ་
མི་འཇུག་པས་དེ་དག་ནི་མིང་ཞེས་བྱའོ། །གཟུགས་ཞེས་བྱ་བ་ནི་འབྱུང་བ་ཆེན་པོ་བཞི་ལ་གཟུགས་ཞེས་བྱའོ། །གཟུགས་མེད་པའི་ཕུང་པོ་བཞི་པོ་འདི་དག་ཀྱང་དངོས་པོ་མེད་པ། གནས་མེད་པ། རྫས་མེད་པ། མཚན་ཉིད་མེད་པ། མཚན་ཉིད་དང་བྲལ་བ་སྟེ། ཚོར་བའི་རྣམ་པར་སྨིན་པའི་མཚན་ཉིད་རབ་ཏུ་མི་ཤེས་པའོ། །རྒྱུ་དང་རྐྱེན་ལ་དམིགས་པ་དང་འབྲས་བུ་འགྲུབ་པར་རབ་ཏུ་མི་ཤེས་པའོ། །ཆོས་འདི་དག་ནི་ཕན་ཚུན་ནས་འདུ་བ་དང་གནས་རྣམ་པར་དབྱེ་བ་རབ་ཏུ་མི་ཤེས་པའོ། །འདུ་ཤེས་དང་། འདུ་བྱེད་དང་། རྣམ་པར་ཤེས་པའི་ཕུང་པོའི་རྣམ་པར་སྨིན་པ་ནས་རྣམ་པར་ཕྱེ་བའི་བར་དུ་རབ་ཏུ་མི་ཤེས་པའོ། །དེ་ཅིའི་ཕྱིར་ཞེ་ན། ཆོས་འདི་དག་ཐམས་ཅད་ནི་ཁམས་གསུམ་ལས་གྲོལ་བ། དུས་གསུམ་ལས་ཤིན་ཏུ་འདས་པ། མཉམ་པ་མེད་པ། ཡོངས་སུ་འཛིན་པ་མེད་པ། ཁ་ཟས་མེད་པ། དངོས་པོ་མེད་པ། ཆགས་ཤིང་རྣམ་པར་རྟོག་པ་མེད་པ། སྒྲ་མེད་པ། འབྱུང་བ་མེད་པ། གཉིས་སུ་མེད་པ། རྒྱུ་མེད་པ། ཀུན་གཞི་མེད་པ། དབང་དུ་གྱུར་པ་མེད་པ། འཆི་འཕོ་མེད་པ། རྐྱེན་མེད་པ། མཚན་ཉིད་མེད་པ། བྱས་པ་མེད་པ། རྒྱུ་མེད་པ། བདག་གི་མེད་པ། བརྗོད་དུ་མེད་པ། ཆད་པ་མེད་པ། རྟག་པ་མེད་པ། བྱ་བ་མེད་པ། མིང་མེད་པའོ། །གནས་མེད་པས་གཟུགས་མེད་པའོ། །ཡིད་མེད་པའོ། །རྣམ་པར་རྟོག་པ་མེད་པའོ། །རྣམ་པར་སྨིན་པ་མེད་པའོ། །རྣམ་པར་ཤེས་པ་མེད་པའོ། །གཞལ་བ་མེད་པའོ། །མངོན་པར་འགྲུབ་པ་མེད་པའོ། །དུས་གསུམ་དང་ཁམས་གསུམ་ཐམས་ཅད་ཀྱི་གཟུགས་མེད་པའོ། །ཕུང་པོ་བཞི་པོ་འདི་དག་ནི་ནམ་མཁའ་དང་མཚུངས་པའོ། །མཚན་ཉིད་མེད་པའོ། །རླུང་དང་མཚུངས་པའོ། །རྟོག་པ་མེད་པའོ། །མིག་གི་ལམ་དུ་བརྗོད་པའི་མཚན་ཉིད་དོ། །དུས་གསུམ་ཐ་དད་པ་མེད་ཅིང་འགྲོ་བ་མེད་པའི་ཚུལ་གྱིས་ཡང་དག་པའི་མཐའི་རྗེས་སུ་མ་ཞུགས་པའོ། །འཇུག་པ་མེད་པའོ། །མུན་པ་མེད་པའོ། །སྣང་བ་མེད་པའོ། །རང་བཞིན་མེད་པའོ། །ངོ་བོ་ཉིད་ཀྱིས་རྩ་བ་མེད་པའོ། །ཡི་གེ་མེད་པའོ། །དེ་དག་ནི་གང་དུ་ཡང་བསྒོམ་པ་དང་སྐྱེས་པ་དང་མ་སྐྱེས་པ་དང་། འོང་བ་དང་། འགྲོ་བ་དང་། བསགས་པ་མེད་པའོ། ཁམས་གསུམ་ཐམས་
ཅད་ན་གཏམ་གྱི་དངོས་པོར་གདགས་པའི་མཚན་ཉིད་ཀྱི་འཇུག་པ་མེད་པའོ། །བླང་བ་མེད་པའོ། །དོར་བ་མེད་པའོ། །གཟུགས་མེད་པའི་ཕུང་པོ་བཞི་པོ་འདི་དག་ནི་མཚན་ཉིད་ཀྱི་འཇུག་པ་མེད་པའོ། །ཕུང་པོ་འདི་དག་ནི་མིག་གི་གནས་ཀྱི་དབྱིབས་སུ་མི་གནས་པ་ནས། ལུས་ཀྱི་གནས་ཀྱི་བར་གྱི་དབྱིབས་སུ་མི་གནས་པ་ཡིན་ནོ། །ལུས་ཀྱི་རྣམ་པར་ཤེས་པའི་གནས་ཀྱི་དབྱིབས་སུ་གནས་པ་མ་ཡིན། སེམས་དང་། ཡིད་དང་། རྣམ་པར་ཤེས་པའི་གནས་སེལ་བའི་བརྡ་དང་། མཚན་མ་རྣམ་པར་གཞག་པར་རྣམ་པར་གཞག་པ་མ་ཡིན་ནོ། །གཟུགས་མེད་པའི་ཕུང་པོ་བཞི་པོ་འདི་དག་ནི་གནས་ཀྱི་དབྱིབས་སུ་གནས་ཀྱང་གཟུགས་མེད་པའི་ཕུང་པོ་བཞི་པོ་འདི་དག་ནི་གཟུགས་ཀྱི་ཕུང་པོའི་གནས་ཀྱི་དབྱིབས་སུ་གནས་པ་མ་ཡིན་ནོ། ཁམས་གསུམ་གྱི་ལས་ཀྱི་མཚན་ཉིད་རྣམ་པར་དཔྱོད་པའི་རྗེས་སུ་འབྲེལ་པ་གཟུགས་མེད་པའི་ཕུང་པོ་བཞི་པོ་འདི་དག་ནི་གནས་ཀྱི་དབྱིབས་སུ་མི་གནས་པའོ། །དེ་དག་ནི་བདག་མེད་པ་ནས་གང་ཟག་གི་བར་དུ་མེད་པའོ། །བརྗོད་དུ་མེད་པའོ། །ཡི་གེ་མེད་པའོ། །གཟུགས་མེད་པའི་ཕུང་པོ་བཞི་པོ་འདི་དག་ནི་སྟོང་པའི་མཚན་ཉིད་ཀྱིས་ཤིན་ཏུ་སྐད་ཅིག་གིས་འཇིག་པ་ཐེར་ཟུག་མ་ཡིན་པའོ། །གནས་མི་དམིགས་པས་མཚན་མ་མེད་པའོ། །སྐད་ཅིག་གིས་སྐྱེ་ཞིང་འབྲི་བའི་ཚུལ་གྱིས་སྨོན་པ་མེད་པའོ། །འགོག་པ་མེད་པས་ཆགས་པ་མེད་པའི་ཤེས་རབ་འཇུག་པ་སྟེ། དེས་ན་ཕུང་པོ་བཞི་པོ་འདི་དག་ནི་སྟོང་པའོ། །གཟུགས་ཀྱི་ཕུང་པོ་འབྱུང་བ་ཆེན་པོ་འདི་དག་ཀྱང་ཇི་ལྟར་སྔར་བསྟན་པ་བཞིན་དུ་སྟོང་པའོ། །ཉེ་བར་ལེན་པའི་ཕུང་པོ་ལྔ་པོ་འདི་དག་ཀྱང་སྐད་ཅིག་མའི་རྒྱུན་གྱི་ཚུལ་གྱིས་སྐྱེ་བ་མ་ཡིན། ཕན་ཚུན་ལས་ཤིན་ཏུ་འདས་ཤིང་མི་གནས་པའི་ཚུལ་གྱིས་མ་ཡིན། ཕན་ཚུན་དུ་ཉེ་བར་ཉོན་མོངས་པ་མ་ཡིན། ཕན་ཚུན་ལས་ཤིན་ཏུ་འདའ་བ་མ་ཡིན་ནོ། །སྐད་ཅིག་མ་དང་པོ་ལ་གཟུགས་མེད་པར་མིང་སྐྱེ་བ་མ་ཡིན། སྐད་ཅིག་མ་གཉིས་པའི་གནས་ལ་མིང་མེད་པར་གཟུགས་སྐྱེ་བ་མ་ཡིན་གྱི། སྐད་ཅིག་མ་གཅིག་གི་གནས་ལ་ཉེ་བར་ལེན་པའི་ཕུང་པོ་ལྔ་པོ་འདི་དག་ཐམས་ཅད་སྐྱེ་ཞིང་འགག་སྟེ། སྐད་ཅིག་མ་ལྷག་མ་གཉིས་པོ་ལ་གནས་པ་མ་ཡིན་ནོ། །དེ་ཅིའི་ཕྱིར་ཞེ་
ན། ཇི་ལྟར་སེམས་ལས་བྱུང་བའི་ཆོས་མྱུར་དུ་འགྱུར་བ་བཞིན་དུ་བསྒྲུབ་པར་སླ་བ་ཡིན་ཏེ། དེ་དག་ཀྱང་དངོས་པོ་མེད་པ་སྐད་ཅིག་གིས་འཇིག་པར་གནས་པ་མ་ཡིན་ནོ། །ཡང་མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་ལ་རྟོག་པར་བྱེད་དེ། མིང་དང་གཟུགས་ལ་སྐྱེས་ཤིང་འགགས་ནས་སྐད་ཅིག་མ་གཉིས་པ་ལ་སྐྱེ་མཆེད་དྲུག་སྐྱེ་སྟེ། །སྐྱེ་མཆེད་དྲུག་པོ་འདི་དག་ནི་མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་དོ། །མིག་གི་རྣམ་པར་ཤེས་པ་ཡང་རྣ་བའི་རྣམ་པར་ཤེས་པ་དང་འདྲེ་བ་དང་འབྲེལ་བའི་ལ་སོགས་པ་མ་ཡིན། གཅིག་ལ་གཅིག་འབྲེལ་པ་སེལ་བ་མ་ཡིན། མིག་གི་རྣམ་པར་ཤེས་པའི་ལས་ཀྱི་དམིགས་པ་སྐྱེས་པ་རྣ་བའི་རྣམ་པར་ཤེས་པའི་སྐད་ཅིག་མར་བྱ་བར་མི་ནུས། རྣ་བའི་རྣམ་པར་ཤེས་པའི་དམིགས་པ་ཡང་མིག་གི་རྣམ་པར་ཤེས་པའི་དམིགས་པའི་རྒྱུར་མི་སྐྱེད་པ་ནས་ཡིད་ཀྱི་རྣམ་པར་ཤེས་པའི་བར་དུ་བརྗོད་པར་བྱའོ། །མིག་གི་རྣམ་པར་ཤེས་པ་ཡང་རྟག་པ་དང་མི་རྟག་པ་དང་འདྲེས་ཏེ་འབྱུང་བ་མ་ཡིན། ཁམས་གསུམ་གྱི་ཆད་པ་དང་རྟག་པའི་མཐའ་དང་འདྲེས་ཏེ་འབྱུང་བ་མ་ཡིན། ཆོས་ཐམས་ཅད་དུས་གསུམ་དང་། ཐ་མི་དད་པའི་མཐའ་ཉེ་བར་ལེན་པ་མ་ཡིན་པ་ནས། ཡིད་ཀྱི་རྣམ་པར་ཤེས་པའི་བར་དུ་བརྗོད་པར་བྱའོ། །མིག་གི་རྣམ་པར་ཤེས་པ་ནི་བདེ་བ་དང་སྡུག་བསྔལ་གྱི་དངོས་པོའི་བདག་གི་མཐའ་དང་འདྲེས་ཏེ་འབྱུང་བ་མ་ཡིན། བདག་དང་བདག་མེད་པ་མ་ཡིན། སྡུག་པ་དང་མི་སྡུག་པ་མ་ཡིན། འདུས་བྱས་དང་འདུས་མ་བྱས་མ་ཡིན། ཆད་པ་དང་རྟག་པ་མ་ཡིན། མཚན་མ་དང་མཚན་མ་མེད་པ་མ་ཡིན།གཉིས་སུ་མ་ཡིན། གཉིས་སུ་མེད་པའི་མཐའ་མ་ཡིན། ཡང་དག་པའི་མཐའ་ཉེ་བར་འཛིན་པ་མ་ཡིན་པ་ནས། ཡིད་ཀྱི་རྣམ་པར་ཤེས་པའི་བར་དག་ཀྱང་ངོ་། །མིག་གི་རྣམ་པར་ཤེས་པ་ལ་གཟུགས་ཀྱི་མཚན་ཉིད་སྟོང་པའམ་མི་སྟོང་པ་ཞེས་ཆགས་པ་མེད། སེལ་བ་མེད། ཐ་དད་པ་མེད། བདེ་བ་དང་། སྡུག་བསྔལ་བ་དང་། ནང་དང་ཕྱིའི་རྣམ་པར་སྨིག་རྒྱུ་བ་ལྟ་བུ་དང་འདྲེས་ཏེ་འབྱུང་བ་མ་ཡིན། ཐེག་པ་གསུམ་དང་། མི་ཁོམ་པའི་མཐའ་དང་། འཇིག་ཚོགས་ཀྱི་མཐའ་སེལ་བ་མ་ཡིན། གསུམ་གྱིས་གུས་པའི་ཚུལ་དུ་བྱེད་པ་མ་ཡིན། ཟད་མི་ཤེས་པའི་མཐའ་རྣམ་པར་འཁྱམ་པ་
མ་ཡིན་པ་ནས། ཡིད་ཀྱི་རྣམ་པར་ཤེས་པ་ལ་ཚོར་བ་སྐད་ཅིག་མ་བདེན་པ་དང་། མི་བདེན་པ་ཉེ་བར་འགྲོ་བ་མེད། སྐྱེད་པ་མེད་པ་ནས། ཡིད་ཀྱི་རྣམ་པར་ཤེས་པའི་བར་དུ་བརྗོད་པར་བྱའོ། །སྒྱུ་མ་ལྟ་བུའི་མིག་གི་རྣམ་པར་ཤེས་པ་ཡོད་པ་མ་ཡིན་པ་འདི་ལ་སྐད་ཅིག་མའི་སྤྱོད་པ་མེད། ཤེས་པ་མེད། སྣང་བ་མེད། ཡི་གེ་མེད་དེ། སྐད་ཅིག་མའི་མི་སྐྱེ་བ་དང་། འགོག་པ་དང་། ཆོས་འདི་དག་ནི་སྐད་ཅིག་མ་གཅིག་ལ་སྐྱེ་ཞིང་འགག་སྟེ། འདི་ལ་བྱེད་པ་པོ་དང་། བྱེད་དུ་འཇུག་པ་པོ་དང་། ཚོར་བ་པོ་དང་། ཚོར་བར་བྱེད་པ་པོ་དང་། སྐྱེད་པ་པོ་དང་། སྐྱེད་པར་བྱེད་པ་དང་། ལྡང་བར་བྱེད་པ་དང་། ལྡང་བར་བྱེད་དུ་འཇུག་པ་དང་། བྱིན་གྱིས་རློབ་པ་པོ་དང་། རྣམ་པར་འཇིག་པ་པོ་མེད་དོ། །དེ་དག་ནི་སྐད་ཅིག་མ་དང་པོ་ལ་སྐྱེས་ལ་སྐད་ཅིག་མ་གཉིས་པ་ལ་གནས་པ་མ་ཡིན། སྐྱེས་ནས་ཕན་ཚུན་ཐ་དད་པར་བྱེད་པ་མ་ཡིན། རྒྱུ་མེད་པ་ལས་བྱུང་བ་མ་ཡིན་ཏེ། ཆོས་དེ་དག་ནི་སྐད་ཅིག་གིས་འཇིག་པའི་མཚན་ཉིད་པས་དེས་ན་དེ་དག་ནི་སྟོང་པའོ། །ཡང་དག་པ་མ་ཡིན་པ་ཀུན་ཏུ་རྟོག་པ་ལས་སྐྱེས་ཤིང་འགག་སྟེ། དེས་ན་དེ་དག་ནི་སྟོང་པའོ། །སྐྱེ་མཆེད་དྲུག་གི་རྐྱེན་གྱིས་རེག་པ་ལ་རྟོག་པར་བྱེད་དེ། རྣམ་པར་ཤེས་པ་དྲུག་གི་ཚོགས་སྐྱེས་ཤིང་འགགས་པ་དང་། སྐད་ཅིག་མ་གཉིས་པའི་གནས་ལ་མིག་གི་འདུས་ཏེ་རེག་པ་ནས། ཡིད་ཀྱི་འདུས་ཏེ་རེག་པའི་བར་དག་གི་འདུས་ཏེ་རེག་པ་དྲུག་གི་ཚོགས་སྐྱེ་བའི་རྒྱུ་མེད་དོ། །དེ་ལ་མིག་གི་འདུས་ཏེ་རེག་པ་ནི་མིག་གི་རྣམ་པར་ཤེས་པས་ཡུལ་ལ་རེག་པ་ལ་གནས་པའི་བྱ་བ་སྟེ། ཆགས་པར་བྱ་བའི་ཕྱིར་སྐད་ཅིག་མ་གཉིས་པ་ལ་འབྱུང་བའོ། །དེ་ནི་གཉིས་ཀ་ཡང་དངོས་པོ་མེད་པ་སྟེ། ནམ་མཁའ་ལ་བརྟག་པའི་མཚན་ཉིད་ལྟ་བུའོ། །མིག་གི་ཡུལ་གྱི་རེག་པ་ནི་མིག་གི་རྣམ་པར་ཤེས་པ་ལ་གནས་པའི་ཆགས་པར་བྱ་བའི་དོན་དུ་སྐད་ཅིག་མ་གཉིས་ལ་འབྱུང་བ་ནི་མ་ཡིན་ནོ། །དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་དང་ཡིད་ཀྱང་བརྗོད་པར་བྱའོ། །མིག་གི་རྣམ་པར་ཤེས་པའི་རྐྱེན་ཀྱང་གཟུགས་ཀྱི་འདུས་ཏེ་རེག་པ་ལ་དམིགས་པ་ལ་ཡོད་པའི་མཚན་ཉིད་ཀྱི་རང་བཞིན་དུ་ཆགས་པར་བྱ་བའི་ཕྱིར་སྐད་ཅིག་མ་གཉིས་ལ་འབྱུང་བ་ནི་མ་ཡིན་ནོ། །དེ་ནི་གཉིས་ཀ་
ཡང་དངོས་པོ་མེད་པ་སྟེ། ནམ་མཁའ་ལ་བརྟག་པ་ལྟ་བུའོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་བརྗོད་པར་བྱའོ། །མིག་ནི་མིག་གིས་གཉིས་སུ་མེད་དེ། གཉིས་ཀ་ཡང་དངོས་པོ་མེད་པའི་ཕྱིར་རོ། །མིག་ནི་མིག་གི་རྣམ་པར་ཤེས་པས་གཉིས་སུ་མེད་དེ། གཉིས་ཀ་ཡང་དངོས་པོ་མེད་པའི་ཕྱིར་རོ། །མིག་གི་རྣམ་པར་ཤེས་པ་ཡང་ཡུལ་གྱི་འདུས་ཏེ་རེག་པ་དང་གཉིས་སུ་མེད་དེ། གཉིས་ཀ་ཡང་དངོས་པོ་མེད་པའི་ཕྱིར་རོ། །དེ་བཞིན་དུ་གནས་པའི་བྱ་བ་ཡང་ཆགས་པར་བྱ་བས་གཉིས་སུ་མེད་ཅིང་དངོས་པོ་མེད་དེ། ནམ་མཁའ་ལ་བརྟག་པའི་མཚན་ཉིད་ལྟ་བུའི་ཕྱིར་རོ། །དངོས་པོ་འདི་དག་ནི་མཚན་ཉིད་མེད་པར་རྣམ་པར་བརྟག་སྟེ། བྱ་བ་མེད་པ། ཆགས་པ་མེད་པའི་མཚན་ཉིད་ཞེན་པ་མེད་པའོ། །དུས་གསུམ་དང་ཁམས་གསུམ་དེ་དག་ཐམས་ཅད་ནི་ཆོས་ཀྱི་དབྱིངས་རྣམ་པར་མི་རྟོག་པ་ཆོས་ངེས་པར་སེམས་པ་ཤེས་པ་མེད་པ་སྦྱོར་བ་ལས་རྣམ་པར་བཟློག་པ། དཀའ་བ་མེད་པ། བྱིས་པ་སེམས་ཅན་ཇི་ལྟ་བ་བཞིན་དུ་མིང་མེད་པ། རྐྱེན་མེད་པ། ཁ་དོག་དང་མཚན་མ་མེད་པ། གནས་པ་མེད་པ། རྣམ་པར་དམིགས་པ་མེད་པ། བརྗོད་དུ་མེད་པ་ཡིན་ན། ནམ་མཁའི་རང་བཞིན་ལྟ་བུ་ལ་ཆོས་དང་ཆོས་ཀྱི་དབྱིངས་ཐ་དད་དུ་འབྱེད་དོ། །རང་གི་རྒྱུད་ཀྱི་ཡོངས་སུ་རྟོག་པས་ཆོས་ཀྱི་དབྱིངས་གཅིག་ལ་ཚུལ་སྣ་ཚོགས་ཀྱིས་དེ་ལྟར་ཐ་དད་དུ་འབྱེད་དོ། །མིང་དང་། རྐྱེན་དང་། ཁ་དོག་དང་། མཚན་དང་དབྱིབས་སུ་འདོགས་སོ། །འདོད་པའི་ཡོན་ཏན་ལྔ་ནི་སྐྱེ་བ་མེད་པ། ལྡང་བ་མེད་པ་མཚན་ཉིད་མེད་པ། རྣམ་པར་གཞག་པ་མེད་པའོ། །རྣམ་པར་ཐར་པ་གསུམ་ནི་དབྱིངས་གཅིག་པའི་རང་བཞིན་གྱི་ངོ་བོ་ཉིད་དེ་དུས་གསུམ་ཐམས་ཅད་ལ་རྣམ་པར་མི་རྟོག་པའི་ཆོས་ཀྱི་དབྱིངས་ནམ་མཁའི་ལམ་ལྟ་བུར་རྣམ་པར་དཔྱད་པ་སྟེ། དེས་ནི་མིག་གི་ཡུལ་དང་། མིག་གི་རྣམ་པར་ཤེས་པའི་ཡུལ་གྱི་འདུས་ཏེ་རེག་པ་དང་། ཁམས་གསུམ་ཐམས་ཅད་ལ་འཇུག་པ་དང་། མཚན་དང་ཁ་དོག་དང་། དབྱིབས་དང་བྲལ་བ་ནམ་མཁའ་ལ་བརྟག་པའི་མཚན་ཉིད་ལྟ་བུ་ལ་འཇུག་པ་ཐམས་ཅད་ཀྱང་ཆོས་ཀྱི་དབྱིངས་སོ། །དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་དང་།
ཡིད་ཀྱི་རྣམ་པར་ཤེས་པའི་འདུས་ཏེ་རེག་པ་ཡང་གཉིས་སུ་མེད་པ་སྟེ། གཉི་ག་ཡང་དངོས་པོ་མེད་པའི་ཕྱིར་རོ། །དེས་ན་རྣམ་པར་ཤེས་པ་དང་འདུས་ཏེ་རེག་པ་ལྡང་བ་ཇི་སྙེད་པ་ཐམས་ཅད་དང་། ཁམས་གསུམ་པ་ཐམས་ཅད་ཁོང་དུ་ཆུད་པ་དང་། ཁ་དོག་དང་། མཚན་དང་། དབྱིབས་ཁོང་དུ་ཆུད་པ་དང་། ནམ་མཁའ་ལ་བརྟག་པ་ལ་འཇུག་པ་ཡང་ཆོས་ཀྱི་དབྱིངས་སོ། །གང་རེག་པའི་སྐྱེ་མཆེད་དྲུག་ལ་རྣམ་པར་དཔྱོད་ཅིང་འབྲེལ་པར་འབྱུང་བ་ཀུན་ཏུ་སློང་བའི་རྣམ་པར་དཔྱོད་པ་ཁོང་དུ་ཆུད་པ་ཆགས་པ་ཐམས་ཅད་བརྗོད་པས་བཅིངས་པ། བདུད་ཀྱི་དབང་དུ་སོང་བ་ནི་བདུད་ཀྱི་འདོད་པ་ཇི་ལྟ་བ་བཞིན་དུ་བྱེད་པའོ། །གང་རེག་པའི་སྐྱེ་མཆེད་དྲུག་ལ་མི་དཔྱོད་ཅིང་མི་སྐྱེ་བ་ཀུན་ཏུ་སློང་བ་དང་། ཁ་དོག་དང་། དབྱིབས་ཐམས་ཅད་སེལ་བ་དང་། སྐད་ཅིག་གིས་འཇིག་པ། ནམ་མཁའ་ལ་བརྟག་པའི་མཚན་ཉིད་ལྟ་བུ་འདི་ནི་འཇིག་རྟེན་ལས་འདས་པ་བརྗོད་དུ་མེད་པའི་ཡེ་ཤེས་ཁོང་དུ་ཆུད་པའོ། །གང་གཟུགས་ལ་རོ་མྱང་ཞིང་རེག་པའི་སྐྱེ་མཆེད་དྲུག་དང་། འདོད་པའི་ཡོན་ཏན་ལྔ་ལ་རྟག་པའམ། མི་རྟག་པ་ཞེས་དཔྱོད་པ་ཁོང་དུ་ཆུད་ཅིང་ཆགས་པ་ཐམས་ཅད་བརྗོད་པའི་བར་དག་ཀྱང་བདུད་ཀྱི་འདོད་པ་ཇི་ལྟ་བ་བཞིན་དུ་བྱེད་པའོ། །གང་ཡང་གཟུགས་ལ་རོ་མྱང་བ་དང་འདོད་པ་ལྔའི་ཡོན་ཏན་དང་། རེག་པའི་སྐྱེ་མཆེད་དྲུག་ལ་རྟག་པའམ། མི་རྟག་པ་ཞེས་རྣམ་པར་དཔྱོད་པར་ནུས་པ། ཀུན་ཏུ་སློང་བའི་མཚན་ཉིད་ཡིད་ལ་བྱེད་པ་དེ་ནི་ཆགས་པ་ཐམས་ཅད་ཡོངས་སུ་གཅོད་པ་འཇིག་རྟེན་ལས་འདས་པ་བརྗོད་དུ་མེད་པ་ཁོང་དུ་ཆུད་པའི་བྱང་ཆུབ་ཀྱི་ལམ་རྣམ་པར་སྦྱོང་བའོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། གང་ཡང་རྣམ་པར་ཤེས་པ་དང་། རེག་པའི་སྐྱེ་མཆེད་དྲུག་ལ་རྟག་པའམ། མི་རྟག་པ་ཞེས་དཔྱོད་པ་ཁོང་དུ་ཆུད་པ་ཆགས་པ་ཐམས་ཅད་བརྗོད་པའི་བར་དེ་ཡང་བདུད་ཀྱི་འདོད་པ་ཇི་ལྟ་བ་བཞིན་དུ་བྱེད་པའོ། །གང་ཡང་ཡིད་ཀྱི་རྣམ་པར་ཤེས་པ་དང་རེག་པའི་སྐྱེ་མཆེད་དྲུག་ལ་འདོད་པའི་ཡོན་ཏན་ལྔའི་རོ་མྱང་བར་མི་བྱེད་ཅིང་མུན་པ་ཡང་མེད། སྣང་བ་ཡང་མེད་དེ་ནམ་མཁའ་ལྟར་གཉིས་ལྟ་བུར་བྱ་བ་མ་ཡིན་པ་འདི་ཡང་འཇིག་རྟེན་ལས་འདས་པ་བརྗོད་དུ་མེད་པ་
ཁོང་དུ་ཆུད་པའི་བྱང་ཆུབ་ཀྱི་ལམ་རྣམ་པར་སྦྱོང་བའོ། །ཆོས་འདི་དག་ནི་འདུ་ཤེས་དང་སེམས་པ་དང་སྐད་ཅིག་མའི་རྒྱུན་གྱིས་འཇུག་པ་མ་ཡིན་ནོ། །རེག་པ་ཕན་ཚུན་འདྲེས་ནས་འབྱུང་བར་བྱེད་པ་ཡང་མ་ཡིན་ནོ། །སྐད་ཅིག་མའི་རྒྱུན་གྱིས་ཕན་ཚུན་སྐྱེད་པར་བྱེད་པ་ཡང་མ་ཡིན་ནོ། །འགོག་པར་བྱེད་པ་ཡང་མ་ཡིན་ནོ། །ཆོས་འདི་དག་ནི་སྐད་ཅིག་མ་དང་པོ་ལ་སྐྱེས་ནས་སྐད་ཅིག་མ་འདི་ཉིད་ལ་འཇིག་སྟེ། སྐད་ཅིག་མ་གཉིས་པ་ལ་གནས་པ་མ་ཡིན་ནོ། །དེ་འགགས་ཏེ་རེག་པའི་སྐྱེ་མཆེད་དྲུག་དང་། འདུ་ཤེས་དང་སེམས་པ་འཇིག་པའི་སྐད་ཅིག་མ་གཉིས་པ་ལ་ཚོར་བ་སྐྱེའོ། །དེ་ལ་ཚོར་བ་གང་ཞེ་ན། ཚོར་བའི་ཚོགས་དྲུག་གོ །མིག་གིས་རེག་ནས་ཚོར་བ་སྐྱེ་སྟེ། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་འདུས་ཏེ་རེག་པ་ལས་སྐྱེས་པའི་ཚོར་བ་སྐྱེ་སྟེ། དེ་ཡང་སྐད་ཅིག་མ་གཅིག་མ་ཡིན། ལས་གཅིག་རྣམ་པར་དམིགས་པའི་སྐད་ཅིག་མ་མ་ཡིན། ཚོར་བ་གསུམ་ནི་བདེ་བའི་ཚོར་བ་དང་། སྡུག་བསྔལ་གྱི་ཚོར་བ་དང་། བདེ་བ་ཡང་མེད་སྡུག་བསྔལ་ཡང་མེད་པའི་ཚོར་བ་སྟེ། དུས་གསུམ་དང་། ཁམས་གསུམ་ཐམས་ཅད་ཀྱི་རེག་པའི་སྐྱེ་མཆེད་དྲུག་ལ་ཚོར་བ་རྣམ་པ་གསུམ་པོ་སྟོང་པར་ཁོང་དུ་ཆུད་པར་བྱ་སྟེ། ཇི་ལྟར་སྔར་བསྟན་པ་བཞིན་ནོ། ཡང་ལ་ལ་དག་འདི་སྐད་ཅེས་གང་རེག་པའི་སྐྱེ་མཆེད་དྲུག་ལས་ཚོར་བ་རྣམ་གསུམ་སྐྱེ་སྟེ། སྐལ་བ་མཉམ་པར་ཕུང་པོ་ལ་རྣམ་པར་དཔྱོད་པ་ལས་གནས་པ་དེ་ལྟ་བུ་ནི་རྟག་པར་ལྟ་བ་ཞེས་འཛེར་ཏོ། ཡང་གང་དག་འདི་སྐད་ཅེས་གང་རེག་པའི་སྐྱེ་མཆེད་དྲུག་ལས་ཚོར་བ་རྣམ་གསུམ་སྐྱེ་སྟེ། ཕུང་པོ་མེད་པའི་ཚིག་ལ་གནས་པ་དེ་ལྟ་བུའི་ཆད་པ་ཞེས་ཟེར་ཏེ། གཉི་ག་ཡང་ཡོངས་སུ་སྤང་བར་བྱའོ། །དེ་ཅིའི་ཕྱིར་ཞེ་ན། ཕུང་པོ་རྣམས་ནི་རྣམ་པར་མི་རྟོག་པ་སྟེ། ཕྱིར་ལྡོག་པ་ལ་གནས་པ་འདི་ནི་བཟོད་པའོ། །འདི་ལྟ་སྟེ། དཔེར་ན་འབྱུང་བ་ཆེན་པོའི་ལུས་ཀྱི་ཕྱི་རོལ་སེམས་མེད་པ་དེ་ལ་ནི་བསྐྱེད་པར་བྱ་བའི་གཟུགས་དང་། མི་བྱ་བའི་གཟུགས་ཀྱི་གློག་གིས་སྣང་བར་བྱེད། ལུས་ཀྱི་ནང་དུ་ནི་སྣང་བར་མི་བྱེད། གློག་ནི་གཟུགས་ཀྱི་རྐྱེན་ལས་སྐྱེས་པ་མ་ཡིན། གཟུགས་རྣམ་པར་དམིགས་པ་མ་ཡིན། གཟུགས་ཀྱི་གནས་མ་ཡིན། གཟུགས་
ཀྱི་རོ་མྱོང་བར་བྱེད་པ་མ་ཡིན། གློག་གི་གཟུགས་ཕན་ཚུན་ལ་འཇུག་པ་མ་ཡིན། གཟུགས་མཚན་མར་འཛིན་པ་མ་ཡིན། གཟུགས་སྤངས་ནས་སྣང་བར་བྱེད་པ་མ་ཡིན་ནོ། །གློག་གི་གཟུགས་ཀྱི་ས་དང་འཐུན་པར་འབྲེལ་ཏེ་བྱུང་བ་མ་ཡིན། གཟུགས་ལ་སོགས་པ་དང་། འགག་པ་མ་ཡིན་པ་དེ་བཞིན་དུ་མྱུར་བའི་ཕྱིར་རེག་པའི་སྐྱེ་མཆེད་དྲུག་ལ་གཟུགས་མེད་པའི་ཕུང་པོ་བཞི་སྣང་བར་བྱེད་དེ། འདི་ལ་ཚོར་བ་གསུམ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་འཇུག་གོ །འདུ་ཤེས་དང་། འདུ་བྱེད་དང་། རྣམ་པར་ཤེས་པའི་རྣམ་པར་རིག་པས་འདུ་བྱེད་ཀྱི་སྡུག་བསྔལ་སྐྱེད་པ་ནི་མ་ཡིན་ནོ། །ཚོར་བ་ལ་གནས་པ་མ་ཡིན་ནོ། །ཚོར་བ་བསྒྲུབ་པ་མ་ཡིན་ནོ། །ཚོར་བའི་རྗེས་སུ་འགྲོ་བ་མ་ཡིན་ནོ། །ཚོར་བ་འཕེལ་བར་བྱེད་པ་མ་ཡིན་ནོ། །ཚོར་བའི་རོ་མྱང་བའི་ཕྱིར་མ་ཡིན་ནོ། །ཚོར་བ་མཚན་མར་འཛིན་པའི་ཕྱིར་མ་ཡིན་ནོ། །ཚོར་བ་ལ་ཀུན་ཏུ་དམིགས་པའི་ཕྱིར་མ་ཡིན་ནོ། །ཚོར་བའི་རོ་མྱང་བ་དང་མཚུངས་ཤིང་འདྲ་བའི་ཕུང་པོ་ལ་འདུ་བྱེད་ཀྱི་སྡུག་བསྔལ་དང་། སྡུག་བསྔལ་བའི་སྡུག་བསྔལ་སྐྱེད་པ་མ་ཡིན་ནོ། །ཚོར་བ་སྐྱེས་པ་ན་འདུ་བྱེད་འགག་པ་མ་ཡིན་ནོ། །ཚོར་བ་འགགས་པ་ན་འདུ་བྱེད་རྣམས་སོགས་པ་མ་ཡིན་ནོ། །འདི་ལྟ་སྟེ་དཔེར་ན་གློག་ནི་ནམ་མཁའ་བོར་ནས་གཟུགས་རྣམས་ལ་སྣང་བར་བྱེད་པ་མ་ཡིན་ཏེ། ནམ་མཁའ་དང་གློག་གཉི་ག་ཡང་རྫས་མེད་ཅིང་བརྗོད་དུ་མེད་པ་དེ་བཞིན་དུ་ཆོས་རྣམས་དང་། མིང་དང་གཟུགས་དང་། ཚོར་བ་རྣམས་ཀྱང་ཕན་ཚུན་ཐ་དད་པར་མི་བྱེད་དོ། ཁམས་གསུམ་ཐམས་ཅད་ཀྱང་རྫས་མེད་པ། བརྗོད་དུ་མེད་པ། ཡི་གེ་མེད་པ་སྟེ། སྐད་ཅིག་མའི་རྒྱུན་གྱིས་གནས་པ་མ་ཡིན། ཕན་ཚུན་དུ་སོགས་ཤིང་འཕེལ་བས་ཆོས་ཀྱི་དབྱིངས་ཐ་དད་དུ་བྱེད་པ་མ་ཡིན་ཏེ། དེས་ན་དེ་དག་ནི་སྟོང་པའོ། །སྐད་ཅིག་མ་གང་ལ་སྐྱེས་པ་སྐད་ཅིག་མ་དེ་ཉིད་ལ་འགག་སྟེ། སྐད་ཅིག་མའི་རྒྱུན་ལ་གནས་པ་མ་ཡིན་ནོ། །དེས་ན་ཁམས་གསུམ་དང་། དུས་གསུམ་དང་། ཕུང་པོ་དང་། ཁམས་དང་། སྐྱེ་མཆེད་ཐམས་ཅད་འབྱུང་བ་མེད་པ། སྤྱོད་པ་མེད་པ། བརྗོད་དུ་མེད་པ། སྟོང་པའོ། །མེ་ཏོག་གི་གློག་གིས་བརྒྱན་པ་འདི་ནི་རྒྱ་མཚོའི་ཕྱག་རྒྱ་ཟད་མི་ཤེས་པ་
སྣང་བའི་ཆོས་ཀྱི་སྒོའི་གནས་ཀྱི་ཚུལ་ཞེས་བྱའོ། །སྐད་ཅིག་མ་དང་པོ་ལ་ཚོར་བ་སྐྱེས་ཏེ་འགགས་ནས་སྐད་ཅིག་མ་གཉིས་པ་ལ་སྲེད་པ་སྐྱེའོ། །དེ་ལ་སྲེད་པ་གང་ཞེ་ན། སྲེད་པའི་ཚོགས་དྲུག་སྟེ། མིག་གི་འདུས་ཏེ་རེག་པ་ནས་ཡིད་ཀྱི་འདུས་ཏེ་རེག་པའི་བར་གྱི་སྲེད་པ་འབྱུང་ངོ་། །གང་གཟུགས་ལ་མངོན་པར་དགའ་བ། གཏི་མུག་གི་དྲ་བསྒྲུབ་པ། ལུས་དང་། གཟུགས་དང་། སྒྲ་དང་། དྲི་དང་། རོ་དང་། རེག་བྱ་ལ་འཇུག་པ་ཐིབས་པོ་ནི་ནམ་མཁའ་བཞིན་ནོ། །གཟུགས་ལ་ཡོངས་སུ་མི་རྟོག་པའི་ཚོར་བ་ནི་གློག་དང་ནམ་མཁའ་བཞིན་ནོ། །འདུ་ཤེས་ནི་རླུང་དང་། ནམ་མཁའ་བཞིན་ནོ། །འདུ་བྱེད་རྣམས་ནི་སྤྲིན་མེད་པའི་ནམ་མཁའ་བཞིན་ནོ། །རྣམ་པར་ཤེས་པ་ནི་སྨིག་རྒྱུ་བ་དང་ནམ་མཁའ་བཞིན་ནོ། །གཟུགས་ལ་ཡོངས་སུ་མི་རྟོག་ཅིང་ཐེར་ཟུག་ཏུ་མོས་ཏེ། མི་རྟག་པ་ཉིད་ཡོངས་སུ་མི་རྟོག་པ་འདི་ནི་སྲིད་པ་ཞེས་བྱའོ། །གཞན་ཡང་གཟུགས་ལ་སྡུག་བསྔལ་དུ་ཡོངས་སུ་མི་རྟོག་པ་དང་། སྒྲ་དང་དྲི་ལ་ཀུན་འབྱུང་བ་དང་། འགོག་པར་ཡོངས་སུ་མི་རྟོག་པ་དང་། རོ་ལ་ལམ་དུ་ཡོངས་སུ་མི་རྟོག་པ་དང་། རེག་བྱ་ལ་སྐྱེ་བ་དང་། འགོག་པ་བརྗོད་དུ་མེད་པར་ཡོངས་སུ་མི་རྟོག་པ་འདི་ནི་སྲིད་པའི་གནས་ལ་ཆགས་པ། ཁམས་གསུམ་ཐམས་ཅད་དུ་འཕྲོ་བ། དུས་གསུམ་གྱི་དངོས་པོ་ལ་སྲེད་པའི་གནས་ཞེས་བྱའོ། །བྱིས་པ་སོ་སོའི་སྐྱེ་བོ་ངན་པ་རྣམས་ནི་འཁོར་བའི་ཆུ་ཀླུང་གི་རྒྱུན་གྱི་ཤུགས་འབབ་པ་ལ་མངོན་པར་བརྩོན་པ་སྟེ། དེ་ལ་བྱང་ཆུབ་སེམས་དཔས་གཟུགས་ལ་འདི་ལྟར་ཚུལ་བཞིན་གྱིས་སོ་སོར་བརྟག་པར་བྱ་སྟེ། འབྱུང་བ་ཆེན་པོ་བཞིའི་གཟུགས་འདི་ནི་ནང་དང་། འགོད་པའི་མཚན་ཉིད་དོ། །གང་རབ་ཏུ་རྣམ་པར་འཇིག་པའི་མཚན་ཉིད་དེ་ནི་མི་རྟག་པ་སྟེ། ཇི་ལྟར་འབྱུང་བ་ཆེན་པོ་ཡོངས་སུ་བརྟག་པ་སྔར་བསྟན་པ་དེ་བཞིན་དུ་སོ་སོར་བརྟག་གོ །འདོད་པའི་ཡོན་ཏན་ལྔ་ལ་ནི་སྡོང་པོའི་ཚུལ་དུ་སོ་སོར་བརྟག་པར་བྱ་སྟེ། ཇི་ལྟར་སྡོང་པོ་ནམ་མཁའ་ལ་གནས་བཅས་ཏེ་མི་གནས་ཤིང་ས་ལ་བརྟེན་ཏེ། གནས་པ་དེ་བཞིན་དུ་གཟུགས་ནི་དབུ་བའི་གོང་བུ་ལྟ་བུ་སྟེ། གཟུགས་དང་གཟུགས་མེད་པའི་རྣམ་པར་དམིགས་པས་གཟུགས་དང་
གཟུགས་མེད་པ་ལ་འཇུག །གཟུགས་དང་གཟུགས་མེད་པ་དང་མི་འབྲལ། གཟུགས་དང་གཟུགས་མེད་པའི་ལས་དང་། གཟུགས་དང་གཟུགས་མེད་པ་སྤངས་ནས་དབུ་བའི་གོང་བུ་ལྟར་སྙིང་པོ་མེད་པར་བརྟགས་ན་སྟོང་པ་སྟེ། འཇུག་པ་དང་མི་འཇུག་པ་ནི་ཇི་ལྟར་རླུང་འདུས་པའི་རྐྱེན་གྱིས་ཁ་ནས་སྒྲ་འབྱུང་བ། ཡི་གེ་མེད་ཅིང་བརྗོད་དུ་མེད་པ་དེ་བཞིན་དུ་ཁམས་གསུམ་གྱི་སྒྲ་ཡང་སྟོང་པར་ཁོང་དུ་ཆུད་པར་བྱའོ། །ཇི་ལྟར་རླུང་འདུས་པ་དང་། ནམ་མཁའི་རླུང་དང་། ནམ་མཁའི་དྲི་མེད་དེ་སྟོང་པ་དེ་བཞིན་དུ་ཁམས་གསུམ་ཡང་དྲི་ལྟ་བུར་ཁོང་དུ་ཆུད་པར་བྱའོ། །ཇི་ལྟར་བུམ་པ་ཆར་པའི་ཐིགས་པས་གང་བ་ཡང་དེའི་ནང་དུ་སུས་ཀྱང་ཐིགས་པ་བླུགས་པ་མེད། བསྒྲུབས་པ་མེད། བྱས་པ་མེད། བྱེད་དུ་བཅུག་པ་མེད་དེ། ཐམས་ཅད་ཡོངས་སུ་བཟུང་བ་དང་། ཉེ་བར་སྤྱད་པ་དང་བྲལ་བ་དེ་བཞིན་དུ་ཁམས་གསུམ་བདག་དང་བཅས་པའི་རོའི་ཡོན་ཏན་ཡང་སྟོང་པར་ཁོང་དུ་ཆུད་པར་བྱའོ། །ཇི་ལྟར་བུམ་པ་གང་ཡང་ནམ་མཁའ་དང་འདྲེས་པར་བསྒྲུབས་པ་མེད་དེ། ཇི་ལྟར་ནམ་མཁའ་ལ་མ་ཡིན། ནམ་མཁའ་དང་བུམ་པ་ཕན་ཚུན་རེག་པ་དང་བྲལ་བ་སེམས་མེད་པ་དེ་བཞིན་དུ་ཁམས་གསུམ་གྱི་རེག་པ་ཡང་སྟོང་པར་ཁོང་དུ་ཆུད་པར་བྱའོ། །འདོད་པའི་ཡོན་ཏན་ལྔ་ལ་གཏི་མུག་གི་འཁོར་ལོས་བུང་བ་མེ་ཏོག་གི་དྲི་ལ་ཆགས་པ་དེ་བཞིན་དུ་གང་ཡང་འདོད་པའི་སྲེད་པ་དང་། གང་ཡང་གཟུགས་ཀྱི་སྲེད་པ་འདི་དག་ནི་འདོད་པའི་ཡོན་ཏན་ལྔའི་ཚུལ་གྱིས་སྟོང་པར་ཁོང་དུ་ཆུད་པར་བྱའོ། །གང་ཡང་གཟུགས་མེད་པའི་ཕུང་པོ་བཞི་ལ་སྲེད་པ་གཟུགས་མེད་པ་ནི་ཡི་གེ་མེད་པ་རང་བཞིན་མེད་པ་སྟེ། ཅུང་ཟད་མ་ཡོད་པའི་ཚུལ་གྱིས་ཇི་ལྟར་སྔར་བསྟན་པ་བཞིན་དུ་སྟོང་པར་ཁོང་དུ་ཆུད་པར་བྱའོ། །ཇི་ལྟར་ནམ་མཁའ་ལ་བརྟེན་ཏེ། རླུང་རྒྱུ་བ་ནི་ནམ་མཁའ་ལ་རླུང་གིས་འདྲེས་པར་བྱས་ཤིང་ཆགས་པ་ཡང་མེད་དེ། ནམ་མཁའ་ལས་ཀྱང་རླུང་ལ་མ་ཡིན་ཞིང་གཉི་ག་ཡང་བརྗོད་དུ་མེད་ཅིང་ཡི་གེ་མེད་པ་དེ་བཞིན་དུ་གཟུགས་མེད་པའི་ཕུང་པོ་ཡང་ཕན་ཚུན་དངོས་པོ་མེད་པར་འགྲུབ་ཅིང་ལྡན་པ་སྟེ། ཕན་ཚུན་གནོད་པ་དང་། སྦྱོར་བ་དང་། འདྲེ་བ་དང་། ཆགས་པ་དང་། གནོད་པར་བྱེད་པ་མེད་པ་དེ་བཞིན་དུ་
ཕུང་པོ་འདི་དག་ཀྱང་ཆོས་ཐམས་ཅད་མི་སྐྱེ་བའི་ཚུལ་གྱིས་དངོས་པོའི་མཚན་ཉིད་དུ་ཉེ་བར་མི་འགྲོ་ཞིང་སྐྱེད་པ་མེད་པར་ཁོང་དུ་ཆུད་པར་བྱའོ། །ཇི་ལྟར་ནམ་མཁའ་དང་། རླུང་དང་། གློག་ཡི་གེ་མེད་ཅིང་བརྗོད་དུ་མེད་དེ་ལྷན་ཅིག་ཏུ་རྒྱུ་ཡང་ཕན་ཚུན་ཆགས་པ་མེད་པ་བཞིན་དུ་མྱ་ངན་ལས་འདས་པ་ཡང་ཟད་པ་མེད་དོ། །ཇི་ལྟར་མྱ་ངན་ལས་འདས་པ་ཟད་པ་ཡང་མ་ཡིན་མི་ཟད་པ་ཡང་མ་ཡིན་པ་དེ་བཞིན་དུ་ཆོས་ཐམས་ཅད་ཀྱང་མྱ་ངན་ལས་འདས་པ་དང་མཉམ་སྟེ། མཉམ་པ་ཡང་མེད། མི་མཉམ་པ་ཡང་མེད་ལ་གཉེན་པོ་མི་དམིགས་ཏེ། གཉིས་སུ་བྱ་བ་མ་ཡིན་ཞིང་ཆོས་ཐམས་ཅད་ཆོས་ཀྱི་དབྱིངས་དང་མཚུངས་པར་སྤྱོད་པར་ཤེས་ནས་ཆོས་ཀྱི་དབྱིངས་དང་ཡང་དག་པའི་མཐའ་ལ་སྐྱེ་བའམ། འགག་པ་ཅུང་ཟད་ཀྱང་མི་སེམས་ཏེ། དེས་ན་ཆོས་ཀྱི་དབྱིངས་ནི་གནས་མེད་པའི་མཐའ་སྟེ། དེ་ནི་ཡང་དག་པའི་མཐའོ། །གང་ཡང་དག་པའི་མཐའ་དེ་ནི་ཆོས་ཐམས་ཅད་ཀྱི་མཐའོ། །དེ་ནི་དཀྱིལ་འཁོར་གསུམ་ཡོངས་སུ་གཅོད་པའི་མཐའོ། །དེ་ནི་གཅོད་པ་མེད་ཅིང་འབྱེད་པ་མེད་པའི་མཐའོ། །དེ་ནི་ཆད་པ་མེད་ཅིང་རྟག་པ་མེད་པའི་མཐའོ། །ཇི་ལྟ་བ་བཞིན་གྱི་མཐའ་སྟེ། མཐའ་དེས་ཆོས་ཐམས་ཅད་མཐར་གྱུར་པ་སྟེ། མཐའ་ཇི་སྙེད་པ་དང་། མཐའ་མེད་པ་ནི་མི་གཉིས་པ་སྟེ། སྲིད་པའི་སྲེད་པ་མི་དམིགས་པའི་ཕྱིར་རོ། །སྲོག་དང་འགྲོ་བ་དང་། གསོ་བ་དང་། གང་ཟག་ཐམས་ཅད་ནི་གཉིས་སུ་མེད་པའི་མཐའོ། །ཡང་དག་པའི་མཐའ་དང་། འཇིག་ཚོགས་ཀྱི་མཐའ་དང་། སྲེད་པ་སེལ་བ་ཡང་མི་གཉིས་པའི་མཐའོ། །དེ་ལྟར་ན་འཇིག་ཚོགས་ཀྱི་མཐའ་དང་འདོད་པ་གཅོད་པ་ཡོད་དོ། །དེ་ལྟར་རབ་ཏུ་ཤེས་ན་འཇིག་ཚོགས་ལ་ལྟ་བའི་ཆ་ཉི་ཤུར་འགྱུར་རོ། །ཡང་དག་པའི་མཐའ་ནི་སྲེད་པའི་འཇུག་པ་དང་མཚུངས་པ་ཉིད་མ་ཡིན་ནོ། །ཡང་དག་པའི་མཐའ་ནི་སོང་བ་མེད་དོ། །ནམ་སོང་བ་ན་ཟད་པ་མེད་འགོད་པ་མེད་དེ་ཤིན་ཏུ་མཐར་གྱུར་པ་དེ་བཞིན་དུ་སྲེད་པ་ཡང་མི་ཟད་པའི་སྒོ་སྟེ། ཆོས་ཐམས་ཅད་ཀྱང་མི་ཟད་པའོ། །རང་བཞིན་མེད་པའོ། །ཆོས་ཐམས་ཅད་མ་སྐྱེས་པར་ཤེས་ནས་ཀུན་ནས་བསྐོར་བ་ཐམས་ཅད་གཅོད་པ་ནི་བརྗོད་དུ་མེད་པའི་དོན་སངས་རྒྱས་ཀྱི་སྐུ་མཐའ་ཡས་པ་
ཡོངས་སུ་འགྲུབ་པ་སྒྲུབ་པའི་བཟོད་པའི་སྒོའི་གཏེར་གྱི་གཟུངས་རབ་ཏུ་ཐོབ་བོ། །གཟུངས་དེ་རབ་ཏུ་ཐོབ་ནས་བྱང་ཆུབ་སེམས་དཔའ་ཕྱོགས་བཅུའི་སངས་རྒྱས་ཀྱི་སྐུ་མངོན་པར་གྲུབ་པ་སྟོན་ཏེ། མིག་གི་མཉམ་པ་ཉིད་ལས་མི་གཡོ་བར་སེམས་ཅན་རྣམས་ལ་འཆི་འཕོ་དང་སྐྱེ་བ་ཡང་སྟོན་ལ། འཆི་འཕོ་ཡང་མེད་སྐྱེ་བ་ཡང་མེད། གང་དུ་ཡང་འགྲོ་ཞིང་འོང་བར་འཇུག་པ་ཡང་མེད། འདུ་བྱེད་རྣམས་ལ་རྣམ་པར་རྟོག་པ་ཡང་མེད་དོ། །དེ་ལྟར་དོན་དུ་གཉེར་ཞིང་མངོན་པར་རྟོག་པའི་བྱང་ཆུབ་སེམས་དཔའ་རྣམས་སྐད་ཅིག་ལ་སྲེད་པ་ལ་ཞུགས་ནས་སྐད་ཅིག་མ་གཉིས་པ་ལ་ལེན་པ་མངོན་པར་འགྲུབ་བོ། །ལེན་པ་གང་ཞེ་ན། ལེན་པ་བཞི་སྟེ། འདོད་པའི་ལེན་པ་དང་། ལྟ་བའི་ལེན་པ་དང་། ཚུལ་ཁྲིམས་ཀྱི་ལེན་པ་དང་། བདག་ཏུ་སྨྲ་བའི་ལེན་པའོ། །དེ་ལ་འདོད་པའི་ལེན་པ་གང་ཞེ་ན། འདོད་པའི་རོ་མྱོང་བར་བྱེད་པ་དང་། བདེ་བ་ལ་མངོན་པར་དགའ་ཞིང་མངོན་པར་ཆགས་ཞེན་པ་འདི་ནི་འདོད་པའི་ལེན་པ་ཞེས་བྱའོ། །དེ་ལ་ལྟ་བའི་ལེན་པ་གང་ཞེ་ན། ཆད་པའམ་རྟག་པ་ཞེས་བྱ་བ་ནས་ལྟ་བར་སོང་བ་དྲུག་ཅུ་རྩ་གཉིས་ཀྱི་བར་དེ་ནི་ལྟ་བའི་ལེན་པ་ཞེས་བྱའོ། །དེ་ལ་ཚུལ་ཁྲིམས་ཀྱི་ལེན་པ་གང་ཞེ་ན། གང་དག་འཕགས་པའི་བསྟན་པའི་ཚུལ་ཁྲིམས་དང་བརྟུལ་ཞུགས་དང་དཀའ་ཐུབ་དང་ཚངས་པར་སྤྱོད་པའི་གནས་དང་སྦྱངས་པའི་ཡོན་ཏན་དང་།ཡོ་བྱད་བསྙུངས་པ་དང་གང་ཡང་ཞགས་པ་འཐུབ་པ་དགུ་བཅུ་རྩ་ལྔའི་ཚུལ་ཁྲིམས་དང་། བརྟུལ་ཞུགས་དང་། དཀའ་ཐུབ་དང་། ཚངས་པར་སྤྱོད་པའི་གནས་དང་། སྦྱངས་པའི་ཡོན་ཏན་དང་། ཡོ་བྱད་བསྙུངས་པ་འདི་ནི་ཚུལ་ཁྲིམས་ཀྱི་ལེན་པའོ། །གང་དག་འདི་སྙམ་དུ་སེམས་ཏེ། བདག་དང་། སེམས་ཅན་དང་། སྲོག་དང་། འགྲོ་བ་དང་། ཤེད་ལས་སྐྱེས་པ་དང་། ཤེད་ཅན་དང་། བྱེད་པ་པོ་དང་། བྱེད་དུ་འཇུག་པ་དང་། ལྡང་བར་བྱེད་པ་དང་། ལྡང་བར་བྱེད་དུ་འཇུག་པ་དང་། ཚོར་བ་པོ་དང་། སྐྱེད་པ་པོ་དང་། སྐྱེད་དུ་འཇུག་པ་བྱུང་ཞིང་འབྱུང་བ་ཡོད་དོ་སྙམ་པ་འདི་ནི་བདག་ཏུ་སྨྲ་བའི་ལེན་པ་ཞེས་བྱ་སྟེ། དེ་དག་ནི་ལེན་པ་བཞིའོ། །དེ་ལ་བྱང་ཆུབ་སེམས་དཔའ་བརྗོད་དུ་མེད་པའི་ཚུལ་གྱིས་ཡང་དག་པ་མ་ཡིན་པ་དང་མ་བྱུང་བར་རྟོག་གོ །ཆོས་
ཐམས་ཅད་མཚན་ཉིད་གཅིག་སྟེ། དབྱེར་མེད་པའི་ཚུལ་གྱིས་དངོས་པོ་མེད་པ་དང་། བརྗོད་དུ་མེད་པ་དང་། ཚིག་གི་ལམ་མ་ཡིན་པ་དང་། ཆུའི་ཟླ་བ་ལྟ་བུ་དང་། ནམ་མཁའ་ལ་རྟག་པའི་མཚན་ཉིད་དང་། ཆོས་ཀྱི་དབྱིངས་དབྱེར་མེད་པར་ཡོངས་སུ་རྟོག་གོ །གང་ལ་འདོད་པའི་རོ་མྱང་ཞིང་མངོན་པར་དགའ་བ་དེ་ནི་སྡུག་བསྔལ་ལ་མངོན་པར་དགའ་བའོ། །འདོད་པའི་གནས་སོ། །མངོན་པར་ཞེན་པའོ། །བྱང་ཆུབ་སེམས་དཔའ་གང་མིག་གིས་ཤེས་པར་བྱ་བའི་གཟུགས་མཛེས་པ་སྡུག་པ་ཡིད་དུ་འོང་བ་མཐོང་ན། མིག་གི་རྣམ་པར་ཤེས་པ་ལ་མེའི་ཕུང་པོ་ཇི་ལྟ་བ་བཞིན་དུ་ཚུལ་བཞིན་གྱིས་རྟོག་སྟེ། མིག་གི་རྣམ་པར་ཤེས་པས་བརྟག་ཏུ་མེད་པའི་ཕུང་པོ་དེ་ཡང་རྫས་མེད་པ། བརྗོད་དུ་མེད་པ་ཡི་གེ་མེད་པ། དངོས་པོ་མི་དམིགས་པར་རྟོག་གོ །མིག་གི་རྣམ་པར་ཤེས་པ་དེ་ཡང་དངོས་པོ་མི་དམིགས་པའི་ཕྱིར་རྫས་མེད་པ། མཚན་ཉིད་མེད་པའོ། །ནམ་མཁའ་དང་། མེ་དང་། མིག་དེ་ཡང་དངོས་པོ་མི་དམིགས་པས་བརྗོད་དུ་མེད་ཅིང་ཡི་གེ་མེད་པ་དེ་བཞིན་དུ་གཟུགས་སྡུག་པ་ནས་འདོད་པ་དང་ལྡན་པའི་བར་དུ་མཐོང་ན་མིག་གི་རྣམ་པར་ཤེས་པ་དེ་དང་། གཟུགས་དེ་གཉི་ག་དང་། བར་གྱི་ནམ་མཁའི་བར་དུ་ཡང་དངོས་པོ་མི་དམིགས་སོ། །གང་གིས་མེ་མཐོང་བར་མིག་གི་རྣམ་པར་ཤེས་པ་སྐྱེས་ནས་དེ་འགགས་ཏེ་སྐད་ཅིག་མ་གཉིས་པ་ལ་གནས་པ་མ་ཡིན་ནོ། །སྐད་ཅིག་མ་གཉིས་པ་ལ་ཚོར་བ་སྐྱེ་སྟེ། ཇི་ལྟར་འོད་འཕྲོ་བའི་ཕུང་པོ་བཞིན་དུ་དམིགས་སོ། །ཚོར་བ་དེ་ཡང་བརྗོད་དུ་མེད་པ། ཡི་གེ་མེད་པ། མཚན་མ་དང་བྲལ་བའོ། །ཚོར་བ་སྐྱེས་ཏེ་འགགས་ནས་སྐད་ཅིག་མ་གཞན་གྱི་གནས་ལ་འདུ་ཤེས་སྐྱེ་སྟེ། མེ་ལྕེ་འབར་བའི་འོད་འཕྲོ་བ་བཞིན་དུ་ཤེས་པར་བྱའོ། །དེ་ཡང་འདུ་ཤེས་སྐྱེས་ནས་འགགས་པའི་བར་དུ་སྟེ། སྐད་ཅིག་མ་གཉིས་པའི་གནས་ལ་འདུ་བྱེད་རྣམས་སྐྱེ་སྟེ། གང་ཆུང་ངུ་དང་། ཚད་མེད་པ་དང་། གང་རིང་བ་དང་། གང་ཉེ་བའི་འོད་འཕྲོ་བ་བཞིན་དུ་རབ་ཏུ་ཤེས་ཏེ། འདུ་བྱེད་རྣམས་སྐྱེས་ནས་འགགས་པའི་བར་དུའོ། །སྐད་ཅིག་མ་གཞན་ལ་རྣམ་པར་ཤེས་པ་སྐྱེ་སྟེ། ཇི་ལྟར་འོད་འཕྲོ་བའི་ཕུང་པོ་སྐྱེ་བ་དང་འཇིག་པ་བཞིན་དུ་རབ་ཏུ་ཤེས་ཏེ། རྣམ་པར་ཤེས་པ་དེ་ཡང་
བརྗོད་དུ་མེད་པ། ཡི་གེ་མེད་པར་གནས་པ། སྐད་ཅིག་གིས་འཇིག་པ་སྟེ། ནམ་མཁའ་ལ་བརྟག་པ་ལྟ་བུའོ། །དེ་ལ་མེའི་བར་གྱི་ནམ་མཁའ་དེ་ཡང་རྫས་མེད་པ། བརྗོད་དུ་མེད་པ། ཡི་གེ་མེད་པའོ། །གལ་ཏེ་འོད་འཕྲོ་བའི་ཕུང་པོ་གང་སྐྱེས་ནས་འབར་བ་དང་། འགག་པ་མཐོང་བ་ཐམས་ཅད་ཀྱང་ནམ་མཁའ་དང་མཚུངས་པའི་མཚན་ཉིད་དེ། བརྗོད་དུ་མེད་པ་དངོས་པོ་མེད་པ་སྟེ། འོད་འཕྲོ་བ་གཅིག་ཀྱང་རྐྱེན་མེད་པ། གྲངས་མེད་པའོ། །ཆོས་འདི་དག་ཐམས་ཅད་སྐྱེ་ཞིང་འགག་པ་དེ་བཞིན་དུ་བྱང་ཆུབ་སེམས་དཔས་འདོད་པའི་ཡོན་ཏན་ལྔ་ལ་སྐྱེ་བ་དང་། འགག་པ་དང་། ནམ་མཁའ་ལ་བརྟག་པ་ལྟ་བུ་དང་། བརྗོད་དུ་མེད་པ་དང་། དངོས་པོ་མེད་པར་བརྟག་ཅིང་བཟོད་པ་བསྒོམ་པར་བྱའོ། །དོན་འདི་དག་ནི་བཅོམ་ལྡན་འདས་ཀྱིས་གསུངས་ཏེ། དེ་ལ་འདི་སྐད་ཅེས་བྱའོ། །གཟུགས་ནི་མེ་ཡི་ཕུང་པོ་འདྲ། །འདོད་པ་ཡང་དག་ཉིད་མཐོང་ནས། །མིག་གི་རྣམ་ཤེས་འདུས་མ་བྱས། །མིག་ནི་འོད་འཕྲོ་འདྲ་བར་ཤེས། །གཉི་ག་རྫས་དང་བྲལ་བ་སྟེ། །བརྗོད་དུ་མེད་ཅིང་ཡི་གེ་མེད། །འོད་འཕྲོ་སྨིག་རྒྱུ་འདྲ་བ་སྟེ། །རྣམ་པར་ཤེས་པ་སྒྱུ་མ་འདྲ། །མྱུར་དུ་སྐྱེ་ཞིང་འཇིག་པ་ཡང་། །གཉི་ག་དངོས་པོ་མེད་པ་སྟེ། །སྐད་ཅིག་གཉིས་པར་འོད་འཕྲོ་ཡི། །དྲོ་བ་ཐ་དད་ཤེས་པ་མེད། །སྐྱེས་ནས་སྐད་ཅིག་འཇིག་པ་ཡི། །ཚོར་བ་ཆུ་ཡི་ཆུ་བུར་འདྲ། །འདུ་ཤེས་དེ་ཡང་མེ་ལྕེ་ལྟར། །རབ་ཏུ་ཤེས་ཏེ་མཚན་ཉིད་མེད། །འདུ་ཤེས་དང་ནི་འདུ་བྱེད་རྣམས། །སྐད་ཅིག་གཉིས་ལ་འགོག་པའོ། །ཚད་མེད་དག་དང་ཆུང་ངུ་ཡང་། །འོད་འཕྲོའི་ཕུང་པོ་འདྲ་བར་ཤེས། །འདུ་བྱེད་རྣམས་ནི་འགོག་པ་ལྟར། །དེ་ལྟར་རྣམ་ཤེས་རྗེས་སུ་འགྲོ། །འགགས་ནས་ཀྱང་ནི་ཡང་སྐྱེ་སྟེ། །འོད་འཕྲོ་ཕུང་པོ་འདྲ་བར་ཤེས། །དེ་ལྟར་འོད་འཕྲོ་རྫས་མེད་དེ། །གཟུགས་རྣམས་མཐོང་བ་སྒྱུ་མ་བཞིན། །མྱུར་ཞིང་གཡོ་བ་མེད་བཞིན་དུ། །ཕུང་པོ་ལྔ་རྣམས་རྗེས་སུ་འཇུག །ནམ་མཁའ་ལ་ནི་རྒྱུ་བ་ཀུན། །མེ་ཡི་ཕུང་པོ་འབར་བ་འདྲ། །རྫས་ཡོད་མ་ཡིན་བརྗོད་མེད་དེ། །དེ་དག་ཐམས་ཅད་དངོས་པོ་མེད། །དེ་ལྟར་འདོད་པའི་ལེན་པ་ཡང་། །འདོད་པའི་ཡོན་ཏན་ལྔ་ལ་དགའ། །སྐད་ཅིག་འཇིག་པའི་རྒྱུན་དག་ཀྱང་། །ཐམས་ཅད་སྟོང་པ་དངོས་
པོ་མེད། །བྱང་ཆུབ་སེམས་དཔའ་འཇིགས་མེད་པ། །དེ་ལྟར་འདོད་པ་རྣམས་བརྟགས་ནས། །འདོད་སེམས་ཡོངས་སུ་ཟད་བྱེད་ཅིང་། །ཚུལ་བཞིན་དུ་ནི་བཟོད་པ་སྒོམ། །འདོད་པ་རྣམས་ནི་མེ་འདྲ་སྟེ། །རོ་མྱང་བྱ་བའི་མི་རིགས་སྟོན། །སྒྱུ་མ་སྨིག་རྒྱུ་ཚུལ་གྱིས་ནི། །ཚོར་བ་ཆུ་ཡི་ཆུ་བུར་འདྲ། །གང་གིས་འདོད་པ་ཤེས་བྱེད་པའི། །རྣམ་པར་ཤེས་པ་སྒྱུ་མ་འདྲ། །ཐམས་ཅད་ནམ་མཁའ་འདྲ་བར་ཡང་། །དེ་ལྟར་བཟོད་པ་རྣམ་པར་སྒོམ། །རིགས་ཀྱི་བུ་དེ་ལ་ལྟ་བའི་ལེན་པ་གང་ཞེ་ན། རིགས་ཀྱི་བུ་གང་ཕུང་པོ་ལྔ་ལ་བརྟག་པར་ལྟ་བ་སྟེ། གནས་སུ་སྙེམས་པ་དང་། ཡང་དག་པ་མ་ཡིན་པ་ཀུན་ཏུ་རྟོག་པ་དང་། གཏི་མུག་གིས་རྣམ་པར་བསྒྲུབས་པས་གཟུགས་ལ་རྣམ་པར་རྟོག །གཟུགས་ལ་མངོན་པར་ཆགས། གཟུགས་ཀྱི་རོ་མྱོང་བར་བྱེད། བདེ་བ་དང་སྡུག་བསྔལ་བར་རློམ་ཞིང་སྙེམས་སོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཡང་རྟོག་པ་ནས་སྙེམས་པའི་བར་འདི་ནི་རྟག་པར་ལྟ་བ་ཞེས་བྱའོ། །རིགས་ཀྱི་བུ་དེ་ལ་ཆད་པར་ལྟ་བ་ནི་གང་ལེགས་པར་བྱས་པ་དང་། ཉེས་པར་བྱས་པ་རྣམས་ཀྱི་རྒྱུ་དང་འབྲས་བུ་དང་། རྐྱེན་ཆུད་གསོན་པ་སྟེ། མདོར་ན་གང་ཅུང་ཟད་འཇིག་རྟེན་དང་། འཇིག་རྟེན་ལས་འདས་པ་དང་། ཟག་པ་དང་བཅས་པ་དང་། ཟག་པ་མེད་པ་རྣམས་ཀྱི་རྒྱུ་ལ་དམིགས་པའི་ལས་དང་། བྱ་བ་དང་། འབྲས་བུ་དང་། སྤྱོད་པ་ཁོང་དུ་ཆུད་པ་སྙེམས་པར་འགྱུར་བ་འདི་ནི་ཆད་པར་ལྟ་བ་སྟེ། ལྟ་བར་སོང་བ་དྲུག་ཅུ་རྩ་གཉིས་ཀྱི་བར་དག་ཀྱང་ངོ་། །གང་ཡང་འཇིག་རྟེན་གྱི་དང་། འཇིག་རྟེན་ལས་འདས་པ་དང་། ཟག་པ་དང་བཅས་པ་དང་། ཟག་པ་མེད་པ་དང་། ལྟ་བ་ཐམས་ཅད་ལ་གནས་པའི་རྟོག་པ་སྐད་ཅིག་མས་ཀླས་པ། སྐད་ཅིག་མས་འཇལ་བ། དངོས་པོ་ཐམས་ཅད་དང་མ་འདྲེས་པ། གནས་ཁོང་དུ་ཆུད་པ་སྟེ། གང་གནས་མེད་པ་དེ་ནི་དངོས་པོ་མེད་པའོ། །དེ་མི་འགྲོ་བའོ། །གང་མི་འགྲོ་བ་དེ་ཀུན་ནས་ཉོན་མོངས་པ་མ་ཡིན། རྣམ་པར་བྱང་བ་མ་ཡིན། འབྱུང་བ་མ་ཡིན། འཇུག་པ་མ་ཡིན་ནོ། །གང་འབྱུང་བ་མ་ཡིན། འཇུག་པ་མ་ཡིན་པ་དེ་ནི་རྫས་མེད་པའོ། །སྣང་བ་མེད་པའོ། །རྟོག་པ་མེད་པའོ། །འགྲོ་བ་མེད་པའོ། །འོང་བ་
མེད་པའོ། །དུས་གསུམ་ཐམས་ཅད་ལ་སྐད་ཅིག་སྐད་ཅིག་ཏུ་རྟོག་པའོ། །སྤྱོད་པ་མེད་པའོ། །སྟོང་པའོ། །བརྗོད་དུ་མེད་པའོ། །ཇི་ལྟར་རྫས་ཀྱི་མཚན་ཉིད་ཀྱིས་དུས་གསུམ་ཐམས་ཅད་ཀྱི་སྐད་ཅིག་མ་དང་། ཤིན་ཏུ་སྐད་ཅིག་མས་སྟོང་པ་དེ་བཞིན་དུ་རིགས་ཀྱི་བུ་གང་ལ་ལ་འཕགས་པ་དང་། འཕགས་པ་མ་ཡིན་པ་དང་། འཇིག་རྟེན་གྱི་དང་། འཇིག་རྟེན་ལས་འདས་པ་དང་། ལྟ་བ་ཀུན་ནས་བསྐོར་བ་དང་། རྣམ་པར་མི་རྟོག་པ་དང་། ཀུན་ཏུ་རྟོག་པ་དང་། ཉེ་བར་རྟོག་པ་དང་། རྒྱུ་དང་། སྐྱེ་བ་དང་། ལུས་དང་། སྣོད་དང་། ལྟ་བ་སྙེམས་པ་ཐམས་ཅད་སྐད་ཅིག་མ་སྟེ། དུས་གསུམ་གྱི་ལྟ་བ་ནི་ཤིན་ཏུ་སྟོང་པའོ། །བརྗོད་དུ་མེད་པའོ། །འདུལ་བར་ཡང་དག་པར་འདུལ་བ་མ་ཡིན་པའོ། །འདུ་བ་མ་ཡིན་པར་ཡང་མ་ཡིན་ནོ། །ཚུལ་ཁྲིམས་དང་། ལེན་པ་དང་། བརྩོན་འགྲུས་དང་། དགའ་བ་དང་། ལེ་ལོ་ཡང་དག་པར་འདུལ་བ་མ་ཡིན་ནོ། །ཆགས་པ་སེལ་བ་དང་། ཤེས་རབ་མ་ཡིན་ནོ། །འཆལ་པའི་ཤེས་རབ་མ་ཡིན་ནོ། །ལྟུང་བ་མ་ཡིན་ནོ། །ལྟུང་བ་མེད་པ་དང་གཡོ་བ་ཡང་ཡང་དག་པར་འདུ་བ་མ་ཡིན་ནོ། །ཐོབ་པ་མ་ཡིན་ནོ། །ཐོབ་པ་མེད་པ་དང་གཡོ་བ་མ་ཡིན་ནོ། །འཇིག་རྟེན་གྱི་དང་། འཇིག་རྟེན་ལས་འདས་པ་དང་། དམ་པར་དཔྱོད་པ་དང་། གཡོ་བ་ཡང་དག་པར་འདུ་བ་མ་ཡིན་ནོ། །གནས་ལ་རྣམ་པར་རྟོག་པའི་ལམ་མ་ཡིན་ནོ། །འདོད་པའི་ཡོན་ཏན་ལྔ་རྣམས་དང་། གཟུགས་དང་གཟུགས་མེད་པའི་ཁམས་དང་། ཕུང་པོ་ནི་བླང་བ་མེད་པ་མང་པོ་ལྟ་བུའི་མཚན་ཉིད་བསྡུ་བའི་མཚན་མ་ཡིན་ནོ། །ཕུང་པོ་དང་ཁམས་དང་སྐྱེ་མཆེད་ལ་ལྟ་བ་དང་། གཡོ་བ་ཡང་དག་པར་འདུ་བ་མ་ཡིན་ནོ། །ལྟ་བ་ཐམས་ཅད་ནི་གཉིས་སུ་མེད་པའོ། །སྟོང་པའོ། །རྫས་མེད་པའོ། །བརྗོད་དུ་མེད་པའོ། །འདི་ལྟ་སྟེ་དཔེར་ན་མེ་ལོང་གི་དཀྱིལ་འཁོར་ལ་བཞིན་གྱི་དཀྱིལ་འཁོར་སྣང་བ་ཡང་བཞིན་གྱི་དཀྱིལ་འཁོར་དེ་ཕུང་པོས་བསྐྱེད་པ་མ་ཡིན། ཁམས་ཀྱིས་བསྐྱེད་པ་མ་ཡིན། སྐྱེ་མཆེད་ཀྱིས་བསྐྱེད་པ་མ་ཡིན་གྱི་ཚུལ་གཅིག་སྟེ། ཡི་གེ་མེད་ཅིང་བརྗོད་དུ་མེད་པ་དེ་བཞིན་དུ་རིགས་ཀྱི་བུ་འཕགས་པ་དང་། འཕགས་པ་མ་ཡིན་པ་དང་། འཇིག་རྟེན་གྱི་དང་། འཇིག་རྟེན་ལས་འདས་པ་གང་ཡང་རུང་སྟེ། དེ་དག་ཐམས་ཅད་ནི་ཕུང་པོས་བསྐྱེད་པ་
མ་ཡིན། ཁམས་ཀྱིས་བསྐྱེད་པ་མ་ཡིན། སྐྱེ་མཆེད་ཀྱིས་བསྐྱེད་པ་མ་ཡིན་ཏེ། ལྟ་བ་ཐམས་ཅད་ནི་བརྗོད་དུ་མེད་ཅིང་ཡི་གེ་མེད་པའོ། །རིགས་ཀྱི་བུ་འདི་ལྟ་སྟེ། དཔེར་ན་ཉི་མའི་རྐྱེན་གྱིས་སྨིག་རྒྱུ་བ་སྣང་བར་འགྱུར་བ་ཡང་། སྨིག་རྒྱུ་བ་ཕུང་པོ་ལ་གནས་པ་མ་ཡིན། ཁམས་ལ་གནས་པ་མ་ཡིན། སྐྱེ་མཆེད་ལ་གནས་པ་མ་ཡིན་པ་དེ་བཞིན་དུ་རིགས་ཀྱི་བུ་འཕགས་པ་དང་། འཕགས་པ་མ་ཡིན་པ་དང་། འཇིག་རྟེན་གྱི་དང་། འཇིག་རྟེན་ལས་འདས་པའི་ལྟ་བ་གང་ཡང་རུང་སྟེ། ལེན་པ་དང་བཅས་པ་གཏི་མུག་གིས་རྣམ་པར་བསྒྲུབས་པའི་རྐྱེན་གྱིས་བརྗོད་དུ་མེད་པ་ཡི་གེ་མེད་པའོ། །དོན་འདི་དག་ནི་བཅོམ་ལྡན་འདས་ཀྱིས་གསུངས་ཏེ། དེ་ལ་འདི་སྐད་ཅེས་བྱའོ། །རྐྱེན་གྱིས་རྣམས་ནི་རྐྱེན་བཅུ་སྟེ། །ལྟ་བ་སྐྱེད་པ་མཁས་པ་ཡིན། །ཆོས་རྣམས་སྟོང་པར་མི་ཤེས་ཏེ། །ལོག་པར་ལྟ་བའི་སྤྱོད་ཡུལ་ལོ། །ལྟ་བ་དག་ནི་བརྗོད་མེད་ཅིང་། །ཡི་གེ་ཡོད་པ་མ་ཡིན་པས། །དུས་གསུམ་མཉམ་པ་ཉིད་དག་ནི། །ལྟ་བའི་གཟུགས་ཀྱི་ལྟ་མ་ཡིན། །བཅུ་གསུམ་རྐྱེན་ལ་རག་ལས་པ། །ཆོས་ཉིད་ཐ་དད་མ་ཡིན་ཏེ། །མཉམ་པ་ཉིད་དང་འགལ་མེད་ལ། །ལྟ་བ་སྐྱེད་ཅིང་རྟོག་པར་བྱེད། །ལྟ་བའི་ལེན་པ་སྨིག་རྒྱུ་འདྲ། །ཐ་དད་མ་ཡིན་ཡི་གེ་མེད། །བྱིས་པ་དཀའ་བ་བྱེད་པ་དག །ཀུན་ཏུ་རྟོག་པར་བྱིན་གྱིས་རློབ། །རྐྱེན་གྱི་རྣམ་པ་བཅུ་གསུམ་མཉམ། །ཆད་མེད་རྟག་པ་མེད་པ་ཡི། །རྣམ་པར་ཐར་པ་གསུམ་བསྒོམས་པས། །མཁས་པ་འགལ་བར་མི་བྱེད་དོ། །ལྟ་བ་ཐམས་ཅད་རྒྱུ་བ་མེད། །མཚན་མ་མེད་པས་བསྐྱེད་པ་སྟེ། །ཇི་ལྟར་གཟུགས་རྣམས་མེ་ལོང་ལ། །དེ་ལྟར་ཆོས་ཀྱི་ཆོས་ཉིད་དོ། །ཆོས་རྣམས་ཐམས་ཅད་ཚུལ་གཅིག་སྟེ། དབེན་པ་སྟོང་པ་ཉིད་ལ་གནས། །མཁས་པ་ལྟ་བ་ཐམས་ཅད་ཀྱི། ཀུན་ནས་ལྡང་ལ་མི་རྟོག་གོ །རིགས་ཀྱི་བུ་དེ་ལ་ཚུལ་ཁྲིམས་ཀྱི་ལེན་པ་གང་ཞེ་ན། གང་ཅུང་ཟད་ཚུལ་ཁྲིམས་དང་། དཀའ་ཐུབ་དང་། བརྟུལ་ཞུགས་དང་། ཚངས་པར་སྤྱོད་པ་སྙེམས་ཤིང་རྣམ་པར་དམིགས་ཏེ། གནས་ལ་མངོན་པར་ཆགས་པ་དེ་དག་ཐམས་ཅད་ནི་ལུས་དང་ངག་དང་། ཡིད་ཀྱི་ལས་རྣམ་པར་གཞིག་པའི་དོན་གྱི་ཕྱིར་འཁོར་བ་
ལས་བསྒྲལ་བའི་དོན་གྱི་ཕྱིར། ཁམས་གསུམ་ལས་འབྱུང་བའི་དོན་གྱི་ཕྱིར། དེ་དང་དེར་ལུས་ལ་གནོད་པ་དང་ལྡན་པའི་རྗེས་སུ་སྦྱོར་བ་དང་། སྡོམ་པ་དང་། སྡོམ་པ་མ་ཡིན་པ་ལ་སྦྱོར་བ་འདི་ནི་ཚུལ་ཁྲིམས་ཀྱི་ལེན་པའོ། །རིགས་ཀྱི་བུ་དེ་ལ་གང་ལུས་ལ་གནོད་པ་དང་ལྡན་པ་ལ་འཇུག་པ་དག་ནི་ཚོར་བ་གསུམ་འདྲེས་པར་བྱེད་པ། འཕགས་པ་མ་ཡིན་པ། དོན་མ་ཡིན་པ་དང་ལྡན་པ་འདི་ཉིད་བདེན་གྱི། གཞན་ནི་གཏི་མུག་གོ་སྙམ་པ་ནི་ལུས་ཀྱི་ཚུལ་ཁྲིམས་སྙེམས་པའོ། །དེ་ཅིའི་ཕྱིར་ཞེ་ན། ལུས་འདི་ནི་གཡོ་བ་མེད་པ། འགྱུར་བ་མེད་པ་ཉོན་མོངས་པ་ཐམས་ཅད་དང་མ་འདྲེས་པའི་ཕྱིར་རོ། །རིགས་ཀྱི་བུ་འདི་ལྟ་སྟེ། དཔེར་ན་ཆུ་ཀླུང་གང་གཱའི་བྱེ་མ་ནི་གཡོ་བ་མེད་ཅིང་འགྱུར་བ་མེད་པ་སྟེ། འོན་ཀྱང་རླུང་གི་རང་བཞིན་གྱིས་འདྲིལ་བ་དེ་བཞིན་དུ་ཆེན་པོ་བཞི་ལས་གྱུར་པའི་ལུས་ཀྱང་གཡོ་བ་མེད་ཅིང་འགྱུར་བ་མེད་པ་སྟེ། འོན་ཀྱང་གློ་བུར་གྱི་རེག་པའི་རྐྱེན་ཉེ་བར་ལེན་པ་དང་བཅས་པ་སྟེ། ལུས་དེ་ལ་གནོད་པ་དང་འབྲེལ་པ་སྣ་ཚོགས་ལ་འདི་ལྟ་སྟེ། ཞགས་པ་འཐུབ་པ་དགུ་བཅུ་རྩ་ལྔའི་སེམས་ཅན་ལ་སོགས་པ་མཆོག་དམ་པར་སྦྱོར་རོ། །གང་དུས་གསུམ་གྱི་ལུས་དང་ངག་དང་། ཡིད་ཀྱི་འདུ་བྱེད་ལ་སྙེམས་པ་དང་། གང་ཚུལ་གཅིག་པ་མཉམ་པ་ཉིད་མི་ཤེས་ཤིང་ལུས་དང་ངག་དང་ཡིད་སྡོམ་པའི་ངལ་བ་མི་སྐྱེད་པ་འདི་ཡང་ཟག་པ་དང་བཅས་ཤིང་ཉེ་བར་ལེན་པ་དང་བཅས་པའི་འདུ་བྱེད་ཀྱི་སྡུག་བསྔལ་བཟོད་པ་འཁྲུགས་པར་བྱེད་པའོ། །རིགས་ཀྱི་བུ་དེ་ལ་ཚུལ་གཅིག་པ་མཉམ་པ་ཉིད་ཀྱི་བཟོད་པ་བསྒོམ་པ་གང་ཞེ་ན། གང་སྡོམ་པ་གསུམ་རྡུལ་ཙམ་ཡང་མི་སྐྱེད་པ་འདི་ནི་ཚུལ་གཅིག་པ་མཉམ་པ་ཉིད་ཀྱི་བཟོད་པ་བསྒོམ་པའོ། །གང་འདི་ལ་ཉེ་བར་ལེན་པ་དང་བཅས་པའི་སྡོམ་པ་གསུམ་གྱི་འདུ་ཤེས་སྙེམས་པ་འདི་ཡང་ཟག་པ་དང་བཅས་ཤིང་ཉེ་བར་ལེན་པ་དང་བཅས་པའི་འདུ་བྱེད་ཀྱི་སྡུག་བསྔལ་བཟོད་པ་འཁྲུགས་པར་བྱེད་པའོ། །གང་འདི་ལ་དུས་གསུམ་རོ་གཅིག་ཅིང་ཐ་མི་དད་པ་དང་། སྡོམ་པ་གསུམ་གྱི་སྐྱེད་པ་དང་། རྒྱུ་བ་མེད་པ་དང་། ཀུན་ནས་ཉོན་མོངས་པ་མེད་པ་དང་། རྣམ་པར་བྱང་བ་མེད་པའི་འདུ་བྱེད་རྣམས་ལ་རྣམ་པར་རྟོག་པ་འདི་ནི་ཚུལ་གཅིག་པ་མཉམ་པ་ཉིད་བསྒོམ་པའོ། །གང་
ཡང་ཕ་རོལ་ཏུ་ཕྱིན་པ་དྲུག་པོ་མི་གཉིས་པའི་གནས་པ་འདི་དག་ལ་གནས་སུ་དམིགས་པ་དང་། དངོས་པོར་དམིགས་པ་དང་། ཡེ་ཤེས་འཕེལ་བར་རྟོག་པ་དང་། དུས་གསུམ་ཡང་དག་པར་བསྒྲུབས་པ་སྙེམས་པ་འདི་ཡང་ཟག་པ་དང་བཅས་ཤིང་ཉེ་བར་ལེན་པ་དང་བཅས་པའི་འདུ་བྱེད་ཀྱི་སྡུག་བསྔལ་བཟོད་པ་འཁྲུགས་པར་བྱེད་པའོ། །གང་ཕ་རོལ་ཏུ་ཕྱིན་པ་དྲུག་པོ་འདི་དག་ལ་གཉིས་སུ་མེད་པའི་གནས་དང་། དུས་གསུམ་ཐ་མི་དད་པ་དང་། མི་སྐྱེ་བ་དང་། མི་འགག་པ་དང་། ཆད་པ་མེད་པ་དང་། རྟག་པ་མེད་པ་དང་། འཕེལ་བ་མེད་པར་སྙེམས་པ་འདི་ནི་ཚུལ་གཅིག་པ་མཉམ་པ་ཉིད་ཀྱི་བཟོད་པ་བསྒོམ་པའོ།། །།བམ་པོ་བདུན་པ། གང་ཡང་ཉན་ཐོས་དང་། རང་སངས་རྒྱས་ཀྱི་ཐེག་པ་སྤངས་ཏེ་ཐེག་པ་ཆེན་པོ་བཙལ་ནས་རོ་མྱང་བའི་ཡོན་ཏན་ལ་མངོན་པར་ཆགས་ཤིང་རེག་ནས་སྣོད་དང་སྣོད་མ་ཡིན་པར་ཆར་འབེབས་པ་དང་། སྡོམ་པ་དང་། སྡོམ་པ་མེད་པ་ལ་རྣམ་པར་རྟོག་པ་དང་། སེམས་ཅན་དང་། སྲོག་དང་། སྐྱེ་བ་དང་། གསོ་བ་དང་། གང་ཟག་དང་། བྱེད་པ་པོ་དང་། བྱེད་དུ་འཇུག་པ་ལ་རྒྱུ་དང་རྐྱེན་དུ་དམིགས་པ་དང་། དགེ་བ་དང་མི་དགེ་བའི་འབྲས་བུ་ལ་གནས་ཤིང་སྙེམས་པ་འདི་དག་ཀྱང་ཟག་པ་དང་བཅས་པ་ཉེ་བར་ལེན་པའི་འདུ་བྱེད་ཀྱིས་སྡུག་བསྔལ་ལ་བཟོད་པ་རྣམ་པར་འཇིག་པའོ། །གང་ཡང་ཉན་ཐོས་དང་། རང་སངས་རྒྱས་ཀྱི་ཐེག་པའི་དུས་གསུམ་གྱི་སྡོམ་པ་ལ་རྟོག་པ་མེད་པ་དང་། རྣམ་པར་རྟོག་པ་མེད་པ་དང་། འཛིན་པ་མེད་པ་དང་། གཏོང་བ་མེད་པ་དང་། བསྐྱེད་པ་མེད་པ་དང་། བསྐྱུང་བ་མེད་པ་དང་། བླ་ན་མེད་པའི་ཐེག་པ་ཆེན་པོའི་དུས་གསུམ་གྱི་སྡོམ་པ་ལ་ཡང་རྟོག་པ་མེད་པ་དང་། རྣམ་པར་རྟོག་པ་མེད་པ་དང་། འཛིན་པ་མེད་པ་དང་། གཏོང་བ་མེད་པ་དང་། བསྐྱེད་པ་མེད་པ་དང་། བསྐྱུང་བ་མེད་པ་དང་། ཚངས་པར་སྤྱོད་པའི་དངོས་པོ་ལ་དམིགས་པ་མེད་པ་དང་། འདུ་བྱེད་ཐམས་ཅད་ཀྱི་ཚིག་གི་ལམ་ལ་སྙེམས་པ་མེད་པའི་མཚན་ཉིད་ལ་མི་དམིགས་པ་འདི་དག་ཀྱང་ཚུལ་གཅིག་གི་མཉམ་པ་ཉིད་ཀྱི་ཆོས་ཐམས་ཅད་མངོན་སུམ་དུ་འབྱུང་བ་མེད་པར་སྟོང་པར་སྟོན་པའི་བཟོད་པ་ཡོངས་སུ་རྫོགས་པ་ཡིན་ནོ། །འདི་ཡང་ཚུལ་ཁྲིམས་ཉེ་བར་ལེན་པ་ལ་འབྱུང་བ་མེད་ཅིང་འགོག་པ་མེད་པར་བལྟའོ། །
བཅོམ་ལྡན་འདས་ཀྱིས་བཟོད་པ་བསྒོམ་པའི་དོན་དུ་གསུངས་པ་དེ་ནི་འདི་སྐད་བརྗོད་དོ། །རིགས་དང་མི་རིགས་ཞུགས་པ་རྣམས། །འདུ་བྱེད་རྟག་པའི་བློ་གྲོས་ཏེ། །ཚུལ་ཁྲིམས་བརྟུལ་ཞུགས་བྱིན་བརླབས་ལས། །ཡོངས་སུ་འཁྱམས་པས་རབ་སྡུག་བསྔལ། །དངོས་པོ་མེད་པའི་ཕུང་པོ་རྣམས། །སྟོང་པའི་ཆོས་ལ་བྱེད་པ་མེད། །བདག་མེད་ཆོས་ལ་འཇུག་པ་རྣམས། །ཇི་ལྟར་བྱེ་མ་བཞིན་དུ་མཐོང་། །འདུ་བྱེད་རྣམས་ལ་སྙེམས་པ་ཡི། །བརྟུལ་ཞུགས་རྣལ་འབྱོར་སྤྱོད་ཀྱིས་མཐོང་། །འདི་ལ་སྙིང་རྗེ་བསྐྱེད་པས་ན། །སེམས་ཅན་བྱེ་བ་རྣམ་པར་འདུལ། །སྒྱུ་མ་སྨིག་རྒྱུ་རྨི་ལམ་དང་། །ལུས་མེད་ཅིང་ནི་གནས་མེད་པ། །བདག་མེད་ཕུང་པོ་སྟོན་པ་དང་། །སྲོག་ཆགས་རྣམས་ལ་ཆོས་ཀྱང་སྟོན། །ཆོས་ཀུན་ཚུལ་གཅིག་བདག་མེད་པས། །སྟོང་པ་ཉིད་པས་སྐྱེ་འགོག་མེད། །སྲོག་ཆགས་རྣམས་ལ་བཟོད་པ་སྟོན། །རྟོག་པར་རྣམ་རྟོག་ཐེ་ཙོམ་བཅད། །བཟོད་པ་མ་ནོར་དེ་བཞིན་ཉིད། །ཚུལ་ཁྲིམས་བརྟུལ་ཞུགས་སྙེམས་པ་ཡིས། །བཅིངས་པ་ཐམས་ཅད་གཅོད་པར་འགྱུར། །ཇི་ལྟར་མེ་མར་མུན་པ་ལ། །བྱུང་ནས་མུན་པ་བསལ་བ་ལ། །བཅིངས་པ་ཐམས་ཅད་མཐོང་བ་བཞིན། །བཟོད་པ་ཉི་ཤུ་བས་པ་ཡིས། །མུན་ནག་དེར་ནི་རབ་ཞུགས་ཀྱང་། །དེ་ནི་སྲེད་པ་སྐྱེ་མི་འགྱུར། །བཟོད་པ་སྒོམ་ལ་དཔའ་བ་ཡིས། །སྲེད་པ་ཐམས་ཅད་ཟད་པར་བྱེད། །འཁོར་བ་ན་ནི་ཡུན་རིང་པོར། །འཁོར་བར་གྱུར་པའི་མི་རྣམས་ཀྱང་། །སྲེད་པ་ལས་ནི་རྣམ་པར་གྲོལ། །དེ་དག་མྱ་ངན་འདས་པ་ནི། །བགྲང་བར་ཡང་ནི་མི་ཆོག་སྟེ། །མཚོན་ཆ་ཤིན་ཏུ་བསླབས་པས་ན། །དགྲ་རྣམས་ཀུན་ལ་འཇིགས་པ་མེད། །བཟོད་པ་ཤིན་ཏུ་བསྒོམས་པ་དེས། །ཉོན་མོངས་ཐམས་ཅད་རབ་ཏུ་འཇོམས། །རིགས་ཀྱི་བུ་དེ་ལ་བདག་ཏུ་སྨྲ་བའི་ཉེ་བར་ལེན་པ་གང་ཞེ་ན། བདག་ནི་རང་བཞིན་གྱིས་མེད་པ་ཡིན་མོད་ཀྱི། འོན་ཀྱང་འདོད་པའི་ཡོན་ཏན་ལྔ་ལ་བདག་ཏུ་སྨྲ་བས་རྨོངས་ནས་བདག་སྐྱེད་དེ། མིག་ནི་བདག་དུ་རབ་ཏུ་ཤེས། མིག་གི་རྣམ་པར་ཤེས་པ་ཡང་བདེ་བ་དང་སྡུག་བསྔལ་ལ་འཇུག་པ། སྐྱེ་བ་ལ་མངོན་པར་ཆགས་པར་བྱེད་པ་ནས། ཡིད་བདག་ཏུ་རབ་ཏུ་ཤེས་ཤིང་ཡིད་ཀྱི་རྣམ་པར་ཤེས་པ་ཡང་བདེ་བ་
དང་སྡུག་བསྔལ་ལ་འཇུག་པ། སྐྱེ་བ་ལ་མངོན་པར་ཆགས་པར་བྱེད་པའི་བར་དུ་འདི་དག་ནི་བདེན་གྱི་གཞན་ནི་གཏི་མུག་གོ་སྙམ་པའོ། །དེ་ཅིའི་ཕྱིར་ཞེ་ན། སྐྱེ་མཆེད་དྲུག་རང་གི་ཡུལ་ལས་བདེན་པ་སྟེ། རིགས་ཀྱི་བུ་མིག་ནི་འདི་ལྟར་བདག་ནི་བདག་མ་ཡིན་ཏེ། བདག་དང་བདག་གི་མ་ཡིན་པས་འདི་ལྟར་བདག་ནི་བདག་གིས་བསྐྱེད་པར་མི་འགྱུར་ཞིང་། བདག་གང་ཡིན་པ་བདག་གིའང་ཡིན་ཏེ། བདག་དང་བདག་གི་ནི་མིག་ཡིན་ནོ། །དེ་ལྟར་མིག་ཀྱང་བདག་ཡིན་པར་རྣམ་པར་ཤེས་པ་བསྐྱེད་ནས་ལུས་ཀྱི་རེག་པའི་བར་དུ་ཤེས་པར་བྱའོ་སྙམ་པ་མི་སེམས་ཏེ། འོན་ཀྱང་མིག་གིས་གཟུགས་མ་བསྐྱེད་དེ། སྒྲས་ཀྱང་རྣ་བ་མ་བསྐྱེད་པ་ནས། ལུས་ཀྱིས་རེག་པའི་བར་དུ་མ་བསྐྱེད་དེ། རེག་པས་ལུས་མ་བསྐྱེད། མིག་གིས་གཟུགས་མ་བསྐྱེད་དེ། མིག་གིས་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་མ་བསྐྱེད་དེ། མིག་གིས་མིག་གི་རྣམ་པར་ཤེས་པ་ཡང་མ་བསྐྱེད། མིག་གི་རྣམ་པར་ཤེས་པས་ཀྱང་མིག་མ་བསྐྱེད་དེ། ཡང་མིག་གིས་རྣ་བའི་ཡུལ་རབ་ཏུ་མི་ཤེས་ཏེ། རྣ་བས་ཀྱང་མིག་གི་ཡུལ་རབ་ཏུ་མི་ཤེས་པ་ནས། ཡིད་ཀྱིས་ཆོས་ཀྱི་ཡུལ་རབ་ཏུ་མི་ཤེས་ཏེ། ཆོས་ཀྱིས་ཀྱང་ཡིད་ཀྱི་ཡུལ་རབ་ཏུ་མི་ཤེས་སོ། །སྐྱེ་མཆེད་འདི་དག་ཐམས་ཅད་ནི་འདོད་པའི་ཡོན་ཏན་ལྔ་དང་། ཕུང་པོ་ལྔ་རྣམས་ཀྱི་རྒྱུ་དང་རྐྱེན་ལ་དམིགས་པའི་ངོ་བོ་ཉིད་ལས་ཕྱི་དང་ནང་གི་ཕུང་པོ་དང་། སྐྱེ་མཆེད་འདི་དག་ཐམས་ཅད་ནི་གཅིག་ལ་གཅིག་རྣམ་པར་རྟོག་པའི་རྒྱུས་སྟོང་པར་འགྱུར་ཏེ། འདོད་པའི་ཡོན་ཏན་ལྔ་དང་ཕུང་པོ་ལྔ་རྣམས་གཅིག་ལ་གཅིག་རྒྱུ་དང་རྐྱེན་དུ་དམིགས་ཤིང་། རྣམ་པར་རྟོག་པའི་ངོ་བོ་ཉིད་ཀྱིས་གཅིག་གིས་གཅིག་སྟོང་སྟེ། གང་ནང་གི་ཕུང་པོ་དང་། སྐྱེ་མཆེད་རྣམས་ནི་གཅིག་གི་ཡུལ་དུ་གཅིག་མི་འགྱུར་ཏེ། དེ་བཞིན་དུ་ནང་དང་ཕྱིའི་དངོས་པོར་མ་ཡིན་ཏེ། ཕྱིའི་ཡང་ནང་གི་ཕུང་པོ་དང་སྐྱེ་མཆེད་རྣམས་ཡུལ་དུ་མི་འགྱུར་རོ། །དེ་ལྟར་ཕྱི་དང་ནང་གི་དངོས་པོ་ཐམས་ཅད་གཅིག་གི་ཡུལ་གཅིག་མ་ཡིན་ཞིང་། གཅིག་ལ་གཅིག་རྒྱུ་དང་རྐྱེན་དུ་དམིགས་ཤིང་རྣམ་པར་རྟོག་པའི་ཡུལ་དུ་མི་འགྱུར་མོད་ཀྱི། འོན་ཀྱང་སྲིད་པའི་ཚུལ་དུ་སྟོན་ཏེ། དེ་ཡང་སྒྱུ་མའི་ཚུལ་ལོ། །སྒྱུ་མའི་ཚུལ་གང་ཡིན་པ་དེ་ནི་དེ་བཞིན་
ཉིད་མ་ཡིན་ནོ། །གང་དེ་བཞིན་ཉིད་ཀྱི་ཚུལ་མ་ཡིན་པ་དེ་ནི་མེད་དེ། གང་མེད་པ་དེ་ལ་ནི་སྐྱེ་བ་མེད་དོ། །གང་སྐྱེ་བ་མེད་པ་དེ་ནི་འགག་པ་མེད་དེ། རིགས་ཀྱི་བུ་ཆོས་ཐམས་ཅད་ལ་ནི་སྐྱེ་བ་དང་འགག་པ་མེད་དོ། །འོན་ཀྱང་བྱིས་པ་སོ་སོའི་སྐྱེ་བོ་ཐམས་ཅད་ནི་དཀའ་བར་བྱེད་པ་སྟེ། གང་ལ་བདག་མེད་པ་དེ་སྐྱེད་ཅིང་དེ་ལྟར་མི་དགེ་བའི་རྒྱུ་དང་རྐྱེན་ལ་དམིགས་ནས་གཟུགས་བསྐྱེད་ནས་ཐར་པ་དེ་ལས་ཡོངས་སུ་འཁྱམས་ནས་ངན་སོང་དུ་ཡུན་རིང་པོར་མི་འདོད་པའི་འབྲས་བུ་སོ་སོར་མྱོང་བར་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན་ཤིང་ནི་མེ་མ་ཡིན་ལ་ཤིང་ལ་མེ་ཡང་མེད་དེ། ཤིང་དང་མེར་འདྲེས་པ་ཡང་མ་ཡིན་མོད་ཀྱི། འོན་ཀྱང་མེ་འདོད་པའི་མི་ཞིག་གིས་ལག་པ་གཉིས་ཀྱིས་ཤིང་ལ་ཤིང་སྦྱར་བ་དང་དེ་ལས་མེ་ཕྱུང་ནས་ཤིང་དེ་ཉིད་ཚིག་པར་འགྱུར་རོ། །རིགས་ཀྱི་བུ་དེ་བཞིན་དུ་ཕྱི་ནང་གི་དངོས་པོ་དེ་དག་ཐམས་ཅད་ཀྱང་གཅིག་གིས་གཅིག་སྟོང་ཞིང་གཅིག་གི་ཡུལ་གཅིག་མ་ཡིན་ལ། ཚུལ་གཅིག་ཅིང་བདག་མེད་དེ། སྟོང་མོད་ཀྱི་འོན་ཀྱང་བྱིས་པ་སོ་སོའི་སྐྱེ་བོ་དཀའ་བ་བྱེད་པ་རྣམས་ཀྱིས་བདག་མེད་པའི་ཆོས་སྟོང་པ་ལ་ཆགས་ནས། ཕན་ཚུན་ནས་བསྡུས་པས་ན་ལོག་པར་སྤྱོད་པ་གསུམ་གྱི་རྒྱུ་དང་རྐྱེན་བསྐྱེད་དེ། རྒྱུ་དང་རྐྱེན་དེས་ངན་སོང་གསུམ་དུ་མི་འདོད་པའི་འབྲས་བུ་སོ་སོར་མྱོང་ནས་འཁོར་བ་ན་ཡུན་རིང་པོར་འཁོར་བར་འགྱུར་རོ། །འོན་ཀྱང་གང་ཕྱི་ནང་གི་ཆོས་ཐམས་ཅད་ཀྱི་ངོ་བོ་ཉིད་བདག་མེད་ཅིང་སྟོང་པར་རབ་ཏུ་ཤེས་པ་དེ་དག་ནི་ཡང་དག་པར་སྤྱོད་པའི་ཚུལ་གྱིས་བཟོད་པ་འདི་ཡོངས་སུ་རྫོགས་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །བཅོམ་ལྡན་འདས་ཀྱིས་དོན་འདི་བསྡུས་ཏེ་གསུངས་པ་དེ་ལ་འདི་སྐད་ཅེས་བཀའ་སྩལ་ཏོ། །བདག་དང་བདག་གིས་བྱིན་བརླབས་པས། །འདོད་པའི་ཡོན་ཏན་ལྔ་ལ་ཆགས། །མིག་ནི་བདག་ཏུ་རབ་ཏུ་ཤེས། །རྣ་བ་སྣ་དང་དེ་ལྟར་ཡིད། །བདེ་དང་སྡུག་བསྔལ་རབ་ཏུ་ཤེས། །འདུ་བྱེད་ཀུན་ལ་སྙེམས་པས་ན། །ངན་སོང་རྣམས་ཀྱང་རབ་ཏུ་བསྐྱེད། །དེ་བས་དེ་དག་དཀའ་བར་བྱེད། །ཆོས་རྣམས་འདི་དག་བྱེད་མེད་པ། །སྤྲོས་མེད་ཡི་གེ་མེད་པ་སྟེ། །ཇི་ལྟར་འཇིགས་པའི་མེ་ལས་ནི། །ངན་སོང་རྣམས་ནི་བསྐྱེད་པར་འགྱུར། །
འདིར་ཚོགས་གནས་པ་ཇི་སྙེད་པ། །དགེ་བ་ཁྱེད་ལ་བརྗོད་པར་བྱ། །ཆོས་རྣམས་ཀུན་གྱི་དེ་ཉིད་ལ། །བསྒོམས་ལ་བཟོད་པ་རྟོགས་པར་བྱོས། །འདུ་བྱེད་རྣམས་ལ་རྒྱུ་མེད་དེ། །བདག་གི་རང་བཞིན་མེད་པས་ན། །ལས་ཀྱི་རྒྱུ་དང་རྐྱེན་རྣམས་ཀྱང་། །གཅིག་ནས་གཅིག་ཏུ་མི་ཤེས་སོ། །ཕྱི་རོལ་དང་ནི་ནང་རྣམས་ཀྱི། །ཆོས་རྣམས་ཀུན་ལ་བདག་མེད་དེ། །ཟབ་ཅིང་ཞི་བའི་ཆོས་ཉིད་ནི། །བུས་པ་འདིས་ནི་མི་ཤེས་སོ། །ཇི་ལྟར་ནམ་མཁའི་ཆོས་རྣམས་ལ། །ཐམས་ཅད་ཉེ་བར་རྟོག་པ་མེད། །མཚན་དང་མཚན་མ་མེད་པ་ཡི། །དེ་བཞིན་བཟོད་པ་རྣམ་པར་བསྒོམ། །ཕྱི་རོལ་དང་ནི་ནང་དག་གི །ནམ་མཁའ་ལ་ནི་སྙེམས་པ་མེད། །སྟོང་པའི་བཟོད་པ་དེ་བསྒོམས་པ། །དེ་བཞིན་འདུ་བྱེད་བལྟ་བར་བྱ། །སངས་རྒྱས་ཐམས་ཅད་མཐོང་བ་ནི། །ཐམས་ཅད་ཆོས་ལ་གཏི་མུག་མེད། །དགེ་བ་དྲན་ལྡན་འགྱུར་བ་དག །གང་ནི་དེ་བཞིན་བཟོད་པ་བསྒོམ། །ཆོས་ཀྱི་སྦྱིན་པ་ཅུང་ཟད་ཀྱང་། །ཀུན་ཏུ་འཛིན་ཅིང་མཐོང་བ་མེད། །དེ་ལྟར་བཟོད་པ་གང་སྒོམ་པ། །སྙིང་པོ་ལ་ནི་གནས་ཤེས་བྱ། །ཉེ་བར་ལེན་པའི་རྐྱེན་གྱིས་ཀྱང་སྲིད་པ་རྟོགས་ཏེ་ཉེ་བར་ལེན་པ་འདི་བཞི་ནི་སྐད་ཅིག་མའོ། །དེ་ལ་སྐྱེ་ཞིང་འགག་པའི་ཉེ་བར་ལེན་པའི་སྐད་ཅིག་མ་གཉིས་པོས་ནི་སྲིད་པ་ཉེ་བར་སྐྱེད་དོ། །སྲིད་པ་གསུམ་ནི་འདོད་པའི་སྲིད་པ་དང་། གཟུགས་ཀྱི་སྲིད་པ་དང་། གཟུགས་མེད་པའི་སྲིད་པའོ། དེ་ལ་འདོད་པའི་སྲིད་པ་ནི་སེམས་ཅན་རྣམས་ལ་རྣམ་པར་སླུ་བ་སྟེ། སེམས་ཅན་དམྱལ་བ་ཆེན་པོ་བརྒྱད་དང་། བྱོལ་སོང་དང་། ཡི་དྭགས་དང་། གླིང་ཆེན་པོ་བཞི་དང་། འདོད་པ་ན་སྤྱོད་པའི་ལྷའི་གནས་དྲུག་པོ་འདི་དག་ནི་གླིང་བཞི་པའི་འདོད་པའི་སྲིད་པ་ཞེས་བྱའོ། །གཟུགས་ཀྱི་སྲིད་པ་ནི་གཟུགས་ལ་སྤྱོད་པའི་ལྷའི་གནས་བཅུ་དྲུག་སྟེ། འདི་ནི་གཟུགས་ཀྱི་སྲིད་པ་ཞེས་བྱའོ། །དེ་ལ་གཟུགས་མེད་པའི་སྲིད་པ་ནི་གཟུགས་མེད་པ་ལ་སྤྱོད་པའི་ལྷའི་གནས་བཞི་སྟེ། འདི་ནི་གཟུགས་མེད་པའི་སྲིད་པ་ཞེས་བྱའོ། །དེ་ལ་རིགས་ཀྱི་བུ་གང་རྒྱུ་དང་རྐྱེན་ལ་དམིགས་ནས་ངན་སོང་གསུམ་དུ་སྲིད་པ་དེ་ནི་གཅིག་ཏུ་ཚུལ་བཞིན་མེད་པའི་ཡིད་ལ་བྱེད་པ་ཟག་པ་དང་བཅས་པ་འདོད་པའི་ཡོན་ཏན་ལྔ་ལ་སྙེམས་པ་འདི་ལ་སྲིད་པ་འབྱུང་བར་འགྱུར་རོ། །གང་
ཡང་གཟུགས་ཀྱི་ཁམས་ཀྱི་གནས་གཞན་བཅུ་གཅིག་གི་སྲིད་པ་འབྱུང་བ་དེ་ཡང་ཟག་པ་དང་བཅས་པ་དགེ་བའི་རྒྱུའི་སྲིད་པ་སྟེ། གང་འདི་ལ་གཟུགས་ཀྱི་ཁམས་ཀྱི་གནས་གཞན་ལྔའི་སྲིད་པ་འབྱུང་བའི་རྒྱུ་དེ་དགེ་བ་ལ་དམིགས་པའི་རྒྱུ་བཟོད་པ་ལ་དམིགས་པའི་དངོས་པོ་རྣམས་ས་དང་པོ་ནས་ས་བདུན་པའི་བར་དུ་དེ་ལ་སྐྱེ་བར་འགྱུར་རོ། །གང་ཡང་གཅིག་ཏུ་དགེ་བའི་རྒྱུ་སྟོང་པ་ཉིད་བསྒོམ་པའི་ཕྱིར་བཟོད་པ་ཡོངས་སུ་རྫོགས་པ་ནི་ས་བརྒྱད་པ་དང་། ས་དགུ་པ་དང་། ས་བཅུ་པ་གཅིག་ཏུ་དགེ་བའི་རྒྱུ་དེ་ལ་སྲིད་པ་འབྱུང་བར་འགྱུར། འདི་ནི་དགེ་བ་དང་མི་དགེ་བའི་རྒྱུས་གཟུགས་ཀྱི་དངོས་པོ་མངོན་པར་འབྱུང་བ་དེ་བཞིན་དུ་ཉོན་མོངས་པའི་རྙོག་པ་ལྔའི་སངས་རྒྱས་ཀྱི་སྲིད་པ་འབྱུང་བ་རྣམ་པར་དག་པ་དང་། ཡང་སངས་རྒྱས་ཀྱི་ཞིང་གཅིག་གི་དགེ་བའི་རྒྱུའི་སྲིད་པ་འབྱུང་ངོ་། །དངོས་པོ་དང་། དངོས་པོ་མེད་པ་ཐམས་ཅད་བསྡུས་པ་དང་བྲལ་བ་འདི་ནི་བཟོད་པ་སྒོམ་པའོ། །དེ་ཅིའི་ཕྱིར་ཞེ་ན། ཇི་ལྟ་བུར་དངོས་པོ་ཡོད་པ་དང་། དངོས་པོ་མེད་པའི་རང་བཞིན་ལ་རྟོག་པ་མེད་པ་དང་། རྣམ་པར་རྟོག་པ་མེད་པ་དང་། ཀུན་ནས་སྤྱོད་པ་མེད་པ་འདི་ནི་རྒྱུ་དང་རྐྱེན་ལ་དམིགས་པ་དང་། འདྲེས་པ་མེད་པ་དང་། འབྱུང་བ་མེད་པ་དང་། འགོག་པ་མེད་པར་འགྱུར་རོ། །དེ་ལ་ཡང་ཇི་ལྟར་བྱང་ཆུབ་སེམས་དཔའ་ནམ་མཁའི་རང་བཞིན་དག་དངོས་པོ་ཐམས་ཅད་ལས་ལྡོག་པའི་འདུ་བྱེད་ཐམས་ཅད་དུས་གསུམ་ཀུན་ཏུ་སྤྱོད་པའི་བཟོད་པ་སྒོམ་པར་བྱེད་པ་ནི་དངོས་པོ་དང་དངོས་པོ་མེད་པ་ཐམས་ཅད་ཅེས་བྱའོ། །སངས་རྒྱས་ཀྱི་ཞིང་ཐམས་ཅད་ཀྱི་གནས་གཞན་ཆུའི་ཟླ་བ་དང་མཉམ་པར་མཐོང་བ་ནི་གཞན་གྱི་དྲིང་མི་འཇོག་པའི་གློག་མགྱོགས་པ་ཡིན་ནོ། །དུས་གསུམ་གྱི་དགེ་བའི་རྩ་བ་ཐམས་ཅད་ཀྱི་ཕྱི་མའི་མཐའི་ཡེ་ཤེས་ལ་མཁས་པར་འགྱུར་རོ། །རིགས་ཀྱི་བུ་ཉོན་མོངས་པའི་སངས་རྒྱས་ཀྱི་ཞིང་འདི་ལ་བྱང་ཆུབ་སེམས་དཔའ་པུཎྜ་རཱི་ཀ་སྐྱེ་བར་འགྱུར་རོ། །སྙིང་རྗེ་ཆེན་པོས་བརྒྱན་པ་བརྟན་པའི་བརྩོན་འགྲུས་ཡང་དག་པར་ལེན་པའི་ཕུང་པོ་ཐམས་ཅད་ལ་དམིགས་པ་མེད་པ། གཟུགས་ཐམས་ཅད་ལས་ཕྱིར་ལོག་པ། ཆོས་ཐམས་ཅད་འབྱུང་བ་དང་། ཟད་པ་ལ་གནས་པ་མེད་ཅིང་སྤྱོད་པ་མེད་དོ། །འདུ་བྱེད་ཐམས་ཅད་ལ་
ཡང་ཡིད་དང་། མཚན་མ་གཉི་ག་འང་འབྱུང་བ་མེད་པར་འགྱུར་རོ། །གཉིས་ལྟ་བུ་མེད་པའི་དུས་གསུམ་ཐམས་ཅད་ལ་དམིགས་པ་མེད་པ་དང་། ཉོན་མོངས་པ་མེད་པའི་ཆོས་ཀྱི་དབྱིངས་དང་། ཡང་དག་པའི་མཐའ་མངོན་དུ་བྱེད་པར་འགྱུར་རོ། །དངོས་པོ་གང་ལ་ཡང་འཕེལ་བ་དང་འབྲི་བར་རྣམ་པར་རྟོག་པར་འགྱུར་བའང་མེད། ཚད་མེད་པའི་སེམས་དང་ཡིད་གཉིས་རྣམ་པར་དམིགས་པ་དང་བྲལ་བ་ལ་འཇུག་པ་མེད་པ་དང་། དུས་གསུམ་ཐམས་ཅད་ཀྱི་ཆོས་ཀྱི་དབྱིངས་ཚུལ་གཅིག་པར་རབ་ཏུ་ཤེས་སོ། །འདི་ལ་རིགས་ཀྱི་བུ་བྱང་ཆུབ་སེམས་དཔའི་གཟུགས་དང་ལྡན་པའི་ཆོས་ལ་གནས་ཤིང་དམིགས་པ་མེད་པ་དང་། ཆོས་ཐམས་ཅད་བདག་མེད་པ་དང་། གང་ཟག་མེད་པའི་ཕྱིར་རྣམ་པར་ཤེས་སོ། །ཁམས་གསུམ་ཐམས་ཅད་ལ་བདག་པོ་མེད་པའི་དུས་གསུམ་ཐམས་ཅད་ལ་ང་རོ་དང་སྒྲ་དབྱངས་འབྱུང་བ་ལ་སོ་སོར་གནས་ཤིང་འབྱུང་བ་མེད་པར་འགྱུར། སྲིད་པ་ཐམས་ཅད་ཚུལ་གཅིག་གིས་དངོས་པོ་མེད་པའི་ཀུན་གཞི་མེད་པ་དང་། རྒྱུ་དང་རྐྱེན་མེད་པ་རྟག་ཏུ་འདུ་བྱེད་ཐམས་ཅད་དང་བྲལ་བ་ལ་ཡང་རྟོག་པ་མེད་པ་དང་། རྣམ་པར་རྟོག་པ་མེད་པ་དང་། འབྱུང་བ་མེད་པ་དང་། འགོག་པ་མེད་ཅིང་མངོན་སུམ་དུ་མི་བྱེད་དོ། །ཉན་ཐོས་དང་། རང་སངས་རྒྱས་ཀྱི་ཐེག་པ་ལ་ཡང་རྟོག་པ་མེད་པ་དང་། རྣམ་པར་རྟོག་པ་མེད་དོ། །སེམས་ཅན་རྣམས་ལ་འཁོར་བ་དང་འཆི་འཕོ་དམིགས་པ་མེད་དོ། །རྟག་པ་དང་ཆད་པ་སྤངས་པའི་བྱང་ཆུབ་ཀྱི་སེམས་སྙིང་རྗེ་ཆེན་པོ་ལ་དམིགས་པ་དོར་བ་མེད་པ་དང་། རྒྱུ་མེད་པ་ཐམས་ཅད་ཀུན་ནས་བསླང་བ་རྣམ་པར་སྤྱོད་པ་སྟོང་པར་ཁོང་དུ་ཆུད་པས་བཟོད་པ་སྒོམ་པར་བྱེད། དེ་ནས་སྲིད་པ་ཐམས་ཅད་རྣམ་པར་སྤྱོད་པ་སྟུག་པོ་གཏོང་བར་བྱེད། སངས་རྒྱས་ཀྱི་ཞིང་ཐམས་ཅད་ཀྱི་གནས་གཞན་དག་ཆུའི་ཟླ་བ་དང་འདྲ་བར་མཐོང་བ་ནི་གཞན་གྱི་དྲིང་མི་འཇོག་པའི་གློག་མགྱོགས་པར་འགྱུར་རོ། དགེ་བའི་རྩ་བ་ཐམས་ཅད་དུས་གསུམ་གྱི་ཕྱི་མའི་མཐའི་ཡེ་ཤེས་ལ་མཁས་པར་འགྱུར་རོ། །འདི་ལྟ་སྡེ་དཔེར་ན་རིགས་ཀྱི་བུ་མ་དྲོས་པའི་ཆུས་འཁོར་བའི་ཆུ་ཡོངས་སུ་ཟག་པའི་སའི་ཕྱོགས་ཡང་དག་པར་འཚོ་བའི་མིག་ཅེས་བྱ་བའི་མེ་ཏོག་ཆེན་པོ་མཆོག་ཏུ་བལྟ་ན་སྡུག་པའི་དྲི་ཞིམ་པོས་
གང་བ། ཅུང་ཟད་ལྷ་དང་། ཀླུ་དང་གནོད་སྦྱིན་རྣམས་ཀྱི་ལུས་ཀྱི་ཉེས་པ་སྦོམ་པོར་འགྱུར་བ་དེ་ཡང་མ་དྲོས་པར་འགྲོ་ཞིང་དེ་ཡང་དག་པར་འཚོ་བའི་མིག་མེ་ཏོག་ཆེན་པོའི་སྨན་གྱི་དྲི་བསྣམས་པས་མིག་གི་ཉེས་པ་སྦོམ་པོ་ཐམས་ཅད་ཀྱི་ནད་དང་། ལུས་ཀྱི་ཉེས་པ་སྦོམ་པོའི་ནད་ཀྱིས་ཀྱང་དེ་ཡོངས་སུ་དག་པར་འགྱུར་རོ། །མེ་ཏོག་ཆེན་པོ་དེའི་སྨན་གྱི་དྲིས་ཉམས་པ་མེད་པ་དང་། སྟོབས་མེད་པས་རྟོག་པ་མེད་པ་དང་། རྣམ་པར་རྟོག་པ་མེད་པ་དང་དགའ་བ་མེད་པ་དང་། ཁྲོ་བ་མེད་པ་འདི་ལ་དེ་བཞིན་དུ་དགའ་བ་ཡང་མེད་པར་འགྱུར་རོ། །བདག་འདི་ལྟར་ཡོན་ཏན་དང་ལྡན་པས་སེམས་ཅན་རྣམས་ནད་རབ་ཏུ་ཞི་བ་དེ་བཞིན་དུ་རིགས་ཀྱི་བུ་སྙིང་རྗེ་ཆེན་པོ་དང་ལྡན་པའི་བྱང་ཆུབ་སེམས་དཔའ་སྒྲིབ་པ་མེད་པའི་ཡེ་ཤེས་སྟོང་པ་ཉིད་ཀྱི་བཟོད་པའི་གོ་སྐབས་འདོད་པར་འགྱུར། སྲིད་པ་ཐམས་ཅད་ཀྱི་དངོས་པོའི་སྙིང་པོ་ལ་གནས་པ། འཆི་འཕོ་དང་སྐྱེ་བ་སྤྱོད་པ་ཤིན་ཏུ་འདོད་པར་འགྱུར། དེ་སྐྱེ་བ་སླུ་བར་བྱེད། གང་སྐྱེ་བ་སླུ་བར་བྱེད་པ་དེ་ཆོས་ཐམས་ཅད་སླུ་བར་བྱེད། གང་ཆོས་ཐམས་ཅད་སླུ་བར་བྱེད་པ་དེ་ཐེག་པ་གསུམ་སྤྱོད་པའི་ལམ་ལ་འཇུག་པའི་སྟོབས་ཀྱི་རྗེས་སུ་ཐོབ་པ་སླུ་བར་བྱེད་དོ། །དེ་ཅིའི་ཕྱིར་ཞེ་ན། ཕུང་པོ་གཅིག་ནས་གཅིག་ཏུ་རྣམ་པར་སྤྱོད་པའི་བྱིན་གྱིས་བརླབས་པ་ལ་བྱིན་གྱིས་རློབ་པའང་མེད་གཅིག་ནས་གཅིག་ཏུ་ཡང་དག་པར་འདུ་བའང་མེད། བདག་གི་ཡུལ་ལ་གནས་པའང་མེད། གཅིག་ནས་གཅིག་ཏུ་གནས་ལ་འདུག་པའང་མེད། སྐད་ཅིག་མར་ཀུན་ཏུ་སྤྱོད་པའང་མེད། སྐད་ཅིག་མའི་རྒྱུད་ལ་གནས་པའང་མེད། དུས་གསུམ་ཐམས་ཅད་ཀྱི་གཟུགས་དང་། གཟུགས་མེད་པ་དང་། ཚད་མེད་པ་དང་། མི་ཆུང་བའི་ཆོས་ཀྱང་མེད། གང་གཅིག་ནས་གཅིག་ཏུ་ཉེ་བར་ལེན་པ་དང་། བྱིན་གྱིས་རློབ་པ་དང་། འཇུག་པ་དང་། འཛིན་པ་དང་། འགེབས་པ་དང་། ཉམས་པ་དང་། རབ་ཏུ་སྣང་བ་ནི་རིགས་ཀྱི་བུ་འདི་ལྟ་སྟེ་དཔེར་ན་ནམ་མཁའ་ལ་རླུང་སྐྱེ་བ་མེད་པ་དང་། བྱིན་གྱིས་བརླབས་པ་མེད་པ་ནས། རྣམ་པར་རྟོག་པ་མེད་པའི་བར་དུའོ། །ཡང་རླུང་ལ་ནམ་མཁའ་སྐྱེ་བ་མེད་པ་ནས་རྣམ་པར་རྟོག་པ་མེད་པའི་བར་དུ་སྟེ། རིགས་ཀྱི་བུ་དེ་ལྟར་དེ་བཞིན་དུ་
ཆོས་ཐམས་ཅད་ལ་གཅིག་ནས་གཅིག་ཏུ་ཆུང་ཟད་ཀྱང་སྐྱེ་བ་མེད་པ་ནས་རྣམ་པར་རྟོག་པ་མེད་པའི་བར་དུ་ཇི་ལྟར་ཆོས་ཐམས་ཅད་ལ་རྒྱུ་བ་མེད་པ་དང་། ཉེ་བར་སྤྱོད་པ་མེད་པ་དང་། ཐ་དད་པ་མེད་པ་དང་། སྣང་བ་མེད་པ་དང་། སྐྱེ་བ་མེད་པ་དང་། འགག་པ་མེད་པ་དང་། ཆད་པ་མེད་པ་དང་། རྟག་པ་མེད་པ་དང་། རྟོག་པ་མེད་པ་དང་། རྣམ་པར་རྟོག་པ་མེད་པ་དེ་ཐམས་ཅད་སྐྱེ་བར་མི་ཤེས་པ་དང་། ཉེ་བར་སྐྱེ་བ་མེད་པ་དང་། རྗེས་སུ་སྐྱེ་བ་མེད་པ་དང་། བདག་པོར་རབ་ཏུ་མི་ཤེས་སོ། །ཇི་ལྟ་བུར་ནམ་མཁའ་ལ་རླུང་སྐྱེ་བ་དང་འགོག་པ་མེད་པ་དེ་ལྟར་དེ་བཞིན་དུ་ཕུང་པོ་རྣམས་སྐྱེ་བ་ཟད་པར་རབ་ཏུ་ཤེས་སོ། །དེ་སྐྱེ་བ་དང་། ཡི་གེ་མེད་པ་ཐམས་ཅད་དང་། དངོས་པོ་མེད་པར་རབ་ཏུ་ཤེས་སོ། །དེ་ཆོས་ཐམས་ཅད་ཀྱི་རྗེས་སུ་སོང་བ་དང་། ཡང་དག་པར་སོང་བ་མི་ཤེས་པ་དང་། ཤིན་ཏུ་འདས་པ་གཅིག་ནས་གཅིག་ཏུ་རྣམ་པར་སྤྱོད་པར་ཡང་དག་པར་རྗེས་སུ་མི་མཐོང་ངོ་། །ཅི་ལ་ཡང་ཆགས་པ་མེད་དོ། །བཏགས་པ་མེད་དོ། །བཏང་བ་མེད་དོ། །ཆོས་ཐམས་ཅད་ཐ་མི་དད་པར་ཡང་དག་པར་རྗེས་སུ་མི་མཐོང་ངོ་། །དེ་དུས་གསུམ་ཐམས་ཅད་ཀྱི་ཆོས་ཐམས་ཅད་ལ་གནས་པའི་སྒོ་སྐྱེ་བར་ཡང་དག་པར་རྗེས་སུ་མི་མཐོང་ངོ་། །གང་དེ་ལྟར་སྐྱེ་བ་དང་ལྟ་བ་བྲལ་བ་དེ་ཆོས་ཐམས་ཅད་གཞན་ལ་རག་མ་ལས་པའི་ཡེ་ཤེས་ཀྱི་མཛོད་ཀྱི་ཆོས་དང་ལྡན་པ་གཉིས་མངོན་དུ་མ་བྱུང་ཞིང་བདུད་བཞི་ལས་ཤིན་ཏུ་འདས་པ་དེ་ཆོས་ཐམས་ཅད་སོགས་པ་ཡང་དག་པར་རྗེས་སུ་མི་མཐོང་ངོ་། །དེ་ཆོས་ཐམས་ཅད་དང་བྲལ་བས་ཁམས་གསུམ་ཐམས་ཅད་ཀྱི་སྐྱེ་བ་ལས་ཤིན་ཏུ་འདས་པ་ནི་ཡང་སྐྱེ་བ་མེད། འཁོགས་པ་མེད། འཆི་འཕོ་བ་མེད། འབྱུང་བ་ཡང་མེད་དོ། །ཞིང་ཐམས་ཅད་སྤྲིན་མགྱོགས་པ་དང་མཉམ་པར་མཐོང་ཞིང་སེམས་ཅན་རྣམས་ཡོངས་སུ་སྨིན་པའི་ཕྱིར་ཉེ་བར་སོང་ངོ་། །རིགས་ཀྱི་བུ་དེ་ལྟར་བྱང་ཆུབ་སེམས་དཔའ་སྐྱེ་བ་ལས་ཤིན་ཏུ་བཟླ་བའི་ཕྱིར་ཡང་དག་པར་སྤྱོད་པའི་བཟོད་པ་བསྒོམ་པར་བྱའོ། །དེ་ལ་རིགས་ཀྱི་བུ་གང་གཏི་མུག་སྐྱེ་བའི་རྐྱེན་གྱིས་རྒ་ཤི་ལ་རྟོག་པར་འགྱུར། སྐད་ཅིག་མ་དང་ལྡན་པའི་སྐྱེ་བས་རྒལ་བ་ལ་འཚེ་བར་བྱེད། །སྐྱེས་བུ་གཏི་མུག་པ་འདིའི་འདུ་བྱེད་རྣམས་ཕྱི་དང་ནང་གི་སླུ་
བ་དང་། གཞན་ཡང་གཉིས་སུ་མེད་པའི་ཚོར་བ་ཇི་སྙེད་པ་རྣམ་པར་ཤེས་པས་རྒ་ཤི་དང་བྲལ་བ་ནས་འཁྲུག་པ་དང་བྲལ་བའི་བར་དུ་རྟོག་པ་མེད། རྣམ་པར་རྟོག་པ་མེད་ཅིང་སླུ་བ་མེད་པ་དེ་ལྟར་དེ་བཞིན་དུ་ཚེའི་རླངས་པ་ཡང་རྣམ་པར་ཤེས་པ་ནམ་མཁའ་འདྲ་བར་མཉམ་པ་རྣམ་པར་རྟོག་པ་མེད་པའི་མཉམ་པ་ཉིད་དང་། གཉིས་སུ་མེད་པའི་ལུས་ལ་སླུ་བ་མེད་པས་འཕགས་པ་མ་ཡིན་པའི་བརྫུན་གཉིས་དང་བྲལ་བའོ། །ཇི་ལྟར་ཆོས་ཐམས་ཅད་ཀྱི་དབྱིངས་རང་བཞིན་གྱིས་ཉོན་མོངས་པ་མེད་པའི་རྒ་ཤི་འདྲེས་པ་མེད་པ་དེ་བཞིན་དུ་མིག་གི་རྣམ་པར་ཤེས་པ་རྒ་ཤི་སླུ་བའི་འདོད་ཆགས་ལ་ཐུག་པ་ནས་འཁྲུག་པའི་བར་དུའོ། །དེ་བཞིན་དུ་རྣ་བའི་རྣམ་པར་ཤེས་པ་ཇི་སྙེད་པ་ནས། ཡིད་ཀྱི་རྣམ་པར་ཤེས་པ་རྒ་ཤི་སླུ་བ་ནས་འདོད་ཆགས་འཁྲུག་པ་ལ་ཐུག་པའི་བར་དུ་དེ་ལྟར་འདྲེས་པ་མེད་དོ། །ཡང་མིག་གི་རྣམ་པར་ཤེས་པ་རྒ་ཤི་སླུ་བ་འདོད་ཆགས་མེད་པའི་མཐའ་ནས་འཁྲུག་པའི་བར་དུའོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ལ་འདྲེས་པ་མེད་པ་དེ་བཞིན་དུ་རྒ་ཤི་སླུ་བའི་མཐའ་ནས། འཁྲུག་པའི་བར་དུའོ། །ཡང་མིག་རྒ་བ་ནས། འཁྲུག་པའི་བར་དུ་ཡང་དག་པར་འདུས་པ་མེད་དོ། །དེ་ཁོ་ན་ཉིད་ལ་དམིགས་པས་ན་དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་རྒ་ཤི་ནས་འཁྲུག་པའི་བར་དུ་ཡང་དག་པར་འདུས་པ་མེད་དོ། །དེ་ཁོ་ན་ཉིད་ལ་དམིགས་པས་ན་གཟུགས་ཀྱི་རྒ་ཤི་ནས་འཁྲུག་པའི་བར་དུ་ཡང་དག་པར་འདུས་པ་མེད་དོ། །དེ་ཁོ་ན་ཉིད་ལ་དམིགས་པས་ན་རྣམ་པར་ཤེས་པའི་རྒ་ཤི་འདི་ཇི་སྙེད་པ་ནས། འཁྲུག་པའི་བར་དུ་ཀུན་ཏུ་ཆད་པའི་འདོད་ཆགས་དང་བྲལ་བའི་མཐའ་དད་པ་མེད་དོ། །ཚེའི་རླངས་པ་ཡང་རྣམ་པར་ཤེས་པའི་རྒ་ཤི་ནས་འཁྲུགས་པའི་བར་དུ་འདོད་ཆགས་དང་བྲལ་བའི་མཐའ་ཀུན་ཏུ་ཆད་པའོ། །རིགས་ཀྱི་བུ་འདི་ལ་ཡང་ཚོར་བའི་ཕུང་པོ་རྣམས་དེ་བཞིན་དུ་བྱང་ཆུབ་སེམས་དཔས་ཚོར་བའི་ཕུང་པོ་བསྒོམ་པར་བྱའོ། །གང་ཁམས་གསུམ་ན་དུས་གསུམ་གྱི་ཚོར་བ་མེད་པ་འབྱུང་བ་ཟད་པ་ལ་མི་རྟག་པ་དང་། སྡུག་བསྔལ་བ་དང་། སྟོང་པའི་བཟོད་པ་འདི་སྒོམ་པར་བྱེད་པ་འདི་ལ་ཡང་བྱང་ཆུབ་སེམས་དཔའ་སེམས་ཅན་ཐམས་ཅད་ཡོངས་སུ་སྨིན་པ་ཉེ་
བར་འཚོ་བའི་བཟོད་པ་ལ་བལྟ་བར་བྱའོ། །གཞན་ཡང་རིགས་ཀྱི་བུ་བྱང་ཆུབ་སེམས་དཔས་འདུ་ཤེས་ཀྱི་ཕུང་པོ་ལ་ཡང་ཚུལ་བཞིན་དུ་བརྟག་པའི་ཕྱིར་བཟོད་པ་བསྒོམ་པར་བྱའོ། །དེ་ལ་འདུ་ཤེས་ཀྱི་ཕུང་པོ་གང་ཞེ་ན། འདུ་ཤེས་ཀྱི་ཚོགས་དྲུག་སྟེ། མིག་གི་འདུས་ཏེ་རེག་པ་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་འདུས་ཏེ་རེག་པའི་འདུ་ཤེས་སོ། །དེ་ལ་མིག་གི་འདུས་ཏེ་རེག་པ་ནི་གསུམ་འདུས་པའི་རེག་པ་སྟེ། གང་མིག་དང་། རྣམ་པར་ཤེས་པ་དང་། གཟུགས་ཀྱི་འདུ་ཤེས་འབྱུང་བར་བྱེད་པ་འདི་ནི་གསུམ་འདུས་པ་རེག་པའི་རྐྱེན་གྱིས་འདུ་ཤེས་ཀུན་འབྱུང་བར་འགྱུར་རོ། །གང་མིག་གི་གཟུགས་ལ་ཡང་བྱེད་པ་མེད་པ་དང་། རྣམ་པ་མེད་པ་དང་། ལྦུ་བའི་ཕུང་པོ་ལྟ་བུར་དུས་གསུམ་ཐམས་ཅད་ཀྱི་འདུ་བྱེད་སྟོང་པ་ཇི་ལྟ་བ་བཞིན་དུ་རབ་ཏུ་སྦྱོར་བ་གསུངས་སོ། །གང་མིག་གི་རྣམ་པར་ཤེས་པ་ནི་ཅི་ལའང་འོང་བ་དང་འགྲོ་བ་སྙེམས་པར་རབ་ཏུ་མི་ཤེས་སོ། །ཁམས་གསུམ་ཐམས་ཅད་ཡུལ་དང་གནས་མེད་པ་མིག་གི་རྣམ་པར་ཤེས་པ་དེས་སྟོང་པ་ནས། ཡིད་ཀྱི་རྣམ་པར་ཤེས་པས་སྟོང་པའི་བར་དུ་ཤེས་པར་བྱའོ། །གང་སྐྱེ་མཆེད་དྲུག་གི་འདུ་ཤེས་འབྱུང་བ་དེ་ཚོར་བའོ། །གང་ཚོར་བ་དེ་རྟོག་པའོ། །གང་རྟོག་པ་དེ་སྙེམས་པའོ། །གང་སྙེམས་པ་དེ་ཉེ་བར་ལེན་པའོ། །གང་ཉེ་བར་ལེན་པ་འབྱུང་བ་ནས། འཁྲུག་པའི་བར་དུ་ཀུན་ནས་ལྡང་སྟེ། དེ་བས་ན་བྱང་ཆུབ་སེམས་དཔས་འདུ་ཤེས་ཚུལ་བཞིན་དུ་བརྟག་པའི་ཕྱིར་བཟོད་པ་བསྒོམ་པར་བྱའོ། །བཟོད་པ་བསྒོམ་པའི་རེག་པ་ཡོངས་སུ་ཤེས་པའི་ཕྱིར་འདུ་ཤེས་ཡོངས་སུ་ཤེས་པ་ཡིན་ནོ། །ཡིད་ཀྱི་འདུ་ཤེས་ཀྱི་བར་དུ་བཟོད་པ་དེ་བསྒོམས་པས་འདུ་ཤེས་ཀྱི་ཚོགས་དྲུག་བཟོད་པ་དེ་བསྒོམ་པ་ཡོངས་སུ་ཤེས་པ་ལ་རྟོག་པ་མེད། རྣམ་པར་རྟོག་པ་མེད། ཉེ་བར་མི་འགྲོ། ཉེ་བར་ལེན་པ་མེད། བྱིན་གྱིས་རློབ་པ་མེད། མངོན་པར་ཆགས་པའང་མེད་དོ། །འདུ་ཤེས་ཐམས་ཅད་རང་བཞིན་མེད་པ་ཡོངས་སུ་ཆད་པའི་བཟོད་པ་དེ་བསྒོམས་པའི་རྗེས་སུ་འབྱུང་བ་ཇི་ལྟ་བ་བཞིན་ཡོངས་སུ་ཤེས་པ་ཅི་ལ་ཡང་ཆགས་པ་མེད་དོ། །ཁམས་གསུམ་ཐམས་ཅད་ཀྱི་དུས་གསུམ་གནས་པ་མེད་པ་དང་། གནས་མེད་པ་དང་། འཁྲུལ་པ་མེད་པ་དང་། ཞིག་པ་མེད་པ་དང་།
བླང་བ་མེད་པ་དང་། དོར་བ་མེད་པ་དང་། གཉིས་སུ་བྱ་བ་མེད་པའི་ཆོས་ཀྱི་དབྱིངས་ལ་ཡང་དག་པར་གཞོལ་བའི་འདུ་ཤེས་ཐམས་ཅད་ཤེས་པ་ནི་ཅིས་ཀྱང་དབྱེ་བ་མེད་དོ། །དེ་འདུ་ཤེས་ཐམས་ཅད་ཉེ་བར་ལེན་པ་མེད་པའི་ཡིད་ཅི་ལའང་དམིགས་པ་མེད་པ་ནི་སོ་སོ་ཡང་དག་པར་སྤྱོད་པའི་ཚུལ་གྱི་བཟོད་པ་ལ་བསྒོམ་པ་ཞེས་བྱའོ། །འདུ་ཤེས་ཐམས་ཅད་ནི་མི་རྟག་པ་དང་། སྡུག་བསྔལ་བ་དང་། སྟོང་པའི་བཟོད་པ་སྒོམ་པར་བྱེད་པ་འདི་ལ་ཡང་བྱང་ཆུབ་སེམས་དཔའ་སེམས་ཅན་ཐམས་ཅད་ཡོངས་སུ་སྨིན་པ་ཉེ་བར་འཚོ་བའི་བཟོད་པ་ལ་བལྟ་བར་བྱའོ། །རིགས་ཀྱི་བུ་བྱང་ཆུབ་སེམས་དཔས་ཡང་འདུ་བྱེད་ཡོངས་སུ་ཤེས་པའི་བཟོད་པ་བསྒོམ་པར་བྱའོ། །དེ་ལ་འདུ་བྱེད་གང་ཞེ་ན་འདི་ལྟ་སྟེ། འདུ་བྱེད་རྣམ་པ་གསུམ་མོ། །གསུམ་གང་ཞེ་ན། ལུས་ཀྱི་འདུ་བྱེད་དང་། ངག་གི་འདུ་བྱེད་དང་། ཡིད་ཀྱི་འདུ་བྱེད་དོ། །ལུས་ཀྱི་འདུ་བྱེད་ནི་དབུགས་ཕྱི་ནང་དུ་རྒྱུ་བའོ། །ངག་གི་འདུ་བྱེད་ནི་རྣམ་པར་རྟོག་པ་དང་། རྣམ་པར་དཔྱོད་པའོ། །ཡིད་ཀྱི་འདུ་བྱེད་ནི་འདུ་ཤེས་དང་སེམས་པའོ། །དེ་ལ་རིགས་ཀྱི་བུ་ལུས་ཀྱི་འདུ་བྱེད་དབུགས་ཕྱི་ནང་དུ་རྒྱུ་བ་ཚུལ་བཞིན་དུ་བརྟག་པར་བྱའོ། །ལུས་ཐམས་ཅད་སྟོང་ཕྲག་དགུ་བཅུ་རྩ་གཉིས་སམ། །བ་སྤུའི་ཁུང་བུ་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་དགུ་ལྷག་ཙམ་གྱི་ལུས་ཐམས་ཅད་ཤིན་ཏུ་ཕྲ་བའི་རྡུལ་དགུ་བཅུ་རྩ་དགུའི་ཁའི་སྒོ་ནས་ཤིན་ཏུ་ཕྲ་བའི་རྡུལ་བརྒྱ་སྟོང་ཕྲག་བཅུ་སོགས་སོ། །ཉེས་པ་མེད་པའི་མིའི་བ་སྤུའི་ཁུང་བུ་འདི་གཅིག་འགྲངས་བས་ལུས་ཐམས་ཅད་ཀྱི་བ་སྤུའི་ཁུང་བུ་ཐམས་ཅད་ཀྱི་སྒོ་སྟོང་ཕྲག་དགུ་བཅུ་རྩ་དགུ་ཇི་ལྟ་བུར་ཁའི་སྒོ་ནས་དབུགས་རྒྱུ་བ་དེ་ལྟ་བུར་བ་སྤུའི་ཁུང་བུ་ཐམས་ཅད་ནས་དབུགས་རྒྱུའོ་ཞེས་དབུགས་ཕྱི་ནང་དུ་རྒྱུ་བ་ཐམས་ཅད་ཤེས་པར་བྱའོ། །ཁའི་སྒོ་ཐམས་ཅད་ནས་དབུགས་ཕྱི་ནང་དུ་རྒྱུ་བའི་ཕུང་པོ་ལྔ་དག་འབྱུང་བ་དང་ཟད་པ་བརྟག་པའི་ཕྱིར་བཟོད་པ་བསྒོམ་པར་བྱའོ། །དེ་ལ་ངག་གི་འདུ་བྱེད་གང་ཞེ་ན། གང་རྣམ་པར་རྟོག་པ་དང་། རྣམ་པར་དཔྱོད་པ་སྐད་ཅིག་མར་འབྱུང་ཞིང་འགོག་པ་འདི་ལ་ཡང་སྐད་ཅིག་མ་ཉི་མ་གཅིག་ལ་ཡང་མི་བརྒྱ་སྟོང་ཕྲག་དྲུག་ཅུ་རྩ་ལྔ་སྐད་ཅིག་མར་འོང་བར་འགྱུར་རོ། །དེ་རེ་རེ་ལ་ཡང་རྣམ་པར་རྟོག་པ་དང་། རྣམ་པར་དཔྱོད་པ་སྐད་ཅིག་མ་འབྱུང་
བའི་ཕུང་པོ་ལྔ་ཐམས་ཅད་འབྱུང་ངོ་། །འགོག་གོ །ཕུང་པོ་དེ་རེ་རེ་ལའང་ཚོར་བ་རྣམ་གསུམ་འབྱུང་ངོ་། །འགོག་གོ །ཚོར་བ་དེ་རེ་རེ་ལ་ཡང་འབྱུང་བའི་ཡན་ལག་བཅུ་གཉིས་ཐམས་ཅད་འབྱུང་ངོ་། །འགོག་གོ །འབྱུང་བའི་ཡན་ལག་དེ་རེ་རེ་ལ་ཡང་བག་ལ་ཉལ་བ་དགུ་བཅུ་རྩ་བརྒྱད་འབྱུང་བར་འགྱུར་རོ། །བག་ལ་ཉལ་བ་དེ་རེ་རེ་ལ་ཡང་ཁམས་གསུམ་ཐམས་ཅད་ན་སྤྱོད་པ་ཉོན་མོངས་པ་ཀུན་འབྱུང་བ་ལ་བལྟ་བར་བྱའོ། །འདི་དག་ནི་ངག་གི་འདུ་བྱེད་དོ། །དེ་ལ་འདུ་ཤེས་གང་ཞེ་ན། དབུགས་ཕྱི་ནང་དུ་རྒྱུ་བ་ལ་རྣམ་པར་རྟོག་པ་དང་། ཀུན་ཏུ་ཉོན་མོངས་པ་དང་། དེ་ཕྱིན་ཅི་ལོག་ཐམས་ཅད་ཀྱི་མཚན་མས་ཀུན་ཏུ་ཉོན་མོངས་པ་འདི་ཡང་འདུ་ཤེས་སོ། །དེ་ལ་སེམས་པ་གང་ཞེ་ན། གང་སེམས་པ་དང་། ཚོར་བ་དང་། ཕུང་པོ་དང་། རྣམ་པར་དཔྱོད་པ་དང་། དབང་པོ་དྲུག་དང་། རྣམ་པར་འཕེལ་བ་འདི་ནི་སེ་གོལ་གཏོགས་པ་ཙམ་གྱིས་ཀྱང་འདོད་ཆགས་ཀྱི་ཀུན་གཞི་ཉོན་མོངས་པའི་དབང་པོ་བརྒྱ་ལས་འདས་པ་འབྱུང་བར་འགྱུར། ཞེ་སྡང་གི་ཀུན་གཞི་བརྒྱ་ལས་འདས་པ་འབྱུང་བར་འགྱུར། གཏི་མུག་གི་ཀུན་གཞི་བརྒྱ་ལས་འདས་པ་འབྱུང་བར་འགྱུར། ཆ་ཤས་སྤྱོད་པའི་ཉོན་མོངས་པ་བརྒྱ་ལས་འདས་པ་འབྱུང་བར་འགྱུར་བ་འདི་ནི་རིགས་ཀྱི་བུ་ལུས་དང་། ངག་དང་། ཡིད་དོ། །འདུ་བྱེད་དང་། དཔྱོད་པ་དང་། རྣམ་པར་དཔྱོད་པ་དང་། དབུགས་ཕྱི་ནང་དུ་རྒྱུ་བ་འདི་དག་ལ་རྣམ་པར་རྟོག་པས་འདུ་ཤེས་སུ་སེམས་པ་དང་། བསམ་པའི་རྗེས་སུ་སོང་བ་ལ་བྱིན་གྱིས་བརླབས་པ་དེ་ལ། བྱང་ཆུབ་སེམས་དཔའི་དངོས་པོ་དེ་ལྟར་རང་བཞིན་དང་དུས་གསུམ་ནི་ལུས་དང་། ངག་དང་། ཡིད་དོ། །འདུ་བྱེད་ལ་དངོས་པོ་མེད་པ་དང་། མི་ཟད་པ་ནི་ཆོས་ཀྱི་དབྱིངས་ལ་ཉོན་མོངས་པ་མེད་པ་དང་། ཆོས་ཀྱི་དབྱིངས་ཡོངས་སུ་ཤེས་པ་ནི་རྣམ་པར་དག་པ་རྗེས་སུ་འོང་བ་དེ་ཅིར་དགོས་ཤེ་ན། ཆོས་ཀྱི་མཚན་ཉིད་རྣམ་པར་དག་པ་དེ་མཚན་ཉིད་མི་རྙེད་པ་དང་། མི་འཛིན་པ་དང་། ཆོས་ཀྱི་དབྱིངས་སུ་མི་འབྱུང་བར་འགྱུར་བ་དེ་ཡང་དག་པའི་མཐའ་མི་སོགས་སོ། །འདུ་བྱེད་ཀྱི་མཐར་མི་རྙེད་པ་དང་། མི་འཛིན་པ་མི་འགོག་པར་འགྱུར་བ་དེ་བཞིན་དུ་འདུ་བྱེད་ཀྱི་མཐའ་དང་། དེ་ཆོས་ཀྱི་དབྱིངས་སུ་སྙེམས་པ་ཡང་དག་པའི་མཐའ་དང་། དེ་ཆོས་ཐམས་ཅད་ཀྱི་མཐའ་དང་། གང་
ཆོས་ཐམས་ཅད་ཀྱི་མཐའ་དང་། དེ་འདུ་བྱེད་གསུམ་དང་། དུས་གསུམ་ཡོངས་སུ་གཅོད་པའི་མཐའ་དང་། དེ་མཐའ་ཡས་པ་མི་གཅོད་པའི་མཐའ་དང་། རྗེས་སུ་མི་གཅོད་པའི་མཐའ་དང་། མི་རྟག་པའི་མཐའ་དང་། དེ་ལྟ་བུའི་མཐའ་ནི་དུས་གསུམ་དང་མཉམ་པའི་མཐའ་དང་། མཐར་འགྲོ་བ་དང་།དུས་གསུམ་དང་། ལུས་དང་ངག་དང་། ཡིད་གཉིས་སུ་མེད་པའི་མཐའ་དང་། དུས་གསུམ་ཐམས་ཅད་ཀྱི་མཐའ་ནི་འདུ་བྱེད་གསུམ་ཡང་དག་པའི་མཐའ་ལ་གཉིས་སུ་མེད་པའི་མཐའ་དང་། ཅིའང་མ་ཡིན་པའི་མཐའ་དང་། རེག་པ་ཡོངས་སུ་ཤེས་པ་གཉིས་སུ་མེད་པའི་མཐའ་དང་། འཇིག་པ་དང་བྲལ་བའི་མཐའ་དང་། དེ་བཞིན་དུ་དབུགས་ཕྱི་ནང་དུ་རྒྱུ་བ་ཡོངས་སུ་ཤེས་པའི་མཐའ་དང་། དེ་བཞིན་དུ་ཉི་ཤུའི་མཐའ་དང་། རྣམ་པར་རྟོག་པ་དང་། རྣམ་པར་དཔྱོད་པ་དང་། ཤིང་ཏ་ལའི་མགོ་བཅད་པའི་མཐའ་དང་། འདུ་ཤེས་སུ་མི་ཆགས་པར་སེམས་པ་དང་། སྐད་ཅིག་མའི་མཐའ་སེམས་པའི་མཐའ་དང་། དེ་ལྟར་ཡོངས་སུ་ཤེས་པ་ནི་འདུ་བྱེད་གསུམ་ལ་རྣམ་པར་མི་གཅོད་པའི་མཐར་ཡོངས་སུ་ཤེས་པ་ནི་འདི་ལ་དངོས་པོ་དང་། དངོས་པོ་མ་ཡིན་པར་སྐྱེ་བའོ། །ཡང་དངོས་པོ་ལས་འདས་པ་ཞེས་བྱ་བ་ནི་འདུ་བྱེད་ཐམས་ཅད་ལ་རྣམ་པར་ཤེས་པ་མེད་པ་དང་། འདུ་བྱེད་ཐམས་ཅད་ལ་གཉིས་དང་། གཉིས་སུ་མེད་པ་ནི་ཡང་དག་པའི་མཐའི་ཆོས་ཀྱི་དབྱིངས་ལ་འཇུག་པ་དང་། སོགས་པ་དང་། ཉེ་བར་སོགས་པ་དང་བྲལ་བར་འགྱུར་རོ། །འདི་ལ་འདུ་བྱེད་ཐམས་ཅད་ལ་བྱིན་གྱིས་མི་རློབ་པའི་མཐའ་དང་། དུས་གསུམ་དུ་ཕྱག་འཚལ་བ་དང་བྲལ་བ་དེ་ཡང་དག་པར་ཡོངས་སུ་ཤེས་པ་དང་། ཡང་དག་པའི་མཐར་ཡོངས་སུ་ཤེས་པ་དེ་ནི་ཆོས་ཐམས་ཅད་ཡོངས་སུ་ཤེས་པ་ཞེས་བྱའོ། །ཡོངས་སུ་བསྐོར་བའི་འདུ་བྱེད་གསུམ་ཡོངས་སུ་ཆད་པའོ། །རིགས་ཀྱི་བུ་གང་དུས་གསུམ་གྱི་འདུ་བྱེད་གསུམ་མི་གཅོད་པའི་མཚན་མ་ལ་དམིགས་པས་བཟོད་པ་སྒོམ་པ་ཡོངས་སུ་འཛིན་ཏོ། །རིགས་ཀྱི་བུ་འདུ་བྱེད་གསུམ་དང་། མཚན་མ་མི་གཅོད་པ་དམིགས་པ་སྤངས་པས་གཉིས་སུ་མེད་པའི་བཟོད་པ་བསྒོམ་མོ། །རིགས་ཀྱི་བུ་དེའི་ཕྱིར་དུས་གསུམ་དང་། འདུ་བྱེད་
གསུམ་པོ་ཡོངས་སུ་ཤེས་པའི་བཟོད་པ་འདི་ནི་སོ་སོ་ཡང་དག་པར་སྤྱོད་པའི་ཚུལ་གྱིས་བཟོད་པ་བསྒོམ་པར་བྱའོ། །རིགས་ཀྱི་བུ་གང་འདུ་བྱེད་ནི་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་བཟོད་པ་བསྒོམ་པར་བྱའོ། །འདི་ཡང་བྱང་ཆུབ་སེམས་དཔའི་ཉེ་བར་འཚོ་བས་སེམས་ཅན་ཡོངས་སུ་སྨིན་པའི་བཟོད་པ་བསྒོམ་པར་བལྟ་བར་བྱའོ། །དེ་ལ་རིགས་ཀྱི་བུ་རྣམ་པར་ཤེས་པ་འབྱུང་བའི་ཕུང་པོ་གང་ཞེ་ན། རྣམ་པར་ཤེས་པ་དྲུག་གི་ལུས་དང་། མིག་དང་། རེག་པའི་རྣམ་པར་ཤེས་པ་ཞེས་བྱའོ། །གང་ཡང་རྣམ་པར་ཤེས་པའི་ལུས་དྲུག་དག་དུས་གསུམ་གྱི་རེག་པས་རྣམ་པར་གནས་པ་དང་། དུས་གསུམ་འབྱུང་བས་རྣམ་པར་ཤེས་པ་དང་། དུས་གསུམ་གྱི་རྣམ་པར་ཤེས་པས་རྣམ་པར་གནས་པ་དེ་ཕན་ཚུན་དུ་རྟོག་པ་དང་། རྣམ་པར་རྟོག་པ་དང་། ཀུན་ནས་ལྡང་བར་འགྱུར་རོ། །གང་ཡུལ་གྱི་སྲེད་པ་ལ་རྟོག་པ་དང་། དམིགས་པས་བཟོད་པར་སྨྲ་བ་ཡོངས་སུ་འཁྲུག་པའོ། །གང་མིག་དང་གཟུགས་ཀྱི་ཡུལ་ལ་སྲེད་པ་ལ་རྣམ་པར་རྟོག་པས་བཟོད་པ་ཡོངས་སུ་སྤངས་པའོ། །འཁྲུག་པའོ། །རེག་པ་དང་ཚོར་བ་ལ་རྗེས་སུ་གདུངས་པས་དེ་ཡུལ་ལ་སྲེད་པའི་བཟོད་པ་ཡོངས་སུ་སྤངས་པའོ། །རྣམ་པར་འཇིག་པའོ། །ཡིད་ལ་རྣམ་པར་དམིགས་པས་འདུ་ཤེས་ཀྱི་ཞིང་ལ་སྲེད་པའི་བཟོད་པ་ཡོངས་སུ་སྤངས་པའོ། །འཁྲུག་པའོ། །དུས་གསུམ་དང་། འདུ་བྱེད་གསུམ་ལ་ཉེ་བར་ཆད་པའི་ཡུལ་ལ་སྲེད་པའི་བཟོད་པ་ཡོངས་སུ་སྤངས་པའོ། །འཁྲུག་པའོ། །འདུ་བྱེད་གསུམ་དག་མཚན་མར་ཉེ་བར་འཛིན་པ་དང་། རང་གི་ཡུལ་གྱི་སྲེད་པའི་བཟོད་པ་ཡོངས་སུ་སྤངས་པའོ། །འཁྲུག་པའོ། །འདུ་བྱེད་དག་ཀུན་ནས་ལྡང་ལ་དམིགས་པ་རང་གི་ཡུལ་ལ་སྲེད་པའི་བཟོད་པ་ཡོངས་སུ་སྤངས་པ་ནི་ཆོས་ཀྱི་དབྱིངས་ལ་ཅིའང་མ་ཡིན་པའི་ཉོན་མོངས་པའི་བཟོད་པ་ཐམས་ཅད་ཡོངས་སུ་སྤངས་པའོ། །རིགས་ཀྱི་བུ་ཆོས་ཀྱི་དབྱིངས་ལ་ཀུན་ཏུ་ཉོན་མོངས་པ་མེད་པའི་བཟོད་པ་དེ་སྒོམ་པ་དང་། རྣམ་པར་ཤེས་པའི་ལུས་དྲུག་གི་ཡུལ་དུ་ཡིད་ལ་མི་བྱེད་དོ། །དེ་བཟོད་པ་བསྒོམས་པའི་རང་བཞིན་དང་། སྒྱུ་མ་ལྟ་བུའི་སེམས་ཀྱི་ཡུལ་ལ་ཡང་དག་པར་
གཞོལ་བས་ཡུལ་ཐམས་ཅད་ལ་རྟོག་པར་འགྱུར་རོ། །དེ་ལ་སོ་སོ་ཡང་དག་པར་སྤྱོད་པའི་ཚུལ་གྱི་བཟོད་པ་བསྒོམས་པས་དེ་ལ་བྱང་ཆུབ་སེམས་དཔའི་སྔོན་གྱི་ལས་ལ་བརྩོན་པར་བྱའོ། །གང་ཡང་བྱང་ཆུབ་སེམས་དཔས་རྣམ་པར་དབྱེ་བ་ཡོངས་སུ་བྱས་པ་དང་། མཆོག་གི་དགེ་བའི་རྩ་བ་ཡོངས་སུ་ལྡང་བ་འདི་ནི་ནམ་མཁའ་ལ་འགྲོ་བས་འདུལ་བའི་བཟོད་པ་ཡོངས་སུ་རྒྱས་པར་བསྒོམ་པའི་ཕྱིར་འདི་ནི་དུས་གསུམ་དང་། འདུ་བྱེད་ཐམས་ཅད་ཀྱི་ཡུལ་དུ་ཡིད་ལ་མི་བྱེད་དོ། །སྙེམས་པ་མེད་དོ། །དུས་གསུམ་དང་། འདུ་བྱེད་ཐམས་ཅད་དག་ཀུན་ནས་ལྡང་བའི་ལམ་ཐམས་ཅད་དུ་ཡིད་ཀྱི་རྣམ་པར་ཤེས་པ་ཡང་དག་པར་སྤྱོད་དོ། །དེ་བཞིན་ཉིད་ནི་དངོས་པོ་མེད་པའོ། །དུས་གསུམ་དང་། འདུ་བྱེད་ཀྱི་རྗེས་སུ་འཇུག་པ་དང་། ཆོས་ཐམས་ཅད་མི་བསྒོམ་པར་རབ་ཏུ་ཤེས་པ་དང་། བསྒོམ་པ་དང་བྲལ་བ་དང་། དབྱངས་མ་ཡིན་པ་དང་། ངག་གི་ལམ་མ་ཡིན་པ་དང་། ཡི་གེ་མ་ཡིན་པ་དང་། རྗེས་སུ་འབྱུང་བ་མེད་པ་དང་། འགོག་པ་མེད་པ་དང་། མཚན་ཉིད་མེད་པ་དང་། སོ་སོའི་ཐེག་པ་མ་ཡིན་པ་དང་། དམིགས་པ་མེད་པ་དང་། མཚན་མ་མེད་པ་དང་། ཤིན་ཏུ་དབེན་པ་མ་ཡིན་པ་དང་། བརྗོད་པ་མེད་པ་དང་། ཤིན་ཏུ་འཇུངས་པ་མེད་པ་དང་། ཤིན་ཏུ་ཞི་བ་དང་། སྐད་ཅིག་མར་ཤིན་ཏུ་དམིགས་པས་རྣམ་པར་བྲལ་བ་དང་། ཤིན་ཏུ་ཟད་པ་དང་། ཀུན་གཞི་ལས་ཤིན་ཏུ་བྲལ་བ་དང་། ཤིན་ཏུ་རྣམ་པར་གནས་པ་དང་། ཡུལ་ཤིན་ཏུ་མེད་པ་དང་། གཏོང་བའི་སེམས་ཤིན་ཏུ་མེད་པ་དང་། རྩ་བ་ཤིན་ཏུ་མེད་པ་དང་། དབང་པོ་ཤིན་ཏུ་མ་ཡིན་པ་དང་། ཤིན་ཏུ་རྣམ་པར་མ་དག་པ་དང་། ཤིན་ཏུ་བྲལ་བ་དང་། གཉེན་པོ་ཤིན་ཏུ་མེད་པ་དང་། མཚན་མ་དང་དངོས་པོ་མེད་པ་དང་། ཤིན་ཏུ་འཕྲོག་པ་མེད་པ་དང་། ཤིན་ཏུ་འཐོར་བ་དང་ཆོས་ཐམས་ཅད་ལ་ཤིན་ཏུ་དངོས་པོ་མེད་པར་རབ་ཏུ་ཤེས་པ་ནི་བྱེད་པ་པོ་མེད་པ་དང་། ཚོར་བ་པོ་མེད་པ་དང་། ཉན་པ་མེད་པ་དང་། འཛིན་པ་མེད་པ་དང་། སྨིག་རྒྱུ་བ་ལྟ་བུར་སོ་སོར་སྣང་བ་དང་། ཆུ་ཟླ་ལྟ་བུ་དང་། གཟུགས་བརྙན་ལྟ་བུ་ནམ་མཁའི་རང་བཞིན་ཆུང་ཟད་ཀྱང་མེད་པ་
དང་། ཆོས་ཐམས་ཅད་ལ་བདག་མེད་པ་ནི་མཚན་ཉིད་ཀྱི་གཞི་དང་མཉམ་པའི་མཚན་ཉིད་དང་། མཚན་ཉིད་གཅིག་པ་དང་། མཚན་ཉིད་མེད་པ་ལ་བརྟེན་པ་དེ་ཆོས་ཐམས་ཅད་ལ་ཀུན་དུ་ལྟའོ། །དེ་ལྟར་ཤིན་ཏུ་འདུ་བྱེད་ཐམས་ཅད་ནི་དེ་བཞིན་དུ་དུས་གསུམ་ལ་ཀུན་ཏུ་སྤྱོད་པའི་དངོས་པོ་དེའི་བར་དུ་ཆོས་ཐམས་ཅད་ལ་དེ་བཞིན་ཉིད་དུ་རྟེན་པ་ལ་ཀུན་ཏུ་ལྟའོ། །འདི་ལ་ཡང་བྱང་ཆུབ་སེམས་དཔའི་ཉེ་བར་འཚོ་བས་སེམས་ཅན་ཐམས་ཅད་ཡོངས་སུ་རྒྱས་པ་ནི་སོ་སོ་ཡང་དག་པར་སྤྱོད་པའི་ཚུལ་ནམ་མཁའ་ལ་འགྲོ་བའི་འོད་ཀྱིས་འདུལ་བའི་བཟོད་པར་བལྟ་བར་བྱའོ། །རིགས་ཀྱི་བུ་བྱང་ཆུབ་སེམས་དཔའ་དེ་བཞིན་དུ་གཟུགས་ཀྱི་བཟོད་པ་བསྒོམ་པའི་ཕྱིར་ཕྱི་ནང་གི་འཇམ་པ་དབུང་ཙམ་ཐམས་ཅད་ཀྱིས་ཉོན་མོངས་པ་རྣམ་པར་སེལ་བར་ཐམས་ཅད་དུ་སེམས་པ་དང་། ཡིད་བཞིན་ཡོངས་སུ་རྒྱས་པར་འགྱུར་རོ། །འདི་ལ་བཟོད་པ་ཐམས་ཅད་ནི་ཉན་ཐོས་དང་རང་སངས་རྒྱས་ཀྱི་ཆོས་ལས་ཀུན་ཏུ་འདས་པའོ། །འདི་ལ་བཟོད་པ་ཐམས་ཅད་ནི་བྱང་ཆུབ་སེམས་དཔའི་སྤྱོད་པའི་ཡོན་ཏན་ཡོངས་སུ་རྫོགས་པར་བྱེད་དོ། །འདི་ལ་བཟོད་པ་ཐམས་ཅད་ནི་སངས་རྒྱས་ཀྱི་ཆོས་ཀྱི་ཡོན་ཏན་ཀུན་ནས་སྡུད་དོ། །འདི་ལ་བཟོད་པ་ཐམས་ཅད་ནི་གཞན་གྱི་རྒོལ་བའི་ཆོས་དང་ལྷན་ཅིག་པར་འཛིན་ཏོ། །འདི་ལ་བཟོད་པ་ཐམས་ཅད་ནི་གཏི་མུག་གི་མུན་པ་མུན་ནག་འཇིག་པའི་ཡིད་དོ། །སངས་རྒྱས་ཀྱི་ཆོས་ལ་དགའ་བར་བྱེད། བསྒྲིབས་པ་དང་། སྒྲིབ་པ་ཐམས་ཅད་ཀུན་ཏུ་ཟད་པར་བྱེད་དེ། སངས་རྒྱས་ཀྱི་ཞིང་ཐམས་ཅད་སྣང་བར་བྱེད། སངས་རྒྱས་ཐམས་ཅད་ལ་དད་པར་བྱེད། ཕ་རོལ་ཏུ་ཕྱིན་པ་ཐམས་ཅད་ཀྱི་ཕ་རོལ་ཏུ་འགྲོ་བ། མངོན་པར་ཤེས་པ་ཐམས་ཅད་ལ་རྣམ་པར་རོལ་པར་བྱེད་པ། ཏིང་ངེ་འཛིན་གྱི་གཟུངས་ཀྱི་བཟོད་པ་སྒྲུབ་པར་བྱེད་པ་འདི་ནི་སོ་སོར་ཡང་དག་པར་སྤྱོད་པའི་ཚུལ་ནམ་མཁའ་ལ་འགྲོ་བའི་འོད་ཀྱིས་འདུལ་བའི་བཟོད་པའོ། །དེ་ལ་ཡང་དྲང་སྲོང་ཐུབ་པ་ལ་སོ་སོར་ཡང་དག་པར་སྤྱོད་པའི་
ཚུལ་ནམ་མཁའ་ལ་འགྲོ་བའི་འོད་ཀྱིས་འདུལ་བའི་བཟོད་པ་བརྗོད་པ་དང་། འཆད་པ་ནི་བརྒྱ་སྟོང་ཕྲག་དྲུག་ཅུ་རྩ་བརྒྱད་ཀྱི་ཆུ་བོ་གང་གཱའི་བྱེ་མ་སྙེད་ཀྱི་ཕྱོགས་བཅུའི་ཁུང་བུར་མཉམ་པར་འགྲོ་བ་ནི་བྱང་ཆུབ་སེམས་དཔའི་གོམས་པས་སོ་སོར་ཡང་དག་པར་སྤྱོད་པའི་ཚུལ་ནམ་མཁའ་ལ་འགྲོ་བའི་འོད་ཀྱིས་འདུལ་བའི་བཟོད་པ་སོ་སོར་ཐོབ་པར་འགྱུར་རོ། །བྱང་ཆུབ་སེམས་དཔའ་མེ་བཅུ་རྡུལ་ཡལ་སུམ་ཅུ་རྩ་གཅིག་གི་ཏིང་ངེ་འཛིན་གྱི་སྐར་མདའི་བདག་པོ་སོ་སོར་ཐོབ་པར་འགྱུར་རོ། །བྱང་ཆུབ་སེམས་དཔའ་ས་ཡ་ཕྲག་དགུ་བཅུ་རྩ་གཉིས་རྣམས་དཔའ་བར་འགྲོ་བའི་ཏིང་ངེ་འཛིན་སོ་སོར་ཐོབ་པར་འགྱུར་རོ། །བྱང་ཆུབ་སེམས་དཔའ་མདོར་ན་དེའི་བར་དུ་ཆུ་བོ་གང་གཱའི་བྱེ་མ་སྙེད་ཀྱི་བར་དུ་རྣམ་པ་སྣ་ཚོགས་དང་། རྣམ་པ་ཐ་དད་པ་ཐམས་ཅད་ཀྱི་ཏིང་ངེ་འཛིན་གྱི་གཟུངས་ཀྱི་བཟོད་པའི་ཆོས་ཀྱི་སྒོ་སོ་སོར་ཐོབ་པར་འགྱུར་རོ། །དེ་ནས་ཡང་བཅོམ་ལྡན་འདས་ཀྱིས་སྔགས་ཀྱི་ཚིག་འདི་བརྗོད་དོ། །པྲ་མ་ཏ་ཏེ། བིཛྲཱི་མ་བྷ་ཨུཏ་པ་ཏ་ཏེ། ཨུཏ་པ་ཏ་ཏ། ཨུད་མ་ཏ་ཏེ། ཛ་སམ་བིཛྲཱི་མ་བྷ་སྭཱ་ཧཱ། ལྷ་ས་ཡ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་བརྒྱད་འདིས་སོ་སོར་ཡང་དག་པར་སྤྱོད་པའི་ཚུལ་ནམ་མཁའ་ལ་འགྲོ་བའི་འོད་ཀྱིས་འདུལ་བའི་བཟོད་པ་སོ་སོར་ཐོབ་པར་འགྱུར་རོ། །ཆུ་བོ་གང་གཱའི་བྱེ་མ་དང་མཉམ་པའི་ལྷ་རྣམས་ཀྱིས་ཕྱིར་མི་ལྡོག་པའི་བྱང་ཆུབ་སོ་སོར་ཐོབ་པར་འགྱུར་རོ། །ཡང་བཅོམ་ལྡན་འདས་ཀྱིས་སྔགས་འདི་བརྗོད་དོ། །ཏད་ཡ་ཐཱ། ས་མུ་དྲ་བ་ཏེ། མ་རུ་བ་ཏེ་ན་པི་ནི། ན་པི་ནི། གཽ་ར་བེ་ཥ་དེ་ནི་ཥ་དེ་ནི། ཨི་བི་ཛ་སོ་ཧ་ཛ་བྷི་བྷེ་ད་སང་སྐ་རཱ་བྷྲ་སྭཱ་ཧཱ། ས་ཡ་ཕྲག་བདུན་ཅུ་རྩ་བདུན་གྱི་ཀླུ་རྣམས་ལ་འདི་དག་བཤད་པ་འཆད་པས་བཟོད་པ་སོ་སོར་ཐོབ་པར་འགྱུར་རོ། །ཆུ་བོ་གང་གཱའི་བྱེ་མ་དང་མཉམ་པའི་ཀླུ་རྣམས་ཀྱིས་བྱང་ཆུབ་ཀྱིས་ཕྱིར་མི་ལྡོག་པ་སོ་སོར་ཐོབ་པར་འགྱུར་རོ། །དེ་ལ་བཅོམ་ལྡན་འདས་ཀྱིས་སྔགས་ཀྱི་ཚིག་འདི་བརྗོད་དོ། །ཏད་ཡ་ཐཱ། ཛ་ན་མི་བྷཱ་བ་སུ་བྷཱ་བ་སུ་བྷཱ་བ་སུ་བྷཱ་བོ། །བྷ་བ་བོ། །བྲ་བོ་བ་བ་ཁ། ག་བ་ཨ་ཁ་ག་བ་བི་བྷ་ཛ་ཡ་བྷྱོ་སྭཱ་ཧཱ། ས་ཡ་སྟོང་ཕྲག་ཉི་ཤུ་རྩ་གཉིས་ཀྱི་གནོད་སྦྱིན་རྣམས་ལ་བཤད་པ་འཆད་པས་ཕྱིར་མི་ལྡོག་པའི་ས་ལ་འཇུག་པར་འགྱུར་རོ། །སྟོང་ཕྲག་བརྒྱའི་གནོད་སྦྱིན་རྣམས་ཚད་མེད་པ་ཕྱིར་མི་ལྡོག་པའི་ས་ཐོབ་པར་འགྱུར་རོ། །བྱེ་བ་ཁྲག་ཁྲིག་བརྒྱ་ཕྲག་སྟོང་གི་ལྷ་མ་ཡིན་རྣམས་ཚད་མེད་པ་ཕྱིར་མི་ལྡོག་པའི་ས་ལ་ཞུགས་སོ། །ས་ཡ་ཕྲག་བརྒྱ་སྟོང་གི་ནམ་མཁའ་ལྡིང་དང་། མིའམ་ཅི་དང་། ལྟོ་
འཕྱེ་ཆེན་པོ་རྣམས་ཚད་མེད་པ་ཕྱིར་མི་ལྡོག་པའི་ས་ལ་འཇུག་པར་འགྱུར་རོ། །འདི་ལ་བཅོམ་ལྡན་འདས་ཀྱིས་འཆད་པ་བཤད་ནས་ཕྱོགས་བཅུ་མཐའ་ཡས་པའི་ས་ཆེན་པོ་རྣམ་པ་དྲུག་ཏུ་གཡོས་སོ། །ལྷ་བྲན་བྱེ་བ་ཁྲག་ཁྲིག་བརྒྱ་ཕྲག་སྟོང་ཚད་མེད་གྲངས་མེད་པ་རྣམས་ནམ་མཁའ་ལས་ལྷ་རྫས་ཀྱི་མེ་ཏོག་གི་ཆར་འབེབས་སོ། །གང་ཕྱོགས་བཅུ་ཚད་མེད་གྲངས་མེད་པའི་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་གི་སངས་རྒྱས་ཀྱི་ཞིང་འདིར་དེ་འོངས་ཤིང་ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པའི་འཁོར་ཐམས་ཅད་དང་ལྡན་པ་དེ་ཡང་དག་པར་འོངས་ནས། དེ་ཐམས་ཅད་ཀྱིས་དབྱངས་གཅིག་ཏུ་ལེགས་སོ་ཞེས་བྱ་བ་བྱས་ཏེ། དེ་བཞིན་དུ་ཚིག་འདི་རྗོད་པར་བྱེད་དོ། །ལེགས་སོ་ལེགས་སོ། །བཅོམ་ལྡན་འདས་ལུས་ཐམས་ཅད་རྣམ་པར་འཇིག་པ་དང་། ཡུལ་ཐམས་ཅད་རབ་ཏུ་འཇིག་པའི་བཟོད་པ་བཤད་པ་དང་། གཞན་ལ་རག་མ་ལས་པ་བདུད་བཞིའི་ཆོས་ཀྱི་བཟོད་པ་ལྷག་པར་བཤད་པ་ངོ་མཚར་ཆེན་པོ་འདི་སྔོན་མ་ཐོས་སོ། །འདི་ལ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དག་གི་སྤྱོད་པ་དང་། བྱ་བའི་གནས་ཀྱི་ས་ལས་ཤིན་ཏུ་འདས་པའི་ཚོགས་འདྲེན་པར་བྱེད་དོ། །བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་གྱི་རིན་པོ་ཆེའི་གཏེར་ཐམས་ཅད་ཐོབ་པར་བྱེད་པའི་བཟོད་པ་སྟོན་པ་དང་། ཐམས་ཅད་མཁྱེན་པའི་ཡེ་ཤེས་ཐམས་ཅད་ཤེས་པར་བྱེད་པ་དང་། རྣམ་པ་ཐམས་ཅད་ཀྱི་བཟོད་པ་བསྒོམ་པ་འདི་བཤད་པ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བརྗོད་དུ་མེད་པའི་དོན་སྙིང་རྗེ་ཆེན་པོ་ཐོབ་པ་ལ་འཇུག་གོ །ཐབས་ལ་མཁས་པ་སེམས་ཅན་ཐམས་ཅད་ཡོངས་སུ་སྨིན་པའི་ཡེ་ཤེས་ཆེན་པོ་ཀུན་ཏུ་བསགས་པའི་བརྩོན་འགྲུས་དང་། སྟོབས་ཀྱི་བཟོད་པ་རབ་ཏུ་བསྟན་ཏོ། །སོ་སོར་ཡང་དག་པར་སྤྱོད་པའི་ཚུལ་ནམ་མཁའ་ལ་འགྲོ་བའི་འོད་ཀྱིས་འདུལ་བའི་བཟོད་པ་ཞེས་བྱ་བ་ཐེག་པ་ཆེན་པོའི་མདོ་ལེའུ་དྲུག་གོ།། །།