འཕགས་པ་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་ཞེས་བྱ་བ་ཐེག་པ་ཆེན་པོའི་མདོ་ལས། ལེའུ་དགུ་པ།
དེ་ནས་བཅོམ་ལྡན་འདས་ཀྱིས་ཤིན་ཏུ་རྣམ་པར་ཕྱེ་བ་སྤྱོད་པ་དང་ལྡན་པའི་ཏིང་ངེ་འཛིན་དུ་ཞུགས་ནས་ཏིང་ངེ་འཛིན་ལོགས་སུ་བཅོམ་ལྡན་འདས་ཀྱི་སྤུའི་བ་སྤུའི་ཁུང་བུ་ཐམས་ཅད་ནས་ཁ་དོག་སྣ་ཚོགས་དང་། ཁ་དོག་དུ་མ་དང་། བརྒྱ་སྟོང་དུ་མའི་ཁ་དོག་གི་འོད་ཟེར་དུ་མ་སྐུ་ལས་བྱུང་ངོ་། །དེ་ནས་ཡང་བཅོམ་ལྡན་འདས་ཀྱིས་རྣམ་པ་སྣ་ཚོགས་ལ་དཀའ་ཐུབ་དང་། བརྟུལ་ཞུགས་ངན་པ་དག་དྲང་སྲོང་གི་ཆ་བྱད་ལ་ཀུན་ཏུ་ལྟའོ། དེ་ལ་འོད་བྱུང་བས་ཕྱོགས་བཅུའི་སངས་རྒྱས་ཀྱི་ཞིང་ཆུ་བོ་གང་གཱའི་བྱེ་མ་དང་མཉམ་པའི་འཇིག་རྟེན་གྱི་རྙོག་པ་ལྔའི་སངས་རྒྱས་ཀྱི་ཞིང་སྣང་བར་བྱེད་དོ། །གང་ཡང་ཆུ་བོ་གང་གཱའི་བྱེ་མ་ལྟ་བུའི་རྙོག་པ་ལྔའི་སངས་རྒྱས་ཀྱི་ཞིང་བརྟུལ་ཞུགས་དང་། དཀའ་ཐུབ་ངན་པ་དང་། མུ་སྟེགས་ཅན་གཞན་རྣམས་གང་དེ་དག་བྲམ་ཟེ་ལ་དད་པར་འཇུག་པས་གང་སངས་རྒྱས་བྲམ་ཟེར་སྤྲུལ་ཏེ་གནས་སོ། །དེ་ནས་བྲམ་ཟེ་ལ་དད་པར་སྨྲས་པ་དེ་བཞིན་ནོ། །བདག་ཅག་སློབ་པ་འདི་ནི་བྲམ་ཟེ་ལ་དད་པས་བདག་ཀྱང་བྲམ་ཟེ་ལ་ལྟའོ། །དགའ་བ་དང་ཡིད་བདེ་བ་སྐྱེས་ནས་མྱུར་དུ་ལངས་ཏེ་བྲམ་ཟེའི་རྐང་པ་ལ་སྤྱི་བོས་ཕྱག་འཚལ་ཏེ་བྲམ་ཟེ་ལ་ཐལ་མོ་སྦྱར་ཏེ་ཕྱག་བྱས་ནས་འདི་སྐད་ཅེས་སྨྲས་སོ། །བཅོམ་ལྡན་འདས་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བའི་ཕྱིར་བདག་ཅག་གི་འཁོར་དེ་བཞིན་དུ་ཡུན་རིང་
པོ་ནས་ཁྱོད་ཀྱི་སློབ་མར་འདྲེན་ཏོ། །བྲམ་ཟེ་སྤྲུལ་པ་དེས་སྨྲས་པ། བདག་ཀྱང་གཞན་ཚངས་པ་ཆེན་པོ་བདག་གི་བླ་མར་ཡོད་པའི་ལག་པ་བསྟན་པའི་ཕྱིར་བཅོམ་ལྡན་འདས་ཤཱཀྱ་ཐུབ་པ་དེ་བཞིན་དུ་མི་རིང་བར་ཞུགས་སོ། །སྨྲས་པ། བཅོམ་ལྡན་འདས་ཀྱི་མཐུས་ན་སེམས་ཅན་དེ་ཡང་བཅོམ་ལྡན་འདས་ཤཱཀྱ་ཐུབ་པ་བྲམ་ཟེ་ཆེན་པོ་སྤོས་ཀྱི་ངད་ལྡང་བའི་རི་ལ་དཔག་ཚད་ཕྱེད་ཙམ་ན་བཞུགས་པ་ལ་ལྟའོ། །དེ་ཡང་མཆོག་ཏུ་དགའ་བ་དང་། ཡིད་བདེ་བ་སྐྱེད་པ་དེས་ཡུད་ཙམ་གྱིས་ན་སྤོས་ཀྱི་ངད་ལྡང་བའི་རི་ལ་གནས་པ་དག་ཤཱཀྱ་ཐུབ་པ་བྲམ་ཟེ་ཆེན་པོའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འཁོད་དོ། །གང་དབང་ཕྱུག་ལ་དད་པ་དང་། གང་བརྒྱ་བྱིན་ལ་དད་པ་དང་། གང་རྒྱལ་ཆེན་བཞི་ལ་དད་པ་དང་། གང་ཉི་མ་དང་ཟླ་བ་ལ་དད་པ་དང་། གང་ནག་པོ་དང་། ནག་པོ་ཆེན་པོ་གཞོན་ནུ་ལ་དད་པ་ནས་མེ་ལ་དད་པའི་བར་དུ་བསྡུས་ཏེ་དེ་ལྟར་མདུན་དུ་འོད་འཕྲོ་བའི་ཕུང་པོ་བྱུང་བར་གྱུར་ཏོ། །འོད་འཕྲོ་བའི་ཕུང་པོ་དེ་ལས་ལྷའི་བུ་ལུས་དང་གོས་ཀྱི་ཁ་དོག་དཀར་པོ་གཟུགས་བཟང་པོ་མཆོག་གི་ཁ་དོག་རྒྱས་པ་དང་ལྡན་པ་བྱུང་བར་གྱུར་ཏེ། མེའི་ལྷའི་བུས་འདི་སྐད་ཅེས་སྨྲས་སོ། ཁྱོད་ནི་བདག་གི་སློབ་མར་གོར་མ་ཆག །དེས་སྨྲས་པ། བཅོམ་ལྡན་འདས་དེ་བཞིན་ནོ། །ལྷའི་བུས་སྨྲས་པ། བདག་ལ་ཡང་མེའི་བདག་པོ་གཞན་བླ་མར་བྱེད་པ་ཡོད་པས་དེ་ལྟར་ལགས་པས་སྟོན་པར་བྱེད་དོ། །བཅོམ་ལྡན་འདས་ཀྱི་མཐུས་ན་སེམས་ཅན་དེ་ཡང་བཅོམ་ལྡན་འདས་ཤཱཀྱ་ཐུབ་པ་སྤོས་ཀྱི་ངད་ལྡང་བའི་རི་ལ་དཔག་ཚད་ཕྱེད་ཙམ་ནས་དེ་བཞིན་དུ་མི་རིང་བར་བཞུགས་པ་ལ་ལྟའོ། །མེའི་ཕུང་པོ་ཆེན་པོ་དེའི་ནང་ནས་ལུས་དང་སྐྲ་དང་། གོས་ཀྱི་ཁ་དོག་དཀར་པོ་གཟུགས་བཟང་པོ་བལྟ་ན་མཛེས་པ། ཁ་དོག་མཆོག་ཏུ་རྒྱས་པ་དང་ལྡན་པའི་སྤྱན་སྔར་དེའང་ཇི་སྙེད་པ་ཆོས་མཉན་པའི་སླད་དུ་འཁོད་དོ། །དེ་ནས་ཡང་དེའི་ཚེ་དེའི་དུས་ན་ཚད་མེད་གྲངས་མེད་པའི་ཆུ་བོ་གང་གཱའི་བྱེ་མ་སྙེད་ཀྱི་མུ་སྟེགས་ཅན་ཚུལ་ཁྲིམས་དང་བརྟུལ་ཞུགས་ངན་པ་རྣམས་བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འཁོད་དོ། །དེ་ལ་གང་བྲམ་ཟེ་ལ་དད་པ་དེ་བྲམ་ཟེ་ལ་དད་པའི་བྲམ་ཟེའི་གཟུགས་ཀྱིས་
བཅོམ་ལྡན་འདས་ལ་བལྟའོ། །དེ་ལྟར་དེ་བཞིན་དུ་སེམས་དང་སེམས་ལས་སྐྱེས་པས་གལ་ཏེ་བྲམ་ཟེ་ཆེན་པོ་དང་བདག་གཏམ་བྱའོ། །གང་བདག་གི་ཐེ་ཙོམ་དང་ནེམ་ནུར་དག་བཅོམ་ལྡན་འདས་བྲམ་ཟེ་ཆེན་པོ་ལ་བདག་ཡོངས་སུ་ཞུའོ། །ཇི་ལྟར་འཁོར་ཐམས་ཅད་དང་ལྡན་པ་འདི་བྲམ་ཟེ་ཆེན་པོ་ལ་དད་པར་འགྱུར་རོ། །གང་དེ་མེའི་བརྟུལ་ཞུགས་ཅན་ནས་མེའི་ཕུང་པོ་ཆེན་པོའི་ནང་ནས་ལྷའི་བུ་ལུས་དང་། སྐྲ་དང་། གོས་དཀར་པོ་གཟུགས་བཟང་པོ་བལྟ་ན་སྡུག་པ་ཁ་དོག་མཆོག་ཏུ་རྒྱས་པས་ལྡན་པའི་བར་དུ་བལྟའོ། །དེ་ལྟར་དེ་བཞིན་དུ་སེམས་དང་སེམས་ལས་སྐྱེས་པ་ནས། ཇི་ལྟར་འཁོར་ཐམས་ཅད་དང་ལྡན་པའི་བར་དུ་མེའི་བརྟུལ་ཞུགས་ཅན་དུ་འགྱུར་རོ། །དེ་ནས་དྲི་མ་མེད་པའི་གོས་གཞོན་ནུར་གྱུར་པས་འཁོར་ཐམས་ཅད་དང་ལྡན་པ་ལ་སྐད་ཀྱི་དབྱངས་ཀྱིས་གསོལ་པ། བཟང་པོའི་ཞལ་འདིར་བྲམ་ཟེ་ཆེན་པོ་ཇི་སྙེད་ཡང་དག་པར་བྱོན་པ་རྣམས་གསོན་ཅིག །དེ་ལྟར་དྲང་སྲོང་ཆེན་པོ་ཤཱཀྱ་ཐུབ་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ་བླ་ན་མེད་པ་སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མིའི་མཁན་པོ། སངས་རྒྱས་བཅོམ་ལྡན་འདས་ཚོལ་བ། སེམས་ཅན་ཐམས་ཅད་དང་ཆོས་ཐམས་ཅད་ཀྱི་ཕ་རོལ་ཏུ་འགྲོ་བ། བྱང་ཆུབ་སེམས་དཔའ་རྣམས་ཀྱི་ཕ། དཀའ་ཐུབ་དང་བརྟུལ་ཞུགས་དང་ཚངས་པར་སྤྱོད་པ་ཐམས་ཅད་སྟོན་པ། ཟག་པ་ཐམས་ཅད་ཡོངས་སུ་ཟད་པ། འཕགས་པའི་གང་ཟག་གི་རྒྱལ་པོ། སེམས་ཅན་ཐམས་ཅད་དེར་སེམས་པ་མེད་པ། དེད་དཔོན་མྱ་ངན་ལས་འདས་པར་འགྲོ་བ། དུས་གསུམ་གྱི་སངས་རྒྱས་ཐམས་ཅད་ཡོངས་སུ་ཤེས་པ། བསོད་ནམས་སུ་འགྲོ་བའི་བསོད་ནམས་ཀྱི་མཛོད་ཚད་མེད་པའི་ཡེ་ཤེས་ཀྱིས་སེམས་ཅན་ཐམས་ཅད་ཀྱི་བསམ་པ་རྣམ་པར་ཤེས་པ། གྲངས་མེད་པའི་སྤོབས་པས་མ་རིག་པའི་མུན་པ་ཐམས་ཅད་སེལ་བར་བྱེད་པ། རྣམ་པར་དག་པའི་ང་རོ་དང་དབྱངས་ཡོད་པས་བཟོད་པས་བརྒྱན་པ། མེ་ཏོག་གི་མཚན་ཉིད་ཅན་ལུས་དཔེ་བྱད་བཟང་པོས་བྲིས་པ། གཏང་དུ་མི་བྲ་བའི་གཟུགས་སྟོན་པ། རིགས་དང་མི་འཐུན་པར་སྟོན་པ། གཟུགས་ཀྱི་
སྤྱོད་ཡུལ་དག་དགའ་བར་བྱེད་པ། དགེ་བར་མོས་པ་ལ་མངོན་པར་དགའ་བ། ཤེས་རབ་མངོན་དུ་བྱུང་བ་མེད་པ། སྲིད་པའི་འགྲོ་བ་ཐམས་ཅད་སྐམ་པར་བྱེད་པ། གཙུག་ལག་ཐམས་ཅད་ཀྱི་དམ་ཚིག་དུལ་བ་མེད་པ། སྐུ་མཉམ་པ་མེད་པ། འདོད་པས་གོས་པ་མེད་པ། གཟུགས་དང་། མཚན་མ་དང་། མཚན་ཉིད་ཐམས་ཅད་ལ་གོས་པ་མེད་པ། གཟུགས་མེད་པ་ལས་ཡང་དག་པར་ཤིན་ཏུ་འདས་པ། སྡུག་བསྔལ་ཐམས་ཅད་གྲོལ་བ། མདུད་པ་སྤངས་པ། འཆི་འཕོ་དང་སྐྱེ་བ་ཐམས་ཅད་ལས་ཕྱིར་ལྡོག་པ། སེམས་ཅན་ཐམས་ཅད་ལ་སྨན་པར་གྱུར་ཅིང་སྡུག་བསྔལ་རབ་ཏུ་གཏོང་བར་བྱེད་པ། དུས་གསུམ་གྱི་ཕུང་པོ་རྣམ་པར་གྲོལ་བ། སྐྱེ་མཆེད་དང་། སྲེད་པ་ཟད་པ་ལ་ཆགས་པ་མེད་པ། ཆུ་བོ་བཞི་ལས་རྒལ་བ། ཡེ་ཤེས་ཀྱིས་ངོམས་པ་མེད་པ། ཡང་དག་པའི་མཐའ་ལ་སོ་སོར་གནས་པ། རིག་པ་བསྒྲུབས་པས་རིག་པ་ཐམས་ཅད་དང་ལྡན་པ། གཏོང་བ། སྙིང་རྗེ་ཆེན་པོ་ཅན། སེམས་ཅན་རྣམས་མྱ་ངན་ལས་འདས་པའི་ལམ་ལ་འགོད་པ། བདུད་བཞིའི་ཡུལ་ལས་ཡང་དག་པར་ཤིན་ཏུ་འདས་པ། སེམས་ཅན་ཆེན་པོ་བརྗོད་དུ་མེད་པར་ཁོང་དུ་ཆུད་པ་དེ་ཐམས་ཅད་ཁྱོད་དགའ་བ་སྐྱེད་ཅིང་བྱམས་པ་འབྱུང་བར་བྱོས་ཤིག །མི་ཐོབ་པ་རྙེད་དཀའ་བ་དང་། སྐད་ཅིག་མའི་དུས་རྙེད་དཀའ་བ་དང་། དགེ་བ་ལ་མོས་པ་རྙེད་དཀའ་བ་དང་། དགེ་བའི་གྲོགས་པོ་རྙེད་དཀའ་བ་དང་། ཚངས་པར་སྤྱོད་པའི་གནས་རྙེད་དཀའ་བ་དང་། དབང་པོ་ཡོངས་སུ་རྒྱས་པ་རྙེད་དཀའ་བ་དང་། ཆོས་འདོད་པའི་འཁོར་འདི་འདྲ་བ་རྙེད་དཀའ་བ་དང་། དགེ་བའི་གྲོགས་པོ་ལ་དམིགས་པའི་གཙུག་ལག་འདི་འདྲ་བ་རྙེད་དཀའ་བ་དང་། ཆོས་མཉན་པ་ལ་དམིགས་པ་འདི་འདྲ་བ་རྙེད་དཀའ་བ་ཁྱོད་ཀྱིས་ཐོབ་པ་ཇི་ལྟར་སྔོན་མ་ཐོས་པ་ད་ཉོན་ཅིག །སུས་ཡོངས་སུ་མ་ཤེས་པ་ཡོངས་སུ་ཤེས་པར་འགྱུར་རོ། །ལམ་སྔོན་ཁོང་དུ་མ་ཆུད་པ་ཁོང་དུ་ཆུད་པར་གྱུར་ཅིག །ཁྱོད་སྔོན་ཕུང་པོ་དང་། ཁམས་དང་། སྐྱེ་མཆེད་མངོན་སུམ་དུ་མ་ཡིན་པ་དེ་ད་མངོན་སུམ་དུ་བྱུང་བར་གྱུར་ཅིག །ཁྱོད་སྔོན་འཕགས་པའི་ལམ་གྱི་ཡན་ལག་བརྒྱད་མ་བསྒོམས་པ་དེ་ད་སེམས་བསྒོམས་པར་གྱུར་ཅིག །ཁྱོད་ཟག་པ་མ་ཟད་
པ་ཟད་པར་འགྱུར་བ་དང་མུན་པ་མུན་ནག་ཏུ་གྱུར་པའི་འཁོར་བ་རྣམས་ཤེས་རབ་ཆེན་པོའི་སྣང་བ་དང་ལྡན་པར་གྱུར་ཅིག །དེ་ནས་ཁྱོད་དེ་མ་ཐག་ཏུ་དཀའ་ཐུབ་དང་། བརྟུལ་ཞུགས་དང་། ཚངས་པར་སྤྱོད་པ་ཐམས་ཅད་ཀྱི་འབྲས་བུ་རྣམ་པར་སྨིན་པ་དེ་བཞིན་དུ་ཉོན་ཅིག །ཇི་ལྟར་བཅོམ་ལྡན་འདས་དྲང་སྲོང་ཆེན་པོ་ད་ལྟར་སེམས་རྩེ་གཅིག་ཏུ་སྟོན་ཏོ། །དེ་ནས་མུ་སྟེགས་ཅན་དེ་དག་ཐམས་ཅད་མགུ་ཞིང་རངས་པ་དང་། རབ་ཏུ་དགའ་བའི་སེམས་ཀྱིས་སེམས་རྩེ་གཅིག་ཏུ་ཐལ་མོ་སྦྱར་ཏེ། བཅོམ་ལྡན་འདས་ལ་མིག་མི་འཛུམས་པར་ལྟ་བར་གྱུར་ཏོ། །བཅོམ་ལྡན་འདས་ཀྱིས་དྲི་མ་མེད་པའི་གོས་གཞོན་ནུར་གྱུར་པ་ལ་བཀའ་སྩལ་པ། །རིགས་ཀྱི་བུ་ཅི་འདྲ་བའི་ཚུལ་གྱིས་ན་བཟོད་པ་སོ་སོར་ཐོབ། དམ་པའི་ཆོས་ཅི་འདྲ་བའི་ཚུལ་གང་དང་གང་གིས་ན་སེམས་ཅན་སྙིང་པོར་གནས་པ་ལ་གྲོལ་བར་འགྱུར་རམ། ཚུལ་ཐམས་ཅད་ཟད་པའི་ཕ་རོལ་ཏུ་འགྲོ་བར་འགྱུར་རམ། ཅི་རལ་པས་ཡོངས་སུ་གྲོལ་བར་འགྱུར་རམ། འོན་ཏེ་རུས་པས་སམ། ལུད་ཀྱིས་བྱུག་པ་དང་། ཐལ་བའི་མལ་གྱིས་ཡོངས་སུ་གྲོལ་བར་འགྱུར་རམ། འོན་ཏེ་བརྒྱ་བྱིན་དང་། ཚངས་པ་དང་། ཟླ་བ་དང་། ཉི་མ་དང་། མེ་དང་སྟེན་པའི་བར་དུ་སྙིང་པོར་གནས་པ་ལ་ཡོངས་སུ་གྲོལ་བར་འགྱུར་རམ། འཇིགས་པ་རྣམ་པ་ཐམས་ཅད་ཟད་པའི་ཕ་རོལ་ཏུ་འགྲོ་བར་འགྱུར་རམ། དེ་སྐད་ཅེས་བཀའ་སྩལ་པ་དང་། དྲི་མ་མེད་པའི་གོས་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་སེམས་ཅན་ལྟ་བའི་རྙེད་པ་འདིས་སྙིང་པོར་གནས་པ་ལ་འགྲོ་བར་མི་འགྱུར་རོ། །འཆི་འཕོ་དང་སྐྱེ་བ་ཤིན་ཏུ་སྲིད་པ་འགྲོ་བ་ལ་བརྟག་པ་ན་སྲིད་པ་ཀུན་ཏུ་སྦྱོར་བའི་ཕ་རོལ་ཏུ་འགྲོ་བར་མི་འགྱུར་རོ། །སེམས་ཅན་གྱི་མཐའ་འདི་གཉིས་ཀྱིས་གང་སོ་སོར་ཡང་དག་པར་སྤྱོད་པའི་ཚུལ་ནམ་མཁའ་ལ་འགྲོ་བའི་འོད་ཀྱིས་འདུལ་བའི་བཟོད་པ་འདི་ཡོངས་སུ་ཉམས་པར་འགྱུར་རོ། །གང་ཡང་འདོད་པ་དང་འདོད་པ་བདེ་བའི་རྗེས་སུ་སྦྱོར་བ་རང་བཞིན་གྱིས་འགྲོ་བ་ངན་པའི་མི་ལ་བརྩོན་ནོ། །གང་ཡང་བདག་ལ་གནོད་པར་སྦྱོར་བའི་ཞགས་པ་འཐུབ་པ་དགུ་བཅུ་རྩ་ལྔ་ཚུལ་ཁྲིམས་དང་བརྟུལ་ཞུགས་ངན་པ་
འཕགས་པ་མ་ཡིན་པ་དང་། དོན་དུ་མི་འགྱུར་བ་འདི་གཉིས་ཀྱི་བཟོད་པ་ཡོངས་སུ་ཉམས་པའི་ཕྱིར་འཇིག་པར་འགྱུར་རོ། །ཉོན་མོངས་པའི་ཕུང་པོ་ཆེན་པོ་འབྱུང་བར་འགྱུར་རོ། །བཙུན་པ་བཅོམ་ལྡན་འདས་དེ་འདི་བཟོད་པ་སྒོམ་པ་དག །གང་གིས་བཟོད་པ་ཐོབ་བ་མི་ཤེས་སོ། །གང་ལ་འདོད་ཆགས་ཞེ་སྡང་དང་། ང་རྒྱལ་འཆབ་པ་རབ་ཏུ་གནས། །ཕུང་པོ་ལྔ་དང་མི་ལྡན་པས། །བྱས་པ་ཤེས་ལ་མེད་པར་འགྲོལ། །ཕ་མ་དགྲ་བཅོམ་སྟོང་པ་སྟེ། །སྟོང་པའི་ཆོས་ལ་བསྟེན་པས་ན། །དངོས་པོ་མེད་ཅིང་འདྲེས་མེད་པ། །ཚུལ་གཅིག་གིས་ནི་གྲོལ་བར་འགྱུར། །ཚོར་བ་རྣམ་གསུམ་འདྲེས་མེད་ཅིང་། །འདུ་བྱེད་གསུམ་ཡང་སྙེམས་པ་མེད། །ཇི་ལྟར་ཤེས་པ་མཆོག་གི་ཕྱིར། །སྲིད་པ་ཟད་ལ་འགྲོལ་བར་འགྱུར། ཁམས་གསུམ་དག་ནི་སྙེམས་མེད་པ། །རིག་པ་གསུམ་ནི་རབ་ཏུ་བསླབས། །ཚོར་བ་རྣམ་གསུམ་ཡོངས་ཤེས་ཤིང་། །དུས་གསུམ་ལ་ནི་ཆགས་པ་མེད། །སྨོན་པའི་འདོད་ཆགས་ཟད་པ་དང་། །བརྗོད་དུ་མེད་ལ་གྲོལ་བར་འགྱུར། །ཇི་ལྟར་ཉི་ཟླ་ནམ་མཁའ་རྣམས། །རྒྱུ་བ་ལ་ནི་ཆགས་པ་མེད། །མཐའ་གཉིས་རྣམ་པར་སྤངས་ནས་ནི། །སྐྱེ་བ་ཟད་ལ་འགྲོལ་བར་འགྱུར། །སྙིང་རྗེ་ཆེན་པོ་རྣམ་གཉིས་སྤོང་། །སྡུག་བསྔལ་ཐམས་ཅད་རབ་ཏུ་བཀྲོལ། །བློ་གྲོས་རྟོག་པ་སྤངས་པས་ན། །སྙིང་པོར་གནས་པ་རྣམ་པར་བཀྲོལ། །རྟོག་དང་རྣམ་རྟོག་སྤངས་པ་ནི། །བསོད་ནམས་ཆགས་པའི་སྡིག་པ་མེད། །སེམས་ཅན་རྣམས་ནི་སྙིང་བརྩེའི་ཕྱིར། །སྤྱོད་ལ་ཆགས་པ་འགྲོལ་བར་འགྱུར། །ལྷ་དང་དྲི་ཟ་མི་རྣམས་ཀྱིས། །དྲང་པོའི་ལམ་ནི་མི་ཤེས་སོ། །དེ་ལྟར་ཤིན་ཏུ་རྟོགས་པའི་ཕྱིར། །སྤྱོད་ལ་ཆགས་པ་འགྲོལ་བར་འགྱུར། །སྙིང་རྗེ་དང་ལྡན་ཡིད་གཞུངས་པ། །སེམས་ཅན་སྤྱོད་པ་རབ་མི་ཤེས། །ཡེ་ཤེས་མཆོག་དང་ལྡན་པས་ན། །སེམས་ཅན་སངས་རྒྱས་རབ་ཏུ་འགྲོལ། །ཡང་དྲི་མ་མེད་པའི་གོས་གཞོན་ནུར་གྱུར་པས་འདི་བསྟན་པའི་ཚེ་ཡོངས་སུ་སྦྱང་བ་སྔོན་བྱས་པའི་མུ་སྟེགས་ཅན་གཞན་ཁྲག་ཁྲིག་ཕྲག་དགུ་བཅུ་རྩ་བརྒྱད་ཀྱིས་སོ་སོར་ཡང་དག་པར་སྤྱོད་པའི་ཚུལ་ནམ་མཁའ་ལ་འགྲོ་བའི་འོད་ཀྱིས་འདུལ་བའི་བཟོད་པ་འདི་སོ་སོར་ཐོབ་པར་གྱུར་ཏོ། །མུ་སྟེགས་ཅན་གཞན་མེ་བཅུ་རྡུལ་ཡལ་
སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་པར་གྱུར་ཏོ། །ཕྱིར་མི་ལྡོག་པའི་ས་ཐོབ་པར་གྱུར་ནས་ལྷ་དང་། དྲི་ཟ་དང་། མིའི་འཁོར་ཐམས་ཅད་དང་ལྡན་པ་དེས་དྲི་མ་མེད་པའི་གོས་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ནོ། །སྐྱེས་བུ་དམ་པས་ཤིན་ཏུ་ལེགས་པར་བཤད་པ་ལེགས་སོ་ལེགས་སོ། །བཅོམ་ལྡན་འདས་དེས་ཀྱང་དྲི་མ་མེད་པའི་གོས་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ནོ། །སྐྱེས་བུ་དམ་པ་ཁྱོད་ཀྱིས་སེམས་ཅན་མང་པོ་ཡོངས་སུ་སྨིན་པར་བྱས་པ་དང་ལེགས་པར་བཤད་པ་ལེགས་སོ་ལེགས་སོ། །དེ་ནས་བཅོམ་ལྡན་འདས་ཀྱིས་སྒྲ་ཀུན་ཏུ་འཚོ་བའི་མེའི་བརྟུལ་ཞུགས་ཅན་ལ་བཀའ་སྩལ་པ། སྒྲ་ཀུན་ཏུ་འཚོ་བ་ལས་ཀྱི་སྒྲིབ་པ་རྣམ་པར་དག་པ་ལས་ཀྱི་སྒྲིབ་པ་རྣམ་པར་དག་པ་ཞེས་བྱ་བ་ནི་ལས་ཀྱི་རྣམ་པར་སྨིན་པ་ཡིད་ཀྱིས་བྱ་བ་ལ་ཆགས་པ་མེད་པའོ། །ཆོས་ཐམས་ཅད་ལ་སྙེམས་པ་མེད་པའོ། །འདོད་ཆགས་ཀྱི་མཐའ་ལ་སོགས་པ་མེད་པའོ། །ཞེ་སྡང་དང་། གཏི་མུག་གི་མཐའ་ལ་སོགས་པ་མེད་པའོ། །སྙེམས་པ་མེད་པའོ། །ཉེ་བར་འགྲོ་བ་མེད་པའོ། །ཉེ་བར་ལེན་པ་མེད་པའོ། །དེ་ཡང་དག་པའི་མཐའ་མངོན་སུམ་དུ་མི་བྱེད་པའོ། །གང་མངོན་སུམ་དུ་མི་བྱེད་པ་དེ་རློམ་ཞིང་སེམས་པ་མེད་པའོ། །གང་རློམ་ཞིང་སེམས་པ་མེད་པ་དེ་གཟུང་བ་མེད་པའོ། །གང་གཟུང་བ་མེད་པ་དེ་ཆགས་པ་མེད་པའོ། །གང་ཆགས་པ་མེད་པ་དེ་དངོས་པོ་མེད་པའོ། །གང་དངོས་པོ་མེད་པ་དེ་ཤེས་པ་མེད་པའོ། །གང་ཤེས་པ་མེད་པ་དེ་ཚུ་རོལ་དང་ཕ་རོལ་དུའོ། །གང་ཚུ་རོལ་དང་ཕ་རོལ་པོ་དེ་བརྗོད་དུ་མེད་པའོ། །གང་བརྗོད་དུ་མེད་པ་དེ་དངོས་པོ་མེད་པའོ། །གང་དངོས་པོ་མེད་པ་དེ་འབྱུང་བ་མེད་པའོ། །གང་འབྱུང་བ་མེད་པ་དེ་འགོག་པ་མེད་པའོ། །གང་འགོག་པ་མེད་པ་དེ་ཡི་གེ་མེད་པའོ། །གང་ཡི་གེ་མེད་པ་དེ་དུས་གསུམ་དང་སྐད་ཅིག་མར་བྲལ་བའོ། །གང་དུས་གསུམ་དང་སྐད་ཅིག་མར་བྲལ་བ་དེ་སོ་སོར་ཡང་དག་པར་སྤྱོད་པའི་ཚུལ་ནམ་མཁའ་ལ་འགྲོ་བའི་འོད་ཀྱིས་འདུལ་བའི་བཟོད་པ་དང་ལྡན་པའི་གང་བྱང་ཆུབ་སེམས་དཔས་བདུད་ཐམས་ཅད་ཀྱི་ལམ་ལ་ཡོངས་སུ་སྦྱོར་བར་བྱེད་དོ། །གཞན་ཡང་སྒྲ་ཀུན་ཏུ་འཚོ་བ་གང་བྱང་ཆུབ་སེམས་དཔའ་ཉན་ཐོས་དང་། རང་སངས་རྒྱས་ཀྱི་ཐེག་པ་ལ་རེག་པར་མི་
བྱེད། འདུས་བྱས་ཀྱི་ཆོས་ལ་སྙེམས་པ་མེད་ཅིང་རེག་པར་མི་བྱེད། འདི་ལྟ་སྟེ། དཔེར་ན་ནམ་མཁའ་དང་ཆོས་ཐམས་ཅད་ལ་སྙེམས་པ་མེད་ཅིང་རེག་པ་མེད་པ་དེ་ལྟར་དེ་བཞིན་དུ་བྱང་ཆུབ་སེམས་དཔའི་ཆོས་ལ་སྙེམས་པ་མེད་ཅིང་རེག་པ་མེད་དེ། དེ་ནས་ལས་ཀྱི་སྒྲིབ་པ་རྣམ་པར་སྦྱོང་བར་བྱེད་དོ། །འདི་སྟོན་པ་བསྟན་པའི་ཚེ་ཆུ་བོ་གང་གཱའི་བྱེ་མ་སྙེད་ཀྱི་ལས་སྔོན་བྱས་པའི་མུ་སྟེགས་ཅན་གཞན་སོ་སོར་ཡང་དག་པར་སྤྱོད་པའི་ཚུལ་ནམ་མཁའ་ལ་འགྲོ་བའི་འོད་ཀྱིས་འདུལ་བའི་བཟོད་པ་ཞེས་བྱ་བ་སོ་སོར་ཐོབ་པར་གྱུར་ཏོ། །ཆུ་བོ་གང་གཱ་བདུན་གྱི་བྱེ་མ་སྙེད་ཀྱི་མུ་སྟེགས་ཅན་གཞན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་པར་གྱུར་ཏོ། །ཕྱིར་མི་ལྡོག་པའི་ས་ཐོབ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་བདུད་སྤོང་བ་ཀུན་ཏུ་རྒྱུ་ལ་བཀའ་སྩལ་པ། བདུད་སྤོང་བ་གང་ཁྱིམ་གྱི་གནས་ནས་བྱུང་སྟེ་ཐར་པ་ལ་མངོན་པར་བརྩོན་པའི་རྐྱེན་གྱིས་ཆོས་དང་ཆོས་ཉིད་ཀྱི་རྗེས་སུ་རབ་ཏུ་མི་ཤེས་སོ། །ཡོངས་སུ་གྲོལ་བ་མེད་དོ། །སྐྱེ་བ་དང་། རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་ཡོངས་སུ་ཐར་པ་མེད་དོ། །ཕུང་པོ་དང་། ཁམས་དང་། སྐྱེ་མཆེད་རྣམས་རྟག་ཏུ་ཕྱི་མའི་མཐའ་འཁོར་བའི་ཆུ་ཀླུང་རྟག་ཏུ་འབབ་བོ། །ཅི་འདྲ་བའི་ཡིད་མ་བགྱིས་ན་རྐྱེན་གྱིས་རབ་ཏུ་མི་ཤེས། འདི་ལྟ་སྟེ། དེ་བཞིན་དུ་ཁྱོད་ཀྱི་གཟུགས་དཀའ་ཐུབ་དང་། བརྟུལ་ཞུགས་དང་། ཚངས་པར་སྤྱོད་པའི་འབྲས་བུ་མེད་པ། འཕགས་པ་ལ་དམོད་པ་ནི་ཇི་ལྟར་ལ་ལ་གོས་མེད་པ་དང་། ལ་ལ་གོས་བོར་བ་དང་། ལ་ལ་རུས་པའི་རྡུལ་གྱིས་བྱུགས་པ་དང་། ལ་ལ་ཐལ་བས་བྱུགས་པ་དང་། ལ་ལ་སྣག་ཚས་བྱུགས་པ་དང་། ལ་ལ་ཁུ་ཆུ་བྱུང་བས་བྱུགས་པ་དང་། ལ་ལ་བད་ཀན་གྱིས་བྱུགས་པ་དང་། ལ་ལ་ཉལ་ཉིལ་གྱིས་བྱུགས་པས་འཁོད་དོ། །ལ་ལ་སྐྲའི་སྣམ་བུ་གྱོན་ཏོ། །ལ་ལ་བལ་གྱི་སྣམ་བུ་དང་། ལ་ལ་སྨྱིག་མའི་གོས་དང་། ལ་ལ་རྩྭའི་འདབ་མའི་གོས་དང་། ལ་ལ་དུར་ཁྲོད་པའི་གོས་དང་། ལ་ལ་མིང་མཁན་ཙམ་གྱི་གོས་དང་། ལ་ལ་བྱའི་གོས་དང་། ལ་ལ་བ་ལང་གི་སླུད་བུ་དང་། ལ་ལ་ཕྱག་དར་
ཁྲོད་ཀྱི་གོས་དང་། ལ་ལ་པགས་པ་དང་། རྙིང་པའི་གོས་གྱོན་ཏོ། །ལ་ལ་ཚོད་མ་ཟ་བར་འགྱུར་རོ། །ལ་ལ་ནས་ཟ་བ་དང་། ནས་ལས་བྱས་པ་ཟ་བ་དང་། སྦུན་པ་ཟ་བ་དང་། བྱ་ཟ་བ་དང་། རི་དགས་ཟ་བ་དང་། དུག་ཟ་བ་དང་། མར་ཟ་བ་དང་། འབྲས་བུ་ཟ་བ་དང་། རྩ་བ་ཟ་བ་དང་། ཤུན་ཕྲགས་ཟ་བ་དང་། འདབ་མ་ཟ་བ་དང་། མེ་ཏོག་ཟ་བ་དང་། ལ་ལ་ཡང་འབྲས་བུའི་རོ་ཟ་བ་དང་། ལ་ལ་ཡང་པད་མོའི་རྩ་བའི་ཚལ་པ་ཟ་བ་དང་།རླུང་ཟ་བ་དང་། པགས་པ་ཟ་བ་དང་། ཁྲག་ཟ་བ་དང་། ལ་ལ་ཡང་ངན་སྐྱུགས་སྐམ་པོ་ཟ་བར་འགྱུར་བ་དེ་ཉིན་མཚན་ཤིན་ཏུ་གཏོང་བར་བྱེད་དོ། །ལ་ལ་དེ་བཞིན་དུ་ས་ཁར་ཟ་བ་ལེན་པ་མེད་ཅིང་ལག་པས་མ་ཡིན། ཁས་མ་ཡིན། ལྷུང་བཟེད་ལས་མ་ཡིན། འབྲེང་བུས་མ་ཡིན། གཏུན་བུའི་བར་ལས་མ་ཡིན། རྩྭ་ལས་མ་ཡིན་ཞིང་ཉིང་རུམ་ལས་ཟ་བ་སོ་སོར་ལེན་པ་མེད་དོ། །རྗེའུ་རིགས་ཀྱི་ལག་པ་ནས་ཟ་བ་སོ་སོར་ལེན་པ་མེད་དོ། །བྲམ་ཟེའི་ལག་པ་ནས་མ་ཡིན། མཐའ་མེད་པའི་ལག་པ་ནས་མ་ཡིན། བྱོལ་སོང་བའི་སྐྱེ་གནས་ཀྱི་ཁ་ནས་མ་ཡིན། ཆུར་བོར་བ་ལས་མ་ཡིན། ས་ལ་བཞག་པ་ལས་མ་ཡིན། རིའི་ཁ་ལས་མ་ཡིན། སྣོད་གཅིག་ཏུ་གཉིས་ཟ་ཟ་བ་མ་ཡིན། བཟའ་བ་ལག་པས་ལེན་པ་མེད་དོ། །ལ་ལ་གཤེར་བ་ལས་ཟ་བ་མེད་དོ། །གང་ལ་བུད་མེད་སྦྲུམ་པ་མེད་པ་དང་། གང་ན་ཁྱིམ་གནས་པ་མེད་པ་དང་། གང་ན་ཆོ་ག་མེད་པ་དང་། གང་ན་སྦྲང་མ་རྒྱུ་བ་འདི་ལ་ཟ་བ་མེད་དོ། །བཙུན་པ་ཁྱོད་ཀྱི་ཕྱིར་གང་སུ་ཞིག་གིས་མཆོད་སྟོན་དེ་ལྟར་བྱས་སོ་ཞེས་དེ་བཞིན་སྨྲས་པ་འདི་ཟོས་པ་མེད་དོ། །མར་མེད་པ་དང་། ཤ་མེད་པ་དང་། སྒོག་པ་མེད་པ་ཆེད་ཀར་བྱས་ཏེ་ཟོས་པ་མེད་དོ། །ཆང་འཐུངས་པ་མེད་དོ། །སྦྲང་རྩི་དང་། བུ་རམ་དང་། དགུན་ཆང་དང་། མར་འཐུང་ཞིང་ཟས་དང་སྐོམ་གཞན་ལེན་པའང་མེད་དོ། །ཁྱིམ་གཅིག་ཏུ་ཐམས་ཅད་ཟའོ། །ལ་ལ་ཡང་རིལ་པོ་གཅིག་གིས་ཉིན་མཚན་ཤིན་ཏུ་གཏོང་བར་བྱེད། ལ་ལ་རིལ་པོ་གཉིས་ལས་བདུན་གྱི་བར་དུ་ཉིན་མཚན་ཤིན་ཏུ་གཏོང་བར་བྱེད། ལ་ལ་ཡང་རིལ་པོ་གཅིག་གིས་ཉིན་མཚན་ཤིན་ཏུ་གཏོང་བར་བྱེད། ལ་ལ་ཉིན་མཚན་གསུམ་དང་། ལ་ལ་བཞི་དང་། ལ་ལ་ལྔ་དང་། ལ་ལ་དྲུག་དང་། ལ་ལ་ཡང་ཉིན་
མཚན་བདུན་གྱིས་ཤིན་ཏུ་གཏོང་བར་བྱེད། ལ་ལ་ཡང་སློང་བ་གཅིག་གིས་ཉིན་མཚན་ཤིན་ཏུ་གཏོང་བར་བྱེད། ལ་ལ་གཉིས་དང་གསུམ་ནས་བདུན་གྱི་བར་དུ་སློང་བས་ཉིན་མཚན་ཤིན་ཏུ་གཏོང་བར་བྱེད། ལ་ལ་ཚེར་མའི་ནང་དུ་མལ་བྱེད་པ་དང་། ལ་ལ་ཞིང་གི་རོལ་དང་། ལ་ལ་རུས་པ་དང་། ལ་ལ་ཐལ་བ་དང་། ལ་ལ་གྲམ་བུ་དང་། ལ་ལ་རྡོ་བ་དང་། ལ་ལ་གཏུན་བུའི་སྡུག་བསྔལ་གྱི་ནང་དུ་མལ་བྱེད་པར་འགྱུར་རོ། །ལ་ལ་སྟན་གྱིས་ཡོངས་སུ་བསྐོར་བ་དང་། ལ་ལ་ལག་པ་གྱེན་དུ་ཉིན་མཚན་ཤིན་ཏུ་གཏོང་བར་བྱེད། ལ་ལ་ལག་པ་ཡན་ལག་ལ་འཇུས་ཤིང་ཉིན་མཚན་ཤིན་ཏུ་གཏོང་བར་བྱེད། ལ་ལ་སྐྲ་དང་། ཨག་ཙོམ་དང་། ལ་ལ་རྐང་པའི་ཡན་ལག་ལ་འཇུས་ཤིང་ཉིན་མཚན་ཤིན་ཏུ་གཏོང་བར་བྱེད། ལ་ལ་ཆུའི་ནང་དུ་ཞུགས་ཏེ་ཉིན་མཚན་ཤིན་ཏུ་གཏོང་བར་བྱེད། ལ་ལ་རྐང་པ་གཅིག་གིས་ཟླ་བ་བསྟོད་པས་ན་ཉིན་མཚན་ཤིན་ཏུ་གཏོང་བར་བྱེད། ཉི་མས་སྐེམས་པས་ན་ཉིན་མཚན་ལྔས་ཤིན་ཏུ་གཏོང་བར་བྱེད། ལ་ལ་སྐྲ་དང་ཨག་ཙོམ་འཐོག་པ་དང་ལྡན་པས་ཉིན་མཚན་ཤིན་ཏུ་གཏོང་བར་བྱེད། ལ་ལ་རལ་པ་ཡང་འཛིན་པར་བྱེད། ཆུ་ཡང་འཛིན་པར་བྱེད། དབྱིག་པ་གསུམ་སྤྱོད་པར་བྱེད། ལ་ལ་རི་ལ་ལྟུང་བར་བྱེད། ལ་ལ་མེ་ལ་ལྟུང་བར་བྱེད། ལ་ལ་ཆུ་ལ་འཇུག་པར་བྱེད། ལ་ལ་རི་དང་ཤིང་དང་ལྟེང་ཀའི་ལྷ་བྲན་ལ་ཕྱག་བྱ་བས་ཉིན་མཚན་ཤིན་ཏུ་གཏོང་བར་བྱེད། ལ་ལ་བྱོལ་སོང་གི་སྐྱེ་གནས་ཀྱི་བརྟུལ་ཞུགས་ཀྱིས་ཉིན་མཚན་ཤིན་ཏུ་གཏོང་བར་བྱེད། སྡིག་པ་སྤོང་བ་ཁྱོད་ཀྱིས་གཟུགས་དེ་བཞིན་དུ་དཀའ་ཐུབ་དང་། བརྟུལ་ཞུགས་དང་། ཚངས་པར་སྤྱོད་པ་ལ་གནས་པ་ཕྱོགས་དང་མི་འཐུན་པའི་མྱ་ངན་ལས་མ་འདས་ཤིང་འཕགས་པས་དམོད་གོར་མ་ཆག །བཙུན་པ་བཅོམ་ལྡན་འདས་དེ་བཞིན་ནོ། །བཅོམ་ལྡན་འདས་ཀྱིས་བཀའ་སྩལ་པ། སྡིག་པ་སྤོང་བ་ཁྱོད་ཐར་པ་ལ་ཡང་ཕྱོགས་དང་མི་འཐུན་པའི་མྱ་ངན་ལས་འདས་པས་འཕགས་པ་ལ་དམོད་པ་ནི་འདི་ལྟ་སྟེ། དྲི་མས་དྲི་མ་བཀྲུས་པ་དང་། དམར་པོས་དམར་པོ་བཀྲུས་པ་དང་།མུན་པས་མུན་པ་ལ་ཞུགས་པ་དང་། དུག་གིས་དུག་ཟོས་པ་དང་། ཚིག་པས་མེའི་ནང་དུ་བཅུག་པ་དེ་ལྟར་དེ་བཞིན་དུ་ཁྱོད་སྡུག་
བསྔལ་མྱ་ངན་ལས་འདའ་བའི་ཐར་པ་ལ་བརྩོན་པས་ཉོན་མོངས་པ་ལས་ཐར་བར་བྱ་བའི་ཕྱིར་ཁྱོད་ཀྱི་གཟུགས་དེ་བཞིན་དུ་མཆོག་ཏུ་དཀའ་བ་སྤྱོད་པ་བདག་ལ་གནོད་པའི་རྗེས་སུ་སྦྱོར་བར་འགྱུར་རོ། །ཕྱི་ཕྱིར་ཡང་ཉོན་མོངས་པ་སྟུག་པོས་བཅིངས་ཤིང་བཏགས་པར་འགྱུར་རོ། །སྡིག་པ་སྤོང་བ་བདག་ནི་གྲངས་མེད་པའི་བསྐལ་པ་ལས་ཤིན་ཏུ་འདས་པ་དང་། ཤིན་ཏུ་གྲངས་མེད་ཚད་མེད་པའི་རྣམ་པར་རྒྱས་པར་མངོན་པར་ཤེས་སོ། །གང་བདག་དེའི་དུས་དེའི་ཚེ་ན་རྙོག་པ་ལྔའི་སངས་རྒྱས་ཀྱི་ཞིང་གི་རྒྱལ་པོ་བསོད་ནམས་ཀྱི་འོད་ཟེར་གྱི་མཛོད་ཅེས་བྱ་བ་དང་། དབུ་མའི་གླིང་བཞི་དང་། འཛམ་བུའི་གླིང་གི་དབང་པོ་ཡང་ལོ་སྟོང་གི་བར་དུ་སྐྱེ་བར་གྱུར་ཏོ། །དེའི་ཚེ་ན་ཡང་སེམས་ཅན་རྣམས་ཤིན་ཏུ་རྒ་ཤིའི་བགེགས་སུ་གྱུར་ཏོ། །དེའི་ཚེ་ན་སངས་རྒྱས་འབྱུང་བ་མེད་པ་དང་། སངས་རྒྱས་ཀྱི་བསྟན་པ་མེད་པས་ཡང་དེའི་ཚེ་ན་རང་སངས་རྒྱས་སུ་གྱུར་པ་ཡང་མེད་དོ། །དྲང་སྲོང་ཡང་མེད་དེ་ཕྱི་མའི་དུས་ན་བདག་དགོན་པ་དང་ནགས་འདབ་ནས་འབྱུང་བར་གྱུར་ཏོ། །ལ་ལ་ལྷའི་བྱ་བ་ཁ་དོག་བཞི་དང་། ལུས་ཀྱི་སྟོབས་དང་ལྷན་ཅིག་པ་སྐྱིལ་མོ་ཀྲུང་བཅས་པ་དེ་ལ་བདག་དང་སེམས་ཅན་བྱེ་བ་ཁྲག་ཁྲིག་བརྒྱ་སྟོང་མང་པོ་བལྟ་བར་གྱུར་ཏོ། །ཟླ་བ་དང་ཉི་མས་བསྟོད་པ་དེ་ལ་བདག་གིས་དྲིས་པ། གང་བདག་གིས་བཟུང་ཞིང་བཏང་སྟེ། དགོན་པ་དང་ནགས་འདབ་ཏུ་སྤྱོད་ཅིག་ཅེས་ཁྱོད་ལ་སྟོན་པ་སུ་དེས་སྨྲས་པ། བདག་ནི་རྒ་ཤིའི་བགེགས་སོ། །ཤུ་བས་ཡོངས་སུ་བཟུང་བ་དང་། ནད་ཀྱིས་ཡོངས་སུ་བཟུང་བ་དང་། ཟུག་རྔུས་ཡོངས་སུ་བཟུང་བ་སྟེ། ཡོངས་སུ་བཟུང་བ་དེ་ཐམས་ཅད་བདག་གིས་གཏོང་བ་དང་། ནགས་འདབ་ཏུ་ཐར་པའི་ཐབས་མི་ཤེས་པས་ཉིན་མཚན་ཤིན་ཏུ་གཏོང་བར་གྱུར་ཏོ། །དེ་ལ་བདག་གིས་དྲི་བ་དྲིས་པ། ཁྱོད་ལ་སྟོན་པ་སུ། དེས་སྨྲས་པ། ཉི་མ་དང་ཟླ་བ་གཉིས་བདག་གིས་བསྟན་ཏེ། རྒ་ཤི་འབྱུང་བ་ལ་བསྟེན་པར་ཡང་མི་ཤེས་སོ། །བདག་དེ་ལྟར་སེམས་སྐྱེས་པས་བདག་གིས་སེམས་ཅན་ཡོངས་སུ་སྨིན་པར་འགྱུར་རོ། །བདག་གང་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ། གང་བདག་ནི་སེམས་ཅན་རྣམས་ཀྱི་ལམ་འདི་མཐོང་བའང་
མེད་དོ། །བདག་ནི་མ་འོངས་པའི་དུས་ན་སྒྲིབ་པ་མེད་པའི་ཡེ་ཤེས་རྣམ་པར་གྲོལ་བའི་ལས་ཀྱི་སྒྲིབ་པའང་མེད་དོ། །བདག་དེ་ལས་ཕྱིར་ལོག་སྟེ། རང་རྒྱལ་པོའི་ཕོ་བྲང་དུ་ཞུགས་ཏེ་བདག་གིས་བུད་མེད་ཀྱི་རྩེ་བའི་རང་བཞིན་ཐམས་ཅད་སྤངས་ཤིང་རྒྱལ་པོའི་དགོས་པ་ཐམས་ཅད་བོར་ཏེ་ཉིན་མཚན་བདུན་དུ་ཁ་ཟས་མེད་པར་སོ་སོ་ནས་བསྡུས་ཏེ་ཐིམ་པ་གཅིག་ཏུ་སྤྱོད་པར་འགྱུར་རོ། །བདག་དེ་བཞིན་དུ་སྨོན་ལམ་བསྐྱེད་དོ། །གལ་ཏེ་བདག་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོའི་མདུན་དུ་དགེ་བའི་རྩ་བ་བསྐྱེད་པ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་པར་འགྱུར་རོ། །དེ་འདི་སངས་རྒྱས་བཅོམ་ལྡན་འདས་དག་དགོངས་ཤིང་བདག་ནི་གང་ཕྱོགས་བཅུའི་ཚད་མེད་གྲངས་མེད་པའི་འཇིག་རྟེན་གྱི་ཁམས་ན་གནས་སོ། །འཚོའོ། །སྐྱོང་ངོ་། །སྙིང་རྗེ་ཆེན་པོ་དང་ལྡན་པའི་སེམས་ཅན་རྣམས་ལ་ཆོས་སྟོན་ཏོ། །སངས་རྒྱས་བཅོམ་ལྡན་འདས་དེའི་སྒྲིབ་པ་མེད་པའི་ཡེ་ཤེས་སྟོན་ཅིང་བདག་གི་རེ་བ་ཡོངས་སུ་རྫོགས་པར་བྱེད་དོ། །ཇི་ལྟར་བདག་དེ་འདྲ་བའི་ཉེ་བར་ལེན་པའི་རྙེད་པར་གྱུར་པ་གང་གི་ཐབས་ཀྱིས་གང་ལ་བདག་དེ་ལྟར་སེམས་ཅན་རྣམས་ཀྱི་གཉེན་དུ་གྱུར། སེམས་ཅན་རྣམས་རྒ་ཤིའི་ལམ་མཐོང་བར་གྱུར། གལ་ཏེ་བདག་སངས་རྒྱས་བཅོམ་ལྡན་འདས་ཀྱི་དགོངས་པ་མེད་པས་དེ་ལྟར་བདག་ཟས་དང་སྐོམ་ཡོངས་སུ་མི་ཟ་བ་ནས་བཀྲེས་ཤིང་སྐོམ་པས་ཤི་བར་བྱས་པའི་བར་དུ་མནར་མེད་པའི་དམྱལ་བ་ཆེན་པོ་མི་བཟད་པར་དྲག་ཅིང་ཚ་བའི་སྡུག་བསྔལ་གྱི་ཚོར་བ་རྣམས་ཚོར་བར་འགྱུར་ཞིང་སེམས་ཅན་ཐམས་ཅད་ཕྱི་མའི་མཐའ་ལ་ཐུག་གི་བར་དུ་འཁོར་བ་ནི་ཆུང་ངུ་ན་སེམས་ཅན་གཅིག་ཀྱང་འཁོར་བ་ལས་གྲོལ་བ་མེད་དོ། །བདག་ཀྱང་དམྱལ་བ་ལས་ཡོངས་སུ་གྲོལ་བ་མེད་པ་ནི་གང་སྔོན་གྱི་མཐའ་ལ་ཐུག་པ་དང་། ཕྱི་མའི་མཐའ་ལ་ཐུག་པའི་སེམས་ཅན་རྣམས་ཉོན་མོངས་པ་སྐྱེ་བ་དང་། སྡུག་བསྔལ་སྐྱེ་བ་དང་སེམས་ཅན་གྱི་སྒྲིབ་པ་དང་། ཉོན་མོངས་པའི་སྒྲིབ་པ་དང་། ལས་ཀྱི་སྒྲིབ་པ་དང་། ཆོས་ཀྱི་སྒྲིབ་པ་བོར་བར་འགྱུར་རོ། །ཡོངས་སུ་སྨིན་པ་མེད་པ་དང་། ཉམས་པ་མེད་པ་ཡོད་པས་ངན་འགྲོ་གསུམ་གྱི་ཆོས་རྣམ་པར་སྨིན་པ་དེ་ཐམས་ཅད་སེམས་ཅན་རྣམས་ཀྱི་དཀའ་བར་བྱས་
པ་བདག་གི་ལུས་དམྱལ་བར་སྐྱེས་པས་རྣམ་པར་སྨིན་པར་འགྱུར་རོ། །གང་ཡང་ཕྱི་མའི་མཐའ་ལ་ཐུག་པའི་སེམས་ཅན་རྣམས་ངན་པར་བྱས་པའི་ལས་བོར་ཏེ། དེ་ཡང་བདག་གི་ལུས་དེ་ལྟར་མནར་མེད་པར་སྐྱེས་པ་རྣམ་པར་སྨིན་པར་འགྱུར། གང་བདག་གིས་དགེ་བ་བསགས་པ་དེ་སེམས་ཅན་རྣམས་དགེ་བའི་ལས་མངོན་པར་བྱེད་པས་བདག་གིས་བསྔོས་སོ། །ཇི་ལྟར་སེམས་ཅན་ཐམས་ཅད་འཇིགས་པ་མེད་པའི་ཁང་པར་གནས་པ་མེད་པར་གྱུར་པ། དེ་ལྟར་བདག་མནར་མེད་པའི་དམྱལ་བ་ཆེན་པོ་ལས་ཡོངས་སུ་གྲོལ་བ་མེད་དོ། །སྡིག་པ་སྤོང་བ་དེ་ཉིན་མཚན་བདུན་དུ་ཁ་ཟས་མེད་པར་སྨོན་ལམ་གྱི་ཁྱད་པར་སྤྱོད་དོ། །དེའི་དུས་ན་སྡིག་པ་སྤོང་བ་བྱང་ཕྱོགས་སུ་སོང་སྟེ། སངས་རྒྱས་ཀྱི་ཞིང་བྱེ་བ་ལས་ཤིན་ཏུ་འདས་པར་གྱུར་ཏོ། །དེ་ལ་རྙོག་པ་ལྔའི་སངས་རྒྱས་ཀྱི་ཞིང་དགེ་བ་ཞེས་བྱ་བའི་སངས་རྒྱས་ཀྱི་ཞིང་དུ་གྱུར་ཏོ། །དེ་ལ་སངས་རྒྱས་བཅོམ་ལྡན་འདས་བཟོད་པའི་མཆོག་དཔལ་བརྩེགས་པའི་རྒྱལ་པོ་ཞེས་བྱ་བ་གནས་སོ། །འཚོའོ། །སྐྱོང་ངོ་། །དེ་ཐེག་པ་གསུམ་གྱི་ཆོས་རྣམས་ཀྱང་འཆད་དོ།། །།བམ་པོ་དགུ་པ། དེ་ནས་བཅོམ་ལྡན་འདས་དེ་བཞིན་གཤེགས་པ་བཟོད་པའི་མཆོག་དཔལ་གྱི་ཕུང་པོའི་རྒྱལ་པོས་བྱང་ཆུབ་སེམས་དཔའ་གཟི་བརྗིད་དྲི་མ་མེད་པའི་འོད་དང་། བྱང་ཆུབ་སེམས་དཔའ་དེ་དག་ལ་བཀའ་སྩལ་པ། རིགས་ཀྱི་བུ་ཁྱོད་ལྷོ་ཕྱོགས་ཀྱི་སངས་རྒྱས་ཀྱི་ཞིང་བྱེ་བ་དགུ་བཅུ་རྩ་གཉིས་ཀྱི་སངས་རྒྱས་ཀྱི་ཞིང་འདི་ལས་འདས་ཏེ་སོང་ཤིག་དང་། དེ་ན་སངས་རྒྱས་ཀྱི་ཞིང་རབ་ཏུ་རྣམ་པར་ཕྱེ་བ་ཞེས་བྱ་བ་ན་གླིང་བཞི་པའི་དབུས་ཀྱི་རྒྱལ་པོ་བསོད་ནམས་འོད་ཟེར་གྱི་མཛོད་ཅེས་བྱ་བ་ཞིག་ཡོད་ཀྱིས་དེ་ལ་མེ་ཏོག་བན་དུའི་ཆུན་པོ་འདི་གཉིས་བྱིན་ཏེ་བཟོད་པའི་ཆོས་ཀྱི་གཞུང་འདི་ཁྲོལ་ཅིག །ནམ་མཁའི་མདོག་གི་སྔགས་ཀྱི་ཚིག་འདི་རྗོད་ཅིག་དང་། སྔགས་ཀྱི་ཚིག་དེས་རྒྱལ་པོ་དེ་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་ཐོབ་བོ། །བཟོད་པ་དེས་རྒྱལ་པོ་དེ་དང་། སེམས་ཅན་ཐམས་ཅད་ཀྱི་ཉོན་མོངས་པ་སྐྱེ་བ་དང་། སྡུག་བསྔལ་སྐྱེ་བ་དང་། སེམས་ཅན་གྱི་སྒྲིབ་པ་དང་། ཉོན་མོངས་པའི་སྒྲིབ་པ་དང་། ཆོས་
ཀྱི་སྒྲིབ་པ་དང་། ལས་དང་ཉོན་མོངས་པའི་སྒྲིབ་པ་རབ་དང་། འབྲིང་དང་ཐ་མ་མ་ལུས་པར་ཡོངས་སུ་ཟད་པར་འགྱུར་རོ། །རྒྱལ་པོ་དེ་ཡང་སེམས་ཅན་བྱེ་བ་ཁྲག་ཁྲིག་བརྒྱ་སྟོང་དགེ་བའི་བཤེས་གཉེན་དུ་ལམ་སྟོན་པ་བསྟན་པར་གྱུར་ཏོ། །རྒྱལ་པོ་དེ་ཡང་སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཐེག་པ་གསུམ་གྱིས་ཡོངས་སུ་སྨིན་ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་བྱེད་དོ། །དེ་དག་དང་བྱང་ཆུབ་སེམས་དཔའ་གཟི་བརྗིད་དྲི་མ་མེད་པའི་འོད་ཆེན་པོ་དང་། ལྷ་དང་། དྲི་ཟའི་འཁོར་ཐམས་ཅད་དང་ལྡན་པ་དེ་ཡང་བཟོད་པའི་མཆོག་དཔལ་གྱི་ཕུང་པོའི་རྒྱལ་པོ་དེ་ལ་ཕྱིར་མཉན་ནས་དེ་བཞིན་གཤེགས་པ་བཟོད་པའི་མཆོག་དཔལ་གྱི་ཕུང་པོའི་རྒྱལ་པོས་བཀའ་སྩལ་པ། རིགས་ཀྱི་བུ་རྒྱལ་པོ་བསོད་ནམས་འོད་ཟེར་གྱི་མཛོད་དེ་ལ་འདི་སྐད་ཅེས་སྨྲོས་ཤིག །རྒྱལ་པོ་ཆེན་པོ་ཇི་ལྟར་རང་བཞིན་གྱིས་ཉོན་མོངས་པ་མེད་པའི་ཆོས་ཀྱི་དབྱིངས་གཉིས་སུ་མེད་པའི་ཆོས་ཀྱི་སྒོས་ཡོངས་སུ་ཤེས་པར་བྱ་བ་དེ་ལྟར་མིག་གི་གཟུགས་ཀྱི་སྒོ་འཕོས་པ་མེད་ཅིང་རྣམ་པར་ཕྱེ་བ་མེད་པ་གཉིས་སུ་མེད་པ་སྟོན་པར་འགྱུར་བ་ནས་ཡིད་ཀྱི་རྣམ་པར་ཤེས་པའི་བར་དུ་འཕོས་པ་མེད་ཅིང་རྣམ་པར་ཕྱེ་བ་མེད་པ་གཉིས་སུ་མེད་པར་སྟོན་པར་འགྱུར་རོ། །དེ་ཅིའི་ཕྱིར་ཞེ་ན། ཆོས་ཐམས་ཅད་སེམས་ཅན་མེད་པ་ནི་སེམས་ཅན་དང་བྲལ་བའོ། །ཆོས་ཐམས་ཅད་སྲོག་མེད་པ་ནི་སྲོག་གི་སྒྲས་བསྟན་པའོ། །ཆོས་ཐམས་ཅད་གསོ་བ་མེད་པ་ནི་གསོ་བའི་སྒྲས་བསྐྱེད་པའོ། །ཆོས་ཐམས་ཅད་གང་ཟག་མེད་པ་ནི་གང་ཟག་གི་སྒྲས་རྣམ་པར་བརྗོད་པའོ། །ཆོས་ཐམས་ཅད་བསམ་གྱིས་མི་ཁྱབ་པ་ནི་བསམ་གྱིས་མི་ཁྱབ་པ་དང་བྲལ་བའོ། །ཆོས་ཐམས་ཅད་འདོད་ཆགས་དང་བྲལ་བའི་མཐའ་ནི་དངོས་པོ་མེད་པའོ། །ཆོས་ཐམས་ཅད་ཉེས་པ་མེད་པ་ནི་རིམས་དང་བྲལ་བའོ། །ཆོས་ཐམས་ཅད་གཏི་མུག་མེད་པ་ནི་ལུས་དང་བྲལ་བའོ། །ཆོས་ཐམས་ཅད་གནས་པ་མེད་པ་ནི་གནས་པར་དམིགས་པ་མེད་པའོ། །ཆོས་ཐམས་ཅད་གནས་པ་མེད་པ་ནི་ནམ་མཁའི་རང་བཞིན་ལྟ་བུའོ། །ཆོས་ཐམས་ཅད་གསོག་ནི་ཡུལ་ལ་དམིགས་པ་མེད་པའོ། །ཆོས་ཐམས་ཅད་གསོ་བ་ནི་ཉོན་
མོངས་པ་དང་བྲལ་བའོ། །ཆོས་ཐམས་ཅད་འགྲོ་བ་མེད་པ་ནི་བྱེད་པ་པོ་དང་བྲལ་བའོ། །ཆོས་ཐམས་ཅད་བླང་བ་མེད་པ་ནི་སེམས་པ་དང་བྲལ་བའོ། །ཆོས་ཐམས་ཅད་རློམ་སེམས་མེད་པ་ནི་སྒྱུ་མ་དང་བྲལ་བའོ། །ཆོས་ཐམས་ཅད་སྤྲོས་པ་མེད་པ་ནི་ལུས་དང་ངག་དང་ཡིད་ཀྱི་འདུ་བྱེད་དང་བྲལ་བའོ། །ཏད་ཡ་ཐཱ། བེ་དི་ནི། བེ་དི་ནི། བེ་དི་ནི། པཎ་ཌི་ནི། པཎ་ཌི་ནི། པཎ་ཌི་ནི། ཏྲི་ཛྙ་ནི། ཏྲི་ཛྙ་ནི། ཏྲི་ཛྙ་ནི། ཨུ་པ་དཱ་ནི། ཨུ་པ་དཱ་ནི། ཨུ་པ་དཱ་ནི། ན་པཱི་ནི། ན་པཱི་ནི། ན་པཱི་ནི། མུ་ཛི་ནི། མུ་ཛི་ནི། མུ་ཛི་ནི། ཨ་རིཥྛ། བ་རིཥྛ། ཧེ་ཏང་གྲ་མ། མ་ཧུ་ཤོ་ཙ། དྷ་རི་དྷ་རི། དྷཥྚེ་པྲ་དྷཥྚེ། ཨུ་རུ་ཀཱན་ཏེ། གམ་བྷི་རི། ཨ་བརྟ་ནི་བརྟ་ནི། མེ་བ་ཨ་བརྟ་ནི། ཨི་ཧ་ནི། བརྟ་ནི། ཀཱན་ཏེ། སརྦ་ཀཱན་ཏེ། ཧྲཱིད་ཡ་ཀཱན་ཏི། བི་ར་ཛེ། བ་ར་ཛེ། བ་ར་བི་ར་ཛེ། སྐན་དྷ་བ་མེ། ཨ་ཡ་ཏ་ན་ར་ཧེ་བྷ་ཏུ་ས་རེ། དརྦ་ཕ་ལྒུ། དྷརྨ་རཱ་ཛེ་ར་པྲེ་ཀྵི་ཏེ་།སྭཱ་ཧཱ། སེམས་ཅན་ངན་པ་རྣམས་ལྟ་བ་དང་འདུལ་བའི་ཕྱིར་འགྲོའོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གང་གི་དུས་ལ་དབབ་པར་ཤེས་ན་སོང་ཤིག །དེ་ནས་བྱང་ཆུབ་སེམས་དཔའ་དེ་དག་དང་། བྱང་ཆུབ་སེམས་དཔའ་གཟི་བརྗིད་དྲི་མ་མེད་པའི་འོད་ལ་མེ་ཏོག་བན་དུ་ཆུན་པོ་གཉིས་པོ་སྐྲའི་རལ་པ་ལ་བཏགས་ཏེ། རིགས་ཀྱི་བུ་སྟོང་ཕྲག་དགུ་བཅུ་རྩ་ལྔ་དང་ལྷན་ཅིག་ཏུ་དེ་བཞིན་གཤེགས་པ་དཔལ་གྱི་ཕུང་པོ་དེ་ལ་རྐང་པ་གཉིས་ས་ལ་བཙུགས་ཏེ་སྤྱི་བོས་ཕྱག་འཚལ་ནས་གཡས་ཕྱོགས་ནས་ལན་གསུམ་བསྐོར་བ་བྱས་ཏེ། ཡུད་ཙམ་གྱིས་སངས་རྒྱས་ཀྱི་ཞིང་ཤིན་ཏུ་རྣམ་པར་ཕྱེ་བ་ནས་གྲོང་ཁྱེར་གང་ལ་གླིང་བཞི་པའི་དབུས་ཀྱི་རྒྱལ་པོ་དེ་འདུག་པ་དེར་ཉེ་བར་ཕྱིན་ནས། དེ་ནུབ་བདུན་པའི་ཐ་མ་ན་དེ་དག་གི་མདུན་ན་འདུག་པར་གྱུར་ནས་དེ་དག་ལ་བལྟས་ཏེ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ཚུར་སྤྱོན། རྒྱལ་པོ་ཆེན་པོ་ལེགས་སོ། །བྱང་ཕྱོགས་ཀྱི་སངས་རྒྱས་ཀྱི་ཞིང་བྱེ་བ་ཕྲག་དགུ་བཅུ་རྩ་གཉིས་ཀྱི་སངས་རྒྱས་ཀྱི་ཞིང་འདི་ལས་འདས་པ་དེ་ན་འཇིག་རྟེན་གྱི་ཁམས་བཟོད་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་བཟོད་པའི་མཆོག་དཔལ་གྱི་ཕུང་པོའི་རྒྱལ་པོ་ཞེས་བྱ་བ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་བཞུགས་ཤིང་འཚོ་སྐྱོང་ལ་ཆོས་ཀྱང་སྟོན་ཏོ། །དེ་བཞིན་གཤེགས་པ་དེས་ཆོས་ཀྱི་གཞུང་འདི་བསྟན་པའི་ཕྱིར་བདག་ཅག་ཁྱོད་ཀྱི་གན་དུ་བཏང་ངོ་། །རྒྱལ་པོ་ཆེན་པོ་ཇི་ལྟར་ཆོས་ཐམས་ཅད་ཀྱི་དབྱིངས་རང་བཞིན་གྱིས་ཉོན་མོངས་པ་མེད་པ་གཉིས་སུ་མེད་པའི་སྒོས་ཡོངས་སུ་ཤེས་པར་བྱ་ཞིང་ཆོས་ཀྱི་དབྱིངས་ཇི་ལྟ་བ་དེ་ལྟར་བདག་གི་ཁམས་དང་དེ་ལྟར་སེམས་ཅན་གྱི་ཁམས་ཀྱང་གཉིས་སུ་མེད་པའི་སྒོས་ཡོངས་སུ་ཤེས་པར་བྱའོ། །དེ་ལྟར་མིག་གིས་གཟུགས་ཀྱི་སྒོ་ལ་ཡང་འཕོས་པ་མེད་ཅིང་རྣམ་པར་ཕྱེ་བ་མེད་པ་གཉིས་སུ་མེད་པའི་ཆོས་སྟོན་པར་འགྱུར་བ་ནས་ཡིད་ཀྱི་རྣམ་པར་ཤེས་པའི་སྒོའི་བར་དུ་འཕོས་པ་མེད་ཅིང་རྣམ་པར་ཕྱེ་བ་མེད་པས་གཉིས་སུ་མེད་པའི་ཆོས་སྟོན་པར་འགྱུར་རོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་ཆོས་ཐམས་ཅད་སེམས་ཅན་མེད་པ་ནི་སེམས་ཅན་དང་བྲལ་བའོ། །ཆོས་ཐམས་ཅད་སྲོག་མེད་པ་ནི་སྲོག་གི་སྒྲས་བསྟན་པ་ནས་ཆོས་ཐམས་ཅད་སྤྲོས་པ་མེད་པ་ནི་ལུས་དང་ངག་དང་ཡིད་ཀྱི་འདུ་བྱེད་དང་བྲལ་བའི་བར་དུའོ། །ཏད་ཡ་ཐཱ། བེ་དི་ནི། བེ་དི་ནི། བེ་དི་ནི། པཎ་ཌི་ནི། པཎ་ཌི་ནི། པཎ་ཌི་ནི། ཏྲི་ཛྙ་ནི། ཏྲིཛྙ་ནི། ཏྲིཛྙ་ནི། ཨུ་པ་དཱ་ནི། ཨུ་པ་དཱ་ནི། ཨུ་པ་དཱ་ནི། ན་པཱི་ནི། ན་པཱི་ནི། ན་པཱི་ནི། མུ་ཛི་ནི། མུ་ཛི་ནི། མུ་ཛི་ནི། ཨ་རིཥྛ་བ་རིཥྛ། ཧེ་ཏང་གྲ་མ། མ་ཧུ་ཤོ་ཙ། དྷ་རི་དྷ་རི། དྷཥྚེ་པྲ་དྷཥྚེ། ཨུ་རུ་ཀཱན་ཏེ། གམ་བྷི་རེ། ཨ་བརྟ་ནི། བརྟ་ནི། མེ་བ་ཨ་བརྟ་ནི། ཨི་ཧ་ནི་བརྟ་ནི། ཀཱན་ཏེ། སརྦ་ཀཱན་ཏེ། ཧྲཱི་ད་ཡ་ཀཱན་ཏེ། བི་ར་ཛེ། བ་ར་ཛེ། བ་ར་ཛེ། བ་ར་བི་ཛེ། སྐན་དྷ་བ་མེ། ཨ་ཡ་ཏ་ན་ར་ཧེ། བྷ་ཏུ་ས་རེ། དམྜ་ཕ་ལྒུ། དྷརྨ་རཱ་ཛེ་ར་པྲཀྵི་ཏེ་སྭཱ་ཧཱ། རྒྱལ་པོ་བསོད་ནམས་ཀྱི་འོད་ཟེར་མཛོད་ལ་སེམས་ཅན་དེ་དག་གིས་སྔགས་ཀྱི་ཚིག་འདི་དག་བརྗོད་མ་ཐག་ཏུ་དེ་ནས་དེ་ཉིད་ཀྱི་ཚེ་ན་སངས་རྒྱས་ཀྱི་ཞིང་ཤིན་ཏུ་རྣམ་པར་ཕྱེ་བ་ལན་དྲུག་ཏུ་གཡོས་སོ། །སིལ་སྙན་བྱེ་བ་ཁྲག་ཁྲིག་བརྒྱ་སྟོང་མ་བརྡབས་པར་རང་འཁྲོལ་ལོ་ལྷ་རྫས་ཀྱི་མེ་ཏོག་དང་སྤོས་ཀྱི་ཕྱེ་མའི་ཆར་དག་ཀྱང་ཕབ་བོ། །སངས་རྒྱས་ཀྱི་ཞིང་དེ་ན་ལྷ་དང་མི་ཐམས་ཅད་ཀུན་ཏུ་དགའ་སྟེ། བ་སྤུའི་ཁུང་བུ་གཡོས་ཤིང་རྒ་ཤི་ལས་ཐར་པར་བསམས་པར་གྱུར་ཏོ། །དེ་
དག་ཀྱང་བདག་གི་ལུས་ལས་མེ་ཏོག་བན་དུའི་ཐོར་ཚུགས་བཀྲོལ་ཏེ་རྒྱལ་པོ་བསོད་ནམས་འོད་ཟེར་གྱི་མཛོད་ལ་ཕུལ་ནས་སྨྲས་པ། དེ་བཞིན་གཤེགས་པ་དེས་མེ་ཏོག་བན་དུ་བཏང་ཞིང་མུ་སྟེགས་ཅན་སྒྲིབ་པའི་ཕྱིར་ནམ་མཁའི་མདོག་གིས་འདུལ་བའི་བཟོད་པའི་སྔགས་ཀྱི་ཚིག་བརྗོད་པ་འདི་དག་ཀྱང་བཏང་ངོ་། །རྒྱལ་པོ་ཆེན་པོ་ཁྱོད་སྔགས་ཀྱི་ཚིག་འདི་སྒོམས་ཤིག་དང་། རྒྱལ་པོ་ཆེན་པོ་སྔགས་ཀྱི་ཚིག་འདི་དག་གིས་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་ཐོབ་པར་འགྱུར་རོ། །རྒྱལ་པོ་ཆེན་པོ་ཁྱོད་བཟོད་པ་དེས་སེམས་ཅན་གྱི་སྒྲིབ་པ་དང་། འཁྲུག་པ་དང་། ཉོན་མོངས་པའི་སྒྲིབ་པ་དང་། ལས་ཀྱི་སྒྲིབ་པ་དང་། ཆོས་ཀྱི་སྒྲིབ་པ་དང་། ཉོན་མོངས་པའི་ལས་ཀྱི་སྒྲིབ་པ་རབ་དང་། འབྲིང་དང་། ཐ་མ་ཐམས་ཅད་མ་ལུས་པར་ཡོངས་སུ་ཟད་པར་འགྱུར་རོ། །རྒྱལ་པོ་ཆེན་པོ་ཁྱོད་ཀྱང་སེམས་ཅན་བྱེ་བ་ཁྲག་ཁྲིག་བརྒྱ་སྟོང་མང་པོ་ལ་དགེ་བའི་བཤེས་གཉེན་དུ་ལམ་བསྟན་པ་སྟོན་པར་འགྱུར་རོ། །རྒྱལ་པོ་ཆེན་པོ་ཁྱོད་སེམས་ཅན་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་མང་པོ་ལ་ཐེག་པ་གསུམ་གྱིས་ཡོངས་སུ་སྨིན་པར་འགྱུར་ཞིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་འགྱུར་རོ། །དེ་དག་གི་ཚིག་ངས་ཐོས་པས་མཆོག་ཏུ་མགུ་རངས་རབ་ཏུ་དགའ་ཞིང་ཡིད་བདེ་བ་སྐྱེས་པར་གྱུར་ནས་བྱང་ཆུབ་སེམས་དཔའ་དེ་དག་ལ་མེ་ཏོག་དང་། ཕྲེང་བ་དང་། དྲི་དང་། སྤོས་དང་། བྱུག་པ་དང་། གདུགས་དང་། རྒྱལ་མཚན་དང་། བ་དན་དང་། རོལ་མོ་དཀྲོལ་བ་མཆོག་ཏུ་རྒྱ་ཆེ་བ་རྣམ་པ་སྣ་ཚོགས་ཀྱིས་དེ་དག་ལ་མཆོད་པ་བྱས་ནས་རྐང་པ་གཉིས་ས་ལ་བཙུགས་ཏེ། སྤྱི་བོས་ཕྱག་འཚལ་ནས་མེ་ཏོག་བན་དུའི་ཆུན་པོ་དེ་གཉིས་བླངས་ཏེ་དེའི་རལ་པ་ལ་བཏགས་ནས་རྣམ་པ་དེ་ལྟ་བུའི་བརྩོན་འགྲུས་ཀྱི་རང་བཞིན་མཆོག་ཏུ་རྒྱ་ཆེ་བའི་སྟོབས་དང་མཐུ་དང་དྲན་པ་ཡང་ཐོབ་བོ། །ཇི་ལྟར་བཀྲེས་པ་དང་སྐོམ་པ་ཐམས་ཅད་ཀྱིས་ཐམས་ཅད་རྒྱུན་བཅད་ནས་བྱང་ཆུབ་སེམས་དཔའ་དེ་དག་གི་མདུན་དུ་ཆོས་མཉན་པའི་ཕྱིར་འདུག་པས་དེ་མཆོག་ཏུ་དགའ་བར་གྱུར་ཏོ། །རྣམ་པ་དེ་ལྟ་བུའི་བརྩོན་འགྲུས་ཀྱིས་ཡང་དག་པར་སྤྱོད་པའི་ཚུལ་ནམ་མཁའི་མདོག་
གིས་འདུལ་བའི་བཟོད་པ་བསྒོམ་པར་འགྱུར་བ་ནི་གང་ཞེས་བྱས་པ་དང་། དེ་དག་གིས་སྨྲས་པ། རྒྱལ་པོ་ཆེན་པོ་ཆོས་བཞི་དང་ལྡན་ན་རིགས་ཀྱི་བུ་བཟོད་པ་འདི་སྒོམ་པར་བྱེད་དོ། །བཞི་གང་ཞེ་ན། ཕུང་པོ་དང་ཁམས་དང་སྐྱེ་མཆེད་ལ་རྟེན་པ་མེད་པ་དང་། སྙིང་རྗེ་ཆེན་པོའི་ཐབས་ལ་མཁས་པ་རྒྱུན་མི་གཅོད་པ་དང་། རྟག་པ་དང་ཆད་པ་མེད་པ་དང་། ཉན་ཐོས་དང་རང་སངས་རྒྱས་ཀྱི་ཐེག་པ་ལ་མི་འདོད་པ་དང་། ཚུལ་གཅིག་གིས་ཆོས་ཐམས་ཅད་ནམ་མཁའི་རང་བཞིན་ལྟ་བུར་ཤེས་པ་སྟེ། རིགས་ཀྱི་བུ་ཆོས་འདི་བཞི་དང་ལྡན་ན་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་འདི་ཐོབ་བོ། །འདི་ལ་ལུང་བསྟན་པ་ན། རྒྱལ་པོ་དེ་སྟན་དེ་ལ་འདུག་སྟེ་རིགས་དང་འཐུན་པའི་སྒོ་ནས་འོད་ཟེར་འབྱུང་བའི་བཟོད་པ་ཐོབ་པར་གྱུར་ནས་བྱང་ཆུབ་སེམས་དཔའ་དེ་དག་ལ་རྐང་པ་གཉིས་ས་ལ་བཙུགས་ཏེ་སྤྱི་བོས་ཕྱག་འཚལ་ནས་མཆོད་པ་སྣ་ཚོགས་བྱས་ཏེ་གཡས་ཕྱོགས་ནས་ལན་གསུམ་བསྐོར་བ་བྱས་ནས་འདུག་གོ །བྱང་ཆུབ་སེམས་དཔའ་དེ་དག་ཀྱང་རང་རང་གི་སངས་རྒྱས་ཀྱི་ཞིང་དུ་ཡང་དག་པར་ཞུགས་སོ། །དེ་ནས་ངས་ཞང་བློན་དང་། བློན་པོ་དང་། ཞམ་རིང་བ་འཁོར་ལ་ཤེས་པར་བྱས་པ། ང་ཉིན་ཞག་བདུན་དུ་སྲིད་དང་། ཕྱུག་པོ་དང་། ལོངས་སྤྱོད་དང་། ཀུན་ཏུ་སྤྱོད་པ་དང་། ཁྱིམ་པའི་མཚན་མ་ཐམས་ཅད་སྤངས་ཏེ། དཀའ་ཐུབ་ཀྱི་ནགས་ཚལ་དུ་འགྲོ་ཞིང་རྒ་ཤིའི་ཕ་རོལ་དུ་འགྲོ་བར་གྲོགས་པོ་དག་ཤེས་པར་གྱིས་ཤིག །དེ་སྐད་ཅེས་བཀའ་སྩལ་པ་དང་། ཞང་བློན་དང་། བློན་པོ་དང་། ཞམ་རིང་བའི་འཁོར་དེས་འདི་སྐད་ཅེས་གསོལ་ཏོ། །རབ་ཏུ་བྱུང་བའི་ལྷའི་དུས་དེ་ནི་དེ་ལྟ་མ་ལགས་སོ། །དེ་ཅིའི་སླད་དུ་ཞེ་ན། གང་སེམས་ཅན་བྱེ་བ་ཁྲག་ཁྲིག་བརྒྱ་སྟོང་མང་པོ་དེ་དག་རྒ་ཤིའི་འཇིགས་པས་དཀའ་ཐུབ་ཀྱི་ནགས་ཚལ་དུ་དོང་སྟེ་བསྟན་པ་རྣམས་ལ་དམིགས་པར་ཡང་མི་འགྱུར་རོ། །གང་ལ་ལ་སེམས་ཅན་གཅིག་ཀྱང་འཕགས་པ་བླ་མ་མིའི་ཆོས་ཀྱི་ཁྱད་པར་མ་ལུས་པར་ཁོང་དུ་ཆུད་པ་ཡང་མེད་དོ། །ངས་ཡང་འདི་སྐད་ཅེས་སྨྲས་སོ། །ང་ནི་སེམས་ཅན་ཐམས་ཅད་ཀྱི་བསྟན་པར་འགྱུར་ཞིང་རྒ་ཤིའི་ཕ་རོལ་གྱི་ལམ་སྟོན་པའོ། །ངས་སེམས་ཅན་ཐམས་ཅད་འབོད་པའི་ཕྱིར་ཚིག་འདི་
བརྗོད་མ་ཐག་ཏུ་དེ་ནས་དེ་ཉིད་ཀྱི་ཚེ་ན་སྟོང་གསུམ་གྱི་སྟོང་ཆེན་པོའི་ས་ལན་དུ་མ་གཡོས་སོ། །ལྷ་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོས་ཀྱང་ལེགས་སོ་ཞེས་བྱ་བ་བྱིན་ནོ། །ལྷ་རྫས་ཀྱི་རོལ་མོ་བརྡུང་བ་བྱེ་བ་ཁྲག་ཁྲིག་བརྒྱ་སྟོང་གིས་རབ་ཏུ་དཀྲོལ་ཏོ། །ལྷ་རྫས་ཀྱི་མེ་ཏོག་དང་། སྤོས་དང་། དྲི་དང་། ཕྱེ་མ་དང་། བྱུག་པའི་ཆར་སྣ་ཚོགས་རབ་ཏུ་བབ་ནས་ལྷ་བྱེ་བ་ཁྲག་ཁྲིག་མང་པོས་མགྲིན་གཅིག་ཏུ་འདི་སྐད་ཅེས་གསོལ་ཏོ། །སྐྱེས་བུ་དམ་པ་ཁྱོད་ཀྱིས་རྣམ་པ་དེ་ལྟ་བུའི་རྩལ་ཆེན་པོ་བྱ་བར་ནུས་ཤིང་སྐྱེས་བུ་དམ་པ་ཁྱོད་ཀྱིས་ལེགས་པར་བཤད་པ་ལེགས་སོ་ལེགས་སོ། །སྐྱེས་བུ་དམ་པ་ཁྱོད་དང་བདག་ཅག་ནི་བྱམས་པའི་རྗེས་སུ་འབྲང་བའི་གྲོགས་པོར་འགྱུར་རོ། །དེ་ལྟར་སྐྱེས་བུ་དམ་པ་ཁྱེད་རྒ་ཤིའི་ཕ་རོལ་གྱི་ལམ་བསྟན་པ་སྟོན་པར་གྱུར་ཅིག །སྡིག་པ་སྤོང་བ་དེ་ང་ནི་ཞག་བདུན་པ་གཉིས་ཀྱི་བར་དུ་དབེན་པས་རྗེས་སུ་རྟོག་ཅིང་གནས་པས་ཞག་བདུན་ན་དེ་དག་གིས་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་འདི་ཐོབ་པར་གྱུར་ཏོ། །ཞག་བདུན་པ་དེ་ལས་ཤིན་ཏུ་འདས་ནས་གནོད་སྦྱིན་བྱེ་བ་མང་པོ་སངས་རྒྱས་ཀྱི་ཞིང་ཤིན་ཏུ་རྣམ་པར་ཕྱེ་བ་ཐམས་ཅད་དུ་སྒྲ་འབྱིན་པར་གྱུར་ཏོ། །དབྱངས་ཀྱི་རྗེས་སུ་ཉན་པར་གྱུར་ཏོ། །སེམས་ཅན་རྣམས་ལ་སྐྱོ་བ་སྐྱེད་པར་བྱེད་པ་ནི་ཀྱེ་སེམས་ཅན་རྣམས་ལོངས་ཤིག །གླིང་བཞི་པའི་དབུས་ཀྱི་རྒྱལ་པོ་བསོད་ནམས་འོད་ཟེར་གྱི་མཛོད་གང་ན་བ་དེར་ཉེ་བར་སོང་ཤིག་དང་། དེ་ཞག་བདུན་ན་བྱུང་སྟེ་དཀའ་ཐུབ་ཀྱི་ནགས་ཚལ་དུ་སོང་ནས་སེམས་ཅན་རྣམས་ལ་རྒ་ཤིའི་ཕ་རོལ་དུ་འགྲོ་བ་ཞི་བའི་ལམ་སྟོན་པར་འགྱུར་རོ། །དེ་ང་ནི་མཁར་གྱི་རྒྱལ་པོ་དྲུག་ཅུ་རྩ་བཞི་དང་བུ་དང་བཅས་པ་དང་། མཁར་གྱི་རྒྱལ་པོའི་བུ་ཁྲག་ཁྲིག་དགུ་བཅུ་རྩ་གཉིས་དང་། བགྲང་བ་ལས་ཤིན་ཏུ་འདས་པའི་སེམས་ཅན་དང་ལྷན་ཅིག་ཏུ་ཉི་མ་བདུན་པ་དེ་ལས་ཤིན་ཏུ་འདས་ནས་བྱུང་སྟེ། ཁྱིམ་གྱི་ལོངས་སྤྱོད་དང་། ཀུན་ཏུ་སྤྱོད་པ་ཐམས་ཅད་དང་། ཁྱིམ་པའི་མཚན་མ་ཐམས་ཅད་སྤངས་ཤིང་སྐྲ་དང་ཁ་སྤུ་བྲེགས་ནས་མེ་ཏོག་བན་དུ་ཇི་སྙེད་པ་རལ་པ་ལ་བཏགས་ཏེ་གོས་ཁ་དོག་བསྒྱུར་བ་གྱོན་ནས། དཀའ་ཐུབ་ཀྱི་ནགས་ཚལ་དུ་དོང་སྟེ། དེ་ཡང་དེ་ལ་གནས་
ནས་བགྲང་བ་ལས་ཤིན་ཏུ་འདས་པའི་སེམས་ཅན་རྣམས་ལ་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་འདི་བསྒོམ་པའི་ལམ་སྟོན་ཏོ། །སེམས་ཅན་བྱེ་བ་ཁྲག་ཁྲིག་བརྒྱ་སྟོང་མང་པོ་ཡུན་མི་རིང་བས་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་འདི་ཐོབ་པར་གྱུར་ཏོ། །དེ་ན་ངས་བགྲང་བ་ལས་ཤིན་ཏུ་འདས་པའི་སེམས་ཅན་རྣམས་ཉན་ཐོས་ཀྱི་ཐེག་པ་ལ་སྦྱོར་བར་གྱུར་ཏོ། །དེ་ན་ངས་བགྲང་བ་ལས་ཤིན་ཏུ་འདས་པའི་སེམས་ཅན་རྣམས་རང་སངས་རྒྱས་ཀྱི་ཐེག་པ་ལ་སྦྱོར་བར་གྱུར་ཏོ། །བགྲང་བ་ལས་ཤིན་ཏུ་འདས་པའི་སེམས་ཅན་རྣམས་ལྷ་དང་མི་ལ་སྦྱོར་བར་གྱུར་ཏོ། །དེས་བགྲང་བ་ལས་ཤིན་ཏུ་འདས་པའི་སེམས་ཅན་རྣམས་ཕྱོགས་བཅུའི་སངས་རྒྱས་བཅོམ་ལྡན་འདས་ལ་བསྙེན་བཀུར་བར་གྱུར་ཏོ། །དེ་ནས་སངས་རྒྱས་བཅོམ་ལྡན་འདས་དེ་དག་གི་སྤྱན་སྔར་ངས་རྣམ་པ་འདི་ལྟ་བུའི་སྨོན་ལམ་བཏབ་སྟེ། བདག་ད་ལྟར་སངས་རྒྱས་ཀྱི་ཞིང་ཤིན་ཏུ་རྣམ་པར་ཕྱེ་བ་ན་སེམས་ཅན་རྣམས་རྒ་ཤིའི་ཕ་རོལ་ཏུ་འགྲོ་བའི་བཟོད་པའི་ལམ་སྟོན་ཅིང་ཕྱོགས་བཅུའི་ཉོན་མོངས་པ་དང་། རྙོག་པ་ལྔའི་སངས་རྒྱས་ཀྱི་ཞིང་ཆུ་བོ་གང་གཱའི་བྱེ་མ་སྙེད་ན་སེམས་ཅན་རྣམས་ལ་རྒ་ཤིའི་ཕ་རོལ་ཏུ་ཕྱིན་པའི་བཟོད་པའི་ལམ་བསྟན་པར་བྱའོ། །སྡིག་པ་སྤོང་བ་ཇི་ལྟར་ཡང་ང་རྣམ་པ་དེ་ལྟ་བུའི་སྤྱོད་ལམ་ལ་བརྩོན་པ་འདིས་རྩལ་ཆེན་པོ་བྱས་པར་གྱུར་ཏོ། །དེ་བཞིན་དུ་བསྐལ་པ་བར་མ་བདུན་ལས་ཤིན་ཏུ་འདས་པའི་ཕྱོགས་བཅུ་ཀུན་ནས་ཉོན་མོངས་པ་དང་། རྙོག་པ་ལྔའི་སངས་རྒྱས་ཀྱི་ཞིང་ཆུ་བོ་གང་གཱའི་བྱེ་མ་སྙེད་ཐམས་ཅད་དུ་ཀུན་ཏུ་རྒྱུའི་ཆ་བྱད་ཀྱིས་རྣམ་པ་དེ་ལྟ་བུའི་རྩལ་ཆེན་པོ་བྱས་སོ། །ངས་སངས་རྒྱས་ཀྱི་ཞིང་རེ་རེ་ལ་བགྲང་བ་ལས་ཤིན་ཏུ་འདས་པའི་སེམས་ཅན་རྣམས་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་ལ་བཀོད་དོ། །ངས་བགྲང་བ་ལས་ཤིན་ཏུ་འདས་པའི་སེམས་ཅན་རྣམས་བྱང་ཆུབ་ཀྱི་སེམས་སུ་སྦྱོར་བར་གྱུར་ཏོ། །དེ་བཞིན་དུ་ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པ་དང་། ལྷ་དང་མིའི་ཐེག་པ་ལ་སྦྱོར་བར་གྱུར་ཏོ། །སྡིག་པ་སྤོང་བ་དེ་ང་བསྐལ་པ་བར་མ་བདུན་གྱིས་ཕྱོགས་བཅུའི་ཞིང་སྟོང་པ་དང་།
རྙོག་པ་ལྔའི་སངས་རྒྱས་ཀྱི་ཞིང་ཆུ་བོ་གང་གཱའི་བྱེ་མ་སྙེད་ཀྱི་སངས་རྒྱས་ཀྱི་ཞིང་འདི་རེ་རེ་ལ་ཀུན་ཏུ་རྒྱུའི་ཆ་བྱད་ཀྱིས་རྣམ་པ་དེ་ལྟ་བུའི་རྩལ་ཆེན་པོ་བྱས་ཏེ། ཕྱིས་གླིང་བཞི་པ་དེ་དག་ཏུ་བདུད་དུ་གྱུར་ཏོ། །དེ་ན་སེམས་ཅན་ལ་ལའི་མདུན་དུ་ཚངས་པའི་གཟུགས་ཀྱིས་འདུག་པར་གྱུར་པ་ནི་དེ་དག་རྟག་པར་ལྟ་བ་ལོག་པར་བཟུང་བ་ལས་ཐར་བར་བྱ་སྟེ། ལ་ལ་བརྒྱ་བྱིན་གྱི་གཟུགས་དང་། ལ་ལ་ཟླ་བ་དང་ཉི་མ་དང་། དབང་ཕྱུག་གི་གཟུགས་ནས། ལ་ལ་འོད་འཕྲོ་བའི་ཕུང་པོའི་བར་དུ་གཟུགས་ཀྱིས་མདུན་དུ་འདུག་པར་གྱུར་ཏོ། །ངས་ཇི་ལྟར་སྔོན་ཀུན་ཏུ་རྒྱུའི་གཟུགས་ཀྱིས་ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་འདི་བསྒོམ་པ་སྟོན་ཅིང་ཇི་ལྟར་རང་བཞིན་གྱིས་ཉོན་མོངས་པའི་ཆོས་ཀྱི་དབྱིངས་གཉིས་སུ་མེད་པའི་སྒོས་ཡོངས་སུ་ཤེས་པར་བྱ་བ་དང་། བདག་གི་ཁམས་ཇི་ལྟ་བ་དེ་ལྟར་སེམས་ཅན་གྱི་ཁམས་གཉིས་སུ་མེད་པའི་སྒོས་ཡོངས་སུ་ཤེས་པར་བྱ་ཞིང་། དེ་ལྟར་མིག་གི་གཟུགས་ཀྱི་སྒོ་འཕོས་པ་མེད་ཅིང་རྣམ་པར་ཕྱེ་བ་མེད་པ་གཉིས་སུ་མེད་པའི་ཆོས་བསྟན་པར་འགྱུར་རོ། །དེ་ཅིའི་ཕྱིར་ཞེ་ན། ཆོས་ཐམས་ཅད་སེམས་ཅན་མེད་པ་ནི་སེམས་ཅན་དང་བྲལ་བ་ནས་ཆོས་ཐམས་ཅད་སྤྲོས་པ་མེད་པ་ནི་ལུས་དང་ངག་དང་ཡིད་ཀྱི་འདུ་བྱེད་དང་བྲལ་བའི་བར་དུའོ། །རྒྱལ་པོ་ཆེན་པོ་བསོད་ནམས་ཀྱི་འོད་ཟེར་གྱི་མཛོད་ངས་ཀུན་ཏུ་རྒྱུའི་ཆ་བྱད་ཀྱིས་རྣམ་པ་དེ་ལྟ་བུའི་བདེ་བའི་ལམ་འདི་སྒོམ་པ་ན་སེམས་ཅན་རྣམས་ཡོངས་སུ་སྨིན་པར་བྱ་བའི་ཕྱིར་ལྟ་བ་སྐྱེད་དོ། །དེའི་འོག་ཏུ་གླིང་བཞི་པ་ཆགས་པ་མེད་པ་དེ་དག་ན་སེམས་ཅན་དེ་དག་ལ་བདུད་ལ་ལ་ཚངས་པའི་གཟུགས་ནས་མེའི་ཁ་དོག་གི་བར་གྱི་གཟུགས་ཀྱིས་ཉེ་བར་ཕྱིན་ཏོ། །སེམས་ཅན་མཆོག་ཏུ་མ་རུངས་པའི་ལྟ་བར་སོང་བ་དེ་དག་ལ་རྣམ་པ་དེ་ལྟ་བུའི་ལམ་སྟོན་ཏོ། །ལ་ལ་ལ་འདི་སྐད་ཅེས་སྨྲས་སོ། །ཀྱེ་སེམས་ཅན་རྣམས་ཚུར་ཤོག །ཀྱེ་སེམས་ཅན་རྣམས་ལེགས་སོ། །འཁོར་བའི་ཕ་རོལ་ཏུ་འགྲོ་བ་དང་རྒ་ཤི་ལས་ཐར་པར་བྱ་བའི་ཕྱིར་ཁྱོད་དགེ་བའི་རྩ་བ་ལ་བརྩོན་པར་གྱིས་ཤིག །ཁྱོད་འབའ་ཞིག་མྱ་ངན་ལས་འདའ་བར་འགྲོ་བ་ཡོངས་སུ་རྫོགས་པའི་ཕྱིར་བདག་ནི་ཁྱོད་མྱ་ངན་ལས་འདའ་བར་འགྲོ་བའི་ལམ་བསྟན་པར་
འགྱུར་རོ། །ཁྱོད་གོས་མེད་པར་ཉིན་མཚན་དེ་དག་ལས་ཡང་དག་པར་ཤིན་ཏུ་འདའ་བར་བྱོས་ཤིག །དེས་ཐར་པ་ཐོབ་པར་བྱོས་ཤིག །ཡང་ལ་ལ་ལ་འདི་སྐད་ཅེས་སྨྲས་སོ། །ཁྱོད་འདི་ལ་གྲོལ་ཞིང་གོས་མེད་པར་འགྱུར་བ་ནས་པགས་པའི་གོས་ཀྱི་བར་དུ་གྱོན་ཅིག །ཡང་ལ་ལ་ལ་འདི་སྐད་ཅེས་སྨྲས་སོ། །ཀྱེ་ཚུར་ཤོག་ལོ་མ་ཟ་བ་ནས་མ་ཞུ་བ་དང་ངན་སྐྱུགས་ཀྱི་བར་དུ་ཟ་བར་བྱོས་ཤིག །ཡང་ལ་ལ་ལ་འདི་སྐད་ཅེས་སྨྲས་སོ། །ཀྱེ་ཚུར་ཤོག་ཁྱེད་ཅག་དེ་བཞིན་དུ་བུམ་པའི་ཁ་ནས་ཟས་མ་ལེན་ཅིག་པ་ནས་ཟས་ཟ་ཅིག་གི་བར་དུ་ཟོ་ཤིག །ཡང་ལ་ལ་ལ་འདི་སྐད་ཅེས་སྨྲས་སོ། །ཚུར་ཤོག་ཁྱོད་སློང་བ་གཅིག་གིས་ཉིན་མཚན་ཡང་དག་པར་ཤིན་ཏུ་འདའ་བར་བྱོས་ཤིག །ཡང་ལ་ལ་ལ་འདི་སྐད་ཅེས་སྨྲས་སོ། །ཚེར་མའི་མལ་དང་སྟན་ལ་འདུག་པ་ནས་ཙོག་པུའི་མལ་གྱི་བར་དུ་བྱོས་ཤིག །ཡང་ལ་ལ་ལ་འདི་སྐད་ཅེས་སྨྲས་སོ། །སྟན་སྤངས་པར་གྱུར་པ་ནས་རྐང་པ་གཉིས་ཤིང་གི་ཡལ་ག་ལ་འཁྱུད་པའི་བར་དུ་ཉིན་མཚན་ཤིན་ཏུ་ཡང་དག་པར་འདའ་བར་བྱོས་ཤིག །ཡང་ལ་ལ་ལ་འདི་སྐད་ཅེས་སྨྲས་སོ། །ཚུར་ཤོག་ཁྱེད་ཅག་ཆུའི་ནང་དུ་ཞུགས་པ་ནས་ཉི་མ་ལྔ་པས་ཡོངས་སུ་སྐེམས་པ་ན་ཉིན་མཚན་ཡང་དག་པར་འདའ་བར་བྱོས་ཤིག །ཡང་ལ་ལ་ལ་འདི་སྐད་ཅེས་སྨྲས་སོ། །ཁྱེད་ཅག་ཚུར་ཤོག་སྐྲ་དང་ཁ་སྤུ་བྲེགས་པའི་རྗེས་སུ་སྦྱོར་བ་དང་ལྡན་པ་རྣམས་ཉིན་མཚན་ཡང་དག་པར་ཤིན་ཏུ་འདའ་བ་ནས་ལ་ལ་ཆུའི་འདམ་གཅིག་གི་བར་དུ་ཡང་འདི་ལྟར་སློབ་བོ། །ཁྱེད་ཅག་རི་བོའི་གཡང་ས་དེ་ལས་བདག་རང་ལྷུང་བ་ནས་ཆུའི་བར་དུ་ལྷུང་བར་བྱོས་ཤིག །ལ་ལ་ཡང་དེ་ལྟར་སློབ་ཏུ་བཅུག་གོ །ཁྱེད་ཅག་ཚུར་ཤོག །རི་དང་། ཤིང་དང་། ལྟེང་ཀའི་ལྷ་མོ་ལ་ཕྱག་འཚལ་བར་བྱོས་ཤིག །ལ་ལ་གནོད་སྦྱིན་གྱི་བརྟུལ་ཞུགས་ནས་བྱོལ་སོང་གི་སྐྱེ་གནས་ཀྱི་བརྟུལ་ཞུགས་ཀྱི་བར་དུ་སློབ་ཅིང་ཐར་པ་ཐོབ་པར་བྱོས་ཤིག །ཡང་ལ་ལ་ལ་འདི་སྐད་ཅེས་སྨྲས་སོ། །ཚུར་ཤོག་ཁྱེད་ཅག་རབ་བསྐོར་བ་དེ་ལ་སེམས་ཅན་དུ་མ་སོད་ལ་དེས་ཐར་པ་ཐོབ་པར་བྱོས་ཤིག །ལ་ལ་དེ་ལྟར་སློབ་བོ། །ཁྱེད་ཅག་འདི་ལ་ལུས་སྣ་ཚོགས་བསད་པ་དེས་ཐར་པ་ཐོབ་པར་གྱུར་ཅིག །ཡང་ལ་ལ་ལ་འདི་སྐད་ཅེས་སྨྲས་སོ། །མྱ་ངན་ལས་
འདས་པ་ཁོང་དུ་ཆུད་པའི་ལམ་འདི་ནི་འདི་ལྟ་སྟེ། ལས་ཐམས་ཅད་ཟད་པ་ཐར་པའོ། །དེ་ཇི་ལྟ་ཞེས་བྱས་ན་ཇི་ལྟར་སྐྱེས་བུ་འདིས་མི་དགེ་བའི་ལས་ཟད་པར་འགྱུར་བ་དེ་བཞིན་དུ་བསོད་ནམས་ཀྱང་ཟད་པར་འགྱུར་རོ། །གང་གི་ཚེ་བསོད་ནམས་དང་སྡིག་པ་འདི་གཉིས་ཀྱིས་མ་ལུས་པར་ཡོངས་སུ་ཟད་པར་འགྱུར་བ་དེའི་ཚེ་ཕྱིས་བྱང་ཆུབ་ཐོབ་པར་འགྱུར་རོ། །ལ་ལ་དེ་ལྟར་སློབ་བོ། །དེ་གཉིས་སྦྱོར་བ་དང་འབྱུང་བར་གྱུར་པ་དེ་ཐར་པ་སྟེ། ལ་ལ་དེ་ལྟར་སློབ་ཏུ་བཅུག་གོ །དངོས་པོ་མེད་པ་དེ་གཉིས་ནི་དངོས་པོ་ཡོད་པ་མ་ཡིན་ནོ། །གཉིས་གང་ཞེ་ན། ཆོས་དང་ཆོས་མ་ཡིན་པ་ཞེས་བྱ་བ་ནི་ཚིག་གི་ལྷག་མའོ། །ལུས་འདིའི་ལུས་གཞན་གྱིས་ཆགས་པ་མེད་པའི་ཡེ་ཤེས་འབྱུང་བར་འགྱུར་བ་དེ་ཡང་དེ་བཞིན་དུ་ཐར་པ་སྟེ། ལ་ལ་ཇི་ཙམ་པ་དེ་ལྟར་སློབ་པར་བྱེད་དོ། །ཁྱོད་ཀྱིས་འདི་ལ་སྲོག་གཅད་པར་བྱ་བ་དང་། མ་བྱིན་པར་ལེན་པ་བླང་བར་བྱ་བ་ནས་ལོག་པ་ལ་ལྟ་བའི་བར་དུ་གྱུར་ཅིག་ཅེས་དེ་སྐད་དུ་སྨྲས་པས་ན་ལྷག་མ་མེད་དོ། །འཇིག་རྟེན་ན་དགྲ་བཅོམ་པའང་མེད་དོ། །འཇིག་རྟེན་ཕ་རོལ་དང་འཇིག་རྟེན་འདིར་ཡང་དག་པར་སོང་བ་དང་། ཡང་དག་པར་ཞུགས་པར་བདག་མངོན་པར་ཤེས་ནས་མངོན་སུམ་དུ་བྱས་པ་ཉེ་བར་བསྒྲུབས་ཏེ་རབ་ཏུ་ཤེས་སོ། །བདག་གི་ཚེ་ཟད་ནས་ཚངས་པར་སྤྱོད་པ་ལ་སྤྱོད་དོ། །བྱ་བ་བྱས་སོ། །སྲིད་པར་ཀུན་ཏུ་སྦྱོར་བ་ཡོངས་སུ་ཟད་པའོ། །ཡང་དག་པའི་བཀའ་ཤིན་ཏུ་རྣམ་པར་གྲོལ་བའི་སེམས་སོ་ཞེས་བྱ་བ་དེས་ཐར་པ་ཐོབ་པར་འགྱུར་རོ་ཞེས་བྱ་བ་ནས་གྲངས་ཅན་ཁྱོད་རང་བཞིན་གྱིས་སྐྱེས་བུ་དེའི་ཡེ་ཤེས་ལས་ཐར་པ་ཐོབ་པར་འགྱུར་རོ། །ཞེས་བྱ་བའི་བར་དུ་སྔོན་བདུད་ཀྱིས་དེ་བཞིན་དུ་སློབ་ཏུ་བཅུག་གོ །དེ་ལ་རང་བཞིན་ཞེས་བྱ་བ་ནི་འཁོར་བའི་རྒྱུ་རྣམས་སྐྱེས་བུ་དང་བདག་གི་དོན་གཞན་མ་ཡིན་ནོ། དེ་ལ་གང་གི་ཚེ་རང་བཞིན་གྱིས་བདག་ཏུ་ལྟ་བ་དང་། རང་བཞིན་གྱིས་བདག་ཏུ་འགྱུར་བ་དེའི་ཚེ་ཐར་པ་ཐོབ་པ་དེ་བཞིན་དུ་གྲངས་ཅན་ཁྱོད་ཀྱིས་ཐར་པའོ། །དེ་བཞིན་དུ་ཁྱོད་ཁྱིམ་གྱི་གནས་ནས་བྱུང་ཞིང་ཆོས་དང་ཆོས་མ་ཡིན་པ་དེ་ཉིད་དུ་རབ་ཏུ་ཤེས་སོ། །དེས་ཁྱེད་ཅག་ཐར་པར་མི་འགྱུར་རོ་ཞེས་བཅོམ་ལྡན་འདས་ཀྱིས་ཀུན་ཏུ་རྒྱུ་སྡིག་པ་སྤོང་བ་ལ་བཀའ་སྩལ་པ་དང་ཀུན་ཏུ་རྒྱུས་
གསོལ་པ་བཅོམ་ལྡན་འདས་དེ་དེ་བཞིན་ཏེ་བདེ་བར་གཤེགས་པ་དེ་བཞིན་ནོ། །བཅོམ་ལྡན་འདས་ཀྱིས་བཀའ་སྩལ་པ། སྡིག་པ་སྤོང་བ་གང་ལ་ལ་ལོག་པ་ལ་ལྟ་བ་ཅན་ཐར་པར་འདོད་པར་བྱེད་པ་དེ་ཡང་བདུད་ཀྱི་ཞགས་པས་བཏགས་པར་འགྱུར་བ་ནི་ཉོན་མོངས་པའི་བདུད་དང་། ཕུང་པོའི་བདུད་དང་། འཆི་བའི་བདུད་དང་། དབང་སྒྱུར་བའི་བདུད་ཀྱི་ཞགས་པས་བཏགས་པར་འགྱུར་རོ། །སྡིག་པ་སྤོང་བ་གང་ལ་ལ་བདུད་བཞི་ལ་ཆགས་པ་དེ་དག་གི་ཚངས་པར་སྤྱོད་པར་གནས་པ་ལ་འདྲེས་པའོ། །གང་དག་ཚངས་པར་སྤྱོད་པར་གནས་པ་ལ་འདྲེས་པ་དེ་དག་རྟག་ཏུ་ཡོངས་སུ་ཆད་པར་བྱས་པ་རྒ་ཤིའི་ཆུ་བོ་བཞིས་ཁྱེར་རོ། །དེས་ཁྱེད་ཅག་ཚངས་པར་སྤྱོད་པ་ལ་གནས་པ་འབྲས་བུ་མེད་ཅིང་འཕགས་པ་ལ་དམོད་པ་འདི་ཐར་པའི་སླུ་བར་བྱོས་ཤིག །སྡིག་པ་སྤོང་བ་དེ་ལ་ཆོས་དང་ཆོས་མ་ཡིན་པ་ནི་འདི་ལྟ་སྟེ། རྟག་པ་མེད་ཅིང་ཆད་པ་མེད་པའོ། །ལུས་ནམ་མཁའ་དང་མཚུངས་པའོ། །ནང་མེད་ཅིང་ཕྱི་རོལ་མེད་པའོ། །འདུ་བྱེད་ཐམས་ཅད་མི་དམིགས་པའོ། །སེམས་ཞེས་བྱ་བ་འདི་ནི་མིང་ཙམ་མོ། །ནམ་མཁའ་ཀུན་ཏུ་རྟོག་པའི་མཚན་ཉིད་ལ་འཇུག་པའོ། །དགེ་བ་དང་མི་དགེ་བའི་ཆོས་ལ་སེམས་དམིགས་པ་མེད་ཅིང་སེམས་ལ་དགེ་བ་དང་མི་དགེ་བའི་ཆོས་དམིགས་པ་ཡང་མེད་དོ། །ཇི་ལྟར་ཤིང་ལ་རྟོག་པ་མེད་པ་དེ་ལ་མེ་ཏོག་དང་འབྲས་བུར་རྟོག་པ་ཡང་མེད་དོ། །དེ་ལ་ཡང་མེ་ཏོག་དང་འབྲས་བུ་དང་ཤིང་དུ་རྟོག་པ་ཡང་མི་བྱེད་པ་དེ་བཞིན་དུ་དངོས་པོ་དང་དངོས་པོ་མེད་པ་འདི་དག་མི་སྨྲ་བར་བྱའོ། །གང་གི་ཕྱིར་གཅིག་ལ་གཅིག་མི་རྟོག་ཅིང་རྣམ་པར་མི་རྟོག་པ་དེས་ཆོས་ཐམས་ཅད་ཡུལ་མེད་པའོ། །ཆོས་ཐམས་ཅད་གཉིས་སུ་མེད་ཅིང་གཉིས་ལྟ་བུར་མེད་པ་དང་། མི་རྟོག་ཅིང་རྣམ་པར་མི་རྟོག་པའོ། །ཚེ་དང་རླངས་པ་དང་། རྣམ་པར་ཤེས་པ་སྨིག་རྒྱུ་བ་ལྟ་བུར་དམིགས་པ་མེད་པའི་ཚུལ་དང་། བརྗོད་དུ་མེད་པའི་ཡང་བརྗོད་དུ་མེད་པའི་ཚུལ་གྱིས་བསྒོམ་པར་བྱའོ། །ཆོས་ཐམས་ཅད་བྱ་བ་མེད་པར་འཇུག་པ་ནི་བྱེད་པ་པོ་དམིགས་པ་མེད་པ་མེད་པ་ལས་དམིགས་པ་མེད་པའི་ཚུལ་གྱིས་བསྒོམ་པར་བྱའོ། །ཆོས་ཐམས་ཅད་མི་ཤེས་པས་ནི་སྲོག་ཏུ་དམིགས་པ་མེད་པ་ལས་ཀུན་དུ་རྟོག་པ་མེད་པའི་ཚུལ་གྱིས་བསྒོམ་
པར་བྱའོ། །ཆོས་ཐམས་ཅད་དམིགས་པ་མེད་པ་ནི་ཀུན་དུ་དམིགས་པའི་ཚུལ་གྱིས་བསྒོམ་པར་བྱའོ། །ཆོས་ཐམས་ཅད་དྲན་པ་དང་བྲལ་བ་ནི་དྲན་པ་ལ་དམིགས་པས་བསྒོམ་པར་བྱའོ། །ཆོས་ཐམས་ཅད་རང་བཞིན་གྱིས་ཡང་དག་པར་ཞུགས་པ་ཅན་ནི་ཕྱི་དང་ནང་གི་དམིགས་པའི་ལྟ་བ་རྣམ་པར་སྤངས་པས་བཟོད་པ་འདི་སྒོམས་ཤིག །འདི་ནི་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་བཟོད་པའོ། །འདི་ནི་ལུས་དང་ངག་དང་ཡིད་ཀྱི་ལས་ཀྱི་འདུ་བྱེད་བག་ཡངས་ཀྱི་བཟོད་པའོ། །འདི་ནི་ཉོན་མོངས་པའི་དབང་རབ་དང་འབྲིང་དང་ཐ་མ་བག་ཡངས་པའི་བཟོད་པའོ། །འདི་ནི་ལོག་པར་ལྟ་བ་དང་། ལོག་པའི་ལམ་ཐམས་ཅད་སྨོན་ལམ་གྱིས་རྣམ་པར་ཆད་པར་བྱེད་པའི་བཟོད་པའོ། །འདི་ནི་ལྟ་བ་ངན་པ་ལམ་དོག་པ་རྙེད་པ་དང་། ལམ་ངན་པར་ཞུགས་པ་དང་། བསྟན་པ་ངན་པའི་ཡི་དམ་ཡོངས་སུ་སྨིན་པའི་བཟོད་པའོ། །འདི་ནི་འཕགས་པ་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་པའི་བཟོད་པའོ། །འདི་ནི་མངོན་པར་ཤེས་པས་རྣམ་པར་རྩེ་བར་བྱེད་པའི་བཟོད་པའོ། །འདི་ནི་སངས་རྒྱས་ཀྱི་ཞིང་གྲངས་མེད་པ་ན་རྣམ་པར་དཔྱོད་པའི་བཟོད་པའོ། །འདི་ནི་བཅོམ་ལྡན་འདས་གྲངས་མེད་པ་ལ་བསྙེན་བཀུར་བྱེད་པའི་བཟོད་པའོ། །འདི་ནི་སངས་རྒྱས་བཅོམ་ལྡན་འདས་གཅིག་ལ་དེ་བཞིན་དུ་ཞུ་བ་གྲངས་མེད་པ་ཡོངས་སུ་ཞུ་བར་བྱེད་པའི་བཟོད་པའོ། །འདི་ནི་ཆགས་པ་མེད་པའི་སྤོབས་པ་གྲངས་མེད་པ་ལ་སྣང་བར་བྱེད་པའི་བཟོད་པའོ། །འདི་ནི་བྱང་ཆུབ་ཀྱི་ཕྱོགས་ཀྱི་སུམ་ཅུ་རྩ་བདུན་གྱི་ཆོས་ལ་སྒྲིབ་པ་མེད་པའི་ཡེ་ཤེས་ཐོབ་པར་བྱེད་པའི་བཟོད་པའོ། །འདི་ནི་བདུད་བཞི་རྣམ་པར་འཇིག་པའི་བཟོད་པའོ། །འདི་ནི་ཆོས་ཀྱི་འཁོར་ལོ་འཇུག་པར་བྱེད་པའི་བཟོད་པའོ། །འདི་ནི་མུ་སྟེགས་ཅན་དང་བཅས་པའི་ཆོས་ཀྱི་གནོད་པར་བྱེད་པའི་བཟོད་པའོ། །འདི་ནི་སངས་རྒྱས་ཀྱི་དགོངས་པ་མ་ལུས་པར་ཡོངས་སུ་ཐོབ་པར་བྱེད་པའི་བཟོད་པའོ། །འདི་ནི་མྱ་ངན་ལས་འདའ་བར་བྱེད་པ་ཆེན་པོའི་བཟོད་པའོ། །འདི་ནི་ལུས་ཕྱེ་མར་བྱེད་པའི་བཟོད་པའོ། །འདི་ནི་རིགས་ཀྱི་བུ་ཁྱེད་ཅག་གདོན་མི་ཟ་བར་ཉན་པར་བྱེད་པའི་བཟོད་པའོ། །སྔོན་གྱི་ཚུལ་བསྟན་པ་འདི་ལུང་སྟོན་
པ་བསྟན་པ་ན་མུ་སྟེགས་ཅན་གཞན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བརྟན་པར་བྱས་པ་ཉི་ཤུ་རྩ་བཞི་བཟོད་པ་འདི་ཐོབ་པར་གྱུར་ཏོ། །སྔོན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མ་བསྐྱེད་པ་དགུ་བཅུ་རྩ་གཉིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེ་ལས་ཕྱིར་མི་ལྡོག་པར་གྱུར་ཏོ། །ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་རིགས་དང་འཐུན་པའི་བཟོད་པ་ཐོབ་པར་གྱུར་ཏོ། །དེ་ནས་བཅོམ་ལྡན་འདས་ལ་ཀུན་ཏུ་འཚོ་མེ་ཏོག་འོད་ཀྱིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་དྲན་པ་ཅི་འདྲ་བ་ལ་རྣལ་འབྱོར་དུ་བགྱི། དྲན་པ་དང་ལྡན་པ་གང་གིས་རང་སངས་རྒྱས་ཀྱི་ཐེག་པ་ཐོབ་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ཀྱེ་ཀུན་ཏུ་འཚོ་ཅི་ཁྱོད་རྐྱེན་གྱི་ཆོས་དང་ཆོས་ཀྱི་རྗེས་རབ་ཏུ་མི་ཤེས་སམ། གསོལ་པ། བཙུན་པ་བཅོམ་ལྡན་འདས་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཀྱེ་ཅི་ཁྱོད་མིག་མིག་གིས་ཆགས་སམ། འོན་ཏེ་མིག་མིག་གི་རྣམ་པར་ཤེས་པས་ཆགས་སམ། འོན་ཏེ་མིག་གི་རྣམ་པར་ཤེས་པ་མིག་གིས་ཆགས་པ་ནས་ཡིད་ཆོས་ཀྱིས་ཆགས་སམ། འོན་ཏེ་ཆོས་ཡིད་ཀྱིས་ཆགས་པའི་བར་དུ་མངོན་པར་ཤེས་སམ། གསོལ་པ། བཙུན་པ་བཅོམ་ལྡན་འདས་མིག་མིག་གིས་ཆགས་པ་ནས་ཆོས་ཡིད་ཀྱིས་ཆགས་པ་མེད་པའི་བར་དུ་འཚལ་ཏོ། །བཀའ་སྩལ་པ། ཀྱེ་ཁྱོད་འདི་ལ་ཆགས་པ་ནི་ཆད་པར་ལྟ་བར་འགྱུར་རོ། །ཀྱེ་སྐྱེས་བུ་གང་ཟག་གི་ཆད་པར་ལྟ་བ་ནི་རྒ་ཤིའི་ཕ་རོལ་ཏུ་མི་འགྲོའོ། །ཡུལ་བཅུ་གཉིས་པོ་འདི་དག་ཏུ་སོང་བ་ན་གཅིག་ལ་གཅིག་རྐྱེན་གྱི་རྗེས་སུ་འབྲེལ་བའོ། །གསོལ་པ། བཙུན་པ་བཅོམ་ལྡན་འདས་ཅི་ཀྱེ་མེ་ཏོག་འོད་ཅེས་བྱ་བ་དང་། མིག་མིག་གི་རྣམ་པར་ཤེས་པའི་གནས་ལ་འདུག་པ་ནས་བཅོམ་ལྡན་འདས་ཅི་ཆོས་ཡིད་ཀྱི་རྣམ་པར་ཤེས་པའི་བར་གྱི་གནས་ལ་འཇུག་གམ། མེ་ཏོག་འོད་ཀྱེ་ཞེས་བྱ་བ་ནི་སྐྱེས་བུ་གང་ཟག་གི་ཐ་སྙད་དེ། །དེ་ནི་དེའི་རྟག་པར་ལྟ་བར་འགྱུར་རོ། །མེ་ཏོག་འོད་སྐྱེས་བུ་གང་ཟག་གི་རྟག་པར་ལྟ་བ་ནི་རྒ་ཤིའི་ཕ་རོལ་ཏུ་མི་འགྲོའོ། །མེ་ཏོག་འོད་ཆོས་རྣམས་ཀྱི་ཆོས་ཉིད་ཡོད་
པ་འདི་དག་མཉན་ནས་རབ་ཏུ་གསོལ་པ་ལ་མངོན་པར་ཆགས་པ་ནི་རྟག་པ་དང་ཆད་པ་མེད་པའི་དབུས་ཀྱི་ལམ་མོ། །མིག་བརྟེན་པའི་གཟུགས་སྣང་བ་འབྱུང་བ་དེ་ལ་མིག་དང་། རྣམ་པར་ཤེས་པ་དང་། གཟུགས་རྣམས་འདྲེས་ནས་དུས་གསུམ་དུ་འདྲེས་པར་འདུག་གོ །མིག་མིག་གི་རྣམ་པར་ཤེས་པ་ལ་འདྲེས་ནས་དུས་གསུམ་དུ་འདྲེས་ཤིང་འདུག་པ་ཡང་མེད་དོ། །མིག་གི་རྣམ་པར་ཤེས་པ་ནི་གང་ནས་ཀྱང་མི་འོང་གང་དུ་ཡང་མི་འགྲོའི་འཇིག་པའི་མཚན་ཉིད་འབྱུང་བའི་རྐྱེན་གྱི་རྗེས་སུ་ནུས་ན་འབྱུང་བ་དང་། རྐྱེན་འགོག་པ་ལས་འགོག་པ་ནི་མིག་གི་རྣམ་པར་ཤེས་པའོ། །ཀྱེ་མེ་ཏོག་འོད་རྣམ་པ་དེ་དག་ནི་མིག་དང་གཟུགས་ལ་བརྟེན་པ་སྟེ། མིག་དང་གཟུགས་ཀྱི་རྐྱེན་གྱིས་རྣམ་པར་ཤེས་པ་དང་གསུམ་འདུས་པའི་རྐྱེན་གྱིས་རེག་པར་འགྱུར་རོ། །རེག་པའི་རྐྱེན་གྱིས་ཚོར་བ་ནས་སྡུག་བསྔལ་གྱི་ཕུང་པོ་ཆེན་པོའི་བར་དུ་ཀུན་འབྱུང་བར་འགྱུར་རོ། །མིག་འགགས་པས་གཟུགས་འགག །མིག་དང་གཟུགས་འགགས་པས་མིག་གི་རྣམ་པར་ཤེས་པ་འགག་སྟེ། མིག་གི་རྣམ་པར་ཤེས་པ་འགགས་པ་ནས་སྡུག་བསྔལ་གྱི་ཕུང་པོ་ཆེན་པོའི་བར་དུ་འགག་པར་འགྱུར་རོ། །དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་རྐྱེན་དང་། ཆོས་ཀྱི་རྐྱེན་གྱིས་ཡིད་ཀྱི་རྣམ་པར་ཤེས་པ་འབྱུང་བ་ལས་གསུམ་འདུས་པ་ནི་རེག་པ་སྟེ། རེག་པའི་རྐྱེན་གྱིས་ཚོར་བ་ནས་སྡུག་བསྔལ་གྱི་ཕུང་པོ་ཆེན་པོའི་བར་དུ་ཀུན་འབྱུང་བར་འགྱུར་རོ། །ཡིད་འགགས་ཤིང་ཆོས་འགགས་པས་ཡིད་ཀྱི་རྣམ་པར་ཤེས་པ་ཡང་འགག་གོ །ཡིད་ཀྱི་རྣམ་པར་ཤེས་པ་འགགས་པས་རེག་པ་འགག་པ་ནས་སྡུག་བསྔལ་གྱི་ཕུང་པོ་ཆེན་པོའི་བར་དུ་འགག་པར་འགྱུར་རོ། །མེ་ཏོག་འོད་དབུས་ཀྱི་ལམ་ཞེས་བྱ་བ་ནི་བྱང་ཆུབ་ཀྱི་ཕྱོགས་ཅན་གྱི་ཡེ་ཤེས་ཁོང་དུ་ཆུད་པར་བྱ་བའི་ཕྱིར་རབ་ཏུ་གསལ་བར་བྱ་བ་སྟེ། བཅོམ་ལྡན་འདས་ཀྱིས་འདི་བསྟན་པ་སྟོན་པ་ན་ཀུན་ཏུ་འཚོ་མེ་ཏོག་འོད་དང་མུ་སྟེགས་ཅན་གཞན་ཁྲག་ཁྲིག་དགུ་བཅུ་རྩ་གཉིས་དང་ལྷན་ཅིག་ཏུ་རང་སངས་རྒྱས་ཀྱི་ཐེག་པ་ལ་སེམས་བསྐྱེད་པར་གྱུར་ཏོ། །རང་སངས་རྒྱས་ཀྱི་ཐེག་པ་ལ་ཡེ་ཤེས་ཐོབ་པར་བྱ་བའི་ཕྱིར་ཕྱིར་མི་ལྡོག་པའི་
ས་ཡང་ཐོབ་པར་གྱུར་ཏོ། །ཡང་བཅོམ་ལྡན་འདས་ཀྱིས་སངས་རྒྱས་ཀྱི་ཞིང་མ་ལུས་པར་ས་དང་ནམ་མཁས་ཁྱབ་པ་ལ་གནས་པའི་འཁོར་ཐམས་ཅད་དང་ལྡན་པ་ལ་ཤེས་པར་བྱས་པ། བཞིན་བཟངས་འདིར་ཡང་དག་པར་ལྷགས་པ་ཇི་ཙམ་པ་ཉོན་ཅིག །དེ་ནས་སངས་རྒྱས་ཀྱི་ཞིང་མ་ལུས་པར་ས་དང་ནམ་མཁས་ཁྱབ་པ་ལ་གནས་པའི་འཁོར་ཐམས་ཅད་དང་ལྡན་པ་དང་། ལྷ་དང་། དྲི་ཟ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་དག་ཐལ་མོ་སྦྱར་ཏེ། ཁ་དོག་དང་། གཟུགས་དང་། དབྱིབས་སྣ་ཚོགས་དཀའ་ཐུབ་དང་། བརྟུལ་ཞུགས་སྤྱོད་པའི་སྤྱོད་ལམ་གྱིས་བཅོམ་ལྡན་འདས་དྲང་སྲོང་ཆེན་པོ་ལ་ལྟའོ། །དེ་ནས་བཅོམ་ལྡན་འདས་ཏིང་ངེ་འཛིན་ལས་བཞེངས་ཏེ། སྔོན་ཇི་ལྟ་བུའི་སངས་རྒྱས་ཀྱི་སྐུ་གཟུགས་ཀྱིས་ཡང་དག་པར་མཐོང་ནས་སངས་རྒྱས་ཀྱི་ཞིང་མ་ལུས་པར་ས་དང་ནམ་མཁས་ཁྱབ་པ་ལ་གནས་པའི་འཁོར་ཐམས་ཅད་དང་ལྡན་པས་ལན་གསུམ་བསྐོར་བ་བྱས་ཏེ། མགྲིན་གཅིག་ཏུ་གསོལ་བ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱག་འཚལ་ལོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱག་འཚལ་ལོ། །ཕྱག་འཚལ་ལོ། །རྣམ་པ་དེ་ལྟ་བུར་འདུས་པ་ལ་ཐེག་པ་གསུམ་གྱིས་སེམས་ཅན་ཡོངས་སུ་སྨིན་ཏོ་ཞེས་ལུང་ཆེན་པོ་བསྟན་པ་སྔོན་མ་མཐོང་མ་ཐོས་སོ། །ཡང་དག་པར་སྤྱོད་པའི་ཚུལ་ནམ་མཁའི་མདོག་གིས་འདུལ་བའི་བཟོད་པ་ཞེས་བྱ་བ་ཐེག་པ་ཆེན་པོའི་མདོ་ལེའུ་དགུ་པའོ།། །།