སྡོམ་གྱི་ཚིགས་སུ་བཅད་པ་དགུ་པ།
སྡོམ་ནི། བུ་དང་རི་ཡི་གཅོང་རོང་གླུད། །འཐབ་དང་རྙིས་བཟུང་གོང་མ་ཕྲེག།ཕག་དང་མི་རྒོད་ཤ་ཟ་དང་། །དབང་པོའི་མགོ་ནི་ཐ་མ་ཡིན། །བུ་ཞེས་བྱ་བ་ནི། གླེང་གཞི་མཉན་དུ་ཡོད་པ་ན་བཞུགས་ཏེ། དེའི་ཚེ་མཉན་དུ་ཡོད་པ་ན། བྲམ་ཟེ་ཞིག་གནས་ཏེ། དེས་ཐབས་ཟླར་བབ་པ་ལས་ཆུང་མ་བླངས་ཏེ། དེ་དེ་དང་ལྷན་ཅིག་ཏུ་རྩེ་ཞིང་དགའ་ལ་དགའ་མགུར་སྤྱོད་པ་ལས། ཕྱི་ཞིག་ན་དེའི་ཆུང་མ་ལ་བུ་ཆགས་ནས། དེ་ཟླ་བ་དགུའམ་བཅུ་ལོན་པ་དང་། ཁྱེའུ་གཟུགས་བཟང་ཞིང་བལྟ་ན་སྡུག་ལ་མཛེས་པ་ཞིག་བཙས་ཏེ། དེའི་བཙས་སྟོན་རྒྱས་པར་བྱས་ནས། རིགས་དང་འཐུན་པར་མིང་བཏགས་ཏེ། འོ་མ་དང་ཞོ་དང་མར་དང་། ཞུན་མར་དང་། མར་གྱི་ཉིང་གུས་བསྐྱེད་བསྲིངས་སོ། །འདོད་པ་རྣམས་ནི་ཚྭ་ཆུ་དང་འདྲ་སྟེ། ཅི་ཙམ་དུ་བསྟེན་པ་དེ་ཙམ་དུ་སྐྱེ་བར་འགྱུར་རོ། །དེ་ནས་ཕྱིས་ཀྱང་མཐར་གྱིས་བྲམ་ཟེའི་བུ་གཅིག་ནས་གཉིས་ནས་བདུན་གྱི་བར་དུ་བྱུང་ནས། དེ་རྣམས་རིགས་དང་འཐུན་པར་མིང་བཏགས་ཏེ། འོ་མ་དང་ཞོ་དང་། མར་དང་ཞུན་མར་དང་།
མར་གྱི་ཉིང་གུས་བསྐྱེད་བསྲིངས་ཏེ། དེ་དག་གང་གི་ཚེ་ཆེར་སྐྱེས་པ་དེའི་ཚེ་ཡི་གེ་དང་བྲམ་ཟེའི་སྤྱོད་ལམ་དང་། སྤྱོད་པ་དང་། ཨོཾ་ཞེས་བྱ་བ་དང་། བྷོ་ཞེས་བྱ་བ་དང་། གཙང་སྦྲ་དང་། ཆོ་ག་དང་། ཐལ་བ་བླང་བ་དང་། རིལ་བ་ཐོགས་པ་དང་། ངེས་བརྗོད་ཀྱི་རིག་བྱེད་དང་། མཆོད་སྦྱིན་གྱི་རིག་བྱེད་དང་། སྙན་ཚིག་གི་རིག་བྱེད་དང་། སྲིད་སྲུང་གི་རིག་བྱེད་དང་། མཆོད་སྦྱིན་བྱ་བ་དང་། མཆོད་སྦྱིན་བྱེད་དུ་གཞུག་པ་དང་། སྦྱིན་པ་དང་། བླང་བ་དང་། ཁ་ཏོན་བྱ་བ་དང་། ཁ་ཏོན་སློབ་ཏུ་གཞུག་པའི་ཐབས་བསླབས་ནས། ལས་རྣམ་པ་དྲུག་ལ་མཁས་པའི་བྲམ་ཟེར་གྱུར་ཏོ། །དེ་ནས་ཕྱི་ཞིག་ན་བྲམ་ཟེ་དེས་བུ་དེ་དག་ཐམས་ཅད་ཁྱིམ་ཕུབ་སྟེ། བྲམ་ཟེ་དེའི་ཁྱིམ་ན་ནོར་ཅི་ཡོད་པ་དེ་དག་ཐམས་ཅད་སོ་སོར་བགོས་ནས་བུ་དེ་དག་ལ་བྱིན་ནོ། །དེ་ནས་ཕྱི་ཞིག་ན་བྲམ་ཟེ་དེའི་ཆུང་མ་ཡང་ཤི་བྲམ་ཟེ་དེ་ཡང་རྒས་ཏེ་མིག་གིས་མི་མཐོང་བར་གྱུར་ནས། དེ་བུ་དེ་རྣམས་ཀྱིས་ཁྱིམ་ནས་བསྐྲད་དེ། དེ་གཞན་དག་གི་ཁྱིམ་དུ་སློང་ཞིང་འཚོ་བར་བྱེད་དོ། །སངས་རྒྱས་བཅོམ་ལྡན་འདས་བགྲོད་པ་གཅིག་པུའི་ལམ་སྟོན་པ། རྣམ་པ་གཉིས་ཀྱི་ཤེས་བྱ་དང་། ཡེ་ཤེས་ལ་མངའ་བརྙེས་པ། མ་འདྲེས་པའི་དྲན་པར་ཉེ་བར་གཞག་པ་གསུམ་ལ་མཁས་པ། མི་འཇིགས་པ་བཞིས་མི་འཇིགས་པ། འགྲོ་བ་ལྔར་འགྲོ་བ་ལས་རྣམ་པར་གྲོལ་བ། སྐྱེ་མཆེད་དྲུག་ལ་མཁས་པ། བྱང་ཆུབ་ཀྱི་ཡན་ལག་བདུན་ལ་སྤྱོད་ཡུལ་བ། རྣམ་པར་ཐར་པ་བརྒྱད་ལ་བསམ་གཏན་པ། མཐར་གྱིས་གནས་པའི་སྙོམས་པར་འཇུག་པ་དགུ་ལ་སྙོམས་པར་འཇུག་པ། སྟོབས་བཅུའི་སྟོབས་དང་ལྡན་པ། ཡང་དག་པའི་སེང་གེའི་སྒྲ་ཆེན་པོ་སྒྲོགས་པ་རྣམས་ནི། ཆོས་ཉིད་ཀྱིས་ཉིན་དུས་གསུམ་མཚན་དུས་གསུམ་སྟེ། ཉིན་མཚན་དུས་དྲུག་ཏུ་སངས་རྒྱས་ཀྱི་སྤྱན་གྱིས་འཇིག་རྟེན་ལ་གཟིགས་ཏེ། སུ་ནི་རྒུད། སུ་ནི་དར། སུ་ནི་ཕོངས་ཤིང་འདུག།སུ་ནི་ཉམ་ང་བར་གྱུར། སུ་ནི་གནོད་པ་དང་ལྡན། སུ་ནི་ཕོངས་པ་དང་། ཉམ་ང་བ་དང་། གནོད་པ་དང་ལྡན། སུ་ནི་ངན་སོང་དུ་གཞོལ། སུ་ནི་ངན་སོང་དུ་འབབ། སུ་ནི་ངན་སོང་དུ་བབ། སུ་ནི་ངས་ངན་སོང་ནས་ཕྱུང་སྟེ། མཐོ་རིས་དང་ཐར་པ་དང་། འབྲས་བུ་ལ་གཞག་
པར་བྱ། སུ་ནི་ཉེས་པར་སྤྱོད་པའི་འདམ་དུ་བྱིང་བ་ལས་ལག་ནས་དྲང་བར་བྱ། སུ་ནི་འཕགས་པའི་ནོར་བདུན་མེད་པ་ལས། འཕགས་པའི་ནོར་བདུན་གྱི་དབང་ཕྱུག་ལ་དབང་བྱེད་དུ་གཞུག་པར་བྱ། སུ་ནི་དགེ་བའི་རྩ་བ་རྣམས་མ་བསྐྱེད་པ་ལས་བསྐྱེད་པར་བྱ། སུ་ནི་དགེ་བའི་རྩ་བ་རྣམས་བསྐྱེད་ཟིན་པ་ལས་ཡོངས་སུ་སྨིན་པར་བྱ། སུ་ནི་དགེ་བའི་རྩ་བ་རྣམས་ཡོངས་སུ་སྨིན་ཟིན་པ་ལས་ཡེ་ཤེས་ཀྱི་མཚོན་གྱིས་བརྟོལ་བར་བྱ། སུ་ལ་ནི་སངས་རྒྱས་བྱུང་བས་བརྒྱན་པའི་འཇིག་རྟེན་འབྲས་བུ་ཡོད་པར་བྱ་སྙམ་དུ་ཡེ་ཤེས་གཟིགས་པ་འཇུག་གོ །རྒྱ་མཚོ་ཆུ་སྲིན་རྣམས་ཀྱི་གནས། །དུས་རླབས་ཡོལ་བར་འགྱུར་ཡང་སྲིད། །གདུལ་བར་བྱ་བའི་སྲས་རྣམས་ལ། །སངས་རྒྱས་དུས་ལས་ཡོལ་བ་མེད། །དེ་ནས་བཅོམ་ལྡན་འདས་ཀྱིས་རིགས་ཀྱི་བུ་དེ་གདུལ་བའི་དུས་ལ་བབ་པར་དགོངས་ནས། སྔ་དྲོ་ཆོས་གོས་དང་ཤམ་ཐབས་གསོལ་ཏེ། ལྷུང་བཟེད་བསྣམས་ནས། མཉན་དུ་ཡོད་པར་བསོད་སྙོམས་ལ་གཤེགས་ཏེ། བཅོམ་ལྡན་འདས་མཉན་དུ་ཡོད་པར་གཤེགས་པ་ན། བྲམ་ཟེ་རྒས་ཤིང་འཁོགས་ལ་གཏུགས་པ། ཁར་བ་དང་སྣོད་ཐོགས་ཤིང་གཞན་དག་གི་ཁྱིམ་དུ་སློང་བ་དེ་གཟིགས་སོ། །གཟིགས་ནས་བྲམ་ཟེ་དེ་ལ་བཀའ་སྩལ་པ། བྲམ་ཟེ་རྒས་ཤིང་འཁོགས་ལ་གཏུགས་པ། ཁྱོད་ཅིའི་ཕྱིར་ཁར་བ་དང་སྣོད་ཐོགས་ཤིང་། གཞན་གྱི་ཁྱིམ་དུ་སློང་ཞིང་འདུག།བྲམ་ཟེས་གསོལ་པ། ཀྱེ་མ་གཽ་ཏ་མ་བདག་གི་བུ་བདུན་མཆིས་ཏེ། དེ་རྣམས་བདག་གིས་གསོས་ནས་བསྐྱེད་བསྲིངས་ནས། ཐོས་པས་ཀྱང་མཐར་ཕྱིན་པར་བགྱིས་ཏེ་བཞག་ནས། མཆིས་བྲང་དང་བཅས་ཏེ་བཙེམས་ཏེ་བདག་གི་ཁྱིམ་ན་ཅི་བདོག་པ་དེ་དག་ཐམས་ཅད་ཀྱང་བདག་གིས་སོ་སོར་བགོས་ཏེ་སྩལ་ན། དེ་རྣམས་ཀྱིས་བདག་ཁྱིམ་ནས་བསྐྲད་པས་ན། ཁར་བ་དང་སྣོད་ཐོགས་ཤིང་། གཞན་དག་གི་ཁྱིམ་དུ་སློང་ཞིང་རྒྱུ་བར་བགྱིད་དོ། །དེ་ནས་བཅོམ་ལྡན་འདས་ཀྱིས་བྲམ་ཟེ་དེ་ལ་བཀའ་སྩལ་པ། བྲམ་ཟེ་ཁྱོད་ཀྱིས་ང་ལས་ཚིགས་སུ་བཅད་པ་བསླབས་ཏེ། ཀུན་ཆུབ་པར་བྱས་ལ། བུ་དེ་རྣམས་འཁོར་གྱི་ནང་ན་འཁོད་པ་ལས་བསྒྲགས་པར་ནུས་སམ། བྲམ་ཟེས་གསོལ་
པ། ཀྱེ་མ་གཽ་ཏ་མ་བདག་གིས་རྔོ་ཐོགས་ཞེས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་དེ་བཀའ་སྩལ་པ། གང་དག་བཙས་ནས་དགར་འགྱུར་བ། །གང་ཕྱིར་ནོར་ནི་ཀུན་བསགས་པ། །དེ་དག་བདག་གིས་ཚེམས་དང་སྦྱར། །བདག་ནི་ཁྱིམ་ནས་བསྐྲད་པར་གྱུར། །ནོར་ཟད་པས་ནི་གང་དག་གིས། །བདག་སྤངས་དེ་དག་དེ་ན་མིན། །སྲིན་པོ་བུ་ཡི་ཆ་ལུགས་ཅན། །ཕ་ཕ་ཞེས་བརྗོད་དེ་མི་བརྗིད། །རྟ་རྒན་ཞོ་ཤ་ཟད་པ་བཞིན། །ན་ཚོད་ཡལ་བར་གྱུར་པ་ན། །གཞོན་ནུ་རྣམས་ཀྱིས་ཕ་རྒན་ཞིག །གཞན་གྱི་ཁྱིམ་དུ་སློང་བར་གྱུར། །རྟེན་ལ་མ་ཕན་བུ་རྣམས་པས། བདག་གི་ཁར་བ་འདི་བདམ་སྟེ། །ཁར་བ་འདི་ཡི་ཡོན་ཏན་མཐུས། །བ་ལང་རྡུང་ཞིང་འོང་བ་དང་། །སྦྲུལ་དང་ཁྱི་ཟ་ཟློག་པར་བྱེད། །མུན་པའི་ནང་ན་མདུན་དུ་འགྲོ། །ཡ་ངའི་གནས་སུ་ཚོད་ཀྱང་རིག།རྡེག་འཆོས་ན་ཡང་བདག་ལ་རྟོན། །དེ་ནས་བྲམ་ཟེ་དེས་བཅོམ་ལྡན་འདས་ཀྱི་ཚིགས་སུ་བཅད་དེ་བཀའ་སྩལ་པ་འདི་དག་ཐོས་ནས། བུ་རྣམས་ཀྱི་འཁོར་དུ་སོང་སྟེ་བརྗོད་ནས། བུ་རྣམས་ཀྱིས་དེ་ཐོས་མ་ཐག་ཏུ་ཕ་ལ་བཟོད་པར་གསོལ་ཏེ། སྔ་མཁོ་བཞིན་དུ་ཁྱིམ་གྱི་བདག་པོར་བཞག་གོ །དེ་ནས་ཕྱི་ཞིག་ན། བྲམ་ཟེ་དེས་བསམས་པ། བདག་གི་དཔལ་དང་སྐལ་བ་དང་ལྡན་པ་གང་ཅི་ཡང་རུང་བ་དེ་དག་ཐམས་ཅད་ནི། བཅོམ་ལྡན་འདས་གཽ་ཏ་མ་དེའི་བཀའ་དྲིན་ཡིན་ན། མ་ལ་བདག་གིས་བཅོམ་ལྡན་འདས་གཽ་ཏ་མ་དེ་བཤོས་གསོལ་ལ། རིན་ཐང་ཆེ་བའི་ན་བཟའ་དབུལ་བར་བྱ་གོར་མ་ཆག་སྙམ་ནས། བྲམ་ཟེ་དེས་བཅོམ་ལྡན་འདས་སྤྱན་དྲངས་ཏེ། བཟའ་བ་དང་བཅའ་བ་གཙང་མ་བཟང་པོ་མང་པོ་དག་གསོལ་ནས། རིན་ཐང་ཆེ་བའི་ན་བཟའ་ཕུལ་ལོ། །དེ་ནས་བཅོམ་ལྡན་འདས་ཀྱིས་བྲམ་ཟེ་དེ་དང་བུ་དེ་རྣམས་ལ་དེ་དག་དང་འཐུན་པའི་ཆོས་བསྟན་ཏེ། དེ་ནས་བྲམ་ཟེ་དེ་འཁོར་དང་བཅས་པས། སྟན་དེ་དག་ཉིད་ལ་འཁོད་བཞིན་དུ། འཇིག་ཚོགས་ལ་ལྟ་བའི་རིའི་རྩེ་མོ་མཐོན་པོ་ཉི་ཤུ་ཡེ་ཤེས་རྡོ་རྗེས་བཅོམ་ནས། རྒྱུན་ཏུ་ཞུགས་པའི་འབྲས་བུ་མངོན་སུམ་དུ་བྱས་ཏེ། དེས་བདེན་པ་མཐོང་ནས་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་ག་
ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་། བསྙེན་པར་རྫོགས་ཤིང་དགེ་སློང་གི་དངོས་པོ་འཐོབ་ཏུ་རུང་ན། བདག་ཀྱང་བཅོམ་ལྡན་འདས་ཀྱི་ཐད་དུ་ཚངས་པར་སྤྱད་པ་སྤྱོད་པར་འཚལ་ལོ། །དེ་ནས་བཅོམ་ལྡན་འདས་ཀྱིས་བྲམ་ཟེ་དེ་ལ་དགེ་སློང་ཚུར་ཤོག་ཅེས་བྱ་བའི་ཚིག་གིས་རབ་ཏུ་ཕྱུང་སྟེ། བསྙེན་པར་རྫོགས་པར་མཛད་ནས། དེ་ལ་ལུང་ཡང་ཕོག་སྟེ། དེས་ཀྱང་བརྩོན་པ་དང་བསྒྲུབ་པ་དང་། འབད་པས་ཉོན་མོངས་པ་ཐམས་ཅད་སྤངས་ཏེ། དགྲ་བཅོམ་པ་ཉིད་མངོན་སུམ་དུ་བྱས་སོ། །དེ་ནས་དགེ་སློང་རྣམས་ཀྱིས་སངས་རྒྱས་བཅོམ་ལྡན་འདས་ལ་གསོལ་པ། བཙུན་པ་བྲམ་ཟེ་རྒས་ཤིང་འཁོགས་ལ་གཏུགས་པ་འདི་བུ་རྣམས་ཀྱིས་ཁྱིམ་ནས་བསྐྲད་ནས། འདི་བཅོམ་ལྡན་འདས་ཀྱིས་ཐབས་དང་ལྡན་པས། སྔ་མཁོའི་གནས་སུ་སླར་སོར་ཆུད་པར་མཛད་ནས། གཡུང་དྲུང་གི་མཐར་ཐུག་པ་གྲུབ་པ་དང་། བདེ་བའི་མྱ་ངན་ལས་འདས་པ་ལ་བཞག་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། ད་ལྟར་འབའ་ཞིག་མ་ཡིན་ཏེ། འདས་པའི་དུས་ན་ཡང་བྲམ་ཟེ་འདི་བུ་རྣམས་ཀྱིས་རང་གི་ཁྱིམ་ནས་བསྐྲད་པ་ན། འདི་ངས་སྔ་མཁོའི་གནས་སུ་བཞག་ནས། བསམ་གཏན་བཞི་དང་། མངོན་པར་ཤེས་པ་ལྔ་ལ་ཇི་ལྟར་གནས་པར་བྱས་པ་དེ་ཉོན་ཅིག །དགེ་སློང་དག་སྔོན་བྱུང་བ་འདས་པའི་དུས་ན། གྲོང་ཁྱེར་ཙམ་པ་ཞེས་བྱ་བ་ན། ཁྱིམ་བདག་ཅིག་གནས་པ་དེ་ལ་སྔ་ཕྱིར་བུ་བདུན་བྱུང་ནས་དེ་དག་གང་གི་ཚེ་ཆེར་སྐྱེས་པ་དེའི་ཚེ། བརྟག་པ་རྣམ་པ་བརྒྱད་ལ་བྱང་བར་གྱུར་ནས། ཁྱིམ་བདག་དེས་བུ་དེ་དག་ཐམས་ཅད་ཁྱིམ་ཕུབ་སྟེ། དེའི་ཅི་བདོག་པ་དེ་དག་ཐམས་ཅད་ཀྱང་སོ་སོར་བགོས་ནས། དེ་རྣམས་ལ་བྱིན་ནོ། །ཁྱིམ་བདག་དེ་ཡང་རྒས་ཤིང་འཁོགས་ལ་གཏུགས་པར་གྱུར་ནས། དེ་བུ་དེ་རྣམས་ཀྱིས་ཁྱིམ་ནས་བསྐྲད་དེ། དེ་རྒས་བཞིན་ཟོང་ཁྱེར་ཏེ་ཡུལ་གཞན་དུ་ཆས་སོ། །དེའི་ཚེ་དཀའ་ཐུབ་ཀྱི་གནས་ཞིག་ན། དྲང་སྲོང་རྫུ་འཕྲུལ་ཆེ་ཞིང་མཐུ་ཆེ་བ་ཞིག་གནས་ཏེ། དཀའ་ཐུབ་ཀྱི་གནས་དེའི་འདབ་ཅིག་
ཏུ་དེ་འོངས་ནས། དྲང་སྲོང་དེས་ཁྱིམ་བདག་དེ་མཐོང་ནས་སྨྲས་པ། ཁྱིམ་བདག་རྒས་ཤིང་འཁོགས་ལ་གཏུགས་པ་ཁྱོད་ཅིའི་ཕྱིར་ཡུལ་གཞན་དུ་ཆས་ཏེ་འགྲོ། དེ་ནས་ཁྱིམ་བདག་དེས་གཏམ་དེ་དྲང་སྲོང་དེ་ལ་རྒྱས་པར་བསྙད་དོ། །དེ་ནས་དྲང་སྲོང་གིས་སྨྲས་པ། ཁྱིམ་བདག་ཁྱོད་ངས་ཅི་ནས་བུ་དེ་རྣམས་ཀྱིས་མཆོད་པ་དང་རིམ་གྲོ་བྱེད་པར་འགྱུར་བ་དེ་ལྟར་བྱའོ་ཞེས་སྨྲས་ནས། དྲང་སྲོང་དེས་ཁྱིམ་བདག་དེ་ཕྱིར་ཟློག་སྟེ་རང་གི་གནས་སུ་ཁྲིད་ནས། དྲང་སྲོང་དེས་དེའི་བུ་རྣམས་ལ་དེ་དང་འཐུན་པའི་ཆོས་བསྟན་ཏེ། དེས་ན་བུ་དེ་རྣམས་ཀྱིས་ཕ་དེ་ཁྱིམ་དུ་བོས་ནས། སྔ་མཁོ་བཞིན་དུ་བཞག་གོ །དེ་ནས་ཁྱིམ་བདག་དེས་སྔ་མའི་དྲིན་ལན་བསབ་པའི་ཕྱིར་དྲང་སྲོང་དེ་ཁྱིམ་དུ་ཟས་བྱིན་ནས། དེའི་ཐད་དུ་རབ་ཏུ་བྱུང་སྟེ། དེ་རབ་ཏུ་ཕྱུང་ནས་བསམ་གཏན་བཞི་དང་། མངོན་པར་ཤེས་པ་ལྔ་བསྐྱེད་དོ། །དགེ་སློང་དག་ཇི་སྙམ་དུ་སེམས། དེའི་ཚེ་དྲང་སྲོང་དུ་གྱུར་པ། བྱང་ཆུབ་སེམས་དཔའི་སྤྱོད་པ་ལ་གནས་པ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་ཁྱིམ་བདག་ཏུ་གྱུར་པ་གང་ཡིན་པ་དེ་ནི་བྲམ་ཟེ་འདི་ཁོ་ན་ཡིན་ནོ། །དེའི་བུར་གྱུར་པ་གང་ཡིན་པ་དེ་དག་ནི་བུ་འདི་དག་ཁོ་ན་ཡིན་ཏེ། དེའི་ཚེ་ཡང་འདི་རྒས་ཤིང་འཁོགས་ལ་གཏུགས་པར་གྱུར་ནས། ཁྱིམ་ནས་བསྐྲད་པ་ལས་ངས་ཐབས་དང་ལྡན་པས་སྔ་མཁོའི་གནས་སུ་བཅུག་སྟེ་བཞག་ནས། བསམ་གཏན་བཞི་དང་། མངོན་པར་ཤེས་པ་ལྔ་ལ་གནས་པར་བྱས་སོ། ད་ལྟར་ཡང་འདི་རྒས་ཤིང་འཁོགས་ལ་གཏུགས་པར་གྱུར་ནས། ཁྱིམ་ནས་བསྐྲད་པ་ལས་ངས་ཐབས་དང་ལྡན་པས་སྔ་མཁོའི་གནས་སུ་བཅུག་སྟེ་བཞག་ནས། གཡུང་དྲུང་གི་མཐར་ཐུག་པ་གྲུབ་པ་དང་། བདེ་བའི་མྱ་ངན་ལས་འདས་པ་ལ་བཞག་གོ །གཞན་ཡང་ཡང་དག་པར་རྫོགས་པའི་སངས་རྒྱས་འོད་སྲུང་གི་གསུང་རབ་ལ་འདི་རབ་ཏུ་བྱུང་སྟེ། དེར་ཚེ་གཅིག་ཏུ་ཚངས་པར་སྤྱོད་པ་སྤྱད་ནས། དབང་པོ་རྣམས་ཡོངས་སུ་སྨིན་པར་བྱས་པ་དེས་ན། ད་ལྟར་རྣམ་པར་གྲོལ་བར་གྱུར་ཏོ།། །།རི་ཞེས་བྱ་བ་ནི། གླེང་གཞི་མཉན་དུ་ཡོད་པ་ན་བཞུགས་ཏེ། དེའི་ཚེ་མཉན་དུ་ཡོད་པ་ན་ཁྱིམ་བདག་ཅིག་གནས་པ་དེས། ཐབས་ཟླར་བབ་པ་ལས་ཆུང་མ་བླངས་ནས། དེ་དེ་དང་
ལྷན་ཅིག་ཏུ་རྩེ་ཞིང་དགའ་ལ་དགའ་མགུར་སྤྱོད་པ་ལས། ཕྱི་ཞིག་ན་དེའི་ཆུང་མ་ལ་བུ་ཆགས་ནས། དེ་ཟླ་བ་དགུའམ་བཅུ་ལོན་པ་དང་། ཁྱེའུ་གཟུགས་བཟང་ཞིང་བལྟ་ན་སྡུག་ལ་མཛེས་པ་ཞིག་བཙས་ཏེ། རིགས་དང་འཐུན་པར་མིང་བཏགས་ནས། དེ་འོ་མ་དང་། ཞོ་དང་། མར་དང་། ཞུན་མར་དང་། མར་གྱི་ཉིང་གུས་བསྐྱེད་བསྲིངས་ཏེ། དེ་གང་གི་ཚེ་ཆེར་སྐྱེས་པ་དེའི་ཚེ་ཡི་གེ་དང་། ཁོང་རྩིས་དང་། ཤོད་དགོད་པ་དང་། ལག་རྩིས་དང་། དབྱུང་བ་དང་། སྦ་བ་དང་། དགྲམ་པ་དང་། གོས་བརྟག་པ་དང་། ནོར་བུ་བརྟག་པ་དང་། རིན་པོ་ཆེ་བརྟག་པ་དང་། སྤོས་བརྟག་པ་དང་། སྨན་བརྟག་པ་དང་། གླང་པོ་ཆེ་བརྟག་པ་དང་། རྟ་བརྟག་པ་དང་། གོ་མཚོན་བརྟག་པ་ལ་བསླབས་ཏེ། ཡི་གེ་མཁས་པ་དང་། ཀློག་མཁས་པ་དང་། མཛངས་པ་དང་། བྱ་བ་ལ་གསལ་བ་དང་། ཡིད་གཞུངས་པ་དང་། བརྟག་པ་རྣམ་པ་བརྒྱད་ལ་བྱང་བར་གྱུར་ཏོ། །དེ་ནས་ཕྱི་ཞིག་ན་དེ་ཕས་མཛའ་སྡེ་རྣམས་ཀྱི་ནང་དུ་བཏང་ངོ་། །མཛའ་སྡེ་བོ་དེ་རྣམས་ནི་ལྟ་བ་དང་། འདོད་པ་ཐ་དད་པ་ཕན་ཚུན་མི་འཐུན་པར་སྨྲ་བ་ཤ་སྟག་སྟེ། གང་དག་གང་ལ་དགའ་བ་དེ་དག་དེའི་བསྔགས་པ་རྗོད་པར་བྱེད་དོ། །ཁྱིམ་བདག་གི་བུ་དེ་ནི་རང་བཞིན་གྱིས་མཛངས་པ་ཞིག་སྟེ། ཐམས་ཅད་ཀྱི་གཞུང་ལུགས་འདྲི་བར་བྱེད་ན། ལ་ལ་ཅི་ཟེར། ལ་ལ་ཅི་ཟེར་བར་གྱུར་ནས། ལྟ་བའི་རྣམ་པ་དེ་དག་མི་འདོད་ཅིང་། མི་བཟོད་ལ་རུང་བར་མི་འཛིན་ཏོ། །དེ་ནས་ཕྱི་ཞིག་ན་དགེ་བསྙེན་ཞིག་གིས་སངས་རྒྱས་ཀྱི་བསྔགས་པ་ཡང་དག་པ་ཅི་ལྟ་བ་བཞིན་དུ་བརྗོད་ནས། དེ་ཐོས་མ་ཐག་ཏུ་ཁྱིམ་བདག་གི་བུ་དེས་དྲིས་པ། སངས་རྒྱས་ཞེས་བྱ་བའི་སྒྲ་བྱུང་བ་འདི་དག་ནི་སྔོན་མ་བྱུང་ན་སངས་རྒྱས་ཞེས་བྱ་བ་དེ་སུ་ཞིག །དེ་ནས་དགེ་བསྙེན་དེས་དེ་དང་འཐུན་པའི་སངས་རྒྱས་ཀྱི་བསྔགས་པ་བརྗོད་དོ། །དེ་ནས་ཁྱིམ་བདག་གི་བུ་དེ་བཅོམ་ལྡན་འདས་བལྟ་བར་འདོད་པར་གྱུར་ཏོ། །དེ་ནས་དེས་ཐམས་ཅད་བོར་ཏེ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཆོས་ཉན་པའི་ཕྱིར་སྤྱན་སྔར་འདུག་གོ །དེ་ནས་བཅོམ་ལྡན་འདས་ཀྱིས་དེ་ལ་
དེ་དང་འཐུན་པའི་ཆོས་བསྟན་ཏེ། དེ་ཐོས་ནས་ཁྱིམ་བདག་གི་བུ་དེ་བཅོམ་ལྡན་འདས་ལ་སེམས་དགའ་བར་གྱུར་ཏོ། །དེ་ནས་ཁྱིམ་བདག་གི་བུ་དེས་བཅོམ་ལྡན་འདས་ཀྱི་གཏམ་མཇུག་རྫོགས་པར་རིག་ནས། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་ཅིང་རྗེས་སུ་ཡི་རངས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། བཅོམ་ལྡན་འདས་ཀྱི་ཐད་ནས་སོང་ངོ་། །དེ་ནས་ཕྱི་ཞིག་ན་དེ་སྦྱིན་པ་གཏོང་བའི་སེམས་སྐྱེས་ལ། ཁྱིམ་ན་ནི་ཅི་ཡང་མི་བདོག་པར་མཐོང་ནས། དེའི་བློ་སྐྱེས་པ། བདག་རྒྱ་མཚོ་ཆེན་པོའི་ནང་དུ་སོང་ལ། གལ་ཏེ་བདག་གི་ལན་ཅིག་ཙམ་རིན་པོ་ཆེའི་གླིང་བགྲོད་པ་བསྒྲུབ་ནུས་པར་གྱུར་ན་ཡང་། དེ་ལྟར་ན་བདེ་བླག་ཏུ་སྦྱིན་པ་དག་སྦྱིན་ཞིང་བསོད་ནམས་དག་ཀྱང་བྱེད་ནུས་སོ་སྙམ་ནས། ཚོང་པ་ལྔ་བརྒྱ་ཙམ་དང་ལྷན་ཅིག་ཏུ་ཟོང་ཁྱེར་ཏེ། རྒྱ་མཚོ་ཆེན་པོའི་ནང་དུ་སོང་ནས། དེས་རིན་པོ་ཆེའི་གླིང་བགྲོད་པ་བསྒྲུབས་ཏེ། ཕྱིར་འཛམ་བུའི་གླིང་ལོགས་སུ་ཆས་པ་ལས། དེ་དག་རླུང་མི་བཟོད་པ་བྱུང་ནས། དེས་གྲུ་བོ་ཆེ་དེ་རིའི་གཅོང་རོང་ཞིག་ཏུ་བཙངས་སོ། །དེ་ནས་རྒྱ་མཚོའི་དུས་རླབས་ཕྱིར་ལོག་པ་དང་། ཚོང་པ་དེ་དག་འཇིགས་ཤིང་སྐྲག་སྟེ། བདག་ཅག་ནི་ཤི་ཟིན་ནོ། །བདག་ཅག་གི་སྲོག་ནི་མེད་ཟིན་ནོ། །ད་བདག་ཅག་ལ་དགའ་བ་བྱེད་པ་དང་། སྲོག་ཕངས་པ་སྦྱིན་པ་སུ་ཡོད་ཅེས་འཛེར་ཏོ། །དེ་ནས་དེད་དཔོན་གྱིས་སྨྲས་པ། མ་འཇིགས་ཤིག་མ་འཇིགས་ཤིག །སངས་རྒྱས་བཅོམ་ལྡན་འདས་ལ་སྐྱབས་སུ་དེང་ཤིག་དང་། དེས་བདག་ཅག་ཕོངས་པ་དང་། དཀོས་ཐག་པ་དང་གནོད་པ་དང་ཕྲད་པ་ལས་སྐྱབས་མཛད་པར་འགྱུར་རོ་ཞེས་བྱས་སོ། །དེ་ནས་དེ་ཐོས་མ་ཐག་ཏུ་ཚོང་པ་དེ་རྣམས་སངས་རྒྱས་ལ་སྐྱབས་སུ་སོང་སྟེ། བཙུན་པ་བཅོམ་ལྡན་འདས་ཀྱིས་ནི་འདི་ལྟ་སྟེ། འདས་པ་དང་། མ་འོངས་པ་དང་ད་ལྟར་བྱུང་བ་ཅི་ཡང་མི་གཟིགས་པ་དང་། མི་མཁྱེན་པ་དང་། ཐུགས་སུ་མ་ཆུད་པ་མ་མཆིས་ན། ཀྱེ་མ་བཙུན་པ་བདག་ཅག་ཕོངས་ཤིང་དཀོས་ཐག་ལ་གནོད་པ་དང་ཕྲད་པ་རྣམས་ལ་སྐྱབས་མཛད་དུ་གསོལ། སྲོག་ཕངས་པ་སྩལ་དུ་གསོལ་ཞེས་བྱས་སོ། །དེ་ནས་བཅོམ་ལྡན་འདས་ཀྱིས་ཅི་ནས་
གྲུ་དེ་རང་ཉིད་རིའི་གཅོང་རོང་དེ་ནས་ཕྱིར་ལོག་སྟེ། རྒྱ་མཚོའི་འགྲམ་དུ་འབྱུང་བར་འགྱུར་བ་དེ་ལྟ་བུར་བྱིན་གྱིས་བརླབས་སོ། །དེ་ནས་དེ་དག་རྒྱ་མཚོ་ཆེན་པོའི་འགྲམ་དུ་བྱུང་ནས། མཐར་གྱིས་མཉན་དུ་ཡོད་པར་སོང་སྟེ། མཉན་དུ་ཡོད་པར་རྫས་རྣམས་བཞག་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་ཞབས་ལ་འོ་བྱས་ནས། འདི་སྐད་ཅེས་གསོལ་ཏོ། །བཅོམ་ལྡན་འདས་ནི་བདག་ཅག་ལ་དཀའ་བ་མཛད་མཛད་པ་ལགས། སྲོག་ཕངས་པ་སྩོལ་བ་ལགས་སོ་ཞེས་གསོལ་ནས། ཆོས་མཉན་པའི་ཕྱིར་སྤྱན་སྔར་འཁོད་དོ། །དེ་ནས་བཅོམ་ལྡན་འདས་ཀྱིས་དེ་རྣམས་ཀྱི་བསམ་པ་དང་། བག་ལ་ཉལ་དང་། ཁམས་དང་། ཤེས་པ་དང་། རང་བཞིན་ཐུགས་སུ་ཆུད་ནས། དེ་དང་འཐུན་པའི་ཆོས་བསྟན་ཏེ། དེ་ནས་དེད་དཔོན་ལ་སོགས་པ་ཚོང་པ་ལྔ་བརྒྱ་པོ་རྣམས་ཀྱིས་སྟན་དེ་ཉིད་ལ་འཁོད་བཞིན་དུ། འཇིག་ཚོགས་ལ་ལྟ་བའི་རིའི་རྩེ་མོ་མཐོན་པོ་ཉི་ཤུ་ཡེ་ཤེས་རྡོ་རྗེས་བཅོམ་ནས། རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། དེ་རྣམས་ཀྱིས་བདེན་པ་མཐོང་ནས། གསོལ་པ། བཙུན་པ་བདག་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་། བསྙེན་པར་རྫོགས་ཤིང་དགེ་སློང་གི་དངོས་པོ་འཐོབ་ཏུ་རུང་ན། བདག་ཅག་ཀྱང་བཅོམ་ལྡན་འདས་ཀྱི་ཐད་དུ་ཚངས་པར་སྤྱོད་པ་སྤྱད་པར་འཚལ་ལོ། །དེ་ནས་བཅོམ་ལྡན་འདས་ཀྱིས་དེ་དག་ལ་དགེ་སློང་ཚུར་ཤོག་ཅེས་བྱ་བའི་ཚིག་གིས་རབ་ཏུ་ཕྱུང་སྟེ། བསྙེན་པར་རྫོགས་པར་མཛད་ནས། དེ་དག་ལ་ལུང་ཡང་ཕོག་ནས། དེ་དག་གིས་ཀྱང་བརྩོན་པ་དང་། བསྒྲུབ་པ་དང་། འབད་པས་ཉོན་མོངས་པ་ཐམས་ཅད་སྤངས་ནས། དགྲ་བཅོམ་པ་ཉིད་མངོན་སུམ་དུ་བྱས་ཏེ། དེ་དག་དགྲ་བཅོམ་པ་ཁམས་གསུམ་པའི་འདོད་ཆགས་དང་བྲལ་བར་གྱུར་ནས། གསེར་དང་བོང་བར་མཉམ་པ། ནམ་མཁའ་དང་ལག་མཐིལ་དུ་འདྲ་བའི་སེམས་དང་ལྡན་པ། ཙན་དན་སྤངས་པ་ལྟ་བུར་བསིལ་བར་གྱུར་པ། རིག་པས་སྒོ་ངའི་སྦུབས་བཅོམ་པ། རིག་པ་དང་
མངོན་པར་ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པའི་རྙེད་པ་དང་། ཆགས་པ་དང་། བཀུར་སྟི་ལ་མི་ལྟ་བ་དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་ཅིང་རྗེད་པ་དང་། གུས་པར་སྨྲ་བའི་གནས་སུ་གྱུར་ཏོ། །དེ་ནས་དགེ་སློང་རྣམས་ཀྱིས་སངས་རྒྱས་བཅོམ་ལྡན་འདས་ལ་གསོལ་པ། བཙུན་པ་ཚོང་པ་ལྔ་བརྒྱ་པོ་འདི་རྣམས་དེད་དཔོན་འདི་ལ་བརྟེན་ཏེ། བཅོམ་ལྡན་འདས་ཀྱིས་འཇིགས་པ་ཆེན་པོ་ལས་བསྐྱབས་ནས། གཡུང་དྲུང་གི་མཐར་ཐུག་པ་གྲུབ་པ་དང་། བདེ་བའི་མྱ་ངན་ལས་འདས་པ་ལ་བཀོད་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། ད་ལྟར་འབའ་ཞིག་མ་ཡིན་ཏེ། འདས་པའི་དུས་ན་ཡང་ཚོང་པ་ལྔ་བརྒྱ་པོ་འདི་རྣམས་ཀྱིས། དེད་དཔོན་འདི་ལ་བརྟེན་ཏེ། ངས་འཇིགས་པ་ཆེན་པོ་ལས་བསྐྱབས་ནས། བསམ་གཏན་བཞི་དང་། མངོན་པར་ཤེས་པ་ལྔ་ལ་ཅི་ལྟར་བཀོད་པ་དེ་ཉོན་ཅིག །དགེ་སློང་དག་སྔོན་བྱུང་བ་འདས་པའི་དུས་ན། གྲོང་ཁྱེར་བཱ་ར་ཎ་སཱི་ན་དཀའ་ཐུབ་ཀྱི་གནས་ཞིག་ན། དྲང་སྲོང་མངོན་པར་ཤེས་པ་ལྔ་དང་ལྡན་པ། རྫུ་འཕྲུལ་ཆེ་ཞིང་མཐུ་ཆེ་བ་ཞིག་གནས་ཏེ། དེ་ཡང་བཱ་ར་ཎ་སཱི་ན་གནས་པའི་སྐྱེ་བོ་མང་པོས་བཀུར་སྟིར་བྱ་བ་དང་། བླ་མར་བྱ་བ་དང་། རི་མོར་བྱ་བ་དང་། མཆོད་པར་བྱ་བ་ཞིག་གོ །དེ་ནས་ཕྱི་ཞིག་ན་བཱ་ར་ཎ་སཱི་ན་ཚོང་པ་ལྔ་བརྒྱ་ཙམ་གྱིས། དྲང་སྲོང་དེ་ལ་བསྙེན་བཀུར་བྱས་ནས། རྒྱ་མཚོ་ཆེན་པོའི་ནང་དུ་སོང་སྟེ། དེ་དག་གི་རིན་པོ་ཆེའི་གླིང་བགྲོད་པ་བསྒྲུབས་ནས། ཕྱིར་འཛམ་བུའི་གླིང་ལོགས་སུ་ཆས་པ་ལས། དེ་དག་གི་གྲུ་བོ་ཆེ་རྒྱ་མཚོའི་དུས་རླབས་ཀྱིས་ཐང་ལ་འཕངས་ནས། དེ་དག་དེར་འཇིགས་ཤིང་སྐྲག་པར་གྱུར་ཏེ། བདག་ཅག་འཚོ་བའི་དུས་སྐབས་མེད་དོ་སྙམ་ནས། དེ་དག་ལྷ་རྣམས་ལ་གསོལ་བ་འདེབས་པར་བྱེད་དོ། །དེ་ནས་དེད་དཔོན་གྱིས་སྨྲས་པ། བདག་ཅག་གིས་ལྷ་གཞན་དག་ལ་གསོལ་བ་གདབ་ཅི་དགོས། བདག་ཅག་དྲང་སྲོང་དེ་ཉིད་ལ་སྐྱབས་སུ་འགྲོ་བར་བྱའོ། །འོན་ཀྱང་དེས་བདག་ཅག་ཕོངས་ཤིང་དཀོས་ཐག་པ་དང་། གནོད་པ་དང་ཕྲད་པ་ལ་སྐྱབས་བྱེད་པར་འགྱུར་ཞིང་། སྲོག་ཕངས་པ་སྦྱིན་པར་བྱེད་དོ། དེ་ནས་དེ་ཐོས་མ་ཐག་
ཏུ་ཚོང་པ་ལྔ་བརྒྱ་པོ་དེ་དག་དྲང་སྲོང་དེ་ཁོ་ན་ལ་སྐྱབས་སུ་དོང་ངོ་། །དེ་ནས་དྲང་སྲོང་དེ་ལ་དགའ་བའི་ལྷས་དྲང་སྲོང་དེ་ལ་སྦྲན་ནས། དྲང་སྲོང་དེས་ཚོང་པ་ལྔ་བརྒྱ་པོ་དེ་དག་རྫུ་འཕྲུལ་གྱིས་རྒྱ་མཚོ་ཆེན་པོའི་ནང་ནས་ཕྱུང་སྟེ། རང་གི་དཀའ་ཐུབ་ཀྱི་ཚལ་དུ་བཀོད་དོ། །དེ་ནས་ཚོང་པ་རྣམས་ཀྱིས་བསམས་པ། བདག་ཅག་གསོན་པོར་གྱུར་པ་ཅི་ཡང་རུང་བ་དེ་དག་ཐམས་ཅད་ནི་དྲང་སྲོང་འདིའི་མཐུ་ཡིན་ནོ་སྙམ་ནས། སྦྱིན་པ་དག་བྱིན་ཞིང་བསོད་ནམས་དག་བྱས་ནས། ཐམས་ཅད་དྲང་སྲོང་དེའི་ཐད་དུ་རབ་ཏུ་བྱུང་སྟེ། དེ་དག་དེར་རབ་ཏུ་བྱུང་ནས། བསམ་གཏན་བཞི་དང་། མངོན་པར་ཤེས་པ་ལྔ་བསྐྱེད་དོ། །དགེ་སློང་དག་ཇི་སྙམ་དུ་སེམས། དེའི་ཚེ་དྲང་སྲོང་དུ་གྱུར་པ་བྱང་ཆུབ་སེམས་དཔའི་སྤྱོད་པ་ལ་གནས་པ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེད་དཔོན་དུ་གྱུར་པ་གང་ཡིན་པ་དང་། ཚོང་པར་གྱུར་པ་གང་ཡིན་པ་དེ་དག་ནི། ཚོང་པ་འདི་རྣམས་ཁོ་ན་ཡིན་ཏེ། དེའི་ཚེ་ཡང་འདི་རྣམས་ཀྱིས་དེད་དཔོན་འདི་ཁོ་ན་ལ་བརྟེན་ནས། ངས་འཇིགས་པ་ཆེན་པོ་ལས་བསྐྱབས་ཏེ། བསམ་གཏན་བཞི་དང་། མངོན་པར་ཤེས་པ་ལྔ་ལ་བཀོད་དོ། །ད་ལྟར་ཡང་འདི་རྣམས་ཀྱིས་དེད་དཔོན་འདི་ལ་བརྟེན་ནས། ངས་འཇིགས་པ་ཆེན་པོ་ལས་བསྐྱབས་ཏེ། གཡུང་དྲུང་གི་མཐར་ཐུག་པ་གྲུབ་པ་དང་། བདེ་བའི་མྱ་ངན་ལས་འདས་པ་ལ་བཀོད་དོ། །གཞན་ཡང་ཡང་དག་པར་རྫོགས་པའི་སངས་རྒྱས་འོད་སྲུང་གི་གསུང་རབ་ལ་འདི་དག་ཐམས་ཅད་རབ་ཏུ་བྱུང་སྟེ། དེར་འདི་རྣམས་ཀྱིས་ཚེ་གཅིག་ཏུ་ཚངས་པར་སྤྱོད་པ་སྤྱད་ནས། དབང་པོ་རྣམས་ཡོངས་སུ་སྨིན་པར་བྱས་པ་དེས་ན། ད་ལྟར་རྣམ་པར་གྲོལ་བར་གྱུར་ཏོ།། །།གླུད་ཅེས་བྱ་བ་ནི། གླེང་གཞི་མཉན་དུ་ཡོད་པ་ན་བཞུགས་ཏེ། དེའི་ཚེ་མཉན་དུ་ཡོད་པ་ན་ཁྱིམ་བདག་ཕྱུག་ཅིང་ནོར་མང་ལ། ལོངས་སྤྱོད་ཆེ་བ་ཡོངས་སུ་འཛིན་པ། ཡངས་ཤིང་རྒྱ་ཆེ་བ་རྣམ་ཐོས་ཀྱི་བུའི་ནོར་དང་མཉམ་པ། རྣམ་ཐོས་ཀྱི་བུའི་ནོར་དང་འགྲན་པ་ཞིག་གནས་པ་དེས་ཐབས་ཟླར་བབ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་ཏུ་རྩེ་ཞིང་དགའ་ལ་དགའ་མགུར་
སྤྱོད་དོ། །ཁྱིམ་བདག་དེ་ཡང་བུ་མི་གཤིན་པ་ཞིག་སྟེ། བུ་དང་བུ་མོ་བཙས་སོ་ཅོག་འཆི་བར་འགྱུར་རོ། །ཁྱིམ་བདག་དེའི་བསེན་ནི། ཚེ་དང་ལྡན་པ་མ་འགགས་པ་ཡིན་ཏེ། དེས་ཁྱིམ་བདག་དེ་སྐྱབས་སུ་འགྲོ་བ་དང་། བསླབ་པའི་གཞི་རྣམས་ལ་གནས་པར་བྱས་ནས། སྦྱིན་པ་དག་སྦྱིན་པའི་བགོ་བཤའ་བྱེད་དུ་བཅུག་གོ །དེ་ནས་ཕྱི་ཞིག་ན་ཁྱིམ་བདག་དེའི་ཆུང་མ་ལ་བུ་ཆགས་ནས། དེ་ཟླ་བ་དགུའམ་བཅུ་ལོན་པ་དང་། ཁྱེའུ་གཟུགས་བཟང་ཞིང་བལྟ་ན་སྡུག་ལ་མཛེས་པ་ཞིག་བཙས་ནས། ཁྱིམ་བདག་དེས་བསམས་པ། ཐབས་ཅི་ལྟར་བྱས་ན། ཁྱེའུ་འདི་ཚེ་རིང་བར་འགྱུར་ཞིག་གུ་སྙམ་ནས། དེའི་བློ་སྐྱེས་པ། འཕགས་པ་མ་འགགས་པ་འདི་ནི་རྫུ་འཕྲུལ་ཆེ་ཞིང་བསོད་ནམས་དང་ལྡན་པ། ཆེ་བར་གྲགས་པ་ཡིན་པས་ན། འདི་ལ་བདག་གི་བུ་འདི་གཡོག་ཏུ་ཕུལ་ན། འདིའི་མཐུས་ཚེ་རིང་བར་འགྱུར་ཡང་སྲིད་དོ་སྙམ་ནས། ཕ་མ་གཉིས་ཀྱིས་ཁྱེའུ་དེ་ཚེ་དང་ལྡན་པ་མ་འགགས་པ་ལ་ཕུལ་ནས། དེ་ཉིན་གཅིག་བཞིན་དུ་རྒྱལ་བུ་རྒྱལ་བྱེད་ཀྱི་ཚལ་དུ་ཁྲིད་ཅིང་གསོ་བར་བྱེད་ལ། དགེ་སློང་གི་ཆ་ལུགས་སུ་བཅུག་ནས། དགེ་སློང་དག་དང་ལྷན་ཅིག་ཏུ་བསོད་སྙོམས་ལ་རྒྱུ་བར་བྱེད་དོ། །དེ་ནས་དེ་གང་གི་ཚེ་ཤེད་བྱེ་བར་གྱུར་པ་དེའི་ཚེ། ཁྱིམ་བདག་དེས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་དུ་སྤྱན་དྲངས་ནས། རང་གི་ལག་ནས་བཟའ་བ་དང་། བཅའ་བ་གཙང་མ་བཟང་པོ་མང་པོས་ཚིམ་པར་བྱས་ཏེ། ཅི་བཞེད་པ་བསྟབས་ནས། ཁྱེའུ་དེའི་གླུད་དུ་གསེར་དངུལ་མང་པོ་ཕུལ་ལོ། །བཅོམ་ལྡན་འདས་ཀྱིས་ཀྱང་ཁྱིམ་བདག་དེ་ལ་ཆོས་ཀྱི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག།ཡང་དག་པར་གཟེངས་བསྟོད། ཡང་དག་པར་དགའ་བར་མཛད་ནས། གདན་ལས་བཞེངས་ཏེ་གཤེགས་སོ། །བཅོམ་ལྡན་འདས་གཤེགས་ནས། ཁྱིམ་བདག་དེས་ཁྱེའུ་དེའི་ཆོས་གོས་ཚོན་ཅན་རྣམས་ཕུད་དེ། ཁྱིམ་པའི་གོས་དང་རྒྱན་རྣམས་བསྐོན་ནོ། །དེ་ནས་དེའི་ཁྱིམ་པའི་གོས་དང་རྒྱན་བསྐོན་ནོ་ཅོག་མི་སྣང་བར་གྱུར་ཏེ། ཆོས་གོས་ཚོན་ཅན་དེ་དག་འབའ་ཞིག་བྱུང་བར་གྱུར་ཏོ། །དེ་ནས་གང་གི་ཚེ་ཆ་ལུགས་དེ་བསྒྱུར་
མ་ནུས་པ་དེའི་ཚེ། དགེ་སློང་གི་ཆ་ལུགས་སུ་འདུག་བཞིན་དུ་གསོ་བར་བྱེད་དེ། ཁྱིམ་དེ་ཉིད་དུ་ནེའུ་ལྡངས་ཀྱི་གྲོགས་པོ་ལྔ་བརྒྱ་དང་ལྷན་ཅིག་ཏུ་ཡི་གེ་སློབ་ཏུ་བཅུག་གོ །དེ་ནས་དེ་རང་གི་ཁྱིམ་དེར་ཡང་དགའ་བ་མེད་ན། གཞན་དུ་ལྟ་ཅི་སྨོས་ཏེ། གཙུག་ལག་ཁང་འབའ་ཞིག་ཏུ་འགྲོ་འདོད་པར་གྱུར་ཏོ། །དེ་ནས་ཁྱིམ་བདག་དེས་བུ་དེ་གཙུག་ལག་ཁང་དུ་ཁྲིད་ནས་དེ་ཉིད་དུ་གསོས་སོ། །དེ་ནས་དེས་གཙུག་ལག་ཁང་དེ་ཉིད་དུ་བསྟན་བཅོས་ཐམས་ཅད་རྟོགས་པར་གྱུར་ནས། དེ་ཕྱིར་ཁྱིམ་དུ་འགྲོ་མི་འདོད་དོ། །གཙུག་ལག་ཁང་དུ་འདུག་བཞིན་དུ་དེས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། དེས་བདེན་པ་མཐོང་ནས་ཕ་མ་ལ་གསོལ་ཏེ། ཚེ་དང་ལྡན་པ་མ་འགགས་པའི་ཐད་དུ་རབ་ཏུ་བྱུང་ནས། བསྙེན་པར་རྫོགས་ཏེ། ཚེ་དང་ལྡན་པ་མ་འགགས་པས་དེ་ལ་ལུང་ཡང་ཕོག་ནས། དེས་ཀྱང་བརྩོན་པ་དང་བསྒྲུབ་པ་དང་། འབད་པས་ཉོན་མོངས་པ་ཐམས་ཅད་སྤངས་ནས། དགྲ་བཅོམ་པ་ཉིད་མངོན་སུམ་དུ་བྱས་སོ། །དགྲ་བཅོམ་པར་གྱུར་ནས་བསམས་པ། བདག་གིས་འདུལ་བར་འགྱུར་བ་འགའ་ལྟ་ཅི་ཡོད་སྙམ་སྟེ། དེས་བལྟས་ན་བདག་གི་ཕ་མ་ལ་སོགས་པ་ནེའུ་ལྡངས་ཀྱི་གྲོགས་པོ་ལྔ་བརྒྱ་འདུལ་བར་གྱུར་པ་མཐོང་ནས། རྒྱལ་བུ་རྒྱལ་བྱེད་ཀྱི་ཚལ་ནས་མི་སྣང་བར་གྱུར་ཏེ། རང་གི་ཁྱིམ་དུ་ཕ་མ་གཉིས་ཀྱི་མདུན་ནས་ས་བརྟོལ་ཏེ་བྱུང་ངོ་། །དེ་ནས་དེ་མཐོང་མ་ཐག་ཏུ་ཕ་མ་གཉིས་ཀྱིས་དེ་ལ་ཤིན་ཏུ་དགའ་བར་གྱུར་ཏོ། །དགའ་བར་གྱུར་ནས་ཆོས་ཉན་པའི་ཕྱིར་མདུན་དུ་འདུག་གོ །དེ་ནས་དེས་ཕ་མ་དེ་གཉིས་ཀྱི་བསམ་པ་དང་། བག་ལ་ཉལ་དང་། ཁམས་དང་ཤེས་པ་དང་། རང་བཞིན་རྟོགས་ནས་དེ་དང་འཐུན་པའི་ཆོས་བསྟན་ཏེ། དེས་ན་ཕ་མ་དེ་གཉིས་འཁོར་དང་བཅས་པ་སྟན་དེ་དག་ཉིད་ལ་འཁོད་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་མཐོན་པོ་ཉི་ཤུ་ཡེ་ཤེས་རྡོ་རྗེས་བཅོམ་ནས། རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། བདེན་པ་མཐོང་ནས་སྐྱབས་སུ་འགྲོ་བ་དང་། བསླབ་པའི་གཞི་རྣམས་ལ་བཀོད་དེ། སྦྱིན་པ་དང་སྦྱིན་པའི་བགོ་བཤའ་ཡང་བྱེད་དུ་བཅུག་ནས། ཁྱིམ་དེ་ཁྲོན་པ་དང་འདྲ་
བར་བྱས་ཏེ་བཞག་གོ །དེས་ནེའུ་ལྡངས་ཀྱི་གྲོགས་པོ་ལྔ་བརྒྱ་པོ་དེ་དག་སྐྱབས་སུ་འགྲོ་བ་དང་། བསླབ་པའི་གཞི་རྣམས་ལ་བཀོད་དོ། །དེ་ནས་དགེ་སློང་རྣམས་ཀྱིས་སངས་རྒྱས་བཅོམ་ལྡན་འདས་ལ་གསོལ་པ། བཙུན་པ་ཁྱིམ་བདག་གི་བུ་འདིས་ལས་ཅི་བགྱིས་ན། ལས་དེའི་རྣམ་པར་སྨིན་པས་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེས་ལ། བཅོམ་ལྡན་འདས་ཀྱང་འདིས་མཉེས་པར་བགྱིས་ཏེ། མི་མཉེས་པར་མ་བགྱིས་ནས། བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་སྟེ། ཉོན་མོངས་པ་ཐམས་ཅད་སྤངས་ནས། དགྲ་བཅོམ་པ་ཉིད་མངོན་སུམ་དུ་བགྱིས་ཏེ། འདི་ཉིད་ལ་བརྟེན་ནས་ཕ་མ་ལ་སོགས་པ་དང་། ནེའུ་ལྡངས་ཀྱི་གྲོགས་པོ་ལྔ་བརྒྱས་བདེན་པ་མཐོང་བར་གྱུར་ཏེ། བཅོམ་ལྡན་འདས་ཀྱང་འདིས་མཉེས་པར་བགྱིས་ཏེ། མི་མཉེས་པར་མ་བགྱིས་ལགས། བཅོམ་ལྡན་འདས་ཀྱིས་བཀའ་སྩལ་པ། སྨོན་ལམ་གྱི་དབང་ལས་གྱུར་ཏོ། །གསོལ་པ། བཙུན་པ་འདི་རྣམས་ཀྱིས་སྨོན་ལམ་གང་དུ་བཏབ་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་སྔོན་བྱུང་བ་འདས་པའི་དུས་ན། བསྐལ་པ་བཟང་པོ་འདི་ཉིད་ལ་སྐྱེ་དགུས་ཚེ་ལོ་ཉི་ཁྲི་ཐུབ་པ་ན། ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་ཞེས་བྱ་བ་འཇིག་རྟེན་དུ་བྱུང་སྟེ། དེའི་ཚེ་གྲོང་ཁྱེར་བཱ་ར་ཎ་སཱི་ན་ཁྱིམ་བདག་ཅིག་གནས་པ་ལས། ཕྱི་ཞིག་ན་དེའི་བུ་གཟུགས་བཟང་ཞིང་བལྟ་ན་སྡུག་ལ་མཛེས་པ་ཞིག་བཙས་ཏེ། དེ་གང་གི་ཚེ་ཆེར་སྐྱེས་པ་དེའི་ཚེ། དེས་ཡང་དག་པར་རྫོགས་པའི་སངས་རྒྱས་འོད་སྲུང་གི་བསྟན་པ་ལ་དད་པ་རྙེད་ནས། སྐྱབས་སུ་འགྲོ་བ་དང་། བསླབ་པའི་གཞི་རྣམས་བླངས་སོ། །དེ་གང་གི་ཉིན་པར་བཙས་པ་དེ་ཁོ་ནའི་ཉིན་པར་ཁྱིམ་བདག་གཞན་གྱི་བུ་ལྔ་བརྒྱ་ཡང་བཙས་ཏེ། གང་གི་ཚེ་དེ་དག་ཆེར་སྐྱེས་པ་དེའི་ཚེ་བརྟག་པ་རྣམ་པ་བརྒྱད་ལ་བྱང་བར་གྱུར་ཏེ། དེ་ནས་དེ་དག་སོ་སོའི་ཕ་མ་རྣམས་ཀྱིས་མཛའ་སྡེའི་ནང་དུ་བཏང་ངོ་། །དེ་ནས་ཕྱི་ཞིག་ན་དཔྱིད་ཀྱི་
དུས་སུ་མཛའ་སྡེ་བོ་དེ་རྣམས་སྐྱེད་མོས་ཚལ་ཤིང་ལྗོན་པ་ཡལ་ག་འཁྲིགས་ཤིང་། མེ་ཏོག་རྒྱས་པའི་ནང་དུ་འགྲོ་འདོད་པར་གྱུར་ནས། ནེའུ་ཟླ་རྣམས་ཀྱིས་ཁྱེའུ་དེ་སྔོན་དུ་བཏང་བར་འདོད་དེ། ཁྱོད་སྔར་སོང་ལ་བཟའ་བ་དང་བཅའ་བ་དག་སྟ་གོན་གྱིས་ཤིག་དང་། བདག་ཅག་ཀྱང་དོན་གྲུབ་ནས་འོང་ངོ་ཞེས་བྱས་སོ། །དེ་ནས་དེ་དེར་སོང་ནས་བཟའ་བ་དང་བཅའ་བ་གཙང་མ་བཟང་པོ་མང་པོ་དག་སྟ་གོན་བྱས་སོ། །ཡང་དག་པར་རྫོགས་པའི་སངས་རྒྱས་འོད་སྲུང་འཁོར་དང་བཅས་པ་ཡང་ས་ཕྱོགས་དེ་ལོགས་ནས། བཱ་ར་ཎ་སཱིར་བསོད་སྙོམས་ལ་ཆས་ཏེ་གཤེགས་སོ། །དེ་ནས་ཁྱེའུ་དེས་ཐག་རིང་པོ་ཞིག་ནས། ཡང་དག་པར་རྫོགས་པའི་སངས་རྒྱས་འོད་སྲུང་འཁོར་དང་བཅས་པ་མཐོང་ངོ་། །མཐོང་ནས་ཀྱང་དེས་བསམས་པ། ཡོན་གནས་ཀྱི་མཆོག་འདི་ལྟ་བུ་བསོད་སྙོམས་ལ་ཆས་ཏེ་གཤེགས་ལ། བདག་གིས་ཀྱང་ཚེགས་ཆུང་ངུས་བཟའ་བ་དང་བཅའ་བ་དག་སྦྱར་བ་ཡོད་ན། བདག་གིས་ཇེ་ཡང་དག་པར་རྫོགས་པའི་སངས་རྒྱས་འོད་སྲུང་འཁོར་དང་བཅས་པ་ལ་བཤོས་གསོལ་ལ། དེའི་འོག་ཏུ་བདག་གིས་གྲོགས་པོ་རྣམས་ཀྱི་བཟའ་བ་དང་བཅའ་བ་གཞན་དག་སྦྱར་བར་བྱའོ་སྙམ་ནས། དེས་ཡང་དག་པར་རྫོགས་པའི་སངས་རྒྱས་འོད་སྲུང་འཁོར་དང་བཅས་པ་སྐྱེད་མོས་ཚལ་དེ་ཉིད་ཀྱི་ནང་དུ་སྤྱན་དྲངས་ཏེ། བཟའ་བ་དང་བཅའ་བ་གཙང་མ་བཟང་པོ་མང་པོས་ཚིམ་པར་བྱས་ཏེ། ཅི་བཞེད་པ་བསྟབས་ནས་ཆོས་ཉན་པའི་ཕྱིར་སྤྱན་སྔར་འདུག་གོ །དེ་ནས་ཡང་དག་པར་རྫོགས་པའི་སངས་རྒྱས་འོད་སྲུང་གིས་དེ་ལ་ཆོས་ཀྱི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག།ཡང་དག་པར་གཟེངས་བསྟོད། ཡང་དག་པར་དགའ་བར་མཛད་ནས། གདན་ལས་བཞེངས་ཏེ་གཤེགས་སོ། །དེ་ནས་ཁྱེའུ་དེས་མཛའ་སྡེ་བོ་རྣམས་ཀྱི་ཕྱིར་བཟའ་བ་དང་བཅའ་བ་གཞན་དག་སྟ་གོན་བྱེད་པ་ལ་ཞུགས་སོ། །དེ་ནས་མཛའ་སྡེ་བོ་དེ་རྣམས་སྐྱེད་མོས་ཚལ་དེར་ལྷགས་ནས། བདག་ཅག་གི་བཟའ་བ་དང་བཅའ་བ་སྟ་གོན་བྱས་པ་དེ་དག་ཐམས་ཅད་ཡང་དག་པར་རྫོགས་པའི་སངས་རྒྱས་འོད་སྲུང་འཁོར་དང་བཅས་པ་ལ་ཕུལ་ལོ་ཞེས་ཐོས་
སོ། །དེ་ཐོས་མ་ཐག་ཏུ་དེ་དག་ཤས་ཆེར་ཁྲོས་ཏེ། དེ་དག་ཁྲོས་ནས་ཁྱེའུ་དེ་བསད་པར་བྱས་སོ། །དེ་ནས་ཁྱེའུ་དེ་འཇིགས་ཤིང་སྐྲག་པར་གྱུར་ནས། དྲང་སྲོང་སྨྲ་བར་སོང་སྟེ། དེས་གནས་དེ་ནས་ཕ་མ་གཉིས་ལ་བཟླུགས་ཏེ། ཕ་མ་གཉིས་ཀྱིས་འཐབ་མོ་ཞི་བར་བྱ་བར་བརྩམས་པ་ལས། ཞི་བར་བྱེད་མ་ནུས་ནས། ཁྱེའུ་དེས་ཕ་མ་གཉིས་ལ་གསོལ་ཏེ། ཡང་དག་པར་རྫོགས་པའི་སངས་རྒྱས་འོད་སྲུང་གི་གསུང་རབ་ལ་རབ་ཏུ་བྱུང་ངོ་། །དེ་རབ་ཏུ་བྱུང་ནས་སྡེ་སྣོད་གསུམ་ལོབས་ཏེ་དང་གྲོལ་བའི་སྤོབས་པ་དང་ལྡན་པའི་ཆོས་སྨྲ་བར་གྱུར་ནས། དེས་ཕ་མ་གཉིས་སྐྱབས་སུ་འགྲོ་བ་དང་། བསླབ་པའི་གཞི་རྣམས་ལ་བཀོད་ནས། སྦྱིན་པ་དག་དང་། སྦྱིན་པའི་བགོ་བཤའ་བྱེད་དུ་བཅུག་གོ །དེ་ནས་མཛའ་སྡེ་བོ་དེ་རྣམས་ཀྱིས་དེ་རབ་ཏུ་བྱུང་བ་མཐོང་ནས། འགྱོད་པ་སྐྱེས་ཏེ། བདག་ཅག་གིས་མ་ལེགས་པ་བྱས་སོ། །སྙམ་ནས། དེ་དག་གིས་དེའི་རྐང་པ་ལ་ཕྱག་འཚལ་ཏེ། བཟོད་པ་གསོལ་ཏོ། །དེ་ལས་སྐྱབས་སུ་འགྲོ་བ་དང་། བསླབ་པའི་གཞི་རྣམས་ཀྱང་བླངས་སོ། །དེ་ནས་ཕྱི་ཞིག་ན་དགེ་སློང་དེ་ནད་ཀྱིས་ཐེབས་ནས། དེ་རྩ་བ་དང་སྡོང་བུ་དང་། ལོ་མ་དང་མེ་ཏོག་དང་། འབྲས་བུའི་སྨན་རྣམས་ཀྱིས་རིམ་གྲོ་བྱས་ཀྱང་། སོས་པར་བྱེད་མ་ནུས་ཏེ། དེས་འཆི་ཀར་སྨོན་ལམ་བཏབ་པ། ཀྱེ་མ་འདི་ལྟར་བདག་གིས་ཡང་དག་པར་རྫོགས་པའི་སངས་རྒྱས་འོད་སྲུང་གི་བསྟན་པ་ལ་ཚེ་གཅིག་ཏུ་ཚངས་པར་སྤྱོད་པ་སྤྱད་ཀྱང་ཡོན་ཏན་གྱི་ཚོགས་ཅི་ཡང་མ་ཐོབ་ན། དགེ་བའི་རྩ་བ་འདིས་བདག་གང་དང་གང་དུ་སྐྱེ་བར་འགྱུར་བ་དེ་དང་དེར་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེ་བར་ཤོག་ཤིག །ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལུང་བསྟན་པ་གང་ཡིན་པའི་སངས་རྒྱས་བཅོམ་ལྡན་འདས་དེ་བདག་གིས་མཉེས་པར་བྱེད་པར་གྱུར་ཅིག །མི་མཉེས་པར་བྱེད་པར་མ་གྱུར་ཅིག །དེ་ཁོ་ནའི་བསྟན་པ་ལ་རབ་ཏུ་བྱུང་ནས། ཉོན་མོངས་པ་ཐམས་ཅད་སྤངས་ཏེ། དགྲ་བཅོམ་པ་ཉིད་མངོན་སུམ་དུ་བྱེད་པར་གྱུར་ཅིག་ཅེས་བྱས་སོ། །དེའི་ཕ་མ་གཉིས་དང་མཛའ་སྡེ་བོ་དེ་རྣམས་ཀྱང་དེའི་མདུན་དུ་འདུག་པར་གྱུར་ཏེ། དེ་རྣམས་
ཀྱིས་ཀྱང་ཐོས་ནས་སྨོན་ལམ་བཏབ་པ། བདག་ཅག་ཀྱང་ཁྱོད་ཁོ་ན་ལ་བརྟེན་ཏེ། སངས་རྒྱས་བཅོམ་ལྡན་འདས་དེ་བདག་ཅག་རྣམས་ཀྱིས་མཉེས་པར་བྱེད་པར་གྱུར་ཅིག །མི་མཉེས་པར་བྱེད་པར་མ་གྱུར་ཅིག་ཅེས་བྱས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་སྡེ་སྣོད་གསུམ་པར་གྱུར་པ་གང་ཡིན་པ་དེ་ནི། ཁྱིམ་བདག་གི་བུ་འདི་ཁོ་ན་ཡིན་ནོ། །དེའི་ཚེ་ཕ་མ་གཉིས་སུ་གྱུར་པ་གང་ཡིན་པ་དེ་གཉིས་ནི་ད་ལྟར་གྱི་ཕ་མ་འདི་གཉིས་ཁོ་ན་ཡིན་ནོ། །དེའི་ཚེ་མཛའ་སྡེ་བོར་གྱུར་པ་གང་ཡིན་པ་དེ་དག་ནི། ད་ལྟར་གྱི་ནེའུ་ལྡངས་ལྔ་བརྒྱ་པོ་འདི་དག་ཁོ་ན་ཡིན་ནོ། །དེས་དེར་ཚེ་གཅིག་ཏུ་ཚངས་པར་སྤྱོད་པ་སྤྱད་ནས། འཆི་ཀར་སྨོན་ལམ་བཏབ་པའི་ལས་དེའི་རྣམ་པར་སྨིན་པས། གང་དང་གང་དུ་སྐྱེས་པ་དེ་དང་དེར་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེས་ཏེ། དགེ་སློང་དག་ང་ཡང་དག་པར་རྫོགས་པའི་སངས་རྒྱས་འོད་སྲུང་དང་། ཤིན་ཏུ་མཉམ་པ་དང་ཤུགས་མཉམ་པ་དང་། མཛད་པ་མཉམ་པ་དང་། ཐབས་མཉམ་པ་བརྙེས་པར་གྱུར་ནས། འདིས་ང་མཉེས་པར་བྱས་ཏེ། མི་མཉེས་པར་མ་བྱས་ལ། ང་ཉིད་ཀྱི་བསྟན་པ་ལ་རབ་ཏུ་བྱུང་སྟེ། ཉོན་མོངས་པ་ཐམས་ཅད་སྤངས་ནས། དགྲ་བཅོམ་པ་ཉིད་མངོན་སུམ་དུ་བྱས་སོ། །དེར་དེའི་ཕ་མ་གཉིས་དང་མཛའ་སྡེ་བོ་དེ་རྣམས་ཀྱིས་ཀྱང་སྨོན་ལམ་བཏབ་པ་དེས་ན། ད་ལྟར་ཡང་འདི་ཁོ་ན་ལ་བརྟེན་ནས། འདི་རྣམས་ཀྱིས་ང་མཉེས་པར་བྱས་ཏེ། མི་མཉེས་པར་མ་བྱས་སོ།། །།ལས་བརྒྱ་ཐམ་པ། བམ་པོ་སུམ་ཅུ་གཉིས་པ། འཐབ་པ་ཞེས་བྱ་བ་ནི། གླེང་གཞི་མཉན་དུ་ཡོད་པ་ན་བཞུགས་ཏེ། དེའི་ཚེ་ཡུལ་ཀོ་ས་ལ་དང་། ཡུལ་མ་ག་དྷའི་བར་མཚམས་ན། སེང་གེ་མཐུ་རྩལ་བདོ་བ་གཉིས་འདུག་སྟེ། དེ་གཉིས་དེ་ན་འདུག་པས། སྐྱེ་བོ་མང་པོ་ཁ་འདོག་པར་བྱེད་དེ། འདྲུལ་བཅད་དོ། །དེ་གཉིས་ཀྱིས་ལམ་ཆོད་པས། སུ་ཡང་ལམ་དེར་འགྲོ་མི་ནུས་པར་གྱུར་ཏོ། །སངས་རྒྱས་བཅོམ་ལྡན་འདས་བགྲོད་པ་གཅིག་པུའི་ལམ་སྟོན་པ། རྣམ་པ་གཉིས་ཀྱི་ཤེས་བྱ་དང་། ཡེ་ཤེས་ལ་མངའ་བརྙེས་པ། མ་འདྲེས་པའི་དྲན་པ་ཉེ་བར་གཞག་པ་
གསུམ་ལ་མཁས་པ། མི་འཇིགས་པ་བཞིས་མི་འཇིགས་པ། འགྲོ་བ་ལྔ་ལས་རྣམ་པར་གྲོལ་བ། སྐྱེ་མཆེད་དྲུག་ལ་མཁས་པ། བྱང་ཆུབ་ཀྱི་ཡན་ལག་བདུན་ལ་སྤྱོད་ཡུལ་བ། རྣམ་པར་ཐར་པ་བརྒྱད་ལ་བསམ་གཏན་པ། མཐར་གྱིས་གནས་པའི་སྙོམས་པར་འཇུག་པ་དགུ་ལ་སྙོམས་པར་འཇུག་པ། སྟོབས་བཅུའི་སྟོབས་དང་ལྡན་པ། ཡང་དག་པའི་སེང་གེའི་སྒྲ་ཆེན་པོ་སྒྲོགས་པ་རྣམས་ནི། ཆོས་ཉིད་ཀྱིས་ཉིན་དུས་གསུམ་མཚན་དུས་གསུམ་སྟེ། ཉིན་མཚན་དུས་དྲུག་ཏུ་སངས་རྒྱས་ཀྱི་སྤྱན་གྱིས་འཇིག་རྟེན་ལ་གཟིགས་ཏེ། སུ་ནི་རྒུད། སུ་ནི་དར། སུ་ནི་ཕོངས་ཤིང་འདུག།སུ་ནི་ཉམ་ང་བར་གྱུར། སུ་ནི་གནོད་པ་དང་ལྡན། སུ་ནི་ཕོངས་པ་དང་། ཉམ་ང་བ་དང་། གནོད་པ་དང་ལྡན། སུ་ནི་ངན་སོང་དུ་གཞོལ། སུ་ནི་ངན་སོང་དུ་འབབ། སུ་ནི་ངན་སོང་དུ་བབ། སུ་ནི་ངས་ངན་སོང་ནས་ཕྱུང་སྟེ། མཐོ་རིས་དང་། ཐར་པ་དང་འབྲས་བུ་ལ་གཞག་པར་བྱ། སུ་ནི་ཉེས་པར་སྤྱོད་པའི་འདམ་དུ་བྱིང་བ་ལས་ལག་ནས་དྲང་བར་བྱ། སུ་ནི་འཕགས་པའི་ནོར་བདུན་མེད་པ་ལས། འཕགས་པའི་ནོར་བདུན་གྱི་དབང་ཕྱུག་ལ་དབང་བྱེད་དུ་གཞུག་པར་བྱ། སུ་ནི་དགེ་བའི་རྩ་བ་རྣམས་མ་བསྐྱེད་པ་ལས་བསྐྱེད་པར་བྱ། སུ་ནི་དགེ་བའི་རྩ་བ་རྣམས་བསྐྱེད་ཟིན་པ་ལས་ཡོངས་སུ་སྨིན་པར་བྱ། སུ་ནི་དགེ་བའི་རྩ་བ་རྣམས་སྨིན་པ་ལས་ཡེ་ཤེས་ཀྱི་མཚོན་གྱིས་བརྟོལ་བར་བྱ། སུ་ལ་ནི་སངས་རྒྱས་བྱུང་བས་བརྒྱན་པའི་འཇིག་རྟེན་འབྲས་བུ་ཡོད་པར་བྱ་སྙམ་དུ་ཡེ་ཤེས་གཟིགས་པ་འཇུག་གོ །རྒྱ་མཚོ་ཆུ་སྲིན་རྣམས་ཀྱི་གནས། །དུས་རླབས་ཡོལ་བར་འགྱུར་ཡང་སྲིད། །གདུལ་བར་བྱ་བའི་སྲས་རྣམས་ལ། །སངས་རྒྱས་དུས་ལས་ཡོལ་བ་མེད། །དེ་ནས་བཅོམ་ལྡན་འདས་ཀྱིས་སེང་གེ་དེ་གཉིས་འདུལ་བའི་དུས་ལ་བབ་པར་དགོངས་ནས། ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་སོང་ལ་དགེ་སློང་རྣམས་ལ། བཅོམ་ལྡན་འདས་ཡུལ་མ་ག་་ཕྱོགས་སུ་ལྗོངས་རྒྱུ་ཞིང་གཤེགས་ཀྱིས། སུ་བཅོམ་ལྡན་འདས་དང་ལྷན་ཅིག་ཏུ་ལྗོངས་རྒྱུ་ཞིང་འགྲོ་འདོད་པ་དེ་དག་ཆོས་གོས་ལོང་ཤིག་ཅེས་བསྒོ་ཤིག་ཅེས་བཀའ་སྩལ་ནས། བཅོམ་ལྡན་འདས་དབྱར་
གནས་ཤིང་། དབྱར་བཞུགས་ནས། དགེ་སློང་མང་པོས་ཞམ་རིང་བྱས་ཏེ། དགེ་སློང་གི་དགེ་འདུན་གྱིས་མདུན་དུ་བདར་ནས། རྒྱལ་པོའི་ཁབ་ཏུ་ཆས་ཏེ། མཐར་གྱིས་རྒྱུ་ཞིང་གཤེགས་གཤེགས་ནས། སེང་གེའི་ནགས་ཁུང་དུ་བྱོན་ནས། སེང་གེ་དེ་གཉིས་ཟས་ཚོལ་དུ་སོང་སོང་བ་ལས། དེ་གཉིས་ཕྲད་ནས་འཐབ་པར་ཆས་སོ། །བཅོམ་ལྡན་འདས་ཀྱང་དེ་གཉིས་ལ་ཐུགས་བརྩེ་བའི་ཕྱིར་མདུན་ལོགས་སུ་གཞེས་སོ། །དེ་ནས་ཐག་རིང་པོ་ཞིག་ནས། སེང་གེ་དེ་གཉིས་ཀྱིས་བཅོམ་ལྡན་འདས་མཐོང་ངོ་། །མཐོང་ནས་ཀྱང་སེང་གེ་གཉིས་ཁྲོ་བའི་ཀུན་ནས་དསྲེས་པ་མེད་པར་གྱུར་ཏེ། བཅོམ་ལྡན་འདས་ལ་ཤིན་ཏུ་དགའ་བར་གྱུར་ནས། དེ་གཉིས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་ཞལ་དུ་བལྟ་ཞིང་འདུག་གོ །དེ་ནས་བཅོམ་ལྡན་འདས་ཀྱིས་དེ་གཉིས་ལ་བཀའ་སྩལ་པ། བཞིན་བཟངས་ཁྱེད་གཉིས་སྔོན་གྱི་ཉེས་པར་སྤྱོད་པའི་ལས་ཀྱིས་དུད་འགྲོའི་ནང་དུ་སྐྱེས་ན། ཁྱེད་གཉིས་ད་ལྟར་ཡང་དེ་འབའ་ཞིག་གི་རྒྱུ་བྱེད་ཅིང་འདུག་གོ །བཞིན་བཟངས་གཉིས་འདི་ལྟར་འདུ་བྱེད་ཐམས་ཅད་ནི་མི་རྟག་གོ །ཆོས་ཐམས་ཅད་ནི་བདག་མེད་དོ། །མྱ་ངན་ལས་འདས་པ་ནི་ཞི་བའོ། །ང་ལ་སེམས་དགའ་བར་གྱིས་ཤིག་དང་། དུད་འགྲོའི་སྐྱེ་གནས་དང་བྲལ་བར་འགྱུར་ཡང་སྲིད་དོ་ཞེས་བཀའ་སྩལ་ནས། བཅོམ་ལྡན་འདས་གཤེགས་སོ། །དེ་གཉིས་བཅོམ་ལྡན་འདས་ལས་ཆོས་ཐོས་ནས་ཁ་འཚོས་སོ། །དུད་འགྲོའི་སྐྱེ་གནས་སུ་སྐྱེས་པ་རྣམས་ནི་མེའི་དྲོད་ཆེ་སྟེ། བཅོམ་ལྡན་འདས་ལ་སེམས་དགའ་བ་བསྐྱེད་བཞིན་དུ་ཤི་ནས་ལྷའི་ནང་དུ་སྐྱེས་སོ། །ལྷའི་བུའམ་ལྷའི་བུ་མོ་སྐྱེས་མ་ཐག་པ་ནི། ཆོས་ཉིད་ཀྱིས་སེམས་རྣམ་པ་གསུམ་སྐྱེ་བར་འགྱུར་ཏེ། བདག་གང་ནས་ཤི་འཕོས་གང་དུ་སྐྱེ། ལས་གང་གིས་སྐྱེས་སྙམ་མོ། །དེ་ནས་དུད་འགྲོ་ལས་ཤི་འཕོས་པ་དང་། ལྷའི་ནང་དུ་སྐྱེས་པ་དང་། བཅོམ་ལྡན་འདས་ལ་སེམས་དགའ་བར་གྱུར་པ་དེ་གཉིས་ཀྱིས་མཐོང་ངོ་། །དེ་ནས་དེ་གཉིས་ཀྱིས་
བསམ་པ། བདག་ཅག་གཉིས་ཞག་ལོན་ནས། གཟོད་བཅོམ་ལྡན་འདས་ལ་བལྟ་བའི་ཕྱིར་འགྲོ་བ་ནི། བདག་ཅག་གཉིས་ཀྱི་ཆ་མ་ཡིན་གྱི། བདག་ཅག་གཉིས་ཞག་མ་ལོན་པར་བཅོམ་ལྡན་འདས་ལ་བལྟ་བའི་ཕྱིར་འགྲོའོ་སྙམ་མོ། །དེ་ནས་སྔོན་སེང་གེར་གྱུར་པའི་ལྷའི་བུ་རྣ་ཆ་གདུབ་ཀོར་དག་ཅིང་མགུལ་རྒྱན་ཐོགས་པ། ལུས་དོ་ཤལ་དང་། སེ་མོ་དོས་བརྒྱན་པ། ནོར་བུ་རིན་པོ་ཆེ་སྣ་ཚོགས་ཀྱིས་སྤྲས་པའི་ཅོད་པན་ཅན་ལུས་གུར་གུམ་དང་། ཏ་མ་ལའི་ལོ་མ་དང་། སྤྲོ་ཀ་ལ་སོགས་པས་བྱུགས་པ་དེ་གཉིས་ཀྱིས་དེ་ཉིད་ཀྱི་མཚན་མོ་ལྷའི་མེ་ཏོག་ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་། མན་དཱ་ར་བ་དག་གིས་ཐུ་བ་བཀང་སྟེ། རྒྱལ་བུ་རྒྱལ་བྱེད་ཀྱི་ཚལ་ཐམས་ཅད་འོད་ཆེན་པོས་སྣང་བར་བྱས་ནས་བཅོམ་ལྡན་འདས་ལ་མེ་ཏོག་གིས་གཏོར་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། ཆོས་ཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ །དེ་ནས་བཅོམ་ལྡན་འདས་ཀྱིས་དེ་གཉིས་ལ་དེ་དང་འཐུན་པའི་ཆོས་བསྟན་ཏེ། དེ་གཉིས་ཀྱིས་ཆོས་ཐོས་ནས་བདེན་པ་མཐོང་བར་གྱུར་ཏེ། དེ་གཉིས་ཀྱིས་བདེན་པ་མཐོང་ནས་རང་གི་གནས་སུ་སོང་ངོ་། །དེ་ནས་དགེ་སློང་རྣམས་ཀྱིས་རྒྱལ་བུ་རྒྱལ་བྱེད་ཀྱི་ཚལ་ཐམས་ཅད་སྣང་བ་ཆེན་པོས་ཁྱབ་པར་གྱུར་པ་མཐོང་ནས། བཅོམ་ལྡན་འདས་ལ་ཞུས་པ། བཅོམ་ལྡན་འདས་ཅི་ལགས། མདང་སུམ་མི་མཇེད་ཀྱི་བདག་པོ་ཚངས་པའམ། ལྷའི་དབང་པོ་བརྒྱ་བྱིན་ནམ། འཇིག་རྟེན་སྐྱོང་བ་བཞིའམ། ལྷའི་བུ་རྫུ་འཕྲུལ་ཆེ་ཞིང་མཐུ་ཆེ་བ་གཞན་འགའ་ཞིག །བཅོམ་ལྡན་འདས་ལ་བལྟ་བའི་སླད་དུ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་མདང་སུམ་མི་མཇེད་ཀྱི་བདག་པོ་ཚངས་པའམ། ལྷའི་དབང་པོ་བརྒྱ་བྱིན་ནམ། འཇིག་རྟེན་སྐྱོང་བ་བཞིའམ། ལྷའི་བུ་རྫུ་འཕྲུལ་ཆེ་ཞིང་མཐུ་ཆེ་བ་གཞན་འགའ་ཞིག་ང་བལྟ་བའི་ཕྱིར་འོངས་པ་མ་ཡིན་གྱིས། དགེ་སློང་དག་ཁྱེད་ཀྱིས་ནགས་ཁུང་དགོན་པ་ན། སེང་གེ་གཉིས་ཕན་ཚུན་འཐབ་ཅིང་འདུག་པ་མཐོང་ངམ། གསོལ་པ། བཙུན་པ་མཐོང་ལགས་སོ། །
བཀའ་སྩལ་པ། ངས་དེ་གཉིས་ལ་ཆོས་བསྟན་ཏེ། དེ་གཉིས་ཀྱིས་ང་ལས་ཆོས་ཐོས་ནས་ཁ་འཚོས་ཏེ། དེ་གཉིས་ཤི་འཕོས་ཏེ་དུས་ལས་འདས་པ་ལས་ལྷའི་ནང་དུ་སྐྱེས་ཏེ་ལྷར་གྱུར་ནས། ངའི་ཐད་དུ་འོངས་ཏེ། དེ་གཉིས་ལ་ངས་ཆོས་བསྟན་ནས། ང་ལས་ཆོས་ཐོས་པ་དེས་ན། དེ་དག་གིས་བདེན་པ་རྣམས་མཐོང་སྟེ། དེ་གཉིས་ཀྱིས་བདེན་པ་མཐོང་ནས། རང་གི་གནས་སུ་སོང་ངོ་། །དེ་ནས་དགེ་སློང་རྣམས་ཀྱིས་སངས་རྒྱས་བཅོམ་ལྡན་འདས་ལ་གསོལ་པ། བཙུན་པ་བཅོམ་ལྡན་འདས་ཀྱིས་སེང་གེ་དེ་གཉིས་ཀྱི་ཁོན་བྱང་བར་མཛད་དེ། མཐོ་རིས་དང་ཐར་པ་ཐོབ་པར་མཛད་ལ། ཡུལ་འཁོར་གཉིས་ཀྱི་འཇིགས་པ་བསལ་བ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། ད་ལྟར་འབའ་ཞིག་མ་ཡིན་ཏེ། འདས་པའི་དུས་ན་ཡང་ངས་འདི་གཉིས་ཀྱི་ཁོན་བྱང་བར་བྱས་ནས། བསམ་གཏན་བཞི་དང་། མངོན་པར་ཤེས་པ་ལྔ་ལ་བཀོད་དེ། ཡུལ་འཁོར་གཉིས་ཀྱི་འཇིགས་པ་ཡང་ཅི་ལྟར་བསལ་བ་དེ་ཉོན་ཅིག །དགེ་སློང་དག་སྔོན་བྱུང་བ་འདས་པའི་དུས་ན། ཡུལ་་ཤིའི་རྒྱལ་པོ་ཚངས་པས་བྱིན་དང་། བི་དེ་ཧའི་རྒྱལ་པོ་དབང་ཆེན་སྡེ་གཉིས་ཕན་ཚུན་མི་འཐུན་པར་གྱུར་ནས། དེ་གཉིས་ཀྱིས་དུས་དུས་སུ་སྐྱེ་བོ་ཕལ་པོ་ཆེ་ཁ་འདོག་པར་བྱེད་དོ། །དེ་ནས་ཕྱི་ཞིག་ན་དེ་གཉིས་ཀྱིས་དཔུང་གི་ཚོགས་ཡན་ལག་བཞི་གོ་བསྐོན་ནས། གཡུལ་འགྱེད་པར་འདོད་པའི་ཕྱིར། ས་མཚམས་ན་འཁོད་དོ། །དེ་གཉིས་འཁོད་པའི་འདབ་ན་དཀའ་ཐུབ་ཀྱི་གནས་ཞིག་ན། དྲང་སྲོང་མངོན་པར་ཤེས་པ་ལྔ་དང་ལྡན་པ། རྫུ་འཕྲུལ་ཆེ་ཞིང་མཐུ་ཆེ་བ་ཞིག་གནས་པ་དེས། དེ་གཉིས་ལ་སྙིང་བརྩེ་བའི་ཕྱིར། སྟེང་གི་ནམ་མཁའ་ལ་འོངས་ནས། དེ་གཉིས་ཀྱི་བར་མཚམས་སུ་འདུག་གོ །དེ་ནས་དྲང་སྲོང་དེ་མཐོང་ནས་དེ་གཉིས་ཀྱི་ཁྲོ་བའི་ཀུན་ནས་དསྲེས་པ་མེད་པར་གྱུར་ནས། དྲང་སྲོང་དེ་ལ་ཤས་ཆེར་དགའ་བར་གྱུར་ཏོ། །དེ་གཉིས་དགའ་བར་གྱུར་ནས། དྲང་སྲོང་དེ་ལ་སྨྲས་པ། བཀའ་སྩལ་པ་ཅི་མཆིས། དྲང་སྲོང་དེས་སྨྲས་པ། ཁོན་བྱང་བར་གྱིས་ཤིག །རྒྱལ་པོ་དེ་གཉིས་ཀྱིས་སྨྲས་
པ། དྲང་སྲོང་གིས་ཅི་སྐད་བཀའ་སྩལ་པ་དེ་བཞིན་དུ་འཚལ་ལོ་ཞེས་སྨྲས་ནས། མཇལ་དུམ་བྱས་ཏེ། དྲང་སྲོང་གི་རྐང་པ་ལ་ཕྱག་འཚལ་ནས། ཆོས་ཉན་པའི་ཕྱིར། དྲང་སྲོང་གི་མདུན་དུ་འདུག་གོ །དྲང་སྲོང་དེས་ཀྱང་དེ་གཉིས་ལ་དེ་དང་འཐུན་པའི་ཆོས་བསྟན་ཏོ། །དེ་ནས་རྒྱལ་པོ་དེ་གཉིས་ཀྱིས་སོ་སོའི་བུ་རབ་རྒྱལ་སར་བཅུག་ནས། དྲང་སྲོང་དེ་ཉིད་ཀྱི་ཐད་དུ་རབ་ཏུ་བྱུང་སྟེ། བསམ་གཏན་བཞི་དང་། མངོན་པར་ཤེས་པ་ལྔ་བསྐྱེད་དོ། །དགེ་སློང་དག་ཇི་སྙམ་དུ་སེམས། དེའི་ཚེ་དྲང་སྲོང་དུ་གྱུར་པ། བྱང་ཆུབ་སེམས་དཔའི་སྤྱོད་པ་ལ་གནས་པ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་་ཤིའི་རྒྱལ་པོ་ཚངས་པས་བྱིན་དང་། བི་དེ་ཧའི་རྒྱལ་པོ་དབང་ཆེན་སྡེར་གྱུར་པ་གང་ཡིན་པ་དེ་གཉིས་ནི། སེང་གེ་འདི་གཉིས་ཁོ་ན་ཡིན་ཏེ། དེའི་ཚེ་ཡང་ངས་འདི་གཉིས་ཀྱི་ཁོན་བྱང་བར་བྱས་ནས་རབ་ཏུ་བྱུང་སྟེ། བསམ་གཏན་བཞི་དང་། མངོན་པར་ཤེས་པ་ལྔ་བསྐྱེད་དོ། །ད་ལྟར་ཡང་ངས་འདི་གཉིས་ཀྱི་ཁོན་བྱང་བར་བྱས་ནས། མཐོ་རིས་དང་ཐར་པ་ཐོབ་པར་བྱས་སོ། །གསོལ་པ། བཙུན་པ་འདི་གཉིས་ཀྱིས་ལས་ཅི་བགྱིས་ན། ལས་དེའི་རྣམ་པར་སྨིན་པས་སེང་གེར་སྐྱེས་ལགས། ལས་ཅི་བགྱིས་ན། དེ་ནས་ཤི་འཕོས་ནས་ལྷའི་ནང་དུ་སྐྱེས་ལ་འདི་གཉིས་ཀྱིས་བཅོམ་ལྡན་འདས་མཉེས་པར་བགྱིས་ཏེ། མི་མཉེས་པར་མ་བགྱིས་ལགས། བཅོམ་ལྡན་འདས་ཀྱིས་བཀའ་སྩལ་པ། འདས་པའི་ལས་ཀྱང་ཡོད། ད་ལྟར་གྱི་ལས་ཀྱང་ཡོད་དེ། འདས་པའི་ལས་གང་ཞེ་ན། ཡང་དག་པར་རྫོགས་པའི་སངས་རྒྱས་འོད་སྲུང་གི་གསུང་རབ་ལ་འདི་གཉིས་དགེ་བསྙེན་དུ་གྱུར་ཏེ། ཁ་མི་མཁས་པ་དེས། འདི་གཉིས་ཁྲོས་པས། སྐྱེ་བོ་མང་པོ་ལ་དུད་འགྲོ་ཞེས་བྱ་བའི་ཚིག་སྨྲས་ལ། དེར་འདི་གཉིས་ཀྱིས་ཚེ་གཅིག་ཏུ་སྐྱབས་སུ་འགྲོ་བ་དང་། བསླབ་པའི་གཞི་རྣམས་བསྲུངས་ནས། འཆི་ཀར་སྨོན་ལམ་བཏབ་པ། ཡང་དག་པར་རྫོགས་པའི་སངས་རྒྱས་འོད་སྲུང་གིས། བྲམ་ཟེའི་ཁྱེའུ་བླ་མ་ལུང་བསྟན་པ་གང་ཡིན་པའི་སངས་རྒྱས་བཅོམ་ལྡན་འདས་དེ་བདག་གིས་མཉེས་པར་བྱེད་པར་གྱུར་ཅིག །མི་མཉེས་པར་བྱེད་པར་མ་གྱུར་ཅིག་ཅེས་བྱས་སོ། །དགེ་
སློང་དག་ཇི་སྙམ་དུ་སེམས། དེའི་ཚེ་དགེ་བསྙེན་དུ་གྱུར་པ་གང་ཡིན་པ་དེ་གཉིས་ནི། སེང་གེ་འདི་གཉིས་ཁོ་ན་ཡིན་ཏེ། དེ་གཉིས་ཀྱིས་དེར་སྐྱེ་བོ་མང་པོ་ལ་དུད་འགྲོ་ཞེས་བྱ་བའི་ཚིག་བརྗོད་པའི་ལས་དེའི་རྣམ་པར་སྨིན་པས་ནི་དུད་འགྲོར་སྐྱེས་སོ། །དེ་གཉིས་ཀྱིས་དེར་ཚེ་གཅིག་ཏུ་སྐྱབས་སུ་འགྲོ་བ་དང་། བསླབ་པའི་གཞི་རྣམས་བསྲུངས་ནས། འཆི་ཀར་སྨོན་ལམ་བཏབ་པ་དེས་ནི། དགེ་སློང་དག་ང་ཡང་དག་པར་རྫོགས་པའི་སངས་རྒྱས་འོད་སྲུང་དང་། ཤིན་ཏུ་མཉམ་པ་དང་། ཤུགས་མཉམ་པ་དང་། མཛད་པ་མཉམ་པ་དང་། ཐབས་མཉམ་པ་བརྙེས་པར་གྱུར་ནས། འདི་གཉིས་ཀྱིས་ང་མཉེས་པར་བྱས་ཏེ། མི་མཉེས་པར་མ་བྱས་པ་འདི་ནི་འདས་པའི་དུས་ཀྱི་ལས་ཡིན་ནོ། །ད་ལྟར་བྱུང་བའི་ལས་གང་ཞེ་ན། འདི་གཉིས་སེང་གེར་གྱུར་ནས། ང་ལ་སེམས་དགའ་བར་བྱས་པ་དེས་ན་ལྷའི་ནང་དུ་སྐྱེས་ཏེ། འདི་ནི་ད་ལྟར་བྱུང་བའི་ལས་ཡིན་ནོ།། །།རྙིས་བཟུང་བ་ཞེས་བྱ་བ་ནི། གླེང་གཞི་མཉན་དུ་ཡོད་པ་ན་བཞུགས་ཏེ། དེའི་ཚེ་མཉན་དུ་ཡོད་པ་ན། ནགས་ཁྲོད་ཅིག་ན། རི་དགས་ཀྱི་རྔོན་པ་དག་ཅིག་གིས་རི་དགས་བཤོར་པའི་ཕྱིར་རྒྱ་དང་རྙི་དང་། འཇོལ་རླུབས་དང་། རྙི་མང་པོ་དག་བཙུགས་ནས། དེར་རི་དགས་མང་པོ་ཞིག་བཟུང་ངོ་། །རྔོན་པ་དེ་དག་ཀྱང་ནང་པར་སྔར་ལངས་ཏེ། ནགས་ཁྲོད་དེར་སོང་ནས། དེ་དག་གིས་དེར་རི་དགས་ཅི་ཟིན་པ་རྣམས་མདའ་འཕངས་ཏེ་བསད་ནས། དེ་དག་ལས་ཉུང་ཤས་ཅིག་ལུས་སོ། །དེའི་ཚེ་ས་ཕྱོགས་དེར་བཅོམ་ལྡན་འདས་ཀྱང་གཤེགས་སོ། །དེ་ནས་རི་དགས་དེ་རྣམས་དང་། རྔོན་པ་དེ་རྣམས་ཀྱིས་ཐག་རིང་པོ་ཞིག་ནས་བཅོམ་ལྡན་འདས་མཐོང་ངོ་། །མཐོང་ནས་ཀྱང་བཅོམ་ལྡན་འདས་ལ་ཤིན་ཏུ་དགའ་བར་གྱུར་ཏོ། །དགའ་བར་གྱུར་ནས། རྔོན་པ་དེ་དག་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཆོས་མཉན་པའི་ཕྱིར་སྤྱན་སྔར་འདུག་གོ །དེ་ནས་བཅོམ་ལྡན་འདས་ཀྱིས་དེ་རྣམས་ཀྱི་བསམ་པ་དང་། བག་ལ་ཉལ་དང་། ཁམས་དང་། ཤེས་པ་དང་། རང་བཞིན་ཐུགས་སུ་ཆུད་ནས། དེ་
དང་འཐུན་པའི་ཆོས་བསྟན་ཏེ། དེས་ན་རྔོན་པ་དེ་རྣམས་ཀྱིས་སྟན་དེ་ཉིད་ལ་འཁོད་བཞིན་དུ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། དེ་དག་གིས་བདེན་པ་མཐོང་ནས། གསོལ་པ། བཙུན་པ་བདག་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ཞིང་། དགེ་སློང་གི་དངོས་པོ་འཐོབ་ཏུ་རུང་ན། བདག་ཅག་ཀྱང་བཅོམ་ལྡན་འདས་ཀྱི་ཐད་དུ་ཚངས་པར་སྤྱོད་པ་སྤྱད་པར་འཚལ་ལོ། །དེ་ནས་བཅོམ་ལྡན་འདས་ཀྱིས་དེ་དག་ལ་དགེ་སློང་ཚུར་ཤོག་ཅེས་བྱ་བའི་ཚིག་གིས་རབ་ཏུ་ཕྱུང་སྟེ། བསྙེན་པར་རྫོགས་པར་མཛད་ནས། དེ་དག་ལ་ལུང་ཡང་ཕོག་སྟེ། དེ་དག་གིས་ཀྱང་བརྩོན་པ་དང་བསྒྲུབ་པ་དང་། འབད་པས་ཉོན་མོངས་པ་ཐམས་ཅད་སྤངས་ཏེ། དགྲ་བཅོམ་པ་ཉིད་མངོན་སུམ་དུ་བྱས་སོ། །རི་དགས་དེ་རྣམས་ཀྱང་བཅོམ་ལྡན་འདས་ལ་སེམས་དགའ་བཞིན་དུ་ཤི་འཕོས་ཏེ། དུས་ལས་འདས་ནས་ལྷའི་ནང་དུ་སྐྱེས་སོ། །ལྷའི་བུའམ་ལྷའི་བུ་མོ་སྐྱེས་མ་ཐག་པ་ནི་ཆོས་ཉིད་ཀྱིས་སེམས་རྣམ་པ་གསུམ་སྐྱེ་བར་འགྱུར་ཏེ། བདག་གང་ནས་ཤི་འཕོས། གང་དུ་སྐྱེས། ལས་གང་གིས་སྐྱེས་སྙམ་མོ། །དེ་ནས་དུད་འགྲོ་ལས་ཤི་འཕོས་པ་དང་ལྷའི་ནང་དུ་སྐྱེས་པ་དང་། བཅོམ་ལྡན་འདས་ལ་སེམས་དགའ་བར་གྱུར་པ་དེ་དག་གིས་མཐོང་ངོ་། །དེ་ནས་དེ་དག་གིས་བསམས་པ། བདག་ཅག་ཞག་ལོན་ནས་གཟོད་བཅོམ་ལྡན་འདས་ལ་བལྟ་བའི་ཕྱིར་འགྲོ་བ་ནི་བདག་ཅག་གི་ཆ་མ་ཡིན་གྱིས། བདག་ཅག་ཞག་མ་ལོན་པར་བཅོམ་ལྡན་འདས་ལ་བལྟ་བའི་ཕྱིར་འགྲོའོ་སྙམ་མོ། །དེ་ནས་སྔོན་རི་དགས་སུ་གྱུར་པའི་ལྷའི་བུ་རྣ་ཆ་གདུབ་ཀོར་དག་ཅིང་མགུལ་རྒྱན་ཐོགས་པ། ལུས་དོ་ཤལ་དང་སེ་མོ་དོས་བརྒྱན་པ། ནོར་བུ་རིན་པོ་ཆེ་སྣ་ཚོགས་ཀྱིས་སྤྲས་པའི་ཅོད་པན་ཅན་ལུས་གུར་གུམ་དང་། ཏ་མ་ལའི་ལོ་མ་དང་སྤྲིན་ཀ་ལ་སོགས་པས་བྱུག་པ་དག་གིས་དེ་ཉིད་ཀྱི་མཚན་མོ་ལྷའི་མེ་ཏོག་ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་། མན་་ར་བ་རྣམས་ཀྱིས་ཐུ་བ་བཀང་སྟེ། རྒྱལ་བུ་རྒྱལ་བྱེད་ཀྱི་ཚལ་ཐམས་ཅད་འོད་ཆེན་པོས་སྣང་བར་བྱས་ནས། བཅོམ་ལྡན་འདས་ལ་མེ་ཏོག་གིས་གཏོར་ཏེ། བཅོམ་
ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འཁོད་དོ། །དེ་ནས་བཅོམ་ལྡན་འདས་ཀྱིས་དེ་དག་ལ་དེ་དང་འཐུན་པའི་ཆོས་བསྟན་ཏོ། །དེ་དག་གིས་ཆོས་ཐོས་ནས་བདེན་པ་མཐོང་བར་གྱུར་ཏེ། དེ་དག་གིས་བདེན་པ་མཐོང་ནས་རང་གི་གནས་སུ་དོང་ངོ་། །དེ་ནས་དགེ་སློང་རྣམས་ཀྱིས་རྒྱལ་བུ་རྒྱལ་བྱེད་ཀྱི་ཚལ་ཐམས་ཅད་སྣང་བ་ཆེན་པོས་ཁྱབ་པར་གྱུར་པ་མཐོང་ནས། བཅོམ་ལྡན་འདས་ལ་ཞུས་པ་བཅོམ་ལྡན་འདས་ཅི་ལགས། མདང་སུམ་མི་མཇེད་ཀྱི་བདག་པོ་ཚངས་པའམ། ལྷའི་དབང་པོ་བརྒྱ་བྱིན་ནམ། འཇིག་རྟེན་སྐྱོང་བ་བཞིའམ། ལྷའི་བུ་རྫུ་འཕྲུལ་ཆེ་ཞིང་མཐུ་ཆེ་བ་གཞན་འགའ་ཞིག་བཅོམ་ལྡན་འདས་ལ་བལྟ་བའི་སླད་དུ་མཆིས་ལགས་སམ།བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་མདང་སུམ་མི་མཇེད་ཀྱི་བདག་པོ་ཚངས་པའམ། ལྷའི་དབང་པོ་བརྒྱ་བྱིན་ནམ། འཇིག་རྟེན་སྐྱོང་བ་བཞིའམ་ལྷའི་བུ་རྫུ་འཕྲུལ་ཆེ་ཞིང་མཐུ་ཆེ་བ་གཞན་འགའ་ཞིག་ང་ལ་བལྟ་བའི་ཕྱིར་འོངས་པ་མ་ཡིན་གྱིས། དགེ་སློང་དག་ཁྱོད་ཀྱིས་ནགས་ཁུང་དགོན་པ་ན། རི་དགས་ལྔ་བརྒྱ་རྔོན་པ་རྣམས་ཀྱིས་མདའ་འཕངས་ཏེ་བསད་པ་མཐོང་ངམ། གསོལ་པ། བཙུན་པ་མཐོང་ལགས་སོ། །བཀའ་སྩལ་པ། དེ་དག་ང་ལ་སེམས་དགའ་བར་གྱུར་བཞིན་དུ་ཤི་འཕོས་ནས་དུས་ལས་འདས་པ་ལས་ལྷའི་ནང་དུ་སྐྱེས་ཏེ། ལྷར་གྱུར་ནས་ངའི་ཐད་དུ་འོངས་ཏེ། དེ་དག་ལ་ངས་ཆོས་བསྟན་ནས། ང་ལས་ཆོས་ཐོས་པ་དེས་ན་དེ་དག་གིས་བདེན་པ་རྣམས་མཐོང་སྟེ། དེ་དག་གིས་བདེན་པ་མཐོང་ནས། རང་གི་གནས་སུ་སོང་ངོ་། །དེ་ནས་དགེ་སློང་རྣམས་ཀྱིས་བཅོམ་ལྡན་འདས་ལ་ཞུས་པ། བཙུན་པ་རྔོན་པ་དེ་དག་གིས་ལས་ཅི་བགྱིས་ན། ལས་དེའི་རྣམ་པར་སྨིན་པས་གདོལ་པའི་རིགས་སུ་སྐྱེས་ལགས། རི་དགས་དེ་དག་གིས་ལས་ཅི་བགྱིས་ན། ལས་དེའི་རྣམ་པར་སྨིན་པས་རི་དགས་སུ་སྐྱེས་ནས། འདི་རྣམས་ཀྱིས་བཅོམ་ལྡན་འདས་མཉེས་པར་བགྱིས་ཏེ། མི་མཉེས་པར་མ་བགྱིས་ལགས། བཅོམ་ལྡན་འདས་ཀྱིས་
བཀའ་སྩལ་པ། ཡང་དག་པར་རྫོགས་པའི་སངས་རྒྱས་འོད་སྲུང་གི་གསུང་རབ་ལ་འདི་དག་ཐམས་ཅད་རབ་ཏུ་བྱུང་སྟེ། དགེ་སློང་འཐབ་ཀྲོལ་ཅན་ཁ་མི་མཁས་པ་ཤ་སྟག་ཏུ་གྱུར་ཏེ། དགེ་སློང་དག་ལ་དེར་དེ་རྣམས་ཀྱིས་གདོལ་པ་ཞེས་བྱ་བའི་ཚིག་བརྗོད་དོ། །ཁ་ཅིག་གིས་དུད་འགྲོ་ཞེས་བྱ་བའི་ཚིག་བརྗོད་དེ། གང་དག་གིས་དུད་འགྲོ་ཞེས་བྱ་བའི་ཚིག་བརྗོད་པ་དེ་དག་ནི་དུད་འགྲོར་སྐྱེས་སོ། །གང་དག་གིས་གདོལ་པ་ཞེས་བྱ་བའི་ཚིག་བརྗོད་པ་དེ་དག་ནི་གདོལ་པར་སྐྱེས་སོ། །དེ་དག་གིས་དེར་ཚེ་གཅིག་ཏུ་ཚངས་པར་སྤྱོད་པ་སྤྱད་ནས། དབང་པོ་རྣམས་ཡོངས་སུ་སྨིན་པར་བྱས་པ་དེས་ནི་ད་ལྟར་རྣམ་པར་གྲོལ་བར་གྱུར་ཏོ།། །།གོང་མ་ཕྲེག་ཅེས་བྱ་བ་ནི། བཅོམ་ལྡན་འདས་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་། ཚོང་པ་ལྔ་བརྒྱ་དང་། སྤྲང་པོ་ལྔ་བརྒྱ་དང་། ཐབས་ཅིག་ཏུ་ལྗོངས་རྒྱུ་ཞིང་གཤེགས་པ་ལས། ནགས་ཁྲོད་ཅིག་ཏུ་ལམ་ཕྱུང་སྟེ། བཅོམ་ལྡན་འདས་གཤེགས་པའི་ཚེ། ནགས་ཁྲོད་དེའི་ནང་གི་གནས་སུ་མེ་ཆེན་པོ་འབར་ནས། དེས་སྐྱེ་བོ་ཕལ་པོ་ཆེ་དག་འཇིགས་ཤིང་སྐྲག་པར་གྱུར་ཏེ། བདག་ཅག་ནི་ཚིག་ཟིན་ནོ། །བདག་ཅག་ནི་འཚོ་བར་འགྱུར་བའི་སྐབས་མེད་དོ་སྙམ་མོ། །དེ་ནས་བཅོམ་ལྡན་འདས་ཀྱིས་སྐྱེ་བོ་ཕལ་པོ་ཆེ་དག་འཇིགས་ཤིང་སྐྲག་པར་གཟིགས་སོ། །གཟིགས་ནས་ཀྱང་འགྲོན་པོ་དེ་རྣམས་ཀྱི་མདུན་ལོགས་སུ་གཤེགས་ནས། ཚིགས་སུ་བཅད་དེ་བཀའ་སྩལ་པ། སངས་རྒྱས་ཀུན་གྱི་སྟོབས་གང་དང་། །དགྲ་བཅོམ་རྣམས་ཀྱི་སྟོབས་གང་དང་། །སངས་རྒྱས་དཀོན་མཆོག་གཟི་བརྗིད་ཀྱིས། །མེ་ཁྱོད་ལམ་ནི་དབྱེ་བར་གྱིས། །སངས་རྒྱས་ཀུན་གྱི་སྟོབས་གང་དང་། །དགྲ་བཅོམ་རྣམས་ཀྱི་སྟོབས་གང་དང་། །དམ་ཆོས་དཀོན་མཆོག་གཟི་བརྗིད་ཀྱིས། །མེ་ཁྱོད་ལམ་ནི་དབྱེ་བར་གྱིས། །སངས་རྒྱས་ཀུན་གྱི་སྟོབས་གང་དང་། །དགྲ་བཅོམ་རྣམས་ཀྱི་སྟོབས་གང་དང་། །དགེ་འདུན་དཀོན་མཆོག་གཟི་བརྗིད་ཀྱིས། །མེ་ཁྱོད་ལམ་ནི་དབྱེ་བར་གྱིས། །བཅོམ་ལྡན་འདས་ཀྱིས་དེ་སྐད་ཅེས་གསུངས་མ་ཐག་ཏུ་མེ་ཞི་བར་གྱུར་
ནས། ཚོང་པ་དེ་དག་བཅོམ་ལྡན་འདས་ལ་ཤིན་ཏུ་དགའ་བར་གྱུར་ཏོ། །དགའ་བར་གྱུར་ནས། ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འཁོད་དོ། །དེ་ནས་བཅོམ་ལྡན་འདས་ཀྱིས་དེ་དག་ལ་དེ་དང་འཐུན་པའི་ཆོས་བསྟན་ཏོ། །དེ་ནས་དེ་དག་གི་ནང་ནས་ཁ་ཅིག་གིས་ནི་དྲོ་བར་གྱུར་པ་བསྐྱེད་དོ། །ཁ་ཅིག་གིས་ནི་སྤྱི་བོ་དང་། བདེན་པ་དང་འཐུན་པའི་བཟོད་པ་དང་། འཇིག་རྟེན་གྱི་ཆོས་ཀྱི་མཆོག་དང་། མཐོང་བའི་སྙོམས་པར་འཇུག་པ་བསྐྱེད་དོ། །ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་སོ། །ཁ་ཅིག་གིས་ནི་ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱས་སོ། །ཁ་ཅིག་གིས་ནི་ཕྱིར་མི་འོང་བའི་འབྲས་བུ་མངོན་སུམ་དུ་བྱས་སོ། །ཁ་ཅིག་གིས་ནི་རབ་ཏུ་བྱུང་ནས་དགྲ་བཅོམ་པ་ཉིད་མངོན་སུམ་དུ་བྱས་སོ། །ཁ་ཅིག་གིས་ནི་འཁོར་ལོས་སྒྱུར་བའི་རྒྱལ་པོར་འགྱུར་བའི་ས་བོན་བསྐྱེད་དོ། །ཁ་ཅིག་གིས་ནི་སྟོབས་ཀྱི་འཁོར་ལོས་སྒྱུར་བར་འགྱུར་བ་དང་། ཁ་ཅིག་གིས་ནི་བརྒྱ་བྱིན་དུ་འགྱུར་བ་དང་། ཁ་ཅིག་གིས་ནི་ཚངས་པར་འགྱུར་བ་དང་། ཁ་ཅིག་གིས་ནི་ཉན་ཐོས་ཀྱི་བྱང་ཆུབ་དང་། ཁ་ཅིག་གིས་ནི་རང་སངས་རྒྱས་ཀྱི་བྱང་ཆུབ་དང་། ཁ་ཅིག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ས་བོན་བསྐྱེད་དོ། །འཁོར་དེ་དག་གི་ནང་ནས་ཕལ་ཆེར་ནི་སངས་རྒྱས་ལ་གཞོལ། ཆོས་ལ་འབབ། དགེ་འདུན་ལ་བབ་པར་བྱས་ཏེ་བཀོད་དོ། །དེ་ནས་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ། བཙུན་པ་བཅོམ་ལྡན་འདས་ཀྱིས་སྐྱེ་བོ་ཕལ་པོ་ཆེ་ཞུགས་ཀྱིས་ཚིག་པར་གྱུར་པ་ལས་ཐར་བར་མཛད་ནས། གཡུང་དྲུང་གི་མཐར་ཐུག་པ་གྲུབ་པ་དང་བདེ་བའི་མྱ་ངན་ལས་འདས་པ་ལ་བཀོད་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། ད་ལྟར་འབའ་ཞིག་མ་ཡིན་ཏེ། འདས་པའི་དུས་ན་ཡང་ངས་དུད་འགྲོ་ཕལ་ཆེར་མེའི་འཇིགས་པ་ལས་བསྐྱབས་ནས་ཇི་ལྟར་འཇིགས་པ་མེད་པའི་གནས་སུ་བཀོད་པ་དེ་ཉོན་ཅིག །དགེ་སློང་དག་སྔོན་བྱུང་བ་འདས་པའི་དུས་ན། ནགས་ཁྲོད་ཅིག་ན་བྱ་ཕལ་ཆེར་གནས་སོ། །དེ་ནས་ནགས་ཁྲོད་དེར་ཤིང་སྐམ་པོ་གཅིག་ལ་གཅིག་དྲུད་པ་ལས་མེ་བྱུང་ནས། བྱ་དེ་དག་གི་
ནང་ནས་འགྲོ་ནུས་པ་དེ་དག་ནི་དོང་ངོ་། །འགྲོ་མི་ནུས་པ་དང་། སྒོ་ང་རྣམས་ནི་དེ་ཉིད་དུ་བོར་རོ། །དེའི་ཚེ་བྱང་ཆུབ་སེམས་དཔའ་གོང་མ་ཕྲེག་ཏུ་སྐྱེ་བ་ཞིག་ཡོད་དེ། བྱང་ཆུབ་སེམས་དཔའ་དེས་ཐག་རིང་པོ་ཞིག་ནས་མེ་འབར་ཞིང་འོང་བ་མཐོང་ངོ་། །མཐོང་ནས་ཀྱང་དེ་སེམས་ཅན་དེ་དག་ལ་སྙིང་རྗེ་སྐྱེས་ཏེ། བདག་གིས་སེམས་ཅན་སྡུག་བསྔལ་དང་ཕྲད་པ་འདི་རྣམས་ཀྱི་ཕྱིར་ཡང་བརྩོན་འགྲུས་མ་བསྐྱེད་ན་བདག་གིས་སེམས་ཅན་རྣམས་འཁོར་བ་ལས་ཇི་ལྟར་བསྒྲལ་བར་བྱ་སྙམ་དུ་བསམས་ནས། བྱང་ཆུབ་སེམས་དཔའ་དེས་འདབ་མ་ཆུར་སྤངས་ནས། མེ་ཆེན་པོའི་སྟེང་གི་ནམ་མཁའ་ལ་འདུག་སྟེ། འདབ་མ་སྤྲུགས་ནས་ཚིགས་སུ་བཅད་དེ་སྨྲས་པ། འདི་དག་འདབ་མ་ཡོད་མོད་ཀྱིས། །འདི་དག་ད་དུང་འཕུར་མི་ནུས། །འདི་དག་རྐང་པ་ཡོད་མོད་ཀྱིས། །འདི་དག་ད་དུང་འགྲོ་མི་ནུས། །འདི་རྣམས་ཕ་མ་འཕུར་ཏེ་སོང་། །མེ་ཁྱོད་སྡོད་ལ་མ་འགུལ་ཞིག །བདེན་དང་བདེན་ཚིག་གང་ཡིན་པ། །བདག་གིས་བྱམས་སེམས་རབ་བསྒོམས་པའི། །བདེན་པའི་ཚིག་ནི་འདི་ཡིས་ན། །མེ་ཁྱོད་སྡོད་ལ་མ་འགུལ་ཞིག །དེ་ནས་ལྷའི་དབང་པོ་བརྒྱ་བྱིན་གྱིས། བྱང་ཆུབ་སེམས་དཔའ་སེམས་ཅན་གྱི་དོན་གྱི་ཕྱིར་མི་དགའ་ཞིང་འདུག་པ་མཐོང་ངོ་། །མཐོང་ནས་ཀྱང་དེས་བསམས་པ། འདི་ནི་བསྐལ་པ་བཟང་པོའི་བྱང་ཆུབ་སེམས་དཔའ་ཡིན་ཏེ། སེམས་ཅན་ལ་ཕན་པའི་ཕྱིར་མི་དགའ་ཞིང་འདུག་གིས། མ་ལ་བདག་གིས་གྲོགས་བྱའོ་སྙམ་ནས། ལྷའི་དབང་པོ་བརྒྱ་བྱིན་གྱིས་ཆར་མོ་ཆེ་ཕབ་སྟེ། མེ་དེ་ཞི་བར་གྱུར་ནས་སེམས་ཅན་དེ་དག་ཐམས་ཅད་མེའི་འཇིགས་པ་ལས་ཐར་བར་གྱུར་ཏོ། །དགེ་སློང་དག་ཇི་སྙམ་དུ་སེམས། དེའི་ཚེ་བྱ་གོང་མ་ཕྲེག་ཏུ་གྱུར་པ་བྱང་ཆུབ་སེམས་དཔའི་སྤྱོད་པ་ལ་གནས་པ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་ནགས་ཁྲོད་དེ་ན་གནས་པའི་སེམས་ཅན་དུ་གྱུར་པ་གང་ཡིན་པ་དེ་དག་ནི་སྐྱེ་བོ་ཕལ་པོ་ཆེ་འདི་དག་ཁོ་ན་ཡིན་ཏེ། དེའི་ཚེ་ཡང་ངས་དེ་དག་མེའི་འཇིགས་པ་ལས་ཐར་བར་བྱས་ཏེ། འཇིགས་པ་མེད་པའི་གནས་སུ་བཀོད་དོ། །ད་ལྟར་ཡང་ངས་མེའི་འཇིགས་པ་ལས་ཐར་བར་བྱས་ནས།
གཡུང་དྲུང་གི་མཐར་ཐུག་པ་གྲུབ་པ་དང་། བདེ་བའི་མྱ་ངན་ལས་འདས་པ་ལ་བཀོད་དོ། །གཞན་ཡང་ཡང་དག་པར་རྫོགས་པའི་སངས་རྒྱས་འོད་སྲུང་གི་གསུང་རབ་ལ། འདི་དག་ཐམས་ཅད་ཁ་ཅིག་ནི་རབ་ཏུ་བྱུང་ངོ་། །ཁ་ཅིག་ནི་དགེ་བསྙེན་དུ་གྱུར་ཏེ། དེར་འདི་རྣམས་ཀྱིས་ཚེ་གཅིག་ཏུ་ཚངས་པར་སྤྱོད་པའི་གནས་བསྲུངས་ནས། དབང་པོ་རྣམས་ཡོངས་སུ་སྨིན་པར་བྱས་པ་དེས་ནི་ད་ལྟར་རྣམ་པར་གྲོལ་བར་གྱུར་ཏོ།། །།ཕ་ཞེས་བྱ་བ་ནི། གླེང་གཞི་རྒྱལ་པོའི་ཁབ་ན་བཞུགས་ཏེ། དེའི་ཚེ་རྒྱལ་པོའི་ཁབ་ན་ཁྱིམ་བདག་ནོར་ཅན་ཞེས་བྱ་བ་ཕྱུག་ཅིང་ནོར་མང་ལ་ལོངས་སྤྱོད་ཆེ་བ། ཡོངས་སུ་འཛིན་པ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་མཉམ་པ། རྣམ་ཐོས་ཀྱི་བུའི་ནོར་དང་འགྲན་པ་ཞིག་གནས་པ་དེས་ཐབས་ཟླར་བབ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་ཏུ་རྩེ་ཞིང་དགའ་ལ་དགའ་མགུར་སྤྱོད་པ་ལས། ཕྱི་ཞིག་ན་དེའི་ཆུང་མ་ལ་བུ་ཆགས་ནས་དེ་ཟླ་བ་དགུའམ་བཅུ་ལོན་པ་དང་། ཁྱེའུ་གཟུགས་བཟང་ཞིང་བལྟ་ན་སྡུག་ལ་མཛེས་པ་མདོག་བཟང་བ། གསེར་གྱི་ཁ་དོག་ཅན་མགོ་བོ་གདུགས་ལྟར་འདུག་པ་ལག་པ་རིང་བ། དཔྲལ་བའི་དབྱེས་ཆེ་བ། སྣ་མཐོ་བ། སྣ་ལེགས་པ། སྨིན་མ་སྟུག་པ་ཞིག་བཙས་ཏེ། ཁྱེའུ་དེ་བཙས་མ་ཐག་ཏུ་སྐྱེ་བོ་ཕལ་པོ་ཆེས་བལྟ་ན་སྡུག་པར་གྱུར་ཏོ། །དེ་ནས་དེའི་ཚེ་བཙས་སྟོན་རྒྱས་པར་བྱས་ནས། ཁྱེའུ་འདིའི་མིང་ཇི་སྐད་གདགས་ཞེས་མིང་འདོགས་པར་བྱེད་དེ། ཁྱེའུ་འདི་བཙས་མ་ཐག་ཏུ་སྐྱེ་བོ་ཕལ་པོ་ཆེས་བལྟས་ན་སྡུག་པར་གྱུར་པས་ན། དེའི་ཕྱིར་ཁྱེའུ་འདིའི་མིང་བལྟ་ན་སྡུག་ཅེས་གདགས་སོ་ཞེས་ཟེར་རོ། །དེ་ནས་ཁྱེའུ་བལྟ་ན་སྡུག།འོ་མ་དང་། ཞོ་དང་། མར་དང་། ཞུན་མར་དང་། མར་གྱི་ཉིང་གུས་བསྐྱེད་བསྲིངས་ནས། རྒྱལ་པོའི་ཁབ་ཐམས་ཅད་དུ་དེའི་གྲགས་པ་རྒྱས་པར་གྱུར་ཏོ། །དེ་ནས་གང་གི་ཚེ་བཅོམ་ལྡན་འདས་ཀྱིས་བླ་ན་མེད་པའི་ཡེ་ཤེས་བརྙེས་ནས་མཐར་གྱིས་གདུལ་བར་བྱ་བའི་དོན་མཛད་ཅིང་། རྒྱལ་པོའི་ཁབ་ཏུ་བྱོན་པ་དེའི་ཚེ། དེར་བཅོམ་ལྡན་འདས་ཀྱིས་འོད་མའི་ཚལ་གཞེས་ནས།
སེམས་ཅན་སྟོང་ཕྲག་དུ་མ་སྐྱབས་སུ་འགྲོ་བ་དང་། བསླབ་པའི་གཞི་རྣམས་ལ་བཀོད་དོ། །སྐྱེ་བོ་མང་པོ་དེ་དག་ཀྱང་སྡེ་ཚན་ནས་སྡེ་ཚན་དང་། ཕ་ཚན་ནས་ཕ་ཚན་དང་། དགའ་སྡེ་ནས་དགའ་སྡེར་དུས་དུས་སུ་བཅོམ་ལྡན་འདས་ལ་བལྟ་བའི་ཕྱིར་འདོང་བར་བྱེད་དོ། །ཕྱིན་ཅད་ཁྱེའུ་དེ་བལྟ་བའི་ཕྱིར་འདོང་བར་མི་བྱེད་དོ། །དེ་ནས་ཕྱི་ཞིག་ན་ཁྱེའུ་བལྟ་ན་སྡུག་གིས་དྲིས་པ། སྔོན་ཅད་ནི་སྐྱེ་བོ་མང་པོ་འདི་དག་ང་བལྟ་བའི་ཕྱིར་འོང་ན། ད་ནི་ང་བལྟ་བའི་ཕྱིར་མི་འོང་བ་ཅི་ལས་གྱུར། དེ་དག་གིས་སྨྲས་པ། དེ་དག་ནི་ད་ལྟར་བཅོམ་ལྡན་འདས་བལྟ་བའི་ཕྱིར་འདོང་བར་བྱེད་དོ། །ཁྱེའུས་སྨྲས་པ། བཅོམ་ལྡན་འདས་ཞེས་བྱ་བ་དེ་ལྟ་བུ་སུ་ཞིག །དེ་ནས་ཕ་མ་གཉིས་ཀྱིས་དེ་ལ་བཅོམ་ལྡན་འདས་ཀྱི་བསྔགས་པ་རྒྱས་པར་བརྗོད་དོ། །དེ་ནས་དེ་ཐོས་མ་ཐག་ཏུ་ཁྱེའུ་དེ་ངོ་མཚར་དུ་གྱུར་ཏེ། བདག་བས་ཆེས་བལྟ་ན་སྡུག་པ་དེ་ཇི་ལྟ་བུ་ཞིག་སྙམ་ནས། ཕ་མ་གཉིས་ལ་སྨྲས་པ། ཡབ་ཡུམ་བདག་བཅོམ་ལྡན་འདས་དེ་བལྟ་བའི་སླད་དུ་མཆི་བར་འཚལ་ལོ། །ཕ་མ་གཉིས་ཀྱིས་སྨྲས་པ། བུ་ཐབས་ཅིག་ཏུ་འདོང་ངོ་ཞེས་སྨྲས་ནས། ཕ་མ་གཉིས་ཀྱིས་ཁྱེའུ་དེ་ཁྲིད་དེ། འོད་མའི་ཚལ་དུ་སོང་ནས། ཁྱེའུ་དེས་ཐག་རིང་པོ་ཞིག་ནས་སངས་རྒྱས་བཅོམ་ལྡན་འདས་སྐུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ལེགས་པར་བརྒྱན་ཅིང་སྤ་བར་བྱས་པ། མེ་ལུས་ཀྱི་དབྱིབས་སུ་འདུག་པ་ལྟ་བུ། མེ་ལྕེ་མར་གྱིས་བཏབ་པ་ལྟ་བུ། མར་མེ་གསེར་གྱི་སྣོད་དུ་བཞག་པ་ལྟ་བུ། མཆོད་སྡོང་རིན་པོ་ཆེ་སྣ་ཚོགས་ཀྱིས་སྤྲས་པ་ལྟ་བུ། བློ་གསལ་ཞིང་དྲི་མ་མེད་ལ་རྣམ་པར་དག་པ་དང་ལྡན་པའི་སངས་རྒྱས་བཅོམ་ལྡན་འདས་མཐོང་ངོ་། །མཐོང་ནས་ཀྱང་བཅོམ་ལྡན་འདས་ལ་མཆོག་ཏུ་དགའ་བ་སྐྱེས་ནས་དེ་ལ་ཕའི་འདུ་ཤེས་ཀྱང་བྱུང་སྟེ། དེས་ཕ་ཕ་ཞེས་སྒྲ་ཕྱུང་སྟེ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཕ་ཙམ་དུ་འཛིན་ཅིང་བཅོམ་ལྡན་འདས་ཀྱི་ཞབས་དྲུང་དུ་འདུག་གོ །དེའི་ཕ་མ་གཉིས་ཀྱང་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། ཆོས་མཉན་པའི་ཕྱིར་སྤྱན་སྔར་འདུག་གོ །
དེ་ནས་བཅོམ་ལྡན་འདས་ཀྱིས་དེ་དག་གི་རྐྱེན་དུ་འཚམ་པའི་ཆོས་བསྟན་ནས་ཅང་མི་གསུང་བར་བཞུགས་སོ། །དེ་ནས་ཁྱིམ་བདག་ནོར་ཅན་དང་། དེའི་ཆུང་མས་བཅོམ་ལྡན་འདས་ཀྱི་གཏམ་མཇུག་རྫོགས་པར་རིག་ནས། ཁྱེའུའི་ལག་པ་ནས་བཟུང་སྟེ་འགྲོའོ་ཞེས་བྱས་ན། ཁྱེའུ་དེ་བཅོམ་ལྡན་འདས་ཀྱི་ཐད་ནས་དབྲལ་བར་མ་ནུས་སོ། །དེ་ནས་ཕ་མ་གཉིས་ཀྱིས་བསམས་པ། བཅོམ་ལྡན་འདས་བདག་ཅག་གི་ཁྱིམ་དུ་སྤྱན་དྲངས་དང་། ཐབས་དེས་ན་འདི་བདག་གིས་ཁྱིམ་དུ་དསྲེང་ནུས་པར་འགྱུར་རོ་སྙམ་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགུང་བདུན་གྱི་བར་དུ་བཅོམ་ལྡན་འདས་བདག་ཅག་གི་ཁྱིམ་དུ་བཤོས་གསོལ་བར་ཅི་གནང་ཞེས་བྱས་སོ། །དེ་ནས་བཅོམ་ལྡན་འདས་ཀྱིས་ཁྱིམ་བདག་དེ་ལ་ཅང་མི་གསུང་བས་གནང་ངོ་། །དེ་ནས་ཁྱིམ་བདག་དེས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས། ཆུང་མ་ལ་སྨྲས་པ། བཟང་མོ་སོང་ལ་བཅོམ་ལྡན་འདས་ཀྱི་ཞལ་ཟས་སྟ་གོན་གྱིས་ཤིག །བདག་ནི་ཁྱེའུ་དང་ལྷན་ཅིག་ཏུ་འདུག་གོ་ཞེས་བྱས་ནས། ཁྱིམ་བདག་ནི་ཁྱེའུ་དེ་དང་ལྷན་ཅིག་ཏུ་རྒྱལ་བུ་རྒྱལ་བྱེད་ཀྱི་ཚལ་དུ་མཚན་མོ་དགོངས་མལ་བཏབ་བོ། །ཆུང་མས་ཀྱང་དེ་ཉིད་ཀྱི་མཚན་མོ་བཟའ་བ་དང་། བཅའ་བ་གཙང་མ་བཟང་པོ་མང་པོ་སྦྱར་ནས། ནང་པར་སྔར་ལངས་ཏེ་གདན་བཤམས་ནས། ཆུ་ར་བཀང་སྟེ་བཞག་ནས། བཅོམ་ལྡན་འདས་ལ་ཕྲིན་གྱིས་གདུགས་ཚོད་བསྐུལ་བ། བཙུན་པ་གདུགས་ཚོད་ལ་བབ་སྟེ་བཤོས་ལགས་ན། བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་ཏེ་གཤེགས་སུ་གསོལ་ཞེས་བསྐུལ་ཏེ། དེ་ནས་བཅོམ་ལྡན་འདས་སྔ་དྲོ་ཤམ་ཐབས་དང་ཆོས་གོས་གསོལ་ཏེ། ལྷུང་བཟེད་བསྣམས་ནས། དགེ་སློང་མང་པོས་ཞམ་རིང་བྱས་ཏེ། དགེ་སློང་གི་དགེ་འདུན་གྱིས་མདུན་དུ་བདར་ནས། ཁྱིམ་བདག་དེའི་བཀད་ས་ག་ལ་བ་དེར་གཤེགས་ཏེ་བྱོན་ནས། བཅོམ་ལྡན་འདས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ལ་བཞུགས་
སོ། །དེ་ནས་ཁྱིམ་བདག་དེས་སངས་རྒྱས་ལ་སོགས་པ་དགེ་སློང་གི་དགེ་འདུན་རྣམས་བདེ་བར་བཞུགས་པར་རིག་ནས། རང་གི་ལག་ནས་བཟའ་བ་དང་བཅའ་བ་གཙང་མ་བཟང་པོ་མང་པོས་ཚིམ་པར་བྱས་ཏེ། ཅི་བཞེད་པ་བསྟབས་ནས། བཅོམ་ལྡན་འདས་བཤོས་གསོལ་ཟིན་ཏེ། བསྩང་སྡེར་ནི་གྱུ་ཕྱག་ནི་བཅབས་པར་རིག་ནས། སྟན་ཆེས་དམའ་བ་ཞིག་བླངས་ཏེ། ཆོས་མཉན་པའི་ཕྱིར་འཁོར་དང་བཅས་ཏེ། བཅོམ་ལྡན་འདས་ཀྱི་སྤྱན་སྔར་འཁོད་དོ། །དེ་ནས་བཅོམ་ལྡན་འདས་ཀྱིས་དེ་དག་གི་བསམ་པ་དང་། བག་ལ་ཉལ་དང་། ཁམས་དང་། ཤེས་པ་དང་། རང་བཞིན་ཐུགས་སུ་ཆུད་ནས། དེ་དག་དང་འཐུན་པའི་ཆོས་བསྟན་ཏེ། དེས་ན་ཁྱིམ་བདག་དེ་འཁོར་དང་བཅས་པས། སྟན་དེ་དག་ཉིད་ལ་འཁོད་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་མཐོན་པོ་ཉི་ཤུ་ཡེ་ཤེས་རྡོ་རྗེས་བཅོམ་ནས། རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་སོ། །དེ་ལྟར་བདེན་པ་མཐོང་ནས། ཁྱེའུ་དེས་ཕ་མ་གཉིས་ལ་གསོལ་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་། བསྙེན་པར་རྫོགས་ཤིང་། དགེ་སློང་གི་དངོས་པོ་འཐོབ་ཏུ་རུང་ན། བདག་ཀྱང་བཅོམ་ལྡན་འདས་ཀྱི་ཐད་དུ་ཚངས་པར་སྤྱོད་པ་སྤྱད་པར་འཚལ་ལོ། །དེ་ནས་བཅོམ་ལྡན་འདས་ཀྱིས་དགེ་སློང་ཚུར་ཤོག་ཅེས་བྱ་བའི་ཚིག་གིས་རབ་ཏུ་ཕྱུང་སྟེ། བསྙེན་པར་རྫོགས་པར་མཛད་ནས། དེ་ལ་ལུང་ཡང་ཕོག་སྟེ། དེས་ཀྱང་བརྩོན་པ་དང་བསྒྲུབ་པ་དང་། འབད་པས་ཉོན་མོངས་པ་ཐམས་ཅད་སྤངས་ནས། དགྲ་བཅོམ་པ་ཉིད་མངོན་སུམ་དུ་བྱས་ཏེ། དེ་དགྲ་བཅོམ་པ་ཁམས་གསུམ་པའི་འདོད་ཆགས་དང་བྲལ་བར་གྱུར་ནས། གསེར་དང་བོང་བར་མཉམ་པ། ནམ་མཁའ་དང་ལག་མཐིལ་དུ་འདྲ་བའི་སེམས་དང་ལྡན་པ། ཙན་དན་སྦངས་པ་ལྟ་བུར་བསིལ་བར་གྱུར་པ་མ་རིག་པའི་སྒོ་ངའི་སྦུབས་བཅོམ་པ་རིག་པ་དང་མངོན་པར་ཤེས་པ་དང་སོ་སོ་ཡང་དག་པར་རིག་པ་ཐོབ་པ་སྲིད་པའི་རྙེད་པ་དང་ཆགས་པ་དང་བཀུར་སྟི་ལ་མི་ལྟ་བ་དབང་པོ་དང་། ཉེ་
དབང་དང་བཅས་པའི་ལྷ་རྣམས་ཀྱིས་མཆོད་ཅིང་རྗེད་པ་དང་གུས་པར་སྨྲ་བའི་གནས་སུ་གྱུར་ཏོ། །དེ་ནས་དགེ་སློང་རྣམས་ཀྱིས་སངས་རྒྱས་བཅོམ་ལྡན་འདས་ལ་གསོལ་པ། བཙུན་པ་བཅོམ་ལྡན་འདས་བྱིས་པ་སྟོང་ཕྲག་དུ་མས་མཐོང་ཡང་སུ་ཡང་འདི་ཁོ་ན་ལྟར་བཅོམ་ལྡན་འདས་ལ་མཇལ་བར་མི་བགྱིད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཁྱེའུ་འདི་ནི་ངའི་འདས་མ་ཐག་པའི་ཚེ་རབས་ལྔ་བརྒྱར་བུར་གྱུར་པས་ན། སྔོན་གྱི་བག་ཆགས་དེ་ཁོ་ནས་འདིས་ང་ལ་མཇལ་བར་བྱེད་དོ། །གསོལ་པ། ཁྱེའུ་འདིས་ལས་ཅི་བགྱིས་ན་ལས་དེའི་རྣམ་པར་སྨིན་པས་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེས་ཏེ། འདི་གཟུགས་བཟང་ཞིང་བལྟ་ན་སྡུག་ལ་མཛེས་པར་གྱུར་ལ། འདིས་བཅོམ་ལྡན་འདས་ཀྱང་མཉེས་པར་བགྱིས་ནས། མི་མཉེས་པར་མི་བགྱིས་ཏེ། བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་ཏེ། དགྲ་བཅོམ་པ་ཉིད་མངོན་སུམ་དུ་བགྱིས་ལགས། བཅོམ་ལྡན་འདས་ཀྱིས་བཀའ་སྩལ་པ། སྨོན་ལམ་གྱི་དབང་ལས་གྱུར་ཏོ། །གསོལ་པ་བཙུན་པ་འདིས་སྨོན་ལམ་གང་དུ་བཏབ་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་སྔོན་བྱུང་བ་འདས་པའི་དུས་ན། བསྐལ་པ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་བཞི་ཁྲི་ཐུབ་པ་ན་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཁོར་བ་འཇིག་ཅེས་བྱ་བ་འཇིག་རྟེན་དུ་བྱུང་སྟེ། དེར་གང་གི་ཚེ་ཡང་དག་པར་རྫོགས་པའི་སངས་རྒྱས་འཁོར་བ་འཇིག་གིས། བླ་ན་མེད་པའི་ཡེ་ཤེས་བརྙེས་ནས། རྒྱལ་པོའི་ཕོ་བྲང་མཛེས་ལྡན་དུ་གཤེགས་པ་དེའི་ཚེ། རྒྱལ་པོ་མཛེས་པས་ཡང་དག་པར་རྫོགས་པའི་སངས་རྒྱས་འཁོར་བ་འཇིག་གི་ཕྱིར། གཙུག་ལག་ཁང་རྣམ་པ་ཐམས་ཅད་ཡོངས་སུ་རྫོགས་པ་ཞིག་བྱས་ནས། ཡང་དག་པར་རྫོགས་པའི་སངས་རྒྱས་འཁོར་བ་འཇིག་ལ་
ཕུལ་ལོ། །རྒྱལ་པོ་མཛེས་པ་དེའི་ལུགས་ཀྱིས་ན། ཉིན་གཅིག་བཞིན་དུ་འཁོར་དང་བཅས་ཏེ། གཙུག་ལག་ཁང་དུ་འགྲོ་ཞིང་གཙུག་ལག་ཁང་གི་བྱི་དོར་བྱེད་དོ། །དེ་ནས་ཕྱི་ཞིག་ན་རྒྱལ་པོ་མཛེས་པ་དེ་གཙུག་ལག་ཁང་དུ་སོང་བ་ལས་བྱ་བ་ཞིག་བྱུང་ནས་དེས་བུ་ཐུ་བོ་བསྐོས་ཏེ། དེང་ཁྱོད་ཀྱིས་གཙུག་ཁང་གི་བྱི་དོར་གྱིས་ཤིག་ཅེས་བསྒོ་ནས་རྒྱལ་པོ་སོང་ངོ་། །དེ་ནས་རྒྱལ་པོའི་བུ་འཁོར་དང་བཅས་པ་གཙུག་ལག་ཁང་གི་བྱི་དོར་བྱེད་པ་ལ་ཞུགས་པ་ལས། ཡང་དག་པར་རྫོགས་པའི་སངས་རྒྱས་འཁོར་བ་འཇིག་གིས་ཅི་ནས་རྒྱལ་པོའི་བུ་དེ་ཉི་མ་ནུབ་ཀྱི་བར་དུ་ཡང་། གཙུག་ལག་ཁང་གི་བྱི་དོར་བྱེད་མི་ནུས་པ་དེ་ལྟ་བུར་བྱིན་གྱིས་བརླབས་ནས། དེ་གཙུག་ལག་ཁང་དེ་ཉིད་དུ་དགོངས་མལ་བཏབ་བོ། །དེས་དེར་དགོངས་མལ་བཏབ་ནས། དགེ་སློང་རྣམས་ཆོ་འཕྲུལ་དག་བྱེད་པ་ཡང་མཐོང་། བརྒྱ་བྱིན་དང་། ཚངས་པ་ལ་སོགས་པ་འོང་བ་ཡང་མཐོང་ངོ་། །དེ་ནས་དེ་མཐོང་མ་ཐག་ཏུ་དེ་བཅོམ་ལྡན་འདས་ལ་ཤིན་ཏུ་དགའ་བར་གྱུར་ནས། གཙུག་ཁང་དེ་ཉིད་ན་དགེ་སློང་དག་གི་རིམ་གྲོ་བྱེད་པ་ལ་བརྩོན་པར་གྱུར་ཏེ། ཕྱིར་གྲོང་ཁྱེར་དུ་འགྲོ་མི་འདོད་པར་གྱུར་ཏོ། །དེ་དེར་ལོ་ལྔ་སྟོང་གི་བར་དུ་དགེ་སློང་རྣམས་ལ་རིམ་གྲོ་བྱེད་ཅིང་འདུག་སྟེ། བྱམས་པའི་ཏིང་ངེ་འཛིན་ཀྱང་བསྐྱེད་ནས། དེས་ཚེ་གཅིག་ཏུ་སྐྱབས་སུ་འགྲོ་བ་དང་། བསླབ་པའི་གཞི་རྣམས་བསྲུངས་ནས། འཆི་ཀར་སྨོན་ལམ་བཏབ་པ། དགེ་བའི་རྩ་བ་འདིས་ན་བདག་གང་དང་གང་དུ་སྐྱེ་བར་འགྱུར་བ་དེ་དང་དེར་གཟུགས་བཟང་ཞིང་བལྟ་ན་སྡུག་ལ་མཛེས་པར་གྱུར་ཅིག །བདག་གིས་སྟོན་པ་འདི་ལྟ་བུ་མཉེས་པར་བྱེད་པར་གྱུར་ཅིག །མི་མཉེས་པར་བྱེད་པར་མ་གྱུར་ཅིག །དེ་ཁོ་ནའི་བསྟན་པ་ལ་རབ་ཏུ་བྱུང་ནས། ཉོན་མོངས་པ་ཐམས་ཅད་སྤངས་ཏེ། དགྲ་བཅོམ་པ་ཉིད་མངོན་སུམ་དུ་བྱེད་པར་གྱུར་ཅིག་ཅེས་བྱས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་རྒྱལ་པོའི་བུར་གྱུར་པ་གང་ཡིན་པ་དེ་ནི་ཁྱེའུ་འདི་ཁོ་ན་ཡིན་ཏེ། དེས་དེར་ཡང་དག་པར་རྫོགས་པའི་སངས་རྒྱས་འཁོར་བ་འཇིག་གི་ཉན་ཐོས་ཀྱི་དགེ་འདུན་རྣམས་ལ་བཀུར་སྟི་བྱས་ནས།
སྨོན་ལམ་བཏབ་པའི་ལས་དེའི་རྣམ་པར་སྨིན་པས་གང་དང་གང་དུ་སྐྱེས་པ་དེ་དང་དེར་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེས་ཏེ། དགེ་སློང་དག་ང་ཡང་དག་པར་རྫོགས་པའི་སངས་རྒྱས་འཁོར་བ་འཇིག་དང་ཤིན་ཏུ་མཉམ་པ་དང་། ཤུགས་མཉམ་པ་དང་། མཛད་པ་མཉམ་པ་དང་། ཐབས་མཉམ་པ་བརྙེས་པར་གྱུར་ནས། འདིས་ང་མཉེས་པར་བྱས་ཏེ། མི་མཉེས་པར་མ་བྱས་ལ་ང་ཉིད་ཀྱི་བསྟན་པ་ལ་རབ་ཏུ་བྱུང་ནས། ཉོན་མོངས་པ་ཐམས་ཅད་སྤངས་ཏེ། དགྲ་བཅོམ་པ་ཉིད་མངོན་སུམ་དུ་བྱས་སོ། །དེས་དེར་བྱམས་པ་བསྒོམས་པའི་ལས་དེའི་རྣམ་པར་སྨིན་པ་དེས་ནི་གང་དང་གང་དུ་སྐྱེས་པ་དེ་དང་དེར་གཟུགས་བཟང་ཞིང་བལྟ་ན་སྡུག་ལ་མཛེས་པར་གྱུར་ཏོ། །གཞན་ཡང་ཡང་དག་པར་རྫོགས་པའི་སངས་རྒྱས་འོད་སྲུང་གི་གསུང་རབ་ལ་འདི་རབ་ཏུ་བྱུང་སྟེ། དེར་འདིས་ཚེ་གཅིག་ཏུ་ཚངས་པར་སྤྱོད་པ་སྤྱད་དེ། དབང་པོ་རྣམས་ཡོངས་སུ་སྨིན་པར་བྱས་པ་དེས་ན་ད་ལྟར་རྣམ་པར་གྲོལ་བར་གྱུར་ཏོ།། །།མི་རྒོད་ཅེས་བྱ་བ་ནི། གླེང་གཞི་མཉན་དུ་ཡོད་པ་ན་བཞུགས་ཏེ། དེའི་ཚེ་མཉན་དུ་ཡོད་པ་ནས། རྒྱལ་པོའི་ཁབ་ཀྱི་བར་མཚམས་ན། ཤིང་་ལའི་ནགས་ཁུང་ན། མི་རྒོད་ལྔ་བརྒྱ་ཙམ་ཞིག་ཁྲོ་ཞིང་གནས་ཏེ། དེ་དག་དེ་ན་འཁོད་པས་སྐྱེ་བོ་མང་པོ་ཁ་འདོག་པར་བྱེད་དོ། །དེ་ནས་ཕྱི་ཞིག་ན་དེར་འགྲོན་པོ་མང་པོ་དག་ཅིག་བཅོམ་ནས། ཚོང་པ་རྣམས་རྒྱལ་པོ་གསལ་རྒྱལ་གྱི་ཐད་དུ་དོང་སྟེ། རྒྱལ་པོ་ལ་གསོལ་ནས། རྒྱལ་པོ་གསལ་རྒྱལ་གྱིས་བུ་འཕགས་སྐྱེས་པོ་དཔུང་གི་ཚོགས་ཡན་ལག་བཞི་དང་ལྡན་པ་བསྒྲོགས་ཏེ། དེར་བཏང་ནས་དེས་མི་རྒོད་ལྔ་བརྒྱ་པོ་དེ་དག་གསོན་པོར་བཟུང་སྟེ་འོང་ནས། རྒྱལ་པོ་གསལ་རྒྱལ་ལ་ཕུལ་ལོ། །དེ་ནས་རྒྱལ་པོ་གསལ་རྒྱལ་གྱིས་མི་རྒོད་ལྔ་བརྒྱ་གསོད་དུ་བཏང་སྟེ། གཤེད་མ་རྣམས་ཀྱིས་མི་རྒོད་ལྔ་བརྒྱ་པོ་དེ་དག་བསད་པའི་སར་ཁྲིད་པ་ན། སངས་རྒྱས་བཅོམ་ལྡན་འདས་བགྲོད་པ་གཅིག་པུའི་ལམ་སྟོན་པ་རྣམ་པ་གཉིས་ཀྱི་ཤེས་བྱ་དང་། ཡེ་ཤེས་ལ་མངའ་བརྙེས་པ། མ་འདྲེས་པའི་དྲན་པར་ཉེ་བར་བཞག་པ་གསུམ་ལ་མཁས་པ། མི་འཇིགས་པ་བཞིས་མི་འཇིགས་པ།
འགྲོ་བ་ལྔར་འགྲོ་བ་ལས་རྣམ་པར་གྲོལ་བ་སྐྱེ་མཆེད་དྲུག་ལ་མཁས་པ། བྱང་ཆུབ་ཀྱི་ཡན་ལག་བདུན་ལ་སྤྱོད་ཡུལ་བ། རྣམ་པར་ཐར་པ་བརྒྱད་ལ་བསམ་གཏན་པ། མཐར་གྱིས་གནས་པའི་སྙོམས་པར་འཇུག་པ་དགུ་ལ་སྙོམས་པར་འཇུག་པ། སྟོབས་བཅུའི་སྟོབས་དང་ལྡན་པ། །ཡང་དག་པའི་སེང་གེའི་སྒྲ་ཆེན་པོ་སྒྲོགས་པ་རྣམས་ནི། ཆོས་ཉིད་ཀྱིས་ཉིན་དུས་གསུམ་མཚན་དུས་གསུམ་སྟེ་ཉིན་མཚན་དུས་དྲུག་ཏུ་སངས་རྒྱས་ཀྱི་སྤྱན་གྱིས་འཇིག་རྟེན་ལ་གཟིགས་ཏེ། སུ་ནི་རྒུད། སུ་ནི་དར། སུ་ནི་ཕོངས་ཤིང་འདུག །སུ་ནི་ཉམ་ང་བར་གྱུར། སུ་ནི་གནོད་པ་དང་ལྡན། སུ་ནི་ཕོངས་ཤིང་ཉམ་ང་བ་དང་གནོད་པ་དང་ལྡན། སུ་ནི་ངན་སོང་དུ་གཞོལ། སུ་ནི་ངན་སོང་དུ་འབབ། སུ་ནི་ངན་སོང་དུ་བབ། སུ་ནི་ངས་ངན་སོང་ནས་ཕྱུང་སྟེ། མཐོ་རིས་དང་ཐར་པ་དང་འབྲས་བུ་ལ་གཞག་པར་བྱ། སུ་ནི་ཉེས་པར་སྤྱོད་པའི་འདམ་དུ་བྱིང་བ་ལས་ལག་ནས་དྲང་བར་བྱ། སུ་ནི་འཕགས་པའི་ནོར་བདུན་མེད་པ་ལས་འཕགས་པའི་ནོར་བདུན་གྱི་དབང་ཕྱུག་ལ་དབང་བྱེད་དུ་གཞུག་པར་བྱ། སུ་ནི་དགེ་བའི་རྩ་བ་རྣམས་མ་བསྐྱེད་པ་ལས་བསྐྱེད་པར་བྱ། སུ་ནི་དགེ་བའི་རྩ་བ་རྣམས་བསྐྱེད་ཟིན་པ་ལས་ཡོངས་སུ་སྨིན་པར་བྱ། སུ་ནི་དགེ་བའི་རྩ་བ་རྣམས་ཡོངས་སུ་སྨིན་ཟིན་པ་ལས་ཡེ་ཤེས་ཀྱི་མཚོན་གྱིས་བརྟོལ་བར་བྱ། སུ་ལ་ནི་སངས་རྒྱས་བྱུང་བས་བརྒྱན་པའི་འཇིག་རྟེན་འབྲས་བུ་ཡོད་པར་བྱ་སྙམ་དུ་ཡེ་ཤེས་གཟིགས་པ་འཇུག་གོ །རྒྱ་མཚོ་ཆུ་སྲིན་རྣམས་ཀྱི་གནས། །དུས་རླབས་ཡོལ་བར་འགྱུར་ཡང་སྲིད། །གདུལ་བར་བྱ་བའི་སྲས་རྣམས་ལ། །སངས་རྒྱས་དུས་ལས་ཡོལ་བ་མེད། །དེ་ནས་བཅོམ་ལྡན་འདས་ཀྱིས་མི་རྒོད་ལྔ་བརྒྱ་འདུལ་བའི་དུས་ལ་བབ་པར་དགོངས་ནས། རྒྱལ་བུ་རྒྱལ་བྱེད་ཀྱི་ཚལ་ནས་མི་སྣང་བར་གྱུར་ཏེ། རྒྱལ་པོའི་ཁབ་ཏུ་གཤེགས་སོ། །དེ་ནས་རྒྱལ་པོ་གསལ་རྒྱལ་གྱིས་ཐག་རིང་པོ་ཞིག་ནས་བཅོམ་ལྡན་འདས་མཐོང་ངོ་། །མཐོང་ནས་ཀྱང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་
གསོལ་ཏོ། །བཅོམ་ལྡན་འདས་ཅི་ལ་གཤེགས་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་རིགས་ཀྱི་བུ་ལྔ་བརྒྱ་པོ་དེ་རྣམས་མ་བསད་པར་ཐོང་ཤིག །རྒྱལ་པོས་གསོལ་པ། གལ་ཏེ་རབ་ཏུ་བྱུང་ན་བཏང་བར་འཚལ་ལོ་ཞེས་གསོལ་ནས། དེ་ནས་རྒྱལ་པོ་གསལ་རྒྱལ་གྱིས་མི་རྒོད་ལྔ་བརྒྱ་པོ་དེ་དག་ཕྱིར་ཟློག་སྟེ། བཅོམ་ལྡན་འདས་ལ་ཕུལ་ལོ། །དེ་ནས་བཅོམ་ལྡན་འདས་ཀྱིས་དེ་རྣམས་རྒྱལ་བུ་རྒྱལ་བྱེད་ཀྱི་ཚལ་དུ་ཁྲིད་ནས་རབ་ཏུ་ཕྱུང་སྟེ། བསྙེན་པར་རྫོགས་པར་མཛད་ནས། དེ་དག་ལ་ལུང་ཡང་ཕོག་སྟེ། དེ་དག་གིས་ཀྱང་བརྩོན་པ་དང་། བསྒྲུབ་པ་དང་འབད་པས་ཉོན་མོངས་པ་ཐམས་ཅད་སྤངས་ཏེ། དགྲ་བཅོམ་པ་ཉིད་མངོན་སུམ་དུ་བྱས་སོ། །དེ་ནས་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ། བཙུན་པ་བཅོམ་ལྡན་འདས་ཀྱིས་མི་རྒོད་ལྔ་བརྒྱ་སྲོག་ཕངས་པ་སྩལ་ཏེ། གཡུང་དྲུང་གི་མཐར་ཐུག་པ་གྲུབ་པ་དང་། བདེ་བའི་མྱ་ངན་ལས་འདས་པ་ལ་བཀོད་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། ད་ལྟར་འབའ་ཞིག་མ་ཡིན་ཏེ། འདས་པའི་དུས་ན་ཡང་ངས་རིགས་ཀྱི་བུ་ལྔ་བརྒྱ་པོ་འདི་རྣམས་སྲོག་ཕངས་པ་བྱིན་ཏེ། ཅི་ལྟར་བསམ་གཏན་བཞི་དང་མངོན་པར་ཤེས་པ་ལྔ་ལ་བཀོད་པ་དེ་ཉོན་ཅིག །དགེ་སློང་དག་སྔོན་བྱུང་བ་འདས་པའི་དུས་ན། ཡུལ་བི་དེ་ཧ་ཞེས་བྱ་བ་ན། རྒྱལ་པོ་དབང་ཆེན་སྡེ་ཞེས་བྱ་བ་རྒྱལ་པོ་བྱེད་དེ། དེ་ནས་ཕྱི་ཞིག་ན་རྒྱལ་པོ་དེས་དཔུང་གི་ཚོགས་ཡན་ལག་བཞི་གོ་བསྐོན་ནས་རི་དགས་བཤོར་དུ་སོང་བ་ལས། རྒྱལ་པོ་དེ་ལ་བློན་པོ་ལྔ་བརྒྱས་གླགས་བཙལ་ཏེ། དེ་དག་གིས་བསམས་པ། ད་ནི་རྒྱལ་པོ་འདི་བདག་གི་ལག་ན་འདུག་གིས། འདི་འདུག་པ་ཁོ་ནའི་ཚེ། བདག་ཅག་གིས་འདི་བསད་དོ་སྙམ་མོ། །འཇིག་རྟེན་པ་དག་ནི་དགྲ་དང་ཟིན་གྱི་ནང་དུ་འདུག་སྟེ། དེར་གཞན་དག་གིས་རྒྱལ་པོ་ལ་སྦྲན་ནས་དེ་ཐོས་མ་ཐག་ཏུ་རྒྱལ་པོ་དབང་ཆེན་སྡེས་བློན་པོ་ལྔ་བརྒྱ་པོ་དེ་དག་གསོད་དུ་བཏང་སྟེ། དེ་དག་གཤེད་མ་རྣམས་ཀྱིས་ཁྲིད་ནས། ནགས་ཁྲོད་ཅིག་ཏུ་ཞུགས་ཏེ་བསད་ཅེས་བྱས་པ་ལས། ནགས་
ཁྲོད་དེ་ན་དྲང་སྲོང་ཞིག་གནས་ཏེ། དྲང་སྲོང་དེས་བློན་པོ་ལྔ་བརྒྱ་པོ་དེ་དག་རྒྱལ་པོ་དབང་ཆེན་སྡེ་ལ་གཏོང་དུ་བཅུག་ནས། དཀའ་ཐུབ་ཀྱི་གནས་སུ་ཁྲིད་དེ་རབ་ཏུ་བྱུང་ངོ་། །རབ་ཏུ་ཕྱུང་ནས་དེ་དག་གིས་ཀྱང་བསམ་གཏན་བཞི་དང་། མངོན་པར་ཤེས་པ་ལྔ་བསྐྱེད་དོ། །དགེ་སློང་དག་ཇི་སྙམ་དུ་སེམས། དེའི་ཚེ་དྲང་སྲོང་དུ་གྱུར་པ་བྱང་ཆུབ་སེམས་དཔའི་སྤྱོད་པ་ལ་གནས་པ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་བློན་པོ་ལྔ་བརྒྱ་པོར་གྱུར་པ་གང་ཡིན་པ་དེ་དག་ནི་རིགས་ཀྱི་བུ་ལྔ་བརྒྱ་པོ་འདི་དག་ཁོ་ན་ཡིན་ཏེ། དེའི་ཚེ་ཡང་དེ་དག་གསོད་དུ་བཏང་བ་ལས་ངས་སྲོག་ཕངས་པ་བྱིན་ཏེ། བསམ་གཏན་བཞི་དང་། མངོན་པར་ཤེས་པ་ལྔ་ལ་བཀོད་དོ། །ད་ལྟར་ཡང་འདི་རྣམས་ངས་སྲོག་ཕངས་པ་བྱིན་ནས། གཡུང་དྲུང་གི་མཐར་ཐུག་པ་གྲུབ་པ་དང་། བདེ་བའི་མྱ་ངན་ལས་འདས་པ་ལ་བཀོད་དོ། །གཞན་ཡང་ཡང་དག་པར་རྫོགས་པའི་སངས་རྒྱས་འོད་སྲུང་གི་བསྟན་པ་ལ་འདི་རྣམས་རབ་ཏུ་བྱུང་ནས། འདི་རྣམས་ཀྱིས་དེར་ཚེ་གཅིག་ཏུ་ཚངས་པར་སྤྱོད་པ་སྤྱད་ནས། དབང་པོ་རྣམས་ཡོངས་སུ་སྨིན་པར་བྱས་པ་དེས་ན། ད་ལྟར་རྣམ་པར་གྲོལ་བར་གྱུར་ཏོ།། །།ཤ་ཟ་ཞེས་བྱ་བ་ནི། གླེང་གཞི་རྒྱལ་པོའི་ཁབ་ན་བཞུགས་ཏེ། དེའི་ཚེ་མཉན་དུ་ཡོད་པ་དང་། རྒྱལ་པོའི་ཁབ་ཀྱི་བར་མཚམས་ན་ཤ་ཟ་སྟོང་གནས་ཏེ། དེ་དག་གིས་དེ་ཕྱོགས་སུ་འདྲུལ་བཅད་དེ། ཡུལ་མ་ག་་དང་ཡུལ་ཀོ་ས་ལའི་སྐྱེ་བོ་མང་པོ་ཁ་འདོག་པར་བྱེད་དོ། །དེ་ནས་རྒྱལ་པོ་གསལ་རྒྱལ་གྱིས་རྒྱལ་པོ་གཟུགས་ཅན་སྙིང་པོ་ལ་ཕོ་ཉས་བཟླུགས་ཏེ། མཉན་དུ་ཡོད་པ་དང་རྒྱལ་པོའི་ཁབ་ཀྱི་བར་མཚམས་ན། ཤ་ཟ་སྟོང་གནས་ཏེ། དེ་དག་དེ་ན་འཁོད་པས། ཡུལ་གཉིས་ལ་གནོད་པ་ཆེན་པོ་བྱེད་པ་ཁྱོད་ཀྱིས་ཤེས་སམ། བཅོམ་ལྡན་འདས་ཀྱང་ཁྱོད་ཀྱི་ཁམས་ན་བཞུགས་ན། ཤ་ཟ་དེ་རྣམས་ཀྱི་ཕྱིར་ཁྱོད་ཀྱིས་བཅོམ་ལྡན་འདས་ལ་གསོལ་བའི་རིགས་སོ་ཞེས་སྤྲིང་ངོ་། །དེ་ནས་དེ་ཐོས་མ་ཐག་ཏུ་རྒྱལ་པོ་གཟུགས་ཅན་སྙིང་པོ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་
ཕྱག་འཚལ་ཏེ། ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས། བཅོམ་ལྡན་འདས་ཀྱིས་རྒྱལ་པོ་གཟུགས་ཅན་སྙིང་པོ་ལ་ཆོས་ཀྱི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག།ཡང་དག་པར་གཟེངས་བསྟོད། ཡང་དག་པར་དགའ་བར་མཛད་དེ། ཆོས་ཀྱི་གཏམ་རྣམ་གྲངས་དུ་མས་ཡང་དག་པར་བསྟན། ཡང་དག་པར་འཛིན་དུ་བཅུག།ཡང་དག་པར་གཟེངས་བསྟོད། ཡང་དག་པར་དགའ་བར་མཛད་ནས། ཅང་མི་གསུང་བར་བཞུགས་སོ། །དེ་ནས་རྒྱལ་པོ་གཟུགས་ཅན་སྙིང་པོས། བཅོམ་ལྡན་འདས་ཀྱི་གཏམ་གྱི་མཇུག་རྫོགས་པར་རིག་ནས། སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱིས་ཀླུ་མ་རུངས་པ་དག་དགའ་བོ་དང་ཉེ་དགའ་ལ་སོགས་པ་ཡང་བཏུལ། གནོད་སྦྱིན་མ་རུངས་པ་འབྲོག་གནས་ལ་སོགས་པ་ཡང་བཏུལ་ན། ཡུལ་མ་ག་་དང་། ཀོ་ས་ལ་གཉིས་ཀྱི་བར་མཚམས་ན། ཤ་ཟའི་ཚོགས་ཆེན་པོ་གནས་ཏེ། དེ་དག་དེ་ན་འཁོད་པས་སྐྱེ་བོ་མང་པོ་ལ་གནོད་པ་བགྱིད་ན། བཅོམ་ལྡན་འདས་ཀྱིས་ཤ་ཟའི་ཚོགས་དེ་དག་ལ་ཐུགས་བརྩེ་བའི་སླད་དུ་འདུལ་བར་གསོལ། དེ་ནས་བཅོམ་ལྡན་འདས་ཀྱིས་རྒྱལ་པོ་གཟུགས་ཅན་སྙིང་པོ་ལ་ཅང་མི་གསུང་བས་གནང་ངོ་། །དེ་ནས་རྒྱལ་པོ་གཟུགས་ཅན་སྙིང་པོས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་ཐད་ནས་སོང་ངོ་། །དེ་ནས་བཅོམ་ལྡན་འདས་ཀྱིས་ཤ་ཟ་དེ་རྣམས་འདུལ་བའི་དུས་ལ་བབ་པར་གཟིགས་ནས། རྒྱལ་པོའི་ཁབ་ནས་མི་སྣང་བར་གྱུར་ཏེ། ་ལའི་ནགས་ཁུང་ཤ་ཟ་རྣམས་ཀྱི་འདབ་ཏུ་གཤེགས་སོ། །དེ་ནས་ཤ་ཟ་དེ་རྣམས་ཀྱིས་ཐག་རིང་པོ་ཞིག་ནས། སངས་རྒྱས་བཅོམ་ལྡན་འདས་མཐོང་ངོ་། །མཐོང་ནས་ཀྱང་གཟུགས་མི་སྡུག་པར་བསྒྱུར་ཏེ། ཤུགས་ཆེན་པོས་བཅོམ་ལྡན་
འདས་ཀྱི་ཐོག་ཏུ་བརྒྱུགས་སོ། །དེ་ནས་བཅོམ་ལྡན་འདས་ཀྱིས་འཇིག་རྟེན་པའི་ཐུགས་བསྐྱེད་དེ། ཀྱེ་མ་རྒྱལ་པོ་ཆེན་པོ་རྣམ་ཐོས་ཀྱི་བུ་གནོད་སྦྱིན་ཆེ་བར་གྲགས་སོ་ཅོག་དང་ལྷན་ཅིག་ཏུ་ང་ལ་བལྟ་བའི་ཕྱིར་འོངས་ན་ལེགས་སོ་སྙམ་དུ་དགོངས་ནས། བཅོམ་ལྡན་འདས་ཀྱིས་ཐུགས་བསྐྱེད་མ་ཐག་ཏུ་རྒྱལ་པོ་ཆེན་པོ་རྣམ་ཐོས་ཀྱི་བུ། གནོད་སྦྱིན་ཆེ་བར་གྲགས་སོ་ཅོག་དང་ལྷན་ཅིག་ཏུ་བཅོམ་ལྡན་འདས་ག་ལ་བ་དེར་སོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འཁོད་དོ། །དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུ་དང་། གནོད་སྦྱིན་ཆེ་བར་གྲགས་སོ་ཅོག་གཞན་དག་གིས་ཤ་ཟའི་ཚོགས་རྣམས་གཙེས་ནས་དེ་དག་འཇིགས་ཤིང་སྐྲག་སྟེ། ཕན་ཚུན་དུ་འབྱེར་བར་བརྩམས་པ་ལས། བཅོམ་ལྡན་འདས་ཀྱིས་དེ་དག་འདུལ་བའི་ཕྱིར། ཁོ་ར་ཁོར་ཡུག་ནས་མེ་ལྕེ་ཆེན་པོ་སྤྲུལ་ནས། དེ་དག་གིས་བདག་ཅག་ཉིད་མེ་ལྕེ་ཆེན་པོས་འཁོར་བ་མཐོང་སྟེ། འབྲོས་ཀྱང་མ་ནུས་ནས། བཅོམ་ལྡན་འདས་ཀྱི་ཞབས་དྲུང་འབའ་ཞིག་ཞི་བར་མཐོང་སྟེ། སྐྱབས་འཚོལ་ཞིང་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ལ་བསྐོར་ནས་འཁོད་དོ། །དེ་ནས་བཅོམ་ལྡན་འདས་ཀྱིས་ཤ་ཟ་དེ་རྣམས་ལ་བཀའ་སྩལ་པ། ཁྱོད་སྔོན་གྱི་སྡིག་པ་མི་དགེ་བའི་ལས་ཀྱིས་ཤ་ཟའི་སྐྱེ་གནས་དམའ་བར་སྐྱེས་ལ་ད་ལྟར་ཡང་ཁྱེད་སྐྱེ་བོ་མང་པོ་ལ་གནོད་པར་བྱེད་ན། འདི་ནས་ཤི་འཕོས་ན་ཁྱེད་ཀྱི་འགྲོ་བ་ནི་ཅིར་འགྱུར། སྐྱེ་གནས་ནི་ཅི་ཡིན། འགྲོ་བའི་ས་ནི་གང་ཡིན། དེ་དག་གིས་སྨྲས་པ། བཅོམ་ལྡན་འདས་ཀྱིས་བདག་ཅག་ལ་བཀའ་ཅི་སྩལ། བཅོམ་ལྡན་འདས་ཀྱིས་བཀའ་སྩལ་པ། ད་ཕྱིན་ཆད་སྡིག་པ་ལས་བཟློག་ལ། སྐྱབས་སུ་འགྲོ་བ་དང་བསླབ་པའི་གཞི་རྣམས་ཟུང་ཤིག །ཤ་ཟ་རྣམས་ཀྱིས་གསོལ་པ། བཅོམ་ལྡན་འདས་ཀྱིས་བདག་ཅག་ལ་བཀའ་ཅི་སྐད་སྩལ་བ་དེ་བཞིན་དུ་འཚལ་ལོ་ཞེས་གསོལ་ནས། ཤ་ཟ་དེ་རྣམས་ཀྱིས་སྐྱབས་སུ་འགྲོ་བ་དང་། བསླབ་པའི་གཞི་རྣམས་བླངས་ཏེ། དེ་ཕྱིན་ཅད་སྡིག་པའི་ལས་སྤངས་སོ། །དེ་ནས་བཅོམ་ལྡན་འདས་ཀྱིས་དེ་དག་ལ་དེ་དག་དང་འཚམ་པའི་
ཆོས་བསྟན་ནས། ཤིང་་ལའི་ནགས་ཁུང་ནས་མི་སྣང་བར་གྱུར་ཏེ། འོད་མའི་ཚལ་དུ་གཤེགས་སོ། །ཤ་ཟ་དེ་རྣམས་ཀྱང་བླ་ན་མེད་པའི་ལམ་ལ་གནས་པར་གྱུར་ནས། ཕན་ཚུན་འདྲུལ་བ་རྣམས་ལ་ཆུ་སྦྱིན་པར་བྱེད་དོ། །ཁ་ཟས་ཀྱང་སྦྱིན་པར་བྱེད་དོ། །ལམ་སྟོར་བ་རྣམས་ལ་ཡང་ལམ་སྟོན་པར་བྱེད་དོ། །དེ་ནས་ཡུལ་་ཤི་དང་། ཡུལ་ཀོ་ས་ལའི་མི་རྣམས་ངོ་མཚར་དུ་གྱུར་ཏོ། །བཅོམ་ལྡན་འདས་ཀྱིས་འདི་ལྟར་འདུལ་བར་དཀའ་བ་འདི་དག་བཏུལ་ལོ། །ཞེས་འཛེར་ཏོ། །དེ་ནས་དགེ་སློང་རྣམས་ཀྱིས་སངས་རྒྱས་བཅོམ་ལྡན་འདས་ལ་གསོལ་པ། བཙུན་པ་བཅོམ་ལྡན་འདས་ཀྱིས་ཤ་ཟ་འདི་དག་ཀྱང་བཏུལ་ཏེ། སྐྱབས་སུ་འགྲོ་བ་དང་། བསླབ་པའི་གཞི་རྣམས་ཀྱང་འཛིན་དུ་སྩལ་ལ། སྐྱེ་བོ་ཕལ་པོ་ཆེ་ལ་ཡང་སྨན་བཏགས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། ད་ལྟར་འབའ་ཞིག་མ་ཡིན་ཏེ། འདས་པའི་དུས་ན་ཡང་ངས་འདི་རྣམས་སྡིག་པའི་ལས་ལས་བཟློག་སྟེ། ཅི་ལྟར་དགེ་བ་བཅུའི་ལས་ཀྱི་ལམ་ལ་བཀོད་པ་དེ་ཉོན་ཅིག །དགེ་སློང་དག་སྔོན་བྱུང་བ་འདས་པའི་དུས་ན། ས་ཕྱོགས་འདི་ཉིད་ན་ཤ་ཟའི་ཚོགས་ཆེན་པོ་གནས་གནས་ཏེ། དེ་དག་འདི་ན་གནས་པས་ཡུལ་་ཤི་དང་། ཀོ་ས་ལའི་མི་རྣམས་མ་རུངས་པར་བྱེད་པ་ལས། རྒྱལ་པོའི་ཁབ་ཀྱི་གྲོང་ཁྱེར་ན་དཀའ་ཐུབ་ཀྱི་གནས་ཞིག་ན་དྲང་སྲོང་ཞིག་གནས་ཏེ། སྐྱེ་བོ་མང་པོ་དེ་དག་གིས་ཤ་ཟ་དེ་དག་གདུལ་བའི་ཕྱིར་དྲང་སྲོང་དེ་ལ་གསོལ་བ་བཏབ་ནས། དྲང་སྲོང་དེས་ཤ་ཟ་དེ་དག་བཏུལ་ཏེ། དགེ་བ་བཅུའི་ལས་ཀྱི་ལམ་ལ་བཀོད་དོ། །དགེ་སློང་དག་ཇི་སྙམ་དུ་སེམས། དེའི་ཚེ་དྲང་སྲོང་དུ་གྱུར་པ་བྱང་ཆུབ་སེམས་དཔའི་སྤྱོད་པ་ལ་གནས་པ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་ཤ་ཟར་གྱུར་པ་གང་ཡིན་པ་དེ་དག་ནི། ཤ་ཟ་འདི་དག་ཁོ་ན་ཡིན་ཏེ། དེའི་ཚེ་ཡང་ངས་འདི་དག་བཏུལ་ཏེ། དགེ་བ་བཅུའི་ལས་ཀྱི་ལམ་ལ་བཀོད་དོ། །ད་ལྟར་ཡང་ངས་འདི་དག་སྡིག་པའི་ལས་ལས་བཟློག་སྟེ། དགེ་བ་བཅུའི་ལས་ཀྱི་ལམ་ལ་བཀོད་དོ།། །།ལས་བརྒྱ་ཐམ་པ། བམ་པོ་སུམ་ཅུ་གསུམ་པ། དབང་
པོའི་མགོ་ཞེས་བྱ་བ་ནི། གླེང་གཞི་རྒྱལ་པོའི་ཁབ་ན་བཞུགས་ཏེ། དེའི་ཚེ་ཡུལ་ཡངས་པ་ཅན་ན། འཕོང་གི་སློབ་དཔོན་དབང་པོའི་མགོ་ཞེས་བྱ་བ་འཕོང་གི་རིག་པ་ཐམས་ཅད་ཀྱི་མཐར་ཕྱིན་པ་ཞིག་གནས་པ་དེས། ལི་ཙ་བྱི་ལྔ་བརྒྱ་ལ་འཕོང་གི་རིག་པ་བསླབས་ནས། དེ་དག་ཀྱང་དེ་ལ་མཐར་ཕྱིན་པར་གྱུར་ཏེ། སྟོབས་པོ་ཆེར་ཡང་གྱུར་ཏོ། །དེ་ནས་ཕྱི་ཞིག་ན་རྒྱལ་པོའི་ཁབ་ན་གནས་པ་རྣམས་དང་། ཡངས་པ་ཅན་ན་གནས་པ་རྣམས་འགྲས་པར་གྱུར་ཏེ། རྒྱལ་པོའི་ཁབ་ན་གནས་པ་རྣམས་ཀྱིས་དཔུང་གི་ཚོགས་ཡན་ལག་བཞི་གོ་བསྐོན་ནས། གཡུལ་འགྱེད་པའི་ཕྱིར་ཡངས་པ་ཅན་ན་གནས་པ་རྣམས་ཀྱི་སྟེང་དུ་དྲངས་སོ། །དེ་ནས་འཕོང་གི་སློབ་དཔོན་དབང་པོའི་མགོས། རྒྱལ་པོའི་ཁབ་ན་གནས་པ་རྣམས་ཀྱིས་གཡུལ་འགྱེད་པའི་ཕྱིར། བདག་ཅག་གི་སྟེང་དུ་དྲངས་སོ་ཞེས་ཐོས་སོ། །ཐོས་ནས་ཀྱང་གཡུལ་འགྱེད་པའི་ཕྱིར་འཁོར་ལྔ་བརྒྱ་དང་ཆས་ཏེ། རྒྱལ་པོའི་ཁབ་ཀྱི་དམག་གི་སྟེང་དུ་དྲངས་སོ། །དེ་དག་གིས་དྲངས་ནས་སྐྱེ་བོ་མང་པོ་ཁ་བཏག་སྟེ། དེ་ནས་རྒྱལ་པོའི་ཁབ་ཀྱི་དམག་མི་རྣམས་འབྲོས་སོ། །དེ་བཞིན་དུ་ལན་གཉིས་ལན་གསུམ་ནས་ལན་ལྔའི་བར་དུ་རྒྱལ་པོའི་ཁབ་ཀྱི་སྐྱེ་བོ་མང་པོ་རྣམས་ཁ་བཏག་གོ །དེ་ནས་འཕོང་གི་སློབ་དཔོན་དབང་པོའི་མགོས་མི་ལྔ་སྟོང་མདའ་འཕངས་ཏེ་བསད་དོ་ཞེས་ཐོག་ཐག་ཏུ་གྲགས་སོ། །དེ་ནས་ཕྱི་ཞིག་ན་རྒྱལ་པོའི་ཁབ་ན་གནས་པའི་མི་རྣམས་ཀྱིས་བཅོམ་ལྡན་འདས་ལ་གསོལ་ཏེ། བཙུན་པ་དབང་པོའི་མགོ་དེ་ནི་བདག་ཅག་གི་དགྲ་མ་ལགས་པའི་དགྲ། འགྲན་ཟླ་མ་ལགས་པའི་འགྲན་ཟླ་ལགས་ཏེ། བཙུན་པ་དེས་ནི་མི་ལྔ་སྟོང་ཙམ་ཁ་བཏག་ལགས་ན། བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ། དབང་པོའི་མགོ་འདུལ་བར་གསོལ་ཞེས་བྱས་སོ། །དེ་ནས་བཅོམ་ལྡན་འདས་ཀྱིས་རྒྱལ་པོའི་ཁབ་ཀྱི་མི་རྣམས་ལ་ཅང་མི་གསུང་བས་གནང་ངོ་། །དེ་ནས་རྒྱལ་པོའི་ཁབ་ཀྱི་མི་རྣམས་ཀྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཐད་ནས་དོང་ངོ་། །དེ་ནས་བཅོམ་ལྡན་འདས་རྒྱལ་པོའི་ཁབ་ནས་མི་སྣང་བར་གྱུར་ཏེ། ཡངས་པ་ཅན་དུ་གཤེགས་
ནས། བཅོམ་ལྡན་འདས་ཀྱིས་ཅི་ནས་ཕྱིན་ཅད་དབང་པོའི་མགོ་འཕོང་མི་ཤེས་པ་དེ་ལྟ་བུར་བྱིན་གྱིས་བརླབས་ནས། དེ་རྨོངས་པར་གྱུར་ཏེ། ཅིའི་ཕྱིར་བདག་འདི་ཁོ་ན་ལྟར་མ་རུང་བར་གྱུར་སྙམ་མོ། །དེ་ནས་དེས་ཅི་ལྟར་བཅོམ་ལྡན་འདས་རྒྱལ་པོའི་ཁབ་ན་བཞུགས་བཞུགས་པ་ལས། དགྱེས་བཞིན་དུ་ཡངས་པ་ཅན་དུ་གཤེགས་པ་ཐོས་ནས། དེས་བསམས་པ་བཅོམ་ལྡན་འདས་ནི་ཐམས་ཅད་མཁྱེན་པ་ཐམས་ཅད་གཟིགས་པ་ཡིན་པས་ན། ཅིའི་ཕྱིར་བདག་འཕོང་གི་རིག་པ་མི་ཤེས་པར་གྱུར་པ་ཐུགས་སུ་ཆུད་དོ་སྙམ་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཆོས་མཉན་པའི་ཕྱིར་སྤྱན་སྔར་འདུག་གོ །དེ་ནས་བཅོམ་ལྡན་འདས་ཀྱིས་དེའི་བསམ་པ་དང་། བག་ལ་ཉལ་དང་། ཁམས་དང་། ཤེས་པ་དང་། རང་བཞིན་ཐུགས་སུ་ཆུད་ནས། དེ་དང་འཐུན་པའི་ཆོས་བསྟན་ཏེ། དེས་ན་དབང་པོའི་མགོས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་མཐོན་པོ་ཉི་ཤུ་ཡེ་ཤེས་རྡོ་རྗེས་བཅོམ་ནས། རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། དེས་བདེན་པ་མཐོང་ནས། སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་། བསྙེན་པར་རྫོགས་ཤིང་དགེ་སློང་གི་དངོས་པོ་འཐོབ་ཏུ་རུང་ན། བདག་ཀྱང་བཅོམ་ལྡན་འདས་ཀྱི་ཐད་དུ་ཚངས་པར་སྤྱོད་པ་སྤྱད་པར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། དབང་པོའི་མགོ་རེ་ཞིག་སློབ་མ་རྣམས་ལ་སྤྲིན་ཅིག་དང་། དེའི་འོག་ཏུ་ཁྱོད་རབ་ཏུ་བྱུང་བ་དང་། བསྙེན་པར་རྫོགས་ཤིང་དགེ་སློང་གི་དངོས་པོར་བྱ་བ་ནི་སླའོ། །དེས་གསོལ་པ། བཅོམ་ལྡན་འདས་ཀྱིས་བཀའ་སྩལ་པ་དེ་བཞིན་དུ་འཚལ་ལོ་ཞེས་གསོལ་ནས། བཅོམ་ལྡན་འདས་ཀྱི་ཐད་ནས་སོང་སྟེ། དེ་ཡངས་པ་ཅན་དུ་སོང་ནས། ལི་ཙ་བྱི་ལྔ་བརྒྱ་པོ་རྣམས་ཅི་ནས་དེ་དག་ཐམས་ཅད་རབ་ཏུ་འབྱུང་བར་འདོད་པར་འགྱུར་བ་
དེ་ལྟ་བུའི་ཆོས་བསྟན་ཏོ། །དེ་ནས་དེ་རྣམས་ཀྱིས་ཕ་མ་ལ་གསོལ་ཏེ། དབང་པོའི་མགོ་དང་ལྷན་ཅིག་ཏུ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཆོས་མཉན་པའི་ཕྱིར་སྤྱན་སྔར་འཁོད་དོ། །དེ་ནས་བཅོམ་ལྡན་འདས་ཀྱིས་དེ་དག་གི་བསམ་པ་དང་། བག་ལ་ཉལ་དང་། ཁམས་དང་། ཤེས་པ་དང་། རང་བཞིན་ཐུགས་སུ་ཆུད་ནས། དེ་དང་འཐུན་པའི་ཆོས་བསྟན་ཏེ། དེས་ན་ལི་ཙ་བྱི་ལྔ་བརྒྱ་པོ་དེ་རྣམས་ཀྱིས་སྟན་དེ་ཉིད་ལ་འཁོད་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་མཐོན་པོ་ཉི་ཤུ་ཡེ་ཤེས་རྡོ་རྗེས་བཅོམ་ནས། རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། དེ་རྣམས་ཀྱིས་བདེན་པ་མཐོང་ནས། སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་། བསྙེན་པར་རྫོགས་ཤིང་དགེ་སློང་གི་དངོས་པོ་འཐོབ་ཏུ་རུང་ན། བདག་ཅག་ཀྱང་བཅོམ་ལྡན་འདས་ཀྱི་ཐད་དུ་ཚངས་པར་སྤྱོད་པ་སྤྱད་པར་འཚལ་ལོ། །དེ་ནས་བཅོམ་ལྡན་འདས་ཀྱིས་དེ་རྣམས་ལ་དགེ་སློང་ཚུར་ཤོག་ཅེས་བྱ་བའི་ཚིག་གིས་རབ་ཏུ་ཕྱུང་སྟེ། བསྙེན་པར་རྫོགས་པར་མཛད་ནས། དེ་དག་ལ་ལུང་ཡང་ཕོག་སྟེ། དེ་དག་གིས་ཀྱང་བརྩོན་པ་དང་། བསྒྲུབ་པ་དང་། འབད་པས་ཉོན་མོངས་པ་ཐམས་ཅད་སྤངས་ནས། དགྲ་བཅོམ་པ་ཉིད་མངོན་སུམ་དུ་བྱས་སོ། །དེ་ནས་དགེ་སློང་རྣམས་ཀྱིས་སངས་རྒྱས་བཅོམ་ལྡན་འདས་ལ་གསོལ་པ། བཙུན་པ་བཅོམ་ལྡན་འདས་ཀྱིས་དབང་པོའི་མགོ་ལ་བརྟེན་ནས། ལི་ཙ་བྱི་ལྔ་བརྒྱ་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས། ཉོན་མོངས་པ་ཐམས་ཅད་སྤངས་ཏེ། དགྲ་བཅོམ་པ་ཉིད་མངོན་སུམ་དུ་བགྱིས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། ད་ལྟར་འབའ་ཞིག་མ་ཡིན་ཏེ། འདས་པའི་དུས་ན་ཡང་དབང་པོའི་མགོ་ལ་སོགས་པ་ལི་ཙ་བྱི་ལྔ་བརྒྱ་པོ་འདི་རྣམས་ངས་སྡིག་པ་ལས་བཟློག་སྟེ། ཅི་ལྟར་དགེ་བ་བཅུའི་ལས་ཀྱི་ལམ་
ལ་བཀོད་པ་དེ་ཉོན་ཅིག །དགེ་སློང་དག་སྔོན་བྱུང་བ་འདས་པའི་དུས་ན། གྲོང་ཁྱེར་གྲུ་འཛིན་ཅེས་བྱ་བ་ན། རྒྱལ་པོ་དབང་ཆེན་ཞེས་བྱ་བ་རྒྱལ་པོ་བྱེད་དོ། །དེ་ནས་ཕྱི་ཞིག་ན་རྒྱལ་པོ་དེའི་བཙུན་མོ་ལ་བུ་ཆགས་ནས། དེ་ཟླ་བ་དགུའམ་བཅུ་ལོན་པ་དང་། ཁྱེའུ་གཟུགས་བཟང་ཞིང་བལྟ་ན་སྡུག་ལ་མཛེས་པ། མདོག་བཟང་བ་གསེར་གྱི་མདོག་ཅན། མགོ་བོ་གདུགས་ལྟར་འདུག་པ་ལག་པ་རིང་བ། དཔྲལ་བའི་དབྱེས་ཆེ་བ། སྣ་མཐོ་བ་སྣ་ལེགས་པ། སྨིན་མ་སྟུག་པ་ཞིག་བཙས་སོ། །དེ་ནས་དེའི་བཙས་སྟོན་རྒྱས་པར་བྱས་ནས། ཁྱེའུ་འདིའི་མིང་ཇི་སྐད་གདགས་ཞེས་མིང་འདོགས་པར་བྱེད་དེ། ཁྱེའུ་འདི་དབང་ཆེན་གྱི་བུ་ཡིན་པས་ན། ཁྱེའུ་འདིའི་མིང་དབང་ཆེན་སྡེ་ཞེས་གདགས་སོ་ཞེས་ཟེར་རོ། །དེ་ནས་ཁྱེའུ་དབང་ཆེན་སྡེ་འོ་མ་དང་། ཞོ་དང་། མར་དང་། ཞུན་མར་དང་། མར་གྱི་ཉིང་གུས་བསྐྱེད་བསྲིངས་ཏེ། དེ་གང་གི་ཚེ་ཆེར་སྐྱེས་པ་དེའི་ཚེ། ཁྱེའུ་དེ་ཡི་གེ་སློབ་ཏུ་བཅུག་སྟེ། རྒྱལ་རིགས་སྤྱི་བོ་ནས་དབང་བསྐུར་བའི་རྒྱལ་པོ་རྣམས་ཀྱི་བཟོའི་གནས་དང་། ལས་ཀྱི་གནས་ཐ་དད་པ་འདི་ལྟ་སྟེ། གླང་པོ་ཆེ་ཞོན་པ་དང་། རྟ་ཞོན་པ་དང་། མཚོན་ཆ་བཅང་བ་དང་། འཕོང་དང་། མདུན་དུ་བསྣུར་བ་དང་། ཕྱིར་བསྣུར་བ་དང་། གཡུལ་ལས་ཐར་བར་བྱ་བ་དང་། ལྕགས་ཀྱུས་གཟུང་བ་དང་། ཞགས་པས་གཟུང་བ་དང་། མདའ་བོ་ཆེ་འཕང་བ་དང་། རྡོ་རྗེ་རྩེ་གཅིག་པ་འཕང་བ་དང་། མཚོན་རྩེ་གཅིག་པས་གདབ་པ་དང་། འཁོར་ལོ་འཕང་བ་དང་། གཅད་པ་དང་། གཤེག་པ་དང་། ལག་པས་གཟུང་བ་དང་། རྐང་པའི་སྟབས་དང་། མགོ་བོ་བསྐྱབ་པ་དང་། རྒྱང་མར་འཕང་བ་དང་། སྒྲ་གྲག་པར་ཕོག་པ་དང་། གནད་དུ་ཕོག་པ་དང་། མ་ཚོར་བར་ཕོག་པ་དང་། གདོན་མི་ཟ་བར་ཕོག་པར་བྱ་བ་དང་། ཚབས་ཆེར་གཏང་བ་རྣམས་ཀྱང་བསླབས་ནས། གནས་ལྔ་ལ་བྱང་བར་གྱུར་ཏོ། །དེ་ནས་དེས་བལྟས་ན། ཕ་དང་བློན་པོ་ལྔ་བརྒྱ་པོ་དེ་རྣམས་ཆོས་མ་ཡིན་པས་རྒྱལ་པོ་བྱས་ནས། དེས་བསམས་པ་བདག་གིས་རྒྱལ་སྲིད་བཏང་ལ་དཀའ་ཐུབ་ཀྱི་ནགས་ཚལ་དུ་འགྲོ་བར་བྱའོ་སྙམ་སྟེ། ཕ་མ་ལ་གསོལ་ནས་ནགས་འདབ་ཏུ་གནས་བཅས་སོ། །དེ་ནས་ཕྱི་ཞིག་ན་དེའི་
ཕ་ཤིའོ། །དེ་ཤི་ནས་ཉི་འོག་གི་རྒྱལ་པོ་དག་གིས་ཡུལ་དུ་གནོད་པ་བྱེད་པ་ལ་ཞུགས་ནས། བློན་པོ་རྣམས་ཀྱིས་བསམས་པ། བདག་ཅག་ཇོ་བོ་མེད་པའི་ཕྱིར་ཉི་འོག་གི་རྒྱལ་པོ་དག་གིས་གནོད་པ་བྱེད་ཀྱིས། རྒྱལ་པོའི་སྲས་སྤྱན་དྲངས་ཏེ། རྒྱལ་སར་གཞུག་གོ་སྙམ་ནས་རྒྱལ་པོའི་བུ་དེའི་ཐད་དུ་བློན་པོ་ཆེན་པོ་སོང་སྟེ། དེས་རྒྱལ་པོའི་བུ་ལ་སྨྲས་པ། ཇོ་བོ་ཁྱོད་ཀྱི་ཡབ་ནོངས་ཀྱིས་ཚུར་གཤེགས། ཡབ་ཀྱི་རྒྱལ་སྲིད་བཞེས་སུ་གསོལ། དེས་སྨྲས་པ་གལ་ཏེ་ཁྱོད་དགེ་བ་བཅུའི་ལས་ཀྱི་ལམ་ལ་གནས་པར་གྱུར་ན་དེའི་འོག་ཏུ་བྱས་པ་སླེབ་བོ་ཞེས་བྱས་ནས། དེས་བློན་པོ་ཆེན་པོ་དེ་དགེ་བ་བཅུའི་ལས་ཀྱི་ལམ་ལ་གནས་པར་བྱས་སོ། །བློན་པོ་ཆེན་པོ་དེས་ཀྱང་བློན་པོ་ལྔ་བརྒྱ་པོ་དེ་དག་དགེ་བ་བཅུའི་ལས་ཀྱི་ལམ་ལ་བཀོད་དོ། །དེ་ནས་དེས་རྒྱལ་པོའི་བུ་དེ་སྤྱན་དྲངས་ཏེ། རྒྱལ་སར་བཅུག་གོ །དེ་ནས་དེ་དེར་འོངས་པས་ཡུལ་ཁམས་ན་གནས་པའི་སྐྱེ་བོ་མང་པོ་ཐམས་ཅད་དགེ་བ་བཅུའི་ལས་ཀྱི་ལམ་ལ་བཀོད་དོ། །དགེ་སློང་དག་ཇི་སྙམ་དུ་སེམས། དེའི་ཚེ་རྒྱལ་པོར་གྱུར་པ་བྱང་ཆུབ་སེམས་དཔའི་སྤྱོད་པ་ལ་གནས་པ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་བློན་པོ་ཆེན་པོར་གྱུར་པ་གང་ཡིན་པ་དེ་ནི་དབང་པོའི་མགོ་འདི་ཁོ་ན་ཡིན་ནོ། །དེའི་ཚེ་བློན་པོ་ལྔ་བརྒྱ་པོར་གྱུར་པ་གང་ཡིན་པ་དེ་ནི་ལི་ཙ་བྱི་ལྔ་བརྒྱ་པོ་འདི་དག་ཁོ་ན་ཡིན་ཏེ། དེའི་ཚེ་ཡང་ངས་དབང་པོའི་མགོ་འདི་ཁོ་ན་ལ་བརྟེན་ནས། བློན་པོ་ལྔ་བརྒྱ་པོ་རྣམས་སྡིག་པ་ལས་བཟློག་སྟེ། དགེ་བ་བཅུའི་ལས་ཀྱི་ལམ་ལ་བཀོད་དོ། །ད་ལྟར་ཡང་ངས་ལི་ཙ་བྱི་ལྔ་བརྒྱ་པོ་འདི་རྣམས་དབང་པོའི་མགོ་འདི་ལ་བརྟེན་ནས། སྡིག་པ་ལས་བཟློག་སྟེ། གཡུང་དྲུང་གི་མཐར་ཐུག་པ་གྲུབ་པ་དང་། བདེ་བའི་མྱ་ངན་ལས་འདས་པ་ལ་བཀོད་དོ། །གཞན་ཡང་ཡང་དག་པར་རྫོགས་པའི་སངས་རྒྱས་འོད་སྲུང་གི་བསྟན་པ་ལ་འདི་དག་ཐམས་ཅད་རབ་ཏུ་བྱུང་ནས། དེར་འདི་རྣམས་ཀྱིས་ཚེ་གཅིག་ཏུ་ཚངས་པར་སྤྱོད་པ་སྤྱད་དེ། དབང་པོ་རྣམས་ཡོངས་སུ་སྨིན་པར་བྱས་པ་དེས་ན། ད་ལྟར་རྣམ་པར་གྲོལ་བར་གྱུར་ཏོ། །ལས་བརྒྱ་ཐམ་པ་ལས་སྡོམ་གྱི་ཚིགས་སུ་བཅད་པ་དགུ་པ་རྫོགས་སོ།། །།