བཞི་བཅུ་གཉིས་པ། གླང་པོ་སྐྱོང་གི་ལེའུ།
འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ཡུལ་མ་ག་་ན། ཁྱིམ་བདག་ཅིག་ལ་བུ་ཞིག་བཙས་ཏེ། བཟང་བ་བལྟ་ན་སྡུག་པ་མཚན་དང་ལྡན་པ་ཞིག་གོ །ཁྱེའུ་ཐོག་མ་བཙས་པ་ན། བང་མཛོད་ཀྱི་ནང་ནས་ངོ་མཚར་བ་གསེར་གྱི་གླང་པོ་ཆེའི་ཕྲུག་གུ་ཞིག་རང་བྱུང་ངོ་། །ཁྱེའུའི་ཕ་མས་དེ་ལྟ་བུ་མཐོང་ནས་རབ་ཏུ་དགའ་སྟེ། མཚན་མཁན་ལ་བསྟན་ནས་མཚན་མཁན་གྱིས་ཀྱང་ཁྱེའུ་བསོད་ནམས་ཀྱི་མཚན་དང་ལྡན་པར་རྟོགས་སོ། །ཁྱེའུ་ཐོག་མ་བཙས་ན་ངོ་མཚར་ཆེ་བའི་ལྟས་ཅི་བྱུང་ཞེས་དྲིས་སོ། །ཁྱེའུའི་ཕ་མས་སྨྲས་པ། ཁྱེའུ་འདི་བཙས་པ་ན་བང་མཛོད་ནང་ནས་གསེར་གྱི་གླང་པོ་ཆེའི་ཕྲུག་གུ་ཞིག་རང་བྱུང་ངོ་ཞེས་སྨྲས་པ་དང་། ཁྱེའུའི་མིང་ཡང་གླང་པོ་སྐྱོང་ཞེས་བྱ་བར་བཏགས་སོ། །ཁྱེའུ་ཇི་ཙམ་དུ་ཆེར་སྐྱེས་པ་བཞིན་དུ་གསེར་གྱི་གླང་པོ་ཆེའི་ཕྲུག་གུ་ཡང་སྐྱེས་ཏེ། ཁྱེའུ་འགྲོ་ན་གླང་པོ་ཆེའི་ཕྲུག་གུ་ཡང་འགྲོ་སྟེ། རྟག་ཏུ་འགྲོགས་ཏེ། གླང་པོ་ཆེའི་ཕྲུག་གུའི་གཅིན་རྟུག་ཀྱང་གསེར་དུ་བྱུང་ངོ་། །གླང་པོ་སྐྱོང་ཆེར་སྐྱེས་ནས་ཁྱིམ་བདག་གི་བུ་ལྔ་བརྒྱ་ཙམ་དང་། རྟག་ཏུ་ལྷན་ཅིག་ཏུ་རྩེ་སྟེ། གཅིག་
ལ་གཅིག་ཡིད་གཅུགས་པས་ཕྱི་ཞིག་ན་བྱིས་པ་དེ་དག་སོ་སོ་ནས། ཁྱིམ་ན་ངོ་མཚར་ཆེ་བ་ཅི་ཡོད་པའི་གཏམ་བྱས་པ་དང་། དེ་ལ་ཁ་ཅིག་ནི་ངའི་ཁྱིམ་ཁྲི་སྟན་དང་། ཉལ་བའི་མལ་ཆ་ལ་སོགས་པ་ཐམས་ཅད་རིན་པོ་ཆེ་སྣ་བདུན་ལས་བྱས་སོ། །ཞེས་ཟེར་རོ། །ཁ་ཅིག་ནི་ངའི་ཁྱིམ་དང་སྐྱེད་མོས་ཚལ་ལ་སོགས་པ་ཐམས་ཅད་རིན་པོ་ཆེ་ཞེས་ཟེར་རོ། །ཁ་ཅིག་ནི་ངའི་བང་མཛོད་རྟག་ཏུ་རིན་པོ་ཆེའི་དམ་པས་ཡོངས་སུ་གང་ངོ་ཞེས་ཟེར་ཏེ། ཀུན་གྱིས་སོ་སོ་ནས་ཡ་མཚན་ཅི་ཡོད་པ་རྣམ་པ་སྣ་ཚོགས་ཀུན་སྨྲས་པ་དང་། དེ་ནས་གླང་པོ་སྐྱོང་གིས་ཀྱང་བདག་ཐོག་མ་བཙས་པ་ན། གསེར་གྱི་གླང་པོ་ཆེའི་ཕྲུག་གུ་གཅིག་ཀྱང་རང་བྱུང་སྟེ། ཁོ་བོ་ཇི་ཙམ་སྐྱེས་པ་བཞིན་དུ་གླང་པོ་ཆེའི་ཕྲུག་གུ་ཡང་དེ་བཞིན་དུ་སྐྱེས་ཏེ། ཁོ་བོ་ཡང་བསམས་པ་བཞིན་དུ་འགྲོ་ལ་གླང་པོ་ཆེ་ལ་ཞོན་ནས་ལྟད་མོ་ལྟ་བ་ལ་སོགས་པ་གར་ཡང་ཡིད་བཞིན་དུ་མགྱོགས་པར་འགྲོ་སྟེ། གཅིན་རྟུག་ཀྱང་གསེར་དུ་འགྱུར་ཞེས་སྨྲས་པ་དང་། དེའི་ཚེ་ན་རྒྱལ་བུ་མ་སྐྱེས་དགྲ་ཡང་དེ་ན་འདུག་སྟེ། གླང་པོ་སྐྱོང་གིས་སྨྲས་པ་ཐོས་ནས་འདི་སྙམ་དུ་བདག་ནམ་རྒྱལ་པོར་གྱུར་པ་ན་གླང་པོ་ཆེ་འཕྲོག་གོ་སྙམ་བསམ་མོ། །ཕྱིས་རྒྱལ་པོར་གྱུར་ནས་གླང་པོ་སྐྱོང་བཀུག་སྟེ། ཁྱོད་ཀྱི་གླང་པོ་ཆེ་འོན་ཅིག་ཅེས་བསྒོའོ། །དེ་ནས་གླང་པོ་སྐྱོང་གི་ཕ་མས་བུ་ལ་འདི་སྐད་ཅེས་སྨྲས་སོ། །མ་སྐྱེས་དགྲ་ལྟ་བུ་ཁྲོ་ཞིང་གཏུམ་ལ་འདོད་པ་ཆེ་བ་མེད་དེ། བདག་གི་ཕ་ཡང་གསོད་ན་གཞན་ལྟ་ཅི་སྨོས་ཏེ། ད་ཁྱོད་ཀྱི་གླང་པོ་ཆེ་འཕྲོགས་པར་བྱས་ཀྱིས་གླང་པོ་ཆེ་སྦྱིན་དགོས་སོ། །བུས་སྨྲས་པ། བདག་གི་གླང་པོ་ཆེ་འདི་སུས་ཀྱང་འཕྲོགས་མི་ནུས་སོ་ཞེས་སྨྲས་ནས། སྤུན་གཉིས་གླང་པོ་ཆེ་ལ་ཞོན་ཏེ། རྒྱལ་པོའི་ཕོ་བྲང་གི་སྒོར་འོངས་པ་དང་། སྒོ་སྲུང་དག་གིས་རྒྱལ་པོ་ལ་གསོལ་ཏོ། །རྒྱལ་པོས་ཀྱང་གླང་པོ་སྐྱོང་སྤུན་གཉིས་ལ་གླང་པོ་ཆེ་མ་བབས་པར་ནང་དུ་ཤོག་ཤིག་ཅེས་བསྒོ་བ་དང་། གླང་པོ་སྐྱོང་སྤུན་གཉིས་གླང་པོ་ཆེ་ལ་ཞོན་ཏེ། ཕོ་བྲང་གི་ནང་དུ་འོངས་ནས་གདོད་བབས་སོ། །དེ་
ནས་རྒྱལ་པོ་ལ་ཕྱག་བྱས་ཏེ། བདེ་བར་གྱུར་ཅིག་ཅེས་སྨྲས་པ་དང་། རྒྱལ་པོ་རབ་ཏུ་དགའ་སྟེ། སྟན་བཏིང་བ་ལ་འདུག་ཏུ་བཅུག་སྟེ། བཟའ་བ་དང་། བཏུང་བ་བྱིན་ཏོ། །དེ་སྐད་ཅེས་སྨྲས་པ་དང་། འོག་ཏུ་ཕྱིར་འགྲོ་ཞེས་བྱས་པ་དང་། གླང་པོ་སྐྱོང་ལ་གསེར་གྱི་གླང་པོ་ཞོག་ལ་ཁྱེད་ཅག་ཕྱིར་དེང་ཤིག་ཅེས་བསྒོའོ། །དེ་ནས་གླང་པོ་སྐྱོང་ཡང་རྒྱལ་པོའི་བཀའ་བཞིན་གླང་པོ་ཆེ་ཕྱིར་བཞག་ནས། སྤུན་གཉིས་རྐང་པས་སོང་སྟེ། སྒོར་ཕྱིན་པ་ཙམ་ན་རིང་པོར་མ་ལོན་པར་གླང་པོ་ཆེ་དེ་ཡང་དེ་ཉིད་དུ་སའི་འོག་ཏུ་ནུབ་ནས་སྒོའི་ཕྱི་རོལ་ཏུ་གླང་པོ་སྐྱོང་གི་དྲུང་དུ་བྱུང་ངོ་། །གླང་པོ་སྐྱོང་སྤུན་གཉིས་དེ་ལ་ཕྱིར་ཞོན་ཏེ། ཁྱིམ་དུ་སོང་ནས་འདི་སྙམ་དུ་སེམས་སོ། །རྒྱལ་པོ་ཡང་ཆོས་བཞིན་དུ་བྱེད་པ་མ་ཡིན་ཏེ། མ་ཉེས་པ་དག་ཀྱང་ཁྲིམས་དང་སྦྱར་བས། བདག་གིས་ཀྱང་མ་སྟེར་ན། གླང་པོ་ཆེ་འདིའི་ཕྱིར་སྲོག་ལ་རྒལ་བར་འོང་གིས་ད་ལྟར་བཅོམ་ལྡན་འདས་འཇིག་རྟེན་ན་འགྲོ་བ་མང་པོ་ལ་བདེ་བའི་དོན་མཛད་པ་དེའི་དྲུང་དུ་སོང་ལ། ཁྱིམ་ནས་རབ་ཏུ་བྱུང་ཞིང་ཚངས་པར་སྤྱོད་པ་ལ་དགའ་བར་བྱའོ་སྙམ་བསམས་ནས་ཕ་མ་ལ་རབ་ཏུ་བྱུང་བར་གསོལ་པ་དང་ཕ་མས་ཀྱང་རབ་ཏུ་བྱུང་བར་གནང་ནས། འཕྱི་ཕྱག་འཚལ་ཏེ་གསེར་གྱི་གླང་པོ་ཆེ་ལ་ཞོན་ནས་རྒྱལ་བུ་རྒྱལ་བྱེད་ཀྱི་ཚལ་གང་ན་བར་སོང་ངོ་བཅོམ་ལྡན་འདས་ཀྱི་སྤྱན་སྔར་ཕྱིན་པ་དང་ཞབས་ལ་མགོ་བོས་ཕྱག་འཚལ་ནས། ཇི་ལྟར་གྱུར་པ་རྒྱས་པར་གསོལ་པ་དང་། བཅོམ་ལྡན་འདས་ཀྱིས་ལེགས་པར་འོངས་སོ་ཞེས་བཀའ་སྩལ་པས། སྐྲ་དང་ཁ་སྤུ་རང་བྱི་སྟེ། དགེ་སློང་དུ་གྱུར་ཏོ། །དེ་ལ་བཅོམ་ལྡན་འདས་ཀྱིས་བདེན་པ་བཞིའི་ཆོས་ཅི་རིགས་པར་བསྟན་པས་དགྲ་བཅོམ་པར་གྱུར་ཏོ། །དགེ་སློང་གླང་པོ་སྐྱོང་ཡང་དགེ་སློང་གྲོགས་གཞན་དང་ལྷན་ཅིག་གང་ན་འདུག་ཀྱང་རུང་སྟེ། གསེར་གྱི་གླང་པོ་ཆེ་རྟག་ཏུ་དྲུང་ན་འདུག་གོ །དེའི་ཚེ་མཉན་དུ་ཡོད་པ་ན་འཁོད་པ་རྣམས་ཀྱིས་གསེར་གྱི་གླང་པོ་ཆེ་བལྟ་བའི་ཕྱིར་མི་ཐམས་ཅད་འདུ་བར་གྱུར་ཏེ། རྣལ་འབྱོར་
སྤྱོད་པ་ལ་འདུ་འཛི་མང་བར་གྱུར་ཏོ། །དགེ་སློང་དེ་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་དེའི་ཕྱིར་དགེ་སློང་གླང་པོ་སྐྱོང་ལ་འདི་སྐད་ཅེས་བཀའ་སྩལ་ཏོ། །ཁྱོད་ཀྱི་གླང་པོ་ཆེ་ལ་བལྟ་བས་མང་པོ་མི་དབེན་པར་གྱུར་གྱིས། མྱུར་དུ་སྤོང་ཤིག་ཅེས་བཀའ་སྩལ་པ་དང་། གླང་པོ་སྐྱོང་གིས་གསོལ་པ། བདག་གིས་ཀྱང་ཐོག་མ་ནས་སྤངས་པར་བསམས་ན། འགྲོར་མ་བཏུབ་བོ། །བཅོམ་ལྡན་འདས་ཀྱིས་བཀའ་སྩལ་པ། ཁྱོད་གླང་པོ་ཆེ་ལ་ལན་གསུམ་གྱི་བར་དུ་འདི་སྐད་ཅེས་སྨྲོས་ཤིག།ང་ནི་སྐྱེ་བའི་ཕྱོགས་ཟད་དེ་ད་ཕྱིན་ཅད་མི་དགོས་ཀྱི་སྨྲོས་ཤིག་དང་མེད་པར་འགྱུར་རོ། །གླང་པོ་སྐྱོང་གིས་ཀྱང་བཅོམ་ལྡན་འདས་ཀྱིས་བཀའ་སྩལ་པ་བཞིན་དུ་གླང་པོ་ཆེ་ལ་མི་དགོས་ཞེས་ལན་གསུམ་གྱི་བར་དུ་སྨྲས་པས་གསེར་གྱི་གླང་པོ་ཆེ་ཡང་སའི་ནང་དུ་ནུབ་བོ། །དགེ་སློང་དག་ངོ་མཚར་དུ་གྱུར་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སློང་གླང་པོ་སྐྱོང་འདིས་སྔོན་བསོད་ནམས་ཀྱི་ཞིང་ཅི་ལྟ་བུ་ལ་དགེ་བའི་རྩ་བ་ཅི་ལྟ་བུ་ཞིག་བསྐྱེད་ན་འདི་ལྟ་བུའི་འབྲས་བུ་རྣམ་པར་སྨིན་པར་གྱུར། བཅོམ་ལྡན་འདས་ཀྱིས་ཀུན་དགའ་བོ་དང་དགེ་སློང་རྣམས་ལ་འདི་སྐད་ཅེས་བཀའ་སྩལ་ཏོ། །སོ་སོའི་སྐྱེ་བོ་གང་ཡང་རུང་བ་དཀོན་མཆོག་གསུམ་གྱི་བསོད་ནམས་ཀྱི་ཞིང་ལ། དགེ་བའི་ས་བོན་ཅུང་ཟད་ཅིག་བཏབ་ན་འབྲས་བུ་ཚད་མེད་པ་ཐོབ་པར་འགྱུར་རོ། །སྔོན་འདས་པའི་དུས་ན་སངས་རྒྱས་འོད་སྲུང་འཇིག་རྟེན་དུ་གཤེགས་པའི་ཚེ་མི་ཚེ་ནི་ལོ་སྟོང་ཕྲག་ཉི་ཤུའི་བར་དུ་གནས་སོ། །སངས་རྒྱས་དེ་སེམས་ཅན་གྱི་དོན་བྱས་ནས། མྱ་ངན་ལས་འདས་པའི་འོག་ཏུ་རིང་བཕྲེལ་ལ་མཆོད་རྟེན་མང་དུ་བྱས་སོ། །དེའི་ཚེ་མཆོད་རྟེན་གཅིག་གི་ནང་ན་བྱང་ཆུབ་སེམས་དཔའ་ཐོག་མ་དགའ་ལྡན་གྱི་གནས་ནས་བབས་ཏེ། ཡུམ་གྱི་ལྷུམས་སུ་གཤེགས་པའི་ཚེ། བཅིབས་པ་གླང་པོ་ཆེ་དེའི་མཆོད་རྟེན་ཞིག་ཀྱང་ཡོད་དེ། དེའི་ཚེ་གླང་པོ་ཆེའི་གཟུགས་ཅུང་ཟད་ཅིག་ཞིག་ནས། དེ་ལ་མི་ཞིག་ཕྱག་
འཚལ་དུ་འོངས་ནས། གླང་པོ་ཆེ་ཅུང་ཟད་ཅིག་ཞིག་པ་དེ་མཐོང་ནས་དེ་འདི་སྙམ་དུ་བསམས་སོ། །འདི་ནི་བྱང་ཆུབ་སེམས་དཔའི་བཅིབས་པའི་ཐེག་པ་ཡིན་ཏེ། འདི་ལྟར་ཞིག་པར་གྱུར་གྱི་བདག་གིས་སླར་གསོ་སྙམ་བསམས་ནས། འཇིམ་པ་ཞིག་སྦྱར་ཏེ་བསྐུས་པའི་སྟེང་དུ་ལྡོང་རོས་ཀྱིས་བསྐུས་ནས་འདི་སྐད་ཅེས་སྨོན་ལམ་བཏབ་བོ། །བདག་མ་འོངས་པའི་དུས་སུ་རྟག་ཏུ་ཆོ་རིགས་བཙུན་ཞིང་ལོངས་སྤྱོད་ཟད་མི་ཤེས་པ་དང་ལྡན་པར་ཤོག་ཤིག་ཅེས་སྨོན་ལམ་བཏབ་བོ། །མི་དེ་ཚེ་འཕོས་ནས་མཐོ་རིས་ཀྱི་ལྷར་སྐྱེས་ཏེ། ལྷ་ལས་ཚེའི་དུས་བྱས་ནས་མིའི་འཇིག་རྟེན་དུ་སྐྱེས་ཏེ། རྟག་ཏུ་ཆོ་རིགས་བཙུན་པ་དང་། ལོངས་སྤྱོད་དང་ལྡན་ཞིང་། བྱད་གཟུགས་འཕགས་པར་བཟང་སྟེ། གསེར་གྱི་གླང་པོ་ཆེ་རྟག་ཏུ་བསྲུངས་པར་གྱུར་ཏོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། དེའི་ཚེ་དེའི་དུས་ན་གླང་པོ་ཆེ་གསོས་པའི་མི་དེ་ནི་ད་ལྟར་དགེ་སློང་གླང་པོ་སྐྱོང་ཡིན་ནོ། །དེའི་ཚེ་གླང་པོ་ཆེ་གསོས་པ་དེ་ཚུན་ཅད་ལྷ་དང་མིའི་ནང་ན་ལོངས་སྤྱོད་ཆེན་པོ་དང་ལྡན་པར་གྱུར་ཏོ། །དཀོན་མཆོག་གསུམ་ལ་གུས་ཤིང་བསྟི་སྟང་བྱས་པས་ད་ལྟར་ང་དང་ཕྲད་ནས་བསྟན་པ་ལ་རབ་ཏུ་བྱུང་སྟེ། སེམས་ཀྱི་དྲི་མ་ཀུན་ཟད་དེ། དགྲ་བཅོམ་པར་གྱུར་ཏོ། །ཚེ་དང་ལྡན་པ་ཀུན་དགའ་བོ་དང་། འཁོར་མང་པོ་རྣམས་བཅོམ་ལྡན་འདས་ཀྱིས་གསུངས་པ་འདི་ཐོས་ནས་ཐམས་ཅད་ཀྱིས་དོན་རྟོགས་ཤིང་ཁོང་དུ་ཆུད་དེ། ལ་ལ་ནི་རྒྱུན་དུ་ཞུགས་པ་དང་། ལན་ཅིག་ཕྱིར་ལྡོག་པ་དང་། ཕྱིར་མི་ལྡོག་པ་དང་། དགྲ་བཅོམ་པ་ཡང་ཐོབ་པར་གྱུར་ཏོ། །ཁ་ཅིག་ནི་བླ་ན་མེད་པའི་བྱང་ཆུབ་ཏུ་སེམས་བསྐྱེད་དེ། ཕྱིར་མི་ལྡོག་པའི་ས་ལ་གནས་སོ། །བཅོམ་ལྡན་འདས་ཀྱིས་གསུངས་པ་ལ་འཁོར་མང་པོ་མངོན་པར་དགའ་ནས་རྗེས་སུ་ཡི་རང་ངོ་། །གླང་པོ་སྐྱོང་གི་ལེའུ་སྟེ་བཞི་བཅུ་གཉིས་པའོ།། །།