གཉིས་པ། སྲི་ཞུའི་ལེའུ།
དེའི་ཚེ་དེའི་དུས་ན་འཁོར་མང་པོ་འདུས་པ་དེར་རིན་པོ་ཆེ་སྣ་བདུན་ལས་གྲུབ་པའི་པད་མའི་སྡོང་པོ་དངུལ་ལས་བྱས། འདབ་མ་ནི་གསེར་ལས་བྱས། གཞི་ནི་རིན་པོ་ཆེ་ཤེལ་ལས་བྱས། མུ་ཏིག་གི་དྲ་བས་ཀུན་དུ་བརྒྱན་པ་གཅིག་ས་དེ་ཉིད་ནས་བྱུང་བར་གྱུར་ཏོ། །དེ་ནས་བཅོམ་ལྡན་འདས་ཤཱཀྱ་ཐུབ་པ་བཞུགས་པ་ལས་བཞེངས་ནས་པད་མོ་དེ་ལ་སྐྱིལ་མོ་ཀྲུང་བཅས་ནས་བཞུགས་སོ། །དེ་ལ་བཞུགས་མ་ཐག་ཏུ་ཡོངས་སུ་དག་པའི་སྐུ་མངོན་པར་བསྟན་ཏོ། །སྐུ་དེ་ལས་ལམ་རྒྱུད་ལྔའི་ལུས་ཀྱི་ཚོགས་བསྟན། ལུས་ཀྱི་ཚོགས་རེ་རེ་ལ་ཡང་གཟུགས་ཐ་དད་པ་རྣམ་པ་ཁྲི་བརྒྱ་སྟོང་སྙེད་བསྟན་ཏོ། །གཟུགས་རྣམ་པ་དེ་རེ་རེ་ལ་ཡང་སྐུའི་ཚོགས་བརྒྱ་སྟོང་སྙེད་བསྟན། སྐུའི་ཚོགས་དེ་དག་རེ་རེ་ལ་ཡང་གང་གཱའི་ཀླུང་བཞིའི་བྱེ་མ་སྙེད་ཀྱི་སྐུའི་ཚོགས་སྙེད་བསྟན་ཏོ། །གང་གཱའི་ཀླུང་བཞིའི་བྱེ་མ་སྙེད་ཀྱི་སྐུའི་ཚོགས་དེ་དག་རེ་རེ་ལ་ཡང་གླིང་བཞིའི་རྡུལ་ཕྲ་རབ་སྙེད་ཀྱི་སྐུའི་ཚོགས་བསྟན་ཏོ། །རྡུལ་ཕྲ་རབ་སྙེད་ཀྱི་སྐུའི་ཚོགས་དེ་དག་རེ་རེ་ལ་ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་སྙེད་ཀྱི་སྐུའི་ཚོགས་བསྟན་ཏོ། །རྡུལ་ཕྲ་རབ་སྙེད་ཀྱི་སྐུའི་ཚོགས་དེ་དག་རེ་རེ་ལ་ཡང་ཕྱོགས་བཅུར་ཕྱོགས་རེ་རེར་ཡང་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་གི་རྡུལ་ཕྲ་རབ་སྙེད་ཀྱི་སྐུའི་ཚོགས་བསྟན་ནས། ནམ་མཁའི་དབྱིངས་ཀྱིས་ཀླས་པ། ཆོས་ཀྱི་དབྱིངས་དང་མཉམ་པ་བསམ་གྱིས་མི་ཁྱབ་པ་སྙེད་ཀྱི་སེམས་ཅན་གྱི་ལུས་ཀྱི་ཚོགས་མངོན་པར་བསྟན་ཏོ། །དེའི་ཚེ་དེ་བཞིན་གཤེགས་པས་དེ་སྙེད་ཀྱི་ལུས་ཀྱི་ཚོགས་མངོན་པར་བསྟན་ནས་ཀུན་དགའ་བོ་དང་ཕྱོགས་བཅུ་ནས་འདུས་ཤིང་ཚོགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་། འཁོར་མང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་དེང་དེ་བཞིན་གཤེགས་པས་ཐམས་ཅད་མཁྱེན་པའི་ཡེ་ཤེས་ཀྱིས་ཡང་དག་པའི་ཚིག་གང་ཡིན་པ་དེ་བཀའ་སྩལ་པར་བྱའོ། །ཆོས་ལ་ཚིག་ཏུ་བརྗོད་པ་མེད་མོད་ཀྱི་དེ་བཞིན་གཤེགས་པས་ཐབས་མཁས་པའི་དབང་གིས་མཚན་མ་དང་། མིང་མེད་པའི་ཆོས་ལ་མིང་དང་མཚན་མར་བསྟན་པར་བྱའོ། །འདི་ལྟ་སྟེ། དེ་བཞིན་གཤེགས་པ་ནི་ཐོག་མར་སྐྱེས་ཤིང་འཁོར་བར་འཁོར་བའི་ཚེ་བསམ་གྱིས་མི་ཁྱབ་པའི་རྡུལ་ཕྲ་རབ་སྙེད་ཀྱི་ལུས་ཀྱི་ཚོགས་རྣམ་པ་ཐ་དད་པ་དེ་དག་
ཐམས་ཅད་རྫོགས་པར་མྱོང་སྟེ། དེ་ལྟར་ལུས་ཀྱི་ཚོགས་དེ་དག་ཀུན་མྱོང་བས་ན། སེམས་ཅན་ཐམས་ཅད་ཀྱང་དེ་བཞིན་གཤེགས་པའི་ཕ་མར་མ་གྱུར་པ་མེད། དེ་བཞིན་གཤེགས་པས་ཀྱང་སེམས་ཅན་གྱི་ཕ་མར་མ་གྱུར་པ་མེད་དེ། ཕ་མར་གྱུར་པ་ཐམས་ཅད་ཀྱི་ཕྱིར་རྒྱུན་དུ་ཤིན་ཏུ་སྤྱད་དཀའ་བ་ཡང་སྤྱད། ཤིན་ཏུ་གཏང་དཀའ་བ་ཡན་ལག་གི་དམ་པ་མགོ་དང་། མིག་དང་། ཀླད་རྒྱས་དང་། ཡུལ་དང་། གྲོང་ཁྱེར་དང་། ཆུང་མ་དང་། བུ་ཕོ་དང་། བུ་མོ་དང་། བན་གླང་དང་། རྟ་དང་། རིན་པོ་ཆེ་སྣ་བདུན་གྱི་ཤིང་རྟ་དང་། ཐེག་པ་དང་། གོས་དང་། ཟས་དང་། སྐོམ་དང་། མལ་ཆ་དང་། ནད་ཀྱི་རྐྱེན་རྩི་དང་། དགོས་པའི་ཡོ་བྱད་ཐམས་ཅད་གང་ཡང་མ་བཏང་བ་མེད་དོ། །ཤིན་ཏུ་འབད་པའི་བརྩོན་འགྲུས་ཀྱིས་ཚུལ་ཁྲིམས་བསྲུངས་པ་དང་། སྦྱིན་པ་བྱས་པ་དང་། མང་དུ་ཐོས་པ་དང་། བསམ་གཏན་བསྒོམས་པ་དང་། ཤེས་རབ་སྤྱད་པ་ནས་སྤྱོད་དཀའ་བ་ཐམས་ཅད་སྤྱད་དེ། སྐྱོ་བ་དང་། ངལ་བ་མེད་ཅིང་རྒྱུན་མི་འཆད་པར་བརྩོན་འགྲུས་སུ་འབད་པ་ཡང་ཕ་མ་ལ་སྲི་ཞུ་བྱ་བ་དང་། དྲིན་ཤེས་པ་དང་། དྲིན་ལན་བསབ་པ་དང་། སེམས་ཅན་ཐམས་ཅད་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་དགོད་པ་དང་། དེ་བཞིན་གཤེགས་པའི་སྔོན་གྱི་སྨོན་ལམ་ཡོངས་སུ་རྫོགས་པར་བྱ་བ་དང་། དེ་ལྟར་ན་སེམས་ཅན་ཐམས་ཅད་ལ་སངས་རྒྱས་ཀྱི་བཀའ་དྲིན་ཆེན་པོ་ཡོད་པར་ཤེས་པར་བྱ་བ་དང་། དེ་བཞིན་གཤེགས་པའི་ཐུགས་རྗེ་ཆེན་པོས་སེམས་ཅན་ཡོངས་སུ་མི་གཏོང་བ་དང་། རྟག་པར་ཤིན་ཏུ་ཐབས་མཁས་པས་ཁམས་གསུམ་པའི་སྲིད་པ་ཉི་ཤུ་རྩ་ལྔར་གནས་པའི་སེམས་ཅན་ཐམས་ཅད་ལ་བསྐལ་པ་བསམ་གྱིས་མི་ཁྱབ་པའི་བར་དུ་མཉམ་སྙོམས་པའི་བྱམས་པ་བསྒོམས་ཤིང་། བཏང་སྙོམས་དང་ལྡན་པའི་ཐབས་མཁས་པས་སྤྱོད་དེ། སེམས་ཅན་ཐམས་ཅད་སྟོང་པ་ཉིད་དུ་རྟོགས་པ་དང་། ཆོས་སྟོང་པ་ཉིད་དང་། ཕུང་པོ་ལྔ་སྟོང་པ་ཉིད་དུ་རྟོགས་ཤིང་ཕྱིར་མི་ནུར་བ་དང་། མི་འབྱིང་བ་དང་། མི་རྒོད་པ་སྟོང་པ་ཉིད་དུ་
ཡང་དག་པའི་མཚན་ཉིད་ལ་ཐབས་མཁས་པས་བསྒོམ་པར་བྱ་བ་དང་། ཐེག་པ་གསུམ་མི་སྤོང་ཞིང་ཆུབ་པར་སློབ་པའི་ཐབས་ལ་མཁས་པས་ཤིན་ཏུ་ཟབ་མོའི་སྤྱོད་ཡུལ་དམ་པ་སྤྱད་པ་ལ་ཐབས་མཁས་པར་བྱ་བའི་ཕྱིར། ཆོས་ཀྱི་མཚན་ཉིད་ལ་ཤིན་ཏུ་གསལ་བར་རྟོགས་ཏེ། སངས་རྒྱས་ཀྱི་ཆོས་རྣམས་ཐོག་མ་དང་ཐ་མའི་བར་དུ་གཅིག་མ་ཡིན་པར་རྟོགས་ཤིང་ཆུད་ཀྱང་སོ་སོའི་སྐྱེ་བོ་དག་ནི་མྱོས་ཤིང་བསླད་པས་གདུང་བ་གསུམ་གྱིས་ཡོངས་སུ་གདུངས་ཏེ། སྡུག་བསྔལ་གྱི་མཚོར་ནུབ་པར་གྱུར་ཏོ། །ཕྱིན་ཅི་ལོག་བཞིས་བསྒྲིབས་པས་ཟག་པ་དང་བཅས་པའི་ཆོས་ལ་ཕྱིན་ཅི་ལོག་ཏུ་གྱུར་ཏོ། །མི་བདེན་པ་ཀུན་ཏུ་རྟོགས་པས་བདག་མེད་པ་ལ་བདག་ཏུ་ལྟ། མི་རྟག་པ་ལ་རྟག་པར་ལྟ། མི་བདེ་བ་ལ་བདེ་བར་ལྟ། མི་གཙང་བ་ལ་གཙང་བར་ལྟ་ཞིང་སྐྱེ་བ་དང་། རྒ་བ་དང་། ན་བ་དང་། འཆི་བས་གཟིར་ཏེ་སྐད་ཅིག་ཏུ་མི་རྟག་པས་སྒྲིབ་པ་ལྔ་དང་། ཀུན་ནས་གླགས་པ་བཅུས་ཀུན་དུ་གླགས་ཏེ། སྲིད་པ་གསུམ་དུ་འཁོར་ཞིང་སྐྱེ་ཤི་ཐོག་མ་དང་ཐ་མ་མེད་པ་མྱོང་བར་གྱུར་ཏོ། །དེ་བས་ན་དེ་བཞིན་གཤེགས་པས་ཅི་དང་ཅིར་འཕྲོད་པ་བཞིན་སྡེ་སྣོད་གསུམ་དང་། མདོ་སྡེ་དགུ་ནས་མདོ་སྡེ་བཅུ་གཉིས་ཀྱི་བར་དུ་རྣམ་པར་ཕྱེ་ཞིང་བསྟན་ཏོ། །སོ་སོའི་འདོད་པ་བཞིན་མདོ་སྡེ་མང་པོ་གསུངས་སོ། །ཚིག་ལ་ཆགས་པ་ཁ་ཅིག་བདག་ནི་འདི་ཁོ་ནས་ཆོག་སྟེ། མྱ་ངན་ལས་འདས་པ་ཐོབ་ཅེས་འཛིན་པ་ཡང་ཡོད་དོ། །དེ་ཡང་དེ་བཞིན་གཤེགས་པའི་སྔོན་གྱི་ཐུགས་རྗེ་ཆེན་པོའི་སྨོན་ལམ་གྱི་ཤུགས་ཀྱིས་ཕྱོགས་བཅུའི་འཇིག་རྟེན་གྱི་ཁམས་ན་ལས་འཐུན་པ་ཐམས་ཅད་བསྡུས་སོ། །དེ་ལྟར་ལས་འཐུན་པ་ཀུན་འདུས་པ་འཁོར་མང་པོའི་དཀྱིལ་འཁོར་དེར་དམ་པའི་ཆོས་མདོ་སྡེ་གསུངས་པར་དགོངས་ཏེ། གཟུགས་བརྙན་གྱི་ཆོས་ནམ་དུ་ཡང་རྒྱུན་མི་འཆད་ཅིང་སོ་སོའི་སྐྱེ་བོ་ཐམས་ཅད་བདེ་བ་ཆེན་པོ་ཐོབ་པར་མཛད་དོ། །དེ་བས་ན་དེ་བཞིན་གཤེགས་པ་འདུལ་ཞིང་སྟོན་པ་ཡང་དུས་ལས་མི་ཡོལ་བར་ཤེས། དུས་ལས་མི་ཡོལ་བར་མྱ་ངན་ལས་འདའོ། །འཇིག་རྟེན་གྱི་ཁམས་ཁ་ཅིག་ཏུ་དེ་བཞིན་གཤེགས་པ་རྣམ་པར་སྣང་མཛད་ཅེས་བྱ་བ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། སྟོན་པ་རྒྱལ་བ། སངས་རྒྱས་བཅོམ་ལྡན་འདས་ཞེས་གྲགས་སོ། །སྐབས་ཁ་ཅིག་ཏུ་ནི་དགའ་ལྡན་གནས་སུ་གཤེགས་ནས་ལྷ་རྣམས་ཀྱི་སྟོན་པ་མཛད་དོ། །སྐབས་ཁ་ཅིག་ཏུ་ནི་དགའ་ལྡན་གནས་ནས་བབས་ཏེ། འཛམ་བུའི་གླིང་དུ་སྐུ་ཚེ་ལོ་བརྒྱད་ཅུར་བཞུགས་པ་ཡང་སྟོན་ཏོ། །དེ་བས་ན་དེ་བཞིན་གཤེགས་པ་ནི་བསམ་གྱིས་མི་ཁྱབ་བོ། །འཇིག་རྟེན་གྱི་ཁམས་ཀྱང་བསམ་གྱིས་མི་ཁྱབ་བོ། །ལས་ཀྱི་རྣམ་པར་སྨིན་པ་ཡང་བསམ་གྱིས་མི་ཁྱབ་བོ། །སེམས་ཅན་གྱི་བསམ་པ་ཡང་བསམ་གྱིས་མི་ཁྱབ་བོ། །བསམ་གཏན་གྱི་ཏིང་ངེ་འཛིན་ཡང་བསམ་གྱིས་མི་ཁྱབ་བོ། །ཀླུའི་མཐུ་ཡང་བསམ་གྱིས་མི་ཁྱབ་བོ། །འདི་ནི་སངས་རྒྱས་བསམ་གྱིས་མི་ཁྱབ་པ་སྟེ། སེམས་ཅན་ཐམས་ཅད་ཀྱིས་སངས་རྒྱས་ཀྱི་ཐུགས་ལ་དགོངས་པ་ཤེས་པར་འདོད་ན་སེམས་ཅན་དབང་པོ་ཞན་པ་ཐ་མའི་བར་དུ་ཡང་ཀུན་ཤེས་པར་མཛད་དོ། །སེམས་ཅན་ཐམས་ཅད་ལས་གང་ཡང་སངས་རྒྱས་མཐོང་བར་འདོད་ན་དེ་མ་ཐག་ཏུ་མཐོང་བར་མཛད་དོ། །གལ་ཏེ་མཐོང་བར་མི་མཛད་ན་མིག་སྔར་བབ་ཀྱང་མི་མཐོང་ངོ་། །དེ་བས་ན་ཉན་ཐོས་དང་། རང་སངས་རྒྱས་དག་ལྷའི་མིག་གི་མངོན་པར་ཤེས་པ་ཡོད་ཀྱང་མཐོང་བར་མི་ནུས་སོ། །དེ་མ་ཡིན་པ་གཞན་ཡང་སངས་རྒྱས་ཀྱིས་འོད་ཟེར་ཆེན་པོ་བཀྱེ་ནས་སྲིད་པའི་རྩེ་མོ་མན་ཆད་མཚམས་མེད་པའི་སེམས་ཅན་དམྱལ་བ་ཡན་ཆད་སྣང་བར་མཛད་ཀྱང་གང་འདུལ་བའི་སྐལ་བ་དང་ལྡན་པས་ནི་མཐོང་བར་འགྱུར། གང་སྐལ་བ་དང་མི་ལྡན་པས་ནི་མིག་སྔར་བབ་ཀྱང་མི་མཐོང་ངོ་། །དེ་བཞིན་གཤེགས་པ་སྐབས་ཁ་ཅིག་ཏུ་ནི་ཆེད་དུ་སྐུལ་བ་མཛད། སྐབས་ཁ་ཅིག་ཏུ་ནི་ཅང་མི་གསུང་བས་ན། སངས་རྒྱས་བཅོམ་ལྡན་འདས་ནི་བསམ་གྱིས་མི་ཁྱབ་སྟེ། ཤིན་ཏུ་དཔག་པར་དཀའ་བ། ཤིན་ཏུ་ཤེས་ཤིང་རྟོགས་པར་དཀའ་ན། ཇི་ལྟར་ཁྱོད་ཀྱིས་དེ་བཞིན་
གཤེགས་པ་ལ་སྤྱོད་དཀའ་བ་ཤིན་ཏུ་ཟབ་མོ་དྲི་བ་ལ་སྤོབས་པར་གྱུར། ཁྱོད་ཀྱིས་ཞུས་པ་འདི་ནི་ཡང་དག་པར་སེམས་ཅན་ཐམས་ཅད་ལ་བྱམས་ཤིང་སྙིང་བརྩེ་བ་ཡིན་ཏེ། ངན་འགྲོ་གསུམ་གྱི་ལམ་བཀག་ནས་ལྷ་དང་མིའི་ལམ་བཏོད་པ་ཡིན་ནོ། །ཀུན་དགའ་བོ་ངས་ད་ཁྱོད་ལ་ཕ་མ་ལ་སྲི་ཞུ་བྱ་བའི་སྤྱད་དཀའ་བ་མདོ་ཙམ་ཞིག་བསྟན་པར་བྱས་ལེགས་པར་ཉོན་ལ་ཡིད་ལ་ཟུང་ཤིག །དེ་ནས་བཅོམ་ལྡན་འདས་ཀྱིས་ཀུན་དགའ་བོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་། འཁོར་མང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །སྔོན་བྱུང་བ་བསྐལ་པ་ཚད་མེད་པ་མཐའ་ཡས་གྲངས་མེད་པ་འདས་པའི་ཕ་རོལ་ན་ཡུལ་བཱ་རཱ་ཎ་སཱིར་སངས་རྒྱས་རྣམ་པར་གཟིགས་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་གདུལ་བའི་ཁ་ལོ་སྒྱུར་བ་བླ་ན་མེད་པ། སྟོན་པ་རྒྱལ་བ། འཇིག་རྟེན་གྱི་གཙོ་བོ། ལྷ་དང་མིའི་སྟོན་པ་འཇིག་རྟེན་དུ་བྱུང་ངོ་། །སངས་རྒྱས་དེའི་སྐུ་ཚེའི་ཚད་ཀྱང་བསྐལ་པ་ཆུང་ངུ་ཉི་ཤུར་བཞུགས་སོ། །དམ་པའི་ཆོས་ཀྱང་བསྐལ་པ་ཆུང་ངུ་ཉི་ཤུར་གནས་སོ། །གཟུགས་བརྙན་གྱི་ཆོས་ཀྱང་བསྐལ་པ་ཆུང་ངུ་ཉི་ཤུར་གནས་སོ། །གཟུགས་བརྙན་གྱི་ཆོས་ལ་སྤྱོད་པའི་ཚེ་མིའི་རྒྱལ་པོ་རཱ་ཛ་ཞེས་བྱ་བ་འཇིག་རྟེན་དུ་བྱུང་སྟེ། ཡུལ་བཱ་རཱ་ཎ་སཱི་ལ་དབང་སྒྱུར་རོ། །རྒྱལ་པོ་དེ་ལ་བཙུན་མོ་ནི་ཉི་ཁྲི་ཡོད། བློན་པོ་ནི་བཞི་སྟོང་སྙེད་ཡོད། བལ་གྱི་གླང་པོ་ཆེ་ཡང་ལྔ་བརྒྱ་ཡོད། རྒྱལ་ཕྲན་དྲུག་ཅུ་ལ་དབང་། གྲོང་ཁྱེར་བརྒྱད་བརྒྱ་ཞིག་ཡོད། རྒྱལ་པོ་དེ་ལ་རྒྱལ་བུ་གསུམ་ཡོད་དེ། གསུམ་ཆར་ཡང་རྒྱལ་ཕྲན་རེ་རེ་བྱེད་དོ། །དེའི་ཚེ་དེའི་དུས་ན་ཡུལ་བཱ་རཱ་ཎ་སཱིའི་རྒྱལ་པོ་དེ་མཁས་ཤིང་ཤེས་རབ་དང་ལྡན་ཏེ། རྟག་ཏུ་ཡང་དྲང་བའི་ཆོས་ཀྱིས་ཡུལ་གྱི་སྲིད་འཛིན་པས་གང་ཡང་གཏམས་ལས་ཆད་ཅེས་བྱ་བ་མེད་དོ། །རྒྱལ་པོའི་བསོད་ནམས་དང་ཡོན་ཏན་གྱི་མཐུས་ཆར་ཆུ་དུས་ལས་མི་ཡོལ་ཏེ། ལོ་ཏོག་རྒྱུན་དུ་ལེགས་པས་དེ་ན་གནས་པའི་མི་རྣམས་ཀྱང་བདེ་སྐྱིད་དོ། །དེའི་ཚེ་ན་བཱ་རཱ་ཎ་སཱིའི་རྒྱལ་པོ་
དེ་ལ་བློན་པོ་ནག་པོ་སྒྲ་གཅན་ཞེས་བྱ་བ་ཞིག་ཡོད་དོ། །བློན་པོ་སྒྲ་གཅན་རྒྱལ་པོ་ལ་འཁུས་ནས་དམག་རྣམ་བཞི་བཤམས་པ་ལ་འདི་ལྟ་སྟེ། བལ་གླང་གི་ཚོགས་དང་། ཤིང་རྟའི་ཚོགས་དང་། རྟའི་ཚོགས་དང་། དཔུང་བུ་ཆུང་གི་ཚོགས་བཤམས་ནས་བཱ་རཱ་ཎ་སཱིའི་རྒྱལ་པོ་ལ་བརྒལ་ནས་རྒྱལ་པོའི་སྲོག་བཅད་དོ། །དེ་ལྟར་རྒྱལ་པོ་བསད་ནས་ཀྱང་དམག་གི་ཚོགས་རྣམ་པ་བཞི་བཀྱེ་ནས་མཐའི་རྒྱལ་ཕྲན་རྒྱལ་བུ་རབ་ཀྱང་བསད་དོ། །དེ་ནས་རྒྱལ་བུ་འབྲིང་པོ་ཡང་ཕབ་ནས་མཐའི་རྒྱལ་ཕྲན་རྒྱལ་བུ་ཐ་ཆུངས་ཀྱི་ཐོག་ཏུ་དམག་དྲང་བར་བཤམས་སོ། །རྒྱལ་བུ་ཐ་ཆུངས་དེ་ངོ་མཚར་དུ་གཟུགས་བྱད་བཟང་ལ། འཕགས་པར་མཛེས་ཤིང་རང་བཞིན་གྱིས་དགེ་བ། དུལ་བ། འཛུམ་ཞིང་སྨྲ་བ་སྨྲའོ་ཅོག་ཀྱང་ཕན་པའི་དོན་དུ་སྨྲ་ཞིང་འགྱུར་གྱི་གནོད་པ་མེད་པ། རྟག་ཏུ་དྲང་པོའི་ཆོས་ཀྱིས་ཡུལ་གྱི་སྲིད་འཛིན་ཏེ། ལོག་པས་མི་འཚོ་བས་ཡུལ་གྱི་མི་རྣམས་ཀྱང་བདེ་སྐྱིད་ལ་དར་བ། ལོངས་སྤྱོད་དང་ནོར་རིན་པོ་ཆེར་ལྡན་པ། བང་མཛོད་གང་བ། རྒྱལ་པོ་དེའི་ཡོན་ཏན་ལ་ཀུན་གྱིས་བསྔགས་ཤིང་བསྟོད་པ། བར་སྣང་གི་ལྷ་དང་། འཇིག་རྟེན་གྱི་ལྷ་ཐམས་ཅད་ཀྱིས་ཀྱང་དགའ་ཞིང་བཀུར་བ། དེའི་ཚེ་ན་རྒྱལ་པོ་དེ་ལ་རྒྱལ་བུ་སུ་ཤ་དེ་བ་ཞེས་བྱ་བ་གཅིག་པུ་ཞིག་ཡོད་དེ། ཤིན་ཏུ་ཡིད་གཞུངས་ཤིང་གསལ་བ། བྱམས་པའི་སེམས་དང་ལྡན་པ། སྦྱིན་པ་ལ་དགའ་བ། ལུས་ཀྱི་མདོག་གསེར་དུ་འདུག་པ། གནས་བདུན་མཉམ་པར་གང་བ། སྐྱེས་བུའི་མཚན་རྫོགས་པར་ལྡན་པ། ལོ་བདུན་ལོན་པ་ཞིག་ཡོད་པ་དེ་ལ། ཡབ་རྒྱལ་པོ་ཡང་ཤིན་ཏུ་བྱམས་ཤིང་སྡུག་པར་སེམས་སོ། །དེའི་ཚེ་ན་ཕོ་བྲང་སྲུང་བའི་ལྷ་ཞིག་རྒྱལ་པོ་དེ་ལ་འདི་སྐད་ཅེས་སྨྲས་སོ། །རྒྱལ་པོ་མཁྱེན་ཏམ། བློན་པོ་སྒྲ་གཅན་འཁུས་ནས་ཡུལ་སྲིད་ཕྲོགས་ཏེ་རྒྱལ་པོ་ཡབ་ཀྱང་བཀྲོངས། དམག་གི་ཚོགས་བཞི་ཡང་བཀྱེ་ནས། རྒྱལ་པོ་གཅེན་གཉིས་ཀྱང་སྲོག་གི་དབང་པོ་དང་ཕྲལ་ཏེ། དམག་གི་ཚོགས་རྣམས་རིང་པོ་མི་ཐོགས་པར་འདིར་ཕྱིན་ན་རྒྱལ་པོ་ཅིའི་ཕྱིར་སྲོག་བསྐྱབས་ཤིང་
གུད་དུ་མི་འགྲོ། དེའི་ཚེ་རྒྱལ་པོ་དེས་དེ་སྐད་སྨྲས་པ་ཐོས་ནས་ལུས་ཀྱི་བ་སྤུ་ཀུན་ཟིང་ཞེས་བྱེད་དེ། ལུས་ཀྱང་འདར་ནས་ཡི་མུག་ཅིང་མྱ་ངན་གྱིས་སེམས་གདུངས་ཏེ། ས་ལ་འགྲེ་ཞིང་བརྒྱལ་བར་གྱུར་ནས་རིང་ཞིག་ལོན་པ་དང་། ཅུང་ཟད་སངས་ཏེ་དལ་གྱིས་ནམ་མཁའི་ལྷ་ལ་འདི་སྐད་ཅེས་སྨྲས་སོ། །འདི་ལྟར་སྨྲ་བའི་སྐད་ནི་ཡོད་ལ་གཟུགས་ནི་མི་སྣང་བ་ཁྱོད་ཅི་ཡིན། སྨྲས་པའི་ཚིག་འདི་ཡང་དག་པར་བདེན་ནམ། ལྷས་སྨྲས་པ་བདག་ནི་རྒྱལ་པོའི་ཕོ་བྲང་སྲུང་བའི་ལྷ་ཡིན་ཏེ། རྒྱལ་པོ་ཁྱོད་ཤེས་པ་དང་ལྡན་ཞིང་བསོད་ནམས་དང་ཡོན་ཏན་དུ་བཅས་པས་དྲང་པོའི་ཆོས་ཀྱིས་ཡུལ་སྲིད་འཛིན་ཏེ། དེ་བས་ན་བདག་གིས་སྔར་སྨྲས་པ་ཡིན་ཏེ། སྡུག་བསྔལ་གྱིས་ཉོན་མོངས་པར་མ་གྱུར་པར་མྱུར་དུ་བྱོལ་ཞིང་འགྲོ་བའི་རིགས་སོ། །དེ་ནས་རྒྱལ་པོ་དེ་ཕོ་བྲང་དུ་ཞུགས་ནས་ད་ནི་བདག་ཡུལ་གཞན་ཞིག་ཏུ་འགྲོ་དགོས་སོ་སྙམ་དུ་བསམས་སོ། །ཡང་འདི་སྙམ་དུ་བསམས་སོ། །ཡུལ་ཕ་རོལ་ཏུ་འགྲོ་བའི་ལམ་གཉིས་ཡོད་དོ། །ལམ་ཉེ་བར་ཞུགས་ན་ནི་ཞག་བདུན་གྱིས་ཡུལ་ཕ་རོལ་ཏུ་ཕྱིན་པར་འགྱུར། ལམ་རིང་པོར་ཞུགས་ན་ནི་ཞག་བཅུ་བཞིས་ཕྱིན་པར་འགྱུར་བས། ཅི་ནས་ལམ་ཉེ་བར་འགྲོའོ་སྙམ་བསམས་ནས་ཞག་བདུན་གྱི་རྒྱགས་དང་ཆས་ཏེ། ཕོ་བྲང་གི་ཕྱི་རོལ་ཏུ་ཕྱིན་པ་དང་། ཕྱིར་ཕོ་བྲང་གི་ནང་དུ་ལོག་ནས་རྒྱལ་བུ་སུ་ཤ་དེ་བ་པང་དུ་བླངས་ཏེ་མིག་མི་འཛུམས་པར་ལྟ་ཞིང་དངངས་པ་ལྟར་ལངས་ནས་ཕྱིར་ཡང་འདུག་གོ །དེའི་ཚེ་ན་བཙུན་མོས་དེ་ལྟར་མི་བདེ་ཞིང་སྐྲག་པ་ལྟར་གྱུར་པ་མཐོང་ནས་རྒྱལ་པོ་ལ་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ། ཅིའི་སླད་དུ་འཇིགས་ཤིང་སྐྲག་པ་ལྟ་བུའི་གཟུགས་སྟོན་ཅིང་སྐུ་ལ་ཡང་རྡུལ་གྱིས་གོས་པ་ལྟ་བུ། སྐྲ་ཡང་འཛིངས་ཏེ། དབུགས་ཀྱང་མི་བདེ་སྟེ། ཡུལ་སྟོར་ལ་ཐུག་པའམ། མཛའ་སྡུག་པ་དང་བྱེ་བའམ། དགྲ་སྡང་བ་དང་ཕྲད་པ་ལྟ་བུ་དང་། བཀྲ་མི་ཤིས་པའི་མཚན་མ་དག་གདའ་བ་འདི་ཅི་ལགས་བསྟན་དུ་གསོལ། རྒྱལ་པོས་སྨྲས་པ། ཁོ་བོ་ཅི་ཉེས་པ་ཁྱོད་ཀྱིས་ཤེས་པ་མ་ཡིན་གྱིས་མ་སྨྲ་ཞིག་བཙུན་མོས་གསོལ་པ།
བདག་དང་རྒྱལ་པོར་ལུས་གཟུགས་གཉིས་ཀྱང་སེམས་གཅིག་སྟེ། དཔེར་ན་བྱའི་འདབ་མ་གཉིས་སམ། ལུས་ཀྱི་རྐང་པ་གཉིས་སམ། མགོའི་མིག་གཉིས་སམ། དེ་དང་འདྲ་ན་ཅིའི་སླད་དུ་བདག་ལ་གསང་སྟེ་མི་གསུང་། རྒྱལ་པོས་བཙུན་མོ་ལ་སྨྲས་པ། ཁྱོད་མི་ཤེས་སམ། བློན་པོ་སྒྲ་གཅན་ངན་སེམས་སྐྱེས་ནས་རྒྱལ་པོ་ལ་འཁུས་ཏེ་ཡབ་རྒྱལ་པོ་ཡང་བཀྲོངས་ཏེ་གཅེན་རྒྱལ་བུ་གཉིས་ཀྱི་སྲོག་གི་བར་ཆད་བྱས་ནས་ད་ལྟར་དམག་དང་ཆས་ཏེ་ང་ལ་རྒོལ་དུ་འོང་བས། ཁོ་བོ་ཡུལ་གཞན་དུ་འབྱོལ་དུ་འགྲོ་ཞེས་སྨྲས་ནས་རྒྱལ་བུ་དགེ་དོན་པང་དུ་བླངས་ཏེ་ལམ་དུ་ཞུགས་སོ། །དེ་ནས་བཙུན་མོ་ཡང་རྒྱལ་པོའི་ཕྱིར་འབྲངས་ཏེ་སོང་ངོ་། །དེའི་ཚེ་རྒྱལ་པོ་མྱ་ངན་གྱིས་ནོན་ཏེ། ཡིད་འཁྲུགས་ནས་ཞག་བཅུ་བཞིའི་ལམ་དུ་ཞུགས་པས་ལམ་ཡང་ནོར་ཏེ། ལམ་དེ་ཡང་བགྲོད་དཀའ་ཞིང་རྩྭ་ཡང་རྩུབ། རྩྭ་ཆུ་ཙམ་ཡང་མེད་དེ། ཞག་དུ་མ་ཞིག་སོང་སོང་བ་ལས་རྒྱགས་ཀྱང་ཆད་དོ། །ཐོག་མ་གསང་སྟེ་རྒྱལ་པོ་གཅིག་པུ་འགྲོ་བར་བྱས་ནས་ཞག་བདུན་གྱི་རྒྱགས་ལས་ཀྱང་མ་བརྫངས་པ་ལས་ལམ་ཡང་ནོར། མི་གསུམ་གྱིས་ཀྱང་ཟོས་ཏེ། ཞག་བཅུ་བཞིའི་ལམ་དུ་ཞུགས་པས་ད་དུང་ལམ་རིང་ཞིག་ཡོད་པ་ལས་རྒྱགས་ཀྱང་ཆད་ནས་དེའི་ཚེ་རྒྱལ་པོ་དང་བཙུན་མོས་སྐད་ཕྱུང་ནས་ངུས་སོ། །ཀྱི་ཧུད་ཀྱི་ཧུད་རེ་སྡུག་ཐོག་མ་བཙས་ནས་ད་ཙམ་གྱི་བར་དུ་འདི་འདྲ་བ་མ་མྱོང་བ་ད་འདིར་མྱོང་བར་གྱུར་ཏེ། ད་འདིར་སྡུག་ཅིང་ཕོངས་སོ་ཞེས་ཟེར་ཏེ་ལག་པས་མགོ་ལ་བརྡབས་སོ། །ས་ལ་འགྲེ་ཞིང་ལུས་ལ་རྡུལ་གྱིས་གོས་ནས་ཚིག་འདི་སྐད་དུ་སྨྲེ་སྔགས་འདོན་ཏོ། །བདག་ཅག་གིས་ཚེ་སྔ་མ་ལ་སྡིག་པ་མི་དགེ་བའི་ལས་ཅི་ཞིག་བྱས། འོན་ཏེ་ཕ་མ་དང་དགྲ་བཅོམ་པ་བསད་དམ། འོན་ཏེ་དམ་པའི་ཆོས་ལ་སྐུར་པ་བཏབ་བམ། འོན་ཏེ་འཐུན་པའི་དགེ་འདུན་གྱི་དབྱེན་བགྱིས་སམ། འོན་ཏེ་རྔོན་པ་དང་། ཉ་པ་བྱས་སམ། འོན་ཏེ་སྲང་དང་བྲེ་བཅོས་ཏེ་ཕ་རོལ་ལ་ཕྲོག་རློམ་བྱས་སམ། འོན་ཏེ་དགེ་འདུན་གྱི་ནོར་ལ་སྤྱོད་སྤྱོད་དམ། ཅི་བྱས་ན་འདི་འདྲ་བའི་སྡུག་བསྔལ་མྱོང་བར་གྱུར་ཅེས་དེ་སྐད་སྨྲེ་ཞིང་ཅུང་
ཟད་བསྟིར་ནི་དགྲས་སླེབས་ན་སྲོག་གི་བར་ཆད་ངེས་པར་འབྱུང་། ལམ་དུ་ཞུགས་ནས་འགྲོར་ནི་བཀྲེས་པ་དང་སྐོམ་པས་ཉེན་ནས། སྲོག་ལ་བབ་ཏུ་ཆའོ། །རྒྱལ་པོ་དང་བཙུན་མོ་དེ་ལྟ་བུའི་སྡུག་བསྔལ་གྱིས་ཉེན་ཏེ་སྐད་ཕྱུང་སྟེ་ངུས་པ་དང་ས་ལ་འགྱེལ་ནས་བརྒྱལ་བར་གྱུར་ཏོ། །དེ་ནས་རིང་ཞིག་ལོན་པ་དང་སངས་ནས་འདི་སྙམ་དུ་གསུམ་ཆར་ལྷན་ཅིག་ཏུ་འདི་ཁོ་ནར་འཆི་བར་འགྱུར་གྱིས། བཙུན་མོ་བསད་ལ་བདག་དང་བུའི་སྲོག་ཐར་བར་བྱའོ་སྙམ་བསམས་ནས་རལ་གྲི་ཕྱུང་སྟེ་བཙུན་མོ་བསད་པར་བཤམས་པ་དང་། རྒྱལ་བུ་དགེ་དོན་གྱིས་རྒྱལ་པོའི་ལག་པ་ནས་བཟུང་སྟེ། ད་ལྟར་ཅི་ཞིག་མཛད་དགོངས་ཞེས་གསོལ་ཏོ། །ཡབ་རྒྱལ་པོས་མིག་ནས་མཆི་མས་གང་བཞིན་དུ་རྒྱལ་བུ་ལ་འདི་སྐད་ཅེས་སྨྲས་སོ། །ཁྱོད་ཀྱི་མ་བཙུན་མོ་དམ་པ་བསད་ལ་ཁྱོད་ཀྱི་སྲོག་གསོ་སྙམ་མོ། །གལ་ཏེ་མ་བསད་ཀྱང་། རང་འཆི་བར་འགྱུར་ཏེ། ཁོ་བོ་ནི་འཆི་འམ་གསོན་ཡང་རུང་ན་བུ་ཁྱོད་ཀྱི་སྲོག་གསོ་བའི་ཕྱིར་ཁྱོད་ཀྱི་མ་བཙུན་མོ་བསད་སྙམ་མོ། །དེ་ནས་རྒྱལ་བུ་དགེ་དོན་གྱིས་ཡབ་རྒྱལ་པོ་ལ་འདི་སྐད་ཅེས་གསོལ་ཏོ། །གལ་ཏེ་བཙུན་མོ་བསད་པར་གྱུར་ན་དེའི་ཤ་ལ་བདག་མི་འཚལ་ཏེ། གང་ན་ཡང་མའི་ཤ་ལ་བུ་ཟ་བ་མི་སྲིད་པས་བདག་ཀྱང་འཆི་བར་འགྱུར་ན་ཡབ་རྒྱལ་པོ་ཅིའི་སླད་དུ་བདག་བཀུམ་སྟེ། ཕ་མའི་སྲོག་ཐར་བར་མི་མཛད། ཡབ་རྒྱལ་པོས་དེ་སྐད་ཅེས་སྨྲས་པ་ཐོས་ནས་མོད་ལ་འཁམས་ཏེ་འགྱེལ་ནས་ས་ལ་འགྲེ་ཞིང་རྒྱལ་བུ་ལ་འདི་སྐད་ཅེས་སྨྲས་སོ། །ཁྱོད་ཁོ་བོའི་མིག་དང་འདྲ་ན་སུ་ཞིག་རང་གི་མིག་ཕྱུང་སྟེ་ཟ་བར་བྱེད། ཁོ་བོ་ནི་ཤིའང་བླ་བས་བུ་མི་གསོད་དོ། །བུ་བསད་དེ་ཤ་ཟ་མི་ནུས་སོ། །དེ་ནས་རྒྱལ་བུ་དགེ་དོན་གྱིས་ཡང་ཡབ་རྒྱལ་པོ་ལ་འདི་སྐད་ཅེས་གསོལ་ཏོ། །གལ་ཏེ་ཡབ་ཡུམ་གྱིས་བདག་བཀུམ་ན་ཤ་ཁྲག་ཀྱང་རིང་པོ་མི་ཐོགས་པར་རུལ་སུངས་ནས་དགོས་པ་མ་མཆིས་པར་འགྱུར་ཏེ། བདག་གིས་གསོལ་བ་གཅིག་ཅིག་མ་གནང་ན་བྱམས་པའི་ཡབ་ཡུམ་མ་ལགས་པས་བདག་གི་ཡིད་དང་མི་འགལ་བར་མཛད་དུ་གསོལ། དེ་ནས་ཡབ་རྒྱལ་པོས་སྲས་རྒྱལ་བུ་ལ་ཁྱོད་ཀྱི་ཡིད་དང་མི་འགལ་བར་བྱ་བས་ཅི་གསོལ་
བ་རྣམས་མྱུར་དུ་སྨྲོས་ཤིག་ཅེས་བསྒོ་བ་དང་། རྒྱལ་བུ་དགེ་དོན་གྱིས་ཡབ་རྒྱལ་པོ་ལ་འདི་སྐད་ཅེས་གསོལ་ཏོ། །ཡབ་ཡུམ་གྱིས་བདག་ལ་ཐུགས་བརྩེ་བའི་སླད་དུ་ཉིན་རེ་རེ་ཞིང་བདག་གི་ལུས་ལས་ཤ་རྒྱ་མ་གསུམ་གསུམ་བཅད་དེ། ཆ་གཉིས་ནི་ཡབ་ཡུམ་ལ་འབུལ། ཆ་གཅིག་ནི་བདག་རང་འཚལ་ན་ལུས་སྲོག་གི་ཟུངས་སུ་འགྱུར་རོ། །དེ་ནས་རྒྱལ་པོས་ཀྱང་རྒྱལ་བུས་གསོལ་པ་བཞིན་དུ་གནང་ནས་ཉིན་གཅིག་བཞིན་ཤ་རྒྱ་མ་གསུམ་གསུམ་བཅད་དེ། ཆ་གསུམ་དུ་བགོས་ནས། ཆ་གཉིས་ནི་རྒྱལ་པོ་དང་བཙུན་མོ་ཟ། ཆ་གཅིག་ནི་རྒྱལ་བུ་རང་ཟ་སྟེ། ལུས་དང་སྲོག་གི་ཟུངས་བྱས་ནས་ལམ་དུ་ཞུགས་ཏེ་སོང་སོང་བ་ལས་ཞག་གཉིས་ཀྱིས་ཡུལ་ཕ་རོལ་མ་སླེབས་པར་རྒྱལ་བུའི་ལུས་ཀྱི་ཤ་ཟད་དེ་རུས་པའི་ཚིགས་དང་ཆུ་བ་ཙམ་ཞིག་འབྲེལ་ཏེ་སྲོག་གི་ལྷག་མ་ཙམ་ཞིག་ལུས་ནས་ས་ལ་འགྱེལ་ཏོ། །དེ་ནས་རྒྱལ་པོ་དང་བཙུན་མོས་རྒྱལ་བུ་པང་དུ་བླངས་ནས་སྐད་ཆེན་པོ་ཕྱུང་ནས་ཆོ་ངེས་ཆེན་པོ་བཏབ་སྟེ་འདི་སྐད་ཅེས་སྨྲས་སོ། །ངེད་གཉིས་ཀྱིས་མ་རིག་པས་ཁྱོད་ཀྱི་ཤ་ཟོས་ཏེ་ཁྱོད་འདི་ལྟ་བུའི་ན་ཚ་བའི་སྡུག་བསྔལ་མྱོང་བར་གྱུར་ལ། ལམ་ཡང་ད་དུང་རིང་བས། ཁྱོད་ཀྱི་ལུས་ཀྱི་ཤ་ནི་ཟད་དེ། ད་ནི་ལྷན་ཅིག་ཏུ་གནས་འདིར་རོ་གཞག་གོ །དེ་ནས་རྒྱལ་བུ་དགེ་དོན་གྱིས་སྐད་ཆུང་ངུས་ཡབ་རྒྱལ་པོ་ལ་འདི་སྐད་ཅེས་གསོལ་ཏོ། །ད་འདི་ནས་ཕ་རོལ་ཏུ་ཞག་གཅིག་ཙམ་གྱི་ལམ་ལས་མ་ལུས་ཏེ། བདག་ནི་གཡོ་ཞིང་བསྐྱོད་མི་ནུས་པས་སྲོག་འདིར་འདོར་རོ། །རྒྱལ་པོ་དང་བཙུན་མོ་ནི་མི་མ་རབས་ངན་པ་ལྟར་ལྷན་ཅིག་ཏུ་གནས་འདིར་རོ་གཞག་གོ་མ་གསུང་ཤིག །བདག་ལ་བྱམས་ཤིང་ཐུགས་བརྩེ་བར་དགོངས་ན་བདག་གིས་བསམས་པ་དང་མི་འགལ་བར་མཛད་དུ་གསོལ། ད་དུང་ཡང་བདག་གི་རུས་པའི་གསེབ་ན་ཤ་ཅི་ཡོད་པ་མ་ལུས་པར་བཏོགས་ལ་ཡུལ་ཕ་རོལ་ཏུ་གཤེགས་སུ་གསོལ། དེ་ནས་རྒྱལ་པོས་ཡང་རྒྱལ་བུས་གསོལ་པ་བཞིན་དུ་ཚིགས་དང་རུས་པའི་གསེབ་ན་ཤ་ཅི་ཡོད་པ་ཟད་པར་བཏོགས་ནས་ཆ་གསུམ་དུ་བགོས་ཏེ། ཆ་གཉིས་ནི་རྒྱལ་པོ་དང་བཙུན་མོས་ཟོས། ཆ་གཅིག་ནི་རྒྱལ་བུ་རང་གིས་ཟོས་ཏེ། རྒྱལ་པོ་
དང་བཙུན་མོ་ཡང་ལམ་དུ་ཞུགས་ནས་དོང་ངོ་། །རྒྱལ་བུ་དགེ་དོན་ལངས་ནས་འགྲེང་བཞིན་དུ་རྒྱལ་པོ་དང་བཙུན་མོ་སོང་བ་ལ་བལྟའོ། །རྒྱལ་པོ་དང་བཙུན་མོ་གཉིས་སྐད་ཕྱུང་ནས་ངུ་ཞིང་སོང་ནས་རྒྱལ་བུ་དགེ་དོན་གྱིས་མིག་གིས་མི་སོད་ཀྱི་བར་དུ་རྒྱལ་པོ་དང་བཙུན་མོ་ལ་ཆགས་པའི་སེམས་ཀྱིས་མིག་མི་འཛུམས་པར་བལྟ་བལྟ་ནས་རིང་ཞིག་ལོན་པ་དང་ཕྱིར་ས་ལ་འགྱེལ་ཏོ། །ཤ་དང་ཁྲག་གི་དྲི་བྲོ་བས་ཕྱོགས་བཅུ་ནས་སྦྲང་མ་དང་ཤ་སྦྲང་མང་པོ་འདུས་ནས་རྒྱལ་བུ་ཡོག་པ་ཙམ་དུ་ལུས་ལ་ཟ་ཞིང་འཛུགས་ཏེ་སྡུག་བསྔལ་གྱིས་གདུངས་སོ། །དེའི་ཚེ་ན་རྒྱལ་བུ་དེ་སྲོག་གི་ལྷག་མ་ཙམ་ཞིག་མ་ཆད་དེ་སྐད་ཕྱུང་ནས་འདི་སྐད་ཅེས་སྨོན་ལམ་དུ་བཏབ་བོ། །བདག་གི་སྔོན་གྱི་མི་དགེ་བའི་ལས་རྣམས་ནི་འདིས་བྱང་ཞིང་ཟད་པར་གྱུར་ཅིག །དེང་སླན་ཆད་མི་བགྱིད་དོ། །བདག་གི་ལུས་ཕ་མ་ལ་ཕུལ་ཏེ་སྦྱིན་པ་བྱས་པས་བདག་གི་ཕ་མ་སྔ་མ་བས་ལྷག་པའི་བསོད་ནམས་བཅུ་གཅིག་དང་ལྡན་ཏེ་བདེ་བར་ཉལ་བ་དང་། བདེ་བར་སད་པ་དང་། རྨི་ལམ་ངན་པ་མི་རྨི་བ་དང་། ལྷས་སྲུང་བ་དང་། མིས་བཀུར་བ་དང་། ཞལ་མཆུ་དང་། རྐུན་པོ་དང་། དགྲ་དང་། རྐུ་ལྟོ་བྱེད་པ་མེད་ཅིང་དུས་ཐམས་ཅད་དུ་བཀྲ་ཤིས་པར་ཤོག་ཤིག །བདག་གི་ལུས་ལྷག་མ་ཙམ་ཤ་ཁྲག་སྦྲང་མ་ལ་བྱིན་པས་ཐམས་ཅད་དུ་འགྲངས་ཤིང་ཚིམ་པར་གྱུར་ཏེ་བདག་མ་འོངས་པའི་དུས་ན་སངས་རྒྱས་སུ་གྲུབ་པར་ཤོག་ཤིག །སངས་རྒྱས་སུ་གྲུབ་ནས་ཆོས་ཀྱི་སྐུ་ཐོབ་ནས་ཀྱང་ཆོས་ཀྱི་སྐུས་ཐམས་ཅད་ཀྱི་བཀྲེས་སྐོམ་པའི་མུ་གེ་དང་སྐྱེ་ཤིར་འཁོར་བའི་ནད་ལྕི་བ་སེལ་བར་ཤོག་ཤིག །རྒྱལ་བུས་དེ་སྐད་ཅེས་སྨོན་ལམ་བཏབ་པ་ན་གནམ་ས་ཡང་རྣམ་པ་དྲུག་ཏུ་གཡོས། ཉི་མ་ཡང་འོད་མི་གསལ་བར་གྱུར། གཅན་གཟན་དང་རི་དགས་རྣམས་ཀྱང་སྐྲག་ནས་ཀུན་ཏུ་རྒྱུག །རྒྱ་མཚོ་ཡང་རབ་ཏུ་འཁྲུགས། རི་རབ་ཀྱང་འགུལ་ཞིང་ལྡེག །སུམ་ཅུ་རྩ་གསུམ་གནམ་གྱི་བར་དུ་ཡང་རབ་ཏུ་གཡོས་སོ། །དེའི་ཚེ་བརྒྱ་བྱིན་ལྷའི་དབང་པོས་འདོད་པའི་ཁམས་ཀྱི་ལྷ་དག་དང་འཛམ་བུའི་གླིང་དག་ཏུ་བབས་ནས་རྒྱལ་བུ་དགེ་དོན་བསྡིགས་པའི་ཕྱིར་སེང་གེ་དང་། སྟག་དང་། འཕར་སྤྱང་ལ་སོགས་པའི་ལུས་
སུ་སྤྲུལ་ནས་མིག་བགྲད་ཁ་གདངས། སྤུ་བསྒྲེངས་ནས་སྐད་ཆེན་པོའི་ང་རོ་ཕྱུང་སྟེ། རྒྱལ་བུ་ལ་མཆོང་བ་བཞིན་བསྡིགས་སོ། །དེའི་ཚེ་རྒྱལ་བུ་དགེ་དོན་གྱིས་གཅན་གཟན་ཁྲོ་བོ་དེ་དག་མཐོང་ནས་ཀྱང་སྐད་མི་ཆེ་བས་འདི་སྐད་ཅེས་སྨྲས་སོ། །ཁྱེད་རྣམས་ཁོ་བོ་ཟ་འདོད་ན་ཅི་བདེར་ཟོ་ཞིག །འདི་འདྲ་བའི་མཐུ་རྩལ་གྱིས་བསྡིགས་ཅི་དགོས་ཞེས་བསྒོའོ། །དེ་ནས་བརྒྱ་བྱིན་ལྷའི་དབང་པོས་སྨྲས་པ། བདག་ཅག་ནི་སེང་གེའམ་གཅན་གཟན་མ་ཡིན་གྱི། བརྒྱ་བྱིན་ལྷའི་དབང་པོ་ཡིན་ཏེ་ཁྱོད་བགམ་ཞིང་སད་དུ་འོངས་སོ། །དེའི་ཚེ་རྒྱལ་བུས་བརྒྱ་བྱིན་ལྷའི་དབང་པོ་མཐོང་ནས་ཤིན་ཏུ་དགའ་མགུ་རངས་པར་གྱུར་ཏོ། །དེ་ནས་བརྒྱ་བྱིན་གྱིས་རྒྱལ་བུ་ལ་སྨྲས་པ། ཁྱོད་ཀྱིས་ཤིན་ཏུ་གཏོང་དཀའ་བ་བཏང་སྟེ། ལུས་ཀྱི་ཤ་ཁྲག་གིས་ཕ་མ་ལ་བསྟབས་པ་འདིའི་བསོད་ནམས་ཀྱིས་ཁྱོད་བདུད་ཀྱི་རྒྱལ་པོ་འདོད་དམ། འོན་ཏེ་ཚངས་པའི་རྒྱལ་པོ་འདོད་དམ། ལྷའི་དབང་པོའམ། མིའི་རྒྱལ་པོའམ། འཁོར་ལོས་སྒྱུར་བའི་རྒྱལ་པོ་འདོད། རྒྱལ་བུས་སྨྲས་པ། བདག་ནི་བདུད་ཀྱི་རྒྱལ་པོའམ། ཚངས་པའམ། ལྷའི་རྒྱལ་པོའམ། མིའི་རྒྱལ་པོའམ། འཁོར་ལོས་སྒྱུར་བའི་རྒྱལ་པོ་གང་ཡང་མི་འདོད་དེ། སེམས་ཅན་ཐམས་ཅད་རྣམ་པར་གྲོལ་བར་བྱ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་དོ། །བརྒྱ་བྱིན་གྱིས་སྨྲས་པ། ཁྱོད་ནི་ཤིན་ཏུ་ཡང་གཏི་མུག་ཅན་ཞིག་ཡིན་པ་འདྲ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་ཡུན་རིང་པོ་ནས་ཤིན་ཏུ་དཀའ་བ་བསྒྲུབས་པས་གདོད་འགྲུབ་ཅེའོ། །ཁྱོད་ཀྱིས་ཤིན་ཏུ་སྡུག་བསྔལ་བ་བཟོད་དམ། རྒྱལ་བུས་སྨྲས་པ། གལ་ཏེ་ལྕགས་ཀྱི་འཁོར་ལོ་འབར་བ་བདག་གི་སྤྱི་བོའི་སྟེང་ནས་རྒྱུན་དུ་འཁོར་ཡང་སྡུག་བསྔལ་དེ་ཙམ་གྱིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་གོ །བརྒྱ་བྱིན་གྱིས་སྨྲས་པ། ཁྱོད་ཀྱིས་སྨྲས་པ་སྟོང་པ་འདི་ལ་སུ་ཞིག་ཡིད་ཆེས་པར་འགྱུར། དེ་ནས་རྒྱལ་བུས་དམ་བཅས་ནས་སྨོན་ལམ་འདི་སྐད་ཅེས་བཏབ་བོ། །གལ་ཏེ་བདག་གིས་སྨྲས་པའི་ཚིག་བརྫུན་ཏེ། ལྷའི་དབང་པོ་
བསླུས་པར་གྱུར་ན་བདག་གི་ལུས་ཀྱི་རྨ་འདི་ནམ་དུ་ཡང་འཚོ་བར་མ་གྱུར་ཅིག །གལ་ཏེ་སྨྲས་པའི་ཚིག་བདེན་ན། བདག་གི་ལུས་ཀྱང་སོར་ཆུད་ཅིང་ཁྲག་ཀྱང་འོ་མར་གྱུར་ཅིག་ཅེས་སྨྲས་མ་ཐག་ཏུ་ལུས་ཀྱི་རྨ་ཡང་སྔ་མཁོ་བཞིན་སོར་ཆུད་དེ། ཁྲག་ཀྱང་འོ་མར་གྱུར་ནས་རྒྱལ་བུའི་བྱད་གཟུགས་ཀྱང་སྔ་མ་བས་ལྷག་པར་བཟང་ཞིང་སྡུག་པ་དང་མཛེས་པར་གྱུར་ཏེ་ལངས་ནས་ལྷའི་དབང་པོའི་རྐང་པ་ལ་མགོ་བོས་ཕྱག་བྱས་སོ། །དེ་ནས་ལྷའི་དབང་པོ་བརྒྱ་བྱིན་གྱིས་རྒྱལ་བུ་ཁྱོད་ལེགས་སོ། །ཤིན་ཏུ་ལེགས་སོ། །ཤིན་ཏུ་དཔའ་བའི་བརྩོན་འགྲུས་ཀྱིས་གདོན་མི་ཟ་བར་བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་འགྱུར་རོ། །རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པ་ན། ཐོག་མར་བདག་གི་དོན་མཛད་པར་གྱུར་ཅིག་ཅེས་སྨྲས་ནས་བརྒྱ་བྱིན་ལྷའི་དབང་པོ་ཡང་ནམ་མཁའི་ཕྱོགས་དེ་ཉིད་དུ་མི་སྣང་བར་གྱུར་ཏོ། །དེའི་ཚེ་ཡང་རྒྱལ་པོ་དང་བཙུན་མོ་ཡང་རྒྱལ་པོ་ཕ་རོལ་པོ་དེའི་དྲུང་དུ་ཕྱིན་ནས་རྒྱལ་པོ་དེས་ཀྱང་རྒྱང་མ་ནས་བསུ་ནས་དགོས་པའི་ཡོ་བྱད་ཡིད་བཞིན་དུ་སྦྱར་རོ། །དེའི་ཚེ་རྒྱལ་པོ་དང་བཙུན་མོ་དེས་རྒྱལ་བུའི་ལུས་ཀྱི་ཤ་ཁྲག་གིས་ཕ་མ་ལ་ཇི་ལྟར་བསྟབས་པ་རྒྱལ་པོ་དེ་ལ་ཞིབ་ཏུ་བརྗོད་པ་དང་། རྒྱལ་པོ་དེས་ཇི་ལྟར་གྱུར་པ་དེ་དག་ཐོས་ནས་རྒྱལ་བུ་དེས་ལུས་ཀྱི་ཤ་ཁྲག་གིས་ཕ་མ་ལ་བསྟབས་པས་སྲི་ཞུ་ཆེར་བྱས་པའི་དྲིན་ལན་བསབས་ནས། དམག་རྣམ་བཞི་བཤམས་ནས་རྒྱལ་པོ་དེ་དང་ཡུལ་བཱ་རཱ་ཎ་སཱིར་དམག་དྲངས་སོ། །དེའི་ཚེ་རྒྱལ་པོ་དེ་དམག་རྣམ་བཞི་དང་ཆས་ནས་ལམ་དུ་ཞུགས་ཏེ། རྒྱལ་བུ་དང་བྲལ་བའི་གནས་སུ་ཕྱིན་པ་དང་། འདི་སྙམ་དུ་བདག་གི་བུ་ནི་གདོན་མི་ཟ་བར་འདི་ཉིད་དུ་ཤི་ན་བུའི་རུས་པ་ཙམ་བསྡུས་ཏེ་ཕྱིར་བདག་གི་ཡུལ་དུ་བཀུར་རོ་སྙམ་དུ་བསམས་ནས་སྐད་ཕྱུང་ནས་ངུ་ཞིང་བུའི་རུས་བུ་སྡུད་དུ་སོང་སོང་བ་ལས་རྒྱང་མ་ནས་བདག་གི་བུ་ལུས་ཀྱི་རྨ་ཡང་སོས་ནས་སྔ་བས་ཀྱང་བཟང་ཞིང་མཛེས་ཏེ་དྲུང་དུ་འོངས་སོ། །དེ་ནས་རྒྱལ་པོས་པང་དུ་བླངས་ཏེ་ཁྱོད་ད་དུང་གསོན་ནམ་ཞེས་སྨྲས་པ་དང་། རྒྱལ་བུས་ཇི་ལྟར་གྱུར་པ། ཡབ་རྒྱལ་པོ་དང་བཙུན་མོ་ལ་སྨྲས་སོ། །རྒྱལ་པོ་དང་བཙུན་མོ་རབ་ཏུ་དགའ་སྟེ། ཐམས་
ཅད་བན་གླང་ལ་ཞོན་ནས་ཕྱིར་བདག་གི་ཡུལ་དུ་ཕྱིན་པ་དང་། རྒྱལ་བུ་དེའི་བསོད་ནམས་ཀྱི་མཐུས་བདག་གི་ཡུལ་ཡང་ཕྱིར་ཐོབ་ནས་རྒྱལ་བུ་དོན་གྲུབ་རྒྱལ་པོར་དབང་བསྐུར་ཏེ་རྒྱལ་པོར་བཅུག་གོ །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། དེའི་ཚེ་དེའི་དུས་ན་ཡབ་རྒྱལ་པོར་གྱུར་པ་དེ་གཞན་ཞིག་ཡིན་སྙམ་དུ་ཁྱོད་སེམས་ན་དེ་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེའི་ཚེ་དེའི་དུས་ན་ཡབ་རྒྱལ་པོ་དེ་ནི་ད་ལྟར་ངའི་ཡབ་ཟས་གཙང་མ་ཞེས་བྱ་བར་གྱུར་ཏོ། །དེའི་ཚེ་དེའི་དུས་ན་ཡུམ་དུ་གྱུར་པ་དེ་ནི་གཞན་ཞིག་ཡིན་སྙམ་དུ་ཁྱོད་སེམས་ན་དེ་དེ་ལྟར་མི་བལྟ་སྟེ། དེ་ནི་ད་ལྟར་ངའི་ཡུམ་ལྷ་མཛེས་ཞེས་བྱ་བ་ཡིན་ནོ། །དེའི་ཚེ་དེའི་དུས་ན་རྒྱལ་བུ་དོན་གྲུབ་ཅེས་བྱ་བར་གྱུར་པ་དེ་གཞན་ཞིག་ཡིན་སྙམ་དུ་ཁྱོད་སེམས་ན་དེ་དེ་ལྟར་མི་བལྟའོ། །དེའི་ཚེ་དེའི་དུས་ན་རྒྱལ་བུ་དེ་ནི་ད་ལྟར་ཤཱཀྱ་ཐུབ་པ་ཞེས་བྱ་བ་ང་ཡིན་ནོ། །དེའི་ཚེ་དེའི་དུས་ན་བརྒྱ་བྱིན་ལྷའི་དབང་པོར་གྱུར་པ་དེ་ནི་ད་ལྟར་ཀུན་ཤེས་ཀཽ་ཌི་ནྱ་ཞེས་བྱ་བ་ཡིན་ནོ། །བཅོམ་ལྡན་འདས་ཀྱིས་ཕ་མ་ལ་སྲི་ཞུ་བྱེད་པའི་ལེའུ་འདི་བསྟན་པའི་ཚེ་འཁོར་གྱི་དཀྱིལ་འཁོར་དེ་ན་བྱང་ཆུབ་སེམས་དཔའ་ཁྲི་ཕྲག་ཉི་ཤུ་སྙེད་ཀྱིས་འགྲོ་བ་ཐམས་ཅད་ལ་ཕན་པ་དང་བདེ་བའི་དོན་ལ་མཁས་པའི་ཚིག་གི་སྤོབས་པ་ཐོབ་པར་གྱུར་ཏོ། །བྱང་ཆུབ་སེམས་དཔའ་ཁྲི་ཕྲག་བཅུ་གཉིས་ཀྱིས་མི་སྐྱེ་བའི་ཆོས་ལ་ཆོས་ཀྱི་བཟོད་པ་ཐོབ་བོ། །གཞན་ཡང་ཕྱོགས་བཅུ་ནས་འདུས་པའི་ཉན་ཐོས་དང་། རང་སངས་རྒྱས་རྡུལ་ཕྲ་རབ་སྙེད་ཀྱིས་ཐེག་པ་གཉིས་ཀྱི་སེམས་སྤངས་ཏེ་ཐེག་པ་གཅིག་གིས་མཐར་ཕྱིན་པར་གྱུར་ཏོ། །དགེ་བསྙེན་དང་། དགེ་བསྙེན་མ་རྡུལ་ཕྲ་རབ་སྙེད་ཀྱིས་འབྲས་བུ་དང་པོ་ནས་ཐེག་པ་གཉིས་ཀྱི་འབྲས་བུའི་བར་དུ་ཐོབ་པར་གྱུར་ཏོ། །ལྷ་དང་མི་བརྒྱ་སྟོང་སྙེད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་མ་ཡིན་པ་ལྷ་དང་། ཀླུ་དང་། ཡི་དགས་དང་། ལྷ་མ་ཡིན་དང་། དྲི་ཟ་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ལགས་པ་ལ་སོགས་པའི་ཚོགས་མང་པོ་རྣམས་ལ་ལ་ནི་བླ་ན་མེད་པའི་བྱང་ཆུབ་ཏུ་སེམས་བསྐྱེད་ནས་ཉན་
ཐོས་དང་རང་སངས་རྒྱས་ཀྱི་བར་དུ་སེམས་བསྐྱེད་པར་གྱུར་ཏོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། བྱང་ཆུབ་སེམས་དཔའ་དག་གིས་སེམས་ཅན་ཐམས་ཅད་ཀྱི་དོན་དུ་ཕ་མ་ལ་སྲི་ཞུ་བྱ་བའི་ཕྱིར་ལུས་ཀྱི་ཤ་དང་ཁྲག་གིས་ཀྱང་ཕ་མ་ལ་བསྟབས་ཤིང་ཤིན་ཏུ་སྤྱད་དཀའ་བ་སྤྱོད་པ་ནི་འདི་ལྟ་བུ་ཡིན་ནོ། །འཁོར་མང་པོ་ཐམས་ཅད་ཀྱིས་སངས་རྒྱས་ཀྱིས་གསུངས་པ་ཐོས་ནས་སོ་སོ་ནས་ཕན་པ་དང་བདེ་བའི་དོན་རྙེད་དེ། དགའ་མགུ་རངས་ནས་མགོ་བོས་ཕྱག་འཚལ་ཏེ་གཡས་ཕྱོགས་ནས་བསྐོར་བ་བྱས་ནས་ཕྱིར་དོང་ངོ་། །ཐབས་མཁས་པ་ཆེན་པོ་སངས་རྒྱས་དྲིན་ལན་བསབ་པའི་མདོ་ལས་སྲི་ཞུའི་ལེའུ་ཞེས་བྱ་སྟེ་གཉིས་པའོ།། །།