གསུམ་པ། གཉེན་པོའི་ལེའུ།
ཐབས་མཁས་པ་ཆེན་པོ་སངས་རྒྱས་དྲིན་ལན་བསབ་པའི་མདོ། བམ་པོ་གཉིས་པ། དེའི་ཚེ་དེའི་དུས་ན་བཅོམ་ལྡན་འདས་འཁོར་གྱི་དཀྱིལ་འཁོར་མང་པོའི་ནང་ན་ཉི་མའི་དཀྱིལ་འཁོར་གྱིས་སྐར་མ་མང་པོ་ཟིལ་གྱིས་མནན་པ་ལྟ་བུའམ། ཀླུ་འཁྱིལ་པའི་འཇའ་ཚོན་ལྟར་འཚེར་ཞིང་གསལ་བ་ལ་ལྟ་ན་མིག་མི་ཆགས་པ་བཞིན་ནམ། བསམས་ན་ཡིད་འཁྲུལ་པ་ཙམ་དུ་འོད་ཟེར་ལྷམ་མེ། ལྷང་ངེར་བཞུགས་ཏེ། དཔེར་མི་བཟོད་པ་ནི་སྲིན་བུ་མེ་ཁྱེར་གྱི་འོད་ཉི་མ་ཤར་མ་ཐག་ཏུ་མི་སྣང་བའམ། ཉི་ཟླ་ལ་འོད་ཟེར་བརྒྱ་སྟོང་སྙེད་ཡོད་ཀྱང་བརྒྱ་བྱིན་གྱི་དྲུང་ན་སོལ་ཕུང་ལྟ་བུའམ། བརྒྱ་བྱིན་ལ་འོད་གསལ་བ་ཡོད་ཀྱང་ཚངས་པ་ཆེན་པོའི་འོད་ཟེར་གྱི་དྲུང་ན་གྱོ་མོའམ། གསེག་མ་ལྟ་བུའམ། མཚན་མོ་དང་ནོར་བུ་རིན་པོ་ཆེའི་འོད་དུ་བསྒྲུན་པ་ཙམ་མམ། ཚངས་པའི་རྒྱལ་པོ་ཆེན་པོ་ལ་འོད་ཟེར་དམ་པ་བརྒྱ་སྟོང་སྙེད་ཡོད་པའི་འོད་ཐམས་ཅད་ཀྱང་དེ་བཞིན་གཤེགས་པའི་འོད་ཟེར་གྱི་དྲུང་ན་སོལ་བའི་ཕུང་པོ་ལྟར་གྱུར་ཏོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པའི་འོད་ཟེར་གྱི་མདོག་གང་གིས་ཕྱོགས་བཅུའི་འཇིག་རྟེན་གྱི་ཁམས་ཀུན་ཏུ་སྣང་བར་གྱུར་ཏོ། །དེ་དག་ན་གནས་པའི་སེམས་ཅན་དག་ལ་འོད་ཟེར་དེས་རེག་ན་དམུས་ལོང་ནི་མིག་གིས་གཟུགས་མཐོང་བར་འགྱུར། ལུས་སྒུར་པོ་ནི་ལུས་རངས་པར་འགྱུར། དབང་པོ་ཉམས་པ་རྣམས་ནི་དབང་པོ་ཚང་ཞིང་ཡན་ལག་
དང་ཉིང་ལག་དང་ལྡན་པར་འགྱུར། མྱོས་པ་རྣམས་ནི་དྲན་པ་ཕྱིར་རྙེད་པར་འགྱུར། མདོར་ན་ཇི་ཙམ་དུ་ཡིད་དུ་མི་འོང་བ་ཐམས་ཅད་དང་བྲལ་ཏེ་འདོད་པ་བཞིན་ཐོབ་པར་འགྱུར་རོ། །དེའི་ཚེ་འཁོར་གྱི་དཀྱིལ་འཁོར་དེ་ཉིད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་བདུན་ཅུ་སྙེད་སྟན་ལས་ལངས་ནས་སངས་རྒྱས་ཀྱི་ཞབས་ལ་མགོ་བོས་ཕྱག་འཚལ་ཏེ་ལན་བརྒྱ་སྟོང་དུ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །ཐམས་ཅད་ཀྱིས་སྐད་འཐུན་པར་ཚིགས་སུ་བཅད་པ་བརྒྱ་སྟོང་གིས་དེ་བཞིན་གཤེགས་པ་ལ་མངོན་པར་བསྟོད་པ་བྱས་པ་ལ་འདི་ལྟ་སྟེ། བྱང་ཆུབ་སེམས་དཔའ་བསམ་གྱིས་མི་ཁྱབ་པ་དང་། བྱང་ཆུབ་སེམས་དཔའ་རྟོག་མེད་དབྱངས་དང་། བྱང་ཆུབ་སེམས་དཔའ་བདེ་བ་འབའ་ཞིག་སེམས་དང་། བྱང་ཆུབ་སེམས་དཔའ་དྲི་མ་མེད་པར་གྲགས་པ་དང་། བྱང་ཆུབ་སེམས་དཔའ་ཚད་མེད་དབྱངས་དང་། བྱང་ཆུབ་སེམས་དཔའ་གྲགས་པ་ཆེན་པོ་དང་། བྱང་ཆུབ་སེམས་དཔའ་གཙུག་ཕུད་འོད་དང་། བྱང་ཆུབ་སེམས་དཔའ་བརྟན་པའི་སེང་གེ་དང་། བྱང་ཆུབ་སེམས་དཔའ་འབའ་ཞིག་རོལ་དང་། བྱང་ཆུབ་སེམས་དཔའ་རྟོག་པ་སྤོང་བ་དང་། བྱང་ཆུབ་སེམས་དཔའ་ཡེ་ཤེས་བརྩེགས་དང་། བྱང་ཆུབ་སེམས་དཔའ་དགེ་གནས་བློ་གྲོས་དང་། བྱང་ཆུབ་སེམས་དཔའ་རབ་ཏུ་མཚན་མེད་དང་། བྱང་ཆུབ་སེམས་དཔའ་བློ་གྲོས་འོད་ཟེར་དང་། བྱང་ཆུབ་སེམས་དཔའ་ཁྲོ་ཞི་བློ་གྲོས་དང་། བྱང་ཆུབ་སེམས་དཔའ་ཤིན་ཏུ་བསྲུང་འགྱུར་དང་། བྱང་ཆུབ་སེམས་དཔའ་དད་པ་བཙན་དང་། བྱང་ཆུབ་སེམས་དཔའ་མེ་ཏོག་འཕགས་དང་། བྱང་ཆུབ་སེམས་དཔའ་ཀུན་ཏུ་བདེ་དང་། བྱང་ཆུབ་སེམས་དཔའ་འཕགས་པའི་ཤེས་རབ་ལས་དང་། བྱང་ཆུབ་སེམས་དཔའ་ངོ་འཕྲལ་འཆད་དང་། བྱང་ཆུབ་སེམས་དཔའ་བསམ་དུ་མེད་པ་དང་། བྱང་ཆུབ་སེམས་དཔའ་ཚངས་པ་སྦྱིན་དང་། བྱང་ཆུབ་སེམས་དཔའ་རིན་ཆེན་ལས་དང་། བྱང་ཆུབ་སེམས་དཔའ་ལྷའི་མེ་ཏོག་གནས་དང་། བྱང་ཆུབ་སེམས་དཔའ་ཤིན་ཏུ་སེམས་དང་། བྱང་ཆུབ་སེམས་དཔའ་དཔག་མེད་ཆོས་དང་། བྱང་ཆུབ་སེམས་དཔའ་གྲགས་
པའི་ཡིད་དང་། བྱང་ཆུབ་སེམས་དཔའ་སྤོབས་པ་བརྩེགས་དང་། བྱང་ཆུབ་སེམས་དཔའ་དབང་ཕྱུག་སྒོ་དང་། བྱང་ཆུབ་སེམས་དཔའ་སྟོབས་བཅུ་དང་། བྱང་ཆུབ་སེམས་དཔའ་སྟོབས་བཅུ་འཆང་དང་། བྱང་ཆུབ་སེམས་དཔའ་འཕགས་པ་ཆེན་པོས་སྐྱོང་དང་། བྱང་ཆུབ་སེམས་དཔའ་འདས་པ་མེད་པ་དང་། བྱང་ཆུབ་སེམས་དཔའ་ཞི་བ་རོལ་དང་། བྱང་ཆུབ་སེམས་དཔའ་དེ་ན་གནས་དང་། བྱང་ཆུབ་སེམས་དཔའ་གྲངས་མེད་ལྷ་དང་། བྱང་ཆུབ་སེམས་དཔའ་རི་རབ་འོད་དང་། བྱང་ཆུབ་སེམས་དཔའ་རབ་ཏུ་ལྕི་བའི་སྡོང་པོ་དང་། བྱང་ཆུབ་སེམས་དཔའ་རྒྱུ་ལས་འཕགས་དང་། བྱང་ཆུབ་སེམས་དཔའ་གཅིག་པུ་འགྲོ་དང་། བྱང་ཆུབ་སེམས་དཔའ་གཟི་བརྗིད་འཕགས་དང་། བྱང་ཆུབ་སེམས་དཔའ་སྡེ་ཆེན་མཁས་དང་། བྱང་ཆུབ་སེམས་དཔའ་རིས་སྐྱོབ་དང་། བྱང་ཆུབ་སེམས་དཔའ་འཇིག་རྟེན་གསུམ་འཛིན་དང་། བྱང་ཆུབ་སེམས་དཔའ་ངོ་འཕྲལ་ཡོད་དང་། བྱང་ཆུབ་སེམས་དཔའ་གྲགས་པ་བརྗོད་དང་། བྱང་ཆུབ་སེམས་དཔའ་ཉི་འོད་གསལ་དང་། བྱང་ཆུབ་སེམས་དཔའ་སེང་གེ་བཙན་དང་། བྱང་ཆུབ་སེམས་དཔའ་དུས་ཚོད་རྒྱལ་པོ་དང་། བྱང་ཆུབ་སེམས་དཔའ་སེང་གེའི་སྙིང་པོ་དང་། བྱང་ཆུབ་སེམས་དཔའ་སྲིད་མངོན་སྟོན་དང་། བྱང་ཆུབ་སེམས་དཔའ་འོད་རྒྱང་གསལ་དང་། བྱང་ཆུབ་སེམས་དཔའ་སེང་གེའི་རི་དང་། བྱང་ཆུབ་སེམས་དཔའ་སྲིད་ལེན་སྦྱིན་དང་། བྱང་ཆུབ་སེམས་དཔའ་རྒྱལ་བ་སྦྱིན་དང་། བྱང་ཆུབ་སེམས་དཔའ་རྒྱལ་མཚན་མཆོག་དང་། བྱང་ཆུབ་སེམས་དཔའ་དགའ་མགུ་རངས་དང་། བྱང་ཆུབ་སེམས་དཔའ་བརྩོན་འགྲུས་བརྟན་དང་། བྱང་ཆུབ་སེམས་དཔའ་འགྲིབས་མེད་དང་། བྱང་ཆུབ་སེམས་དཔའ་གྲགས་ལྡན་དང་། བྱང་ཆུབ་སེམས་དཔའ་འཇིགས་མེད་དང་། བྱང་ཆུབ་སེམས་དཔའ་མ་ཆགས་ལྷ་དང་། བྱང་ཆུབ་སེམས་དཔའ་སྒྲོན་མ་ཆེན་པོ་དང་། བྱང་ཆུབ་སེམས་དཔའ་འཇིག་རྟེན་འོད་དང་། བྱང་ཆུབ་སེམས་དཔའ་དམ་པའི་དབྱངས་དང་། བྱང་ཆུབ་སེམས་དཔའ་ཐབས་ཆེན་སྟོབས་དང་།
བྱང་ཆུབ་སེམས་དཔའ་མུན་ནག་སེལ་དང་། བྱང་ཆུབ་སེམས་དཔའ་མཉམ་མེད་ཕྱོགས་ལ་སོགས་པ་བྱང་ཆུབ་སེམས་དཔའ་དེ་དག་ཐམས་ཅད་ཀྱིས་སངས་རྒྱས་ཀྱི་སྤྱན་སྔར་ཡི་དམ་འདི་སྐད་བཅས་སོ། །བདག་ཅག་རྣམས་ཀྱིས་བཅོམ་ལྡན་འདས་མྱ་ངན་ལས་འདས་པའི་འོག་ཏུ་སངས་རྒྱས་ཀྱི་ཆོས་བསྲུང་ཞིང་ཕྱོགས་བཅུའི་འཇིག་རྟེན་གྱི་ཁམས་ཀུན་ཏུ་རྒྱས་པར་བགྱི་ཞིང་རྒྱུན་མི་འཆད་པར་བགྱིའོ། །དེ་ཅིའི་སླད་དུ་ཞེ་ན། བདག་ཅག་གིས་དེ་བཞིན་གཤེགས་པའི་འོད་ཟེར་དམ་པ་བསམ་གྱིས་མི་ཁྱབ་པ་མཐོང་ནས་འོད་ཟེར་དེ་དག་ལས་སངས་རྒྱས་ཀྱི་ཆོས་བསམ་གྱིས་མི་ཁྱབ་པར་ཡང་ཐོས་པར་འགྱུར། ཆོས་དེ་དག་ཐོས་ནས་སེམས་ཀྱི་སྒྲིབ་པ་དང་བྲལ་ཏེ་ཀུན་ནས་ཉོན་མོངས་པ་ཐམས་ཅད་བྱང་ནས། ལྷའི་རིན་པོ་ཆེ་གསེར་ལྟར་སེམས་རྣམ་པར་དག་པར་གྱུར་པས་ཐམས་ཅད་གསལ་བར་སྣང་བར་གྱུར་པའི་ཕྱིར་རོ། །བདག་ཅག་གིས་ཕན་པ་དང་། བདེ་བའི་ཡོན་ཏན་འདི་ལྟ་བུ་དྲན་པས་དེ་བཞིན་གཤེགས་པ་ལ་སྟོན་པ་ཆེན་པོར་འདུ་ཤེས་སྐྱེས་སོ། །བྱམས་པའི་ཕ་མ་ལྟ་བུའི་འདུ་ཤེས་སྐྱེས་ནས་རྟག་ཏུ་སངས་རྒྱས་ཀྱི་བཀའ་དྲིན་དྲན་ཏེ་སངས་རྒྱས་ཀྱི་བཀའ་དྲིན་ཤེས་པར་བགྱིད་དོ། །དེ་ཅིའི་ཕྱིར་ཞེ་ན། དམ་པའི་ཆོས་ཐོས་པས་རིང་པོ་མི་ཐོགས་པར་བྱང་ཆུབ་ཀྱི་སྙིང་པོ་ལ་འདུག་ཅིང་དམ་པའི་ཆོས་ཀྱི་འཁོར་ལོ་བསྐོར་ཏེ་སེམས་ཅན་ཐམས་ཅད་སྒྲོལ་བར་འགྱུར་རོ། །དེ་དག་ཀྱང་ཆོས་ཐོས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་བའི་ཕྱིར་རོ། །དེ་ནས་དེ་བཞིན་གཤེགས་པས་འཁོར་མང་པོ་ལ་འདི་སྐད་ཅེས་བཀའ་སྩལ་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་བདུན་ཅུ་པོ་འདི་དག་ཡུན་རིང་པོ་ནས་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་གི་རྡུལ་ཕྲ་རབ་སྙེད་ཀྱི་སྔོན་རོལ་ན། སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་བརྒྱ་སྟོང་སྙེད་ཀྱི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་སྙེད་ལ་བསྙེན་བཀུར་བྱས་ཏེ། སངས་རྒྱས་དེ་དག་ལས་རྟག་ཏུ་ཚངས་པར་སྤྱོད་པ་སྤྱད་ཅིང་རྒྱལ་བ་དེ་དག་ལ་མི་སྐྱོ་བའི་སེམས་ཀྱིས་མཉེས་པར་བྱས་ནས།
བྱམས་པས་བདག་གི་ལུས་བསྲུངས་ཏེ་སངས་རྒྱས་ཀྱི་ཆོས་འཛིན་ཅིང་སྙིང་རྗེ་ཆེན་པོས་རྒྱུན་དུ་ཕྱོགས་བཅུར་ཐམས་ཅད་ལ་ཕན་པ་དང་བདེ་བའི་དོན་བྱེད་དོ། །སེམས་ཅན་གང་ཞིག་ཐ་མ་ཤི་ཀར་བྱང་ཆུབ་སེམས་དཔའ་དེ་དག་ལ་གཅིག་གི་མིང་ངམ། གཉིས་སམ། གསུམ་མམ། བཞི་ནས་བདུན་ཅུའི་བར་དུ་རྫོགས་པར་ཐོས་ཏེ། དེ་ལ་སྲོག་ཕྱོགས་སྐྱབས་སུ་སོང་ན་ཚེ་འཕོས་མ་ཐག་ཏུ་གང་ན་སངས་རྒྱས་བཞུགས་པའི་འཇིག་རྟེན་གྱི་ཁམས་སུ་པད་མོ་ལས་རྫུས་ཏེ་སྐྱེ་བར་འགྱུར་ཞིང་འདོད་ཆགས་དང་ཡོངས་སུ་བྲལ་བ་དང་། མངལ་གྱི་གནས་ནས་མི་སྐྱེ་བ་དང་། མནམ་ཞིང་བཙོག་པ་དང་བྲལ་བར་འགྱུར་ཏེ། ལུས་ཡོངས་སུ་དག་ཅིང་ལུས་དྲི་ཞིམ་པ་དང་། ཐམས་ཅད་ཀྱི་ཡིད་དུ་འོང་ཞིང་བཀུར་སྟི་བྱེད་པར་འགྱུར་རོ། །ཀུན་གྱི་ཡིད་དུ་འོང་ཞིང་བཀུར་སྟི་བྱས་པས་སེམས་རབ་ཏུ་དགའ་བར་འགྱུར་རོ། །སེམས་རབ་ཏུ་དགའ་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པས་སེམས་ཅན་ཐམས་ཅད་ལ་བྱམས་པ་དང་སྙིང་རྗེ་ཆེན་པོའི་སེམས་བསྐྱེད་པར་འགྱུར། དེ་ལྟར་བྱམས་པ་དང་སྙིང་རྗེའི་སེམས་བསྐྱེད་པས་འགྲོ་བ་མ་ལུས་པ་ལ་བཏང་སྙོམས་སུ་མི་གཏོང་བའི་སེམས་སྐྱེ་བར་འགྱུར། གཞན་ཡང་སེམས་ཅན་ཐམས་ཅད་ལ་ཕན་པ་དང་བདེ་བར་འགྱུར་བའི་སེམས་དང་། བདག་དང་གཞན་གྱི་དོན་བྱེད་པའི་སེམས་དང་། སྒྲིབ་པ་དང་། བར་ཆད་དུ་འགྱུར་བ་བསལ་བའི་སེམས་དང་། ཉོན་མོངས་པ་ཞི་བར་བྱེད་པའི་སེམས་དང་། དགེ་བའི་བཤེས་གཉེན་ལ་བསྙེན་ཅིང་རྟག་ཏུ་བཀུར་སྟི་བྱེད་པའི་སེམས་དང་། འདུན་པའི་ཡིད་ཀྱིས་ཆོས་ཉན་པའི་སེམས་དང་། མི་བརྗེད་པར་ཡིད་ལ་བྱེད་ཅིང་དོན་བཟང་པོ་གཟུངས་སུ་འཛིན་པའི་སེམས་དང་། ཉུང་དུ་ཐོས་ལ་དོན་མང་དུ་ཤེས་པའི་སེམས་དང་། མང་དུ་ཐོས་ལ་དོན་མི་ཤེས་པ་མི་འདོད་པའི་སེམས་སྐྱེ་བར་འགྱུར་རོ། །དེ་ནས་ཡང་དག་པ་ཉིད་ལ་དང་བའི་སེམས་དང་། དེ་བཞིན་ཉིད་ཀྱི་དོན་བདེན་པ་ལ་དད་པའི་སེམས་སྐྱེ་བར་
འགྱུར། ཡང་དག་པའི་དོན་བདེན་པ་ལ་དད་པའི་སེམས་སྐྱེས་པས་ཇི་ལྟར་བསྟན་པ་བཞིན་དུ་རྣལ་འབྱོར་སྤྱོད་པའི་སེམས་སྐྱེ་བར་འགྱུར་རོ། །ཇི་ལྟར་བསྟན་པ་བཞིན་དུ་རྣལ་འབྱོར་སྤྱོད་པའི་སེམས་སྐྱེས་པས་ཕྱིར་མི་ལྡོག་པའི་སེམས་སྐྱེ་བར་འགྱུར། དེ་ལྟར་ཕྱིར་མི་ལྡོག་པའི་སེམས་སྐྱེས་པས་སེམས་ཅན་དེ་དག་ཐམས་ཅད་ལ་མཉམ་སྙོམས་པའི་གཉེན་པོའི་སེམས་སྐྱེ་བར་འགྱུར་རོ། །ཇི་ལྟར་བདག་ཁམས་གསུམ་པའི་སྲིད་པ་ཉི་ཤུ་ལྔར་སྐྱེ་བར་མི་དགའ་བ་བཞིན་དུ་གཟུགས་ཡོད་པ་དང་། གཟུགས་མེད་པ་དང་། རྐང་བཞི་དང་། རྐང་མངས་དང་། གྲོག་སྦུར་ནས་སྲོག་ཆགས་ཐམས་ཅད་ཀྱང་དེ་དང་འདྲ་སྟེ། དེ་བས་ན་བྱང་ཆུབ་སེམས་དཔའ་ནི་ལུས་དང་སྲོག་གི་བར་དུ་སྟོར་ཡང་ཕ་རོལ་པོའི་སྲོག་འཕྲོག་པའི་ལས་མི་བྱེད་དོ། །ཇི་ལྟར་བདག་ལ་ནོར་རྫས་དང་། འབྲུ་དང་། གོས་དང་། ཟས་དང་། སྐོམ་དང་། བན་གླང་དང་། ཤིང་རྟ་དང་། ཐེག་པ་དང་། ཡུལ་དང་། གྲོང་ཁྱེར་དང་། ཆུང་མ་དང་། བུ་དང་། ལུས་ཀྱི་ཡན་ལག་གི་བར་དུ་ལོངས་སྤྱོད་རྣམས་ལ་སྲུང་ཞིང་རིམ་གྲོ་བྱེད་དོ། །གཞན་གྱིས་ཁྱེར་ཞིང་འཕྲོག་པ་ལ་མི་དགའ་བ་བཞིན་དུ་སེམས་ཅན་ཐམས་ཅད་ཀྱང་དེ་དང་འདྲ་སྟེ། དེ་བས་ན་བྱང་ཆུབ་སེམས་དཔའ་ནི་བདག་གི་ལུས་དང་སྲོག་སྟོར་ཀྱང་སེམས་ཅན་རྣམས་ཀྱི་ནོར་དང་། གོས་དང་། ཟས་དང་། སྐོམ་དང་། ལོངས་སྤྱོད་ལ་འཕྲོག་པའི་སེམས་མི་སྐྱེད་དོ། །ཇི་ལྟར་བདག་གི་གཟུགས་དམ་པ་སྲིང་མོའམ། ཆུང་མའམ། སླས་ལ་གཞན་གྱི་མི་རིགས་པར་བྱེད་མི་འདོད་པ་དེ་བཞིན་དུ་སེམས་ཅན་ཐམས་ཅད་ཀྱང་དེ་དང་འདྲ་སྟེ། དེ་བས་ན་བྱང་ཆུབ་སེམས་དཔའ་ནི་བདག་གི་ལུས་དང་སྲོག་སྟོར་ཀྱང་ཕ་རོལ་པོའི་གཟུགས་དམ་པ་ལ་འདུ་ཤེས་ངན་པ་ལོག་པའི་སེམས་མི་སྐྱེད་ན་མི་རིགས་པའི་ཆོས་ངན་པ་ལྟ་ཅི་སྨོས། ཇི་ལྟར་བདག་ཕྲ་མ་དང་ཚིག་རྩུབ་པོ་འཁྲུག་པར་འགྱུར་བ་ལ་མི་དགའ་བ་བཞིན་དུ་སེམས་ཅན་རྣམས་ཀྱང་དེ་དང་འདྲ་སྟེ། དེ་བས་ན་བྱང་ཆུབ་སེམས་དཔའ་ནི་བདག་གི་ལུས་དང་
སྲོག་ཡལ་ཡང་བརྫུན་དུ་སྨྲ་བ་དང་། ཕན་ཚུན་འཁྲུག་པའི་ཚིག་མི་སྨྲའོ། །ཇི་ལྟར་བདག་རྡོ་དབྱུག་གིས་རྡེག་པ་དང་། ལྕག་གིས་གཞུ་བ་དང་། ནན་ལ་འབོར་བ་ལ་མི་དགའ་བ་བཞིན་དུ་སེམས་ཅན་ཐམས་ཅད་ཀྱང་དེ་དང་འདྲ་སྟེ། དེ་བས་ན་བྱང་ཆུབ་སེམས་དཔའ་ནི་བདག་གི་ལུས་དང་སྲོག་ཡལ་ཡང་རྡོ་དབྱུག་དང་། ལྕག་དང་ཆད་པས་གཅད་པའི་ལས་ཀྱིས་སེམས་ཅན་རྣམས་ལ་མི་འཚེའོ། །ཇི་ལྟར་བདག་ལྕགས་སྒྲོག་དང་། ཁོང་སྒྲིལ་དང་། མཚོན་ཆ་དང་། བཟུང་བ་དང་། བཏགས་པ་དང་། བཅིང་བས་བཅིངས་པའི་གནོད་པ་རྣམས་ལ་མི་དགའ་བ་བཞིན་དུ་སེམས་ཅན་ཀུན་ཀྱང་དེ་དང་འདྲ་སྟེ། དེ་བས་ན་བྱང་ཆུབ་སེམས་དཔའ་ནི་ལུས་དང་སྲོག་ཡལ་ཡང་ལྕགས་སྒྲོག་དང་། ཁོང་སྒྲིལ་དང་། བཟུང་བ་དང་། བཅིང་བ་ལ་སོགས་པ་གནོད་པས་འཚེ་བར་མི་བྱེད་དོ། །ཇི་ལྟར་བདག་གཞན་གྱིས་བརྙས་པ་དང་། དབང་དང་། དྲག་ཤུལ་བྱེད་པ་དང་། དབང་རློམ་བཙན་བྱེད་བསྙེམས་ཤིང་ངན་དུ་བྱེད་པ་ལ་མི་དགའ་བ་བཞིན་དུ་སེམས་ཅན་ཐམས་ཅད་ཀྱང་དེ་དང་འདྲ་སྟེ། དེ་བས་ན་བྱང་ཆུབ་སེམས་དཔའ་ནི་བདག་གཅིག་པུའི་ལུས་དང་སྲོག་ཡལ་ཡང་ཚུལ་བཞིན་མ་ཡིན་པའི་མི་རིགས་པས་སེམས་ཅན་ལ་གནོད་པ་མི་བྱེད་དོ། །ཇི་ལྟར་བདག་ལ་ཕ་རོལ་པོ་གཞན་གྱིས་བཀུར་སྟི་བྱེད་ཅིང་མཆོད་དམ་ཚིག་སྙན་པས་བསྟོད་ན། བདག་བདེ་བ་ལ་དགའ་བ་བཞིན་དུ་བདག་ཀྱང་སེམས་ཅན་རྣམས་ལ་གོས་དང་། ཟས་དང་། སྐོམ་དང་། མལ་ཆ་དང་། ནད་ཀྱི་རྐྱེན་རྩི་དང་། བདེ་བའི་ཡོ་བྱད་ཐམས་ཅད་ཀྱིས་སྦྱིན་པར་བྱེད་དོ། །གལ་ཏེ་བདག་གིས་ལས་ཆེན་པོ་ཞིག་སྒྲུབ་པའམ། སངས་རྒྱས་ཀྱི་ཕྱིར་རམ། ཆོས་ཀྱི་ཕྱིར་རམ། དགེ་འདུན་གྱི་ཕྱིར་རམ། དོན་སྒྲུབ་པ་ལས་བློས་མི་ལྕོགས་ཏེ་དོན་གྲུབ་པར་མ་གྱུར་ནས། མི་དགའ་ཞིང་མྱ་ངན་གྱིས་གདུངས་པ་ལས་མཁས་པ་བློ་དང་ལྡན་པ་ཞིག་གིས་བདག་གིས་བསྒྲུབ་པའི་དོན་མ་གྲུབ་པས་མི་དགའ་ཞིང་མྱ་ངན་བྱེད་པར་མཐོང་ན་བདག་ལ་འདི་སྐད་ཟེར་རོ། །རིགས་ཀྱི་བུ་ཁྱོད་མི་དགའ་བ་མ་བྱེད་ཅིག །ཁྱོད་
ཀྱི་དོན་གྲུབ་པའི་གྲོགས་བྱ་སྟེ། དོན་ཡིད་བཞིན་དུ་བསྒྲུབ་པར་བྱའོ། །ཞེས་ཟེར་ན་དེ་ལ་རབ་ཏུ་དགའ་བའི་སེམས་སྐྱེ་བར་འགྱུར་ཏེ། དེ་བས་ན་བདག་གིས་སེམས་ཅན་ལ་ཕན་པ་དང་བདེ་བའི་དོན་དུ་བསྒྲུབ་པའི་ལས་ཀྱི་གྲོགས་བྱའོ། །ཇི་ལྟར་བདག་ལ་རྒྱལ་པོ་དང་། རྐུན་པོ་དང་ཆུའམ། མེས་གནོད་པར་འགྱུར་རམ། བློན་པོ་ལ་སོགས་པས། བཟུང་ངམ། བཏགས་སམ། བཅིངས་ན་མི་དགའ་བའི་མྱ་ངན་གྱིས་གདུངས་པར་གྱུར་པ་ལས་མཁས་པ་བློ་དང་ལྡན་པ་ཞིག་གིས་བདག་དེ་ལྟར་མྱ་ངན་གྱིས་གདུངས་པ་མཐོང་ན། སྙན་པ་སྒྲའི་ཚིག་གིས་བདག་ལ་ཁྱེད་མྱ་ངན་མ་བྱེད་ཅིག །ཁྱོད་ཀྱི་ཕྱིར་ཁོ་བོས་རྒྱལ་པོའམ། བློན་པོ་ཆེན་པོ་ལ་གསོལ་བ་བཏབ་སྟེ། གལ་ཏེ་ན་ནོར་གསུག་སྦྱིན་པའམ། ཐབས་རྣམ་པ་སྣ་ཚོགས་ཀྱིས་ཅི་ནས་ཀྱང་ཁྱོད་མི་བདེ་བའི་སྡུག་བསྔལ་ལས་ཐར་བར་བྱའོ་ཞེས་ཟེར་ན། བདག་གིས་ཚིག་དེ་ཐོས་པ་ཙམ་གྱིས་སེམས་དགའ་བར་འགྱུར་ཏེ། དེ་བས་ན་བྱང་ཆུབ་སེམས་དཔའ་ནི་ཤེས་པར་བྱ་བའི་སྒྱུ་རྩལ་དང་བཟོའི་བར་དུ་ཡང་མཐར་ཕྱིན་པར་བརྩོན་འགྲུས་སུ་སློབ་བོ། །འདི་ལྟ་སྟེ། ཤེས་པར་བྱ་བ་རིག་པའི་གནས་དང་། བཟོའི་གནས་དང་། རོལ་མོ་དང་། རྩེད་མོ་དང་། གྲངས་དང་། རྩིས་དང་། མིག་འཕྲུལ་གྱི་སྔགས་དང་། སྨན་དང་། བན་གླང་དང་། རྟ་དང་། བཞོན་པ་དང་། དགྲ་ཆོས་དང་། དམག་དྲང་བ་དང་། དཔྱད་ལ་སོགས་པ་ལ་མཁས་པར་སློབ་སྟེ། དེ་ལྟར་སྒྱུ་རྩལ་ཅི་ལ་ཡང་མཁས་པར་བསླབས་ནས་འགྲོ་བ་མང་པོ་དང་། རྒྱལ་པོ་དང་། བློན་པོ་ཆེན་པོ་ལ་སོགས་པ་ཡང་བསམས་པའི་ཡིད་དང་འགལ་བར་མི་བྱེད། དེ་མ་ཡིན་པ་གཞན་ཡང་ལོངས་སྤྱོད་ཀྱི་རྐྱེན་གོས་སམ། ནོར་རམ། ཟས་སམ། བཟའ་བའམ། བཏུང་བའམ། ནོར་བུའམ། གདུ་བུའམ། ལུས་ཀྱི་རྒྱན་ནམ། གསེར་རམ། དངུལ་ལམ། བཻ་དཱུརྱའམ། བྱི་རུའམ། མན་ཤེལ་ལམ། སྤུག་གམ། མུ་ཏིག་གམ། ཨ་མྲ་གར་བྷའམ། ནོར་བུ་
རིན་པོ་ཆེའམ། བན་གླང་ངམ། རྟའམ། ཐེག་པའམ། བྲན་པོའམ། ལས་བྱེད་པའི་མིའམ། ཆུང་མའམ། སླས་ཀྱང་ཡོད། ཆུ་མིག་གམ། ཁྲུས་ཀྱི་རྫིང་བུའམ། རིན་པོ་ཆེའི་ཡང་ཏོག་བཟང་པོའམ། ལོངས་སྤྱོད་ཀྱི་ཡོ་བྱད་རྣམ་པ་སྣ་ཚོགས་ཡོད་ཀྱང་བྱང་ཆུབ་སེམས་དཔའ་དེ་ལ་རློམ་པའམ་རྒྱགས་པའི་སེམས་མེད་དོ། །དེ་ལྟར་སྒྱུ་རྩལ་ཀུན་ལ་ཡང་མཁས། རིན་པོ་ཆེའི་བང་མཛོད་བརྒྱ་སྟོང་དང་ཡང་ལྡན། བན་གླང་དང་། རྟ་དང་། ཐེག་པ་ཡང་ཡོད། ན་ཆུང་བཟང་མོ་ཡང་གྲངས་མེད་པར་ཡོད། ཡང་ཏོག་བཟང་པོ་ཡང་ཡོད། ཆུ་མིག་དང་ཁྲུས་ཀྱི་རྫིང་བུ་ལ་སོགས་པ་འདོད་པའི་ལོངས་སྤྱོད་གང་ཡང་ཡོད་མོད་ཀྱི། དེ་ལ་མ་ཆགས་ཏེ་རྟག་ཏུ་འདོད་པ་ཉུང་བ་དང་། ཆོག་ཤེས་པ་ལ་དགའ་ཞིང་། བས་མཐའ་དགོན་པ་དང་། རི་དང་། ཚལ་དང་། ཤིང་དྲུང་དུ་བསམ་གཏན་ལ་ཞི་བར་གནས་པ་ལ་མོས་སོ། །སྐྱེ་བོ་མང་པོ་དང་། སྨྲ་ཞིང་གཏམ་ཟེར་ཡང་། སེམས་ནི་རྟག་ཏུ་གཉེན་པོའི་སྒོར་འཇུག་པར་བྱེད་དོ། །སོ་སོའི་སྐྱེ་བོ་དང་སྤྱོད་ཚུལ་འཐུན་པ་ལྟར་བྱེད་ཀྱང་སེམས་ཅན་ལ་ཕན་པའི་དོན་དུ་ནོར་བུ་རིན་པོ་ཆེ་གཏོང་བར་བྱེད་ཀྱིས་སེམས་ཅན་ལ་གནོད་པ་མི་ཕན་པའི་དོན་མི་བྱེད་དོ། །གང་དབུལ་བ། ཕོངས་པ་ཉམ་ཐག་པར་གྱུར་པ་དག་བྱང་ཆུབ་སེམས་དཔའ་ལ་སློང་དུ་འོངས་ན་དེ་ལ་ཅི་འདོད་པ་བཞིན་བྱང་ཆུབ་སེམས་དཔའ་སྦྱིན་པར་བྱེད་དོ། །སེམས་ཅན་གང་ཞིག་སངས་རྒྱས་ཀྱི་ཆོས་ལ་མོས་ཤིང་དད་དེ་བྱང་ཆུབ་སེམས་དཔའ་ལ་བསྙེན་བཀུར་དང་། མཆོད་པ་བྱ་བའི་ཕྱིར་རིམ་གྲོ་དང་གཡོག་བྱེད་ཅིང་རྐང་པ་འཁྲུ་བའི་ལས་བྱེད་དམ། ལུས་བཀྲུ་བ་དང་མཉེ་བའི་ལས་བྱེད་དམ། ཆག་ཆག་དང་ཕྱག་དར་བྱེད་དམ། སོ་ཤིང་དང་ཁྲུས་ཆུར་སྦྱོར་རམ། མལ་སྟན་འདིངས་ཤིང་མལ་གོས་སྤྲུག་པའི་ལས་བྱེད་དམ། སྲོད་དང་ཐོ་རངས་ལ་མར་མེ་འབུད་དམ། ཁྱེའུ་སུས་དང་། དྲོ་ལ་ཁ་ཟས་ཐ་ན་པ་ན་དང་། པུ་ཤེ་ན་དང་། ཁ་ད་ནེ་འབུལ་ལམ། འཐུང་བའི་སྐོམ་ཡུ་ལི་ཤི་དང་། བུ་ལ་ཤ་ཀའི་འབྲས་བུའི་སྐོམ་དང་། རྒུན་ཆུ་དང་། ཁ་ར་ནག་པོའི་ཆུ་ལ་སོགས་
པ་སྦྱར་སྦྱར་ནས་ཡོ་བྱད་དེ་ལྟ་བུས་ཞག་བདུན་ནས་ཞག་དགུ་བཅུའི་བར་དུ་བྱང་ཆུབ་སེམས་དཔའ་ལ་ཆོས་འདོད་པའི་ཕྱིར་འབུལ་བར་བྱེད་ན་བྱང་ཆུབ་སེམས་དཔའ་དེའི་ཚེ་མཆོད་པའི་ཡོ་བྱད་འབུལ་བ་དེ་ལ་དགའ་བའི་སེམས་མེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི་བསྐལ་པ་གྲངས་མེད་པ་ཡུན་རིང་པོ་ནས་སངས་རྒྱས་ཀྱི་ཆོས་ཚོལ་བའི་ཕྱིར། སེམས་ཅན་ཐམས་ཅད་ལ་སྐྱེད་འབྲིའི་སེམས་མེད་པའི་ཕྱིར། བྱམས་པ་དང་སྙིང་རྗེའི་སེམས་དང་ལྡན་པའི་ཕྱིར། མཉམ་སྙོམས་པའི་སེམས་ལ་གནས་པའི་ཕྱིར་རོ། །དེ་བས་ན་དུས་ཁ་ཅིག་ཏུ་འཁོར་ལོས་སྒྱུར་བའི་རྒྱལ་པོ་བྱེད་དེ། རྟག་ཏུ་དགེ་བ་བཅུའི་ཆོས་ཀྱིས་སེམས་ཅན་གྱི་དོན་བྱེད་དོ། །སེམས་ཅན་དེ་དག་ཀྱང་རྒྱལ་པོའི་ཡིད་བཞིན་དུ་དགའ་ཞིང་སྤྱོད་པས་ཚེའི་དུས་བྱས་ན་ཡང་ལྷ་དང་མིའི་འཇིག་རྟེན་དུ་འདོད་པ་ལྔའི་ལོངས་སྤྱོད་མཆོག་དམ་པ་དང་ལྡན་ཏེ། རིགས་ཆེ་ཞིང་མཐོ་བར་སྐྱེ་བར་འགྱུར། བསམས་པའི་ཡིད་བཞིན་དུ་ཉལ་བ་དང་། ལྡང་བ་དང་། འགྲོ་བ་ལ་གནོད་པ་མེད་པར་འགྱུར། གནས་གང་དུ་འགྲོ་ཡང་བཞོན་པའི་རྟ་དང་ཐེག་པར་ལྡན་ཏེ་སྐྱེད་མོས་ཚལ་དུ་རྩེད་མོ་དང་རོལ་མོ་ལ་རྩེ་ཞིང་ལོངས་སྤྱོད་པར་འགྱུར། བཟའ་བ་དང་བཏུང་བ་དམ་པ་དང་དགའ་དགུར་སྤྱོད་པར་འགྱུར་ཡང་ཐ་མ་མི་རྟག་པ་བསྟེན་ཏེ། རྒ་བ་དང་ན་བས་གཟིར་ཏེ་ཤི་བར་གྱུར་ན་ཁྱིམ་གྱི་བུ་སྨད་མྱ་ངན་གྱིས་གདུངས་ཏེ་སྐད་ཕྱུང་ནས་ངུ་ཞིང་ལ་ལ་ནི་མགོ་ལ་ཐལ་མོ་རྡེབས། ལ་ལ་ནི་རང་རང་གི་སྐྲ་འབལ་ཏེ་མཆི་མ་འཛག་ཅིང་ས་ལ་འགྲེའོ། །དེ་ནས་ཁྱོགས་སམ་ཤིང་རྟའི་སྟེང་དུ་བཞག་ནས་དུར་ཁྲོད་དུ་བསྐྱེལ་ཏེ། དེ་ལྟར་བསྐྱལ་ནས་ཀྱང་བུ་སྨད་དག་ཕྱིར་ཁྱིམ་དུ་འོངས་ནས་མྱ་ངན་གྱིས་གདུངས་ཏེ་ལ་ལ་ནི་བརྒྱལ་ནས་ས་ལ་འགྲེ། ལ་ལ་ནི་དེའི་རྐྱེན་གྱིས་ནད་དུ་འགྱུར། ལ་ལ་ནི་མི་དྲན་ནས་མྱོས། ལ་ལ་ནི་ཚེའི་བར་ཆད་དུ་ཤི་བར་བྱས་ཏེ། དེ་ལྟར་བྱས་ཀྱང་གསོན་པ་རྣམས་ལ་ནི་ཕན་པ་མེད། ཤི་བ་ལ་ནི་རབ་ཏུ་གནོད་དོ། །དེའི་ཚེ་དེའི་དུས་ན་འཁོར་ལོས་སྒྱུར་བའི་རྒྱལ་པོ་འཁོར་དང་བཅས་ཏེ་ཡུལ་རྒྱུ་ཞིང་སོང་བ་ལས་སེམས་ཅན་མྱ་ངན་གྱིས་
གཟིར་བ་མཐོང་ནས་སྙིང་བརྩེ་བའི་སེམས་སྐྱེས་ཏེ་འདི་སྐད་ཟེར་རོ། །རྒྱལ་པོ་ཞེས་བྱ་བ་ནི་ཡུལ་ས་དབང་གིས་འགྲོ་བ་མང་པོའི་དབང་སྒྱུར་ཏེ། དེ་ལྟར་དགེ་བ་བཅུའི་ལམ་གྱིས་འགྲོ་བ་རྣམས་བཏུལ་ཏེ། འབྲས་བུ་འདོད་པ་ལྔ་མཆོག་དམ་པ་ཐོབ་ཏུ་ཟིན་ཀྱང་སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མི་རྟག་པས་འཇིགས་པ་ལས་ཐར་བར་མ་གྱུར་ན། བདག་གིས་དྲང་པོའི་ཆོས་ཀྱིས་ཡུལ་གྱི་སྲིད་བཙས་ཀྱང་ཕན་པའི་དོན་མེད་དོ། །དེ་ལྟར་འགྲོ་བ་རྣམས་ལ་ཕན་པའི་དོན་མེད་ན་འཁོར་ལོས་སྒྱུར་བའི་རྒྱལ་པོ་ཆེན་པོ་ཞེས་ཀྱང་ཇི་སྐད་བྱ། བྱམས་པ་ཆེན་པོའི་ཕ་ཞེའམ། སྨན་པའི་རྒྱལ་པོ་ཆེན་པོ་ཞེའམ། འདྲེན་པའི་སྟོན་པ་ཆེན་པོ་ཞེས་ཇི་སྐད་དུ་གདགས། འདྲེན་པའི་སྟོན་པ་ཆེན་པོ་ཞེས་བྱ་བ་ནི་ཡང་དག་པའི་ལམ་དུ་འདྲེན་ཅིང་མྱ་ངན་ལས་འདས་པའི་ལམ་སྟོན་ཏེ། འདུས་མ་བྱས་པའི་རབ་ཏུ་བདེ་བ་ཐོབ་པར་བྱེད་དོ། །བདག་ཅག་ནི་མིང་དང་སྤྱོད་པར་མི་འཐུན་ཏེ། དཔེར་ན་མི་ཞིག་སྐོམ་པས་གདུངས་ནས་སྲོག་ལ་བབ་པ་ལས་ཆུ་འདོད་པའི་ཕྱིར་ཕན་ཚུན་བརྒྱུགས་ཏེ། ཁྲོན་པ་སྐམ་པོ་ཞིག་དང་ཕྲད་ནས་རབ་ཏུ་དགའ་བའི་སེམས་སྐྱེས་ཏེ་འདི་སྙམ་དུ་སེམས་སོ། །ད་ནི་བདག་གི་ལུས་འདི་འཆི་བ་ལས་ཕྱིར་སོས་སོ། །དེ་ཅིའི་ཕྱིར་ཞེ་ན། གལ་ཏེ་ཆུ་དང་མ་ཕྲད་ན་སྲོག་འདི་འཆི་བ་ལས་ཡུན་མི་རིང་བ་ལས་ད་ཁྲོན་པ་བཟང་པོ་དང་ཕྲད་ནས་གདོན་མི་ཟ་བར་ཆུ་དོང་གྲང་མོ་གཙང་མ་དང་ཕྲད་དེ་ངོམས་ཤིང་ཚིམ་པར་འགྱུར་བས་སྲོག་འཚོ་བར་འགྱུར་རོ་སྙམ་བསམས་ནས་མྱུར་བ་མྱུར་བར་ཁྲོན་པའི་དྲུང་དུ་བསྙེན་ཏོ། །ཁྲོན་པའི་དྲུང་དུ་ཕྱིན་ནས་ལུས་ལ་གྱོན་པའི་གོས་ཕུད་དེ། ཕྱོགས་གཅིག་ཏུ་སྦས་ནས་ཆུ་འདོད་པའི་ཕྱིར་ཁྲོན་པའི་ནང་དུ་ཞུགས་སོ། །ཁྲོན་པའི་གཏིང་དུ་ཕྱིན་ནས་ཆུ་ནི་མེད་ཀྱི་སྦྲུལ་གདུག་པ་དང་། སྨིགས་པ་དང་། སྡིག་པ་དང་། རྩངས་པ་དང་། སྦལ་པ་དང་། གྱོ་མོ་དང་། དེ་ལ་སོགས་པ་གསེག་མ་དང་། ཤིང་དང་། རྩྭ་ཉལ་ཉིལ་འབའ་ཞིག་མཐོང་བར་གྱུར་ཏོ། །དེའི་ཚེ་སྐོམ་པས་ཉམ་ཐག་པར་གྱུར་པ་དེ་ཐོག་མ་རེ་བ་བཞིན་དུ་ཆུ་ཡང་མ་རྙེད་ལ་གདུག་པ་མང་པོས་གཟས་ནས་ཁྲོན་པ་དེ་ལས་ཕྱིར་བྱུང་བར་གཟས་ཀྱང་ཁྲོན་པ་
རྙིངས་ཤིང་ཞིག་ལ་ཟབས་ཀྱང་མདའ་རྒྱང་གང་ཙམ་ཡོད་དེ། དེའི་ནང་ན་སྐས་སམ། ཐག་སྲད་དམ། འབྲུ་བའི་ཤིང་ཙམ་ཡང་མེད་དེ། མས་མཆོང་དུ་སྩལ་ཡང་ཉམ་ཐག་ལ་སྟོབས་ཞན་པས་འཕར་མི་ནུས་ཏེ། ཕྱིར་ཡང་ཞབས་སུ་ལྷུང་ནས་སྦྲུལ་གདུག་པ་ལ་སོགས་པས་ཟ་ཞིང་འཇིབ་བོ། །དེ་ཅུང་ཟད་ཅིག་སྲོག་མ་ཆད་ཀྱི་བར་དུ་འདི་སྐད་ཅེས་ཟེར་རོ། །བདག་ཁྲོན་པ་འདིའི་ནང་ན་ཆུ་མེད་པར་སྔར་ཤེས་ན་ལྟ་ཁྲོན་པ་འདི་ལ་མིག་གིས་བལྟ་ཡང་མི་ཕོད་ན་འདིའི་ནང་དུ་ཞུགས་པ་ལྟ་སྨོས་ཀྱང་ཅི་དགོས་ཏེ། ད་ནི་ཁྲོན་པ་འདིའི་རྐྱེན་གྱིས་སྡུག་བསྔལ་བའི་སྡུག་བསྔལ་མྱོང་བར་གྱུར་ཏོ་ཞེས་སྨྲེ་སྔགས་འདོན་ཏོ། །འཁོར་ལོས་སྒྱུར་བའི་རྒྱལ་པོ་ཡང་དེ་ལྟར་སོ་སོའི་སྐྱེ་བོ་དག་གཅིག་ཤི་བའི་འོག་ཏུ་ཁྱིམ་གང་གི་བུ་སྨད་དང་། གཉེན་རྣམས་ཀྱིས་སྡུག་པ་དང་བྱེ་བྲལ་བའི་སྡུག་བསྔལ་གྱིས་གདུངས་པ་མཐོང་ནས་འདི་སྐད་ཟེར་རོ། །བདག་གི་ལུས་འདི་ནི་ཁྲོན་པ་སྐམ་པོ་དེ་དང་འདྲ་སྟེ། ཁྲོན་པ་མིང་ཙམ་ཡོད་ཀྱི་ཆུ་ནི་མེད་པས་ན་འཇུག་པ་ཡོད་ཀྱང་ཐོབ་པ་མེད་པས་དེ་ལྟ་བུའི་ལུས་དང་སྲོག་སྟོར་བའི་སྡུག་བསྔལ་མྱོང་བར་གྱུར་ཏོ། །ད་ལྟར་བདག་འཁོར་ལོས་སྒྱུར་བའི་རྒྱལ་པོའི་དབང་སྒྱུར་ཞིང་རིན་པོ་ཆེ་སྣ་བདུན་དང་ལྡན་ཏེ། དགེ་བ་བཅུའི་ལས་ཀྱིས་འགྲོ་བ་འདུལ་ཞིང་དྲང་པོའི་ཆོས་ཀྱིས་ཡུལ་གྱི་སྲིད་བཙས་ནས་སྐྱེ་བོ་མང་པོ་དག་ལྷ་དང་མིའི་མཐོ་རིས་ཀྱི་གནས་སུ་བཀོད་དེ་འདོད་པ་ལྔའི་ཡོན་ཏན་མཆོག་དམ་པ་ལ་ལོངས་སྤྱོད་དུ་བཅུག་ཀྱང་དེ་དག་སྐྱེ་བ་དང་། རྒ་བ་དང་། ན་བ་དང་། འཆི་བ་དང་། སྡུག་པ་དང་། བྱེ་བྲལ་བ་དང་། དགྲ་སྡང་བ་དང་ཕྲད་པའི་ སྡུག་བསྔལ་ལས་ཐར་བར་མ་ནུས་ཏེ། གཅིག་ལ་གཅིག་ངུ་ཞིང་ཆོ་ངེ་བྱེད་པ་འདི་ནི་བདག་གིས་ཉེས་ཀྱི་སེམས་ཅན་རྣམས་ཀྱིས་མ་ཉེས་སོ། །དེ་ཇི་ལྟ་ཞེ་ན། བདག་ལ་འཇིག་རྟེན་ལས་འདས་པའི་ཆོས་འགྲོ་བ་མང་པོ་ལ་ཕན་པའི་དོན་དུ་འགྱུར་བ་མེད་དེ། བདག་ལས་དགེ་བའི་ཆོས་འདོད་ཅིང་རབ་ཏུ་བདེ་བ་འདོད་ཀྱང་སྡུག་བསྔལ་གྱི་མཚོ་ལས་རྒལ་མི་ནུས་སོ། །དེའི་ཚེ་འཁོར་ལོས་སྒྱུར་བའི་རྒྱལ་པོ་ཡང་འདི་སྙམ་དུ་སེམས་སོ། །ད་ལྟར་བདག་གི་ལུས་འདི་ནི་དཔེར་ན་ཤེས་
པ་མེད་པ་གཏི་མུག་ཅན་གྱི་སྦྱིན་བདག་དང་འདྲའོ། །དེའི་ཚེ་དུས་གཞན་ཞིག་ན་ལོ་བདུན་གྱི་བར་དུ་ཆར་མ་བབ་པས་ཐན་པ་ཆེན་པོ་བྱུང་སྟེ། རྩི་ཤིང་ཡང་སྐམས། འབྲུ་ཡང་རབ་ཏུ་དཀོན་པར་གྱུར་ནས་མུ་གེ་ཆེན་པོ་བྱུང་སྟེ། གཅིག་ལ་གཅིག་འཆའ་ཞིང་ཟ་བར་གྱུར། གཅིག་གི་ཤ་ཁྲག་ལ་གཅིག་ཟ་སྟེ། ལ་ལ་ནི་བུའི་ཤ་ཁྲག་ལ་ཕ་མ་ཟ། ལ་ལ་ནི་ཕ་མའི་ཤ་ལ་བུ་ཟ་ཞིང་། ཕ་མ་དང་། ཕུ་ནུ་དང་། ཁྱོ་ཤུག་དང་། བུ་ཕོ་དང་། བུ་མོ་ཡང་གཅིག་གི་ཤ་ལ་གཅིག་ཟ་བར་གྱུར་ཏོ། །དེའི་ཚེ་ན་སྦྱིན་བདག་ཆེན་པོ་དེ་འཆག་ཅིང་འཕྱན་དུ་སོང་སོང་བ་ལས་སེམས་ཅན་མང་པོ་དག་ལྟོགས་ནས་ད་རོད་ཉམས་དེ་རིད་ཅིང་སྐམས་ལ་ཉམ་ཆུང་ལ་མདོག་ངན་པ་དང་། སྐྲ་ཡང་འཛིངས་ནས་ལུས་གནག་ལ་རྐེ་བ་དག་ཕྲག་པ་ལ་མི་རོ་ཁུར་དུ་ཁྱེར་ཏེ། ཁ་ཅིག་ནི་མིའི་མགོ་དང་། ལག་པ་དང་། རྐང་པ་དང་། ལྷུ་ཚིགས་དང་། ལག་ངར་དང་། ཕྲག་པ་དང་། ཚིགས་པ་དང་། རྒལ་པ་དང་། བརླ་དང་། རྗེ་ངར་དང་། ཡན་ལག་དང་། ཉིང་ལག་གི་བར་དུ་ཁྱེར། ཁ་ཅིག་ནི་ནང་ཁྲོལ་མཆིན་པ་དང་། མཚེར་པ་དང་། གློ་བ་དང་། རྒྱུ་མ་དང་། གཞང་རྣམས་ཁྱེར་བ་མཐོང་ངོ་། །དེ་ལྟ་བུ་དག་མཐོང་ནས་སྦྱིན་བདག་དེས་དེ་དག་མཐོང་ནས་ཁྱེད་ཁུར་དུ་ཁྱེར་བ་འདི་དག་ཅི་ཡིན་ཞེས་དྲིས་སོ། །དེ་དག་གིས་སྨྲས་པ། བདག་ཅག་གི་ཁུར་དུ་ཁྱེར་བ་འདི་དག་ནི་མི་རོ་སྟེ། མིའི་མགོ་དང་། རྐང་ལག་དང་། བརླ་དང་། རྗེ་ངར་དང་། ཡན་ལག་དང་། ཉིང་ལག་གི་བར་དུའོ། །ཁྱེད་མིའི་མགོ་དང་། ཡན་ལག་དང་། ཉིང་ལག་གི་བར་དུ་ཁྱེར་བ་འདི་ཅི་དགོས་ཅི་ཞིག་བྱ་ཞེས་དྲིས་པ་དང་། དེ་དག་གིས་སྨྲས་པ། ཁྱོད་མི་ཤེས་སམ། མུ་གེ་ཆེན་པོ་བྱུང་ནས་འབྲུ་རབ་ཏུ་དཀོན་པར་གྱུར་ཏེ། མི་ཀུན་ལྟོགས་ནས་ད་ལྟར་གཅིག་ལ་གཅིག་ཟ་བས། བདག་ཅག་གི་ཁུར་བུ་ཁྱེར་བ་འདི་ནི་བདག་ཅག་གི་ཟས་ཡིན་ནོ། །དེའི་ཚེ་སྦྱིན་བདག་ཆེན་པོ་དེས་དེ་སྐད་ཅེས་སྨྲས་པ་དེ་ཐོས་ནས་དངངས་ཏེ། སྤུ་ཟིང་ཞེས་བྱེད་ནས་འཁམས་ཏེ་ས་ལ་འགྱེལ་བ་ལས་ཆུ་གྲང་མོས་གདོང་དུ་གཏོར་ནས་རིང་ཞིག་ལོན་པ་དང་། སེམས་སོར་ཆུད་ནས་འོ་ན་ཁྱོད་ཀྱི་
ཟས་ཡིན་ན་འདི་དག་སུའི་ཤ་ཡིན་ཞེས་དྲིས་པ་དང་། དེ་དག་སྐད་ཆེན་པོ་ཕྱུང་ནས་ངུས་ཏེ། སྦྱིན་བདག་ལ་བརྗོད་དུ་མི་རུང་ངོ་ཞེས་སྨྲས་སོ། །ཀྱེ་མའོ་བདག་ཅག་ནི་སྡུག་གོ །ཀྱེ་མའོ་བདག་ཅག་ནི་སྡུག་གོ །ཀྱི་ཧུད་ཀྱི་ཧུད་ཁྱོད་ལ་དྲང་པོར་མི་སྨྲར་མི་རུང་སྟེ། བདག་ཅག་ཁུར་དུ་ཁྱེར་བ་འདི་ལ་ལ་ནི་ཕའི་ཤ ། ལ་ལ་ནི་མའི་ཤ ། ལ་ལ་ནི་བུའི་ཤ ། ལ་ལ་ནི་ཕུ་ནུའི་ཤ ། ལ་ལ་ནི་གཉེན་བཤེས་ཀྱི་ཤ་ཡིན་ནོ་ཞེས་ལྟོགས་པ་དེ་དག་གིས་སོ་སོ་ནས་ཁྱིམ་བདག་ལ་དྲང་པོར་གཏམ་བྱས་ནས། བདག་ཅག་ནི་ཤིན་ཏུ་ལྟོགས་པས་གཅིག་ལ་གཅིག་ཉིང་ཤ་ཟ་བར་གྱུར་ཏོ། །དེའི་ཚེ་སྦྱིན་བདག་དེས་དབུགས་ཀྱིས་བརྣངས་པ་ཙམ་དུ་མི་ལྟོགས་པ་རྣམས་ལ་འདི་སྐད་ཅེས་སྨྲས་སོ། །ཁྱེད་རྣམས་དེང་ཕྱིན་ཆད་གཅིག་ལ་གཅིག་ཉིང་ཤ་ཟ་བར་མ་བྱེད་ཅིག །ཁྱེད་རྣམས་ལ་དགོས་པའི་ཡོ་བྱད་གང་ཡང་རུང་། བགོ་བའི་གོས་སམ། བཟའ་བའམ། བཏུང་བའམ། ནད་ཀྱི་རྐྱེན་རྩིའམ། ཡོ་བྱད་ཅི་དགོས་པ་ཐམས་ཅད་སྦྱིན་པར་བྱ་སྟེ། ཞག་བདུན་ན་ཁྱེད་རྣམས་ཁོ་བོའི་སྒོར་ཤོག་ཤིག་དང་། ཡིད་བཞིན་དུ་གོས་སམ། ཁ་ཟས་སམ། ནད་ཀྱི་རྐྱེན་རྩིའམ། ཇི་འདོད་པ་ཚིམ་པར་བྱའོ་ཞེས་བསྒོ་བ་དང་། དེ་དག་རབ་ཏུ་དགའ་རངས་ནས་ཤིན་ཏུ་ལེགས་སོ་ལེགས་སོ། །ངོ་མཚར་ཆེའོ་ཞེས་བསྟོད་པ་བྱས་སོ། །དེ་ནས་སྦྱིན་བདག་དེ་ཕྱིར་ཁྱིམ་དུ་འོངས་ནས་ཆུང་མ་དང་། བུ་རྣམས་དང་། བྲན་ཁོལ་དང་། ལས་བྱེད་པའི་མི་རྣམས་ཀྱང་བསྡུས་ཏེ། དགའ་བའི་མདངས་ཕྱུང་ནས། འཇམ་ཞིང་ཡིད་དུ་འོང་བའི་ཚིག་སྙན་པས་བུ་སྨད་དང་། བྲན་ཁོལ་དང་། ལས་བྱེད་པའི་མི་རྣམས་ལ་འདི་སྐད་ཅེས་བསྒོའོ། །ཁྱེད་རྣམས་ཤེས་པར་གྱིས་ཤིག །ཁོ་བོས་སྨྲས་པའི་ཚིག་ལེགས་པར་ཉོན་ཅིག །ཁྱེད་ཤེས་སམ་ཐན་པ་ཆེན་པོས་མུ་གེ་བྱུང་ནས། མི་ཐམས་ཅད་ལྟོགས་ཏེ་གྲངས་མེད་པ་ཞིག་ཤི་བར་གྱུར་ཏོ། །བདག་གི་ཁྱིམ་ན་བང་མཛོད་ཀུན་གང་ཞིང་ལུད་དེ་འབྲུ་ཡང་གྲངས་མེད་པ་ཞིག་ཡོད་པས་དུས་ལས་མ་ཡོལ་བར་བདག་ཅག་བསོད་ནམས་བྱའོ་ཞེས་བུ་སྨད་ཀུན་གྱིས་དེ་སྐད་ཅེས་བསྒོ་བ་ཐོས་ནས་ལེགས་སོ་ལེགས་སོ། །
བདག་ཅག་གི་སྲོག་ལུས་སྦྱིན་པ་བྱས་ཀྱང་མི་ཕངས་ན་བང་མཛོད་དང་། ནོར་རྫས་དང་། ཁ་ཟས་ལྟ་སྨོས་ཀྱང་ཅི་དགོས། དེ་ནས་སྦྱིན་བདག་ཀྱང་རབ་ཏུ་དགའ་རངས་ནས་ཁྱེད་རྣམས་ནི་ཡང་དག་པར་ཁོ་བོའི་བླ་ན་མེད་པའི་བྱང་ཆུབ་ཐོབ་པར་བྱ་བའི་གྲོགས་ཡིན་པ་ལྟ་དགེའོ་ལེགས་སོ། །ཁྱེད་རྣམས་ཀྱང་སོ་སོ་ནས་ཅི་དང་ཅི་བྱ་བ་རྣམས་ཅི་དང་ཅི་བསྒྲུབ་པ་སྐོལ་བྱ་བའི་རིགས་པ་ཡང་མོད་ལ་བྱ། བསྒྲུབ་པའི་རིགས་པ་ཡང་མྱུར་དུ་བསྒྲུབ་སྟེ། ད་སྟེ་ཞག་བདུན་ན་ངེས་པར་འབྱོར་བར་བྱའོ། །དེའི་ཚེ་སྦྱིན་བདག་དེས་སོ་སོར་བསྒོ་ནས་ཁྱིམ་གྱི་ཕྱི་རོལ་དུ་བྱུང་སྟེ། གང་ནས་མཉམ་ཞིང་ཡངས་ལ་བདེ་བའི་གནས་ཞིག་བལྟས་ནས་མོད་ལ་ས་གཞི་དག་པར་ཉལ་ཉིལ་དང་ས་རྡོ་མེད་པར་བྱས་ཕྱགས་ཏེ་ཁྲི་སྟན་བཤམས་སོ། །དེ་ལྟར་མང་པོ་འདུ་བའི་གནས་སྦྱིན་པ་སྦྱིན་པའི་ས་གཞི་བཤམས་ནས་བན་གླང་ལྔ་བརྒྱ་ལ་ཁ་ཟས་བཀལ་ཏེ་སྦྱིན་པའི་སར་བསྐྱལ་ནས། ཁ་ཟས་ནི་རི་བཞིན་དུ་སྤུངས། ཞོ་ཆུ་ནི་མཚོ་བཞིན་བསྐྱིལ། མར་དང་། འབྲུ་མར་དང་། ཁུར་བ་ལ་སོགས་པ་ཁ་ཟས་རོ་བརྒྱ་དང་ལྡན་པ་ཆོ་མ་ཆོ་དགུ་སྦྱར་ཏེ། དེ་མ་ཡིན་པ་གཞན་ཡང་གོས་དང་། གདུ་བུ་དང་། ཕྲེང་བ་དང་། ལུས་ཀྱི་རྒྱན་སྣ་ཚོགས་དང་། བན་གླང་དང་། རྟ་དང་། རིན་པོ་ཆེ་སྣ་བདུན་ལ་སོགས་ཏེ། ཐམས་ཅད་ཕུན་སུམ་ཚོགས་པར་སྦྱར་ནས་ཞག་བདུན་ལོན་པའི་སྐྱ་རེངས་ཤར་ནས་ཞག་བདུན་གྱི་ཉི་མ་ལ་དྲིལ་རྔ་བརྡུངས། དུང་བུས་ཏེ། སྐད་ཆེན་པོས་ཐམས་ཅད་སྦྱིན་པའི་གནས་འདིར་འདུས་ཤིང་ཤོག་ཤིག་ཅེས་བོས་སོ། །དེའི་ཚེ་ན་ཐམས་ཅད་ཀྱིས་བོས་པའི་སྐད་ཐོས་ནས་འཕགས་པས་བྱིན་གྱིས་བརླབས་པ་ཙམ་དུ་རབ་ཏུ་དགའ་བའི་སེམས་སྐྱེས་ཏེ། ཐམས་ཅད་སྦྱིན་པ་གཏོང་བའི་གནས་སུ་ལྷགས་ཏེ། ཡིད་བཞིན་དུ་གོས་དང་། མལ་ཆ་དང་། ཟས་སྐོམ་དང་། ལུས་ཀྱི་རྒྱན་སྣ་ཚོགས་པ་དང་། ནད་ཀྱི་རྩི་སྨན་མང་པོ་དང་། བན་གླང་དང་། རྟ་དང་། རིན་པོ་ཆེ་སྣ་བདུན་ལ་སོགས་པ་ཅི་དང་ཅི་འདོད་པ་ཡིད་བཞིན་དུ་དྲངས་ནས་སྦྱིན་པའི་རྫས་ཅི་ཡོད་པ་ཐམས་ཅད་ཀྱིས་མ་ལུས་པར་ཁྱེར་རོ། །དེ་ནས་སྦྱིན་བདག་དེ་དགའ་ནས་ཕྱིར་ཁྱིམ་དུ་
འོངས་ནས་ཆུང་མ་དང་བུ་རྣམས་དགའ་བ་བཞིན་དུ་འདོད་པ་ལྔ་ལ་ལོངས་སྤྱོད་དོ། །དེ་ནས་ཞག་བདུན་ཙམ་ལོན་པ་དང་མི་དག་ན་རེ་སྦྱིན་བདག་དེས་སྔར་གོས་དང་། ཟས་དང་། སྐོམ་ལ་སོགས་པ་སྦྱིན་པ་བྱས་ན་ཁ་ཟས་ཟོས་པ་རྣམས་དུག་ལངས་ནས་ཐམས་ཅད་ཤིའོ་ཞེས་ཟེར་རོ། །དེ་ལྟར་ཤི་བར་གྱུར་པས་ཐམས་ཅད་ཚིག་ཏུ་བརྗོད་དེ་ངོ་མཚར་ཆེའོ་ངོ་མཚར་ཆེའོ། །དེ་ལྟར་སྦྱིན་བདག་ཆེན་པོ་དེས་ཀུན་ལ་སྙིང་བརྩེ་བའི་ཕྱིར་ཅི་འདོད་པ་བཞིན་དུ་ཁ་ཟས་ལ་སོགས་པས་ཚིམ་པར་བྱས་ཏེ་ལུས་དང་སྲོག་གསོན་པར་བྱས་པར་གྱུར་ན་ཕྱིས་ཞག་མང་པོ་མ་ལོན་པར་དུག་ལངས་ནས་ཐམས་ཅད་ཤིའོ་བར་སྒྲ་སྒྲོགས་པར་གྱུར་ཏོ། །དེའི་ཚེ་སྦྱིན་བདག་ཆེན་པོ་དེས་དེ་ལྟར་གྱུར་པ་དེ་ཐོས་ནས་ཡི་མུག་ཅིང་མི་དགའ་བར་གྱུར་ཏེ། ཆུང་མ་དང་། བུ་ལ་སོགས་པ་ལ་ཁྱེད་ཀྱི་ཁ་ཟས་ཇི་ལྟར་སྦྱར་ན་ཁ་ཟས་ཀྱི་ནང་དུ་དུག་མ་རུངས་པ་ཇི་ལྟར་འོངས་ཞེས་དྲིས་པ་དང་། ཆུང་མ་དང་། བུ་དང་། བྲན་ཁོལ་དང་། ལས་བྱེད་པའི་མི་རྣམས་ཀྱི་མཆིད་ནས་དུག་མི་སྲིད་དོ། །དུག་འདི་ག་ལས་འོངས་ཞིབ་ཏུ་རྟོགས་ཤིག་ཅེས་སྨྲས་སོ། །དེ་ནས་སྦྱིན་བདག་དེ་ཁྱིམ་གྱི་ཞལ་ཏ་བྱེད་ཅིང་མཐར་གྱིས་སོང་སོང་བ་ལས་ཁྲོན་པ་ཞིག་སྟེང་བཀབ་ཅིང་གཡོགས་པ་མཐོང་ངོ་། །ཁྲོན་པ་འདི་ཅིའི་ཕྱིར་གཡོགས་ཞེས་དྲིས་པ་དང་། ཁྲོན་པ་འདི་ནི་ཁྱིམ་བདག་ཁྱོད་བུས་པ་ཆུང་ངུའི་ཚེ་ན་སྦྲུལ་གདུག་པ་གསུམ་ཞིག་གསོ་གསོ་བ་ལས་ཁྲོན་པ་འདི་བརྐོས་ནས་སྦྲུལ་གདུག་པ་གསུམ་བཅུག་གོ །ཁྲོན་པ་འདི་ནི་སྦྲུལ་གདུག་པ་འདུག་པའི་ཁྲོན་པ་ཡིན་ནོ། །ཆུ་ཡང་གདུག་པས་ཆུ་འདི་ཡང་འཐུངས་པས་ན་སྟེ་འཆི་བར་འགྱུར་རོ། །སྦྱིན་བདག་དེས་ཚིག་དེ་དག་ཐོས་ནས་ལས་བྱེད་པ་དག་ལ་ཁྱེད་དེ་བར་ཁ་ཟས་གཡོ་བའི་ཚེ་ཁྲོན་ཆུ་འདི་ལས་བཅུས་ཏེ་ཁ་ཟས་མ་གཡོས་སམ། ལས་བྱེད་པས་སྨྲས་པ། ཁ་ཟས་མང་དུ་གཡོས་པས་རིངས་ནས་ཆུ་འདི་ཡང་བཅུས་ནས་ཁ་ཟས་ཀྱི་གཡོས་བྱས་སོ་ཞེས་བསྒོའོ། །ཁྱིམ་བདག་མི་དགའ་སྟེ། ངོ་མཚར་ཆེའོ། །བདག་ནི་གཏི་མུག་ཅན་ཤེས་པའི་བློ་མེད་པ་ཡིན་པ་འདྲ་སྟེ། ཅིའི་ཕྱིར་སྦྲུལ་གདུག་པ་གསོ་ཞིང་ཁྲོན་པ་
གདུག་པ་རྐོ་ཞེས་འགྱོད་ནས་ཆུང་མ་དང་། བུ་ལ་བསྒོ་བ། སྦྲུལ་གདུག་པ་གསུམ་གྱི་ཁྲོན་པ་མྱུར་དུ་ཚོངས་ཤིག །སྦྲུལ་གདུག་པ་གསུམ་ཡང་ཁོ་བོ་བདག་གིས་བསྲེག་གོ་ཞེས་བསྒོ་བ་དང་། ལས་བྱེད་པའི་མི་རྣམས་ཀྱིས་དེ་མ་ཐག་ཏུ་ཁྲོན་པ་དེ་ཡང་བསུབས་ནས་མེད་པར་བྱས་སོ། །དེ་ནས་སྦྱིན་བདག་དེས་སྦྲུལ་གདུག་པའི་ཁྲོན་པ་དེ་མེད་པར་བྱས་ནས་ཕྱི་རོལ་དུ་འཆག་ཏུ་སོང་སོང་བ་ལས་སྦྱིན་བདག་གི་ཁ་ཟས་དུག་ཅན་གྱི་ཤི་བར་གྱུར་པ་ལས་ཐམས་ཅད་ཚིག་འཐུན་པར་སྦྱིན་བདག་འདིས་བདག་ཅག་ལ་ཁ་ཟས་དུག་ཅན་བྱིན་ནས་བདག་ཅག་སྔར་ཤི་བར་གྱུར་པ་ཡིན་ནོ། །བདག་ཅག་གིས་དེ་ལྟར་ཤེས་ན་དེར་མ་སོང་ཡང་རུང་ཞེས་འགྱོད་པ་སྐྱེས་སོ། །དེ་བཞིན་དུ་འཁོར་ལོས་སྒྱུར་བའི་རྒྱལ་པོ་དེ་ཡང་དགེ་བ་བཅུས་སེམས་ཅན་བཏུལ་ཏེ། སེམས་ཅན་དག་ལྷ་དང་མིའི་མཐོ་རིས་སུ་སྐྱེ་ཞིང་འདོད་པ་ལྔ་ལ་འདོད་དགུར་ལོངས་སྤྱོད་མོད་ཀྱི་སྐྱེ་བ་དང་། རྒ་བ་དང་། ན་བ་དང་། འཆི་བ་ལས་མི་ཐར་བ་ཡང་དེ་དང་འདྲའོ། །དེ་ནས་འཁོར་ལོས་སྒྱུར་བའི་རྒྱལ་པོ་དེ་དེའི་མོད་ལ་བདག་བླ་ན་མེད་པའི་སངས་རྒྱས་ཀྱི་ཆོས་དང་། འཇིག་རྟེན་ལས་འདས་པའི་ཆོས་བསྒྲུབས་ཏེ། སེམས་ཅན་རྣམས་ཀྱང་དེ་ལ་ཀློག་པ་དང་། འདོན་པ་དང་། འདྲི་བ་དང་། གོམས་པར་བྱ་སྟེ། སྐྱེ་ཤིའི་འཁོར་བ་ཡོངས་སུ་སྤང་ཞིང་མྱ་ངན་ལས་འདས་པ་འཐོབ་པར་བྱའོ་ཞེས་དམ་བཅས་སོ། །དེའི་ཚེ་ན་འཁོར་ལོས་སྒྱུར་བའི་རྒྱལ་པོ་སངས་རྒྱས་ཀྱི་ཆོས་ཚོལ་བའི་ཕྱིར། འཛམ་བུའི་གླིང་ན། སངས་རྒྱས་ཀྱི་ཆོས་སུས་ཤེས་ཞེས་གནས་ཀུན་ཏུ་བཀར་བཏགས་སོ། །འཁོར་ལོས་སྒྱུར་བའི་རྒྱལ་པོ་ཆོས་འདོད་པའི་ཕྱིར་གནས་ཀུན་ཏུ་བཀར་བཏགས་ཀྱང་ཤེས་པ་མ་བྱུང་ངོ་། །མཐའ་འཁོབ་ཀྱི་ཡུལ་ཆུང་ངུ་ཅིག་ཏུ་ཕྱིན་པ་དང་། དེ་ན་བྲམ་ཟེ་གཅིག་ཅིག་སངས་རྒྱས་ཀྱི་ཆོས་ཤེས་སོ་ཞེས་ཟེར་རོ། །དེ་ནས་བྲམ་ཟེ་དེའི་སྟེང་དུ་ཕོ་ཉ་བཏང་ནས་ཕོ་ཉ་དེས་བྲམ་ཟེ་ག་ལ་བ་དེར་ཕྱིན་ནས་བཙུན་པ་སངས་རྒྱས་ཀྱི་ཆོས་ཤེས་སམ་ཞེས་དྲིས་ན་ཤེས་སོ་ཞེས་ཟེར་རོ། །དེ་ནས་ཕོ་ཉས་བྲམ་ཟེའི་རྐང་པ་ལ་མགོ་བོས་ཕྱག་བྱས་ནས་བཙུན་པ་འཁོར་ལོས་སྒྱུར་བའི་
རྒྱལ་པོས་སྤྱན་འདྲེན་དུ་བཏང་གིས་འཁོར་ལོས་སྒྱུར་བའི་རྒྱལ་པོ་དེ་ག་ལ་བ་དེར་གཤེགས་སུ་གསོལ། །དེ་ནས་བྲམ་ཟེ་ཡང་དེར་འོངས་ནས་འཁོར་ལོས་སྒྱུར་བའི་རྒྱལ་པོས་རྒྱང་མ་ནས་བསུ་སྟེ་རྐང་པ་ལ་མགོ་བོས་ཕྱག་འཚལ་ནས་བདེ་བར་བྱོན་ཏམ། ལམ་དུ་ཉོན་མོངས་པར་མ་གྱུར་ཏམ། ངལ་བར་མ་གྱུར་ཏམ། ཞེས་གཏམ་དྲིས་ཏེ་ཕོ་བྲང་གི་ནང་དུ་ཁྲིད་ནས་ཕོ་བྲང་གི་དབུས་སུ་རྒྱལ་པོའི་གདན་ལ་བཞག་གོ །བྲམ་ཟེས་ཀྱང་གདན་ལ་སྐྱིལ་མོ་ཀྲུང་བཅས་ཏེ་འདུག་ནས་དེའི་ཚེ་རྒྱལ་པོས་བྲམ་ཟེ་དེ་བདེ་བར་འདུག་ནས་དགོས་པའི་ཡོ་བྱད་རྣམས་ཀུན་ཕུལ་ཏེ་སྦྱིན་པ་བྱས་ནས་ཐལ་མོ་སྦྱར་ཏེ་བྲམ་ཟེ་དེ་ལ་སྟོན་པ་ཆེན་པོ་སངས་རྒྱས་ཀྱི་ཆོས་ཤེས་སམ་ཞེས་དྲིས་པ་དང་། བྲམ་ཟེ་ན་རེ་བདག་གིས་སངས་རྒྱས་ཀྱི་ཆོས་ཤེས་སོ་ཞེས་ཟེར་རོ། །དེ་ནས་རྒྱལ་པོས་བྲམ་ཟེ་ལ་སྟོན་པ་ཆེན་པོ་བདག་ལ་བསྟན་ཅིང་བཤད་དུ་གསོལ་ཞེས་བྱས་ནས། བྲམ་ཟེ་ན་རེ་རྒྱལ་པོ་ཁྱོད་ནི་ཤིན་ཏུ་གླེན་ནོ། །ཁོ་བོས་སངས་རྒྱས་ཀྱི་ཆོས་བསླབས་པ་ན། ཡུན་རིང་དུ་ན་དཀའ་བའི་སྡུག་བསྔལ་མྱོང་ནས་གདོད་ལོབས་པ་ཡིན་ན། ད་རྒྱལ་པོས་ཐལ་བྱུང་དུ་ཐོས་པར་འདོད་དམ། རྒྱལ་པོས་སྨྲས་པ། སྟོན་པ་ཆེན་པོ་འོ་ན་ཅི་ཞིག་འདོད། བྲམ་ཟེས་སྨྲས་པ། བདག་ལ་མཆོད་པ་ཕུལ་ཅིག །རྒྱལ་པོས་སྨྲས་པ། སྟོན་པ་ཆེན་པོ་མཆོད་པ་ཅི་ཞིག་འདོད། གོས་སམ། མལ་ཆའམ། བཟའ་བའམ། བཏུང་བ་འདོད་དམ། འོན་ཏེ་གསེར་རམ། དངུལ་ལམ། རིན་པོ་ཆེ་འདོད་དམ། བྲམ་ཟེས་སྨྲས་པ། བདག་དེ་འདྲ་བའི་མཆོད་པ་མི་འདོད་དོ། །རྒྱལ་པོས་སྨྲས་པ། མཆོད་པ་དེ་དག་མི་འདོད་ན་འོ་ན་བན་གླང་ངམ། རྟའམ། ཐེག་པ་འདོད་དམ། འོན་ཏེ་ཡུལ་ལམ། གྲོང་ཁྱེར་རམ། ཆུང་མའམ། བུ་འདོད་དམ། རོལ་མོའམ། གླུའམ། གར་བྱེད་པ་འདོད་དམ། བྲམ་ཟེས་སྨྲས་པ། བདག་ནི་དེ་དག་གང་ཡང་མི་འདོད་དོ། །གལ་ཏེ་ལུས་ལ་རྨ་སྟོང་ཕྱུང་སྟེ་རྨའི་ནང་དུ་མར་བླུགས་ལ་མེ་མར་སྙིང་པོ་བཙུགས་ཏེ་མར་མེ་སྟོང་འབར་བས་མཆོད་ན་སངས་རྒྱས་ཀྱི་ཆོས་བསྟན་ཅིང་བཤད་པར་བྱའོ། །གལ་ཏེ་དེ་ལྟར་མི་ནུས་
ན་བདག་ལངས་ཏེ་འགྲོ་ཞེས་སྨྲས་ནས་རྒྱལ་པོས་སྐད་ཅིག་ཙམ་ལན་མ་སྨྲས་ཀྱི་བར་དུ་ཁྲི་ལས་བབས་སོ། །དེ་ནས་རྒྱལ་པོས་པང་དུ་བླངས་ནས་སྟོན་པ་ཆེན་པོ་ཅུང་ཟད་ཉག་བསྲིང་དུ་གསོལ། བདག་ཤེས་པ་ཞན་ཞིང་བསོད་ནམས་ཆུང་བས་ཅུང་ཟད་བསམས་ཏེ་མཆོད་པར་བགྱིད་དོ་ཞེས་སྨྲས་སོ། །དེའི་ཚེ་འཁོར་ལོས་སྒྱུར་བའི་རྒྱལ་པོ་དེ་འདི་སྙམ་དུ་སེམས་པར་གྱུར་ཏེ། བདག་གི་ལུས་འདི་ཐོག་མ་མེད་པའི་དུས་ནས་ཤི་བ་གྲངས་མེད་པར་མྱོང་ན་ཡང་ཆོས་ཀྱི་ཕྱིར་མ་ཤིའི། ད་ཡང་བདག་གི་ལུས་འདི་ཡང་མཐར་འཇིག་ཅིང་རུལ་བར་འགྱུར་བས་ཕན་པ་མེད་དེ། ད་ནི་དུས་ལས་བབ་བོ་སྙམ་བསམས་ནས་སྟོན་པ་བྲམ་ཟེ་ལ་འདི་སྐད་ཅེས་སྨྲས་སོ། །སྟོན་པ་ཆེན་པོ། བདག་མཆོད་པ་འདོད་པ་བཞིན་བགྱིད་དོ། །དེ་ནས་རྒྱལ་པོ་ཕོ་བྲང་དུ་སོང་ནས་བཙུན་མོ་རྣམས་ལ་ད་ནི་བདག་ཅག་བྱེ་འབྲལ་ལོ་ཞེས་སྨྲས་སོ། །བཙུན་མོ་རྣམས་དེ་སྐད་ཅེས་སྨྲས་པ་ཐོས་ནས་དངངས་ཤིང་འཁམས་ཏེ་ཅི་ཉེས་གཏོལ་མེད་དེ་རྒྱལ་པོ་ད་ལྟར་ཅི་ཞིག་མཛད་སྙམ་དགོངས་ཞེས་གསོལ་ལོ། །རྒྱལ་པོས་སྨྲས་པ། བདག་གི་ལུས་འདི་ལ་མར་མེ་སྟོང་ཞིག་བཙུགས་ཏེ་སྟོན་པ་བྲམ་ཟེ་ལ་མཆོད་པ་བྱ་སྙམ་མོ། །བཙུན་མོ་རྣམས་ཀྱིས་དེ་སྐད་ཅེས་སྨྲས་པ་ཐོས་ནས་ས་ལ་འགྲེ་ཞིང་ཆོ་ངེས་བཏབ་སྟེ་བརྒྱལ་ལོ། །རིང་ཞིག་ལོན་པ་དང་། ཕྱིར་དྲན་པ་རྙེད་དོ། །རྒྱལ་པོ་ཆེན་པོ་འཇིག་རྟེན་ན་བདག་གི་ལུས་ལས་ཕངས་པ་མེད་དེ། ཉེས་ཏེ་དོགས་ནས་གསོ་བའི་རིམ་གྲོ་ཆེར་བྱེད་ན་ཅིའི་ཕྱིར་བདག་གི་ལུས་ལ་ཐོ་འཚམ་ཞིང་གནོད་པ་བགྱིད། རྒྱལ་པོ་ནི་མཁས་པའི་བློ་དང་ལྡན་པ་ལགས་ན་ད་ལྟར་མྱོས་སམ། འོན་ཏེ་ཡི་དགས་ཀྱིས་བརླམས་སམ། ཅི་ནོངས། རྒྱལ་པོས་སྨྲས་པ། དེ་ལྟ་བུ་གང་ཡང་མ་ཡིན་ནོ། །འོ་ན་ཅིའི་ཕྱིར་དེ་ལྟ་བུའི་གནོད་པ་མཛད་ཅིང་བྲམ་ཟེ་ལ་མཆོད་པར་དགོངས། རྒྱལ་པོས་སྨྲས་པ། བདག་ནི་སངས་རྒྱས་ཀྱི་ཆོས་འདོད་དེ། སེམས་ཅན་ཐམས་ཅད་ཀྱི་དོན་བྱེད་པར་སེམས་སོ། །དེ་ལྟར་སེམས་ཅན་ཐམས་ཅད་ལ་དགོངས་ན་ད་ཅིའི་ཕྱིར་བདག་ཅག་རྣམས་བཀོལ་བར་གྱུར། རྒྱལ་པོས་སྨྲས་པ། འཇིག་རྟེན་ན་མཛའ་སྡུག་ཐམས་ཅད་མཐར་བྱེ་བྲལ་དུ་འགྱུར་ཏེ་དེ་བས་ན་བདག་
གིས་ལུས་ཀྱི་མཆོད་པ་བྱས་ཏེ། ཁྱེད་དང་སེམས་ཅན་ཐམས་ཅད་ཀྱི་མུན་གནག་གི་ཁང་པར་ཡེ་ཤེས་ཆེན་པོའི་སྒྲོན་མ་གཟུགས་ཤིང་སྐྱེ་ཤིར་འཁོར་བའི་མ་རིག་པའི་མུན་པ་སྣང་བར་བྱས་ལ། ཀུན་ནས་དཀྲིས་པའི་ཉོན་མོངས་པའི་མདུད་པ་བཅད་དེ། འཁོར་བའི་སྐྱོན་ལས་བསྒྲལ་ནས་མྱ་ངན་ལས་འདས་པའི་གནས་སུ་དགོད་པའི་ཆེད་དུ་བསམས་ཀྱིས་ཁྱེད་རྣམས་བར་ཆད་དང་བགེགས་མ་བྱེད་ཅིག །དེའི་ཚེ་བཙུན་མོ་རྣམས་དེ་སྐད་ཅེས་བསྒོ་བ་ཐོས་ནས་བརྣངས་པ་ལྟར་ཅང་མི་སྨྲ་ཞིང་སྐད་ཆེན་པོ་ཕྱུང་སྟེ་ངུ་ཞིང་རང་རང་གི་སྐྲ་འབལ་ལོ། །བདག་ཅག་ལ་བསོད་ནམས་མེད་དེ་བཀྲ་མི་ཤིས་པས་གསོན་པོར་བདག་ཅག་ལ་ལྷ་མེད་པར་གྱུར་ཅེས་སྨྲའོ། །རྒྱལ་པོ་དེ་ལ་རྒྱལ་བུ་ལྔ་བརྒྱ་ཡོད་དེ་ཐམས་ཅད་ཀྱང་མངའ་བྱད་བཟང་ཞིང་སྡུག་པ། ཡིད་གཞུངས་ཤིང་མཁས་པའི་བློ་དང་ལྡན་པ། མིའི་མཚན་དང་རྫོགས་པར་ལྡན་པ། རྒྱལ་པོ་ཡང་མིག་བཞིན་དུ་ཕངས་ཤིང་བྱམས་སོ། །དེའི་ཚེ་རྒྱལ་པོས་རྒྱལ་བུ་རྣམས་ལ་སྨྲས་པ། ཁོ་བོ་ད་མཆོད་པའི་ལས་ཤིག་བྱེད་སྙམ་ན་ལུས་དང་སྲོག་ཉམ་ཆུང་ངུ་དོགས་ཏེ་ཁྱེད་དང་བྲལ་བ་སྙམ། ཡུལ་གྱི་སྲིད་དང་འབངས་རྣམས་ཀྱི་ཚིས་ནི་ཆེ་རིམས་ཀྱིས་བྱོས་ཤིག་ཅེས་བསྒོའོ། །རྒྱལ་བུ་རྣམས་དེ་སྐད་བསྒོ་བ་དེ་ཐོས་ནས་ལུས་ཀྱི་ཡན་ལག་དང་རྩ་རྣམས་བཅད་པ་ཙམ་དུ་སྡུག་བསྔལ་གྱིས་གདུངས་ཏེ། དཔེར་ན་མི་བརྣངས་པ་ལ་སྐྱུག་ཏུ་ཡང་མེད། མིད་དུ་ཡང་མེད་པ་བཞིན་དུ་རྒྱལ་པོ་ལ་འདི་སྐད་ཅེས་གསོལ་ཏོ། །ཅིའི་སླད་དུ་བདག་ཅག་རྣམས་སྤངས་ཏེ་སྐྱབས་སུ་མ་མཆིས་པར་མཛད། ལ་ལ་ནི་རྒྱལ་པོའི་གཉའ་བ་ནས་འཁྱུད། ལ་ལ་ནི་ལག་པ་དང་། རྐང་པ་ལ་བཟུང་ནས་སྐད་ཕྱུང་ཞིང་ངུ་། ཀྱི་ཧུད་ཀྱི་ཧུད་ཅིའི་ཕྱིར་མགོན་དང་སྐྱབས་མེད་པར་འགྱུར་ཞེས་སྨྲས་སོ། །དེ་ནས་རྒྱལ་པོས་རྒྱལ་བུ་རྣམས་ལ་སྤྲོ་བ་བསྐྱེད་པའི་ཕྱིར་འཇིག་རྟེན་ན་མཛའ་ཞིང་སྡུག་པ་ཐམས་ཅད་མཐར་བྱེ་བྲལ་བར་འགྱུར་རོ་ཞེས་བསྒོའོ། །དེ་སྐད་ཅེས་བསྒོ་བ་ཐོས་ཀྱང་ཡིད་ལ་གཅགས་ཏེ་འབྲལ་མི་ཕོད་ན་བདག་གི་གསོལ་བ་གཅིག་གནང་བར་མཛད་དུ་གསོལ། །བདག་ཅག་གི་ལུས་དང་སྲོག་རྒྱལ་པོ་ལ་འབུལ་ན་སྟོན་པ་བྲམ་ཟེ་ལ་མཆོད་པ་མཛད་
དུ་གསོལ། རྒྱལ་པོས་སྨྲས་པ། བུ་ཁྱེད་རྣམས་ནི་ད་དུང་ཤེད་མ་བྱེ་ལ་ཆུང་བས་དེ་འདྲ་བའི་མཆོད་པ་བྱེད་མི་བཟོད་ཀྱིས། ཁོ་བོ་ནི་སྟོན་པ་ལམ་རིང་པོ་ནས་གཉེར་ཏེ་མཆོད་པ་བྱ་བར་ཁས་བླངས་པའི་ཡིད་དང་འགལ་བར་བྱར་མི་རུང་བས་བུ་སྲི་ཞུ་ཅན་ནི་ཕའི་ཡིད་དང་འགལ་བར་མི་བྱེད་ན་ཁྱེད་རྣམས་ཁོ་བོའི་ཡིད་དང་འགལ་བར་བྱེད་དམ། རྒྱལ་བུ་རྣམས་དེ་སྐད་སྨྲ་བ་ཐོས་ནས་སྐད་ཕྱུང་སྟེ་ཆོ་ངེས་བཏབ་པས་ཡུལ་གྱི་ལྷ་རྣམས་ཀྱང་དངངས་ཏེ་རི་འགྱེལ་བ་བཞིན་དུ་ཐམས་ཅད་ལུས་ས་ལ་བརྡབས་སོ། །དེའི་ཚེ་རྒྱལ་པོ་ལ་ཡུལ་མཐའི་རྒྱལ་ཕྲན་ཐམས་ཅད་ཀྱིས་ཀྱང་མཆི་ཕྱག་བྱས་ནས་ཕོ་བྲང་གི་ནང་སྟོན་པ་ཆེན་པོ་ག་ལ་བ་དེར་སོང་སྟེ། དེའི་དྲུང་དུ་ཕྱིན་ནས་ལུས་ཀྱི་རྒྱན་ཐམས་ཅད་ཀྱང་བཀྲོལ་ནས་གོས་ཀྱང་ཕུད་ནས་ཕྱོགས་གཅིག་ཏུ་བཞག་ནས་ལུས་དྲང་པོར་བསྲང་སྟེ་འདུག་གོ །འདུག་མ་ཐག་ཏུ་རྒྱལ་ཕྲན་རྣམས་དང་། བློན་པོ་དང་། རྒྱལ་བུ་ལྔ་བརྒྱ་དང་། བཙུན་མོ་ཉི་ཁྲི་ལ་བསྒོའོ། །ཁྱེད་རྣམས་ལས་གང་གིས་ཁོ་བོའི་ལུས་ལ་རྨ་སྟོང་ཞིག་གཅོད་སུས་ནུས་ཞེས་སྨྲས་ན། བཙུན་མོ་དང་། རྒྱལ་བུ་དང་། བློན་པོ་དང་། རྒྱལ་ཕྲན་གྱི་མི་རྣམས་ཚིག་འཐུན་པར་བདག་ཅག་གིས་རང་གི་ལུས་ལ་གྲི་ཐོགས་ཏེ་མིག་ཕྱུང་ཡང་བླའི་རྒྱལ་པོའི་ལུས་ལ་རྨ་འབྱིན་མི་ཕོད་དོ། །དེ་ནས་རྒྱལ་པོ་མི་དགའ་བར་གྱུར་ནས་ད་ནི་བདག་ཡེ་འུར་གྱུར་པ་ལྟ་འཁོར་མང་པོ་འདི་སྙེད་ཀྱི་ནང་ན་མི་འགའ་ཡང་ཁོ་བོའི་གྲོགས་སུ་འགྱུར་བ་མེད་དམ་ཞེས་སྨྲ་བར་གྱུར་ཏོ། །དེའི་ཚེ་ན་རྒྱལ་པོ་དེ་ལ་རིགས་ངན་ཤེན་པ་རང་བཞིན་གྱིས་ཁྲོ་ལ་ཀུན་ཀྱང་འཇིགས་སུ་རུང་བ་ཞིག་ཡོད་པ་ཞིག་བོས་སོ། །ཤེན་པ་དེ་དེར་འོངས་སོ། །ཤེན་པ་དེ་འོངས་ནས་རྒྱལ་བུ་རྣམས་ལ་ཁྱེད་མྱ་ངན་མ་བྱེད་ཅིག །རྒྱལ་པོ་ཆེན་པོ་དོན་མི་འགྲུབ་པའི་ཐབས་བདག་ལ་མཆིས་ཀྱིས། དོན་མ་གྲུབ་ན་སྔ་མཁོ་བཞིན་དུ་རྒྱལ་པོའི་སྲིད་གཟུང་དུ་ཟད་དོ་ཞེས་སྨྲས་སོ། །རྒྱལ་བུ་རྣམས་ཀྱིས་ཚིག་དེ་སྐད་ཅེས་སྨྲས་པ་ཐོས་ནས་རབ་ཏུ་དགའ་བའི་སེམས་སྐྱེས་པར་གྱུར་ཏོ། །དེ་ནས་ཤེན་པ་དེ་རྒྱལ་པོའི་དྲུང་དུ་འོངས་ནས་རྒྱལ་པོ་ཆེན་པོ་ད་ལྟར་ཅི་ཞིག་མཛད་པར་དགོངས་ཞེས་གསོལ་པ་དང་། རྒྱལ་པོས་སྨྲས་པ། ཁོ་བོའི་ལུས་ལ་
མར་མེ་སྟོང་བཙུགས་ལ་སྟོན་པ་ཆེན་པོ་བྲམ་ཟེ་ལ་མཆོད་པར་སེམས་སོ། །ཤེན་པས་སྨྲས་པ། དེ་ལྟ་ན་སྐུ་ལ་གཅོད་ནུས་སོ། །རྒྱལ་པོས་དེ་སྐད་སྨྲས་པ་ཐོས་ནས་རབ་ཏུ་དགའ་བའི་སེམས་སུ་གྱུར་ནས་ཤན་པ་ལ་ཁྱོད་ནི་ཡང་དག་པར་ཁོ་བོའི་བླ་ན་མེད་པའི་བྱང་ཆུབ་སྒྲུབ་པའི་གྲོགས་ཡིན་ནོ་ཞེས་སྨྲས་སོ། །དེ་ནས་ཤན་པས་རྒྱལ་པོའི་དྲུང་དུ་འགྲེང་བཞིན་ངུ་ངམ་ངུར་བའི་སྐད་ཆེན་པོས་རྒྱལ་པོ་ལ་འདི་སྐད་ཅེས་གསོལ་ཏོ། །རྒྱལ་པོ་མཁྱེན་ཏམ། མི་གསད་པའི་ཆོས་ཀྱིས་ནི་སྔར་མགོ་བཅད་པར་དགོས་ཏེ། གཉའ་བ་གཏུབས་ལ་རྐང་ལག་ཀྱང་ཕྲལ་ཏེ། ཆུ་བ་དང་། རྒྱུས་པ་ཡང་དབྱུང་དགོས་ན་རྒྱལ་པོ་ཆེན་པོ་དེ་འདྲ་བའི་ན་ཚའི་སྡུག་བསྔལ་བཟོད་དམ། རྒྱལ་པོས་དེ་སྐད་སྨྲས་པ་ཐོས་ནས་རབ་ཏུ་དགའ་བའི་སེམས་སུ་གྱུར་ནས། དེ་ནས་ཤེན་པས་གནག་ལྕེ་ལྟ་བུའི་གྲི་ཐོགས་ཏེ་རིང་པོ་མ་ཐོགས་པར་རྒྱལ་པོའི་ལུས་ལ་རྨ་སྟོང་ཚང་བར་བཅད་དོ། །ཤན་པ་རྒྱལ་པོའི་སེམས་ཕྱིར་ནུར་བ་ཙམ་དུ་སེམས་པ་ལས། སེམས་མ་ནུར་བས་དེ་གྲི་ཡང་ས་ལ་བོར་ནས་བྲོས་སོ། །དེ་ནས་རྒྱལ་པོ་ཆེན་པོའི་ལུས་ལ་རྨ་སྟོང་བཅད་པའི་ནང་དུ་མར་ཁུ་བླུགས་ནས་རས་བཟང་པོའི་སྙིང་པོ་བཙུགས་ཏེ་མར་མེ་སྟོང་བཙུགས་སོ། །དེའི་ཚེ་བྲམ་ཟེ་སྟོན་པ་ཆེན་པོས་དེ་ལྟར་བྱས་པ་མཐོང་ནས་འདི་སྙམ་དུ་ད་ནི་མྱུར་དུ་ཆོས་མ་བཤད་ན་ལུས་སྲོག་འཚོའམ་མི་འཚོ་གཏོལ་མེད་པས། གལ་ཏེ་སྲོག་མ་སོས་ན་སུས་ཆོས་མཉན་པར་འགྱུར་སྙམ་བསམས་ནས། རྒྱལ་པོ་ལ་འདི་སྐད་ཅེས་སྨྲས་སོ། །སངས་རྒྱས་ཀྱི་ཆོས་ཐོས་པར་འདོད་པས་ཤིན་ཏུ་དཔའ་བའི་བརྩོན་འགྲུས་ཀྱིས་བྱ་དཀའ་བའི་སྤྱོད་པ་སྤྱད་པས་ལེགས་པར་ཉོན་ལ་ཤིན་ཏུ་ཡིད་ལ་ཟུང་ཤིག་དང་། ད་རྒྱལ་པོ་ལ་སངས་རྒྱས་ཀྱི་ཆོས་བསྟན་པར་བྱའོ། །དེ་སྐད་ཅེས་སྨྲས་པ་ཐོས་ནས་རྒྱལ་པོ་རབ་ཏུ་དགའ་བའི་སེམས་སུ་གྱུར་ཏེ། དཔེར་ན་བུ་སྲི་ཞུ་ཅན་ཞིག་ཕ་མ་ཤི་ན་རབ་ཏུ་མི་དགའ་སྟེ། སྡུག་བསྔལ་གྱིས་གདུངས་པ་ལས་ཕ་མ་ཕྱིར་སོས་པ་ན་བུ་དེ་ཇི་ལྟར་རབ་ཏུ་དགའ་བ་ལྟར་རྒྱལ་པོ་དེ་ཡང་རབ་ཏུ་དགའ་བར་གྱུར་ཏོ། །དེ་ནས་བྲམ་ཟེ་དེས་རྒྱལ་པོ་ལ་སྨྲས་པ། སྐྱེ་བ་ཡོད་ན་འཆི་བར་འགྱུར། །འགོག་པ་འདི་ནི་བདེ་བ་ཡིན། །ཞེས་
ཚིགས་སུ་བཅད་པ་ཕྱེད་པ་འདི་བསྟན་ཏོ། །རྒྱལ་པོས་དམ་པའི་ཆོས་བསྟན་པ་ཐོས་ནས་རབ་ཏུ་དགའ་བའི་སེམས་སུ་གྱུར་ཏེ། རྒྱལ་བུ་དང་བློན་པོ་རྣམས་ལ་འདི་སྐད་ཅེས་བསྒོའོ། །ཁྱེད་རྣམས་ཁོ་བོ་ལ་སྡུག་ཅིང་བརྩེ་བའི་སེམས་ཡོད་ན་ཆོས་འདི་མ་བརྗེད་པར་ཡིད་ལ་ཟུང་ལ་ཡུལ་ཕྱོགས་སུ་གང་ན་མང་པོ་འདུ་བའི་གནས་དང་། གྲོང་དང་། གྲོང་ཁྱེར་དང་། ཚོང་འདུས་སུ་འགྲོ་བ་མང་པོ་ལ་འདི་སྐད་ཅེས་བཀར་ཐོགས་ཤིག །འཁོར་ལོས་སྒྱུར་བའི་རྒྱལ་པོ་ཆེན་པོས་སེམས་ཅན་མང་པོ་སྡུག་བསྔལ་གྱི་རྒྱ་མཚོར་བྱིང་བ་དག་འདོན་པ་དང་། སེམས་ཅན་ཐམས་ཅད་ལ་སྙིང་རྗེ་ཆེན་པོའི་སེམས་བསྐྱེད་ནས་ལུས་ལ་མར་མེ་སྟོང་བཙུགས་ཏེ། ཚིགས་སུ་བཅད་པའི་ཚིགས་བཅད་ཕྱེད་ཐོས་པ་འདི་རྒྱལ་པོ་ཆེན་པོ་འདིའི་བྱམས་པ་དང་སྙིང་རྗེའི་སེམས་གྲུབ་པར་བྱ་བའི་ཕྱིར་ཐམས་ཅད་ཀྱིས་ཡི་གེར་བྲིས་ཏེ་གདོན་པ་དང་། ཁ་ཏོན་དུ་བྱ་བ་དང་། འདྲི་བ་དང་། གོམས་པར་བྱེད་པ་དང་། དོན་ཡང་ཡིད་ལ་བྱ་ཞིང་ཇི་ལྟར་གཏམས་པ་བཞིན་དུ་ནན་ཏན་དུ་སྤྱད་པར་བྱའོ། །དེའི་ཚེ་ན་མི་མང་པོས་དེ་སྐད་ཅེས་བསྒོ་བ་ཐོས་ནས་རབ་ཏུ་དགའ་ཞིང་མགུ་བར་གྱུར་ཏེ། ཐམས་ཅད་ཀྱིས་ཚིག་འཐུན་པར་རྒྱལ་པོ་ལ་བསྟོད་ནས་ཤིན་ཏུ་དགའོ། །རྒྱལ་པོ་ཆེན་པོ་བདག་ཅག་གི་སྙིང་རྗེ་ཆེན་པོའི་ཕ་ཡང་དག་པ་ཡིན་ནོ། །སེམས་ཅན་ཐམས་ཅད་ཀྱི་ཕྱིར་ཤིན་ཏུ་སྤྱད་དཀའ་བ་སྤྱད་དོ་ཞེས་ཀུན་གྱིས་བསྔགས་ཏེ། ཀུན་གྱིས་ཤོག་ཤོག་དང་། དར་དང་། ཤུན་པ་དང་། ཤིང་དང་། རྡོ་ལ་ཡི་གེར་བྲིས་ཏེ་ཁ་ཏོན་དུ་སློབ་བོ། །གང་ན་མི་མང་པོ་འདུ་བའི་གནས་སུ་ཡང་ཡི་གེར་བྲིས་ཏེ། ཐམས་ཅད་ཀྱིས་མཐོང་བར་བྱས་ནས། བླ་ན་མེད་པའི་བྱང་ཆུབ་ཏུ་སེམས་བསྐྱེད་དུ་བཅུག་གོ །དེའི་ཚེ་རྒྱལ་པོ་ཆེན་པོས་ལུས་ལ་མར་མེ་སྟོང་བཙུགས་ཏེ་སྟོན་པ་ཆེན་པོ་བྲམ་ཟེ་ལ་མཆོད་པ་བྱས་པའི་འོད་ཟེར་གྱིས་ཕྱོགས་བཅུའི་ཞིང་འཇིག་རྟེན་གྱི་ཁམས་སྣང་བར་གྱུར་ཏེ། མར་མེ་དེའི་འོད་དེ་ལས་ཚིགས་སུ་བཅད་པའི་ཚིགས་བཅད་ཕྱེད་ཀྱི་ཆོས་ཀྱི་སྒྲ་ཡང་གྲགས་པར་གྱུར་ནས་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །མར་མེ་དེའི་འོད་དེས་སུམ་ཅུ་རྩ་གསུམ་གནམ་གྱི་ལྷའི་
ཁང་པ་ཡང་སྣང་བར་བྱས་ནས་མར་མེའི་འོད་དེས་ལྷའི་འོད་ཀུན་ཟིལ་གྱིས་མནན་པས་སུམ་ཅུ་རྩ་གསུམ་གནམ་གྱི་ལྷ་རྣམས་མར་མེའི་འོད་དེས་ཀུན་ཏུ་སྣང་བར་བྱས་པས་དེ་དག་འདི་སྙམ་དུ་གྱུར་ཏོ། །ཅིའི་རྒྱུ་ཅིའི་རྐྱེན་གྱིས་འོད་ཟེར་འདི་ལྟ་བུ་སྣང་བར་གྱུར་སྙམ། ལྷའི་མིག་གིས་བལྟས་པས་འཇིག་རྟེན་གྱི་ཁམས་ན་འཁོར་ལོས་སྒྱུར་བའི་རྒྱལ་པོ་ཆེན་པོས་སྙིང་རྗེའི་སེམས་བསྐྱེད་དེ། འགྲོ་བ་ཐམས་ཅད་ཀྱི་དོན་དུ་ལུས་ལ་མར་མེ་སྟོང་བཙུགས་ནས་སྟོན་པ་ཆེན་པོ་བྲམ་ཟེ་ལ་མཆོད་པ་བྱས་པར་མཐོང་ངོ་། །ལྷ་དེ་དག་རབ་ཏུ་དགའ་བའི་སེམས་སྐྱེས་ནས་འཇིག་རྟེན་གྱི་ཁམས་སུ་བབས་ནས་མི་ཐ་མལ་པའི་ལུས་སུ་སྤྲུལ་ནས་རྒྱལ་པོ་ག་ལ་བར་ལྷགས་ཏེ་རྒྱལ་པོ་ཆེན་པོ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ལུས་ལ་མར་མེ་སྟོང་བཙུགས་ཏེ། ཤིན་ཏུ་ཡང་སྤྱོད་དཀའ་བ་སྤྱད་ཅིང་ཚིགས་སུ་བཅད་པ་ཕྱེད་ཅིག་ཐོས་པས་ཅི་ཞིག་བྱ། རྒྱལ་པོས་སྨྲས་པ། རིགས་ཀྱི་བུ་བདག་ནི་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དུ་གཞུག་པའི་ཕྱིར་རོ། །དེ་ནས་སྤྲུལ་པའི་མི་དེ་ཕྱིར་བརྒྱ་བྱིན་གྱི་ལུས་སུ་བསྒྱུར་ནས་ལུས་ཀྱི་འོད་ཀྱིས་ཀུན་ཏུ་སྣང་བར་བྱས་ཏེ། རྒྱལ་པོ་ཆེན་པོ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་འདི་ལྟར་མཆོད་པ་བྱས་པ་འདིས་ལྷའི་རྒྱལ་པོ་འདོད་དམ། བདུད་ཀྱི་རྒྱལ་པོ་འདོད་དམ། ཚངས་པའི་རྒྱལ་པོ་འདོད་དམ། འཁོར་ལོས་སྒྱུར་བའི་རྒྱལ་པོས་བརྒྱ་བྱིན་ལ་སྨྲས་པ། ལྷའི་དབང་པོ་བདག་ནི་ལྷ་དང་མིའི་ལོངས་སྤྱོད་གང་ཡང་མི་འདོད་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་དེ། སོ་སོའི་སྐྱེ་བོ་ཐམས་ཅད་མི་བདེ་བ་རྣམས་བདེ་བའི་གནས་སུ་དགོད་པ་དང་། མ་གྲོལ་བ་རྣམས་གྲོལ་བར་བྱ་བ་དང་། ཕ་རོལ་ཏུ་མ་ཕྱིན་པ་རྣམས་ཕྱིན་པར་བྱ་བ་དང་། བྱང་ཆུབ་མ་ཐོབ་པ་རྣམས་ཐོབ་པར་བྱ་བར་འདོད་དོ། །བརྒྱ་བྱིན་གྱིས་སྨྲས་པ། རྒྱལ་པོ་ཆེན་པོ་ཁྱོད་ནི་རབ་ཏུ་བླུན་པའོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་ཡུན་རིང་པོར་ཤིན་ཏུ་སྤྱོད་དཀའ་བ་སྤྱད་པས་ཐོབ་པར་འགྱུར་ན་ཅིའི་ཕྱིར་བླ་ན་མེད་པའི་བྱང་ཆུབ་འཐོབ་པར་འགྱུར། རྒྱལ་པོས་བརྒྱ་བྱིན་ལ་སྨྲས་པ། ཅི་སྟེ་བདག་
གི་སྤྱི་བོའི་སྟེང་ན་ལྕགས་ཀྱི་འཁོར་ལོས་ཤིན་ཏུ་འབར་བ་རྒྱུན་དུ་འཁོར་ཡང་སྡུག་བསྔལ་དེ་ཙམ་གྱིས་བླ་ན་མེད་པའི་བྱང་ཆུབ་ལས་ཕྱིར་མི་ལྡོག་གོ །བརྒྱ་བྱིན་གྱིས་སྨྲས་པ། ཚིག་དེ་སྐད་ཅེས་སྨྲས་པ་ལ་སུ་ཞིག་ཡིད་ཆེས་པར་འགྱུར། དེ་ནས་འཁོར་ལོས་སྒྱུར་བའི་རྒྱལ་པོས་བརྒྱ་བྱིན་ལ་སྨྲས་པ། གལ་ཏེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་པ་མ་ཡིན་ལ་ལྷའི་དབང་པོ་ཁྱོད་བསླུས་པར་གྱུར་ན། བདག་གི་ལུས་ཀྱི་རྨ་འདི་དག་ནམ་དུ་ཡང་འཚོ་བར་མ་གྱུར་ཅིག །གལ་ཏེ་དེ་ལྟ་མ་ཡིན་ན་ཁྲག་ཀྱང་འོ་མར་གྱུར་ཅིག །རྨ་རྣམས་ཀྱང་སོས་པར་གྱུར་ཅིག་ཅེས་དམ་བཅས་མ་ཐག་ཏུ་རྨ་རྣམས་ཀྱང་སོས་པར་གྱུར་ཏོ། །བརྒྱ་བྱིན་ལྷའི་དབང་པོས། རྒྱལ་པོ་ལ་ཤིན་ཏུ་དགེའོ་ཤིན་ཏུ་དགེའོ་ཞེས་བསྟོད་ནས། རྒྱལ་པོ་ཆེན་པོ་ཁྱོད་ནི་ཡང་དག་པར་སྙིང་རྗེ་ཆེན་པོ་དང་ལྡན་པ་སྟེ། སྙིང་རྗེ་ཆེན་པོའི་སྤྱོད་པའོ། །དེ་ལྟར་སྤྱོད་དཀའ་བ་སྤྱད་པས། རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཐོབ་པར་འགྱུར་བས། ནམ་བླ་ན་མེད་པའི་བྱང་ཆུབ་ཐོབ་པ་ན། ཐོག་མ་བདག་གི་དོན་སྔར་བྱས་པར་ཤོག་ཤིག་ཅེས་སྨྲས་ནས། བརྒྱ་བྱིན་ལྷའི་དབང་པོས་ལུས་ཀྱི་འོད་ཟེར་གྱིས་རྒྱལ་པོའི་ལུས་ཀུན་ཏུ་སྣང་བར་བྱས་ནས། ལྷའི་འཁོར་བརྒྱ་སྟོང་དང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །རྒྱལ་བུ་ལྔ་བརྒྱ་རྣམས་དེ་ལྟར་ཡབ་རྒྱལ་པོའི་ལུས་ཀྱི་རྨ་སོས་ཏེ་སྔ་མཁོ་བཞིན་དུ་གྱུར་པ་མཐོང་ནས། རབ་ཏུ་དགའ་རངས་ཏེ་རྒྱལ་པོའི་རྐང་པ་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དེ། ཐལ་མོ་སྦྱར་བ་བཏུད་ནས་ཚིག་འཐུན་པར་འདི་སྐད་ཅེས་སྨྲས་སོ། །འདི་ལྟ་བུ་མཛད་པ་ངོ་མཚར་ཆེ་སྟེ། ཡབ་རྒྱལ་པོ་ནི་ཡང་དག་པར་འགྲོ་བ་ཐམས་ཅད་ལ་སྙིང་རྗེ་ཆེ་བའོ་ཞེས་བསྟོད་དོ། །རྒྱལ་པོས་སྨྲས་པ། བུ་ཁྱེད་ང་ལ་སྲི་ཞུ་བྱེད་པ་བདེན་ན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་ཅིག་ཅེས་བསྒོ་ནས། རྒྱལ་བུ་རྣམས་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དེ་བཞིན་དུ་བཙུན་མོ་ཉི་ཁྲི་དང་ཕོ་བྲང་གི་སླས་བརྒྱ་སྟོང་སྙེད་
ཀྱང་བྱང་ཆུབ་ཏུ་སེམས་བསྐྱེད་དོ། །དེའི་ཚེ་འཁོར་དེའི་ནང་ན་གནས་པའི་སེམས་ཅན་གང་གཱའི་ཀླུང་གི་བྱེ་མ་བཅུ་བདུན་སྙེད་ཀྱིས་ཉན་ཐོས་དང་། རང་སངས་རྒྱས་སུ་སེམས་བསྐྱེད་པར་གྱུར་ཏོ། །ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་ལ་སོགས་པ་གྲངས་མེད་པ་རྣམས་འདི་ལྟ་བུར་གྱུར་པ་མཐོང་ཐོས་ནས་ཐམས་ཅད་ཀྱིས་བྱང་ཆུབ་ཏུ་སེམས་བསྐྱེད་དེ་རབ་ཏུ་དགའ་ནས་ཕྱིར་དོང་ངོ་། །ཐབས་མཁས་པ་ཆེན་པོ་སངས་རྒྱས་དྲིན་ལན་བསབ་པའི་མདོ་ལས། གཉེན་པོའི་ལེའུ་ཞེས་བྱ་སྟེ་གསུམ་པའོ།། །།