དྲུག་པ། ངན་དོན་གྱི་ལེའུ།
ཐབས་མཁས་པ་ཆེན་པོ་སངས་རྒྱས་དྲིན་ལན་བསབ་པའི་མདོ། བམ་པོ་བཞི་པ། དེའི་ཚེ་བཅོམ་ལྡན་འདས་ལ་འཁོར་བཞི་པོས་མདུན་གྱིས་བྱས་ནས་མཆོད་པ་བྱས། རིམ་གྲོ་བྱས་བཀུར་སྟི་བྱས་ཏེ་ཚིག་གིས་བསྟོད་པ་བྱས་སོ། །དེའི་ཚེ་དེ་བཞིན་གཤེགས་པས་འཛུམ་པ་མཛད་དེ་ཞལ་གྱི་སྒོ་ནས་འོད་ཟེར་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་ལྡན་པ་སྙིང་རྗེ་ཆེན་པོ་ཞེས་བྱ་བ་བཀྱེ་ནས། ཕྱོགས་བཅུའི་འཇིག་རྟེན་གྱི་ཁམས་སྲིད་པའི་རྩེ་མོ་མན་ཆད་སེམས་ཅན་དམྱལ་བ་ཆེན་པོ་བཅོ་བརྒྱད་ཀྱི་བར་དུ་སྣང་བར་བྱས་ནས། ལྷ་སྦྱིན་གྱི་ལུས་ལ་ཡང་འོད་ཀྱིས་སྣང་བར་གྱུར་ཏེ། ལྷ་སྦྱིན་སྡུག་བསྔལ་མྱོང་བ་ལས་བདེ་བར་བྱས་སོ། །དེ་ནས་འཁོར་མང་པོའི་རྣམས་ཐམས་ཅད་ཚིག་འཐུན་པར་དེ་བཞིན་གཤེགས་པ་ལ་ལེགས་སོ་ལེགས་སོ་ཞེས་བསྟོད་དེ། བཅོམ་ལྡན་འདས་ནི་བྱམས་པ་ཆེན་པོ་དང་ལྡན་པ། ཐུགས་རྗེ་ཆེན་པོ་དང་ལྡན་པ་ཡང་དག་པ་སྟེ། དགྲ་དང་གཉེན་ལ་ཐུགས་སྙོམས་པའོ། །ལྷ་སྦྱིན་ལྟ་བུ་རྟག་པར་བཅོམ་ལྡན་འདས་ལ་གནོད་པ་དང་དགྲར་བགྱིད་པ་ལགས་ན། བཅོམ་ལྡན་འདས་ནི་གནོད་པ་བགྱིད་པ་ལ་ཡང་ཐུགས་བརྩེ་བར་དགོངས་ཏེ་ཐུགས་རྗེ་ཆེན་པོའི་འོད་བཀྱེ་ནས་ལྷ་སྦྱིན་གྱི་ལུས་ལ་རེག་པར་བྱས་ཏེ་སྡུག་བསྔལ་ལས་ཐར་བར་མཛད་དོ། །དེ་ནས་བཅོམ་ལྡན་འདས་ཀྱིས་འཁོར་མང་པོ་ལ་འདི་སྐད་ཅེས་བཀའ་སྩལ་ཏོ། །ལྷ་སྦྱིན་འདི་ནི་ཚེ་འདི་འབའ་ཞིག་ལ་ང་ལ་གནོད་པ་བྱེད་པར་མ་ཟད་ཀྱི། སྔོན་འདས་པའི་དུས་ན་ཡང་ང་ལ་རྟག་ཏུ་གནོད་པ་བྱས་ཀྱང་བྱམས་པ་དང་སྙིང་རྗེའི་ཤུགས་ཀྱིས་རྟག་པར་ཕན་པ་དང་བདེ་བའི་དོན་བྱས་སོ། །དེ་ནས་ཀུན་དགའ་བོས་འཁོར་
མང་པོའི་བསམ་པ་སེམས་ཀྱིས་ཤེས་ཏེ། ཀུན་གྱི་ཐེ་ཙོམ་གཅོད་པའི་ཕྱིར་སྟན་ལས་ལངས་ནས་བླ་གོས་ཕྱོགས་གཅིག་ཏུ་བྱས་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་ཐལ་མོ་སྦྱར་བ་བཏུད་དེ། དེ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ལྷ་སྦྱིན་འདི་སྔོན་འདས་པའི་དུས་ན། བཅོམ་ལྡན་འདས་ལ་གནོད་པ་ཅི་དག་བགྱིས་པ་བཅོམ་ལྡན་འདས་ཀྱིས་དངོས་པོ་དེ་དག་བསྟན་དུ་གསོལ། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ལེགས་པར་ཉོན་ཅིག་དང་ཁྱོད་ལ་དགྲོལ་ཞིང་བཤད་པར་བྱའོ། །བཅོམ་ལྡན་འདས་ཀྱིས་བཀའ་སྩལ་པ། སྔོན་ལོ་ཚད་མེད་པ་སྟོང་འདས་པའི་ཕ་རོལ་ན་ཡུལ་བཱ་རཱ་ཎ་སཱི་ཞེས་བྱ་བར་སངས་རྒྱས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། སྟོན་པ་རྒྱལ་བ་འཇིག་རྟེན་དུ་བྱུང་སྟེ། ལོ་སྟོང་ཕྲག་བཅུའི་བར་དུ་སེམས་ཅན་གྱི་དོན་མཛད་ནས་མྱ་ངན་ལས་འདས་སོ། །མྱ་ངན་ལས་འདས་པའི་འོག་ཏུ་དམ་པའི་ཆོས་ལོ་ཁྲི་ཕྲག་ཉི་ཤུའི་བར་དུ་གནས་པར་གྱུར་ཏོ། །གཟུགས་བརྙན་གྱི་ཆོས་ཀྱང་ནུབ་ཅིང་མེད་པར་གྱུར་ནས་ཡུལ་བཱ་རཱ་ཎ་སཱི་ཞེས་བྱ་བའི་རྒྱལ་པོ་མ་ཧཱ་རཱ་ཛཱ་ཞེས་བྱ་བ་རང་བཞིན་གྱིས་དགེ་ཞིང་མཁས་པའི་བློ་དང་ལྡན་པ། ཡང་དག་པའི་ཆོས་ཀྱིས་ཡུལ་གྱི་སྲིད་འཚོ་སྟེ་མི་རྣམས་ཀྱང་བདེ་སྐྱིད་དོ། །རྒྱལ་པོ་དེ་མཐའི་རྒྱལ་ཕྲན་དྲུག་ཅུ་དང་། གྲོང་ཁྱེར་ཆེན་པོ་བརྒྱད་བརྒྱ་ལ་དབང་སྒྱུར་ཏེ། བལ་གྱི་གླང་པོ་ཆེ་ལྔ་བརྒྱ་ཡང་ཡོད་དོ། །བཙུན་མོ་ཉི་ཁྲི་ཡོད་ཀྱང་སྲས་མེད་པས། རྒྱལ་པོ་དེ་རྒྱུན་དུ་འཇིག་རྟེན་གྱི་ལྷ་དང་། རི་དང་། ཆུ་ཀླུང་དང་། ཤིང་གི་ལྷ་རྣམས་ལ་མཆོད་འབྲས་བྱེད་ཅིང་གསོལ་བ་བཏབ་ནས་ལོ་བཅུ་གཉིས་ལོན་པ་དང་། བཙུན་མོ་ཆེན་མོ་ལ་ཡང་སྲས་མངའ་བར་གྱུར། བཙུན་མོ་འབྲིང་མོ་ལ་ཡང་སྲས་མངའ་བར་གྱུར་ཏེ། རྒྱལ་པོ་ཤིན་ཏུ་དགའ་ནས་རྒྱལ་པོ་ལག་དར་ཏེ་
རིམ་གྲོ་དང་། བཀུར་སྟི་དང་། མལ་ཆ་བྱ་བ་དང་། ཟས་དང་། སྐོམ་དང་། དེ་ལ་སོགས་པ་ཡོ་བྱད་ཀྱི་བར་དུ་འཇམ་ཞིང་བཟང་བ་སྦྱར་ཏེ། རིམ་གྲོ་བྱས་སོ། །དེ་ལྟར་ཟླ་བ་བཅུའི་བར་དུ་རིམ་གྲོ་བྱས་ནས་བཙུན་མོ་ཆེན་མོ་ལ་སྲས་མངའ་བྱད་བཟང་ལ་མཛེས་ཤིང་མཚན་བཟང་པོས་བརྒྱན་པ། མིའི་མཚན་རྫོགས་པར་ལྡན་པ་ཞིག་བྱུང་ངོ་། །བཙུན་མོ་འབྲིང་མོ་ལ་ཡང་སྲས་ཅིག་བྱུང་བས་རྒྱལ་པོ་རབ་ཏུ་དགའ་བས་བློན་པོ་རྣམས་དང་། མཚན་མཁན་རྣམས་དང་། བྲམ་ཟེ་རྣམས་བསྡུས་ནས་སྲས་བུ་བསྟན་ནས་མཚན་བསྟན་ཏོ། །མཚན་མཁན་རྣམས་ཀྱིས་མཚན་བལྟས་ནས་རྒྱལ་བུའི་མཚན་གདགས་པའི་ཕྱིར་སྲས་བུ་འདི་བལྟམ་པའི་ཚེ་ལྟས་ཇི་ལྟ་བུ་བྱུང་ཞེས་དྲིས་སོ། །རྒྱལ་པོས་སྨྲས་པ། རྒྱལ་བུ་ཆེན་པོའི་ཡུམ་བཙུན་མོ་ཆེན་མོ་ནི་སྔོན་རང་བཞིན་གྱིས་ཁྲོ་ལ་ཕྲག་དོག་ཆེ་ཞིང་། ང་རྒྱལ་བྱེད་པ་ལས་སྲས་མངལ་དུ་ཆགས་ནས་ནི་རང་བཞིན་གྱིས་དགེ་དེས་པར་གྱུར་ནས། རྟག་ཏུ་འཛུམ་པ་དང་ལྡན་ཞིང་སེམས་ཅན་ལ་ཡང་བུ་གཅིག་པ་དང་འདྲ་བར་བྱམས་ཤིང་བརྩེ་བའི་སེམས་ཀྱིས་འཛུམ་པ་དང་ལྡན་ཞིང་གསོང་པོར་སྨྲ་བར་གྱུར་ཏོ། །དེ་ནས་མཚན་མཁན་གྱིས་ཀྱང་རྒྱལ་བུའི་མཚན་དགེ་དོན་ཞེས་བཏགས་སོ། །བཙུན་མོ་འབྲིང་མོ་ལ་སྲས་མངའ་བའི་ཚེ་སྔ་ལྟས་ཇི་ལྟ་བུ་བྱུང་ཞེས་དྲིས་ན། སྲས་བུ་འདིའི་མ་རང་བཞིན་གྱིས་དགེ་ཞིང་དེས་ཏེ་འཛུམ་པ་དང་ལྡན་ཞིང་ཚིག་གིས་སྔར་གསོང་པོར་སྨྲ་ཞིང་ཀུན་གྱི་ཡིད་ཚིམ་པར་བྱེད་པ་ལས། སྲས་མངལ་དུ་ཆགས་ནས་རང་བཞིན་གྱིས་ཁྲོ་ཞིང་ཞེ་སྡང་ཆེ་བ་དང་། ཕྲག་དོག་དང་ང་རྒྱལ་བྱེད་པར་གྱུར་ཏོ། །མཚན་མཁན་གྱིས་སྨྲས་པ། འདི་ཡང་སྲས་བུའི་སྔོན་གྱི་ལས་འཕྲོ་ཡིན་པས། སྲས་བུའི་མཚན་ངན་དོན་ཞེས་བཏགས་སོ། །དེ་ནས་རྒྱལ་བུ་གཉིས་གསོས་བསྐྱེད་དེ་ལོ་བཅུ་བཞི་ལོན་ནས་རྒྱལ་བུ་དགེ་དོན་རང་བཞིན་གྱིས་མཁས་པའི་བློ་དང་བྱམས་པའི་སེམས་སུ་ལྡན་ཏེ། སྦྱིན་པ་བྱེད་པ་ལ་དགའ་བས་ཕ་མ་ཡང་ལྷག་པར་སྲས་བུ་དེ་ལ་མིག་དང་འདྲ་བར་སྡུག་པར་སེམས་སོ། །རྒྱལ་བུ་ངན་དོན་ནི་རང་བཞིན་གྱིས་
ཁྲོ་བས་ན་ཕ་མ་ཡང་དེ་ལ་མི་དགའ་སྟེ། སྡང་བས་རྒྱལ་བུ་ངན་དོན་རྒྱུན་དུ་ཕྲག་དོག་བྱེད་དེ་ཕུ་བོ་ལ་གནོད་པ་བྱ་བར་སེམས་སོ། །ཕྱིས་དུས་གཞན་ཞིག་ན་རྒྱལ་བུ་དགེ་དོན་འཁོར་དང་བཅས་པ་རོལ་མོ་བྱེད་ཅིང་ཕོ་བྲང་གི་ཕྱི་རོལ་དུ་ལྟད་མོ་ལྟ་ཞིང་འཆག་ཏུ་སོང་བ་ལས་ཞིང་རྨོ་བ་དག་ཞིང་རྨོ་བའི་རོལ་ནས་སྲིན་བུ་དག་བྱུང་བ་ལས་བྱ་མང་པོ་དག་ཐུ་ཞིང་ཟ་བ་མཐོང་ངོ་། །རྒྱལ་བུ་དགེ་དོན་གྱིས་དེ་ལྟ་བུ་དག་མཐོང་ནས་སྙིང་རྗེ་བའི་སེམས་སྐྱེས་ཏེ། བདག་ནི་ཕོ་བྲང་ཟབ་མོ་ནས་སྐྱེས་པས་འདི་ལྟ་བུའི་དངོས་པོ་མ་མཐོང་མ་ཐོས་ན། འཁོར་རྣམས་ལ་འདི་དག་ཅིའི་ཕྱིར་གཅིག་ལ་གཅིག་གནོད་པ་བྱེད་ཅིང་ཟ་ཞེས་དྲིས་སོ། །འཁོར་རྣམས་ཀྱིས་རྒྱལ་བུ་ལ་སྨྲས་པ། ད་ལྟར་རྒྱལ་པོ་མངའ་བའི་ཡུལ་འདི་ཡང་འབངས་ལ་རྟེན་ཏེ། འབངས་ཀྱང་ཁ་ཟས་ལ་ལྟོས་ཏེ་ཁ་ཟས་ནི་ཞིང་རྨོས་པ་ལས་འབྲུ་སྣ་ལྔ་སྐྱེས་ཏེ་སེམས་ཅན་གྱི་སྲོག་འཛིན་ཏོ། །རྒྱལ་བུས་དེ་ལ་རེ་སྡུག་རེ་སྡུག་ཅེས་སྨྲས་ཏེ། ཡང་སོང་སོང་བ་ལས་སྐྱེས་པ་དང་། བུད་མེད་དག་སྐུད་པ་འཁལ་བ་དང་འཐག་པའི་ལས་བྱེད་དེ། ཕན་ཚུན་བསྐྱོད་ཅིང་ཉོན་མོངས་པར་མཐོང་ངོ་། །དེ་དག་མཐོང་ནས་མི་འདི་དག་ཅི་བྱེད་ཅེས་གཡོག་པོ་གཡས་གཡོན་ན་འདུག་པ་ལ་དྲིས་སོ། །དེ་དག་གིས་སྨྲས་པ། མི་འདི་དག་ནི་བཀལ་བ་དང་འཐག་པའི་ལས་བྱེད་དེ། དེས་བདག་གི་ལུས་གཡོག་ཅིང་དགབ་པའི་གོས་བྱེད་དོ། །འདི་དག་ཡང་རེ་སྡུག་ཉོན་མོངས་པར་གྱུར་པའི་ལས་བྱེད་དོ། །དེ་ནས་ཡང་སོང་སོང་བ་ལས་མི་མང་པོ་དག་བ་ལང་དང་། རྔ་མོ་དང་། རྟ་དང་། ཕག་དང་། ལུག་གསོད་ཅིང་པགས་པ་བཤུ་བ་དག་མཐོང་ནས་འདི་དག་ཅི་བྱེད་ཅེས་དྲིས་སོ། །སྨྲས་པ་འདི་དག་ནི་གསོད་པའི་ལས་བྱེད་དེ། ཤ་འཚོང་ཞིང་བགོ་བ་དང་བཟའ་བའི་སྤོགས་བྱེད་དོ། །དེས་སྲོག་འཚོ་བར་བྱེད་དོ། །རྒྱལ་བུས་དེ་སྐད་ཅེས་ཐོས་ནས། བ་སྤུ་དང་ལུས་ཀྱི་ཤ་ཀུན་འགུལ་ཏེ། ཀྱི་ཧུད་ཀྱི་ཧུད་གསོད་པ་ལ་སྙིང་མི་བཟོད་དོ། །གཅིག་གིས་གཅིག་གི་ཉིང་ཤ་ཉིང་ཟ་ཞིང་བསྐལ་པ་བགྲངས་པའི་བར་དུ་གཅིག་ལ་གཅིག་གསོད་པའི་ལས་བྱེད་དོ། །དེ་ནས་ཡང་སོང་སོང་བ་ལས་མི་
མཆིས་པོ་དག་ཅིག་ཉ་རྒྱ་དང་བྱ་རྒྱ་ཐོགས་ཤིང་བྱ་དང་། ཉ་གསོད་དེ། གཅིག་ལ་གཅིག་ཉིད་ཤ་ཟ་བར་མཐོང་ངོ་། །དེ་ནས་འདི་ཅི་བྱེད་ཅེས་དྲིས་སོ། །གསོལ་པ། འདི་དག་ནི་བྱ་དང་ཉ་ཤོར་བ་ཡིན་ཏེ། གསོད་པའི་ལས་འདི་ལྟ་བུ་བྱེད་ཅིང་བགོ་བ་དང་ཟས་ཚོལ་ལོ། །རྒྱལ་བུ་དགེ་དོན་གྱིས་དེ་སྐད་ཅེས་སྨྲས་པའི་ཚིག་དེ་ཐོས་ནས་མིག་མཆི་མས་གང་སྟེ། འཇིག་རྟེན་གྱི་སེམས་ཅན་འདི་དག་ནི་སྡིག་པ་མི་དགེ་བར་འགྱུར་བའི་ལས་བྱེད་དེ། སྡུག་བསྔལ་ལས་ནམ་དུ་ཡང་མི་ཐར་རོ་སྙམ་ནས་མི་དགའ་ཞིང་མྱ་ངན་གྱིས་ནོན་ཏེ་ཕྱིར་ཕོ་བྲང་དུ་འོངས་སོ། །ཡབ་རྒྱལ་པོས་རྒྱལ་བུ་མི་དགའ་ཞིང་མྱ་ངན་བྱེད་པའི་ཚུལ་གྱིས་ཕྱིར་འོངས་པ་མཐོང་ནས་རྒྱལ་བུ་ལ་ཅི་ཞིག་གིས་མི་དགའ་ཞེས་དྲིས་པ་དང་། རྒྱལ་བུས་ཀྱང་ཇི་ལྟར་མཐོང་བའི་དངོས་པོ་དེ་དག་ཡབ་རྒྱལ་པོ་ལ་ཞིབ་ཏུ་གསོལ་ཏོ། །རྒྱལ་པོས་རྒྱལ་བུ་ལ་སྨྲས་པ། འདི་ལྟ་བུའི་དངོས་པོ་ནི་ཡོངས་ཀྱི་ཡོད་ཅིང་སྲིད་པ་ཡིན་ན་མྱ་ངན་བྱར་ཡང་ཅི་ཞིག་ཡོད། རྒྱལ་བུས་གསོལ་པ། བདག་རྒྱལ་པོ་ལ་འདོད་པ་གཅིག་ཅིག་གསོལ་ན་རྒྱལ་པོས་གནང་ངམ། རྒྱལ་པོས་སྨྲས་པ། ང་ལ་བུ་ཁྱོད་གཅིག་པུར་ཟད་དེ་བྱམས་ཤིང་སྡུག་པས་ཁྱོད་ཀྱི་ཡིད་དང་འགལ་བར་མི་བྱེད་དོ། །རྒྱལ་བུས་གསོལ་པ། བདག་ནི་ཡབ་རྒྱལ་པོའི་བང་མཛོད་ན་ནོར་དང་། རིན་པོ་ཆེ་དང་། བཟའ་བ་དང་། བཏུང་བ་ཅི་མངའ་བ་ཐམས་ཅད་སེམས་ཅན་ཐམས་ཅད་ལ་སྦྱིན་པར་བགྱིའོ་ཞེས་གསོལ་པ་དང་། རྒྱལ་པོས་ཀྱང་ཁྱོད་ཀྱི་ཡིད་དང་འགལ་བར་མི་བྱེད་ཀྱིས་ཅི་དགའ་མགུར་སྦྱིན་པ་གྱིས་ཤིག་ཅེས་བཀའ་སྩལ་ཏོ། །དེ་ནས་རྒྱལ་བུ་དགེ་དོན་གྱིས་བློན་པོ་བཀུག་ནས་རྒྱལ་པོའི་བང་མཛོད་ཕྱེ་ནས་བལ་གྱི་གླང་པོ་ཆེ་ལྔ་བརྒྱ་ལ་ནོར་དང་རིན་པོ་ཆེ་བཀལ་ཏེ་གྲོང་ཁྱེར་གྱི་སྒོ་བཞིར་སྤུངས་ནས་འགྲོ་བ་མང་པོ་དག་བགོ་བ་འདོད་དམ། བཟའ་བ་དང་བཏུང་བ་འདོད་དམ། ཅི་འདོད་པ་ཡིད་བཞིན་དུ་ལོང་ལ་ཁྱེར་ཅིག་ཅེས་ཕྱོགས་བཞིར་བསྒྲགས་སོ། །དེ་ལྟར་རྒྱལ་བུ་དགེ་དོན་གྱི་སྙན་པ་ཕྱོགས་སུ་བསྒྲགས་པས་ཐམས་ཅད་འདུས་ནས་ཅི་འདོད་པ་ཡིད་བཞིན་དུ་ཁྱེར་རོ། །རིང་པོ་མ་ལོན་པར་རྒྱལ་
པོའི་བང་མཛོད་སུམ་ཆ་ཞིག་ཟད་ནས། བློན་པོ་རྣམས་ཀྱིས་རྒྱལ་པོ་ལ་དཀོར་མཛོད་སུམ་ཆ་གཅིག་བས་ཏེ། རྒྱལ་བུས་མ་མཆིས་པར་བགྱིས་ཀྱིས་རྒྱལ་པོ་དགོངས་ཤིག་ཅེས་གསོལ་པ་དང་། རྒྱལ་པོས་ང་ནི་རྒྱལ་བུའི་ཡིད་དང་འགལ་བར་བྱེད་མི་ནུས་སོ་ཞེས་བཀའ་སྩལ་ཏོ། །ད་ནི་རྒྱལ་པོའི་བང་མཛོད་སུམ་ཆ་གཉིས་བས་ཀྱི་རྒྱལ་པོ་དགོངས་ཤིག་བཀའ་སྩལ་པ། ང་ནི་རྒྱལ་བུའི་ཡིད་དང་འགལ་བར་བྱེད་མི་ནུས་སོ། །ཁྱོད་ཀྱིས་ཐབས་ཅི་ལེགས་སུ་ཅུང་ཟད་བཀག་སྟེ་ཡིད་དང་མི་འགལ་བར་གྱིས་ཤིག་པར་བཀའ་སྩལ་ཏོ། །དེ་ནས་ཡང་རྒྱལ་བུ་དགེ་དོན་བང་མཛོད་འབྱེད་དུ་སོང་བ་ལས། བང་མཛོད་ལ་དབང་བའི་བློན་པོ་དོན་གཉེར་དུ་སོང་ནས་རིང་ཞིག་མ་ཁུགས་ཏེ་འཕྱིས་པར་གྱུར་པས་རྒྱལ་བུ་དགེ་དོན་འདི་སྐད་དུ། བང་མཛོད་བསྲུང་བའི་བློན་པོ་ཆུང་ངུ་ན་བདག་གི་ཡིད་དང་འགལ་བར་བྱེད་པའི་ཐུགས་མི་ཐུབ་སྟེ། འདི་ནི་རྒྱལ་པོ་ཡབ་ཀྱི་བཀའ་ཡིན་དུ་ངེས་པས་བུ་སྲི་ཞུ་ཅན་ཞེས་བྱ་བ་ཕའི་བང་མཛོད་སྟོངས་པར་བྱ་བར་མི་རིགས་ཀྱིས་ད་བདག་ཉིད་ཀྱིས་ནོར་དང་རིན་པོ་ཆེ་བཙལ་ལ་སེམས་ཅན་ཐམས་ཅད་ཚིམ་པར་བྱའོ། །གལ་ཏེ་བདག་གིས་སེམས་ཅན་ཐམས་ཅད་ལ་བགོ་བ་དང་། བཟའ་བ་དང་། བཏུང་བ་ཡིད་བཞིན་དུ་ཆོག་པར་སྦྱིན་མི་ནུས་ན་རྒྱལ་པོ་ཆེན་པོའི་སྲས་སུ་ཇི་སྐད་གདགས་ཞེས་སྨྲས་ནས་བློན་པོ་ཆེན་པོ་དང་། བློན་པོ་ཕྲ་མོ་ཡན་ཆད་བསྡུས་ཏེ། ནོར་དང་། ཁེ་སྤོགས་ཚོལ་བ་དག་ཅིའི་སྒོ་ནས་བསྒྲུབས་ན་མཆོག་ཏུ་འགྱུར་ཞེས་བགྲོས་སོ། །དེ་ལ་བློན་པོ་ཆེན་པོ་གཅིག་གིས་སྨྲས་པ། དེ་ལྟར་སྤོགས་ཤིག་བྱ་ན་ཞིང་རྨོ་བ་ལས་འདའ་བ་མེད་དེ་གཅིག་ལ་ཁྲིར་འགྱུར་རོ། །ཡང་བློན་པོ་ཆེན་པོ་གཅིག་གིས་སྨྲས་པ། འཇིག་རྟེན་ན་ཁེ་སྤོགས་བྱ་བའི་ནང་ན་རྐང་འགྲོས་ལས་ཁྱུ་བཙུགས་ལ་འབྲོག་བཟང་པོར་བཞག་ན་མང་དུ་འཕེལ་ཏེ་སྤོགས་དེ་ལས་ཆེ་བ་མེད་དོ། །ཡང་བློན་པོ་གཅིག་གིས་སྨྲས་པ། འཇིག་རྟེན་ན་ཁེ་སྤོགས་ཤིག་བྱ་ན་རྒྱ་མཚོར་ཞུགས་ལ་ནོར་བུ་རིན་པོ་ཆེ་བཙལ་བ་ལས་འདའ་བ་མེད་དོ། །
གལ་ཏེ་ཡིད་བཞིན་གྱི་ནོར་བུ་རིན་པོ་ཆེ་རྙེད་ན་ཡིད་བཞིན་དུ་སེམས་ཅན་ཐམས་ཅད་ལ་ཚིམ་པར་སྦྱིན་པར་འགྱུར་རོ། །དགེ་དོན་གྱིས་སྨྲས་པ། འདི་ནི་བདག་གི་ཡིད་ལ་བབ་སྟེ་རུང་ངོ་ཞེས་ཕོ་བྲང་དུ་སོང་སྟེ། ཡབ་རྒྱལ་པོ་ལ་བདག་ནི་རྒྱ་མཚོ་ཆེན་པོར་ཞུགས་ཏེ། ནོར་བུ་རིན་པོ་ཆེ་ལེན་དུ་འགྲོ་བར་འདོད་དོ་ཞེས་གསོལ་ཏོ། །རྒྱལ་པོས་ཚིག་དེ་ཐོས་ནས་དཔེར་ན་མི་བརྣངས་པ་ལྟར་སྐྱུག་ཏུ་ཡང་མེད་ལ་མིད་དུ་ཡང་མེད་པ་ལྟར་མི་བདེ་བ་ལྟར་གྱུར་ནས་རྒྱལ་བུ་ལ་འདི་སྐད་ཅེས་སྨྲས་སོ། །ཡུལ་འདི་ཡང་ཁྱོད་ཀྱི་ཡུལ་ཡིན་ཏེ། བང་མཛོད་དང་། ནོར་རིལ་དང་། རིན་པོ་ཆེ་ཅི་ཡོད་པ་ཡང་ཁྱོད་དབང་བས་ཡིད་བཞིན་དུ་སྤྱད་དུ་ཡོད་པས་ན་བདག་ཉིད་རྒྱ་མཚོར་འཇུག་ཅི་དགོས། ཁྱོད་ནི་རྒྱལ་པོའི་སྲས་ཡིན་ཏེ། ཕོ་བྲང་ཟབ་མོའི་ནང་དུ་སྐྱེས་པས་ཉལ་ན་ནི་གུར་ཡོལ་བ་ཅན་གྱིས་བསྐོར། ཁ་ཟས་ནི་ཅི་འདོད་པ་དང་ལྡན་ཏེ། ད་ལམ་དུ་ཞུགས་ཏེ་འདྲོན་དུ་འགྲོ་ན་ཉོན་མོངས་ཤིང་བཀྲེས་པ་དང་། སྐོམ་པ་དང་། གྲང་བ་དང་། ཚ་བས་ཉེན་པར་འགྱུར་ཡང་སུས་ཤེས། དེ་མ་ཡིན་པ་རྒྱ་མཚོའི་ནང་ན་བགེགས་སུ་གྱུར་པ་ཡང་གཅིག་ཏུ་མ་ཟད་དེ་མང་ངོ་། །འདི་ལྟ་སྟེ། ཡི་དགས་མ་རུངས་པ་དང་། ཀླུ་གདུག་པ་དང་། དབའ་རླབས་འཁྱིལ་པ་དང་། རླུང་དྲག་པོས་བསྒུལ་ཞིང་གཡེང་བ་དང་། ཆུའི་མདོག་དང་། རི་དང་། ཆུ་སྲིན་དང་། ཉ་ཆེན་པོ་ལ་སོགས་པ་བགེགས་མང་བས་བརྒྱ་སྟོང་ཙམ་སོང་ཡང་ཕྱིར་ཡང་འཁོར་བ་ནི་གཅིག་གཉིས་ཙམ་ལས་མེད་ན་ཅིའི་ཕྱིར་ཁྱོད་རྒྱ་མཚོ་ཆེན་པོར་འགྲོ་བར་སེམས་དེ་ནི་ཁོ་བོ་མི་ཉན་ཏོ། །དེ་ནས་རྒྱལ་བུ་དགེ་དོན་ལུས་སྨད་ལྔ་ས་ལ་ཁ་སྦུབ་ཏུ་ས་ལ་ཕབ་སྟེ། རྐང་ལག་བཞི་ཡང་བརྐྱང་ནས་ཡབ་རྒྱལ་པོ་དང་ཡུམ་ལ་འདི་སྐད་ཅེས་གསོལ་ཏོ། །གལ་ཏེ་བདག་རྒྱ་མཚོར་མཆིར་མ་གནང་ན་བདག་འདི་ཁོ་ནར་སྲོག་ཡོངས་སུ་འདོར་གྱི་འདི་ལས་མི་ལྡང་ངོ་། །དེའི་ཚེ་རྒྱལ་པོ་ཆེན་པོ་དང་བཙུན་མོ་དག་དེ་ལྟར་གྱུར་པ་མཐོང་ནས་མིག་མི་འཛུམས་པ་ལྟར་བལྟ་ཞིང་། རྒྱལ་བུ་ཁྱོད་ལོངས་ལ་བཟའ་བ་དང་། བཏུང་བ་འཐུང་ཤིག་ཅེས་ཐབས་སྣ་ཚོགས་ཀྱིས་སྤྲོ་བ་བསྐྱེད་ཀྱང་། རྒྱལ་བུ་
དགེ་དོན་མ་ཉན་ཏེ། བདག་རྒྱ་མཚོ་ཆེན་པོར་མཆིར་མི་གནང་ན་ནམ་དུ་ཡང་བཟའ་བ་དང་བཏུང་བ་དག་མི་འཚལ་ལོ་ཞེས་གསོལ་ཏོ། །རྒྱལ་པོ་དང་བཙུན་མོ་མི་དགའ་བའི་མྱ་ངན་གྱིས་གདུངས་ཏེ་དྲུང་ན་ངུ་ཞིང་སྨྲེ་སྔགས་འདོན་ནས་ས་ལ་འགྲེའོ། །དེ་བཞིན་དུ་ཉི་མ་གཅིག་མ་ཟོས་མ་འཐུངས་པ་ནས་ཞག་གཉིས། ཞག་གསུམ་ཞག་དྲུག་གི་བར་དུ་མ་ཟོས་མ་འཐུངས་པས་ཡབ་ཡུམ་ལྷག་པར་ཡང་མྱ་ངན་གྱིས་གདུངས་པར་གྱུར་ཏེ། སྲོག་མི་འཚོ་བར་དོགས་ནས་ཞག་བདུན་ལོན་པ་དང་ཡབ་ཡུམ་གྱིས་རྐང་ལག་པང་དུ་བླངས་ཏེ་རྐང་ལག་ལ་འོ་བྱས་ཏེ་ཚིག་སྙན་པ་འཇམ་པོས་ད་ལོངས་ལ་བཟའ་བ་དང་། བཏུང་བ་འཐུང་ཤིག །ཁ་ཟས་ཀྱིས་བསྡུས་པའི་ལུས་འདི་ནི་ཁ་ཟས་ལ་བརྟེན་པའི་རྐྱེན་གྱིས་གསོན་པ་ཡིན་གྱིས། མ་ཟོས་མ་འཐུངས་ན་ཁྱོད་སྲོག་མི་འཚོའོ་ཞེས་སྤྲོ་བ་བསྐྱེད་ཀྱང་རྒྱལ་བུ་མ་ཉན་ཏེ། ཡབ་དང་ཡུམ་གྱིས་བདག་མཆི་བར་མ་གནང་ན་ངེས་པར་འདི་ཁོ་ན་ལས་ནམ་དུ་ཡང་མི་ལྡང་ངོ་ཞེས་གསོལ་ཏོ། །དེའི་ཚེ་ན་བཙུན་མོ་ཆེན་མོས་རྒྱལ་པོ་ལ་འདི་སྐད་ཅེས་གསོལ་ཏོ། །རྒྱལ་བུས་བསམས་པའི་སེམས་འདི་ཤིན་ཏུ་སྤྱོད་དཀའ་བས་རྒྱལ་བུ་འདི་ཉིད་དུ་ཚེའི་དུས་བྱེད་པར་ཐུགས་བཟོད་དམ། ཡིད་དང་འགལ་བར་མཛད་པར་མི་རིགས་ཀྱི། ཐུགས་རྗེ་བར་དགོངས་ཏེ་རྒྱ་མཚོ་ཆེན་པོར་མཆི་བར་གནང་བའི་རིགས་སོ། །མཆིར་གནང་ན་གལ་ཏེ་བརྒྱ་ལམ་ན་སླར་འཁོར་ཡང་སྲིད་ཀྱིས། ད་མ་གནང་ན་གདོན་མི་ཟ་བར་ཚེའི་དུས་བགྱིད་པར་འགྱུར་རོ་ཞེས་གསོལ་ཏོ། །རྒྱལ་པོས་ཀྱང་ཐུགས་མ་བཟོད་ནས་འགྲོ་བར་གནང་ངོ་། །དེ་ལྟར་གནང་ནས་དེའི་ཚེ་རྒྱལ་བུ་དགེ་དོན་ཉལ་བ་ལས་ལངས་ཏེ་རབ་ཏུ་དགའ་མགུ་རངས་ནས་ཡབ་རྒྱལ་པོའི་ཞབས་ལ་མགོ་བོས་ཕྱག་འཚལ་ཏོ། །རྒྱལ་པོའི་འཁོར་བཙུན་མོ་དང་། སླས་རྣམས་དང་། མི་མང་པོ་བརྒྱ་སྟོང་སྙེད་གཅིག་ལ་གཅིག་འདི་སྐད་དུ། རྒྱལ་བུ་དགེ་དོན་ད་ལྟར་ཤིའམ་གསོན་ཞེས་གཏམ་ཟེར་བ་ལས། རྒྱལ་བུ་དགེ་དོན་ད་ལྟར་ལངས་ཏེ་རབ་ཏུ་དགའ་ནས་བཟའ་བ་དང་བཏུང་བའི་ལས་ཀྱང་བྱེད་དོ་ཞེས་སྨྲས་སོ། །
དེ་ནས་རྒྱལ་པོས་རྒྱལ་བུ་ལ་ཁྱོད་འདི་ལྟར་དུས་ཀྱིས་རྒྱ་མཚོར་འགྲོར་གསོལ་པ་འདིའི་དོན་ཅི་ཞིག་ཡོད། རྒྱལ་བུས་གསོལ་པ། རྒྱལ་པོ་ཆེན་པོ་བདག་ཡིད་བཞིན་གྱི་ནོར་བུ་རིན་པོ་ཆེ་ཆེན་པོ་བླངས་ཏེ་སེམས་ཅན་ཐམས་ཅད་ཀྱི་དགོས་པ་ཆོག་པར་བགྱིད་འཚལ་ལོ། །དེ་ནས་རྒྱལ་པོ་ཆེན་པོས་ཀུན་བཀར་བཏགས་ཏེ། སུ་དག་རྒྱ་མཚོར་འགྲོ་བར་འདོད། གལ་ཏེ་རྒྱ་མཚོ་ནས་སླར་འཁོར་ན་རབས་བདུན་གྱི་བར་དུ་བགོ་བ་དང་། ཁ་ཟས་དང་། ནོར་དང་། རིན་པོ་ཆེ་མི་བྲེལ་བར་སྦྱིན་ལ། རྒྱ་མཚོར་འཇུག་པའི་ཡོ་བྱད་ཅི་དགོས་པ་ཐམས་ཅད་ཀྱང་སྦྱིན་ཞིང་སྦྱར་རོ་ཞེས་བཀར་བཏགས་སོ། །རྒྱལ་བུ་དགེ་དོན་རྒྱ་མཚོར་འཇུག་ཅིང་ནོར་བུ་རིན་པོ་ཆེ་ལེན་དུ་འགྲོ་ཞེས་ཐོས་ནས་ཐམས་ཅད་རབ་ཏུ་དགའ་ནས་འདུས་སོ། །དེའི་ནང་ན་མི་ལྔ་བརྒྱ་ཞིག་བདག་ཅག་ཀྱང་རྒྱལ་བུའི་ཞབས་འབྲིང་དུ་མཆི་བར་གསོལ་ལོ་ཞེས་ཁས་བླངས་སོ། །དེའི་ཚེ་ཡུལ་བཱ་རཱ་ཎ་སཱི་ན་རྒྱ་མཚོའི་ས་མཁན་གཅིག་ཅིག་སྔ་ཕྱིར་ལན་དུ་མ་ཞིག་རྒྱ་མཚོར་ཕྱིན་ཏེ། ཐར་བ་དང་མི་ཐར་བའི་ལམ་རྒྱུས་ཤིན་ཏུ་མཁས་པ། ལོ་བརྒྱད་ཅུ་ལོན་པ། མིག་གཉིས་ཀྱང་མི་མཐོང་བ་ཞིག་ཡོད་དེ། དེའི་ཚེ་རྒྱལ་པོ་ཆེན་པོ་ཉིད་ལམ་མཁན་གྱི་དེར་གཤེགས་ནས་ལམ་མཁན་ལ་འདི་སྐད་ཅེས་བཀའ་སྩལ་ཏོ། །ང་ལ་བུ་གཅིག་ལས་མེད་པས་སྒོར་བྱུང་ཡང་མ་མྱོང་ན་རྒྱ་མཚོར་འགྲོ་བར་འདོད་དེ་ཁྱོད་ཀྱང་ཞབས་འབྲིང་དུ་འགྲོ་དགོས་སོ། །དེའི་ཚེ་ལམ་མཁན་དེས་རྒྱལ་པོའི་གསུང་ཐོས་ནས་སྐད་ཆེན་པོ་ཕྱུང་ནས་ངུས་ཏེ། རྒྱལ་པོ་ཆེན་པོ་རྒྱ་མཚོ་ཆེན་པོར་འཇུག་པ་ནི་བགེགས་དང་བར་ཆད་མང་སྟེ། ཉོན་མོངས་པར་འགྱུར་བ་ཡང་གཅིག་ཏུ་མ་ཟད་པས་བརྒྱ་སྟོང་གྲངས་མེད་པ་ཅིག་སོང་ཡང་སླར་འཁོར་བ་གཅིག་གཉིས་ཙམ་ལས་མེད་ན། རྒྱལ་པོ་ཆེན་པོ་ཅིའི་སླད་དུ་རྒྱལ་བུ་འདི་ལྟ་བུའི་ལམ་རིང་པོ་ཡ་ང་བར་གཏོང་། རྒྱལ་པོས་སྨྲས་པ། རྒྱལ་བུ་ལ་བྱམས་ཤིང་བརྩེ་བས་ངོ་མ་ཟློགས་ཏེ་བཏང་བ་ཡིན་ནོ། །ལམ་མཁན་གྱིས་བདག་ཀྱང་འོ་ན་མཆིའོ་ཞེས་གསོལ་ཏོ། །དེ་ནས་རྒྱལ་བུ་དགེ་དོན་གྱིས་མི་ལྔ་བརྒྱའི་ལམ་རྒྱགས་དང་ཡོ་བྱད་སྦྱར་ཏེ་རྒྱ་མཚོའི་ངོགས་
སུ་བསྐྱས་སོ། །དེའི་ཚེ་ནུ་བོ་ངན་དོན་འདི་སྙམ་དུ་རྒྱལ་བུ་དགེ་དོན་ལ་ཡང་ཡང་ཡབ་ཡུམ་ལྷག་པར་བྱམས་ཏེ། ད་རྒྱ་མཚོར་ནོར་བུ་རིན་པོ་ཆེ་ལེན་དུ་འགྲོ་བ་གལ་ཏེ་ཕྱིར་ཡང་འཁོར་ན་དགེ་དོན་ལ་ཇེ་བྱམས་ཇེ་བྱམས་ཤིང་བདག་ལ་ནི་ལྷག་པར་སྡང་ཞིང་བེན་པར་འགྱུར་རོ་སྙམ་བསམས་ནས་བདག་ཀྱང་རྒྱལ་བུ་དགེ་དོན་གྱི་ཕྱི་བཞིན་དུ་རིན་པོ་ཆེ་ལེན་དུ་འགྲོའོ་ཞེས་གསོལ་པ་དང་། ཡབ་ཡུམ་གྱིས་འགྲོ་བར་གནང་སྟེ། འདི་ཡང་སོང་ན་ལམ་ཡ་ང་བའམ། མི་བདེ་བ་དག་ཏུ་སྤུན་གཉིས་འགྲོགས་ན་གདོན་མི་ཟ་བར་གཅིག་ལ་གཅིག་ཕན་ནོ་ཞེས་གསུངས་ནས་རྒྱལ་བུ་ངན་དོན་ཡང་བཏང་ངོ་། །དེ་ནས་རྒྱལ་བུ་དགེ་དོན་གྲུའི་ནང་ན་ཞུགས་ནས་གྲུ་ལ་ལྕགས་ཀྱི་ཉག་ཐག་བདུན་བཏགས་ཏེ་ཞག་བདུན་གྱི་བར་དུ་བསྡད་དོ། །ཐོག་མར་གྲུར་ཞུགས་པའི་ནང་པར་ཉི་མ་ཤར་བ་ན་རྒྱལ་བུ་དགེ་དོན་གྱིས་རྔ་བརྡུངས་ཏེ་སྐད་ཆེན་པོས་འདི་སྐད་ཅེས་བོས་སོ། །ཁྱོད་ལ་སོགས་པ་སུ་རྒྱ་མཚོར་འགྲོ་འདོད་པ་ནི་ཅང་མ་སྨྲ་ཤིག །སུ་ཕ་མ་དང་། ཕུ་ནུ་དང་། བུ་སྨད་ལ་ཆགས་ཏེ་འཛམ་བུའི་གླིང་གི་ལོངས་སྤྱོད་དང་། བདེ་བ་ལ་དད་པ་རྣམས་ནི་འདི་ནས་ཕྱིར་དེང་ཤིག །བདག་གི་ཕྱིར་འགྱོད་པར་གྱུར་ཏ་རེ། དེ་ཅིའི་ཕྱིར་ཞེ་ན། རྒྱ་མཚོའི་ནང་ན་བགེགས་རབ་ཏུ་མང་བས་སོང་བ་གྲངས་མེད་ཀྱང་ཕྱིར་འཁོར་བ་གཅིག་གཉིས་ཙམ་ལས་མེད་དོ་ཞེས་སྐད་ཆེན་པོས་བོས་ཀྱང་འཁོར་མང་པོ་རྣམས་ནི་ཅང་མི་སྨྲ་བས་ཉག་ཐག་གཅིག་བཅད་དེ་གྲུའི་སྟེང་དུ་དྲངས་སོ། །དེ་བཞིན་ཉིན་རེ་ལན་རེ་ཞག་བདུན་གྱི་བར་དུ་བོས་ཀྱང་ཀུན་ཁ་རོག་འདུག་སྟེ་ཅང་མི་སྨྲ་བས་ཉག་ཐག་བདུན་ཆར་བཅད་དེ་ཉག་ཐག་གྲུའི་སྟེང་དུ་དྲངས་སོ། །དེ་ནས་རླུང་ཕྱོགས་སུ་གཡོར་མོ་བསྒྲེངས་ནས་སོང་ངོ་། །རྒྱལ་བུའི་སྙིང་རྗེའི་སེམས་དང་བསོད་ནམས་ཀྱི་ཤུགས་ཀྱིས་ཉེ་ཞོ་མེད་པར་རྒྱ་མཚོའི་གླིང་ནོར་བུ་རིན་པོ་ཆེའི་དྲུང་དུ་ཕྱིན་ཏོ། །རིན་པོ་ཆེའི་དྲུང་དུ་ཕྱིན་ནས་རྒྱལ་བུ་དགེ་དོན་གྱིས་ཡང་རྔ་བརྡུངས་ཏེ་མི་མང་པོ་ལ་ལམ་རིང་ཞིང་ཡ་ང་བས། ཁྱེད་རྣམས་འདི་ནས་རིན་པོ་ཆེ་ལོང་ལ་ཞག་བདུན་ཞིག་བསྟིས་ལ་ཕྱིར་དེང་ཤིག་པར་བསྒོའོ། །ཡང་
འདི་སྐད་དུ་རིན་པོ་ཆེ་འདི་དག་ནི་འཛམ་བུའི་གླིང་ན་ངོ་མཚར་དུ་རིན་ཆེ་བ་ཡིན་གྱིས། ཧ་ཅང་ཡང་མ་ལྕི་ཞིག །ལྕིས་ན་གྲུ་འབྱིང་བར་འགྱུར་རོ། །ཧ་ཅང་ཡང་ན་ལམ་རིང་པོར་ཉོན་མོངས་པའི་དོན་མེད་པས་རན་པར་བྱོས་ལ་དེང་ཤིག་ཅེས་མི་དེ་དག་ལ་ཁྱེད་རྣམས་ཡུལ་དུ་བདེ་བར་ཕྱིན་པར་གྱུར་ཅིག །བདག་ནི་ཡིད་བཞིན་གྱི་ནོར་བུ་རིན་པོ་ཆེ་ཚོལ་དུ་འགྲོའོ་ཞེས་བསྒོ་ནས་མཆི་ཕྱག་བྱས་ཏེ་སོ་སོར་དོང་ངོ་། །དེའི་ཚེ་རྒྱལ་བུ་དགེ་དོན་ནི་ལམ་མཁན་དང་གཉིས་ཆས་ནས་ཞག་བདུན་གྱི་བར་དུ་ཆུ་པུས་མོ་ལས་མི་ནུབ་པའི་ནང་དུ་སོང་ངོ་། །དེ་ནས་ཞག་བདུན་གྱི་བར་དུ་གཉའ་བར་ཕྱིན་པ་ཙམ་གྱི་བར་དུ་སོང་ངོ་། །དེ་ནས་ཞག་བདུན་ནི་རྐྱལ་ཏེ་ཕ་རོལ་རྒྱ་མཚོའི་གླིང་དུ་ཕྱིན་ཏོ། །རྒྱ་མཚོའི་གླིང་དེ་ས་གཞི་དངུལ་གྱི་བྱེ་མ་བདལ་བ་ཞིག་ཏུ་ཕྱིན་ནས་ལམ་མཁན་གྱིས་ས་གཞི་འདི་ཅི་ཡིན་ཞེས་དྲིས་ན་རྒྱལ་བུས་ས་གཞི་འདི་ནི་དངུལ་གྱི་བྱེ་མ་འབའ་ཞིག་ཡོད་དོ་ཞེས་སྨྲས་སོ། །ལམ་མཁན་གྱིས་སྨྲས་པ། ཕྱོགས་བཞིར་ལྟོས་ཤིག་དང་། རི་དཀར་པོ་ཞིག་སྣང་བའི་རིགས་ན་ཁྱོད་མཐོང་ངམ། རྒྱལ་བུས་སྨྲས་པ། ཤར་ལྷོའི་མཚམས་ན་རི་དཀར་པོ་ཞིག་སྣང་ངོ་། །ལམ་མཁན་གྱིས་སྨྲས་པ། ཕར་འགྲོ་བའི་ལམ་ནི་རི་དེའི་དྲུང་ན་ཡོད་དེ། དེའི་འགྲམ་ཕ་ཟད་ཅིག་ན་གསེར་གྱི་བྱེ་མ་བདལ་བའི་ས་གཞི་ཞིག་ཡོད་པའི་རིགས་ཞེས་སྨྲས་ནས། ངལ་ཆད་དེ་ཉམ་ཐག་ནས་ས་ལ་འགྱེལ་ཏེ་རྒྱལ་བུ་ལ་འདི་སྐད་ཅེས་སྨྲས་སོ། །བདག་ནི་ཉམ་ཐག་ནས་མ་ནུས་པར་འདིར་འཆིའོ། །རྒྱལ་བུ་ཁྱོད་འདི་ནས་ཤར་ཕྱོགས་སུ་ཞག་བདུན་གྱི་བར་དུ་སོང་ཤིག་དང་། གསེར་གྱི་རི་དང་ཕྲད་པའི་རིགས་སོ། །དེ་ནས་ཞག་བདུན་གྱི་བར་དུ་སོང་ཤིག་དང་། ས་གཞི་པད་མོ་སྔོན་པོ་འབའ་ཞིག་ཡོད་པར་ཕྱིན་པའི་རིགས་སོ། །དེ་ནས་ཡང་ཞག་བདུན་སོང་ཤིག་དང་། ས་གཞི་པད་མ་ལེ་བརྒེན་འབའ་ཞིག་ཡོད་པ་དང་ཕྲད་པའི་རིགས་སོ། །པད་མོ་དེའི་ཕ་རོལ་ན་རིན་པོ་ཆེ་སྣ་བདུན་གྱི་མཁར་ཞིག་ཡོད་དེ། མཁར་དེའི་ཉེན་ནི་གསེར་ལས་བྱས། ཅོག་པར་དངུལ་ལས་བྱས། མདའ་ཡབ་ཀེ་ཀེ་རུ་དམར་པོ་ལས་བྱས། མན་ཤེལ་དང་། སྤུག་ལ་སོགས་པ་རིན་
པོ་ཆེ་སྣ་ཚོགས་ཀྱིས་སྤྲས་ཏེ། མུ་ཏིག་དམར་པོའི་དྲ་བས་སྟེང་གཡོགས་ལ། མཐའ་མ་བཻ་དཱུརྱ་མཐོན་མཐིང་གི་འོབས་རིམ་པ་བདུན་གྱིས་བསྐོར་བའི་ནང་ན་ཀླུའི་རྒྱལ་པོའི་ཕོ་བྲང་ཡོད་ཀྱིས་ཀླུའི་རྒྱལ་པོ་དེའི་རྣ་བའི་ནང་ན་ཡིད་བཞིན་གྱི་ནོར་བུ་རིན་པོ་ཆེ་ཡོད་ཀྱིས་སློངས་ཤིག །དེ་ཐོབ་པར་གྱུར་ན་འཛམ་བུའི་གླིང་དུ་རིན་པོ་ཆེ་སྣ་བདུན་གྱི་ཆར་འབེབས་ཤིང་། གོས་དང་། ཟས་དང་། ནད་ཀྱི་རྐྱེན་སྨན་དང་། རོལ་མོ་དང་། དགོས་པའི་ཡོ་བྱད་ཐམས་ཅད་ཡིད་བཞིན་དུ་ཆར་འབེབས་སོ། །དེ་བས་ན་ཡིད་བཞིན་གྱི་ནོར་བུ་རིན་པོ་ཆེ་ཞེས་བྱའོ། །གལ་ཏེ་རྒྱལ་བུས་ཐོབ་ན་སྨོན་པ་ཐམས་ཅད་ངེས་པར་འགྲུབ་པར་འགྱུར་རོ་ཞེས་སྨྲས་ནས་ཚེའི་དུས་བྱས་པར་གྱུར་ཏེ། དེའི་ཚེ་རྒྱལ་བུ་དགེ་དོན་གྱི་ལམ་མཁན་དེ་པང་དུ་བླངས་ནས་སྐད་ཕྱུང་སྟེ་ངུས་སོ། །ཀྱི་ཧུད་ཀྱི་ཧུད་ཅིའི་ཕྱིར་བདག་གི་ལྷ་ནང་ཅིག་སྟོར་བར་གྱུར་ཅེས་ལམ་མཁན་གྱི་རུས་བུ་གསེར་གྱི་བྱེ་མའི་ནང་དུ་སྦས་ནས་གཡས་ཕྱོགས་ནས་ལན་གསུམ་བསྐོར་བ་བྱས་ཏེ་ཕྱག་བྱས་ནས་སོང་ངོ་། །དེ་ནས་སོང་སོང་བ་ལས་གསེར་གྱི་རིའི་དྲུང་དུ་ཕྱིན་ནོ། །གསེར་གྱི་རིའི་དྲུང་ཕ་རོལ་དུ་ཕྱིན་ནས་པད་མོ་སྔོན་པོས་ས་གཞི་ཁེབས་པར་འདུག་པ་དེ་ན་པད་མོ་དེ་དག་གི་འོག་ན་སྦྲུལ་གདུག་པ་ཆེན་པོས་གང་བར་མཐོང་ངོ་། །སྦྲུལ་གདུག་པ་ཅན་དེ་དག་ལ་གདུག་པ་རྣམ་པ་གསུམ་ཡོད་དེ། འདི་ལྟ་སྟེ། ཟིན་པའི་གདུག་པ་དང་། རེག་པའི་གདུག་པ་དང་། ཁ་རླངས་ཀྱི་གདུག་པའོ། །སྦྲུལ་གདུག་པ་དེ་དག་པད་མའི་སྡོང་བུ་ལ་འཁྲི་ཞིང་ཁ་ནི་གདངས། མིག་ནི་བགྲད་དེ། རྒྱལ་བུ་ལ་བལྟའོ། །དེའི་ཚེ་ན་རྒྱལ་བུ་དགེ་དོན་བྱམས་པའི་སེམས་ཀྱི་ཏིང་ངེ་འཛིན་དུ་ཞུགས་ནས་ཏིང་ངེ་འཛིན་གྱི་མཐུས་དེ་ནས་ཆས་ཏེ། པད་མོ་དེ་དག་ལ་རྡོག་པས་བརྫིས་ཤིང་སོང་ཡང་སྦྲུལ་གདུག་པ་དེ་དག་གིས་གནོད་པར་མ་གྱུར་ཏོ། །དེ་ལྟར་བྱམས་པའི་སེམས་ཀྱི་ཏིང་ངེ་འཛིན་གྱི་ཤུགས་ཀྱིས་སོང་སོང་བ་ལས་ཀླུའི་ཕོ་བྲང་གི་དྲུང་དུ་ཕྱིན་ནོ། །ཀླུའི་རྒྱལ་པོའི་ཕོ་བྲང་གི་ཕྱི་རོལ་འོབས་རིམ་པ་བདུན་གྱིས་བསྐོར་ཏེ། འོབས་དེ་དག་གི་ནང་ན་ཀླུ་གདུག་པ་
གཅིག་ལ་གཅིག་འཁྲི་ཞིང་མགོ་བཏེག་སྟེ་མཁར་སྒོ་སྲུང་ངོ་། །དེའི་ཚེ་ན་རྒྱལ་བུ་དགེ་དོན་མཁར་སྒོ་དེར་ཕྱིན་ཏེ། ཀླུ་གདུག་པ་དེ་མཐོང་ནས་བྱམས་པའི་སེམས་ཀྱིས་འཛམ་བུའི་གླིང་གི་སེམས་ཅན་ཐམས་ཅད་ཡིད་ལ་བྱས་ཏེ། བདག་སེམས་ཅན་གྱི་དོན་དུ་སོང་སོང་བ་ལས་གལ་ཏེ་ཀླུ་གདུག་པས་གནོད་པ་བྱས་ན། ཕན་པ་དང་བདེ་བའི་དོན་མེད་པར་འགྱུར་རོ་སྙམ་དུ་བསམས་ནས། རྒྱལ་བུ་དགེ་དོན་གྱིས་ལག་པ་གཡས་པ་བཏེག་ནས་ཀླུ་གདུག་པ་རྣམས་ལ་འདི་སྐད་ཅེས་བསྒོའོ། །ཁྱེད་རྣམས་ཤེས་པར་གྱིས་ཤིག །བདག་ནི་སེམས་ཅན་ཐམས་ཅད་ཀྱི་དོན་དུ་ཀླུའི་རྒྱལ་པོ་དང་ཕྲད་པར་འདོད་དོ། །དེ་ནས་ཀླུ་གདུག་པ་རྣམས་ཀྱིས་ལམ་ཕྱེ་སྟེ། འོབས་རིམ་པ་བདུན་གྱི་བར་དུ་ཐལ་ཏེ་སོང་ནས་མཁར་སྒོར་ཕྱིན་ནོ། །མཁར་སྒོ་དེ་ན་ཤེལ་གྱི་བུ་མོ་གཉིས་ཤིག་ཤེལ་གྱི་སྐུད་པ་འཁལ་ཞིང་འདུག་པ་མཐོང་ནས་ཁྱེད་ཅི་ཡིན་ཞེས་དྲིས་ན་ཁོ་མོ་ནི་ཀླུའི་རྒྱལ་པོའི་ཕྱི་སྒོ་སྲུང་བའི་བྲན་མོ་ཡིན་ནོ་ཞེས་ཟེར་རོ། །དེ་ནས་ཡང་ནང་དུ་ཞུགས་ཏེ་སོང་བ་ལས་བར་སྒོར་ཕྱིན་པ་དང་། བར་སྒོ་ན་ཤེལ་གྱི་བུ་མོ་བཞི་ཞིག་དངུལ་གྱི་སྐུད་པ་འཁལ་ཞིང་འདུག་པ་མཐོང་ངོ་། །བུ་མོ་དེ་ལ་ཁྱེད་ཀླུའི་རྒྱལ་པོའི་བཙུན་མོ་ཡིན་ནམ་ཞེས་དྲིས་ན་མ་ཡིན་ཏེ། བདག་ཅག་ནི་ཀླུའི་རྒྱལ་པོའི་བར་སྒོ་སྲུང་བའི་བྲན་མོ་ཡིན་ནོ་ཞེས་ཟེར་རོ། །དེ་ནས་ཡང་རྒྱལ་བུ་སྒོ་དེའི་ནང་དུ་ཞུགས་ཏེ་སོང་བ་ལས་ནང་སྒོ་དེ་ལ་ཤེལ་གྱི་བུ་མོ་བརྒྱད་ཅིག་གསེར་གྱི་སྐུད་པ་འཁལ་ཞིང་འདུག་པ་མཐོང་ངོ་། །ཁྱེད་ཅི་ཡིན་ཞེས་དྲིས་ན་བདག་ཅག་ནི་ཀླུའི་རྒྱལ་པོའི་ཕོ་བྲང་གི་ནང་སྒོ་སྲུང་བའི་བྲན་མོ་ཡིན་ནོ་ཞེས་ཟེར་རོ། །དེ་ནས་རྒྱལ་བུ་དགེ་དོན་གྱིས་བུ་མོ་དེ་དག་ལ་བདག་ནི་འཛམ་བུའི་གླིང་གི་ཡུལ་བཱ་རཱ་ཎ་སཱིའི་རྒྱལ་པོའི་བུ་དགེ་དོན་ཞེས་བྱ་བ་ཡིན་ཏེ། རྒྱལ་པོ་དང་ཕྲད་འདོད་པས་ད་ལྟར་སྒོ་ན་འདུག་གོ་ཞེས་ཕྲིན་གྱིས་ཤིག་ཅེས་བསྒོའོ། །དེ་ནས་སྒོ་སྲུངས་དེས་ཀྱང་ཀླུའི་རྒྱལ་པོ་ལ་དེ་བཞིན་དུ་གསོལ་པ་དང་། ཀླུའི་རྒྱལ་པོ་ངོ་མཚར་དུ་འཛིན་ཏེ་འདི་སྙམ་དུ་འདི་ནི་བསོད་ནམས་དང་དགེ་བའི་རྩ་བ་ཤིན་ཏུ་བྱང་བ་ཞིག་མ་ཡིན་པར་ཐ་མལ་པ་གཞན་ཞིག་གིས་ལམ་
འདི་ལྟ་བུ་བགྲོད་ཅིང་འོང་མི་ནུས་སོ་སྙམ་བསམས་ནས་ནང་དུ་བོས་ཏེ་ཀླུའི་རྒྱལ་པོ་ཉིད་ཀྱིས་བསུ་ནས་ཕོ་བྲང་གི་ནང་དུ་ཁྲིད་དོ། །ཀླུའི་རྒྱལ་པོའི་ཕོ་བྲང་གི་ནང་ནི་ས་གཞི་བཻ་དཱུརྱ་ལས་བྱས། ཁྲི་སྟན་ནི་རིན་པོ་ཆེ་སྣ་བདུན་ལས་བྱས་སོ། །འོད་རྣམ་པ་སྣ་ཚོགས་ནི་མིག་གིས་མི་བཟོད་པ་ཙམ་དུ་འཚེར་རོ། །དེ་ནས་ཀླུའི་རྒྱལ་པོས་རྒྱལ་བུ་དགེ་དོན་སྟན་བཏིང་བ་ལ་བཞག་ནས་གཏམ་བྱས་སོ། །དེ་ནས་རྒྱལ་བུ་དགེ་དོན་དེ་ལས་གླེངས་ཏེ་ཀླུའི་རྒྱལ་པོ་ལ་སྤྲོ་བ་དང་། གཟེངས་བསྟོད་པ་དང་། དགའ་བའི་གཏམ་རྣམ་པ་སྣ་ཚོགས་དང་། སྦྱིན་པའི་གཏམ་དང་། ཚུལ་ཁྲིམས་ཀྱི་གཏམ་དང་། ལྷ་དང་མིའི་གཏམ་ལ་སོགས་པ་རྒྱས་པར་སྨྲས་ཏེ་ཆོས་བཤད་དོ། །དེ་ནས་ཀླུའི་རྒྱལ་པོ་རབ་ཏུ་དགའ་ཞིང་རངས་པར་གྱུར་ཏེ། འདི་ལྟར་བགྲོད་དཀའ་བ་བགྲོད་ཅིང་ལམ་རིང་པོ་ནས་འོངས་པ་འདི་ཅི་འདོད་ཅེས་སྨྲས་པ་དང་། རྒྱལ་བུ་དགེ་དོན་གྱིས་ཀླུའི་རྒྱལ་པོ་ལ་འདི་སྐད་ཅེས་སྨྲས་སོ། །འཛམ་བུའི་གླིང་གི་སེམས་ཅན་རྣམས་ནི་གོས་དང་། ནོར་དང་། ཟས་དང་། སྐོམ་གྱི་ཕྱིར་མཐའ་མེད་པའི་སྡུག་བསྔལ་ཆེན་པོ་མྱོང་བར་གྱུར་པས་རྒྱལ་པོའི་སྙན་གཡོན་པའི་ནང་ན་ནོར་བུ་རིན་པོ་ཆེ་འདོད་དོ། །ཀླུའི་རྒྱལ་པོས་སྨྲས་པ། ཞག་བདུན་གྱི་བར་དུ་བདག་གིས་མཆོད་པ་སྦྱར་བ་ཙམ་བཞེས་སུ་གནང་ན་ནོར་བུ་སྦྱིན་ནོ་ཞེས་སྨྲས་སོ། །དེ་ནས་རྒྱལ་བུ་དགེ་དོན་ཀླུའི་རྒྱལ་པོས་སྤྱན་དྲངས་པ་བཞིན་ཞག་བདུན་གྱི་བར་དུ་ཀླུའི་ཕོ་བྲང་ན་འདུག་ནས་ཡིད་བཞིན་གྱི་ནོར་བུ་རིན་པོ་ཆེ་ཁྱེར་ཏེ་ཕྱིར་འཛམ་བུའི་གླིང་དུ་འགྲོ་བར་ཆས་པ་ལས། དེའི་ཚེ་ན་ཀླུའི་རྒྱལ་པོ་ཆེན་པོས་ཀླུ་རྣམས་ཀྱི་མཐུས་ནམ་མཁའ་ལ་འཕུར་ཏེ་རྒྱ་མཚོའི་ཚུ་རོལ་གྱི་ངོགས་སུ་བསྐྱལ་ཏོ། །དེར་ཕྱིན་པ་དང་ནུ་བོ་ངན་དོན་དང་ཕྲད་དོ། །རྒྱལ་བུས་ནུ་བོ་ངན་དོན་ལ་ཁྱོད་ཀྱི་གྲོགས་པོ་ཀུན་ག་རེ་ཞེས་དྲིས་ནས་ཁྱོད་གཅིག་པུ་འདི་ན་འདུག་གམ་ཞེས་སྨྲས་པ་དང་། རྒྱལ་བུ་ངན་དོན་ན་རེ་གྲུ་བྱིང་ནས་ཐམས་ཅད་ཤི་སྟེ། བདག་འབའ་ཞིག་རོ་ཞིག་ལ་འཇུ་འཇུ་ནས་མ་ཤི་ནས་ཕྱིན་ཏེ་གཞན་ནི་ཅིག་ཅར་ཀུན་ཤིའོ། །རྒྱལ་བུ་དགེ་དོན་གྱིས་སྨྲས་པ། འཇིག་རྟེན་ན་རིན་པོ་ཆེའི་མཆོག་ནི་བདག་གི་ལུས་ལས་འདའ་བ་མེད་དོ། །ནུ་བོས་སྨྲས་
པ། དེ་ལྟར་མ་ཡིན་ཏེ་ཕྱུག་བཞིན་དུ་ཤི་ཡང་སླའི་དབུལ་བཞིན་དུ་མི་གསོན་ནོ། །དེར་ཅི་མངོན་ཞེ་ན། བདག་དུར་ཁྲོད་ཅིག་ན་འདུག་པར་ཕྱིན་པ་ན། དུར་ཁྲོད་དེ་ན་ཡོད་པའི་རོ་དག་དེ་སྐད་ཅེས་ཟེར་བ་ཐོས་སོ། །རྒྱལ་བུ་དགེ་དོན་རང་བཞིན་གྱིས་དྲང་བས་ནུ་བོ་ལ་ཁྱོད་རིན་པོ་ཆེ་མེད་ཀྱང་ཚོད་ཡོད་ཀྱིས། བདག་ལ་ཀླུའི་རྒྱལ་པོའི་ཡིད་བཞིན་གྱི་ནོར་བུ་རིན་པོ་ཆེ་ཡོད་དོ། །ནུ་བོས་ནོར་བུ་ག་རེ་ཞེས་དྲིས་ན། ཕུ་བོས་སྨྲས་པ། ཡིད་བཞིན་གྱི་ནོར་བུ་རིན་པོ་ཆེ་བདག་གི་དོ་ཀེར་གྱི་ནང་ན་ཡོད་དོ་ཞེས་སྨྲས་སོ། །ནུ་བོས་དེ་སྐད་ཅེས་སྨྲས་པ་ཐོས་ནས་ཕྲག་དོག་གི་སེམས་ཀྱིས་ལྷག་པར་འཁྲུག་ཅིང་ཞེ་སྡང་གི་སེམས་སྐྱེས་ཏེ། འདི་སྙམ་དུ་ཡབ་རྒྱལ་པོ་དང་ཡུམ་བདག་ལ་ལྷག་པར་སྡང་བའི་སྟེང་དུ་ད་ཕུ་བོས་ནི་ཡིད་བཞིན་གྱི་ནོར་བུ་རིན་པོ་ཆེ་རྙེད་པས། ད་ནི་ལྷག་པར་བདག་ལ་སྡང་ཞིང་ས་རྡོ་དང་འདྲ་བར་བེན་པར་འགྱུར་རོ་སྙམ་བསམས་ནས་ཕུ་བོ་དགེ་དོན་ལ་འདི་སྐད་ཅེས་སྨྲས་སོ། །ཤིན་ཏུ་ལེགས་སོ། །ནོར་བུ་རིན་པོ་ཆེ་ཐོབ་པ་ཤིན་ཏུ་ལེགས་ཀྱིས་ད་འཇིགས་པ་འདིར་ལེགས་པར་བསྲུང་དགོས་སོ། །དེ་ནས་རྒྱལ་བུ་དགེ་དོན་གྱིས་དོ་ཀེར་བཀྲོལ་ཏེ་ནོར་བུ་ནི་ནུ་བོ་ངན་དོན་གྱི་ལག་ཏུ་བྱིན་ཏེ། ཁྱོད་ངལ་ཞིང་ཆད་དེ་ཉལ་བའི་ཚེ་ཁོ་བོས་བཙའ་ཞིང་བསྲུང་ངོ་། །ཁོ་བོ་ངལ་ཏེ་ཉལ་བའི་ཚེ་ན་ཁྱོད་ཀྱིས་བཙའ་ཞིང་སྲུངས་ཤིག །དེའི་ཚེ་ངན་དོན་ནོར་བུ་སྲུང་རེས་ལ་བབ་ནས་ཕུ་བོ་དགེ་དོན་དེ་གཉིད་ལོག་ཅིང་འདུག་པ་ལས། ངན་དོན་གྱིས་སྨྱིག་མ་སྐམ་པོའི་ཚལ་པ་གཉིས་ཀྱིས་དགེ་དོན་གྱི་མིག་གཉིས་ཀྱི་ནང་དུ་བཙུགས་ནས་ནོར་བུ་རིན་པོ་ཆེ་ཁྱེར་ཏེ་བྲོས་སོ། །དེ་ནས་རྒྱལ་བུ་དགེ་དོན་གྱིས་ནུ་བོ་ངན་དོན་ཞེས་བོས་ཏེ། ངའི་མིག་གཉིས་སུ་རྐུན་པོས་ཤིང་ཚལ་བཙུགས་ཀྱིས་ནོར་བུ་རིན་པོ་ཆེ་ཐོགས་ལ་བྲོས་ཤིག་ཅེས་བོས་ནས་ཅང་མི་གྲག་པས། ད་ནི་བདག་གི་ནུ་བོ་ངན་དོན་ཡང་དགྲས་བསད་པ་ལྟའི་ཅང་མི་གྲག་གོ་ཞེས་སྐད་ཆེན་པོས་ལྷ་རྣམས་ཐོས་པ་ཙམ་དུ་བོས་ཀྱང་རིང་ཞིག་གི་བར་དུ་ཅང་མི་གྲག་གོ །དེ་ནས་ཤིང་ལྗོན་པའི་ལྷ་ཞིག་འདི་སྐད་ཅེས་སྨྲའོ། །ཁྱོད་ཀྱི་ནུ་བོ་ངན་དོན་ཉིད་དགྲ་ཡིན་ཏེ། ཁྱོད་ཀྱི་མིག་གཉིས་ཕྱུང་ནས་ནོར་བུ་རིན་པོ་ཆེ་ཁྱེར་ཏེ་ཕྱིར་བྲོས་
ནས་སོང་བ་ལ་ངན་དོན་ཞེས་བོས་པས་ཅི་ཕན་ཞེས་སྨྲས་སོ། །ཡང་རྒྱལ་བུ་དགེ་དོན་གྱིས་ཚིག་དེ་ཐོས་ནས་མྱ་ངན་གྱིས་གདུངས་ཏེ་ཡི་མུག་པར་གྱུར་ཏོ། །དེའི་ཚེ་རྒྱལ་བུ་ངན་དོན་ནོར་བུ་རིན་པོ་ཆེ་ཁྱེར་ཏེ་ཕྱིར་བདག་གི་ཡུལ་དུ་ཕྱིན་ནས་ཡབ་ཡུམ་དང་ཕྲད་དེ་ཡབ་རྒྱལ་པོ་དང་ཡུམ་ལ་འདི་སྐད་ཅེས་སྨྲས་སོ། །བདག་ནི་བསོད་ནམས་དང་ལྡན་ཏེ་ཉེ་ཞོ་མེད་པར་སླར་མཆིས་སོ། །རྒྱལ་བུ་དགེ་དོན་དང་གྲོགས་གཞན་ནི་བསོད་ནམས་ཆུང་བས་ཆུར་གུམ་སྟེ་ཟད་པར་ཤིའོ། །ཡབ་རྒྱལ་པོ་དང་ཡུམ་གྱིས་ཚིག་དེ་ཐོས་ནས་སྐད་ཆེན་པོ་ཕྱུང་ནས་ངུས་སོ། །བརྒྱལ་ཏེ་ས་ལ་འགྱེལ་ཏོ། །དེ་ནས་ཆུ་གྲང་མོ་གཏོར་བས་རིང་ཞིག་ལོན་པ་དང་ཕྱིར་སངས་ནས་རྒྱལ་བུ་ངན་དོན་ལ་ངོ་སོ་ཅི་ཡོད་ན་ངེད་དང་ཕྲད་ཅིང་འོངས་ཞེས་སྨྲས་པ་དང་། རྒྱལ་བུ་ངན་དོན་མི་དགའ་ནས་ཁྲོས་ཏེ་ནོར་བུ་རིན་པོ་ཆེ་དབེན་པ་ཞིག་ཏུ་ས་བརྐོས་ནས་སྦས་སོ། །དེའི་ཚེ་རྒྱལ་བུ་དགེ་དོན་མིག་གཉིས་སུ་སྨྱིག་མའི་ཚལ་པ་སྐམ་པོ་ཟུག་པ་འབྱིན་པའི་མི་མེད་པས་སྡུག་བསྔལ་གྱིས་གདུངས་ཏེ་ས་ལ་འགྲེའོ། །གར་འགྲོ་ཡང་མི་ཤེས་ཏེ་བཀྲེས་པ་དང་སྐོམ་པས་ཀྱང་གདུངས་ནས། གསོན་ན་གསོན་དུ་ཡང་མེད། ཤི་ན་ཤིར་ཡང་མེད་དེ་བགབ་ཀྱིས་འཐོམ་ཞིང་སོང་བ་ལས་རྒྱལ་པོ་ལི་ཤི་བར་གྱི་ཡུལ་འདབ་ཏུ་ཕྱིན་ཏོ། །ལི་ཤི་བར་གྱི་རྒྱལ་པོ་དེ་ལ་བུ་མོ་ཞིག་ཡོད་པ་ནི་ཡུལ་བཱ་རཱ་ཎ་སཱིའི་རྒྱལ་པོའི་སྲས་རྒྱལ་བུ་དགེ་དོན་ལ་སྦྱིན་པར་བྱས་སོ། །རྒྱལ་བུ་ལི་ཤི་བར་དེ་ལ་རྫིའུ་བ་ལང་ལྔ་བརྒྱ་འཚོ་བ་ཞིག་ཡོད་དེ། རྩྭ་དང་ཆུ་ག་ལ་ཡོད་པར་འཚོ་ཞིང་འགྲོའོ། །དེའི་ཚེ་ན་རྒྱལ་བུ་དགེ་དོན་ལམ་ཀ་ཞིག་ན་འདུག་པ་ལས་རྫིའུ་དེས་གནག་ཕལ་པོ་ཆེ་དེད་ནས་དེར་ཕྱིན་པ་དང་། བ་ལང་ཕལ་གྱིས་བརྫིས་མ་ཁད་པ་ལས་བ་ལང་དེའི་ནང་ན་ཁྱུ་མཆོག་གི་རྒྱལ་པོ་གཅིག་ཡོད་པས་རྒྱལ་བུའི་སྟེང་དུ་ཞོན་ཏེ་བ་ལང་ཕལ་ཀུན་ཐལ་བའི་འོག་ཏུ་ཕ་ཟད་སོང་ནས་ས་ལ་འགྲེ་ཞིང་རྒྱལ་བུ་ལ་ལྟ་ཞིང་ཕྱིར་ལངས་ཏེ། རྒྱལ་བུའི་མིག་གཉིས་སུ་ལྕེས་བལྡགས་པ་དང་སྨྱིག་མའི་ཚལ་པ་ཡང་ཕྱུང་ངོ་། །དེ་ནས་གནག་རྫི་ཡང་ཕྱི་བཞིན་དེར་འོངས་ནས་ཁྱོད་སུ་ཞིག་ཅེས་དྲིས་སོ། །དགེ་དོན་གྱིས་འདི་སྙམ་དུ་བདག་གིས་ཆོ་རིགས་དང་ཇི་ལྟར་གྱུར་པ་ཞིབ་ཏུ་སྨྲས་ན་གལ་
ཏེ་བདག་གི་ནུ་བོ་སྡུག་བསྔལ་ཆེན་པོ་མྱོང་ངོ་སྙམ་བསམས་ནས་བདག་ནི་ལོང་བ་མུ་ལྟོ་བ་ཡིན་ནོ་ཞེས་སྨྲས་སོ། །དེ་ནས་གནག་རྫི་དེས་བལྟས་ན། མཚན་གཞན་ལས་དཔགས་ཏེ་ཐ་མལ་པ་མ་ཡིན་པར་མཐོང་ནས་ཁོ་བོའི་ཁྱིམ་འདི་ནས་མི་རིང་བ་ཞིག་ན་ཡོད་དེ། ཁྱོད་ཀྱི་འཚོ་བ་སྦྱར་གྱིས་ངའི་ཁྱིམ་དུ་འདོང་ངོ་ཞེས་སྨྲས་ནས་རྒྱལ་བུ་དགེ་དོན་ཁྱིམ་དུ་ཁྲིད་དོ། །གནག་རྫི་དེས་ཁྱིམ་དུ་ཁྲིད་ནས་ཟས་དང་། སྐོམ་དང་། དགོས་པ་ཐམས་ཅད་སྦྱར་ནས། ཁྱིམ་གྱི་བུ་དང་། བུ་མོ་དང་། ཁྱིམ་གང་གི་མི་ཐམས་ཅད་ལ་ཁྱེད་ཐམས་ཅད་ཀྱིས་ལོང་བ་འདི་ལ་ང་དང་འདྲ་བར་རིམ་གྲོ་བྱོས་ཤིག་ཅེས་བསྒོའོ། །དེ་ནས་དེ་བཞིན་དུ་ཟླ་བ་གཅིག་ལྷག་གི་བར་དུ་ཁྱིམ་ན་གསོ་གསོ་བ་ལས་སྐྱོ་བར་གྱུར་ནས་འདི་སྐད་དུ། ད་ནི་སོ་ཚིས་ཀྱང་དམས་པས་རྟག་ཏུ་ལོང་བ་འདི་གསོ་སུས་ནུས་ཞེས་སྨྲས་སོ། །དགེ་དོན་གྱིས་ཚིག་དེ་སྐད་སྨྲས་པ་ཐོས་ནས་སེམས་ཉམ་ང་བར་གྱུར་ཏེ། དེའི་མཚན་མོ་འདས་ནས་ཕྱི་དེ་ཉིན་ཁྱིམ་བདག་ལ་ད་བདག་མཆིའོ་ཞེས་སྨྲས་པ་དང་། ཁྱིམ་བདག་གིས་སྨྲས་པ། ཅི་ཞིག་མ་རུངས་ན་བདག་ཅག་སྤངས་ནས་འགྲོ་བར་སེམས། དགེ་དོན་གྱིས་སྨྲས་པ། བཟའ་དང་མགྲོན་ནི་ཆོས་ཀྱིས་ཡུན་རིང་དུ་འགྲོགས་ཤིང་གནས་པ་མ་ཡིན་ནོ། །དགེ་དོན་གྱིས་ཡང་སྨྲས་པ། ཁྱོད་འདི་ལྟར་བདག་ལ་བྱམས་ན་བདག་ལ་རོལ་མོ་ཇེང་སྙན་པ་ཅིག་བྱས་ཏེ། གང་ན་མི་མང་པོ་འདུ་བའི་གནས་སམ། གྲོང་ཁྱེར་ཆེན་པོ་ཞིག་ཏུ་སྐྱོལ་ཅིག །དེ་ནས་ཁྱིམ་བདག་དེས་ཀྱང་དེའི་ཡིད་བཞིན་དུ་དགོས་པ་སྦྱར་ནས་རྒྱལ་པོ་ལི་ཤི་བར་གྱི་གྲོང་ཁྱེར་དུ་མི་མང་པོའི་ནང་དུ་བསྐྱལ་ནས་བདེ་བར་ཕྱིར་ལོག་གོ །དེ་ནས་རྒྱལ་བུ་དགེ་དོན་ཇེང་ལ་ཤིན་ཏུ་མཁས་པས་ཇེང་གི་སྒྲ་སྙན་པ་ཡིད་དུ་འོང་བས་ཐམས་ཅད་ཀྱིས་འཚོ་བའི་ཡོ་བྱད་བྱིན་ནོ། །བཟའ་བ་དང་བཏུང་བས་མི་བྲེལ་བར་བྱས་སོ། །དེའི་ཚེ་ལི་ཤི་བར་གྱི་ཡུལ་ན་སྤྲང་པོ་ལྔ་བརྒྱ་ཡོད་པ་ཡང་ཐམས་ཅད་བཟའ་བ་དང་བཏུང་བས་ཆོག་པར་བྱས་སོ། །དེའི་ཚེ་ན་རྒྱལ་པོ་དེ་ལ་བཟའ་ཤིང་གི་ར་བ་ཞིག་ཡོད་དེ། འབྲས་བུ་རབ་ཏུ་རྒྱས་ནས་རྟག་ཏུ་བྱ་མི་ཐུབ་སྟེ། ར་བ་སྲུང་བའི་སྣ་བོས་དེའི་ཚེ་ན་རྒྱལ་བུ་དགེ་དོན་ལ་
འདི་སྐད་ཅེས་སྨྲས་སོ། །ཁྱོད་བདག་གི་ཤིང་ཏོག་གི་ར་བ་སྲུང་ཞིང་འདུག་མི་ནུས་སམ། བདག་གིས་ཁྱོད་ལ་དགོས་པའི་ཡོ་བྱད་སྦྱར་རོ། །དགེ་དོན་གྱིས་སྨྲས་པ། བདག་ལ་མིག་གཉིས་མེད་དེ་མི་མཐོང་ན་ཇི་ལྟར་ཁྱོད་ཀྱི་ར་བ་སྲུང་ཞིང་བྱ་རྣམས་བསྐྲད་ནུས། ར་བའི་སྣ་བོས་སྨྲས་པ། བདག་ལ་ཐབས་ཡོད་དེ། བདག་གི་སྐྱེད་ཤིང་གི་ཁར་ཐག་པ་བྲེས་ཏེ་ཐག་པ་ལ་དྲིལ་བུ་བཏགས་ལ་ཐག་པ་ཁྱོད་ཀྱི་ལག་ཏུ་བཞག་ལ་བྱ་སྐད་ནམ་གྲག་པ་དང་ཐག་པ་ནས་དྲངས་པས་ཆོག་གོ །དགེ་དོན་གྱིས་སྨྲས་པ། དེ་ལྟར་བྱས་ན་བདག་གིས་ནུས་ཀྱི་ཤིང་དྲུང་དུ་ཁྲིད་ཅིག་ཅེས་སྨྲས་ནས་དེར་སོང་ངོ་། །རྒྱལ་བུ་དགེ་དོན་ར་བ་དེ་ན་ཤིང་ཏོག་སྲུང་ཞིང་རོལ་མོ་ཇེང་བྱེད་དེ་རྩེ་ཞིང་འདུག་གོ །དེའི་ཚེ་ན་རྒྱལ་པོའི་བུ་མོ་འཁོར་རྣམས་དང་བཟའ་ཤིང་གི་ར་བར་འཆག་ཅིང་ལྟད་མོ་ལྟར་སོང་བ་ལས་ལོང་བ་དེ་མཐོང་ནས་ལོང་བའི་དྲུང་དུ་སོང་སྟེ། ཁྱེད་སུའི་མི་ཡིན་ཞེས་དྲིས་སོ། །སྨྲས་པ། བདག་ནི་དམུས་ལོང་མུ་ལྟོ་བ་ཡིན་ནོ། །རྒྱལ་པོའི་བུ་མོས་ལོང་བ་དེ་མཐོང་ནས་དེ་ལ་སྙིང་ཆགས་ཏེ་གཏོང་མ་ཕོད་དོ། །རྒྱལ་པོས་བུ་མོ་འབོད་དུ་བཏང་བ་ལས་ཁོ་མོ་མི་འགྲོའོ། །བཟའ་བ་དང་བཏུང་བ་འདིར་སྐྱོལ་ཅིག །བདག་ལོང་བ་འདི་དང་ལྷན་ཅིག་ཟའོ། །དེ་ལྟར་ལོང་བ་དང་ལྷན་ཅིག་ཟན་ཟོས་ནས་རྒྱལ་པོ་ལ་འདི་སྐད་ཅེས་གསོལ་ཏོ། །བདག་ལོང་བ་འདི་ལ་སྩལ་དུ་གསོལ། དེ་ལ་སྩལ་ན་བདག་གི་ཡིད་ཚིམ་པར་འགྱུར་རོ། །རྒྱལ་པོས་སྨྲས་པ། བུ་མོ་ཁྱོད་འདྲེ་གདོན་གྱིས་བརླམས་སམ། འོན་ཏེ་སྨྱོས་སམ། སྙིང་མྱོས་སམ། ཅིའི་ཕྱིར་ལོང་བ་དེ་དང་ལྷན་ཅིག་ཏུ་གནས། ཁྱོད་མི་ཤེས་སམ། སྔར་བཱ་རཱ་ཎ་སཱིའི་རྒྱལ་པོས་བུ་དགེ་དོན་གྱི་ཆུང་མར་བསླངས་ཏེ་དེ་ལ་སྦྱིན་པར་བྱས་ནས་རྒྱལ་བུ་ད་ལྟར་རྒྱ་མཚོར་སོང་བ་ལས་ཕྱིར་མ་འཁོར་ན་ཅིའི་ཕྱིར་ན་མུ་ལྟོ་བ་ཞིག་གི་ཆུང་མ་བྱེད་པར་སེམས། བུ་མོས་གསོལ་པ། དེ་ལྟ་ལགས་མོད་ཀྱི་སྲོག་འདི་ཡལ་ཡང་ལོང་བ་མི་གཏོང་ངོ་། །རྒྱལ་པོས་ཚིག་དེ་ཐོས་ནས་བུ་མོའི་ངོ་མ་ཟློགས་ནས་ལོང་བ་བཀུག་ནས་ཕོ་བྲང་གི་ནང་དུ་ཕྱོགས་དབེན་པ་ཞིག་ཏུ་བཞག་གོ །དེ་ནས་རྒྱལ་པོའི་བུ་མོ་དེ་ལོང་བའི་ཐད་དུ་སོང་
ནས་འདི་སྐད་ཅེས་སྨྲས་སོ། །མཁྱེན་ཏམ། ད་བདག་ཁྱོད་དང་བཟའ་ཤུག་ཏུ་འདུའོ། །དགེ་དོན་གྱིས་སྨྲས་པ། ཁྱོད་སུའི་བུ་མོ་ཡིན་ཏེ་བདག་དང་བཟའ་ཤུག་ཏུ་འདུ་བར་སེམས། སྨྲས་པ་བདག་ནི་རྒྱལ་པོ་ལི་ཤི་བར་གྱི་བུ་མོ་ཡིན་ནོ། །དགེ་དོན་གྱིས་སྨྲས་པ། ཁྱེད་ནི་རྒྱལ་པོའི་བུ་མོ་ཡིན་ཏེ་བདག་ནི་མུ་ལྟོ་བ་ཡིན་ན་གཅིག་ལ་གཅིག་ཇི་ལྟར་བཀུར་སྟི་བྱེད་པར་འགྱུར། ཆུང་མས་སྨྲས་པ། བདག་སྙིང་ནས་ཁྱོད་ཀྱི་རིམ་གྲོ་བྱ་སྟེ་ཡིད་དང་འགལ་བར་མི་བྱའོ། །དེ་ལྟར་ཞག་དགུ་བཅུའི་བར་དུ་འདུས་ཤིང་འཁོད་པ་ལས་ཉིན་གཅིག་ཆུང་མས་ཁྱིམ་ཐབ་ལ་གཏམ་མ་བྱས་པར་ཕྱི་རོལ་དུ་སོང་བ་ལས་རིང་ཞིག་ལོན་པ་དང་ཕྱིར་འོངས་སོ། །དགེ་དོན་གྱིས་ཆུང་མ་ལ་ཁྱོད་གསང་སྟེ་གར་སོང་སོང་། བདག་ལ་ཡང་གཏམ་མ་བྱས་པར་གང་དུ་ཕྱིན་གང་ནས་ཕྱིར་ལོག་ཅེས་སྨྲས་སོ། །ཆུང་མས་སྨྲས་པ། བདག་གསང་སྟེ་སོང་བ་མེད་དོ། །དགེ་དོན་གྱིས་སྨྲས་པ། ཁྱོད་གསང་ངམ་མི་གསང་མི་སུས་ཤེས། ཆུང་མས་མི་དགའ་སྟེ་ཡི་ཆད་ནས་མིག་མཆི་མས་གང་བཞིན་དུ་འདི་སྐད་དུ་སྨྲས་ཏེ་དམ་བཅས་སོ། །གལ་ཏེ་བདག་ཁྱོད་ལ་གསང་བ་ཞིག་ལ་སོང་བར་གྱུར་ན་ཁྱོད་ཀྱི་མིག་གཉིས་ནམ་དུ་ཡང་འཚོ་བར་མ་གྱུར་ཅིག །གལ་ཏེ་དེ་ལྟ་མ་ཡིན་ན་ཁྱོད་ཀྱི་མིག་ཡ་གཅིག་སྔོན་བཞིན་དུ་མཐོང་བར་གྱུར་ཅིག་ཅེས་དམ་བཅས་པའི་ཚིག་སྨྲས་མ་ཐག་ཏུ་ཁྱིམ་ཐབ་ཀྱི་མིག་ཡ་གཅིག་སྔོན་བཞིན་དུ་མཐོང་ཞིང་གསལ་བར་གྱུར་ཏེ། སྐར་མ་ལྟར་བཀྲ་ལ་མངོན་པར་ཆུང་མས་མཐོང་བར་གྱུར་པ་དང་། ཆུང་མས་སྨྲས་པ། ད་ཁྱོད་ཡིད་ཆེས་སམ། དགེ་དོན་འཛུམ་དམུལ་ཏེ་ཅང་མི་སྨྲའོ། །ཆུང་མས་སྨྲས་པ། ཁྱོད་ནི་ཁྲེལ་མེད་པ་དྲིན་མི་ཤེས་པ་ཞིག་སྟེ། བདག་ནི་རྒྱལ་པོ་ཆེན་པོའི་བུ་མོ་ཞིག་སྟེ། ཁྱོད་ནི་མི་ཐ་མལ་པ་ཞིག་ལས་བདག་གིས་སྙིང་ནས་རིམ་གྲོ་བྱས་ན་འོན་ཀྱང་ཁྱོད་ཡིད་མི་ཆེས་སོ། །ཁྱིམ་ཐབ་ཀྱིས་སྨྲས་པ། ང་སུ་ཡིན་པ་ཁྱོད་ཀྱིས་ཤེས་སམ། སྨྲས་པ། མི་ཤེས་ཏེ་ཁྱོད་མུ་ལྟོ་བ་ཡིན་ནོ། །ཁྱིམ་ཐབ་ཀྱིས་སྨྲས་པ། མ་ཡིན་ནོ། །ཁོ་བོ་ནི་ཡུལ་བཱ་རཱ་ཎ་སཱིའི་རྒྱལ་པོའི་སྲས་རྒྱལ་བུ་དགེ་དོན་ཞེས་བྱ་བ་ཡིན་ནོ། །ཆུང་མས་སྨྲས་པ། ཁྱོད་ནི་
ཆེར་གླེན་པ་ཞིག་གོ །ཅིའི་ཕྱིར་དེ་སྐད་ཅེས་སྨྲ། བཱ་རཱ་ཎ་སཱིའི་རྒྱལ་པོའི་སྲས་རྒྱ་མཚོར་ཞུགས་ཏེ། རིན་པོ་ཆེ་ལེན་དུ་སོང་བ་ལས་ད་དུང་ཕྱིར་མ་འཁོར་ན། ཅིའི་ཕྱིར་ཁྱོད་དེ་ཡིན་ཞེས་ཟེར། ཁྱོད་བརྫུན་ཟེར་བས་ཁོ་མོ་ཡིད་མི་ཆེས་སོ། །རྒྱལ་བུ་དགེ་དོན་གྱིས་སྨྲས་པ། བདག་ནི་ཐོག་མ་སྐྱེས་ནས་ད་ཙམ་གྱི་བར་དུ་བརྫུན་ཟེར་མ་མྱོང་ངོ་། །ཆུང་མས་སྨྲས་པ། ཁྱོད་སྨྲས་པ་བདེན་ནམ་བརྫུན་པ་སུ་ཞིག་ཡིད་ཆེས་པར་འགྱུར། ཁྱིམ་ཐབ་ཀྱིས་སྨྲས་པ། ཁོ་བོས་སྨྲས་པའི་ཚིག་འདི་བརྫུན་ཏེ་ཁྱོད་བསླུས་པར་གྱུར་ན་ཁོ་བོའི་མིག་ཡ་གཅིག་གཏན་མི་མཐོང་བར་ཤོག་ཤིག །གལ་ཏེ་ཚིག་བདེན་ན་བདག་གི་མིག་ཡ་གཅིག་ཀྱང་སྔོན་བཞིན་དུ་མཐོང་བར་ཤོག་ཤིག་ཅེས་སྨྲས་མ་ཐག་ཏུ་མིག་ཡ་གཅིག་གི་འབྲས་བུ་ཡང་སྔོན་བཞིན་དུ་གསལ་ཞིང་མཐོང་བར་གྱུར་ཏོ། །རྒྱལ་བུ་དགེ་དོན་གྱི་མིག་གཉིས་སྔོན་བཞིན་དུ་གསལ་ཞིང་མཛེས་པ་དང་། མིའི་མཚན་དང་ལྡན་ཞིང་ཡིད་དུ་འོང་ལ་འཇིག་རྟེན་ན་དཔེ་མེད་པར་བཟང་བར་ཆུང་མས་མཐོང་ནས་རབ་ཏུ་དགའ་བའི་སེམས་སྐྱེས་ཏེ་འཕགས་པས་བྱིན་གྱིས་བརླབས་པ་ཙམ་དུ་སྤྲོ་ཞིང་མིག་མི་འཛུམས་པ་ཙམ་དུ་ལྟའོ། །དེ་ནས་ཕོ་བྲང་དུ་སོང་སྟེ། ཡབ་རྒྱལ་པོ་ལ་བདག་གི་ཁྱིམ་ཐབ་དེ་ནི་རྒྱལ་བུ་དགེ་དོན་ཡིན་ཞེས་གསོལ་པ་དང་། རྒྱལ་པོས་སྨྲས་པ། གླེན་མ་འདི་སྨྱོས་སམ། ཡི་དགས་ཀྱིས་བསླུས་སམ། ཅི་ཉེས་ན་འདི་སྐད་ཅེས་ཟེར་རྒྱལ་བུ་དགེ་དོན་ནི་རྒྱ་མཚོར་ཞུགས་ཏེ་ད་དུང་ཡང་མ་འཁོར་ཟེར་ན། ཅིའི་ཕྱིར་ཁྱོད་མུ་ལྟོ་བ་ཞིག་ལ་རྒྱལ་བུ་དགེ་དོན་ཞེས་ཟེར། བུ་མོས་གསོལ་པ། དེ་ལྟ་མ་ལགས་ཏེ། རྒྱལ་པོ་ཐུགས་མི་ཆེས་ན་སྤྱན་གྱིས་གཟིགས་པར་ཅི་གནང་ཞེས་གསོལ་པ་དང་། རྒྱལ་པོས་གཟིགས་མ་ཐག་ཏུ་རྒྱལ་བུ་དགེ་དོན་ཡིན་པར་རྟོགས་སོ། །དེ་ལྟར་རྟོགས་ནས་དངངས་ཏེ་འདི་སྐད་དུ། གལ་ཏེ་བཱ་རཱ་ཎ་སཱིའི་རྒྱལ་པོས་ཐོས་ན་བདག་ཅག་ལ་དཔྱས་པར་འགྱུར་རོ་སྙམ་ཞེས་སྨྲས་ནས། རྒྱལ་བུ་དགེ་དོན་བདག་གིས་སྔར་རྒྱལ་བུ་ཡིན་པར་མ་ཤེས་པར་ཉེས་པ་བཤགས་སོ་ཞེས་སྨྲས་སོ། །རྒྱལ་བུས་སྨྲས་པ། དེ་ལ་ཉེས་པ་མེད་དེ། རྒྱལ་པོའི་
གནག་རྫི་དེ་ལ་སྦྱིན་པ་བྱིན་ཅིག་ཅེས་སྨྲས་སོ། །དེ་ནས་རྒྱལ་པོ་ལི་ཤི་བར་གྱིས་གནག་རྫི་དེ་ལ་གསེར་དང་། དངུལ་དང་། རིན་པོ་ཆེ་དང་། གོས་དང་། བཟའ་བ་དང་། བཏུང་བ་ཡང་བྱིན་གནག་ལྔ་བརྒྱ་ཡང་ཐལ་བྱུང་བྱིན་ནོ། །དེ་ནས་གནག་རྫི་དེ་ཡང་ཤིན་ཏུ་དགའ་ནས་རྒྱལ་བུ་དགེ་དོན་ལ་བདག་གིས་ཕན་པའི་དྲིན་ཅི་ཞིག་བྱས་ན་བདག་ལ་ནོར་དང་། རིན་པོ་ཆེ་འདི་སྙེད་ཅིག་བྱིན་ཞེས་མི་མང་པོའི་ནང་དུ་སྐད་ཆེན་པོས་གསང་མཁྱུད་དེ་སྦྱིན་པ་བྱས་ཀྱང་དྲིན་མངོན་སུམ་དུ་འོངས་པས་སྦྱིན་པ་བྱས་པའི་འབྲས་བུའི་རྣམ་པར་སྨིན་པ་ནི་འདི་ལྟར་རྒྱ་ཆེའོ་ཞེས་བསྒྲགས་སོ། །དེའི་ཚེ་ན་འཁོར་མང་པོ་ཀུན་རབ་ཏུ་དགའ་ནས་སྦྱིན་པ་ལ་དགའ་བའི་སེམས་སྐྱེས་སོ། །གང་སངས་རྒྱས་འདོད་པས་ནི་ཐམས་ཅད་ལ་སྦྱིན་པར་བྱའོ་ཞེས་ལྷ་རྣམས་ཀྱང་མི་དེ་ལ་བསྔགས་ཤིང་བསྟོད་པས་དེ་བཞིན་དུ་གྲུབ་པར་གྱུར་ཏོ། །དེའི་ཚེ་ན་རྒྱལ་བུ་དགེ་དོན་རྒྱ་མཚོར་མ་ཞུགས་པ་ཕོ་བྲང་ན་འདུག་པ་ན་ངང་པ་དཀར་པོ་གཅིག་གསོས་ཏེ་རྟག་ཏུ་འགྲོགས་ཤིང་བཟའ་བ་དང་། བཏུང་བ་དང་། འགྲོ་བ་དང་། སྡོད་པ་དང་། འདུག་པ་དང་། ཉལ་བ་ན་རྟག་པར་ལྷན་ཅིག་གོ །དེ་ནས་ཡུམ་བཙུན་མོས་བྱ་ངང་པའི་དྲུང་དུ་སོང་ནས་འདི་སྐད་ཅེས་སྨྲས་སོ། །རྒྱལ་བུ་འདུག་པའི་ཚེ་ཁྱོད་དང་རྟག་པར་འགྲོགས་ན་ད་རྒྱ་མཚོར་སོང་སྟེ་ཤིའམ་གསོན་གཏོལ་མེད་དེ་བདག་མི་ཤེས་ན་ཁྱོད་རྒྱལ་བུ་མི་དྲན་ནམ། ངང་པས་ཚིག་དེ་ཐོས་ནས་སྐད་ཕྱུང་སྟེ་ས་ལ་འགྲེ་ནས་མིག་མཆི་མས་གང་བཞིན་དུ་བཙུན་མོ་ལ་འདི་སྐད་ཅེས་སྨྲས་སོ། །བཙུན་མོ་བདག་རྒྱལ་བུ་ཚོལ་བར་བཀའ་སྩལ་ན་མཆིའོ་ཞེས་སྨྲས་ནས་དེའི་ཚེ་བཙུན་མོས་ཡི་གེར་བྲིས་ཏེ་ངང་པའི་མགུལ་དུ་བཏགས་ནས་རྒྱལ་བུ་ཚོལ་དུ་བཏང་ངོ་། །དེ་ནས་ངང་པ་དེས་རྒྱལ་བུ་གང་ལོགས་སུ་སོང་བ་དྲིས་ནས་ནམ་མཁའ་ལ་འཕུར་ནས་རྒྱ་མཚོའི་ལོགས་སུ་སོང་ངོ་། །བཙུན་མོས་དེ་ལྟར་ངང་པ་སོང་བ་མཐོང་ནས་ད་ནི་གདོན་མི་ཟ་བར་བདག་གི་བུ་གསོན་ནམ་ཤི་བའི་གཏམ་ངེས་པར་ཉེ་བར་ཐོས་པར་འགྱུར་རོ་སྙམ་སེམས་སོ། །དེ་ནས་ངང་པ་དེས་རྒྱ་མཚོའི་སྟེང་གི་ནམ་མཁའ་ལ་ལྡིང་ལྡིང་ནས་ཀུན་ཏུ་བརྟགས་ནས་བཙལ་ཀྱང་རྒྱལ་བུ་མ་མཐོང་ནས་མཐར་
གྱིས་རྒྱལ་པོ་ལི་ཤི་བར་གྱི་ཡུལ་དུ་ཕྱིན་པ་དང་། རྒྱང་མ་ནས་རྒྱལ་བུ་དགེ་དོན་རྒྱལ་པོའི་ཕོ་བྲང་ན་འདུག་པ་མཐོང་ངོ་། །དེ་ནས་ངང་པ་དེ་དེ་ཉིད་དུ་བབས་ཏེ་རྒྱལ་བུ་གང་ན་བར་འོངས་ཏེ། སྙིང་རྗེ་རྗེ་སྐད་ཕྱུང་སྟེ་རབ་ཏུ་དགའ་བས་རྒྱལ་བུ་ལ་བལྟའོ། །དེ་ནས་རྒྱལ་བུས་ངང་པའི་མགུལ་ནས་ཡི་གེ་བླངས་ནས་མགོ་བོས་གུས་པར་ཕྱག་འཚལ་ཏོ། །དེ་ནས་ཡི་གེ་ཕྱེ་ནས་བཀླགས་སོ། །བཀླགས་ནས་རྒྱལ་པོ་ཡབ་ཡུམ་གཉིས་ཉིན་མཚན་དུ་རྒྱལ་བུ་དྲན་པས་རྟག་ཏུ་ངུ་བས་མིག་གཉིས་ལྡོངས་པར་རྟོགས་སོ། །དེ་ནས་རྒྱལ་བུ་དགེ་དོན་གྱིས་ཇི་ལྟར་གྱུར་པ་ཞིབ་ཏུ་ཡི་གེར་བྲིས་ཏེ། ཕྱིར་ཡང་ངང་པའི་མགུལ་དུ་བཏགས་ནས་ཕྱིར་བཏང་ངོ་། །དེ་ནས་ངང་པ་རབ་ཏུ་དགའ་ཞིང་ཕྱིར་ཡུལ་བཱ་རཱ་ཎ་སཱིར་ཡབ་རྒྱལ་པོ་དང་ཡུམ་བཙུན་མོའི་དེར་འོངས་སོ། །རྒྱལ་པོས་ཡི་གེ་འོངས་པ་མཐོང་ནས་རབ་ཏུ་དགའ་མགུ་རངས་ཏེ། སྤྲོ་བ་ཚད་མེད་པར་གྱུར། རྒྱལ་བུ་དགེ་དོན་ཡང་ངན་དོན་གྱིས་རྐུ་བྱས་ཏེ། རིན་པོ་ཆེ་ཡང་ཕྲོགས་པས་སྡུག་བསྔལ་མང་པོ་མྱོང་བར་རྟོགས་སོ། །དེ་ནས་ཡབ་རྒྱལ་པོས་དེ་མ་ཐག་ཏུ་ངན་དོན་བཟུང་ནས་ལག་པ་དང་རྐང་པ་ཁོང་སྒྲིལ་དུ་བཅུག །གཉའ་བ་ཡང་ལྕགས་ཐག་གིས་བཏགས་ནས་ཁྲི་མོན་དུ་བོར་རོ། །དེ་ནས་རྒྱལ་པོ་ལི་ཤི་བར་གྱི་སྟེང་དུ་ཕོ་ཉ་བཏང་ནས་ཅིའི་ཕྱིར་རྒྱལ་བུ་བཀག་སྟེ་བདག་ཅག་མྱ་ངན་གྱིས་གདུངས་པར་བྱས་ཞེས་སྤྲིངས་སོ། །དེ་ནས་རྒྱལ་པོ་ལི་ཤི་བར་སྐྲག་ནས་རྒྱལ་བུ་དགེ་དོན་གོས་དང་རྒྱན་གྱིས་བརྒྱན་ཏེ་ས་མཚམས་སུ་བཞག་སྟེ། ཕོ་ཉ་ལ་སྤྲིང་བ་ལྟར་བྱས་ནས་རྒྱལ་བུ་དགེ་དོན་རྒྱ་མཚོ་ནས་སླར་འཁོར་ཏེ་ད་འདིར་གཤེགས་སོ་ཞེས་ཕོ་ཉ་འོངས་པ་ལྟར་བྱས་སོ། །དེའི་ཚེ་རྒྱལ་པོ་ལི་ཤི་བར་གྱིས་གང་ནས་འོངས་པའི་ས་ཕྱོགས་དེ་ཀུན་ཕྱག་དར་བྱས། ཆག་ཆག་བཏབ་ནས་རྒྱལ་མཚན་དང་། བ་དན་དང་། གདུགས་བྲེས་ཏེ། དྲིལ་བུ་དང་། རྔ་བརྡུངས་ནས་རོལ་མོ་སྣ་ཚོགས་བྱས་ཏེ། རྒྱང་མ་ནས་རྒྱལ་པོ་ཉིད་འཁོར་དང་བཅས་པས་རྒྱལ་བུ་ཕོ་བྲང་གི་ནང་ནས་བསུ་ནས་བུ་མོ་ཆུང་མར་བྱིན་ཏེ་ཡུལ་བཱ་རཱ་ཎ་སཱིར་སྐྱེལ་དུ་བཏང་ངོ་། །བཱ་རཱ་ཎ་སཱིའི་རྒྱལ་པོ་དང་། བཙུན་མོས་རྒྱལ་བུ་འོངས་ཞེས་ཐོས་ནས་རབ་ཏུ་དགའ་མགུ་རངས་
ཏེ། བལ་གྱི་གླང་པོ་ཆེ་རབ་ལ་ཞོན་ནས་རྒྱལ་བུ་བསུས་སོ། །བསུ་བའི་ས་ཕྱོགས་དེར་ཕྱག་དར་དང་ཆག་ཆག་བྱས་ཏེ། བདུག་སྤོས་དང་། བ་དན་དང་། རྒྱལ་མཚན་དང་། གདུགས་ལ་སོགས་པ་སྦྱར་ཅིང་བྲེས་ནས་རོལ་མོ་རྣམ་པ་སྣ་ཚོགས་ཀྱང་བྱས་སོ། །ཡུལ་དེ་ན་གནས་པའི་ཡུལ་མི་ཕོ་སྨོས་ཐམས་ཅད་ཀྱིས་རྒྱལ་བུ་དགེ་དོན་རྒྱ་མཚོ་ནས་བདེ་བར་ཕྱིར་འཁོར་བར་ཐོས་ནས་ཐམས་ཅད་རབ་ཏུ་དགའ་ནས་ཀུན་གྱིས་རྒྱལ་བུ་བསུས་སོ། །དེ་ནས་རྒྱལ་བུ་དགེ་དོན་གྱིས་ཡབ་རྒྱལ་པོ་དང་། ཡུམ་བཙུན་མོའི་ཞབས་ལ་མགོ་བོས་ཕྱག་འཚལ་ཏེ། རྒྱལ་པོ་དང་། བཙུན་མོ་མིག་ལྡོངས་ཏེ་རྒྱལ་བུ་མི་མཐོང་བས་ལག་པས་མནམས་བྱུགས་ནས་ཁྱོད་ངའི་བུ་དགེ་དོན་ཡིན་ནམ་ཁྱོད་རྟག་པར་དྲན་ཏེ་མྱ་ངན་གྱིས་གདུངས་པས་འདི་ལྟར་གྱུར་ཏོ། །རྒྱལ་བུས་ཡབ་རྒྱལ་པོ་དང་བཙུན་མོ་ལ་ཕྱག་བྱས་ནས་རྒྱལ་ཕྲན་རྣམས་དང་། བློན་པོ་རྣམས་དང་། མི་མང་པོ་ལ་ལག་པ་བཏེག་སྟེ་སྐད་ཆེན་པོས་སྤྲོ་བ་བསྐྱེད་དོ། །བདག་ཉོན་མོངས་ཀྱང་ཁྱོད་ཀྱི་ཡོན་ཏན་གྱིས་ཕྱིར་འཁོར་རོ་ཞེས་སྨྲས་སོ། །དེ་ནས་རྒྱལ་བུ་དགེ་དོན་གྱིས་ཡབ་རྒྱལ་པོ་ལ་བདག་གི་ནུ་བོ་ངན་དོན་ད་ལྟར་ག་རེ། གང་ན་མཆིས་ཞེས་གསོལ་པ་དང་། ཡབ་རྒྱལ་པོས་བཀའ་སྩལ་པ། ཁྱོད་དེའི་གཏམ་མ་འདྲི་ཤིག །སྡིག་པ་ཅན་དེ་ད་ལྟར་ཁྲི་མོན་ན་ཡོད་དེ་གཏང་ཞེས་བྱ་བ་མེད་དོ། །རྒྱལ་བུ་དགེ་དོན་གྱིས་གསོལ་པ། བདག་ངན་དོན་དང་ཕྲད་དུ་སྩོལ་ཅིག་ཅེས་དེ་བཞིན་དུ་ལན་གཉིས་ལན་གསུམ་གྱི་བར་དུ་ངུས་ཤིང་གསོལ་ནས་ཡིད་མ་བཟློགས་ཏེ་ཁྲི་མོན་ནས་ངན་དོན་ཕྱུང་ངོ་། །ངན་དོན་གྱི་ལག་པ་དང་། རྐང་པ་ནས་ལྕགས་དང་ཁོང་སྒྲིལ་ཕྱུངས་ཤིག་པར་གསོལ་ལོ། །དེ་ནས་བཙོན་ར་ནས་ཕྱུང་ནས་ངན་དོན་པང་དུ་འཁྱུད་ནས་ཁྱོད་རབ་ཏུ་ཉོན་མོངས་སམ་ཞེས་ཚིག་འཇམ་པོས་སྤྲོ་བ་བསྐྱེད་དེ་གཏམ་བྱས་ནས་ངའི་ནོར་བུ་རིན་པོ་ཆེ་ཁྱེར་བ་ག་རེ་ཞེས་ལན་གཉིས་ལན་གསུམ་གྱི་བར་དུ་དྲིས་པ་དང་། གདོད་སའི་འོག་ན་སྦས་ཤིང་འདུག་གོ་ཞེས་སྨྲས་སོ། །དེ་ནས་རྒྱལ་བུ་དགེ་དོན་གྱིས་གནས་དེ་ནས་རིན་པོ་ཆེ་ཕྱུང་ནས་བླངས་སོ། །དེ་ནས་ཡབ་རྒྱལ་པོ་དང་ཡུམ་བཙུན་མོའི་དྲུང་དུ་འོངས་ཏེ། ནོར་བུ་རིན་པོ་ཆེ་ལ་བདུག་སྤོས་བཟང་
པོས་བདུགས་ནས་པུས་མོ་བཙུགས་ཏེ་སྨོན་ལམ་འདི་སྐད་ཅེས་བཏབ་བོ། །ཡིད་བཞིན་གྱི་ནོར་བུ་རིན་པོ་ཆེ་ཡིན་ཡང་དག་ན་ཡབ་རྒྱལ་པོ་དང་ཡུམ་བཙུན་མོའི་སྤྱན་སྔོན་བཞིན་དུ་ཕྱིར་མཐོང་བར་ཤོག་ཤིག་ཅེས་སྨྲས་མ་ཐག་ཏུ་ཡབ་རྒྱལ་པོ་དང་ཡུམ་གཉིས་ཀྱི་སྤྱན་སྔོན་བཞིན་དུ་གསལ་བར་མཐོང་བར་གྱུར་ནས་རབ་ཏུ་དགའ་མགུ་རངས་པར་གྱུར་ཏོ། །དེའི་ཚེ་རྒྱལ་བུ་དགེ་དོན་ཟླ་བ་ཉ་བའི་དུས་ཚེས་བཅྭ་ལྔའི་ཉིན་པར་ཁྲུས་བྱས་ནས་གོས་སར་པ་གཙང་མ་གྱོན་ནས་ནོར་བུ་རིན་པོ་ཆེ་ཡང་ཏོག་གི་སྟེང་དུ་བཞག་སྟེ། ལག་ན་བདུག་སྤོས་ཀྱི་སྣོད་ཐོགས་ནས་ཡིད་བཞིན་གྱི་ནོར་བུ་རིན་པོ་ཆེ་ལ་མགོ་བོས་ཕྱག་འཚལ་ནས་འདི་སྐད་ཅེས་སྨོན་ལམ་དུ་བཏབ་བོ། །བདག་གིས་འཛམ་བུའི་གླིང་གི་སེམས་ཅན་ཐམས་ཅད་ཀྱི་ཕྱིར་སྡུག་བསྔལ་ཆེན་པོ་ཉམས་སུ་བླངས་ཏེ་ནོར་བུ་རིན་པོ་ཆེ་བླངས་སོ་ཞེས་སྨྲས་མ་ཐག་ཏུ། དེའི་ཚེ་ཤར་ཕྱོགས་ནས་རླུང་ཆེན་པོ་ལངས་ནས་སྤྲིན་དང་ན་བུན་བུས་ཏེ་ནམ་མཁའ་ཡོངས་སུ་དག་པར་བྱས་ཏེ། འཛམ་བུའི་གླིང་ན་མི་གཙང་བའི་ཉལ་ཉིལ་དང་། བཤང་གཅི་དང་། ཕྱག་དར་དང་། མི་སྡུག་པ་ཐམས་ཅད་རླུང་གིས་བུས་ཏེ་ཡོངས་སུ་དག་པར་བྱས་ནས་ནོར་བུ་རིན་པོ་ཆེའི་བྱིན་གྱིས་འཛམ་བུའི་གླིང་དུ་མ་རྨོས་པར་རང་གྲུབ་པའི་འབྲས་སཱ་ལུ་ཆར་བཞིན་དུ་བབ་ནས་འབྲས་སཱ་ལུ་དེ་ཡང་འཇམ་ཞིང་ཁ་དོག་དང་རོར་ལྡན་པ། ཤང་ཤོང་ཐམས་ཅད་ཀྱང་གང་ནས་པུས་མོ་ནུབ་ཙམ་དུ་བབ་བོ། །དེའི་འོག་ཏུ་བགོ་བའི་གོས་དམ་པ་དང་། ལུས་ཀྱི་རྒྱན་གདུབ་དང་། ནོར་བུ་དང་གདུ་བུ་ལ་སོགས་པ་ཆར་བཞིན་དུ་བབ་བོ། །དེའི་འོག་ཏུ་གསེར་དང་། དངུལ་དང་། རིན་པོ་ཆེ་སྣ་བདུན་དང་། དེ་ལ་སོགས་ཏེ་རོལ་མོ་སྣ་ཚོགས་དང་། མདོར་ན་སེམས་ཅན་ཐམས་ཅད་ཀྱི་དགོས་པའི་ཡོ་བྱད་ཅི་འདོད་པ་ཐམས་ཅད་ཆར་བཞིན་དུ་བབ་ནས་ཐམས་ཅད་ཆོག་ཅིང་ཚིམ་པར་བྱས་སོ། །བྱང་ཆུབ་སེམས་དཔའི་སྙིང་རྗེ་ཆེན་པོའི་ཤུགས་ཀྱིས་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་དེ། སེམས་ཅན་ཐམས་ཅད་ལ་དགོས་པའི་ཡོ་བྱད་ཆོག་པར་སྦྱིན་པའི་དོན་ནི་འདི་ལྟ་བུ་ཡིན་ནོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། དེའི་ཚེ་དེའི་དུས་ན་ཡུལ་
བཱ་རཱ་ཎ་སཱིའི་རྒྱལ་པོ་ཆེན་པོ་དེ་གཞན་ཞིག་ཡིན་སྙམ་དུ་སེམས་ན་དེ་ལྟར་མི་བལྟའོ། །དེའི་ཚེ་དེའི་དུས་ན་རྒྱལ་པོ་ཆེན་པོ་དེ་ནི་ད་ལྟར་ངའི་ཡབ་རྒྱལ་པོ་ཟས་གཙང་མ་ཡིན་ནོ། །དེའི་ཚེ་དེའི་དུས་ན་བཙུན་མོ་དེ་གཞན་ཞིག་ཡིན་སྙམ་དུ་སེམས་ན་དེ་ལྟར་མི་བལྟའོ། །དེའི་ཚེ་དེའི་དུས་ན་བཙུན་མོར་གྱུར་པ་དེ་ནི་ད་ལྟར་ངའི་ཡུམ་ལྷ་མཛེས་ཡིན་ནོ། །དེའི་ཚེ་དེའི་དུས་ན་རྒྱལ་བུ་ངན་དོན་དེ་ནི་ད་ལྟར་ལྷ་སྦྱིན་ཉིད་ཡིན་ནོ། །དེའི་ཚེ་དེའི་དུས་ན་རྒྱལ་བུ་དགེ་དོན་དེ་ནི་ད་ལྟར་ང་ཉིད་ཡིན་ཏེ། ལྷ་སྦྱིན་འདི་ནི་སྔོན་འདས་པའི་དུས་ན་ཡང་ང་ལ་རྒྱུན་དུ་ངན་སེམས་ཀྱིས་ང་ལ་གནོད་པ་བྱས་ཀྱང་ངས་ནི་བཟོད་པ་རྟག་ཏུ་དང་དུ་བླངས་ནས་རྟག་ཏུ་དེ་ལ་དྲིན་བྱིན་པས་རྒྱུན་དུ་བདེ་བར་བྱས་ན། ད་མངོན་པར་སངས་རྒྱས་པ་ན་ལྟ་སྨོས་ཀྱང་ཅི་དགོས། བཅོམ་ལྡན་འདས་ཀྱིས་དེ་སྐད་ཅེས་གསུངས་པ་ན་ལྷ་དང་མི་བརྒྱ་སྟོང་སྙེད་རྒྱུན་དུ་ཞུགས་པའི་འབྲས་བུ་ཐོབ་པ་ནས་དགྲ་བཅོམ་པའི་འབྲས་བུའི་བར་དུ་ཐོབ་པར་གྱུར་ཏོ། །གཞན་ཡང་ལྷ་དང་མི་ཚད་མེད་པ་བརྒྱ་སྟོང་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས། སེམས་ཅན་ཚད་མེད་པ་བརྒྱ་སྟོང་སྙེད་ཉན་ཐོས་དང་། རང་སངས་རྒྱས་ཀྱི་བར་དུ་སེམས་བསྐྱེད་པར་གྱུར་ཏོ། །ཀུན་དགའ་བོས་སངས་རྒྱས་ལ་གསོལ་པ། བཅོམ་ལྡན་འདས་མདོ་སྡེ་འདིའི་མིང་ཅི་ཞེས་བགྱི། ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། མདོ་སྡེ་འདིའི་མིང་ཐབས་མཁས་པ་སངས་རྒྱས་དྲིན་ལན་བསབ་པ་སེམས་ཅན་ཐམས་ཅད་ལ་ཚིམ་པར་སྦྱིན་པ་ཞེས་བྱའོ། །འཁོར་མང་པོ་རྣམས་མདོ་སྡེ་འདི་གསུངས་པ་ལ་རབ་ཏུ་དགའ་ནས་ཕྱག་བྱས་ཏེ་ཕྱིར་དོང་ངོ་། །གཞན་ཡང་ལྷ་སྦྱིན་ནི་སངས་རྒྱས་ཀྱིས་བསྟན་པའི་རྗེས་སུ་རབ་ཏུ་བྱུང་མོད་ཀྱི། ཁེ་བཀུར་དང་རྙེད་པའི་ཕྱིར་རྒྱུན་དུ་ཕྲག་དོག་བྱེད་དེ། ལྷ་སྦྱིན་མདོ་སྡེ་སྤོས་ཀྱི་གླང་པོ་ཆེའི་ཁལ་དྲུག་ཁྲི་སྙེད་ཁ་དོན་དུ་འདོན་ཤེས་ཀྱང་མཚམས་མེད་པའི་སེམས་ཅན་དམྱལ་བ་ལས་མ་ཐར་རོ། །དེའི་ཚེ་ན་ལྷ་སྦྱིན་རྒྱལ་པོ་མ་སྐྱེས་དགྲ་དང་རབ་ཏུ་མཛའ་ནས་གཅིག་ལ་གཅིག་དགའ་ཞིང་ཉེ་བར་སེམས་ཏེ། གཅིག་གི་ཚིག་ལ་གཅིག་ཡིད་ཆེས་སོ། །དེ་ནས་ལྷ་སྦྱིན་གྱིས་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །ཁྱོད་ནི་རྒྱལ་པོ་སར་
པ་བྱོས་ཤིག །བདག་ནི་སངས་རྒྱས་སར་པ་བགྱིའོ། །རྒྱལ་པོ་མ་སྐྱེས་དགྲས་སྨྲས་པ། ད་ལྟར་ཡབ་རྒྱལ་པོ་ཡང་བཞུགས་པས་དེ་ལྟར་མི་རུང་ངོ་། །ལྷ་སྦྱིན་གྱིས་སྨྲས་པ། དེ་མེད་པར་བྱར་རུང་ངོ་། །བདག་ཀྱང་སངས་རྒྱས་མེད་པར་བྱས་ལ། དེའི་འོག་ཏུ་རྒྱལ་པོ་སར་པ་དང་། སངས་རྒྱས་སར་པས་སེམས་ཅན་གྱི་དོན་བྱས་པ་མི་སྐྱིད་དམ། དེ་ནས་རྒྱལ་པོ་མ་སྐྱེས་དགྲས་ལྷ་སྦྱིན་གྱིས་སྨྲས་པ་བཞིན་ཡབ་རྒྱལ་པོ་བཀྲོངས་ཏེ་རྒྱལ་པོའི་ཁབ་ཡུལ་བཱ་རཱ་ཎ་སཱི་གཟུང་ངོ་། །ལྷ་སྦྱིན་གྱིས་རྒྱལ་པོ་མ་སྐྱེས་དགྲ་ལ་སྨྲས་པ། བདག་ཀྱང་དེ་བཞིན་གཤེགས་པ་མེད་པར་བྱའོ། །མ་སྐྱེས་དགྲས་སྨྲས་པ། དེ་བཞིན་གཤེགས་པ་ནི་རྫུ་འཕྲུལ་ཆེན་པོའི་མཐུ་མངའ་བས་གཞན་གྱིས་བསམ་པའི་སེམས་ཤེས་ན་ཁྱོད་ཀྱིས་ཇི་ལྟར་མེད་པར་བྱ་བར་ནུས། དེ་བཞིན་གཤེགས་པ་ལ་གཞན་ཡང་ཉེ་གནས་ཆེན་པོ་ཤཱ་རིའི་བུ་དང་། མཽང་གལ་གྱི་བུ་ཆེན་པོ་དང་། ན་བུན་དང་། མ་འགགས་པ་ལ་སོགས་པ་ཡོད་པས་མི་ནུས་སོ། །ལྷ་སྦྱིན་གྱིས་རྒྱལ་པོ་མ་སྐྱེས་དགྲ་ལ་སྨྲས་པ། རྒྱལ་པོ་ཁྱོད་ཀྱིས་བདག་གི་གྲོགས་གྱིས་ཤིག །རྒྱལ་པོས་སྨྲས་པ། ཁྱོད་ལས་ཅི་ཞིག་བྱེད་པར་སེམས། ལྷ་སྦྱིན་གྱིས་སྨྲས་པ། རྒྱལ་པོ་ཆེན་པོས་ཡུལ་ཕྱོགས་སུ་བཀར་བཏགས་ཏེ། སུ་ཡང་དགེ་སློང་རྣམས་ལ་གོས་དང་། བཟའ་བ་དང་། བཏུང་བ་དང་། བསོད་སྙོམས་བྱིན་དུ་མ་སྩལ་ཅིག །དེ་ནས་རྒྱལ་པོ་མ་སྐྱེས་དགྲས་ཀྱང་བཀར་བཏགས་ཏེ། དགེ་སློང་རྣམས་ལ་སུ་ཡང་གོས་དང་། ཟས་དང་། བསོད་སྙོམས་སྦྱིན་པར་གྱུར་ན་རྐང་ལག་བཅད་དོ་ཞེས་བཀར་བཏགས་སོ། །དེའི་ཚེ་བཅོམ་ལྡན་འདས་དགེ་སློང་གི་དགེ་འདུན་ཆེན་པོའི་འཁོར་དང་བཅས་ཏེ། བྱ་རྒོད་སྤུངས་པའི་རི་ནས་བསོད་སྙོམས་ སློང་དུ་སོང་བ་ལས་ཅི་ཡང་མ་རྙེད་དོ། །དེ་བཞིན་དུ་ཞག་གཅིག་ནས་ཞག་བདུན་གྱི་བར་དུ་ཅི་ཡང་མ་རྙེད་པས་ཤཱ་རིའི་བུ་ལ་སོགས་པ་སློབ་མ་ཆེན་པོ་རྣམས་ནི་རྫུ་འཕྲུལ་གྱི་མཐུས་ཡུལ་ཁམས་གཞན་དུ་གོས་དང་། ཟས་དང་། བསོད་སྙོམས་སློང་དུ་སོང་ངོ་། །དེའི་ཚེ་ན་ལྷ་སྦྱིན་གྱིས་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །ད་ལྟར་སངས་རྒྱས་ཀྱི་སློབ་མ་ཆེན་པོ་གཅིག་ཀྱང་མེད་དེ། དེ་བཞིན་གཤེགས་པ་གཅིག་པུ་བཞུགས་ཀྱིས་རྒྱལ་པོས་དེ་བཞིན་གཤེགས་པ་སྤྱན་འདྲེན་
དུ་ཐོང་ཤིག །ཕོ་བྲང་གི་ནང་དུ་འོངས་ན་བདག་ཅག་གིས་བལ་གྱི་གླང་པོ་ཆེ་ནག་པོ་མ་རུངས་པ་ལྔ་བརྒྱ་ལ་ཆང་བླུད་དེ་རབ་ཏུ་མྱོས་པར་བྱས་ལ་སངས་རྒྱས་སྤྱན་དྲངས་ཏེ། ཕོ་བྲང་གི་ནང་དུ་འོངས་ནས་བལ་གླང་རྨིས་ཤིང་མྱོས་པ་དེ་དག་གིས་བརྫིས་ཏེ་གསད་པར་བྱའོ། །དེ་ནས་རྒྱལ་པོ་མ་སྐྱེས་དགྲས་དེ་བཞིན་གཤེགས་པ་སྤྱན་འདྲེན་དུ་བཏང་ནས། སངས་རྒྱས་དང་། དགྲ་བཅོམ་པ་ལྔ་བརྒྱ་རྒྱལ་པོས་སྤྱན་དྲངས་པར་གཤེགས་པར་གནང་སྟེ་རྒྱལ་པོའི་ཁབ་ཏུ་གཤེགས་སོ། །དེ་ནས་རྒྱལ་པོ་མ་སྐྱེས་དགྲས་བལ་གླང་རྨིས་ཤིང་མྱོས་པ་ལྔ་བརྒྱ་བཀྱེ་ནས་བལ་གླང་རྨིས་པས་ཤིང་བཅག་ར་བ་ཡང་དྲལ། རྩིག་པ་ཡང་བསྒྱེལ་ཏེ་ངར་བའི་སྒྲ་ཆེན་པོ་ཕྱུང་སྟེ། དེ་བཞིན་གཤེགས་པ་དང་དགྲ་བཅོམ་པ་ལྔ་བརྒྱའི་ལོགས་སུ་མཆོངས་ཏེ་སོང་ངོ་། །དེ་ནས་དགྲ་བཅོམ་པ་ལྔ་བརྒྱ་རབ་ཏུ་སྐྲག་ནས་སྟེང་གི་ནམ་མཁའ་ལ་འཕགས་ཏེ་སངས་རྒྱས་ཀྱི་སྟེང་གི་ནམ་མཁའ་ལ་འཁོད་དོ། །དེའི་ཚེ་ཀུན་དགའ་བོ་འབའ་ཞིག་དེ་བཞིན་གཤེགས་པ་དང་མ་བྲལ་ཏེ་འདུག་གོ །དེའི་ཚེ་དེ་བཞིན་གཤེགས་པས་བྱམས་པ་དང་སྙིང་རྗེའི་ཤུགས་ཀྱིས་ཕྱག་གཡས་པ་བཏེགས་ནས་ཕྱག་སོར་ལྔ་ལས་སེང་གེ་ཁ་གདངས་ཤིང་སྒྲ་ཆེན་པོ་སྒྲོགས་པར་སྤྲུལ་ནས་བལ་གླང་རྨིས་པ་ལྔ་བརྒྱ་འཇིགས་སྐྲག་ནས་ས་ལ་འགྱེལ་ཏོ། །དེ་ནས་དེ་བཞིན་གཤེགས་པ་འཁོར་མང་པོས་བསྐོར་ཏེ་རྒྱལ་པོའི་ཕོ་བྲང་དུ་གཤེགས་ནས་རྒྱལ་པོ་མ་སྐྱེས་དགྲ་ཕྱི་རོལ་དུ་བྱུང་སྟེ། དེ་བཞིན་གཤེགས་པ་བསུ་ནས་གདན་ལ་བཞུགས་སུ་གསོལ་ལོ། །གདན་ལ་བཞུགས་ནས་མཐོལ་ཞིང་འགྱོད་ཚངས་བྱས་ཏེ། སངས་རྒྱས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ནི་བདག་གིས་བགྱིས་པ་ནི་མ་ལགས་སོ། །ལྷ་སྦྱིན་གྱིས་བགྱིད་དུ་སྩལ་ལོ། །བཅོམ་ལྡན་འདས་ཀྱིས་བཀའ་སྩལ་པ། དེ་ངས་ཤེས་ཏེ་ལྷ་སྦྱིན་འདིས་རྟག་ཏུ་ང་ལ་གནོད་པ་བྱས་ཏེ། ད་ལྟར་འབའ་ཞིག་ཏུ་མ་ཟད་དེ། འདས་པའི་དུས་ན་ཡང་རྟག་ཏུ་ང་ལ་གནོད་པ་བྱས་ན་ཡང་ངས་ནི་ཐུགས་རྗེ་ཆེན་པོའི་ཤུགས་ཀྱིས་རྟག་ཏུ་ཕན་པ་བྱས་སོ། །དེའི་ཚེ་རྒྱལ་པོ་མ་སྐྱེས་དགྲས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ལྷ་སྦྱིན་འདིས་སྔོན་འདས་པའི་དུས་ན་དེ་བཞིན་གཤེགས་པ་ལ་གནོད་པ་བགྱིས་པ་གང་དང་གང་ལགས། བཅོམ་
ལྡན་འདས་ཀྱིས་བཀའ་སྩལ་པ། ལེགས་པར་ཉོན་ཅིག་དང་དགྲོལ་ཞིང་བཤད་པར་བྱའོ། །སྔོན་འདས་པའི་དུས་ན་བསྐལ་པ་གྲངས་མེད་པ་འདས་པའི་ཕ་རོལ་ན་རྒྱལ་པོ་ཆེན་པོ་ངང་པའི་ཤ་ལ་དགའ་བ་ཞིག་བྱུང་སྟེ། རྒྱུན་དུ་རྔོན་པ་ཞིག་བྱ་ངང་པ་ཤོར་དུ་བཅུག་གོ །དེའི་ཚེ་བྱ་ངང་པ་ལྔ་བརྒྱ་ཞིག་བྱང་ཕྱོགས་ནས་ནམ་མཁའ་ལ་ལྷོ་ཕྱོགས་སུ་འཕུར་བ་ལས་ངང་པའི་རྒྱལ་པོ་དེ་རྔོན་པའི་བྱ་རྒྱ་ལ་ཟིན་ནོ། །དེའི་ཚེ་རྔོན་པ་དེ་རབ་ཏུ་དགའ་བའི་སེམས་སུ་གྱུར་ནས་སྤྱིལ་བུ་ནས་བྱུང་སྟེ། གསད་པར་གཟས་པ་ལས། ངང་པ་མོ་ཞིག་འཕུར་ཏེ་དྲུང་དུ་འོངས་ནས་སྙིང་རྗེ་རྗེ་སྐད་དུ་ཟེར་བའི་སྒྲ་བྱུང་ངོ་། །དེ་ནས་རྔོན་པ་དེས་གཞུ་བདུངས། མདའ་ལྟོང་དུ་བཅུག་སྟེ་གསད་པར་གཟས་ན་ཡང་མདས་མ་སྐྲག་སྟེ། འདབ་མ་གཉིས་བརྡབས་ནས་ངང་པའི་རྒྱལ་པོའི་སྟེང་དུ་མཆོངས་སོ། །ངང་པ་ཕལ་ལྔ་བརྒྱ་ཡང་དེའི་སྟེང་གི་ནམ་མཁའ་ལ་འཁོར་ཞིང་ལྡིང་ངོ་། །དེའི་ཚེ་ན་རྔོན་པ་དེས་ངང་མོ་དེ་སྙིང་རྗེ་བའི་སྐད་ཕྱུང་སྟེ། ཁ་ནས་ཁྲག་སྐྱུག་ཅིང་སྲོག་ལ་ཡང་མི་ལྟ་བར་ངང་པའི་རྒྱལ་པོ་ལ་ཆགས་པ་མཐོང་ནས་རྔོན་པ་དེ་འདི་སྙམ་དུ། དུད་འགྲོའི་སྐྱེ་གནས་སུ་གྱུར་པའི་བྱ་ཡང་འདི་ལྟར་གཅིག་ལ་གཅིག་ཆགས་ཏེ་ལུས་དང་སྲོག་ཀྱང་འདོར་ན། བདག་ཇི་ལྟ་བུའི་སྙིང་ཞིག་ངང་པའི་རྒྱལ་པོ་འདི་གསད་སྙམ་བསམས་ནས་བྱ་རྒྱ་བཏེག་སྟེ་བཏང་ངོ་། །དེའི་ཚེ་ངང་མོ་ཡང་རབ་ཏུ་དགའ་སྟེ་ཕྱི་བཞིན་འཕུར་ཏེ། ངང་པ་ལྔ་བརྒྱས་བསྐོར་ནས་ནམ་མཁའ་ལ་འཕུར་ཏེ་སོང་ངོ་། །དེའི་ཚེ་རྔོན་པ་དེས་རྒྱལ་པོ་ལ་འདི་སྐད་ཅེས་གསོལ་ཏོ། །བདག་གིས་ངང་པའི་རྒྱལ་པོ་གཅིག་ཟིན་ཏེ་དབུལ་བར་བགྱིས་པ་ལས་ངང་པ་མོ་ཞིག་ཁ་ནས་ཁྲག་སྐྱུག་ཅིང་མདའ་གཞུ་ལ་ཡང་མི་འཛེམ་པར་ངང་པའི་རྒྱལ་པོའི་སྟེང་དུ་མཆོངས་པས་བདག་སྙིང་གིས་མ་བཟོད་ནས་བཏང་བ་ལས་ངང་པ་ལྔ་བརྒྱས་བསྐོར་ནས་ནམ་མཁའ་ལ་འཕུར་ཏེ་སོང་ངོ་། །དེའི་ཚེ་རྒྱལ་པོ་དེ་ཚིག་དེ་ཐོས་ནས་སེམས་མི་བདེ་བར་གྱུར་ཏེ། སྙིང་རྗེ་བའི་སེམས་སྐྱེས་ནས་དུད་འགྲོའི་སྐྱེ་གནས་སུ་གྱུར་པ་ལ་ཡང་གཅིག་ལ་གཅིག་ཆུ་གང་བྱེད་དེ། ལུས་དང་སྲོག་ཀྱང་མི་ཕངས་སོ་སྙམ་བསམས་ནས་རྒྱལ་པོ་ཡང་ངང་པའི་ཤ་མི་ཟ་བར་ཡི་དམ་བཅས་སོ། །དེའི་ཚེ་དེའི་དུས་ན་རྒྱལ་པོ་ཆེན་པོ་དེ་ནི། ད་ལྟར་
རྒྱལ་པོ་ཆེན་པོ་ཉིད་ཡིན་ནོ། །དེའི་ཚེ་དེའི་དུས་ན། རྔོན་པར་གྱུར་པ་དེ་ནི་ད་ལྟར་ལྷ་སྦྱིན་ཉིད་ཡིན་ནོ། །དེའི་ཚེ་དེའི་དུས་ན་ངང་པ་མོ་ཁ་ནས་ཁྲག་སྐྱུག་པ་དེ་ནི་ད་ལྟར་ཀུན་དགའ་བོ་ཡིན་ནོ། །དེའི་ཚེ་དེའི་དུས་ན་ངང་པ་ལྔ་བརྒྱ་ནི་ད་ལྟར་དགྲ་བཅོམ་པ་ལྔ་བརྒྱ་ཡིན་ནོ། །དེའི་ཚེ་དེའི་དུས་ན་ངང་པའི་རྒྱལ་པོར་གྱུར་པ་དེ་ནི་ད་ལྟར་ང་ཡིན་ནོ། །དེ་བས་ན་དེ་ལྟར་ཀུན་དགའ་བོས་ད་ལྟར་ང་ལ་ཆགས་པ་ཡང་སྔོན་དང་འདྲའོ། །དེའི་ཚེ་དེའི་དུས་ན་དགྲ་བཅོམ་པ་ལྔ་བརྒྱ་སྟེང་གི་ནམ་མཁའ་ལ་འཕགས་པ་ཡང་སྔོན་གྱུར་པ་དང་འདྲའོ། །དེའི་ཚེ་ན་ཡང་ལྷ་སྦྱིན་ང་ལ་གནོད་པ་བྱེད་པ་ཡང་ངས་ནི་སྙིང་རྗེ་ཆེན་པོའི་ཤུགས་ཀྱིས་རྒྱུན་དུ་ཕན་པའི་དོན་བྱས་སོ། །ཆོས་འདི་བསྟན་པའི་ཚེ་ལྷ་དང་མི་བརྒྱ་སྟོང་སྙེད་འབྲས་བུ་དང་པོ་ཐོབ་པ་ནས་འབྲས་བུ་བཞི་པའི་བར་དུ་ཐོབ་པར་གྱུར་ཏོ། །ལ་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་ཉན་ཐོས་དང་། རང་སངས་རྒྱས་ཀྱི་བར་དུ་སེམས་བསྐྱེད་པར་གྱུར་ཏོ། །གཞན་ཡང་ལྷ་སྦྱིན་ངན་སེམས་མ་ཞི་ནས་འདི་སྙམ་དུ་བདག་གི་སོར་མོ་བཅུའི་སེན་མོ་རིང་དུ་སྐྱེས་ལ། སེན་མོའི་བར་དུ་དུག་བཅུག་ལ་དེ་བཞིན་གཤེགས་པ་གང་ན་བར་སོང་ལ་མགོ་བོས་ཞབས་ལ་ཕྱག་འཚལ་ཏོ། །དེ་ལྟར་ཕྱག་འཚལ་ཏེ་ཞབས་ལ་བཟུང་བའི་ཚེ་སེན་མོ་བཅུའི་འོག་ན་དུག་ཡོད་པས་ཞབས་ལ་བསྐུས་ཏེ། དུག་ལངས་ནས་གདོན་མི་ཟ་བར་ཚེའི་དུས་བྱེད་པར་འགྱུར་རོ་སྙམ་བསམས་ནས། ཇི་ལྟར་བསམས་པ་ལྟར་དེ་བཞིན་གཤེགས་པ་གང་ན་བར་སོང་ནས་དེར་ཕྱིན་པ་དང་། ཞབས་ལ་མགོ་བོས་ཕྱག་འཚལ་ནས་ཞབས་ལ་ལག་པས་བཟུང་སྟེ་དུག་བསྐུས་པ་དང་། དེའི་ཚེ་དུག་དེ་དག་ནི་ཟིལ་དངར་དུ་གྱུར་ཏེ་དེ་བཞིན་གཤེགས་པ་ལ་གནོད་པར་མ་གྱུར་ཏོ། །དེ་ལྟར་ལྷ་སྦྱིན་གྱིས་བསམས་པ་ལྟར་མ་གྱུར་ནས་ཡང་འདི་སྙམ་དུ་དེ་བཞིན་གཤེགས་པ་ད་ལྟར་བྱ་རྒོད་སྤུངས་པའི་རི་ལ་གཅིག་པུ་བཞུགས་ཀྱིས། རི་དེའི་སྟེང་དུ་སོང་ལ་ཕ་བོང་རྦབ་ཏུ་བཏང་ལ་གསད་པར་བྱའོ་སྙམ་བསམས་ནས་རིའི་རྩེ་མོར་སོང་སྟེ་རྦབ་བཏང་བ་ལས། སངས་རྒྱས་ཀྱི་ཞབས་ཀྱི་མཐེའུ་ཆུང་རྨས་ཀྱང་ངའི་ཐུགས་རྗེ་ཆེན་པོའི་ཤུགས་ཀྱིས་དགྲ་དང་གཉེན་ལ་མཉམ་སྙོམས་སོ། །གཞན་ཡང་ལྷ་སྦྱིན་གྱིས་སྔོན་འདས་པའི་དུས་
བསྐལ་པ་གྲངས་མེད་པའི་ཕ་རོལ་དེའི་ཚེ་དེའི་དུས་ན། སངས་རྒྱས་བཅོམ་ལྡན་འདས་རིགས་པར་སྟོན་པ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། སྟོན་པ་རྒྱལ་བ་འཇིག་རྟེན་དུ་བྱུང་ངོ་། །སངས་རྒྱས་དེ་མྱ་ངན་ལས་འདས་ནས་གཟུགས་བརྙན་ལ་ཆོས་སྤྱོད་པའི་ཚེ་བསམ་གཏན་བྱེད་པའི་དགེ་སློང་ཞིག་དགོན་པའི་ཚལ་ན་འདུག་པ་ལས་དེའི་ཚེ་དགེ་སློང་དེ་ལ་ཤིག་མང་དུ་ཟའོ། །དེ་ནས་དགེ་སློང་དེས་ཤིག་དང་འདི་སྐད་དུ་དམ་བཅས་སོ། །ཁོ་བོ་བསམ་གཏན་བྱེད་པའི་ཚེ་ཁྱེད་མ་འགུལ་བར་ཡིབ་ཅིང་སྡོད་ཅིག་ཅེས་དམ་བཅས་ནས་ཤིག་རྣམས་ཀྱང་དེ་བཞིན་དུ་བྱེད་དོ། །དེ་ནས་དུས་གཞན་ཞིག་ན་འཇི་བ་ཞིག་དེར་འོངས་ནས་ཤིག་ལ་འདི་སྐད་ཅེས་སོ། །ཁྱོད་ལ་འདི་ལྟར་ཚོ་ཞིང་ཉམ་མཚག་བཟང་བ་ཅི་ལས་གྱུར་ཅེས་དྲིས་ན། ཤིག་གིས་སྨྲས་པ། བདག་གི་གནས་པོ་རྟག་ཏུ་བསམ་གཏན་བྱེད་པ་དེས་བདག་ཅག་གི་ཟས་དང་སྐོམ་དུས་ལས་མི་ཡོལ་བར་དུས་བཞིན་དུ་ཟ་བས་ན་ཉམ་མཚག་བཟང་བ་ཡིན་ནོ། །འཇི་བས་སྨྲས་པ། བདག་ཀྱང་ཁྱེད་དང་ལྷན་ཅིག་ཏུ་འདུག་གོ་ཞེས་སྨྲས་ནས་དེ་ན་ལྷན་ཅིག་ཏུ་འདུག་གོ །དེའི་ཚེ་དགེ་སློང་དེ་བསམ་གཏན་བྱེད་པ་ལས་འཇི་བ་དེས་ཤ་དང་ཁྲག་གི་དྲི་ཚོར་ནས་དགེ་སློང་དེ་ལ་བཙུགས་སོ། །དེ་ནས་དགེ་སློང་དེ་སེམས་འཁྲུགས་ནས་གོས་ཕུད་དེ་མེའི་ནང་དུ་བོར་ནས་བསྲེགས་སོ། །དེའི་ཚེ་དེའི་དུས་ན་བསམ་གཏན་བྱེད་པའི་དགེ་སློང་དེ་ནི་སངས་རྒྱས་འོད་སྲུང་ཡིན་ནོ། །དེའི་ཚེ་དེའི་དུས་ན་འཇི་བ་དེ་ནི་ལྷ་སྦྱིན་ཉིད་ཡིན་ནོ། །དེའི་ཚེ་དེའི་དུས་ན་ཤིག་ཏུ་གྱུར་པ་དེ་ནི་ད་ལྟར་ང་ཡིན་ནོ། །ལྷ་སྦྱིན་དེ་ཁེ་བཀུར་དང་རྙེད་པའི་ཕྱིར་ང་ལ་གནོད་པར་བྱས་ན་ད་མངོན་པར་སངས་རྒྱས་ན་ཡང་ཁེ་བཀུར་དང་གྲགས་པའི་ཕྱིར་སངས་རྒྱས་ཀྱི་སྐུ་ལ་ཁྲག་ཕྱུང་བ་སེམས་ཅན་དམྱལ་བ་ཆེན་པོར་ལྷུང་ངོ་། །ལྷ་སྦྱིན་གྱིས་རྟག་ཏུ་ང་ལ་ངན་སེམས་ཀྱིས་དེ་བཞིན་གཤེགས་པ་ལ་གནོད་པ་བྱས་པ་ནི་བསྐལ་པར་ཡང་བརྗོད་ཀྱིས་མི་རྫོགས་ཏེ། དེ་བཞིན་གཤེགས་པ་ནི་རྟག་ཏུ་ཐུགས་རྗེ་ཆེན་པོས་བྱམས་ཤིང་བརྩེ་བའི་ཐུགས་ཀྱིས་
བསྐྱབས་སོ། །ང་ནི་ལྷ་སྦྱིན་དང་ཕྲད་པས་མྱུར་དུ་སངས་རྒྱས་སུ་གྲུབ་པར་གྱུར་ཏེ། དྲིན་དྲན་པའི་ཕྱིར་རྟག་ཏུ་ཐུགས་རྗེས་བསྐྱབས་སོ། །དེའི་ཚེ་ན་དེ་བཞིན་གཤེགས་པས་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཁྱེད་སེམས་ཅན་དམྱལ་བའི་ནང་དུ་སོང་ལ་ལྷ་སྦྱིན་ཁྱོད་སྡུག་བསྔལ་གྱིས་རབ་ཏུ་ཉོན་མོངས་སམ་ཞེས་དྲིས་ལ་ཤོག་ཤིག །དེ་ནས་ཀུན་དགའ་བོས་སངས་རྒྱས་ཀྱི་བཀའ་བཞིན་དུ་སེམས་ཅན་དམྱལ་བའི་ནང་དུ་སོང་ནས་དམྱལ་བའི་སྒོར་ཕྱིན་ཏེ། དམྱལ་བའི་སྲུངས་མ་ཨ་བང་ལ་ཁྱོད་ལྷ་སྦྱིན་བོས་ཤིག་ཅེས་སྨྲས་སོ། །ཨ་བང་གིས་སྨྲས་པ། ཁྱོད་སངས་རྒྱས་གང་གི་ལྷ་སྦྱིན་འདོད། འདས་པའི་སངས་རྒྱས་ཐམས་ཅད་ལ་ཡང་ལྷ་སྦྱིན་ཞེས་བྱ་བ་ཡོད་དོ་ཞེས་སྨྲས་ནས། དེ་ནས་ཨ་བང་གིས་ལྷ་སྦྱིན་ལ་ཀུན་དགའ་བོ་ད་ལྟར་སྒོའི་ཕྱི་རོལ་ན་སྡོད་དེ་ཁྱོད་དང་ཕྲད་དགོས་སོ་ཞེས་ཟེར་རོ། །ལྷ་སྦྱིན་དེར་འོངས་ཏེ་ཀུན་དགའ་བོ་ལ་ལེགས་པར་འོངས་སམ། ཅི་དེ་བཞིན་གཤེགས་པ་གསུང་བདག་ལ་ད་ལྟར་མཚམས་མེད་པའི་སེམས་ཅན་དམྱལ་བ་འདི་ན་བདེ་བ་ནི་དགེ་སློང་བསམ་གཏན་གསུམ་པ་ལ་ཞུགས་པའི་བདེ་བ་ཐོབ་པ་དང་འདྲའོ། །བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་དཔའ་ཆེན་པོ་སེམས་ཅན་གྱི་དོན་དུ་ཐབས་མཁས་པ་ཆེན་པོས་སྐྱེ་ཤིའི་འཁོར་བའི་སྡུག་བསྔལ་ཆེན་པོ་གྲངས་མེད་པ་མྱོང་ངོ་། །ཡང་དེ་ལ་གནོད་པར་མི་འཛིན་ཏོ། །གང་ཞིག་ལྷ་སྦྱིན་ནི་ཡང་དག་པར་སྡིག་པ་ཅན་ཡིན་ཏེ། མཚམས་མེད་པའི་སེམས་ཅན་དམྱལ་བར་ལྟུང་སྙམ་སེམས་ན་དེ་ནི་གནས་མེད་དོ། །དེའི་ཚེ་དེ་བཞིན་གཤེགས་པ་ལས་འཁོར་མང་པོ་རྣམས་ལྷ་སྦྱིན་གྱི་སྤྱོད་པ་ཐབས་མཁས་པ་ཤིན་ཏུ་ཟབ་མོ་འདི་གསུངས་པ་ཐོས་ནས་བྱང་ཆུབ་སེམས་དཔའ་ཚད་མེད་པ་བརྒྱ་སྟོང་སྙེད་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ལྷ་དང་མི་ཚད་མེད་པ་བརྒྱ་སྟོང་སྙེད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ལྷ་དང་མི་ཚད་མེད་པ་བརྒྱ་སྟོང་སྙེད་ནི་རྒྱུན་དུ་ཞུགས་པའི་འབྲས་བུ་ཐོབ་པ་ནས་དགྲ་བཅོམ་པའི་འབྲས་བུའི་བར་དུ་ཐོབ་པར་གྱུར་ཏོ། །དེའི་ཚེ་བར་སྣང་གི་ལྷ་རྣམས་ཀྱིས་སྟེང་གི་ནམ་མཁའ་ལས་ལྷ་རྫས་ཀྱི་མེ་ཏོག་ཆར་བཞིན་དུ་ཕབ། ལྷ་རྫས་
ཀྱི་རོལ་མོ་བྱས་ནས་འོད་ཟེར་ཆེན་པོས་ཀུན་ཏུ་སྣང་བར་བྱས་ཏེ། དེ་བཞིན་གཤེགས་པས་གསུངས་པ་ངོ་མཚར་ཆེ་སྟེ་དགེའོ་ཞེས་བསྟོད་དོ། །བཅོམ་ལྡན་འདས་ཀྱིས་དེ་སྐད་ཅེས་གསུངས་པ་ལ་འཁོར་མང་པོ་མངོན་པར་དགའ་ནས་མགོ་བོས་ཕྱག་འཚལ་ཏེ་ཕྱིར་དོང་ངོ་། །ཐབས་མཁས་པ་ཆེན་པོ་སངས་རྒྱས་དྲིན་ལན་བསབ་པའི་མདོ་ལས་ངན་དོན་གྱི་ལེའུ་ཞེས་བྱ་སྟེ་དྲུག་པའོ།། །།