དགུ་པ། ཉེ་བར་བསྙེན་པའི་ལེའུ།
ཐབས་མཁས་པ་ཆེན་པོ་སངས་རྒྱས་དྲིན་ལན་བསབ་པའི་མདོ། བམ་པོ་བདུན་པ་སྟེ་ཐ་མ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དྲིན་ལན་ཤེས་པ་དང་། དྲིན་ལན་བསབ་པ་དང་། ཐབས་མཁས་པ་ཆེན་པོས་སེམས་ཅན་རྣམས་ལ་ཕན་པ་དང་བདེ་བའི་དོན་བྱེད་པ་དག་དུས་དང་སྐབས་ཤེས་ན་བསྟན་ཅིང་བཅོས་པ་ལ་གནོད་པར་མི་འགྱུར་རོ། །རིགས་ཀྱི་བུ་སངས་རྒྱས་མངོན་པར་འཇིག་རྟེན་དུ་བྱུང་བ་འཇིགས་པ་མེད་པའི་རྒྱལ་པོ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། སྟོན་པ་རྒྱལ་བ་འཇིག་རྟེན་དུ་གཤེགས་ཏེ། སྐལ་བ་དང་ལྡན་པའི་དོན་མཛད་དོ། །སྐལ་བ་དང་ལྡན་པ་རྣམས་ཀྱི་དོན་མཛད་ནས་ཡོངས་སུ་མྱ་ངན་ལས་འདས་སོ། །མྱ་ངན་ལས་འདས་ནས་དམ་པའི་ཆོས་ལ་སྤྱོད་པའི་ཚེ་བྲམ་ཟེའི་བུ་ཡིད་གཞུངས་ཤིང་རྣོ་བའི་ཤེས་རབ་དང་ལྡན་པ་གཏན་ཁྲིམས་ལྔ་སྲུང་བ། དམ་པའི་ཆོས་འཛིན་པ་ཞིག་བྱུང་ངོ་། །དུས་གཞན་ཞིག་ན་བྲམ་ཟེའི་བུ་དེ་ཡུལ་གཞན་ཞིག་ཏུ་དོན་
གཉེར་དུ་སོང་སོང་བ་ལས་འགྲོན་དུ་འགྲོ་བའི་ལམ་དེ་འཇིགས་ས་ཆེ་བས་ལམ་གྲོགས་ལྔ་བརྒྱ་དང་འགྲོགས་ཏེ་སོང་ངོ་། །ལམ་གྲོགས་དེ་དག་དང་འཇིགས་སར་ཕྱིན་ནས་འཇིགས་ས་དེ་ན་མི་རྒོད་ལྔ་བརྒྱ་ཞིག་གནས་ཏེ། རྟག་ཏུ་འདྲོན་པོ་རྒྱུ་བ་རྣམས་འཇོམས་སོ། །དེའི་ཚེ་ན་མི་རྒོད་དེ་དག་གིས་འདྲོན་པོ་དེ་དག་གཞོམ་པར་བྱས་ནས་མི་རྒོད་ཀྱི་དཔོན་པོ་དེས་མི་གཅིག་སྔར་འདྲོན་པོ་དེ་དག་ཇི་ལྟར་འགྲོ་བ་ལྟ་ཞིང་རྟོག་ཏུ་བཏང་ངོ་། །དེའི་ཚེ་མི་རྒོད་དེ་དག་གི་ནང་ན་མི་གཅིག་ཅིག་སྔོན་བྲམ་ཟེའི་བུ་དེ་དང་མཛའ་ཞིང་བཤེས་པས་སྔར་མི་དེ་དག་གི་ནང་དུ་འོངས་ཏེ་བྲམ་ཟེའི་བུ་དེ་ལ་འདི་སྐད་ཅེས་བསྒོའོ། །རིགས་ཀྱི་བུ་ཁྱོད་འདི་ལྟར་རིག་པར་བྱོས་ཤིག །དོ་ནུབ་ནམ་གྱི་ཆ་སྟོད་ལ་དགྲ་འོང་གིས། ཅི་ནས་ཀྱང་ཁྱོད་ཉིད་ལ་གནོད་པ་དང་སྨས་པར་མ་གྱུར་པར་ཁྱོད་ཉིད་ཀྱིས་བྱོལ་བའི་ཐབས་བྱོས་ཤིག་པར་བསྒོའོ། །དེའི་ཚེ་བྲམ་ཟེའི་བུ་དེས་ཚིག་དེ་དག་ཐོས་ནས་དཔེར་ན་མི་བརྣངས་པ་ལྟར་མིད་དུ་ཡང་མེད་ལ་སྐྱུག་ཏུ་ཡང་མེད་པ་བཞིན་མི་བདེ་བར་གྱུར་ནས་གྲོགས་པོ་རྣམས་ལ་གཏམ་བྱར་ནི་གྲོགས་པོ་རྣམས་ཀྱིས་མི་དེ་བསད་ཀྱིས་དོགས། ཅི་སྟེ་གྲོགས་པོ་རྣམས་ཀྱིས་མི་དེ་བསད་ན་གྲོགས་པོ་རྣམས་ངན་འགྲོ་གསུམ་དུ་སྡུག་བསྔལ་གྲངས་མེད་པ་མྱོང་བར་འགྱུར་ཏེ། གལ་ཏེ་གྲོགས་པོ་རྣམས་ལ་མ་སྨྲས་ན་ནི་དགྲས་གྲོགས་པོ་རྣམས་བསད་པར་འགྱུར་རོ། །གལ་ཏེ་གྲོགས་པོ་རྣམས་བསད་ན་དགྲ་རྣམས་ངན་འགྲོ་གསུམ་དུ་ལྟུང་ཞིང་སྡུག་བསྔལ་གྲངས་མེད་པ་མྱོང་ངོ་སྙམ་བསམས་ནས་བདག་གིས་སེམས་ཅན་ལ་ཕན་པ་དང་། བདེ་བའི་ཐབས་བྱས་ཏེ། བདག་ཉིད་ངན་འགྲོ་གསུམ་དུ་ལྟུང་ཞིང་སྡུག་བསྔལ་མྱོང་ཡང་སླའོ་སྙམ་བསམས་ནས་རལ་གྲི་ཐོགས་ནས་སྦྲོན་པའི་མི་དེ་བསད་ནས་གྲོགས་པོ་རྣམས་བདེ་བར་བྱས་སོ། །དེའི་ཚེ་ན་གྲོགས་པོ་རྣམས་ཀྱིས་དེ་ལྟར་གྱུར་པ་མཐོང་ནས་བྲམ་ཟེའི་བུ་དེ་ལ་འདི་སྐད་ཅེས་སྨྲས་སོ། །བྲམ་ཟེའི་བུ་ཁྱོད་ནི་མིའི་ནང་ན་མཆོག་ཏུ་གྱུར་པ་ཤིན་ཏུ་དགེ་བ་ཡིན་ན། ཅིའི་ཕྱིར་དེང་འདིར་འདི་ལྟ་བུའི་སྡིག་པ་ཆེན་པོ་བྱེད་ཅེས་སྨྲས་སོ། །དེའི་ཚེ་བྲམ་ཟེའི་བུ་དེས་པུས་མོ་ས་ལ་བཙུགས་ནས་ཐལ་མོ་སྦྱར་ཏེ་ངོ་མཚར་དང་ལྡན་པའི་སེམས་ཀྱིས་གྲོགས་པོ་དག་ལ་འདི་སྐད་ཅེས་
སྨྲས་སོ། །བདག་དེ་རིང་བྱ་བར་མི་རིགས་པའི་སྡིག་པ་ཆེན་པོ་བྱས་ཏེ། དེ་ཡང་སེམས་ཅན་རྣམས་ལ་ཕན་པ་དང་། གྲོགས་པོ་རྣམས་ལ་བདེ་བར་བྱ་བའི་ཕྱིར་རོ། །གྲོགས་པོ་རྣམས་ཀྱིས་སྨྲས་པ། ཁྱོད་ཉིད་ཀྱིས་མི་བསད་པ་ལ་ངེད་བདེ་བར་བྱས་སོ་ཞེས་བརྗོད་དུ་ཡང་ཅི་ཡོད། བྲམ་ཟེའི་བུས་སྨྲས་པ། བདག་གིས་བསད་པའི་མི་འདི་ནི་དགྲ་མ་རུངས་པ་ཡིན་ཏེ། དགྲ་འདིས་གྲོགས་པོ་ཁྱེད་གསོད་དུ་འོངས་པས་བདག་ནི་གྲོགས་པོ་ཁྱེད་ཀྱི་ཕྱིར་མི་འདིའི་སྲོག་བཅད་པས་ན་ཁྱེད་རྣམས་ནི་བདེ་བར་ཡུལ་དུ་ཕྱིན་ཏེ། བདག་ནི་སེམས་ཅན་དམྱལ་བའི་སྡུག་བསྔལ་མྱོང་ཡང་སླའོ། །དེ་ནས་གྲོགས་པོ་ལྔ་བརྒྱ་རྣམས་ཀྱིས་སྐད་ཕྱུང་སྟེ་ངུས་ནས་འདི་སྐད་ཅེས་སྨྲས་སོ། །གནམ་མཐའ་འོག་ན་ཕངས་པར་བྱ་བ་ནི་སྲོག་ལས་འདའ་བ་མེད་དོ། །འཇིགས་པའི་ནང་ན་འཆི་བ་ལས་འདའ་བ་མེད་དེ། དེ་བས་ན་སེམས་ཅན་ཐམས་ཅད་ནི་ལུས་དང་སྲོག་གི་ཕྱིར་གསེར་དང་། དངུལ་དང་། རིན་པོ་ཆེ་དང་། ཡུལ་ས་དང་། ཆུང་མ་དང་། བུ་དང་། ཟས་དང་གོས་ཀྱང་ཡོངས་སུ་གཏོང་སྟེ། བདག་ཅག་ནི་དེང་དུ་ཕྱིར་ལན་ཅིག་འཚོ་བའི་སྲོག་ཐོབ་བོ་ཞེས་སྨྲས་ནས་བྲམ་ཟེའི་བུ་ཁྱོད་སེམས་ཅན་གྱི་ཕྱིར་ངན་འགྲོ་གསུམ་གྱི་སྡུག་བསྔལ་ཁྱད་དུ་བསད་པས་བདག་ཅག་ནི་ཁྱོད་ཀྱི་དྲིན་ཤིན་ཏུ་ལྕི་བ་དྲན་པར་བྱེད་དོ། །དྲིན་ལྕི་བ་དྲན་པས་ན་དེང་བདག་ཅག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཞེས་སྨྲས་ནས་ཐམས་ཅད་བྱང་ཆུབ་ཏུ་སེམས་བསྐྱེད་དོ། །དེའི་ཚེ་ན་མི་རྒོད་ལྔ་བརྒྱ་རྣམས་ཀྱིས་ཀྱང་འདི་སྐད་ཅེས་སྨྲས་སོ། །ཁྱོད་ནི་ཀུན་གྱི་མཆོག་ཤིན་ཏུ་དགེ་བ་ཡིན་ནོ་ཞེས་ཟེར་ན་ཅིའི་ཕྱིར་འདི་ལྟ་བུའི་སྡིག་པ་ཆེན་པོ་བྱེད། བྲམ་ཟེའི་བུས་སྨྲས་པ། བདག་ནི་བྱ་བར་མི་རིགས་པའི་སྡིག་པ་ཆེན་པོ་བྱས་ཏེ། དེ་ཡང་སེམས་ཅན་ཐམས་ཅད་ལ་ཕན་པ་དང་། ཁྱེད་རྣམས་ཀྱི་ལུས་དང་སྲོག་གི་བསྐྱབ་བྱ་བའི་ཕྱིར་རོ། །དེ་ནས་མི་རྒོད་དེ་དག་གིས་བྲམ་ཟེའི་བུ་ལ་སྨྲས་པ། ཁྱོད་ཉིད་ཀྱིས་མི་བསད་པ་ལ་བདག་ཅག་ལ་ཕན་པ་ཡང་ཅི་ཞིག་ཡོད། བྲམ་ཟེའི་བུས་སྨྲས་པ། མི་རྒོད་ཁྱེད་རྣམས་འདི་ན་འདུག་པར་སྔ་ནས་ཤེས་ཀྱང་བདག་ཀྱང་མ་སྨྲས་ཏེ། རྒྱལ་པོ་ཡང་མ་
སྦྲན། བདག་གི་གྲོགས་པོ་རྣམས་ལ་ཡང་མ་སྨྲས། གཏམ་མ་བྱས་པས་ཁྱེད་ཀྱི་ལུས་དང་སྲོག་བདེ་བར་གྱུར་པ་ཡིན་ནོ། །དེའི་ཚེ་མི་རྒོད་དེ་དག་གིས་དེ་སྐད་ཅེས་སྨྲས་པ་ཐོས་ནས་འདི་སྙམ་དུ་གྱུར་ཏོ། །བདག་ཅག་གི་ལུས་དང་སྲོག་ཀྱང་གཟོད་གསོན་ནོ་སྙམ་བསམས་ནས་བྲམ་ཟེའི་བུ་ལ་ཐལ་མོ་སྦྱར་ཏེ། སྐྱེས་བུ་ཆེན་པོ་ཤིན་ཏུ་ལེགས་སོ། །སྙིང་རྗེ་ཆེན་པོ་དང་ལྡན་པ་བདག་ཅག་གིས་དེང་ཕྱིན་ཆད་ཅི་དང་ཅི་བྱ་བ་བསྟན་དུ་གསོལ། བྲམ་ཟེའི་བུས་སྨྲས་པ། ཁྱེད་རྣམས་མྱུར་དུ་བླ་ན་མེད་པའི་བྱང་ཆུབ་ཏུ་སེམས་སྐྱེད་ཅིག །དེ་ནས་མི་རྒོད་རྣམས་ཀྱང་དྲིན་ལན་བསབ་པའི་ཕྱིར་དེ་མ་ཐག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། བྱང་ཆུབ་སེམས་དཔའ་བརྩོན་འགྲུས་ལ་གནས་པ་བྱང་ཆུབ་ཡོངས་སུ་བརྒྱན་པ་དང་། སངས་རྒྱས་ཀྱི་བཀའ་དྲིན་གྱི་ལན་བསབ་པར་འདོད་པ་དག་རྟག་ཏུ་སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་འདུ་ཤེས་བསྐྱེད་ཅིང་དྲན་པར་བྱའོ། །རིགས་ཀྱི་བུ་འདི་ལྟར་རིག་པར་བྱ་སྟེ། དེའི་དུས་དེའི་ཚེ་ན་བྲམ་ཟེའི་བུ་དེ་གཞན་ཞིག་ཡིན་པར་མ་སེམས་ཤིག །དེ་ལྟར་མི་བལྟའོ། །དེའི་ཚེ་བྲམ་ཟེའི་བུར་གྱུར་པ་དེ་ནི་ད་ལྟར་ང་ཉིད་ཡིན་ནོ། །དེའི་རྒྱུ་དེའི་རྐྱེན་གྱིས་བསྐལ་པ་དགུ་བཅུ་སྙེད་ཀྱི་འཁོར་བ་ལས་འདས་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །གཞན་ཡང་བྱང་ཆུབ་སེམས་དཔའ་ཐབས་མཁས་པ་ཆེན་པོ་སྤྱོད་ཅིང་དྲིན་ལན་ཤེས་པ་དང་། དྲིན་ལན་བསབ་པ་ནི་འདི་ལྟ་སྟེ། སངས་རྒྱས་བཅོམ་ལྡན་འདས་འོད་མའི་ཚལ་ན་བཞུགས་པ་ན། དགེ་སློང་གཅིག་ལུས་ལ་འབྲུམ་བུའི་ནད་ཀྱིས་བཏབ་ནས་ལུས་ལ་ཀུན་ནས་རྣག་ཁྲག་རྒྱུན་དུ་ཟག་པས་ཐམས་ཅད་ཀྱིས་མི་འདོད་དེ། གཙུག་ལག་ཁང་གི་ཕྱི་རོལ་གནས་ཁང་ཞིག་པར་གྱུར་པ་ཐ་མ་ཞིག་གི་ནང་དུ་བཞག་གོ །དེའི་ཚེ་དེ་བཞིན་གཤེགས་པས་རྫུ་འཕྲུལ་གྱི་མཐུས་འཁོར་མང་པོས་གཅིག་གིས་ཀྱང་མི་ཤེས་པར་བྱིན་གྱིས་བརླབས་ནས་དེ་བཞིན་གཤེགས་པ་ཉག་གཅིག་དགེ་སློང་ནད་པའི་ཐད་དུ་
གཤེགས་ཏེ། ཆུས་བཀྲུ་བར་དགོངས་ནས་འདོད་པའི་ཁམས་ཀྱི་ལྷ་རྣམས་ཤིས་པར་བྱ་བའི་ཕྱིར་བརྒྱ་བྱིན་ལྷའི་དབང་པོ་ལྷའི་འཁོར་ཚད་མེད་པ་བརྒྱ་སྟོང་གིས་བསྐོར་ཏེ་ལྷ་རྫས་ཀྱི་མེ་ཏོག་ཆར་བཞིན་དུ་ཕབ། ལྷ་རྫས་ཀྱི་རོལ་མོ་རྣམ་པ་སྣ་ཚོགས་བྱས་ནས་སྟེང་གི་ནམ་མཁའ་ལ་འཁོད་དོ། །དེའི་ཚེ་ན་སུམ་ཅུ་རྩ་གསུམ་གནམ་གྱི་ལྷའི་དབང་པོ་བསོད་ནམས་བརྒྱ་ལས་གྲུབ་པའི་བུམ་པ་དམ་པའི་ནང་ན་སྙིང་རྗེ་ཆེན་པོའི་ཆུ་གཙང་མས་བཀང་ནས་ལག་ན་ཐོགས་ཏེ། དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ནས་དེ་བཞིན་གཤེགས་པ་ལ་མདུན་ནས་བསུ་སྟེ་ཕྱོགས་གཅིག་ཏུ་སྡོད་དོ། །དེའི་ཚེ་ན་དེ་བཞིན་གཤེགས་པས་བསོད་ནམས་བརྒྱ་དང་ལྡན་པའི་ཕྱག་བརྐྱང་ནས་ཕྱག་སོར་མཉེན་ཞིང་རིང་བ་ལྔ་ལས་འོད་ཟེར་ཆེན་པོ་བཀྱེ་ནས་ལྷ་དང་འཁོར་མང་པོ་དེ་དག་རྣམས་སྣང་བར་བྱས་ཏེ། འཁོར་མང་པོ་དེ་དག་འདུག་ནས་དེ་བཞིན་གཤེགས་པ་ཉིད་དགེ་སློང་ནད་པའི་དྲུང་དུ་གཤེགས་ཏེ་དབུའི་སྤྱི་གཙུག་ནས་འོད་ཟེར་བཀྱེ་ནས་དགེ་སློང་ནད་པ་སྣང་བར་བྱས་སོ། །དགེ་སློང་ནད་པ་དེ་ལ་རེག་མ་ཐག་ཏུ་ན་བའི་སྡུག་བསྔལ་བྱང་བར་གྱུར་ཏེ། རྨའི་རྣག་ཁྲག་དང་བཅས་པའི་ལུས་ཀྱིས་སྐྱབས་སུ་གསོལ་ནས་ལུས་ཀྱིས་དེ་བཞིན་གཤེགས་པ་ལ་ཕྱག་འཚལ་མ་ནུས་པས་དེ་བཞིན་གཤེགས་པས་ཕྱག་གཡས་པས་བརྒྱ་བྱིན་ལྷའི་དབང་པོ་ལས་རིན་པོ་ཆེའི་བུམ་པ་བླངས་ཏེ་དགེ་སློང་ནད་པའི་སྤྱི་བོ་ནས་ཆུ་བླུགས་ཏེ། ཕྱག་གཡོན་པས་དགེ་སློང་ནད་པའི་ལུས་ཀྱི་རྨ་བཀྲུས་ཤིང་བྱུགས་པས་དགེ་སློང་ནད་པའི་རྨ་ཐམས་ཅད་དེ་བཞིན་གཤེགས་པའི་ཕྱག་གི་རྗེས་སུ་སོས་པར་གྱུར་ཏོ། །དེ་ལྟར་རྨ་ཀུན་སོས་ནས་དགེ་སློང་དེ་དགའ་མགུ་རངས་པར་གྱུར་ཏེ་སངས་རྒྱས་ཤཱཀྱ་ཐུབ་པ་ལ་ཕྱག་འཚལ་ལོ། །ཐུགས་རྗེ་ཆེན་པོའི་ཡབ་ལ་ཕྱག་འཚལ་ལོ། །བླ་ན་མེད་པའི་སྨན་པའི་རྒྱལ་པོ་མཆོག་ལ་ཕྱག་འཚལ་ལོ་ཞེས་བརྗོད་དོ། །བདག་གི་ལུས་ཀྱི་ནད་རྣམས་ནི་དེང་དུ་སོས་པར་གྱུར་ན་སེམས་ཀྱི་ནད་འབའ་ཞིག་མ་སོས་པས་དེ་བཞིན་གཤེགས་པས་ཐུགས་བརྩེ་བའི་སླད་དུ་བདག་ལ་ཆོས་ཀྱི་སྨན་སྩལ་ཅིང་སེམས་ཀྱི་ནད་ཀྱང་
གསོ་བར་གསོལ་ཏོ། །དེ་ནས་དེ་བཞིན་གཤེགས་པས་དགེ་སློང་ནད་པ་དེ་ལ་འདི་སྐད་ཅེས་བཀའ་སྩལ་ཏོ། །དེ་བཞིན་གཤེགས་པ་ནི་ཁྱོད་ཀྱི་དྲིན་ཤིན་ཏུ་ལྕི་བར་དགོངས་པས་ན་དེ་བཞིན་གཤེགས་པས་ཁྱོད་ཀྱི་དྲིན་ལན་བསབ་པར་མཛད་དོ། །དེའི་ཚེ་དགེ་སློང་ནད་པ་དེ་ཤིན་ཏུ་དགའ་བར་གྱུར་ཏེ། དེ་བཞིན་གཤེགས་པས་སྤྲོ་བ་དང་། དགའ་བ་དང་། གཟེངས་བསྟོད་པ་མཛད་ནས་དགེ་སློང་ནད་པ་དེ་དགྲ་བཅོམ་པའི་འབྲས་བུ་ཐོབ་ནས་རིག་པ་གསུམ་དང་། མངོན་པར་ཤེས་པ་དྲུག་དང་། རྣམ་པར་གྲོལ་བ་བརྒྱད་དང་ལྡན་པར་གྱུར་ཏོ། །བརྒྱ་བྱིན་ལྷའི་དབང་པོ་ལ་སོགས་པ་ལྷའི་འཁོར་ཐམས་ཅད་ཐེ་ཙོམ་དུ་གྱུར་ཏེ། དེ་བཞིན་གཤེགས་པ་ལ་འདི་སྐད་ཅེས་གསོལ་ཏོ། །ཅིའི་སླད་དུ་དེ་བཞིན་གཤེགས་པ་ཉིད་ཕྱག་དར་ཏེ་དགེ་སློང་ནད་པའི་ལུས་ཀྱི་རྨ་ཁྲག་ཀུན་བཀྲུས་ཏེ། དགེ་སློང་འདི་ལ་ཤིན་ཏུ་དྲིན་ལྕི་བ་ཡོད་དོ་ཞེས་གསུངས་པའི་དོན་བདག་ཅག་ལ་བཀྲོལ་ཞིང་བཤད་དུ་གསོལ། སངས་རྒྱས་ཀྱིས་བརྒྱ་བྱིན་ལྷའི་དབང་པོ་དང་ལྷའི་འཁོར་མང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །ཁྱེད་རྣམས་ལེགས་པར་ཉོན་ལ་ཤིན་ཏུ་ཡིད་ལ་ཟུང་ཤིག་དང་། དངོས་པོ་དེ་དག་བསྟན་པར་བྱའོ། །བརྒྱ་བྱིན་ལྷའི་དབང་པོ་སྔོན་འདས་པའི་དུས་བསྐལ་པ་གྲངས་མེད་ཚད་མེད་པའི་ཕ་རོལ་ན་རྒྱལ་པོ་སྡིག་པ་ཅན་ཆོས་མ་ཡིན་པར་བྱེད་པ་ཀུན་ལ་འཕྲོག་རློམ་བྱེད་པ་ཞིག་བྱུང་ངོ་། །དེའི་ཚེ་རྒྱལ་པོ་སྡིག་པ་ཅན་དེ་ལ་བློན་པོ་ལྔ་བརྒྱ་ཞིག་བཀུག་ནས་དཀུ་གསང་གཅིག་ཏུ་བྱས་ཏེ། གསང་ལ་བཏགས་ནས་བློན་པོ་དེ་ལ་འདི་སྐད་ཅེས་བསྒོའོ། །གང་སུ་ཡང་རུང་ཁྲིམས་ལས་འགལ་བར་བྱས་ན་ཁྱེད་ཀྱིས་ཆད་པས་བཅད་པར་དབང་བསྐུར་གྱིས། ཁྱེད་ཀྱིས་ནོར་ཅི་ཐོབ་ཀྱང་རུང་ང་དང་ཐུན་མོང་དུ་བྱའོ་ཞེས་བསྒོའོ། །དེའི་ཚེ་ན་ལྔ་བརྒྱ་པོ་དེས་རྟག་ཏུ་གཞུ་རྡེག་བྱེད་དེ་ནོར་མང་དུ་ཐོབ་པ་ནི་དེ་བཞིན་དུ་བཏང་། གང་ནོར་མེད་པ་ལ་ནི་སྲོག་ལ་བབ་ཀྱི་བར་དུ་གནོད་པ་བྱེད་དེ། དེའི་ཚེ་ན་དགེ་བསྙེན་གཅིག་ཁྲིམས་ལས་འགལ་བ་ཅུང་ཟད་ཅིག་བྱས་པས་ལྔ་བརྒྱ་པའི་གན་དུ་ཁྲིད་ནས་གཞུ་བརྡེག་བྱ་བར་བྱས་པ་ལས་དགེ་བསྙེན་ཤིན་ཏུ་དགེ་བ་ཡིན་ནོ་ཞེས་ཐོས་པས་གནོད་པ་
མ་བྱས་པར་ཡན་པར་བཏང་ངོ་། །དེའི་རྐྱེན་གྱིས་དགེ་བསྙེན་དེ་ཡང་ཤིན་ཏུ་དགའ་བར་གྱུར་ཏོ། །ཀཽ་ཤི་ཀ་འདི་ལྟར་རིག་པར་བྱ་སྟེ། དེའི་ཚེ་དེའི་དུས་ན་ལྔ་བརྒྱ་པོ་དེ་ནི་དགེ་སློང་ནད་པ་འདི་ཡིན་ནོ། །དེའི་ཚེ་དེའི་དུས་ན་དགེ་བསྙེན་དུ་གྱུར་པ་དེ་ནི་ད་ལྟར་ང་ཉིད་ཡིན་ནོ། །དེ་བས་ན་བྱང་ཆུབ་སེམས་དཔའ་ནི་བསྐལ་པ་གྲངས་མེད་པའི་སྔོན་རོལ་གྱི་དྲིན་ཡང་བ་ཡང་ལྕི་བས་གླན་པ་ཡིན་ཏེ། མངོན་པར་སངས་རྒྱས་ཀྱི་བར་དུ་ཡང་རྟག་ཏུ་མི་བརྗེད་དོ། །དེའི་ཚེ་ན་བརྒྱ་བྱིན་ལྷའི་དབང་པོ་དང་ལྷའི་འཁོར་མང་པོ་རབ་ཏུ་དགའ་བར་གྱུར་ཏེ། ལྷའི་འཁོར་བཞི་ཁྲི་བརྒྱད་སྟོང་སྙེད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །བྱང་ཆུབ་ཏུ་སེམས་བསྐྱེད་ནས་ལྷ་རྫས་ཀྱི་རོལ་མོ་བྱས་ཏེ། ཕྱིར་རང་རང་གི་གནས་སུ་སོང་ངོ་། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། རིགས་ཀྱི་བུའམ་རིགས་ཀྱི་བུ་མོ་གང་དྲིན་ཤེས་པ་དང་། དྲིན་ལན་བསབ་པ་ནི་དོན་རྣམ་པ་འདི་བཞི་ལ་ནན་ཏན་བྱའོ། །བཞི་གང་ཞེ་ན། དགེ་བའི་བཤེས་གཉེན་བསྟེན་པ་དང་། སེམས་རྩེ་གཅིག་ཏུ་ཆོས་ཉན་པ་དང་། དོན་ཡིད་ལ་བྱེད་པ་དང་། ཇི་ལྟར་བསྟན་པ་བཞིན་དུ་སྤྱོད་པའོ། །གཞན་ཡང་ཆོས་རྣམ་པ་བཞི་ལ་གནས་པར་བྱའོ། །བཞི་གང་ཞེ་ན། ཆོས་ལ་གནས་ཀྱི་གང་ཟག་གི་རྗེས་སུ་མི་གནས་པ་དང་། དོན་ལ་གནས་ཀྱི་ཡི་གེའི་རྗེས་སུ་མི་གནས་པ་དང་། ཡེ་ཤེས་ལ་གནས་ཀྱི་རྣམ་པར་ཤེས་པའི་རྗེས་སུ་མི་གནས་པ་དང་། ངེས་པའི་དོན་གྱི་མདོ་སྡེ་ལ་གནས་ཀྱི་བཀྲི་བའི་དོན་གྱི་མདོ་སྡེ་ལ་མི་གནས་པ་སྟེ། ཆོས་འདི་བརྒྱད་ལ་ནན་ཏན་བྱེད་ན་ནི་དྲིན་ལན་ཤེས་པ་ཞེས་བྱའོ། །གཞན་ཡང་ཆོས་རྣམ་པ་བརྒྱད་དང་ལྡན་ན་དྲིན་ལན་བསབ་པ་ཞེས་བྱའོ། །བརྒྱད་གང་ཞེ་ན། འདི་ལྟ་སྟེ། རྙེད་པ་དང་། ཁེ་དང་། སྨད་པ་དང་། བསྟོད་པ་དང་། གྲགས་པ་དང་། འཕྱ་བ་དང་། སྡུག་བསྔལ་དང་། བདེ་བ་ལ་མི་བལྟ་བའོ། །གཞན་ཡང་དངོས་པོ་འདི་བཞི་ལ་ནན་ཏན་བྱེད་པ་ནི་དྲིན་ལན་ཤེས་པ་ཞེས་བྱ། དྲིན་ལན་བསབ་པ་ཞེས་ཀྱང་བྱའོ། །བཞི་གང་ཞེ་ན། འདི་ལྟ་སྟེ། བྱམས་པ་བསྒོམས་པའི་རྐྱེན་གྱིས་སེམས་ཅན་སྡིག་པ་ཅན་དག་མཐོང་ན་བྱམས་ཤིང་སྙིང་བརྩེ་བའི་སེམས་བསྐྱེད་པ་
དང་། སྙིང་རྗེ་བསྒོམས་པའི་རྐྱེན་གྱིས་སྡུག་བསྔལ་བའི་སེམས་ཅན་རྣམས་མཐོང་ན་མི་སྐྱོ་བར་ལྟ་ཞིང་མི་གཏོང་བ་དང་། དགའ་བ་བསྒོམས་པའི་རྐྱེན་གྱིས་སློབ་དཔོན་དང་། བླ་མ་དང་། ཕ་མ་དང་། ཡོན་ཏན་དང་ལྡན་པ་རྣམས་མཐོང་ན་དགའ་བའི་སེམས་བསྐྱེད་པ་དང་། བཏང་སྙོམས་བསྒོམས་པའི་རྐྱེན་གྱིས་དགྲར་གྱུར་པའི་སེམས་ཅན་མཐོང་ན་ཞེ་སྡང་གི་སེམས་མི་བསྐྱེད་པའོ། །དེའི་ཚེ་ཀུན་དགའ་བོས་གོས་ཚགས་སུ་བཅོས་ནས་སངས་རྒྱས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐོག་མ་ནས་བྱང་ཆུབ་ཏུ་སེམས་བསྐྱེད་པ་ན་དྲིན་ཤེས་པ་དང་། དྲིན་ལན་བསབ་པའི་དོན་གྱི་དངོས་པོ་བཞི་ཅི་ལྟར་ནན་ཏན་དུ་མཛད་པ་ལགས། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། སྔོན་འདས་པའི་དུས་བསྐལ་པ་གྲངས་མེད་དཔག་ཏུ་མེད་ཚད་མེད་པའི་ཕ་རོལ་ན་སངས་རྒྱས་རྣམ་པར་གཟིགས་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་སྟོན་པ་རྒྱལ་བ་འཇིག་རྟེན་དུ་བྱུང་སྟེ། སྐལ་བ་དང་ལྡན་པ་རྣམས་ཀྱི་དོན་མཛད་དོ། །སྐལ་བ་དང་ལྡན་པ་རྣམས་ཀྱི་དོན་མཛད་ནས་ཡོངས་སུ་མྱ་ངན་ལས་འདས་ཏེ། དམ་པའི་ཆོས་དང་གཟུགས་བརྙན་ལས་ཆོས་བྱ་བ་ཡང་ནུབ་ནས་ཡུལ་བཱ་རཱ་ཎ་སཱི་ཞེས་བྱ་བ་ན་མི་རྣམས་ཀྱང་སྐྱིད་ཅིང་བདེ་ལ་ལོ་ཡང་ལེགས་ཏེ་རྒྱལ་པོ་དེ་ཡང་དྲང་པོའི་ཆོས་ཀྱིས་ཡུལ་གྱི་སྲིད་འཚོའོ། །ཡུལ་དེ་ན་རི་དྲང་སྲོང་འཕགས་ཞེས་བྱ་བ་ཞིག་ཡོད་དེ། རི་དེ་ལ་རྒྱུན་ཏུ་རང་སངས་རྒྱས་ལྔ་བརྒྱ་གནས་སོ། །དེ་མ་ཡིན་པ་མངོན་པར་ཤེས་པ་ལྔ་དང་ལྡན་པའི་དྲང་སྲོང་ཡང་མང་དུ་གནས་སོ། །དེའི་ཚེ་རི་དེ་ལ་རི་དགས་དང་གཅན་གཟན་ཡང་མང་དུ་གནས་ཏེ། དེ་ན་སེང་གེ་ཡི་དམ་བརྟན་ཞེས་བྱ་བ་ཞིག་ལུས་ཀྱི་སྤུ་གསེར་གྱི་མདོག་ཏུ་འདུག་པ། མཐུ་སྟོབས་དང་གཟི་བརྗིད་ཆེ་བ། སྐད་ཕྱུང་ན་བྱ་རྣམས་ཀྱང་ས་ལ་ལྟུང་བ། རི་དགས་རྣམས་ཀྱང་འབྲོས་པ་ཞིག་ཡོད་དེ། རི་དེ་ལ་འགྲོ་ཞིང་རྒྱུ་བ་དང་། རང་སངས་རྒྱས་དགེ་སྦྱོང་གི་གཟུགས་དང་སྤྱོད་ལམ་དུ་ལྡན་པ་གཅིག་དང་ཕྲད་ནས་དེ་ལ་ཤིན་ཏུ་དགའ་བའི་
སེམས་སྐྱེས་ཏེ། ཉིན་གཅིག་བཞིན་དུ་ཉེ་བར་བསྙེན་ནས་རྒྱུན་དུ་མདོ་སྡེ་ཀློག་པ་དང་དམ་པའི་ཆོས་འཆད་པ་ཐོས་པར་གྱུར་ཏོ། །དེའི་ཚེ་ན་རྔོན་པ་ཆེན་པོ་མ་རུངས་པ་ཞིག་གིས་སེང་གེའི་པགས་པ་གསེར་གྱི་མདོག་ཏུ་འདུག་པ་དེ་མཐོང་ནས་རབ་ཏུ་དགའ་བའི་སེམས་སྐྱེས་ཏེ་འདི་སྙམ་དུ་སེམས་སོ། །གལ་ཏེ་བདག་གིས་གསེར་གྱི་སེང་གེ་དེ་བསད་དེ་པགས་པ་བཤུས་ལ་རྒྱལ་པོ་ལ་ཕུལ་ན་གདོན་མི་ཟ་བར་བྱ་དགའ་ཆེན་པོ་ཐོབ་པར་འགྱུར་ཏེ། རབས་བདུན་གྱི་བར་དུ་ཕོངས་པ་མེད་པར་འགྱུར་རོ་སྙམ་བསམས་ནས། ཡང་འདི་སྙམ་དུ་བསམས་སོ། །སེང་གེ་ཡི་དམ་བརྟན་ཞེས་བྱ་བ་འདི་ནི་གཅན་གཟན་གྱི་རྒྱལ་པོ་ཡིན་པས་མདའ་གཞུས་ཀྱང་མི་རྫི། རྙི་དང་རྒྱས་ཀྱང་བྱར་མེད་དེ། ད་བདག་གིས་ཐབས་འདི་ལྟ་བུ་ཞིག་བྱའོ། །རི་དགས་ཀྱི་རྒྱལ་པོ་སེང་གེ་འདི་ལྟར་དགེ་སྦྱོང་གི་ཕྱི་བཞིན་འབྲང་བས་བདག་ཀྱང་དགེ་སྦྱོང་གི་གཟུགས་སུ་བྱས་ལ། ཆོས་གོས་ཀྱི་འོག་ཏུ་མདའ་གཞུ་སྦས་ལ་མིག་ཕབ་ལ་གོམ་པ་དལ་བུས་སོང་སྟེ་ཤིང་དྲུང་ཞིག་ཏུ་འདུག་ན། དེས་བདག་མཐོང་མ་ཐག་ཏུ་གདོན་མི་ཟ་བར་བདག་གི་དྲུང་དུ་འོང་སྟེ། གལ་ཏེ་བདག་གི་དྲུང་དུ་འོངས་ན་གཞུ་བདུངས་བཀང་སྟེ། དུག་མདའ་འཕངས་ན་གདོན་མི་ཟ་བར་སོད་དོ་སྙམ་བསམས་ནས་ཕྱིར་ཁྱིམ་དུ་འོངས་ཏེ་འདི་སྐད་ཅེས་སྨྲས་སོ། །བདག་རྒྱུད་ཀྱིས་རྔོན་པ་བྱེད་བྱེད་དེ་གནས་ན་གཅན་གཟན་ལ་སྤུ་གསེར་དུ་འདུག་པ་ཡང་མ་ཐོས་ན་མཐོང་བ་ལྟ་ཅི་སྨོས་ཏེ། ད་བདག་གིས་དེ་བསད་པའི་ཕྱིར་སྐྲ་དང་ཁ་སྤུ་བྲེགས་ལ། ཆོས་གོས་གྱོན་ནས་ཕྱིར་ཡང་རི་དེ་ལ་སོང་ནས་ཤིང་དྲུང་ཞིག་ན་འདུག་ན། དེའི་ཚེ་སེང་གེ་ཡི་དམ་བརྟན་གྱིས་དགེ་སློང་མཐོང་ནས་རབ་ཏུ་དགའ་སྟེ་མཆོང་རྒལ་ནས་དགེ་སློང་དེའི་དྲུང་དུ་བསྙེན་ཏེ། རྐང་པ་ལ་བལྡག་གོ །དེ་ནས་རྔོན་པ་དེས་སེང་གེ་ལ་མདའ་འཕངས་སོ། །དེ་ནས་དུག་མདས་སྡུག་བསྔལ་བར་གྱུར་ཏེ་སྐད་ཕྱུང་ནས་གཟུང་ཞིང་མཆོང་བར་བྱས་པ་ལ་འདི་སྙམ་བསམས་སོ། །འདི་ནི་དགེ་སྦྱོང་གི་གོས་ཁ་དོག་བསྒྱུར་བ་གྱོན་པ་ཡིན་ཏེ། དུས་གསུམ་གྱི་སངས་རྒྱས་ཀྱི་འཕགས་པའི་རྒྱལ་མཚན་ཡིན་པས་འདི་ལ་བདག་གིས་གནོད་པ་བྱས་ན་དཀའ་བ་མ་ཡིན་ན། གལ་
ཏེ་འདི་ལ་གནོད་པ་བྱས་ཏེ་སྲོག་གི་དབང་པོ་དང་ཕྲལ་ནས་སངས་རྒྱས་རྣམས་ཀྱི་འཕགས་པའི་རྒྱལ་མཚན་མ་རུངས་པར་བྱས་པ་ཡིན་ནོ་སྙམ་བསམས་ནས་ཅང་མ་བྱས་པར་བསྡད་པ་ལས། རིང་པོ་མ་ལོན་པར་དུག་ལངས་ནས་ལྷག་པར་སྡུག་བསྔལ་མི་བཟོད་པར་གྱུར་ཏེ། ཡང་བཟའ་ཞིང་བཅའ་བའམ། སྙམ་བསམས་པ་ལས་འདི་ནི་དཀའ་བ་མ་ཡིན་ན། གལ་ཏེ་བདག་གིས་འདི་ལ་གནོད་པ་བྱས་ན་སངས་རྒྱས་རྣམས་དང་འཕགས་པ་རྣམས་ཀྱིས་སྨོད་པར་འགྱུར་ཏེ། འཇིག་རྟེན་ན་དགེ་བ་བྱེད་པ་དང་། སྡིག་པ་བྱེད་པ་ཡང་བྱེ་བྲག་མེད་དེ། འདི་ནི་སྡིག་པ་ཅན་ཡིན་ཏེ་བདག་གསོད་དུ་འོངས་པས་གལ་ཏེ་བདག་གིས་དེ་ལ་བཟོད་པ་མ་བྱས་ན་ནི་སྡིག་པ་ཅན་དེ་དང་ཐ་དད་པ་ཡང་མེད་དེ། གང་ཡང་བཟོད་པ་སྒོམ་པ་དེ་ལ་ཐམས་ཅད་བྱམས་པར་འགྱུར་རོ། །གང་མི་བཟོད་པ་དེ་ལ་ནི་ཐམས་ཅད་སྡང་བར་འགྱུར་བས་དེ་ལ་ཉོན་མོངས་པ་སྐྱེ་བར་འགྱུར་ཏེ། ཉོན་མོངས་པ་སྐྱེས་པར་གྱུར་ན་སྐྱེ་ཤིའི་འཁོར་བར་འགྱུར་རོ། །སྐྱེ་ཤིར་འཁོར་བ་ན་མི་ཁོམ་པའི་གནས་སུ་སྐྱེ་བར་འགྱུར། མི་ཁོམ་པའི་གནས་སུ་སྐྱེས་ན་དགེ་བའི་བཤེས་གཉེན་དང་འབྲལ་བར་འགྱུར། དགེ་བའི་བཤེས་གཉེན་དང་བྲལ་ན་དམ་པའི་ཆོས་མི་ཐོས་པར་འགྱུར། དམ་པའི་ཆོས་མ་ཐོས་ན་ཐེ་ཙོམ་གྱི་དྲ་བས་གླགས་པར་འགྱུར། ཐེ་ཙོམ་གྱི་དྲ་བས་གླགས་པར་གྱུར་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་བྲལ་བར་འགྱུར་ཏེ། དེ་བས་ན་བདག་ནི་སྡིག་པའི་སེམས་མི་བསྐྱེད་དོ་སྙམ་བསམས་ནས་ཚིགས་སུ་བཅད་པ་འདི་སྐད་ཅེས་སྨྲས་སོ། །བདག་གི་ལུས་སྲོག་ཡལ་བླ་ཡི། །མི་དགེ་སྡིག་པའི་སེམས་མི་བསྐྱེད། །བདག་ནི་སྲོག་དང་བྲལ་ཡང་རུང་། །ངུར་སྨྲིག་གྱོན་ལ་གནོད་མི་བྱ། །རབ་ཏུ་བྱུང་བའི་མི་དག་ལ། །ནམ་དུའང་ངན་སེམས་མི་སྐྱེད་དོ། །ཚིགས་སུ་བཅད་པ་འདི་དག་སྨྲས་ནས་ཚེའི་དུས་བྱས་པར་གྱུར་ཏེ། གནམ་ས་ཡང་ལན་དྲུག་ཏུ་གཡོས་སོ། །གཅན་གཟན་དང་རི་དགས་ཀྱང་སྐྲག་ནས་ཕྱོགས་བཞིར་བྲོས་སོ། །སྤྲིན་མེད་པར་ཆར་པ་བབ་ནས་ཉི་མ་ཡང་འོད་མི་སྣང་བར་གྱུར་
ཏོ། །དེའི་ཚེ་རྔོན་པ་དེས་གོས་ཕུད་ནས་གྲི་ཐོགས་ནས་པགས་པ་བཤུས་ཏེ་ཕྱིར་ཁྱིམ་དུ་སོང་ངོ་། །ཕྱིར་ཁྱིམ་དུ་སོང་ནས་རྒྱལ་པོ་ལ་ཕུལ་ལོ། །རྒྱལ་པོས་པགས་པ་དེ་མཐོང་ནས་རབ་ཏུ་དགའ་སྟེ་བློན་པོ་རྣམས་ལ་འདི་སྐད་ཅེས་སྨྲས་སོ། །བདག་སྐྱེས་ནས་དུད་འགྲོ་ལ་ལུས་ཀྱི་པགས་པ་སྤུ་གསེར་གྱི་མདོག་ཏུ་འདུག་པ་ཡོད་པ་ཡོང་མ་ཐོས་ཏེ། ད་འདིར་མིག་གིས་མངོན་སུམ་དུ་མཐོང་བ་ངོ་མཚར་ཆེའོ་ངོ་མཚར་ཆེའོ་ཞེས་རྔོན་པ་དེ་ལ་ཁྱོད་ཇི་ལྟ་བུ་ཞིག་གི་ཐབས་བྱས་ཏེ་པགས་པ་འདི་ལྟ་བུ་ཐོབ་ཅེས་དྲིས་སོ། །དེ་ནས་རྔོན་པས་རྒྱལ་པོ་ལ་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ་འཇིགས་པ་མེད་པ་སྩལ་ན་དྲང་པོར་སྨྲའོ་ཞེས་གསོལ་ཏོ། །རྒྱལ་པོས་ཀྱང་ཁྱོད་ཅི་འདོད་པ་བཞིན་གནང་ངོ་བར་བསྒོ་ནས་རྔོན་པ་དེས་ཀྱང་ཇི་ལྟར་གྱུར་པ་བཞིན་དུ་གསོལ་ཏོ། །རྒྱལ་པོས་ཀྱང་ཚིག་དེ་ཐོས་ནས་ཤིན་ཏུ་མྱ་ངན་གྱིས་ནོན་ཏེ། དཔེར་ན་མི་བརྣངས་པ་བཞིན་མིད་དུ་ཡང་མེད་ལ་སྐྱུག་ཏུ་ཡང་མེད་པ་ལྟར་མི་བདེ་བར་གྱུར་ཏེ། །བློན་པོ་ཆེན་པོ་ཐམས་ཅད་དང་། རྒྱལ་ཕྲན་དང་། འཁོར་མང་པོ་ཀུན་བསྡུས་ཏེ་འདི་སྐད་ཅེས་བསྒོའོ། །ཁྱེད་རྣམས་ཤེས་པར་གྱིས་ཤིག །ངས་སྔོན་མཁས་པ་ཤེས་རབ་ཅན་དག་ལས་འདི་སྐད་ཅེས་ཐོས་ཏེ། དུད་འགྲོའི་ཁམས་སུ་སྐྱེས་པའི་ནང་ན་ལུས་ཀྱི་སྤུ་མདོག་གསེར་ལྟ་བུར་འདུག་ན་གདོན་མི་ཟ་བར་བྱང་ཆུབ་སེམས་དཔའ་ཡིན་ནོ་ཞེས་ཟེར་ཏེ། གལ་ཏེ་སོ་སོའི་སྐྱེ་བོ་ལས་གཅིག་ཙམ་བླ་ན་མེད་པའི་བྱང་ཆུབ་ཏུ་སེམས་བསྐྱེད་ན། སེམས་ཅན་ཐམས་ཅད་ལ་ཕན་པ་དང་བདེ་བའི་དོན་ཆེན་པོ་བྱེད་པ་ཡིན། ཅིའི་ཕྱིར་རྔོན་པ་སྡིག་པ་ཅན་འདིས་དེ་འདྲ་བའི་ཐབས་བྱས་ཏེ། བྱང་ཆུབ་སེམས་དཔའ་བསད་པ་འདི་གལ་ཏེ་བདག་གིས་བློན་ཐབས་སམ། བྱ་དགའ་འམ། བལ་གྱི་གླང་པོ་ཆེའམ། རྟའམ། རིན་པོ་ཆེ་སྣ་བདུན་ནམ། གོས་སམ། ཟས་སམ། ནོར་རམ། འབྲུའམ། ནོར་འདི་ལྟར་བྱིན་པར་གྱུར་ན་སྡིག་ཅན་དེ་དང་འཐུན་པར་གྱུར་ཏེ་དེའི་གྲོགས་སུ་འགྱུར་རོ་སྙམ་བསམས་ནས་རྔོན་པ་དེའི་སྲོག་གི་དབང་པོ་བཅད་དོ། །དེ་ལྟར་རྔོན་པ་དེའི་སྲོག་
གི་དབང་པོ་བཅད་ནས་སེང་གེའི་པགས་པ་ཐོགས་ཏེ་རི་དེ་ལ་སོང་ནས་ཤིང་གླང་མགོའི་ཙན་དན་སྤུངས་ཏེ་སེང་གེའི་པགས་པ་དང་རོ་བསྲེགས་སོ། །དེ་ལྟར་སེང་གེའི་རོ་བསྲེགས་ནས་རུས་པ་བསྡུས་ཏེ་མཆོད་རྟེན་བརྩིགས་ནས་མཆོད་པ་བྱས་སོ། །བཅོམ་ལྡན་འདས་ཀྱིས་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་དེའི་ཚེ་དེའི་དུས་ན་སེང་གེ་ཡི་དམ་བརྟན་ཞེས་བྱ་བ་དེ་ནི་ད་ལྟར་ཤཱཀྱ་ཐུབ་པ་ང་ཉིད་ཡིན་ནོ། །དེ་བས་ན་བྱང་ཆུབ་སེམས་དཔའ་ནི་དགེ་བའི་བཤེས་གཉེན་དང་བསྟེན་པའི་ཕྱིར་ལུས་དང་སྲོག་གི་ཕྱིར་ཡལ་ཡང་སླའི་སྡིག་པའི་སེམས་མི་བསྐྱེད་དོ། །དེ་ཅིའི་ཕྱིར་ཞེ་ན། དྲིན་ཤེས་པ་དང་། དྲིན་ལན་བསབ་པའི་ཕྱིར་རོ། །དེ་ཡང་ཇི་ལྟ་ཞེ་ན། བྱང་ཆུབ་སེམས་དཔའ་ནི་དགེ་བའི་བཤེས་གཉེན་ལ་བསྟེན་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མྱུར་དུ་ཐོབ་པར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའ་ནི་རྒྱུན་དུ་བརྩོན་འགྲུས་སུ་དགེ་བའི་བཤེས་གཉེན་ལ་བསྟེན་ཏེ་ཁམས་གསུམ་གྱི་ཉོན་མོངས་པ་གཞོམ་ཞིང་རྒུད་པར་བྱ་བའི་ཕྱིར་སངས་རྒྱས་ཀྱི་ཆོས་ཚིག་གཅིག་ཙམ་མམ། ཚིགས་སུ་བཅད་པ་གཅིག་གམ། དོན་གཅིག་ཙམ་གྱི་བར་དུ་ཉན་པ་ལ་རབ་ཏུ་བརྩོན་པར་བྱེད་དོ། །དེ་ལྟར་བྱང་ཆུབ་སེམམ་དཔའ་སེམས་རྩེ་གཅིག་ཏུ་སངས་རྒྱས་ཀྱི་གསུང་རབ་ཚོལ་བ་ན་ཆོས་འདོད་པའི་སེམས་དང་ཤིན་ཏུ་ལྡན་པས་ལུས་དང་སྲོག་ཀྱང་མི་ཕངས་པར་མེ་མ་མུར་གྱི་ལྕགས་སམ། ས་གཞི་ལས་ཀྱང་འབོག་ཅིང་འགྲོ་སྟེ་གནོད་པར་མི་སེམས་སོ། །བྱང་ཆུབ་སེམས་དཔའ་ནི་ཚིགས་སུ་བཅད་པ་འགའ་ཙམ་གྱི་ཕྱིར་ཡང་ལུས་དང་སྲོག་མི་ཕངས་ན་མདོ་སྡེ་བཅུ་གཉིས་ལྟ་ཅི་སྨོས། ཚིགས་སུ་བཅད་པ་གཅིག་ཙམ་གྱི་ཕྱིར་ཡང་ལུས་དང་སྲོག་མི་ཕངས་ན་དེ་མ་ཡིན་པ་ཕྱིའི་ཟང་ཟིང་ལྟ་ཅི་སྨོས། ཆོས་ཐོས་པའི་དོན་གྱིས་ལུས་དང་སེམས་ཤིན་ཏུ་བདེ་བར་འགྱུར་ཏེ། ཤིན་ཏུ་དད་པའི་སེམས་སྐྱེས་པས་ཡང་དག་པའི་ལྟ་བའི་སེམས་ཐོབ་པར་འགྱུར་རོ། །ཆོས་སྟོན་པ་མཐོང་ན་ཕ་མ་མཐོང་བ་ལྟར་ང་རྒྱལ་གྱི་སེམས་མི་སྐྱེའོ། །སེམས་ཅན་གྱི་དོན་དུ་ཆོས་ཉན་
གྱི་རྙེད་པ་དང་གྲགས་པའི་ཕྱིར་མ་ཡིན། སེམས་ཅན་ལ་ཕན་པ་དང་བདེ་བའི་དོན་བྱེད་ཀྱི། བདག་ལ་ཕན་པའི་དོན་གྱི་ཕྱིར་མ་ཡིན་ནོ། །དམ་པའི་ཆོས་ཀྱི་ཕྱིར་རྒྱལ་པོ་དང་། བཀྲེས་སྐོམ་དང་། གྲང་བ་དང་། ཚ་བ་དང་། སྟག་དང་། སྤྱང་ཀི་ལ་སོགས་ཏེ། གཅན་གཟན་ཁྲོ་བོ་དང་། རྐུན་པོ་དང་། དགྲ་ལ་སོགས་པས་འཇིགས་པ་མ་ཡིན་ནོ། །སྔར་དབང་པོ་རྣམས་ཀྱི་ཉོན་མོངས་པ་བཏུལ་ནས་དེའི་འོག་ཏུ་ཆོས་ཉན་པར་བྱེད་ཀྱི་དུས་མ་ཡིན་པར་ཉན་པ་ནི་མ་ཡིན་ཏེ། སེམས་རྩེ་གཅིག་ཏུ་ཉན་པར་བྱེད་དོ། །ཆོས་ལ་བཀུར་སྟི་བྱ་བའི་ཕྱིར་ཆོས་སྟོན་པ་ལ་རིམ་གྲོ་གུས་པར་བྱེད་པ་ནི་བྱང་ཆུབ་སེམས་དཔའ་དྲིན་ཤེས་པ་དང་དྲིན་ལན་བསབ་པ་ཞེས་བྱའོ། །ཇི་ལྟར་ན་བྱང་ཆུབ་སེམས་དཔའ་སེམས་རྩེ་གཅིག་ཏུ་ཆོས་ཉན་པ་ཞེ་ན། ཆོས་ཉན་པ་ལ་རྣམ་པ་འདི་བཞི་སྟེ། ཡང་དག་པའི་སེམས་དང་། རྩེ་གཅིག་པའི་སེམས་དང་། ཐམས་ཅད་དུ་ཐམས་ཅད་ཀྱི་སེམས་དང་། དགེ་བའི་སེམས་དང་བཞི་སྟེ། དེ་ནི་བྱང་ཆུབ་སེམས་དཔའ་མདོ་སྡེ་བཅུ་གཉིས་ཚོལ་བ་ལ་བརྩོན་པ་ཞེས་བྱའོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་བཀའ་དྲིན་ལྕི་བ་དྲན་པ་ནི་སངས་རྒྱས་ཐམས་ཅད་ཀྱི་དམ་པའི་ཆོས་ཀུན་ཏུ་རྒྱས་པར་བྱ་བའི་ཕྱིར། སངས་རྒྱས་ཀུན་གྱི་དམ་པའི་ཆོས་སྐྱེ་ཞིང་འཕེལ་བར་བྱ་བའི་ཕྱིར། འཇིག་རྟེན་པ་དག་སངས་རྒྱས་ཀྱི་ཆོས་ལ་དད་པར་བྱ་བའི་ཕྱིར། སེམས་ཅན་ཐམས་ཅད་བླ་ན་མེད་པའི་བྱང་ཆུབ་པར་བྱ་བའི་ཕྱིར། དེ་བས་ན་བྱང་ཆུབ་སེམས་དཔའ་ཕྱོགས་བཅུའི་སེམས་ཅན་གྲངས་མེད་པ་དྲན་པར་བྱེད་དོ། །སངས་རྒྱས་ཀུན་གྱི་བཀའ་དྲིན་ལྕི་བ་བསབ་པའི་ཕྱིར། བྱང་ཆུབ་སེམས་དཔའ་ནི་མདོ་སྡེ་བཅུ་གཉིས་ཚོལ་བ་ལ་བརྩོན་པར་བྱེད་དོ། །བྱང་ཆུབ་སེམས་དཔས་བརྩོན་འགྲུས་སུ་སངས་རྒྱས་ཀྱི་ཆོས་ཚོལ་བ་ནི་སེམས་ཅན་ཐམས་ཅད་དད་པའི་སེམས་བསྐྱེད་པའི་ཕྱིར་རྒྱུའི་རིག་པའི་བསྟན་བཅོས་སློབ་པར་བྱེད་དོ། །གཞན་ཡང་ཉེས་པའི་སྐྱོན་ཐམས་ཅད་ཤེས་པར་བྱ་བ་དང་། མུ་
སྟེགས་ཅན་གྱི་ངན་པར་ལྟ་བའི་གཙུག་ལག་གཞིག་པར་བྱ་བ་དང་། སེམས་ཅན་གདུལ་བའི་ཐབས་མཁས་པ་ཤེས་པར་བྱ་བ་དང་། དེ་བཞིན་གཤེགས་པས་གསུངས་པའི་དོན་དང་། འཇིག་རྟེན་པའི་ཚིག་གི་དོན་རྣམ་པར་དབྱེ་བར་བྱ་བའི་ཕྱིར། བྱང་ཆུབ་སེམས་དཔའ་རྒྱུའི་རིག་པའི་བསྟན་བཅོས་སློབ་པར་བྱེད་དོ། །བྱང་ཆུབ་སེམས་དཔའ་ཅིའི་ཕྱིར་སྒྲའི་རིག་པའི་བསྟན་བཅོས་སློབ་པར་བྱེད་ཅེ་ན། སྒྲའི་ཚིག་ཡོངས་སུ་དག་པར་བརྒྱན་པ་དང་། ཡོངས་སུ་མ་དག་པའི་ཚིག་གིས་དོན་གསལ་བར་སྟོན་མི་ནུས་པ་དང་། དོན་ཐམས་ཅད་ཤེས་ཤིང་ཁོང་དུ་ཆུད་པར་བྱ་བ་དང་། ཡང་དག་པའི་ཚིག་མི་ཉམས་པས་ང་རྒྱལ་གྱིས་མི་ཤིགས་པ་དང་། ངན་པར་ལྟ་བ་ལས་བཟློག་ཅིང་སེམས་ཅན་གདུལ་བའི་ཐབས་མཁས་པར་ཤེས་པར་བྱ་བའི་ཕྱིར་བྱང་ཆུབ་སེམས་དཔའ་སྒྲའི་རིག་པའི་བསྟན་བཅོས་སློབ་པར་བྱེད་དོ། །བྱང་ཆུབ་སེམས་དཔའ་ཅིའི་ཕྱིར་སྨན་དཔྱད་ཀྱི་རིག་པའི་བསྟན་བཅོས་སློབ་ཅེ་ན། སེམས་ཅན་རྣམས་མི་དགེ་བའི་ནད་བརྒྱ་རྩ་བཞི་དང་དབྲལ་བར་བྱ་བ་དང་། སེམས་ཅན་ཐམས་ཅད་ལ་བྱམས་ཤིང་སྙིང་བརྩེ་བའི་ཕྱིར་སེམས་ཅན་རྣམས་དད་པའི་སེམས་བསྐྱེད་པར་བྱ་བ་དང་། དེ་ལྟར་ནད་དང་བྲལ་བས་དགའ་བའི་སེམས་སྐྱེ་བར་བྱ་བ་དང་། དེ་ལྟར་དགའ་བའི་སེམས་སྐྱེས་པས། རྟག་ཏུ་སངས་རྒྱས་དྲན་པར་འགྱུར་ཏེ། སྙིང་རྗེ་ཆེན་པོས་སེམས་ཅན་རྣམས་ཕ་རོལ་ཏུ་ཕྱིན་པར་བྱ་བའི་ཕྱིར། བྱང་ཆུབ་སེམས་དཔའ་སྨན་དཔྱད་ཀྱི་རིག་པའི་བསྟན་བཅོས་སློབ་པར་བྱེད་དོ། །བྱང་ཆུབ་སེམས་དཔའ་ནི་ཅིའི་ཕྱིར། འཇིག་རྟེན་གྱི་བཟོའི་རིག་པ་སློབ་པར་བྱེད་ཅེ་ན། སེམས་ཅན་ལ་ཕན་པར་བྱ་བའི་ཕྱིར། ནོར་ཟང་ཟིང་རྙེད་སླ་བས་སེམས་ཅན་རྣམས་དད་པ་བསྐྱེད་པར་བྱ་བ་རྣམས་དང་། འཇིག་རྟེན་གྱི་བྱ་བའི་དངོས་པོ་ཀུན་ཤེས་པས་ང་རྒྱལ་གཞོམ་པ་དང་། སེམས་ཅན་གདུལ་བར་བྱ་བ་དང་། སྲིད་པའི་ཆོས་ཐམས་ཅད་ཀྱིས་བསྒྲིབས་པ་ཀུན་བསལ་བའི་ཕྱིར། བྱང་ཆུབ་སེམས་དཔའ་བཟོའི་རིག་པ་སློབ་པར་བྱེད་དོ། །
གལ་ཏེ་བྱང་ཆུབ་སེམས་དཔའ་རིག་པའི་དངོས་པོ་ལྔར་མ་བསླབས་ན་ནམ་དུ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཐམས་ཅད་མཁྱེན་པའི་ཡེ་ཤེས་ཐོབ་པར་མི་ནུས་སོ། །དེ་བས་ན་བླ་ན་མེད་པའི་བྱང་ཆུབ་ཐོབ་པའི་ཕྱིར་རིག་པའི་དངོས་པོ་ལྔ་བསླབ་པར་བྱའོ། །བྱང་ཆུབ་སེམས་དཔའ་ནི་དྲིན་ཤེས་པ་དང་། དྲིན་ལན་བསབ་པ་ནི་སེམས་ཅན་ལ་བཤད་པའི་དངོས་པོ་བཤད་ཅིང་བསྟན་པར་བྱའོ། །ཇི་ལྟར་བཤད་ཅེ་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱ་བའི་ཕྱིར། རིག་པ་ལྔ་དང་ལྡན་པར་བཤད་པར་བྱའོ། །བཤད་པ་ལ་ཡང་རྣམ་པ་གཉིས་ཏེ། རིམ་གྱིས་བཤད་པ་དང་། ཡོངས་སུ་དག་པར་བཤད་པའོ། །དེ་ལ་ཇི་ལྟར་ན་རིམ་གྱིས་བཤད་པ་ཞེ་ན། སྔར་སྦྱིན་པའི་ཕ་རོལ་ཏུ་ཕྱིན་པ་བཤད་ལ་དེའི་འོག་ཏུ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ནས། ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་བཤད་པ་དང་། དྲིན་ཤེས་པ་དང་། དྲིན་བསབ་པའི་ཕྱིར། དོན་ཡིད་ལ་བྱེད་ཅིང་ཆོས་བཞིན་དུ་གནས་པ་ནི་རིམ་གྱིས་བཤད་པ་ཞེས་བྱའོ། །དེ་ལ་ཡོངས་སུ་དག་པར་བཤད་པ་ཞེས་བྱ་བ་ནི་གང་ཞེ་ན། ཉན་པ་འདུག་ལ་འཆད་པ་འགྲེང་ན་དེ་ལ་བཤད་པར་མི་བྱའོ། །གལ་ཏེ་ཉན་པ་ཆོས་ལ་སྐྱོན་ཚོལ་ལམ་བཤད་པ་ལ་སྐྱོན་ཚོལ་ན་དེ་ལ་བཤད་པར་མི་བྱའོ། །གལ་ཏེ་ཉན་པ་གང་ཟག་ལ་རྟེན་གྱི་ཆོས་ལ་མི་རྟེན་ན་ཆོས་ལ་མི་རྟེན་པས་དེ་ལ་བཤད་པར་མི་བྱའོ། །གལ་ཏེ་ཉན་པ་ཡི་གེ་ལ་རྟེན་ལ་དོན་ལ་མི་རྟེན་ན་བཤད་པར་མི་བྱ་བ་ནས་བཀྲི་བའི་དོན་ལ་རྟེན་གྱི་ངེས་པའི་དོན་གྱི་བར་ལ་མི་རྟེན་ན་བཤད་པར་མི་བྱའོ། །དེ་ཅིའི་ཕྱིར་ཞེ་ན། གང་ཟག་དེ་ནི་སངས་རྒྱས་དང་། བྱང་ཆུབ་སེམས་དཔའ་རྣམས་ཀྱི་ཡོངས་སུ་དག་པའི་ཆོས་ལ་མ་གུས་པའི་ཕྱིར་རོ། །གལ་ཏེ་བཤད་ཅིང་སྟོན་པ་ཡང་ཆོས་ལ་བཀུར་སྟི་བྱེད་ལ། ཆོས་ཉན་པ་གང་གུས་པའི་སེམས་ཀྱིས་རྩེ་གཅིག་ཏུ་ཉན་ཅིང་ང་རྒྱལ་གྱི་སེམས་མེད་པ་ནི་ཡོངས་སུ་དག་པར་བཤད་པ་ཞེས་བྱའོ། །གཞན་ཡང་རིམ་གྱིས་བཤད་པ་ཞེས་བྱ་བ་ནི་ཐམས་ཅད་བཤད་པའོ། །ཐམས་
ཅད་བཤད་པ་ཞེས་བྱ་བ་ནི་མདོ་སྡེ་བཅུ་གཉིས་ནས་ཚིག་གཅིག་གམ། ཚིགས་སུ་བཅད་པ་གཅིག་གམ། ཚིགས་སུ་བཅད་པ་ཕྱེད་ཀྱི་བར་དུ་བཤད་པ་སྟེ། དེ་ཡང་ཚིག་གི་སྒྲ་དང་། དོན་དང་། ཆོས་སུ་ལྡན་ལ། ཆོས་དང་དོན་བསྟན་པ་ཡང་སྤྲོ་བ་དང་། གཟེངས་བསྟོད་པ་དང་། དགའ་བར་བྱ་བའི་ཕྱིར་དུས་སུ་བསྟན་པ་དང་། དུས་ཁ་ཅིག་ཏུ་གཤེ་ཞིང་སྤྱོ་བ་དང་། དུས་ཁ་ཅིག་ཏུ་དྲང་པོར་ཐད་ཀར་བསྟན་པ་དང་། དུས་ཁ་ཅིག་ཏུ་དཔེ་རྣམས་བསྟན་ཏེ་ཅི་དང་འཕྲོད་པ་བཞིན་དུ་བསྟན་པ་དང་། དུས་ཁ་ཅིག་ཏུ་དེ་བས་ཉེ་ཞིང་སླ་བར་བསྟན་པ་དང་། དུས་ཁ་ཅིག་ཏུ་ཇི་ལྟར་མོས་པ་བཞིན་དུ་འཇུག་སླ་བ་བསྟན་པ་ནི་བྱང་ཆུབ་སེམས་དཔའི་དྲིན་ཤེས་པ་དང་། དྲིན་བསབ་པ་ལ་མཁས་པའི་མཆོག་ཆོས་རིམ་གྱིས་བཤད་པ་ཞེས་བྱའོ། །གཞན་ཡང་ཡོངས་སུ་དག་པར་བཤད་པ་ཞེས་བྱ་བ་ནི། བྱང་ཆུབ་སེམས་དཔའ་སེམས་དཔའ་ཆེན་པོ་དགྲ་སྡང་བ་ལ་བྱམས་པའི་སེམས་སྒོམ་སྟེ། བྱམས་པའི་སེམས་ཀྱིས་སེམས་ཅན་སྡིག་པ་དང་བཅས་པ་དང་། གང་ཟག་བག་མེད་པ་དང་། ལེ་ལོ་ཅན་དག་ལ་ཐབས་རྣམ་པ་མང་པོ་ནས་ཆོས་བསྟན་ནས་རྒྱགས་ཤིང་དྲེགས་པ་དང་། གང་ཟག་དབུལ་ཕོངས་པའི་བར་དུ་ཐབས་རྣམ་པ་མང་པོས་ཆོས་སྟོན་པར་བྱེད་ཀྱི་བདག་སྟོད་པའམ། གཞན་སྨོད་པའམ། བཟའ་བ་དང་། བཏུང་བ་དང་། རྙེད་པ་དང་། གྲགས་པའི་ཕྱིར་མ་ཡིན་པ་ནི་བྱང་ཆུབ་སེམས་དཔའ་དྲིན་ཤེས་ཤིང་དྲིན་བསབ་པ་ལ་མཁས་པའི་ཆོས་ཡོངས་སུ་དག་པ་བཤད་པ་ཞེས་བྱའོ། །དེ་ལ་ཇི་ལྟར་ན་ཆོས་བཞིན་དུ་གནས་པ་ཡིན་ཞེ་ན།ལུས་དང་། ངག་དང་། ཡིད་ཀྱི་ལས་དགེ་བའི་ཆོས་སྒོམ་ཞིང་ཡོངས་སུ་དག་པ་དང་ལྡན་ཏེ། དྲིན་ཤེས་པ་དང་། དྲིན་བསབ་པ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་བསྟན་པའོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དྲིན་ཤེས་ཤིང་དྲིན་བསབ་པ་ནི་དོན་ཡིད་ལ་བྱེད་དེ། མང་དུ་ཐོས་པས་གཟུངས་ཐོབ་པར་བྱེད་ཅིང་ཆོས་ཀྱི་སྒྲོན་མ་འབར་བར་བྱ་བའི་ཕྱིར། སེམས་ཅན་
ཐམས་ཅད་ལ་ཕན་པ་དང་བདེ་བའི་དོན་དུ་སྦྱིན་པ་དང་། ཚུལ་ཁྲིམས་དང་། མང་དུ་ཐོས་པ་ལ་བརྩོན་པར་བྱ། ཆོས་སྟོན་ཅིང་འཆད་པ་ལ་མཆོད་པ་དང་རིམ་གྲོ་བྱའི་ཆོས་ལ་སྐྱོན་མི་གདགས། སྟོན་ཅིང་འཆད་པ་ལ་སྐྱོན་མི་གདགས། གནོད་པ་དང་འཚེ་བ་མེད་པའི་སེམས་ཀྱིས་སེམས་ཅན་ལ་མི་འཇིགས་པ་སྦྱིན་པ་ནི་དྲིན་ཤེས་པ་ཞེས་བྱའོ། །ལྷ་དང་མིའི་ལོངས་སྤྱོད་མྱོང་ཞིང་མྱ་ངན་ལས་འདའ་བའི་ལམ་ཐོབ་པ་ནི་དྲིན་ཤེས་པ་དང་། དྲིན་བསབ་པ་ཞེས་བྱའོ། །བྱང་ཆུབ་སེམས་དཔའ་ནི། གཞན་ཡང་དངོས་པོ་བཞིས་བཟོད་པ་བསྒོམ་ཞིང་མི་བཟོད་པ་ཡོངས་སུ་སྤངས་ཏེ་བྱང་ཆུབ་བརྒྱན་པའི་ཕྱིར། སེམས་ཅན་མང་པོ་བསྡུས་ནས་བཟོད་པ་བསྒོམ་པ་ལ་བཀོད་དེ། བདག་ཀྱང་བཟོད་པ་བྱེད་དེ། གཞན་ཡང་བཟོད་པ་བྱེད་པ་ལ་འགོད་ཅིང་འཇིགས་པ་དང་བྲལ་བ་ནི་དྲིན་ཤེས་པ་ཞེས་བྱའོ། །དེ་ལྟར་བཟོད་པ་བྱས་པའི་རྐྱེན་གྱིས་ཞེ་སྡང་གི་སེམས་མི་འབྱུང་བས་འཁོར་ཕུན་སུམ་ཚོགས་པ་དང་ལྡན་ཏེ། སྡུག་བསྔལ་བའམ། ཉོན་མོངས་པ་མི་འབྱུང་བས་འགྱོད་པའི་སེམས་མེད་དེ། ལུས་འདི་དང་བྲལ་ནས་ཀྱང་ལྷ་དང་མིའི་ལོངས་སྤྱོད་མྱོང་ཞིང་མྱ་ངན་ལས་འདའ་བ་ཐོབ་པ་ནི་དྲིན་བསབ་པ་ཞེས་བྱའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའི་དངོས་པོ་རྣམ་པ་བཞིས་བརྩོན་འགྲུས་རྩོམ་སྟེ། ལེ་ལོ་ཡོངས་སུ་སྤངས་ནས་བྱང་ཆུབ་བརྒྱན་པའི་ཕྱིར་སེམས་ཅན་ཡོངས་སུ་སྡུད་དོ། །བྱང་ཆུབ་ཀྱི་ལམ་གྱི་ཕྱིར་བརྩོན་འགྲུས་རྩོམ་པས་ཉལ་ན་ཡང་བདེ་ལ། སད་ན་ཡང་བདེ་སྟེ། ཉོན་མོངས་པ་དང་བྲལ་བས་བདེ་བའི་ཆོས་སྐྱེ་ཞིང་འཕེལ་ཏེ། ལུས་ཀྱིས་བདེ་བའི་ལོངས་སྤྱོད་མྱོང་བ་ནི་བདག་ལ་ཕན་པའི་དོན་བྱེད་པ་ཞེས་བྱའོ། །བྱང་ཆུབ་སེམས་དཔའ་བརྩོན་འགྲུས་རྩོམ་ཡང་སེམས་ཅན་ལ་མི་འཚེ་སྟེ། འཚོག་རྡེག་དང་། གཤེ་བ་དང་། སྤྱོ་བ་མེད་པ་ནི་གཞན་ལ་ཕན་པའི་དོན་བྱེད་པ་ཞེས་བྱ་སྟེ། ལུས་འདི་དང་བྲལ་ནས་ཀྱང་། ལྷ་དང་མིའི་ལོངས་སྤྱོད་མྱོང་ཞིང་མཐུ་དང་དབང་དུ་ལྡན་ཏེ། བྱང་ཆུབ་ཀྱི་ལམ་ཐོབ་པས་འབྲས་བུ་
ཆེན་པོ་ཐོབ་པར་འགྱུར་ཏེ། འདི་ནི་བྱང་ཆུབ་སེམས་དཔའ་བརྩོན་འགྲུས་རྩོམ་པའི་དངོས་པོ་བཞི་ཞེས་བྱའོ། །བྱང་ཆུབ་སེམས་དཔའི་ཏིང་ངེ་འཛིན་སྒོམ་པས་འཁྲུག་པའི་སེམས་ཡོངས་སུ་སྤངས་ཏེ། བྱང་ཆུབ་བརྒྱན་པའི་ཕྱིར་སེམས་ཅན་ཡོངས་སུ་སྡུད་དོ། །བྱང་ཆུབ་ཀྱི་ལམ་གྱི་ཕྱིར་ཏིང་ངེ་འཛིན་བསྒོམས་པས་ཚེ་འདི་ལ་ཡང་འཇིག་རྟེན་གྱི་བདེ་བ་མྱོང་ལ། ལུས་དང་སེམས་དབེན་ཞིང་ཞི་བ་ནི་དྲིན་ལན་ཤེས་པ་ཞེས་བྱའོ། །དེ་ལྟར་ལུས་དང་སེམས་དབེན་ཞིང་ཞི་བས་སེམས་ཅན་ལ་མི་འཚེ་བ་ནི་དྲིན་བསབ་པ་ཞེས་བྱ་སྟེ། བྱང་ཆུབ་སེམས་དཔའ་ལུས་འདི་དང་བྲལ་ནས། རྣམ་པར་དག་པའི་ལུས་ཐོབ་ཅིང་བདེ་བ་ཕུན་སུམ་ཚོགས་པའི་ལོངས་སྤྱོད་མྱོང་སྟེ། ཡོངས་སུ་མྱ་ངན་ལས་འདའ་པ་ཐོབ་པ་ནི། བྱང་ཆུབ་སེམས་དཔའི་བསམ་གཏན་སྒོམ་པའི་དངོས་པོ་བཞི་ཞེས་བྱའོ། །གཞན་ཡང་བྱང་ཆུབ་སེམས་དཔའ་དྲིན་ཤེས་པ་དང་། དྲིན་བསབ་པ་ནི་ཤེས་རབ་དང་ལྡན་པས་མ་རིག་པ་བཅོམ་སྟེ། བྱང་ཆུབ་ཡོངས་སུ་བརྒྱན་པའི་ཕྱིར། བསྡུ་བའི་ཆོས་རྣམ་པ་བཞིས་སེམས་ཅན་ཡོངས་སུ་སྡུད་དོ། །བྱང་ཆུབ་ཀྱི་ཕྱིར་ཤེས་རབ་བསྒོམས་པས་ཆོས་ཀྱི་དབྱིངས་ཤེས་ཤིང་རྟོགས་པའི་ཕྱིར། ལུས་ཀྱི་བདེ་བའི་ལོངས་སྤྱོད་མྱོང་བ་ནི་བདག་ལ་ཕན་པའི་དོན་ཞེས་བྱའོ། །སེམས་ཅན་རྣམས་ཀྱི་འཇིག་རྟེན་གྱི་དོན་དང་། འཇིག་རྟེན་ལས་འདས་པའི་དོན་བསྐྱེད་པ་ནི་གཞན་ལ་ཕན་པའི་དོན་ཞེས་བྱའོ། །ཉོན་མོངས་པ་དང་ཤེས་བྱའི་སྒྲིབ་པ་རྣམ་པ་གཉིས་ཡོངས་སུ་སྤངས་པས་ན་འབྲས་བུ་ཆེན་པོ་ཞེས་བྱ་སྟེ། འདི་ནི་དྲིན་ཤེས་ཤིང་དྲིན་བསབ་པའི་བྱང་ཆུབ་སེམས་དཔའི་ཤེས་རབ་ཀྱི་དངོས་པོ་བསམ་གྱིས་མི་ཁྱབ་པ་བཞི་ཞེས་བྱའོ། །གཞན་ཡང་བྱང་ཆུབ་སེམས་དཔའ་སྔོན་གྱི་གནས་དྲན་པའི་མངོན་པར་ཤེས་པས་སྔོན་འདས་པའི་དངོས་པོ་ཤེས་རབ་ཀྱིས་རྟོགས་ཏེ། སེམས་ཅན་རྣམས་ཀྱི་དགེ་བ་དང་སྡིག་པའི་ལས་བརྟགས་ནས་དགེ་བའི་རིས་སུ་འཐུན་པའི་སེམས་ཅན་ཐམས་ཅད་ལ་ཕན་པ་དང་། བདེ་བའི་དོན་དུ་བྱང་ཆུབ་སེམས་དཔའ་སེམས་
དཔའ་ཆེན་པོ་ཐབས་མཁས་པས་དགའ་ལྡན་གནམ་དུ་ཚེ་ཕུན་སུམ་ཚོགས་པར་སྐྱེས་སོ། །དེ་ན་མཆོག་ཏུ་གྱུར་པ་གསུམ་དང་ལྡན་ཏེ། ཚེ་མཆོག་ཏུ་གྱུར་པ་དང་། གཟུགས་མཆོག་ཏུ་གྱུར་པ་དང་། གྲགས་པ་མཆོག་ཏུ་གྱུར་པའོ། །ཐོག་མ་གནས་དེ་ནས་བབས་པའི་ཚེ་འོད་ཟེར་ཆེན་པོ་བཀྱེ་ནས་ཕྱོགས་བཅུ་སྣང་བར་བྱས་ཏེ་ཡུམ་གྱི་ལྷུམས་སུ་འཇུག་པ་དང་། ལྷུམས་ན་ཇི་སྲིད་གནས་པ་དང་། ལྷུམས་ནས་བལྟམ་པའི་དུས་མཁྱེན་ཏོ། །ཕྱོགས་བཅུར་ཕྱོགས་རེ་རེར་ཡང་མིས་མ་བརྟེན་པར་གོམ་པ་བདུན་བདུན་བོར་ཏེ་འདི་སྐད་ཅེས་བསྒྲགས་སོ། །བདག་གི་ད་ལྟར་གྱི་ལུས་འདི་ནི་ནངས་ཀྱི་ཐ་མ་སྟེ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་རྣམས་ཀྱིས་མེ་ཏོག་དང་། བདུག་སྤོས་དང་། རོལ་མོ་དང་། སིལ་སྙན་དང་། བ་དན་དག་དང་། གདུགས་དམ་པ་རྣམས་ཀྱིས་མཆོད་པ་བྱས་སོ། །སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པས་དེའི་ལུས་ལས་མཆོག་ཏུ་གྱུར་པ་གཞན་མེད་དོ། །བྱམས་པའི་ཤུགས་ཀྱིས་བདུད་ཀྱི་དཔུང་རྣམས་བཅོམ་མོ། །ལྷུ་ཚིགས་རེ་རེ་ལ་ཡང་གྱད་མཐུ་བོ་ཆེའི་སྟོབས་རེ་རེ་དང་ལྡན་ནོ། །གཞོན་ནུ་བུས་པའི་ཚེ་འཇིག་རྟེན་གྱི་དངོས་པོ་མ་བསླབས་པར་ཐམས་ཅད་ཀུན་རྟོགས་ཤིང་ཤེས་སོ། །སྟོན་པ་མེད་པར་རང་བཙལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལྷུན་གྱིས་གྲུབ་བོ། །ཚངས་པའི་ལྷའི་དབང་པོས་བསྐུལ་ནས་སེམས་ཅན་རྣམས་ལ་ཆོས་ཀྱི་འཁོར་ལོ་བསྐོར་ཏོ། །ཏིང་ངེ་འཛིན་ལ་མཉམ་པར་བཞག་པས། འབྲུག་སྒྲ་བསྒྲགས་ཀྱང་མ་གཡོས་སོ། །གཅན་གཟན་རྣམས་ཉེ་བར་བསྟེན་ཏེ་ཕ་མ་བཞིན་དུ་སྡུག་པར་བསམས་སོ། །བྱོལ་སོང་གིས་བསོད་སྙོམས་ཕུལ་བ་ཡང་སངས་རྒྱས་ཀྱིས་དེའི་བསམ་པ་མཁྱེན་ཏོ། །ལྷ་དང་ཀླུས་ཆར་ཕབ་སྟེ་ལུས་ཀྱི་ཁྲུས་བྱས་སོ། །ཤིང་ལྗོན་པའི་ཡལ་ག་ཡང་དེའི་ཕྱོགས་སུ་བཏུད་དེ་གྲིབ་མས་སྐྱབས་བྱས་སོ། །མངོན་
པར་སངས་རྒྱས་ནས་ཀྱང་ལོ་དྲུག་གི་བར་དུ་བདུད་མ་རུངས་པས་རྒྱུན་དུ་གླགས་བཙལ་ཀྱང་གླགས་མ་རྙེད་དོ། །རྒྱུན་དུ་ཏིང་ངེ་འཛིན་ལ་མཉམ་པར་བཞག་པས་དྲན་པ་ཉེ་བར་གཞག་པའི་སེམས་ཡོངས་སུ་རྫོགས་ཏེ། རྣམ་པར་རྟོག་པ་འབྱུང་བ་དང་། འགག་པ་ལ་ཤིན་ཏུ་མཁས་པས་དེ་ནི་བྱང་ཆུབ་སེམས་དཔའི་སྐྱེ་བ་ཐུན་མོང་བ་བསམ་གྱིས་མི་ཁྱབ་པ་ཞེས་བྱའོ། །སྐྱེ་བ་ཐུན་མོང་མ་ཡིན་པ་ནི་སེམས་ཅན་ལ་ཕན་པ་དང་། བདེ་བའི་དོན་དུ་དཔེར་ན་གང་ཟག་སྨྱོས་པ་དག་དེ་བཞིན་གཤེགས་པ་མཐོང་བའི་རྐྱེན་གྱིས་སྔོན་གྱི་སེམས་སོར་ཆུད་པའམ། དམུས་ལོང་གིས་མཐོང་བར་གྱུར་པའམ། མངལ་མགོ་ལོག་ཏུ་གྱུར་པ་ལེགས་པར་བཙས་པའམ། འོན་པ་རྣ་བས་ཐོས་པར་གྱུར་པའམ། འདོད་ཆགས་དང་། ཞེ་སྡང་དང་། གཏི་མུག་ཅན་དུག་གསུམ་བྱང་བར་གྱུར་པ་དེ་ལྟ་བུ་ནི་སྐྱེ་བ་ཐུན་མོང་མ་ཡིན་པ་བསམ་གྱིས་མི་ཁྱབ་པ་ཞེས་བྱའོ། །གཞན་ཡང་སྐྱེ་བ་ཐུན་མོང་ཞེས་བྱ་བ་ནི། དེ་བཞིན་གཤེགས་པའི་མཛད་པ་བསམ་གྱིས་མི་ཁྱབ་པ་སྟེ། རྟག་ཏུ་གློ་གཡས་པ་ཕབ་ནས་གཟིམས་པ་དང་། སེང་གེའི་རྒྱལ་པོ་ལྟ་བུར་རྩྭ་འཇག་མ་ལྟར་མི་འགྲུག་པ་དང་། རླུང་གི་རྒྱལ་པོ་བཻ་རམ་བས་ཀྱང་ན་བཟའི་མཐའ་ཙམ་མི་གཡོ་བ་དང་། གཤེགས་པའི་གོམ་སྟབས་རི་དགས་ཀྱི་རྒྱལ་པོ་སེང་གེའམ་ངང་པའི་རྒྱལ་པོ་ལྟར་གཤེགས་པ་དང་། གཤེགས་སུ་ཆ་བ་ན་ཞབས་གཡས་པ་སྔར་འདོར་བ་དང་། གནས་གང་དང་གང་དུ་གཤེགས་ཀྱང་ས་གཞི་མཐོ་དམའ་མཉམ་པ་དང་། བསོད་སྙོམས་ལ་དྲི་ང་བའི་སྐྱོན་མེད་ཅིང་ཞལ་ནས་ཕྱིར་མི་འབྲུལ་བ་ནི་སྐྱེ་བ་ཐུན་མོང་བ་བསམ་གྱིས་མི་ཁྱབ་པ་ཞེས་བྱའོ། །གཞན་ཡང་སྐྱེ་བ་ཐུན་མོང་བ་བསམ་གྱིས་མི་ཁྱབ་པ་ནི་འདི་ལྟ་སྟེ། ཞབས་ཀྱི་མཐིལ་མཉམ་ཞིང་གང་བ་ཡིན། ཞབས་ཀྱི་མཐིལ་ན་འཁོར་ལོ་རྩིབས་སྟོང་དང་ལྡན་པ་ཡོད་པ་ཡིན། ཕྱག་སོར་ཕྲ་ལ་རིང་བ་ཡིན། ཞབས་ཀྱི་རྟིང་བ་ཟླུམ་ལ་གང་བ་ཡིན། ཕྱག་སོར་གྱི་བར་དྲ་བས་འབྲེལ་བ་ཡིན།
ཕྱག་དང་ཞབས་འཇམ་ཞིང་མཉེན་པ་ཡིན། ཞབས་ཀྱི་བྱིན་པ་རི་དགས་ཀྱི་རྒྱལ་པོ་ཨེ་ན་ཡ་ལྟར་ཟླུམ་ལ་ཤུགས་ཀྱིས་གཞོལ་བ་ཡིན། ཞབས་ཀྱི་ལོང་བུ་ཕྱིར་མི་སྣང་བ་ཡིན། ཕྱག་པུས་མོར་སླེབས་པ་ཡིན། རྟའི་རྒྱལ་པོ་ལྟར་མཚན་སྦུབས་ཀྱི་ནང་དུ་ནུབ་པ་ཡིན། ཤིང་ནྱ་གྲོ་དྷ་ལྟར་སྐུའི་ཡན་ལག་ཡོངས་སུ་རྫོགས་པ་ཡིན། སྐུའི་བ་སྤུ་གྱེན་དུ་ཉལ་བ་ཡིན། བ་སྤུ་རེ་རེ་ནས་གཡས་སུ་འཁྱིལ་བ་ཡིན། སྐུ་མདོག་གསེར་བཙོ་མ་ལྟར་འདུག་པ་ཡིན། རྟག་པའི་འོད་འདོམ་གང་དང་ལྡན་པ་ཡིན། པགས་པ་མཉེན་ཞིང་འཇམ་ལ་རྡུལ་དང་དྲི་མས་མི་གོས་པ་ཡིན། གནས་བདུན་ཡོངས་སུ་གང་བ་ཡིན། སྐུའི་སྟོད་སེང་གེ་ལྟར་འདུག་པ་ཡིན། ཕྱག་གི་ལག་ངར་ཟླུམ་ལ་ཤུགས་ཀྱིས་གཞོལ་བ་ཡིན། སྒྲོག་རུས་མཉམ་པར་གང་བ་ཡིན། སྐུའི་སྟོད་སྨད་འབྱེས་པའི་མཚན་དང་ལྡན་པ་ཡིན། ཞལ་གྱི་ཚེམས་བཞི་བཅུ་དང་ལྡན་པ་ཡིན། ཚེམས་ཀྱི་ཐགས་བཟང་ཞིང་མཉམ་པ་ཡིན། ཚེམས་ཀྱི་མདོག་དཀར་བ་ཡིན། འགྲམ་པ་རི་དགས་ཀྱི་རྒྱལ་པོ་སེང་གེ་ལྟར་གང་བ་ཡིན། རོ་བྲོ་བའི་མཆོག་དང་ལྡན་པ་ཡིན། ཤའི་དོ་ཀེར་གྱི་མཚན་དང་ལྡན་པ་ཡིན། ལྗགས་རིང་ལ་ཡངས་པ་ཡིན། ཚངས་པའི་སྒྲ་དབྱངས་དང་ལྡན་པ་ཡིན། སྤྱན་གྱི་མདོག་མཐོན་མཐིང་ལྟར་འདུག་པ་ཡིན། སྤྱན་ཁྱུ་མཆོག་གི་རྒྱལ་པོ་ལྟར་འདུག་པ་ཡིན། སྨིན་མཚམས་ཀྱི་མཛོད་སྤུ་དཀར་པོ་དང་ལྡན་པ་ཡིན་ནོ། །དེ་བཞིན་དུ་བསམ་གྱིས་མི་ཁྱབ་པའི་དཔེ་བྱད་བཟང་པོ་བརྒྱད་ཅུ་དང་ལྡན་ཏེ། དཔེ་བྱད་བཟང་པོ་རེ་རེ་ལ་ཡང་དཔེ་བྱད་བཟང་པོའི་མཆོག་དམ་པ་བརྒྱ་སྟོང་སྙེད་ཡོད་དེ། དཔེ་བྱད་བཟང་པོ་དེ་དག་རེ་རེ་ལ་ཡང་བྱང་ཆུབ་སེམས་དཔའ་ཐོག་མ་བྱང་ཆུབ་ཏུ་སེམས་བསྐྱེད་ནས་བྱང་ཆུབ་ལ་ཤིན་ཏུ་བརྟན་པས་དྲིན་ཤེས་ཤིང་དྲིན་བསབ་པའི་ཕྱིར་སྤྱོད་པ་དམ་པ་དེ་དག་སྤྱད་དེ། དེ་བས་ན་བླ་ན་མེད་པའི་བྱང་ཆུབ་ཐོབ་པར་གྱུར་ཏོ། །སངས་རྒྱས་ཀྱིས་བཀའ་སྩལ་
པ། དེ་བཞིན་གཤེགས་པ་ནི་སྔོན་ཡུན་རིང་པོ་བསྐལ་པ་གྲངས་མེད་པ་ཚད་མེད་པའི་བར་དུ་ཚུལ་ཁྲིམས་ཡོངས་སུ་དག་པར་བསྲུངས་པས། ཞབས་ཀྱི་མཐིལ་མཉམ་པར་གང་བའི་མཚན་དང་ལྡན་པར་གྱུར་པ་ཡིན་ནོ། །ཕ་མ་དང་། སློབ་དཔོན་དང་། བླ་མ་དང་། གང་ཟག་ཡོན་ཏན་དང་ལྡན་པ་ལ་མཆོད་པ་དང་། བཀུར་སྟིར་བྱས་པའི་རྐྱེན་གྱིས་ཞབས་ཀྱི་མཐིལ་འཁོར་ལོའི་མཚན་དང་ལྡན་པར་གྱུར་པ་ཡིན་ནོ། །སེམས་ཅན་རྣམས་ལ་མི་འཚེ་ཞིང་འཕྲོག་པ་དང་རྐུ་བའི་སེམས་མེད་ལ་ཕ་མ་དང་། སློབ་དཔོན་དང་། བླ་མ་དང་། ཡོན་ཏན་དང་ལྡན་པའི་གང་ཟག་ལ་རྒྱང་མ་ནས་བསུ་བསྐྱལ་བྱས་ཤིང་ཁྲི་སྟན་བཏིང་ལ་ང་རྒྱལ་སྤངས་ཏེ། རིམ་གྲོ་དང་། བཀུར་སྟི་དང་། ཕྱག་བྱས་པས་དེའི་རྒྱུ་དེའི་རྐྱེན་གྱིས་སོར་མོ་ཕྲ་ཞིང་རིང་བར་གྱུར་པའི་མཚན་དང་ལྡན་པར་གྱུར་པ་ཡིན་ནོ། །གོང་དུ་སྨོས་པའི་བྱ་བ་གསུམ་དང་ལྡན་པས་རྟིང་བ་ཟླུམ་ལ་གང་བའི་མཚན་དང་ལྡན་པར་གྱུར་པ་ཡིན་ནོ། །བསྡུ་བའི་ཆོས་རྣམ་པ་བཞིས་འགྲོ་བ་མང་པོ་ཡོངས་སུ་བསྡུས་པས། དེའི་རྒྱུ་དེའི་རྐྱེན་གྱིས་སོར་མོའི་བར་དྲ་བས་འབྲེལ་པའི་མཚན་དང་ལྡན་པར་གྱུར་པ་ཡིན་ནོ། །མར་དང་འབྲུ་མར་གྱིས་ཕ་མ་དང་། སློབ་དཔོན་དང་། བླ་མ་དང་། ཡོན་ཏན་དང་ལྡན་པའི་གང་ཟག་གི་ལུས་ལ་བསྐུས་ཤིང་མཉེས་པས། དེའི་རྒྱུ་དེའི་རྐྱེན་གྱིས་རྐང་ལག་མཉེན་ཞིང་རིང་ལ་འཇམ་པ་ཡིན་ནོ། །དགེ་བའི་ཆོས་བསྒོམ་པ་ལ་མི་སྐྱོ་བས། དེའི་རྒྱུ་དེའི་རྐྱེན་གྱིས་ཐལ་གོང་མཉམ་ལ་ལག་ངར་ཟླུམ་ཞིང་ཤུགས་ཀྱིས་གཞོལ་བ་ཡིན་ནོ། །ཆོས་ཐོས་པར་དགའ་ཞིང་གཞན་ལ་ཆོས་སྟོན་པར་ཡང་མོས་ཏེ། ཆོས་ཀྱི་ཕྱིར་མངག་གཞུག་གི་ལས་བྱས་ན། དེའི་རྒྱུ་དེའི་རྐྱེན་གྱིས་ལོང་བུའི་རུས་པ་མི་སྣང་བའི་མཚན་དང་ལྡན་ནོ། །སྒོ་གསུམ་ཡོངས་སུ་དག་ཅིང་ནད་གཡོག་དང་། སྨན་གྱི་སྦྱིན་པ་བྱིན་ཏེ། ང་རྒྱལ་མེད་ལ་བཟའ་བ་དང་། བཏུང་བ་ལ་ཆོག་ཤེས་པའི་རྒྱུ་དང་རྐྱེན་གྱིས་ལུས་དྲང་པོར་འགྲེང་ན་ལག་པས་པུས་མོར་སླེབས་པ་ཡིན་ནོ། །འཁོན་
གཅུགས་སུ་གྱུར་པ་ལ་ཚིག་འཇམ་པོས་བསྡུམས་ཏེ། བདག་ཀྱང་ངོ་ཚ་བ་དང་ལྡན་པའི་ཆོས་སྤྱད་དེ་གཞན་ཡང་སྤྱོད་དུ་བཅུག་ན། དེའི་རྒྱུ་དེའི་རྐྱེན་གྱིས། རྟའི་རྒྱལ་པོ་ལྟར་མཚན་སྦུབས་ཀྱི་ནང་དུ་ནུབ་པ་ཡིན་ནོ། །བདག་གི་སྒོ་གསུམ་ཡོངས་སུ་དག་ལ། གཞན་ཡང་ཡོངས་སུ་དག་པར་བྱེད་ཅིང་། སེམས་ཅན་དག་འབྱུང་བ་ཆེན་པོ་བཞི་འཁྲུགས་ཏེ། ནད་དུ་གྱུར་པའི་སྨན་དཔྱད་ཀྱིས་གསོས་པས་ན། དེའི་རྒྱུ་དེའི་རྐྱེན་གྱིས། ལུས་ཀྱི་མཚན་ཡོངས་སུ་རྫོགས་པ་ཡིན་ནོ། །ཆོས་ཐོས་པར་དགའ་ཞིང་གཞན་ལ་ཆོས་སྟོན་པར་མོས་པས་ན། ལུས་ཀྱི་བ་སྤུ་གྱེན་དུ་ཉལ་བའི་མཚན་དང་ལྡན་པ་ཡིན། ཆོས་ཀྱི་དོན་ཟབ་མོ་ཡིད་ལ་བགྱིད་ཅིང་དགེ་བའི་ཆོས་སྒོམ་པར་མོས་ལ། ཕ་མ་དང་། སློབ་དཔོན་དང་། བླ་མ་དང་། ཡོན་ཏན་དང་ལྡན་པའི་གང་ཟག་ལ་མཆོད་པ་བྱས་པ་དང་། སངས་རྒྱས་ཀྱི་མཆོད་རྟེན་དང་། དགེ་འདུན་གྱི་གནས་ཁང་དང་། ལམ་སྲང་ན་འདུག་པའི་བོང་བའམ། རྡོ་བའམ། ཚེར་མའམ། མི་གཙང་བ་མེད་པར་བྱས་ན། དེའི་རྒྱུ་དེའི་རྐྱེན་གྱིས་སྤུ་རེ་རེ་ནས་གཡས་ཕྱོགས་སུ་འཁྱིལ་པའི་མཚན་དང་ལྡན་པར་གྱུར་པ་ཡིན་ནོ། །ཕ་རོལ་པོ་གཞན་དག་ལ་ཟས་དང་། སྐོམ་དང་། རྒྱན་དང་། དེ་ལ་སོགས་པ་བྱིན་ཞིང་ཞེ་སྡང་གི་སེམས་མེད་ན། དེའི་རྒྱུ་དེའི་རྐྱེན་གྱིས་གསེར་བཙོ་མའི་མདོག་དང་ལྡན་པ་དང་། འོད་རྟག་པའི་མཚན་ཉིད་དང་ལྡན་པ་ཡིན་ནོ། །ཅིའི་ལས་ཀྱིས་བ་སྤུའི་ཁུང་བུ་རེ་རེ་ནས་སྤུ་རེ་རེ་སྐྱེས་པའི་མཚན་དང་ལྡན་ཞེ་ན། ལས་དེ་ཉིད་ཀྱི་རྒྱུ་ལས་གྱུར་ཏེ། ལས་ཀྱི་རྒྱུ་དེ་ཉིད་ཀྱིས་ལུས་མཉེན་ཞིང་འཇམ་ལ་རྡུལ་དང་དྲི་མས་མི་གོས་པའི་མཚན་དང་ལྡན་པ་ཡིན་ནོ། །སེམས་ཅན་དག་ལ། དགོས་པའི་ཟང་ཟིང་རྒྱུན་དུ་གཏོང་བས་ན། དེའི་རྒྱུ་དེའི་རྐྱེན་གྱིས། གནས་བདུན་མཉམ་པར་གང་བའི་མཚན་དང་ལྡན་པ་ཡིན་ནོ། །བདག་གི་ང་རྒྱལ་དང་དྲེགས་པ་བཅོམ་ནས། རང་
བཞིན་གྱིས་མཉེན་ཞིང་དེས་པའི་སེམས་ཀྱིས་སེམས་ཅན་གྱི་ཡིད་དང་སྦྱོར་ཏེ། །ཆོས་བཞིན་དུ་སྤྱོད་ལ། མི་དགེ་བའི་ཆོས་སྤངས་པའི་ཕྱིར་དགེ་བའི་ཆོས་ སྟོན་ན། དེའི་རྒྱུ་དེའི་རྐྱེན་གྱིས། རོ་སྟོད་རི་དགས་ཀྱི་རྒྱལ་པོ་སེང་གེ་ལྟ་བུའི་མཚན་དང་། སྨིན་མཚམས་དང་། སྒྲོག་རུས་མཉམ་པར་གང་བའི་མཚན་དང་། སོར་མོ་རིང་བའི་མཚན་དང་། ལུས་ཀྱི་མཐའ་ཡང་ཞིང་འཇམ་པའི་མཚན་དང་ལྡན་པ་ཡིན་ནོ། །ཕྲ་མ་ཡོངས་སུ་སྤངས་ཏེ། རྩོད་ཅིང་འཁོན་པའི་བསྡུམས་བྱས་པས། དེའི་རྒྱུ་དེའི་རྐྱེན་གྱིས་སོ་བཞི་བཅུ་དང་ལྡན་པའི་མཚན་དང་། སོའི་ཐགས་བཟང་བའི་མཚན་དང་། སོ་མཉམ་པའི་མཚན་དང་ལྡན་པ་ཡིན་ནོ། །འདོད་པའི་ཁམས་ཀྱི་བྱམས་པ་བསྒོམས་པས། དེའི་རྒྱུ་དེའི་རྐྱེན་གྱིས། སོ་དཀར་བའི་མཚན་དང་ལྡན་པ་ཡིན་ནོ། །སློང་བ་མཐོང་ན་དགའ་བའི་སེམས་ཀྱིས་བསུ་བསྐྱལ་བྱས་པས། དེའི་རྒྱུ་དེའི་རྐྱེན་གྱིས། སེང་གེའི་འགྲམ་པ་ལྟ་བུའི་མཚན་དང་ལྡན་པར་གྱུར་པ་ཡིན་ནོ། །སེམས་ཅན་ཐམས་ཅད་ལ་བུ་གཅིག་པ་བཞིན་དུ་འདྲ་བར་ལྟ་བས། དེའི་རྒྱུ་དེའི་རྐྱེན་གྱིས། རོ་བྲོ་བའི་མཆོག་གི་མཚན་དང་ལྡན་པ་ཡིན་ནོ། །སེམས་ཅན་ལ་བླ་ན་མེད་པའི་ཆོས་ཀྱི་རོ་རྟག་ཏུ་གཏོང་ཞིང་བརྗེད་ཅིང་མི་དྲན་པ་ལ་ཡང་དྲན་པར་བྱས་ཏེ། བདག་ཀྱང་ཚུལ་ཁྲིམས་ལྔ་སྲུང་ལ་གཞན་ཡང་བསྲུང་བར་བསྐུལ་ཞིང་བྱམས་པའི་སེམས་ཀྱིས་ཆོས་ཀྱི་སྦྱིན་པ་ཆེན་པོ་བྱས་ན། དེའི་རྒྱུ་དེའི་རྐྱེན་གྱིས་ཤའི་གཙུག་ཏོར་གྱི་མཚན་དང་ལྕེ་རིང་ཞིང་ཡངས་པའི་མཚན་དང་ལྡན་པ་ཡིན་ནོ། །བདེན་པའི་ཚིག་དང་། ཆོས་ཀྱིས་དགའ་བའི་ཚིག་དང་། མཉེན་དེས་པའི་ཚིག་སྨྲའི། དུས་མ་ཡིན་པའི་ཚིག་མི་སྨྲ་བས། དེའི་རྒྱུ་དེའི་རྐྱེན་གྱིས་ཚངས་པའི་སྒྲ་དབྱངས་དང་ལྡན་པ་ཡིན་ནོ། །སྙིང་རྗེའི་སེམས་བསྒོམས་པས་སེམས་ཅན་རྣམས་ལ་ཕ་མ་ལྟ་བུར་ལྟ་བས། དེའི་རྒྱུ་དེའི་རྐྱེན་གྱིས་མིག་མཐོན་མཐིང་ལྟར་འདུག་པ་དང་། མིག་ཁྱུ་མཆོག་གི་རྒྱལ་པོ་ལྟ་
བུའི་མཚན་དང་ལྡན་པ་ཡིན་ནོ། །ཡོན་ཏན་དང་ལྡན་པའི་ལེགས་པ་མི་བཅབས་ཤིང་། བསྟོད་ཅིང་བསྔགས་པས། དེའི་རྒྱུ་དེའི་རྐྱེན་གྱིས། མཛོད་སྤུ་དཀར་པོའི་མཚན་དང་ལྡན་པ་ཡིན་ནོ། །མཚན་སུམ་ཅུ་རྩ་གཉིས་འདི་དག་གི་རྒྱུ་དང་རྐྱེན་སོ་སོར་བཤད་མོད་ཀྱི། དེའི་རྒྱུ་དེའི་རྐྱེན་ཡང་དག་པ་ནི། ཚུལ་ཁྲིམས་དང་བརྩོན་འགྲུས་སོ། །དེ་ཅིའི་ཕྱིར་ཞེ་ན། གལ་ཏེ་ཚུལ་ཁྲིམས་མ་བསྲུངས། བརྩོན་འགྲུས་མ་སྤྱད་ན། མིའི་ལུས་ཀྱང་ཐོབ་པར་མི་ནུས་ན། མཚན་སུམ་ཅུ་རྩ་གཉིས་ཐོབ་པ་ལྟ་སྨོས་ཀྱང་ཅི་དགོས། སྤྱི་གཙུག་བལྟར་མི་སྣང་བ་དང་། ཤའི་གཙུག་ཏོར་གྱི་མཚན་གཉིས་ལ་ཐ་དད་པ་མེད་དོ། །གཞན་ཡང་ཅི་བྱེད་དོ་ཅོག་ལ་གཅིག་ཏུ་མ་ངེས་ཏེ། འགྱོད་པའི་སེམས་མེད་ན། དེའི་རྒྱུ་དེའི་རྐྱེན་གྱིས། རྐང་མཐིལ་མཉམ་པར་གང་བའི་མཚན་ཐོབ་བོ། །དེ་ཡང་སེམས་རྩེ་གཅིག་ཏུ་བྱས་ན། དེའི་རྒྱུས་འཁོར་ལོའི་རྩིབས་སྟོང་དང་ལྡན་པའི་མཚན་དང་། མཚན་གསུམ་པ་དང་། བཞི་པ་དང་། སོར་མོའི་བར་འབྲེལ་པ་དང་། གནས་བདུན་མཉམ་པར་གང་བ་དང་། མཉེན་ཞིང་འཇམ་པ་དང་། ཕྲག་པ་ཟླུམ་པ་དང་། སྒྲོག་རུས་གང་བ་དང་། ལུས་དྲང་བ་དང་། ལྕེ་རིང་ཞིང་ཡངས་པའི་མཚན་དང་ལྡན་པ་ཡིན་ནོ། །དེ་ཡང་བྱ་བ་རྟག་ཏུ་བྱས་ན། དེའི་རྒྱུས་སོར་མོ་རིང་བའི་མཚན་དང་། ལག་པས་པུས་མོར་སླེབས་པའི་མཚན་དང་། འོད་རྟག་པ་འདོམ་གང་གི་མཚན་དང་། སོ་ཐགས་བཟང་ཞིང་ཡ་ཡོ་མེད་པའི་མཚན་ཐོབ་བོ། །བྱ་བ་ཡོངས་སུ་དག་པར་བྱས་ན། དེའི་རྒྱུས་མཚན་ལྷག་མ་གཞན་རྣམས་ཐོབ་པར་འགྱུར་རོ། །གཞན་ཡང་སེམས་ཅན་དག་ལ་དགེ་བ་འབའ་ཞིག་གི་སེམས་བསྐྱེད་པས། དེའི་རྒྱུས་རྐང་ལག་མཉེན་ཞིང་འཇམ་པ་དང་། པགས་པ་མཉེན་ཞིང་འཇམ་ལ། རྡུལ་དང་དྲི་མས་མི་གོས་པའི་མཚན་ཐོབ་བོ། །རིམ་གྱིས་
བསྒོམ་ཞིང་སྤྱོད་པ་དང་། དུས་བཞིན་དུ་བསྒོམས་ཤིང་སྤྱོད་པས་དེའི་རྒྱུས། གཉིས་པ་དང་། གསུམ་པ་དང་། བཞི་པའི་མཚན་ཐོབ་བོ། །དགེ་བའི་ཆོས་བསྒོམ་པ་ལ་མོས་ཤིང་། འགྱོད་པའི་སེམས་མེད་པས། དེའི་རྒྱུས་ལུས་ཀྱི་མདོག་གསེར་ལྟ་བུ་དང་། འོད་རྟག་པ་དང་། སོ་དཀར་བ་དང་། སྨིན་མཚམས་ཀྱི་མཛོད་སྤུའི་མཚན་ཐོབ་བོ། །བསྟོད་ཅིང་བསྔགས་ན་ཡང་ང་རྒྱལ་མི་སྐྱེ་ལ། བདག་གི་ལེགས་པ་བཅབས་ཏེ་རློམ་སེམས་མེད་ན་དེའི་རྒྱུས་རྟ་ལྟ་བུར་མཚན་སྦུབས་སུ་ནུབ་པའི་མཚན་ཐོབ་བོ། །དགེ་བའི་ལས་ཅི་བྱས་པ་བྱང་ཆུབ་ཏུ་བསྔོས་ན་དེའི་རྒྱུས། བ་སྤུའི་ཁུང་རེ་རེ་ནས་སྤུ་རེ་རེ་སྐྱེ་བའི་མཚན་དང་། བ་སྤུ་གྱེན་དུ་ཉལ་བ་དང་། སོ་བཞི་བཅུ་དང་ལྡན་པ་དང་། རོ་བྲོ་བའི་མཆོག་གི་མཚན་ཐོབ་བོ། །རྟག་ཏུ་བརྩོན་འགྲུས་བྱས་ན། དེའི་རྒྱུས་འགྲམ་པའི་ལྷ་ང་ཟླུམ་པ་དང་། ལུས་ཀྱི་སྟོད་སེང་གེ་ལྟ་བུའི་མཚན་ཐོབ་བོ། །སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་སྡུག་པར་བསམས་པས་དེའི་རྒྱུས་སོ་ཐགས་བཟང་ཞིང་མཉམ་པ་དང་། མིག་མཐོན་མཐིང་དུ་འདུག་པ་དང་། མིག་ཁྱུ་མཆོག་གི་རྒྱལ་པོ་ལྟ་བུའི་མཚན་ཐོབ་བོ། །དགེ་བའི་ཆོས་སྒྲུབ་པ་ལ་སྐྱོ་ཞིང་ངལ་བའི་སེམས་མེད་པས་མཚན་ལྷག་མ་གཞན་རྣམས་ཐོབ་བོ། །བྱང་ཆུབ་སེམས་དཔའ་སེམས་དཔའ་ཆེན་པོ་མཚན་ཉིད་ལ་སྤྱོད་ཅིང་གནས་པའི་ཚེ་མཚན་སུམ་ཅུ་རྩ་གཉིས་ཀྱི་ལས་བྱེད་དོ། །རྣམ་པར་དག་པའི་སྤྱོད་པ་ལ་གནས་པའི་ཚེ། མཚན་སུམ་ཅུ་རྩ་གཉིས་ཡོད་མོད་ཀྱི། ཡོངས་སུ་རྫོགས་པའམ། གསལ་བ་མ་ཡིན་ནོ། །སྤྱོད་པ་བཅུ་གསུམ་པ་ལ་གནས་པ་ན་མཚན་རྣམས་ཀྱང་མངོན་པར་གསལ་བར་ཡོངས་སུ་རྫོགས་སོ། །སངས་རྒྱས་ཀྱི་ཆོས་ཀྱི་མཚན་གྲངས་མེད་མོད་ཀྱི་སེམས་ཅན་རྣམས་ལ་མི་འཐུན་ཏེ། རབ་དང་། འབྲིང་དང་། ཐ་མ་ཡོད་པས་བསམ་གྱིས་མི་ཁྱབ་པས་ན། དེ་བས་ན། སངས་རྒྱས་ཀྱིས་
མཚན་བཟང་པོ་སུམ་ཅུ་རྩ་གཉིས་གསུངས་སོ། །སེམས་ཅན་ཐམས་ཅད་ཀྱི་བསོད་ནམས་ཇི་ཙམ་ཡོད་པ་ཕྱོགས་གཅིག་ཏུ་བསྡུས་ཏེ་སྤུངས་ནས། དེ་བཞིན་གཤེགས་པའི་བ་སྤུ་གཅིག་གི་མཚན་དང་མཉམ་མོ། །བ་སྤུའི་ཁུང་བུ་ཐམས་ཅད་ཀྱི་བསོད་ནམས་ཇི་སྙེད་ཅིག་ཡོད་པ། གཅིག་ཏུ་བསྡུས་ཏེ་སྤུངས་ནས། དཔེ་བྱད་བཟང་པོ་གཅིག་དང་མཉམ་མོ། །དཔེ་བྱད་བཟང་པོ་ཇི་ཙམ་ཡོད་པའི་བསོད་ནམས་ཇི་སྙེད་ཡོད་པ་དེ་ལས་བརྒྱ་འགྱུར་དུ་བྱས་ན་མཚན་གཅིག་དང་མཉམ་སྟེ། སྨིན་མཚམས་ཀྱི་མཛོད་སྤུ་དཀར་པོའི་མཚན་དང་། སྤྱི་གཙུག་བལྟར་མི་སྣང་བའི་མཚན་ནི་མ་གཏོགས་སོ། །དེ་མ་ཡིན་པ་མཚན་གཞན་ཐམས་ཅད་གཅིག་ཏུ་བསྡུས་ཏེ། སྟོང་འགྱུར་དུ་བྱས་ན། མཚན་གོང་མ་གཉིས་སུ་འགྱུར་རོ། །མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་པོའི་བསོད་ནམས་ཇི་སྙེད་ཡོད་པ་གཅིག་ཏུ་བསྡུས་སྤུངས་ཏེ་ཁྲི་ཕྲག་སྟོང་འགྱུར་དུ་བྱས་པ་དང་། དེ་བཞིན་གཤེགས་པའི་འབྲུག་སྒྲ་ལྟ་བུའི་དབྱངས་ཟབ་ཅིང་རྒྱང་རིང་པོར་གྲགས་པའི་མཚན་དང་མཉམ་སྟེ། གསུང་སྒྲ་དེས་ནི། སངས་རྒྱས་ཀྱི་ཞིང་ཚད་མེད་མཐའ་ཡས་བསམ་གྱིས་མི་ཁྱབ་པའི་རྡུལ་ཕྲ་རབ་སྙེད་དུ་གྲགས་ཤིང་། སེམས་ཅན་གྱི་དོན་དུ་བྱམས་པ་དང་། སྙིང་རྗེ་ཆེན་པོ་སྤྱོད་པས། དྲིན་ཤེས་པ་དང་། དྲིན་བསབ་པ་འདི་ནི་བསམ་གྱིས་མི་ཁྱབ་བོ། །དེ་ལྟར་མཚན་དང་དཔེ་བྱད་བཟང་པོ་དེ་དག་རེ་རེས་ཀྱང་། སོ་སོའི་སྐྱེ་བོ་ཚད་མེད་གྲངས་མེད་པ་བྱེ་བ་བརྒྱ་སྟོང་གིས་ས་ཆེན་པོའི་རྡུལ་ཕྲ་རབ་སྙེད་ལ་ཕན་པ་དང་བདེ་བའི་དོན་བྱས་ནས། བྱང་ཆུབ་ཏུ་སེམས་བསྐྱེད་དུ་བཅུག་གོ །དེ་ལྟར་མཐར་གྱིས། བསྒྲུབ་པ་ཡོངས་སུ་རྫོགས་ནས། མཚན་དང་དཔེ་བྱད་བཟང་པོ་རྣམ་གཉིས་ཐོབ་སྟེ། མཚན་དང་དཔེ་བྱད་བཟང་པོ་ཡོངས་སུ་རྫོགས་ནས། བྱང་ཆུབ་ཀྱི་ཤིང་དྲུང་དུ་སོང་སྟེ། བདུད་ཀྱི་དཔུང་
རྣམས་བཏུལ་ཏེ། མངོན་པར་སངས་རྒྱས་ནས། ཡང་དག་པར་ཆོས་ཀྱི་འཁོར་ལོ་བསྐོར་ཏོ། །སོ་སོའི་སྐྱེ་བོ་ལ་ཕན་པ་དང་བདེ་བའི་དོན་དུ་འདོད་པའི་ཆུའི་ཀླུང་ལས་བསྒྲལ་ནས། ཤེས་རབ་ཀྱི་ཕ་རོལ་ཏུ་ཕྱིན་པའི་འགྲམ་དུ་བཀོད་དེ། སེམས་ཅན་ཐམས་ཅད་ལ་ཕན་པ་དང་བདེ་བའི་དོན་ཡོངས་སུ་རྫོགས་པར་བྱས་སོ། །བཅོམ་ལྡན་འདས་ཀྱིས། ཀུན་དགའ་བོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ལ་སོགས་ཏེ། འཁོར་མང་པོ་ཐམས་ཅད་ལ། འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་ཁྱེད་རྣམས་ལ་སུ་ཞིག་སངས་རྒྱས་ཀྱི་བཀའ་དྲིན་རྟག་ཏུ་གཟོ་ཞིང་། དམ་པའི་ཆོས་བསྲུང་བའི་ཕྱིར། ཐབས་མཁས་པ་ཆེན་པོ་དྲིན་ལན་བསབ་པའི་མདོ་སྡེ་ཤིན་ཏུ་ཟབ་མོ་འདི། གླེགས་བམ་དུ་བྲི་བ་དང་། ཀློག་པ་དང་། ཁ་ཏོན་བྱེད་པར་འགྱུར། སུ་ཞིག་གིས་ཕྱི་མའི་དུས་ངན་པའི་ཚེ། བརྩོན་འགྲུས་ཆེན་པོ་བསྐྱེད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་སྲུང་ཞིང་གཟུངས་སུ་འཛིན་པར་འགྱུར། སུ་ཞིག་གིས་ཆོས་བསྲུང་བའི་ཕྱིར། མདོ་སྡེ་འདི་རྒྱས་པར་སྤེལ་ཞིང་སེམས་ཅན་ཐམས་ཅད་ལ་ཕན་པ་དང་། བདེ་བའི་དོན་བྱེད་པར་ནུས། ཞེས་བཀའ་སྩལ་པ་དང་། དེའི་ཚེ་འཁོར་དེ་ཉིད་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཁྲི་བརྒྱ་སྟོང་སྙེད་འདུག་པ་ལས་ལངས་ཏེ། གོས་ཚགས་བཅོས་ནས་བླ་གོས་ཕྱོགས་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ཐལ་མོ་སྦྱར་བ་བཏུད་ནས། སངས་རྒྱས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་གིས་སླད་མའི་དུས་ངན་པའི་ཚེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་བསྲུང་ཞིང་། དམ་པའི་ཆོས་གཟུངས་སུ་བཟུང་སྟེ། སེམས་ཅན་མང་པོ་ལ་ཕན་པའི་དོན་བྱེད་པར་སྤྲོའོ། །དེ་ནས་བྱང་ཆུབ་སེམས་དཔའ་སེང་གེས་འདི་སྐད་ཅེས་གསོལ་ཏོ། །བཅོམ་ལྡན་
འདས། བདག་ཀྱང་ཐབས་རྣམ་པ་སྣ་ཚོགས་ཀྱིས། སེམས་ཅན་རྣམས་ཡོངས་སུ་བསྡུ་བར་སྤྲོའོ། །བྱང་ཆུབ་སེམས་དཔའ་རྡོ་རྗེས་གསོལ་པ། སེམས་ཅན་གང་ངན་འགྲོ་གསུམ་དུ་ལྟུང་བར་འགྱུར་བ་དག །བདག་གིས་ཅི་ནས་ཀྱང་མི་ལྟུང་བར་བགྱི་བར་སྤྲོའོ། །བྱང་ཆུབ་སེམས་དཔའ་འཇམ་དཔལ་གྱིས་གསོལ་པ། སེམས་ཅན་རྣམས་ཅི་དང་ཅི་འདོད་པ། བདག་གིས་ཐམས་ཅད་ཡོངས་སུ་རྫོགས་པར་བགྱི་བར་སྤྲོའོ། །བྱང་ཆུབ་སེམས་དཔའ་ཡེ་ཤེས་རྒྱལ་མཚན་གྱིས་གསོལ་པ། བདག་གིས་ནི། སེམས་ཅན་རྣམས་ལ་ཡེ་ཤེས་ཆེན་པོའི་ཆོས་ཀྱི་རྒྱལ་མཚན་སྦྱིན་པར་བགྱི་བ་སྤྲོའོ། །བྱང་ཆུབ་སེམས་དཔའ་ཆོས་ཀྱི་རྒྱལ་མཚན་གྱིས་གསོལ་པ། བཅོམ་ལྡན་འདས། བདག་གིས་ནི། སེམས་ཅན་རྣམས་ལ་ཆོས་ཡོངས་སུ་སྦྱིན་པར་སྤྲོའོ། །བྱང་ཆུབ་སེམས་དཔའ་ཉི་འོད་ཀྱིས་གསོལ་པ། བཅོམ་ལྡན་འདས། བདག་གིས་ནི། སེམས་ཅན་རྣམས་ལ་བདེ་བ་སྦྱིན་པར་སྤྲོའོ། །བྱང་ཆུབ་སེམས་དཔའ་ཟླ་འོད་ཀྱིས་གསོལ་པ། བཅོམ་ལྡན་འདས། བདག་གིས་ནི། སེམས་ཅན་རྣམས་ལ་བསོད་ནམས་ཀྱི་ལས་བྱེད་དུ་གཞུག་པར་བསྐུལ་བར་སྤྲོའོ། །བྱང་ཆུབ་སེམས་དཔའ་དགེ་སྦྱོང་གིས་གསོལ་པ། བཅོམ་ལྡན་འདས། བདག་གིས་ནི་སེམས་ཅན་རྣམས་ལ་ཐམས་ཅད་བག་མེད་པ་ལ་མི་གནས་པར་བསྐུལ་བར་སྤྲོའོ། །བྱང་ཆུབ་སེམས་དཔའ་བློ་གྲོས་མི་ཟད་པས་གསོལ་པ། བཅོམ་ལྡན་འདས། བདག་གིས་ནི། སེམས་ཅན་ཐམས་ཅད་ལ། ཟད་པ་མི་ཤེས་པའི་དབྱིངས་ཀྱི། དོན་མཐོང་བར་བསྟན་པར་སྤྲོའོ། །བྱང་ཆུབ་སེམས་དཔའ་ཟླ་འོད་བུས་གསོལ་པ། བཅོམ་ལྡན་འདས། བདག་ནི་སེམས་ཅན་ཐམས་ཅད་ལ། བླ་ན་མེད་པའི་བདེ་བ་སྦྱིན་པ་བགྱི་བར་སྤྲོའོ། །ཞེས་བྱང་ཆུབ་
སེམས་དཔའ་དེ་དག །སོ་སོ་ནས་དམ་བཅས་སོ། །བྱང་ཆུབ་ཡོངས་སུ་བརྒྱན་ཅིང་། སེམས་ཅན་ཐམས་ཅད་ལ་ཕན་ཞིང་། བདེ་བ་དང་། སངས་རྒྱས་ཀྱི་བཀའ་དྲིན་དྲན་ཞིང་། སངས་རྒྱས་ཀྱི་བཀའ་དྲིན་བསབ་པའི་ཕྱིར། སྟན་ལས་ལངས་ནས། ཐལ་མོ་སྦྱར་བ་བཏུད་དེ། སངས་རྒྱས་ཀྱི་མདོ་སྡེ་འདི། བདག་ཅག་ལ་གཏད་དུ་གསོལ། ཞེས་གསོལ་ཏོ། །དེའི་ཚེ་ཚེ་དང་ལྡན་པ་ཀུན་དགའ་བོས། འདི་སྐད་ཅེས་གསོལ་ཏོ། །བཅོམ་ལྡན་འདས་མདོ་སྡེ་འདིའི་མཚན་ཅི་ཞེས་བགྱི། ཇི་ལྟར་ཡོངས་སུ་གཟུང་། བཅོམ་ལྡན་འདས་ཀྱིས། ཀུན་དགའ་བོ་ལ་བཀའ་སྩལ་པ། མདོ་སྡེ་འདིའི་མིང་། དགེ་བའི་དངོས་པོ་ཀུན་བསྡུ་བ་ཞེས་ཀྱང་བྱ། ཐབས་མཁས་པ་ཆེན་པོ་ཞེས་ཀྱང་བྱ། དགོངས་པ་དམ་པའི་སྤྱོད་པ་ཞེས་ཀྱང་བྱ། སངས་རྒྱས་དྲིན་ལན་བསབ་པ་ཞེས་ཀྱང་བྱའོ། །བཅོམ་ལྡན་འདས་ཀྱིས། ཀུན་དགའ་བོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་འདི་སྐད་ཅེས་བཀའ་སྩལ་ཏོ། །ཁྱེད་རྣམས་ཇི་ལྟར་བསྟན་པ་བཞིན་དུ། ནན་ཏན་དུ་སྤྱོད་ཅིག །སངས་རྒྱས་ཀྱིས་ཡོངས་སུ་གདམས་པའི་ལེའུ་འདི་བསྟན་པའི་ཚེ། ཉན་ཐོས་བདུན་ཁྲི་ཉིས་སྟོང་གིས། བླ་ན་མེད་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །གཞན་ཡང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་དང་། དེ་ལ་སོགས་པ་ཐམས་ཅད་སངས་རྒྱས་ཀྱིས་གསུངས་པ་ལ་རྗེས་སུ་ཡི་རང་བར་གྱུར་ཏོ། །ཐབས་མཁས་པ་ཆེན་པོ་སངས་རྒྱས་དྲིན་ལན་བསབ་པའི་མདོ་ལས། ཉེ་བར་བསྙེན་པའི་ལེའུ་ཞེས་བྱ་སྟེ་དགུ་པའོ།། །།ཐབས་མཁས་པ་ཆེན་པོ་སངས་རྒྱས་དྲིན་ལན་བསབ་པ་ཞེས་བྱ་བའི་མདོ་རྫོགས་སོ།། །།