ནགས་སྒྲུབ་པའི་ཆོ་ག
འོན་ཏེ་མི་སྣང་བ་བསྒྲུབ་པར་འཚལ་ན་དོན་ཡོད་པའི་ཞགས་པའི་ཕྱག་རྒྱ་ལག་པས་བཅིངས་ཏེ། གཡས་པ་དང་གཡོན་པས་གང་དུ་ཇི་སྐད་གསུངས་པ་བཞིན་ཞགས་པ་བཟུང་ནས་དོན་ཡོད་པའི་ཞགས་པའི་སྙིང་པོ་ལན་བརྒྱ་རྩ་བརྒྱད་བཟླས་བརྗོད་བགྱིས་ན་མི་གདའ་བར་འགྱུར་རོ། །བརྒྱ་རྩ་བརྒྱད་ལན་གཉིས་བཟླས་བརྗོད་བགྱིས་ན་ནམ་མཁའ་ལ་མཆི་བར་འགྱུར་རོ། །དོན་ཡོད་པའི་རིག་སྔགས་འཆང་གི་འཁོར་ལོས་སྒྱུར་བར་འགྱུར་རོ། །རིག་སྔགས་འཆང་བརྒྱ་སྟོང་ཕྲག་འབུམ་གྱིས་ཡོངས་སུ་བསྐོར་བར་འགྱུར་རོ། །ལོ་བྱེ་བ་བཅུར་འཚོ་བར་འགྱུར་རོ། །སྐྲ་ཅུང་ཟད་འཁྱིལ་བར་འགྱུར་རོ། །སྟོབས་དང་། བརྩོན་འགྲུས་ཕ་རོལ་གྱིས་ཟིལ་གྱིས་མི་གནོན་པར་འགྱུར་རོ། །ཆར་པ་འཚལ་བས་མཆོད་པ་བགྱིས་ན་ཅི་ཙམ་གསོལ་བ་བཏབ་པ་བཞིན་འབབ་པར་འགྱུར་རོ། །ཧ་ཅང་ཆར་པ་ཆེས་པ་དགག་པའི་སླད་དུ་མཆོད་པ་བགྱིས་ན་ཆར་པ་བཀག་པར་འགྱུར་རོ། །ཡམས་ཀྱི་ནད་དང་། གནོད་པ་དང་། འཚེ་བ་དང་། འཁྲུག་པ་ཐམས་ཅད་དང་། མི་ངས་ཐམས་ཅད་རབ་ཏུ་ཞི་བར་འཚལ་བས་རིག་སྔགས་འཆང་ལེགས་པར་ཁྲུས་བགྱིས་པ་གཙང་མས་གོས་གཙང་མ་བགོས་ལ་ལག་པས་ཞགས་པ་བླངས་ཏེ། གནས་མཐོན་པོར་འཛེགས་ནས་དོན་ཡོད་པའི་ཞགས་པའི་ཕྱག་རྒྱ་དང་། ཞགས་པ་བཅིངས་ནས་དོན་ཡོད་པའི་
ཞགས་པའི་སྙིང་པོ་ཕྱོགས་བཞིར་ལན་བདུན་བཟླས་ནས་ཞགས་པ་འཕངས་ན་དེ་དག་ཐམས་ཅད་དྲན་པ་ཙམ་གྱིས་འཐབ་པ་དང་། རྩོད་པ་དང་། འགྱེད་པ་དང་། རང་གི་དཔུང་དང་། གཞན་གྱི་དཔུང་ཐམས་ཅད་དང་། ཕས་ཀྱི་རྒོལ་བ་ཐམས་ཅད་དང་། མི་མཛའ་བ་ཐམས་ཅད་རབ་ཏུ་ཞི་བར་འགྱུར་རོ། །འཇིགས་པ་དང་། ཡམས་ཀྱི་ནད་དང་། གནོད་པ་ཐམས་ཅད་དང་། མི་ངས་ཆེན་པོ་དང་མུ་གེའི་དགོན་པའི་འཇིགས་པ་ཐམས་ཅད་རབ་ཏུ་ཞི་བར་འགྱུར་རོ། །ཧ་ཅང་ཆར་ཆེ་བ་དང་། དུས་མ་ལགས་པའི་ཆར་དང་། གྲང་བ་དང་། རླུང་དང་། ཚ་བ་མི་བཟད་པའི་འཇིགས་པ་ཐམས་ཅད་རབ་ཏུ་ཞི་བར་འགྱུར་རོ། །དཔག་ཚད་བརྒྱ་སྟོང་ཁོར་ཡུག་ཏུ་མཚམས་ཆེན་པོ་བཅིང་བ་བགྱིས་པར་འགྱུར་རོ། །ཅི་ལྟ་ཅི་ལྟར་ཡིད་ལ་བསམས་པ་དེ་ལྟ་དེ་ལྟར་ཐམས་ཅད་འགྲུབ་པར་འགྱུར་བས། དོན་ཡོད་རྒྱལ་པོ་མཆོད་པར་བགྱི་ཞིང་བཟླས་བརྗོད་བགྱི་གསོལ་བར་ཡང་བགྱིའོ། །མཆོད་པ་དང་། གསོལ་བ་བགྱིས་པ་ཙམ་གྱི་མོད་ལ་ཐམས་ཅད་ཕུན་སུམ་ཚོགས་པར་འགྱུར་ཏེ། དེ་ལ་ཡིད་གཉིས་དང་སོམ་ཉི་བསྐྱེད་པར་མི་བགྱིའོ། །ཆོ་ག་ཞིབ་མོ་ལས་ཅི་སྐད་གསུངས་པ་བཞིན་ལས་བགྱིད་པ་རྣམས་ཀྱིས་ཆོ་ག་དེ་བཞིན་དུ་བསྒྲུབ་པར་བགྱིའོ། །དེ་ནས་སྐད་ཅིག་དེའི་མོད་ལ་ཐམས་ཅད་འགྲུབ་པར་འགྱུར་རོ། །བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་བསྒོམ་པར་བགྱིའོ། །སེམས་ཅན་ཐམས་ཅད་ལ་མཆོག་ཏུ་བརྩེ་བར་བགྱིའོ། །འཕགས་པ་སྤྱན་རས་གཟིགས་དབང་ཕྱུག་ལ་མཆོད་པར་བགྱིའོ། །དཀོན་མཆོག་གསུམ་ལ་གུས་པར་བགྱིའོ། །དེ་བཞིན་གཤེགས་པ་ཐམས་ཅད་ལ་གུས་པ་དང་། བླ་མར་ཡིད་ལ་བསྒོམ་པར་བགྱིའོ། །མི་གཙང་བ་སྤྱོད་པ་གཙང་བར་བགྱི་ཞིང་ཡོངས་སུ་དག་པའི་ངང་ཚུལ་ཅན་དུ་བསྒོམ་པར་བགྱིའོ། །དོན་ཡོད་པའི་ཞགས་པ་དེ་ཁོ་ན་ཉིད་ཀྱི་ཆོ་ག་སྒྲུབ་པ་ཡིད་བཞིན་གྱི་ནོར་བུ་བྱང་ཆུབ་དགུག་པར་བགྱིའོ། །དེ་ནས་ཞགས་པའི་འཁོར་ལོའི་ཆོ་ག་སྒྲུབ་པ་བཤད་པར་བགྱི་སྟེ། རིག་སྔགས་འཆང་དེ་ཁོ་ན་ཉིད་བསྒྲུབས་པས་ཕུག་ཏུ་འཇུག་པའི་བསྒྲུབ་པ་
ཐམས་ཅད་ཀྱི་མཆོག་ཕུག་ཏུ་འཇུག་པ་དང་། ལྷ་མ་ཡིན་གྱི་གནས་སུ་འཇུག་པ་དང་། མིའམ་ཅིའི་གནས་སུ་འཇུག་པ་དང་། དྲི་ཟའི་གནས་སུ་འཇུག་པ་དང་། ལྷའི་གནས་སུ་འཇུག་པ་དང་། ནམ་མཁའ་ལ་རྒྱུ་བ་དང་། སུམ་ཅུ་རྩ་གསུམ་པའི་གནས་སུ་འཇུག་པ་དང་། འོག་མིན་གྱི་གནས་ཀྱི་བར་དུ་འཇུག་པ་དང་། ཀླུའི་རྒྱལ་པོའི་གནས་སུ་འཇུག་པ་དང་། ཐང་ལ་རྒྱུ་བ་དང་། ཉི་མའི་གནས་སུ་འཇུག་པ་དང་། ཟླ་བའི་གནས་སུ་འཇུག་པ་དང་། སྐར་མ་དང་རྒྱུ་སྐར་གྱི་གནས་སུ་འཇུག་པ་དང་། ནགས་སུ་འཇུག་པ་དང་། རིལ་རྒྱུ་བ་དང་། འབབ་ཆུ་ཆེན་པོར་འཇུག་པ་སྟེ། ཇི་ལྟ་ཇི་ལྟར་ཡིད་ལ་བསམས་པ་དེ་ལྟ་དེ་ལྟར་འཇིག་རྟེན་པ་དང་། འཇིག་རྟེན་ལས་འདས་པའི་ཞགས་པའི་ཆོ་ག་བསྒྲུབ་པ་ཚོགས་ཆུང་ངུ་དང་། རྩོལ་བ་ཆུང་ངུས་འགྲུབ་པར་འགྱུར་རོ། །དེལ་ཡིད་གཉིས་དང་། སོམ་ཉི་བསྐྱེད་པར་མི་བྱའོ། །རིག་སྔགས་འཆང་གཙང་མར་གྱུར་པས་ལེགས་པར་ཁྲུས་བགྱིས་ཏེ། གོས་གཙང་མ་བགོས་ནས་ཟས་དཀར་གསུམ་འཚལ་བ། གཙང་མ་དེ་ཁོ་ན་ཉིད་ལ་གུས་པས་སངས་རྒྱས་རྗེས་སུ་དྲན་པ་བསྒོམ་པར་བགྱིའོ། །བྱམས་པའི་སེམས་ལ་མཉམ་པར་གཞག་ནས་ས་སྙིང་རྗེའི་བསམ་པ་དག་པའི་ཡིད་ཀྱིས་ཚེས་བཅུ་གསུམ་ནས་བརྩམས་ཏེ། ཟླ་བ་ཉའི་བར་དུ་གསལ་བ་ཤིན་ཏུ་བཀྲ་ཤིས་པ་ལ་དུས་གསུམ་དུ་ཅི་འབྱོར་པའི་མཆོད་པ་རྣམ་པ་སྣ་ཚོགས་ཀྱིས་མཆོད་པར་བགྱིས་ལ། རྟག་ཏུ་བརྒྱ་རྩ་བརྒྱད་པ་ཡི། །དུས་གསུམ་རྒྱུན་དུ་བཟླས་བརྗོད་བགྱི། །ཉིན་པར་དུས་གསུམ་ལན་གསུམ་སྟེ། །མཚན་མོའི་དུས་སུ་ལན་གསུམ་བགྱི། །འཁོར་ལོ་ཞགས་པ་བླ་མེད་འདི། །སྐུད་པ་གསུམ་ལས་བསྒྲུབ་བགྱི་སྟེ། །རས་སྐུད་པདྨའི་སྐུད་པ་དང་། །ཨརྒའི་སྐུད་པ་སུམ་འགྱུར་དུ། །དེ་ནི་ལེགས་པར་ཚད་བཞིན་དུ། །ཁྲུ་ནི་སུམ་ཅུ་རྩ་དྲུག་བགྱི། །འཁོར་ལོ་རྣམ་པ་གསུམ་ལས་བགྱི། །རྒྱར་ནི་སོར་བཞིའི་ཚད་ལགས་ཏེ། །སྙིང་པོར་བཅས་ཤིང་མུ་ཁྱུད་བཅས། །ཀུན་ནས་རྩིབས་དང་ལྡན་པ་དག །གསེར་དང་དངུལ་
དང་ཟངས་ལས་བགྱི། །ཆོས་བསྟན་ལེགས་པར་བརྒྱན་པ་ཡི། །བཟང་པོའི་སྟན་ལ་གཞག་པར་བགྱི། །སྤོས་ཀྱི་དཀྱིལ་འཁོར་མེ་ཏོག་གི། །སིལ་མ་བཀྲམ་ནས་བུམ་པ་དགོད། །དེ་བཞིན་མཆོད་ཡོན་སྣོད་ཀྱང་བཤམ། །རི་མོའི་གཟུགས་ཀྱི་མདུན་དུ་ཆོས་ཀྱི་སྟན་བཤམས་པར་བགྱིས་པའི་སྟེང་དུ་འཁོར་ལོའི་ཞགས་པ་གཞག་པར་བྱ་སྟེ། མཆོད་པ་བགྱིས་ལ་བསམས་པ་ཅི་ལྟ་བ་བཞིན་དུ་དུས་གསུམ་དུ་ལན་བརྒྱ་རྩ་བརྒྱད་བཟླས་བརྗོད་བགྱིའོ། །དེ་ནས་ཚེས་བཅྭ་ལྔའི་ཟླ་བ་ཉ་བ་ལ་ཉིན་ཞག་གཅིག་མཆིས་པར་གྱུར་པས། ཚིག་གཞན་མི་སྨྲ་བར་འཕགས་པ་སྤྱན་རས་གཟིགས་དབང་ཕྱུག་གི་རི་མོའི་གཟུགས་ལ་མཆོད་པ་བགྱི་ཞིང་། བདུག་པ་རྣམ་པ་གསུམ་པོ། །ཨ་ག་རུ་དང་། ཙན་དན་དང་། གུ་གུལ་རྣམས་འབུལ་བར་བགྱིའོ། །རི་མོའི་གཟུགས་ཀྱི་མདུན་དུ་ཆོས་ཀྱི་སྟན་མཆིས་པ་ལ་མངོན་དུ་ཕྱོགས་ཏེ་མཆིས་ནས། དོན་ཡོད་པའི་ཞགས་པའི་སྙིང་པོ་སྟོང་རྩ་བརྒྱད་བཟླས་བརྗོད་བགྱིས་ཏེ། ཡུངས་ཀར་རེ་རེ་ལ་བཟླས་བརྗོད་བགྱིས་པས་ཞགས་པའི་སྟེང་དུ་གཏོར་བར་བགྱིའོ། །སྟོང་རྩ་བརྒྱད་ཚང་ནས་ཞགས་པ་འབར་བའི་འཁོར་ལོ་ནམ་མཁའ་ལ་མཆིས་ནས་འབར་ཞིང་ལྡིང་བར་འགྱུར་རོ། །རིག་སྔགས་འཆང་གི་ལུས་ཀྱི་སྟོད་དང་། སྤྱི་བོ་ནས་འོད་ཟེར་འབྱུང་བར་འགྱུར་རོ། །རི་མོའི་གཟུགས་ལས་ལེགས་སོ་ཞེས་བྱ་བའི་སྒྲ་འབྱིན་པར་འགྱུར་རོ། །དེ་ནས་རིག་སྔགས་འཆང་གིས་དོན་ཡོད་པའི་ཞགས་པའི་སྙིང་པོའི་འཁོར་ལོ་ཞགས་པའི་ཆོ་ག་རྒྱ་ཆེན་པོ་འདི་འགྲུབ་པར་འཚལ་བར་བགྱིའོ། །དེ་ནས་རིག་སྔགས་འཆང་གིས་མཆོད་པ་ཆེན་པོ་བགྱིས་ལ། དོན་ཡོད་ཁྲོ་བོའི་རྒྱལ་པོ་ལན་སྟོང་རྩ་བརྒྱད་བཟླས་བརྗོད་བགྱི་སྟེ། དེའི་འོག་ཏུ་རིག་སྔགས་འཆང་གིས་ཞགས་པ་བླང་བར་བགྱིའོ། ལག་པ་གཡོན་པ་འཁོར་ལོའི་ཕྱག་རྒྱའི་ཚུལ་དུ་བཅིང་བར་བགྱི་ཞིང་། གཡས་པ་ཞགས་པའི་ཕྱག་རྒྱ་དང་འཁོར་ལོའི་ཚུལ་ལ་བརྟེན་ནས་བླངས་ཏེ། དོན་ཡོད་པའི་ཞགས་པའི་སྙིང་པོ་བརྗོད་ནས་ཕྱོགས་བཞིར་འཕང་བར་བགྱིའོ། །དེ་ནས་ཕྱོགས་བཅུར་ཁྲོ་བོའི་རྒྱལ་པོ་ལན་ཉི་ཤུ་
རྩ་གཅིག་བཟླས་བརྗོད་བགྱིའོ། །དེ་ནས་བདག་ཉིད་ཀྱི་ལུས་ལ་དབང་བསྐུར་བའི་ཚུལ་དུ་ལན་བདུན་དུ་བསྐོར་བར་བགྱིའོ། །དེ་ནས་ཕྱག་རྒྱའི་ཚུལ་དུ་བསྐོར་བ་ཙམ་གྱི་མོད་ལ་རིག་སྔགས་འཆང་འཁོར་ལོས་སྒྱུར་བའི་དབང་བསྐུར་བར་འགྱུར་རོ། །དམ་པ་ཆེན་པོ་འགྲུབ་པར་འགྱུར་རོ། །འཁོར་ལོས་སྒྱུར་བའི་རྒྱལ་པོ་ཆེན་པོ་ལེགས་མཐོང་རང་གི་གཟུགས་ཀྱིས་མདུན་ན་མཆིས་ནས། རིག་སྔགས་འཆང་གི་རྐང་བ་སྤྱི་བོས་བླངས་ནས་འདི་སྐད་ཅེས་ཀྱང་སྨྲ་བར་འགྱུར་ཏེ། རིག་སྔགས་འཆང་གིས་ཅི་བཀའ་སྩལ་བ་དེ་བགྱིའོ་ཞེས་ཅི་བསྒོ་བའི་དོན་དེ་དང་དེ་ཐམས་ཅད་བགྱིད་པར་འགྱུར་རོ། །བྲན་ནི་རང་བཞིན་གྱིས་ཐམས་ཅད་དུ་ལས་བགྱིད་པར་འགྱུར་རོ། །དེ་ནས་རིག་སྔགས་འཆང་གི་གནས་སུ་འཇུག་པར་འཚལ་བས། འདི་ལྟར་ནུབ་གསུམ་དུ་མཆིས་པར་གྱུར་པས། ཞགས་པའི་ཕྱག་རྒྱ་ལག་པས་བླང་བར་བགྱིའོ། །ཕུག་གི་སྒོ་གང་ལགས་པ་དེར་ཞགས་པ་ལན་གསུམ་དུ་བསྐོར་བར་བགྱིའོ། །དོན་ཡོད་པའི་རྒྱལ་པོ་བཟླས་བརྗོད་བགྱིས་ཏེ། ཞགས་པ་གདབ་པར་བགྱིའོ། །ཞགས་པ་བཏབ་པ་ཙམ་གྱི་མོད་ལ་གནས་ཀྱི་ཕུག་གི་སྒོ་ཐམས་ཅད་ཕྱེ་བར་འགྱུར་རོ། །འཁྲུལ་འཁོར་དང་། གཏན་པ་དང་། ཕུག་དང་། འབབ་ཆུ་ཆེན་པོ་དང་། གསེག་མ་དང་། འབབ་ཆུ་དང་། གནོད་སྦྱིན་དང་། སྲིན་པོ་དང་། ལམ་མི་བདེ་བ་ཐམས་ཅད་བསལ་བ་དང་། བཅོམ་པ་དང་བཤིག་པར་འགྱུར་རོ། །གཏན་པ་དང་། སྒོ་གླེགས་དང་། འཁྲུལ་འཁོར་དང་། ལྕགས་སྒྲོག་རྣམས་དུམ་བུ་དུམ་བུར་བཅད་ཅིང་གྱེས་པར་འགྱུར། ཉམས་པར་འགྱུར། འཇིག་པར་འགྱུར་རོ། །ཤིན་ཏུ་དག་པ་དང་ཤིན་ཏུ་དྲི་མ་མེད་པ། ཤིན་ཏུ་རྒྱ་ཆེ་བའི་གཞལ་མེད་ཁང་འབྱོར་པ་རྣམ་པར་འཕྲུལ་པ་དག་མཐོང་བར་འགྱུར་རོ། །རིན་པོ་ཆེ་སྣ་ཚོགས་ཀྱིས་བཀྲ་བ་རིན་པོ་ཆེ་སྣ་བདུན་གྱིས་བརྒྱན་པའི་གནས། རིན་པོ་ཆེ་སྣ་ཚོགས་ཀྱི་ལྗོན་ཤིང་གིས་བརྒྱན་པའི་གཞལ་མེད་ཁང་མཐོང་བར་འགྱུར་རོ། །མེ་ཏོག་སྣ་ཚོགས་ཀྱི་རབ་ཤིན་ཏུ་དྲི་ཞིམ་པོའི་གཞལ་མེད་ཁང་མཐོང་བར་འགྱུར་རོ། །དེ་ནས་རིག་སྔགས་འཆང་གིས་ལག་པའི་ཞགས་པ་དང་། འཁོར་ལོའི་
ཕྱག་རྒྱའི་ཚུལ་མངོན་སུམ་དུ་བགྱིས་ནས། དོན་ཡོད་པའི་ཞགས་པའི་སྙིང་པོ་བཟླས་ཏེ་འཇུག་པར་བགྱིའོ། །རིག་སྔགས་འཆང་གནས་སུ་ཞུགས་པ་ཙམ་ཁོ་ནས་གནས་མཆོག་དེ་ཡང་རྣམ་པར་དྲུག་ཏུ་འགུལ་བ་དང་། གཡོ་བ་དང་། ལྡེག་པ་དང་། འུར་འུར་ཆེམ་ཆེམ་སྟེ་ལྷའི་འོད་ཟེར་གྱི་སྣང་བ་ཆེན་པོས་སྣང་བར་འགྱུར་རོ། །དེ་ནས་རིག་སྔགས་འཆང་འཇུག་པར་བགྱིའོ། །དེ་ནས་དོན་ཡོད་པ་རྣམ་པར་དག་པ་དྲི་མ་མེད་པ་ཞེས་བགྱི་བའི་སྨན། བུད་མེད་ཀྱི་གཟུགས་ལྷའི་རྒྱན་གྱིས་བརྒྱན་པ། ལྷའི་གོས་ཀྱི་རྒྱན་གྱིས་བཀླུབས་པ་ཁ་དོག་བཟང་པོ་རྒྱས་པ། མཆོག་དང་ལྡན་པ། ལྷའི་གཟུགས་ཆེན་པོ་འཆང་བ་བཱི་ཛ་པཱུ་ར་ཐོགས་པ་མཆི་བར་འགྱུར་རོ། །སྨན་བུད་མེད་ཀྱི་གཟུགས་འཆང་བ་དེ་མ་མཐོང་བ་ཙམ་ཁོ་ནས་དཔག་ཚད་གང་ཙམ་ནས། གཟི་བརྗིད་ཐམས་ཅད་དང་། སྟོབས་ཐམས་ཅད་ཉེ་བར་བསྒྲུབ་པར་བགྱིའོ། །དེ་ནས་རིག་སྔགས་འཆང་གིས་དོན་ཡོད་པའི་འཁོར་ལོའི་ཞགས་པ་མདུན་དུ་བཅིང་བར་བགྱི་སྟེ། མཐོང་བཅོམ་གྱི་མོད་ལ་དེའི་སྟོབས་དང་། བརྩོན་འགྲུས་དང་། གཟི་བརྗིད་ཉམས་པར་འགྱུར་རོ། །མཐུ་ཆུང་བར་འགྱུར་རོ། །དེ་ནས་བུད་མེད་དེ་རྒོད་པ་དང་། ཨོཾ་ཞེས་བགྱི་བས་གནོན་པར་བྱའོ། །ཁྲོ་བོའི་རྒྱལ་པོ་བཟླས་པར་བགྱིས་ཏེ། ཁ་བུབ་ཏུ་སྒྱེལ་ནས་ཆབ་འབྱུང་བར་འགྱུར་ཏེ་ཆབ་དེ་ལ་རེག་པར་མི་བགྱིའོ། །དོན་ཡོད་རྒྱལ་པོ་བཟླས་པར་བགྱི་སྟེ། དེ་ནས་མིག་ཚུགས་ཀྱིས་བལྟ་བར་བགྱིད་ན། རིག་སྔགས་འཆང་གིས་ཞགས་པས་བཞུ་བར་བགྱིའོ། །དེའི་འོག་ཏུ་བདུད་རྩིའི་ཆབ་འབྱུང་སྟེ་བླང་བར་བགྱི་བྱུག་པར་བགྱིའོ། །ཀུན་ཏུ་བྱུགས་པ་ཙམ་གྱིས་ནམ་མཁའ་ལ་མཆི་བར་འགྱུར་ཏེ། ཐོག་མར་རླུང་གི་ཕུང་པོ་ནས་འཛེགས་པར་འགྱུར་རོ། །མིག་ལ་བྱུགས་ན་ཕྱོགས་བཅུ་ཐམས་ཅད་དུ་གཏོགས་པའི་དེ་བཞིན་གཤེགས་པ་བྱང་ཆུབ་སེམས་དཔའི་ཚོགས་ཀྱི་འཁོར་དང་བཅས་པ་ཐམས་ཅད་དང་། སངས་རྒྱས་ཀྱི་ཞིང་དེའི་གཞལ་མེད་ཁང་དང་། གནས་རྣམ་པར་འཕྲུལ་པ་དང་། གང་དག་བཞུགས་ཤིང་གཞེས་ལ་འཚོ་བ་དག་ཅི་ལྟར་ལག་མཐིལ་ན་མཆིས་པ་དེ་བཞིན་དུ་མཐོང་བར་འགྱུར་རོ། །
གང་དག་ཡོངས་སུ་མྱ་ངན་ལས་འདས་པ་དང་། གང་དག་འདས་པ་དང་། གང་དག་མ་བྱོན་པ་དང་། གང་དག་ད་ལྟར་བྱུང་བ་དང་། སངས་རྒྱས་པ་རྣམས་དང་། གང་དག་རིང་བསྲེལ་སྙིང་པོའི་མཆོད་རྟེན་ཆེན་པོའི་སྲོག་ཤིང་གི་ཚོགས་ཅན་དག་དང་། དེ་བཞིན་དུ་ཅི་ལྟར་འཁོར་གྱི་དཀྱིལ་འཁོར་གྱི་ཁང་པ་དེ་དག་ཐམས་ཅད་མཐོང་བར་འགྱུར་རོ། །བདག་ཉིད་ལ་ཀུན་ནས་བྱུགས་ཏེ། དེས་བྱུགས་པ་ཙམ་གྱིས་པགས་པའི་མདོག་ལྷའི་གསེར་དང་འདྲ་བར་འགྱུར་རོ། །སྐྲ་སྔོ་ལ་ཅུང་ཟད་འཁྱིལ་བར་འགྱུར་རོ། །མིག་ལྷའི་ཨུཏྤལ་སྔོན་པོ་མཆོག་འདྲ་བར་འགྱུར་རོ། །ཚེ་ལྷའི་བསྐལ་པ་བརྒྱ་སྟོང་དུ་འགྱུར་རོ། །རིག་སྔགས་འཆང་གི་འཁོར་ལོས་སྒྱུར་བ་འབུམ་ཕྲག་བརྒྱ་སྟོང་ཕྲག་བཅྭ་བརྒྱད་ཀྱིས་ཡོངས་སུ་བསྐོར་བར་འགྱུར་རོ། །ལྷའི་བུ་མོ་བརྒྱ་བཞི་བཅུ་དང་། མིའམ་ཅིའི་བུ་མོ་དང་། རིག་སྔགས་འཆང་གི་བུ་མོ་གང་གཱའི་ཀླུང་གི་བྱེ་མ་བརྒྱ་སྟོང་ཕྲག་འབུམ་སྙེད་ཀྱིས་ཡོངས་སུ་བསྐོར་བར་འགྱུར་རོ། །ཅི་ལྟར་ཡིད་ལ་བསམས་པ་དང་། ཡིད་ལ་བརྣག་པ་ཙམ་གྱིས་ལྷའི་ཟས་ཀྱི་མཆོག་རོ་བརྒྱ་དང་ལྡན་པ་དག་མདུན་དུ་འབྱུང་བར་འགྱུར་རོ། །ལྷའི་བཏུང་བ་ཆེན་པོ་བདུད་རྩིའི་རོ་བྲོ་བདག་འབྱུང་བར་འགྱུར་རོ། །བྱང་ཆུབ་ཀྱི་སྙིང་པོ་ལ་ཐུག་གི་བར་དུ་འཁོར་ལོས་སྒྱུར་བའི་རྒྱལ་པོ་ཆེན་པོ་ལེགས་མཐོང་མདུན་ནས་རྒྱུག་པར་བྱེད་དོ། །དགྲ་ཐམས་ཅད་དང་། བགེགས་དང་། ལོག་འདྲེན་ཐམས་ཅད་བཅོམ་པ་དང་། ཉམས་པ་དང་། གཏུགས་པ་དང་། གཤེགས་པ་དང་། བཙལ་བ་དང་། གྱེས་པ་དང་། ཕྱེ་མར་བགྱིས་པར་འགྱུར་རོ། །ཡང་ན་སྨན་གྱི་བུད་མེད་དེའི་སྐྲ་ཀུན་བཏོན་ཏེ། སྐ་རགས་སུ་བགྱིས་ནས་བཅིང་བར་བགྱིའོ། །གང་དུ་བཅིངས་པ་དེ་ཡང་རིན་པོ་ཆེ་སྣ་བདུན་དུ་འགྱུར་རོ། །གང་དུ་ཞུགས་པ་ཐམས་ཅད་མི་སྣང་བར་འགྱུར་རོ། །དེ་ལ་ལྷ་ཐམས་ཅད་གནས་འཆའ་བར་འགྱུར་རོ། །ཀླུ་ཐམས་ཅད་དང་། ལྷ་མ་ཡིན་ཐམས་ཅད་དང་། མི་འམ་ཅི་ཐམས་ཅད་དང་། རིག་སྔགས་འཆང་ཐམས་ཅད་དེའི་དབང་དུ་མཆི་བར་འགྱུར་རོ། །འཁོར་དེ་ཐམས་ཅད་བྱང་ཆུབ་ཀྱི་སྙིང་པོ་ལ་ཐུག་གི་བར་དུ་དེའི་ཕྱི་བཞིན་
རྗེས་སུ་འབྲང་བར་འགྱུར་རོ། །དེ་ནས་རིག་སྔགས་འཆང་གནས་སུ་འཇུག་པར་འཚལ་ཞིང་སླར་ཡང་ལྡོག་པར་འཚལ་ན་སྨན་གྱི་བུད་མེད་དེ་དང་གཏམ་མི་བགྱི། རེག་པར་མི་བགྱི་བར་ལག་པའི་ཕྱག་རྒྱས་གནས་མཆོག་ཏུ་འཇུག་པར་བགྱིའོ། །དེ་ནས་གནས་ཐམས་ཅད་ན་གནས་པའི་བུད་མེད་དང་། སྐྱེས་པ་དང་། ཁྱེའུ་དང་། བུ་མོ་ཐམས་ཅད་ཕྱིར་བྱུང་ནས་མདུན་ན་སྡོད་པར་འགྱུར་ཏེ། ཁ་ཅིག་གི་ལག་ན་ནི་བུམ་པ་གང་བའོ། །ཁ་ཅིག་གི་ལག་ན་ནི་གདུགས་སོ། །ཁ་ཅིག་གི་ལག་ན་ནི་ལྷའི་གོས་ཐོགས་སོ། །ཁ་ཅིག་ནི་ལྷའི་ནོར་བུ་རིན་པོ་ཆེ་ཐོགས་པའོ། །ཁ་ཅིག་ནི་དྲི་དག་གོ། །ཁ་ཅིག་ནི་མེ་ཏོག་དག་གོ། །ཁ་ཅིག་ནི་ཕྲེང་བ་དག་གོ། །ཁ་ཅིག་ནི་རྒྱན་དང་ལྷབ་ལྷུབ་སྣ་ཚོགས་ཐོགས་སོ། །ཁ་ཅིག་ནི་བྱུག་པ་དག་གོ། །ཁ་ཅིག་ནི་དྲིའི་ཕྱེ་མ་དག་གོ། །ཁ་ཅིག་ནི་སྤོས་ཆུས་རིན་པོ་ཆེ་སྣ་བདུན་གྱི་སྣོད་བཀང་བ་དག་གོ། །ཁ་ཅིག་ནི་ལྷའི་འབྲས་བུ་སྣ་ཚོགས་པ་དག་གོ། །ཁ་ཅིག་ནི་ལྷའི་མེ་ཏོག་སྣ་ཚོགས་ཐོགས་ཏེ། པདྨ་དང་། ཀུ་མུ་ད་དང་། པདྨ་དཀར་པོ་དང་། མན་དཱ་ར་བ་ཆེན་པོ་དང་། མཉྫུ་ཥ་ཀ་དང་། མཉྫུ་ཥ་ཀ་ཆེན་པོ་དང་། མདོག་མཛེས་དང་། མདོག་མཛེས་ཆེན་པོ་དང་། ཨ་ཏི་མུག་ཏ་ཀཱ་དང་། ཙམ་པ་ཀ་དང་། བར་ཤི་ཀ་དང་། མཐོན་ཀ་དང་། མཐོན་ཀ་ཆེན་པོ་དང། ཀཱ་དམ་པ་དང་། སྣ་མ་དང་། ཡུ་ཏི་ཀ་དང་། ཀླུའི་མེ་ཏོག་དང་། ཀོན་ཏ་དང་། གྷན་དྷ་བར་ཤི་ཀའི་མེ་ཏོག་དག་ཐོགས་སོ། །ཁ་ཅིག་ནི་ལྷའི་ཙན་དན་གོ་ཤིརྵ་དང་། སྦྲུལ་གྱི་སྙིང་པོའི་བདུག་པ་དང་། ཨ་ག་རུ་དང་། དུ་རུ་སྐ་དང་། ཏམ་ལའི་ལོ་མའི་བདུག་པ་ཐོགས་པའོ། །ཁ་ཅིག་གི་ལག་པ་ན་ནི་རྨ་བྱའི་བསིལ་ཡབ་ཐོགས་སོ། །ཁ་ཅིག་གི་ལག་པ་ན་ནི་རལ་གྲིའོ། །ཁ་ཅིག་གི་ལག་པ་ན་ནི་མདུང་ཐུང་ངོ་། །ཁ་ཅིག་གི་ལག་པ་ན་ནི་རྡོ་རྗེ་དང་། དགྲ་སྟ་དང་། མདའ་བོ་ཆེ་དང་། མདུང་དང་། གཏུན་ཤིང་དང་། མདུང་རྩེ་གསུམ་པ་དང་། གཟོང་ཁ་གཉིས་པ་དག་གོ། །ཁ་ཅིག་ནི་གོ་ཆ་དང་། ཡ་ལད་བགོས་ནས་བསྲུང་བའི་ཕྱིར་ཀུན་ནས་འདུ་ཞིང་མཆི་བར་འགྱུར་རོ། །ཁ་ཅིག་ནི་རིན་པོ་ཆེ་སྣ་ཚོགས་པའི་སྣོད་དང་།
གསེར་གྱི་སྣོད་དང་། དངུལ་གྱི་སྣོད་དག་ཐོགས་པ་རིན་པོ་ཆེ་སྣ་ཚོགས་ཀྱི་མེ་ཏོག་དང་། གསེར་གྱི་མེ་ཏོག་དང་། དངུལ་གྱི་མེ་ཏོག་གིས་བཀང་ནས་ཐོགས་ཏེ། དེ་དག་ཐམས་ཅད་རིག་སྔགས་འཆང་ལ་དབུལ་བར་བགྱིད་དོ། །རིག་སྔགས་འཆང་གིས་བྱམས་པ་དང་། སྙིང་རྗེ་ཆེན་པོ་ཡིད་ལ་བགྱིད་པ་དང་། སངས་རྒྱས་ཡིད་ལ་བྱེད་པས་འཕགས་པ་སྤྱན་རས་གཟིགས་དབང་ཕྱུག་དོན་ཡོད་པའི་ཞགས་པའི་ཆ་ལུགས་འཆང་བ་ཡིད་ལ་བགྱིའོ། །མཆོག་ཏུ་བརྩེ་བའི་ཡིད་ལ་བགྱིད་པས་ཚིག་གཞན་མི་སྨྲ་བར་དབུགས་དབྱུང་བར་བགྱི་ཞིང་ལམ་དྲང་བོ་ནས་འཇུག་པར་བགྱི་སྟེ། སེང་གེའི་ཁྲི་ལ་མངོན་དུ་མཆིས་ནས། དོན་ཡོད་པའི་འཁོར་ལོའི་ཞགས་པ་ཐོག་མར་སེང་གེའི་ཁྲིའི་སྟེང་དུ་གཞག་པར་བགྱིའོ།། །།འཕགས་པ་དོན་ཡོད་པའི་ཞགས་པའི་ཆོ་ག་ཞིབ་མོའི་རྒྱལ་བོ།བམ་པོ་བཞི་པ། དེའི་འོག་ཏུ་རིག་སྔགས་འཆང་རང་ཉིད་མཆིས་ནས། སྟེང་དུ་གཏོགས་པའི་དེ་བཞིན་གཤེགས་པ་ཐམས་ཅད་ལ་ཕྱག་བགྱི་ཞིང་། འཕགས་པ་སྤྱན་རས་གཟིགས་དབང་ཕྱུག་མཆོག་སྦྱིན་པ་ལ་ཡང་ཕྱག་བགྱིའོ། །དེས་དགྲ་ཐམས་ཅད་ཕམ་པར་བགྱིས་པར་འགྱུར་རོ། །གལ་ཏེ་འོག་ཏུ་ཕྱོགས་ནས་ཕྱག་བགྱིས་ན་དེ་ནས་འཁོར་ལོས་རིག་སྔགས་འཆང་གི་ཕྱིར་རྒོལ་བ་རྣམས་མགོ་གཅད་པར་འགྱུར་རོ། །རིག་སྔགས་འཆང་མཆིས་མ་ཐག་ཏུ་གནས་རྣམ་པ་དྲུག་ཏུ་གཡོས་ནས་སྒྲ་ཆེན་པོ་འབྱུང་བར་འགྱུར་རོ། །ཅ་ཅོའི་སྒྲ་ཆེན་པོ་འབྱུང་བར་འགྱུར་རོ། །ལྷའི་རོལ་མོའི་ཆ་བྱད་ཡན་ལག་ལྔ་དང་ལྡན་པ་དག་འབུད་པར་འགྱུར་རོ། །ནམ་མཁའི་ལྷ་རྣམས་ཀྱིས་ཀྱང་གཞལ་མེད་ཁང་ཆེན་པོ་ནས་དབུ་རྒྱན་དང་། ཅོད་པན་གྱིས་རིག་སྔགས་འཆང་གི་མགོ་བོ་ལ་དབང་བསྐུར་བར་བགྱིད་དོ། །དབང་བསྐུར་བ་ཙམ་གྱི་མོད་ལ་རིན་པོ་ཆེ་སྣ་བདུན་གྱི་ཆར་འབབ་པར་འགྱུར་རོ། །གསེར་གྱི་ཆར་དང་གོས་ཀྱི་ཆར་འབབ་པར་འགྱུར་རོ། །གསེར་གྱི་མེ་ཏོག་དང་། དངུལ་གྱི་མེ་ཏོག་དང་། ལྷའི་མེ་ཏོག་བཀྲ་བ་སྣ་ཚོགས་ཀྱི་ཆར་དང་། ལྷའི་རྒྱན་གྱི་ཆར་འབབ་པར་འགྱུར་རོ། །དེ་ནས་ལྷའི་བུ་མོས་རིན་པོ་ཆེ་སྣ་བདུན་གྱི་སྣོད་དུ་བདུད་རྩིའི་
བཅུད་འཚལ་ཏེ། མཆིས་ནས་འབུལ་བར་བགྱིད་དོ། །རིག་སྔགས་འཆང་གིས་བླངས་ནས་དོན་ཡོད་པའི་ཞགས་པའི་སྙིང་པོ་བཟླས་པར་བགྱིའོ། །དེ་ནས་རིག་སྔགས་འཆང་གིས་རེག་པར་བགྱིའོ། །རིག་སྔགས་འཆང་གིས་རེག་པ་ཙམ་གྱི་མོད་ལ་ལྷའི་ལུས་རྣམ་པར་དག་པ་ཐོབ་ནས། པགས་པའི་མདོག་གསེར་འདྲ་བར་འགྱུར་རོ། །སྐྲ་ལྷག་པར་སྔོ་བ་དང་། མིག་ཨུཏྤལ་སྔོན་པོ་ལྟར་ལྷའི་མིག་ཡོངས་སུ་དག་པར་འགྱུར་རོ། །ཚེའི་ཚད་ལྷའི་བསྐལ་པ་འབུམ་ཕྲག་བརྒྱ་སྟོང་དུ་འགྱུར་རོ། །གལ་ཏེ་ཕྱིར་མི་ལྡོག་པར་འཚལ་ན། དེའི་བཅུད་ཀྱིས་ལེན་མཆོག་ལས་ཅི་ཙམ་འཚལ་བ་བླངས་ཏེ། ལྷའི་ཆབ་ཙན་དན་གྱི་དྲི་དང་ལྡན་པའི་ནང་དུ་ཞུགས་ནས་ཁྲུས་བགྱིའོ། །ཁྲུས་བགྱིས་པ་ཙམ་གྱི་མོད་ལ་ཕུག་གི་སྒོ་རང་འབྱེ་བར་འགྱུར་ཞིང་། ཅི་ལྟར་དབང་ཕྱུག་ཆེན་པོའི་གཟུགས་འདྲ་བར་མཐོང་ན་ནི་འཇིག་རྟེན་ཐམས་ཅད་ཀྱི་མཆོད་གནས་ཀྱི་གཙོ་བོ་གཅིག་པུར་འགྱུར་རོ། །ཅི་ལྟར་འཕགས་པ་སྤྱན་རས་གཟིགས་དབང་ཕྱུག་བཞིན་དུ་རིག་སྔགས་འཆང་འདི་ཡང་མཆོད་པ་དང་། བཀུར་སྟི་དང་བླ་མས་བླ་མར་བགྱི་བ་དེ་ལྟ་བུར་འགྱུར་རོ། །གང་དུ་བཅུད་ཀྱིས་ལེན་མཆོག་འདིས་རེག་ན་འཛམ་བུ་ཆུ་བོའི་གསེར་ཡོངས་སུ་དག་པར་འགྱུར་རོ། །རྩིག་པའམ། རི་འམ། ཀ་བའམ། ལྗོན་ཤིང་ངམ། སྣོད་དམ། བུམ་པའམ། རྫ་བོ་འམ། གོས་སམ། བོང་བ་ལ་རེག་ན་དེ་དག་ཐམས་ཅད་འཛམ་བུའི་ཆུ་བོའི་གསེར་ཡོངས་སུ་དག་པར་འགྱུར་བ་ནས། དགོས་པའི་བར་དུ་འགྱུར་རོ། །དེ་ནས་རིག་སྔགས་འཆང་ཀླུ་མོ་འམ། ལྷ་མོ་འམ། མི་འམ་ཅི་མོ་འཚལ་ན། རིག་སྔགས་འཆང་དེ་གོས་གཙང་མ་བགོས་ནས། ལེགས་པར་ཁྲུས་བགྱིའོ། །ཚེས་བརྒྱད་དམ། བཅུ་བཞི་འམ། བཅྭ་ལྔ་ལ་འཕགས་པ་སྤྱན་རས་གཟིགས་དབང་ཕྱུག་གི་རི་མོའི་གཟུགས་ལ་མཆོད་པ་བགྱིས་ནས། ཉིན་ཞག་གཅིག་གནས་པར་བགྱིའོ། །འཁོར་ལོའི་ཞགས་པ་ཆེན་པོ་འདི་ཆོས་ཀྱི་སྟན་ལེགས་པར་བརྒྱན་པའི་སྟན་བཟང་པོའི་སྟེང་དུ་གཞག་པར་བགྱི་ཞིང་མཆོད་པ་ཆེན་པོ་བགྱི་སྟེ། དེ་ཉིད་ཀྱི་མདུན་དུ་ཚིག་གཞན་མི་སྨྲ་བར།
ལན་སྟོང་རྩ་བརྒྱད་བཟླས་ཏེ། ཡུངས་ཀར་རེ་རེ་ནས་བཟླས་བརྗོད་བགྱིས་པ་ཞགས་པའི་སྟེང་དུ་གཏོར་བར་བགྱིའོ། །ལན་སྟོང་རྩ་བརྒྱད་ཚང་ནས་ཞགས་པ་དེ་ཡང་སྦྲུལ་བཞིན་དུ་ཡོངས་སུ་འཁྱིལ་ལ་འཁོར་ལོའི་གདེངས་ཀའི་ཚུལ་དུ་མཆིས་པར་འགྱུར་རོ། །དེ་ནས་རིག་སྔགས་འཆང་གིས་ཞགས་པ་བླངས་ཏེ། ཀླུ་གནས་པའི་མཚོ་འམ། མིའམ་ཅི་གནས་པའི་མཚོ་འམ། ལྷ་མོ་གནས་པའི་མཚོ་འགྲམ་དུ་མཆིས་ནས། དོན་ཡོད་པའི་ཞགས་པའི་སྙིང་པོ་བཟླས་ཏེ། གནས་ཀྱི་ནང་དུ་ཞགས་པ་འཕང་བར་བགྱིའོ། །འཕངས་མ་ཐག་ཏུ་སླར་ཡང་ཁོ་ནར་དྲང་བར་བགྱི་སྟེ། ཅི་ལྟ་བུའི་དོན་ཡིད་ལ་བསམས་པའི་དོན་དེ་ཞགས་པས་བཅིངས་ནས། ཅི་ལྟར་བསམས་པ་དེ་བཞིན་དུ་བགྱི་བར་འགྱུར་རོ། །གཞན་ཡང་ཇི་ལྟར་ཡིད་ལ་བསམས་པའི་ནོར་རམ། དབྱིག་ག། གསེར་རམ། ནོར་བུ་འམ། མུ་ཏིག་གམ། བཻ་ཌཱུརྱའམ། ཤང་ཀ་ཤི་ལའམ། བྱི་རུའམ། ས་ལེ་སྦྲམ་མམ། དངུལ་ལམ། གོས་སམ། ཆས་སམ། རྒྱན་ནམ། གཞན་ཡང་གཞལ་མེད་ཁང་ཇི་ལྟ་བུར་འབྱོར་པ་ཅན་དག་དོན་དུ་གཉེར་ན་ཞགས་པ་འཕང་བར་བགྱི་སྟེ། དེ་ཐམས་ཅད་འདྲེན་པར་བགྱིད་དོ། །གང་དང་གང་དུ་འཕངས་པ་དེ་དང་དེར་ཇི་ལྟར་ཡིད་ལ་བསམས་པ་དེ་ཉིད་ཤིན་ཏུ་གསལ་བར་ཡོངས་སུ་རྫོགས་པར་འགྱུར་རོ། །དངོས་པོ་གཞན་དུ་མི་འགྱུར་རོ། །རྒྱལ་པོའི་རིགས་སམ། བྲམ་ཟེའི་རིགས་སམ། ཁྱིམ་བདག་གི་རིགས་སམ། རྗེའུ་རིགས་ཀྱིས་ཅི་དང་ཅི་བསམས་པ་འགྲུབ་པར་བགྱིད་དོ། །སྐྱེས་པའམ། བུད་མེད་དམ། ཁྱེའུའམ། བུ་མོའི་མིང་ནས་བརྗོད་དེ་ཞགས་པ་འཕངས་པ་ཙམ་གྱི་མོད་ལ་ཞགས་པས་བཅིངས་ནས་འདྲེན་པར་འགྱུར་རོ། །ཐ་ན་རི་དགས་དང་། བྱ་དང་། སེང་གེ་དང་། སྟག་དང་། གླང་པོ་ཆེ་དང་། མ་ཧེ་ཡང་འདྲེན་པར་བགྱིད་དོ། །གང་གི་མིང་ནས་བརྗོད་དེ་གཡུལ་འགྱེད་པའི་ནང་དུ་འཕངས་ན། དེ་ཡང་ཞགས་པས་བཅིངས་ནས་མདུན་དུ་མཆིས་ཏེ། ཅི་ལྟར་ཡིད་ལ་བསམས་པ་དེ་བཞིན་དུ་ཐམས་ཅད་འགྲུབ་པར་བགྱིད་དོ། །ཟླ་བ་དང་ཉི་མ་དབབ་པར་
འཚལ་ན་ཡང་། ཟླ་བ་དང་ཉི་མའི་མདུན་དུ་མཆིས་ནས། དོན་ཡོད་པའི་ཞགས་པའི་སྙིང་པོ་ལན་བདུན་བཟླས་ཏེ། ཟླ་བ་དང་ཉི་མའི་མངོན་སུམ་དུ་ཞགས་པ་འཕངས་ནས་སླར་ཡང་དྲང་བར་བགྱི་སྟེ། ཟླ་བ་དང་ཉི་མ་ཞགས་པས་བཅིངས་ནས་དྲང་བར་འགྱུར་རོ། །ནམ་མཁའ་ལས་བབས་ནས་རིག་སྔགས་འཆང་གི་མདུན་དུ་མཆིས་ཏེ། ཅི་ལྟར་ཡིད་ལ་བསམས་པ་བཞིན་དགོས་པ་ཐམས་ཅད་སྒྲུབ་པར་བགྱིད་དོ། །འོན་ཏེ་ཟླ་བ་དང་ཉི་མའི་གནས་སུ་མཆི་བར་འཚལ་ན། ཞགས་པའི་ཕྱག་རྒྱ་བཅིངས་པ་ལག་པས་བླངས་ཏེ། དོན་ཡོད་པའི་རྒྱལ་པོའི་སྙིང་པོ་བཟླས་པ་དང་། རིག་སྔགས་འཆང་ནམ་མཁའ་ལ་འཕུར་ན། ཉི་མ་དང་ཟླ་བའི་སྟན་ལ་ཅི་སྲིད་དུ་འཚལ་བར་ལོངས་སྤྱོད་པར་འགྱུར་ཞིང་། སླར་བདེ་བ་དང་། མ་སྣད་པ་དང་། མ་རྨས་པ་དང་། ལེགས་པར་འབབ་པར་འགྱུར་རོ། །ནགས་ཁུང་དུ་འགྲོ་བར་འཚལ་ན། གཙང་མ་ལེགས་པར་ཁྲུས་བགྱིས་པས། གོས་གཙང་མ་བགོ་བར་བགྱི་ཞིང་ནགས་ཁུང་གི་སྒོར་ལན་ཉི་ཤུ་རྩ་གཅིག་བཟླས་བརྗོད་བགྱི་སྟེ། ཞགས་པ་འཕང་བར་བགྱིའོ། །ལག་པས་ཞགས་པ་འཕངས་པ་ཙམ་གྱིས་ནགས་ཁུང་གི་གནས་ཀྱི་གཞལ་མེད་ཁང་གི་ཀླུ་ཐམས་ཅད་བཅིངས་ནས་ཐམས་ཅད་རིག་སྔགས་འཆང་གི་མདུན་དུ་མཆིས་པར་འགྱུར་ཞིང་རིག་སྔགས་འཆང་ལ་ཕྱག་བགྱིས་ནས། རིག་སྔགས་འཆང་ཁྱོད་གནས་ཆེན་པོ་མཆོག་ཏུ་ཞུགས་ཤིག་ཅེས་སྨྲ་བར་འགྱུར་རོ། །དེ་ནས་རིག་སྔགས་འཆང་གིས་དོན་ཡོད་པའི་རྒྱལ་པོའི་སྙིང་པོ་བཟླས་ཏེ། ལག་པ་ཞགས་པའི་ཕྱག་རྒྱས་ནགས་ཁུང་དུ་འཇུག་པར་བགྱིའོ། །ཞུགས་པ་ཙམ་ཁོ་ནས་ནགས་ཀྱི་གནས་རྣམ་པ་དྲུག་ཏུ་གཡོ་བར་འགྱུར་ཞིང་། དབུས་ཀྱི་ནགས་ཀྱི་མཐའ་ན་རིན་པོ་ཆེ་སྣ་བདུན་གྱི་རྫིང་ལྷའི་ཆབ་དང་ས་ཤིང་རྙོག་པ་མ་མཆིས་པ་ཤིན་ཏུ་གསལ་བ་ལྷའི་ཙན་དན་གྱི་དྲི་དང་ལྡན་པ་ཧ་ཅང་མི་གྲང་བ་ཧ་ཅང་མི་དྲོ་བ་རེག་ན་བདེ་བ་རོ་དང་ལྡན་པ། བདུད་རྩིའི་བཅུད་ཅན་མཆིས་ཏེ། དེ་ལྟར་དོན་ཡོད་པའི་རྒྱལ་པོའི་སྙིང་པོ་ཡུངས་ཀར་ལ་ལན་ཉི་ཤུ་རྩ་གཅིག་བཟླས་བརྗོད་བགྱིས་ནས་རྫིང་གི་དབུས་སུ་ཞགས་པ་འཕང་བར་བགྱིའོ། །
འཕངས་པ་ཙམ་གྱི་མོད་ལ་བུད་མེད་རིན་པོ་ཆེའི་གཟུགས་འདྲ་བ་ལྷའི་བུ་མོའི་ལུས་ཕྱེད་བྱུང་ནས། ལྷའི་མེ་ཏོག་རྣམ་པ་སྣ་ཚོགས་ཀྱིས་བརྒྱན་ཅིང་། རིན་པོ་ཆེ་སྣ་བདུན་གྱི་བུམ་པ་གང་བ་ཐོགས་ཏེ། རིག་སྔགས་འཆང་ལ་དབུལ་ཞིང་སྤྱི་བོ་སྨད་དེ་འཛུམ་པ་དང་བཅས་པས་རིག་སྔགས་འཆང་ལ་སྨྲས་པ། རྗེ་བཙུན་རིག་སྔགས་འཆང་ཁྱོད་མ་བཞེངས་པར་གནས་སུ་ཞུགས་ཤིག །རིག་སྔགས་འཆང་གིས་གྲུབ་པའི་ཚིག་གསུམ་བརྗོད་པར་བགྱི་སྟེ། འཇིག་རྟེན་ཕ་རོལ་གྱི་དོན་དང་། རིག་སྔགས་འཆང་ཉིད་དང་། འཇིག་རྟེན་པའི་དངོས་གྲུབ་གྲུབ་སྟེ། བདག་ཉིད་ཀྱི་མ་དང་། སྲིང་མོ་དང་། མངག་གཞུག་མ་ཞེས་གར་བདེ་བར་བརྗོད་ལ་དེའི་འོག་ཏུ་རིག་སྔགས་འཆང་གིས་སྨྲ་བར་བགྱི་སྟེ། སྲིང་མོ་ཁོ་བོ་ལ་འཇིག་རྟེན་ཕ་རོལ་གྱི་དོན་བྱིན་ཅིག་ཅེས་འཇུག་པར་བགྱིའོ། །དེ་ཡང་རིག་སྔགས་འཆང་ཁྱོད་རང་གི་གནས་སུ་སྣོམས་ཏེ་ཞུགས་ཤིག་ཅེས་སྨྲ་བར་འགྱུར་རོ། །དེ་ནས་རིག་སྔགས་འཆང་གིས་ལག་པ་ཞགས་པའི་ཕྱག་རྒྱས་འཇུག་པར་བགྱི་ཞིང་། དོན་ཡོད་པའི་རྒྱལ་པོའི་སྙིང་པོ་བཟླས་སོ། །དེ་ནས་གནས་ཆེན་པོ་མཆོག་རིན་པོ་ཆེ་སྣ་བདུན་གྱི་གཞལ་མེད་ཁང་ལྷའི་དྲིལ་བུ་གཡེར་ཁའི་དྲ་བ་དང་། གསེར་དང་། གོས་དཔྱངས་པ་དར་གྱི་ཆུན་འཕྱང་རབ་ཏུ་དཔྱངས་པར་གདའ་བ་ནས་བུ་མོ་དེ་ཡང་ནོར་བུ་རིན་པོ་ཆེ་ཆེན་པོ་ཐོགས་ཏེ། རིག་སྔགས་འཆང་འཇིག་རྟེན་ཕ་རོལ་གྱི་དོན་དུ་རིན་པོ་ཆེ་ཆེན་པོ་བཞེས་ཤིག་ཅེས་འབུལ་བར་བགྱིད་དོ། །དེ་ནས་རིག་སྔགས་འཆང་གིས་སྟན་བཤམས་པའི་སྟེང་དུ་ཞགས་པ་ལེགས་པར་ཡོངས་སུ་བསྐྱིལ་ཏེ། སྟན་དུ་བཏིང་ལ་ནོར་བུ་རིན་པོ་ཆེ་ཆེན་པོ་དེ་ཞགས་པའི་སྟེང་དུ་གཞག་ཅིང་མེ་ཏོག་དང་བདུག་པ་དབུལ་བར་བགྱིའོ། །དོན་ཡོད་རྒྱལ་པོའི་སྙིང་པོ་བཟླས་པར་བགྱིའོ། །བཟླས་པ་ཙམ་གྱི་མོད་ལ་ཞགས་པ་ནོར་བུ་རིན་པོ་ཆེ་དང་བཅས་ཏེ་འབར་བར་འགྱུར་རོ། །ནོར་བུ་རིན་པོ་ཆེ་ཆེན་པོ་དེ་ལས་ཀྱང་འོ་མའི་ཆབ་འབྱུང་བར་འགྱུར་རོ། །རིག་སྔགས་འཆང་གིས་འོ་མའི་ཆབ་དེ་ལས་བླངས་ལ་སྐྱོར་ཆུ་ལན་བདུན་དུ་རེག་པར་བགྱིའོ། །འོ་མའི་ཆབ་ཀྱིས་རེག་པ་ཙམ་གྱི་མོད་
ལ་ལུས་ཐམས་ཅད་དྲི་མ་དང་བྲལ་ཞིང་ཡོངས་སུ་དག་པར་འགྱུར་རོ། །དོན་ཡོད་སྣང་བ་ནོར་བུ་གཞལ་མེད་ཀྱི་དཀྱིལ་འཁོར་གྱི་འོད་ཟེར་གྱི་དྲ་བ་འོད་ཟེར་ཞེས་བགྱི་བ་ཐོབ་ནས་ས་བཅུ་ལ་གནས་ཏེ་ཕྱིར་མི་ལྡོག་པར་འགྱུར་རོ། །བླ་ན་མེད་པའི་བྱང་ཆུབ་ཀྱི་ལམ་འཐོབ་པར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་གི་ཏིང་ངེ་འཛིན་སྒྱུ་མ་ལྟ་བུར་རྣམ་པར་འཕྲུལ་པ་ཐོབ་པར་འགྱུར་ཞིང་། ཤིན་ཏུ་ཡོངས་སུ་དག་པའི་བདག་ཉིད་ཀྱི་རང་བཞིན་གྱིས་དོན་ཡོད་པའི་ཞགས་པའི་ཆ་ལུགས་འཆང་བ་རིག་སྔགས་འཆང་གི་མདུན་དུ་མཆིས་ནས། ལག་པ་གཡས་པ་སྤྱི་བོར་བཞག་སྟེང་འི་རིག་སྔགས་འཆང་གི་བུ་ཐུ་བོ་ཁྱོད་ཀྱིས་གྲོལ་བ་ཆེན་པོའི་དཀྱིལ་འཁོར་སངས་རྒྱས་ཀྱི་སྐུ་ཡོངས་སུ་དག་པ་འཐོབ་བོ། །ཞེས་དབུགས་འབྱིན་པར་འགྱུར་རོ། །ཕྱོགས་བཅུའི་དེ་བཞིན་གཤེགས་པ་རྣམས་མཐོང་ནས་ཐམས་ཅད་ཀྱིས་ལེགས་སོ་ཞེས་བྱ་བའི་སྒྲ་འབྱིན་པར་འགྱུར་ཏེ། སེམས་དཔའ་ཆེན་པོ་ལེགས་སོ་ལེགས། །ཁྱོད་ནི་བྱང་ཆུབ་ལམ་དུ་ཞུགས། །ཁྱོད་ཀྱིས་སངས་རྒྱས་ཉིད་འཐོབ་སྟེ། །གྲོལ་བའི་ལམ་ཞེས་བྱ་བ་བསྒྲུབས། །འོན་ཏེ་རིག་སྔགས་འཆང་ཉིད་དོན་དུ་གཉེར་ན་དེའི་ཚེ་གསེར་གྱི་མེ་ཏོག་སྩོལ་བར་འགྱུར་ཏེ། བླངས་ལ་བུ་མོ་དེ་ཉིད་ཀྱི་སྤྱི་བོར་བཞག་ནས། ཨོཾ་ཞེས་བགྱི་བས་མནན་པར་བགྱིའོ། །ཨོཾ་ཞེས་བགྱི་བའི་སྒྲ་བརྗོད་ནས་སྤྱི་བོར་བཞག་པ་ཙམ་གྱི་མོད་ལ་བུ་མོ་དེའི་མིག་མཆོག་གཉིས་ནས་མཆི་མ་འཛག་པར་འགྱུར་རོ། །དེ་ནས་རིག་སྔགས་འཆང་གིས་བླངས་ཏེ་ཉེ་རེག་བགྱིའོ། །ཉེ་རེག་བགྱིས་པ་ཙམ་གྱི་མོད་ལ་རིག་སྔགས་འཆང་གི་འཁོར་ལོས་སྒྱུར་བར་འགྱུར་རོ། །སྐྲ་ཅུང་ཟད་འཁྱིལ་ཞིང་ལག་པ་ན་འཁོར་ལོའི་ཞགས་པ་ཐོགས་ཏེ་ནམ་མཁའ་ལ་མཆི་བར་འགྱུར་རོ། །རིག་སྔགས་འཆང་བྱེ་བ་འབུམ་ཕྲག་བཅྭ་བརྒྱད་ཀྱིས་ཡོངས་སུ་བསྐོར་བར་འགྱུར་རོ། །ཚེ་ལོ་དྲུག་ཁྲི་ཉིས་སྟོང་དུ་འགྱུར་ཞིང་སྐྱེ་བར་བདུན་སྟོང་རྗེས་སུ་དྲན་པར་འགྱུར་རོ། །འོན་ཏེ་གསང་སྔགས་འཆང་འཇིག་རྟེན་པའི་དངོས་གྲུབ་ཀྱི་ཆོ་ག་སློང་ན་དེའི་ཚེ་འདི་ལྟ་བུར་འགྱུར་ཏེ། རིག་སྔགས་འཆང་གིས་བདག་གི་སྐྲ་འདི་སྡོམས་ཤིག་ཅེས་དེའི་ཚེ་བུད་མེད་དེས་སྐྲའི་རལ་པ་བཏོན་ནས། རིག་
སྔགས་འཆང་ལ་འབུལ་བ་ན། སྐྲ་ཐམས་ཅད་བླངས་ཏེ་དུམ་བུ་གསུམ་དུ་བཀུག་ནས་སྲད་བུ་ལ་མདུང་པ་ཉི་ཤུ་རྩ་གཅིག་བགྱི་སྟེ། གཅིག་བཀལ་ཏེ། མགོ་ལ་བཏགས་པས་ནི་ཇི་ལྟར་ཡིད་ལ་བསམས་པ་དེ་བཞིན་དུ་མིག་འཕྲུལ་སྟོན་པར་འགྱུར། འབྲས་བུ་དང་མེ་ཏོག་འཚལ་བ་ཐམས་ཅད་སྟོན་པར་འགྱུར། བདེན་པ་ཇི་ལྟར་འཚལ་བ་བཞིན་སྟོན་པར་འགྱུར་རོ། །མགུལ་དུ་བཏགས་པས་ནི་མི་གདའ་བར་གྱུར་ནས། གནོད་སྦྱིན་དང་། སྲིན་པོ་དང་། འབྱུང་པོ་དང་། ཤ་ཟ་དང་། གྲུལ་བུམ་དང་། ལྟོ་འཕྱེ་ཆེན་པོ་དང་། མི་མ་ཡིན་པ་རྣམས་དབང་དུ་གྱུར་ནས་མཆིས་པར་འགྱུར་རོ། །དཔྲལ་བ་ལ་བཏགས་པས་ནི་ལྷ་དང་ཀླུ་ཐམས་ཅད་དབང་དུ་གྱུར་ནས་མཆིས་པར་འགྱུར་རོ། །དཔུང་པ་གཡས་པ་ལ་བཏགས་པས་ནི་གླང་པོ་ཆེ་བཅུའི་སྟོབས་དང་ལྡན་པར་འགྱུར་ཏེ། ཕས་ཀྱི་དགྲ་བོ་དང་མི་མཛའ་བ་དང་། གདུག་པ་ཐམས་ཅད་ཀྱིས་མི་ཚུགས་པས་སྟོབས་ཀྱིས་འཁོར་ལོས་སྒྱུར་བར་འགྱུར་རོ། །དཔུང་པ་གཡོན་པ་ལ་བཏགས་པས་ནི་རིགས་བཞིའི་འཇིག་རྟེན་དབང་དུ་གྱུར་ནས་མཆིས་པར་འགྱུར་རོ། །ལག་པ་གཡོན་པ་ལ་བཏགས་པས་ནི་གང་ལ་རེག་པ་དེ་དབང་དུ་འགྱུར་ཞིང་། བདག་གི་ནོར་དུ་འགྱུར་རོ། །ལག་པ་གཡས་པ་ལ་བཏགས་པས་ནི་གྲོང་ཁྱེར་གྱི་ཤར་ཕྱོགས་ཀྱི་སྒོ་ནས་རྒྱལ་པོའི་སྒོ་ལ་ཐལ་མོ་ལན་གསུམ་བརྡབས་ན་རྒྱལ་པོའི་བཙུན་མོ་འཁོར་དང་བཅས་པ་དང་། གྲོང་ཁྱེར་དང་། ཡུལ་འཁོར་དང་། རྒྱལ་པོའི་ཕོ་བྲང་དང་། བུད་མེད་དང་། སྐྱེས་པ་དང་། ཁྱེའུ་དང་། བུ་མོ་དང་བཅས་པ་བདག་ཉིད་དམ། ནོར་དབང་དུ་གྱུར་ནས་མཆིས་པར་འགྱུར་རོ། །ཐ་ན་དུད་འགྲོའི་སྐྱེ་གནས་སུ་གཏོགས་པར་བྱ་དང་། གཅན་གཟན་དང་། རི་དགས་དང་། གདུག་པ་དང་། གཞན་ཡང་གདུག་པ་དང་བཅས་པའི་སྲོག་ཆགས་རྣམས་དབང་དུ་གྱུར་ནས་མཆིས་པར་འགྱུར་རོ། །བརླ་གཡས་པ་ལ་བཏགས་པས་ནི་ཚལ་ལམ། སེར་གའམ། རི་འོར་རམ། ཕུག་གམ། དགོན་པའམ། བསྟི་གནས་གང་དུ་ཞུགས་ཏེ། ཞུགས་པ་ཙམ་གྱི་མོད་ལ་ནོར་ཐམས་ཅད་དང་། སྨན་ཐམས་ཅད་དང་། ལྷ་ཐམས་
ཅད་རང་གི་གཟུགས་སུ་མདུན་དུ་མཆིས་པར་འགྱུར་རོ། །བྱིན་པ་གཡས་པ་དང་། རྐང་པ་གཡས་པ་ལ་བཏགས་པས་ནི། རྒྱ་མཚོ་ཆེན་པོའི་ཕ་མཐར་ཡང་རྒལ་བར་འགྱུར་ན་ཆུ་ཀླུང་ཆེན་པོའི་ཆབ་ཀྱིས་བྱིན་པ་ནུབ་ཙམ་དུ་འགྱུར་བ་ལྟ་སྨོས་ཀྱང་ཅི་འཚལ། བྱིན་པ་གཡོན་པ་ལ་བཏགས་པས་ནི། ཉི་མ་རེ་རེ་བཞིན་དཔག་ཚད་བརྒྱར་ཕྱིན་ནས། དུབ་པ་མ་མཆིས་པར་སླར་ཡང་ལྡོག་པར་འགྱུར་རོ། །བརླ་གཡོན་པ་ལ་བཏགས་ནས་དུར་ཁྲོད་ཆེན་པོར་ཞུགས་ན་དུར་ཁྲོད་ཐམས་ཅད་ན་གནས་པའི་གཅེར་བུ་པ་ཐམས་ཅད་དབང་དུ་གྱུར་ནས་མཆིས་པར་འགྱུར་རོ། །དེ་ནས་རིག་སྔགས་འཆང་གནས་དེ་ཉིད་ན་སྤྱོད་ན་རིག་སྔགས་འཆང་དེས་ལག་པ་གཡོན་པས་བུམ་པ་གང་བ་བཟུང་ཞིང་། ལག་པ་གཡས་པས་བུད་མེད་དེ་བཟུང་ནས། གནས་ཆེན་པོའི་མཆོག་ཏུ་འཇུག་པར་བགྱིའོ། །གནས་མཆོག་དེའི་དབུས་ན་རྫིང་མེ་ཏོག་གི་ཚལ་པར་བཀྲམ་པར་བགྱི་སྟེ། རྫིང་དེར་གཉིས་ཀ་ཁྲུས་བགྱི་ཞིང་ཆབ་ཀྱིས་ཉེ་རེག་བགྱིའོ། །བཀྲུས་ཤིང་རེག་པ་ཙམ་ཁོ་ནས། འཁོར་ལོའི་རིག་སྔགས་འཆང་ཞགས་པ་དང་། འཁོར་ལོས་སྒྱུར་བའི་རིག་སྔགས་འཆང་དུ་འགྱུར་རོ། །རིག་སྔགས་འཆང་འབུམ་ཕྲག་བདུན་སྟོང་གིས་ཡོངས་སུ་བསྐོར་ཅིང་ཚེ་བསྐལ་པ་ཁྲིར་འགྱུར་རོ། །སྐྲ་ཅུང་ཟད་འཁྱིལ་པར་ཡང་འགྱུར་རོ། །ནགས་ཀྱི་གནས་ཀྱི་གཞལ་མེད་ཁང་བདུན་ཅུ་རྩ་གཉིས་ཀྱི་དཔོན་པོ་རྒྱལ་པོར་འགྱུར་རོ། །གལ་ཏེ་མ་ཞེས་བགྱི་བས་དོན་དུ་གཉེར་ན་ནི་བུ་གཅིག་པ་བཞིན་ཡོངས་སུ་སྐྱོང་བར་འགྱུར་རོ། །འབྲས་དང་། འབྲུ་དང་། གོས་དང་། ཆས་དང་། ནོར་བུ་དང་། མུ་ཏིག་དང་། བྱི་རུ་དང་། གསེར་དང་། དངུལ་ཡོངས་སུ་འགྲུབ་པར་བགྱིད་དོ། །སྲིང་མོ་ཞེས་བགྱི་བས་ནི་དགོས་པའི་ཡོ་བྱད་ཐམས་ཅད་ཚང་བར་སྟོབས་པར་འགྱུར་ཞིང་ཡན་ལག་སྤོང་བར་བགྱིད་དོ། །ཉི་མ་རེ་རེ་ཞིང་རྒྱན་ཐམས་ཅད་ཀྱིས་བཀླུབས་པའི་ལྷའི་བུ་མོ་ཁྲིད་ནས་མཆི་བར་འགྱུར། ལྷའི་གཞལ་མེད་ཁང་འབྱོར་པ་སྟོབས་པར་བགྱིད། ལྷའི་ཁྱིམ་དང་། གཞལ་མེད་ཁང་སྟོབས་པར་བགྱིད་དོ། །མངག་གཞུག་མ་ཞེས་བགྱི་བ་ནི། གང་དང་གང་དུ་
མངག་པ་དེ་དང་དེར་མཆི་བར་འགྱུར་ཏེ། ལྷའི་གནས་སམ། ཀླུའི་གནས་སམ། གནོད་སྦྱིན་གྱི་གནས་སམ། སྲིན་པོའི་གནས་སམ། འབྱུང་པོའི་གནས་སམ། གཞན་ཡང་མངག་གཞུག་པའི་སྒྲུབ་པ་རྣམ་པ་སྣ་ཚོགས་ཡིད་ལ་བསམས་པ་བཞིན་བགྱིད་དོ། །ནགས་སྒྲུབ་པའི་ཆོ་གའོ།། །།