ནོར་བུ་བསྒྲུབ་པའི་ཆོ་ག
འཕགས་པ་དོན་ཡོད་པའི་ཞགས་པའི་ཆོ་ག་ཞིབ་མོའི་རྒྱལ་པོ། བམ་པོ་བཅུ་གཅིག་པ། དེ་ནས་རིག་སྔགས་འཆང་རྣམས་ལ་ཕན་པ་དང་བདེ་བའི་ཕྱིར་ཐིག་ལེ་བྱ་བ་དང་། གདོང་བཀྲུ་བ་དང་ལུས་བསྐུ་བ་བྱས་ན་ཡ་ལད་དང་། གོ་ཆ་བགོས་པ་དང་འདྲ་བར་འགྱུར་བ་བཤད་པར་བགྱི་ཡིས་བཅོམ་ལྡན་འདས་གསན་དུ་གསོལ། དོན་ཡོད་པའི་ནོར་བུ་རྒྱ་ཆེན་པོ་རྡོ་རྗེའི་ཞགས་པ་ཞེས་བྱ་བའི་ནོར་བུ་གང་སྦྱོར་བ་བྱས་པ་ཙམ་གྱིས་ཐམས་ཅད་འགྲུབ་པ་བླ་ན་མེད་པ་མཁས་པས་མཛོད་
སྤུ་རྣམས་སུ་ཐིག་ལེ་བྱས་ན་ཚོགས་ཀྱི་ནང་དང་སྐྱེ་བོ་མང་པོའི་ནང་དང་ཚོགས་པའི་ནང་དང་དགེ་འདུན་གྱི་ནང་དང་དེ་བཞིན་དུ་རིགས་བྱེད་ཀྱི་ཚོགས་བཞིའི་ནང་དུ་སྐར་མའི་ཚོགས་ཀྱི་ནང་དུ་ཟླ་བ་ཚེས་པ་བཞིན་དུ་མཛེས་ཤིང་འཇིགས་པ་མེད་དོ། །ལྷ་རྣམས་ཐམས་ཅད་ཡ་མཚན་སྐྱེ། །དྲག་པོ་ཡི་ནི་ཅོད་པན་འཆང། འཇིག་རྟེན་མགོན་པོའི་གཡས་ཀྱི་དབུའི། །དབུ་རྒྱན་རྩེ་ཕྲན་ཟླ་ཚེས་བཞིན། །གདོང་བཀྲུ་བ་ནི་མཆོག་ཡིན་ནོ། །ཟླ་བ་ཉ་བའི་འོད་དང་མཚུངས། །སྨིན་མ་རྣ་བ་དཔྲལ་བ་དང་། །པདྨ་དཀར་ཤམ་ཤིན་ཏུ་འཇམ། །མིག་གཉིས་ཨུཏྤལ་སྔོན་པོ་འདྲ། །སེམས་ཅན་ཐམས་ཅད་དགའ་བས་བལྟ། །དགའ་ཞིང་རྟག་ཏུ་ཚིག་བཙན་འགྱུར། །དེ་ཡི་མིག་གིས་གང་མཐོང་བ། །ཐམས་ཅད་དབང་དུ་གྱུར་པར་འགྱུར། །སྐྱེས་པ་དག་ལ་བསྐུ་བྱས་ན། །རྟག་ཏུ་རིག་སྨྲ་བློ་ཆེ་ཞིང་། །རྟག་ཏུ་ཡ་ལ་གོ་བགོས་པའི། །འཇིགས་པ་མེད་པའི་ལུས་སུ་འགྱུར། །འབྱུང་པོ་རྣམས་ནི་མི་བཟོད་ཅིང་། །གནོད་སྦྱིན་འབྱུང་པོ་གསང་བ་པས། །རྟག་ཏུ་ཐུབ་པར་མི་འགྱུར་རོ། །སྟོབས་ཆེན་ཕ་རོལ་གནོན་པ་དང་། །རྟག་ཏུ་སྲེད་མེད་སྟོབས་ལྡན་ཞིང་། །གླང་ཆེན་སྟོབས་ཀྱི་སྟོབས་ལྡན་འགྱུར། །ལྷ་རྣམས་འདར་ནི་ཡེད་ཡེད་ཅིང་། །ཀླུ་རྣམས་མཚོན་སྐྲག་པར་བྱེད། །གལ་ཏེ་རིག་སྔགས་སྨྲ་བ་ཡིས། །རེག་ན་རི་རབ་ལྷུན་པོ་ཡང་། །གཡོ་བར་འགྱུར་བར་ཐེ་ཚོམ་མེད། །རྟག་ཏུ་སྲེད་མེད་སྟོབས་ལྡན་ཞིང་། །སྟོབས་དང་གཟུགས་དང་རྩལ་ལྡན་འགྱུར། །ནོར་བུ་རྒྱལ་པོ་བླ་ན་མེད། །འདི་ནི་ཐོས་པ་ཙམ་གྱིས་ཀྱང་། །སྡིག་པ་ཀུན་ལས་ངེས་གྲོལ་ཞིང་། །དུག་རྣམས་ཐམས་ཅད་འཇོམས་པར་བྱེད། །དཔལ་དང་སྐལ་བཟང་རྟག་ཐོབ་འགྱུར། །གང་གི་ལག་ཏུ་ཐོགས་གྱུར་པ། །སྒྲིབ་བ་ཀུན་ལས་ངེས་གྲོལ་ཞིང་། །དེ་བཞིན་འཇིག་རྟེན་དགའ་བར་འགྱུར། །དེ་ནི་དེ་བཞིན་གཤེགས་ཀུན་གྱི། །ཐུགས་སྐྱེས་གསུང་སྐྱེས་སྲས་སུ་འགྱུར། །འཕགས་པ་སྤྱན་རས་གཟིགས་དབང་ཕྱུག །བླ་མ་རྟག་ཏུ་རྗེས་འབྲང་ཞིང་། །རིག་སྔགས་སྨྲ་བ་དབུགས་འབྱུང་ཕྱིར། །དེ་བཞིན་དུ་ནི་བསྲུང་བ་དང་། །རྟག་ཏུ་མཆོག་ནི་སྦྱིན་པར་འགྱུར། །འཇིག་རྟེན་མགོན་
པོ་ཐུབ་ཆེན་གྱི། །བསོད་ནམས་ཕུང་པོ་ཆེན་པོ་འཐོབ། །གང་ཞིག་ནོར་བུ་འདི་འཆང་བ་དེ་དེ་བཞིན་གཤེགས་པ་གང་གཱའི་ཀླུང་གི་བྱེ་མ་སྙེད་བྱེ་བ་ཁྲག་ཁྲིག་བརྒྱ་སྟོང་ཕྲག་དྲུག་ཅུ་རྩ་བཞི་སྙེད་ལས་དགེ་བའི་རྩ་བ་བསྐྱེད་པར་འགྱུར། །དེ་བཞིན་གཤེགས་པ་དེ་དག་ཐམས་ཅད་མཐོང་ཞིང་དབུགས་འབྱིན་པ་དང་། ཕྱི་བཞིན་འབྲང་བར་འགྱུར། དཔལ་དང་སྐལ་བ་བཟང་པོ་ཐམས་ཅད་དང་ལྡན་པར་འགྱུར། རྟག་ཏུ་ལུས་དང་ངག་དང་ཡིད་ཡོངས་སུ་དག་པར་འགྱུར། སེམས་ཅན་ཐམས་ཅད་ཀྱིས་མཆོད་པ་གཅིག་བུར་འགྱུར། དགྲ་ཐམས་ཅད་ཀྱིས་མི་སོད་པར་འགྱུར། ཕྱག་ན་རྡོ་རྗེས་དེ་ལ་རྟག་ཏུ་བསྲུང་བ་དང་། བསྐྱབ་པ་དང་། སྦ་བའི་ཕྱིར་གནས་པར་འགྱུར་རོ། །ཕྱག་ན་པདྨ་ཡང་རྟག་ཏུ་མཆོག་སྦྱིན་པར་འགྱུར་རོ། །རིག་སྔགས་འཆང་འདི་ནི་དེ་བཞིན་གཤེགས་པ་ཐམས་ཅད་ཀྱིས་ལུང་བསྟན་པ་སྟེ། འདིར་དེ་བཞིན་གཤེགས་པ་ཐམས་ཅད་ཀྱི་ནོར་བུ་ཆེན་པོ་བཟུང་བས་སྡང་བ་བདུད་ལ་སོགས་པ་ཐམས་ཅད་དང་བགེགས་དང་ལོག་འདྲེན་ཐམས་ཅད་ལས་རྒྱལ་ཏེ། ཕ་རོལ་ཕམ་པར་མཛད་ནས་ཆོས་ཀྱི་འཁོར་ལོ་བསྐོར་རོ། །འདིས་རྔ་བོ་ཆེ་ལ་བསྐུས་ཏེ་བརྡུངས་ན་ཆོས་ཀྱི་རྔ་བོ་ཆེ་བརྡུངས་པར་འགྱུར་རོ། །གང་དག་སྒྲ་ཐོས་པ་ཙམ་གྱིས་སེམས་ཅན་ཐམས་ཅད་ཀྱི་མཚམས་མེད་པ་ལྔའི་སྡིག་པ་རབ་ཏུ་ཞི་བར་འགྱུར་རོ། །ཐ་ན་དུད་འགྲོའི་སྐྱེ་གནས་སུ་གཏོགས་པའི་རི་དགས་དང་བྱ་གང་ཡིན་པ་དེ་དག་ཐམས་ཅད་ཡོངས་སུ་གྲོལ་བར་འགྱུར་རོ། །འཕགས་པ་ལ་སྐུར་བ་འདེབས་པ་དང་། དམ་པའི་ཆོས་སྤོང་བ་དང་། མནར་མེད་པ་ལ་གཞོལ་ཞིང་གནས་པ་དག་ལས་ཡོངས་སུ་གྲོལ་བར་འགྱུར། དམྱལ་བ་ཆེན་པོ་བཅུ་དྲུག་ལས་ཡོངས་སུ་གྲོལ་བར་འགྱུར། འཇིགས་པ་ཆེན་པོ་བརྒྱད་ལས་ཡོངས་སུ་གྲོལ་བར་འགྱུར། དེ་ལ་དུག་གི་འཇིགས་པ་འབྱུང་བར་མི་འགྱུར། མེའི་འཇིགས་པ་འབྱུང་བར་མི་འགྱུར། མཚོན་གྱི་འཇིགས་པ་འབྱུང་བར་མི་འགྱུར། དུས་མ་ཡིན་པར་འཆི་བའི་འཇིགས་པ་འབྱུང་བར་མི་འགྱུར། རིམས་ཐམས་ཅད་ཀྱི་འཇིགས་པ་འབྱུང་བར་མི་འགྱུར། འདིས་དུང་ལ་བསྐུས་ཏེ་བུས་ན་ཆོས་ཀྱི་དུང་ཆེན་པོ་བུས་པར་འགྱུར། ཐ་ན་དུང་གི་སྒྲ་
ཐོས་པའི་བར་དེ་དག་ཐམས་ཅད་ཀྱང་སླར་ལྡོག་པར་མི་འགྱུར། སྐྱེས་པ་དང་བུད་མེད་དང་ཁྱེའུ་དང་བུ་མོ་དག་ཀྱང་སྐྱེ་བ་དང་རྒ་བ་དང་ནད་དང་འཆི་བ་དང་མྱ་ངན་དང་། སྨྲེ་སྔགས་འདོན་པའི་སྡུག་བསྔལ་ལས་ཡོངས་སུ་གྲོལ་བར་འགྱུར། འདི་ནི་སྐྱེ་བ་ཕྱི་མ་ཡིན་ཏེ་ཤི་ནས་ཐམས་ཅད་རིགས་མཐུན་པར་བདེ་བ་ཅན་གྱི་འཇིག་རྟེན་གྱི་ཁམས་སུ་པདྨ་ལས་བརྫུས་ཏེ་སྐྱེ་བར་འགྱུར། ལུས་སྐྱེས་བུ་ཆེན་པོའི་མཚན་དང་དཔེ་བྱད་ཀྱིས་བརྒྱན་པ་རྒྱན་ཐམས་ཅད་ཀྱིས་བཀླུབས་པ་པདྨ་ལས་སྐྱིལ་མོ་ཀྲུང་བཅས་ཏེ་སྐྱེ་བར་འགྱུར་རོ། །བྱང་ཆུབ་ཀྱི་སྙིང་པོ་ལ་ཐུག་གི་བར་དུ་འོད་དཔག་མེད་ལས་མངོན་སུམ་དུ་ཆོས་ཀྱི་གཏམ་ཐོས་པར་འགྱུར་རོ། །ཟླ་བ་ཡར་གྱི་ངོ་ལ་ཅོད་པན་དཀར་པོ་བཅིངས་ཏེ་ནོར་བུ་ཆེན་པོ་འདི་རྒྱལ་མཚན་གྱི་རྩེ་མོ་ལ་བཏགས་ཏེ་བསྒྲེང་བ་ཙམ་གྱི་མོད་ལ་ཆོས་ཀྱི་རྒྱལ་མཚན་བསྒྲེང་བར་འགྱུར་རོ། །འདི་རྒྱལ་མཚན་གྱི་རྩེ་མོ་ལ་བཏགས་པ་མཐོང་བ་ཙམ་གྱིས་དེ་བཞིན་གཤེགས་པ་བྱང་ཆུབ་ཀྱི་སྙིང་པོར་ཆོས་ཀྱི་འཁོར་ལོ་བསྐོར་བ་དང་བདུད་འདུལ་བའི་རྒྱལ་མཚན་སྒྲེང་བ་མཐོང་བར་རིག་པར་བྱའོ། །འདི་བསྒྲེང་བ་ཙམ་གྱིས་འཐབ་པ་དང་། རྩོད་པ་དང་ཁྲག་ཁྲུག་ཐམས་ཅད་ཞི་བར་འགྱུར། གནོད་པ་ཐམས་ཅད་དང་མི་ངས་དང་མུ་གེའི་དགོན་པ་རབ་ཏུ་ཞི་བར་འགྱུར། ཆོམ་པོ་དང་གཡོན་ཅན་དང་རྐུན་མ་དང་ཕྱིར་རྒོལ་བ་དང་མི་མཛའ་བ་འཇིག་པར་འགྱུར། རང་གི་དཔུང་དང་གཞན་གྱི་དཔུང་དང་སྡང་བའི་སེམས་ཀྱང་རབ་ཏུ་ཞི་བར་འགྱུར། དུག་མི་བཟད་པ་དང་གཅན་གཟན་གཏུམ་པོ་དང་བྱ་དང་སྦྲང་བུ་དང་ཤ་སྦྲང་དང་བྱི་བ་དང་སྡིག་སྦྲུལ་དང་འབྲས་དང་ལུའུ་ཏ་དང་དུག་དང་ཤུ་བ་དང་ལྷོག་པ་དང་མཚན་བར་རྡོལ་བ་དང་སྐེ་བགེགས་པ་ཐམས་ཅད་འཇིགས་པར་འགྱུར། སྡང་བའི་ཀླུ་དང་། སེར་བ་དང་། གྲང་བ་དང་། རླུང་གིས་མི་ཚུགས་ཤིང་ནད་ཐམས་ཅད་རབ་ཏུ་ཞིབ་བར་འགྱུར་རོ། །བདེ་བ་དང་། དགའ་བ་དང་། ལོ་ལེགས་པ་དང་། སྐྱེ་བོ་མང་པོ་དང་མི་མང་པོས་ཡོངས་སུ་གང་ཞིང་འབྱོར་བར་འགྱུར། ཆོས་འདོད་ཅིང་ཆོས་ཀྱི་ཀུན་དགའ་བ་དང་མགུ་བར་འགྱུར། མེ་ཏོག་དང་། འབྲས་བུ་དང་། ལོ་ཏོག་དང་། ཟས་དང་། སྐོམ་རོ་ཞིམ་པ་དང་། ཤིན་ཏུ་འཇམ་པ་
ཕུན་སུམ་ཚོགས་པར་འགྱུར། ཐམས་ཅད་དུ་ལྷའི་རེག་པ་དང་བཅས་པའི་བཟའ་བ་དང་བཏུང་བ་འབྱུང་བར་འགྱུར་རོ། །སྡང་བའི་གནོད་སྦྱིན་དང་། སྲིན་པོ་དང་། འབྱུང་པོ་དང་། ཤ་ཟ་དང་། ཕྲ་མེན་མ་དང་། ཡི་དགས་དང་། བརྗེད་བྱེད་དང་། སྲུལ་པོ་དང་། ལུས་སྲུལ་པོ་དང་། སྐེམ་བྱེད་དང་། གྲིབ་མ་དང་། བཟའ་ཉེས་དང་། བགོ་ཉེས་དང་། བལྟ་ཉེས་དང་། གྲིབ་མ་ངན་པ་ཞི་བར་འགྱུར་ཞིང་མི་ཚུགས་པར་འགྱུར། སེམས་ཅན་དེ་དག་ཐམས་ཅད་ཕན་ཚུན་དུ་བྱམས་པའི་སེམས་སུ་འགྱུར། མཆོག་ཏུ་ཡིད་བདེ་བའི་གནས་པས་གནས་པར་འགྱུར་རོ། །ཡོན་ཏན་དང་ཕན་ཡོན་ཆེན་པོ་དེ་དག་ནི་ནོར་བུའི་རྒྱལ་པོ་ཆེན་པོའི་བྱིན་གྱིས་བརླབས་པ་ཡིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་བཅོམ་ལྡན་འདས་ཀྱི་སྤྱན་སྔ་ན་བཞིན་འཛུམ་ཞིང་མིག་མི་འཛུམས་པར་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གྲུབ་པའི་རྫས་ཀྱི་མཆོག་ནོར་བུ་གདགས་པ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་ཤིང་ལུང་བསྟན་པ་བདག་གི་སྙིང་པོ་ཡིད་བཞིན་གྱི་ནོར་བུ་ཆེན་པོ་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་ཞུགས་པ་རྗེས་སུ་བསྒྲགས་པར་བགྱིའོ། །གསེར་དང་ན་ལ་ད་དང་། གི་ཝང་དང་། བ་བླ་དང་། ལྡོང་རོས་དང་། པདྨ་དང་། ཨུཏྤ་ལ་དང་། གུར་གུམ་དང་། ནཱ་ག་པུས་པ་དང་། ཏྭ་ཙ་དང་། ཏར་ག་དང་། ཙནྡན་རྣམ་གཉིས་དང་། སྤྲྀ་ཀ་དང་། ཀཱ་ལ་ཀ་དང་། རུ་རྟ་དང་། ཤུ་ཏི་དང་། པྲི་ཡང་ཀུ་དང་། ཧ་རེ་ནུ་ཀེ་དང་། སག་སྨེལ་དང་། ལོ་དྷ་དང་། ཛཱ་ཏ་པ་ཀྲི་ཀཱ་སུ་མ་ན་དང་། སཱ་མ་ཀ་དང་། སྲ་རྩི་པོག་དང་། ཤིང་ཨརྐའི་འོ་མ་རྣམས་བསོགས་ཏེ་ཆ་མཉམ་པར་བྱས་ལ་གསེར་ཉིས་འགྱུར་དུ་བྱས་ཏེ། རྒྱུ་སྐར་བཟང་པོ་དང་ཚེས་གྲངས་ཤིས་ཤིང་དགེ་བ་ལ་ཁྲུས་ལེགས་པར་བྱས་ཏེ། གོས་གཙང་མ་བགོས་ནས་ཉིན་ཞག་གཅིག་བྱམས་པའི་སེམས་ལ་མཉམ་པར་བཞག་སྟེ། ཕྱེ་མ་ཞིབ་མོར་བྱས་ཏེ་དོན་ཡོད་པའི་རྒྱལ་པོའི་སྙིང་པོའི་གཟུངས་སྟོང་རྩ་བརྒྱད་བཟླས། ཁྲོ་བོའི་རྒྱལ་པོ་བརྒྱ་རྩ་བརྒྱད་བཟླས་ཏེ། གཏོར་ལ་དྲི་ཆབ་བཟང་པོས་སྤངས་ཏེ། སྦྱར་ལ་
གསེར་དང་བསྲེས་ལག་པུར་དང་གླ་རྩིའི་བདུག་པས་བདུགས་ཏེ་ནོར་བུ་ཞོ་གཉིས་པའི་ཚད་དུ་བྱས་ནས་ཕུག་ལ་རས་སྐུད་ཀྱིས་བཏགས་ཏེ་གསེར་གྱིས་གཡོགས་ལ་ཡང་དོན་ཡོད་པའི་ཞགས་པའི་སྙིང་པོ་སྟོང་རྩ་བརྒྱད་བཟླས། ཁྲོ་བོའི་རྒྱལ་པོ་བརྒྱ་རྩ་བརྒྱད་བཟླས་ཏེ། འཕགས་པ་སྤྱན་རས་གཟིགས་དབང་ཕྱུག་གི་སྤྱན་སྔར་མི་སྨྲ་བར་སྒྲུབ་པ་བྱས་ལ་དེ་ཉིད་ཀྱི་ཞབས་དྲུང་དུ་གྲི་བ་མ་ལ་བསྐམ་པར་བྱས་ཏེ། ཕྱེད་དམ་བཞི་ཆ་གསེར་གྱིས་གཡོགས་པར་བྱ་ཞིང་ཕྱེད་གཡོགས་པར་མི་བྱའོ། །གང་ལ་གསེར་གྱིས་གཡོགས་པ་འདི་ནི་གང་ལ་དོན་ཡོད་པའི་ཞགས་པ་ཡིད་བཞིན་གྱི་ནོར་བུ་ཆེན་པོ་དང་འདྲ་སྟེ། སངས་རྒྱས་ཀྱི་བྱང་ཆུབ་དང་འཇིག་རྟེན་པ་དང་འཇིག་རྟེན་ལས་འདས་པའི་ལས་ཆེན་པོ་སྒྲུབ་པར་བྱེད་དོ། གསེར་གྱིས་མ་གཡོགས་པས་ནི་འཇིག་རྟེན་པའི་དགོས་པ་ཐམས་ཅད་སྒྲུབ་པར་བྱེད་དེ། ནད་ཐམས་ཅད་དང་། གདོན་ཐམས་ཅད་དང་། ལུའུ་ཏ་དང་། འབྲས་དང་། འགོ་བའི་ནད་དང་། ཤུ་བ་དང་། ལྷོག་པ་དང་། མཚན་པར་རྡོལ་བ་དང་། ཕོལ་མིག་དང་། ཤ་བཀྲ་དང་། མིག་ནད་དང་། ཀླད་ནད་དང་། གཞོགས་ཕྱེད་ན་བ་དང་། མགུལ་པ་འགགས་པ་དང་། ཁ་ནད་དང་། སྣ་ནད་དང་། རྣ་བའི་ནད་དང་། སོ་ནད་དང་། རྐན་ན་བ་དང་། ལྕེ་ན་བ་དང་། མཆུ་ན་བ་དང་། སྙིང་ན་བ་དང་། རྩི་བ་ལོགས་ན་བ་དང་། ལྟོ་ན་བ་དང་། མཆིན་པ་ན་བ་དང་། རྒྱབ་ན་བ་དང་། གཅིན་སྙི་བ་དང་། ཟུག་གཟེར་དང་། འཁྲུ་བ་དང་། ཕོ་བའི་ནད་དང་། གཞང་འབྲུམ་ཐམས་ཅད་རབ་ཏུ་ཞི་བར་འགྱུར་ཞིང་རིམས་ཐམས་ཅད་རབ་ཏུ་ཞི་བར་འགྱུར་ཏེ། རིམས་ཉིན་བཞི་པ་དང་། རླུང་ལས་གྱུར་པ་དང་། མཁྲིས་པ་ལས་གྱུར་པ་དང་། བད་ཀན་ལས་གྱུར་པ་དང་། འདུས་པ་ལས་གྱུར་པ་རྣམས་རབ་ཏུ་ཞི་བར་འགྱུར་རོ། །ལུས་ཀྱི་ནང་གི་ནད་ཐམས་ཅད་ལ་ཆུ་དྲོན་དང་ལྷན་ཅིག་སྦྱིན་ནོ། །ཕ་རོལ་གྱི་ནད་ཐམས་ཅད་དང་གནོད་པ་ཐམས་ཅད་ལ་བྱུགས་པ་ཙམ་གྱིས་ཡོངས་སུ་གྲོལ་བར་འགྱུར་རོ། །ཐམས་ཅད་དུ་དགོས་པ་ཐམས་ཅད་ལ་སྦྱར་བ་ཙམ་གྱིས་ཐམས་ཅད་འགྲུབ་པར་འགྱུར་ཏེ་ཐེ་ཚོམ་མི་བྱའོ། །གསེར་གྱིས་གཡོགས་པ་དཔུང་པ་ལ་
བཏགས་ན་ཐམས་ཅད་དུ་ཐོགས་པ་མེད་པར་འགྱུར་ཏེ། སྟོབས་དང་བརྩོན་འགྲུས་དང་། ཕ་རོལ་གནོན་པ་ཕྱག་ན་རྡོ་རྗེ་དང་། པདྨ་འཆང་དང་འདྲ་བར་འགྱུར་རོ། །དགོས་པ་ཐམས་ཅད་འགྲུབ་པ་བླ་ན་མེད་པ་རྣམ་པ་གསུམ་པོ་འདི་ལ་སྦྱར་བར་བྱས་ཏེ། ཐིག་ལེ་དང་གདོང་པ་བཀྲུ་བ་དང་ལུས་བཀྲུ་བའོ། །ཡིད་ལ་ཇི་ལྟར་བསམ་པའི་དགོས་པ་བསྒྲུབ་པའི་དེ་ཁོ་ན་ཉིད་འགྲུབ་པ་སྟེ། ཐེ་ཚོམ་མི་བྱའོ། །རྒྱལ་པོ་བཙུན་མོའི་འཁོར་དང་བཅས་པ་དང་། སྐྱེ་བོ་དང་བློན་པོར་བཅས་བརྟག་ཏུ་བགྱི་བ་ཅི་མཆིས་ཞེས་བྲན་བཞིན་དུ་དབང་དུ་འགྱུར་རོ། །ནོར་བུ་སྤྱི་གཙུག་ཏུ་བཞག་ནས་རིག་སྔགས་བཟླས་ན་བགེགས་མེད་པར་ཐམས་ཅད་འགྲུབ་པར་འགྱུར་རོ། །ལག་པ་གཡས་པ་ལ་བཏགས་ཏེ་རིག་སྔགས་བཟླས་ན་བཟླས་བརྗོད་ཀྱི་ཆོ་ག་སྟོང་ཕྲག་བརྒྱ་འགྱུར་དུ་བྱས་པར་འགྱུར་ཏེ། ལན་ཅིག་བཟླས་པས་སྟོང་ཕྲག་བརྒྱར་རབ་ཏུ་འཕེལ་བར་འགྱུར་རོ། །མགུལ་བར་བཏགས་ཏེ་བཅངས་ན་ཁྲུས་མ་བྱས་པ་ཁྲུས་བྱས་པར་འགྱུར། མི་གཙང་བ་གཙང་བར་འགྱུར། ཚངས་པར་མི་སྤྱོད་པ་ཚངས་པར་སྤྱོད་པར་འགྱུར། ཐུབ་པར་མ་བྱས་པ་ཐུབ་པར་བྱས་པར་འགྱུར། སྨྱུང་བ་མ་བྱས་པ་སྨྱུང་བ་བྱས་པར་འགྱུར། ཚིག་མི་བཙན་པ་ཚིག་བཙན་པར་འགྱུར། མ་གྲུབ་པ་གྲུབ་པར་འགྱུར། དམ་ཚིག་མི་ཤེས་པ་དམ་ཚིག་ཤེས་པར་འགྱུར། བྱམས་པའི་སེམས་དང་ལྡན་པར་འགྱུར། །སྦྱིན་པ་གང་ཅུང་ཟད་ཅི་སྦྱིན་པ་ཆུང་དུ་ཡང་སྟོང་ཕྲག་བརྒྱ་འགྱུར་དུ་སྦྱིན་པ་ཆེན་པོ་འཕེལ་བར་འགྱུར། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར། ནོར་བུ་འདི་ལག་མཐིལ་གཡས་པ་ལ་བཏགས་ན་གང་ལ་རེག་པ་དེ་ཟད་མི་ཤེས་པར་འགྱུར་རོ། །སུ་ལ་ཡང་བརྗོད་པར་མི་བྱ་སྟེ་དེའི་འོག་ཏུ་དེ་དག་ཐམས་ཅད་འཕེལ་བར་འགྱུར་རོ། །རྐེད་པ་ལ་བཏགས་ཏེ་ཆུའི་ནང་དུ་ཞུགས་ན་ཆུ་ཀླུང་ཆེན་པོའི་གཏིང་དུ་སླེབས་པར་འགྱུར་རོ། །དེ་ནས་ནོར་བུ་བསྒྲུབ་པར་འདོད་པས་དངུལ་ཤིན་ཏུ་ཡོངས་སུ་དག་པ་ལས་པདྨ་འདབ་མ་སུམ་ཅུ་རྩ་གཉིས་པ་ཁ་ཕྱེ་བ་དབུས་ཀྱི་སྙིང་པོ་དང་ཟེ་བ་ཟ་མ་ཏོག་འདྲ་བ་སོར་བཅུ་དྲུག་བཅུ་དྲུག་པའི་ཚད་དུ་བྱས་ལ་དེའི་དབུས་སུ་གསེར་གྱི་ནོར་བུ་གཞག་པར་བྱའོ། །བ་ལང་གི་ལྕི་བ་བ་ལང་གི་གཅིན་དང་ལྡན་པས་དཀྱིལ་འཁོར་གྲུ་བཞི་པ་
བྱས་ལ་ཚོན་སྣ་ཚོགས་ཀྱིས་བྲི་བར་བྱ་སྟེ། ཁོ་ར་ཁོར་ཡུག་ཏུ་པདྨ་བྲིས་ལ་པདྨའི་དབུས་ཀྱི་ཟེ་བར་དངུལ་ལས་བྱས་པའི་པདྨ་བཞག་སྟེ། བུམ་པ་གང་བ་བཞི་དང་གཏོར་མའི་བུམ་པ་བཞི་གཞག་པར་བྱ་ཞིང་མེ་ཏོག་དགྲམ་པར་བྱ། ཚོན་རྣམ་པ་སྣ་ཚོགས་ཀྱིས་བྲི་བར་བྱ། ཨ་ག་རུ་དང་། ཙནྡན་དང་། ཏུ་རུ་སྐའི་བདུག་པས་བདུག་ཅིང་གཏོར་མ་དཀར་པོ་གཞག་པར་བྱ། འཕན་གདུགས་རྣམ་པ་སྣ་ཚོགས་ཀྱིས་བརྒྱན་པར་བྱ། མར་གྱི་མར་མེ་སུམ་ཅུ་རྩ་གཉིས་ཀྱང་བལྟམ་པར་བྱ། འབྲས་བུ་དང་མེ་ཏོག་ཕྲེང་སྣ་ཚོགས་གཞག་པར་བྱ། འཕགས་པ་སྤྱན་རས་གཟིགས་དབང་ཕྱུག་མངོན་དུ་ཕྱོགས་པར་བཞག་སྟེ། རིག་སྔགས་འཆང་གཙང་མས་གོས་གཙང་མ་བགོས་ལ་ཉིན་མཚན་གཅིག་སྨྱུང་བ་བྱས་ལ། ཚེས་བཅྭ་ལྔ་ནས་ཉི་ཤུ་དགུ་དང་གནམ་སྟོང་གི་བར་དུ་མཚམས་གསུམ་དུ་མཆོད་པར་བྱ་ཞིང་། པདྨ་ཟ་མ་ཏོག་དེ་དང་འཕགས་པ་སྤྱན་རས་གཟིགས་དབང་ཕྱུག་ལའང་མཆོད་པ་བྱས་ལ་དཀྱིལ་འཁོར་གྱི་ཤར་ཕྱོགས་སུ་མངོན་དུ་ཕྱོགས་ཏེ་འདུག་ལ་བཟླས་བརྗོད་སྟོང་རྩ་བརྒྱད་བྱ། ཁྲོ་བོའི་རྒྱལ་པོ་སྟོང་རྩ་བརྒྱད་བཟླས་ཏེ་ཡུངས་ཀར་དང་ཆུས་དབང་བསྐུར་བར་བྱ། དོན་ཡོད་པའི་ཞགས་པའི་ཕྱག་རྒྱ་སྟོང་རྩ་བརྒྱད་བྱ། དེ་བཞིན་དུ་ཁྲོ་བོའི་རྒྱལ་པོའི་ཕྱག་རྒྱ་བྱའོ། །མི་སྨྲ་བར་དགོས་པ་ཐམས་ཅད་བྱས་ནས་དེའི་འོག་ཏུ་ཚེས་བཅྭ་ལྔ་ཟླ་བ་ཉའི་ནང་བར་གྱི་དུས་མཚམས་སུ་ནོར་བུའི་རྒྱལ་པོ་པདྨ་དང་བཅས་ཏེ་གཅིག་ཏུ་འབར་བར་འགྱུར་ཞིང་། འཕགས་པ་སྤྱན་རས་གཟིགས་དབང་ཕྱུག་གི་ཞལ་ནས་སྒྲ་འབྱུང་བར་འགྱུར། རིག་སྔགས་འཆང་དགའ་བར་འགྱུར། ནམ་མཁའི་དཀྱིལ་ནས་ལེགས་སོ་ཞེས་བྱ་བའི་སྒྲ་འབྱུང་བར་འགྱུར། དེ་བཞིན་གཤེགས་པའི་སྐུ་ཆེན་པོ་མཐོང་བར་འགྱུར། དེ་ནས་རིག་སྔགས་འཆང་གིས་པདྨ་འབར་བ་དེ་ལག་པ་གཡས་པས་བླངས་ཏེ། བླངས་པ་ཙམ་གྱི་མོད་ལ་ནམ་མཁའ་ལ་འགྲོ་བར་འགྱུར་ཞིང་། རིག་སྔགས་འཆང་ཐམས་ཅད་ཀྱི་འཁོར་ལོས་སྒྱུར་བར་འགྱུར། འཁོར་ལོས་སྒྱུར་བའི་རྒྱལ་པོ་གསེར་གྱི་མདོག་ཅན་བལྟ་ན་སྡུག་པ་ཆེན་པོ་མདུན་ན་གནས་པར་འགྱུར། སྡང་བ་དང་ཕྱིར་རྒོལ་བ་དང་མི་མཛའ་བ་
ཐམས་ཅད་ཟློག་པར་བྱེད། འཁོར་བྱེ་བ་སྟོང་ཕྲག་བཅུ་གཉིས་དང་ལྡན་པའི་རིག་སྔགས་འཆང་གི་རྒྱལ་པོར་འགྱུར། ཚེ་བསྐལ་པ་སྟོང་ཐུབ་པར་འགྱུར། དོན་ཡོད་པའི་རྣམ་པར་བལྟ་བའི་ནོར་བུ་ཆེན་པོ་རྒྱལ་མཚན་གྱི་རྩེ་མོ་དང་ལྡན་པའི་ཏིང་ངེ་འཛིན་ཐོབ་པར་འགྱུར། དོན་ཡོད་པའི་དྲི་མ་མེད་པ་འབར་བའི་རྩེ་མོ་རྣམ་པར་བལྟ་བ་ཞེས་བྱ་བའི་དོན་ཡོད་པའི་ཞགས་པ་འཐོབ་པར་འགྱུར། ཕྱོགས་བཅུ་ཀུན་གྱི་དེ་བཞིན་གཤེགས་པའི་ཞིང་གི་རྣམ་པར་འཕྲུལ་པ་མཐོང་བར་འགྱུར། དེ་བཞིན་གཤེགས་པ་དེ་དག་ཐམས་ཅད་ཀྱིས་དབུགས་འབྱིན་པར་འགྱུར། ནོར་བུ་ཆེན་པོ་ཡོངས་སུ་དག་པ་རྡོ་རྗེ་ལ་རྣམ་པར་ལྟ་བའི་འོད་ཀྱིས་ལུས་རྣམ་པར་དག་པ་འཐོབ་པར་འགྱུར། ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་རྣམས་བགྱི་བ་ཅི་མཆི་ཞེས་དབང་དུ་བགྱི་བར་འགྱུར། མགོའི་སྤྱི་བོར་བཏགས་ན་ནོར་བུ་ཆེན་པོ་རྫུ་འཕྲུལ་གྱིས་ནུབ་ཕྱོགས་སུ་སོང་ནས་བདེ་བ་ཅན་གྱི་རབ་ཏུ་དབྱེ་བ་གཞལ་མེད་ཁང་དང་བཅས་འཁོར་དང་བཅས་ལེགས་པར་བརྒྱན་པའི་དཀྱིལ་འཁོར་དང་བྱང་ཆུབ་སེམས་དཔའི་ཚོགས་དང་བཅས་པ་མཐོང་བར་འགྱུར་རོ། །དེ་བཞིན་གཤེགས་པ་དེ་དག་ལས་ཆོས་གནང་བའི་སྒོའི་ཆོས་བཤད་པ་ཆེན་པོ་ཐོས་པར་འགྱུར། འཕགས་པ་སྤྱན་རས་གཟིགས་དབང་ཕྱུག་གི་གཟུགས་དང་རྒྱན་དང་གཞལ་མེད་ཁང་སྟོན་པར་འགྱུར། མགུལ་དུ་བཏགས་ན་ཕུག་གི་གནས་ཐམས་ཅད་དུ་འཇུག་པར་འགྱུར། ཐམས་ཅད་དུ་རྒྱལ་བའི་རྗེ་དཔོན་དང་འཁོར་ལོས་སྒྱུར་བའི་རྒྱལ་པོར་འགྱུར། ཕུག་སྟོང་ཕྲག་དྲུག ཅུ་རྩ་བཞིའི་སྒོ་འབྱེ་བར་འགྱུར། དཔུང་པ་གཡས་པ་ལ་བཏགས་ན་མི་སྣང་བར་འགྱུར་ཞིང་ལུས་མི་སྣང་བ་གང་གཱའི་ཀླུང་བྱེ་བ་སྟོང་ཕྲག་བརྒྱ་སྙེད་ཀྱི་ལུས་མི་སྣང་བ་རྣམས་ཀྱི་མཆོག་རྗེ་དཔོན་དང་རྒྱལ་པོར་འགྱུར་རོ། །དཔུང་བ་གཡོན་པ་ལ་བཏགས་ན་གནོད་སྦྱིན་དང་སྲིན་པོ་དང་འབྱུང་པོ་ལ་སོགས་པ་ཐམས་ཅད་མི་སྣང་བར་བྱས་པར་འགྱུར། ཐམས་ཅད་ཀྱི་གནས་ཀྱི་གཞལ་མེད་ཁང་སྒོ་བྱེ་ཞིང་འདུག་པར་འགྱུར་རོ། །རྐེད་པ་ལ་བཏགས་ན་གཏེར་ཐམས་ཅད་འབྱུང་བར་འགྱུར། པུས་
མོ་གཡས་པ་དང་བརླ་གཡས་པ་ལ་བཏགས་ན་ནགས་ཀྱི་ཕུག་གི་གཞལ་མེད་ཁང་གི་གནས་ཐམས་ཅད་ཀྱི་སྒོ་ཕྱེ་ཞིང་། སྨན་གྱི་དངོས་པོ་ཐམས་ཅད་རང་གི་གཟུགས་ཀྱིས་མདུན་ན་གནས་པར་འགྱུར་ཞིང་ཐམས་ཅད་དབང་དུ་འགྱུར་རོ། །རྐང་པའི་རྗེ་ངར་ལ་བཏགས་ན་རླུང་གི་ཕུང་པོ་དང་པོའི་སྟོབས་ཀྱི་ཤུགས་ཆེན་པོ་དང་ལྡན་པར་འགྱུར་ཞིང་། ཅུང་ཟད་ཙམ་སོང་བས་དཔག་ཚད་སྟོང་ཕྲག་བཅུར་འགྲོ་ཞིང་སླར་ཡང་འོང་བར་འགྱུར། ཉིན་མཚན་གཅིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རླུང་ཆེན་པོའི་ཤུགས་ཀྱི་སྟོབས་དང་བརྩོན་འགྲུས་ཀྱིས་སོང་སྟེ། སླར་ཡང་འོང་བར་འགྱུར་ཞིང་གང་གིས་ཀྱང་གནོད་པར་མི་འགྱུར། ཐམས་ཅད་དུ་དགོས་པ་བསྒྲུབ་པ་ཐམས་ཅད་འགྲུབ་པར་འགྱུར་རོ། །རྐང་མཐིལ་ལ་བཏགས་ན་སའི་འོག་གི་དངོས་གྲུབ་ཆེན་པོ་ཐོབ་པར་འགྱུར་ཞིང་། སའི་འོག་ཕུག་གི་སྒོ་ཐམས་ཅད་བྱེ་བར་འགྱུར་ཏེ། རང་ཇི་ལྟར་འདོད་པ་དེར་འཇུག་ཅིང་འབྱུང་བར་འགྱུར་རོ། །ཁར་བཅུག་ན་ཉི་མ་རེ་རེ་ཚིགས་སུ་བཅད་པ་སྟོང་ལོབས་པར་འགྱུར་རོ། །མིད་པ་ཙམ་གྱིས་ཐོས་པ་རྒྱ་མཚོ་བསགས་པར་འགྱུར་རོ། །ལྕེའི་རྩེ་མོར་བཞག་ན་ལྕེ་པདྨ་དང་ཀུ་མུ་ད་ལྟར་འཇམ་པར་འགྱུར་ཞིང་ཐོས་པ་མང་པོ་འཛིན་པར་འགྱུར་རོ། །ལག་པ་ལ་བྱུགས་ན་གང་ལ་རེག་པ་དེ་བྲན་བཞིན་དུ་འགྱུར་རོ། །སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དང་། དགེ་སྦྱོང་དང་། བྲམ་ཟེ་ཐམས་ཅད་བགྱི་བ་ཅི་མཆིས་ཞེས་ཐམས་ཅད་དབང་དུ་འགྱུར་རོ། །ནོར་བུ་བསྒྲུབ་པའི་ཆོ་གའོ།། །།