ནོར་བུའི་རིལ་བུ་སྒྲུབ་པའི་དཀྱིལ་འཁོར་གྱི་ཆོ་ག
དེ་ནས་དེའི་ཕྱིར་གསེར་གྱི་རིལ་བུའི་དཀྱིལ་འཁོར་བཤད་པར་བྱ་སྟེ། འཇིག་རྟེན་དབང་ཕྱུག་གི་དོན་ཡོད་པའི་སྙིང་པོ། དེ་བཞིན་གཤེགས་པ་ཐམས་ཅད་ཀྱི་དོན་ཡོད་པའི་རྣམ་པར་གཟིགས་པ། དེ་བཞིན་གཤེགས་པ་པདྨ་གཙུག་ཏོར་གྱི་རྒྱལ་པོ་ཞེས་བྱ་བས་བྱིན་གྱིས་བརླབས་པ། དེ་བཞིན་གཤེགས་པ་རྣམ་པར་སྣང་མཛད་དང་། དེ་བཞིན་
གཤེགས་པ་རིན་ཆེན་སྙིང་པོས་བྱིན་གྱིས་བརླབས་པ། དེ་བཞིན་གཤེགས་པ་འཇིག་རྟེན་དབང་ཕྱུག་འོད་ཀྱིས་བཀའ་སྩལ་པ། གཞན་ཡང་དེ་བཞིན་གཤེགས་པ་གང་གཱའི་ཀླུང་གི་བྱེ་མ་སྙེད་བྱེ་བ་ཁྲག་ཁྲིག་འབུམ་ཕྲག་དགུ་བཅུ་རྩ་དགུས་གསུངས་ཤིང་བསྔགས་པ། བྱིན་གྱིས་བརླབས་པ། དབང་བསྐུར་བ། རྗེས་སུ་ཐུགས་རངས་པར་མཛད་པ། ལུང་བསྟན་པ། མགོན་པོ་འཕགས་པ་སྤྱན་རས་གཟིགས་དབང་ཕྱུག་གི་གཙུག་ཏོར་གྱི་ནོར་བུ་ཅོད་པན་འཆང་བ། རྒྱལ་པོ་འོད་དཔག་མེད་ཀྱི་གཙུག་ཏོར་གྱི་མཚན་ཉིད་ཀྱི་ཐིག་ལེ་ཡིད་བཞིན་གྱི་ནོར་བུ་རྒྱལ་མཚན་གྱི་ནོར་བུ་ཆེན་པོའི་རྒྱལ་པོ་མཆོག་ཏུ་གྲུབ་པ། རིག་སྔགས་དང་། དཀྱིལ་འཁོར་དང་། ཕྱག་རྒྱ་དང་། ཆོ་ག་ཞིབ་མོ་ཐམས་ཅད་ཀྱི་གསང་བ། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དམ་ཚིག་སྤྱི། སྐུའི་སྙིང་པོ་གང་གིས་མཐོང་བ་ཙམ་ལ་སོགས་པ་འདིས་ཚད་བསྟན་པར་ལྟ་སུ་ཞིག་གིས་ནུས་མོད་ཀྱི། འོན་ཀྱང་དེ་བཞིན་གཤེགས་པ་གང་གཱའི་ཀླུང་གི་བྱེ་མ་སྙེད་བྱེ་བ་དང་། དུས་གསུམ་གྱི་དེ་བཞིན་གཤེགས་པ་རྫོགས་པར་མངོན་སུམ་དུ་མཐོང་བ་དང་འདྲ་བར་འགྱུར་ཞིང་། དེ་བཞིན་གཤེགས་པ་དེ་དག་ཉིད་མངོན་སུམ་དུ་མཆོད་པར་གཟུང་བ་དང་ལུང་སྟོན་པ་འཐོབ་པར་འགྱུར། དེ་བཞིན་གཤེགས་པ་དེ་དག་གི་མངོན་སུམ་དུ་དགེ་བའི་རྩ་བ་བསོད་ནམས་ཀྱི་ཕུང་པོ་དང་ལྡན་པར་འགྱུར་རོ། །ནོར་བུ་གསེར་གྱི་ཁ་དོག་ཏུ་བསྟན་པའི་རིལ་བུ་འདི་གང་གིས་མཐོང་ཞིང་འཆང་བ་ནི་དགེ་བའི་རྩ་བ་བསོད་ནམས་ཀྱི་ཕུང་པོ་ཆེན་པོ་བསྐྱེད་བསྐྱེད་པར་འགྱུར། ནོར་བུ་རིལ་བུ་འདི་མཐོང་བ་ཙམ་གྱིས་སྒྲིབ་པ་དང་། སྡིག་པ་དང་། གདུག་པ་དང་། མཚམས་མེད་པ་ལྔ་དང་། མནར་མེད་པར་གཞོལ་པ་དང་། དམ་པའི་ཆོས་སྤྲོད་བ་དང་། འཕགས་པ་ལ་སྐུར་པ་འདེབས་པ་དང་། སྔོན་གྱི་ཚེ་རབས་ནས་བསགས་པའི་སྒྲིབ་པ་ཐམས་ཅད་རྣམ་པར་འཇིག་ཅིང་སྤངས་པར་འགྱུར། རིམས་དང་། ནད་ཐམས་ཅད་ལས་ཡོངས་སུ་ཐར་བར་འགྱུར། གང་གི་ལག་ན་སྨན་འདི་ཡོད་པར་གྱུར་པའི་སེམས་ཅན་དེ་ནི་ལུང་བསྟན་པར་འགྱུར་རོ། །རིལ་བུ་གང་ལ་ཡོད་པ་ནི། །ཕྱིར་མི་ལྡོག་པར་ལུང་
བསྟན་ཅིང་། །མགོན་པོ་ས་བཅུད་དག་ལ་གནས། །རྟག་ཏུ་མཆོད་རྟེན་གྱུར་པ་སྟེ། །སྐུ་གདུང་སྙིང་པོའི་བདག་ཉིད་ཅན། །རྟག་ཏུ་སངས་རྒྱས་བདག་ཉིད་འགྱུར། །དུས་གསུམ་དག་ལ་ཞུགས་པ་ཡི། །སངས་རྒྱས་དེ་བཞིན་གཤེགས་པ་གང་། །སངས་རྒྱས་དཔའ་བོ་དེ་ཀུན་གྱི། །སྲས་གཅིག་ཏུ་ནི་བརྗོད་པ་ཡིན། །འདི་ནི་དེ་བཞིན་གཤེགས་པའི་སྲས། །ཐུགས་ལས་སྐྱེས་དང་ཞལ་ལས་སྐྱེས། །ཆོས་ཀྱི་དབྱིངས་སྤྲུལ་ཆོས་ལས་སྐྱེས། །འཇིག་རྟེན་དབང་ཕྱུག་མཆོག་སྦྱིན་མགོན། །རྟག་ཏུ་རྗེས་སུ་འབྲང་བར་འགྱུར། །ཕྱག་གཡས་རྟག་ཏུ་སྤྱི་བོར་ནི། །འཇོག་མཛད་འདི་ནི་ཐེ་ཙོམ་མེད། །རིལ་བུ་མཐོང་བ་ཙམ་གྱིས་ནི། །སྡུག་བསྔལ་ཀུན་ལས་རབ་ཏུ་གྲོལ། །སྡིག་པ་ཐམས་ཅད་རྣམ་པར་འཚེད། །སྒྲིབ་པ་ཐམས་ཅད་རྣམ་པར་འདག །དེ་ནི་ངན་འགྲོར་འགྲོ་མི་འགྱུར། །ཕྱིར་ཞིང་གནས་མཆོག་ཞི་བ་འཐོབ། །འཇིག་རྟེན་འདྲེན་པ་འོད་དཔག་མེད། །མགོན་པོ་རྟག་ཏུ་མངོན་སུམ་མཐོང་། །བདེ་བ་ཅན་དུ་འཇུག་པར་བྱེད། །གང་ན་དེ་ཡི་མངོན་དགའ་བ། །དེ་བཞིན་གཤེགས་པ་མི་འཁྲུགས་པ། །རྟག་ཏུ་མི་འཁྲུགས་པར་འགྱུར་ཞིང་། །དེ་བཞིན་མི་གཡོ་མི་འགུལ་ཏེ། །སེམས་དཔའ་རི་རབ་ཆེ་དང་མཉམ། །གཟུང་དུ་མེད་པས་མཆོ་དང་འདྲ། །དེ་ལ་བགེགས་དང་ལོག་འདྲེན་དག །ནམས་ཀྱང་འཇུག་པར་མི་འགྱུར་ལ། །སེམས་དཔའ་ཕྱག་བྱའི་གནས་སུ་འགྱུར། །གང་ལ་ནོར་རྒྱལ་འདི་ཡོད་ལ། །རྒྱལ་པོ་ཆེན་པོ་བཞི་པོ་དག །དཔུང་དང་བཅས་པ་བཀོལ་དང་བཅས། །རྟག་ཏུ་བསྲུང་ཕྱིར་གནས་བྱེད་དེ། །འདིར་ནི་ཉིན་མཚན་དེ་བཞིན་ནོ། །ལྷ་ཚོགས་ཐམས་ཅད་བསྲུང་བར་ནི། །ཐེ་ཚོམ་མེད་པར་བྱེད་པར་འགྱུར། །གཟི་བརྗིད་དཔལ་ཡང་རབ་ཏུ་འཕེལ། །དེ་ལ་ལེགས་པར་འཇུག་པར་འགྱུར། །འཇིགས་མེད་རྟག་ཏུ་རྨི་ལམ་ནི། །དངོས་པོ་ཆེན་པོ་སྣ་ཚོགས་མཐོང་། །གྲུ་འཛིན་རི་ལ་གཞལ་མེད་ཁང་། །ཚལ་དང་བཅས་ཤིང་རིན་ཆེན་བཅས། །གནས་དང་བཅས་པ་མཐོང་བར་འགྱུར། །ལྷ་དང་ཀླུ་དང་གནོད་སྦྱིན་དང་། །
དྲི་ཟ་ལྷ་མིན་གསང་བ་པ། །མ་མཁའ་ལྡིང་དག་མི་འམ་ཅི། །དེ་བཞིན་ལྟོ་འཕྱེ་འཁོར་དང་བཅས། །བྱང་ཆུབ་སེམས་དཔའི་འཁོར་རྣམས་ནི། །ཀུན་ནས་བསྐོར་བ་མཐོང་བར་འགྱུར། །རིན་ཆེན་ལྷ་ཡི་སེང་གེའི་གདན། །ཁང་པ་བརྩེགས་པ་རིན་ཆེན་དང་། །ནོར་བུ་ཆེན་པོས་བརྒྱན་པ་དང་། །འཇིག་རྟེན་དབང་ཕྱུག་ཐུབ་པའི་གཙོ། །པདྨའི་སྙིང་པོ་ལ་ཞུགས་ནས། །དོན་ཡོད་ཞགས་པའི་ཕྱག་རྒྱ་དང་། །དཀྱིལ་འཁོར་བཅས་པའི་ཆོས་སྟོན་ཏོ། །གསུང་ཀུན་ཐོབ་པར་གྱུར་ནས་ནི། །ཐུབ་པ་རང་གི་ངོ་བོ་མཐོང་། །དེ་ལྟར་རྨི་ལམ་བཟང་རྨི་བ། །ཉིན་གཅིག་བཞིན་དུ་མཐོང་བར་འགྱུར། །ནོར་བུ་རྒྱལ་པོའི་མཐུ་ནི་དེ་འདྲ་བས། །དེ་བས་མི་ཡིས་འབད་པ་ཆེན་པོས་ཟུང་། །དགེ་སྦྱོང་བྲམ་ཟེ་ཉིད་དང་རྒྱལ་རིགས་དང་། །དམངས་རིགས་ཉིད་དམ་ཡང་ན་རྒྱལ་པོ་འམ། །བཙུན་མོ་སླས་སམ་དཔུང་གི་གཙོ་བོ་འམ། །སྐྱེས་པ་འམ་བུད་མེད་ཁྱེའུ་དང་བུ་མོ་དག །ནོར་བུའི་རྒྱལ་པོ་རྟག་ཏུ་འཆང་བྱེད་པ། །དེ་ནི་སྟོན་པ་ཉིད་དང་འདྲ་བར་འགྱུར། །ཆོམ་རྐུན་གྱིས་ནི་མི་སླུས་ཤིང་། །གནོད་བྱེད་ཀྱིས་ནི་འཇིགས་མི་འགྱུར། །འཇིག་པ་མི་བཟད་བརྒྱད་ལས་ཐར། །དེ་ལ་དུག་དང་སྦྱར་བའི་དུག །སྦྱར་དུག་དྲག་པོས་མི་ཚུགས་ཤིང་། །དེ་ལ་བྱད་ཀྱིས་ཚུགས་མི་འགྱུར། །གང་ལ་ནོར་བུའི་རྒྱལ་པོ་ཡོད། །དེ་ལ་ནད་ཀྱིས་མི་ཚུགས་ཤིང་། །ན་བས་མ་ཡིན་སྡིག་པས་མིན། །པདྨ་ཆུ་ཡིས་མི་ཆགས་ལྟར། །རྟག་ཏུ་ཆགས་པ་མེད་པར་གནས། །གཡུལ་འགྱེད་པ་ཡི་ནད་ན་འམ། །འཐབ་བམ་འགྱེད་པའམ་རྩོད་པ་ན། །ལན་ཐེབས་རྟག་ཏུ་རྒྱལ་བར་ནི། །ཐོབ་པར་འགྱུར་ཏེ་ཐེ་ཙོམ་མེད། །དེ་ནས་རྫས་ནི་བཤད་བྱ་སྟེ། །སྨན་ནི་བཀྲ་ཤིས་དང་ལྡན་པ། །གྲུབ་པའི་མཐའ་སྟེ་མཆོག་ཏུ་གཙང་། །འཇིག་རྟེན་མགོན་དང་མཉམ་པར་གསུངས། ཨ་ག་རུ་དང་། ཙནྡན་དང་། པདྨ་དང་། ཨུཏྤལ་དང་། ཤི་རི་ཤའི་མེ་ཏོག་དང་། ཨ་བཱ་མརྒ་དང་། མེ་རུ་དང་། ན་ལ་ད་དང་། ཆུ་སྲིན་གྱི་སེན་མོ་དང་། ཀ་ན་ཀའི་འབྲས་བུ་དང་། ཙནྡན་གྱི་འབྲས་བུ་དང་། །པདྨའི་འབྲས་བུ་དང་།
རྡོ་དྲེག་དང་། མེད་དང་། བཙོད་དང་། སཱུ་ཀ་རི་དང་། མ་ཀ་ཊཱི་དང་། ཛཱ་ཡ་དང་། བི་ཛཱ་ཡ་དང་། པ་རི་པེ་ལ་པ་དང་། ར་ས་དང་། བཱི་རཱ་དང་། དྷྱ་མ་ཀ་དང་། རྒྱ་སྤོས་དང་། བུ་སཱ་དང་། ཨ་པར་ཏ་ཀ་དང་། རུ་རྟ་དང་། བྱ་གྲན་ཁ་དང་།པད་ཏྲ་དང་། ཏྲ་ཙ་དང་། ཀ་དམར་རཱ་དང་། པྲི་ཡང་ཀུ་དང་། གིའུ་ཝང་དང་། སྤྲྀ་ཀ་དང་། སྨྱིག་རྐང་དང་། ཡུངས་ཀར་དང་། ནཱ་ག་པུཥྤ་དང་། ཨེ་ལཱ་དང་། ལྡོང་རོས་དང་། གུར་གུམ་དང་། ག་པུར་དང་། གླ་རྩི་དང་། སྤང་སྤོས་དང་། ན་ལེ་ཤམ་དཀར་པོ་དང་། སུ་མ་དང་། ཉེའུ་ཤིང་དང་། ཤུ་ཏི་དང་། སྤྲང་རྩི་དང་། ཙམ་པ་ཀ་སྟེ། དེ་བཞིན་རྫས་ནི་དེ་དག་ཀུན། །སུ་བར་ཎ་ནི་དཀར་པོས་སྦྱར། །རིལ་བུ་ནམ་གཅིག་ཙམ་དུ་ནི། །སྐྱེས་བུ་མཁས་པས་བྱ་བ་ཡིན། །སུ་བར་ཎས་ནི་བཀབ་ནས་སུ། །རྫས་རྣམས་བསྲེས་ནས་སྦྱར་བར་བྱ། །ཆ་རྣམས་འཕེལ་བར་བྱ་བ་སྟེ། །གླ་རྩི་ཡིས་ནི་དྲི་བསྐྱེད་དོ། །ཕྱེ་མ་ཞིབ་མོར་བཏགས་ནས་སུ། །ཙནྡན་དཀར་པོའི་ཆུ་སྦྱར་ནས། །གྲིབ་མ་ལ་ནི་བསྐམ་པར་བྱ། །ཚེས་བརྒྱད་ནས་ནི་བརྩས་ནས་སུ། །ཚེས་ནི་བཅྭ་ལྔ་ཉ་ཡི་བར། །ཉིན་གཅིག་བཞིན་དུ་དོན་ཡོད་པའི། །རྒྱལ་པོས་བརྒྱ་རྩ་བརྒྱད་དུ་བཟླས་སོ། །ཁྲོ་བོའི་རྒྱལ་པོ་ཉིན་གཅིག་བཞིན། །ལན་བདུན་བར་དུ་དབང་བསྐུར་རོ། །ཕྱག་རྒྱས་དབང་བསྐུར་བར་ཡང་བྱ། །དེ་ནས་ཚེས་ནི་བཅྭ་ལྔ་སྟེ། །ཉ་ལ་ཆུ་དང་ཡུངས་ཀར་དག །དཀྱིལ་འཁོར་དུ་ནི་གཞག་པར་བྱ། །དེ་ནས་ནོར་བུའི་རྒྱལ་པོ་དང་། །གཞག་པའི་དཀྱིལ་འཁོར་བཤད་པར་བྱ། །ཆ་རྣམས་མ་ནོར་ལེགས་པར་དབྱེ། །རྒྱར་ནི་ཀོ་ལའི་ཚད་དུ་བྱ། །ཤིན་ཏུ་འཇམ་ལ་ཕྱི་བདར་ལེགས། །ཚོན་རྩི་སྣ་ཚོགས་མཛེས་པ་དང་། །དཀྱིལ་འཁོར་མཆོག་ནི་ཐིག་གདབ་བོ། །སྒོ་བཞི་གདོད་ཅིང་གྲྭ་བཞི་གདོད། །ཀུན་ནས་ཤིན་ཏུ་ཆ་ཕྱེ་ཞིང་། །དཀྱིལ་འཁོར་སྙིང་པོ་ཆ་ཕྱེ་བ། །ཚད་དང་ཤིན་ཏུ་ལྡན་པར་བྱ། །པདྨ་ཆེན་པོ་བཞི་དག་དང་། །དེ་བཞིན་ཕྱག་དང་སྤྱན་དུ་བཅས། དོན་ཡོད་དངོས་གྲུབ་བྲི་བར་བྱ། །ནོར་བུ་རྒྱལ་པོ་འཆང་བ་ཡིས། །ཕྱག་རྒྱར་བཅས་པ་བྲི་བར་བྱ། །ཆུ་ཡི་རྒྱ་
མཚོའི་ནང་དུ་ནི། །ལས་ཀྱིས་རྡོ་རྗེ་ལེགས་པར་བྲི། །དཀྱིལ་འཁོར་སྙིང་པོ་དམ་པ་ལ། །ཀུན་ནས་ཁ་ཁྱེར་རྣམ་པ་དང་། །མེ་ཏོག་སྣ་ཚོགས་པ་དག་བྲི། །དཀྱིལ་འཁོར་ཕྱི་རོལ་ཀུན་དུ་ནི། །ནོར་བུ་པདྨ་ལེགས་པར་བྲི། །སྒོ་བཞི་ཡི་ནི་གནས་རྣམས་སུ། །པདྨ་ཞགས་པ་མདུང་རྩེ་གསུམ། །རྡོ་རྗེའི་ཙུལ་མཆོག་ལེགས་པར་བྲི། །གྲྭ་བཞི་ཡི་ནི་གནས་རྣམས་སུ། །ལག་ན་ནོར་བུ་ཡོད་པ་བྲི། །པདྨའི་སྟེང་ན་རབ་ཏུ་གནས། །དཀྱིལ་འཁོར་བཟང་པོ་ཕན་ཕྲན་དང་། །བུམ་པ་བཀང་དང་མེ་ཏོག་དང་། །བདུག་པ་འབྲས་བུ་རྣམས་ཀྱིས་བརྒྱན། །གཏོར་མ་རྣམ་པ་སྣ་ཚོགས་དག །ཅི་བདོག་བུངས་ཆེར་གཞག་པར་བྱ། །ཀུན་དུ་མར་མེ་ཕྲེང་བ་དང་། །མཆོད་ཡོན་ཆུ་དང་ཨ་ག་རུ། །ཙནྡན་བདུག་སྤོས་དབུལ་བར་བྱ། །ནོར་བུ་རྒྱལ་པོ་འཇིགས་མེད་པ། །སྣོད་བཟང་ལེགས་པར་བཀང་ནས་སུ། །རྒྱ་དར་ལ་ཡིས་ཁ་གཡོགས་ཏེ། །དཀྱིལ་འཁོར་དེ་ཉིད་རིག་པས་གཞག །དཀྱིལ་འཁོར་སྙིང་པོར་འཇིག་རྟེན་དབང་། །གཞག་སྟེ་དེ་ནས་ལས་རྡོ་རྗེ། །སྣོད་ཀྱི་སྟེང་དུ་བཞག་པ་ནི། །ནོར་བུ་དཀྱིལ་འཁོར་བྱ་བ་ཡིན། དེ་ནས་རིག་སྔགས་འཆང་གིས་དོན་ཡོད་པའི་རྒྱལ་པོ་ལན་ཉི་ཤུ་རྩ་གཅིག་བཟླས་བརྗོད་བྱ། ཁྲོ་བོའི་རྒྱལ་པོས་ལན་བདུན་དབང་བསྐུར་བར་བྱ། དེ་ནས་གསང་སྔགས་ཡི་གེ་གཅིག་པོ་འབུམ་ཚང་བར་བཟླས་བརྗོད་བྱ་སྟེ། འབུམ་བཟླས་བརྗོད་བྱས་ན་ནོར་བུའི་རྒྱལ་པོ་འབར་བར་འགྱུར་རོ། །དེ་ནས་རིག་སྔགས་འཆང་གི་ལག །གཡས་དང་ལྡན་པས་བཟུང་ནས་ནི། །ཆང་པ་དམ་དུ་བསྡམ་པར་བྱ། །བསྡམས་པ་ཙམ་གྱི་མོད་དག་ལ། །རྫུ་འཕྲུལ་གྱིས་ནི་མཁའ་ལ་འགྲོ། །ནོར་བུ་དྲི་མ་མེད་པ་དོན་ཡོད་པའི་རྣམ་པར་འཕྲུལ་པ་བཀོད་པ་ཞེས་བྱ་བ། རིག་སྔགས་འཆང་གི་འཁོར་ལོས་སྒྱུར་བ་འཐོབ་ལ་འཁོར་རིག་སྔགས་འཆང་འཁོར་ལོས་སྒྱུར་བ་བྱེ་བ་ཕྲག་འབུམ་ཡོད་པར་འགྱུར། ཁུང་གི་སྒོ་ཐམས་ཅད་ཕྱེ་བར་འགྱུར། སངས་རྒྱས་ཀྱི་ཞིང་ཐམས་ཅད་ཕྱེ་བར་འགྱུར། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དམ་ཚིག་དང་། དཀྱིལ་འཁོར་དང་། ཕྱག་
རྒྱ་དག་ཁ་ཏོན་དུ་ལོབས་པར་འགྱུར། སངས་རྒྱས་ཀྱི་ཞིང་ཐམས་ཅད་དུ་འཇུག་པར་འགྱུར། དེ་བཞིན་གཤེགས་པ་ཐམས་ཅད་ལ་ཕྱག་འཚལ་བ་དང་། འདུད་པ་དག་གིས་གསོང་པོར་སྨྲ་བར་བྱེད། ཐམས་ཅད་དུ་ཡང་དོན་ཡོད་པའི་དཀྱིལ་འཁོར་རྣམ་པར་ཐར་བའི་དཀྱིལ་འཁོར་རྣམ་པར་ཕྱེ་བ་ཐོབ་པར་འགྱུར། ཚེ་བསྐལ་པ་འབུམ་ཕྲག་བདུན་ཅུ་རྩ་གཉིས་སུ་རིང་བར་འགྱུར། དོན་ཡོད་པའི་པདྨའི་འཁོར་ལོ་བདུན་ནས་འགྲོ་བར་འགྱུར་རོ། །གལ་ཏེ་འབར་བར་མ་གྱུར་ན་སྔར་བསྟན་པའི་ཡོན་ཏན་གྱི་ཁྱད་པར་རྣམས་ཐོབ་པར་འགྱུར་ལ། མཉམ་པ་ཉིད་ཀྱིས་དེ་བཞིན་གཤེགས་པ་དང་འདྲ་བའི་ནོར་བུ་རྒྱལ་པོའི་རིལ་བུ་ནི་འཇིག་རྟེན་དང་འཇིག་རྟེན་ལས་འདས་པའི་ལས་རྣམས་སྒྲུབ་པ་ཡིན་ནོ། །ཚེ་བརྗེས་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་ལ། གང་དང་གང་དུ་སྐྱེ་བའི་ཚེ་རབས་ཐམས་ཅད་དུ་ཚེ་རབས་དྲན་པར་འགྱུར། ནོར་བུའི་རིལ་བུ་འདི་མཐོང་བ་ཙམ་གྱིས་དུས་གསུམ་གྱི་དེ་བཞིན་གཤེགས་པ་མངོན་སུམ་དུ་མཐོང་ཞིང་བལྟ་བར་འགྱུར། འཕགས་པ་སྤྱན་རས་གཟིགས་དབང་ཕྱུག་མངོན་དུ་མཐོང་ཞིང་རྟག་ཏུ་བལྟ་བར་འགྱུར། རིལ་བུ་རང་གི་ལུས་ལ་ཡོད་པ་དེ་ཡང་ཕྱིར་མི་ལྡོག་པར་རིག་པར་བྱའོ། །དེ་བཞིན་གཤེགས་པའི་རིང་བསྲེལ་གྱི་སྙིང་པོ་མཆོད་རྟེན་དང་མཉམ་པ་ཞེས་བྱ་བ་སྟེ། འདི་ལ་སོམ་ཉི་དང་ཡིད་གཉིས་བསྐྱེད་པར་མི་བྱའོ། །མཐོང་བ་དང་རེག་པ་ཙམ་གྱི་མོད་ལ་སྔོན་གྱི་ལས་ཀྱི་སྒྲིབ་པ་གྲངས་དང་བགྲང་བའི་ཚུལ་གྱིས་བསྐལ་པ་འབུམ་དུ་བསགས་པ། མནར་མེད་པའི་གནས་སུ་འགྲོ་བར་འགྱུར་བ། མཚམས་མེད་པ་ལྔ་བྱེད་པ། འཕགས་པ་ལ་སྐུར་པ་འདེབས་པ། དམ་པའི་ཆོས་སྤོང་བ་དེ་དག་ཐམས་ཅད་དུས་གསུམ་གྱི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གི་མཐུ་དང་། འཕགས་པ་སྤྱན་རས་གཟིགས་དབང་ཕྱུག་གི་ནོར་བུའི་རྒྱལ་པོའི་མཐུས་ཐམས་ཅད་ཟད་པར་འགྱུར། སེམས་ཅན་དམྱལ་བའི་འགྲོ་བདག་ལས་ཡོངས་སུ་ཐར་བར་འགྱུར། བདེ་འགྲོའི་ལམ་ལ་གཞོལ་
བར་འགྱུར། ཚེ་བརྗེས་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་རོ། །དེ་ལྟ་བས་ན་ལེགས་པར་སྒྲུབ་པ་མཐར་ཐུག་པར་བྱ་ཞིང་བསྒྲུབ་པར་བྱ། མཐུ་སྟོབས་ཀྱིས་སྦྱར་བར་བྱ། ཤིན་ཏུ་གསལ་ཞིང་རབ་ཏུ་གསལ་བའི་བསམ་པ་འབད་པས་སྦྱར་བར་བྱ། རང་གི་ཤ་དང་ཁྲག་ཀྱང་ཡོངས་སུ་བཏང་ནས་བཙལ་བར་བྱ་ཞིང་ཆོ་ག་ཞིབ་མོའི་རྒྱལ་པོ་ཡོངས་སུ་བཙལ་བར་བྱ་བ་ཡིན་ན་ཕྱི་རོལ་གྱི་དངོས་པོ་ནོར་དང་། འབྲུ་དང་། དབྱིག་དང་། གསེར་དང་། དངུལ་དང་། གོས་དང་། རྒྱན་རྣམས་ཡོངས་སུ་བཏང་ནས་ཡོངས་སུ་བཙལ་བར་བྱ་བ་ལྟ་སྨོས་ཀྱང་ཅི་དགོས་ཏེ། སྲོག་གཏང་བར་བྱའི་དེ་གཏང་བར་མི་བྱའོ། །དོན་ཡོད་པའི་ཞགས་པའི་སྙིང་པོ་རྣམ་པར་ཐར་བའི་དཀྱིལ་འཁོར་རིམ་པར་ཕྱེ་བ་སྒྲུབ་པ་འདི་བཙལ་བར་བྱ་ཞིང་བསྒྲུབ་པར་བྱའོ། །འདིའི་དུས་ཕྱི་མའི་ཚེ་ན་སེམས་ཅན་ཐམས་ཅད་ལ་སངས་རྒྱས་ཀྱི་མཛད་པ་བྱེད་པར་འགྱུར། སེམས་ཅན་ཐམས་ཅད་ཡང་དག་པ་ཉིད་ཀྱི་དད་པས་སངས་རྒྱས་ཉིད་དུ་མངོན་པར་རྫོགས་པར་འཚང་རྒྱ་བར་འགྱུར། ཕྱིར་མི་ལྡོག་པར་འགྱུར་ཞིང་ནམས་ཀྱང་ངན་འགྲོ་ལོག་པར་འགྲོ་བར་མི་འགྱུར་རོ། །ནོར་བུའི་རིལ་བུ་སྒྲུབ་པའི་དཀྱིལ་འཁོར་གྱི་ཆོ་གའོ།། །།