སྦྱིན་སྲེག་གི་དཀྱིལ་འཁོར་གྱི་ཆོ་ག
དེ་ནས་སྦྱིན་སྲེག་གི་ཆོ་གའི་དཀྱིལ་འཁོར་བཤད་པར་བྱ་སྟེ། རིག་སྔགས་འཆང་བ་རྣམ་དག་གི། །འདི་ཉིད་སྒྲུབ་པ་བསྒྲུབ་པའི་ཕྱིར། །སྤྱི་ཡི་རིགས་རྣམས་ཐམས་ཅད་ཀྱི། །ཆོ་ག་ཞིབ་མོ་བླ་མེད་ཡིན། །གང་གིས་སྦྱིན་སྲེག་བྱས་ཙམ་གྱིས། །ཕྱོགས་ཀུན་རྣམ་པར་གཟིགས་པ་ཡི། །དེ་བཞིན་གཤེགས་གནས་བྱོན་འགྱུར་ཞིང་། །བྱང་ཆུབ་སེམས་དཔའ་དགོངས་པར་འགྱུར། །རིག་སྔགས་དངོས་གྲུབ་རྗེས་སྩོལ་ཅིང་། །རྟག་ཏུ་སྲུང་བ་མཛད་པར་འགྱུར། །མགོན་པོ་འཕགས་པ་སྤྱན་རས་གཟིགས། །ཐེ་ཙོམ་མེད་པར་མྱུར་དུ་བྱོན། །མགོན་པོ་འཁོར་བཅས་གནས་ཉིད་ན། །རང་གི་གཟུགས་སུ་མཐོང་བར་འགྱུར། །འདོད་པ་ཐམས་ཅད་རྟག་ཏུ་སྩོལ། །རྟག་ཏུ་མཆོག་ནི་སྩོལ་བ་ཉིད། །ཉིན་དང་མཚན་དུ་རྟག་པར་ནི། །རྣམ་པར་གཟིགས་འགྱུར་ཐེ་ཙོམ་མེད། །དཀྱིལ་འཁོར་བཤད་པར་བྱ་བ་སྟེ། །དཀྱིལ་འཁོར་གྲུ་བཞི་ཤིན་ཏུ་མཛེས་པར་བྱ་བ་ནི་རྒྱ་ཆེན་པོ་ཀོ་ལའི་ཚད་ཙམ་ལ། ལེགས་པར་བྱུགས་
པ་ཤིན་ཏུ་འཇམ་པ། ཤིན་ཏུ་གསལ་བ་གྲུ་བཞི་སྒོ་བཞི་དང་། ཐེམ་སྐས་བཞི་དང་ལྡན་པ། རྣམ་པར་དབྱེས་པ་མཆོག་ཏུ་མཛེས་པ་དབུས་ཀྱི་དཀྱིལ་འཁོར་གྱི་སྙིང་པོར་ཡང་བྱའོ། །མེ་ཡི་གནས་ཀྱི་དཀྱིལ་འཁོར་ནི། །གྲུ་བཞི་ཉིད་ཀྱི་རྣམ་པ་ལ། །ཀུན་ནས་ཐེམ་སྐས་བཞི་དག་དང་། །སྟེང་དུ་གྲྭ་ནི་བཞི་པ་བྱ། །རྟག་ཏུ་པདྨའི་སྙིང་པོ་དང་། སྙིང་པོ་རྒྱས་པའི་སྟེང་དུ་ཡང་། །ཀུན་ནས་འདབ་མ་མཛེས་པར་བྱ། །གྲྭ་བཞིར་པདྨའི་ཕྲེང་བ་བྱ། །དེ་བཞིན་དུ་གྲྭ་གཉིས་ཀར་རྡོ་རྗེ་པདྨ་དང་བཅས་པའོ། །གསུམ་པར་མདུང་རྩེ་གསུམ་པ་པདྨ་དང་བཅས་པའོ། །བཞི་པར་འཁོར་ལོ་པདྨ་དང་བཅས་པའོ། །ལྔ་པར་བུམ་པ་གང་བ་གཞག་གོ། །སྣ་ཚོགས་ཚོན་གྱིས་རྣམ་མཛེས་པའི། །ཀུན་ནས་འདབ་མའི་མྱུ་གུ་བྱ། །རིན་ཆེན་སྣོད་ནི་བཀང་བ་དང་། །མེ་ཏོག་ཕྲེང་དང་ངང་བ་དང་། །ཕྱེ་མ་པདྨར་བཅས་པ་དང་། དེ་བཞིན་མེ་ཏོག་རིགས་དག་ཉིད། །དེ་བཞིན་སྣ་ཚོགས་བརྒྱན་པའོ། །ནུབ་ཀྱི་གནས་དང་གྲྭ་དག་ཏུ། །པདྨའི་འདབ་མ་ཨུཏྤལ་བཅས། །བུམ་པ་དཱུར་བས་བཀང་བ་བྲི། །རྩ་བའི་བུམ་པ་དབུ་མ་ལ། །འདིར་ནི་ཁ་ཁྱེར་ཐིག་ཀྱང་གདབ། །དེ་ནས་དཀྱིལ་འཁོར་མཛེས་བྱ་བ། །ཐིག་གིས་ཀུན་ནས་ཆ་མཉམ་ཞིང་། །སྒོ་བཞི་མཛེས་པར་བྱ་བ་ནི། །ཚོན་སྣ་ལྔ་ཡི་སྐུད་པས་གདབ། །མེ་འབར་མདོག་ཅན་བྲི་བ་ནི། །ཀུན་ནས་འབར་བའི་ཕྲེང་བ་ཅན། །གྲྭ་དང་གྲྭར་ནི་མེ་ལྷ་བྲི། །ལུས་ནི་མེ་མདོག་འབར་བ་དང་། །ལག་ན་མེ་འབར་འཛིན་པ་དང་། །མཚན་མ་སྣ་ཚོགས་གཞན་དག་ཀྱང་། །ཆོ་ག་བཞིན་དུ་བྲི་བར་བྱ། །དཀྱིལ་འཁོར་གྱི་ནི་ཆོ་ག་བཞིན། །བ་དན་མདའ་དང་སྣ་ལྔ་ཡི། །སྐུད་པས་བུམ་པ་གང་དཀྲིས་དང་། །དེ་བཞིན་བདུག་སྤོས་སྣོད་དག་གིས། །ཀུན་ནས་དཀྱིལ་འཁོར་བརྒྱན་པར་བྱ། །སྣ་ཚོགས་གཟུགས་ཅན་རྒྱ་ཆེ་ཡི། །སྣ་ཚོགས་རོ་ཡི་གཏོར་མ་གཞག །རྫེའུ་དང་ཁམ་ཕོར་རྣམ་གསུམ་གྱི། །དཀར་པོས་དཀར་བ་གཞག་པར་བྱ། །རྫེའུ་དང་དབྱིབ་མོ་བུམ་པ་ནི། །གཏོར་མས་བཀང་བ་ཀུན་དུ་གཞག །འབྲས་བུ་རྣམ་པ་སྣ་ཚོགས་གཞག །ཀུན་ནས་མེ་ཏོག་
དགྲམ་བྱ་ཞིང་། །ཕྲེང་བ་སྣ་ཚོགས་གཞག་པར་བྱ། །འབྲས་ཡོས་ཡུངས་ཀར་གཏོར་ནས་ནི། །ཀུན་དུ་མར་མེ་འབར་བ་དག །སྣ་ཚོགས་དྲི་དང་དེ་བཞིན་དུ། །དྲི་ཡི་ཕྱེ་མ་ལྷ་བཤོས་དང་། །དཀྱིལ་འཁོར་ཀུན་ལ་གཞག་པར་བྱ། །དཀྱིལ་འཁོར་དག་ནི་ཐམས་ཅད་ལ། །བླུགས་གཟར་དཱུར་བ་རྟག་ཏུ་གཞག །ཤིང་ནི་ཨརྐ་ཤི་མི་དང་། །ཡུངས་ཀར་འབྲས་ནི་སོ་བ་དང་། །ཞུན་མར་དང་ནི་མར་དཀར་དང་། །ཀུན་དུ་ཙནྡན་དཀར་པོ་དག །སྦྱིན་སྲེག་ཆོ་གར་འདིར་བཞག་སྟེ། །དུས་གསུམ་རྟག་ཏུ་རེག་འཛིན་གྱིས། །སྦྱིན་སྲེག་བརྒྱ་རྩ་བརྒྱད་དུ་བྱ། །རིགས་པ་འཛིན་པ་གཙང་མ་ཡིས། །གཙང་མ་ཡི་ནི་གོས་བགོས་ལ། །དཀར་གསུམ་གྱི་ནི་ཟས་བཟའ་ཞིང་། །གཞན་ནི་བཟའ་དང་སྤྱད་མི་བྱ། །དཀྱིལ་འཁོར་གྱི་ནི་ནུབ་སྒོ་ནས། །དཀྱིལ་འཁོར་ཤེས་པ་འཇུག་བྱ་ཞིང་། །དར་བྷའི་སྟན་ལ་སྐྱིལ་ཀྲུང་དུ། །ཤར་ཕྱོགས་ཁ་བལྟས་འདུག་པར་བྱ། །བྱམས་པའི་སེམས་ལ་མཉམ་བཞག་སྟེ། །དོན་ཡོད་རྒྱལ་པོ་དྲན་བྱ་ཞིང་། །སྔ་དྲོའི་དུས་སུ་སྦྱིན་སྲེག་བྱ། །གུང་ལ་སློམ་མ་གཞུག་བྱ་ཞིང་། །སྤྱི་ཡི་རིགས་ཀྱི་སྲེག་བླུགས་ནི། །ཕྱེ་མ་རེད་དུས་སུ་བྱ་བའོ། །གང་ཞིག་དཀྱིལ་འཁོར་དུ་ཞུགས་ལ། །སྦྱིན་སྲེག་དཀྱིལ་འཁོར་དེ་ཉིད་དང་། །གྲུབ་པ་ཀུན་དུ་ཆོ་ག་ཡི། །བདག་ཉིད་དབང་བསྐུར་མེ་ཀུན་གྱི། །སྦྱིན་སྲེག་བྱེད་པའི་མཆོག་ཏུ་གསུངས། །ཀུན་དུ་གནས་ནི་ཐམས་ཅད་ན། །རྒྱས་པ་གནས་འཇོག་རྭ་གཅིག་དང་། །གར་གེ་དེ་བཞིན་ཕུར་བུ་དང་། །མདུན་ན་འདོན་པ་མེ་ལྷ་ནི། །སྦྱིན་སྲེག་བྱེད་པ་འཇིག་རྟེན་པར། །མཚུངས་ཞེས་སྟོན་པས་ལུང་བསྟན་ཏོ། །འཇིག་རྟེན་འདས་པའི་ལས་སྒྲུབ་པ། །རིག་འཛིན་དབང་པོ་ཆེན་པོ་དང་། །ཕྱག་ན་རྡོ་རྗེ་ཚངས་པ་དང་། །ཁྱབ་འཇུག་དབང་ཕྱུག་ཆེན་པོ་དང་། །མཉམ་པ་བས་ཀྱང་ལྷག་པ་ཉིད། །མེ་ཡིས་སྦྱིན་སྲེག་བྱེད་པ་ལ། །དེ་བཞིན་གཤེགས་ཀུན་བྱིན་གྱིས་རློབ། །གལ་ཏེ་ཞག་བདུན་དུས་གསུམ་དུ། །དེ་ལ་སོགས་པའི་ལས་རྣམས་ནི། །མེ་ལ་སྦྱིན་སྲེག་བྱེད་པ་ལ། །མོད་ལ་མངོན་ཤེས་ལྔ་ཐོབ་ཅེས། །དེ་སྐད་འཇིག་
རྟེན་འདྲེན་པ་གསུང་། །ལས་ནི་བྱས་ནས་དེ་ནས་ནི། །སྦྱིན་སྲེག་ལ་ནི་བརྩམ་པར་བྱ། །སྲེག་བླུགས་སྦྱིན་སྲེག་བྱས་ཙམ་གྱིས། །ལས་རྣམས་ཐམས་ཅད་འགྲུབ་པར་འགྱུར། །ལྷ་རྣམས་རྟག་ཏུ་འོང་འགྱུར་ཞིང་། །དེ་བཞིན་གཤེགས་ཀུན་དགྱེས་པར་འགྱུར། །བྱང་ཆུབ་སེམས་དཔའ་བྱོན་ནས་ནི། །མོད་ལ་མཐོང་བའི་སྦྱིན་པར་མཛད། །སྡིག་པ་ཐམས་ཅད་བསྲེག་པར་འགྱུར། །ཤིན་ཏུ་མི་བཟད་སྔོན་གྱི་ལས། །སྲེག་བླུགས་ཙམ་གྱི་མོད་ལ་བསྲེགས། །འབར་བའི་མེ་ཡིས་ཕྱེ་ལེབ་བཞིན། །དེ་ལ་སོགས་པའི་སྡིག་པ་ནི། །བསྲེག་འགྱུར་འདིར་ནི་ཐེ་ཚོམ་མེད། །སྡང་བའི་ཕྱིར་ནི་རྒོལ་ཉིད་དང་། །མི་བཟད་ཕས་ཀྱི་དགྲ་རྣམས་དང་། །ཕ་རོལ་དཔུང་གིས་འཇིགས་པ་ཉིད། །དེ་བཞིན་དུ་ཡང་རྒྱལ་པོའི་དཔུང་། །དེ་ཀུན་སྦྱིན་སྲེག་བྱས་ཙམ་གྱིས། །མི་སྣང་བར་འགྱུར་ཐེ་ཙོམ་མེད། །དེ་བཞིན་མི་ངས་གཅོང་ཀུན་དང་། །ནད་ཀུན་རབ་ཏུ་ཞི་བར་འགྱུར། །མུ་གེའི་དགོན་པའི་འཇིགས་ཉིད་ཀྱང་། །སྦྱིན་སྲེག་བྱས་པ་ཙམ་གྱིས་འཇིག །གནོད་སྦྱིན་སྲིན་པོ་འབྱུང་པོ་དང་། །དེ་བཞིན་བགེགས་དང་ལོག་འདྲེན་དང་། །ཤ་ཟ་བརྗེད་བྱེད་ཡི་དགས་དང་། །དེ་བཞིན་རྣམ་པ་སྣ་ཚོགས་གདོན། །འདི་ཀུན་སྦྱིན་སྲེག་བྱས་ཙམ་གྱིས། །འཇིག་པར་འགྱུར་བར་ཐེ་ཙོམ་མེད། །རྟག་ཏུ་འཇིགས་མེད་ལོ་ལེགས་ཤིང་། །གླིང་དང་བདེ་བར་འགྱུར་བ་ཡིན། །རྟག་ཏུ་སེམས་ཅན་ཐམས་ཅད་ནི། །ཀུན་ཏུ་རྒྱལ་བར་འགྱུར་བ་ཡིན། །རྒྱལ་པོ་དཔུང་དང་བཅས་པ་ཉིད། །བཙུན་མོར་བཅས་པ་ཉིད་ཀྱང་ནི། །རྟག་པར་ཀུན་ཏུ་གསལ་བར་ནི། །མི་འཇིགས་སྦྱིན་པར་ཐེ་ཙོམ་མེད། །རྟག་ཏུ་ནད་མེད་འགྱུར་བ་དང་། །དགའ་ཞིང་ཡིད་ནི་བདེ་བ་དང་། །ལུས་ཅན་དག་ནི་ཐམས་ཅད་ལ། །རྟག་ཏུ་དགའ་བར་བྱེད་ཅིང་གནས། །རྟག་ཏུ་མེ་ཡི་ལྷ་ཉིད་ནི། །རྒྱུན་དུ་མཐོང་བར་འདོད་པ་ཡིས། །མེ་ལ་སྦྱིན་སྲེག་བྱས་ཙམ་གྱིས། །མེ་ལྷ་ཉིད་ནི་བཞུགས་གྱུར་ཏེ། །རྟག་ཏུ་ལས་རྣམས་ཐམས་ཅད་མཛད། །རྒྱུན་དུ་ཕྱི་བཞིན་འབྲང་བར་འགྱུར། །ལྷ་ནི་རྟག་ཏུ་འོང་འགྱུར་ཞིང་། །ཐམས་ཅད་དུ་ནི་མཐོང་
བ་སྟེར། །རྒྱུ་སྐར་ཟླ་བ་ཉི་མ་དང་། །གཤིན་རྗེ་དང་ནི་ཆུ་ལྷ་དང་། །རྒྱལ་པོ་ཆེན་པོ་བཞི་པོ་དག །དཔུང་བཅས་བཞོན་པར་བཅས་པ་ཡང་། །ཉིན་དང་མཚན་དུ་རྟག་པར་ནི། །རྗེས་འབྲང་བསྲུང་འགྱུར་ཐེ་ཙོམ་མེད། །ཅི་སྟེ་རིག་སྔགས་འཆང་དོན་ཡོད་པའི་རྒྱལ་པོའི་སྙིང་པོ་བསྒྲུབ་པར་འདོད་ན་རིག་སྔགས་འཆང་གཙང་མ་དེས་ཤིན་ཏུ་ཁྲུས་བྱས་ལ་གོས་གཙང་མ་བགོ་བར་བྱ། ཉིན་ཞག་གཅིག་སྨྱུང་བ་བྱ་ཞིང་། ཤིང་ཨརྒའི་ཡམ་སྲེག་ཤིང་གི་མེ་སྦར་ལ་པདྨ་དང་། ཞུན་མར་དང་། འབྲས་སོ་བའི་སྦྱིན་སྲེག་བརྒྱད་བརྒྱ་བྱས་ནས་སྲེག་བླུགས་ལན་ཅིག་བྱས་པས་མཚམས་མེད་པ་ལྔ་བྱེད་པ་ཡང་འགྲུབ་པར་འགྱུར་ཏེ། འདི་ལ་ཐེ་ཚོམ་དང་ཡིད་གཉིས་བསྐྱེད་པར་མི་བྱའོ། དེ་བཞིན་གཤེགས་པ་ཐམས་ཅད་ཀྱི་སྤྱིའི་རིགས་ཀྱི་དངོས་གྲུབ་འདོད་ན་རིག་སྔགས་འཆང་དེས་བྱང་ཆུབ་ཀྱི་ཤིང་གི་མེ་སྦར་ལ་རིགས་སྤྱིར་པདྨ་དང་། །ཨུཏྤ་ལ་སྔོན་པོ་དང་། ཡུངས་ཀར་དཀར་པོ་དང་། །ཞུན་མར་བསྲེས་པའི་སྦྱིན་སྲེག་བརྒྱད་བརྒྱ་བྱས་ན་དེ་བཞིན་གཤེགས་པ་ཐམས་ཅད་ཀྱི་སྤྱིའི་རིགས་ཀྱི་དངོས་གྲུབ་འཐོབ་སྟེ་ཐམས་ཅད་ཆོ་ག་ཆེན་པོ་ཞིབ་མོ་དང་། སྦྱིན་སྲེག་ཆེན་པོའི་ཆོ་གར་འགྱུར་རོ། །དེ་ནས་ཕ་རོལ་གྱི་དམག་ཚོགས་གཞོམ་པར་འདོད་ན་རིག་སྔགས་འཆང་གཙང་མ་དེས་ཤིན་ཏུ་ཁྲུས་བྱས་ལ་གོས་གཙང་མ་བགོས་ཏེ་སེང་ལྡེང་གི་མེ་སྦར་ལ་ཞོ་དང་། ཞུན་མར་དང་། ཡུངས་ཀར་དང་། གུ་གུལ་གྱི་སྲེག་བླུགས་ཀྱིས་སྦྱིན་སྲེག་བརྒྱད་སྟོང་བྱས་ན་དཔག་ཚད་སྟོང་ཚུན་ཆད་ཀྱི་ཕ་རོལ་གྱི་དམག་ཚོགས་བཅིང་བ་བྱས་པར་འགྱུར་རོ། །ཕ་རོལ་གྱི་དམག་ཚོགས་དང་། དགྲ་གཞོམ་པར་འདོད་པ་དང་། དཔུང་གཞིགས་པར་འདོད་ན་དེ་ནས་རིག་སྔགས་འཆང་གིས་ཤིང་ཀར་བ་ཀའི་མེ་སྦར་ལ། སྦྲུལ་གྱི་པགས་པ་བརྗེས་པ་དང་། སྐེ་ཙེའི་ས་བོན་དང་། ལན་ཚྭ་འབྲས་སཱ་ལུ་དང་བསྲེས་པ་ཡུངས་ཀར་མར་དང་སྦྱར་བའི་སྦྱིན་སྲེག་བྱས་ན་དཔག་ཚད་སྟོང་ཚུན་ཆད་ཀྱི་ཕ་རོལ་གྱི་དམག་ཚོགས་དང་། དགྲ་ལ་གནམ་ལྕགས་ཆེན་པོ་དང་། རླུང་གྲང་མོ་འབབ་པས་ཕོངས་པ་དང་། ཡིད་མི་བདེ་བ་བསྐྱེད་པར་འགྱུར། དགྲ་ཐམས་ཅད་རྣམ་པར་
འཇིག་པར་འགྱུར་རོ། །ཀླུས་ཆར་འབེབས་པར་འདོད་ན་རིག་སྔགས་འཆང་དེས་ཉིན་ཞག་གཅིག་སྨྱུང་བ་བྱས་ལ། ཤིན་ཏུ་ཁྲུས་བྱས་པ་གཙང་མས་དྲི་སྣ་ཚོགས་དང་། མེ་ཏོག་ཕྲེང་བ་དང་། ཡུངས་ཀར་དང་། ཤ་ཏ་བུས་པ་ཞུན་མར་དང་སྦར་བའི་སྦྱིན་སྲེག་མཚན་གཅིག་ལ་དུས་གསུམ་དུ་བྱས་ན་ཀླུའི་རྒྱལ་པོས་ཆར་གྱི་རྒྱུན་ཆེན་པོ་འབེབས་ཏེ། འཛམ་བུའི་གླིང་མཐའ་དག་ཏུ་ཞག་བདུན་གྱི་བར་དུ་ཆར་འབབ་པར་འགྱུར་རོ། །ཆར་དེ་ཉིད་ཧ་ཅང་ཆེས་ན་ཐལ་བ་ནམ་མཁའ་ལ་གཏོར་ན་ཧ་ཅང་ཆར་ཆེས་པ་འཆད་པར་འགྱུར་རོ། །ཡང་མེ་ལྷ་འོང་བར་འདོད་ཅིང་རང་གི་གཟུགས་སུ་མཐོང་བར་འདོད་ན་རིག་སྔགས་འཆང་གཙང་མ་དེས་གོས་གཙང་མ་བགོས་ལ་ཉིན་ཞག་གཅིག་གནས་པར་གྱུར་པས་ཤིང་སྣ་མའི་མེ་སྦར་ལ་འབྲས་སོ་བ་དང་། ཞུན་མར་དང་། བུ་རམ་ཤ་ཁར་དང་བཅས་པ་དང་། ཚ་བ་གསུམ་དང་། སྣ་མའི་མེ་ཏོག་བསྲེས་པ་བརྒྱད་སྟོང་སྦྱིན་སྲེག་བྱའོ། །བརྒྱད་སྟོང་ཚང་བ་དང་། མེ་ལྷ་མེའི་ནང་ནས་ལུས་ཕྱེད་ཕྱུང་སྟེ་འདུག་ནས་རིག་སྔགས་འཆང་ལ་ཅི་བགྱི་བཀའ་སྩོལ་ཅིག་ཅེས་ཟེར་ཞིང་ཇི་ལྟར་རིག་སྔགས་འཆང་གི་ཆོ་གའི་དོན་དུ་འགྱུར་བ་དེ་བཞིན་དུ་སྨྲའོ། །ཐམས་ཅད་སྦྱིན་པ་ཞེས་བྱ་བ་མཆོག་ཐམས་ཅད་སྦྱིན་པ་ཞེས་བྱ་བ་བདུད་རྩི་འབར་བ་ཞེས་བྱ་བའི་མེའི་ཁ། ཁའི་མཆོག་སྦྱིན་པར་བྱེད་དོ། །གང་བདུད་རྩི་འབར་བའི་མེའི་ཁ་ཐོབ་པས་གང་དུ་དབུགས་ཕྱུང་བ་དང་། རྔུབས་པ་དེར་མེ་འབར་བ་འབྱུང་བར་འགྱུར་རོ། །གང་དུ་ཕུ་ཞེས་བྱས་པ་དེར་མེ་འབྱུང་བར་འགྱུར་རོ། །མུན་གནག་ཏུ་དབུགས་ཕྱུང་ན་མེ་འབར་ཏེ། སྣང་བར་འགྱུར་རོ། །ཙནྡན་དཀར་པོའི་སྦྱིན་སྲེག་སྟོང་རྩ་བརྒྱད་བྱས་པས་འཕགས་པ་སྤྱན་རས་གཟིགས་དབང་ཕྱུག་ཉིད་ཀྱི་གཟུགས་སྟོན་པར་མཛད་དོ། །ས་བོན་བདུན་གྱི་སྦྱིན་སྲེག་གིས་ནད་ཐམས་ཅད་ཞི་བར་བྱེད་དོ། །འབྲས་སོ་བའི་སྦྱིན་སྲེག་གིས་ནི་རྒྱལ་ནི་རྒྱལ་པོ་དབང་དུ་བྱེད་དོ། །ཕུབ་མ་དང་ལན་ཚྭའི་སྦྱིན་སྲེག་གིས་ནི་ཞེ་འགྲས་པར་བྱེད་དོ། །འབྲས་ཡོས་དང་ཡུངས་ཀར་གྱི་སྦྱིན་སྲེག་གིས་ནི་སེམས་ཅན་ཐམས་ཅད་དབང་དུ་བྱེད་དོ། །ཡུངས་ཀར་དང་། གུ་གུལ་དང་། ཞུན་མར་གྱི་སྦྱིན་
སྲེག་གིས་ནི་གནོད་སྦྱིན་འགུགས་སོ། །ཀ་ར་བཱི་རའི་མེ་ཏོག་དང་། གུ་གུལ་ཞུན་མར་དང་སྦྱར་བའི་སྦྱིན་སྲེག་གིས་ནི་སྲིན་མོ་འགུགས་སོ། །དེ་བཞིན་དུ་འདིར་ལས་ཐམས་ཅད་བྱེད་དོ། །སྦྱིན་སྲེག་གི་དཀྱིལ་འཁོར་གྱི་ཆོ་གའོ།། །།