རི་མོའི་དཀྱིལ་འཁོར་གྱི་སྒྲུབ་པའི་ཆོ་ག
རི་མོའི་དཀྱིལ་འཁོར་གྱི་སྒྲུབ་པའི་ཆོ་ག་བཤད་པར་བྱ་སྟེ། ཀུན་ཏུ་ཐུན་མོང་སྒྲུབ་པའི་མཆོག །དགེ་བའི་ལས་ཀུན་བྱེད་པ་སྟེ། །སངས་རྒྱས་ཐམས་ཅད་མཐོང་འགྱུར་ཞིང་། །བླ་མེད་བསོད་ནམས་ཆེན་པོ་སོགས། །དོན་ཡོད་རྒྱལ་པོ་དེ་ཉིད་ནི། །རྣམ་པ་སྣ་ཚོགས་གཟུགས་དག་ཏུ། །འཇིག་རྟེན་འདྲེན་པ་སྣང་བར་བྱ། །མཐུན་དང་དངོས་གྲུབ་སྣ་ཚོགས་པའི། །འཇིག་རྟེན་འདྲེན་པའི་གཟུགས་བྱ་བ། །གྲུབ་པ་སྣ་ཚོགས་བྱེད་པའི་གནས། །སོ་སོའི་གཟུགས་སུ་བྱ་བ་ནི། །རས་སམ་ཡང་ན་དར་དག་ལ། །འཇིགས་པ་མེད་པས་གཟུགས་བྱའོ། །དོན་ཡོད་པའི་རྒྱལ་པོ་ནི་ཁྲུ་གང་ཙམ་གྱི་ཚད་དམ་ཡང་ན་ཚད་ཤིན་ཏུ་རྣམ་པར་འབྱེད་པ་པདྨའི་མདོག་ལྟ་བུ་ཕྱག་བརྒྱད་པ། དབུ་གསུམ་པ། དེ་བཞིན་དུ་སྤྱན་གསུམ་པ། ཞི་བའི་ཞལ་དུ་བྲི་བར་བྱ་སྟེ་དེ་བཞིན་དུ་ཞགས་པ་འཛིན་པ་དང་པདྨ་འཛིན་པ་དང་མདུང་རྩེ་གསུམ་པ་དང་། རིལ་བ་སྤྱི་བླུགས་འཛིན་པ་དང་། ཡིད་བཞིན་གྱི་ནོར་བུ་དང་། བེ་ཅོན་དང་དབུགས་འབྱིན་པ་དང་། བགྲང་ཕྲེང་དང་། མེ་ཏོག་ཐུམ་པོ་འཛིན་པར་བྱའོ། །གཡོན་དུ་ནི་དཀར་མོའོ། །གཡས་སུ་འཕགས་མ་སྒྲོལ་མ་ཐལ་མོ་སྦྱར་ལ་དབུ་ཡིད་ཙམ་འདུད་བརྒྱན་ཐམས་ཅད་ཀྱིས་བརྒྱན་པའོ། །འཕགས་པ་སྤྱན་རས་གཟིགས་དབང་ཕྱུག་ནི་རལ་པའི་ཐོར་ཚུགས་ཅན། དབུ་རྒྱན་འོད་དཔག་མེད་ཀྱིས་བརྒྱན་པ། གཡས་ཕྱོགས་ཀྱི་དབུ་ཟླ་བ་ཚེས་པས་བརྒྱན་པ། རི་དགས་ཀྱི་པགས་པ་མནབས་པ། མཆོད་ཕྱིར་ཐོགས་པ། རྒྱན་ཐམས་ཅད་ཀྱིས་བརྒྱན་པ། འོད་འདོམ་གང་དང་ལྡན་པའོ། །ནང་རིམ་དུ་པདྨའི་ཕྲེང་བའོ། །རིམ་པ་གཉིས་པར་རྡོ་རྗེ་ཕྲེང་བ་ལྕགས་ཀྱུ་དང་བཅས་པར་བྱའོ། །རིམ་པ་གསུམ་པར་ནོར་བུ་རིན་པོ་ཆེའི་ཕྲེང་བ་དང་། རིན་པོ་ཆེ་སྣ་ཚོགས་མཛེས་པའོ། །རིམ་པ་བཞི་པར་མདུང་རྩེ་གསུམ་པའི་ཕྲེང་བའོ། །རིམ་པ་ལྔ་པར་ཀུན་ནས་འབར་བའི་ཕྲེང་བའོ། །
སྟེང་དང་གཡས་ཕྱོགས་ཀྱི་གནས་སུ་དབང་པོ་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་མེ་ཏོག་སྣ་ཚོགས་ཐོགས་པར་བྱའོ། །གཡོན་དུ་གཞོན་ནུ་དང་། གཤིན་རྗེ་དང་། ཆུ་ལྷ་དང་། ལུས་ངན་དང་། དབང་ཕྱུག་དང་། ལྷའི་བུ་རྣམས་བྱ་བ་ནི་མེ་ཏོག་སྣ་ཚོགས་ཐོགས་པར་བྱའོ། །ལྷ་མོ་སྒྲོལ་མའི་རྒྱབ་ཏུ་ཁྲོ་བོའི་རྒྱལ་པོ་དོན་ཡོད་པའི་ཞགས་པ་བྱ་བ་ནི་ཁྲོས་པ། གཏུམ་པའི་གཟུགས་འཆང་བ། ཕྱག་བཞི་པ། འབར་བའི་ནང་དུ་བཞུགས་པ། སྐུ་རྒྱན་ཐམས་ཅད་ཀྱིས་བརྒྱན་པ། རལ་པ་འཆང་བ། འོད་དཔག་མེད་ཀྱི་དབུ་རྒྱན་ཅན། སྤྱན་གསུམ་པ། གཡས་པ་ཟླ་བས་བརྒྱན་ཅིང་རལ་གྲི་འཛིན་པ་དང་ཞགས་པ་འཛིན་པ་དང་། མདུང་རྩེ་གསུམ་པ་འཛིན་པ་དང་། དགྲ་སྟ་འཛིན་པར་བྱའོ། །དཀར་མོའི་རྒྱབ་ཏུ་རིག་སྔགས་ཀྱི་རྒྱལ་པོ་དབུ་གསུམ་པ་བྱ་བ་ནི། ཞི་བའི་ཞལ་རས་ཅན་རྒྱན་ཐམས་ཅད་ཀྱིས་བརྒྱན་པ། དབུ་རྒྱན་རྒྱལ་བ་འོད་དཔག་མེད་ཅན་ཐོགས་པ། པདྨ་འཛིན་པ། ནོར་བུ་རིན་པོ་ཆེ་འཛིན་པར་བྱའོ། །འོག་ཏུ་ཕོ་ཉ་མོ་དང་། དབྱངས་ཅན་མ་དང་། དུང་ཅན་མ་དང་། དཔལ་མོ་དང་། གནས་མ་དང་། དཔེ་མེད་མ་དང་། རལ་པ་གཅིག་མ་དང་། ཕོ་ཉ་མོ་ཞི་བ་དང་། ལོ་ཏོག་གི་ལྷ་དང་། སའི་ལྷ་དང་། རྒྱལ་པོ་ཆེན་པོ་བཞི་བྱའོ། སྟེང་དང་གཡས་གཡོན་དུ་སངས་རྒྱས་ཀྱི་སྐུ་གཟུགས་སྐྱིལ་མོ་ཀྲུང་བཅས་པ་སོར་བཞི་པའི་ཚད་ཙམ་བྱའོ། །ཉི་མ་དང་། ཟླ་བའི་ལྷ་རྒྱུ་སྐར་དང་བཅས་པ་བྱའོ། །རི་མོའི་གཟུགས་ཀྱི་ཕྱི་རོལ་གྱི་རིམ་པ་ཀུན་དུ་ཕྱག་རྒྱ་དང་། ཕྱག་མཚན་སྣ་ཚོགས་རྫོགས་པར་བྲིའོ། ཀླུ་བརྒྱད་བྱ་ཞིང་ཀུན་ནས་འབར་བ་དང་བཅས་པར་བྱའོ། །རིག་སྔགས་དངོས་གྲུབ་བླ་མེད་པའི། །རི་མོའི་ཆོ་གའི་གནས་འདི་ནི། །སྡིག་པ་ཐམས་ཅད་མོད་ལ་སེལ། །མཚམས་མེད་ལྔ་པོ་སྦྱོང་བར་བྱེད། །ཕྱག་རྒྱ་དང་། དཀྱིལ་འཁོར་དང་བཅས་པ་རི་མོའི་གཟུགས་གྲུབ་པ་འདི་ནི་སྤྱིའི་རིགས་ཐམས་ཅད་དུ་འཇུག་པར་སྟོན་པ་ཡིན་ནོ། །ཕྱིའི་རིགས་ཐམས་ཅད་ཀྱི་དེ་ཁོ་ན་ཉིད་ཀྱི་རི་མོའི་དཀྱིལ་འཁོར་འདི་ནི་དུས་གསུམ་དུ་གཤེགས་པའི་སངས་རྒྱས་དང་། དེ་བཞིན་དུ་བྱང་ཆུབ་
སེམས་(དངས་དཔས་)ཀྱང་བྱིན་གྱིས་བརླབས་པའོ། །དོན་ཡོད་པའི་བྱིན་གྱི་བརླབས་ཀྱི་རི་མོ་འདི་ནི་ཐུབ་པ་རྣམ་པར་སྣང་མཛད་ཀྱིས་བྱིན་གྱིས་བརླབས་པ་སྟེ། དོན་ཡོད་པའི་ཞགས་པའི་དེ་ཁོ་ན་ཉིད་སྙིང་པོར་གྱུར་པ་དེ་ཁོ་ན་ཉིད་གསང་བ་འདི་མཐོང་བ་ཙམ་གྱིས་རྣམ་པར་ཐར་པ་འཐོབ་ཅིང་ལུང་བསྟན་པར་འགྱུར་རོ། །མཐོང་བ་ཙམ་གྱིས་ཆོ་ག་ཞིབ་མོ་བླ་ན་མེད་པ་ཐམས་ཅད་འགྲུབ་བོ། །རྣམ་པར་སྣང་མཛད་འཁོར་གྱི་དཀྱིལ་འཁོར་ཆེན་པོ་དང་ལྡན་པར་སྣང་བ་བྱེ་བ་གང་གཱའི་ཀླུང་གི་བྱེ་མ་བརྒྱ་སྟོང་ཕྲག་དགུ་བཅུ་རྩ་དགུ་མངོན་སུམ་དུ་མཐོང་བར་འགྱུར་རོ། །དཀྱིལ་འཁོར་ཆེན་པོ་འཁོར་བཅས་ཀྱི། །རིག་སྔགས་ཆོ་ག་བླ་མེད་པ། །སྤྱི་རིགས་ཡང་དག་འབྱུང་བ་ནི། །ཐུབ་པ་རྣམ་སྣང་མཛད་ཀྱིས་བསྟན། །དེ་བཞིན་གཤེགས་རིགས་གྲུབ་པ་དང་། །གང་ཡང་པདྨའི་རིགས་དེ་བཞིན། །ནོར་རིགས་དེ་ཉིད་འབྱུང་བ་དང་། །རྡོ་རྗེའི་རིགས་གང་བླ་མེད་པ། །སྤྱི་རིགས་འདི་ཉིད་མཐོང་བ་ནི། །རི་མོ་མཐོང་བའི་ཁྱད་པར་ཡིན། །ཕྱིར་ཡང་ངན་འགྲོར་མི་འགྲོ་ཞིང་། །དམྱལ་བ་ངན་འགྲོའི་སྒོ་བཅད་དེ། །མཐོ་རིས་ཀྱི་ནི་སྒོ་ཡང་ཕྱེ། །བླ་ན་མེད་པ་སྟོན་པ་ཡི། །ཕྱག་རྒྱའི་རི་མོའི་དཀྱིལ་འཁོར་འདི། །བསོད་ནམས་བླ་ན་མེད་པ་ཡིན། །ཅི་སྟེ་དོན་ཡོད་པའི་འཇིག་རྟེན་དབང་ཕྱུག་གི་གཟུགས་མཐོང་བར་འདོད་ན་རིག་སྔགས་འཆང་དེས་ཙནྡན་དཀར་པོ་ལས་འཕགས་པ་སྤྱན་རས་གཟིགས་དབང་ཕྱུག་དོན་ཡོད་པའི་ཞགས་པ་སོར་བརྒྱད་ཀྱི་ཚད་ཙམ་ལ། གནད་ཀྱི་གནས་ཀྱི་ཆའི་སོར་ཚད་ཤིན་ཏུ་རྣམ་པར་མཛེས་པ། དབུ་དང་། མགུར་དང་། རྐེད་པ་དང་། པུས་མོ་དང་། ཡན་ལག་དང་། ཞབས་ཀྱི་ཚིགས་དང་། ཕྱག་སོར་དང་། ཕྱག་སོར་གྱི་ཚིགས་དང་། སེན་མོ་ཐམས་ཅད་མཉམ་ཞིང་མཛེས་པ་དང་། རལ་པ་དང་། སེན་མོ་ཚད་ཤིན་ཏུ་མཛེས་ཤིང་ཅོད་པན་གྱི་རྒྱལ་བའི་གཡས་ཕྱོགས་ན་ཟླ་ག་མ་ཞི་པའི་གཟུགས་ཅན་སྤྱན་གསུམ་པ། ཕྱག་བཞི་ཤིན་ཏུ་མཛེས་པ་དང་། དབུ་སྐྲ་ཤིན་ཏུ་མཛེས་པ། རྒྱན་ཐམས་ཅད་ཀྱིས་བརྒྱན་པའི་གཟུགས་དང་ལྡན་པ། ཞགས་པ་འཛིན་པ། གཡོན་པ་འོད་དཔག་མེད་ཅན་ཕྱག་ན་པདྨ་བསྣམས་
པ། ཕྱག་གཡས་པ་མདུང་རྩེ་གསུམ་པ་དང་། དབུགས་འབྱིན་ཅིང་རྟག་ཏུ་མཆོག་སྦྱིན་པར་མཛད་པ། པདྨའི་གདན་ལ་བཞུགས་པར་བྱའོ། །སྒྲོལ་མ་དང་། དཀར་མེ་ཡང་འོད་འདོམ་གང་དང་བཅས་པར་དགོད་དོ། །མགོན་པོ་ཤིན་ཏུ་མཛེས་པ། ནོར་བུ་དང་། མུ་ཏིག་གི་རྒྱན་གྱི་མཚམས་སུ་གསེར་གྱི་རྒྱན་གྱིས་གཡོགས་པའི་ཅོན་པན་ནམ། ཡང་ན་སྤྱི་གཙུག་ཏུ་རིང་བསྲེལ་གཞག་པར་བྱས་ལ། ཙནྡན་དཀར་པོའི་དཀྱིལ་འཁོར་བྱ་ཞིང་གུར་གུམ་དང་། གླ་རྩི་དང་། ག་པུར་གྱིས་མཆོད་ལ་དཀྱིལ་འཁོར་གྱི་སྙིང་པོ་འདིའི་དབུས་སུ་པདྨ་གེ་སར་དང་བཅས་པའི་འདབ་མ་སུམ་ཅུ་རྩ་གཉིས་པ་བྲིས་ལ་དེའི་དབུས་སུ་འཇིགས་པ་མེད་པས་འཇིག་རྟེན་དབང་ཕྱུག་དར་གྱི་ཅོད་པན་གྱིས་བཅིངས་པ་བཞག་ལ། ཨ་ག་རུ་དང་། ཙནྡན་གྱི་བདུག་པ་དབུལ་ཞིང་མེ་ཏོག་དགྲམ་པར་བྱ། མེ་ཏོག་གི་ཕྲེང་བས་མཆོད་པར་བྱའོ། །རིག་སྔགས་འཆང་གཙང་མ་གྱུར་པ་ཤིན་ཏུ་ཁྲུས་བྱས་པ་གོས་གཙང་མ་བགོས་པས། སྨྱུང་བ་བྱས་ལ་མགོན་པོ་འཇིག་རྟེན་དབང་ཕྱུག་ལ་མངོན་དུ་ཕྱོགས་པར་སྐྱིལ་མོ་ཀྲུང་བཅས་ཏེ་འདུག་ལ་མཆོད་ཡོན་དང་། ལྷ་བཤོས་ཕུལ་ལ་བྱམས་པའི་སེམས་ལ་མཉམ་པར་བཞག་སྟེ། སངས་རྒྱས་རྗེས་སུ་དྲན་པ་བསྒོམ་མོ། །སེམས་ཅན་ཐམས་ཅད་ལ་བརྩེ་བར་གྱུར་པའི་ཏིང་ངེ་འཛིན་ཡང་བསྒོམ་ཞིང་གཏམ་གཞན་མི་སྨྲ་བར་ཤིན་ཏུ་ཡོངས་སུ་སྦྱར་བ་ལེགས་པར་སྤྱོད་ཅིང་གཞན་འཇིགས་པ་མེད་པས་བདག་བསྲུང་བ་དང་། ཕྱོགས་བཅིང་བ་དང་། དཀྱིལ་འཁོར་བཅིང་བ་སྲུང་བ་དང་བཅས་པ་ཡང་བྱས་ལ་བཟླས་བརྗོད་དེ་ཉིད་སྟོང་རྩ་བརྒྱད་དང་། ཕྱག་རྒྱ་ཡང་སྟོང་རྩ་བརྒྱད་བརྩམས་ན་འཕགས་པ་སྤྱན་རས་གཟིགས་དབང་ཕྱུག་འབར་ཞིང་གཡོ་བ་དང་། བདག་ཀྱང་འབར་བ་དང་སྙིང་དགའ་བར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་གི་མཆོག་སྦྱིན་པར་མཛད་པའི་ཕྱག་སྤྱི་བོར་གཞག་སྟེ་ལེགས་སོ་ལེགས་སོ། །རིག་སྔགས་འཆང་ཁྱོད་ཀྱིས་མཆོད་པ་དམ་པ་དང་། གསང་སྔགས་ཀྱི་ཆོ་ག་ཆེན་པོ་བྱས་སོ། །སྒྲུབ་པ་དམ་པ་བྱས་སོ། །དེ་བཞིན་
གཤེགས་པའི་སྤྱིའི་རིགས་འདི་དང་། དེ་བཞིན་གཤེགས་པའི་རིགས་ཐམས་ཅད་ཀྱི་ཆོ་ག་ཞིབ་མོ་གསང་བ་དང་། ཕྱག་རྒྱ་དང་། དཀྱིལ་འཁོར་གྱི་ཆོ་ག་དང་། ཐམས་ཅད་དུ་སྤྱིའི་དངོས་གྲུབ་རིག་སྔགས་འཆང་ཁྱོད་ལ་འགྲུབ་ཀྱིས། ཁྱོད་ཀྱིས་དོན་ཡོད་པའི་ཞགས་པའི་སྙིང་པོ་རྗེས་སུ་ཟུང་ཤིག་དང་། རིག་སྔགས་འཆང་ཇི་ལྟར་ཡིད་ལ་བྱེད་པ་དེ་ལྟར་འདོད་པ་དང་། མཆོག་ཐམས་ཅད་ཇི་ལྟར་ཡིད་ལ་བསམས་པ་དེ་ཐམས་ཅད་རྗེས་སུ་སྦྱིན་ནོ། །འདི་ནི་ཁྱོད་ཀྱི་སྐྱེ་བའི་འཁོར་བ་ཐ་མ་ཡིན་ཏེ་སྐྱེ་བ་དང་། རྒ་བ་དང་། འཆི་བ་དང་། མངལ་དུ་གནས་པ་ལས་ཡོངས་སུ་གྲོལ་བར་འགྱུར་རོ། །རིག་སྔགས་འཆང་ཁྱོད་ཤི་འཕོས་ནས་བདེ་བ་ཅན་གྱི་འཇིག་རྟེན་གྱི་ཁམས་སུ་པདྨ་ལས་རྫུས་ཏེ་སྐྱེ་བར་འགྱུར་རོ། །དེ་བཞིན་གཤེགས་པ་ཚེ་དཔག་མེད་མངོན་སུམ་དུ་མཐོང་བར་འགྱུར། མངོན་སུམ་དུ་ཆོས་ཉན་པར་འགྱུར་རོ། །བྱང་ཆུབ་ཀྱི་སྙིང་པོ་ལ་གནས་ཀྱི་བར་ཚེའི་ཚད་བསྐལ་པ་བརྒྱ་སྟོང་དཔག་ཏུ་མེད་གྲངས་མེད་བགྲང་དུ་མེད་པར་འགྱུར་རོ་ཞེས་ཚིག་ཏུ་གསུང་ངོ་། །དེ་ནས་རིག་སྔགས་འཆང་གིས་ཁྲོ་བོའི་རྒྱལ་པོ་གང་ལ་ཁྲོ་བོའི་རྒྱལ་པོ་མེ་ཏོག་གམ། ཅོད་པན་ལ་མངོན་པར་གཏོར་ན། དེས་ན་འཕགས་པ་སྤྱན་རས་གཟིགས་དབང་ཕྱུག་རང་གི་སྐུར་བཞུགས་ཏེ། རིག་སྔགས་འཆང་ནམ་མཁའ་ལ་འགྲོ་ཞིང་དོན་ཡོད་པའི་ཡེ་ཤེས་བཀོད་པ་དྲི་མ་མེད་པ་ཞེས་བྱ་བའི་ཏིང་ངེ་འཛིན་འཐོབ་བོ། །ཡངས་པ་ཆེན་པོས་རྣམ་པར་ཐར་པའི་དཀྱིལ་འཁོར་དོན་ཡོད་པའི་ཞགས་པའི་དངོས་གྲུབ་ཐོབ་པར་འགྱུར་རོ། །སྐུ་གཟུགས་བསྒྲུབ་པ་དེ་ཁོ་ན་ཉིད་ཅེས་པ་འདི་གལ་ཏེ་རིག་སྔགས་འཆང་སྐལ་བ་ཆུང་བ་མནར་མེད་པར་གཞོལ་བ། མཚམས་མེད་པ་ལྔ་བྱེད་པས་དེ་ལན་ཅིག་ངེས་པར་བསྒྲུབས་པ་ཙམ་གྱིས་མདུན་དུ་རང་གི་གཟུགས་ཀྱིས་ངེས་པར་མཆིས་པར་འགྱུར་རོ། །གལ་ཏེ་དེ་བཞིན་གཤེགས་པ་ཐམས་ཅད་དང་དུས་གསུམ་དུ་གཤེགས་པའི་སངས་རྒྱས་ལ་སྡང་བས་ཁྲག་དབྱུང་བར་སེམས་བསྐྱེད་པ་དེས་ཀྱང་དེ་བཞིན་གཤེགས་པ་ཐམས་ཅད་དང་། དུས་གསུམ་དུ་གཤེགས་པའི་སངས་རྒྱས་ཀྱིས་
དགོངས་པའི་དམ་ཚིག་ཆེན་པོའི་བྱིན་གྱིས་བརླབས་དེ་རིག་སྔགས་འཆང་བསྒྲུབས་ན་རྨི་ལམ་དུ་བདག་གི་གཟུགས་མཐོང་བ་སྩལ་བར་བགྱི་ཞིང་ཡིད་ལ་བསམས་པ་ཐམས་ཅད་ཡོངས་སུ་རྫོགས་པར་བགྱིའོ། །མཆོག་ཐམས་ཅད་རྗེས་སུ་སྩལ་བར་བགྱི་ཞིང་སྡིག་པ་དང་སྒྲིབ་པ་ཐམས་ཅད་རྣམ་པར་དག་པར་བགྱིའོ། །དྲི་མ་མེད་པར་རྣམ་པར་ཐར་པའི་འོད་ཟེར་གྱི་དཀྱིལ་འཁོར་ལ་རྣམ་པར་ལྟ་བ་ཞེས་བྱ་བ་ཏིང་ངེ་འཛིན་འཐོབ་བོ། །སད་ནས་འཇིག་རྟེན་པ་ཐམས་ཅད་ཀྱི་མཆོད་པའི་འོས་ཆེན་པོ་གཅིག་པུར་འགྱུར་རོ། །སྐྱེ་བོ་ཐམས་ཅད་ཀྱིས་མཆོད་པར་བྱ་བ་ཆེན་པོར་འགྱུར་རོ། །སྒྲིབ་པ་དང་བྲལ་ཞིང་རྣམ་པར་དག་པ། སྒོ་ཀུན་དུ་དྲི་མ་མེད་པར་སྣང་བ་ཞེས་བྱ་བའི་ལུས་ཡོངས་སུ་དག་པ་འཐོབ་པར་འགྱུར་རོ། །སེམས་ཅན་གང་དག་གིས་དེ་མཐོང་བར་གྱུར་པ་དེ་དག་ཐམས་ཅད་སྒྲིབ་པ་དང་བྲལ་བར་འགྱུར་རོ། །ནད་ཐམས་ཅད་དང་བྲལ་ཞིང་ཉོན་མོངས་པ་དང་བྲལ་བར་འགྱུར་རོ། །གདོལ་པས་ཀྱང་དད་པ་དང་། གུས་པས་སྒྲུབ་པ་རྣམ་པ་གསུམ་དང་། ཆོ་ག་གཞན་གྱིས་ཀྱང་ངེས་པར་ཡིད་ལ་བསམས་པ་ཐམས་ཅད་ཡོངས་སུ་རྫོགས་པར་བགྱི། རང་གི་གཟུགས་ཀྱིས་མཐོང་བ་སྩལ་བར་བགྱི་ན། མིར་གྱུར་པ་དད་པའི་རྗེས་སུ་འབྲང་བ་སྡོམ་བརྩོན་ཅན་གྱིས་ལྟ་སྨོས་ཀྱང་ཅི་འཚལ་ཏེ། དྲན་པ་ཙམ་གྱིས་བདག་རང་གི་གཟུགས་ཀྱིས་མདུན་ན་མཆིས་པར་བགྱི་ཞིང་ཡིད་ལ་བསམས་པ་ཐམས་ཅད་ཡོངས་སུ་རྫོགས་པར་བགྱི་སྟེ། འདི་ལ་ཐེ་ཙོམ་དང་ཡིད་གཉིས་བསྐྱེད་པར་མི་བྱའོ། །དེ་ལྟ་མོད་ཀྱི་བཅོམ་ལྡན་འདས་སེམས་ཅན་ཚེ་གཅིག་པུ་པ་དེ་ལ་རིག་སྔགས་སྒྲུབ་པའི་དངོས་གྲུབ་རྗེས་སུ་སྩལ་བར་བདག་གིས་རྔོ་མི་ཐོགས་ལགས་སོ། །གང་ཡང་ཕྱི་མའི་ཚེ་ཕྱི་མའི་དུས་ན་དགེ་སློང་དག་དང་། རིག་སྔགས་འཆང་བའི་སེམས་ཅན་སེར་སྣ་ཅན། སེམས་གྱ་གྱུ་བ་གཉིས་སུ་མི་བྱེད་པ། ངོ་གཉིས་ཅན། སེར་སྣ་ཅན། བྱས་པ་མི་གཟོ་བ། ཕ་རོལ་གྱི་རྫས་ལ་བརྐམ་ཆགས་ཅན། གསང་སྔགས་རྐུ་བ། ཡི་གེ་རྐུ་བ། གདུག་པ། ཕྲག་དོག་ཆེ་བ། ཁེངས་བ། གཞན་གྱི་རྫས་འཕྲོག་པ།
མཁན་པོ་དང་སློབ་དཔོན་ཕྱག་རྒྱ་དང་དཀྱིལ་འཁོར་སྟོན་པའི་བླ་མ་ལ་མ་གུས་པ། རིག་སྔགས་ཀྱི་ཆོ་ག་ཞིབ་མོ་འདི་སྟོན་པ་ལ་མ་གུས་པ་ཉིད་བརྐམ་ཆགས་ཅན། བྱས་པ་མི་གཟོ་བ་ཉིད་དག་འབྱུང་སྟེ། སེམས་ཅན་དེ་དག་ལ་བསྐྱང་བར་བསྟན་པའམ། དངོས་གྲུབ་བསྟན་པར་རྡོ་མི་ཐོགས་ལགས་སོ། །བདག་ལ་ཡང་བརྙས་པར་བགྱིད་པའི་སེམས་ཅན་དེ་ལྟ་བུ་མང་དུ་འབྱུང་སྟེ། བདག་ལའང་སུན་པར་བགྱིད་པ། བདག་ལའང་མ་གུས་པར་བགྱིད་པ། ཀུན་ནས་མནར་སེམས་དང་སྡང་བས་ཁྲག་འབྱིན་པར་བགྱིད་པ་དག་འབྱུང་ངོ། །བདག་ལའང་འཁུ་བར་བགྱིད་པ། དེ་བཞིན་གཤེགས་པ་ཐམས་ཅད་ཀྱི་གསང་བའི་དཀྱིལ་འཁོར་དང་། སྤྱིའི་རིགས་ཀྱི་དམ་ཚིག་སུན་པར་བགྱིད་པའི་སེམས་ཅན་དེ་ནི་སྨད་པར་འོས་པ་ཞེས་བརྗོད་པར་བགྱིའོ། །རིག་སྔགས་ཀྱི་ཆོ་ག་ཞིབ་མོ་དང་། དམ་ཚིག་ཀུན་ནས་འཇོམས་པར་བགྱིད་པའི་གདོལ་བ་ཞེས་རིག་པར་བགྱིའོ། །དེ་བཞིན་གཤེགས་པ་ཐམས་ཅད་ཀྱི་གསང་བ་ཀུན་ནས་འཇོམས་པ་ཞེས་རིག་པར་བགྱིའོ། །དེ་བཞིན་གཤེགས་པ་ཐམས་ཅད་ཀྱི་སྙིང་པོ་དང་། གསང་བ་དང་། དཀྱིལ་འཁོར་ཀུན་ནས་འཇོམས་པ་ཞེས་རིག་པར་བགྱིའོ། །བྱང་ཆུབ་སེམས་དཔའ་ཐམས་ཅད་ཀྱི་དམ་ཚིག་དང་། གསང་བ་དང་། རིག་སྔགས་འཆང་གི་དཀྱིལ་འཁོར་དང་། ཕྱག་རྒྱ་ཀུན་ནས་འཇོམས་པ་ཞེས་རིག་པར་བགྱིའོ། །དེ་དག་གིས་བདག་ལ་སྨད་པས་སེམས་ཅན་དེ་དག་གི་སྡིག་པས་གདོལ་པ་ཞེས་བགྱི་སྟེ། དགེ་སློང་དག་དང་། རིག་སྔགས་འཆང་དེ་དག་ནི་སྨད་པར་འོས་པར་རིག་པར་བགྱིའོ། །ཚིག་པ་ཀ་བ་ཚིག་པ་ལྟ་བུ། རིག་སྔགས་ཉམས་པ། ལོག་འདྲེན་གྱིས་ཟིན་པ་དཀྱིལ་འཁོར་གྱི་ལྷ་ཐམས་ཅད་ཀྱིས་སྨད་པ་ཞེས་བགྱིའོ། །འཇིག་རྟེན་པ་དང་། འཇིག་རྟེན་ལས་འདས་པ་ཆུད་གཟན་པ། རིག་སྔགས་ཉམས་པ། དམྱལ་བར་གཞོལ་བ་དེ་དག་ནི་བདག་གིས་མནོངས་ཏེ། བདག་གིས་ཡོངས་སུ་སྤངས་པ་མ་ལགས་སོ། །དེ་ལྟ་མོད་ཀྱི་དུས་གསུམ་དུ་གཤེགས་པའི་དེ་བཞིན་གཤེགས་པ་ཡོངས་སུ་སྤངས་
པ། དུས་གསུམ་དུ་གཤེགས་པའི་བྱང་ཆུབ་སེམས་དཔའ་ཡོངས་སུ་སྤངས་པ། རྡོ་རྗེའི་དམ་ཚིག་དང་། དཀྱིལ་འཁོར་དང་། ཕྱག་རྒྱ་ཐམས་ཅད་སྤངས་བ། ཐུབ་པ་རྣམ་པར་སྣང་མཛད་ཀྱི་དམ་ཚིག་ཆེན་པོའི་དཀྱིལ་འཁོར་དང་། དམ་ཚིག་ཡོངས་སུ་སྤངས་པས་བགེགས་དང་ལོག་འདྲེན་ཐམས་ཅད་དང་། སྡང་བ་ཐམས་ཅད་ཀྱིས་ཟིན་ཅིང་ནད་ཀྱིས་ཡོངས་སུ་ཟིན་པར་འགྱུར་བ་དེ་དག་ནི་བདག་གིས་མནོངས་ཏེ། བདག་གིས་ཡོངས་སུ་མ་སྤངས་སོ། །དེ་ལྟར་མོད་ཀྱིས་རིག་སྔགས་འཆང་བསྲེགས་པ། དཀྱིལ་འཁོར་དང་དམ་ཚིག་བསྲེགས་པ། ཕྱག་རྒྱ་བྱེད་པ་དང་བཅས་པར་བསྲེགས་པ། གསང་བ་བསྲེགས་པ། དེ་བཞིན་གཤེགས་པའི་དམ་ཚིག་དང་རིགས་སུན་པར་བྱེད་པ། སྡིག་པའི་དགེ་སློང་མང་པོ་དེ་དག་ནི་དེས་ན་བསྐལ་པ་མང་པོ་རྡུལ་ཕྲ་མོ་བསགས་པའི་བསྐལ་བར་སྡུག་བསྔལ་ཉམས་སུ་མྱོང་སྟེ། འཇིག་རྟེན་འདི་དང་འཇིག་རྟེན་ཕ་རོལ་གྱི་བདེ་བ་ཅན་མེད་དོ། །དེ་ལྟ་བས་ན་སེམས་ཅན་རིག་སྔགས་ཀྱི་ཆེད་དུ་རིག་སྔགས་རྗེས་སུ་སེམས་པས་བྱམས་པའི་སེམས་སུ་བྱའོ། །གང་གི་དྲུང་དུ་ཕྱག་རྒྱ་དང་། གསང་སྔགས་རིམ་པར་ཕྱེ་བ་དང་། རིག་སྔགས་གསང་བ་རྙེད་པར་འགྱུར་བ་དེ་ལ་དེས་གུས་པ་ཆེན་པོ་དང་། བླ་མར་བགྱི་བ་ཆེན་པོ་བསྐྱེད་པར་བགྱི། ཕ་དང་མ་དང་འདྲ་བའི་སེམས་བསྐྱེད་པར་བགྱི། ཕ་དང་མའི་གུས་པ་བགྱི། སྟོན་པའི་གུས་པ་བགྱི། རང་གི་ཤ་དང་། ཁྲག་དང་། རྐང་ཡང་གཏང་བར་བགྱི། གོས་དང་། རྒྱན་དང་། བཟའ་བ་དང་། བཏུང་བ་དང་། སྟན་དང་། བགོ་བས་རིམ་གྲོ་དང་མཆོད་པ་བགྱི་སྟེ། དེ་ལ་ནི་བདག་གིས་མཆོད་པར་བགྱི། རྗེད་པ་དང་བླ་མར་བགྱིའོ། རྟག་ཏུ་རྗེས་སུ་འབྲང་བར་བགྱི། དྲན་པ་ཙམ་གྱིས་ཀྱང་བདག་གི་གཟུགས་མཐོང་བ་རྗེས་སུ་སྩལ་བར་བགྱི། རྒྱུན་དུ་རྗེས་སུ་འབྲང་བར་བགྱི། བདག་རྒྱུན་དུ་རྗེས་སུ་འབྲང་བ་ནི་ཇི་ལྟར་ཆབ་ཀྱི་ནང་དུ་ཏིལ་མར་གྱི་ཐིགས་པ་སྩལ་བ་ལྟར་དངོས་གྲུབ་ཀུན་དུ་མཆི་བར་བགྱི། རྒྱ་མཚོའི་དུས་རླབས་བཞིན་དུ་ཐམས་ཅད་དུ་མཆི་བར་བགྱིའོ། །བདག་གིས་ཞགས་པ་དང་། ལྕགས་ཀྱུས་
དམྱལ་བ་ཐམས་ཅད་དྲང་བར་བགྱི། བདེ་བར་གཤེགས་པའི་ལམ་ལ་སོ་སོར་གཞག་པར་བགྱི།སྟོབས་དང་། བརྩོན་འགྲུས་དང་། གཟི་བརྗིད་ཆེན་པོ་འཇུག་པར་བགྱི། ཐམས་ཅད་དུ་སྒྲུབ་པ་དང་། དངོས་གྲུབ་དང་། མཆོག་སྩལ་བར་བགྱིའོ། །དེ་ནས་ཙནྡན་གྱི་གཟུགས་འདི་མཐོང་བས་འཕགས་པ་སྤྱན་རས་གཟིགས་དབང་ཕྱུག་ཉིད་ཀྱི་གཟུགས་མཐོང་སྟེ། དེ་མཚུངས་པར་འཚལ་བར་བགྱི་སྟེ་བདག་རང་གི་གཟུགས་ཀྱིས་རྒྱུན་ཁོ་ནར་གནས་པར་བགྱིའོ། །གང་ན་ཆོ་ག་འདི་གནས་པ་དེ་མཆོད་རྟེན་དང་བཅས་པར་མཚུངས་པར་རིག་པར་བགྱིའོ། །ས་ཕྱོགས་དེ་ནི་སྟོན་པ་བླ་མ་བཞུགས་པའི་གནས་སུ་རིག་པར་བགྱིའོ། །གང་ན་དུས་གསུམ་དུ་གཤེགས་པའི་སྤྱིའི་དམ་ཚིག་གནས་པ་འདི་སངས་རྒྱས་ཀྱི་གནས་སོ་ཞེས་རིག་པར་བགྱིའོ། །དེ་གསང་བའི་དཀྱིལ་འཁོར་རྨད་དུ་བྱུང་བ་ཞེས་རིག་པར་བགྱིའོ། །ལྷ་ཐམས་ཅད་ཀྱི་གནས་དང་དམ་ཚིག་གོ་ཞེས་རིག་པར་བགྱིའོ། །དེ་བཞིན་གཤེགས་པའི་རིགས་ཐམས་ཅད་ཀྱི་གནས་བྱང་ཆུབ་ཀྱི་སྙིང་པོ་དང་། ཆོས་ཀྱི་འཁོར་ལོ་བསྐོར་བ་དང་། བདུད་འདུལ་བ་དང་། ཡོངས་སུ་མྱ་ངན་ལས་འདས་པ་ཆེན་པོ་ཡང་དག་པར་སྟོན་པའི་གནས་སོ་ཞེས་རིག་པར་བགྱིའོ། །ས་ཕྱོགས་འདི་རིན་པོ་ཆེ་སྣ་བདུན་གྱི་གཞལ་མེད་ཁང་གི་གནས་བཀོད་པས་བརྒྱན་པར་རིག་པར་བགྱི་སྟེ། དེ་ལ་ཐེ་ཙོམ་དང་ཡིད་གཉིས་བསྐྱེད་པར་མི་བྱའོ། །དེ་ནས་དེའི་འོག་ཏུ་གནས་ཐམས་ཅད་དུ་གཏོགས་པའི་དངོས་གྲུབ་ཆེན་པོ་སྒྱུ་མ་ཆེན་པོའི་རྣམ་པར་འཕྲུལ་པའི་གནས་བྱེད་པར་འདོད་པ་དང་། དགོས་པ་ཐམས་ཅད་བྱེད་པར་འདོད་ན་རིག་སྔགས་འཆང་དེས་དྲི་སྣ་ཚོགས་ལས་འཕགས་པ་སྤྱན་རས་གཟིགས་དབང་ཕྱུག་གི་གཟུགས་སོར་བཅུ་དྲུག་པ་ཤིན་ཏུ་མཛེས་པ། སྐུ་ཤིན་ཏུ་ཚད་དང་ལྡན་པ། ཕྱག་དྲུག་པ། དེ་བཞིན་དུ་ཞལ་གསུམ་པ་བྱ་སྟེ། དང་པོ་ནི་ཞི་བའི་ཞལ་རས་ཅན་ཚངས་པའི་ཆ་བྱད་འཆང་བ། སྤྱན་གསུམ་པ། རལ་པའི་ཐོག་ཚུགས་ཀྱིས་བརྒྱན་པ། འོད་དཔག་མེད་པའི་དབུ་རྒྱན་འཆང་བ། ཟླ་གམ་ཅན་ནོ། །ཞལ་
གཡས་པ་ནི་ཁྲོ་བོའི་རྒྱལ་པོ་གཟུགས་ཅན། གཟུགས་བསྒྱུར་བ། སྤྱན་གསུམ་པ། རལ་པའི་ཐོར་ཚུགས་ཀྱི་སྟེང་གི་རལ་པ་ལ་འོད་དཔག་མེད་པའི་དབུ་རྒྱན་འཆང་བ། ཟླ་གམ་གཡས་ཕྱོགས་ན་གནས་པའོ། །གཡོན་པ་ནི་ཞལ་ཁྲོ་གཉེར་ཅན། ཁྲོས་པའི་ལྟ་སྟངས་སུ་ལྟ་པ། སྤྱན་གསུམ་པ། རལ་པའི་ཐོར་ཚུགས་འཆང་བ། འོད་དཔག་མེད་པའི་དབུ་རྒྱན་འཆང་བ། གཡས་ཕྱོགས་ཟླ་གམ་ཅན། རྒྱན་ཐམས་ཅད་ཀྱིས་བརྒྱན་པ། འོད་འདོམ་གང་གིས་ལེགས་པར་བརྒྱན་པ། ཞགས་པ་ཐོགས་པ། པདྨ་ཐོགས་པ། མདུང་རྩེ་གསུམ་པ་ཐོགས་པ། དགྲ་སྟ་ཐོགས་པ། དབུགས་འབྱིན་པ། རིན་པོ་ཆེའི་དབྱུག་པ་ཐོགས་པ། པདྨའི་གདན་ལ་བཞུགས་པའོ། །གཡས་ན་ལྷ་མོ་སྒྲོལ་མ་ཐལ་མོ་སྦྱར་ཅིང་འདུད་པའོ། །གཡོན་ན་དཀར་མོ་ཐལ་མོ་སྦྱར་ཏེ་ཡིད་ཙམ་དུ་འདུད་པ། རྒྱན་ཐམས་ཅད་ཀྱིས་བརྒྱན་པ། མེ་ཏོག་སྣ་ཚོགས་ཀྱིས་ལེགས་པར་བརྒྱན་པར་བྱའོ། །ཞབས་ཀྱི་དྲུང་དུ་རིག་སྔགས་འཆང་གསེར་གྱི་རྒྱན་གྱིས་བརྒྱན་པ། ལག་ན་མེ་ཏོག་ཐོགས་པ། འཕགས་པ་སྤྱན་རས་གཟིགས་དབང་ཕྱུག་ལ་ཁ་བལྟས་ནས་པུས་མོ་བཙུགས་ཏེ་འདུག་པར་བྱའོ། །ལྷག་མ་མ་ཡིན་པའི་ཚོན་རྩིས་ཚད་དང་ཚད་མ་འདྲེས་པར་སྤྱན་དང་། སྨིན་མ་དང་། མཆུ་དང་། སེན་མོའི་གནས་ཀྱིས་གནས་སུ་སྦྱར་བར་བྱའོ།། །།འཕགས་པ་དོན་ཡོད་པའི་ཞགས་པའི་ཆོ་ག་ཞིབ་མོའི་རྒྱལ་པོ། །བམ་པོ་ཉི་ཤུ་པ། དེ་ནས་རྫས་བཤད་པར་བྱ་སྟེ། འཇིགས་པ་མེད་པས་སྤོས་ཀྱི་རིགས་ཙནྡན་དང་། ཏ་ག་ར་དང་། པུ་ཤེལ་ཅི་དང་། ལི་ཤི་དང་། ནཱ་ག་པུས་པ་དང་། སྤྲྀ་ཀ་དང་། རྒྱ་སྐྱེགས་དང་། ཁ་བར་ཎི་ཁ་དང་། སྤང་སྤོས་དང་། ན་ལ་ད་དང་། གུར་གུམ་དང་། གླ་རྩི་དང་། ག་བུར་དང་། སྒྲོན་ཤིང་དང་། གནྡ་པྲི་ཡང་ཀུ་དང་།ཀུན་དུ་རུ་དང་། ཤ་ཁ་ར་དང་། པདྨ་གེ་སར་དང་། དུ་རུ་སྐ་དང་། ཏིལ་མར་དང་། སྤྲ་ཚིལ་དང་། ལྷན་ཅིག་སྦྱར་བའི་ཕྱེ་མ་ཞིབ་མོ་ཤིན་ཏུ་འཇམ་པ། ཤིན་ཏུ་མཉེན་པ། མཆོག་འདི་གཙང་མ་གཙང་སྦྲ་སྤྱོད་པས་
ཐུབ་པ། འཕགས་པ་སྤྱན་རས་གཟིགས་དབང་ཕྱུག་དགེ་ཞིང་ཤིན་ཏུ་དུལ་བ། རབ་ཏུ་ཞི་བའི་རྣམ་པར་ཤིན་ཏུ་མཛེས་པར་བྱའོ། །གསང་སྔགས་བརྒྱད་སྟོང་བཟླས་བརྗོད་བྱས་པས། ལན་ཅིག་བསྒྲུབས་པ་ནི་མཆོག་ཡིན་ཏེ། འདི་ཡོངས་སུ་རྫོགས་ནས་ཁྲོ་བོའི་རྒྱལ་པོས་ཐམས་ཅད་ལ་མངོན་དུ་གཏོར་ཏེ་དེ་ནས་རིག་སྔགས་འཆང་གིས་ལས་བརྩམ་མོ། །དེ་ནས་རིག་སྔགས་འཆང་གཙང་མར་གྱུར་པས་གོས་གཙང་མ་བགོས་ཏེ། ཤིན་ཏུ་ཁྲུས་བྱས་ལ་དྲིས་བྱུགས་པས་དཀྱིལ་འཁོར་གྲུ་བཞི་ཤིན་ཏུ་མཛེས་པ་གསལ་བ། ཀོ་ལའི་ཚད་ཙམ་གྱི་དཀྱིལ་འཁོར་བཟང་པོ་ལེགས་པར་བྱུགས་པ་ཤིན་ཏུ་གསལ་བ་བྱའོ། །དྲི་སྣ་ཚོགས་ཀྱིས་བྱུགས་པ་ཤིན་ཏུ་འཇམ་པ་ལ་ཙནྡན་དཀར་པོ་དང་། གུར་གུམ་གྱིས་དབུས་སུ་ལས་ཀྱི་དཀྱིལ་འཁོར་རྣམ་པར་ཕྱེ་བ་བྲི་བར་བྱའོ། །འདིར་ནི་པདྨའང་བྱས་ཏེ། །འདབ་མ་བརྒྱ་རྩ་བརྒྱད་པ་གེ་སར་དང་སྙིང་པོར་བཅས་པ། ཤིན་ཏུ་མཛེས་པ། ཤིན་ཏུ་བཟང་བ། ཙནྡན་དང་གུར་གུམ་གྱིས་བྲི་བར་བྱ་སྟེ། དེར་ཚོན་རྩི་གཞན་ནི་སྤྱད་པར་མི་བྱའོ། །བུམ་པ་སྤོས་ཆུས་བཀང་བ་དང་། དེ་བཞིན་དུ་དྲི་ཆུ་དང་། གཏོར་མ་ཐམས་ཅད་དྲི་སྣ་ཚོགས་ཀྱིས་བསྒོས་པ་དང་། ཅི་ཡོད་པའི་གཏོར་མ་གཞག་སྟེ། དེ་ནས་འདིར་དཀྱིལ་འཁོར་བྱ་བ་ནི་གནས་སམ་དགོན་པའམ། ཁྱིམ་མམ་གང་དུ་གནས་པར་གྱུར་པ་དེར་ཁྲུ་གང་ཚད་དམ་ཁྲུ་དོའམ་ཁྲུ་གསུམ་མམ་ལྷག་པར་ཡང་བྱའོ། །དེ་བཞིན་དུ་བདུག་སྤོས་དང་། ཙནྡན་དང་། ཨ་ག་རུ་དང་། དུ་རུ་སྐ་དང་། ཀུན་ཏུ་རུའོ། །བ་དན་ཁ་དོག་སྣ་ཚོགས་པས་དཀྱིལ་འཁོར་ཀུན་ནས་བརྒྱན་པར་བྱའོ། །མེ་ཏོག་ཕྲེང་བ་དགྲམ་བྱ་ཞིང་། །དྲི་དང་བྱུག་པ་དེ་ཉིད་དང་། །ཀུན་དུ་མར་མེའི་ཕྲེང་བའོ། །དེ་ནས་དྲི་ལས་བྱས་པའི་འཕགས་པ་སྤྱན་རས་གཟིགས་དབང་ཕྱུག་དཀྱིལ་འཁོར་གྱི་དབུས་སུ་པདྨའི་གེ་སར་གྱི་སྟེང་དུ་བཞག་པ་ལ། རིག་སྔགས་འཆང་མངོན་དུ་ཕྱོགས་པར་སྐྱིལ་མོ་ཀྲུང་བཅས་ཏེ་འདུག་ནས་གཞན་མི་སྨྲ་བར་བཟླས་བརྗོད་བརྒྱད་སྟོང་བརྩམ་པར་བྱའོ། །བརྒྱད་སྟོང་རྫོགས་པ་དང་
འཕགས་པ་སྤྱན་རས་གཟིགས་དབང་ཕྱུག་གི་སྐུ་ལས་འོད་ཟེར་སྣ་ཚོགས་འབྱུང་ཞིང་ཆེར་གཡོ་བར་འགྱུར། རང་གི་ལག་པ་གཡས་པ་འབར་བར་འགྱུར་རོ། །གཟུགས་བརྙན་ལས་རིག་སྔགས་འཆང་ལེགས་སོ་ལེགས་སོ། །ཁྱོད་ཀྱིས་འདོད་པའི་ལས་ཐམས་ཅད་གྲུབ་བོ། །དོན་ཡོད་པ་ཆེན་པོའི་འཁོར་ལོ་རྣམ་པར་འཕྲུལ་པའི་དངོས་གྲུབ་དང་། ཐམས་ཅད་དུ་དགོས་པ་གྲུབ་པ་དེ་ཁོ་ན་ཉིད་གྲུབ་བོ། །ཁྱོད་ཀྱིས་དོན་ཡོད་པའི་ཞགས་པའི་སྙིང་པོ་འདི་མཆོག་ཏུ་གྲུབ་བོ། །ཁྱོད་ཀྱིས་སྒྲུབ་པའི་ཆོ་ག་རྒྱ་ཆེར་མཆོག་ཏུ་གྲུབ་བོ་ཞེས་སྒྲ་འབྱུང་ངོ་། །དེ་ནས་རིག་སྔགས་འཆང་གིས་དགོས་པ་ཡོངས་སུ་རྫོགས་པའི་དཀྱིལ་འཁོར་གྱི་ཆོ་ག་ཇི་ལྟར་དགོས་པར་བྱ་སྟེ། སློབ་མ་གཞུག་པ་དང་། དམ་ཚིག་ནི་འདིར་དགོས་པ་ཞེས་བྱའོ། དེ་ནས་རིག་སྔགས་འཆང་གིས་གང་གི་ཚེ་དགོས་པ་བྱུང་བ་དེའི་ཚེ་དྲི་ལས་བྱས་པའི་མགོན་པོ་ལ་སྔར་མཆོད་པ་བྱ་སྟེ། དེ་ནས་དགོས་པ་ཐམས་ཅད་འགྲུབ་པར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་མདུན་དུ་བཞག་ལ། བཟླས་བརྗོད་བརྒྱད་བརྒྱ་བྱས་ན་དགོས་པ་སྣ་ཚོགས་རྨི་ལམ་དུ་སྟོན་ཅིང་ཇི་ལྟར་བསམས་པ་ཐམས་ཅད་སྟོན་པར་འགྱུར་རོ། །དེའི་མདུན་དུ་ཙནྡན་དཀར་པོ་ལས་དཀྱིལ་འཁོར་བྱས་ལ། ཙནྡན་དཀར་པོའི་སྦྱིན་སྲེག་བརྒྱ་རྩ་བརྒྱད་བྱའོ། །དེ་ནས་ཐལ་བ་ལ་བཟླས་བརྗོད་ལན་བརྒྱ་རྩ་བརྒྱད་བྱ་སྟེ། རང་གི་ལུས་མཐའ་དག་ཁྱབ་པར་བསྐུ་ཞིང་། ཐལ་བ་དེ་ཉིད་དང་། ཡུངས་ཀར་གྱི་བྱུག་པ་ཕྱོགས་བཞིར་གཏོར་ན་འཇིག་རྟེན་དབང་ཕྱུག་གི་གཟུགས་ཇི་ལྟ་བ་དེ་ལྟར་འཇིག་རྟེན་ཐམས་ཅད་ཀྱིས་མངོན་སུམ་དུ་མཐོང་སྟེ། ཇི་སྲིད་དུ་ཕྱིར་བསྡུ་བ་མ་བྱས་པ་དེ་སྲིད་དུ་འཇིག་རྟེན་དབང་ཕྱུག་གི་གཟུགས་སུ་སྣང་བར་འགྱུར་རོ། །དྲི་ཆུ་དང་ཡུངས་ཀར་གྱིས་མངོན་དུ་ཕྱོགས་པར་གཏོར་ན་ཕྱིར་བསྡུ་བ་བྱས་པར་འགྱུར་རོ། །ཐལ་བ་དེས་རབ་ཏུ་བདུགས་ཏེ་དུར་ཁྲོད་ཀྱི་ནང་དུ་ཞུགས་ན་འབྱུང་པོའི་དཔུང་དང་འཁོར་དང་བཅས་པ་མདུན་ན་ཉེ་བར་གནས་པར་འགྱུར་རོ། །གནོད་སྦྱིན་དང་། སྲིན་པོ་དང་། འབྱུང་པོ་དང་། ཤ་ཟ་ཐམས་
ཅད་མདུན་ན་ཉེ་བར་གནས་ཤིང་དབང་དུ་གྱུར་ནས་གནས་ཏེ། བདག་དང་ནོར་གྱིས་བགྱི་བ་ཅི་མཆིས་ཞེས་བྱ་བ་བྱེད་དོ། །རང་ལ་བྱུགས་ཏེ་ཚོགས་ཀྱི་ནང་ངམ། དགེ་འདུན་གྱི་ནང་དུ་ཞུགས་ན་སྟོན་པ་མཐོང་བ་ཇི་ལྟར་རིག་སྔགས་འཆང་སྣང་ཞིང་མཐོང་སྟེ། མཆོད་པའི་འོས་ཆེན་པོར་འགྱུར་རོ། །ཕྱག་བྱ་བའི་འོས་སུ་འགྱུར། དོན་དང་མཆོད་པ་ཆེན་པོ་འཐོབ་པར་འགྱུར་རོ། །ཐལ་བས་ལུས་བསྐུས་ཏེ་ཀླུའི་མཚོར་ཞུགས་ན་ཀླུའི་རྒྱལ་པོ་སྟོང་ཕྲག་དྲུག་ཅུ་རྩ་བརྒྱད་ཐམས་ཅད་དབང་དུ་གྱུར་ནས་གནས་ཏེ་བཀའ་བཞིན་བྱེད་པར་འགྱུར་ཞིང་ཇི་སྲིད་འཚོའི་བར་དུ་ཉེ་བར་གནས་པར་འགྱུར་རོ། །རང་ལ་བྱུགས་ཏེ་རྒྱལ་པོའི་ཕོ་བྲང་དུ་ཞུགས་ན། རྒྱལ་པོ་བཙུན་མོ་དང་འཁོར་དུ་བཅས་པ་རྣམས་དབང་དུ་འགྱུར་ཏེ། ཅི་བགྱི་ཞེས་བྱ་བ་བྱེད་ཅིང་མདུན་ན་ཉེ་བར་གནས་པར་འགྱུར་རོ། །འཇིག་རྟེན་གྱི་བླ་མ་ཇི་ལྟ་བ་དེ་བཞིན་དུ་མཆོད་པ་ཆེན་པོ་འབྱུང་བར་འགྱུར། དོན་ཆེན་པོ་དང་མཆོད་པ་ཆེན་པོ་འཐོབ་པར་འགྱུར། ཇི་སྲིད་འཚོའི་བར་དུ་ཉེ་བར་གནས་པར་འགྱུར་ཏེ། སྟོན་པ་འདྲེན་པ་ཇི་ལྟ་བ་བཞིན་ནོ། །གང་དང་གང་ལ་ཐལ་བས་རེག་པ་ཙམ་གྱིས་དེ་དང་དེའི་ནད་ཐམས་ཅད་བྲལ་བར་འགྱུར་སྡིག་པ་དང་སྒྲིབ་པ་ཐམས་ཅད་རྣམ་པར་དག་པར་འགྱུར་ངན་འགྲོའི་སྒོ་ཐམས་ཅད་གཅད་པརའགྱུར། མཆོག་ཏུ་བདེ་བ་དང་ལྡན་པར་འགྱུར་རོ། །ཤི་འཕོས་ནས་བདེ་བ་ཅན་གྱི་འཇིག་རྟེན་གྱི་ཁམས་སུ་སྐྱེ་བར་འགྱུར་རོ། །བྱས་པ་མི་གཟོ་བ། གསང་སྔགས་ཀྱི་གདོལ་པ། མ་གུས་པ། བླ་མར་མི་བྱེད་པ། རློམ་སེམས་ཅན། ང་རྒྱལ་དང་ལྡན་པ། བདུད་ཀྱི་ཕྱོགས་པ། སྐྱེས་བུ་གཏི་མུག་ཅན། བསོགས་པ་ལ་ཞེན་པ། ཁེངས་པ། ང་རྒྱལ་ཅན་དེ་དག་གིས་གང་དུ་ཡང་དངོས་གྲུབ་ཡང་དག་པར་རྗེས་སུ་མི་མཐོང་ངོ་། །དེ་དག་ཡུན་རིང་པོར་ཐར་པ་མི་རྙེད་པས་དུས་གསུམ་གྱི་དེ་བཞིན་གཤེགས་པ་དང་། བྱང་ཆུབ་སེམས་དཔའ་དང་། གང་ཡང་རིག་སྔགས་ཀྱི་དཀྱིལ་འཁོར་གྱི་ལྷ་རྣམས་ཀྱིས་སྨད་པ། སྐྱེ་བ་བརྒྱུད་པར་རང་གི་རྒྱུད་ལ་དངོས་གྲུབ་བསྲེགས་པ། འཇིག་རྟེན་འདི་དང་ཕ་རོལ་ཆུད་གསོན་པ་
དག་ནི་མ་གཏོགས་ཏེ། དེ་ལྟ་མོད་ཀྱི་འདིར་བདག་གིས་ཅུང་ཟད་ཀྱང་མ་ནོངས་ཏེ། སྡུག་བསྔལ་མང་པོ་དང་ཆེན་པོའི་སེམས་ཅན་དགྲོལ་བར་རྔོ་མི་ཐོགས་ལགས་སོ། །སངས་རྒྱས་ཐུགས་རྗེ་ཆེན་པོས་བཀའ་སྩལ་པའི་ཡིད་ལ་བགྱི་བ་བསྐལ་པ་བགྲངས་པར་ཡིད་ལ་བགྱིས་པས་དགྲོལ་བར་རྡོ་མི་ཐོགས་ལགས་སོ། །དེ་ལྟ་མོད་ཀྱི་སྡུག་བསྔལ་མང་པོ་བརྒྱུད་པར་ཉམས་སུ་མྱོང་བར་འགྱུར་རོ། །དངོས་གྲུབ་ནི་བྱམས་པས་འཐོབ་སྟེ། བྱམས་པ་དང་། གསང་སྔགས་ཀྱི་གོ་ཆ་བགོས་པ། བྱམས་པའི་རལ་གྲི་ཐོགས་པ། སེམས་ཅན་ཐམས་ཅད་ལ་ཕན་ཞིང་མཉེས་གཤིན་པ་ལ་དེ་ཁོ་ན་ཉིད་སྒྲུབ་པའི་དངོས་གྲུབ་འདི་དག་འཇིག་རྟེན་འདྲེན་པས་རྗེས་སུ་གནང་ངོ་། །མགོན་པོ་འདི་མཐོང་བ་ཙམ་གྱིས་སྤོས་ཀྱི་གཟུགས་ཀྱི་འཇིག་རྟེན་མགོན་པོ་མཐོང་བ་དང་། འཇིག་རྟེན་འདྲེན་པ་རང་གི་གཟུགས་སུ་མངོན་སུམ་དུ་མཐོང་བ་མཚུངས་པ་ཉིད་དུ་ཁོང་དུ་ཆུད་པར་བགྱིའོ། །སངས་རྒྱས་བྱེ་བ་གང་གཱའི་ཀླུང་གི་བྱེ་མ་དང་མཉམ་པ་མངོན་སུམ་དུ་མཐོང་བ་ཁོ་ན་དང་། འཇིག་རྟེན་གྱི་མགོན་པོ་མཐོང་བ་མཚུངས་པ་ཁོ་ནར་ཁོང་དུ་ཆུད་པར་བགྱི་སྟེ། འདི་ལྟར་ཤེས་པར་བྱའོ། དེ་ནས་ཕྱིར་མི་ལྡོག་པའི་གནས་རིག་སྔགས་འཆང་གི་འཁོར་ལོས་སྒྱུར་བ་ཆེན་པོ་སྒྲུབ་པར་འདོད་པའི་དགེ་སློང་ངམ། རིགས་ཀྱི་བུའམ། རིགས་ཀྱི་བུ་མོའམ། རྒྱལ་པོའམ། བློན་པོ་ཆེན་པོའམ། རིག་སྔགས་འཆང་ངམ། གཞན་གང་ཡང་རུང་བའི་རིག་སྔགས་འཆང་གིས་ཕྱིར་མི་ལྡོག་པའི་གནས་ཐོབ་པར་འདོད་པ་དང་། དུས་གསུམ་དུ་གཤེགས་པའི་སངས་རྒྱས་མཐོང་བར་འདོད་པ་དང་། འཕགས་པ་སྤྱན་རས་གཟིགས་དབང་ཕྱུག་གི་གནས་མཐོང་བར་འདོད་པ་དང་། རིག་སྔགས་འཆང་གི་དཀྱིལ་འཁོར་གྱི་ལྷ་ཐམས་ཅད་མཐོང་བར་འདོད་པ་དང་། འཕགས་པ་རྡོ་རྗེ་འཛིན་མཐོང་བར་འདོད་པ་དང་། དེ་བཞིན་གཤེགས་པའི་རིགས་ཐམས་ཅད་ཀྱི་སྤྱིའི་དམ་ཚིག་མཐོང་བར་འདོད་ན་ཆོ་ག་འདི་བསྒྲུབ་པར་བྱ་སྟེ། སྙིང་པོ་དང་བཅས། བྱ་བ་དང་བཅས་པ་དེས་མྱུར་བ་དང་། ཤིན་
ཏུ་མྱུར་བ་དང་། མགྱོགས་པར་འཇིག་རྟེན་ཐམས་ཅད་ཀྱི་མངོན་སུམ་དུ་ཆོ་འཕྲུལ་རྨད་དུ་བྱུང་བ་གསང་བ་སྟོན་པར་མཐོང་སྟེ། འདི་ལ་སོམ་ཉི་དང་ནེ་མནུར་བསྐྱེད་པར་མི་བྱའོ། །ཐེ་ཙོམ་དང་ཡིད་གཉིས་བསྐྱེད་པར་མི་བྱའོ། །དེ་ནས་རིག་སྔགས་འཆང་གིས་འཕགས་པ་སྤྱན་རས་གཟིགས་དབང་ཕྱུག་གསེར་གྱི་མདོག་ཅན་སོར་བཞིའི་ཚད་ཙམ། ཚངས་པའི་ཆ་བྱད་འཆང་བ། རལ་པའི་ཐོར་ཚུགས་ཀྱིས་བརྒྱན་པ་བྱ་སྟེ། ཤིན་ཏུ་ཚད་དང་ལྡན་པ། ཆ་བྱད་མཛེས་པ། ཆ་ཤིན་ཏུ་རྣམ་པར་མཛེས་པ། ཕྱག་གཉིས་པ། སྤྱན་གསུམ་པ། འོད་དཔག་མེད་པའི་དབུ་རྒྱན་ཅན། གཡས་ན་ཟླ་བ་ཚེས་པ། ཕྱག་གཡོན་ན་པདྨ་དང་། རིལ་བ་སྤྱི་བླུགས་བསྣམས་པ། ཕྱག་གཡས་མི་འཇིགས་པ་སྦྱིན་པ། སྐུའི་ནང་ག་བུར་དང་། གླ་རྩི་དང་རིང་བསྲེལ་གྱིས་བཀང་བ། གཡས་ན་ལྷ་མོ་སྒྲོལ་མ་དངུལ་ལས་བྱས་པ་ཐལ་མོ་སྦྱར་ཏེ་ཡིད་ཙམ་འདུད་པ། གསེར་གྱི་རྒྱན་གྱིས་བརྒྱན་པ་དང་། གཡོན་ན་དངུལ་ལས་དཀར་མོ་ཐལ་མོ་སྦྱར་ཏེ་ཡིད་ཙམ་འདུད་པ་པདྨའི་གདན་ལ་བཞུགས་པར་བྱའོ། །སྟེང་གི་གཡས་ཕྱོགས་ན་འོད་དཔག་མེད་སྐྱིལ་མོ་ཀྲུང་བཅས་བཅས་ཏེ་བཞུགས་པ་དང་། གཡོན་ན་ཤཱཀྱའི་རྒྱལ་པོ་སྐྱིལ་མོ་ཀྲུང་བཅས་ཏེ་བཞུགས་པ་དགོད་པར་བྱའོ། །འོད་འདོམ་གང་དང་བཅས་པས་ལེགས་པར་བརྒྱན་པར་བྱ་ཞིང་། གནད་དང་གནད་ཤིན་ཏུ་རྣམ་པར་འབྱེས་པ།སྐྲ་དང་། དཔྲལ་བ་དང་། སྨིན་མ་དང་། ཤངས་དང་། སྙན་དང་། ཞལ་དང་། མགུལ་པ་དང་། དཔུང་པ་དང་། ནུ་མ་དང་། རྐེད་པ་དང་། བརླ་དང་། པུས་མོ་དང། བྱིན་པ་དང་། ཞབས་དང་། ཕྱག་གི་སོར་མོ་མཉམ་ཞིང་ཐམས་ཅད་དུ་མཛེས་པ། སྐུ་ཆུ་ཞེང་གབ་ཅིང་མཐོ་དམན་རན་པ། མཆོད་ཕྱིར་ཐོགས་པ་དཀར་པོ་འཆང་བ་བྱའོ། །ལས་ཤིན་ཏུ་ཡོངས་སུ་རྫོགས་ཤིང་ཤིན་ཏུ་མཐར་ཕྱིན་པ་དང་། འཕགས་པ་སྤྱན་རས་གཟིགས་དབང་ཕྱུག་གི་གཟུགས་ཟིན་པར་རིག་ནས། དེ་ནས་རིག་སྔགས་འཆང་གིས་རྒྱུ་སྐར་བཟང་པོའི་ཟླ་བ་ཉའམ། ཚེས་བརྒྱད་དམ། བཅྭ་ལྔའམ། བཅུ་གསུམ་མམ། བཅུ་
བཞིའམ། རྒྱུ་སྐར་བཀྲ་ཤིས་པ་རྒྱལ་གྱི་ཉི་མ་དང་མཐུན་པ་རྙེད་ནས་དཀྱིལ་འཁོར་བསྒྲུབ་པར་བྱ་སྟེ། དཀྱིལ་འཁོར་ཤིན་ཏུ་མཛེས་པར་བྱ་བ་ནི་གྲུ་བཞི་ལ་ཆ་ལེགས་པར་ཕྱེ་བ། ཀོ་ལའི་ཚད་ཙམ་ལ་ཐེམ་སྐས་བཞིས་བརྒྱན་པ། ཁྲུ་གསུམ་པར་རྣམ་པར་དབྱེ་བར་བྱ་སྟེ། ཆུང་བ་དང་ལྷག་པར་ནི་མི་བྱའོ། །ལེགས་པར་བྱུགས་པ་ཤིན་ཏུ་འཇམ་པ། སྙི་བ། མཉེན་པ། དབྱིབས་ལེགས་པ་ལ་ཚོན་རྩི་སྣ་ཚོགས་ཀྱིས་རྣམ་པར་དབྱེ་ཞིང་དཀྱིལ་འཁོར་དམ་པ་ཐིག་གདབ་པ་ནི་ཤིན་ཏུ་རྣམ་པར་མཛེས་པ། སྒོ་བཞི་པ་ལ་དཀྱིལ་འཁོར་གྱི་དབུས་ཀྱི་སྙིང་པོར་པདྨའི་རིགས་ཀྱི་དཀྱིལ་འཁོར་དོན་ཡོད་པའི་ཞགས་པའི་དཀྱིལ་འཁོར་བྲིའོ། །ཕྱི་རོལ་གྱི་དཀྱིལ་འཁོར་གྱི་གནས་སུ་ཆ་རྣམ་པ་བརྒྱད་དུ་ཕྱེ་ལ། ལྷོའི་གྲྭའི་གནས་སུ་དེ་བཞིན་གཤེགས་པའི་རིགས་ཚོན་སྣ་ཚོགས་ཀྱིས་བྲིའོ། །དེ་ནས་བྱང་གི་གྲྭར་བྲི་བ་ནི་རྡོ་རྗེའི་རིགས་ཀྱི་དཀྱིལ་འཁོར་ཚོན་རྩི་སྣ་ཚོགས་ཀྱིས་རྣམ་པར་བཀྲ་བར་བྲིའོ། །དེ་ནས་ནུབ་ཀྱི་གྲྭར་བྲི་བ་ནི་ནོར་བུའི་རིགས་ཀྱི་དཀྱིལ་འཁོར་སྣ་ཚོགས་ཀྱིས་རྣམ་པར་བཀྲ་བར་བྲིའོ། །དེ་ནས་ཤར་གྱི་གྲྭར་གླང་པོ་ཆེའི་རིགས་ཀྱི་དཀྱིལ་འཁོར་ཚོན་རྩི་སྣ་ཚོགས་ཀྱིས་རྟག་ཏུ་ཤིན་ཏུ་མཛེས་པ་དང་། ཤིན་ཏུ་གསལ་བར་བྲིའོ། །ཤར་ཕྱོགས་ཀྱི་དཀྱིལ་འཁོར་གྱི་སྒོར་རི་བོ་པོ་ཊ་ལ་མེ་ཏོག་དང་ཤིང་ལྗོན་པ་སྣ་ཚོགས་ཀྱིས་ལེགས་པར་བརྒྱན་པ་རིའི་ལྷ་དང་བཅས་པ་བྲིའོ། །ལྷོ་ཕྱོགས་ཀྱི་སྒོར་རི་རབ་ཀླུའི་རྒྱལ་པོ་དགའ་བོ་དང་ཉེ་དགའ་བོས་ཀུན་ནས་དཀྲིས་པ་དང་། སུམ་ཅུ་རྩ་གསུམ་པའི་རིས་ཀྱི་ལྷ་བྲིའོ། །བྱང་ཕྱོགས་ཀྱི་སྒོར་ནི་སྤོས་ཀྱི་ངད་ལྡང་དྲི་ཟའི་ཚོགས་ཀྱིས་གང་བ་ཤིང་ལྗོན་པ་སྣ་ཚོགས་ཀྱིས་ཤིན་ཏུ་མཛེས་པ་བྲིའོ། །ནུབ་ཕྱོགས་ཀྱི་སྒོར་རི་ཏི་སེ་ལྷ་རྣམས་ཀྱི་གནས་མེ་ཏོག་སྣ་ཚོགས་དང་། འཁྲི་ཤིང་དང་། ཤིང་ལྗོན་པ་སྣ་ཚོགས་མཆོག་གིས་རྟག་ཏུ་གང་བ་བྲིའོ། །ལེགས་པར་ཟིན་ནས་ཀུན་ཏུ་ནི་མདུང་རྩེ་གསུམ་པའི་བར་ཕྲེང་ངོ་། །དེ་བཞིན་གཤེགས་པའི་རིགས་སུ་དེ་བཞིན་གཤེགས་པ་དང་། རྡོ་རྗེའི་རིགས་ཉིད་གཞག་གོ། །ནོར་བུའི་རིགས་སུ་དེ་བཞིན་གཤེགས་པ་གཞག་
ཅིང་དེ་བཞིན་གཤེགས་པའི་རིགས་དང་། ཐམས་ཅད་དུ་རྡོ་རྗེ་འཛིན་པ་བཞག་ན་སྤྱིའི་རིགས་འགྲུབ་བོ། །ལྷ་མོ་སྒྲོལ་མ་ནི་རི་བོ་པོ་ཊ་ལ་ལ་གཞག་གོ། །རི་རབ་ལ་ནི་གོས་དཀར་མོའོ། །དཔེ་མེད་མ་ནི་ཏི་སེའི་རྩེ་མོར་རོ། །སྒྲོལ་མ་བདུན་ནི་སྤོས་ཀྱི་ངད་ལྡང་ལ་གཞག་གོ །ཤར་ཕྱོགས་ཀྱི་སྒོར་ཕོ་ཉ་མོ་ཞིབ་ཕོ་ཉ་མོ་བདུན་གྱིས་ཡོངས་སུ་བསྐོར་བའོ། །ལྷོ་ཕྱོགས་ཀྱི་སྒོར་ནི་སྲིན་མོ་རལ་པ་གཅིག་མ་སྲིན་མོ་བདུན་གྱིས་ཡོངས་སུ་བསྐོར་བའོ། །ནུབ་ཕྱོགས་ཀྱི་སྒོར་རྡོ་རྗེ་ལུ་གུ་རྒྱུད་ལུ་གུ་རྒྱུད་བདུན་གྱིས་ཡོངས་སུ་བསྐོར་བའོ། །བྱང་ཕྱོགས་ཀྱི་སྒོར་ཁྲོ་གཉེར་ཅན་མོ་ཁྲོ་གཉེར་ཅན་བདུན་གྱིས་ཡོངས་སུ་བསྐོར་བའོ། །དེ་ནས་འཇིགས་པ་མེད་པས་མགོན་པོ་འཇིག་རྟེན་གྱི་བླ་མའི་གཟུགས་གསེར་གྱི་མདོག་ཅན་རིང་བསྲེལ་དང་ལྡན་པ་དོན་ཡོད་པའི་རྒྱལ་པོ་རྣམ་པར་འཕྲུལ་པའི་དཀྱིལ་འཁོར་གྱི་སྙིང་པོ་པདྨ་རྒྱ་ཆེན་པོའི་དཀྱིལ་འཁོར་དུ་གཞག་པར་བྱའོ། །གྲྭར་རྒྱལ་པོ་ཆེན་པོ་བཞི་སྟོབས་པོ་ཆེ་གོ་ཆ་བགོས་པ། དྲག་ཤུལ་གྱི་གཟུགས་ཅན། མཚོན་ཆ་འབར་བ་ཐོགས་པ་གཞག་པར་བྱའོ། །གང་ཞིག་ཐུབ་པ་རྣམ་པར་སྣང་མཛད་ཀྱི་སྤྲུལ་པ། སྤྱིའི་རིགས་ཡང་དག་པར་འབྱུང་བ། དོན་ཡོད་པའི་རྒྱལ་པོ་རྣམ་པར་འཕྲུལ་པ། འཇིག་རྟེན་དབང་ཕྱུག་མཆོག་སྦྱིན་པ་དང་བཅས་པ། དོན་ཡོད་པའི་ཞགས་པ་རྣམ་པར་འཕྲུལ་པ་བསྒྲུབ་པའི་ཆེད་དུ་ཆོ་ག་སྣ་ཚོགས་དྲན་པར་བྱའོ། །སེམས་ཅན་ཀུན་ལ་ཕན་པའི་ཕྱིར། །རྣམ་ཐར་དཀྱིལ་འཁོར་དེ་ཉིད་ནི། །ལེགས་པར་བསྒྲུབས་པ་མཐོང་ཙམ་དང་། །བཀླགས་པས་དངོས་གྲུབ་བླ་མེད་འགྱུར། །དེ་བས་རྟག་ཏུ་འབད་པ་ཡིས། །སྒྲུབ་པར་བྱེད་པ་མི་མཁས་སོ། །དེ་ནས་རིག་སྔགས་འཆང་གཙང་མར་གྱུར་པ་ཤིན་ཏུ་ཁྲུས་བྱས་པ་གོས་གཙང་མ་བགོས་པས་དར་དང་བ་དན་སྣ་ཚོགས་བཟང་པོས་དཀྱིལ་འཁོར་བརྒྱན་པར་བྱའོ། །རོ་བྲོ་བའི་མཆོག་རྒྱ་ཆེན་པོས་སྣོད་སྣ་ཚོགས་ལེགས་པར་བཀང་བ་དང་། གསེར་དང་དངུལ་གྱི་སྣོད་དུ་མཆོད་ཡོན་དབུལ་ཞིང་རོ་སྣ་ཚོགས་ཀྱི་གཏོར་མ་གཞག་པར་བྱའོ། །དེ་བཞིན་དུ་འབྲས་བུ་སྣ་ཚོགས་གཞག་པར་བྱའོ། །གཟུགས་
རྣམ་པ་སྣ་ཚོགས་པའི་ཁ་ཟས་ཀྱི་གཏོར་མ་ཡང་བསྒྲུབ་བོ། །མེ་ཏོག་སྣ་ཚོགས་བཀྲམ་ཞིང་གཏོར་མ་སྣ་ཚོགས་ཀྱིས་བཀང་བྲ་དང་། བུམ་པ་དང་། རྫེའུ་དང་། ཕོར་ཟླུམ་དང་། ཁམ་ཕོར་དང་། དབྱིབ་མོ་དག་ཀྱང་དགང་ངོ་། །ཀུན་དུ་དྲི་ཆུས་བསྐོས་པ་ཡི། །རྒྱ་ཆེན་གཏོར་མ་ཀུན་དུའོ། །སྣ་ཚོགས་པ་ཡི་པོག་ཕོར་ནས། །སྣ་ཚོགས་བདུག་སྤོས་དབུལ་བ་ནི། །ཨ་ག་རུ་དང་། ཙནྡན་དང་། སྤྲྀ་ཀ་དང་། དུ་རུ་སྐ་དང་། ཀུན་ཏུ་རུ་དང་། གུ་གུལ་དང་། སྒྲོན་ཤིང་དང་། ཤྲི་བེཥྚ་ཀ་དང་། ས་ར་དང་། སར་ཛ་ར་ས་དང་། དེ་བཞིན་དུ་ག་བུར་དང་། གླ་རྩི་དང་། གུར་གུམ་དང་། ཤ་ཁ་རའི་བདུག་སྤོས་འདི་དག་ནི་རབ་ཏུ་ཕུལ། ཐམས་ཅད་དུ་སྒྲུབ་པ་བླ་ན་མེད་པ་ཡིན་ནོ། །སྣ་ཚོགས་པ་ཡི་དྲི་དག་དང་། །ཕྱེ་མ་བྱུག་པ་སྣ་ཚོགས་ཉིད། །ཤེས་རབ་ཅན་གྱིས་ཀུན་ཏུ་ནི། །དཀྱིལ་འཁོར་དག་ལ་གཞག་པར་བྱ། །ལྷ་རྫས་ཀྱི་རིན་པོ་ཆེ་སྣ་བདུན་གྱི་མེ་ཏོག་དང་། དངུལ་གྱི་མེ་ཏོག་དང་། ཟངས་ཀྱི་མེ་ཏོག་དང་། བྱི་རུ་དང་ནི་མུ་ཏིག་དང་། །ཨིནྡྲ་ནཱི་ལ་དག་དང་ནི། །པདྨ་རཱ་ག་དག་ཀྱང་ངོ་། །གསེར་དང་དངུལ་གྱི་བུམ་པ་རིན་པོ་ཆེ་སྣ་བདུན་ཅན་ཡང་གྲྭ་བཞིར་གཞག་པར་བྱའོ། །འབྲས་ཡོས་དང་། ཡུངས་ཀར་དང་བསྲེས་པས་དཀྱིལ་འཁོར་ཀུན་དུ་གཏོར་རོ། །ཀུན་ནས་མེ་ཏོག་ཕྲེང་བ་ནི། །རྨད་བྱུང་དཀྱིལ་འཁོར་ལ་གཞག་ཅིང་། །ཀུན་ནས་མར་མེའི་ཕྲེང་བ་ཡང་། །དཀྱིལ་འཁོར་རྨད་དུ་བྱུང་ལ་བཞག །རིག་སྔགས་འཆང་ཉིན་ཞག་གཅིག་གནས་པར་གྱུར་པས་ཡང་བཟླས་བརྗོད་རྒྱ་ཆེར་བྱས་ལ་ཆོ་གས་བསྲུང་བ་དང་། ཕྱོགས་བཅིང་བ་དང་། ཀུན་ནས་དཀྱིལ་འཁོར་བཅིང་བ་བྱས་ལ་དཀྱིལ་འཁོར་གྱི་ལས་བྱའོ། །དེ་ནས་སློབ་མ་གཞུག་པར་བྱ་སྟེ། བླ་མ་མཁན་པོ་འམ། སློབ་དཔོན་ནམ། ཕའམ་རྒྱལ་པོའམ། བློན་པོ་ཆེན་པོ་ལ་དམ་ཚིག་དང་། ཕྱག་རྒྱ་དང་། དཀྱིལ་འཁོར་གསང་བ་བསྟན་ཏེ། མགོན་པོ་འཇིག་རྟེན་གྱིས་བླ་མ་མཐོང་ཞིང་དཀྱིལ་འཁོར་རྨད་དུ་བྱུང་བ་མཐོང་ནས་ཕྱག་བྱ་ཞིང་མཆོད་པ་དང་། མེ་ཏོག་དང་། བདུག་སྤོས་དབུལ་བ་བྱས་ལ་བསྐོར་བ་
བྱའོ། །དེ་ནས་རིག་སྔགས་འཆང་གིས་ཐམས་ཅད་ལ་བྱམས་པའི་སེམས་མཉམ་པར་བཞག་སྟེ། སྐྱིལ་མོ་ཀྲུང་བཅས་ནས་འདུག་ལ་མི་སྨྲ་བར་ཡ་མཚན་དུ་སྣང་བར་མཐོང་གི་བར་དུ་དོན་ཡོད་པའི་ཞགས་པའི་སྙིང་པོ་བཟླས་བརྗོད་བྱས་ལ་དཀྱིལ་འཁོར་ཀུན་ཏུ་ཁྲོ་བོའི་རྒྱལ་པོས་ལན་བརྒྱ་རྩ་བརྒྱད་དབང་བསྐུར་ཞིང་ཡུངས་ཀར་དང་། ཆུ་དང་མེ་ཏོག་གིས་དཀྱིལ་འཁོར་ཀུན་ཏུ་ལན་བརྒྱ་རྩ་བརྒྱད་གཏོར་བའི་མོད་ལ་རྟག་ཏུ་ཕྱག་རྒྱ་ལན་བརྒྱ་རྩ་བརྒྱད་བཅིངས་ལ་དཀྱིལ་འཁོར་ཀུན་ཏུ་མེ་ཏོག་དང་། བདུག་སྤོས་དང་། དྲི་ཕུལ་ནས་མགོན་པོ་འཇིག་རྟེན་དབང་ཕྱུག་དོན་ཡོད་པའི་ཞགས་པ་མཐོང་ན་དོན་ཡོད་པ་ཉིད་མཆོད་པར་བྱའོ། །དེ་ནས་མགོན་པོ་ཕྱག་ན་རྡོ་རྗེ་དང་། རིག་སྔགས་ཀྱི་རྒྱལ་པོ་བླ་ན་མེད་པ་མཆོད་པ་བྱེད་དོ། །དེ་ནས་ལྷ་མོ་སྒྲོལ་མ་དང་། ཀུན་དུ་ལྷ་མོ་ཐམས་ཅད་ལའོ། །དེ་ནས་དཀྱིལ་འཁོར་གྱི་ལྷ་ཐམས་ཅད་ལའོ། །དེ་ནས་རིའི་རྒྱལ་པོ་རྣམས་ལ་གནས་པའི་རིའི་ལྷ་ཐམས་ཅད་ལའོ། །ཐམས་ཅད་དང་སྒོ་སྲུངས་ལ་རྟག་ཏུ་མཆོད་པ་བྱའོ། །དེ་ནས་ཕྱོགས་བཞི་ཀུན་དུ་རིག་སྔགས་འཆང་གིས་རྟག་ཏུ་མཆོད་ནས་སྐྱིལ་མོ་ཀྲུང་བཅས་ཏེ་འདུག་ལ་འཇིགས་པ་མེད་པས་ལག་པའི་ཕྱག་རྒྱ་བཅིང་བར་བྱའོ། །བྱམས་པའི་སེམས་དང་སྙིང་རྗེའི་ལྷག་པའི་བསམ་པ་ཉིད་ཀྱིས་དོན་ཡོད་པའི་ཞགས་པ་རྟག་ཏུ་དྲན་པར་བྱ་ཞིང་སངས་རྒྱས་རྗེས་སུ་དྲན་པ་བསྒོམ་མོ། །གསང་སྔགས་བརྗོད་མ་ཐག་ཏུ་དཀྱིལ་འཁོར་དང་ས་གཞི་གཡོ་ཞིང་གང་དཀྱིལ་འཁོར་དུ་ཞུགས་པའི་མོད་ལ་སྙིང་དགའ་བ་དང་། སེམས་བདེ་བ་འཐོབ་བོ། །འོད་ཟེར་བྱེ་བ་ཁ་དོག་སྣ་ཚོགས་རྣམ་པར་བཀྲ་བ་འབྱུང་ཞིང་དཀྱིལ་འཁོར་གྱི་སྙིང་པོ་ན་དོན་ཡོད་པའི་ཞགས་པ་འགུལ་བར་འགྱུར། དཀྱིལ་འཁོར་གྱི་སྙིང་པོ་འབར་བར་འགྱུར། དེ་བཞིན་གཤེགས་པ་ཐམས་ཅད་དང་། དེ་བཞིན་དུ་ཕྱག་ན་རྡོ་རྗེ་འབར་བར་འགྱུར། དཀྱིལ་འཁོར་ལ་གནས་པའི་ལྷ་དང་ལྷ་མོ་ཐམས་ཅད་འབར་བར་འགྱུར། ལྷ་གཡོ་བར་འགྱུར་ཞིང་དཀྱིལ་འཁོར་ཀུན་ནས་ལེགས་སོ་ཞེས་སྒྲ་གྲག་པར་འགྱུར་རོ། །དེ་ནས་ཇི་ལྟར་གསེར་བཀོད་པ་དེ་ལྟར་
དབུས་ཀྱི་དཀྱིལ་འཁོར་གྱི་སྙིང་པོ་དང་། མགོན་པོ་དེ་བཞིན་གཤེགས་པ་ཤཱཀྱ་ཐུབ་པ་དང་། འཕགས་པ་སྤྱན་རས་གཟིགས་ཀྱི་དབང་ཕྱུག་དང་། ཕྱག་ན་རྡོ་རྗེ་དང་། སྒྲོལ་མ་དང་། དཀར་མོ་གསེར་གྱི་མདོག་གིས་བཀོད་པ་ཆེན་པོའི་དཀྱིལ་འཁོར་གྱི་ནང་ནས་བཞེངས་པར་འགྱུར། སྐུ་གསེར་མདོག་ཅན་གཟུགས་བཟང་པོས་བདག་ཉིད་ཀྱི་རང་གི་ངོ་བོ་སྟོན་པ་སྣང་བར་འགྱུར། ཕྱོགས་བཅུ་ཀུན་དུ་རྟག་ཏུ་གཟིགས་པར་འགྱུར་རོ། །ཐམས་ཅད་དུ་རྟག་ཏུ་སེམས་བརྟན་པོར་བྱ་སྟེ། རིག་སྔགས་འཆང་བྱམས་པ་དང་བཅས་པའི་སེམས་བརྟན་པོར་གྱུར་བས་མེ་ཏོག་དང་རོལ་མོའི་སྒྲ་དབུལ་ཞིང་དོན་ཡོད་པའི་རྒྱལ་པོ་ཡང་དྲན་པར་བྱའོ། །དེ་ནས་དེ་བཞིན་གཤེགས་པས་ཕྱག་གསེར་གྱི་མདོག་ཅན་བརྐྱང་སྟེ། རིག་སྔགས་འཆང་གི་སྤྱི་བོར་བཞག་ནས་ལེགས་སོ་ཞེས་བྱ་བ་སྦྱིན་པར་མཛད་ཅིང་རིག་སྔགས་འཆང་ཁྱོད་ཀྱིས་དོན་ཡོད་པའི་ཞགས་པའི་སྙིང་པོ་དང་། ཆོ་ག་ཞིབ་མོ་མཐའ་དག་དང་། དཀྱིལ་འཁོར་དང་། ཕྱག་རྒྱ་རིམ་པར་ཕྱེ་བ་གྲུབ་སྟེ།སྐྱེས་བུ་དམ་པ་ཁྱོད་བདེ་བ་ཅན་གྱི་འཇིག་རྟེན་གྱི་ཁམས་སུ་ལུང་བསྟན་གྱིས་རང་གི་ངོ་བོ་ཉིད་ཀྱིས་ཡོངས་སུ་དག་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཀྱི་བར་དུ་སྐྱེས་བུ་དམ་པ་ཁྱོད་རང་གི་ངོ་བོ་ཕྱིར་མི་ལྡོག་པ་དང་། དོན་ཡོད་པའི་རིག་སྔགས་འཆང་གི་འཁོར་ལོས་སྒྱུར་བར་འགྱུར་བར་བྱོས་ཤིག །དཀྱིལ་འཁོར་འདི་ལ་བརྟེན་པའི་སྐྱེ་བོ་དགེ་བ་དང་ལྷག་པའི་བསམ་པ་ལ་ཞུགས་པ། སེམས་ཅན་ཐམས་ཅད་བླ་ན་མེད་པའི་མྱ་ངན་ལས་འདས་པར་ལུང་བསྟན་གྱི་བར་དུ་ཕྱིར་མི་ལྡོག་པར་འགྱུར་རོ། །ཇི་སྟེ་སེམས་ཅན་ངན་པ་རིག་སྔགས་ཀྱི་གདོལ་པ་སྨད་པ་དག་དེར་ཞུགས་ན་གཟུགས་བརྙན་ལས་ཁྲག་འཛག་ཅིང་སྒྲ་མི་ཟད་པ་འབྱུང་སྟེ། མགོན་པོ་འདི་མི་མཐོང་། ས་འདི་གཡོ་བར་མི་འགྱུར། དཀྱིལ་འཁོར་འདི་འབར་བར་མི་འགྱུར་ཏེ། དེའི་ཚེ་རིག་སྔགས་འཆང་ལ་རྨི་ལམ་དུ་སྟོན་ཏེ་དེ་ཉིད་ཀྱང་གཞན་དུ་མི་འགྱུར་རོ། །ཇི་ལྟར་མངོན་སུམ་པ་དེ་བཞིན་དུ་རྨི་ལམ་དུ་སྟོན་ཅིང་ཡིད་ལ་
བསམས་པ་ཐམས་ཅད་ཡོངས་སུ་རྫོགས་པར་འགྱུར་རོ། །དེ་ལྟ་བས་ན་རིག་སྔགས་འཆང་གིས་ལེགས་པར་བརྟག་ཅིང་སོ་སོར་བརྟགས་ཏེ། སེམས་ཅན་དཀྱིལ་འཁོར་དུ་ཞུགས་པར་བྱའོ། །སྒྲུབ་པ་པོ་བདེན་པར་སྨྲ་བ་དང་། དབང་པོ་ཡང་དག་པར་བསྡམས་པ། སེམས་ཅན་ཐམས་ཅད་ལ་བྱམས་པ། སེམས་ཅན་ཐམས་ཅད་ལ་བརྩེ་བ་ཅན། གཞན་ལ་ཡང་དག་པར་སྨྲ་བ། ཚིག་བརྟགས་པ་དད་པ་ཅན། གུས་པ་དང་ལྡན་པ་ཉིད། མར་འཛིན་པ། ཕར་འཛིན་པ། དཀོན་མཆོག་གསུམ་ལ་སྐྱབས་སུ་སོང་བ་རྟག་ཏུ་བླ་མ་ལ་གུས་པ་ཉིད་ཀྱི་སེམས་ཅན་འདི་དག་གཞུག་པར་བྱའོ། །རབ་ཏུ་བག་ཡོད་པ་དང་། རྟག་ཏུ་གཙང་ཞིང་གཙང་སྦྲ་དང་ལྡན་པ་དང་། ཁ་ཟས་ངན་པ་དང་། ལྷག་མ་དང་། འབགས་པ་དང་འདྲེས་པ་དང་། ཁ་གཅིག་ཏུ་བསྲེས་པ་དང་། ཆུང་ཟད་བཀྲུས་པ་དང་། ཆང་དང་། ཤ་དང་། ཀུན་དོང་དང་། སྒོག་སྐྱ་དང་། ཀེའུ་དང་བསྲེས་པའི་ཁ་ཟས་དག་སྤང་བར་བྱ་ཞིང་། རང་གི་ཁ་འཕྲོ་ཡང་སྤང་བར་བྱའོ། །ལྷག་མ་ནི་རྟག་ཏུ་སྤང་བར་བྱ་སྟེ། འདི་དག་སྒྲུབ་པའི་ཆོ་ག་ལ་དྲན་པར་བྱའོ། །ལག་པ་འབགས་པས་གདོང་ལ་རེག་པར་མི་བྱ། ལྷུང་བཟེད་དོར་བར་མི་བྱའོ། རྟག་ཏུ་ཁ་མ་ཕྱེད་ཕྱེད་དུ་གཅོད་པ་དང་། མཆོག་ཏུ་འབགས་པ་འདི་དག་ནམ་ཡང་བཟའ་བར་མི་བྱའོ། །གཙང་མས་ཟས་གཙང་མ་བཟའ་ཞིང་ལག་པའི་སོར་མོ་བསྡམས་པས་ཁ་གདོང་ལ་སོགས་པ་ལ་མི་རེག་པར་འདི་དག་ཟ་བ་ཉིད་ནི་མཆོག་ཏུ་མཛེས་ཤིང་བློ་དང་ལྡན་པ་ཡིན་ནོ། །དེ་ནས་རིག་སྔགས་འཆང་གིས་ལས་ཤིན་ཏུ་ཡོངས་སུ་རྫོགས་པར་བྱས་ཤིང་དཀྱིལ་འཁོར་གྱི་བྱ་བ་ལེགས་པར་རྫོགས་ན་དེ་ལ་ཁྲག་འཛག་པར་མི་འགྱུར་རོ། །དེ་ནས་འཕགས་པ་སྤྱན་རས་གཟིགས་དབང་ཕྱུག་གི་ཕྱག་བརྐྱང་བས་རིག་སྔགས་འཆང་གི་ལག་པ་ནས་བཟུང་ནས་དཀྱིལ་འཁོར་གྱི་ནང་དུ་འཇུག་པར་མཛད་ཅིང་ཤིན་ཏུ་དྲི་མ་མེད་པར་སྣང་བ་ཞེས་བྱ་བའི་ནོར་བུ་ཉིད་ཀྱི་མགུལ་པ་ནས་བཀྲོལ་ཏེ་རིག་སྔགས་འཆང་གི་མགུལ་དུ་འདོགས་པར་མཛད་དོ། །སྤྱི་བོར་ཕྱག་འཇོག་པར་མཛད་ཅིང་འདི་ལ་སྲས་ཀྱི་ཐུ་བོ་ཞེས་གསུང་ངོ་། །མགུལ་པར་ནོར་
བུ་བཅིངས་པ་ཙམ་གྱི་མོད་ལ་དེ་ནམ་མཁའ་ལ་འགྲོ་བར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་སྤྱིའི་རིགས་ཀྱི་གསང་བའི་དམ་ཚིག་དང་དཀྱིལ་འཁོར་མཐོང་བར་འགྱུར་རོ། །བྱང་ཆུབ་ཀྱི་སྙིང་པོ་ལ་ཐུག་གི་བར་དུ་རིགས་ཐམས་ཅད་དུ་དོན་ཡོད་པའི་རིག་སྔགས་འཆང་གི་རྒྱལ་པོ་འཁོར་ལོས་སྒྱུར་བར་འགྱུར་རོ། །དོན་ཡོད་པའི་རྒྱལ་པོའི་ཆོ་ག་ཞིབ་མོ་དང་། དཀྱིལ་འཁོར་ཆེན་པོ་རྟག་ཏུ་མངོན་དུ་འགྱུར་ཞིང་རྒྱལ་མཚན་གྱི་རྩེ་མོ་ཉིད་སྨིན་མཚམས་ན་འདུག་པར་འགྱུར་རོ། །རྒྱ་ཆེན་པོ་དྲི་མ་མེད་པར་སྣང་བ་དོན་ཡོད་པའི་ཡེ་ཤེས་རྣམ་པར་འཕྲུལ་པ་ཞེས་བྱ་བའི་ཏིང་ངེ་འཛིན་འཐོབ་སྟེ། གང་ཏིང་ངེ་འཛིན་རྗེས་སུ་ཐོབ་པས་འཇིག་རྟེན་པ་ཐམས་ཅད་ཀྱི་དངོས་གྲུབ་རྣམ་པར་འཕྲུལ་པའི་ཆོ་འཕྲུལ་སྟོན་པར་འགྱུར་རོ། །ཕྱག་རྒྱ་དང་། དཀྱིལ་འཁོར་དང་། ཆོ་ག་ཞིབ་མོ་དང་། སྒྲུབ་པ་དང་། དམ་ཚིག་དང་། གསང་བ་ཐམས་ཅད་ཀྱི་མཐུ་ཆེན་པོ་སྟོན་པར་འགྱུར་རོ། །དོན་ཡོད་པ་ཆེན་པོའི་འཁོར་ལོས་སྒྱུར་བའི་རྣམ་པར་འཕྲུལ་པ་ཐམས་ཅད་སྟོན་པར་འགྱུར་རོ། །དོན་ཡོད་པའི་དམ་ཚིག་གི་བྱིན་གྱིས་བརླབས་དང་། དེ་བཞིན་གཤེགས་པའི་གསང་བའི་དམ་ཚིག་མཐའ་ཡས་པ་ཐོབ་སྟེ། གང་དམ་ཚིག་ཐོབ་པས་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་དམ་ཚིག་དང་མཚུངས་པར་ཤེས་པར་འགྱུར་རོ། དེ་བཞིན་གཤེགས་པའི་དམ་ཚིག་མཉམ་པ་ཉིད་ཀྱི་རྣམ་པར་འཕྲུལ་པ་སྟོན་པར་འགྱུར་རོ། །དེ་ནས་རིག་སྔགས་འཆང་དཀྱིལ་འཁོར་གྱི་ཆོ་གའི་བྱ་བ་ཐམས་ཅད་ཡོངས་སུ་རྫོགས་པར་བྱས་ནས་སྤྱན་རས་གཟིགས་དབང་ཕྱུག་རིང་བསྲེལ་དང་བཅས་པ་དེ་ཡང་ས་ཕྱོགས་དབེན་པའི་གནས་གཙང་མར་གོས་གཙང་མའི་གདན་བཤམས་ལ་དེའི་སྟེང་དུ་གཞག་པར་བྱའོ། །ཨ་ག་རུའི་བདུག་སྤོས་འབུལ་ཞིང་ཉིན་གཅིག་བཞིན་དུ་ནང་པར་སྔར་གཞན་མི་སྨྲ་བར་བཟླས་བརྗོད་བརྒྱ་རྩ་བརྒྱད་བྱ་སྟེ། རིག་སྔགས་ཀྱི་རྒྱལ་པོས་མཆོད་པ་དབུལ་བར་བྱའོ། །དེ་ནས་འཕགས་པ་སྤྱན་རས་གཟིགས་དབང་ཕྱུག་གི་གཟུགས་བརྙན་འབར་བར་འགྱུར་ཏེ། ཉིན་གཅིག་བཞིན་དུ་འཕགས་པ་སྤྱན་རས་གཟིགས་དབང་ཕྱུག་
གཟུགས་བརྙན་སྨྲ་བར་འགྱུར། ཚིག་འབྱིན་པར་འགྱུར་རོ། །ད་ལྟར་གྱི་བཞིན་དུ་དེ་ཐམས་ཅད་སྨྲ་བར་འགྱུར་ཏེ། དགེ་བ་དང་། མི་དགེ་བ་དང་། འདས་པ་དང་། མ་འོངས་པ་དང་། ད་ལྟར་བྱུང་བའི་དེ་ཐམས་ཅད་སྨྲ་བར་འགྱུར་རོ། །ཚེ་རིང་བའམ། ཚེ་ཡོངས་སུ་ཟད་པ་དེ་ཐམས་ཅད་སྟོན་ཅིང་སྨྲ་བར་འགྱུར་རོ། །རྒྱལ་པོ་བརྗེ་བའམ། དགྲ་འཐབ་པའམ། ཕ་རོལ་གྱི་དམག་ཚོགས་འཐབ་པའམ། ལོ་ཉེས་པ་དང་། མི་ངས་དང་། དགོན་པ་དང་། ནད་དང་། ན་བ་དང་། གདོན་དང་། གནོད་པ་དང་། འཚེ་བ་དང་། གྲང་བ་དང་། རླུང་དང་ཚ་བ་དང་། སེར་བ་དང་། ཆོམ་པོའི་འཇིགས་པ་དང་། རྐུན་པོའི་འཇིགས་པ་དང་། གཅན་གཟན་གཏུམ་པོའི་འཇིགས་པ་དང་། སྦྲུལ་གདུག་པའི་འཇིགས་པ་དང་། བདེ་བ་དང་། ལོ་ལེགས་པ་དང་། འབྲས་བུ་འཕེལ་བ་དང་། འབྲུ་འཕེལ་བ་དེ་ཐམས་ཅད་སྨྲ་བར་འགྱུར་ཞིང་དེའི་ཐབས་ཐམས་ཅད་ཀྱང་རབ་ཏུ་སྟོན་པར་འགྱུར་རོ། །རིག་སྔགས་འཆང་ལ་ཉིན་གཅིག་བཞིན་དུ་ཁྱད་པར་དུ་གྱུར་པ་རྣམ་པ་མང་པོ་རབ་ཏུ་སྟོན་པར་འགྱུར་རོ། །ཁ་ཅིག་ལ་བསྟན་པར་མི་བགྱི་སྟེ། སྡང་སེམས་ཅན་རིག་སྔགས་ཀྱི་གདོལ་པ་རྐུན་མ། བྱས་པ་མི་གཟོ་བ། བརླང་བ། འཕགས་པའི་དགེ་འདུན་ལ་འཁུ་བ། འཕགས་པའི་དགེ་འདུན་ལ་འཕྲོག་པ། བསླབ་པ་མི་འདོད་པ་དང་ཡང་དག་པར་ལྡན་པ་དེ་དག་གི་ལག་ཏུ་བསྟན་པར་མི་བགྱི། རྣ་བར་བསྒྲགས་པར་མི་བགྱི། སྐྲའི་རྩེ་མོ་ཙམ་དུ་སྣང་བ་ཡང་བསྟན་པར་མི་བགྱིའོ། །ཆོ་ག་ཞིབ་མོ་འདི་ནི་ཡི་གེའི་འབྲུ་གཅིག་ཙམ་ཡང་བསྟན་པར་མི་བགྱིའོ། །རྗེས་སུ་འཇུག་པར་མི་བགྱིའོ། །དེ་ནས་རིག་སྔགས་འཆང་དངོས་གྲུབ་མཆོག་ཐོབ་པར་འགྱུར་ཏེ། མཆོག་ཏུ་ཡིད་བརྟན་པ། རྣམ་པར་ཐར་པ་མཆོག་གི་དཀྱིལ་འཁོར་གསང་བ་ཐོབ་པར་འགྱུར་རོ། །གང་གི་དྲུང་ནས་རིག་སྔགས་ཀྱི་རྒྱལ་པོའི་རིག་སྔགས་ཀྱི་དཀྱིལ་འཁོར་ཆེན་པོ་ལག་ཏུ་འཐོབ་པར་འགྱུར་བ་དེ་ལ་སྟོན་པ་དང་། བླ་མའི་འདུ་ཤེས་བསྐྱེད་པར་བགྱིད། བདག་དང་འདྲ་བར་མཆོད་པ་སྣ་ཚོགས་ཀྱིས་གུས་པར་བགྱིད་ན་བདག་ལ་གུས་པ་དང་བླ་མར་བགྱིས་པ་ལགས། མཆོད་པ་དང་རྗེད་པ་བགྱིད་པ་
ལགས་སོ། །དེ་ལྟ་བས་ན་དད་པའི་རྗེས་སུ་འབྲང་བས་བྱམས་པ་བསྒོམས་པ་དང་། སྙིང་རྗེ་བསྐྱེད་པས་དངོས་གྲུབ་ཆེན་པོ་འཐོབ་པར་འགྱུར་རོ། །ཇི་སྟེ་བགྱི་བ་འདི་ལས་འདའ་བར་མི་བགྱིད་པའི་སེམས་ཅན་དེ་ལ་བདག་གིས་རྟག་པར་རྒྱུན་མི་འཆད་པར་དྲན་པ་དང་། བདག་བརྗོད་པ་ཙམ་གྱིས་རང་གི་ཤིན་ཏུ་ཡོངས་སུ་དག་པའི་རང་གི་ངོ་བོས་བདག་མདུན་ན་མཆིས་པར་བགྱི་ཞིང་ཡིད་ལ་རེ་བ་ཐམས་ཅད་དང་མཆོག་ཡོངས་སུ་རྫོགས་པར་བགྱིའོ། །ཇི་སྟེ་བདག་ཇི་ལྟར་དམ་བཅས་པ་ལས་གཞན་དུ་བགྱིད་ན་བདག་གིས་སངས་རྒྱས་བཅོམ་ལྡན་འདས་དེ་དག་ལ་བསླུས་པ་ལགས་སོ། །རིག་སྔགས་ཀྱི་གདོལ་པ་རྐུན་མར་གྱུར་པ་ལ་ནི་མི་བགྱིད་དེ། དམ་བཅས་པ་བཞིན་དུ་སྨྲ་བར་མི་བགྱིད་དེ། རིག་སྔགས་འཆང་གིས་རྟག་ཏུ་གཙང་བར་བགྱི། རྟག་ཏུ་འཛུམ་པ་དང་། རྟག་ཏུ་བྱམས་པ་དང་། སྙིང་རྗེ་སྒོམ་པ་ཡིད་ལ་བགྱིད་ན། དེ་ལ་བདག་གིས་རྟག་ཏུ་ཡོན་ཏན་ཕུན་སུམ་ཚོགས་པ་ཐམས་ཅད་འཐོབ་པར་འགྱུར་བར་བགྱི། དེ་དགེ་བའི་སྤྱོད་པ་ཐམས་ཅད་དང་ལྡན་པར་བགྱི། དོན་ཡོད་པ་ཡངས་པ་ཆེན་པོའི་དངོས་གྲུབ་རྗེས་སུ་སྩལ་བར་བགྱིའོ། །སེམས་ཅན་ཐམས་ཅད་ཀྱི་བསམ་པ་ཐམས་ཅད་ཡོངས་སུ་རྫོགས་པར་བགྱི་བ་ལ། རྒྱ་མཚོའི་དུས་རླབས་ལྟར་ཐམས་ཅད་ཀུན་ཏུ་མཆི་བར་བགྱིའོ། །ངན་སོང་དང། ངན་འགྲོ་དང་། ལོག་པར་ལྟུང་བ་ཐམས་ཅད་ཡོངས་སུ་ཟད་པར་བགྱི་བའི་སླད་དུ་བདག་དགའ་བས་ཀུན་ཏུ་མཆི་བར་བགྱིའོ། །སེམས་ཅན་གང་ལ་བྱམས་པ་དང་། སྙིང་རྗེ་མཆིས་པའི་སེམས་ཅན་ཕ་རོལ་དེ་རྣམས་ཀྱི་བསམ་པ་ཕུན་སུམ་ཚོགས་པ་ཡོངས་སུ་རྫོགས་པར་བགྱིའོ། །དེ་ལྟ་བས་ན་རིག་སྔགས་འཆང་གིས་ཤིན་ཏུ་སྡོམ་པས་བསྡམས་ཤིང་རིག་སྔགས་བརྗོད་པར་བགྱིའོ། །ཡོངས་སུ་གཏོང་པའི་ལག་པར་བགྱི་ཞིང་སྤར་ཆུམ་པར་མི་བགྱི་སྟེ། ལག་པ་བརྐྱང་བར་བགྱིའོ། །གཏོར་བ་མང་བས་དེ་བཞིན་གཤེགས་པ་དམ་ཚིག་ལ་གནས་པར་བགྱིའོ། །སྔགས་ལེགས་པར་སྤྱད་པར་བགྱི་སྟེ། དོན་ཡོད་པའི་རྒྱལ་པོའི་སྤྱད་པ་བགྱི་ཞིང་རྟག་ཏུ་ཡིད་ལ་བགྱིའོ། །དེ་ནས་བདག་
དང་ཆོས་ཀྱི་མཆོག་ལ་དགའ་བ་ཞེས་བགྱིའོ། །རང་གི་གཟུགས་བརྙན་བྱ་བའི་དཀྱིལ་འཁོར་གྱི་ཆོ་གའོ།། །།