པདྨའི་ཞགས་པ་སྒྲུབ་པའི་ཆོ་ག
དེ་ནས་རིག་སྔགས་འཆང་པདྨའི་ཞགས་པ་སྒྲུབ་པར་འཚལ་བས། རིག་སྔགས་འཆང་དེ་གཙང་མ་ལེགས་པར་བཀྲུས་ཏེ་གོས་གཙང་མ་བགོ་བར་བགྱིའོ། །ནུབ་གསུམ་མཆིས་སམ། ནུབ་ལྔ་མཆིས་སམ། ནུབ་གཅིག་མཆིས་ནས་རིག་སྔགས་འཆང་གིས་ཞགས་པའི་སྐུད་པ་བསྒྲུབ་པར་བགྱི་སྟེ། རས་ཀྱི་སྐུད་པའམ་པདྨའི་སྐུད་པ་བཻ་ཌཱུརྱའི་ཁ་དོག་ལྟ་བུར་ཚོན་གྱིས་ཁ་བསྒྱུར་བར་བགྱི་ཞིང་ཁྲུ་ཉི་ཤུ་རྩ་གཅིག་བཀལ་ཏེ། དེ་ལ་ཡང་པདྨ་བགྱིས་ཏེ། རིན་པོ་ཆེ་སྣ་བདུན་གྱི་འདབ་མ་ཁ་ཕྱེ་བ་སོར་བཞི་བའི་ཚད་ཀྱིས་པདྨ་གསེར་གྱི་འདབ་མ་དང་། དངུལ་གྱི་འདབ་མ་དང་། བཻ་ཌཱུརྱ་དང་། ཨིན་དྲ་ནཱི་ལ་དང་། རིན་པོ་ཆེ་ཀ་ཏི་ཀ་ལས་བགྱི་ཞིང་མུ་ཏིག་གིས་བསྐོར་བ་བགྱི་སྟེ། དེ་ནས་ཞགས་པ་ལ་བཏགས་པར་བགྱིའོ། །ཞགས་པའི་ཐོར་ཏོ་གཅིག་ལ་ནི་པདྨའི་ཕྱག་རྒྱ་གདགས་པར་བགྱིའོ། །དེ་ནས་ལེགས་པར་བརྒྱན་པའི་ཆོས་ཀྱི་སྟན་བཟང་པོ་བཤམ་པར་བགྱིའོ། །བའི་ལྕི་བས་དཀྱིལ་འཁོར་བགྱིས་ལ་དཀྱིལ་འཁོར་གྱི་སྟེང་དུ་དྲིའི་པདྨ་བསམས་པར་བགྱི་ཞིང་། དཀྱིལ་འཁོར་གྱི་སྟེང་དུ་ཆོས་ཀྱི་སྟན་བཤམས་ལ། བུམ་པ་གང་བས་བརྒྱན་པར་བགྱིའོ། །མེ་ཏོག་གི་སིལ་མ་བཀྲམ་ཞིང་ཨ་ག་རུ་དང་། ཙན་དན་དང་། དུ་རུ་སྐའི་བདུག་པ་དབུལ་བར་བགྱིའོ། །མཆོད་ཡོན་དང་ཞབས་བསིལ་གྱི་སྣོད་ཀྱང་གཞག་པར་བགྱིའོ། །པདྨའི་ཞགས་པ་དེ་ཡང་ཆོས་ཀྱི་སྟན་གྱི་སྟེང་དུ་གཞག་པར་བགྱིའོ། །འཕགས་པ་སྤྱན་རས་གཟིགས་དབང་ཕྱུག་གི་མདུན་དུ་རིག་སྔགས་འཆང་གིས་སྐྱིལ་མོ་ཀྲུང་བཅས་ནས། དོན་ཡོད་པའི་ཞགས་པའི་སྙིང་པོ་ལན་ཁྲི་བཟླས་ཏེ། བཟླས་པའི་ཡུངས་ཀར་རེ་རེ་ནས་དེའི་སྟེང་དུ་གཏོར་བར་བགྱིའོ། །ལན་ཁྲི་རྫོགས་ནས་དེ་ནས་ཚེས་བཅྭ་ལྔའི་ཟླ་བ་ཉ་བའི་ནུབ་མོ་མཆིས་ནས་འཕགས་པ་སྤྱན་རས་གཟིགས་དབང་ཕྱུག་ལ་མཆོད་
པ་བགྱིའོ། །ཞགས་པ་དེ་ལ་ཡང་མཆོད་པར་བགྱིའོ། །དོན་ཡོད་པའི་ཞགས་པའི་ཕྱག་རྒྱ་བཅིངས་ནས་དོན་ཡོད་པའི་རྒྱལ་པོའི་སྙིང་པོ་ལན་བརྒྱ་རྩ་བརྒྱད་བཟླའོ། །དེ་ནས་ཁྲོ་བོའི་རྒྱལ་པོ་ལན་བརྒྱ་རྩ་བརྒྱད་བཟླས་ཏེ། ཉིན་མཚན་གསུམ་དུས་གསུམ་དུ་བཟླས་བརྗོད་དང་མཆོད་པ་བགྱིའོ། །དེ་ནས་པདྨའི་ཞགས་པ་འབར་ཞིང་ཁ་དོག་སྣ་ཚོགས་ཀྱི་འོད་ཟེར་འབྱུང་བར་འགྱུར་རོ། །ལེགས་སོ་ལེགས་སོ་ཞེས་བགྱི་བའི་ཚིག་འབྱིན་པར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་གི་ལུས་ལ་ཁ་དོག་སྣ་ཚོགས་ཀྱི་འོད་ཟེར་འབྱུང་བར་འགྱུར་རོ། །དེ་ནས་རིག་སྔགས་འཆང་ཕྱག་རྒྱའི་སྐྱིལ་མོ་ཀྲུང་གིས་མཆིས་ནས་མིག་མི་འཛུམས་ཤིང་བཞིན་འཛུམ་པས་སྙིང་རྗེ་ཆེན་པོ་ཡིད་ལ་བསྒོམ་པར་བགྱིའོ། །འཕགས་པ་སྤྱན་རས་གཟིགས་དབང་ཕྱུག་གི་གདོང་དུ་བལྟ་སྟེ། དོན་ཡོད་པའི་ཞགས་པའི་སྙིང་པོ་ལན་སུམ་སྟོང་བཟླས་པར་བགྱིའོ། །དེའི་འོག་ཏུ་འཕགས་པ་སྤྱན་རས་གཟིགས་དབང་ཕྱུག་བདག་ཉིད་ཀྱི་ལྷའི་རང་བཞིན་མདུན་དུ་མཆིས་ནས། ལག་པ་གཡས་པ་བརྐྱང་སྟེ་རིག་སྔགས་འཆང་གི་སྤྱི་བོར་བཞག་ནས་ལེགས་སོ་ཞེས་བགྱི་བ་སྩོལ་བར་འགྱུར་ཞིང་། འདི་སྐད་ཅེས་ཀྱང་དབུགས་འབྱིན་པར་འགྱུར་རོ། །རིག་སྔགས་འཆང་ངའི་བུ་སྙིང་ལས་སྐྱེས་པའི་ཐུ་བོ། བཟླས་བརྗོད་ཀྱི་ཆོ་ག་ཆེན་པོ་དང་། མཆོད་པའི་ཆོ་ག་ཆེན་པོ་འདིས་ང་ལ་མཆོད་པའི་མཆོག་བྱས་པ་དང་། བཟླས་བརྗོད་ཀྱི་མཆོད་དང་གྲུབ་པའི་མཆོག་སྟེ། ཁྱོད་ཀྱིས་དོན་ཡོད་རྒྱལ་པོའི་སྙིང་པོ་གྲུབ་ཅིང་། ཁྱོད་ཀྱིས་པདྨའི་ཞགས་པ་ཆེན་པོ་གྲུབ་ཀྱིས། ཅི་ལྟར་ཡིད་ལ་བསམས་པ་བཞིན་དུ་མཆོག་ཁྱེར་ཅིག །ཁྱོད་ཀྱིས་ཡིད་ཀྱི་བརྣག་པ་ཐམས་ཅད་ནི་ཡོངས་སུ་རྫོགས་པར་བྱས། ཁྱོད་འཁོར་བའི་འཇིགས་པ་རྒྱུ་བ་ལས་ནི་གྲོལ། ཁྱོད་སྐྱེ་བ་དང་། རྒ་བ་དང་། ན་བ་དང་། འཆི་བའི་མྱ་ངན་མི་བཟད་པའི་འཇིགས་པ་ལས་ཐར་ན། ཁྱོད་དམྱལ་བ་ཆེན་པོ་མི་བཟད་པ་བཅུ་དྲུག་ལས་ནི་ཡོངས་སུ་གྲོལ། འཇིགས་པ་ཆེན་པོ་མི་བཟད་པའི་སྡུག་བསྔལ་གྱི་ཚོར་བ་བརྒྱད་ལས་ནི་ཡོངས་སུ་ཐར། འདི་ནས་ཕྱི་མའི་སྐྱེ་བའི་མངལ་དུ་གནས་ནས་སྡུག་བསྔལ་མི་བཟད་པ་ལས་ཤི་འཕོས་ཏེ། རིག་
སྔགས་འཆང་ཁྱོད་བྱང་ཆུབ་ཀྱི་སྙིང་པོ་ལ་ཐུག་གི་བར་དུ་འཇིག་རྟེན་གྱི་ཁམས་བདེ་བ་ཅན་དུ་པདྨ་ལས་རྫུས་ཏེ་སྐྱེ་བར་འགྱུར་རོ། །ཁྱོད་ཀྱི་གང་གཱའི་ཀླུང་འབུམ་ཕྲག་སྟོང་བརྒྱད་ཅུ་རྩ་བཞི་སྙེད་ཀྱི་བྱེ་མ་དང་མཉམ་པའི་དེ་བཞིན་གཤེགས་པ་རྣམས་ལ་དགེ་བའི་རྩ་བ་ཆེར་བསྐྱེད་པའི་བསོད་ནམས་ཀྱི་ཚོགས་ཆེན་པོ་དང་ནི་ལྡན། རིག་སྔགས་འཆང་ཁྱོད་ཀྱིས་ལྷག་པར་བྱ་བ་མང་པོ་ནི་བྱས། ཁྱོད་རིག་སྔགས་འཆང་ཆེན་པོར་ནི་ལུང་བསྟན། དམྱལ་བ་དང་། ངན་སོང་གི་ལས་ཀྱི་སྒྲིབ་པ་མི་བཟད་པ་ཐམས་ཅད་ལས་ནི་གྲོལ་གྱིས། ཅི་ལྟར་ཡིད་ལ་བསམས་པ་བཞིན་མཆོག་ཁྱེར་ཅིག །དེ་ནས་རིག་སྔགས་འཆང་གིས་ཅི་ལྟར་ཡིད་ལ་བསམས་པ་བཞིན་དེའི་ཚེ་མཆོག་ཐོབ་པར་འགྱུར་རོ། །དེ་ནས་རིག་སྔགས་འཆང་གིས་པདྨའི་ཞགས་པ་དེ་བླངས་ཏེ་གནས་གཙང་མར་གུས་པས་མཆོད་པ་རྒྱ་ཆེར་བགྱིའོ། །ནམ་དགོས་པ་དེའི་ཚེ་ཞགས་པ་བླང་བར་བགྱིའོ། །ལས་ཐམས་ཅད་བགྱིད་པར་འགྱུར་རོ། །པདྨ་ནི་འཕགས་པ་སྤྱན་རས་གཟིགས་དབང་ཕྱུག་གི་ལག་པ་གཡོན་པར་བཞག་ལ། ལག་པ་གཡས་པས་ཞགས་པ་བཟུང་སྟེ། དོན་ཡོད་པའི་རྒྱལ་པོའི་སྙིང་པོ་ལན་བརྒྱ་རྩ་བརྒྱད་བཟླས་ནས། སེམས་ཅན་ནམ་ལྷ་གང་གི་མིང་ནས་བརྗོད་དེ། བཟླས་བརྗོད་བརྒྱ་རྩ་བརྒྱད་ཚང་བ་དང་། བྱང་ཆུབ་སེམས་དཔའ་མདུན་ན་མཆིས་ནས། འདོད་པའི་མཆོག་ཐམས་ཅད་སྩོལ་བར་འགྱུར་རོ། །དེ་ནས་རིག་སྔགས་འཆང་བྱང་ཆུབ་ཏུ་ལུང་བསྟན་པ་དོན་དུ་གཉེར་བར་འཚལ་ན། རིག་སྔགས་འཆང་གཙང་མས་ལེགས་པར་ཁྲུས་བགྱིས་ཏེ། གོས་གཙང་མ་བགོས་པས་ཉིན་ཞག་གཅིག་མཆིས་པར་གྱུར་པས། སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ལ་མཆོད་པ་རྒྱ་ཆེན་པོ་བགྱིས་ནས། པདྨའི་ཞགས་པ་དེ་ཡང་སངས་རྒྱས་བཅོམ་ལྡན་འདས་ཀྱི་ཕྱག་ཏུ་དབུལ་བར་བགྱིའོ། །ཞགས་པའི་ཐོར་ཏོ་ཡ་གཅིག་གིས་ནི་རང་གི་མགུལ་དུ་བཏགས་ལ་དོན་ཡོད་རྒྱལ་པོའི་སྙིང་པོ་ལན་སྟོང་རྩ་བརྒྱད་ཚང་བར་བཟླས་བརྗོད་བགྱིའོ། །སྟོང་རྩ་བརྒྱད་ཚང་བ་དང་། སངས་རྒྱས་བཅོམ་ལྡན་འདས་སྐུ་གསེར་གྱི་མདོག་ཅན་རིག་སྔགས་འཆང་གི་མདུན་དུ་བཞུགས་ནས་རིག་སྔགས་
འཆང་གི་སྤྱི་བོར་ཕྱག་བཞག་སྟེ་དབུགས་འབྱིན་པར་མཛད་ལུང་སྟོན་པར་མཛད་ཡིད་ཀྱི་བརྣག་པ་ཐམས་ཅད་ཡོངས་སུ་རྫོགས་པར་མཛད་པར་འགྱུར་རོ། །སྒྲིབ་པ་དང་སྡིག་པ་ཚེ་རབས་སྟོང་དུ་བསགས་པ་ཐམས་ཅད་གཏུགས་པར་འགྱུར། ལྷག་མ་མ་ལུས་པར་གཏུགས་པར་གྱུར་ནས། ལུས་ཡོངས་སུ་དག་པར་འགྱུར་རོ། །དྲི་མ་དང་བྲལ་ཞིང་ཕྲག་དོག་དང་། སེར་སྣ་སྤངས་པར་འགྱུར་རོ། །འདི་ནས་མ་འོངས་པའི་སྐྱེ་བའི་མངལ་དུ་གནས་ནས། ལྷ་དང་མིའི་དཔལ་ཉམས་སུ་མྱོང་བར་བགྱིས་ནས། སེམས་ཅན་ཐམས་ཅད་ཀྱི་བླ་མ་གཅིག་པུར་འགྱུར་རོ། །མཆོད་པར་འོས་པ་དང་། བླ་མའི་གནས་སུའང་འགྱུར་རོ། །ནད་རྣམས་དང་བྲལ་བར་འགྱུར་རོ། །སྐྱེ་བོ་ཐམས་ཅད་དགའ་བར་འགྱུར་རོ། །འགུམ་པའི་དུས་སུ་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱིས་དགོངས་པར་འགྱུར། དབུགས་འབྱིན་པར་མཛད།ལེགས་པའི་ལམ་སྟོན་པར་ཡང་མཛད་པར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་མདུན་ན་མཆིས་ནས་དབུགས་འབྱིན་པར་བགྱིད་ཅིང་ལག་པ་གཡས་པ་སྤྱི་བོར་འཇོག་པར་བགྱིད་དོ། །དེ་བདེ་བས་ཤིན་ཏུ་དྲན་པ་ཉེ་བར་བཞག་ནས་ལུས་འདོར་བར་འགྱུར་རོ། །བོར་བ་ཙམ་གྱི་མོད་ལ་སྐལ་བ་མཉམ་པར་བདེ་བ་ཅན་གྱི་འཇིག་རྟེན་གྱི་ཁམས་སུ་སྐྱེ་བར་འགྱུར་ཏེ། རྒྱན་ཐམས་ཅད་ཀྱིས་བརྒྱན་ནས། མཚན་དང་དཔེ་བྱད་ཀྱིས་སྤྲས་པའི་ལུས་པདྨ་ལས་རྫུས་ཏེ་སྐྱེ་བར་འགྱུར་རོ། །ཚེ་རབས་དྲན་པར་འགྱུར་ཏེ། བསྐལ་པ་བརྒྱ་སྟོང་གི་སྐྱེ་བའི་ཚེ་རབས་དྲན་པར་འགྱུར་རོ། །དོན་ཡོད་པའི་ཞགས་པའི་སྙིང་པོ་རྣམ་པར་གྲོལ་བའི་དཀྱིལ་འཁོར་གྱི་ཕྱག་རྒྱ་རིམ་པར་དབྱེ་བའི་ཆོ་ག་ཞིབ་མོ་འདི་མཐའ་དག་རྫོགས་པར་གཡར་ཐོན་དུ་བགྱིས་ནས་ས་བཅུ་ལ་གནས་ཤིང་ཕྱིན་ཅི་ལོག་ཏུ་མ་གྱུར་པས་ཕྱིར་མི་ལྡོག་པར་འགྱུར་རོ། །རྫུ་འཕྲུལ་གྱི་རྣམ་པར་འཕྲུལ་པ་ཆེན་པོ་དང་། ཆོ་འཕྲུལ་ཆེན་པོས་ལྷའི་ཁང་པ་བརྩེགས་པ་དང་། གཞལ་མེད་ཁང་དང་། གནས་མཆོག་དང་། ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ནས། སངས་རྒྱས་ཀྱི་ཞིང་དུ་བྱང་ཆུབ་ཀྱི་སྙིང་པོ་ལ་ཐུག་གི་བར་དུ་མཆི་བར་འགྱུར་རོ། །དེ་ནས་རིག་སྔགས་འཆང་བདེ་བ་ཅན་གྱི་འཇིག་
རྟེན་གྱི་ཁམས་མཐོང་བའི་ཆོས་ཁོ་ན་ལ་བལྟ་བར་འཚལ་ན། རིག་སྔགས་འཆང་གིས་གནས་གཙང་མའི་ཕྱོགས་སམ། གནས་སམ། ཁང་པའམ། དགོན་པའི་གནས་སམ། འཁོར་གྱི་ཁྱམས་སམ། འཆག་སའམ། ཁང་པ་བརྩེགས་པའམ། སྤྱིལ་པོ་གཙང་མ་ཕྱི་བརྡར་ལེགས་པར་བགྱིས་པའི་ས་ཕྱོགས་སུ་དཀྱིལ་འཁོར་གྲུ་བཞི་འབྱེས་པ་ཁྲུ་གང་བའམ། ཁྲུ་དོ་པའི་དཀྱིལ་འཁོར་བགྱི་སྟེ། གྲུ་བཞི་ལྷམ་པ། གྲྭ་ཀུན་ནས་ཆ་མཛེས་པ། ས་དང་སྦྱར་བའི་ལྕི་བས་ཤིན་ཏུ་ལེགས་པར་ཕྱི་བརྡར་བགྱིས་ལ། རྩྭ་སྔོན་པོ་གཉེན་པོ་ལྟ་བུ་ལ་མཁས་པས་དཀྱིལ་འཁོར་མཐའ་དག་གི་ཆ་དབྱེ་བའི་ཐིག་གདབ་པར་བགྱིའོ། །དཀྱིལ་འཁོར་གྱི་དབུས་ཀྱི་སྙིང་བོ་ལ་པདྨ་རྒྱ་ཆེན་པོ་འབྱེས་པ་འདབ་མ་བརྒྱ་པ། ཚོན་སྣ་བརྒྱད་ཀྱི་ཚོན་རྩིས་བཀྲ་བར་བགྱི་ཞིང་མཛེས་པར་བགྱིས་ལ། སྙིང་པོ་ནི་རིན་པོ་ཆེ་ཀ་ཏི་ཀ་ལས་བགྱིའོ། །པདྨའི་མཐའ་ནོར་བུ་རིན་པོ་ཆེ་སྣ་ཚོགས་ཀྱིས་བསྐོར་ལ། གྲྭ་བཞི་ནས་ཁ་ཁྱེར་སོར་བཞི་པའི་ཚད་དུ་བགྱིའོ། །པདྨའི་བར་གྱི་ཟུར་ཟུར་དུ་ཨུཏྤལ་སྔོན་པོ་ལེགས་པར་བྲིས་ལ། ཁ་ཁྱེར་གྱི་ཕྱི་རོལ་དུ་ནོར་བུས་འཁོར་བའི་མཐའ་དེ་མཚོས་བསྐོར་བར་བགྱིའོ། །ལྷའི་ཆབ་རིན་པོ་ཆེ་སྣ་ཚོགས་ཀྱི་གཞལ་མེད་ཁང་གིས་མཛེས་པར་བགྱིས་ལ། ཆབ་ལ་མེ་ཏོག་སྣ་ཚོགས་ཀྱི་སིལ་མ་བཀོད་པ་བྱ་རྣམ་པ་སྣ་ཚོགས་གནས་འཆའ་བ་ངང་པ་དང་། བཞད་དང་། ཁྲུང་ཁྲུང་དང་། ངུར་བ་དང་། ཤང་ཤང་ཏེའུ་དང་། ཀ་ལ་པིང་ཀ་དང་། བྱའི་ཚོགས་ཀྱིས་མཛེས་པར་བགྱིས་ལ། ཉ་དང་ཆུ་སྲིན་དང་། ཆུ་སྲིན་བྱིས་པ་གསོད་ཀུན་ནས་རྟེན་འཆའ་བར་བགྱིད་དོ། །མཚོའི་འགྲམ་ན་རིན་པོ་ཆེའི་ལྗོན་ཤིང་དང་། མེ་ཏོག་གི་ལྗོན་ཤིང་དང་། འབྲས་བུའི་ལྗོན་ཤིང་དང་། སྣ་ཚོགས་པ་ཁ་ཁྱེར་དང་བཅས་པར་བགྱིའོ། །དཀྱིལ་འཁོར་གྱི་ཁ་ཁྱེར་གྱི་ཕྱི་རོལ་ན་ལག་པ་དང་ཐལ་མོའི་ཕྱག་རྒྱ་བྲིས་ལ་སྒོ་བཞི་རྣམས་སུ་རྒྱལ་པོ་ཆེན་པོ་བཞི་བགྱིའོ། །དེ་ནས་དབུས་ཀྱི་དཀྱིལ་འཁོར་ལ་པདྨའི་གདན་བཟང་པོ་བཤམས་ཏེ་དེའི་སྟེང་དུ། བཅོམ་ལྡན་འདས་འོད་དཔག་མེད་དང་། འཕགས་པ་སྤྱན་རས་གཟིགས་དབང་ཕྱུག་དང་
མཐུ་ཆེན་ཐོབ་གཞག་པར་བགྱིའོ། །དཀྱིལ་འཁོར་བུམ་པ་གང་བས་བརྒྱན་པར་བགྱིའོ། །མེ་ཏོག་སིལ་མ་དང་། དྲི་དང་བྱུག་པ་ཡང་དབུལ་བར་བགྱིའོ། །བ་དན་བཟང་པོ་སྣ་ཚོགས་ཀྱིས་བརྒྱན་པར་བགྱིའོ། །གཏོར་མ་དཀར་པོ་དབུལ་བར་བགྱིའོ། །ཡོན་ཆབ་དང་ཞབས་བསིལ་གྱི་སྣོད་དང་། མར་མེའི་ཕྲེང་བ་དབུལ་བར་བགྱིའོ། །པདྨའི་ཞགས་པ་འོད་དཔག་མེད་ཀྱི་ཕྱག་ཏུ་དབུལ་བར་བགྱིའོ། །རིག་སྔགས་འཆང་གཙང་མས་གོས་གཙང་མ་བགོ་བར་བགྱིའོ། །ལེགས་པར་ཁྲུས་བགྱིས་ནས་བའི་རྣམ་ལྔས་ཉེ་རེག་བགྱིས་ལ་ཟླ་བ་ཉ་ལ་ཉིན་ཞག་གཅིག་མཆིས་པར་གྱུར་པས་ཁ་ཤར་ཕྱོགས་སུ་བལྟས་ལ་སྐྱིལ་མོ་ཀྲུང་བཅས་ཏེ་མཆིས་ནས། ལག་པས་ཞགས་པའི་ཕྱག་རྒྱ་བཅིངས་ཏེ་བཟླས་བརྗོད་བགྱིའོ། །བྱམས་པ་དང་བརྩེ་བའི་སེམས་ཀྱིས་ལྷག་པར་བརྩོན་པར་བགྱིའོ། །སྙིང་རྗེས་མཆོག་ཏུ་བརྩེ་བར་གྱུར་པས་སེམས་ཅན་ཐམས་ཅད་ལ་བརྩེ་བར་བགྱིད་ན། དོན་ཡོད་པའི་ཞགས་པའི་སྙིང་པོ་བཟླས་བརྗོད་བགྱིས་ཏེ། ཅི་ཙམ་ན་ཐུན་ཐ་མ་ལ། འོད་དཔག་མེད་འབར་བར་གྱུར་ནས། དཀྱིལ་འཁོར་ཆེན་པོ་དེ་ལ་ཡང་འོད་ཟེར་འབྱུང་བར་འགྱུར་རོ། །རིག་སྔགས་འཆང་གཡོ་བར་གྱུར་ནས་ལུས་འབར་བར་འགྱུར་རོ། །དེ་ནས་རིག་སྔགས་འཆང་གིས་སྐྱ་རེངས་ཤར་ཙམ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཕགས་པ་འོད་དཔག་མེད་གསེར་སྤུངས་པ་ལྟ་བུ་དེ་བཞིན་གཤེགས་པའི་སྐུ་གསེར་གྱི་ཁ་དོག་གིས་རིག་སྔགས་འཆང་གི་མདུན་དུ་བཞུགས་ནས། ཕྱག་གཡས་པ་རིག་སྔགས་འཆང་གི་སྤྱི་བོར་བཞག་ནས། དབུགས་འབྱིན་པར་མཛད་ཅིང་ཡིད་ཀྱི་བརྣག་པ་ཐམས་ཅད་ཡོངས་སུ་རྫོགས་པར་མཛད་ནས་མི་གདའ་བར་གྱུར་པ་དང་། ཤིན་ཏུ་རྣམ་པར་དག་པ་དྲི་མ་མེད་པའི་སྣང་བ་ཞེས་བགྱི་བའི་གཉིད་ཐོབ་ནས། ཅི་ལྟར་ཉལ་བ་ཙམ་མམ་མིག་བཙུམ་པ་ཙམ་གྱིས་འཇིག་རྟེན་གྱི་ཁམས་བདེ་བ་ཅན་གཞལ་མེད་ཁང་དང་། གནས་དང་། འཇིག་རྟེན་དང་། ཡུལ་ལྗོངས་དང་། བྱང་ཆུབ་སེམས་དཔའི་འཁོར་མཐའ་དག་དང་བཅས་པའི་དཀྱིལ་འཁོར་ཡོངས་སུ་རྫོགས་པར་མཐོང་བར་འགྱུར་ལགས་སོ། །དེ་བཞིན་གཤེགས་
པ་དེ་ཆོས་སྟོན་པར་མཛད་པ་ཡང་མཐོང་བར་འགྱུར་ལགས་སོ། །འཁོར་གྱི་དཀྱིལ་འཁོར་དེ་དག་ཐམས་ཅད་དབུགས་འབྱིན་པར་བགྱིད་པ་དང་། གཞལ་མེད་ཁང་དང་། རྣམ་པར་འཕྲུལ་པ་དང་། རྫུ་འཕྲུལ་དང་། ཆོ་འཕྲུལ་ཐམས་ཅད་མཐོང་བར་འགྱུར་ལགས་སོ། །འདི་ནས་མ་འོངས་པའི་སྐྱེ་བ་ནས་ཤི་འཕོས་ཏེ། འཇིག་རྟེན་གྱི་ཁམས་བདེ་བ་ཅན་དུ་སྐལ་བ་མཉམ་པར་སྐྱེ་བར་འགྱུར་རོ། །སྐྱེ་བའི་སྐྱེ་བ་དྲན་པར་འགྱུར་ཏེ་སྐྱེ་བ་བདུན་སྟོང་རྗེས་སུ་དྲན་པར་འགྱུར་རོ། །དེ་སད་ནས་ཞགས་པ་ལ་ལན་སྟོང་རྩ་བརྒྱད་བཟླས་བརྗོད་བགྱིས་ནས། ལག་པ་གཡས་པས་གཟུང་ནས། ནམ་མཁའ་ལ་འཕུར་བར་འགྱུར་རོ། །ལོ་ཁྲིར་འཚོ་བར་འགྱུར་རོ། །ཞགས་པ་གྲུབ་པ་རྣམས་དང་། རིག་སྔགས་འཆང་ཐམས་ཅད་ཀྱི་འཁོར་ལོས་སྒྱུར་བར་འགྱུར་རོ། །འཁོར་ཁྲི་བརྒྱ་སྟོང་དང་ལྡན་པར་འགྱུར་རོ། །པདྨའི་ཞགས་པ་སྒྲུབ་པའི་ཆོ་གའོ།། །།