རྡོ་རྗེའི་ཞགས་པ་ལས་ཐམས་ཅད་བགྱིད་པ་སྒྲུབ་པའི་ཆོ་ག
དེ་ནས་རིག་སྔགས་འཆང་རྡོ་རྗེའི་ཞགས་པ་བསྒྲུབ་པར་འཚལ་ན། ཤིང་ཤུན་དང་། རས་སྐུད་དང་། ཁ་ཆེ་དར་གྱི་སྐུད་པ་མཉམ་དུ་ལྷན་ཅིག་བཀལ་ཏེ། ཁྲུ་ཉི་ཤུ་རྩ་གཅིག་གི་ཚད་ཙམ་དུ་བགྱིས་ལ། ཙན་དན་དཀར་པོ་ལས་རྡོ་རྗེ་སོར་བཞི་བའི་ཚད་དུ་བགྱིས་ཏེ། རྩེ་ལྔ་བ་འབྱུང་པོ་ལ་སོགས་པའི་མགོ་དང་། སྦྲུལ་གྱི་སྐ་རགས་ཀྱིས་བཅིངས་ལ། ཀླུའི་རྒྱལ་པོ་དགའ་བོ་དང་ཉེ་དགའ་བོའི་དྲ་བའི་ཕྲེང་བས་དཀྲི་བ་བགྱིས་ནས་ཞགས་པ་ལ་གདགས་པར་བགྱིའོ། །དེ་ནས་རིག་སྔགས་འཆང་གཙང་མས་གོས་གཙང་མ་བགོ་བར་བྱའོ། །ལེགས་པར་ཁྲུས་བགྱིའོ། །བའི་རྣམ་ལྔས་ཉེ་རེག་བགྱིའོ། །རྩྭའི་སྟན་བཏིང་ནས་རི་མོའི་གཟུགས་ཀྱི་མདུན་དུ་ལག་པ་གཡས་པས་ཞགས་པ་མནན་ནས། དོན་ཡོད་པའི་ཞགས་པའི་སྙིང་པོ་ཁྲི་བཟླས་སོ། །ཁྲོ་བོའི་རྒྱལ་པོའི་སྙིང་པོ་སྟོང་བཟླས་སོ། །དེ་ནས་ཞགས་པ་དེ་འབར་བར་འགྱུར་ཏེ། དེ་བཟུང་ནས་ནམ་མཁའ་ལ་འཕུར་བར་འགྱུར་རོ། །རྡོ་རྗེའི་རིགས་དང་། དེ་བཞིན་གཤེགས་པའི་རིགས་དང་། ནོར་བུའི་རིགས་དང་། པདྨའི་རིགས་གང་དག་ལགས་པ་དེ་དག་ཐམས་ཅད་མདུན་ན་བཞུགས་པར་འགྱུར་རོ། །ལག་ན་རྡོ་རྗེ་དང་འདྲ་བར་གཟུགས་དང་། མཐུ་
དང་། བརྩོན་འགྲུས་ཕ་རོལ་གྱི་ཟིལ་གྱིས་མི་ནོན་པར་འགྱུར་རོ། །ལག་ན་རྡོ་རྗེ་དང་འདྲ་བར་རིག་སྔགས་འཆང་གི་དབང་པོར་འགྱུར་རོ། །ལྷའི་ལོ་ཁྲི་ཉིས་སྟོང་དུ་འཚོ་བར་འགྱུར་རོ། །ལས་ཐམས་ཅད་བགྱིད་པ་རྡོ་རྗེའི་ཞགས་པ་དགྲ་ཐམས་ཅད་འཇོམས་པར་བགྱིད་པའི་ཞགས་པ་སྟེང་ངམ་འོག་གར་འཕངས་པར་ཡིད་ལ་བསམས་པ་བཞིན་ཐམས་ཅད་བཅིངས་ནས་དགུག་པར་བགྱིད་དོ། །ཕྱོགས་བཅུར་འཕང་སྟེ་ཁྲོ་བོའི་རྒྱལ་པོ་བཟླས་ནས་སྐྱེས་པ་དང་། བུད་མེད་དམ། གཞན་གང་ཅི་ཡང་རུང་བ་ཐམས་ཅད་ཞགས་པས་བཅིངས་ནས། མྱུར་དུ་དགུག་པར་བགྱིད་དེ། སོམ་ཉི་མི་བགྱིའོ། །གལ་ཏེ་ལྷ་འམ། ཀླུ་འམ། གནོད་སྦྱིན་ནམ། སྲིན་པོ་འམ། དྲི་ཟ་འམ། ལྷ་མ་ཡིན་ནམ། ནམ་མཁའ་ལྡིང་ངམ། མི་འམ་ཅི་འམ། འབྱུང་པོ་འམ། ལྟོ་འཕྱེ་ཆེན་པོ་ཐམས་ཅད་ཞགས་པས་བཅིངས་ནས་མྱུར་དུ་དགུག་པར་བགྱི་སྟེ་སོམ་ཉི་མི་བགྱིའོ། །ཞགས་པ་ལ་ཁྲོ་བོའི་རྒྱལ་པོ་ལན་ཉི་ཤུ་རྩ་གཅིག་བཟླས་བརྗོད་བགྱི་སྟེ། མར་གྱི་ངོའི་ཚེས་བཅུ་བཞིའི་མཚན་མོ་ནམ་ཕྱེད་ན་ཞགས་པ་ཕྱོགས་བཞིར་འཕང་བར་བགྱིའོ། །འཕངས་པ་ཙམ་གྱི་མོད་ལ་བགེགས་དང་། ལོག་འདྲེན་དང་། གནོད་སྦྱིན་དང་། སྲིན་པོ་དང་། གདུག་པ་ཐམས་ཅད་ཞགས་པས་བཅིངས་ནས། རིག་སྔགས་འཆང་གི་མདུན་ན་མཆིས་ཤིང་ཅི་སྲིད་འཚོའི་བར་དུ་དབང་དུ་གྱུར་ནས་མཆིས་ཏེ། བྲན་བཞིན་དུ་ལས་ཐམས་ཅད་བགྱིད་པར་འགྱུར། བལྟས་པ་ཙམ་གྱིས་གདོན་ཐམས་ཅད་ལས་ཐར་བར་འགྱུར་རོ། །ཞགས་པ་ལ་ཁྲོ་བོའི་རྒྱལ་པོ་ལན་བརྒྱ་རྩ་བརྒྱད་བཟླས་བརྗོད་བགྱིས་ཏེ། ལག་པས་ཞགས་པ་བླངས་ཏེ་དུར་ཁྲོད་དུ་ཞུགས་ན་མི་སྣང་བར་འགྱུར་ཞིང་གནས་ཐམས་ཅད་ཀྱི་སྒོ་དབྱེ་བར་འགྱུར་རོ། །ཕུག་གི་སྒོར་མཆིས་ནས་རྡོ་རྗེའི་ཞགས་པས་བརྡབས་ན། ཕུག་ཐམས་ཅད་ཀྱི་སྒོ་དབྱེ་བར་འགྱུར་ཞིང་འཁྲུལ་འཁོར་དང་གཏན་པ་ཐམས་ཅད་དུམ་བུར་འཆག་པར་འགྱུར་རོ། །ལམ་ངན་པ་དང་། མི་ངན་པ་དང་། མི་མ་ཡིན་པ་དང་། འབབ་ཆུ་ངན་པ་དང་། སྦྲུལ་དང་། དབུགས་གདུག་པ་དང་། སྲོག་ཆགས་གོན་ས་དང་། གདུག་པ་དང་བཅས་པའི་སྲོག་
ཆགས་སུ་གཏོགས་པ་ཐམས་ཅད་མི་གདའ་བར་འགྱུར་རོ། །མི་དྲང་བོ་དང་ལམ་དྲང་བོར་ཅི་ལྟར་རང་གི་གནས་སམ། གཙུག་ལག་ཁང་ངམ། ཁང་པ་བཞིན་དུ་ཞུགས་ནས་དགོས་པ་ཐམས་ཅད་བསྒྲུབས་ཏེ། སླར་ཡང་གནས་ནས་ཕྱིར་ལྡོག་པར་འགྱུར་རོ། །རྡོ་རྗེའི་ཞགས་པ་ལས་ཐམས་ཅད་བགྱིད་པ་སྒྲུབ་པའི་ཆོ་གའོ།། །།