འཇིག་རྟེན་པ་སྒྲུབ་པའི་ཆོ་ག
དེ་ནས་བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པའི་ཕྱག་གསེར་གྱི་ཁ་དོག་ཅན་བརྒྱད་སྟེ་འཕགས་པ་སྤྱན་རས་གཟིགས་དབང་ཕྱུག་གི་དབུའི་སྤྱི་བོར་བཞག་སྟེ་བཀའ་སྩལ་པ། མཆོག་ཏུ་རྨད་དུ་བྱུང་བ་ཞེས་བྱ་བའི་ཆོ་ག་ཞིབ་མོ་གྲུབ་པ་བླ་ན་མེད་པ་དོན་ཡོད་པ་ཆེན་པོའི་བུམ་པ་སྒྲུབ་པ་རིག་པ་འཆང་བ་རྣམས་ཀྱིས་བཀླགས་པས་གྲུབ་པ་འཛམ་བུ་གླིང་བའི་རིགས་བཞིའི་འཇིག་རྟེན་ལ་ཕན་པ་དང་། བདེ་བའི་དོན་དུ་རབ་ཏུ་བྱིན་པ་དང་། སྒྲུབ་པ་ཤིན་ཏུ་བཀྲ་ཤིས་པ་བླ་ན་མེད་པ་རང་གི་བྱིན་གྱི་རླབས་ཀྱི་བྱིན་གྱིས་བརླབས་པ། དོན་ཡོད་པ་ཆེན་པོའི་ཆོ་འཕྲུལ་སངས་རྒྱས་དང་བྱང་ཆུབ་སེམས་དཔའ་བླ་ན་མེད་པ་གྲུབ་པ་ཡང་དག་པར་བསྒྲུབ་པ། ཆེ་ཞིང་ཆེ་བ་བྱང་ཆུབ་ཀྱི་སྙིང་པོའི་ཆོས་ཀྱི་འཁོར་ལོ་བསྐོར་བ། དེ་བཞིན་གཤེགས་པ་ཆེན་པོའི་བྱིན་གྱི་རླབས་ཀྱི་བྱིན་གྱིས་བརླབས་པ། སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་དབུགས་འབྱིན་པ་ཆེན་པོའི་འཇིག་རྟེན་དུ་བཞག་པ་ནི་སེམས་དཔའ་ཆེན་པོ་ལེགས་སོ་ལེགས་སོ། །མཆོག་ཏུ་གྲུབ་པ་བླ་ན་མེད་པ་བསྒྲུབ་པ་བཀླགས་པས་འགྲུབ་པ། རྟག་ཏུ་རྗེས་སུ་འབྲང་བར་འགྱུར་བ། རྟག་ཏུ་མཆོག་སྦྱིན་པར་མཛད་པ། རྟག་ཏུ་རྗེས་སུ་སྐྱོང་བར་མཛད་པ་ནི་སེམས་ཅན་གྱི་བསམ་པ་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་སྤྱན་རས་གཟིགས་དབང་ཕྱུག་ཁྱོད་ལ་ཡོངས་སུ་གཏད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་མཆོག་ཏུ་ཡིད་དགའ་སྟེ། བཞིན་འཛུམ་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ཏེ་བཏུད་ནས། བཅོམ་ལྡན་འདས་ཀྱི་ཞབས་གཉིས་ལ་སྤྱི་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཕྱོགས་བཅུའི་སེམས་ཅན་ཐམས་ཅད་དང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སྲོག་
ཆགས་སུ་གྱུར་པ་ཇི་སྙེད་རི་དགས་དང་བྱ་ཇི་སྙེད་པ་དེ་དག་ཐམས་ཅད་བདག་གིས་ཡོངས་སུ་གཟུང་བར་བགྱི་ཞིང་། སྡུག་བསྔལ་ཐམས་ཅད་ལས་ཡོངས་སུ་ཐར་བར་བགྱི་བ་དང་བྱང་ཆུབ་ཆེན་པོའི་ལམ་ལ་འགོད་པའི་ཕྱིར་སྙིང་རྗེ་ཆེན་པོ་རྣམ་པར་དག་པས་རྗེས་སུ་གཟུང་བར་བགྱིའོ། །བཅོམ་ལྡན་འདས་མངོན་པར་བརྩོན་པ་དེ་དག་ནི་ཐམས་ཅད་ཀྱི་མཆོག་ཏུ་ཡོངས་སུ་གྲོལ་བར་བགྱིའོ། །བཅོམ་ལྡན་འདས་ཡང་དག་པར་འགྲུབ་པར་བྱེད་པའི་རིག་པ་འཛིན་པ་ཐམས་ཅད་ཀྱིས་བདག་དྲན་ན། བཅོམ་ལྡན་འདས་སེམས་ཅན་དེ་ནི་བདག་གིས་རྟག་ཏུ་བལྟ་བར་བགྱིའོ། །རྟག་ཏུ་རྗེས་སུ་དྲན་པ་དང་རྟག་ཏུ་རྗེས་སུ་བསྲུང་བར་བགྱིའོ།། །།འཕགས་པ་དོན་ཡོད་པའི་ཞགས་པའི་ཆོ་ག་ཞིབ་མོའི་རྒྱལ་པོ། བམ་པོ་བཅུ་གཉིས་པ། བཅོམ་ལྡན་འདས་འོན་ཀྱང་དོན་ཁྱད་པར་ཅན་གྱི་ཆེད་དུ། དོན་ཡོད་ཞགས་པའི་སྙིང་པོའི་ཆོ་ག་ཞིབ་མོ་འདི། ཀློག་པ་དང་། སྒྲུབ་པ་དང་། རེག་པ་དང་། མཆོད་པར་བྱེད་པ་ལ་མངོན་པར་བརྩོན་པ་དེ་བདག་ཅག་གིས་བཅོམ་ལྡན་འདས་ཀྱི་ཐུགས་ལས་སྐྱེས་པའི་སྲས་ལྟ་བུར་ཡོངས་སུ་བསྐྱང་བར་བགྱི། ཕྲག་པས་ཡོངས་སུ་བཀུར་བར་བགྱིའོ། །བཅོམ་ལྡན་འདས་དེ་བཞིན་ཉིད་དུ་སེམས་ཅན་ཐམས་ཅད་སྙིང་རྗེ་ཆེན་པོས་ཡོངས་སུ་བཟུང་སྟེ། ཡོངས་སུ་ཐར་པའི་དོན་གྱི་ཆེད་དང་། མཆོག་སྦྱིན་པ་ཡོངས་སུ་རྫོགས་པའི་ཆེད་དང་། རེ་བ་དང་། ཡིད་ཀྱི་ཤིང་རྟ་ཐམས་ཅད་ཡང་དག་པར་དགོངས་པའི་ཆེད་དུ་བདག་གིས་བཅོམ་ལྡན་འདས་ལ་ལྟོས་པ་མེད་པར་བགྱིའོ། །བདག་བཅོམ་ལྡན་འདས་ཀྱི་ཚིམ་པ་མེད་པ་དང་། སེམས་ཅན་ཐམས་ཅད་ཡོངས་སུ་གྲོལ་བའི་ཆེད་དང་། མཆོག་སྦྱིན་པའི་ཆེད་དང་། སྲུང་བའི་ཆེད་དང་། ཐམས་ཅད་ལ་བྱང་ཆུབ་མཆོག་གི་ལམ་ལ་རབ་ཏུ་དགོད་པའི་ཆེད་དང་། བཅོམ་ལྡན་འདས་ཁྱད་པར་དུ་ཆོ་ག་ཞིབ་མོའི་རྒྱལ་པོ་འདི་ལ་གལ་ཏེ་ཀློག་པ་དང་། སྒྲུབ་པ་དང་། དཀྱིལ་འཁོར་དང་། ཕྱག་རྒྱ་ལ་མངོན་པར་བརྩོན་པར་བྱེད་པ་དང་། འཆང་བར་བྱེད་པ་དང་། འདོན་པར་བྱེད་པ་དང་། མཆོད་པར་བྱེད་པ་དང་། ཀུན་ཆུབ་པར་བྱེད་པ་དང་། ཚུལ་
བཞིན་དུ་ཡིད་ལ་བྱེད་པས་སྒོམ་པར་བྱེད་པ་དང་། ཉན་པར་བྱེད་པ་དང་། ཐ་ན་རྣ་བའི་བུ་གར་ཡང་སྒྲ་ལྷུང་བར་འགྱུར་བ་དེ་ལ་བདག་གིས་བཅོམ་ལྡན་འདས་རྟག་ཏུ་དུས་ཐམས་ཅད་དུ་རྒྱུན་རྗེས་སུ་འབྲང་བར་བགྱི། འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཀྱི་མཆོག་ཐམས་ཅད་དང་བཀྲ་ཞིང་རྣམ་པར་བཀྲ་བའི་ལྷ་རྫས་ཐམས་ཅད་རྗེས་སུ་སྩལ་བར་བགྱིའོ། །ཆོ་ག་ཞིབ་མོ་ཆེན་པོ་སྒྲུབ་པར་བྱེད་པ་རྣམས་ཕྱིར་མི་ལྡོག་པའི་གནས་ལ་དགོད་པར་བགྱི། ཐ་ན་དུད་འགྲོའི་སྐྱེ་གནས་སུ་སོང་བའི་རི་དགས་དང་བྱ་རྣམས་ཀྱིའང་སྒྲ་གྲག་པ་རྣ་བའི་བུ་གར་ལྷུང་བ་ཙམ་ལས་ཕྱིར་མི་ལྡོག་པའི་གནས་ལ་རབ་ཏུ་འཇུག་པར་བགྱི། བཅོམ་ལྡན་འདས་ཅི་སླར་ཡང་ཡོངས་སུ་དག་པའི་ཡིད་ཀྱིས་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ལ་རྟག་ཏུ་ཡང་དག་པར་གནས་པས་དོན་ཡོད་ཞགས་པའི་སྙིང་པོ་འདི་སྒྲུབ་པར་བྱེད་པ་དང་། ཀློག་པར་བྱེད་པ་དང་། དཀྱིལ་འཁོར་དང་། ཕྱག་རྒྱ་དང་། ཆོ་ག་ཞིབ་མོའི་རྒྱལ་པོ་སྒྲུབ་པར་བྱེད་པ་དང་། འཆང་བར་བྱེད་པ་དང་། འདོན་པར་བྱེད་པ་དང་། ཐུན་མཚམས་གསུམ་གྱི་གནས་སུ་གནས་པས་རྗེས་སུ་དྲན་པར་བྱེད་པ་དང་། ཉིན་དང་མཚན་མོར་རི་མོར་བྱེད་པ་འདི་རྣམས་བཅོམ་ལྡན་འདས་མིའི་ལུས་སུ་མི་འགྱུར་ཏེ། མིའི་ལུས་དག་པའི་ལུས་སུ་རིག་པར་བྱ། ལྷ་ཞེས་བྱ་བའི་ལུས་སུ་རིག་པར་བྱའོ། །བཅོམ་ལྡན་འདས་བདག་གིས་རྟག་པར་རྒྱུན་དུ་ཕྲག་པས་ཡོངས་སུ་བཀུར་བར་བགྱི། བཅོམ་ལྡན་འདས་བདག་གི་སྤྱི་བོར་སོན་པ་བཟུང་བར་བགྱི། བཅོམ་ལྡན་འདས་གང་གི་སླད་དུ་ཞེ་ན། བཅོམ་ལྡན་འདས་ལྷའི་ལུས་འདི་ནི་མིའི་ལུས་སུ་རིག་པར་བགྱི་བ་མ་ལགས་སོ། །གང་གི་སླད་དུ་ཞེ་ན་བཅོམ་ལྡན་འདས་དོན་ཡོད་པའི་ཞགས་པའི་སྙིང་པོ་འདི། མིའི་ལུས་ཀྱི་སྙིང་དང་། ནང་གི་ཡིད་ལ་གནས་པ་དེས། དེའི་མཐུས་དོན་ཡོད་ཞགས་པའི་སྙིང་པོ་ཆེན་པོའི་མཐུ་ཡིས། མིའི་ལུས་དག་པའི་ལྷའི་ལུས་སུ་འགྱུར་ཏེ། ལྷའི་ལུས་སུ་རིག་པར་བྱའོ། །འཇིག་རྟེན་དབང་ཕྱུག་གི་ལུས་སུ་རིག་པར་བྱའོ། །ཡིད་བཞིན་གྱི་ནོར་བུ་རིན་པོ་ཆེའི་ལུས་སུ་རིག་པར་
བྱའོ། །དེ་བཞིན་གཤེགས་པའི་མཛོད་རྒྱ་མཚོ་ཆེན་པོའི་དཀྱིལ་འཁོར་གྱི་ལུས་སུ་རིག་པར་བྱའོ། །དོན་ཡོད་པའི་སྙིང་པོའི་ལུས་སུ་རིག་པར་བྱའོ། །དྲི་མ་དང་བྲལ་ཞིང་། སེར་སྣ་དང་ཕྲག་དོག་སྤངས་པའི་ལུས་སུ་རིག་པར་བྱའོ། །སྡིག་བ་དང་སྒྲིབ་པ་ཐམས་ཅད་རྣམ་པར་དག་ཅིང་དྲི་མ་མེད་པའི་ལུས་སུ་རིག་པར་བྱའོ། །ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་ཐམས་ཅད་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། ཕྱག་བྱ་བའི་འོས་སུ་རིག་པར་བྱའོ། །སུམ་ཅུ་རྩ་གསུམ་པའི་ལྷ་རྣམས་ཀྱིས་བསྲུངས་པའི་ལུས་སུ་རིག་པར་བྱའོ། །དེ་བཞིན་གཤེགས་པ་གང་གཱའི་ཀླུང་གི་བྱེ་མ་བྱེ་བ་ཁྲག་ཁྲིག་བརྒྱ་སྟོང་ཕྲག་བདུན་ཅུ་རྩ་གཉིས་ཀྱིས་བསྐྱེད་པའི་དགེ་བའི་རྩ་བ་དང་། ཡང་དག་པར་ལྡན་པའི་ལུས་སུ་རིག་པར་བྱའོ། །ཚེ་དཔག་ཏུ་མེད་པའི་ལུས་སུ་རིག་པར་བྱའོ། །བྱང་ཆུབ་སེམས་དཔའ་ཐམས་ཅད་ཀྱིས་དབུགས་ཕྱུང་བའི་ལུས་སུ་རིག་པར་བྱའོ། །ལག་ན་རྡོ་རྗེས་རྡོ་རྗེར་བྱིན་གྱིས་བརླབས་པའི་ལུས་སུ་རིག་པར་བྱའོ། །རྒྱ་མཚོ་ཆེན་པོ་ཟབ་མོའི་ཆུའི་རིགས་དཀུ་དང་མཉམ་ཞིང་མཚུངས་པའི་ལུས་སུ་རིག་པར་བྱའོ། །དེ་མ་ཐག་ཏུ་ལྷུན་པོ་ཆེན་པོའི་ལུས་སུ་རིག་པར་བྱའོ། །ནམ་མཁའ་ཆེན་པོ་ཡོངས་སུ་དག་པ་དང་། ནོར་བུ་རིན་པོ་ཆེ་ཆེན་པོ་དང་འདྲ་བར་འགྱུར་ཏེ། ལྷའི་ལུས་དང་ལྷའི་ཁམས་ཀྱི་སྙིང་པོ་མཉམ་པའི་ལུས་སུ་རིག་པར་བྱའོ། །དེ་ལྟར་མཐུ་ཆེན་པོ་དང་སྟོབས་ཆེན་པོ་ཞེས་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་ཤིང་ལུང་བསྟན་པར་འགྱུར་ཏེ། ལུས་ཆེན་པོར་ཡང་འགྱུར་རོ། །བཅོམ་ལྡན་འདས་འོན་ཀྱང་སེམས་ཅན་སྒྲུབ་དཀའ་བ། ཁོང་དུ་ཆུད་པར་དཀའ་བ། གཏིང་དཔག་པར་དཀའ་བ། དད་པ་མེད་པ། སེར་སྣས་ཡོངས་སུ་དཀྲིས་པ། སྡིག་པ་དང་། གདུག་བ་དང་། ལྷག་མ་དང་། སྦགས་པ་དང་། ཁྲོ་བ་དང་། ཞེ་གདུག་པ་མང་བ་དེས་ནི་བཅོམ་ལྡན་འདས་སེམས་ཅན་རང་གི་ཉེས་པ་ལགས་ཀྱི་བཅོམ་ལྡན་འདས་བདག་གིས་ཉེས་པ་ནི་མ་ལགས་
སོ། །བཅོམ་ལྡན་འདས་འོན་ཀྱང་བདག་དྲན་པ་ཙམ་གྱིས་སྙིང་པོ་འདི་ཀློག་པ་དང་། ཁ་ཏོན་དུ་བྱེད་པ་དང་། བཟླས་པ་ཙམ་གྱིས་ཡང་དག་པར་དགོངས་པར་བགྱི་མཐོང་བ་སྩལ་བར་བགྱིའོ། །ཡང་དང་ཡང་དུ་བསྐུལ་བར་བགྱིའོ། །བཅོམ་ལྡན་འདས་སེམས་ཅན་དེ་རྣམས་ནི་བདག་ལ་ལྟ་བར་མི་བྱེད་པ་དང་། བསམ་པར་མི་བྱེད་པ་དང་། སེམས་པར་མི་བྱེད་པ་དང་། སྐད་ཅིག་ཡུད་ཙམ་ཐང་ཅིག་ཡིད་ལ་བྱེད་པས་ཀུན་ཏུ་འཛིན་པར་མི་བྱེད་ལགས་ཏེ། གདུག་པའི་བསམ་པ་དང་། གདུག་པའི་སེམས་ཀྱིས་སེམས་ཅན་རང་གི་ཉེས་པས་ཡང་དག་པར་གང་བའི་ལུས་ལགས་སོ། །བཅོམ་ལྡན་འདས་བདག་ནི་སེམས་པ་དང་། དྲན་པ་དང་། རྣམ་པར་ལྟ་བར་བྱེད་པ་ཙམ་གྱི་མོད་ལ་མདུན་ན་ཉེ་བར་འདུག་པར་བགྱི། མཐོང་བ་དང་ཡང་དག་པའི་གཏམ་ཀུན་ཏུ་སྨྲ་བ་དང་། ཡང་དག་པར་འགྲོགས་པར་བགྱིའོ། །སེམས་ཅན་དེ་རྣམས་ནི་རིག་སྔགས་འཆང་ཐ་ན་སེམས་ཀྱི་ཀུན་ཏུ་རྟོག་པ་ཙམ་ཡང་མི་སྐྱེ་སྟེ། ཡིད་ལ་བྱེད་པ་དང་། སེམས་པར་བྱེད་པ་ཡང་མ་ལགས་སོ། །འདི་ལྟ་སྟེ། དགེ་སྦྱོང་གི་ཆ་བྱད་སྐྲ་བཞར་ཞིང་ངུར་སྨྲིག་ཙམ་འཆང་བའི་ཆ་བྱད་ནི་བྲམ་ཟེ་དང་། རྒྱལ་རིགས་ཀྱི་ཆ་བྱད་དང་། ཚོང་པ་དང་དེད་དཔོན་ཆེན་པོའི་ཆ་བྱད་དང་། བྱིས་པ་དང་། བཅོམ་ལྡན་འདས་ཀྱི་ཆ་བྱད་དང་། རྒྱལ་པོ་དང་། བློན་པོ་དང་། འགྲོགས་བཤེས་དང་། གོས་དམར་པོ་ཅན་ལ་མཁན་པོ་དང་། སློབ་དཔོན་དང་མཚུངས་པར་མཁན་པོ་དང་། བུ་དང་། བུ་མོ་དང་། མ་དང་། ཕ་དང་། སྲིང་མོར་ཉེ་བར་ལྟ་བར་བྱེད་དོ། །འོན་ཀྱང་མཁས་པ་ནི་ལྷག་པའི་བསམ་པ་ཡང་དག་པར་རྫོགས་པ་ལ་གནས་པས། གཟུགས་དང་། ཁ་དོག་དང་། རྟགས་དང་། དབྱིབས་དང་། སྐད་དང་། ཡང་དག་པའི་གཏམ་སྨྲ་བ་དང་། ཚིག་འབྲུ་དང་། ཡི་གེ་དང་། དུས་ཚིགས་སུ་འགྲོ་བ་ཡང་དག་པར་མཚོན་པར་བྱ། ཡང་དང་ཡང་དུ་གཏམ་ཀུན་ཏུ་སྨྲ་བ་ལ་རྣམ་པར་སྤྱད་པར་བྱ། དེའི་འོག་ཏུ་ཤེས་པར་བྱའོ། །འཕགས་པའི་སེམས་ཅན་ནོ་ཞེས་བལྟ་བར་བྱ། བདག་ལ་བལྟ་བར་འདོད་པ་དང་། བདག་མཐོང་བར་འདོད་པ་དེར་ཉེ་བར་འགྲོ་
བར་བགྱིའོ། །དེ་ལྟ་བུའི་ཆོ་གས་ཤིན་ཏུ་གསལ་བར་མཐོང་བསྩལ་བར་བགྱི། རེ་བ་ཐམས་ཅད་དང་། ཡིད་ཀྱི་ཤིང་རྟ་ཡོངས་སུ་རྫོགས་པར་བགྱི། སྐྱེ་བོ་ཆེན་པོའི་དབུས་སུ་ཉོ་བ་དང་། འཚོང་བ་དང་། ཀུན་ཏུ་སྨྲ་བ་དང་། ཡང་དག་པར་སྨྲ་བའི་ཐ་སྙད་ཡང་དག་བར་བགྱི། འདུན་སའི་དབུས་སུ་བསྟན་བཅོས་དང་། སྙན་དང་གས་དང་། རིག་བྱེད་དང་། གསང་སྔགས་དང་། རིགས་པ་དང་། བརྡ་སྤྲོད་པ་དང་། མདོ་སྡེ་དང་། ཟློས་གར་དང་། དྲི་ཟའི་གླུ་དབྱངས་ཀྱི་ཐ་སྙད་ཡང་དག་པར་བགྱི། བྱང་ཆུབ་སྒྲུབ་པ་ལ་ཚུལ་དང་། འདུལ་བ་དང་། ཐེག་པ་ཆེན་པོའི་ཆོས་ཀྱི་མན་ངག་ལྷག་པར་བགྱི། བྲམ་ཟེ་རྣམས་ལ་སྔོན་རབས་དང་། རིག་བྱེད་དང་། མེའི་སྦྱིན་སྲེག་དང་། བྷ་ར་ཏ་དང་། རཱ་མཱ་ཡ་ཎ་བསྟན་པར་བགྱི། གསང་སྔགས་སྨྲ་བ་རྣམས་ལ། གསང་སྔགས་ཀྱི་བཟླས་བརྗོད་དང་། དཀྱིལ་འཁོར་དང་། ཕྱག་རྒྱ་དང་། ཆོ་ག་ཞིབ་མོ་དང་། གཟུངས་ཀྱི་བཟླས་བརྗོད་དང་། སྦྱིན་སྲེག་དང་། ཞི་བ་དང་། རྒྱས་པ་དང་། མངོན་སྤྱོད་ལ་སོགས་པ་བསྟན་པར་བགྱི། གང་གིས་བདག་མངོན་སུམ་དུ་མདུན་ན་འདུག་བར་ཅི་ཞིག་གིས་ཤེས་པར་བྱ་ཞེ་ན། རྣམ་པ་གསུམ་གྱིས་ཤེས་པར་བྱ་སྟེ། ཚིག་སྙན་པ་དང་། འཇམ་ཞིང་མཉེན་པའི་ངག་མི་འགྱུར་ཞིང་ཡོངས་སུ་གསལ་བར་རབ་ཏུ་འབྱེད་པ་ཡིན་པ་དང་། ངག་གསལ་བ་ཡིན་པས་ཏེ། ཐམས་ཅད་དུ་མཆོག་ཏུ་སྨྲ་ཞིང་སོ་སོར་ཁྱད་པར་དུ་བྱེད་པའོ། །ཁ་ནས་ཨུཏྤ་ལའི་དྲི་དང་ལྡན་པའི་རླུང་གནས་པ་དང་། ལུས་ལས་ཀྱང་གླ་རྩིའི་དྲི་གནས་པས་ཏེ། འོན་ཀྱང་འཇིགས་སུ་རུང་བའི་གཟུགས་ལ་ཤིན་ཏུ་དཔལ་གྱིས་འབར་བར་བྱེད་དོ། །དེས་ན་རིག་སྔགས་འཆང་གིས་གཞན་ནམ། འཇིག་རྟེན་གྱི་རིགས་བཞི་པོ་གང་ཡང་རུང་བ་འདི་འཕགས་པ་སྤྱན་རས་གཟིགས་དབང་ཕྱུག་གོ་ཞེས་དེ་གསལ་བར་ཤེས་པར་བྱ་སྟེ། འདི་ལ་ཡིད་གཉིས་དང་དོགས་པ་བསྐྱེད་པར་མི་བྱའོ། །རྨི་ལམ་དུ་ཡང་ཐུན་མཚམས་བཞི་རུ་སྣ་ཚོགས་པའི་གཟུགས་དང་ཁ་དོག་དང་དབྱིབས་སུ་མཐོང་བ་སྩལ་བར་བགྱི། རེ་བ་ཐམས་ཅད་དང་། ཡིད་ཀྱི་ཤིང་རྟའི་མཆོག་རྗེས་སུ་སྩལ་བར་བགྱི།
ལྷུན་གྱིས་གྲུབ་བ་ལས་ཕན་པ་ཐམས་ཅད་དང་། ཕུན་སུམ་ཚོགས་པའི་འབྱོར་པ་ཡོངས་སུ་རྫོགས་པར་བགྱི། བཅོམ་ལྡན་འདས་ནམ་དུ་ཡང་རྣམ་པ་གཞན་དུ་མི་འགྱུར་བར་བགྱིའོ། །ཡོངས་སུ་གཏང་བར་མི་བགྱིའོ། །དེ་ནས་མཆོག་སྦྱིན་པ་ལ་ལྟོས་པར་མི་བགྱིའོ། །བཅོམ་ལྡན་འདས་བརྫུན་དུ་སྨྲ་བ་དེའི་དངོས་གྲུབ་ཡང་དག་པར་རྗེས་སུ་མི་མཐོང་ཞིང་། ལྷ་རྣམས་དེ་ལ་བསྲུང་བ་དང་། ཡོངས་སུ་སྐྱོང་བར་མི་བགྱིད་པ་ནི་མ་གཏོགས་སོ། །བཅོམ་ལྡན་འདས་དེ་ཡང་སེམས་ཅན་སྡུག་བསྔལ་ཅན་དེའི་སྐྱོབ་པ་དང་། དཔུང་གཉེན་དང་། སྐྱབས་དང་། འཁྲ་སར་འགྱུར་བར་བགྱི། གདོན་མི་ཟ་བར་བརྩེ་བ་མེད་པར་འགྱུར་བ་མ་ཡིན་ནོ་ཞེས་མཆོག་ཏུ་བསྒྲལ་བར་བགྱིའོ། །བཅོམ་ལྡན་འདས་དེ་ལྟར་སྙིང་རྗེས་ཡོངས་སུ་ཟིན་པའི་ཡིད་ཀྱིས་སེམས་ཅན་ཐམས་ཅད་བླ་ན་མེད་པར་བགྱི། ཡང་དག་པར་གཟུང་བར་བགྱི། སེམས་ཅན་འདི་དག་ལ་གདོན་མི་ཟ་བར་བྱང་ཆུབ་ཀྱི་ས་བོན་རྗེས་སུ་གདབ་པར་བགྱིའོ་ཞེས་སོ། །དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དེ་དང་། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ལེགས་སོ་ཞེས་བྱ་བ་བྱིན་ཏེ། ལེགས་སོ་ལེགས་སོ་སེམས་དཔའ་ཆེན་པོ་མཆོག་གི་སྙིང་རྗེ་ཅན། ཁྱོད་སེམས་ཅན་ལ་མཉེས་གཤིན་པ་གང་གིས་སེམས་ཅན་དེ་རྣམས་ཐམས་ཅད་སྙིང་རྗེ་ཆེན་པོས་ཡོངས་སུ་བཟུང་སྟེ་མཆོད་པར་བྱེད་ཅིང་། འཁོར་བ་ཆེན་པོར་སྤྱོད་པར་བྱེད་པ་ལས་ཡོངས་སུ་ཐར་བ་གང་ཡིན་པ་དང་། བསད་པར་འོས་པ་ཤིན་ཏུ་ཡོངས་སུ་གྱུར་པ་བྱིང་བར་གནས་པ་དང་། བཀྲེས་པ་དང་། སྐོམ་པས་ཉེན་པ་དང་། འཇིགས་པ་དང་། སྐྲག་པ་དང་། ཡིད་འབྱུང་ཞིང་སྐྱོ་བ་དང་། སྡུག་བསྔལ་མང་བ་དེས་ན་སེམས་ཅན་དེའི་དོན་ཡོད་པའི་རྒྱལ་པོའི་སྙིང་པོའི་དཀྱིལ་འཁོར་དང་། ཕྱག་རྒྱ་རིམ་པར་ཕྱེ་བ་དང་། ཆོ་ག་ཞིབ་མོའི་རྒྱལ་པོ་ཆེན་པོ་འདིའི་མིང་འཛིན་པ་དང་། སྒྲ་རྣ་བའི་བུ་གར་ལྷུང་ཞིང་ཐོས་པར་བྱེད་པ་དེའི་སྡུག་བསྔལ་ཆེས་ཆེ་བ་དེ་རྣམས་དང་། སྡིག་པ་དང་། སྒྲིབ་པ་ཐམས་ཅད་ཡོངས་སུ་
གྲོལ་ཏེ། འཇིགས་པ་ཐམས་ཅད་ཞི་བར་འགྱུར་རོ། །དམྱལ་བའི་འཇིགས་པ་ཆེན་པོ་ལས་འདོན་ཅིང་ཡོངས་སུ་གྲོལ་བར་འགྱུར་རོ། །འཇིག་རྟེན་དང་འཇིག་རྟེན་ལས་འདས་པ་རྣམས་སྡིག་པ་ཐམས་ཅད་དང་། དམྱལ་བའི་སྡུག་བསྔལ་གྱི་ཚོར་བ་མྱོང་བའི་ལས་ཀྱི་སྒྲིབ་པ་རྣམས་ཡོངས་སུ་ཟད་ཅིང་ཡོངས་སུ་གཏུགས་པར་འགྱུར་རོ། །དེ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱིས་ཡོངས་སུ་འཛིན་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱིས་ལུང་བསྟན་པར་འགྱུར་རོ། །ལན་བདུན་ཐོས་པ་ཙམ་གྱིས་སེམས་ཅན་དེ་རྒལ་བར་འགྱུར་རོ། །ཚོགས་ཆེན་པོ་བསགས་པ་དང་། དེ་བཞིན་གཤེགས་པས་དབུགས་ཕྱུང་བ་ཡིན་ནོ། །བྱང་ཆུབ་ཀྱི་ས་བོན་ཡོངས་སུ་རྫོགས་པར་འགྱུར་རོ། །སྤྱན་རས་གཟིགས་དབང་ཕྱུག་འོན་ཀྱང་སེམས་ཅན་འདི་དག་ནི་འཕགས་པ་སྤྱན་རས་གཟིགས་དབང་ཕྱུག་དོན་ཡོད་ཞགས་པའི་སྙིང་པོ་དཀྱིལ་འཁོར་དང་། ཕྱག་རྒྱ་རིམ་པར་ཕྱེ་བ་དང་བཅས་པའི་ཆོ་ག་ཞིབ་མོ་མཐའ་དག་རྫོགས་པར་ཉན་པར་བྱེད་པ་དང་། ཀློག་པར་བྱེད་པ་དང་། འཆང་དུ་འཇུག་པ་དང་། འདོན་དུ་འཇུག་པ་དང་། མཆོད་པར་བྱེད་པ་དང་། འདྲི་བར་བྱེད་པ་དང་། འདྲིར་འཇུག་པ་དང་། མཆོད་པ་ཆེན་པོ་བྱེད་པ་དེའི་སེམས་ཅན་དེ་རྣམས་ཕྱིར་མི་ལྡོག་པར་རིག་པར་བྱ་སྟེ། འདི་ལ་ཐེ་ཚོམ་དང་། དོགས་པ་བསྐྱེད་པར་མི་བྱའོ། །འོན་ཀྱང་རིལ་བུ་དང་། མིག་སྨན་དང་། བདུག་པ་ལག་ཏུ་ཐོགས་པར་འགྱུར་བ་དེའི་སེམས་ཅན་དེ་རྣམས་ཆེར་དག་ཅིང་ཀུན་ནས་ཕྱོགས་བཅུ་རྣམས་སུ་དེ་བཞིན་གཤེགས་པ་ཐམས་ཅད་ཀྱིས་ཡོངས་སུ་འཛིན་པར་འགྱུར་རོ། །དེ་བཞིན་གཤེགས་པ་ཐམས་ཅད་མཉེས་པར་བྱས་པར་འགྱུར་རོ། །ཕྱག་ན་པདྨ་དང་། རིགས་ཀྱི་བུའམ་རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་དོན་ཡོད་ཞགས་པའི་སྙིང་པོ་དང་། ཀུན་ཏུ་ཁྲོ་བོའི་ཕྱག་རྒྱའི་སྙིང་པོ་འདི་ལན་བདུན་སྨྱུང་བར་གནས་པའི་ཆོ་གས་མཆོད་པ་བྱེད་ཅིང་བཟླས་པ་འབུལ་བར་བྱེད་ཅིང་དབང་སྐུར་བར་བྱེད་
པ་དེ་ནི་མཐོང་བའི་ཆོས་ཉིད་ལ་དེ་བཞིན་གཤེགས་པའི་ལུས་སུ་རིག་པར་བྱའོ། །དེ་བཞིན་གཤེགས་པའི་ཆོས་ཉིད་དངོས་སུ་མཐོང་སྟེ། དེ་བཞིན་གཤེགས་པའི་མཛོད་ལག་ཏུ་སོན་པར་འགྱུར་ཏེ་ཡིད་ཀྱིས་ཐེ་ཚོམ་མི་བྱའོ། །འཁོན་དང་དྲེགས་པ་ཐམས་ཅད་ཡོངས་སུ་སྤངས་པས་བྱ་སྟེ། སྙིང་རྗེ་ཆེན་པོས་ཡོངས་སུ་བཟུང་བས་སེམས་ཅན་དེ་རྣམས་ཐམས་ཅད་ཀྱི་མཐར་ཐུག་པར་འགྱུར་བར་བྱ་ཞིང་བཟླས་པ་སྦྱིན་པར་བྱའོ། །གང་ཡང་དོན་ཡོད་པའི་དཀྱིལ་འཁོར་ཆེན་པོ་འཆད་པར་བྱེད་པ་དང་། མཐོང་བ་དང་། ལྟ་བར་བྱེད་པ་དང་། རས་རིས་ཆེན་པོ་འདི་ལྟ་བར་བྱེད་པ་དེ་ནི་དེ་བཞིན་གཤེགས་པ་དེ་རྣམས་ཐམས་ཅད་ཀྱི་སངས་རྒྱས་ཀྱི་ཞིང་ཕྱོགས་བཅུ་ཀུན་ཏུ་གང་གཱའི་ཀླུང་གི་བྱེ་མ་དང་མཉམ་པའི་སངས་རྒྱས་ཀྱི་ཞིང་རྣམས་སུ་རྗེས་སུ་ཞུགས་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་གསང་བ་དམ་ཚིག་ཆེན་པོའི་སྙིང་པོ་རབ་ཏུ་ཞུགས་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་སྐུ་མཐོང་བར་འགྱུར་རོ། །ཁྲོ་བོའི་རྒྱལ་པོ་འདིས་དབང་བསྐུར་བས་དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བར་འགྱུར་རོ། །དེ་ལྟར་ཡོན་ཏན་དང་། ཕན་ཡོན་ཆེན་པོ་དང་། བསོད་ནམས་ཀྱི་ཕུང་པོ་ཆེན་པོ་དང་ལྡན་པར་འགྱུར་རོ། །དགེ་བའི་རྩ་བ་ཆེན་པོ་ཡོངས་སུ་འཛིན་པར་འགྱུར་རོ། །དེ་བཞིན་དུ་ཕན་ཡོན་ཆེན་པོ་དང་། མཐུ་ཆེན་པོ་དང་། ཡོན་ཏན་ཆེན་པོ་བསྐྱེད་པར་བྱ་བ་ཆོ་ག་ཞིབ་མོའི་རྒྱལ་པོ་ཆེན་པོའི་ཆོ་ག་སྟེ། ཆོ་ག་ཞིབ་མོའི་རྒྱལ་པོ་ཆེན་པོ་འདི་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གི་མིང་འཛིན་པ་དང་མཐོང་བ་ཙམ་གྱིས་མཐོང་བའི་ཆོས་ཉིད་ལ་ཆོ་འཕྲུལ་ཆེས་ཆེ་བ་དང་། དེ་བཞིན་གཤེགས་པའི་བྱིན་གྱིས་རློབ་པ་བལྟ་བ་འདི་དག་མཚུངས་སོ། །ཆོ་ག་ཞིབ་མོའི་རྒྱལ་པོའི་དཀྱིལ་འཁོར་དང་། སྙིང་པོ་དང་། ཕྱག་རྒྱ་དང་། གཟུངས་དང་། དོན་ཡོད་པའི་རྒྱལ་པོའི་རྣམ་པར་འཕྲུལ་པ་གླེགས་བམ་དུ་བྲིས་པ་ལྟ་བར་བྱེད་པ་འདི་དག་མཚུངས་སོ། །དེ་བཞིན་གཤེགས་པ་གང་གཱའི་ཀླུང་གི་བྱེ་མ་བྱེ་བ་བརྒྱ་སྟོང་ཕྲག་དང་མཉམ་པའི་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་ཁྲག་ཁྲིག་བརྒྱ་སྟོང་ཕྲག་རྣམས་མཐོང་བར་འགྱུར་རོ། །དེ་བཞིན་གཤེགས་པ་དེ་རྣམས་ཐམས་ཅད་དུ་ཡང་དག་པར་རྗེས་སུ་འབྲང་བར་འགྱུར་རོ། །ཡང་དག་པར་སྲུང་བའི་ཆེད་དང་། ཡང་དག་པར་དབུགས་འབྱིན་པའི་ཆེད་དུ་མཐོང་བར་གནས་སོ། །གླེགས་བམ་བྲིས་པ་འདི་ཡང་མཐོང་བ་ཙམ་གྱིས་མཚམས་མེད་པའི་ལས་རྣམས་དང་། སྔོན་གྱི་སྒྲིབ་པ་ཐམས་ཅད་ཡོངས་སུ་ཟད་པ་དང་ཡོངས་སུ་གཏུགས་པར་འགྱུར་རོ། །མཐོང་བའི་ཆོས་ཉིད་ལ་དཔལ་དང་། གཡང་མང་པོ་དང་། གཟི་བརྗིད་དང་ལྡན་པར་འགྱུར་རོ། །ཤི་འཕོས་ནས་བདེ་བ་ཅན་གྱི་འཇིག་རྟེན་གྱི་ཁམས་སུ་པདྨ་ལས་རྫུས་ཏེ་སྐྱེ་བར་འགྱུར་རོ། །འདི་ནི་སྐྱེ་བའི་ཐ་མའོ། །གླེགས་བམ་འདི་མཐོང་ན། ཚེ་དང་བྲལ་བ་ཡང་ཚེ་འཕེལ་བར་འགྱུར་རོ། །ནད་རྣམས་དང་བྲལ་བར་འགྱུར་རོ། །སྒྲིབ་པ་དང་། ཁྲོ་བ་དང་བྲལ་བར་འགྱུར་རོ། །མཆོག་ཆེན་པོ་གྲུབ་པར་འགྱུར་རོ། །གྲུབ་པ་ཆེན་པོ་དང་། རྣལ་འབྱོར་གྱི་དབང་ཕྱུག་ཏུ་འགྱུར་རོ། །ཡོན་ཏན་ཕུན་སུམ་ཚོགས་པ་ཐམས་ཅད་དང་ལྡན་པར་ཡང་འགྱུར་རོ། །གླེགས་བམ་འདི་ནི་ཆོས་ཀྱི་དབྱིངས་དང་མཉམ་པའི་དེ་བཞིན་གཤེགས་པ་དང་མཚུངས་པར་རིག་པར་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ཀྱི་སྤྱན་སྔར་བཞིན་འཛུམ་ཞིང་སྙིང་གཡོ་བ་དང་བཅས་པ་འོད་ཟེར་འབར་ཞིང་སྣང་བར་བྱེད་བཞིན་པ་རྒྱན་བྱེ་བ་ཁྲག་ཁྲིག་བརྒྱ་སྟོང་ཕྲག་གིས་ཡང་དག་པར་བརྒྱན་པའི་ལུས་བཅོམ་ལྡན་འདས་ཀྱི་སྤྱན་སྔར་འདུག་སྟེ་གསོལ་པ། བཅོམ་ལྡན་འདས་བདག་ལ་པདྨོ་ཡངས་པའི་དཀྱིལ་འཁོར་ཆེན་པོར་ཀུན་ནས་དོན་ཡོད་པའི་རས་རིས་བལྟ་བ་དང་། དོན་ཡོད་ཞགས་པའི་སྙིང་པོ་གང་གིས་དོན་ཡོད་པའི་རས་རིས་ཀྱི་བྱ་བས་དེ་རྣམས་ཐམས་ཅད་ལ་སྒྱུ་མ་ལྟ་བུའི་ཏིང་ངེ་འཛིན་གྱི་མཐོང་བའི་རྣམ་འཕྲུལ་སྟོང་ཕྲག་མང་པོ་མཐོང་བ་དང་། རྣམ་པ་སྣ་ཚོགས་གཟུགས་དང་། ཁ་དོག་དང་། རྟགས་མཐོང་བ་དང་། གཟུགས་གཅིག་གི་རྗེས་སུ་འཇུག་པར་མཚུངས་
སོ་ཞེས་མི་འཇུག་གོ། །འདི་ལྟ་སྟེ། དབང་ཕྱུག་དང་། དབང་ཕྱུག་ཆེན་པོ་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་ཕྱུགས་བདག་ཆེན་པོ་དང་། གཤིན་རྗེ་དང། ཆུ་ལྷ་དང་། ལུས་ངན་དང་། དྲང་སྲོང་གི་ཚོགས་དང་། གཞོན་ནུ་དང་། དེད་དཔོན་དང་། ཚོང་པ་དང་། རིག་སྔགས་འཆང་དང་། ཟླ་བ་དང་། ཉི་མ་དང་། རྒྱུ་སྐར་དང་། སྐར་མའི་ཚོགས་ལུས་གཅིག་པུས་རྗེས་སུ་འཇུག་པར་འགྱུར་རོ། །བཅོམ་ལྡན་འདས་གང་གིས་མཐོང་བ་ཙམ་གྱི་མོད་ལ་དོན་ཡོད་པའི་ཞགས་པའི་དཀྱིལ་འཁོར་ཆེན་པོ་དང་། དམ་ཚིག་དང་། ཕྱག་རྒྱ་དང་། ཆོ་ག་ཞིབ་མོའི་སྒྲུབ་པ་ཆེན་པོ་དེ་རྣམས་ཐམས་ཅད་གྲུབ་པར་འགྱུར་རོ། །གྲུབ་པའི་དམ་ཚིག་རྗེས་སུ་ཞུགས་པར་འགྱུར་རོ། །དོན་ཡོད་པ་ཆེན་པོའི་གསང་སྔགས་དང་། སྙིང་པོ་དང་། གཟུངས་དང་། དམ་ཚིག་རྗེས་སུ་སྩལ་བར་བགྱིའོ། །སེམས་ཅན་ཐམས་ཅད་ཀྱི་བདེ་བ་སྒྲུབ་པའི་ཆེད་དུ་བཅོམ་ལྡན་འདས་ཀྱི་སྤྱན་སྔར་མངོན་སུམ་དུ་འདུག་པར་འགྱུར་རོ། །རིག་སྔགས་འཆང་རྣམས་ཀྱི་མཆོག་གི་དངོས་གྲུབ་ཀྱི་ཆེད་དང་། རེ་བ་ཐམས་ཅད་ཡོངས་སུ་རྫོགས་པའི་ཆེད་དུ་ཀློག་པ་དང་སྒྲུབ་པར་བྱེད་པའོ། །ན་མ་སྟྲཻ་ཡ་དྷྭི་ཀཱ་ནཱཾ་ཏ་ཐཱ་ག་ཏཱ་ནཱཾ། ཨོཾ་ཨ་མོ་གྷ་པདྨ་པཱ་ཤ་ཀྲོ་དྷཱ་ཀརྵ་ཡ་པྲ་བེ་ཤ་ཡ་མ་ཧཱ་པ་ཤུ་བ་ཏཾ་ཡ་མ་བ་རུ་ཎ་ཀུ་བེ་ར། བྲཧྨ་བེ་ཥ་དྷ་ར། ཨ་མོ་ག་ཧྲྀ་ད་ཡ་པདྨ་ཀུ་ལ་ས་མ་ཡཱ་ཡ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱ་ཧཱ། སྙིང་པོའི་གཟུངས་ཀྱི་ཕྱག་རྒྱ་འདི་འཁོར་གྱི་དཀྱིལ་འཁོར་ཆེན་པོ་འདུས་པར་གསུངས་པ་ཙམ་གྱི་མོད་ལ། རི་དང་ནགས་དང་། དགོན་པར་བཅས་པ་རྣམ་པར་འགྱུར་བ་དྲུག་ཏུ་རབ་ཏུ་གཡོས་ཏེ། མེ་ཏོག་གི་ཆར་ཆེན་པོ་མངོན་པར་བབ་པོ། །ལྷ་དང་། ཀླུ་དང་། གནོད་སྦྱིན་དང་། དྲི་ཟ་རྣམས་དང་། ཅ་ཅོའི་སྒྲ་ཆེན་པོ་རིང་དུ་སྒྲོག་པར་བྱེད་དོ། །དོན་ཡོད་ཞགས་པའི་ཆོ་ག་ཞིབ་མོའི་རྒྱལ་པོའི་སྙིང་པོ་འདི་གསུངས་པའི་དེ་མ་ཐག་ཏུ་གནོད་སྦྱིན་དང་། སྲིན་པོ་གདུག་པ་ཐམས་ཅད་དང་། ལོག་འདྲེན་གདུག་པ་ཅན་རྣམས་ཁས་ཕུབ་ཏུ་འགྱེལ་ཏེ་འབར་ཞིང་ཕྱོགས་ཀྱི་གནས་བསྐྱོད་ཅིང་ཁ་ཕྱིར་ཕྱོགས་སོ། །བགེགས་དང་། ལོག་འདྲེན་རྣམས་ཕྱོགས་བཅུར་འབྲོས་པར་བྱེད་དོ། །ངུ་བཞིན་དུ་རྒྱུག་པར་བྱེད་ཅིང་།
སྤ་གོང་ཞིང་ཀུན་ཏུ་འཁྱམ་མོ། འདིར་ནི་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་ལྷ་རྫས་ཀྱི་རྒྱན་དང་། གོས་དང་། རས་བཅོས་བུ་རྣམ་པ་སྣ་ཚོགས་པས་མཆོད་པར་བྱེད་ཅིང་། ཆོས་ཀྱི་དགའ་བ་རྗེས་སུ་སྦྱིན་པར་བྱེད་དོ། །ལྷ་རྫས་ཀྱི་མེ་ཏོག་སྣ་ཚོགས་དང་། ལྷ་རྫས་ཀྱི་དྲིའི་མཆོད་པ་བྱེད་པར་གྱུར་ཏོ། །དེ་ནས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་རྣམས་མེ་ཏོག་དང་། དྲི་དང་། ཕྲེང་བ་དང་། བྱུག་པ་དང་། ཕྱེ་མ་དང་། ཆོས་གོས་དང་། རྒྱལ་མཚན་དང་། བ་དན་དང་། ལྷ་རྫས་ཀྱི་གོས་དང་། སྤུད་པ་དང་། རྒྱན་དང་། ལྷབ་ལྷུབ་སྣ་ཚོགས་པ་ཐོགས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ག་ལ་བ་དེ་ལོགས་སུ་དོང་སྟེ་ལྷགས་ནས། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་དང་། དེ་བཞིན་གཤེགས་པའི་སྤྱན་སྔར་མཆོད་པ་ཆེས་ཆེ་བ་བྱེད་པར་འགྱུར་རོ། །བཅོམ་ལྡན་འདས་དང་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་མཆོད་པ་འགུགས་པ་ནི་མཆོག་ཏུ་རྙེད་པར་དཀའོ། །དོན་ཡོད་པའི་རྒྱལ་པོའི་སྙིང་པོ་རྣམ་པར་ཐར་པའི་དཀྱིལ་འཁོར་གྱི་ཆོ་ག་ཞིབ་མོའི་རྒྱལ་པོ་འདི་དང་། དོན་ཡོད་པའི་རས་རིས་ཀུན་ཏུ་བལྟ་བའི་སྙིང་པོ་འདི་གསུངས་པ་འདི་ནི་དག་པའི་སེམས་དཔའ་ཆེན་པོའོ། །དེ་ནས་ཡང་བཅོམ་ལྡན་འདས་ཤཱཀྱ་ཐུབ་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །དག་པའི་སེམས་དཔའ་ཆོ་ག་ཤིན་ཏུ་རྒྱས་པ་ཤོད་ཅིག །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གི་གཟུངས་འདིའི་དོན་ཡོད་པའི་རྣམ་པར་འཕྲུལ་པ་ཤིན་ཏུ་རྒྱས་པ་བཤད་དོ། །གཟུངས་འདིའི་དོན་ཡོད་པའི་རྣམ་པར་འཕྲུལ་པ་ནི་རིག་སྔགས་འཆང་དེས་དོན་ཡོད་པའི་རྒྱལ་པོའི་སྙིང་པོ་ཉི་མ་རེ་རེར་སྟོང་རྩ་བརྒྱད་དུ་བཟླས་པས། སྒྱུ་མ་ལྟ་བུའི་ཏིང་ངེ་འཛིན་གྱིས་གཟུགས་རྣམ་པ་སྣ་ཚོགས་
པ་ཡང་དག་པར་མཐོང་བ་དང་། སྒྱུ་མ་ཡང་དག་པར་མཐོང་བའི་ཏིང་ངེ་འཛིན་གྱི་རྣམ་འཕྲུལ་དེ་ཐམས་ཅད་རྗེས་སུ་འཛིན་པར་འགྱུར་ཞིང་། ཐམས་ཅད་དུ་རྗེས་སུ་ཞུགས་པར་འགྱུར་ལ། ཐམས་ཅད་དུ་དམ་ཚིག་རྟོགས་པར་ཁོང་དུ་ཆུད་པར་འགྱུར་ཏེ། ཐམས་ཅད་དུ་ཕྱག་རྒྱ་དང་། དཀྱིལ་འཁོར་དང་གསང་སྔགས་ཀྱི་ཆོ་ག་ཞིབ་མོའི་རྗེས་སུ་རབ་ཏུ་གནས་པར་འགྱུར་རོ། །ཐམས་ཅད་དུ་ཏིང་ངེ་འཛིན་གྱི་རྣམ་པར་འཕྲུལ་བ་རྒྱལ་མཚན་གྱི་མཆོག་གཅེས་བྱ་བ་ལ་གནས་ཏེ། དེ་བཞིན་གཤེགས་པ་ཐམས་ཅད་ཀྱི་གསང་བའི་རྗེས་སུ་སོན་ཅིང་རྗེས་སུ་ཞུགས་པར་འགྱུར་རོ། །དོན་ཡོད་པའི་རིག་སྔགས་ཀྱི་དངོས་གྲུབ་ཡོངས་སུ་རྫོགས་པ་ལ་རབ་ཏུ་གནས་པར་འགྱུར་རོ། །དོན་ཡོད་པའི་རྣམ་པར་འཕྲུལ་པ་དང་ལྡན་པར་འགྱུར་རོ། །དོན་ཡོད་པའི་གཟུགས་དང་། ཁ་དོག་དང་། རྟགས་དང་། དབྱིབས་དང་མཐུན་པར་འགྱུར་རོ། །དོན་ཡོད་པའི་ཡོན་ཏན་ཡོངས་སུ་བསྒྲགས་པ་དང་ལྡན་པར་འགྱུར་རོ། །དོན་ཡོད་པའི་དགེ་བའི་རྩ་བ་དང་ལྡན་པར་འགྱུར་རོ། །དོན་ཡོད་པའི་དེ་བཞིན་གཤེགས་པ་ལུང་བསྟན་པ་ཡོངས་སུ་འཛིན་པར་འགྱུར་རོ། །དོན་ཡོད་པའི་དེ་བཞིན་གཤེགས་པའི་བསོད་ནམས་ཀྱི་ཕུང་པོ་ཆེན་པོ་དགེ་བའི་རྩ་བ་བསྐྱེད་པར་འགྱུར་རོ། །དོན་ཡོད་པར་དེ་བཞིན་གཤེགས་པ་མངོན་སུམ་དུ་མཐོང་ཞིང་བྱིན་གྱིས་རློབ་པ་དང་ལྡན་པར་འགྱུར་རོ། །དོན་ཡོད་པར་དེ་བཞིན་གཤེགས་པའི་རིགས་ཀྱི་རྗེས་སུ་ཞུགས་པར་འགྱུར་རོ། །དོན་ཡོད་པར་རྡོ་རྗེའི་རིགས་ལ་མཉམ་པར་རྗེས་སུ་ཞུགས་པར་འགྱུར་རོ། །དོན་ཡོད་པར་པདྨའི་རིགས་ཀྱི་དམ་ཚིག་བྱིན་གྱིས་བརླབས་པར་འགྱུར་རོ། །དོན་ཡོད་པའི་ནོར་བུའི་རིགས་ཀྱི་དམ་ཚིག་རྗེས་སུ་འཛིན་པར་འགྱུར་རོ། །དོན་ཡོད་པར་རྒྱལ་པོའི་རིགས་ཀྱི་དམ་ཚིག་རྗེས་སུ་འཛིན་པར་འགྱུར་རོ། །དོན་ཡོད་པར་དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་གྱི་རྣམ་པར་འཕྲུལ་བ་བྱིན་གྱིས་རློབ་པའི་བྱིན་གྱིས་བརླབས་པར་འགྱུར་རོ། །དོན་ཡོད་པར་འཁོར་ལོས་སྒྱུར་བའི་རིགས་དབང་དུ་གྱུར་ནས་རབ་ཏུ་གནས་པར་བྱིན་གྱིས་བརླབས་པར་འགྱུར་རོ། །དོན་ཡོད་པ་རིག་སྔགས་ཀྱི་དབང་གིས་མངོན་པར་དབང་བསྐུར་བར་འགྱུར་རོ། །དོན་ཡོད་པར་དེ་བཞིན་གཤེགས་པ་ཐམས་ཅད་ཀྱི་
མངོན་པར་དབང་བསྐུར་བས་མངོན་པར་དབང་བསྐུར་བར་འགྱུར་རོ། །དོན་ཡོད་པར་ཕྱག་རྒྱ་ཆེན་པོ་རིམ་པར་ཕྱེ་བ་དང་། གསང་སྔགས་ཀྱི་སྒྲུབ་ཐབས་ལ་རབ་ཏུ་གནས་པར་འགྱུར་རོ། །དོན་ཡོད་པར་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཀྱི་སྙིང་པོར་ཉེ་བར་འགྲོ་བར་བྱིན་གྱིས་བརླབས་པར་འགྱུར་རོ། །དོན་ཡོད་པར་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་བ་བསྐོར་བར་འགྱུར་རོ། །དོན་ཡོད་པར་ཆོས་ཀྱི་རྔ་བོ་ཆེ་རྡུང་བར་འགྱུར་རོ། །དོན་ཡོད་པར་ཆོས་ཀྱི་དུང་འབུད་པར་འགྱུར་རོ། །དོན་ཡོད་པར་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །དོན་ཡོད་པར་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་དབྱིངས་ཀྱི་སྙིང་བོར་འགྱུར་རོ། །དོན་ཡོད་པར་ཐོས་པ་ཟབ་མོ་ཆོས་དབྱིངས་ཀྱི་སྙིང་པོ་དང་ལྡན་པར་འགྱུར་རོ། །དོན་ཡོད་པར་དེ་བཞིན་གཤེགས་པ་ཐམས་ཅད་ཀྱི་འཇིག་རྟེན་ལས་འདས་པའི་ལམ་གྱི་ཡན་ལག་བརྒྱད་དང་ལྡན་པར་འགྱུར་རོ། །དོན་ཡོད་པར་འཇིག་རྟེན་པ་དང་ཐུན་མོང་བའི་ཆོས་ཆོ་ག་ཞིབ་མོའི་སྒྲུབ་པའི་དངོས་གྲུབ་ཆེན་པོ་སོ་སོར་ཐོབ་བོ། །དོན་ཡོད་པར་འཇིག་རྟེན་བའི་ལྷའི་དཔལ་ཉམས་སུ་མྱོང་ངོ་། །དོན་ཡོད་པར་སེམས་ཅན་ཐམས་ཅད་ཀྱི་མཆོག་ཏུ་བླ་མར་བྱེད་པ་དང་། གུས་པར་བྱེད་པ་དང་། སྤྱི་བོར་འཇོག་པར་འགྱུར་རོ། །དེ་བཞིན་དུ་ཚོགས་ཆེན་པོའི་ཡོན་ཏན་དང་ལྡན་པ་དང་། ཕན་ཡོན་ཆེན་པོ་རྗེས་སུ་སོན་བར་འགྱུར་རོ། །དོན་ཡོད་པའི་རྒྱལ་པོའི་སྙིང་པོའི་ཆོ་ག་ཞིབ་མོ་རིམ་པར་ཕྱེ་བ་དང་བཅས་པ་ལ་ཕྱག་རྒྱ་དང་། དཀྱིལ་འཁོར་གྱི་སྒྲུབ་པ་དང་། ཞགས་པའི་ཆོ་ག་མཐའ་དག་རྫོགས་པ་གང་ཡིན་པ་འདི་ཉན་པར་འགྱུར་བ་དང་། འཆང་བར་འགྱུར་བ་དང་། འདོན་པར་འགྱུར་བ་དང་། ཀུན་ཆུབ་པར་འགྱུར་བ་དང་། ཚུལ་བཞིན་དུ་ཡིད་ལ་བྱེད་པ་དང་། བཟླས་པའི་ཆོ་ག་བྱེད་པར་འགྱུར་བ་དང་། སངས་རྒྱས་རྗེས་སུ་དྲན་པ་སྒོམ་པར་འགྱུར་བ་དེ་དག་སྐྱེ་བ་འདི་ཉིད་ལ་ལས་ཀྱི་སྒྲིབ་པ་ཐམས་ཅད་དང་། སྡིག་པ་ཐམས་ཅད་ཡོངས་སུ་དག་ཅིང་བསལ་བར་འགྱུར་རོ། །ནད་ཐམས་ཅད་དང་། སྐྱེ་བ་དང་། རྒ་བ་དང་། ན་བ་དང་། འཆི་བ་ལས་ཡོངས་སུ་གྲོལ་བར་འགྱུར་རོ། །འཁོར་བའི་རྒྱ་མཚོའི་ཆུ་བོའི་ཕ་རོལ་ཏུ་འགྲོ་
བར་འགྱུར་རོ། །བཅོམ་ལྡན་འདས་འོན་ཀྱང་གང་ལ་ལ་ཞིག་སེམས་ཅན་ཆེས་མང་པོ་ལ་དབང་བྱེད་པར་འགྱུར་ཏེ། དེ་ཡང་བཅོམ་ལྡན་འདས་ཕྱིར་མི་ལྡོག་པར་རིག་པར་བགྱིའོ། །ས་བཅུ་ལ་རབ་ཏུ་གནས་པ་དང་བཅས་པར་བརྗོད་པར་བགྱིའོ། །བཅོམ་ལྡན་འདས་རིགས་ཀྱི་བུའམ་རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་ལ་ལ་ཞིག་དོན་ཡོད་པའི་རྒྱལ་པོའི་སྙིང་པོ་འདི་ཆོ་ག་ཞིབ་མོའི་རྒྱལ་བོ་ཆེན་པོ་དང་། ཕྱག་རྒྱ་དང་། དཀྱིལ་འཁོར་དང་། རས་རིས་ཡོངས་སུ་དག་ནས་དད་པ་དང་གུས་པ་ཡིད་ལ་བྱེད་པ་དང་། དེ་བཞིན་གཤེགས་པ་ཐམས་ཅད་ལྷག་པའི་བསམ་པ་རབ་ཏུ་དང་བས་འདྲི་བར་འགྱུར་རོ། །འདྲི་མཁན་དད་པ་དང་། གུས་པ་དང་། བྱམས་པ་ཡོངས་སུ་དག་པའི་ཡིད་ཀྱིས་ཡོ་བྱད་ཡོངས་སུ་མ་ཚང་བ་མེད་པའི་མཆོད་པ་དང་། བསྙེན་བཀུར་བའི་འདྲི་མཁན་གྱིས་བྲི་བའམ་འདྲིར་གཞུག་པར་འགྱུར་རོ། །སེམས་ཅན་ཐམས་ཅད་ཀྱི་སྟོབས་དང་མཐུས་བྲིས་པའི་སེམས་ཅན་དེ་ཡང་ཕྱིར་མི་ལྡོག་པར་རིག་པར་བགྱི་སྟེ། འདི་ལ་དོགས་པ་དང་ཡིད་གཉིས་བསྐྱེད་པར་མི་བགྱིའོ། །གཞན་ཡང་སེམས་ཅན་འདི། དེ་བཞིན་གཤེགས་པ་ཐམས་ཅད་ཀྱི་ཐུགས་ལས་སྐྱེས་པའི་སྲས་སུ་རིག་པར་བགྱི། ཞལ་ལས་སྐྱེས་པ་དང་། །ཆོས་ལས་སྐྱེས་པ་དང་། ཆོས་ཀྱི་སྦྲུལ་བ་དང་། དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་པར་འགྱུར་ཏེ། སེམས་ཅན་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པར་ལུང་བསྟན་ཏོ། །དེ་ལྟར་རྫུ་འཕྲུལ་ཆེ་བའི་ཕྱིར་ཆོ་ག་ཞིབ་མོའི་རྒྱལ་པོ་དེ་བཞིན་གཤེགས་པ་དང་མཉམ་པ་ཉིད་དུ་རིག་པར་བགྱིའོ། །དེའི་ཕྱིར་འདིའི་ཕན་ཡོན་དང་ཡོན་ཏན་ཆེན་པོ་ཡོངས་སུ་བསྒྲགས་སོ། །དེ་ནས་དོན་ཡོད་པའི་དངོས་གྲུབ་བླ་ན་མེད་པའི་ཡོ་བྱད་དང་ཆོ་ག་བཤད་པར་བགྱི་སྟེ། རས་ཁྲུ་གཉིས་པའི་ཚད་དུ་བགྱི་ཞིང་། ཀུན་ནས་གྲུ་བཞི་པ། ཤིན་ཏུ་གསལ་བ། ཤིན་ཏུ་བཏགས་པ། ཤིན་ཏུ་གསར་བ། ལེགས་པར་བཅགས་པ་ལ། རི་མོ་མཁན་གཙང་མ་གོས་གཙང་མ་བགོས་པས། ཆང་དང་། ཤ་དང་། ཀུན་དོང་དང་། སྒོག་སྐྱ་དང་། ཀེའུ་དང་འདྲེས་པ་དང་། སྦགས་པ་དང་།
ཁ་ཟས་ངན་པ་ཡོངས་སུ་སྤངས་པས་ཚོན་རྣམ་པ་སྣ་ཚོགས་པ་འབར་བ་ལྷག་མ་མ་ཡིན་པ་སྣོད་གསར་པར་བཞག་པས་འདྲིར་གཞུག་པར་བགྱི་སྟེ། འཕགས་པ་སྤྱན་རས་གཟིགས་དབང་ཕྱུག་གི་གཟུགས་བརྙན་རི་མོར་བགྱིའོ། །དོན་ཡོད་པའི་ཞགས་པ་ཞི་བའི་ཞལ་སྤྱན་གསུམ་པ་རལ་བའི་ཅོད་པན་གྱིས་བརྒྱན་པ་ཞལ་བཅུ་གཅིག་པ་བགྱི་སྟེ། ཕྱག་སུམ་ཅུ་སོ་གཉིས་པ། རྒྱན་ཐམས་ཅད་ཀྱིས་རྣམ་པར་བརྒྱན་པ། ཕྱག་ན་མཚོན་ཆ་སྣ་ཚོགས་པ་དང་ཞགས་པ་ཐོགས་པ། པདྨ་དཀར་པོའི་ལུས་དང་ཁ་དོག་ཅན། སྣ་ཚོགས་པའི་གོས་འཆང་བ། ཞལ་གཡས་པ་དབང་ཕྱུག་ཆེན་པོའི་ཞལ། གཡོན་པ་སྲེད་མེད་ཀྱི་བུའི་གཟུགས་འཛིན་པ། དབང་ཕྱུག་ཆེན་པོའི་སྟེང་དུ་གཤིན་རྗེའི་གཟུགས། སྲེད་མེད་ཀྱི་བུའི་སྟེང་དུ་ཆུ་ལྷའི་གཟུགས། གཤིན་རྗེའི་སྟེང་དུ་ལུས་ངན་གྱི་གཟུགས། ཞལ་ཁྲོ་གཉེར་ཅན། ཆུ་ལྷའི་སྟེང་དུ་གཞོན་ནུ་ཞལ་ཁྲོ་གཉེར་ཅན། ལུས་ངན་གྱི་སྟེང་དུ་དབང་ཕྱུག་ཆེན་པོའི་གཟུགས་དྲག་པོ་མཆེ་བ་གཙིགས་པའོ། །གཞོན་ནུའི་སྟེང་དུ་དབང་ཕྱུག་དྲག་པོའི་གཟུགས་མཆེ་བ་གཙིགས་པའོ། །དབང་ཕྱུག་གི་སྟེང་དུ་ཉི་མའི་ཞལ། དབང་ཕྱུག་ཆེན་པོའི་སྟེང་དུ་ཟླ་བའི་ཞལ། སྟེང་གི་རལ་པ་ལ་འཕགས་པ་འོད་དཔག་མེད་འོད་འདོམ་གང་དང་བཅས་པའི་ཕྱག་བརྐྱང་བས་དབུགས་འབྱིན་པར་བྱེད་པའོ། །ཕྱག་གཡས་པ་དང་། སྐྲའི་བར་དུ་རླུང་ལྷ་བྱ་སྟེ་ལུས་རྫོགས་པའོ། །གཞོགས་གཡོན་དུ་མེའི་ལྷ་སྟེ་ལུས་ཕྱེད་པའོ། །སྔར་བཤད་པའི་ཕྱག་རྒྱ་དང་མཚོན་ཆ་ལག་ན་ཐོགས་པ་བགྱིའོ། །གཡས་སུ་འཕགས་པ་ཁྲོ་བོའི་རྒྱལ་པོ་བགྱི་སྟེ། རྒྱན་ཐམས་ཅད་ཀྱིས་རྣམ་པར་བརྒྱན་པ་ཁྲོས་པའི་གཟུགས་སོ། །གཡོན་དུ་རིག་པའི་རྒྱལ་པོ་རྒྱན་ཐམས་ཅད་ཀྱིས་རྣམ་པར་བརྒྱན་པར་བགྱིའོ། །ཁྲོ་བོའི་རྒྱལ་པོ་ནི་པདྨ་དང་ཞགས་པ་ཐོགས་པའོ། །རིག་པའི་རྒྱལ་པོ་ནི་ཡིད་བཞིན་གྱི་ནོར་བུ་དང་། མེ་ཏོག་གི་ཕུར་མ་ཐོགས་པར་བགྱིའོ། །འཕགས་པ་སྤྱན་རས་གཟིགས་དབང་ཕྱུག་ནི་ཞལ་ནས་འོད་ཟེར་འཕྲོ་བཞིན་པ་བགྱི་སྟེ། པདྨའི་གདན་དང་། ལུས་ལ་པདྨའི་ཕྲེང་བ་འཕྱང་བའོ། །འཕགས་
པ་སྤྱན་རས་གཟིགས་དབང་ཕྱུག་གི་འོག་གི་པདྨ་ལ། དཀྱིལ་འཁོར་གྱི་ལྷ་མོ་བགྱི་སྟེ། དྲག་མོ་དྲག་ཏུ་དགོད་པ། ཕྱག་བཞི་པ། རྒྱན་ཐམས་ཅད་ཀྱིས་རྣམ་པར་བརྒྱན་པ། པདྨ་དང་། ཞགས་པ་དང་། དགྲ་སྟ་དང་། རལ་གྲི་ཐོགས་པ། པདྨའི་གདན་ལ་སྐྱིལ་ཀྲུང་ཕྱེད་པས་བཞུགས་པ་བགྱིའོ། །ཁྲོ་བོའི་རྒྱལ་པོའི་རྒྱབ་ཏུ་འཕགས་པ་སྒྲོལ་མ་བགྱི་སྟེ། ཕྱག་ན་གོས་འཛིན་པ་དབུ་སྨད་པ། རྒྱན་ཐམས་ཅད་ཀྱིས་རྣམ་པར་བརྒྱན་པའོ། །རིག་པའི་རྒྱལ་པོའི་རྒྱབ་ཏུ་དཀར་ཤམ་ཆེན་མོ་བགྱི་སྟེ་རྒྱན་ཐམས་ཅད་ཀྱིས་རྣམ་པར་བརྒྱན་པ། ཕྱག་ཐལ་མོ་སྦྱར་ཞིང་མགོ་སྨད་པའོ། །དཀྱིལ་འཁོར་གྱི་ལྷ་དེ་དག་གི་བར་དུ་གཡས་ངོས་སུ་རིག་སྔགས་འཆང་པུས་མོ་བཙུགས་པ་བགྱི་སྟེ། འཕགས་པ་སྤྱན་རས་གཟིགས་དབང་ཕྱུག་གི་ཞལ་ལ་བལྟ་བཞིན་པ་ལག་ན་མེ་ཏོག་གི་ཕོར་པ་ཐོགས་པ་བགྱིའོ། །ངོས་བཞི་རུ་སངས་རྒྱས་བཅོམ་ལྡན་འདས་ཀྱི་རི་མོ་བགྱི་སྟེ། སྐྱིལ་མོ་ཀྲུང་གིས་བཞུགས་པ། དཀྱིལ་འཁོར་གྱི་རྣམ་པ་སུམ་ཅུ་རྩ་བརྒྱད་རྣམ་པར་འབྱེས་པར་བགྱིའོ། །སྟེང་དུ་སོན་པར་དྲང་སྲོང་རྣམས་དང་ལྷའི་བུ་བགྱིའོ། །གྲྭ་བཞི་རུ་རྒྱལ་པོ་ཆེན་པོ་བཞི་བགྱི་སྟེ། གོ་ཆ་དང་ཡ་ལད་བགོས་པའོ། །ཞབས་དག་གི་འོག་ཏུ་དཔལ་ལྷ་མོ་དང་། དབྱངས་ཅན་དང་། འཇིགས་མ་དང་། མཚན་མོའི་ལྷ་མོ་རྣམས་བགྱིའོ། །རས་རིས་ཡོངས་སུ་རྫོགས་པ་ལེགས་པར་བགྱིས་ཤིང་། ལས་བགྱིས་པ་བྲིས་ནས་དེའི་འོག་ཏུ་གསང་བའི་གནས་སུ་བཞག་སྟེ། ཕྱོགས་གཙང་མར་བ་བྱུང་གི་དཀྱིལ་འཁོར་བགྱི་སྟེ། ཀུན་ནས་གྲུ་བཞི་པ་བགྱིའོ། །དེའི་སྟེང་དུ་དྲི་སྣ་ཚོགས་ཀྱི་བྱུག་པ་སྦྱིན་པར་བགྱི། མེ་ཏོག་སྣ་ཚོགས་ཀྱིས་གཅལ་དུ་དགྲམ་པར་བགྱི། གང་བའི་བུམ་པས་སྤྲས་པར་བགྱི། ཕོག་ཕོར་གྱིས་སྤྲས་པར་བགྱིའོ། །ཙནྡན་དང་། ཀུན་དུ་རུ་དང་། ཨ་ག་རུ་དང་། དུ་རུ་སྐ་དང་། གུ་གུལ་གྱི་བདུག་པ་སྲེག་ཅིང་། མཆོད་ཡོན་དང་། ཞབས་བསིལ་ཡང་གཞག་པར་བགྱིའོ། །རས་རིས་དཀྱིལ་འཁོར་ལ་མངོན་དུ་ཕྱོགས་པར་བཞག་ནས། རིག་སྔགས་འཆང་གཙང་མས་གོས་གཙང་མ་བགོས་པ། ལེགས་པར་ཁྲུས་བྱས་པས་བགྱི་སྟེ། རས་རིས་
ལ་མཆོད་པ་བགྱི་ཞིང་མར་མེ་བཅུ་དྲུག་སྦར་བར་བགྱིའོ། །དེ་ནས་རས་རིས་ལ་མངོན་དུ་ཕྱོགས་ནས་སྐྱིལ་མོ་ཀྲུང་གིས་འདུག་ནས་ཕྱག་རྒྱ་བཅིང་བར་བགྱིའོ། །དོན་ཡོད་པ་ཆེན་པོའི་སྙིང་པོའི་གསང་སྔགས་ཀྱི་གཟུངས་ཀྱི་དམ་ཚིག་སྟོང་ཕྲག་བཅུར་བཟླས་སོ། །དོན་ཡོད་རྒྱལ་པོའི་སྙིང་པོ་དང་། ཁྲོ་བོའི་རྒྱལ་པོ་དུས་གསུམ་དུ་ལན་ཉི་ཤུ་རྩི་གཅིག་བཟླས་པར་བགྱིའོ། །སྟོང་ཕྲག་བཅུ་རྫོགས་པ་དང་། རིག་སྔགས་འཆང་གི་མགོ་ལ་འབར་བར་བགྱིད་ཅིང་། རས་རིས་དེ་ལ་ཡང་འོད་སྣ་ཚོགས་པ་རྣམས་འབར་བར་བགྱིད་དེ། ཐོ་རངས་སྐྱ་རེངས་སེར་པོའི་ཐུན་མཚམས་ཀྱི་དུས་ཚོད་ལ་ཇི་ལྟ་བ་བཞིན་དུ་རས་རིས་མངོན་པར་འདྲི་ན། འཕགས་པ་སྤྱན་རས་གཟིགས་དབང་ཕྱུག་ལྷའི་ལུས་ཀྱིས་མདུན་དུ་འདུག་སྟེ་རིག་སྔགས་འཆང་ལ་དབུགས་འབྱིན་པར་བགྱིད་ཅིང་། དེ་བཞིན་དུ་སྨྲ་བར་བགྱིད་དེ། རིག་སྔགས་འཆང་སྨྲོས་ཤིག་མཆོག་སྦྱིན་པར་བྱ། ཡིད་ལ་ཇི་ལྟར་འདོད་པ་དེ་དག་ཐམས་ཅད་སྦྱིན་པར་བྱའོ། །རིག་སྔགས་འཆང་གིས་མཆོག་གཉིས་བླང་བར་བྱ་སྟེ། འཇིག་རྟེན་པའི་མཆོག་གི་དངོས་གྲུབ་དང་། འཇིག་རྟེན་ལས་འདས་པའི་མཆོག་སངས་རྒྱས་ཉིད་དོ། །གལ་ཏེ་འཇིག་རྟེན་པའི་མཆོག་སློང་བར་བྱེད་ན། དེ་ཐམས་ཅད་སྦྱིན་པར་བགྱིད་དེ། དོན་ཡོད་ཞགས་པའི་རྣམ་པར་ཐར་བའི་དཀྱིལ་འཁོར་ཆོ་ག་ཞིབ་མོའི་རྒྱལ་པོ་ཆེན་པོ་མཆོག་གི་སྒྲུབ་པའི་དངོས་གྲུབ་ཏུ་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་གི་སྤྱན་སྔར་གྲུབ་པའི་དངོས་གྲུབ་ཇི་ལྟ་བ་དེ་བཞིན་དུ། རིག་སྔགས་འཆང་ལ་མཆོག་གི་དངོས་གྲུབ་འགྲུབ་པར་བགྱིད་དོ་ཞེས་བྱ་བའི་དངོས་གྲུབ་ཆེན་པོར་འགྱུར་རོ། །དངོས་གྲུབ་ཡངས་པར་ཡང་འགྱུར་རོ། །འཇིག་རྟེན་པའི་བྱ་བ་ཐམས་ཅད་ཀྱི་མཆོག་སྒྲུབ་པའི་དངོས་གྲུབ་ཏུ་འགྱུར་རོ། །གཞན་པའི་མཆོག་ཐམས་ཅད་མངོན་པར་བླངས་ན་སྩོལ་བར་བགྱིད་དེ། འདི་ལྟ་སྟེ། སྔགས་ཀྱི་དངོས་གྲུབ་ཡང་མིག་འཕྲུལ་དང་། འོད་ཟེར་གྱི་དྲ་བ་དང་། ལྷའི་གཟུགས་མཐོང་བ་དང་། མི་སྣང་བ་དང་། ནམ་མཁའ་ལ་འགྲོ་བ་དང་། ཁུང་བུར་འཇུག་པ་དང་། ནགས་སུ་འཇུག་པ་དང་། ཀླུའི་གནས་སུ་འཇུག་པ་དང་།
མིའམ་ཅིའི་གནས་སུ་འཇུག་པ་དང་། ཆུ་ལ་འཇུག་པ་དང་། ནམ་མཁར་འཇུག་པ་དང་། ས་འོག་ཏུ་འཇུག་པ་དང་། ནོར་སྒྱུར་བ་སྨྲ་བ་དང་། ཞིང་དུ་སྨྲ་བ་དང་། ནོར་བུ་སྨྲ་བ་དང་། གཡུལ་ངོར་འཇུག་པ་དང་། འགུགས་པ་དང་། ཆར་འབེབས་པ་དང་། ཡང་དག་པར་འཛིན་པ་དང་། དབང་དུ་བྱེད་པ་དང་། གནོད་སྦྱིན་ཕྱིར་འབྱིན་པ་དང་། རྣམ་པར་གཡོ་བ་མེད་པར་བྱེད་པ་དང་། ཆུ་ཀླུང་ཆེན་པོ་སྒྲོལ་བ་དང་། རྒྱུ་སྐར་སྨྲ་བ་དང་། སྔགས་སྨྲ་བ་དང་། རྫས་དང་། སྨན་གཡོ་བར་བྱེད་པ་དང་། བཅུད་ཀྱིས་ལེན་སྒྲུབ་པ་དང་། འཕོ་བར་བྱེད་པ་དང་། འབྱིན་པར་བྱེད་པ་དང་། ལོ་ཐོག་སྒྲུབ་པ་དང་། གོས་འདོར་བར་བྱེད་པ་དང་། རྒྱལ་པོ་དབང་དུ་བྱེད་པ་དང་། འཇིག་རྟེན་པའི་སྒྲུབ་པའི་དངོས་གྲུབ་དེ་ཐམས་ཅད་འགྲུབ་པར་བགྱིད་དོ། །དེ་ནས་འཇིག་རྟེན་པ་གཞན་དོན་དུ་གཉེར་ཅིང་འདོད་ན། ཕྱག་གཡས་པ་སྤྱི་བོའི་གཙུག་ཏུ་འཇོག་པར་བྱེད་དེ། བཞག་པ་ཙམ་གྱི་མོད་ལ། ལུས་མེད་པ་དྲི་མ་དང་བྲལ་བ་ཡོངས་སུ་དག་པ་ཞེས་བྱ་བའི་ཡོངས་སུ་དག་པའི་ལུས་སོ་སོར་ཐོབ་སྟེ། སྦྲུལ་གྱི་ཤུན་པ་བཞིན་དུ་ལུས་འདོར་བར་བགྱིད་དོ། །བསམས་པ་ཉིད་ཀྱི་མོད་ལ་དེ་མ་ཐག་ཁོ་ནར་བདེ་བ་ཅན་གྱི་འཇིག་རྟེན་གྱི་ཁམས་སུ་འགྲོ་བར་བགྱིད་དོ། །སྐྱེ་བ་བྱེ་བ་བརྒྱ་སྟོང་ཕྲག་གི་ཚེ་རབས་དྲན་པར་འགྱུར་རོ། །དེ་མ་ཐག་ཁོ་ནར་དེ་བཞིན་གཤེགས་པ་ཚེ་དཔག་ཏུ་མེད་པས་ལུང་བསྟན་པ་ཐོབ་པའི་མོད་ཉིད་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །འདི་ཉིད་ནི་སྐྱེ་བར་སྐྱེས་པའི་ཐ་མའོ་ཞེས་སོ། །སྒྲིབ་པ་ཐམས་ཅད་དང་བྲལ་བ་དོན་ཡོད་པ་རྣམ་པར་འཕྲུལ་པ་ཞེས་བྱ་བའི་ཏིང་ངེ་འཛིན་སོ་སོར་ཐོབ་ཅིང་། ཏིང་ངེ་འཛིན་གཞན་བྱེ་བ་ཁྲག་ཁྲིག་བརྒྱ་སྟོང་ཕྲག་ཐོབ་བོ། །ཕྱོགས་བཅུ་ཀུན་གྱི་དེ་བཞིན་གཤེགས་པ་ཐམས་ཅད་ཀྱིས་དགོངས་པར་འགྱུར་ཞིང་ལེགས་སོ་ཞེས་བྱ་བ་རྗེས་སུ་སྩོལ་བར་མཛད་དོ། །བྱང་ཆུབ་སེམས་དཔའ་ཐམས་ཅད་ཀྱིས་དགོངས་པར་འགྱུར་རོ། །ལྷ་ཐམས་ཅད་ཀྱིས་ཀྱང་འདི་ལ་ཀུན་ཏུ་སྲུང་བར་འགྱུར་རོ། །འཇིག་རྟེན་པ་དང་འཇིག་རྟེན་ལས་འདས་པའི་དངོས་གྲུབ་ཀྱི་མཆོག་གཉིས་པོ་འདི་ནི་མཐོང་བའི་
ཆོས་ཉིད་ལ་རྗེས་སུ་སྩོལ་བར་འགྱུར་རོ། །བྱ་བ་གཞན་མང་ཞིང་ཆེས་མང་བ་ཐམས་ཅད་སྒྲུབ་པར་བགྱིད་དོ། །གདོན་གྲོལ་བར་བྱེད་པ་དང་། འབེབས་པར་བྱེད་པ་དང་། མདོ་སྡེ་ལ་རྟོག་པ་དང་། ཚེ་ལ་རྟོག་པ་དང་། ནད་རབ་ཏུ་ཞི་བར་བྱེད་པ་དང་། འབྲས་དང་། ཕོལ་མིག་དང་། ལྷོག་པ་དང་། མཚན་བར་རྡོལ་བ་དང་། རྐང་ཤུ་དང་། ཤ་བཀྲ་དང་། མཛེ་དང་། འབྲུམ་བུ་ཕྲ་མོ་དང་། གཡན་པ་དང་། མེ་དབལ་དང་། ལྟོ་བ་ན་བ་དང་། མིག་ན་བ་དང་། མགོ་བོ་ན་བ་དང་། གཞོགས་ཕྱེད་ན་བ་དང་། མ་རོ་ཙ་ཀ་དང་། ཕོ་བའི་ནད་དང་། སོ་ན་བ་དང་། མགུལ་པ་ན་བ་དང་། ལྕེ་དང་། རྐན་ན་བ་དང་། ཁ་ན་བ་དང་། སྣ་ན་བ་དང་། རྣ་བ་ན་བ་དང་། སྙིང་ན་བ་དང་། ལྟོ་བ་ན་བ་དང་། རྩིབ་ལོགས་ན་བ་དང་། ལག་པ་ན་བ་དང་། རྐང་པ་ན་བ་དང་། རྗེ་ངར་ན་བ་དང་། སེན་མོ་ན་བ་དང་། རིམས་ཉིན་གཅིག་པ་དང་། ཉིན་གཉིས་པ་དང་། ཉིན་གསུམ་པ་དང་། ཉིན་བཞི་པ་དང་། རྟག་པའི་རིམས་དང་། མཚན་མོ་པ་དང་། ཉིན་མོ་པ་དང་། འདུས་པ་སྟེ་འདི་དག་ཐམས་ཅད་གསང་སྔགས་འདི་བཟླས་པ་ཙམ་གྱིས་རྣམ་པར་ཉམས་པར་བགྱིད་དོ། །སྡིག་པ་དེ་རྣམས་རྣམ་པར་ཉམས་པར་བགྱིད་དོ། །གདུག་པ་ཐམས་ཅད་དང་། ཕྱིར་རྒོལ་བ་དང་། དགྲ་ཐམས་ཅད་རྣམ་པར་ཉམས་པར་བགྱིད་དོ། །དེ་ལྟར་གཟུངས་ཀྱི་སྙིང་པོ་འདི་ནི་སྟོབས་ཆེན་པོ་དང་ལྡན་པས་ཏེ། འཇིག་རྟེན་པའི་དངོས་གྲུབ་ཀྱི་མཆོག་འདི་དག་འགྲུབ་པར་འགྱུར་རོ། །དེ་ནས་ལས་བྱེད་པར་འདོད་ན། དེའི་འོག་ཏུ་རིག་སྔགས་འཆང་གཙང་མ་གོས་གཙང་མ་བགོས་པ་ལེགས་པར་ཁྲུས་བྱས་པས་བགྱི་སྟེ། དེ་ནས་དོན་ཡོད་པ་ཆེན་པོའི་སྙིང་པོའི་གསང་སྔགས་ཀྱི་གཟུངས་འདི་སྒྲུབ་ཅིང་བཟླས་པས་དེ་དག་འགྲུབ་པར་འགྱུར་རོ། །སྟོང་ཕྲག་བཅོ་བརྒྱད་དུ་བཟླས་པས་སྡིག་པ་ཐམས་ཅད་ཞི་ཞིང་འཇིག་རྟེན་པའི་རིག་སྔགས་ཆེན་པོ་གྲུབ་པར་འགྱུར་རོ། །ཐམས་ཅད་ལ་ལུས་ཐམས་ཅད་དུ་སྒྲུབ་པར་བྱེད་དོ། །དེ་ནས་འཇིག་རྟེན་ལས་འདས་པའི་བཟླས་པའི་ཆོ་ག་སྒྲུབ་པར་འདོད་པའི་རིག་སྔགས་འཆང་དེས་ཉི་མ་རེ་རེ་ཞིང་གཙང་མ་ལེགས་པར་ཁྲུས་བགྱིས་ཤིང་གོས་གཙང་མ་བགོས་པས་བགྱིས་ཏེ། ཉལ་ཚེས་གཅིག་ནས་
བརྩམས་ཏེ། ཉི་མ་རེ་རེ་ཞིང་སྟོང་ཕྲག་བཅུར་བཟླས་པ་དབུལ་བར་བྱའོ། །བཅུ་གཅིག་པའི་ཕྱོགས་ལ་ཚེས་གསུམ་གྱི་ཉིན་མཚན་ནས་བགྱི་སྟེ། ཉི་མ་རེ་རེ་ཞིང་སྟོང་ཕྲག་ཕྱེད་དང་གཉིས་བཟླས་པ་དབུལ་བར་བགྱིའོ། །འཕགས་པ་སྤྱན་རས་གཟིགས་དབང་ཕྱུག་ལ་མཆོད་པར་བགྱི། བཅོ་ལྔའི་ཉ་ལ་དཀར་གསུམ་གྱི་གཏོར་མ་དབུལ་བར་བགྱི། མཆོད་ཡོན་དང་ཞབས་བསིལ་དབུལ་བར་བགྱི། དེ་ནས་ཟས་དཀར་གསུམ་བཟའ་བར་བགྱི་ཞིང་། བཅོ་ལྔ་ཉའི་མཚན་མོ་སྟོང་རྩ་བརྒྱད་བཟླས་པ་དབུལ་བར་བགྱིའོ། །ཐུན་ཐ་མ་ལ་འཕགས་པ་སྤྱན་རས་གཟིགས་དབང་ཕྱུག་འོངས་ཏེ། རིག་སྔགས་འཆང་ལེགས་སོ་ཞེས་སྨྲ་བར་བགྱིད་ཅིང་། ཁྱོད་ཀྱིས་དོན་ཡོད་རྒྱལ་པོའི་སྙིང་པོ་མཐའ་དག་ཡོངས་སུ་རྫོགས་པའི་ཆོ་ག་ཞིབ་མོ་དང་། རྣམ་པར་ཐར་པའི་དཀྱིལ་འཁོར་གྲུབ་བོ། །ཕྱག་གཡས་པ་བརྐྱང་ནས་པདྨ་སྩོལ་བར་བགྱིད་དེ། རིག་སྔགས་འཆང་གིས་བླང་བར་བགྱིའོ། །བླངས་པ་ཙམ་གྱི་མོད་ལ། ནམ་མཁའ་ལ་རྫུ་འཕྲུལ་གྱིས་འགྲོ་ཞིང་། གང་དུ་འདོད་པའི་སངས་རྒྱས་ཀྱི་ཞིང་དེར་འགྲོའོ། །དེ་བཞིན་གཤེགས་པ་ཐམས་ཅད་ཀྱིས་ཡང་དག་པར་དབུགས་འབྱིན་པར་བགྱིད་དོ། །དེ་ནས་སྦྱིན་སྲེག་གི་ཆོ་ག་བགྱིད་པར་འདོད་པས་པདྨའི་སྙིང་པོ་བཟའ་བར་བགྱི། དཀྱིལ་འཁོར་གྱི་ཚད་ལ་པདྨའི་རྩ་བ་དང་། སྡོང་བུ་དང་། ལོ་མ་མར་དང་བསྲེས་པའི་སྦྱིན་སྲེག་བགྱིའོ། །དྲི་ཞིམ་པོའི་ཤིང་ལ་མེ་སྦར་ལ་སྟོང་ཕྲག་བརྒྱད་དུ་སྦྱིན་སྲེག་བགྱིའོ། །སྟོང་ཕྲག་བརྒྱད་རྫོགས་པ་དང་། དཔལ་ལྷ་མོ་ཆེན་མོ་དངོས་སུ་འོངས་ཏེ། དེ་ལ་དྲི་ཞིམ་པོའི་མཆོད་ཡོན་ཕུལ་བས་རིག་སྔགས་འཆང་བགྱི་བ་ཅི་ཡོད་ཅེས་སྨྲ་བར་བགྱིད་དོ། །དེས་བཅོམ་ལྡན་འདས་མ་བདག་ལ་ནོར་མི་ཟད་པ་རྙེད་པ་དང་། གཏེར་རྙེད་པ་རབ་ཏུ་སྩོལ་ཅིག་ཅེས་བརྗོད་པར་བྱའོ། །དེ་ནས་ཁྱོད་ཀྱིས་དེ་བཞིན་བྱའོ་ཞེས་དབུགས་འབྱིན་པར་བྱེད་ཅིང་མི་སྣང་བར་འགྱུར་རོ། །རིག་སྔགས་འཆང་གང་དང་གང་དུ་འགྲོ་བ་དེ་དང་དེར་གཏེར་ཆེན་པོ་མཐོང་སྟེ། ནམ་ཡང་ཟད་པར་ཉེ་བར་མི་འགྲོའོ། །སྦྱིན་པར་བགྱི། ལོངས་སྤྱད་པར་བགྱི། དཀོན་མཆོག་གསུམ་ལ་མཆོད་པར་བགྱི།
འཕགས་པ་སྤྱན་རས་གཟིགས་དབང་ཕྱུག་ལ་མཆོད་པར་བགྱི། དཔལ་ལྷ་མོ་ཆེན་མོ་ལ་ཉི་མ་རེ་རེ་ཞིང་སོ་སོའི་ཆ་ཤས་དབུལ་བར་བགྱིའོ། །ཨུཏྤ་ལ་སྔོན་པོ་དང་། ཙནྡན་གྱི་ཕྱེ་མ་དང་། མར་གསར་བསྲེས་པས་ཨརྒའི་ཤིང་ལ་མེ་སྦར་ཏེ། འཕགས་པ་སྤྱན་རས་གཟིགས་དབང་ཕྱུག་གི་རས་རིས་ཀྱི་མདུན་དུ་ཟླ་ཕྱེད་ཅིག་ཏུ་སྦྱིན་སྲེག་བགྱི་སྟེ། དཔག་ཏུ་མེད་པ་དབུལ་བར་བགྱིས་ན་རྫོགས་པ་ན་ལས་ཐམས་ཅད་ལ་ཀུན་ནས་ལོངས་སྤྱད་པ་ཐོབ་བོ། །རས་རིས་ཀྱི་མདུན་དུ་ཤིང་ཀུན་དང་། ཏིལ་མར་དང་། ཡུངས་ཀར་བསྲེས་ལ་པདྨའི་འདབ་མ་དང་། ཐང་ཤིང་གི་ཡམ་ཤིང་གིས་ཞག་བདུན་དུ་ཐུན་གསུམ་དུ་སྦྱིན་སྲེག་བརྒྱད་བརྒྱ་བྱས་ན་གྲོང་བརྒྱ་ཐོབ་བོ། །ཤིང་མྱ་ངན་མེད་པའི་ཡམ་ཤིང་མར་ལ་བཏགས་པས་ཟླ་ཕྱེད་ཅིག་ཏུ་ཐུག་གསུམ་དུ་སྦྱིན་སྲེག་བརྒྱད་བརྒྱ་བྱས་ན་རྒྱལ་པོ་ཉིད་ཐོབ་བོ། །མཚན་མོ་བདུན་དུ་ཐུན་གསུམ་དུ་ཡམ་ཤིང་གིས་སྦྱིན་སྲེག་བརྒྱད་བརྒྱ་བྱས་ན་གནས་ངེས་པར་བསྟན་པའི་ཆོ་ག་སྨྲ་བར་བྱེད་དོ། །འཕགས་པ་སྤྱན་རས་གཟིགས་དབང་ཕྱུག་གི་གཟུགས་བརྙན་ལ་མཚན་མོ་བཅུ་གཉིས་སུ་མ་ལི་ཀའི་མེ་ཏོག་སྟོང་ཕྲག་བརྒྱད་ཀྱིས་མཆོད་པར་བྱ་སྟེ། སངས་རྒྱས་བཅོམ་ལྡན་འདས་ཐམས་ཅད་ལ་མངོན་པར་དད་པ་དང་། ལྷ་དང་། ཀླུ་རྣམས་མངོན་པར་དང་བར་འགྱུར་རོ། །མཆོག་ཐམས་ཅད་དང་བྱ་བ་ཐམས་ཅད་སྒྲུབ་པར་བྱེད་དོ། །ནོར་བུ་བཟང་པོ་སྤྱན་དྲང་བར་འདོད་པས་སྙིང་གར་མིང་མེད་ཀྱི་སོར་མོ་བཞག་ནས་ཐུན་གསུམ་དུ་བརྒྱད་བརྒྱ་བཟླས་པར་བྱ་སྟེ། མཚན་མོ་བཅུ་གཉིས་སུ་ལས་རྫོགས་པ་དང་། ནོར་བུ་བཟང་པོ་མཐོང་བ་སྩལ་བར་བྱེད་དོ། །སྙིང་གར་ཡོངས་སུ་བྱུགས་པ་ཙམ་གྱིས་ཉི་མ་རེ་རེ་ལ་དོང་ཚེ་བརྒྱ་སྩོལ་བར་བགྱིད་དེ། དེ་ཡང་ལྷག་མ་མེད་པར་ཟད་པར་བགྱི་སྟེ། ཡང་དང་ཡང་དུ་སྩོལ་བར་བགྱིད་དོ། །གང་ཡིན་པ་དེ་དང་དེ་མ་བགྱིས་ན་ཕྱིས་སྩོལ་བར་མི་བགྱིད་དོ། །འཕགས་པ་སྤྱན་རས་གཟིགས་དབང་ཕྱུག་ལ་མངོན་དུ་ཕྱོགས་པར་འདུག་ནས་སམ། ཡང་ན་རིང་བསྲེལ་ཅན་གྱི་མཆོད་རྟེན་ནམ་རས་རིས་ལ་མངོན་དུ་ཕྱོགས་པར་གཞག་པར་བགྱིའོ། །སེང་ལྡེང་
གི་ཡམ་ཤིང་ཞོ་དང་། སྦྲང་རྩི་དང་། མར་ལ་བཏགས་པས་ཐུན་གསུམ་དུ་བརྒྱད་བརྒྱར་སྦྱིན་སྲེག་བགྱི་སྟེ། ཉི་མ་བདུན་ཡོངས་སུ་རྫོགས་པ་ན། ཟོང་སྟོང་ཕྲག་བཅུ་ཐོབ་བོ། །དེ་ལྟ་བུ་ལ་སོགས་པའི་རྒྱས་པའི་ལས་རྣམས་ཐམས་ཅད་དུ་སྦྱར་བར་བགྱིའོ། །དེ་ནས་མིག་སྨན་སྒྲུབ་པར་འདོད་པའི་རིག་སྔགས་འཆང་དེས་གཙང་མས་བསྒྲུབ་པར་བགྱི་སྟེ་ཁྲུས་བགྱིའོ། །ལྡོང་རོས་ཟངས་ཀྱི་སྣོད་དུ་གཞག་པར་བགྱི་སྟེ། རས་རིས་ལ་མངོན་དུ་ཕྱོགས་ནས་སྐྱིལ་མོ་ཀྲུང་གིས་འདུག་སྟེ། ཚེས་བརྒྱད་དམ་བཅོ་ལྔ་ལ་ཉིན་མཚན་དུ་སྨྱུང་བར་གནས་པས་ཨ་ཤྭཏྠའི་འདབ་མ་བཞི་ཡིས་དག་པར་བགྱི་སྟེ། ཇི་སྲིད་དུ་དངོས་གྲུབ་རྣམ་པ་གསུམ་དྲོ་བར་བགྱིད་པ་དང་། དུ་བ་འཐུལ་བར་བགྱིད་པ་དང་། འབར་བར་བགྱིད་པ་དེ་སྲིད་དུ་བཟླས་པ་བགྱིའོ། །དྲོ་བར་གྱུར་པ་འདིས་མིག་ལ་བྱུགས་པས་གང་མཐོང་བ་དེ་དབང་དུ་འགྱུར་རོ། །གང་བླངས་པ་དེ་རྙེད་དོ། །འཇིག་རྟེན་ཐམས་ཅད་ཀྱི་མཆོད་པའི་འོས་ཆེན་པོར་འགྱུར་རོ། །རྒྱལ་པོ་དང་། རྒྱལ་པོའི་བློན་པོ་དང་། བཙུན་མོའི་འཁོར་དང་བཅས་པ་ཐམས་ཅད་ཀྱི་མཆོད་པ་བྱ་བའི་འོས་སུ་འགྱུར་ཏེ། སྤྱི་བོར་འཇོག་པར་འགྱུར་རོ། །དུ་བ་འཐུལ་བ་འདིས་མིག་ལ་བྱུགས་པས། སོར་མོ་བཅུའི་ཚད་ཀྱི་ས་གཞི་ལ་རྐང་པས་རེག་པས་དཔག་ཚད་སྟོང་ཕྲག་ཏུ་སོང་ནས། སླར་ཡང་འོང་བར་བྱེད་དོ། །དཔག་ཚད་སྟོང་ཕྲག་ཏུ་ཉན་པར་བྱེད་དོ། །དཔག་ཚད་སྟོང་ཕྲག་ཏུ་ལྟ་བར་བྱེད་དོ། །ལོ་སྟོང་ཕྲག་བཅུ་གསུམ་དུ་འཚོ་བར་བྱེད་དོ། །སུ་གང་གིས་ཀྱང་བཀའ་བསྒོ་བར་བྱེད་པར་མི་འགྱུར་རོ། །རྟག་ཏུ་བདེ་བ་དང་བཅས་པ་ཡང་དག་པར་ཐོབ་པ་དང་། རྟག་ཏུ་བླ་མའི་གནས་སུ་བྱ་བར་འགྱུར་རོ། །དེ་བཞིན་གཤེགས་པ་ཐམས་ཅད་ལྷག་པར་མཐོང་བར་འགྱུར་རོ། །འབར་བས་ནི་བདག་ཉིད་གཉིས་ཏེ། འཕུར་བར་བྱེད་པ་དང་ལོ་སྟོང་ཕྲག་བཅུར་འཚོ་བར་བྱེད་དོ། །དེ་ནས་ལྡོང་རོས་ཀྱི་སྒྲུབ་པ་གཞན་ནི་འཇིག་རྟེན་དང་འཇིག་རྟེན་ལས་འདས་པའི་སྒྲུབ་བར་བྱེད་པའོ། །དེ་ནས་ཀ་ར་བཱི་ར་དང་། ལྡོང་རོས་དཔའ་བོའི་རིན་གྱིས་བླངས་ནས་སྦྱོང་དུ་གཞུག་པར་བགྱི་ཞིང་བ་བྱུང་ལྔས་ཡང་དག་པར་སྦྱངས་ནས། རྫོགས་པ་ལ་ཞག་གསུམ་དུ་སྨྱད་
བར་གནས་པས་བཅོམ་ལྡན་འདས་དང་འཕགས་པ་སྤྱན་རས་གཟིགས་དབང་ཕྱུག་ལ་མཆོད་པ་རྒྱ་ཆེན་པོ་བྱས་ནས། པདྨའི་འདབ་མ་བཞི་རྣམས་ཀྱིས་ལྡོང་རོས་ལ་རབ་ཏུ་བཀོད་ནས། གསུམ་གྱིས་ཀུན་ཏུ་གཡོགས་ཏེ། ཇི་སྲིད་དུ་དངོས་གྲུབ་རྣམ་པ་གསུམ་དྲོ་བར་བྱེད་པ་དང་། དུ་བ་འཐུལ་བར་བྱེད་པ་དང་། འབར་བར་བྱེད་པ་དེ་སྲིད་དུ་བཟླས་པར་བྱའོ། །དྲོ་བར་བྱེད་བཞིན་པས་ནི་ཐིག་ལེ་བྱས་ནས། ཇི་སྲིད་དུ་སེམས་ཅན་མཐོང་བ་དང་། གང་གིས་བལྟ་བ་དེ་ཐམས་ཅད་དབང་དུ་འགྱུར་རོ། །དུད་འགྲོའི་སྐྱེ་གནས་སུ་སོང་བ་ཚེ་མེད་པ་ཡང་ཚེ་ཉིས་འགྱུར་དུ་འཕེལ་བར་འགྱུར་རོ། །དུ་བ་འཐུལ་བཞིན་པས་ནི་ཐིག་ལེ་བྱས་པས་རིགས་བཞིའི་འཇིག་རྟེན་ཐམས་ཅད་དེའི་དབང་དུ་འགྱུར་རོ། །སྐྱེས་བུ་ཙམ་གྱིས་གཞི་ལ་རྐང་པས་རེག་པས་དཔག་ཚད་སྟོང་ཕྲག་གསུམ་མཐོང་ངོ་། །དཔག་ཚད་སྟོང་ཕྲག་གསུམ་ནས་ཉན་པར་བྱེད་དོ། །ལོ་སྟོང་ཕྲག་བཅུ་གཉིས་སུ་འཚོ་བར་འགྱུར་རོ། །འབར་བར་བྱེད་པས་ནི་ཐིག་ལེ་བྱས་པས་ནམ་མཁའ་ལ་འགྲོ་བར་འགྱུར་རོ། །ལན་གྲངས་ཉི་ཤུར་འཕུར་བར་བྱེད་དོ། །ལྡོང་རོས་ཀྱི་དངོས་གྲུབ་ཐམས་ཅད་ཀྱི་རྒྱལ་པོར་འགྱུར་རོ། །དཔག་ཚད་སྟོང་ཕྲག་གསུམ་དུ་འཕུར་བར་བྱེད་དོ། །ལོ་སྟོང་ཕྲག་བརྒྱད་ཅུར་འཚོ་བར་བྱེད་དོ། །གི་ཝང་སྒྲུབ་པར་འདོད་པས་བ་སེར་སྐྱའི་མར་གྱིས་གི་ཝང་ཡང་དག་པར་སྦྱངས་ཏེ། དཀར་པོའི་བཅོ་ལྔའམ་བརྒྱད་ལ་མཚན་མོ་གསུམ་དུ་སྨྱུང་བར་གནས་པས། བཅོམ་ལྡན་འདས་དང་སྤྱན་རས་གཟིགས་དབང་ཕྱུག་ལ་མཆོད་པ་རྒྱ་ཆེན་པོ་བྱས་ནས་རབ་ཏུ་བཀོད་དེ། ལག་པ་གཡས་པས་མནན་ནས་ཇི་སྲིད་དུ་དངོས་གྲུབ་རྣམ་པ་གསུམ་དུ་གྱུར་པ་དེ་སྲིད་དུ་བཟླས་པར་བྱའོ། །དྲོ་བར་བྱེད་བཞིན་པས་ནི་ཐིག་ལེ་བྱས་པས་གནོད་སྦྱིན་དང་། སྲིན་པོ་དང་། ཡི་དགས་དང་། ཤ་ཟ་དང་། འབྱུང་པོ་རྣམས་ཀྱིས་དེ་ལ་རི་མོར་བྱེད་དོ། །གང་བླངས་པ་དེ་སྟེར་རོ། །ཉི་མ་དེ་ནས་བརྩམས་ཏེ་ཚེ་ལོ་སྟོང་ཕྲག་ལྔར་འགྱུར་རོ། །དུ་བ་འཐུལ་བཞིན་པས་ནི་ཐིག་ལེ་བྱས་ན་མི་སྣང་བ་ཐམས་ཅད་ཀྱི་རྒྱལ་པོར་འགྱུར་རོ། །རླུང་གི་ཕུང་པོ་རབ་ཏུ་ཞི་བས་བཞོན་པར་བྱེད་དོ། །དཔག་ཚད་སྟོང་ཕྲག་ཉི་ཤུར་
སོང་ནས་སླར་ཡང་འོང་བར་བྱེད་དོ། །ཚེ་ལོ་སྟོང་ཕྲག་དྲུག་ཅུར་འགྱུར་རོ། །དཔག་ཚད་སྟོང་ཕྲག་དྲུག་ཅུ་རྣམས་མཐོང་བར་བྱེད་དོ། །འབར་བར་བྱེད་པས་ཐིག་ལེ་བྱས་ནས་ནམ་མཁའ་ལ་འགྲོ་བར་འགྱུར་རོ། །བདག་ཉིད་ལན་བརྒྱར་འཕུར་བར་བྱེད་དོ། །གི་ཝང་གྲུབ་པ་ཐམས་ཅད་ཀྱི་རྒྱལ་པོར་འགྱུར་ཏེ། ལོ་བྱེ་བར་འཚོ་བར་འགྱུར་རོ། །གང་གི་ཚེ་འཆི་བར་འགྱུར་བ་དེའི་ཚེ། གླིང་བཞི་ལ་དབང་བའི་རྒྱལ་པོར་འགྱུར་རོ། །དེ་ནས་བདག་ཉིད་གསེར་གྱི་ཁ་དོག་ཏུ་སྒྲུབ་པར་འདོད་པའི་རིག་སྔགས་འཆང་དེས། ཟླ་ཕྱེད་དྲུག་གི་བར་དུ་བཟླས་པའི་ཆོ་ག་བསྒྲུབ་པར་བགྱིའོ། །དེ་ནས་རིག་སྔགས་འཆང་གཙང་མ་གོས་གཙང་མ་བགོས་པས་ལེགས་པར་ཁྲུས་བྱས་ཏེ། སྨན་འདི་རྣམས་བསྒྲུབ་པར་བགྱིའོ། །ཨུཥྨཱ་ཎི་དང་། ལྡོང་རོས་དང་། བ་བླ་དང་། སྦྲང་རྩི་དང་། ས་ཀཱི་དང་། རུ་རྟ་དང་། གུར་གུམ་དང་། གི་ཝང་དང་། ཤིང་མྱ་ངན་མེད་ཀྱི་མེ་ཏོག་དང་། པཱཎྜུ་ཏྲ་བྱཾ་དང་། འཛམྦུ་ཆུ་བོའི་སྨན་དང་། གསེར་གྱི་ཕྱེ་མ་དང་། བའི་འོ་མ་དང་། ཤིང་ཨརྐའི་འོ་མ་དང་། གསེར་གྱི་འོ་མ་དང་། སྣུ་ཧའི་འོ་མ་དང་། བྱང་ཆུབ་ཤིང་གི་འོ་མ་དང་། ཁྱབ་འཇུག་གནོན་པའི་འོ་མ་སྟེ། འདི་རྣམས་ཆ་མཉམ་པར་སྦྱར་བར་བྱས་ནས་ཟངས་ཀྱི་སྣོད་དུ་གཞག་པར་བགྱི་ཞིང་དཀྲུག་པར་བགྱི་སྟེ། ཟླ་བ་ཕྱེད་ལ་བའི་འོ་མ་ཉིད་དུ་འགྱུར་ཏེ་འདི་ལ་ཐེ་ཚོམ་མེད་དོ། །རས་རིས་ལ་མངོན་དུ་ཕྱོགས་པར་གཞག་པར་བྱ་ཞིང་། དགོན་པའམ། གཙུག་ལག་ཁང་ངམ། འཆག་སའམ། སའི་ཕྱོགས་གཙང་མར་རས་རིས་བཞག་ནས་བྱམས་པ་དང་། སྙིང་རྗེ་ཆེན་པོ་དང་། སངས་རྒྱས་དང་། ཆོས་དང་། དགེ་འདུན་རྗེས་སུ་དྲན་པ་དང་། བསྟན་ཞིང་དཔའ་བས་ཕ་རོལ་གནོན་པའི་གོ་ཆ་ཆེན་པོ་བགོས་པ་དང་། འཕགས་པ་སྤྱན་རས་གཟིགས་དབང་ཕྱུག་ལ་མཆོག་ཏུ་དད་ཅིང་གུས་པ་དང་། བྱང་ཆུབ་དོན་དུ་གཉེར་ཞིང་མངོན་པར་འདོད་བཞིན་པས་ཉི་མ་རེ་རེ་ཞིང་ཇི་ལྟར་ནུས་པའི་མཆོད་པ་སྔོན་དུ་འགྲོ་བས་ཟླ་ཕྱེད་དྲུག་ཏུ་བཟླས་པར་བྱའོ། །དེ་ནས་རིག་སྔགས་འཆང་གི་ཟླ་ཕྱེད་དྲུག་རྫོགས་པ་དང་། ས་སྨན་གྱི་མཆོག་སྐམས་ལ་ཕྱེ་མ་ཞིབ་མོར་བྱེད་དུ་བཅུག་སྟེ། ཟངས་
ཀྱི་སྣོད་དུ་བཞག་ནས་དོན་ཡོད་རྒྱལ་པོའི་སྙིང་པོ་སྟོང་རྩ་བརྒྱད་བཟླས་ཤིང་། ཁྲོ་བོའི་རྒྱལ་པོ་སྟོང་རྩ་བརྒྱད་དུ་བཟླས་སོ། །དེ་ནས་ཚེས་བཅོ་ལྔའི་ཉལ་མཚན་མོ་གསུམ་དུ་སྨྱུང་བར་གནས་ཏེ། སངས་རྒྱས་བཅོམ་ལྡན་འདས་དང་འཔགས་པ་སྤྱན་རས་གཟིགས་དབང་བྱུག་ལ་མཆོད་པ་རྒྱ་ཆེན་པོ་བྱས་ནས། ཕྱོགས་བཞིར་གཏོར་མ་ཆེས་རྒྱ་ཆེ་བ་དབུལ་བར་བགྱིའོ། །དེ་ནས་རིག་སྔགས་འཆང་གིས་སྨན་གྱི་མཆོག་དང་། དངུལ་ཆུ་དང་། ལི་ཁར་དཀར་པོ་དང་། སྦྲང་རྩི་དང་ལྷན་ཅིག་སྦྱར་བར་བྱའོ། །དེ་ནས་སླར་ཡང་སྟོང་ཕྲག་བཅུར་བཟླས་སོ། །འཕགས་པ་སྤྱན་རས་གཟིགས་དབང་ཕྱུག་གི་སྤྱན་སྔ་རུ། ཟངས་ཀྱི་སྣོད་ལ་འབར་བར་བགྱིད་དེ་དྲོ་བར་བགྱིད་དོ། །འོད་ཟེར་ཁ་དོག་སྣ་ཚོགས་པ་རྣམས་འབར་བར་བགྱིད་དོ། །རིག་སྔགས་འཆང་གི་ལུས་འབར་བར་འགྱུར་ཏེ། ས་ཡང་གཡོ་བར་འགྱུར་རོ། །དེ་ནས་རིག་སྔགས་འཆང་བ་བཞིན་འཛུམ་པ་ཡིད་ལ་བྱའོ། །འབར་བ་དེ་དང་། བྲཧྨ་པུ་ཏྲ་ཀའི་མར་དང་ལྷན་ཅིག་ཏུ་སྦྱར་ལ་བདག་གི་ལུས་བསྐུ་བར་བྱའོ། །བསྐུས་པ་ཙམ་གྱི་མོད་ལ་རང་གི་ལུས་ཀྱི་པགས་པ་གསེར་གྱི་མདོག་ཏུ་འགྱུར་རོ། །ལུས་རྡོ་རྗེ་སྙིང་པོ་བཞིན་དུ་མི་ཆོད་པ་དང་། མི་ཕིགས་པར་གྱུར་ནས་འཁོར་བརྒྱ་ཕྲག་སྟོང་དང་བཅས་ཏེ་འཕུར་བར་འགྱུར་རོ། །སྐྲ་ལ་བསྐུས་ན་སྐྲ་སྤུ་གསེར་མདོག་ཏུ་འགྱུར་རོ། །སེན་མོ་ལ་བསྐུས་ན་སེན་མོ་གསེར་དུ་འགྱུར་རོ། །སོ་ལ་བསྐུས་ན་སོ་གསེར་དུ་འགྱུར་རོ། །མི་ལུས་གང་དང་གང་དུ་བསྐུས་པ་དེ་དང་དེ་ཉིད་གསེར་མདོག་ཏུ་འགྱུར་རོ། །ཏིལ་མར་བཞག་སྟེ་བཅུད་ཀྱིས་ལེན་མཆོག་སྲང་གཅིག་གིས་ཟངས་སྲང་སྟོང་གསེར་དུ་འགྱུར་རོ། །ཏིལ་མར་དང་སྦྱར་བཟངས་གླེབས་པ་ལ་བསྐུས་ཏེ་མེར་བསྲེགས་ན། སྲང་གཅིག་གིས་སྲང་བཅུའི་གསེར་དུ་འགྱུར་རོ། །བཅུད་ཀྱིས་ལེན་མཆོག་འདི་དང་། བའི་འོ་མ་དང་། ཞུན་མར་བཞི་ཆ་གཅིག་དང་སྦྱར་ཏེ། མེ་མི་ཆེ་བས་བསྐོལ་ཏེ། ཚོས་པར་རིག་པ་དང་། འདི་དེ་ནས་ཕྱུང་ལ་ཁྲུས་ལེགས་པར་བྱས་ཤིང་། གོས་སར་པ་བགོས་ལ་གཙང་མར་བྱས་ཏེ། ཐོག་མར་བའི་རྣམ་ལྔ་ལ་རེག་པར་བྱའོ། །དེ་ནས་ཆུ་དྲོན་པོ་དང་། བཅུད་ཀྱིས་ལེན་གྱི་མཆོག་འདི་བཏུང་བར་བྱའོ། །སྦྱོར་བ་ཞག་བདུན་དུ་བྱས་ན་དེའི་ལུས་རྣམ་
བར་དག་པར་འགྱུར་རོ། །སྡིག་པ་ཐམས་ཅད་ཟད་པ་དང་། མོད་ལ་ཉོན་མོངས་པ་ཐམས་ཅད་དང་བྲལ་བ་དང་། ནད་ཐམས་ཅད་བྱང་བ་དང་། མོད་ལ་དུག་ཐམས་ཅད་སེལ་བ་དང་། དུག་སླར་ཞེན་པར་མི་འགྱུར་བ་དང་། མཚོན་གྱིས་མ་ཡིན། ཆུས་ཁྱེར་བར་མི་འགྱུར། མེས་ཚུགས་པར་མི་འགྱུར། ཡང་དུག་མ་རུངས་པ་གཞན་གྱིས་མི་ཚུགས་པར་འགྱུར་རོ། །ཞག་བཅུ་བཞིར་སྦྱོར་བ་བྱེད་ན་ནད་ཐམས་ཅད་བྱང་བ་དང་། འདིའི་པགས་པ་རྣམ་པར་དག་པ་དང་། གཉེར་མ་དང་སྐྲ་དཀར་མེད་པར་འགྱུར་རོ། །ཞག་ཉི་ཤུ་རྩ་གཅིག་སྦྱོར་བ་བྱས་ན་བྱིས་པ་ལོ་བཅུ་པ་པདྨ་དཀར་ཤམ་དང་འདྲ་བའི་མདོག་ཅན་གྱི་ལུས་སུ་འགྱུར་རོ། །པདྨའི་ལོ་མ་དང་། ཀུ་མུ་ད་ལྟར་འཇམ་པ་དང་། ཨུཏྤ་ལ་སྔོན་པོ་ལྟ་བུ་ལྷའི་མིག་དང་། མིའམ་ཅིའི་དབྱངས་ལྟ་བུར་མ་ཞུམ་པ་དང་། དབུ་སྐྲ་འཁྱིལ་ལ་འཁྱིལ་ཅིང་བུང་བ་ལྟར་མདོག་གནག་པ་ལྷ་རྫས་ལྟ་བུར་འགྱུར་རོ། །ཟླ་བ་གཅིག་ཏུ་སྦྱོར་བ་བྱས་ན་ལོ་སྟོང་ཕྲག་བཅུར་འཚོ་བར་འགྱུར་རོ། །དགྲ་ཐམས་ཅད་དང་། གནོད་སྦྱིན་དང་། སྲིན་པོའི་ཚོགས་ཀྱིས་མི་ཚུགས་པར་འགྱུར་རོ། །འབྱུང་པོ་དང་སྡིག་པ་བྱེད་པ་གཞན་རྣམས་ཀྱིས་ཀྱང་དེ་མི་མཐོང་བར་འགྱུར་རོ། །ལོ་གཅིག་ཚང་བར་བསྙེན་ན་ལྷའི་བུ་མོ་དག་དང་ལྷན་ཅིག་རྩེ་ཞིང་ལྷ་རྫས་ཀྱི་ལོངས་སྤྱོད་དང་། གཞལ་མེད་ཁང་དང་། ཇི་ལྟར་ལྷ་རྣམས་རྩེ་བ་བཞིན་དུ་འགྱུར་རོ། །དྲོ་བར་གྱུར་བ་སྦྲང་རྩི་དང་ལྷན་ཅིག་ཟོས་ན་ལོ་ཁྲི་ཉིས་སྟོང་དུ་འཚོ་བར་འགྱུར་རོ། །ནམ་མཁའ་ལ་འགྲོ་བར་འགྱུར་རོ། །ཟངས་སྲང་སྟོང་དང་བཅུད་ཀྱིས་ལེན་པའི་མཆོག་སྲང་གཅིག་དང་། དངུལ་སྲང་བཅུ་ཟངས་དང་སྦྱར་ཏེ་བཞུ་ན། བཅུད་ཀྱིས་ལེན་མཆོག་དངུལ་སྲང་སྟོང་དུ་འགྱུར་རོ། །སྲང་གཅིག་གིས་ཟངས་སྲང་སྟོང་དངུལ་དུ་འགྱུར་རོ། །ཁ་དོག་སྣ་ཚོགས་ཀྱི་འོད་ཟེར་བྱུང་ན་ནི། ཁ་དོག་སྣ་ཚོགས་སུ་འགྱུར་ཏེ། གཟུགས་མདོག་སྣ་ཚོགས་ཀྱི་ནོར་བུ་རིན་པོ་ཆེ་འཆང་ཞིང་། དངུལ་དང་གསེར་བཞུ་ལ་ཏིལ་མར་དང་ལྷན་ཅིག་བསྐོལ་ཏེ་མགོ་བོ་ལ་བསྐུས་པ་ཙམ་གྱི་མོད་ལ་སྐྲ་མདོག་སྣ་ཚོགས་སུ་འགྱུར་རོ། །ལུས་ལ་བསྐུས་ན་ཁ་དོག་སྣ་ཚོགས་ཀྱི་འོད་ཟེར་འབྱུང་བར་འགྱུར་རོ། །མིག་ལ་བསྐུས་ན་ནམ་མཁའ་
ལ་འགྲོ་ཞིང་ཁྱིམ་ཐམས་ཅད་ཀྱི་སྒོ་ཕྱེ་བར་མཐོང་སྟེ། ཁྱིམ་བདག་ཐམས་ཅད་ཀྱི་དཔོན་པོ་དང་། རྒྱལ་པོར་འགྱུར་རོ། །དཔྲལ་བ་ལ་ཐིག་ལེ་བྱས་ན་མི་སྣང་བར་འགྱུར་རོ། །ཁར་བཅངས་ན་གང་དང་སྨྲས་པ་དེ་ནོར་གྱི་དབང་དང་བདག་གི་དབང་དུ་འགྱུར་རོ། །ཡང་ན་བ་སེར་སྐྱའི་ཞུན་མར་དང་། མར་དཀར་དང་། འོ་མ་དང་། བཅུད་ཀྱིས་ལེན་གྱི་མཆོག་འབར་བ་དང་ལྷན་ཅིག་བསྐོལ་ཏེ་ཁ་ར་བཞིན་དུ་ལེགས་པར་ཚོས་པ་དང་བླངས་ལ་དོན་ཡོད་པའི་རྒྱལ་པོའི་སྙིང་པོ་བརྒྱ་སྟོང་བཟླས་བརྗོད་བྱས་ཏེ། རིག་སྔགས་འཆང་བ་བདག་ཉིད་བསྐུས་པ་ཙམ་གྱི་མོད་ལ་ཐམས་ཅད་རིག་འཛིན་གྱི་འཁོར་ལོས་སྒྱུར་བར་འགྱུར་རོ། །བསྐལ་བ་ཆེན་པོ་བཅུར་འཚོ་བར་འགྱུར་རོ། །བར་གྱི་བསྐལ་པར་སངས་རྒྱས་བཅོམ་ལྡན་འདས་མཐོང་བར་འགྱུར་རོ། །བྱང་ཆུབ་ཀྱི་སྙིང་པོ་མཆོག་ཏུ་ལུང་བསྟན་པ་ཐོབ་པར་འགྱུར་རོ། །ཐིག་ལེ་བྱས་ན་ནམ་མཁའ་ལ་འཕུར་བར་འགྱུར་རོ། །ཨོཾ་ཞེས་བྱ་བའི་སྒྲས་ཚངས་པ་གནས་ནས་ཕྱིར་འབྱུང་བར་འགྱུར་རོ། །སེ་གོལ་གཏོགས་པ་ཙམ་གྱིས་འོག་མིན་གྱི་གནས་ཀྱི་བར་དུ་འགྲོ་ཞིང་ཕྱིར་ཡང་འོང་བར་འགྱུར་རོ། །ནམ་གྱི་ཚེ་འཆི་བའི་དུས་བྱས་པར་འགྱུར་པ་དེའི་ཚེ་བདེ་བ་ཅན་གྱི་འཇིག་རྟེན་གྱི་ཁམས་སུ་འགྲོ་བར་འགྱུར་རོ། །འདི་ནི་སྐྱེ་བ་ཐ་མ་ཡིན་ཞིང་མངལ་ན་གནས་པ་ལས་ཡོངས་སུ་ཐར་བ་ཡིན་ནོ། །དེ་ནས་དོན་ཡོད་པའི་རིལ་བུ་བརྗོད་པར་བྱ་སྟེ། རིག་སྔགས་འཆང་སྒྲུབ་པར་བྱེད་པ་ལེགས་པར་བསྒྲུབས་ན་རིག་སྔགས་འཆང་བ་ལེགས་པར་ཁྲུས་བྱས་ཤིང་གོས་གཙང་མ་བགོས་ཏེ་གཙང་བར་བྱའོ། །པདྨ་དང་། ལིག་བུ་མིག་དང་། ནཱ་ག་གེ་སར་དང་། གིའུ་ཝང་དང་། ཨུད་ཏ་མ་ར་ཎི་དང་། སྐྱེར་ཁཎྜ་དང་། ཨ་ག་རུ་རྣམས་དེ་བཞིན་དུ་དེ་དག་ཆ་མཉམ་སྟེ་ཞིབ་མོར་བཏགས་ལ་ཁར་དང་སྦྱར་ཏེ་གསེར་དང་དངུལ་གྱིས་དཀྲི་ཞིང་ཟངས་ཀྱིས་ཀྱང་དཀྲིས་ཏེ། ཙནྡན་དཀར་པོའི་ག་བ་ཚེ་ནང་དུ་བཅུག་ལ་ལག་པའི་སྙིམ་པར་བཅང་བར་བྱའོ། །ཟླ་བ་ཡར་གྱི་ངོ་ཚེས་བརྒྱད་དང་། བཅུ་བཞི་ལ་ཞག་གཅིག་སྨྱུང་བ་བྱས་ཏེ། འཕགས་པ་སྤྱན་རས་གཟིགས་དབང་ཕྱུག་གི་རས་ཀྱི་སྐུ་གཟུགས་ཀྱི་སྤྱན་སྔར་དོན་ཡོད་པའི་རྒྱལ་པོའི་སྙིང་པོ་སྟོང་རྩ་བརྒྱད་བཟླས་བརྗོད་བྱ། ཁྲོ་བོའི་རྒྱལ་པོ་བརྒྱ་རྩ་བརྒྱད་
བཟླས་བརྗོད་བྱ། གསང་སྔགས་སྟོང་རྩ་བརྒྱད་བཟླས་བརྗོད་བྱའོ། །དེ་ནས་འགུལ་བར་གྱུར་ན་དེ་བླངས་ཏེ་ཁར་བཅུག་ན་མི་སྣང་བར་འགྱུར་རོ། །ལོ་སྟོང་ཐུབ་པར་འགྱུར་རོ། །སོར་བཞི་ཙམ་གྱིས་རྐང་པ་ས་ལ་མི་རེག་པར་འགྱུར་རོ། །དཔག་ཚད་བརྒྱར་འགྲོ་ཞིང་ཕྱིར་ཡང་འོང་བར་འགྱུར་རོ། །མེ་ཏོག་ཅན་གྱི་རིག་འཛིན་འཁོར་ལོས་སྒྱུར་བར་འགྱུར་རོ། །ལུས་ལས་ཀུ་མུ་ད་དང་ཨུཏྤ་ལའི་དྲི་འབྱུང་བར་འགྱུར་རོ། །ཨུཏྤ་ལ་སྔོན་པོ་དང་། ཙམ་པ་ཀ་དང་། ཀེ་ཏུའི་མེ་ཏོག་དང་དེ་དག་ཆ་མཉམ་སྟེ་སྦྱར་ལ་མཁས་པས་སྦྲང་རྩི་དང་ལྷན་ཅིག་སྦྱར་ཏེ་རིལ་བུ་བྱས་ལ་གསེར་དང་། དངུལ་དང་ཟངས་ཀྱིས་དཀྲིས་ཏེ་ཟླ་བ་ཡར་གྱི་ཚེས་དྲུག་ནས་ཚེས་བརྒྱད་དམ། བཅུ་གཉིས་ནས་བཅུ་བཞིའམ། བཅུ་གསུམ་ནས་བཅོ་ལྔའི་ཚེ་ཉིན་ཞག་གསུམ་དུ་སྨྱུང་བར་བྱའོ། །ཤིན་ཏུ་ཁྲུས་བྱས་ཤིང་གོས་གཙང་མ་བགོས་ཏེ་གཙང་བར་བྱའོ། །སངས་རྒྱས་བཅོམ་ལྡན་འདས་དང་འཕགས་པ་སྤྱན་རས་གཟིགས་དབང་ཕྱུག་གི་སྐུ་གཟུགས་རས་ལ་བྲིས་པ་ལ་མཆོད་པ་རྒྱ་ཆེན་པོ་བྱས་ཏེ། ཤིང་ཨ་ཤྭད་ཐ་ལས་བྱས་པའི་གབ་ཚེའི་ནང་དུ་རིལ་བུ་བཅུག་ནས་ལག་པའི་སྙིམ་པར་བཅུག་ལ་རི་མོའི་སྤྱན་སྔར་ཇི་སྲིད་དུ་ཇི་སྲིད་འཁྲོལ་བའི་སྒྲ་འབྱུང་བ་དེ་སྲིད་དུ་བཟླས་བརྗོད་བྱའོ། །དེ་ནས་གྲུབ་པ་ཡིན་ཏེ་དེ་ལས་ཁར་བཅུག་ན་དཔག་ཚད་སྟོང་དུ་འདི་འགྲོ་བར་འགྱུར་ཞིང་སླར་ཡང་འོང་བར་འགྱུར་རོ། །སོར་བརྒྱད་ཙམ་དུ་རྐང་པས་ལ་མི་རེག་པར་འགྱུར་རོ། །ལོ་སྟོང་ཕྲག་བཅུར་འཚོ་བར་འགྱུར་རོ། །མིག་ཨུཏྤ་ལ་སྔོན་པོ་ལྟ་བུར་འགྱུར་རོ། །ཨུཏྤ་ལ་སྔོན་པོའི་དྲི་ཁ་ནས་འབྱུང་བར་འགྱུར་རོ། །བཞིན་ཡོངས་སུ་རྒྱས་པ་ཟླ་བའི་དཀྱིལ་འཁོར་ལྟ་བུར་འགྱུར་རོ། །མདོག་པདྨ་ལྟ་བུར་འགྱུར་རོ། །ལུས་ལས་ཙམ་པ་ཀའི་དྲི་འབྱུང་བར་འགྱུར་རོ། །རིག་འཛིན་ནམ་མཁའ་ལ་འགྲོ་བ་ཐམས་ཅད་ཀྱི་འཁོར་ལོས་སྒྱུར་བའི་རྒྱལ་པོར་འགྱུར་རོ། །ཙནྡན་གྱི་ཕྱེ་མ་དང་། ཨ་ག་རུའི་ཕྱེ་མ་དང་། རྒྱ་སྤོས་དང་། ཨ་རུ་ར་དང་། པ་ནི་ན་དང་། དེ་དག་རྣམས་ཆ་མཉམ་སྟེ་ཞིབ་མོར་བཏགས་ལ་དུ་རུ་སྐའི་མར་གྱིས་རིལ་བུར་བྱའོ། །གསེར་དང་། དངུལ་དང་ཟངས་ཀྱིས་དཀྲིའོ། །ཙནྡན་དཀར་པོ་ལས་བྱས་པའི་སྒྲོམ་བུར་བཅུག་སྟེ། ཚེས་བཅུ་གསུམ་ནས་ཉའི་བར་དུ་ཉིན་ཞག་
གསུམ་མི་ཉལ་བར་སངས་རྒྱས་བཅོམ་ལྡན་འདས་དང་། འཕགས་པ་སྤྱན་རས་གཟིགས་དབང་ཕྱུག་ལ་མཆོད་པ་རྒྱ་ཆེར་བྱ་ཞིང་གཏོར་མ་ཡང་རྒྱ་ཆེར་བྱིན་ལ། རྩྭ་དཱུར་བའི་སྟན་ལ་འདུག་སྟེ། ལག་པའི་སྙིམ་པར་བཅུག་ནས། དོན་ཡོད་པའི་ཞགས་པའི་སྙིང་པོ་སྟོང་རྩ་བརྒྱད་ཀྱི་བར་དུ་བཟླས་བརྗོད་བྱའོ། །ཁྲོ་བོའི་རྒྱལ་པོ་བརྒྱ་རྩ་བརྒྱད་བཟླས་བརྗོད་བྱའོ། །དེ་ནས་རིལ་བུ་འགུལ་བར་འགྱུར་ན་རིག་སྔགས་འཆང་བས་དེས་ན་གྲུབ་པ་ཡིན་པར་རིག་པར་བྱ་སྟེ་རིལ་བུ་གྲུབ་པ་དེ་ཡིན་ནོ། །དེ་ནས་རིག་སྔགས་འཆང་བས་འཕགས་པ་སྤྱན་རས་གཟིགས་དབང་ཕྱུག་ལ་མཆོད་པ་བྱས་ཏེ། ནམ་ལངས་ཀ་སྐྱ་རེངས་སེར་པོ་འཆར་བའི་དུས་སུ་བཟའ་བར་བྱའོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་བྱས་ནས་སེམས་ཅན་ཐམས་ཅད་ལ་བྱམས་པའི་སེམས་བྱའོ། །གྲོགས་བྱེད་པ་ལ་ཡང་བྱིན་ཏེ། རིལ་བུ་གཅིག་ཁར་གཞུག་པར་བྱའོ། །རིལ་བུ་ཁར་བཅུག་པ་ཙམ་གྱི་མོད་ལ་མི་སྣང་བར་འགྱུར། ནམ་མཁའ་ལ་འགྲོ་བར་འགྱུར། དཔག་ཚད་ལྔ་སྟོང་དུ་འགྲོ་ཞིང་སླར་ཡང་འོང་བར་འགྱུར་རོ། །རིལ་བུ་སྒྲུབ་པར་བྱེད་པ་ཚེགས་མེད་པར་གྲུབ་པ་རྣམས་ཀྱི་འཁོར་ལོས་སྒྱུར་བའི་རྒྱལ་པོར་འགྱུར། ཚེ་ལོ་ལྔ་སྟོང་ཐུབ་པར་འགྱུར། ཁྲུ་གང་ཙམ་གྱིས་རྐང་པ་ས་ལ་མི་རེག་པར་འགྱུར་རོ། །དེ་ནས་གཏེར་བརྐོ་བར་འདོད་པས་གནས་གང་ན་གཏེར་ཡོད་པར་དོགས་པའི་གནས་དེར་བའི་ལྕི་བས་མཎྜལ་བྱས་ལ། མེ་ཏོག་གཏོར་ཞིང་གུ་གུལ་གྱི་བདུག་པས་བདུག་ཅིང་། གཏོར་མ་གཙང་མ་དང་། ཤ་དང་།ཁྲག་གི་གཏོར་མ་དང་། ཕྱེ་ཟན་དང་འབྲས་བུ་དང་། པདྨའི་གཏོར་མ་དང་། གཏོར་མ་རྣམ་པ་གསུམ་སྦྱིན་པར་བྱའོ། །འཕགས་པ་སྤྱན་རས་གཟིགས་དབང་ཕྱུག་ལ་མཆོད་པ་བྱའོ། །སྟོང་ཕྲག་བཅུ་བཟླས་བརྗོད་བྱའོ། །སྟོང་ཕྲག་བཅུ་ཚང་བ་དང་གནས་གང་ན་གཏེར་ཡོད་པའི་གནས་དེར་གཏེར་སྲུང་བ་མངོན་དུ་འབྱུང་ཞིང་གཏེར་འབྱུང་བར་འགྱུར་རོ། །གཏེར་སྲུང་བ་ལ་གཏོར་མ་དང་། མཆོད་ཡོན་སྦྱིན་པར་བྱས་ན་གཏེར་སྲུང་བ་དེ་ཇི་སྲིད་འཚོའི་བར་དུ་ལས་བྱས་པ་པོར་འགྱུར་རོ། །གང་དུ་མངགས་པ་དང་། གང་བསྒོ་བའི་ལས་དེ་ཐམས་ཅད་བྱེད་པར་འགྱུར་རོ། །ཡུངས་
ཀར་དང་ཐལ་བ་ལ་དོན་ཡོད་པའི་རྒྱལ་པོའི་སྙིང་པོ་ལན་བདུན་བཟླས་བརྗོད་བྱས་ཏེ་ཕྱོགས་བཞིར་གཏོར་ན་བགེགས་དང་། ལོག་འདྲེན་དང་། གནོད་སྦྱིན་དང་། སྲིན་པོ་དང་། འབྱུང་པོ་ཐམས་ཅད་བཅིངས་པར་འགྱུར་རོ། །མཚམས་ཆེན་པོ་བཅིང་བར་བྱས་པར་འགྱུར་རོ། །ལོག་འདྲེན་ཕུང་བར་བྱ་ན་ཡུངས་མར་དང་། ཡུངས་ཀར་དང་། གུ་གུལ་དང་། སྐེ་ཚེའི་འབྲུ་དང་། ལན་ཚྭ་རྣམས་སྦྲང་རྩི་དང་བསྲེས་ལ་ཤིང་ཀར་བཱི་རའི་ཡ་མ་སྲེག་ཤིང་གི་མེ་བུས་ཏེ། ཉིན་བར་དུས་གསུམ་དུ་བརྒྱ་རྩ་བརྒྱད་སྦྱིན་སྲེག་བྱས་ན་ལོག་འདྲེན་གྱི་རིགས་ཐམས་ཅད་བཅོམ་པར་འགྱུར་ཞིང་རྣམ་པར་ཞི་བར་འགྱུར་རོ། །དམག་བཅིང་བར་འདོད་པས་ཡུངས་ཀར་དང་། དུག་དང་། སྐེ་ཚེའི་འབྲུ་དང་། ས་བོན་བདུན་རྣམས་སྦྲང་རྩི་དང་སྦྱར་ལ་དམག་གི་མདུན་དུ་ཤིང་ནིམ་པའི་མེ་སྦར་ཏེ། ཐོག་མར་བརྒྱད་བརྒྱ་བྱས་ན་དམག་བཅིང་བར་འགྱུར་རོ། །ལན་གཉིས་བྱས་ན་ནད་ཆེན་པོ་འབྱུང་བར་འགྱུར་རོ། །བརྒྱད་བརྒྱ་བཟླས་བརྗོད་ལན་གསུམ་པ་བྱས་ན། དམག་ཐམས་ཅད་ཞིག་པར་འགྱུར་ཞིང་ཕྱིར་ཡང་ལན་འགའ་ཡང་འོང་བར་མི་འགྱུར་རོ། །དེ་ནས་དབྱུག་པ་སྒྲུབ་པ་སེང་ལྡེང་ལས་གཤིན་རྗེའི་དབྱུག་པའི་ཚད་ཁྲུ་དོ་པ་བྱའོ། །དེ་ནས་འཕགས་པ་སྤྱན་རས་གཟིགས་དབང་ཕྱུག་གི་སྤྱན་སྔར་ཟས་དཀར་གསུམ་ཟོས་ཏེ། སྟོང་ཕྲག་བཅུར་བཟླས་བརྗོད་བྱའོ། །དེ་ནས་ཚེས་བཅོ་ལྔ་ཚང་བའི་ཚེ་སྨྱུང་བ་བྱས་ཏེ། དོན་ཡོད་པའི་རྒྱལ་པོའི་སྙིང་པོ་བརྒྱ་རྩ་བརྒྱད་བཟླས་བརྗོད་བྱའོ། །ཁྲོ་བོའི་རྒྱལ་པོ་བརྒྱ་རྩ་བརྒྱད་བཟླས་པ་བྱས་ན་དེ་ནས་དབྱུག་པ་འབར་རོ། །དེ་ནས་གྲུབ་པ་ཡིན་པར་ཤེས་པར་བྱའོ། །དོན་ཡོད་པའི་དབྱུག་པ་ཞེས་བྱ་བའི་སྒྲ་འབྱུང་བར་འགྱུར་རོ། །དེ་ནས་འཕགས་པ་སྤྱན་རས་གཟིགས་ཀྱི་དབང་ཕྱུག་ལ་མཆོད་པ་བྱའོ། །དེ་ནས་རིག་སྔགས་འཆང་བ་དབྱུག་པ་བླངས་ཏེ་ཀུན་དུ་ལན་བདུན་བསྐོར་བར་བྱའོ། །དེ་ནས་དབྱུག་པ་དེ་ས་ལ་བརྡབ་པར་བྱའོ། །དབྱུག་པས་ས་ལ་གྲུ་བཞིར་གཞལ་བར་བྱས་ན་ཀུན་ཏུ་གྲུ་བཞི་ལྷམ་པའི་ཁྱིམ་ཆེན་པོ་གཞལ་མེད་ཁང་འབྱུང་བར་འགྱུར་ཏེ། ཕུན་སུམ་ཚོགས་པ་རྣམ་པ་ཐམས་ཅད་ཡོངས་སུ་རྫོགས་པའི་ལྷའི་གཞལ་མེད་ཁང་འབྱུང་བར་འགྱུར་
རོ། །བུད་མེད་དང་། སྐྱེས་པ་དང་། ཁྱེའུ་དང་། བུ་མོའི་སྐྱེ་བོས་གང་བར་འགྱུར་རོ། །དེ་ནས་ལྷ་མོ་རྒྱན་ཐམས་ཅད་ཀྱིས་བརྒྱན་པ། བཟང་བ། མཛེས་པ་། བལྟ་བར་འོས་པ་ཞིག་འོངས་ནས་རིན་པོ་ཆེ་བདུན་ལས་བྱས་པའི་སྣོད་བུམ་པ་གང་བ་ཞིག་ཐོགས་ཤིང་སྒོའི་ནང་དུ་འདུག་གོ། །དེ་ནས་ལྷ་མོ་དོན་རེ་རིག་སྔགས་འཆང་གི་ཁྱིམ་ཡིན་གྱིས་ནང་དུ་ཞུགས་ཤིག་ཅེས་སྨྲ་བར་འགྱུར་རོ། །རིག་སྔགས་འཆང་བས་སྙིང་པོ་མེད་པར་འགྱུར་བའི་ཁྱིམ་གཞལ་མེད་ཁང་འདིས་ཅི་ཞིག་བྱ་ཞེས་བརྗོད་པར་བྱའོ། །དེ་ན་དེ་སྣོད་གང་བ་འདི་ལོང་ཤིག་དང་། རྒྱ་ཆེར་འཕེལ་བར་འགྱུར་རོ་ཞེས་སྨྲ་བར་འགྱུར་རོ། །རིག་སྔགས་འཆང་བས་དྷིག་དྷིག་ཅེས་ཁྲོས་པ་བྱས་པ་དང་། ལྷ་མོ་དེ་དུས་ཏེ་ཇི་ལྟར་ཆར་པ་ཆེར་འབབས་པ་དེ་བཞིན་དུ་འདིའི་མིག་ནས་མཆི་མ་བྱུང་བ་དང་རིག་སྔགས་འཆང་བས་བླང་བར་བྱ་ཞིང་རང་གི་ལུས་ལ་བསྐུ་བར་བྱའོ། །བསྐུས་པ་ཙམ་གྱི་མོད་ལ་འཛམ་བུའི་གླིང་གི་གསེར་ལྟ་བུའི་ལུས་སུ་འགྱུར་རོ། །ཙནྡན་སྦྲུལ་གྱི་སྙིང་པོ་དང་། གོ་ཤིརྵའི་དྲི་ལུས་ལས་འབྱུང་བར་འགྱུར་རོ། །ཁར་བཅུག་ན་ལྟ་རྫས་ཀྱི་ཨུཏྤ་ལའི་དྲི་ཁ་ནས་འབྱུང་བར་འགྱུར་རོ། །མཆི་མ་དེ་མིག་ཏུ་བསྐུས་ན་ལྷ་རྫས་ཀྱི་ཨུཏྤལ་སྔོན་པོ་འདྲ་བའི་ལྷའི་མིག་ཏུ་འགྱུར་རོ། །སྐྲ་ལ་བསྐུས་ན་ལྷའི་རྨ་བྱའི་མདོག་འདྲ་བའི་སྐྲར་འགྱུར་ཞིང་སྐྲ་འཁྱིལ་ལ་འཁྱིལ་བར་འགྱུར་རོ། །རྣ་བའི་བུ་གར་བླུགས་ན་ལྷའི་སྙན་དུ་འགྱུར་ཏེ། དཔག་ཚད་སྟོང་ཕྲག་གསུམ་དུ་ཐོས་པར་འགྱུར་རོ། །དཔག་ཚད་སྟོང་ཕྲག་གསུམ་དུ་མཐོང་བར་འགྱུར་རོ། །འཐུངས་ན་བསྐལ་པ་སྟོང་ཕྲག་བཅུ་འཚོ་བར་འགྱུར་རོ། །བར་གྱི་བསྐལ་བ་རྗེས་སུ་དྲན་པར་འགྱུར་རོ། །གར་ཐབས་དང་། ཏྲོ་ཊ་ཀ་དང་། བརྡ་སྤྲོད་པ་དང་། བསྟན་བཅོས་དང་། བྷ་ར་ཏ་དང་། རཱ་མ་ཡ་ཎ་དང་། སྔོན་གྱི་གཏམ་རྙིང་དང་། ཚུལ་དང་། འདུལ་བ་དང་། སྐྱེས་རབས་དང་། སྙན་དང་གས་དང་བྱེ་བྲག་པ་ཐམས་ཅད་དང་། ཆོ་ག་ཞིབ་མོ་ཐམས་ཅད་དང་། དཀྱིལ་འཁོར་དང་། ཕྱག་རྒྱ་དང་། གསང་སྔགས་དང་། གཟུངས་དང་། མདོ་སྡེ་དང་། ཆོས་མངོན་པ་དང་། ཐེག་པ་ཆེན་པོ་དང་། དེ་དག་ཐམས་ཅད་མངོན་དུ་གྱུར་པར་གནས་སོ། །ཐམས་ཅད་དུ་རྟོགས་པ་ཁོང་དུ་ཆུད་པ་ཆེན་པོར་
འགྱུར་རོ། །དེ་ནས་བུད་མེད་དེ་ན་རེ་རྗེ་བཙུན་དམ་པ་རང་གི་ཁབ་མཆོག་ཏུ་གཤེགས་སུ་གསོལ་ཞེས་སྨྲ་བར་འགྱུར་རོ། །རིག་སྔགས་འཆང་བས་བརྗོད་པར་བྱ་ཞིང་རང་གི་རྐང་པ་རིམ་གྱིས་འཇུག་པར་བྱའོ། །དེ་ནས་བུད་མེད་དེ་ནུ་མ་གཉིས་སྟོན་པར་བྱེད་ན་རིག་སྔགས་འཆང་བས་ནུ་མ་གཉིས་བཟུང་ལ་བཙིར་ན་དེ་ལས་འོ་མ་འཛག་པར་འགྱུར་རོ། །དེ་ནས་རིག་སྔགས་འཆང་བས་བླང་བར་བྱ། བཏུང་བར་བྱ། རྐང་པ་ལ་བསྐུ་བར་བྱས་ན་བསྐུས་པ་ཙམ་གྱི་མོད་ལ་འཁོར་སྟོང་དང་ལྷ་མོ་དེ་དང་ལྷན་ཅིག་ཏུ་ནམ་མཁའ་ལ་འཕུར་ཏེ་འགྲོ་བར་འགྱུར་རོ། །རླུང་གི་ཕུང་པོ་དང་པོ་ལ་ཞོན་པར་འགྱུར་རིག་འཛིན་འཁོར་ལོས་སྒྱུར་པ་སྟོང་ཕྲག་བདུན་ཅུ་རྩ་བཞི་རྣམས་ཀྱི་རིག་འཛིན་འཁོར་ལོས་སྒྱུར་བའི་རྒྱལ་པོ་དང་དཔོན་པོར་འགྱུར་རོ། །བདེ་བ་ཅན་གྱི་འཇིག་རྟེན་གྱི་ཁམས་སུ་འགྲོ་བར་འགྱུར་རོ། །དེ་ཉིད་རིག་འཛིན་རྣམས་ཀྱི་མཆོག་ཏུ་འགྱུར་ཏེ། འཇིག་རྟེན་པའི་ཆོ་ག་བསྒྲུབ་པ་ཡིན་ནོ། །དབྱུག་པ་ལག་པ་གཡས་པས་བཟུང་སྟེ། དོན་ཡོད་པའི་རྒྱལ་པོའི་སྙིང་པོ་ལན་ཉི་ཤུ་རྩ་གཅིག་བཟླས་བརྗོད་བྱ་ཞིང་ལན་བདུན་བསྐོར་བ་བྱས་ན་དོན་གང་ཡིད་ལ་སེམས་པ་དང་། གང་འདོད་པ་དེ་དག་ཐམས་ཅད་སྐད་ཅིག་ཏུ་འགྲུབ་པར་འགྱུར་རོ། །གང་དགུག་པ་དེ་དག་ཐམས་ཅད་བཀུག་ཅིང་མདུན་ན་གནས་པར་འགྱུར་རོ། །གནོད་སྦྱིན་དང་། གནོད་སྦྱིན་མོ་དགུག་པར་འདོད་ན་བཙག་གིས་རི་མོ་བྲིས་ལ་དབྱུག་པ་ལ་དོན་ཡོད་པའི་རྒྱལ་པོ་ལན་བདུན་བཟླས་བརྗོད་བྱ་ཞིང་། གནོད་སྦྱིན་དང་། གནོད་སྦྱིན་མེའི་སྟེང་དུ་བསྐོར་བར་བྱའོ། །གུ་གུལ་གྱི་བདུག་པ་སྦྱིན་པར་བྱའོ། །གཏོར་མ་དཀར་པོ་ཅན་གྱི་སྣོད་དབུལ་བར་བྱའོ། །ལན་བདུན་བསྐོར་བ་ཙམ་གྱི་མོད་ལ་གནོད་སྦྱིན་དང་། གནོད་སྦྱིན་མོ་མདུན་ན་འདུག་ཅིང་བཀའ་བཞིན་དུ་བྱེད་པར་འགྱུར་རོ། །གང་བསྒོ་བའི་ལས་དེ་བྱེད་པར་འགྱུར་རོ། །ཐམས་ཅད་མ་ཚང་བ་མེད་པར་སྒྲུབ་པར་འགྱུར་རོ། །ནོར་དང་། འབྲུ་དང་། དབྱིག་དང་། ནོར་བུ་དང་། མུ་ཏིག་དང་། དངུལ་དང་། ས་ལེ་སྦྲམ་དང་། གོས་དང་། མལ་སྟན་དང་། ཆོས་གོས་དང་། རྒྱན་གྱི་རྣམ་པ་ལ་སོགས་པ་སྒྲུབ་པར་བྱེད་པར་འགྱུར་རོ། །གཞན་གང་བསྒོ་བ་དེ་ཐམས་ཅད་སྒྲུབ་པར་བྱེད་དོ། །
དཔལ་ལྷ་མོའི་མདུན་དུ་བསྐོར་ན་ནོར་གྱི་མཆོག་རྣམ་པ་མང་དུ་སྦྱིན་པར་བྱེད་དོ། །མདུན་ན་རང་གི་ངོ་བོ་གནས་པར་འགྱུར་རོ། །གང་འདོད་པ་དེ་ཐམས་ཅད་སྦྱིན་པར་བྱེད་དོ། །རྣམ་ཐོས་སྲས་ཀྱི་ཞབས་ལ་ལན་བདུན་བརྡབ་ཅིང་དོན་ཡོད་པའི་རྒྱལ་པོ་ལ་ལན་ཉི་ཤུ་རྩ་གཅིག་དྲན་པར་བྱས་ན་རྣམ་ཐོས་ཀྱི་སྲས་རྒྱུག་ཅིང་མདུན་ན་གནས་པར་འགྱུར་རོ། །ནོར་མང་དུ་སྦྱིན་པར་མཛད་དོ། །གང་འདོད་པ་དེ་ཐམས་ཅད་མཛད་པར་འགྱུར་རོ། །མི་སྨྲ་བར་དབྱུག་པ་ལ་ལན་ཉི་ཤུ་རྩ་གཅིག་བཟླས་བརྗོད་བྱ་ཞིང་རྒྱལ་པོའི་སྒོར་ལན་བདུན་བསྐོར་བ་བྱས་ན་རྒྱལ་པོ་དང་། བཙུན་མོའི་འཁོར་རྣམས་བདག་ཉིད་དང་། ནོར་ལ་དབང་བར་འགྱུར་རོ། །གྲོང་ཁྱེར་གྱི་སྒོར་བསྐོར་ན་གྲོང་ཁྱེར་ན་གནས་པའི་བུད་མེད་དང་། སྐྱེས་པ་དང་། ཁྱེའུ་དང་བུ་མོ་རྣམས་དབང་དུ་འགྱུར་ཞིང་གནས་སོ། །དེ་གཅིག་པུ་མཆོད་པར་འོས་པར་འགྱུར་རོ། །དེ་དག་ཐམས་ཅད་བྲན་ཕོ་དང་བྲན་མོ་བཞིན་དུ་རྗེས་སུ་འབྲང་བར་འགྱུར་རོ། །ལྷ་ཁང་དུ་སོང་ནས་ལྷའི་སྤྱན་སྔར་བསྐོར་ཞིང་དོན་ཡོད་པའི་རྒྱལ་པོའི་སྙིང་པོ་བཟླས་བརྗོད་བྱས་ན་ལྷ་དེ་རང་གི་ངོ་བོ་མདུན་ན་གནས་པར་འགྱུར་རོ། །གང་བསྒོ་བ་དེ་ཐམས་ཅད་བྱེད་པར་འགྱུར་རོ། །གང་འདོད་པ་དེ་ཐམས་ཅད་སྦྱིན་བར་འགྱུར་རོ། །ཉི་མ་འཆང་བའི་ཚེ་ཉི་མའི་མདུན་དུ་བསྐོར་བར་བྱ་ཞིང་དོན་ཡོད་པའི་རྒྱལ་པོའི་སྙིང་པོ་བཟླས་བརྗོད་བྱས་ན་ཉི་མ་བབས་ཏེ། མཆོག་གང་འདོན་པ་དེ་ཐམས་ཅད་སྦྱིན་པར་མཛད་དོ། །ཟླ་བ་ཉའི་ཞལ་དུ་བསྐོར་ཅིང་དོན་ཡོད་པའི་ཞགས་པའི་སྙིང་པོ་བཟླས་བརྗོད་བྱེད་ན་ཟླ་བ་དང་། རྒྱུ་སྐར་དང་། སྐར་མའི་ཚོགས་དང་བཅས་ཏེ་འབབ་པར་འགྱུར་རོ། །མཆོག་བསམ་པ་ཐམས་ཅད་སྦྱིན་པར་བྱེད་དོ། །རིང་བསྲེལ་དང་བཅས་པའི་མཆོད་རྟེན་ལ་སྐོར་བ་བྱེད་ཅིང་དོན་ཡོད་པའི་རྒྱལ་པོ་བཟླས་བརྗོད་བྱས་ཤིང་དབྱུག་པ་བསྐོར་ན་མཆོད་རྟེན་འབར་ཞིང་སྒྲ་འབྱུང་བར་འགྱུར་རོ། །གང་བསམ་པ་དེ་ཐམས་ཅད་སྨྲ་བར་འགྱུར་རོ། །གང་འདོད་པ་དེ་ཐམས་ཅད་སྦྱིན་པར་མཛད་དོ། །དེ་བཞིན་གཤེགས་པ་ལ་བསྐོར་བ་བྱ་སྟེ། དོན་ཡོད་པའི་སྙིང་པོའི་བཟླས་བརྗོད་བྱེད་ཅིང་དབྱུག་པ་བསྐོར་ན་དེ་བཞིན་གཤེགས་པ་ཐམས་ཅད་མཐོང་བར་
འགྱུར་བ་དང་། དེ་བཞིན་གཤེགས་པ་ཐམས་ཅད་དབུགས་འབྱིན་པར་མཛད་པ་དང་། བསམ་པ་དང་རེ་བ་ཐམས་ཅད་ཡོངས་སུ་རྫོགས་པར་མཛད་པར་འགྱུར་རོ། །ཡང་ན་འཕགས་པ་སྤྱན་རས་གཟིགས་དབང་ཕྱུག་གི་རང་གི་སྐུ་བཞིན་ཐུན་ཐོ་རངས་ཀྱི་ཚེ་མདུན་ན་བཞུགས་པར་འགྱུར་རོ། །མཆོག་བསམ་པ་ཐམས་ཅད་སྦྱིན་པར་མཛད་པར་འགྱུར་རོ། །དགོས་པ་ཐམས་ཅད་གྲུབ་པར་མཛད་པར་འགྱུར་རོ། །དོན་ཡོད་པའི་དབྱུག་པ་རིག་འཛིན་འཁོར་ལོས་སྒྱུར་བ་གྲུབ་པ་ཐོབ་པར་འགྱུར་རོ། །ཆར་མི་འབབ་པའི་ཚེ་ཀླུའི་གནས་སུ་སོང་སྟེ། དོན་ཡོད་པའི་རྒྱལ་པོའི་སྙིང་པོ་དྲན་པར་བྱ། དབྱུག་པ་བསྐོར་བར་བྱའོ། །བསྐོར་བ་ཙམ་གྱི་མོད་ལ་ཀླུ་རྣམས་ཆར་པའི་རྒྱུན་ཆེན་པོ་འབྱུང་བར་འགྱུར་རོ། །ཅི་འདོད་པའི་ཆར་གྱི་རྒྱུན་འབེབས་སོ། །ཆར་ཆེས་ན་ཁང་ཐོག་ཏུ་དོན་ཡོད་པའི་ཞགས་པའི་སྙིང་པོ་སྐད་དྲག་པོས་བརྗོད་དེ། དབྱུག་པ་བསྐོར་ན་ཆར་ཆེས་པ་འཆད་པར་འགྱུར་རོ། །སེར་བ་འབབ་པའི་ཚེ་སྤྲིན་ལོགས་སུ་བལྟས་ཏེ་ཁྲོས་པས་ཁྲོ་བོའི་རྒྱལ་པོ་སྐད་ཆེན་པོས་དྲན་པར་བྱ་ཞིང་ཁྲོས་པས་དབྱུག་པ་བསྐོར་ན་སད་དང་། རླུང་དང་སེར་བ་མི་འབབ་པར་འགྱུར་རོ། །དཔག་ཚད་ཚུན་ཚད་དུ་མཚམས་ཆེན་པོ་ཀུན་ཏུ་བཅད་པར་འགྱུར་རོ། །གདོན་ཀུན་གྱིས་ཟིན་པ་ལ་ཁྲོ་བོའི་རྒྱལ་པོ་ལ་ལན་བདུན་དྲན་པར་བྱ་ཞིང་དབྱུགས་པ་བསྟན་ན་གདོན་ཐམས་ཅད་དུ་ཞིང་འབྲོས་པར་འགྱུར་རོ། །བརྗེད་བྱེད་ལ་སོགས་པའི་བར་ལ་བསྟན་པ་ཙམ་གྱིས་འབྲོས་པར་འགྱུར་རོ། །རིམས་ཐམས་ཅད་ལ་དོན་ཡོད་པའི་རྒྱལ་བོའི་སྙིང་པོས་བྱབས་ན་བྱབས་པ་ཙམ་གྱི་མོད་ལ་རིམས་ཐམས་ཅད་ལས་ཐར་བར་འགྱུར་རོ། །ཞག་བཞི་པའི་རིམས་ནི་ངུ་ཞིང་འབྲོས་པར་འགྱུར་རོ། །གཡུལ་འགྱེད་ཅིང་འཐབ་པའི་ཚེ་དོན་ཡོད་པའི་རྒྱལ་པོའི་སྙིང་པོ་ཁྲོས་པས་བཟླས་བརྗོད་བྱ། དབྱུག་པ་བསྐོར་བ་བྱས་ན་མཚོན་དང་། དགྲ་སྟ་དང་། ལག་ཆ་ཐམས་ཅད་མི་སྣང་བར་འགྱུར་ཞིང་། ཕ་རོལ་གྱི་དཔུང་རྣམས་ཀྱི་ཧུད་ཀྱི་ཧུད་ཟེར་ཞིང་འབྲོས་པར་འགྱུར་རོ། །འབྲོག་དགོན་པའི་ནང་དུ་འགྲོན་པོ་རྣམས་སོང་བ་ན་དོན་ཡོད་པའི་རྒྱལ་པོ་དྲན་པར་བྱ་ཞིང་དབྱུག་པ་བསྐོར་བ་བྱས་ན་རྐུན་པོ་དང་། ཆོམ་པོ་དང་། མི་རྒོད་དང་།
སེང་གེ་དང་། སྟག་དང་། དོམ་དང་། དྲེད་དང་། དུག་མི་བཟད་པ་དང་། གཅན་གཟན་ཁྲོ་བོ་དང་། གླང་པོ་ཆེ་དང་། མ་ཧེ་དང་། དུག་དང་བཅས་པའི་སྲོག་ཆགས་དེ་དག་ཐམས་ཅད་མི་སྣང་བར་འགྱུར་རོ། །རང་གི་ཁྱིམ་དུ་བདེ་བར་འགྲོ་བར་འགྱུར་རོ། །མི་ངས་ཐམས་ཅད་དང་། བ་ལང་གི་ནད་དང་། ཕྱུགས་ངས་ཆེན་པོ་དང་། རྟ་ནད་ཆེན་པོ་དང་། བུད་མེད་དང་། སྐྱེས་པ་དང་། ཁྱེའུ་དང་བུ་མོའི་ནད་ཆེན་པོ་བྱུང་བའི་ཚེ་དོན་ཡོད་པའི་རྒྱལ་བོའི་སྙིང་པོ་དང་། ཁྲོ་བོའི་རྒྱལ་པོའི་སྐད་ཆེན་པོས་དྲན་པར་བྱ་ཞིང་དབྱུག་པ་གྲོང་ཁྱེར་གྱི་སྒོ་བཞིར་བསྐོར་བ་བྱས་ན་བསྐོར་བ་ཙམ་གྱི་མོད་ལ་མི་ངས་དང་། གནོད་པ་དང་། ཉོན་མོངས་པ་དང་། འཁྲུག་པ་ཐམས་ཅད་པ་དང་། འཐབ་པ་དང་། རྩོད་པ་དང་། འགྱེད་པ་དང་། མཚང་འདྲུ་བ་ཐམས་ཅད་ཞི་བར་འགྱུར་རོ། །འཇིགས་པ་ཐམས་ཅད་ལས་གྲོལ་བར་འགྱུར་རོ། །བུད་མེད་དང་། སྐྱེས་པ་དགུག་པར་འདོད་ན་གནས་མཐོན་པོར་འདུག་སྟེ། སྐད་ཆེན་པོས་དོན་ཡོད་པའི་རྒྱལ་པོའི་སྙིང་པོ་ལན་ཉི་ཤུ་རྩ་གཅིག་དྲན་པར་བྱའོ། །དབྱུག་པ་བསྐོར་བར་བྱའོ། །གང་གི་ཆེད་དུ་བྱ་བ་དེ་མིང་བརྗོད་པར་བྱས་ན་དཔག་ཚད་བརྒྱ་ནས་ཀྱང་དེ་འོང་ཞིང་བདག་དང་ནོར་ལ་དབང་བྱ་བར་ཡོད་ཅིང་གནས་པར་འགྱུར་རོ། །ཇི་སྲིད་འཚོའི་བར་དུ་འགྱུར་རོ། །འོན་ཏེ་ནོར་བུ་བཟང་པོའི་སྲས་དགུག་པར་འདོད་ན་ཟླ་བ་ཡར་གྱི་ངོ་ཚེས་བཅུ་བཞི་ལ་སྨྱུང་བ་བྱས་ཏེ། དབྱུག་པ་ལ་དོན་ཡོད་པའི་རྒྱལ་པོའི་སྙིང་པོ་ལན་ཉི་ཤུ་རྩ་གཅིག་བཟླས་བརྗོད་བྱ་སྟེ། ནོར་བཟངས་ཀྱི་སྲས་ཀྱི་ལྟོ་བའི་སྟེང་དུ་གཞག་པར་བྱ། ཁྲོ་བོའི་རྒྱལ་པོ་བཟླས་པ་བྱས་ན་བཞི་ཐུན་གྱི་ཐོ་རངས་ཙམ་ན་ནོར་བུ་བཟང་པོའི་སྲས་རང་ཉིད་རིག་སྔགས་འཆང་བའི་མདུན་ན་བཞུགས་པར་འགྱུར་ཞིང་གསེར་གྱི་དོང་ཙེ་སྟོང་ཕྲག་བཅུ་སྦྱིན་པར་མཛད་དོ། །དེ་ལས་དཀོན་མཆོག་གསུམ་གྱི་སྐུ་སྐལ་དབུལ་བར་བྱ། འཕགས་པ་སྤྱན་རས་གཟིགས་དབང་ཕྱུག་ལ་མཆོད་པར་བྱ། ནོར་བུ་བཟང་པོའི་སྲས་ལ་མཆོད་ཡོན་གྱི་ཆབ་དབུལ་བར་བྱ། ཉི་མ་རེ་རེ་ཞིང་ནོར་བཟངས་ཀྱི་སྲས་ལ་མཆོད་ཡོན་གྱི་ཆབ་ཕུལ་ན་ནམ་འཚོའི་བར་དུ་ཉི་མ་རེ་རེ་ཞིང་གསེར་གྱི་དོང་ཙེ་སྟོང་སྦྱིན་པར་མཛད་དོ། །དེ་
ནས་རིག་སྔགས་འཆང་བས་ཕྱེད་དང་བཞི་ཆ་གཅིག་དགོད་པར་བྱ་སྟེ། སྦྱིན་པ་སྦྱིན་པར་བྱ། བསོད་ནམས་བསགས་པར་བྱས་ལ། ནོར་བུ་བཟང་པོའི་སྲས་དང་ལྷན་ཅིག་ཏུ་རྗེས་སུ་ཡི་རང་བར་བྱའོ། །འབྲོག་དགོན་པའི་ནང་དུ་སོང་བ་ན། འབྲོག་དགོན་པ་གང་ན་ཆུ་དཀོན་པར་དབྱུག་པ་ལ་ལན་ཉི་ཤུ་རྩ་གཅིག་དོན་ཡོད་པའི་ཞགས་པའི་སྙིང་པོ་བཟླས་བརྗོད་བྱ་ཞིང་གང་ན་ནེའུ་གསིང་སྔོན་པོ་ཡོད་པའི་གནས་དེར་ས་ལ་ལན་བདུན་བརྡབ་ཅིང་བསྐོར་ཏེ་སྐད་དྲག་པོས་དོན་ཡོད་པའི་རྒྱལ་པོའི་སྙིང་པོ་དྲན་པར་བྱ། འཕགས་པ་སྤྱན་རས་གཟིགས་ཀྱི་དབང་ཕྱུག་ལ་ཉམ་ཐག་ཐག་སྐད་དུ་བྱས་ན། དེ་ནས་གནས་གང་དུ་བརྡབས་པའི་གནས་དེར་ལྷ་རྫས་ཀྱི་ཆུ་ཧ་ཅང་གྲང་པ་ཡང་མིན། ཧ་ཅང་དྲོ་བ་ཡང་མིན། རོ་དང་ཆས་པ་ཡོད་པའི་རྫིང་བུ་འབྱུང་བར་འགྱུར་རོ། །དེ་ནས་རིག་སྔགས་འཆང་བས་དབྱུག་པ་ལ་ཁྲོ་བོའི་རྒྱལ་པོ་ལན་བདུན་བཟླས་བརྗོད་བྱ་སྟེ། རྫིང་བུའི་ནང་དུ་ཆུ་ལ་བརྡབ་པར་བྱའོ། །དེ་ནས་རྫིང་བུའི་ནང་ནས་མི་སེར་སྐྱ་བོ་ཞིག་བྱུང་སྟེ། རིག་སྔགས་འཆང་བ་ལ་ཐལ་མོ་ཁོང་སྟོང་དུ་སྦྱར་ནས་མདུན་ན་འདུག་སྟེ་རིག་སྔགས་འཆང་བ་ཅི་འདོད་ཅེས་སྨྲས་བར་འགྱུར་རོ། །རིག་སྔགས་འཆང་བས་བདག་ནི་ཁ་ཟས་ཀྱི་ཁ་ཟས་ཀྱི་ཆེད་དུ་ལགས་ཀྱིས་སྩལ་དུ་གསོལ་ཞེས་བརྗོད་པར་བྱའོ། །དེ་ནས་རིག་སྔགས་འཆག་བས་མི་དེ་ལ་ཤིས་པའི་ཚིག་བརྗོད་པར་བྱའོ། །དེ་ནས་མི་དེ་རྫིང་བུའི་ནང་དུ་ཞུགས་པ་དང་། སྐད་ཅིག་ཐང་ཅིག་ཡུད་ཙམ་ལ་ཁ་ཟས་དང་བཏུང་བའི་རོ་ཞིམ་པོ་རྣམ་པ་སྣ་ཚོགས་ཡོད་པར་བྱེད་ཅིང་རིག་སྔགས་འཆང་བ་ལ་སྦྱིན་པར་བྱེད་དོ། །སྐྱེ་བོ་སྟོང་ཕྲག་བརྒྱའི་སྟོན་མོ་བྱར་ཡོད་ཅིང་ཡོ་བྱད་ཕུན་སུམ་ཚོགས་པ་ཤིན་ཏུ་མང་པོར་འགྱུར་རོ། །གལ་ཏེ་རིག་སྔགས་འཆང་བས་རྫིང་བུ་མེད་པར་མི་བྱེད་ན་རྫིང་བུ་དེ་དུས་རྟག་ཏུ་གནས་པར་འགྱུར། མི་སྣང་བར་མི་འགྱུར་ཏེ། སེམས་ཅན་ཐམས་ཅད་དང་འགྲོན་པོ་ཐམས་ཅད་ལ་ཡོ་བྱད་ཐམས་ཅད་ཀྱིས་བྲེལ་བ་མེད་པར་འབྱུང་བར་འགྱུར་རོ། །འོན་ཏེ་དོན་ཡོད་པ་སྣ་ཚོགས་བྱ་བར་འདོད་ན་རིག་སྔགས་འཆང་བ་དེས་ལན་ཉི་ཤུ་རྩ་གཅིག་བཟླས་བརྗོད་བྱས་པའི་དྲི་ཆུས་ཁྲུས་བྱས་ལ་སྤྱི་གཙུག་བཅིང་བར་བྱའོ། །མི་སྨྲ་བར་དབྱུག་པ་ལ་ལན་
བརྒྱ་རྩ་བརྒྱད་བཟླས་བརྗོད་བྱས་ཏེ་བསྐོར་བར་བྱའོ། །དེ་ནས་འཁོར་དང་སྐྱེ་བོ་མང་པོ་འཁོར་ཞིང་རྨོངས་པར་འགྱུར་རོ། །དེ་ནས་དབྱུགས་པ་བསྐོར་བ་བྱས་ན་ཡིད་ལ་ཇི་ལྟར་སེམས་པའི་ངོ་བོ་དེ་བཞིན་དུ་ཐམས་ཅད་སྟོན་པར་བྱེད་དོ། །འབྲས་བུ་དང་མེ་ཏོག་གི་ཆར་འབེབས་སོ། །སྒྱུ་མ་རྣམ་པ་སྣ་ཚོགས་སྟོན་པར་བྱེད་དོ། །དེ་ནས་རོ་ལངས་བསླང་བར་འདོད་ན་རིག་སྔགས་འཆང་བ་དེས་ལེགས་པར་ཁྲུས་བྱས་ཤིང་གོས་གསར་བ་བགོས་ཏེ། གཙང་མར་བྱས་ལ་དུར་ཁྲོད་དུ་སོང་སྟེ། དབྱུག་པ་ལ་དོན་ཡོད་པའི་རྒྱལ་པོའི་སྙིང་པོ་ལན་བདུན་བཟླས་བརྗོད་བྱས་ནས་ཁྲོ་བོའི་རྒྱལ་པོ་ལན་བདུན་བཟླས་བརྗོད་བྱེད་ཅིང་དུར་ཁྲོད་ཀྱི་ནང་དུ་བསྐོར་བ་བྱས་ན་དཔག་ཚད་ཚུན་ཆད་དུ་ཀུན་ཏུ་མཚམས་བཅད་པར་འགྱུར་རོ། །བགེགས་ཐམས་ཅད་དང་། གནོད་སྦྱིན་དང་། སྲིན་པོ་མ་རུངས་པ་ཐམས་ཅད་བཅིངས་པར་འགྱུར་རོ། །དེ་ནས་རིག་སྔགས་འཆང་བས་མི་རོ་བླངས་ཏེ་བཀྲུ་བར་བྱའོ། །བའི་རྣམ་ལྔས་སྦྱང་བར་བྱའོ། །བའི་ལྕི་བས་དཀྱིལ་འཁོར་གྲུ་བཞི་ལྷམ་པར་བྱའོ། །སེང་ལྡེང་གི་ཕུར་པ་ཚད་སོར་བཅུ་གཉིས་པ་བཞི་གྲྭ་བཞིར་གཟུགས་པར་བྱའོ། །ཚོན་སྣ་ལྔའི་སྐུད་པས་དཀྱིལ་འཁོར་ཀུན་ཏུ་བསྐོར་བར་བྱའོ། །མི་རོ་རས་དཀར་པོས་དཀྲི་བར་བྱས་ལ་དཀྱིལ་འཁོར་དབུས་སུ་གཞག་པར་བྱའོ། །མེ་ཏོག་གིས་གཏོར་བར་བྱའོ། །གཏོར་མ་དཀར་པོ་གཞག་པར་བྱའོ། །མཆོད་ཡོན་གྱི་ཆུ་གཞག་པར་བྱའོ། །གུ་གུལ་གྱི་བདུག་པ་སྦྱིན་པར་བྱའོ། །རིག་སྔགས་འཆང་བ་ཤར་ཕྱོགས་སུ་ཁ་བལྟས་ཏེ་འདུག་ལ། དབྱུག་པ་ལག་པ་གཡས་པར་བཞག་སྟེ། རིག་པའི་རྒྱལ་པོ་གདོན་པར་བྱའོ། །ཁྲོ་བོའི་རྒྱལ་པོ་ལན་དྲུག་ཅུ་དྲན་པར་བྱའོ། །གཡས་པས་བྱབ་པར་བྱའོ། །ལག་པ་གཡས་པའི་དབྱུག་པས་བརྡབ་པ་བྱས་ན་མི་རོ་དེ་འགུལ་བར་འགྱུར།གཡོ་བར་འགྱུར། ལངས་ཏེ་ཕྱོགས་བཅུར་ལྟ་བར་འགྱུར། རིག་སྔགས་འཆང་བས་དབྱུག་པ་དེ་སྤྱི་བོར་གཞག་པར་བྱས་ན། མི་རོ་དེ་ཚིག་སྨྲ་བར་འགྱུར་རོ། །རིག་སྔགས་འཆང་བས་གསང་སྔགས་དྲན་པར་བྱའོ། །ཡིད་ཀྱིས་བསམ་པར་བྱས་ན་མི་རོ་དེ་ཐམས་ཅད་སྨྲ་བར་འགྱུར་ཏེ། འདས་
པ་དང་། མ་འོངས་པ་དང་། ད་ལྟར་བྱུང་བ་དང་། མ་འོངས་པ་ན་འབྱུང་བ་སྨྲ་བར་འགྱུར་རོ། །དེ་ནས་རིག་སྔགས་འཆང་བས་དབྱུག་པ་སྙིང་གར་གཞག་པར་བྱས་ན་ཁྲག་ཏུ་སྐྱུག་པར་འགྱུར། ཁྲག་དེས་ཐིག་ལེ་བྱས་ན་ཁྱིམ་ཐམས་ཅད་ལ་སྒོ་སྲུང་མེད་ཅིང་། སྒོ་ཐམས་ཅད་གདངས་པར་འགྱུར་རོ། །བུད་མེད་དང་། སྐྱེས་པ་དང་། ཁྱེའུ་དང་། བུ་མོ་ཐམས་ཅད་དབང་དུ་གྱུར་ཅིང་འདུག་གོ། །དབྱུག་པ་སྙིང་གར་བཙིར་ན་སྐྱུག་པར་འགྱུར་རོ། །རིག་སྔགས་འཆང་བས་བླངས་ཏེ་མཐའ་དག་བཟའ་བར་བྱའོ། །ཟོས་པ་ཙམ་གྱིས་ནམ་མཁའ་ལ་འགྲོ་བར་འགྱུར་རོ། །འབྱུང་པོ་ཆེན་པོའི་བདག་པོ་དང་། དབང་ཕྱུག་ཆེན་པོ་འདྲ་བར་འགྱུར་རོ། །ལྷའི་ལོ་སྟོང་དུ་འཚོ་བར་འགྱུར་རོ། །ཨོཾ་ཞེས་བྱ་བས་དབྱུག་པས་བཅིར་ལ་བསྡིགས་པ་བྱས་ན་དེ་ནས་ལྕེ་འབྱིན་པར་འགྱུར་རོ། །རིག་སྔགས་འཆང་བས་བཅད་ལ་རིག་སྔགས་འཆང་བས་བླང་བར་བྱའོ། །བླངས་པ་ཙམ་གྱིས་ནམ་མཁའ་ལ་འགྲོ་བར་འགྱུར་རོ། །རིག་སྔགས་འཆང་བ་རལ་གྲིའི་འཁོར་ལོས་སྒྱུར་ཡར་འགྱུར་རོ། །ལོ་སྟོང་ཕྲག་བཅུར་འཚོ་བར་འགྱུར་རོ། །རིག་སྔགས་འཆང་བ་བཅྭ་བརྒྱད་ཀྱི་འཁོར་གྱིས་བསྐོར་བར་འགྱུར་རོ། །དེ་ནས་རིག་སྔགས་འཆང་བས་མི་རོའི་སྤྱི་བོར་དབྱུག་པས་བརྡ་བས་ན་སྒྲ་འབྱུང་བར་འགྱུར་ཞིང་ཤི་བའི་རོ་གཅིག་ཏུ་མཁྲེགས་པའི་གསེར་ཡིན་པས་བླང་བ་བྱས་ན་སྲང་གཅིག་གིས་ཟངས་སྲང་སྟོང་གསེར་དུ་འགྱུར་རོ། །དེ་དག་ནི་འཇིག་རྟེན་པ་སྒྲུབ་པའི་ཆོ་ག་ཡིན་ནོ།། །།