དཀྱིལ་འཁོར་གྱི་ཆོ་ག་དང་སྒྲུབ་ཐབས་ཅད་ཀྱི་ཆོ་ག
དེ་ནས་དཀྱིལ་འཁོར་བཤད་པར་བྱ་སྟེ། དེ་ཁོ་ན་ཉིད་ཀྱི་དངོས་གྲུབ་བླ་ན་མེད་པ་དང་། དོན་ཡོད་ཞགས་པའི་པདྨ་གཙུག་ཏོར་གྱི་དངོས་གྲུབ་དང་། རིག་པ་འཛིན་པ་ཐམས་ཅད་ཀྱི་དངོས་གྲུབ་ཀྱི་དེ་ཁོ་ན་ཉིད་བླ་ན་མེད་པའོ། །དང་པོར་སྡིག་པ་ཟད་པར་བྱེད་པ་དེ་བཞིན་དུ་སྒྲིབ་པ་ཐམས་ཅད་རྣམ་པར་ཉམས་པར་བྱེད་པ། འདོད་པ་ཐམས་ཅད་ཀྱི་དངོས་གྲུབ་དང་། དོན་ཡོད་པའི་དངོས་གྲུབ་བླ་ན་མེད་པ་དང་། སྔགས་ཀྱི་
དངོས་གྲུབ་དང་། མཆོག་གི་དངོས་གྲུབ་དང་། གཟུངས་ཐོབ་པའི་དངོས་གྲུབ་རྣམས་དང་། ས་བཅུ་ལ་རབ་ཏུ་འཇུག་པར་བྱེད་པ་གྲུབ་པ། སངས་རྒྱས་ཉིད་ཀྱི་སྒྲུབ་ཐབས་དེ་ཁོ་ན་ཉིད་མཐོང་བ་རྨད་དུ་བྱུང་བ། བྱང་ཆུབ་ཀྱི་སྙིང་པོར་ཉེ་བར་འགྲོ་བར་བྱེད་པ། རྡོ་རྗེ་གདན་གྱི་གནས་སུ་ཡང་དག་པར་ལྷག་པར་གནས་པ། ཆོས་ཀྱི་འཁོར་ལོ་བསྐོར་བར་བྱེད་པ། བདུད་འཇོམས་ཤིང་ཚར་གཅོད་པ། བགེགས་ཐམས་ཅད་ལྷུང་བར་བྱེད་པ། སངས་རྒྱས་ཀྱི་ཞིང་གི་གནས་མཐོང་བར་བྱེད་པ། དེ་ཉིད་ལས་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་རློབ་པའི་གནས་དང་མཉམ་པ། སེམས་ཅན་ཐམས་ཅད་དང་ཐུན་མོང་བའོ། །དེ་ནས་པོ་ཊ་ལ་ཀའི་གཞལ་མེད་ཁང་དང་མཉམ་པའི་གནས། དོན་ཡོད་པ་སྤྱན་རས་གཟིགས་དབང་ཕྱུག་གི་གནས། སྐད་ཅིག་ལ་མནར་མེད་པའི་གནས་དང་། མཚམས་མེད་པ་ལྔ་རྣམ་པར་སྦྱོང་བར་བྱེད་པ། དེ་བཞིན་གཤེགས་པ་ཐམས་ཅད་ཀྱི་གསང་བའི་གནས་དང་མཉམ་པ་དང་། དེ་བཞིན་དུ་སངས་རྒྱས་ཐམས་ཅད་ཀྱི་རིགས་ཀྱི་མཆོག་བྱང་ཆུབ་སེམས་དཔའི་གཞིའི་གནས་དེ་བཞིན་དུ་རྡོ་རྗེ་སྙིང་པོའི་དགེ་བ་འཕེལ་བ་དེ་གཤེགས་པའི་རིགས་ཀྱི་རིག་སྔགས་ཀྱི་དངོས་གྲུབ་དང་། དེ་བཞིན་དུ་པདྨའི་རིགས་དང་། དེ་བཞིན་དུ་ནོར་བུའི་རིགས་དང་། དེ་བཞིན་དུ་རྡོ་རྗེའི་རིགས་ཀྱི་དངོས་གྲུབ་དང་། དཀྱིལ་འཁོར་གྱི་གཙོ་བོ་གཅིག་པུར་ཞུགས་པ་དཀྱིལ་འཁོར་གྱི་མཆོག་རི་རབ་ཆེན་པོ་དང་མཉམ་པའི་གནས། དེ་བཞིན་དུ་རྒྱ་མཚོ་ཆེན་པོ་ལྟ་བུ། ཁྱད་པར་དུ་འཕགས་པའི་གནས་ཐམས་ཅད་དུ་སོན་པ། ཡིད་བཞིན་གྱི་ནོར་བུའི་མཆོག་རབ་ཏུ་སྦྱིན་པ། དཔག་བསམ་ཤིང་དང་མཚུངས་པའི་གནས། ཡིད་ཀྱི་ཤིང་རྟ་ཐམས་ཅད་ཡོངས་སུ་རྫོགས་པར་བྱེད་པ། རེ་བ་ཕུན་སུམ་ཚོགས་པར་བྱེད་པའི་གནས་ཐམས་ཅད་དུ་མཆོག་སྦྱིན་པ་པོ་འདི་ནི་བྱང་ཆུབ་ཀྱི་ས་བོན་གྱི་གནས་ཏེ། སེམས་ཅན་ཐམས་ཅད་རྟག་ཏུ་སྒྲོལ་བར་བྱེད་པ། དོན་ཡོད་པའི་གནས་གསང་ཞིང་རྡོ་རྗེ་བྱིན་གྱིས་རློབ་པ་བླ་ན་མེད་པའོ། །བསོད་ནམས་
ཐམས་ཅད་འགུགས་པར་བྱེད་པའི་གནས། དགེ་བའི་རྩ་བ་ཐམས་ཅད་རྣམ་པར་འཕེལ་བར་བྱེད་པ། འདི་ནི་བསོད་ནམས་ཀྱི་ཕུང་པོའི་གནས། ཆོས་ཀྱི་མཛོད་དང་རྟག་ཏུ་མཉམ་པ། སངས་རྒྱས་ཀྱི་མཛོད། མཛོད་ཆེན་པོ་སྤྱན་རས་གཟིགས་ཀྱི་མཛོད་ལ་མཁས་པ་རྟག་ཏུ་པདྨའི་མཛོད། དེ་བཞིན་དུ་དེ་བཞིན་གཤེགས་པ་ཐམས་ཅད་ཀྱི་མཛོད། རྡོ་རྗེའི་མཛོད། དེ་བཞིན་དུ་ནོར་བུ་ཆེན་པོ་ཉིད་ཀྱི་མཛོད། རྒྱ་མཚོ་ཆེན་པོ་ལྟར་ཟབ་པ། མི་གཡོ་བ། མི་འགུལ་བ། ཟིལ་གྱིས་མི་ནོན་པའོ། །བདུད་དང་། ལོག་པར་འདྲེན་པ། བགེགས་དང་། གནོད་སྦྱིན་དང་། སྲིན་པོ་དང་། འབྱུང་པོ་དང་། སྲིན་པོ་ཐམས་ཅད་ཀྱིས་སྡང་བའི་སེམས་ཀྱིས་འཇུག་པར་མི་ནུས་སོ། །དེ་ལ་མི་གཡོ་བའི་གནས་རྙེད་དཀའ་ཞིང་བླ་ན་མེད་པའོ། །དཀྱིལ་འཁོར་གྲུ་བཞི་པར་བྱ་སྟེ། བ་བྱུང་དང་ཡང་དག་པར་ལྡན་པ། ཁྲུ་སུམ་ཅུ་རྩ་གཉིས་པ་བྱའོ། །ཡང་ན་ཁྲུ་བརྒྱད་པར་བྱ་སྟེ། དེ་ཕྱེད་དང་གཉིས་ཀྱི་ཁྲུའི་ཚད་ཀྱི་ཐིག་སྐུད་ཀྱིས་ཚད་རྣམ་པར་ཕྱེ་སྟེ་གདབ་པར་བྱའོ། །གྲྭ་བཞི་མཉམ་པར་ཕྱེ་བ། ལོགས་བཞི་ལེགས་པར་རྣམ་པར་ཕྱེ་བ། ཤིན་ཏུ་འཇམ་པ། ཤིན་ཏུ་ལེགས་པར་བཅགས་པ། བསྙེན་ལ་འཇམ་ཤིང་བརྒྱན་པ། ས་གཞི་བཻ་ཌཱུརྱའི་ཁ་དོག་ལ་དཀྱིལ་འཁོར་མཛེས་པ་ཐིག་གིས་ཆར་རྣམ་པ་དབྱེ་བར་བྱ་སྟེ། སྒོ་བཞི་རྣམ་པར་ཕྱེ་བ། སྐུད་པ་ལ་ཚོན་སྣ་ལྔ་བྱིན་ཏེ། དབུས་ཀྱི་དཀྱིལ་འཁོར་གྱི་སྙིང་པོར་གྲུ་བཞི་པར་རྣམ་པར་དབྱེའོ། །ཁྲུ་གཉིས་ཀྱི་ཚད་ཀྱིས་རེ་ཁཱ་ལྔ་རྣམ་པར་དབྱེའོ། །དབུས་ཀྱི་དཀྱིལ་འཁོར་གྱི་སྙིང་པོར་པདྨ་འདབ་མ་སུམ་ཅུ་རྩ་གཉིས་པ་ཀུན་ནས་རྒྱས་པ་བྲི་བར་བྱ་སྟེ། དབུས་ཀྱི་པདྨའི་གེ་སར་ལ། དོན་ཡོད་པ་པདྨའི་གཙུག་ཏོར་བྱ་སྟེ། པདྨ་ཕྱེད་ཁ་བྱེ་པའི་པདྨའི་འདབ་མའི་སྟེང་དུ། པདྨ་ལ་ཞལ་གསུམ་པར་བྲི་བར་བྱ་སྟེ། བདེ་བའི་གཟུགས་དང་མཚན་གྱིས་བརྒྱན་པ། གཙུག་ཏོར་གྱི་རྣམ་པ་འབར་བའི་སྙིང་པོ་ལ་ཁོར་ཡུག་ཏུ་ཡོངས་སུ་བསྐོར་བ་བྲིའོ། །གཞོགས་གཡས་སུ་འཕགས་པ་སྤྱན་རས་གཟིགས་དབང་ཕྱུག་གི་
གཟུགས་རལ་པའི་ཅོད་པན་གྱིས་བརྒྱན་པ་དབུལ་འོད་དཔག་མེད་འབར་བའི་སྙིང་པོའི་ལུས་ཅན་ནོ། །གཞོགས་གཡོན་དུ་འཕགས་པ་སྤྱན་རས་གཟིགས་དབང་ཕྱུག་གི་གཟུགས་རལ་པ་དང་རྒྱན་བཅིངས་པ། འབར་བའི་སྙིང་པོའི་ལུས་དང་དབུ་ལ་པདྨ་གཙུག་ཏོར་གྱི་ཁོར་ཡུག་ཏུ་འོད་ཟེར་སྣ་ཚོགས་འབར་བའོ། །ཕྱི་རོལ་དུ་ཙམ་པ་ཀ་དང་། བཱརྵི་ཀ་དང་། ཨུཏྤལ་སྔོན་པོའི་མེ་ཏོག་གི་ཕྲེང་བ་བཅིང་བར་བྱའོ། །དེ་ནས་དཀྱིལ་འཁོར་གྱི་སྙིང་པོའི་གྲྭ་བཞིའི་གནས་རྣམས་སུ་རྒྱལ་པོ་ཆེན་པོ་བཞི་བྲི་བར་བྱ་སྟེ། གོ་ཆ་དང་ཡ་ལད་བགོས་པ་དྲག་པོའི་གཟུགས་ཅན་འཇིགས་པར་བྱེད་པ་འབར་བའི་ཕྲེང་བའི་སྙིང་པོའི་ལུས་སོ། །དཀྱིལ་འཁོར་གྱི་རེ་ཁཱ་སྔོན་མ་ལ། རྡོ་རྗེ་དང་མདུང་རྩེ་གསུམ་པའི་རེ་ཁཱ་འབར་བ་དང་བཅས་པ་བྲི་བར་བྱའོ། །རེ་ཁཱ་རིམ་པར་ཕྱེ་བ་གཉིས་པ་ལ་མེ་ཏོག་གི་རེ་ཁཱ་བྲི་བར་བྱའོ། །གསུམ་པ་ལ་ནོར་བུ་རིན་པོ་ཆེ་ཆེན་པོའི་སྐུད་པ་རེ་ཁཱ་བྲི་བར་བྱའོ། །རེ་ཁཱ་བཞི་པ་ལ་ལག་པའི་ཕྱག་རྒྱ་མཚོན་ཆ་སྣ་ཚོགས་པ་འཛིན་པ་བྲི་བར་བྱའོ། །རེ་ཁཱ་ལྔ་པ་ལ་ཁ་ཁྱེར་གྱི་རྣམ་པ་བྲི་བར་བྱ་སྟེ། ཚོན་སྣ་ཚོགས་པས་རྣམ་པར་ཕྱེ་བ་རྣམ་པར་བཀྲ་བའོ། །དཀྱིལ་འཁོར་གྱི་ཕྱིའི་ཁོར་ཡུག་ཏུ་མཚན་མའི་ཕྱག་རྒྱ་མཚོན་ཆ་སྣ་ཚོགས་པ་རྣམས་བྲི་བར་བྱའོ། །དཀྱིལ་འཁོར་གྱི་སྒོ་བཞི་རྣམས་སུ་གནོད་སྦྱིན་ཆེན་པོ་བཞི་བྱ་སྟེ། དྲག་པོ་དྲག་ཏུ་རྒོད་པའི་གཟུགས་ཅན་མཆེ་བ་གཙིགས་པ་བཞིན་རྣམ་པར་འགྱུར་བ་བུམ་པ་གང་བ་ཐོགས་པ། སྐྲ་བརྫེས་པ། རྒྱན་ཐམས་ཅད་ཀྱིས་རྣམ་པར་བརྒྱན་པ་ཐོད་པའི་ཅོད་པན་ཅན་འབར་བའི་སྙིང་པོའི་ལུས་ཅན་རི་བོའི་གདན་ལ་གནས་པར་བྱའོ། །དཀྱིལ་འཁོར་གྱི་རེ་ཁཱའི་ཕྱི་རོལ་དུ་ཕྲེང་གསུམ་འགྱུར་དུ་བྲི་བར་བྱའོ། །པདྨ་དང་། ཨུཏྤལ་སྔོན་པོ་དང་། ཙམ་པ་ཀ་དང་། སྣ་མའི་མེ་ཏོག་དང་། བཱརྵི་ཀ་དང་། ཨ་དྷི་མུཀྟ་ཀ་རྣམས་རྣམ་པར་དབྱེ་བར་བྱའོ། །དེ་ནས་རིག་སྔགས་འཆང་གིས་དཀྱིལ་འཁོར་ལེགས་པར་བྲི་བར་བྱས་ནས་ཤིན་ཏུ་རྣམ་པར་ཕྱེ་བ། ཤིན་ཏུ་མཁས་པ་དཀྱིལ་འཁོར་གྱི་ཁོར་ཡུག་ཏུ་རྒྱན་དང་། རྟ་བབས་བཞིས་མཛེས་པར་བྱས་པ། ཁོར་ཡུག་ཏུ་མདའ་དང་། ཚོན་སྣ་ཚོགས་ཀྱིས་རྣམ་
པར་བཀྲ་བའི་བ་དན་དང་། གདུགས་དང་། རྒྱལ་མཚན་དང་། བ་དན་དང་། བླ་རེ་དང་། དར་དཔྱངས་དང་། ཁོར་ཡུག་ཏུ་བུམ་པ་གང་བ་བཅུ་དྲུག་དང་། གཏོར་མའི་བུམ་པ་བཅུ་དྲུག་དང་། དེ་བཞིན་དུ་བདུག་པའི་སྣོད་བཅུ་དྲུག་དང་། གཞོང་པ་བཅུ་དྲུག་ཏུ་རབ་ཏུ་བརྗོད་དོ། །ཁམ་པོར་བཅུ་དྲུག་ཏུ་བཤད་པ་དང་། དྲི་སྣ་ཚོགས་པའི་སྣོད་དང་། ལྷུང་བཟེད་བཅུ་དྲུག་ཉིད་དང་། མཆོད་ཡོན་གྱི་སྣོད་བཅུ་དྲུག་དང་། དངུལ་གྱི་སྣོད་བཞི་དང་། དྲིའི་ཕྱེ་མ་རྣམས་བཞག་ཅིང་གཏོར་མའི་བུམ་པ་བཅུ་དྲུག་བཞག་ནས་པོག་ཕོར་བཞིའི་ནང་དུ་ཙནྡན་དང་། ཨ་ག་རུ་དང་དུ་རུ་སྐ་དང་པོག་དང་། གུ་གུལ་གྱི་བདུག་པ་སྲེག་ཅིང་དེ་བཞིན་དུ་སྤྲྀ་ཀ་དང་། སྲ་རྩི་པོག་དང་། གུར་གུམ་དང་། གླ་རྩི་དང་། བོ་ལ་དང་། ག་པུར་ཙམ་དང་ཡང་དག་པར་ལྡན་པའོ། །དཀྱིལ་འཁོར་གྱི་ལྷ་ཐམས་ཅད་ཀྱི་བྱུག་པ་འདི་ཉེ་བར་གཞག་པར་བྱའོ། །ཙནྡན་དང་། གུར་གུམ་དང་། དེ་བཞིན་དུ་ཛཻ་གྷ་དང་། བལླི་ཀའི་ཕྱེ་མ་རྣམས་ཐམས་ཅད་ཡང་དག་པར་སྦྱར་བ་འདིས་ཕྱེ་མར་སྦྱར་བས་བསྒོས་པའོ། །མེ་ཏོག་སྣ་ཚོགས་གཅལ་དུ་བཀྲམ་ཞིང་ཇི་ལྟར་འདོད་པ། ཇི་ལྟར་སྟོང་པ་དང་། ཇི་ལྟར་ཐོབ་པའི་མེ་ཏོག་མཛེས་པ་མངོན་པར་གཏོར་བར་བྱའོ། །དཀྱིལ་འཁོར་གྱི་ཁོར་ཡུག་ཏུ་དྲིའི་ཆུས་གང་བའི་བུམ་པ་མ་རེག་པ་དང་གསེར་དང་། དངུལ་ལས་བྱུང་བའི་སྣོད་གསར་པ་ཉིད་དང་། ཟངས་དང་ས་ལས་བྱུང་བའི་མཆོག་དང་། དྲི་སྣ་ཚོགས་སྦྱར་བས་དགང་བར་བྱའོ། །བུམ་པ་དང་བཀྲ་ཤིས་བཅིང་བར་བྱ་ཞིང་པི་ཝང་དང་། གོས་བཟང་པོ་དང་། རྒྱན་དང་། ལྷབ་ལྷུབ་རྣམས་ཀྱིས་བརྒྱན་པར་བྱའོ། །རིང་བསྲེལ་པདྨའི་སྟེང་དུ་བཞག་ནས་བུམ་པ་དང་། གཙུག་ཏོར་གྱི་མཚན་ཉིད་དང་། སྣ་མའི་མེ་ཏོག་དང་། གདུ་བུ་བྱས་ནས་གཞག་པར་བྱའོ། །དབུས་ཀྱི་སྙིང་པོའི་དཀྱིལ་འཁོར་དུ་སྙིང་པོ་དང་། ཉེ་བའི་སྙིང་པོ་ཉིད་ཀྱི་གསང་སྔགས་སྟོང་ཕྲག་བརྒྱད་བཟླས་སོ། །དེ་ནས་གཏོར་མའི་ལས་ལ་མཉམ་པར་བཞག་ནས་སྣ་ཚོགས་པའི་གཟུགས་རྣམ་པ་སྣ་ཚོགས་དང་། དཀར་པོ་དང་། དེ་བཞིན་དུ་སྣ་ཚོགས་པའི་གཟུགས་ཉིད་དང་སྣ་ཚོགས་པའི་རོ་གཞག་པར་བྱའོ། །རྣམ་པ་སྣ་ཚོགས་སུ་
ཕྱེ་བའི་སྣ་ཚོགས་པའི་གཟུགས་དང་། སྣ་ཚོགས་པའི་ཁ་དོག་དང་རོ་ཉིད་དང་སྣ་ཚོགས་པའི་ཡུལ་དུ་རྒྱུ་བ་སྟེ། འདི་ནི་གཏོར་མར་བརྗོད་དེ། འབྱོར་བའི་གཏོར་མར་བཤད་དོ། །དཀྱིལ་འཁོར་གྱི་ཁོར་ཡུག་ཏུ་རྒྱན་གདགས་ཏེ་སྣ་ཚོགས་པའི་འབྲས་བུ་རྒྱ་ཆེན་པོ་དང་། སྣ་ཚོགས་པའི་ལོ་མ་སྔོན་པོའི་ཕྲེང་བ་དང་། མར་མེའི་ཕྲེང་བ་བརྒྱ་རྩ་བརྒྱད་དང་། ཇི་ལྟར་རྙེད་པའི་མར་དང་ཏིལ་མར་གྱིས་ཀུན་ནས་བཀང་བ་བརྒྱ་རྩ་བརྒྱད་དོ། །བདག་དངོས་གྲུབ་འདོད་པ་རྣམས་ཕྱེ་དང་། ལ་ཕུག་དང་། དཀར་དང་། ལ་དུ་དང་། སྲན་མ་མུད་གའི་ལ་དུ་དང་། འབྲས་བུ་རྣམས་དེ་བཞིན་དུ་ལོག་འདྲེན་ལ་གཏོར་མར་བྱིན་པས་ལས་ཐམས་ཅད་བདེ་བླག་ཏུ་འགྲུབ་བོ། །ཕྱེའི་ཟན་དང་། ཞོའི་ཉིང་ཁུ་དང་། ལོ་མ་སྔོན་པོ་ཉིད་གནོད་སྦྱིན་དང་། སྲིན་པོ་ཀུན་ནས་ཕྱོགས་བཞིར་གནས་པ་རྣམས་ལ་གཏོར་མར་སྦྱིན་པར་བྱའོ། །ཞོའི་ཟན་དང་འོ་མ་ཡང་སྟེ། འདི་ནི་འབྱུང་པོའི་གཏོར་མར་བཤད་དོ། །ལོ་མའི་གོང་བུ་དང་། ཕྱེ་དང་། འབྲས་ཐུག་པོ་ཆེའི་ཟན་དང་། དེ་བཞིན་དུ་འཁུར་བ་ཟླུམ་པོ་སྟེ། འདི་ནི་ཕྱོགས་བཞིར་ཡི་དགས་དང་ཤ་ཟ་རྣམས་ལ་གཏོར་མར་སྦྱིན་པར་བྱའོ། །འབྲས་ཐུག་པོ་ཆེ་དང་། འོ་མའི་ཟན་ནི་ཟླ་བ་དང་། ཉི་མའི་ཚོགས་ཀྱིས་ལྷན་ཅིག་པའི་ལྷ་དང་རྒྱུ་སྐར་རྣམས་ཀྱི་གཏོར་མར་བྱའོ། །རྟག་ཏུ་ཙནྡན་གྱི་ཆུ་དང་། དེ་བཞིན་དུ་མེ་ཏོག་དང་འོ་མའི་ཟན་ནི་མཚན་མོའི་ལྷ་ལ་གཏོར་མར་སྦྱིན་པར་བྱ་སྟེ་ལས་ཀྱི་དངོས་གྲུབ་བླ་ན་མེད་པའོ། །འབྲུ་བདུན་མཛེས་པ་ཆེན་པོ་དང་། ཤིང་སྣུ་ཧ་མཆོག་ཏུ་མཛེས་པ། འབྲས་ཨཱ་མ་ཁུ་བསྐོལ་བ་མཛེས་པ་དང་། ཞོ་དང་འོ་མ་སོ་སོར་མཉམ་པ་དང་། མེ་ཏོག་དང་། འབྲས་བུ་དང་བཅས་པ་རྣམ་པ་བདུན་པོ་སའི་དཀྱིལ་འཁོར་གྱི་ལྷ་ལ་གཏོར་མར་སྦྱིན་པར་བྱའོ། །ས་ཀུརྦ་དང་། རྩབ་མོ་དང་། འབྲས་ཐུག་པོ་ཆེ་བཙོས་པའི་ཁུ་བ་དང་ལྡན་པ་འདི་རླུང་ལྷའི་གཏོར་མར་བརྗོད་དེ། རླུང་གི་དཀྱིལ་འཁོར་ཐམས་ཅད་དགྱེས་པར་བྱེད་དོ། །ཞོ་དང་འོ་མ་བསྐོལ་བ་དང་། འབྲས་ཐུག་པོ་ཆེ་དང་། ཧྭགས་དང་བཅས་ཤིང་བུ་རམ་དང་བཅས་པར་ལྡན་པ་འཁུར་བ་ཟླུམ་པོ་
དང་། མར་གྱིས་གང་བའི་འཁུར་བ་འདི་ནི་ཀླུའི་རྒྱལ་པོ་རྣམས་ཀྱི་གཏོར་མར་བརྗོད་དེ་ལས་ཐམས་ཅད་སྒྲུབ་པའོ། །འཁུར་བ་ཟླུམ་པོ་དང་། བ་བྱུང་ལྔ་དང་། པུ་ཤེལ་ཙེ་དང་། མ་ལ་ཡའི་ཙནྡན་དང་། འབྲས་ཐུག་པོ་ཆེ་དང་། ཞབས་བསིལ་དང་། མཆོད་ཡོན་རྣམས་བདུད་ཀྱི་དཀྱིལ་འཁོར་ལ་གཏོར་མར་སྦྱིན་པར་བྱའོ། །གུར་གུམ་གྱི་ཆུ་དང་འབྲས་ཐུག་པོ་ཆེ་ལ་དྲི་བཟང་པོས་བསྒོས་ཏེ། ཆུ་ཀླུང་གི་རྒྱལ་པོ་ལ་གཏོར་མར་སྦྱིན་པར་བྱའོ། །ཐམས་ཅད་དུ་ལས་ཐམས་ཅད་སྒྲུབ་པར་བྱེད་དོ། །རྩྭ་དཱུར་བའི་ཆུ་དང་། འོ་མ་དང་། གཏུམ་པའི་ས་བོན་བཙོས་པ་དང་། འབྲས་ཐུག་པོ་ཆེ་ནི་ཚངས་པའི་སྲིན་པོ་ཉིད་དང་། གསང་བ་པ་རྣམས་ལ་གཏོར་མར་དབུལ་བར་བྱ་སྟེ་ཐམས་ཅད་རིག་པས་སོ། །འདི་ནི་གཏོར་མར་བརྗོད་དེ། བགེགས་རྣམས་ཀྱི་དཀྱིལ་འཁོར་སྒྲུབ་པར་བྱེད་པ་ལ་བགེགས་རྣམས་ཇི་སྲིད་འཚོའི་བར་དུ་དགའ་བར་འགྱུར་ཏེ་ཐེ་ཙོམ་མེད་དོ། །དེའི་ཕྱིར་རིག་སྔགས་འཆང་མཁས་པས་ཐམས་ཅད་ལེགས་པར་བསྒྲུབ་པར་བྱའོ། །ཞོ་དང་འོ་མ་དང་འོ་ཐུག་དང་། བུ་རམ་དང་མར་དང་། ལི་ཁ་ར་དང་ལྡན་པ་འདིས་བདག་སྐྱེས་པའི་རྒྱུ་སྐར་གྱི་ལྷ་ལ་གཏོར་མར་སྦྱིན་པར་བྱ་སྟེ། ཚེའི་དངོས་གྲུབ་དང་། དེ་བཞིན་དུ་རྒྱས་པ་དང་། ཞི་བ་དང་། སྡིག་པ་ཐམས་ཅད་ཟློག་པར་བྱེད་དོ། །འདི་ནི་གཏོར་མར་བརྗོད་དེ་རིག་སྔགས་འཆང་རྣམས་ཀྱི་བདེ་བ་ཐོབ་པའོ། །བྱ་བ་གང་ཡིན་པ་དེ་རྣམས་ལ་བདག་གི་གཏོར་མཐུན་གསུམ་དུ་བྱས་ན། རིག་སྔགས་འཆང་རྣམས་ཀྱི་རིག་སྔགས་དང་། གསང་སྔགས་བདེ་བླག་ཏུ་འགྲུབ་སྟེ་ཐེ་ཙོམ་མེད་དོ། །དེའི་བགེགས་ཐམས་ཅད་དང་སྡིག་པ་དང་། སྡང་བ་རྣམས་ནམ་ཡང་བར་དུ་གཅོད་པར་མི་ནུས་ཏེ་ནམ་ཡང་ཕྱིས་སྡིག་པ་མི་འབྱུང་ངོ་། །རྟག་ཏུ་གཏོར་མ་རྒྱས་པ་ཐོབ་པར་བྱེད་ཅིང་། སྟོབས་དང་བརྩོན་འགྲུས་དང་ལྡན་པ་དང་ཐམས་ཅད་ཐོགས་པ་མེད་པར་འགྱུར་རོ། །དེ་ལྟ་བུ་བྱེད་བཞིན་པའི་རིག་སྔགས་སྨྲ་བའི་མཁས་པ་དེ་བགེགས་རྣམས་ཐམས་ཅད་ཀྱིས་དེ་ནམ་དུ་ཡང་མཐོང་བར་མི་འགྱུར་རོ། །གནོད་སྦྱིན་དང་། སྲིན་པོ་དང་། འབྱུང་པོ་དང་ཤ་ཟས་སྡང་བར་བྱེད་པ་མེད་དོ། །ནད་མེད་ཅིང་རྒྱལ་པོའི་དཔལ་མིན་མེད་ལ་
སྐེམ་བྱེད་དང་། སྐེམ་པ་མེད་ལ་བརྗེད་བྱེད་དང་། ཀླུ་དང་། གཟའ་དང་། རིམས་མེད་ཅིང་ཐམས་ཅད་ཀྱི་ཚེ་ཅུང་ཟད་ཀྱང་མེད་དོ། །དུག་མེད་ཅིང་སྦྱར་བའི་དུག་ཉིད་ཀྱང་མེད་ལ་བྱད་སྟེམས་ཐམས་ཅད་ཀྱང་ནམ་ཡང་མི་ཡོང་སྟེ། ཀུན་ནས་དཔག་ཚད་སྟོང་ཕྲག་ཏུ་རིང་དུ་འབྲོས་པར་བྱེད་དོ། །ཀུན་ནས་སྟོབས་ཉིད་རྒྱས་པ་དང་དེ་བཞིན་དུ་ཡང་དགའ་བ་དང་། དེ་བཞིན་དུ་ཡང་སྟོབས་དང་བརྩོན་འགྲུས་དང་གཟི་བརྗིད་འཕེལ་བར་འགྱུར་རོ། །ཐམས་ཅད་དུ་ཕྱག་རྒྱ་དང་གསང་སྔགས་དང་ཆོ་ག་ཞིབ་མོ་ཐམས་ཅད་ཀྱི་དངོས་གྲུབ་ཐོབ་པར་བྱེད་དོ། །ཚེ་རིང་དུ་འཕེལ་ཞིང་ལྷ་དང་མི་རྣམས་ཀྱི་མཆོད་པའི་འོས་སུ་འགྱུར་རོ། །སྐྱེས་པའི་རྒྱུ་སྐར་གྱི་ལྷ་གང་ཡིན་པ་ཡང་དྲི་ཡོངས་སུ་འཛིན་པར་འགྱུར་ཞིང་དེ་རྣམས་ཐམས་ཅད་ཀྱི་ཇི་སྲིད་འཚོའི་བར་དུ་སྟོབས་དང་བརྩོན་འགྲུས་འཕེལ་བར་བྱེད་པར་ཐེ་ཙོམ་མེད་དོ། །དེ་ལ་དགྲ་མི་འབྱུང་ཞིང་ནམ་དུ་ཡང་ཕྱིར་རྒོལ་བ་དང་དགྲ་བོ་མེད་དེ་ཕྱག་རྒྱ་འཛིན་པ་ཉིད་མེད་ཀྱང་དཀྱིལ་འཁོར་གྱི་མཆོག་ཏུ་ཞུགས་པ་ཙམ་གྱི་མོད་ལའམ། ཡང་ན་འཇུག་པའི་དཀྱིལ་འཁོར་མཐོང་བ་ཙམ་ལ་དེ་རྣམས་ཀྱི་ལུས་དེ་བཞིན་གཤེགས་པ་གང་གཱའི་ཀླུང་གི་བྱེ་མ་སྙེད་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་བྱིན་གྱིས་བརླབས་པའི་ལུས་སུ་འགྱུར་རོ། །དེ་བཞིན་གཤེགས་པ་གང་གཱའི་ཀླུང་གི་བྱེ་མ་སྙེད་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞིའི་དྲུང་དུ་བསོད་ནམས་ཀྱི་ཕུང་པོ་རབ་ཏུ་སྐྱེ་བར་འགྱུར་ཏེ། རི་རབ་ཆེན་པོ་དང་མཉམ་པའི་བསོད་ནམས་ཀྱི་ཕུང་པོ་ཆེན་པོ་ཡོངས་སུ་འཛིན་པར་འགྱུར་རོ། །དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་གང་གཱའི་ཀླུང་གི་བྱེ་མ་སྙེད་དགུ་བཅུ་རྩ་དགུ་དང་མཉམ་པའི་དྲུང་དུ་དགེ་བའི་རྩ་བ་ཆེན་པོ་དང་ཡང་དག་པར་ལྡན་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དམ་ཚིག་གསང་བ་དང་། ཆོ་ག་ཞིབ་མོ་དང་། གསང་སྔགས་རྣམས་ཀྱི་དངོས་གྲུབ་ཆེན་པོ་སོ་སོར་རྙེད་དོ། །བྱང་ཆུབ་སེམས་དཔའ་ཐམས་ཅད་ཀྱི་རིས་ཐུན་མོང་བའི་ཚོགས་བསྡུས་པའི་སར་བགྲོད་དེ་ཕྱིར་མི་ལྡོག་པར་འགྱུར་རོ། །སུམ་ཅུ་རྩ་གཉིས་ཀྱི་ལྷའི་གནས་ན་གནས་པ་དང་། ལྷའི་
དབང་པོ་བརྒྱ་བྱིན་དང་། སུམ་ཅུ་རྩ་གསུམ་གྱི་ལྷའི་ཚོགས་དང་ལྷན་ཅིག་ཐམས་ཅད་དུ་སྲུང་པ་དང་བསྐྱབ་པ་དང་སྦ་བའི་ཆེད་དུ་ཡང་དག་པར་སྒྲུབ་པར་འགྱུར་རོ། །ལག་ན་རྡོ་རྗེ་དང་རིག་པ་འཛིན་པའི་དབང་པོ་དུ་མ་རིག་པ་འཛིན་པ་བྱེད་པའི་ཚོགས་ཀྱིས་ཡོངས་སུ་བསྐོར་ཞིང་རྟག་ཏུ་རྗེས་སུ་འབྲང་བ་རྣམས་སྲུང་བ་དང་བསྐྱབ་པ་དང་སྦ་བའི་ཆེད་དུ་ཡང་དག་པར་སྒྲུབ་པར་འགྱུར་རོ། །སྟོབས་ཆེན་པོ་དང་བརྩོན་འགྲུས་དང་ཕ་རོལ་གནོན་པ་དང་མདངས་ཀྱི་རྣམ་པ་སོ་སོར་རྙེད་པར་འགྱུར་རོ། །དཀྱིལ་འཁོར་མཐོང་བ་ཙམ་གྱི་མོད་ལ་བསྐལ་པ་བྱེ་བར་བརྒྱུད་ནས་བསགས་པའི་སྡིག་པ་དང་སྒྲིབ་པ་དང་། མཚམས་མེད་པ་ལྔའི་འགྲོ་བ་རྣམས་དང་མནར་མེད་པ་ལ་གཞོལ་བ་དེ་ཐམས་ཅད་ཡོངས་སུ་ཟད་ཅིང་ཡོངས་སུ་གཏུགས་པར་འགྱུར་རོ། །ཐམས་ཅད་རབ་ཏུ་ཞི་བར་བྱེད་དོ། །དོན་ཡོད་པའི་བྱ་བའི་དངོས་གྲུབ་སོ་སོར་རྙེད་དོ། །སྒྲིབ་པ་དང་ཉོན་མོངས་པའི་རྙོག་པའི་དྲི་མ་དང་སེར་སྣའི་དྲི་མ་ཐམས་ཅད་དང་བྲལ་བར་འགྱུར་རོ། །འཇིག་རྟེན་ཐམས་ཅད་དགའ་བ་དང་བླ་མ་ཆེན་པོ་མཆོད་པར་འོས་པར་འགྱུར་རོ། །དེ་བཞིན་གཤེགས་པ་ཐམས་ཅད་མཐོང་བར་འདོད་པར་ཡང་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་གིས་རྟག་ཏུ་མཆོག་སྩོལ་བར་བྱེད་ཅིང་བླ་མར་འགྱུར་རོ། །འཆི་འཕོས་ཏེ་སྐྱེ་བ་རྗེ་བ་ན་བསམས་པ་ཉིད་ཀྱི་མོད་ལ་བདེ་བ་ཅན་གྱི་འཇིག་རྟེན་གྱི་ཁམས་སུ་པདྨ་ལས་རྫུས་ཏེ་སྐྱེ་བར་འགྱུར་རོ། །དཀྱིལ་འཁོར་གྱི་སློབ་དཔོན་ལ་དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་བླ་མར་ཤེས་པར་བྱ། མཆོད་པར་བྱ། འོད་དཔག་མེད་དང་། སྤྱན་རས་གཟིགས་དབང་ཕྱུག་དང་མཐུ་ཆེན་ཐོབ་ཀྱི་བཀོད་པ་དང་འདྲ་བར་བལྟ་བར་བྱའོ། །དེས་ན་རིག་སྔགས་འཆང་དཀྱིལ་འཁོར་གྱི་སློབ་དཔོན་དེས་ཀྱང་དཀྱིལ་འཁོར་དུ་འཇུག་པ་བྱས་ནས་ཀུན་ནས་མཚམས་བཅིང་བ་བྱས་ཤིང་། སྲུང་བའི་ཆོ་ག་བྱས་ལ་བདག་བཅིང་བ་དང་། གཙུག་ཏོར་བཅིང་བ་དང་མཚམས་བཅིང་བ་བྱས་ཏེ། དེའི་འོག་ཏུ་ཁ་ཤར་དུ་ཕྱོགས་ཏེ་དཀྱིལ་འཁོར་ལ་མངོན་དུ་ཕྱོགས་པས་སྐྱིལ་མོ་ཀྲུང་གིས་འདུག་ལ་དོན་ཡོད་པ་པདྨའི་གཙུག་
ཏོར་སྟོང་ཕྲག་བརྒྱད་བཟླས་པར་བྱའོ། །གུ་གུལ་ལ་ལན་བརྒྱ་རྩ་བརྒྱད་བཟླས་པའི་བདུག་སྤོས་དབུལ་བར་བྱའོ། །དེ་ནས་འཕགས་པ་སྤྱན་རས་གཟིགས་དབང་ཕྱུག་དབུས་ཀྱི་སྙིང་པོའི་དཀྱིལ་འཁོར་དུ་པདྨའི་གེ་སར་གྱི་དབུས་སུ་ཚངས་པའི་ཆ་བྱད་འཆང་བ་པདྨ་དང་ཞགས་པ་ཐོགས་ཏེ། བཞེངས་ནས་ཕྱོགས་བཅུར་རྣམ་པར་གཟིགས་པར་མཛད་དེ་རིག་སྔགས་འཆང་ལ་བཀའ་སྩལ་པ། རིག་སྔགས་འཆང་ལེགས་སོ་ལེགས་སོ། ཁྱོད་ཀྱིས་རིག་པ་འཛིན་པ་གྲུབ་པོ་དོན་ཡོད་པའི་ཞགས་པ་པདྨ་གཙུག་ཏོར་གྱི་རིག་པའི་རྒྱལ་པོ་འདི་རྗེས་སུ་ཟུང་ཤིག །རིག་སྔགས་འཆང་ཇི་ལྟར་ཡིད་ལ་བྱེད་པ་བཞིན་དུ་འདོད་པའི་མཆོག་ཐམས་ཅད་སྦྱིན་པར་འགྱུར་རོ། །འདི་ནི་རིག་སྔགས་འཆང་དེ་རྣམས་ཀྱི་མངལ་དུ་གནས་པའི་སྐྱེ་བའི་ཐ་མ་ཡིན་ཏེ་སྐྱེ་བ་རྗེས་ནས་ཐམས་ཅད་དུ་པདྨ་ལས་རྫུས་ཏེ་སྐྱེ་བར་འགྱུར་རོ། །ཐམས་ཅད་དུ་ཚེ་རབས་དྲན་པར་འགྱུར་ཞིང་ཐམས་ཅད་དུ་སྐྱེ་བ་དྲན་པར་འགྱུར་རོ། །སྐྱེ་བ་ནས་སྐྱེ་བ་ཐམས་ཅད་དུ་དོན་ཡོད་ཞགས་པའི་དཀྱིལ་འཁོར་མཐའ་དག་དང་ཆོ་ག་ཞིབ་མོའི་རྒྱལ་པོ་མཐའ་དག་ཁ་ཏོན་དུ་བྱེད་དོ། །དོན་ཡོད་ཞགས་པའི་གཙུག་ཏོར་དྲི་མ་མེད་པ་ཁ་ཏོན་དུ་ཀུན་ཏུ་གནས་སོ། །དེ་ནས་རིག་སྔགས་འཆང་གིས་འཕགས་པ་སྤྱན་རས་གཟིགས་དབང་ཕྱུག་གི་ཞབས་དྲུང་དུ་མཆོད་ཡོན་དང་ཞབས་བསིལ་དབུལ་བར་བྱ། ཨ་ག་རུའི་བདུག་པ་དབུལ་བར་བྱ། མེ་ཏོག་ཇི་ལྟར་འབྱོར་པ་དབུལ་བར་བྱ། གཤེགས་སུ་གསོལ་བར་བྱ་སྟེ། དེ་ནས་འཕགས་པ་སྤྱན་རས་གཟིགས་དབང་ཕྱུག་མི་སྣང་བར་འགྱུར་རོ། །དེ་ལྟ་བུ་བྱས་ནས་རིག་སྔགས་འཆང་ནམ་མཁའ་ལ་འགྲོའོ། །དོན་ཡོད་པའི་གཙུག་ཏོར་པདྨ་དྲི་མ་མེད་པའི་འོད་ཟེར་གྱི་བཀོད་པ་ཞེས་བྱ་བའི་ཏིང་ངེ་འཛིན་སོ་སོར་ཐོབ་སྟེ། རིག་པ་འཛིན་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དྲུག་ཅུ་རྩ་བཞིས་ཡོངས་སུ་བསྐོར་བར་འགྱུར་ཞིང་པདྨའི་རིས་ཀྱི་འཁོར་ལོས་སྒྱུར་བར་འགྱུར་རོ། །ཚེ་ལོ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་དགུར་འགྱུར་རོ། །དཀྱིལ་འཁོར་གྱི་ཆོ་ག་དང་སྒྲུབ་ཐབས་ཅད་ཀྱི་ཆོ་གའོ།། །།