ཁྲུས་ཀྱི་དཀྱིལ་འཁོར་གྱི་ཆོ་ག
དེ་ནས་ཁྲུས་ཀྱི་དཀྱིལ་འཁོར་བཤད་པར་བྱ་སྟེ། ཁྲུས་བྱེད་པ་ལ་མཁས་པ་གང་གིས་དྲི་མ་ཐམས་ཅད་སེལ་བར་བྱེད་ཅིང་མཛེས་པ། སྡིག་
པ་ཐམས་ཅད་རྣམ་པར་ཉམས་པར་བྱེད་པ། དངོས་གྲུབ་ཐམས་ཅད་བྱེད་པའི་དེ་ཁོ་ན་ཉིད་བསོད་ནམས་དང་གཟི་བརྗིད་རབ་ཏུ་འཕེལ་བར་བྱེད་པ། ནད་ཐམས་ཅད་སེལ་བར་གྲུབ་པ། སྡིག་པ་དང་། སྡིག་ཏོ་ཉམས་པར་བྱེད་པ། དེ་བཞིན་དུ་ཟད་པ་དང་ཉམས་པ་བཅོམ་པ། དུག་དང་བྱད་སྟེམས་ཉམས་པ། ནད་ཡུན་རིང་པོ་ཡོངས་སུ་སྤངས་པ། དེ་བཞིན་དུ་གཅོད་ཡུན་རིང་པོ་དང་རིམས་ཡོངས་སུ་སྤངས་པ་སྟེ་འདི་དག་ཁྲུས་ཀྱིས་འགྲུབ་སྟེ། རིག་སྔགས་གང་ཡིན་པ་དེས་འགྲུབ་པར་དོན་ཡོད་པ་སྤྱན་རས་གཟིགས་དབང་ཕྱུག་གིས་ཡོངས་སུ་བསྒྲགས་སོ། །བགེགས་ཀྱིས་རེག་པ་གང་ཡིན་པ་དང་། གྲིབ་གནོན་གྱི་གདོན་མི་བཟད་པས་རེག་པ་གང་ཡིན་པ་དང་། ཕ་རོལ་གྱི་དམག་ཚོགས་ཀྱི་འཇིགས་པ་མི་བཟད་པ་དང་། འཐབ་པ་དང་། རྩོད་པ་ལ་ཡང་། དགྲ་རྣམས་ཀྱིས་ཕམ་པ་དང་། སྐྱེ་བོ་སྡང་བ་དང་། གང་གི་འཁྲུག་པའི་གཡུལ་དུ་སོང་བ་དང་། རྒྱུ་སྐར་གྱིས་བཅོམ་པ་གང་ཡིན་པ་དང་། བློའི་སྐྱེ་བ་ཟད་པ་དང་། མ་ནིང་དང་། ཉམས་པའི་མ་ནིང་དང་། དབང་པོ་ཉམས་པའི་བར་གང་ཡིན་པ་རྣམས་དང་བུ་མི་འཚོ་བ་གང་ཡིན་པ་རྣམས་ཀྱི་བུ་མཐུན་པར་སྐྱེ་བར་འགྱུར་རོ། །བསད་ཅིང་གཞོམ་པ་ཐོབ་པ་གང་ཡིན་པ་དང་། འཆིང་བ་དང་། གསོད་པར་སོང་བ་གང་ཡིན་པ་དང་། ཆོམ་རྐུན་ནམ། རྐུན་མོའི་ནང་ངམ། གནོད་སྦྱིན་ནམ་སྲིན་པོའི་ནང་དུ་སོང་བ་གང་ཡིན་པ་དང་། གཅན་གཟན་གཏུམ་པོའི་ནང་དུ་སོང་བ་གང་ཡིན་པ་དང་། མཆེ་བ་གདུག་པ་དང་། དུག་གི་ཁྲོད་དུ་སོང་བས་དུག་འཇིགས་པ་མི་བཟད་པ་ཟོས་པ་གང་ཡིན་པ་དང་། ཁྱིམ་རྡིབ་པ་དང་། གཡང་ས་དང་། བྱི་བ་ཁ་གདུག་པའི་འཇིགས་པ་རྣམས་དང་། མི་མངོན་པར་སྡིག་པ་བྱེད་པ་གང་ཡིན་པ་དང་། མཚམས་མེད་པ་བྱེད་པ་གང་ཡིན་པ་དང་། འཕགས་པ་ལ་སྐུར་པ་འདེབས་པ་དང་། དམ་པའི་ཆོས་སྤོང་བ་འདི་རྣམས་དཀྱིལ་འཁོར་དུ་ཁྲུས་བྱས་པས་ཐམས་ཅད་ཡང་དག་པར་ཟད་པར་འགྲོ་ཞིང་། མྱུར་དུ་ཐམས་ཅད་རྣམ་པར་ཉམས་པར་བྱེད་དེ་རྩྭ་རྣམས་མེས་སྲེག་པ་བཞིན་དུ་སྔོན་བསགས་པའི་མི་བཟད་པའི་ལས་འདི་དག་
ཐམས་ཅད་རྣམ་པར་ཉམས་པར་བྱེད་དོ། འཇིག་རྟེན་ཐམས་ཅད་ཀྱི་བླ་མ་དང་། རྟག་ཏུ་མཆོད་པར་འོས་པར་འགྱུར་རོ། །ཚེ་ཡུན་རིང་པོར་གནས་ཏེ། རྟག་ཏུ་བདེ་བ་དང་། དགའ་བར་བྱེད་དོ། །ཇི་སྲིད་འཚོའི་བར་དུ་ནད་མེད་ཅིང་རིམས་མེད་པ་ཉིད་དུ་གནས་སོ། །བདེ་བླག་ཏུ་བྱ་བ་བྱེད་ཅིང་། དེའི་སྐྱེ་བ་བདུན་དྲན་པར་འགྱུར་རོ། །ལྷ་རྣམས་ཀྱིས་རྟག་ཏུ་སྲུང་བར་བྱེད་ཅིང་། མཐར་ཐུག་རྟག་ཏུ་དཔལ་འབར་བར་བྱེད་དོ། །སངས་རྒྱས་རྣམས་རྟག་ཏུ་མཐོང་བ་དང་། རྟག་ཏུ་འཇིག་རྟེན་དབང་ཕྱུག་གི་མཆོག་སྦྱིན་པར་བྱེད་པ་དང་། རྟག་ཏུ་མཐོང་བར་འདོད་པ་ཡང་ཐུན་མཚམས་རྟག་ཏུ་མངོན་སུམ་དུ་མཐོང་བས་གནས་པར་བྱེད་དོ། །རྟག་ཏུ་རིག་སྔགས་དང་། དཀྱིལ་འཁོར་གྱི་ལྷ་དང་། རིག་སྔགས་ཀྱི་དངོས་གྲུབ་ཏུ་འགྱུར་ཏེ། རྟག་ཏུ་དཀྱིལ་འཁོར་གྱི་མཆོག་གང་ཡིན་པ་ཡང་སྒྲུབ་པར་བྱེད་དོ། །རྒྱར་གཟིངས་ཀྱི་ཚད་ཀྱི་དཀྱིལ་འཁོར་གྲུ་བཞི་པ་བྱ་སྟེ། ཚོན་སྣ་ཚོགས་པས་རྣམ་པར་ཕྱེ་བའི་དཀྱིལ་འཁོར་གྱི་མཆོག་བྲི་བར་བྱའོ། །མེ་ཏོག་དང་འབྲས་བུ་སྣ་ཚོགས་པས་བཀྲ་བ། སྒོ་བཞི་ཀུན་ནས་རྣམ་པར་ཕྱེ་བ་དང་། ལས་རྣམས་ལེགས་པར་ཟིན་ནས་དབུས་ཀྱི་དཀྱིལ་འཁོར་གྱི་སྙིང་པོར། འཁོར་ལོ་ཡང་དག་པར་བྲིའོ། །པདྨའི་ལྟེ་བ་དང་། སྙིང་པོ་ཉིད་ཀྱང་འབར་བར་བྱའོ། །ཟུར་དང་ཟུར་རྣམས་སུ། ཞགས་པ་འབར་བ་པདྨ་ལ་གནས་པ་བྱའོ། །རིག་སྔགས་འདོད་པས་ཁྲུས་དང་གཏོར་མ་དཀར་པོ་ཡང་འདིར་དགོད་པར་བྱའོ། །ཨ་ག་རུའི་བདུག་པ་དབུལ་ཞིང་། དཀྱིལ་འཁོར་གྱི་ཆོ་ག་ཇི་ལྟ་བ་བཞིན་དུ། དཀྱིལ་འཁོར་ལེགས་པར་བརྒྱན་པར་བྱའོ། །ལས་གཞན་སྒྲུབ་པ་ནི་རོ་སྣ་ཚོགས་པའི་གཏོར་མས་མཆོད་པར་བྱ་ཞིང་སྣ་ཚོགས་པའི་བདུག་སྤོས་དབུལ་ལོ། །བུམ་པ་ཆུས་བཀང་ནས་རྫས་ཀྱི་ཕྱེ་མ་རྣམས་དེར་གཞུག་ཅིང་། རིན་ཆེན་སྣ་བདུན་བཅུག་སྟེ། དེ་ལ་རྒྱ་དར་གྱིས་བཅིངས་ལ། དོན་ཡོད་ཞགས་པ་བརྒྱ་དང་། སྙིང་པོ་ཉིད་ཀྱང་ལན་བརྒྱར་བཟླས་སོ། །ཡི་གེ་གཅིག་པ་བརྒྱ་རྩ་བརྒྱད་དུ་བཟླས་སོ། །ཙནྡན་དང་། ས་མཱི་དང་། སི་རི་ཥ་དང་། ཧབ་ཤང་ཙིའུ་དང་། གུར་གུམ་དང་། ཡུངས་ཀར་དང་པདྨ་གེ་སར་རྣམས་ལེགས་པར་བཏགས་ནས་
བུམ་པ་བཀང་བར་བྱ་སྟེ། འདི་རྣམས་ཀྱིས་ཁྲུས་བྱའོ། ཉེའུ་ཤིང་། ཤུ་ཏི་དང་། བིལ་བ་སྟེ་འདི་རྣམས་ཀྱིས་ཉེད་པ་དང་། རྟག་ཏུ་སྔོན་ཏུ་བྱ་བ་པར་བྱས་ལ། དེ་ནས་མཁས་པས་ཁྲུས་བྱའོ། །དེ་ནས་སྲུང་བའི་ཆོ་ག་ནི་དོན་ཡོད་རྒྱལ་པོས་བྱའོ། །དེ་ནས་རྩྭ་དཱུར་བ་བཏིང་ནས། དེ་ལ་སྐྱིལ་མོ་ཀྲུང་གིས་འདུག་སྟེ། བུམ་པའི་ཆུས་ཁྲུས་བྱ་ཞིང་པདྨའི་ཕྱག་རྒྱ་ཡང་བྱེད་དུ་གཞུག་གོ། །དེ་ནས་གཙང་མ་གོས་གཙང་མ་བགོས་ཏེ། གཙུག་ཏོར་བཅིང་བར་བྱ་ཞིང་། སྔོན་དུ་བཟླས་པ་འབུལ་བ་དང་བསྐོར་བ་བྱས་ནས། སྒོ་དང་སྒོ་ནས་ཕྱག་བྱའོ། །ཤར་གྱི་སྒོ་རུ་ཞུགས་ལ་དབུས་ཀྱི་དཀྱིལ་འཁོར་གྱི་སྙིང་པོར། སྐྱིལ་ཀྲུང་གིས་འདུག་ལ། དོན་ཡོད་པའི་རྒྱལ་པོས་ལན་བདུན་དུ་བྱ་བ་པར་བྱའོ། །ལག་ཏུ་རྡོ་རྗེ་དང་། བགྲང་ཕྲེང་གིས་མངོན་པར་དབང་བསྐུར་ཞིང་། ཆུ་དང་། ཡུངས་ཀར་དང་ཕྱག་རྒྱས་དབང་བསྐུར་བར་བྱའོ། །དེ་ནས་དཀོན་མཆོག་གསུམ་ལ་མཆོད་པ་བྱའོ། །འདི་ནི་ཁྲུས་ཀྱི་གཙོ་བོར་འཇིག་རྟེན་དབང་ཕྱུག་གིས་གསུངས་སོ། །སེམས་ཅན་ཐམས་ཅད་ལ་ཕན་པའི་དོན་གྱི་ཆེད་དང་། རིག་སྔགས་འཆང་རྣམས་ལ་ཁྱད་པར་དུ། སངས་རྒྱས་ཐམས་ཅད་ཀྱིས་བྱིན་གྱིས་བརླབས་པ་དང་། ལྷ་ཐམས་ཅད་ཀྱིས་མཆོད་པ་དང་། དོན་ཡོད་པའི་ཕུན་སུམ་ཚོགས་པ་གདོན་མི་ཟ་བར་བྱེད་དོ། །གང་དང་གང་དུ་ལས་ལ་ངེས་པར་སྦྱར་བ་ཐམས་ཅད་དུ་དོན་ཡོད་པའི་དངོས་གྲུབ་ཐོབ་པར་འགྱུར་ཏེ། ཐམས་ཅད་དུ་འདི་ལ་ཐེ་ཚོམ་མེད་དོ། སྔགས་ཀྱི་དངོས་གྲུབ་བླ་ན་མེད་པ་མ་གྲུབ་པ་ཡང་གྲུབ་པར་འགྱུར་ཏེ། དོན་ཡོད་པའི་དངོས་གྲུབ་ཐོབ་ཅིང་འཕྲལ་ཉིད་དུ་འབྲས་བུ་མཐོང་བ་ཡིན་ནོ། །ལུས་ཡོངས་སུ་དག་ཅིང་ཤིན་ཏུ་དྲི་མ་མེད་པ་དང་། ལེགས་པར་ཁྲུས་བྱས་པར་དེ་བརྗོད་པར་བྱའོ། །སྡིག་པ་ཐམས་ཅད་ཉམས་པར་བྱེད་པ། ཉོན་མོངས་པ་ཐམས་ཅད་ཟད་པར་བྱེད་པ། ནད་ཐམས་ཅད་ལས་ཡོངས་སུ་གྲོལ་བར་བྱེད་པ་སྟེ། མདོར་ན། ཐམས་ཅད་དུ་དངོས་གྲུབ་སོ་སོར་རྙེད་ཅིང་། དཔལ་ཆེན་པོར་ལྷག་པར་འགྲོའོ། །རིག་སྔགས་དོན་དུ་གཉེར་བ་ཐོབ་སྟེ། རིག་སྔགས་དོན་ཡོད་པའི་དངོས་གྲུབ་ཀྱི་དེ་ཁོ་ན་ཉིད་ལ་ས་བུ་འདོད་པས་ནི་བུ་ཐོབ་བོ། །ནོར་འདོད་པས་ནི་ནོར་ཐོབ་བོ། །དབང་ཕྱུག་
འདོད་པས་ནི་དབང་ཕྱུག་ཐོབ་བོ། །མྱུར་དུ་དཔལ་འདོད་པས་ནི་དཔལ་ཐོབ་བོ། །མངོན་པར་འདོད་པ་ཐམས་ཅད་འཕྲལ་དུ་ཡོངས་སུ་རྫོགས་པར་བྱེད་དོ། །ཞེས་སོ། ཁྲུས་ཀྱི་དཀྱིལ་འཁོར་གྱི་ཆོ་གའོ།། །།