སྨན་གྱི་དཀྱིལ་འཁོར་གྱི་ཆོ་ག
དེ་ནས་སྨན་གྱི་དཀྱིལ་འཁོར་གྱི་ཆོ་ག་བཤད་པར་བྱ་སྟེ། དོན་ཡོད་པར་ཐམས་ཅད་དུ་གཞན་གྱིས་མི་ཐུབ་པ་ནད་ཐམས་ཅད་སེལ་བར་གྲུབ་པ། ཐམས་ཅད་དུ་དུག་འཇོམས་པར་བྱེད་པ། ན་བ་ཐམས་ཅད་སེལ་བར་གྲུབ་པ། སྡང་བ་ཐམས་ཅད་ལྡོག་པར་བྱེད་པ། འབྱུང་པོ་ཐམས་ཅད་ལ་མི་འཇིགས་པ། མཚོན་དང་། མེ་དང་། ཆུ་དང་། དུག་རབ་ཏུ་འཇོམས་པ། རྟག་ཏུ་སྲུང་བ་
དང་བསྐྱབ་པ་དང་སྦ་བར་བྱེད་པ། དགྲ་རྣམས་དང་། གཞན་རྒྱལ་བ་ལྡོག་པར་བྱེད་པ། རྒྱལ་པོ་དང་། རྒྱལ་ཕྲན་ནམ། བཙུན་མོའི་འཁོར་དུ་སོང་བ་དང་གཙོ་བོ་རྟག་ཏུ་དབང་དུ་བྱེད་ཅིང་ཐམས་ཅད་དུ་ཐོགས་པ་མེད་པར་འགྱུར་རོ། །ཕ་རོལ་གྱི་དམག་ཚོགས་དང་འཁྲུག་པ་དང་། གཡུལ་རྣམས་རྟག་ཏུ་རབ་ཏུ་འཇོམས་པར་བྱེད་པ། གང་གི་ཚེ་ཆོམ་རྐུན་གྱི་ནང་དུ་སོང་བ་ཉིད་དང་། དོན་མཐུན་གྱི་ནང་དང། རྐུན་མོ་དང་། སེང་གེ་དང་། སྟག་གི་ནང་དུ་སོང་བ་དེའི་ཚེ། ཐམས་ཅད་དུ་སྨན་གྱི་རྒྱལ་བ་སྟེར་རོ། །ཚེ་རིང་པོར་འགྱུར་ཏེ། རྟག་ཏུ་པདྨའི་ཕྱག་གི་མཆོག་སྦྱིན་པར་འགྱུར་རོ། །ལྷ་རྣམས་ཀྱིས་རྟག་ཏུ་སྲུང་བར་བྱེད་དོ། །གནོད་སྦྱིན་དང་། སྲིན་པོ་དང་། ཀླུ་དང་། ལྷ་མ་ཡིན་དང་། ནམ་མཁའ་ལྡིང་ཉིད་དང་། མི་འམ་ཅི་དང་། ལྟོ་འཕྱེ་ཆེན་པོ་ཉིད་དང་། མི་མ་ཡིན་གདུག་པ་གང་ཡིན་པ་དེ་རྣམས་ཐམས་ཅད་ཉིན་དང་མཚན་དུ་སྲུང་བའི་དོན་དུ་ཡང་དག་པར་སྒྲུབ་པར་འགྱུར་ཏེ་ཐེ་ཚོམ་མེད་དོ། །རྒྱལ་པོ་ཆེན་པོ་རྣམ་ཐོས་སྲས་དང་། རྒྱལ་པོ་ཆེན་པོ་ཡུལ་འཁོར་སྲུང་དང་། རྒྱལ་པོ་ཆེན་པོ་འཕགས་སྐྱེས་པོ་དང་། མིག་མི་བཟང་དཔུང་དང་བཞོན་པ་དང་བཅས་པ་དང་། སྐབས་གསུམ་པའི་ལྷའི་དབང་པོ་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། ལྷ་དེ་རྣམས་ཐམས་ཅད་མཐུན་པས་རྟག་ཏུ་སྲུང་བར་བྱེད་དོ། །སངས་རྒྱས་ཀྱིས་རྣམ་པར་གཟིགས་ཤིང་། རྟག་ཏུ་ཡང་མཐོང་བ་སྩོལ་བར་མཛད་དོ། །གང་སྨན་ལག་ཏུ་ཕྱིན་པར་འགྱུར་བ་འདི། ཡང་ནས་ཡང་དུ་རིག་སྔགས་ཀྱི་དངོས་གྲུབ་མྱུར་དུ་ཐོབ་བོ། །བྱད་སྟེམས་འཕོ་བ་མེད་དོ། །དེ་ལ་དུག་མེད་ཅིང་སྡིག་པ་མེད་ལ། མི་བཟད་པའི་སྦྱོར་བ་དང་། ཕྱེ་མའི་སྦྱོར་བས་གནོན་པར་མི་འགྱུར་རོ། །སྔོན་གྱི་སྒྲིབ་པ་ཉམས་པར་བྱེད་དེ། དེ་བཞིན་དུ་ཡང་། སྡིག་པ་ཐམས་ཅད་དང་། རྨི་ལམ་ངན་པ་དང་། མཚན་མ་ངན་པ་གང་ཡིན་པ་དང་། གཞན་རྣམ་པ་སྣ་ཚོགས་པའི་སྡང་བ་ཉིད་དེ། དེ་རྣམས་ཐམས་ཅད་མྱུར་དུ་རྣམ་པར་ཉམས་པར་བྱེད་དོ། །སྨན་གང་དུ་གནས་པའི་དཔག་ཚད་ཁོར་ཡུག་ཏུ་སྲུང་བ་དང་། དེ་བཞིན་ཉིད་དུ་མཚམས་བཅིང་བར་བྱེད་དོ། །
བགེགས་དང་། ལོག་པར་འདྲེན་པ་ཐམས་ཅད་དང་། དེ་བཞིན་དུ། བདུད་དམ་སྡང་བ་དེ་རྣམས་ཐམས་ཅད་རབ་ཏུ་འབྲོས་པར་བྱེད་དོ། །སྨན་གང་དུ་གནས་པར་གདོན་རབ་ཏུ་འབྲོས་པར་བྱེད་དེ། །མཁའ་འགྲོ་མ་གང་ཡིན་པ་དང་། རྣལ་འབྱོར་མ་གང་ཡིན་པ་དང་། སྐེམ་བྱེད་དང་། གཟའ་དང་བརྗེད་བྱེད་དང་། གྲིབ་གནོན་གང་ཡིན་པ་དང་། མི་བཟད་པ་དེ་རྣམས་ཐམས་ཅད་རབ་ཏུ་ཞི་བར་འགྲོ་བར་འགྱུར་རོ། །ལྷ་རྣམས་དེར་གནས་པར་བྱེད་ཅིང་། འཁྲུལ་འཁོར་ལ་སྨན་ཨ་ག་ད་དེ་མཆོག་གོ་ཞེས་སོ། །རྒྱལ་བས་དབུགས་འབྱིན་པར་མཛད་ཅིང་། དངོས་གྲུབ་ཐམས་ཅད་ཀྱི་དེ་ཁོ་ན་ཉིད་སྩོལ་བར་མཛད་དོ། །རྟག་ཏུ་འཇིག་རྟེན་དབང་ཕྱུག་གི་མཆོག་སྩོལ་ཞིང་། རྟག་པའི་མཐར་མཐོང་བ་སྩོལ་བར་འགྱུར་རོ། །དོན་ཡོད་པའི་ཞགས་པ་མྱུར་དུ་འགྲུབ་སྟེ། སྨན་འཆང་བ་ལ། སྨན་གང་དུ་གནས་པར་གང་གིས་ཀྱང་གླགས་མི་རྙེད་དོ། །དོན་ཡོད་པའི་མཆོག་སྦྱིན་པ་ཞེས་བྱ་བ་ཡིད་བཞིན་གྱི་ནོར་བུ་སྨན་གྱི་མཆོག་རབ་ཏུ་འབད་པས་བཅངས་པས་ལེགས་པར་བསྒྲུབ་པར་བྱ་བ་དངོས་གྲུབ་ཀྱི་མཆོག་ལས་ཐམས་ཅད་བྱེད་པ་དེ་ཉིད་དེའི་ཚེ་ཤི་བ་ཡང་དག་པར་འཚོ་བར་བྱེད་པ། ལོ་རྫོགས་པར་བསྟེན་ཏེ། སྔགས་དང་ཕྱག་རྒྱས་གསོ་བར་བྱའོ། །ལོ་སྟོང་ཕྲག་ཏུ་རྟག་ཏུ་བདེ་བ་དང་། དགའ་བར་བྱེད་དོ། །དབང་ཕྱུག་དང་། ནོར་ཐོབ་པ་དང་། འབྲུ་འཕེལ་བ་དང་། བླ་ན་མེད་པ་དང་། རྒྱལ་པོ་དགའ་བར་འགྱུར་ཏེ་རྟག་ཏུ་གནས་སོ། །འབངས་དང་། ཅི་བགྱི་དང་། མཆོད་པ་ཆེན་པོ་རྙེད་དོ། །ཐམས་ཅད་དུ་དེ་རྟག་ཏུ་ཚིག་བཙུན་པའོ། །ཐོས་པས་དངོས་གྲུབ་མཆོག་གྱུར་པའི། །རྫས་ཀྱང་འདིར་ནི་བཤད་བྱ་སྟེ། །ཙནྡན་རྒྱ་སྤོས་རུ་རྟ་དང་། །སྤྲྀ་ཀ་ཤིང་ཚ་བཱ་ལ་ཀ། །བྲག་སྐྱེས་སྤང་སྤོས་སཱ་མ་ཀང་། །སུག་སྨེལ་གླ་སྒང་ན་ལ་ད། པདྨ་ཨུཏྤལ་པྲི་ཡང་ཀུ། །ཤིང་ཀུན་འདབ་མ་ཚ་བ་གསུམ། །ཤི་རཱི་ཤ་ཡི་མེ་ཏོག་དང་། །དེ་བཞིན་པ་རི་པཻ་ལ་བ། །འདི་རྣམས་ཆ་ནི་མཉམ་པར་ལྡན། །ཐམས་ཅད་ལེགས་གཞལ་ལེགས་པར་སྦྱར། །གསང་སྔགས་བརྒྱ་རྩ་བརྒྱད་བཟླས་ལ། །ཁྲོ་བོའི་རྒྱལ་པོས་དབང་བསྐུར་ཏེ། །
ཡི་གེ་གཅིག་པས་སྟོང་ཕྲག་བཅུར་བཟླས་སོ། །འདིར་སྨན་རྣམས་བགྲང་ཕྲེང་གི་ཚད་ཙམ་དུ་བསྒོངས་ནས་གྲིབ་མ་ལ་ཡོངས་སུ་བསྐམ་པར་བྱའོ། །གླ་རྩི་དང་། ག་བུར་གྱི་བླངས་ལ་ལེགས་པར་སྦྱོང་བའི་བྱ་བ་བྱས་པ་དང་། དཀྱིལ་འཁོར་དུ་འཇུག་པ་ནི། ཇི་ལྟ་བ་བཞིན་དུ་དཀྱིལ་འཁོར་གྱི་བྱ་བ་དང་། ཕྱག་རྒྱ་དང་། གསང་སྔགས་དང་། དམ་ཚིག་ལ་རབ་ཏུ་འཇུག་པ་ལ། ཤར་གྱི་སྒོ་རུ་ཕྱག་བྱས་ནས། དཀྱིལ་འཁོར་མཆོག་ལ་བསྐོར་པ་བྱ་སྟེ། སྒོ་དང་སྒོ་རུ་ཕྱག་བྱ་ཞིང་། ཤར་གྱི་སྒོ་རུ་འཇུག་པར་བྱའོ། །དབུས་ཀྱི་དཀྱིལ་འཁོར་གྱི་སྙིང་པོར། འཕགས་པ་སྤྱན་རས་གཟིགས་དབང་ཕྱུག་ལ་མངོན་དུ་ཕྱོགས་པར་པདྨའི་གེ་སར་ལ་འདུག་ནས། དོན་ཡོད་པའི་རྒྱལ་པོའི་བཟླས་བརྗོད་བརྒྱ་རྩ་བརྒྱད་དང་། ཁྲོ་བོའི་རྒྱལ་པོའི་བཟླས་བརྗོད་བརྒྱ་རྩ་བརྒྱད་བྱ་སྟེ། མངོན་པར་དབང་བསྐུར་བར་བྱ་ཞིང་། ཕྱག་རྒྱ་དང་། གསང་སྔགས་ལེགས་པར་སྒྲུབ་བོ། །དེ་ནས་མཆོད་པས་འཇིག་རྟེན་མགོན་པོའི་དངོས་གྲུབ་མཐོང་བར་བྱེད་ཅིང་རྟག་ཏུ་གཡོ་བར་བྱེད་ལ་འཇིག་རྟེན་མགོན་པོའི་འོད་ཟེར་གྱི་སྦྱིན་སྲེག་རབ་ཏུ་གྲོལ་ལོ། །དཀྱིལ་འཁོར་བཤད་པར་བྱ་སྟེ། གྲུ་བཞི་པོ་ཀོ་ལའི་ཚད་དུ་ཆ་ལེགས་པར་ཕྱེ་བ་གྲུ་བཞི་དང་། སྒོ་བཞི་ཡོད་པ། ཐེམ་སྐས་ཀྱི་རིམ་པ་ཅན་དུ་ཚོན་སྣ་ཚོགས་ཀྱི་སྐུད་པས་ཐིག་གདབ་ཅིང་དཀྱིལ་འཁོར་གྱི་སྙིང་པོ་མཛེས་པར་བྱ། དཀྱིལ་འཁོར་གྱི་དབུས་ཀྱི་སྙིང་པོ་པདྨ་མཆོག་ཁ་ཕྱེ་བ་འདབ་མ་བརྒྱ་རྩ་བརྒྱད་པ། སྙིང་པོ་དང་། ཟེ་བ་ཤིན་ཏུ་མཛེས་པ། སྙིང་པོ་ལས་པདྨ་བྱུང་བ། ཁ་ཕྱེད་བྱེ་བ་དང་། ལག་པ་གཉིས་བྱུང་བས་པདྨའི་འདབ་མ་འཛིན་པ་བྲིས་པར་དངུལ་གྱི་སྣོད་ཀྱི་ནང་དུ་སྨན་བཀང་སྟེ་དར་གྱིས་ཁ་གཡོགས་ནས་པདྨའི་འདབ་མའི་སྟེང་དུ་གཞག་པར་བྱ། འཕགས་པ་སྤྱན་རས་གཟིགས་དབང་ཕྱུག་རྟག་ཏུ་ཚངས་པའི་ཆ་བྱད་དུ་བཞུགས་པ། དར་གྱི་ཅོད་པན་བཅིངས་ཤིང་བརྒྱན་པ་པདྨའི་སྟེང་དུ་བཞུགས་པར་བྱའོ། །དཀྱིལ་འཁོར་ཕྱི་རོལ་ཀུན་ཏུ་ཕྱག་རྒྱའི་རྟགས་རྣམས་གསལ་བར་བྲིའོ། །སྒོ་སྒོར་དོན་ཡོད་པའི་ཞགས་པ་པདྨའི་སྟེང་དུ་བཞག་པ་ཁ་དོག་དང་འོད་ཟེར་འབར་བ་བྲིའོ། །གྲྭ་གྲྭར་བུམ་པ་གང་བ་བྲིའོ། །དཀྱིལ་འཁོར་
ཀུན་དུ་འཕན་དང་། བུམ་པ་གང་བ་དང་། འབྲས་བུ་དང་། མེ་ཏོག་བསྲེས་པ་མཛེས་པས་བརྒྱན་པར་བྱའོ། །གཏོར་མ་རྣམ་པ་སྣ་ཚོགས་གཞག་པར་བྱའོ། །མཆོད་ཡོན་གྱི་ཆུ་དབུལ་བར་བྱ། ཙནྡན་དང་། ཨ་ག་རུའི་བདུག་སྤོས་དང་། སྤོས་སྣ་ཚོགས་དབུལ་བར་བྱ། དཀྱིལ་འཁོར་ཀུན་ཏུ་མར་མེའི་ཕྲེང་བ་དང་། མེ་ཏོག་ཕྲེང་བ་དགོད་ཅིང་ཀུན་དུ་འབྲས་ཡོས་དང་། ཡུངས་ཀར་དགྲམ་པར་བྱའོ། །རིག་སྔགས་འཆང་གཙང་མར་གྱུར་པས་ལེགས་པར་ཁྲུས་བྱ་ཞིང་། གོས་གཙང་མ་བགོས་པ་འཇིགས་པ་མེད་པས་ཟླ་བ་ཡར་གྱི་ངོ་ཉ་ལ་བསྒྲུབ་པར་བྱ་སྟེ། སེམས་ཅན་ཐམས་ཅད་ལ་བརྩེ་བར་གྱུར་ཅིང་བྱམས་པའི་སེམས་དང་། སྙིང་རྗེའི་བདག་ཉིད་ཅན་གྱིས་བསྒྲུབ་པར་བྱའོ། །གང་གིས་ལག་གིས་གཟུང་བ་ཙམ་དང་། རེག་པ་ཙམ་གྱི་མོད་ལ་དེ་དགའ་བ་འཐོབ་ཅིང་སྡིག་པ་ཐམས་ཅད་འཇིག་པར་འགྱུར། སྔོན་གྱི་སྒྲིབ་པ་རྣམས་འཇིག་པར་འགྱུར། མཚམས་མེད་པ་བྱེད་པ་རྣམས་ལས་གྲོལ་བར་འགྱུར། མོད་ལ་ནད་ཐམས་ཅད་འབྱང་ཞིང་ངན་འགྲོ་ཐམས་ཅད་འཇིག་པར་བྱེད་པ་བསོད་ནམས་ཆེན་པོའི་སྟོབས་ཀྱི་དངོས་གྲུབ་སྨན་གྱི་དེ་ཁོ་ན་ཉིད་མཐོང་བ་ནི་སངས་རྒྱས་ཐམས་ཅད་ཀྱིས་ལུང་བསྟན་ཅིང་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ། བྱང་ཆུབ་སེམས་དཔའ་རྣམས་ཀྱིས་བསྔགས་པ། འདྲེན་པ་འཇིག་རྟེན་དབང་ཕྱུག་གིས་སྤྲུལ་པ། དཀྱིལ་འཁོར་གྱི་ལྷ་ཐམས་ཅད་ཀྱིས་བསྔགས་པ། རིག་སྔགས་འཆང་གི་དབང་པོ་ཐམས་ཅད་ཀྱིས་ཕྱག་བྱས་པ། ལྷ་ཐམས་ཅད་ཀྱིས་བསྲུང་བ། ཀླུའི་དབང་པོ་ཐམས་ཅད་རྗེས་སུ་འབྲང་བ། སུམ་ཅུ་རྩ་གསུམ་གྱི་ལྷའི་དབང་པོ་དང་། ཚངས་པ་དང་། ཁྱབ་འཇུག་དང་། དབང་ཕྱུག་ཆེན་པོ་དང་། གཤིན་རྗེ་དང་། ཆུ་ལྷ་དང་། ཀུ་བེ་ར་དང་། ཉི་མ་དང་། ཟླ་བས་མཆོད་པ། དེ་བཞིན་དུ་རྒྱུ་སྐར་གྱི་ཚོགས་དང་། གཟའ་ཀུན་དང་། མཇུག་རིངས་དང་། དེ་བཞིན་དུ་གཟའི་ཁྱིམ་དང་། ཐམས་ཅད་དུ་བཀྲ་ཤིས་ཀྱིས་མཆོད་པ། ཆོ་ག་ཞིབ་མོ་ཐམས་ཅད་དང་། དེ་བཞིན་དུ་དཀྱིལ་འཁོར་དང་། ཕྱག་རྒྱ་དང་། བཟླས་བརྗོད་ཐམས་ཅད་དང་། གསང་སྔགས་ཐམས་ཅད་ཀྱི་
རྗེས་སུ་ཞུགས་པ། རིགས་སྤྱིའི་དེ་བཞིན་གཤེགས་པ་གང་གཱའི་ཀླུང་བྱེ་མ་སྙེད་བྱེ་བ་ཁྲག་ཁྲིག་འབུམ་ཕྲག་དྲུག་ཅུ་རྩ་བཞིའི་དེ་བཞིན་གཤེགས་པ་རྣམས་ཀྱིས་སྨན་གྱི་མཆོག་དབང་བསྐུར་བ། དུས་གསུམ་གྱི་དེ་བཞིན་གཤེགས་པ་རྣམས་ཀྱིས་ལུང་བསྟན་པ། ཡིད་བཞིན་གྱི་ནོར་བུ་ཐམས་ཅད་དང་མཐུན་པའི་སྨན་གྱི་རྫས་བཀྲ་ཤིས་པ་བྱེ་བ་ཁྲག་ཁྲིག་གམ། ལྷག་པར་གྱུར་པ་གཞན་གང་ཡང་མེད་དོ། །སྨན་དེ་ལྟ་བུ་ནི་རྟག་ཏུ་མཆོག་གཙོ་བོ་འབྱིན་པ། འཇིག་རྟེན་དབང་ཕྱུག་དང་འདྲ་བ་ཡིན་ནོ། །དེའི་ཕྱིར་ཐམས་ཅད་སྨན་འཆང་བར་འདོད་པས་གནས་གང་ཡང་རུང་བར་སྦྱར་བར་བྱ་སྟེ། གཙང་མ་ལེགས་པར་ཁྲུས་བྱས་པ་དེས་སྦྱང་བར་བྱའོ། །ཇི་ལྟ་ཇི་ལྟར་བཀྲ་ཤིས་ཀྱི་བསམ་པ་ཡིད་ལ་བྱེད་པ་ད་ལྟ་དེ་ལྟར་བསམ་པ་ཡིད་ལ་བྱེད་པ་ཡོངས་སུ་རྫོགས་པར་འགྱུར་ཏེ། སྦྱར་བ་ཙམ་གྱི་མེད་ལ་ཐམས་ཅད་འགྲུབ་པར་འགྱུར། འདོད་པ་ཐམས་ཅད་ཀྱི་བསམ་པ་ཡོངས་སུ་རྫོགས་པར་འགྱུར།རིག་སྔགས་འཆང་གཙང་མར་གྱུར་པ། གོས་གཙང་མ་བགོས་པ་སྤོས་ཆུས་ལེགས་པར་ཁྲུས་བྱས་ལ་ཉིད་རེ་སྨན་རེ་རེ་དོན་ཡོད་པའི་རྒྱལ་པོས་བཟླས་བརྗོད་བྱས་ཏེ་ཟོས་ན། ཟོས་པ་ཙམ་གྱི་མོད་ལ་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་དང་། བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས་དགོངས་ཤིང་སྣང་བ་རྣམ་པར་དག་པ་འཐོབ་པར་འགྱུར། ཉིན་ཞག་གསུམ་དུ་སྦྱར་ན་ངག་རྣམ་པར་དག་པ་འཐོབ་བོ། །ཉིན་ཞག་ལྔར་སྦྱར་ན་དྲན་པ་རྣམ་པར་དག་པ་འཐོབ་བོ། །ཉིན་ཞག་བདུན་དུ་སྦྱར་ན་རིག་སྔགས་ཆེན་པོའི་ཆོ་ག་ཞིབ་མོ་རྣམ་པར་དག་པ་འཐོབ་བོ། །ཉིན་ཞག་བཅུ་བཞིར་སྦྱར་ན་དོན་ཡོད་པའི་ཞགས་པ་དེ་ཁོ་ན་ཉིད་ཀྱི་དངོས་གྲུབ་གྱི་དམ་ཚིག་ཆེན་པོ་འཐོབ་བོ། །ཉིན་ཞག་ཉི་ཤུ་རྩ་གཅིག་ཏུ་སྦྱར་ན་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དམ་ཚིག་དང་། ཕྱག་རྒྱ་དང་། དཀྱིལ་འཁོར་ཆེན་པོའི་དམ་ཚིག་གི་དངོས་གྲུབ་འཐོབ་བོ། །དེ་བཞིན་གཤེགས་པ་ཐམས་ཅད་ཀྱི་གསང་བ་དེ་ཁོ་ན་ཉིད་ཀྱི་དམ་ཚིག་གི་དངོས་གྲུབ་འཐོབ་བོ། །ཟླ་བ་གཅིག་གི་བར་དུ་སྦྱར་ན་འཕགས་པ་སྤྱན་རས་
གཟིགས་དབང་ཕྱུག་གི་དངོས་གྲུབ་སྒྱུ་མ་ལྟ་བུས་བརྒྱན་པ་ཐོབ་ཅིང་ཚེ་ལོ་སྟོང་ཐུབ་པར་འགྱུར་རོ། །ཟླ་བ་གསུམ་དུ་སྦྱར་ན་ལུས་ཡོངས་སུ་དག་པ་དང་། མདོག་ཡོངས་སུ་དག་པ་འཐོབ་བོ། །ལོ་གཅིག་ཚང་བར་སྦྱར་ན་དོན་ཡོད་པའི་དངོས་གྲུབ་རིག་སྔགས་འཆང་འཁོར་ལོས་སྒྱུར་བར་འགྱུར་ཏེ། མིག་མཐོན་མཐིང་མདོག་བུང་བ་ལྟ་བུ་སྐྲ་རལ་བུ་འཁྱིལ་བར་འགྱུར། ཚེ་ལོ་བདུན་པ་ལྟ་བུའི་གཟུགས་དང་མཐུན་པར་འགྱུར་ལ། ཚེ་བསྐལ་བ་འབུམ་ཐུབ་པར་འགྱུར་རོ། །བདར་ནས་བདག་ཉིད་ལ་བྱུགས་ན། གང་དྲི་མནམས་པ་ཙམ་གྱིས་བགེགས་དང་། ལོག་འདྲེན་དང་། གནོད་སྦྱིན་དང་། སྲིན་པོ་དང་། འབྱུང་པོ་དང་། ཤ་ཟ་དང་། ཡི་དགས་དང་། སྐེམ་བྱེད་དང་། བརྗེད་བྱེད་དང་། གྲིབ་གནོན་ཐམས་ཅད་དང་། གདོན་ཐམས་ཅད་དང་། གདུག་པ་ཐམས་ཅད་དང་། དགྲ་ཐམས་ཅད་དཔག་ཚད་སྟོང་དུ་འབྲོས་སོ། །གལ་ཏེ་མྱུར་དུ་མི་འབྲོས་ན་ནི་སྤྱི་བོ་དུམ་བུ་འབུམ་དུ་འགས་ཤིང་ཡན་ལག་དང་། ཡན་ལག་རྣམས་ཞིག་པར་འགྱུར་ལ། བུ་དང་ཆུང་མར་བཅས་པ་འཇིགས་པར་འགྱུར། སྔོན་གྱི་སྡིག་པ་དང་སྒྲིབ་པ་རྣམས་ཀྱིས་མི་ཚུགས་པར་འགྱུར། སེམས་ཅན་དམྱལ་བ་མྱོང་བར་འགྱུར་བ་མཚམས་མེད་པ་ལྔ་དག་འཇིག་པར་འགྱུར། རྨི་ལམ་ངན་པ་དང་། ལྟས་ངན་པ་དང་། མི་ཤིས་པ་དང་། བཀྲ་མི་ཤིས་པའི་དངོས་པོ་ཐམས་ཅད་འཇིག་པར་འགྱུར། སྤོས་བསྣམས་པ་ཙམ་གྱིས་རྒྱལ་པོ་དང་། རྒྱལ་པོའི་བློན་པོ་དང་། བྲམ་ཟེ་དང་། ཁྱིམ་བདག་དང་། རྒྱལ་རིགས་དང་། རྗེའུ་རིགས་དང་། དམངས་རིགས་ཅི་བགྱི་ཞེས་བྱ་བ་བྱེད་ལ་དབང་དུ་གྱུར་ནས་འཁོད་དོ། །བྱམས་པ་ཙམ་གྱིས་འབྲས་དང་། ཕོལ་མིག་དང་། ལྷོག་པ་དང་། མེ་དཔལ་དང་། རྐང་ཤུ་དང་། གཡན་པ་དང་། མཛེ་དང་། ཁྱི་རྡོ་དང་། ཤུ་བ་དང་། འབྲུམ་བུ་ཕྲ་མོ་དང་། རྨ་དང་། ཁོང་གི་རྨ་ཡོངས་སུ་སོས་པར་འགྱུར། དུག་ཐམས་ཅད་དང་། ཟོས་པ་དང་། དུག་མྱོས་དང་། སྦྱར་དུག་དྲག་པོ་དང་། དུག་སྦྱར་མ་དང་། སྦྱར་དུག་ཕྱེ་མ་དང་། བྱད་རྣམས་ལ་བསྐུས་པ་ཙམ་དང་། ཆུ་དྲོན་པོ་འཐུངས་པ་ཙམ་གྱིས་དུག་མེད་པར་འགྱུར་རོ། །དྲི་ཙམ་གྱིས་
ཀླུའི་རྒྱལ་པོ་འཇོག་པོའི་དུག་ཀྱང་མེད་པར་འགྱུར་རོ། །རིམས་ཉིན་བཞི་པས་ཐེབས་པ་ལ་དཔྲལ་བར་བསྐུས་ན་ཀུ་ཅོ་འདོད་ཅིང་འབྲོས་སོ། །རིམས་ཐམས་ཅད་དང་། ཉིན་གཅིག་པ་དང་། ཉིན་གཉིས་པ་དང་། ཉིན་གསུམ་པ་དང་། རླུང་ལས་གྱུར་པ་དང་། མཁྲིས་པ་ལས་གྱུར་པ་དང་། བད་ཀན་ལས་གྱུར་པ་དང་། འདུས་པ་ལས་གྱུར་པ་དང་། ལྤ་བ་དང་། ཕོ་བའི་ནད་དང་། མཆིན་པ་ན་བ་དང་། ལྟོ་ན་བ་དང་། སྐྲན་དང་། གཅིན་སྲི་བ་དང་། སྙིང་ན་བ་དང་། རྩིབ་ལོགས་ན་བ་དང་། མགུལ་པ་ན་བ་དང་། ཁ་ན་བ་དང་། འཁྱིལ་ཞིང་ན་བ་དང་། ཚང་པ་དང་།མདོམས་ན་བ་དང་། ཡན་ལག་དང་ཉིང་ལག་ན་བ་ཆུ་དྲོན་པོ་འཐུངས་བ་ཙམ་གྱིས་ཡོངས་སུ་སོས་པར་འགྱུར་རོ། །གཞོགས་ཕྱེད་ན་བ་དང་། མགོ་ན་བ་དང་། མིག་ན་བ་དང་། རྣ་བ་ན་བ་ལ་བསྐུས་པ་ཙམ་གྱིས་སོས་པར་འགྱུར་རོ། །ཐིག་ལེ་བྱས་ན་ཆོམ་རྐུན་དང་། གནོད་བྱེད་དང་། མེ་དང་། ཆུ་དང་། བྱི་བ་ཟ་བས་འཇིགས་པ་དང་། གཅན་གཟན་ཁྲོ་བོའི་འཇིགས་པ་ལས་ཐར་བར་འགྱུར་ཞིང་། འཇིགས་པ་ཐམས་ཅད་ལས་ཡོངས་སུ་ཐར་བར་འགྱུར་རོ། །ཉེས་པར་བྱས་པ་ཐམས་ཅད་ཡོངས་སུ་ཐར་བར་འགྱུར་རོ། །ལག་པ་གདེངས་པའི་འཇིགས་པ་འབྱུང་བར་མི་འགྱུར། མི་མ་ཡིན་པ་གང་གིས་ཀྱང་མདངས་འཕྲོག་པར་མི་ནུས་ཤིང་བར་ཆད་བྱ་བར་མི་ནུས་སོ། །མཁའ་འགྲོ་མ་ཐམས་ཅད་མཐོང་བ་ཙམ་གྱིས་དབང་དུ་གྱུར་ནས་འཁོད་དོ། །རྒྱལ་པོ་བཙུན་མོ་དང་། འཁོར་དང་བཅས་པའི་མཆོད་གནས་ཆེན་པོར་འགྱུར་རོ། །གཞན་ཡང་གང་དང་གང་དུ་སྦྱར་བ་རང་གི་བློས་བྱེ་བ་ཕྲག་འབུམ་སྦྱར་ན་ལས་གྲུབ་པར་བྱད་དེ། སྨན་གྱི་མཆོག་ཤིན་ཏུ་འབད་པས་བསྒྲུབ་པར་བྱའོ། །སྨན་གྱི་དཀྱིལ་འཁོར་གྱི་ཆོ་གའོ།། །།